669. The President's Barber (2004)

Director : Im Chan-Sang

Genre : Comedy

Rating : 6.9/10

Country : South Korea

Duration : 112 Minutes

🔸ഫോറസ്റ്റ് ഗമ്പ് എന്ന ചിത്രം കാണാത്ത സിനിമാ പ്രേമികൾ അധികം ഉണ്ടാവില്ല, ദി പ്രെസിഡെന്റ്സ് ബാർബർ എന്ന ചിത്രം കണ്ട് കൊണ്ടിരിക്കെ പല കാരണങ്ങൾ കൊണ്ടും ഓർമ്മ വന്നത് മുകളിൽ സൂചിപ്പിച്ച ടോം ഹാങ്ക്സ് ചിത്രമാണ്. രണ്ട് ചിത്രങ്ങളും ഒരു രാജ്യത്തിൻറെ ഗതി മാറ്റിയ അനവധി സംഭവങ്ങളും കാര്യങ്ങളും ഒരു ഫിക്ഷനൽ സാധാരണക്കാരന് കഥാപാത്രത്തിലൂടെ കാണിക്കുന്നു എന്നതാണ് ഏറ്റവും വലിയ കാരണം എന്ന് പറയാം. ഗമ്പിൽ പശ്ചാത്തലം അമേരിക്ക ആണെങ്കിൽ ഇവിടെ അത് കൊറിയ ആണ്, അതും രാജ്യത്തിൻറെ ഏറ്റവും ഇരുണ്ട കാലഘട്ടങ്ങളിൽ ഒന്നിലൂടെ.

🔸നെറ്റ്ഫ്ലിക്സിലെ ഏഷ്യൻ ചിത്രങ്ങളിലൂടെ ഒന്ന് കറങ്ങിയപ്പോഴാണ് പ്രെസിഡെന്റ്സ് ബാർബർ ആദ്യമായി കണ്ടത്, കൗതുകം ഉണർത്തുന്ന പേരിൽ ശ്രദ്ധ ഉടക്കി കാസ്റ്റിലേക്ക് നോക്കിയപ്പോഴാണ് കാങ് ഹോ സോങിനെ കണ്ടത്, മെമ്മോറിസ് ഓഫ് മർഡർ തൊട്ട് തന്നെ ഇഷ്ടമുള്ള നടന്മാരിൽ ഒരാളാണ് കാങ്. മിതത്വം തോന്നിക്കുന്ന രീതിയിലുള്ള പുള്ളിയുടെ അഭിനയവും സൂക്ഷമമായി ഭാവങ്ങളും എല്ലാം ഈ ചിത്രത്തിലും അതിന്റെ ടോപ് ഫോമിലുണ്ട്, ഇത് തന്നെയാണ് ഒരു പരിധി വരെ ചിത്രത്തിന്റെ ഹൈലൈറ്റും.

🔸നമ്മുടെ നായക കഥാപാത്രമായ സോങ് രാഷ്ട്രീയത്തിൽ യാതൊരു താല്പര്യവും ഇല്ലാത്തൊരു വ്യക്തിയാണ്, ഭാര്യയും കുഞ്ഞും അടങ്ങുന്ന കുടുംബമാണ് അയാളുടെ ലോകം, അതിനപ്പുറത്തുള്ള കാര്യങ്ങളിലേക്ക് അയാൾ ശ്രദ്ധ കൊടുക്കാറേ ഇല്ലായിരുന്നു. തന്റെ സുഹൃത്തുക്കൾ രാഷ്ട്രീയ ചർച്ചകൾ നടത്തുമ്പോഴും വാക്ക് പോരിലേക്ക് കടക്കുമ്പോഴും എല്ലാം ഇവയിൽ ഒരു താല്പര്യവും കാണിക്കാതെ സോങ് മാറി ഇരിക്കാരാണ് പതിവ്. ഇലക്ഷനിൽ ആർക്ക് വോട്ട് ചെയ്യണം എന്ന് പോലും പിടിയില്ലാത്ത സോങ് അവിടെയും ആശ്രയിക്കുന്നത് സ്വന്തം സുഹൃത്തുക്കളുടെ അഭിപ്രായങ്ങളെയാണ്.

🔸ഒരു ബാർബർ ആണ് സോങ്, അത്യാവശ്യം സ്റ്റൈൽ ആയും വെടിപ്പായും മുടി വെട്ടാനുള്ള കഴിവ് അയാൾക്കുണ്ട്, ഈ ഒരു കാരണം കൊണ്ട് തന്നെ മൂന്ന് പേർ അടങ്ങുന്ന കുടുംബത്തിന് വലിയ അല്ലൽ ഏതും ഇല്ലാതെ ജീവിച്ച് പോവാൻ കഴിഞ്ഞിട്ടുണ്ട് ഇതുവരെ. ഇങ്ങനെയൊക്കെ പോയി കൊണ്ടിരുന്ന കഥ ട്രാക്ക് ഒന്ന് മാറ്റി പിടിക്കുന്നത് സോങ് പ്രെസിഡന്റിന്റെ പേഴ്സണൽ ക്ഷുരകൻ ആയി മാറുമ്പോഴാണ്. പട്ടാളത്തിന്റെ ബലത്തിൽ അധികാരം പിടിച്ചെടുത്ത ജനറൽ പാർക്ക് ആണ് ഇന്ന് കൊറിയയിലെ പ്രസിഡന്റ്, അത്യാവശ്യം മുൻ കോപിയായ ഈ കഥാപാത്രത്തെയാണ് സോങ്ങിന് ഡീൽ ചെയ്യേണ്ടി വരുന്നത്.

🔸പതിയെ പതിയെ ഈ ഒരു രാഷ്ട്രീയ പശ്ചാത്തലം സോങിനെയും ബാധിച്ച് തുടങ്ങുകയാണ്, ഇത് കഥയെ ഏതെല്ലാം രീതിയിൽ ബാധിക്കും എന്നും ഈ കഥാപാത്രങ്ങളുടെ ഭാവി എന്താവും എന്നുമെല്ലാമുള്ള ചോദ്യങ്ങൾക്ക് ഉത്തരമാണ് രണ്ട് മണിക്കൂറിന് അടുത്ത് ദൈർഘ്യമുള്ള ചിത്രം. തുടക്കം ഒരല്പം പതിയെ ആണെങ്കിലും ട്രാക്കിൽ കയറിയ ശേഷം മികച്ച രീതിയിൽ മുന്നേറുന്ന ചിത്രം നല്ലൊരു ക്ലൈമാക്‌സും കരുതി വെച്ചിട്ടുണ്ട്, പ്രേക്ഷകർക്ക്. നല്ല കാസ്റ്റും പെർഫോമൻസുകളും, കഥയും എല്ലാം ചേർന്ന ചിത്രം കാണാൻ ശ്രമിക്കുക, നഷ്ടമാവില്ല.

Verdict : Good

DC Rating : 76/100

668. Mad Detective (2007)

Director : Johnnie To

Genre : Mystery

Rating : 7.2/10

Country : Hong Kong

Duration : 89 Minutes

🔸ഡിറ്റക്ടീവ് ബൻ ആളൊരു വല്ലാത്ത ജാതി മനുഷ്യനാണ്, തന്റെ കർമ്മ മണ്ഡലത്തിൽ ഇത്രയും കൃത്യതയും സൂക്ഷ്മതയും പാലിക്കുന്ന മറ്റൊരു അന്വേഷകൻ ഇന്ന് ഫോഴ്‌സിൽ ഉണ്ടായിരിക്കില്ല. ഏറ്റെടുത്ത കേസുകൾ എല്ലാത്തിലും നൂറ് ശതമാനം റിസൾട്ട് കരസ്ഥമാക്കിയ ആള് കൂടിയാണ് ബൻ, ഒരു കുറ്റവാളിക്ക് പോലും അയാളെ കബളിപ്പിച്ച് കടന്ന് കളയാൻ സാധിച്ചിട്ടില്ല, അയാളുടെ പ്രതാപ കാലത്ത്. എന്നാൽ ഇന്ന് കാര്യങ്ങൾ മാറി മറിഞ്ഞിരിക്കുകയാണ്, വർഷങ്ങൾ കുറച്ച് കഴിഞ്ഞിരിക്കുന്നു, ബൻ ജോലിയിൽ നിന്നും വിരമിച്ച് കുടുംബ ജീവിതത്തിലേക്ക് മടങ്ങി പോയിരിക്കുന്നു.

