1022. Judas And The Black Messiah (2021)

Director : Shaka King

Genre : Drama

Rating : 7.5/10

Country : USA

Duration : 126 Minutes

🔸ജദാസ് ആൻഡ് ദി ബ്ലാക്ക് മെസ്സിയാ എന്ന ചിത്രം കണ്ട് കൊണ്ടിരിക്കെ ആദ്യം സ്‌ട്രൈക്കിങ് ആയി തോന്നിയ കാര്യം ഡാനിയേൽ കാലുയ എന്ന നടനാണ്. മുൻപ് പല സിനിമകളിലും കണ്ടിട്ടുണ്ട് എങ്കിലും അദ്ദേഹത്തിന്റെ ആക്ടിങ് എബിലിറ്റിയെ കുറിച്ച് വ്യക്തമായ ധാരണ ഒന്നും ഇല്ലായിരുന്നു, ആ ലെവൽ മനസിലാക്കാൻ ഏറ്റവും മികച്ച ഉദാഹരണം ഈ ചിത്രം തന്നെ ആവും. ഫ്രെഡ് ഹാംപ്ടൺ എന്ന അമേരിക്കയുടെ കഴിഞ്ഞ നൂറ്റാണ്ടിലെ ചരിത്രത്തിലെ വളരെ പ്രധാനപ്പെട്ട പൊളിറ്റിക്കൽ ഫിഗറിനെ കാലുയ സ്‌ക്രീനിൽ അവിസ്മരണീയമാം വിധം അവതരിപ്പിച്ചിട്ടുണ്ട്.

🔸കഥയുടെ പശ്ചാത്തലം അറുപതുകളുടെ അവസാനം ആണ്, അതായത് അമേരിക്കയിൽ കറുത്ത വംശജരുടെ കാര്യത്തിൽ അരക്ഷിതാവസ്ഥ നിറഞ്ഞ് നിന്നിരുന്ന കാലഘട്ടം. മാർട്ടിൻ ലൂതർ കിംഗ് പോലെയുള്ള നേതാക്കളുടെ അഭാവത്തിൽ ബ്ലാക്ക് പാന്തേഴ്സ് പോലുള്ള സംഘടനകൾ ഉയർന്ന് വന്ന, അഹിംസയുടെ പാതയിൽ നിന്നും എന്ത് കൊണ്ട് മാറി നടന്ന് കൂടാ എന്ന് പ്രസ്തുത വിഭാഗം ചിന്തിച്ച് തുടങ്ങിയ കാലഘട്ടം. ഈ ഒരു സമയത്ത് അമേരിക്കൻ കറുത്ത വംശജരുടെ ഇടയിൽ നിന്നും ഉയർന്ന് വന്ന നേതാവാണ് ഫ്രെഡ് ഹാംപ്ടൺ, ഈ ചിത്രം അയാളുടേതാണ്.

🔸ഹാംപ്ടണിന്റെ വളർച്ചയും, ആ വിഭാഗത്തിന് ഇടയിൽ അയാൾക്കുള്ള സ്വാധീനവും കുറച്ചൊന്നുമല്ല അധികാര കേന്ദ്രങ്ങളെ അലോസര പെടുത്തിയത്. എല്ലാവരെയും ചേർത്ത് പറയാനാവില്ല, പക്ഷെ റേസിസവും ചർമ്മത്തിന്റെ നിറം തങ്ങളെ സുപ്പീരിയർ ആക്കും എന്ന ചിന്ത വെച്ച് പുലർത്തുന്നവർക്കും അയാൾ ഒരു ശത്രു തന്നെ ആയിരുന്നു. കാര്യങ്ങൾ തങ്ങളുടെ നിയന്ത്രണ പരിധിയിൽ നിന്നും കൈവിട്ട് പോവാതിരിക്കാൻ അധികൃതർ തിരഞ്ഞെടുത്തത് പഴയ ചാര പരിപാടി തന്നെ ആയിരുന്നു താനും, അങ്ങനെയാണ് വില്യം ഒനീൽ കഥയിലേക്ക് വരുന്നത്.

🔸ശക്തമായ പ്രകടനം ആണ് ചിത്രത്തിന്റെ നട്ടെല്ല്, ഹാംപ്ടണിന്റെയും ഒനീലിന്റെയും കഥ അറിയാവുന്നവർക്ക് സ്റ്റോറി പോവുന്നത് എങ്ങനെ എന്നും എങ്ങോട്ട് എന്നും കൃത്യമായി പറയാൻ കഴിയും എന്നതാണ് ഒരല്പം നെഗറ്റിവ് ആയി തോന്നിയത്, അതായത് കൈകാര്യം ചെയ്യുന്ന വിഷയങ്ങളിൽ പോലും ഔട്ട്‍സൈഡ് ദി ബോക്സിലേക്ക് വരുന്നില്ല. ബ്ലാക്ക് പാന്തേഴ്സ് എന്ന സംഘടനയെ പരാമർശിക്കുന്ന കഴിഞ്ഞ ആറ് മാസത്തിനിടെ പുറത്തിറങ്ങിയ രണ്ടാമത്തെ ചിത്രം ആണെങ്കിലും ഇപ്പോഴും ഒരു വ്യക്തത കിട്ടിയിട്ടില്ല പല കാര്യങ്ങളിലും എന്ന് പറയാം. ഈ രണ്ട് കാര്യങ്ങൾ ഒഴിച്ചാൽ മോശമായി ഒന്നും തന്നെ തോന്നിയില്ല, കാണാൻ ശ്രമിക്കുക.

