1184. Flee (2021)

Director : Jonas Poher

Writer : Jonas Poher

Genre : Animation

Country : Denmark

Duration : 88 Minutes

🔸ഈ വർഷം ഇറങ്ങിയ സിനിമാ സംരംഭങ്ങളിൽ ഏറ്റവും ഇഷ്ട്ടപ്പെട്ട ചിത്രങ്ങളിൽ ഒന്നാണ് ഫ്ളീ, ഈ ഒരു വസ്തുത യാതൊരു തർക്കമോ സംശയമോ ഇല്ലാതെ ആദ്യമേ പറഞ്ഞിടാം. ഒരു അനിമേഷൻ ഫോർമാറ്റിൽ ആണ് സിനിമ അവതരിപ്പിച്ചിരിക്കുന്നത് എങ്കിലും റിയൽ ലൈഫ് ഫുട്ടേജ് കൂടി ഉൾപ്പെടുത്തിയിട്ടുള്ളതിനാൽ ഒരു ഡോക്യൂമെന്ററിയുടെ ശൈലിയും സ്വഭാവവും എല്ലാം നമുക്ക് ഇവിടെ കാണാൻ കഴിയും. അമീൻ നവാബി എന്ന വ്യക്തിയുടെ കഥയാണ് ചിത്രം എങ്കിലും ഇത് ലോകത്താകമാനം ഉള്ള അഭയാർത്ഥികളുടെ കൂടി കഥയാണ്, അഫ്‌ഘാൻ എന്ന രാജ്യത്തിന്റെയും പലായനത്തിന്റെയും എല്ലാം കഥയാണ്. ഈ കാരണങ്ങൾ കൂടി ചേരുമ്പോൾ ഡോക് ശൈലിയിൽ ഒരു യൂണിവേഴ്സൽ സബ്ജക്ട്ട് കൂടിയായി മാറുന്നുണ്ട് ഫ്ളീ.

🔸മജാഹിദീൻ ഭരണം പിടിച്ചെടുത്ത എഴുപതുകളിലെ അഫ്‌ഘാനിൽ ആണ് നമ്മുടെ കഥ ആരംഭിക്കുന്നത്. അച്ഛനും അമ്മയും രണ്ട് വീതം സഹോദരിമാരും സഹോദരന്മാരും എല്ലാമുള്ള, സാമ്പത്തികമായി ബേധപ്പെട്ട ഒരു കുടുംബത്തിലാണ് അമീൻ ജനിച്ചത്. ഇങ്ങനെ ഒക്കെ ആയിരുന്നെങ്കിലും പിന്നീടുണ്ടായ രാഷ്ട്രീയ സാഹചര്യത്തിലെ വലിയ മാറ്റങ്ങൾ ആ കുടുംബത്തെ കീറി മുറിക്കുകയാണ്, രാജ്യദ്രോഹി എന്ന് മുദ്ര കുത്തപ്പെട്ട് വീട്ടിൽ നിന്നും പോലീസുകാർ കൊണ്ടുപോയ അമീനിന്റെ അച്ഛൻ പിന്നീട് ഒരിക്കലും മടങ്ങി വന്ന് പോലുമില്ല, എന്തിന് ഒരു വിവരം പോലും അയാളെ സംബന്ധിച്ച് പിന്നീട് അറിയാൻ കഴിഞ്ഞില്ല. പിന്നീട് അങ്ങോട്ട് അഭയാർത്ഥികൾ ആവേണ്ടി വരുന്ന ഈ കഥാപാത്രങ്ങൾ നേരിടേണ്ടി വരുന്ന ഭീകരമായ മാനസിക സംഘർഷങ്ങളാണ്.

🔸ഇതിനോടൊപ്പം തന്നെ ഗേ ആയ അമീൻ നേരിടുന്ന മാനസിക പ്രശ്നങ്ങളും സംശയങ്ങളും എല്ലാം ചിത്രം വിഷയമാക്കുന്നുണ്ട്. വളരെ ഹാർട്ട് വാമിങ് ആയ ഒരു ചിത്രമാണ് ഫ്ളീ, അരങ്ങേറുന്ന സംഭവങ്ങൾ പലതും ട്രാജിക് ആണെങ്കിലും അവയെ എല്ലാം അതിജീവിക്കാനുള്ള ആർജവം നമ്മളിൽ ഉണ്ട് എന്ന ചിത്രം തരുന്ന ആ പോസിറ്റീവ് തോട്ട് മനോഹരം ആയിരുന്നു, പ്രത്യേകിച്ചും ലാസ്റ്റ് ആക്റ്റിൽ. ഒരിടവേളയ്ക്ക് ശേഷം വൈകാരികമായി മനസിനെ വല്ലാതെ സ്പർശിച്ച ചിത്രം കൂടിയാണ് ഫ്ളീ, അമീനിന്റെ അമ്മയും സഹോദരന്മാരും അവരുടെ എപിക് എന്നൊക്കെയുള്ള വിശേഷണം അർഹിക്കുന്ന യാത്രയും എല്ലാം പ്രത്യേക പരാമർശം അർഹിക്കുന്നുണ്ട്, അപ്പോൾ കാണാൻ ശ്രമിക്കുക.

Verdict : Must Watch

DC Rating : 4.5/5 

1183. Friend (2001)

Director : Kwak Kyung Taek

Cinematographer : Hwang Ki Suk

Genre : Drama

Country : South Korea

Duration : 118 Minutes

🔸ഫരണ്ട് എന്ന കൊറിയൻ ഡ്രാമ ചിത്രം അതിന്റെ കോറിൽ നാല് സുഹൃത്തുക്കളുടെ കഥയാണ്, അതായത് എഴുപതുകളുടെ പകുതിയിൽ തുടങ്ങി തൊണ്ണൂറുകളിൽ ഈ കഥാപാത്രങ്ങൾ യൗവനവും കടന്ന് പോവുന്ന കാലം വരെയുള്ള രണ്ട് പതിറ്റാണ്ടുകൾ ആണ് ചിത്രം വിഷയമാക്കുന്നത്. വളരെ വ്യത്യസ്തമായ ചുറ്റുപാടുകളിൽ നിന്നും വന്ന കഥാപാത്രങ്ങൾ ആയതിനാലും അവർ കൈക്കൊള്ളുന്ന ചില തീരുമാനങ്ങൾ കൊണ്ടായാലും എല്ലാം ഒരു രീതിയിൽ അല്ലെങ്കിൽ മറ്റൊരു രീതിയിൽ ഇവർക്കിടയിൽ ചില കോൺഫ്ളിക്ട്ടുകൾ രൂപപ്പെടുന്നതും, അത് അവർക്കിടയിലെ സൗഹൃദത്തിന് വെല്ലുവിളി ആവുന്നതും എല്ലാം സിനിമ മനോഹരമായി കാണിക്കുന്നുണ്ട്.

