489. Kuroneko (1968)

Director : Kaneto Shindo

Genre : Horror

Rating : 7.8/10

Country : Japan

Duration : 96 Minutes

🔸ഒനിബാബ എന്ന ചിത്രം പൊതുവെ ഉണ്ടായിരുന്ന ജാപ്പനീസ് ഹൊറർ ബ്ലാക്ക് ആൻഡ് വൈറ്റ് ചിത്രങ്ങളോടുള്ള സമീപനം മാറ്റി കുറിക്കുന്നതിനും മുന്നേ കേട്ടൊരു പേരാണ് കുറോൺകോ എന്ന ചിത്രത്തിന്റേത്. എന്തിരുന്നാലും അന്ത കാലത്ത് ചിത്രം കാണാൻ വലിയ താല്പര്യം ഉണ്ടായിരുന്നില്ല എന്നതാണ് സത്യം, പ്രഥമ കാരണം ഹൊറർ നമ്മളുടെ വിഷയം അല്ല എന്ന തോന്നൽ ആയിരുന്നെങ്കിൽ മറ്റൊന്ന് ചിത്രത്തിന്റെ പോസ്റ്റർ തന്ന, പിന്നീട് തെറ്റാണെന്ന് ബോധ്യപ്പെട്ട ഒരു തോന്നലാണ്. വെള്ള വസ്ത്രവും, പുകയും, മറയും, യുഗ്മ ഗാന സമാനമായ മ്യുസിക്കും എല്ലാം ചേർന്ന മറ്റൊരു സിനിമ മാത്രമാണോ ഈ ചിത്രവും എന്നൊരു ചിന്ത മനസ്സിലുണ്ടായിരുന്നു. നിഴലായി ഒഴുകി വരും എന്ന പാട്ടിലൂടെ സ്‌ക്രീനിൽ എത്തിയ കള്ളിയങ്കാട്ട് നീലിക്ക് പിറകെ ഇതൊരു ശീലമാക്കിയ ഒരുപാട് ചിത്രങ്ങളും ഒടുവിൽ ജഗദീഷും ഇന്ദ്രൻസും വരെ ആ രീതിയിൽ വന്ന് കണ്ടതിനാൽ ഈ ചിത്രം ഒരുപാട് നാൾ സിസ്റ്റത്തിൽ കിടന്നു.

🔸നൂറ്റാണ്ടുകൾക്ക് മുന്നേ ഉള്ള ഒരു ജാപ്പനീസ് ഉൾനാടൻ ഗ്രാമമാണ് കുറോൺകോയുടെ കഥാ പശ്ചാത്തലം, വികസനം എന്നതൊക്കെ നാമ മാത്രമായൊരു പ്രദേശം. ഈ ഗ്രാമത്തിൽ ഏറെക്കുറെ ഒറ്റപ്പെട്ട് ജീവിക്കുന്ന അമ്മയും മകളും ആണ് ചിത്രത്തിലെ പ്രധാന കഥാപാത്രങ്ങൾ. തങ്ങളുടെ ദൈനം ദിന ജീവിത രീതികളിൽ നിന്നും മാറി മറ്റൊന്നിലും വലിയ താല്പര്യം കാണിക്കാതെ ഒതുങ്ങി കൂടി ജീവിക്കുന്ന ഇരുവരുടെയും വീട്ടിലേക്ക് ഒരു പറ്റം ആളുകൾ ഒരുനാൾ കടന്ന് വരികയാണ്. ഒട്ടും നല്ല ഉദ്ദേശത്തോട് കൂടിയല്ലാതെ വന്ന ഈ സംഘം താമസിയാതെ ആ വീടും, രണ്ട് സ്ത്രീകളെയും കയ്യടക്കുകയാണ്, പിന്നീട് അവിടെ അരങ്ങേറുന്നത് വിവരണാതീതമായ ക്രൂര രംഗങ്ങളാണ്.

🔸ആ കൂട്ടത്തിലെ ഓരോ വ്യക്തിയും മാറി മാറി രണ്ട് യുവതികളെയും ബലാത്സംഗം ചെയ്യുകയാണ്, ഒറ്റപ്പെട്ട് കിടന്ന ഗ്രാമത്തിലെ ആ താഴ്‌വരയിൽ ഇരുവരുടെയും നിലവിളികൾ എവിടെയും എത്താതെ ഒതുങ്ങി പോവുകയാണ്. ഇനി ആ അലർച്ച കേട്ടിരുന്നെങ്കിൽ പോലും വലിയ പ്രയോജനം ഒന്നും ഉണ്ടാവില്ലായിരുന്നു എന്നതാണ് സത്യം. അംഗ ബലത്തിലും, കായിക ശേഷിയിലും അത്രമേൽ ശക്തരായിരുന്നു ആ സംഘം, അതും പോരെങ്കിൽ പേരെടുത്ത പോരാളി സംഘവും. അങ്ങനെ മൃഗീയമായ ഒരു കൂട്ട ബലാത്സംഗവും, അതിനെ തുടർന്നുള്ള കൊലപാതകങ്ങളും അവിടെ പൂർത്തിയാവുകയാണ്. കുറോൺകോ എന്ന ജാപ്പനീസ് ഹൊറർ ചിത്രം ആരംഭിക്കുന്നത് ഈ രംഗങ്ങളിൽ കൂടിയാണ്.

🔸മുകളിൽ സൂചിപ്പിച്ച രംഗത്തിന് ഒരു ചെറിയ തുടർച്ച കൂടിയുണ്ട്, അതാണ് ചിത്രത്തെ സംബന്ധിച്ചിടത്തോളം ഏറ്റവും പ്രസക്തമായ ഭാഗവും. തങ്ങളുടെ പരിപാടികൾ എല്ലാം കഴിഞ്ഞ് വീടിനും തീയിട്ട ശേഷം പോരാളികൾ അവിടെ നിന്ന് മടങ്ങുമ്പോൾ ഒരു പൂച്ച, കാഴ്ചയിൽ വലിയ പ്രത്യേകത ഒന്നും തോന്നിക്കാത്ത ഒരു സാധാരണ പൂച്ച തന്റെ സാന്നിധ്യം അറിയിക്കുകയാണ്. വലിയ പ്രാധാന്യം ഒന്നും ഇല്ലെന്ന് പ്രത്യക്ഷത്തിൽ തോന്നുമെങ്കിലും പിന്നീട് ഉടലെടുക്കുന്ന അനവധി കെട്ട് കഥകളിലേക്കും, ആചാരങ്ങളിലേക്കും, ഭീതിതമായ സംഭവങ്ങളിലേക്കും ഒക്കെയുള്ള ആരംഭം ഇവിടെ നിന്നുമാണ്. എന്ത് എങ്ങിനെ എന്നൊക്കെ ചിത്രം കണ്ട് തന്നെ അറിയുക.

🔸നേക്കഡ് ഐലൻഡ്, ഒനിബാബ എന്നീ ചിത്രങ്ങളുടെ സംവിധായകനായ കാനേറ്റോ ഷിൻഡോയുടെ മറ്റൊരു മാസ്റ്റർപീസ് ഐറ്റം ആണ് കുറോൺകോ, അതിൽ യാതൊരു സംശയവും വേണ്ട. വ്യക്തിപരമായി ഒനിബാബയോടൊപ്പം തന്നെ നിർത്തും ഈ ചിത്രത്തെയും, പ്രത്യേകിച്ചും കഥ പോവുന്ന വഴിയും, കഥാപാത്രങ്ങളുടെ നിസ്സഹായ അവസ്ഥയും ഡാർക്ക് ടോണും എല്ലാം മികച്ച അനുഭവം തന്നെ ആയിരുന്നു, എല്ലാ തരത്തിലും. മുകളിൽ സൂചിപ്പിച്ചത് പോലെ തന്നെ ഒരു റേപ്പ്, റിവഞ്ച്, ഗോസ്റ്റ്, മിസ്റ്ററി ചിത്രമാണ് കുറോൺകോ, ഇതിൽ നിന്ന് പ്രതീക്ഷിക്കുന്ന രീതിയിൽ തന്നെയാണ് ഏറെക്കുറെ ചിത്രം മുന്നോട്ട് പോവുന്നത്. ഇതിൽ 'ഏറെക്കുറെ' എന്ന വാക്കിന് പ്രാധാന്യം നൽകികൊണ്ട് പറയുന്നു അമ്പരപ്പിക്കാൻ ഉള്ള വകയും ചിത്രത്തിൽ ഉണ്ട്, അതിനാൽ തീർച്ചയായും ശുപാർശ ചെയ്യുന്നു.

Verdict : Must Watch

Rating : 90/100

488. Death Note (2006)

Creator : Tsugumi Ohba

Genre : Animation

Rating : 9.1/10

Season : 01

Episode : 37

Country : Japan

Duration : 19 - 24 Minutes Per Episode

🔸ഒരു നായകൻ എത്രമേൽ ഉഗ്രനാവുന്നുണ്ടെങ്കിലും അതിന് കാരണം ഒരു പരിധി വരെ അയാളുടെ എതിരാളി അഥവാ വില്ലനാണ്, വില്ലൻ സൂപ്പർ ആണെങ്കിൽ നായകന് അയാളെ കീഴടക്കുക എന്നത് ബുദ്ധിമുട്ടേറിയ ഒരു കാര്യമായി മാറുന്നു, ഒടുവിൽ അത് അയാളുടെ നിലനില്പിനും ഭവിക്കും എല്ലാം നേരെ ചോദ്യ ചിഹ്നമായി ഉയരുമ്പോൾ കളി കൊഴുക്കുകയാണ്. മുകളിൽ സൂചിപ്പിച്ച സിനാറിയോ ഒരു സിനിമയുടെ കാര്യത്തിലാണ് പറയുന്നതെങ്കിൽ ശെരിയാണ് എന്നാൽ ഡെത് നോട് പോലെയൊരു സീരീസിന്റെ കാര്യമാണ് എടുക്കുന്നതെങ്കിൽ സ്ഥിതിഗതികൾ ഒരല്പം വ്യത്യസ്തമാണ്. കാര്യം വേറൊന്നുമല്ല, ഇവിടെ ആരാണ് ശെരി ആരാണ് തെറ്റ് എന്നതൊക്കെ നിർണ്ണയിക്കാൻ ഒരല്പം ബുദ്ധിമുട്ടാണ്, നായകൻ എന്ന് തോന്നിക്കുന്ന വ്യക്തി ആയാലും വില്ലനെന്ന് തോന്നിക്കുന്ന പുള്ളി ആയാലും വ്യക്തമായ ഉദ്ദേശങ്ങളും കാര്യകാരണങ്ങളും ഉണ്ട്. ഇങ്ങനെ വരുമ്പോഴാണ് പൊതുവെ സിനിമ ആയാലും സീരീസ് ആയാലും ഒരാവേശം തോന്നുന്നത്, അത് തന്നെയാണ് ഡെത് നോട് നിങ്ങൾക്കായി കരുതി വെച്ചിരിക്കുന്നതും.

🔸മുപ്പത്തി ഏഴ് എപ്പിസോഡുകൾ ഉണ്ട് ഈ സീരീസിൽ, അതെല്ലാം ഉൾക്കൊള്ളിച്ച് ഒരൊറ്റ സീസണും. ഓരോ എപ്പിസോഡിനും ഉദ്ദേശം ഇരുപത് മിനുട്ടിന് അടുത്ത് ദൈർഖ്യം വരും. ചുരുക്കി പറയുക ആണെങ്കിൽ ഒരു സിനിമ കാണുന്ന സമയം കൊണ്ട് ആറോ ഏഴോ എപ്പിസോഡുകൾ കാണാം. ഇതിൽ തന്നെ ഇങ്ങനെ ഇങ്ങനെ കണ്ടാൽ ഇത്ര സമയം കൊണ്ട് സീരീസ് തീർക്കാം എന്നൊന്നും പറയുന്നില്ല, വേറൊന്നും കൊണ്ടല്ല ആദ്യ മൂന്ന് എപ്പിസോഡുകളോട് കൂടി തന്നെ ഏറെക്കുറെ ഈ സീരീസ് നിങ്ങൾ ഇഷ്ടപ്പെട്ട് കഴിഞ്ഞിരിക്കും, പിന്നീടെല്ലാം യാന്ത്രികമായി നടന്നോളും. അപ്പൊ പറയുന്നത് വേറെ ഒന്നുമല്ല ഒന്ന് രണ്ട് എപ്പിസോഡുകൾ കാണാൻ ശ്രമിക്കുക, അനിമേ ഐറ്റംസിനെ കാര്യമായി കാണാത്തവർ എന്താണ് ഒഴിവാക്കുന്നത് എന്ന് തിരിച്ചറിയുന്നില്ല എന്നതാണ് സത്യം.

🔸ഒരു പോലീസ് ഉദ്യോഗസ്ഥന്റെ മകനാണ് നമ്മുടെ കേന്ദ്ര കഥാപാത്രമായ ലൈറ്റ് യാഗാമി. ലൈറ്റ് ആളൊരു ചില്ലറക്കാരനല്ല, കോളേജിലെ മത്സരങ്ങളിലും പരീക്ഷകളിലും എല്ലാം വിജയം കരസ്ഥമാക്കാറുള്ള, കുറച്ച് കൂടി ലളിതമായി പറഞ്ഞാൽ മാതൃകാ വിദ്യാർത്ഥിയാണ് ടിയാൻ. ഇതൊക്കെ ആണ് കാര്യമെങ്കിലും ലൈറ്റ് അസ്വസ്ഥനാണ്, തന്റെ ചുറ്റുപാടുകളെ കുറിച്ചും സഹജീവികളെ കുറിച്ചുമെല്ലാമുള്ള ചിന്തകൾ അയാളെ വ്യാകുലപ്പെടുത്തുന്നുണ്ട്. ഇവർ അനുഭവിക്കേണ്ടി വരുന്ന യാതനകളും മുതലെടുപ്പുകളും അരാജകത്വവും എല്ലാം അയാളെ ചൊടിപ്പിക്കുന്നുണ്ട്, ഇങ്ങനെ കടന്ന് പോയി കൊണ്ടിരുന്ന ലൈറ്റിന്റെ ജീവിതത്തിൽ ഒരുനാൾ ഒരു പ്രത്യേക സംഭവം അരങ്ങേറുകയാണ്.

🔸ലൈറ്റിന്റെ മുന്നിലേക്ക് ഒരു നാൾ ഡെത് നോട്ട് എന്ന പുസ്തകം വന്ന് വീഴുകയാണ്, വെറുതെ തോന്നിയ കൗതുകത്തിന്റെ പുറത്ത് പുസ്തക താളുകൾ മറച്ച ടിയാന് ആദ്യ വാചകത്തിൽ തന്നെ ചിരി പൊട്ടി. ആ വാചകം "ഈ പുസ്തകത്തിൽ ആരുടെ പേര് എഴുതുന്നുവോ അയാൾ നാല്പത് സെക്കന്റിനകം മരണപ്പെടും' എന്നായിരുന്നു. ആരുടെയോ കിറുക്ക് എന്ന തോന്നലിൽ പിന്തിരിഞ്ഞ് നടന്നെങ്കിലും മുകളിൽ സൂചിപ്പിച്ച കൗതുകം ഒന്ന് കൊണ്ട് മാത്രം ആ പുസ്തകവും അയാൾ കൊണ്ടുപോവുകയാണ്. വീട്ടിൽ എത്തിയ ശേഷം കുറെ ആലോചിച്ചെങ്കിലും ഉത്തരങ്ങളൊന്നും ലഭിക്കാത്തതിനാൽ ഒന്ന് പരീക്ഷിച്ച് നോക്കാം എന്ന് തീരുമാനിച്ച ടിയാൻ ആദ്യ പേര് പുസ്തകത്തിൽ എഴുതുകയാണ്, തുടർന്ന് നാല്പത് സെക്കൻഡ് ക്ലോക്കിൽ കണ്ണും മിഴിച്ചിരുന്ന് കാത്ത് നിൽക്കുന്നു....

🔸ആദ്യ എപ്പിസോഡിലെ തുടക്കത്തിലേ പത്ത് മിനിറ്റ് മാത്രമേ പോസ്റ്റിൽ ഉൾപ്പെടുത്തിയിട്ടുള്ളൂ, ഇതിന് ശേഷം മികച്ച മുപ്പത്തി ആറ് എപ്പിസോഡുകളും ഒരുപാട് മികച്ച കഥാപാത്രങ്ങളും, മാസ്സ് രംഗങ്ങളുടെ ഒരു കുത്തൊഴുക്ക് തന്നെയും ഈ സീരീസിൽ നിങ്ങളെയും കാത്തുണ്ട്. മുകളിൽ സൂചിപ്പിച്ച ഭാഗത്ത് നിന്നും താല്പര്യം തോന്നുന്നില്ലെങ്കിൽ എഴുത്ത് ഒഴിവാക്കി ഒന്ന് രണ്ട് എപ്പിസോഡ് കണ്ട് സ്വയം ഒരു തീരുമാനത്തിൽ എത്താനും നിർദ്ദേശിക്കുന്നു. കൂടുതൽ പറഞ്ഞ് രസം കളയുന്നില്ല, കഴിയുമെങ്കിൽ കാണാൻ ശ്രമിക്കുക, നല്ലൊരു അനുഭവം ഉറപ്പ് നൽകുന്നു.

Verdict : Must Watch

DC Rating : 90/100

487. Vice (2018)

Director : Adam Mckay

Genre : Biography

Rating : 7.1/10

Country : USA

Duration : 132 Minutes

🔸"Beware The Quiet Man. For While Others Speak He Watches. And While Others Act, He Plans. And When They Finally Rest....He Strikes" ഈ വരികളോട് കൂടിയാണ് ക്രിസ്റ്റിയൻ ബെയ്ൽ നായകനായ വൈസ് എന്ന ബയോഗ്രഫിക്കൽ ഡ്രാമാ ചിത്രം ആരംഭിക്കുന്നത്. തുടർന്നുള്ള രണ്ട് മണിക്കൂർ സമയം ഏറെക്കുറെ ഈ വാക്കുകളുടെ ദ്രിശ്യാവതരണമാണ്. അധികം ബഹളങ്ങളോ വികാര വിക്ഷോഭങ്ങളോ ഇല്ലാത്ത ഡിക്ക് ചെനി എന്ന വ്യക്തി കാത്തിരിക്കുകയാണ്, അവസരത്തിന് വേണ്ടി, മറ്റുള്ളവർ മുന്നേ കടക്കുമ്പോഴും, വിരലുകൾ എല്ലാം തനിക്കെതിരെ തിരിയുമ്പോഴും, ചോദ്യങ്ങൾ അനവധി ഉയരുമ്പോഴും ആ കാത്തിരിപ്പ് തുടരുന്നു, ശെരിയായ നിമിഷത്തിന് വേണ്ടി, ശെരിയായ അവസരത്തിന് വേണ്ടി. ഒടുവിൽ ആ അവസരം കൈവെള്ളയിൽ എത്തുമ്പോൾ അവിടെയാണ് ചെനി വെളിച്ചത്തിലേക്ക് വരുന്നത്.

🔸"നിങ്ങൾ കേൾക്കാൻ ആഗ്രഹിക്കാത്ത, പ്രതീക്ഷിക്കാത്ത, ഭയപ്പെടുന്ന കാര്യങ്ങൾ പോലും നിങ്ങളെ പ്രീതി പെടുത്തും വിധം, കാതിന് കുളിർമ നൽകും രീതിയിൽ അവതരിപ്പിക്കാൻ അയാൾക്ക് കഴിയും, അവിടെയാണ് അയാൾ വ്യത്യസ്തനാവുന്നത്, അവിടെയാണ് അയാൾ ജയിക്കുന്നത്" ഡിക്ക് ചെനി എന്ന നമ്മുടെ കേന്ദ്ര കഥാപാത്രത്തെ പറ്റി സിനിമയിലെ മറ്റൊരു കഥാപാത്രം പറയുന്ന വരികളാണിത്. അത് എത്രമേൽ ശരിയാണെന്ന് ഈ സിനിമ കഴിയുമ്പോഴേക്ക് നിങ്ങൾക്ക് മനസിലായിരിക്കും, തങ്ങൾക്ക് നേരെ വെല്ലുവിളി ഉയർത്തിയ ഇറാഖിനെയും സദാമിനെയും പൂട്ടാൻ, അണികൾ എല്ലാവരും എതിർത്ത് നിന്ന സമയത്ത് പോലും എത്ര ലളിതമായാണ് പ്രസിഡന്റ് ബുഷിനോട് ചെനി കാര്യം അവതരിപ്പിക്കുന്നത് എന്ന് ആ രംഗം കണ്ടവർക്ക് മനസിലാവും. ഇതൊക്കെയാണ് വൈസ് എന്ന ചിത്രം, അത്രയൊന്നും പ്രശസ്തി ലഭിച്ചിട്ടില്ലാത്ത ഡിക്ക് ചെനി എന്ന അമേരിക്കയുടെ ഏറ്റവും ഇരുണ്ട കാലഘട്ടത്തിലെ വൈസ് പ്രെസിഡന്റിന്റെ ജീവിത കഥ.