Verdict : Very Good

DC Rating : 4/5 

1021. The Collini Case (2019)

Director : Marco Kreuzpaintner

Genre : Drama

Rating : 7.2/10

Country : Germany

Duration : 123 Minutes

🔸അറുപതുകളിലാണ് ജാങ്കോ എന്ന ഇറ്റാലിയൻ വെസ്റ്റേൺ ചിത്രം പുറത്തിറങ്ങുന്നത്, പിന്നീട് ഈ ലോൺലി ഔട്ട്ലോ കഥാപാത്രത്തെ ബേസ് ചെയ്ത് കൊണ്ട് ഒട്ടനവധി സിനിമകൾ വന്നിട്ടുണ്ട് എങ്കിലും ഇവയിൽ ഏറ്റവും സ്‌ട്രൈക്കിങ് ആയി തോന്നിയത് മുകളിൽ സൂചിപ്പിച്ച ചിത്രം തന്നെ. ഇങ്ങനെ ഒരഭിപ്രായം ഉണ്ടാവാനുള്ള പ്രധാന കാരണങ്ങളിൽ ഒന്ന് ടൈറ്റിൽ കഥാപാത്രത്തെ അവതരിപ്പിച്ച ഫ്രാങ്കോ നീറോ എന്ന നടൻ തന്നെയാണ്, പുള്ളിയുടെ ആ ഒരു കമാൻഡിങ് പ്രെസൻസ്, സ്റ്റൈൽ ഒക്കെ കിടിലനായിരുന്നു എന്ന് പറയാതെ വയ്യ.

🔸ഇത്രയും വർഷങ്ങൾക്ക് ശേഷം വീണ്ടും ഫ്രാങ്കോയെ കാണാൻ കഴിഞ്ഞു എന്നത് തന്നെയാണ് കോളിനി കേസിനെ പറ്റി പറയേണ്ട ആദ്യ കാര്യങ്ങളിൽ ഒന്ന്, ഇവിടെയും ടിയാൻ ടൈറ്റിൽ കഥാപാത്രം തന്നെയാണ്, പഴയ ആ ടഫ് ആറ്റിറ്റിയൂഡ്, പ്രസൻസ് ഒക്കെ അതെ പടി ഇവിടുണ്ട്, കാലം അയാൾക്ക് കൂടുതൽ ഗാംഭീര്യമാണ് നൽകിയത് എന്ന് തോന്നുന്നു. എന്ത് തന്നെ ആയാലും ഈ സിനിമയിലേക്ക് വരാം, ഏറെക്കുറെ ഒരു കോർട്ട് റൂം ഡ്രാമ തന്നെയാണ് ഈ ചിത്രം, നല്ല ഒരു സ്റ്റോറിയും അതിന്റെ അവതരണവും ബാക്ക്ബോൺ ആയി ചിത്രത്തിൽ ഉണ്ട്.

🔸ഹാൻസ് മേയർ എന്ന ജർമൻ ബിസിനസ് ടൈക്കൂൺ ഒരുനാൾ കൊല്ലപ്പെടുകയാണ്, വെടി ഏറ്റാണ് മരണം, കൊലപാതകിയെ ആ പരിസര പ്രദേശത്ത് നിന്ന് തന്നെ പോലീസ് അറസ്റ്റും ചെയ്തു. യാതൊരു വിധ പ്രതിരോധമോ പ്രതിഷേധമോ ഇല്ലാതെയാണ് കൊലയാളിയായ കോളിനി കീഴടങ്ങിയത്, അയാളുടെ മനോഭാവം തന്റെ ദൗത്യം പൂർത്തിയാക്കിയ യോദ്ധാവിനോട് സാമ്യം ഉള്ള രീതിയിൽ ഒരു തരം നിസ്സംഗത ആയിരുന്നു താനും. കൊല്ലപ്പെട്ട മേയർ ഒരു സാധാരണക്കാരനാണ്, രാജ്യത്തിൻറെ നയതന്ത്ര മേഖലയിൽ വരെ സ്വാധീനമുള്ള ഒരു പ്രമുഖൻ തന്നെയാണ്.

🔸ഈ ഒരു കേസിന്റെ വിചാരണ വേളയാണ് ചിത്രം കഥയ്ക്കായി തിടഞ്ഞെടുത്തിരിക്കുന്നത്. പകയും പ്രതികാരവുമാണ് കൊലയ്ക്ക് പിന്നിലെ ഡ്രൈവിങ് ഫോഴ്‌സ് എന്നത് വ്യക്തമാണ്, അപ്പോഴും ചോദ്യങ്ങൾ ഒരുപാട് ബാക്കി കിടക്കുന്നു. കോളിനിക്ക് വേണ്ടി വാദിക്കാൻ എത്തുന്ന പബ്ലിക് പ്രോസിക്യൂറ്റർ ആയ നായക കഥാപാത്രത്തിന്റെ വ്യൂ പോയിന്റിലൂടെ ആണ് ചിത്രം മുന്നോട്ട് പോവുന്നത്. രണ്ട് മണിക്കൂർ ദൈർഘ്യത്തിൽ കണ്ട് വിടാവുന്ന ഒരു ചെറിയ ചിത്രമാണ് കോളിനി കേസ്, അതിൽ കൂടുതൽ അവകാശ വാദങ്ങൾ ഒന്നുമില്ല, താല്പര്യം ഉണ്ടെങ്കിൽ കണ്ട് നോക്കാം.

