537. Repulsion (1965)

Director : Roman Polanski

Genre : Thriller

Rating : 7.8/10

Country : USA

Duration : 105 Minutes

🔸ഇരുൾ നിറഞ്ഞ് നിൽക്കുന്ന ഇടനാഴിയിലൂടെ നടന്ന് നീങ്ങുന്ന നായികാ കഥാപാത്രം, ഇരുൾ കാരണം തന്നെ മുഖമോ മുഖത്തുള്ള ഭാവമോ വ്യക്തമല്ല. ഈ നായികയ്ക്ക് നേരെ ചുവരിൽ നിന്നും നീണ്ട് വരുന്ന കൈകൾ, അതും ഒന്നും രണ്ടുമൊന്നുമല്ല അനവധി കൈകൾ. റിപ്പൽശൻ എന്ന ചിത്രം കാണാൻ കാരണം ഒരു പരിധി വരെ ഇടക്കാലത്ത് കണ്ട ഈ വിഷ്വൽ ആണ്, ഇതിൽ നിന്നും ഒരു ഹൊറർ ചിത്രമാണ് പ്രതീക്ഷിച്ചത് എങ്കിലും ലഭിച്ചത് അതിനും മുകളിൽ നിൽക്കുന്ന ഒരു അനുഭവം ആണ്. പേടിപ്പെടുത്തുക എന്ന ഉദ്ദേശത്തിലേക്ക് താഴാതെ കാണാനിരിക്കുന്ന ഓരോ പ്രേക്ഷകന്റെയും മനസിനെ നോവിക്കുകയും ആഴത്തിൽ സ്പർശിക്കുകയും ചെയ്യുന്ന ഒരു സിനിമ, അതാണ് റിപ്പൽഷെൻ.

🔸ഷൈനിങ് എന്ന ചിത്രത്തെ ചൂണ്ടി കാട്ടി "That's Just A Man's Descent Into Madness" എന്ന് പറയപ്പെടാറുണ്ട്, റിപ്പൽഷെൻ എന്ന ചിത്രവും സഞ്ചരിക്കുന്നത് ഏറെക്കുറെ ഇതേ പാതയിലാണ്. നമ്മൾ ഇവിടെ പരിചയപ്പെടുന്നത് കരോൾ ലീഡോക്സ് എന്ന യുവതിയെയാണ്. തന്റെ പ്രായത്തിലുള്ള മറ്റ് പെൺകുട്ടികളെ പോലെ അല്ല കരോൾ, അന്തർമുഖയാണ്. അധികം ആരുമായോ സൗഹൃദമോ സമ്പർക്കമോ ഇല്ലാത്തവളാണ് കരോൾ, അവൾക്ക് അവളുടേതായ ലോകമാണ്. ഈ ലോകത്തേക്ക് തന്റെ സഹോദരിയെയും, വിരലിൽ എണ്ണാവുന്ന സുഹൃത്തുക്കളെയും അല്ലാതെ അധികം ആരെയും അവൾ കടത്തി വിടാറില്ല.

🔸പുരുഷന്മാരോട് ഒരുതരം ഭയമാണ് കരോളിന്, അവരുമായി അടുക്കുന്നത് പോയിട്ട് സംസാരിക്കാനോ ഇടപഴകാനോ പോലും അവൾക്ക് പേടിയാണ്. പുരുഷന്മാർ എന്നല്ല തന്റേതായ കംഫർട്ട് സോൺ വിട്ട് പുറത്തിറങ്ങാൻ അവൾക്ക് താല്പര്യമില്ല. കാണാൻ അത്യാവശ്യം നല്ല ഭംഗിയുള്ളത് കൊണ്ട് തന്നെ അവൾക്ക് ആരാധകന്മാർ ഉണ്ട്, അത്തരത്തിൽ ഒരാളാണ് കോളിൻ. കാഴ്ചയിലും പെരുമാറ്റത്തിലും രീതിയിലും എല്ലാം മാന്യനാണ് കോളിൻ, ടിയാൻ കുറച്ച് നാളായി കരോളിന്റെ പിറകെ കൂടിയിട്ട്, പ്രേമം വിവാഹം തുടങ്ങിയ ചിന്തകളാണ് കോളിന്റെ മനസ്സിൽ ഉള്ളതെങ്കിലും അവയോട് കരോൾ വേണ്ട രീതിയിൽ പ്രതികരിച്ചിട്ടില്ല.

🔸സ്വന്തം സഹോദരിയോടൊപ്പം ആണ് കരോൾ ജീവിച്ച് പോന്നത്, അവർ അല്ലാതെ മറ്റ് ബന്ധു മിത്രാദികളുടെ കാര്യം ചിത്രത്തിൽ എവിടെയും പരാമർശിച്ചിട്ടില്ല. രണ്ട് സഹോദരിമാരും മാനസികമായി നല്ല അടുപ്പത്തിൽ ആണെങ്കിൽ കൂടിയും അവളുടെ കാമുകനായ ഹെൻറിയോട് ഒരുതരം അറപ്പ് ആണ് കരോളിന്. തങ്ങളോടൊപ്പം വീട്ടിൽ ഹെൻറി താമസിക്കുന്നതിനോട് ഒരു രീതിയിലും യോജിക്കാൻ അവൾക്ക് കഴിഞ്ഞിട്ടില്ല. ഇങ്ങനെ അത്യാവശ്യം പ്രശ്നങ്ങൾ നിറഞ്ഞൊരു ജീവിതമാണ് കരോളിന്റെത്, ഒന്നേമുക്കാൽ മണിക്കൂർ ദൈർഖ്യമുള്ള ചിത്രത്തിലൂടെ നമ്മൾ കാണുന്നത് അത്യാവശ്യം വിചിത്ര സ്വഭാവം ഉള്ള ഈ കഥാപാത്രം അതിലും വിചിത്രമായ ചുറ്റുപാടിലൂടെ കടന്ന് പോവുന്നതാണ്.

🔸പല കാരണങ്ങൾ കൊണ്ടും ശ്രദ്ധയിൽ പെടാതെ പോയ ഒരു ചിത്രമാണ് റിപ്പൽഷെൻ, എന്നാൽ കണ്ട് കഴിഞ്ഞ ഈ സന്ദർഭത്തിൽ കാഴ്ചക്കാരൻ എന്ന നിലയിൽ ഇത്രമേൽ ആഘാതം ഏൽപ്പിച്ച അധികം ചിത്രങ്ങൾ ഇല്ല എന്ന് തന്നെ പറയാം. മേല്പറഞ്ഞ സ്വഭാവ ചേഷ്ടകളിൽ നിന്നും വിചിത്രം എന്ന തോന്നൽ നൽകുമെങ്കിലും നമ്മൾ മിക്കവർക്കും റിലേറ്റ് ചെയ്യാൻ കഴിയുന്ന കഥാപാത്രമാണ് കരോൾ, അത് ചിത്രം കാണുമ്പോൾ പിടികിട്ടും. കൂടുതൽ അന്വേഷിക്കാനോ ആലോചിക്കാനോ നിൽക്കാതെ കാണാൻ ശ്രമിക്കുക, മികച്ചൊരു ചിത്രം നിങ്ങളെയും കാത്ത് നിൽപ്പുണ്ട്.

Verdict : Must Watch

DC Rating : 90/100

536. Avengers Endgame (2019)

Director : Russo Brothers

Genre : Superhero

Rating : 9/10

Country : USA

Duration : 181 Minutes

🔸അപ്പൊ ഇതാണ് ആ പടം, വെറുമൊരു പടമല്ല ലോകത്താകമാനം കോടിക്കണക്കിന് ആരാധകരുള്ള മാർവെൽ സ്റ്റുഡിയോസിന്റെ പതിറ്റാണ്ടിലെ തന്നെ ഏറ്റവും വലിയ പടം. പതിനൊന്ന് വർഷം നീണ്ട് നിന്ന കഥകളുടെയും ഇരുപത്തി രണ്ട് ചിത്രങ്ങളുടെയും ആകെത്തുക ആയ ചിത്രം. കഴിഞ്ഞ വർഷം ഇൻഫിനിറ്റി വാർ പുറത്തിറങ്ങുകയും കാഴ്ചക്കാരെ എല്ലാം തന്നെ നിശ്ശബ്ദരാക്കുകയും ചെയ്ത നിമിഷം തൊട്ട് തന്നെ ഈ ചിത്രത്തിന് വേണ്ടി കാത്തിരിക്കുക ആയിരുന്നു എന്ന് പറയാം. ഒരു വർഷത്തിന്റെ ഇടവേളയിൽ പുറത്തിറങ്ങിയ ഈ രണ്ട് ചിത്രങ്ങളും പറയുന്നത് ഒരു കഥയുടെ രണ്ട് ഭാഗങ്ങൾ തന്നെ ആണെങ്കിലും നരേറ്റിവിലും, ടോണിലും, രീതിയിലും എല്ലാം വ്യത്യാസം പ്രകടമാണ്, ചുരുക്കി പറയുക ആണെങ്കിൽ താരമത്യം എന്നത് പാടാണ്. ഈ കാരണങ്ങൾ കൊണ്ട് തന്നെ ഇൻഫിനിറ്റി വാറിനെ തല്ക്കാലം നമുക്ക് മറക്കാം, എൻഡ് ഗെയിമിലേക്ക് വരാം.

🔸എൻഡ്ഗെയിം എന്ന ചിത്രത്തിന്റെ സ്പോയിലേർസ് പരമാവധി ഒഴിവാക്കിയിട്ടുണ്ടെങ്കിലും ഇൻഫിനിറ്റി വാർ കണ്ടിട്ടില്ലാത്തവർ തുടർന്ന് വായിക്കേണ്ടതില്ല. താനോസ് എന്ന വില്ലൻ കഥാപാത്രം ചിത്രത്തിൽ ആകമാനം ഇൻഫിനിറ്റി സ്റ്റോൺസ് തേടിയുള്ള യാത്രയിൽ ആയിരുന്നതും, അവ കയ്യടക്കിയ ശേഷം വിരലൊന്ന് ഞൊടിച്ച സന്ദർഭത്തിൽ ഭൂമിയിലെ ജീവജാലങ്ങളിൽ എല്ലാത്തിന്റെയും പകുതി അപ്രത്യക്ഷമായ കഥയും എല്ലാം നമ്മൾ കണ്ടതാണ്. ഇവിടെ നിന്ന് ഇനി എന്ത് എന്ന കാര്യത്തിൽ ഉത്തരമില്ലാതെ പകച്ച് നിൽക്കുന്ന സന്ദർഭത്തിലാണ് ഈ ചിത്രം ആരംഭിക്കുന്നത്. ഈ ചോദ്യത്തിന് എന്തായാലും മൂന്ന് മണിക്കൂർ കഥാപാത്രങ്ങൾ മുഖത്തോട് മുഖം നോക്കിയിരുന്നു എന്ന ഉത്തരം പ്രതീക്ഷിക്കേണ്ടതില്ല, ചില സംഭവങ്ങൾ നടക്കുന്നുണ്ട് അത് പറഞ്ഞ് സ്പോയിൽ ചെയ്യുന്നില്ല, കണ്ട് അറിയാൻ ശ്രമിക്കുക.

🔸സ്പോയ്ലർ ഒഴിവാക്കി ചിത്രത്തെ കുറിച്ച് പറയുക ആണെങ്കിൽ ആദ്യമേ തന്നെ ദൈർഖ്യത്തെ ഒന്ന് സൂചിപ്പിക്കേണ്ടി വരും. മൂന്ന് മണിക്കൂറിനടുത്ത് സമയം ഉണ്ടെങ്കിൽ കൂടിയും അത് പോരാത്ത രീതിയിലാണ് ചിത്രത്തിന്റെ ഘടന. ഒരുപാട് കഥാപാത്രങ്ങളും, സംഭവങ്ങളും ഉൾപ്പെട്ടിട്ടുള്ളതിനാൽ തന്നെ ഇത് ന്യായീകരിക്കാവുന്നതാണ് എന്നാലും ചില ഇടങ്ങളിൽ എങ്കിലും വ്യക്തത കുറവാണ്. ഇത് മാറ്റി നിർത്തിയാൽ നല്ല ഒന്നാം ക്‌ളാസ് അനുഭവം ആണ് ഈ ചിത്രം, പ്രത്യേകിച്ചും അവസാന മുപ്പത് നാല്പത് മിനുട്ട്. പ്രതീക്ഷിച്ചത് ആണെങ്കിൽ കൂടിയും മികച്ചൊരു ക്ലൈമാക്സിലൂടെ ചിത്രം അവസാനിക്കുമ്പോൾ ഇനി പോരായ്മകൾ ഉണ്ടെങ്കിൽ കൂടിയും അവയൊന്നും ആസ്വാദനത്തെ ബാധിക്കാത്ത ഒന്നായി മാറുന്നുണ്ട് എൻഡ്ഗെയിം എന്ന ചിത്രവും, അതിനും മുകളിൽ എൻഡ്ഗെയിം എന്ന അനുഭവവും.

