415. Chekka Chivantha Vaanam (2018)

Director : Mani Ratnam

Genre : Thriller

Rating : 9/10

Country : India

Duration : 142 Minutes


🔸ഒരു മണിരത്നം ചിത്രം എന്ന മൂന്ന് വാക്കുകൾ മാത്രം മതി ഒരു സിനിമ കാണാൻ പ്രചോദനം ലഭിക്കാൻ, ഇരുവർ, ദളപതി, അഞ്ജലി, ദിൽസേ, ബോംബെ തുടങ്ങി അനേകം ചിത്രങ്ങളിലൂടെ മണിരത്നം കരസ്ഥമാക്കിയ തമിഴ് സിനിമയുടെയും ഒരു പരിധി വരെ ഇന്ത്യൻ സിനിമാ ചരിത്രത്തിന്റെയും സിംഹാസനത്തിന് ചോദ്യങ്ങൾ ഉയർന്ന് തുടങ്ങിയത് ഈ അടുത്ത കാലത്താണ്. സംവിധായകന്റെ മുൻ ചിത്രങ്ങളുടെ നിലവാരത്തിലേക്ക് ഒരു രീതിയിലും ഉയരാതെ പോയ കടൽ, കാറ്റ്ര് വെളിയിടെ തുടങ്ങിയ ചിത്രങ്ങൾക്ക് ശേഷം പ്രതിഭയ്ക്കും ബ്രാൻഡിനും അനിവാര്യമായ തിരിച്ചുവരവിനാണ് ചെക്ക ചിവന്ത വാനം കളം ഒരുക്കിയിരിക്കുന്നത്. അതി ശക്തമായ താരനിരയും, തന്റെ സ്ഥിരം അണിയറ കൂട്ടാളികളുടെയും ബലത്തിൽ മണിരത്നം ഒരു വരവ് കൂടി വരുമ്പോൾ തീർച്ചയായും പ്രതീക്ഷകൾ വാനോളം ആയിരുന്നു.

🔸സിനിമയുടെ ട്രൈലെർ, പോസ്റ്റർ തുടങ്ങിയവയിൽ നിന്നും ലഭിച്ച ഗോഡ്ഫാദർ എന്ന ചിത്രത്തോടുള്ള സാമ്യം പ്രതീക്ഷിച്ച് കൊണ്ട് തന്നെയാണ് തിയേറ്ററിലേക്ക് കടന്നതെങ്കിലും അധോലോക നായകനായ അച്ഛന്റെയും മൂന്ന് ആണ്മക്കളുടെയും കഥ എന്നതിൽ കവിഞ്ഞ് വലിയ താരമത്യങ്ങൾ ഇരു ചിത്രങ്ങളും അർഹിക്കുന്നില്ല എന്നത് ആശ്വാസകരം തന്നെ ആയിരുന്നു. ചെന്നൈ നഗരം അടക്കി വാഴുന്ന സേനാപതി എന്ന പ്രകാശ് രാജ് അവതരിപ്പിക്കുന്ന കഥാപാത്രവും, അയാളുടെ മൂന്ന് മക്കളായ വരദൻ, ത്യാഗു, എത്തി എന്നിവരുമാണ് ചിത്രത്തിന്റെ ബാക്ബോൺ. സേനാപതിക്കെതിരെ അരങ്ങേറുന്ന ഒരു വധശ്രമം അച്ഛന് ശേഷം ആര് എന്ന ന്യായമായ ചോദ്യത്തിന് വഴി വെക്കുന്നതും തുടർന്നുണ്ടാവുന്ന പ്രശ്നങ്ങളുമാണ് ചിത്രത്തിന്റെ പ്രമേയം. കൂടുതൽ കഥ പറഞ്ഞ് സിനിമയുടെ ഭംഗി കളയുന്നില്ല.

🔸അധികാര സ്വരവും മറ്റ് കഥാപാത്രങ്ങളുടെ മേൽ നിയന്ത്രണ മനോഭാവവും സർവോപരി കലിപ്പനുമായ വരദൻ എന്ന കഥാപാത്രത്തിന് അരവിന്ദ് സ്വാമിയേക്കാൾ മികച്ച മറ്റൊരു നടനെ കാണിച്ചു തരാനില്ല, നീണ്ട ഇടവേളയ്ക്ക് ശേഷം തന്റെ ഇഷ്ട നായകനോടൊപ്പം ഒരുമിച്ച മണിരത്നത്തിന്റെയും പ്രേക്ഷകന്റെയും വിശ്വാസം അദ്ദേഹം കാത്തു എന്ന് നിസ്സംശയം പറയാം. ജ്യോതിക അവതരിപ്പിച്ച ഭാര്യാ കഥാപാത്രവും, അതിഥി റാവുവുമായുള്ള രംഗങ്ങളും നന്നായിരുന്നെങ്കിലും ഇതിലും പ്രാധാന്യം അർഹിച്ചിരുന്നതായി തോന്നി. സിലമ്പരശൻ എന്ന നടനോട് യാതൊരു താല്പര്യവും ഉണ്ടായിരുന്നില്ലെങ്കിൽ കൂടിയും ഈ ഒരൊറ്റ ചിത്രത്തിലെ അദ്ദേഹത്തിന്റെ പ്രകടനം കൊണ്ട് ആ അഭിപ്രായങ്ങളിൽ മാറ്റം വന്നു എന്നതിൽ കവിഞ്ഞ് കൂടുതൽ പറയാൻ താല്പര്യപ്പെടുന്നില്ല, ഈ കഥാപാത്രത്തെയും അയാളുടെ മാനറിസങ്ങളെയും ഉദ്ദേശങ്ങളെയും കണ്ടറിയേണ്ടി ഇരിക്കുന്നു.

🔸മുൻ നിര നായകന്മാരിൽ ആരാധകരിൽ പിന്നോക്കം നിൽക്കുന്ന അരുൺ വിജയ് അവതരിപ്പിച്ച ത്യാഗു എന്ന കഥാപാത്രം ആണ്  ചിത്രത്തിൽ വ്യക്തിപരമായി ഏറ്റവും ശ്രദ്ധ പിടിച്ചുപറ്റിയ കഥാപാത്രം. പൂച്ചയെ പോലെ എങ്ങനെ വീണാലും പിടിച്ചു നിൽക്കും എന്ന പ്രതീതി ജനിപ്പിച്ച കഥാപാത്രം ഓരോ രംഗത്തും മുഖത്ത് പ്രകടിപ്പിച്ച ശാന്തതയ്ക്ക് പിറകിൽ അലയടിക്കുന്ന പ്രളയത്തിന്റെ സൂചനകൾ നൽകിയിരുന്നു. അരുൺ വിജയ് എന്ന നടൻ തീർച്ചയായും പ്രശംസ അർഹിക്കുന്നുണ്ട് ഈ പ്രകടനത്തിലൂടെ. ഫഹദ് ഫാസിൽ എന്ന നടൻ കൂടി ഉണ്ടായിരുന്നെങ്കിൽ എന്ന് ആരാധക മനോഭാവത്തോടെ ചിന്തിച്ചെങ്കിലും അത് ഒരിക്കലും അരുൺ വിജയ് എന്ന നടന്റെ പ്രകടനവുമായി ബന്ധപ്പെടുത്തിയല്ല എന്ന് കൂടി ചേർക്കേണ്ടി ഇരിക്കുന്നു. വിജയ് സേതുപതി എന്ന നടന് പരിചയപ്പെടുത്തലുകൾ ആവശ്യമില്ല, കഴിഞ്ഞ അഞ്ച് വർഷത്തോളമായി തന്റെ മികച്ച പ്രകടനങ്ങളും നിലവാരമുള്ള ഒരു പിടി സിനിമകളുമായി നമ്മുടെ മുന്നിലേക്കെത്തിയ വിജയ് സേതുപതിക്ക് റസൂൽ എന്ന ശക്തമായ പോലീസ് കഥാപാത്രമാണ് മണിരത്നം നൽകിയത്, സംവിധായകനും കഥയും ആവശ്യപ്പെട്ടതെല്ലാം വിജയ് സേതുപതി ചിത്രത്തിനായി നൽകിയിട്ടുണ്ട്. ഇവർക്കൊപ്പം, കുറച്ച് രംഗങ്ങളിൽ മാത്രമേ ഉള്ളൂവെങ്കിലും പഴയകാല നടൻ ത്യാഗരാജനെ വീണ്ടും കാണാനായതും സന്തോഷം നൽകി.

🔸നാല് നായക കഥാപാത്രങ്ങൾക്കും കൃത്യമായ സമയവും പ്രേക്ഷകന്റെ മനസ്സിൽ ഇടം നേടാനുള്ള രീതിയിൽ തങ്ങളുടെ കഴിവുകൾ പ്രകടിപ്പിക്കാനുള്ള അവസരങ്ങളും നൽകിയ തിരക്കഥ തന്നെയാണ് ഏറ്റവും പ്രശംസ അർഹിക്കുന്നത്. മണിരത്നം സിനിമകളിലെ സ്ഥിര സാന്നിധ്യമായ റഹ്മാന്റെ പാട്ടുകളും മികച്ച പശ്ചാത്തല സംഗീതവും ചിത്രത്തിന്റെ മറ്റ് പ്ലസ് പോയിന്റുകളാണ്. വിപ്ലവകരം എന്നൊന്നും വിശേഷിപ്പിക്കാൻ കഴിയുന്ന കഥയല്ല ചെക്ക ചിവന്ത വാനം എന്ന ചിത്രത്തിന്റേത്, അനാവശ്യമായ രീതിയിൽ സങ്കീർണ്ണമാക്കാൻ ശ്രമിച്ചിട്ടുമില്ല. ഗ്യാങ്സ്റ്റർ ചിത്രങ്ങളിൽ നിന്നും പ്രതീക്ഷിക്കാവുന്ന പക, ചതി, തിരിച്ചടി ഇതൊക്കെ തന്നെയാണ് ഈ ചിത്രത്തെയും മുന്നോട്ട് കൊണ്ടുപോവുന്നത്, അത് മികച്ച രീതിയിൽ അവതരിപ്പിച്ചിട്ടുണ്ട് എന്നിടത്താണ് ചിത്രം വിജയിക്കുന്നത്. ട്രൈലെർ കണ്ട് കൊണ്ടിരിക്കെ ശ്രദ്ധ കൊടുക്കാതെ വിട്ട ഒരു രംഗം സിനിമയിൽ പ്രത്യേകിച്ചും ക്ലൈമാക്സിൽ എത്രമേൽ പ്രധാനപ്പെട്ടതായിരുന്നു എന്നത് ചെറിയ കൗതുകം ഉളവാക്കി.

Verdict : Very Good

Andrei Tarkovski

സിനിമയുടെ ചരിത്രം ഏത് രാജ്യമെന്നോ കാലമെന്നോ രീതിയെന്നോ ബേധമില്ലാതെ എങ്ങനെ ഒക്കെ പറഞ്ഞ് തുടങ്ങിയാലും തർക്കോവ്സ്കി എന്ന നാമം ചേർത്ത് പറഞ്ഞില്ലെങ്കിൽ അത് അപൂർണമാണ്, അതിൽ യാതൊരു സംശയവും വേണ്ട. ആത്മീയതയുടെയും, ഫിലോസഫിയുടെയും മേൻപൊടിയോടെ സിനിമകളെ സമീപിച്ച തർക്കോവ്സ്കിയോളം ഒരു കാലഘട്ടത്തിനെയും ആ കാലത്തെ പ്രതിനിധീകരിക്കുന്ന സിനിമാ സംസ്കാരത്തെയും സ്വാധീനിച്ച മറ്റനേകം സംവിധായകർ ഉണ്ടാവില്ല. തന്റെ സമകാലികരായ സംവിധായകരിൽ നിന്നും വ്യത്യസ്തമായി ലോങ്ങ് ഷോട്ടുകളുടെയും, വേറിട്ട അവതരണത്തിന്റെയും സർവോപരി മാനവ രാശിയുടെ നിലനില്പും ഉത്ഭവവും അതിന്റെ കാര്യ കാരണങ്ങളും വരെ താഥ്വികമായി അവതരിപ്പിച്ച ശൈലിയായിരുന്നു തർക്കോവ്‌സ്‌കിയുടേത്. 1962ൽ ഇവാൻസ് ചൈൽഡ്ഹുഡ് എന്ന ചിത്രത്തിൽ നിന്നും തുടങ്ങി ഇരുപത്തി നാല് വർഷങ്ങൾക്കിപ്പുറം 1986ൽ സാക്രിഫൈസ് എന്ന ചിത്രത്തോടെ അവസാനിച്ച കരിയറിൽ പൊൻതൂവലുകൾ പോലെ പതിനൊന്ന് ചിത്രങ്ങൾ. തന്റെ സൃഷ്ടിയിൽ വിട്ടുവീഴ്ചയ്ക്ക് മുതിരാതിരുന്ന മാസ്റ്റർ മൈൻഡിന്റെ അഞ്ച് മികച്ച ചിത്രങ്ങളിലൂടെ ഒന്ന് സഞ്ചരിച്ച് നോക്കാം.

Nostalghia (1983)

Genre : Drama

Rating : 8.2/10

Duration : 125 Minutes


ഒരു മനുഷ്യൻ ഭൂമിയിൽ ജനിച്ച് വീഴുന്ന നിമിഷം മുതൽ ശ്വാസത്തിന്റെ അവസാന നാളം ശരീരം വിട്ട് പോവുന്നത് വരെയുള്ള കാലയളവ് അവൻ സ്വന്തം വ്യക്തിത്വത്തെ കുറിച്ചും ഞാൻ എന്നതിനെ കുറിച്ചുമുള്ള ഒടുങ്ങാത്ത അന്വേഷണത്തിൽ ആയിരിക്കും എന്ന് എവിടെയോ കേട്ട് മറന്ന ചിന്തയുടെ പേടിപ്പെടുത്തും വിധം സുന്ദരമായ അവതരണം ആണ് നൊസ്റ്റാൾജിയ എന്ന ചിത്രം. പതിനെട്ടാം നൂറ്റാണ്ടിൽ റഷ്യയിൽ ജീവിച്ചിരുന്ന കമ്പോസർ ആയിരുന്ന പാവൽ സോസ്‌നോവ്സ്കിയെ കുറിച്ച് കൂടുതൽ അറിയാനും മറ്റുമായി ഇറ്റലിയിൽ എത്തുന്ന ഗോർച്ചക്കോവ് എന്ന എഴുത്തുകാരനെയും, ഈ അന്വേഷണങ്ങളിൽ അയാൾ കണ്ടെത്തുന്ന വസ്തുതകളുമാണ് ചിത്രത്തിന്റെ പ്രമേയം. കാഴ്ചയിൽ വിസ്മയം ജനിപ്പിക്കുന്ന ഓരോ ഫ്രെയിമും, തർക്കോവ്സ്കി എന്ന വ്യക്തിയുടെ പ്രതിഭ വിളിച്ചോതുന്ന സിനിമയുടെ ഓരോ ഘടകങ്ങളും എല്ലാത്തിനും പുറമെ ഒലെ യാങ്കോവ്സ്കിയുടെ മാസ്മരിക പ്രകടനവും ചിത്രത്തിന്റെ മാറ്റ് കൂട്ടുന്നു.

Andrei Rublev (1966)

Genre : Biography

Rating : 8.4/10

Duration : 205 Minutes


തർക്കോവ്സ്കിയുടെ മികച്ച ചിത്രങ്ങളിൽ ഒന്ന് എന്നതിനപ്പുറം ലോകത്ത് ഇന്നേവരെ പുറത്തിറങ്ങിയ ഏറ്റവും മികച്ച ചിത്രങ്ങളിൽ ഒന്ന് എന്ന പദവി ആന്ദ്രേ റബ്ലെവ് എന്ന ചിത്രം തീർച്ചയായും അർഹിക്കുന്ന ഒന്ന് തന്നെയാണ്. പതിനഞ്ചാം നൂറ്റാണ്ടിന്റെ പശ്ചാത്തലത്തിൽ റഷ്യയിൽ ജീവിച്ചിരുന്ന ആന്ദ്രേ റബ്ലെവ് എന്ന ചിത്രകാരന്റെ ജീവിതമാണ് ചിത്രത്തിന് ആസ്പദമായിരിക്കുന്നത്. യുദ്ധവും കലഹങ്ങളും വിപ്ലവവും എല്ലാം കൊണ്ട് വിഭജിക്കപ്പെട്ടിരുന്ന റഷ്യയിൽ രാജവംശത്തിനിടയിൽ ജീവിച്ച് പോന്ന ഒരു ജനതയുടെയും ഇവർക്കിടയിൽ മൗനം ഒരു തരം പ്രതിഷേധ മാർഗമായി സ്വീകരിച്ച റബ്ലെവിന്റെയും കഥ ഏതൊരു സിനിമാ ആസ്വാദകനും നിശ്ചയമായും കണ്ടിരിക്കേണ്ടതാണ്. പതിനഞ്ചാം നൂറ്റാണ്ടിലെ റഷ്യയെ സാമൂഹിക രാഷ്ട്രീയ പരിസ്ഥിതികളിൽ എല്ലാം തന്നെ മാറ്റങ്ങൾ ഏതുമില്ലാതെ അവതരിപ്പിക്കുന്നതിൽ വിസ്മയകരമാം വിധം വിജയിച്ച തർക്കോവ്സ്കിയുടെ തലയിലെ മറ്റൊരു പൊൻ തൂവലാണ് റിലീസിന് ശേഷം കടുത്ത സെൻസറിങ് നേരിടേണ്ടി വന്ന ആന്ദ്രേ റാബ്ലെവ്.