Verdict : Good

DC Rating : 3.75/5 

1020. Gumnaami (2019)

Director : Srijit Mukherji

Genre : Drama

Rating : 7.8/10

Country : India

Duration : 137 Minutes

🔸ഇന്ത്യ സ്വതന്ത്രയായ കാലഘട്ടത്തേക്കാൾ പഴക്കമുള്ള വിവാദമാണ് നേതാജി സുഭാഷ് ചന്ദ്ര ബോസിന്റെ മരണവുമായി ബന്ധപ്പെട്ടുള്ളത്, ഇത്രയും വർഷങ്ങൾക്ക് ഇപ്പുറവും ശാസ്ത്ര സാങ്കേതിക ആശയ വിനിമയ മാർഗങ്ങൾ അത്രയ്ക്ക് പുരോഗമിച്ചിട്ട് പോലും ഈ വിഷയത്തിൽ വ്യക്തമായ ഒരുത്തരം നേടാനോ, ചോദ്യങ്ങൾക്ക് മറുപടി നൽകാനോ ബന്ധപ്പെട്ടവർക്ക് കഴിഞ്ഞിട്ടില്ല എന്നത് അങ്ങേയറ്റം നിരാശാജനകമായ ഒരു കാര്യം തന്നെയാണ്. ഈ കാര്യങ്ങളെ, മിസ്റ്ററിയെ മറ്റൊരു വ്യൂ പോയിന്റിലൂടെ നോക്കി കാണുകയാണ് ഗുംനാമി എന്ന ബംഗാളി ചിത്രം.

🔸നേതാജിയുടെ മരണവുമായി ബന്ധപ്പെട്ട് പൊതുവെ മൂന്ന് തിയറികളാണ് കേട്ട് കേൾവി ഉള്ളത്, അതായത് ഒഫീഷ്യൽ ആയി വിശ്വസിക്കപ്പെടുന്ന ആദ്യത്തേത് നമുക്കെല്ലാം പരിചിതമായ ജപ്പാനിൽ നടന്ന, നടന്നു എന്ന് പറയപ്പെടുന്ന വിമാന അപകടവും അതിനെ തുടർന്നുണ്ടായ മരണവുമാണ് ആദ്യ വേർഷൻ. ഗവണ്മെന്റ് തലത്തിൽ ഔദ്യോഗികമായി ലഭിച്ച വിശദീകരണം ആണെങ്കിലും ഇതിൽ ഒരുപാട് പിഴവുകൾ ഒക്കെ ഉള്ളതായാണ് പറയപ്പെടുന്നത്, പിൽക്കാലത്ത് ഗവണ്മെന്റ് നിയമിച്ച മുഖർജി കമ്മീഷനും ഈ വിശദീകരണം പാടെ തള്ളിയിരുന്നു.

🔸ഈ ഔദ്യോഗിക വിശദീകരണം തെറ്റാണെങ്കിൽ അദ്ദേഹത്തിന് എന്ത് സംഭവിച്ചു എന്ന ചോദ്യത്തിൽ നിന്നുമാണ് പിന്നീടുള്ള രണ്ട് തിയറികൾ ഉരുത്തിരിഞ്ഞ് വരുന്നത്. ഇവയിൽ ആദ്യത്തേത് പ്രകാരം നേതാജി തന്റെ മരണം സ്റ്റേജ് ചെയ്ത ശേഷം റഷ്യയിലേക്ക് രക്ഷപ്പെട്ടു എന്നും തുടർന്ന് അവിടത്തെ ജയിലിൽ ആയിരുന്നു എന്നുമൊക്കെ പറയപ്പെടുന്നുണ്ട്, അറുപതുകൾ വരെ അദ്ദേഹം ജീവിച്ചിരുന്നതായും ഈ വേർഷൻ സമര്ഥിക്കുന്നുണ്ട്. ഇതും അല്ലാത്ത മൂന്നാമത്തെ തിയറിയിലേക്കാണ് ഈ ചിത്രം കടന്ന് ചെല്ലുന്നത്.

🔸ഇത് പ്രകാരം നേതാജി തന്റെ പിൽക്കാല ജീവിതം ഗുംനാമി എന്ന പേരുള്ള ഒരു സന്യാസി വര്യനായി ജീവിച്ച് തീർത്തു എന്നാണ് പറയപ്പെടുന്നത്, അതും ഇന്ത്യയിൽ തന്നെ. ഈ തിയറി അടിസ്ഥാനപ്പെടുത്തി അനുജ് ധർ, ചന്ദ്രചൂർ എന്നിവർ നടത്തിയ കണ്ട് പിടിത്തങ്ങളുടെയും മറ്റും ഫിക്ഷനലൈസ്ഡ് വേർഷനാണ് ചിത്രം. ഈ വിഷയവുമായി ബന്ധപ്പെട്ട് ഗവൺമെന്റിന് സംഭവിച്ച പിഴവുകളും, ഇപ്പോഴും കാണിക്കുന്ന നിസ്സംഗ ഭാവവും എല്ലാം ചിത്രം നല്ല തോതിൽ തന്നെ വിമർശിക്കുന്നുണ്ട്. ഒരുപക്ഷെ ഒരുകാലത്തും ഉത്തരം കിട്ടാൻ പോകുന്നില്ലാത്ത ഒരു ചോദ്യം ആയിരിക്കും നേതാജിയുടെ മരണവുമായി ബന്ധപ്പെട്ടുള്ളത്, പക്ഷെ ഇങ്ങനെയൊരു ദുരൂഹാവസ്ഥ അദ്ദേഹം തന്റെ മരണത്തിൽ അർഹിക്കുന്നില്ല എന്ന കാര്യത്തിൽ രണ്ടഭിപ്രായം വരാൻ സാധ്യതയില്ല, എന്നെങ്കിലും ഈ ചോദ്യത്തിന് ഉത്തരം കിട്ടുമായിരിക്കും, അല്ല കിട്ടണം.

