741. Bojack Horseman (2014)

Creator : Raphael Bob-Waksberg

Genre : Black Comedy

Rating : 8.7/10

Seasons : 06

Episodes : 77

Duration : 25 - 27 Minutes

🔸ഇന്നേവരെ കണ്ട് തീർത്ത ടീവി സീരീസുകളിൽ ഏറ്റവും മികച്ച മൂന്നെണ്ണത്തിൽ ഒന്ന് ബൊജാക്ക് ഹോഴ്‌സ്മാൻ ആയിരിക്കും, സംശയത്തിന്റെ ഒരു കണിക പോലും ഇല്ലാതെ നൂറ് ശതമാനം ഉറപ്പിച്ച് പറയാൻ കഴിയുന്ന ഒരു കാര്യം. ഇത്രമേൽ എന്നെ  വൈകാരികമായി സ്പർശിച്ച മറ്റൊരു സീരീസ് ഇല്ല, ഏകാന്തത വിഷാദം ഒറ്റപ്പെടൽ അവഗണന തുടങ്ങിയ കാര്യങ്ങളെ പ്രസ്തുത സീരീസ് കൈകാര്യം ചെയ്തിരിക്കുന്ന വിധം സത്യത്തിൽ അതിന്റെ ടെക്സ്റ്റ് ബുക് ഉദാഹരണമാണ്. ബ്ലാക്ക് കൊമെടിയിൽ ചാലിച്ചുള്ള എഴുപത്തി ഏഴ് എപ്പിസോഡുകളിലൂടെ നമ്മൾ പരിചയപ്പെടുന്നത് ബൊജാക്ക് എന്ന പഴയകാല നടനെയാണ്.

🔸കഥ നടക്കുന്നതിന് ഉദ്ദേശം രണ്ട് പതിറ്റാണ്ട് മുൻപ് ടീവിയിൽ സംപ്രേഷണം ആരംഭിച്ച ഒരു സീരിയൽ ആയിരുന്നു ഹോഴ്‌സിങ് അറൗണ്ട്. സീരീസിലെ നായക കഥാപാത്രമായ കുതിരയെ അവതരിപ്പിച്ച വ്യക്തിയാണ് നമ്മുടെ കേന്ദ്ര കഥാപാത്രമായ ബൊജാക് ഹോഴ്‌സ്മാൻ. സീരീസിന്റെ കഥ എന്താണെന്നാൽ, അനാഥരായ മൂന്ന് കൊച്ച് കുട്ടികളെ കേന്ദ്ര കഥാപാത്രം തെരുവിൽ നിന്നും എടുത്ത് വളർത്തുന്നതും, തുടർന്ന് അവർക്കിടയിൽ ഉടലെടുക്കുന്ന ഊഷ്മളമായ ബന്ധവും ഒക്കെ ആയിരുന്നു. പതിഞ്ഞ രീതിയിൽ ആയിരുന്നു സീരീസിന്റെ തുടക്കം എങ്കിലും കാഴ്ചക്കാർക്കിടയിൽ ഒരു തരംഗമാവാൻ ഹോഴ്‌സിങ് അറൗണ്ടിന് അധികം സമയം വേണ്ടിവന്നില്ല.

🔸ഒരു ദശാബ്ദത്തോളം കാലം ഹോഴ്‌സിങ് അറൗണ്ട് ടീവിയിൽ പ്രക്ഷേപണം ചെയ്യപ്പെട്ടു, കുട്ടികളും മാതാപിതാക്കളും അടക്കം രാജ്യത്തൊന്നടങ്കം വലിയൊരു ആരാധക ശൃംഖലയും ഈ സീരീസിന് ലഭിക്കാനിടയായി. സ്വാഭാവികമായും അതിൽ കേന്ദ്ര കഥാപാത്രങ്ങളെ അവതരിപ്പിച്ച ബൊജാക് ഹോഴ്‌സ്‌മാനും കുട്ടികൾക്കും എല്ലാം തന്നെ ഒരു സെലിബ്രിറ്റി സ്റ്റാറ്റസും ലഭിക്കാനിടയായി. ഇത്രയും കാര്യങ്ങളാണ് ഭൂതകാലത്ത് സംഭവിച്ചത്, വർത്തമാന കാലത്തേക്ക് വരുമ്പോൾ സംഗതികൾ കുറച്ച് കൂടി വ്യത്യസ്തമാണ്.

🔸കാഴ്ചക്കാർ ഹോഴ്‌സിങ് അറൗണ്ടിനെയും അതിൽ അഭിനയിച്ചവരെയും മറന്ന് തുടങ്ങിയിരിക്കുന്നു, തങ്ങളുടെ ചെറുപ്പ കാലത്ത് സീരീസ് ആസ്വദിച്ച് കണ്ടവർ പോലും ഇന്ന് അതിനെ വക വെക്കുന്നില്ല. സീരീസിന്റെ ഓടിയൻസിൽ വലിയൊരു ശതമാനം കുട്ടികൾ ആയതിനാലും ഇന്നവർ ആ പ്രായം ഒക്കെ വിട്ട് മുതിർന്നവർ ആയി മാറിയതിനാലും ഇന്നത്തെ കുട്ടികൾക്ക് ഈ വക ഫാമിലി ഡ്രാമ പരിപാടികളോട് താല്പര്യം ഇല്ലാത്തതിനാലും ഹോഴ്‌സിങ് അറൗണ്ടും ബൊജാക് ഹോഴ്‌സ്മാനും വിസ്‌മൃതിയിൽ ആണ്ടതിൽ വലിയ അത്ഭുതം ഏതുമില്ല.

🔸ക്യാരക്ടർ ഡെവലൊപ്മെന്റ് എന്നതിന്റെയൊക്കെ ടെക്സ്റ്റ് ബുക് ഉദാഹരണമാണ് ഈ സീരീസ്, ടൈറ്റിൽ കഥാപാത്രത്തിൽ മാത്രം ഈ പുരോഗതി ഒതുങ്ങി നിൽക്കുന്നുമില്ല. ഉദാഹരണമായി മിസ്റ്റർ പീനട്ട് ബട്ടർ എന്ന ഒറ്റ കഥാപാത്രത്തെ മാത്രം നോക്കിയാൽ മതി, തുടക്കത്തിൽ ഒരല്പം വെറുപ്പ് ജനിപ്പിച്ച ഈ കഥാപാത്രമൊക്കെ അവസാന സീസൺ ആവുമ്പോൾ എവിടെ എത്തി നിൽക്കുന്നു എന്ന് കണ്ടവർക്ക് അറിയാനാവും. ബ്ലാക്ക് കൊമെടിയിൽ ചാലിച്ച് അവതരിപ്പിച്ച നല്ല ഇമോഷണൽ ആയൊരു കഥയാണ് ബൊജാക് ഹോഴ്‌സ്മാന്റെത്, അത് കണ്ട് അനുഭവിച്ച് തന്നെ അറിയണം, ബൊജാക്കിന് തുല്യം ബൊജാക് മാത്രം.

Verdict : Must Watch

DC Rating : 100/100

740. Friends (1995)

Creator : David Crane

Genre : Sitcom

Rating : 8.9/10

Seasons : 10

Episodes : 236

Duration : 20 - 22 Minutes

🔸പറഞ്ഞ് ഫലിപ്പിക്കാൻ ഏറ്റവും ബുദ്ധിമുട്ടുള്ള കാര്യം കൊമെടി ആണെന്ന് മുൻപ് ഏതോ ഒരു നടൻ പറഞ്ഞത് വായിച്ചിട്ടുണ്ട്. ഈ ഒരു കാര്യം മൈൻഡിൽ വെച്ച് കൊണ്ട് ചിന്തിച്ചാൽ സത്യത്തിൽ ഫ്രെണ്ട്സ് എന്ന ടീവി സീരീസ് ഇന്നും ഒരത്ഭുതമാണ്, ഇറങ്ങിയ കാലത്ത് ആരാധകരെ തമാശയിലൂടെ കയ്യിലെടുത്തു എന്ന് മാത്രമല്ല, മറിച്ച് റിപ്പീറ്റ് വാച്ചിൽ പോലും സീരീസ് തരുന്ന ആ ഒരു എന്റർടെയ്‌ൻമെന്റ്‌ വേറൊന്നിനോടും താരമത്യം ചെയ്യാൻ പറ്റാത്തതാണ്, ഇന്നും വർഷാവർഷം റിപ്പീറ്റ് വാച്ചിലൂടെ മാത്രം സീരീസ് സമ്പാദിക്കുന്ന തുകയുടെ വലിപ്പം മാത്രം മതി ഈ പറഞ്ഞത് ഒന്ന് കൂടി ബോധ്യപ്പെടാൻ.

🔸എന്ത് കൊണ്ട് ഫ്രണ്ട്സ് എന്ന് പലപ്പോഴും ചിന്തിച്ചിട്ടുണ്ട്, സ്ലാപ്സ്റ്റിക്ക് കൊമെടിയും വൺ ലൈൻ ജോക്സുകളും ഡൈനാമിക് ആയ കഥാപാത്രങ്ങളും, അവരുടെ റിലേഷൻഷിപ്പ് ഡ്രാമകളും, കഥാപാത്രങ്ങളായി എത്തിയ നടീ നടന്മാരുടെ അപാരമായ കെമിസ്ട്രിയും എല്ലാം പ്ലസ് പോയിന്റുകൾ തന്നെ. എന്നാൽ ഫ്രെണ്ട്സ് എന്ന ടീവി ഷോ സത്യത്തിൽ ഇത്രയും പ്രചാരം നേടാൻ, ഒരു ഫിനോമിനൻ എന്നൊക്കെ വിശേഷിപ്പിക്കാവുന്ന തലത്തിലേക്ക് ഉയരാൻ ഇതായിരുന്നോ കാരണം, അതോ മറ്റെന്തെങ്കിലും പ്രസക്തമായ കാര്യം ഉണ്ടോ എന്നത് ഇപ്പോഴും സംശയം ജനിപ്പിച്ചിരുന്ന ചോദ്യമാണ്, സീരീസ് കാണുന്നതിന് മുന്നേ വരെ.