🔸നാല് കഥാപാത്രങ്ങളുടെയും ബാല്യ കാലത്താണ് സിനിമ ആരംഭിക്കുന്നത്, ഏത് കുട്ടികളെയും പോലെ തന്നെ രസിച്ച് ഉല്ലസിച്ച് നാട് നീളെ അലഞ്ഞ് തിരിഞ്ഞ് പരസ്പരം മത്സരിച്ചും മറ്റുമൊക്കെയാണ് ഈ കഥാപാത്രങ്ങളും തങ്ങളുടെ സമയം കളയുന്നത്. കൊറിയയിലെ അത്യാവശ്യം പേര് കേട്ട ഒരു ഗ്യാങ്സ്റ്ററിന്റെ മകനാണ് ഇവരിൽ ഒരാൾ, ഈ ഒരു ആസ്പെക്റ്റ് രണ്ടാം പകുതിയിൽ ചിത്രത്തിന് മേൽ വലിയ സ്വാധീനം ചെലുത്തുന്നുണ്ട്. ഈ പോയിന്റിൽ തുടങ്ങി കഥ പിന്നീട് ഇവരുടെ കോളേജ് ലൈഫിലേക്കും അതിന് ശേഷം മുതിർന്ന ജീവിത കാലയളവിലേക്കും എല്ലാം കടന്ന് പോവുന്നുണ്ട്. ഈ നാല് സുഹൃത്തുക്കളുടെയും ജീവിതത്തിൽ കാലം കൊണ്ടുവരുന്ന മാറ്റങ്ങളും, അതിനോട് അവരുടെ പ്രതികരണവും എല്ലാം സിനിമ നല്ല തോതിൽ കാണിക്കുന്നുണ്ട്.

🔸ഈ സിനിമയുടെ പ്രശ്നങ്ങളിൽ ഒന്നായി അനുഭവപ്പെട്ടത് നാല് സുഹൃത്തുക്കൾ ഉണ്ടെങ്കിലും രണ്ടാം പകുതിയിൽ ഫോക്കസ് ഏറെക്കുറെ പൂർണമായി രണ്ട് പേരിൽ ഒതുങ്ങുന്നു എന്നതാണ്, അത് മോശമായി എന്ന് നിലവാരം കൊണ്ട് പറയാനാവില്ല എങ്കിലും ഒരു തൃപ്തിക്കുറവ് അനുഭവപ്പെട്ടു. വളരെ വൈകാരികമായ ഒന്നാണ് ചിത്രത്തിന്റെ അവസാന ഇരുപത് മിനിറ്റ്, കളി ചിരിയുമായി തുടങ്ങിയ ബാല്യ കാല പോർഷനെ ഈ ഒരു പാർട്ട് മനോഹരമായി കോണ്ട്രദിക്റ്റ് ചെയ്യുന്നതായി തോന്നി. ചെറുപ്പ കാലം ആണ് കൂടുതൽ മനോഹരം എന്ന പൊതു വിശ്വാസത്തെ ഇവിടെ കൂടുതൽ അരക്കിട്ട് ഉറപ്പിക്കുകയാണ്, ഒരു പരിധി വരെ അതാണ് ഫ്രണ്ടിന്റെ പ്രധാന പ്ലോട്ട് പോയിന്റും.

Verdict : Good

DC Rating : 3.75/5 

1182. House Of Secrets - The Burari Deaths (2021)

Creator : Leena Yadav

Director : Anubhav Chopra

Genre : Documentary

Seasons : 01

Episodes : 03

Duration : 44 - 46 Minutes

🔸ഇന്ത്യയിലെ ഏറ്റവും തിരക്കേറിയ, ജനങ്ങൾ തിങ്ങി പാർക്കുന്ന മെട്രോ നഗരമായ ഡൽഹി ആണ് നമ്മുടെ കഥാ പശ്ചാത്തലം. ഇവിടെ ഒരു കുടുംബത്തിലെ പതിനൊന്ന് പേർ, വളരെ വിചിത്രമായ സാഹചര്യത്തിൽ ആത്മഹത്യ ചെയ്ത സംഭവം നമ്മളിൽ ചിലർ എങ്കിലും കേട്ടിട്ടുണ്ടാവും, ഉദ്ദേശം മൂന്ന് വർഷങ്ങൾക്ക് മുൻപ്. ബുരാരി മാസ്സ് സൂയിസൈഡ്സ് എന്ന പേരിൽ കുപ്രസിദ്ധി ആർജിച്ച ഈ സംഭവത്തിന്റെ ഡോക്യുമെന്ററി രൂപേണ ഉള്ള അവതരണമാണ് ഹൌസ് ഓഫ് സീക്രട്ട്സ് എന്ന മൂന്ന് പാർട്ട് നെറ്റ്‌ഫ്ലിക്സ് സീരീസ്. ഡോണ്ട് ഫക്ക് വിത്ത് കാറ്റ്സ് ഒക്കെ പോലെ, മറ്റൊരു മികച്ച റിയൽ ലൈഫ് ഇൻസിഡന്റ് ബെസ്ഡ് ഡോക് ആയി മാറ്റാൻ ഈ സീരീസിന്റെ അണിയരപ്രവർത്തകർക്ക് കഴിഞ്ഞിട്ടുണ്ട്, അത്യാവശ്യം അൺസെറ്റ്‌ലിംഗ് ആണ് സീരീസ്, യഥാർത്ഥ ഫുട്ടേജുകൾ ഉൾപ്പെടെ ഉള്ളവർ ഇതിനായി ഉപയോഗപ്പെടുത്തിയിട്ടുണ്ട്.

🔸സീരീസിന്റെ നിലവാരം സംബന്ധിച്ച വിഷയങ്ങളിലേക്ക് കടക്കുന്നതിന് മുന്നേ സംഭവങ്ങളെ പറ്റി ലളിതമായി പറഞ്ഞിടാം. ഹര്യാനയിൽ നിന്നും വർഷങ്ങൾക്ക് മുന്നേ താമസം മാറി വന്ന കുടുംബമാണ് ബുരാരികളുടേത്, പിന്നീട് കടയും കച്ചവടവും ഒക്കെയായി ഡൽഹിയുടെ പ്രാന്ത പ്രദേശങ്ങളിൽ അവർ ഒരു സ്ഥിര സാന്നിധ്യമായി മാറി. അയല്പക്കക്കാരും മറ്റും ഒക്കെയായി നല്ല രീതിയിൽ ഒത്തു ചേർന്ന് പോയ അവരെ പറ്റി അവിടുള്ള ആർക്കും തന്നെ മോശമായി ഒന്നും പറയാൻ ഉണ്ടായിരുന്നില്ല. ഡോക്യുമെന്ററിയിൽ പറയുന്നത് പോലെ ആ പ്രദേശത്തുള്ള മറ്റുള്ളവരെ സ്വന്തം കുടുംബം പോലെ കണ്ടിരുന്നവരാണ് എൻപത് വയസുകാരി ആയ നാരായണിയും അവരുടെ രണ്ട് തലമുറകളും.

