1242. Bunny Lake Is Missing (1965)

Director : Otto Preminger

Cinematographer : Denys Coop

Genre : Mystery

Country : UK

Duration : 107 Minutes

🔸അധികം ആരും എവിടെയും പറഞ്ഞ് കെട്ടിട്ടില്ലാത്ത, എന്നാൽ ആദ്യാവസാനം പിടിച്ചിരുത്തിയ നല്ലൊരു ചെറിയ ത്രില്ലർ ആണ് ബണ്ണി ലേക്ക് ഈസ്‌ മിസ്സിംഗ്‌. ഒരു പേഴ്സൻ മിസ്സിംഗ്‌ കേസ് ആണോ അതോ സൈക്കോളജിക്കൽ ത്രില്ലർ ആണോ എന്ന ചോദ്യത്തിന് വ്യക്തമായ ഉത്തരം തരാതെ പ്രേക്ഷകരെ കൊണ്ട് ഗസ് അടിപ്പിക്കുകയാണ് ഈ ചിത്രം, തുടക്കം തൊട്ട് അവസാനം വരെ. ഒടുവിൽ ചോദ്യങ്ങൾക്ക് ഉത്തരം നൽകുന്ന ഫൈനൽ ആക്റ്റ് കൂടി ചേരുമ്പോൾ തൃപ്തികരമായ ഒരു വ്യൂയിങ് അനുഭവമായി മാറുന്നുണ്ട് ഈ ചിത്രം. ത്രില്ലർ അല്ലെങ്കിൽ മിസ്റ്ററി വിഭാഗത്തിൽ പെട്ട സിനിമകളോട് താല്പര്യം ഉള്ളവർക്ക് തീർച്ചയായും കണ്ട് നോക്കാവുന്നതാണ്.

🔸തന്റെ മകളെ കാണാനില്ല എന്ന പരാതിയും ആയാണ് ആൻ ലേക്ക് പോലീസിൽ പരാതി പറയാൻ എത്തുന്നത്. സിംഗിൾ മദർ ആയ ആൻ നാല് വയസുകാരി ആയ ബണ്ണിയോടൊപ്പം പുതുതായി താമസത്തിന് എത്തിയതാണ് ആ പ്രദേശത്തേക്ക്, അല്ലെങ്കിൽ അങ്ങനെയാണ് അവർ പറയുന്നത്. അവരുടെ പരാതിയിന്മേൽ കേസ് എടുത്ത് അന്വേഷണം ആരംഭിച്ച പോലീസ് ഉദ്യോഗസ്ഥന്റെ അന്വേഷണം വളരെ വിചിത്രമായ ഒരു സാധ്യതയിന്മേൽ ആണ് വിരൽ ചൂണ്ടുന്നത്, അതായത് ബണ്ണി എന്നൊരു കുട്ടി ഇല്ല, ഒരുകാലത്തും ഉണ്ടായിരുന്നുമില്ല എന്ന സാധ്യതയിലേക്ക്. എന്നാൽ ആൻ തറപ്പിച്ച് പറയുന്നും വിശദീകരിക്കുന്നും ഒക്കെയുണ്ട് തന്റെ മകളെ പറ്റി.

🔸സത്യത്തിൽ അങ്ങനെ ഒരാൾ ഉണ്ടോ, അതോ എല്ലാം ആനിന്റെ തോന്നൽ മാത്രമാണോ, ഇനി ഉണ്ടെങ്കിൽ അവൾക്ക് എന്ത് സംഭവിച്ചു, ഇല്ല എങ്കിൽ ആനിന്റെ ചിന്തകളിൽ മാത്രമുള്ള ആ കുട്ടി സത്യത്തിൽ ആരാണ്, ആനിന്റെ മാനസിക നില തകരാറിൽ ആണോ തുടങ്ങി ഒരുപാട് ഒരുപാട് ചോദ്യങ്ങൾക്ക് ഉള്ള ഉത്തരമാണ് ഈ സിനിമ. സത്യത്തിൽ എന്താണ് സംഭവിക്കുന്നത് എന്നത് ഫൈനൽ ആക്റ്റ് വരെ റിവീൽ ചെയ്യാതെ കാഴ്ചക്കാരനെ പസ്സിൽ ചെയ്യിക്കുന്നുണ്ട് ഈ ചിത്രം. മികച്ച പ്രകടനങ്ങളും, അവതരണവും എല്ലാം കൂടി ചേരുമ്പോൾ നല്ലൊരു ത്രില്ലർ സിനിമ കൂടി ലഭിക്കുകയായി. കാണാൻ ശ്രമിക്കുക, നിരാശപ്പെടേണ്ടി വരില്ല.

Verdict : Very Good

DC Rating : 4/5

1196. The Last Duel (2021)

Director : Ridley Scott

Cinematographer : Dariusz Wolski

Genre : Drama

Country : UK

Duration : 153 Minutes

🔸ഒരു പ്രത്യേക സംഭവം അരങ്ങേറുന്നു, ഉദാഹരണത്തിന് ഒരു വാഹനാപകടം ആണെന്ന് കണക്കാക്കുക. ഇവിടെ മൂന്ന് ആളുകളെയും സങ്കല്പിക്കുക, അതായത് തന്റെ തെറ്റ് കാരണം അപകടം ഉണ്ടാക്കിയവൻ, ആക്സിഡന്റ് കാരണം പരുക്ക് ഏറ്റവൻ, ഇതിൽ ഒന്നും പെടാത്ത കാഴ്ചക്കാരൻ ആയ മൂന്നാമൻ. ഇവിടെ മൂന്ന് പേരും അരങ്ങേറിയ സംഭവം കണ്ടവരാണ്, എന്നാൽ ഈ പ്രത്യേക സംഭവത്തെ പറ്റിയുള്ള മൂന്ന് പേരുടെയും വിശദീകരണങ്ങൾ മൂന്ന് വ്യത്യസ്ത സാധനങ്ങൾ ആയിരിക്കും. ചുരുക്കി പറഞ്ഞാൽ ഒരു വാഹനാപകടം നടന്നു എന്ന ഫാക്റ്റ് നില നിൽക്കുമ്പോഴും അതിന്റെ വ്യാഖ്യാനങ്ങൾ പലതാകാം. ഈ ഒരു കൺസപ്റ്റിനെ ആണ് കുറോസാവ എഫക്ട് എന്ന് പൊതുവെ പറയാറ്, വളരെ റിലേട്ടബിൽ ആയ ഒന്ന് ആയത് കൊണ്ട് കൂടിയാവാം ഈ ഇഫ്‌ഫക്റ്റ് ഉപയോഗിക്കുന്ന സിനിമകളോട് ഒരു പ്രത്യേക താല്പര്യവും തോന്നാറുണ്ട്. ഈ ഒരു വസ്തുത നിലനിൽക്കുന്നുണ്ട് എങ്കിലും ദി ലാസ്റ്റ് ഡ്യുവൽ അതിന്റെ നിലവാരത്തിലും ഒട്ടും മോശം ആവുന്നില്ല എന്നതാണ് സത്യം.

🔸മൻപ്, അതായത് കുറച്ചധികം നൂറ്റാണ്ടുകൾക്ക് മുൻപ് യൂറോപ്പിൽ ട്രയൽ ബൈ കൊമ്പാറ്റ് എന്നൊരു പരിപാടി നിലവിൽ ഉണ്ടായിരുന്നു. അതായത് ഏതെങ്കിലും വിവാദമായ ഒരു വിഷയം ഉണ്ടായാൽ അതിന്റെ രണ്ട് ഭാഗത്ത് നിൽക്കുന്നവർ പരസ്പരം വാൾ പയറ്റോ മല്ല യുദ്ധമോ ഒക്കെ നടത്തുക എന്ന പ്രാകൃത നിയമം. ഈ പരിപാടിയിൽ സ്വാഭാവികമായും രണ്ട് ഔട്ട് പുട്ടുകൾ മാത്രമേ ഉണ്ടാവു, ഒരാൾ മരിക്കും മറ്റെയാൾ ജയിക്കും എന്ന ഔട്ട്കം. അവസാനമായി രേഖപ്പെടുത്തിയ ട്രയൽ ബൈ കൊമ്പാറ്റ് ഉണ്ടായത് പതിനാലാം നൂറ്റാണ്ടിന്റെ അവസാനത്തിലാണ്, ഈ പരിപാടി ആണ് ചിത്രത്തിന് ആധാരം ആയിരിക്കുന്നത്. അന്ത കാലത്തെ പ്രഗത്ഭരായ പോരാളികളായ ലെ ഗ്രീസും, ഡി കരോഗ്സും ആയിരുന്നു രണ്ട് ഭാഗത്ത്, അതിന്റെ അവസാനം എന്തായിരുന്നു എന്നൊന്നും തല്ക്കാലം പറയുന്നില്ല.

🔸ഈ രണ്ട് പോരാളികളും അന്ത്യ യുദ്ധത്തിന് ഇറങ്ങാൻ ഒരുപാട് കാരണങ്ങൾ ഉണ്ടായിരുന്നു എങ്കിലും അതിലെ ഏറ്റവും സവിശേഷം ആയത് ഒരു സ്ത്രീ ആയിരുന്നു, കരോഗ്സിന്റെ ഭാര്യ ആയ മാർഗരിട്ട. ഈ മൂന്ന് കഥാപാത്രങ്ങളും ഈ യുദ്ധത്തിലേക്ക് വഴി വെച്ച കാര്യങ്ങളെ പറ്റി പറയുന്നത് വളരെ വ്യത്യസ്തമായ മൂന്ന് വേർഷണുകളിൽ കൂടിയാണ്. ഈ മൂന്ന് വേർഷൻസും എല്ലാത്തിനും കൂടിയുള്ള കിടിലൻ പേ ഓഫും എല്ലാം ചേർന്നതാണ് ഈ രണ്ടര മണിക്കൂർ ചിത്രം. നല്ല കാസ്റ്റും, കിടിലൻ അവതരണവും, മികച്ച പെർഫോമൻസും ഒക്കെ കൂടി ചേരുമ്പോൾ ഒരു വിന്നിംഗ് ഫോർമുല ഉരുതിരിഞ്ഞ് വരികയാണ്. എല്ലാം കൊണ്ടും നല്ലൊരു അനുഭവം നൽകിയാണ് ലാസ്റ്റ് ഡ്യുവൽ കടന്ന് പോവുന്നത്, കഴിയുമെങ്കിൽ കാണാൻ ശ്രമിക്കുക.

Verdict : Very Good

DC Rating : 4.25/5 

1194. Land And Freedom (1995)

Director : Ken Loach

Cinematographer : Barry Ackroyd

Genre : Drama

Country : UK

Duration : 109 Minutes

🔸കെൻ ലോച്ച് സിനിമകൾ എന്നും പേഴ്സണൽ ഫേവറൈറ്റുകൾ ആണ്, അദ്ദേഹത്തിന്റെ അവസാനമായി കണ്ട സോറി വി മിസ്ഡ് യു പോലുള്ള സംരംഭങ്ങൾ തന്നെ തന്ന ഫീൽ വളരെ മികച്ചത് ആയിരുന്നു. ഈ ഒരു താല്പര്യം കൊണ്ട് തന്നെയാണ് അദ്ദേഹത്തിന്റെ ഏറ്റവും പ്രെസ്റ്റീജ്യസ് ആയ അല്ലെങ്കിൽ അംബീഷ്യസ് ആയ പ്രോജക്റ്റ് ആയ ലാൻഡ് ആൻഡ് ഫ്രീഡം എന്ന ചിത്രത്തിൽ വലിയ പ്രതീക്ഷ വെച്ചതും. പ്രതീക്ഷിച്ചത് പോലെ തന്നെ മികച്ചൊരു അനുഭവം ആണ് സിനിമ സമ്മാനിച്ചതും, മുൻപ് ഒരുപാട് സിനിമകളിലും ലേഖനങ്ങളിലും എല്ലാം കണ്ടും വായിച്ചും അറിഞ്ഞ സ്പാനീഷ് സിവിൽ വാറിന്റെ മറ്റൊരു വശം കൂടി കാണിച്ച് തരുന്നുണ്ട് ഈ ചിത്രം.

🔸ദേവ് കാർ എന്ന പ്രധാന കഥാപാത്രം തൊണ്ണൂറുകളിൽ മരണപ്പെടുന്ന രംഗം കാണിച്ച് കൊണ്ടാണ് സിനിമ ആരംഭിക്കുന്നത്, പ്രായം  എൺപതുകൾ കഴിഞ്ഞ കാർ ഐതിഹസികമായ ഒരു ജീവിതം ജീവിച്ച് തീർത്താണ് മരണത്തിന് കീഴടങ്ങുന്നത് എന്ന് വേണമെങ്കിൽ പറയാം. ആ ജീവിത കാലയളവാണ് സിനിമയുടെ പ്ലോട്ട്, അയാളുടെ പേരകുട്ടി പഴയ കത്തുകളിൽ കൂടിയും രേഖകളിൽ കൂടിയും കഥ വായിച്ച് അറിയുന്ന രൂപത്തിൽ ആണ് സിനിമയുടെ പ്ലോട്ട് പുരോഗമിക്കുന്നത്. ഇവിടെ നിന്നും സിനിമ പോവുന്നത് സ്പെയിൻ എന്ന രാജ്യത്തിന്റെ ചരിത്രം തന്നെ മാറ്റി എഴുതിയ മുപ്പതുകളിലേക്ക് ആണ്, അതായത് ഫ്രാങ്കോയ്ക്ക് എതിരെയുള്ള വിപ്ലവ ശ്രമങ്ങൾ അതിന്റെ ഉച്ചസ്ഥായിലേക്ക് കടന്ന കാലഘട്ടം.