🔸അറുപതുകളിലാണ് ചിത്രം ആരംഭിക്കുന്നത്, അതായത് ഡിക്ക് ചെനി വൈറ്റ് ഹൌസിന്റെ പടികൾ ചവിട്ടി കയറുന്നതിനും, പ്രെസിഡന്റുമാരുടെ വിശ്വസ്ത സഹചാരി ആവുന്നതിനും വർഷങ്ങൾക്ക് മുന്നേ. ലഹരി ഉപയോഗവും കയ്യിലിരിപ്പും എല്ലാം കൊണ്ട് പഠിത്തം അവസാനിച്ചിടത്ത് നിന്ന് ഡിക്ക് ചെനിയെ നമ്മൾ പരിചയപ്പെടുമ്പോൾ ലിൻ അയാളുടെ കൂടെ തന്നെയുണ്ട്. ഭാര്യ എന്നതിനേക്കാൾ ശക്തി സ്രോതസ്സ് എന്നൊക്കെ വിശേഷിപ്പിക്കാവുന്ന അവതാരമാണ് ലിൻ ചെനി, ഡിക്ക് ചെനിയുടെ ജീവിതത്തിൽ. ഈ ബന്ധവും മനോഹരമാം വിധം പല കൈവഴികളിലൂടെ ഒഴുകി വേറിട്ടൊരു ലക്ഷ്യസ്ഥാനത്ത് എത്തിച്ചേരുന്നുണ്ട് ഈ ചിത്രത്തിൽ.

🔸മുകളിൽ സൂചിപ്പിച്ച അറുപതുകളിലെ ലൈൻ മാൻ ജീവിതത്തിൽ നിന്നും ജോർജ് ബുഷ് ഭരണകാലത്ത് വൈസ് പ്രസിഡന്റ് സ്ഥാനം വരെ എത്തിയ ചെനിയുടെ യാത്രയാണ് ഈ ചിത്രം. ഈ യാത്രയിൽ അമേരിക്കയുടെ ചരിത്രത്തിലെ പല നിർണ്ണായക സംഭവങ്ങളും പാത്രമായി മാറുന്നുണ്ട്. ഭരണത്തിനെ പിടിച്ചുലച്ച വാട്ടർഗേറ്റ് സംഭവം, സ്വവർഗ്ഗ വിവാഹ വിവാദം, വേർൾഡ് ട്രേഡ് സെന്റർ ആക്രമണം, ഇറാക്കിന്റെ വീഴ്ച, റിപ്ലബിക്കൻ പാർട്ടികളുടെ തിരിച്ചുവരവ്, അൽ ക്വേയ്‌ദയും ആയുള്ള യുദ്ധം, സദ്ദം ഹുസ്സൈൻ, ബിൻ ലാദൻ, ISIS തുടങ്ങിയ വിഷയങ്ങളെല്ലാം ചിത്രത്തിന്റെ നിർണ്ണായക ഭാഗമായി മാറുന്നുണ്ട്. ഇവയെല്ലാം വ്യക്തിപരമായും ഔദ്യോഗികപരമായും ചെനി എന്ന വ്യക്തിയെ ഏതൊക്കെ രീതിയിൽ സ്വാധീനിച്ചു എന്നും ചിത്രം മനോഹരമായി പറയുന്നുണ്ട്.

🔸വേഷ രൂപ ഭാവ മാറ്റങ്ങളിലൂടെ തന്റെ ആരാധകരെയും പ്രേക്ഷകരെയും എല്ലാം അത്ഭുതപ്പെടുത്താറുള്ള ക്രിസ്റ്റിയൻ ബെയ്‌ലിന്റെ ഈ കീഴ്വഴക്കത്തിനുള്ള ഏറ്റവും പുതിയ ഉദാഹരണമാണ് വൈസ് എന്ന ചിത്രത്തിലെ കഥാപാത്രം. കഥാപാത്രം അർഹിക്കുന്നതെല്ലാം അദ്ദേഹം നൽകിയിട്ടുണ്ടെങ്കിലും ഏറ്റവും ഇഷ്ടം തോന്നിയത് വ്യക്തിപരമായി ആമി ആഡംസിന്റെ കഥാപാത്രത്തോടാണ്. എല്ലാ രീതിയിലും നായകനോട് തുല്യം നിൽക്കുന്ന ഈ കഥാപാത്രം ചിത്രത്തിന്റെ ഹൈലൈറ്റുകളിൽ ഒന്നാണ്. ഇവർക്ക് പുറമെ സ്റ്റീവ് കാറൽ, ജോർജ്ജ് ബുഷായി സാം റോക്ക്വെൽ (സ്ക്രീൻ ടൈം കുറഞ്ഞുപോയി) എന്നിവരും ചിത്രത്തിൽ പ്രത്യക്ഷപ്പെടുന്നുണ്ട്. നാഴികയ്ക്ക് നാല്പത് വട്ടം അമേരിക്ക ദി ഗ്രെറ്റസ്റ്റ് കൺട്രി ഇൻ ദി വേർൾഡ് എന്ന വാചകം പറഞ്ഞത് ഒഴിവാക്കിയാൽ പ്രകടനം കൊണ്ടും അവതരണം കൊണ്ടും കണ്ടിരിക്കേണ്ട ചിത്രങ്ങളിൽ ഒന്നാണ് വൈസ്, തീർച്ചയായും നല്ലൊരു സിനിമാ അനുഭവം.

Verdict : Very Good

DC Rating : 80/100

486. Widows (2018)

Director : Steve McQueen

Genre : Heist

Rating : 7.4/10

Country : USA

Duration : 128 Minutes

🔸വളരെ പ്രശസ്തനായ ഒരു കവർച്ചക്കാരനാണ് ഹാരി റോളിംഗ്‌സ്, അയാളുടെ കയ്യാളുകളാണ് ഈ വിഷയത്തിൽ അപാരമായ കഴിവുകളുള്ള ഫ്ളോറെക്, ജിമ്മി, കാർലോസ് തുടങ്ങിയവർ. അങ്ങനെ കവർച്ചകളിൽ നിന്നും കവർച്ചകളിലേക്ക് കടന്ന് പോയിക്കൊണ്ടിരുന്ന സംഘത്തിന്റെ ഒരു ശ്രമം ദുരന്തമായി കലാശിക്കുന്നതും, ഇവർ തുടങ്ങി വെച്ച ദൗത്യം പൂർത്തീകരിക്കുന്നതിനായി ഇവരുടെ ഭാര്യമാർ കടന്നു വരേണ്ടി വരുന്നതും, അവർ നേരിടേണ്ടി വരുന്ന തടസങ്ങളും മറ്റുമൊക്കെയാണ് ചിത്രത്തിന്റെ കഥ. മുകളിൽ ചേർത്തിരിക്കുന്ന കഥാംശം സൂചിപ്പിക്കുന്നത് പോലെ തന്നെ ഒരു ഹെയ്സ്റ്റ് മൂവിയാണ് വിഡോസ്.

🔸ഹങ്കർ, ഷെയിം, 12 ഇയേഴ്സ് എ സ്ലെവ് തുടങ്ങിയ കിടിലോൽക്കിടില സിനിമകളുടെ അമരക്കാരനായ സ്റ്റീവൻ മക്വീൻ ആണ് ഈ ചിത്രത്തിന്റെ അമരത്ത്, ഈ ഒരു കാരണം ഒന്ന് മാത്രം മതിയായിരുന്നു വിഡോസ് എന്ന ചിത്രത്തിന് വേണ്ടി കാത്തിരിക്കാൻ. സ്‌ക്രീനിന് മുന്നിൽ ആണെങ്കിൽ വിയോള ഡേവിസ്, മിഷേൽ റോഡ്രിഗസ്, ഡാനിയേൽ കാലുയ, എലിസബേത് ഡെബിക്കി, ലിയാം നീസൺ, കോളിൻ ഫെറിൽ, റോബർട്ട് ഡ്യൂവൽ തുടങ്ങി പ്രതിഭകളുടെ സംഗമവും. ഇനി അതും പോരെങ്കിൽ സംഗീത വിഭാഗം സാക്ഷാൽ ഹാൻസ് സിമ്മെറും. തിയേറ്റർ റിലീസ് ഇന്ത്യയിൽ ഇല്ലാത്തതിനാൽ ഡിവിഡിക്ക് വേണ്ടി ഏറ്റവും കാത്തിരുന്ന ചിത്രം കൂടി ആയിരുന്നു വിഡോസ്. ഹെസ്റ്റ് ചിത്രങ്ങളോടുള്ള താല്പര്യവും കാണാൻ പ്രേരിപ്പിക്കുന്ന മറ്റൊരു ഘടകം ആയിരുന്നു.

🔸ചിത്രത്തിന്റെ നല്ല വശങ്ങളിലേക്ക് ആദ്യം ശ്രദ്ധ കൊടുക്കുക ആണെങ്കിൽ ആദ്യമേ തന്നെ സംവിധായകന് ഒരു കയ്യടി കൊടുക്കേണ്ടി വരും, തന്റെ മികച്ച ഫിൽമോഗ്രാഫിയിലേക്ക് ഒരു നല്ല ചിത്രം കൂടി ചേർത്തു എന്നതിനോടൊപ്പം തന്നെ ആ ചിത്രത്തിന് അർഹിച്ച പ്രാധാന്യവും മികവും എല്ലാം പകർന്നു കൊടുത്തു എന്നിടത്താണ് മാക്ക്വീൻ വിജയിക്കുന്നത്. ഇതിനോടൊപ്പം മികച്ച പ്രകടനം പുറത്തെടുത്ത വിയോള ഡേവിസും പ്രത്യേക പരാമർശം അർഹിക്കുന്നുണ്ട്. റോബർട്ട് ഡ്യുവൽ എന്ന നടനോടുള്ള ഇഷ്ടം ഗോഡ്ഫാദറും, അപോകലിപ്സ് നൗവും വരെ നീണ്ട് നിൽക്കുന്നതാണ് അതിനാൽ തന്നെ അദ്ദേഹത്തെ ഈ ചിത്രത്തിൽ കാണാൻ കഴിഞ്ഞതിൽ സന്തോഷം, അദ്ദേഹത്തിന്റെ കഥാപാത്രവും നന്നായിരുന്നു.

🔸കൂടുതൽ സ്പോയ്ലറിലേക്ക് കടക്കുന്നില്ലെങ്കിലും ഒരു കാര്യം പറയാം, ആദ്യ ആക്റ്റ് മുതൽക്കേ തന്നെ ചിത്രം കാഴ്ചക്കാരനെ കയ്യിൽ എടുത്തിരിക്കും, അവിടെ നിന്നും പലയിടങ്ങളിലും ബ്രൂട്ടൽ ആയ രീതിയിൽ മുന്നേറുന്ന ചിത്രം ഒരു നിമിഷം പോലും ബോറടിപ്പിക്കുകയില്ല എന്ന് മാത്രമല്ല പിടിച്ചിരുത്തുകയും ചെയ്യും. ഇനി മോശം എന്ന് അനുഭവപ്പെട്ട കാര്യം ആണെങ്കിൽ ഒരു ശരാശരി ഹെയ്‌സ്റ്റ് ചിത്രം കടന്ന് പോവുന്ന വഴികളിലൂടെ തന്നെ, ആ ബ്ലൂ പ്രിന്റ് ഏറെക്കുറെ അത് പോലെ തന്നെ പകർത്തി മുന്നേറുന്ന ചിത്രമാണ് വിഡോസ്, എന്നാൽ ഇത് ഒരിക്കലും ആസ്വാദനത്തിന് പ്രശനം സൃഷ്ടിക്കില്ല എന്നതാണ് വ്യക്തിപരമായ അനുഭവം.

🔸ഇനി കാണണമോ വേണ്ടയോ എന്നതാണ് ചോദ്യമെങ്കിൽ, തീർച്ചയായും കാണാൻ നിർദ്ദേശിക്കും, കാരണം നല്ലൊരു ചിത്രം തന്നെയാണ് വിഡോസ്, ഒരുപക്ഷെ കഴിഞ്ഞ വർഷത്തെ ഏറ്റവും മികച്ച ഹെയ്‌സ്റ്റ് ചിത്രം. ആദ്യ നിമിഷങ്ങളിൽ തന്നെ അപ്രതീക്ഷിതമായ ചില സംഭവങ്ങൾ പ്രേക്ഷകന് നൽകി ശ്രദ്ധ പിടിച്ചെടുക്കുന്നിടത്ത് നിന്നും രണ്ട് മണിക്കൂർ സമയം അത് നഷ്ടപ്പെടാതെ കണ്ടിരിക്കാനുള്ള വകയെല്ലാം ചിത്രം നൽകുന്നുണ്ട്. പ്ലോട്ടിൽ നിന്നും പ്രതീക്ഷിച്ച സ്ഥിരം ഫെമിനിസ്റ്റ് സഹതാപ രീതിയിലേക്ക് ചിത്രം ഒരിടത്തും പോകുന്നില്ല, എന്ന് മാത്രമല്ല വ്യക്തമായ മോട്ടിവേഷനുകൾ കഥാപാത്രങ്ങൾക്ക് നൽകി അവരെ നമുക്ക് മുന്നിലേക്ക് വിട്ടു തരികയാണ് സംവിധായകൻ. ചുരുക്കി പറഞ്ഞാൽ വ്യക്തിപരമായി കാത്തിരിപ്പുകൾ വെറുതെ ആയില്ല, ഇഷ്ട ജെനെറിൽ മറ്റൊരു നല്ല ചിത്രം കൂടി കൂട്ടി ചേർക്കാനായതിൽ വളരെ സന്തോഷം.

Verdict : Very Good

DC Rating : 84/100

485. Boy Erased (2019)

Director : Joel Edgerton

Genre : Drama

Rating : 7/10

Country : USA

Duration : 115 Minutes

🔸പൊതുവെ ഈ ഗേ അല്ലെങ്കിൽ ഹോമോ സെക്ഷുവൽ വിഷയങ്ങളെ പറ്റി സംസാരിക്കുമ്പോൾ, സിനിമകളെ പറ്റി ആണെങ്കിൽ പോലും ഒരു തരം അറപ്പോടുകൂടി മുഖം തിരിക്കുന്ന അനവധി ആളുകൾ ഇന്നും നമ്മുടെ ഇടയിലുണ്ട്. ഈ വക കാര്യങ്ങൾ എല്ലാം തന്നെ ഒരു മനുഷ്യന്റെ വ്യക്തി സ്വാതന്ത്ര്യം ആണെന്നതും ഭൂമിയിൽ മനുഷ്യനായി പിറന്ന, നമ്മുടെ അറിവ് വെച്ചുള്ള ഒരേയൊരു ജന്മം അത് അവനവന് തോന്നുന്ന രീതിയിൽ ജീവിക്കാൻ അർഹത ഉണ്ടെന്ന വസ്തുത പൊതുവെ സദാചാരത്തിലും ഇത് പോലുള്ള സ്വയം പ്രഖ്യാപിത അസഹിഷ്ണുതയിലും നമുക്ക് ചുറ്റുമുള്ള സംരക്ഷക സദാചാര കൂട്ടങ്ങൾ മാറ്റിയെഴുതാൻ ശ്രമിക്കാറാണ് പതിവ്. ബോയ് ഇറേസ്ഡ് എന്ന ഈ ചിത്രവും മുകളിൽ സൂചിപ്പിച്ചത് പോലെ ചില മാറ്റിയെഴുതൽ ശ്രമങ്ങളാണ്.

🔸കഴിഞ്ഞ വർഷം പുറത്തിറങ്ങിയ ദി മിസ് എഡ്യൂകേഷൻ ഓഫ് കാമറോൺ പോസ്റ്റ് എന്ന ചിത്രവുമായി ചെറിയ ചില സാമ്യതകൾ വിഷയത്തിലും അവതരണത്തിലും ഈ ചിത്രം പുലർത്തുന്നുണ്ട്. അത് എന്ത് തന്നെ ആയാലും ഈ ചിത്രത്തിലെ കേന്ദ്ര കഥാപാത്രം ആണ് ജേർഡ് എമോൺസ്, ഉവ്വ് അയാൾ ഒരു ഗേ ആണ്. അയാളുടെ വാക്കുകളിൽ പറയുക ആണെങ്കിൽ താൻ ഇങ്ങനെ ഒക്കെ ആയതിന് പ്രത്യേകിച്ച് കാരണങ്ങൾ ഏതുമില്ല, ആ കാരണങ്ങൾ അറിയാൻ അയാൾക്ക് ആഗ്രഹമോ താല്പര്യമോ ഇല്ല, പക്ഷെ ഇതാണ് താൻ. ഇതിൽ തനിക്കോ തന്റെ ചുറ്റുമുള്ളവർക്കോ ഒന്നും ചെയ്യാനില്ല എന്നതാണ് സത്യമെന്നും ജേർഡിന് അറിയാം, ഇത് തന്റെ മാതാപിതാക്കൾ ഏത് രീതിയിൽ ഉൾക്കൊള്ളും എന്നത് മാത്രമാണ് അയാളുടെ പേടി.

🔸ജേർഡിന്റെ മാതാപിതാക്കളുടെ കാര്യം ആണെങ്കിൽ, മാർഷൽ ഈമോൺസ് ആണ് ജേർഡിന്റെ അച്ഛൻ. ഒരു സാധു മനുഷ്യനാണ് മാർഷൽ, കാർ ഡീലർ ആയ ടിയാൻ ഒരു കടുത്ത ഈശ്വര വിശ്വാസിയും മത പണ്ഡിതനും പള്ളിയിലെ പ്രാസംഗികനും എല്ലാമാണ്. മതത്തിന്റെയും വിശ്വാസത്തിന്റെയും ബലത്തിൽ തന്റെ മകൻ സഞ്ചരിക്കുന്ന വഴികൾ തെറ്റാണ് എന്ന് അയാൾക്ക് ഉറച്ച ബോധ്യമുണ്ട്, അതിനാൽ തന്നെയാണ് ഒരു മാറ്റത്തിന് വേണ്ടി അയാൾ മകനെ നിർബന്ധിക്കുന്നതും പുതിയ ചില തീരുമാനങ്ങൾക്കായി അവനെ പ്രേരിപ്പിക്കുന്നതും. ഒരു പരിധി വരെ സ്വന്തം മകനെക്കാളും അവന്റെ സ്ഥിതിയെക്കാളും മാർഷൽ പ്രാധാന്യം കൊടുക്കുന്നത് താൻ ഉയർത്തി പിടിച്ച വിശ്വാസങ്ങൾക്കും, തനിക്ക് തന്നെ ഏൽക്കേണ്ടി വന്ന മാനസിക ആഘാതത്തിനുമാണ്.

🔸നാൻസി ഈമോൺസ് ആണ് ജേർഡിന്റെ അമ്മ, മർഷലിനെ പോലെ തന്നെ മറ്റൊരു സാധുജീവൻ. മകനെ കുറിച്ചുള്ള ഞെട്ടിച്ച തിരിച്ചറിവിൽ ഭർത്താവിന്റെ തീരുമാനത്തിന് പിന്തുണ നൽകേണ്ടി വരികയാണ് നാൻസിക്ക്, ഇതിനപ്പുറം മകനോട് നിറഞ്ഞ സ്നേഹം നിലനിർത്തുന്ന ഏതൊരമ്മയുടെയും പ്രതീകം കൂടിയാണ് നാൻസി. ഈ വസ്തുത ചിത്രം അവസാനത്തോട് അടുക്കുമ്പോൾ മനസിലാകും, ചിത്രത്തിലെ ഏറ്റവും ശക്തമായ ഡയലോഗിലൂടെ നാൻസി തന്റെ വികാരങ്ങളും വിചാരങ്ങളും തുറന്ന് കാട്ടുന്നുണ്ട്. എന്ത് തന്നെ ആയാലും മാതാപിതാക്കളുടെ ആഗ്രഹത്തിനായി ഒരു പരിവർത്തനത്തിന് വേണ്ടി ജേർഡ് ഇറങ്ങി തിരിക്കുന്നിടത്ത് ചിത്രം ആരംഭിക്കുകയാണ്.

🔸ബോയ് ഇറെയ്സ്ഡ് എന്ന ചിത്രം നിങ്ങളെ നൊമ്പരപ്പെടുത്തും, ചിന്തിപ്പിക്കും, കഥാപാത്രം കടന്ന് പോവുന്ന വേദനകളിലേക്ക് നിങ്ങളെ വലിച്ചിടും, ഒടുവിൽ ചിത്രം അവസാനിക്കുമ്പോൾ സങ്കടത്തിന്റെയും സന്തോഷത്തിന്റെയും വേദനയുടെയും ആകെത്തുക ആയൊരു ചിരി നിങ്ങളിൽ സൃഷ്ടിക്കുകയും ചെയ്യും, ഇതിൽ യാതൊരു സംശയവും എനിക്കില്ല. ലൂക്കാസ് ഹെഡ്ജസ്, നിക്കോൾ കിഡ്മാൻ, റസ്സൽ ക്രോ, ജോയേൽ എഡ്ഗർട്ടൻ തുടങ്ങിയവരുടെ ശക്തമായ പ്രകടനങ്ങൾ, ശക്തമായ കഥയും കഥാപാത്രങ്ങളും, മികച്ച മ്യുസിക്കും എല്ലാം ചേരുമ്പോൾ ബോയ് ഇറെയ്സ്ഡ് കണ്ടിരിക്കേണ്ട ചിത്രങ്ങളിൽ ഒന്നായി മാറുകയാണ്. ഒരു കാര്യം കൂടി ചിത്രം കൈകാര്യം ചെയ്യുന്ന വിഷയവും, ഒരു രംഗവും ചെറുപ്രായക്കാർക്ക് ബുദ്ധിമുട്ട് ആയേക്കാം. കഴിയുമെങ്കിൽ കാണാൻ ശ്രമിക്കുക, നല്ലൊരു അനുഭവം ഉറപ്പ് നൽകുന്നു.