Ivans Childhood (1962)

Genre : War

Rating : 8.1/10

Duration : 97 Minutes


ചിത്രം കാണുന്നയാൾ അവസാനം ആവുമ്പോൾ  യുദ്ധം എന്ന വാക്കിനെ പോലും വെറുത്തിരിക്കണം, അതിന് ഏറ്റവും നല്ലത് ബാല്യം ആണ്. കാരണം യുദ്ധവും ബാല്യവും പോലെ ഒരേസമയം വ്യത്യസ്തവും എന്നാൽ ബന്ധപ്പെട്ടിരിക്കുന്നതുമായ മറ്റൊന്നുമില്ല - തർക്കോവ്സ്കി. രണ്ടാം ലോകമഹായുദ്ധം ആണ് കഥാ പശ്ചാത്തലം. റഷ്യ കീഴടക്കാനുള്ള ഹിറ്റ്ലറുടെ കല്പന നടപ്പാക്കാനായി ഇരച്ച് കയറിയ നാസികളും റഷ്യൻ സൈന്യവും തമ്മിൽ കനത്ത ആക്രമണം നടക്കുകയാണ്. ആ നാളുകളിൽ ഒന്നിലാണ് ഇരു സേനകളെയും വേർതിരിച്ചിരുന്ന നദി നീന്തി കടന്ന് കൊണ്ട് പന്ത്രണ്ട് വയസ്സുകാരനായ ഇവാൻ റഷ്യൻ സേന തമ്പടിച്ചിരുന്നിടത്ത് എത്തുന്നത്. സംശയത്തോടെ നോക്കിയ പട്ടാളക്കാർക്ക് അധികം താമസിയാതെ ഇവാൻ ഒരു അത്ഭുതമായി മാറുകയാണ്, കാരണം അവൻ യുദ്ധ മുഖത്ത് നിന്നും വിലപ്പെട്ട വിവരങ്ങളുമായി എത്തിയ റഷ്യൻ ചാരനാണ്. ബാല്യത്തിൽ തന്നെ ജീവൻ പണയം വെച്ച് യുദ്ധമുഖത്ത് ഇറങ്ങാൻ ഇവാന് കാരണങ്ങൾ ഉണ്ടായിരുന്നു. സ്വസ്ഥമായ മനസ്സോടെ അല്പം പോലും ദേഷ്യം തോന്നാതെ കണ്ടുതീർക്കാനാവില്ല ഈ തർക്കോവ്സ്കി ചിത്രം.

Stalker (1979)

Genre : Sci Fi

Rating : 8.2/10

Duration : 161 Minutes


ദൃശ്യവിസ്മയം എന്നൊക്കെ ഒരു ചിത്രത്തെ വിശേഷിപ്പിക്കാമെങ്കിൽ അത് സ്റ്റാക്കർ എന്ന ചിത്രത്തിനെയാണ്, ഓരോ ഫ്രെയിമും ഓരോ കാഴ്ചയും പ്രേക്ഷകനോട് പറയുന്നത് ഒരുപാട് കാര്യങ്ങളാണ്. ദൃശ്യഭംഗിയോളം തന്നെ പ്രാധാന്യം അർഹിക്കുന്നതാണ് ചിത്രത്തിലെ സംഭാഷണങ്ങളും, ഓരോ വരിയിലും ഒരുപാട് അർഥങ്ങൾ അവയിൽ ഓരോന്നിലും ഒരുപാട് തലങ്ങൾ, ചുരുക്കി പറയുക ആണെങ്കിൽ സ്റ്റാക്കർ എന്ന ചിത്രം ഒരു സിനിമ എന്നതിനേക്കാൾ സൃഷ്ടി എന്നോ പിറവി എന്നോ ഉള്ള നാമം അർഹിക്കുന്നു. സോൺ എന്ന പേരുള്ള സ്ഥലം, അവിടെ എത്തുന്ന വ്യക്തിക്ക് തന്റെ ഒരാഗ്രഹം സാധിക്കാനുള്ള അവസരം ലഭിക്കും എന്നാൽ അവിടേക്കുള്ള പാത അത്യന്തം കഠിനമായതും. സോണിലേക്കുള്ള മൂന്ന് വ്യക്തികളുടെ യാത്രയാണ് സ്റ്റാക്കർ എന്ന ചിത്രം. സോണിനെ ഏത് രീതിയിൽ വേണമെങ്കിലും പ്രതിപാദിക്കാം, മതമോ ദൈവമോ എങ്ങനെ വേണമെങ്കിലും, അതെല്ലാം പൂർണമായും പ്രേക്ഷകന് വിട്ടുതരുന്ന ചിത്രം ഒരനുഭവം ആണ്, ഒഴിവാക്കാൻ പാടില്ലാത്ത ഒരനുഭവം.

The Mirror (1975)

Genre : Art

Rating : 8.2/10

Duration : 106 Minutes


ഫിലോസഫിയും സ്പിരിച്വലിറ്റിയും നോൺ ലീനിയർ അവതരണ ശൈലിയും സ്വത സിദ്ധമായ തർക്കോവ്സ്കിയുടെ കയ്യൊപ്പും ചേർന്നാൽ ദി മിറർ എന്ന ചിത്രമാകും, വ്യക്തിപരമായി സംവിധായകന്റെ ഏറ്റവും ഇഷ്ട്ടപ്പെട്ട ചിത്രം കൂടിയാണ് ദി മിറർ. മരണകിടക്കയിൽ അന്ത്യം കാത്ത് കിടക്കുന്ന റഷ്യൻ കവിയുടെ ഭൂതകാലത്തേക്കുള്ള ഒരു തിരിഞ്ഞ് നോട്ടവും, അതിനോടൊപ്പം കാലഘട്ടത്തിലെ റഷ്യൻ ജനതയുടെ ശബ്ദവും കുടുംബം എന്ന വസ്തുതയും എല്ലാം തർക്കോവ്സ്കി തന്റെ പ്രമേയമാക്കി മാറ്റുന്നു. സ്വന്തം പിതാവിന്റെ കഥ തന്നെ പ്രമേയമാക്കിയ തർക്കോവ്സ്കി ഭൂതകാലത്തിലും ഓർമകളിലും ഫിലോസോഫിയോടൊപ്പം തന്നെ വികാരങ്ങൾക്കും പ്രാധാന്യം നൽകിയിരിക്കുന്നു. ഒരു മനുഷ്യന്റെ ഓർമകളെ അനശ്വരമാം വിധം വീണ്ടും ഒപ്പിയെടുക്കാനും മികച്ച രീതിയിൽ അവശ്യ ഘടകങ്ങളുടെ അകമ്പടിയോടെ പ്രേക്ഷകന് മുന്നിൽ എത്തിക്കാനും തർക്കോവ്സ്കി നടത്തിയ പരിശ്രമങ്ങൾക്ക് മുന്നിൽ കൂപ്പ് കയ്യോടെ നിൽക്കാനേ വഴിയുള്ളൂ.

ഈ ചിത്രങ്ങൾക്ക് പുറമെ സ്പേസ് സ്റ്റേഷനുകളും ബാഹ്യാകാശവും അവിടെ അരങ്ങേറുന്ന ചില വിചിത്ര സംഭവങ്ങളും പ്രമേയമാക്കിയ സൊളാരിസ് (1972), മനഃശാന്തി അന്വേഷിച്ച് കൊണ്ടുള്ള ഒടുങ്ങാത്ത പ്രയാണത്തെ കുറിച്ച് പറഞ്ഞ സാക്രിഫൈസ് (1986), വോയേജ് ഇൻ ടൈം (1983) തുടങ്ങിയവയും തർക്കോവ്സ്കിയുടെ മികച്ച ചിത്രങ്ങളാണ്.

414. Mandy (2018)

Director : Panos Cosmatos

Genre : Action

Rating : 7/10

Country : USA

Duration : 120 Minutes


🔸നിക്കോളാസ് കേജ്‌ എന്ന നടനോളം തന്റെ അഭിനയ ജീവിതത്തിൽ തെറ്റായ തീരുമാനങ്ങൾ കൈക്കൊണ്ട വേറൊരാൾ ഉണ്ടാവില്ല, ലോർഡ് ഓഫ് ദി റിങ്‌സ്, മട്രിക്സ്, ഇടെർണേൽ സൺഷൈൻ, റസ്ലർ, നോളന്റെ ബാറ്റ്മാൻ ട്രിലജി ഉൾപ്പെടെ ഉള്ള ചിത്രങ്ങൾ ഒഴിവാക്കി ലെഫ്റ്റ് ബിഹൈൻഡ്, പേ ദി ഗോസ്റ്റ്, വിക്കർ മാൻ, സീക്കിങ് ജസ്റ്റിസ് തുടങ്ങിയ ശരാശരിക്ക് താഴെ നിൽക്കുന്ന ചിത്രങ്ങൾക്ക് തല വെച്ച കേജിന്റെ തീരുമാനങ്ങൾ ഒരു രീതിയിലും ന്യായീകരിക്കാൻ കഴിയാത്തതും ആണ്. ഈ കാരണങ്ങളാൽ തന്നെ നിലവാരമുള്ള, ബേധപ്പെട്ടതെന്ന് തോന്നിക്കുന്ന ഓരോ നിക്കോളാസ് കേജ്‌ ചിത്രങ്ങളും ആശ്വാസവും പ്രതീക്ഷയുമാണ്, മാൻഡി അത്തരമൊരു ചിത്രമാണ്.

🔸എൺപതുകളിലും അതിന് മുൻപും വൻ പ്രചാരം നേടിയിരുന്ന ഹിപ്പി സംസ്കാരത്തെ പ്രത്യക്ഷമായും പരോക്ഷമായും ഉൾക്കൊള്ളുന്ന ചിത്രമാണ് മാൻഡി. ഹിപ്പി പോപ്പ് സംഗീതവും അത് വഴി കൾട്ട് ഫോള്ളോയിങ്ങും കരസ്ഥമാക്കിയ ഒരു കൂട്ടം ആളുകളുടെയും അവർക്കിടയിലേക്ക് കടന്ന് വരേണ്ടി വരുന്ന ദമ്പതിമാരുടെയും കഥയാണ് ലളിതമായി പറഞ്ഞാൽ മാൻഡി എന്ന ചിത്രം. ടോൺ കൊണ്ടും അവതരണ രീതി കൊണ്ടും, എല്ലാത്തിനും പുറമെ കണ്ട് ശീലമില്ലാത്ത പശ്ചാത്തലവും കഥാപാത്രങ്ങളും കൊണ്ടും ഇത്രയേറെ ഒറ്റപ്പെട്ട് കിടക്കുന്ന മറ്റൊരു ചിത്രം ഈ വർഷം പുറത്തിറങ്ങിയിട്ടുണ്ടോ എന്ന കാര്യം സംശയമാണ്.

🔸മുപ്പത്തി അഞ്ച് വർഷങ്ങൾക്ക് മുൻപാണ് ചിത്രത്തിന് ആസ്പദമായ കഥ അരങ്ങേറുന്നത്, "ഞാൻ മരിച്ചു കഴിഞ്ഞാൽ എന്റെ ശവശരീരം കുഴിച്ചിടുന്നതിനോടൊപ്പം കാല്പാദത്തിന് അരികെ രണ്ട് സ്പീക്കറുകളും തലയ്ക്കരികെ രണ്ട് ഹെഡ്ഫോണുകളും കൂടി കരുതണം" എന്ന വിചിത്രമായ വരികളോട് കൂടിയാണ് ചിത്രം ആരംഭിക്കുന്നത്. ഒരുപക്ഷെ തുടർന്ന് വരാനുള്ള സംഭവങ്ങളുടെ മുന്നോടിയോ സംവിധായകന്റെ ജാമ്യം എടുക്കലോ ആയി ഈ വരികളെ വ്യാഖ്യാനിക്കാം. എന്നാൽ ശ്രദ്ധ പിടിച്ചു പറ്റിയത് തുടക്കം മുതൽക്കേ തന്നെ നിലനിൽക്കുന്ന സ്വപ്നമോ യാഥാർഥ്യമോ എന്ന് തിരിച്ചറിയാനാവാത്ത അസ്വാഭാവികതയാണ്. ഈ അസ്വാഭാവികത തന്നെയാണ് തുടർന്ന് ചിത്രം കാണാൻ പ്രേരണ പകരുന്നതും.

🔸ദമ്പതിമാരായ റെഡ് മില്ലറുടെയും മാൻഡി ബ്ലൂമിന്റെയും കഥയാണ് മാൻഡി. മരം വെട്ടുകാരനായ റെഡ് തന്റെ ജീവിതത്തിൽ എന്തിനെ എങ്കിലും അഗാധമായി ഇഷ്ടപ്പെടുകയും, അതിന് ആവശ്യമായ പ്രധാനം നൽകുകയും ചെയ്യുന്നുണ്ടെങ്കിൽ അത് അയാളുടെ ഭാര്യ മാൻഡിക്ക് ആണ്. മറ്റുള്ളവരിൽ നിന്നും ബഹളങ്ങളിൽ നിന്നും മാറി തികച്ചും ഒറ്റപ്പെട്ട താഴ്‌വരയിൽ തങ്ങളുടേതായ ലോകത്താണ് ഇരുവരും സമയം ചിലവഴിക്കാറ്. രണ്ട് കഥാപാത്രങ്ങളുടെയും ഇരുണ്ട ഭൂതകാലത്തെ കുറിച്ച് നൽകുന്ന സൂചനകൾ വേറിട്ട ഒരു പരിവേഷം കൂടി ചിത്രത്തിന് നൽകുന്നുണ്ട്. ഈ സംഭവങ്ങളിലേക്ക് ആഴത്തിൽ പ്രതിപാദിക്കുന്നില്ലെങ്കിലും വിചിത്രവും സംശയം ജനിപ്പിക്കുന്നതുമായ അവതരണ ശൈലിയെ ഒന്ന്കൂടി സങ്കീർണമാക്കുന്നുണ്ട്.

🔸ഇരുണ്ട ഭൂതകാലവും, ഏകാന്തമായ വർത്തമാന കാലവും, ആകുലതകൾ ഇല്ലാത്ത അനിശ്ചിതമായ വർത്തമാന കാലവും എല്ലാം കീഴ്മേൽ മറയുന്നത് മാൻഡിയും റെഡ്‌ഡും ചിൽഡ്രൻ ഓഫ് ദി ന്യൂ ഡോൺ എന്ന ഹിപ്പി കൾട്ട് വിഭാഗക്കാരുടെ ശ്രദ്ധ പിടിച്ചുപറ്റുമ്പോൾ ആണ്. അധികം താമസിയാതെ ക്ഷണിക്കാത്ത അതിഥികളായി ഈ വിഭാഗം ദമ്പതിമാരുടെ ജീവിതത്തിലേക്ക് കടന്ന് വരികയാണ്. തുടർന്ന് അരങ്ങേറുന്ന സംഭവങ്ങളും ഈ കഥാപാത്രങ്ങളുടെ വിധിയും ചിത്രം കണ്ട് മനസിലാക്കേണ്ടി ഇരിക്കുന്നു, വളരെ മികച്ചത് എന്ന അവകാശ വാദമൊന്നും ചിത്രം അർഹിക്കുന്നില്ലെങ്കിലും വ്യത്യസ്തമായ അനുഭവം ഒരു പരിധി വരെ ഉറപ്പ് നൽകുന്നുമുണ്ട്.

