505. Look Who's Back (2015)

Director : David Whendt

Genre : Comedy

Rating : 7.1/10

Country : Germany

Duration : 116 Minutes

🔸വളരെ രസകരമായ ഒരു ത്രെഡ് ആണ് ലുക് ഹൂസ് ബാക്ക് എന്ന ജർമൻ ചിത്രത്തിന്റേത്, ഹിറ്റ്ലർ എന്ന വ്യക്തിയെ പരിചയപ്പെടുത്തേണ്ട ആവശ്യം ഉണ്ടെന്ന് തോന്നുന്നില്ല, മനുഷ്യരാശി കണ്ട ഏറ്റവും ക്രൂരമായ കൂട്ടക്കൊലകളിൽ ഒന്നിനും, രണ്ടാം ലോക മഹായുദ്ധത്തിനും എല്ലാം കാരണക്കാരനായ ഹിറ്റ്ലറിന് ചരിത്രത്തിൽ ഒഴിച്ച് കൂടാനാവാത്ത സാന്നിധ്യമാണ് ഉള്ളത്, ഒരല്പം കുപ്രസിദ്ധമായ സാന്നിധ്യം എന്ന് വേണമെങ്കിൽ പറയാം. ലുക് ഹുസ് ബാക്ക് എന്ന ചിത്രം ഹിറ്റ്ലറിനെ വർത്തമാന കാലത്തിൽ ഒന്ന് ചിന്തിച്ച് നോക്കുകയാണ്, അതായത് ഏഴ് പതിറ്റാണ്ട് മുൻപ് ആത്മഹത്യ ചെയ്ത ടിയാൻ ഇന്നിന്റെ ഭാഗം ആയിരുന്നെങ്കിൽ എന്താവുമായിരുന്നു എന്ന ഒരല്പം കൗതുകം ജനിപ്പിക്കുന്ന വിഷയം ആണ് ഈ ചിത്രത്തിന്റെത്.

🔸ഒരു ചെറിയ ഹോട്ടലിൽ നിന്നാണ് ചിത്രം ആരംഭിക്കുന്നത്, കഥാനായകനായ ഹിറ്റ്ലർ ഒരല്പം വിഷണ്ണനായി അവിടെ ഇരുന്ന് ചായ കുടിക്കുകയാണ്. ഈ ശോക മനോഭാവം കണ്ടത് കൊണ്ടാവണം കാര്യ കാരണങ്ങൾ തിരക്കാൻ എന്ന മട്ടിൽ മറ്റൊരു കഥാപാത്രം അവിടേക്ക് കടന്ന് വരികയാണ്, അയാളുടെ മുന്നിലേക്ക് ഹിറ്റ്ലർ തന്റെ സങ്കടങ്ങൾ തുറന്ന് പറയുകയാണ്. ആദ്യമേ തന്നെ താൻ നാസി രീതിയിൽ അഭിവാദ്യം ചെയ്താൽ ഒരു മനുഷ്യൻ പോലും തിരിച്ച് തന്നോട് ആ രീതിയിൽ ആദരവ് പ്രകടിപ്പിക്കുന്നില്ല, താൻ ഉയർത്തി പിടിച്ച മൂല്യങ്ങൾ ജനത പിന്തുടരാത്തതിൽ ചെറിയൊരു അമർഷം ടിയാനുണ്ട്. ചെറിയ രീതിയിൽ ഹിറ്റ്ലറിനെ സമാധാനിപ്പിക്കാൻ ആ വഴിപോക്കൻ ശ്രമിച്ചെങ്കിലും അത്ര നല്ല രീതിയിൽ അല്ല അതവസാനിക്കുന്നത്.

🔸അവിടെ നിന്നും ഹിറ്റ്ലറുടെ ആത്മഗതം ആരംഭിക്കുകയാണ്, ജർമനി എന്ന രാജ്യം ഇന്നത്തെ രീതിയിൽ പുരോഗതി കൈവരിച്ചതിന് കാരണം താൻ ആണെന്ന് അയാൾ ഉറച്ച് വിശ്വസിക്കുന്നുണ്ട്. ശബ്ദം ഇല്ലാതെ കീഴ്പ്പെട്ട് ജീവിച്ച ജനതയെ ഒന്നിപ്പിച്ച് നിർത്തിയതിനും ശക്തി സ്വരൂപിച്ചതിനും എല്ലാം കാരണക്കാരനായ തന്നെയും തന്റെ ആശയങ്ങളെയും ജനങ്ങൾ പാടെ നിരാകരിച്ചത് ഉൾക്കൊള്ളാൻ അയാൾക്ക് കഴിഞ്ഞിട്ടില്ല. താൻ ഇല്ലായിരുന്നെങ്കിൽ ജർമനി പോലും ഉണ്ടാവില്ലായിരുന്നു എന്ന് വരെ ഊറ്റം കൊള്ളുന്ന ഹിറ്റ്ലർ പക്ഷെ ഒരുകാര്യം വിട്ട് പോയിരുന്നു, ഇത് തന്റെ ഇരുപതാം നൂറ്റാണ്ട് അല്ല എന്ന കാര്യം. കാലചക്രം ഹിറ്റ്ലർക്ക് പിടികൊടുക്കാതെ ഒരുപാട് കാലം കറങ്ങി കഴിഞ്ഞിരിക്കുന്നു.

🔸കാര്യ കാരണങ്ങൾ ഒന്നും ചിത്രം വ്യക്തമാക്കുന്നില്ലെങ്കിലും ഹിറ്റ്ലർ ഇപ്പോൾ എത്തപ്പെട്ടിരിക്കുന്നത് ഇരുപത്തി ഒന്നാം നൂറ്റാണ്ടിലാണ്, ഈ നൂറ്റാണ്ടിലെ രാഷ്ട്രീയ പരിസ്ഥിതി നമുക്ക് പരിചിതം ആണെങ്കിലും ഹിറ്റ്ലർക്ക് വലിയ പിടി ഇല്ല. രണ്ടാം ലോക മഹായുദ്ധത്തിൽ ജർമനി തോറ്റതും, ന്യുരംബർഗ് വിചാരണയും, നാസി നിരോധനവും ഒന്നും ഹിറ്റ്ലർ അറിഞ്ഞിട്ടില്ല എന്ന് സാരം. അത് കൊണ്ട് തന്നെയാണ് ബോധം തെളിഞ്ഞ നിമിഷം തൊട്ടടുത്ത് ഉള്ള കുട്ടികളോട് തന്റെ സഹായി ആയ കമാണ്ടർ മാർട്ടിൻ ഫോർമാൻ എവിടെ എന്ന് ഹിറ്റ്ലർ ചോദിക്കുന്നത്. ഈ പറഞ്ഞ വ്യക്തിയൊക്കെ മരിച്ചിട്ട് വർഷം പത്തേഴുപത് കഴിഞ്ഞെന്ന് ഹിറ്റ്ലർക്കൊ ഈ കിളി പോയവൻ ആരാണെന്ന് പിള്ളേർക്കൊ പിടി കിട്ടിയതുമില്ല.

🔸ഇതിനെ എല്ലാം വെല്ലുന്ന മറ്റൊരു പ്രശ്നമാണ് ഹിറ്റ്ലറിനെ ഇപ്പോൾ അലട്ടുന്നത്, അത് വേറൊന്നും അല്ല തന്നെ ജനങ്ങൾ തിരിച്ചറിയുന്നില്ല എന്നതാണ് പ്രശനം. പഴയ പട്ടാള ഉടുപ്പ്, തൊപ്പി ഒക്കെ ഉണ്ടെങ്കിലും ഇതേതോ ഫാൻസി ഡ്രസ്സ് ഐറ്റം ആണെന്നാണ് എല്ലാവരും പറയുന്നത്. ഞാനാണ് നിങ്ങളുടെ പഴയ ഫ്യുറർ എന്ന് പറഞ്ഞാൽ ബുദ്ധിയും ബോധവും ഉള്ള ഒരുത്തനും ഒട്ട് വിശ്വസിക്കുന്നുമില്ല, ഇത്രയും ഗതികെട്ട അവസ്ഥ വേറൊരുത്തനും കൊടുക്കരുതേ എന്ന് മനസ്സിൽ അറിയാതെ പറഞ്ഞ് പോവുകയാണ് ഹിറ്റ്ലർ. ഇവിടെ നിന്നും അയാളുടെ വീക്ഷണത്തിലൂടെ കഥ പലവഴി ഒഴുകുകയാണ്, സന്ദർഭത്തെ അധികം ചോദ്യം ചെയ്യാതെ കാണുക ആണെങ്കിൽ ഒരു ചിരിയോട് കൂടി കണ്ട് തീർക്കാവുന്ന നല്ലൊരു കൊമെടി ചിത്രമാണ് ലുക്ക് ഹുസ് ബാക്ക്, കാണാൻ ശ്രമിക്കുക.

Verdict : Good

DC Rating : 74/100

504. Dark (2017)

Creator : Baran Bo Odar

Genre : Sci Fi

Rating : 8.6/10

Seasons : 01

Episodes : 10

Country : Germany

Duration : 45 -57 Minutes Per Episode

🔸ഭൂത കാലത്ത് നമ്മൾ ഭാഗം ആവേണ്ടി വന്ന ചില സംഭവങ്ങളിൽ നിന്നും പാഠവും, പ്രചോദനവും ഉൾക്കൊണ്ട് വർത്തമാന കാലത്തെ ചില സന്ദർഭങ്ങളിൽ നമ്മൾ കൈക്കൊള്ളുന്ന തീരുമാനങ്ങളാണ് ഭാവി കാലത്തെ നിർവചിക്കുക, അല്ലെങ്കിൽ അങ്ങനെയാണ് നമ്മൾ വിശ്വസിച്ച് പോന്നത്. എന്നാൽ ഈ ഭൂതം ഭാവി വർത്തമാനം എന്നതൊക്കെ എത്രത്തോളം സ്ഥായിയാണ്, നമ്മൾ കരുതി വെച്ച അതെ രീതിയിൽ തന്നെയാണോ കാല ചക്രം കറങ്ങുന്നത്, ഭാവി എന്നത് അനിശ്ചിതത്വത്തിന്റെയും ഭൂതകാലം എന്നത് നഷ്ടബോധത്തിന്റെയും മാത്രമാണോ, അത്രത്തോളം അരക്ഷിതാവസ്ഥയിലും നിസ്സഹായതയിലും ഉള്ളതാണോ മനുഷ്യൻ എന്ന ജീവി. ഇങ്ങനെ അനവധി അനവധി അനവധി ചോദ്യങ്ങൾക്കുള്ള ഉത്തരങ്ങളാണ് ഡാർക്ക് എന്ന ജർമൻ സീരീസിൽ ഉള്ളത്. ഒരു സീസണിൽ പത്ത് എപ്പിസോഡ് മാത്രമേ ഈ സീരീസിൽ ഇതുവരെ പുറത്തിറങ്ങിയിട്ടുള്ളൂ, അത് നൂറ് ശതമാനം കാഴ്ചക്കാരന്റെ സമയത്തെ നീതികരിക്കുന്നതുമാണ്.

🔸ജർമനിയിലെ വിൻടെൻ എന്ന ചെറിയ ഗ്രാമത്തിലാണ് ഡാർക്കിന്റെ കഥ അരങ്ങേറുന്നത്, വിശദീകരിക്കാൻ കഴിയാത്ത രീതിയിലുള്ള ഒരു തരം വിഷാദം ഗ്രാമത്തിൽ ഒന്നടങ്കം കാണാൻ കഴിയും, അത് അന്തേവാസികളായ ജനങ്ങളുടെ കാര്യത്തിൽ ആണെങ്കിലും ചുറ്റുപാടുകളിൽ ആണെങ്കിലും അന്തരീക്ഷത്തിൽ ആണെങ്കിൽ പോലും തളം കെട്ടി കിടക്കുന്നതായി കാണാം. ചെറിയൊരു സ്‌കൂളും പോലീസ് സ്റ്റേഷനും, അല്ലറ ചില്ലറ ഫാക്ടറികളും എല്ലാം ഒഴിച്ച് നിർത്തിയാൽ ഏറെക്കുറെ ഒഴിഞ്ഞ പട്ടണമാണ് വിന്റൻ, ആ പിന്നെ പറയാൻ ആണെങ്കിൽ ഒരു ന്യുക്ളിയാർ പവർ പ്ലാന്റ് ഉണ്ട് എന്നത് എടുത്ത് പറയേണ്ടി ഇരിക്കുന്നു.

🔸ഒരു ഹൈസ്‌കൂൾ വിദ്യാർത്ഥിയെ കാണാതാവുന്നിടത്ത് വെച്ചാണ് സീരീസിന്റെ കഥ ആരംഭിക്കുന്നത്, വിന്റൻ എന്ന ഗ്രാമത്തിന്റെ സമീപകാല ചരിത്രം പരിശോധിച്ചാൽ ഈ രീതിയിലുള്ള തിരോധനങ്ങളോ കൊലപാതകങ്ങളോ ഒന്നും തന്നെ അത്ര സാധാരണമായ ഒന്നല്ല, അല്ലറ ചില്ലറ തർക്കങ്ങൾ മാറ്റി നിർത്തിയാൽ വളരെ സമാധാനപൂർണം ആയതാണ് വിന്റൻ ഗ്രാമം. എന്നാൽ ഈ വിദ്യാർത്ഥിയുടെ തിരോധാനത്തിന്റെ ചുവട് പിടിച്ച് അന്വേഷണങ്ങൾക്കായി ഒരു സൗഹൃദ സംഘം കാടിനുള്ളിലേക്ക് കടന്ന് വരുമ്പോൾ കളി ആകെ മാറുകയാണ്, ചില അനിഷ്ട സംഭവങ്ങൾക്ക് ശേഷം മറ്റൊരു കുട്ടി കൂടി കാണാതാവുന്നിടത്ത് സീരീസിന്റെ കഥ ചൂട് പിടിക്കുകയാണ്.

🔸ഒരു ഗ്രാമത്തെ തന്നെ ബാധിക്കുന്ന കഥ ആണെങ്കിൽ കൂടിയും നാല് കുടുംബങ്ങളിൽ ശ്രദ്ധ ചെലുത്തിയാണ് ഡാർക്ക് പുരോഗമിക്കുന്നത്, പുറമെ നിന്ന് കാണുന്നതിനേക്കാൾ ഒരല്പം ചീഞ്ഞ് നാറിയതിന് കണക്കെ പ്രശ്നങ്ങൾ ഈ കുടുംബങ്ങളിൽ എല്ലാമുണ്ട്. എന്നാൽ മുകളിൽ സൂചിപ്പിച്ച ചില അപ്രതീക്ഷിത സംഭവങ്ങൾ ഒട്ടും പ്രതീക്ഷിക്കാത്ത രീതിയിൽ ഈ കുടുംബങ്ങളുടെ എല്ലാം ഭാവി തുലാസിലാക്കുകയാണ്. ഈ വ്യക്തികളുടെ എല്ലാം ഭൂത, ഭാവി, വർത്തമാന കാലത്തേക്ക് കാഴ്ചക്കാരനെ കൂട്ടി കൊണ്ടുപോവുന്നുണ്ട് ഈ സീരീസ്. ഇങ്ങനെ ഒക്കെ ആണെങ്കിൽ പോലും കഥയുടെ കെട്ടുറപ്പിൽ യാതൊരു ദോഷവും വരുത്താതെ മികച്ച രീതിയിൽ പുരോഗമിക്കുന്നുമുണ്ട് ഡാർക്.

🔸സ്പോയിലെർ ആവും എന്നത് ഉറപ്പ് ആയതിനാൽ സീരീസിന്റെ കഥയിലേക്കും കഥാപാത്രങ്ങളിലേക്കും അധികം കടന്ന് ചെല്ലാൻ താല്പര്യപ്പെടുന്നില്ല, പ്രത്യേകിച്ചും ഡാർക്ക് പോലെ അത്യാവശ്യം യൂണീക് ആയ ത്രെഡ് പിന്തുടരുന്ന ഒരു സീരീസ് കാണാനിരിക്കുമ്പോൾ തീർച്ചയായും ഒഴിവാക്കേണ്ട ഒന്നാണ് സ്പോയിലെർ എന്നത്. നോൺ ലീനിയർ ആയ രീതിയിലാണ് സീരീസ് പുരോഗമിക്കുന്നത്, തുടക്ക ഭാഗത്ത് വലിയ പ്രശനം അനുഭവപ്പെട്ടേക്കില്ലെങ്കിലും പകുതിക്ക് ശേഷം കഥാപാത്രങ്ങളും കഥയും സാധ്യതകളും എല്ലാം വർധിക്കുമ്പോൾ ഒരല്പം കോംപ്ലെക്സ് ആയി മാറുന്നുണ്ട് ഡാർക്ക്. മികച്ച ഛായാഗ്രഹണം, പശ്ചാത്തല സംഗീതം, കഥ, പ്രകടനം തുടങ്ങി എല്ലാ മേഖലകളിലും ടിക്ക് മാർക്ക് അർഹിക്കുന്ന ഈ സീരീസ് കഴിയുമെങ്കിൽ കാണുക, വ്യത്യസ്തമായ ഒരനുഭവം ഉറപ്പ്. സീരീസിന്റെ രണ്ടാമത്തെ സീസൺ ഈ വർഷം വരുന്നുണ്ടെന്ന് കേട്ടു, ഈ സീസണിന്റെ മികവ് നിലനിർത്തി കൂടുതൽ സാദ്ധ്യതകൾ തുറന്നിടുന്ന മികച്ചൊരു സീസൺ ആവുമെന്ന് പ്രതീക്ഷിക്കുന്നു.

