656. My Dad Is A Heel Wrestler (2019)

Director : Kyohei Fujimara

Genre : Sports

Rating : 7.4/10

Country : Japan

Duration : 110 Minutes

🔸ഈ ചിത്രത്തെ കുറിച്ച് എന്ത് പറയണം എന്നതാണ് സംശയം, ഫെസ്റ്റിൽ ഇതുവരെ കണ്ടതിൽ ഏറ്റവും മികച്ച ചിത്രമാണ് മൈ ഡാഡ് ഈസ് എ ഹീൽ റെസ്ലർ. ഒരു സ്പോർട്സ് ഡ്രാമ ചിത്രത്തിൽ നിന്നും പ്രതീക്ഷിക്കാവുന്ന സകലമാന ക്ലിഷേകളും പ്രതീക്ഷിച്ചിട്ടും അത്യാവശ്യം നന്നായി തൃപ്തിപ്പെടുത്തിയ ചിത്രം എന്ന് വിശേഷിപ്പിക്കാം ഇതിനെ. തന്റെ പ്രൈം കഴിഞ്ഞ ഒരു റെസ്ലറുടെ ഇപ്പോഴത്തെ ജീവിതവും സ്വന്തം മകനോടുള്ള അയാളുടെ അടുപ്പവും എല്ലാം മനോഹരമായി തന്നെ ചിത്രം സ്‌ക്രീനിൽ കാണിക്കുന്നുണ്ട്.

🔸ഈ റെസ്ലിങിൽ മുൻ നിശ്ചയ പ്രകാരം വ്യക്തികൾ നല്ലവരായും മോശപ്പെട്ടവരായും അഭിനയിക്കാറുണ്ട്, യഥാക്രമം ഇവർ ഫെയ്‌സസ് എന്നും ഹീൽസ് എന്നും വിശേഷിപ്പിക്കപ്പെടുന്നു. ഒരു നായകൻ അത്രമേൽ മികച്ചവൻ ആവുന്നത് അവനൊത്തൊരു വില്ലനെ കീഴ്പ്പെടുത്തുമ്പോഴാണ്, സത്യത്തിൽ നായകന്റെ നിലനിൽപ്പ് പോലും സാധൂകരിക്കപ്പെടുന്നത് വില്ലനായൊരു എതിരാളി ഉള്ളത് കൊണ്ടാണെന്ന് പറഞ്ഞിടാം. ഈ വില്ലൻ കഥാപാത്രങ്ങൾക്ക് ഏത് നിലയിലേക്കും തരം താഴാം, എന്ത് നെറികേടും കാണിക്കാം, അപ്പോഴാണ് അവരെ ജനങ്ങൾ കൂടുതൽ വെറുക്കുക, അപ്പോഴേ അവരൊരു വില്ലൻ കഥാപാത്രമായി മാറുകയുമുള്ളൂ.

🔸ഷോട്ട എന്ന സ്‌കൂൾ വിദ്യാർത്ഥിയായ കഥാപാത്രമാണ് നമ്മുടെ ചിത്രത്തിലെ ഫോക്കൽ പോയിന്റ്, തന്റെ അച്ഛനോടും അമ്മയോടും വല്ലാത്തൊരു അറ്റാച്ച്മെന്റ് ഉണ്ട് ഷോട്ടയ്ക്ക്. ഷോട്ടയുടെ അച്ഛനാണ് ഒരുകാലത്ത് ജാപ്പനീസ് റെസ്ലിങ് സർക്കിയുട്ടുകളിലെ അടുത്ത വലിയ താരം എന്ന ഖ്യാതി നേടിയ തകാഷി ഒമുറ. തന്റെ ചെറു പ്രായത്തിൽ തന്നെ രാജ്യത്തെ ഒരു റെസ്ലർക്ക് നേടാൻ കഴിയുന്ന നേട്ടങ്ങൾ എല്ലാം ഓമുറ നേടി കഴിഞ്ഞതാണ്, സെഡ് വൺ ക്ലൈമാക്സ് ടൂർണമെന്റ് അടക്കം, പറഞ്ഞ് വന്നത് എന്താണെന്നാൽ ഒരു ലെജൻഡറി സ്റ്റാറ്റസ് അയാൾക്ക് ഉണ്ടായിരുന്നു.

🔸എന്നാൽ ഈ സംഭവങ്ങൾ എല്ലാം നടന്ന് കഴിഞ്ഞ് ഏകദേശം പത്ത് വർഷങ്ങൾ കഴിഞ്ഞ് പോയിരിക്കുന്നു, ഓമുറ എന്ന പേര് ഏറെക്കുറെ എല്ലാവരും മറന്ന് പോയിട്ടുണ്ട്. തന്റെ വലത്തെ കാലിന് നേരിട്ട കരിയർ ത്രേട്ടനിങ് ഇഞ്ചുറി കാരണം പഴയ പ്രതാപത്തിന്റെ ഒരു ശില മാത്രമാണ് ഇന്ന് ഒമുറ. ഇത് മറച്ച് വെക്കാൻ എന്നവണ്ണം ഇന്നയാൾ കൈകാര്യം ചെയ്യുന്നത് ഒരു ഹീൽ അല്ലെങ്കിൽ വില്ലൻ കഥാപാത്രത്തെയാണ്. ഈ അവതരണത്തിൽ അയാൾ ഒരു വൻ വിജയം ആണെന്ന് പറയാതെ വയ്യ കാരണം ഇത്രത്തോളം വെറുക്കപ്പെട്ട ഒരു റെസ്ലർ ഇന്ന് ജപ്പാനിൽ ഇല്ല എന്നതാണ് സത്യം.

