644. The Irishman (2019)

Director : Martin Scorcese

Genre : Crime

Rating : 8.7/10

Country : USA

Duration : 209 Minutes

🔸"As Far As I Can Remember, I Always Wanted To Be A Gangster...." എന്ന് സ്വന്തം കഥാപാത്രത്തെ കൊണ്ട് പറയിപ്പിച്ച്, ആ ഒരു അനിശ്ചിതത്വം നിറഞ്ഞ ജീവിതത്തെ ആഘോഷമാക്കി കാണിച്ച് കയ്യടി വാങ്ങിയ വ്യക്തിയാണ് മാർട്ടിൻ സ്കോഴ്സാസി, അതും ഏകദേശം മുപ്പത് വർഷങ്ങൾക്ക് മുന്നേ ഗൂഡ്‌ഫെല്ലാസ് എന്ന ചിത്രത്തിലൂടെ. അവിടെ നിന്നും ഐറിഷ്‌മാൻ എന്ന ഈ ചിത്രത്തിലേക്കുള്ള ദൂരം വളരെ വളരെ വലുതാണ്, ഒരു നാണയത്തിന്റെ തന്നെ രണ്ട് വശം അല്ലെങ്കിൽ രാവും പകലും പോലെ എന്നൊക്കെയുള്ള വിശേഷണങ്ങൾ അർഹിക്കുന്നുണ്ട് ഈ രണ്ട് ചിത്രങ്ങളും.

🔸നായകനായി മാർട്ടിൻ സ്കോർസേസിയുടേ ടിപ്പിക്കൽ ഗ്യാങ്‌സ്റ്റർ നായകൻ റോബർട്ട് ഡെനിരോ, ഏറ്റവും ഇഷ്ട്ടപ്പെട്ട നടന്മാരിൽ ഒരാളായ ജോ പെഷിയുടെ തിരിച്ചുവരവ്, എല്ലാത്തിനും പുറമെ ആദ്യമായി അൽ പച്ചിനോ ഒരു മാർട്ടിൻ ചിത്രത്തിൽ തുടങ്ങി പല കാരണങ്ങൾ ഉണ്ടായിരുന്നു ഈ ചിത്രത്തിന് വെണ്ടി കാത്തിരിക്കാൻ, ഉദ്ദേശം രണ്ട് വർഷം മുന്നേ പ്രഖ്യാപിച്ച ചിത്രം പിന്നീട് ഒന്നര വർഷത്തോളം പോസ്റ്റ് പ്രൊഡക്ഷനിൽ ആയതും മറ്റും കാത്തിരിപ്പിന്റെ ആ ഒരു ഇഫക്ട് കൂട്ടിയിട്ടേ ഉള്ളൂ. എല്ലാം കഴിഞ്ഞ് ഇന്ന് ഈ ദിവസം ചിത്രം മുന്നിൽ എത്തുമ്പോൾ ഒന്നേ പറയാൻ ഉള്ളൂ, നൂറ് ശതമാനം കാത്തിരിപ്പിനോട് നീതി പാലിച്ച ഒരു ചിത്രം, ഈ വർഷത്തെ ഏറ്റവും മികച്ചത് അല്ലെങ്കിൽ അവയിൽ ഒന്ന്.

🔸ഫ്രാങ്ക് ഷീരൻ, ജിമ്മി ഹോഫ ഈ രണ്ട് കഥാപാത്രങ്ങളെയും ചുറ്റി പറ്റിയാണ് ചിത്രം പുരോഗമിക്കുന്നത്, ഈ രണ്ട് വ്യക്തികളെ കുറിച്ചും ആ കാലഘട്ടത്തിന്റെ ചരിത്രത്തെ പറ്റിയും എന്തെങ്കിലും ഒരു അറിവ് ഉള്ള ഏതൊരു വ്യക്തിയും നടന്ന സംഭവങ്ങളെ കുറിച്ച് ബോധവാൻ ആയിരിക്കും, ആ സംഭവങ്ങളിൽ തന്നെ മിസ്റ്ററി ഒരുപാട് ഉണ്ടായിരുന്നു എന്നത് വേറെ കാര്യം, പറഞ്ഞ് വന്നത് എന്താണെന്നാൽ കഥയിലേക്കും കാര്യങ്ങളിലേക്കും തല്ക്കാലം നമ്മൾ കടക്കുന്നില്ല, അത് സസ്പെൻസ് ആയും സർപ്രൈസുകൾ സർപ്രൈസുകൾ ആയും നിൽക്കട്ടെ. ചിത്രത്തിൽ നല്ലതും മോശവുമായി അനുഭവപ്പെട്ട കാര്യങ്ങൾ ചികഞ്ഞെടുക്കാൻ ആണെങ്കിൽ മോശമായി ഒന്നും കണ്ടില്ല എന്ന് ആദ്യമേ പറയാം, ഒരു പേടി ഉണ്ടായിരുന്ന ചിത്രത്തിന്റെ മൂന്നര മണിക്കൂർ റൺ ടൈം പോലും നൂറ് ശതമാനം അർഹിക്കുന്നതും ഒരു നിമിഷം പോലും അനാവശ്യവുമല്ല.

🔸'Crime Never Pays' എന്നൊരു ലൈൻ പൊതുവെ ഈ ഗ്യാങ്‌സ്റ്റർ ചിത്രങ്ങളിൽ പ്രതിപാദിക്കപ്പെടാറുണ്ട്, അതിന്റെ ഒരു തരത്തിൽ പറഞ്ഞാൽ ഡിപ്രഷൻ അടിപ്പിക്കുന്ന ചലച്ചിത്രാവിഷ്കാരം ആണ് ഈ ചിത്രം. പ്രകടനം നോക്കുക ആണെങ്കിൽ എല്ലാവരും ടോപ് ഫോമിൽ ആണ്, ഡെനിരോ തന്റെ സ്വത സിദ്ധമായ ശൈലിയിൽ ഒരു വശത്ത് കൂടി പൊളിച്ചടുക്കുമ്പോൾ ഒരല്പം ഓവറായ ജിമ്മി ഹോഫ എന്ന കഥാപാത്രത്തെ അൽ പച്ചിനോ മറ്റൊരു തലത്തിലേക്ക് കൊണ്ടുപോവുന്നു, പുള്ളിയുടെ അടുത്ത കാലത്തെ ഏറ്റവും മികച്ച റോൾ എന്ന് തന്നെ പറയാം. തന്റെ കരിയറിന്റെ പീക്ക് ടൈമിൽ റിട്ടയർമെന്റിലേക്ക് പോയ പെഷിയുടെ തിരിച്ചുവരവും കിടിലനാണ്, പക്ഷെ ഗുഡ്‌ഫെലാസിലേത് പോലെ ഉള്ള ഒരു ഓവർ ദി ടോപ് കഥാപാത്രത്തെ ഇവിടെ പ്രതീക്ഷിക്കരുത് എന്നൊരു മുന്നറിയിപ്പ് തരുന്നു.

🔸ദശാബ്ദങ്ങൾ നീണ്ട് നിൽക്കുന്ന ഒരു കഥയാണ് ഐറിഷ്മാന്റേത്, ഈ കഥയിൽ കഥാപാത്രങ്ങൾക്ക് എല്ലാം തന്നെ വ്യക്തമായ ഐഡന്റിറ്റിയും, വ്യക്തിത്വവും, മികച്ചൊരു തുടക്കവും, സ്റ്റോറി ആർക്കും, അവസാനവും എല്ലാം ചിത്രം നൽകുന്നുണ്ട്. അവസാനത്തെ പറ്റി പറയുവാണേൽ, ചിത്രത്തിന്റെ ലാസ്റ്റ്‌ ആക്ടിനെ പറ്റി പറയാതെ വിടാൻ കഴിയില്ല. ഒരുപാട് കഥാപാത്രങ്ങളെ പരിചയപ്പെടുത്തിയ തുടക്കത്തിന് ശേഷം ഇവർക്കെല്ലാം കൃത്യമായ പേ ഓഫ് നൽകുന്ന ഒന്നാണ് ചിത്രത്തിന്റെ ലാസ്റ്റ് ആക്റ്റ്, ഈ ഒരു പോർഷൻ ചിത്രത്തിന്റെ ഹൈലൈറ്റ് ആണ്, കൂടുതൽ എന്ത് പറഞ്ഞാലും സൂചിപ്പിച്ചാലും സ്പോയ്ലർ ആവും, അത്കൊണ്ട് നിർത്തുന്നു. വ്യക്തിപരമായി ഈ വർഷത്തെ ഏറ്റവും മികച്ച മൂന്ന് ചിത്രങ്ങളിൽ ഒന്നാണ് ഐറിഷ്‌മാൻ, തിയേറ്റർ റിലീസ് ഇല്ലാതെ നേരിട്ട് നെറ്റ്ഫ്ലിക്സിൽ വരുന്നു എന്നറിഞ്ഞപ്പോൾ ആദ്യം സന്തോഷം ആയിരുന്നെങ്കിലും ഇപ്പോൾ തോന്നുന്നു ഇത് ബിഗ് സ്‌ക്രീനിൽ ആസ്വദിക്കേണ്ടത് ആയിരുന്നെന്ന്.

Verdict : Must Watch

DC Rating : 90/100

643. Blank 13 (2018)

Director : Saito Takumi

Genre : Drama

Rating : 6.6/10

Country : Japan

Duration : 71 Minutes

🔸"ഒരു വ്യക്തി മരണപ്പെട്ടാൽ, അയാളുടെ ശരീരം കത്തിച്ച് കളയുന്നതാണ് പതിവ്, ബാക്കിയുള്ള അവശിഷ്ട്ടം ഒഴുക്കി കളയുകയോ അല്ലെങ്കിൽ മറ്റെന്തെങ്കിലും രീതിയിൽ നിർമാർജ്ജനം ചെയ്യുകയോ ചെയ്യും. അനവധി ആളുകൾ പിന്തുടരുന്ന രീതിയാണ് ഇത്, പ്രത്യേകിച്ചും അടക്കം ചെയ്യാൻ മണ്ണോ സ്ഥലമോ ഒന്നും ഇല്ലാത്തവർ. ഉദ്ദേശം ആയിരം ഡിഗ്രി സെൽഷ്യസിൽ കത്തിക്കുന്ന മനുഷ്യ ശരീരം അറുപത് മിനിറ്റുകൾക്കുള്ളിൽ എല്ലും ചാരവുമായി മാറും, അതോടെ ആ കഥ അവസാനിക്കുകയായി...." ഈ ഒരു വരിയോട് കൂടിയാണ് ബ്ലാങ്ക് 13 എന്ന ജാപ്പനീസ് ചിത്രം ആരംഭിക്കുന്നത്.

🔸ഒരു മരണാനന്തര ചടങ്ങിന്റെ പശ്ചാത്തലത്തിലാണ് സിനിമ ആരംഭിക്കുന്നത്, ബന്ധം ഏതും ഇല്ലാത്ത രണ്ട് വ്യക്തികൾ മരണപ്പെട്ടിരിക്കുകയാണ്, ഇരുവരുടെയും ചടങ്ങുകൾ ഒരു ബിൽഡിങ്ങിന്റെ തന്നെ രണ്ട് വശത്ത് വെച്ചാണ് നടത്തുന്നത്. ഈ രണ്ട് വ്യക്തികളും തമ്മിൽ പ്രത്യക്ഷത്തിൽ ബന്ധം ഏതും ഇല്ല, ഒരു കാര്യത്തിൽ ഒഴിച്ച്. മരണപ്പെട്ട രണ്ടാളുടെയും പേര് മസൂദാ എന്നാണ്, ഒരാൾ സതുറോ മസൂദാ, മറ്റെയാൾ മസാട്ടോ മസൂദാ. ഇതിൽ സത്തുറോയുടെ ചടങ്ങുകൾക്ക് അനവധി ആളുകളാണ് പങ്കെടുക്കുന്നത്, മസത്തൊയുടേതിന് ഒരു പട്ടികുഞ്ഞ് പോലും തിരിഞ്ഞ് നോക്കുന്നുമില്ല.

🔸ഇവരൊക്കെ ആര്, എന്ത്, കഥയിൽ ഇവർക്കുള്ള റോളെന്ത് തുടങ്ങിയ കാര്യങ്ങൾ ഒന്നും തന്നെ തുടക്കത്തിൽ ചിത്രം വെളിപ്പെടുത്തുന്നില്ല, ആകെ ഒരു പുക മയമാണ്. ഇവിടെ നിന്നും കഥ കുറച്ച് കാലം പിറകോട്ട് പോവുകയാണ്, ഒരു പതിനഞ്ച് ഇരുപത് കൊല്ലം പിറകിലേക്ക്. ഒരു അച്ഛനും അമ്മയും രണ്ട് കുട്ടികളും അടങ്ങിയ കുടുംബമാണ് ചിത്രത്തിന്റെ ഫോക്കൽ പോയിന്റ്, ദാരിദ്ര്യം എന്നത് കഴുത്തറ്റം എത്തിയ അവസ്ഥയിലാണ് ഈ കുടുംബം. അന്നന്നത്തേക്കുള്ള വക ഇല്ല എന്ന് മാത്രമല്ല കടം നൽകിയവർ വീടിന്റെ പടിക്കൽ വന്ന് തെറിയഭിഷേകം നടത്തുന്ന ദാരുണമായ അവസ്ഥയിലാണ് ആ കുടുംബം.

🔸ഇങ്ങനെ തെറിയഭിഷേക കലാ പരിപാടികൾ മൂർച്ഛിച്ച ദിവസങ്ങളിൽ ഒന്നിൽ നമ്മുടെ കുടുംബസ്ഥനായ കഥാപാത്രം വീട്ടിൽ നിന്നും ഇറങ്ങി പോവുകയാണ്, ഒരു സിഗരറ്റ് വാങ്ങി വരാം എന്നും പറഞ്ഞ് പുറത്തേക്ക് പോവുന്ന ഈ കഥാപാത്രം പിന്നെ മടങ്ങി വരുന്നേയില്ല. നമ്മുടെ ചിന്താവിഷ്ടയായ ശ്യാമള എന്ന ചിത്രത്തിലെ നായികയെ പോലെ ചെറിയ രണ്ട് മക്കളെയും ചേർത്ത് പിടിച്ച് ഇരുട്ടിലേക്ക് നോക്കി നിൽക്കുന്ന അവസ്ഥയിലായിപ്പോയി ഭാര്യാ കഥാപാത്രം. സഹതപിക്കാനോ ആശ്വസിപ്പിക്കാനോ ആരും ഇല്ലാഞ്ഞതിനാൽ തന്നെ അതിനൊന്നും അവർ സമയം കളഞ്ഞില്ല, മക്കളുടെ മുന്നിൽ ആഹാരം എത്തിക്കുക എന്നത് മാത്രമായി അവരുടെ ലക്ഷ്യങ്ങൾ ചുരുങ്ങി.