🔸യൗവനത്തിലേക്ക് കടന്ന ആറ് പേരുടെ കഥയാണ് ഫ്രണ്ട്സ്, ഇവർ എല്ലാവരും തന്നെ അടുത്ത സുഹൃത്തുക്കളും, അടുത്തടുത്ത അപ്പാർട്മെന്റുകളിൽ താമസിക്കുന്നവരുമാണ്. ഇങ്ങനെയൊക്കെ ആണ് കാര്യമെങ്കിലും ജീവിതത്തിൽ ഒരു കുടുംബം ഒക്കെയായി സെറ്റിൽ ആവാൻ ഇവരിൽ ആർക്കും കഴിഞ്ഞിട്ടില്ല, ഒരു ചെറിയ അപവാദം ഉണ്ട് എന്ന് മാത്രം. കൂട്ടത്തിലെ മൂന്ന് പുരുഷന്മാരിൽ ഒരാളായ റോസ് ഒരിക്കൽ വിവാഹിതൻ ആയതാണ്, എന്നാൽ ചില പ്രത്യേക കാരണങ്ങൾ കാരണം ബന്ധം വേർപ്പെട്ടിട്ടുമുണ്ട്, മറ്റെല്ലാവരും ആദ്യമേ സൂചിപ്പിച്ചത് പോലെ തന്നെ.

🔸റോസിനെ മാറ്റി നിർത്തിയാൽ മറ്റ് കഥാപാത്രങ്ങൾ ചാൻഡ്ലർ, ജോയെ, മോണിക്ക, ഫീബി, റേച്ചൽ എന്നിവരാണ്. നീണ്ട പത്ത് വര്ഷങ്ങളാണ് ഫ്രെണ്ട്സ് സംപ്രേക്ഷണം ചെയ്യപ്പെട്ടത്, ഈ കാലയളവിനിടെ ഒരുപാട് മാറ്റങ്ങൾ കഥാ ഗതിയിലും കഥാപാത്രങ്ങളിലും എല്ലാം വന്നിട്ടുമുണ്ട്, അപ്പോൾ പോലും എല്ലാ കഥാപാത്രങ്ങളെയും തികച്ചും വ്യത്യസ്തർ എന്ന നിലയിൽ അവതരിപ്പിക്കാൻ അണിയറ പ്രവർത്തകർക്ക് കഴിഞ്ഞു എന്നത് വലിയൊരു കാര്യം തന്നെയാണ്, റിപ്പീറ്റ് വാച്ചിനും ഈ സീരീസ് തുറന്നിടുന്ന സാദ്ധ്യതകൾ ചെറുതല്ല.

🔸സങ്കീർണമായ കഥാ ഗതി ഒന്നും പ്രതീക്ഷിക്കേണ്ടതില്ല, സിറ്റുവേഷൻ കോമെടികളും, വൺ ലൈനർ ജോക്കുകളും തുടങ്ങി കഥാപാത്രങ്ങൾ മുഖഭാവം കൊണ്ടുവരെ ചിരിപ്പിക്കുന്ന ലൈറ്റ് ആയ ഒരു സീരീസാണ് ഫ്രെണ്ട്സ്. ആറ് പ്രധാന കഥാപാത്രങ്ങളിൽ ഏറ്റവും ഇഷ്ട്ടപ്പെട്ടവർ ചാൻഡ്ലറും ജോയേയും മോണിക്കയും ആയിരിക്കും, ഇതിൽ തന്നെ ചാൻഡ്ലർ ജോയെ സഖ്യം ഇന്നേവരെ കണ്ടതിൽ ഏറ്റവും മികച്ച ഡബിൾ ആക്ടുകളിൽ ഒന്നായിരിക്കും. നൂറ് ശതമാനം എന്ജോയ്മെന്റ് ഗ്യാരന്റീ ചെയ്യുന്ന ഒന്നാണ് ഫ്രെണ്ട്സ്, ഇത് പോലെ മറ്റൊന്ന് കണ്ടിട്ടുമില്ല, കാണാൻ ശ്രമിക്കുക.

Verdict : Very Good

DC Rating : 85/100

739. Marianne (2019)

Creator : Samuel Bodin

Genre : Horror

Rating : 7.5/10

Seasons : 01

Episodes : 08

Duration : 36 - 52 Minutes

🔸ദി ഹോന്റിങ് ഓഫ് ഹിൽ ഹോസ് എന്ന ടീവി സീരീസാണ് ആദ്യമായി കണ്ട നെറ്റ്ഫ്ലിക്സ് ഒറിജിനൽ ഹൊറർ സീരീസ്, സ്ഥിരം ക്ലിഷേ പ്രേത കഥകളിൽ നിന്ന് ഒരല്പം വ്യത്യസ്തമായിരുന്നു ഈ സീരീസ്, അനാവശ്യ ജംബ് സ്‌കെയറുകൾ നൽകി ആൾക്കാരെ വടി ആക്കുന്നതിന് പകരം മോശം പറയാനില്ലാത്ത കാമ്പുള്ള എന്ഗേയ്ജിങ് ആയൊരു സ്റ്റോറി കൂടി ഉണ്ടായിരുന്നു അവിടെ. ഈ സീരീസിന് ശേഷം കണ്ട അടുത്ത ഒറിജിനൽ സീരീസ് ആയിരുന്നു മറിയാൻ, പൊതുവെ നല്ല അഭിപ്രായങ്ങൾ എല്ലാ ദിക്കിൽ നിന്നും കേട്ടതിനാൽ തന്നെ പ്രതീക്ഷകൾ ഒരുപാട് ഉണ്ടായിരുന്നു പ്രസ്തുത സീരീസിൽ.

🔸ഈ ഹൊറർ സീരീസുകളിലും സിനിമകളിലും പൊതുവായി നോക്കുന്ന ഒരേയൊരു കാര്യം പുതുതായി എന്തെങ്കിലും അവ മുന്നോട്ട് വെക്കുന്നുണ്ടോ എന്ന് മാത്രമാണ്, കാരണം വേറൊന്നുമല്ല ഒരുപാട് തവണ പറഞ്ഞ് കഴിഞ്ഞ നമ്മൾ കണ്ട് പരിചയിച്ച ഒരു ഫോർമുല ഉണ്ട് ഈ ഹൊറർ വിഭാഗത്തിൽ, ക്ളീഷെയുടെ അങ്ങേത്തല എന്നൊക്കെ പറയാവുന്ന ഒരു പാറ്റേൺ. ആവശ്യത്തിൽ അധികം സിനിമകൾ ഈ ഒരു പാറ്റേൺ ഫോളോ ചെയ്ത് വന്നത് ഒരു പരിധി വരെ ഈ ജോണറിനോട് തന്നെ മടുപ്പ് നൽകിയതാണ്, മറിയാനിൽ നിന്ന് ലൈറ്റ് ആയി പറഞ്ഞാൽ പ്രതീക്ഷിച്ചതും എന്തെങ്കിലും ഒരു പുതുമ തന്നെയാണ്, എന്നാൽ കാര്യമായി ഒന്നും കിട്ടിയില്ല എന്നതാണ് സത്യം.

🔸എഴുത്തുകാരി ആണ് നമ്മുടെ നായികയായ എമ്മ, എഴുത്തുകാരി എന്ന് പറഞ്ഞാൽ ഹൊറർ ജോണർ ആണ് അവരുടെ പ്രധാന മേഖല. കഴിഞ്ഞ ഒരു പത്ത് പതിനഞ്ച് വർഷമായി അവർ മറിയാൻ എന്ന ഡാർക്ക് എന്റിറ്റിയുടെ കഥ എഴുതി തുടങ്ങിയിട്ട്, ഇതിനിടെ കഥയുടെ ഒരുപാട് വേർഷൻസ് ഒരു സീരീസ് പോലെ അവർ പുറത്തിറക്കി കഴിഞ്ഞിട്ടുണ്ട്. ഈ പുസ്തകങ്ങൾക്കെല്ലാം വലിയൊരു ഫാൻ ഫോളോയിങ്ങും ഉണ്ട്, ചുരുക്കി പറഞ്ഞാൽ അത്യാവശ്യം ആരാധകരും പ്രശസ്തിയും എല്ലാമുള്ള ഒരു ചെറിയ സെലിബ്രിറ്റി ആണ് എമ്മ.

🔸കഥ ആരംഭിക്കുന്നത് എമ്മ, മറിയാനെ പ്രധാന കഥാപാത്രമാക്കി പുറത്തിറക്കുന്ന പുതിയ പുസ്തകത്തിന്റെ പ്രകാശന വേളയിലാണ്, ഈ സമയം പ്രസ്തുത പുസ്തകം സീരീസിലെ അവസാനത്തേതാണ് എന്നും എമ്മ പറയുന്നുണ്ട്. ഈ ഒരു വാർത്തയോട് അത്ര നല്ല രീതിയിലല്ല അവിടെ കൂടി നിൽക്കുന്ന ആരാധകർ പ്രതികരിക്കുന്നത്, കാരണം ഒന്നാമത് വലിയൊരു ആരാധക വൃന്ദം ഉള്ള സീരീസ് ആയതിനാൽ തന്നെ കഥ അവസാനിക്കുന്നതിനോട് അവർക്ക് യോജിപ്പില്ല, രണ്ടാമത്തെയും ഏറ്റവും പ്രധാനപ്പെട്ടതുമായ കാരണം കഥയ്ക്ക് ഒരു ഓപ്പൺ എൻഡിങ് ആണ് എമ്മ നൽകിയിരിക്കുന്നത് എന്നതാണ്, ഇതും ആരാധകരെ അത്ര സുഖിപ്പിച്ചിട്ടില്ല. എന്ത് തന്നെ ആയാലും തന്റെ തീരുമാനത്തിൽ ഒരു മാറ്റവുമില്ല എന്നതാണ് അമ്മയുടെ നിലപാട്.