🔸ഈ വസ്തുതകൾ ഒന്നും ഷോട്ടയ്ക്ക് പിടിയില്ല, ഇത് അറിയുന്ന നിമിഷം അവൻ എങ്ങിനെ പ്രതികരിക്കും എന്നതും തുടർന്ന് ഈ കഥാപാത്രങ്ങളുടെ ഭാവി എന്താവും എന്നതുമൊക്കെയാണ് ഈ ചിത്രത്തിന്റെ പ്രമേയം. ഈ ഒരു ബാക്ക്ഗ്രൗണ്ടിൽ നിന്നും പ്രതീക്ഷിക്കാവുന്ന സ്ഥിരം ക്ലിഷേകളിലേക്ക് പോവാതെ നന്നായി അവസാനിപ്പിച്ചു എന്നത് സിനിമയുടെ പ്ലസ് പോയിന്റുകളിൽ ഒന്നാണ്. ജാപ്പനീസ് റെസ്ലരായ ഹിരോഷി തനഹാശിയാണ് ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നത്, വലിയ ദോഷം ഒന്നും പറയാൻ ഇല്ലാത്ത നൈസ് ഒരു സിനിമ ആണ് മൈ ഡാഡ് ഈസ് എ ഹീൽ റെസ്ലർ.

Verdict : Very Good

DC Rating : 80/100

639. Ford Vs Ferrari (2019)

Director : James Mangold

Genre : Sports

Rating : 7.9/10

Country : USA

Duration : 152 Minutes

🔸ഇത് ഡബിൾ ആക്ടുകളുടെ ടൈം ആണെന്ന് തോന്നുന്നു, വൺസ് അപ്പോൺ എ ടൈം ഇൻ ഹോളിവുഡിലെ ബ്രാഡ് പിറ്റ് ഡി കാപ്രിയോ കോമ്പൊയ്ക്കും ഐറിഷ്‌മാൻ ഫിലിമിലെ ഡി നീറോ അൽ പച്ചിനോ കോമ്പൊയ്ക്കും ശേഷം ഇപ്പോൾ സ്‌ക്രീനിൽ എത്തിയിരിക്കുന്നത് മാറ്റ് ദാമൻ ബ്രാഡ് പിറ്റ് സഖ്യമാണ്, ഒരു റേസിംഗ് പശ്ചാത്തലം ഉള്ള ഫോർഡ് വേഴ്സസ് ഫെറാറി എന്ന ചിത്രത്തിലൂടെ. ഈ വർഷത്തെ നല്ല ചിത്രങ്ങളിൽ ഒന്ന് തന്നെയാണ് ഫോർഡ് വേഴ്സസ് ഫെറാറി, ആ കാര്യം തർക്കം ഏതും ഇല്ലാതെ അംഗീകരിക്കാം,.മുകളിൽ സൂചിപ്പിച്ച മറ്റ് സിനിമകളുടെ നിലവാരത്തിലേക്ക് ഉയർന്നോ എന്നത് സംശയമാണ്.

🔸ഫോർഡും ഫെറാരിയും തമ്മിലുള്ള പ്രശ്നങ്ങൾ കൊടുമ്പിരി കൊണ്ടിരിക്കുന്ന കാലം, ട്രാക്കിൽ നിന്നും മാറി ബിസിനസിലേക്കും എന്തിനധികം രണ്ട് ക്യാമ്പുകളിലേക്കും ഈ വൈരം എത്തിയിരിക്കുകയാണ്. പരസ്പരമുള്ള മത്സരവും അതിൽ നേടുന്ന വിജയവും അഭിമാന പ്രശ്നമായി മാറിയിരിക്കുകയാണ് ചുരുക്കി പറഞ്ഞാൽ. ഈ ഒരവസരത്തിൽ അടുത്ത കാറോട്ട മത്സരത്തിൽ ഫെറാരിയെ തോൽപ്പിക്കുക എന്നത് ഫോർഡിന്റെ പ്രാഥമിക ആവശ്യമായി മാറിയിരിക്കുകയാണ്, ഇതിനായി അവർ കണ്ടെത്തിയിരിക്കുന്നത് മുൻ റേസ് ഡ്രൈവറായ കരോൾ ഷെൽബിയെയാണ്.

🔸രോഗം കാരണം ട്രാക്കിൽ നിന്നും ഒഴിഞ്ഞ ഷെൽബി ഒരു പുതിയ ഫോർഡ് മോഡൽ സൃഷ്ടിച്ച് എടുക്കാനുള്ള തീരുമാനത്തിലാണ്, അതിന് അയാൾ സഹായം അഭ്യർത്ഥിക്കുന്നത് മറ്റൊരു റേസറായ കെൻ മൈൽസിനോടാണ്. മൈൽസ് ആളൊരു ചൂടനാണ്, പെട്ടെന്ന് പ്രകോപിതനാവുന്ന എന്നാൽ ഒന്നും ഒളിച്ച് വെക്കാത്ത പ്രകൃതം. ഈ രണ്ട് കഥാപാത്രങ്ങളുടെ ആത്മബന്ധവും, ചിത്രത്തിൽ അരങ്ങേറുന്ന സംഭവങ്ങൾ ഈ ബന്ധത്തെ ഏത് തലത്തിലേക്ക് കൊണ്ടുപോവുന്നു എന്നതും ഒക്കെയാണ് ഫോർഡ് വേഴ്സസ് ഫെറാരി എന്ന ചിത്രം.