Verdict : Good

413. Bandit Queen (1994)

Director : Shekhar Kapoor

Genre : Biography

Rating : 7.6/10

Country : India

Duration : 119 Minutes


🔸സ്വന്തം കഥ സിനിമയായി തിയേറ്ററിൽ എത്തിയപ്പോൾ ചിത്രത്തെ നഖശിഖാന്തം എതിർക്കുക, തന്റെ ജീവിതവുമായി യാതൊരു രീതിയിലും ചിത്രം ചേർന്ന് നിൽക്കുന്നില്ലെന്നും തന്നെ അപകീർത്തി പെടുത്തുകയാണ് സംവിധായകന്റെ ഉദ്ദേശം എന്ന് പറഞ്ഞ് കേസിന് മുതിരുക, ഇനി ഇതൊന്നും നടന്നില്ലെങ്കിൽ തന്റെ പ്രതീക്ഷ എല്ലാം തച്ചുടയ്ക്കപ്പെടുകയാണെങ്കിൽ ചിത്രം പ്രദർശിപ്പിക്കുന്ന തിയേറ്ററിന് മുന്നിൽ വന്ന് പരസ്യമായി ആത്മഹത്യ ചെയ്യുമെന്ന് ഭീഷണി മുഴക്കുക. കേൾക്കുമ്പോൾ സിനിമാ കഥ പോലെ തോന്നാമെങ്കിലും ഇത് ഫൂലൻ ദേവിയുടെ ജീവിത കഥയാണ്. ഒരു കാലത്ത് സിനിമാ നടിമാർക്ക് തുല്യമായ സെലിബ്രിറ്റി സ്റ്റാറ്റസ് സ്വന്തമായിരുന്ന ഫൂലൻ ദേവി എന്ന കഥാപാത്രത്തെ ഇന്ന് അധികം പേർ ഓർക്കാനിടയില്ല.

🔸ചിത്രത്തെ പറ്റി കൂടുതൽ പറയുന്നതിന് മുൻപേ എന്ത് കൊണ്ട് ബാൻഡിറ്റ് ക്വീൻ എന്ന ചിത്രം ഇന്ത്യൻ സിനിമാ ചരിത്രത്തിലെ തന്നെ ഏറ്റവും വിവാദമായ കറുത്ത അധ്യായങ്ങളിൽ ഒന്നായി എന്ന് അറിഞ്ഞിരിക്കുന്നത് നന്നാവും. ഫൂലൻ ദേവി എന്ന സ്ത്രീയുടെ പേര് രാജ്യ ചരിത്രത്തിൽ തങ്ക ലിപികളാൽ രേഖപ്പെടുത്തിയ ഒന്നല്ല, എൺപതുകളിൽ ഒരു പറ്റം കൊള്ളക്കാരുടെ സഹായത്തിൽ താക്കൂർ വിഭാഗക്കാർക്കെതിരെ ഫൂലൻ ദേവി അഴിച്ചുവിട്ട ആക്രമണം അവരെ ഒരിക്കലും ന്യായീകരിക്കാൻ കഴിയാത്ത രീതിയിൽ മറ്റുള്ളവരുടെ കണ്ണുകളിൽ അവതരിപ്പിച്ച് കഴിഞ്ഞിരിക്കുന്നു. ഈ ചിത്രം അതിനെല്ലാം മുൻപേയുള്ള സംഭവങ്ങളാണ്, കാര്യ കാരണങ്ങളാണ് സർവോപരി ഒരു പക്ഷെ വ്യാഖ്യാനത്തിൽ മാറിപ്പോയ യഥാർത്ഥ ചരിത്രവുമാവാം.

🔸പതിനൊന്നാം വയസ്സിൽ സ്വന്തം ഭർത്താവിന്റെ കയ്യാൽ നേരിടേണ്ടി വന്ന ക്രൂര ബലാത്സംഗം, വളർച്ചയുടെ പടവുകളിൽ ചുറ്റുമുള്ളവർ അവസരങ്ങൾ കൃത്യമായി മുതലെടുക്കുന്നതിൽ വിജയിച്ചപ്പോൾ നേരിടേണ്ടി വന്ന അനേകം ബലാത്സംഗ ശ്രമങ്ങൾ, സംരക്ഷിക്കേണ്ടി ഇരുന്ന പോലീസുകാരിൽ നിന്നും നേരിടേണ്ടി വന്ന കൂട്ട ബലാത്സംഗം, ഗ്രാമത്തിലെ തല മുതിർന്നവർ എന്ന് സ്വയം വിശ്വസിക്കുന്ന സവർണ്ണ സമൂഹത്തിൽ നിന്നും നേരിടേണ്ടി വന്ന കൂട്ട ബലാത്സംഗം, അങ്ങനെ ഒരു പരിധി കഴിഞ്ഞാൽ എണ്ണം പോലും തെറ്റി പോവുന്നത്ര ബലാത്സംഗ രംഗങ്ങൾ, കണ്ടിരിക്കുന്നതിൽ പ്രേക്ഷകന് തന്നെ മടുപ്പ് തോന്നിക്കും വിധം അവതരിപ്പിച്ചിട്ടുള്ള നഗ്നത, എല്ലാത്തിനും പുറമെ നാല്പത് വർഷങ്ങൾക്ക് മുൻപേ ഇന്ത്യയിൽ നിലനിന്നിരുന്ന ദുരാചാരങ്ങളുടെ നേർ സാക്ഷ്യം, സെൻസർ ബോർഡിന് ചിത്രത്തിന് മേൽ കത്തിവെക്കാൻ ഈ കാരണങ്ങൾ തന്നെ ധാരാളം.

🔸ബാൻഡിറ്റ് ക്വീൻ എന്ന ചിത്രം എല്ലാ രീതിയിലുള്ള കാഴ്ചക്കാർക്കും കണ്ടിരിക്കാൻ ഉതകുന്ന ചിത്രമല്ല എന്നതാണ് യാഥാർഥ്യം, മേൽ പറഞ്ഞ രംഗങ്ങൾക്ക് പുറമെ അതീവ ഗൗരവം അർഹിക്കുന്ന ബാലവിവാഹം, ജാതി വേർതിരിവ്, സമൂഹത്തിൽ താഴെക്കിടയിൽ ഉള്ള ജനങ്ങൾ നേരിടേണ്ടി വരുന്ന വേർതിരിവ് എന്നതൊക്കെ ചിത്രം പ്രതിപാദിക്കുന്ന വിഷയങ്ങളാണ്. ഈ ഇരുപത്തിയൊന്നാം നൂറ്റാണ്ടിൽ ലോക ശക്തികളിൽ ഒന്നായി മാറിക്കൊണ്ടിരിക്കുന്ന ഇന്ത്യ എന്ന രാജ്യത്തിന് നാല്പത് വർഷങ്ങൾക്ക് മുന്നേ ഇതുപോലെ ജീർണിച്ച ഒരു ചരിത്രം ഉണ്ടായിരുന്നു എന്നത് ഇന്ന് പലർക്കും അംഗീകരിക്കാൻ കഴിയാത്ത കാര്യമായിരിക്കും, ഒരു പരിധി വരെ അതിനെ കുറ്റം പറയാനും കഴിയില്ല.

🔸പതിനൊന്നാം വയസ്സിൽ പുട്ടിലാൽ എന്ന വ്യക്തിയുടെ ഭാര്യയായി വീടിന്റെ പടി ഇറങ്ങേണ്ടി വന്നത് മുതൽ അറുപതുകളുടെ ആരംഭത്തിൽ രാജ്യം മുഴുവൻ പ്രശസ്തി ആർജിച്ച ഒരു കൊള്ള സംഘത്തിന്റെ നേതൃത്വം കയ്യാളുന്നത് വരെയുള്ള ഫൂലൻ ദേവിയുടെ ഐതിഹാസികമായ ജീവിതമാണ് ചിത്രത്തിന് പ്രമേയം. ഫൂലൻ ദേവി എന്ന വ്യക്തിയോ അവരുടെ നയങ്ങളോ നല്ലതായിരുന്നോ എന്ന ചോദ്യത്തിന് കൃത്യമായ ഉത്തരം നൽകാൻ ചിത്രം മുതിരുന്നതായി തോന്നിയില്ല, ഈ പോസ്റ്റും അതിന് ശ്രമിക്കുന്നില്ല. വേറൊന്നുമില്ലെങ്കിലും നാല്പത് വർഷങ്ങൾക്ക് മുന്നേ ഈ രാജ്യത്ത് നടമാടിയ ചില അനാചാരങ്ങളെ ഈ ചിത്രത്തിലൂടെ പരിചയപ്പെടാം, എന്തിരുന്നാലും ഒരിക്കൽ കൂടി പറയുന്നു ഈ ചിത്രം എല്ലാവർക്കും പറ്റിയ ഒന്നല്ല.

Verdict : Very Good

412. The Chronicles Of Evil (2015)

Director : Beak Woon Hak

Genre : Thriller

Rating : 6.7/10

Country : Korea

Duration : 103 Minutes


🔸ഒരു നിമിഷത്തെ ആവേശം കാരണം ഒട്ടും പ്രതീക്ഷിക്കാത്ത ഒരു കൈയബദ്ധം ചോയി ചാങ്‌സിക്കിന്റെ കയ്യാൽ സംഭവിച്ച് പോയിരിക്കുന്നു. ഇനി ഇപ്പോൾ പാശ്ചാത്തപിച്ചിട്ടോ വിഷമിച്ചിട്ടോ ഒന്നും യാതൊരു കാര്യവുമില്ല, ഒരു മനുഷ്യൻ കൊല്ലപ്പെട്ടിരിക്കുന്നു, അതിന് കാരണക്കാരൻ ചോയി ആണ് താനും. സ്വയം പ്രതിരോധം, തനിക്കെതിരെ ഉള്ള ആക്രമണ ശ്രമം എന്നതൊക്കെ യാഥാർഥ്യം ആയിരിക്കാം എന്നാൽ ഈ കാരണങ്ങൾ ഒന്നും താൻ വ്യക്തി ജീവിതത്തിലും അല്ലാതെയും നേരിടാൻ പോവുന്ന കഠിന പരീക്ഷണങ്ങളിൽ നിന്നും തന്നെ രക്ഷിക്കാൻ പോവുന്നില്ല എന്ന കാര്യത്തിൽ അയാൾക്ക് സംശയങ്ങൾ ഏതുമില്ല, പ്രത്യേകിച്ചും ജോലിയിൽ സ്ഥാനക്കയറ്റം ലഭിക്കാൻ പോവുന്ന ഈ അവസരത്തിൽ ഇതിലും മോശമൊരു കാര്യം അയാളുടെ ജീവിതത്തിൽ സംഭവിക്കാനില്ല.

🔸കൊറിയയിലെ രഹസ്യാന്വേഷണ ഏജൻസിയിൽ ദീർഘ നാളായി ജോലി ചെയ്യുന്ന, കഴിവ് തെളിയിച്ച എല്ലാവരാലും ബഹുമാനിക്കപ്പെടുന്ന വ്യക്തിത്വമാണ് ചോയി ചാങ്‌സിക്. ഏറ്റെടുത്ത കേസുകൾ പൂർത്തിയാക്കുന്നതിൽ അപാര വൈദഗ്ദ്യം പ്രകടിപ്പിക്കാറുള്ള ചോയി നിയമത്തിന് മുന്നിൽ മാനുഷിക മൂല്യങ്ങൾക്കോ വൈകാരികതയ്ക്കോ അധികം പ്രാധാന്യം ഒന്നും കല്പിക്കാത്ത വ്യക്തിയാണ്. ഈ രീതിയിലുള്ള കാര്യക്ഷമമായ പ്രവർത്തനം കാരണം പ്രവർത്തി മണ്ഡലത്തിൽ പേരെടുക്കാൻ സാധിച്ചിട്ടുണ്ടെങ്കിലും ശത്രുക്കളുടെ എണ്ണത്തിൽ ചോയിക്ക് യാതൊരു പഞ്ഞവുമില്ല എന്ന് സാരം.

🔸ജോലിയിൽ സ്ഥാനക്കയറ്റം കിട്ടിയ ദിവസം സഹപ്രവർത്തകരോടൊപ്പം ഒരല്പം ആഘോഷത്തിൽ ഏർപ്പെട്ട ചോയിക്ക് തിരികെ വീട്ടിലേക്ക് മടങ്ങാൻ ടാക്സി പിടിച്ചത് മാത്രമേ ഓർമ ഉള്ളൂ, അടുത്തതായി അയാൾ കാണുന്നത് അപരിചിതമായ ഏതോ പ്രദേശത്ത് തന്നെ ആക്രമിക്കാനായി ഊരി പിടിച്ച കത്തിയുമായി നിൽക്കുന്ന ടാക്സി ഡ്രൈവറെയാണ്. കാര്യമോ കരണങ്ങളോ വ്യക്തമല്ലെങ്കിലും ജീവൻ തന്റേതായതിനാൽ തന്നെ പ്രതിരോധിക്കാൻ തയ്യാറാവുകയാണ് ചോയി. ഈ പ്രതിരോധ നീക്കമാണ് മേൽ സൂചിപ്പിച്ച കയ്യബദ്ധത്തിലേക്കും ചോയിയുടെ സ്വസ്ഥത തകർത്ത പ്രശ്നത്തിലേക്കും വഴി തെളിച്ചത്. ഈ പ്രശ്നത്തെ ഏത് രീതിയിൽ സമീപിക്കണം എന്ന ചോദ്യം ചോയിയെ വേട്ടയാടുകയാണ്.

🔸താൻ നിലനിന്ന് പോന്ന നീതി ന്യായ വ്യവസ്ഥയ്ക്കും നിയമത്തിനും പ്രാധാന്യം കല്പിച്ച് കുറ്റകൃത്യത്തിന്റെ ഉത്തരവാദിത്തം ഏറ്റെടുത്ത് ശിക്ഷ അനുഭവിക്കണമോ അതോ സ്വന്തം ജീവിതത്തിനും സ്ഥാനമാനങ്ങൾക്കും വില നൽകി അബദ്ധത്തിൽ എങ്കിലും സ്വന്തം കയ്യാൽ ചെയ്ത കുറ്റം മറ്റുള്ളവരിൽ നിന്നും മറച്ച് പിടിച്ച് ഒന്നും സംഭവിക്കാത്തത് പോലെ മുന്നോട്ട് നീങ്ങണമോ, ഇതാണ് ചോയിയെ അലട്ടുന്ന പ്രശ്‍നം. ഒടുവിൽ നേരിടുന്ന പ്രശ്നത്തിന്റെ സ്വഭാവവും തീവ്രതയും എല്ലാ സാധ്യതകളും കൂട്ടി കിഴിച്ച് രണ്ടാമത്തെ വഴിയിലൂടെ സഞ്ചരിക്കാൻ ചോയി തീരുമാനിക്കുകയാണ്. ഇങ്ങനെ ഒരു സംഭവമേ നടന്നില്ലെന്ന മട്ടിൽ ശവശരീരം ഉപേക്ഷിച്ച് ചോയി സംഭവസ്ഥലത്ത് നിന്നും കടന്നുകളയുകയാണ്.

🔸തന്നെ ഒരു രീതിയിലും കൊലപാതകവുമായോ കൊല്ലപ്പെട്ടയാളുമായോ ബന്ധിപ്പിക്കാൻ കഴിയില്ലെന്ന് ഉറച്ച് വിശ്വസിച്ച ചോയിയേയും സിനിമ കണ്ട് കൊണ്ടിരിക്കുന്ന കാഴ്ചക്കാരനെയും അക്ഷരാർത്ഥത്തിൽ ഞെട്ടിക്കുന്ന സംഭവങ്ങളാണ് തുടർന്ന് അരങ്ങേറുന്നത്. മികച്ച കൊറിയൻ ചിത്രങ്ങളുടെ പട്ടികയിൽ തുടക്കത്തിൽ ഒന്നും കാണാൻ കഴിഞ്ഞേക്കില്ലെങ്കിലും നൂറ് മിനുട്ടിനടുത്ത് ദൈർഖ്യമുള്ള ഈ ചിത്രം കാഴ്ചക്കാരനെ മടുപ്പിക്കുകയില്ല, എന്ന് മാത്രമല്ല ആദ്യ കാഴ്ചയിൽ പിടിച്ചിരുത്തുകയും ചെയ്യും. കൂടുതൽ പറഞ്ഞ് ആസ്വാദന ഭംഗി കളയുന്നില്ല, കാണാൻ ശ്രമിക്കുക, നഷ്ടമാവില്ല.

Verdict : Good

411. Alien Covenant (2017)

Director : Ridley Scott

Genre : Sci Fi

Rating : 6.4/10

Country : USA

Duration : 122 Minutes


🔸സിനിമ കണ്ട് തുടങ്ങിയ കാലഘട്ടത്തിൽ ആദ്യം കണ്ട ഫ്രാൻഞ്ചൈസികളിൽ ഒന്നായിരുന്നു ഏലിയൻ സീരീസ്. അതിനാൽ തന്നെ ഏലിയൻ ചിത്രങ്ങളോട് ഒരു പ്രത്യേക ഇഷ്ടം എല്ലാ കാലത്തും മനസ്സിൽ ഉണ്ടായിരുന്നു, പ്രത്യേകിച്ചും പേടിയുടെയും ആകാംക്ഷയുടെയും മുൾമുനയിൽ നിർത്തിയ, സിനിമാ ചരിത്രത്തിലെ തന്നെ ഏറ്റവും മാസ്സ് ആയ സ്ത്രീ കഥാപാത്രങ്ങളിൽ ഒന്നിനെ സിഗോർണി വീവറുടെ രൂപത്തിൽ സമ്മാനിച്ച ആദ്യ ചിത്രം. നെഞ്ച് പിളർന്ന് പുറത്ത് വന്നുകൊണ്ട് തന്റെ വരവറിയിച്ച ക്‌സിനോ മോർഫിന്റെ രംഗം പോലെ ഒരേ സമയം പേടിപ്പിക്കുകയും ഞെട്ടിക്കുകയും ചെയ്ത അധികം രംഗങ്ങൾ ഓർമയിലില്ല, ഇനി ഒട്ട് ഉണ്ടാവുമോ എന്ന കാര്യവും സംശയമാണ്.