Verdict : Very Good

DC Rating : 80/100

484. Uri The Surgical Strike (2019)

Director : Aditya Dhar

Genre : Action

Rating : 9/10

Country : India

Duration : 138 Minutes

🔸പൊതുവെ വളരെ അപൂർവമായി മാത്രം കാണാറുള്ള ഒരു സിനിമ വിഭാഗം ആയിരുന്നു ഹിന്ദി സിനിമകൾ. ഷാരൂഖ് ഖാൻ, അമീർ ഖാൻ തുടങ്ങിയ ഖാന്മാരുടെ ചില ചിത്രങ്ങൾ മാറ്റി നിർത്തിയാൽ ഈ മേഖലയിൽ പരിചയം വളരെ കുറവ് ആയതിനാലും ഭാഷ ഒരു വലിയ കടമ്പ ആയി തോന്നിയതിനാലും നല്ലതെന്ന് കേട്ട ചിത്രങ്ങൾ പോലും ഒഴിവാക്കാറാണ് പതിവ്. ഈ ഒരു ഒഴിവാക്കൽ പക്രിയയിൽ പെട്ട് പോകുമായിരുന്ന ചിത്രങ്ങളിൽ ഒന്നായി മാറിയേനെ ഉറി ദി സർജിക്കൽ സ്ട്രൈക്ക് എന്ന ഈ ചിത്രവും, എന്തിരുന്നാലും ചില കാരണങ്ങളാൽ ആദിത്യ ധർ എന്ന നവാഗത സംവിധായകന്റെ ഈ ചിത്രത്തിന്റെ കാര്യത്തിൽ പതിവുകൾ തെറ്റാനായിരുന്നു വിധി. മുകളിൽ സൂചിപ്പിച്ച പരിമിതമായ അറിവ് കാരണം തന്നെ പ്രതീക്ഷകൾ വളരെ കുറവായിരുന്നു, അതിനാലാവണം കണ്ട് കഴിയുമ്പോൾ അടുത്തിടെ കണ്ട നല്ല ചിത്രങ്ങളിൽ ഒന്നായി ഈ ചിത്രം മാറുന്നത്.

🔸വലിയ വലിച്ച് നീട്ടലുകൾ ഏതുമില്ലാതെ നേരിട്ട് യുദ്ധമുഖത്തേക്കാണ് ചിത്രം കടന്ന് ചെല്ലുന്നത്, കാശ്മീരിൽ ഇന്ത്യൻ സൈന്യം നേരിട്ട ഏറ്റവും രൂക്ഷമായ വെല്ലുവിളികളിൽ ഒന്നായിരുന്നു ഉറി ആർമി ബേസിൽ 2016ൽ അരങ്ങേറിയ മിലിറ്റന്റ് ആക്രമണം. ഈ ആക്രമണ പരിപാടിക്ക് ഒരു വർഷം മുന്നെയാണ് ചിത്രം ആരംഭിക്കുന്നത്, ദി സെവൻ സിസ്റ്റേഴ്സ് എന്ന് പേരിട്ട് തരം തിരിച്ച ഈ ഭാഗം മണിപ്പൂരിലെ ഉൾനാടൻ പ്രവിശ്യകളിൽ ഒന്നിലാണ് അരങ്ങേറുന്നത്. പട്ടാളക്കാരെയും വഹിച്ച് കൊണ്ട് കാട്ടിനുള്ളിൽ കൂടി കടന്ന് പോവുന്ന നാല് ആർമി വാഹനങ്ങൾ ക്രൂരവും നിഷ്ട്ടൂരവുമായ ഗറില്ലാ ആക്രമണത്തിന് ഇരയാവുകയാണ്. തുടർന്നങ്ങോട്ടുള്ള രണ്ടര മണിക്കൂർ നേരത്തെ സിനിമയ്ക്കുള്ള ടോൺ ഈ ആദ്യ രംഗത്തിലൂടെ തന്നെ സംവിധായകൻ സൃഷ്ടിച്ചെടുക്കുന്നുണ്ട്.

🔸ഹോളിവുഡ് സിനിമകളിലെ യുദ്ധ ചിത്രങ്ങളുമായി തട്ടിച്ച് നോക്കുമ്പോൾ സ്കെയിൽ ഒരു പ്രശ്നമാവാം എങ്കിലും അവതരണത്തിലും മികവിലും ഈ ചിത്രങ്ങളിൽ പലതിനോടും കിട പിടിക്കുന്നുണ്ട് ഉറി ദി സർജ്ജിക്കൽ സ്ട്രൈക്ക് എന്ന ചിത്രം. പട്ടാളക്കാരുടെ ജീവിതത്തെ അർഹിച്ച ഗൗരവത്തോടെയും ബഹുമാനത്തോടെയും പ്രാധാന്യത്തോടെയും കൂടി ചിത്രം അവതരിപ്പിക്കുന്നുണ്ട് എന്നതും മേന്മ തന്നെ, ഒരുപക്ഷെ ഒരു പടി കൂടി കടന്ന് ചെന്നാൽ ഈ വിഭാഗത്തിൽ ഇന്ത്യയിൽ പുറത്തിറങ്ങിയ മികച്ച ചിത്രം എന്നും വിശേഷിപ്പിക്കാം ഉറിയെ. അമാനുഷിക പരിവേഷം ഒഴിവാക്കി കൊണ്ട്, ഗ്രൗൻഡഡ്‌ ആയ രീതിയിൽ കഥാപാത്രങ്ങളെ അടുപ്പം തോന്നിക്കും വിധം അവതരിപ്പിച്ച നവാഗതനായ സംവിധായകന്റെ കയ്യടക്കവും പ്രശംസ അർഹിക്കുന്നുണ്ട്.

🔸ഉറിയിൽ വെച്ച് ഏറ്റ തിരിച്ചടിക്ക് സർജ്ജിക്കൽ സ്ട്രൈക്ക് എന്ന രീതിയിൽ കണക്കിന് പകരം ചോദിക്കുന്ന സംഭവങ്ങൾ എല്ലാം കാഴ്ചക്കാരനെ ആവേശം കൊള്ളിക്കുന്ന രീതിയിൽ ഒട്ടും മോശമാക്കാതെ പൾസിനോട് ചേർന്ന രീതിയിൽ ചിത്രത്തിൽ കാണാനാവും. സിനിമയുടെ കഥയിലേക്ക് കൂടുതൽ കടന്ന് ചെല്ലുന്നില്ല, കാരണം പരിമിതമായ അറിവ് വെച്ച് കണ്ടനുഭവിക്കേണ്ട ഒന്നാണ് ഈ ചിത്രം. അത് മാത്രമല്ല വാക്കുകളിൽ കൂടിയോ എഴുത്തിലൂടെയോ വിവരിക്കാൻ കഴിയാത്ത വ്യത്യസ്തമായ ഒരനുഭവം കൂടിയാണ് ഉറി ദി സർജിക്കൽ സ്ട്രൈക്ക്. യഥാർത്ഥ സംഭവങ്ങളെ കുറിച്ച് ധാരണയില്ലെങ്കിൽ കൂടിയും ചരിത്രത്തിലെ വളച്ചുകെട്ടില്ലാതെ അവതരിപ്പിച്ചു എന്നൊരു അഭിപ്രായവും കേൾക്കാനിടയായി, പല റിയൽ സ്റ്റോറി ഹിസ്റ്റോറിക്കൽ ചിത്രങ്ങളും വീണുപോവുന്ന ഈ കടമ്പയിൽ ഉറി വിജയം കൈവരിച്ചു എങ്കിൽ അതിലും സന്തോഷം.

🔸പ്രശസ്തരായ താരങ്ങൾ ഏതുമില്ലാത്ത ഒരു 'ചെറിയ' ചിത്രമാണ് ഉറി ദി സർജ്ജിക്കൽ സ്ട്രൈക്ക്. അവസാനമായി കണ്ട ഹിന്ദി ചിത്രങ്ങളിൽ ഒന്ന് താരങ്ങളുടെ കുത്തൊഴുക്ക് തന്നെ ഉണ്ടായ 'ഹാപ്പി ന്യു ഇയർ' ആയതിനാലും ആ അനുഭവം വിവരണാതീതമാം വിധം ഭീകരം ആയതിനാലും ഈ ചിത്രം ഒരത്ഭുതം തന്നെ ആയിരുന്നു, ഒരു ഇൻഡസ്ട്രിയുടെ ഹൈ, ലോ പോയിന്റ് കാണാൻ സാധിച്ചു. വിഹാൻ എന്ന കഥാപാത്രമായി വിക്കി കൗശൽ നിറഞ്ഞ് നിന്നപ്പോൾ പരേഷ് റാവൽ, രജത് കപൂർ, യാമി ഗൗതം, മോഹിത് റൈന എന്നിവരും മറ്റ് കഥാപാത്രങ്ങളായെത്തി, എല്ലാവരും മികച്ച പ്രകടനം തന്നെ കാഴ്ചവെക്കുകയും ചെയ്തു. ഉറി ഒരു നല്ല ചിത്രമാണ് അതിൽ യാതൊരു സംശയവും വേണ്ട, കൊട്ടിഘോഷിച്ച് എത്തി പ്രതീക്ഷകൾ വെള്ളത്തിൽ വരച്ച വര പോലാവുന്ന ചിത്രങ്ങൾക്കിടയിൽ ഈ ചിത്രം വേറിട്ട നിൽക്കുന്നുമുണ്ട്. കഴിയുമെങ്കിൽ കാണാൻ ശ്രമിക്കുക, നഷ്ടമാവില്ലെന്ന് ഉറപ്പ്.

Verdict : Very Good

DC Rating : 84/100

483. Glass (2019)

Director : M Night Shyamalan

Genre : Superhero

Rating : 7/10

Country : USA

Duration : 128 Minutes

🔸ശ്യാമളേട്ടന്റെ ഈ അൺബ്രെകബിൽ, സ്പ്ലിറ്റ് കംബൈൻഡ് ഉദ്യമം പാതിയോട് അടുക്കുമ്പോൾ ഒരു രംഗമുണ്ട്, പ്രധാന കഥാപാത്രങ്ങളിൽ ഒന്ന് ബ്രൂസ് വില്ലിസിന്റെ ഡേവിഡ് ഡൺ എന്ന കഥാപാത്രത്തോട് "How Will You Chose Who's Right And Who's Wrong ?? How Do You Get To Choose ?? Convince Me David" എന്ന ഡയലോഗ്. ഈ ഡയലോഗ് കേട്ട മാത്രയിൽ കഥാപാത്രം ഒരു നിമിഷം പതറി പോവുന്നുണ്ട്. ഈ രംഗത്തിൽ ബ്രൂസ് വില്ലിസിന് പകരം സംവിധായകനെ അവിടെ പ്രതിഷ്ട്ടിച്ചാൽ ഏറെക്കുറെ ഗ്ലാസ് എന്ന ചിത്രമാകും. നല്ല വിഭവ സമൃദ്ധമായ ഒരു സദ്യ കയ്യിൽ കിട്ടിയിട്ട് ഇത് എവിടുന്ന് തുടങ്ങണം എന്നറിയാതെ പകച്ചിരിക്കുന്ന ഒരു അവസ്ഥയില്ലേ, ആ അവസ്ഥയാണ് പുള്ളിയിൽ കാണാനായത്, നല്ല കഥാപാത്രങ്ങൾ നല്ല തീം നല്ല അവസരം തുടങ്ങി എല്ലാം ഉണ്ടായിട്ടും ഒരു സങ്കോചം എവിടൊക്കെയോ ശ്യാമളെട്ടനിൽ ഉണ്ടായിരുന്നിരിക്കണം, അത് നന്നായി പ്രതിഫലിക്കുന്നുണ്ട്.

🔸കഥയിലേക്ക് വരിക ആണെങ്കിൽ ഈ ട്രിലോഗിയിലെ ആദ്യ ചിത്രമായ അൺബ്രെകബിൽ കഴിഞ്ഞിട്ട് രണ്ട് പതിറ്റാണ്ടോളം കഴിഞ്ഞിരിക്കുന്നു, ഡേവിഡ് ഡൺ ഇന്നും രഹസ്യമായി കുറ്റകൃത്യങ്ങളോട് പോരാടിക്കൊണ്ട് തന്റെ സാന്നിധ്യം അറിയിക്കുന്നുണ്ട്. സ്പ്ലിറ്റിലെ സംഭവങ്ങൾക്ക് ശേഷം കെവിനും ആ നഗരത്തിൽ തന്നെ വിഹരിക്കുന്നുണ്ട്, അയാൾ ട്രെയിലറിൽ സൂചിപ്പിച്ചത് പോലെ ഒരു കൂട്ടം ചിയർലീഡർ പെൺകുട്ടികളെ തട്ടി കൊണ്ട് പോവുന്നതും ഇത് കാരണം ഡേവിഡുമായി ഒരു നേർ സംഘട്ടനത്തിന് കളമൊരുങ്ങുന്നതും എല്ലാമാണ് ചിത്രത്തിന്റെ കഥ. ഈ പോരിനിടയിലേക്ക് സാമുവൽ ജാക്ക്സണിന്റെ മിസ്റ്റർ ഗ്ലാസും കടന്നുവരുമ്പോൾ കാര്യങ്ങൾ ആകെ കുഴഞ്ഞ് മറിയുകയാണ്. ഈ മൂന്ന് കഥാപാത്രങ്ങളിലൂടെ ഗ്ലാസ് എന്ന ചിത്രത്തിന്റെ കഥ അങ്ങനെയങ് പുരോഗമിക്കുകയാണ്.

🔸കഥയിലേക്കും സന്ദര്ഭങ്ങളിലേക്കും കടക്കുന്നത് ഒഴിവാക്കാം കാരണം ഒരു പരിധി വരെ മിക്ക മേഖലകളിലും ശരാശരി ആയി നിൽക്കുന്ന ചിത്രത്തിന്റെ ശക്തി എന്നത് തന്നെ അപ്രതീക്ഷിതമായ വഴികളിലൂടെ മുന്നേറുന്ന കഥ മാത്രമാണ്. അവ തന്നെ എടുത്ത് പറയുന്നത് ഗുണം ചെയ്യില്ല എന്നതിനാൽ മറ്റ് ചില വസ്തുതകളിലേക്ക് ശ്രദ്ധ കൊടുക്കാം. ഒരു ആവറേജ് ചിത്രമാണ് ഗ്ലാസ്, ഇത് ആദ്യമേ തന്നെ മനസ്സിൽ പറഞ്ഞ് ഉറപ്പിച്ചാൽ കാര്യങ്ങൾ കൂടുതൽ എളുപ്പമായി, ചിത്രം കാണുന്നതിന് മുന്നേ ട്രെയ്ലറിൽ സൂചിപ്പിച്ച പോലെയുള്ള ഇന്റെറാക്ഷെനുകളോ തീപ്പൊരി ഡയലോഗുകളോ സംഘട്ടനങ്ങളോ ഒന്നും ചിത്രത്തിൽ ഇല്ല, ഒരുപാട് പ്രതീക്ഷയോടെ കാത്തിരുന്ന സാമുവൽ ജാക്സണിന്റെ കഥാപാത്രം ചിത്രത്തിന്റെ നല്ലൊരു ഭാഗം സ്‌ക്രീനിൽ വരുന്ന് പോലുമില്ല, ഇതിനോടൊപ്പം തന്നെ ലോജിക് എന്നത് പ്രശ്നമായി മാറുന്നുണ്ട് പലയിടത്തും. ഈ കാരണങ്ങൾ ഒക്കെ ചേർത്ത് ഒരു ശരാശരി ചിത്രമാണ് കാണാൻ പോവുന്നത് എന്ന് മനസ്സിൽ ഉറപ്പിച്ചാൽ വലിയ നഷ്ടം തോന്നില്ല എന്നുറപ്പ്.

🔸മോശം പടമാണോ ഗ്ലാസ് എന്ന് ചോദിച്ചാൽ അതുമല്ല കാരണം നല്ല ചില രംഗങ്ങളും ഐഡിയകളും ചിത്രത്തിൽ ഉണ്ട്, അതും പോരെങ്കിൽ ഒന്ന് ഞെട്ടിക്കാനുള്ള വകുപ്പും ചിത്രത്തിൽ ഉണ്ട്. ഈ അടുത്തിടെ കണ്ട ചിത്രങ്ങളിൽ അപ്രതീക്ഷിതമായ രീതിയിൽ ഞെട്ടിച്ച ചിത്രങ്ങളിൽ ഒന്നാണ് ഗ്ലാസ്, പ്രത്യേകിച്ചും ചില കഥാപാത്രങ്ങളുടെ രീതികളും ചെയ്തികളും ഒക്കെ കണ്ട്. എന്നാൽ ഈ പോസിറ്റിവുകളെ എല്ലാം ഏതെങ്കിലും രീതിയിൽ ബാലൻസ് ചെയ്യുന്ന ചില വസ്തുതകൾ കൃത്യമായ ഇടവേളകളിൽ ചിത്രം തരുന്നുമുണ്ട്. ചിത്രത്തിന്റെ പോസിറ്റിവുകളിൽ ഒന്ന് മക്കാവോയുടെ കെവിൻ എന്ന കഥാപാത്രം തന്നെ, കെവിന്റെ ഇരുപതോളം വ്യക്തിത്വങ്ങളെ കാണാൻ സാധിച്ചു, ബീസ്റ്റിനെയും. ഈ കഥാപാത്രങ്ങൾ എല്ലാം മാറി മറിഞ്ഞ് വരുന്ന സീക്വൻസ് ചിത്രത്തിന്റെ ഹൈലൈറ്റുകളിൽ ഒന്നാണ്. മക്കോവായെ മാറ്റി നിർത്തിയാൽ സാമുവൽ ജാക്ക്സൺ സ്ക്രീൻ ടൈം ലഭിക്കാത്തതിനാൽ സൈഡ് ആയി പോയെന്ന് പറയേണ്ടി വരും.

🔸സ്ഥിരം ശ്യാമളൻ ചിത്രങ്ങളിലേത് പോലെ തന്നെ ഗ്ലാസിലും സർപ്രൈസ് / ട്വിസ്റ്റ് മോമെന്റുകൾ ഉണ്ട്, ഇവയിൽ മോശം എന്ന് തോന്നത്തക്കവണ്ണം ഒന്നും ഇല്ലായിരുന്നെങ്കിലും അവിടെയും 'പ്രതീക്ഷയുടെ അമിതഭാരം' ഒഴിവാക്കുന്നത് ഗുണം ചെയ്യും. കഥാപാത്ര വികസനത്തിനും സാറാഹ് പോൾസണിന്റെ കഥാപാത്രത്തിന് ആവശ്യത്തിൽ അധികം സമയം നൽകിയും ഒക്കെ കടന്ന് പോയ ആദ്യ പകുതിക്ക് ശേഷം വന്ന രണ്ടാം പകുതി, പ്രത്യേകിച്ചും അവസാന മുപ്പത് നാല്പത് മിനുട്ടാണ് ജെയിംസ് മക്കോവയെ മാറ്റി നിർത്തിയാൽ ചിത്രത്തെ ഉയർത്തി പിടിക്കുന്ന ഘടകം. ഇതിനിടെ വലിയ ബഹളമോ കാര്യമോ ആവശ്യമോ ഇല്ലാതെ കാസി കുക് എന്ന സ്പ്ലിറ്റ് കഥാപാത്രവും (ബ്യുട്ടി ആൻഡ് ബീസ്റ്റ്.ജെപിജി) വന്ന് പോവുന്നുണ്ട്. ചുരുക്കി പറയുക ആണെങ്കിൽ പ്രതീക്ഷ നന്നായി കുറച്ച് കാണാൻ കയറിയാൽ എന്റർടെയ്‌ൻമെന്റ്‌ എന്ന രീതിയിൽ ആസ്വദിക്കാവുന്ന ചിത്രമാണ് ഗ്ലാസ്. 