🔸ചിത്രത്തെ കുറിച്ച് എന്ത് തന്നെ പറഞ്ഞാലും ഇതിന് പിന്നിൽ പ്രവർത്തിച്ചവരുടെ മാർക്കറ്റിങ് സ്ട്രാറ്റജിയെ സൂചിപ്പിച്ചില്ലെങ്കിൽ അവ പൂർണമാവില്ല. ഇതിനോടകം രണ്ട് ട്രെയ്‌ലറുകളും ഒരു സ്പെഷ്യൽ ലുക്കുമാണ് ചിത്രത്തിന്റേതായി നാം കണ്ടത്, ഇൻഫിനിറ്റി വാർ എന്ന ചിത്രത്തിന്റെ ട്രെയിലറുകൾ ഏറെക്കുറെ കഥ മുഴുവൻ നൽകുന്ന തോതിൽ ഉള്ളവ ആയിരുന്നെങ്കിൽ ഇവിടെ കാര്യങ്ങൾ വ്യത്യസ്തമാണ്. ഇനി നാം കണ്ട ട്രെയിലറുകൾ ആണെങ്കിൽ കൂടി ഇവ തിയേറ്ററിൽ കാണുമ്പോൾ അതിൽ ചില സൂത്രപ്പണികളും മറ്റും നടന്നിട്ടുള്ളതായി കാണാൻ കഴിയും, അതും പോരെങ്കിൽ ഇവയിൽ സിംഹഭാഗവും ആദ്യ ഇരുപത് മിനുട്ടിനുള്ളിൽ നടക്കുന്ന സംഭവങ്ങളാണ്. ചുരുക്കി പറയുക ആണെങ്കിൽ നമ്മൾ കാര്യമായിട്ട് ഒന്നും കണ്ടിട്ടില്ല, ഞെട്ടിക്കാനുള്ള അല്ലെങ്കിൽ അമ്പരപ്പിക്കാനുള്ള വകയെല്ലാം ചിത്രത്തിൽ ബാക്കിയുണ്ട്.

🔸മുകളിൽ സൂചിപ്പിച്ച പോരായ്മ എന്നത് വളരെ ചെറിയ ഒരു കാര്യമാണ്, ഭാവി ചിത്രങ്ങളിലൂടെ മാർവെലിന് തന്നെ പരിഹരിക്കാൻ കഴിയുന്ന വളരെ ചെറിയൊരു പോരായ്മ, അത് കഥയുമായി അടുത്ത് ബന്ധപ്പെട്ട് കിടക്കുന്നതിനാൽ ഇപ്പോൾ പറയുന്നില്ല. ആദ്യ ഭാഗം താനോസിന് ഉള്ളത് ആയിരുന്നെങ്കിൽ ഇത് അവേഞ്ചേഴ്സിന് ഉള്ളതാണ്, സ്ക്രീൻ ടൈമും പ്രാധാന്യവും എല്ലാം ഈ കഥാപാത്രങ്ങൾക്ക് തന്നെയാണ് കൂടുതൽ. ഒറിജിനൽ അവേഞ്ചേഴ്‌സായി എത്തിയവർ എല്ലാം തന്നെ മികച്ച പ്രകടനം നടത്തിയപ്പോൾ താനോസ് ഒരല്പം സൈഡ് ആയിപ്പോയോ എന്ന സംശയം മാത്രം ബാക്കി നിൽക്കുന്നു. ഒട്ടും പ്രതീക്ഷിക്കാത്ത അനവധി മാർവെൽ കഥാപാത്രങ്ങൾ ചിത്രത്തിൽ വന്ന് പോവുന്നുണ്ട്, എന്തായാലും സർപ്രൈസ് ഒക്കെ സർപ്രൈസ് ആയി തന്നെ നിൽക്കട്ടെ. മികച്ച സ്കോറും, ക്യാരക്ടർ ആർക്കുകളും, ഭാവി ചിത്രങ്ങൾക്കുള്ള സെറ്റ് അപ്പുകളും എല്ലാം കൂടി ചേരുമ്പോൾ നല്ലൊരു എന്റെർറ്റൈനെർ ആയി മാറുന്നുണ്ട് അവേഞ്ചേഴ്‌സ് എൻഡ്ഗെയിം.

Verdict : Very Good

DC Rating : 80/100

535. Highwaymen (2019)

Director : John Lee Hancock

Genre : Crime

Rating : 7/10

Country : USA

Duration : 132 Minutes

🔸ബോണി ആൻഡ് ക്ളൈഡ്, പരിചയപ്പെടുത്തലുകൾ ആവശ്യമില്ലാത്ത സെലിബ്രിറ്റി സ്റ്റാറ്റസ് കരസ്ഥമാക്കിയ രണ്ട് ക്രിമിനൽ ദമ്പതിമാർ. ഏകദേശം അഞ്ച് പതിറ്റാണ്ട് മുൻപ് ആർതർ പെന്നിന്റെ ബയോഗ്രഫിക്കൽ ചിത്രത്തിലൂടെ ഇവരുടെ കഥ സ്‌ക്രീനിൽ എത്തിയതാണ്. ആദ്യ സാമ്പത്തിക മാന്ദ്യ കാലത്ത് കൊള്ളയും കൊലയും പിടിച്ച് പറിയും എല്ലാം കൈമുതലാക്കി പോലീസുകാരുമായി വരെ സംഘട്ടനത്തിൽ ഏർപ്പെട്ട ഇവർക്ക് അന്ത കാലത്ത് ഒരു വീരപരിവേഷം വരെ ലഭിച്ചിരുന്നു. ഹൈവേ മെൻ എന്ന ചിത്രവും ഇവരുടേത് തന്നെയാണ്, എന്നാൽ ഇത്തവണ ഫോക്കസ് ഇവർക്ക് പിറകെ വച്ച് പിടിച്ച അന്വേഷകരിൽ ആണെന്ന് മാത്രം.

🔸വർഷങ്ങൾക്ക് മുന്നേ നടന്ന ചില കുറ്റ കൃത്യങ്ങളുടെ പശ്ചാത്തലത്തിൽ ഉള്ള അന്വേഷണം, രണ്ട് അന്വേഷകരുടെ സാന്നിധ്യം ഇവരിൽ തന്നെ വുഡി ഹരേൽസണിന്റെ കഥാപാത്രം എന്നിവയെല്ലാം ചേരുമ്പോൾ ട്രൂ ഡിറ്റക്ടീവ് സീരീസിന്റെ ഒരു ചെറിയ സാമ്യം തരുന്നുണ്ട് ഈ ചിത്രം. ഒരുപരിധി വരെ ചിത്രം കാണാൻ പ്രചോദനം നൽകിയത് ഈ വസ്തുതയും ബോണി ആൻഡ് ക്ലയ്‌ഡ് എന്ന പഴയ ചിത്രത്തിന്റെ ഓർമയും ആണെങ്കിലും ഒരു സിനിമ എന്ന നിലയിൽ സ്വന്തം കാലിൽ നിൽക്കാനുള്ള വകുപ്പെല്ലാം ഹൈവേ മെന്നിന് ഉണ്ട്, അത് തന്നെ ആണ് ആസ്വാദ്യകരമായ വസ്തുതയും ചിത്രത്തിന്റെ വിജയവും.

🔸ഏറെക്കുറെ ഒരേ സംഭവങ്ങൾ തന്നെയാണ് രണ്ട് ചിത്രങ്ങളും പറയുന്നത് എങ്കിലും രണ്ട് സിനിമകളിലെയും ട്രീറ്റ്‌മെന്റ് തികച്ചും വ്യത്യസ്തമാണ്. ആദ്യ ചിത്രം ബോണിയെയും ക്ലയ്‌ഡിനെയും ഗ്ലോറിഫൈ ചെയ്യുക ആയിരുന്നെങ്കിൽ ഇവിടെ അവർക്ക് പ്രാധാന്യം നന്നേ കുറവാണ്, ക്ലൈമാക്സ് രംഗത്തിന് മുന്നേ ഇവരെ ഇരുവരെയും മരിയാദയ്ക്ക് കാണിക്കുന്നു കൂടിയില്ല ചിത്രം. കെവിൻ കോസ്റ്റ്നർ അവതരിപ്പിച്ച ഫ്രാങ്ക് ഹാമെറിലും, വുഡി ഹെറാൾസണിന്റെ മാനി ഗോൾട്ടിലുമാണ് ശ്രദ്ധ മുഴുവൻ. കഥ ആദ്യാവസാനം പറഞ്ഞ് പോവുന്നതും ഇവരുടെ വീക്ഷണത്തിലൂടെ തന്നെ.

🔸ചിത്രത്തിന്റെ ആരംഭത്തിൽ രണ്ട് അന്വേഷകരുടെയും അവസ്ഥ അത്ര നന്നല്ല. തങ്ങൾ ഒരുകാലത്ത് കയ്യാളിയ സേനാ വിഭാഗത്തിൽ നിന്നും ഒഴിവായി പോകേണ്ടി വന്ന, തങ്ങളേക്കാൾ കഴിവ് കുറഞ്ഞവർ മറ്റ് പല കാര്യങ്ങളുടെയും അടിസ്ഥാനത്തിൽ ഉയരങ്ങൾ കീഴടക്കിയത് നോക്കി നിൽക്കേണ്ടി വന്ന അവസ്ഥയിൽ വ്യക്തി ജീവിതത്തിൽ തന്നെ പരാജയമായി മാറിയ അവസ്ഥയിലാണ് കഥാപാത്രങ്ങളെ നമ്മൾ കണ്ട് മുട്ടുന്നത്. ഹാമർ ഈ വസ്തുതയുമായി പൊരുത്തപ്പെട്ട് മാറി നടന്നെങ്കിൽ മാനി ഇവിടെയും ഒരു പരാജയമായി മാറി, അയാളുടെ കുടുംബ ജീവിതം ഏറെക്കുറെ താറുമാറായ അവസ്ഥയാണ്.

🔸ഏകദേശം രണ്ട് വർഷത്തിൽ അധികമായി ബോണിയും ക്ലയ്‌ഡും എല്ലാവര്ക്കും ഭീഷണി ഉയർത്തി കൊണ്ട് തങ്ങളുടെ വേട്ട ആരംഭിച്ചിട്ട്. ഇവരെ പിടികൂടാനുള്ള എല്ലാ ശ്രമങ്ങളും പരാജയപ്പെട്ട അവസ്ഥയിൽ പഴയ റേഞ്ചേഴ്സിനെ തിരികെ കൊണ്ട് വരാൻ സേന തീരുമാനിക്കുകയാണ്, അങ്ങനെ നായക കഥാപാത്രങ്ങൾ മടങ്ങി വരുന്നിടത്ത് സിനിമ ഒന്ന് ചൂട് പിടിക്കുന്നു. കെവിൻ കോസ്റ്റ്നർ, വുഡി ഹെറാൾസൻ എന്നിവർക്കൊപ്പം ഇവർ ഗ്രീൻ കാത്തി ബേറ്റ്സും ചിത്രത്തിൽ വേഷമിടുന്നുണ്ട്, ഓവറോൾ ഒരുതവണ കാണാവുന്ന ബേധപ്പെട്ട ചിത്രമാണ് ദി ഹൈവേയ്‌മെൻ.

Verdict : Good

DC Rating : 70/100

534. The Curse Of La Llorona (2019)

Director : Michael Chaves

Genre : Horror

Rating : 6/10

Country : USA

Duration : 91 Minutes

🔸ഈ കാലഘട്ടത്തിൽ പുറത്തിറങ്ങുന്ന മിക്ക ഹോളിവുഡ് ചിത്രങ്ങൾക്കും ഒരു ചട്ടക്കൂട് ഉണ്ട്, അല്ലെങ്കിൽ ഇവയെല്ലാം തന്നെ ഒരു അച്ചിൽ വാർത്തത് ആണെന്ന് പറയാം. ഈ ചട്ടക്കൂട് പൊളിച്ചെഴുതാതെ ഇതേ അച്ചിൽ ചുറ്റുപാടുകളും പേരുകളും മാറ്റി പുതിയ സൃഷ്ടികൾ പിറന്ന് കൊണ്ടേ ഇരിക്കുകയാണ്, യാതൊരു വ്യത്യാസവും ഇല്ലാതെ. ദി കേഴ്സ് ഓഫ് ലാ ലൊരാന എന്ന ചിത്രവും ഇത് പോലെ ചട്ടക്കൂടുകളിൽ ഒതുങ്ങി നിൽക്കുന്ന പഴയ വീഞ്ഞ് പുതിയ കുപ്പിയിൽ നൽകുന്ന സ്ഥിരം സംരംഭം തന്നെയാണ്. ഒരുപക്ഷെ ഹോളിവുഡ് ചിത്രങ്ങളിൽ ഏറ്റവും ദാരിദ്ര്യം നില നിൽക്കുന്നത് ഹൊറർ വിഭാഗത്തിൽ ആവും എന്ന ചിന്ത ഊട്ടി ഉറപ്പിക്കാനുള്ള പ്രൂഫ് കൂടിയാണ് ഈ ചിത്രം.