🔸പ്രശ്നങ്ങൾ ആരംഭിക്കുന്നത് കഥയിലെ മറിയാൻ യഥാർത്ഥ ലോകത്തേക്ക് വരുമ്പോഴാണ്, എമ്മയുടെ ജന്മനാട്ടിൽ മറിയാൻ തന്റെ വേട്ട ആരംഭിക്കുകയാണ്, അവളുടെ ആവശ്യം വളരെ ലളിതമാണ്, തന്റെ കഥ പറയുന്നത് എമ്മ നിർത്താൻ പാടില്ല, തുടർന്ന് കൊണ്ടേ ഇരിക്കണം, ഇല്ലെങ്കിൽ അവൾക്ക് നേരിടേണ്ടി വരിക നരകതുല്യമായ അനുഭവങ്ങൾ ആയിരിക്കും എന്ന്. ഒരു ഇറ്റ് മോഡലിൽ ഗോസ്റ്റ് ഹണ്ടിങ് ലെവെലിലേക്ക് ഒക്കെ കഥ പോവുന്നുണ്ട്, പൊതുവെ വലിയ താല്പര്യം ഇല്ലാഞ്ഞത് കൊണ്ടോ ഇത് അത്ര നന്നായി തോന്നാഞ്ഞത് കൊണ്ടോ ആസ്വാദന അനുഭവം തൃപ്തികരം ആയിരുന്നില്ല, നിങ്ങൾക്ക് സ്വയം കണ്ട് ഒരു തീരുമാനത്തിൽ എത്താവുന്നതാണ്.

Verdict : Average

DC Rating : 60/100

738. When They See Us (2019)

Creator : Ava DuVernay

Genre : Drama

Rating : 9/10

Seasons : 01

Episodes : 04

Duration : 64 - 88 Minutes

🔸സെൻട്രൽ പാർക്ക് ഫൈവ് അല്ലെങ്കിൽ സെൻട്രൽ പാർക്ക് ജോഗിങ് കേസ് എന്നത് നമുക്ക് അത്ര പരിചിതമായ കാര്യം ആവാൻ വഴിയില്ല, പക്ഷെ എൺപതുകളിലും തൊണ്ണൂറുകളിലും അമേരിക്കയിൽ ഇത്രയും കുപ്രസിദ്ധി നേടിയ, ഒരു പരിധി വരെ ആഘോഷിക്കപ്പെട്ട മറ്റൊരു കേസ് ഉണ്ടാവാൻ വഴിയില്ല. കേസിന് ആസ്പദമായ സംഭവങ്ങൾ ഇങ്ങനെയാണ്, 1989 ഏപ്രിൽ 19ആം തിയതി മുപ്പതിൽ അധികം ടീനേജര്മാരായ കുട്ടികൾ മാൻഹാട്ടൻ സെൻട്രൽ പാർക്കിലേക്ക് കടന്ന് വന്നു, സമയം രാത്രിയോട് അടുക്കുന്ന നേരത്ത്.

🔸ഈ യുവാക്കൾ കൂട്ടമായി പാർക്കിന് അകത്തേക്ക് കയറിയ ശേഷം അവിടെ അരങ്ങേറിയത് യുക്തിക്ക് നിരക്കാത്ത കാര്യങ്ങളായിരുന്നു, പ്രായ ബേധമന്യേ പാർക്കിന് അകത്ത് അപ്പോഴുണ്ടായിരുന്ന വ്യക്തികൾ മിക്കവരും ആക്രമിക്കപ്പെട്ടു, സ്ത്രീയെന്നോ പുരുഷനെന്നോ കുട്ടിയെന്നോ യാതൊരു പരിഗണനയും ഉണ്ടായിരുന്നില്ല, ചിലർ ഓടിയെങ്കിലും രക്ഷപ്പെട്ടു, മറ്റുള്ളവർക്ക് അതിനും സാധിച്ചില്ല. ഒൻപത് മണിയോടെ കേസുകൾ റിപ്പോർട്ട് ചെയ്യപ്പെട്ട് തുടങ്ങിയ സെൻട്രൽ പാർക്കിൽ പോലീസ് എത്തിയപ്പോഴേയ്ക്കും കാര്യങ്ങൾ ഏറെക്കുറെ കൈവിട്ട് പോയിരുന്നു.

🔸മർദ്ദനം പിടിച്ചുപറി തുടങ്ങിയവ ആയിരുന്നു ആദ്യം റിപ്പോർട്ട് ചെയ്യപ്പെട്ട കുറ്റകൃത്യങ്ങൾ, അപ്പോഴും ഇതിന് പിന്നിലെ മൂല കാരണം ഒന്നും വ്യക്തം ആയിരുന്നില്ല. നടക്കാൻ ഇറങ്ങിയവരും ജോഗിങ് ചെയ്യാൻ എത്തിയവരും ആയിരുന്നു കൂടുതലും ആക്രമിക്കപ്പെട്ടത്, ഇവയിൽ തന്നെ സിവിയർ ആയി ആദ്യം റിപ്പോർട്ട് ചെയ്യപ്പെട്ട കേസ് ജോൺ ലാഫ്‌ലിൻ എന്ന നാല്പത് വയസുകാരൻ സ്‌കൂൾ അധ്യാപകന്റേതായിരുന്നു, ക്രൂര മർദ്ദനം ഏറ്റുവാങ്ങിയ ജോൺ ലാഫ്‌ലൈനിനെ പോലീസുകാർ കണ്ടെത്തിയപ്പോൾ അയാൾ ചോരയിൽ കുളിച്ച്‌ കിടക്കുകയായിരുന്നു എന്നാണ് സാക്ഷ്യപത്രം.

🔸എന്നാൽ സത്യത്തിൽ ഈ കേസിന്റെ തീവ്രത വർധിപ്പിച്ച ഗതി മാറ്റിയ സംഭവം ഇതൊന്നുമല്ല, അത് പോലീസ് കണ്ടെത്താൻ പോവുന്നെ ഉണ്ടായിരുന്നുള്ളൂ. സ്ഥിരമായി ജോഗ് ചെയ്യാൻ പാർക്കിൽ എത്താറുള്ള ഒരാളായിരുന്നു തൃഷ മെയ്‌ലി എന്ന യുവതി, സംഭവം നടക്കുന്ന ദിവസവും അവരവിടെ എത്തിയിരുന്നു, സ്വാഭാവികമായും ആക്രമിക്കപ്പെടുകയും ചെയ്തിരുന്നു. ക്രൂരമായി മർദ്ദനം ഏറ്റിരുന്നു അവർക്ക്, വലിയ തോതിൽ രക്തം വാർന്ന് പോവുകയും തലയോട്ടിക്ക് പരിക്ക് പറ്റുകയും ചെയ്തിരുന്നു, എല്ലാത്തിനും പുറമെ ബലാത്സംഗത്തിനും അവർ ഇരയായിരുന്നു.

🔸കേസ് അന്വേഷണം ഊർജ്ജിതമാക്കിയ പോലീസ് താമസിയാതെ തന്നെ ഒരുപാട് ടീനേജർമാരായ ചുറ്റും താമസിക്കുന്നവരെ അറസ്റ്റ് ചെയ്യുകയും കേസ് തീർക്കുകയും ചെയ്തു. ഈ അറസ്റ്റ് ചെയ്യപ്പെട്ടവരിൽ അഞ്ച് പേരായിരുന്നു പിന്നീട് സെൻട്രൽ പാർക്ക് ഫൈവ് എന്നപേരിൽ പ്രശസ്തി നേടിയത്, ഈ കഥാപാത്രങ്ങൾക്ക് കേസുമായി യാതൊരു ബന്ധവും ഇല്ലായിരുന്നു എന്ന് പിന്നീട് തെളിയുകയും ചെയ്തിട്ടുണ്ട്, ഇൻക്രഡിബിൾ എന്നൊക്കെ വിശേഷിപ്പിക്കാവുന്ന ഈ കഥയാണ് സീരീസിന്റെ പ്രമേയം, കഴിഞ്ഞ വർഷം പുറത്തിറങ്ങിയതിൽ ഏറ്റവും മികച്ച സീരീസുകളിൽ ഒന്നാണ് നാല് എപ്പിസോഡ് മാത്രമുള്ള വെൻ ദേ സീ അസ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 95/100

737. Kingdom (2019)

Director : Kim Seong-hun

Genre : Horror Thriller

Rating : 8.3/10

Seasons : 02

Episodes : 12

Duration : 36 - 56 Minutes

🔸സോംബി സിനിമകൾ ഒരുപാട് ഇറങ്ങിയിട്ടുണ്ട്, വിവിധ ഭാഷകളിൽ, വിവിധ രാജ്യങ്ങളിൽ ആയിട്ട്. ഇവയിൽ ട്വന്റി എയ്റ്റ് സീരീസ് പോലെയുള്ള മികച്ച സിനിമകളും യുക്തിക്ക് നിരക്കാത്തതായ സിനിമകളും ഉണ്ടായിട്ടുണ്ട്, പറഞ്ഞ് വന്നത് എന്താണെന്ന് വെച്ചാൽ ഈ വിഭാഗത്തിൽ നിലവാരം അധികം ടീവി സീരീസ് ഇറങ്ങിയിട്ടില്ല എന്നാണ്, ചിലപ്പോൾ കാണാഞ്ഞതുമാവാം, ആ കുറവ് പരിഹരിക്കാൻ ഏറ്റവും നല്ല ഉദാഹരണമാണ് കിങ്‌ഡം, നിലവാരത്തിൽ ഇതിലും മികച്ച ഒന്ന് എടുത്ത് കാണിക്കാൻ കഴിഞ്ഞേക്കില്ല.