🔸മോശം എന്ന് അനുഭവപ്പെട്ട കാര്യങ്ങളിലേക്ക് കടക്കുക ആണെങ്കിൽ ആദ്യമേ തന്നെ പറയാം ഒരല്പം പ്രെഡിക്റ്റബിൾ ആണ് ചിത്രം, കഥ എവിടേക്ക് ആണ് പോവുന്നത് എന്ന് തുടക്കം തൊട്ട് തന്നെ പിടികിട്ടും, ഈ ഒരു കാരണം കൊണ്ട് തന്നെ രണ്ടര മണിക്കൂർ ഉള്ള ദൈർഖ്യം ചിലയിടത്ത് പോരായ്മയായി തോന്നി. ഇത് ഒഴിച്ച് നിർത്തിയാൽ പ്രത്യക്ഷത്തിൽ പോരായ്മകൾ ഏതും അനുഭവപ്പെട്ടില്ല. പ്രകടനം നോക്കുക ആണെങ്കിൽ രണ്ട് താരങ്ങളും മികച്ചുനിന്നു, പ്രത്യേകിച്ചും ക്രിസ്റ്റിയൻ ബെയ്ൽ, ടെയ്‌ലർ മെയ്ഡ് എന്നൊക്കെ വിശേഷിപ്പിക്കാൻ പറ്റിയ ഒന്നായി തോന്നി അദ്ദേഹത്തിന് ഈ കഥാപാത്രം.

🔸ഒരു റേസിംഗ് ചിത്രം അല്ലെങ്കിൽ ആ ബാക്ക്ഗ്രൗണ്ട് ആണെങ്കിലും നല്ല ബാലൻസ് ഉണ്ട് ഡ്രാമയും ത്രില്ലും തമ്മിൽ, അനാവശ്യമായി ഒന്നും തന്നെ ഇല്ല. രണ്ട് പ്രധാന കഥാപാത്രങ്ങൾക്ക് പുറമെ നല്ലൊരു സപ്പോർട്ടിങ് കാസ്റ്റും ചിത്രത്തിലുണ്ട്, ജോൺ ബെർന്താൽ പ്രത്യേക പരാമർശം അർഹിക്കുന്നുണ്ട്. സിജിഐയുടെ അതിപ്രസരം ഒന്നും ചിത്രത്തിൽ കാണാനില്ല എന്ന് മാത്രമല്ല അത് ഒരു പോസിറ്റീവ് എലമെന്റ് ആയി മാറുന്നുമുണ്ട്. ഓസ്കർ അവാർഡുകളുടെ പടിവാതിലുകൾ തുറക്കാൻ ഒരുങ്ങുന്ന സമയത്താണ് ഫോർഡ് വേഴ്സസ് ഫെറാരി എത്തിയിരിക്കുന്നത്, ബെയ്ൽ ഉൾപ്പെടെ ചില നോമിനേഷൻ സാദ്ധ്യതകൾ കാണുന്നുമുണ്ട്. നല്ലൊരു ചിത്രം തന്നെയാണ് ഫോർഡ് വേഴ്സസ് ഫെറാരി, തീർച്ചയായും കാണാൻ ശ്രമിക്കുക.

Verdict : Very Good

DC Rating : 80/100

586. Fighting With My Family (2019)

Director : Stephen Merchant

Genre : Sports

Rating : 7.2/10

Country : UK

Duration : 108 Minutes

🔸ഈ തൊണ്ണൂറുകളിൽ ജനിച്ച് വളർന്നവരുടെ മിക്കവരുടെയും ചെറുപ്പ കാലത്ത് ചെറുതോ വലുതോ ആയ സാന്നിധ്യമായിരിക്കും റെസ്‌ലിംഗും ഡബ്ള്യു ഡബ്ള്യു ഇയും. കാർഡ്‌സ്, പോസ്റ്റെർസ്, ആഴ്ചകളിൽ മുടങ്ങാതെ ഉള്ള ഷോകൾ, ഇഷ്ടപ്പെട്ട കഥാപാത്രങ്ങൾ തുടങ്ങി പല രീതികളിൽ ഇവ നമ്മുടെ ജീവിതത്തിന്റെ ഭാഗമായിട്ടുണ്ട്. വർഷങ്ങൾ കഴിഞ്ഞ് പോയപ്പോൾ ഇതെല്ലാം വെറും നാടകം ആണെന്നും മറ്റുമുള്ള തിരിച്ചറിവ് ലഭിച്ചപ്പോൾ വലിയൊരു വിഭാഗം ആ താല്പര്യവും മറികടന്ന് പോയി, മറ്റ് ചിലർ അതൊന്നും വിഷയമാക്കാതെ വീണ്ടും അതിന് പിറകെയും. ഈ ചിത്രം എന്നത് ഇതൊക്കെയാണ്, റെസ്ലിങിനോടുള്ള പാഷൻ, ഇഷ്ടം എന്നിവയെല്ലാം സറായ നൈറ്റ് എന്ന യുവതിയുടെ കാണിച്ച് തരികയാണ്.