🔸പതിനേഴാം നൂറ്റാണ്ടിലാണ് ചിത്രം ആരംഭിക്കുന്നത്, ചിത്രത്തിന്റെ തുടർന്നങ്ങോട്ട് അരങ്ങേറുന്ന സംഭവങ്ങൾക്ക് ആധാരമായ ബാക്കസ്റ്റോറിയാണ് ഈ ഭാഗത്ത് നമ്മൾ കാണുന്നത്. അച്ഛനും അമ്മയും രണ്ട് മക്കളും അടങ്ങുന്ന കുടുംബം തങ്ങളുടെ അവധിക്കാലം ആസ്വദിച്ച് കൊണ്ടിരിക്കുകയാണ്, ഈ പരിപാടിയ്ക്കിടെ കുടുംബത്തിലെ ഏറ്റവും ഇളയവനായ ആൺകുട്ടി ഒരു ഭീതിദമായ കാഴ്ച കാണാൻ ഇടയാവുന്നതും, തുടർന്ന് അരങ്ങേറുന്ന ചില സംഭവങ്ങളോടും കൂടി ഈ ഫ്ലാഷ്ബാക്ക് രംഗങ്ങൾ അവസാനിക്കുകയാണ്. ഇവിടെ നിന്നും വർത്തമാന കാലത്തിലേക്ക് ചിത്രം കടന്ന് വരികയാണ്.

🔸ലിൻഡ കാർഡെല്ലിനി അവതരിപ്പിക്കുന്ന അന്ന എന്ന കഥാപാത്രത്തിന്റെയും രണ്ട് മക്കളുടെയും കഥകളാണ് ചിത്രം പറയുന്നത്. ഒരു അന്വേഷക ആയ അന്ന കുറച്ച് നാളുകളായി തന്റെ പരിസരത്ത് അരങ്ങേറി കൊണ്ടിരിക്കുന്ന വിചിത്ര സംഭവങ്ങളുടെ കാര്യ കാരണങ്ങൾ തേടിയുള്ള അലച്ചലിലാണ്. സ്വാഭാവികമായും ഇതിന് മുൻപ് ഇതേ രീതിയിലുള്ള ചിത്രങ്ങൾ കണ്ട ഓർമയിൽ നമ്മൾ കരുതുന്നത് പോലെ തന്നെ നായികാ കഥാപാത്രത്തിനും കുടുംബത്തിനും ഭീഷണി ഉയർത്തി കൊണ്ട് ഒരു പ്രാചീന ശക്തി, അല്ലെങ്കിൽ പ്രേതം കടന്ന് വരികയാണ്. പോകെ പോകെ ഉപദ്രവവും അപകടവും വർധിച്ച് വരുമ്പോൾ രക്ഷപ്പെടുക എന്ന ലക്ഷ്യത്തിൽ മാത്രമായി ഒതുങ്ങുകയാണ് ഇവരുടെ ശ്രമങ്ങളെല്ലാം.

🔸ലാ ലല്ലോരണ എന്ന കഥാപാത്രത്തിന് അത്യാവശ്യം ബേധപ്പെട്ടൊരു ബാക്ക് സ്റ്റോറി കൊടുക്കുന്നുണ്ട് എന്നതൊഴിച്ചാൽ മറ്റ് കാര്യ കാരണങ്ങൾ എല്ലാം തന്നെ ഒട്ടും വിശ്വസനീയം അല്ലാത്തവയാണ്. ഈ കഥാബീജത്തിന് പുറമെ മറ്റൊരു സബ് പ്ലോട്ട് കൂടിയുണ്ട് എന്നത് കഥയ്ക്ക് മറ്റൊരു വശം കൂടി നൽകിയേക്കും എന്ന പ്രതീതി മുൻപ് ഉണ്ടായിരുന്നെങ്കിലും അങ്ങനെയല്ല അങ്ങനെയല്ല കാര്യങ്ങളുടെ കിടപ്പ് വശം എന്ന് ചിത്രം കാണുമ്പോൾ ബോധ്യപ്പെടുന്നുണ്ട്. ഈ കാരണം കൂടി ചേരുമ്പോൾ മുകളിൽ പറഞ്ഞത് പോലെ കേവലമൊരു ഹൊറർ കാട്ടി കൂട്ടലുകളിൽ ഒന്നായി മാറുന്നു ഈ ചിത്രവും.

🔸കോഞ്ചേരിങ് യുണിവേഴ്‌സ് ചിത്രങ്ങളോട് വലിയ താല്പര്യം ഒരിക്കലും അനുഭവപ്പെട്ടിട്ടില്ല, കണ്ടിരിക്കാം എന്ന അഭിപ്രായം അല്ലാതെ. ഈ കാരണങ്ങൾ കൊണ്ട് തന്നെ ഈ യുണിവേഴ്സിനെ ഞെക്കി പിഴിഞ്ഞ് മുതലെടുക്കാനുള്ള സ്റ്റുഡിയോയുടെ വികലമായ ശ്രമങ്ങളോടും തീരെ താല്പര്യമില്ല. കണ്ട് പഴകിയ കഥയും ജീവനില്ലാത്ത ജംപ് സ്‌കെയറുകൾക്കും അപ്പുറം യാതൊന്നും ഈ ചിത്രത്തിൽ കാണാൻ കഴിഞ്ഞില്ല എന്ന കാര്യത്തിൽ നിരാശ ബാക്കി നിൽക്കുന്നു, എന്തിരുന്നാലും അത്ഭുതം ഒട്ടുമില്ല താനും. കുറച്ച് നാളുകളായി ചത്തതിന് ഒക്കുമെ എന്ന അവസ്ഥയിൽ നിൽക്കുന്ന ഹൊറർ വിഭാഗത്തിന് എത്രയും പെട്ടെന്ന് പഴയ പ്രൗഢിയിലേക്ക് മടങ്ങി വരാൻ കഴിയട്ടെ എന്ന് പ്രത്യാശിച്ച് കൊണ്ട് നിര്ത്തുന്നു.

Verdict : Avoidable

DC Rating : 40/100

533. Delhi Crime (2019)

Director : Richie Mehta

Genre : Crime

Rating : 8.7/10

Seasons : 01

Episodes : 07

Country : India

Duration : 45 - 64 Minutes

🔸ഡൽഹി ക്രൈം എന്ന ടീവി സീരീസിലെ നിർണ്ണായക രംഗങ്ങളിൽ ഒന്നിൽ ഒരു പ്രധാന കഥാപാത്രം പറയുന്ന സംഭാഷണം ഉണ്ട് "മുംബൈ ഭീകരാക്രമണത്തിന് ശേഷം ഇത്രയും ജനരോഷം ആർത്തിരമ്പിയ ഒരവസ്ഥ രാജ്യം ഇതുവരെ നേരിടേണ്ടി വന്നിട്ടില്ല, ഭീകരാക്രമണം രാജ്യാന്തര തലത്തിലുള്ള ഒരു പ്രശനം ആയിരുന്നെങ്കിൽ ഇത് ലോക്കൽ പോലീസ് സ്റ്റേഷനിൽ നിന്നും തുടങ്ങി രാജ്യമാകമാനം പടർന്ന് പിടിച്ച കാട്ട് തീ ആണ്" എന്ന സംഭാഷണം. ഈ ഒരൊറ്റ സംഭാഷണത്തിൽ തന്നെ സംഭവങ്ങളുടെ തീവ്രതയും, ഭീകരതയും കാണാൻ കഴിയും. ഒരു പക്ഷെ ഒരു രാജ്യത്തിൻറെ നിയമ വ്യവസ്ഥിതിയെ തന്നെ പൊളിച്ചെഴുതാൻ കാരണമായ, ഭരണ സിരാ കേന്ദ്രങ്ങളെ പോലും ഈ തോതിൽ പിടിച്ചുലക്കിയ മറ്റൊരു കേസ് കാണിച്ച് തരാൻ കഴിഞ്ഞേക്കില്ല, ഇത് അരങ്ങേറിയത് ലോകത്തെ ഏറ്റവും വലിയ ജനാധിപത്യ രാജ്യത്താണ് എന്നത് മറ്റൊരു ദയനീയ വസ്തുത.

🔸നിർഭയ എന്ന പേര് അത്ര പെട്ടെന്നൊന്നും ഈ രാജ്യം മറക്കാൻ ഇടയില്ല, മറക്കാൻ പാടുള്ളതുമല്ല. സഞ്ചരിക്കുന്ന ബസ്സിൽ, നഗരമധ്യത്തിൽ വെച്ച് ആറോളം വ്യക്തികളുടെ കൂട്ട ബലാത്സംഗത്തിന് ഇരയായി, അവിടെയും അവസാനിക്കാതെ സ്വന്തം വജയ്നയിലേക്ക് ഇരുമ്പ് കമ്പി കുത്തിയിറക്കപ്പെട്ട്, അതും പോരാതെ സ്വന്തം ഇന്റസ്റ്റെയിൻ ശരീരത്തിന് പുറത്തേക്ക് വലിച്ചെടുക്കപ്പെട്ട അവസ്ഥയിൽ ഒരു മനുഷ്യന് സഹിക്കാവുന്ന വേദനയുടെ പരമാവധി അനുഭവിച്ച് പതിനാല് ദിവസം ആശുപത്രിക്കിടക്കയിൽ കിടന്ന് നരകിച്ച് മരിച്ച നിർഭയയുടെ വിധിയെ മൃഗീയം എന്ന് വിളിച്ചാൽ അത് മൃഗങ്ങൾക്ക് അപമാനമാണ്.

🔸ഈ നിർഭയ കേസിനെ ആസ്പദമാക്കിയാണ് ഡൽഹി ക്രൈം എന്ന ടിവി സീരീസ് തയാറാക്കിയിരിക്കുന്നത്, യഥാർത്ഥത്തിൽ അരങ്ങേറിയ ഭീകര സംഭവങ്ങൾ സീൻ ബൈ സീൻ ചിത്രത്തിൽ അവതരിപ്പിക്കുന്നില്ലെങ്കിലും സംഭവത്തിൽ ഉൾപ്പെട്ട കഥാപാത്രങ്ങളുടെ വാക്കുകളിലൂടെ തന്നെ ഈ ഭീകരത ഒപ്പി എടുക്കുന്നുണ്ട്. ഷെഫാലി ഷാ അവതരിപ്പിച്ച വർത്തിക ചതുർവേദി എന്ന ഡൽഹി ഡെപ്യൂട്ടി കമ്മീഷണറുടെ വീക്ഷണത്തിലൂടെ, അന്വേഷണങ്ങളിലൂടെ ആണ് സീരീസ് പുരോഗമിക്കുന്നത്. പ്രധാന പ്ലോട്ട് ലൈൻ നിർഭയ കേസ് ആണെങ്കിലും ഡൽഹി രാഷ്ട്രീയവും, മുതലെടുപ്പും, പോലീസുകാരുടെ അനാസ്ഥയും എല്ലാം സീരീസ് പ്രമേയമാക്കുന്നുണ്ട്.

🔸ഇത് പോലൊരു ചുറ്റുപാടിൽ സ്വന്തം മകളെ വളർത്താനുള്ള ബുദ്ധിമുട്ടുകളും, അത് അവളെ പറഞ്ഞ് മനസിലാക്കാനുള്ള കേന്ദ്ര കഥാപാത്രത്തിന്റെ ബദ്ധപ്പാടുകളും എല്ലാം സീരീസിന്റെ ഭാഗമായി മാറുന്നുണ്ട്. ദേശീയ തലത്തിൽ വലിയ പ്രാധാന്യം ലഭിച്ച കേസ് ആയതിനാൽ തന്നെ നിശ്ചിത സമയത്തിനുള്ളിൽ പ്രതികളെ പിടിക്കാൻ പൊലീസിന് മേലുള്ള സമ്മർദ്ദവും, പരാജയപ്പെട്ടാൽ നേരിടേണ്ടി വന്നേക്കാവുന്ന പ്രത്യാഘാതങ്ങളും എല്ലാം കൂടി ആവുമ്പോൾ അത്യാവശ്യം നല്ല രീതിയിൽ തന്നെ ത്രിൽ അടിപ്പിക്കുന്നുണ്ട് ഈ സീരീസ്. താല്പര്യം ജനിപ്പിക്കുന്ന, അടുപ്പം തോന്നിക്കുന്ന കഥാപാത്രങ്ങളുണ് ഡൽഹി ക്രൈമിന്റെ മറ്റൊരു പ്ലസ് പോയിന്റ് ആണ്.

🔸രണ്ട് ഭാഗമായി പൂർത്തിയാവുന്ന സീരീസിന്റെ ആദ്യ ഭാഗമാണ് ഇപ്പോൾ എത്തിയിരിക്കുന്നത്, രണ്ടാം ഭാഗം ചിത്രീകരണം അടുത്ത് തന്നെ ആരംഭിക്കുമെന്ന് കേൾക്കുന്നു. അമ്പത് മിനുട്ട് പരിധിയിൽ ഉള്ള ഏഴ് എപ്പിസോഡുകളാണ് സീരീസിൽ ഉള്ളത്, ഈ ഏഴ് എപ്പിസോഡിലൂടെ തന്നെ ശക്തമായൊരു കഥ അതിലും ശക്തമായി അവതരിപ്പിക്കാൻ കഴിഞ്ഞിട്ടുണ്ട് അണിയറ പ്രവർത്തകർക്ക്. മാധ്യമങ്ങളിലൂടെയും മറ്റും നമ്മളറിഞ്ഞ കേസിന്റെ തികച്ചും വ്യത്യസ്തമായ ഒരു വശമാണ് ഈ ടീവി സീരീസ്, താല്പര്യം തോന്നുന്നുവെങ്കിൽ കാണാൻ ശ്രമിക്കുക, മികച്ചൊരു അനുഭവം ആവുമെന്ന് ഉറപ്പ് നൽകുന്നു.