🔸ഫരാങ്കോയ്ക്ക് എതിരെ ഉള്ള ശബ്ദങ്ങൾ എല്ലാം നേരിട്ടത് മിലിട്ടറിയുടെ ഉരുക്ക് മുഷ്ടികൾ തന്നെയാണ്, ഈ മിലിട്ടറിയുടെ ഭാഗം ആയിരുന്നു ദേവും. പക്ഷെ ഇവയൊന്നും വിപ്ലവകാരികളെ പിറകോട്ട് കൊണ്ട് പോയതുമില്ല, പിന്നീട് അരങ്ങേറുന്നത് ചതിയും വഞ്ചനയും പ്രണയവും പരാജയവും അതിജീവനവും മരണവും എല്ലാം ഉൾപ്പെട്ട ഒരു എപിക് കാൻവാസിൽ ഉള്ള കഥയാണ്. വളരെ താല്പര്യം ഉണർത്തുന്ന തോതിൽ ഉള്ള അവതരണം തന്നെയാണ് ഈ സിനിമയുടെ ഏറ്റവും വലിയ പ്ലസ് പോയിന്റ്, മികച്ച പ്രകടനങ്ങളും സ്ക്കോറും ചായഗ്രഹനവും എല്ലാം കൂടി ചേരുമ്പോൾ മികച്ചൊരു അനുഭവം തന്നെയായി മാറുന്നുണ്ട് ലാൻഡ് ആൻഡ് ഫ്രീഡം. ഡ്രാമ ജോണറിൽ പെട്ട സിനിമകളുടെ ആരാധകർക്ക് നല്ലൊരു അനുഭവം ആയിരിക്കും ഈ ചിത്രം.

Verdict : Very Good

DC Rating : 4/5 

1178. No Time To Die (2021)

Director : Cary Joji Fukunaga

Cinematography : Linus Sandgren

Genre : Action

Country : UK

Duration : 163 Minutes

🔸ഒരു ആക്ഷൻ മൂവി ഫ്രാഞ്ചയ്‌സ് എന്ന നിലയ്ക്കും, ഫിക്ഷണൽ കഥാപാത്രം എന്ന നിലയ്ക്ക് തന്നെയും ജെയിംസ് ബോണ്ട്‌ എങ്ങിനെ ഒരു ഗ്ലോബൽ സെൻസേഷൻ ആയി മാറി എന്ന് പലപ്പോഴും ആലോചിച്ചിട്ടുണ്ട്. ഇരുപത്തി അഞ്ചോളം സിനിമകൾ വന്നിട്ടുള്ള സീരീസ് ആയിട്ട് പോലും നല്ലത് എന്ന് പറയാൻ, അല്ലെങ്കിൽ മറ്റൊരാൾക്ക്‌ സജസ്റ്റ് ചെയ്ത് കൊടുക്കാൻ തക്കവണ്ണം ഉള്ളത് വിരലിൽ എണ്ണാവുന്ന സിനിമകൾ മാത്രമാണ്, അതിൽ തന്നെ ഭൂരിഭാഗവും ഈ നൂറ്റാണ്ടിൽ പുറത്തിറങ്ങിയതും. ഡാനിയേൽ ക്രെയ്‌ഗിന്റെ മുൻ ബോണ്ട്‌ സിനിമകളിൽ സോളാസ് ഒഴികെ ഉള്ളവ എല്ലാം ആസ്വദിക്കാൻ കഴിഞ്ഞിരുന്നു എന്നതും, നോ ടൈം ടു ഡൈ അദ്ദേഹത്തിന്റെ അവസാന ബോണ്ട്‌ ഔട്ടിങ് ആണ് എന്നതും എല്ലാത്തിനും ഉപരി കാരി ജോജി ഫുകുനാഗ എന്ന പേരും എല്ലാം സിനിമയിൽ താല്പര്യം ഉണർത്തിയ ഘടകങ്ങൾ തന്നെ ആയിരുന്നു, ഇവയെ സാധൂകരിക്കുന്ന ഔട്ടപുട്ട് ഉണ്ടോ എന്നത് ആണ് ചോദ്യം.

🔸ചിത്രം കണ്ട് കഴിഞ്ഞപ്പോൾ തോന്നിയ മറ്റൊരു എടുത്ത് പറയേണ്ട വസ്തുത മുൻ ക്രെയ്‌ഗ് ബോണ്ട്‌ സിനിമകളുമായി മികച്ച രീതിയിൽ വരുന്ന സ്റ്റോറി കണ്ടിന്യുവേഷൻ കൂടിയാണ്. അതായത് കസിനോ റോയൽ, സ്പെക്ടർ തുടങ്ങി സ്‌കൈഫോൾ വരെയുള്ള സിനിമകളെ ചിത്രം ചെറുതും വലുതുമായ രീതിയിൽ പരാമർശിക്കുന്നുണ്ട്, സ്റ്റോറി കം ക്യാരക്റ്റർ പ്രോഗ്രഷനിൽ ഈ അസ്പെക്റ്റ് കൊണ്ടുവരുന്ന ഇൻഫ്ലുവെൻസ് ചെറുതല്ല. കഥയിലേക്ക് വരിക ആണെങ്കിൽ ബ്ലോഫെൽഡിന്റെ വീഴ്ചയ്ക്ക് ശേഷം ബോണ്ട് തന്റെ ഔദ്യോഗിക ജീവിതത്തിൽ നിന്നും ഏറെക്കുറെ വിരമിച്ച മട്ടാണ്, വ്യക്തി ജീവിതത്തിൽ അയാൾക്ക് നേരിടേണ്ടി വരുന്ന ചില പ്രശ്നങ്ങൾ കൂടി ആവുമ്പോൾ എല്ലാം പൂർണം. ഇങ്ങനെ ബോണ്ടിന് പതിവില്ലാത്ത ശാന്തമായ ജീവിതത്തിന് ഇടയിലേക്ക് ഒരു മിസ്റ്റീരിയസ് കഥാപാത്രം കടന്ന് വരുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രം.

🔸നല്ല ഓപ്പണിങ് ആക്റ്റും, തൃപ്തി തരുന്ന എൻഡിങ്ങും സിനിമയുടെ പോസിറ്റീവ് എലമെന്റുകൾ ആണ്, ഇടക്ക് ഒരല്പം സ്ലോ ആവുന്നുണ്ട് എങ്കിലും വലിയ പോരായ്മ ഒന്നും തോന്നിയില്ല. ലേഡി ബോണ്ട്‌ എന്നത് മാർക്കറ്റിങ്ങിൽ വലിയ തോതിൽ ചൂണ്ടി കാണിക്കപ്പെട്ട ഒന്നായിരുന്നു എങ്കിലും സിനിമയിൽ വലിയ ചലനം ഉണ്ടാക്കിയതായി തോന്നിയില്ല, അന അർമസിന്റെ കഥാപാത്രവും ഇത് പോലെ തന്നെ. റാമി മലക്കിന്റെ വില്ലൻ കഥാപാത്രം നന്നായിരുന്നു എങ്കിലും സ്ക്രീൻ ടൈം കുറഞ്ഞത് പോലെയാണ് അനുഭവപ്പെട്ടത്, ഐകോനിക് കഥാപത്രമായ ബ്ലോഫെൽഡിന് കാര്യമായി ഒന്നും ചെയ്യാൻ ഇല്ലായിരുന്നു എങ്കിലും ഈ ഫൈനൽ ഔട്ട്റ്റിംഗിൽ കാണാൻ കഴിഞ്ഞത് തൃപ്തികരം ആയിരുന്നു. നല്ല വിഷ്വൽസും, സ്ക്കോറും എല്ലാം സിനിമയുടെ മറ്റ് മികച്ച അസ്പെക്റ്റുകളിൽ ചിലതാണ്. ഒരു ഇടവേളയ്ക്ക് ശേഷം തിയേറ്ററിൽ കണ്ട ചിത്രം ആയത് കൊണ്ട് കൂടി ആവും നോ ടൈം ടു ഡൈ നല്ലൊരു കാഴ്ച്ചാനുഭവം കൂടി ആയിരുന്നു.

I Really Missed This Place ❤️

Verdict : Good

DC Rating : 3.75/5 

1174. The Servant (1963)

Director : Joseph Losey

Cinematographer : Douglas Slocombe

Genre : Drama

Country : UK

Duration : 116 Minutes

🔸വളരെ ഇരിറ്റെറ്റിങ് ആയ ഒരു വ്യൂയിങ് എക്സ്പീരിയൻസ് ആണ് ദി സെർവന്റ് എന്ന അറുപതുകളിൽ പുറത്തിറങ്ങിയ ഇംഗ്ലീഷ് ഡ്രാമ ചിത്രം. ഒരു ത്രീ ആക്റ്റ് സ്ട്രക്ച്ചർ ഒക്കെ മനസ്സിൽ വെച്ച് കൃത്യമായ സ്റ്റോറി പേ ഓഫ് ഒക്കെ പ്രതീക്ഷിച്ച് കാണാൻ ഇരുന്നാൽ അതൊന്നും തന്നെ ലഭിക്കാൻ പോവുന്നില്ല, അതൊരു മോശം കാര്യമായി അനുഭവപ്പെട്ടുമില്ല. ടോണി എന്ന നമ്മുടെ നായക കഥാപാത്രം അതായവശ്യം സമ്പന്നനായ ഒരു ചെറുപ്പക്കാരൻ കഥാപാത്രമാണ്, വളരെ ചെറുപ്പത്തിലേ വലിയൊരു ഫോർച്യുൻ കൈവശപ്പെടുത്തിയതിന്റെ മോശം ഫലം കൊണ്ടാവണം ആളൊരു പ്ളേ ബോയ് ടൈപ്പ് കഥാപാത്രം ആണ്.

🔸അപ്പൊ ടോണി ഒരു നാൾ തന്റെ സെർവന്റ് ആയി ബാരറ്റ് എന്ന ആളെ ജോലിക്ക് എടുക്കുകയാണ്. വീട്ട് ജോലിക്കാരൻ എന്ന തസ്തിക ആണ് ബാററ്റിന് ലഭിക്കുന്നത് എങ്കിലും അത് ഒരു പേഴ്സണൽ അസിസ്റ്റന്റ് ലെവലിലേക്ക് പോവുന്നുണ്ട്. ടോണിക്ക് സൂസൻ എന്ന കാമുകി ഒഴിച്ച് നിർത്തിയാൽ മറ്റ് ബന്ധുക്കൾ ആരും തന്നെ ഇല്ല, സുഹൃത്തുക്കളും ഇല്ല, അങ്ങനെ എല്ലാ തോതിലും ഒറ്റപ്പെട്ട ഒരു കഥാപാത്രം. ബാരറ്റ് ഒരു വല്ലാത്ത കഥാപാത്രം ആണ്, അയാൾ ജോലി ഒക്കെ വൃത്തിയായി ചെയ്യും എങ്കിലും ഒരു പ്രത്യേക തരം വൈചിത്ര്യം അയാൾക്ക് ചുറ്റിപറ്റി ഉണ്ട്. ആ വീടിന്റെ എവിടെ നോക്കിയാലും അയാളുടെ നിസ്സംഗമായ മുഖം കാണുന്ന തോതിലുള്ള ഒരു ഇരിറ്റേഷനിലേക്ക് കാര്യങ്ങൾ പോവുകയാണ്.

🔸ടോണിയുടെ കഴിവ് കേട് കൊണ്ടോ, അല്ലെങ്കിൽ ബാരറ്റിന്റെ മുതലെടുപ്പ് മെന്റാലിറ്റി കൊണ്ടോ, അവിടെയുള്ള മുതലാളി തൊഴിലാളി സമവാക്യം ആകെ മാറി മറിയുകയാണ്. താമസിയാതെ കാര്യങ്ങളുടെ കടിഞ്ഞാൺ ബാററ്റിന്റെ കയ്യിലേക്ക് എത്തുകയാണ്, കഥ മറ്റൊരു തലത്തിലേക്ക് മാറുകയാണ്. മുന്നേ സൂചിപ്പിച്ച പോലെ അത്യാവശ്യം ഇരിട്ടെറ്റിങ് ആയ ഒരു സിനിമയും കഥാപാത്രവും ആണ് ഈ ചിത്രവും ബാരട്ടും, അത് ഒരു പോസിറ്റീവ് ആയി മാറിയിട്ടുമുണ്ട്. അവസാനത്തെ സീനും കണ്ട് കഴിയുമ്പോൾ വാക്കുകളാൽ വിശേഷിപ്പിക്കാൻ കഴിയാത്ത ഒരുപാട് വികാരങ്ങളുടെ ഒരു വരവ് ഉണ്ട്, ഒരുപാട് സിനിമകൾക്ക് ഒന്നും അങ്ങനെ ഒരു അനുഭവം തരാൻ കഴിഞ്ഞിട്ടില്ല, അപ്പൊ സ്വാഭാവികമായും പറയാം ഇത് ഒരു സ്പെഷ്യൽ മൂവി തന്നെ ആണെന്ന്.

Verdict : Must Watch

DC Rating : 5/5 

1160. The Courier (2020)

Director : Dominic Cooke

Cinematographer : Sean Bobbit

Genre : Historical

Country : UK

Duration : 111 Minutes

🔸ഒരു റിയൽ ലൈഫ് സംഭവമാണ് ദി കൊറിയർ സ്ക്രീനിലേക്ക് എത്തിക്കുന്നത് എന്നത് തിരിച്ചറിയാൻ ക്രെഡിറ്റ് സീൻ വരെ എത്തേണ്ടി വന്നു എന്നത് കൊണ്ട് കുറച്ച് കൂടി നല്ല രീതിയിൽ ആസ്വദിക്കാൻ കഴിഞ്ഞ ഒരു അപൂർവ അനുഭവമാണ് ഈ ചിത്രം. ഇതിന് മുന്നേ കോൾഡ് വാർ സമയത്തെ ചാര പ്രവർത്തി ഒക്കെ ആധാരമാക്കിയുള്ള അനവധി സിനിമകളും എഴുത്തുകളും ഒക്കെ കണ്ടിട്ടുണ്ട് എങ്കിലും ഇത്രയും സിഗ്നിഫിക്കൻറ്റ് ആയൊരു സംഭവത്തെ കുറിച്ച് യാതൊരു അറിവും ഉണ്ടായിരുന്നില്ല. ഈ കാരണം കൊണ്ട് തന്നെ ആവണം സിനിമ ആ പോർഷ്യനിലേക്ക് കടക്കുമ്പോൾ ലഭിക്കുന്നത് മികച്ചൊരു അനുഭവം തന്നെയാണ്, ചില സമയങ്ങളിൽ ഒരു സാധാരണക്കാരനായ മനുഷ്യൻ കൈക്കൊള്ളുന്ന വളരെ സാധാരണമായ തീരുമാനത്തിന് പോലും അസാധാരണമായ ആഫ്റ്റർ എഫക്ടുകൾ ഉണ്ടാവും എന്ന വാചകത്തിന് ഉള്ള നല്ല ഉദാഹരണമാണ് ദി കൊറിയർ.