🔸ഒരു പത്ത് പതിനഞ്ച് വർഷങ്ങൾക്ക് മുൻപ് വരെ ഈ പരിപാടികൾ വലിയ താല്പര്യത്തോടെ നോക്കി കണ്ടിരുന്നു, പിന്നീട് ആ ഇഷ്ടം എന്നോ കൈമോശം വന്നതിനാലാവണം ഈ ചിത്രത്തിൽ പറയുന്ന യഥാർത്ഥ കഥാപാത്രത്തെയോ അവരുടെ കഥയോ വലിയ പിടിയില്ല. അതെ ചിത്രം ഒരു ബയോപിക് ആണ്, പെയ്ജ് എന്ന റെസ്ലറുടെ കഥയാണ് ചിത്രം പറയുന്നത്. കുറച്ച് കൂടി വ്യക്തമായി പറയുക ആണെങ്കിൽ നോർവിച്ചിലെ ചെറുകിട വേദികളിൽ നിന്നും അമേരിക്കയിലെ പേ പെർ വ്യൂ ഇവന്റുകൾ വരെ എത്തിയ അവരുടെ യാത്രയുടെ കഥ.

🔸കുടുംബം അടക്കം റെസ്‌ലർമാരായ നൈറ്റ് ഫാമിലിയിലാണ് പെയ്ജ് അഥവാ സറായ ജനിച്ചത്. അച്ഛൻ ഒരു റെസ്ലിങ് പ്രൊമോട്ടർ ആണെങ്കിൽ അമ്മയും രണ്ട് സഹോദരന്മാരും കറ തീർന്ന റെസ്‌ലർമാർ തന്നെ. തന്റെ ചെറുപ്പ കാലത്ത് മത്സരങ്ങളിൽ ഒന്നിൽ ആളെ തികയ്ക്കാനായി റിങ്ങിൽ കയറിയ നിമിഷം തൊട്ട് സറായായും ഇതിന്റെയൊക്കെ ഭാഗമായി മാറി. ആദ്യ കാലത്ത് വലിയ താല്പര്യം ഒന്നും ഇല്ലെങ്കിൽ കൂടിയും പതിയെ രക്തത്തിൽ അലിഞ്ഞ് ചേർന്ന വികാരം അതിന്റെ ഇഫ്ഫക്റ്റ് സറായയിലും കാണിച്ച് തുടങ്ങി.

🔸അമേരിക്കയിലെ എന്നല്ല ഒരുപക്ഷെ ലോകത്തിലെ തന്നെ ഏറ്റവും വലിയ റെസ്ലിങ് കമ്പനികളിൽ ഒന്നായ ഡബ്ല്യൂഡബ്ള്യുഇയിൽ എത്തണം എന്നതാണ് സ്റായയുടെയും സഹോദരന്റെയും ലക്‌ഷ്യം. ചെറുപ്പം തൊട്ട് റിങ്ങിലും പ്രാക്ടീസ് ഗ്രൗണ്ടിലും ജിമ്മിലും വരെ ചിലവിട്ട ഓരോ നിമിഷവും ആ ഒരു അവസരത്തിന് വേണ്ടിയുള്ളതായിരുന്നു. മുൻപ് ഇതേ അവസരത്തിന് വേണ്ടി അഹോരാത്രം പ്രയത്നിച്ച് ഒടുവിൽ അത് കയ്യാലപ്പുറത്ത് നഷ്ട്ടപ്പെട്ട് പോയ, ആ വിഷമത്തിൽ ജീവിതം തന്നെ കൈവിട്ട് പോയ മൂത്ത ചേട്ടന്റെ കഥ ഒരു പാഠമായി ഇരുവർക്കും മുന്നിലുണ്ട്.

🔸ഒടുവിൽ ഇത്രയും നാളത്തെ പ്രയത്നത്തിന്റെ ഫലം എന്നോണം അവസരം ഇരുവരുടെയും വാതിൽക്കൽ വന്ന് മുട്ടുകയാണ്. ലണ്ടനിൽ നടക്കുന്ന പരിപാടിയ്ക്കിടെ ഒരു ട്രൈ ഔട്ടിന് കമ്പനി ഇരുവരെയും ക്ഷണിക്കുകയാണ്. കഠിനമാണ് അവരുടെ സെലക്ഷൻ പരിപാടി, പങ്കെടുക്കുന്നവരിൽ തൊണ്ണൂറ് ശതമാനം പേരും തിരഞ്ഞെടുക്കപ്പെടാറ് പോലുമില്ല. അങ്ങനെ രണ്ട് കഥാപാത്രങ്ങളും പരിപാടിയിൽ പങ്കെടുക്കാനായി ലണ്ടനിലേക്ക് യാത്ര തിരിക്കുകയാണ്. വലിയ അവകാശ വാദങ്ങൾ ഒന്നും ഇല്ലാത്ത ഒരു ചെറിയ നല്ല സ്പോർട്സ് ഡ്രാമ ആണ് ഫൈറ്റിങ് വിത്ത് മൈ ഫാമിലി.