🔸ഈ പറഞ്ഞ രണ്ട് പ്ലോട്ടും തമ്മിൽ വലിയ അന്തരമുണ്ട്, പല കാര്യത്തിലും, എന്തിരുന്നാലും സ്റ്റോറിയുടെ ഒരു പ്രത്യേക പോയിന്റിൽ ഇവ കൂട്ടി മുട്ടുന്നുമുണ്ട്. ഒരു നോൺ ലീനിയർ ശൈലിയിലാണ് ചിത്രത്തിന്റെ കഥ പുരോഗമിക്കുന്നത്, അത് കൊണ്ട് തന്നെ കഥ പൂർണമായും ഗ്രഹിച്ചെടുക്കാൻ അവസാനം വരെ കാത്തിരിക്കേണ്ടിയും വന്നേക്കാം. ഒരു മണിക്കൂർ പരിധിയിലാണ് ചിത്രത്തിന്റെ ദൈർഖ്യം, ഒട്ടും മുഷിപ്പില്ലാതെ ഒറ്റ സ്ട്രെച്ചിൽ തന്നെ കാണാനും കഴിയും. കൂടുതൽ പറയുന്നില്ല, നൈസ് ആണ് ബ്ലാങ്ക് തർട്ടീൻ എന്ന ഈ ചിത്രം, കാണാൻ ശ്രമിക്കുക.

Verdict : Good

DC Rating : 70/100

642. La Mante (2017)

Creator : Alice Chegaray-Breugnot

Genre : Thriller

Rating : 7.5/10

Country : France

Seasons : 01

Episodes : 06

Duration : 44 - 56 Minutes

🔸ഈ സിനിമ കാണുന്നതിന് ഇടെ സീരീസുകൾ പൊതുവെ ഒഴിവാക്കാറാണ് പതിവ്, ദൈർഖ്യം എന്നത് തന്നെയാണ് പ്രശനം. ലോസ്റ്റ് പോലുള്ള സീരീസുകൾ അത്രമേൽ പിടിച്ചിരുത്തുന്നത് ആയിരുന്നെങ്കിൽ കൂടിയും കണ്ട് തീർക്കാൻ എടുത്തത് രണ്ട് മാസത്തിന് അടുത്ത് സമയമാണ്, പലപ്പോഴും ഈ കാലയളവിൽ സിനിമകൾ കാണാൻ കഴിഞ്ഞേക്കില്ല എന്നതാണ് സത്യം. കാണാനുള്ള ചിത്രങ്ങൾ കുമിഞ്ഞ് കൂടുന്നതിനാലും സമയം എന്നത് ഇപ്പോൾ പരിമിതം ആയതിനാലും സീരീസുകൾക്ക് നേരെ മുഖം തിരിക്കുകയാണ് കുറച്ച് നാളുകളായി ചെയ്യാറ്, ഈ സന്ദർഭത്തിൽ മിനി സീരീസുകളാണ് കുറച്ച് കൂടി ആശ്വാസകരം, ലാ മാന്റെ പോലുള്ള കിടിലൻ മിനി സീരീസുകൾ.

🔸ജീൻ ഡബ്ബർ എന്ന പേര് ഫ്രഞ്ച് ജനത മറന്ന് തുടങ്ങിയിരിക്കുന്നു, അതിൽ അവരെ കുറ്റം പറയാനും കഴിയില്ല കാരണം കഴിഞ്ഞ രണ്ടര പതിറ്റാണ്ടായി അങ്ങനൊരു വ്യക്തി ജീവിച്ചിരിക്കുന്നതായോ അല്ലെങ്കിൽ എന്തെങ്കിലും രീതിയിൽ ഉള്ള വിവരമോ ലഭ്യമല്ല. വർഷങ്ങൾ ഒരുപാട് കഴിഞ്ഞെങ്കിലും അന്ന് അവർ ചെയ്ത് കൂട്ടിയ കാര്യങ്ങളുടെ ഗൗരവം കാരണം ഒരിക്കലും പൂർണമായും വിസ്‌മൃതിയിലേക്ക് മറയുകില്ല എന്നത് മറ്റൊരു സത്യം. കഴിഞ്ഞ ഇരുപത്തി അഞ്ച് വർഷമായി പുറം ലോകവുമായി യാതൊരു തരത്തിൽ ഉള്ള സമ്പർക്കവും ഇല്ലാതെ ഒരു പ്രിസൺ സെല്ലിൽ ജീവിതം കഴിച്ച് കൂട്ടുകയാണ് ജീൻ, ശിക്ഷ ഇളവോ പരോളോ ഒന്നും തന്നെ അവർ പ്രതീക്ഷിക്കേണ്ടതുമില്ല.

🔸ഇത്രയും കഠിനമായ ശിക്ഷ ലഭിക്കണം എങ്കിൽ തീർച്ചയായും മനുഷ്വത്വ രഹിതമായ ഒരു കുറ്റം അവർ ചെയ്തിരിക്കണം എന്നത് തീർച്ച, ഒന്നല്ല മറിച്ച് എട്ടോളം ക്രൂര കൃത്യങ്ങളിലാണ് അവരുടെ കൈ പതിഞ്ഞിട്ടുള്ളത്, എല്ലാം കൊലപാതകങ്ങൾ. ഈ കൊലപാതകങ്ങളുടെ കാരണങ്ങൾ ഈ കാലയളവിനിടെ ഒരിക്കൽ പോലും വ്യക്തമായിട്ടില്ല, എന്ന് മാത്രമല്ല ഇവരെ തമ്മിൽ ബന്ധിപ്പിക്കാൻ ഉള്ള ഒരു വസ്തുതയും പൊലീസിന് കണ്ടെത്താൻ കഴിഞ്ഞിട്ടുമില്ല. അതൊക്കെ എന്തായാലും ഈ സംഭവങ്ങൾ എല്ലാം കഴിഞ്ഞിട്ട് വർഷങ്ങൾ ഒരുപാട് കഴിഞ്ഞിരിക്കുന്നു, ഇപ്പോൾ ജീൻ ഡ്രബ്ബർ വീണ്ടും ചർച്ച ആയതിന് ഒരു കാരണമുണ്ട്.

🔸കാര്യം വേറൊന്നുമല്ല, ഇത്രയും വർഷങ്ങൾക്ക് ശേഷം ഇപ്പോൾ ജീൻ ഡ്രബ്ബറിന്റെ അതെ ശൈലിയിൽ വീണ്ടും കൊലപാതകങ്ങൾ അരങ്ങേറി തുടങ്ങിയിരിക്കുകയാണ്, ജയിലിൽ ആയതിനാൽ തന്നെ ജീനിനെ സംശയത്തിന്റെ നിഴലിൽ നിന്നും ഒഴിവാക്കാൻ കഴിയുമെങ്കിലും രണ്ടിടത്തും കാണാൻ കഴിയുന്ന സാമ്യതകൾ ആരെയും അതിശയിപ്പിക്കുന്നതാണ്, എക്സാക്റ്റ് കോപ്പി എന്നൊക്കെ വിശേഷിപ്പിക്കാൻ കഴിയുന്ന സാധനം. വർഷങ്ങൾക്ക് മുൻപ് ജീനിന്റെ കേസ് അന്വേഷിച്ച അതേ ഉദ്യോഗസ്ഥൻ തന്നെയാണ് ഈ കേസും ഏറ്റെടുത്തിരിക്കുന്നത് എന്നത് രണ്ടിനെയും ഒരു നേർ രേഖയിൽ കൊണ്ടുവരികയാണ്.

🔸പ്ലോട്ട് സൂചിപ്പിക്കുന്നത് പോലെ തന്നെ ഒരു മർഡർ മിസ്റ്ററി ത്രില്ലർ സീരീസാണ് ലാ മാന്റെ, ഇതിനോടൊപ്പം തന്നെ അമ്മ മകൻ, ഭാര്യ ഭർത്താവ് തുടങ്ങിയ ബന്ധങ്ങൾക്കും മൂല്യങ്ങൾക്കും എല്ലാം സീരീസ് വില നൽകുന്നുണ്ട്. കാഴ്ചക്കാരൻ പ്രതീക്ഷിക്കുന്ന അതെ രീതിയിൽ പോവാതെ കൃത്യമായ ഇടവേളകളിൽ ട്വിസ്റ്റുകളും മറ്റും നൽകി നമ്മെ പിടിച്ചിരുത്തുന്നുണ്ട് ഈ ആറ് പാർട്ട് സീരീസ്. പ്രകടനങ്ങൾ എടുക്കുക ആണെങ്കിൽ പ്രധാന താരങ്ങൾ എല്ലാം തന്നെ തങ്ങളുടെ എ ഗെയിം പുറത്തെടുത്തിട്ടുണ്ട്, ചുരുക്കി പറഞ്ഞാൽ മർഡർ മിസ്റ്ററികൾ ഇഷ്ട്ടപ്പെടുന്ന ത്രില്ലർ ആരാധകർക്ക് തീർച്ചയായും കാണാം.

Verdict : Very Good

DC Rating : 85/100

641. Star Wars Episode 3 - Revenge Of The Sith (2005)

Director : George Lucas

Genre : Sci Fi

Rating : 7.6/10

Country : USA

Duration : 140 Minutes

🔸അപ്പൊ ഇതാണ് അത്, സ്റ്റാർ വാഴ്സിന്റെ ചരിത്രത്തിലെ തന്നെ ഡിഫൈനിംഗ് ചാപ്റ്റർ എന്നൊക്കെ വിശേഷിപ്പിക്കാവുന്ന ഐറ്റം. ഇതിന് മുൻപും ശേഷവുമുള്ള സകല സംഭവങ്ങളും, കഥാപാത്രങ്ങളും, കഥകളും, ത്രെഡുകളും എല്ലാം വന്ന് സംഗമിക്കുന്ന ടർണിങ് പോയിന്റ് എന്നൊക്കെ വിശേഷിപ്പിക്കാവുന്ന സിനിമ. ഒരു പരിധി വരെ പ്രീക്വൽ ചിത്രങ്ങളെ പിടിച്ച് നിർത്തുന്നതും ഈ ചിത്രമാണ്, യാതൊരു സംശയവും ഇല്ലാതെ പറയാം പ്രീക്വലുകളിലെ ഏറ്റവും മികച്ച ചിത്രമാണ് റിവഞ്ച് ഓഫ് ദി സിത്ത്.

🔸മുൻ ഭാഗ ചിത്രങ്ങളിലെ സംഭവങ്ങൾക്ക് ശേഷം കുറച്ച് വർഷങ്ങൾ കടന്ന് പോയിരിക്കുന്നു. അനാകിനും പദ്മെയും കല്യാണം കഴിച്ചു എന്ന് മാത്രമല്ല, ആദ്യത്തെ കുഞ്ഞിനെ കാത്തിരിക്കുകയുമാണ്. എന്നാൽ കുറച്ച് നാളുകളായി വല്ലാത്തൊരു അവസ്ഥയിലൂടെയാണ് അനാകിൻ കടന്ന് പോയി കൊണ്ടിരിക്കുന്നത്, കണ്ണടച്ചാൽ ദുസൂചനകളാണ് മുന്നിൽ, പദ്മെയുടെ മരണം മുൻകൂട്ടി താൻ കാണുന്നത് പോലെ. ഒട്ടും ആശാവഹമായ കാര്യങ്ങളല്ല കാണുന്നതൊന്നും, എന്തോ ഒരപകടം വഴിയിൽ തന്നെയും കാത്ത് നിൽപ്പുണ്ടെന്ന് അയാൾക്ക് ബോധ്യമാവുകയാണ്.

🔸ഗാലക്സിയിലെ കാര്യങ്ങൾ കൂടുതൽ പ്രശ്നമാണ്, കൗണ്ട് ഡോക്കുവിന്റെ കീഴിലുള്ള പൊട്ടിപ്പുറപ്പെടലിനെ ഒഴിവാക്കാൻ കഴിഞ്ഞെങ്കിലും പൂർണമായി ഇല്ലായ്മ ചെയ്യാൻ കഴിഞ്ഞിട്ടില്ല അനാകിന്നിനും ഒബിവാനും. ഇപ്പോഴാണെങ്കിൽ കാര്യം കൂടുതൽ പ്രശ്നത്തിലേക്ക് വഴി വെച്ചുകൊണ്ട് സെനറ്റർ പാൽപെട്ടീൻ ഡോക്കുവിന്റെ കയ്യിൽ പെട്ടിരിക്കുന്നു. സെനറ്ററെ രക്ഷിക്കുക എന്നത് ശ്രമകരമായ ദൗത്യമാണ്, അത് വന്ന് പെട്ടിരിക്കുന്നത് അനാകിന്റെയും ഒബിവാന്റെയും ചുമലുകളിലുമാണ്, ഈ ഒരു പശ്ചാത്തലത്തിലാണ് ചിത്രം ആരംഭിക്കുന്നത്.

🔸പ്രീക്വൽ ട്രിലോഗിയിലെ ആദ്യ രണ്ട് സിനിമകളുടെയും പാത പിന്തുടർന്ന് കൊണ്ട് തന്നെ അനാകിൻ സ്‌കൈവാക്കെറിൽ നിന്നും ദാർഥ് വെയ്ഡറിലേക്കുള്ള ട്രാൻസ്ഫോർമേഷന്റെ കഥ തന്നെയാണ് ഈ ചിത്രവും, ആ മാറ്റം പൂർണമാവുന്നത് ഇവിടെ ആണെന്ന് പറയാം. കുറച്ച് കൂടി ലളിതമായി പറയുക ആണെങ്കിൽ ശവപ്പെട്ടിയിലെ അവസാന ആണി തന്നെ. വെയ്ഡരുടെ എന്നത് പോലെ തന്നെ എമ്പറർ പാൽപെറ്റിന്റെയും ഒറിജിൻ സ്റ്റോറി ആവുന്നുണ്ട് ഈ ചിത്രം, തുടർന്നുള്ള സീക്വൽ ത്രിലോഗിയിലേക്കുള്ള ബേസ് അത്യാവശ്യം നന്നായി തന്നെ ചിത്രം സൃഷ്ടിച്ചെടുക്കുന്നുണ്ട്.