Verdict : Very Good

DC Rating : 4/5 

1019. Malmkrog (2020)

Director : Christi Puiu

Genre : Drama

Rating : 5.9/10

Country : Romania

Duration : 201 Minutes

🔸കരിസ്റ്റിയൻ പിയുവിന്റെ ദി ഡെത് ഓഫ് മിസ്റ്റർ ലാസറസ്ക്യു ഈ നൂറ്റാണ്ടിലെ തന്നെ ഏറ്റവും ഇഷ്ട്ടപ്പെട്ട ചിത്രങ്ങളിൽ ഒന്നാണ്, വളരെ ശക്തമായ വിഷയങ്ങൾ അനായാസം എന്ന് തോന്നിക്കും വിധം കൈകാര്യം ചെയ്തിരിക്കുന്ന സംവിധായകന്റെ കഴിവിൽ അന്നേ ഇമ്പ്രസ്ഡ് ആയിരുന്നു എന്ന് പറഞ്ഞാൽ തെറ്റില്ല. ഈ ഒരു കാര്യം മാത്രം മതിയായിരുന്നു പ്രിന്റ് കിട്ടിയാൽ ഉടനെ തന്നെ മാംക്രൊഗ് കാണാൻ, പോരെങ്കിൽ ചിത്രത്തിന്റെ പ്രെമിസ് തന്നെ വളരെ കൗതുകം ജനിപ്പിക്കുന്ന ഒന്നായിരുന്നു താനും.

🔸ചിത്രത്തെ കുറിച്ച് കൂടുതൽ പറയുന്നതിന് മുന്നേ, ഫാസ്റ്റ് ആയി കഥ പറഞ്ഞ് പോവുന്ന, ത്രിൽ എലെമെന്റുകൾ ഉള്ള, അമ്പരപ്പിക്കുന്ന ട്വിസ്റ്റുകളും കാര്യങ്ങളും ഒക്കെയുള്ള സിനിമകൾ അന്വേഷിച്ച് വരുന്നവരും അത്തരം സിനിമകൾ പ്രതീക്ഷിക്കുന്നവരും ഈ ഭാഗത്തേക്ക് വരേണ്ടതില്ല, കാണണ്ട എന്ന് തന്നെ പറയും കാരണം നിങ്ങളെ എന്റർടെയ്ൻ ചെയ്യാനുള്ള ഒന്നും ഇവിടെ കാണാൻ കഴിഞ്ഞേക്കില്ല. നന്മയും തിന്മയും, ചരിത്രം, ഭൂമി, സംസ്കാരം, വിശ്വാസം പോലുള്ള കാര്യങ്ങളെ കുറിച്ചുള്ള ഒരു അവലോകനം ഒക്കെ പോലെയാണ് സിനിമ പുരോഗമിക്കുന്നത്, ആ ഒരു ബോധ്യത്തിൽ കാണാൻ ശ്രമിക്കുക.

🔸ഇരുപതാം നൂറ്റാണ്ടിന്റെ ആരംഭത്തിൽ ആണ് ചിത്രം തുടങ്ങുന്നത്, മഞ്ഞ് മൂടി കിടക്കുന്ന ഒരു ഗ്രാമ പ്രദേശത്ത് ഒരു ഒത്തുചേരൽ നടന്ന് കൊണ്ടിരിക്കുകയാണ്. വിവിധ തട്ടുകളുടെ പ്രതിനിധികൾ എന്നവണ്ണം അഞ്ച് കഥാപാത്രങ്ങൾ അവിടെ സന്നിഹിതരായിട്ടുണ്ട്. പിന്നീട് ആ കഥാപാത്രങ്ങളുടെ അത്യാവശ്യം ലോങ്ങ് ആയ സംഭാഷണങ്ങളിലൂടെ ആണ് കഥ മുന്നോട്ട് പോവുന്നത്, ഈ സംഭാഷണങ്ങളിൽ മുകളിൽ സൂചിപ്പിച്ച വിഷയങ്ങൾ എല്ലാം തന്നെ വളരെ പ്രധാനപ്പെട്ട കാര്യങ്ങളായി കടന്ന് വരുന്നുണ്ട്. ആറ് ചാപ്റ്ററുകളിലായി ആണ് കഥ പുരോഗമിക്കുന്നത്, ഉദ്ദേശം മൂന്നര മണിക്കൂറിന് അടുത്താണ് ദൈർഘ്യം.

🔸സംവിധായകന്റെ മുൻകാല ചിത്രങ്ങളുടെ അത്ര താല്പര്യം ഒന്നും അവതരണം വഴി ഈ ചിത്രം ജനിപ്പിക്കുന്നില്ല എങ്കിലും കൈകാര്യം ചെയ്യുന്ന വിഷയം അത്യാവശ്യം ഇണ്ട്രിഗ്യുയിങ് തന്നെ ആണ്. ഈ വിഷയങ്ങളിൽ താല്പര്യവും, സർവോപരി പരിചിതമല്ലാത്ത ഇത്യാദി കാര്യങ്ങളുടെ ഒരു വശം അറിയാനും ഗ്രഹിക്കാനും ഉള്ള മനസും, താല്പര്യവും ഉണ്ടെങ്കിൽ കണ്ട് നോക്കാവുന്നതാണ്. ഈ വർഷം കണ്ടതിൽ യുണീക് ആയി അനുഭവപ്പെട്ട ചിത്രങ്ങളിൽ ഒന്ന് കൂടിയാണ് മാംക്രൊഗ്.