Verdict : Good

DC Rating : 70/100

452. Creed 2 (2018)

Director : Steven Caple Jr

Genre : Sports

Rating : 8/10

Country : USA

Duration : 117 Minutes

🔸ക്രീഡ് എന്ന ചിത്രത്തിനും റയാൻ കൂഗ്ലെർ എന്ന സംവിധായകനും മൈക്കൽ ജോർദാൻ എന്ന നടനും ലോകത്താകമാനം ഉള്ള റോക്കി സിനിമാ ഫ്രാൻഞ്ചൈസ് ആരാധകർക്ക് ഇടയിലുള്ള സ്ഥാനം ചെറുതല്ല, കാരണം റോക്കി 5 എന്ന അടപടല ദുരന്ത പടത്തിന്റെ റിലീസിന് ശേഷം ചത്തതിന് ഒക്കുമെ എന്ന പരിതാപകരമായ അവസ്ഥയിൽ നിലകൊണ്ടിരുന്ന സീരീസിനെ ഉയർത്തി കൊണ്ടുവന്നത് ഈ ടീമിന്റെ പ്രയത്നം ഒന്ന് കൊണ്ട് മാത്രമാണ്. റോക്കി ബൽബോവ എന്ന ഇതിഹാസ സമാനമായ കഥാപാത്രത്തിനും ക്രീഡ് കൊടുത്ത ഉണർവ് വാക്കുകൾക്ക് അതീതമാണ്, അതിനാൽ തന്നെ മൂന്ന് വർഷം മുൻപ് പുറത്തിറങ്ങിയ ക്രീഡിന് ഒരു രണ്ടാം ഭാഗം വരുന്നു എന്ന വാർത്ത ഒരുപാട് പ്രതീക്ഷയോടെ ആണ് സ്വീകരിച്ചത്, റയാൻ കൂഗ്ലെറിന്റെ വിടവാങ്ങൽ ചില സംശയങ്ങൾ ഉയർത്തിയെങ്കിൽ കൂടിയും ആദ്യ ദിവസം തന്നെ ചിത്രം കാണുന്നതിൽ നിന്നും പിന്മാറാൻ തക്കവണ്ണം മോശമായിരുന്നില്ല പുറത്തിറങ്ങിയ ടീസറും ട്രെയ്ലറും എല്ലാം.

🔸"A Fight Over 30 Years In The Making" എന്ന ടാഗ്‌ലൈനോട് കൂടി പ്രൊമോഷൻ നടത്തിയ ചിത്രം പൂർണമായും ആസ്വദിക്കാൻ ഒരല്പം ചരിത്രം അറിഞ്ഞിരിക്കുന്നത് നന്നാവും, പ്രത്യേകിച്ചും റോക്കി 4 എന്ന ചിത്രം ക്രീഡ് രണ്ടാം ഭാഗത്തിന്റെ കഥയിൽ നിർണ്ണായക സാന്നിധ്യമായി മാറുന്നുണ്ട്. കളത്തിൽ വികാരങ്ങൾ പ്രകടിപ്പിക്കാത്ത, എതിരാളികളെ ഇടിച്ച് ഇടുന്ന ഉപകരണം മാത്രമായ ഇവാൻ ഡ്രാഗോയെ റോക്കി ആരാധകർ അത്ര പെട്ടെന്ന് മറക്കാൻ ഇടയില്ല, പ്രത്യേകിച്ചും ഡ്രാഗോയുടെ ഇടിയേറ്റ് മരണത്തിലേക്ക് പോയികൊണ്ടിരുന്ന അപ്പോളോയുടെ മുന്നിൽ വെച്ച് തീർത്തും നിർവികാരനായി "If He Dies, He Dies" പോലെയുള്ള മരണമാസ്സ്‌ ഡയലോഗ് പടച്ച് വിട്ട ടിയാൻ അന്നും ഇന്നും ഒരു പേടി സ്വപ്നം തന്നെയാണ്. പല വഴികളിലൂടെ ഡ്രാഗോയും, ഡ്രാഗോയുടെ മകനും ക്രീഡും റോക്കിയും അപ്പോളോയുടെ ഓർമകളും എല്ലാം ഈ ചിത്രത്തിൽ ഒത്ത് ചേരുകയാണ്.

🔸ആദ്യ ഭാഗത്തെ സംഭവങ്ങൾക്ക് ശേഷം ബോക്സിങ് റിങ്ങിലേക്ക് മടങ്ങി എത്തിയ അഡോണിസ് ക്രീഡ് തുടർ വിജയങ്ങളുമായി ആരാധക ശ്രദ്ധ ഏറ്റുന്നതും, ഈ വിജയങ്ങൾ അയാളെ പഴയ ഇവാൻ ഡ്രാഗോയുടെ മകൻ വിക്ടർ ഡ്രാഗോയുമായുള്ള നേരങ്കത്തിന് തയാറെടുപ്പിക്കുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. പുതിയ ചിത്രം ആയതിനാലും, സ്‌പോയ്‌ലർ ഒഴുവാക്കാനുള്ള ആഗ്രഹം കാരണവും, അധികം കഥയെ പറ്റി ധാരണ ഇല്ലാതെ കാണുന്നത് ഈ ചിത്രത്തിന്റെ ആസ്വാദനത്തിന് ഗുണം ചെയ്യും എന്നതിനാലും കഥയിലേക്ക് കടക്കുന്നില്ല. ചിത്രം കണ്ട് കൊണ്ടിരിക്കെ മനസ്സിൽ ഉടലെടുത്ത തോന്നൽ തന്നെയാണ് ഈ ചിത്രത്തെ പറ്റി എടുത്ത് പറയേണ്ടത്, ക്രീഡ് 2 എന്ന ചിത്രം അച്ഛൻ - മകൻ ബന്ധത്തിന് ഊന്നൽ കൊടുക്കുന്ന ഒരു ചിത്രമാണ്. ഈ ഒരു വസ്തുതയെ ചിത്രം പല കഥാപാത്രങ്ങളിലൂടെ പല കൈവഴികളിലൂടെ സമീപിക്കുന്നുണ്ട്, ഇവയിൽ എല്ലാം വിജയിക്കുന്നുമുണ്ട്, അതാണ് ചിത്രത്തിന്റെ ശക്തിയും.

