1246. Elvis (2022)

Director : Baz Luhrmann

Cinematographer : Mandy Walker

Genre : Drama

Country : Australia

Duration : 159 Minutes

🔸ഇരുപതാം നൂറ്റാണ്ടിലെ ഏറ്റവും പോപ്പുലർ ആയ കൾച്ചറൽ ഐക്കൺ, കിങ് ഓഫ് റോക്ക് ആൻഡ് റോൾ എന്ന് പരക്കെ അറിയപ്പെട്ട വ്യക്തിത്വം, മരണ ശേഷം പോലും ഒരുപാട് കോൻസ്പിറേസി തിയറികൾക്ക് ഭാഗമായ വ്യക്തി, സംഗീത ചരിത്രത്തിൽ തന്നെ ഏറ്റവും കൂടുതൽ കോപ്പികൾ വിറ്റഴിഞ്ഞ മ്യൂസിക് ആർട്ടിസ്റ്റ്, ഇങ്ങനെ ഒരുപാട് ഒരുപാട് നേട്ടങ്ങൾ കരസ്തമാക്കിയ എൽവിസ് പ്രസ്‌ലി എന്ന നാൽപത്തി രണ്ട് വയസ്സ് വരെ മാത്രം ജീവിച്ച വ്യക്തിയുടെ കഥയാണ് കഴിഞ്ഞ വർഷം പുറത്തിറങ്ങിയ എൽവിസ് എന്ന സിനിമ. കഴിഞ്ഞ വർഷം പുറത്തിറങ്ങിയ സിനിമകളിൽ മികച്ചവയിൽ ഒന്ന് എന്ന് നിസ്സംശയം പറയാവുന്ന ഒരു സംരംഭം തന്നെയാണ് എൽവിസ്.

🔸പ്രസ്തുത സിനിമ എൽവിസിന്റെ കഥ എന്നതിനൊപ്പം തന്നെ അയാളുടെ മാനേജർ ആയിരുന്ന കോളണൽ പാർക്കരിന്റെയും കഥയാണ്. മിസിസ്പ്പിയിലെ ദരിദ്ര കുടുംബ പശ്ചാത്തലത്തിൽ ജനിച്ച് വളർന്ന എൽവിസ് പിന്നീട് ഒരു ഗ്ലോബൽ സെൻസെഷൻ ആയി മാറിയതിനു പിന്നിൽ തീർച്ചയായും പാർക്കരിന്റെ കൂടി സ്വാധീനം ഉണ്ട് എന്ന് പറയേണ്ടി വരും. പിൽക്കാലത്ത് ഒരുപാട് വിള്ളലുകൾ വീണ, ഒരുപാട് വിവാദങ്ങൾ സൃഷ്ട്ടിച്ച ഒരു ബന്ധം കൂടിയാണ് എങ്കിലും അതിൽ മാത്രം ഒതുങ്ങി നിൽക്കാതെ എല്ലാ വശങ്ങളിൽ കൂടിയും കാര്യങ്ങളെ നോക്കി കാണാൻ സിനിമ തയാറാവുന്നുണ്ട്.

🔸മുന്നേ സൂചിപ്പിച്ചത് പോലെ തന്നെ എൽവിസിന്റെ യൗവനത്തിൽ തുടങ്ങി അയാളുടെ അവസാന പെർഫോമൻസ് വരെ ഉള്ള സംഭവങ്ങൾ സിനിമ കവർ ചെയ്യുന്നുണ്ട്. ഇതിന് പാരലൽ ആയി യൂറോപ്പിൽ നിന്ന് അനധികൃതമായി കുടിയേറി വന്ന്, ഐതിഹസികമായ ഒരു ജീവിതം ജീവിച്ച് തീർത്ത പാർക്കരിന്റെ യാത്രയും അയാളുടെ മരണകിടക്ക വരെ സിനിമ കാണിച്ച് തരുന്നുണ്ട്, അതും ടോം ഹാങ്ക്സ് പോലൊരു നടനിലൂടെ ആണ് അത് അവതരിപ്പിച്ചത് എന്നത് കൂടുതൽ മനോഹരമായ ഒരു സ്റ്റാറ്റ് ആണ്. നല്ലൊരു സിനിമ ആണ് എൽവിസ്, ദൈർഘ്യം ഒരല്പം കൂടി പോയത് പോലെ തോന്നിയെങ്കിലും പോരായ്മയായി പറയാൻ മാത്രം ഇല്ല, കണ്ട് നോക്കുക.

Verdict : Very Good

DC Rating : 4/5

947. Babyteeth (2019)

Director : Shannon Murphy

Genre : Drama

Rating : 7.1/10

Country : Australia

Duration : 120 Minutes

🔸ഒരു ടീൻ റൊമാന്റിക് ഡ്രാമ, മറ്റൊരു ഭാഗത്ത് കൂടി കഥാപാത്രങ്ങളിൽ ഒന്ന് രോഗാവസ്ഥയിൽ ബുദ്ധിമുട്ടുന്ന സബ് പ്ലോട്ട്, സ്വാഭാവികമായും ഫ്രഷ് ഫ്രെഷേയ്യ് എന്ന കമന്റ് നേടാൻ ഇത് മതിയാവും, കാരണം ഈ ആസ്‌പെക്റ്റുകൾ അത്യാവശ്യം നല്ല രീതിയിൽ തന്നെ കൈകാര്യം ചെയ്ത ഒട്ടനവധി സിനിമകൾ കാണിച്ച് തരാൻ കഴിയും. ഈ ഒരു പ്രശനം തലയ്ക്ക് മീതെ വാൾ കണക്കിന് നിക്കുമ്പോൾ പോലും ബോർ അടിപ്പിക്കുന്നില്ല എന്ന് മാത്രമല്ല ഇമോഷണലി കാഴ്ചക്കാരനുമായി കമ്യുണിക്കേറ്റ് ചെയ്യാൻ ചിത്രത്തിന് കഴിയുന്നുണ്ട് എന്നത് ചെറിയ കാര്യമല്ല.

🔸റിത കഞ്ചലസിന്റെ നാടകം അടിസ്ഥാനമാക്കി തയ്യാറാക്കപ്പെട്ട ചിത്രം വെനീസ് ഉൾപ്പെടെ ഉള്ള വേദികളിൽ പ്രദര്ശിപ്പിക്ക പെടുകയും മോശമല്ലാത്ത തോതിലുള്ള ആരാധക നിരൂപക പ്രശംസ കരസ്ഥമാക്കുകയും ചെയ്തിരുന്നു. മിയ്യ എന്ന നമ്മുടെ നായികാ കഥാപാത്രം യൗവനത്തിലേക്ക് കടന്ന് കൊണ്ടിരിക്കുന്ന ഒരു ടീൻ ആണ് എന്ന് പറയാം, ദീർഘ നാളുകളായി കാൻസർ രോഗത്തിന് ചികിത്സ തേടി കൊണ്ടിരിക്കുന്ന ഒരാൾ കൂടിയാണ് അവൾ, അച്ഛനും അമ്മയ്ക്കും മകളുടെ കാര്യത്തിൽ വിഷമം ഉണ്ടെങ്കിലും അത് അവളെ ബാധിക്കാതിരിക്കാൻ ശ്രദ്ധിക്കുന്നുമുണ്ട്.