Verdict : Must Watch

DC Rating : 90/100

503. The Favourite (2018)

Director : Yorgos Lanthimos

Genre : Historical

Rating : 7.8/10

Country : Ireland

Duration : 120 Minutes

🔸ബ്രിട്ടൻ എന്ന രാജ്യത്തിന്റെ രാജ്ഞി ആയ ആൻ, ആനിന്റെ ഉറ്റ സുഹൃത്തും തോഴിയും സഹായിയും എല്ലാം ആയ സാറാ, സാറയുടെ ബന്ധുവും രാജ്ഞിയുടെ ജോലിക്കാരിയും എല്ലാമായ അബിഗെയ്ൽ, ഈ മൂന്ന് കഥാപാത്രങ്ങളെയും ഒരു ത്രികോണം പോലെ സങ്കല്പിച്ചാൽ ഇവർക്കിടയിൽ കറങ്ങിക്കൊണ്ടിരിക്കുന്ന മികച്ചൊരു ചിത്രമാണ് ദി ഫേവറൈറ്റ്. ഡോഗ്‌ടൂത്ത്, ലോബ്സ്റ്റർ, കില്ലിംഗ് ഓഫ് എ സേക്രഡ് ഡിയർ പോലെയുള്ള ചിത്രങ്ങളുടെ സംവിധായകനായ യോർഗോസ് ലാന്തിമോസിന്റെ പുതിയ ചിത്രം, സ്‌ക്രീനിൽ ഇഷ്ട താരങ്ങളുടെ സാന്നിധ്യം എന്നിവ തന്നെ ആയിരുന്നു ചിത്രം കാണാൻ ഉള്ള പ്രചോദനം. ഈ വക പ്രതീക്ഷയോടെല്ലാം നൂറ് ശതമാനം നീതി പുലർത്തുന്നുമുണ്ട് ഈ ചിത്രം.

🔸ബ്രിട്ടന്റെ ഇപ്പോഴത്തെ ഭരണാധികാരി ആയ ആനിനെ കുറിച്ച് പറഞ്ഞ് കൊണ്ട് ആരംഭിക്കാം. വലിയൊരു രാജ്യത്തിന്റെ അവകാശി ആണ്, ഉത്തരവ് കേൾക്കാനും അത് പോലെ പ്രവർത്തിക്കാനും ഒക്കെ ആയി വലിയൊരു അനുചാരക വൃന്ദം തന്നെ ചുറ്റിലുമുണ്ട്, പക്ഷെ പറഞ്ഞിട്ടെന്താ കുട്ടികളുടെ മനസ്സാണ്. രാജ്യ ഭരണത്തെക്കാളും അതുമായി ബന്ധപ്പെട്ട തീരുമാനങ്ങളെക്കാളും ചെറിയ ചില മത്സരങ്ങളിലും തമാശകളും ഒക്കെ ഏർപ്പെടാനാണ് ആനിന് താല്പര്യം, തന്റെ മെയ്ക്കപ്പ് പോരാ എന്ന് പറഞ്ഞ സാറയുടെ മുന്നിൽ വെച്ച് കരച്ചിലേക്ക് വീഴുന്ന ആനിനെ ഇതുമായി കൂട്ടി വായിച്ചാൽ ഏറെക്കുറെ ഒരു ചിത്രം പിടികിട്ടും.

🔸രാജ്യ ഭരണം എന്നത് ഏറെക്കുറെ ഇപ്പോൾ സാറയുടെ ചുമലിൽ ആണ്, തീരുമാനങ്ങൾ കൈ കൊള്ളേണ്ടത് ആൻ ആണെങ്കിലും അവർ ഏറെക്കുറെ സാറയുടെ കയ്യിലെ പാവ ആയി മാറിയിട്ടുണ്ട്. ഇങ്ങനെ ഒക്കെയാണ് കാര്യം എങ്കിലും ആനിനോട് അകമഴിഞ്ഞ സ്നേഹം ആണ് സാറയ്ക്ക്, അത്രത്തോളം തന്നെ കൂറും അവൾക്ക് ആനിനോട് ഉണ്ട്. രാജ്യ ഭരണത്തിൽ കൃത്യമായ, മികച്ച തീരുമാനങ്ങൾ കൈക്കൊള്ളുക വഴി ഭരണാധികാരി എന്ന നിലയിൽ സമ്പൂർണ വിജയമാണ് സാറ, ഫ്രാൻസുമായുള്ള യുദ്ധത്തിൽ ബ്രിട്ടൻ വിജയത്തിലേക്ക് എത്തിയതും ഒരു പരിധി വരെ സാറയുടെ തീരുമാനങ്ങളുടെ മിടുക്കാണ്. ഇങ്ങനെ പൊയ്ക്കൊണ്ടിരുന്ന രണ്ട് കഥാപാത്രങ്ങൾക്കിടയിലേക്ക് ആണ് ഏറെക്കുറെ ഒരു ഔട്ട് സൈഡർ ആയ അബിഗെയ്‌ലിന്റെ വരവ്.

🔸ജീവിതത്തിന്റെ രണ്ട് വശവും കണ്ടവളാണ് അബിഗെയ്ൽ, സമ്പത്തിന്റെ ഔന്നിത്യത്തിൽ നിന്നും ദാരിദ്ര്യത്തിന്റെ പടു കുഴിയിലേക്ക് വീണവൾ. സ്വന്തം അച്ഛന്റെ ധൂർത്തും ചൂത് കളിയും കാരണം എല്ലാം നഷ്ടപ്പെട്ട് അന്തപുരത്തിലെ ജോലിക്കാരിൽ ഒരാളായി എത്തുകയാണ് അബിഗെയ്ൽ. സാറയുടെ അകന്ന ബന്ധുവാണ് അബിഗെയ്ൽ, ആ ബന്ധത്തിന്റെ ബലത്തിലാണ് ജോലിയിലേക്ക് പ്രവേശിക്കുന്നതും. ഇങ്ങനെയൊക്കെ ആണ് കാര്യങ്ങളുടെ കിടപ്പ് വശം എങ്കിലും ഈ കഥാപാത്രങ്ങൾക്കെല്ലാം തന്നെ പുറം ലോകം കാണാത്ത ചില വശങ്ങളും അറിയാത്ത ചില രഹസ്യങ്ങളും ഉണ്ടായിരുന്നു, ഈ വസ്തുതകളിലേക്കുള്ള വെളിച്ചം വീശലാണ് പ്രസ്തുത ചിത്രം.

🔸നല്ല കഥ, നല്ല അവതരണം, മികച്ച അഭിനേതാക്കളുടെ മികവുറ്റ അഭിനയം, തുടങ്ങി ഒരു മികച്ച ചിത്രത്തിന് വേണ്ട എല്ലാ വസ്തുവകകളും ദി ഫേവറിറ്റ് എന്ന ചിത്രത്തിനുണ്ട്. മൂന്ന് മികച്ച കഥാപാത്രങ്ങോടും അവരുടെ ഉദ്ദേശങ്ങളോടും കരണങ്ങളോടും എല്ലാം പ്രേക്ഷകനെ ഇൻവെസ്റ്റ് ചെയ്യിപ്പിക്കുന്ന രീതിയിൽ കഥ പറഞ്ഞ് പോവുന്ന ചിത്രം ഒടുവിൽ എല്ലാ പഴുതുകളും അടയ്ക്കുന്ന രീതിയിൽ, ന്യായീകരണം ആവശ്യമില്ലാത്ത തോതിൽ മികച്ച അവസാനവും ഈ കഥാപാത്രങ്ങൾക്ക് എല്ലാം കരുതി വെച്ചിട്ടുണ്ട്. കൂടുതൽ പറഞ്ഞ് മുഷിപ്പിക്കുന്നില്ല, തീർച്ചയായും കാണാൻ ശ്രമിക്കുക നല്ലൊരു സിനിമാ അനുഭവം ഉറപ്പ് നൽകുന്നു.

Verdict : Very Good

DC Rating : 88/100

502. Cold War (2018)

Director : Pawel Pawlikowski

Genre : Drama

Rating : 7.7/10

Country : Poland

Duration : 88 Minutes

🔸പാവെൽ പാവലികൊസ്കിയുടെ കോൾഡ് വാർ എന്ന ചിത്രത്തിൽ പ്രതീക്ഷ വെച്ച് പുലർത്താൻ പ്രധാനമായും കാരണങ്ങൾ മൂന്ന് ആയിരുന്നു, ആദ്യമായി ടിയാന്റെ മുൻകാല ചിത്രമായ ഐദ എന്നത് കഴിഞ്ഞ കുറച്ച് വർഷങ്ങളിൽ കണ്ട മികച്ച ചില ചിത്രങ്ങളിൽ ഒന്ന് ആയതിനാലും രണ്ടാമതായി ചിത്രം പ്രദർശിപ്പിക്കപ്പെട്ട ഫെസ്റ്റുകളിലും മേളകളിലും മറ്റും ലഭിച്ച മികച്ച പ്രതികരണങ്ങൾ കാരണവും. ഇതിനെല്ലാം മേലെ രണ്ടാം ലോക മഹായുദ്ധത്തിന് ശേഷം ഏറെക്കുറെ ഒരു ട്രാന്സിഷൻ പീരീഡ്ലൂടെ കടന്ന് പോയി കൊണ്ടിരുന്ന യൂറോപ്പിന്റെ പശ്ചാത്തലത്തിൽ ഒരു പ്രണയ ചിത്രം എന്ന കൺസെപ്റ്റിനോടും താല്പര്യം ജനിച്ചിരുന്നു. ഈ കാരണങ്ങൾ കൊണ്ടെല്ലാം തന്നെ പ്രതീക്ഷയോടെ കാത്തിരുന്ന ചിത്രങ്ങളിൽ ഒന്ന് തന്നെ ആയിരുന്നു കോൾഡ് വാർ.

🔸നാല്പതുകളിലെ പോളണ്ടിൽ ആണ് ചിത്രം ആരംഭിക്കുന്നത്, യുദ്ധത്തിന് ശേഷം സ്വന്തം കാലിൽ ഉറച്ച് നില്ക്കാൻ ബുദ്ധിമുട്ടുന്ന ഒരു കൂട്ടം ജനങ്ങളെയാണ് ചിത്രം കാണിച്ച് തരുന്നതും. ഇവർക്കിടയിലേക്കാണ് ക്‌ളാസ്സിക് പോളിഷ് സംഗീതത്തിന്റെ വേരുകൾ തേടിയിറങ്ങിയ വിക്ടറും ഐറീനയും എത്തുന്നത്, ഒരു ഓഡിഷൻ എന്ന രൂപേണ കലാരൂപത്തിന്റെ ഉയർത്തെഴുന്നേൽപ്പിന് തങ്ങളാൽ കഴിയുന്ന ചെറിയൊരു സംഭാവന ആണ് ഇരുവരുടെയും ഉദ്ദേശം. അനേകം കലാകാരന്മാർക്ക് ഇടയിലൂടെ അന്യം നിന്ന് പോയേക്കാവുന്ന കലാസൃഷ്ടികളിലൂടെ കടന്ന് പൊയ്ക്കൊണ്ടിരുന്ന ഇരുവർക്കും മുന്നിലേക്ക് ഒരുനാൾ സൂലാ പ്രത്യക്ഷപ്പെടുകയാണ്.

🔸പരമ്പരാഗത സംഗീതത്തിന് പകരം റഷ്യൻ സ്വാധീനം ഉള്ള സംഗീതം കൈമുതലാക്കിയ സൂലയോട് ഐറീനയ്ക്ക് വലിയ മതിപ്പ് ഒന്നും തോന്നിയില്ലെങ്കിലും അവളുടെ രീതികളിലും ശൈലിയിലും എല്ലാം ആകൃഷ്ടനായ വിക്ടർ അവസരം നൽകാൻ തന്നെ തീരുമാനിക്കുകയാണ്. അങ്ങനെ എങ്ങുനിന്ന് എന്നറിയാതെ എത്തിയ സുലാ വിക്ടറിന്റെയും ടീമിന്റെയും ഭാഗം ആയി മാറുകയാണ്. സൂലയുടെ ഭൂതകാലത്തിലേക്ക് ഒരന്വേഷണം നടത്തിയ ഐറീനയ്ക്ക് അത്ര നല്ല വാർത്തകൾ ആയിരുന്നില്ല നൽകാൻ ഉണ്ടായിരുന്നത്, സ്വന്തം പിതാവിനെ കൊന്നതിന് ജയിൽ ശിക്ഷ അനുഭവിച്ചവളാണ് അവൾ, ഈ കാര്യം വിക്ടറിനെ ഐറീൻ അറിയിക്കുന്നുണ്ടെങ്കിലും മുന്നോട്ട് പോവാൻ തന്നെ ആയിരുന്നു അയാളുടെ തീരുമാനം.

🔸അത്യാവശ്യം നല്ല രീതിയിൽ തന്നെ കലയും പ്രവർത്തനങ്ങളും ഒക്കെയായി ജീവിതം മുന്നോട്ട് പോവുന്നുണ്ടെങ്കിലും സ്വരാജ്യത്ത് ജീവിതം ദുസ്സഹം ആവുന്നത് വിക്ടർ പതിയെ തിരിച്ചറിയുകയാണ്. ഈ ദുസ്സഹാവസ്ഥ അതിന്റെ പാരമ്യത്തിൽ എത്തുമ്പോൾ അയാൾ രാജ്യം വിട്ട് പോവാൻ തീരുമാനിക്കുന്നതും തന്നോടൊപ്പം വരാൻ സൂലയെ നിർബന്ധിക്കുകയും ചെയ്യുകയാണ്. ഇവിടെ നിന്നും പിന്നീടുള്ള ഒരു ഒന്നര പതിറ്റാണ്ട് കാലം ഈ രണ്ട് കഥാപാത്രങ്ങളുടെ വിവിധ കാലഘട്ടങ്ങളിലൂടെ ഒരു പ്രണയകഥ പറയുകയാണ് ഈ ചിത്രം. സന്ദർഭങ്ങൾക്കും രാജ്യങ്ങൾക്കും അപ്പുറം വിവിധ, വ്യത്യസ്ത വൈകാരിക തലങ്ങളിൽ കൂടിയും ചിത്രം കടന്ന് പോവുന്നുണ്ട്.

🔸ഡോക്ടർ ഷിവാഗോ, കാസാബ്ലാങ്ക, ലാ ലാ ലാൻഡ് പോലെയുള്ള ചിത്രങ്ങളുടെ അംശം പലയിടത്തും കാണാനാവും ഈ ചിത്രത്തിൽ, പ്രത്യേകിച്ചും രണ്ട് കാമുകീ കാമുകന്മാരുടെ പ്രണയം കടന്ന് പോവുന്ന തടസ്സങ്ങളും പ്രത്യാഘാതങ്ങളും എല്ലാം കൺ മുന്നിൽ എത്തുമ്പോൾ തീർച്ചയായും ആ സാമ്യം അനുഭവപ്പെടും. മികച്ചൊരു ചിത്രം തന്നെയാണ് കോൾഡ് വാർ, കഥാപരമായി പുതുമകൾ ഒന്നും ചൂണ്ടി കാണിക്കാൻ ഇല്ലെങ്കിൽ കൂടിയും കാഴ്ചക്കാരന് നൽകുന്ന അനുഭവവും, ബാക്കി വെക്കുന്ന ചോദ്യങ്ങളും എല്ലാം ഒരു മികച്ച ചിത്രത്തിന്റെ ബാക്കി പത്രങ്ങളാണ്, ഈ കാരണങ്ങൾ എല്ലാം കൊണ്ട് തന്നെ തീർച്ചയായും ശുപാർശ ചെയ്യും കോൾഡ് വാർ എന്ന ചിത്രം. ഒന്നര മണിക്കൂറിൽ താഴെ മാത്രം ദൈർഖ്യം ഉള്ള ചിത്രം കഴിയുമെങ്കിൽ കാണാൻ ശ്രമിക്കുക.

Verdict : Very Good

DC Rating : 82/100

501. Mary Queen Of Scots (2018)

Director : Josie Rourke

Genre : Historical

Rating : 6.5/10

Country : UK

Duration : 125 Minutes

🔸ചതി, വഞ്ചന, പിന്നിൽ നിന്ന് കുത്തൽ, മുതലെടുപ്പ് എന്നിവയെല്ലാം ഭരണം പിടിച്ചെടുക്കാനും സുരക്ഷിതമാക്കാനും ഉള്ള മാർഗങ്ങളിൽ ചിലതാണ് എന്ന് ചരിത്രം പലകുറി തെളിയിച്ചിട്ടുണ്ട്, ഉദാഹരണങ്ങൾ അനവധിയാണ്. ഈ വിഷയം കൈകാര്യം ചെയ്യുന്ന അനവധി സിനിമകളും ഗെയിം ഓഫ് ത്രോൺസ് ഉൾപ്പെടെയുള്ള ടിവി സീരീസുകളും നമ്മുടെ മുന്നിലുണ്ട്, ഈ വിഭാഗത്തിൽ ഉൾപ്പെടുത്താവുന്ന മറ്റൊരു ചിത്രമാണ് മേരി ക്വീൻ ഓഫ് സ്‌കോട്സ് എന്ന കഴിഞ്ഞ വര്ഷം പുറത്തിറങ്ങിയ ബ്രിട്ടീഷ് ഹിസ്റ്റോറിക്കൽ ഡ്രാമ ചിത്രവും. അരങ്ങേറ്റക്കാരി ആയ ജോസി റൂർക്കേ സംവിധാനം ചെയ്യുന്ന ചിത്രത്തിൽ സോയർസെ റൊണനും, മാർഗോട്ട് റോബിയും ആണ് കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്.

🔸രണ്ട് സ്ത്രീ കഥാപാത്രങ്ങളാണ് ചിത്രത്തിൽ പ്രാധാന്യം പിടിച്ച് പറ്റുന്നത്, സോയർസെയുടെ മേരി എന്ന കഥാപാത്രവും റോബ്ബിയുടെ ക്വീൻ എലിസബത്തും. മേരി എന്ന കഥാപാത്രത്തിന്റെ ജീവിതം ഏറെക്കുറെ സംഭവബഹുലം ആണ്, ഇംഗ്ലണ്ടിലെ രാജാവായിരുന്ന അച്ഛന്റെ മരണശേഷം ദിവസങ്ങൾ മാത്രം പ്രായമുള്ളപ്പോൾ കിരീടാവകാശി ആയി വാഴിക്കപ്പെട്ടവളാണ് മേരി. പിന്നീട് ഫ്രഞ്ച് രാജാവിന്റെ പത്നിയും, തുടർന്ന് അർദ്ധ സഹോദരി ആയ എലിസബത്തും ആയി അരങ്ങേറിയ അധികാര തർക്കങ്ങളും എല്ലാം ചേർന്ന വളരെ വളരെ സംഭവ ബഹുലമായ ജീവിതം എന്ന് തന്നെ പറയാം.

