362. The Promise (1996)

Director : Dardenne Brothers

Genre : Drama

Rating : 7.9/10

Country : Belgium

Duration : 94 Minutes


🔸നാല് ബില്യൺ വർഷങ്ങളോളം പഴക്കമുണ്ട് ഭൂമിക്ക് ,മനുഷ്യൻ ഭൂമിയിൽ വിഹരിച്ച് തുടങ്ങിയിട്ട് ഒരു ലക്ഷം വർഷങ്ങൾ ആയി എന്നാണ് ഏകദേശ കണക്ക്. ഭൂമിയുടെ പ്രായവുമായി തട്ടിച്ച് നോക്കുകയാണെങ്കിൽ വളരെ ചെറിയ ഒരു സംഖ്യ മാത്രം. എന്നാൽ ഈ ഒരു ലക്ഷം വർഷങ്ങൾക്കിടെ ഭൂമിയിൽ വന്ന മാറ്റങ്ങൾ അത്ഭുതാവഹം ആണെന്ന് പറഞ്ഞാൽ കുറഞ്ഞ് പോവും ,ഇവയിൽ വളരെ പ്രാധാന്യം അർഹിക്കുന്ന മനുഷ്യ സൃഷ്ടി ആണ് സംസ്കാരവും ഭാഷയും മതവും വർണവും അതിനോട് അനുബന്ധിച്ച് വരുന്ന കെട്ട് പാടുകളും. മുകളിലെ വരികളിൽ നിന്നും തെറ്റിദ്ധരിക്കരുത് ,ഭൂമിയുടെയും മനുഷ്യരുടെയും ഉത്ഭവത്തിനും മറ്റും ഈ ചിത്രവുമായി ഒരു ബന്ധവുമില്ല. ഈ ചിത്രം മനുഷ്യന്റെ മറ്റൊരു സൃഷ്ടി ആണ് പ്രതിപാദിക്കുന്നത് ,രാജ്യങ്ങൾ ഉണ്ടാക്കിയ കെട്ടുപാടുകളിൽ നിന്നും പിറവി എടുത്ത അഭയാർത്ഥികളാണ് ഈ ചിത്രത്തിന്റെ വിഷയം.

🔸പേര് സൂചിപ്പിക്കുന്നത് പോലെ തന്നെ വാഗ്ദാനങ്ങൾ ആണ് ചിത്രത്തെ മുന്നോട്ട് നയിക്കുന്ന ഘടകം ,അതും വെറുമൊരു ഒറ്റപ്പെട്ട സംഭവം അല്ല ഒരുപാട് വാഗ്ദാനങ്ങളുടെ ആകെ തുക ആണ് ചിത്രം. മരണം കാത്ത് കിടക്കുന്ന ഒരു വ്യക്തിയോട് പ്രധാന കഥാപാത്രം നൽകുന്ന വാഗ്ദാനം ,ഒരു അഭയാർത്ഥി പെൺകുട്ടിയോട് നൽകേണ്ടി വന്ന വാഗ്ദാനം എല്ലാത്തിനും ഉപരി തന്നോടും ,തന്റെ ഉപബോധ മനസ്സിനോടും നൽകേണ്ടി വന്ന വാഗ്ദാനം. പ്രധാന കഥാപാത്രമായ ഇഗോർ ഇതിനെല്ലാം ഒത്ത നടുക്ക് ,തികച്ചും അനിശ്ചിതമായ അവസ്ഥയിലാണ് ഈ ചിത്രത്തിൽ.

🔸അനിശ്ചിതം എന്ന വാക്ക് ശ്രദ്ധിക്കുക ,ഇഗോർ എന്ന കഥാപാത്രം ഒരു പ്രത്യേക നിമിഷത്തിൽ ഒരു വാക്ക് മറ്റൊരു കഥാപാത്രത്തിന് നൽകുകയാണ്. അത് പാലിക്കണം എന്ന ആഗ്രഹം ഇഗോറിന്റെ മനസ്സിൽ ഉണ്ട് എന്നാൽ അത് എത്രത്തോളം സാധ്യമാണ് എന്നോ ,അതിനായി എന്തെല്ലാം കാര്യങ്ങൾ ത്യജിക്കേണ്ടി വരുമെന്നോ ,എന്തെല്ലാം നഷ്ടങ്ങൾ സഹിക്കേണ്ടി വരുമെന്നോ ഇഗോറിന് അറിയില്ല. കാരണം ചെയ്യാൻ തുനിഞ്ഞിറങ്ങിയ കാര്യം എന്ത് തന്നെ ആണെങ്കിലും താൻ ശീലിച്ച ,ഇന്നുവരെ കണ്ട് പരിചയിച്ച ,പഠിച്ച വസ്തുതകൾക്ക് തീർത്തും എതിരാണ് അവ എന്നതാണ് സത്യം.

🔸വാക്ക് ,വാഗ്ദാനം എന്ന് വിശേഷിപ്പിച്ചിട്ടുണ്ടെങ്കിലും അവയിലേക്ക് കൂടുതൽ കടക്കാത്തതിന് ഒരു പ്രത്യേക കാരണം കൂടി ഉണ്ട് ,വളരെ ലളിതമായ ഒരു കഥയാണ് പ്രോമിസ് എന്ന ചിത്രത്തിന്റേത് ,രണ്ടോ മൂന്നോ വരികളിൽ പറഞ്ഞ് തീർക്കാൻ കഴിയുന്നവ. എന്നാൽ ചിത്രം കൈകാര്യം ചെയ്യുന്ന വിഷയവും അതിന്റെ പ്രമേയവും അങ്ങേയറ്റം ശക്തവുമാണ് ,അതിനെ ഒട്ടും ഭംഗി കുറയാതെ അവതരിപ്പിച്ചിട്ടുമുണ്ട്. കുറച്ച് കൂടി ലഘു ആയി പറയുക ആണെങ്കിൽ നമ്മൾ സ്ഥിരമായി കാണാറുള്ള എന്ന ചിന്ത കൊണ്ടുപോലും ഒരു നിമിഷം ഓർക്കാറില്ലാത്ത സമൂഹത്തിന്റെ താഴെ തട്ടിലുള്ള പേരറിയാത്ത ഒരുപാട് പേരുടെ ജീവിതങ്ങൾ ആണ് ഈ ചിത്രം.

🔸റിലീസ് കഴിഞ്ഞ ഇരുപത് വർഷങ്ങൾക്കിപ്പുറവും ചിത്രം പ്രതിപാദിച്ച പ്രശ്നങ്ങൾ അത് പോലെ തുടരുന്നു എന്നത് ശ്രദ്ധേയമാണ്. അച്ഛനും മകനുമായ റോജറും ഇഗോറും നിയമത്തിന്റെ കണ്ണിൽ കുറ്റക്കാരായ അഭയാർത്ഥികളെ ചൂഷണം ചെയ്തും ,അവരെ തങ്ങളുടെ ലാഭത്തിനായി ഉപയോഗിച്ചുമാണ് ജീവിച്ച് പോന്നത് ,ഇവർക്കിടയിൽ പൈസ പിരിക്കാനും മറ്റും അവകാശമുള്ള റോജറിന് ഒരു ഭൂവുടമയുടെ പരിവേഷമാണ് പൊതുവെ. അങ്ങനെ ജീവിച്ച് പോന്ന ഇരുവരുടെയും ജീവിതത്തിൽ ഒരു പ്രത്യേക സംഭവം വരുത്തുന്ന മാറ്റങ്ങളാണ് ഈ ചിത്രത്തിന്റെ വിഷയം.

Verdict : Very Good

361. Hereditary (2018)

Director : Ari Aster

Genre : Horror

Rating : 7.8/10

Country : USA

Duration : 127 Minutes


🔸സ്ലോ പോയ്സൺ എന്നൊക്കെ ചില ചിത്രങ്ങളെ വിശേഷിപ്പിക്കുന്നത് പൊതുവെ കാണാറുണ്ട് ,ഹെരെഡിറ്ററി എന്ന ചിത്രത്തിന് ഏറ്റവും ചേരുന്ന പദവും ഇത് തന്നെ ആവും. പ്രത്യേകിച്ചും ചിത്രത്തിന്റെ ഘടനയും ക്ലൈമാക്സും അതിലേക്ക് വഴി വെക്കുന്ന സംഭവങ്ങളും കാരണങ്ങളും ഒക്കെ കണക്കിൽ എടുക്കുമ്പോൾ അതാണ് യോജ്യമായ പദം. ഇത്രത്തോളം സമ്മർദ്ദത്തോടെ കണ്ട് തീർത്ത ചിത്രം ഈ അടുത്ത് വേറെ ഉണ്ടായില്ല ,പ്രത്യേകിച്ചും ഈ ചിത്രത്തിന്റെ രണ്ടാം പകുതിയും അവസാനവും. അന്യായമായ ഒഴുക്കിൽ നിന്നും അവസാനം കാഴ്ചക്കാരന് മുക്തി നൽകിയേക്കും എങ്കിലും ഒന്ന് ഇരുത്തി ചിന്തിച്ചാലോ അല്ലെങ്കിൽ കൂടുതൽ ആഴത്തിൽ ചെന്നാലോ ആയിരിക്കും യഥാർത്ഥത്തിൽ എന്തൊക്കെയാണ് സംഭവിച്ചത് എന്ന മനസിലാക്കാൻ കഴിഞ്ഞേക്കുക.

🔸ഹൊറർ ചിത്രങ്ങൾ അതിന്റെ പഴയ മികവിലേക്ക് മടങ്ങി എത്തിക്കൊണ്ടിരിക്കുന്നു എന്ന വാദത്തിന് ആശ്വാസകരമായ ഒരു ഉദാഹരണം ആണ് ഹെരെഡിറ്ററി എന്ന ചിത്രം. കഴിഞ്ഞ കുറച്ച് വർഷങ്ങളായി പുറത്തിറങ്ങി പ്രേക്ഷക പ്രശംസ നേടിയ ഇറ്റ് ഫോളോസ് ,ഇറ്റ് കംസ് അറ്റ് നൈറ്റ് ,ഗെറ്റ് ഔട്ട് ,ഇറ്റ് എന്നീ ചിത്രങ്ങളുടെ സ്രെണിയിൽ പെടുത്താം ഈ ചിത്രത്തെയും ,ഇവയിൽ പലതിനേക്കാളും മുകളിൽ ആണ് ഈ ചിത്രത്തിന്റെ സ്ഥാനം എന്ന് ഭാവിയിൽ ഒരു അഭിപ്രായം ഉയർന്നാൽ പോലും അതിനെ തള്ളി കളയാൻ ആവില്ല ,കാരണം അത്രയ്ക്കും ശക്തമായി പ്രേക്ഷകനിൽ വന്ന് പതിക്കുന്ന ആഘാതമാണ് ഹെരെഡിറ്റോറി.

🔸ആനി ഗ്രഹാം എന്ന യുവതി ആണ് ചിത്രത്തിലെ പ്രധാന കഥാപാത്രം ,ഭർത്താവും സ്വതവേ അന്തർമുഖനും ആയ സ്റ്റീവും മക്കളായ പീറ്ററും ചാർളിയും ഉൾപ്പെടുന്നതാണ് ആനിയുടെ ലോകം. ആനിയുടെ അമ്മ എലെൻ മരിച്ചിട്ട് അധിക കാലം ആയില്ല ,അമ്മയുമായി അത്ര നല്ല ബന്ധമല്ല മകൾക്ക് ഉണ്ടായിരുന്നത്. തന്റെ വ്യക്തിപരമായ ജീവിതത്തിലേക്ക് ആരെയും ,ഇനി അത് സ്വന്തം മകൾ ആണെങ്കിൽ പോലും കടത്തി വിടാത്ത വ്യക്തിത്വത്തിന് ഉടമ ആയിരുന്നു എലെൻ. എലെൻറെ രഹസ്യ സ്വഭാവവുമായി ഒത്തു പോവാൻ ആനിക്ക് ഒരിക്കലും കഴിഞ്ഞിരുന്നില്ല ,ഇപ്പോഴും അത് അംഗീകരിക്കാൻ തയ്യാറുമല്ല.

🔸എന്തൊക്കെ തന്നെ ആയാലും എലെൻ ഇന്ന് ജീവനോടെ ഇല്ല ,മരണവുമായി പൊരുത്തപ്പെട്ട് വരികയാണ് ആനിയും കുടുംബവും. എലെന്ന് ആനിയോട് എന്നത് പോലെ തന്നെ ആനിക്ക് തന്റെ മക്കളോടും അത്ര നല്ല അടുപ്പം ഒന്നുമില്ല ,പീറ്ററിന്റെ ലഹരി ഉപയോഗത്തോടും ചാർളിയുടെ ചില സമയത്തെ വികൃതമായ പെരുമാറ്റങ്ങളോടും യോജിക്കാൻ ആനിക്ക് കഴിയില്ല. ചുരുക്കി പറഞ്ഞാൽ പ്രത്യക്ഷത്തിൽ പ്രശനം ഒന്നും തന്നെ കാണാൻ ഇല്ലെങ്കിലും ഉള്ള ജീർണിച്ച മൃത ശരീരം കണക്കെയാണ് ആ കുടുംബം ,എവിടെയൊക്കെയോ ഒരു സ്ഥിരത ഇല്ലായ്മയും ,അസ്വാഭാവികതയും നിലനിൽക്കുന്നുണ്ട്.

🔸ചിത്രം ഗിയർ മാറ്റി മറ്റൊരു തലത്തിലേക്ക് ഉയരുന്നത് തനിക്ക് ചുറ്റും സംഭവിക്കുന്ന ചില കാര്യങ്ങളും വസ്തുതകളും സ്വാഭാവികം അല്ല എന്നും അവയിൽ എന്തൊക്കെയോ പോരായ്മകൾ ഉണ്ട് എന്നും ആനി തിരിച്ചറിയുമ്പോൾ ആണ്. അവയുടെ ഉത്തരങ്ങൾ തേടി ആനി ഇറങ്ങുന്നതും തുടർന്നുണ്ടാവുന്ന സംഭവങ്ങളും ഒക്കെ വഴിവെക്കുന്നത് ഈ വർഷത്തെ ഏറ്റവും മികച്ച ത്രില്ലർ ചിത്രങ്ങളിൽ ഒന്നിലേക്കാണ് എന്ന കാര്യത്തിൽ സംശയം വേണ്ട. ഏതൊരു സസ്പെൻസ് ചിത്രത്തെയും പോലെ തന്നെ അധികം അന്വേഷണങ്ങളോ കാര്യങ്ങളോ ഒന്നും ഇല്ലാതെ ഒഴിഞ്ഞ മനസ്സോടെ ചിത്രം കണ്ട് ആസ്വദിക്കാൻ ശ്രമിക്കുക.

Verdict : Very Good

360. Satan's Slaves (2017)

Director : Joko Anwar

Genre : Horror

Rating : 7.6/10

Country : Indonesia

Duration : 107 Minutes


🔸കണ്ടവർ പറഞ്ഞും വായിച്ചും അറിഞ്ഞും ഒരുപാട് കേട്ടിരുന്നെങ്കിലും ഒരുപാട് വൈകിയാണ് സാത്താൻസ് സ്ലേവ്സ് എന്ന ഈ ചിത്രം കാണാൻ കഴിഞ്ഞത്. കഴിഞ്ഞ വർഷത്തെ ഏറ്റവും മികച്ച ഹൊറർ ചിത്രങ്ങളിൽ ഒന്ന് എന്ന പൊതു വിലയിരുത്തൽ ഉള്ളതിനാലും ,കണ്ട പ്രിയ സുഹൃത്തുക്കളിൽ ഒരാൾ പേടിച്ചിരിക്കും എന്ന കാര്യത്തിൽ നൂറ് ശതമാനം ഉറപ്പ് തന്നതിനാലും പ്രതീക്ഷകൾ ഒരുപാട് ആയിരുന്നു പ്രസ്തുത ചിത്രത്തെ കുറിച്ച്. എന്തിരുന്നാലും ഹൊറർ ചിത്രങ്ങളോടുള്ള താല്പര്യ കുറവ് മാത്രമായിരുന്നു ഇത്രയും വൈകാൻ ഉണ്ടായ കാരണം. ജോകോ അൻവർ സംവിധാനം ചെയ്ത് കഴിഞ്ഞ വർഷം പ്രദര്ശനത്തിന് എത്തിയ ചിത്രം ഐ എഫ് എഫ് കെ ഉൾപ്പെടെയുള്ള ഒരുപാട് ചലച്ചിത്ര മേളകളിൽ പ്രദർശിപ്പിക്കപ്പെടുകയും നല്ല പ്രേക്ഷക ,വിമർശക അഭിപ്രായങ്ങൾ നേടുകയും ചെയ്തിരുന്നു. 1982ൽ ഇതേ പേരിൽ എത്തിയ ചിത്രത്തിന്റെ റീമേക് കൂടിയാണ് ചിത്രം.

🔸107 മിനുട്ടോളം ദൈർഖ്യമുള്ള ചിത്രം കണ്ട് കഴിഞ്ഞപ്പോൾ ആദ്യം മനസ്സിൽ എത്തിയ തോന്നൽ ഒരു തരത്തിലുള്ള നിയന്ത്രണവും തന്റെ ചിത്രത്തിൽ സംവിധായകൻ നടത്തിയിട്ടില്ല എന്നതാണ് ,കാരണം ചിത്രം ആരംഭിച്ച് മിനിറ്റുകൾക്കുള്ളിൽ തന്നെ എന്ത് പ്രതീക്ഷിക്കണം എന്നതിന് വ്യക്തമായ ഉത്തരം സംവിധായകൻ നൽകുന്നുണ്ട്. പ്രേക്ഷകൻ ഈ ചിത്രത്തിൽ നിന്നും പ്രതീക്ഷിക്കേണ്ടത് അപ്രതീക്ഷിതമായ വസ്തു വകകൾ ആണെന്ന് പറയാതെ പറഞ്ഞ് കൊണ്ട് ആദ്യ ഷോക്ക് നൽകിയ അൻവർ കൃത്യമായ ഇടവേളകളിൽ വീണ്ടും വീണ്ടും അമ്പരപ്പിക്കുന്ന പല കഥാസന്ദർഭങ്ങളും ഒരുക്കിവെച്ചിട്ടുണ്ട് ,അങ്ങനെ ഒരു നിമിഷം പോലും ചിന്തിക്കാൻ ഇട നൽകാത്ത ,സ്വസ്ഥമായി സീറ്റിൽ മുറുകി ഇരിക്കാൻ പ്രേക്ഷകനെ അനുവദിക്കാത്ത ചിത്രമാണ് സാത്താൻസ് സ്ലെവ്സ്.

🔸എൺപതുകളുടെ തുടക്കത്തിലേ ഇന്തോനേഷ്യൻ നഗരമായ ജകാർട്ട ആണ് കഥയ്ക്ക് പശ്ചാത്തലം ആയിരിക്കുന്നത്. റിനി എന്ന പെൺകുട്ടി ആണ് ചിത്രത്തിലെ പ്രധാന കഥാപാത്രം ,അച്ഛനും അമ്മയും മൂന്ന് ഇളയ സഹോദരന്മാരും മുത്തശ്ശിയും ഒക്കെ അടങ്ങുന്നതാണ് റിനിയുടെ കുടുംബം. റിനിയുടെ അമ്മ മര്വാനി കുറച്ച് നാളുകൾ ആയി രോഗം കാരണം ദുരിതം അനുഭവിക്കുകയാണ്. പാട്ടുകാരി ആയിരുന്ന മര്വാണി ഇന്ന് പരസഹായം കൂടാതെ നടക്കാനോ സംസാരിക്കാനോ പോലും കഴിയാതെ കിടപ്പ് രോഗിയായി മാറി കഴിഞ്ഞിരിക്കുന്നു ,കൃത്യമായ വരുമാന മാർഗം ഇല്ലാത്തതിനാലും കിടപ്പിലായ ഭാര്യയും നടക്കാൻ കഴിയാത്ത അമ്മയും കാരണം രണ്ടറ്റം കൂട്ടി മുട്ടിക്കാൻ പെടാപാട് പെടുകയാണ് റിനിയുടെ അച്ഛൻ.

🔸അങ്ങനെ കടന്ന് പോയിക്കൊണ്ടിരുന്നു ആ ദിവസങ്ങളിൽ ഒന്നിൽ ,തീർത്തും അപ്രതീക്ഷിതവും അവിചാരിതവും ആയി റിനി ഒരു ദുസ്വപ്നം കാണുകയാണ് ,സഹായത്തിനായി വിളിച്ച അമ്മയുടെ മുറിയിലേക്ക് കയറി ചെന്ന റിനി അവിടെ കണ്ടത് ഭീകരമായ ഒരു കാഴ്ച ആയിരുന്നു. ദുസ്വപ്നം കണ്ട് ഞെട്ടിയുണർന്ന് മനസ്സിനെ സമാധാനിപ്പിച്ച് ശാന്തയാവാൻ ശ്രമിച്ചെങ്കിലും ദുസ്വപ്നം യാഥാർഥ്യമാവുന്നത് ഞെട്ടലോടെ അവൾ തിരിച്ചറിയുകയാണ് ,എല്ലാം താൻ മുൻകൂട്ടി കണ്ട പോലെ തന്നെ ആവർത്തിക്കുകയാണ്.

🔸അവിടെ നിന്നും പ്രതീക്ഷയ്ക്ക് വക ഇല്ലാത്ത റിനിയുടെയും കുടുംബത്തിന്റെയും കഥ ആരംഭിക്കുകയാണ്. ചിത്രത്തിന്റെ ആരംഭം കുറച്ച് നിമിഷങ്ങൾ മാത്രമേ പോസ്റ്റിൽ ചേർത്തിട്ടുള്ളൂ ,കാരണം കൂടുതൽ യാതൊന്നും അറിയാതെ ,പ്രതീക്ഷകൾ ഒന്നും ഇല്ലാതെ കാണുന്നതാവും നന്നാവുക. കാഴ്ചക്കാരനെ പേടിപ്പിച്ച് ശ്വാസം മുട്ടിക്കുമെന്നോ ,ഇത് പോലൊരു ദൃശ്യാനുഭവം വേറെ ഉണ്ടാവില്ലെന്നോ ,അല്ലെങ്കിൽ അതുപോലെ എന്തെങ്കിലും വലിയ അവകാശവാദങ്ങൾ ഒന്നുമില്ല പക്ഷെ കാഴ്ചക്കാരനെ സ്‌ക്രീനിൽ പിടിച്ച് ഇരുത്താനും ഞെട്ടിക്കാനും ഉള്ള വക സംവിധായകൻ കരുതി വെച്ചിട്ടുണ്ട് ഈ ചിത്രത്തിൽ ,കൂടുതൽ അന്വേഷിക്കാതെ കണ്ട് തന്നെ മനസിലാക്കുക.