🔸ഇങ്ങനെ ഒക്കെ ആയിരുന്നിട്ടും ഒരു രാത്രി ഇരുട്ടി പുലർന്നപ്പോൾ ആ പരിസര വാസികൾ കണ്ടത് കയ്യും കണ്ണും ഒക്കെ കെട്ടിയ രൂപത്തിൽ ഒന്നൊഴിയാതെ ഈ കുടുംബത്തിലെ എല്ലാവരും കയറിൽ ശവ ശരീരങ്ങളായി കിടക്കുന്നതാണ്, ഒരു ആൽമരവും അതിന്റെ ശാഖകളും ഒക്കെ പോലെ വളരെ ഭീതിതമായ കാഴ്ച. ഈ സംഭവത്തിന്റെ മൂല കാരണങ്ങൾ ഒക്കെ തേടിയുള്ള യാത്രയാണ് തുടർന്നുള്ള സീരീസിന്റെ പ്രസക്തം ഭാഗങ്ങൾ. മുന്നേ പറഞ്ഞത് പോലെ തന്നെ അത്യാവശ്യം അൻസെറ്റ്‌ലിംഗ് ആണ് സീരീസ്, കണ്ട് കഴിഞ്ഞാലും ചില ഭാഗങ്ങൾ ഒരുപാട് സമയം നമ്മളെ വിടാതെ പിന്തുടരും, തീർച്ചയായും കാണാൻ ശ്രമിക്കുക.

Verdict : Very Good

DC Rating : 4.25/5 

1181. Squid Game (2021)

Director : Hwang Dong Hyuk

Writer : Hwang Dong Hyuk

Genre : Thriller

Seasons : 01

Episodes : 09

Duration : 32 - 63 Minutes

🔸സ‌ക്വിഡ് ഗെയിം എന്ന സീരീസ് ഏറെക്കുറെ ഒരു ഗ്ലോബൽ സെൻസെഷൻ ആയി മാറി കഴിഞ്ഞിട്ടുണ്ട്, ഇതിനോടകം തന്നെ. സ്ട്രീമിങ് സൈറ്റ് ആയ നെറ്റ്‌ഫ്ലിക്സിൽ കണ്ട ആളുകളുടെ കണക്ക് തൊട്ട് ഡേയ്ലി ലൈഫിൽ ഉള്ള പരാമർശങ്ങൾ വരെ ഈ ഒൻപത് എപ്പിസോഡ് സർവയിവൽ ഡ്രാമ ഇതിനോടകം കരസ്തമാക്കിയ നേട്ടങ്ങൾക്ക് കയ്യും കണക്കും ഇല്ല. ഈ ഒരു സ്വീകാര്യതയ്ക്ക് ഉള്ളത് പ്രസ്തുത സീരീസിൽ ഉണ്ടോ എന്നാണ് ചോദ്യം എങ്കിൽ, ഒരു എന്റെർറ്റെയിനിങ് വാച്ചിന് പറ്റിയ സീരീസാണ് എന്ന് മാത്രം പറഞ്ഞ് നിർത്തേണ്ടി വരും, കാരണം ഇതിലും മികച്ച കണ്ടന്റ് ഉള്ള കെ ഡ്രാമകൾ തന്നെ ഒരുപാട് ഉണ്ട്, പക്ഷെ ഒരിടത്തും മുഷിപ്പിക്കാത്ത ഒറ്റ ഫ്ലോയിൽ കഥ പറഞ്ഞ് പോവുന്ന, വലിയ സ്‌റ്റെയ്‌ക്സ് കഥയിൽ ഉള്ള പ്രസ്തുത സീരീസിന് ആരാധകർ കൂടിയതിൽ അത്ഭുതം ഏതും ഇല്ല.

🔸ഒരു ഗെയിമിംഗ് കൺസപ്റ്റ് ആണ് സീരീസിന്റേത്, അതായത് കൊറിയയിലെ പല ഭാഗങ്ങളിൽ നിന്നുമുള്ള നാനൂറ്റി അമ്പത്തി ആറ് ആളുകൾ ഒരു മത്സരത്തിൽ പങ്കെടുക്കാൻ തയാറായി വരികയാണ്, അല്ലെങ്കിൽ സമ്മതം പ്രകടിപ്പിക്കുകയാണ്. കേൾക്കുമ്പോൾ കൗതുകം തോന്നുന്ന ലളിതമായ കൺസപ്റ്റ് ഉൾപ്പെട്ട ഒരു മത്സര ഘടന ആണെങ്കിലും അവസാനത്തെ വിജയിക്ക് ലഭിക്കുന്ന സമ്മാന തുക ഉദ്ദേശം നാല്പത്തി അഞ്ച് ബില്ല്യൺ കൊറിയൻ വോൺ ആണ്. പിന്നേ എടുത്ത് പറയേണ്ട മറ്റൊരു വസ്തുത എന്താണെന്നാൽ ഈ പരിപാടിയിൽ പങ്കെടുക്കുന്നവർ എല്ലാം തന്നെ വലിയ കടവും കടബാധ്യതയും ഒക്കെയായി ജീവിതം ത്രിശങ്കുവിൽ അകപ്പെട്ട അവസ്ഥയിൽ ഉള്ളവരും കൂടിയാണ്.

🔸എന്തായാലും മത്സര പരിപാടികൾ ആരംഭിക്കുകയാണ്, ആറ് റൗണ്ടുകളാണ് ആകെ ഉള്ളത്, എല്ലാത്തിനും നമ്മളെല്ലാം ചെറുപ്പത്തിൽ കളിച്ച കളികളുടെ ഫോർമാറ്റുമായി ചെറുതല്ലാത്ത സാമ്യവും, ഒരു വ്യത്യാസം ഒഴിച്ച്. ഒരു മത്സരം ആവുമ്പോ ഒന്നുകിൽ ജയിക്കാം അല്ലെങ്കിൽ തോൽക്കാം എന്നാണ് പൊതുവെ, പക്ഷെ ഇവിടെ ഒന്നുകിൽ ജയിക്കാം അല്ലെങ്കിൽ മരിക്കാം എന്നതാണ് ലൈൻ. തുടർന്ന് അങ്ങോട്ട് ആ മത്സര സ്ഥലം ഒരു കൊലക്കളം ആയി മാറുകയാണ്, അതിജീവനം എന്നത് ഒരാളുടെ മാത്രം യാഥാർഥ്യം ആയി ചുരുങ്ങുന്നു. ഇന്ട്രെസ്റ്റിങ് ആയ കൺസപ്റ്റിന്റെ മോശം അല്ലാത്ത അവതരണം കൂടിയാണ് ഈ സീരീസ്, ബിഞ്ച് വാച്ചിന് ഒക്കെ പറ്റിയ ഒരു ഐറ്റം, സ്വാഭാവികമായും ഒരു സീസൺ ടു ഉണ്ടാവും, അതിൽ നിൽക്കാനും സാധ്യതയില്ല.

Verdict : Good

DC Rating : 3.5/5 

1180. The Exam (2011)

Director : Peter Bergendy

Cinematographer : Zsolt Toth

Genre : Drama

Country : Hungary

Duration : 88 Minutes

🔸ഈ നാൽപതുകൾ തൊട്ട് എഴുപതുകൾ വരെയുള്ള കാലയളവിൽ സെറ്റ് ചെയ്യപ്പെട്ട് പുറത്തിറങ്ങിയ സിനിമകൾക്ക് ഒരു പ്രത്യേക ഭംഗി ഉണ്ട്. അതിപ്പോ ആ കാലഘട്ടത്തിലെ രഹസ്യ സ്വഭാവം കൊണ്ടാണോ അതോ ഒരു അപ്പോകാലിപ്റ്റൻ ഫീൽ തരുന്നത് കൊണ്ടാണോ എന്നത് വ്യക്തമല്ല. ഈ ഒരു ഭംഗി ഒരു തവണ കൂടി പകർന്നു തരുന്നുണ്ട് എ വിഴുഗ അഥവാ ദി എക്സാം എന്ന ഹങ്കേറിയൻ ഡ്രാമ ത്രില്ലർ ചിത്രം. അത്യാവശ്യം പബ്ലിക് ഫണ്ടിങ് ഒക്കെ ഉപയോഗിച്ചാണ് സംവിധായകൻ ഈ സിനിമ പൂർത്തിയാക്കിയിരിക്കുന്നത്, എന്നാൽ ഒരു ലിമിറ്റഡ് ബഡ്ജറ്റിന്റെയോ റിസോർസ്സിന്റെയോ പ്രശ്നങ്ങൾ ഒന്നും തന്നെ കാണാൻ കഴിഞ്ഞില്ല എന്നത് എടുത്ത് പറയേണ്ട വസ്തുത തന്നെയാണ്.