🔸ഇനി എലിസബത്തിന്റെ കാര്യം ആണെങ്കിൽ കുറച്ച് കൂടി വ്യത്യസ്തമാണ്, ജീവിതത്തിൽ പരാജയപ്പെട്ട് പോയവളാണ് എലിസബത്ത്. അധികാര മോഹത്തിലും കഴിവിലും എല്ലാം മേരിയുമായി തട്ടിച്ച് നോക്കാമെങ്കിലും ജീവിതത്തിൽ ഒറ്റപ്പെട്ട് പോയതാണ് എലിസബത്ത്, അതിന്റെതായ ചെറിയൊരു അപകർഷതാ ബോധം എന്നും അവരിൽ നിറഞ്ഞ് നിൽപ്പുണ്ടായിരുന്നു. ഈ കാരണങ്ങൾ കൊണ്ട് തന്നെയാണ് താൻ ഏറ്റവും പ്രിയപ്പെട്ടത് എന്ന് കരുതിയിരുന്ന അധികാരം കൂടി മേരിക്ക് വിട്ട് കൊടുക്കാൻ എലിസബത്ത് മടിച്ചതും അത് ഒരു നീണ്ട അധികാര വടംവലിക്ക് വഴി വെക്കുന്നതും. തുടർന്ന് അരങ്ങേറുന്ന സംഭവങ്ങളാണ് ചിത്രത്തിന് ആധാരം ആയിരിക്കുന്നത്.

🔸പതിനാറാം നൂറ്റാണ്ടിൽ അരങ്ങേറിയത് എന്ന് പറയപ്പെടുന്ന യഥാർത്ഥ സംഭവങ്ങളാണ് ചിത്രം പറയുന്നത്, എന്തിരുന്നാലും മുകളിൽ പറഞ്ഞ 'പറയപ്പെടുന്ന' എന്ന വാക്ക് ശ്രദ്ധിക്കുക. വേറൊന്നുമല്ല ചിത്രം പറയുന്ന സംഭവങ്ങൾ എത്രമേൽ യഥാർത്ഥ സംഭവങ്ങളോട് നീതി പുലർത്തുന്നുണ്ട് എന്നതിൽ സംശയം നിലനിൽക്കുന്നു, പല സംഭവങ്ങളുടെയും കാര്യത്തിൽ അനിശ്ചിതത്വം നില നിൽക്കുന്നുണ്ട് താനും. ഈ വ്യക്തത ഇല്ലായ്മ അല്ലെങ്കിൽ വെള്ള പൂശൽ തന്നെയാണ് ചിത്രത്തിൽ അനുഭവപ്പെട്ട വലിയ കല്ല് കടികളിൽ ഒന്ന്. രണ്ട് മണിക്കൂറിന് മുകളിൽ ദൈർഖ്യം ഉള്ള ചിത്രം അത്യാവശ്യം നല്ല പെയ്‌സോഡ് കൂടി മുന്നോട്ട് പോവുന്നുണ്ടെങ്കിലും കഥയിൽ ചിലയിടത്ത് എങ്കിലും പതറി പോവുന്നുണ്ട്, ചുരുക്കി പറഞ്ഞാൽ ഒരു പെർഫെക്റ്റ് ഹിസ്റ്റോറിക്കൽ അല്ലെങ്കിൽ മികച്ചത് എന്ന് വിശേഷിപ്പിക്കാവുന്ന ചിത്രം പ്രതീക്ഷിക്കണ്ട എന്ന് സാരം.

🔸ചിത്രം കാണാനുള്ള വലിയൊരു പ്രചോദനം മാർഗോട്ട് റോബ്ബിയുടെ സാന്നിധ്യം തന്നെ ആയിരുന്നു, ചിത്രത്തിന്റെ പ്ലോട്ടിൽ നിന്നും മറ്റും അർദ്ധ സഹോദരിമാരുടെ അധികാര വടംവലി ആണ് പ്രതീക്ഷിച്ചിരുന്നത് എങ്കിലും പ്രതീക്ഷിച്ചത്ര സമയം സ്‌ക്രീനിലോ ആവശ്യത്തിന് സ്വാധീനം കഥയിലോ റോബ്ബിക്ക് ഉണ്ടായിരുന്നതായി അനുഭവപ്പെട്ടില്ല. ടൈറ്റിൽ സൂചിപ്പിക്കുന്നത് പോലെ തന്നെ മേരിയിൽ ശ്രദ്ധ ചെലുത്തുകയാണ് ചിത്രം, പ്രധാന കഥാപാത്രങ്ങൾ ആയെത്തിയ നടീ നടൻമാർ എല്ലാം ബേധപ്പെട്ട പ്രകടനം കാഴ്ചവെച്ച ചിത്രം കോസ്റ്റിയൂം വിഭാഗത്തിൽ അർഹിച്ച ഓസ്കാർ നോമിനേഷൻ കരസ്ഥമാക്കിയിട്ടുണ്ട്. ചരിത്ര സിനിമകളോട് താല്പര്യം ഉള്ള സമാന വിഭാഗക്കാർക്ക് ഒരു തവണ പരീക്ഷിച്ച് നോക്കാം ഈ ചിത്രം, കാര്യമായ പ്രതീക്ഷ ഒന്നും വെച്ച് പുലർത്തരുത്.

Verdict : Watchable

DC Rating : 60/100

500. Border (2018)

Director : Ali Abbasi

Genre : Fantasy

Rating : 7.2/10

Country : Sweden

Duration : 105 Minutes

🔸ബോർഡർ എന്ന പേരിൽ ഒരു ചിത്രം വരുന്നുണ്ട് എന്ന് കേട്ട് തുടങ്ങിയിട്ട് കുറച്ച് നാളുകളായി, പ്രദർശിപ്പിച്ച വേദികളിൽ നിന്നും കാഴ്ചക്കാരിൽ നിന്നും എല്ലാം കേട്ടറിഞ്ഞ മികച്ച പ്രതികരണങ്ങൾ കാരണം കാത്തിരിക്കുന്ന പടങ്ങളുടെ കൂട്ടത്തിൽ ഉൾപ്പെടുത്തിയ ചിത്രമായിരുന്നു ഇതും. എന്തിരുന്നാലും പ്രിന്റ് കയ്യിൽ കിട്ടുന്നത് വരെ ചിത്രത്തെ കുറിച്ചുള്ള അറിവ് വളരെ പരിമിതം ആയിരുന്നു എന്നതാണ് സത്യം. ട്രെയ്‌ലർ, പിക്സ്, പ്രോമോ തുടങ്ങി ചിത്രവുമായി ബന്ധപ്പെട്ട യാതൊന്നും കണ്ടിരുന്നില്ല, ടൈറ്റിലിൽ നിന്നും ഒരുവേള രാജ്യാതിർത്തികളിലോ മറ്റോ അരങ്ങേറുന്ന ത്രില്ലർ സ്വഭാവമുള്ള ചിത്രം ആയിരിക്കുമോ എന്ന സംശയം പോലും ഉണ്ടായിരുന്നു, എന്ത് തന്നെ ആയാലും ഒഴിഞ്ഞ മനസ്സോട് കൂടി ചിത്രത്തിലേക്ക് കടന്ന് ചെല്ലുക ആയിരുന്നു എന്ന് പറയാം.

🔸കാഴ്ചക്കാരനുള്ള ആദ്യ ഷോക്ക് ആരംഭ രംഗത്തിൽ തന്നെ ചിത്രം കരുതി വെച്ചിട്ടുണ്ട്, സ്‌ക്രീനിന് പുറം തിരിഞ്ഞ് നിൽക്കുന്ന നായികാ കഥാപാത്രം തന്റെ മുന്നിലുള്ള കമ്പിൽ നിന്നും ഒരു ചെറിയ പാറ്റയെ കയ്യിൽ എടുക്കുന്നതാണ് ആദ്യത്തെ സീൻ. കയ്യിൽ എടുക്കലും, നിരീക്ഷിക്കലും ഒക്കെ കഴിഞ്ഞ ശേഷം അതിനെ തിരികെ വിട്ട ശേഷം കാമറയ്ക്ക് അഭിമുഖമായി അവർ തിരിയുമ്പോഴാണ് ഒരു തിരിച്ചറിവ് നമുക്കുണ്ടാവുന്നത്, വേറൊന്നുമല്ല എന്തോ എവിടെയോ ഒരു പാകപ്പിഴ ഉണ്ട് എന്ന തിരിച്ചറിവ്. കാരണം ഒരു സാധാരണ മനുഷ്യസ്ത്രീ അല്ല നമ്മുടെ നായിക, കാഴ്ചയിലും പ്രവർത്തികളിലും രീതികളിലും എല്ലാം വിവരണത്തിലൂടെ നല്കാൻ കഴിയാത്ത എന്തോ ഒരു പ്രത്യേകത അവർക്കുണ്ട്.

🔸ഈ വ്യത്യസ്തതയ്ക്കും മറ്റുമുള്ള കാരണങ്ങൾ തുടക്ക ഭാഗത്ത് ചിത്രം നൽകുന്നില്ല എങ്കിലും അത് ഒരു സൂചന പോലെ കാഴ്ചക്കാരനിൽ കിടക്കും. നമ്മുടെ നായിക ആള് ചില്ലറക്കാരിയല്ല, കസ്റ്റംസ് വിഭാഗത്തിൽ ഉദ്യോഗസ്ഥയാണ്. തന്റെ കുറച്ച് നാളുകളായുള്ള അധ്വാനത്തിന്റെ ഫലമായി അത്യാവശ്യം പേരും പെരുമയും അവർ സ്വന്തമാക്കിയിട്ടുണ്ട്. ഇതിന് ഒരു പരിധി വരെ സഹായകരമായിട്ടുള്ളത് വൈരൂപ്യം എന്ന ശിക്ഷ അവൾക്ക് മേൽ അടിച്ചേൽപ്പിച്ച അതേ പ്രത്യേകതകൾ തന്നെയാണ്, ഈ പ്രത്യേകതകൾ ഉപയോഗിച്ചാണ് പ്രമാദമായ പല കേസ് അന്വേഷണങ്ങളും ടീന തെളിയിച്ചിരുന്നത്.

🔸ഇങ്ങനെ കടന്ന് പൊയ്ക്കൊണ്ടിരുന്ന ഔദ്യോഗിക ജോലിദിവസങ്ങളിൽ ഒന്നിലാണ് ടീന സ്വപ്നം പോലും കാണാത്തൊരു സംഭവം അരങ്ങേറുന്നതും അതിൽ അവൾ കൂടി ഉൾപ്പെടുന്നതും. ഈ സംഭവം എന്നത് മറ്റൊന്നുമല്ല, താനുമായി സാമ്യമുള്ള രീതികളും വൈരൂപ്യവും, കഴിവും എല്ലാമുള്ള മറ്റൊരു വ്യക്തിയെ അവൾ കണ്ട് മുട്ടുകയാണ്, അസംഭവ്യം എന്ന് നൂറാവർത്തി മനസിനെ പറഞ്ഞ് പഠിപ്പിച്ച ടീനയ്ക്ക് മേൽ ഈ സംഭവം സൃഷ്ട്ടിക്കുന്ന ആഘാതം വളരെ വലുതായിരുന്നു. അപ്പോഴും ഒരുപാട് ചോദ്യങ്ങൾ അവളിൽ ബാക്കി കിടപ്പുണ്ടായിരുന്നു, അതിൽ ഏറ്റവും പ്രധാനം ആരാണ് അല്ലെങ്കിൽ എന്താണ് താൻ എന്നതായിരുന്നു, ഈ ചോദ്യങ്ങൾക്കുള്ള ഉത്തരം ആണ് ഒന്നേമുക്കാൽ മണിക്കൂറിനടുത്ത് ദൈർഖ്യമുള്ള ബോർഡർ എന്ന ചിത്രം.

🔸വെയ്ർഡ് എന്നൊക്കെ വിശേഷിപ്പിക്കാവുന്ന, ഒരല്പം ഫാന്റസിയും ഹൊറർ എലെമെന്റ്സും എല്ലാം ചേർന്ന ചിത്രമാണ് ബോർഡർ, വ്യക്തിപരമായി നല്ലൊരു സിനിമാ അനുഭവം തന്നെ. ചിത്രം കണ്ട് കഴിഞ്ഞ ഉടനെ ആദ്യം ചെയ്തത് ഗൂഗിളിൽ ടീന എന്ന കഥാപാത്രത്തെ അവതരിപ്പിച്ച ഇവാ മെലൻഡർ എന്ന നടിയെ പറ്റി അന്വേഷിക്കുക ആയിരുന്നു, യഥാർത്ഥത്തിൽ ചിത്രത്തിൽ കണ്ട രൂപം മെയ്ക്ക് ആപ്പിന്റെ പരിണിത ഫലം ആണെന്നും, അത്യാവശ്യം സൗന്ദര്യം ഒക്കെയുള്ള സ്ത്രീ ആണ് ഇവാ എന്നും അറിഞ്ഞപ്പോൾ ഒരു സമാധാനം അനുഭവപ്പെട്ടു, ഇത് പറഞ്ഞത് വേറൊന്നും കൊണ്ടല്ല അത്യാവശ്യം ഡിസ്റ്റർബിങ് ആവുന്നുണ്ട് ചിത്രം പലയിടത്തും. രണ്ട് മണിക്കൂറിൽ താഴെ നിന്ന് കൊണ്ട് നല്ലൊരു കഥയെ നല്ല രീതിയിൽ തന്നെ അവതരിപ്പിക്കുന്നുണ്ട് ചിത്രം, താല്പര്യം തോന്നുന്നവർക്ക് ഒന്ന് ശ്രമിച്ച് നോക്കാം, എല്ലാവര്ക്കും നിർദ്ദേശിക്കുന്നില്ല.

Verdict : Good

DC Rating : 76/100

499. Money Heist (2017)

Creator : Alex Pina

Genre : Heist

Rating : 8.6/10

Seasons : 02

Episodes : 22

Country : Spain

Duration : 42 - 58 Minutes Per Episode

🔸ഒരു യഥാർത്ഥ ജീനിയസ് എന്നത് എല്ലാ കാര്യങ്ങളും മുൻകൂട്ടി കാണുന്നവനോ അല്ലെങ്കിൽ എല്ലാം എല്ലാ രീതിയിലും ആലോചിച്ച് തീരുമാനിക്കുന്നവനോ അല്ല മറിച്ച് തനിക്കെതിരായി വന്ന് ഭവിക്കുന്ന കാര്യങ്ങൾ പോലും തന്റെ പദ്ധതിയുടെ ഭാഗമായി മാറ്റുന്നവനാണ് എന്ന് പേര് ഓർമയില്ലാത്ത ഒരു ചിത്രത്തിൽ കേട്ടത് ഓർമയുണ്ട്. ഈ ഒരു കാര്യം മനസ്സിൽ വെച്ച് കൊണ്ട് തന്നെ പറയാം ഞാൻ ഇന്നേവരെ കണ്ട ടിവി സീരീസുകളിലെ ഏറ്റവും ജീനിയസ് ആയ മൈൻഡ്, അത് മണി ഹെയ്സ്റ്റ് എന്ന ടിവി സീരീസിലെ കേന്ദ്ര കഥാപാത്രമായ പ്രൊഫെസ്സർ ആണ്. താൻ ഇറങ്ങി പുറപ്പെട്ട പദ്ധതിക്ക് വേണ്ടി അയാൾ തയാറാക്കുന്ന രൂപ രേഖയും അത് വിജയിപ്പിക്കാനായി അയാൾ കടന്ന് പോവുന്ന വഴികളും പ്രതിസന്ധി ഘട്ടങ്ങളിൽ പോലും പതറാതെ പിടിച്ച് നിൽക്കുന്ന ധൈര്യവും എല്ലാം കാണുമ്പോൾ അറിയാതെ എങ്കിലും ചോദിച്ച് പോവും, താൻ എന്തൊരു മനുഷ്യനാടോ പഹയാ എന്ന്.

🔸മോഷണ ചരിത്രത്തിലെ തന്നെ ഏറ്റവും വലിയ കവർച്ചകളിൽ ഒന്ന് നടത്താനായി ഇറങ്ങി തിരിച്ചിരിക്കുകയാണ് പ്രൊഫെസ്സർ എന്ന കേന്ദ്ര കഥാപാത്രം, ഇതിനായി അയാൾ കണ്ടുവെച്ചിരിക്കുന്നത് സ്പെയിൻ തലസ്ഥാനമായ മാഡ്രിഡിലെ റോയൽ മിന്റ് എന്ന കറൻസി പ്രിന്റിങ് സെന്റർ തന്നെയാണ്. എന്തായാലും ഒരു മോഷണം നടത്തുകയല്ലേ, എങ്കിൽ പിന്നെ ഖജനാവ് തന്നെ കൊള്ളയടിച്ചാൽ എന്താ എന്ന് സ്വാഭാവികമായും ടിയാൻ ചിന്തിച്ച് കാണണം, അത് എന്ത് തന്നെ ആയാലും ഇത്രയും പ്രയാസം ഏറിയ ഒരു ദൗത്യം വിജയത്തിൽ എത്തിക്കണം എങ്കിൽ ആ തലത്തിലേക്ക് ഉയരുന്ന ഒന്നിനെയും ഭയക്കാത്ത, തോൽവി സമ്മതിക്കാത്ത ഒരു സംഘത്തെ കൂടി ആവശ്യമുണ്ട്. ഇത് നന്നായി അറിയാവുന്നത് കൊണ്ടാവണം എട്ട് പേരെ പ്രൊഫെസ്സർ റിക്രൂട് ചെയ്തത്, എല്ലാം കൊണ്ടും തികഞ്ഞ എട്ട് പേർ.

