860. Yomeddine (2018)

Director : A.B Shawky

Genre : Journey

Rating : 7.2/10

Country : Egypt

Duration : 97 Minutes

🔸യോമെഡീൻ എന്ന ഈജിപ്ഷ്യൻ ചിത്രം കണ്ട് കൊണ്ടിരിക്കുന്ന വേളയിൽ പലയിടത്തും ഓർമയിൽ എത്തിയത് ഉദ്ദേശം നൂറ് വർഷങ്ങൾക്ക് മുന്നേ പുറത്തിറങ്ങിയ ഫ്രീക്സ് എന്ന ചിത്രമാണ്. ഫ്രീക്സ് എന്ന സിനിമ മുന്നോട്ട് വെച്ച ആശയം വിരൂപർ എന്ന് സമൂഹം വിലയിരുത്തിയ ഒരു കൂട്ടം ആളുകളും എല്ലാം തികഞ്ഞവർ എന്ന് സ്വയം ഊറ്റം കൊള്ളുന്ന വിഭാഗവും തമ്മിലുള്ള സ്വഭാവം ഉൾപ്പെടെ ഉള്ള കാര്യങ്ങളിലെ അന്തരം ആയിരുന്നു. യോമെഡീൻ എന്ന ചിത്രവും ഈ വിഷയം പരാമർശിക്കുന്നുണ്ട്, അല്ല ചർച്ച ചെയ്യുന്നു തന്നെയുണ്ട്. ഫ്രീക്സ് വ്യക്തിപരമായി വളരെ ഇഷ്ട്ടപ്പെട്ട ചിത്രമാണ്, ഈ ഒരു പാരലൽ കാരണമാവും യോമെഡിനും ആ ഒരു തലത്തിലേക്ക് പോവുന്നുണ്ട്.

🔸ബേഷായ് എന്ന വ്യക്തിയുടെ കഥയാണ് യോമെഡീൻ, പുള്ളിക്ക് പ്രായം നാല്പതിന് അടുത്ത് എത്തി. നഗരത്തിന് പുറത്ത് കുപ്പയ്ക്ക് സമാനമായ ഒരു കോളനിയിലാണ് അയാളുടെ താമസം, ആ സ്ഥലത്തിന് ഒരു പ്രത്യേകത ഉണ്ട്, വേറൊന്നുമല്ല അവിടം നിറച്ച് രോഗികളായവരുടെയും ആരാരുമില്ലാത്ത അനാഥർ ആയവരുടെയും ഒക്കെ വാസ സ്ഥലമാണ്. കഴിഞ്ഞ ഒരു മൂന്ന് പതിറ്റാണ്ട് കാലമായി ബെശായിയും ഇവിടുത്തെ താമസക്കാരനാണ്, നഗരത്തിൽ നിന്നും വരുന്ന മാലിന്യങ്ങളിൽ നിന്നും മറ്റും വേസ്റ്റ് പെറുക്കി വിറ്റിട്ട് ഒക്കെയാണ് അയാൾ ഉപജീവനത്തിനുള്ള മാർഗം കണ്ടെത്തുന്നത്.

🔸ഭാര്യ ഒഴിച്ച് നിർത്തിയാൽ അയാൾക്ക് ബന്ധുക്കൾ എന്ന് പറയാൻ ആരുമില്ല, ഭാര്യയെ ആണെങ്കിൽ ചില മാനസിക പ്രശ്നങ്ങളും മറ്റും കാരണം ഒരു അഗതി മന്ദിരം പോലൊരു മാനസിക ആരോഗ്യ കേന്ദ്രത്തിൽ താമസിപ്പിച്ചിരിക്കുകയാണ്. ബേഷായ് ഒരു ലെപ്രസി രോഗി ആയിരുന്നു, ഈ കാരണം കൊണ്ട് തന്നെ അയാളുടെ സ്കിന്നും മുഖവും എല്ലാം വികലമാക്കപ്പെട്ടതാണ്, കാഴ്ചയിലെ ഈ ഒരു വിരൂപത കാരണം തന്നെ അയാളെ ആളുകൾ അകറ്റി നിർത്താറാണ് പതിവ്. അതിൽ ഇപ്പൊ അയാൾക്ക് വലിയ പരാതിയോ പരിഭവമോ ഒന്നുമില്ല, ശീലം ആയി കഴിഞ്ഞിരിക്കുന്നു ഇതെല്ലാം.

🔸അങ്ങനെ വലിയ മാറ്റം ഒന്നും ഇല്ലാതെ പോയി കൊണ്ടിരുന്ന ദിവസങ്ങളിൽ ഒന്നിലാണ് ബശ്ശായിയുടെ മനസ്സിൽ ഒരു ആഗ്രഹം ഉടലെടുക്കുന്നത്, തന്റെ കുടുംബത്തെ, ബാക്കി ഉള്ളവരെ ഒരിക്കൽ എങ്കിൽ ഒരിക്കൽ കാണണം എന്ന്. അതിനായി അയാൾ സ്വന്തം കഴുതപ്പുറത്ത് യാത്ര തിരിക്കുകയാണ്. കൃത്യമായ അറിവ് ഒന്നും തന്നെയില്ല അയാളുടെ പക്കൽ, എല്ലാം ഊഹാപോഹങ്ങളാണ്, എന്തായാലും യാത്ര ആരംഭിച്ച് കഴിഞ്ഞു. അതിമനോഹരമായ ഒരു സിനിമയാണ് യോമെഡീൻ, ഒരുവേള കണ്ണ് നനയിപ്പിക്കും എന്ന് തന്നെ പറയാം. മികച്ച കഥ, കഥാപാത്രങ്ങൾ, പേ ഓഫ് തുടങ്ങി എല്ലാ കോളങ്ങളും എ ഗ്രെയ്ഡ അർഹിക്കുന്ന നല്ല ഒന്നാന്തരം ഒരു സിനിമ,തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