🔸ഇറങ്ങിയ രണ്ട് സീസണും കൂടി ഉദ്ദേശം പന്ത്രണ്ട് എപ്പിസോഡ് മാത്രമേയുള്ളൂ കിങ്‌ഡം, ഓരോന്നിനും ഒരു മണക്കൂറിൽ താഴെ മാത്രം ദൈർഘ്യം. ഈ ഒരു ടൈമിനിടെ വളരെ ബ്രൂട്ടൽ ആയ, പിടിച്ചിരുത്തുന്ന, എഡ്ജ് ഓഫ് ദി സീറ്റ് എന്നൊക്കെ വിശേഷിപ്പിക്കാവുന്ന ഒരു കഥ സീരീസ് പറയുന്നുണ്ട് എന്നത് എടുത്ത് പറയേണ്ട വസ്തുതയാണ്. എന്നാൽ സത്യത്തിൽ മറ്റ് സീരീസുകളിൽ നിന്നും കിങ്‌ടത്തെ വേറിട്ട് നിർത്തുന്ന ഒരു പ്രത്യേക കാര്യമുണ്ട്, അതാണ് സത്യത്തിൽ ഇവിടെ ട്രംപ് കാർഡും.

🔸ഒരു സോംബി അപോകലിപ്സ് എന്നത് സ്‌ക്രീനിൽ എത്തിക്കുമ്പോൾ കൃത്യമായ രീതിയിൽ അവതരിപ്പിക്കാൻ കഴിഞ്ഞാൽ അതിന് തരാൻ കഴിയുന്ന ഒരു ഭീകരതയുണ്ട്, ഒരു തരം അപ്രവചനീയത, അധികം സിനിമകൾക്ക് ഒന്നും ചെയ്യാൻ കഴിയാഞ്ഞ ഒരു കാര്യമാണ്, ലൈറ്റനിംഗ് ഇൻ എ ബോട്ടിൽ എന്നൊക്കെ വിശേഷിപ്പിക്കാൻ കഴിയുന്ന ഈ കാര്യം കിങ്‌ഡം എത്ര എളുപ്പത്തിൽ എത്ര മനോഹരമായാണ് കൈവരിച്ചത് എന്നത് സത്യത്തിൽ അത്ഭുതപ്പെടുത്തുന്ന ഒരു കാര്യം തന്നെയാണ്, ചെറുതായല്ല അത്യാവശ്യം നന്നായി തന്നെ പേടിപ്പിക്കുകയും ടെൻഷൻ അടിപ്പിക്കുകയും ചെയ്യുന്നുണ്ട് കിങ്‌ഡം.

🔸വർഷങ്ങൾക്ക് മുൻപുള്ള കൊറിയയാണ്‌ നമ്മുടെ കഥാ പശ്ചാത്തലം, അതായത് രാജ ഭരണം നിൽക്കുന്ന കാലം. ഭരണം പിടിച്ചെടുക്കാനും നിലനിർത്താനും എല്ലാം ഉള്ള അണിയറ നാടകങ്ങൾ നടന്ന് കൊണ്ടിരിക്കുകയാണ് ചില കഥാപാത്രങ്ങൾക്ക് ഇടയിൽ, ചുരുക്കി പറഞ്ഞാൽ ഒരു ഗെയിം ഓഫ് ത്രോൺസ് പൊളിറ്റിക്കൽ ലൈൻ, ഇതിനിടെ സോംബികൾ എന്ന ഫാക്ടർ കടന്ന് വന്നാൽ എങ്ങിനെ ഉണ്ടാവും എന്നതാണ് സീരീസിന്റെ കൗതുകകരമായ പ്രമിസ്. യാങ് ക്വിങിന്റെ വെബ് കോമിക് ആയ കിങ്ഡം ഓഫ് ഗോഡ്‌സിന്റെ ദൃശ്യാവിഷ്കരണമാണ് ഈ സീരീസ്, അത്യാവശ്യം വയലന്റ് എന്ന നിലയിൽ പ്രശസ്തി നേടിയ കോമിക്സിൽ നിന്നും ഒട്ടും ചോരാതെ ആണ് സീരീസും തയാറാക്കിയിരിക്കുന്നത്, അല്പം കൂടി പോയെങ്കിലേ ഉള്ളൂ.

🔸സീരീസിന്റെ ഏറ്റവും വലിയ ഹൈലൈറ്റ് അല്ലെങ്കിൽ ടേണിങ് പോയിന്റ് എന്നത് ആദ്യ സീസണിന്റെ ഫിനാലെ ആണ് എന്ന് നിസ്സംശയം പറയാം. ആ സീൻ കാഴ്ചക്കാരന് നൽകുന്ന ഒരുതരം തരിപ്പ് ഉണ്ട്, അപ്രതീക്ഷിതം ആയൊരു വസ്തുത കഥയിലേക്ക് കൊണ്ടുവന്നു എന്നത് മാത്രമല്ല മറിച്ച് ഇനി അങ്ങോട്ട് എന്ത് എന്നറിയാനുള്ള ജെനുവിൻ ആയൊരു താല്പര്യം കൂടി ആ സീൻ ജനിപ്പിക്കും. ലളിതമായി കിങ്‌ഡം എന്ന സീരീസിനെ അടയാളപ്പെടുത്താൻ ഈ ഒറ്റ സീൻ മതിയാവും, അത് കണ്ടവർക്ക് മനസ്സിലാവുകയും ചെയ്യും. തീർച്ചയായും കാണേണ്ട, കണ്ടിരിക്കേണ്ട ഒന്നാണ് കിങ്‌ഡം, കഴിയുമെങ്കിൽ പെട്ടെന്ന് തന്നെ കാണാൻ ശ്രമിക്കുക, ഒരു രീതിയിലും നഷ്ടം ആവില്ല.

Verdict : Must Watch

DC Rating : 90/100

736. Big Bang Theory (2007)

Creator : Chuck Lorre

Genre : Sitcom

Rating : 8.1/10

Seasons : 12

Episodes : 279

Duration : 18 - 22 Minutes

🔸സിറ്റ്‌കോം സീരീസുകളോട് പൊതുവെ വലിയൊരു താല്പര്യം ഉണ്ടായിരുന്നില്ല കുറച്ച് കാലം മുൻപ് വരെ, ആയിടെ ആണ് ഫ്രണ്ട്സ് എന്ന സിറ്റ്‌കോമിന്റെ ചരിത്രത്തിലെ അല്ല ഒരുപക്ഷെ ടീവി സീരീസ് ചരിത്രത്തിലെ തന്നെ നാഴിക കല്ലുകളിൽ ഒന്നായ സീരീസ് കാണാൻ ഇടയായതും അതിനെ തുടർന്ന് ബിഗ് ബാംഗ് തിയറിയിൽ എത്തിയതും. സ്വാഭാവികമായും ഇത് വരെ പുറത്തിറങ്ങിയ എല്ലാ സിറ്റ്‌കോമും ഇനി അങ്ങോട്ട് വരാൻ പോവുന്ന എല്ലാതും എന്ന പോലെ ഇതും ഫ്രെണ്ട്സ് എന്ന സീരീസുമായി കംപേർ ചെയ്യപ്പെട്ട് കണ്ടിട്ടുണ്ട്, എന്തിന്റെ അടിസ്ഥാനത്തിൽ ആയാലും അതിലേക്ക് കടക്കുന്നില്ല.

🔸ബിഗ് ബാംഗ് തിയറി കാണുമ്പോൾ അനുഭവപ്പെട്ട ഏറ്റവും വലിയ പ്രശനം ദൈർഘ്യം തന്നെ ആയിരുന്നു, ഇരുപത് മിനിറ്റ് പരിധിയിൽ ഉള്ള എപ്പിസോഡുകൾ ആയിരുന്നെങ്കിലും ഇരുന്നൂറ്റി എണ്പതിന് അടുത്ത് എപ്പിസോഡ് എന്നത് അല്പം നീളക്കൂടുതൽ തന്നെ ആയിരുന്നു. ഇനി ഇതൊന്നും പോരെങ്കിൽ ആറാമത്തെ സീസണിന് ശേഷം കുറച്ചധികം സമയം ദിക്കറിയാതെ തുഴയുന്ന കപ്പലിന്റെ ഫീൽ തരുന്നുണ്ട് ബിഗ് ബാംഗ് തിയറി. മെറ്റാ ജോക്‌സുകളിലൂടെയും മറ്റും ഇത് പരിഹരിക്കാൻ ഒരു പരിധി വരെ കഴിഞ്ഞിട്ടുണ്ടെങ്കിലും കെട്ടുറപ്പില്ലായ്മ വ്യക്തമാണ്.