🔸ഈ എട്ട് പേരും തങ്ങളുടെ മുൻകാല കലാ പരിപാടികൾ കാരണം മോഷണ മേഖലയിൽ അത്യാവശ്യം പേര് എടുത്തവർ തന്നെയാണ്, എന്തിരുന്നാലും തങ്ങൾ ഇറങ്ങി തിരിച്ചിരിക്കുന്ന ദൗത്യത്തിന്റെ കാഠിന്യവും അത് വിജയത്തിൽ എത്തിക്കാനുള്ള പ്രയാസങ്ങളും, ഒരു ചെറിയ പിഴവ് പോലും ശിഷ്ട കാല ജീവിതം അഴിക്കുള്ളിലേക്കുള്ള വഴിയാകും എന്നതും കണക്കിലെടുത്ത് ഇവർക്കെല്ലാം തന്നെ ഓരോ പുതിയ ഐഡൻറ്റിറ്റികൾ പ്രൊഫെസ്സർ നൽകുകയാണ്, സ്ഥലങ്ങളുടെ പേരുകൾ വെച്ച് കൊണ്ടുള്ള ഐഡന്റിറ്റികൾ. ഇങ്ങനെ ഒക്കെയാണ് പ്രൊഫെസറും പദ്ധതിയും, ബെർലിനും, ടോക്യോയും, നെയ്‌റോബിയും, മോസ്‌കോയും, റിയോയും, ഡെൻവരും, ഹെൽസിങ്കിയും, ഒസ്ലോയും എല്ലാം ഒത്ത് ചേരുന്നതും ഇറങ്ങി തിരിക്കുന്നതും.

🔸വ്യത്യസ്ത ബാക്ക്ഗ്രൗണ്ടുകളിൽ നിന്ന് വന്നതിനാലും വ്യത്യസ്ത രീതികളിൽ പെട്ടവർ ആയതിനാലും ഇവർ തമ്മിൽ അഭിപ്രായ വ്യത്യാസങ്ങൾ തീർച്ചയായും ഉടലെടുക്കുന്നുണ്ട്, പല സന്ദര്ഭങ്ങളിലും ഇവ ഒരല്പം അതിര് കവിഞ്ഞ് പോകുന്നുമുണ്ട്. എന്നാലും മുന്നിലുള്ള വലിയ ലക്ഷ്യവും പ്രൊഫെസ്സറും ഇവരെ ഒന്നിച്ച് നിർത്തി മുന്നോട്ട് കൊണ്ടുപോവുകയാണ്. വർഷങ്ങളായുള്ള ആലോചനയുടെയും ഗവേഷണത്തിന്റെയും ആകെത്തുകയായി ഉരുത്തിരിഞ്ഞ് വന്നതാണ് പ്രൊഫെസ്സരുടെ ഈ പദ്ധതി, എന്നാൽ എത്ര കണ്ട് മികച്ച രീതിയിൽ ആവിഷ്കരിച്ച പദ്ധതി ആണെങ്കിൽ പോലും റിയാലിറ്റിയിൽ സംഭവിച്ചേക്കാവുന്ന ചെറിയ ചില കാര്യങ്ങൾക്ക് പോലും ഈ പദ്ധതിക്കും ഉൾപ്പെട്ടിരിക്കുന്നവരുടെ ജീവിതത്തിന് മേലും വലിയ പ്രത്യാഘാതങ്ങൾ ഉണ്ടാക്കാൻ കഴിയും എന്ന് തെളിയിച്ച് കൊണ്ട് എല്ലാം കീഴ്മേൽ മറിയുകയാണ്. കവർച്ചക്കാരും, ബന്ദികളും അവർക്ക് ചുറ്റും പോലീസ്, ഇന്റലിജൻസ് മേധാവികളും നിലയുറപ്പിക്കുമ്പോൾ മണി ഹെയ്സ്റ്റ് എന്ന ടീവി സീരീസ് ചൂട് പിടിക്കുകയാണ്.

🔸രണ്ട് സീസണുകളിൽ ആയി ഉദ്ദേശം ഇരുപത്തി രണ്ട് എപ്പിസോഡുകൾ നീണ്ട് നിൽക്കുന്ന ഒരു കവർച്ചാ ശ്രമം ആണ് മണി ഹെയ്സറ്റിന്റേത്, നല്ല രീതിയിൽ തന്നെ കാഴ്ചക്കാരനെ പിടിച്ചിരുത്തി അത്യാവശ്യം സസ്‌പെൻസും ഉദ്വേഗവും എല്ലാം നിലനിർത്തി ഉഗ്രൻ പെയ്‌സിൽ തന്നെ കഥ മുന്നോട്ട് പോവുന്നുമുണ്ട്. വ്യക്തിത്വവും ഉൾക്കൊള്ളാൻ കഴിയുന്ന മോട്ടീവ്‌കളും ഉള്ള കഥാപാത്രങ്ങൾ ആണ് എല്ലാവരും എങ്കിലും ബെർലിൻ വേറിട്ട് നിന്നു, ഒരു വില്ലൻ പരിവേഷം നിലനിർത്തി ആന്റി ഹീറോ രീതിയിലുള്ള കഥാപാത്രം ഇന്നേവരെ കണ്ട സീരീസുകളിലെ മികച്ചവയിൽ ഒന്നായി ഓർമയിൽ നിൽക്കും എന്നതിൽ സംശയമില്ല. ഇതിനോടൊപ്പം തന്നെ ടോക്കിയോ, അർതുറോ എന്നീ കഥാപാത്രങ്ങളെ കൂടി എടുത്ത് പറയാൻ ആഗ്രഹിക്കുന്നു, സീരീസ് കഴിയുമ്പോൾ വെറുപ്പ് തോന്നിയ കഥാപാത്രങ്ങളായി ഇവർ അവശേഷിക്കും, അത് ഒരുപക്ഷെ വ്യക്തിത്വ മികവായും പരിഗണിക്കാം. സീരീസിന് ഒരു മൂന്നാം ഭാഗം വരുന്നുണ്ട് എന്ന് അടുത്തിടെ കേൾക്കുക ഉണ്ടായി, അതിൽ തീർച്ചയായും സന്തോഷം മാത്രം. കാണാത്തവർ ഉണ്ടെങ്കിൽ കാണാൻ ശ്രമിക്കുക, നല്ല ഒരനുഭവം ഉറപ്പ് നൽകുന്നു.

Verdict : Must Watch

DC Rating : 90/100

498. The Plague Dogs (1982)

Director : Martin Rosen

Genre : Animation

Rating : 7.9/10

Country : UK

Duration : 103 Minutes

🔸ഈ മൃഗങ്ങൾ കേന്ദ്ര കഥാപാത്രങ്ങളായി വരുന്ന ചിത്രങ്ങൾ മിക്കപ്പോഴും ഒരു ഇമോഷണൽ അനുഭവം ആയി മാറാറുണ്ട്, അതാണ് പതിവ്. അമ്പതുകളിൽ പുറത്തിറങ്ങിയ ഓൾഡ് യെല്ലെർ ആയാലും യഥാർത്ഥ സംഭവങ്ങൾ ദൃശ്യവൽക്കരിച്ച ഹാച്ചിക്കോ ആയാലും മിക്ക ചിത്രങ്ങളും ഈ ഒരു പാറ്റേൺ പിന്തുടർന്ന് കാണാറുണ്ട്. ഏറെക്കുറെ ഇങ്ങനെയൊക്കെ തന്നെയാണ് പ്ളേഗ് ഡോഗ്സ് എന്ന ചിത്രവും പോവുന്നത്, എന്നാൽ ഒരു ചെറിയ വ്യത്യാസമുണ്ട്. മുകളിൽ സൂചിപ്പിച്ച ഇമോഷണൽ പഞ്ചിന് രണ്ടാം പാതി വരെ ചിത്രം കാത്ത് നിൽക്കുന്നില്ല, ആദ്യ രംഗം മുതൽ തന്നെ ഈ ചിത്രം കാഴ്ചക്കാരനെ വേദനിപ്പിക്കും, നൊമ്പരപ്പെടുത്തും, എല്ലാം കൊണ്ടും മറക്കാനാവാത്ത ഒരു ഓർമ ആയി കുറച്ച് നാൾ ഈ ചിത്രം നിങ്ങളെ വേട്ടയാടും, അതിലൊന്നും യാതൊരു സംശയവും വേണ്ട.

🔸ഈ ശാസ്ത്രീയ പരീക്ഷണങ്ങൾക്കും മറ്റും ഒക്കെ മൃഗങ്ങളെ ബലിയാടാക്കുന്ന പരിപാടിയോട് പൊതുവെ വെറുപ്പാണ്, പ്രത്യേകിച്ചും മനുഷ്യൻ ചെയ്യാൻ മടിക്കുന്നതും, ഭയപ്പെടുന്നതും ആയ പരിപാടികളിലേക്ക് മൃഗങ്ങളെ വലിച്ചിഴയ്ക്കുന്നതിനോളം വലിയ ചെറ്റത്തരം വേറെ ഉണ്ടാവില്ല. ഈ ഒരു മനോഭാവം ഉള്ളത് കൊണ്ട് തന്നെയാവാം ഇത്രമേൽ ഡിസ്റ്റർബിങ് ആയി തോന്നിയൊരു ചിത്രം അടുത്ത കാലത്ത് ഒന്നും കണ്ടിട്ടില്ല. ഡാർക്ക് എന്നൊക്കെയുള്ള വിശേഷണം വല്ലാതെ കുറഞ്ഞ് പോവും ഈ ചിത്രത്തെ സംബന്ധിച്ചിടത്തോളം, ഇത്രയും പറഞ്ഞത് കാണാൻ ആഗ്രഹിക്കുന്നുണ്ടെങ്കിൽ അത് ഏത് തരം ചിത്രം ആണെന്ന് ഒരേകദേശ ധാരണ നൽകാൻ വേണ്ടിയാണ്.

🔸വടക്കേ ഇംഗ്ലണ്ടിൽ സ്ഥിതി ചെയ്യുന്ന ലേക്ക് ഡിസ്ട്രിക്ട് എന്ന അനിമൽ റിസേർച് സെന്ററിലെ എണ്ണമില്ലാത്ത നായകളിൽ രണ്ടുപേരാണ് റൗഫും സ്നിറ്ററും, അഥവാ ചിത്രത്തിലെ കേന്ദ്ര കഥാപാത്രങ്ങൾ. ഓർമ വെച്ച നാൾ മുതൽ തന്നെ പരീക്ഷണങ്ങൾ എന്ന ഓമന പേരിട്ട് വിളിക്കുന്ന കീറി മുറിക്കലുകൾക്കും പീഡനങ്ങൾക്കും പാത്രം ആവേണ്ടി വന്നവരാണ് ഇരുവരും. സ്നിറ്റെർ തന്റെ ബ്രയിനിന്റെ മേൽ തുടർച്ചയായി പരീക്ഷണങ്ങൾക്ക് വിധേയനാവേണ്ടി വന്നവനാണ് എങ്കിൽ റൗഫിന്റെ കാര്യം കുറച്ച് കൂടി മൃഗീയമാണ്, വെള്ളത്തിൽ മുക്കുക വഴി അവന്റെ ശരീരത്തിൽ, ശ്വാസമിടിപ്പിൽ വരെ വരുന്ന മാറ്റങ്ങൾ പഠിച്ച് കൊണ്ടിരിക്കുക ആണ് ഒരുകൂട്ടം ഡോക്ടർമാർ. ഈ കൈക്രിയകൾ എല്ലാം ദിനചര്യ എന്ന മട്ടിൽ എല്ലാ ദിവസവും തുടരും.

🔸സ്‌ക്രീനിൽ ആദ്യം തെളിയുന്ന രംഗം തന്നെ വെള്ളത്തിൽ പിടിച്ച് കയറാൻ പറ്റാതെ നരക യാതന അനുഭവിച്ച് ശ്വാസത്തിന് വേണ്ടി പിടഞ്ഞ് തോൽവി സമ്മതിക്കുന്ന റൗഫിനെ കാണിച്ച് കൊണ്ടാണ്, അവിടെ നിന്നും ചിത്രം കൂടുതൽ ഡാർക്കായി മാറുന്നതെ ഉള്ളൂ. ഒരു അനിമേഷൻ ചിത്രം ആണെങ്കിൽ കൂടിയും കുട്ടികൾക്ക് കാണാൻ ശുപാർശ ചെയ്യാൻ പാടില്ലാത്ത ചിത്രങ്ങളിൽ ഒന്നാണ് പ്ളേഗ് ഡോഗ്സ്, അനിമൽ വയലൻസ് അത്യാവശ്യം നല്ല തോതിൽ തന്നെ ഉണ്ട്. മുകളിൽ സൂചിപ്പിച്ച ദിനചര്യകൾ തീർന്ന ദിവസങ്ങളിൽ ഒന്നിൽ രണ്ട് നായകൾക്കും രക്ഷപ്പെടാനുള്ള അവസരം ലഭിക്കുന്നിടത്താണ് ചിത്രത്തിന്റെ ട്രാക്ക് മാറുന്നത്, താമസിയാതെ തന്നെ ഈ അവസരം മുതലെടുത്ത് രണ്ട് പേരും പുറം ലോകത്ത് എത്തുന്നു.

🔸തുടക്കത്തിൽ ഈ സ്വാതന്ത്ര്യത്തോട് വല്ലാത്തൊരു ഇഷ്ടം തോന്നിയെങ്കിലും റിയാലിറ്റി കുറച്ച് കൂടി ഭീകരമാണ് എന്ന തിരിച്ചറിവ് താമസിയാതെ രണ്ട് പേരിലും ഉടലെടുക്കുകയാണ്. പുറം ലോകത്ത് ജീവിച്ച് പോവണം എങ്കിൽ സ്വയം പ്രതിരോധിക്കാൻ പഠിക്കണം, അത്യാവശ്യം സാമർഥ്യം വേണം, എല്ലാത്തിനും ഉപരി ഭക്ഷണം തേടി പിടിച്ച് സമ്പാദിക്കണം. ഇവയൊന്നും ശീലിച്ചിട്ടില്ലാത്ത ഈ രണ്ട് കഥാപാത്രങ്ങളുടെയും അവസ്ഥ നാളുകൾ കഴിയവേ ദയനീയം ആയി മാറുകയാണ്. ഈ രണ്ട് കഥാപാത്രങ്ങളിലൂടെ വളരെ പ്രസക്തവും ശക്തവുമായ ഒരു കഥയാണ് ഈ ചിത്രം അവതരിപ്പിക്കുന്നത്, ഒടുവിൽ ചിത്രത്തിന്റെ അവസാനം അത്ര പെട്ടെന്നൊന്നും നമ്മളെ വിട്ട് പോവാത്ത മികച്ചൊരു ക്ലൈമാക്സും കാത്തിരിപ്പുണ്ട്. ഡാർക്ക്, ഇമോഷണൽ ചിത്രങ്ങളോട് താല്പര്യം ഉള്ളവർ മാത്രം കാണുക.

Verdict : Very Good

DC Rating : 85/100

497. Lego Movie 2 The Second Part (2019)

Director : Mike Mitchell

Genre : Animation

Rating : 7.3/10

Country : USA

Duration : 106 Minutes

🔸കുട്ടികൾക്ക് കളിക്കാനുള്ള ബിൽഡിങ് ബ്ലോക്ക് ടോയ്‌സ് അഥവാ ലെഗോ മെറ്റീരിയലുകൾ കേന്ദ്ര കഥാപാത്രമായി ഒരു സിനിമ പുറത്തിറങ്ങുന്നുണ്ട് എന്ന വാർത്ത ആദ്യം കേട്ടപ്പോൾ സംശയങ്ങൾ അനവധി ആയിരുന്നു. അനിമേഷൻ വിഭാഗത്തിൽ വലിയ സംശയങ്ങൾ ഇല്ലായിരുന്നെങ്കിലും ഇത് പോലൊരു വിഷയം എത്ര കണ്ട് മികച്ചതായിരിക്കും എന്നതും എല്ലാ തരം ആളുകൾക്കും ആസ്വാദ്യകരം ആയിരിക്കുമോ എന്ന സംശയവും വളരെ വലുതായിരുന്നു. ലെഗോ മൂവി ആദ്യ ഭാഗവും ലെഗോ ബാറ്റ്മാനും എല്ലാം ഈ സംശയം ആസ്ഥാനത്ത് ആയിരുന്നെന്ന് പിൽക്കാലത്ത് തെളിയിക്കുക ഉണ്ടായി. ആദ്യ ഭാഗ ലെഗോ മൂവി നൽകിയ പുതുമ ഒന്ന് മാത്രം മതിയായിരുന്നു രണ്ടാം ഭാഗത്തിന് വേണ്ടി കാത്തിരിക്കാൻ, അങ്ങനെ ഏറെക്കുറെ നല്ല പ്രതീക്ഷയും പേറിയാണ് രണ്ടാം ഭാഗം കാണാൻ ഇറങ്ങിയത്.

🔸ആദ്യ ചിത്രത്തിലെ സംഭവങ്ങൾക്ക് ശേഷം കുറച്ച് വർഷങ്ങൾ കഴിഞ്ഞിടത്ത് നിന്നാണ് രണ്ടാം ഭാഗം ആരംഭിക്കുന്നത്, നമ്മുടെ കേന്ദ്ര കഥാപാത്രങ്ങൾ എല്ലാവരും ബ്രിക്സ്ബെർഗിൽ തന്നെ ഉണ്ടെങ്കിലും സ്ഥിതിഗതികൾ ഏറെ മാറി പോയിരിക്കുന്നു. ദുപ്ലോ എന്ന രാജ്യത്തെ പോരാളികൾ ബ്രിക്സ്ബെർഗിനെ ആക്രമിച്ച് കീഴടക്കുകയും ജനങ്ങളെ കഠിനമായി ഉപദ്രവിക്കുകയും ചെയ്യുകയാണ്, ഈ ഒരു സന്ദർഭത്തിൽ തങ്ങളുടെ വേണ്ടപ്പെട്ടവരെ രക്ഷിക്കുക എന്നതും പഴയ ശാന്തിയും സമാധാനവും തിരികെ പിടിക്കുക എന്നതുമായ കഠിനമായ ദൗത്യം ഒരു തവണ കൂടി എമ്മെട്ടിന്റെയും, വൈൽഡ് സ്റ്റൈലിന്റെയും, ബാറ്റ്മാന്റെയും ചുമലിൽ വന്ന് പതിക്കുകയാണ്.