🔸അറുപതുക്കളുടെ ആരംഭത്തിലാണ് കഥ തുടങ്ങുന്നത്, അതായത് അമേരിക്കയും സോവിയറ്റ് യുണിയനും തമ്മിലുള്ള മത്സരം അതിന്റെ എല്ലാ അതിരുകളും ബേധിച്ച് ന്യൂക്ലിയാർ വാർ ഫെയരിലേക്ക് പോവും എന്ന് സകലരും പേടിച്ചിരുന്ന ഒരു കാലഘട്ടം. ചാരവൃത്തിക്കും ഒരുപാട് പേര് കേട്ട കാലഘട്ടം ആയിരുന്നു ഇത്, ഇരു രാജ്യങ്ങളും ശത്രുവിന്റെ നീക്കങ്ങൾ അറിയുന്നതിനായി തങ്ങളുടെ വിശ്വസ്ഥരെ പല ഉന്നത സ്ഥലങ്ങളിൽ ഉൾപ്പെടെ വിന്യസിച്ചിരുന്നു. അമേരിക്കയ്ക്ക് ഈ രീതിയിൽ ഒരുപാട് സഹായങ്ങൾ എത്തിച്ച വ്യക്തിയാണ് സോവിയറ്റ് പൗരനായ ഓലഗ് പെങ്കോവസ്കി, എന്നാൽ ഓലഗിനെ സംബന്ധിച്ചിടത്തോളം കാര്യങ്ങൾ കൂടുതൽ ദുർഘദമായി കൊണ്ടിരിക്കുക ആയിരുന്നു.

🔸ഈ ഒരു പോയിന്റിലാണ് ഗ്രേവിൽ വിൻ എന്ന നമ്മുടെ പ്രധാന കഥാപാത്രം കഥയിലേക്ക് വരുന്നത്. സാധാരണക്കാരിൽ സാധാരണക്കാരനായ ഒരു ബിസിനസുകാരനാണ് വിൻ, ഒരു ചാരൻ ആണെന്ന് ആരും പെട്ടെന്ന് വിശ്വസിക്കാത്ത ഒരു വ്യക്തി, ഇത് തന്നെയാണ് അമേരിക്കൻ രഹസ്യന്വേഷണ വിഭാഗം മുൻ‌തൂക്കമായി കണ്ടതും. ഈ രണ്ട് കഥാപാത്രങ്ങളെ ചുറ്റിപ്പറ്റിയാണ് കഥ മുന്നോട്ട് പോവുന്നത്. അത്യാവശ്യം ടെൻഷൻ അടിപ്പിക്കുന്നുണ്ട് എങ്കിലും കാര്യമായ തൃപ്തി ഒന്നും ചിത്രം തന്നിട്ടില്ല, പെർഫോമൻസുകൾ എല്ലാം നന്നായിരുന്നു എങ്കിലും കണ്ട് പഴകിയ സ്പൈ ത്രില്ലരുകളിൽ ഒന്ന് എന്നതിനപ്പുറം സവിശേഷമായി കാണിച്ച് തരാൻ ഒന്നും തന്നെയില്ല.

Verdict : Watchable

DC Rating : 3/5 

1108. Promising Young Woman (2020)

Director : Emerald Fennell

Genre : Thriller

Rating : 7.5/10

Country : UK

Duration : 113 Minutes

🔸ഒരു നല്ല പ്രതികാരത്തോളം കഥയിൽ പേഴ്സണലി താല്പര്യം ജനിപ്പിക്കുന്ന വേറെ അനേകം ഫാക്റ്ററുകൾ ഒന്നും ഇല്ല, ഒരു റിവഞ്ച് സ്റ്റോറി നല്ല രീതിയിൽ വൈൻഡ് അപ്പ് ചെയ്യുമ്പോൾ ലഭിക്കുന്ന സംപ്ത്രിപ്തിയും ചെറുതല്ല. ഈ രണ്ട് കാര്യങ്ങളിലും ഗ്യാരന്റി തരാൻ കഴിയും എന്നതാണ് പ്രോമിസിങ് യങ് വുമൺ എന്ന ചിത്രത്തിന്റെ ഏറ്റവും വലിയ പ്ലസ് പോയിന്റ്. അതായത് നല്ല തോതിൽ പിടിച്ചിരുത്തുന്ന രീതിയിൽ ഉള്ള സ്റ്റോറി ടെല്ലിങ് ആണ്, അതേ സമയം അങ്ങേയറ്റം സാറ്റിസ്ഫൈങ് ആയ കാപ്പിങ് ഓഫുമാണ്.

🔸കാസി എന്ന നമ്മുടെ നായികാ കഥാപാത്രം ഒരു മെഡിക്കൽ സ്‌കൂൾ ഡ്രോപ്പ് ഔട്ട് ആണ്, പ്രായം മുപ്പതോട് അടുത്തെങ്കിലും ജീവിതത്തിൽ കാര്യമായ വിജയം ഒന്നും ഇതുവരെ നേടാൻ കഴിഞ്ഞിട്ടില്ല. ഒരു ചെറിയ സ്റ്റോറിൽ നോക്കി നടത്തിപ്പുകാരി ആയി ജോലി ചെയ്യുക ആണെങ്കിലും ആ ജോലിയിലും തനിക്ക് ചുറ്റുമുള്ള ചുരുക്കം ചില ആളുകളിലുമായി അവൾ തൃപ്തയാണ്. ഈ ഒരു ജീവിതത്തിന് എതിരായി രാത്രി വിഹാരത്തിന്റെ മറ്റൊരു ഡബിൾ ലൈഫ് കൂടി ഉണ്ട് കാസിക്ക്, അത് അധികം ആർക്കും അറിവുള്ള കാര്യമല്ല എന്ന് മാത്രം.

🔸നീന എന്ന പേരിൽ പണ്ടൊരു സുഹൃത്ത് ഉണ്ടായിരുന്നു കാസിക്ക്, പഠന കാലത്ത് സഹപാഠി ആയിരുന്ന ഒരു സുഹൃത്ത്. ആ കാലത്ത് റേപ്പ് ചെയ്യപ്പെട്ട്, ആ സംഭവത്തിന്റെ പ്രത്യാഘാതം എന്നവണ്ണം ആത്മഹത്യ ചെയ്ത ആളാണ് നീന. നീനയുടെ മരണം കാസിയിൽ സൃഷ്ട്ടിച്ച ആഘാതം ഭീകരം ആയിരുന്നു, അവളെ സംബന്ധിച്ച് അതിലും വേദനാജനകമായ കാര്യമായിരുന്നു തന്റെ പ്രിയ സുഹൃത്തിന് ഒരിക്കലും നീതി ലഭിച്ചില്ല എന്നത്. നിയമപരമായാലും മാനുഷികപരം ആയാലും നീനയെ എല്ലാവരും മറന്ന് കളയുക ആയിരുന്നു, കാസി ഒഴിച്ച്.

🔸ഇത്രയും വർഷങ്ങൾക്ക് ഇപ്പുറം നിനയുടെ മരണത്തിന് കരണക്കാരായവർക്ക് എതിരെ ഒരു പ്രതികാരത്തിന് ഉള്ള അവസരം കാസിക്ക് ലഭിക്കുകയാണ്, ഇവിടെ നിന്നുമാണ് കഥ ആരംഭിക്കുന്നത്, പിന്നീട് അങ്ങോട്ട് ഒരുപാട് ട്വിസ്റ്റുകളും ടെണുകളും ഒക്കെയായി അപ്രതീക്ഷിതമായ പ്ലോട്ട് ഡെവലപ്‌മെന്റുകൾ ഒക്കെ കഥയിലേക്ക് കടന്ന് വരുന്നുണ്ട്. ആദ്യമേ സൂചിപ്പിച്ചത് പോലെ നല്ലൊരു സാറ്റിസ്ഫയിങ് ആയ അനുഭവം ആയിരുന്നു പ്രോമിസിങ് യങ് വുമൺ, തീർച്ചയായും കാണാൻ ശ്രമിക്കുക.

Verdict : Very Good

DC Rating : 4.25/5 

1067. Education (2020)

Director : Steve McQueen

Genre : Drama

Rating : 7.6/10

Country : UK

Duration : 63 Minutes

🔸ആദ്യ മൂന്ന് ചിത്രങ്ങൾ തന്ന മികച്ച അനുഭവങ്ങൾക്ക് ശേഷം അലക്സ് വീടിൽ വരുത്തിയ ചെറിയ ക്ഷീണം എഡ്യൂക്കേഷൻ എന്ന ചിത്രത്തിന് മാറ്റാൻ കഴിയുമോ എന്നതായിരുന്നു യഥാർത്ഥ ചോദ്യം. സത്യത്തിൽ വളരെ മികച്ച അറ്റംപ്റ്റ് ആയ സ്മാൾ ആക്സ് അത്തരമൊരു മികച്ച കാപ്പിങ് ഓഫ് അർഹിച്ചിരുന്നു എന്നതും സത്യമാണ്. എന്തായാലും കാര്യത്തിലേക്ക് കടക്കാം, നല്ലൊരു ചിത്രം തന്നെയാണ് എഡ്യൂക്കേഷൻ, സീരീസിലെ ഏറ്റവും പ്രിയപ്പെട്ട മൂന്നാമത്തെ ചിത്രം. ഇതോട് കൂടി ഹൈ ഗ്രൗണ്ടിൽ തന്നെ സീരീസ് അവസാനിക്കുകയാണ്, അർഹിച്ചത് തന്നെ.

🔸പന്ത്രണ്ട് വയസുകാരനായ കിങ്ങ്ലസി സ്മിത്ത് ആണ് നമ്മുടെ കേന്ദ്ര കഥാപാത്രം, സ്‌കൂൾ വിദ്യാർത്ഥിയായ ടിയാന്റെ വലിയൊരു ആഗ്രഹം ഒരു അസ്‌ട്രോനോട്ട് ആവണം എന്നാണ്. സയൻസിനോടും അത് സംബന്ധമായ വിഷയങ്ങളോടും കിങ്സ്ലിക്ക് വലിയ താല്പര്യമുണ്ട്, എന്നാൽ ഒരു ചെറിയ പ്രശനം അയാളെ അലട്ടുന്നുമുണ്ട്. ബേസിക് ആയ വായന ഉൾപ്പെടെ ഉള്ള കാര്യങ്ങളിൽ അയാളുടെ എബിലിറ്റി കുറവാണ്, ഈ ഒരു കാരണം കൊണ്ട് തന്നെ കിങ്സ്ലിക്ക് നേരിടേണ്ടി വരുന്ന അപമാനത്തിനും അവഗണനയ്ക്കും ഒന്നും ഒരു കുറവുമില്ല. ഒരുപക്ഷെ മറ്റുള്ള കുട്ടികളെക്കാൾ അയാൾ അപമാനിതൻ ആവുന്നുണ്ട് എന്ന് തന്നെ പറയാം.

🔸ഈ വിഷയവുമായി ബന്ധപ്പെട്ട കിങ്സ്ലിയുടെ അമ്മയായ ആഗ്നസ് പ്രിൻസിപ്പലിനെ കാണാൻ വരുന്നതും, അവനെ ഒരു സ്പെഷ്യൽ സ്‌കൂളിലേക്ക് മാറ്റേണ്ട സാദ്ധ്യതകൾ ഉദിക്കുന്നതും എല്ലാമാണ് ചിത്രത്തിന്റെ ഒരു പ്ലോട്ട് ലൈൻ. ഇതിന് പുറമെ കിങ്സ്ലിയുടെ സഹോദരി കഥാപാത്രം ഉൾപ്പെടെ നമ്മുടെ താല്പര്യം ഉണർത്തുന്ന മറ്റനേകം കഥാപാത്രങ്ങൾ സിനിമയിലേക്ക് കടന്ന് വരുന്നുമുണ്ട്. കഥയിൽ അരങ്ങേറുന്ന ഓരോ ചെറിയ പ്ലോട്ട് പോയിന്റും, ക്യാരക്റ്റർ ഇന്റെര്വെന്ഷനും പ്ലോട്ടിലേക്ക് മികച്ച രീതിയിൽ കോൺട്രിബ്യുട് ചെയ്യുന്നുണ്ട് എന്നതും വലിയൊരു സവിശേഷതയാണ്.

🔸ഇന്നത്തെ കാലത്ത് പോലും പ്രസക്തമായ വിഷയങ്ങളെ പീരിയഡ് സെറ്റപ്പിൽ അവതരിപ്പിക്കാൻ കഴിഞ്ഞ സംവിധായക മികവ് കയ്യടി അർഹിക്കുന്നത് തന്നെയാണ്. എഡ്യൂക്കേഷൻ എന്ന മികച്ച ചിത്രത്തോട് കൂടി സ്മാൾ ആക്സിന് കർട്ടൻ വീഴുകയാണ്, തീർച്ചയായും കണ്ടിരിക്കേണ്ട ഒരു സിനിമ സീരീസാണ് ഇത്, കണ്ടില്ലെങ്കിൽ നഷ്ടമാണ് എന്ന് തന്നെ പറയാവുന്ന ചിത്രങ്ങൾ ഉൾപ്പെട്ട, ശക്തമായ വിഷയങ്ങൾ പരാമർശിച്ച, മികച്ച അഭിനയ മുഹൂർത്തങ്ങൾ ഉള്ള ഒരു സീരീസ്, കാണാൻ ശ്രമിക്കുക.