🔸തുടർന്നുള്ള ഭാഗങ്ങളിൽ കഥയിൽ വലിയ പ്രാധാന്യം കരസ്ഥമാക്കിയ പല കഥാപാത്രങ്ങളും അതിഥി താരങ്ങളായി ചിത്രത്തിൽ വന്ന് പോവുന്നുണ്ട്. ടോണിൽ ആയാലും കഥയ്ക്ക് നൽകിയിരിക്കുന്ന ഗൗരവത്തിൽ ആയാലും സീക്വൽ ത്രിലോഗിയെ അനുസ്മരിപ്പിക്കുന്ന ഒന്നാണ് ഈ ചിത്രം, നിലവാരത്തിലും ഇത് വ്യക്തമാണ്. സീരീസിലെ തന്നെ ഏറ്റവും മികച്ച അഞ്ച് ചിത്രങ്ങളിൽ ഒന്നായിരിക്കും ഈ ചിത്രം, ഒറിജിനൽ ത്രിലോഗിയുടെ നിലവാരം നോക്കുകയാണ് എങ്കിൽ അത് വലിയൊരു നേട്ടം ആണ് താനും. നല്ല പ്രകടനങ്ങളും, ബാറ്റിൽ സീനുകളും, സ്കോറും എല്ലാം ചിത്രത്തിന്റെ മറ്റ് പ്രത്യേകതകളാണ്.

Verdict : Very Good

DC Rating : 85/100

640. Chidambaram (1985)

Director : G Aravindan

Genre : Drama

Rating : 7.2/10

Country : India

Duration : 94 Minutes

🔸ചെയ്ത തെറ്റിന്റെ വ്യാപ്തി നോക്കി വധ ശിക്ഷ നൽകുന്നൊരു പതിവ് ഉണ്ട് പല ദേശങ്ങളിലും, തെറ്റിന് നൽകാൻ കഴിയുന്ന ഏറ്റവും വലിയ ശിക്ഷയാണ് ഇത് എന്നാണ് പൊതുവെ വെപ്പ്, എന്നാൽ ചില സന്ദർഭങ്ങളിൽ കൊലയ്ക്ക് കൊടുക്കാതെ തെറ്റ് ചെയ്ത വ്യക്തിക്ക് കുറ്റഭാരവും പേറി നിരാശയും പശ്ചാത്താപവും കാരണം വെന്തുരുകി ചത്തതിന് ഒക്കുമേ എന്ന അവസ്ഥയിൽ ജീവിക്കേണ്ടിയും വരാറുണ്ട്, ഇത് മരണ ശിക്ഷയേക്കാൾ ഭീതിതമാണ്. കാലന് പോലും വേണ്ടാത്ത ജീവിതം എന്നൊക്കെ വിശേഷിപ്പിക്കാവുന്ന അത്തരമൊരു ജന്മത്തിന്റെ കഥയാണ് ജി അരവിന്ദൻ സംവിധാനം ചെയ്ത ചിദംബരം എന്ന ചിത്രത്തിന്റേത്.

🔸കേരള തമിഴ്‌നാട് അതിർത്തിയിലെ ഒരു ഗവണ്മെന്റ് ഫാമിലാണ് ചിത്രത്തിന് ആസ്പദമായ കഥയുടെ സിംഹ ഭാഗവും അരങ്ങേറുന്നത്, ഫാമിലെ ഓഫീസ് സൂപെറിടെന്റാണ് ഭരത് ഗോപി അവതരിപ്പിക്കുന്ന ശങ്കരൻ എന്ന കഥാപാത്രം. ഒരു ഏകാന്ത പഥികനാണ് ശങ്കരൻ, തന്റെ ജോലിയും ഫോട്ടോഗ്രാഫിയും ഒക്കെ ആയി അടങ്ങി ഒതുങ്ങി നിശബ്ദമായി പോവുന്നൊരു കഥാപാത്രം. വലിയ ഒച്ചയും ബഹളവും ഒന്നും ഇല്ലാത്ത ആ ഉൾനാടൻ ഗ്രാമവും ശങ്കരനും തമ്മിൽ സാമ്യതകൾ അനവധിയാണ്. ഗ്രാമത്തിൽ ശങ്കരന് അടുപ്പം എന്ന് പറയത്തക്ക ഒരു ബന്ധം ഉള്ളത് ഫീൽഡ് സൂപ്പർവൈസർ ആയ ജേക്കബിനോടും ജോലിക്കാരനായ മുനിയാണ്ടിയോടും മാത്രം.

🔸മുനിയാണ്ടിയെ കുറിച്ച് എടുത്ത് പറയണം, ഒരു നിഷ്കളങ്ക കഥാപാത്രമാണ് മുനിയാണ്ടി, ഒരുവേള കാണുന്ന കാഴ്ചക്കാരനെ ഭയപ്പെടുത്തുന്ന തരം നിഷ്കളങ്കത. ഒരു ജോലിക്കാരൻ എന്നതിനേക്കാൾ അടിയാളൻ എന്നൊക്കെ തോന്നിപ്പിക്കുന്ന കഥാപാത്രമാണ് മുനിയാണ്ടി, പഴയ ജന്മിത്വം ഒക്കെ പേരിൽ എങ്കിലും തുടച്ച് നീക്കപ്പെട്ടിട്ട് അധിക കാലമായില്ല എന്നതിനാലും, ആ പശ്ചാത്തലവും എല്ലാം കണക്കിൽ എടുക്കുമ്പോൾ ഈ വിധേയത്വം ന്യായീകരിക്കപ്പെടാവുന്നതാണ്. മുനിയാണ്ടിക്ക് ശങ്കരനോട് തികഞ്ഞ ബഹുമാനവും അടുപ്പവും ഉണ്ട്, ശങ്കരന് തിരിച്ചും.

🔸ഈ ഒരു അടുപ്പം കൊണ്ട് തന്നെയാണ് താൻ വിവാഹം കഴിക്കാൻ പോവുന്ന കാര്യം മുനിയാണ്ടി ആദ്യം ശങ്കരനോട് തന്നെ പറയുന്നത്. താമസിയാതെ തന്നെ മുനിയാണ്ടി തന്റെ നാട്ടിൽ നിന്നും ശിവകാമി എന്ന യുവതിയെ കല്യാണം കഴിക്കുകയും, ശങ്കരൻ ആ ചടങ്ങിൽ പങ്കെടുക്കുകയും ചെയ്യുന്നുണ്ട്, ആ മനോഹര ദൃശ്യങ്ങൾ എല്ലാം തന്റെ ക്യാമെറയിൽ അയാൾ പകർത്തുന്നുമുണ്ട്. കല്യാണത്തിന് ശേഷം ഭാര്യാ സമേതം പണി സ്ഥലത്ത് എത്തുമ്പോഴാണ് പുതിയ ചില പ്രശ്നങ്ങളെ പറ്റി മുനിയാണ്ടി ബോധവാൻ ആവുന്നത്, ഇവിടെ നിന്നും ചിത്രം മറ്റൊരു തലത്തിലേക്ക് നീങ്ങുന്നു.

🔸ഈ മൂന്ന് കഥാപാത്രങ്ങൾക്ക് ചുറ്റുമാണ് ചിദംബരം എന്ന ചിത്രം പുരോഗമിക്കുന്നത്. നിരാശയും കുറ്റ ബോധവും ഒക്കെ കൂടിയുള്ള വേട്ടയാടലുകൾ നിറഞ്ഞ രണ്ടാം പകുതി വിശദീകരണങ്ങൾക്കും വാക്കുകൾക്കും അതീതമാണ്. ഒടുവിൽ എല്ലാ വഴികളും ചിദംബരം ക്ഷേത്രാങ്കണത്തിൽ ചെന്ന് അവസാനിക്കുമ്പോൾ ഒരു ജന്മം പൂർണമാവുകയാണ്, ജീവിത ചക്രവും. സ്മിതാ പട്ടേൽ അഭിനയിച്ച ഒരേയൊരു മലയാള ചിത്രമാണിത് എന്നാണ് അറിവ്, ഇത്രയും ഭംഗിയിൽ അവരെ അവതരിപ്പിച്ചത് പ്രത്യേക പരാമർശം അർഹിക്കുന്നുണ്ട്. മലയാളത്തിൽ ഇന്നേവരെ പുറത്തിറങ്ങിയ ചിത്രങ്ങളിൽ ഏറ്റവും മികച്ചവയിൽ ഒന്നാണ് ചിദംബരം, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 95/100

639. Ford Vs Ferrari (2019)

Director : James Mangold

Genre : Sports

Rating : 7.9/10

Country : USA

Duration : 152 Minutes

🔸ഇത് ഡബിൾ ആക്ടുകളുടെ ടൈം ആണെന്ന് തോന്നുന്നു, വൺസ് അപ്പോൺ എ ടൈം ഇൻ ഹോളിവുഡിലെ ബ്രാഡ് പിറ്റ് ഡി കാപ്രിയോ കോമ്പൊയ്ക്കും ഐറിഷ്‌മാൻ ഫിലിമിലെ ഡി നീറോ അൽ പച്ചിനോ കോമ്പൊയ്ക്കും ശേഷം ഇപ്പോൾ സ്‌ക്രീനിൽ എത്തിയിരിക്കുന്നത് മാറ്റ് ദാമൻ ബ്രാഡ് പിറ്റ് സഖ്യമാണ്, ഒരു റേസിംഗ് പശ്ചാത്തലം ഉള്ള ഫോർഡ് വേഴ്സസ് ഫെറാറി എന്ന ചിത്രത്തിലൂടെ. ഈ വർഷത്തെ നല്ല ചിത്രങ്ങളിൽ ഒന്ന് തന്നെയാണ് ഫോർഡ് വേഴ്സസ് ഫെറാറി, ആ കാര്യം തർക്കം ഏതും ഇല്ലാതെ അംഗീകരിക്കാം,.മുകളിൽ സൂചിപ്പിച്ച മറ്റ് സിനിമകളുടെ നിലവാരത്തിലേക്ക് ഉയർന്നോ എന്നത് സംശയമാണ്.

🔸ഫോർഡും ഫെറാരിയും തമ്മിലുള്ള പ്രശ്നങ്ങൾ കൊടുമ്പിരി കൊണ്ടിരിക്കുന്ന കാലം, ട്രാക്കിൽ നിന്നും മാറി ബിസിനസിലേക്കും എന്തിനധികം രണ്ട് ക്യാമ്പുകളിലേക്കും ഈ വൈരം എത്തിയിരിക്കുകയാണ്. പരസ്പരമുള്ള മത്സരവും അതിൽ നേടുന്ന വിജയവും അഭിമാന പ്രശ്നമായി മാറിയിരിക്കുകയാണ് ചുരുക്കി പറഞ്ഞാൽ. ഈ ഒരവസരത്തിൽ അടുത്ത കാറോട്ട മത്സരത്തിൽ ഫെറാരിയെ തോൽപ്പിക്കുക എന്നത് ഫോർഡിന്റെ പ്രാഥമിക ആവശ്യമായി മാറിയിരിക്കുകയാണ്, ഇതിനായി അവർ കണ്ടെത്തിയിരിക്കുന്നത് മുൻ റേസ് ഡ്രൈവറായ കരോൾ ഷെൽബിയെയാണ്.

🔸രോഗം കാരണം ട്രാക്കിൽ നിന്നും ഒഴിഞ്ഞ ഷെൽബി ഒരു പുതിയ ഫോർഡ് മോഡൽ സൃഷ്ടിച്ച് എടുക്കാനുള്ള തീരുമാനത്തിലാണ്, അതിന് അയാൾ സഹായം അഭ്യർത്ഥിക്കുന്നത് മറ്റൊരു റേസറായ കെൻ മൈൽസിനോടാണ്. മൈൽസ് ആളൊരു ചൂടനാണ്, പെട്ടെന്ന് പ്രകോപിതനാവുന്ന എന്നാൽ ഒന്നും ഒളിച്ച് വെക്കാത്ത പ്രകൃതം. ഈ രണ്ട് കഥാപാത്രങ്ങളുടെ ആത്മബന്ധവും, ചിത്രത്തിൽ അരങ്ങേറുന്ന സംഭവങ്ങൾ ഈ ബന്ധത്തെ ഏത് തലത്തിലേക്ക് കൊണ്ടുപോവുന്നു എന്നതും ഒക്കെയാണ് ഫോർഡ് വേഴ്സസ് ഫെറാരി എന്ന ചിത്രം.

🔸മോശം എന്ന് അനുഭവപ്പെട്ട കാര്യങ്ങളിലേക്ക് കടക്കുക ആണെങ്കിൽ ആദ്യമേ തന്നെ പറയാം ഒരല്പം പ്രെഡിക്റ്റബിൾ ആണ് ചിത്രം, കഥ എവിടേക്ക് ആണ് പോവുന്നത് എന്ന് തുടക്കം തൊട്ട് തന്നെ പിടികിട്ടും, ഈ ഒരു കാരണം കൊണ്ട് തന്നെ രണ്ടര മണിക്കൂർ ഉള്ള ദൈർഖ്യം ചിലയിടത്ത് പോരായ്മയായി തോന്നി. ഇത് ഒഴിച്ച് നിർത്തിയാൽ പ്രത്യക്ഷത്തിൽ പോരായ്മകൾ ഏതും അനുഭവപ്പെട്ടില്ല. പ്രകടനം നോക്കുക ആണെങ്കിൽ രണ്ട് താരങ്ങളും മികച്ചുനിന്നു, പ്രത്യേകിച്ചും ക്രിസ്റ്റിയൻ ബെയ്ൽ, ടെയ്‌ലർ മെയ്ഡ് എന്നൊക്കെ വിശേഷിപ്പിക്കാൻ പറ്റിയ ഒന്നായി തോന്നി അദ്ദേഹത്തിന് ഈ കഥാപാത്രം.

🔸ഒരു റേസിംഗ് ചിത്രം അല്ലെങ്കിൽ ആ ബാക്ക്ഗ്രൗണ്ട് ആണെങ്കിലും നല്ല ബാലൻസ് ഉണ്ട് ഡ്രാമയും ത്രില്ലും തമ്മിൽ, അനാവശ്യമായി ഒന്നും തന്നെ ഇല്ല. രണ്ട് പ്രധാന കഥാപാത്രങ്ങൾക്ക് പുറമെ നല്ലൊരു സപ്പോർട്ടിങ് കാസ്റ്റും ചിത്രത്തിലുണ്ട്, ജോൺ ബെർന്താൽ പ്രത്യേക പരാമർശം അർഹിക്കുന്നുണ്ട്. സിജിഐയുടെ അതിപ്രസരം ഒന്നും ചിത്രത്തിൽ കാണാനില്ല എന്ന് മാത്രമല്ല അത് ഒരു പോസിറ്റീവ് എലമെന്റ് ആയി മാറുന്നുമുണ്ട്. ഓസ്കർ അവാർഡുകളുടെ പടിവാതിലുകൾ തുറക്കാൻ ഒരുങ്ങുന്ന സമയത്താണ് ഫോർഡ് വേഴ്സസ് ഫെറാരി എത്തിയിരിക്കുന്നത്, ബെയ്ൽ ഉൾപ്പെടെ ചില നോമിനേഷൻ സാദ്ധ്യതകൾ കാണുന്നുമുണ്ട്. നല്ലൊരു ചിത്രം തന്നെയാണ് ഫോർഡ് വേഴ്സസ് ഫെറാരി, തീർച്ചയായും കാണാൻ ശ്രമിക്കുക.