🔸സ്പോയ്ലർ ആയേക്കാവുന്ന കാര്യങ്ങൾ ഒഴിവാക്കി ചിത്രത്തിന്റെ നല്ലതും മോശവുമായ കാര്യങ്ങൾ പരിഗണിക്കുക ആണെങ്കിൽ ആദ്യമേ തന്നെ പറയാം മുൻ ഭാഗത്തിന്റെ പുതുമ ഈ ചിത്രത്തിന് നൽകാൻ കഴിഞ്ഞേക്കില്ല, ചിലയിടങ്ങളിൽ ഏൽക്കാതെ പോയ കൊമെടിയും മറ്റും ഈ പോരായ്മ ഒന്ന്കൂടി വലുതാക്കി കാട്ടുന്നതെ ഉള്ളുതാനും. ആദ്യ ഭാഗത്തിലെ ഏറ്റവും ഇഷ്ട്ടപ്പെട്ട കഥാപാത്രം ആയിരുന്നു ബാറ്റ്മാൻ, എന്നാൽ രണ്ടാം ഭാഗത്തിൽ പുള്ളിയുടെ സാന്നിധ്യം കുറഞ്ഞ് പോയോ എന്ന സംശയവും നില നിൽക്കുന്നു. ഇതിനോടൊപ്പം ആദ്യ ചിത്രത്തിലെ മികച്ച ചില കഥാപാത്രങ്ങളെ വെറുതെ കാഴ്ചക്കാരാക്കി മാറ്റി എന്നതും ചിത്രത്തിന്റെ പോരായ്മകളിൽ ഒന്നാണ്. ഗുഡ് കോപ്പ് ബാഡ് കോപ്പ്, മെറ്റൽ ബേർഡ് പോലെയുള്ള കഥാപാത്രങ്ങൾ ശടപടെ വന്ന് പോവുന്നുണ്ടെങ്കിലും പ്രത്യേകിച്ച് ഒന്നും ചെയ്യാനില്ലാതെ പോയത് ഒരല്പം കല്ല് കടിയായി തോന്നി.

🔸ഇനി നല്ല വശങ്ങളിലേക്ക് കടക്കുക ആണെങ്കിൽ ക്രിസ് പ്രാട്ടിനെ അഭിനന്ദിക്കേണ്ടി ഇരിക്കുന്നു, ലെഗോ യുണിവേഴ്സിന് പുറമെയുള്ള തന്റെ കഥാപാത്രങ്ങളെ വരെ സൂചിപ്പിച്ച് ആദ്യാവസാനം ചിരിപ്പിക്കുന്ന, പിടിച്ചിരുത്തുന്ന രീതിയിലുള്ള പ്രകടനമാണ് ക്രിസിന്റേത്. അദ്ദേഹത്തോടൊപ്പം തന്നെ എലിസബേത് ബാങ്ക്സ്, വിൽ ഫെറേൽ തുടങ്ങിയവരും മികച്ച് നിന്നു. ഒരു അനിമേഷൻ ലെഗോ ബേസ്ഡ് ചിത്രത്തിൽ നിന്നും പ്രതീക്ഷിക്കുന്ന എന്റർടൈൻമെന്റ് എന്താണോ അതിനോട് നൂറ് ശതമാനം നീതി പുലർത്തുന്നതാണ് ഈ ചിത്രം, ചുരുക്കി പറയുക ആണെങ്കിൽ എന്റർടൈൻമെൻറ് നൂറ്റിയൊന്ന് ശതമാനം ഗ്യാരന്റീഡ്. മികച്ച സൈഡ് കഥാപാത്രങ്ങളും, നല്ല കഥാ സന്ദര്ഭങ്ങളും, ക്യാരക്ടർ ഡൈനാമിക്കും, പാട്ടുകളും എല്ലാം കൂടി ചേരുമ്പോൾ നല്ലൊരു അനുഭവമായി മാറുന്നുണ്ട് ലെഗോ മൂവി 2 ദി സെക്കൻഡ് പാർട്ട്.

🔸ഇനി കാണണമോ വേണ്ടയോ എന്നതാണ് ചോദ്യമെങ്കിൽ, ആദ്യ ഭാഗം ഇഷ്ട്ടപ്പെട്ട വ്യക്തി ആണ് നിങ്ങൾ എങ്കിൽ തീർച്ചയായും ഈ ചിത്രം ആസ്വദിക്കാൻ നിങ്ങൾക്ക് കഴിഞ്ഞേക്കും. മുൻ ഭാഗം നൽകിയ ഫ്രഷ് ഫീൽ ഉറപ്പ് നൽകുന്നില്ലെങ്കിലും ആസ്വാദ്യകരം എന്ന് തോന്നിപ്പിച്ച വസ്തുതകൾ എല്ലാം നല്ല രീതിയിൽ തന്നെ ഇവിടെയും ഉണ്ട്. ഈ കാര്യം കുറച്ച് കൂടി ലളിതമായി പറയാൻ ഒരു ചെറിയ താരമത്യം ആവാം, ഗാർഡിയൻസ് ഓഫ് ദി ഗാലക്സി വോള്യം 2 ആദ്യ ഭാഗത്തിന് എന്താണോ ഏറെക്കുറെ അത് തന്നെയാണ് ലെഗോ മൂവി 2 മുൻ ഭാഗത്തിനും. കൂടുതൽ പറഞ്ഞ് മുഷിപ്പിക്കുന്നില്ല, എന്റർടൈൻമെന്റ് മാത്രമാണ് ലക്‌ഷ്യം എങ്കിൽ തീർച്ചയായും കാണാം ഈ ചിത്രം, രസിപ്പിക്കാൻ ഉള്ള വകയെല്ലാം ഉണ്ട്.

Verdict : Good

DC Rating : 78/100

496. Ayla The Daughter Of War (2018)

Director : Can Ulkay

Genre : War

Rating : 8.8/10

Country : Turkey

Duration : 120 Minutes

🔸യുദ്ധവും കുട്ടികളും ഒരു നാണയത്തിന്റെ രണ്ട് വശങ്ങൾ പോലെ അത്രമേൽ അന്തരം സൂക്ഷിക്കുന്ന രണ്ട് കാര്യങ്ങൾ ആണെന്ന് ഇവാൻസ് ചൈൽഡ്ഹുഡ് എന്ന ചിത്രം തെളിയിച്ചിട്ട് വർഷങ്ങൾ ഒരുപാട് കഴിഞ്ഞ് പോയിരിക്കുന്നു. ഈ ചിത്രത്തിൽ നിന്നും അയ്‌ലാ ദി ഡോട്ടർ ഓഫ് വാർ എന്ന ചിത്രത്തിൽ എത്തുമ്പോൾ വിഷയത്തിലോ മുകളിൽ സൂചിപ്പിച്ച വസ്തുതയിലോ വലിയ മാറ്റം ഒന്നും വന്നിട്ടില്ല, കുറച്ച് കൂടി വൈകാരികത കൂടി എന്ന് മാത്രം. ഈ ചിത്രത്തെ കുറിച്ച് എന്തൊക്കെ ഏതൊക്കെ രീതിയിൽ പറഞ്ഞാലും അതൊന്നും ഒരിക്കലും ആ രണ്ട് മണിക്കൂർ സമയത്തെ നീതികരിക്കുകയില്ല, കാരണം അവയൊന്നും തന്നെ വാക്കുകളാൽ വിവരിക്കാനോ പറഞ്ഞറിയിക്കാനോ കഴിയാത്ത വിധം മനോഹരമാണ്, ആയതിനാൽ തന്നെ ഈ പോസ്റ്റ് കാണുന്ന ഏതൊരു വ്യക്തിക്കും രണ്ടാമതൊരു ചിന്തയില്ലാതെ ഈ ചിത്രം ശുപാർശ ചെയ്യും, ഒടുക്കത്തെ മസ്റ്റ് വാച്ച് എന്നൊക്കെ വിശേഷിപ്പിക്കാവുന്നതാണ് അയലയുടെയും സുലെയ്മന്റെയും കഥ.

🔸രണ്ട് പ്രധാന കഥാപാത്രങ്ങളാണ് ഈ ചിത്രത്തിലുള്ളത്, തുർക്കിഷ് വംശജനായ സുലൈമാനും, കൊറിയൻ വംശജ ആയ അയ്‌ലാ എന്ന കുട്ടിയും. അയ്‌ലാ എന്നത് യഥാർത്ഥത്തിൽ അവളുടെ പേരൊന്നുമല്ല, അതെന്താണെന്ന് സുലൈമാന് വലിയ പിടിയുമില്ല, പൂർണശോഭയോട് കൂടി തിളങ്ങി നിൽക്കുന്ന ചന്ദ്രനോട് സാദൃശ്യം തോന്നിയതിനാൽ അവളെ ആ പേര് അയാൾ വിളിച്ചെന്ന് മാത്രം. സത്യത്തിൽ ഈ രണ്ട് കഥാപാത്രങ്ങൾ തമ്മിൽ വലിയ രീതിയിലുള്ള ഇടപഴകലുകൾ ഒന്നും നടക്കുന്നില്ല. രണ്ട് ഭൂ പ്രദേശത്ത് നിന്നും വരുന്ന, വ്യത്യസ്ത ഭാഷകൾ ഉപയോഗിക്കുന്ന, വ്യത്യസ്ത സംസ്കാരം പിന്തുടരുന്ന ഇരുവർക്കും ഇടയിൽ കടമ്പകൾ അനവധി ആയിരുന്നു. എന്തിരുന്നാലും ഇതിനെയെല്ലാം മറികടന്ന് കൊണ്ട് മനോഹരമായ ഒരു ബന്ധം അവിടെ ഉടലെടുക്കുകയാണ്.

🔸ടൈറ്റിൽ കഥാപാത്രത്തെ നാം ആദ്യമായി കാണുന്നത് രണ്ടാം ലോക മഹായുദ്ധത്തിന് അഞ്ച് വർഷങ്ങൾക്ക് ശേഷമാണ്, ഉത്തര ദക്ഷിണ കൊറിയകൾ തമ്മിലുള്ള യുദ്ധം കൊടുമ്പിരി കൊണ്ടിരിക്കുന്ന സമയമാണ്. ഈ യുദ്ധം കാരണം ദുരിതങ്ങൾ ഏറ്റ് വാങ്ങേണ്ടി വന്ന സാധാരണക്കാരിൽ ഒരാളാണ് അയ്‌ലാ എന്ന കഥാപാത്രവും. അച്ഛനോടും അമ്മയോടുമൊപ്പം സന്തോഷവതി ആയി കാണപ്പെടുന്നിടത്ത് നിന്നും യുദ്ധം അയലയുടെ ജീവിതം ആകെ മാറ്റി മറിക്കുകയാണ്. തുടർന്നങ്ങോട്ട് സുലൈമാനെ കണ്ട് മുട്ടുന്നത് വരെ ഒരുപാട് അനിശ്ചിതത്വങ്ങളിലൂടെ ആണ് അവൾ കടന്ന് പോവുന്നതും.

🔸ഈ സംഭവങ്ങൾ എല്ലാം അരങ്ങേറിക്കൊണ്ടിരിക്കെ ഭൂമിയുടെ മറ്റൊരു ഭാഗത്ത് സുലൈമാൻ തന്റെ ശാന്തതയും സമാധാനവും നിറഞ്ഞ ജീവിതം ജീവിച്ച് കൊണ്ടിരിക്കുക ആണ്. അവൻ സംപ്ത്രിപ്തനാണ്, അത്യാവശ്യം നല്ലൊരു ജീവിത സാഹചര്യം അവനുണ്ട്, അല്ലൽ ഇല്ലാത്ത വരുമാനം ഉണ്ട്, മുന്നോട്ട് പോവാൻ പ്രേരിപ്പിക്കുന്നതായി ഒരു പ്രണയവും മറ്റ് കാര്യ കാരണങ്ങളും ഉണ്ട്. ഇങ്ങനെ കഴിഞ്ഞ് പോന്ന സുലെയ്മാന് രാജ്യ സേവനം കാരണം കൊറിയയിലേക്ക് സൈനികനായി വരേണ്ടി വരുന്നതും, അയ്‌ലയെ കണ്ട് മുട്ടുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ഈ ചിത്രത്തിന്റെ പ്രമേയം.

🔸ഒരു യുദ്ധ കാല ചിത്രം ആണെങ്കിൽ കൂടിയും വൈകാരികതയുടെ അളവിൽ കുറവൊന്നും ഈ ചിത്രം വരുത്തുന്നില്ല എന്ന് മുകളിൽ സൂചിപ്പിച്ചിരുന്നു, അതിനോട് നീതി പുലർത്തും വിധം ഇമോഷണൽ രംഗങ്ങളുടെയും സംഭവങ്ങളുടെയും ഒരു അതിപ്രസരം തന്നെയാണ് ഈ ചിത്രത്തിന്റെ രണ്ടാം പകുതി, കുറച്ച് കൂടി ലളിതമായി പറയുക ആണെങ്കിൽ കണ്ണ് നിറഞ്ഞിരിക്കും എന്നുറപ്പ്. മികച്ച പ്രകടനങ്ങളും, പിടിച്ചിരുത്തുന്ന രീതിയിലുള്ള കഥയുടെ പോക്കും എല്ലാം കൂടി ചേരുമ്പോൾ ഈ വർഷം ഇതുവരെ കണ്ടവയിൽ ഏറ്റവും മികച്ച ചിത്രങ്ങളിൽ ഒന്നായി മാറുകയാണ് അയ്‌ലാ ദി ഡോട്ടർ ഓഫ് വാർ എന്ന ചിത്രം. ചിത്രത്തിന്റെ അവസാനം ഒരു ചെറിയ തിരിച്ചറിവ് ഉണ്ടാവും കാഴ്ചക്കാരന്, അല്ലെങ്കിൽ വേണ്ട അങ്ങട്ടേക്ക് കടക്കുന്നില്ല, കണ്ട് തന്നെ അനുഭവിക്കുക.

Verdict : Must Watch

DC Rating : 90/100

495. Alita The Battle Angel

Director : Robert Rodriguez

Genre : Action

Rating : 7/10

Country : USA

Duration : 126 Minutes

🔸ഒരു ചിത്രം സാധാരണ പുറത്തിറങ്ങുന്നതിന് മുൻപേ വരുന്ന ക്രിട്ടിക്സ് റിവ്യൂ കൊണ്ട് ഒരുപാട് ഉപകാരങ്ങൾ ഉണ്ട്, പ്രത്യേകിച്ചും ഈ റിവ്യൂ നെഗറ്റിവ് കൂടി ആണെങ്കിൽ. ഇതിൽ ആദ്യമേ തന്നെ പറയേണ്ടത് കാണാൻ പോവുന്ന ചിത്രം മോശം ആണെന്ന ഒരു പ്രതീതി നമ്മൾ പോലും അറിയാതെ മനസ്സിൽ സൃഷ്ടിക്കപ്പെടും, ഈ ഒരു പ്രക്രിയ കാരണം തന്നെ ആഘോഷിക്കപ്പെടാറുള്ള പല ക്രിട്ടിക്സ് പ്രഖ്യാപിത ദുരന്ത പടങ്ങളും ഒരു പരിധി വരെ ആസ്വദിക്കാൻ കഴിഞ്ഞിട്ടുണ്ട്, ഇതിന് ഏറ്റവും നല്ല ഒരു ഉദാഹരണമാണ് കഴിഞ്ഞ മാസം പുറത്തിറങ്ങിയ ഗ്ലാസ് എന്ന ചിത്രം. അലീറ്റ ദി ബാറ്റിൽ എയ്ഞ്ചൽ എന്ന ചിത്രത്തിന്റെയും സ്ഥിതി ഗതികൾ മറിച്ചായിരുന്നില്ല. റിലീസിന് മുൻപേ തന്നെ വധം എന്നും 200 മില്യൺ ദുരന്തം എന്നുമൊക്കെ പലരും വിശേഷിപ്പിച്ച് കേട്ടെങ്കിലും കാണാൻ ഉണ്ടായ പ്രചോദനം മുകളിൽ സൂചിപ്പിച്ച പ്രക്രിയ തന്നെ ആയിരുന്നു, ചെറിയ തോതിൽ പ്രതീക്ഷ നിലനിർത്തിയതും ഇത് തന്നെ.

🔸യുകിട്ടോ കിഷിറോയുടെ ഹൈലി അക്ക്ലെയിംഡ് മാങ്കാ ഐറ്റത്തിന്റെ വർഷങ്ങൾക്ക് ശേഷമുള്ള ദൃശ്യാവിഷ്കാരമാണ് അലീറ്റ ദി ബാറ്റിൽ എയ്ഞ്ചൽ. പിന്നിലും മുന്നിലും ആയി ഹോളിവുഡ് സിനിമാ ഇന്ഡസ്ട്രിയിലെ മികച്ച ചില താരങ്ങളാണ് ഈ ചിത്രത്തിൽ അണി നിരന്നിരിക്കുന്നത്. ജെയിംസ് കാമറോൺ, റോബർട്ട് റോഡ്രിഗസ്, ക്രിസ് വാട്സ്, മഹേർസല അലി, റോസാ സലാസെർ, ജെന്നിഫർ കോൺലി തുടങ്ങിയവർ അണിനിരക്കുന്ന ചിത്രത്തിന് തീർച്ചയായും താരപ്പകിട്ടിന് യാതൊരു കുറവുമില്ല. ഇനി ഇതൊന്നും പോരെങ്കിൽ വളരെ പ്രശസ്തനായ, ഓസ്കാർ നോമിനേഷനുകൾ വാരിക്കൂട്ടിയ മറ്റൊരു നടനും ചിത്രത്തിൽ ഉണ്ട്, അതെന്തായാലും സസ്പെൻസ് ഒക്കെ സസ്പെൻസ് ആയി തന്നെ നിൽക്കട്ടെ. ഇരുപത്തി ആറാം നൂറ്റാണ്ടിലാണ് ചിത്രത്തിന്റെ കഥ അരങ്ങേറുന്നത്, ഏറെക്കുറെ ശിഥിലമായി മാറിയ ഭൂമിയിലെ അയേൺ സിറ്റി എന്ന നഗരത്തിൽ നിന്നും അലീറ്റ എന്ന സൈബോർഗിനെ ഡോക്ടർ ഐഡോ കണ്ടെത്തുന്നതും തുടർന്ന് അരങ്ങേറുന്ന സംഭവങ്ങളും ആണ് ചിത്രത്തിന്റെ കഥ.