🔸തന്റെ വളർച്ചാ കാലഘട്ടത്തിൽ ഇല്ലാതെ പോയ അപ്പോളോയും അഡോനിസും തമ്മിലുള്ള ബന്ധം, സുഹൃത്തിന്റെ മകൻ എന്നതിൽ കവിഞ്ഞ് സ്വന്തം മകൻ എന്ന രീതിയിൽ അഡോണിസിനെ കാണുന്ന റോക്കി, സ്നേഹം പ്രകടിപ്പിക്കുന്നതിൽ അമ്പേ പരാജയമായ റോക്കി എന്ന കഥാപാത്രത്തെ ഒരു തവണ കൂടി സ്റ്റാലോൺ അവിസ്മരണീയമാക്കി എന്ന് പറയേണ്ടി ഇരിക്കുന്നു, ഇതിന് പുറമെ അഡോണിസും അയാളുടെ സന്തതിയും തമ്മിലുള്ള ബന്ധം, എല്ലാത്തിനും പുറമെ ഡോൾഫ് ലൻഡ്‌ഗ്രെനിന്റെ ഇവാൻ ഡ്രോഗോയും മകൻ വിക്ടറും തമ്മിലുള്ള ബന്ധം, ഇവയെല്ലാം ചേർന്നതാണ് ക്രീഡ് 2 എന്ന ചിത്രം, ഇവയ്ക്ക് പുറമെ മറ്റൊരു സബ്പ്ലോട്ട് കൂടി ഉണ്ടെങ്കിലും മുകളിൽ സൂചിപ്പിച്ച സ്‌പോയ്‌ലർ പ്രശനം കാരണം ഒഴിവാക്കുന്നു. ഒരു ബോക്സിങ് അല്ലെങ്കിൽ സ്പോർട്സ് ചിത്രത്തിൽ നിന്നും പ്രതീക്ഷിക്കാവുന്നതിൽ ഏറെ വികാരങ്ങൾക്ക് പ്രാധാന്യം നൽകുന്നുണ്ട് ക്രീഡ് 2, പ്രത്യേകിച്ചും അഡോണിസിന്റെ കുടുംബവും ഒത്തുള്ള രംഗങ്ങൾ മികച്ചതായിരുന്നു.

🔸വിദേശ ഭാഷാ സിനിമകൾ കണ്ട് തുടങ്ങിയ ആദ്യ നാളുകളിൽ കണ്ടവയാണ് റോക്കി, റാംബോ പോലെയുള്ള സിനിമാ സീരീസുകൾ, അതിനാൽ തന്നെ ഇവയോടുള്ള ഇഷ്ടം പറഞ്ഞറിയിക്കാൻ കഴിയാത്തവയാണ്. എന്തിരുന്നാലും ഇതെല്ലാം മാറ്റിവെച്ച് പരിശോധിക്കുക ആണെങ്കിലും ക്രീഡ് 2 എന്ന ചിത്രം നല്ല നിലവാരം പുലർത്തുന്ന ഒന്ന് തന്നെയാണ്, ഉപകരണം പോലെ ഭയം ജനിപ്പിച്ചിരുന്ന ഇവാൻ ഡ്രാഗോയിൽ മനുഷ്യപ്പറ്റുള്ള എന്തെങ്കിലും വികാരം കാണിച്ചത് പഴയ സിനിമകളുടെ ഓർമ വെച്ച് കല്ലുകടി ആയി എന്നത്, തെറ്റ് കണ്ട് പിടിക്കുന്ന മലയാളി സ്വഭാവത്തിനുള്ള ഹോമേജ് ആയിക്കോട്ടെ. ആദ്യ ഭാഗത്തിനോടൊപ്പം ഈ ചിത്രവും നിലവാരത്തിൽ വിമർശകർക്കും, കാത്തിരിപ്പിന് ആരാധകർക്കും ഉള്ള മറുപടി ആണ്. ചിത്രം കാണാൻ തിയേറ്ററിലേക്ക് കടക്കവേ പഴയ 'Gonna Fly Now' ഇട്ട് കേൾപ്പിച്ച ആ റോക്കി ആരാധകനായ മനുഷ്യന് ഇരിക്കട്ടെ ഒരു കുതിരപ്പവൻ.

Verdict : Good

238. Borg Vs Mcenroe (2017)

Director : Janus Metz Pederson

Genre : Sports

Rating : 7/10

Country : Sweden

Duration : 107 Minutes

🔸ക്രിക്കറ്റിൽ ഇന്ത്യയും പാകിസ്ഥാനും പോലെ, ഫുട്ബോളിൽ ബ്രസീലും അർജന്റീനയും പോലെ വാശിയേറിയ ,ഒരു കാലഘട്ടത്തെ കാലഘട്ടത്തെ നിർവചിച്ച ,ആരാധകരെ രണ്ട് തട്ടിൽ നിർത്തിയ ശത്രുതയാണ് ടെന്നിസിൽ ബോർഗും മക്കെൻറോയും തമ്മിൽ.