Verdict : Very Good

DC Rating : 4/5 

1066. Alex Wheatle (2020)

Director : Steve McQueen

Genre : Drama

Rating : 6.8/10

Country : UK

Duration : 66 Minutes

🔸സ‌മോൾ ആക്സ് സീരീസിൽ ഇതുവരെ കണ്ട മൂന്ന് ചിത്രങ്ങളിൽ ഏറ്റവും ഇഷ്ടപ്പെട്ടത് മാൻഗ്രോവ് ആയിരിക്കും, പിന്നീട് റെഡ് വൈറ്റ് ആൻഡ് ബ്ലൂ. ഈ ഓർഡർ ഇല്ലാതെ ആയാലും പറയാം നിലവാരം കൊണ്ടായാലും അഭിനയ പ്രകടനങ്ങൾ കൊണ്ടായാലും മികച്ച നിലവാരം പുലർത്താൻ ഈ സീരീസിന് ഇതുവരെ കഴിഞ്ഞിട്ടുണ്ട്. എന്നാൽ അതിനൊപ്പം ഉദ്ദേശിച്ച, പറയാൻ തയാറായ കാര്യങ്ങളോട് നീതി പുലർത്താനും സംവിധായകന് കഴിഞ്ഞിട്ടുണ്ട് എന്നത് എടുത്ത് പറയണം. തീർച്ചയായും പറയാം കഴിഞ്ഞ വർഷം ഉണ്ടായ ഏറ്റവും മികച്ച സിനിമാ ഇനീഷ്യേട്ടീവുകളിൽ ഒന്ന് ഈ സീരീസ് ആയിരിക്കും.

🔸മന്നേ വന്ന ചിത്രങ്ങളും മറ്റും കാരണം വലിയ പ്രതീക്ഷ ഉണ്ടായിരുന്നു സീരീസിലെ അവസാന രണ്ട് ചിത്രങ്ങളിൽ, അത് കാരണമാണോ എന്നറിയില്ല ഇതുവരെ വന്നതിൽ വീക്കെസ്റ്റ് എന്നൊക്കെ പറയാവുന്ന ചിത്രമായി ആണ് അലക്സ് വീറ്റിൽ അനുഭവപ്പെട്ടത്. വിഷയം ശക്തം ആണെങ്കിലും അതിന്റെ കാര്യ കാരണങ്ങളിലും അവതരണത്തിലും എല്ലാം ഒരു റീപെട്ടീഷന്റെ ഫീൽ പലയിടത്തും ലഭിക്കുന്നുണ്ട്. ഇങ്ങനെ ഒക്കെ ആണെങ്കിലും പെർഫോ ലെവലിൽ ചിത്രം സീരീസിലെ മറ്റുള്ളവയോട് കിട പിടിക്കുന്നുമുണ്ട്.

🔸മറ്റുള്ള സിനിമകളെ പോലെ തന്നെ പോലീസ് വയലൻസ് ഉൾപ്പെടെ ഉള്ള വിഷയങ്ങൾ ഇവിടെ കടന്ന് വരുന്നുണ്ട്, അത് പോലെ തന്നെ കാലഘട്ടത്തെയും കമ്യുണിറ്റിയെയും പരിഗണിക്കുമ്പോൾ വളരെ പ്രസക്തമായ പല സോഷ്യോ പൊളിറ്റിക്കൽ വിഷയങ്ങളും ഇവിടേക്ക് വരുന്നുണ്ട്. ഇവിടെ പ്രധാന കഥാപാത്രം ഒരു ടീനേജർ ആണ്, അയാളുടെ അച്ഛനെ പറ്റി സിനിമ കാര്യമായി ഒന്നും പറയുന്നില്ല, അമ്മ ആണെങ്കിൽ എന്നോ ഗയാനയിലേക്ക് പോയതാണ്, പിന്നീട് മടങ്ങി വന്നിട്ടില്ല. ചുരുക്കി പറഞ്ഞാൽ അനാഥത്വം നിറഞ്ഞതാണ് അയാളുടെ ബാല്യം.

🔸ഈ ഒരു ഫ്രസ്റ്ററേഷൻ ഉള്ളിലുള്ള കഥാപാത്രം ഇത്തരത്തിലുള്ള ഒരു ട്രോമാറ്റിക്ക് രാഷ്ട്രീയ ഫെയ്‌സിലൂടെ കൂടി കടന്ന് പോവേണ്ടി വന്നാൽ എന്ത് സംഭവിക്കും എന്നതാണ് ചിത്രം പറയാൻ ശ്രമിക്കുന്നത്. മുൻ ചിത്രങ്ങളെ പോലെ താല്പര്യം ജനിപ്പിക്കുന്നില്ല ഈ ചിത്രം, ഓക്കേ ആണ് എന്നതിന് അപ്പുറം എടുത്ത് പറയേണ്ട അനുഭവവും ആയി മരുന്നില്ല. സീരീസിലെ മറ്റുള്ള ചിത്രങ്ങളുടെ കൂട്ടത്തിൽ പെടുത്താൻ കഴിയാത്ത എന്തിരുന്നാലും കണ്ട് വിടാവുന്ന ഒരു ആവറേജ് അനുഭവമാണ് പേഴ്സണലി അലക്സ് വീറ്റിൽ.

Verdict : Average

DC Rating : 2.75/5 

1065. Red White And Blue (2020)

Director : Steve McQueen

Genre : Drama

Rating : 7.6/10

Country : UK

Duration : 80 Minutes

🔸മാൻഗ്രോവ് എന്ന സിനിമയുടെ ഒരു ആന്റി ഡോട്ട് ആയിട്ടൊക്കെ കാണാവുന്ന ചിത്രമാണ് റെഡ് വൈറ്റ് ആൻഡ് ബ്ലൂ. അതായത് ആദ്യ ചിത്രത്തിൽ വെസ്റ്റ് ഇന്ത്യൻ കമ്യുണിറ്റി തങ്ങൾക്ക് പോലീസിന്റെ കയ്യിൽ നിന്നും നേരിടേണ്ടി വരുന്ന തിക്താനുഭവങ്ങൾക്ക് പകരം എന്നവണ്ണം പ്രക്ഷോഭത്തിന് ഇറങ്ങുകയാണ് എങ്കിൽ ഇവിടെയും വിഷയം അതൊക്കെ തന്നെ, പക്ഷെ പെർസ്പെക്റ്ററ്റീവിൽ ആണ് വ്യത്യാസം. ഇവിടെ നമ്മുടെ പ്രധാന കഥാപാത്രം തന്നെ പോലീസ് വിഭാഗത്തിൽ ഉള്ള ആളാണ്, സർവോപരി അയാൾ ആദ്യമേ സൂചിപ്പിച്ച ന്യുന പക്ഷത്തിന്റെ പ്രതിനിധി കൂടിയാണ്.

🔸കാലങ്ങളായി തന്റെ വിഭാഗം നേരിടുന്ന അവഗണനയും അപമാനവും എല്ലാം അയാൾക്ക് സുപരിചിതം ആയിരിക്കണം, അതാവും ഇതിനൊരു മാറ്റം വരുത്താനായി അയാൾ തന്റേതായ മാർഗം പിന്തുടരാൻ ശ്രമിക്കുന്നത്. മാൻഗ്രോവ് എന്ന ചിത്രത്തിലെ സംഭവങ്ങൾക്ക് ശേഷം ഉദ്ദേശം പതിനഞ്ച് വർഷങ്ങൾക്ക് ശേഷമാണ് ഈ ചിത്രത്തിലെ സംഭവങ്ങൾ അരങ്ങേറുന്നത്. അത് കൊണ്ട് തന്നെ വെറുപ്പ് അതിന്റെ പീക് ലെവൽ എത്തിയ സന്ദർഭം ആയിരിക്കണം. ഈ ഒരു അനിമോസിറ്റിയും, ഇന്റെന്സിറ്റിയും കഥാപാത്രങ്ങളുടെയും ചുറ്റുപാടുകളുടെയും സമീപനത്തിൽ തന്നെ പ്രകടമാണ്.

🔸തങ്ങളെ അകൽച്ചയോടെ നോക്കി കാണുന്ന ഫോഴ്സിൽ ഉദ്യോഗസ്ഥൻ ആവുക വഴി തങ്ങളെ പറ്റിയുള്ള മിഥ്യാ ധാരണയും മറ്റും ഇല്ലാതാക്കാൻ കഴിയും എന്ന ചിന്തയാണ് നമ്മുടെ നായക കഥാപാത്രത്തിന്. ഈ ഒരു ലക്ഷ്യം മുന്നിൽ വെച്ച് കൊണ്ട് തന്നെ സേനയിൽ തങ്ങൾക്കായി ഒരു സ്‌പെയ്‌സ് ഉണ്ടാക്കി എടുക്കേണ്ടി ഇരിക്കുന്നു എന്നും അയാൾ വിശ്വസിക്കുന്നുണ്ട്. ലെറോയ് എന്ന നായക കഥാപാത്രത്തിന് ചെറുപ്പത്തിൽ നേരിടേണ്ടി വന്ന തിക്താനുഭവങ്ങളെയും മറ്റുമെല്ലാം ചിത്രം പരാമർശിക്കുന്നുണ്ട്, അർഹിക്കുന്ന ഗൗരവത്തോടെ തന്നെ. കറപ്റ്റ് ആയി ചിന്തിക്കാൻ ഒരാൾ തുനിഞ്ഞിറങ്ങിയാൽ ഉണ്ടാവുന്നത് എത്രത്തോളം ഭീകരമായ കാര്യങ്ങളാണ് എന്നതൊക്കെ ഈ ഒരു പോർഷനിൽ നമുക്ക് കാണാനാവും.

🔸നായക കഥാപാത്രം ഇറങ്ങി തിരിക്കുന്ന ദൗത്യത്തിന് അയാളെ പ്രാപ്തനാക്കിയ, കംപെൽ ചെയ്യിച്ച കാര്യ കരണമൊക്കെ അവിസ്മരണീയമാം വിധമാണ് സിനിമയിൽ അവതരിപ്പിച്ചിരിക്കുന്നത്. സീരീസിൽ ഇതുവരെ ഇറങ്ങിയതിൽ ഏറ്റവും പവർഫുൾ ചിത്രങ്ങളിൽ ഒന്നാണ് റെഡ് വൈറ്റ് ആൻഡ് ബ്ലൂ, നായകനെയും അയാളുടെ സ്‌ട്രെഗിളിനെയും നമുക്ക് ന്യായീകരിക്കാനും, ചേർത്ത് നിർത്താനും കഴിയും വിധം സ്ട്രെയിറ്റ് ആണ്, അയാളുടെ സ്ട്രഗിൾ കണ്ട് കൊണ്ടിരിക്കുമ്പോൾ നമ്മുടേത് കൂടി ആവുന്നിടത്താണ് സിനിമ മറ്റൊരു തലത്തിലേക്ക് പോവുന്നത്.

Verdict : Very Good

DC Rating : 4.25/5 

1064. Lovers Rock (2020)

Director : Steve McQueen

Genre : Drama

Rating : 7.6/10

Country : UK

Duration : 68 Minutes

🔸സ‌മോൾ അക്സ് സീരീസിലെ രണ്ടാമത്തെ ചിത്രമാണ് ലവേഴ്സ് റോക്ക്, സീരീസിലെ ഏറ്റവും ദൈർഘ്യം കുറഞ്ഞ സിനിമയും ഇത് തന്നെ. ഈ ചിത്രത്തിന് ഒരു ചെറിയ പ്രശനം ഉണ്ട്, അതായത് സിനിമയോട്, അതിന്റെ അവതരണത്തോട് ഒരു താല്പര്യം നമ്മളിൽ ഉണ്ടായാൽ ഇത്രയും ഇന്റെരെസ്റ്റിംഗ് ആയി തോന്നുന്ന ചിത്രം അധികം ഉണ്ടാവില്ല. അതെ സമയം നേരെ തിരിച്ചാണ് നിങ്ങളുടെ അനുഭവം എങ്കിൽ കാര്യമായി ഒന്നും തന്നെ സ്‌ക്രീനിൽ അരങ്ങേറാത്ത ഒരു ഫീൽ നിങ്ങൾക്ക് ലഭിക്കും, അപ്പൊ പിന്നെ പൂർണ്ണ നിരാശ ആയിരിക്കും ഫലം.

🔸ആദ്യ ചിത്രത്തെ കുറിച്ച് പറഞ്ഞ ഡിഫോൾട്ട് ബാക്ക്ഗ്രൗണ്ട് സെറ്റപ്പ് എല്ലാം ഈ ചിത്രത്തിനും ബാധകമാണ്, അതായത് എഴുപതുകളുടെ അവസാനമാണ് കാലം, കഥാപശ്ചാത്തലം ബ്രിട്ടനിലെ വെസ്റ്റ് ഇൻഡീസ് കുടിയേറ്റക്കാർ തിങ്ങി പാർക്കുന്ന സ്ഥലം ഒക്കെ തന്നെ. പക്ഷെ ഇവിടെ പ്രകടമായ വ്യത്യാസം എന്തെന്നാൽ ആദ്യ ചിത്രമായ മംഗ്രോവ് ഈ വിഭാഗവും റേസിസ്റ്റുകളായ പുറമേ ഉള്ളവർ തമ്മിൽ ആണെങ്കിൽ ഇവിടെ കോൺഫ്ലിക്റ്റ് കുറച്ച് കൂടി ഇന്റെർണൽ ആണ് എന്നതാണ്. ഈ ഒരു കാരണം കൊണ്ട് തന്നെ വളരെ മനോഹരമായ രീതിയിൽ രണ്ട് സിനിമകളും മെഷ് ചെയ്യുന്നുണ്ട്.