🔸ചിത്രത്തിന്റെ നല്ല വശങ്ങളിലേക്ക് കടക്കുക ആണെങ്കിൽ കാസ്റ്റിംഗിനെ കുറിച്ച് ആദ്യമേ പറയേണ്ടി വരും, മികച്ച ഒരുപിടി താരങ്ങളെ അണിനിരത്താൻ ചിത്രത്തിന് കഴിഞ്ഞിട്ടുണ്ട് എന്നതിൽ യാതൊരു സംശയവുമില്ല എന്നാൽ ഇവരെയെല്ലാം മികച്ച രീതിയിൽ ഉപയോഗിച്ചുവോ എന്നത് സംശയമാണ്. നെഗറ്റിവ് എന്ന് തോന്നിക്കുന്ന വസ്തുതകൾ പല മേഖലയിലും കാണാം എങ്കിലും ചിത്രത്തിന്റെ സ്പെഷ്യൽ എഫക്ട് വിഭാഗം ഇവയിൽ നിന്നെല്ലാം മാറി നിൽക്കുന്നുണ്ട്, മോശം എന്ന് തോന്നിക്കാവുന്നത് ഒന്നും തന്നെ കാണാനില്ല എന്ന് മാത്രമല്ല റേസിംഗ് സീൻ ഉൾപ്പെടെയുള്ള രംഗങ്ങൾ എല്ലാം മികച്ച് നിൽക്കുന്നുമുണ്ട്. മികച്ച ആക്ഷൻ രംഗങ്ങളും, അലീറ്റ എന്ന ടൈറ്റിൽ കഥാപാത്രം തന്നെയും, ഇടയ്ക്കിടെ വന്ന് പോയ ചില സർപ്രൈസുകളും എല്ലാം ചേരുമ്പോൾ ഏറെക്കുറെ ചിത്രത്തിന്റെ നല്ല വശങ്ങൾ എല്ലാം പൂർണമാവും.

🔸ഇനി മോശം എന്ന് അനുഭവപ്പെട്ട കാര്യങ്ങൾ ആണെങ്കിൽ, ആദ്യമേ തന്നെ ക്ലൈമാക്സിലേക്ക് പോവേണ്ടി വരും. അധികം സ്പോയ്ലർ ഉൾപ്പെടുത്താതെ തന്നെ പറയാം ഒരു രണ്ടാം ഭാഗത്തിനുള്ള സാധ്യത നിലനിർത്തികൊണ്ടാണ് അലീറ്റ അവസാനിക്കുന്നത്. അതായിരുന്നു ഉദ്ദേശം എങ്കിൽ ചിത്രത്തിന് ഇത് പോലെ ഒരു പെയ്‌സിങ് ആവശ്യം ഉണ്ടായിരുന്നു എന്ന് തോന്നുന്നില്ല. ആവശ്യത്തിൽ അധികം എന്ന രീതിയിൽ തോന്നപ്പെട്ട വില്ലൻ കഥാപാത്രങ്ങളും ചെറിയൊരു പോരായ്മയായി തോന്നി. അനാവശ്യം എന്ന തോതിൽ കുത്തിക്കേറ്റിയ ഒരു റൊമാന്റിക് സബ് പ്ലോട്ടും, ആസ്ഥാനത്തായ ചില തമാശകളും മറ്റ് പോരായ്മകളായി വരുന്നു. ഇതൊക്കെയാണ് അലീറ്റ എന്ന ചിത്രത്തിൽ പോരായ്മകളായി അനുഭവപ്പെട്ട വസ്തുതകൾ.

🔸നല്ലതാണോ മോശമാണോ എന്നാണ് ചോദ്യം എങ്കിൽ മികച്ച വിഷ്വൽ ട്രീറ്റിനും, പന്ത്രണ്ട് മിനുട്ടിനടുത്ത് നീണ്ട നിന്ന മോട്ടോർബോൾ സീക്വൻസിനും വേണ്ടി ചിത്രം കാണാം എന്നാണ് അഭിപ്രായം. 200 മില്യണിന് അടുത്ത് ചിലവഴിച്ച് തയാറാക്കിയ ചിത്രം പൊതു അഭിപ്രായം കണക്കിൽ എടുക്കുമ്പോൾ വിജയിക്കാനുള്ള സാധ്യത വളരെ കുറവാണെന്ന് തുറന്ന് പറയേണ്ടി വരും. ഒറിജിനൽ മാങ്കാ ഐറ്റത്തിനെ പറ്റി വലിയ അറിവ് ഇല്ലാത്തതിനാൽ എത്ര കണ്ട് സോഴ്സ് മെറ്റിറിയലിനോട് ചേർന്ന് നിൽക്കുന്നുണ്ട് എന്നും ഉറപ്പില്ല. വിജയം ആകാൻ സാധ്യത ഇല്ലാത്തതിനാൽ ക്ലൈമാക്സിൽ സൂചിപ്പിച്ച രണ്ടാം ഭാഗം പുറത്തിറങ്ങുമോ എന്നതും സംശയമാണ്, അങ്ങനെ ആണെങ്കിൽ അതിൽ ചെറിയൊരു നിരാശയുണ്ട്, അതിനുള്ള കാരണം ഇവിടെ ഉൾപ്പെടുത്താനാവില്ല കാരണം അത്യാവശ്യം നല്ലൊരു സ്പോയ്ലർ ആണത്. ചുരുക്കി പറയുക ആണെങ്കിൽ നല്ലതും മികച്ചതും ആയ വസ്തുതകൾ ബാലൻസ് ചെയ്ത് നിൽക്കുന്ന ഒരു പെർഫെക്റ്റ് ശരാശരി ചിത്രമാണ് അലീറ്റ ദി ബാറ്റിൽ എയ്ഞ്ചൽ.

Verdict : Average

DC Rating : 58/100

494. Climax (2018)

Director : Gasper Noe

Genre : Horror

Rating : 7.5/10

Country : France

Duration : 96 Minutes

🔸ക്ലൈമാക്സ് എന്ന ഗാസ്പെർ നോ ചിത്രം കിടുവാണ്, പൊളിയാണ്, വേറെ ലെവൽ ആണ്. ഇതിനേക്കാൾ അധികം ആയോ അല്ലെങ്കിൽ ഇതിന് വിരുദ്ധമായോ ഒന്നും തന്നെ പറയാൻ ഉദ്ദേശിക്കുന്നില്ല. അത് കൊണ്ട് തന്നെ തുടർന്ന് പറയാൻ പോവുന്ന കാര്യങ്ങൾ നിങ്ങൾ വായിക്കണം എന്ന് നിർബന്ധവുമില്ല. ഗാസ്പെർ നോയുടെ ചിത്രങ്ങൾ ഇഷ്ടപ്പെടുന്നവർ ആണ് നിങ്ങൾ എങ്കിൽ യാതൊരു സംശയവും വെച്ച് പുലർത്താതെ ധൈര്യമായി ഡൗൺലോഡ് ചെയ്ത് കാണാം ഈ ചിത്രം. മറ്റുള്ളവർക്ക്, അതായത് നോയുടെ ചിത്രങ്ങൾ പരിചിതം അല്ലാത്തവർക്ക് അറിയാനുള്ള ചില കാര്യങ്ങളാണ് ചുവടെ ചേർത്തിരിക്കുന്നത്. ഇതിനോടൊപ്പം തന്നെ പറയേണ്ടതാണ് നോയുടെ ചിത്രങ്ങൾ ഇഷ്ട്ടപ്പെടാത്ത ഒരു ചെറിയ അംശം കാഴ്ചക്കാരുടെ കാര്യം, നിങ്ങൾ ഈ ചിത്രം ഒഴിവാക്കുന്നതാവും നല്ലത്, മറ്റൊന്നും കൊണ്ടല്ല ഒരു ടിപ്പിക്കൽ ഗാസ്പെർ നോ ചിത്രത്തിന്റെ ബ്ലൂ പ്രിന്റ് എന്നൊക്കെ വിശേഷിപ്പിക്കാവുന്ന ഐറ്റം ആണ് ക്ലൈമാക്സ്.

🔸തൊണ്ണൂറുകളുടെ മധ്യത്തിൽ ഫ്രാൻ‌സിൽ വെച്ച് അരങ്ങേറിയ ഒരു യഥാർത്ഥ സംഭവത്തിന്റെ നേർ കാഴ്ചകൾ എന്ന ജാമ്യവും ആയാണ് ക്ലൈമാക്സ് എന്ന ചിത്രം ആരംഭിക്കുന്നത്. ഇവിടെ നിന്നും കൂടെ ഇല്ലാത്തവർക്കും, നിന്ദിച്ചവർക്കും നന്ദി പറഞ്ഞ് കൊണ്ട് ചിത്രം നേരിട്ട് കഥയിലേക്ക് കടക്കുകയാണ്. മഞ്ഞ് പുതച്ച വഴിയിലൂടെ ആരാണെന്ന് മനസിലാവാത്ത ഒരു കഥാപാത്രം വേച്ച് വേച്ച് നടന്ന് വരുന്നതാണ് ആദ്യ രംഗം, ചോരക്കറ ഈ കഥാപാത്രത്തിന്റെ ദേഹമാസകലം കാണാം. അധികം താമസിയാതെ തന്നെ തളർന്ന് വീഴുന്ന ഈ കഥാപാത്രത്തിന്റെ രക്തത്തിന്റെ നിറവും മഞ്ഞും കൂടിച്ചേർന്ന് കാഴ്ചക്കാരന് മുന്നിൽ ദൃശ്യമാവുന്ന രംഗം ഒരു മുൻകരുതലാണ്, വരാൻ പോവുന്ന സംഭവങ്ങൾക്കുള്ള മുൻകരുതൽ.

🔸അമേരിക്ക, ബ്രിട്ടൻ പോലെയുള്ള രാജ്യങ്ങളിലേക്ക് വരും കാലത്ത് സന്ദർശനം നടത്തേണ്ട ഒരു ഡാൻസ് ട്രൂപ്പിന്റെ ഓഡിഷൻ പ്രക്രിയ അരങ്ങേറുകയാണ്. പങ്കെടുക്കാൻ എത്തിയ കലാകാരൻമാർ എല്ലാവരും തന്നെ തങ്ങളെ സ്വയം പരിചയപ്പെടുത്തുകയും, തങ്ങളുടെ വ്യക്തിത്വങ്ങളെ കുറിച്ചുള്ള ഒരേകദേശ ചിത്രം പ്രേക്ഷകന് നൽകുകയും ചെയ്യുന്നുണ്ട്. തുടർന്നുള്ള മൂന്ന് ദിവസങ്ങൾ പുറം ലോകവുമായി അധികം ബന്ധമില്ലാത്ത ഒരു ഉൾനാടൻ ക്യാമ്പിൽ ഇവരെല്ലാം പരിശീലനത്തിൽ ഏർപ്പെടുകയാണ്. യാതൊരു പ്രശ്നങ്ങളും ഇല്ലാതെ മൂന്ന് ദിവസം നന്നായി തന്നെ കടന്ന് പോയെങ്കിലും അവസാന ദിവസം, കുറച്ച് കൂടി ആഴത്തിൽ പറയുക ആണെങ്കിൽ അവസാന ദിവസത്തെ അവസാന രാത്രി കളിയെല്ലാം മാറുകയാണ്.

🔸അവസാന ദിവസത്തെ പാർട്ടിക്കിടെ നർത്തകർ കുടിക്കുന്ന മദ്യത്തിലേക്ക് കൂട്ടത്തിൽ ആരോ തന്നെ മറ്റൊരു ദ്രാവകം കലർത്തുമ്പോൾ അത് വരെ ഉണ്ടായിരുന്ന സ്ഥിതിഗതികൾ ആകെ മാറി മറിയുകയാണ്. തുടർന്ന് അങ്ങോട്ടുള്ള ഒന്നര മണിക്കൂർ സമയം മറക്കാനാവാത്ത ദൃശ്യങ്ങൾ ആണ് ചിത്രം സമ്മാനിക്കുക. വയലെന്സിന്റെ അതിപ്രസരം, ലൈംഗികത, ലഹരി തുടങ്ങി എല്ലാ രീതിയിലും, എല്ലാ ഭാഗത്തുകൂടിയും ചിത്രവും കഥാപാത്രങ്ങളും കാഴ്ചക്കാരനെ വേട്ടയാടും. തുടർന്ന് അരങ്ങേറുന്ന സംഭവങ്ങളും ഈ കഥാപാത്രങ്ങളുടെ ഭാവിയും, ചില സസ്പെൻസുകളും എല്ലാം ചിത്രം കണ്ട് തന്നെ മനസിലാക്കുന്നതാവും നല്ലത്.

🔸ഇറിവേർസബിൾ, എന്റർ ദി വോയിഡ്, ഐ സ്റ്റാൻഡ് അലോൺ തുടങ്ങിയ സംവിധായകനോട് ഇഷ്ടം തോന്നിച്ച ചിത്രങ്ങളുടെ പട്ടികയിലേക്ക് തീർച്ചയായും ഉൾപ്പെടുത്തും ഈ ചിത്രത്തെയും. ഗാസ്പെർ നോയുടെ ചിത്രങ്ങൾ ആരംഭിക്കുന്നത് പലപ്പോഴും അവസാനിക്കുമ്പോൾ ആണെന്നും, കഥാപാത്രങ്ങളും കഥയും പിന്നീടാണ് മനസിനെ വേട്ടയാടി തുടങ്ങുന്നതെന്നും എവിടെയോ വായിച്ചത് നന്നായി ഓർക്കുന്നു, അത് എന്ത് തന്നെ ആയാലും നൂറ് ശതമാനം ശെരി ആണെന്ന് ഈ ചിത്രം അരക്കിട്ട് ഉറപ്പിക്കുന്നു. ചിത്രം അവസാനിക്കുമ്പോഴും ചില ദൃശ്യങ്ങളും, കഥാപാത്രങ്ങളും ഒരു നോവായി മനസ്സിൽ നിറഞ്ഞ് നിൽക്കുന്നു. ചിത്രം കാണാൻ താല്പര്യപ്പെടുന്നവരോട്, ഗാസ്പെർ നോ ചിത്രം ഡിസ്റ്റർബിങ് ആണെന്ന് പറയുന്നത് ദിവസവും സൂര്യൻ ഉദിക്കും എന്ന് പറയുന്നത് പോലെയാണ്, ഈ ഡിസ്റ്റർബിങ് കണ്ടന്റ് അത്യാവശ്യം നല്ല തോതിൽ തന്നെ ചിത്രത്തിൽ ഉണ്ട്. അത് പ്രശനം ആവില്ലെങ്കിൽ ധൈര്യമായി കണ്ടോളു, മികച്ചൊരു ചിത്രമാണ് ക്ലൈമാക്സ്.

Verdict : Very Good

DC Rating : 84/100

493. Gabbeh (1996)

Director : Mohsen Makhmalbaf

Genre : Drama

Rating : 7/10

Country : Iran

Duration : 72 Minutes

🔸ഇറാനിയൻ സിനിമകൾക്ക് ചില പ്രത്യേകതകൾ ഉണ്ട്, വളരെ ലളിതമായ കഥയെ അങ്ങേയറ്റം മനസ്സിൽ തട്ടുന്ന രീതിയിൽ അവതരിപ്പിക്കുക എന്നതും ആദ്യാവസാനം റിയലിസ്റ്റിക് ആയ രീതിയിൽ കഥ പറയുക എന്നതും ഇവയിൽ ഏറ്റവും പ്രാധാന്യം അർഹിക്കുന്ന രണ്ട് കാരണങ്ങളാണ്. ഈ കാരണങ്ങൾ കൊണ്ട് തന്നെയാണ് വിദേശ സിനിമാ ഇൻഡസ്ട്രിയിൽ ഏറ്റവും മികച്ചവയിൽ ഒന്നായി ഇറാനിയൻ സിനിമാ ലോകം വിലയിരുത്തപ്പെടുന്നതും. ദി ഹൌസ് ഈസ് ബ്ലാക്, ദി കൗ പോലെയുള്ള പഴയ ക്ലസ്സിക്കുകളിൽ തുടങ്ങി കിയാറോസ്റ്റാമിയുടെയും മജീദിയുടെയും സിനിമകളിൽ വരെ മുകളിൽ സൂചിപ്പിച്ച പ്രത്യേകതകൾ ഒരു നേർ രേഖ പോലെ കാണാനാവും. ഈ വിഭാഗത്തിൽ ഉൾപ്പെടുത്താവുന്ന, എന്നാൽ അധികം ശ്രദ്ധ ലഭിച്ചിട്ടില്ലാത്ത ഒരു ചിത്രമാണ് ഗാബെ.