Verdict : Must Watch

DC Rating : 90/100

532. Hellboy (2019)

Director : Neil Marshal

Genre : Fantasy

Rating : 6/10

Country : USA

Duration : 121 Minutes

🔸ഇംഗ്ലീഷ് സിനിമകളോട് താല്പര്യം തോന്നി തുടങ്ങിയ കാലഘട്ടത്തിൽ, അതായത് ഒരു ഏഴെട്ട് വർഷങ്ങൾക്ക് മുന്നേ കണ്ടവയാണ് ഹെൽബോയ് സീരീസിലെ ആദ്യ രണ്ട് ചിത്രങ്ങൾ. ഗ്വില്ലെർമോ ഡെൽ ടോറോയുടെ സംവിധാനം, റോൺ പേൾമാന്റെ കമാൻഡിങ് രൂപേണയുള്ള പ്രകടനം, വ്യത്യസ്തമായ രീതി, അത്യാവശ്യം ഡാർക്ക് ആയ അവതരണം എല്ലാം കൂടി ചേർന്നപ്പോൾ ഇഷ്ട്ടപ്പെട്ട ചിത്രങ്ങളിൽ പെട്ടവ ആയിരുന്നു ആദ്യ രണ്ട് ചിത്രങ്ങളും, പ്രത്യേകിച്ചും രണ്ടാം ഭാഗമായ ഗോൾഡൻ ആർമി. ഈ ചിത്രത്തിന് ശേഷം ട്രിലോഗി എൻഡർ എന്ന നിലയിൽ ഒരു മൂന്നാം ചിത്രത്തിന് വേണ്ടി ഡെൽറ്റോരോ ഒരുപാട് ചരട് വലികൾ നടത്തി നോക്കിയെങ്കിലും ഒന്നും കാര്യവത്തായില്ല. അങ്ങനെ വെളിച്ചം കാണാതെ അവസാനിക്കും എന്ന് ഏറെക്കുറെ ഉറപ്പിച്ചിടത്താണ് മൂന്ന് വർഷങ്ങൾക്ക് മുന്നേ വീണ്ടും മുറുമുറുപ്പ് കേട്ട് തുടങ്ങിയത്.

🔸രണ്ടാം ഭാഗമായ ഗോൾഡൻ ആർമിയ്ക്ക് ശേഷം ഡെൽ ടാരോ ചിന്തിച്ച് തുടങ്ങിയ മൂന്നാം ഭാഗം പാടെ ഒഴിവാക്കി ഒരു റീബൂട്ട് ആയാണ് ഈ ചിത്രം എത്തിയിരിക്കുന്നത്. മുൻകാല ചിത്രങ്ങളുമായോ, സംഭവങ്ങളുമായോ കാര്യമായ ബന്ധം ഒന്നും തന്നെ ഈ ചിത്രം വെച്ച് പുലർത്തുന്നില്ല. ഒരു വിജിലൻറെ ആയ ഹെൽബോയ് എന്ന കഥാപാത്രം മില്ല ജൊവാവോവിച്ച് അവതരിപ്പിച്ച പുരാതന വില്ലൻ കഥാപാത്രമായ ബ്ലഡ് ക്വീനുമായി പോരിൽ ഏർപ്പെടുന്നതും, ഇത് മനുഷ്യരാശിയുടെ തന്നെ നിലനിൽപ്പിന് ചോദ്യചിഹ്നമായി മാറുന്നതും എല്ലാമാണ് ചിത്രത്തിന്റെ കഥ. കാര്യമായ പുതുമ ഒന്നും തന്നെ ഈ മേഖലയിൽ നിന്നും പ്രതീക്ഷിക്കേണ്ടതില്ല എന്ന് കൂടി പറയട്ടെ.

🔸സ്പോയ്ലർ ഒഴിവാക്കിക്കൊണ്ട് നല്ലതും മോശവുമായ വശങ്ങളിലേക്ക് ശ്രദ്ധ കൊടുക്കുന്നത് നന്നാവും. മോശം കാര്യങ്ങളിലേക്ക് കടക്കുക ആണെങ്കിൽ ആദ്യമേ തന്നെ മുകളിൽ സൂചിപ്പിച്ച കഥയിലേക്ക് കടക്കാം, ഒരു പരിധി കഴിഞ്ഞാൽ ദിശ മറന്ന് പോവുന്ന, പല ബ്ലോക്ക്ബസ്റ്ററുകളുടെയും അന്ത്യമായി മാറിയ കാരണം ഇവിടെയും കാണാം. എവിടെ നിന്ന് തുടങ്ങണമെന്നോ, അവസാനിപ്പിക്കണമെന്നോ ബോധ്യമില്ലാത്ത പോലെ ആണ് ചിത്രം പലയിടത്തും പുരോഗമിക്കുന്നത്. ഇതിനോടൊപ്പം മോശം എഡിറ്റിങ്ങും, അതി ദാരുണമായ പേസിങ്ങും മറ്റുള്ള 'പ്രത്യേകതകളാണ്'. ദൈവം സഹായിച്ച് ഹെൽബോയ് സ്ഥിരത നിലനിർത്തിയത് കഥാപാത്രങ്ങളുടെ കാര്യത്തിലാണ്, ഒരു കഥാപാത്രം പോലും പ്രകടനത്തിലൂടെയോ കഥയിലൂടെയോ ഇഷ്ടം പിടിച്ച് പറ്റുന്നില്ല എന്ന് മാത്രമല്ല നല്ല ബോറുമാണ്.

🔸രണ്ട് മണിക്കൂറിന് മുകളിലുള്ള ദൈർഖ്യവും കളഞ്ഞ് കുളിച്ച അനവധി സാധ്യതകളും, രണ്ടാം ഭാഗത്തിനായി കാണിച്ച് വെച്ച കോപ്രായങ്ങളും കൂടി ചേരുമ്പോൾ നിങ്ങളുടെ മുന്നിൽ ഇരിക്കുന്നതാണ് ഈ വർഷത്തെ ആദ്യ ദുരന്തങ്ങളിൽ ഒന്ന്. സമ്പൂർണ്ണ ദുരന്തം അല്ലെന്ന് തെളിയിക്കാനും ചില വക സിനിമയിൽ ഉണ്ട്, അതിൽ തന്നെ ആദ്യമായി ടൈറ്റിൽ കഥാപാത്രമായി എത്തിയ ഡേവിഡ് ഹാർബറിന്റെ പ്രകടനം പ്രത്യേകം പരാമർശിക്കേണ്ടി ഇരിക്കുന്നു, ഗോറിനും വയലെൻസിനും പ്രാധാന്യം നൽകിക്കൊണ്ടുള്ള അവതരണവും നന്നായിരുന്നു, എങ്കിലും കുറഞ്ഞ് പോയി എന്ന പരാതി നിലനിൽക്കുന്നു. ഇതോട് കൂടി ഹെൽബോയ് എന്ന ചിത്രത്തിൽ പ്രത്യക്ഷത്തിൽ അനുഭവപ്പെട്ട പോസിറ്റിവുകളും തീർന്നു.

🔸ഒരു സിനിമ കണ്ടിറങ്ങുമ്പോൾ നടക്കാതെ പോയ മറ്റൊരു ചിത്രത്തെ കുറിച്ചും അതെന്ത് ആവുമായിരുന്നു എന്നുമാണ് ചിന്ത എങ്കിൽ അതിൽ നിന്ന് തന്നെ ഏറെക്കുറെ മനസിലാക്കാം ഈ ചിത്രത്തിന്റെ റെയ്ഞ്ച്. ഇഷ്ട്ട കഥാപാത്രങ്ങളിൽ ഒന്നായ ഹെൽബോയിയെ പരിതാപകരമായ ഈ അവസ്ഥയിൽ കാണാൻ കഴിഞ്ഞതിലും വിഷമം ബാക്കി കിടക്കുന്നു. പഴയ പ്രതാപത്തിലേക്ക് ഈ കഥാപാത്രത്തെ തിരികെ കൊണ്ടുവരിക എന്നത് ശ്രമകരമായ ദൗത്യം തന്നെയാണ്, അതിന് ഒരു തവണ കൂടി സ്റ്റുഡിയോ ഇറങ്ങി തിരിക്കുക ആണെങ്കിൽ വ്യക്തമായ പദ്ധതിയുടെയും പരിശ്രമത്തിന്റെയും ബലത്തിൽ ആയിരിക്കും എന്ന് പ്രത്യാശിച്ച് കൊണ്ട് നിർത്തുന്നു.

Verdict : Disaster

DC Rating : 25/100

531. Black Narcissus (1947)

Director : Emeric Pressburger

Genre : Drama

Rating : 8/10

Country : UK

Duration : 100 Minutes

🔸ചില സിനിമകളും കഥാപാത്രങ്ങളുമുണ്ട്, കണ്ട് കഴിഞ്ഞാലും ഒരുപാട് നേരം അതങ്ങനെ കിടക്കും, ഒരുപാട് ചോദ്യങ്ങളും സംശയങ്ങളും ബാക്കി വെച്ച് കൊണ്ട്. ബ്ലാക്ക് നർസിസസ് എന്ന ചിത്രം കണ്ട് കഴിയുമ്പോഴും ഇത് പോലെ അനവധി ചോദ്യങ്ങൾ ബാക്കി കിടക്കുന്നുണ്ട്, പ്രത്യേകിച്ചും ഈ കഥാപാത്രങ്ങൾക്ക് പിന്നീട് എന്ത് സംഭവിച്ചിട്ടുണ്ടാവും എന്ന കൗതുകത്തിൽ നിന്നുള്ള ചോദ്യങ്ങൾ, ചിത്രത്തിൽ അരങ്ങേറിയ സംഭവങ്ങളുടെ പ്രത്യാഘാതങ്ങൾ എന്തായിരിക്കും എന്നുള്ള ചോദ്യങ്ങൾ, എല്ലാത്തിനും ഉപരി മഞ്ഞ് മൂടിക്കിടന്ന, നിഗൂഢതകൾ നിറഞ്ഞ് നിന്ന ആ സ്ഥലത്തെ പറ്റിയുള്ള ചോദ്യങ്ങൾ. ചുരുക്കി പറഞ്ഞാൽ ഒരുതവണ കണ്ടാൽ അത്ര പെട്ടെന്നൊന്നും ഈ ചിത്രം നമ്മെ വിട്ട് പോവില്ല എന്ന് സാരം.

🔸ഒരു കന്യാസ്ത്രീ മഠത്തിലാണ് ബ്ലാക്ക് നർസിസസ് എന്ന ചിത്രം ആരംഭിക്കുന്നത്, യാഥാസ്ഥിക വിശ്വാസങ്ങളും അച്ചടക്കവും ദൈവഭയവും എല്ലാം സ്വ ജീവനോളം വില കല്പിക്കുന്ന വ്യക്തിയാണ് മഠത്തിലെ മദർ സുപ്പീരിയർ. ഒരുനാൾ ഈ മദർ സുപ്പീരിയർ, സിസ്റ്റർ ക്ളോദയെ തന്റെ മുറിയിലേക്ക് വിളിപ്പിക്കുകയും, ഒരു ആവശ്യം അവരെ അറിയിക്കുകയും ചെയ്യുകയാണ്. മഠത്തെ പ്രതിനിധീകരിച്ച് കൊണ്ട് ഒരു ഉൾനാടൻ നോർത്തിന്ത്യൻ ഗ്രാമത്തിൽ സ്‌കൂളും ആശുപത്രിയും സ്ഥാപിക്കുക എന്നതാണ് ക്ലോദയുടെ ദൗത്യം. എളുപ്പം ആണെന്ന് തോന്നുമെങ്കിലും അങ്ങനെ അല്ല കാര്യങ്ങളുടെ കിടപ്പ് എന്ന് താമസിയാതെ തന്നെ ക്ലോദയ്ക്ക് മനസിലാവുകയാണ്.

🔸ഡാർജീലിങ്ങിന് അടുത്ത് മോപു എന്ന മലയോര ഗ്രാമത്തിലാണ് ചിത്രത്തിലെ സംഭവങ്ങൾ അരങ്ങേറുന്നത്, രാജ ഭരണം ആണ് മോപൂവിലേത്, കൃഷിയും കൂട്ടവുമായി ജീവിച്ച് പോകുന്ന അപരിഷ്‌കൃത കൂട്ടമാണ് ഇവിടത്തെ ജനങ്ങൾ. തങ്ങളുടെ ബുദ്ധിയും വിവേകവും ഉപയോഗിച്ച് തീരുമാനങ്ങൾ കൈക്കൊള്ളുന്നതിനേക്കാൾ മേലാളന്മാരുടെ ഇങ്ങിതത്തിന് അനുസരിച്ച് ചലിക്കുന്ന, പണത്തിന് വേണ്ടി വിട്ടുവീഴ്ചകൾക്ക് തയ്യാറാവുന്ന ഒരു ദരിദ്ര സമൂഹം എന്ന് പറയാം. ഇവർക്കിടയിലേക്കാണ് സ്‌കൂൾ, ആശുപത്രി എന്നൊക്കെ പറഞ്ഞ് കന്യാസ്ത്രീകൾ വരുന്നത്.