🔸ബോൺ ബോർഗ്, എഴുപതുകളിലെ ടെന്നീസിലെ അനിഷേധ്യമായ സാന്നിധ്യം. എല്ലാ അർത്ഥത്തിലും ബോർഗിന്റെ ഒത്ത എതിരാളി ആയിരുന്നു മക്കെൻറോ.

🔸ഗ്രൗണ്ടിലും ,പുറത്തും നേർ വിപരീതമായിരുന്നു ഇരുവരും. എത്ര സമ്മർദ്ദം നിറഞ്ഞ സന്ദർഭത്തിലും മനഃസാന്നിധ്യം കൈവിടാത്ത ബോർഗ് കളികൾ ജയിച്ചിരുന്നത് ഒരു പരിധിവരെ തന്റെ മനസ്സിലായിരുന്നു.

🔸മക്കെൻറോ ആണെങ്കിൽ പെട്ടെന്ന് പൊട്ടിത്തെറിക്കുന്ന സ്വഭാവത്തിനുടമയും എടുത്തുചാട്ടക്കാരനും ആയിരുന്നു.അതിനാൽ തന്നെ ഈ ശത്രുത പൊതുവെ അറിയപ്പെട്ടിരുന്നത് ഐസ് ആൻഡ് ഫയർ എന്നായിരുന്നു.

🔸വിംബ്ൾഡൺ ഫൈനലിൽ തന്റെ തുടർച്ചയായ അഞ്ചാം കിരീടം പ്രതീക്ഷിച്ചെത്തിയ ബോർഗിന് നേരിടേണ്ടി ഇരുന്നത് മക്കെൻറോയെ ആയിരുന്നു.വർഷങ്ങൾ നീണ്ടുനിന്ന കുടിപ്പകയ്ക്ക് ഇതിലും നല്ലൊരു അന്ത്യം വേറെ ലഭിക്കാനില്ലായിരുന്നു.

Verdict : Good

204. Battle Of The Sexes (2017)

Director : Jonathan Dayton

Genre : Sports

Rating : 7/10

Country : USA

Duration : 121 Minutes

🔸ഒരു ടെന്നീസ് മത്സരത്തിനായി മുപ്പതിനായിരത്തോളം ജനങ്ങളാണ് അമേരിക്കയിലെ വിവിധ ഭാഗങ്ങളിൽ നിന്നും ടെക്സാസ് ഇൻഡോർ സ്റ്റേഡിയത്തിലേക്ക് അന്ന് ഒഴുകിയെത്തിയത്.

🔸ഒരു സാധാരണ ടെന്നീസ് മത്സരമായിരുന്നില്ല അന്നേദിവസം നടന്നത്. പോർവിളികൾക്കും കളിയാക്കലുകൾക്കും പരിഹാസങ്ങൾക്കും അപ്പുറം ബഹുമാനം നേടിയെടുക്കാനുള്ള ഒരു സ്ത്രീയുടെ ശ്രമം ആയിരുന്നു അത്.

🔸ബില്ലി ജീൻ കിംഗ്, വിമെൻസ് ടെന്നീസിലെ അനിഷേധ്യയ പോരാളി.നേടാനാവുന്നതെല്ലാം കോർട്ടിൽ നിന്നും നേടി കഴിഞ്ഞ പ്രതിഭ.ഇങ്ങനെയൊക്കെ ആയിരുന്നെങ്കിലും പുരുഷന്മാർക്ക് ലഭിക്കുന്ന തുകയുടെ എട്ടിൽ ഒന്ന് മാത്രം നൽകിയാണ് അസോസിയേഷൻ അവരെ അഭിനന്ദിച്ചത്.

🔸ബില്ലിയുടെ എതിരാളി ആണെങ്കിൽ തന്റെ പ്രതിഭയ്ക്ക് മങ്ങലേറ്റെങ്കിലും ,പ്രായമായെങ്കിലും പിടിച്ചുനിൽക്കാൻ ഏതറ്റം വരെയും പോവുന്ന ബോബി റിഗ്‌സും.

🔸ഇരു താരങ്ങളും അന്നേവരെ ടെന്നീസ് ലോകത്തിന് പരിചയമില്ലാത്ത തലത്തിലേക്ക് തങ്ങളുടെ ശത്രുത കൊണ്ടുപോവുകയാണ്. സിനിമകഥകളെ വെല്ലുന്ന യഥാർത്ഥ സംഭവങ്ങളുടെ പശ്ചാത്തലത്തിൽ 2017ലെ മികച്ച ചിത്രങ്ങളിൽ ഒന്ന്.

Verdict : Good

129. As One (2012)

Director : Moon Hyun Sung

Genre : Sports

Rating : 7.2/10

Country : Korea

Duration : 127 Minutes


🔸ഉത്തര കൊറിയയും ദക്ഷിണ കൊറിയയും പോലെ പരസ്പരം വേർതിരിക്കപ്പെട്ട രണ്ട് രാജ്യങ്ങൾ അധികം ഉണ്ടാവില്ല, പരസ്പരം ഉള്ള വൈരാഗ്യവും പകയും കെട്ടടങ്ങാത്ത ഒരു ജനതയാണ് ഇരു രാജ്യത്തും ഉള്ളത്.