🔸ഇറാനിലെ ഉൾനാടൻ ഗ്രാമങ്ങളിൽ ഒന്നിലാണ് ചിത്രത്തിന് ആസ്പദമായ കഥ അരങ്ങേറുന്നത്, ഒരു പുഴക്കരയിലേക്ക് വൃദ്ധരായ ദമ്പതിമാർ നടന്ന് വരികയാണ്. അത്യാവശ്യം പ്രായത്തിന്റെയും ആരോഗ്യത്തിന്റെയും പ്രശ്നങ്ങൾ നേരിടുന്നവരാണ് ഇരുവരും, അതിന്റെതായ അവശതയും പ്രാരാബ്ധവും വിഷമവും എല്ലാം ഇരുവരുടെയും സംഭാഷണങ്ങളിലും പെരുമാറ്റത്തിലും തെളിഞ്ഞ് കാണാം. തങ്ങളുടെ ഗാബെ അഥവാ പുതപ്പ് കഴുകി വൃത്തിയാക്കുക എന്ന ഉദ്ദേശത്തോട് കൂടിയാണ് ഇരുവരും പുഴക്കരയിലേക്ക് വരുന്നത്. വെറുമൊരു പുതപ്പ് എന്നതിൽ കവിഞ്ഞ് വല്ലാത്തൊരു വൈകാരികബന്ധം ഇരുവർക്കും ആ ഗാബിയോട് ഉണ്ട് എന്നതാണ് സത്യം.

🔸ഈ ഇഷ്ടത്തിന്റെ കാരണം തുടക്കത്തിൽ പറയുന്നില്ലെങ്കിലും ഇരുവരും പുതപ്പിനോട് കാണിക്കുന്ന സമീപനവും, ചെറു തലോടലുകളും, മൃദുവായ രീതിയിലുള്ള പെരുമാറ്റവും എല്ലാം ഈ അടുപ്പത്തിന്റെ നേർ സാക്ഷ്യങ്ങളാണ്. അങ്ങനെ അല്ലറ ചില്ലറ സംസാരങ്ങളും കാര്യങ്ങളും ഒക്കെ ആയി വൃത്തിയാക്കൽ ചടങ്ങുകൾ ചെയ്ത് കൊണ്ടിരിക്കെ ആണ് അദ്ഭുതകരമായ ഒരു സംഭവം അവിടെ അരങ്ങേറുന്നത്. വിലപ്പെട്ടതായി കരുതി തങ്ങൾ സംരക്ഷിച്ച് പോന്ന പുതപ്പിൽ നിന്നും അതി സുന്ദരിയായ ഒരു യുവതി പ്രത്യക്ഷപ്പെടുകയാണ്. തുടർന്ന് ഈ മൂന്ന് കഥാപാത്രങ്ങളും തമ്മിലുള്ള ഇടപെടലുകളിലൂടെ ചിത്രം പുരോഗമിക്കുകയാണ്.

🔸ഇരുപതിൽ അധികം ചിത്രങ്ങൾ സംവിധാനം ചെയ്ത മൊഹ്‌സീൻ മക്മൽബഫിന്റെ മറ്റൊരു സംവിധാന സംരംഭമാണ് ഈ ചിത്രം, സലാം സിനിമ എന്ന ചിത്രം ഒഴിച്ച് നിർത്തിയാൽ ഏറെക്കുറെ അപരിചിതനായ സംവിധായകനെ പറ്റി ഒരേകദേശം ചിത്രം നൽകാൻ ഗാബെ എന്ന ചിത്രത്തിന് തീർച്ചയായും കഴിയും. ഇറാൻ ഭരണകൂടവും നിയമങ്ങളും ഒക്കെ ആയി എന്നും ഉടക്കിൽ ആയിരുന്ന സംവിധായകന്റെ രാഷ്ട്രീയം ഈ ചിത്രത്തിൽ കാണാൻ കഴിയില്ല, മനസിലാവാതെ പോയതാണോ എന്ന സംശയം ബാക്കി നിൽക്കുന്നു. ഇതെല്ലാം മാറ്റി നിർത്തി വളരെ ഗ്രൗൻഡഡ്‌ ആയ രീതിയിൽ വളരെ കുറച്ച് കഥാപാത്രങ്ങളിലൂടെ പുരോഗമിക്കുന്ന ചിത്രമാണ് ഗാബെ.

🔸ഇറാനിയൻ ചിത്രങ്ങളെ ഇഷ്ടപ്പെടുന്നവർക്ക്, പ്രത്യേകിച്ചും ചെറിയ സ്കെയിലിൽ ഉള്ള മനോഹരമായ കഥയും കാമ്പും ഉള്ള ചിത്രങ്ങളെ ഇഷ്ടപ്പെടുന്നവർക്ക് നല്ലൊരു അനുഭവം ആയിരിക്കും ഗാബെ എന്ന ചിത്രം. ഒരു സിനിമ എൻഗേജിങ് ആയിരിക്കാൻ കൃത്യമായ ഇടവേളകളിൽ ശ്രദ്ധ പിടിച്ച് പറ്റുന്ന രീതിയിൽ ഉള്ള സംഭവങ്ങളോ പ്ലോട്ട് ഡെവെലപ്‌മെന്റോ ആവശ്യമുണ്ട് എന്ന ധാരണ തെറ്റാണെന്ന് തെളിയിക്കാനും ഈ ചിത്രം കൊണ്ട് സംവിധായകന് കഴിഞ്ഞിട്ടുണ്ടെന്ന് പറയാം. കൂടുതൽ പറയാനില്ല, ലളിതമായ നല്ലൊരു ചിത്രം ഗാബെയുടെ രൂപത്തിൽ നിങ്ങളെയും കാത്ത് ഇറാനിൽ ഉണ്ട്, കഴിയുമെങ്കിൽ കാണാൻ ശ്രമിക്കുക.

Verdict : Good

DC Rating : 76/100

492. Black Mirror (2011)

Creator : Charlie Brooker

Genre : Sci Fi

Rating : 8.9/10

Seasons : 04

Episodes : 18

Country : UK

Duration : 41 - 89 Minutes Per Episode

🔸ടെക്കനോളജിയുടെ കാര്യത്തിൽ നാം കൈവരിച്ച നേട്ടം എന്നത് ഏത് വിഷയത്തിൽ ആണെങ്കിലും അത്ഭുതകരം എന്നല്ലാതെ വിശേഷിപ്പിക്കാൻ കഴിയാത്തതാണ്. ഇതിന്റെ വ്യാപ്തി പൂർണമായും മനസിലാവണം എങ്കിൽ ഒരു നൂറ്റാണ്ട് മുൻപ് നിന്നും ഒരു വ്യക്തി ഇന്നത്തെ ചുറ്റുപാടിൽ എത്തിയാൽ എന്ത് സംഭവിക്കും എന്ന് വളരെ ലളിതമായി ചിന്തിച്ചാൽ മതിയാവും. മൊബൈൽ ഫോണും, ലാപ്ടോപ്പും തുടങ്ങി ഇന്ന് നമ്മുടെയെല്ലാം ജീവിതത്തിന്റെ ഭാഗമായി മാറിയ, ചിര പരിചിതമായ വസ്തുക്കൾ പോലും അയാൾക്ക് അത്ഭുതം സൃഷ്ട്ടിക്കുന്ന ഉപകരണങ്ങൾ ആയിരിക്കും. ഇനി ഒരു നൂറ് കൊല്ലം മുന്നോട്ടേക്കാണ് നമ്മൾ ചിന്തിക്കുന്നത് എങ്കിലോ, ഒരു കാര്യം ഉറപ്പിച്ച് പറയാനാവും, നമ്മൾ ഒന്നും സ്വപ്നം പോലും കാണാത്ത രീതിയിൽ ആയിരിക്കും ചുറ്റുപാടുകളും, സാഹചര്യങ്ങളും, രീതികളും മാറിയിട്ടുണ്ടാവുക. ഈ ഒരു വസ്തുതയിലേക്ക് ഒരല്പം വൈൽഡ് ആയി തന്നെ ശ്രദ്ധ കൊടുക്കുകയാണ് ബ്ലാക്ക് മിറർ എന്ന ഈ ബ്രിട്ടീഷ് ടിവി സീരീസ്. മുകളിൽ സൂചിപ്പിച്ചത് പോലെ തന്നെ വിവരണാതീതമായ രീതിയിൽ മാറിയ, മനുഷ്യന്റെ ജീവിതത്തിന്റെ ഭാഗമായ ടെക്ക്നോളജിയുടെ ദൂഷ്യ വശങ്ങളാണ് ആന്തോളജി രൂപത്തിൽ ഈ സീരീസ് സ്‌ക്രീനിൽ എത്തിക്കുന്നത്.

🔸ടെക്കനോളജിയുമായി വലിയ ബന്ധമോ താല്പര്യമോ ഇല്ലാഞ്ഞതിനാൽ തന്നെ ഒരല്പം സംശയത്തോട് കൂടിയാണ് ബ്ലാക്ക് മിറർ എന്ന സീരീസ് കാണാൻ തയാറായത്. അൻപത് മിനുട്ട് പരിധിയിൽ ഉള്ള മൂന്ന് എപ്പിസോഡുകളാണ് ആദ്യ സീസണിൽ ഉള്ളത്, ഈ മൂന്ന് കഥകൾ മാത്രം മതിയാവും സീരീസിനെ പറ്റിയുള്ള കാഴ്ചപ്പാട് തന്നെ മാറാൻ എന്നതാണ് വ്യക്തിപരമായ അനുഭവം. പ്രത്യേകിച്ചും ദി നാഷണൽ ആൻതം എന്ന ആദ്യ എപ്പിസോഡ്, ഒരു രാജ്യത്തിൻറെ ഭരണാധികാരിയെ ഇത്രയും നിസ്സഹായ അവസ്ഥയിൽ ദയനീയമായ രീതിയിൽ കാഴ്ചക്കാരന് മുന്നിൽ അവതരിപ്പിക്കുമ്പോൾ അമ്പരക്കുക അല്ലാതെ മറ്റൊന്നും ചെയ്യാനില്ല. ഈ എപ്പിസോഡിന് പുറമെ 15 മില്യൺ മെറിറ്റസ്, ദി എന്റയർ ഹിസ്റ്ററി ഓഫ് യു എന്നീ രണ്ട് എപ്പിസോഡുകൾ കൂടിയുണ്ട് ആദ്യ സീസണിൽ. വ്യക്തിപരമായി സീരീസിലെ എല്ലാ എപ്പിസോഡുകളും പരിഗണിക്കുമ്പോൾ ഏറ്റവും മികച്ചവയുടെ പട്ടികയിൽ ഉൾപ്പെടുത്താവുന്ന രണ്ട് കഥകൾ എങ്കിലും ഈ ഒരൊറ്റ സീസണിൽ നിങ്ങൾക്ക് കാണാനായേക്കാം.

🔸ഒരു സീരീസിന്റെ പീക് ടൈം എന്നൊക്കെ ചില ഭാഗങ്ങളെ പൊതുവെ വിശേഷിപ്പിച്ച് കാണാറുണ്ട്, ആ ചോദ്യം ബ്ലാക്ക് മിററിനെ കുറിച്ച് ആവർത്തിക്കുക ആണെങ്കിൽ രണ്ടാമത്തെ സീസണിലേക്ക് വിരൽ ചൂണ്ടേണ്ടി വരും. ആദ്യ സീസൺ പോലെ തന്നെ മൂന്ന് കഥകളാണ് ഈ ഭാഗത്തും ഉള്ളത്, വ്യക്തിപരമായി സീരീസിലെ ഏറ്റവും മികച്ച എപ്പിസോഡായ ബി റൈറ്റ് ബാക്കോട് കൂടിയാണ് സീരീസ് ആരംഭിക്കുന്നത്. ഒരു പക്ഷെ ബ്ലാക്ക് മിറർ പറയാൻ ആഗ്രഹിച്ച കാര്യങ്ങളോട് ഇത്രയും ചേർന്ന് നിൽക്കുന്ന, വൈകാരികമായി കാഴ്ചക്കാരനെ ഉലയ്ക്കുന്ന മറ്റൊരു എപ്പിസോഡ് കാണിച്ച് തരാൻ കഴിഞ്ഞേക്കില്ല. ഇതിന് പുറമെ വൈറ്റ് ബിയർ, വാൾഡോ മൊമെന്റ് എന്നീ രണ്ട് കഥകൾ കൂടിയുണ്ട് ഈ സീസണിൽ. കഥയുടെ പോക്ക് തുടക്കത്തിൽ നിന്നും മനസിലാക്കി എടുക്കാൻ കഴിയും എന്നൊരു വിശ്വാസം നിങ്ങൾക്ക് ഉണ്ടെങ്കിൽ തീർച്ചയായും വൈറ്റ് ബിയർ കാണാൻ ഞാൻ നിർദ്ദേശിക്കുകയാണ്.

🔸രണ്ടാം സീരീസ് കഴിയുന്നതോടെ സീരീസിന് ചെറിയ ചില മാറ്റങ്ങൾ സംഭവിക്കുന്നുണ്ട്, ഒന്നാമതായി ദൈർഘ്യത്തിലും എപ്പിസോഡുകളുടെ എണ്ണത്തിലും എല്ലാം വർദ്ധനവ് ഉണ്ടാവുന്നുണ്ട്. ആദ്യ രണ്ട സീസണുകളിലും മൂന്ന് വീതം കഥകൾ ആണെങ്കിൽ ഈ സീസണിൽ 6 കഥകൾ ആണുള്ളത്. മുൻ ഭാഗങ്ങൾ പോലെ വൈകാരികമായും മറ്റും അത്ര ഹാർഡ് ഹിറ്റിങ്ങും അല്ല തുടർന്നങ്ങോട്ടുള്ള എപ്പിസോഡുകൾ, എന്തിരുന്നാലും ഇത് നെഗറ്റിവ് ആയ രീതിയിൽ ബ്ലാക്ക് മിററിനെ ബാധിക്കുന്നില്ല.ജുറാസിക് വേൾഡ് നായികാ ബ്രൈസ് ഡാളസ് ഹൊവാഡ് കേന്ദ്ര കഥാപാത്രമാവുന്ന നോസ്ഡൈവ് പ്രത്യേക പരാമർശം അർഹിക്കുന്നുണ്ട്, പ്രത്യേകിച്ചും പ്രസ്തുത എപ്പിസോഡിന്റെ ക്ലൈമാക്സ് ഏറ്റവും സംപ്ത്രിപ്തി നൽകിയ എൻഡിങ്ങുകളിൽ ഒന്നാണ്. പൊതുവെ ഡിസ്റ്റർബിങ്, ഡിപ്രസിങ് ആയ കഥകളാൽ സമ്പന്നമായ സീരീസിനും പോസിറ്റീവ് എനർജി നൽകാനാവും എന്ന് തെളിയിച്ച സാൻ ജൂനിപെറോ എന്ന എപ്പിസോഡും പ്രത്യേകം പരാമർശിക്കുന്നു.

🔸സ്റ്റാർ ട്രെക്ക് സിനിമകളുടെ സ്വാധീനം ഉള്ള USS കലിസ്റ്റർ എന്ന എപിസോഡോട് കൂടിയാണ് നാലാമത്തെയും, ഇതുവരെ പുറത്തിറങ്ങിയതിൽ അവസാനത്തേതുമായ എപ്പിസോഡ് ആരംഭിക്കുന്നത്. സീരീസിലെ ഏറ്റവും മികച്ച എപ്പിസോഡുകളിൽ ഒന്നാണെങ്കിൽ കൂടിയും മുകളിൽ സൂചിപ്പിച്ച 'മാറ്റം' പലയിടത്തും വളരെ പ്രസക്തമാവുന്നുണ്ട് ഈ സീസണിൽ. പ്രത്യേകിച്ചും തുടർന്നുള്ള ഹാങ്ങ് ദി ഡിജെ പോലുള്ള എപ്പിസോഡുകളിൽ. ക്രോക്കൊഡൈൽ, ബ്ലാക്ക് മ്യൂസിയം തുടങ്ങി മികച്ച കുറച്ച് കഥകളും അമ്പരപ്പിക്കുന്ന സന്ദർഭങ്ങളും ഈ സീസണിൽ കാണാനാവും എന്ന കാര്യത്തിൽ യാതൊരു സംശയവും വേണ്ട. ടെക്കനോളജി എന്നത് മാറ്റി നിർത്തിയാൽ പ്രത്യക്ഷത്തിൽ വലിയ ബന്ധമൊന്നും തന്നെ ഈ കഥകൾ തമ്മിലില്ല, എന്തിരുന്നാലും ആസ്വാദനത്തിന്റെ കാര്യത്തിൽ വലിയ ഭംഗമൊന്നും തന്നെ ഇവ വരുത്തുന്നുമില്ല. ചുരുക്കി പറയുക ആണെങ്കിൽ കണ്ട ചുരുക്കം ചില സീരീസുകളിൽ ഏറ്റവും മികച്ചവയുടെ പട്ടികയിൽ ഉണ്ടാവും ബ്ലാക്ക് മിറർ.

Verdict : Must Watch

DC Rating : 92/100

491. Dr. Babasaheb Ambedkar (2000)

Director : Jabbar Patel

Genre : Biography

Rating : 8.4/10

Country : India

Duration : 179 Minutes

🔸ഇന്ത്യ എന്ന രാജ്യം ഒരുപാട് വളർന്നിരിക്കുന്നു. രാഷ്ട്രീയ, സാമൂഹിക, സാംസ്‌കാരിക, ശാസ്ത്ര മേഖലകളിലെല്ലാം നമ്മുടെ രാജ്യം കൈവരിച്ചിരിക്കുന്ന നേട്ടങ്ങൾ ശ്രദ്ധേയമാണ്. ചന്ദ്രന്റെ ഉപരിതലത്തിൽ എത്തിയ അപൂർവ രാജ്യങ്ങളിൽ ഒന്ന്, ഭൂഗർഭ സഞ്ചാര പദ്ധതികൾ, മെട്രോ റെയിലുകൾ തുടങ്ങി എല്ലാ മേഖലകളിലും വൻ കുതിച്ച് ചാട്ടം നടത്തിയ രാജ്യത്തെയാണ് ഇന്ന് നമ്മൾ കാണുന്നത്. അയിത്തത്തിന്റെയും, അനാചാരങ്ങളുടെയും, അവഗണനകളുടെയും കഥകൾ നമുക്ക് ഇന്ന് ഏറെക്കുറെ അപരിചിതമാണ്, പ്രത്യേകിച്ചും ജാതി പറഞ്ഞ് കൊണ്ടുള്ള വേർതിരിവുകൾ. മേലാളന്മാരുടെ മുന്നിൽ പെടാതെ മാറി നടക്കേണ്ടതും, വേദങ്ങൾ ഉരുവിട്ടവന്റെ നാവ് അറത്തെടുക്കുന്നതും, ചെവിയിൽ ലോഹം ഉരുക്കി ഒഴിക്കുന്നതുമെല്ലാമായ ആചാരങ്ങൾ ഇന്ന് കുഴിച്ച് മൂടപ്പെട്ടിരിക്കുന്നു.