🔸പ്രശ്നങ്ങളുടെ ഒരു കൂമ്പാരം തന്നെയാണ് കന്യാസ്ത്രീമാരുടെ മുന്നിലേക്ക് എത്തുന്നത്, അത്യാവശ്യം ഉയരത്തിൽ സ്ഥിതി ചെയ്യുന്ന ഗ്രാമം ആയതിനാലും ആ അന്തരീക്ഷം അപരിചിതം ആയതിനാലും ശാരീരിക പ്രശ്നങ്ങൾ നേരിടേണ്ടി വരികയാണ് ഇവർക്കെല്ലാം. അതിന് പുറമെ പുറം നാട്ടുകാരോടുള്ള ഗ്രാമവാസികളുടെ അടുപ്പമില്ലായ്മയും തെല്ലൊന്നുമല്ല ബുദ്ധിമുട്ടിപ്പിക്കുന്നത്. ഇവരുമായി അടുക്കാനും തങ്ങളുടെ സദുദ്ദേശത്തെ ഇവരിലേക്ക് എത്തിക്കാനും അത്യാവശ്യം സമയം എടുക്കും എന്ന തിരിച്ചറിവിൽ പ്രവർത്തിച്ച് തുടങ്ങുന്നുണ്ടെങ്കിലും രാജാവിന്റെ സേവകനും ഗ്രാമത്തിലെ അന്തേവാസിയുമായ ഡീനിന്റെ വരവ് പ്രശ്നങ്ങൾ കൂടുതൽ വഷളാക്കുകയാണ്.

🔸ഇന്ത്യയുടെ പശ്ചാത്തലത്തിലാണ് ബ്ലാക്ക് നർസിസസ് എന്ന ചിത്രം തയാറാക്കിയിരിക്കുന്നത്, ഈ പശ്ചാത്തലവുമായി അത്ര പരിചിതനല്ല ചിത്രത്തിന്റെ ഛായാഗ്രാഹകൻ എന്ന് തോന്നുന്നു കാരണം വേറിട്ടൊരു ശൈലി പ്രകടമാണ്. ഓരോ സീനിലും ദൃശ്യ ഭംഗി അങ്ങേയറ്റം മിഴിവോടെ ഒപ്പിയെടുക്കാൻ ഇദ്ദേഹം ശ്രമിച്ചിട്ടും വിജയിച്ചിട്ടുമുണ്ട്, അതിനുള്ള അംഗീകാരം കൂടിയാണ് അക്കാഡമി അവാർഡ്. കുറച്ച് നാൾ മുന്നേ വരെ കേട്ട് കേൾവി പോലുമില്ലാഞ്ഞ ഒരു ചിത്രമായിരുന്നു ബ്ലാക്ക് നർസിസസ്, സംഭാഷണങ്ങളിലൂടെ ശ്രദ്ധയിൽ കൊണ്ട് വന്ന സുഹൃത്തുക്കൾക്ക് നന്ദി. യാതൊരു സംശയവും ഇല്ലാതെ പറയാം, അടുത്തിടെ കണ്ട ഏറ്റവും മികച്ച ചിത്രം ആണ് ബ്ലാക്ക് നർസിസസ്.

Verdict : Must Watch

DC Rating : 90/100

530. Five Deadly Venoms (1978)

Director : Chang Cheh

Genre : Action

Rating : 7.2/10

Country : Hong Kong

Duration : 100 Minutes

🔸ഫൈവ് ഡെഡ്ലി വെനംസ് എന്ന ചിത്രത്തിന്റെ തുടക്കത്തിൽ ഒരു സീക്വൻസ് ഉണ്ട്, തന്റെ പഴയ അഞ്ച് ശിഷ്യന്മാരെയും അവസാനത്തെ ശിഷ്യന് ഗുരു വാക്കുകളിലൂടെ പരിചയപ്പെടുത്തി കൊടുക്കുന്ന സീക്വൻസ്. ഇവരിൽ ഓരോരുത്തരുടെയും കഴിവും രീതിയും മെയ്വഴക്കവും എല്ലാം വാക്കുകളിലൂടെ കേട്ടറിയുമ്പോൾ തന്നെ വരാൻ പോവുന്നത് വെടിക്കെട്ട് ആണെന്ന് ഒരു സൂചന ലഭിക്കും, അതിനോട് നീതി പുലർത്തുന്നുമുണ്ട് ഈ ചിത്രം, പിന്നീടങ്ങോട്ട്. ഒരു മിക്സഡ് മാർഷ്യൽ ആർട്സ് ചിത്രത്തിൽ നിന്നും എന്ത് പ്രതീക്ഷിക്കുന്നുവോ, അതിനെല്ലാം ഉള്ള ഉത്തരമാണ് ഈ ചിത്രം, അതിനോടൊപ്പം എങ്ങേയ്‌ജിങ്‌ ആയ ഒരു കഥ കൂടി ചേരുമ്പോൾ പ്രത്യേകിച്ച് പറയേണ്ട.

🔸പോയിസൺ ക്ലാൻ എന്ന ഗ്രൂപ്പിലെ മാസ്റ്റർ ആയ വ്യക്തി തന്റെ മരണം കാത്ത് കഴിയുകയാണ്, തന്റെ ജീവിതത്തിൽ ഒരുപാട് ശിഷ്യന്മാരെ പഠിപ്പിച്ചിട്ടുണ്ടെങ്കിലും ഈ ഒരവസ്ഥയിൽ അവസാന ശിഷ്യൻ ആയ യാങ് മാത്രമേ ടിയാന്റെ ഒപ്പമുള്ളൂ. ആയോധന കലയും രഹസ്യ മുറകളും എല്ലാം നല്ല ഉദ്ദേശത്തോട് കൂടിയാണ് ശിഷ്യഗണങ്ങൾക്ക് പറഞ്ഞ് കൊടുത്തതെങ്കിലും അവയെല്ലാം സ്വ ലാഭത്തിന് വേണ്ടിയും മറ്റും അവർ ഉപയോഗിക്കുന്നത് തെല്ലൊന്നുമല്ല ഈ വ്യക്തിയെ വേദനിപ്പിക്കുന്നത്. ഈ കാരണം കൊണ്ട് തന്നെയാണ് തന്റെ അവസാന ആഗ്രഹം എന്ന നിലയ്ക്ക് യാങ്ങിനോട് ഒരു കാര്യം മാസ്റ്റർ ആവശ്യപ്പെടുന്നത്, ഒരുതരത്തിൽ പറയുക ആണെങ്കിൽ ആത്മഹത്യാപരം എന്ന് വിശഷിപ്പിക്കാവുന്ന ആഗ്രഹം.

🔸താൻ പഠിപ്പിച്ച ശൈലിയിൽ നിന്നും ഉൾക്കൊണ്ട വിശ്വാസങ്ങളിൽ നിന്നും ശിഷ്യന്മാർ വ്യതി ചലിച്ചെന്ന് മാസ്റ്റർക്ക് നന്നായി അറിയാം, ഇനി ഒരു മടങ്ങി വരവ് ഉണ്ടാവില്ലെന്നും എന്നാൽ ഇന്നത്തെ സ്ഥിതിഗതികൾ ഒരല്പം പ്രശ്നമാണ്. ചില രഹസ്യ വിവരങ്ങൾ അടങ്ങിയ ഒരു പ്രാചീന നിധിക്ക് പുറകെയാണ് ഇന്ന് ഇവരെല്ലാം തന്നെ, ഇന്നത്തെ ചുറ്റുപാടിൽ നിധി ഇവരിൽ ആര് കൈക്കലാക്കിയാലും അത് ദുരിതത്തിലെ കലാശിക്കൂ എന്ന അവസ്ഥയാണ്. അതിനാൽ അത് ഒഴിവാക്കാൻ വേണ്ടിയാണ് മാസ്റ്റർ യാങ്ങിനെ പറഞ്ഞ് വിടുന്നത്, യാത്രയ്ക്ക് മുന്നേ ഒരു ചെറിയ മുൻകരുതൽ കൂടി യാങിന് നൽകാൻ അദ്ദേഹം മറക്കുന്നില്ല, നീ ഒരിക്കലും അവരെക്കാൾ മികച്ചവനല്ല എന്നാൽ അവരുടെ ബലഹീനതകളെ കുറിച്ച് നിനക്കറിയാം എന്നായിരുന്നു ഉപദേശം.

🔸ചില്ലറക്കാരല്ല മാസ്റ്ററുടെ അഞ്ച് ശിഷ്യന്മാരും, ആയോധന കലയിലും മെയ്വഴക്കത്തിലും മനഃസാന്നിധ്യത്തിലും പോരാട്ട വീര്യത്തിലും അവർക്ക് ഒത്തൊരു എതിരാളി ഇല്ലെന്ന് തന്നെ പറയാം, എന്നാൽ ഇതൊന്നും ആയിരുന്നില്ല ഇവരെ ഏറ്റവും അപകടാകാരികൾ ആക്കുന്നത്, അത് യഥാർത്ഥ ജീവിതത്തിൽ ഇവർ ആരാണെന്ന അറിവില്ലായ്മ തന്നെ ആയിരുന്നു. പഠിപ്പിന് ശേഷം പേരും വിവരങ്ങളും എല്ലാം മാറ്റി പുതിയൊരു വ്യക്തിത്വം സ്വീകരിച്ച ഇവരെല്ലാം ആരാണെന്ന് മാസ്റ്റർക്ക് പോലും പിടിയില്ല, ആരുമാവാം എന്ന സാധ്യത മാത്രമാണ് സത്യം. ഈ ഒരു വസ്തുതയാണ് കാര്യങ്ങൾ കൂടുതൽ കുഴപ്പിക്കുന്നത്, മറഞ്ഞിരിക്കുന്ന എതിരാളികൾ എന്ന വസ്തുത.

🔸ടാരന്റിനോയുടെ കിൽ ബില്ലിൽ ഉൾപ്പെടെ വിവിധ സിനിമകളിൽ സ്വാധീനം ഉറപ്പിച്ചിട്ടുള്ള ഒന്നാണ് ഫൈവ് ഡെഡ്ലി വെനംസ് എന്ന ചിത്രം, മിക്സഡ് മാർഷ്യൽ ആർട്സ് വിഭാഗത്തിലെ നല്ലൊരു ശ്രമം എന്ന് തന്നെ പറയാം ഈ ചിത്രത്തെ. ചതി, വഞ്ചന, പ്രതികാരം തുടങ്ങി അനവധി വികാരങ്ങളിലൂടെ ആണ് ചിത്രം പുരോഗമിക്കുന്നത്, ഒടുവിൽ കഥ പറഞ്ഞ് തീരുമ്പോൾ നല്ലൊരു അനുഭവമായി മാറുവാനും മറക്കുന്നില്ല ഈ ചാങ് ചെ ചിത്രം. മാർഷ്യൽ ആർട്സ്, ആക്ഷൻ ചിത്രങ്ങളോട് താല്പര്യമുള്ളവർക്ക് ധൈര്യമായി കാണാം ഈ ചിത്രം.

Verdict : Very Good

DC Rating : 80/100

529. Salaam Bombay (1988)

Director : Mira Nair

Genre : Drama

Rating : 8/10

Country : India

Duration : 113 Minutes

🔸ഒരു വ്യക്തിയുടെ ജീവിതം എന്നതിനേക്കാൾ ഒരു നഗരത്തിന്റെ മിടിപ്പ് ആണ് സലാം ബോംബെ എന്ന ചിത്രം, ശെരിയാണ് ഷഫീക് സയീദ് അവതരിപ്പിച്ച കൃഷ്ണ എന്ന കഥാപാത്രത്തിന്റെ കാഴ്ചപ്പാടിലൂടെ ആണ് ചിത്രം പുരോഗമിക്കുന്നത് എന്നാൽ അതിൽ തന്നെ പ്രേക്ഷകൻ കാണുന്നതും അറിയുന്നതും ഇന്നലെകളിലെ ബോംബെ എന്ന നഗരത്തെ കുറിച്ചാണ്, ജീർണിച്ച് നാറിയ ആ തെരുവുകളിലെ ജീവിതങ്ങളെയാണ്, ഈ കാരണങ്ങൾ കൊണ്ട് തന്നെയാണ് ഈ ചിത്രം ഒരു നഗരത്തിന്റെ നേർക്കാഴ്ച ആവുന്നതും ടൈറ്റിലിനെ അന്വർത്ഥമാക്കുന്നതും. ദേശീയ പുരസ്‌കാരങ്ങൾ, കാനസിലെയും മോണ്ട്രിയലിലെയും ഫിലിം ഫെസ്റ്റുകളിൽ കൈനിറയെ പുരസ്‌കാരങ്ങൾ, ഇന്ത്യയുടെ ആ വർഷത്തെ ഓസ്കാർ എൻട്രി, ന്യു യോർക്ക് ടൈമ്സിന്റെ എക്കാലത്തെയും മികച്ച ആയിരം ചിത്രങ്ങളിൽ ഒന്ന് തുടങ്ങി പട്ടങ്ങളും പദവികളും അനവധിയാണ് ഈ ചിത്രത്തിന്.