🔸സിറ്റ്‌കോം സീരീസുകളോടുള്ള അമേരിക്കൻ ജനതയുടെ താല്പര്യം ഏറ്റവും കൂടുതൽ ഗുണം ചെയ്ത, ഒരു പരിധി വരെ മുതലെടുത്ത ഒന്നാണ് ബിഗ് ബാംഗ് തിയറി. കഴിഞ്ഞ പന്ത്രണ്ട് വർഷത്തിനിടെ ഏറ്റവും കൂടുതൽ കാഴ്ചക്കാർ കണ്ട സീരീസുകളിൽ ഒന്നും കൂടിയാണ് ഇത്, ആവറേജ് ഒരു എപ്പിസോഡിന് ലഭിച്ച വ്യൂവേഴ്സ് ഒന്നര കോടിയോളം ആണത്രേ. അപ്പൊ സ്വാഭാവികമായും ഉയരുന്ന ചോദ്യം ഈ ഹൈപ്പിന്റെ അല്ലെങ്കിൽ ഫാൻ ഫോളോയിങ്ങിന്റെ കാരണമെന്ത് എന്നാവും, തമാശകൾക്കും സിറ്റുവേഷൻ ജോക്സിനും അപ്പുറം എന്താണ് സീരീസിന്റെ സ്ട്രെങ്ത് എന്ന് അറിയേണ്ടി വരും.

🔸പ്രധാനമായും മൂന്ന് കഥാപാത്രങ്ങളെ ഫോക്കസ് ചെയ്ത് കൊണ്ടാണ് സീരീസ് ആരംഭിച്ചത്, പിന്നീട് പല പുതിയ കഥാപാത്രങ്ങളും സപ്പോർട്ടിങ് കഥാപാത്രങ്ങളായി കടന്ന് വന്നു, ചിലർ മെയിൻ കഥാപാത്രങ്ങളായി ഉയർത്തപ്പെട്ടു, ചിലർ വിസ്മരിക്കപ്പെടുകയും ചെയ്തു, ഇങ്ങനെ ഒരുപാട് ഓവർഹോളിലൂടെ കടന്ന് പോയിട്ടുണ്ട് ബിഗ് ബാംഗ് തിയറി. പ്രധാന കഥാപാത്രങ്ങൾ ഷെൽഡൺ കൂപ്പർ, ലിയോണാർഡ്, പെന്നി എന്നിവരാണ്. ഇവരിൽ ഷെൽഡനും ലിയോണാർഡും കഠിനാധ്വാനികളായ ഒരല്പം അല്ല നല്ലോണം തന്നെ ബുജികളായ ഫിസിസിസ്റ്റുകളാണ്.

🔸ഈ രണ്ട് കഥാപാത്രങ്ങളും താമസിക്കുന്ന അപ്പാർട്ട്മെന്റിന് അടുത്ത് പുതിയ താമസക്കാരിയായി പെന്നി എത്തുന്നിടത്താണ് സീരീസ് ആരംഭിക്കുന്നത്, നടിയാകാൻ ആഗ്രഹിക്കുന്ന അത്യാവശ്യം സുന്ദരിയായ കഥാപാത്രമാണ് പെന്നി, സ്വാഭാവികമായും ഈ ഒരു പ്ലോട്ട് ലൈൻ കൊമെടി സിറ്റ്‌കോമിന് ചേർന്നതാണ്, അത് തന്നെയായിരുന്നു ട്രംപ് കാർഡും. മോശം പ്ലാനിങ്ങിന്റെ കൂടി ഉത്തമ ഉദാഹരണമാണ് ബിഗ് ബാംഗ് തിയറി, അതിന് ആറാം സീസണിന് ശേഷമുള്ള എപ്പിസോഡുകൾ തന്നെ മതിയാവും ഉദാഹരണങ്ങളായി. ഈ ഭാഗത്തൊക്കെ ക്ഷമ എന്നത് നന്നായി ആവശ്യം വരും, സിറ്റ്‌കോം ആരാധകർക്ക് കാണാം, മറ്റുള്ളവർക്ക് അങ്ങനെ നിർദ്ദേശിക്കില്ല.

Verdict : Watchable

DC Rating : 65/100

735. Beastars (2019)

Creator : Paru Itagaki

Genre : Drama

Rating : 8.1/10

Seasons : 01

Episodes : 12

Duration : 22 - 23 Minutes

🔸പൊതുവെ അനിമേ സീരീസുകളുടെ പേരുകൾ പറയുമ്പോൾ എവിടെയും കേൾക്കാതെ പോയ ഒന്നാണ് ബീസ്റ്റേഴ്‌സ് എന്ന പന്ത്രണ്ട് എപ്പിസോഡുള്ള ടിവി സീരീസ്. അനിമേകളിലെ പ്രമുഖന്മാർക്ക് ഇടയിൽ നിൽക്കാനുള്ള അത്രയും മികവ് ഒന്നും ഇല്ലെങ്കിലും സ്വന്തമായ ഒരു സ്‌പെയ്‌സ് സത്യത്തിൽ ഈ സീരീസ് ഉണ്ടാക്കി എടുക്കുന്നുണ്ട്. വ്യക്തമായ ഒരു ജോണറിന് ഉള്ളിൽ ഈ സീരീസിനെ തളച്ചിടാൻ ഇച്ചിരി ബുദ്ധിമുട്ടാണ്, കാരണം വേറൊന്നുനല്ല ഒരല്പം മിസ്റ്ററി, സസ്പെൻസ്, ത്രിൽ തുടങ്ങി ടീൻ റൊമാൻസ് വരെ ഇതിലുണ്ട് എന്ന കാരണം കൊണ്ട് തന്നെ.

🔸ഒരു ഹൈ സ്‌കൂൾ ആണ് സീരീസിന്റെ കഥാ പശ്ചാത്തലം, പിന്നെ ഇവിടെ കാര്യങ്ങളിൽ ചെറിയൊരു വ്യത്യാസമുണ്ട്, എടുത്ത് പറയേണ്ട വ്യത്യാസം. പണ്ട് ബാലരമയിലോ ബാലഭൂമിയിലോ മറ്റോ മൃഗാധിപത്യം എന്നൊരു പംക്തി വായിച്ചിട്ടുണ്ട്, സംഭവം വേറൊന്നുമല്ല മനുഷ്യൻ വിഹരിക്കുന്ന ഈ ഭൂമി ശെരിക്കും മൃഗങ്ങൾ ആധിപത്യം പുലർത്തിയിരുന്ന ഒന്ന് ആയിരുന്നെങ്കിലോ എന്ന നല്ല രസികൻ കൺസപ്റ്റ് ആയിരുന്നു ഈ പംക്തിയുടെ ബേസ്. ഈ കൺസപ്റ്റിന് ഇവിടെയും പ്രാധാന്യം ഉണ്ട്.

🔸കഥ നടക്കുന്ന ഹൈസ്‌കൂൾ മൃഗങ്ങളുടേതാണ്, അധ്യാപകരും വിദ്യാർത്ഥികളും നടത്തിപ്പുകാരും എല്ലാം മൃഗങ്ങൾ, മനുഷ്യർ എന്നത് ചിത്രത്തിലെ ഇല്ല. മാംസാഹാര പ്രിയരായ മൃഗങ്ങളും സസ്യാഹാര പ്രിയരായ മൃഗങ്ങളും ഒന്നിച്ചാണ് പഠിക്കുന്നത്, പക്ഷെ പ്രശ്നങ്ങൾ ഒന്നും തന്നെ ഇവർക്കിടയിൽ ഇത്രയും കാലം ഉണ്ടായിട്ടില്ല എന്നതാണ് സത്യം. ഏതൊരു വിദ്യാഭ്യാസ സ്ഥാപനത്തിലെയും എന്ന പോലെ ഇവിടെയും പാഠ്യേതര പദ്ധതികളും വിനോദ പരിപാടികളും എല്ലാമായി നല്ലൊരു മൂഡിലാണ് കലാലയ ജീവിതം മുന്നോട്ട് പൊയ്ക്കൊണ്ടിരുന്നത്, ഒരു സംഭവം അരങ്ങേറുന്നത് വരെ.

🔸ഈ സംഭവമാണ് സീരീസിന്റെ ഓപ്പണിങ് സീൻ, സസ്യഭുക്കായ ഒരു വിദ്യാർത്ഥി ഒരുനാൾ രാത്രി കോളേജിന്റെ പടികൾ ഭീതിയോടെ ഓടി ഇറങ്ങുന്നതാണ് നമ്മൾ കാണുന്നത്, അവളുടെ പിറകെ ഒരു നിഴൽ വരുന്നത് കാണാം, ആ നിഴലിന്റെ രൂപത്തിൽ നിന്നും അതൊരു കാർണിവോർ ആയ ചെന്നായ ആണെന്നും വ്യക്തമാണ്. വല്ലാത്തൊരു തരം പേടിയോടെ കോളേജിലെ മുറികളിൽ ഒന്നിൽ അഭയം തേടിയ വിദ്യാർത്ഥിയുടെ പ്രാർത്ഥനകളോ രക്ഷപ്പെടാൻ ഉള്ള ശ്രമങ്ങളോ ഒന്നും തന്നെ ഫലിക്കുന്നില്ല, അന്നേദിവസം അവൾ ക്രൂരമായി കൊല ചെയ്യപ്പെടുകയാണ്.

🔸കൊന്നയാൾ ആരാണെന്ന് സീരീസ് ആരംഭത്തിൽ വെളിപ്പെടുത്തുന്നില്ല, എന്നാൽ ഈ സംഭവം രണ്ട് വിഭാഗത്തിൽ പെട്ട വിദ്യാർത്ഥികൾക്ക് ഇടയിലെയും ബന്ധത്തിൽ വിള്ളൽ വീഴ്ത്തുകയാണ്, ഒരു സംശയവും പേടിയും ടെൻഷനും എല്ലാം അവിടെ നിറഞ്ഞ് നിൽക്കുന്നു. ഒരു ഹു ഡൺ ഇറ്റ് മിസ്റ്ററി ആണെങ്കിലും ഇതിനോട് ഇട കലർത്തി ഒരു റൊമാന്റിക് സബ് പ്ലോട്ട് കൂടിയുണ്ട് സീരീസിൽ. വലിയ സംഭവം ഒന്നുമല്ല എങ്കിലും ഉള്ള സമയം ആസ്വദിച്ച് കാണാനുള്ള വകുപ്പുണ്ട് ഈ സീരീസിന്, വലിയ ദൈർഘ്യമോ അല്ലെങ്കിൽ മനസിലാക്കാൻ ബുദ്ധിമുട്ടേറിയ പ്ലോട്ട് ലൈനോ അല്ല, താല്പര്യം ഉണ്ടെങ്കിൽ പരീക്ഷിക്കാവുന്നതാണ്.