439. Ko To Tamo Peva (1980)

Director : Slobodan Sijan

Genre : Journey

Rating : 8.9/10

Country : Yugoslavia

Duration : 88 Minutes

🔸സിനിമ കഴിഞ്ഞാലും നമ്മളുടെ കൂടെ പോരുന്ന കഥാപാത്രങ്ങൾ, കണ്ട് കൊണ്ടിരിക്കുന്ന സമയത്തും അതിന് ശേഷവും നമ്മളുടെ മനസ്സിൽ കയറിക്കൂടിയ, മനസ്സിനെ ആഴത്തിൽ സ്പർശിച്ച കഥാപാത്രങ്ങൾ എന്നൊക്കെ ചില സിനിമകളെയും അതിലെ കഥാപാത്രങ്ങളെയും നമ്മൾ വിശേഷിപ്പിക്കാറുണ്ട്. ഈ ഗണത്തിൽ ഞാൻ ചേർക്കുന്ന ചിത്രമാണ് കോ തോ ടാമോ പേവ എന്ന യുഗോസ്ലോവിയൻ ചിത്രം. രണ്ടാഴ്ച മുൻപ് വരെ കേട്ടുകേൾവി പോലും ഇല്ലാഞ്ഞ ഒരു ചിത്രം ഇന്നേവരെ കണ്ട ഏറ്റവും മികച്ച ചിത്രങ്ങളുടെ പട്ടികയിൽ എത്തുന്നത് ലളിത സുന്ദരമായ കഥ കൊണ്ടും, ഹൃദയത്തിൽ തറഞ്ഞ് നിൽക്കുന്ന കഥാപാത്രങ്ങൾ കൊണ്ടും, രസകരമായ സന്ദർഭങ്ങൾ കൊണ്ടുമെല്ലാമാണ്. യുഗോസ്ലോവിയയിലെ ഉൾനാടൻ ഗ്രാമങ്ങളിൽ ഒന്നിൽ നിന്നും ബ്രസ്സൽസിലേക്കുള്ള ബസ് യാത്രയും, ആ യാത്രയുടെ ഭാഗമാവുന്ന ഒരു കൂട്ടം മനുഷ്യരുടെയും കഥയാണ് ഈ ചിത്രം.

🔸ഇരുപതാം നൂറ്റാണ്ടിന്റെ മധ്യകാലഘട്ടത്തിൽ ലോക ചരിത്രത്തിൽ തന്നെ പിൽക്കാലത്ത് രേഖപ്പെട്ട നിർണ്ണായകമായ ദിനങ്ങളിൽ ഒന്നിലാണ് ചിത്രത്തിന് ആസ്പദമായ കഥ അരങ്ങേറുന്നത്, ഈ പ്രത്യേകത എന്താണെന്നും അതിന് ചിത്രത്തിന് മേൽ ഉള്ള പ്രാധാന്യം എന്താണ് എന്നും തല്ക്കാലം പറയുന്നില്ല, അത് കണ്ട് തന്നെ അറിയുക. എന്ത് തന്നെ ആയാലും തങ്ങളുടെ ജീവിതത്തിൽ ഇന്നേ വരെ പരിചയപ്പെട്ടിട്ടില്ലാത്ത എട്ടോളം വ്യത്യസ്ത വ്യക്തിത്വങ്ങൾ യാത്ര ആരംഭിക്കുകയാണ്. വ്യത്യസ്തർ എന്ന് വെറുതെ പറഞ്ഞതല്ല, സാമ്പത്തിക സാംസ്‌കാരിക മേഖലകളിൽ എല്ലാം പരസ്പരം വലിയ അന്തരം പാലിക്കുന്നവരാണ് ഇവർ എല്ലാവരും, എന്നാൽ ചിത്രത്തിൽ ഇവരെല്ലാം ഒന്നിനൊന്ന് മികച്ചതായിരുന്നു എന്ന കാര്യത്തിൽ സംശയമില്ല, ആദ്യാവസാനം സ്‌ക്രീനിൽ പ്രത്യക്ഷപ്പെട്ടിട്ടും നല്ലൊരു സംഭാഷണം പോലും ഇല്ലാതിരുന്ന ജിപ്സി ആയ കഥാപാത്രം പോലും മനോഹരം ആയിരുന്നു.

🔸ലളിതമായ കഥ ആയതിനാൽ തന്നെ അതിലേക്ക് കടക്കുന്നത് ആസ്വാദനത്തിന് ദോഷം ചെയ്തേക്കാം, അതിനാൽ കഥാപാത്രങ്ങളെ ഒന്ന് ശ്രദ്ധിക്കാം. പേരോ ഓരോ വെളിപ്പെടുത്താത്ത രണ്ട് ജിപ്സി ഗായകരെ കാണിച്ച് കൊണ്ടാണ് ചിത്രം ആരംഭിക്കുന്നത്, ഇരുവരുടെയും ഉദ്ദേശങ്ങൾ ഒന്നും വ്യക്തമല്ലെങ്കിലും സിനിമയുടെ മർമ്മ പ്രധാനമായ ചില ഭാഗങ്ങളിൽ ഇവർ ഒഴിച്ചുകൂടാനാവാത്ത സാന്നിധ്യം ആവുന്നുണ്ട്. ഇവരെ മാറ്റി നിർത്തിയാൽ അഞ്ച് മണിക്ക് മുന്നേ തന്റെ ഡാൻസ് ഓഡിഷന് വേണ്ടി ബ്രെസ്സൽസിൽ ഏതാണ് തത്രപ്പെടുന്ന നർത്തകനായ കഥാപാത്രം, സൈന്യത്തിൽ ജോലി ചെയ്യുന്ന മകനെ കാണാൻ വേണ്ടി ഗ്രാമത്തിൽ നിന്നും യാത്ര തിരിക്കുന്ന വൃദ്ധനായ പഴയ സൈനികൻ എന്നിവരാണ് പ്രധാന താരങ്ങൾ.

🔸ഇവർക്ക് പുറമെ നാസി സംസ്കാരത്തോടും, തത്വ ചിന്തകളോടും താല്പര്യം പ്രകടിപ്പിക്കുന്ന, താഴ് ജാതിക്കാരായവരോട് ഒരു തരം അറപ്പോടുകൂടി പെരുമാറുന്ന ഒരു കഥാപാത്രം, ട്യൂബര്കുലോസിസ് കാരണം നന്നേ ബുദ്ധിമുട്ടുന്ന, ഏത് സമയവും ചുമച്ച് ബഹളം സൃഷ്ട്ടിക്കുന്ന, മറ്റുള്ളവർ അകറ്റി നിർത്തുന്ന ഒരു കഥാപാത്രം എന്നിവരും ചിത്രത്തിൽ ഉണ്ട്. ബസ് ഡ്രൈവറും കിറുക്കനും ആയ വൃദ്ധനും അയാളുടെ മകനും, ഇവർക്ക് പുറമെ വീട്ടിൽ നിന്ന് ഒളിച്ചോടി വരുന്ന നവ ദമ്പതികളും, ബുദ്ധിക്ക് ഒരു അഞ്ച് പൈസ കുറവുള്ള മറ്റൊരു കഥാപാത്രവും കൂടി ചേർന്നാൽ യാത്രക്കാരെല്ലാം ആയി. മേൽ പറഞ്ഞ കഥാപാത്രങ്ങൾക്ക് പുറമെ മറ്റ് ചിലരും, രസകരമായ അനവധി രംഗങ്ങളും, കഥാപാത്രങ്ങൾ ചെന്ന് ചാടുന്ന തമാശ നിറഞ്ഞ സന്ദർഭങ്ങളും എല്ലാം ചിത്രത്തിന്റെ ഭാഗമാണ്.