🔸ആയിരത്തി തൊള്ളായിരത്തി അമ്പത്തി എഴിലെ ക്രിസ്തുമസ് ദിവസമാണ് കഥ ആരംഭിക്കുന്നത്. ഹങ്കറി എന്ന രാജ്യത്തെ സംബന്ധിച്ചും അവിടുത്തെ രാഷ്ട്രീയ സാംസ്‌കാരിക പരിതസ്തിതിയെ സംബന്ധിച്ചും എല്ലാം ഒരുപാട് മാറ്റങ്ങൾ ഉണ്ടായ ഒരു കാലഘട്ടമാണ് അമ്പതുകൾ എന്ന് പറയാം. പുതുതായി ഭരണം പിടിച്ചെടുത്ത പ്രധാന മന്ത്രിയെ സംബന്ധിച്ചിടത്തോളം ഭരണവും ഭരണ സിരാ കേന്ദ്രങ്ങളും എല്ലാം തന്റെ വരുതിയിൽ കൊണ്ടുവരിക എന്നത് ഏറെക്കുറെ ഹിമാലയൻ ടാസ്ക് ആയിരുന്നു എന്ന് തന്നെ പറയാം. ഇതിനായി ടിയാൻ ആദ്യം ഇറങ്ങി തിരിച്ചത് രാജ്യത്തിന്റെ കീഴിലുള്ള രഹസ്യന്വേഷണ വിഭാഗം പൂർണമായും തന്റെ ചൊല്പടിയിലാണ് എന്ന് ഉറപ്പ് വരുത്താൻ ശ്രമിക്കുക ആയിരുന്നു, ഇതാണ് നമ്മുടെ കഥ അരങ്ങേറുന്ന പശ്ചാത്തലത്തിന്റെ ഒരു ബാക്ക്ഗ്രൗണ്ട് എന്ന് പറയാം.

🔸ഈ ഭരണത്തിന്റെ കീഴിലുള്ള ഒരു ചാരനാണ് നമ്മുടെ പ്രധാന കഥാപാത്രം, ഒരു ഭാഷാ ഇൻസ്‌ട്രക്റ്റർ ആയി ജോലി ചെയ്യുകയാണ് ടിയാൻ. ഈ വ്യക്തി പൂർണമായും അൺ കറപ്റ്റഡ് ആണ് എന്ന് അറിയാനായി അയാളെ നിരീക്ഷിക്കുക എന്ന ഉദ്ദേശത്തിൽ ടിയാന്റെ ഒരു മേലധികാരി കഥയിലേക്ക് കടന്ന് വരികയാണ്, ഇരുവർക്കും ഇടയിൽ വളരെ ആഴത്തിൽ ഉള്ള ഒരു ആത്മബന്ധം കൂടി ഉണ്ടെന്ന് പറയാം. പിന്നീട് അരങ്ങേറുന്നത് ഒരു തരം ചെസ്സ് ഗെയിം ആണ്, കഥാപാത്രങ്ങളുടെ അലീജിയൻസും എക്‌സൈസ്റ്റൻസും എല്ലാം ചോദ്യം ചെയ്യപ്പെടുന്ന വളരെ നീറ്റ് ആയ തോതിൽ പുരോഗമിക്കുന്ന ഒന്നര മണിക്കൂർ സമയം. ഇതാണ് ചിത്രം, ഇത്ര മാത്രമേ പ്രതീക്ഷിക്കേണ്ട കാര്യവുമുള്ളൂ, അപ്പൊ താല്പര്യം ഉണ്ടെങ്കിൽ കാണാൻ ശ്രമിക്കുക.

Verdict : Good

DC Rating : 3.5/5 

1179. Injustice (2021)

Director : Matt Peters

Writer : Ernie Altbacker

Genre : Animation

Country : USA

Duration : 78 Minutes

🔸ഇഞ്ജസ്റ്റിസ് എന്ന ഡീസിയുടെ ഗെയിം കളിച്ചത് ഉദ്ദേശം അഞ്ച് അല്ലെങ്കിൽ ആറ് വർഷങ്ങൾക്ക് മുന്നെയാണ്, മികച്ച രീതിയിലുള്ള വിഷ്വൽസും അക്ഷനും കോമ്പാറ്റും ഒക്കെ ഉണ്ടായിരുന്ന ആ ഗെയിം അന്ന് തന്നെ ഇഷ്ടം പിടിച്ച് വാങ്ങിയിരുന്നു. എന്നാൽ ആക്ഷൻ ഒരിയന്റഡ് ഗെയിം പ്ലെ അല്ലാതെ ശ്രദ്ധ കരസ്തമാക്കിയ വേറൊരു ആസ്പെക്റ്റ് കൂടി ഉണ്ടായിരുന്നു പ്രസ്തുത ഗെയിമിൽ, വേറൊന്നുമല്ല കഥ തന്നെ. വളരെ വൈൽഡ് ആയ അതേസമയം ഡാർക്ക് ആയ ഒരു ത്രെഡ് ആണ് ഇഞ്ജസ്റ്റിസിന്റെ ബേസിക് പ്ലോട്ട്, അതിലേക്ക് കടക്കാം. നിയമവും, നോർമൽ ലൈഫും എല്ലാം അതേപടി നിലനിർത്തുന്ന ജസ്റ്റിസ് ലീഗ് തങ്ങളുടെ ഉദ്യമം ഭംഗിയായി നടത്തി പോരുന്ന ഒരു യൂണിവേഴ്സിൽ തന്നെയാണ് കഥ ആരംഭിക്കുന്നത്.

🔸എന്നാൽ ഒരുനാൾ ജോക്കർ ഗോതം സിറ്റിയിലേക്ക് മടങ്ങി വരികയാണ്, സ്വാഭാവികമായും ആ വരവ് വെറുതെ ആവില്ല എന്ന് ആർക്കും ഊഹിക്കാം. ജോക്കറിന്റെ ഭാഷയിൽ പറഞ്ഞാൽ അയാളുടെ ഏറ്റവും അപകടകരമായ അവസാനത്തെ കളി ഇവിടെ ആരംഭിക്കുകയാണ്. മാനസികമായും ശാരീരികമായും ബാറ്റ്മാനെ തകർക്കാൻ കഴിയില്ല എന്ന ഉത്തമ ബോധ്യം ഉള്ള ജോക്കർ ഇത്തവണ തന്റെ കളിയിൽ കരു ആയി ഉപയോഗിക്കുന്നത് സൂപ്പർമാനെ ആണ്. അളവില്ലാത്ത ശക്തി ആണെങ്കിലും അത് ഉപയോഗിക്കുന്ന മൈൻഡ് കറപ്റ്റഡ് ആയി പോയാൽ അതിനോളം അപകടം വേറൊന്നും ഇല്ല എന്ന് തന്നെ പറയാം, അത് തന്നെയാണ് ഇവിടെ സൂപ്പർമാന്റെ കാര്യത്തിൽ സംഭവിക്കുന്നതും.