Verdict : Good

359. Isle Of Dogs (2018)

Director : Wes Anderson

Genre : Animation

Rating : 8.2/10

Country : USA

Duration : 97 Minutes


🔸വെസ് ആൻഡേഴ്സൺ ചിത്രം എന്നത് ഒരു ബ്രാൻഡ് ആയി മാറി കഴിഞ്ഞിരിക്കുന്നു ,വ്യത്യസ്തമായ കഥയും ,അതിലും വ്യത്യസ്തമായ അവതരണ ശൈലിയും കാരിക്കേച്ചർ പോലെ മനോഹരമായ കഥാപാത്രങ്ങളും എല്ലാം വെസ് ആൻഡേഴ്സൺ ചിത്രങ്ങളുടെ കാര്യത്തിൽ ഒരു ഗ്യാരന്റി ആണെന്ന് കഴിഞ്ഞ പതിനെട്ട് വര്ഷങ്ങളായി കാഴ്ചക്കാർ അറിഞ്ഞ് കൊണ്ടിരിക്കുന്നതാണ്. അനിമേഷൻ ചിത്രങ്ങളോട് വലിയ താല്പര്യം ഇല്ലാതിരുന്നിട്ട് കൂടിയും ഐൽ ഓഫ് ഡോഗ്സ് എന്ന ചിത്രം കാണാൻ തീരുമാനിച്ചതിന് പിന്നിലും ഒരൊറ്റ കാരണം മാത്രം ,വെസ് ആൻഡേഴ്സൺ എന്ന കാരണം. ഇത്തവണ തന്റെ കഥയും കഥാപാത്രങ്ങളുമായി ആൻഡേഴ്സൺ ചെല്ലുന്നത് ജപ്പാനിലേക്കാണ്.

🔸ഐൽ ഓഫ് ഡോഗ്സ് എന്ന ചിത്രത്തെ പരിചയപ്പെടുമ്പോൾ ഏതൊരു കാഴ്ചക്കാരനും ആദ്യം ശ്രദ്ധിച്ചിട്ടുണ്ടാവുക ചിത്രത്തിന്റെ അന്യായമായ കാസ്റ്റിംഗ് തന്നെ ആവും. ബിൽ മുറെ ,ബ്രയാൻ ക്രാൻസ്റ്റൻ ,ജെഫ് ഗോൾഡ്ബ്ലം ,സ്കാർലെറ്റ് ജോഹാൻസൺ ,റ്റിൽഡ സ്വിന്റൻ ,ഹാർവി കെയ്റ്റൽ തുടങ്ങി ഹോളിവുഡിലെ ഒരുപറ്റം മികച്ച നടന്മാരെ തന്നെ തന്റെ കഥാപാത്രങ്ങളുടെ ശബ്ദങ്ങളായി സംവിധായകൻ അണി നിരത്തിയിട്ടുണ്ട്. ലൈവ് ആക്ഷൻ ചിത്രത്തിൽ ആയിരുന്നെങ്കിൽ കുറച്ച് കൂടി തകർത്തേനെ എന്ന ചിന്ത സ്വാഭാവികമായും ചിത്രം കാണുന്നതിന് മുൻപേ ഉണ്ടായിരുന്നെങ്കിലും അവയ്ക്ക് ചിത്രം പൂർത്തിയാവുന്നത് വരെ മാത്രമേ ആയുസ്സ് ഉണ്ടായിരുന്നുള്ളൂ.

🔸ജപ്പാനിലെ മെഗാസാക്കി എന്ന സാങ്കല്പിക നഗരത്തിലാണ് കഥ അരങ്ങേറുന്നത്, പട്ടണത്തിൽ ആകെമാനം പകർച്ചവ്യാധി പടർന്ന് പിടിച്ചിരിക്കുകയാണ്. പകർച്ച വ്യാധിക്ക് കാരണമായ വസ്തുതകൾ കണ്ടെത്താനോ ആവശ്യമായ നിയന്ത്രണ സൗകര്യങ്ങളോ ഒരുക്കാനോ ഗവൺമെന്റിന് കഴിഞ്ഞിട്ടില്ല. രോഗ പ്രതിരോധത്തിനായി പ്രൊഫെസ്സർ വാറ്റാനബി നടത്തുന്ന പരീക്ഷണങ്ങൾ അതിന്റെ അന്ത്യ ഘട്ടത്തിൽ ആണെങ്കിലും നഗരത്തിന്റെ മേയർക്ക് വിശ്വാസം പോരാ. രോഗത്തിന്റെ കരണക്കാരായി പൊതുവെ കരുതപ്പെടുന്ന നായ വർഗത്തിനെതിരെ തിരിയാനും അവയെ ഒഴിവാക്കാനും മാനസികമായി തയ്യാറെടുത്ത് കഴിഞ്ഞിരുന്നു മേയർ കൊബായാഷി.

🔸അങ്ങനെ മേയറുടെ നിർദേശ പ്രകാരം നഗരത്തിലെ സകലമാന നായകളെയും നാട് കടത്തി പട്ടണത്തിന് പുറത്ത് മാലിന്യ നിക്ഷേപിക്കലിനായി ഉപയോഗിച്ച് പോന്ന ട്രാഷ് ദ്വീപിലേക്ക് അയക്കുകയാണ്. നഗര വീഥികളിലൂടെ അലഞ്ഞ് തിരിഞ്ഞ് നടന്നവരും യജമാനന്മാരുടെ ലാളനകൾ ഏറ്റ് വാങ്ങി ജീവിച്ച് പോന്നവരും എല്ലാം ഒരു നാൾ ഉപേക്ഷിക്ക പെട്ടവരായി ദ്വീപിലേക്ക് എത്തുകയാണ് ,തിരിച്ച് പോക്ക് എന്ന പ്രതീക്ഷ പോലും പതിയെ എല്ലാവരിൽ നിന്നും മാഞ്ഞ് പോയി തുടങ്ങി. കഠിനമായ യാഥാർഥ്യങ്ങളുമായി പൊരുത്തപ്പെട്ട് കഴിഞ്ഞ ആറ് മാസത്തോളമായി അവരെല്ലാം ദ്വീപിൽ ജീവിച്ച് പോരുകയാണ്.

🔸മേയറുടെ തീരുമാനവും നാട് കടത്തലുകളും എല്ലാം കഴിഞ്ഞ് ആറ് മാസത്തിന് ശേഷം ആണ് അനന്തരവനായ അറ്റാരി ട്രാഷ് ദ്വീപിൽ എത്തുന്നത്. അറ്റാരിയുടെ വരവിന് പിന്നിൽ ഒരു പ്രത്യേക ലക്ഷ്യം ഉണ്ടായിരുന്നു ,തീരുമാനത്തിന്റെ ഭാഗമായി ഉപേക്ഷിക്കപ്പെട്ടവരിൽ തന്റെ പ്രിയപ്പെട്ട സന്തത സഹചാരി ആയിരുന്ന സ്പോട്സ് എന്ന നായ കൂടി ഉണ്ടായിരുന്നു, അവൻ ഈ ദ്വീപിൽ എവിടെയോ ഉണ്ട് ,കണ്ടെത്തിയേ മതിയാവൂ. സ്പോട്സിനെ കണ്ടെത്താനായി ദ്വീപിൽ എത്തിയ അറ്റാരി ,ദൗത്യം ഒട്ടും എളുപ്പമല്ല എന്ന അധികം താമസിയാതെ തന്നെ തിരിച്ചറിയുകയാണ്. തന്റെ ലക്ഷ്യം പൂർത്തി ആവണം എങ്കിൽ മറ്റുള്ള നായകളുടെ സഹായം കൂടി ആവശ്യമുണ്ട് ,എന്നാൽ ഇതിനോടുള്ള അവരുടെ പ്രതികരണം എന്താവുമെന്ന് ഒരു ഊഹം പോലുമില്ല.

Verdict : Very Good

358. Goodbye (2011)

Director : Mohammad Rosoulof

Genre : Drama

Rating : 7.2/10

Country : Iran

Duration : 101 Minutes


🔸ഗുഡ്ബൈ എന്ന ഈ ഇറാനിയൻ ചിത്രത്തെ കുറിച്ച് ഒരു വാക്ക് പറയുന്നതിന് മുൻപേ സംവിധായകനായ മുഹമ്മദ് റോസൗലോഫിനെ കുറിച്ച് പറയണം ,തന്റെ രാഷ്ട്രീയത്തെ കുറിച്ചും നിലപാടുകളെ കുറിച്ചും വ്യക്തമായ ഒരു ധാരണ എല്ലാ കാലത്തും ഉണ്ടായിരുന്ന വ്യക്തിയാണ് റോസൗലോഫ്. തന്റെ സിനിമ ആർക്ക് വേണ്ടി ഉള്ളതാവണം എന്നും ,സിനിമയിലൂടെ ഉരുത്തിരിഞ്ഞ് വരേണ്ട രാഷ്ട്രീയം എന്തായിരിക്കണം എന്നും അയാൾക്ക് നിർബന്ധ ബുദ്ധി ഉണ്ടായിരുന്നു. അതിനാൽ ഒക്കെ തന്നെയാണ് തന്റെ സിനിമ ചിത്രീകരണ വേളയിൽ റോസൗലോഫ് അറസ്റ്റ് ചെയ്യപ്പെട്ടതും ആറ് വർഷത്തേക്ക് ജയിലിൽ അടയ്ക്കപ്പെട്ടതും. ശിക്ഷ പിന്നീട് കുറച്ച് കൊടുക്കപ്പെട്ടെങ്കിലും വീട്ട് തടങ്കലിലും മറ്റുമായി ജീവിതം മുന്നോട്ട് കൊണ്ടുപോവാൻ നിർബന്ധിക്കപ്പെട്ടു ആ സംവിധായകൻ ,ഇതെല്ലാം തന്റെ ചിത്രങ്ങളിലൂടെ ഒരു ജനതയുടെ ശബ്ദം അധികാരികൾക്ക് മുന്നിൽ എത്തിക്കാനുള്ള ശ്രമങ്ങൾ ഒന്ന് കൊണ്ട് മാത്രം.

🔸ഗുഡ്ബൈ എന്ന തന്റെ അഞ്ചാമത് ചിത്രത്തിന് വേണ്ടി റോസൗലോഫ് ആധാരമാക്കിയ വിഷയം പിൽക്കാലത്ത് തന്നെ ജയിലറയ്ക്ക് ഉള്ളിൽ എത്തിച്ച ഗവണ്മെന്റ് സെൻസർഷിപ്പ് എന്ന പദ്ധതി തന്നെ ആണ്. ചിത്രം ഒരു തരത്തിലും സംവിധായകന്റെ കഥയല്ല ,അതിന് വേണ്ടിയുള്ള പ്രത്യക്ഷമോ പരോക്ഷമോ ആയ യാതൊരു ശ്രമവും ചിത്രത്തിൽ നടത്തിയിട്ടുമില്ല. ഈ സിനിമയിൽ കേന്ദ്ര കഥാപാത്രം നൂറ എന്ന സ്ത്രീ ആണ്, ഇറാനിലെ ടെഹ്റാനിൽ അറിയപ്പെടുന്ന വക്കീലാണ് നൂറ.

🔸ഇറാനിലെ അന്തേവാസികളായ ജനങ്ങളുടെ സ്ഥിതി ഗതികൾ ഒട്ടും മെച്ചമല്ല ,തങ്ങളുടെ അഭിപ്രായമോ പരാതികളോ കേൾക്കാനും ആവശ്യമായ നടപടികൾ കൈക്കൊള്ളാനും ഉതകുന്ന ഒരു ഗവൺമെന്റോ ഭരണാധികാരിയോ ഇന്ന് അധികാരത്തിൽ ഇല്ല. ഉള്ളവർ ആണെങ്കിൽ ഏത് വിധേനയും തങ്ങളുടെ അധികാരം ജനങ്ങൾക്ക് മേൽ അടിച്ചമർത്താനും അനുസരിപ്പിക്കാനും ഉള്ള മത്സരത്തിലാണ്. ഭയം എന്ന വസ്തുതയാണ് ഏറ്റവും മികച്ച ആയുധം എന്ന ചൊല്ല് അതിന്റെ പൂർണതയിൽ പ്രോയോഗിക്കുന്നുണ്ട് ഭരണവർഗം. നായികയായ നൂറയുടെ അവസ്ഥയും ഒട്ടും വ്യത്യസ്തമല്ല ,കുറച്ച് കൂടി മോശം ആണെന്ന് പറയേണ്ടി വരും.

🔸നൂറയുടെ ഭർത്താവ് ഇറാനിലെ അറിയപ്പെടുന്ന പത്ര പ്രവർത്തകൻ ആയിരുന്നു ,ഒരുപക്ഷെ സർക്കാരിനും ഭരണ വർഗ്ഗത്തിന്റെ ശിങ്കിടികൾക്കും മുന്നിൽ തല കുനിക്കാതിരുന്ന ,ആദർശങ്ങൾ ആക്രോശത്തിന് മുന്നിൽ അടിയറവ് വെക്കാതിരുന്ന അവസാന പത്ര പ്രവർത്തകരിൽ ഒരാൾ. ഗവണ്മെന്റിനും ,അവർ ജനങ്ങൾക്കിടയിൽ വളർത്തി കൊണ്ടുവന്ന ഇമേജിനും അയാൾ ഒരു കോട്ടം ആയി മാറും എന്ന് ഉറപ്പായ നിമിഷം അയാളെ കളിയിൽ നിന്നും ഒഴിവാക്കാൻ തീരുമാനിക്കുകയാണ് രാജ്യത്തെ ഉന്നതരായ പൗരന്മാർ. എന്നാൽ ഈ നീക്കം മുൻകൂട്ടി കണ്ട ടിയാൻ ഒരവസാന ശ്രമത്തിൽ രാജ്യത്ത് നിന്നും രക്ഷപ്പെടുകയാണ്.

🔸ഭർത്താവിന്റെ തിരോധാനം കാരണവും ,മുൻകാല നിലപാടുകൾ കാരണവും നൂറ അടക്കമുള്ളവർ നിരീക്ഷണത്തിലാണ്. പേടി ഒന്ന് മാത്രം എങ്ങും നിറഞ്ഞ് നിൽക്കുന്ന ഈ ജീവിതം നൂറയ്ക്ക് മടുത്ത് തുടങ്ങിയിട്ടുണ്ട് ,ഏത് വിധേനയും രാജ്യത്ത് നിന്നും രക്ഷപ്പെടുക എന്നതാണ് അവളുടെ ലക്ഷ്യം ,ശ്രമമാണ് ഈ ചിത്രം. കാനെസ് മേളയിൽ ഉൾപ്പെടെ ചിത്രത്തിന്റെ പ്രദർശനം തടയാൻ ചിലർ നടത്തിയ ശ്രമങ്ങളെ പിൽക്കാലത്ത് റോസൗലോഫ് വെളിപ്പെടുത്തിയിരുന്നു ,ഗവണ്മെന്റ് എന്തിന് കേവലം ഒരു സിനിമ സംവിധായകനെ ഭയന്നു എന്നതിന് ഉത്തരം ഈ സിനിമ നൽകും.

Verdict : Very Good

357. Tabu (2012)

Director : Miguel Gomes

Genre : Drama

Rating : 7.3/10

Country : Portugal

Duration : 118 Minutes


🔸ആരൊക്കെയോ പറഞ്ഞും അറിഞ്ഞും കേട്ട് മറന്ന ഒരു പഴങ്കഥയിൽ നിന്നുമാണ് തബു എന്ന ഈ പോർച്ചുഗീസ് ചിത്രം ആരംഭിക്കുന്നത്. വർഷങ്ങൾക്ക് മുന്നേ ആഫ്രിക്കയിലെ തബു മലനിരയ്ക്ക് കീഴിലുള്ള ഗ്രാമത്തിൽ വിദേശി ആയ ഒരു പര്യവേക്ഷകൻ ഉണ്ടായിരുന്നു. തന്റെ ജീവിതത്തിനോടും ,അതിൽ ഭാഗമായവരോടും സർവോപരി തന്നോടും തന്നെ അയാൾക്ക് വെറുപ്പ് ഉണ്ടായിരിക്കണം ,കാരണം ഒരുനാൾ അയാൾ സ്വയം മരണം വരിക്കുകയാണ്. അതും തടാകത്തിലെ ഒറ്റപ്പെട്ട മുതലയ്ക്ക് തന്റെ ജീവൻ സമർപ്പിച്ച് കൊണ്ട് അയാൾ എല്ലാം എന്നെന്നേക്കുമായി അവസാനിപ്പിക്കുകയാണ്.

🔸അയാൾ തന്റെ ജീവിതം അവസാനിപ്പിച്ചത് എന്തിനാണ് എന്ന് ഗ്രാമത്തിലുള്ള ആർക്കും തന്നെ വ്യക്തമല്ല ,അതിനുള്ള കാര്യ കാരണങ്ങൾ അയാൾ ആരോടും പറഞ്ഞിട്ടുമില്ല. എന്ത് തന്നെ ആയാലും അയാളുടെ മരണം നേരിൽ കണ്ട ഗോത്ര വർഗക്കാർ തങ്ങളിൽ ഒരാൾ മരിച്ചാൽ നൽകി പോവുന്ന ആദരങ്ങൾ നൽകിയാണ് അയാളുടെ ആത്മാവിനെ പറഞ്ഞ് വിട്ടത്. പര്യവേക്ഷകനെ കൊന്ന് തിന്നതിന് ശേഷം തടാകത്തിലെ മുതലയ്ക്ക് വരെ ഒരുതരം വിഷാദം പിടിപ്പെട്ടതായി പറയപ്പെടുന്നു ,അയാളുടെ മരണ ശേഷം തടാക കരയിൽ ഒരു സ്ത്രീയും ഒരുപാട് നാളുകൾ വന്ന് ചിലവിട്ടതായി കഥകളിൽ പറഞ്ഞ് കേട്ടിട്ടുണ്ട്. ഇവർ ആരായിരുന്നു എന്നത് ഇന്നും അവ്യക്തമായി തുടരുന്നു ,തുടരുകയും ചെയ്യും.

🔸രണ്ട് കഥകളാണ് ഈ ചിത്രം ,അവയുടെ വിവരണങ്ങളിലേക്ക് കടക്കുന്നത് സ്പോയ്ലർ ആവും എന്നതിനാലും അത് മനോഹരമായ ഈ ചിത്രത്തിനോട് ചെയ്യുന്ന നീതികേട്‌ ആവും എന്നതിനാലും പരമാവധി ഒഴിവാക്കാൻ ശ്രമിക്കുകയാണ്. ചിത്രത്തിന്റെ ആദ്യ ഭാഗം ആരംഭിക്കുന്നത് ഇന്നത്തെ കാലത്ത് തന്നെയാണ് ,മൂന്ന് സ്ത്രീകളാണ് ചിത്രത്തിലെ പ്രധാന കഥാപാത്രങ്ങൾ. ജീവിതത്തിന്റെ അന്ത്യ കാലഘട്ടങ്ങളിലേക്ക് കടന്ന് കൊണ്ടിരിക്കുന്നവരാണ് മൂന്ന് പേരും ,അതിനാൽ തന്നെ ശാരീരികമായും മാനസികമായും ഒരുപാട് പ്രശ്നങ്ങളിലൂടെ കടന്ന് പോവേണ്ടി വരുന്നുണ്ട് മൂന്ന് പേർക്കും.

🔸ഒറോറ എന്ന സ്ത്രീയാണ് ഇവരിൽ ചിത്രത്തിലെ പ്രധാന കഥാപാത്രം ,വാർദ്ധക്യത്തിലേക്ക് കടന്ന ഒറോറ ഒരു റിബൽ സ്വഭാവക്കാരിയാണ്. സംസാര പ്രിയയും മറ്റുള്ളവർക്ക് യോജിക്കാൻ കഴിയാത്ത ,വിശദീകരിക്കാൻ പറ്റാത്ത തീരുമാനങ്ങൾ കൈക്കൊള്ളുന്നതിൽ ഒരു പ്രത്യേക കഴിവുണ്ട് ഒറോറയ്‌ക്ക്. ഒറോറയുടെ സഹായിയായ സാന്റായും ,അയൽക്കാരിയായ പില്ലറും ആണ് ചിത്രത്തിലെ മറ്റ് രണ്ട് പ്രധാന കഥാപാത്രങ്ങൾ. ഒരുനാൾ മരണം അടുത്തിരിക്കുന്നെന്ന ഭയം ഒറോറയെ മാനസികമായി കീഴ്പ്പെടുത്തുകയാണ് ,മരണം എന്നത് അനിവാര്യം ആണെന്ന് വ്യക്തമായി അറിയാം എങ്കിലും അതിന് മുൻപ് ഒരു ആഗ്രഹം ,ഒരൊറ്റ ആഗ്രഹം മനസ്സിൽ ബാക്കി കിടക്കുന്നുണ്ട്.

🔸തന്റെ ആഗ്രഹം ഒറോറ മറ്റ് രണ്ട് പേരോടും വെളിപ്പെടുത്തുകയാണ് ,അതിന് വര്ഷങ്ങളുടെ പഴക്കം ഉണ്ടായിരുന്നു, ഒറോറയുടെ ഭൂതകാലത്തിന്റെ വിലയും. എന്ത് തന്നെ ആയാലും സുഹൃത്തിന്റെ ആഗ്രഹം സഫലീകരിക്കാൻ വേണ്ടി രണ്ട് പേരും ഒരു ശ്രമത്തിന് ഒരുങ്ങുകയാണ്, പ്രയാസം ആണെന്ന് അറിയാമെങ്കിൽ കൂടിയും. ഈ ആഗ്രഹം ,അത് എന്ത് തന്നെ ആയാലും അവിടെ നിന്നും ചിത്രത്തിന്റെ രണ്ടാം ഭാഗം ആരംഭിക്കുകയാണ്. മേൽ പറഞ്ഞ വിവരണത്തിൽ നിന്നും ഏറെക്കുറെ ചിത്രം പിടി കിട്ടി എന്ന് കരുതുന്നുണ്ടെങ്കിൽ അത് തെറ്റാണെന്ന് പറയേണ്ടി വരും കാരണം ഒരു കാഴ്ചയിൽ അനുഭവിക്കാൻ കഴിയുന്നതിൽ അധികം ഈ ബ്ലാക് ആൻഡ് വൈറ്റ് പോർച്ചുഗീസ് ചിത്രം ഒളിപ്പിച്ച് വെച്ചിട്ടുണ്ട്.

Verdict : Very Good

356. Margarita With A Straw (2014)

Director : Shonali Bose

Genre : Drama

Rating : 7.3/10

Country : India

Duration : 100 Minutes


🔸എങ്ങനെ ജീവിക്കണം എന്നും ഏത് രീതിയിൽ പെരുമാറണം എന്നും അലിഖിതമായ ഒരു നിയമം സമൂഹത്തിൽ നില നിൽക്കുന്നുണ്ട് ,പ്രത്യേകിച്ചും ഇന്ത്യ പോലെയുള്ള സാംസ്‌കാരിക സാമൂഹിക ജീവിതത്തിന് അത്രമേൽ പ്രാധാന്യം നൽകുന്ന ,ലഭിക്കപ്പെടുന്ന രാജ്യത്ത് സമൂഹത്തിനും അലിഖിത കെട്ടുപാടുകളാവുന്ന നിയമങ്ങൾക്കും ഉള്ള പ്രാധാന്യം ഭയം ജനിപ്പിക്കും വിധം ഭീകരം ആണ്. ഈ നിയമങ്ങൾ എല്ലാം തന്നെ അസ്തിത്വത്തിലേക്ക് വരെ എത്തിയിട്ടുള്ളതായി കാണാം ,നമ്മുടെ ചുറ്റും അരങ്ങേറുന്ന ചില സംഭവങ്ങൾ വെറുതെ ഒന്ന് വീക്ഷിച്ചാൽ. ഇത്തരത്തിലുള്ള കെട്ട് പാടുകൾക്കും ,തല മുതിർന്നവർ എന്ന് സ്വയം കരുതുന്നവർ സൃഷ്ടിച്ചെടുത്ത വേലി കെട്ടുകൾക്കും നേരെയുള്ള ചോദ്യമാണ് ഒരു പരിധി വരെ ഈ ചിത്രം.