🔸മിയയുടെ ജീവിതത്തിലേക്ക് അപ്രതീക്ഷിതമായി ആണ് മോസസ് കടന്ന് വരുന്നത്. തോൽവി എന്ന് അക്ഷരം തെറ്റാതെ വിളിക്കാൻ കഴിവുള്ള ഒരു കഥാപാത്രം, ഉത്തരവാദിത്തം കാര്യഗൗരവം എന്നിവയൊന്നും മോസസ് നിൽക്കുന്നതിന്റെ ഏഴ് അയലത്ത് കൂടി പോയിട്ടില്ല. ജോലി എന്നൊരു സാധനം ഇല്ല എന്നത് പോട്ടെ, അതിനായി ഒരു ശ്രമം പോലും അവൻ നടത്തുന്നില്ല എന്ന് കണ്ട വീട്ടുകാർ അവനെ ഒരുനാൾ പടി അടച്ച് പിണ്ഡം വെക്കുകയാണ്. ഇതൊന്നും പോരെങ്കിൽ ചെറിയ തോതിൽ ലഹരി ഉപയോഗവും അതിനോട് അനുബന്ധിച്ചുള്ള അസ്‌കിരതകളും അവനുണ്ട്.

🔸മിയയും ആയും അവളുടെ കുടുംബവും ആയും ഒരു രീതിയിലും ഒത്തുപോവാത്ത കഥാപാത്രം ആണ് മോസസ് എങ്കിലും വിധി മറ്റൊന്നായിരുന്നു, മോസസിനെ തങ്ങളുടെ വീട്ടിലേക്ക് ക്ഷണിക്കാൻ മിയയുടെ മാതാപിതാക്കൾ നിര്ബന്ധിതരാവുകയാണ്. അങ്ങനെ ബേബിടീത് എന്ന ചിത്രം കഥ പറഞ്ഞ് തുടങ്ങുകയാണ്, മികച്ച പ്രകടനങ്ങളും കഥയും ഒക്കെയുള്ള ചിത്രത്തിന്റെ ക്ളൈമാക്സ് ഒരു ഹൈലൈറ്റ് തന്നെയാണ്. ഈ ചിത്രം കണ്ട് കൊണ്ടിരുന്നപ്പോൾ തോന്നിയ കാര്യമാണ്, ഈ തലമുറയിലെ ഏറ്റവും അണ്ടർ ഏപ്രീഷ്യേറ്റഡ് നടന്മാരിൽ ഒരാളാണ് ബെൻ മെൻഡേഴ്‌സൺ എന്നത്, ഇത് തോന്നണുണ്ടായ കാരണം ചിത്രം പറയും.

Verdict : Good

DC Rating : 3.5/5 

866. Little Monsters (2020)

Director : Abe Forsythe

Genre : Comedy

Rating : 6.3/10

Country : Australia

Duration : 94 Minutes

🔸ഒരു സോംബി ചിത്രം, കൊമെടി ജോണർ, ഒന്ന് നോക്കിയാൽ ഒരു രീതിയിലും മിക്സ് ആവാത്ത ഒരു കോമ്പിനേഷൻ ആയി തോന്നിയേക്കാം, ഈ ഒരു സ്രെണിയിൽ ചിത്രങ്ങൾ പുറത്തിറങ്ങുകയോ വിജയിക്കുകയോ ചെയ്തിട്ടില്ല എന്നല്ല മറിച്ച് അതൊരു ലൈറ്റനിംഗ് ഇൻ എ ബോട്ടിൽ എന്നൊക്കെ വിശേഷിപ്പിക്കാവുന്ന പരിപാടി ആണ്, വിജയിക്കാൻ വളരെ സാധ്യത കുറഞ്ഞ ഒരു കൈവിട്ട കളി. ഈ ഒരു ഹിമാലയൻ ടാസ്ക് അതിജീവിക്കാൻ ഉള്ള കരുത്ത് ലിറ്റിൽ മോൺസ്റ്റെർസ് എന്ന ചിത്രത്തിന് ഉണ്ടോ എന്നതായിരുന്നു യഥാർത്ഥ ചോദ്യം. അതിനുള്ള ഉത്തരത്തിലേക്ക് കടക്കുന്നതിന് മുന്നേ ഒരു കാര്യം കൂടി, ഇത്തരം സിനിമകളിൽ താല്പര്യം ഉള്ളവരാണ് നിങ്ങളെങ്കിൽ ത്രീ ഫ്ലേവർസ് കോർനെറ്റോ ത്രിലോഗി കാണാൻ ശ്രമിക്കുക.

🔸നമ്മുടെ നായക കഥാപാത്രമായ ഡേവ് ആളൊരു മ്യുസിഷ്യൻ ആണ്, തെറ്റിദ്ധരിക്കരുത് ആള് ഈ മേഖലയിൽ ഉന്നത നിലയിൽ ഒന്നും എത്തിയിട്ടില്ല ഇതുവരെ, ഒരു സ്ട്രീറ്റ് സിംഗർ എന്നൊക്കെ പറഞ്ഞ് വിടാം. അത്യാവശ്യം ജീവിച്ച് പോകാനുള്ള വരുമാനം ഉണ്ടാക്കാം എന്നതൊഴിച്ചാൽ വലിയ മെച്ചം ഒന്നും തന്നെയില്ല, ഡേവ് ഉദ്ദേശം പത്ത് വർഷത്തിൽ അധികമായി ബെത് എന്ന യുവതിയുമായി പ്രണയത്തിലാണ് മാത്രമല്ല ഒരു ലിവ് ഇൻ റിലേഷനിലുമാണ്. എന്നാൽ ബെത്തിന് ഡേവിന്റെ ഈ കെയർ ഫ്രീ സ്വഭാവത്തിലും ആറ്റിറ്റിയൂഡിലും ഒന്നും ലവലേശം മതിപ്പില്ല, സ്വാഭാവികമായും അത് ഒരു ബ്രെയ്ക്കിങ് പോയിന്റിൽ എത്തി നിൽക്കുകയാണ്.

🔸ബെത്തിന്റെ വീട്ടിൽ നിന്ന് പുറത്താക്കപ്പെട്ട ഡേവ് ഒരു പ്രശ്ന പരിഹാരത്തിന് ഒക്കെ ശ്രമിക്കുന്നുണ്ട് എങ്കിലും അത് അത്ര ഫലവത്ത് ആവുന്നില്ല, പോരാത്തതിന് അവളുടെ പുതിയ കാമുകന്റെ കയ്യിൽ നിന്നും കണക്കിന് കിട്ടുകയും ചെയ്തു. അങ്ങനെ ആകെ എല്ലാ രീതിയിലും തേഞ്ഞ് തരിപ്പണമായി മറ്റ് മാർഗം ഒന്നും ഇല്ലാത്ത അവസ്ഥയിലാണ് ഡേവ് സഹോദരിയുടെ വീട്ടിൽ താമസത്തിന് എത്തുന്നത്, അവിടെ അവരും മകളും മാത്രമേയുള്ളു, ആ കുഞ്ഞിനെ ആണെങ്കിൽ ഡേവിന് കണ്ണെടുത്താൽ കണ്ടൂടാത്ത അവസ്ഥയുമാണ്. തന്റെ ഈ ദുരന്താവസ്ഥയിൽ അവനോടുള്ള ഇടപഴകലുകളും അവന്റെ ചോദ്യങ്ങളും സംശയങ്ങളും എല്ലാം അയാളെ മടുപ്പിക്കുന്നെ ഉള്ളൂ, ഗത്യന്തരം ഇല്ലാത്ത കൊണ്ട് മുന്നോട്ട് പോവുന്നു എന്ന് പറയാം.