Verdict : Above Average

DC Rating : 62/100

482. Split (2016)

Director : M Night Shyamalan

Genre : Thriller

Rating : 7.3/10

Country : USA

Duration : 113 Minutes

🔸മനോജ് ശ്യാമളൻ എന്ന പേര് കേട്ടാൽ പലർക്കും ചിരി പൊട്ടുന്ന ഒരു കാലം ഉണ്ടായിരുന്നു കുറച്ച് മുൻപ് വരെ, അതിൽ ഒരു പരിധി വരെ കുറ്റം പറയാനും കഴിയില്ല. സിക്സ്ത് സെൻസ് പോലെയൊരു ചിത്രം സംവിധാനം ചെയ്ത് ഓസ്കാർ നോമിനേഷൻ കരസ്ഥമാക്കിയിടത്ത് നിന്നും ദി ലാസ്റ്റ് എയർബെൻഡർ, ആഫ്റ്റർ ഏർത് പോലെയുള്ള ദുരന്തങ്ങളിലേക്ക് തലവെച്ച സംവിധായകൻ ഇത് അർഹിച്ചിരുന്നു എന്നതാണ് സത്യം. അങ്ങനെ ശ്യാമളൻ എന്ന സംവിധായകനിലും, അയാളുടെ ചിത്രങ്ങളിലും പ്രതീക്ഷ ലവലേശം പുലർത്താതിരുന്ന കാലഘട്ടത്തിലാണ് ദി വിസിറ്റ് എന്ന ചിത്രം പുറത്തിറങ്ങുന്നത്, മികച്ചത് എന്ന അവകാശവാദം ഒന്നും ഉണ്ടായില്ലെങ്കിലും ശ്യാമളാൻ ക്യാമ്പിൽ നിന്നും വരുന്ന ബേധപ്പെട്ട എന്തും ആശ്വാസകരം ആയിരുന്നു ആ നാളുകളിൽ. ഈ കാരണങ്ങൾ കൊണ്ട് തന്നെ സ്പ്ലിറ്റ് എന്ന ചിത്രം നിർണായകമായിരുന്നു സംവിധായകന്, അയാൾക്ക് തെളിയിക്കാൻ ഒരുപാട് കാര്യങ്ങൾ ബാക്കി ഉണ്ടായിരുന്നു.

🔸ബഹളങ്ങളിൽ നിന്നും മറ്റ് കുട്ടികളിൽ നിന്നുമൊക്കെ മാറി ഒരു പരിധി വരെ ഏകാകിയായി ജീവിച്ച് പോന്നവളാണ് കാസി കുക്. വളരെ ചെറുപ്പത്തിലേ തന്നെ അച്ഛനെ നഷ്ട്ടപ്പെട്ട കാസിക്ക് അമ്മാവന്റെ പക്കൽ നിന്നും ശാരീരിക പീഡനങ്ങൾ നേരിടേണ്ടി വന്നിട്ടുണ്ട്, ഒരു പരിധി വരെ ഇതാണ് അവളുടെ അന്തർമുഖ സ്വഭാവത്തിന് കാരണവും. അങ്ങനെ കാര്യമായ സംഭവ വികാസങ്ങൾ ഒന്നും ഇല്ലാതെ പൊയ്ക്കൊണ്ടിരുന്ന കാസിയുടെ ജീവിതം ഒരുനാൾ കീഴ്മേൽ മറിയുകയാണ്. അവളെയും രണ്ട് സഹപാഠികളെയും കെവിൻ എന്ന വ്യക്തി തട്ടി കൊണ്ട് പോവുകയാണ്. തങ്ങൾ അകപ്പെട്ടിരിക്കുന്ന അവസ്ഥയുടെ ഭീകരത മൂന്ന് പേർക്കും മനസിലാവുന്നത് കെവിൻ ആരാണെന്നും എന്താണെന്നും ഒരു ഏകദേശ ധാരണ ലഭിക്കുമ്പോഴാണ്.

🔸കെവിൻ ഒരു മാനസിക രോഗിയാണ്, അല്ലെങ്കിൽ അത്തരമൊരു അവസ്ഥയ്ക്ക് അടിമയാണ്. കെവിൻ എന്ന വ്യക്തിക്ക് സ്വന്തമായി ഇരുപത്തി നാലോളം വ്യക്തിത്വങ്ങൾ ഉണ്ട്, അവ ഓരോന്നും വ്യത്യസ്ത സന്ദർഭങ്ങളിൽ മാറിയും മറഞ്ഞും തങ്ങളുടെ സാന്നിധ്യം പ്രകടിപ്പിച്ച് കൊണ്ടേ ഇരിക്കും. ഈ വ്യക്തിത്വങ്ങൾ ചിലപ്പോൾ നിഷ്കളങ്കർ ആയിരിക്കും ഒരു ഉറുമ്പിനെ പോലും നോവിക്കാൻ കഴിയാത്ത വിധം സാധു, മറ്റ് ചിലപ്പോൾ മുന്നിൽ വരുന്ന എന്തിനെയും ഏതിനെയും ഒരു തരം ആക്രമണ മനോഭാവത്തോട് കൂടി വീക്ഷിക്കുന്ന ഒന്നുമാവാം. ഈ ഇരുപത്തി മൂന്ന് വ്യക്തിത്വങ്ങൾക്ക് അപ്പുറം ഇരുപത്തി നാലാമത് ഒന്ന് കൂടി ഉണ്ട്, കേട്ടറിവുകൾ മാത്രമുള്ള ഭീതി ഉണർത്തുന്ന ബീസ്റ്റ് എന്ന ഐറ്റം.

🔸രക്ഷപ്പെടുക എന്നത് ഏറെക്കുറെ അസാധ്യമാണ് കാസിക്കും കൂട്ടുകാർക്കും, അടച്ചിട്ട മുറി എന്നതിനോടൊപ്പം തങ്ങൾ ഇപ്പോൾ നിൽക്കുന്ന സ്ഥലത്തെയും ഭൂമി ശാസ്ത്രത്തെയും കുറിച്ചുള്ള അറിവില്ലായ്മ വലിയ പ്രശനം തന്നെയാണ്, അതിനോടൊപ്പം തങ്ങൾ അടുത്ത നിമിഷം ഇടപഴകാൻ പോവുന്നത് കെവിനിന്റെ ഏത്, ഇങ്ങനെയുള്ള വ്യക്തിത്വത്തോടാണ് എന്ന ഉൽക്കണ്ഠയും കാര്യങ്ങൾ ഒട്ടും എളുപ്പമാവുന്നില്ല, ഇവിടുന്നങ്ങോട്ട് രണ്ട് മണിക്കൂർ നേരം കാഴ്ചക്കാരനെ പിടിച്ചിരുത്തി നല്ല രീതിയിൽ കഥ മുന്നോട്ട് കൊണ്ടുപോവുന്നുണ്ട് സംവിധായകനും സ്ക്രീനിലെ താരങ്ങളും. ഇനി ഇതൊന്നും പോരെങ്കിൽ അപ്രതീക്ഷിതം എന്നൊക്കെ വിശേഷിപ്പിക്കാവുന്ന നല്ലൊരു എൻഡ് ട്വിസ്റ്റും ചിത്രം കരുതി വെച്ചിട്ടുണ്ട്.

🔸ശ്യാമളൻ ചിത്രങ്ങളുടെ വലിയൊരു ഘടകം അവയിലെ ട്വിസ്റ്റുകൾ തന്നെയാണ്. സിക്സ്ത് സെൻസ്, അൺബ്രെകബിൽ പോലെയുള്ള ചിത്രങ്ങൾ ഈ ക്രാഫ്റ്റ് മനോഹരമായി കൊണ്ടുപോയെങ്കിലും പിറകെ വന്ന പല ചിത്രങ്ങളും പ്രേക്ഷകനെ വെറുതെ കറക്കുക എന്ന ലക്ഷ്യത്തോട് കൂടി ട്വിസ്റ്റിനെ സമീപിച്ചവ ആയിരുന്നു. ഈ രീതിയിൽ നോക്കിയാലും സ്പ്ലിറ്റ് എന്ന ചിത്രം ഒരു വിജയമാണ്. കെവിൻ എന്ന കഥാപാത്രമായി എത്തിയ ജെയിംസ് മേക്കോവയ്‌ തന്റെ കരിയറിലെ തന്നെ ഏറ്റവും മികച്ച കഥാപാത്രങ്ങളിൽ ഒന്നിനെ അവതരിപ്പിച്ചപ്പോൾ അന്യ ജോയ്, ബെറ്റി ബേക്കലി, ഹാലെ ലിയു, ജെസ്സിക്ക സുല എന്നിവരും മറ്റ് കഥാപാത്രങ്ങളെ നന്നായി അവതരിപ്പിച്ചു, ഇവർക്ക് പുറമെ ഒരു ഹോളിവുഡ് എ ലിസ്റ്റർ നടനും ചിത്രത്തിൽ അതിഥിതാരമായി വന്ന് പോവുന്നുണ്ട്. കൂടുതൽ പറഞ്ഞ് പോവുന്നില്ല, കഴിയുമെങ്കിൽ കാണാൻ ശ്രമിക്കുക.

Verdict : Good

DC Rating : 70/100

481. Unbreakable (2000)

Director : M Night Shyamalan

Genre : Superhero

Rating : 7.3/10

Country : USA

Duration : 106 Minutes

🔸"ഒരു ശരാശരി കോമിക് ബുക്കിൽ മുപ്പത്തിയഞ്ച് പേജുകൾ ഉണ്ടാവാറുണ്ട്, അവയിൽ ഓരോന്നിലും നൂറ്റി ഇരുപത്തി നാലോളം ചിത്രങ്ങളും, ഒരു കോമിക് ബുക്കിന്റെ വില ഒരു ഡോളർ മുതൽ നൂറ്റി നാല്പത് ഡോളർ വരെയാവാം. അമേരിക്കയിൽ ഒരു ശരാശരി ദിവസം ഒരു ലക്ഷത്തി എഴുപത്തി രണ്ടായിരം കോമിക് ബുക്കുകൾ വിറ്റ് പോവാറുണ്ട്, ഒരു വർഷത്തെ കണക്ക് എടുക്കുക ആണെങ്കിൽ അത് ആറ് കോടിക്ക് മുകളിൽ വരും. ഒരു കോമിക് ആരാധകൻ തന്റെ ജീവിത കാലയളവിൽ ഒരു വർഷം ഈ പുസ്തകങ്ങൾക്കായി ചിലവഴിക്കും എന്നാണ് കരുതപ്പെടുന്നത്. ഇത്രയും സ്വാധീനം മനുഷ്യന് മേൽ ചെലുത്താൻ ഇവയിൽ എന്താണ് ഉള്ളത്, ഒരു നായകനും അയാൾക്കെതിരായി ഒരു വില്ലനും, അത്ര മാത്രം അല്ലേ ? ആണോ ?"

🔸ഫിലാഡൽഫിയയിൽ ഒരു സ്റ്റോർ റൂമിലേക്കാണ് ചിത്രം ആദ്യം കടന്ന് ചെല്ലുന്നത്, അവിടം ഒരു പ്രസവ മുറി ആയി മാറിയിരിക്കുന്നു. സ്റ്റോറിലെ ജീവനക്കാരിൽ ഒരാളായ യുവതി എലൈജ എന്ന കുട്ടിക്ക് ജന്മം നൽകിയിരിക്കുകയാണ്, ജനിച്ചതിന് ശേഷവും നിർത്താതെയുള്ള കുഞ്ഞിന്റെ കരച്ചിൽ ഒരല്പം അവരെ വേദനിപ്പിക്കുന്നുണ്ടെങ്കിലും പ്രശ്നത്തിന്റെ സങ്കീർണ്ണത പൂർണമായും മനസിലാവുന്നത് ഡോക്ടറായ മത്‌സണിന്റെ വാക്കുകൾ ഇടിത്തീ പോലെ ചെവിയിൽ പതിച്ചപ്പോഴാണ്. അപ്പൂർവ്വത്തിൽ അപൂർവമായ ഒസ്ടിയോജൻസിസ്‌ ഇമ്പെർഫെക്ട എന്ന രോഗത്തിന് അടിമയാണ് ഏലിജാഹ്. ദുർബലവും പെട്ടെന്ന് പൊട്ടൽ സംഭവിക്കാം വണ്ണം ശിഥിലവുമായ എല്ലുകളാണ് ഈ രോഗത്തിന്റെ ലക്ഷണങ്ങളും പ്രത്യാഘാതവും എല്ലാം.

🔸ഈ അവസ്ഥ കാരണം തന്നെ ഒരു സാധാരണ മനുഷ്യനെ പോലെ തന്റെ പ്രാഥമിക കാര്യങ്ങൾ ചെയ്യാനോ വേദനയില്ലാതെ ജീവിക്കാനോ എലിജക്ക് കഴിയില്ല. ശാരീരികമായി ദുർബലനാണ് എങ്കിലും അത് നികത്താനുള്ള വക ബുദ്ധിയിലും ചിന്തകളിലൂടെയും എലിജക്ക് കൈമുതലായുണ്ട്. കോമിക് ബുക്കുകളാണ് ഒരു പരിധി വരെ അയാളുടെ ലോകം, ആ കഥകളുടെയും കഥാപാത്രങ്ങളുടെയും സ്വാധീനം അയാളിൽ നിറഞ്ഞ് നിൽക്കുന്നുണ്ട്. ഇത്രയും മോശം അവസ്ഥയിലൂടെ കടന്ന് പോവുമ്പോഴും താൻ ജനിച്ചത് വെറുതെ അല്ലെന്നും, ഏതൊരു വ്യക്തിയെയും പോലെ ചെയ്ത് തീർക്കേണ്ടൊരു കർമം തനിക്ക് ഉണ്ടെന്നും അയാൾ ഉറച്ച് വിശ്വസിക്കുന്നുണ്ട്. അത് കണ്ടെത്താനുള്ള പ്രയത്നത്തിലാണ് എലിജാഹ്.

🔸എലിജയ്ക്ക് പുറമെ ചിത്രത്തിലുള്ള മറ്റൊരു പ്രധാന കഥാപാത്രമാണ് ഡേവിഡ് ഡൺ, വ്യക്തി ജീവിതത്തിൽ ഒരു തികഞ്ഞ പരാജയമാണ് ഡൺ. ഭാര്യയുമായി സ്വരച്ചേർച്ച ഇല്ലാത്ത ടിയാൻ വേർപിരിയലിന്റെ വക്കിലാണ്, മറ്റൊരു ബന്ധത്തിലേക്കുള്ള ഡണ്ണിയ്‌ന്റെ ശ്രമങ്ങൾ അടപടലം പരാജയപ്പെടുന്ന രംഗത്തോടെയാണ് ഈ കഥാപാത്രം പ്രേക്ഷകന്റെ മുന്നിൽ എത്തുന്നത്, അതിലൂടെ തന്നെ ആ കഥാപാത്രത്തിന്റെ ദയനീയ സ്ഥിതിയും മാനസികാവസ്ഥയും എല്ലാം ഏറെക്കുറെ പിടികിട്ടും. ഇത്പോലെ അത്യാവശ്യം ദുരന്തമായി പൊയ്ക്കൊണ്ടിരുന്ന ഡണ്ണിന്റെ ജീവിതം മാറി മറിയുന്നത് അയാൾ സഞ്ചരിച്ച് കൊണ്ടിരുന്ന ട്രെയിൻ ഒരപകടത്തിൽ പെടുമ്പോഴാണ്. ഒരാളൊഴിച്ച് ട്രയിനിലെ 131 യാത്രികരും കൊല്ലപ്പെടുകയാണ്, ഡേവിഡ് ഡൺ ഒഴിച്ച്. അയാളുടെ ദേഹത്ത് ഒരു പോറൽ പോലും ഉണ്ടായിരുന്നില്ല.

🔸തുടക്കത്തിൽ രണ്ട് നേർ രേഖകൾ പോലെ പോയി കൊണ്ടിരിക്കുന്ന ഈ രണ്ട് കഥാപാത്രങ്ങളും ചില സംഭവങ്ങൾ കാരണം കൂട്ടി മുട്ടുകയാണ്, തുടർന്നുള്ള കഥാ പുരോഗതിയും ഈ കഥാപാത്രങ്ങളുടെ ഭാവിയും ലക്ഷ്യങ്ങളും എല്ലാം ചിത്രം കണ്ട് തന്നെ അറിയാൻ ശ്രമിക്കുക. കോമിക് ബുക്കുകൾക്കും സൂപ്പർ ഹീറോ കഥാപാത്രങ്ങൾക്കും ഒരു ഹോമേജ് പോലെയുള്ള ചിത്രമാണ് അൺബ്രെകബിൽ, ഇനി സൂപ്പർഹീറോ ചിത്രമായി പരിഗണിക്കുക ആണെങ്കിൽ ആ ജിൻറിലെ വ്യത്യസ്ത, മികച്ച ശ്രമങ്ങളിൽ ഒന്ന് കൂടിയാണ് ഈ ചിത്രം. ഈ ചിത്രവുമായി കണക്ഷൻ ഉള്ള മറ്റ് രണ്ട് ചിത്രങ്ങൾ കൂടിയുണ്ട്, അവയിൽ അവസാനത്തെ ചിത്രമായ ഗ്ലാസ് റിലീസിന് തയാറെടുക്കുകയാണ്. കഴിയുമെങ്കിൽ കാണാൻ ശ്രമിക്കുക, നല്ലൊരു ചിത്രവും, മികച്ചൊരു അനുഭവവും ഉറപ്പ് നൽകുന്നു.

Verdict : Good

DC Rating : 76/100

480. The Old Man And The Gun (2018)

Director : David Lowery

Genre : Biography

Rating : 7/10

Country : USA

Duration : 93 Minutes

🔸"അയാൾക്ക് ഒരു അറുപത് വയസ്സ് തോന്നിക്കും സാർ, ഉറപ്പില്ല എന്നാലും ഒരു അൻപത് അറുപത് ഒക്കെ ഉണ്ടാവും. കണ്ടാൽ മോശം ഒന്നും തോന്നിക്കാത്ത നല്ല വേഷ വിധാനങ്ങളും, ഊഷ്മളമായ പെരുമാറ്റവും ഒക്കെ ആയിരുന്നു അയാളുടേത്. അയാളുടെ പക്കൽ ഒരു തോക്ക് ഉണ്ടായിരുന്നു, ഉവ്വ് ഞാൻ കണ്ടിരുന്നു, ഇല്ല എനിക്ക് നേരെ ചൂണ്ടിയില്ല. തെറിയോ ? ഇല്ല സാർ, അങ്ങനെ ഒരു സംഭാഷണവും ഉണ്ടായില്ല ഒരു  ഭീഷണി പോലും അയാളിൽ നിന്നും ഉണ്ടായില്ല സാർ, തന്റെ പക്കൽ തോക്ക് ഉണ്ട് എന്ന് അയാൾ ഇടക്ക് സൂചിപ്പിച്ചിരുന്നു. തികച്ചും സൗമ്യമായ രീതിയിലുള്ള ഇടപഴകൽ ആയിരുന്നു അയാളുടേത്, ആ പിന്നെ അയാളൊരു തികഞ്ഞ ജെന്റിൽമാൻ ആയിരുന്നു സാർ....".

🔸പറഞ്ഞ് വന്നത് ഫോറസ്റ്റ് ടക്കറെ പറ്റിയാണ്, എഴുപത് വയസ്സിനിടെ പതിനെട്ട് തവണ വിജയകരമായി ജയിൽ ചാട്ടം പൂർത്തിയാക്കിയ അപൂർവ പ്രതിഭാസം. ബാങ്ക് കൊള്ള ആണ് ടക്കരുടെ മാസ്റ്റർപീസ്, വിവിധ പോലീസ് റെക്കോർഡുകൾ പ്രകാരം കഴിഞ്ഞ രണ്ട് വർഷങ്ങൾക്കിടെ നൂറിനടുത്ത് കൊള്ളകളാണ് ടക്കറുടേതായി ഉള്ളത്. തന്റേതെന്ന് മനസിലാക്കാൻ ഒരു സൂചന പോലും അവശേഷിപ്പിക്കുന്നത് ടിയാന്റെ രീതിയല്ല. രീതികളുടെ കാര്യം പറഞ്ഞപ്പോഴാണ്, ചെയ്യുന്നത് മോഷണം ആണെങ്കിൽ പോലും അതിന് ഒരു പ്രത്യേക സ്റ്റൈൽ ഫോറെസ്റ്റ് ടേക്കർ പിന്തുടരുന്നുണ്ട്. തന്റെ ദൗത്യത്തിൽ വയലെന്സിന്റെ അളവ് കുറവായിരിക്കണം എന്നൊരു നിർബന്ധം ഉള്ളത് പോലെയാണ് ടിയാന്റെ ചെയ്തികൾ.