🔸ഒന്നാം ഭാഗത്തിന്റെ മേന്മകൾ എന്തെല്ലാമായിരുന്നോ അതിനെ മാത്രമായി തിരഞ്ഞെടുത്ത് കുറച്ച് കൂടി മികച്ച രീതിയിൽ അവതരിപ്പിച്ച രണ്ടാം ഭാഗം, അതാണ് ജെയിംസ് കാമറോണിന്റെ ഏലിയെൻസ് എന്ന ചിത്രം. ആദ്യ ചിത്രത്തിൽ എന്തെങ്കിലും രീതിയിൽ ബാക്കി ഉണ്ടായിരുന്ന സേഫ് സോണിൽ നിന്നും റിപ്ലിയെ വേർ പെടുത്തിയ ശേഷം കഥാപാത്രത്തെ ഒന്നാകെ അഴിച്ച് പണിത് ഉടച്ച് വാർത്ത ചിത്രം ആദ്യ ഭാഗത്തേക്കാൾ മികച്ച അപൂർവം ചില രണ്ടാം ഭാഗ ചിത്രങ്ങൾക്കുള്ള ഉദാഹരണമാണ്. നാല്പത് വർഷം പ്രായമുള്ള സീരീസിന്റെ ഏറ്റവും ഹൈ പോയിന്റ് ഈ ചിത്രമാണെന്ന് ഒരല്പം നിരാശയോടെ പറയേണ്ടി വരും, കാരണം ഇതിന് ശേഷം തൊട്ടതെല്ലാം പിഴയ്ക്കുകയായിരുന്നു.

🔸ഡേവിഡ് ഫിഞ്ചറിനെ പോലെയൊരു സംവിധായകൻ, ആദ്യ രണ്ട് ഭാഗങ്ങൾ വൻ വിജയങ്ങൾ കരസ്ഥമാക്കിയ ഫ്രാൻഞ്ചൈസ്, പിഴവുകൾക്ക് സ്ഥാനം ഉണ്ടാവാൻ പാടില്ലായിരുന്നു. എന്തിരുന്നാലും മുൻ ഭാഗത്തിൽ നായികയ്‌ക്കൊപ്പം തന്നെ മികച്ച പ്രതികരണങ്ങൾ നേടിയ രണ്ട് കഥാപാത്രങ്ങളെ ഓഫ്‌സ്ക്രീനിൽ കൊന്ന് കളഞ്ഞത് മുതൽ തെറ്റുകളുടെ ഒരു കൂമ്പാരമായിരുന്നു എലിയൻസ് 3. ആദ്യ ഭാഗങ്ങളിൽ മികച്ച കഥാപാത്ര വികസനം നേടിയ നായികയുടെ വികലമായ പല തീരുമാനങ്ങളും അതിലേക്ക് വിരൽ ചൂണ്ടിയ പാതി വെന്ത തിരക്കഥയും, ആരാധകർ മറക്കാൻ ആഗ്രഹിക്കുന്ന ക്ലൈമാക്സും ചിത്രത്തിന്റെ വിധി നിർണയിച്ച് കഴിഞ്ഞിരുന്നു, നാലാം ഭാഗമായി പുറത്തിറങ്ങിയ ഏലിയൻ റിസരെക്ഷൻ എന്ന ചിത്രത്തെ പറ്റി കൂടുതൽ പറയേണ്ടതില്ല.

🔸നാലാം ഭാഗ ചിത്രത്തിന് ശേഷം ഒന്നര പതിറ്റാണ്ട് കഴിഞ്ഞാണ് ഏലിയൻ സീരീസിലെ അഞ്ചാമത് ചിത്രമായ പ്രോമിത്യുസ് തിയേറ്ററുകളിൽ എത്തിയത്. മുൻ ഭാഗങ്ങളിൽ പറഞ്ഞ കഥയുടെ തുടർച്ചയ്ക്ക് ശ്രമിക്കാതെ ഏലിയൻ ജീവികളുടെ ഉത്ഭവത്തിലേക്ക് വെളിച്ചം വീശിയ ഈ പ്രീക്വൽ ചിത്രം മുൻ ഭാഗങ്ങളിൽ നിന്നും മികച്ചതായിരുന്നെങ്കിലും ആദ്യ രണ്ട് സിനിമകളുമായി താരമത്യം അർഹിക്കാത്ത ചിത്രമായിരുന്നു. ഇതിനെല്ലാം ശേഷമാണ് എലിയെൻ കോവെനന്റ് എന്ന പോസ്റ്റിന് ആസ്പദമായ ചിത്രം പുറത്തിറങ്ങുന്നത്. ഈ ചിത്രത്തിനെ പറ്റിയുള്ള പോസ്റ്റിൽ മുൻ ഭാഗ ചിത്രങ്ങൾക്ക് ഇത്രയും പ്രാധാന്യം കൊടുത്തതിന് ഒരൊറ്റ കാരണം മാത്രമേയുള്ളൂ, കോവെനന്റിനെ കുറിച്ച് പറയാൻ അധികം ഒന്നും തന്നെയില്ല.

🔸പ്രോമിത്യുസിലെ സംഭവങ്ങൾ അരങ്ങേറിയിട്ട് പത്ത് വർഷങ്ങൾക്ക് ശേഷം ഒറിഗായ് എന്ന ഗ്രഹത്തിലേക്കുള്ള യാത്രയിലാണ് കോവെനന്റ് എന്ന സ്പേസ് ഷിപ്, യാത്രയ്ക്കിടയിൽ അവർ കടന്ന് പോയിക്കൊണ്ടിരുന്നു ഗ്രഹത്തിൽ നിന്നും മനുഷ്യശബ്ദം സിഗ്നലായി ലഭിക്കുന്നതും തുടർന്നുള്ള അന്വേഷണങ്ങളുമാണ് ചിത്രത്തിന്റെ പ്രമേയം. മൈക്കൽ ഫാസ്സ്‌ബെൻഡർ എന്ന നടനും കുറച്ച് ഗോർ രംഗങ്ങളും, കുറച്ചെങ്കിലും അപ്രതീക്ഷിതമായ ക്ലൈമാക്സും ഒഴിച്ച് നിർത്തിയാൽ പറയത്തക്കതായി യാതൊന്നും ഈ ചിത്രത്തിൽ ഉള്ളതായി തോന്നിയില്ല, പിന്നെ ഈ പോസ്റ്റിന്റെ ഉദ്ദേശം എന്നത് ആദ്യ രണ്ട് ഭാഗങ്ങൾ കാണാത്തവർക്കുള്ള ഒരു ചെറു ഓർമപ്പെടുത്തൽ കൂടിയാണെന്ന് ചേർക്കട്ടെ. ഇടക്കാലത്ത് ഏലിയൻ അവയ്ക്കെനിങ് എന്ന പേരിൽ അടുത്ത ചിത്രം പ്രഖ്യാപിച്ചിരുന്നെങ്കിലും ഉപേക്ഷിച്ചതായി കേൾക്കാനിടയായി.

Verdict : Average

410. The Alienist (2018)

Director : Jacob Verbruggen

Genre : Period Drama

Rating : 7.8/10

Season : 1

Episodes : 10

Country : USA

Duration : 42-53 Minutes Per Episode


🔸ഇരുപത്തി നാല് വർഷങ്ങൾ, ദി ഏലിയെനിസ്റ്റ് എന്ന നോവൽ സ്‌ക്രീനിൽ എത്താൻ എടുത്ത കാലയളവ് ഇരുപത്തി നാല് വർഷങ്ങളാണ്. പുറത്തിറങ്ങുന്നതിന് മുന്നേ തന്നെ വലിയ തുകയ്ക്ക് ചലച്ചിത്രവൽക്കരിക്കാനുള്ള അവകാശം വിറ്റ് പോയെങ്കിലും ഇറങ്ങി തിരിച്ച ഓരോ വ്യക്തികളും, ഓരോ ശ്രമങ്ങളും പരാജയത്തിലാണ് കലാശിച്ചത്. ചരിത്രം എന്ത് തന്നെ ആയാലും നീണ്ട കാലയളവിന് ശേഷം ടിവി സീരീസ് രൂപേണ നോവൽ ഈ വർഷം പ്രേക്ഷകന് മുന്നിൽ എത്തുക ഉണ്ടായി, ഡാനിയേൽ ബ്രുഹൽ, ലൂക് ഇവാൻസ്, ഡകോട്ട ഫാനിങ് തുടങ്ങി ഹോളിവുഡിലെ കഴിവ് തെളിയിച്ച മുൻ നിര താരങ്ങൾ തന്നെ പ്രധാന കഥാപാത്രങ്ങൾ കൈകാര്യം ചെയ്ത സീരീസ് കഴിഞ്ഞ വർഷത്തെ ഹിറ്റ് ചാർട്ടുകളിൽ തന്നെ ഇടം നേടി. അഞ്ഞൂറിലധികം പേജുകളിൽ നീണ്ടുകിടക്കുന്ന സങ്കീർണമായ കഥ ദൃശ്യവൽക്കരിക്കുമ്പോൾ സ്വാഭാവികമായും നേരിടേണ്ടി വരുന്ന ബുദ്ധിമുട്ടുകൾ ഒരു പരിധി വരെ പരിഹരിച്ച് അമ്പത് മിനുട്ട് പരിധിയിലുള്ള പത്ത് ഭാഗങ്ങളാണ്  ആദ്യ സീസണിൽ ഉള്ളത്.

🔸പത്തൊമ്പതാം നൂറ്റാണ്ടിന്റെ അവസാനമാണ് സീരീസിന് ആസ്പദമായ കഥാപശ്ചാത്തലം, കുറച്ച് നാൾ മുൻപ് വരെ സമാധാന പൂർണമായിരുന്ന ന്യുയോർക്ക് നഗരത്തിൽ ചില അനിഷ്ട സംഭവങ്ങൾ കണ്ട് തുടങ്ങിയിരിക്കുന്നു. കുറച്ച് നാളുകളായി കൃത്യമായ ഇടവേളകളിൽ ആൺകുട്ടികൾ കൊല്ലപ്പെടുന്നത് ഒരു സ്ഥിരം സംഭവമായി മാറിയിരിക്കുന്നു, ഇവയ്ക്ക് പിന്നിലെ കാരണവും ചേതോവികാരവും എന്തെന്ന് പിടികിട്ടാതെ ഉഴലുകയാണ് നഗരത്തിലെ പോലീസും ബന്ധപ്പെട്ടവരും. ന്യുയോർക് നഗരത്തിൽ പുതിയ പോലീസ് കമ്മീഷണറായി എത്തിയ, പിൽക്കാലത്ത് അമേരിക്കൻ പ്രസിഡണ്ട് പദവി വരെ കരസ്ഥമാക്കിയ തിയോഡർ റൂസ്‌വെൽറ്റ് അത്ര എളുപ്പത്തിൽ തോൽവി സമ്മതിക്കാൻ തയാറായിരുന്നില്ല, അതും പോരാതെ ഈ കുറ്റകൃത്യങ്ങൾക്ക് പിറകിലുള്ള സാന്നിധ്യം ആര് തന്നെ ആണെങ്കിലും അയാളെ വെളിച്ചത്ത് കൊണ്ടുവരേണ്ടത് തന്റെ ദൗത്യമാണെന്ന് അയാൾ വിശ്വസിക്കുന്നുമുണ്ട്.

🔸പ്രസ്തുത സംഭവങ്ങൾക്ക് പിറകിലുള്ള കാരണം കണ്ടെത്താനായി റൂസ്‌വെൽറ്റ് ആശ്രയിക്കുന്നത് തന്റെ രണ്ട് പഴയകാല സുഹൃത്തുക്കളുടെ സഹായമാണ്. സൈക്കോളോജിസ്റ്റ് ആയ ഡോക്ടർ ലാസ്ലോ ക്രെയ്‌സ്‌ലെർ ആണ് ഇവരിലെ ആദ്യ കഥാപാത്രം, പഠന കാലയളവിൽ റൂസ്‌വെൽറ്റിന്റെ സഹപാഠി ആയിരുന്ന ലാസ്ലോ ഒരേകാകി ആണ്. തന്റെ ജോലിക്കും താല്പര്യങ്ങൾക്കും മുന്നിൽ കുടുംബ ബന്ധങ്ങൾക്കോ സൗഹൃദങ്ങൾക്കോ പോലും വില കല്പിക്കാത്ത ലാസ്ലോ ഒരു രീതിയിൽ പറയുകയാണെങ്കിൽ ഈ ഏകാന്തവാസം ആസ്വദിക്കുകയാണ്. തന്റെ മുന്നിൽ വരുന്ന കുറ്റകൃത്യങ്ങളെയും, കുറ്റവാളികളെയും വൈകാരികവും മാനസികവുമായ തലങ്ങളിൽ സമീപിക്കുക എന്നതാണ് ലാസ്ലോയുടെ ശൈലിയും വിജയമന്ത്രവും. തന്റെ പുതിയ പഠനവുമായി വല്ലാതെ ചേർന്ന് നിൽക്കുന്നതിനാൽ തന്നെ കേസിനോട് സാധാരണയിൽ കവിഞ്ഞൊരു താല്പര്യം ലാസ്ലോയിൽ പോകെ പോകെ ഉടലെടുക്കുന്നുണ്ട്.

🔸ലാസ്ലോയോടൊപ്പം റൂസ്‌വെൽറ്റിന്റെ അഭ്യർത്ഥന മാനിച്ച് എത്തുന്ന രണ്ടാമത്തെ കഥാപാത്രം ലുക്ക് ഇവാൻസ് അവതരിപ്പിച്ച ജോൺ മൂർ എന്ന പത്രപ്രവർത്തകനാണ്. തന്റെ പഠന കാലയളവ് ലാസ്ലോയോടും റൂസ്‌വെൽറ്റിനോടുമൊപ്പം ചിലവഴിച്ച ജോൺ മൂർ, വ്യക്തി ജീവിതത്തിൽ ഒരുപാട് വേദനകളും ഒഴിവാക്കലുകളും കുത്തിനോവിക്കലുകളും സഹിക്കേണ്ടി വന്ന വ്യക്തിത്വമാണ്. സ്വന്തം താല്പര്യങ്ങളും ചിന്തയുമാണ് ലാസ്ലോയെ ഏകാന്ത ജീവിതത്തിലേക്ക് നയിച്ചതെങ്കിൽ, ഓർക്കാൻ ഇഷ്ട്ടപ്പെടാത്ത സ്വന്തം ജീവിതത്തിൽ അരങ്ങേറിയ സംഭവങ്ങളാണ് ജോണിനെ ഈ അവസ്ഥയിൽ എത്തിച്ചത്. മദ്യപാനവും വിലയ്ക്ക് കിട്ടുന്ന സ്ത്രീ ശരീരങ്ങളുമാണ് ജോണിന്റെ ഇഷ്ടങ്ങൾ, അതാണ് അയാളുടെ ശീലങ്ങൾ. കാര്യം എന്തൊക്കെ തന്നെ ആണെങ്കിലും മുൻപേ സൂചിപ്പിച്ച അനിഷ്ട സംഭവങ്ങൾക്ക് പിന്നിലെ രഹസ്യങ്ങൾ അറിയാനായി ഈ രണ്ട് കഥാപാത്രങ്ങളും വരികയാണ്.

🔸ഈ രണ്ട് കഥാപാത്രങ്ങൾക്ക് പുറമെ ന്യു യോർക്ക് രഹസ്യാന്വേഷണ വിഭാഗത്തിൽ ജോലി നേടിയ ആദ്യ സ്ത്രീ ആയ സാറ ഹൊവാർഡും, ഇരട്ടകളായ ഐസക്സൺ സഹോദരന്മാരുമുണ്ട്. പുരുഷ കേന്ദ്രീകൃത മേഖല ആയതിനാൽ തന്നെ ഒരുപാട് താഴ്ത്തികെട്ടലുകളും പരിഹാസവും ഒക്കെ സഹിക്കേണ്ടി വന്നിട്ടുണ്ട് തന്റെ ഔദ്യോഗിക ജീവിതത്തിൽ സാറയ്ക്ക്, എങ്കിലും ആർക്ക് മുന്നിലും തല കുനിക്കാത്ത ദൃഢ നിശ്ചയം ഒന്ന് മാത്രമാണ് അവരെ മുന്നോട്ട് നയിക്കുന്നതും. ഒരു പതിമൂന്ന് വയസുകാരന്റെ കൊലപാതകത്തിൽ നിന്നും ആരംഭിച്ച അന്വേഷണം സംഘത്തെ കൊണ്ടുപോവുന്നത് കൊലപാതകങ്ങളുടെ ഒരു തുടർ പാരമ്പരയിലേക്കാണ്, ഒട്ടും പ്രതീക്ഷിക്കാത്ത, അവിശ്വസിനീയമായ ചില വസ്തുതകളിലേക്കും. കുറ്റാന്വേഷണ കഥകൾ പ്രമേയമാക്കിയ സീരീസുകളിൽ ഏറ്റവും മികച്ചത് എന്ന പദവി ഒന്നും അർഹിക്കുന്നില്ലെങ്കിലും മികച്ചവയുടെ പട്ടികയിൽ നിസ്സംശയം ഉൾപ്പെടുത്താം ഈ സീരീസിനെ.