Verdict : Good

DC Rating : 3.75/5 

1018. Boys In The Band (2020)

Director : Joe Mantello

Genre : Drama

Rating : 6.8/10

Country : USA

Duration : 122 Minutes

🔸കഴിഞ്ഞ കുറച്ച് പതിറ്റാണ്ടുകൾക്ക് ഇടെ തന്നെ, ഗേ അല്ലെങ്കിൽ ഹോമോ സെക്ഷുവൽ കമ്യുണിറ്റിയോടുള്ള ആളുകളുടെ മനോഭാവത്തിൽ വലിയ മാറ്റം വന്നിട്ടുണ്ട്. അതായത് ഒളിഞ്ഞും തെളിഞ്ഞും ഉള്ള ആക്രമണവും പരിഹാസവും ഒക്കെ നല്ല തോതിൽ ഉണ്ടെങ്കിലും ഒരു മഹാപാപമോ അപരാധമോ ആയി കാണുന്ന ആളുകളിൽ കുറവ് വന്നിട്ടുണ്ട് എന്നാണ് അനുമാനം. ഈ ഒരു ഫാക്റ്റർ വെച്ച് നോക്കുമ്പോൾ ബോയ്സ് ഇൻ ദി ബാൻഡ് എന്ന സിനിമയും അതിന് ആധാരമായ പ്ളേയും എല്ലാം നേരിട്ട പ്രതികരണങ്ങൾ തമ്മിലും വലിയ അന്തരം ഉണ്ടാവേണ്ടതാണ്, കാരണം മുകളിൽ സൂചിപ്പിച്ച കാലഘട്ടത്തിൽ പതിറ്റാണ്ടുകൾക്ക് മുന്നെയാണ് പ്രസ്തുത പ്ളേ കാഴ്ചക്കാർക്ക് മുന്നിൽ എത്തിയത്, ഒട്ടും ആശാവഹം ആയിരുന്നില്ല പ്രതികരണങ്ങൾ.

🔸ആദ്യ പ്രദർശനത്തിന് അൻപത് വർഷങ്ങൾക്ക് ശേഷം നെറ്റ്ഫ്ലിക്സ് സംരംഭമായി പുനരവതരിപ്പിക്കുമ്പോൾ നടൻമാർ എല്ലാവരും തന്നെ ഓപൺലി ഗേ ആയവർ കൂടിയാണ് എന്ന പ്രത്യേകത ചിത്രത്തിനുണ്ട്. ആദ്യ അവതരണത്തിൽ അഭിനേതാക്കളായി എത്തിയ നടന്മാരെ അവരുടെ ഏജന്റുമാർ ഉൾപ്പെടെ ഇതിന്റെ ഭാഗമായി മാറുന്നതിൽ നിന്ന് വിലക്കിയ സംഭവമൊക്കെ നല്ല രീതിയിൽ തന്നെ ഡോക്യുമെന്റ് ചെയ്യപ്പെട്ടതാണ്, ആ ഒരു അന്തരം നമുക്ക് വ്യക്തമായി മനസിലാക്കാം. സിനിമയിലേക്ക് കടക്കുക ആണെങ്കിൽ ഒരു സ്ലോ ബേൺ, ഡയലോഗ് ഓറിയന്റഡ് ഡ്രാമ ചിത്രമാണ് ബോയ്സ് ഇൻ ദി ബാൻഡ്.

🔸നഗരത്തിലെ ഒരു കൂട്ടം ഗേ ആയ വ്യക്തികൾ തമ്മിൽ അടുപ്പവും ബന്ധവും അവർ കാത്ത് സൂക്ഷിക്കുന്നുണ്ട്. വീക്കെന്റുകളിലും അത് പോലുള്ള വിശേഷ ദിവസങ്ങളിലും എല്ലാം ഒരു ഒത്ത് ചേരൽ അവർക്കിടയിൽ ഉണ്ടാകാറുണ്ട്. മദ്യപാനവും, ആഘോഷവും എല്ലാമായി മുന്നോട്ട് പോവുന്ന ആ ദിവസം ഒരു പരിധി വരെ യഥാർത്ഥ ജീവിതത്തിലെ അഭിനയവും കയ്‌പേറിയ അനുഭവങ്ങളും എല്ലാം അതിജീവിക്കാൻ സഹായിക്കാറുണ്ട്. ഇത്തരത്തിൽ ഒരു ഒത്തുചേരൽ ദിവസമാണ് നമ്മുടെ കഥയ്ക്ക് ആധാരമായ സംഭവം അരങ്ങേറുന്നത്.

🔸ഈ കമ്യുണിറ്റിയുടെ പരിപാടികൾക്ക് ഇടയിലേക്ക് ഗേ അല്ലാത്ത ഒരാൾ എത്തുന്നതും തുടർന്ന് അരങ്ങേറുന്ന ആശയ കുഴപ്പങ്ങളും കാര്യങ്ങളും ഒക്കെയാണ് ഈ ചിത്രത്തിന്റെ പ്ലോട്ട് ലൈൻ. ഡ്രാമ വിഭാഗം സിനിമകൾ ഇഷ്ടപ്പെടുന്നവർക്ക് നല്ലൊരു ട്രീറ്റ് ആയിരിക്കും ഈ ചിത്രം, ഒരു ഓൾ സ്റ്റാർ കാസ്റ്റ് തന്നെയുണ്ട് ചിത്രത്തിന്, അവർ എല്ലാവരും വ്യക്തിത്വം ഉള്ള ശക്തരായ കഥാപാത്രങ്ങളെ തന്നെയാണ് അവതരിപ്പിച്ചിരിക്കുന്നതും. ഇത്രയും പറഞ്ഞതിൽ നിന്നും താല്പര്യം തോന്നുന്നെങ്കിൽ, തോന്നുന്നെങ്കിൽ മാത്രം കണ്ട് നോക്കാവുന്നതാണ്.