🔸രീതികളിലും ആശയങ്ങളിലും സാമ്യം പുലർത്തുന്ന മറ്റ് രണ്ട് സുഹൃത്തുക്കൾ കൂടിയുണ്ട് ടാക്കറിന്, മൂന്ന് പേരും ചേർന്നാണ് തങ്ങളുടെ പദ്ധതികൾ എല്ലാം ആവിഷ്കരിക്കുന്നതും നിറവേറ്റുന്നതും. മൂവർ സംഘത്തിനെ നിയമത്തിന് മുന്നിൽ എത്തിക്കുക എന്ന ഉദ്ദേശവുമായി പിറകെ കൂടിയതാണ് ഡിറ്റക്റ്റീവ് ആയ ജോൺ ഹണ്ട്, ഒരു പോലീസുകാരൻ എന്ന രീതിയിൽ ജീവിതത്തിൽ അങ്ങോളം ഇങ്ങോളം പരിഹാസവും അവഗണനയും പുച്ഛവും മാത്രം സമ്പാദ്യമായി ഉള്ള വ്യക്തിയാണ് ഹണ്ട്. കഴിവും, ബുദ്ധിയും എല്ലാം ഉണ്ടായിട്ടും നേരിടേണ്ടി വരുന്ന ഈ ദുരനുഭവങ്ങൾ കാരണം ഒരുവേള സേവനം അവസാനിപ്പിച്ച് കടന്ന് പോയാലോ എന്ന ചിന്ത വരെ ഹണ്ടിൽ ഉടലെടുക്കുന്നുണ്ട്.

🔸മുകളിൽ സൂചിപ്പിച്ച ഡിറ്റക്റ്റീവ് ആയ ജോൺ ഹണ്ടിനും, മൂവർ സംഘത്തിനും ഇടയിൽ ചെറിയ ചരിത്രമുണ്ട്. ടക്കരുടെയും സംഘത്തിന്റെയും കലാ പരിപാടികളിൽ ഒന്നിൽ മനസ്സറിയാതെ ഹണ്ടും ഭാഗമായിട്ടുണ്ട്, അയാളുടെ മൂക്കിന്റെ തുമ്പത്തൂടെയാണ് മൂവർ സംഘം കൊള്ള നടത്തിയതും രക്ഷപ്പെട്ടതും. അന്ന് അനുഭവിക്കേണ്ടി വന്ന ദേഷ്യവും നിരാശയും രോഷവും അപമാനവുമെല്ലാം അത്ര പെട്ടെന്ന് ജോൺ ഹണ്ടിന് മറക്കാനാവില്ല. അതിനാൽ തന്നെ ഫോറെസ്റ്റ് ടക്കറിനെ പിടികൂടുക എന്നതിന് വ്യക്തിപരമായ കാരണങ്ങൾ കൂടി ഉണ്ട് ജോണ് ഹണ്ടിന്. ഇതാണ് ദി ഓൾഡ് മാൻ ആൻഡ് ദി ഗൺ എന്ന ചിത്രത്തിന്റെ വളരെ ലളിതമായ പ്രമേയം.

🔸വലിയ സങ്കീർണ്ണതകൾ ഒന്നും ഇല്ലാതെ നല്ല രീതിയിൽ മനോഹരമായി കഥ പറഞ്ഞ് പോവുന്ന ലളിതമായ ചിത്രമാണ് ഇത്, നേർ രേഖയിൽ പോവുന്ന കഥാപാത്രങ്ങൾ അവർക്കുള്ള വ്യക്തമായ മോട്ടിവേഷൻ, അതിനോട് നീതി പുലർത്തുന്ന കഥാ പുരോഗതി ഒക്കെ ചേർന്ന് കണ്ടിരിക്കാവുന്ന നല്ല ഒരു ചിത്രം. പ്രധാന കഥാപാത്രങ്ങളെ അവതരിപ്പിച്ചിരിക്കുന്നത് ഇതിഹാസ സമാനനായ റോബർട്ട് റെഡ്‌ഫോർഡും ഓസ്കാർ ജേതാവായ കാസി അഫ്‌ളെക്കും ആണ്. പേരും പെരുമയും വാക്കുകളിൽ ഒതുക്കാതെ സ്‌ക്രീനിൽ എത്തിച്ചിട്ടുണ്ട് ഇരുവരും. തന്റെ അഭിനയ ജീവിതത്തിലെ അവസാന കഥാപാത്രമാണ് ഈ ചിത്രത്തിലേത് എന്ന് റെഡ്ഫോർഡ് പറയുക ഉണ്ടായി, അങ്ങനെയെങ്കിൽ 'Adios Captain'.

Verdict : Good

DC Rating : 75/100

479. The Trial (1962)

Director : Orson Welles

Genre : Crime

Rating : 7.8/10

Country : France

Duration : 118 Minutes

🔸ഒരു ദിവസം, വലിയ പ്രത്യേകതകൾ ഒന്നും ഇല്ലാത്ത ഒരു സാധാരണ ദിവസം നിങ്ങൾ നിങ്ങളുടെ വീട്ടിൽ ഉറങ്ങി എഴുന്നേൽക്കുകയാണ്. ഉറങ്ങി എഴുന്നേറ്റ നിങ്ങൾ കണി കാണുന്നത് നിങ്ങളുടെ വീട്ടിൽ കുറ്റാന്വേഷണം നടത്തുന്ന, നിങ്ങൾ ചെയ്യുന്ന ഓരോ കാര്യവും സംശയത്തോടെ നോക്കി കാണുന്ന, ഉരുളയ്ക്ക് ഉപ്പേരി പോലെ നിങ്ങളുടെ വായിൽ നിന്ന് വീഴുന്ന ഓരോ വാക്കിലും പിടിച്ച് കയറുന്ന കുറച്ച് പോലീസുകാരാണ്. അത്യന്തം ഗൗരവത്തോട് കൂടി കാര്യങ്ങൾ ചെയ്ത് കൊണ്ടിരിക്കുന്ന പോലീസുകാരോട് സ്വാഭാവികമായും നിങ്ങളുടെ ചോദ്യം എന്താണ് സംഭവം എന്നതും, എന്ത് കൊണ്ട് ഞാൻ എന്നുമൊക്കെ ആവും, ആ കാര്യത്തിൽ സംശയം ഏതുമില്ല. കേന്ദ്ര കഥാപാത്രമായ ജോസഫും ഇത് തന്നെയാണ് ചെയ്യുന്നത്, എന്നാൽ അതിന് ലഭിക്കുന്ന ഉത്തരങ്ങളിലാണ് നിഗൂഢത നിറഞ്ഞ് നിൽക്കുന്നത്.

🔸സത്യത്തിൽ തന്റെ മുറിയിലുള്ളവർ പോലീസുകാർ ആണോ എന്ന കാര്യത്തിൽ പോലും ജോസഫിന് ഉറപ്പില്ല. അയാളുടെ ഒരു ചോദ്യത്തിനും അവർ മറുപടി നൽകുന്നില്ല, സംശയങ്ങൾ നിഷേധിക്കുന്നോ അംഗീകരിക്കുന്നോ ഇല്ല, അത്യന്തം ഗൗരവം ഏറിയത് എന്ന് പ്രവർത്തിയിലൂടെ തെളിയിക്കുന്ന അന്വേഷണങ്ങളുമായി അവർ മുന്നോട്ട് പോവുകയാണ്. ഈ അന്വേഷണത്തിന് കാരണമായ കുറ്റ കൃത്യം എന്താണ് എന്ന ചോദ്യത്തിന് പോലും അവർ മറുപടി നൽകുന്നില്ല, എന്നാൽ കാര്യങ്ങൾ കൂടുതൽ വിചിത്രമാവുന്നത് താൻ ഒഴികെ ബാക്കിയെല്ലാവർക്കും കാര്യങ്ങളെ പറ്റി വ്യക്തമായ ധാരണ ഉണ്ടെന്ന് ജോസഫ് മനസിലാക്കുമ്പോഴാണ്, ഇവർ ആരും തന്നെ അത് തുറന്ന് പറയാത്തത് പ്രശനം കൂടുതൽ സങ്കീർണ്ണമാക്കുന്നെ ഉള്ളൂ.

🔸ഒർസൺ വെൽസിന്റെ സംവിധാന സംരംഭമാണ് ദി ട്രയൽ, ദി സിറ്റിസൺ കെയ്ൻ പോലെയൊരു ചിത്രം സംവിധാനം ചെയ്ത വ്യക്തി "The Trial is the best film I have ever made" എന്ന് പറഞ്ഞിട്ടുണ്ടെങ്കിൽ സ്വാഭാവികമായും അതിൽ കണ്ടിരിക്കേണ്ട എന്തോ ഉണ്ടെന്ന് മനസിലാക്കാം. വ്യത്യസ്തമായ ട്രീറ്റ്‌മെന്റ് കൊണ്ടും ചിത്രീകരണം കൊണ്ടും ആദ്യാവസാനം നിറഞ്ഞ് നിൽക്കുന്ന മിസ്റ്ററി എലെമെന്റിനാലും ഏറെക്കുറെ ഈ വാക്കുകൾ ചിത്രം സാധൂകരിക്കുന്നുണ്ട്. സംവിധായക വേഷത്തിനപ്പുറം ഒരു ചെറിയ കഥാപാത്രമായി വെൽസ് ചിത്രത്തിൽ പ്രത്യക്ഷപ്പെടുന്നുമുണ്ട്. ഹിച്ച്കോക്കിന്റെ സൈക്കോ എന്ന ചിത്രത്തിലൂടെ പ്രശസ്തനായ ആന്തണി പെർകിൻസ് ആണ് ഈ ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നത്. റിലീസിന് ശേഷം പരാജയം നേരിട്ടെങ്കിലും വർഷങ്ങൾക്കിപ്പുറം ചിത്രത്തിന് ലഭിക്കുന്ന സ്വീകാര്യത വളരെ വലുതാണ്.

🔸ചിത്രത്തിന്റെ കഥയെ കുറിച്ച് കൂടുതൽ പറയുന്നത് ഇത് വരെ നില നിർത്തിപ്പോന്ന, മുകളിൽ സൂചിപ്പിച്ച നിഗൂഢതയ്ക്ക് കോട്ടം തട്ടിക്കും എന്നതിനാൽ ചിത്രത്തിന്റെ മറ്റൊരു പ്രത്യേകതയെ പറ്റി പറയാം. കഥാപാത്രത്തെയും അയാളുടെ ചുറ്റുപാടുകളെയും പരിചയപ്പെടുന്നതിന് മുന്നേ ഫ്രാൻസ് കാഫ്കയുടെ 'ബീഫോർ ദി ലോ' എന്ന നോവലിനെ ചിത്രം ചെറുതായി ദൃശ്യവൽക്കരിക്കുന്നുണ്ട്. നോവലിന്റെ ഇതിവൃത്തം ഏറെക്കുറെ ഇങ്ങനെയാണ്. നീതിയും നിയമവും ലഭിക്കാനായി ഒരു സാധാരണക്കാരൻ എത്തുകയാണ്, അയാളുടെ മുന്നിൽ വലിയൊരു കവാടവും അതിന്റെ കാവൽക്കരനുമുണ്ട്, ആ കവാടത്തിന്റെ അവസാനം അയാൾ അന്വേഷിച്ച് നടക്കുന്നതെന്തോ അതുണ്ട്, എന്നാണ് അയാളെ കാവൽക്കാരൻ പറഞ്ഞ് വിശ്വസിപ്പിക്കുന്നത്, അത് സത്യമാവാം അല്ലാതിരിക്കാം.

🔸ഈ പ്രതീക്ഷയിൽ അനുവാദം ചോദിക്കുന്ന സാധാരണക്കാരന് അനുമതി നിഷേധിക്കപ്പെടുകയാണ്, തന്റെ സമയം വരുന്നത് വരെ കാത്തിരിക്കാൻ അയാൾ നിർബന്ധിക്കപ്പെടുകയാണ്. സാധാരണക്കാരന്റെ കാത്തിരിപ്പ് ദിവസങ്ങളും മാസങ്ങളും കഴിഞ്ഞ് വർഷങ്ങൾ നീണ്ട് പോവുന്നു. ഒടുവിൽ മരണം അടുത്തെത്തി എന്ന തിരിച്ചറിവിൽ അയാൾ കാവൽക്കരനോട് ഒരു ചോദ്യം ചോദിക്കുകയാണ്, ആ ചോദ്യത്തിന് അപ്രതീക്ഷിതമായ ഒരുത്തരവും. ഈ കഥയ്ക്ക് ദി ട്രയൽ എന്ന സിനിമയുമായി ചില ബന്ധങ്ങളുണ്ട്, ഒരു ഘട്ടത്തിൽ നിർണ്ണായകമായ സ്വാധീനവുമുണ്ട്. എന്തിരുന്നാലും അതിലേക്ക് തല്ക്കാലം പോവുന്നില്ല. കാണാൻ ശ്രമിക്കുക, വ്യത്യസ്തമായ ഒരു ചിത്രമാണ് ദി ട്രയൽ, അതിപ്പോ കഥ കൊണ്ടായാലും അവതരണം കൊണ്ടായാലും ഫീൽ കൊണ്ടായാലും.

Verdict : Very Good

DC Rating : 85/100

478. Odd Man Out (1947)

Director : Carol Reed

Genre : Film Noir

Rating : 7.8/10

Country : UK

Duration : 116 Minutes

🔸"This Is It, The Most Exciting Motion Picture Ever Made", "Odd Man Out, An Adventure In Unbearable Suspense" കാണാത്ത പഴയകാല ചിത്രങ്ങളിലൂടെ വെറുതെ ഒന്ന് സഞ്ചരിച്ചപ്പോഴാണ് മുകളിലെ രണ്ട് ടാഗ്‌ലൈൻ വെണ്ടയ്ക്കാ അക്ഷരത്തിൽ ചേർത്ത ഓഡ്ഡ് മാൻ ഔട്ട് എന്ന ചിത്രത്തെ പറ്റി അറിയാൻ ഇടയായത്. സാധാരണ ഉള്ള ഈ ടാഗ്‌ലൈൻ ഇടപാടുകൾ പലപ്പോഴും തള്ളുകളായി പരിണമിക്കാറുണ്ടെങ്കിലും ശ്രദ്ധ ചെന്ന് പെട്ടത് സംവിധായകന്റെ പേരിലാണ്, കരോൾ റീഡ്. ദി ഫോളെൻ ഐഡൽ, തേർഡ് മാൻ എന്നീ ചിത്രങ്ങൾ ഏറ്റവും പ്രിയപ്പെട്ടവയുടെ പട്ടികയിൽ ആയതിനാലും, ഇതിന്റെയെല്ലാം അമരക്കാരൻ ഒരാൾ തന്നെ ആയതിനാലും മറ്റ് കാരണങ്ങൾ ഒന്നും വേണ്ടി വന്നില്ല ഓഡ്ഡ് മാൻ ഔട്ട് എന്ന ചിത്രം കാണാൻ, ആ പേര് അത് തന്നെയാണ് ചിത്രത്തിന്റെ ഗ്യാരന്റി.

🔸ഇത്രയും കാലം കണ്ട ചിത്രങ്ങളിൽ നിന്നും ഒരല്പം വ്യത്യസ്തമായ രീതിയിലാണ് ഈ ചിത്രം ആരംഭിക്കുന്നത്, ഈ ചിത്രത്തിന് രാഷ്ട്രീയ, നിയമ നിലപാടുകൾ ഏതുമില്ല, ഇവയിൽ യാതൊരു താല്പര്യവും കാണിക്കുന്നുമില്ല, ഈ വക കാര്യങ്ങളിലേക്ക് വലിച്ചിഴയ്ക്കപ്പെടുന്ന വ്യക്തി ജീവിതങ്ങളുടെ കഥയാണ് ഈ ചിത്രം, അതിൽ കൂടുതലുമില്ല കുറവുമില്ല. ഈ വരികളോടും നിലപാടുകളോടും ആണ് ഓഡ്ഡ് മാൻ ഔട്ട് എന്ന ചിത്രം ആരംഭിക്കുന്നത്. ഇതിനോട് നീതി പുലർത്താൻ വേണ്ടിയാവണം കഥ അരങ്ങേറുന്ന സാമൂഹിക രാഷ്ട്രീയ പശ്ചാത്തലത്തിന് ഒന്നും ചിത്രം ലവലേശം പ്രാധാന്യം പോലും, ഒരു പരാമർശം പോലും നൽകുന്നില്ല.

🔸കഴിഞ്ഞ കുറച്ച് നാളുകളായി കുപ്രസിദ്ധി ആർജിച്ച വിപ്ലവ സംഘടനയിൽ അംഗമാണ് കഥാനായകനായ ജോണി, ജോണി തന്റെ ഏറ്റവും പുതിയ ജയിൽ ചാട്ടം കാരണം ഇപ്പോൾ ഒളവിലാണ്. പിടികിട്ടാപ്പുള്ളി ആയി പ്രഖ്യാപിക്കപ്പെട്ട ജോണിയുടെ തലയ്ക്ക് അത്യാവശ്യം നല്ലൊരു തുക ഇട്ടിട്ടുണ്ട് ഭരണാധികാരികൾ, കാത്‌ലീൻ എന്ന യുവതിയുടെ വീട്ടിലാണ് കഴിഞ്ഞ കുറച്ച് നാളുകളായി ജോണി താമസിക്കുന്നത്. അയാൾക്ക് അറിഞ്ഞാലും ഇല്ലെങ്കിലും അവിടെ ചെറിയൊരു പ്രണയം കൂടി ഉടലെടുത്തിട്ടുണ്ട്, ഇതാണ് വിഖ്യാതനായ കഥാനായകൻ ജോണി മക്വീനിന്റെ ഇന്നത്തെ പരിതസ്ഥിതി.

🔸ഒരു സംഘടനയുടെ ഏറ്റവും വലിയ ശക്തി നേതാവിന്റെ ഉത്തരവിന് ലഭിക്കുന്ന ബഹുമാനവും ഭയവും ഒക്കെ ആണെന്ന് കണക്കിലെടുക്കേ ഇന്നത്തെ അവസ്ഥ ജോണിക്ക് ഒട്ടും ആശ്വാസകരം അല്ല. ജയിൽ വാസം ജോണിയെ പുതിയൊരാളായി മാറ്റിയിരിക്കുന്നു എന്നൊരു പൊതു വിശ്വാസം അംഗങ്ങൾക്ക് ഇടയിൽ രൂപപ്പെട്ടിട്ടുണ്ട്. ആക്രമണത്തേക്കാൾ പ്രതിരോധത്തെ തങ്ങളുടെ തലവൻ ഇഷ്ട്ടപ്പെടുന്നുണ്ടോ എന്ന സംശയം സംശയ ദൃഷ്ടിയോടെ അയാളെ നോക്കി കാണാൻ അവരെ പ്രേരിപ്പിക്കുന്നുണ്ട്. ഈയൊരു അവസ്ഥയിൽ പണത്തിന് വേണ്ടി സംഘം ഒരു ബാങ്ക് കൊള്ളയടിക്ക് ഇറങ്ങി തിരിക്കുന്നതും തുടർന്നുണ്ടാവുന്ന അനിഷ്ട സംഭവങ്ങളുടെ പരമ്പര തന്നെയുമാണ് ഈ ചിത്രത്തിന്റെ പ്രമേയം. ഒടുവിൽ മികച്ചൊരു ക്ലൈമാക്സിലൂടെ ചിത്രം കഥ പറഞ്ഞ് അവസാനിപ്പിക്കുമ്പോൾ ഒരു മലയാള ചിത്രവുമായി ചെറിയ സാമ്യം കൂടി അനുഭവപ്പെടുന്നുണ്ട്.

🔸ബ്രിട്ടീഷ് സിനിമാ ചരിത്രത്തിൽ ലെജൻഡറി സ്റ്റാറ്റസ് ഉള്ള ജെയിംസ് മേസൺ ആണ് ചിത്രത്തിലെ കേന്ദ്ര കഥാപാത്രം ആയ ജോണിയെ അവതരിപ്പിച്ചിരിക്കുന്നത്. ആ നടനെ ഏറെക്കുറെ ചിത്രത്തിന്റെ സിംഹഭാഗവും ചത്തതിനൊക്കുമേ എന്ന രീതിയിൽ പാതി ബോധാവസ്ഥയിൽ അവതരിപ്പിച്ച സംവിധായകന്റെ ധൈര്യത്തിന് അഭിനന്ദനം അർഹിക്കുന്നുണ്ട്. ഈ അവസ്ഥയിൽ ടിയാൻ അർഹിക്കുന്ന സിമ്പതി, അരക്ഷിതാവസ്ഥ, നിസ്സഹായാവസ്ഥ എന്നിവയെല്ലാം മികച്ചതായിരുന്നു. മുകളിൽ സൂചിപ്പിച്ച ഔട്‍ലിനിൽ നിന്നും കഥ ഏറെക്കുറെ മുഴുവനായി പിടികിട്ടി എന്ന് കരുതേണ്ട, വളരെ ചെറിയ അംശം മാത്രമേ സൂചിപ്പിച്ചിട്ടുള്ളൂ. കഴിയുമെങ്കിൽ കാണാൻ ശ്രമിക്കുക മികച്ചൊരു അനുഭവം ഉറപ്പ് നൽകുന്നു.