🔸ഒരു മോറലി റൈറ്റ് സൂപ്പർഹീറോയിൽ നിന്നും തനിക്കെതിരെ ഉയരുന്ന ശബ്ദത്തെ തൽക്ഷണം അടിച്ചമർത്തുന്ന ഏകാധിപതി ആയി സൂപ്പർമാൻ മാറുമ്പോൾ ഭീകരമായ ആഫ്റ്റർ ഇഫ്ഫക്ട്ടുകളാണ് ഉണ്ടാവുന്നത്, തുടർന്ന് സ്വഭാവികമായി ഒരു ചെറുത്തുനിൽപ്പ് ഉണ്ടാവുന്നതും മറ്റുമൊക്കെയാണ് കഥ. വളരെ ഡാർക്ക് ആയ ഈ പ്ലോട്ട് താല്പര്യം നേടിയെടുത്തു എങ്കിലും തൃപ്തികരമായ ഒരു എൻഡിങ് അല്ലെങ്കിൽ രണ്ടാം പകുതി ഒന്നും ചിത്രം നൽകുന്നില്ല, ഒരുപാട് ഉത്തരങ്ങൾ ബാക്കി വെക്കുന്നുമുണ്ട്. ഒന്നെകാൽ മണിക്കൂർ മാത്രം ദൈർഘ്യം ഉള്ളത് കൊണ്ടാവണം വളരെ റഷ്ഡ് ആയ ഫീൽ കൂടി ചിത്രം തരുന്നുണ്ട്, ഇഞ്ജസ്റ്റിസ് എന്ന ഈ സിനിമയുടെ ബേസിക് പ്ലോട്ട് ഉപയോഗിച്ച് ഒരു ലൈവ് ആക്ഷൻ സിനിമ വന്നാൽ നന്നായിരിക്കും എന്ന് കൂടി തോന്നി, ചിത്രം കണ്ട് കഴിഞ്ഞ വേളയിൽ.

Verdict : Watchable

DC Rating : 2.5/5 

1178. No Time To Die (2021)

Director : Cary Joji Fukunaga

Cinematography : Linus Sandgren

Genre : Action

Country : UK

Duration : 163 Minutes

🔸ഒരു ആക്ഷൻ മൂവി ഫ്രാഞ്ചയ്‌സ് എന്ന നിലയ്ക്കും, ഫിക്ഷണൽ കഥാപാത്രം എന്ന നിലയ്ക്ക് തന്നെയും ജെയിംസ് ബോണ്ട്‌ എങ്ങിനെ ഒരു ഗ്ലോബൽ സെൻസേഷൻ ആയി മാറി എന്ന് പലപ്പോഴും ആലോചിച്ചിട്ടുണ്ട്. ഇരുപത്തി അഞ്ചോളം സിനിമകൾ വന്നിട്ടുള്ള സീരീസ് ആയിട്ട് പോലും നല്ലത് എന്ന് പറയാൻ, അല്ലെങ്കിൽ മറ്റൊരാൾക്ക്‌ സജസ്റ്റ് ചെയ്ത് കൊടുക്കാൻ തക്കവണ്ണം ഉള്ളത് വിരലിൽ എണ്ണാവുന്ന സിനിമകൾ മാത്രമാണ്, അതിൽ തന്നെ ഭൂരിഭാഗവും ഈ നൂറ്റാണ്ടിൽ പുറത്തിറങ്ങിയതും. ഡാനിയേൽ ക്രെയ്‌ഗിന്റെ മുൻ ബോണ്ട്‌ സിനിമകളിൽ സോളാസ് ഒഴികെ ഉള്ളവ എല്ലാം ആസ്വദിക്കാൻ കഴിഞ്ഞിരുന്നു എന്നതും, നോ ടൈം ടു ഡൈ അദ്ദേഹത്തിന്റെ അവസാന ബോണ്ട്‌ ഔട്ടിങ് ആണ് എന്നതും എല്ലാത്തിനും ഉപരി കാരി ജോജി ഫുകുനാഗ എന്ന പേരും എല്ലാം സിനിമയിൽ താല്പര്യം ഉണർത്തിയ ഘടകങ്ങൾ തന്നെ ആയിരുന്നു, ഇവയെ സാധൂകരിക്കുന്ന ഔട്ടപുട്ട് ഉണ്ടോ എന്നത് ആണ് ചോദ്യം.

🔸ചിത്രം കണ്ട് കഴിഞ്ഞപ്പോൾ തോന്നിയ മറ്റൊരു എടുത്ത് പറയേണ്ട വസ്തുത മുൻ ക്രെയ്‌ഗ് ബോണ്ട്‌ സിനിമകളുമായി മികച്ച രീതിയിൽ വരുന്ന സ്റ്റോറി കണ്ടിന്യുവേഷൻ കൂടിയാണ്. അതായത് കസിനോ റോയൽ, സ്പെക്ടർ തുടങ്ങി സ്‌കൈഫോൾ വരെയുള്ള സിനിമകളെ ചിത്രം ചെറുതും വലുതുമായ രീതിയിൽ പരാമർശിക്കുന്നുണ്ട്, സ്റ്റോറി കം ക്യാരക്റ്റർ പ്രോഗ്രഷനിൽ ഈ അസ്പെക്റ്റ് കൊണ്ടുവരുന്ന ഇൻഫ്ലുവെൻസ് ചെറുതല്ല. കഥയിലേക്ക് വരിക ആണെങ്കിൽ ബ്ലോഫെൽഡിന്റെ വീഴ്ചയ്ക്ക് ശേഷം ബോണ്ട് തന്റെ ഔദ്യോഗിക ജീവിതത്തിൽ നിന്നും ഏറെക്കുറെ വിരമിച്ച മട്ടാണ്, വ്യക്തി ജീവിതത്തിൽ അയാൾക്ക് നേരിടേണ്ടി വരുന്ന ചില പ്രശ്നങ്ങൾ കൂടി ആവുമ്പോൾ എല്ലാം പൂർണം. ഇങ്ങനെ ബോണ്ടിന് പതിവില്ലാത്ത ശാന്തമായ ജീവിതത്തിന് ഇടയിലേക്ക് ഒരു മിസ്റ്റീരിയസ് കഥാപാത്രം കടന്ന് വരുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രം.