Verdict : Good

DC Rating : 75/100

734. Game Of Thrones (2011)

Creator : David Benioff

Genre : Fantasy Drama

Rating : 9.3/10

Seasons : 08

Episodes : 73

Duration : 50 - 82 Minutes

🔸പല കാരണങ്ങൾ കൊണ്ടും വളരെ പ്രിയപ്പെട്ട ഒന്നാണ് ഗെയിം ഓഫ് ത്രോൺസ് എന്ന സീരീസ്, ജീവിതത്തിൽ ആദ്യമായി കണ്ട സീരീസ്, പിന്നീട് അത് തുടരാൻ ഉള്ള പ്രചോദനം നൽകിയ, സത്യത്തിൽ വിടമയിപ്പിച്ച ഒന്ന് ആണ് ഈ സീരീസ്. അവസാന ഭാഗത്തോട്ട് എല്ലാം എത്തിയപ്പോൾ ഭയങ്കര റഷ്ഡ് ആയി തോന്നിയെങ്കിലും സത്യത്തിൽ അതിന് പോലും ഈ സീരീസിനോടുള്ള താല്പര്യം കുറയ്ക്കാൻ കഴിഞ്ഞിട്ടില്ല. ഇന്നേവരെ കണ്ട സീരീസുകളിൽ ഏറ്റവും പ്രിയപ്പെട്ടവ പറയാൻ പറഞ്ഞാൽ അതിൽ ആദ്യം പറയുന്ന പേരുകളിൽ ഒന്ന് നിശ്ചയമായും ഗെയിം ഓഫ് ത്രോൺസ് എന്ന് തന്നെയാവും.

🔸ഒരുപാട് കഥാ സന്ദർഭങ്ങൾ ഉള്ള, അത്യാവശ്യം ലെങ്ങ്തി ആയ, അനവധി കഥാപാത്രങ്ങളും പ്ലോട്ട് പോയിന്റുകളും എല്ലാമുള്ള വലിയൊരു സീരീസ് ആണ് ഗെയിം ഓഫ് ത്രോൺസ്. ഈ ഒരു കാരണം കൊണ്ടുതന്നെ പ്രസ്തുത സീരീസിന്റെ പ്ലോട്ട് ലൈൻ ഒക്കെ എങ്ങനെ ലളിതമായി പറഞ്ഞ് തരണം എന്ന കാര്യത്തിൽ സംശയങ്ങൾ ഒരുപാടുണ്ട്. മനുഷ്യന്മാർ ഉണ്ടായ കാലം തൊട്ടുള്ളതാണ് അധികാരം, ഭരണം, എന്നീ വസ്തുതകൾ, കയ്യൂക്കുള്ളവനും പ്രമാണിമാരായവരും എല്ലാം തങ്ങളുടെ കീഴിൽ നിൽക്കേണ്ടവർ എന്ന് മുദ്രകുത്തി ആയ കാലം മുഴുവൻ ഈ അധികാരത്തിന്റെ മേലങ്കി എടുത്ത് ചാർത്തിയിട്ടുണ്ട്.

🔸ജോർജ്ജ് ആർ മാർട്ടീനിന്റെ എ സോങ് ഓഫ് ഐസ് ആൻഡ് ഫയർ എന്ന ഫാന്റസി നോവൽ സീരീസിന്റെ അഡാപ്റ്റേഷൻ ആണ് ഗെയിം ഓഫ് ത്രോൺസ്, വെസ്റ്ററോസ്‌ - എസോസ് എന്നീ ഭൂകണ്ഡങ്ങളിലാണ് സീരീസിന്റെ കഥ അരങ്ങേറുന്നത്. ഏഴ് രാജ്യങ്ങളുടെ അധിപനാണ് ഇപ്പോൾ അധികാരത്തിൽ ഇരിക്കുന്നത് സാക്ഷാൽ റോബർട്ട് ബരത്തിയോൺ എന്ന രാജാവാണ്, കിങ്‌സ് ലാൻഡിംഗ് എന്നാണ് അദ്ദേഹത്തിന്റെ കൊട്ടാരവും അതിനോട് അനുബന്ധിച്ചുള്ള സ്ഥലങ്ങളും അറിയപ്പെടുന്നത്. ബരാതിയോണിന്റെ അധികാരത്തിന് കീഴിൽ അനവധി ചെറു രാജ്യങ്ങളും നോബിൾ കുടുംബങ്ങളും എല്ലാമുണ്ട്.

🔸ഈ കുടുംബങ്ങളിൽ ഏറ്റവും പ്രാധാന്യം ഉള്ളവരിൽ ഒന്ന് സ്റ്റാർക് കുടുംബമാണ്, നെഡ് സ്റ്റാർക് ആണ് കുടുംബത്തിന്റെ തലവൻ. സ്റ്റാർക്കിന് മക്കളും അടുപ്പക്കാരും സ്നേഹിതരും ഒക്കെയായി അനവധി പേരുണ്ട്, രാജാവായ ബാറാത്തിയോൺ നെഡ് സ്റ്റാർക്കിന്റെ സുഹൃത്തുക്കളിൽ ഒരാളുമാണ്, സത്യത്തിൽ ബാറാത്തിയോൺ അകമഴിഞ്ഞ് വിശ്വസിക്കുന്ന അപൂർവം ആളുകളിൽ ഒരാൾ. ഒരു രാജാവിന് സ്വാഭാവികമായും ശത്രുക്കൾക്ക് ഒരു പഞ്ഞവും ഉണ്ടാവില്ലല്ലോ, റോബെർട്ടിനും ഇല്ല, പിന്നൊരു വ്യത്യാസം എന്താണെന്നാൽ സ്വന്തം സഹപ്രവർത്തകർ തന്നെയാണ് അയാളുടെ ഏറ്റവും വലിയ ശത്രുക്കൾ എന്നതാണ്.

🔸ഭരണം പിടിച്ചെടുക്കാനും മറ്റുമുള്ള ഒരു മത്സരം അണിയറയിൽ പല ഭാഗങ്ങളിലും നടക്കുന്നുണ്ട്, ഇത് പോരാതെ അധികാരത്തിന്റെ ഇടനാഴികളിൽ നിന്നും പുറത്താക്കപ്പെട്ട ജന്മം കൊണ്ട് അധികാരം അർഹതപ്പെട്ട മറ്റൊരു കഥാപാത്രവും പ്ലോട്ട് ലൈനും ഇവിടുണ്ട്, പോരാതെ ഇതിൽ ഒന്നും പെടാത്ത ഒരു നൈറ്റ് കിങ്ങും അയാളുടെ പരിവാരങ്ങളും. പ്രൊഡക്ഷൻ, പെർഫോമൻസ്, സ്കെയിൽ തുടങ്ങിയ കാര്യങ്ങളിൽ എല്ലാം നിലവാരത്തിന്റെ പരമോന്നത പട്ടം കരസ്ഥമാക്കിയ ഒന്നാണ് ഗെയിം ഓഫ് ത്രോൺസ്, അവസാന സീസൺ ചിലയിടത്ത് കൈവിട്ട് പോയി എന്ന ന്യായമായ വിമർശനം മാനിക്കേണ്ടതുമാണ്, എന്തിരുന്നാലും തീർച്ചയായും കണ്ടിരിക്കേണ്ട ഒന്നാണിതെന്ന കാര്യത്തിൽ മറിച്ചൊരു അഭിപ്രായമില്ല.

Verdict : Must Watch

DC Rating : 92/100

733. Russian Doll (2019)

Creator : Natasha Lyonne

Genre : Comedy Drama

Rating : 7.9/10

Seasons : 01

Episodes : 08

Duration : 24 - 30 Minutes

🔸കഴിഞ്ഞ വർഷം പുറത്തിറങ്ങിയ നല്ല കിടിലൻ സീരീസുകളുടെ പട്ടികയിലേക്ക് ചേർക്കാൻ ഒന്ന് കൂടി, എട്ട് എപ്പിസോഡ് മാത്രമുള്ള ഒരു പടത്തിന്റെ ദൈർഘ്യം വരുന്ന റഷ്യൻ ഡോൾ. പ്ലോട്ടിനെ കുറിച്ചോ കൺസെപ്ടിനെ കുറിച്ചോ ഒരറിവും ഇല്ലാതെ കാണേണ്ട ഒന്നാണ് സത്യത്തിൽ ഈ സീരീസ് അത് കൊണ്ട് തന്നെ തുടർന്ന് വായിക്കണം എന്ന് യാതൊരു നിർബന്ധവുമില്ല, ഇവിടെ നിന്ന് മടങ്ങി പോവാം, സീരീസ് കിടിലനാണ്. തുടർന്ന് പറയാൻ പോവുന്ന ഭാഗങ്ങളിൽ ചെറിയ തോതിൽ പ്ലോട്ട് മെൻഷൻ ചെയ്യപ്പെട്ടേക്കാം, അത് ചിലപ്പോൾ പൂർണ ആസ്വാദനത്തിന് കോട്ടവും വരുത്തിയേക്കാം.