🔸ഇതുവരെ പറഞ്ഞത് ഒഫീഷ്യൽ റെക്കോർഡുകൾ പ്രകാരം ഉള്ള കാര്യങ്ങൾ, എന്നാൽ യാഥാർഥ്യം എന്നത് ഇതിൽ നിന്നും ചെറുതായി വ്യതിചലിച്ച ഒന്നാണ്, ബൻ സ്വമേധയാ വിരമിച്ചതല്ല മറിച്ച് ഫോഴ്സിൽ ഉള്ള ഉന്നതരുടെയും മറ്റും നിർബന്ധം കാരണം വിരമിക്കേണ്ടി വന്നതാണ്. ഇത്രയും മികച്ചൊരു ട്രാക്ക് റെക്കോർഡ് ഉള്ളൊരാൾ എന്തായാലും അകാരണമായി റിട്ടയര്മെന്റിലേക്ക് പോവേണ്ടി വരില്ലല്ലോ, തീർച്ചയായും ഒരു കാരണമുണ്ട്, ആ കാരണം പറയുന്നതിന് മുൻപ് അയാളുടെ മാനസിക നിലയെ പറ്റിയും മറ്റും ചെറുതായൊന്ന് പറഞ്ഞിടാം.

🔸ഭ്രാന്തമായ സ്വഭാവമാണ് ബന്നിന്റേത്‌, കുറ്റം തെളിയിക്കാൻ അയാൾ ഏതറ്റം വരെയും പോവും. ഒരു കത്തിക്കുത്ത് കേസ് തെളിയിക്കുന്നതിന് വേണ്ടി പന്നിയെ കൊന്ന സ്റ്റേഷന്റെ നടുക്ക് കെട്ടി തൂക്കുക, എന്നിട്ട് കത്തി കൊണ്ട് കുത്തി പഠിക്കുക, സ്റ്റെയർ കേസിൽ നിന്നും ബാഗിൽ കെട്ടി താഴേക്ക് എറിഞ്ഞ് കൊന്ന കേസിലെ വിക്ടിമിന്റെ അവസ്ഥ മനസിലാക്കാനായി സ്വയം ബാഗിൽ കേറി കിടന്ന് താഴേക്ക് വീഴുക തുടങ്ങിയ കലാ പരിപാടികൾ എല്ലാം അയാളുടെ വീരേതിഹാസങ്ങളിൽ ചിലത് മാത്രമാണ്. ഈ മനോഭാവത്തെയും രീതികളെയും ഭ്രാന്ത് എന്ന് സഹപ്രവർത്തകർ വിശേഷിപ്പിക്കാറുണ്ടെങ്കിലും ഇതിലെല്ലാം അയാൾ നേടിയ എൻഡ് റിസൾട്ട് ആർക്കും അവഗണിക്കാൻ കഴിയാത്ത ഒന്ന് തന്നെയാണ്.

🔸സ്വന്തം മേലുദ്യോഗസ്ഥന്റെ വിരമിക്കൽ ചടങ്ങിലാണ് പ്രശ്നങ്ങളുടെ തുടക്കം, സഹപ്രവർത്തകന്റെ വിടവാങ്ങൽ വേളയിൽ അയാൾക്ക് ബൻ സമ്മാനമായി നൽകുന്നത് സ്വന്തം ചെവി ആണ്, അതും എല്ലാവരുടെയും മുന്നിൽ വെച്ച് ലൈവ്‌ ആയി കത്തി കൊണ്ട് അറുത്ത് മുറിച്ചെടുത്ത്. ചോരയിൽ കുതിർന്ന് നിൽക്കുന്ന ചെവി കയ്യിൽ പിടിച്ച് അക്ഷരാർത്ഥത്തിൽ ഞെട്ടി പകച്ച് നിൽക്കുന്ന മേലുദ്യോഗസ്ഥന്റെ ആ ഞെട്ടൽ തന്നെയാണ് ക്രമേണ ബണ്ണിന്റെ വിരമിക്കലിൽ ചെന്ന് അവസാനിക്കുന്നത്. പിന്നെ പറയാൻ വിട്ടുപോയി, ബെന്നിന് കുറച്ച് കഴിവുകൾ ഉണ്ട്, അസാധാരണം എന്നൊക്കെ വിശേഷിപ്പിക്കാൻ കഴിയുന്ന ചിലത്.

🔸കുറച്ച് വർഷങ്ങൾക്ക് ശേഷമാണ് ചിത്രത്തിന്റെ കഥ ആരംഭിക്കുന്നത്, ഒരു സുപ്രധാനമായ കേസിൽ തുമ്പ് കിട്ടാതെ നിൽക്കുന്ന പഴയൊരു സഹപ്രവർത്തകൻ സഹായത്തിനായി ബെന്നിനെ സമീപിക്കുന്നതും തുടർന്നുള്ള സംഭവ വികാസങ്ങളുമാണ് ചിത്രത്തിന്റെ കഥ. കേസ് എന്നത് ഒരു തിരോധനമാണ്, കാണാതായത് ഒരു പോലീസുകാരനെയും, സംഭവം നടന്നിട്ട് ആണെങ്കിൽ ഒന്നര വർഷം കഴിഞ്ഞിരിക്കുന്നു. ബെന്നിനെ പോലെ പൊടിക്ക് ഭ്രാന്തുള്ളൊരു വ്യക്തി എങ്ങനെ ഇതുപോലൊരു കേസ് തെളിയിക്കും എന്നതാണ് ചിത്രത്തിന്റെ ഫോക്കൽ പോയിന്റ്, തീർച്ചയായും നല്ലൊരു ചിത്രമാണ് മാഡ് ഡിറ്റക്ടീവ്.

Verdict : Good

DC Rating : 75/100

667. A Beautiful Day In The Neighborhood (2019

Director : Marielle Heller

Genre : Drama

Rating : 7.9/10

Country : USA

Duration : 109 Minutes

🔸ഈ ബയോപിക് ചിത്രങ്ങളോട് പൊതുവെ ലവലേശം താല്പര്യമില്ല, കാരണം വേറൊന്നുമല്ല വെളുപ്പിക്കൽ അല്ലെങ്കിൽ വെള്ളപൂശൽ എന്ന കാലാ കാലങ്ങളായി നിലകൊണ്ട് പോരുന്ന കലാപരിപാടിക്ക് ഏറ്റവും അനുയോജ്യമായ മാധ്യമങ്ങളിൽ ഒന്നാണ് സിനിമ, അതിൽ തന്നെ ബയോപ്പിക്കുകളും, സിനിമയ്ക്ക് ലോകത്താകമാനം ഉള്ള പ്രചാരം ഇതിന്റെ മറ്റൊരു ഡ്രൈവിങ് ഫോഴ്‌സ് കൂടിയാണ്. സ്ട്രെയിറ്റ് ആയി പറയുക ആണെങ്കിൽ ബയോപ്പിക്കുകൾ ഇഷ്ട്ടമല്ല, കാണാറുമില്ല, പിന്നെ എ ബ്യുട്ടിഫുൾ ഡേ ഇൻ ദി നെയ്ബർഹുഡ് കാണാൻ ഉണ്ടായ ഒരേയൊരു കാരണം ടോം ഹാങ്ക്സ് മാത്രമാണ്. ആ ഫാക്ടർ തന്നെയാണ് ചിത്രത്തിന്റെ ശക്തിയും.

🔸ഒരു ടിപ്പിക്കൽ ബയോഗ്രഫിക്കൽ ചിത്രമല്ല ബ്യുട്ടിഫുൾ ഡേ ഇൻ ദി നെയ്ബർഹുഡ്, പ്രതീക്ഷയ്ക്ക് വിരുദ്ധമായി ഒരു സൈഡ് ക്യാരക്ടർ മാത്രമാണ് ടോം ഹാങ്ക്സ് അവതരിപ്പിക്കുന്ന ഫ്രെഡ് റോജേഴ്‌സ് എന്ന കഥാപാത്രം. ഒരു ടോക്ക് ഷോ ഹോസ്റ്റ് ആയിരുന്ന ഈ കഥാപാത്രത്തിൽ ഫോക്കസ് ചെയ്യാതെ മറ്റൊരു ഫിക്ഷനൽ കഥാപാത്രത്തിന്റെ ജീവിതവും പ്രശ്നങ്ങളും കാര്യങ്ങളും എല്ലാം റോജേഴ്സിന്റെ വ്യൂ പോയിന്റിലൂടെ അവതരിപ്പിക്കുകയാണ് ഈ ചിത്രം. സ്ഥിരം ക്ലിഷേ ശൈലിയിൽ നിന്നും തീർത്തും സ്വീകാര്യമായ ഒരു മാറ്റം തന്നെ എന്ന് പറയാം.