🔸നല്ല ഓപ്പണിങ് ആക്റ്റും, തൃപ്തി തരുന്ന എൻഡിങ്ങും സിനിമയുടെ പോസിറ്റീവ് എലമെന്റുകൾ ആണ്, ഇടക്ക് ഒരല്പം സ്ലോ ആവുന്നുണ്ട് എങ്കിലും വലിയ പോരായ്മ ഒന്നും തോന്നിയില്ല. ലേഡി ബോണ്ട്‌ എന്നത് മാർക്കറ്റിങ്ങിൽ വലിയ തോതിൽ ചൂണ്ടി കാണിക്കപ്പെട്ട ഒന്നായിരുന്നു എങ്കിലും സിനിമയിൽ വലിയ ചലനം ഉണ്ടാക്കിയതായി തോന്നിയില്ല, അന അർമസിന്റെ കഥാപാത്രവും ഇത് പോലെ തന്നെ. റാമി മലക്കിന്റെ വില്ലൻ കഥാപാത്രം നന്നായിരുന്നു എങ്കിലും സ്ക്രീൻ ടൈം കുറഞ്ഞത് പോലെയാണ് അനുഭവപ്പെട്ടത്, ഐകോനിക് കഥാപത്രമായ ബ്ലോഫെൽഡിന് കാര്യമായി ഒന്നും ചെയ്യാൻ ഇല്ലായിരുന്നു എങ്കിലും ഈ ഫൈനൽ ഔട്ട്റ്റിംഗിൽ കാണാൻ കഴിഞ്ഞത് തൃപ്തികരം ആയിരുന്നു. നല്ല വിഷ്വൽസും, സ്ക്കോറും എല്ലാം സിനിമയുടെ മറ്റ് മികച്ച അസ്പെക്റ്റുകളിൽ ചിലതാണ്. ഒരു ഇടവേളയ്ക്ക് ശേഷം തിയേറ്ററിൽ കണ്ട ചിത്രം ആയത് കൊണ്ട് കൂടി ആവും നോ ടൈം ടു ഡൈ നല്ലൊരു കാഴ്ച്ചാനുഭവം കൂടി ആയിരുന്നു.

I Really Missed This Place ❤️

Verdict : Good

DC Rating : 3.75/5 

1177. Shang-Chi And The Legend Of The Ten Rings (2021)

Director : Destin Daniel Cretton

Cinematography : William Pope

Genre : Superhero

Country : USA

Duration : 132 Minutes

🔸മാർവ്വലിന്റെ ടിപ്പിക്കൽ ഒറിജിൻ സ്റ്റോറിയിൽ നിന്നും എന്തൊക്കെ പ്രതീക്ഷിക്കാമോ, അതിന്റെ ഒക്കെ ഒരു ബ്ലൂ പ്രിന്റ് തന്നെയാണ് ഷാങ് ച്ചി എന്ന ചിത്രവും. തന്റെ ഉത്തരവാദിത്തത്തിൽ നിന്നും മറ്റുമൊക്കെ മാറി നടക്കുന്ന നായക കഥാപാത്രം തന്റെ കഴിവ് തിരിച്ചറിയുന്നതും, അതിനോടൊപ്പം വരുന്ന റെസ്പോൺസിബിലിറ്റിസ് മനസിലാക്കുന്നതും ഒക്കെയായ ട്രാക്കിൽ കൂടി തന്നെയാണ് ചിത്രം മുന്നോട്ട് പോവുന്നത്, ഒരല്പം ഡൈവേഴ്‌സിറ്റി ആഡ് ചെയ്യാനായി പശ്ചാത്തലം ഏഷ്യയും മറ്റുമൊക്കെയായി മാറ്റിയിട്ടുണ്ട് എന്ന് മാത്രം. ഈ മാറ്റത്തിൽ ഒരു ഒറിജിനാലിറ്റി അല്ലെങ്കിൽ ഫ്രഷ്‌ണസ്‌ വേറൊരു ഡിപ്പാർട്ട്മെന്റിലും തോന്നുന്നില്ല എന്നത് തന്നെയാണ് ചിത്രത്തിന്റെ ഏറ്റവും വലിയ പോരായ്മ ആയി തോന്നിയതും, കണ്ടാലും കണ്ടില്ലെങ്കിലും നഷ്ടമില്ല എന്നൊക്കെ പറയാവുന്ന ഒരു ചിത്രം.

🔸ടെൻ റിങ്സ് എന്ന സീക്രറ്റ് ഓർഗനൈസെഷനെ മാർവെൽ ഹിന്റ് ചെയ്യാൻ തുടങ്ങിയിട്ട് കാലം കുറച്ചായി, ആദ്യ അയെൺ മാൻ ചിത്രത്തിൽ വളരെ പ്രധാനപ്പെട്ട ഒരു ഫാക്റ്റർ ആണെങ്കിലും പിന്നീട് പരാമർശം അർഹിക്കുന്ന ഒരു പ്രെസെൻസ് ആവുന്നത് ഈ ചിത്രത്തിലാണ്. ഈ സംഘടനയുടെ തലവനാണ് വെൻവു എന്ന ടോണി ലിയുങ് കഥാപാത്രം. വെൻവുവിന്റെ മകനാണ് ടൈറ്റിൽ കഥാപാത്രം, സ്വാഭാവികമായും ഇവർക്കിടയിലെ ഐഡിയോലജിയുടെ വ്യത്യാസം കാര്യങ്ങളെ ഒരു കോൺഫ്ളിക്റ്റിൽ കൊണ്ട് ചെന്ന് എത്തിക്കുന്നതും മറ്റുമൊക്കെയാണ് സിനിമയുടെ കഥ. ടോണി ലിയുങ് എന്ന ഒറ്റ ഫാക്റ്റർ മാത്രമായിരുന്നു പ്രതീക്ഷ ഉണർത്തിയിരുന്നത് എങ്കിലും ആ ഒരു ഘടകത്തിന് പോലും തൃപ്തി നൽകാൻ കഴിഞ്ഞിട്ടില്ല.

🔸ആക്ഷൻ രംഗങ്ങളും കൊറിയോഗ്രഫിയും ഒക്കെ തന്നെയാണ് സിനിമയുടെ ഏറ്റവും വലിയ പ്ലസ് പോയിന്റുകൾ,. ഇത്രയും ചടുലമായ തോതിലുള്ള സെറ്റ് പീസുകൾ കുറഞ്ഞത് മാർവൽ എങ്കിലും ഇതുവരെ ട്രൈ ചെയ്തിട്ടില്ലാത്തത് ആണ്. നല്ല വിഷ്വൽസും, മോശം ഇല്ലാത്ത സ്ക്കോറും ഒഴിച്ചാൽ തൃപ്തി നൽകിയ ഘടകങ്ങൾ ഒന്നും സിനിമയിൽ കണ്ടില്ല. അസ്ഥാനത്ത് എന്ന് തോന്നിച്ച ചില ഹ്യൂമർ രംഗങ്ങളും തന്ന ഇരിട്ടേഷൻ ചെറുതല്ല, മുൻകാലത്തെ ചില മാർവെൽ സിനിമകളുടെ ട്രെയിറ്റ് തന്നെ. ഒരു കോമിക് ബുക്ക്, ആക്ഷൻ സിനിമ ഒക്കെ ആവുമ്പോൾ തേർഡ് ആക്റ്റിന് ഉള്ള പ്രാധാന്യം വളരെ വലുതാണ്, അവിടെയും ഒരു പരിധിക്ക് അപ്പുറത്തേക്ക് ഉയരാൻ സിനിമയ്ക്ക് കഴിഞ്ഞിട്ടില്ല എന്ന് പറയേണ്ടി വരും.