🔸ആളും ബഹളവും എല്ലാം ഒഴിഞ്ഞ ഒരു സർക്കസ് കൂടാരത്തിൽ നിന്നുമാണ് സലാം ബോംബെ ആരംഭിക്കുന്നത്. സ്ഥിരമായി ഒരിടത്തും താമസിക്കാതെ നാടുകളിൽ നിന്നും നാടുകളിലേക്ക് ആളുകളെ രസിപ്പിച്ച് കൊണ്ട് കടന്ന് പോവുന്ന സംഘം പുതിയൊരിടത്തേക്ക് യാത്ര ആരംഭിക്കാൻ തയ്യാറാവുകയാണ്. ഈ സംഘത്തിലെ അന്തേവാസിയാണ് കൃഷ്ണ എന്ന കഥാപാത്രം, മറ്റുള്ളവരെ പോലെ അഭ്യാസി അല്ലെങ്കിലും തന്നാൽ കഴിയാവുന്ന രീതിയിലുള്ള സഹായങ്ങൾ ചെയ്ത് കൊടുത്താണ് അന്നന്നത്തേക്കുള്ള അന്നത്തിന്റെ വക അവൻ ഉണ്ടാക്കുന്നത്. അങ്ങനെ സംഘം യാത്ര തിരിക്കുന്ന ദിവസം നഗരത്തിൽ നിന്നും പാൻ മസാല വാങ്ങാനായി മുതലാളി അവനെ പറഞ്ഞ് വിടുകയാണ്.

🔸തന്നെ ഏല്പിച്ച ദൗത്യം നിർവഹിച്ച ശേഷം ബാക്കിയുള്ള തുകയും മൂന്ന് ബോട്ടിൽ പാൻ മസാലയുമായി കൂടാരത്തിൽ തിരിച്ചെത്തുമ്പോഴാണ് കൃഷ്ണ അക്ഷരാർത്ഥത്തിൽ ഞെട്ടുന്നത്. തനിക്ക് വേണ്ടി കാത്ത് നിൽക്കാതെ എല്ലാവരും യാത്രയായി കഴിഞ്ഞിരുന്നു. ഇനിയെന്ത് എന്ന ചോദ്യം അവനെ വല്ലാതെ ഉലയ്ക്കുകയാണ്, സംഘം യാത്ര തിരിച്ചത് എവിടേക്കാണ് എന്നത് അറിയാത്തതിനാൽ ആ വഴി ഏറെക്കുറെ അടഞ്ഞ മട്ടാണ്, നിലനിന്ന് പോവാൻ ഒരു ജോലിയും ഭക്ഷണവും അത്യാവശ്യം ആയതിനാൽ എന്തെങ്കിലും ഒരു മാർഗം കണ്ടെത്തിയേ മതിയാവൂ താനും. അങ്ങനെ മുതലാളി കയ്യിൽ തന്ന് വിട്ട ബാക്കി പണവും, മൂന്ന് കുപ്പി പാൻ മസാലയും പേറി കൊണ്ട് അവൻ യാത്ര തിരിക്കുകയാണ്, ബോംബെ നഗരത്തിലേക്ക് അതും പ്രതീക്ഷകളുടെയും സ്വപ്നങ്ങളുടെയും വലിയൊരു ഭാണ്ഡവും പേറി.

🔸ബോംബെ നഗരത്തിൽ ചായക്കാരനായി ജോലി ചെയ്യുന്ന കൃഷ്ണയുടെ കണ്ണുകളിലൂടെ പിന്നീടുള്ള ഒന്നേമുക്കാൽ സമയം കൊണ്ട് ബാബ, മഞ്ജു, സോള സാൽ, രേഖ, ചില്ലും എന്നീ കഥാപാത്രങ്ങളെ നമ്മൾ പരിചയപ്പെടുകയാണ്, ഈ കഥാപാത്രങ്ങൾക്കെല്ലാം പറയാൻ ഉള്ളത് ഒരു പത്ത് ഇരുപത് വർഷക്കാലം മുന്നേ ഉണ്ടായിരുന്ന ബോംബെയുടെ വിശ്വസിക്കാൻ കഴിയാത്ത മറ്റൊരു മുഖത്തെ പറ്റിയാണ്. കൃഷ്ണ എന്ന കഥാപാത്രത്തെ പറ്റി പറയുമ്പോൾ ഷെഫീഖ് സയീദ് എന്ന നടനെ കുറിച്ച് കൂടി പറയേണ്ടി ഇരിക്കുന്നു. ഒരു ബയോഗ്രഫിയുടെ ചുവ കൂടിയുണ്ട് ഷെഫീക്കിനെ സംബന്ധിച്ചിടത്തോളം ഈ ചിത്രത്തിന്, ബാംഗ്ലൂരിലെ തെരുവിൽ നിന്ന് രക്ഷപ്പെട്ട ബോംബെയിലേക്ക് ജോലി തേടി എത്തിയതാണ് ഷെഫീക്കും സുഹൃത്തുക്കളും, തങ്ങളുടെ പന്ത്രണ്ടാം വയസ്സിൽ.

🔸സംവിധായിക മീര നായരെ സംബന്ധിച്ചിടത്തോളം ക്യാമറയ്ക്ക് മുന്നിൽ പെരുമാറാൻ ഇവരെ പഠിപ്പിക്കേണ്ട ദൗത്യം മാത്രമേ ഉണ്ടായിരുന്നുള്ളു. പതങ് എന്ന ചിത്രത്തിൽ കൂടി അഭിനയിച്ച ശേഷം സ്‌ക്രീനിൽ നിന്ന് വിടവാങ്ങിയ സയീദ് പിന്നീട് ബാംഗ്ലൂരിൽ ഓട്ടോ തൊഴിലാളി ആയി മാറിയതും അറിയാനായി. പച്ചയായ രീതിയിൽ ഒരു നഗരത്തെ അവതരിപ്പിച്ചതിന് പഴികളും കുറ്റപ്പെടുത്തലുകളും മീര നായർ കേട്ടതായി വായിച്ചിട്ടുണ്ട്. രക്ഷപ്പെട്ട് ഓടാൻ ശ്രമിക്കും തോറും തന്നിലേക്ക് വലിച്ചെടുക്കുന്ന ചുഴിയെ പോലെയാണ് ബോംബെ എന്ന നഗരത്തെ ഈ ചിത്രത്തിൽ അവതരിപ്പിച്ചിരിക്കുന്നത്. അമ്പരപ്പിക്കുന്ന പ്രകടനങ്ങൾ കാഴ്ചവെച്ച പുതുമുഖങ്ങൾക്ക് പുറമെ നാന പട്ടെക്കറും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്, പ്രശസ്ത നടൻ ഇർഫാൻ ഖാനും ഒരു ചെറിയ സീനിൽ വന്നുപോവുന്നുണ്ട്. കാണാൻ വളരെ വൈകിപ്പോയ ചിത്രമാണ് സലാം ബോംബെ, എന്നാൽ അത്ര പെട്ടെന്നൊന്നും ഈ കഥാപാത്രങ്ങൾ മനസ്സിൽ നിന്ന് പോവില്ല എന്ന കാര്യം നൂറ് ശതമാനം ഉറപ്പാണ്.

Verdict : Must Watch

DC Rating : 90/100

528. Pet Sematary (2019)

Director : Kevin Kölsch

Genre : Horror

Rating : 6.6/10

Country : USA

Duration : 101 Minutes

🔸ഷൈനിങ്, ഗ്രീൻ മൈൽ, ഷോഷാങ്ക് റിഡെംപ്‌ഷെൻ, സ്റ്റാൻഡ് ബൈ മീ, ഇറ്റ് എന്നീ ചിത്രങ്ങൾ പറയും സ്റ്റീഫൻ കിംഗ് എന്ന വ്യക്തിയുടെയും ആ ബ്രാൻഡിന്റെയും മൂല്യം. കാസ്റ്റിംഗിനും മറ്റ് കാര്യങ്ങൾക്കും മേലെ ഈ പേരിലുള്ള വിശ്വാസം ആണ് ഒരു പരിധി വരെ ഏത് ചിത്രവും കാണാൻ ഉണ്ടായിരുന്ന പ്രചോദനം. ഏതാണ്ട് മൂന്ന് പതിറ്റാണ്ട് മുൻപ് പെറ്റ് സെമിത്തേരി എന്ന നോവലിന്റെ ചലച്ചിത്രാവിഷ്കാരം തിയേറ്ററുകളിൽ എത്തിയിരുന്നെങ്കിലും കാര്യമായ ചലനങ്ങൾ ഒന്നും സൃഷ്ടിച്ചിരുന്നില്ല. വ്യക്തിപരമായി ഡാർക്ക് ടവർ പോലെയൊരു വികൃതമായ അഡാപ്റ്റേഷൻ ആയാണ് പ്രസ്തുത ചിത്രം അനുഭവപ്പെട്ടത്, ഈ കാരണങ്ങൾ കൊണ്ട് തന്നെ നല്ലൊരു സിനിമ ഈ കഥ അർഹിക്കുന്നുണ്ട് എന്ന ബോധം ഉണ്ടായിരുന്നെങ്കിലും പ്രതീക്ഷകൾ കുറവായിരുന്നു, സിനിമ കാണാൻ തയ്യാറെടുക്കുമ്പോൾ പോലും.

🔸അടുത്ത കാലത്ത് പല ഹോളിവുഡ് ഹൊറർ ചിത്രങ്ങളും സഞ്ചരിച്ച പാതയിലൂടെ തന്നെയാണ് പെറ്റ് സെമിത്തേരിയും വെച്ച് പിടിക്കുന്നത്. ലുഡ്‌ലോ എന്ന ചെറിയ പട്ടണത്തിലേക്ക് സ്ഥലം മാറി എത്തുകയാണ് കഥാനായകനും ഡോക്ടറും ആയ ലൂയിസ് ക്രീഡ്. ഇതിൽ നിന്നും പ്രതീക്ഷിക്കാവുന്നത് പോലെ തന്നെ താങ്കൾ എത്തപ്പെട്ട സ്ഥലത്തെ കുറിച്ചും ചുറ്റുപാടുകളെ കുറിച്ചും നിഗൂഢമായ ചില അറിവുകൾ ലൂയിസിന് ലഭിക്കുകയാണ്, പ്രത്യേകിച്ചും തന്റെ വീടിന് പിറകിലായി സ്ഥിതി ചെയ്യുന്ന ശ്മശാനത്തെ കുറിച്ച്. ഇതിന് പിറകെ ക്രീഡ് കുടുംബത്തിന്റെ ജീവിതങ്ങളിൽ ചില അനിഷ്ട സംഭവങ്ങൾ കൂടി അരങ്ങേറുമ്പോൾ കഥാ ഗതി ആകെ മാറി മറിയുകയാണ്.

🔸പെറ്റ് സെമിത്തേരി എന്ന ചിത്രം കണ്ട് കഴിഞ്ഞപ്പോൾ പല കാരണങ്ങൾ കൊണ്ടും മനസ്സിൽ എത്തിയത് നിർണായകമായ ഒരു ഘട്ടത്തിൽ കഥാപാത്രങ്ങളിൽ ഒന്ന് പറയുന്ന "Sometimes Dead Is Better" എന്ന ഡയലോഗ് ആണ്. മുൻ ചിത്രത്തേക്കാൾ മികച്ചത് ആണെങ്കിൽ കൂടിയും ഹൈപ്പിനോടും പേരിനോടും നീതി പുലർത്താൻ ഈ ചിത്രത്തിന് ഒരുപരിധി വരെ കഴിഞ്ഞിട്ടില്ല, നോവൽ വായിച്ചിട്ടില്ലാത്തതിനാൽ ആ ഭാഗത്തേക്ക് കടക്കുന്നില്ല. നല്ല കുറച്ച് ജംപ് സ്‌കെയറുകൾ ഉണ്ടെങ്കിൽ കൂടിയും ഇവ നിലനിർത്തിക്കൊണ്ട് മുന്നോട്ട് പോവാൻ കഴിയാഞ്ഞതും ചിത്രത്തിന്റെ വലിയ പോരായ്മകളിൽ ഒന്നാണ്. ഈ കാരണങ്ങൾ കൊണ്ട് തന്നെ വലിയ സാദ്ധ്യതകൾ ഉണ്ടായിട്ടും ശരാശരിയിൽ ഒതുങ്ങി പോവുന്നുണ്ട് ഈ ചിത്രം, പല സന്ദർഭങ്ങളിലും.

🔸ശരാശരിയിൽ ഒതുങ്ങി പോവുന്നുണ്ട് പല സന്ദർഭങ്ങളിലും എന്ന് മുകളിൽ പറഞ്ഞിരിക്കുന്നത് ശ്രദ്ധിക്കുക, ഈ സന്ദർഭങ്ങൾ പിറകോട്ട് വലിക്കുമ്പോഴും ചില ഇടങ്ങളിൽ ചിത്രം തീർച്ചയായും ഹൈപിന് നീതി നൽകുന്നുണ്ട്, പ്രത്യേകിച്ചും റേച്ചൽ ക്രീഡ് എന്ന കഥാപാത്രത്തെ അടുത്തറിയുന്ന ചില രംഗങ്ങളിൽ. ഇതോടൊപ്പം തന്നെ പറയേണ്ടതാണ് നടീ നടന്മാരുടെ മികച്ച പ്രകടനങ്ങളും. അപ്രതീക്ഷിതമായ ചില വഴികളിലൂടെ സഞ്ചരിക്കുന്നുണ്ട് ഈ ചിത്രം, പ്രത്യേകിച്ചും ക്ളൈമാക്സിനോട് അടുക്കുമ്പോൾ, ഈ ഭാഗത്ത് സോഴ്സ് മെറ്റീരിയലിൽ നിന്നും വഴി മാറാൻ തീരുമാനിച്ച മനോഭാവം തീർച്ചയായും നല്ലത് തന്നെ.