Verdict : Very Good

DC Rating : 80/100

638. Charlie's Angels (2019)

Director : Elizabeth Banks

Genre : Action

Rating : 5.8/10

Country : USA

Duration : 116 Minutes

🔸ആദ്യമേ തന്നെ പറയാം, ഈ ചിത്രം കാണാൻ വേണ്ടിയല്ല തിയേറ്റർ പരിസരത്തേക്ക് ചെന്നത്, ഒരു സർവൈവൽ ത്രില്ലർ ചിത്രം റിലീസ് ആയത് കാണാം എന്ന ഉദ്ദേശത്തിൽ ആയിരുന്നു, എന്ത് തന്നെ ആയാലും അവസാനം ചെന്ന് പെട്ടത് ഈ പടത്തിലേക്കാണ്. റിലീസിന് മുന്നേ തന്നെ അടപടലം റിപ്പോർട് ആയതിനാലും പ്രതീക്ഷ എന്നൊരു സാധനം ഇതിന്റെ ഏഴ്‌ അയലത്തൂടി പോയിട്ടില്ല എന്നതിനാലും ദുരന്തത്തിൽ കവിഞ്ഞ ഒന്നും പ്രതീക്ഷിച്ചിരുന്നില്ല. ഒരല്പം സന്തോഷത്തോടെ പറയാം, പ്രതീക്ഷ അങ് തെറ്റി, വലിയ സംഭവം ഒന്നും ആയില്ലെങ്കിലും കണ്ടിരിക്കാം എന്ന തോതിൽ സിനിമ എത്തിയിട്ടുണ്ട് എന്ന് പറയാം.

🔸കഥ എന്ന് പറയുമ്പോൾ, ഏയ്ഞ്ചൽസ് എന്നത് ഇന്നൊരു സീക്രെട്ട് ഗ്രൂപ് പോലെ ആയി മാറിയിട്ടുണ്ട്. ലോകത്താകമാനം അരങ്ങേറുന്ന കൊള്ളരുതായ്മകൾക്കും മറ്റും എതിരെ പ്രതികരിക്കാനും പ്രതിരോധിക്കാനും ഒരു വലിയ സംഘം തന്നെ ഇവർക്കുണ്ട്. ബോസ്സ്ലി എന്ന പദവി വഹിക്കുന്ന ഒരു വ്യക്തിക്ക് കീഴിൽ തന്നെ അനവധി ഏയ്ഞ്ചൽസ് ഉണ്ടാവാറുണ്ട്, ഇങ്ങനെ അനവധി ബോസ്‌ലിമാരും എയ്‌ഞ്ചൽസും ലോകത്താകമാനം ഉള്ള നഗരങ്ങളിൽ പ്രവർത്തിച്ച് പോവുന്നുണ്ട്, ഇവരെല്ലാം റിപ്പോർട്ട് ചെയ്യേണ്ടത് മുഖം വെളിപ്പെടുത്താത്ത ചാർളി എന്ന ഹയർ അതോറിറ്റിക്ക് മുന്നിലാണ്.

🔸ഒരു സയന്റിഫിക്ക് ഓർഗനൈസേഷനിൽ ജോലി ചെയ്യുന്ന യുവ സയന്റിസ്റ്റ് ഒരു വലിയ പവർ സോഴ്സ് കണ്ടെത്തുന്നതും, അത് ആയുധവൽക്കരിക്കാൻ ഉള്ള സാധ്യത ഉരുത്തിരിഞ്ഞ് വരുന്നതും അതിനായി ചിലർ ഇറങ്ങി തിരിക്കുന്നതും എല്ലാമാണ് കഥ, ഏറെക്കുറെ സ്ഥിരം ബോംബ് കഥയൊക്കെ തന്നെ, പക്ഷെ ചില ട്വിസ്റ്റുകൾ ഒക്കെ ഇടയ്ക്കിടെ നൽകി കാഴ്ചക്കാരന്റെ താല്പര്യം കളയുന്നില്ല എന്ന് പറയാം. ചിത്രം ഏതാണ്ട് ഇരുപത് മിനിറ്റ് കഴിഞ്ഞപ്പോൾ ഒരു ഊഹം ഉണ്ടായിരുന്നു, ഇതെങ്ങോട്ടാണ് പോവുന്നത് എന്ന്, ആ വഴിയേ പോയി മടുപ്പിക്കാത്തതിൽ പെരുത്ത് സന്തോഷം.

🔸നമ്മുടെ ഹലോ സിനിമയിൽ മോഹൻലാലും ജഗതി ശ്രീകുമാറും ഉൾപ്പെട്ട ഒരു സീൻ ഉണ്ട്, അതായത് പുള്ളിയെ വീട്ടിലേക്ക് മടക്കി കൊണ്ടുവരാനായി പല അടവും പയറ്റുന്ന ജഗതിയോട് അമ്മയുടെ കണ്ണീർ കോർപറേഷൻ പൈപ്പിലെ വെള്ളമായും അനിയനോട് പോയി തൂങ്ങി ചാവാനും ഒക്കെ പറയുന്ന സീൻ, അവസാനം വാറ്റിയ ചാരായം ഉണ്ടെന്ന് കേട്ടപ്പോ പുള്ളിയുടെ കണ്ണ് നിറയുന്ന സീൻ, അത് പോലൊന്ന് ഇവിടെയും ഉണ്ട്. ഹലോയുടെ ഓർമയിൽ ഇവിടെയും ചിരിച്ചെങ്കിലും ലോജിക്ക് പോലുള്ള വകകളെ കാറ്റിൽ പറത്തുന്ന ഐറ്റം ആയിരുന്നത്. അത്പോലെ തന്നെ താൻ ഒരു ഏജന്റ് ആണെന്ന് പറഞ്ഞ നായികയോട് വേറൊരു നായിക തൊട്ടടടുത്ത സീനിൽ ചോദിക്കുന്നത് നിങ്ങൾക് തോക്ക് ഉപയോഗിക്കാൻ അറിയുമോ എന്നൊക്കെ ആണ്, ഇല്ല വെണ്ടയ്ക്ക അരിയാൻ അറിഞ്ഞാണ് ഏജന്റ് ആയതെന്ന് കണ്ടിരിക്കുന്ന നമ്മുടെ വായിൽ വരെ വരും. ഇങ്ങനെ കുറച്ച് വെറുപ്പിച്ച വൺ ലൈനർ ജോക്സ് ഉണ്ട് ചിത്രത്തിൽ, പ്രത്യേകിച്ചും നയോമിയുടേത്.

🔸നല്ലൊരു കാസ്റ്റ് ആണ് ചിത്രത്തിലേത്, പ്രധാന താരങ്ങളെ മാറ്റി നിർത്തിയാൽ പാട്രിക് സ്ടിയുവർട്ട്, ജീമോൻ ഹോൻസോ, എലിസബത്ത് ബാങ്ക്സ് തുടങ്ങിയ വെറ്ററൻ താരങ്ങൾ ചിത്രത്തിലുണ്ട്. ബാങ്ക്സിന് മുഴുനീള റോൾ ആണെങ്കിൽ പാട്രിക്ക് ആദ്യവും, അവസാനവും തല കാണിച്ച് മടങ്ങി, ഹോൺസോയുടെതും വളരെ ചെറിയൊരു കഥാപാത്രം ആയിരുന്നു. പ്രധാന താരങ്ങളിൽ നയോമി ചില ഇടങ്ങളിൽ വെറുപ്പിച്ചു, കിർസ്റ്റൻ സ്ടിയുവർട്ടിന് ചെയ്യാൻ അധികം ഇല്ലെങ്കിലും നന്നായിരുന്നു. എല്ലാ ബാലിൻസ്‌കയും നന്നായിരുന്നു. എൻഡ് ക്രെഡിറ്റ് സീനുകളിൽ ചില സർപ്രൈസുകൾ ഉണ്ട്, തിയേറ്ററിൽ കാണാൻ ഒന്നും പറയില്ല, എന്തിരുന്നാലും പ്രതീക്ഷിച്ചത്ര ദുരന്തം ആയില്ല. ആ പിന്നെ കോളം തികയ്ക്കാൻ എന്ന മട്ടിൽ വുമൺ എംപവര്മെന്റ് ഉന്നം വെച്ച് ചില പൊടികൈകൾ മുറയ്ക്ക് ചേർത്തിട്ടുണ്ട്.

Verdict : Watchable

DC Rating : 55/100

637. Tigers Are Not Afraid (2017)

Director : Issa Lopez

Genre : Fantasy

Rating : 7.1/10

Country : Mexico

Duration : 84 Minutes

🔸"നമ്മൾ എല്ലാവരും ഒരുപാട് ഫെയറി ടെയ്ൽ കഥകൾ വായിച്ചിട്ടുള്ളവർ അല്ലെ, എങ്കിൽ പറഞ്ഞേ ഏത് തരം കഥാപാത്രങ്ങളാണ് ഒരു ഫെയറി ടെയ്ൽ സ്റ്റോറിയിൽ വരാറ്, ഒരു രാജകുമാരനും രാജകുമാരിയും ഉണ്ടാവും, പിന്നെ കുറച്ച് പരിചാരകർ, ങാ പിന്നെ മൂന്ന് വരങ്ങൾ ഉണ്ടാവും എല്ലാ കഥയിലും, പിന്നെ ചിലപ്പോ ചെന്നായ്ക്കൾ, ദുർമന്ത്രവാദിനികൾ, രക്തരക്ഷസ്സുകൾ, കടുവകൾ അങ്ങനെ അങ്ങനെ, എന്നാൽ ഒരു കാര്യം ചെയ്യാം ഇതെല്ലാം ഉൾപ്പെടുത്തി ഒരു കഥ അങ്ങട്ട് പറഞ്ഞാലോ....". ഈ ഒരു നറേഷനോടെ ആണ് ചിത്രം ആരംഭിക്കുന്നത്, കഥാ പശ്ചാത്തലം മെക്സിക്കോയിലെ ഒരു സ്‌കൂൾ ആണ്.

🔸ഈ ഒരു നറേഷൻ അല്ലാതെ മറ്റൊന്ന് കൂടി ചിത്രം തരുന്നുണ്ട്, മെക്സിക്കോയുടെ സാമൂഹിക രാഷ്ട്രീയ പശ്ചാത്തലം വിഷയമാക്കിയ ഒരു പോർഷൻ. അതിൽ പറയുന്നത് കഴിഞ്ഞ പത്ത് വർഷങ്ങൾക്കിടെ ഉദ്ദേശം ഒന്നര ലക്ഷത്തിനുമേൽ ജനങ്ങൾ ഡ്രഗ് മാഫിയകളുടെ ഇരയായി കൊല്ലപ്പെട്ടിട്ടുണ്ട് എന്നും ഏകദേശം അറുപത്തിനായിരത്തിന് അടുത്ത് ജനങ്ങളെ കാണാതായിട്ടുണ്ട് എന്നുമാണ്. ചില പ്രദേശങ്ങളിൽ നിന്നും ആളുകൾക്ക് കൂട്ടമായി ഒഴിഞ്ഞ് പോവേണ്ടി വന്നിട്ടുണ്ട്, മരണപ്പെട്ട അല്ലെങ്കിൽ കാണാതായ കുട്ടികളുടെ എണ്ണത്തിൽ ഇന്നും ഒരു ധാരണ വന്നിട്ടില്ല, എന്ന് തുടങ്ങി ഒരു നരേഷൻ കൂടി ചിത്രത്തിലുണ്ട്. ഈ രണ്ട് നറേഷനും കൂട്ടി ചേർത്ത രീതിയിലാണ് ചിത്രം പുരോഗമിക്കുന്നത്.

🔸എസ്ട്ടല്ല എന്ന കുട്ടിയാണ് ചിത്രത്തിലെ പ്രധാന കഥാപാത്രം, മെക്സിക്കോയിൽ ജനിച്ച് വളർന്ന അവൾക്ക് അമ്മ അല്ലാതെ മറ്റാരും ഉള്ളതായി ചിത്രത്തിൽ പറയുന്നില്ല. ഡ്രഗ് മാഫിയകളുടെ തമ്മിലടിയും കുടിപ്പകയും കാരണം വളരെ മോശമായ അവസ്ഥയിലൂടെ കടന്ന് പോവുന്ന പ്രദർശത്തെ അന്തേവാസിയായ എസ്റ്റെല്ല ഒരു നാൾ വീട്ടിലെത്തുമ്പോൾ കാണുന്നത് വീട്‌ ഒഴിഞ്ഞു കിടക്കുന്നതാണ്, അവളുടെ അമ്മയെ കുറിച്ചുള്ള ഒരു സൂചന പോലും അവിടെ ബാക്കിയുണ്ടായിരുന്നില്ല. തുടർന്നുള്ള അമ്മയുടെ വരവും കാത്തുള്ള ഇരിപ്പിനിടെ ആണ് എസ്ടെല്ല ഷൈനിനെ ആദ്യമായി കാണുന്നത്.

🔸ഷൈൻ ഒരു സർവൈവർ ആണ്, മുകളിൽ സൂചിപ്പിച്ച മാഫിയകളുടെ പോരാട്ടത്തിനിടെ കുടുംബവും, മറ്റ് വകകളും എല്ലാം നഷ്ട്ടപ്പെട്ട അവന് കൂട്ടായി ഉള്ളത് അവനെപ്പോലെ എല്ലാം നഷ്ട്ടപ്പെട്ട മൂന്ന് നാല് സുഹൃത്തുക്കൾ മാത്രമാണ്. ഇവർക്കെല്ലാം പറയാൻ ഉണ്ടായിരുന്നു, നഷ്ട്ടത്തിന്റെ കഥകൾ. നഗരത്തിന് വെളിയിലെ തെരുവുകളിലാണ് ഇവരെല്ലാം താമസം, അന്നന്നത്തേക്കുള്ള അന്നത്തിന് വക ഉണ്ടാക്കുക എന്നതൊഴിച്ചാൽ മറ്റ് ലക്ഷ്യങ്ങൾ ഒന്നും തന്നെ ഇവർക്കില്ല, ചില സന്ദർഭങ്ങളിൽ ഇതിന് മോഷണം വരെ ഉപയോഗിക്കാറുണ്ട്. മുകളിൽ സൂചിപ്പിച്ച രണ്ട് ഗ്രൂപ്പുകളുമാണ് കഥാഗതിയിൽ ഏറ്റവും പ്രാധാന്യം അർഹിക്കുന്നവർ.