Verdict : Good

DC Rating : 3.75/5 

1017. Train (2020)

Director : Ryu Seung-Jin

Genre : Mystery

Rating : 8/10

Seasons : 01

Episodes : 10

Duration : 60 Minutes

🔸കൊറിയൻ ഡ്രാമകൾ പലപ്പോഴും അമ്പരപ്പിച്ച ചരിത്രമുണ്ട്, പ്രത്യേകിച്ചും അവരുടെ കൺസപ്റ്റുകൾ കൊണ്ട്. ഇത് പോലത്തെ ഐറ്റംസ് എന്ത് കൊണ്ട് നമ്മടെ ഒന്നും തലയിൽ ഉദിക്കുന്നില്ല എന്ന് തോന്നിപ്പിച്ചവ ഒരുപാടെണ്ണം കാണിച്ച് തരാൻ കഴിയും. സിഗ്നൽ, ടണൽ, എറ്റേർണൽ മൊണാർച്ച് പോലെയുള്ള സീരീസുകൾ പ്രസ്തുത വിഭാഗത്തിൽ പെടുത്താവുന്നതാണ്, കൺസപ്റ്റ് കൊണ്ട് ആ വിശേഷണം ട്രെയിനും അർഹിക്കുന്നുണ്ട് എന്നതാണ് സത്യം. സിഗ്നൽ ടണൽ ഒക്കെ പോലെ അത്രയും നിലവാരത്തിലേക്ക് ഉയരുന്നതായി അഭിപ്രായം ഇല്ലെങ്കിലും ഒരു വേർതി വാച്ച് ആണ് ട്രെയിൻ എന്ന പന്ത്രണ്ട് എപ്പിസോഡ് ടീവി സീരീസ്.

🔸വർഷങ്ങളായി അടഞ്ഞ് കിടക്കുന്ന ഒരു റെയിൽവേ സ്റ്റേഷൻ ആണ് നമ്മുടെ കഥാ പശ്ചാത്തലം, ഉദ്ദേശം അഞ്ച് വർഷങ്ങൾ കഴിഞ്ഞു ഈ സ്റ്റേഷൻ ഉപയോഗ ശൂന്യം ആയിട്ട്. നഗര പ്രദേശത്ത് നിന്ന് മാറി ഒരു ശ്മശാന സമാനമായ അവസ്ഥയിലാണ് ഇന്ന് ആ പ്രദേശം, ആരും തിരിഞ്ഞ് നോക്കാറ് പോലുമില്ല. താൻ അന്വേഷിക്കുന്ന ഒരു പെറ്റി കേസുമായി ബന്ധപ്പെട്ടുള്ള അന്വേഷണമാണ് ഒരു നാൾ രാത്രി നായക കഥാപാത്രത്തെ അവിടേക്ക് എത്തിക്കുന്നത്. ഇവിടെ നിന്നും അന്നേ ദിവസം നായകന് കുറച്ച് മനുഷ്യ അസ്ഥിയുടെ അവശിഷ്ടങ്ങൾ ലഭിക്കുകയാണ്.

🔸ഒരല്പം കോമ്പ്ലിക്കേറ്റഡ് ആയ ഒരു കേസ് അവിടെ നിന്നും ആരംഭിക്കുകയാണ്, അതായത് കൊലയാളിയെ പറ്റിയുള്ള സൂചനകൾ ഏതും തന്നെ അവിടെയില്ല, മാത്രമല്ല കൊല്ലപ്പെട്ടവർ തമ്മിൽ പ്രത്യക്ഷത്തിൽ കണക്ഷനോ ലിങ്കുകളോ ഒന്നുമില്ല, ഏറെക്കുറെ ഒരു രണ്ടാം സെലക്ഷന്റെ സാദ്ധ്യതകൾ അവിടെ ഉദിക്കുകയാണ്. ഇതല്ലാതെ കേസ് വിചിത്രമായി മാറാൻ വേറെയും ചില കാരണങ്ങൾ കൂടിയുണ്ട്, അവ സ്പോയ്ലർ ആയതിനാൽ തല്ക്കാലം ഉൾപ്പെടുത്തുന്നില്ല. എന്ത് തന്നെ ആയാലും സാദ്ധ്യതകൾ എല്ലാം വിരൽ ചൂണ്ടുന്നത് ഒരു സീരിയൽ കില്ലറിലേക്കാണ്.

🔸ഇനി അത്ര കോമ്പ്ലിക്കേഷൻ പോരെങ്കിൽ ആൾട്ടർനേറ്റ് ടൈംലൈൻ പോലെയുള്ള കൺസപ്റ്റുകൾ കൂടി സീരീസിലേക്ക് കടന്ന് വരുന്നുണ്ട്. മറ്റുള്ള കെ ഡ്രാമകളിൽ നിന്ന് വിഭിന്നമായി ലെങ്ത് താരമത്യേന കുറവാണ് ഈ സീരീസിന്, ഒരു മണിക്കൂർ പരിധിയിൽ ഉള്ള പന്ത്രണ്ട് എപ്പിസോഡുകൾ മാത്രമേയുള്ളു. ഒരു തവണ കാണാനുള്ള വകുപ്പ് ഉണ്ട് ഈ സീരീസിൽ, എന്നാൽ ഇതിലും മികച്ചവ കണ്ട അനുഭവവുമുണ്ട്, പ്രത്യേകിച്ചും കൊറിയയിൽ നിന്ന് തന്നെ. സൗണ്ട്ട്രാക്ക് നന്നായിരുന്നു, ഐ വിൽ നെവർ എന്ന സോങ് പ്രത്യേക പരാമർശം അർഹിക്കുന്നു.