🔸ലൈല എന്ന ഡെൽഹിക്കാരി പെൺകുട്ടി ആണ് ചിത്രത്തിലെ പ്രധാന കഥാപാത്രം ,സെറിബ്രൽ പാൾസി എന്ന ശാരീരിക അവസ്ഥയ്ക്ക് ഉദാഹരണമാണ് ലൈല. ഡൽഹിയിലെ ഇടത്തരം കുടുംബങ്ങളിൽ ഒന്നിൽ ജനിച്ച് വളർന്ന ലൈല ,കോളേജ് വിദ്യാർത്ഥിയും ,എഴുത്തുകാരിയും സർവോപരി ഒരു ബാൻഡിൽ സംഗീതഘ്നയും കൂടിയാണ്. തുറന്ന് പറയാനും പ്രകടിപ്പിക്കാനും കഴിയുന്നില്ലെങ്കിലും ,തന്റെ വിവാഹേതര ,ലൈംഗിക ജീവിതത്തെ കുറിച്ചും വ്യക്തമായ ചില കാഴ്ചപ്പാടുകളുണ്ട് ലൈലയ്ക്ക്.

🔸താൻ മനസ്സിൽ തോന്നിയത് തുറന്ന് പറഞ്ഞപ്പോൾ എല്ലാം നേരിടേണ്ടി വന്നത് അവഗണനയും പരിഹാസവും പുച്ഛവും ഒക്കെ തന്നെ ആയിരുന്നു ,അതിന് മാതാപിതാക്കൾ എന്നോ കാമുകൻ എന്നോ പരിചയക്കാർ എന്നോ യാതൊരു വ്യത്യാസവും ഉണ്ടായിരുന്നില്ല. അതിൽ ഏറ്റവും വേദനിപ്പിച്ചത് ഇഷ്ട്ടപ്പെട്ട വ്യക്തിയോട് അത് പ്രകടിപ്പിക്കാൻ ശ്രമിച്ചപ്പോൾ നേരിടേണ്ടി വന്ന അവഗണന തന്നെ ആയിരുന്നു ,ഒരുമാറ്റം ആവശ്യമായി തോന്നിയപ്പോഴാണ് രോഗി ഇച്ഛിച്ചതും വൈദ്യൻ കല്പിച്ചതും എന്ന് പറഞ്ഞ പോലെ ഈ അവസരം കണ്മുന്നിൽ എത്തിയത്.

🔸പഠന ആവശ്യത്തിന് വേണ്ടി അമേരിക്കയിലേക്ക് താമസം മാറ്റാനുള്ള അവസരം ആണ് ലൈലയുടെ മുന്നിലേക്ക് എത്തിയിരിക്കുന്നത്. പുതിയ അന്തരീക്ഷം ,പുതിയ ആളുകൾ ,പുതിയ മനസ്ഥിതി എല്ലാത്തിനും അപ്പുറം സമൂഹം തനിക്ക് ചുറ്റും കെട്ടിവരിഞ്ഞ് ഉണ്ടാക്കിയ വേലിക്കെട്ടുകൾ തകർത്ത് അറിയാനും താൻ ആഗ്രഹിച്ച ,ഇഷ്ട്ടപ്പെട്ട ,സ്വപ്നം കാണുന്ന ജീവിതം ജീവിച്ച് തീർക്കാനും ഉള്ള അവസരമാണ് ലൈലയെ സംബന്ധിച്ചിടത്തോളം ഈ അമേരിക്കൻ വാസം. കൂടുതൽ ഒന്നും ആലോചിക്കാതെ തന്നെ ലൈലയും ,യാഥാസ്ഥിതിക ചിന്താ രീതിക്കാരി ആയ അമ്മ ശുഭാംഗിണിയും അമേരിക്കയിലേക്കുള്ള യാത്ര ആരംഭിക്കുകയാണ്.

🔸അമേരിക്കൻ ജീവിതത്തിൽ തന്റെ ആഗ്രഹങ്ങളും സ്വപ്നങ്ങളും സാക്ഷാത്കരിക്കുന്നതിനിടെ ലൈല കണ്ട് മുട്ടിയത് രണ്ട് പ്രധാന കഥാപാത്രങ്ങളെയാണ്. തന്നെ സഹായിക്കാനായി നിയോഗിക്കപ്പെട്ട യുവാവായ ജർഡും ,അന്ധയും പാകിസ്താൻകാരിയും ആയ മനുഷ്യാവകാശ പ്രവർത്തക കാനുവും ആയിരുന്നു ഇവർ. രണ്ട് കഥാപാത്രങ്ങളിലും ലൈല കണ്ടെത്തുന്നത് താൻ അന്വേഷിച്ച് നടന്ന ചോദ്യങ്ങളുടെ ഉത്തരങ്ങളാണ് ,തന്റെ മനസ്ഥിതിയെ കുറിച്ചും ,വ്യക്തിത്വത്തെ കുറിച്ചും മറ്റെല്ലാത്തിനുമുപരി താൻ ആരാണെന്ന തിരിച്ചറിവുമാണ്. കണ്ടിട്ടില്ലാത്തവർ തീർച്ചയായും ഈ മനോഹര ചിത്രം കാണാൻ ശ്രമിക്കുക.

Verdict : Very Good

355. All The Money In The World (2017)

Director : Ridley Scott

Genre : Crime

Rating : 6.9/10

Country : USA

Duration : 133 Minutes


🔸അമ്പത് മില്യൺ ഡോളറോളം മുതൽമുടക്കിൽ ,ഹോളിവുഡിലെ പ്രമുഖരായ നടന്മാരെയും അണിയറ പ്രവർത്തകരെയും ഒന്നിച്ച് കൊണ്ടുവന്ന് ,ഒന്നര വർഷത്തോളമുണ്ടായ കഠിനാധ്വാനത്തിന് ശേഷം തിയേറ്റർ റിലീസിന് ഒരുങ്ങുന്ന ചിത്രത്തിലെ പ്രധാന കഥാപാത്രങ്ങളിൽ ഒന്ന് കൈകാര്യം ചെയ്ത നടനെതിരെ ലൈംഗിക ചൂഷണ ആരോപണം ഉയരുകയാണ്. ചിത്രം പ്രേക്ഷകന്റെ മുന്നിലേക്കെത്താൻ ആറ് ആഴ്ച തികച്ചില്ല ,റിലീസ് തീയതി നീട്ടി വെക്കാനോ കഥാപാത്രത്തെ ചിത്രത്തിൽ നിന്ന് ഒഴിവാക്കാനോ ഒരു വഴിയും ഇല്ല താനും. മാറ്റങ്ങൾ ഏതും വരുത്താതെ റിലീസ് ചെയ്യാനാണ് ശ്രമിക്കുന്നതെങ്കിൽ ചിത്രം നേരിടാൻ പോവുന്നത് കടുത്ത വിമർശനങ്ങളും ,അതിലും വലിയ പരാജയവും ആവും എന്ന കാര്യം ഉറപ്പ്. സംവിധായകൻ അടക്കമുള്ളവർ ധർമ സങ്കടത്തിലാണ് ,പറഞ്ഞ് വന്നത് ഓൾ ദി മണി ഇൻ ദി വേൾഡ് എന്ന ഈ ചിത്രത്തെ കുറിച്ച് തന്നെയാണ്.

🔸പ്രശ്നങ്ങൾ എന്തൊക്കെ തന്നെ ആയാലും എല്ലാവരെയും സംബന്ധിച്ച് ഒരു ഹാപ്പി എൻഡിങ് തന്നെ ആയിരുന്നു ഈ ചിത്രം ,റിലീസ് ഡേറ്റിന് തന്നെ ചിത്രം റിലീസ് ചെയ്യാനും പ്രേക്ഷകരുടെയും വിമര്ശകരുടെയും പ്രശംസ ഒരുപോലെ നേടാനും സാമ്പത്തിക ലാഭം കൊയ്യാനും ഈ റിഡ്‌ലി സ്കോട്ട് ചിത്രത്തിന് കഴിഞ്ഞു. ആരോപണങ്ങൾ ഉന്നയിക്കപ്പെട്ട നടന് പകരം ഹോളിവുഡിലെ തന്നെ മറ്റൊരു അതികായനായ ക്രിസ്റ്റഫർ പ്ലമ്മർ വിവാദം ആയേക്കാവുന്ന റോൾ ആറ് ആഴ്ചയ്ക്കുള്ളിൽ അഭിനയിച്ച് സ്‌ക്രീനിൽ എത്തിച്ചു. മേൽ പറഞ്ഞ സംഭവങ്ങൾ പ്രതിപാദിക്കാൻ ഉണ്ടായ കാരണം എന്താണെന്നാൽ ചിത്രത്തേക്കാൾ ഖ്യാതി ഒരു പരിധി വരെ ഈ സംഭവങ്ങൾ കരസ്ഥമാക്കിയിട്ടുണ്ട് ,പ്രത്യേകിച്ചും സാധാരണ കാഴ്ചക്കാർക്കിടയിൽ പോലും.

🔸ചിത്രത്തെ കുറിച്ചുള്ള സംഭാഷണങ്ങൾ ഓരോന്നും സ്വാഭാവികമായി തന്നെ പ്രസ്തുത വിഷയത്തിലേക്കും അതിന് അനുബന്ധമായ ചർച്ചകളിലേക്കും കടക്കുമ്പോഴും പ്രസ്തുത ചിത്രത്തെ കുറിച്ചോ അതിൽ അഭിനയിച്ച മറ്റ് നടന്മാരെ കുറിച്ചോ ,എന്തിന് ആകെ മൊത്തം നിലവാരത്തെ കുറിച്ചോ അധികമാരും പറയുന്നത് കേട്ടിട്ടില്ല. ത്രില്ലർ എന്ന രീതിയിൽ അതിനേക്കാൾ നല്ല പ്രതികരണങ്ങൾ ഈ ചിത്രം ഒരു പരിധി വരെ അർഹിക്കുന്നുണ്ട് എന്നാണ് കണ്ട് കഴിയുമ്പോൾ ആദ്യം മനസ്സിൽ ഉണ്ടായ ചിന്ത ,പ്രത്യേകിച്ചും കഥയും വിഷയവും പ്രകടനങ്ങളും കണക്കിൽ എടുക്കുമ്പോൾ.

🔸ചിത്രത്തിന് ആസ്പദമായിരിക്കുന്നത് ചില യഥാർത്ഥ സംഭവങ്ങളാണ് ,ഇവ ആരംഭിക്കുന്നത് നാല്പത്തി അഞ്ചോളം വർഷങ്ങൾക്ക് മുൻപ് ഇറ്റലിയിൽ ആണ്. ആ കാലഘട്ടത്തിൽ ലോകത്തിലെ തന്നെ ഏറ്റവും വലിയ ധനികരിൽ ഒരാൾ ആയിരുന്നു അന്തർ ദേശീയ എണ്ണ വ്യാപാരി ആയിരുന്ന പോൾ ഗെറ്റി. തലമുറകളായി രാജ്യത്തെ സാമ്പത്തിക വിഭാഗത്തിന്റെ പോലും അടിത്തറ ഒരു പരിധി വരെ താങ്ങി ഗെറ്റി കുടുംബം തന്നെയാണ്. ഗെറ്റി കുടുംബത്തിലെ ഏറ്റവും ഇളയ തലമുറയിൽ പെട്ട ആളാണ് പതിനാറ് വയസ്സുകാരനായ ജോൺ പോൾ ഗെട്ടി മൂന്നാമൻ.

🔸ജോൺ പോളും അമ്മ ഗെയിൽ ഹാരിസും വർഷങ്ങളായി ഗെട്ടി കുടുംബത്തിൽ നിന്നും വേറിട്ടാണ് താമസിച്ച് പോന്നത്. തന്റെ ലഹരിക്കടിമയായ ഭർത്താവും ഒന്നിച്ചുള്ള നരക തുല്യമായിരുന്ന ജീവിതം ആണ് ഗെയിലിനെ മാറി താമസിക്കാനും ,വേറിട്ട് ജീവിക്കാനും പ്രേരിപ്പിച്ചിരുന്നത്. എന്ത് തന്നെ ആയാലും ജോൺ ഗെട്ടി മൂന്നാമനെ ചില ക്രിമിനൽ സംഘത്തിലെ അംഗങ്ങൾ തട്ടി കൊണ്ടുപോവുകയാണ് ,മുത്തച്ഛനായ പോൾ ഗെട്ടിയുടെ കയ്യിലുള്ള സമ്പത്താണ് ഇവരുടെ ഉദ്ദേശം. തന്റെ മകനെ തിരികെ ലഭിക്കാനായി കഠിനമായ ചില തീരുമാനങ്ങൾ കൈക്കൊള്ളാൻ പ്രേരിപ്പിക്കപ്പെടുകയാണ് അമ്മയായ ഗെയിൽ ഹാരിസ്.

Verdict : Good

354. Death Rides A Horse (1967)

Director : Julio Petroni

Genre : Western

Rating : 7.2/10

Country : Italy

Duration : 114 Minutes


🔸പ്രതികാരത്തിനോളം സംതൃപ്തി നൽകാൻ കഴിയുന്ന അധികം കാര്യങ്ങൾ ഉണ്ടാവില്ല ,അത് സിനിമയിൽ ആയാലും യഥാർത്ഥ ജീവിതത്തിൽ ആയാലും അങ്ങനെ ഒക്കെ തന്നെ. തങ്ങളെ പരിഹസിച്ചവരുടെയും തങ്ങളുടെ തോൽവി മനസാ ആഗ്രഹിച്ചവരുടെയും മുന്നിൽ ജയിച്ച് കാണിക്കണം എന്നത് ഏതൊരു മനുഷ്യന്റെയും ആഗ്രഹങ്ങളിൽ ഒന്നായിരിക്കും ,അതിനാൽ തന്നെ ആവാം പ്രതികാരം പ്രമേയമായി വന്ന ചിത്രങ്ങൾക്കും അവയിലെ നായകന്മാർക്കും ഒരുപാട് ആരാധകന്മാർ ഉണ്ടായതും. തങ്ങൾ ആഗ്രഹിച്ച ആ ചെറിയ നിമിഷം സ്ക്രീനിലെ കഥാപാത്രം സ്വന്തമാക്കുമ്പോൾ അറിയാതെ എങ്കിലും അത് ഇഷ്ടപ്പെട്ട് പോവാറുണ്ട് കാഴ്ചക്കാരനും. അത്തരമൊരു പ്രതികാര കഥയാണ് ഈ ചിത്രവും.

🔸ചിത്രം ആരംഭിക്കുന്നത് ഒരു താഴ്‌വരയിൽ നിന്നുമാണ് ,അതും പേമാരി കണക്കിന് മഴ പെയ്തിറങ്ങിയ രാത്രി സമയത്ത്. വിജനമായ പ്രദേശത്ത് ആകെയുള്ള വീട് ലക്‌ഷ്യം വെച്ച് അഞ്ച് അംഗ സംഘം എത്തുകയാണ്. വീട്ടുടമസ്ഥന്റെയോ മറ്റാരുടെ എങ്കിലുമോ സമ്മതം കൂടാതെ വീടിനുള്ളിലേക്ക് കടന്ന് ചെല്ലുകയാണ് അഞ്ച് പേരും. പിന്നീട് അവിടെ അരങ്ങേറിയത് വാക്കിനാൽ വിവരിക്കാനാവാത്ത കൂട്ടക്കുരുതി ആണ്. ആണെന്നോ പെണ്ണെന്നോ നോട്ടമില്ലാതെ ചലിക്കുന്ന എന്തിനെയും ഏതിനെയും വെടിക്ക് ഇരയാക്കി കൊണ്ടും സ്ത്രീകളെ ബലാത്സംഗം ചെയ്തും അഞ്ചംഗ സംഘം ആ താഴ്‌വരയിൽ അന്നേ ദിവസം ചോര ചാലുകൾ തീർത്ത് കടന്ന് പോയി.

🔸മേൽ പറഞ്ഞ സംഭവങ്ങൾ കഴിഞ്ഞ് വർഷങ്ങൾ ഒരുപാട് കഴിഞ്ഞ് പോയിരിക്കുന്നു, മരിച്ചവരെല്ലാം എല്ലാവരുടെയും ഓർമകളിൽ നിന്ന് പോലും മാഞ്ഞ് പോയിട്ടുണ്ട്, അന്നേ ദിവസം അരങ്ങേറിയ സംഭവങ്ങൾ പോലും ആർക്കും ഓർമയില്ല. അഞ്ചംഗ സംഘത്തിലുള്ളവർ പോലും എവിടെയാണെന്നോ എന്താണെന്നോ ,ജീവനോടെ ഉണ്ടോ എന്ന് പോലും ആർക്കും നിശ്ചയമില്ല. എല്ലാം എല്ലാവരും മറന്നു എന്ന് ചിന്തിച്ച് തുടങ്ങിയ നിമിഷം പഴയ സംഭവങ്ങൾ മനസ്സിൽ വെച്ച് കൊണ്ട് കണക്കുകൾ തീർക്കാനായി ഒരു പുതിയ കഥാപാത്രം പ്രത്യക്ഷപ്പെടുകയാണ്.

🔸പ്രസ്തുത കഥാപാത്രം ആരാണെന്നും മേൽ പറഞ്ഞ സംഭവങ്ങളിൽ ഇയാൾക്കുള്ള പങ്ക് എന്താണെന്നും ചിത്രം കണ്ട് മനസിലാക്കുന്നതാവും നല്ലത് ,അത് എന്ത് തന്നെ ആയാലും വർഷങ്ങൾക്കിപ്പുറം ടിയാൻ മടങ്ങി വന്നിരിക്കുന്നതിന് ഒരേയൊരു കാരണം മാത്രമേയുള്ളൂ ,പ്രതികാരം എന്ന കാരണം. താഴ്‌വരയിൽ അന്ന് അരങ്ങേറിയ സംഭവങ്ങളുടെ ചെറിയ ചില ഓർമകളും ,കൊലപാതകികളെ കുറിച്ചുള്ള ലഘുവായ സൂചനകളും മാത്രമേ ടിയാന്റെ കയ്യിലുള്ളൂ. ഈ വിവരങ്ങൾ ഉപയോഗിച്ച് കഥാപാത്രങ്ങളെ കണ്ടെത്തണം ,കൊല്ലണം ,മടങ്ങണം എന്ന ലക്ഷ്യങ്ങൾ മാത്രമേ ഇയാൾക്കുള്ളൂ.

🔸ഇതേ സമയം നഗരത്തിന്റെ മറ്റൊരു ഭാഗത്ത് പതിനഞ്ച് വർഷത്തെ ജയിൽ ശിക്ഷയ്ക്ക് ശേഷം പ്രതിയെന്ന് ആരോപിക്കപ്പെട്ട റയാൻ എന്ന കഥാപാത്രം പുറത്തിറങ്ങുകയാണ്. ഇയാളുടെയും ഉദ്ദേശങ്ങളോ ലക്ഷ്യങ്ങളോ വ്യക്തമല്ല, കവർച്ചയും കൊള്ളയും കുറ്റങ്ങളായി ആരോപിക്കപ്പെട്ട് ജയിലിലായ റയാന് പറയാനുണ്ടായത് ഈ കഥാപാത്രങ്ങൾ എല്ലാം ഉൾപ്പെട്ട ചില സംഭവങ്ങളുടെ വേറിട്ട വിവരണം ആണ്. മികച്ച ചിത്രം എന്ന അവകാശവാദം ഒന്നുമില്ലെങ്കിലും കണ്ടിരിക്കാവുന്ന, നല്ല വെസ്റ്റേൺ റിവഞ്ച് ചിത്രങ്ങളുടെ പട്ടികയിൽ ഈ ചിത്രത്തെയും ഉൾപ്പെടുത്താം.

Verdict : Above Average

353. 1945 (2017)

Director : Ferenc Torok

Genre : Drama

Country : Hungary

Rating : 7.4/10

Duration : 91 Minutes


🔸രണ്ടാം ലോകമഹായുദ്ധവും അതിനിടെ ഉണ്ടായ ജൂത കൂട്ടക്കുരുതിയും ഹിറ്റ്ലറുടെ ഏകാധിപത്യ ഭരണവും എല്ലാം ഒരുപാട് കേട്ട് പരിചയിച്ചവരാണ് നമ്മളെല്ലാം തന്നെ ,എന്നാൽ ഇതിനിടെ അധികം ആരുടേയും ശ്രദ്ധയിൽ പെടാതെ പോയ അല്ലെങ്കിൽ അധികമാരും അറിഞ്ഞിട്ടും ശ്രദ്ധിക്കാതെ പോയ ഒന്നാണ് ഹങ്കറി പോലെയുള്ള രാജ്യങ്ങളിൽ ജൂത വംശജരോട് അവിടുത്തെ ജനങ്ങൾ തന്നെ കൈക്കൊണ്ട ചില മനുഷ്യത്വ രഹിതമായ നടപടികൾ. അത്തരം സംഭവങ്ങളാണ് ഈ ചിത്രത്തിന്റെ പ്രമേയം, രണ്ടാം ലോകമഹായുദ്ധത്തിന്റെ അന്ത്യ നാളുകളിലാണ് ചിത്രം ആരംഭിക്കുന്നത് ,ജപ്പാനും ഇറ്റലിയും തോൽവി സമ്മതിച്ച് കഴിഞ്ഞ യുദ്ധം ഏത് നിമിഷവും അവസാനിക്കും ,എല്ലാവരും കാത്തിരിക്കുന്നത് ജപ്പാന്റെ വീഴ്ച ആണ് ,അതുവഴി യുദ്ധത്തിന്റെ അവസാനവും.