🔸ടോം ഹാങ്ക്സ് അവതരിപ്പിക്കുന്ന ഫ്രെഡ് റോജേഴ്‌സ് ഒരു റിയൽ ലൈഫ് കഥാപാത്രമാണ്, ഒരു ടോക് ഷോ ഹോസ്റ്റ് ആയിരുന്ന കഥാപാത്രത്തിന് അമേരിക്കയിൽ വലിയ പ്രചാരവും ഒട്ടനവധി ആരാധകരും ഉണ്ടായിരുന്നു, ഒരു കാലഘട്ടത്തിനെയും തലമുറയെയും വരെ സ്വാധീനിച്ച വ്യക്തി ആയിരുന്നു ഫ്രെഡ് റോജേഴ്‌സ് എന്ന് പൊതുവെ പറയപ്പെടുന്നുണ്ട്. ഈ ഫ്രെഡ് റോജേഴ്സിന്റെ ഒരു ടോക്ക് ഷോ എപിസോടോടെ ആണ് ചിത്രം ആരംഭിക്കുന്നത്, സരസനായ കഥാപാത്രമാണ് റോജേഴ്‌സ്, മയത്തോടെയാണ് അയാളുടെ പെരുമാറ്റം, അങ്ങേയറ്റം ലളിതമായ തോതിൽ അളന്ന് മുറിച്ചുള്ള വ്യക്തമായ സംഭാഷണങ്ങൾ, എല്ലാവർക്കും ഒരടുപ്പവും ഇഷ്ട്ടവും എല്ലാം ന്യായമായും തോന്നിപ്പോവും എന്നിടത്താണ് പുള്ളിയുടെ വിജയം.

🔸ഈ കഥാപാത്രത്തെ മാറ്റി നിർത്തിയാൽ മറ്റൊരു പ്രധാന കഥാപാത്രം മാത്യു റൈസ് അവതരിപ്പിക്കുന്ന ലോയ്ഡ് ആണ്, ഒരു എഴുത്തുകാരനാണ് ലോയ്ഡ്. ഭാര്യയും കുഞ്ഞും അടങ്ങുന്ന സന്തുഷ്ടമായ ചെറു കുടുംബമാണ് ലോയ്ഡിന്റെത്, എല്ലാവരുമായി ചേർന്ന് പോവുന്ന ലോയ്ഡിന് ഒരേയൊരു കുഴപ്പമേ പ്രഥമ ദൃഷ്ട്യാ ഉള്ളു, മുൻകോപം മാത്രം. പൊട്ടിത്തെറിക്കാൻ ഒരു കാരണം തേടി നടക്കുന്ന അഗ്നി പർവതം ആണ് ലോയ്ഡ്, അയാളുടെ മനസ്സിൽ പകയും ദേഷ്യവും എല്ലാം നിറഞ്ഞ് നിൽക്കുകയാണ്, മറ്റൊന്നിനോടുമല്ല സ്വന്തം അച്ഛനോട് തന്നെ.

🔸ലോയ്ഡിന്റെ ഭാഷയിൽ പറയുക ആണെങ്കിൽ അച്ഛൻ എന്ന നിലയിൽ ഒരു തികഞ്ഞ പരാജയം ആയിരുന്നു അയാൾക്ക് ജന്മം നൽകിയ വ്യക്തി, അയാളുടെ ചെറുപ്പ കാലത്ത് നേരിടേണ്ടി വന്ന ചില സംഭവങ്ങൾക്കും മറ്റും കാരണക്കാരനായ അയാളോട് ക്ഷമിക്കാൻ ലോയ്ഡിന് ഒരു കാലത്തും കഴിഞ്ഞിട്ടില്ല. ഇങ്ങനെ അറുത്ത് മാറ്റപ്പെട്ട ഒരു ബന്ധമാണ് അച്ഛനും മകനും ഇടയിൽ, ഇതിനിടയിലേക്ക് റോജേഴ്‌സ് എങ്ങിനെ വരുന്നു എന്നതും അയാൾ കഥയിൽ എങ്ങിനെ ഒരു ഫാക്ടർ ആയി മാറും എന്നതും എല്ലാമാണ് ഈ ചിത്രം. ഒരു നല്ല ഫീൽ ഗുഡ് ചിത്രമാണ് ബ്യുട്ടിഫുൾ ഡേ ഇൻ ദി നെയ്ബർഹുഡ്. നല്ല പ്രകടനങ്ങൾ, നല്ല കഥ എന്നിവയെല്ലാം മറ്റ് പ്രത്യേകതകളാണ്, കാണാൻ ശ്രമിക്കുക.

Verdict : Very Good

DC Rating : 80/100

666. Jojo Rabbit (2019)

Director : Taika Waititi

Genre : Comedy

Rating : 8.1/10

Country : USA

Duration : 108 Minutes

🔸ഈ വർഷം പുറത്തിറങ്ങാൻ ഇരുന്ന ചിത്രങ്ങളിൽ ഏറ്റവും പ്രതീക്ഷ അർപ്പിച്ച ചിത്രങ്ങളിൽ ഒന്നായിരുന്നു ജോജോ റാബിറ്റ്, ഇതിന് പ്രധാനമായും മൂന്ന് കാരണങ്ങൾ ആയിരുന്നു ഉണ്ടായിരുന്നത്. ഒന്നാമത്തെ കാരണം ചിത്രത്തിന്റെ അന്യായ കാസ്റ്റും ഹോളോകോസ്റ്റ് ബാക്ക്ഗ്രൗണ്ടും ആയിരുന്നെങ്കിൽ മറ്റൊരു കാരണം ടായ്ക വൈറ്റിറ്റി എന്ന സംവിധായകൻ തന്നെ ആയിരുന്നു. അധികം ചിത്രങ്ങൾ സംവിധാനം ചെയ്തിട്ടില്ലെങ്കിലും ടായ്കയുടെ വേർഡ് ബിസ്‌സാർ സ്റ്റൈൽ ചിത്രങ്ങളോട് ഒരടുപ്പം എപ്പോഴും തോന്നിയിട്ടുണ്ട്, ഇനി ഒരു നാസി പശ്ചാത്തലം കൂടി ആയാലോ, പറയുകയേ വേണ്ട.

🔸അവസാനം സൂചിപ്പിച്ച നാസി പശ്ചാത്തലം തന്നെയാണ് ചിത്രം കാത്തിരിക്കാൻ ഉണ്ടായ മൂന്നാമത്തെ കാരണം, ഒരു ചെറിയ കുട്ടിയും അവന്റെ സുഹൃത്തായ അഡോൾഫ് ഹിറ്റ്ലറും ആണ് ചിത്രത്തിന്റെ ബാക്ക്ബോൺ. പറഞ്ഞ് കേൾക്കുമ്പോൾ തന്നെ നെറ്റി ചുളിയുന്ന ഈ ഒരു കൺസപ്റ്റ് ആണ് സത്യത്തിൽ ഈ ചിത്രത്തിൽ ഇത്രയും താല്പര്യം ഉണ്ടാവാൻ ഉണ്ടായ കാരണം. ജോജോ എന്ന പത്ത് വയസുകാരനാണ് നമ്മുടെ കേന്ദ്ര കഥാപാത്രം, ഈ ചെറു പ്രായത്തിൽ തന്നെ ആളൊരു തികഞ്ഞ നാസി വിശ്വാസി ആണ്, വിശ്വാസി എന്നതിനേക്കാൾ അടിമ എന്നൊക്കെ പറയാം ജോജോയെ.