🔸കാണണമോ വേണ്ടയോ എന്ന ചോദ്യത്തിന് ഉത്തരമാണ് വേണ്ടതെങ്കിൽ സ്റ്റീഫൻ കിങ്ങിന്റെ നോവലിന്റെ മികച്ച ചലച്ചിത്രാവിഷ്കാരം ആണ് ഈ ചിത്രം, എന്നാൽ അത് ഈ സിനിമയുടെ നിലവാരത്തെക്കാൾ ആദ്യ ഭാഗം എത്ര മാത്രം പരാജയം ആയിരുന്നു എന്നതിനെ അടിസ്ഥാനമാക്കിയാണ്. പ്രൊമോഷനിലും മറ്റും ഒരു തികഞ്ഞ പരാജയം ആണ് ഈ ചിത്രം എന്ന് പറയേണ്ടി വരും, അതിനുള്ള കാരണം സിനിമ കാണുമ്പോൾ പിടികിട്ടും. ഒരുപാട് സാദ്ധ്യതകൾ ഉണ്ടായിട്ടും വലിയ ചലനങ്ങൾ സൃഷ്ടിക്കപ്പെടാതെ പോയ ചിത്രങ്ങളുടെ കൂട്ടത്തിൽ കാണും പെറ്റ് സെമിത്തേരിയും.

Verdict : Watchable

DC Rating : 65/100

527. Shazam (2019)

Director : David Sandberg

Genre : Superhero

Rating : 7.8/10

Country : USA

Duration : 132 Minutes

🔸സൂപ്പർഹീറോ സിനിമകൾ എന്നത് ഇന്ന് ഏറെക്കുറെ ലോകം കീഴടക്കി കഴിഞ്ഞിരിക്കുന്നു, ആരാധക പിന്തുണയിലും കളക്ഷനിലും എല്ലാം ഈ ചിത്രങ്ങൾക്ക് ലഭിക്കുന്ന സ്വീകാര്യത വളരെ വലുതാണ്. ഇതിനോടൊപ്പം തന്നെ ചേർത്ത് പറയേണ്ട രണ്ട് പേരുകളാണ് ഡീസിയും മാർവലും, കോമിക് ചരിത്രത്തിലെ തന്നെ രണ്ട് അതികായന്മാർ. കോമിക്സ് അനിമേഷൻ തുടങ്ങിയ മേഖലകളിൽ എല്ലാ കാലത്തും മുന്നിട്ട് നിന്നിരുന്നെങ്കിലും സിനിമ എന്ന മേഖലയിൽ ഡീസി ട്രാക്കിൽ എത്തുന്നതെ ഉള്ളൂ, ബാറ്റ്മാൻ വേഴ്സസ് സൂപ്പർമാൻ എന്ന ചിത്രത്തിന്റെ എക്സ്ടെൻഡഡ്‌ കട്ട് ഇഷ്ടമാണെങ്കിൽ കൂടിയും ജസ്റ്റിസ് ലീഗ് പോലെയുള്ള പരാജയങ്ങൾ അഭിമുഖീകരിക്കേണ്ടി വന്ന ഡിസിക്ക് തുടർ വിജയങ്ങൾ അനിവാര്യമാണ്, അക്വമാൻ എന്ന ചിത്രത്തിന് ശേഷം പുറത്തിറങ്ങുന്ന ഷെസാമിന് ഈ ശ്രമകരമായ ദൗത്യമാണ് നിർവഹിക്കേണ്ടത്.

🔸ബാറ്റ്മാനെ പോലെ ഉള്ള ഡീസിയുടെ കോർണർ സ്റ്റോൺ കഥാപാത്രങ്ങളും ആയി തട്ടിച്ച് നോക്കുമ്പോൾ കുറച്ച് കൂടി ലൈറ്റ് ഹാർട്ടഡ് ആണ് ഷെസാം എന്ന കഥാപാത്രം, അതിന് വ്യക്തമായ കാരണവും ഉണ്ട്. കാഴ്ചയിൽ വലിയൊരു മനുഷ്യൻ ആണെങ്കിൽ കൂടിയും യാഥാർത്ഥത്തിൽ വെറുമൊരു പതിമൂന്ന് വയസുകാരനാണ് ഷെസാമിന്റെ ആൾട്ടർ ഈഗോ ആയ ബില്ലി ബാറ്റ്സൺ. ഈ ഒരു കാരണം കൊണ്ട് തന്നെ അത്യാവശ്യം തമാശയും കാര്യങ്ങളും എല്ലാം ഉൾക്കൊള്ളുന്ന കാര്യ ഗൗരവം ഏതും ഇല്ലാത്ത ഒരു കഥാപാത്രമാണ് നമ്മുടെ നായകൻ.

🔸അധികം സ്പോയ്ലറിലേക്ക് കടക്കാതെ ചിത്രത്തിന്റെ നല്ലതും മോശവുമായ കാര്യങ്ങളിലേക്ക് കടക്കാം, ആദ്യമേ തന്നെ ചിത്രത്തിന്റെ എഫക്ടുകളിലേക്ക്. എൺപത് മില്യൺ ഡോളർ എന്നൊക്കെ പറയുന്നത് ഇന്നത്തെ കാലത്ത് ഒരു സൂപ്പർഹീറോ സിനിമയെ സംബന്ധിച്ചിടത്തോളം വളരെ ചെറിയ ബഡ്‌ജറ്റ്‌ ആണ്, അത് എന്ത് തന്നെ ആയാലും ഏറ്റവും കൂടുതൽ ബാധിച്ചിരിക്കുന്നത് എഫക്ടുകളുടെ കാര്യത്തിലാണ്, ശരാശരി എന്നേ ഈ മേഖലയെ വിശേഷിപ്പിക്കാനാവൂ. ഈ ഒരു വസ്തുതയോടൊപ്പം ശരാശരിയിലോ അതിൽ താഴെയോ ആയി ഒതുങ്ങുന്ന വില്ലൻ കൂടി ചേരുമ്പോൾ മോശം എന്നനുഭവപ്പെട്ട വസ്തുതകൾ പൂർത്തിയായി. മാർക്ക് സ്ട്രോങ്ങ് എന്ന നടന്റെ കഴിവ് വേണ്ടവിധം ഉപയോഗപ്പെടുത്തിയില്ല എന്ന് വേണമെങ്കിൽ പറയാം.

🔸ഇനി നല്ല കാര്യങ്ങളിലേക്ക് കടക്കുക ആണെങ്കിൽ, ഒറ്റ വാക്കിൽ നല്ല ഒന്നാം ക്ലാസ് എന്റെർറ്റൈനെർ എന്ന് വിശേഷിപ്പിക്കാം ഈ ചിത്രത്തെ. കേന്ദ്ര കഥാപാത്രമായി എത്തിയ രണ്ട് താരങ്ങളുടെയും പ്രകടനം കൊണ്ടാണെങ്കിലും കൊമെടി ടോൺ കൊണ്ടാണെങ്കിലും ആദ്യാവസാനം രസിപ്പിച്ചിരിക്കും ഈ ചിത്രം. സ്‌ക്രീനിൽ എത്തിയ താരങ്ങളുടെ എല്ലാം മികച്ച പ്രകടനങ്ങളും ഈ ചിത്രത്തിന്റെ മറ്റൊരു സവിശേഷത ആണ്, പ്രകടനം മാത്രമല്ല ഇവരെ എല്ലാം പ്രേക്ഷനിൽ താല്പര്യം ജനിപ്പിക്കും വിധം അവതരിപ്പിച്ച രീതിയും പ്രശംസ അർഹിക്കുന്നു. ചുരുക്കി പറയുക ആണെങ്കിൽ ഒരു എന്റെർറ്റൈനെർ എന്ന നിലയിൽ ആസ്വദിച്ച് കാണാവുന്ന മികച്ചൊരു ചിത്രം തന്നെയാണ് ഷെസാം.

🔸അവസാനത്തെ മുപ്പതിന് അടുത്ത് മിനുട്ടുകളും രണ്ട് പോസ്റ്റ് ക്രെഡിറ്റ് സീനുകളും ചിത്രത്തിന്റെ സ്ട്രോങ്ങ് പോയിന്റുകളാണ്. നായക വില്ലൻ സംഘട്ടനം തന്നെയാണ് ഈ ഭാഗത്ത് അരങ്ങേറുന്നത് എങ്കിലും അപ്രതീക്ഷിതമായ ചില സംഭവങ്ങളും ഇവിടെ നടക്കുന്നുണ്ട്. ഡീസി യുണിവേഴ്സിന്റെ ഭാവിയെ സൂചിപ്പിക്കുന്ന ഒന്നാണ് പോസ്റ്റ് ക്രെഡിറ്റ് സീനുകളിൽ ഒന്നെങ്കിൽ മറ്റേത് നല്ലൊരു കൊമെടി രംഗവും ഈസ്റ്റർ എഗ്ഗുമാണ്. കൂടുതൽ പറഞ്ഞ് മുഷിപ്പിക്കുന്നില്ല, നല്ലൊരു എന്റെർറ്റൈനെർ ആണ് ഷെസാം, രണ്ട് മണിക്കൂർ സമയം ആസ്വദിച്ച് കാണാൻ ഉതകുന്ന കംപ്ലീറ്റ് എന്റെർറ്റൈനെർ.

Verdict : Good

DC Rating : 75/100

526. Dumbo (2019)

Director : Tim Burton

Genre : Fantasy

Rating : 7/10

Country : USA

Duration : 113 Minutes

🔸കഴിഞ്ഞ കുറച്ച് വർഷങ്ങളായി ഡിസ്‌നി പിന്തുടരുന്ന മാർഗമാണ് തങ്ങളുടെ സുവർണ കാലത്തെ മികച്ച അനിമേഷൻ ചിത്രങ്ങളെ ലൈവ് ആക്ഷൻ ചിത്രങ്ങളായി റീമേയ്ക്ക് ചെയ്യുന്ന പ്രക്രിയ. ബ്യുട്ടി ആൻഡ് ദി ബീസ്റ്റ്, ജംഗിൾ ബുക്, ക്രിസ്റ്റഫർ റോബിൻ എന്നിവ വന്ന് പോയവ ആണെങ്കിൽ അലദീൻ, ലയൺ കിംഗ് എന്നിവ അണിയറയിൽ ഒരുങ്ങി കൊണ്ടിരിക്കുകയാണ്. ഡെമ്പോ എന്ന ചിത്രത്തിനും ആ കഥാപാത്രത്തിനും മുകളിൽ സൂചിപ്പിച്ച ചിത്രങ്ങളുടെ ആരാധക പിന്തുണയോ ജനപ്രീതിയോ ഇല്ലെങ്കിലും ഡിസ്നിയുടെ ഏറ്റവും പുതിയ ലൈവ് ആക്ഷൻ പരിശ്രമം ആയി മാറിയിരിക്കുകയാണ് ഈ ചിത്രം. സംവിധായക വേഷം അണിഞ്ഞ് ടിം ബെർട്ടനും, സ്‌ക്രീനിൽ കോളിൻ ഫെറൽ, ഈവ ഗ്രീൻ, ഡാനി ഡെവിട്ടോ, മൈക്കൽ കീറ്റൺ തുടങ്ങി മികച്ച ഒരു ടീം തന്നെയാണ് ചിത്രത്തിനായി അണിനിരന്നിരിക്കുന്നത്‌.

🔸ചിത്രത്തെ കുറിച്ച് എന്തെങ്കിലും പറയാൻ തുടങ്ങുന്നതിന് മുന്നേ ഒരു യാഥാർഥ്യം പറഞ്ഞിടാം, ഒരു ജാമ്യം പോലെ. ഡിസ്‌നി ചിത്രങ്ങൾ മാത്രമല്ല, പൊതുവെ റീമേയ്ക്ക് ചിത്രങ്ങളുടെ കാര്യത്തിൽ സംഭവിക്കാറുള്ള ഒരു വസ്തുത ഇവിടെയും അരങ്ങേറിയിട്ടുണ്ട്, വേറൊന്നും അല്ല ഒറിജിനലിനോട് കിട പിടിക്കുന്ന അല്ലെങ്കിൽ നീതി പുലർത്തുന്ന ഒരു ചിത്രം ആവുക എന്നതിൽ ഈ ചിത്രം ഒരു പരാജയം ആണ്. നൊസ്റ്റാള്ജിയയുടെ എഫക്ടിൽ വിജയം ആയേക്കും എങ്കിലും ആദ്യ ചിത്രത്തിന് എത്രയോ താഴെയാണ് ഈ ടിം ബെർട്ടൻ പരീക്ഷണം. ജാമ്യം എടുക്കൽ കഴിഞ്ഞ സ്ഥിതിക്ക് ഇനി കാര്യങ്ങളിലേക്ക് കടക്കാം, നല്ലതും മോശവുമായി അനുഭവപ്പെട്ട കാര്യങ്ങളിലേക്ക്.