Verdict : Must Watch

DC Rating : 90/100

477. Death Proof (2007)

Director : Quentin Tarantino

Genre : Slasher

Rating : 7/10

Country : USA

Duration : 113 Minutes

🔸ടാരന്റിനോ ചിത്രങ്ങളിലെ മികച്ചവ തിരഞ്ഞെടുക്കുമ്പോൾ പൊതുവെ ഏറ്റവും അവസാനം പരിഗണിക്കുന്ന ചിത്രങ്ങളിൽ ഒന്നാണ് ഡെത് പ്രൂഫ്. പൾപ് ഫിക്ഷൻ, ജാങ്കോ അൺചെയിൻഡ് പോലുള്ള ചിത്രങ്ങളുമായി നിലവാരത്തിൽ താരമത്യം അർഹിക്കുന്നില്ലെങ്കിൽ കൂടിയും മറ്റ് പല സ്ലേഷെർ ടൈപ്പ് ചിത്രങ്ങളുമായി തട്ടിക്കുമ്പോൾ നല്ലൊരു ചിത്രം തന്നെയാണ് ഡെത് പ്രൂഫ്. ടാരന്റിനോ എന്ന പേരിന് ഉള്ള മൂല്യം ഒന്ന് കൊണ്ടാവണം ഈ ചിത്രം പൊതുവെ തിരസ്കരിക്കപ്പെടുന്നത്. വൈബ്രന്റ് ആയ ഡയലോഗുകൾ, വ്യത്യസ്തരായ കഥാപാത്രങ്ങൾ, ബ്ലഡ് ബാത് തുടങ്ങി ഒരു ടാരന്റിനോ ചിത്രത്തിൽ നിന്നും പ്രതീക്ഷിക്കാവുന്ന വകയെല്ലാം ഈ ചിത്രത്തിലും കാണാനാവും.

🔸“To me, it’s all about my filmography, and I want to go out with a terrific filmography. ‘Death Proof’ has got to be the worst movie I ever make. And for a left-handed movie, that wasn’t so bad, all right? so if that’s the worst I ever get, I’m good.” ഡെത് പ്രൂഫ് എന്ന ചിത്രത്തെ കുറിച്ചുള്ള ടരന്റീനോയുടെ വരികളാണ് മുകളിൽ ചേർത്തിരിക്കുന്നത്. വിഖ്യാത ചലച്ചിത്രകാരൻ റോബർട്ട് റോഡ്രിഗസിനോടൊപ്പം ചേർന്ന് പ്ലാനറ്റ് ടെറർ എന്ന ചിത്രത്തോടൊപ്പം റിലീസ് ചെയ്ത ചിത്രമാണ് തന്റെ കരിയറിലെ ഏറ്റവും മോശം ചിത്രം എന്ന് നിങ്ങൾ പറയുക ആണെങ്കിൽ എന്റെ സിനിമാ ജീവിതത്തിൽ ഞാൻ സംപ്ത്രിപ്തനാണ് എന്ന വരികൾ പല അർത്ഥങ്ങളും ഉൾക്കൊള്ളുന്നുണ്ട്. വിലയിരുത്താൻ ബുദ്ധിമുട്ടുള്ള സിനിമകളിൽ ഒന്നായാണ് ഈ ചിത്രം പൊതുവെ അനുഭവപ്പെടാറ്, അതിനുള്ള പ്രധാന കാരണം പല കോണുകളിൽ നിന്നും ചിത്രം നേരിട്ട പോളറൈസിങ് എന്നൊക്കെ വിശേഷിപ്പിക്കാവുന്ന പ്രതികരണങ്ങൾ തന്നെ.

🔸അർലീൻ, ജൂലിയ, ഷാന എന്നീ മൂന്ന് സുഹൃത്തുക്കൾ ജൂലിയയുടെ പിറന്നാൾ ആഘോഷിക്കാൻ തീരുമാനിക്കുകയാണ്. കാര്യങ്ങൾ ഒന്ന് ഉഷാർ ആവാനായി ടൗണിൽ നിന്ന് മാറി ഗ്രാമ പ്രദേശത്തുള്ള ഒഴിഞ്ഞ സ്ഥലത്തെ ബാർ ആണ് മൂവരും തിരഞ്ഞെടുക്കുന്നത്. ജീവിതത്തിലെ നിർണ്ണായകമായ ഘട്ടങ്ങളിലൂടെ കടന്ന് പോവുന്ന മൂന്ന് പേർക്കും ആഘോഷം എന്നതിനേക്കാൾ ബന്ധം ദൃഢപ്പെടുത്തൽ കൂടിയാണ് ഈ ഒത്തുചേരൽ. യാത്രയുടെ തുടക്കം മുതൽ തന്നെ തങ്ങൾ പിന്തുടരപ്പെടുന്നുണ്ട് എന്നൊരു സൂചന അർലീനിന് ലഭിക്കുന്നുണ്ട്, എന്തിരുന്നാലും അവൾ അതത്ര കാര്യമാക്കാതെ ആഘോഷത്തിലും ലഹരിയിലും ലയിച്ച് ചേരുകയാണ്.

🔸ഇതേ ബാറിലേക്ക്, മൂവർ സംഘം തകർത്താടുമ്പോഴാണ് മൈക്ക് എന്ന വ്യക്തി കടന്ന് വരുന്നത്. മൈക്ക് ആളൊരു സ്റ്റണ്ട് ഡബിളാണ്, അതും ഹോളിവുഡ് ചിത്രങ്ങളിൽ. പൊതുവെ ബഹളങ്ങളിൽ നിന്നും മാറി നിൽക്കാറുള്ള, ഏകാന്ത പഥികനായ ഒരു മിസ്റ്റീരിയസ് ക്യാരക്റ്റർ ആണ് മൈകിന്റേത്. എന്തിരുന്നാലും അന്നേ ദിവസം മൂവർ സംഘത്തിന്റെയും മൈകിന്റെയും വഴികൾ തമ്മിൽ ഉടക്കുകയാണ്, തുടർന്ന് അരങ്ങേറുന്ന സംഭവങ്ങളാണ് രണ്ട് മണിക്കൂറിനടുത്ത് ദൈർഖ്യമുള്ള ഈ ചിത്രത്തിന്റെ പ്രമേയം. കഥയ്ക്ക് ഒരല്പം കൊഴുപ്പ് കൂട്ടാനായി മറ്റ് ചില കഥാപാത്രങ്ങളും സംവിധായകൻ ടാരന്റിനോ തന്നെയും ചിത്രത്തിൽ വന്ന് പോവുന്നുണ്ട്.

🔸മുകളിലെ വൈരുധ്യം നിറഞ്ഞ വിമർശക അഭിപ്രായം അറിഞ്ഞ് കൊണ്ട് കണ്ടതിനാലാവാം ഇഷ്ട്ടപ്പെട്ട ചിത്രങ്ങളുടെ പട്ടികയിലേക്ക് ചേർക്കുകയാണ് ഡെത് പ്രൂഫ് എന്ന ചിത്രത്തെയും. ടാരന്റിനോ ചിത്രങ്ങളിലെ അവിഭാജ്യ ഘടകങ്ങളായ സ്ലാഷ് ടോക്കിങ്, വയലെന്സ്, ചോരക്കളി എല്ലാം നല്ല അളവിൽ തന്നെ ചിത്രത്തിലുണ്ട്. ഇത്തരം രംഗങ്ങൾ പ്രശനം ആയേക്കാവുന്നവർക്കുള്ള മുന്നറിയിപ്പാണ്, കാലും കയ്യും ഒക്കെ ചിന്നി ചിതറി പോവുന്ന രംഗങ്ങൾ ചിത്രത്തിലുണ്ട്. മൈക്ക് എന്ന കഥാപാത്രമായി കർട്ട് റസ്സൽ നന്നായപ്പോൾ, റൊസാരിയോ ഡോസൺ, വനേസ ഫെർലൈറ്റോ, സോ ബെൽ (ടാരന്റിനോ ചിത്രങ്ങളിലെ സ്ഥിര സ്റ്റണ്ട് സാന്നിധ്യം) എന്നിവരും നന്നായി. ആകെ മൊത്തം ഒരു തവണ കാണാനുള്ള വകുപ്പ് ഒരുക്കി വെച്ചിരിക്കുന്ന സ്ഥിരം ടാരന്റിനോ സ്റ്റൈൽ ചിത്രം, അതാണ് ഡെത് പ്രൂഫ്.

Verdict : Good

DC Rating : 70/100

476. Mary Poppins Returns (2019)

Director : Rob Marshall

Genre : Musical

Rating : 7.3/10

Country : USA

Duration : 130 Minutes

🔸കഥ : ആദ്യ ഭാഗത്തെ സംഭവങ്ങൾക്ക് ശേഷം പതിറ്റാണ്ടുകൾ പിന്നിട്ടിരിക്കുന്നു, കുട്ടികളായിരുന്നു മൈക്കേലും ജയിനും എല്ലാം ഇന്ന് ഉത്തരവാദിത്തവും, പ്രാരാബ്ധവും ഒക്കെ ഉള്ള മുതിർന്നവരായി മാറിയിരിക്കുന്നു. ബാല്യം എന്നോ കൊഴിഞ്ഞ് പോയ ഇരുവരും യാഥാർഥ്യങ്ങളുടെ കാഠിന്യവുമായി പൊരുത്തപ്പെട്ട് വരികയാണ്. ആദ്യ ചിത്രത്തിലെ സംഭവങ്ങൾ എല്ലാം തങ്ങളുടെ മനസ്സിൽ ഉണ്ടായ കേവലം സങ്കൽപ്പങ്ങൾ മാത്രമാണെന്ന ചിന്തയിലാണ് ഇരുവരും ഇന്ന് ജീവിക്കുന്നത്. എന്നാൽ ഇരുവരുടെയും പ്രതീക്ഷകൾക്കും വിശ്വാസങ്ങൾക്കും വിപരീതമായി മേരി പോപ്പിൻസ് എന്ന യുവതി ഒരു തവണ കൂടി മടങ്ങി എത്തുമ്പോൾ അക്ഷരാർത്ഥത്തിൽ അമ്പരന്ന് പോവുകയാണ് ജയിനും, മൈക്കേലും. തുടർന്ന് ഈ കഥാപാത്രങ്ങളുടെ ജീവിതത്തിൽ അരങ്ങേറുന്ന സംഭവങ്ങളാണ് ഈ ചിത്രത്തിന്റെ പ്രമേയം.

🔸പിന്നാമ്പുറം : ഒരു മ്യുസിക്കൽ ചിത്രമാണ് മേരി പോപ്പിൻസ്, നിർണ്ണായകമായ കഥാ സന്ദർഭങ്ങളിലും സംഭാഷണങ്ങളിലും എല്ലാം പാട്ട് രൂപേണയുള്ള അവതരണമാണ് ചിത്രം പിന്തുടരുന്നത്. മ്യുസിക്കൽ ചിത്രങ്ങൾ കണ്ട് ശീലിച്ചിട്ടില്ലാത്തവർക്ക് ചിലപ്പോൾ കല്ല് കടിയായി തോന്നിയേക്കാം ഈ ചിത്രം. ജൂലി ആൻഡ്രൂസിനെ നായികയാക്കി അറുപതുകളിൽ പുറത്തിറങ്ങിയ ചിത്രത്തിന്റെ രണ്ടാം ഭാഗമാണ് മേരി പോപ്പിൻസ് റിട്ടേൺസ്, പഴയ ചിത്രത്തിലെ അനവധി കഥാപാത്രങ്ങൾ ഈ ചിത്രത്തിന്റെ ഭാഗമായി വന്ന് പോവുന്നുണ്ട്. എമിലി ബ്ലൻഡ് ടൈറ്റിൽ കഥാപാത്രത്തെ അവതരിപ്പിക്കുന്ന ചിത്രത്തിൽ ബെൻ വിഷോ, ലിൻ മിറാൻഡ, എമിലി മോർട്ടിമാർ, ജൂലി വോട്ടേഴ്‌സ്, കോളിൻ ഫിർത് എന്നിവരും പ്രത്യക്ഷപ്പെടുന്നുണ്ട്, മെറിൽ സ്ട്രീപ് അതിഥിതാരമായും ചിത്രത്തിന്റെ ഭാഗമാവുന്നുണ്ട്.

🔸പോസിറ്റിവ്‌സ് : മേരി പോപ്പിൻസ് റിട്ടേൺസ് എന്ന ചിത്രത്തിന്റെ ജീവനാഡി എന്നൊക്കെ വേണമെങ്കിൽ വിശേഷിപ്പിക്കാം എമിലി ബ്ലൻഡിനെ, ടൈറ്റിൽ കഥാപാത്രം അർഹിക്കുന്ന രീതിയിലുള്ള മാനറിസങ്ങളോട് കൂടി ഏറെക്കുറെ ചിത്രം ഒന്നടങ്കം കയ്യടക്കുന്നുണ്ട് എമിലി ബ്ലൻഡ്, ഓസ്കാർ വേർതി എന്നൊന്നും പറയാനാവില്ലെങ്കിലും ചിത്രം ആവശ്യപ്പെടുന്നത് നൂറ് ശതമാനം സ്‌ക്രീനിൽ നൽകുന്നുണ്ട് അവർ. മ്യൂസിക്കൽ ചിത്രങ്ങളോട് വലിയ താല്പര്യം ഇല്ലെങ്കിലും ബേധപ്പെട്ട രീതിയിൽ മടുപ്പിക്കാതെ പോവുന്ന ഗാനങ്ങളും ചിത്രത്തിന്റെ പ്രത്യേകത ആണ്. ബെൻ വിഷോ എന്ന നടന് ഉത്തരവാദിത്തങ്ങൾ തലയിലേറ്റിയ കഥാപാത്രമായി എത്ര കണ്ട് മാറാൻ കഴിയും എന്ന കാര്യത്തിൽ സംശയം ഉണ്ടായിരുന്നെങ്കിലും ടിയാൻ ഉൾപ്പെടുന്ന സഹ താരങ്ങളും തന്റെ വേഷം ഒട്ടും മോശമാക്കിയില്ല എന്നതാണ് സത്യം. ഇതോടൊപ്പം നല്ല ചില സർപ്രൈസ് രംഗങ്ങൾ കൂടിയുണ്ട് ചിത്രത്തിൽ, അവയിലേക്ക് കടക്കുന്നില്ല അത് സർപ്രൈസ് ആയി തന്നെ നിൽക്കട്ടെ.

🔸നെഗറ്റിവ്‌സ് : മോശം എന്ന് പറയാൻ കാര്യമായി ഒന്നുമില്ലെങ്കിൽ കൂടിയും ആദ്യ ചിത്രം പകരുന്ന ഫീലും മാജിക്കും ഒന്നും തന്നെ ഈ ചിത്രത്തിന് നൽകാൻ കഴിയുന്നില്ല, ഒരുപക്ഷെ രണ്ട് ചിത്രങ്ങളും അടുത്തടുത്ത കാലയളവിൽ കണ്ടത് കൊണ്ടാവാം, മറ്റുള്ളവരുടെ അനുഭവം വ്യത്യസ്തം ആവാനും സാധ്യത ഉണ്ട്. തുടക്കത്തിൽ ഒരല്പം സ്ലോ ആണ് മേരി പോപ്പിൻസ് റിട്ടേണ്സ്, ആദ്യ ചിത്രം പോലെ തന്നെ കഥാപാത്രം സ്‌ക്രീനിൽ എത്താൻ ഒരല്പം സമയം എടുക്കുന്നുണ്ടെങ്കിലും, മുൻ ചിത്രം പോലെ ആ സമയം മികച്ച രീതിയിൽ ഉപയോഗിക്കാൻ ഈ ചിത്രത്തിന് കഴിഞ്ഞിട്ടുണ്ടെന്ന് തോന്നുന്നില്ല. ഇതിനോടൊപ്പം തന്നെ എന്തിനോ വേണ്ടി തിളച്ച സാംബാർ എന്നൊക്കെ വിശേഷിപ്പിക്കാവുന്ന സ്ട്രീപ്പിന്റെ കാമിയോ കൂടി ചേരുമ്പോൾ ചിത്രത്തിന്റെ മോശമെന്ന് അനുഭവപ്പെട്ട കാര്യകാരണങ്ങൾ പറഞ്ഞ് തീരും.

🔸കാണണമോ വേണ്ടയോ : ഈ ചോദ്യത്തിന്റെ ഉത്തരം ചില ചോദ്യങ്ങൾക്കുള്ള ഉത്തരവുമായി ബന്ധപ്പെട്ട് കിടക്കും. മ്യുസിക്കൽ ചിത്രങ്ങളോട് താല്പര്യമുള്ള വ്യക്തി ആണ് കാഴ്ചക്കാരൻ എങ്കിൽ തീർച്ചയായും ഈ ചിത്രം നിങ്ങൾക്ക് നല്ല അനുഭവം ആവും, യാതൊരു സംശയവുമില്ല. ഈ വിഭാഗത്തോട് വലിയ പരിചയം ഇല്ലെങ്കിൽ ആദ്യ ഭാഗം കാണുക, ഇഷ്ടപ്പെടുക ആണെങ്കിൽ ഈ വേർഷൻ കണ്ടാൽ മതിയാവും, അതിനോട് താല്പര്യം തോന്നിയില്ലെങ്കിൽ ഈ ചിത്രം നിങ്ങൾക്ക് പറ്റിയ ഒന്നാവില്ല. മ്യുസിക്കൽ ചിത്രങ്ങൾ പൊതുവെ വിരളമായി പുറത്തിറങ്ങുന്ന ഈ കാലയളവിൽ വ്യത്യസ്തമായ ഒരനുഭവം ആവും മേരി പോപ്പിൻസ് റിട്ടേൺസ് എന്ന കാര്യത്തിൽ സംശയമില്ല.

Verdict : Good

DC Rating : 70/100

475. Jinnah (1998)

Director : Jamil Dehlavi

Genre : Biography

Rating : 8.1/10

Country : Pakistan

Duration : 109 Minutes

🔸"ചരിത്രം തിരുത്തി കുറിച്ചവർ എന്ന് അവകാശപ്പെടാൻ കഴിവുള്ള വളരെ കുറച്ച് വ്യക്തിത്വങ്ങളെ ഭൂമിയിൽ ജന്മം നേടിയിട്ടുള്ളൂ, ലോകത്തിന്റെ ഭൂപടം തന്നെ മാറ്റി രചിക്കാൻ കഴിഞ്ഞവർ അതിലും ചുരുക്കമാണ്, ഒരു പുതിയ രാജ്യം സൃഷ്ട്ടിക്കാൻ കഴിഞ്ഞവർ അത്യപൂർവം. ജിന്ന എന്ന വ്യക്തി ഈ മൂന്ന് ബഹുമതികൾക്കും അർഹനാണ്" ഈ വരികളോട് കൂടിയാണ് ജിന്ന എന്ന പാകിസ്താനി ബ്രിട്ടീഷ് ബയോഗ്രഫിക്കൽ ചിത്രം ആരംഭിക്കുന്നത്, ചരിത്രത്തിൽ ഈ വ്യക്തിത്വത്തിനുള്ള പ്രാധാന്യം ഏറെക്കുറെ ഈ വരികൾ ഉൾക്കൊള്ളുന്നുണ്ട്. നമ്മൾ പാഠ പുസ്തകങ്ങളിലൂടെയും കേട്ടറിവുകളിലൂടെയും പരിചയിച്ച ചരിത്രത്തിലെ അനവധി കഥാപാത്രങ്ങളിൽ ഒന്നായ, ഒരുപരിധി വരെ തിരസ്കരിക്കപ്പെട്ട വ്യക്തി ഈ ചിത്രത്തിൽ സെന്റർ സ്റ്റേജ് കരസ്ഥമാക്കുകയാണ്.

🔸രണ്ടാം ലോകമഹായുദ്ധം അവസാനിച്ചിരിക്കുന്നു, ഇന്ത്യയിലെ ബ്രിട്ടീഷ് ഭരണത്തിന്റെ നാളുകൾ ഏറെക്കുറെ എണ്ണ പെട്ട് കഴിഞ്ഞിരിക്കുന്നു. പുതിയ, സ്വതന്ത്ര രാജ്യം എന്ന ചിന്തയുമായി ഭാരതീയർ പൊരുത്തപ്പെട്ട് വരികയാണ്, എന്തിരുന്നാലും സംശയങ്ങൾ ഒരുപാട് ബാക്കി കിടക്കുകയാണ്, പ്രത്യേകിച്ചും ഇന്ത്യയിലെ മുസ്ലിം സമുദായത്തിന്റെ കാര്യത്തിൽ. തങ്ങളുടെ വസ്തു വകകളിലും അവകാശങ്ങളിലും ആകുലപ്പെട്ടവർ ഒരു പുതിയ രാജ്യത്തിന് വേണ്ടി മുറവിളി കൂട്ടുമ്പോൾ പ്രതീക്ഷകളെല്ലാം ജിന്ന എന്ന വയോധികനിൽ ആയിരുന്നു. ഈ ഒരു പശ്ചാത്തലത്തിലാണ് ചിത്രം മുന്നേറുന്നതും, ജിന്നയെ നമ്മൾ പരിചയപ്പെടുന്നതും.