Verdict : Good

DC Rating : 3.75/5 

1016. Ted Lasso (2020)

Developer : Bill Lawrence

Genre : Sports

Rating : 8.7/10

Seasons : 01

Episodes : 10

Duration : 29 - 33 Minutes

🔸ഈ സ്പോർട്സ് ഡ്രാമ ചിത്രങ്ങൾ പൊതുവെ പിന്തുടരുന്ന ഒരു ക്ളീഷേ പ്ലോട്ട് ലൈൻ ഉണ്ട്, അതായത് ഉപയോഗിച്ച് പഴകി തേഞ്ഞ അണ്ടർ ഡോഗ് സ്റ്റോറി. ഹോളിവുഡ് തൊട്ട് ഇങ് മലയാളം വരെ ഇതിന്റെ വക ബേധങ്ങൾ പല രൂപത്തിൽ നമുക്ക് കാണാൻ കഴിഞ്ഞേക്കും. ഈ ഒരു സിനറിയോയെ ഡ്യു ഡേറ്റ് എന്ന ചിത്രം നല്ല തോതിൽ തന്നെ കളിയാക്കി വിട്ടിട്ടുമുണ്ട്. ഈ കാര്യം ഇവിടെ പറഞ്ഞത് എന്താണെന്നാൽ ഈ ഒരു ക്ളീഷേ ഉണ്ടായേക്കും എന്ന തോന്നൽ കാരണമാണ് റ്റെഡ് ലാസോ കാണാൻ ഒരുപാട് വൈകിയത് എന്നത് കൊണ്ട് തന്നെ.

🔸അമേരിക്കൻ ഫുടബോളിൽ വിപ്ലവകരമായ റിസൾട്ടുകൾ സ്വന്തമാക്കിയ കോച് ആണ് റ്റെഡ് ലാസോ. ടാക്ടിക്കലി വളരെ ബുദ്ധിമാനായ പരിശീലകനോ, സ്ട്രിക്റ്റ് ആയ കോച്ചോ അല്ല പുള്ളി, കളിക്കാരോടുള്ള ആത്മബന്ധവും ലോക്കർ റൂമിലെ പോസിറ്റിവ് അന്തരീക്ഷവും ഒക്കെയാണ് അദ്ദേഹത്തിന്റെ സവിശേഷത. ഈ വസ്തുതകൾ തന്നെയാണ് അയാളെ അവിടെ വലിയ വിജയം ആക്കി മാറ്റിയതും. എന്നാൽ വിജയകരമായ ഒരു സീസണിന് ശേഷം ലാസോ തന്റെ കളം ഒന്ന് മാറ്റി ചവിട്ടുകയാണ്, ഇന്ഗ്ലണ്ടിലേക്ക്. ഇംഗ്ലീഷ് പ്രീമിയർ ലീഗിലേക്ക് അയാൾ കടന്ന് വരികയാണ്.

🔸റിച്ച്മണ്ട് എന്ന ടീമിനെയാണ് ലാസോ പരിശീലിപ്പിക്കാൻ പോവുന്നത്, കഴിഞ്ഞ കുറച്ച് സീസണുകളിലായി ദുരന്ത പൂർണമായ ഒരവസ്ഥയാണ് അവരുടേത്, റെലിഗെറ്റ് ചെയ്യപ്പെടാത്തത് കൊണ്ട് ഇപ്പോഴും ലീഗിൽ തുടരുന്നു എന്ന അവസ്ഥ. ഇതൊക്കെ ഒന്ന് മാറ്റി മറിക്കാം എന്ന ഉദ്ദേശത്തിലാണ് ലാസോ എത്തുന്നത്, പക്ഷെ ഒരു ചെറിയ പ്രശ്നമുണ്ട്. കാര്യം വേറെ ഒന്നുമല്ല ഇംഗ്ലീഷ് ഫുട്‍ബോളിനെ പറ്റി ലാസോയ്ക്ക് യാതൊന്നും പിടിയില്ല, എന്തിനധികം ഓഫ്‌സൈഡ് നിയമത്തെ പറ്റിയോ അവസാന സ്ഥാനത്ത് എത്തിയാൽ ടീം റെലിഗെറ്റ് ആവുന്നതിനെ പറ്റിയോ അയാൾക്ക് ഒരറിവുമില്ല.

🔸ഏറെക്കുറെ ഡിവൈഡ് ആയ ഒരു ലോക്കർ റൂമും അത്ര ജനുവിൻ അല്ലാത്ത ഉടമസ്ഥരും കൂടി ചേരുമ്പോൾ ലാസോയുടെ മുന്നിലുള്ള വെല്ലുവിളി കൂടുതൽ ഉയരത്തിലേക്ക് എത്തുകയാണ്. ഈ ഒരു പശ്ചാത്തലത്തിലാണ് പത്ത് എപ്പിസോഡുകളുള്ള റ്റെഡ് ലാസോ കഥ പറഞ്ഞ് തുടങ്ങുന്നത്. ഒരു ക്ലിഷേ സ്റ്റോറി സെറ്റപ്പ് ആയി തോന്നിയേക്കാം എങ്കിലും നമ്മൾ പ്രതീക്ഷിക്കുന്ന ഭാഗത്തേക്ക് അല്ല കഥ പോവുന്നത് എന്ന് കൂടി പറയാം. അത്യാവശ്യം നല്ല ഒരു ഫീൽ ഗുഡ് സീരീസ് കൂടിയാണ് റ്റെഡ് ലാസോ, രണ്ടാം സീസണിന് സാധ്യത തുറന്നിട്ട് കൊണ്ടാണ് അവസാനിക്കുന്നതും, കണ്ട് നോക്കാവുന്നതാണ്.