🔸മുന്നറിയിപ്പ് ലഭിച്ചിട്ടും പോയിട്ടില്ലാത്ത സ്ഥിതിക്ക് നമുക്ക് കാര്യത്തിലേക്ക് കടക്കാം, ഗ്രൗൻദോഗ് ഡേ എന്ന ചിത്രം നമ്മളിൽ പലരും കണ്ടിട്ടുള്ളത് ആയിരിക്കും, ഒരു ടൈം ലൂപ്പിന് അകത്ത് കുടുങ്ങി കിടക്കുന്ന കഥാപാത്രങ്ങളാണ് ചിത്രത്തിൽ ഉള്ളത്, ഈ ഒരു രീതി ചെറിയ ചില സാമ്യങ്ങളോടെ റഷ്യൻ ഡോൾ പിന്തുടരുന്നുണ്ട്, ഒരു നേർ കോപ്പി ആണെന്നല്ല. നാദിയ എന്ന യുവതിയാണ് നമ്മുടെ പ്രധാന കഥാപാത്രം, സീരീസിന്റെ ക്രിയേറ്റിവ് ഹെഡ് ആയ നടാഷ ലിയോൺ തന്നെയാണ് ഈ കഥാപാത്രത്തെ അവതരിപ്പിച്ചിരിക്കുന്നതും.

🔸നാദിയ തന്റെ മുപ്പത്തി ആറാം പിറന്നാൾ ആഘോഷിക്കുന്ന വേളയിലാണ്, കൂട്ടുകാർക്കും അടുപ്പക്കാർക്കും സഹപ്രവർത്തകർക്കും ആയെല്ലാം കൂടി ഒരു പാർട്ടി അവൾ നടത്തുന്നുണ്ട്, ഇവിടെ നിന്നുമാണ് സീരീസ് ആരംഭിക്കുന്നത്. പാർട്ടി ആകെ പൊടിപൊടിക്കുന്നുണ്ട് എങ്കിലും ആ ബഹളത്തിൽ നിന്നെല്ലാം മാറി നിൽക്കുകയാണ് നാദിയ, പിന്നീടാണ് കഥയിലെ ടർനിങ് പോയിന്റ് ആയ സംഭവം അരങ്ങേറുന്നത്. പാർട്ടിയുടെ ബഹളത്തിൽ നിന്നും മാറി പുറത്തിറങ്ങിയ നാദിയ ഒരു വാഹനാപകടത്തിൽ കൊല്ലപ്പെടുകയാണ്.

🔸റോട്ടിൽ ചോര വാർന്ന് മരിച്ച നാദിയ തൊട്ടടുത്ത നിമിഷം പുനർജനിക്കുകയാണ്, പക്ഷെ അത് ഉദ്ദേശം അര മണിക്കൂറ് മുന്നിലാണ് എന്ന് മാത്രം. ഇവിടെ സൈക്കിൾ റിപ്പീറ്റ് ചെയ്യപ്പെടുകയാണ്, റോഡിൽ മരിച്ച നാദിയ വീണ്ടും പാർട്ടി നടക്കുന്നിടത്തേക്ക്, അതായത് അര മണിക്കൂർ മുന്നേ അവർ നിന്ന ഇടത്തേക്ക് മടങ്ങി എത്തുന്നു, മരിച്ച കാര്യവും റോഡപകടവും എല്ലാം അവർ വ്യക്തമായി ഓർക്കുന്നുണ്ട് എന്നതാണ് കൗതുകകരമായ കാര്യം. ഇവിടം കൊണ്ടും ഈ പ്രക്രിയ അവസാനിക്കുന്നില്ല, റിപ്പീറ്റ് ചെയ്യപ്പെടുകയാണ് വീണ്ടും വീണ്ടും.

🔸ആദ്യം റോഡ് അപകടം കാരണം ആണെങ്കിൽ പിന്നീടത് മറ്റൊരു കാരണത്താൽ ആവുന്നു എന്ന് മാത്രം, എൻഡ് റിസൾട്ട് എല്ലാത്തിലും ഒന്ന് തന്നെയാണ്, നാദിയ കൊല്ലപ്പെടുന്നു, വീണ്ടും ആ പാർട്ടി സീനിലേക്ക് മടങ്ങി എത്തുന്നു വീണ്ടും ആവർത്തിക്കുന്നു അങ്ങനെയങ്ങനെ. തുടർന്ന് ഈ ലൂപ്പിൽ എന്ത് സംഭവിക്കും, അവർക്ക് നോർമൽ ലൈഫിലേക്ക് മടങ്ങി എത്താൻ സാധിക്കുമോ എന്നീ ചോദ്യങ്ങൾക്കുള്ള ഉത്തരമാണ് എട്ട് ഭാഗ സീരീസ്. അത്യാവശ്യം നല്ല തോതിൽ എൻഗേജിങ് ആയ ഹൈലി എന്റർടൈനിംഗ് ആയ ഒരു സീരീസ് ആണ് റഷ്യൻ ഡോൾ, തീർച്ചയായും കാണാൻ ശ്രമിക്കുക,.നഷ്ടം ഏതുമില്ല.

Verdict : Very Good

DC Rating : 85/100

732. Chernobyl (2019)

Creator : Craig Mazin

Genre : Drama

Rating : 9.4/10

Seasons : 01

Episodes : 05

Duration : 60 - 72 Minutes

🔸കഴിഞ്ഞ വർഷം പുറത്തിറങ്ങിയ ഏറ്റവും മികച്ച, ഹാർഡ് ഹിറ്റിങ് ആയ ടീവി സീരീസ് ചെർണോബിൽ ആണ്, അതിൽ സംശയത്തിന്റെ ഒരു കണിക പോലും ആവശ്യം ഉണ്ടെന്ന് തോന്നുന്നില്ല. ഈ സീരീസിന് കിട്ടിയ പ്രചാരം കണ്ട് സത്യത്തിൽ അത്ഭുതപ്പെട്ട് പോയിട്ടുണ്ട്, കാരണം പൂർത്തിയാവുന്നതിന് മുന്നേ തന്നെ എക്കാലത്തെയും ഏറ്റവും മികച്ച സീരീസായി ചെർണോബിലിനെ വാഴ്ത്തി പാടിയവർ കുറവല്ല, രണ്ടാമത്തെ എപ്പിസോഡ് തൊട്ട് പിന്നീടുള്ള ഓരോ എപ്പിസോഡിനുമായി ദിവസങ്ങൾ എണ്ണി കാത്തിരുന്നവരെ കണ്ടിട്ടുണ്ട്, അപ്പോഴെല്ലാം മനസ്സിൽ തോന്നിയ സംശയമാണ് എന്ത് കൊണ്ട് എന്നത്, എന്ത് കൊണ്ട് ചെർണോബിൽ, എന്തുകൊണ്ട് ഇതിനും മാത്രം പ്രചാരം ഇതിന് കിട്ടി, അതിനും മാത്രം ഉണ്ടോ തുടങ്ങി ചോദ്യങ്ങൾ അനവധിയായിരുന്നു.

🔸ചെർണോബിൽ സീരീസിനെ കുറിച്ച് പറയുന്നതിന് മുന്നേ യഥാർത്ഥ സംഭവത്തെ കുറിച്ച് പറയണം. ശീത യുദ്ധത്തിനും സോവിയേറ്റ് യൂണിയന്റെ വീഴ്ചയ്ക്കും മുന്നേയുള്ള കാലഘട്ടം, എണ്പതുകളാണ് പശ്ചാത്തലം. സോവിയേറ്റ് യൂണിയനിൽ ഉടനീളം ഉപയോഗിച്ചിരുന്ന ന്യുക്ലിയർ റിയാക്ടറുകളിൽ ഒന്ന് സേഫ്റ്റി ടെസ്റ്റ് നടക്കുന്നതിനിടെ ഒരു പിഴവ് കാണിക്കുകയാണ്. കൂളിംഗ് വാട്ടർ സർക്കുലേഷൻ പ്രവർത്തന സജ്ജമാക്കാനായി പവർ ഔട്ടെജ് ക്രമീകരിക്കുന്നതായിരുന്നു ടെസ്റ്റിന്റെ ഉദ്ദേശം, അത് എന്ത് തന്നെ ആയാലും ഉദ്ദേശിച്ച രീതിയിൽ അല്ല കാര്യങ്ങൾ നടന്നത്.

🔸ഈ സൂചിപ്പിച്ച പിഴവ് കാരണം ന്യുക്ലിയർ റിയാക്ടർ കോർ ഓവർ ഹീറ്റ് ആവുകയും, ചെറിയ തോതിലുള്ള ഒരു പൊട്ടിതെറി തുടക്കത്തിൽ അവിടെ സംഭവിക്കുകയും ചെയ്യുകയാണ്, എന്നാൽ അപകടകരമായ സംഭവങ്ങൾ വരാനിരിക്കുന്നതെ ഉണ്ടായിരുന്നുള്ളൂ, ഈ പൊട്ടിത്തെറിയുടെ തുടർച്ച എന്നോണം സംഭവങ്ങളുടെ ഒരു ചെയിൻ റിയാക്ഷൻ ആരംഭിക്കുകയാണ്. ഇതിനെ തുടർന്ന് എമിറ്റ് ചെയ്യപ്പെട്ട റേഡിയേഷന്റെ അളവ് ഹിരോഷിമയിൽ പൊട്ടിയ അണുബോംബിനേക്കാൾ അഞ്ഞൂറ് ഇരട്ടി സ്‌ഫോടക ശേഷി ഉള്ളതായിരുന്നു എന്ന് പറഞ്ഞാലേ പ്രശ്നങ്ങളുടെ വ്യാപ്തി പൂർണമായും മനസ്സിലാവൂ.