🔸കായിക വിഭാഗത്തിലും കാര്യങ്ങൾ ഒട്ടും വ്യത്യസ്തമല്ല ,ഏത് ഇനത്തിൽ ആയാലും ഇരു രാജ്യങ്ങളും നേർക്കുനേർ വന്നാൽ ഒരു യുദ്ധ പ്രതീതി തന്നെയാണ്.

🔸രാജ്യങ്ങളും അധികാരികളും തമ്മിലുള്ള കിടമത്സരം കൈവിട്ട് പോവും എന്ന അവസ്ഥയിൽ എത്തിയപ്പോഴാണ് രാജ്യങ്ങൾ തമ്മിലുള്ള സമാധാന ഉടമ്പടി നിലവിൽ വന്നത്.

🔸ഏവരെയും അത്ഭുതപ്പെടുത്തിക്കൊണ്ട് ഉടമ്പടിയിൽ വന്ന തീരുമാനങ്ങളിൽ ഒന്ന് രണ്ട് രാജ്യങ്ങളും ഒരു ടീമിന്റെ ഭാഗമായി ടേബിൾ ടെന്നീസ് ലോക ചാമ്പ്യൻഷിപ്പിൽ പങ്കെടുക്കും എന്നതായിരുന്നു.

🔸കളിക്കാരുടെയും ആരാധകരുടെയും നെറ്റി ചുളിഞ്ഞെങ്കിലും ഇരു രാജ്യങ്ങളും നിലപാടുമായി മുന്നോട്ട് പോവാം എന്ന തീരുമാനത്തിൽ തന്നെ ആയിരുന്നു ,ആവേശോജ്വലമായ യഥാർത്ഥ സംഭവങ്ങളാണ് ചിത്രത്തിന് ആധാരം.

Verdict : Good

124. Invictus (2009)

Director : Clint Eastwood

Genre : Sports

Rating : 7.4/10

Country : USA

Duration : 133 Minutes

🔸ദീർഘ നാളത്തെ ആഭ്യന്തര കലഹത്തിനും സ്വന്തന്ത്ര്യ പോരാട്ടത്തിനും ശേഷം പ്രസിഡന്റായ നെൽസൺ മണ്ടേല കണ്ടത് വിഭജിക്കപ്പെട്ട ഒരു കൂട്ടം ജനങ്ങളെ ആയിരുന്നു.

🔸മുന്നോട്ടുള്ള വളർച്ചയ്ക്ക് വേണ്ടി ജനതയെ ഒന്നിപ്പിക്കാൻ മണ്ടേല കണ്ടെത്തിയത് വേറിട്ട വഴി ആയിരുന്നു, റഗ്ബി.

🔸വർഗീയ ലഹളകളും പരസ്പരമുള്ള പോർവിളികളും കാരണം വിഭജിക്കപ്പെട്ട ഒരു സമൂഹത്തിന് നിലനില്പില്ലെന്ന് മണ്ടേലയ്ക്ക് നന്നായി അറിയാമായിരുന്നു.

🔸ദേശീയതയ്ക്കും വർണത്തിനും പരസ്പരം ഉള്ള പോർവിളികൾക്കും അപ്പുറം ദക്ഷിണ ആഫ്രിക്കയിലെ ഓരോ വ്യക്തിയെയും ഒന്നിപ്പിക്കുന്ന വികാരം ആയിരുന്നു റഗ്ബി.

🔸യഥാർത്ഥ സംഭവങ്ങളെ ആധാരമാക്കി ക്ലിന്റ് ഈസ്റ്റ്വുഡ് സംവിധാനം ചെയ്ത ചിത്രമാണ് ഇൻവിക്റ്റസ്.

Verdict : Good

80. The Blind Side (2009)

Director : John Hancock

Genre : Sports

Country : USA

Rating : 7.7/10

Duration : 126 Minutes



🔸ഒരു അത്ലെറ്റിന് ചേർന്ന ശരീരം മാത്രമാണ് മൈക്കിന് ജന്മനാ കിട്ടിയ ഭാഗ്യം.

🔸വായിക്കാനും എഴുതാനും ഒക്കെ ഉള്ള മൈക്കിന്റെ കഴിവ് ശരാശരിയിൽ താഴെ മാത്രം.

🔸തന്റെ ചെറുപ്പത്തിൽ തന്നെ അച്ഛനെ നഷ്ട്ടപെട്ട മൈക്ക്, അമ്മയുടെ ലഹരി ഉപയോഗം കാരണം അനാഥനായി  ആണ് വളർന്നത്.

🔸മൈക്കിന്റെ ഫുട്ബോളിലെ കഴിവ് മനസിലാക്കിയ ആൻ എന്ന യുവതി അവന്റെ സംരക്ഷണ ചുമതലകൾ ഏറ്റെടുക്കുകയാണ്.

🔸ഒന്നുമില്ലാത്തവനിൽ നിന്നും ലോകം ഓർക്കുന്ന ലെജന്റിലേക്കുള്ള മൈക്കൽ ഓറിന്റെ യാത്ര ആവേശോജ്ജ്വലമായി അവതരിപ്പിച്ചിട്ടുണ്ട് ഈ ചിത്രം.

Verdict : Good