🔸എട്ടോളം യാത്രികർ, ഒരു ബസ് യാത്ര, അതിനിടയിൽ അരങ്ങേറുന്ന സംഭവങ്ങൾ എന്നൊക്കെ പറയുമ്പോൾ ഒരു സസ്പെൻസ് ത്രില്ലർ ഒന്നും പ്രതീക്ഷിച്ച് സിനിമ കാണാൻ ഇരിക്കരുത് എന്ന് അഭ്യർത്ഥിക്കുന്നു. ഒരു മുൻപരിചയവും ഇല്ലാത്ത ചില വ്യക്തികളുടെ സംശയങ്ങളും, മണ്ടത്തരങ്ങളും, തമാശകളും എല്ലാം ചേരുന്ന ലളിതമായ ഒരു കഥയാണ് ഈ ചിത്രം. ചെറിയൊരു ഉദാഹരണം പറയുക ആണെങ്കിൽ ഒരു കഥാപാത്രം തന്റെ അഭിമാനം കാത്ത് സൂക്ഷിക്കാനായി കണ്ണ് കെട്ടി വണ്ടി ഓടിക്കാൻ തയ്യാറാവുന്ന രംഗമൊക്കെ ചിത്രത്തിൽ ഉണ്ട്, അതൊക്കെയാണ് ഈ ചിത്രം. ആദ്യാവസാനം തമാശ നിറച്ച് വെച്ച, മനോഹരമായ കഥാസന്ദർഭങ്ങൾ ഒരുക്കി വെച്ച വെറും ഒന്നര മണിക്കൂറിൽ താഴെ മാത്രം ദൈർഖ്യമുള്ള ഷോർട്ട് ആൻഡ് സ്വീറ്റ് ആയൊരു ചിത്രം കാണാൻ താല്പര്യപ്പെടുന്നുണ്ടെങ്കിൽ ധൈര്യമായി കാണാം ഈ ചിത്രം.

Verdict : Must Watch

431. Bekas (2012)

Director : Karzan Kader

Genre : Journey

Rating : 7.4/10

Country : Iraq

Duration : 97 Minutes

🔸മനുഷ്യന് പ്രായം ഏറും തോറും അവന്റെ ഉള്ള് മലിനീകരിക്കപ്പെടുക ആണ് എന്ന് ഏതോ ഒരു മഹാൻ പറഞ്ഞതായി കേട്ടിട്ടുണ്ട്, അത് എന്ത് തന്നെ ആയാലും ഈ പ്രായം ഏറുന്ന പ്രക്രിയയോടൊപ്പം തന്നെ നശിക്കുന്ന ഒന്നാണ് മനുഷ്യന്റെ ഉള്ളിലെ കുട്ടിത്തവും അതിനോട് അനുബന്ധിച്ചുള്ള നിഷ്കളങ്കതയും. ഈ കാരണങ്ങൾ കൊണ്ട് തന്നെ ആവും കുട്ടികൾ കേന്ദ്ര കഥാപാത്രങ്ങളായി എത്തുന്ന ചിത്രങ്ങൾ മിക്കതും നിഷ്കളങ്കമായ സ്നേഹത്തിന്റെയും, പ്രതീക്ഷയുടെയും എല്ലാം പ്രതീകങ്ങളാണ്. ഈ ചിത്രങ്ങൾ അതിനാൽ തന്നെ മിക്കതും മനസ്സിന് കുളിർമ ഏറും വിധം മനോഹരമായ സൃഷ്ടികളായി മാറാറുമുണ്ട്, ബെക്കസ് എന്ന ചിത്രവും ഒട്ടും വ്യത്യസ്തമല്ല.

🔸സനാ, ദനാ എന്നീ രണ്ട് സഹോദരന്മാരുടെ കഥയാണ് ഈ ചിത്രം. മാതാപിതാക്കൾ ഇല്ലാത്ത ഇരുവരും തങ്ങളുടെ അന്നന്നത്തെ അന്നത്തിന് വേണ്ടി കഷ്ടപ്പെട്ടാണ് ജീവിതം മുന്നോട്ട് കൊണ്ട് പോവുന്നത്. സദ്ദാം ഹുസൈനിന്റെ ഭരണം അന്ത്യകാലത്തേക്ക് കടന്ന് കൊണ്ടിരുന്ന, യുദ്ധം കാരണം കീറി മുറിക്കപ്പെട്ട കുർദിസ്താനിൽ ആണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. രണ്ട് സഹോദരന്മാരുടെയും നാട്ടിലേക്ക് അമേരിക്കൻ സൂപ്പർഹീറോ ആയ സൂപ്പർമാന്റെ ചിത്രം പ്രദർശനത്തിന് എത്തുകയാണ്, അത്യാവശ്യം ബുദ്ധിമുട്ടിയിട്ടാണെങ്കിലും ആ അമാനുഷിക കഥാപാത്രത്തെ ഒരുനോക്ക് കാണാൻ ഇരുവർക്കും സാധിക്കുന്നുണ്ട്.

🔸പ്രതീക്ഷയുടെ പ്രതീകമായ ആ അമാനുഷിക കഥാപാത്രം ഇരുവരെയും ഒരു കടുത്ത തീരുമാനം കൈക്കൊള്ളാൻ നിർബന്ധിക്കുകയാണ്, തങ്ങളുടെ ജീവിതം ഈ ദുസ്സഹമായ സാഹചര്യത്തിൽ ജീവിച്ച് തീർക്കാതെ അമേരിക്കയിൽ പോയി സൂപ്പർമാനോടൊപ്പം ചിലവഴിക്കാൻ ഇരുവരും തയ്യാറാവുകയാണ്. അമേരിക്ക എവിടെ ആണെന്നോ, അവിടെ എത്താൻ ഉള്ള മാർഗം എന്താണെന്നോ ഒന്നും സഹോദരന്മാർക്ക് ഒരു പിടിയുമില്ല. അമേരിക്ക എന്നത് കുറച്ച് കിലോമീറ്ററുകൾക്ക് അപ്പുറമോ റോഡിന്റെ മറുവശത്തോ മറ്റോ ആവാം എന്ന നിഗമനത്തിൽ തങ്ങളുടെ യാത്രയ്ക്ക് ആവശ്യമായ ഒരുക്കങ്ങൾ നടത്തുകയാണ് ഇരുവരും.