Verdict : Watchable

DC Rating : 2.25/5 

1176. What If...? (2021)

Director : Bryan Andrews

Creator : A.C Bradley

Genre : Animation

Seasons : 01

Episodes : 09

Duration : 30 - 37 Minutes

🔸വാട്ട് ഇഫ് എന്ന കൺസപ്റ്റ് തന്നെ വളരെ രസകരം ആയ ഒന്നാണ്, നമ്മളിൽ മിക്കവരും സ്വന്തം ജീവിതത്തിൽ ഒരിക്കൽ എങ്കിലും ആലോചിച്ചിട്ടുണ്ടാവും ഈ ഒരു കാര്യം എന്നത് തർക്കങ്ങൾ ഇല്ലാതെ അംഗീകരിക്കാം. നമ്മുടെ ജീവിതത്തിലെ ചില ഘട്ടങ്ങളിൽ നമ്മൾ എടുത്ത തീരുമാനം അങ്ങിനെ ആയിരുന്നില്ല എങ്കിൽ എന്തൊക്കെ വ്യത്യാസങ്ങൾ സംഭവിച്ചേനെ എന്ന ആ ചിന്ത മാർവെൽ തങ്ങളുടെ സീരീസിലേക്ക് കൊണ്ട് വന്നിരിക്കുകയാണ് ഈ അനിമേഷൻ സീരീസിലൂടെ. ഒൻപത് എപ്പിസോഡുകൾ ഉള്ള ആദ്യ സീസണിലെ എല്ലാ കഥകളും മികച്ചതാണ് എന്നൊന്നും പറയാൻ കഴിയില്ല എങ്കിലും ചിലത് കിടിലൻ തന്നെയാണ്, മൂവി സീരീസ് കണ്ടവർക്ക് അല്ലെങ്കിൽ അതിന്റെ ആരാധകർ ആയവർക്ക് തീർച്ചയായും പരീക്ഷിച്ച് നോക്കാവുന്ന ഒന്നാണ് ഈ സംരംഭം.

🔸കയാപ്റ്റൻ കാർട്ടർ എന്ന ആദ്യ സെഗ്മെന്റ് ഒട്ടും തൃപ്തി തരാത്ത ഒരനുഭവം ആയിരുന്നു, കഥാപാത്രങ്ങൾ തമ്മിൽ വെച്ച് മാറി എന്നതൊഴിച്ചാൽ കാര്യമായ പുതുമ ഒന്നും തന്നെ അനുഭവപ്പെട്ടില്ല. മുകളിൽ സൂചിപ്പിച്ച കൺസപ്റ്റിന്റെ മനോഹാരിത ഉൾക്കൊണ്ട ഒന്ന് എന്ന് പറയാവുന്ന ഒന്നായിരുന്നു രണ്ടാമത്തേത് എങ്കിൽ മാർവെൽ അധികം ഒന്നും കടന്ന് ചെന്നിട്ടില്ലാത്ത ഡാർക്ക് ടെറിട്ടറിയിലേക്ക് പോവുകയാണ് മൂന്നാമത്തെയും നാലാമത്തെയും പാർട്ടുകൾ. ഇതിൽ തന്നെ ഡോക്റ്റർ സ്‌ട്രെഞ്ചിന്റെ സ്റ്റോറി സീരീസിലെ ബെസ്റ്റ് എന്നൊക്കെയുള്ള വിശേഷണം അർഹിക്കുന്ന ഒന്നാണ്. സീരീസിലെ ഏറ്റവും കൗതുകം ഉണർത്തിയ സോമ്പി എപ്പിസോഡ് പ്രതീക്ഷിച്ചത് പോലെ തന്നെ വൈൽഡ് ആയ അനുഭവം ആയിരുന്നു എങ്കിലും ആന്റി ക്ലയിമാറ്റിക്ക് ആയിരുന്നു.

🔸കിൽമോൻകറും, തോറും പ്രധാന കഥാപാത്രങ്ങൾ ആയി എത്തിയ തുടർന്നുള്ള രണ്ട് എപ്പിസോഡുകളെ നിർദോഷകരം എന്ന വിശേഷണം മാത്രം നൽകി ഒതുക്കി വിടാം. ഈ രീതിയിൽ വീണ്ടും മീഡിയോകൃറ്റിയിലേക്ക് പോയിക്കൊണ്ടിരുന്ന സീരീസിനെ ട്രാക്കിലേക്ക് മടക്കി കൊണ്ടുവരുന്നത് ടു പാർട്ട് ഫിനാലെ ആണ്. കൺസപ്റ്റ് പൂർണമായും ഉൾക്കൊണ്ട് ഞെട്ടിക്കാൻ കഴിഞ്ഞ സെഗ്മെന്റുകൾ താരമത്യേനെ സീരീസിൽ കുറവാണ്, എന്നാൽ മിക്കതിലും കണ്ടിരിക്കാൻ ഉള്ള സാധനം ഉണ്ട് താനും, താല്പര്യം തോന്നുന്നെങ്കിൽ കാണാൻ ശ്രമിക്കുക.

Verdict : Good

DC Rating : 3.5/5 

1175. When A Woman Ascends The Stairs (1960)

Director : Mikio Naruse

Cinematographer : Masao Tamai

Genre : Drama

Country : Japan

Duration : 111 Minutes

🔸മിക്കിയോ നറുസേ വളരെ പെക്കൂലിയർ ആയ ഒരു സംവിധായകനാണ്, ആളുടെ സിനിമകൾക്ക് വാക്കുകളാൽ വിശേഷിപ്പിക്കാൻ കഴിയാത്ത ഒരു ഭംഗി ഉണ്ട്. പറയുമ്പോൾ വളരെ ലളിതമായി തോന്നുന്ന ഒരു ഘടനയും ചുറ്റുപാടും രീതിയും ഒക്കെ കാണാം കഴിഞ്ഞേക്കും എങ്കിലും കാഴ്ചക്കാരനെ വൈകാരികമായി സ്പർശിക്കുന്ന എന്തെങ്കിലും ഒരു ഫാക്റ്റർ ചിത്രത്തിൽ എവിടെയെങ്കിലും ഒക്കെ കാണാൻ കഴിഞ്ഞേക്കും. നാരുസെയുടെ ഒരു പക്ഷെ ഏറ്റവും അണ്ടർ അപ്രെഷ്യറ്റെഡ് ആയ സിനിമ ആയി വിശേഷിപ്പിക്കാവുന്ന വെൻ എ വുമൺ അസന്ഡസ് ദി സ്റ്റെയർസ് എന്ന ഈ ചിത്രത്തിലും സ്ഥിതിഗതികൾ വ്യത്യസ്തമല്ല.

🔸കേയ്ക്കോ എന്ന നമ്മുടെ ചിത്രത്തിലെ പ്രധാന കഥാപാത്രം ഒരു വിധവ ആണ്, പ്രായം അധികം ആയിട്ടില്ല അവർക്ക് എങ്കിലും തന്റെ പരേതനായ ഭർത്താവിനോടുള്ള റെസ്‌പെക്റ്റ് കാരണം മറ്റൊരു വിവാഹത്തിന് തുനിയാതെ സ്വന്തം ജീവിതവുമായി അവർ മുന്നോട്ട് പോവുകയാണ്. ഒരു ചെറിയ ബാറിൽ അവർ ഇന്ന് ജോലിക്കാരിയാണ്, അവിടത്തെ ചെറിയ വരുമാനം അല്ലാതെ അവർക്ക് ജീവിക്കാൻ മറ്റ് മാർഗങ്ങൾ ഇല്ല. എന്നെങ്കിലും ഒരിക്കൽ സ്വന്തമായി ഒരു ബാർ തുറക്കണം എന്നും അത് വഴി ശിഷ്ടകാലം അന്തസ്സായി ജീവിക്കാനുള്ള വക കണ്ടെത്തണം എന്നതും ഒക്കെയാണ് കെയ്‌ക്കൊയുടെ ആഗ്രഹങ്ങൾ.