Verdict : Good

409. Welcome To Dongmakgol (2005)

Director : Park Kwang Hyun

Genre : Comedy

Rating : 7.8/10

Country : Korea

Duration : 133 Minutes


🔸പരിചിതമല്ലാത്ത നാടുകളിലെയും ഭാഷകളിലെയും സിനിമകൾ തേടി പിടിച്ച് കാണുന്ന ഒരു കാഴ്ചക്കാരന് അപൂർവമായി എങ്കിലും ലഭിക്കുന്നൊരു ഭാഗ്യമാണ് തീർത്തും അത്ഭുതപ്പെടുത്തുന്ന ഒരു സിനിമ കാണാൻ കഴിയുക എന്നത്. ഈ അത്ഭുതം എന്ന വികാരം പലത് കൊണ്ടും സംഭവിക്കാം, കേട്ട് പരിചയമില്ലാത്ത മികച്ചൊരു കഥ കാരണമാവാം, താരമത്യങ്ങളില്ലാത്ത പ്രകടനം കൊണ്ടാവാം, എല്ലാത്തിനും പുറമെ ആ സിനിമ കാഴ്ചക്കാരനിൽ ഉണർത്തുന്ന ചിന്തകളും വികാരങ്ങളും കൊണ്ടുമാവാം. അത് എന്തൊക്കെ തന്നെ ആണെങ്കിലും എന്നെ സംബന്ധിച്ചിടത്തോളം ഈ സ്രെണിയിൽ സൈലന്റ് വെഡിങ് എന്ന റൊമാനിയൻ ചിത്രത്തിനും യങ് ഒഫെൻഡേർസ് എന്ന ഐറിഷ് ചിത്രത്തിനും ശേഷം ഉൾപെടുത്താനാവുക വെൽകം ടു ഡോങ്മക്ഗോൾ എന്ന ഈ കൊറിയൻ ചിത്രത്തെയാണ്.

🔸ആയിരത്തി തൊള്ളായിരത്തി അൻപതുകളിലാണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. കൊറിയൻ യുദ്ധം കൊടുമ്പിരി കൊണ്ടിരിക്കുകയാണ്, ഉത്തര കൊറിയയും ദക്ഷിണ കൊറിയയും തമ്മിലുള്ള രൂക്ഷമായ യുദ്ധം ഇരു രാജ്യത്തെയും പട്ടാളക്കാരെയും സാധാരണക്കാരായ ജനങ്ങളെയും ബദ്ധ വൈരികളാക്കി മാറ്റിയിരിക്കുന്നു, ഒരു രീതിയിലും കൂട്ടി യോജിപ്പിക്കാൻ കഴിയാത്ത വിധം രണ്ട് പക്ഷവും തമ്മിലുള്ള ബന്ധം അറ്റ് പോയിരിക്കുന്നു, അല്ലെങ്കിൽ അങ്ങനെ എല്ലാവരും വിശ്വസിച്ച് പോന്നു. എതിരാളികളെ തോൽപ്പിക്കുക എന്നതിനപ്പുറം മാനസികമായും ശാരീരികമായും അവരെ അവഹേളിക്കുക എന്നത് രണ്ട് പക്ഷത്തിന്റെയും രഹസ്യ അജണ്ടയായി മാറി.

🔸ഈ ബഹളങ്ങൾ ഒന്നും അറിയാതെ രണ്ട് രാജ്യങ്ങളുമായി അതിർത്തി പങ്കിടുന്ന ഒരു മലയോര ഗ്രാമം ആണ് ഡോങ്മക്ഗോൾ. വികസനം എന്ന വാക്ക് പോലും അവിടെ എത്തിയിട്ടില്ല, കൃഷിസ്ഥലത്ത് കഠിനമായി അധ്വാനിക്കുക, അന്നന്നത്തേക്ക് ആവശ്യമുള്ള വസ്തുവകകൾ ശേഖരിക്കുക, തിന്നുക, കുടിക്കുക, ഉറങ്ങുക എന്നതിൽ കവിഞ്ഞ് ഗ്രാമത്തിന് പുറത്തുള്ള ലോകത്തെ പറ്റിയോ അവിടെ അരങ്ങേറി കൊണ്ടിരിക്കുന്ന പേക്കൂത്തുകളെ പറ്റിയോ യാതൊരറിവും ഗ്രാമത്തിലുള്ളവർക്ക് ഇല്ല. ഇങ്ങനെ പുറം നാട്ടുകാർക്ക് മിഥ്യയായി തുടർന്ന് പോന്ന ഡോങ്മക്ഗോളിന്റെ തലവര മാറുന്നത് പേമാരിയിലും തുടർന്നുണ്ടായ വിചിത്ര സംഭവങ്ങളിലും പെട്ട് അമേരിക്കൻ പൈലറ്റായ നീൽ സ്മിത്തിന് ഗ്രാമത്തിൽ വിമാനം ഇറക്കേണ്ടി വരുമ്പോഴാണ്.

🔸സ്മിത്തിനെ സംബന്ധിച്ചിടത്തോളം ഡോങ്മക്ഗോൾ ഒരു ബാലി കേറാമല തന്നെ ആയിരുന്നു, ഗ്രാമത്തിലെ അത്യാവശ്യം അറിവും പഠിപ്പുമുള്ള വ്യക്തി പോലും ഇംഗ്ലീഷ് എന്ന ഭാഷയെ പറ്റിയോ പാശ്ചാത്യ രീതികളെ പറ്റിയോ കേട്ടിട്ട് പോലും ഇല്ലായിരുന്നു. നാട്ടിലേക്ക് മടങ്ങാൻ മറ്റ് വഴികൾ ഇല്ലാത്ത സ്മിത്തിന് ആണെങ്കിൽ പിടിച്ച് നിന്നേ മതിയാവൂ, ഗ്രാമീണരെ ഇംഗ്ലീഷ് പഠിപ്പിക്കാനുള്ള ശ്രമം കൂടി പരാജയപ്പെട്ടപ്പോൾ എല്ലാം കൊണ്ടും സ്വസ്ഥം. ഇങ്ങനെ ഒരു ഭാഗത്ത് ഗ്രാമീണരും മറു ഭാഗത്ത് സ്മിത്തും പരസ്പരം തലവേദന സൃഷ്ടിച്ച് കൊണ്ടിരിക്കെ ആണ് കൂനിന്മേൽ കുരു പോലെ പുതിയ ചില അതിഥികൾ ഗ്രാമത്തിലേക്ക് കടന്നു വരുന്നത്.

🔸ദക്ഷിണ കൊറിയൻ പട്ടാളവുമായി അരങ്ങേറിയ യുദ്ധത്തിൽ തോറ്റ് തുന്നം പാടിയ, ജീവനും കൊണ്ട് ഓടി രക്ഷപ്പെട്ട ഉത്തര കൊറിയൻ പട്ടാളക്കാരായിരുന്നു ആദ്യം എത്തിയത്. ഇവർക്ക് പുറകെ പട്ടാള ജീവിതം മടുത്ത് രക്ഷപ്പെട്ട് വന്ന ചില ദക്ഷിണ കൊറിയൻ പട്ടാളക്കാർ കൂടി ഗ്രാമത്തിൽ എത്തുമ്പോൾ കഥ മുറുകുകയാണ്, തുടർന്ന് അരങ്ങേറുന്നത് രസകരമായ സംഭവങ്ങളുടെ ഒരു ചങ്ങല തന്നെയാണ്. ഒരു രീതിയിലും ഒത്ത് പോവാത്ത രണ്ട് കൂട്ടം സൈനികരും, ഇവരൊക്കെ ആരാണെന്നും എന്താണെന്നും തിരിച്ചറിഞ്ഞിട്ടില്ലാത്ത ഗ്രാമീണരും, ഇവയ്‌ക്കെല്ലാം പുറമെ പൊട്ടൻ പൂരം കാണുന്നത് പോലെ നീൽ സ്മിത്തും എത്തുമ്പോൾ കാഴ്ചക്കാരന് ലഭിക്കുന്നത് തികച്ചും വ്യത്യസ്തമായ ഒരു കൊറിയൻ ചിത്രം ആകുമെന്നുറപ്പ്.

Verdict : Must Watch

408. Vampire Hunter D Bloodlust (2000)

Director : Yoshiaki Kawajiri

Genre : Animation

Rating : 7.8/10

Country : Japan

Duration : 105 Minutes


🔸അനിമേഷൻ ചിത്രങ്ങളോട്, അതിൽ തന്നെ ജാപ്പനീസ് അനിമേ ചിത്രങ്ങളോട് യാതൊരു താല്പര്യവും പ്രകടിപ്പിക്കാത്ത ഒരുപാട് ആളുകൾ നമുക്ക് ചുറ്റും ഉണ്ട്. മജ്ജയും മാംസവും ഉള്ള നടന്മാരുടെ സ്ഥാനത്ത് കംപ്യൂട്ടർ വഴി സൃഷ്ടിക്കപ്പെട്ട കഥാപാത്രങ്ങളെ സങ്കൽപ്പിക്കാൻ കഴിയാത്തത് കൊണ്ടോ, ഇനി അതും അല്ലെങ്കിൽ ലൈവ് ആക്ഷൻ ചിത്രങ്ങൾക്ക് തുല്യമായ ഗൗരവം അനിമേഷൻ ചിത്രങ്ങൾ അർഹിക്കുന്നില്ല എന്ന പൊതു ചിന്ത കൊണ്ടോ അനിമേ ചിത്രങ്ങളോട് മുഖം തിരിക്കുന്നവരാണ് മിക്കവരും. ഈ വിഭാഗത്തിൽ പെട്ട കാഴ്ചക്കാരോട് അനിമേ ആരാധകർ നിർദേശിച്ച് കൊടുക്കാറുള്ള ഒരു കൂട്ടം ചിത്രങ്ങളുണ്ട്, എന്നാൽ ഈ കൂട്ടത്തിൽ ഉൾപ്പെടാൻ അർഹതയും മേന്മയും ഉണ്ടായിട്ടും ആരാലും അധികം പരാമർശിച്ച് കേട്ടിട്ടില്ലാത്ത ഒരു ചിത്രത്തെ കുറിച്ചാണ് ഈ പോസ്റ്റ്, വാംപയർ ഹണ്ടർ ഡി ബ്ലഡ്ലസ്റ്റ് എന്ന ചിത്രത്തെ കുറിച്ച്.

🔸ഡി എന്ന ചുരുക്കപ്പേരിൽ വിശേഷിപ്പിക്കപ്പെടുന്ന കഥാപാത്രമാണ് ചിത്രത്തിന്റെ നട്ടെല്ല്. ഡി സാധാരണക്കാരനല്ല, പഴങ്കഥകളിൽ അഗ്രഗണ്യന്മാരായ ധാംബിർ വിഭാഗത്തിലെ പുതിയ തലമുറയിൽ പെട്ടവനാണ് ഡി. ധാംബിറുകൾ, രക്തദാഹികളായ വാംപയർമാർക്ക് മനുഷ്യ സ്ത്രീകളിൽ ഉണ്ടാവുന്ന സൃഷ്ടികൾ, സാധാരണ മനുഷ്യർക്ക് അന്യമായ കാഴ്ചകൾ കാണാനും അതിനെ പ്രതിരോധിക്കാനും ഉള്ള ശക്തി ജന്മനാ കയ്യാളുന്നവർ. ധാംബിറുകൾ മിക്കവരും തങ്ങളുടെ തന്നെ അംശമായ വാംപയറുകളെ വേട്ടയാടിക്കൊണ്ടാണ് ജീവിച്ച് പോന്നത്, ഈ കാര്യത്തിൽ ഡിയും ഒട്ടും വ്യത്യസ്തനല്ല. തന്റെ പ്രവർത്തി മണ്ഡലത്തിലെ താരമത്യങ്ങൾക്ക് അതീതമായ കഴിവ് ഡിയ്ക്ക് നേടിക്കൊടുത്ത പ്രശസ്തിയും കുറവല്ല.

🔸ഈ വിശേഷണങ്ങളും പുകഴ്ത്തലുകളും മാറ്റി നിർത്തിയാൽ ഇത്രത്തോളം ഏകാന്തത വേട്ടയാടുന്ന മറ്റൊരു മനുഷ്യനെ കാണാൻ കഴിഞ്ഞേക്കില്ല. തന്റെ വംശത്തിന്റെ മേന്മ ഒന്ന് കൊണ്ട് തന്നെ അയാൾ വല്ലാതെ ആഗ്രഹിക്കുന്ന സാധാരണക്കാരനായ ഒരു മനുഷ്യനായുള്ള ജീവിതം അയാൾക്ക് ഒരു കാലത്തും ലഭിക്കാൻ പോകുന്നില്ല, ഈ സത്യം തെല്ലൊന്നുമല്ല ഡി എന്ന കഥാപാത്രത്തെ വേദനിപ്പിക്കുന്നത്. തന്റെ അന്ത്യം, ഏതെങ്കിലും ഒരു ആയുധത്തിൽ താൻ ഒടുങ്ങുന്നത് വരെ തനിക്ക് വിധിച്ചിട്ടുള്ളത് ഈ നരക തുല്യമായ ജീവിതമാണെന്നും അയാൾക്കറിയാം. ഇതിനെല്ലാം പുറമെ ധാംബിർ വംശത്തിലെ അവസാന കണ്ണികളിൽ ഒരാൾ കൂടിയാണ് ഡി, അയാളെ മനസിലാക്കാൻ സാധിക്കുന്ന മറ്റൊരു കഥാപാത്രം ഇല്ല എന്ന് സാരം.

🔸ഇങ്ങനെ ഏകാന്തനായി ഡോളേഴ്‌സ് സീരീസിലെ ക്ലിന്റ് ഈസ്റ്റ്വുഡിന്റെ ഏകാന്തനായ ഗൺ സ്ലിങ്ർ കഥാപാത്രത്തെ അനുസ്മരിച്ച് കൊണ്ടുള്ള ജീവിതമാണ് ഡി എന്ന കഥാപാത്രത്തിന്റേത്. അങ്ങനെ വലിയ മാറ്റങ്ങൾ ഒന്നും തന്നെ ഇല്ലാത്ത ഡിയുടെ ദിനചര്യകൾ മാറി മറിയുന്നത് എൽബോൺ എന്ന വ്യക്തി ഒരാവശ്യവുമായി അയാൾക്ക് മുന്നിൽ എത്തുമ്പോഴാണ്. എൽബോണിന്റെ മകൾ ഷാർലെറ്റിനെ വാംപയർ ആയ ബാരൺ മീർ ലിങ്ക് തട്ടിക്കൊണ്ട് പോയിരിക്കുന്നു. എൽബോണിന്റെ ആവശ്യം വളരെ ലളിതമായിരുന്നു, ഒന്നുകിൽ മകളെ ജീവനോടെ പോറൽ പോലുമേൽക്കാതെ തിരികെ എത്തിക്കണം, അതല്ല അവളൊരു രക്തരക്ഷസ്സായി മാറിയെങ്കിൽ അവളെ കൊന്ന് കളഞ്ഞേക്കണം.

🔸എൽബോണിന്റെ ആവശ്യത്തിൽ വൈകാരികത ഒന്നും ഒട്ടും ബാധകമാകാത്ത ഡി തന്റെ ജോലി നിറവേറ്റാൻ വേണ്ടി ഇറങ്ങി തിരിക്കുകയാണ്, അതെ സമയം മറ്റൊരിടത്ത് നിന്നും ഇതേ ലക്ഷ്യവും വേറിട്ട മാർഗങ്ങളുമായി മാർകേസ് സഹോദരന്മാർ കൂടി ഇറങ്ങി തിരിക്കുമ്പോൾ സിനിമ ചൂട് പിടിക്കുന്നു. കൂടുതൽ അന്വേഷണങ്ങൾ ആവശ്യമില്ലാതെ തെളിഞ്ഞ മനസ്സോടെ കണ്ടിരിക്കാൻ സാധിക്കുന്ന നല്ലൊരു ചിത്രമാണ് വാമ്പയർ ഹണ്ടർ ഡി ബ്ലഡ്ലസ്റ്റ്. മികച്ച അവതരണവും വിശ്വൽ സ്റ്റൈലും ട്രാജഡി നിറഞ്ഞ ബാക്ഗ്രൗണ്ടും മികച്ച ക്ലൈമാക്സും എല്ലാം കൂടി ഒത്തുചേരുമ്പോൾ മറ്റൊരു മികച്ച ജാപ്പനീസ് അനിമേ ചിത്രം കൂടി കാണാൻ സാധിച്ചേക്കും.