🔸മഹാത്മാ ഗാന്ധി, ജവഹർലാൽ നെഹ്‌റു തുടങ്ങിയ ദേശീയ നേതാക്കളെ മുന്നിൽ നിർത്തിക്കൊണ്ട് അറിഞ്ഞ ചരിത്രത്തിൽ നിന്നും വ്യതിചലിച്ച ഒന്നായി ഈ ചിത്രം അനുഭവപ്പെട്ടേക്കാം, പ്രത്യേകിച്ചും ആരാധിക്കപ്പെട്ട ചില കഥാപാത്രങ്ങളെ ഒരല്പം നെഗറ്റിവ് ഷെയ്ഡിൽ കൂടി സ്‌ക്രീനിൽ എത്തിക്കുമ്പോൾ ചിലർക്കെങ്കിലും അവ അംഗീകരിക്കാൻ കഴിയാതെ വന്നേക്കാം. എന്നാൽ എഴുതപ്പെട്ട ചരിത്രമെല്ലാം യാഥാർഥ്യം ആവണമെന്നില്ല എന്ന വിശ്വാസത്തോട് കൂടെയും, ഇത് പ്രാധാന്യം ലഭിക്കാതെ പോയ ചില സംഭവങ്ങളുടെ അവതരണം ആണെന്ന തിരിച്ചറിവോട് കൂടെയും സമീപിച്ചാൽ വളരെ മികച്ച ഒരു ദൃശ്യാനുഭവം കാഴ്ചക്കാരന് ലഭിക്കും എന്നതിൽ സംശയമേതുമില്ല.

🔸സ്ഥിരം ബയോഗ്രഫി ചിത്രങ്ങളുടെ ശൈലിയിൽ നിന്നും മാറിയാണ് ചിത്രം മുന്നേറുന്നത്, സിനിമ ആരംഭിക്കുന്നത് ജിന്നയുടെ മരണത്തോടെയാണ്. കുറച്ച് നാളുകളായി രോഗം കാരണം ബുദ്ധിമുട്ടികൊണ്ടിരിക്കുന്ന ജിന്നയെയും വഹിച്ച് കൊണ്ടുള്ള വിമാനം കറാച്ചിയിൽ എത്തുകയാണ്, അവിടെ നിന്നും ഗവർണറുടെ വസതിയിലേക്കുള്ള യാത്രാമധ്യേ വാഹനം കേടാവുകയും, രാജ്യത്തിന്റെ സൃഷ്ട്ടാവ് എന്ന പദവിക്ക് തന്നെ അർഹനായ ആ വ്യക്തി റോഡിൽ വെച്ച് മരണത്തിന് കീഴടങ്ങുകയുമാണ്. മരണശേഷം പരലോകത്ത് എത്തുന്ന ജിന്നയ്ക്ക് അവിടെയും പരീക്ഷണങ്ങൾ നേരിടേണ്ടി വരികയാണ്, തന്റെ കർമങ്ങൾ കാരണം ജിന്ന കടന്ന് ചെല്ലേണ്ടത് സ്വർഗ്ഗത്തിലേക്കോ നരകത്തിലേക്കോ എന്ന കാര്യത്തിൽ അനിശ്ചിതത്വം നിലനിൽക്കുകയാണ്.

🔸ഈ കാര്യത്തിൽ ഒരു തീരുമാനത്തിനായി ജിന്നയും തീരുമാനം കൈക്കൊള്ളേണ്ട വ്യക്തിയും ചേർന്ന് ജിന്നയുടെ സംഭവബഹുലമായ ജീവിതത്തിലൂടെ ഒരു തവണ കൂടി സഞ്ചരിക്കാൻ തയ്യാറാവുകയാണ്. അവിടെ നിന്നും ഇന്ത്യൻ സ്വാതന്ത്ര്യ സമരത്തിന്റെയും, പാകിസ്ഥാൻ എന്ന രാജ്യത്തിൻറെ ഉദയത്തിന്റെയും കേട്ട് ശീലിച്ചിട്ടില്ലാത്ത ഒരു വിവരണത്തിലേക്ക് ചിത്രം കടന്ന് ചെല്ലുകയാണ്. ടൈറ്റിൽ കഥാപാത്രത്തെ അവതരിപ്പിച്ചിരിക്കുന്നത് സ്റ്റാർ വാർസ്, ലോർഡ് ഓഫ് ദി റിങ്‌സ്, ജെയിംസ് ബോണ്ട് ചിത്രങ്ങളിലൂടെ പ്രശസ്തി നേടിയ ക്രിസ്റ്റഫർ ലീ ആണ്. ജെയിംസ് ഫോക്സ്, ഇന്ദിര വർമ്മ, മരിയ ഐറ്റകെൻ എന്നിവർ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. ബയോഗ്രഫി, ചരിത്ര സിനിമകളോട് താല്പര്യമുള്ളവർക്ക് നല്ലൊരു അനുഭവമാകും ജിന്ന എന്ന ചിത്രം, ചിത്രത്തിന്റെ നല്ല പ്രിന്റുകൾ യുറ്റ്യുബിലും ടെലിഗ്രാമിലും എല്ലാം ലഭ്യമാണ്. കാണാൻ ശ്രമിക്കുക, തീർച്ചയായും ശുപാർശ ചെയ്യുന്നു.

Verdict : Good

DC Rating : 76/100

474. Bumblebee (2019)

Director : Travis Knight

Genre : Sci Fi

Rating : 7.3/10

Country : USA

Duration : 114 Minutes

🔸കഥ : ഓട്ടോബോറ്റ്സും ഡിസെപ്റ്റിക്കോൻസും തമ്മിലുള്ള ആഭ്യന്തര യുദ്ധം അതിന്റെ അന്ത്യ ഘട്ടത്തോട് അടുത്ത് കൊണ്ടിരിക്കുന്നു, വിപ്ലവകാരികളുടെ പരിവേഷമുള്ള ഓട്ടോബോട്ട്സ് തോൽവിയുടെ വക്കിലാണ്. ഇത്രയും നാൾ പിടിച്ചുനിന്ന കേന്ദ്രങ്ങളിൽ ഒന്നും തന്നെ തങ്ങളുടെ ഭാവി സുരക്ഷിതമല്ല എന്ന് മനസിലായ ഓട്ടോബോട്ട്സ് തലവനായ ഒപ്റ്റിമസ് പ്രൈം തന്റെ കയ്യാളായ B-127 അഥവാ ബംബിൽബിയെ ഭൂമിയിലേക്ക് അയക്കുകയാണ്, ചെറുത്ത് നില്പിന് ആവശ്യമായ പുതിയൊരു കേന്ദ്രമാണ് വരവിന്റെ ഉദ്ദേശം. ഈ വരവിൽ ബംബിൽബി ചാർളി എന്ന യുവതിയുമായി സൗഹൃദത്തിൽ ആവുന്നതും തുടർന്ന് അരങ്ങേറുന്ന സംഭവ വികാസങ്ങളും എല്ലാമാണ് ഈ ചിത്രത്തിന്റെ പ്രമേയം.

🔸പിന്നാമ്പുറം : ഞങ്ങളുടെ നാട്ടിൽ പണ്ട് പവിത്രൻ എന്ന് പേരുള്ള ഒരു പുള്ളി ഉണ്ടായിരുന്നു, പുള്ളിക്ക് നിർദോഷകരമായ ചില ഹോബികളും. സ്ഥിരം ക്വോട്ട അകത്ത് ചെന്ന് കഴിഞ്ഞാൽ പുള്ളി വെയ്റ്റിങ് ഷെൽറ്ററിൽ വന്ന് ഇരുന്നതിന് ശേഷം കയ്യിലുള്ള പടക്കങ്ങൾ എടുത്ത് കത്തിച്ച് വഴിയേ പോവുന്നവരുടെ നേരെ എറിയും. ഉപദ്രവം ഒന്നുമല്ല ലക്ഷ്യം, പുള്ളി മരിക്കുന്നത് വരെ ആർക്കെങ്കിലും അപകടം സംഭവിച്ചിട്ടുള്ളതായി കേട്ടിട്ടില്ല, മറിച്ച് ആ പൊട്ടിത്തെറിയും ശബ്ദവും വഴിപോക്കരുടെ ഞെട്ടലും ഒക്കെ കാണുമ്പോൾ പുള്ളിക്ക് ഒരു എന്റർടൈൻമെന്റ്, പിന്നെ ചിരിയായി കളിയായി അങ്ങനെ പോവും. ട്രാൻസ്‌ഫോർമർ സീരീസിനെയും സംവിധായകനായ മൈക്കൽ ബെയെയും ഓർക്കുമ്പോൾ പല കാരണങ്ങൾ കൊണ്ടും മുകളിൽ സൂചിപ്പിച്ച കഥാപാത്രത്തെയാണ് ഓർമ വരാറ് (പൊട്ടി തെറിയോടുള്ള ബെയുടെ താല്പര്യം കൊണ്ടാവാം). എന്ത് തന്നെ ആയാലും മൈക്കൽ ബേ കളമൊഴിഞ്ഞതിന് ശേഷം പുറത്തിറങ്ങുന്ന ആദ്യ ട്രാൻസ്ഫോർമേഴ്‌സ് ചിത്രമാണ് ബംബിൽബീ, അത് തന്നെ ആയിരുന്നു പ്രതീക്ഷ പകരുന്ന ഘടകവും.

🔸പോസിറ്റിവ്‌സ് : ആദ്യമേ തന്നെ എടുത്ത് പറയേണ്ടത് ഹൈലി സ്റ്റാൻസ്ഫീൽഡിന്റെ കേന്ദ്ര കഥാപാത്രത്തെ പറ്റിയാണ്, യാതൊരു താല്പര്യവും തോന്നിപ്പിക്കാത്ത മുൻകാല നായക കഥാപാത്രത്തിൽ നിന്നും ചിത്രം ഈ 'നായികയിലേക്ക്' എത്തുമ്പോൾ ഒരല്പം കൂടി റിലേറ്റബിൾ ആണ്, പോരാത്തതിന് കാഴ്ചക്കാരനുമായി ഒരടുപ്പം സൃഷ്ടിക്കാനും അവർക്ക് കഴിഞ്ഞിട്ടുണ്ട്. ഏജന്റ് ബേൺസ് എന്ന കഥാപാത്രമായി ജോൺ സീനയും നന്നായി തോന്നി. മികച്ച ദൃശ്യങ്ങളും, കഥാപാത്രങ്ങളുടെ ട്രാൻസ്ഫോർമേഷൻ രംഗങ്ങളും, ബേധപ്പെട്ട കഥയും ടൈറ്റിൽ കഥാപാത്രം തന്നെയും ചിത്രത്തിന്റെ പ്ലസ് പോയിന്റുകളാണ്. മുൻ ചിത്രങ്ങളുമായി താരമത്യം ചെയ്യുമ്പോൾ ഒരല്പം ഗ്രൗൻഡഡ്‌ ആയി നിൽക്കുന്ന ഈ ചിത്രം ആ ഒറ്റ കാരണം കൊണ്ട് മാത്രം കയ്യടി അർഹിക്കുന്നുണ്ട്.

🔸നെഗറ്റിവ്‌സ് : ഒരല്പം സ്ലോ ആണ് ചിത്രം, പലയിടത്തും. മൈക്കൽ ബേയിൽ നിന്ന് വ്യത്യസ്തമായി ദൈർഘ്യം കുറച്ച അവതരണമാണ് ട്രാവിസ് നൈറ്റ് പിന്തുടർന്നതെങ്കിലും ആവശ്യമില്ലാത്ത ചില കഥാപാത്രങ്ങളും സന്ദര്ഭങ്ങളും ബാക്ക്സ്റ്റോറികളും ചിത്രത്തിൽ കടന്ന് കൂടിയിട്ടുണ്ട്. ഇവയ്ക്ക് പുറമെ അവസാന ചിത്രമായ ലാസ്റ്റ് നൈറ്റിലേക്കുള്ള ചെറിയ ഒരു ഓര്മപ്പെടുത്തലും അനാവശ്യമായി തോന്നി. ഇതൊഴിവാക്കിയാൽ തീർച്ചയായും ആസ്വദിക്കാൻ കഴിയുന്ന നല്ല ചിത്രം തന്നെയാണ് ബംബിൽബി.

🔸കാണണമോ വേണ്ടയോ : മുൻകാല ചിത്രങ്ങളുമായി തട്ടിച്ച് നോക്കുമ്പോൾ സീരീസിന് തന്നെ നല്ലൊരു ഉണർവാണ് ഈ ചിത്രം, ഒരുപക്ഷെ സീരീസിലെ ഏറ്റവും മികച്ചത് എന്ന് തന്നെ പറയാം. മറ്റ് ചിത്രങ്ങൾ വ്യക്തിപരമായി ഒട്ടും ഇഷ്ട്ടപ്പെടാഞ്ഞതിനാൽ തന്നെ ഈ താരമത്യത്തിന് വലിയ ശ്രദ്ധ കൊടുക്കേണ്ടതില്ല. ട്രാൻസ്‌ഫോർമർ ചിത്രം എന്നത് ആക്ഷന് പ്രാധാന്യം കൊടുക്കുന്ന ഒന്ന് ആയതിനാൽ തന്നെ വലിയ സ്‌ക്രീനിൽ കാണുന്നത് ഗുണം ചെയ്യും. ആകെ മൊത്തം നോക്കുമ്പോൾ പറയാൻ കഴിയും എന്ന് പ്രതീക്ഷിച്ചതല്ലെങ്കിൽ കൂടി കാണാവുന്ന നല്ലൊരു ട്രാൻഫോർമേഴ്‌സ് ചിത്രം തന്നെയാണ് ബംബിൽബി, കാണാൻ ശ്രമിക്കുക.

Verdict : Good

DC Rating : 76/100

473. The Mule (2018)

Director : Clint Eastwood

Genre : Crime

Rating : 7.2/10

Country : USA

Duration : 117 Minutes

🔸കഥ : ഏൾ സ്റ്റോൺ എന്ന വ്യക്തിയുടെ കഥയാണ് ദി മ്യുൾ, സ്റ്റോൺ ആള് ചില്ലറക്കാരനല്ല, വിയേറ്റ്‌നാം യുദ്ധകാലത്ത് അമേരിക്കൻ സേനയിൽ സേവനം അനുഷ്ഠിച്ച വ്യക്തിയാണ്. തൊണ്ണൂറ് വയസ്സിന് മുകളിൽ പ്രായമുള്ള സ്റ്റോൺ തന്റെ മുൻകാല ജീവിതം കാരണവും നോ നോൺസെൻസ് സ്വഭാവം കാരണവും പൊതുവെ എല്ലാവരാലും ബഹുമാനിക്കപ്പെടുന്ന വ്യക്തിത്വമാണ്, തന്റെ ഇടപെടലുകളിലൂടെയും പതിറ്റാണ്ടുകൾ നീണ്ട് നിന്ന വ്യക്തി ജീവിതത്തിലൂടെയും നേടിയെടുത്ത ഈ റെസ്പെക്റ്റ് മാത്രമേ ഇപ്പോൾ സ്റ്റോണിൻ്റെ പക്കൽ ഉള്ളൂ എന്നതാണ് വിഷമകരമായ കാര്യം. വ്യക്തിജീവിതത്തിലും സമ്പാദ്യത്തിലും എല്ലാം അയാൾ ഒരു പരാജയമായി മാറിയിരിക്കുന്നു, ഒടുവിൽ ഒരുനാൾ പിടിച്ച് നിൽക്കാനായി താൻ ഇത്രയും കാലം നേടിയെടുത്ത പേരും പ്രശസ്തിയും മറ്റുള്ളവരുടെ ബഹുമാനവും എല്ലാം സ്റ്റോൺ പണയം വെക്കാൻ തയ്യാറാവുകയാണ്. മറ്റ് മാർഗങ്ങൾ ഏതും ഇല്ലാത്തതിനാൽ അയാൾ ഒരു ഡ്രഗ് സിണ്ടിക്കേറ്റിന്റെ ഭാഗമായി മാറുകയാണ്.

🔸പിന്നാമ്പുറം : ഒരുപാട് പ്രത്യേകതകൾ ഉണ്ട് ദി മ്യുൾ എന്ന ചിത്രത്തിന്, ഉദ്ദേശം ആറ് വർഷങ്ങൾക്ക് ശേഷമാണ് ക്ലിന്റ് ഈസ്റ്റ്‌വുഡ് അഭിനേതാവ് എന്ന രീതിയിൽ ഒരു ചിത്രത്തിന്റെ ഭാഗമായി മാറിയിരിക്കുന്നത്, ഇതിന് പുറമെ സംവിധായക ചുമതല കൂടി ഏറ്റെടുത്ത ഇദ്ദേഹം ഏറെക്കുറെ ചിത്രം ഒരു പൂർണ്ണ ക്ലിൻറ്റ് ഈസ്റ്റ്‌വുഡ് ഷോ ആയി മാറ്റുന്നുമുണ്ട്. ക്ലിന്റിന് പുറമെ താരമത്യേന ചെറുതെങ്കിലും പ്രാധാന്യം അർഹിക്കുന്ന കഥാപാത്രങ്ങളായി ബ്രാഡ്‌ലി കൂപ്പർ, മൈക്കൽ പേന, ഡെയ്ൻ വെസ്റ്റ് എന്നിവരും ചിത്രത്തിന്റെ ഭാഗമാവുന്നുണ്ട്. ലിയോ ഷാർപ് എന്ന വ്യക്തിയുടെ യഥാർത്ഥ ജീവിത കഥയാണ് ഈ ചിത്രത്തിന് പ്രചോദനം ആയിട്ടുള്ളത്, മുൻകാല പട്ടാളക്കാരനിൽ നിന്നും ഡ്രഗ് ഡീലറിലേക്കുള്ള ഷാർപ്പിന്റെ പരിണാമം മികച്ച രീതിയിൽ തന്നെ ഈസ്റ്റ്‌വുഡിലൂടെ ചിത്രം സ്‌ക്രീനിൽ എത്തിച്ചിട്ടുണ്ട്.

🔸പോസിറ്റിവ്‌സ് : ഒരൊറ്റ പേര്, ക്ലിന്റ് ഈസ്റ്റ്‌വുഡ്. കഴിഞ്ഞ ആറ് വർഷമായി മൊതലാളിയെ സ്‌ക്രീനിൽ കണ്ടിട്ട്, അതിനാൽ തന്നെ ബംബിൽബി, മേരി പോപ്പിൻസ് റിട്ടേൺസ് എന്നീ ചിത്രങ്ങൾക്ക് മുൻപ് ദി മ്യുൾ കാണണം എന്നത് മുൻപേ തീരുമാനിച്ച് ഉറപ്പിച്ച കാര്യം തന്നെ ആയിരുന്നു. ഈ പ്രതീക്ഷയോട് ചിത്രം നീതി പുലർത്തുന്നുണ്ട്, പ്രത്യേകിച്ചും ചിത്രത്തിന്റെ നിർണ്ണായക ഘട്ടങ്ങളിൽ ഒന്നിൽ പല്ല് കടിച്ച് പിടിച്ച്, ചുണ്ട് കോട്ടി, ഒരു കണ്ണ് പാതി ഇറുക്കിയുള്ള ആ നോട്ടം മാത്രം മതി പടയപ്പ സിനിമയിൽ രമ്യ കൃഷ്ണൻ പറയുന്ന ഡയലോഗ് ഒന്ന് കൂടി റിപ്പീറ്റ് അടിക്കാൻ. തൊണ്ണൂറാം വയസ്സിലും ഒരു ചിത്രം തന്റേതാക്കി മാറ്റാനുള്ള ആ കഴിവിന് ഉദാഹരണമാണ് ദി മ്യുൾ. സ്‌ക്രീനിൽ എത്തിയ മറ്റ് നടന്മാരും മികച്ച് നിന്നു, ദോഷം പറയാനില്ലാത്ത ഛായാഗ്രഹണവും മറ്റൊരു പ്രത്യേകത ആണ്.

🔸നെഗറ്റിവ്‌സ് : ക്ലിൻറ്റ് ഈസ്റ്റ്‌വുഡ് ഫാക്ടർ മാറ്റി നിർത്തിയാൽ അവിടെ നിന്നാണ് ചിത്രം ചോദ്യങ്ങൾ ഉയർത്തി തുടങ്ങുന്നത്, വളരെ ബേസിക് ആയ കഥയാണ് ദി മ്യുളിന്റേത്. ഏറെക്കുറെ നമ്മൾ പ്രതീക്ഷിക്കുന്ന രീതിയിൽ തന്നെയാണ് ചിത്രം കടന്ന് പോവുന്നതും. റിയൽ ലൈഫ് സ്റ്റോറി ആയതിനാൽ തന്നെ അതിൽ കുറ്റം പറയുന്നത് മോശം ആയതിനാൽ ഒഴിവാക്കാം. ചിത്രത്തിന്റെ ട്രൈലെർ വന്ന സമയത്ത് തന്നെ ലിയോ ഷാർപ്പ് എന്ന വ്യക്തിയെ കുറിച്ച് അന്വേഷിച്ച് വെച്ചിരുന്നതിനാൽ ദി മ്യുളിന്റെ ക്ലൈമാക്സ് ചില ചോദ്യങ്ങളും സംശയങ്ങളും ഉയർത്തുന്നുണ്ട്, എന്തിരുന്നാലും സ്പോയ്ലർ ആവുമെന്നതിനാൽ ഇപ്പോൾ പറയുന്നില്ല. ഇവ രണ്ടും ചിത്രം കണ്ട് കൊണ്ടിരിക്കെ ആസ്വാദനത്തിന് വലിയ കോട്ടം ഒന്നും സൃഷ്ടിച്ചില്ല എന്നതും എടുത്ത് പറയേണ്ടി ഇരിക്കുന്നു.