🔸പക്ഷെ ഈ ജീവിതം എന്നത് നമ്മൾ ആഗ്രഹിച്ച വഴിയിലൂടെ പോയ ചരിത്രം ഇല്ലല്ലോ, അത് തന്നെയാണ് കെയ്‌ക്കൊയുടെ കാര്യത്തിലും സംഭവിക്കുന്നത്. അവളുടെ ആഗ്രഹങ്ങൾക്ക് വിലങ്ങു തടി ആയിക്കൊണ്ട് ഒരുപാട് കോണ്ഫലിക്റ്റുകൾ കഥയിലേക്ക് കടന്ന് വരുന്നുണ്ട്. ഈ സ്റ്റോറി പ്രോഗ്രഷൻ ആ കഥാപാത്രത്തെ നമ്മൾ ഒട്ടും പ്രതീക്ഷിക്കാത്ത തലങ്ങളിലേക്ക് കൊണ്ട് പോവുന്നുമുണ്ട്. ഡ്രാമ ജോണറിൽ പെട്ട സിനിമകൾ ആസ്വദിക്കുന്നവർ ആണ് നിങ്ങൾ എങ്കിൽ മികച്ച ഒരു അനുഭവം തന്നെ ആയിരിക്കും ഈ ചിത്രം. മികച്ച പ്രകടനങ്ങളും, ചായഗ്രഹണവും, എൻഡിങ് ഷോട്ടും എല്ലാം കൂടി ചേരുമ്പോൾ ആ മേന്മ കൂടുന്നെ ഉള്ളൂ താനും.

Verdict : Very Good

DC Rating : 4/5

1174. The Servant (1963)

Director : Joseph Losey

Cinematographer : Douglas Slocombe

Genre : Drama

Country : UK

Duration : 116 Minutes

🔸വളരെ ഇരിറ്റെറ്റിങ് ആയ ഒരു വ്യൂയിങ് എക്സ്പീരിയൻസ് ആണ് ദി സെർവന്റ് എന്ന അറുപതുകളിൽ പുറത്തിറങ്ങിയ ഇംഗ്ലീഷ് ഡ്രാമ ചിത്രം. ഒരു ത്രീ ആക്റ്റ് സ്ട്രക്ച്ചർ ഒക്കെ മനസ്സിൽ വെച്ച് കൃത്യമായ സ്റ്റോറി പേ ഓഫ് ഒക്കെ പ്രതീക്ഷിച്ച് കാണാൻ ഇരുന്നാൽ അതൊന്നും തന്നെ ലഭിക്കാൻ പോവുന്നില്ല, അതൊരു മോശം കാര്യമായി അനുഭവപ്പെട്ടുമില്ല. ടോണി എന്ന നമ്മുടെ നായക കഥാപാത്രം അതായവശ്യം സമ്പന്നനായ ഒരു ചെറുപ്പക്കാരൻ കഥാപാത്രമാണ്, വളരെ ചെറുപ്പത്തിലേ വലിയൊരു ഫോർച്യുൻ കൈവശപ്പെടുത്തിയതിന്റെ മോശം ഫലം കൊണ്ടാവണം ആളൊരു പ്ളേ ബോയ് ടൈപ്പ് കഥാപാത്രം ആണ്.

🔸അപ്പൊ ടോണി ഒരു നാൾ തന്റെ സെർവന്റ് ആയി ബാരറ്റ് എന്ന ആളെ ജോലിക്ക് എടുക്കുകയാണ്. വീട്ട് ജോലിക്കാരൻ എന്ന തസ്തിക ആണ് ബാററ്റിന് ലഭിക്കുന്നത് എങ്കിലും അത് ഒരു പേഴ്സണൽ അസിസ്റ്റന്റ് ലെവലിലേക്ക് പോവുന്നുണ്ട്. ടോണിക്ക് സൂസൻ എന്ന കാമുകി ഒഴിച്ച് നിർത്തിയാൽ മറ്റ് ബന്ധുക്കൾ ആരും തന്നെ ഇല്ല, സുഹൃത്തുക്കളും ഇല്ല, അങ്ങനെ എല്ലാ തോതിലും ഒറ്റപ്പെട്ട ഒരു കഥാപാത്രം. ബാരറ്റ് ഒരു വല്ലാത്ത കഥാപാത്രം ആണ്, അയാൾ ജോലി ഒക്കെ വൃത്തിയായി ചെയ്യും എങ്കിലും ഒരു പ്രത്യേക തരം വൈചിത്ര്യം അയാൾക്ക് ചുറ്റിപറ്റി ഉണ്ട്. ആ വീടിന്റെ എവിടെ നോക്കിയാലും അയാളുടെ നിസ്സംഗമായ മുഖം കാണുന്ന തോതിലുള്ള ഒരു ഇരിറ്റേഷനിലേക്ക് കാര്യങ്ങൾ പോവുകയാണ്.

🔸ടോണിയുടെ കഴിവ് കേട് കൊണ്ടോ, അല്ലെങ്കിൽ ബാരറ്റിന്റെ മുതലെടുപ്പ് മെന്റാലിറ്റി കൊണ്ടോ, അവിടെയുള്ള മുതലാളി തൊഴിലാളി സമവാക്യം ആകെ മാറി മറിയുകയാണ്. താമസിയാതെ കാര്യങ്ങളുടെ കടിഞ്ഞാൺ ബാററ്റിന്റെ കയ്യിലേക്ക് എത്തുകയാണ്, കഥ മറ്റൊരു തലത്തിലേക്ക് മാറുകയാണ്. മുന്നേ സൂചിപ്പിച്ച പോലെ അത്യാവശ്യം ഇരിട്ടെറ്റിങ് ആയ ഒരു സിനിമയും കഥാപാത്രവും ആണ് ഈ ചിത്രവും ബാരട്ടും, അത് ഒരു പോസിറ്റീവ് ആയി മാറിയിട്ടുമുണ്ട്. അവസാനത്തെ സീനും കണ്ട് കഴിയുമ്പോൾ വാക്കുകളാൽ വിശേഷിപ്പിക്കാൻ കഴിയാത്ത ഒരുപാട് വികാരങ്ങളുടെ ഒരു വരവ് ഉണ്ട്, ഒരുപാട് സിനിമകൾക്ക് ഒന്നും അങ്ങനെ ഒരു അനുഭവം തരാൻ കഴിഞ്ഞിട്ടില്ല, അപ്പൊ സ്വാഭാവികമായും പറയാം ഇത് ഒരു സ്പെഷ്യൽ മൂവി തന്നെ ആണെന്ന്.

Verdict : Must Watch

DC Rating : 5/5