Verdict : Very Good

Stanley Kubrick

ഒരു നൂറ്റാണ്ടോളം പഴക്കമുള്ള സിനിമയുടെ ചരിത്രത്തിൽ ഏറ്റവും മികച്ച സംവിധായകരെ കുറിച്ച് ഒരു ചെറു അന്വേഷണം നടത്തുക ആണെങ്കിൽ പട്ടികയിൽ മുന്നിൽ തന്നെ ഉണ്ടാവും സ്റ്റാൻലി കുബ്രിക് എന്ന പ്രതിഭ, ഈ വസ്തുതയ്ക്ക് സംശയത്തിന്റെയോ വാഗ്വാദങ്ങളുടെയോ ആവശ്യം ഉണ്ടെന്ന് കരുതുന്നില്ല. നാല്പത്തി ആറ് വർഷങ്ങൾ നീണ്ടുനിന്ന സിനിമാ ജീവിതം ,അതിനിടെ പതിമൂന്ന് ചിത്രങ്ങൾ മാത്രം. ഈ പതിമൂന്ന് ചിത്രങ്ങൾ കൊണ്ട് ലോകത്തെ എണ്ണം പറഞ്ഞ സംവിധായകരിൽ ഒരാളായി കുബ്രിക് മാറി എന്ന വസ്തുത മാത്രം മതിയാവും ഈ പതിമൂന്ന് ചിത്രങ്ങളുടെയും മൂല്യം മനസിലാക്കാൻ. തന്റെ ചിത്രങ്ങൾക്ക് മേൽ പൂർണ സ്വാതന്ത്ര്യവും സ്വാധീനവും നിലനിർത്തിയിരുന്ന കുബ്രിക്കിന് ഓരോ ചിത്രങ്ങളും എത്ര മേൽ വ്യത്യസ്തമാവണം എന്നതിനെ കുറിച്ചും വ്യക്തമായ അഭിപ്രായം ഉണ്ടായിരുന്നിരിക്കണം, അതിന്റെ തെളിവാണ് പ്രമേയത്തിലും അവതരണത്തിലും പ്രസക്തിയിലും വരെ വ്യത്യസ്തത പുലർത്തിയ അദ്ദേഹത്തിന്റെ ഓരോ ചിത്രങ്ങളും. തന്റെ സിനിമയുടെ പൂർണതയ്ക്ക് വേണ്ടി നൂറിൽ അധികം ഷോട്ടുകൾ ആവശ്യമെങ്കിൽ അതിനും മടിക്കാത്ത കുബ്രിക്കിന്റെ ഓരോ ചിത്രവും ഓരോ പാഠപുസ്തകങ്ങൾ ആണ് എന്ന് തന്നെ പറയാനാവും, സ്റ്റാൻലി കുബ്രിക് എന്ന വ്യക്തിപ്രഭാവത്തിന്റെ മികച്ച ചിത്രങ്ങളിലൂടെ ഒന്ന് കടന്ന് പോവാം.

A Clockwork Orange (1971)

Genre : Crime

Rating : 8.1/10

Duration : 136 Minutes

മാസ്റ്റർപീസ് എന്നൊക്കെയുള്ള വാക്ക് ഏതെങ്കിലും ഒരു ചിത്രം അക്ഷരാർത്ഥത്തിൽ അർഹിക്കുന്നുണ്ടെങ്കിൽ അത് എ ക്ലോക്ക്വർക്ക് ഓറഞ്ച് പോലുള്ള സിനിമകളാണ്. പ്രേക്ഷകനെയും കൊണ്ട് കുബ്രിക് ഇത്തവണ സഞ്ചരിക്കുന്നത് പ്രതീക്ഷയ്ക്ക് വകയില്ലാത്ത ഒരു സമൂഹത്തിനും നിയമങ്ങൾക്ക് വിലയില്ലാത്ത കാലത്തേക്കുമാണ്. അലക്സ് എന്ന കേന്ദ്ര കഥാപാത്രത്തിന്റെ ഇഷ്ട വിനോദങ്ങൾ കൊലപാതകം ,ബലാത്സംഗം ,ബീതോവാൻ എന്നിവയാണ്. അതിനപ്പുറമുള്ള ഒന്നും അലെക്സിനെ മോഹിപ്പിക്കുന്നില്ല ,ജീവിക്കാൻ പ്രേരിപ്പിക്കുന്നുമില്ല. അലക്സിന്റെ ലോകത്ത് കൂടിയുള്ള ഈ യാത്ര മിക്ക പ്രേക്ഷകർക്കും കണ്ടിരിക്കാൻ ബുദ്ധിമുട്ടേറിയ അനുഭവം ആണ് എന്ന കാര്യത്തിൽ സംശയമില്ലെങ്കിലും കുബ്രിക്കിന്റെ അവതരണവും അതിമനോഹരമായ സെറ്റപ്പും എല്ലാം കൊണ്ട് തന്നെ നൂതനമായ ഒരനുഭവം ആവും എന്ന കാര്യത്തിൽ സംശയമില്ല.

Paths Of Glory (1957)

Genre : Anti War

Rating : 8.5/10

Duration : 88 Minutes

ഒരു കഥാപാത്രം സ്‌ക്രീനിൽ കാണിക്കുന്ന വിദ്യകൾ കണ്ട് മാസ്സ് എന്ന പരിവേഷം ചാർത്തി കൊടുത്ത് അതിനെ ഇന്ന് നമ്മൾ പുകഴ്ത്തുമ്പോൾ വലിയ ബഹളങ്ങൾ ഏതുമില്ലാതെ ഒരു അണ്ടർഗ്രൗണ്ട് ട്രെഞ്ചിൽ കുബ്രിക് ആ വിഭാഗം അറുപത് വർഷങ്ങൾക്ക് മുന്നേ അവതരിപ്പിച്ച് കഴിഞ്ഞിരുന്നു. ചുറ്റും തടിച്ച് കൂടിയ പട്ടാളക്കാർക്കിടയിലൂടെ പൊട്ടി ചിതറുന്ന ഗ്രനേഡുകൾക്കിടയിലൂടെ ഭാവമാറ്റങ്ങളില്ലാതെ നടന്ന് വരുന്ന കൊളോണൽ ഡാക്സിന്റെ ഇൻട്രോ സീൻ ഇന്നും പഴക്കം ഏൽക്കാതെ കാഴ്ചക്കാരനെ വിസ്മയിപ്പിച്ച് കൊണ്ടേ ഇരിക്കുന്നു. പാത്സ് ഓഫ് ഗ്ലോറി എന്ന ചിത്രം യുദ്ധം എന്ന വിഷയം കൈകാര്യം ചെയ്യുന്നതിനോടൊപ്പം തന്നെ ഉയർത്തുന്നത് മനുഷ്യ മനസ്സിൽ ഉയരുന്ന വ്യത്യസ്തമായ ചിന്തകളുടെയും ആഗ്രഹങ്ങളുടെയും അവ ഉളവാക്കുന്ന വലിയ മാറ്റങ്ങളുടെയും കഥയാണ്. കൂടുതൽ പറഞ്ഞ് ആസ്വാദനം കളയുന്നില്ല, ഈ ചിത്രത്തിലൂടെ ജീവിതം സംബന്ധിച്ചുള്ള വലിയൊരു പാഠവും കുബ്രിക് കാഴ്ചക്കാരന് മുന്നിൽ തുറന്നിടുന്നുണ്ട്.

Dr. Strangelove (1964)

Genre : Black Comedy

Rating : 8.5/10

Duration : 94 Minutes

ശീതയുദ്ധം പോലെ സിനിമകൾക്ക് പ്രചോദനമായ അധികം സംഭവങ്ങൾ ഉണ്ടായേക്കില്ല, എന്നാൽ അത്യന്തം ഗൗരവമേറിയ ഈ വിഷയത്തെ അങ്ങേയറ്റം നർമത്തിലും പരിഹാസത്തിലും പൊതിഞ്ഞ് അവതരിപ്പിക്കാനുള്ള ധൈര്യവും ക്രിയാത്മകതയും വിരിഞ്ഞത് കുബ്രിക്കിന്റെ തലയിൽ ആയിരുന്നെന്ന് മാത്രം. അമേരിക്ക ശത്രു രാജ്യമായ സോവിയേറ്റ് യൂണിയനുമേൽ രാസായുധം പ്രയോഗിച്ചാൽ സ്വാഭാവികമായും ഉണ്ടായേക്കാവുന്ന പ്രശ്നങ്ങളും ,മനുഷ്യ കുലത്തെ തന്നെ ബാധിക്കാൻ സാധ്യത ഉള്ള ഇവയുടെ പ്രഹരശക്തിയും ഒക്കെയാണ് സിനിമ ചർച്ച ചെയ്യുന്നത്. സിംഹഭാഗവും ഒരു മുറിക്കുള്ളിൽ ചിലവഴിക്കേണ്ടി വന്നിട്ടും ഒരു നിമിഷം പോലും പ്രേക്ഷകനെ മടുപ്പിക്കാത്ത, പിടിച്ചിരുത്തുന്ന അവതരണവും തന്നെയാണ് സിനിമയുടെ ശക്തി. മൂന്ന് വ്യത്യസ്ത കഥാപാത്രങ്ങളായെത്തിയ പീറ്റർ സെല്ലേഴ്‌സിനെയും കാഴ്ചക്കാരനെ അമ്പരപ്പിക്കുന്ന രീതിയിലുള്ള ചിത്രത്തിന്റെ ക്ലൈമാക്സും എടുത്ത് പറയേണ്ട വസ്തുതകളാണ്.

2001 A Space Odyssey (1968)

Genre : Sci Fi

Rating : 8.6/10

Duration : 161 Minutes

ആദ്യ മൂന്ന് മിനിറ്റ് ഇരുട്ടല്ലാതെ മറ്റൊന്നും കാണിക്കുന്നില്ല ,പിന്നീട് കുറച്ച് സമയം മോണോലിത്ത് അഥവാ ഒരു കൽ പ്രതിമ ആണ് സ്‌ക്രീനിൽ, ആദ്യ ഇരുപത്തഞ്ച് മിനിറ്റും അവസാന ഇരുപത്തി മൂന്ന് മിനിറ്റും സംഭാഷണങ്ങൾ ഏതുമില്ല. അവസാന ഭാഗത്ത് എന്താണ് സംഭവിക്കുന്നതെന്ന് കൃത്യമായി വിശദീകരിക്കാൻ ഇന്നേവരെ ആർക്കും സാധിച്ചിട്ടുമില്ല. ഇതാണ് ചുരുക്കി പറഞ്ഞാൽ കുബ്രിക്കിന്റെ സ്പേസ് ഒഡിസ്സി. ഒരു കാരണവശാലും കാഴ്ചക്കാരന് കാര്യം മനസിലാവരുത് എന്ന് അണിയറ പ്രവർത്തകർ വാശി പിടിച്ച് തീരുമാനിച്ച് ഉറപ്പിച്ച് പുറത്തിറക്കിയ ലോകത്തെ ആദ്യത്തെയും അവസാനത്തെയും ചിത്രം ആയിരിക്കും സ്പേസ് ഒഡീസി. കാഴ്ചക്കാരൻ ചിത്രത്തിൽ നടക്കുന്ന സംഭവങ്ങൾ മനസിലാക്കിയാൽ അത് തങ്ങളുടെ പരാജയം ആണെന്ന് പിന്നണിയിൽ പ്രവർത്തിച്ചവർ തുറന്ന് പറഞ്ഞത് ചരിത്രം.സങ്കീർണമായ ചിത്രം ആയതിനാൽ തന്നെ ആദ്യ ഷോ കഴിഞ്ഞ് തിയേറ്ററിലുള്ള ഇരുന്നൂറോളം കാഴ്ചക്കാർ പാതിവഴി പിന്നിട്ടപ്പോൾ ഇറങ്ങിപ്പോയ ചരിത്രവും ഈ ചിത്രത്തിന് ഉണ്ട്. പഴക്കം കൂടും തോറും വീര്യം കൂടുന്ന വീഞ്ഞ് പോലെ വർഷങ്ങൾക്കിപ്പുറം കൾട്ട് സ്റ്റാറ്റസ് ആണ് ചിത്രത്തിന് ഇന്ന്. കാലത്തിന് പോലും പഴക്കം വരുത്താൻ കഴിയാഞ്ഞ കാലത്തിന് മുന്നേ സഞ്ചരിച്ച കുബ്രിക്കിന്റെ വിശ്വൽ എഫക്ടുകളും ടെക്‌നോളജിയും ആണ് വർഷങ്ങൾക്കിപ്പുറവും ചിത്രത്തിനെ കൾട്ടായി നിലനിർത്താനുള്ള പ്രധാന കാരണങ്ങളിൽ ഒന്ന് എന്നത് തീർച്ചയാണ്.കുരങ്ങന്മാരായി ഭൂമിയിൽ വിഹരിച്ചിരുന്ന കാലം മുതൽ ചന്ദ്രനിൽ കാൽ കുത്തിയത് വരെയുള്ള മാനവരാശിയുടെ പരിണാമത്തിന്റെ വിവിധ ഘട്ടങ്ങളിലൂടെ ചിത്രം കടന്ന് പോവുന്നു. ഇന്റെർസ്റ്റെല്ലർ ,ആർട്ടിഫിഷ്യൽ ഇന്റലിജിൻസ് പോലെയുള്ള ഒരുപാട് ചിത്രങ്ങൾക്ക് പ്രചോദനമായ സ്പേസ് ഒഡീസി അമ്പത് വർഷങ്ങൾക്ക് മുന്നേ തന്നെ മൊബൈൽ ഫോൺ ,ഐ പാഡ് ,സ്പേസ് റോബോട്ട് തുടങ്ങിയവയെ പ്രവചിച്ചിരുന്നു എന്നത് കുബ്രിക് എന്ന ദീർഘ വീക്ഷകന്റെ ലെവൽ മനസ്സിലാക്കി തരുന്നു.കാഴ്ചക്കാരന്റെ ശ്രദ്ധ പിടിച്ച് നിർത്താനായി ഒരൊറ്റ ഷോട്ട് പോലുമില്ല ചിത്രത്തിൽ ,അതിനായി ചിത്രത്തിലെവിടെയും കൂബ്രിക് ശ്രമിച്ചിട്ടുമില്ല. അതിനാൽ തന്നെ പൊതുവെ കേൾക്കുന്ന പരാതികളിൽ ഒന്നാണ് ചിത്രം വളരെ മടുപ്പിക്കുന്നതും വിരസവും ആണെന്നത്. എന്നാൽ സിനിമയെ ഗൗരവമായി കാണുന്ന ഒരാളും ഒരിക്കലും കാണാതെ ഒഴിവാക്കാൻ പാടില്ലാത്ത സിനിമ അപനുഭവം തന്നെയാണ് ഈ ചിത്രം. 2001ൽ എങ്ങനെയാണ് ഇത്രയും മികച്ച ടെക്കനോളജി ഉപയോഗിച്ച് സംവിധായകൻ ചിത്രം പുറത്തിറക്കിയത് എന്ന് 1968ൽ പുറത്തിറങ്ങിയ ചിത്രം കണ്ട് അത്ഭുതപ്പെട്ട കൂട്ടുകാരനെ സ്മരിക്കുന്നു.

Shining (1980)

Genre : Horror

Rating : 8.4/10

Duration : 144 Minutes

ചില സിനിമകൾക്ക് ഒരു സ്വഭാവം ഉണ്ട്, എത്രത്തോളം ശ്രമിച്ചാലും അവ പിടി നൽകില്ല, ഓരോ കാഴ്ചയിലും എന്തെങ്കിലും ഒരു പുതിയ അറിവ് അല്ലെങ്കിൽ പുതിയ വസ്തുത ചിത്രം കാഴ്ചക്കാരനായി ഒഴിച്ചിട്ടിട്ടുണ്ടാവും. അവ പ്രേക്ഷകരിൽ ഉണ്ടാക്കാൻ പോവുന്ന വികാരം അത്ഭുതമാണ്, എന്ത് കൊണ്ട് താനിത് ശ്രദ്ധിച്ചില്ല എന്നല്ല മറിച്ച് ഇത്രയും വർഷങ്ങൾക്ക് മുന്നേ ഒരു വ്യക്തിക്ക് എങ്ങനെ ഇത് പോലൊരു ചിത്രം ഒരുക്കാൻ കഴിഞ്ഞു എന്ന രീതിയിലുള്ള അത്ഭുതമാണ്, ഇതാണ് ഷൈനിങ്. എന്നിലെ സിനിമാ ആസ്വാദകനോട് ചോദിക്കുക ആണെങ്കിൽ കുബ്രിക് എന്ന സംവിധായകന്റെ ഏറ്റവും മികച്ച ചിത്രം, ഒരു മരീചികയാണ് ഷൈനിങ്. തന്റെ രചന പൂർത്തിയാക്കാനായി ഓവർലുക് ഹോട്ടലിൽ എത്തിയ ജാക്കും ഭാര്യ വെൻഡിയും മകൻ മകൻ ഡാനിയും എല്ലാം എന്ത് കൊണ്ട് ഇന്നും ഒരു മരവിപ്പായി തുടരുന്നു എന്നത് സിനിമ കണ്ട് അറിയാൻ ശ്രമിക്കുക.