🔸നാസി ഭരണാധികാരികൾ പറഞ്ഞ് പഠിപ്പിച്ച ചരിത്രമാണ് അവന്റെ വേദ വാക്യം, ഇനി അത് ഹിറ്റ്‌ലർ പിടിച്ച മുയലിന് നാല് കൊമ്പ് ഉണ്ട് എന്നാണെങ്കിൽ അതും അവൻ വിശ്വസിക്കും, വേണമെങ്കിൽ നാട് നീളെ നടന്ന് വിളംബരം ചെയ്യുകയും ചെയ്യും, ഇതാണ് പയ്യന്റെ ഒരു ആറ്റിറ്റിയൂഡ്. ലോകത്തിലെ ഏറ്റവും സ്രേഷ്ട വിഭാഗമായ ആര്യൻ വംശത്തിന്റെ താവഴിയാണ് തന്റേത് എന്നാണ് അവൻ വിശ്വസിക്കുന്നത്, ഒരുവേള അതിൽ അഭിരമിക്കുന്നുമുണ്ട്. നാസികൾ പറഞ്ഞ് പഠിപ്പിച്ച നുണകളുടെയും മറ്റും ഒരു സഞ്ചരിക്കുന്ന ലൈബ്രറി ആണ് ജോജോ എന്ന് വേണമെങ്കിൽ പറയാം.

🔸ജോജോയുടെ ഏറ്റവും അടുത്ത കൂട്ടുകാരൻ ആണ് അഡോൾഫ് ഹിറ്റ്ലർ, അയാളെ അവന് മാത്രമേ കാണാനും കേൾക്കാനും കഴിയത്തുള്ളൂ, ഉപബോധമനസിന്റെ സൃഷ്ടി എന്നൊക്കെ പറഞ്ഞ് വിടാം എങ്കിലും അഡോൾഫ് ജോജോയിൽ ഉണ്ടാക്കിയ സ്വാധീനം വളരെ വളരെ വലുതാണ്. ജോജോയ്ക്ക് ബന്ധു എന്ന് പറയാൻ ഭൂമുഖത്ത് ഇന്ന് അവശേഷിക്കുന്നത് അമ്മ റോസി മാത്രമാണ്, അച്ഛൻ മുൻപെങ്ങോ രണ്ടാം ലോകമഹായുദ്ധത്തിൽ പങ്കെടുക്കാൻ പോയതാണ്, പിന്നെ വിവരമൊന്നും ഉണ്ടായില്ല. ജർമനിയുടെ ഇന്നത്തെ അവസ്ഥയ്ക്ക് കാരണം ജൂതന്മാർ ആണെന്ന് ജോജോ ഉറച്ച് വിശ്വസിക്കുന്നുണ്ട്.

🔸മനുഷ്യനെക്കാളും മൃഗങ്ങളെക്കാളും താഴെ അറപ്പോടും വെറുപ്പോടെയും ആണ് ജോജോ ജ്യുതന്മാരെ കാണുന്നത്, ജ്യുതന്മാരെ ഒന്നടങ്കം ഇല്ലാതാക്കണം എന്നും അതുവഴി ജർമനിയുടെ ആര്യൻ വംശീയത ഉയർത്തിപിടിക്കണം എന്നുമുള്ള ഹിറ്റ്ലറുടെ ജല്പനങ്ങളാണ് അവന്റെ വേദവാക്യം. ഈ രണ്ട് മൂന്ന് കഥാപാത്രങ്ങൾ, സാം റോക്ക്‌വലിന്റെ ക്യാപ്റ്റൻ കെ എന്നിവരാണ് ചിത്രത്തിന്റെ ബാക്ക്ബോൺ, പിന്നൊരു സർപ്രൈസ് കഥാപാത്രം കൂടിയുണ്ട്, അത് പ്ലോട്ടിൽ വലിയ പ്രാധാന്യം ഉള്ളതിനാൽ സ്പോയിൽ ചെയ്യുന്നില്ല. നല്ലൊരു കിടിലൻ പടമാണ് ജോജോ റാബിറ്റ്, അവസാന മുപ്പത് നാല്പത് മിനുട്ടുകൾ ഒരു കംപ്ലീറ്റ് ഇമോഷണൽ ജേർണി തന്നെയാണ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

665. The Clue (1985)

Director : Jonathan Lynn

Genre : Mystery

Rating : 7.3/10

Country : USA

Duration : 96 Minutes

🔸അതിമനോഹരമായ ഒരു കൊലപാതകം പോലെ ഒരു കഥയെ ഡ്രൈവ് ചെയ്ത് കൊണ്ടുപോവാൻ സാധിക്കുന്ന അധികം വസ്തുതകൾ ഇല്ല എന്ന് ഏതോ ഒരു സംവിധായകൻ എവിടെയോ പറഞ്ഞിട്ടുള്ളത് ഒരിക്കൽ വായിച്ചിട്ടുണ്ട്. ഇത് ഒരു പരിധി വരെ സത്യമാണ് എന്ന് തോന്നിയിട്ടുമുണ്ട്, ഈ ഒരു കാരണം കൊണ്ട് തന്നെയാണ് മർഡർ മിസ്റ്ററി ചിത്രങ്ങൾ വ്യക്തിപരമായി ഏറ്റവും ഇഷ്ട്ടപ്പെട്ട സബ് ജോണറുകളിൽ ഒന്നായി മാറിയതും. എൺപതുകളിൽ പുറത്തിറങ്ങിയ ദി ക്ലൂ എന്ന ചിത്രവും ഈ വിഭാഗത്തിൽ ഉൾപ്പെടുത്താവുന്ന നല്ല ഒന്നാന്തരം ഒരു മർഡർ മിസ്റ്ററി ആണ്.

🔸ഒരു കൊട്ടാര സമാനമായ വീട്ടിലാണ് നമ്മുടെ കഥ അരങ്ങേറുന്നത്. അഗത ക്രിസ്റ്റിയുടെ മർഡർ ഓൺ ദി ഓറിയൻട് എക്സ്പ്രസ്, ആൻഡ് ദെൻ ദെയ്ർ വേർ നൺ എന്നീ നോവലുകളുടെ ചലച്ചിത്രാവിഷ്കാരങ്ങളുമായി ചെറിയ സാമ്യതകൾ പുലർത്തുന്നുണ്ട് ഈ ചിത്രം, പ്രത്യേകിച്ചും ടോണിലും മറ്റും. വാഷിംഗ്ടൺ ഡീസിയിലെ താമസക്കാരായ ആറുപേർ ഒരുനാൾ ഒരു ബംഗ്ലാവിലെ വിരുന്നിലേക്ക് ക്ഷണിക്കപ്പെടുകയാണ്. തങ്ങളുടെ ആതിഥേയൻ ആരെന്ന് പിടിയില്ലെങ്കിലും കഥാപാത്രങ്ങൾ അവിടേക്ക് യാത്ര തിരിക്കുകയാണ്.

🔸ഈ ആറ് കഥാപാത്രങ്ങൾക്കും തമ്മിൽ പരിചയം ഏതുമില്ല, പ്രത്യക്ഷത്തിൽ ഇവരെയെല്ലാം കൂട്ടിയിണക്കുന്ന വസ്തുതകളും കാണാനില്ല, എല്ലാത്തിലും പ്രധാനമായി വിരുന്ന് നടത്തുന്ന വ്യക്തിയുടെ പേര് കേട്ടിട്ട് പോലും ഇവർക്ക് ഒരു പരിചയവും തോന്നുന്നില്ല. ഇങ്ങനെ ഒരു വ്യക്തിയെ തങ്ങൾ ആരും തന്നെ ഇതിന് മുൻപ് കണ്ടിട്ടുള്ളതോ പരിചയപ്പെട്ടിട്ട് ഉള്ളതോ ആയി ആർക്കും അറിവില്ല. അതൊക്കെ എന്ത് തന്നെ ആയാലും വിരുന്ന് പരിപാടികൾ പൊടി പൊടിക്കുകയാണ്, ഭക്ഷണവും ആഘോഷങ്ങളും എല്ലാം കെങ്കേമം തന്നെ.

🔸ഈ ആറ് കഥാപാത്രങ്ങളും പരസ്പരം പരിചയപ്പെടാനും മറ്റും ചില്ലറ ശ്രമങ്ങൾ നടത്തിയെങ്കിലും അവയൊന്നും അത്ര ഫലവത്ത് ആവുന്നില്ല, ഇവ മിക്കതും ചെന്ന് അവസാനിക്കുന്നത് തമ്മിലുള്ള ചളി വാരിയെറിയലുകളിലേക്കാണ്. അങ്ങനെ ഒരുപാട് അനിശ്ചിതത്വം നിറഞ്ഞ് നിൽക്കുന്ന ഈ ഒരു ചുറ്റുപാടിലേക്ക് ഏഴാമത് ഒരു വ്യക്തി കടന്ന് വരികയാണ്, മറ്റാരും അല്ല നമ്മുടെ ആതിഥേയൻ തന്നെ. ഇയാളാര്, എന്താണ് ടിയാന്റെ ഉദ്ദേശം, ഈ ആറ് കഥാപാത്രങ്ങളെയും അയാളെയും കൂട്ടിയിണക്കുന്ന ഘടകം എന്ത്, തുടങ്ങി ഒരുപാട് ഒരുപാട് ചോദ്യങ്ങൾക്കുള്ള ഉത്തരമാണ് ഈ ഒന്നര മണിക്കൂർ ദൈർഘ്യമുള്ള ചിത്രം.