🔸ഭീകരമായിരുന്നു തുടർന്ന് അരങ്ങേറിയ കാര്യങ്ങൾ, എഴുപത്തിനായിരത്തിന് അടുത്ത് ജനങ്ങളെ ഒഴിപ്പിക്കേണ്ടി വന്നു, ആ പ്രദേശം ഒന്നടങ്കം അടച്ച് പൂട്ടേണ്ടി വന്നു, മനുഷ്യന് പുറമെ മൃഗങ്ങൾക്ക് വരെ റേഡിയേഷന്റെ തിക്ത ഫലങ്ങൾ അനുഭവിക്കേണ്ടിയും വന്നു. മരിച്ചവരുടെ കണക്കുകളിൽ വ്യക്തത എന്നൊന്ന് ഒരുകാലത്തും ഉണ്ടായിരുന്നില്ല, അവരെ തന്നെ ഭൂമിക്കടിയിൽ ഒരു രീതിയിലും ഒരുകാലത്തും തുറക്കാൻ പാടില്ല എന്ന നിർദ്ദേശം പാലിച്ച് കൊണ്ട് കുഴിച്ച് മൂടുകയാണ് ചെയ്തത്. വാക്കുകളാൽ വിവരിക്കാൻ പറ്റാത്ത ഭീകരതയാണ് അവിടെ അരങ്ങേറിയത്, അത് ഉൾക്കൊണ്ട് കൊണ്ട് തന്നെയാണ് സീരീസ് തയാറാക്കിയിരിക്കുന്നതും.

🔸സോവിയേറ്റ് യൂണിയനിൽ ഭരണത്തിലിരുന്ന കമ്യുണിസ്റ്റ് ഭരണത്തിന് നേരെയും വിമർശനത്തിന്റെ വാൾമുന നീളുന്നുണ്ട് ഈ സീരീസിൽ, ജനങ്ങളുടെ ആരോഗ്യത്തിനും ജീവനും മേലെ സ്വന്തം പ്രതിച്ഛായയ്ക്ക് പ്രാധാന്യം കൊടുത്ത ഭരണാധികാരികൾ ആയാണ് നേതാക്കളെ അവതരിപ്പിച്ചിരിക്കുന്നത്, ഇത് പൂർണമായും ശെരിയാണോ എന്ന കാര്യം അറിവില്ലാത്തതിനാൽ തല്ക്കാലം ആ ഭാഗത്തേക്ക് കടക്കുന്നില്ല. ഒരു വല്ലാത്ത ഹാങ്ങോവർ ആണ് ഈ സീരീസ്, കണ്ട് കഴിയുമ്പോൾ തീർച്ചയായും എക്സോസ്റ്റഡ് ആയെങ്കിൽ അത്ഭുതപ്പെടാനില്ല, അതിനും മാത്രം ബ്രൂട്ടൽ ആയ വേദനാജനകമായ സംഭവങ്ങളാണ് ഇവിടെ അവതരിപ്പിച്ചിട്ടുള്ളത്.

Verdict : Must Watch

DC Rating : 100/100

731. Kengan Ashura (2019)

Creator : Yabako Sandrovich

Genre : Action

Rating : 8/10

Seasons : 02

Episodes : 24

Duration : 24 - 27 Minutes

🔸ഈ അനിമേ സീരീസുകൾ പൊതുവെ കണ്ട കുറച്ചെണ്ണത്തിന്റെ പരിചയത്തിൽ പറയാം, അത്യാവശ്യം ബ്രൂട്ടൽ ആവാറുണ്ട്, അത് കൈകാര്യം ചെയ്യുന്ന വിഷയം കൊണ്ടാണെങ്കിൽ അങ്ങനെ അതല്ല ആക്ഷൻ കം ബ്ലഡ്ബാത് കൊണ്ടാണെങ്കിൽ അങ്ങനെയും. അപ്പൊ പിന്നെ അണ്ടർ ഗ്രൗണ്ട് ഗ്ലാഡിയേറ്റർ ടൈപ്പ് ബാറ്റിൽ ഒക്കെ പ്രമേയമായി വരുന്ന, മരണം കൊണ്ട് മാത്രം മത്സരം അവസാനിക്കുന്ന കെങ്കൻ ആശുറ എന്ന അനിമേയെ പറ്റി പ്രത്യേകം പറയേണ്ടല്ലോ, മേൽ സൂചിപ്പിച്ച രണ്ട് കോളത്തിലും പുഷ്പം പോലെ ടിക്ക് മാർക്ക് വീഴും.

🔸അത്യാവശ്യം ഫാസ്റ്റ് ആയിട്ടുള്ള, വയലെൻസുള്ള, ബ്രൂട്ടലായ വൺ ഓൺ വൺ ടൈപ്പ് മിക്സഡ് മാർഷ്യൽ ആർട്സ് ആക്ഷൻ രംഗങ്ങൾ ഇഷ്ടപ്പെടുന്നവരാണ് നിങ്ങൾ എങ്കിൽ കെങ്കൻ ആശുറ നിങ്ങൾക്ക് പറ്റിയ നല്ല വെടിക്കെട്ട് സാധനം തന്നെയാണ്. പണ്ട് വർഷങ്ങൾക്ക് മുൻപ് രാജ ഭരണ കാലത്ത് രാജാക്കന്മാർ ഉന്മാദം കണ്ടെത്താനും വിനോദത്തിനും മറ്റുമായി മല്ലന്മാർ തമ്മിലുള്ള പോര് നടത്താറുണ്ടായിരുന്നു, ഇതിനായി പ്രത്യേകം പണി കഴിപ്പിച്ച സ്ഥലങ്ങളും, വളർത്തി കൊണ്ടുവന്ന താരങ്ങളും ഉണ്ടായിരുന്നു, ഇന്നിപ്പോ കാലം ഒരുപാട് പോയി എങ്കിലും വലിയ വ്യത്യാസം ഒന്നും ഈ വ്യവസ്ഥയിൽ വന്നിട്ടില്ല.

🔸രാജാക്കന്മാർ കാലത്തിന് അനുസരിച്ച് പടിയിറങ്ങി പോയപ്പോൾ ഇന്നാസ്ഥാനം കയ്യാളുന്നത് സമൂഹത്തിലെ പണക്കാരും പ്രമാണിമാരുമാണ് എന്നതാണ് പറയത്തക്ക മാറ്റം. പോരാളികൾ ഇന്നും പരസ്പരം പോരടിക്കുന്നു, ജയിക്കുന്നവന് സർവസ്വവും നേടാം, തോൽക്കുന്നവന് സ്വന്തം ജീവൻ ഉൾപ്പെടെ സകലതും നഷ്ടപ്പെടും, അത്രയും സിമ്പിളും അതെ സമയം ഭീകരവുമാണ് ഫോർമാറ്റ്. നിലവാരത്തിൽ ഒന്നാമത് എന്നൊന്നും പറയാൻ ആവില്ലെങ്കിലും ഈ സീരീസിന് ലഭിച്ച ഒരു ഫാൻ ഫോളോയിങ് ഉണ്ട്, അത് വളരെ വലുതാണ്, പ്രത്യേകിച്ചും മാങ്കാ ആരാധകർക്ക് ഇടയിൽ ലഭിച്ച പ്രചാരം എടുത്ത് പറയണം.

🔸കഥയെ പറ്റി പറയുക ആണെങ്കിൽ ആദ്യമേ നമ്മുടെ ടൈറ്റിൽ കഥാപാത്രമായ ആശുറായെ പറ്റി പറയണം, അഥവാ ടോക്കിതാ ഓമയെ പറ്റി. ബ്രൂട്ടലിറ്റിയുടെ അങ്ങേത്തല ആണ് ടോക്കിട്ട, പുള്ളിയെ നമ്മൾ ആദ്യം കാണുന്നത് നഗരത്തിന്റെ ഒരു ഒഴിഞ്ഞ മൂലയിലാണ്, തന്നെക്കാൾ വലിയ ആജാനുബാഹുവായ ഒരാളുമായി പോരിന് ഇറങ്ങുകയാണ് ടോക്കിട്ട. ഇരുവരെയും നോട്ടം കൊണ്ട് വിലയിരുത്തുകയാണെങ്കിൽ ടോകിതയുടെ തീരുമാനം ആത്മഹത്യാപരം എന്നൊക്കെ വിശേഷിപ്പിക്കേണ്ടി വരും, കാരണം ലോജിക്കലി അയാൾ ഈ ഫൈറ്റ് അതിജീവിക്കില്ല എന്ന ഉറപ്പ് തന്നെ, എന്നാൽ അന്നവിടെ സംഭവിച്ചത് മറിച്ചാണ്.

🔸അടി എന്നൊക്കെ പറഞ്ഞാൽ നല്ല വെടിക്കെട്ട് അടി, ചോര ബക്കറ്റ് കണക്കിന് ഒഴുകുകയാണ്, ഒടുവിൽ ആ ചോര ചാലിലൂടെ ചത്ത് മലച്ച എതിരാളിയെ അവഗണിച്ച് ആശുറ നടന്നകലുമ്പോഴാണ് അയാൾ ഈ കാണുന്നതോ കാണിക്കുന്നതോ ഒന്നും അല്ലെന്ന് വ്യക്തമാവുക. ഒരു സർവൈവൽ മോഡിലേക്ക് ഒക്കെ സീരീസ് പോവുന്നുണ്ട്, ഞെട്ടിപ്പിക്കുന്ന തോതിലുള്ള കഥയൊന്നും പ്രതീക്ഷിക്കരുത്, ആക്ഷൻ ഇഷ്ട്ടപ്പെടുന്നവർക്കെല്ലാം ധൈര്യമായി കാണാം. ആശൂറാ എന്ന കഥാപാത്രത്തിന് പുറമെ വേറെയും ചില കിടിലൻ കഥാപാത്രങ്ങളുണ്ട് സീരീസിൽ, താല്പര്യം തോന്നുന്നെങ്കിൽ തീർച്ചയായും കാണാവുന്നതാണ്.

Verdict : Good

DC Rating : 75/100