🔸ഇങ്ങനെ പോയി കൊണ്ടിരുന്ന കഥയിൽ ഒരു ട്വിസ്റ്റ് സംഭവിക്കുന്നത് അപ്രതീക്ഷിതമായി ആ പ്രദേശത്ത് ഒരു സോംബി ഔട്ട്‍ബ്രെയ്ക്ക് ഉണ്ടാകുമ്പോഴാണ്, തുടർന്ന് എന്ത് സംഭവിക്കുന്നു എന്നതാണ് ചിത്രത്തിൽ കാണിച്ചിരിക്കുന്നത്. മുകളിൽ സൂചിപ്പിച്ചിട്ടില്ലാത്ത ഒരു ടീച്ചർ കഥാപാത്രമായി ആണ് ലുപിറ്റ നിയോങ്കോ ചിത്രത്തിൽ പ്രത്യക്ഷപ്പെടുന്നത്, അവരാണ് ചിത്രത്തിന്റെ സോളും. സമയം കളയാൻ വെറുതെ കാണാം എന്നതൊഴിച്ചാൽ എടുത്ത് പറയാൻ മാത്രം ഒന്നും തന്നെ ചിത്രത്തിൽ ഇല്ല, മുഷിപ്പിക്കാൻ സാധ്യത ഇല്ല എന്നത് വേറെ കാര്യം. ചുരുക്കി പറഞ്ഞാൽ കണ്ടാലും കണ്ടില്ലെങ്കിലും നഷ്ടമില്ല.

Verdict : Average

DC Rating : 2.5/5

825. Tanna (2015)

Director : Bentley Dean

Genre : Romance

Rating : 6.9/10

Country : Australia

Duration : 100 Minutes

🔸ചില പ്രണയങ്ങൾ അങ്ങിനെയാണ് ലോകം മുഴു വൻ ഇടിഞ്ഞു വീഴുമെന്ന് പറഞ്ഞാലും പരസ്പ്പരം കോർത്തു പിടിച്ച കൈകളെ വേർതിരിക്കാൻ ചിലപ്പോൾ മരണത്തിന് പോലും സാധ്യമാകാതെ വരും. എന്ത്‌ തരത്തിലുള്ള ഭീക്ഷണികളും, മാന സികമായി തിരിച്ചുവിടുന്ന ഉപദേശങ്ങളെയുമൊ ക്കെ അവർ ചിരിച്ചുകൊണ്ട് തള്ളിക്കളയും, അവ ർക്ക് മുൻപിൽ തോൽക്കുകയെ മറ്റുള്ളവർക്കു നിവൃത്തിയുള്ളൂ, അല്ല എങ്കിൽ അവരുടെ സ്നേ ഹം നിങ്ങളെ തോൽപ്പിക്കും.. അതി മാരകമായി തന്നെ.. അത്തരമൊരു സുന്ദര പ്രണയകാവ്യമാ ണ് ഈ ചിത്രം. 

🔸പസഫിക്കിലെ 'Tanna' എന്ന മഴക്കാടുകൾക്കു ള്ളിലാണ് അവരുടെ അധിവാസം.. പുരാതനമായ ഒരുകൂട്ടം ആദിവാസി വർഗ്ഗം അവരുടെ ആചാര അനുഷ്ടാനങ്ങളും ചില അതിർ വരമ്പ് പ്രശ്നങ്ങ ളുമൊക്കെയായി പരസ്പരം തമ്മിലടിച്ചും തർക്ക ങ്ങളിലേർപ്പെട്ടുമെല്ലാം ജീവിച്ചു പോരുന്നു, ഇവരുടെ കൂട്ടത്തിലെ അവസാന തലമുറയിൽ പ്പെട്ടവരാണ് ഇവർ ആയതിനാൽ തന്നെ എണ്ണ ത്തിൽ വളരെ കുറവുമാണവർ, ഇക്കാരണങ്ങളാ ൽ തന്നെ തമ്മിലടി ഒഴിവാക്കുന്നതിനായുള്ള ഉട മ്പടിയിയുടെ ഭാഗമായ് ഒരു വിഭാഗത്തിൽ നിന്നു മുള്ള ഗോത്ര പ്രമുഖന്റെ പ്രായം തികഞ്ഞ മകളെ (Wawa) യെ എതിർ ഭാഗത്തേക്ക് വിവാഹം കഴി ച്ചു കൊടുക്കാൻ ധാരണയാകുന്നു. 

🔸എന്നാൽ 'Wawa' സ്വവിഭാഗത്തിലുള്ള 'Dain' എന്ന ചെറുപ്പക്കാരനുമായി പ്രണയത്തിലാണ്. പക്ഷെ അവർക്ക് അവരുടെ ഈ ബന്ധത്തിന് വേണ്ടി ആരിൽ നിന്നും യാതൊരു രീതിയിലുമുള്ള പിന്തു ണയും ലഭിക്കുന്നില്ല. സ്വവിഭാഗത്തിൽ നിന്നും തന്നെ അറേഞ്ച് ചെയ്ത് മുതിർന്നവർ അംഗീക രിച്ചു തീരുമാനിക്കുന്ന വിവാഹം അല്ലാതെ പ്രണ യവിവാഹം അവരുടെ രീതികളിലും തുടർന്ന് പോ ന്നിരുന്ന അനുഷ്ടാന നിയമങ്ങളിലും ശീലമില്ലാ ത്തതാണ് അതിന് കാരണം. അവർക്ക് പരസ്പരം ഒന്നിക്കാൻ കഴിയുമോ..? അവർ ഒന്നിക്കുന്നതിന് സാക്ഷിയാവുന്നതാര്..? എന്നതിനെല്ലാമുള്ള ഉത്തരമാണ് 'Tanna' എന്ന ഈ കൊച്ചു ചിത്രം പറയുന്നത്. ഇതൊരു Real Life Story ആണ് എന്നതും, ഈ Wawa - Dain പ്രണയം കൊണ്ട് അവരുടെ ഗോത്ര വിഭാഗത്തി ലെ തുടർന്ന് പോന്നിരുന്ന ചില നിയമങ്ങൾക്ക് വകതിരിവുള്ള., മനുഷ്യത്വത്തിന്റെ കാതലായ ചില മാറ്റം സംഭവിച്ചു എന്നതുമൊക്കെ കൗതുക മുണർത്തുന്ന ഒന്നായിരുന്നു. 

🔸ചിത്രം തുടങ്ങുന്നത് തന്നെ കോഴികളുടെ ചിറയ ലും, പക്ഷികളുടെ ചിലക്കലുമൊക്കെയായി പ്രകൃ തിയിലേക്ക് കാതു കൂർപ്പിച്ചു കൊണ്ടാണ്.. ഒപ്പം കണ്ണുകൾ നന്നായി തുറന്ന് കുളിർമ്മയോടെ മാ ത്രം ആസ്വദിക്കാവുന്ന നയന മനോഹാരിതയുടെ ഫ്രെമുകളും കാണാവുന്നതാണ്. ചിത്രത്തിൽ വള രെ പ്രധാനമർഹിക്കുന്ന ചില രംഗങ്ങൾക്ക് സാ ക്ഷിയാവുന്ന അഗ്നിപർവ്വതത്തെയും പരിസരങ്ങ ളെയും വർണ്ണിക്കാൻ വാക്കുകൾ മതിയാവില്ല. എന്തായാലും കണ്ടു തന്നെ അറിയുക നഷ്ടമാവി ല്ല തീർച്ച.