🔸ഹങ്കറിയിലെ ഗ്രാമങ്ങളിൽ ഒന്നാണ് കഥാപശ്ചാത്തലം ,യുദ്ധത്തിന്റെ അലയൊലികൾ ഏറെക്കുറെ അവസാനിച്ചിരിക്കുന്നു. ആറ് വർഷങ്ങൾ നീണ്ടുനിന്ന യുദ്ധം ഗ്രാമത്തെയും അവിടുത്തെ ജനങ്ങളെയും ഒരുപാട് മാറ്റിമറിച്ചിട്ടുണ്ട് ,എല്ലാ രീതിയിലും. ജനങ്ങൾ തങ്ങളുടേതായ പ്രശ്നങ്ങളും പ്രാരാബ്ധങ്ങളും ഒക്കെ ആയി തിരക്കുകളിലേക്ക് കടന്നിരിക്കുകയാണ്.പിടിച്ചെടുക്കാൻ വന്നവരും ,രക്ഷിക്കാൻ എത്തിയവരും എല്ലാം അവിടം വിട്ട് സ്വന്തം നാട്ടിലേക്ക് മടങ്ങാനുള്ള ഉദ്ദേശത്തിലാണ്. ഗ്രാമം വീണ്ടും ശാന്തതയിലേക്ക് കടക്കാൻ ഒരുങ്ങുമ്പോൾ, ആ ദിവസങ്ങളിൽ ഒന്നിൽ തീവണ്ടിയിൽ രണ്ട് കഥാപാത്രങ്ങൾ ആ ഗ്രാമത്തിൽ  വന്നിറങ്ങുകയാണ്, ഒരച്ഛനും മകനും.

🔸വന്നിറങ്ങിയ കഥാപാത്രങ്ങളെ കുറിച്ച് കൂടുതൽ വിവരങ്ങൾ ഒന്നും തന്നെ ഇല്ല ,ആരോടും അധികം സംസാരങ്ങളോ ചോദ്യങ്ങളോ പോലുമില്ല. വലിയ ഒന്ന് രണ്ട് പെട്ടികളോടെയാണ് രണ്ട് പേരും എത്തിയിരിക്കുന്നത് ,എന്തെങ്കിലും വിലപിടിപ്പുള്ള വസ്തുവകകൾ ആയിരിക്കും എന്ന ഊഹങ്ങൾ അല്ലാതെ അതിന്റെ ഉള്ളടക്കത്തെ കുറിച്ചും യാതൊരു അറിവുമില്ല. ഇരുവരും തീവണ്ടി ഇറങ്ങിയ സ്റ്റേഷനിലെ മാസ്റ്റർക്ക് ആ പെട്ടിയിൽ ഒരു കണ്ണുണ്ട് ,അത് കൈക്കലാക്കണം എന്നൊരു ആഗ്രഹവും ഉണ്ട്. എന്തിരുന്നാലും കഥാപാത്രങ്ങൾ ഗ്രാമം ലക്ഷ്യമാക്കി കൊണ്ട് യാത്ര തുടരുകയാണ്.

🔸വിശേഷപ്പെട്ട ദിവസമാണ് എന്തായാലും ഇരുവരും ഗ്രാമത്തിൽ എത്തിയത് ,ഗ്രാമ മുഖ്യനും ജനങ്ങൾക്കിടയിൽ നേതാവും ഒക്കെ ആയ ഇസ്ട്ടവന്റെ മകനായ അർപാടും ഗ്രാമത്തിലെ തന്നെ കിസ്ററോസി എന്ന യുവതിയും ആയുള്ള വിവാഹദിവസം ആണ് അന്ന്. ഗ്രാമം ഒന്നടങ്കം വിവാഹ ആഘോഷങ്ങളിലേക്ക് കടന്നിരിക്കുകയാണ്. ഇസ്ട്ടവന്റെ ഭാര്യയ്ക്ക് വിവാഹത്തോട് താല്പര്യമില്ലെങ്കിലും ഭർത്താവിനോടുള്ള ഭയം ഒന്ന് കൊണ്ട് മാത്രം അവർ മുന്നോട്ട് പോവാൻ ഒരുങ്ങുകയാണ്. കല്യാണ ആഘോഷങ്ങളിൽ മതിമറന്നിരിക്കെ ആണ് ജൂതരുടെ തിരിച്ചുവരവിന്റെ വാർത്ത ജനങ്ങളുടെ ചെവിയിൽ എത്തുന്നത് ,മിക്കവർക്കും അത് ഒരു ദുസ്വപ്നം കണക്കെ ആയിരുന്നു.

🔸ഹിറ്റ്ലറുടെയും ജര്മനിയുടെയും പടയോട്ട കാലത്ത് പിടിച്ചു കൊണ്ടുപോയ ജൂതരുടെ വസ്തുവകകളും സാധന സാമഗ്രികളും ഉപയോഗിച്ചാണ് ഒരു പരിധി വരെ ഗ്രാമത്തിലെ ജനങ്ങൾ ജീവിച്ചു പോന്നത്. അവർ വിട്ടുപോയതെല്ലാം തങ്ങളുടേതായിട്ടാണ് കണക്കാക്കിയതും ഉപയോഗിച്ചതും ,അതിനെല്ലാം വീണ്ടും അവകാശികൾ ഉണ്ടാവുക എന്നതിനെ പറ്റി അവർക്ക് ചിന്തിക്കാൻ പോലും ആവുമായിരുന്നില്ല. അതിനാൽ തന്നെ രണ്ട് കഥാപാത്രങ്ങളുടെയും വരവിനോട് ഒട്ടും നല്ല പ്രതികരണങ്ങളാണ് ജനങ്ങൾക്ക് ഉണ്ടായിരുന്നത്. കാട്ടുതീ പോലെ എത്തിയ വാർത്ത അറിഞ്ഞ ഗ്രാമവാസികൾ കാത്തിരിക്കുകയാണ് ജൂതന്മാരുടെ വരവിനായി.

Verdict : Very Good

352. Ocean's 8 (2018)

Director : Gary Ross

Genre : Heist

Rating : 6.2/10

Country : USA

Duration : 109 Minutes


🔸ഡാനി ഓഷ്യനും കൂടെയുണ്ടായിരുന്ന യഥാക്രമം പത്ത് ,പതിനൊന്ന് ,പന്ത്രണ്ട് പേരും ചേർന്ന് മോഷണവും പിടിച്ചുപറിയും പറ്റിക്കലും ഒക്കെ കഴിഞ്ഞ് പോയിട്ട് പത്ത് വർഷം കഴിഞ്ഞു. ഇപ്പോൾ സഹോദരി ഡെബ്ബി ഓഷ്യന്റെ ഊഴമാണ് ,ഫിലോമിനയുടെ ഭാഷയിൽ പറയുക ആണെങ്കിൽ കുടുംബം അടക്കം കള്ളന്മാരാണ്. മികച്ച ആരാധക പ്രശംസയും ,മോശമല്ലാത്ത നിരൂപക പ്രശംസയും നേടിയ ക്ലൂണിയുടെ ഓഷ്യൻസ് ത്രിലോഗിയിൽ നിന്നും സാന്ദ്ര ബുള്ളക്കിന്റെ ഓഷ്യൻസ് 8ൽ എത്തുമ്പോൾ മാറ്റങ്ങൾ ഒരുപാടാണ്. സംവിധായകനിൽ തുടങ്ങി തലപ്പത്ത് നിന്നും ആരംഭിക്കുന്ന മാറ്റങ്ങളിൽ ഏറ്റവും പ്രാധാന്യം അർഹിക്കുന്നത് പ്രധാന കഥാപാത്രങ്ങളായി ഇത്തവണ എത്തുന്നതെല്ലാം സ്ത്രീകൾ ആണ് എന്നത് തന്നെയാണ് ,അതും ഓസ്കാർ ഉൾപ്പെടെ ഒരുപാട് പുരസ്‌കാരങ്ങൾ വാരിക്കൂട്ടിയ കഴിവുറ്റ നടിമാർ തന്നെ.

🔸പേരും മുൻകാല ചിത്രങ്ങൾ നൽകുന്ന സൂചനകളും ശെരി വെച്ച് കൊണ്ടുതന്നെ ഇതൊരു ഹെയ്‌സ്റ്റ് ചിത്രമാണ് ,എട്ട് സ്ത്രീകളും ഒരുമിക്കുന്നത് മോഷണം എന്ന ലക്ഷ്യം മാത്രം മനസ്സിൽ കണ്ട് കൊണ്ടാണ് ,അതിന് ഓരോരുത്തരെയും പ്രേരിപ്പിക്കുന്ന വ്യത്യസ്തമായ ഘടകങ്ങൾ ഉണ്ടെങ്കിലും ഉദ്ദേശം ഒന്ന് തന്നെ ,എല്ലാവർക്കും. ഇത്തവണ സംഘം ഉന്നം വെച്ചിരിക്കുന്നത് ഒരു നെക്ലേസ് ആണ് ,ഉദ്ദേശം 150 മില്യൺ ഡോളർ വില മതിക്കുന്ന ഈ നെക്ലേസിന് ഇവരിൽ പലരുടെയും ജീവിതം മാറ്റി മറിക്കാനുള്ള ശേഷി ഉണ്ട്. എന്നാൽ ഒട്ടും എളുപ്പമല്ല മുന്നിലുള്ള വഴി ,മോഷണത്തിനായി അവർക്ക് തിരഞ്ഞെടുക്കേണ്ടി വരുന്നത് ലോകത്തിലെ തന്നെ ഏറ്റവും തിരക്ക് അനുഭവപ്പെടുന്ന ന്യൂ യോർക്കിലെ ഫാഷൻ എക്സ്ട്രാവേഗാൻസ എന്ന ഷോ ആണ്. തങ്ങളുടെ പദ്ധതി വിജയകരം ആവാൻ ഇവർക്ക് നേരിടേണ്ടി വരുന്ന വെല്ലുവിളികളും ,കടന്ന് പോവേണ്ടി വരുന്ന അപ്രതീക്ഷിത കഥാ സന്ദർഭങ്ങളും ചിത്രം കണ്ട് മനസ്സിലാക്കുന്നതാവും നല്ലത്.

🔸ഓഷ്യൻസ് ചിത്രങ്ങൾ കണ്ടിട്ടുള്ള ഒരു ശരാശരി ആരാധകൻ ആണെങ്കിൽ സീരീസിൽ നിന്നും എന്താണ് പ്രതീക്ഷിക്കുന്നത് എന്നും എന്ത് കണ്ടാൽ തന്നിലെ കാഴ്ചക്കാരനെ തൃപ്തി പെടുത്താൻ ആവും എന്നും ഒരേകദേശ ധാരണ ഉണ്ടാവും ,ഈ ഒരു മനോഭാവം മാത്രം വെച്ച് കാണുക ആണെങ്കിൽ ഓഷ്യൻസ് 8 എന്ന ചിത്രം ഇഷ്ടപ്പെട്ടേക്കാം. കുറ്റങ്ങളോ കുറവുകളോ ഇല്ല എന്നല്ല ,തീർച്ചയായും അതിന്റെതായ പ്രശ്നങ്ങൾ ചിത്രത്തിന് ഉണ്ട് എന്നാലും ഒരു ഹെയ്‌സ്റ്റ് ചിത്രത്തിന്റെ പൾസ് എന്നത് ആ കവർച്ചയെ അവതരിപ്പിക്കുന്ന രീതിയും അവ പറഞ്ഞ് ഫലിപ്പിക്കാനുമുള്ള കഴിവും ആണെങ്കിൽ ഓഷ്യൻസ് 8 എന്ന ചിത്രം പ്രസ്തുത മേഖലയിൽ മോശമില്ലാത്ത വിജയിച്ചിട്ടുണ്ട്. എന്തിരുന്നാലും ലോജിക് എന്ന വസ്തുതയും ചിത്രം കണ്ട് കൊണ്ടിരിക്കെ സ്വാഭാവികമായും ഉണ്ടാവുന്ന 'ഇത് ഞാൻ എവിടെയോ....' എന്ന ചിന്തയും ഒരു പരിധി വരെ ചിത്രത്തിന് മേൽ ശാപമായി നിൽക്കുന്നുണ്ട്.

🔸പല സ്ഥലങ്ങളിലും പഴയ ചിത്രങ്ങളുടെ ഒരു നിഴൽ ഓഷ്യൻസ് 8നു മേൽ നിലനിൽക്കുന്നതായി അനുഭവപ്പെടുന്നുണ്ട്, പ്രത്യേകിച്ചും രണ്ട് ചിത്രങ്ങളുടെയും മുഖ്യ കഥാപാത്രങ്ങൾ തമ്മിൽ. ജയിലിൽ നിന്നും മടങ്ങി വരുന്ന നായക കഥാപാത്രവും ,ഒരു മോഷണത്തിനായി അയാൾ തന്റെ ഉറ്റ സുഹൃത്തിനെ കാണാൻ പോവുന്നതുമായ രംഗങ്ങൾ പണ്ട് ജോർജ് ക്ലൂണിയും ബ്രാഡ് പിറ്റും ചെയ്തത് ഇവിടെ ഭംഗി ഒന്നും ചോരാതെ സാന്ദ്ര ബുള്ളക്കും ,കേറ്റ് ബ്ലാഞ്ചട്ടും ചെയ്തിട്ടുണ്ട് എങ്കിലും കഥാപാത്രങ്ങളുടെ കാരണങ്ങൾ ഉൾപ്പെടെ പലതും ആവർത്തനമായി പോയ പ്രതീതി ചിത്രത്തിൽ ഉണ്ട്. ഈ രണ്ട് നടിമാർക്ക് പുറമെ ഹെലൻ ബോൺഹാം കാർട്ടർ ,മിന്റി കൈലിങ് ,റിഹാന തുടങ്ങിയവരും ചിത്രത്തിൽ ഉണ്ടെങ്കിലും ആദ്യാവസാനം നിറഞ്ഞ് നിന്നതും സ്ക്രീൻ കീഴടക്കിയതും ആൻ ഹതാവേ തന്നെ. ടീമിന്റെ ഭാഗം അല്ലായിരുന്നിട്ട് കൂടിയും പ്രത്യക്ഷപ്പെടുന്ന ഓരോ സ്ക്രീനിലും അവർ കാഴ്ചവെച്ച പ്രസരിപ്പ് കയ്യടി അർഹിക്കുന്നു.

🔸ശക്തി തന്നെയാണ് ഒരു പരിധി വരെ ഈ ചിത്രത്തിന്റെ ദൗർബല്യവും ,ആരാധകരെ തൃപ്തി പെടുത്താൻ കഴിഞ്ഞേക്കുമെങ്കിലും ഹെയ്‌സ്റ്റ് രംഗങ്ങൾക്ക് ഒന്നും തന്നെ മുൻപുള്ള ചിത്രങ്ങളുടെ തലത്തിലേക്ക് ഉയരാൻ കഴിഞ്ഞിട്ടില്ല. നടീ നടന്മാരുടെ കാര്യവും വ്യത്യസ്തമല്ല ,ചിത്രം കണ്ട് കഴിയുമ്പോൾ രണ്ട് മണിക്കൂറോളം സ്‌ക്രീനിൽ ഉണ്ടായിരുന്ന ചില കഥാപാത്രങ്ങളുടെ പേര് പോലും ഓർത്തെടുക്കാൻ ബുദ്ധിമുട്ടുണ്ടായി എന്നത് ഒട്ടും ഗുണകരം ആണെന്ന് തോന്നുന്നില്ല. എന്തൊക്കെ ഇരുന്നാലും സ്ത്രീ കഥാപാത്രങ്ങളെ ഒരു രീതിയിലും മുൻകാല പുരുഷ കഥാപാത്രങ്ങളുമായി തട്ടിച്ച് നോക്കാനോ താഴ്ത്തി കെട്ടാനോ ഉള്ള ശ്രമങ്ങൾ ചിത്രം നടത്തിയിട്ടില്ല എന്നത് പ്രശംസ അർഹിക്കുന്നു. ഒരു വരിയിൽ പറയുക ആണെങ്കിൽ ഒരു തവണ കണ്ട് ഒഴിവാക്കാവുന്ന ,മുൻകാല ചിത്രങ്ങളോട് നീതി പുലർത്താൻ കഴിയാതെ പോയ ഒരു ശ്രമം ആൺ ഓഷ്യൻസ് 8.

Verdict : Average

351. I Won't Come Back (2014)

Director : Ilmar Raag

Genre : Journey

Rating : 7.1/10

Country : Kazakhsthan

Duration : 109 Minutes


🔸കാണാത്ത നാടുകളിലൂടെയുള്ള ഒരു നല്ല യാത്ര ഇഷ്ടപ്പെടാത്തവരായി ആരും ഉണ്ടാവാൻ സാധ്യത ഇല്ല ,യാത്രകളോളം ഒരു മനുഷ്യനെ മാറ്റിമറിക്കാൻ കഴിവുള്ള അധികം വസ്തുതകളും ഇല്ല. ഓരോ യാത്രയും ഓരോ അനുഭവവും പഠനവും ആണ്, പുതിയ ആളുകളിലൂടെ ,പുതിയ കാഴ്ചകളിലൂടെ ,പുതിയ സംസ്കാരങ്ങളിലൂടെ ,പുതിയ ഭൂതലങ്ങളിലൂടെ. അതിനാൽ ഒക്കെ തന്നെയാവാം യാത്ര പ്രമേയമായുള്ള ചിത്രങ്ങൾക്കും പൊതുവെ ആരാധകർ കൂടുതലാണ്. ഐ വോണ്ട് കം ബാക് എന്ന ചിത്രവും ഒരു യാത്രയുടെ കഥയാണ്, അതും നമ്മളെ പോലുള്ള കാഴ്ചക്കാർക്ക് അത്രയൊന്നും പരിചിതമല്ലാത്ത റഷ്യയിൽ നിന്നും കസാഖിസ്ഥാൻ എന്ന രാജ്യത്തിലേക്കുള്ള ഒരു മനോഹരമായ യാത്ര.

🔸ഈ യാത്രയ്ക്കായി രണ്ട് പേരാണ് ഇറങ്ങി തിരിച്ചിരിക്കുന്നത് ,രണ്ട് സ്ത്രീകൾ. ഇരുവരിൽ മുതിർന്നവളാണ് ആന്യ ,രണ്ടാമത്തെയാൾ ക്രിസ്റ്റീന ,ഇരുവരും അവരവരുടെ ഭാഷയിൽ പറയുക ആണെങ്കിൽ കുറച്ച് പ്രശ്നക്കാരാണ്. ജന്മം കൊണ്ടല്ലെങ്കിലും ജീവിതത്തിൽ അനാഥരാണ് ഇരുവരും ,വേണ്ടപ്പെട്ടവർ എന്ന് പറയാൻ ആരും ഉണ്ടായിരുന്നില്ല ഇരുവർക്കും ,ജനിച്ചതും വളർന്നതും എല്ലാം അനാഥാലയത്തിൽ തന്നെ. ചെറുപ്പം മുതൽക്കേ തന്നെ സ്വന്തം കാലിൽ നിന്ന് ശീലിച്ചതിനാൽ അതിന്റെതായ തന്റേടവും ധൈര്യവും എല്ലാം ഇരുവർക്കും വേണ്ടുവോളം ഉണ്ട്.

🔸ആന്യ ഗ്രാഡുവേഷൻ പൂർത്തിയാക്കിയ വിദ്യാർത്ഥി ആണ്. തന്റെ ഭൂതകാലത്തോട് ഉള്ള ദേഷ്യവും നിരാശയും എല്ലാം ഒരുപാട് കാലം മനസ്സിൽ നീറി പുകഞ്ഞ് കിടന്നിരുന്നെങ്കിലും ഇന്ന് അവയെല്ലാം മറികടക്കാൻ അവൾക്ക് സാധിച്ചിട്ടുണ്ട് ,ഒരു പരിധി വരെ. പഴയത്തിലേക്ക് മടങ്ങി ചെല്ലാൻ താല്പര്യമില്ലാത്ത അന്യ ഇന്ന് ഒരാളുമായി പ്രണയത്തിലുമാണ്. എന്നാൽ കുടുംബസ്ഥനായ ടിയാനുമായുള്ള ബന്ധം തന്നെയും അയാളെയും ഏതെല്ലാം രീതിയിൽ ബാധിക്കും എന്നതിനെ കുറിച്ച് അവൾക്ക് ഉത്തരങ്ങളില്ല. ചുരുക്കി പറയുകയാണെങ്കിൽ പൊട്ടിത്തെറിക്കാൻ ഒരു കാരണം കാത്ത് നിൽക്കുന്ന അഗ്നിപർവതം കണക്കെ ആണ് ആന്യ.

🔸എന്നാലിപ്പോൾ അവൾ നേരിടുന്ന പ്രശനം ഇതൊന്നുമല്ല ,ചെയ്യാത്ത കുറ്റത്തിന് റഷ്യൻ പോലീസ് ആന്യയെ തിരഞ്ഞുനടക്കുന്നുണ്ട്. എന്ത് കൊണ്ടും ഇവിടെ നിന്ന് മാറി നിൽക്കേണ്ട ആവശ്യമാണ് ഇപ്പോൾ അന്യയ്ക്ക്. പതിനാല് കാരിയായ ക്രിസ്റ്റീന നഗരത്തിലെ അനാഥാലയത്തിലെ അന്തെവാസിയാണ്, മറ്റുള്ള സഹവാസികളുമായി ഒത്തുപോവാൻ കഴിയാത്ത ക്രിസ്റ്റീനയ്ക്ക് ഒരു ലക്‌ഷ്യം മാത്രമേ മുന്നിൽ ഉണ്ടായിരുന്നുള്ളൂ.ജന്മനാടായ കസാഖിസ്ഥാനിൽ തന്റെ ജീവിച്ചിരിക്കുന്ന ഒരേ ബന്ധുവായ മുത്തശ്ശി ഇന്നും ജീവിച്ചിരിപ്പുണ്ട് ,അവരെ കണ്ടെത്തണം എന്നതായിരുന്നു അവളുടെ ഉദ്ദേശം.

🔸അങ്ങനെ ഈ രണ്ട് കഥാപാത്രങ്ങളും യാത്ര ആരംഭിക്കുകയാണ് ,കസാഖിസ്ഥാനിലേക്ക്. ലക്ഷ്യ സ്ഥാനത്തെ കുറിച്ചോ അങ്ങോട്ടേക്കുള്ള യാത്രയെ കുറിച്ചോ വലിയ പിടിയൊന്നുമില്ല ഇരുവർക്കും ,അല്ലെങ്കിലും യാത്രകൾ എല്ലാം മിക്കപ്പോഴും പ്രവചിക്കാൻ കഴിയാത്തതാണല്ലോ, ഒരു യാത്രയിൽ എന്ത് വേണമെങ്കിലും സംഭവിക്കാം. ഉപേക്ഷിക്കപ്പെട്ട രണ്ട് കഥാപാത്രങ്ങൾക്കുമിടയിൽ അതി മനോഹരമായ ഒരു ബന്ധവും ഉടലെടുക്കുന്നുണ്ട് ഈ യാത്രയ്ക്കിടയിൽ. റോഡ് മൂവികൾ ഇഷ്ട്ടപ്പെടുന്നവർ തീർച്ചയായും കണ്ടിരിക്കേണ്ട ഈ ചിത്രത്തിന്റെ മലയാളം സബ് അടക്കമുള്ള ഫയൽ ലഭ്യമാണ്.