ഈ ചിത്രങ്ങൾക്ക് പുറമെ ബാരി ലിൻഡൻ (1975) ഐസ് വൈഡ് ഷട്ട് (1999) ഫുൾ മെറ്റൽ ജാക്കറ്റ് (1987) ലോലിറ്റ (1962) ദി കില്ലിംഗ് (1956) എന്നീ ചിത്രങ്ങളും കുബ്രിക്കിന്റെ പ്രതിഭ വിളിച്ചോതുന്ന ചിത്രങ്ങളാണ്.

407. The Aura (2005)

Director : Fabian Bielensky

Genre : Mystery

Rating : 7.2/10

Country : Argentina

Duration : 136 Minutes


🔸ഭൂമിയിൽ പിറന്ന് വീഴുന്ന ഓരോ ജീവനും ഒരു നിയോഗമുണ്ട്, അല്ലെങ്കിൽ അങ്ങനെയാണ് നൂറ്റാണ്ടുകളായി വിശ്വസിച്ച് പോന്നത്. ജനനത്തിൽ ആരംഭിച്ച് മരണത്തിൽ അവസാനിക്കുന്ന ജീവിതം എന്ന യാത്ര ഒരു പരിധി വരെ ഈ നിയോഗം സാക്ഷാത്കരിക്കുക എന്ന ഉദ്ദേശത്തോട് കൂടിയാണ്. ചിലർ തങ്ങളുടെ നിയോഗം തിരിച്ചറിയും, ചിലർ സ്വയം സൃഷ്ട്ടിക്കും, അപൂർവം ചിലർ അതിന് കഴിയാതെ ജീവിതം തീർക്കും. ഇതൊക്കെ എന്ത് തന്നെ ആയാലും എസ്തപാൻ എസ്പിനോസ എന്ന നമ്മുടെ നായക കഥാപാത്രം തന്റെ ജന്മ നിയോഗത്തിന്റെ കാര്യത്തിൽ മുൻപേ തീരുമാനത്തിൽ എത്തിയ വ്യക്തിയാണ്. അയാളെ സംബന്ധിച്ചിടത്തോളം ഇതുവരെ ഉള്ള ജീവിതവും, അനുഭവങ്ങളും, യാത്രകളും എല്ലാം ഈ നിയോഗത്തിലേക്കുള്ള പാത മാത്രമായിരുന്നു.

🔸ഒരു പെർഫെക്റ്റ് ക്രൈം, അല്ലെങ്കിൽ ഏറ്റവും മികച്ച കുറ്റകൃത്യം ചെയ്യുക എന്നതാണ് എസ്പിനോസ വിശ്വസിക്കുന്ന തന്റെ നിയോഗം. പോലീസിനോ, അന്വേഷകർക്കോ ഒരു രീതിയിലും തിരിച്ചറിയാൻ കഴിയാത്ത, തന്നിലേക്ക് വിരൽ ചൂണ്ടാൻ കഴിയാത്ത, ഒരു സൂചന പോലും അവശേഷിപ്പിക്കാത്ത കുറ്റകൃത്യം. വേണ്ട കഴിവോ, ക്ഷമയോ ഇല്ലാത്ത സ്വന്തം കഴിവിൽ വിശ്വാസമില്ലാത്ത ചെറുകിട കുറ്റവാളികൾക്ക് ഒരിക്കലും താനീ പറഞ്ഞ കുറ്റകൃത്യം ചെയ്യാൻ കഴിയുമെന്ന് എസ്പിനോസ കരുതുന്നില്ല, എന്നാൽ ആവശ്യമായ സമയവും കൃത്യമായ പദ്ധതിയും ഉണ്ടെങ്കിൽ തന്നെക്കൊണ്ട് അത് കഴിയുമെന്ന് അയാൾ വിശ്വസിക്കുന്നുണ്ട്, അല്ല അയാൾക്ക് അറിയാം. തന്റെ കഴിവിൽ അത്രമാത്രം വിശ്വാസം എസ്പിനോസയ്ക്ക് ഉണ്ട് എന്നതാണ് സത്യം.

🔸കാര്യം ഇങ്ങനെ ഒക്കെ ആണെങ്കിലും എസ്പിനോസയുടെ മാനസികാവസ്ഥ ഒട്ടും ആശ്വാസകരമല്ല. വർഷങ്ങളായി ചത്ത മൃഗങ്ങളുടെ സംരക്ഷണവും മറ്റും ജോലിയായി കൊണ്ടുനടക്കുന്ന ടിയാൻ എപിലെപ്സി രോഗത്തിന് അടിമയാണ്. തന്റെ വികാരങ്ങളും വിചാരങ്ങളും ഒരു പരിധിക്കപ്പുറം നിയന്ത്രിക്കാനോ അതുൾക്കൊള്ളാനോ എസ്പിനോസയ്ക്ക് കഴിയില്ല. ഈ സമയത്ത് അയാളിൽ ഉടലെടുക്കുന്ന ചിന്തകൾ ഭാവിയോ ഭൂതമോ എന്ന് പോലും തിരിച്ചറിയാൻ കഴിഞ്ഞേക്കില്ല, ചുരുക്കി പറഞ്ഞാൽ സ്വന്തം വ്യക്തിത്വം തന്നെ പണയം വെക്കേണ്ടി വരുന്ന അവസ്ഥയാണ് എസ്പിനോസയുടേത്.

🔸ഇങ്ങനെ അല്ലറ ചില്ലറ പ്രശ്നങ്ങളുമായി കടന്ന് പൊയ്ക്കൊണ്ടിരുന്ന ദിവസങ്ങളിൽ ഒന്നിൽ കഥാനായകനും സുഹൃത്തുക്കളും മൃഗ വേട്ടയ്ക്കായി കാടിനുള്ളിലേക്ക് കടന്ന് ചെല്ലുകയാണ്. മേൽ സൂചിപ്പിച്ച രോഗ സൂചനകൾ അതിന്റെ ഏറ്റവും ഭീകര രൂപം പ്രാപിച്ച നിമിഷങ്ങളിൽ ഒന്നിൽ ടിയാന്റെ കയ്യിൽ നിന്നും ഒരബദ്ധം സംഭവിക്കുകയാണ്, അറിയാതെ ഉതിർത്ത വെടി സഹപ്രവർത്തകരിൽ ഒരാളുടെ ജീവൻ എടുത്ത് കൊണ്ടാണ് കടന്ന് പോയത്. എന്നാൽ ഈ സംഭവം കഥാപാത്രത്തെ കൊണ്ടുപോവുന്നത് പ്രേക്ഷകൻ ഒട്ടും പ്രതീക്ഷിക്കാത്ത മറ്റൊരു പാതയിലേക്കാണ്, ആ പാതയാണ് ഈ ചിത്രത്തിന്റെ പ്രമേയം.

🔸ആർക്കും തിരിച്ചറിയാനാവാത്ത ഒരു പെർഫെക്റ്റ് ക്രൈം ചെയ്യണം എന്നത് തന്റെ ജീവിതാഭിലാഷമായി കൊണ്ടുനടക്കുന്ന കഥാപാത്രത്തിൽ നിന്നും അത് സാക്ഷാത്കരിക്കുന്നതിനായി ഇറങ്ങി പുറപ്പെടുന്ന വേട്ടക്കാരനിലേക്കുള്ള യാത്രയാണ് ഈ ചിത്രം, സൂചനകൾ ശെരി വെക്കും വിധം ആട്ടിൻ തോലിട്ട ചെന്നായ തന്നെയാണ് കേന്ദ്ര കഥാപാത്രമായ എസ്പിനോസ. ചിത്രം കൈകാര്യം ചെയ്യുന്ന വിഷയവും അതിന്റെ അവതരണവും കാരണം തന്നെ അത്യാവശ്യം അമ്പരപ്പും ഞെട്ടലും ഉളവാക്കുന്ന കഥാസന്ദർഭങ്ങൾ തന്നെയാണ് ചിത്രത്തിൽ ഉള്ളത്, കാണാൻ താല്പര്യപ്പെടുന്നവർക്ക് രണ്ട് മണിക്കൂർ ബോർ അടിക്കില്ല എന്ന കാര്യം ഉറപ്പ്. കൂടുതൽ പറഞ്ഞ് ആസ്വാദന ഭംഗി കളയുന്നില്ല, കണ്ട് തന്നെ അറിയുക ഈ അർജന്റീനിയൻ ത്രില്ലർ ചിത്രത്തെ.

Verdict : Very Good

406. American Animals (2018)

Director : Bart Layton

Genre : Heist

Rating : 7.1/10

Country : USA

Duration : 116 Minutes


🔸പതിനഞ്ച് വർഷങ്ങൾക്ക് മുൻപേ അരങ്ങേറിയ ചില യഥാർത്ഥ സംഭവങ്ങൾ, അതിൽ ഉൾപ്പെട്ടിരിക്കുന്ന യഥാർത്ഥ വ്യക്തികളെയും സന്ദര്ഭങ്ങളെയും സ്‌ക്രീനിൽ എത്തിക്കുക എന്ന അത്യാവശ്യം ബുദ്ധിമുട്ടേറിയ കാര്യമാണ് അമേരിക്കൻ അനിമൽസ് എന്ന ചിത്രത്തിലൂടെ സംവിധായകൻ ബർട്ട് ലെയ്റ്റൻ സാക്ഷാത്കരിച്ചിരിക്കുന്നത്. ബുദ്ധിമുട്ടേറിയ കാര്യം എന്ന് ഈ സംഭവങ്ങളെ വിശേഷിപ്പിക്കാൻ പ്രത്യേക കാരണമുണ്ട്, കാരണം ഈ സംഭവം ഏകദേശം പതിനഞ്ച് വർഷങ്ങൾക്ക് മുന്നേ അരങ്ങേറിയ, കുപ്രസിദ്ധി ആർജിച്ച ഒരു മോഷണ ശ്രമമാണ്. അതിൽ ഉൾപ്പെട്ടിരിക്കുന്ന വ്യക്തികളെല്ലാം തന്നെ മേൽ സൂചിപ്പിച്ച സംഭവത്തിന് ശേഷം മറ്റ് പാതകളിലേക്കോ, സമൂഹത്തിന്റെ മറ്റ് തട്ടുകളിലേക്കോ മാറി നടന്നവരാണ്.

🔸ഈ കാരണങ്ങൾ കൊണ്ടെല്ലാം തന്നെ തികച്ചും നീതി പുലർത്തുന്ന രീതിയിൽ സംഭവങ്ങളെ ദൃശ്യവൽക്കരിക്കുക എന്ന കഠിനമായ ജോലി തന്നെയാണ് സംവിധായകന്റെ മുന്നിൽ ഉണ്ടായിരുന്നത്. 2004ഇലാണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്, വിദ്യാർത്ഥിയായ സ്‌പെൻസർ തന്റെ ജീവിതത്തോടും ഒരു പരിധി വരെ തന്നോട് തന്നെയും വെറുപ്പോടെ പെരുമാറുന്ന വ്യക്തി ആണ്. പ്രതീക്ഷിച്ച രീതിയിലുള്ളൊരു ജീവിതം സ്പെൻസറിന് ഒരു കാലത്തും ലഭിച്ചിട്ടില്ല, അതിനാൽ തന്നെ താൻ ഇങ്ങനെ ജീവിച്ച് പോവുന്നതിൽ എന്തെങ്കിലും അർഥം ഉണ്ടെന്നോ ,ഏതെങ്കിലും ഒരു കാലത്ത് തന്റെ ജീവിതം മാറുമെന്നോ അയാൾ കരുതുന്നില്ല. ഒരു തരം വിഷാദം സ്പെൻസറിനെ വേട്ടയാടി കൊണ്ടിരിക്കുകയാണ്.

🔸നേർ രേഖ പോലെ പോയി കൊണ്ടിരിക്കുന്ന തന്റെ ജീവിതത്തിൽ എന്തെങ്കിലും ഒരു മാറ്റം, അത് നല്ലതോ ചീത്തയോ ആയിക്കോട്ടെ, കൊണ്ടുവരാൻ പ്രാപ്തിയുള്ള ഒരു സ്പാർക്കിന് വേണ്ടിയാണ് സ്പെൻസറിന്റെ ഓരോ ദിവസവും കടന്ന് പോവുന്നത്. സ്പെൻസറിന്റെ അടുത്ത സുഹൃത്താണ് സ്പോർട്സ് സ്‌കൂളിൽ വിദ്യാർത്ഥിയായ വാറൻ ലിപ്കാ. അത്ലറ്റിക്സിനോടൊ കായിക ഇനങ്ങളോടോ യാതൊരു താല്പര്യവുമില്ലാത്ത വാറൻ മാതാപിതാക്കളുടെ ആഗ്രഹ സഫലീകരണം എന്ന ഒറ്റ ഉദ്ദേശം മാത്രം മുൻ നിർത്തിയാണ് പഠനം തുടരുന്നത്. ഏറെക്കുറെ സ്പെൻസറിന്റെ മാനസികാവസ്ഥ തന്നെയാണ് വാറനും. എല്ലാത്തിനോടും അടങ്ങാത്ത ഈർഷ്യയും നിരാശയും വിപ്ലവ മനോഭാവവും.

🔸ആയിടെയാണ് സ്പെൻസറിന് യൂണിവേഴ്സിറ്റി ലൈബ്രറിയിലേക്ക് കടന്ന് ചെല്ലാൻ അവസരം ലഭിക്കുന്നതും, അപൂർവ്വത്തിൽ അപൂർവമായ പുസ്തകങ്ങളുടെ ശേഖരം അവിടെ കാണുന്നതും. സ്വാഭാവികമായും കാലപ്പഴക്കവും പുസ്തകങ്ങളുടെ മൂല്യവും കണക്കിലെടുത്തപ്പോൾ അവ മോഷ്ടിച്ച് വിൽക്കുക എന്ന പദ്ധതി തന്നെയാണ് രണ്ട് സുഹൃത്തുക്കളുടെയും മനസ്സിൽ ഉദിക്കുന്നത്. മോഷണത്തിനും പണത്തിനുമപ്പുറം യാന്ത്രികമായി പോയി കൊണ്ടിരുന്ന ജീവിതത്തിൽ വ്യത്യസ്തമായി എന്തെങ്കിലും ചെയ്യണം എന്ന ആഗ്രഹം രണ്ട് പേരെയും ഈ പദ്ധതിയോട് കൂടുതൽ അടുപ്പിക്കുകയാണ്. ശിഷ്ട ഭാഗം കണ്ട് തന്നെ അറിയുന്നതാവും നല്ലത്.

🔸യഥാർത്ഥ സംഭവങ്ങൾ സ്‌ക്രീനിൽ എത്തുന്നതിനൊപ്പം യഥാർത്ഥ സംഭവങ്ങളുടെ ഭാഗമായ വ്യക്തികളുടെ സാന്നിധ്യവും ചിത്രത്തിൽ ഉണ്ട് എന്നത് ഒരു പ്രത്യേകത തന്നെയാണ്, വർഷങ്ങൾക്കിപ്പുറം മാറിയ ജീവിത സാഹചര്യങ്ങളിൽ നിന്ന് കൊണ്ട് തങ്ങളുടെ തന്നെ പഴയ വ്യക്തിത്വങ്ങളെ കണ്ടറിയുന്നത് തീർച്ചയായും ഈ വ്യക്തികളെ സംബന്ധിച്ചിടത്തോളം വ്യത്യസ്തമായ അനുഭവം ആയിരിക്കും എന്നതിൽ സംശയമില്ല. വളരെ ലളിതമായ കഥയാണ് അമേരിക്കൻ അനിമൽസ് എന്ന ചിത്രത്തിന്റേത്, ഒരു ഹെയ്‌സ്റ്റ് ചിത്രത്തിൽ കാണാനിടയുള്ള തോക്ക് ബോംബ് ഉദ്യമങ്ങളുടെ അതിപ്രസരമോ ചെയ്‌സ് രംഗങ്ങളോ ചിത്രത്തിൽ കാണാനായേക്കില്ല, എങ്കിലും ലളിതമായ ഒരു കഥയുടെ മികച്ചൊരു അവതരണം ഈ സിനിമയിൽ കാണാം. ഈ വർഷമിറങ്ങിയ നല്ല ചിത്രങ്ങളുടെ കൂട്ടത്തിൽ തീർച്ചയായും ഉൾപ്പെടുത്താം ബഹളങ്ങളില്ലാത്ത ഈ ചിത്രത്തെയും.