🔸നാൾക്ക് നാൾ അധപ്പതിച്ച് കൊണ്ടിരിക്കുന്ന സർക്കസ് കൂടാരത്തിലെ കുട്ടി ആനയാണ് ഡെംപോ എന്ന ടൈറ്റിൽ കഥാപാത്രം. മറ്റുള്ള ആനകുട്ടികളെ പോലെയല്ല ഡെംപോ, കാണാൻ അത്യാവശ്യം ഭംഗിയുള്ള, മുഖത്തേക്കാൾ വലിയ ചെവിയുള്ള, പറക്കാൻ വരെ കഴിവുള്ളവൻ ആണ് ഡെംപോ. ഈ കാരണങ്ങൾ കൊണ്ട് തന്നെ സർക്കസിലെ ആകർഷണ ഘടകങ്ങളിൽ ഒന്നാണ് ഡെംപോ, എന്നാൽ ഇവിടെ ചില പ്രശ്നങ്ങൾ അരങ്ങേറുന്നതും തുടർന്നുണ്ടാവുന്ന സംഭവങ്ങളും എല്ലാം ചിത്രത്തിന്റെ ഗതി തിരിച്ച് വിടുകയാണ്. ചിത്രത്തിന്റെ മോശമെന്ന് അനുഭവപ്പെട്ട വസ്തുതകളിലേക്ക് കടക്കുക ആണെങ്കിൽ ആദ്യമേ പെയ്‌സിങിനെ കുറ്റം പറയേണ്ടി വരും, തിരക്കിട്ട രീതിയിലാണ് പലപ്പോഴും ചിത്രം പുരോഗമിക്കുന്നത്, പ്രത്യേകിച്ചും ആദ്യ പകുതിയിൽ.

🔸ഫാമിലി ഓടിയെൻസിനെ ഉന്നം വെച്ച് കൊണ്ട് ചിത്രത്തെ കൂടുതൽ ഫാമിലി ഫ്രണ്ട്ലി ആയി മാറ്റുവാൻ സ്റ്റുഡിയോ നടത്തിയ ശ്രമങ്ങളെയും എടുത്ത് പറയേണ്ടി ഇരിക്കുന്നു. ആദ്യ ഭാഗത്തെ പ്രശസ്തമായ പിങ്ക് എലിഫന്റ് രംഗം ഈ ചിത്രത്തിന് വേണ്ടി മാറ്റി എഴുതിയപ്പോൾ വന്ന മാറ്റം ഈ ഒരു വസ്തുതയ്ക്ക് ഉത്തമ ഉദാഹരണമാണ്. ഇതോടൊപ്പം ശരാശരിയിൽ ഒതുങ്ങി പോയ തിരക്കഥയും, മോശം ഡയലോഗുകളും എല്ലാം കൂടി ചേരുമ്പോൾ ഡെംപോ എന്ന ചിത്രത്തിലേ മോശം എന്നനുഭവപ്പെട്ട വസ്തുതകൾ ഏറെക്കുറെ അവസാനിക്കുകയാണ്. ഇനി നല്ല കാര്യങ്ങളിലേക്ക് കടക്കുക ആണെങ്കിൽ ആദ്യമേ തന്നെ ടൈറ്റിൽ കഥാപാത്രത്തെ പറ്റി പറയേണ്ടി വരും, ഈ കഥാപാത്രത്തിന്റെ ഡിജിറ്റൽ റീക്രിയേഷൻ മികച്ചത് തന്നെയാണ്, അതിൽ യാതൊരു സംശയവുമില്ല.

🔸അവസാന മുപ്പത് മിനുട്ട് ചിത്രം മികവ് പുലർത്തുന്നുണ്ട്, അവതരണത്തിലും പ്രകടനത്തിലും. ഡാനി ഡെവിട്ടൊയുടെ പ്രകടനവും ചിത്രത്തിന്റെ ഹൈ ലൈറ്റുകളിൽ ഒന്നാണ്. ഒരു റീമേയ്ക്ക് ആണെങ്കിൽ കൂടിയും വെറുമൊരു സീൻ ബൈ സീൻ കോപ്പി ആയി മാറാതെ വ്യത്യസ്തമായ ഒരു ഐഡന്റിറ്റി ഈ ചിത്രം സ്വന്തമാക്കി എടുക്കുന്നുണ്ട് എന്നത് എടുത്ത് പറയേണ്ട വസ്തുതയാണ്. അങ്ങനെ നല്ലതും മോശവുമായ കാര്യങ്ങൾ എല്ലാം അളന്ന് തൂക്കി തിട്ടപ്പെടുത്തി കഴിഞ്ഞ സ്ഥിതിക്ക് വിധിയിലേക്ക് കടക്കാം, കണ്ടിരിക്കാം എന്ന് മാത്രമേ ഈ ചിത്രത്തെ കുറിച്ച് പറയാനുള്ളു, കണ്ടിരിക്കാവുന്ന ഒരു ശരാശരി ഡിസ്‌നി അനിമേഷൻ ചിത്രം ആണ് ഡെംപോ.

Verdict : Average

DC Rating : 60/100

525. Super Deluxe (2019)

Director : Thiagarajan Kumararaja

Genre : Thriller

Rating : 9/10

Country : India

Duration : 174 Minutes

🔸സൂപ്പർ ഡീലക്സ് എന്ന ചിത്രം തിയേറ്ററിൽ കണ്ടിട്ട് ഏകദേശം രണ്ട് ദിവസം പിന്നിടുന്നു, മിക്കപ്പോഴും ഒരു ചിത്രം കണ്ട് കഴിഞ്ഞാൽ ആ ഒരു ഓളത്തിൽ വന്ന് എഴുതി ഇടറാണ് പതിവ്. എന്നാൽ ഈ ചിത്രത്തിന്റെ കാര്യത്തിൽ കുറച്ച് വ്യത്യാസങ്ങൾ ഉണ്ട്, ഈ വ്യത്യാസങ്ങൾ പറയുന്നതിന് മുന്നേ ചിത്രം കാണാൻ ഇടയായ കരണങ്ങളെയും സംഭവങ്ങളെയും പറ്റി ചെറുതായി ഒന്ന് പറഞ്ഞിടാം. സൂപ്പർ ഡീലക്സ് എന്ന ചിത്രം ഒരുപക്ഷെ ലഭ്യമായതിൽ ഏറ്റവും മോശം സമയത്താണ് തിയേറ്ററുകളിൽ എത്തിയിരിക്കുന്നത്, ഏറ്റവും കുറഞ്ഞത് കേരളത്തിൽ എങ്കിലും. മറ്റൊരു ചിത്രം തിയേറ്ററുകളിൽ അലയൊലി സൃഷ്ട്ടിക്കുന്നതിനാൽ തന്നെ കാണാൻ പത്ത് പേരെ എങ്കിലും ഈ ചിത്രത്തിന് ഒപ്പിക്കുക എന്നത് ശ്രമകരമായ ദൗത്യം തന്നെ ആയിരുന്നു. എന്നാൽ ത്യാഗരാജ കുമാര രാജ എന്ന സംവിധായകനും ഫഹദ് ഫാസിൽ, വിജയ് സേതുപതി എന്നീ നടന്മാരും അത്ര ഒഴിവാക്കാൻ കഴിയുന്ന ഘടകങ്ങൾ അല്ലാഞ്ഞതിനാലും ആരണ്യകാണ്ഡത്തിന്റെ ഓർമയിലും രണ്ടും കല്പിച്ച് കയറുകയായിരുന്നു.

🔸ഇനി ഈ ചിത്രത്തെ കുറിച്ച് എഴുതിയിടാൻ ഒരല്പം ബുദ്ധിമുട്ട് ആണ് എന്ന പറഞ്ഞ വസ്തുതയിലേക്ക്, ആദ്യമേ തന്നെ പറയാം മൂന്ന് മണിക്കൂർ ആണ് ഈ ചിത്രത്തിന്റെ ദൈർഖ്യം, ആ സമയത്ത് പോലും ഒരുപാട് കാര്യങ്ങൾ സ്‌ക്രീനിൽ അരങ്ങേറുന്നുണ്ട്. നാല്‌ കഥകളാണ് ചിത്രത്തിൽ ഉള്ളത്, ഇവ ചില ഇടങ്ങളിൽ എങ്കിലും കൂട്ടി യോജിക്കപ്പെടുന്നുണ്ട്. ഒരുപക്ഷെ ഈ ചിത്രത്തെ പൂർണ തൃപ്തിയോടെ വിലയിരുത്തണം എങ്കിൽ രണ്ട് തവണ എങ്കിലും കാണേണ്ടി വരും, തല്ക്കാലം അതിന് വഴി ഇല്ലാത്തതിനാൽ പോസ്റ്റിന്റെ തുടർ ഭാഗങ്ങളിൽ തെറ്റുകൾ ഉണ്ടെങ്കിൽ സദയം ക്ഷമിക്കുക.

🔸ആദ്യ കഥ എന്നത് ദമ്പതിമാരായ വെമ്പുവിന്റെയും മുകിലിന്റെയും കഥയാണ്. സാമന്ത അവതരിപ്പിച്ച വെമ്ബു എന്ന കഥാപാത്രത്തിന്റെ വോയിസ് ഓവറോഡ് കൂടിയാണ് ചിത്രം ആരംഭിക്കുന്നത്, പിന്നണിയിൽ സ്റ്റൈൽ ആയി ഐ ആം എ ഡിസ്കോ ഡാൻസർ എന്ന ഗാനവും മുറി ആകമാനം കാണിച്ച് കൊണ്ടുള്ള ഡീറ്റയിലിങ്ങും കൂടി ചേരുമ്പോൾ കഥാപാത്രത്തെ പറ്റി ഒരേകദേശ ചിത്രം നമുക്ക് ലഭിക്കുന്നുണ്ട്. ഈ മുറിയിൽ തുടർന്ന് ഒരു പ്രത്യേക സംഭവം അരങ്ങേറുകയാണ്, തുടർന്ന് അതിന്റെ ബാക്കിപത്രമാണ് സ്‌ക്രീനിൽ കാണുന്നത്. ഈ ഒരു കഥയിൽ എടുത്ത് പറയേണ്ടത് സാമന്ത എന്ന നടിയെ തന്നെയാണ്, ഒരുവേള ഫഹദ് ഫാസിലിന് മുകളിൽ പോയോ എന്ന് പോലും തോന്നിപ്പിച്ച പ്രകടനം. ഫഹദും തന്റെ ഭാഗങ്ങൾ മികച്ചതാക്കി, അതിൽ തന്നെ ഒരു രംഗം പ്രത്യേകം പറയേണ്ടി ഇരിക്കുന്നു എന്നാൽ സ്പോയ്ലർ ആവുന്നതിനാൽ ഒഴിവാക്കുന്നു.

🔸ഇനി രണ്ടാമത്തെ കഥയിലേക്ക് വരിക ആണെങ്കിൽ ഇവിടെ പ്രധാന കഥാപാത്രങ്ങൾ ഒരു കൂട്ടം ചെറുപ്പക്കാരാണ്, കമ്പൈൻ സ്റ്റഡി എന്ന ഉദ്ദേശത്തിൽ ഇവരെല്ലാം ഒത്തുകൂടുന്നതും, എന്നാൽ ഈ ഒത്തുചേരൽ മറ്റ് ചില പരിപാടികൾക്ക് വഴി വെക്കുന്നതും എല്ലാമാണ് ഈ കഥയുടെ സാരം. ഈ ഭാഗവും വളരെ പ്രശസ്തമായ അന്തിയിലെ വാനം എന്ന തമിഴ് പാട്ടോട് കൂടിയാണ് ആരംഭിക്കുന്നത്. മൂന്നാമത്തെ കഥ തന്റെ അച്ഛന്റെ വരവിന് വേണ്ടി കാത്തിരിക്കുന്ന രാസകുട്ടി എന്ന കുട്ടിയുടേതും നാലാം ഭാഗം ഒരു ദൈവ വിശ്വാസിയുടെയും കഥകളാണ്. ഇവയെല്ലാം തന്നെ ഇന്റർ കട്ടായിട്ടാണ് മുന്നേറുന്നതും പുരോഗമിക്കുന്നതും.

🔸നാല്‌ കഥകളിലും സ്‌ട്രൈക്കിങ് ആയ എന്തെങ്കിലും ഒന്ന് സംവിധായകൻ പ്രേക്ഷകന് വേണ്ടി കരുതി വെച്ചിട്ടുണ്ട്, ചുരുക്കി പറയുക ആണെങ്കിൽ ഒരു പതിറ്റാണ്ടിന് അടുത്ത് കാലത്തെ സംവിധായകന്റെ അധ്വാനം ഒന്നും വെറുതെ ആയിട്ടില്ല. വിജയ് സേതുപതിയുടെ ശില്പ എന്ന കഥാപാത്രം മുതൽ രാസുകുട്ടി എന്ന കഥാപാത്രത്തെ അവതരിപ്പിച്ച കുട്ടിവരെ, സിനിമയിൽ മുഖം കാണിച്ച എല്ലാവരും മികച്ച പ്രകടനം തന്നെ ആയിരുന്നു ഈ ചിത്രത്തിൽ, സ്ക്രീൻ ടൈം ഒന്നും ഒരു വിഷയമേ അല്ലാതായിപ്പോയി പല കഥാപാത്രങ്ങൾക്കും. മൂന്ന് മണിക്കൂർ ദൈർഖ്യം, എ സെര്ടിഫിക്കറ്റ്, ആളില്ലായ്മ തുടങ്ങി അനവധി കാരണങ്ങൾ കാരണം പ്രശനം നേരിടുന്ന ഈ ചിത്രം എന്ത് തന്നെ ആയാലും ഈ വർഷത്തെ മികച്ച ചിത്രങ്ങളിൽ ഒന്നാണെന്ന കാര്യത്തിൽ സംശയം ഏതും ഇല്ല.

Verdict : Very Good

DC Rating : 88/100