Verdict : Very Good

350. Django (1966)

Director : Sergio Corbucci

Genre : Western

Rating : 7.3/10

Country : Italy

Duration : 92 Minutes


🔸ഒരു ശവപ്പെട്ടി കെട്ടി വലിച്ച് കൊണ്ട് കണ്ണെത്താ ദൂരത്തോളം പരന്നു കിടക്കുന്ന മരുഭൂമിയിലൂടെ ഏകാകിയായി നടന്ന് വരികയാണ് കഥാനായകനായ ജാൻഗോ. ടിയാൻ ആരാണെന്നോ ,ഇയാളുടെ ഉദ്ദേശങ്ങളോ ലക്ഷ്യങ്ങളോ എന്താണെന്നോ യാതൊരു സൂചനയും ചിത്രം ആരംഭത്തിൽ പ്രേക്ഷകന് നൽകുന്നേ ഇല്ല. ജാൻഗോ കെട്ടി വലിച്ച് കൊണ്ടുവരുന്ന ശവപ്പെട്ടിയിൽ എന്താണെന്നും ഒരു പിടിയുമില്ല ,ആകെ മൊത്തം അനിശ്ചിതത്വത്തിന്റെയും അപ്രവചനീയതയുടെയും ഒരു പുകമറ ജാങ്കോയ്ക്ക് ചുറ്റും നിൽക്കുന്നുണ്ട്. അമ്പതോളം വർഷങ്ങൾക്ക് മുന്നേ പുറത്തിറങ്ങിയ പ്രസ്തുത ഇറ്റാലിയൻ വെസ്റ്റേൺ ചിത്രം ആരംഭിക്കുന്നത് തന്നെ ഇതുപോലെ ഒരുപാട് ചോദ്യങ്ങളിൽ നിന്നുമാണ് ,ഈ ചോദ്യങ്ങളുടെയെല്ലാം ഒത്തനടുക്ക് പ്രധാന കഥാപാത്രമായ ജാങ്കോയും നിൽപ്പുണ്ട്.

🔸നാല്പത്തി ആറ് വർഷങ്ങൾ ,മുപ്പത്തി ഒന്ന് ചിത്രങ്ങൾ ,ഒരുപക്ഷെ ഏറ്റവും കൂടുതൽ തവണ സ്‌ക്രീനിൽ എത്തിയ മനുഷ്യ കഥാപാത്രം ആയിരിക്കുന്ന ജാൻഗോ. 1966ൽ ഈ ചിത്രത്തിലൂടെ ആരംഭിച്ച് 2012ൽ ടരന്റീനോയുടെ ജാൻഗോ അൺചെയിൻഡ് എന്ന ചിത്രം വരെ പതിനാറോളം നടൻമാർ ജാൻഗോ എന്ന സാങ്കല്പിക ,ഐതിഹാസിക കഥാപാത്രത്തെ അനശ്വരമാക്കി. ഇവരെല്ലാം ഒരു കഥാപാത്രം തന്നെ ആണെന്നും അയാളുടെ വെവ്വേറെ കാലഘട്ടങ്ങളിലുള്ള സാഹസിക പ്രവർത്തികളാണ് ഓരോ ചിത്രവും എന്ന് ചിലർ കരുതുന്നുണ്ടെങ്കിലും അവ എത്രത്തോളം സത്യമാണെന്ന് പറയാനാവില്ല, പ്രത്യേകിച്ചും പലതിലും കഥാപാത്രത്തെ കറുത്ത വർഗക്കാരനായ അടിമയായും ചിലതിൽ വെള്ളക്കാരനായ പടയാളി ആയും ചിത്രീകരിച്ചിട്ടുള്ളപ്പോൾ.

🔸ഗോസ്റ്റ് ടൌൺ അഥവാ പ്രേതങ്ങളുടെ പട്ടണം എന്ന പേരിൽ കുപ്രസിദ്ധി ആർജിച്ച പട്ടണത്തിലേക്കാണ് ജാങ്കോയുടെ യാത്ര. കുറ്റകൃത്യങ്ങൾക്കും ക്രൂരതയ്ക്കും പേര് കേട്ട പട്ടണമാണ് ഗോസ്റ്റ് ടൌൺ ,ജാക്സൺ എന്ന മാഫിയ തലവന്റെയും അയാളുടെ റെഡ് ഷർട്സ് എന്ന ക്രിമിനൽ ഗ്യാങ്ങിന്റെയും വിഹാരകേന്ദ്രമായ പട്ടണം. റെഡ് ഷർട്സും ജനറൽ ആയ ഹ്യൂഗോ റോഡ്രിഗസിന് കീഴിലുള്ള വിപ്ലവകാരികളും തമ്മിൽ ഉള്ള പോരാട്ടങ്ങൾ മുൻപ് ഉള്ളതിനേക്കാൾ ഭീകരമാം വിധം വർധിച്ച് വന്നിരിക്കുകയാണ് പട്ടണത്തിൽ, അതിനിടയിലേക്കാണ് തീർത്തും അപരിചിതനായ ജാങ്കോയുടെ രംഗപ്രവേശനം.

🔸പരസ്പരം കൊന്നും കൊലവിളിച്ചും മത്സരിച്ചിരുന്ന രണ്ട് സംഘങ്ങൾക്കിടയിലേക്ക് കടന്ന് വന്ന ജാങ്കോ അധികം താമസിയാതെ തന്നെ പോരാട്ടത്തിന്റെ ഭാഗമായി മാറുകയാണ് ,തുടക്കത്തിൽ തെറ്റായ സ്ഥലത്ത് മോശമായ സമയത്ത് എത്തപ്പെട്ട ആളാണ് ജാങ്കോ എന്ന തോന്നൽ ഉളവാക്കുമെങ്കിലും വ്യക്തമായ പദ്ധതികളും ,അതിലും തീക്ഷ്ണമായ കാരണങ്ങളും അയാൾക്ക് പുറകിൽ ഉണ്ടായിരുന്നുന്നെന്ന് മനസിലാവും. സെർജിയോ ലിയോണിന്റെ ഡോളേഴ്‌സ് ത്രിലോഗിയുടെ കാലഘട്ടത്തിൽ ഇറങ്ങിയത് കൊണ്ടാവാം ഈ ഇറ്റാലിയൻ വെസ്റ്റേൺ ചിത്രം അധികം ശ്രദ്ധ നേടാതെ പോയത്. ഡോളേഴ്‌സ് ചിത്രങ്ങളുടെ നിലവാരത്തിലേക്ക് ജാങ്കോ ഉയരുന്നുണ്ടോ എന്നത് സംശയമാണെങ്കിലും ആക്ഷൻ ചിത്രങ്ങൾ ഇഷ്ട്ടപ്പെടുന്ന ഏതൊരു സാധാരണ കാഴ്ചക്കാരനും തീർച്ചയായും ഇഷ്ടപ്പെട്ടേക്കാം ഈ ചിത്രം.

🔸ഇറങ്ങിയ കാലഘട്ടത്തിൽ വയലെന്സിന്റെ പേരിൽ വിമര്ശനങ്ങളും ,ചില രാജ്യങ്ങളിൽ നിരോധനം തന്നെയും നേരിട്ട ചിത്രമാണ് ജാങ്കോ. ഒരു കഥാപാത്രത്തിന്റെ ചെവി ,ടിയാൻ പൂർണ ബോധവാനായ സമയത്ത് മുറിച്ചെടുക്കുകയും അത് അയാളെ കൊണ്ട് തന്നെ നിർബന്ധിച്ച് തിന്നിക്കുകയും ചെയ്യുന്ന സീൻ ഉൾപ്പെടെ വയലന്സിന് പ്രാധാന്യം നൽകുന്ന ഒരുപാട് രംഗങ്ങൾ ചിത്രത്തിൽ കാണാനായേക്കാം. ജാങ്കോ അൺചെയിൻഡ് എന്ന ചിത്രത്തിൽ ജാമി ഫോക്സിന്റെ ജാങ്കോ എന്ന കഥാപാത്രം തന്റെ പേര് ഉച്ചരിക്കുന്നത് ഡി എന്ന അക്ഷരം സൈലന്റ് ആക്കിയാണ് എന്ന് പറയുന്ന രംഗത്തിൽ അത് കേൾക്കുന്ന വ്യക്തി തനിക്കറിയാം എന്ന് പറയുന്നുണ്ട് ,അത് ഈ ചിത്രത്തിലെ ജാങ്കോ എന്ന കഥാപാത്രത്തെ അവതരിപ്പിച്ച നീറോ തന്നെയാണ്. തന്റെ ചിത്രത്തിന് പ്രചോദനമായത് 1966ൽ പുറത്തിറങ്ങിയ ജാങ്കോ എന്ന ചിത്രം തന്നെയാണെന്ന ടരന്റീനോയുടെ വാക്കുകളാണ് ഈ ചിത്രത്തിന് നൽകുന്ന സെര്ടിഫിക്കറ്റും.

Verdict : Very Good

349. November (2017)

Director : Rainer Sarnet

Genre : Fantasy

Rating : 7.2/10

Country : Estonia

Duration : 115 Minutes


🔸നവംബർ എന്ന എസ്റ്റോണിയൻ ചിത്രത്തെ ഒറ്റ വാക്കിൽ അഭിസംബോധന ചെയ്യുകയാണെങ്കിൽ ഏറ്റവും യോജിച്ച പദം വിചിത്രം എന്നാവും ,കാരണം ആദ്യ രംഗം മുതൽ തന്നെ ഇന്നേവരെ കണ്ട ചിത്രങ്ങളിലൊന്നും കണ്ട് പരിചയിച്ചിട്ടില്ലാത്ത വസ്തുതകളും സംഭവങ്ങളും ആണ് കാഴ്ചക്കാരനായി സംവിധായകൻ ഒരുക്കിവെച്ചിരിക്കുന്നത്. പൂർണമായും ബ്ലാക്ക് ആൻഡ് വൈറ്റ് രീതിയിൽ പുറത്തിറക്കിയ ചിത്രം ലളിതമായി പറയുക ആണെങ്കിൽ ഒരു പ്രണയ ചിത്രമാണ് ,എന്നാൽ കഥ പുരോഗമിക്കുന്ന പശ്ചാത്തലങ്ങൾക്കും ഉൾപ്പെട്ടിട്ടുള്ള മനുഷ്യർക്കും ഒരുതരം അതീന്ദ്രിയ സ്വഭാവം കാണാൻ ആവാം ചിത്രത്തിൽ ഉടനീളം.

🔸എസ്റ്റോണിയയിലെ ഉൾനാടൻ ഗ്രാമങ്ങളിൽ ഒന്നിലാണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. കാലങ്ങളായി മറ്റ് നാടുകളിലെ മനുഷ്യരോട് കാര്യമായ സഹവാസമോ അടുപ്പമോ കാണിക്കാത്ത വിഭാഗമാണ് ഗ്രാമത്തിലെ ജനങ്ങൾ ,ആയതിനാൽ തന്നെ കാര്യമായ വികസനം ഗ്രാമത്തിൽ എത്തിയിട്ടില്ല. ഒരു പരിധി വരെ മനുഷ്യരായ തങ്ങൾ മൃഗങ്ങൾക്ക് മേലെ ഉള്ളവർ ആണെന്നും തങ്ങളുടെ ജീവിത സാഹചര്യങ്ങൾ കുറച്ച് കൂടി മെച്ചപ്പെട്ട പരിസ്ഥിതി അർഹിക്കുന്നുണ്ടെന്നുമുള്ള തിരിച്ചറിവ് ഇവരിലേക്ക് എത്തിയിട്ടില്ലെന്ന് വേണം കണക്കിലാക്കാൻ. അത്രമേൽ ദാരിദ്ര്യാവസ്ഥയിലാണ് ജീവിത സാഹചര്യങ്ങൾ ,ഭക്ഷണത്തിനായി മരങ്ങളുടെയും മറ്റും തോല് പോലുള്ളവയാണ് ഇവർ ഉപയോഗിക്കുന്നത്.

🔸ഗ്രാമത്തിലെ ജനങ്ങൾ മിക്കവരും കർഷകരാണ് ,തങ്ങളുടെ കുടുംബം പുലർത്താനായി കഷ്ട്ടപെടുന്നവർ. ഇവിടെ നിന്നും ചിത്രം ഡ്രാമ പരിവേഷം കൈവെടിഞ്ഞ് ഫാന്റസിയിലേക്ക് കടക്കുകയാണ്. തങ്ങളുടെ ജോലി ചെയ്ത് തീർക്കാൻ കർഷകരെ സഹായിക്കുന്ന വസ്തുവാണ് കരാറ്റ്. വസ്തു എന്ന് വിശേഷിപ്പിക്കാൻ കഴിയുമോ എന്നതാണ് ചോദ്യം ,കാരണം കാഴ്ചയിൽ ഉപകരണത്തിന് സമാനം ആണെങ്കിലും ഒരു ആത്മാവ് ഉണ്ട് ക്രാറ്റിന്. ചിത്രത്തിന്റെ ആദ്യ രംഗത്തിൽ തന്നെ പ്രത്യക്ഷപ്പെട്ട് തന്റെ ആഗ്രഹങ്ങളും ആവശ്യങ്ങളും മനുഷ്യർക്ക് മുന്നിൽ അവതരിപ്പിക്കുന്ന കരാറ്റ് ഒരു മുന്നറിയിപ്പ് ആണ്, കാഴ്ചക്കാരൻ കടന്നു ചെല്ലുന്ന ഈ ലോകം എത്രമേൽ വിചിത്രം ആണെന്ന് ഓർമപ്പെടുത്തുന്ന ഒരു മുന്നറിയിപ്പ്.

🔸അവിടെ നിന്നും വൈചിത്ര്യങ്ങൾ ഏറി കൊണ്ടിരിക്കുന്നെ ഉള്ളൂ, തങ്ങളുടെ പൂർവികരും പ്രിയപ്പെട്ടവരും ആയ മരണപ്പെട്ടവരെ വീണ്ടും കണ്ടുമുട്ടുവാനും ,അവരുമായി മരണാനന്തര ജീവിതവും ക്‌ളേശങ്ങളും ഉൾപ്പെടുന്ന കാര്യങ്ങളെ കുറിച്ച് ചർച്ച ചെയ്യാനും ഇടപഴകാനും ഉള്ള കഴിവുള്ളവരാണ് ഗ്രാമത്തിൽ ഉള്ളത്. ഈ പറഞ്ഞ ഭീതിതവും വിചിത്രവും അസാമാന്യവും ആയ സംഭവങ്ങൾക്കിടെ ജനിച്ചു വളർന്നവളാണ് കഥാനായികയായ ലീന. കർഷക കുടുംബത്തിൽ ജനിച്ചുവളർന്ന ലീന ഗ്രാമത്തിലെ തന്നെ യുവാവായ ഹാൻസുമായി ഇഷ്ട്ടത്തിലാണ് ,അവൻ ആണെങ്കിൽ ഗ്രാമത്തിലെ മാടമ്പിമാരിൽ ഒരാളുടെ മകളുമായി ഇഷ്ട്ടത്തിലാണ്.

🔸അങ്ങനെ പരസ്പരം അറിയാതെ ഉള്ള രണ്ട് പ്രണയങ്ങളാണ് ചിത്രത്തിന്റെ പ്രമേയം. ഇടകലർന്ന് കിടക്കുന്ന ഈ രണ്ട് ഇഷ്ട്ടങ്ങളെയും ദുരാചാരങ്ങളും ,ആഭിചാര പ്രയോഗങ്ങളും ,പ്രേതങ്ങളും ,മനുഷ്യചെന്നായകളും ,സാത്താൻ തന്നെയും അടക്കി വാഴുന്ന ഗ്രാമവും അവിടത്തെ ഉന്മാദികളായ ജനങ്ങളും ഏതെല്ലാം രീതിയിൽ മാറ്റി മറിക്കും എന്നതാണ് ചിത്രത്തിലെ ചോദ്യം. മനോഹരമായ രംഗങ്ങളും കേട്ടോ കണ്ടോ പരിചിതമല്ലാത്ത പശ്ചാത്തലങ്ങളും വ്യത്യസ്തമായ വിഷയവും എല്ലാം ഈ ചിത്രത്തെ വേറിട്ട് നിർത്തുന്നു. വ്യത്യസ്തത ഇഷ്ടപ്പെടുന്നവർക്ക് തീർച്ചയായും ഇഷ്ടപ്പെട്ടേക്കാം ഈ എസ്റ്റോണിയൻ ബ്ലാക്ക് ആൻഡ് വൈറ്റ് ഫാന്റസി ചിത്രം.

Verdict : Good

348. Marlina The Murderer In Four Acts (2017)

Director : Mouly Surya

Genre : Drama

Rating : 7.2/10

Country : Indonesia

Duration : 90 Minutes


🔸കവർച്ച ,യാത്ര ,കുമ്പസാരം ,ജനനം ഇങ്ങനെ നാലായി വിഭജിക്കപ്പെട്ട ഒന്നാണ് മാർലിന ദി മർഡറെർ ഇൻ ഫോർ ആക്ടസ് എന്ന ചിത്രം. ഇന്തോനേഷ്യയുടെ കിഴക്കേ ഭാഗങ്ങളിൽ ഒന്നിൽ തരിശ് ഭൂമികളാൽ ചുറ്റപ്പെട്ട പൊതുവെ ജനസാന്ദ്രത വളരെ കുറഞ്ഞ പ്രദേശങ്ങളിൽ ഒന്നിലാണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. ടൈറ്റിൽ സൂചിപ്പിക്കുന്നത് പോലെ തന്നെ ഒരു കൊലപാതകം അരങ്ങേറിയിട്ടുണ്ട് ,അതിന് കാരണക്കാരി കഥാ നായികയായ മാർലിന ആണ് താനും. പ്രസ്‌തുത കുറ്റകൃത്യം എന്തിനു വേണ്ടിയാണെന്നും ,എങ്ങനെ ആയിരുന്നെന്നും ആരെ ആയിരുന്നെന്നും ചിത്രം കണ്ട് മനസിലാക്കുന്നതായിരിക്കും നന്നാവുക. പ്രത്യക്ഷമായോ പരോക്ഷമായോ നാല് ഭാഗങ്ങളും ഈ കൊലപാതകവുമായി ബന്ധപ്പെട്ട് കിടക്കുന്നുണ്ട്.

🔸ആദ്യ ഭാഗത്തിന്റെ ആരംഭത്തിൽ തന്റെ ഭർത്താവിന്റെ മരണത്തോട് പൊരുത്തപ്പെടാൻ പാട് പെടുന്ന മാർലിനയെ ആണ് കാണാവുക. അയാൾ മരിച്ചിട്ട് അധികം ദിവസം ആയിട്ടില്ല ,കല്ലറയിലെ മണ്ണ് പോലും ഉറച്ചിട്ടില്ല ,ഇന്ന് ഈ വീട്ടിൽ മാർലിനായും വൃദ്ധയായ അമ്മയും മാത്രമേ ഉള്ളൂ. അങ്ങനെ കടന്ന്പോയ ദിവസങ്ങളിൽ ഒന്നിലാണ് വൃദ്ധനായ മാർക്കസ് മാർലിനയെ അന്വേഷിച്ച് എത്തുന്നത് ,അയാൾ വന്ന നിമിഷം തൊട്ട് തന്നെ അകാരണമായ ഭയം മാർലിനയിൽ ഉടലെടുത്തിട്ടുണ്ട്. ഭീകരമായ എന്തോ സംഭവിക്കാൻ പോവുന്നെന്ന ഭയം അവളെ കീഴടക്കുകയാണ്.

🔸ജേർണി എന്ന ഭാഗം പേര് സൂചിപ്പിക്കുന്നത് പോലെ തന്നെ ഒരു യാത്ര ആണ് ,എത്തിച്ചേരേണ്ട സ്ഥലമോ ഭാവിയെ കുറിച്ചുള്ള എന്തെങ്കിലും സൂചനകളോ നല്കുന്നില്ലെങ്കിലും മാർലിന തന്റെ യാത്ര തുടങ്ങുകയാണ്. ബസ് കാത്ത് നിൽക്കെയാണ് ഗർഭിണി ആയ നോവിയെ പരിചയപ്പെടുന്നത്. അനിശ്ചിതത്വം നിറഞ്ഞ് നിൽക്കുന്ന തന്നെ പോലെയല്ല ,നോവിയുടെ യാത്രയ്ക്ക് വ്യക്തമായ ലക്ഷ്യം ഉണ്ട് എന്ന് മാർലിന തിരിച്ചറിയുകയാണ്. വേറിട്ട വഴികളിലൂടെ കടന്ന് വന്ന ഇരുവരും ഇനിയുള്ള തങ്ങളുടെ യാത്ര ഒന്നിച്ച് പങ്കിടാൻ തീരുമാനിക്കുകയാണ് ,യാത്ര ആരംഭിക്കുകയാണ്.

🔸താൻ കടന്ന് വന്ന വഴികളിലും ,ചെയ്ത് കൂട്ടിയ തെറ്റുകളിലും മനസ്താപം ഉണ്ട് മാർലിനയ്ക്ക്. ഒരു രീതിയിലും അടക്കാനാവാത്ത പശ്ചാത്താപം തന്നെ മെല്ലെ മെല്ലെ കാർന്ന് തിന്നുകയാണ് എന്ന തിരിച്ചറിവ് അവൾക്ക് ഒരു ഞെട്ടൽ ആയിരുന്നു. എത്രയൊക്കെ ന്യായീകരിക്കാൻ ശ്രമിച്ചാലും തെറ്റ് തെറ്റല്ലാതാവുന്നില്ല, ഇനി ഈ പാപഭാരവും പേറി ജീവിക്കാനുള്ള ശേഷി തനിക്കില്ലെന്ന് മനസിലാക്കിയ മാർലിന തന്റെ തെറ്റുകൾ ഏറ്റ് പറഞ്ഞ് കുമ്പസരിക്കാൻ ഒരുങ്ങുകയാണ് മൂന്നാം ഭാഗമായ കൺഫെഷനിൽ.

🔸നാലാമത്തെയും അവസാനത്തെയും ഭാഗം ആയ ബർത്ത് അഥവാ ജനനം ,പലതിന്റെയും ആരംഭവും കണ്ടെത്തലുകളും ആണ്. സർവോപരി തങ്ങൾ അന്വേഷിച്ച് കൊണ്ടിരുന്ന വസ്തുതകളുടെയും അലട്ടിയിരുന്ന ചോദ്യങ്ങളുടെയും ഉത്തരങ്ങൾ ആണ്, ഒരു പുതിയ തുടക്കം ആണ്. വിവിധ അന്തർദേശീയ ചലച്ചിത്ര മേളകളിലും മറ്റും മികച്ച പ്രേക്ഷക വിമർശക പ്രശംസയോടെ സ്വീകരിക്കപ്പെട്ട ചിത്രമാണ് മർലിൻ മർഡറർ ഇൻ ഫോർ ആക്ടസ്. മികച്ച രംഗങ്ങളും ,വിശ്വല്സും ,സ്കോറും ചിത്രത്തിന്റെ പ്രത്യേകതകൾ ആണ്.