Verdict : Very Good

DC Rating : 4.25/5 

1015. Roulette City (2012)

Director : Thomas Lim

Genre : Drama

Rating : 7.7/10

Country : Macau

Duration : 76 Minutes

🔸സിനിമകൾ വഴി സന്ദർശനം നടത്തിയ രാജ്യങ്ങളിൽ പുതിയ ഒന്ന് കൂടി, മക്കാവു. ചൈനയുടെ അധീനതയിൽ പെട്ട ഒരു ചെറിയ രാജ്യം എന്നതൊഴിച്ചാൽ ഈ ഒരു രാജ്യത്തെ കുറിച്ചോ, അവിടത്തെ സാമൂഹിക സാംസ്‌കാരിക അവസ്ഥയെ കുറിച്ചോ യാതൊരു അറിവും ഉണ്ടായിരുന്നില്ല. ഈ ഒരു കാരണം കൊണ്ട് തന്നെ റൗലറ്റ് സിറ്റി എന്ന ചിത്രവും അതിന്റെ പിന്നാമ്പുറവും ബാക്ക്ഗ്രൗണ്ടും എല്ലാം അപരിചിതം ആയിരുന്നു, കാണുന്നത് വരെ. ഒരു മികച്ച ചിത്രം എന്ന അഭിപ്രായം ഇല്ലെങ്കിലും കണ്ട് നോക്കാവുന്ന ഒന്ന് തന്നെയാണ് ഈ സിനിമ.

🔸ചൈന കൈവശപ്പെടുത്തി വെക്കുന്ന രാജ്യത്തെ അന്തേവാസി ആണ് നമ്മുടെ നായക കഥാപാത്രമായ ടാക്. പ്രത്യേകിച്ച് പറയത്തക്ക ജോലി ഒന്നും ഇല്ലാത്ത ടാക്കിന് ബന്ധുക്കൾ എന്ന് പറയാൻ ആകെ ഉള്ളത് അമ്മയും ഒരു അമ്മാവനും മാത്രമാണ്. അമ്മ കുറച്ച് നാളുകളായി അസുഖവും മറ്റ് കാരണങ്ങളും കൊണ്ട് ബുദ്ധിമുട്ടുകയാണ് എങ്കിൽ അമ്മാവൻ ഏറെക്കുറെ ഒരു യൂസ്‌ലെസ് എന്ന വിശേഷണം അർഹിക്കുന്ന റെയർ പീസ് ആണ്. ഗാംബ്ലിങ് അല്ലെങ്കിൽ ചൂതാട്ടത്തിൽ അപാരമായ കഴിവുള്ള ആളാണ് ടാക്, അയാൾ തോൽക്കില്ല എന്ന് തന്നെ പറയാം, എങ്കിലും ഇതിനോട് പുള്ളിക്ക് വലിയ താല്പര്യം ഏതുമില്ല.

🔸ടാകിന്റെ കാമുകി കുറച്ച് വർഷങ്ങൾക്ക് മുന്നേ ഇത്തരത്തിൽ ഉള്ള ഒരു ചൂതാട്ടത്തിന് പേര് കേട്ട സ്ഥലത്തേക്ക് പൈസ ഉണ്ടാക്കാനായി പോയതാണ്, പിന്നീട് ഇന്നേവരെ മടങ്ങി വന്നിട്ടില്ല, അവൾക്ക് എന്ത് സംഭവിച്ചു എന്ന് ടാക്കിന് ഒട്ട് അറിയുകയുമില്ല. ഇപ്പോഴത്തെ പ്രശനം എന്താണെന്നാൽ അടിയന്തിരമായി കുറച്ച് പണം വേണം, അമ്മയ്ക്ക് ചികിത്സാ ആവശ്യത്തിനായി ആണ്. വലിയൊരു തുക ആയതിനാലും മറ്റ് മാർഗങ്ങൾ ഇല്ലാത്തതിനാലും ഗാംബ്ലിങ്ങിലേക്ക് തന്നെ നമ്മുടെ നായകൻ കടക്കുകയാണ്.

🔸ഒരു പ്രശസ്ത ചൂതാട്ട കേന്ദ്രത്തിൽ നായകൻ അമ്മാവനോടൊപ്പം എത്തുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ഈ ചിത്രത്തിന്റെ പ്രെമിസ്. വർഷങ്ങളുടെ ഇടവേളയിൽ മൂന്ന് ടൈമിലൂടെ കഥ പുരോഗമിക്കുന്നുണ്ട്. പല കഥാ സന്ദര്ഭങ്ങളും ഒരു പരിചിത ഫീൽ തരുന്നുണ്ട് എന്നതാണ് അനുഭവപ്പെട്ടത്, അതായത് ഫ്രഷ്നസ് ഇല്ല എന്ന് തന്നെ, സ്റ്റിൽ ഒരു തവണ കണ്ട് നോക്കാം, അതിനുള്ള വകുപ്പ് ചിത്രത്തിലുണ്ട്.

Verdict : Watchable

DC Rating : 2.75/5