🔸മുകളിൽ സൂചിപ്പിച്ച വാക്യങ്ങളിൽ ചേർക്കാത്ത അനവധി കാര്യങ്ങൾ ഈ ചിത്രത്തിലുണ്ട്, ഒരു ക്രൈം പശ്ചാത്തലത്തിൽ ഉള്ള സിനിമ ആണെങ്കിൽ കൂടിയും ഒരു ഫാന്റസി ലെവെലിലേക്ക് ചിത്രം പോവുന്നുണ്ട്, ചില സന്ദർഭങ്ങളിൽ ഒരു ഹൊറർ ലെവെലിലേക്കും, ഉവ്വ് ചെറുതായി പേടിക്കാനുണ്ട്. സംശയങ്ങൾ ഏതും ഇല്ലാതെ പറയാം, ഈ വർഷം കണ്ട മികച്ച ചിത്രങ്ങളിൽ ഒന്നാണ് ടൈഗേഴ്‌സ് ആർ നോട്ട് അഫ്രയിഡ്, തീർച്ചയായും കാണാൻ ശ്രമിക്കുക. ഒന്നര മണിക്കൂറിൽ താഴെ മാത്രം ദൈർഖ്യം ഉള്ള ചിത്രം മികച്ചൊരു അനുഭവം തന്നെ ആയേക്കും.

Verdict : Very Good

DC Rating : 85/100

636. Asako 1 & 2 (2018)

Director : Ryusuke Hamaguchi

Genre : Drama

Rating : 6.9/10

Country : Japan

Duration : 119 Minutes

🔸ലവ് ട്രയാങ്കിൾ ഒക്കെ വിഷയമായി ഒരുപാട് ഒരുപാട് സിനിമകൾ പല ഭാഷകളിലായി പുറത്തിറങ്ങിയിട്ടുണ്ട്, എന്തിന് അധികം ഇങ് നമ്മുടെ മലയാളത്തിൽ വരെ കാണാൻ കഴിഞ്ഞേക്കും വ്യത്യസ്ത പശ്ചാത്തലത്തിലും, ബാക്ക്ഗ്രൗണ്ടിലും എല്ലാം പൊതിഞ്ഞു വെച്ച ലവ് ട്രയാങ്കിൾ സിനിമകൾ. ഈ വിഭാഗത്തിൽ പെട്ട ഒന്ന് തന്നെയാണ് അസാക്കോ വൺ ആൻഡ് റ്റു എന്ന പ്രസ്തുത ജാപ്പനീസ് ചിത്രവും. ടൈറ്റിൽ സൂചിപ്പിക്കുന്നത് പോലെ തന്നെ അസാക്കോ എന്ന നായികാ കഥാപാത്രത്തിന്റെ രണ്ട് കാലഘട്ടങ്ങളിലെ പ്രണയമാണ് ഈ ചിത്രത്തിന്റെ വിഷയം.

🔸വളരെ ലഘുവായ ഒരു പ്ലോട്ട് ആണ് ചിത്രത്തിന്റേത്, അത് തന്നെ രണ്ടായി തിരിക്കാം, രണ്ട് കാലഘട്ടത്തിന്റെ അടിസ്ഥാനത്തിൽ. ഒന്ന്, അസാക്കോ തന്റെ ചെറിയ പ്രായത്തിൽ, അതായത് പക്വതയും പാകതയും എത്തുന്നതിന് മുൻപേ ഉള്ള കാലഘട്ടത്തിൽ അരങ്ങേറിയ പ്രണയം. രണ്ടാമത്തേത്, വർഷങ്ങൾക്ക് ശേഷം, അസാക്കോ സ്വന്തം കാലിൽ നിൽക്കാനും കാര്യങ്ങൾ ഗ്രഹിക്കാനും ചെയ്യാനും പാകത നേടിയതിന് ശേഷമുള്ള പ്രണയം. ഇങ്ങനെ മേൽ സൂചിപ്പിച്ച രണ്ട് പ്രണയങ്ങളും അതിലേക്ക് വഴി വെച്ച കാര്യങ്ങളും, തുടർന്ന് അരങ്ങേറിയ സംഭവങ്ങളുമാണ് ചിത്രം.

🔸അസാക്കോയുടെ ആദ്യ പ്രണയത്തിലെ നായകനാണ് ബാക്കു, മുകളിൽ സൂചിപ്പിച്ച പാകതയും പക്വതയും ഇല്ലായ്മ ബാക്കുവിലും പ്രകടമാണ്, ഒരുപക്ഷെ അസാക്കോയെക്കാൾ അധികം. ജീവിതത്തിൽ അങ്ങനെ വലിയ പ്ലാനൊന്നും ബാക്കുവിനില്ല, ഒരു ഓളത്തിൽ അങ്ങനെ അങ് പോവുക തന്നെ. അതൊക്കെ എന്ത് തന്നെ ആയാലും അസാക്കോയെ സംബന്ധിച്ചിടത്തോളം ലവ് അറ്റ് ഫസ്റ്റ് സൈറ്റ്‌ ആയിരുന്നു ബാക്കുവിന്റെ കേസ്. താമസിയാതെ തന്നെ ബാക്കുവിനും തിരിച്ച് പ്രണയം തോന്നുന്നിടത്ത് കഥ ട്രാക്കിൽ കയറുകയാണ്.

🔸രണ്ടാമത്തെ ഭാഗം, അല്ലെങ്കിൽ പ്രണയം ഉടലെടുക്കുന്നത് കുറച്ച് വർഷങ്ങൾക്ക് ശേഷമാണ്. ഇവിടെ അസാക്കോയോടൊപ്പം കേന്ദ്ര കഥാപാത്രം ആയി വരുന്നത് റിയോഹേ എന്ന ബിസിനസ്കാരൻ ആണ്. ഒരല്പം ഇന്ട്രോവേർട്ട് ആണ് പുള്ളി, വലിയ ബഹളങ്ങൾ ഒന്നുമില്ല, എല്ലാ കാര്യങ്ങളും അർഹിക്കുന്ന ഗൗരവത്തോടെ നോക്കി കാണുന്ന തികഞ്ഞ മാന്യനായ കഥാപാത്രം. ഈ ഒരു കാലഘട്ടത്തിൽ എത്തുമ്പോഴേക്കും അസാക്കോയും ഒരുപാട് മാറി പോയിരുന്നു, അത് അങ്ങനെ പുതിയൊരു പ്രണയത്തിന് വഴി തുറന്നിടുകയാണ്.

🔸വ്യത്യസ്ത കാലഘട്ടത്തിൽ അസാക്കോയുടെ ജീവിതത്തിൽ അരങ്ങേറിയ ഈ രണ്ട് പ്രണയങ്ങളും ഒരു പ്രത്യേക പോയിന്റിൽ വെച്ച് കണ്ട് മുട്ടുകയാണ്. എന്ത്, എങ്ങിനെ, എന്നിട്ട് എന്നതൊക്കെ സിനിമ കണ്ട് തന്നെ അറിയുക. രണ്ട് മണിക്കൂറിൽ താഴെ ദൈർഖ്യം ഉള്ള ചിത്രം ചിലയിടത്ത് ഒരല്പം സ്ലോ ആവുന്നുണ്ട് എങ്കിലും ഒട്ടും മുഷിപ്പിക്കാതെ നല്ല സ്റ്റൈൽ ആയാണ് കഥ പറഞ്ഞ് പോകുന്നത്. നല്ല പ്രകടനങ്ങളാണ് ചിത്രത്തിലെ പ്രധാന കഥാപാത്രങ്ങളുടേത് എല്ലാം, പ്രത്യേകിച്ചും രണ്ട് കാലഘട്ടങ്ങൾ എന്നത് പരിഗണിക്കുമ്പോൾ. വലിയ കോംപ്ലക്സ് ആയ കഥാഗതി ഒന്നും പ്രതീക്ഷിക്കേണ്ടതില്ല, ഒരു ചെറിയ നല്ല ചിത്രം ആണ് അസാക്കോ വൺ ആൻഡ് റ്റു.

Verdict : Good

DC Rating : 74/100

635. Downton Abbey (2019)

Director : Michael Engler

Genre : Historical

Rating : 7.7/10

Country : UK

Duration : 122 Minutes

🔸ഡൗൺഠൻ അബ്ബി എന്ന പ്രസ്തുത ബ്രിട്ടീഷ് ഹിസ്റ്റോറിക്കൽ ഡ്രാമ ചിത്രം ഇതേ പേരുള്ള ടീവി സീരീസിനെ ആധാരമാക്കി ഉള്ളതാണ് എന്നാണ് അറിവ്, അത് എന്ത് തന്നെ ആയാലും ടീവി സീരീസ് ഇതുവരെ കാണാഞ്ഞതിനാലും പ്ലോട്ട് പോലുള്ള വകകളെ പറ്റി യാതൊരു അറിവും ഇല്ലാത്തതിനാലും ഒരു ഫ്രഷ് മൈൻടോടെ ആണ് കാണാൻ കഴിഞ്ഞത്. ഈ ഒരു കാര്യം കൊണ്ട് തന്നെ ഇവയിൽ ഏതാണ് മികച്ചത് എന്ന താരമത്യം ഒന്നും നടപ്പുള്ള കാര്യമല്ല, എന്തിരുന്നാലും ഈ സിനിമ കിടിലനാണ്, കണ്ടിരിക്കാനുള്ള വകയെല്ലാം ഇവിടുണ്ട്.

🔸സിനിമ ആസ്വദിക്കാൻ ടിവി സീരീസ് കാണണം എന്ന് നിർബന്ധം ഉള്ളതായി അനുഭവപ്പെട്ടില്ല, സ്വന്തം കാലിൽ നിൽക്കാൻ കെല്പുള്ള ഒരു സ്റ്റാൻഡ് അലോൺ ചിത്രം തന്നെയാണ് ഡൗൺടൻ അബ്ബി, എന്തിരുന്നാലും സീരീസിന്റെ ഒരു സീക്വൽ തന്നെയാണ് ഈ ചിത്രം. സീരീസ് അവസാനിച്ചതിന് കുറച്ച് നാളുകൾക്ക് ശേഷമാണ് ചിത്രം ആരംഭിക്കുന്നത്, സീരീസിലെ ഒട്ടുമിക്ക പ്രമുഖ കഥാപാത്രങ്ങളും ചിത്രത്തിലുമുണ്ട്. ആയിരത്തി തൊള്ളായിരത്തി ഇരുപതുകളാണ് ചിത്രത്തിന്റെ കഥാ പശ്ചാത്തലം എന്ന് പറയാം.

🔸ക്രൗളി കുടുംബമാണ് ചിത്രത്തിലെ കേന്ദ്ര കഥാപാത്രങ്ങൾ, കാലാ കാലങ്ങളായി ഡൗൺടാൻ അബ്ബിയിലെ അന്തേവാസികളും പ്രമാണിമാരുമായ ഇവർ വലിയൊരു പറ്റം അംഗരക്ഷകരുടെയും സഹായികളുടെയും എല്ലാം കൂടെയാണ് അബ്ബിയിൽ താമസിക്കുന്നത്, ഡസൻ കണക്കിന് കഥാപാത്രങ്ങൾ ഉണ്ടെന്ന് പറയാം. ഒരുനാൾ ബക്കിങ്ഹാം പാലസിൽ നിന്നും അബ്ബിയിലേക്ക് ഒരു അറിയിപ്പ് എത്തുകയാണ്. കാര്യം വേറൊന്നുമല്ല രാജാവും റാണിയും കുറച്ച് നാളത്തേക്ക് താമസത്തിനായി അബ്ബിയിൽ എത്തിച്ചേരുന്നത് ആയിരിക്കും എന്ന്.

🔸വലിയ ഉത്തരവാദിത്തങ്ങൾ ഉള്ള ദൗത്യം ആണെങ്കിൽ കൂടിയും അഭിമാനിക്കാൻ കഴിവുള്ള ഒന്നാണ് അറിയിപ്പ്, രാജ്യത്തിൻറെ ഭരണാധികാരികൾ തങ്ങളുടെ വീട്ടിൽ വന്ന് താമസിക്കുക എന്നത് നെഞ്ചും വിരിച്ച് ആർക്കുമുന്നിലും പറയാൻ കഴിയുന്ന കാര്യം ആണല്ലോ, തീർച്ചയായും അസൂയാവഹമായ നേട്ടം തന്നെ. രാജ്യത്താകമാനം ഉള്ള സന്ദർശനത്തിനിടെ രാജാവ് വ്യക്തിപരമായി തിരഞ്ഞെടുത്ത സ്ഥലം കൂടിയാണ് അബ്ബി. എന്നാൽ പ്രശ്നങ്ങൾ ആരംഭിക്കുന്നത് രാജാവിനൊപ്പം ഒരു പറ്റം അംഗരക്ഷകരും സഹായികളും കൂടി അബ്ബിയിൽ താമസിക്കാൻ എത്തുമ്പോഴാണ്.

🔸അഭിമാനികളും സ്വന്തം കഴിവിൽ തികഞ്ഞ വിശ്വാസവും ഒരല്പം ഈഗോയും ഉള്ളവരാണ് രണ്ട് ഭാഗത്തെയും ജോലിക്കാർ, തങ്ങൾക്ക് എതിരായി മറ്റൊരു സംഘം വരുന്നത് സ്വാഭാവികമായും ഉൾക്കൊള്ളാൻ രണ്ട് പേരും തയാറായിട്ടില്ല. ഇങ്ങനെ ചെറിയ ചെറിയ പ്രശ്നങ്ങൾ കൂടി ചേർന്ന് അബ്ബി ആകെയൊരു പൊട്ടിത്തെറിയിലേക്ക് നീങ്ങി കൊണ്ടിരിക്കുകയാണ്, ഇനി അതൊന്നും പോരെങ്കിൽ ഒരു വധ ശ്രമം കൂടി ഇതിനിടെ അരങ്ങേറുന്നുണ്ട്, അങ്ങനെ അങ്ങനെ ആകെ ബഹളമയം. ബേസിക്കലി ഇതൊക്കെയാണ് ഡൗൺടൗൺ അബ്ബി എന്ന സിനിമ, ഒരു ചെറിയ നല്ല ചിത്രം.