🔸ആദ്യമേ സൂചിപ്പിച്ചത് പോലെ തന്നെ ഒരു മർഡർ മിസ്റ്ററി ആണ് ചിത്രം, കൊല്ലപ്പെടുന്നത് ആര് എങ്ങിനെ എന്നതൊക്കെ മനഃപൂർവം തന്നെ ഒഴിവാക്കിയതാണ്, അതങ്ങനെ നിൽക്കട്ടെ. വളരെ ദൈർഘ്യം കുറഞ്ഞൊരു ചിത്രമാണ് ക്ലൂ, ഈ ഒരു കാര്യം കൊണ്ട് തന്നെ രണ്ടാം പകുതി മിന്നൽ വേഗത്തിലാണ് പുരോഗമിക്കുന്നത്, ട്വിസ്റ്റുകളും ടെർണുകളും എല്ലാം മിനുട്ടിന് മിനുട്ടിന് വന്ന് കൊണ്ടിരിക്കും. ഒരു ടിപ്പിക്കൽ മിസ്റ്ററി ചിത്രത്തിൽ നിന്നും വിഭിന്നമായി മൂന്ന് ക്ലൈമാക്സ് ഉണ്ട് ചിത്രത്തിന്, നമ്മുടെ ലോജിക്കിന് അനുസരിച്ചുള്ളത് തിരഞ്ഞെടുക്കാം. മിസ്റ്ററി ചിത്രങ്ങൾ ഇഷ്ടപ്പെടുന്നവർക്ക് ധൈര്യമായി കാണാം.

Verdict : Good

DC Rating : 75/100

664. Monos (2019)

Director : Alejandro Landes

Genre : War

Rating : 7.4/10

Country : Colombia

Duration : 105 Minutes

🔸മോണോസ് എന്ന ചിത്രം കണ്ട് കൊണ്ടിരിക്കുമ്പോൾ ആദ്യം സ്‌ട്രൈക്കിങ് ആയി തോന്നുക ചിത്രത്തിന്റെ സിനിമാട്ടോഗ്രാഫിയാണ്. ആദ്യ സീനിലെ മല മുകളിലെ ദൃശ്യങ്ങളിൽ നിന്നും തുടങ്ങുന്ന ചിത്രം ഇതുപോലുള്ള മനോഹരമായ സീനുകളാൽ സമ്പന്നമാണ്, ആദ്യ പാതിയിലെ തന്നെ കഥാപാത്രങ്ങളിൽ ഒരാൾ കുതിരപ്പുറത്ത് മല ഇറങ്ങുന്ന രംഗവും അതിന്റെ ബാക്ക് ഗ്രൗണ്ടിലെ മേഘങ്ങളുടെ മേമ്പൊടിയും എല്ലാം നൂറ് ശതമാനം ബ്രെത് ടെയ്ക്കിങ് എന്ന് വിശേഷിപ്പിക്കാവുന്നതാണ്. പിടിച്ചിരുത്തുന്ന തോതിലുള്ള ഈ ദൃശ്യഭംഗി മോണോസ് എന്ന ചിത്രം ഇഷ്ടപ്പെടാൻ ഉള്ള അനവധി കാരണങ്ങളിൽ ഒന്ന് മാത്രമാവുന്നു.

🔸ഒരു യുദ്ധ പശ്ചാത്തലത്തിലേക്കാണ് സംവിധായകൻ കാഴ്ചക്കാരെ കൊണ്ടുപോവുന്നത്, മുൻപ് ഇവാൻസ് ചൈൽഡ്ഹുഡ് എന്ന ചിത്രത്തിലേത് പോലെ തന്നെ യുദ്ധം യൗവനം അല്ലെങ്കിൽ ബാല്യം കടന്നിട്ടില്ലാത്ത കഥാപാത്രങ്ങളുടെ കണ്ണിലൂടെ കാണിക്കുകയാണ് ഇവിടെയും. ഭയം, അനിശ്ചിതത്വം എന്നിവയെല്ലാം നമ്മുടെ കഥാപാത്രങ്ങളിൽ കാണാം. ടീനേജ് വിട്ടിട്ടില്ലാത്ത ഈ കഥാപാത്രങ്ങളെയാണ് മോണോസ് എന്ന ഓമനപ്പേരിൽ അഭിസംബോധന ചെയ്തിരിക്കുന്നത്, ചിത്രത്തിൽ. ഇവർ ഒരു ആറേഴ് പേരുണ്ട് കഥാപാത്രങ്ങളായി.

🔸ഒരു മലമുകളിൽ ആണ് ചിത്രം ആരംഭിക്കുന്നത്, മോണോസ് എന്ന് മുകളിൽ സൂചിപ്പിച്ച കഥാപാത്രങ്ങളെല്ലാം കണ്ണ് കെട്ടി ഫുട്ബോൾ കളിക്കുകയാണ് ഈ രംഗത്ത്. ആദ്യം സൂചിപ്പിച്ച മനോഹാരിത ഇവിടെ മികവോടെ കാണാം, അത് അവിടെ നിൽക്കട്ടെ, ആഹ്ലാദാരവങ്ങളോടെ അരങ്ങേറിയ കളി ഒരു കഥാപാത്രത്തിന്റെ അവിടേക്കുള്ള കടന്ന് വരവോടെ നിൽക്കുകയാണ്. ഉയരം കുറഞ്ഞ, വികാര പ്രകടനങ്ങൾ ഒന്നും നടത്താത്ത ഈ കഥാപാത്രത്തെ മെസ്സഞ്ചർ എന്നാണ് കഥാപാത്രങ്ങൾ അഭിസംബോധന ചെയ്യുന്നത്, ഏതോ കാര്യപ്പെട്ട ആളാണെന്ന് വ്യക്തം.

🔸ഓർഗനൈസേഷൻ എന്ന് മാത്രം പറയപ്പെടുന്ന ഒരു സംഘടനയ്ക്ക് കീഴിലുള്ള പ്രവർത്തകരാണ് ഈ മോണോസ് എന്നറിയപ്പെടുന്നവരെല്ലാം, ഇവരുടെയെല്ലാം ചുമതല മെസ്സഞ്ചർ എന്ന കഥാപാത്രത്തിനാണ്. ഒരു ഗറില്ലാ വിപ്ലവ സംഘടന എന്ന സൂചന നൽകുന്ന ഓർഗനൈസേഷൻ പരിശീലനത്തിനായി ആണ് കഥാപാത്രങ്ങളെ എല്ലാം മലമുകളിലേക്ക് അയച്ചിരിക്കുന്നത്. മെസ്സെഞ്ചറുടെ ഈ വരവിന് പിന്നിൽ മൂന്ന് കാര്യങ്ങൾ ഉണ്ട്, ഇതിൽ ആദ്യത്തേത് കഥാപാത്രങ്ങളുടെ പരിശീലനങ്ങളും പുരോഗതിയും എല്ലാം എങ്ങിനെ പോവുന്നു എന്ന് സ്വയം കണ്ട് ബോധ്യപ്പെടുക എന്നതായിരുന്നു.

🔸മോനോസിന്റെ കൂടെ ഒരു യുവതി കൂടി ഉണ്ട്, ബന്ധിയായി പിടിച്ചിരിക്കുന്നവൾ എന്നൊക്കെ പറയാം. ഇവരാര്, എന്താണ് കാര്യം എന്നതൊന്നും വ്യക്തമല്ല, ഇവർക്കുള്ള പ്രാധാന്യം ഒന്ന്കൂടി പോരാളികൾക്ക് ബോധ്യപ്പെടുത്തി കൊടുക്കാനുള്ള ശ്രമവും മെസ്സഞ്ചർ ചെയ്യുന്നുണ്ട്. ഇതിന് പുറമെ മറ്റൊരു ആവശ്യം കൂടി അയാൾ അവരെ അറിയിക്കുന്നുണ്ട്, അതെന്ത് എന്ന് സിനിമ കണ്ട് തന്നെ അറിയുന്നതാവും നല്ലത്. ഒരു ഡെഫിനിറ്റിവ് ആയ രീതിയിൽ പോവാതെ നരേറ്റിവിന് പ്രാധാന്യം നൽകിയാണ് ചിത്രം പുരോഗമിക്കുന്നത്, അത് കൊണ്ട് തന്നെ എത്ര പേർക്ക് ചിത്രം ഇഷ്ടപ്പെടാൻ ആവുമെന്ന് പറയാൻ കഴിഞ്ഞേക്കില്ല. നല്ലൊരു ചിത്രമാണ് തീർച്ചയായും, ഇഷ്ടപ്പെടുമോ ഇല്ലയോ എന്നതൊക്കെ മാറി മറിഞ്ഞിരിക്കും.