🔸യാത്രയ്ക്ക് വാഹനമായി തങ്ങളുടെ കഴുത മൈക്കൽ ജാക്ക്സണിനെ തീരുമാനിച്ചു, ഒരു രാജ്യത്ത് നിന്ന് മറ്റൊന്നിലേക്ക് കടക്കുമ്പോൾ പാസ്പോർട്ട് എന്നോ മറ്റോ പേരുള്ള ഒരു ചടങ്ങ് ആവശ്യമാണെന്ന് കേട്ടു, അത് വാങ്ങാനുള്ള ശ്രമം ആവശ്യമായ തുക കയ്യിൽ ഇല്ല എന്ന കാരണത്താൽ മുടങ്ങി എങ്കിലും മറ്റൊരു പകർപ്പ് തയാറാക്കി ആ പ്രശ്നവും പരിഹരിച്ചു. ഇങ്ങനെ ഏറെക്കുറെ കാര്യങ്ങളെല്ലാം തയാറാക്കി യാത്രയ്ക്ക് ഇറങ്ങി തിരിക്കുകയാണ് രണ്ട് സഹോദരങ്ങളും. തന്റെ ചെറുപ്പ കാലത്തെ ജീവിതത്തിനോട് സാമ്യം പുലർത്തും വിധം ഒരു ബയോഗ്രഫിക്കൽ ടച്ചിന്റെ പിൻബലത്തോട് കൂടിയാണ് സംവിധായകൻ കർസാൻ കാദർ ബെക്കസ് അണിയിച്ച് ഒരുക്കി ഇരിക്കുന്നത്.

🔸പോസ്റ്ററും മുകളിൽ സൂചിപ്പിച്ച കഥയുടെ ചെറിയ ഭാഗവും സൂചിപ്പിക്കുന്നത് പോലെ തന്നെ ഒരു ഫീൽ ഗുഡ്, കോമഡി ചിത്രമാണ് ബെക്കസ്, എന്നാൽ അതിനോടൊപ്പം തന്നെ വളരെ ശക്തമായ ഒരു രാഷ്ട്രീയ പരിസ്ഥിതി കൂടി ചിത്രം ചർച്ചാ വിഷയമാക്കുന്നുണ്ട്. പ്രധാന കഥാപാത്രങ്ങളായി എത്തിയ രണ്ട് കുട്ടികളുടെയും ശക്തമായ പ്രകടനവും മികച്ച ഛായാഗ്രഹണവും, മനസ്സിൽ നിന്ന് മായാത്ത കഥാ സന്ദർഭങ്ങളും എല്ലാം കൂടി വേറിട്ട ഒരനുഭവം ആയിരിക്കും ഏതൊരു കാഴ്ചക്കാരനും ഈ ചിത്രം. ഈ ചിത്രം ആദ്യാവസാനം നിങ്ങളെ രസിപ്പിച്ചിരിക്കും, സന്തോഷിപ്പിച്ചിരിക്കും, ചെറുതായി ഒന്ന് നോവിച്ചുമിരിക്കും, കണ്ടിട്ടില്ലാത്തവരോട് തീർച്ചയായും കാണാൻ ശുപാർശ ചെയ്യുന്നു.

Verdict : Must Watch

392. Karwaan (2018)

Director : Akarsh Khurana

Genre : Journey

Rating : 8.4/10

Country : India

Duration : 116 Minutes


🔸ബോളിവുഡിലെ ഏറ്റവും മികച്ച നടന്മാരിൽ ഒരാൾ, സർവോപരി തനിക്കൊപ്പമോ ശേഷമോ വന്നവരെല്ലാം തന്നെ സ്ഥിരം കച്ചവട സിനിമാ ചേരുവകകളുടെ ബലത്തിൽ വിജയം കയ്യടക്കിയപ്പോഴും തിരഞ്ഞെടുക്കുന്ന സിനിമകളുടെ മേന്മയും തന്റെ കഥാപാത്രത്തിന്റെ മികവും പരിഗണിച്ച് സിനിമകൾ ചെയ്യുന്നത് ഒരു ശീലമാക്കിയ നടൻ, ബോളിവുഡിലെ മിനിമം ഗ്യാരന്റി അഭിനേതാവ്, അങ്ങനെ വിശേഷണങ്ങൾ അനവധി ആണ് ഇർഫാൻ ഖാൻ എന്ന നടന്. പിക്കു എന്ന മനോഹര ചിത്രത്തിന് ശേഷം ഇർഫാൻ ഖാൻ പ്രധാന കഥാപാത്രങ്ങളിൽ ഒന്ന് അവതരിപ്പിക്കുന്ന റോഡ് മൂവി എന്ന ഒറ്റ കാരണം തന്നെ കാർവാൻ എന്ന ചിത്രം കാണുന്നതിന് എന്നിലെ കാഴ്ചക്കാരന് വലിയ പ്രചോദനം ആയിരുന്നു, പോരെങ്കിൽ ദുൽക്കർ സൽമാന്റെ അരങ്ങേറ്റവും ,റിലീസിന് മുന്നേ കേട്ട മികച്ച പ്രതികരണവും ,യാത്ര പ്രമേയമായ ചിത്രങ്ങളോടുള്ള പ്രത്യേക ഇഷ്ടവും എല്ലാം ചിത്രം കാണാൻ ഉള്ള കാരണങ്ങളായി മാറി.

🔸വളരെ ലളിതമായ കഥയാണ് ചിത്രത്തിന്റേത്, ചിത്രത്തിന്റെ ടാഗ്‌ലൈനിൽ പറയുന്നത് പോലെ തന്നെ മൂന്ന് കഥാപാത്രങ്ങളുടെയും രണ്ട് ശവശരീരങ്ങളുടെയും കഥ. തന്റെ ഇഷ്ടങ്ങൾക്ക് മേൽ മാതാപിതാക്കളുടെ ഇഷ്ടത്തിന് വില കൊടുക്കേണ്ടി വന്ന കഥാപാത്രമാണ് അവിനാശ്. ഫോട്ടോഗ്രഫി ഒരു വിനോദത്തിന് അപ്പുറം നിർവചിക്കാൻ കഴിയാത്ത രീതിയിൽ ഹൃദയത്തോട് ചേർത്ത് വെച്ചിരുന്ന ടിയാൻ തന്റെ അച്ഛന്റെ താല്പര്യ പ്രകാരം ആണ് സോഫ്ട്‍വെയർ മേഖലയിൽ ജോലിക്ക് കയറുന്നത്, താല്പര്യമേതും ഇല്ലെങ്കിലും മറ്റ് മാർഗങ്ങൾ ഇല്ലാത്തതിനാൽ ഇത് തുടരുക അല്ലാതെ വേറെ വഴി അയാൾക്ക് മുന്നിൽ ഉണ്ടായിരുന്നില്ല.

🔸അച്ഛനുമായി ഒരിക്കലും സ്വരച്ചേർച്ച കൈവരിക്കാനാവാഞ്ഞ അവിനാശിന്റെ ജീവിതം ഒന്നടങ്കം മാറി മറയുന്നത് തീർത്ഥാടനത്തിന് പോയ അച്ഛൻ അവിടെ വെച്ച് മരണമടയുമ്പോൾ ആണ്. ഏജൻസികളുടെ സഹായത്തോടെ ശവശരീരം നാട്ടിലേക്ക് അയച്ചെങ്കിലും ,ഇടയിൽ ഉണ്ടായ ചില പ്രശ്നങ്ങൾ കാരണം എത്തുന്നത് തികച്ചും അപരിചിതനായ വ്യക്തിയുടെ ശരീരം ആണ് താനും. തുടർന്ന് പ്രശ്നങ്ങൾ പരിഹരിക്കാനും കാര്യങ്ങൾ നേർ രേഖയിൽ എത്തിക്കാനുമായി അവിനാശും സുഹൃത്ത് ഷൗക്കത്തും നടത്തുന്ന യാത്രയാണ് ചിത്രത്തിന്റെ പ്രമേയം. ഈ യാത്രയിൽ അവർക്കിടയിലേക്ക് മറ്റ് ചില കഥാപാത്രങ്ങൾ കൂടി അപ്രതീക്ഷിതമായി കടന്നുവരുന്നുണ്ട്.