Verdict : Good

DC Rating : 74/100

634. Star Wars Episode 2 - Attack Of The Clones (2002)

Director : George Lucas

Genre : Sci Fi

Rating : 6.6/10

Country : USA

Duration : 142 Minutes

🔸സ്റ്റാർ വാർസ് സീരീസിലെ ഏറ്റവും മോശം എൻട്രി ഏത് എന്ന് ആരെങ്കിലും ചോദിക്കുക ആണെങ്കിൽ പേഴ്സണലി ചൂണ്ടി കാണിക്കാൻ പോവുന്നത് ഈ ചിത്രം ആയിരിക്കും, ഇതിന് പ്രധാനമായും രണ്ട് കാരണങ്ങൾ ആണ് ഉള്ളത്. ആദ്യമായി ഫാന്റം മെനസ് എന്ന ചിത്രം ജോർജ് ലൂക്കസിനും സ്റ്റുഡിയോയ്ക്കും ഉള്ളൊരു വാണിങ് ആയിരുന്നു, നൊസ്റ്റാൾജിയ കാരണം സാമ്പത്തികമായി ചിത്രം വിജയിച്ചേക്കാം എങ്കിലും നിലവാരത്തിൽ പുതിയ സീരീസ് വളരെ മോശമാണ് എന്ന വാണിങ്. ഇത് മാറ്റി എടുക്കാനുള്ള ഉത്തരവാദിത്തം ഉൾപ്പെട്ടിട്ടുള്ള എല്ലാവർക്കും ഉണ്ടായിരുന്നു, അതിനുള്ള അവസരം ആയിരുന്നു അറ്റാക്ക് ഓഫ് ദി ക്ളോൺസ് എന്ന രണ്ടാം ഭാഗ ചിത്രം. എന്നാലിവിടെ കാര്യമായ പുരോഗതി ഒന്നും കൈവരിച്ചിട്ടില്ല എന്നത് നിരാശാജനകമാണ്.

🔸രണ്ടാമത്തെ കാരണം ഒരു ഫാൻ എന്ന നിലയിൽ ഉള്ളതാണ്, ആദ്യ ട്രിലോഗിയിലെ വ്യക്തിപരമായി ഏറ്റവും ഇഷ്ട്ടപ്പെട്ട ചിത്രമാണ് ദി എമ്പയർ സ്‌ട്രൈക്സ് ബാക്ക്. ആ ത്രിലോഗിയിലെ രണ്ടാമത്തെ ചിത്രമായ എമ്പയർ ഒരു പക്ഷെ ലോകത്ത് ഇന്നേവരെ പുറത്തിറങ്ങിയതിൽ ഏറ്റവും മികച്ച സീക്വലുകളിൽ ഒന്നായിരിക്കും. കഥാപാത്രങ്ങളെ എല്ലാം ഒട്ടും പ്രതീക്ഷിക്കാത്ത തലങ്ങളിലേക്ക് കൊണ്ടുപോയ ഈ ചിത്രത്തിന് സമാനമായ ദൗത്യമായിരുന്നു അറ്റാക്ക് ഓഫ് ദി ക്ളോൺസിനും, അവിടെയും ഈ ചിത്രം നല്ല ഭംഗിയായി പരാജയപ്പെട്ടിട്ടുണ്ട് എന്ന് തുറന്ന് പറയേണ്ടി വരും.

🔸മുൻ ഭാഗ ചിത്രത്തിലെ സംഭവങ്ങൾക്ക് പത്ത് വർഷം ശേഷമാണ് ഈ ചിത്രം ആരംഭിക്കുന്നത്. ഗാലക്റ്റിക്ക് റിപ്പബ്ലിക്ക് ചില പുതിയ വെല്ലുവിളികൾ നേരിട്ട് കൊണ്ടിരിക്കുകയാണ്, പഴയ ജെഡി മാസ്റ്ററായ കൗണ്ട് ഡോക്കുവിന്റെ കീഴിൽ ഭരണത്തിനും ഭരണകർത്താക്കൾക്കും എതിരെ വിപ്ലവ ശ്രമങ്ങൾ നടന്ന് കൊണ്ടിരിക്കുകയാണ്. സെനറ്ററായ പദ്മെ അമിതാലയ്ക്ക് നേരെ അരങ്ങേറുന്ന വധ ശ്രമം കാര്യങ്ങളെ കൂടുതൽ വഷളാക്കുന്നതെ ഉള്ളൂ താനും. ഈ ഒരു പശ്ചാത്തലത്തിലാണ് കേന്ദ്ര കഥാപാത്രങ്ങളായ അനാക്കിനും ഒബിവാനും കഥയിലേക്ക് വരുന്നത്.

🔸രാജകുമാരിയായ പദ്മെയെ സംരക്ഷിക്കാൻ എത്തുന്ന രണ്ട് കഥാപാത്രങ്ങളും ചേർന്ന് ഒരു രണ്ടാം വധ ശ്രമത്തെ തടയുകയാണ്, കൊല ചെയ്യാൻ എത്തിയവന്റെ ഐഡന്റിറ്റി കണ്ടുപിടിക്കുന്നതിൽ പരാജയപ്പെട്ടെങ്കിലും ഇനി ഈ നില തുടരാനാവില്ല എന്ന തീരുമാനത്തിൽ എത്തുകയാണ് എല്ലാവരും. പദ്മെയുടെ സംരക്ഷണം എന്നത് പോലെ തന്നെ പിറകിൽ നിന്ന് കളിക്കുന്ന വ്യക്തിയുടെ ഐഡന്റിറ്റിയും ഉദ്ദേശവും വളരെ പ്രധാനമായി മാറുകയാണ്. ഇതെല്ലാം കണ്ടുപിടിക്കാനായി ഇറങ്ങി തിരിക്കുകയാണ് കഥാപാത്രങ്ങളെല്ലാം.

🔸ഒരു കോൺസ്പിറസിയെ ചുറ്റി പറ്റിയാണ് ചിത്രത്തിന്റെ കഥ പുരോഗമിക്കുന്നത്. ഇതിന് മുൻപും പിൻപും പ്രശസ്തി നേടിയ പല സ്റ്റാർ വാർസ് കഥാപാത്രങ്ങളും ചിത്രത്തിൽ അപ്പിയറൻസ് നടത്തുന്നുണ്ട്, അതിൽ തന്നെ ഏറ്റവും ഇഷ്ട്ടപ്പെട്ട സൈഡ് ക്യാരക്ടറുകളിൽ ഒന്നിന്റെ ഒറിജിൻ കൂടി ആവുന്നുണ്ട് ചിത്രം. നിലവാരത്തിൽ മറ്റ് ചിത്രങ്ങളുമായി തട്ടിച്ച് നോക്കാൻ കഴിയില്ല എങ്കിലും സ്റ്റാർ വാഴ്സിന്റെ കഥയിൽ ഒഴിവാക്കാൻ പറ്റാത്ത ഒന്നാണ് സത്യത്തിൽ അറ്റാക്ക് ഓഫ് ദി ക്ളോൺസ്, കണ്ടില്ലെങ്കിൽ ആ സാഗയിൽ ഒരു പൂർണത കിട്ടില്ല എന്നതാണ് വാസ്തവം.

Verdict : Average

DC Rating : 60/100

633. Doctor Sleep (2019)

Director : Mike Flanagan

Genre : Horror

Rating : 7.4/10

Country : USA

Duration : 151 Minutes

🔸ഷൈനിങ് എന്ന ചിത്രം വ്യക്തിപരമായി ഇന്നുവരെ കണ്ട ചിത്രങ്ങളിൽ ഏറ്റവും ഇഷ്ട്ടപ്പെട്ടവയിൽ ഒന്നാണ്, അത്രയധികം സ്വാധീനിച്ച അല്ലെങ്കിൽ ആഴത്തിൽ അറിയാൻ ശ്രമിച്ച മറ്റൊരു ചിത്രം ഇല്ലാ എന്ന് തന്നെ പറയാം. പറയുമ്പോൾ ഒരല്പം അതിശയോക്തി തോന്നാം എങ്കിലും അതിന്റെ ഒരു തരി പോലും ഇല്ലാതെ പറയാം, ഉദ്ദേശം മുപ്പതിന് മുകളിൽ തവണ ഷൈനിങ് കണ്ടിട്ടുണ്ട്. ഈ ഒരു കാരണം കൊണ്ട് തന്നെ ഡോക്ടർ സ്ലീപ് എന്ന ചിത്രം അന്നൗൻസ് ചെയ്തപ്പോൾ തൊട്ട് പ്രതീക്ഷയേക്കാൾ ആശങ്ക തന്നെ ആയിരുന്നു. രണ്ടാം ഭാഗങ്ങൾ പലപ്പോഴും ഒറിജിനലിനോട് നീതി പുലർത്താറില്ല എന്നത് തന്നെ ആയിരുന്നു കാരണം.

🔸എൺപതുകളുടെ തുടക്കത്തിലാണ് ചിത്രം ആരംഭിക്കുന്നത്, ഡാനിയും അമ്മ വെൻഡിയും ഷൈനിങ്ങിൽ അരങ്ങേറിയ സംഭവങ്ങൾ എല്ലാം മറക്കാനുള്ള ശ്രമത്തിലാണ്. അത് അത്ര എളുപ്പം ആവില്ല എന്ന തികഞ്ഞ ബോധ്യം അവർക്ക് ഉണ്ടെങ്കിലും പുതിയൊരു തുടക്കത്തിനായുള്ള ശ്രമത്തിലാണ് ഇരുവരും. എന്നാൽ പഴയ സംഭവങ്ങൾ ഡാനിയൽ ഏല്പിച്ചിരിക്കുന്ന ആഘാതം വെൻഡി പ്രതീക്ഷിച്ചതിലും അധികമാണ്. ഉറക്കവും സമാധാനവും എല്ലാം അവന് എന്നോ നഷ്ട്ടപ്പെട്ട് കഴിഞ്ഞിരിക്കുന്നു, ഓവർലുക് ഹോട്ടലിൽ നിന്നും ആയിരക്കണക്കിന് കിലോമീറ്ററുകൾ അകലെ ആണെങ്കിലും അവിടത്തെ ഓർമകൾ അവനെ വിടാതെ പിന്തുടരുകയാണ്, വേട്ടയാടുകയാണ്.

🔸ഇവിടെ നിന്നും ആരംഭിക്കുന്ന ചിത്രം പതിറ്റാണ്ടുകൾക്ക് ഇപ്പുറം ഉള്ള ഡാനിയുടെ ജീവിതത്തിലേക്ക് പിന്നീട് കടന്ന് ചെല്ലുകയാണ്, അബ്ര സ്റ്റോൺ എന്ന ഡാനിക്ക് സമാനമായ കഴിവുകൾ ഉള്ള കുട്ടിയുടെ കഥയും ചിത്രത്തിന്റെ പ്രധാന പ്ലോട്ട് പോയിന്റുകളിൽ ഒന്നാവുന്നുണ്ട്. ഇതിനെല്ലാം പുറമെ ഇത്തരം കഴിവുള്ളവരെ തങ്ങളുടെ നിലനില്പിനായി കൊല ചെയ്ത് ഉപയോഗിക്കുന്ന ഒരു കൽട്ടും ചിത്രത്തിലുണ്ട്. ഈ ഒരു മൂന്ന് പോയിന്റുകളിലൂടെയാണ് ഡോക്ടർ സ്ലീപ് എന്ന ചിത്രം ബേസിക്കലി സഞ്ചരിക്കുന്നത്. മുകളിൽ സൂചിപ്പിച്ച കൾട്ടിന്റെ നേതാവായി റബേക്ക ഫെർഗൂസന്റെ പ്രകടനം എടുത്ത് പറയേണ്ടതാണ്.

🔸ചിത്രത്തിന്റെ മോശം എന്ന് അനുഭവപ്പെട്ട കാര്യങ്ങൾ പറയുക ആണെങ്കിൽ, അധികം ഒന്നുമില്ല, രണ്ടര മണിക്കൂർ ദൈർഖ്യം എന്നത് ചില ഇടത്തെങ്കിലും പ്രശ്നമാണ്, ഒരു വലിച്ചുനീട്ടൽ പലയിടത്തും അനുഭവപ്പെട്ടു. പക്ഷെ ഏറ്റവും വലിയ പോരായ്മ എന്നത് ഷൈനിംഗുമായി തട്ടിച്ച് നോക്കുമ്പോൾ ഈ ചിത്രം എത്രയോ താഴെയാണ് എന്നത് തന്നെയാണ്. കുബ്രിക് സൃഷ്ടിച്ചെടുത്ത ശ്രദ്ധ പിടിച്ച് പറ്റുന്ന തോതിലുള്ള ചോദ്യങ്ങൾ ഒന്നും ഫ്ളാനഗൻ ഉയർത്തുന്നില്ല, എന്ന് മാത്രമല്ല മുൻ ചിത്രം വെച്ച് നോക്കുമ്പോൾ വൺ ഡയമെൻഷൻ എന്നൊക്കെ വിശേഷിപ്പിക്കാവുന്ന ഒന്നാണ് കഥ. ഇനി നല്ലത് പറയാൻ ആണെങ്കിൽ കുറച്ച് ഉണ്ട്, പ്രകടനത്തിൽ പ്രധാന കഥാപാത്രങ്ങൾ എല്ലാവരും നന്നായിരുന്നു.

🔸ഒരു ഷൈനിങ് ആരാധകൻ എന്ന നിലയ്ക്ക് ചിത്രം നൂറ് ശതമാനം വർത്ത് ആണ്, ഐകോണിക് എന്നൊക്കെ വിശേഷിപ്പിക്കാവുന്ന പഴയ സ്‌കോർ ചിത്രത്തിൽ ഉണ്ട് എന്ന് മാത്രമല്ല ആദ്യ ഭാഗത്തെ ഓർമയിൽ തങ്ങി നിൽക്കുന്ന പല സീക്വൻസുകളും ചില കഥാപാത്രങ്ങളും ഇവിടെ സർപ്രൈസ് അപ്പിയറൻസ് നടത്തുന്നുണ്ട്. അത്യാവശ്യം നല്ല ഛായാഗ്രഹണവും സ്കോറും ചിത്രത്തിന്റെ മറ്റ് സവിശേഷതകളാണ്. ചുരുക്കി പറയുക ആണെങ്കിൽ വലിയ പേരുദോഷം ഒന്നും ഷൈനിങ്ങിന് ഈ ചിത്രം വരുത്തി വെക്കുന്നില്ല എന്ന് മാത്രമല്ല ബേധപ്പെട്ട ഒരു ഫോളോ അപ്പുമാണ്, മോശം ഇല്ലാത്ത ഒരു ചിത്രം.