Verdict : Very Good

DC Rating : 82/100

663. The Two Popes (2019)

Director : Fernando Meirelles

Genre : Drama

Rating : 7.7/10

Country : UK

Duration : 125 Minutes

🔸വർഷം 2005, റോമിലെ പോപ്പായ ജോൺ പോൾ രണ്ടാമൻ മരണപ്പെട്ടിരിക്കുകയാണ്, തന്റെ കാലഘട്ടത്തിൽ എല്ലാവരോടും തുല്യമായ രീതിയിലും പിന്നോക്കം നിക്കുന്നവരുടെ ഉന്നമനത്തിന് വേണ്ടിയും എല്ലാം അഹോരാത്രം പ്രയത്നിച്ച പഴയ പോപ്പിനായി ലോകത്താകമാനം അനവധി ആദര സൂചക പരിപാടികളാണ് അരങ്ങേറിയത്. ഇതെല്ലാം കെട്ടടങ്ങി അന്തരീക്ഷം ഒന്ന് ശാന്തമായപ്പോഴാണ് ആ മില്യൺ ഡോളർ ചോദ്യം ഉയർന്ന് കേട്ടത്, അടുത്തത് ആര് എന്ന ചോദ്യം. പോപ്പ് ആയി ഇരിക്കുക എന്നത് വലിയൊരു ഉത്തരവാദിത്തമാണ്, അതിലും കഠിനമായ ചടങ്ങാണ് ആ ശ്രമകരമായ ദൗത്യം എല്ലാവരെയും തൃപ്തിപ്പെടുത്തി ചെയ്യുക എന്നത്.

🔸ആന്തണി ഹോപ്കിൻസ് അവതരിപ്പിക്കുന്ന ജോസഫ് റാറ്റ്സിൻഗർ എന്ന ജര്മനിക്കാരനായ കർദിനാളിനാണ് ഏവരും അടുത്ത പോപ്പ് ആയി സാധ്യത നൽകിയിരിക്കുന്നത്. തികഞ്ഞ കൺസർവേറ്റിവ് മനോഭാവക്കാരൻ എന്ന് എല്ലാവരും വിശേഷിപ്പിക്കുന്ന റാറ്റ്സിൻഗർ പോപ്പ് ആയി തിരഞ്ഞെടുക്കപ്പെടരുത് എന്ന് വലിയൊരു ശതമാനം ആളുകൾ ആഗ്രഹിക്കുന്നുണ്ട് എങ്കിലും അയാൾക്കുള്ള പിന്തുണ അതി ശക്തമാണ്, ആ ശബ്ദം കേട്ടില്ല എന്ന് നടിക്കാനാവില്ല എന്നതാണ് സത്യം. ഏറെക്കുറെ എല്ലാവരും റാറ്റ്സിൻഗർ പോപ്പ് ആവും എന്ന കാര്യം ഉറപ്പിച്ച നിലയിലാണ് കാര്യങ്ങൾ.

🔸റാറ്റ്സിൻഗർ ആളൊരു കൂർമ്മ ബുദ്ധിക്കാരൻ ആണ്, സ്ഥാനം ലഭിക്കാൻ ഏറ്റവും സാധ്യത കല്പിക്കപ്പെടുന്നത് തനിക്കാണ് എന്ന് അയാൾക്ക് വ്യക്തമായി അറിയാം, ഇനി അത് നഷ്ടപ്പെടാതെ നോക്കേണ്ടതാണ് തന്റെ ദൗത്യം എന്നും. തനിക്ക് എതിരായി വലിയ ശബ്ദം ഒന്നും ഉയരാൻ സാധ്യത ഇല്ല എന്ന തിരിച്ചറിവിലും അമിത ആഹ്ലാദമോ വികാര പ്രകടനങ്ങളോ ഒന്നും അയാളിൽ നിന്നും വരുന്നില്ല, ഒരു അവസാന നിമിഷ ട്വിസ്റ്റിനുള്ള സാദ്ധ്യതകൾ തള്ളിക്കളയുന്നില്ല എന്നിടത്ത് അയാളുടെ കൗശലവും, മുൻകരുതലും, ജാഗ്രതാ മനോഭാവവും എല്ലാം വ്യക്തം.

🔸മുകളിൽ സൂചിപ്പിച്ച ഈ ട്വിസ്റ്റിന്റെ രൂപത്തിലാണ് ജോനാഥൻ പ്രൈസിന്റെ കർദിനാൾ ജോർജേ ബെർഗോഗ്ലിയോ അവിടേക്ക് കടന്ന് വരുന്നത്. അർജന്റീനയിലെ ബ്യുണസ് അയേഴ്സിൽ വികാരിയാണ് ജോർജേ, തികഞ്ഞ ജന സമ്മതൻ, ആളുകളോട് സ്നേഹത്തോടെയും ദയാവായ്‌പോടെയും പെരുമാറി അവരിൽ ഒരാളെ പോലെ പെരുമാറുന്നതിൽ പ്രശസ്തി നേടിയ വ്യക്തി. ജോർജിയുടെ ഖ്യാതി ഇങ് വത്തിക്കാൻ വരെ എത്തി നിൽക്കുകയാണ്, റാറ്റ്‌സിംഗര്ക്ക് ഒരു എതിരാളിയാവാൻ ആർക്കെങ്കിലും കഴിയുമെങ്കിൽ ഇന്നത്തെ നിലയ്ക്ക് അത് കർദിനാൾ ജോർജിയ്ക്ക് മാത്രമാണ്.

🔸ഈ മുകളിൽ സൂചിപ്പിച്ചത് ബെയ്‌സ് മാത്രമാണ്, ഇത് കാരണം ഒരു പൊളിറ്റിക്കൽ ത്രില്ലറോ അല്ലെങ്കിൽ അത് പോലുള്ള കഥയോ ഒന്നും പ്രതീക്ഷിക്കരുത്. ഈ മുകളിൽ സൂചിപ്പിച്ച രണ്ട് കഥാപാത്രങ്ങൾക്കിടയിലും ഉടലെടുക്കുന്ന സൗഹൃദമാണ് ഈ ചിത്രത്തിന്റെ വിഷയം, അത് നല്ല ഉഗ്രൻ രീതിയിൽ തന്നെ ചിത്രത്തിൽ അവതരിപ്പിച്ചിട്ടുമുണ്ട്. ഇഷ്ട്ട നടനായ ഹോപ്കിന്സിന്റെ മികച്ചൊരു പ്രകടനം എന്നതിനോടൊപ്പം ജോനാഥൻ പ്രൈസിന്റെയും കയ്യടക്കം വിളിച്ചോതുന്ന കഥാപാത്രം, ഇവ രണ്ടുമാണ് ചിത്രത്തിന്റെ പില്ലറുകൾ. ഈ വർഷത്തെ മികച്ച ചിത്രങ്ങളുടെ കൂട്ടത്തിലേക്ക് ഒരു ലേറ്റ് എൻട്രി, അതാണ് ദി ടു പോപ്സ്.