Verdict : Very Good

347. All About My Wife (2012)

Director : Min Kyu Dong

Genre : Comedy

Rating : 6.7/10

Country : Korea

Duration : 121 Minutes


🔸കഥാനായകനായ ദൂഹ്യുനും നായിക ജംഗിനും വിവാഹിതരായിട്ട് ഏഴ് വർഷങ്ങൾ പിന്നിട്ടിരിക്കുന്നു ,ഏതൊരു ദാമ്പത്യ ബന്ധത്തിലും ഉള്ളത് പോലെ അത്യാവശ്യം ഇണക്കങ്ങളും പിണക്കങ്ങളും എല്ലാം നിറഞ്ഞത് തന്നെ ആയിരുന്നു ഇരുവരുടെയും ഇത് വരെയുള്ള ജീവിതം. ഭാര്യയോടൊത്തുള്ള ജീവിതം ഈ ഏഴാം വർഷത്തിൽ എത്തിനിൽക്കുമ്പോൾ ഡ്യുഹുനിൽ ഒരു പുതിയ തിരിച്ചറിവ് ഉടലെടുക്കുകയാണ് ,അയാൾക്ക് ജംഗിനെ മടുത്ത് തുടങ്ങിയിരിക്കുന്നു. മടുപ്പ് എന്നത് അയാളെ സംബന്ധിച്ചിടത്തോളം അങ്ങേയറ്റം എത്തിയതിനാൽ ഒരുമിച്ച് മുന്നോട്ടുള്ള ജീവിതത്തെ പറ്റി ചിന്തിക്കാൻ പോലും ടിയാൻ ഇഷ്ടപ്പെടുന്നില്ല, ഏത് വിധേനയും ബന്ധം ഒഴിഞ്ഞാൽ മതി എന്നതാണ് ഡ്യുഹുനിന്റെ മനസ്സിലിരിപ്പ്.

🔸വർഷങ്ങൾക്ക് മുന്നേ ജപ്പാനെ നടുക്കിയ ഒരു ഭൂകമ്പ കാലഘട്ടത്തിൽ തികച്ചും അപ്രതീക്ഷിതമായാണ് രണ്ട് പ്രധാന കഥാപാത്രങ്ങളും കണ്ടുമുട്ടിയത്. കാഴ്ചയിലും സ്വഭാവത്തിലും സംസ്കാരത്തിലും വരെ തികച്ചും വ്യത്യസ്തരായ രണ്ട് കഥാപാത്രങ്ങൾ ആയിരുന്നിട്ട് കൂടി ആ നിമിഷം ഇരുവരിലും ഒരു പ്രത്യേക ബന്ധം ഉടലെടുക്കുകയാണ് ,അധികം താമസിയാതെ തന്നെ വിവാഹത്തിൽ കലാശിച്ച ബന്ധം. തുടക്കത്തിൽ യാതൊരു പ്രശ്നങ്ങളും ഇല്ലായിരുന്നു ,നായകനും നായികയും കൈ പിടിച്ച് സൂര്യാസ്തമയം കാണാൻ നടന്നകലുന്ന രീതിയിലുള്ള ഹാപ്പി എൻഡിങ് ആവുമായിരുന്ന കഥ യാഥാർഥ്യത്തിലേക്ക് കടക്കുമ്പോൾ അനിവാര്യമായ പ്രശ്നങ്ങൾ ഉടലെടുക്കുകയാണ്.

🔸ഏഴ് വർഷങ്ങൾക്കിപ്പുറം സ്ഥിതിഗതികൾ തീർത്തും വ്യത്യസ്തമാണ് ,ഒരു പരിധി വരെ പരിതാപകരം എന്ന് പറയാം. ഇരുവർക്കും ഇടയിലുള്ള പ്രശ്നങ്ങൾക്കുള്ള പ്രധാന കാരണങ്ങൾ ഒരു പരിധി വരെ അത്യന്തം വ്യത്യസ്തമായ രണ്ട് വ്യക്തിത്വങ്ങൾ തന്നെയാണ്. നായക കഥാപാത്രം കൂടുതൽ സമയവും നിശ്ശബ്ദനാണ് ,തന്റേതായ ലോകത്ത് ഒരല്പം സമയം ആഗ്രഹിക്കുന്ന ,എന്തിനെയും ഏതിനെയും സംയമനത്തോടെ കാണുന്ന ആളാണ് ദൂഹ്യോൺ. അതിനാൽ തന്നെ ഉച്ചത്തിൽ സംസാരിക്കുന്ന ,പരാതിപ്പെട്ടി ആയ ,പെട്ടെന്ന് വികാരങ്ങൾക്ക് അടിമപ്പെടുന്ന ജംഗിൻ അയാൾക്ക് ഒരു നാണക്കേട് ആണ് ഇന്ന്.

🔸ഒരു രീതിയിലും ,ആർക്കും ശെരിപ്പെടുത്താൻ കഴിയാത്ത വിധം തങ്ങൾക്കിടയിൽ ഉണ്ടായിരുന്ന ബന്ധം മുറിഞ്ഞ് പോയി എന്ന് ദൂഹ്യുനിന് അറിയാം. എന്നാൽ അത് സമ്മതിക്കാനോ ,ജംഗിനോട് പ്രസ്തുത വിഷയത്തെ കുറിച്ച് സംസാരിക്കാനോ അയാൾ തയാറല്ല. അവൾ ഏത് രീതിയിൽ തന്റെ ഈ നിലപാടിനോട് പ്രതികരിക്കും എന്ന ഭയം അയാളിൽ നിലനിൽക്കുന്നുണ്ട്. ജോലിസ്ഥലം മാറി വേറൊരു സ്ഥലത്തേക്ക് പോയിട്ട് പോലും തന്നെ പോവാൻ അനുവദിക്കാതെ കൂടെ വന്ന ഭാര്യയുടെ മുന്നിൽ ടിയാൻ അക്ഷരാർത്ഥത്തിൽ നിസ്സഹായനായി പോവുകയാണ്. എന്തിരുന്നാലും ഇത് മുന്നോട്ട് കൊണ്ടുപോവാൻ അയാൾക്ക് താല്പര്യമില്ല. അതിനാൽ ആണ് പ്രശനം പരിഹരിക്കുന്നതിനായി കുറച്ച് വളഞ്ഞ വഴി ഉപയോഗിക്കാൻ തീരുമാനിക്കുന്നത്.

🔸തന്റെ പുതിയ അയൽക്കാരനായ സുങ്കിയെ ഈ ഉദ്യമത്തിൽ കൂട്ട് പിടിക്കുകയാണ് ദൂഹ്യുൻ. സുങ്കി ആള് ചില്ലറക്കാരനല്ല ,ഒരു ഒന്നാന്തരം കാസിനോവ ആണ്. സുങ്കിയുടെ കഴിവിന് മുന്നിൽ വീഴാത്ത പെൺപിള്ളേർ ഇല്ല ,ടിയാന് ഇത് പൂ പറിക്കുന്നത് പോലെ എളുപ്പമായ ജോലി ആണ്. അവനുമായി തന്റെ ഭാര്യ ഏതെങ്കിലും വിധേന അടുത്താൽ ഈ ബന്ധം ഒഴിയാനും ,അവളെ തന്റെ ജീവിതത്തിൽ നിന്നും ഒഴിവാക്കാനും കഴിയും എന്ന് അയാളുടെ കുശാഗ്ര ബുദ്ധിയിൽ തോന്നുകയാണ്. അങ്ങനെ തന്റെ ഭാര്യയ്ക്ക് കാമുകനെ ഉണ്ടാക്കി കൊടുക്കാനായി ആ ഭർത്താവ് ഇറങ്ങി തിരിക്കുകയാണ്.

Verdict : Good

346. Kaala (2018)

Director : PA Ranjith

Genre : Thriller

Rating : 8/10

Country : India

Duration : 166 Minutes


🔸കാല എന്ന ചിത്രം കണ്ട് കഴിഞ്ഞപ്പോൾ രണ്ട് തിരിച്ചറിവുകളാണ് പ്രധാനമായും മനസ്സിൽ രൂപപെട്ട് വന്നത് ,ആദ്യമായി രജനികാന്തിനോളം പ്രേക്ഷകരെ കയ്യിലെടുത്ത ഒരു ഷോസ്റ്റീലർ ഇന്ത്യയിൽ ഇതുവരെ ഉണ്ടായിട്ടില്ല ,ഇനി ആ ഉയരത്തിലേക്ക് ഒരാൾ എത്തുമോ എന്നതും സംശയമാണ്. അടുത്തതായി നാന പട്ടേക്കർ എന്ന നടൻ ഈ തലമുറയിലെ തന്നെ ഏറ്റവും മികച്ച നടന്മാരിൽ ഒരാളാണ് ,വേണ്ട രീതിയിലുള്ള പ്രശംസയും ആദരവും അർഹിക്കുന്ന വലിയ നടൻ. ഇഷ്ട്ട നടന്മാരുടെ പട്ടികയിൽ എന്നും ഉൾപെടുത്താറുള്ള ഇരുവരും ഒന്നിച്ച് ഒരു സിനിമയിൽ ,ഒരേ സ്‌ക്രീനിൽ എത്തുന്നു എന്നത് തന്നെ ആയിരുന്നു കാല കാണാനുണ്ടായ പ്രചോദനം. കബാലി എന്ന രഞ്ജിത്ത് ചിത്രം ഇഷ്ട്ടപ്പെട്ടതിനാലും ഒരു പ്രതീക്ഷ ഈ ചിത്രത്തിൽ ഉണ്ടായിരുന്നു.

🔸കാല പറയുന്നത് മണ്ണിന്റെ കഥയാണ് ,മാനവ രാശി ജനിച്ചുവീണ ,ഉഴുത് മറിച്ച ,ജീവിക്കാനുള്ള വക കണ്ടെത്തിയ ,അവന്റെ സ്വപ്നങ്ങൾക്ക് ചുക്കാൻ പിടിച്ച ,ഒടുവിൽ അധികാര വർഗങ്ങളുടെയും മേലാളന്മാരുടെയും പണത്തിനും പദവിക്കും അധികാരത്തിനുമായി കൊന്നും കൊലവിളിച്ചും നടത്തിയ പോരാട്ടങ്ങളുടെ ഭാഗമായ അതേ മണ്ണിന്റെ കഥ. ഒപ്പം തങ്ങൾ ജനിച്ച് വീണ ,പരിചയിച്ച ഈ മണ്ണ് മറ്റാർക്കും പണയം വയ്ക്കില്ല എന്ന ഒരു ജനതയുടെ വാശിയുടെ കഥ. ചിത്രം ആരംഭിക്കുന്നത് തന്നെ ഈ മണ്ണിന്റെ കഥ പറഞ്ഞ് കൊണ്ടാണ് ,കഥാ പശ്ചാത്തലം ആയിരിക്കുന്നത് ബോംബെയിലെ ധാരാവി തെരുവും.

🔸ഭൂമി എന്നത് സാധാരണക്കാരന്റെ അവകാശമാണ് എന്ന ലളിതമായ വസ്തുത പ്രേക്ഷകരിൽ എത്തിക്കാൻ രഞ്ജിത്ത് ഉപയോഗിക്കുന്ന കഥാപാത്രമാണ് കാല അഥവാ കരികാലൻ. വർഷങ്ങൾക്ക് മുന്നേ തമിഴ് നാട്ടിൽ നിന്നും ബോംബയിൽ കുടിയേറി പാർത്തതാണ് കാലയും കുടുംബവും. മേലാളന്മാരുടെ ചൂഷണത്തിലും അടിച്ചമർത്തലുകളും തളർന്ന് കിടന്നിരുന്ന ഒരു ജനതയെ ഉയർത്തി കൊണ്ടുവന്നതും ,അവരുടെ ശബ്ദം അധികാരികളിൽ എത്തിച്ചതും കാലയുടെ അച്ഛൻ ആയിരുന്നു. ഒരു ദൈവ പരിവേഷമാണ് അദ്ദേഹത്തിന് ദേശവാസികൾ കല്പിച്ച് കൊടുത്തിരുന്നത് ,ഇന്ന് വർഷങ്ങൾക്കിപ്പുറം ആ സ്ഥാനം കാലയ്ക്ക് ലഭിച്ചിരിക്കുന്നു. ചേരിയിലെ ഓരോ വ്യക്തികളും അയാൾക്ക് സ്വന്തം ബന്ധുക്കളാണ് ,ഓരോരുത്തരുടെയും പ്രശനം അയാൾക്ക് സ്വന്തം പ്രശ്‍നം പോലെയുമാണ്. അങ്ങനെയാണ് ചേരി ഒഴിപ്പിക്കാൻ വരുന്ന ഗവണ്മെമറ്റും അധികാരികളും കാലയും രണ്ട് ചേരികളിലായി അണിനിരക്കുന്നതും.

🔸രജനികാന്തിന്റെ സിനിമ എന്ന് കേൾക്കുമ്പോൾ പൊതുവിലെ ആളുകളുടെ മനസ്സിൽ ഉണ്ടാവുന്ന ചില സങ്കൽപ്പങ്ങൾ ഉണ്ട് ,അമ്പതോളം എതിരാളികളെ അടിച്ചിട്ടിട്ട് കൂളായി നടന്ന് പോവുന്ന നായകൻ ,ഒരാവശ്യവും ഇല്ലാതെ ചില പൊട്ടിത്തെറികളും ,കുറെ ഷോ ഓഫുകളും. ഇതൊക്കെ പ്രതീക്ഷിച്ചാണ് കാലയ്ക്ക് പോവുന്നതെങ്കിൽ തീർത്തും നിരാശപെടേണ്ടി വരും. അമാനുഷികത തീർത്തും ഇല്ലെന്നല്ല ,എന്നാലും രജനികാന്ത് എന്ന താരത്തിനേക്കാൾ നടനെ ചിത്രത്തിൽ കാണാനാവും. ശാരീരികമായും വൈകാരികമായും പ്രഹരങ്ങൾ ഏൽക്കുന്ന, അവ കുറച്ച് ബുദ്ധിമുട്ടുകളോടെ ആണെങ്കിലും ഉൾക്കൊള്ളേണ്ടി വരുന്ന ഒരു മനുഷ്യനായി പലയിടത്തും രജനികാന്തിനെ കാണാൻ സാധിക്കും. കഥയിലേക്ക് വരികയാണെങ്കിൽ, പുതുമ കാര്യമായി ചിത്രത്തിന് അവകാശപ്പെടാനില്ലെങ്കിലും ചില ഭാഗങ്ങളിൽ സംവിധായകൻ ചിത്രത്തെ കൊണ്ടുപോയ രീതിയും അതിന്റെ ട്രീറ്റ്മെന്റും വേറിട്ട് നിന്നു.

🔸ചിത്രം ഒന്ന് ട്രാക്കിൽ എത്താൻ കുറച്ച് സമയം ആവശ്യപ്പെടുന്നുണ്ട് ,പ്രത്യേകിച്ചും ആദ്യ പകുതിയിൽ. കാലയുടെ വ്യക്തി ജീവിതവും ,പ്രണയവും ,പിന്നെ മറ്റ് കഥാപാത്ര വികസനവും എല്ലാം ഒന്നാം പകുതിയെ കുറച്ച് പിറകോട്ട് വലിക്കുന്നതായി തോന്നിയെങ്കിലും നാന പട്ടെകരുടെ വരവോടെ ചിത്രം ട്രാക്കിൽ ആവുന്നു. ഒരു സീനിൽ പോലും കഥാപാത്രം തന്റെ നില വിട്ട് സംസാരിക്കുന്നില്ല ,അമിത ക്ഷോഭങ്ങളോ ആക്രോശങ്ങളോ ഒന്നും തന്നെ കാണാനില്ല. കഥാപാത്രം തന്റെ മുഖം കാണിക്കുന്ന രംഗങ്ങളിൽ മിക്കയിടത്തും ഒരു വല്ലാത്ത തരം ശാന്തത അയാളുടെ സ്ഥായീ ഭാവമാണ് ,എല്ലാം തന്റെ നിയന്ത്രണത്തിലാണെന്ന തിരിച്ചറിവിലുള്ള ഈ ശാന്തതയും നിസ്സംഗതയുമാണ് കഥാപാത്രത്തിനെ വേറിട്ട നിർത്തുന്നതായി തോന്നിച്ചത്. ആകെ മൊത്തം പ്രതീക്ഷ കുറച്ച് പോവുകയാണെങ്കിൽ ഇഷ്ടപ്പെട്ടേക്കാവുന്ന ഒരു തികച്ചും ഗ്രൗൻഡഡ്‌ രജനികാന്ത് ചിത്രമാണ് കാല.

Verdict : Good

345. Jurassic World The Fallen Kingdom (2018)

Director : J A Bayona

Genre : Sci Fi

Rating : 7.4/10

Country : USA

Duration : 130 Minutes


🔸മാജിക്കിന്റെ ലോകം ആയിരുന്നിട്ടും തങ്ങളുടെ മക്കളുടെ ജീവൻ ഓരോ തവണയും അപകടത്തിലായിരുന്നിട്ട് കൂടിയും അവരെ വീണ്ടും വീണ്ടും പഠിക്കാനായി ഹോഗ്വാര്ട്സ് സ്‌കൂളിലേക്ക് പറഞ്ഞ് വിട്ട ഹാരി പോട്ടറിലെ മാതാപിതാക്കളെ പോലെ ആണ് ഒരു പരിധി വരെ ജുറാസിക് പാർക്ക് എന്ന ചിത്രത്തിലെ കഥാപാത്രങ്ങളും. നടന്ന് കയറുന്നത് മരണത്തേക്കാൾ ഭീകരം ആയേക്കാവുന്ന അനുഭവങ്ങൾ ആവും എന്ന് ഉറപ്പ് ഉണ്ടായിട്ട് കൂടിയും ഈ അഞ്ചാം തവണയും ദ്വീപിലേക്ക് കടന്ന് വരികയാണ് അവർ. സീരീസിലെ അവസാന ചിത്രം തിയേറ്ററുകളിൽ നിന്നും നേടിയത് 1.7 ബില്യൺ ഡോളർ ആയതിനാൽ തന്നെ സ്റ്റുഡിയോയുടെ വീക്ഷണത്തിൽ നിന്ന് നോക്കുകയാണെങ്കിൽ ദോഷം പറയാനാവില്ല ഈ ചിത്രത്തെയും.

🔸ദ്വീപിലെ സ്ഥിതിഗതികൾ ഇന്ന് മുമ്പത്തേക്കാൾ വ്യത്യസ്തമാണ് ,നാളുകളായി നിലനിൽക്കുന്ന അഗ്നിപർവതം പുകഞ്ഞ് ഏത് നിമിഷവും പൊട്ടി തെറിക്കാം എന്ന അവസ്ഥയിലാണ്. അങ്ങനെ സംഭവിക്കുകയാണെങ്കിൽ ദ്വീപിലെ ജീവജാലങ്ങൾക്ക് ,കുറച്ച് കൂടി വ്യക്തമായി പറയുകയാണെങ്കിൽ ദിനോസറുകൾക്ക് അത് നല്ല കാര്യമല്ല.  ദ്വീപിൽ നിന്നും അവ പൂർണമായും തുടച്ച് നീക്കപെടുക തന്നെ ചെയ്യും. തങ്ങളുടെ ജീവൻ പണയം വെച്ച് ,അവസരം ലഭിച്ചാൽ തങ്ങളെ തന്നെ കൊന്ന് തിന്നുന്ന ഈ ജീവിവിഭാഗത്തെ രക്ഷിക്കേണ്ടതുണ്ടോ എന്നതാണ് ചിത്രം ഉന്നയിക്കുന്ന ചോദ്യം ,അങ്ങനെ രക്ഷിക്കുക ആണെങ്കിൽ അടുത്തത് എന്ത് എന്ന അനിശ്ചിതാവസ്ഥയും പുകമറ പോലെ നിലനിൽക്കുന്നു.

🔸ഒരു രീതിയിലും മോശമായ ചിത്രം അല്ല ഫോളൻ കിങ്‌ഡം ,ചിത്രത്തിന്റെ ഉദ്ദേശ ശുദ്ധിയേയും ചില കഥാപാത്രങ്ങൾ കൈക്കൊള്ളുന്ന തീരുമാനങ്ങളും ഒരുപാട് ചോദ്യങ്ങൾ ബാക്കിവെക്കാം എങ്കിൽ കൂടിയും. സീരീസിലെ മുൻകാല ചിത്രങ്ങൾക്ക് വേണ്ട രീതിയിൽ ആദരം അർപ്പിച്ചിട്ടുണ്ട് ഈ ചിത്രം ,ഇരുപത്തഞ്ച് വർഷങ്ങൾക്ക് മുൻപ് സ്പിൽബെർഗ് ആദ്യമായി ദിനോസറുകളെ ബിഗ് സ്‌ക്രീനിൽ എത്തിച്ചപ്പോൾ ഏറ്റവും കൂടുതൽ കയ്യടി നേടിയ രംഗത്തിലൊന്നിനെ മറ്റൊന്നും കുറയാതെ വീണ്ടും ഈ ചിത്രത്തിൽ മറ്റൊരു രീതിയിൽ കാണാനാവും. അതിനോടൊപ്പം തന്നെ പഴയ നായകന്മാരിൽ ഒരാളായ ജെഫ് ഗോൾഡ്ബ്ലമിന്റെ ഇയാൻ മൽകമിനെ ചെറിയ റോൾ ആയിരുന്നിട്ട് കൂടി വീണ്ടും കാണാനായത് സീരീസിന്റെ ആരാധകൻ എന്ന നിലയിൽ സംപ്തൃപ്തി ഉളവാക്കി. ഇതെല്ലാം ഉണ്ടായിരുന്നിട്ട് കൂടി ചില സ്ഥലങ്ങളിൽ ഉടലെടുത്ത ആവർത്തന വിരസതയും ,അനാവശ്യ സ്ലോ മോഷനുകളും കല്ലുകടി ആയി തന്നെ നിലനിന്നു.

🔸ഒരു മൂന്ന് ഭാഗ സീരീസിന്റെ രണ്ടാം ഭാഗം ആണ് പ്രസ്തുത ചിത്രം ,അത് ചിത്രം കാണാൻ പോവുന്ന ഏതൊരു വ്യക്തിയും അറിഞ്ഞിരിക്കേണ്ട കാര്യമാണ്. അടുത്ത ഭാഗത്തെ കാത്തിരിക്കാൻ ആരാധകർക്കും സാധാരണ കാഴ്ചക്കാർക്കും ഒരു ഡോസ് പോസ്റ്റ് ക്രെഡിറ്റ് സീൻ എന്ന രീതിയിൽ ചിത്രത്തോടൊപ്പം ചേർത്തിട്ടുണ്ട്. ജുറാസിക് സീരീസ് ഇന്നുവരെ കടന്ന് ചെന്നിട്ടില്ലാത്ത ഒരു മേഖലയിലേക്ക് വഴി വെട്ടാൻ പിന്നണിയിൽ പ്രവർത്തിച്ചിരിക്കുന്നവർക്ക് ഈ ചിത്രത്തിന്റെ ക്ലൈമാക്സിലൂടെയും പോസ്റ്റ് ക്രെഡിറ്റ് സീനിലൂടെയും കഴിഞ്ഞിട്ടുണ്ട് എന്നത് മൂന്നാം ഭാഗത്തിന് പ്രതീക്ഷ പകരുന്നുണ്ട്. മനുഷ്യ കഥാപാത്രങ്ങളെ അവതരിപ്പിച്ചവരിൽ ക്രിസ് പ്രാറ്റും ബ്രൈസ് ഡാളസ്‌ ഹൊവാർഡും മികച്ചു നിന്നെങ്കിലും മറ്റുള്ളവരുടെ കഥാപാത്രങ്ങൾ പാതി വെന്ത അനുഭവം ആണ് നൽകിയത് ,അല്ലേലും ജുറാസിക് പാർക്ക് കാണുന്നത് ദിനോസറിനെ കാണാനാണെന്ന തത്വശാസ്ത്രം കടമെടുക്കുന്നു.