"Doctor Sleep Is Nothing Compared To Shining, But It's Still Worthy Of Being A Successor...."

Verdict : Good

DC Rating : 72/100

632. The Peanut Butter Falcon (2019)

Director : Tyler Nilson

Genre : Drama

Rating : 7.9/10

Country : USA

Duration : 98 Minutes

🔸വയസായവർക്കുള്ള ഒരു റിട്ടയർമെന്റ് ഹോമിൽ നിന്നുമാണ് പീനട്ട് ബട്ടർ ഫാൽക്കൺ എന്ന ചിത്രം ആരംഭിക്കുന്നത്, അവിടത്തെ കുറച്ച് നാളുകളായുള്ള അന്തേവാസിയാണ് ഇരുപത്തി രണ്ട് വയസുകാരനായ സാക്. ഡൗൺ സിൻഡ്രോം എന്ന ജനിതക വൈകല്യത്തിന് ഉടമയാണ് സാക്, ലളിതമായി പറയുക ആണെങ്കിൽ ഇരുപത്തി രണ്ട് വയസുകാരന്റെ ശരീരവും ഒൻപത് വയസുകാരന്റെ ബുദ്ധിയുമാണ് അയാൾക്ക്. ഒരു പ്രൊഫഷണൽ റെസ്ലർ ആവണം എന്നതാണ് സാക്കിന്റെ ആഗ്രഹം, തന്റെ ഒഴിവ് വേളകളിൽ എല്ലാം അയാൾ റെസ്ലിങ് മത്സരങ്ങളാണ് കണ്ട് കൊണ്ടിരുന്നത്, ഒരു തരം ഒബ്സഷനാണ് സാക്കിന് ഇതിനോട്.

🔸ചിത്രത്തിലെ മറ്റൊരു പ്രധാന കഥാപാത്രമാണ് ഷിയാ ലെബോഫ് അവതരിപ്പിച്ചിരിക്കുന്ന ടൈലർ. അനധി കൃത്യമായി ഉള്ള മീൻ പിടിത്തവും മറ്റുമാണ് അയാളുടെ തൊഴിൽ, ലൈസൻസ് ഇല്ലാതെയുള്ള ഈ ശ്രമങ്ങൾ പലപ്പോഴും കയ്യാങ്കളിയിലും പോലീസ് പിടിത്തത്തിലും വരെ ചെന്നെത്താറുണ്ട്. ഇതൊന്നും പോരെങ്കിൽ അയാളുടെ സ്വത സിദ്ധമായുള്ള എടുത്ത് ചാട്ടവും ദേഷ്യവും കൂടുതൽ പ്രശ്നങ്ങൾ വിളിച്ച് വരുത്താറുമുണ്ട്. ഇങ്ങനെ രണ്ട് ധ്രുവങ്ങളിൽ നിൽക്കുന്ന രണ്ട് പ്രധാന കഥാപാത്രങ്ങളാണ് ചിത്രത്തിൽ ഉള്ളത്.

🔸ഡക്കോട്ട ജോൺസൺ അവതരിപ്പിക്കുന്ന എലിനോർ എന്ന സാമൂഹിക പ്രവർത്തകയാണ് സാക് ഉൾപ്പെടെ ഉള്ളവർ അന്തേവാസികളായ ഓൾഡ് ഏജ് ഹോമിന്റെ നടത്തിപ്പുകാരി. അന്തേവാസികളോട് തികഞ്ഞ സ്നേഹവും കരുതലും പ്രകടിപ്പിക്കാറില്ല ഇവർ എന്നാൽ സാക്കിന്റെ പുറം ലോകവുമായി ബന്ധപ്പെടാനുള്ള ശ്രമങ്ങളെ ഒന്നും പ്രോത്സാഹിപ്പിച്ചിരുന്നില്ല. കുട്ടികളുടെ മനസിന് ഉടമയായ സാക്ക് പുറം ലോകവുമായും അവിടത്തെ രീതികളുമായും പൊരുത്തപ്പെട്ട് പോവില്ല എന്ന ചിന്ത ആവാം കാരണം.

🔸അങ്ങനെ ഒരുനാൾ സാക്ക് ആ ഓൾഡ് ഏജ് ഹോമിൽ നിന്നും പുറത്തേക്ക് ചാടുകയാണ്, ഫ്‌ലോറിഡയിൽ ഉള്ള റെസ്ലിങ് ട്രെയിനിങ് സെന്ററിൽ എത്തുക എന്നതാണ് ഉദ്ദേശം. ഈ സഞ്ചാരത്തിനിടെ അയാൾ ടെയ്‌ലറെ കണ്ട് മുട്ടുകയാണ്, താമസിയാതെ യാത്ര ഇരുവരുടെയുമായി മാറുന്നു, ഈ സമയത്തിനിടെ സാക്കിനെ അന്വേഷിച്ച് എലാനോറും ഇറങ്ങി പുറപ്പെടുന്നുണ്ട്. മനോഹരമായ ഒരു ട്രാവൽ റോഡ് മൂവി ഇവിടെ ആരംഭിക്കുകയാണ്. ഒന്നര മണിക്കൂർ ദൈർഖ്യമുള്ള ചിത്രം ഒരിടത്തും സ്ലോ ഡൗൺ ചെയ്യുന്നുമില്ല എന്നത് എടുത്ത് പറയേണ്ട വസ്തുതയാണ്.

🔸ഈ മൂന്ന് കഥാപാത്രങ്ങൾക്ക് പുറമെ വേറെ ചില നല്ല കഥാപാത്രങ്ങൾ കൂടി വന്ന് പോവുന്നുണ്ട്, ബ്രൂസ് ടെർണിന്റെത് പോലെയുള്ള ചില കഥാപാത്രങ്ങൾ. ഒന്നര മണിക്കൂർ ദൈർഖ്യമുള്ള ചിത്രം ഒരു കംപ്ലീറ്റ് ഇമോഷണൽ പാക്കേജ് ആണ്, ചിലയിടത്ത് ചിരിക്കാം, ചിലയിടത്ത് നമ്മൾ പോലും അറിയാതെ കണ്ണൊന്ന് നനഞ്ഞെന്നും വരാം. ചുരുക്കി പറയുക ആണെങ്കിൽ ഈ വർഷം ഇറങ്ങിയ മികച്ച ചിത്രങ്ങളിൽ ഒന്ന്, അതാണ് പീനട്ട് ബട്ടർ ഫാൽക്കൺ, തീർച്ചയായും കാണാൻ ശുപാർശ ചെയ്യുന്നു ഈ ചിത്രം.

Verdict : Very Good

DC Rating : 86/100

631. The Farewell (2019)

Director : Lulu Wang

Genre : Family

Rating : 8/10

Country : USA

Duration : 98 Minutes

🔸നവംബർ ആദ്യ വാരം എന്നത് നോട്ട് ചെയ്ത് വെച്ചിട്ട് കുറച്ച് നാളുകളായി, സംഭവം വേറൊന്നുമല്ല ദി ഫെയർവെൽ എന്ന ചിത്രത്തിന്റെയും പീനട്ട് ബട്ടർ ഫാൽക്കൺ എന്ന ചിത്രത്തിന്റെയും ഡിവിഡി റിലീസ് ഈ സമയം ആയിരിക്കും എന്ന് മുന്നേ അറിഞ്ഞിരുന്നു. തിയേറ്റർ റിലീസ് ഒഴിച്ച് നിർത്തിയാൽ ഇത്രയും കാത്തിരുന്ന രണ്ട് ഡിവിഡി റിലീസുകൾ വേറെ ഉണ്ടായിട്ടില്ല ഈ വർഷം. ഒടുവിൽ രണ്ട് ചിത്രങ്ങളും ദിവസങ്ങളുടെ മാത്രം വ്യത്യാസത്തിൽ പ്രിന്റ് ലഭിച്ചിരിക്കുകയാണ്, പീനട്ട് ബട്ടർ ഫാൽക്കൺ എന്ന ചിത്രത്തെ പറ്റി പിന്നീട് പറയാം,ഫെയർവെൽ എന്ന ചിത്രത്തെ കുറിച്ചാണ് ഈ കുറിപ്പ്.

🔸അടുത്ത കാലത്ത് ഒന്നും തന്നെ ഇത്രയും താല്പര്യം ഉണർത്തിയ, ഇമോഷണലി ഇൻവെസ്റ്റ് ചെയ്യിച്ച മറ്റൊരു സിനിമ ഉണ്ടായിട്ടില്ല. കഥാപാത്രങ്ങളോടും അവർക്കിടയിലെ ബന്ധങ്ങളോടും അതിന്റെ മൂല്യത്തോടും എല്ലാം ചിത്രം പാലിക്കുന്ന ഒരു മര്യാദ ഉണ്ട്, അതെല്ലാം അങ്ങേയറ്റം പ്രശംസനീയം ആണ്. ഒരു ഫാമിലി ഗെറ്റ് ടുഗെദറിന്റെ ബാക്ക്ഗ്രൗണ്ടിൽ ഉള്ള കുടുംബ ചിത്രമാണ് ഫെയർവെൽ, ഇതിനോടൊപ്പം തന്നെ ചൈനീസ് കൾച്ചർ പോലെയുള്ള വസ്തുതകളും വളരെ പ്രാധാന്യം അർഹിക്കുന്ന ഭാഗങ്ങളായി കഥയിൽ വന്ന് പോവുന്നുണ്ട്.

🔸ഓഷ്യൻസ് എയ്റ്റ്, ക്രേസി റിച്ച് ഏഷ്യൻസ് പോലെയുള്ള ചിത്രങ്ങളിലൂടെ പ്രശസ്തി നേടിയ അവക്വാഫിന ആണ് ചിത്രത്തിലെ പ്രധാന കഥാപാത്രമായ ബില്ലിയെ അവതരിപ്പിച്ചിരിക്കുന്നത്. ചൈനയിലാണ് ജനിച്ച് വളർന്നത് എങ്കിലും പഠനവും ജോലിയും എല്ലാം മുന്നിൽ കണ്ട് അമേരിക്കയിലാണ് ബില്ലി താമസിക്കുന്നത്, ഒരു നല്ല നിലയിൽ എത്താനുള്ള അവളുടെ ശ്രമങ്ങൾ ഒന്നും ഇതുവരെ ഫലം കണ്ടിട്ടില്ല. തന്റെ കുടുംബത്തോട് വല്ലാത്തൊരു തരം അറ്റാച്ച്മെന്റ് ഉണ്ട് ബില്ലിക്ക്, പ്രത്യേകിച്ചും അമ്മൂമ്മ ആയ നായിനായിയോട്.

🔸ബില്ലിക്ക് എന്നത് പോലെ തന്നെ കരുതലും സ്നേഹവും നായ്ക്ക് തിരിച്ചും ഉണ്ട്, ആദ്യ സീനിലെ സംഭാഷണങ്ങളിൽ കൂടി തന്നെ ഇരുവർക്കും ഇടയിൽ ഉള്ള ബന്ധം വ്യക്തമാവുന്നുണ്ട്. ഒരു ദിവസം ജന്മനാട്ടിൽ നിന്നും ഒരു ഫോൺ കോൾ ബില്ലിക്ക് വരികയാണ്, കാര്യം ഇത്രയേ ഉള്ളൂ, നായ്ക്ക് ലങ് കാൻസർ ആണ്, കൂടിപ്പോയാൽ ഏതാനും മാസങ്ങൾ മാത്രമേ അവർക്ക് ഡോക്ടർമാർ ആയുസ്സ് പറയുന്നുള്ളൂ, ആയതിനാൽ കുടുംബത്തിലെ എല്ലാവരും ഒത്തുകൂടാൻ തീരുമാനിക്കുകയാണ്, നായ്ക്ക് ഒരു സന്തോഷം ആവട്ടെ എന്ന ചിന്തയിൽ. ഒരു ചെറിയ കാര്യം കൂടി ബില്ലിയോട് കുടുംബം ആവശ്യപ്പെടുന്നുണ്ട്.

🔸കാര്യം വേറൊന്നുമല്ല തന്റെ മരണം അടുത്തെന്ന് നായ്‌യോട് ആരും ഇത് വരെ പറഞ്ഞിട്ടില്ല, പറയാൻ ആഗ്രഹിക്കുന്നുമില്ല. ബില്ലി നാട്ടിലേക്ക് വരിക ആണെങ്കിൽ ഇരുവർക്കും ഇടയിലെ ബന്ധം കാരണം ആ രഹസ്യം പുറത്തായേക്കും, അത് ഒഴിവാക്കാനായാണ് ബില്ലിയോട് നാട്ടിലേക്ക് വരണ്ട എന്ന് കുടുംബം ആവശ്യപ്പെടുന്നത്. ഇവിടെ നിന്നങ്ങോട്ടുള്ള ഒന്നര മണിക്കൂർ ഡീപ്പ്, ടച്ചിങ് ആയ ഹ്യുമൻ ഇമോഷൻസിന്റെ കുത്തൊഴുക്ക് തന്നെയാണ്, ഇത്രയും മനസ്സിൽ തട്ടിയ അല്ലെങ്കിൽ കണ്ണ് നിറച്ചൊരു ചിത്രം അടുത്തിടെ എന്നല്ല ഒരുപക്ഷെ ഈ വർഷം വേറെ കണ്ടിട്ടുണ്ടാവില്ല, തീർച്ചയായും കാണാൻ നിർദ്ദേശിക്കുന്നു ഈ ചെറിയ വലിയ ചിത്രം.

Verdict : Must Watch

DC Rating : 91/100

630. The King (2019)

Director : David Michod

Genre : Historical

Rating : 7.2/10

Country : Australia

Duration : 140 Minutes

🔸ഈ അധികാര വടംവലി, യുദ്ധം, ഭരണത്തിന് വേണ്ടിയുള്ള തൊഴുത്തിൽ കുത്തുകൾ തുടങ്ങിയവയെല്ലാം പ്രമേയം ആവുന്ന ചിത്രങ്ങളോട് പണ്ട് തൊട്ടേ ഇഷ്ടക്കൂടുതലുണ്ട്, ഈ കാരണം കൊണ്ട് തന്നെയാണ് ഗെയിം ഓഫ് ത്രോൺസ് ഇപ്പോഴും വ്യക്തിപരമായി ഏറ്റവും ഇഷ്ട്ടപ്പെട്ട ടീവി സീരീസുകളിൽ ഒന്നായി തുടരുന്നത്. ദി കിംഗ് എന്ന നെറ്റ്ഫ്ലിക്സ് ചിത്രത്തോടും മേല്പറഞ്ഞ കാരണങ്ങളാൽ ഒരു താല്പര്യം ഉണ്ടായിരുന്നു, ഒരുപാട് പ്രതീക്ഷയും. നല്ലൊരു കാസ്റ്റും ഹിസ്റ്റോറിക്കൽ ബാക്ക് ഗ്രൗണ്ടും എല്ലാം ചിത്രത്തിൽ പ്രതീക്ഷ ഏറ്റിയ മറ്റ് ഘടകങ്ങൾ ആയിരുന്നു താനും.