Verdict : Very Good

DC Rating : 80/100

630. The King (2019)

Director : David Michod

Genre : Historical

Rating : 7.2/10

Country : Australia

Duration : 140 Minutes

🔸ഈ അധികാര വടംവലി, യുദ്ധം, ഭരണത്തിന് വേണ്ടിയുള്ള തൊഴുത്തിൽ കുത്തുകൾ തുടങ്ങിയവയെല്ലാം പ്രമേയം ആവുന്ന ചിത്രങ്ങളോട് പണ്ട് തൊട്ടേ ഇഷ്ടക്കൂടുതലുണ്ട്, ഈ കാരണം കൊണ്ട് തന്നെയാണ് ഗെയിം ഓഫ് ത്രോൺസ് ഇപ്പോഴും വ്യക്തിപരമായി ഏറ്റവും ഇഷ്ട്ടപ്പെട്ട ടീവി സീരീസുകളിൽ ഒന്നായി തുടരുന്നത്. ദി കിംഗ് എന്ന നെറ്റ്ഫ്ലിക്സ് ചിത്രത്തോടും മേല്പറഞ്ഞ കാരണങ്ങളാൽ ഒരു താല്പര്യം ഉണ്ടായിരുന്നു, ഒരുപാട് പ്രതീക്ഷയും. നല്ലൊരു കാസ്റ്റും ഹിസ്റ്റോറിക്കൽ ബാക്ക് ഗ്രൗണ്ടും എല്ലാം ചിത്രത്തിൽ പ്രതീക്ഷ ഏറ്റിയ മറ്റ് ഘടകങ്ങൾ ആയിരുന്നു താനും.

🔸ഹെൻറി നാലാമൻ രാജാവ് ഇംഗ്ലണ്ട് ഭരിക്കുന്ന കാലഘട്ടത്തിലാണ് ചിത്രം ആരംഭിക്കുന്നത്, ഒരു ഭരണാധികാരി എന്ന നിലയ്ക്ക് തികഞ്ഞ പരാജയമാണ് ഹെൻറി നാലാമൻ. രാജ്യത്തിൻറെ സാമ്പത്തിക വ്യവസ്ഥ മുഴുവൻ തകർത്ത് തരിപ്പണമാക്കി എന്ന് മാത്രമല്ല അയൽ രാജ്യങ്ങളുമായി എല്ലാം യുദ്ധാന്തരീക്ഷത്തിലാണ്. ഇതൊന്നും പോരെങ്കിൽ സ്വന്തം ജനങ്ങൾക്കിടയിൽ പോലും വലിയ പ്രചാരം ഇന്ന് ഹെൻറി നാലാമനില്ല. അസുഖവും മറ്റും കാരണം ഏറെക്കുറെ തന്റെ ജീവിതത്തിന്റെ അവസാന നാളുകളിലേക്ക് കടന്നിരിക്കുകയാണ് അയാൾ.

🔸ഹെൻറി നാലാമന് മൂന്ന് മക്കൾ, മൂത്തവൻ ഹാൽ, അതിന് ശേഷം തോമസ്, ഏറ്റവും ഇളയവൾ ഫിലിപ്പ. തിമോത്തി ചലമറ്റ് അവതരിപ്പിച്ച ഹാൽ ആണ് നമ്മുടെ കേന്ദ്ര കഥാപാത്രം, പ്രായത്തിൽ കവിഞ്ഞ പക്വതയും വിവരവും വകതിരിവും എല്ലാമാണ് ഹാലിന്റെ സവിശേഷതകൾ. അയൽ രാജ്യക്കാരുമായി നിരന്തരം യുദ്ധത്തിനിറങ്ങുന്ന അച്ഛന്റെ നിലപാടിനോട് എല്ലാ കാലത്തും തികഞ്ഞ എതിർപ്പ് പ്രകടിപ്പിച്ചിട്ടുള്ള ഹാൽ പൊതുവെ അനുനയ സമാധാന രീതികളുടെ ആരാധകനാണ്. ഈ ഒരു രീതി കൊണ്ടുതന്നെ അച്ഛനും മകനും തമ്മിലുള്ള ബന്ധം മുൻപേ ഉലഞ്ഞതാണ്, പരസ്പരം കാണാൻ പോലും ഇരുവരും താല്പര്യപ്പെടാറില്ല.

🔸രണ്ടാമത്തെ മകനായ തോമസ് ഏറെക്കുറെ അച്ഛന്റെ തനി പകർപ്പാണ്, എടുത്തുചാട്ടം എതിരാളികളോടുള്ള ഒടുങ്ങാത്ത പക, നിയന്ത്രിക്കാൻ കഴിയാത്ത ദേഷ്യം, ചിന്തിക്കാനുള്ള വകതിരിവ് ഇല്ലായ്മ തുടങ്ങി ഒരു ഭരണാധികാരി ഒരിക്കലും വെച്ച് പൊറുപ്പിക്കാൻ പാടില്ലാത്ത രീതികളുടെയും ചേഷ്ടകളുടെയും സ്വഭാവത്തിന്റെയും ഉടമയാണ് തോമസ്. തന്റെ കാലശേഷം തോമസ് അധികാരത്തിൽ വരണം എന്നാണ് ഹെൻറി നാലാമന്റെ ആഗ്രഹം, രാജാവിന്റെ തീരുമാനം അന്തിമം ആയതിനാലും ഭരണം എന്നതിനോട് ഹാൽ വലിയ താല്പര്യം കാണിച്ചിട്ടില്ലാത്തതിനാലും ഏറെക്കുറെ ആ നീക്കത്തിന് തന്നെയാണ് കളം ഒരുങ്ങിയതും.

🔸എല്ലാം വിധിയുടെ വിളയാട്ടം എന്നൊക്കെ പറയാറുള്ള പോലെ ചില അപ്രതീക്ഷിത സംഭവങ്ങൾ ഈ കാലയളവിൽ ഇംഗ്ലണ്ടിൽ അരങ്ങേറുകയാണ്, ഇതിന്റെയെല്ലാം പരിണിത ഫലമായി ഒട്ടും പ്രതീക്ഷിക്കാതെ ഹാൽ രാജാവായി അവരിധിക്കപ്പെടുകയാണ്. ഭരണാധികാരി എന്ന പരിചയക്കുറവിന് പുറമെ വലിയ വെല്ലുവിളികളാണ് ഹാലിന് നേരിടേണ്ടി ഇരുന്നത്, അതിൽ ഏറ്റവും പ്രധാനം തനിക്ക് വിശ്വസിക്കാൻ കഴിയുന്ന ചിലരെ തനിക്ക് ചുറ്റും അണി നിരത്തുക എന്നതായിരുന്നു. ചലമറ്റ്, എഡ്ഗർട്ടൻ, റോബർട് പാറ്റിൻസൺ, മെൻഡിൽസൺ തുടങ്ങി നല്ലൊരു കാസ്റ്റ് ആണ് ഈ നെറ്റ്ഫ്ലിക്സ് ചിത്രത്തിന് ഉള്ളത്, നല്ലൊരു കഥയും വലിയ മോശമൊന്നും കൂടാതെ പറഞ്ഞ് പോവുന്നുണ്ട്, ദൈർഖ്യം മാത്രം ഒരല്പം കല്ല് കടിയായി അനുഭവപ്പെട്ടു.