🔸അതായത് രണ്ട് സിനിമകളും സംസാരിക്കുന്ന വിഷയങ്ങളിൽ സാമ്യം ഉണ്ടെങ്കിലും അതിന്റെ പെർസ്പെക്ട്ടീവുകൾ തമ്മിൽ വ്യത്യാസം ഉണ്ട്. കഥയിലേക്ക് വരിക ആണെങ്കിൽ കാര്യമായി പറയാൻ ഒന്നുമില്ല, ഇത് ഒരു പോരായ്മ അല്ല മറിച്ച് പ്രത്യേകത ആയി തന്നെ കാണണം. എഴുപതുകളുടെ കാലഘട്ടത്തിൽ ഈ കുടിയേറ്റ വിഭാഗക്കാരുടെ വീടുകളിൽ ഒന്നിൽ അരങ്ങേറുന്ന പാർട്ടി ആണ് കഥാ പശ്ചാത്തലം, പിന്നീടുള്ള ഒരു മണിക്കൂർ സമയം ഈ പാർട്ടിയെയും അവിടെ സന്നിഹിതർ ആവുന്ന കഥാപാത്രങ്ങളെയും ചുറ്റി പറ്റിയാണ് കഥ പുരോഗമിക്കുന്നത്.

🔸ഇതിനിടയിലേക്ക് ലഹരി, സംഗീതം പോലെയുള്ള വിഷയങ്ങളും ഒരുപാട് കോൺഫ്ലിക്റ്റുകളും, ലൈംഗികത ഉൾപ്പെടെ ഉള്ളവയും ഒക്കെ കടന്ന് വരുന്നുണ്ട്. ഇതൊക്കെ തന്നെയാണ് ഈ ചിത്രം, ഏറെക്കുറെ ആ പാർട്ടിയിൽ പങ്കെടുക്കുന്ന ഒരാളായി കണ്ട് ആസ്വദിച്ച് ഇറങ്ങി പോരാം. കഴിഞ്ഞ വർഷം പുറത്തിറങ്ങിയ ഇഷ്ട ചിത്രമായ ബ്ലാക്ക് ക്ലൻസ്മാനെ അനുസ്മരിപ്പിക്കും വിധമുള്ള ചില പാരലൽസ് ചിത്രത്തിൽ പലയിടത്തും കാണാൻ ഇടയായതിൽ സന്തോഷം. എല്ലാവര്ക്കും സജസ്റ്റ് ചെയ്യാൻ ഉതകുന്ന ചിത്രമല്ല ലവേഴ്സ് റോക്ക്, താല്പര്യം ഉണ്ടെങ്കിൽ മാത്രം കാണുക.

Verdict : Very Good

DC Rating : 4/5 

1063. Mangrove (2020)

Director : Steve McQueen

Genre : Drama

Rating : 7.9/10

Country : UK 

Duration : 128 Minutes

🔸കഴിഞ്ഞ വർഷം സിനിമാ മേഖലയിൽ സംഭവിച്ച ഏറ്റവും മികച്ച കാര്യങ്ങളിൽ ഒന്നായി വിലയിരുത്താവുന്ന ഒന്നാണ് സ്‌മോൾ അക്സ് എന്ന അഞ്ച് പാർട്ട് ആന്തോളജി സിനിമാ സംരംഭം. അറുപതുകൾ തൊട്ട് എൺപതുകൾ വരെ നീണ്ട് നിന്ന കാലഘട്ടത്തിൽ, ബ്രിട്ടനിലെ വെസ്റ്റ് ഇന്ത്യൻ കമ്യുണിറ്റിയുടെ കഥയാണ് സംവിധായകൻ സ്റ്റീവ് മക്വീൻ പറയാൻ ശ്രമിച്ചിരിക്കുന്നത്. നിലവാരത്തിൽ ആയാലും പെർഫോമൻസിൽ ആയാലും ഈ ചിത്രം പുലർത്തുന്ന ഒരു സ്റ്റാൻഡേഡ് പ്രശംസ അർഹിക്കുന്ന ഒന്ന് തന്നെയാണ്.

🔸ഒരു ന്യുനപക്ഷ കമ്യുണിറ്റി, പ്രത്യേകിച്ചും കഴിഞ്ഞ നൂറ്റാണ്ടിൽ ഒക്കെ അതായത് വംശവെറി ഒക്കെ ഉച്ചസ്ഥായിൽ ആളുകളിൽ പലരുടെയും മനസ്സിൽ അടിഞ്ഞ് കൂടിയിരിക്കുന്ന കാലത്ത്, നേരിടേണ്ടി വരുന്ന അവഗണനയും, പരിഹാസവും ദുരനുഭവങ്ങളും എല്ലാം സ്വാഭാഭികമായും വളരെ വളരെ ഭീകരം ആയിരിക്കും. ഈ ഒരു കാര്യത്തിന്റെ നേർ സാക്ഷ്യമാണ് സ്‌മോൾ ആക്സ് എന്ന ആന്തോളജിയും അതിലെ മംഗ്രോവ് എന്ന ചിത്രവും. വെസ്റ്റ് ഇന്ത്യൻ വിഭാഗക്കാരിൽ ഒരാൾ തുടങ്ങുന്ന ഹോട്ടലിന്റെ പശ്ചാത്തലത്തിലാണ് കഥ ആരംഭിക്കുന്നത്.

🔸തങ്ങളുടെ സ്വന്തം നാട്ടിൽ, എവിടെ നിന്നോ ഒരു വരത്തൻ വന്ന് ഒരു സംരംഭം തുടങ്ങി പൈസ ഉണ്ടാക്കുന്നു എന്ന മനോഭാവം തീർച്ചയായും പ്രതീക്ഷിക്കാവുന്നതാണ്, നാട്ടുകാരിൽ നിന്ന്. എന്നാൽ നിയമം സംരക്ഷിക്കേണ്ട നിയമ പാലകരിൽ തന്നെ ഇങ്ങനെ ഒരു ചിന്ത ഉടലെടുത്താൽ എങ്ങിനെ ഉണ്ടാവും, ഇനി ആ ചിന്ത അവരുടെ ഉള്ളിൽ കിടന്ന് പുകഞ്ഞ് പുകഞ്ഞ് ഈ വന്നവനെ ഏത് രീതിയിലും നശിപ്പിച്ച് നാറാണക്കല്ല് എടുപ്പിക്കണം എന്നായാലോ, അത് അതിലും ഭീകരം ആയിരിക്കും, ഇത് തന്നെയാണ് സത്യത്തിൽ ഇവിടെ അരങ്ങേറുന്നതും.

🔸നമ്മുടെ പ്രധാന കഥാപാത്രത്തിന്റെ ഹോട്ടലിൽ എത്തിയ പോലീസുകാർ മനഃപൂർവം അയാളെ ഉപദ്രവിക്കാനും അത് വഴി അയാളുടെയും സംരംഭത്തിന്റെയും ഭാവി തന്നെ ഇല്ലാതാക്കാനും തുനിഞ്ഞ് ഇറങ്ങുന്നു, പിന്നീട് ഈ കാര്യങ്ങൾ ഒരു കോർട്ട് റൂമിലേക്ക് കടന്ന് ചെല്ലുന്നതും പിന്നീടുള്ള പ്രശ്നങ്ങളും എല്ലാമാണ് ചിത്രം. ട്രയൽ ഇൻ ചിക്കാഗോ പോലെ അൽപ സ്വല്പം ഇറിറ്റേറ്റിങ് ആയി മാറുന്നുണ്ട് കോർട്ട് പ്രൊസീഡിയെർസ് ഒക്കെ, അതിനേക്കാൾ മികച്ച ഒരു ചിത്രം ആണ് താനും. അപ്പോൾ താല്പര്യം തോന്നുന്നെങ്കിൽ കാണാൻ ശ്രമിക്കുക.

Verdict : Must Watch

DC Rating : 4.5/5/ 

1039. Saint Maud (2020)

Director : Rose Glass

Genre : Horror

Rating : 6.8/10

Country : UK

Duration : 84 Minutes

🔸A24 എന്ന പ്രൊഡക്ഷൻ കമ്പനി നൽകുന്ന ഒരു ഗ്യാരന്റി ഉണ്ട്, കാണാൻ പോവുന്നത് അത്യാവശ്യം യുണീക് ആയ നിലവാരമുള്ള ചിത്രം ആയിരിക്കും എന്ന ഗ്യാരന്റി. കഴിഞ്ഞ ഒരു ദശകത്തോളമായി ഈ നിലവാരത്തിൽ മികച്ച ട്രാക്ക് റെക്കോർഡ് കീപ്പ് ചെയ്തിട്ടുള്ളവരാണ് പ്രസ്തുത കമ്പനി, ഈ ഒരു കാരണം കൊണ്ട് തന്നെയാണ് സെയ്ന്റ് മോഡ്‌ എന്ന ചിത്രത്തിൽ വലിയ പ്രതീക്ഷ വെച്ച് പുലർത്തിയതും, ഗ്രീൻ നൈറ്റ് ഒക്കെ ഈ വർഷത്തെ മോസ്റ്റ് ആന്റിസിപ്പേറ്റഡ് ചിത്രമായി മാറിയതും.

🔸ഒരുപാട് ഇമോഷണൽ, മെന്റൽ കോൺഫ്ലിക്റ്റുകൾ ഉള്ള ഒരു നേഴ്‌സ് കഥാപാത്രമാണ് മൗദ്, ഒരു പഴയകാല ഡാൻസറിന്റെ പരിചാരിക ആയാണ് അവരിന്ന് ജോലി നോക്കുന്നത്. താൻ സ്പെഷ്യൽ ആണെന്നും ദൈവത്താൽ തിരഞ്ഞെടുക്കപ്പെട്ടവൾ ആണെന്നും ഒക്കെയുള്ള ഒരു ധാരണ അവൾ വെച്ച് പുലർത്തുന്നുണ്ട്. ഇത് കൊണ്ട് തന്നെ പരിചാരിക വൃത്തിക്കപ്പുറം തന്റെ ജന്മ നിയോഗം മറ്റൊന്നാണ് എന്നും അവൾ വിശ്വസിക്കുന്നുണ്ട്. ഇത്തരത്തിൽ ഒരു കഥാപാത്രത്തിന് മുന്നിൽ സ്വാഭാവികമായും ഒരു അവിശ്വാസി എത്തിപ്പെട്ടാൽ നല്ല രസം ഉണ്ടാവും.

🔸മേൽ പറഞ്ഞ സ്ഥലത്തേക്ക് തന്നെയാണ് കാര്യങ്ങളുടെ പോക്ക്, അന്ധമായ രീതിയിൽ ദൈവത്തിൽ വിശ്വസിക്കുന്ന മൗദിനെ സംബന്ധിച്ചിടത്തോളം അവൾക്ക് സ്വന്തം വിശ്വാസങ്ങൾ മുറുകെ പിടിച്ചാൽ മാത്രം പോരാ, മറിച്ച് അത് അവിശ്വാസികളെ ബോധ്യപ്പെടുത്തുകയും അവരെ അവൾ കണ്ടെത്തിയതെന്ന് വിശ്വസിക്കുന്ന നന്മയുടെ പാതയിലേക്ക്, അതായത് ദൈവ വഴിയിലേക്ക് കൊണ്ടുവരികയും വേണം. മനുഷ്യനോളം തന്നെ പ്രായമുള്ള ദൈവ സംബന്ധമായ തർക്കം തന്നെയാണ് സെയ്ന്റ് മൗദിന്റെയും ബേസ്.

🔸പരൊഡക്ഷൻ കമ്പനിയുടെ ആദ്യം സൂചിപ്പിച്ച നിലവാരം ചിത്രം കീപ്പ് ചെയ്യുന്നുണ്ട് എങ്കിലും പ്രതീക്ഷിച്ചത്ര ഹാർഡ് ഹിറ്റിങ് ആയൊരു അനുഭവം ചിത്രത്തിൽ നിന്നും ക്ളൈമാക്സ് ഒഴിച്ച് നിർത്തിയാൽ ലഭിച്ചില്ല എന്ന് പറയേണ്ടി വരും. സിനിമയുടെ എൻഡിങ് ഷോട്ട് ഉൾപ്പെടെയുള്ള അവസാന പതിനഞ്ച് മിനിറ്റ് വേറെ തന്നെ ഒരനുഭവം ആയിരുന്നു. മികച്ച പ്രകടനങ്ങളും, സ്കോറും, സെറ്റപ്പും, പേ ഓഫും എല്ലാം കൂടി ചേരുമ്പോൾ സെയ്ന്റ് മൗഡ് ഒരു നല്ല വ്യൂവിങ് എക്സ്പീരിയൻസ് തന്നെ ആവുന്നുണ്ട്, അപ്പോൾ കാണാൻ ശ്രമിക്കുക.

Verdict : Very Good

DC Rating : 4/5 

999. Where Eagles Dare (1968)

Director : Brian Hutton

Genre : War

Rating : 7.7/10

Country : UK

Duration : 158 Minutes

🔸എഴുപതുകളിലെയും എൺപതുകളിലെയും ഒരുപാട് പ്രശസ്തി ആർജിച്ച പല ഗ്രൂപ് ഓറിയന്റഡ് മിഷൻ ബേസ്ഡ് വാർ മൂവി വിഭാഗത്തിൽ പെട്ട സിനിമകളുടെ ആദ്യ പതിപ്പ് ഒരുപക്ഷെ വേർ ഈഗ്ൾസ് ഡെയർ എന്ന ഈ ചിത്രം ആയിരിക്കും. പിൽക്കാലത്ത് കണ്ട് ഇഷ്ട്ടപ്പെട്ട ഒട്ടനവധി സിനിമകൾക്കുള്ള സ്വാധീനം ഈ ചിത്രത്തിൽ കാണാൻ കഴിഞ്ഞു എന്ന വസ്തുത മാത്രം മതിയാവും പ്രസ്തുത ഫിലിമിന്റെ സ്വാധീനം വ്യക്തമാവാൻ. എഡ്ജ് ഓഫ് ദി സീറ്റ് സെറ്റ് പീസുകൾ, രംഗങ്ങൾ ഇഷ്ടമുള്ളവർക്കും താല്പര്യം തോന്നിയേക്കാവുന്ന അനവധി മോമെന്റുകൾ ഈ ചിത്രത്തിലുണ്ട്.