🔸ജാതീയതയുടെ പിറവിക്ക് പിന്നിലെ കഥ ഋഗ്വേദപ്രകാരം പറഞ്ഞ് കൊണ്ടാണ് ബാബാസാഹേബ് അംബേദ്‌കർ എന്ന ചിത്രം ആരംഭിക്കുന്നത്. സൃഷ്ടാവിന്റെ ശരീരത്തിൽ നിന്നും നാല് ജാതികളാണ് മനുഷ്യ കുലത്തിനായി സൃഷ്ടിക്കപ്പെട്ടത്, അതിലെ ഏറ്റവും സ്രേഷ്ടൻ എന്ന് കരുതപ്പെടുന്ന ബ്രാഹ്മണൻ മനുഷ്യന്റെ വായയോട് ഉപമിക്കപ്പെടുന്നു. യോദ്ധാക്കളായ ക്ഷത്രിയന്മാർ കൈകളോടും, വൈശ്യന്മാർ മനുഷ്യന്റെ തുടയോടും ഉപമിക്കപ്പെടുന്നു. ഇനിയാണ് മനുസ്മ്രിതി പ്രകാരം ഏറ്റവും നികൃഷ്ട ജീവികളായ ശൂദ്രന്മാർ വരുന്നത്, അവർ മനുഷ്യന്റെ കാലിനോടും ഉപമിക്കപ്പെടുന്നു. ഇങ്ങനെ പിറന്ന് വീഴുന്ന ഓരോ കുട്ടിയും തന്റെ ജീവിതകാലം മുഴുവൻ ഈ വക തരം തിരിക്കലുകൾ പേറി നടക്കാൻ വിധിക്കപ്പെടുന്ന ഒരു പ്രത്യേക വ്യവസ്ഥയാണ് ജാതി വേർതിരിവുകൾ എന്നത്, ഇവയിൽ തന്നെ വളരെ മോശമായ അല്ലെങ്കിൽ പരിതാപകരം എന്ന് തന്നെ പറയാവുന്ന അവസ്ഥയാണ് ശൂദ്രന്മാർ എന്ന് വിശേഷിപ്പിക്കപ്പെട്ട വിഭാഗത്തിന്റേത്.

🔸ഒരു ശരാശരി താഴ്ന്ന ജാതിക്കാരൻ എന്ന് മുദ്ര കുത്തപ്പെട്ട വ്യക്തിക്ക് തന്റെ ജീവിതത്തിൽ നേരിടേണ്ടി വരുന്ന അപമാനങ്ങൾക്കും അവഗണനയ്ക്കും പുച്ഛത്തിനും കയ്യും കണക്കും ഉണ്ടാവില്ല. മേലാളന്മാർ ഉപയോഗിക്കുന്ന വസ്തുവകകളോ, കുളക്കടവോ, ഇരിക്കാൻ ഉള്ള കസേരയോ, അവരുടെ മുന്നിൽ കൂടിയുള്ള സഞ്ചാര സ്വാതന്ത്ര്യമോ എന്തിനധികം കുടിക്കാൻ ഉള്ള വെള്ളം പോലും ശുദ്രന്മാർക്ക് അവകാശം ഇല്ലാത്തത് ആയിരുന്നു എന്ന വാക്യം ഒരു പക്ഷെ വിശ്വസിക്കാൻ ഇന്ന് ഒരല്പം ബുദ്ധിമുട്ട് തോന്നിയേക്കാം, എന്തിരുന്നാലും അതായിരുന്നു ഒരുകാലത്തെ നമ്മുടെ ഇന്ത്യ എന്നത് വളരെ പ്രസക്തമായ കാര്യമാണ്. ഈ കാരണങ്ങൾ ഒക്കെ കൊണ്ടാണ് 'ഞാൻ ഇവിടെ നിന്ന് വെള്ളം കുടിക്കുന്നത് കൊണ്ട് നിങ്ങൾക്ക് ബുദ്ധിമുട്ട് ആണെങ്കിൽ നിങ്ങൾ മറ്റൊരു വഴി തേടുക, അല്ലെങ്കിൽ ഞാൻ കാരണം നേരിടേണ്ടി വന്ന അയിത്തത്തിന് ശുദ്ധീകരണം നടത്തുക' എന്ന അംബേദ്കറുടെ വാക്കുകൾ നെഞ്ചിൽ തറച്ച് കയറുന്നതും.

🔸ഭീംറാവോ രാമോജി അംബേദ്‌കർ, അഥവാ പിൽക്കാലത്ത് ഡോക്ടർ ബാബാസാഹേബ് അംബേദ്‌കർ, ഇന്ത്യൻ ഭരണ ഘടനയുടെ ശില്പി എന്നതിൽ കവിഞ്ഞ് വലിയ അറിവൊന്നും തന്നെ ഉണ്ടായിരുന്നില്ല ഇദ്ദേഹത്തെ കുറിച്ച്. മികച്ച രീതിയിൽ രേഖപ്പെടുത്തിയ ഇന്ത്യൻ സ്വാതന്ത്ര്യ സമര പോരാട്ടത്തിൽ എവിടെയും ഇദ്ദേഹത്തിന്റെ ഐതിഹാസികമായ നിലപാടുകളോ, പോരാട്ടങ്ങളോ ഒന്നും പറഞ്ഞ് കേട്ടിട്ടില്ല. ഗാന്ധിജിയും ആയി പല കാര്യങ്ങളിലും ഉണ്ടായിരുന്ന അഭിപ്രായ വ്യത്യാസങ്ങളും, കോൺഗ്രെസ്സുമായി ഉണ്ടായിരുന്ന ഉരസലുകളും, നിസ്സഹകരണ പ്രസ്ഥാനങ്ങളിൽ നിന്നും മാറി നടന്ന ശൈലിയും എല്ലാം കാരണം ഒരു പരിധി വരെ ഹീറോയിക് കഥാപാത്രമായി അംബേദ്‌കർ കരുത്തപ്പെട്ടിരുന്നുമില്ല എന്നത് വേറെ കാര്യം. എന്നാൽ എല്ലാ കാര്യങ്ങൾക്കും ഒരു മറു വശമുണ്ട് എന്ന വസ്തുതയിലേക്ക് വിരൽ ചൂണ്ടാൻ പ്രേരിപ്പിക്കുന്ന, ഒരു ചെറിയ ഓർമപ്പെടുത്തലാണ് ഈ ചിത്രം.

🔸ജനനം കൊണ്ട് മഹർ എന്ന കീഴ്ജാതിക്കാരനും, ദരിദ്രനും ആയിരുന്ന അംബേദ്‌കർ കടന്ന് വന്ന സഹനത്തിന്റെയും, പോരാട്ടങ്ങളുടെയും, ത്യാഗത്തിന്റെയും വഴി കാണുമ്പോൾ ഒരുവേള നമ്മുടെയും മനസ്സ് കലങ്ങിയിരിക്കും, അതിൽ സംശയത്തിന് യാതൊരു സ്ഥാനവുമില്ല. അമേരിക്കയിലെ പഠന കാലവും, ദുർഘടമായ കുടുംബ ജീവിതവും, തന്റെ ജനങ്ങൾക്ക് വേണ്ടി നടത്തിയ നീക്കങ്ങളും, ഇത് കാരണം മറ്റുള്ളവരുടെ മുന്നിൽ ലഭിച്ച വില്ലൻ പരിവേഷവും, ഒടുവിൽ ലോകത്തെ ഏറ്റവും വലിയ ജനാധിപത്യ രാജ്യത്തിൻറെ ഭരണ ഘടന വരെ നീണ്ട് നിൽക്കുന്ന ഐതിഹാസികമായ ജീവിതമാണ് സ്‌ക്രീനിൽ കാണാനാവുന്നത്. എല്ലാത്തിനും അവസാനം താൻ നില കൊണ്ടിരുന്ന കാര്യങ്ങൾ നടപ്പിലായപ്പോൾ വിജയം മനസ്സിൽ സൂക്ഷിച്ച്, അവഗണനകളിൽ പരാതി പറയാതെ, കണ്ണീർ മറ്റാരും കാണാതെ തുടച്ച് അംബേദ്‌കർ നടന്നകലുമ്പോൾ അറിയാതെ പറഞ്ഞ് പോവും, നിങ്ങൾ ഇതിനേക്കാൾ അർഹിച്ചിരുന്നു, എല്ലാ രീതിയിലും എന്ന്. നല്ലൊരു സബ്‌ടൈറ്റിലോ പ്രിന്റോ ഇല്ലാതെ ഏറെക്കുറെ വിസ്‌മൃതിയിലാണ്ടു കിടന്നിരുന്ന ചിത്രത്തിന് വേണ്ടി സബ് ടൈറ്റിലുകൾ തയാറാക്കി പ്രേക്ഷകർക്ക് നൽകിയ എം സോൺ ടീമിന് ഒരായിരം നന്ദി പറഞ്ഞ് കൊണ്ട് നിർത്തുന്നു.

Verdict : Must Watch

DC Rating : 90/100

490. A Private War (2018)

Director : Mathew Heineman

Genre : Biography

Rating : 6.7/10

Country : USA

Duration : 110 Minutes

🔸"യുദ്ധഭൂമിയിൽ ഓരോ അമ്മയും രാത്രി ഉറങ്ങാൻ പോവുന്നത് നാളെ സൂര്യോദയം കാണാൻ തന്റെ മക്കൾ തനിക്കൊപ്പം ഉണ്ടാവുമോ എന്ന കാര്യത്തിൽ വരെ വ്യക്തത ഇല്ലാതെയാണ്, അവരെ കാണാൻ തങ്ങൾ ബാക്കി ഉണ്ടാവുമോ എന്നതാണ് അവരുടെ അടുത്ത സംശയം. ഈ വർഷങ്ങൾ ഇത്രയും കടന്ന് പോയിട്ടും ജീവൻ കൈവിട്ട് പോയേക്കാവുന്ന അനവധി പ്രതിസന്ധികളിലൂടെ കടന്ന് പോയിട്ടും ആ അമ്മയുടെ മനസിലെ ഭയം തനിക്ക് ഒരിക്കലും അനുഭവിക്കേണ്ടി വന്നിട്ടില്ല. സ്വന്തം വികാരങ്ങളെക്കാൾ മറ്റുള്ളവരുടെ ഭയം പുറം ലോകത്ത് എത്തിക്കാൻ നിയോഗിക്കപ്പെട്ടവളാണ് താൻ, അവിടെ ഈ വക കാര്യങ്ങൾക്ക് ഒന്നും തന്നെ പ്രാധാന്യമില്ല, മുന്നോട്ട് പോയേ ഒക്കു, അതാണ് വർഷങ്ങളായുള്ള തന്റെ ജീവിതവും യാത്രകളും" - മേരി കൊൾവിൻ തന്റെ ഓർമകൾ രേഖപ്പെടുത്തിക്കൊണ്ടിരിക്കുകയാണ്.

🔸മേരി കൊൾവിനിനെ ഒന്ന് ചെറുതായി പരിചയപ്പെട്ട് കളയാം. സിറിയ, ലിബിയ, ടിമോർ, ശ്രീ ലങ്ക, ഇറാൻ, ഇറാക്ക്, കൊസോവോ തുടങ്ങി മേരി റിപ്പോർട്ടിങ്ങിനായി കടന്ന് ചെന്നിട്ടില്ലാത്ത യുദ്ധ ഭൂമികൾ ഇല്ല എന്ന് തന്നെ പറയാം. ഈ പ്രദേശങ്ങളിൽ എല്ലാം തന്നെ ഭരണകൂട വിഭാഗം എന്നോ വിപ്ലവകാരികൾ എന്നോ ബേധമില്ലാതെ എല്ലാവരുടെയും വാക്കുകൾ മേരി രേഖപ്പെടുത്തിയിട്ടുണ്ട്. ഈ നേതാക്കളിൽ ഒരാൾ പറഞ്ഞത് കടമെടുക്കുക ആണെങ്കിൽ മേരിയുടെ വാക്കുകൾക്ക് ലോകം കാതോർക്കുന്നതിന് ഒരു കാരണമുണ്ട്, അവ എല്ലാം തന്നെ ഭീകരമാം വിധം യാഥാർഥ്യമാണ്, ആ വാക്കുകൾ ആവുന്ന അമ്പുകൾ ഒരിക്കലും ലക്ഷ്യസ്ഥാനം മറക്കുന്നുമില്ല.

🔸മേരിയുടെ ഏറെക്കുറെ പരാജയമായി വ്യക്തി ജീവിതത്തിന് പ്രാധാന്യം നൽകാതെ, തുടക്കം മുതൽ തന്നെ ആഘോഷിക്കപ്പെട്ട റിപ്പോർട്ടിങ് കരിയറിലേക്കാണ് ചിത്രം നടന്ന് കയറുന്നത്. പലസ്തീനിലേക്കുള്ള ദൗത്യം ഉപേക്ഷിച്ച് തന്റെ മേലുദ്യോഗസ്ഥനുമായി ഉടക്കി അവർ ശ്രീലങ്കയിലേക്ക് യാത്ര തിരിക്കുകയാണ്, തമിഴ് പുലികളും സർക്കാരും തമ്മിലുള്ള യുദ്ധം കൊടുമ്പിരി കൊണ്ടിരിക്കുന്ന, കഴിഞ്ഞ കുറെ വർഷങ്ങളായി മാധ്യമ പ്രവർത്തകരെ വരെ വിലക്കിയ അതേ ശ്രീലങ്കയിലേക്ക് തന്നെ. അവിടെ നിന്നങ്ങോട്ട് മേരിയുടെ കാഴ്ചപ്പാടിലൂടെ പുറം ലോകത്തിന് അന്യമായ യുദ്ധത്തെ, ആ ഭീകരതയെ, അനിശ്ചിതത്വത്തെ നമ്മൾ അടുത്തറിയുകയാണ്.

🔸ഈ റിപ്പോർട്ടിങ് കാലഘട്ടത്തിനിടെ അത്യന്തം അപകടകരവും ദുർഘടവുമായ വഴികളിലൂടെയാണ് മേരി കടന്ന് പോവുന്നത്. വിവരണാതീതമായ വൈകാരിക ശാരീരിക പീഡനങ്ങളിലൂടെ ഒരു കണ്ണിന്റെ കാഴ്ച വരെ നഷ്ട്ടപ്പെടുന്നുണ്ട് മേരിക്ക്, പിന്നീട് ഉള്ള ജീവിതകാലം മുഴുവൻ കടൽകൊള്ളക്കാരുടേതിന് സമാനമായ വ്യക്തിത്വത്തിന്റെ ഭാഗമായി മാറിയ കറുപ്പ് ഐ പാച് വരെ ഒരിക്കലും മറക്കാനാവാത്ത അനവധി സംഭാവനകളാണ് മേരി കൊൾവിൻസിന് ശ്രീ ലങ്ക നൽകുന്നത്. ഈ സംഭവങ്ങളുടെ എല്ലാം വെള്ളം ചേർക്കലുകൾ ഇല്ലാത്ത അവതരണം ആണ് എ പ്രൈവറ്റ് വാർ എന്ന ബയോഗ്രഫി ചിത്രം. യുദ്ധ ഭൂമിയുടെ ഭീകരാന്തരീക്ഷം അർഹമായ തീവ്രതയോട് കൂടി തന്നെ ചിത്രം സ്‌ക്രീനിൽ എത്തിക്കുന്നുണ്ട്.

🔸ഗോൺ ഗേൾ, ഫ്രാക്ച്ചർ, ജോണി ഇംഗ്ലീഷ്, ഹോസ്റ്റിൽസ് എന്നീ ചിത്രങ്ങളിലൂടെ പ്രശസ്തി ആർജിച്ച റോസമുണ്ട് പൈക് ആണ് കേന്ദ്ര കഥാപാത്രവും, റിയൽ ലൈഫ് വ്യക്തിത്വവും ആയ മേരി കൊൾവിൻസിനെ അവതരിപ്പിച്ചിരിക്കുന്നത്. പ്രകടനത്തിന്റെ അടിസ്ഥാനത്തിലായാലും അവതരണത്തിലായാലും മേൽ സൂചിപ്പിച്ച ചിത്രങ്ങളുമായി താരമത്യം അർഹിക്കുന്ന പ്രകടനം തന്നെയാണ് ഈ ചിത്രത്തിലും പൈക് കാഴ്ചവെച്ചിരിക്കുന്നത്. ജാമി ടൊർണാൻ, സ്റ്റാൻലി ട്യുക്കി തുടങ്ങി സ്‌ക്രീനിൽ എത്തിയ മറ്റ് താരങ്ങളും നന്നായിരുന്നു. ഒരു യുദ്ധ മേഖലാ ചിത്രം ആണെങ്കിലും യുദ്ധത്തോടൊപ്പം തന്നെ കേന്ദ്ര കഥാപാത്രത്തിന്റെ വ്യക്തി ജീവിതത്തിനും നല്ല പ്രാധാന്യം ചിത്രം നൽകുന്നുണ്ട്. ഈ വർഷത്തെ ഗോൾഡൻ ഗ്ലോബ് അവാർഡ് ദാന ചടങ്ങിൽ മികച്ച നടി, മികച്ച ഒറിജിനൽ സോങ് എന്നീ വിഭാഗങ്ങളിൽ പുരസ്‌കാരം നേടിയ ചിത്രം തീർച്ചയായും നല്ലൊരു കാഴ്ച്ചാനുഭവം ആയേക്കാം.

Verdict : Good

DC Rating : 72/100