Verdict : Very Good

DC Rating : 85/100

662. The Lighthouse (2019)

Director : Robert Eggers

Genre : Drama

Rating : 8.3/10

Country : USA

Duration : 110 Minutes

🔸ഈ ഏകാന്തത എന്നത് വല്ലാത്തൊരു കാര്യം തന്നെയാണ്, ചിലർ സ്വമേധയാ ആ പാത തിരഞ്ഞെടുത്തത് തന്നിലേക്കും തന്റെ ലോകത്തിലേക്കും മാത്രമായി ഒതുങ്ങുമ്പോൾ മറ്റ് ചിലർ തങ്ങളുടേത് അല്ലാത്ത കാരണങ്ങളാണ് ഇതനുഭവിക്കേണ്ടി വന്നവരാണ്. ആദ്യ വിഭാഗക്കാർക്ക് ഏകാന്തതയും മറ്റും ഒരു വിഷയമായി തോന്നാൻ സാധ്യത ഇല്ലെങ്കിൽ രണ്ടാമത്തെ വിഭാഗത്തിന്റെ കാര്യം കുറച്ച് കൂടി പ്രയാസമാണ്. ഒറ്റപ്പെടലിന്റെ യാഥാർഥ്യവും ഡിപ്രഷൻ എന്ന വസ്തുതയും എല്ലാം അവർ പ്രതീക്ഷിക്കുന്നതിലും വലുതായിരിക്കും, തുടക്കത്തിൽ തള്ളി കളയും, പിന്നെ പ്രതിരോധിക്കും, പിന്നെ അംഗീകരിക്കും, ഒടുവിൽ കീഴടങ്ങും, ഇവിടെ പൂർണം.

🔸രണ്ട് പ്രധാന കഥാപാത്രങ്ങൾക്കിടയിലുള്ള സംഭാഷണങ്ങളിൽ ഒരു കഥ പരാമർശിക്കപ്പെടുന്നുണ്ട്, കഥ എന്ന് പറയാനാവില്ല മറിച്ച് അവിടെ അരങ്ങേറിയൊരു സംഭവം തന്നെ. കൂട്ടത്തിലെ മുതിർന്ന ജോലിക്കാരനായ തോമസിന്റെ പഴയ കീഴ്‍ജോലിക്കാരന്റെ കഥ, ഇയാൾ മരണപ്പെട്ട ഒഴിവിലാണ് എഫ്രേയിൻ അവിടെ ജോലിക്ക് വന്നത്. പഴയ ജോലിക്കാരൻ എങ്ങിനെ മരിച്ചു എന്ന ചോദ്യത്തിന് മറുപടി എന്നോണമാണ് ആ കഥ തോമസ് പറഞ്ഞ് തുടങ്ങുന്നത്. അവന് ഭ്രാന്തായിരുന്നു,.ഒറ്റപ്പെടലും വിഷാദവും താങ്ങാൻ കഴിയാതെ വന്ന ഭ്രാന്ത്.

🔸നാലാഴ്ചത്തെ കോണ്ട്രാക്റ്റ് അടിസ്ഥാനത്തിൽ ആണ് റോബർട് പാറ്റിൻസൺ അവതരിപ്പിക്കുന്ന എഫ്രേയിൻ എന്ന കഥാപാത്രം ഒറ്റപ്പെട്ട് കിടക്കുന്ന ആ ദ്വീപിലേക്ക് എത്തുന്നത്, നരകം എന്നൊക്കെ പറഞ്ഞ് കേട്ടിട്ടുള്ളവർക്ക് അതതിന്റെ പൂർണതയിൽ എല്ലാവിധ സന്നാഹങ്ങളോടെയും അനുഭവിക്കാൻ പറ്റിയൊരിടമാണ് അവിടം. വൃത്തിഹീനമായ വെള്ളം തൊട്ട് വട്ടമിട്ട് പറക്കുന്ന കഴുകന്മാർ വരെ മനം മടുപ്പിക്കുന്ന അനവധി കാഴ്ചകളാണ് അവിടം മുഴുവൻ. എല്ലാത്തിനുമുപരി ഒരു കോലച്ചിരിയുടെ പ്രതീതിയാണ് കരയിലേക്ക് വരുന്ന തിരമാലകൾക്ക് പോലും.

🔸ഈ ദ്വീപിൽ കുറച്ച് നാളുകളായി ജോലി നോക്കുന്ന ആളാണ് വില്ലം ഡാഫോയുടെ തോമസ് എന്ന കഥാപാത്രം. അയാളുടെ കീഴിൽ ജോലിക്ക് വരുന്ന മൂന്നാമത്തെ വ്യക്തിയാണ് എഫ്രേയിൻ, ആദ്യത്തെ ആളുടെ ഭാവി എന്തായെന്ന് ചിത്രം പറഞ്ഞ് കണ്ടില്ല, സിനിമ അവസാനിക്കുമ്പോൾ അറിയാൻ ഒരു കൗതുകം ഉണ്ടായിരുന്നു. എന്തായിരുന്നാലും കഥയിലേക്ക് വരികയാണെങ്കിൽ ഒരു നട്ട് ലേശം ലൂസ് ഉള്ള പ്രതീതിയാണ് തോമസിന്, പരുക്കനാണ്, അത് പോലെ തന്നെ മുന്കോപക്കാരനും. എഫ്രേയിമിന്റെ രീതികളോട് യോജിച്ച് പോവാൻ അയാൾ ഒട്ടും തയാറാവുന്നില്ല.

🔸മറ്റ് കാര്യങ്ങളിലേക്ക് കടക്കുക ആണെങ്കിൽ അല്പം ഡിസ്റ്റർബിങ് ആയൊരു സ്റ്റോറിയെ അത് അർഹിക്കുന്ന രീതിയിൽ തന്നെയാണ് ചിത്രത്തിൽ അവതരിപ്പിച്ചിരിക്കുന്നത്. സിനിമാട്ടോഗ്രഫി, ബാക്ക് ഗ്രൗണ്ട് തൊട്ട് ബീമിന്റെ ശബ്ദം വരെ കണ്ട് കഴിഞ്ഞാലും ഇങ്ങനെ നിൽക്കും, പ്രത്യേകിച്ചും ആ അടക്കി പിടിച്ച മൂളൽ പോലുള്ള ശബ്ദം. രണ്ട് പ്രധാന താരങ്ങളെ ചിത്രത്തിലുള്ളൂ, ഇവരുടെ പ്രകടനങ്ങൾ ഒക്കെ വാക്കുകളിൽ വിശേഷിപ്പിക്കാൻ കഴിഞ്ഞേക്കില്ല, അല്ലെങ്കിൽ നീതി പുലർത്താൻ ആയേക്കില്ല. ഈ വർഷത്തെ മികച്ച ചിത്രങ്ങളിൽ ഒന്നാണ് ലൈറ്റ്ഹൗസ്, കാണാൻ ശ്രമിക്കുക.

Verdict : Must Watch

DC Rating : 90/100

661. Star Wars Episode 9 - The Rise Of Skywalker (2019)

Director : J J Abrams

Genre : Sci Fi

Rating : 7/10

Country : USA

Duration : 143 Minutes

🔸സ്റ്റാർ വാഴ്സിലെ സ്‌കൈവാക്കർ സാഗ ആരംഭിച്ചിട്ട് ഏകദേശം നാല്പത്തി രണ്ട് വർഷങ്ങൾ പിന്നിട്ടിരിക്കുന്നു, റൈസ് ഓഫ് സ്‌കൈവാക്കർ സീരീസിലെ അവസാന ചിത്രമായിരിക്കും എന്ന് അണിയറ പ്രവർത്തകർ അവകാശപ്പെട്ടപ്പോഴും സത്യത്തിൽ ഒരു പേടി ഉണ്ടായിരുന്നു ബില്യൺ ഡോളർ പേഴ്സിൽ കണ്ണ് വെച്ച് ഒരല്പം കൂടി നീട്ടി കൊണ്ടുപോവുമോ എന്ന്, നൊസ്റ്റാൾജിയ ഫാൻ അപ്പീൽ വെച്ച് ഓക്കേ ആണെങ്കിലും സത്യത്തിൽ ആവശ്യം ഉണ്ടെന്ന് വിശ്വസിക്കുന്നില്ല. എന്തായാലും കണ്ട് കഴിഞ്ഞ സ്ഥിതിക്ക് ഉറപ്പിച്ച് പറയാം, ഇത് അവസാനം തന്നെ ആയിരുന്നെന്ന്, നന്നായോ ഇല്ലയോ എന്നൊക്കെയുള്ള ചോദ്യത്തിന് ഉത്തരം ഒരല്പം കോംപ്ലക്സ് ആണെന്നും പറയേണ്ടി വരും.