🔸രണ്ടാം ലോക മഹായുദ്ധം കൊടുമ്പിരി കൊണ്ടിരിക്കുന്ന കാലഘട്ടത്തിലാണ് ഈ ചിത്രം ആരംഭിക്കുന്നത്. ബ്രിട്ടൻ, അമേരിക്ക തുടങ്ങിയ രാജ്യങ്ങളിലെ രഹസ്യാന്വേഷണ വിഭാഗത്തിലെ ചില ഓഫീസർമാർ ഒരു മിഷനിന് വേണ്ടി തയാറെടുക്കുകയാണ്. എന്താണ് മിഷൻ എന്നതിനേക്കാൾ പ്രാധാന്യം കൊടുക്കേണ്ടത് എവിടെയാണ് മിഷൻ എന്ന കാര്യത്തിനാണ്. ശത്രു രാജ്യമായ ജർമനിയിലെ നയതന്ത്ര പ്രാധാന്യമുള്ള ഒരിടത്തേക്കാണ് കയറി ചെല്ലേണ്ടത്, ആത്മഹത്യാപരമായ ദൗത്യം ആണെന്ന് പ്രത്യേകം പറയേണ്ടതില്ലല്ലോ.

🔸ഇനി മിഷനിലേക്ക് വരാം, ആർമിയിൽ മേജറായ ജോൺ സ്മിത്തും ലെഫ്റ്റനന്റ് ഷാഫറും മറ്റ് വ്യത്യസ്ത പശ്ചാത്തലങ്ങളിൽ നിന്നും വരുന്ന അഞ്ച് സൈനികരും ഒരു റെസ്‌കിയു മിഷന്റെ ഭാഗമായി ആണ് ശത്രു രാജ്യത്തേക്ക് കടന്ന് ചെല്ലുന്നത്. അമേരിക്കൻ സേനയിൽ പ്ലാനറായ ഒരു ഉദ്യോഗസ്ഥൻ കഷ്ടകാലത്തിന് ജർമ്മൻ പട്ടാളത്തിന്റെ കയ്യിൽ അകപ്പെട്ട് പോയി, പുള്ളിയുടെ കയ്യിൽ നിന്നും നിർണ്ണായകമായ വിവരങ്ങൾ ശത്രുക്കൾ കൈവശപ്പെടുത്തുന്നതിന് മുന്നേ അയാളെ രക്ഷപ്പെടുത്തിയിരിക്കണം എന്നാണ് അവർക്ക് ലഭിക്കുന്ന നിർദ്ദേശം. എന്ത് തന്നെ ആയാലും ഹെലികോപ്റ്ററിന്റെ സഹായത്തിൽ എല്ലാവരും പ്രദേശത്തിന് അടുത്ത് എത്തുന്നുണ്ട്.

🔸ഈ ഒരു പശ്ചാത്തലത്തിലാണ് ഒരു സ്പൈ അല്ലെങ്കിൽ ചാരൻ തങ്ങളുടെ ഒപ്പം ഉണ്ടോ എന്നൊരു സംശയം മിഷന്റെ കോർഡിനേറ്റര്മാര്ക്കും, കാണുന്ന നമ്മൾ കാഴ്ചക്കാർക്കും ഉണ്ടാവുന്നത്. സ്വാഭാവികമായും കൂടുതൽ അപകടത്തിലേക്ക് കാര്യങ്ങളെ കൊണ്ടുപോവുന്ന ഈ ഒരു സാധ്യത കൂടി കടന്ന് വരുമ്പോൾ സിനിമ കൂടുതൽ വൈൽഡ് ആവുകയാണ്. രണ്ടര മണിക്കൂറിന് അടുത്ത് ത്രിൽ അടിച്ച് കാണാനുള്ള മെറ്റേറിയലും, കിടിലൻ ആക്ഷൻ സെറ്റ്‌പീസുകളും എല്ലാം ചിത്രത്തിന്റെ പ്രത്യേകതകളാണ്. ക്ലിന്റ് ഈസ്റ്റ്വുഡിന്റെ പ്രസൻസിനെ കുറിച്ച് കൂടുതൽ പറയേണ്ട കാര്യവുമില്ല, അപ്പോൾ കാണാൻ ശ്രമിക്കുക.

Verdict : Very Good

DC Rating : 4.25/5 

980. Ammonite (2020)

Director : Francis Lee

Genre : Drama

Rating : 6.4/10

Country : UK

Duration : 120 Minutes

🔸ഒരു ഓസ്കർ ബെയ്റ്റ് ചിത്രം എന്ന് കണ്ണും പൂട്ടി പറയാവുന്ന സവിശേഷതകൾ എല്ലാം ഉണ്ടായിരുന്ന ചിത്രമാണ് അമോണൈറ്റ്. പീരിയഡ് ഡ്രാമ സെറ്റപ്പ്, രണ്ട് ഹിസ്റ്റോറിക്കൽ ഫിഗറുകളായ സ്ത്രീകൾക്ക് ഇടയിൽ ഉടലെടുക്കുന്ന പ്രണയം, അക്കാദമി ഫേവറൈറ്റ് ആയ രണ്ട് നടിമാരുടെ സാന്നിധ്യം തുടങ്ങി ഒരുപാട് ഒരുപാട് ഘടകങ്ങൾ. ഒരുവേള മികച്ച നടിക്കുള്ള പുരസ്‌കാരം എങ്കിലും പ്രതീക്ഷിച്ചിരുന്നു എന്ന് ഉറപ്പിച്ച് പറയാം, കിട്ടില്ല എന്ന് ഇപ്പോഴും പറയുന്നില്ല. ഹിസ്റ്റോറിക്കൽ ഇൻ ആക്കുറസി പോലുള്ള പ്രശ്നങ്ങൾ കാരണം ഇതിനോടകം തന്നെ അത്യാവശ്യം വിവാദം ഉണ്ടാക്കിയ ചിത്രം കൂടിയാണ് അമോണൈറ്റ്.

🔸കേറ്റ് വിൻസ്ലേറ്റ് അവതരിപ്പിച്ച മേരി ആനിങ് എന്ന കഥാപാത്രം ഒരു പേരുകേട്ട പാലിയന്റോളജിസ്റ്റ് ആണ്, യുണിവേഴ്സിറ്റിയിലോ തത്തുല്യമായ കേന്ദ്രങ്ങളിലോ ഒന്നും പോവാതെ സ്വയം പഠിച്ച് അറിഞ്ഞ് വളർന്ന ഒരു ഫോസിൽ ഹണ്ടർ. ഈ വിഭാഗത്തിൽ മേരിക്ക് തുല്യം അറിവുള്ള മറ്റൊരാൾ രാജ്യത്ത് ഉണ്ടോ എന്നത് പോലും സംശയമാണ്, എന്തിരുന്നാലും രാജ്യത്തെ സിരാ കേന്ദ്രങ്ങളോ പാലിയന്റോളജി ഡിപ്പാർട്മെന്റോ അവരെ കാര്യമായി പരിഗണിച്ചിട്ടില്ല. ഇന്ന്, കഥ തുടങ്ങുമ്പോൾ മേരിയുടെ സ്ഥിതി കുറച്ച് മോശമാണ്, ദാരിദ്ര്യാവസ്ഥ വല്ലാതെ ബാധിച്ചിരിക്കുന്നുണ്ട് അവരെ.

🔸തന്റെ പഠനം മേരി മുന്നോട്ട് കൊണ്ടുപോവുന്നുണ്ട് എങ്കിലും വരുമാനത്തിനായി ടൂറിസ്റ്റുകൾക്ക് വേണ്ടി കടപ്പുറത്ത് നിന്ന് കിട്ടുന്ന കൗതുക വസ്തുക്കൾ കാഴ്ചവെക്കാനും, ടൂറിസ്റ്റ് ഗൈഡ് തന്നെ ആവാനും അവർ ശ്രമിക്കുന്നുണ്ട്. അമ്മ ഒഴിച്ചാൽ മേരിക്ക് ബന്ധുക്കൾ എന്ന് പറയാൻ തക്കവണ്ണം ആരുമില്ല. ആയിടയ്ക്കാണ് റോഡരിക് മാർച്ചിൻസൺ എന്ന പാലിയന്റോളജി സ്റ്റുഡന്റ് കൂടിയായ വ്യക്തി മേരിയെ കാണാൻ വരുന്നത്, കൂടെ അയാളുടെ ഭാര്യ ഷാർലറ്റും ഉണ്ട്. റോഡറിക്കിന്റെ ഈ വരവിന് പിന്നിൽ വേറെ ചില കാര്യങ്ങൾ കൂടിയുണ്ട്.

🔸വിധി എന്നൊക്കെ പറയുന്നത് പോലെ കാര്യങ്ങൾ ആകെ മാറി മറിഞ്ഞ് രോഗി ആയ ഷാർലറ്റ് മേരിയുടെ പരിചരണത്തിൽ ആവുകയാണ്. രണ്ട് സ്ത്രീകൾക്കും ഇടയിലെ ബന്ധത്തിന് ഈ കാലയളവിനിടെ വരുന്ന മാറ്റങ്ങളും തങ്ങളുടെ ജീവിതത്തിൽ പരസ്പരം ഉണ്ടാക്കുന്ന ഇമ്പാക്റ്റും സ്വാധീനവും ഒക്കെയാണ് ഈ സിനിമയുടെ വിഷയം. രണ്ട് മികച്ച നടീ നടന്മാർ ഒന്നിച്ചാൽ ഒരിക്കലും നല്ല കെമിസ്ട്രി ഗ്യാരന്റീഡ് ആയി കിട്ടില്ല എന്നതിന് ഉദാഹരണമായി തോന്നി അമോണൈറ്റ്, എന്തോ ഒരു കുറവ് അനുഭവപ്പെട്ടു. മോശം സിനിമ ആണെന്നല്ല, നല്ല ബാക്ക്ഗ്രൗണ്ടും കഥാപാത്രങ്ങളും ഒക്കെയാണ് പക്ഷെ ഒരു ബാരിയർ ഇടയിൽ എവിടെയോ നിൽക്കുന്നത് പോലെ തോന്നി, അത് ബ്രെയ്ക്ക് ചെയ്യഞ്ഞത് കൊണ്ട് തന്നെ അവിസ്മരണീയമായ അനുഭവം ഒന്നും ആവുന്നില്ല ഈ ചിത്രം, സ്റ്റിൽ കാണാനുള്ളതുണ്ട്.

Verdict : Good

DC Rating : 3.5/5

946. His House (2020)

Director : Remi Weekes

Genre : Horror

Rating : 6.4/10

Country : UK

Duration : 93 Minutes

🔸സഥിരം ക്ളീഷേ ജംപ് സ്‌കെയറുകൾക്ക് പിറകെ പോവാതെ കാര്യവും കാമ്പുമുള്ള, പറയാൻ ഉദ്ദേശിച്ച കാര്യം സ്ട്രെയിറ്റ് ആയി വളച്ച് കെട്ടലുകളോ ഏച്ച് കെട്ടലുകളോ ഇല്ലാതെ പറഞ്ഞ് പോയ ഹൊറർ സിനിമകളുടെ പട്ടികയിലേക്ക് ഉൾപ്പെടുത്താവുന്ന ഒരു ചിത്രം കൂടി, അതാണ് ഹിസ് ഹൌസ്. ട്രീറ്റ്‌മെന്റ് കൊണ്ടും സൂപ്പർ നാച്ചുറൽ എലെമെന്റുകൾ കൊണ്ടുമെല്ലാം കഴിഞ്ഞ വർഷം പുറത്തിറങ്ങിയ അറ്റ്ലാന്റിക്സ് എന്ന ചിത്രത്തെ ഓർമ പെടുത്തുന്നുണ്ട് ഈ ചിത്രം. പ്ലോട്ടിനെ കുറിച്ച് വലിയ അറിവൊന്നും ഇല്ലാതെ കാണുന്നത് നന്നാവും എന്നത് കൊണ്ട് തന്നെ ഇവിടെ നിന്നും വായന നിർത്തി മടങ്ങി പോകാവുന്നതാണ്, ചിത്രം നല്ലൊരു അനുഭവം തന്നെയാണ്.

🔸സൗത്ത് സുഡാനിൽ നിന്നുമാണ് കഥ ആരംഭിക്കുന്നത്, കുറച്ചധികം കാലമായി നിലനിൽക്കുന്ന കിരാത ഭരണവും ആഭ്യന്തര യുദ്ധവും ഒക്കെ കാരണം അവിടെ താമസിക്കുക എന്നത് കഠിനമായി മാറിയിരിക്കുന്നു, പ്രത്യേകിച്ചും സാധാരണക്കാരായ ജനങ്ങൾക്ക്. ഇങ്ങനെ ഒരു ചുറ്റുപാടിൽ കയ്യിൽ കിട്ടിയ വസ്തു വകകളുമായി രാജ്യത്ത് നിന്ന് രക്ഷപ്പെടാൻ ശ്രമിക്കുന്ന ദമ്പതികളെ കാണിച്ച് കൊണ്ടാണ് സിനിമ തുടങ്ങുന്നത്, ഇവരാണ് നമ്മുടെ കേന്ദ്ര കഥാപാത്രങ്ങൾ. ഒരു വിധേന എല്ലാ പ്രതി ബന്ധങ്ങളും മറികടന്ന് അവിടെ നിന്നുള്ള അവസാന വണ്ടിയിൽ ഇരുവരും കയറി പറ്റുകയാണ്.