🔸കാണണമോ വേണ്ടയോ : കാണാം, ഒരു തവണ കാണാനുള്ള വകുപ്പെല്ലാം ചിത്രത്തിലുണ്ട്. ഈസ്റ്റ്‌വുഡ് ഷോ എന്നതിനും ഡ്രഗ്സ് പ്രമേയമായ ക്രൈം ചിത്രം എന്നതിനും അപ്പുറം മികച്ചൊരു വൈകാരിക സബ്പ്ലോട്ട് കൂടിയുണ്ട് ചിത്രത്തിന്, ആ വിഭാഗത്തിലും ചിത്രം നിരാശപ്പെടുത്തില്ല എന്ന് സാരം. ഇവയ്ക്കൊപ്പം എടുത്ത് പറയേണ്ട മറ്റൊരു വസ്തുത ചിത്രത്തിലുള്ള അഡൽറ്റ് കണ്ടന്റ് ആണ്, സാധാരണ പ്രേക്ഷകർക്ക് വലിയ പ്രശനം ഉണ്ടാവില്ലെങ്കിക്കും ഫാമിലി ഓടിയെൻസിന് ബുദ്ധിമുട്ട് ആയേക്കാവുന്ന രീതിയിലുള്ള സ്വെറിങ്, ചെറിയ രീതിയിൽ ഉള്ള ന്യുഡിറ്റി, വയലെൻസ് എന്നിവ ചിത്രത്തിലുണ്ട്. പ്രശനം ആണെന്നല്ല ഓർമിപ്പിച്ചെന്ന് മാത്രം, ആകെ മൊത്തം പറയുക ആണെങ്കിൽ ഒരു തവണ ആസ്വദിച്ച് കാണാം ഈ ചിത്രം, അതിനുള്ള വക ഈസ്റ്റ്‌വുഡ് കരുതി വെച്ചിട്ടുണ്ട്.

Verdict : Good

DC Rating : 70/100

472. Bose Dead Or Alive (2018)

Creator : Ekta Kapoor

Genre : Historical

Rating : 9.1/10

Seasons : 1

Episodes : 9

Country : India

Duration : 20 - 29 Minutes Per Episode

🔸എല്ലാ കഥയ്ക്കും ഒരു തുടക്കവും അവസാനവും ഉണ്ട്, എല്ലാ ജനനത്തിനും ഒരു മരണവും ഉണ്ട്. ഒരു വ്യക്തിയുടെ ജീവിത കാലയളവിൽ അരങ്ങേറിയ എല്ലാ കഥകളുടെയും അന്ത്യം അയാളുടെ മരണത്തോട് കൂടിയാണ്, എന്നാണ് പൊതുവെ കരുതപ്പെടുന്നത്. എന്നാൽ ചില സന്ദർഭങ്ങളിൽ, ചില അപൂർവ സന്ദർഭങ്ങളിൽ മരണം ഒരു തുടക്കമാണ്. ഒരുപാട് പുതിയ കഥകൾക്ക്, പുതിയ അന്വേഷണങ്ങൾക്ക്, പുതിയ കണ്ടെത്തലുകൾക്ക്. ഇങ്ങനെ ഉള്ള അപൂർവങ്ങളിൽ അപൂർവമായ ഒരു ജീവിതമാണ് നേതാജി സുഭാഷ് ചന്ദ്ര ബോസിന്റേത്. ഒരു പക്ഷെ ജീവിത കാലത്ത് ആരാഞ്ഞ ചോദ്യങ്ങളേക്കാൾ അധികം ചോദ്യങ്ങൾ ബാക്കി നിർത്തി കടന്ന് പോയ ഇതിഹാസം, അതാണ് നേതാജി. ഈ ചോദ്യങ്ങളിൽ മിക്കതും, അദ്ദേഹത്തിന്റെ വിടവിന് എട്ട് പതിറ്റാണ്ടുകൾ തികയുന്ന ഈ കാലത്തും തുടരുന്നു എന്നത് ഒരർത്ഥത്തിൽ അപലപനീയം തന്നെയാണ്, പക്ഷെ മറ്റൊരു രീതിയിൽ ഇതേ വസ്തുത അദ്ദേഹത്തിന് അമർത്യൻ എന്ന പദവിയും നൽകുന്നുണ്ട്, ഇത് പോലെയുള്ള അനവധി ചോദ്യങ്ങളാണ് ഈ ടെലിവിഷൻ സീരീസ് ഉന്നയിക്കുന്നത്.

🔸സ്വാതന്ത്ര്യം എന്നത് ആരും കൈക്കുമ്പിളിൽ വച്ച് നീട്ടേണ്ടത് അല്ലെന്നും അത് പിടിച്ചെടുക്കപ്പെടേണ്ടത് ആണെന്നും അതിന് രക്തവും വിയർപ്പും മാംസവും ജീവനും എല്ലാം ആവശ്യമാണെന്നുമുള്ള സുഭാഷ് ചന്ദ്ര ബോസിന്റെ വരികളിലൂടെയാണ് സീരീസ് ആരംഭിക്കുന്നത്. ആദ്യ രംഗത്ത് കാണുന്നത് ജപ്പാനിലെ ഫോർമോസ (ഇന്നത്തെ തായ്വാൻ) എന്ന ഗ്രാമ പ്രദേശത്ത് ഒരു പ്ലെയിൻ വീണ് തരിപ്പണം ആവുന്നതാണ്, നിയമ രേഖകൾ പ്രകാരവും സഹ യാത്രികരുടെ മൊഴികൾ പ്രകാരവും ആ പ്ലെയിനിലെ യാത്രികരിൽ ഒരാളായിരുന്നു സുഭാഷ് ചന്ദ്ര ബോസ്. ഈ മൊഴികൾ കണക്കിലെടുക്കുമ്പോൾ നേതാജി അവിടെ കൊല്ലപ്പെട്ടു എന്ന് പറയേണ്ടി വരും, എന്നാൽ അത്ര എളുപ്പത്തിൽ നിഗമനത്തിൽ എത്താൻ കഴിയുന്ന വിഷയമല്ല ഇത്, അതിലേക്കുള്ള വെളിച്ചം വീശലാണ് ഈ ഒൻപത് ഭാഗങ്ങളായി എത്തുന്ന ഹിസ്റ്റോറിക്കൽ സീരീസ്.

🔸ഒൻപത് എപ്പിസോഡുകളിലായി ഏകദേശം മൂന്ന് മണിക്കൂർ ദൈർഖ്യമുള്ള ഈ ടിവി സീരീസിനെ കൃത്യം രണ്ടായി തിരിക്കാം. ഒന്ന് നമ്മൾ കേട്ട് ശീലിച്ച സുഭാഷ് ചന്ദ്ര ബോസ് എന്ന വ്യക്തിയുടെ നേതാവായുള്ള ഉയർച്ചയുടെയും ബ്രിട്ടീഷ് ഭരണവുമായി ഉടലെടുത്ത അസ്വാരസ്യങ്ങളുടെയും പോരാട്ടങ്ങളുടെയും കഥ. രണ്ടാമത്തേത് സത്യം എന്നതിനേക്കാൾ സാധ്യതകളിൽ നില നിൽക്കുന്ന ചില വസ്തുതകളാണ്, മുകളിൽ സൂചിപ്പിച്ച വിമാന അപകടത്തിൽ നേതാജി മരിച്ചില്ല എന്ന വിശ്വാസത്തിലാണ് ആ ഭാഗം മുന്നേറുന്നത്. ഒന്ന് കൂടി ഓർമപ്പെടുത്തുന്നു, ഇവയെല്ലാം സാദ്ധ്യതകൾ മാത്രമാണ്, സത്യം എന്നത് ഇവയിൽ ഏതും ആവാം ചിലപ്പോൾ നമ്മൾ ഇതുവരെ കേട്ടിട്ട് പോലുമില്ലാത്ത മറ്റൊരു വേർഷനും ആവാം.

🔸അനുജ് ധർ എന്ന ആക്ടിവിസ്റ്റിന്റെ 'ഇന്ത്യാസ് ബിഗസ്റ്റ് കവർ അപ്പ്' എന്ന നോവലിനെ ആസ്പദമാക്കിയാണ് ഈ ടിവി സീരീസ് തയാറാക്കിയിരിക്കുന്നത്. സീരീസിനെ കുറിച്ച് കൂടുതൽ പറയുന്നത് രസം കൊല്ലി ആവും എന്നതിനാൽ അനുജ് ധറിനെ പറ്റിയും അദ്ദേഹത്തിന്റെ വഴികളെ പറ്റിയും ചെറുതായി പറഞ്ഞിടാം. ഒരു പത്രപ്രവർത്തകനും എഴുത്തുകാരനും ആയ അനുജ് ധർ തന്റെ ജീവിതം ഏറെക്കുറെ പൂർണമായും നേതാജി വിഷയത്തിൽ ഉഴിഞ്ഞ് വെച്ച മനുഷ്യനാണ്, രാജ്യത്തെ നേതാക്കൾ പോലും താല്പര്യം പ്രകടിപ്പിക്കാത്ത വിഷയത്തിൽ പതിറ്റാണ്ടുകളുടെ അനുഭവം അദ്ദേഹത്തിന് ഉണ്ട്. ഇന്ത്യയുടെ സ്വതന്ത്ര സമര മുന്നേറ്റങ്ങളെയും, നേതാക്കളെയും ഒക്കെ നിശിതമായി വിമർശിച്ച് കൊണ്ട് അനവധി കൃതികൾ രചിച്ചിട്ടുള്ള അദ്ദേഹത്തിന്റെ ഏറ്റവും വിവാദം സൃഷ്ട്ടിച്ച പുസ്തകങ്ങളിൽ ഒന്നാണ് ഇന്ത്യാസ് ബിഗസ്റ്റ് കവർ അപ്പ്. നേതാജി യഥാർത്ഥത്തിൽ അപകടത്തിൽ കൊല്ലപ്പെട്ടില്ലെന്നും, റഷ്യയിലേക്ക് കടന്ന് കളഞ്ഞെന്നും, അവിടത്തെ തടവുകാരനായി കുറേക്കാലം കഴിഞ്ഞെന്നും പിന്നീട് ഇന്ത്യയിൽ മടങ്ങിയെത്തി സന്യാസ ജീവിതം തുടങ്ങിയെന്നും ഒക്കെയാണ് അദ്ദേഹത്തിന്റെ വേർഷൻ, അതൊക്കെ എന്ത് തന്നെ ആയാലും സത്യം ഇപ്പോഴും ഇരുളിലാണ്.

🔸മുകളിൽ സൂചിപ്പിച്ചത് പോലെ തന്നെ എല്ലാം ചില ഉള്ളുകളികളുടെ ഫലമാണ് എന്ന മട്ടിലാണ് സീരീസ് പുരോഗമിക്കുന്നത്, ഇതിൽ ഏത് വിശ്വസിക്കണം അല്ലെങ്കിൽ ഏത് വേർഷനോട് അനുഭാവം തോന്നുന്നു എന്നതൊക്കെ കാഴ്ചക്കാരന്റെ മാനസികാവസ്ഥ പോലെയിരിക്കും. സുഭാഷ് ചന്ദ്ര ബോസ് എന്ന കഥാപാത്രത്തെ രാജ് കുമാർ റാവു മികച്ച രീതിയിൽ തന്നെ അവതരിപ്പിച്ചിരിക്കുന്നു, ഓരോ കാലഘട്ടങ്ങളിലെയും നേതാജിയെ തികച്ചും വിശ്വസനീയമായ രീതിയിൽ അദ്ദേഹം അഭിനയിച്ച് ഫലിപ്പിച്ചിട്ടുണ്ട്. ഒരു സിനിമയുടെ ദൈർഘ്യം മാത്രമേ ഈ സീരീസിന് ഉള്ളൂ, പിടിച്ചിരുത്തുന്ന രീതിയിലുള്ള അവതരണവും ആണ്, ആയതിനാൽ തന്നെ തീർച്ചയായും കാണാൻ നിർദ്ദേശിക്കുന്നു. ഇതിൽ പറഞ്ഞത് അതേ പോലെ വിശ്വസിക്കുന്നില്ലെങ്കിലും നമ്മൾ കണ്ടതിലധികം എന്തൊക്കെയോ ചരിത്രം മറച്ച് പിടിക്കുന്നുണ്ട് എന്നൊരു സംശയം ഈ സീരീസോട് കൂടി മനസ്സിൽ ഉടലെടുത്തിരിക്കുന്നു.

Verdict : Must Watch

DC Rating : 90

471. The House That Jack Built (2018)

Director : Lars Von Trier

Genre : Horror

Rating : 7.4/10

Country : Denmark

Duration : 155 Minutes

🔸ലാർസ് വോൺ ട്രയർ എന്ന സംവിധായകനെ കുറിച്ചോ അദ്ദേഹത്തിന്റെ സിനിമകളെ പറ്റിയോ കേൾക്കാത്ത വിദേശ സിനിമാ പ്രേമികൾ കുറവായിരിക്കും. ആന്റി ക്രൈസ്റ്റ്, മേലാങ്കോലിയ, ഡാൻസർ ഇൻ ദി ഡാർക്ക്, ഡോഗ്‌വിൽ തുടങ്ങി കാഴ്ചക്കാരന് അത്ര പെട്ടന്നൊന്നും മറക്കാൻ കഴിയാത്ത ഒരു പിടി ചിത്രങ്ങൾ ലാർസ് സിനിമാ ലോകത്തിന് സമ്മാനിച്ചിട്ടുണ്ട്. ലാർസ് വോൺ ട്രയറിന്റെ സിനിമകൾ പൊതുവെ പ്രേക്ഷകരെ രണ്ട് തട്ടിൽ നിർത്താറുണ്ട്, ചിലർക്ക് കഠിനമായ ഈ സിനിമാ അനുഭവം അരോചകമായി തോന്നാറുണ്ടെങ്കിലും മറ്റ് ചിലർക്ക് ആ ചിത്രങ്ങൾ വേറിട്ടൊരു അനുഭവമാണ് (ഞാൻ ഉൾപ്പെടെ), ആയതിനാൽ തന്നെ പ്രീമിയർ ദിവസം കാഴ്ചക്കാരെ മുഴുവൻ വെറുപ്പിച്ച ഒരു ലാർസ് ചിത്രം വരുന്നുണ്ടെന്ന വാർത്ത വളരെ പ്രതീക്ഷയോടെയാണ് സ്വീകരിച്ചത്, ഈ വർഷം ഏറ്റവും കാത്തിരുന്ന ചിത്രങ്ങളിൽ ഒന്നായിരുന്നു ദി ഹൌസ് ദാറ്റ് ജാക്ക് ബിൽട്ട്.

🔸സ്‌ക്രീനിൽ ദൃശ്യങ്ങൾ തെളിയുന്നതിന് മുൻപ് രണ്ട് കഥാപാത്രങ്ങൾ തമ്മിൽ ഉള്ള ചില സംഭാഷണങ്ങളോട് കൂടിയാണ് ചിത്രം ആരംഭിക്കുന്നത്, ഒരാൾ കഥാനായകൻ ആയ ജാക്ക് ആണെങ്കിൽ മറ്റെയാൾ ആരാണെന്ന് ചിത്രം തുടക്കത്തിൽ സൂചനകൾ ഏതും നൽകുന്നില്ല. ഇവിടെ നിന്നും ജാക്ക് തന്റെ കഥ പറഞ്ഞ് തുടങ്ങുകയാണ്, അയാളുടെ ഭാഷയിൽ പറഞ്ഞാൽ രണ്ട് പതിറ്റാണ്ടുകൾ നീണ്ട് നിന്ന അഞ്ച് പ്രസക്ത ഭാഗങ്ങൾ ആയുള്ള ഐതിഹാസികമായ കഥ അവിടെ ആരംഭിക്കുകയായി. വയലൻസും രക്ത ചൊരിച്ചിലും വിഷാദവും എല്ലാം കൃത്യമായ അളവിൽ കൂട്ടി ചേർത്ത ഒരു സ്ഥിരം ലാർസ് സംരംഭം തന്നെയാണ് ഈ ചിത്രവും എന്നത് ഒന്ന് കൂടി ഓർമ്മപ്പെടുത്തട്ടെ.

🔸ജാക്കിന്റെ കഥയിലെ ആദ്യ സംഭവത്തിലെ കേന്ദ്ര കഥാപാത്രം ഉമാ തുർമാന്റെ പേര് പറയാത്ത വഴിയാത്രക്കാരിയാണ്. തന്റെ ദിനചര്യകൾ ഒക്കെയായി മറ്റാരുടെയും കാര്യത്തിൽ ഇടപെടാതെ കടന്ന് പോയിക്കൊണ്ടിരുന്നു ജാക്ക് വഴിയിൽ വെച്ചാണ് തുർമാന്റെ കഥാപാത്രത്തെ പരിചയപ്പെടുന്നത്, കേടായ വണ്ടിയുമായി സഹായം അഭ്യർത്ഥിച്ച് നിന്ന അവരെ ഒഴിവാക്കി കടന്ന് പോവാൻ ആവുന്ന പണി എല്ലാം ജാക്ക് നോക്കിയെങ്കിലും വരാൻ ഉള്ളത് വിമാനം പിടിച്ചായാലും വരും എന്ന സ്ട്രാറ്റജി ശെരി വെച്ച് കൊണ്ട് ഇരുവരും ഒരുമിച്ച് യാത്ര തുടരേണ്ട സന്ദർഭം ഉടലെടുക്കുകയാണ്. തുടർന്ന് അരങ്ങേറുന്ന ചില സംഭവങ്ങൾക്ക് ശേഷം ചിത്രം അടുത്ത ഭാഗത്തേക്ക് കടക്കുകയാണ്.

🔸നിശ്ചിതമായ ഒരകലം പാലിച്ച് കൊണ്ട് ജാക്ക് ഒരു സ്ത്രീയെ പിന്തുടരുന്നിടത്ത് നിന്നാണ് രണ്ടാം ഭാഗം ആരംഭിക്കുന്നത്, കാരണമോ ഉദ്ദേശമോ ഒന്നും വ്യക്തം അല്ലെങ്കിലും ജാക്ക് വളരെ ജാഗരൂകനാണ്. താൻ ചെയ്യാൻ പോവുന്ന ദൗത്യത്തിന് പ്രാധാന്യം ഉള്ളത് കൊണ്ടാവണം ചുറ്റും നന്നായി വീക്ഷിച്ച ശേഷം അയാൾ യുവതിയുടെ വീട്ടിലേക്ക് കടന്ന് ചെല്ലുകയാണ്, മുൻ ഭാഗത്ത് ഇടപഴകലിന് കാരണമായത് യുവതി ആയിരുന്നെങ്കിൽ ഇവിടെ കാര്യങ്ങൾ വളരെ വ്യത്യസ്തമാണ്. ഒരു പോലീസ്‌കാരന്റെ വേഷ പകർച്ചയോട് കൂടി ജാക്ക് ആ വീട്ട് പടിക്കൽ എത്തുന്നിടത്ത് നിന്നും രണ്ടാം ഭാഗം ആരംഭിക്കുകയാണ്.

🔸മുകളിൽ സൂചിപ്പിച്ച രണ്ട് സന്ദര്ഭങ്ങൾക്ക് പുറമെ മൂന്ന് കഥകൾ കൂടിയുണ്ട് ഈ ചിത്രത്തിൽ, അവയിലേക്ക് കൂടി കടന്ന് ചെന്ന് ആസ്വാദനത്തിന് കോട്ടം തട്ടിക്കുന്നില്ല, പരിമിതമായ അറിവോട് കൂടി തന്നെ കാണുന്നതാവും നല്ലത്. ജാക്ക് എന്ന സീരിയൽ കില്ലറുടെ ജീവിതത്തിലെ വ്യത്യസ്ത കാലഘട്ടങ്ങൾ ആണെങ്കിലും ഏതെങ്കിലും വിധേന വയലെന്സ് ഇവയിലെല്ലാം വിഷയമായി കടന്നുവരുന്നുണ്ട്. ഈ അഞ്ച് കഥയ്ക്കും ശേഷം ഒരു ചെറിയ എപിലോഗ് രൂപേണയുള്ള കഥ കൂടിയുണ്ട് ചിത്രത്തിൽ. ലാർസ് വോൺ ട്രയരുടെ മികച്ച ചിത്രങ്ങളിൽ ഒന്നും ഉൾപ്പെടുത്താനുള്ള ശേഷി ഈ ചിത്രത്തിന് ഉണ്ടെന്ന് കരുതുന്നില്ല, എന്തിരുന്നാലും ഒരു തവണ കാണാം പ്രത്യേകിച്ചും സംവിധായകന്റെ മുൻ ചിത്രങ്ങളോട് താല്പര്യമുള്ളവർക്ക്.

Verdict : Above Average

DC Rating : 66/100