🔸തിരിച്ചറിവ് എന്ന വസ്തുതയാണ് ചിത്രത്തെ മുന്നോട്ട് നയിക്കുന്ന വികാരം, അന്യനായ വ്യക്തിയുടെ ശവ ശരീരവും പേറിയുള്ള ഈ നീണ്ട യാത്ര അവിനാശ് എന്ന കഥാപാത്രത്തെ സംബന്ധിച്ചിടത്തോളം ഒരു തിരിച്ചറിവിന് വേണ്ടി ഉള്ളത് തന്നെയാണ്, ഈ കഥാപാത്രവും അത് അവതരിപ്പിച്ച നടനും തുടക്കം ഒരല്പം ബുദ്ധിമുട്ടുന്നതായി തോന്നിയെങ്കിലും ബേധപ്പെട്ട രീതിയിൽ തന്നെ പറയാൻ ഉദ്ദേശിച്ച കാര്യങ്ങൾ സ്ക്രീനിലും പുറത്തും ഫലവത്തായി പറയാൻ കഴിഞ്ഞു എന്ന് തന്നെ പറയേണ്ടി വരും. എന്നാലും അത്ഭുതം ഏതുമില്ലാതെ പറയാനാവും ഇത് തീർത്തും ഒരു ഇർഫാൻ ഖാൻ ചിത്രം തന്നെയാണ്, സ്‌ക്രീനിൽ പ്രത്യക്ഷപ്പെട്ട മറ്റ് നടന്മാരോട് നീതി പുലർത്തി കൊണ്ട് തന്നെ പറയുന്നു ,പ്രത്യക്ഷപ്പെട്ട രംഗങ്ങളിലും സംഭാഷണങ്ങളിലും എല്ലാം കയ്യടക്കത്തോടെ തിളങ്ങി നിന്നത് ഇർഫാൻ ഖാൻ തന്നെ.

🔸മിക്ക റോഡ് മൂവികളെയും പോലെ തന്നെ കാർവാനും പ്രധാന കഥാപാത്രങ്ങൾക്കിടയിലുള്ള സംഭാഷണങ്ങളിൽ കൂടിയാണ് വികസിക്കുന്നത്. തികച്ചും അപ്രവചനീയം ആയതൊന്നും സ്‌ക്രീനിൽ സംഭവിക്കുന്നില്ലെങ്കിൽ കൂടിയും ഒട്ടും മുഷിച്ചൽ ഉളവാക്കാതെ പ്രേക്ഷകനെ പിടിച്ചിരുത്താൻ ഉള്ള വകയെല്ലാം സംഭാഷണങ്ങളിൽ ചിത്രം ചേർത്തിട്ടുണ്ട്, തികച്ചും വ്യത്യസ്തരായ മൂന്ന് കഥാപാത്രങ്ങളോടൊപ്പം മടുപ്പില്ലാതെ ചിലവഴിക്കുക എന്നതിൽ കവിഞ്ഞ് വലിയ പ്രതീക്ഷകൾ ഒഴിവാക്കി കയറുകയാണെങ്കിൽ സംപ്ത്രിപ്തിയോടെ തന്നെ കണ്ടിറങ്ങാനാവും ഈ ചിത്രം.

Verdict : Good

377. How Much Further (2006)

Director : Tania Hermida

Genre : Journey

Rating : 7.1/10

Country : Ecuador

Duration : 88 Minutes


🔸ക്വിറ്റോയിൽ നിന്നും 440 കിലോമീറ്റർ അകലെ സ്ഥിതി ചെയ്യുന്ന കുയെങ്ക എന്ന പട്ടണത്തിലേക്ക് യാത്ര ആരംഭിക്കുകയാണ് ആ ബസും അതിലെ യാത്രക്കാരും. ബസിലെ മിക്കവരും വിനോദ സഞ്ചാരികൾ ആണ്, ഇക്വഡോറിലെ ഏറ്റവും മനോഹരമായ കാഴ്ചകളിൽ പലതും ഈ ബസ് യാത്രയിൽ വീക്ഷിക്കാനാവുമത്രെ. അഗ്നി പർവ്വതങ്ങളും ,പുഴയോരങ്ങളും ,താഴ്വരകളും എല്ലാമുള്ള ഒരു മനോഹര യാത്രയുടെ തുടക്കത്തിലാണ് എല്ലാവരും. അതിന്റെ പ്രസരിപ്പും ഊർജ്ജസ്വലതയും എല്ലാം യാത്രികരുടെ മുഖത്ത് കാണാം. ബസിലെ പതിനഞ്ചാം നമ്പർ സീറ്റിൽ നമ്മുടെ പ്രധാന കഥാപാത്രങ്ങളായ ട്രിസ്റ്റിസായും ,എസ്പെരൻസായും ഉണ്ട്. ഈ യാത്രയിലൂടെ കാഴ്ചക്കാർ അറിയാൻ പോവുന്നത് അവരുടെ ജീവിതങ്ങളാണ്.

🔸കൂട്ടത്തിൽ മുതിർന്നവളായ എസ്പെരൻസാ സ്പെയിൻ കാരിയാണ്, ഡോക്ടറായ അച്ഛന്റെയും ടെലിഫോൺ ഡിപ്പാർട്മെന്റിൽ ജോലിക്കാരിയായ അമ്മയുടെയും ഒരേയൊരു മകൾ. യാത്രയും പുതിയ അനുഭവങ്ങളും തേടിയുള്ള അവളുടെ അന്വേഷണങ്ങളാണ് ഇക്വഡോറിലും ,അവിടെ നിന്ന് ക്വിറ്റോയിലും എത്തിച്ചത്. എക്വഡോറിയൻ ഭാഷയിൽ പ്രതീക്ഷ എന്നർത്ഥം വരുന്ന പേരിനുടമയായ എസ്പെരൻസാ ,ഏറെക്കുറെ ചിത്രത്തിൽ പ്രതീക്ഷയുടെ പ്രതീകം തന്നെയാണ്. തനിക്ക് ചുറ്റും ഉള്ള സഹജീവികളോട് അനുഭാവം പ്രകടിപ്പിക്കുന്ന എന്നാൽ അമിതമായ ഉൽക്കണ്ഠ കാണിക്കാത്ത ഒരാളാണ് എസ്പെരൻസാ.