🔸തൊട്ടടുത്ത സീനിൽ കാണിക്കുന്നത് ഇങ്ങനെ രക്ഷപ്പെട്ട് പോയ കഥാപാത്രങ്ങൾ കടൽ മാർഗം യാത്ര തിരിക്കുന്നതാണ്, ഒരു ചെറിയ ബോട്ട് എന്ന് പറയാം, അതിൽ ആണെങ്കിൽ തിക്കി തിരുകിയത് പോലെ ആളുകളും ഉണ്ട്. ഈ രാത്രി യാത്രയ്ക്ക് ഇടയിൽ ഒരപകടം ഇവിടെ അരങ്ങേറുകയാണ്, ഈ ഒരു പോയിന്റിൽ ഇത് എന്താണെന്ന് ചിത്രം വ്യക്തമാക്കുന്നുമില്ല, സ്പോയിൽ ചെയ്യാൻ താല്പര്യവുമില്ല. ഈ ഒരു സംഭവത്തിന് പിന്നീട് കഥയിൽ അത്യാവശ്യം പ്രാധാന്യം ഉണ്ട് താനും, എന്തായാലും നമ്മുടെ കഥാപാത്രങ്ങൾ കഷ്ടപ്പെട്ട് ഇന്ഗ്ലണ്ടിൽ എത്തിപ്പെടുന്നുണ്ട്.

🔸അഭയാർത്ഥികൾ ആയതിനാൽ തന്നെ അത്ര ആശാവഹമായ സ്വീകരണം ഒന്നുമല്ല അവർക്ക് ലഭിക്കുന്നത്, സ്വതന്ത്രമായി ജീവിക്കാനുള്ള അനുവാദം കിട്ടുന്നത് വരെ തടവിൽ കഴിയേണ്ടിയും വരുന്നുണ്ട്. അങ്ങനെ ഒക്കെ ആണെങ്കിലും ഒരുനാൾ ഇവർക്ക് താമസ അനുവാദം കൊടുക്കുകയും, ഒരു വീട് അതോറിറ്റി കണ്ടെത്തി നൽകുകയും ചെയ്യുന്നുണ്ട്. ഈ വീട്ടിൽ താമസത്തിന് എത്തിയ കഥാപാത്രങ്ങൾ അവിടെ ചില ദുസൂചനകൾ കണ്ട് തുടങ്ങുന്നിടത്താണ് കഥ ചൂട് പിടിക്കുന്നത്, ഈ ഒരു വിശദീകരണത്തിൽ നിന്നും സ്ഥിരം ക്ളീഷേ ഐറ്റം ആണെന്ന് പ്രതീക്ഷിക്കരുത്, നിങ്ങൾ കരുതുന്ന വഴിയേ കഥ പോയേക്കില്ല.

Verdict : Very Good

DC Rating : 4/5 

899. Enola Holmes (2020)

Director : Harry Bradbeer

Genre : Thriller

Rating : 8.2/10

Country : UK

Duration : 123 Minutes

🔸എത്ര പുതിയ വേർഷൻ സിനിമകൾ അല്ലെങ്കിൽ സീരീസുകൾ അതും അല്ലെങ്കിൽ കഥകൾ വന്നാലും മടുപ്പ് തോന്നാത്ത, അല്ലെങ്കിൽ ഇത് നിർത്താറായില്ലേ എന്ന് തോന്നാത്ത (ഫാസ്റ്റ് ആൻഡ് ഫ്യുരിയസ് സെയ്‌സ് ഹൈ) അപൂർവം യുണിവേഴ്‌സുകളിൽ ഒന്നാണ് ഷെർലോക്ക് യുണിവേഴ്‌സ്. ഈ വിഭാഗത്തിൽ ലഭ്യമായ ഒരുവിധപ്പെട്ട എല്ലാം കണ്ട് തീർന്നിട്ടുണ്ട്, ചിലത് രണ്ടോ മൂന്നോ തവണ ഒക്കെ, പോയിന്റ് ഈസ് ഇത്രയും ഫാസിനേഷൻ തോന്നിയ വേറൊരു ഫിക്ഷനൽ കഥാപാത്രം ഇല്ല എന്ന് തന്നെ. ഇവയിൽ ഒരിടത്തും പറഞ്ഞ് കേട്ടിട്ടില്ലാത്ത കാര്യമാണ് ഷെർലോക്കിന്റെ പെങ്ങളായ ഇനോള ഹോംസിനെ പറ്റി, ഈ ഒരു വസ്തുത തന്നെയാണ് പേഴ്സണലി ഏറ്റവും താല്പര്യം ഉണർത്തിയ ഘടകവും, പരിചയം ഇല്ലായ്മ അല്ലെങ്കിൽ ആ അൺപ്രെഡിക്റ്റബിലിറ്റി.

🔸രണ്ട് കേസുകളാണ് സിനിമയിൽ ഉള്ളത്, അതിന്റെ ഡീറ്റെയിൽസിലേക്ക് ഒന്നും പോവുന്നില്ല, പുതിയ സിനിമ ആയത് കൊണ്ട് ഒഴിവാക്കുന്നു. ഇനോളയുടെ ഓർമകളിൽ അവ്യക്തമായ രൂപങ്ങളാണ് സഹോദരന്മാരായ ഷെർലോക്കും മൈക്രോഫ്റ്റും, ഇരുവരെയും അവൾ നേരിൽ കണ്ടിട്ട് കാലം ഒരുപാടായി. ഇനോലയോടൊപ്പം എല്ലാ കാലത്തും ഉണ്ടായിരുന്നത് അമ്മയായ യുടോറ മാത്രമാണ്, അവർ ഒരുപരിധി വരെ സുഹൃത്തുക്കളെ പോലെ ആണെന്നും പറയാം. ടെക്സ്റ്റ് ബുക്കുകളിൽ കൂടിയുള്ള വിദ്യാഭ്യാസത്തിനോട് യുടോറയ്ക്ക് വലിയ താല്പര്യം ഒന്നും ഉണ്ടായിരുന്നില്ല, ഒരിക്കലും.

🔸അവൾ മകളെ പഠിപ്പിച്ചത് ആയോധന കലകളും, വായനാ ശീലം വളർത്താനും, നിരീക്ഷണ പാടവം ഉണ്ടാക്കാനും ഒക്കെയാണ്, ഒരു റിബൽ സ്വഭാവമാണ് ഇനോളയ്ക്ക്, അതിൽ തെറ്റ് പറയാനുമാവില്ല, യുടോറയും അങ്ങനൊക്കെ തന്നെ. ഇത്രയും പറഞ്ഞതിൽ സ്പോയ്ലർ ഒന്നും തന്നെ ഇല്ല, ഇനി അങ്ങോട്ട് പറയാനും പോവുന്നില്ല. സിനിമ നെറ്റ്ഫ്ലിക്സിൽ സ്ട്രീം ചെയ്യുന്നുണ്ട്, കണ്ട് നോക്കാവുന്നതാണ്, അത്യാവശ്യം എന്റർടൈനിംഗ് ആണ് ചിത്രം, കണ്ടാൽ നഷ്ടം ഒന്നും തന്നെയില്ല എന്ന് സാരം. ചിത്രത്തിന്റെ കഥയുമായി വലിയ ബന്ധം ഒന്നും ഇല്ലാത്ത ചില തോന്നലുകളാണ് ചുവടെ ചേർക്കുന്നത്, മുൻ ഷെർലോക്ക് അഡാപ്റ്റേഷനുകൾ ഒക്കെ ആധാരമാക്കി ഉള്ള ചിലത്.

🔸കറ്റാന്വേഷണ കലയിൽ പരിചയം വന്നിട്ടില്ലാത്ത ചെറുപ്പക്കാരനായ ഷെർലക്കിനെ ആണ് ഇവിടെ കാണാനാവുക, അത് അത്യാവശ്യം കൗതുകകരം ആയ ഒന്ന് തന്നെയാണ്, തന്റെ സ്വതസിദ്ധമായ സ്വാഗ്, അരോഗൻസ് ഒന്നും ഇല്ല. പക്ഷെ അത്യാവശ്യം പ്രശ്നമായി തോന്നിയത് മൈക്രോഫ്ടിനെ ആണ്, തന്നോളം കഴിവുള്ള എന്നാൽ ലവലേശം ഈ വിഷയത്തിൽ താല്പര്യം ഇല്ലാത്ത എന്ന് ഷെർലോക്ക് തന്നെ വിശേഷിപ്പിച്ച മൈക്രോഫ്റ്റിന്റെ പൂർണമായും തൃപ്തി പെടുത്തിയ ഒരു ഓൺ സ്ക്രീൻ വേർഷൻ ഇന്നുവരെ കണ്ടിട്ടില്ല, ഇതിലും ഇല്ല, ഒരുപക്ഷെ സീക്വൽ ഒക്കെ ഉണ്ടെങ്കിൽ വന്നേക്കാം. അതെ, ഒരു ഫ്രാഞ്ചൈസ് അല്ലെങ്കിൽ തുടർ ഭാഗങ്ങൾക്ക് സ്കോപ്പ് ഉള്ള ഒന്നാണ് ഇനോള ഹോംസ്, അപ്പൊ കണ്ട് നോക്കാവുന്നതാണ്.

Verdict : Good

DC Rating : 3.5/5 

864. Official Secrets (2019)

Director : Gavin Hood

Genre : Drama

Rating : 7.3/10

Country : UK

Duration : 112 Minutes

🔸ഈ നൂറ്റാണ്ടിന്റെ തുടക്കത്തിൽ അമേരിക്ക അഫ്ഘാനിസ്ഥാനിലും ഇറാക്കിലും ഒക്കെ നടത്തിയ അധിനിവേശത്തിന്റെ ഒക്കെ പശ്ചാത്തലത്തിൽ അനവധി സിനിമകൾ പുറത്തിറങ്ങിയിട്ടുണ്ട്, മിക്കതും യുദ്ധ മുഖത്തെ ഭീകരത ഒക്കെ തുറന്ന് കാണിക്കുന്നത്. എന്നാൽ ഇത്തരം ചിത്രങ്ങളിൽ മിക്കതിലും കാര്യങ്ങൾ ആയുധങ്ങളിലേക്ക് എത്തുന്നതിന് മുൻപുള്ള കോൺസ്പിരസികളും പൊളിറ്റിക്കൽ വശവും ഒക്കെ മിക്കപ്പോഴും മുഴുവനായോ അല്ലെങ്കിൽ തീർത്തും പരോക്ഷമായി പരാമര്ശിക്കപ്പെടുകയോയെ ചെയ്ത് കണ്ടിട്ടുള്ളൂ. ഇവിടെയാണ് ഒഫീഷ്യൽ സീക്രെട്സ് എന്ന ചിത്രം വേറിട്ട് നിൽക്കുന്നത്.

🔸ഈ നൂറ്റാണ്ടിന്റെ ആരംഭത്തിൽ നടന്ന ഒരു യഥാർത്ഥ സംഭവമാണ് ഒഫീഷ്യൽ സീക്രെട്സ് എന്ന ചിത്രത്തിന് ആധാരം, കാതറീൻ ഗൺ എന്ന പേര് ഇന്ന് ചിലപ്പോൾ നമുക്ക് മിക്കവർക്കും അന്യം ആയിരിക്കും, അതിന് കാരണവുമുണ്ട്, ഇവിടെ സൂചിപ്പിക്കാൻ പോവുന്ന സംഭവങ്ങളുടെ ഒക്കെ ആഫ്റ്റർ എഫക്ട് കാരണമാവാം ആ പേര് വിസ്‌മൃതിയിൽ ആണ്ട് പോയത്, ഈ കാരണം കൊണ്ട് തന്നെ പറയേണ്ട, എല്ലാവരും അറിയേണ്ട ഒരു കഥയാണ് ഒഫിഷ്യൽ സീക്രറ്റ്സിലേത്. വർഷം 2003, ഒരു ഭാഗത്ത് അമേരിക്കയും മറു ഭാഗത്ത് സദ്ദാം ഹുസൈനും ആയി ഒരു പോർക്കളത്തിലേക്ക് കാര്യങ്ങൾ പോയി കൊണ്ടിരുന്ന വളരെ ദുർഘടമായ സമയം.

🔸അമേരിക്കയെയും മറ്റ് അനുചര രാജ്യങ്ങളെയും സംബന്ധിച്ച് പ്രശ്ന പരിഹാരത്തിനുള്ള ഒരേയൊരു മാർഗം യുദ്ധം ആയിരുന്നു, ഏത് വിധേനയും കാര്യങ്ങൾ അവിടേക്ക് എത്തിക്കാനുള്ള മനഃപൂർവ്വമായ നീക്കം ആ ഭാഗത്ത് നിന്നും ഉണ്ടായിരുന്നു. യുദ്ധത്തിനും അമേരിക്കയ്ക്കും എതിരായി നിന്ന ഒരേയൊരു കാര്യം അന്താരാഷ്ട്ര സംഘടനയായ യുഎന്നും അതിനെതിരെ നടന്ന വോട്ടെടുപ്പും മാത്രമായിരുന്നു. അമേരിക്കയ്ക്ക് യുദ്ധ മുഖത്തേക്ക് ഇറങ്ങാൻ ആവശ്യമായ വോട്ട് അവർക്ക് ലഭിച്ചിരുന്നില്ല, ഇത് ലഭിക്കാനായി അവരുടെ ചില ഉന്നത ഉദ്യോഗസ്ഥർ ന്യുട്രൽ ആയി നിന്ന മൂന്നാം ലോക രാജ്യങ്ങളെ സ്വാധീനിക്കുകയും ഒരു പരിധി വരെ ഫോഴ്‌സ് ചെയ്യുകയും ചെയ്തിരുന്നു, ഊഹങ്ങൾ അല്ല അതിന്റെ രേഖകൾ ലീക്ക് ആയിരുന്നു.