Verdict : Good

405. The Taking Of Pelham One Two Three (1974)

Director : Joseph Sergent

Genre : Thriller

Rating : 7.7/10

Country : USA

Duration : 105 Minutes


🔸ന്യു യോർക്ക് നഗരത്തിൽ നിന്നും എന്നത്തേയും പോലെ സബ്‌വേ ട്രെയിൻ യാത്ര ആരംഭിക്കുകയാണ്. ട്രെയിനിൽ യാത്രികർ അധികമില്ല, തിരക്ക് ആരംഭിച്ച് തുടങ്ങിയിട്ടേ ഉള്ളൂ. തങ്ങളല്ലാതെ ഒപ്പം യാത്ര ചെയ്യുന്നവരോട് യാതൊരു രീതിയിലുള്ള ഇടപഴകലുകളും നടത്താത്ത, അതിന് താല്പര്യപ്പെടാത്ത ഈ യാത്രികർക്ക് ഇടയിലേക്ക് നാല് വ്യത്യസ്ത സ്റ്റേഷനുകളിൽ നിന്നും നാല് പേർ വരികയാണ്. ഒരേ രീതിയിലുള്ള മീശ, തൊപ്പി ,കൃതാവ് ,കണ്ണട ,കാർഡ്ബോർഡ് ബോക്സ് തുടങ്ങി നാല് വ്യക്തികളും തമ്മിൽ സാമ്യതകൾ അനവധി ആണ്. ന്യൂ യോർക്കിൽ നിന്നും യാത്ര ആരംഭിച്ച ട്രെയിൻ മാൻഹാട്ടൻ നഗര പരിധിയിൽ എത്തുമ്പോൾ ഈ നാല് പേരും ചേർന്ന് ട്രെയിനിന്റെ ആദ്യ കാർ കയ്യേറി യാത്രികരെ ബന്ദികളാക്കുകയാണ്.

🔸ട്രെയിൻ കയ്യേറിയവരുടെ പദ്ധതി ഒരു പരിധി വരെ അമ്പരപ്പ് ഉളവാക്കുന്നതാണ്, അത് ഇപ്രകാരം ആണ്. ആയുധധാരികളായ നാല് പേർ ചേർന്ന് പതിനെട്ട് യാത്രികർ ഉള്ള ട്രെയിനിന്റെ ഒരു കോച്ച് കയ്യേറുന്നു, ഇവർ അറിഞ്ഞാലും ഇല്ലെങ്കിലും ട്രെയിൻ സഞ്ചരിക്കുന്ന പാത കൃത്യമായ പോലീസ് നിരീക്ഷണത്തിൽ ഉള്ളതാണ്. ഈ പോലീസുകാരിൽ നിന്നും കയ്യേറിയ ട്രെയിൻ കോച്ച് എങ്ങിനെ മറച്ച് പിടിക്കും എന്നതിനെ സംബന്ധിച്ച് ഏതെങ്കിലും രീതിയിലുള്ള പദ്ധതി അവർക്കുണ്ടോ എന്നത് ദൈവത്തിന് മാത്രം അറിയാം. ഇനി ഇതൊന്നും പോരെങ്കിൽ ട്രെയിൻ സഞ്ചരിച്ച് കൊണ്ടിരിക്കുന്നത് ഒരു ടണലിൽ കൂടിയുമാണ്, ശ്രദ്ധ പതിയാതെ ഇതുപോലൊരു കൃത്യം ചെയ്ത ശേഷം രക്ഷപ്പെടാനുള്ള സാധ്യത ഇല്ല എന്ന് തന്നെ പറയാം.

🔸എങ്കിലും കയ്യേറ്റ സംഘവും ഒട്ടും മോശമല്ല, അവരെ സംബന്ധിച്ചിടത്തോളം, ശ്രദ്ധയോടെ പിഴവുകൾ പറ്റാതെ ചെയ്യുക ആണെങ്കിൽ വിജയത്തിൽ എത്തും എന്ന് നൂറ് ശതമാനം ഉറപ്പുള്ളതാണ് അവരുടെ പദ്ധതികൾ. ബെർണാഡ് റൈഡർ അഥവാ മിസ്റ്റർ ബ്ലൂ ആണ് പദ്ധതിയുടെ സൂത്രധാരൻ, ഒരു മുൻ പട്ടാളക്കാരൻ ആയതിനാൽ തന്നെ തന്റെ ഉദ്യമത്തിൽ അങ്ങേയറ്റം കൃത്യതയും അച്ചടക്കവും ബെർണാഡ് പാലിക്കാറുണ്ട്. ബെർണാർഡിനോടൊപ്പം മിസ്റ്റർ ഗ്രീൻ, മിസ്റ്റർ ഗ്രേ, മിസ്റ്റർ ബ്രൗൺ തുടങ്ങിയവരും ഈ പദ്ധതിയിൽ ഭാഗമാണ്. ഇവരിൽ രണ്ടുപേർ ചെറുകിട കുറ്റവാളികളും ഒരാൾ ജോലി നഷ്ട്ടപ്പെട്ട മോട്ടോർ മെക്കാനിക്കും ആണ്.

🔸ഒരു മില്യൺ ഡോളർ ഒരു മണിക്കൂറിനകം, ഈ പറഞ്ഞ ഒരു മണിക്കൂറിന് ശേഷമുള്ള ഓരോ മിനുറ്റിനും ട്രയിനിലെ ഒരു ജീവന്റെ വില, ഇതാണ് നാൽവർ സംഘത്തിന്റെ ആവശ്യം. പണത്തിനായി ഈ സംഘത്തിനോട് ഇടപെടുന്നതാവട്ടെ ജനപ്രീതി കുറഞ്ഞ് കൊണ്ടിരിക്കുന്ന, ജനങ്ങൾ കൂവും എന്ന ഉറപ്പ് ഉള്ളതിനാൽ അവർക്ക് മുന്നിൽ പ്രത്യക്ഷപ്പെടാൻ പോലും ഇഷ്ട്ടപ്പെടാത്ത ഒരു നഗരത്തിന്റെ മേയർ ആയിട്ടും. തുടർന്ന് അരങ്ങേറുന്ന സംഭവങ്ങൾ സ്‌ക്രീനിൽ തന്നെ കണ്ട് ആസ്വദിക്കുന്നതാവും നല്ലത്. 1973ഇൽ പുറത്തിറങ്ങിയ ഇതേ പേരുള്ള നോവലിന്റെ ചലച്ചിത്രാവിഷ്കാരം ആയ ചിത്രം 2009ഇൽ ജോൺ ട്രവോൾട്ട, ഡെൻസെൽ വാഷിംഗ്ടൺ എന്നിവരെ വെച്ച് റീമേയ്ക്ക് ചെയ്‌തെങ്കിലും ഒറിജിനലിനെ നിലവാരത്തോളം എത്താനായില്ല.

🔸മേൽ ഭാഗങ്ങളിൽ സൂചിപ്പിച്ചത് പോലെ തന്നെ തട്ടി കൊണ്ടുപോവൽ സംഘവും പോലീസുകാരും തമ്മിലുള്ള ഒളിച്ച് കളി തന്നെയാണ് ചിത്രത്തിന്റെ പ്രമേയം, അത് അങ്ങേയറ്റം രസകരവും ആകാംക്ഷ ഉളവാക്കുന്നതുമായ രീതിയിൽ ചിത്രം അവതരിപ്പിച്ചിട്ടുമുണ്ട്. ചിത്രം കണ്ടവസാനിപ്പിക്കുമ്പോൾ എടുത്ത് പറയേണ്ടത് കഥ പ്രേക്ഷകന്റെ മുന്നിലേക്ക് വരച്ചിട്ട രീതി തന്നെയാണ്, കഥയിലെ ഓരോ നൂലിഴ പോലും വ്യക്തവും കൃത്യവുമായ രീതിയിൽ ചേർത്ത് വെച്ചിരിക്കുന്നു. പ്രകടനങ്ങളും സംഭാഷണങ്ങളും സർവോപരി പതിയെ പതിയെ കാണുന്ന കാഴ്ചക്കാരന്റെ മനസ്സിൽ സമ്മർദ്ദം ഉളവാക്കാനും ഉൾപ്പെടെ മിക്ക മേഖലകളിലും ചിത്രം വിജയിച്ചിരിക്കുന്നതായി കാണാം. ആകെമൊത്തം, കണ്ടിരിക്കേണ്ട നല്ല ത്രില്ലറുകളുടെ പട്ടികയിലേക്ക് ചേർക്കാം ഈ ചിത്രത്തിനെയും.

Verdict : Very Good

404. To All The Boys I've Loved Before (2018)

Director : Susan Johnson

Genre : Romance

Rating : 7.6/10

Country : USA

Duration : 99 Minutes


🔸തന്റെ പതിനാറ് വർഷ ജീവിതത്തിനിടെ അഞ്ച് ആൺകുട്ടികളോട് ലാറ ജീനിന് ഇഷ്ടം തോന്നിയിട്ടുണ്ട്. സാധാരണ ഇഷ്ടം അല്ല, അതാത് കാലഘട്ടങ്ങളിൽ അവളുടെ വൈകാരിക ചുറ്റുപാടുകളെ പോലും ബാധിക്കാൻ മാത്രം തീവ്രമായ ഇഷ്ടം. രണ്ടാം ഗ്രേഡിൽ പഠിച്ച് കൊണ്ടിരിക്കെ സഹപാഠിയായ പീറ്ററിനോട് തോന്നിയ പ്രണയം മുതൽ, ഇന്ന് പതിനൊന്നാം ഗ്രേഡിൽ പഠിക്കുമ്പോൾ അയൽക്കാരനായ ജോഷിനോട് തോന്നിയ ഇഷ്ടം വരെ നീണ്ട കിടക്കുകയാണ് ലാറ ജീനിന്റെ ഐതിഹാസികമായ പ്രണയ കഥകൾ. ഈ സംഭവങ്ങളിൽ ഒന്നിലും തന്നെ തന്റെ ഇഷ്ടം അതാത് വ്യക്തികളോട് തുറന്ന് പറയാൻ ഒരു കാലത്തും ലാറ ജീൻ തയാറായിട്ടില്ല എന്നതാണ് എടുത്ത് പറയേണ്ട മറ്റൊരു വസ്തുത.

🔸നന്നേ ചെറുപ്പത്തിലേ തന്നെ അമ്മ മരിച്ചുപോയ ലാറ ജീനിനെയും രണ്ട് സഹോദരിമാരെയും വളർത്തി ഇന്നത്തെ നിലയിലേക്ക് കൊണ്ടുവന്നത് അച്ഛൻ കോവയ്‌ ആണ്. അമ്മയില്ലാത്ത മൂന്ന് പെൺകുട്ടികളെ വളർത്തിക്കൊണ്ടുവരിക എന്നത് ഒരു അച്ഛനെ സംബന്ധിച്ചിടത്തോളം കഠിനമായ യത്നം ആണെങ്കിൽ കൂടിയും മക്കൾക്ക് യാതൊരു കുറവും അയാൾ ഒരു കാലത്തും വരുത്തിയിട്ടില്ല. ഓരോ കാലഘട്ടങ്ങളിലും തന്റെ മനസ്സിൽ ഉടലെടുത്ത പ്രണയങ്ങൾ കത്തിന്റെ രൂപേണയാണ് ലാറ ജീൻ സൂക്ഷിച്ച് വെച്ചത്. മരണത്തിന് മുൻപ് തന്റെ അമ്മ സമ്മാനിച്ച പെട്ടിയിൽ സൂക്ഷിച്ചിരുന്ന കത്തുകൾ അവൾക്കല്ലാതെ മറ്റാർക്കും കൈകാര്യം ചെയ്യാനാവില്ല എന്ന് അവൾക്ക് ഉറപ്പായിരുന്നു, അല്ലെങ്കിൽ അങ്ങനെ അവൾ വിശ്വസിച്ചു.

🔸തന്റെ അഞ്ച് പ്രണയങ്ങളിലെയും നായക കഥാപാത്രങ്ങളോട് അതാത് കാലഘട്ടങ്ങളിൽ അവൾക്ക് തോന്നിയ വികാരങ്ങൾ അതിന്റെ പൂർണതയിൽ ആ കത്തിൽ വിവരിച്ചിട്ടുണ്ടായിരുന്നു. ഇടക്കൊക്കെ പഴയ സംഭവങ്ങൾ മനസിലേക്ക് തിരികെ വരുമ്പോൾ ഈ കത്തുകളിലൂടെ ഒരു തവണ കൂടി കടന്ന് പോവുക എന്നതായിരുന്നു ലാറ ജീനിന്റെ ഏക വിനോദം. സാമാന്യ ബുദ്ധിക്ക് വിവരിക്കാൻ കഴിയില്ലെങ്കിലും ഈ കത്തുകൾ ആണ് ലാറ ജീനിന്റെ ഏറ്റവും വലിയ സമ്പാദ്യവും. അതൊക്കെ എന്ത് തന്നെ ആയാലും ഒരു ദിവസം ഈ കത്തുകൾ ലാറ ജീനിന്റെ അറിവില്ലാതെ പോസ്റ്റ് ചെയ്യപ്പെടുകയാണ്.

🔸കത്തുകൾ എല്ലാം എഴുതപ്പെട്ടിട്ട് കാലം ഒരുപാട് കഴിഞ്ഞിരിക്കുന്നു, ഉൾപ്പെട്ട കഥാപാത്രങ്ങളെല്ലാം മറ്റേതൊക്കെയോ പാതകളിലേക്ക് മാറി സഞ്ചരിച്ച് തുടങ്ങിയിരിക്കുന്നു, പലരുടെയും ജീവിതത്തിൽ ലാറ ജീൻ എന്ന കഥാപാത്രത്തിന് ഏതെങ്കിലും രീതിയിലുള്ള പ്രാധാന്യമുണ്ടോ എന്ന കാര്യം പോലും സംശയമാണ്. എന്നാൽ ലാറ ജീനിന്റെ പേടി എല്ലാം സത്യമാവുന്നത് കത്തുകൾ ലഭിച്ച മുറയ്ക്ക് ഈ കഥാപാത്രങ്ങൾ എല്ലാം തിരികെ വരുമ്പോഴാണ്. ഇവയിൽ ഒരു കഥാപാത്രം ലാറ ജീനിന്റെ സഹോദരി മാർഗോട്ടിന്റെ കാമുകൻ ആണെന്നതും മറ്റൊരാൾ കോളേജിലെ സഹപാഠി ആണെന്നതും കാര്യങ്ങളെ കൂടുതൽ കുഴപ്പിക്കുകയാണ് ചെയ്തത്. വിശദീകരണങ്ങൾക്കോ ന്യായങ്ങൾക്കോ പ്രസക്തി ഇല്ലെങ്കിൽ കൂടിയും രണ്ടും കല്പിച്ച് പ്രശ്നങ്ങളെ സമീപിക്കാനാണ് ലാറ ജീനിന്റെ തീരുമാനം.

🔸നാല് വർഷങ്ങൾക്ക് മുന്നേ പുറത്തിറങ്ങി മികച്ച ആരാധക നിരൂപക പ്രശംസ കരസ്ഥമാക്കിയ ഇതേ പേരുള്ള നോവലിന്റെ ദൃശ്യാവിഷ്‌കാരം കൂടിയാണ് ടു ഓൾ ദി ബോയ്സ് ഐ ഹാവ് ലവ്ഡ് ബിഫോർ. ജോൺ ഹ്യുസ് ചിത്രങ്ങൾക്ക് ആദരം അർപ്പിച്ച് കൊണ്ടുള്ള ടീനേജ് റൊമാന്റിക് കോമഡി ആണ് പ്രസ്തുത ചിത്രം. ഈ വിഭാഗത്തിൽ പെട്ട ചിത്രങ്ങളോട് താല്പര്യമുണ്ടെങ്കിൽ ധൈര്യമായി കാണാം നൂറ് മിനുറ്റ് ദൈർഖ്യമുള്ള ഈ ചിത്രവും. പ്രകടനങ്ങളുടെ കാര്യം പറയുകയാണെങ്കിൽ പ്രധാന കഥാപാത്രങ്ങളായ ലാറ ജീൻ, പീറ്റർ ,ജോഷ് എന്നിവരെല്ലാം നന്നായി തോന്നി എങ്കിലും വളരെ കുറച്ച് സീനുകളിൽ മാത്രം വന്ന ലാറയുടെ സഹോദരി കഥാപാത്രമായ കിറ്റിയെ അവതരിപ്പിച്ച നടി പ്രത്യേക പരാമർശം ചോദിച്ച് വാങ്ങുന്നു. ആകെ മൊത്തം ഒഴിവ് വേളയിൽ കണ്ട് ആസ്വദിക്കാവുന്ന ഒരു നല്ല ചിത്രമാണ് ടു ഓൾ ദി ബോയ്സ് ഐ ഹാവ് ലവ്ഡ് ബിഫോർ.

Verdict : Very Good