🔸ആദ്യ ഇരുപത് മിനുട്ടുകൾ കൊണ്ട് തന്നെ ടൈറ്റിൽ കഥാപാത്രങ്ങൾ തങ്ങളുടെ മേൽക്കോയ്മ കാണിച്ച് തുടങ്ങുന്നുണ്ട് ,ആദ്യ കുറച്ച് നിമിഷങ്ങൾ ആരാധകൻ എന്ന രീതിയിൽ തന്ന തരിപ്പ് പ്രത്യേകം പരാമര്ശിക്കേണ്ടി ഇരിക്കുന്നു. വെള്ളത്തിൽ ജീവിക്കുന്ന മുൻ ചിത്രത്തിലെ ഭീകരനായ മോസസറും ,പുതിയ കളിക്കാരൻ ആയ ഇൻഡൊറാപ്റ്ററും ,പഴയ പടക്കുതിര ടിറെക്‌സും ,വെലോസിറാപ്റ്ററും തുടങ്ങി പേര് അറിയാത്ത പുലികൾ വരെ സ്‌ക്രീനിൽ ഉള്ള നിമിഷങ്ങൾ ഉൾകിടിലം കൊള്ളിച്ചു, കുറഞ്ഞ് പോയി എന്ന പരാതി മാത്രം. ജുറാസിക് പാർക്ക് ചിത്രങ്ങളിലെ എഫക്ടുകളെ കുറിച്ച് നല്ലത് പറയേണ്ടി വരിക എന്നത് പുതിയ കാര്യമല്ല ,ഈ ചിത്രത്തിലും സ്ഥിതിഗതികൾ വ്യത്യസ്തമല്ല ,മികച്ച ബാക്ക്ഗ്രൗണ്ട് സ്കോറും വലിയൊരു പ്ലസ് പോയിന്റ് തന്നെ. ആകെ മൊത്തം സീരീസ് ആരാധകർക്ക് ഇഷ്ട്ടപ്പെടാനും ,സാധാരണ പ്രേക്ഷകർക്ക് ഒരുതവണ കണ്ടൊഴിവാക്കാനും ഉള്ളതാണ് ഈ ചിത്രം, ലോജിക്കിന്റെ കാര്യത്തിൽ ചില സംശയങ്ങൾ ഉണ്ടായേക്കാമെങ്കിലും.

Verdict : Good

344. The Incredibles (2004)

Director : Brad Bird

Genre : Animation

Rating : 8/10

Country : USA

Duration : 115 Minutes


🔸പിക്സറും അനിമേഷൻ ചിത്രങ്ങളും ,ഒരു ഒന്നൊന്നര കോമ്പിനേഷൻ ആണ്. ഇരുപത്തി മൂന്ന് വർഷങ്ങൾക്ക് മുന്നേ ആദ്യ ഫീച്ചർ ചിത്രമായ ടോയ് സ്റ്റോറിയിൽ തുടങ്ങി കഴിഞ്ഞ വര്ഷം പുറത്തിറങ്ങി ഏവരെയും അമ്പരപ്പിച്ച കൊക്കോയിൽ എത്തി നിൽക്കുമ്പോൾ മികച്ച ചിത്രങ്ങളുടെ ഒരു കൂമ്പാരം തന്നെയുണ്ട് പിക്സറിന്. ലോകത്താകമാനം ആരാധക ശൃംഖലകൾ തന്നെ സ്വന്തമായുള്ള ടോയ് സ്റ്റോറി ,ഫൈൻഡിങ് ഡോറി ,നെമോ ,മോൺസ്റ്റെർസ് യൂണിവേഴ്സിറ്റി ,കോകോ ,കാർസ് ,അപ് തുടങ്ങിയവ പിക്സറിന്റെ വൈദഗ്ദ്യം വിളിച്ചോതിയ ചിത്രങ്ങളാണ്. ഈ മികച്ച ചിത്രങ്ങളുടെ പട്ടികയിൽ നിസ്സംശയം ഉൾപ്പെടുത്താൻ കഴിയുന്ന ചിത്രമാണ് ഒന്നര പതിറ്റാണ്ടോളം മുന്നേ പുറത്തിറങ്ങിയ ഇൻക്രഡിബിൾസ് എന്ന ചിത്രവും.

🔸സൂപ്പർഹീറോകളെ കുറിച്ചുള്ള ചിത്രങ്ങളുടെ ഒരു തള്ളിക്കയറ്റം തന്നെ സംഭവിച്ച് കൊണ്ടിരിക്കുന്ന ഈ സമയത്ത് മറ്റൊരു അമാനുഷിക ചിത്രം എന്നത് ഒരു കല്ലുകടി ആയേക്കാം ,എന്തിരുന്നാലും ലോകം കീഴടക്കാൻ വരുന്ന വില്ലനും അയാളെ കീഴ്പ്പെടുത്താൻ ശ്രമിക്കുന്ന അമാനുഷിക ശക്തിയുടെ പ്രഭവ കേന്ദ്രമായ നായകനും എന്ന സ്ഥിരം കഥാഘടന അല്ല ഈ ചിത്രത്തിന്. വില്ലൻ കഥാപാത്രവും അയാളുടെ നായകനോടുള്ള മത്സരവും എല്ലാം ചിത്രത്തിന്റെ ഭാഗം ആണെങ്കിൽ കൂടിയും ചിത്രം പ്രാധാന്യം കൊടുക്കുന്ന കാര്യങ്ങളും വസ്തുതകളും വേറെ പലതുമാണ്.

🔸ഒരു സൂപ്പർഹീറോ അല്ല ,നമ്മുടെ പ്രധാന കഥാപാത്രങ്ങൾ ഒരു അമാനുഷിക കുടുംബം തന്നെയാണ്. പ്രധാന കഥാപാത്രവും ഗൃഹനാഥനുമായ ബോബ് അഥവാ മിസ്റ്റർ ഇൻക്രെഡിബിൾ മനുഷ്യാതീതമായ ശക്തി ഉൾക്കൊള്ളുന്ന ആളാണ്. എന്തിനെയും തടഞ്ഞ് നിർത്താനും അമാനുഷികമായ പ്രഹരങ്ങൾ ഉതിർക്കാനുമുള്ള ശേഷിയാണ് ബോബിന്റെ പ്രധാന കഴിവ്. ഭാര്യയായ ഹെലന്റെ ശരീരം ഇലാസ്റ്റിക്കിനെ പോലും അമ്പരപ്പിക്കും വിധം വഴക്കമുള്ളതാണ്, മക്കളായ വയലെറ്റിനും ഡാഷിനും യഥാക്രമം അപ്രത്യക്ഷനാവാനും വേഗത്തിൽ സഞ്ചരിക്കാനും ഉള്ള കഴിവ് ഉണ്ട്. ചുരുക്കി പറഞ്ഞാൽ എല്ലാം കൊണ്ടും ഒന്നിനൊന്ന് വേറിട്ട കുടുംബാംഗങ്ങൾ.

🔸ചിത്രം ആരംഭിക്കുന്ന കാലത്ത് പ്രസ്തുത അമാനുഷിക വ്യക്തിത്വങ്ങൾ ലോകത്താകമാനം പ്രശംസിക്കപ്പെട്ടവരും ,ആരാധിക്കപ്പെട്ടവരും ആയിരുന്നു. ജനങ്ങളെ സേവിക്കുകയും രക്ഷിക്കുകയും തങ്ങളുടെ ദൗത്യമായി കണ്ടവർ എല്ലാവരുടെയും ബഹുമാനം കരസ്ഥമാക്കിയിരുന്നു. എന്നാൽ ഇന്ന് ,പതിനഞ്ച് വർഷങ്ങൾക്കിപ്പുറം സ്ഥിതിഗതികൾ എല്ലാം ഒരുപാട് മാറിപ്പോയിരിക്കുന്നു. മനുഷ്യരുടെ വെറുപ്പോടെയും അമർഷത്തോടെയുമുള്ള പെരുമാറ്റം കാരണം അവരിൽ ഒരാളായി ജീവിക്കാനും തങ്ങളുടെ അമാനുഷിക കഴിവുകളെ അടക്കി വെക്കാനും നിർബന്ധിക്കപ്പെടുകയാണ് ഈ കഥാപാത്രങ്ങളെല്ലാം.

🔸മിക്കവരും തങ്ങളുടെ പുതിയ ജീവിതത്തോട് യോജിച്ച് തുടങ്ങിയിട്ടുണ്ട് ,കുടുംബവും സന്തോഷങ്ങളും കാര്യങ്ങളുമായി എല്ലാവരും തിരക്കിലേക്ക് കടന്നിരിക്കുന്നു. മറ്റു ചിലർ തങ്ങളുടെ കഴിഞ്ഞ കാലം ഓർത്ത് നെടുവീർപ്പിട്ടും ,ഇപ്പോഴത്തെ ജീവിതത്തിലെ നിരാശയും പരാജയങ്ങളും ഓർത്ത് വിഷമിച്ചും ജീവിതം മുന്നോട്ട് കൊണ്ടുപോവുന്നു. എന്നാൽ ഒരു അങ്കത്തിന് ഉള്ള ബാല്യം കൂടി ഇവരിൽ പലർക്കും ബാക്കിയുണ്ടെന്നത് വിസ്മരിക്കാനാവാത്ത സത്യം ആണ് താനും.

Verdict : Very Good

343. Nocturama (2016)

Director : Bertrand Bonello

Genre : Drama

Rating : 6.7/10

Country : France

Duration : 130 Minutes


🔸കുറച്ച് പ്രശ്‍നം നിറഞ്ഞ വിഷയമാണ് സംവിധായകൻ ബെർട്രാൻഡ് ബോൺലോ നോക്ക്റ്റുരാമ എന്ന തന്റെ ചിത്രത്തിനായി തിരഞ്ഞെടുത്തിരിക്കുന്നത്. ഒരു ചിത്രവും അതിലെ പ്രധാന കഥാപാത്രങ്ങളും ആവശ്യപ്പെടുന്ന സിംപതിയും പ്രേക്ഷകർക്ക് അവരോട് തോന്നിയേക്കാവുന്ന ഇഷ്ടവും അടുപ്പവും എല്ലാം സംവിധായകൻ മനഃപൂർവം തന്നെ വേണ്ട എന്ന് കരുതുകയാണ് തുടക്കം മുതൽക്കേ തന്നെ. കാരണം തങ്ങൾ നേരിടുന്ന പ്രശ്നങ്ങൾ എന്ത് തന്നെ ആണെങ്കിലും അത് നികത്താൻ പ്രധാന കഥാപാത്രങ്ങൾ ഉപയോഗിക്കുന്ന വഴി ഒരു തരത്തിലും ന്യായീകരിക്കാൻ കഴിയാത്തതാണ്.

🔸ഏഴ് പ്രധാന കഥാപാത്രങ്ങളാണ് ചിത്രത്തിലുള്ളത്. ഇവരുടെ ഭൂതകാലത്തിലേക്കോ മറ്റ് വസ്തുതകളിലേക്കോ ഒന്നും ചിത്രം കടന്ന് ചെല്ലുന്നേയില്ല ,ആദ്യ രംഗം മുതൽക്കേ ഏഴ് കഥാപാത്രങ്ങളുടെയും മുഖത്ത് നിറഞ്ഞ് നിൽക്കുന്ന ഭാവങ്ങൾ അനിശ്ചിതാവസ്ഥയുടെയും ഭയത്തിന്റെയും സംശയത്തിന്റെയും എല്ലാം പ്രതീകങ്ങൾ ആയിരുന്നു. ഏഴ് കഥാപാത്രങ്ങളും തമ്മിൽ പ്രത്യക്ഷത്തിൽ പരിചയമോ അടുപ്പമോ ഏതെങ്കിലും തരത്തിലുള്ള ഇടപെടലുകളോ തോന്നിക്കുന്നില്ലെങ്കിൽ കൂടിയും ഇവർ എല്ലാം പാരീസ് നഗരത്തിൽ എത്തിയിരിക്കുന്നത് ഒരൊറ്റ ലക്ഷ്യത്തിന് വേണ്ടിയാണ്. ഏഴ് ജീവിതങ്ങളും പൂർണമായും മാറ്റിമറിച്ചേക്കാവുന്ന അപകടകരമായ ഒരു ലക്ഷ്യം.

🔸അപകടം എന്ന് വിശേഷിപ്പിച്ചാൽ കുറഞ്ഞ് പോവും ഇവരുടെ കൃത്യത്തെ ,കാരണം ഈ ഏഴ് പേരിലൂടെ ആരംഭിക്കുന്ന പോരാട്ടം ഒരു രാജ്യത്തിന് എതിരെ ആണ് ,അവിടെ നിലനിൽക്കുന്നു എന്ന് പറയപ്പെടുന്ന നിയമത്തിനെതിരെ ,ജനങ്ങളെ പരിപാലിക്കേണ്ട ഭരണ വ്യവസ്ഥയ്‌ക്കെതിരെ ,എല്ലാത്തിനും ഉപരി അർഹിച്ചവന്റെ അന്നത്തിൽ കയ്യിട്ട് വരുന്ന മാടമ്പിമാർക്കെതിരെ വരെ. ഇതിനായി ,ഒരു മാറ്റത്തിനായി ഇന്ന് നിലനിൽക്കുന്ന രാജ്യത്തിനെ ഇളക്കി മറിക്കുക എന്നതാണ് ഇവരുടെ ലക്ഷ്യം. അതിനായി ഇവർ കണ്ടെത്തിയ വഴികൾ ആക്രമണത്തിന്റേത് ആണ് ,ഒരു നല്ല നാളേയ്ക്ക് വേണ്ടി ജീവൻ ബലി നൽകാനും മടിയില്ല കൂട്ടത്തിൽ ആർക്കും.

🔸ചിത്രം ആരംഭിക്കുന്നത് ഈ ഏഴ് പേരും തങ്ങളുടെ പ്രതിഷേധം ലോകത്തിന് മുൻപിൽ അഴിച്ച് വിടാൻ ഒരുങ്ങുന്ന ദിവസം തന്നെയാണ്. അതിന് മുൻപേയുള്ള സംഭവങ്ങളെ പറ്റി ചിത്രം അധികം പ്രതിപാദിക്കുന്നില്ല ,എങ്കിലും ചില പ്രധാന സംഭവ വികാസങ്ങളുടെ പശ്ചാത്തലങ്ങളും അവ ഏതെല്ലാം രീതിയിൽ കഥാപാത്രങ്ങളെ ബാധിച്ചെന്നുമുള്ള കുറച്ച് ഓർമ്മപ്പെടുത്തലുകൾ ചിത്രത്തിൽ നിറഞ്ഞുനിൽക്കുന്നുണ്ട്. യുവത്വത്തിലേക്ക് കാലെടുത്ത് വെച്ചവരാണ് ഏഴ് പ്രധാന കഥാപാത്രങ്ങളും ,ആയതിനാൽ തന്നെ അതിന്റെതായ ആകുലതകളും ,അനിശ്ചിതത്വങ്ങളും പരിചയക്കുറവുകളും എല്ലാവരിലും ഉണ്ട്. എന്നാൽ തങ്ങൾ ഇറങ്ങിത്തിരിച്ച ദൗത്യത്തെ കുറിച്ച് യാതൊരു സംശയമോ ,പിന്നോട്ടേക്കുള്ള മനോഭാവമോ ഇവരിൽ ഒട്ടുമില്ല താനും.

🔸തങ്ങളുടെ പദ്ധതി നടപ്പിലാക്കാൻ ഏഴ് കഥാപാത്രങ്ങളും തീരുമാനിച്ച ദിവസം രാവിലെ മുതൽ അന്നേ ദിവസം രാത്രി വരെ അരങ്ങേറുന്ന സംഭവങ്ങളാണ് അത്യധികം നാടകീയതയോടെയും വൈകാരികതയോടെയും ചിത്രത്തിൽ അവതരിപ്പിച്ചിട്ടുള്ളത്. സംഘർഷ ഭരിതമാണ് ഓരോ കഥാപാത്രങ്ങളുടെയും മനസ്സ് ,ഇന്നേ ദിവസത്തെ സംഭവങ്ങൾ അരങ്ങേറിയതിന് ശേഷം തങ്ങളുടെ ജീവിതം എങ്ങനെ ആയിരിക്കും എന്നതിനെ കുറിച്ച് വേവലാതി ഓരോരുത്തരിലുമുണ്ട് ,ജീവിതം എന്നൊന്ന് ഇനി അങ്ങോട്ട് ഉണ്ടാവുമോ എന്ന് പോലും സംശയമാണ്. നടപ്പിലാക്കാൻ ഉദ്ദേശിക്കുന്ന പദ്ധതിയെ പറ്റിയുള്ള ആകുലതകൾ വേറെയും. ചില ഇടങ്ങളിൽ മടുപ്പ് അനുഭവപ്പെടാം എങ്കിലും നല്ലൊരു ചിത്രം തന്നെയാണ് നോക്ക്റ്റുരാമ.

Verdict : Good

342. Wall Street (1987)

Director : Oliver Stone

Genre : Drama

Rating : 7.4/10

Country : USA

Duration : 126 Minutes


🔸ഗോർഡൻ ഗെക്കോ ഒരു ഇതിഹാസം ആണ് ,പ്രത്യേകിച്ചും പണമിടപാടുകളിൽ. കച്ചവടത്തിൽ അട്ടയുടെ കണ്ണ് കണ്ടവൻ എന്ന് വേണമെങ്കിൽ വിശേഷിപ്പിക്കാം ഗെക്കോയെ. വാൾ സ്ട്രീറ്റ് ബിസിനെസ്സ് മേഖലയിൽ നിന്നും ഈ ചെറു പ്രായത്തിൽ തന്നെ വൻ ലാഭം കരസ്ഥമാക്കിയ ഏവരെയും അമ്പരപ്പിക്കുന്ന രീതിയിൽ വളർന്ന് വന്ന ഗെക്കോ ഈ വിശേഷണം തീർച്ചയായും അർഹിക്കുന്നുണ്ട്. ഗെക്കോയുമായി കച്ചവട ആവശ്യത്തിന് കൂടിക്കാഴ്ചയ്ക്ക് പുറപ്പെടുന്ന നായക കഥാപാത്രത്തോട് സഹപ്രവർത്തകൻ പറയുന്ന "സൂക്ഷിച്ചില്ലെങ്കിൽ നിന്ന നില്പിൽ നിന്നെ വരെ അങ്ങേര് വിൽക്കും" എന്ന ഒറ്റ സംഭാഷണം മതിയാവും ഗെക്കോ ആരാണെന്നും എന്താണെന്നും മനസ്സിലാവാൻ.

🔸ആർത്തി എന്നത് ഓരോ മനുഷ്യനിലും വ്യത്യസ്തമായ അളവുകളിൽ നിലനിൽക്കുന്ന വസ്തുതയാണ്. ചിലർക്ക് ഭക്ഷണത്തിനോട് ,ചിലർക്ക് ആഡംബര വസ്തുക്കളോട് ,ഒരുപാട് പേർക്ക് പണത്തിനോട്. ഗെക്കോ മൂന്നാമത് പറഞ്ഞ വിഭാഗത്തിൽ പെട്ട വ്യക്തിയാണ് ,എത്ര പണം ലഭിച്ചാൽ താൻ സന്തുഷ്ടനാവും എന്നതിന് ഗെക്കോയ്ക്ക് പോലും വ്യക്തമായ ഉത്തരമില്ല. ഓരോ ദിവസവും അയാൾക്ക് മത്സരമാണ് ,തലേ ദിവസത്തിനേക്കാൾ ഒരു രൂപ എങ്കിലും കൂടുതൽ സമ്പാദിക്കാൻ. തന്നോട് തന്നെ മത്സരിക്കുക ,ഇന്നലെകളിലെ തന്നെ തോൽപ്പിക്കുക ഇതാണ് ഗെക്കോയുടെ ഒരേ ഒരു ലക്‌ഷ്യം. അയാളുടെ സിദ്ധാന്ത പ്രകാരം പണത്തിനോടുള്ള ആർത്തി ഒരു അനിവാര്യത ആണ് ,വിജയത്തിലേക്ക്.

🔸അമേരിക്കയിലെ ഇടത്തരം കുടുംബങ്ങളിൽ ഒന്നിൽ ജനിച്ച് വളർന്ന ആളാണ് കഥാനായകനായ ബഡ്. ഫാക്ടറി തൊഴിലാളിയായ അച്ഛന്റെ ചെറിയ ശമ്പളത്തിൽ ജീവിച്ചു വളർന്ന ബഡിനെ സമ്പന്നരുടെ ജീവിത ശൈലിയും ആർഭാടങ്ങളും എല്ലാകാലത്തും ആകർഷിച്ചിരുന്നു ,ഒരുനാൾ തന്റെ ജീവിതവും മാറി മറയും എന്ന് അയാൾക്ക് ഉറപ്പുണ്ടായിരുന്നു. അതിനാലാണ് കുടുംബത്തിൽ നിന്ന് നേരിട്ട എതിർപ്പുകൾ വക വെക്കാതെ സ്റ്റോക്ക് ബ്രോക്കർ എന്ന വേഷം വാരി കെട്ടിയതും ,വാൾ സ്ട്രീറ്റിൽ എത്തിയതും.

🔸വാൾ സ്ട്രീറ്റിലെ നൂറ് കണക്കിന് ബ്രോക്കർമാരിൽ ഒരാൾ മാത്രമാണ് താൻ എന്നും ,ഇവിടെ വന്ന് പോവുന്നവരിൽ മിക്ക ആളുകൾക്കും നഷ്ടങ്ങളുടെ ഒരു നീണ്ട പട്ടിക തന്നെ പറയാൻ ഉണ്ടെന്നും ഉള്ള തിരിച്ചറിവ് ബഡിനെ തെല്ലൊന്നുമല്ല ഞെട്ടിച്ചത്. എന്തിരുന്നാലും ചെറുപ്പം തൊട്ട് താൻ ആഗ്രഹിച്ചിരുന്ന ജീവിതം ,ആ സ്വപ്നം അയാളെ മുന്നോട്ട് നയിക്കുകയാണ്. കഠിനാധ്വാനത്തെക്കാളും ബഡ് വിശ്വസിച്ചിരുന്നത് സാമർത്യത്തിലാണ് ,ആ വിശ്വാസം ആണ് അയാളെ ഗെക്കോയുടെ അടുത്ത് എത്തിക്കുന്നത്.