🔸ഹെൻറി നാലാമൻ രാജാവ് ഇംഗ്ലണ്ട് ഭരിക്കുന്ന കാലഘട്ടത്തിലാണ് ചിത്രം ആരംഭിക്കുന്നത്, ഒരു ഭരണാധികാരി എന്ന നിലയ്ക്ക് തികഞ്ഞ പരാജയമാണ് ഹെൻറി നാലാമൻ. രാജ്യത്തിൻറെ സാമ്പത്തിക വ്യവസ്ഥ മുഴുവൻ തകർത്ത് തരിപ്പണമാക്കി എന്ന് മാത്രമല്ല അയൽ രാജ്യങ്ങളുമായി എല്ലാം യുദ്ധാന്തരീക്ഷത്തിലാണ്. ഇതൊന്നും പോരെങ്കിൽ സ്വന്തം ജനങ്ങൾക്കിടയിൽ പോലും വലിയ പ്രചാരം ഇന്ന് ഹെൻറി നാലാമനില്ല. അസുഖവും മറ്റും കാരണം ഏറെക്കുറെ തന്റെ ജീവിതത്തിന്റെ അവസാന നാളുകളിലേക്ക് കടന്നിരിക്കുകയാണ് അയാൾ.

🔸ഹെൻറി നാലാമന് മൂന്ന് മക്കൾ, മൂത്തവൻ ഹാൽ, അതിന് ശേഷം തോമസ്, ഏറ്റവും ഇളയവൾ ഫിലിപ്പ. തിമോത്തി ചലമറ്റ് അവതരിപ്പിച്ച ഹാൽ ആണ് നമ്മുടെ കേന്ദ്ര കഥാപാത്രം, പ്രായത്തിൽ കവിഞ്ഞ പക്വതയും വിവരവും വകതിരിവും എല്ലാമാണ് ഹാലിന്റെ സവിശേഷതകൾ. അയൽ രാജ്യക്കാരുമായി നിരന്തരം യുദ്ധത്തിനിറങ്ങുന്ന അച്ഛന്റെ നിലപാടിനോട് എല്ലാ കാലത്തും തികഞ്ഞ എതിർപ്പ് പ്രകടിപ്പിച്ചിട്ടുള്ള ഹാൽ പൊതുവെ അനുനയ സമാധാന രീതികളുടെ ആരാധകനാണ്. ഈ ഒരു രീതി കൊണ്ടുതന്നെ അച്ഛനും മകനും തമ്മിലുള്ള ബന്ധം മുൻപേ ഉലഞ്ഞതാണ്, പരസ്പരം കാണാൻ പോലും ഇരുവരും താല്പര്യപ്പെടാറില്ല.

🔸രണ്ടാമത്തെ മകനായ തോമസ് ഏറെക്കുറെ അച്ഛന്റെ തനി പകർപ്പാണ്, എടുത്തുചാട്ടം എതിരാളികളോടുള്ള ഒടുങ്ങാത്ത പക, നിയന്ത്രിക്കാൻ കഴിയാത്ത ദേഷ്യം, ചിന്തിക്കാനുള്ള വകതിരിവ് ഇല്ലായ്മ തുടങ്ങി ഒരു ഭരണാധികാരി ഒരിക്കലും വെച്ച് പൊറുപ്പിക്കാൻ പാടില്ലാത്ത രീതികളുടെയും ചേഷ്ടകളുടെയും സ്വഭാവത്തിന്റെയും ഉടമയാണ് തോമസ്. തന്റെ കാലശേഷം തോമസ് അധികാരത്തിൽ വരണം എന്നാണ് ഹെൻറി നാലാമന്റെ ആഗ്രഹം, രാജാവിന്റെ തീരുമാനം അന്തിമം ആയതിനാലും ഭരണം എന്നതിനോട് ഹാൽ വലിയ താല്പര്യം കാണിച്ചിട്ടില്ലാത്തതിനാലും ഏറെക്കുറെ ആ നീക്കത്തിന് തന്നെയാണ് കളം ഒരുങ്ങിയതും.

🔸എല്ലാം വിധിയുടെ വിളയാട്ടം എന്നൊക്കെ പറയാറുള്ള പോലെ ചില അപ്രതീക്ഷിത സംഭവങ്ങൾ ഈ കാലയളവിൽ ഇംഗ്ലണ്ടിൽ അരങ്ങേറുകയാണ്, ഇതിന്റെയെല്ലാം പരിണിത ഫലമായി ഒട്ടും പ്രതീക്ഷിക്കാതെ ഹാൽ രാജാവായി അവരിധിക്കപ്പെടുകയാണ്. ഭരണാധികാരി എന്ന പരിചയക്കുറവിന് പുറമെ വലിയ വെല്ലുവിളികളാണ് ഹാലിന് നേരിടേണ്ടി ഇരുന്നത്, അതിൽ ഏറ്റവും പ്രധാനം തനിക്ക് വിശ്വസിക്കാൻ കഴിയുന്ന ചിലരെ തനിക്ക് ചുറ്റും അണി നിരത്തുക എന്നതായിരുന്നു. ചലമറ്റ്, എഡ്ഗർട്ടൻ, റോബർട് പാറ്റിൻസൺ, മെൻഡിൽസൺ തുടങ്ങി നല്ലൊരു കാസ്റ്റ് ആണ് ഈ നെറ്റ്ഫ്ലിക്സ് ചിത്രത്തിന് ഉള്ളത്, നല്ലൊരു കഥയും വലിയ മോശമൊന്നും കൂടാതെ പറഞ്ഞ് പോവുന്നുണ്ട്, ദൈർഖ്യം മാത്രം ഒരല്പം കല്ല് കടിയായി അനുഭവപ്പെട്ടു.

Verdict : Good

DC Rating : 75/100

629. Terminator Dark Fate (2019)

Director : Tim Miller

Genre : Action

Rating : 6.5/10

Country : USA

Duration : 128 Minutes

🔸ഈ വർഷം തിയേറ്ററിൽ കണ്ട സിനിമകളിൽ ഒട്ടും പ്രതീക്ഷിക്കാതെ ഇതെന്താണിത് എന്നൊരു ഞെട്ടൽ ഉണ്ടാക്കിയ രംഗങ്ങൾ അധികം ഉണ്ടായിട്ടില്ല, എന്നാൽ ഇവയിൽ ഒന്ന് ടെർമിനേറ്റർ സീരീസിലെ ആറാം ഭാഗ ചിത്രത്തിലെ ഓപ്പണിങ് സീനാണ്, അക്ഷരാർത്ഥത്തിൽ ഞെട്ടിച്ച ഐറ്റം. ഒരു റീസെറ്റ് ബട്ടൻ എന്നൊക്കെ വിശേഷിപ്പിക്കാവുന്ന ഈ സീൻ പല കാരണങ്ങൾ കൊണ്ടും വല്ലാതെ ഇഷ്ട്ടപ്പെട്ടു, ചിലപ്പോൾ ടെർമിനേറ്റർ സീരീസിനോട് ചെറുപ്പകാലത്ത് തൊട്ടേ ഉള്ള ഇഷ്ടം കാരണവുമാവാം. ഈ സീനിന്റെ കൂടുതൽ ഡീറ്റെയിൽസിലേക്ക് പോവാൻ ഉദ്ദേശിക്കുന്നില്ല, അത് സർപ്രൈസ് ആയി തന്നെ നിൽക്കട്ടെ, ഇനി കാര്യത്തിലേക്ക് കടക്കാം.

🔸മുകളിൽ സൂചിപ്പിച്ച ഈയൊരു ഓപ്പണിങ് ആക്റ്റ് എങ്ങിനെ കാഴ്ചക്കാരൻ, പ്രത്യേകിച്ചും ഒരു ടെർമിനേറ്റർ ഫാൻ സ്വീകരിക്കും എന്ന കാര്യത്തിൽ ഒരല്പം ആകാംക്ഷയുണ്ട്. വർഷങ്ങളും സീരീസിലെ ചിത്രങ്ങളുടെ എണ്ണവും കൂടുമ്പോൾ നിലവാരത്തിൽ താഴേക്ക് കൂപ്പ് കുത്തും എന്ന സ്ഥിരം സ്റ്റുഡിയോ ശൈലിയുടെ മറ്റൊരു വേർഷനാണ് ടെർമിനേറ്റർ എന്ന് ജെനസിസ് പോലെയുള്ള ചിത്രങ്ങൾ മുൻപ് തെളിയിച്ചതാണ്, ഡാർക്ക് ഫെയ്റ്റ് എന്തായാലും അത്രയും താഴേക്ക് പോയിട്ടില്ല എന്നത് ആശ്വാസകരം തന്നെ, വ്യക്തിപരമായി ആദ്യ രണ്ട് ചിത്രങ്ങൾക്ക് ശേഷം വന്ന ഏറ്റവും മികച്ച ടെർമിനേറ്റർ ചിത്രം ഇതാവും. അപ്പോഴും ഇവ തമ്മിലുള്ള അന്തരം രണ്ട് ധ്രുവങ്ങൾക്ക് സമാനമാണ്.

🔸ഭാവി കാലത്ത് നിന്നും, തങ്ങൾക്ക് ഭീഷണി ആയേക്കാവുന്ന ഹ്യുമൻ ലീഡറെ ഇല്ലായ്മ ചെയ്യാൻ ഒരു ടെർമിനേറ്റർ ഭൂതകാലത്തേക്ക്, അതായത് ഇന്നിലേക്ക് എത്തുന്നതും, അത് തടയാനുള്ള ചിലരുടെ ചെറുത്തുനിൽപ്പും എല്ലാമാണ് ഡാർക്ക് ഫെയ്റ്റിന്റെ കഥ. ടെർമിനേറ്റർ സീരീസിലെ സീനിയേഴ്‌സായ ലിൻഡ ഹാമിൽട്ടൺ, അർണോൾഡ് ഷ്വാർസെനഗർ എന്നിവരെല്ലാം ചിത്രത്തിലുണ്ട് എന്നതും എടുത്ത് പറയേണ്ട ഒരു വസ്തുതയാണ്. ജോൺ കോണർ എന്ന കഥാപാത്രത്തെ ഫോക്കസ് ചെയ്തിട്ടുള്ളത് ആയിരുന്നു മുൻ ചിത്രങ്ങൾ എല്ലാം എങ്കിൽ ഇവിടെ പ്രാധാന്യം നതാലിയ റെയ്‌സ് അവതരിപ്പിച്ച ഡാനി റാമോസ് എന്ന കഥാപാത്രത്തിനാണ്. മനുഷ്യ കുലത്തിന്റെ അതിജീവനത്തിൽ നിർണ്ണായക വേഷം കൈകാര്യം ചെയ്യാനുള്ള ഡാനിയെ സംരക്ഷിക്കാൻ ഉള്ള ശ്രമത്തിലാണ് കഥാപാത്രങ്ങളെല്ലാം.

🔸നല്ലതും മോശവും എന്ന് അനുഭവപ്പെട്ട കാര്യങ്ങളിലേക്ക് കടക്കുക ആണെങ്കിൽ ആദ്യമേ പറയാം ഇതൊക്കെ മുന്നേ എവിടെയോ കണ്ടിട്ടുണ്ടല്ലോ എന്നൊരു ഫീൽ ചിത്രം പലയിടത്തും നൽകുന്നുണ്ട്, പ്രത്യേകിച്ചും ജഡ്ജ്‌മെന്റ് ഡേ പോലെയുള്ള മുൻകാല ചിത്രങ്ങളോട് സാമ്യം ഉണ്ട് ചിത്രത്തിന്. ടിം മില്ലർ എന്നൊരു സംവിധായകനും ഇത്രയും മികച്ച കാസ്റ്റും ഉണ്ടായിട്ടും ഇത്രെയേ പറ്റിയുള്ളൂ എന്നൊരു തോന്നലും കിട്ടിയേക്കാം മുകളിൽ പറഞ്ഞ കാരണത്താൽ. പിന്നെ ചിത്രം കണ്ട് കഴിഞ്ഞപ്പോൾ തോന്നിയൊരു രസകരമായ കാര്യം, പ്രധാന കഥാപാത്രങ്ങളിൽ ഒന്നിനെ എടുത്ത് മാറ്റിയാലും കഥയിൽ ഒരു മാറ്റവും വരില്ല, സംഭവിച്ചതെല്ലാം വലിയ മാറ്റങ്ങൾ ഇല്ലാതെ തന്നെ നടക്കും എന്ന വസ്തുത.

🔸ആക്ഷൻ രംഗങ്ങളിൽ സിനിമ ബാക്ക്സീറ്റിലോട്ട് മാറുന്നില്ല, അത്യാവശ്യം ഫോമിൽ തന്നെയാണ്. പെർഫോമൻസ് നോക്കുക ആണെങ്കിൽ ഉദ്ദേശം മൂന്ന് പതിറ്റാണ്ടിന് ശേഷം മടങ്ങി എത്തിയ ലിൻഡയുടെ പെർഫോമൻസ് എടുത്ത് പറയേണ്ടി ഇരിക്കുന്നു, കമാൻഡിങ് എന്നൊക്കെ വിശേഷിപ്പിക്കാവുന്ന സാന്നിധ്യം ആണ് അവർ ഓരോ സീനിലും, അർണോൾഡ് ഉൾപ്പെടെ ഉള്ള മറ്റുള്ളവരും ഒട്ടും മോശമാക്കിയില്ല. തുടക്കവും ഒടുക്കവും ഉള്ള ആക്ഷൻ സെറ്റ് പീസുകൾ അത്യാവശ്യം നന്നായിരുന്നു, കഥ അർഹിക്കുന്ന ഒരു സീരിയസ് ടോണിൽ സിനിമ മുന്നോട്ട് പോവുന്നുമുണ്ട്. എല്ലാം കൂടി കൂട്ടി വായിക്കുമ്പോൾ ഒരു തവണ ചുമ്മാ കാണാനുള്ള ചിത്രം എന്ന് പറഞ്ഞ് വിടാം ടെർമിനേറ്ററിനെ, അത്ര മാത്രം.

Verdict : Watchable

DC Rating : 68/100