🔸ടോപ് സീക്രെട് എന്നൊക്കെ വിശേഷിപ്പിക്കാവുന്ന പ്രസ്തുത രേഖകൾ പബ്ലിക് ആക്കിയത് ബ്രിട്ടനിലെ രഹസ്യാന്വേഷണ വിഭാഗത്തിൽ ജോലി ചെയ്തിരുന്ന കാതറീൻ ഗൺ എന്ന യുവതിയായിരുന്നു, അവരുടെ ആന്റി വാർ മെന്റാലിറ്റിയും മറ്റും ഒക്കെ ആയിരുന്നു ഇതിന് പ്രേരിപ്പിച്ച ഘടകം. തുടർന്ന് അവർക്ക് വ്യക്തി ജീവിതത്തിലും ഔദ്യോഗിക ജീവിതത്തിലും ഒക്കെ നേരിടേണ്ടി വരുന്ന പ്രശ്നങ്ങളും മറ്റുമൊക്കെയാണ് ഈ ചിത്രത്തിന്റെ പ്രെമിസ്. കേന്ദ്ര കഥാപാത്രമായ കെയ്‌റ നൈറ്റ്‌ലിയും രണ്ടാം പാതിയിൽ മാത്രം വരുന്ന റാൽഫ് ഫിയെന്നീസും ഉൾപ്പെടെ ശക്തമായ പ്രകടനങ്ങളാണ് സ്‌ക്രീനിൽ ഉള്ള സകലരും കാഴ്ച വെച്ചത്, ചുരുക്കി പറയുക ആണെങ്കിൽ അധികം ആരുടേയും ശ്രദ്ധയിൽ പെടാതെ പോയ പവർഫുൾ ആയൊരു ചിത്രം, അതാണ് ഒഫീഷ്യൽ സീക്രെട്സ്.

Verdict : Very Good

DC Rating : 4/5

803. The Killing Fields (1984)

Director : Roland Joffé

Genre : War

Rating : 7.8/10

Country : UK

Duration : 142 Minutes

🔸ഒരു യുദ്ധ ചിത്രം എന്ന് പറയുമ്പോൾ മിക്കപ്പോഴും നമ്മുടെ മുന്നിൽ എത്തുന്നവ പിന്തുടരുന്ന ഒരു പാറ്റേൺ ഉണ്ട്, അതായത് ഒരു ഭാഗത്തെ കടന്ന് കയറ്റക്കാരൻ ആയും മറു ഭാഗത്തെ വിക്‌ടിം ആയും അവതരിപ്പിക്കുന്ന ഒരു രീതി. സിനിമയെ സംബന്ധിച്ച് ആവശ്യമായ നായക വില്ലൻ സങ്കല്പങ്ങളെ ഒക്കെ ഊട്ടി ഉറപ്പിക്കാൻ ഈയൊരു രീതി വളരെ ആവശ്യമാണ്, എന്നാൽ ഇവിടെ സത്യം അല്ലെങ്കിൽ യഥാർത്ഥ വസ്തുതകൾ കുഴിച്ച് മൂടപെടുകയാണ്, ഇങ്ങനെയുള്ള അനവധി അനവധി സിനിമകളിൽ വേറിട്ട് നിൽക്കുന്ന ഒന്നാണ് കില്ലിംഗ് ഫീൽഡ്സ് എന്ന ചിത്രം. യുദ്ധ ചിത്രം എന്ന നിലയിൽ നിൽക്കുമ്പോൾ തന്നെയും രണ്ട് ഭാഗങ്ങളെയും വിമർശിക്കുന്നുണ്ട് ഈ ചിത്രം, നിശിതമായി തന്നെ.

🔸അമേരിക്ക എന്ന രാജ്യം കംബോഡിയയിൽ നടത്തിയ കടന്ന് കയറ്റത്തെയും അതിന് ശേഷം അരങ്ങേറിയ മുതലെടുപ്പിന്റെയും ക്രൂരതയുടെയും കഥ ഒക്കെ വിമർശിക്കുമ്പോൾ തന്നെയും പോൾ പ്ലോട്ട് എന്ന ഏകാധിപതിയുടെ കാട്ടി കൂട്ടലുകളും ഖെമാർ റോഗ് എന്ന വിമത സേനയുടെ കൊള്ളരുതായ്മയും എല്ലാം ചിത്രം വിഷയമാക്കുന്നുണ്ട്. ഇതെല്ലാം ശക്തമായി പ്രതിപാദിക്കുമ്പോൾ തന്നെയും കോർ പ്ലോട്ട് എന്നത് സൗഹൃദത്തിൽ ഊന്നി നിൽക്കുന്ന ഒന്നാണ്. ഇത് പോലൊരു ഡിസ്‌ടോപ്യൻ സെറ്റപ്പിൽ വളർന്ന് വന്ന സൗഹൃദം ആയത് കൊണ്ട് കൂടി ആവണം സിഡ്‌നിക്കും പ്രാണിനും ഇടയിലുള്ള ആ ബന്ധം കൂടുതൽ മനോഹരം ആവുന്നുണ്ട്.

🔸സിഡ്‌നി ഷൻബെർഗ് എന്ന അമേരിക്കൻ ജേര്ണലിസ്റ്റിന്റെ ദി ഡെത് ആൻഡ് ലൈഫ് ഓഫ് ഡിത് പ്രാൺ എന്ന പുസ്തകത്തിന്റെ ചലച്ചിത്രാവിഷ്കാരം ആണ് ദി കില്ലിംഗ് ഫീൽഡ്സ് എന്ന ചിത്രം. സിഡ്‌നിയും പ്രാനും തന്നെയാണ് പ്രധാന കഥാപാത്രങ്ങൾ, ഇരുപതാം നൂറ്റാണ്ടിന്റെ രണ്ടാം പാതിയിലെ കംബോഡിയ ആണ് നമ്മുടെ കഥാ പശ്ചാത്തലം. കമ്പോഡിയൻ നാഷണൽ ആർമിയും വിമത ഗ്രൂപ്പായ ഖമർ റോഗുമായുള്ള ആഭ്യന്തര യുദ്ധം രക്ത രൂഷിതമായ അവസ്ഥയിലേക്ക് പോയി കൊണ്ടിരിക്കുന്ന സന്ദർഭത്തിലാണ് ഇത് റിപ്പോർട്ട് ചെയ്യാനായി സിഡ്‌നി ഷെൽഡൺ ആ നാട്ടിൽ വിമാനം ഇറങ്ങുന്നത്, അവിടെ വെച്ചാണ് അയാൾ തന്റെ ജീവിതം തന്നെ മാറ്റി മറിച്ച ദിത് പ്രാണിനെ കണ്ട് മുട്ടുന്നതും.

🔸വന്ന് ഇറങ്ങിയതിന് പിന്നാലെ തന്നെ സിഡ്‌നിയും സംഘവും ആ നാട്ടിലെ അരക്ഷിതാവസ്ഥയിലേക്ക് വലിച്ചെറിയപ്പെടുകയാണ്, അമേരിക്കൻ പട്ടാളം രാജ്യത്തിൻറെ തലസ്ഥാന നഗരിയിൽ ബോംബ് വർഷിച്ചത് പ്രശ്നങ്ങളെ കൂടുതൽ വഷളാക്കുന്നെ ഉള്ളൂ താനും. പതിയെ പതിയെ റിപ്പോർട്ട് ചെയ്യാനായി എത്തിയ സിഡ്‌നിയും സംഘവും യുദ്ധത്തിന്റെ ഭാഗവും ബാക്കി പത്രവും എല്ലാമായി മാറുകയാണ്, തുടർന്ന് അരങ്ങേറുന്ന സംഭാഗങ്ങളാണ് രണ്ടര മണിക്കൂറിന് അടുത്ത് ദൈർഘ്യമുള്ള ഈ ചിത്രം. ഒരു ആന്റി വാർ ചിത്രമായി ഉയർത്തി കാട്ടാവുന്ന മികച്ച ഉദാഹരണമാണ് ദി കില്ലിംഗ് ഫീൽഡ്സ്, മികച്ച സൗണ്ട് ട്രാക്കും, ഛായാഗ്രഹണവും എല്ലാം പ്രത്യേകതകളാണ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

767. Hellraiser (1987)

Director : Clive Barker

Genre : Horror

Rating : 7/10

Country : UK

Duration : 94 Minutes

🔸സംവിധായകൻ ക്ളൈവ് ബാർകരുടെ കരിയർ എന്നത് ഒരു മിസ്റ്ററി ത്രില്ലർ സിനിമ പോലെയാണ്, എൺപതുകളിൽ സിനിമ സ്ക്രീനിലേക്ക് കടന്ന് വന്നപ്പോൾ തൊട്ട് പൊട്ടെൻഷ്യലിൽ പുള്ളി ഒരുപാട് വാഴ്ത്തപ്പെട്ടിട്ടുണ്ട്, ഹൊറർ സിനിമകളുടെ ഭാവി എന്ന് ക്ളൈവിനെ വിശേഷിപ്പിച്ചത് സാക്ഷാൽ സ്റ്റീഫൻ കിംഗ് തന്നെയാണ്, എന്നാൽ ഇത് പോലെ വലിയ പ്രശംസകളോട് പുള്ളി നീതി പാലിച്ചോ എന്നത് മറ്റൊരു ചോദ്യമാണ്, ഹൊററിന്റെ വഴിയേ തന്നെ പുള്ളി സഞ്ചരിച്ചു എങ്കിലും ഒരു കരിയർ ആൾട്ടറിങ് എന്നൊക്കെ വിശേഷിപ്പിക്കാവുന്ന സിനിമ പിന്നീട് ഒരിക്കലും ഉണ്ടായിട്ടില്ല, ഹെൽറെയ്‌സർ ക്ളോസ് ആയിരുന്നെന്ന് മാത്രം.

🔸അധികം ഹൊറർ സിനിമകൾക്ക് സാധിക്കാത്ത ഒരു കാര്യം ഈ ചിത്രത്തിന് കഴിഞ്ഞിട്ടുണ്ട്, വേറൊന്നുമല്ല ആളുകളെ ജെനുവിൻ ആയി പേടിപ്പിക്കുക എന്നത്. മറ്റ് പല ഹൊറർ സിനിമകളും ആവശ്യത്തിനും അനാവശ്യത്തിനും ജംപ് സ്‌കെയറുകളും മറ്റും സൃഷ്ടിച്ചെടുത്ത് വീണ ട്രാപ്പിൽ ഹെൽറെയ്‌സർ പോയില്ല, പിൽക്കാലത്ത് നേഴ്സറി കുട്ടികൾ എണ്ണമിട്ട് പഠിക്കുന്നത് പോലെ ഹെൽറെയ്‌സർ പത്ത് ഭാഗങ്ങൾ വന്നിട്ടുണ്ടെങ്കിലും ആദ്യത്തേതിന്റെ നിലവാരത്തിലേക്ക് സ്വാഭാവികമായും പോയില്ല. അതിൽ പലതും കണ്ടിട്ടില്ല, കാണാൻ തോന്നിയിട്ടില്ല, കാണാൻ സാധ്യതയുമില്ല.

🔸ഫ്രാങ്ക് എന്ന കഥാപാത്രത്തെ കാണിച്ച് കൊണ്ടാണ് സിനിമ ആരംഭിക്കുന്നത്, പുള്ളി ഒരുനാൾ ഒരു പസിൽബോക്സ് വാങ്ങുകയാണ്, ഒരു മെജീഷ്യന്റെ കയ്യിൽ നിന്നും. സ്വാഭാവികമായും കൗതുകം കാരണം പുള്ളി ആ പസിൽ സോൾവ് ചെയ്യാൻ ശ്രമിക്കുകയും തുടർന്ന് അവിടെ ഭീകരമായ ഒരു സംഭവം അരങ്ങേറുകയും ചെയ്യുന്നു. പിന്നീട് നമ്മൾ കാണുന്നത് ഫ്രാങ്കിന്റെ ശരീരത്തിലെ മജ്ജയും മാംസവും രക്തവും എല്ലാം ചിന്നി ചിതറി നിലത്ത് പരന്ന് കിടക്കുന്നതാണ്. ഇതിന്റെ കാര്യ കാരണങ്ങൾ ഒന്നും തുടക്കത്തിൽ വ്യക്തമാക്കുന്നേയില്ല.

🔸തുടർന്ന് ഏതൊരു ഇംഗ്ലീഷ് ഹൊറർ ചിത്രത്തിലെയും എന്നപോലെ ആ വീട്ടിലേക്ക് ഒരു പുതിയ കുടുംബം കടന്ന് വരികയാണ്, താമസക്കാരായിട്ട്. വന്ന് കേറുമ്പോൾ തന്നെ ദുർഗന്ധം വമിക്കുന്ന മുറികളും മറ്റും അവർക്ക് വിമ്മിട്ടവും പേടിയും നൽകുകയാണ്. വീട് വിൽക്കുന്നവനോ, അല്ലെങ്കിൽ ഏജന്റിനോ അതൊന്ന് നേരാംവണ്ണം വൃത്തിയാക്കി കൂടായിരുന്നോ എന്നൊക്കെയുള്ള സംശയങ്ങൾ അനുഭവപ്പെട്ടേക്കാം, പക്ഷെ കാര്യമാക്കണ്ട. തുടർന്ന് അവരുടെ കയ്യിൽ നിന്ന് സംഭവിക്കുന്ന ഒരു ചെറിയ തെറ്റ് കൊണ്ട് ഫ്രാങ്ക് പുനർജനിക്കുകയാണ്, ഇത്തവണ മനുഷ്യനായല്ല മറിച്ച് ഒരു ഭീകരസത്വമായി.

🔸കഥയിലും ചില സന്ദർഭങ്ങളിലും ചെറിയ കല്ല് കടി അനുഭവപ്പെട്ടേക്കാം, കാരണം പിന്നീട് വന്ന അനവധി ഹൊറർ സിനിമകളും മറ്റും പിന്തുടർന്നും, പകർത്തി എഴുതിയും ഒരു ശീലമാക്കിയതാണ് ഇതിൽ പലതും. ആ ഒരു വസ്തുത മാറ്റി നിർത്തിയാൽ അത്യാവശ്യം പേടിക്കാനുള്ള വക ഈ ചിത്രത്തിലുണ്ട്, ഒരു വൺ ഡയമെൻഷനിൽ പോകാതെ അത്യാവശ്യം താല്പര്യം ഉണർത്തുന്ന ചില സബ് പ്ലോട്ടുകളും ചിത്രത്തിലുണ്ട്, ചുരുക്കി പറഞ്ഞാൽ ഒരുതവണ കാണാനുള്ള വകുപ്പെല്ലാം ഈ ആദ്യ ഭാഗ ഹെൽറെയ്‌സറിൽ ഉണ്ടെന്ന് സാരം.

Verdict : Watchable

DC Rating : 65/100