Verdict : Good

DC Rating : 75/100

572. Picnic At Hanging Rock (1975)

Director : Peter Weir

Genre : Thriller

Rating : 7.5/10

Country : Australia

Duration : 115 Minutes

🔸ഏതെങ്കിലും കഥാപാത്രത്തിന്റെയോ അല്ലെങ്കിൽ ഒന്നിൽ അധികം കഥാപാത്രങ്ങളുടെയോ തിരോധാനം പ്രമേയമാക്കി കൊണ്ട് വരുന്ന സിനിമകൾ കാണാൻ ഒരു പ്രത്യേക രസം തന്നെയാണ്, വേറൊന്നുമല്ല ഒരു മിസ്റ്ററി ഫീൽ ആദ്യാവസാനം ഈ ചിത്രങ്ങൾ നിലനിർത്തി പോവാറുണ്ട്. ഉദ്ദേശം എട്ട് വർഷങ്ങൾക്ക് മുന്നേ പുറത്തിറങ്ങിയ ചിൽഡ്രൻ എന്ന കൊറിയൻ ചിത്രം ഈ വിഭാഗത്തിൽ ഉൾപ്പെടുത്താവുന്ന ഒന്നാണ്. ഒരു സിനിമാ ആരാധകൻ എന്ന നിലയ്ക്ക് ഈ ചിത്രങ്ങളോട് വലിയ താല്പര്യം എല്ലാ കാലത്തും തോന്നിയിരുന്നു, അത് തന്നെ ആണ് പിക്നിക് അറ്റ് ഹാങ്ങിങ് റോക്ക് എന്ന ഓസ്‌ട്രേലിയൻ ചിത്രം കാണാൻ ഉണ്ടായ പ്രചോദനവും.

🔸മുകളിൽ സൂചിപ്പിച്ചത് പോലെ തന്നെ ഒരു കാണാതാവലിന്റെ കഥയാണ് ചിത്രം, മൂന്ന് വിദ്യാർത്ഥികളുടെയും ഒരു അധ്യാപികയുടെയും തിരോധാനം. ഇവിടെ പക്ഷെ ശ്രദ്ധ ചെലുത്തേണ്ട വിഷയം മറ്റൊന്നാണ്, ഈ തിരോധാനത്തിന്റെ ചുറ്റുപാടും പശ്ചാത്തലവും എല്ലാമാണ് കൂടുതൽ നിഗൂഡം. ചിത്രത്തിന് ആസ്പദമായ സംഭവം അരങ്ങേറുന്നത് ഇരുപതാം നൂറ്റാണ്ടിന്റെ ആരംഭത്തിലാണ്, ഒരു വാലെന്റൈൻസ് ഡേ ദിനത്തിൽ. ഓസ്‌ട്രേലിയയിലെ വളരെ പ്രശസ്തവും, അച്ചടക്കത്തിന് പേര് കേട്ടതുമായ ഒരു സ്‌കൂളിൽ നിന്നും വിദ്യാർഥികൾ ഒരു ടൂർ പോവുകയാണ്, തങ്ങളുടെ സ്‌കൂളിന് അടുത്ത് തന്നെയുള്ള ഒരു പാറ കെട്ടാണ് ഇവരുടെ ലക്ഷ്യ സ്ഥാനം.

🔸ഇത് പോലുള്ള ഒഴിവ് ദിവസങ്ങൾ ലഭിക്കുന്നത് അപൂർവം ആയതിനാലും കർക്കശക്കാരിയായ മദർ സുപ്പീരിയറിന്റെ കൺവെട്ടത്ത് നിന്ന് ഒരു ദിവസം എങ്കിൽ ഒരു ദിവസം രക്ഷപ്പെടാൻ കഴിഞ്ഞതിനാലും വിദ്യാർഥികൾ എല്ലാവരും ആർത്തുല്ലസിക്കാൻ ഉള്ള മൂഡിൽ ആയിരുന്നു, കളിയും ചിരിയും തമാശകളും എല്ലാമായി ആ ദിവസം ഉച്ചയോട് അടുത്തു. വൈകിട്ട് എട്ട് മണിക്ക് മുന്നേ മടങ്ങി എത്തണം എന്ന കർശനമായ ഉത്തരവുണ്ട്, മദർ സുപ്പീരിയറിന്റേത്. എന്നാലും സമയം ബാക്കി ഉള്ളതിനാൽ ഒരു കൂട്ടം വിദ്യാർഥികൾ പാറക്കെട്ടിന് മുകളിലേക്ക് കയറാൻ തീരുമാനിച്ചു.

🔸ഈ കയറ്റം അല്പം ക്ലേശകരം ആണെങ്കിൽ കൂടിയും അല്പം ശ്രമകരമായ അവർ ഉദ്യമത്തിൽ വിജയിക്കുകയാണ്, എന്നാൽ ഇവിടെ നിന്നും കഥ മാറുകയാണ്. കഠിനമായ യാത്രയും മല കയറ്റവും എല്ലാം കാരണം ക്ഷീണിതരായ യുവതികൾ ഒരല്പം വിശ്രമിക്കാൻ തീരുമാനിച്ചെങ്കിലും ഇവരിൽ ഒരാൾ പിന്നീട് കാണുന്ന കാഴ്ച ബാക്കിയുള്ള യുവതികൾ ആരുടെയോ പ്രേരണ എന്നപോൽ കെട്ടിന് ഉള്ളിലേക്ക് നടന്ന് കയറുന്നതാണ്. ആലസ്യത്തിൽ എന്ന പോലെ അവളുടെ നിലവിളിക്കും വിലക്കലിനും ഒന്നും അവർക്ക് മറുപടികൾ ഉണ്ടായിരുന്നില്ല, ഈ കടന്ന് പോയ കഥാപാത്രങ്ങൾ അപ്രത്യക്ഷരാവുകയാണ് എന്ന് അതിശയോക്തി ഒരല്പം കലക്കി പറയാം.

🔸ഇവിടെ നിന്നുമാണ് പിക്നിക് അറ്റ് ഹാങ്ങിങ് റോക്ക് എന്ന ചിത്രം ആരംഭിക്കുന്നത്, ഇതേ പേരിൽ കുറച്ച് വർഷങ്ങൾക്ക് മുന്നേ ഒരു ടീവി സീരീസ് പുറത്തിറങ്ങി എന്നറിഞ്ഞെങ്കിലും കൂടുതൽ അറിവില്ല ഈ കാര്യത്തിൽ. ഒരു ഡ്രീം പോലെയാണ് ചിത്രം പുരോഗമിക്കുന്നത്, കഥാപാത്രങ്ങൾ അടിമപ്പെട്ട ആലസ്യം ഒരു പരിധി വരെ ചിത്രം കാണുമ്പോൾ നമുക്കും അനുഭവപ്പെടുന്നുണ്ട്. കൂടുതൽ സ്പോയ്ലർ ആയ ഭാഗങ്ങളിലേക്ക് കടക്കുന്നില്ല, കഴിയും എങ്കിൽ, താല്പര്യം തോന്നുന്നെങ്കിൽ കാണാൻ ശ്രമിക്കുക, ഒരു വിധത്തിലും നഷ്ടം ആവില്ല ഈ ചിത്രം.

Verdict : Good

DC Rating : 78/100

557. Hotel Mumbai (2019)

Director : Anthony Maras

Genre : Thriller

Rating : 7.6/10

Country : Australia

Duration : 125 Minutes

🔸സ്വാതന്ത്ര്യാനന്തര ഇന്ത്യയുടെ ചരിത്രത്തിലെ ഏറ്റവും കറുത്ത അധ്യായങ്ങളിൽ ഒന്നാണ് പതിനൊന്ന് വർഷങ്ങൾക്ക് മുന്നേ അരങ്ങേറിയ മുംബൈ ഭീകരാക്രമണ സംഭവം. ഉദ്ദേശം ഇരുന്നൂറിനടുത്ത് സാധാരണക്കാരുടെയും ഒരുപറ്റം ധീരന്മാരായ നീതി പാലകരുടെയും ജീവൻ കവർന്നെടുത്ത ഈ സംഭവം ലോകത്തിലെ തന്നെ ഏറ്റവും വലിയ തീവ്രവാദ പരമ്പരകളിൽ ഒന്നായിരുന്നു. ഈ സംഭവങ്ങളുടെ നേർ സാക്ഷ്യം ആണ് ഹോട്ടൽ മുംബൈ എന്ന പ്രസ്തുത ചിത്രം, സംഭവം നടന്ന കാലയളവിൽ അവ തത്സമയം ഒരല്പം പേടിയോടെ ടീവിയിൽ കണ്ട ആളെന്ന നിലയ്ക്ക് ഒരല്പം ഇമോഷണൽ അറ്റാച്ച്മെന്റ് കൂടിയുണ്ട് ഈ ചിത്രത്തോടും അതിന് കാരണമായ സംഭവങ്ങളോടും.