🔸എസ്പെരൻസയുടെ സഹ യാത്രിക ആയ ട്രിസ്റ്റെസാ തീർത്തും വ്യത്യസ്തയായ സ്വഭാവക്കാരിയാണ്. അധികം പെട്ടെന്നൊന്നും ആരുമായും അടുക്കാത്ത ,തന്റേതായ ലോകത്തും അതിന്റെ നാല് ചുവരുകൾക്കും ഇടയിൽ ജീവിക്കാനാണ് അവൾക്ക് താല്പര്യം. മറ്റുള്ളവരുമായി പരിധിയിൽ കടന്ന് ഇടപഴകുന്നതിലോ ,അവരുമായി തന്റെ സ്വകാര്യതകൾ പങ്ക് വെക്കുന്നതിലോ അവൾക്ക് യാതൊരു താല്പര്യവുമില്ല. ഇതെല്ലാം ആരോ മുൻകൂട്ടി കണ്ടിട്ടാവണം വിഷാദി എന്നർത്ഥം വരുന്ന ട്രിസ്റ്റെസ എന്ന പേര് അവൾക്ക് നൽകിയത്. ഏറെക്കുറെ ഒരു വിഷാദ അവസ്ഥയിലൂടെയാണ് ഈ കഥാപാത്രം കടന്ന് പോവുന്നതും.

🔸കുയെങ്ക എന്ന പട്ടണത്തിലേക്ക് യാത്ര തിരിക്കാൻ എസ്പെരൻസയുടെ കാരണം അവധിക്കാലം ആഘോഷിക്കുക എന്നതാണെങ്കിൽ ട്രിസ്റ്റെസായുടെത് കുറച്ച് കൂടി വ്യക്തിപരവും ,വൈകാരികവും ആണ്. രണ്ട് ദിവസം കഴിഞ്ഞാൽ അവളുടെ കാമുകൻ ഡാനിയേലിന്റെ കല്യാണം ആണ്. തനിക്ക് ജീവിതത്തിൽ എന്തെല്ലാമോ ആയിരുന്ന ഡാനിയേൽ ഒരു വാക്ക് പോലും പറയാതെ തന്നെ അറിയിക്കാതെ മറ്റൊരു കല്യാണത്തിന് സമ്മതം മൂളിയത് അവളെ വല്ലാതെ ചൊടിപ്പിച്ചിട്ടുണ്ട് ,എന്നാലും വിട്ടുകൊടുക്കാൻ അവൾ തയാറല്ലായിരുന്നു. കുയെങ്കയിലേക്ക് ലഭിച്ച അടുത്ത വണ്ടിയിൽ ട്രിസ്റ്റെസ തന്റെ യാത്ര ആരംഭിക്കുകയാണ് ,അവിടെ നിന്നാണ് അവൾ എസ്പെരൻസായെ പരിചയപ്പെടുന്നതും.

🔸യാത്ര ആരംഭിച്ച ഇരുവരെയും തേടി തടസ്സങ്ങൾ ഓരോന്നായി എത്തി തുടങ്ങുകയാണ്. കുയെങ്കയിലേക്കുള്ള വഴി കാന്യരോ എന്ന സ്ഥലത്ത് ചില വിപ്ലവ പ്രവർത്തകർ സമരം പ്രഖ്യാപിച്ചിരിക്കുകയാണ് ,സർക്കാരിന്റെ ചില ജനദ്രോഹ നടപടികൾ പിൻവലിക്കുന്നത് വരെ വാഹനങ്ങൾ ഒന്നും തന്നെ കടത്തിവിടേണ്ടതില്ല എന്നതാണ് അവരുടെ തീരുമാനം ,ഇനി ദിവസങ്ങൾ കഴിഞ്ഞാലും ശെരി. ഡാനിയേലിനെ കാണാൻ കല്യാണത്തിന് മുൻപ് രണ്ട് ദിവസങ്ങൾ മാത്രമുള്ള ട്രിസ്റ്റെസ തന്റെ യാത്ര തുടരാൻ തന്നെ തീരുമാനിക്കുകയാണ് ,നടന്നിട്ടാണെങ്കിൽ അങ്ങനെ ,അതല്ല വേറെ വാഹനങ്ങളിൽ കയറിപ്പറ്റി ആണെങ്കിൽ അങ്ങനെ. അവളുടെ കൂടെ എസ്പെരൻസായും ഇറങ്ങി തിരിക്കുമ്പോൾ ആരംഭിക്കുന്നത് മറ്റൊരു മികച്ച റോഡ് മൂവി കൂടിയാണ്.

Verdict : Very Good

351. I Won't Come Back (2014)

Director : Ilmar Raag

Genre : Journey

Rating : 7.1/10

Country : Kazakhsthan

Duration : 109 Minutes


🔸കാണാത്ത നാടുകളിലൂടെയുള്ള ഒരു നല്ല യാത്ര ഇഷ്ടപ്പെടാത്തവരായി ആരും ഉണ്ടാവാൻ സാധ്യത ഇല്ല ,യാത്രകളോളം ഒരു മനുഷ്യനെ മാറ്റിമറിക്കാൻ കഴിവുള്ള അധികം വസ്തുതകളും ഇല്ല. ഓരോ യാത്രയും ഓരോ അനുഭവവും പഠനവും ആണ്, പുതിയ ആളുകളിലൂടെ ,പുതിയ കാഴ്ചകളിലൂടെ ,പുതിയ സംസ്കാരങ്ങളിലൂടെ ,പുതിയ ഭൂതലങ്ങളിലൂടെ. അതിനാൽ ഒക്കെ തന്നെയാവാം യാത്ര പ്രമേയമായുള്ള ചിത്രങ്ങൾക്കും പൊതുവെ ആരാധകർ കൂടുതലാണ്. ഐ വോണ്ട് കം ബാക് എന്ന ചിത്രവും ഒരു യാത്രയുടെ കഥയാണ്, അതും നമ്മളെ പോലുള്ള കാഴ്ചക്കാർക്ക് അത്രയൊന്നും പരിചിതമല്ലാത്ത റഷ്യയിൽ നിന്നും കസാഖിസ്ഥാൻ എന്ന രാജ്യത്തിലേക്കുള്ള ഒരു മനോഹരമായ യാത്ര.

🔸ഈ യാത്രയ്ക്കായി രണ്ട് പേരാണ് ഇറങ്ങി തിരിച്ചിരിക്കുന്നത് ,രണ്ട് സ്ത്രീകൾ. ഇരുവരിൽ മുതിർന്നവളാണ് ആന്യ ,രണ്ടാമത്തെയാൾ ക്രിസ്റ്റീന ,ഇരുവരും അവരവരുടെ ഭാഷയിൽ പറയുക ആണെങ്കിൽ കുറച്ച് പ്രശ്നക്കാരാണ്. ജന്മം കൊണ്ടല്ലെങ്കിലും ജീവിതത്തിൽ അനാഥരാണ് ഇരുവരും ,വേണ്ടപ്പെട്ടവർ എന്ന് പറയാൻ ആരും ഉണ്ടായിരുന്നില്ല ഇരുവർക്കും ,ജനിച്ചതും വളർന്നതും എല്ലാം അനാഥാലയത്തിൽ തന്നെ. ചെറുപ്പം മുതൽക്കേ തന്നെ സ്വന്തം കാലിൽ നിന്ന് ശീലിച്ചതിനാൽ അതിന്റെതായ തന്റേടവും ധൈര്യവും എല്ലാം ഇരുവർക്കും വേണ്ടുവോളം ഉണ്ട്.