🔸വർഷങ്ങൾക്ക് ശേഷം താൻ കണ്ണാടിയിൽ നോക്കി സംതൃപ്തിയോടെ ചിരിക്കുമ്പോൾ കാണേണ്ട രൂപം എന്താണോ അതാണ് ഇന്നത്തെ ഗെക്കോ ,താൻ സ്വപ്നം കണ്ടതാണ് അയാളുടെ ജീവിതം. വാൾസ്ട്രീറ്റിൽ എത്തിയ അന്ന് തൊട്ട് സ്വപ്നം കണ്ടതാണ് ഗെക്കോയുമായുള്ള ഒത്തുചേരൽ ,തുടർച്ചയായി അൻപത്തൊമ്പത് ദിവസങ്ങളാണ് അയാളോട് സംസാരിക്കാനോ കാണാനോ ഉള്ള ഒരവസരത്തിനായി താൻ ശ്രമിക്കുന്നത്. ആ അവസരം ഇപ്പോൾ തന്റെ മുന്നിൽ ഉണ്ട് ,തന്റെ വിലപ്പെട്ട സമയത്തിൽ നിന്നും അഞ്ച് മിനിറ്റ് ആണ് ഗെക്കോ തന്നിരിക്കുന്നത്. ആ അഞ്ച് മിനിറ്റിൽ അയാളോട് സംസാരിച്ച് ,അയാളിൽ മതിപ്പ് ഉണ്ടാക്കി തന്റെ കച്ചവടത്തിന്റെ ഭാഗം ആക്കണം. കേട്ടറിവ് വെച്ച് ഗെക്കോ തന്നെ എടുത്ത് ചുമരിൽ തേക്കാനാണ് സാധ്യത ,എന്നാലും ശ്രമിച്ച് നോക്കുന്നതിൽ തെറ്റില്ലെന്ന് കരുതി ബഡ് ഗെക്കോയുടെ മുറിയിലേക്ക് കയറുകയാണ്.

Verdict : Very Good

341. Voyage To Cythera (1984)

Director : Theodoros Angelopoulos

Genre : Drama

Rating : 7.8/10

Country : Greece

Duration : 137 Minutes


🔸വോയേജ് ടു സിതേര എന്ന തിയോ ആഞ്ചെലോ പൗലോസ് ചിത്രത്തിൽ വളരെ മനോഹരമായ ഒരു രംഗം ഉണ്ട് ,മുപ്പത്തി രണ്ട് വർഷങ്ങൾക്ക് ശേഷം തന്റെ നാട്ടിൽ തിരിച്ചെത്തിയ പ്രധാന കഥാപാത്രം ഭാര്യയെയും മക്കളെയും കണ്ട് മുട്ടിയ ശേഷം ആഘോഷങ്ങൾക്ക് നിൽക്കാതെ ആ വൈകുന്നേരം തീർത്തും ഒറ്റയ്ക്ക് ആരും പ്രതീക്ഷിക്കാത്ത സ്ഥലത്ത് കഴിച്ച് കൂട്ടുന്ന രംഗം. ഇത്രയും കാലം അകന്നിരുന്നിട്ടും ഒറ്റപ്പെട്ട് ജീവിച്ചിട്ടും ഒരു വൈകുന്നേരം കൂടി വേണ്ടപ്പെട്ടവരുടെ ഇടയിൽ നിന്നും മാറി നില്ക്കാൻ ടിയാനെ പ്രേരിപ്പിച്ച ഘടകങ്ങൾ എന്താവും എന്ന ചോദ്യമാണ് സംവിധായകൻ അവിടെ തുറന്നിടുന്നത്.

🔸അത് ഒരുപക്ഷെ ഏകാന്തതയോടുള്ള ഇഷ്ടം ആവാം ,കഴിഞ്ഞ മുപ്പത്തി രണ്ട് വർഷങ്ങൾ ജീവിതത്തിന്റെ ഭാഗമായി മാറിയ ,ശീലമായിപ്പോയ ഒറ്റപ്പെടലിനോടുള്ള മാനസിക അടുപ്പം ആവാം. അതും അല്ലെങ്കിൽ ഇനിയുള്ളകാലം കുടുംബത്തോടൊപ്പം ആയതിനാൽ മനസിന്റെ വിങ്ങലും ഓർമകളുടെ ഭാണ്ഡക്കെട്ടുകളും എന്നെന്നേക്കുമായി അഴിച്ച് വെക്കുന്നതാവാം. അതും അല്ലെങ്കിൽ കഴിഞ്ഞ മൂന്ന് ദശാബ്ദത്തിൽ അധികം കാലം തനിക്ക് നഷ്ട്ടപ്പെട്ടത് എന്തൊക്കെയെന്ന് മനസ്സിൽ ആലോചിച്ച് ചിട്ടപ്പെടുത്തുന്നതുമാവാം. ഇതിൽ ഏതായാലും കഥാപാത്രത്തിന്റെ അപ്പോഴത്തെ മാനസിക സ്ഥിതിയോട് നീതി പുലർത്തുന്നതുമാണ്.

🔸രണ്ടാം ലോക മഹായുദ്ധകാലം ഗ്രീസ് എന്ന രാജ്യത്തെ സംബന്ധിച്ചിടത്തോളം നഷ്ടങ്ങളുടെ വലിയൊരു കണക്ക് പുസ്തകമാണ്. പരസ്പരമുള്ള മത്സരവും പോരാട്ടങ്ങളും തങ്ങളുടെ മണ്ണിൽ നിന്നും ഗ്രീസിന്റെ മണ്ണിലേക്ക് റഷ്യയും ജർമനിയും കൊണ്ടുവന്നത് ഒരു പരിധി വരെ അന്ന് ഗ്രീസിൽ നിലനിന്നിരുന്ന സ്ഥിരതയുള്ള ഭരണത്തിന്റെയും ശക്തമായ പ്രതിരോധ നയങ്ങളുടെയും അഭാവം കൊണ്ട് തന്നെ ആയിരുന്നു. രാജ്യം ഒന്നടങ്കം യുദ്ധത്തിലേക്ക് എടുത്തെറിയപ്പെട്ടതും വിവിധ മേഖലകളിൽ നേരിട്ട ഇടിവും യുദ്ധത്തിന്റെ ശേഷിപ്പുകൾ മാത്രമായിരുന്നു. അതിലും കഷ്ടമായിരുന്നു ജനങ്ങളുടെ ,പ്രത്യേകിച്ചും വളർന്ന് വരുന്ന യുവാക്കളുടെ അവസ്ഥ.

🔸ആ കാലഘട്ടത്തിൽ യുവത്വത്തിലേക്ക് കാലെടുത്ത് വെച്ചതാണ് ചിത്രത്തിലെ കഥാനായകനായ സ്പൈറോസ്. നിരപരാധി ആണോ അതോ ഏതെങ്കിലും രീതിയിൽ നിയമ വിരുദ്ധമായ എന്തെങ്കിലും പ്രവർത്തിച്ചിട്ടാണോ സ്പൈറോസിന് രാജ്യം വിട്ടുപോവേണ്ടി വന്നത് എന്നത് വ്യക്തമല്ല ,അതല്ല ചിത്രം പ്രതിപാദിക്കുന്ന വിഷയവും. ഭൂതകാലം അത് എന്ത് തന്നെ ആയാലും കഴിഞ്ഞിരിക്കുന്നു ,നാട് കടത്തപ്പെട്ടതിന് മുപ്പത്തി രണ്ട് വർഷങ്ങൾക്ക് ശേഷം സ്പൈറോസ് തന്റെ ഭാര്യയുടെയും രണ്ട് മക്കളുടെയും അടുത്ത് മടങ്ങി എത്തിയിട്ടുണ്ട്. ജീവിതത്തിൽ പ്രതീക്ഷകൾ ഒന്നും ബാക്കിയില്ലെങ്കിലും ഇനിയുള്ള കാലം കുടുംബത്തോടൊപ്പം കഴിച്ച് കൂട്ടണം എന്നതാണ് ആഗ്രഹം.

🔸നാട് ഒരുപാട് മാറിപ്പോയിരിക്കുന്നു ,നാട്ടുകാരും. താൻ ഒട്ടും പ്രതീക്ഷിക്കാത്ത രീതിയിലുള്ള മാറ്റങ്ങളാണ് എല്ലായിടത്തും ,തന്റെ മക്കളിൽ പോലും. ഈ മാറ്റങ്ങളിൽ പലതും ഉൾക്കൊള്ളാൻ തനിക്കാവുമോ എന്നതാണ് സംശയം ,വൃദ്ധന്റെ വാക്കുകൾക്ക് ആരെങ്കിലും ചെവി കൊടുക്കുമോ എന്നതും സംശയമാണ്. ആകെ ഒരു ആശ്വാസം തോന്നിയത് ഭാര്യയാണ് ,വർഷങ്ങൾ ഇത്ര കഴിഞ്ഞിട്ടും താൻ മരിച്ചിട്ടില്ലെന്ന് ഉറച്ച് വിശ്വസിച്ചതും കാത്തിരുന്നതും എങ്ങനെ ആണെന്നത് ഇപ്പോഴും അത്ഭുതമാണ്. ആഞ്ചെലോ പൗലോസിന്റെ ട്രിലോഗി ഓഫ് സൈലെൻസിലെ ആദ്യ ചിത്രം ഏതൊരു കാഴ്ചക്കാരനും പുതിയ ഒരു അനുഭവം ആവും ,എല്ലാ അർത്ഥത്തിലും.

Verdict : Very Good

340. The Headless Woman (2008)

Director : Lucrecia Martel

Genre : Mystery

Rating : 6.5/10

Country : Argentina

Duration : 87 Minutes


🔸ഒരുപാട് ചോദ്യങ്ങളുമായി ആണ് ഹെഡ്‌ലെസ്സ് വുമൺ എന്ന ഈ അർജന്റീനിയൻ ചിത്രം കാഴ്ചക്കാർക്ക് മുന്നിലേക്ക് എത്തുന്നത് ,ചോദ്യങ്ങൾക്കുള്ള ഉത്തരങ്ങൾ നൽകാൻ ഒരിടത്തും ചിത്രം ശ്രമിക്കുന്നില്ലെന്ന് മാത്രമല്ല മിക്കതും സിനിമയുടെ അവസാനം വെറും ചോദ്യങ്ങളായി തന്നെ നില നിൽക്കുന്നുമുണ്ട്. സിനിമയുടെ ഉദ്ദേശം തന്നെ അതാണെന്ന് തോന്നുന്നു ,തങ്ങളുടെ അഭിരുചിയും കാഴ്ചപ്പാടും കണക്കിലെടുത്ത് ഓരോരുത്തർക്കും വ്യത്യസ്തമായ രീതിയിൽ വ്യാഖ്യാനിക്കാൻ കഴിയുന്ന അപൂർവം ചിത്രങ്ങളിൽ ഒന്നായിരിക്കും ഈ ചിത്രം, അതിനാൽ അത് പോലെ തന്നെ ഇരിക്കും സിനിമ കണ്ട് കഴിയുമ്പോഴുള്ള പ്രതികരണങ്ങളും.

🔸കുറ്റബോധം എന്ന വികാരമാണ് ചിത്രത്തിലെ പ്രധാന കഥാപാത്രത്തെ മുന്നോട്ട് നയിക്കുന്നത്.അറിഞ്ഞോ അറിയാതെയോ തന്റെ കയ്യിൽ നിന്നും സംഭവിച്ച ഒരു തെറ്റ് ,അതിന് കൊടുക്കേണ്ടി വന്ന വില ഇതെല്ലാം പ്രസ്തുത കഥാപാത്രത്തിന്റെ മനസ്സിനെ കാർന്ന് തിന്നുകയാണ്. ഇനി എന്ത് പ്രായശ്ചിത്തം ചെയ്താലും താൻ ചെയ്ത തെറ്റിന് പരിഹാരം ആവില്ല എന്നവർക്ക് നന്നായി അറിയാം.എന്നാൽ ഇന്ന് ഈ നിമിഷം കഥാനായികയായ വെറോണിക്ക നേരിടുന്ന പ്രശനം മറ്റൊന്നാണ് ,കുറ്റബോധം നിറഞ്ഞിരിക്കുമ്പോഴും ഒരു ചോദ്യം അവരുടെ മനസ്സിൽ ബാക്കി ഉണ്ടായിരുന്നു, അതായിരുന്നു അവരെ ഏറെ അലട്ടികൊണ്ടിരുന്നതും.

🔸വെറോനിക്കയുടെ സംശയം താൻ ഈ പറയപ്പെടുന്ന സംഭവത്തിൽ ,കുറ്റകൃത്യത്തിൽ യഥാർത്ഥത്തിൽ പങ്കാളി ആയിട്ടുണ്ടോ എന്നാണ്. സ്വബോധ മനസ്സിൽ സംഭവത്തെ പറ്റിയുള്ള ചില ഓർമ ചിത്രങ്ങൾ വ്യക്തമായി തന്നെ കിടക്കുന്നുണ്ട് ,എന്നാൽ ലോജിക്ക് അനുസരിച്ച് വിവരിക്കാൻ കഴിയാത്ത പലതും നടക്കുന്നത് പോലെ ഒരു തോന്നൽ. സംഭവിച്ചെന്ന് പറയപ്പെടുന്ന സംഭവങ്ങളും തന്റെ ഓർമയിലുള്ള ചില വസ്തുതകളും തമ്മിൽ എവിടെ ഒക്കെയോ ഒരു സ്വരച്ചേർച്ച നിലനിൽക്കുന്നത് പോലെ.

🔸യാഥാർഥ്യവും ഭാവനയും വരെ എവിടെയൊക്കെയോ ഇടകലർന്ന പോലെ ,ചോദ്യങ്ങൾക്കുള്ള ഉത്തരങ്ങൾ പുതിയ ചോദ്യങ്ങൾക്ക് വഴി തെളിച്ച് കൊണ്ടേ ഇരിക്കുന്നു. പത്ത് വർഷം മുന്നേ കാനസ് ഫിലിം ഫെസ്റ്റിവലിൽ ചിത്രം പ്രദര്ശിപ്പിച്ചപ്പോൾ നേടിയ അഭിപ്രായങ്ങളിൽ ഒന്ന് പ്രേക്ഷകരെയും വിമര്ശകരെയും ഇത്പോലെ വേർതിരിച്ച ചിത്രങ്ങൾ അധികം ഉണ്ടാവില്ല എന്നായിരുന്നു ,അന്ന് ചിത്രം അതിന്റെ പ്രമേയത്തിനാൽ കയ്യടികളും ചില ഭാഗങ്ങളിലെ വിരസമായ അവതരണം കാരണം കൂവലുകളും ഒരു പോലെ വാങ്ങി കൂട്ടിയിരുന്നു.

🔸ആദ്യമേ പറഞ്ഞത് പോലെ ഈ ചിത്രത്തിനെ വ്യാഖ്യാനിക്കേണ്ടത് കാഴ്ചക്കാരൻ തന്നെയാണ് ,അതിനുള്ള പൂർണ സ്വാതന്ത്ര്യം സംവിധായകൻ വിട്ടുതന്നിട്ടുണ്ട് ,ചിത്രം എങ്ങനെ എന്ന് തീരുമാനിക്കേണ്ടതും അവനവന്റെ വ്യാഖ്യാനരീതി പോലെയിരിക്കും. മേല്പറഞ്ഞതിനേക്കാൾ കൂടുതലായി എന്ത് പറഞ്ഞാലും അത് ചിത്രത്തിന്റെ പ്രധാന കഥാ ഭാഗത്ത് കടക്കും എന്നതിനാലും അത് പ്രേക്ഷകന്റെ രസച്ചരട് മുറിക്കും എന്നതിനാലും നിര്ത്തുന്നു. ഹെഡ്‌ലെസ്സ് വുമൺ എന്ന ചിത്രം വ്യത്യസ്തമായ പ്രമേയങ്ങൾ ഇഷ്ടപ്പെടുന്നവർക്ക് മാത്രം ഉള്ള ചിത്രമാണ് ,മറ്റുള്ള കാഴ്ച്ചക്ക്കാർക്ക് വിരസം ആയി തോന്നുന്നുണ്ടെങ്കിൽ അത് സ്വാഭാവികം എന്നെ പറയാനുള്ളൂ.

Verdict : Above Average

339. Sila Samayangalil (2018)

Director : Priyadarsan

Genre : Drama

Rating : 7.3/10

Country : India

Duration : 92 Minutes


🔸ചില ചിത്രങ്ങൾ കാണുമ്പോൾ അവ സംവിധാനം ചെയ്തത് ടൈറ്റിലിൽ കാണിച്ചിരിക്കുന്ന വ്യക്തി തന്നെ ആണോ എന്ന് ഒരുവേള സംശയിച്ച് പോവും ,മലയാളത്തിൽ സത്യൻ അന്തിക്കാട് സംവിധാനം ചെയ്ത പിൻഗാമിയും ഹോളിവുഡിൽ മിഷൻ ഇമ്പോസ്സിബ്ൾ സംവിധാനം ചെയ്ത ഡി പാൽമയും ഒക്കെ മേല്പറഞ്ഞ വസ്തുതയ്ക്ക് ഉദാഹരണങ്ങളാണ്. ഈ സ്രേണിയിൽ ഏറ്റവും പുതുതായി ഉൾപ്പെടുത്താനാവുക പ്രിയദർശനെയും സില സമയങ്ങളിൽ എന്ന ചിത്രത്തെയും ആണ്. സ്ഥിരം പ്രിയദർശൻ ചിത്രങ്ങളുടെ ചേരുവകകളോ സംഭാഷണ ശൈലികളോ തമാശകളോ ഒന്നും തന്നെ ഈ ചിത്രത്തിൽ കാണാനാവില്ല എന്ന് മാത്രമല്ല ,കൈകാര്യം ചെയ്യുന്ന വിഷയം അതീവ ഗൗരവം ഏറിയതുമാണ്.

🔸വിരലിൽ എണ്ണി തീർക്കാവുന്ന കഥാപാത്രങ്ങൾ മാത്രമേ ചിത്രത്തിലുള്ളൂ ,ഒന്നര മണിക്കൂർ ദൈർഖ്യമുള്ള ചിത്രം ആദ്യാവസാനം അരങ്ങേറുന്നത് ഒരു മുറിയ്ക്കുള്ളിലും. ആകാംഷ എന്ന വികാരം ആണ് ഓരോ കഥാപാത്രത്തെയും മുന്നോട്ട് നയിക്കുന്നത് ,അടക്കാനാവാത്ത ഭയവും. നഗരത്തിലെ ഒരു പ്രമുഖ മെഡിക്കൽ ക്ലിനിക്ക് ആണ് ചിത്രത്തിന്റെ കഥാ പശ്ചാത്തലം. തമിഴ് നടൻ നാസർ അവതരിപ്പിക്കുന്ന സീനിയർ ഡോക്ടർ എന്ന കഥാപാത്രം തന്റെ ഇരുപത് വർഷത്തെ അധ്വാനത്തിന്റെ ഫലമായി ജനങ്ങൾക്കിടയിൽ ഉണ്ടാക്കി എടുത്ത മതിപ്പ് ആണ് ക്ലിനിക്കിന്റെ നട്ടെല്ല്.

🔸പ്രസ്തുത ക്ലിനിക്കിൽ ഒരു ദിവസം തങ്ങളുടെ രക്തപരിശോധനയ്ക്കായി എത്തുകയാണ് ചിത്രത്തിലെ പ്രധാന കഥാപാത്രങ്ങൾ ആയ ഏഴ് പേരും. ആരുടേയും ശ്രദ്ധയിൽ പെടാതെ ആരോടും സമ്പർക്കമില്ലാതെ കഴിവതും ഒറ്റപ്പെട്ട് ഇരിക്കുന്ന ഈ ഏഴ് കഥാപാത്രങ്ങളും അടക്കാനാവാത്ത ഭയം കാരണം ഉള്ളിൽ നീറിപ്പുകയുകയാണ് ,കാരണം ഇവർ എത്തിയിരിക്കുന്നത് തങ്ങളുടെ ശരീരത്തിൽ എയ്ഡ്‌സ് രോഗത്തിന്റെ സാന്നിധ്യം ഉണ്ടോ എന്ന് ഉറപ്പിക്കാൻ വേണ്ടിയാണ്. അതിനപ്പുറം എന്ത് എന്നതിനെ കുറിച്ച് ചിന്തിക്കാൻ പോലും കഴിയാത്ത അവസ്ഥയാണ് ഏഴ് പേർക്കും.

🔸എയ്ഡ്‌സ് രോഗികളോടുള്ള സമൂഹത്തിന്റെ പ്രതികരണം ,അതും ഇന്ത്യ പോലുള്ള രാജ്യങ്ങളിൽ എങ്ങനെ ആണെന്നതിന് നൂറ് കൂട്ടം ഉദാഹരണങ്ങൾ ഉള്ളതിനാലും ,സർവോപരി തങ്ങളുടെ തന്നെ കുടുംബാംഗങ്ങൾ എങ്ങനെ ഈ അവസ്ഥയെ നോക്കിക്കാണും എന്ന ഭയത്തിനാലും ആകെ ഭ്രാന്ത് പിടിച്ച അവസ്ഥയിലാണ് കഥാപാത്രങ്ങൾ എല്ലാം. ക്ലിനിക്കിലെ നിയമം അനുസരിച്ചാണെങ്കിൽ രാവിലെ ശേഖരിച്ച രക്ത സാംപിളിന്റെ ഫലം ഉടമസ്ഥന് തിരികെ നൽകണമെങ്കിൽ വൈകുന്നേരം അഞ്ച് മണി വരെ എങ്കിലും കാത്തിരിക്കണം ,അതായത് തങ്ങളുടെ ജീവിതം കയ്യിൽ പിടിച്ച് കൊണ്ട് പ്രസ്തുത കഥാപാത്രങ്ങൾ എല്ലാം ഉള്ളാലെ നീറി പുകഞ്ഞ് ആറ് മണിക്കൂർ ക്ലിനിക്കിന് മുന്നിൽ കാത്തിരിക്കണം എന്ന് ചുരുക്കം.

🔸സമൂഹത്തിന്റെ വിവിധ തട്ടുകളിൽ നിന്നും വന്ന ഏഴ് പേർ ,നഷ്ടപ്പെടാൻ ഒരുപാടുള്ള വ്യക്തികൾ ,അറിഞ്ഞോ അറിയാതെയോ സംഭവിച്ച് പോയ കൈയബദ്ധം ,ഇനി അതിൽ എത്ര തന്നെ പശ്ചാത്തപിച്ചാലും ഇന്ന് വൈകുന്നേരം അഞ്ച് മണിയോടെ ഇവരിൽ ചിലരുടെ എങ്കിലും ജീവിതങ്ങൾ മാറി മറയും. സമൂഹവും ബന്ധുക്കളും സുഹൃത്തുക്കളും എന്തിന് സ്വന്തം മക്കൾ പോലും തങ്ങളെ നോക്കി കാണുന്ന രീതി മാറും ,പരിചിതമായ മുഖങ്ങളിൽ പോലും അറപ്പും വെറുപ്പും നിറയാൻ തുടങ്ങും ,മരണം ആയിരുന്നു ഭേദം എന്ന് പോലും തോന്നി തുടങ്ങും. ഇവയ്‌ക്കെല്ലാം ഇടയിൽ നിൽക്കുന്നത് ആറ് മണിക്കൂറുകൾ മാത്രം....

Verdict : Good