🔸താജ് ഹോട്ടൽ, ഒബ്‌റോയ് ഹോട്ടൽ, റെയിൽവേ സ്റ്റേഷൻ തുടങ്ങി പന്ത്രണ്ടോളം സ്ഥലങ്ങളിൽ നാല് ദിവസത്തോളം നീണ്ട് നിന്ന ഒന്നായിരുന്നു മുംബൈ ഭീകരാക്രമണ പരമ്പര. പുറത്ത് നിന്നുള്ള രക്ഷാപ്രവർത്തനത്തെക്കാൾ അകത്തുള്ള ജോലിക്കാരുടെയും അതിഥികളുടെയും ചെറുത്ത് നിൽപ്പാണ് ഹോട്ടൽ മുംബൈ എന്ന ചിത്രത്തിന്റെ പ്രമേയം. ഇതിൽ തന്നെ പ്രധാന കഥാപാത്രങ്ങൾ മിക്കതും ഫിക്ഷനൽ ആണ്. ഈ വസ്തുത കൊണ്ട് തന്നെ ആദ്യാവസാനം ഇവരുടെ ഭാവിയെ സംബന്ധിച്ച് ഒരു സസ്പെൻസ് നില നിൽക്കുന്നുണ്ട്. ഈ കഥാപാത്രങ്ങളിൽ ചിലത് അവതരിപ്പിച്ചിരിക്കുന്നത് ദേവ് പട്ടേൽ, അർണി ഹാമർ, അനുപം ഖേർ, ജെയ്‌സൺ ഐസക് എന്നിവരാണ്.

🔸വർഷങ്ങളുടെ പാരമ്പര്യം ഉള്ള ഹോട്ടലാണ് മുംബൈയിലെ താജ് ഹോട്ടൽ, നഗരത്തിന്റെ ഒഴിവാക്കാൻ കഴിയാത്ത ഒരു ഭാഗം, കോർണർ പോയിന്റ്‌ എന്നൊക്കെ പറയാം. അതിഥികളെ ദൈവ സമാനരായി കാണണം എന്നതാണ് അവിടത്തെ ജോലിക്കാർ പഠിച്ച പാഠം. തങ്ങളേക്കാൾ പ്രാധാന്യവും, തങ്ങളുടെ കുടുംബത്തേക്കാൾ പരിചരണവും അതിഥികളായി എത്തിയവർക്ക് നൽകിയാണ് അവർക്ക് ശീലം. ഈ ഒരു പശ്ചാത്തലം കൂടി കണക്കിലെടുത്ത് കൊണ്ട് വേണം ചിത്രം കാണാൻ. നഗരത്തിലെ പന്ത്രണ്ടോളം സ്ഥലങ്ങളിൽ ആക്രമണം നടക്കുന്നുണ്ടെങ്കിലും ചിത്രം ഫോക്കസ് ചെയ്യുന്നത് താജ് ഹോട്ടലിലേക്കാണ്.

🔸താജ് ഹോട്ടലിലെ ഷെഫ് ആയ അർജുൻ എന്ന ദേവ് പട്ടേലിന്റെ കഥാപാത്രം, ചീഫ് ഷെഫ് ആയ അനുപം ഖേറിന്റെ ഹേമന്ത് ഒബ്‌റോയ്, അതിഥികളായി ഡേവിഡ്, ഭാര്യ സെഹ്റ, റഷ്യക്കാരനായ വാസിലി എന്നിവരിലാണ് കഥ ഫോക്കസ് ചെയ്യുന്നത്. തീവ്രവാദികൾ ആക്രമണം അഴിച്ച് വിടുന്ന രാത്രി ഹോട്ടലിന്റെ വിവിധ കോണുകളിലായി ഇവരെല്ലാം പെട്ട് പോവുകയാണ്, അക്രമണകാരികളുടെ കണ്ണിൽ പെടാതെ ഹോട്ടലിൽ നിന്നും ജീവനോടെ രക്ഷപ്പെടുക എന്ന ഏറ്റവും ബേസിക് ആയ ആവശ്യത്തിലേക്ക് ഇവരെല്ലാം ഒതുങ്ങുമ്പോൾ ലഭിക്കുന്നത് നല്ലൊരു ത്രില്ലെർ ചിത്രമാണ്.

🔸വളരെ സെന്സിറ്റിവായ ഒരു വിഷയമാണ് ചിത്രം കൈകാര്യം ചെയ്തിരിക്കുന്നത് എങ്കിലും അധികം വിവാദത്തിലേക്ക് ഒന്നും കടക്കുന്നില്ല. രണ്ട് മണിക്കൂർ ദൈർഖ്യമുള്ള ചിത്രം ആദ്യത്തെ ഒരു മുപ്പത് മിനുട്ട് കഥാപാത്രങ്ങളെ ബിൽഡ് ചെയ്യാൻ ഉപയോഗിക്കുന്നുണ്ടെങ്കിലും തുടർന്നങ്ങോട്ട് ഒരു മിനുട്ട് പോലും ഇട നൽകാത്ത രീതിയിൽ ത്രില്ലിംഗ് ആയാണ് പോവുന്നത്. ചിത്രത്തിന്റെ അവസാനം കുറച്ച് മോണോലോഗുകൾ കൂടിയുണ്ട്, അത് തീർച്ചയായും കാണാൻ ശ്രമിക്കുക. ആകെ മൊത്തം ഹോട്ടൽ മുംബൈ കിടു ആണ്, ത്രില്ലിംഗ് ആണ്, രോമാഞ്ചമാണ്, കാണാൻ ശ്രമിക്കുക.

Verdict : Very Good

DC Rating : 80/100

325. Cargo (2017)

Director : Ben Howling

Genre : Thriller

Rating : 7.6/10

Duration : 104 Minutes

Country : Australia


🔸നാല്പത്തെട്ട്‍ മണിക്കൂർ മാത്രമാണ് ആൻഡിയുടെ മുന്നിൽ ബാക്കിയുള്ളത്. അതിന് ശേഷം മനുഷ്യൻ ആണ് എന്ന് വിശേഷിപ്പിക്കാൻ ഉതകുന്ന സവിശേഷതകളും സ്വഭാവ ഗുണങ്ങളും സർവോപരി തിരിച്ചറിവ് പോലും അയാളിൽ നിന്ന് നഷ്ടമാവും. ശിഷ്ടകാലം മൃഗ സമാനമായ ,നരക തുല്യമായ ഒരു ജീവിതമാണ് അയാളുടെ മുന്നിൽ ഉള്ളത്.