🔸ആന്യ ഗ്രാഡുവേഷൻ പൂർത്തിയാക്കിയ വിദ്യാർത്ഥി ആണ്. തന്റെ ഭൂതകാലത്തോട് ഉള്ള ദേഷ്യവും നിരാശയും എല്ലാം ഒരുപാട് കാലം മനസ്സിൽ നീറി പുകഞ്ഞ് കിടന്നിരുന്നെങ്കിലും ഇന്ന് അവയെല്ലാം മറികടക്കാൻ അവൾക്ക് സാധിച്ചിട്ടുണ്ട് ,ഒരു പരിധി വരെ. പഴയത്തിലേക്ക് മടങ്ങി ചെല്ലാൻ താല്പര്യമില്ലാത്ത അന്യ ഇന്ന് ഒരാളുമായി പ്രണയത്തിലുമാണ്. എന്നാൽ കുടുംബസ്ഥനായ ടിയാനുമായുള്ള ബന്ധം തന്നെയും അയാളെയും ഏതെല്ലാം രീതിയിൽ ബാധിക്കും എന്നതിനെ കുറിച്ച് അവൾക്ക് ഉത്തരങ്ങളില്ല. ചുരുക്കി പറയുകയാണെങ്കിൽ പൊട്ടിത്തെറിക്കാൻ ഒരു കാരണം കാത്ത് നിൽക്കുന്ന അഗ്നിപർവതം കണക്കെ ആണ് ആന്യ.

🔸എന്നാലിപ്പോൾ അവൾ നേരിടുന്ന പ്രശനം ഇതൊന്നുമല്ല ,ചെയ്യാത്ത കുറ്റത്തിന് റഷ്യൻ പോലീസ് ആന്യയെ തിരഞ്ഞുനടക്കുന്നുണ്ട്. എന്ത് കൊണ്ടും ഇവിടെ നിന്ന് മാറി നിൽക്കേണ്ട ആവശ്യമാണ് ഇപ്പോൾ അന്യയ്ക്ക്. പതിനാല് കാരിയായ ക്രിസ്റ്റീന നഗരത്തിലെ അനാഥാലയത്തിലെ അന്തെവാസിയാണ്, മറ്റുള്ള സഹവാസികളുമായി ഒത്തുപോവാൻ കഴിയാത്ത ക്രിസ്റ്റീനയ്ക്ക് ഒരു ലക്‌ഷ്യം മാത്രമേ മുന്നിൽ ഉണ്ടായിരുന്നുള്ളൂ.ജന്മനാടായ കസാഖിസ്ഥാനിൽ തന്റെ ജീവിച്ചിരിക്കുന്ന ഒരേ ബന്ധുവായ മുത്തശ്ശി ഇന്നും ജീവിച്ചിരിപ്പുണ്ട് ,അവരെ കണ്ടെത്തണം എന്നതായിരുന്നു അവളുടെ ഉദ്ദേശം.

🔸അങ്ങനെ ഈ രണ്ട് കഥാപാത്രങ്ങളും യാത്ര ആരംഭിക്കുകയാണ് ,കസാഖിസ്ഥാനിലേക്ക്. ലക്ഷ്യ സ്ഥാനത്തെ കുറിച്ചോ അങ്ങോട്ടേക്കുള്ള യാത്രയെ കുറിച്ചോ വലിയ പിടിയൊന്നുമില്ല ഇരുവർക്കും ,അല്ലെങ്കിലും യാത്രകൾ എല്ലാം മിക്കപ്പോഴും പ്രവചിക്കാൻ കഴിയാത്തതാണല്ലോ, ഒരു യാത്രയിൽ എന്ത് വേണമെങ്കിലും സംഭവിക്കാം. ഉപേക്ഷിക്കപ്പെട്ട രണ്ട് കഥാപാത്രങ്ങൾക്കുമിടയിൽ അതി മനോഹരമായ ഒരു ബന്ധവും ഉടലെടുക്കുന്നുണ്ട് ഈ യാത്രയ്ക്കിടയിൽ. റോഡ് മൂവികൾ ഇഷ്ട്ടപ്പെടുന്നവർ തീർച്ചയായും കണ്ടിരിക്കേണ്ട ഈ ചിത്രത്തിന്റെ മലയാളം സബ് അടക്കമുള്ള ഫയൽ ലഭ്യമാണ്.

Verdict : Very Good

272. Landscape In The Mist (1988)

Director : Theodoros Angelopoulos

Genre : Journey

Rating : 8/10

Country : Greece

Duration : 127 Minutes

🔸ആരാണെന്ന് അറിയില്ല, ഫോട്ടോയോ അത് പോലെ ഉള്ള എന്തെങ്കിലും അടയാളങ്ങളോ കയ്യിലില്ല, കാണാനെങ്ങനെ എന്നൊരു ഊഹം പോലുമില്ല ,കേട്ടറിവുകൾ പോലും പരിമിതം ആണ്. എന്തിന് ഇങ്ങനെ ഒരാളുണ്ടോ എന്ന് പോലും ഉറപ്പില്ല.

🔸എന്തൊക്കെ തന്നെ ആയാലും ഈ പരിമിതമായ അറിവുകൾ വെച്ച് മുന്നോട്ട് പോവാൻ തന്നെയാണ് അവരുടെ തീരുമാനം. അയാളെ കണ്ടുപിടിച്ചേ തീരൂ, കാരണം പ്രസ്തുത കഥാപാത്രം അവരുടെ അച്ഛനാണ്.

🔸ഗ്രീസിലെ ഉൾനാടൻ ഗ്രാമങ്ങളിൽ ഒന്നിലാണ് വോളയും സഹോദരൻ അലക്സാണ്ടറോസും ജനിച്ചു വളർന്നത്. അമ്മയല്ലാതെ പറയത്തക്ക ബന്ധുക്കൾ ഇല്ലാത്ത ഇരുവർക്കും അച്ഛൻ എന്നത് കേട്ടറിവ് മാത്രമുള്ള കഥാപാത്രമാണ്.

🔸അച്ഛനെ കുറിച്ചുള്ള സംഭാഷണങ്ങളെല്ലാം കഴിവതും അവരുടെ അമ്മ ഒഴിവാക്കാറുണ്ട്. എന്നാൽ ഇതെല്ലം പ്രസ്തുത കഥാപാത്രത്തെ കുറിച്ചുള്ള കൗതുകം ഇരുവരിലും വർധിപ്പിക്കുക മാത്രമാണ് ചെയ്തത്.