🔸ലോകത്താകമാനം ഒരു പകർച്ചവ്യാധി പിടിപ്പെട്ടിരിക്കുകയാണ് ,മനുഷ്യനെ അവന്റെ തിരിച്ചറിവിൽ നിന്നും വേർപെടുത്തി തികച്ചും അപരിചിതമായ ഒരു തലത്തിലേക്ക് കൊണ്ടുപോവുന്നതാണ് രോഗത്തിന്റെ അവസാന ഭാഗം. ചിത്രത്തിൽ ഒരിടത്തും ഉച്ചരിക്കുന്നില്ലെങ്കിൽ കൂടിയും ഏറെക്കുറെ ഒരു സോംബി ചിത്രം പോലെ തന്നെയാണ് കാർഗോയും. ലോകത്താകമാനം പടർന്ന് പിടിച്ച ഈ പകർച്ചവ്യാധിയിൽ നിന്നും രക്ഷപ്പെടാനുള്ള തത്രപ്പാടിലാണ് ആൻഡിയും കുടുംബവും.

🔸രക്ഷപ്പെടാനുള്ള ഓട്ടത്തിനിടയ്ക്ക് കനത്ത നഷ്ടങ്ങളാണ് ആൻഡിക്ക് നേരിടേണ്ടി വന്നത് ,കണ്മുന്നിൽ വച്ച് തന്നെ ഭാര്യയെ നഷ്ട്ടപ്പെടേണ്ടി വന്ന അയാൾക്ക് തന്നിൽ പകർച്ചവ്യാധിയുടെ ലക്ഷണങ്ങൾ കൂടി കണ്ട് തുടങ്ങിയത് താങ്ങാവുന്നതിലും അധികം ആയിരുന്നു. തന്റെ ജീവിതത്തിന്റെ കാര്യത്തിൽ ഏറെക്കുറെ തീരുമാനം ആയെങ്കിലും ഒരു വയസ്സുള്ള മകളുടെ മുഖം അയാളെ മുന്നോട്ട് പോവാൻ പ്രേരിപ്പിക്കുകയാണ്.

🔸നാല്പത്തെട്ട്‍ മണിക്കൂർ കഴിഞ്ഞാൽ തന്റെ മകൾക്ക് ഏറ്റവും വലിയ ഭീഷണി ആവാൻ പോവുന്നത് താൻ തന്നെ ആവും എന്നയാൾക്ക് അറിയാം. തിരിച്ചറിവ് നഷ്ട്ടപ്പെടുന്ന നിമിഷം ഒരുപക്ഷെ താൻ തന്നെ അവളെ കൊന്ന് തിന്നേക്കാം ,അതിന് മുൻപ് അവസാനത്തെ ഓർമയും മനസ്സിൽ നിന്നും തുടച്ച് നീക്കപ്പെടുന്നതിന് മുൻപ് അവളെ സുരക്ഷിതമായ ഒരിടത്ത് എത്തിക്കേണ്ടി ഇരിക്കുന്നു.

🔸രോഗം ബാധിച്ചവർക്കോ സാധാരണ മനുഷ്യർക്കോ പ്രവേശനം ഇല്ലാത്ത രാജ്യത്തിന്റെ ഉൾനാടൻ ഭാഗങ്ങളിൽ ഒന്നിൽ ഒരു കൂട്ടം ഗോത്രവർഗക്കാർ ഉണ്ട്. ബാധിതരായവരോട് അവരുടെ പെരുമാറ്റം വളരെ രൂക്ഷമാണെന്ന് അറിയാമെങ്കിലും തന്റെ മകളുടെ സുരക്ഷയ്ക്ക് അവരാണ് അവസാന പ്രതീക്ഷ ,രണ്ട് ദിവസത്തിനുള്ളിൽ അവളെ അവിടെ എത്തിക്കണം. അതിന് ശേഷം എന്ത് എന്നത് ദൈവത്തിങ്കൽ സമർപ്പിക്കുന്നു. അവളുടെ അതിജീവനം ,തന്റെ സ്വപ്നം എല്ലാം ഒരു ഞാണിന്മേൽ കളിയാണ്.

Verdict : Very Good

267. The Rover (2014)

Director : David Michod

Genre : Drama

Rating : 6.6/10

Country : Australia

Duration : 102 Minutes

🔸തന്റെ നായയെ കൊന്നതിന് പ്രതികാരമായി ഒരു ക്രിമിനൽ സിണ്ടിക്കേറ്റിനെ മുഴുവൻ കൊന്നൊടുക്കിയ ജോൺ വിക്കിനെ ഇഷ്ട്ടപ്പെട്ടവർക്ക് തീർച്ചയായും ഇഷ്ടപ്പെട്ടേക്കാവുന്ന ഒന്നാണ് പ്രസ്തുത ഓസ്‌ട്രേലിയൻ ചിത്രം.

🔸ഭാവികാലത്താണ് കഥ ആരംഭിക്കുന്നത്. സാമ്പത്തിക രംഗത്ത് നേരിട്ട കനത്ത തകർച്ചയും മാന്ദ്യവും ലോകത്തിന്റെ ഗതി തന്നെ മാറ്റിമറച്ചിരിക്കുന്നു.

🔸വലിയ കെട്ടിടങ്ങൾക്കും ശീതികരിച്ച മുറികൾക്കും പകരം ഇപ്പോൾ മിക്കയിടത്തും കണ്ണെത്താ ദൂരത്തോളം പരന്നുകിടക്കുന്ന മരുഭൂമിയാണ്. ഒരുനേരത്തെ ആഹാരത്തിന് വേണ്ടി മോഷ്ടിക്കാനും കൊല്ലാനും മടിയില്ലാത്തവരാണ് മിക്കവരും.

🔸തങ്ങളുടെ അടിസ്ഥാന ആവശ്യങ്ങൾക്കായി കൊല്ലാനും ചാവാനും കക്കാനും മടിയില്ലാത്തവരാണ് ആർച്ചിയും സംഘവും. അത്തരത്തിൽ ഒരു മോഷണ ശ്രമത്തിനിടെയാണ് അവർ എരിക്കുമായി നേർക്കുനേർ വന്നത്.

🔸ആദ്യ കൂടിക്കാഴ്ച എരിക്കിന് നല്ല രീതിയിൽ അവസാനിച്ചില്ലെങ്കിലും അയാളിൽ അവർ ബാക്കിവെച്ച അവസാന ശ്വാസം അവർക്ക് വിനയാവുകയാണ്.

Verdict : Average

199. Bad Boy Bubby (1993)

Director : Rolf De Heer

Genre : Comedy

Rating : 7.3/10

Country : Australia

Duration : 114 Minutes


🔸"മുറിയുടെ പുറത്ത് ഒരു കാരണവശാലും പോവരുത്.അന്തരീക്ഷത്തിലെ വായു വിഷാംശമുള്ളതാണ്.ഈ മുറിക്കപ്പുറം നിനക്കൊരു ജീവിതമില്ല".

🔸ജനിച്ച അന്നുമുതൽ ചിത്രത്തിലെ നായകനായ ബബ്ബിയെ അമ്മ പറഞ്ഞു വിശ്വസിപ്പിച്ചതാണ് ഇതെല്ലം. എന്തിനെന്നോ ഏതിനെന്നോ പറയാതെ തന്റെ മകനെ ഒരു തടവുപുള്ളിയായാണ് ആ അമ്മ വളർത്തിയത്.

🔸ഒരൊറ്റ മുറിയിൽ മാത്രമായി മുപ്പത്തഞ്ച് വർഷങ്ങളാണ് ബബ്ബി കഴിച്ചുകൂട്ടിയത്.ശാരീരികമായും മാനസികമായും മുരടിച്ചുപോയ മുപ്പത്തിയഞ്ച് വർഷങ്ങൾ.

🔸ഭയം നിറഞ്ഞിരുന്നെങ്കിലും മുറിക്ക് അപ്പുറം എന്താണെന്ന കൗതുകം ബബ്ബിയെ മുറിവിട്ട് പുറത്തിറങ്ങാൻ പ്രേരിപ്പിക്കുകയാണ്.തന്റെ കയ്യിൽനിന്നും സംഭവിച്ച ഒരു കൈയബദ്ധം അയാളെ പുറംലോകത്ത് എത്തിക്കുന്നു.

🔸മുപ്പത്തഞ്ച് വർഷങ്ങൾക്കിടയിൽ ആദ്യമായി തന്റെ ജീവിതത്തിൽ മറ്റ് മനുഷ്യരെയും ,സൂര്യപ്രകാശവും മഴയും എല്ലാം നേരിട്ടനുഭവിച്ച ആ മനുഷ്യനിലൂടെ കഥ മുന്നോട്ട് പോയി.

Verdict : Good

171. Tracks (2013)

Director : John Curran

Genre : Adventure

Rating : 7.2/10

Country : Australia

Duration : 120 Minutes

🔸പ്രശസ്തയായ ഓസ്‌ട്രേലിയൻ എഴുത്തുകാരിയാണ് റോബിൻ ഡേവിഡ്സൺ. ലോകമെങ്ങും ആരാധകരുള്ള റോബിൻ തന്റെ ജീവിതം യാത്രകൾക്കായി ഉഴിഞ്ഞു വെച്ചയാളാണ്.

🔸മുപ്പത് വര്ഷത്തോളമായുള്ള തന്റെ യാത്രകളിലെ ഏറ്റവും കഠിനമായ കഥയാണ് ട്രാക്‌സ് എന്ന ചിത്രത്തിലൂടെ റോബിൻ പ്രേക്ഷകരിലെത്തിക്കുന്നത്.

🔸ഓസ്‌ട്രേലിയയിലെ മരുഭൂമി പ്രദേശമായ ആലിസ് സ്പ്രിങ്ങിൽ നിന്നും മഹാസമുദ്രത്തിന്റെ തീരത്തേക്ക് 2700 കിലോമീറ്റർ നീണ്ടുനിൽക്കുന്ന യാത്രയാണ് ചിത്രത്തിന് പശ്ചാത്തലം.

🔸അതികഠിനമായ,  മനുഷ്യൻ ഇന്നോളം കാല്കുത്തിയിട്ടില്ലാത്ത ഭൂപ്രദേശങ്ങളും, വന്യ ജീവികളും, ഇഴജന്തുക്കളും എല്ലാം ഈ യാത്രയുടെ ഭാഗമാവുന്നു. നാല് ഒട്ടകങ്ങളും ഒരു നായയും ആയിരുന്നു റോബിന്റെ സന്തത സഹചാരികൾ.

🔸ലോകമെങ്ങും ലക്ഷക്കണക്കിന് കോപ്പികൾ വിറ്റഴിഞ്ഞ പുസ്തകത്തിന്റെ ചലച്ചിത്രാവിഷ്ക്കാരം ക്യാമറാമാൻ ആയ റിക്ക് സ്‌മോളന്റെ കണ്ണുകളിലൂടെ. യാത്രകൾ ഇഷ്ടപ്പെടുന്നവർ എന്തായാലും കണ്ടിരിക്കേണ്ട ഈ ചിത്രം മനോഹരമായ വിഷ്വൽസാൽ സമൃദ്ധമാണ്.

Verdict : Very Good

45. Red Dog (2011)

Director : Kriv Stenders

Genre : Drama

Rating : 7.5/10

Country : Australia

Duration : 92 Minutes

🔸ഒരു നായയ്ക്ക് തന്റെ യജമാനനോടുള്ള കൂറിനും വിശ്വാസത്തിനും സ്നേഹത്തിനുമുള്ള വില അതിനെ സംബന്ധിച്ചിടത്തോളം സ്വന്തം ജീവനേക്കാൾ വലുതാണ്.

🔸തെക്കൻ ഓസ്‌ട്രേലിയയിലെ ഒരു കുഗ്രാമത്തിൽ എത്തിയ ട്രക്ക് ഡ്രൈവറായ തോമസ് വളരെ ദാരുണമായ ഒരു കാഴ്ചക്ക് സാക്ഷി ആവുകയാണ്.

🔸തീവ്ര വേദനയാൽ നരക യാതന അനുഭവിക്കുന്ന ഒരു നായയെ കൊല്ലാൻ ഒരുങ്ങുകയാണ് ഒരു കൂട്ടം ചെറുപ്പക്കാർ.

🔸അവരിൽ ഓരോരുത്തർക്കും ആ നായയോട് പറഞ്ഞറിയിക്കാനാവാത്ത ഒരു അടുപ്പം ഉണ്ട്. പലർക്കും അവരുടെ കുട്ടിക്കാലത്തെ നിറമുള്ള ഓർമയായിരുന്നു ആ നായ.

🔸അവരിലൊരാളിൽ നിന്നാണ് തോമസ് റെഡ് ഡോഗ് എന്ന നായയുടെ കഥ അറിയുന്നത്. ആത്മാർത്ഥത എന്നതിന്റെ മറ്റൊരു വാക്കായ, യജമാനനെ ജീവനേക്കാൾ സ്നേഹിച്ച ഒരു യഥാർത്ഥ സേവകൻ. യഥാർത്ഥ സംഭവങ്ങൾ പ്രമേയമാക്കിയ ചിത്രം ഏതൊരു പ്രേക്ഷകന്റെയും കണ്ണ് നനയിച്ചിരിക്കും.

Verdict : Very Good

13. The Rocket (2013)

Director : Kim Mordaunt

Country : Australia

Genre : Drama

Rating : 7.3/10

Duration : 96 Minutes


🔸ലാഗോസ് മലനിരകളിലെ ആളുകൾക്കിടയിൽ ഉള്ള വിശ്വാസമാണ് ഇരട്ടക്കുട്ടികൾ ജനിച്ചാൽ ഒന്ന് ദൈവത്തിന്റെ അനുഗ്രഹവും മറ്റൊന്ന് ശാപവും ആണ് എന്നത്.

🔸ജനനത്തിൽ തന്നെ തന്റെ ഇരട്ട സഹോദരനെ നഷ്ട്ടപെടുകയാണ് അഹ്ലോയ്ക്ക്. തന്റെ ശേഷിക്കുന്ന മകൻ ദൈവത്തിന്റെ അനുഗ്രഹമാണെന്ന വിശ്വാസത്തിൽ അമ്മയും കുടുംബവും ജീവിച്ചു തുടങ്ങുകയാണ്.

🔸എന്നാൽ അഹ്ലോയുടെ നിർഭാഗ്യങ്ങൾ അവന് വിനയായി മാറുകയാണ്. പതിയെ അവൻ തങ്ങൾക്ക് മേൽ വന്നുപെട്ട ശാപമാണെന്ന് ആ കുടുംബം ധരിച്ചു തുടങ്ങുന്നു.

🔸ഗ്രാമത്തിൽ പുതുതായി നിർമിക്കപ്പെടുന്ന അണക്കെട്ട് കാരണം അഹ്ലോയുടെ കുടുംബവും ജനങ്ങളും പലായനം ചെയ്യാൻ നിർബന്ധിതരാവുകയാണ്.

🔸പുതിയ വാസസ്ഥലം അന്വേഷിച്ചുള്ള ജനതയുടെ യാത്രയിൽ അഹ്ലോ ശാപമാവുമോ അനുഗ്രഹമാവുമോ എന്നത് കണ്ടറിയണം.


Verdict : Very Good