🔸അങ്ങനെ ഒരുനാളിലാണ് ജർമനിയിൽ എവിടെയോ തങ്ങളുടെ അച്ഛൻ ഉണ്ടെന്നുള്ള അറിവ് ഇരുവർക്കും ലഭിക്കുന്നത്. മറ്റാരുടെയും സഹായത്തിന് കാത്തുനിൽക്കാതെ ഇരുവരും യാത്ര തുടങ്ങുമ്പോൾ സിനിമാ പ്രേമികൾക്ക് ലഭിച്ചത് ഏറ്റവും മികച്ച റോഡ് മൂവികളിൽ ഒന്ന്.

Verdict : Must Watch

111. The Bird People In China (1998)

Director : Takashi Miike

Genre : Journey

Rating : 7.6/10

Country : Japan

Duration : 118 Minutes


🔸യാത്ര പോലെ ഒരു മനുഷ്യന് ആനന്ദം പകരുന്ന മറ്റൊരു കാര്യം ഉണ്ടായേക്കില്ല ,പുതിയ പാതകളിലൂടെയും അപരിചിതരായ മനുഷ്യരിലൂടെയും ഉള്ള യാത്ര അത് എവിടേക്ക് ആയാലും വ്യത്യസ്തമായ അനുഭവം തന്നെ ആയിരിക്കും.

🔸ബേർഡ് പീപ്പിൾ ഇൻ ചൈന എന്ന ചിത്രം ഒരു തിരിച്ചറിവാണ് ,കഥാപാത്രത്തിന് മാത്രമല്ല ഓരോ കാഴ്ചക്കാരനും. നഷ്ട്ടപ്പെട്ട സൗഭാഗ്യങ്ങളുടെ തിരിച്ചറിവ്.

🔸കഥാനായകൻ ഒരു ജാപ്പനീസ് ബിസിനസ്സുകാരൻ ആണ്. ചൈനയിലെ ഒരു ഉൾനാടൻ ഗ്രാമത്തിലേക്ക് തന്റെ ജോലിയുമായി ബന്ധപ്പെട്ട് നായകന് നടത്തേണ്ടി വരുന്ന യാത്രയാണ് ചിത്രത്തിന്റെ പ്രമേയം.

🔸അപരിചിതമായ രാജ്യത്ത് കൂടിയുള്ള യാത്ര കഥാപാത്രത്തെ മാനസികമായും ശാരീരികമായും മാറ്റി മറിക്കുകയാണ്.

🔸കൂടുതൽ യാതൊന്നും അറിയാതെ ,അന്വേഷിക്കാതെ കണ്ടിരിക്കേണ്ട ഈ ചിത്രത്തിനോടും ഇത് മുന്നോട്ട് വെയ്ക്കുന്ന പ്രമേയത്തിനോടും കാഴ്ചക്കാരൻ അടുപ്പത്തിൽ ആവും എന്ന കാര്യത്തിൽ സംശയത്തിന് പോലും സാധ്യത ഇല്ല.

Verdict : Very Good

96. Everything Is Illuminated (2005)

Director : Liev Schreiber

Genre : Journey

Rating : 7.5/10

Country : USA

Duration : 104 Minutes


🔸ചില ചിത്രങ്ങൾക്ക് ഒരു പ്രത്യേകതയുണ്ട് ,ഒരു അറിവും ഇല്ലാതെ പ്രതീക്ഷയും ഇല്ലാതെ കാണുന്ന അത്തരം ചിത്രങ്ങൾ ജീവിതത്തിൽ ഉടനീളം നമ്മുടെ കൂടെ ഉണ്ടാവും ,ഇത് അത്തരം ഒരു ചിത്രമാണ്.

🔸യാത്രയാണ് ചിത്രത്തിന്റെ പ്രമേയം ,അതിമനോഹരമായ വിഷ്വൽസ് കൊണ്ട് സമ്പന്നമാണ് ഈ ചിത്രം. യൂറോപ്പിന്റെ ഗ്രാമഭംഗി അത്രമേൽ നന്നായി ചിത്രം ഒപ്പി എടുത്തിട്ടുണ്ട്.

🔸ജൂതനായ ജോനാഥൻ ഒരു യാത്രയുടെ ആരംഭത്തിലാണ് ,തന്റെ മുത്തച്ഛന്റെ ജീവിതം രക്ഷിച്ച ഒരു സ്ത്രീയെ അന്വേഷിച്ചാണ് ഈ യാത്ര.

🔸രണ്ടാംലോകമയുദ്ധ കാലത്തെ സംഭവം ആണ് ,വർഷങ്ങൾ ഒരുപാട് കഴിഞ്ഞു. അതിനാൽ തന്നെ കഥാപാത്രങ്ങൾ എല്ലാം ജീവിച്ചിരിപ്പുണ്ടോ എന്ന് പോലും പിടിയില്ല.

🔸എന്തിരുന്നാലും യാത്ര ആരംഭിക്കുക തന്നെ ചെയ്തു ജോനാഥൻ ,കൂട്ടിനായി ഒപ്പം ഉള്ളത് കിറുക്കനായ അലെക്സും അയാളുടെ അതിലും കിറുക്കനായ മുത്തച്ഛനും അയാളുടെ നായയും.

Verdict : Very Good

77. Easy Rider (1969)

Director : Dennis Hopper

Genre : Journey

Rating : 8/10

Country : USA

Duration : 95 Minutes


🔸വളരെ അടുത്ത സുഹൃത്തുക്കളാണ് ബില്ലിയും വയറ്റും.

🔸ബന്ധുക്കൾ ആയി ആരുമില്ലാത്ത ഇരുവർക്കും സമ്പാദ്യം എന്നുപറയാൻ ആകെയുള്ളത് രണ്ട് ബൈക്കുകളാണ്.

🔸ന്യൂ ഓർലീൻസിലെ മർദി ഫെസ്റ്റിവലിൽ പങ്കെടുക്കാൻ തീരുമാനിച്ച ഇരുവരും ഒരു റോഡ് ട്രിപ്പിന് ഇറങ്ങുകയാണ്.

🔸ഓർമിക്കാൻ തക്കതായ ഒന്നുമില്ലാത്ത ഭൂതകാലത്തിന് പകരമായി എന്നും ഓര്മിക്കപെടേണ്ട ഒരു യാത്ര.

🔸മദ്യവും ലഹരിയും സ്ത്രീകളും സ്വപ്നങ്ങളും ഉൾപ്പെട്ട യാത്ര, ഒരു സിനിമ ജിനേരിനെ തന്നെ നിർവചിച്ച ഒരുപാട് ചിത്രങ്ങൾക്ക് പ്രചോദനമായ ചിത്രം.

Verdict : Must Watch