🔸ദി ലാസ്റ്റ് ജെഡി എന്ന ചിത്രത്തിലെ സംഭവങ്ങൾക്ക് ശേഷം ഒരല്പം നാളുകൾക്ക് ശേഷമാണ് ഈ ചിത്രം ആരംഭിക്കുന്നത്, എന്നാൽ തുടക്കത്തിലേ ഒരു പത്ത് ഇരുപത് മിനുറ്റിൽ നിന്ന് തന്നെ മനസിലാവും രണ്ടാം ഭാഗ ചിത്രത്തിന് വലിയ പ്രാധാന്യം സംവിധായകൻ അബ്രാംസ് നൽകിയിട്ടില്ല എന്ന്, ചില്ലറ ചില പരാമർശങ്ങൾ അവഗണിച്ചാൽ അവിടേക്ക് അധികം ശ്രദ്ധ ഒന്നും കൊടുത്തിട്ടില്ല, ഒരുപക്ഷെ രണ്ടും രണ്ട് സംവിധായകൻ ആയതിനാലും വെവ്വേറെ കാഴ്ചപ്പാടുകൾ ആയത് കൊണ്ടുമെല്ലാം ആവാം. കഥയിലേക്ക് വരികയാണെങ്കിൽ പഴയ ജെഡി സിത്ത് പോര് തന്നെയാണ് ഇവിടെയും പ്രമേയം.

🔸ലുക്ക് സ്‌കൈവാക്കർ കടന്ന് പോയിരിക്കുന്നു, റിബൽ പോരാളികളുടെ അവസാനത്തെ പ്രതീക്ഷ ഇന്ന് റെയിൽ മാത്രമായി ഒതുങ്ങിയിരുന്നു. പോരാട്ട ഭൂമിയിൽ നിന്നും മാറി ലേയയുടെ കീഴിൽ പരിശീലനത്തിലാണ് കുറച്ച് നാളുകളായി റെയ്. വിപ്ലവ പോരാളികളിലെ മറ്റ് പ്രധാനികളായ പോ, ഫിൻ, ച്യുവി എന്നിവരെല്ലാം യുദ്ധമുഖത്താണ്. കൈലോ റെന്നും അയാളുടെ പോരാളികളുമായുള്ള യുദ്ധം നാൾക്കുനാൾ കൈവിട്ട് പോയികൊണ്ടിരിക്കുകയാണ്, ദിവസങ്ങൾ എണ്ണപ്പെട്ട അവസ്ഥ. ഈ ഒരു പശ്ചാത്തലത്തിലാണ് ആരും പ്രതീക്ഷിക്കാത്ത ഒരു സംഭവം അരങ്ങേറുന്നത്.

🔸ഉദ്ദേശം മൂന്നര പതിറ്റാണ്ട് മുൻപാണ് ഗാലക്സിയിൽ എല്ലാവരും അവസാനമായി എമ്പറർ പാല്പാറ്റീനിനെ കണ്ടത്, അന്ന് സ്റ്റാർ ഡിസ്ട്രോയറിന്റെ മുകളിൽ നിന്നും താഴേക്ക് വീണ അയാൾ മരണപ്പെട്ടു എന്നാണ് സർവരും കരുതിയിരുന്നത്, എന്നാൽ ഇന്ന് ഇത്രയും വർഷങ്ങൾക്ക് ശേഷം അയാൾ മടങ്ങി എത്തിയിരിക്കുകയാണ്. എങ്ങനെ എന്നോ, എന്തിന് എന്നോ ആർക്കും പിടിയില്ല പക്ഷെ ആ വരവ് വെറുതെ ആവില്ല എന്നത് ഉറപ്പ്. പാല്പട്ടീനിന്റെ മടങ്ങി വരവ് അതുവരെ നിലനിന്ന എല്ലാ വിശ്വാസങ്ങളെയും കാഴ്ചപ്പാടിനെയും കീഴ്മേൽ മറിക്കുന്നതാണ്, ഇതാണ് ചിത്രത്തിന്റെ ഡ്രൈവിങ് ഫോഴ്‌സ്.

🔸സ്റ്റാർ വാർസ് എന്നത് പേഴ്സണലി ഏറ്റവും ഇഷ്ട്ടമുള്ള സിനിമാ സീരീസുകളിൽ ഒന്നാണ്, ഒരു വികാരം എന്നൊക്കെ തമാശയ്ക്ക് പറയാം, ഈ ഒരു കാരണം കൊണ്ട് തന്നെ ഈ വർഷം ഏറ്റവും പ്രതീക്ഷ അർപ്പിച്ച ചിത്രങ്ങളിൽ ഒന്നാണ് റൈസ് ഓഫ് സ്‌കൈവാക്കർ. ഫാൻ പ്ലീസിങ് മോമെന്റുകൾ കൊണ്ട് സമ്പന്നമാണ് ഈ ചിത്രം, ഈ ഒരു വസ്തുത കൊണ്ട് തന്നെ ലോജിക്ക് ഇല്ലായ്മയും കൺസിസ്റ്റന്റ് ഇല്ലാത്ത അവതരണവും എല്ലാം ചിത്രം മറികടക്കുന്നുണ്ട്. ഒരു ആരാധകൻ ആണെങ്കിൽ കാണാം ഈ ചിത്രം, ആസ്വദിക്കാൻ ഉള്ള വകകൾ ഉണ്ട്.

Verdict : Good

DC Rating : 70/100

660. Uncut Gems (2019)

Director : Safdie Brothers

Genre : Crime

Rating : 8.2/10

Country : USA

Duration : 133 Minutes

🔸ആദം സാൻഡ്‌ലറുടെ റിഡെംപ്‌ഷൻ ആർക്കിലെ ഏറ്റവും പുതിയ അധ്യായം, അതാണ് അൺകട്ട് ജെംസ്. മെയ്‌റോവിറ്റ്സ് സ്റ്റോറീസ് തൊട്ടിങ്ങോട്ട് ഒരു ട്രാക്ക് മാറ്റലിന്റെ സൂചനകൾ പുള്ളിക്കാരൻ തന്നിരുന്നെങ്കിലും ഇതായിരിക്കും അതിന്റെ പീക്ക് പോയിന്റ്. വലിയ സംശയങ്ങൾ ഏതും ഇല്ലാതെ പറയാം, ഒരു കാലത്ത് ഏറ്റവും മോശം അഭിനേതാവായി മുദ്ര കുത്തപ്പെട്ട സാൻഡ്‌ലറുടെ കരിയർ ബെസ്റ്റ് ചിത്രം ഇതായിരിക്കും, അത് വലിയൊരു കാര്യം തന്നെയുമാണ്. പ്രകടനത്തിന്റെ അടിസ്ഥാനത്തിൽ ആയാലും ചിത്രത്തിന്റെ നിലവാരത്തിൽ ആയാലും കയ്യടി നേടുന്നുണ്ട് ഈ ക്രൈം ഡ്രാമാ ചിത്രം.

🔸ഹൊവാഡ് എന്ന കഥാപാത്രത്തെ ആണ് ആദം സാൻഡ്‌ലർ ചിത്രത്തിൽ അവതരിപ്പിച്ചിട്ടിക്കുന്നത്, ആളൊരു ജുവല്ലറി ഷോപ് ഉടമയാണ്. പ്രത്യക്ഷത്തിൽ വലിയ പ്രശനം തോന്നുക ഇല്ലെങ്കിലും ഒരു ബലഹീനത ഉണ്ട് ഹൊവാർഡിന്, മറ്റൊന്നുമല്ല ഗാംബ്ലിങ് അഥവാ ചൂത് കളി. ഭാഗ്യ നിർഭാഗ്യങ്ങൾ മാറി മറിയുന്ന, ഒരു നിമിഷം കൊണ്ട് ധനികനാവാൻ കഴിഞ്ഞേക്കാവുന്ന ചൂതാട്ടത്തോട് ഒരു തരം അഡിക്ഷൻ ആണ് ഹൊവാർഡിന്. പിന്നെ പ്രശനം എന്താണെന്ന് വെച്ചാൽ ഭാഗ്യദേവത ഇന്നേവരെ ഹൊവാർഡിനെ കനിഞ്ഞ് അനുഗ്രഹിച്ചിട്ടില്ല എന്നത് തന്നെ.

🔸ഇന്നേവരെ വലിയ നേട്ടങ്ങൾ ഒന്നും തന്നെ ഹൊവാർഡിന് ചൂത് കളിച്ച് നേടാൻ കഴിഞ്ഞിട്ടില്ല, ഉണ്ടായിട്ടുള്ളത് മുഴുവൻ വൻ നഷ്ടങ്ങളാണ്. ആൾ ഇന്ന് ഒരല്പം കടത്തിലാണ്, അല്പം എന്ന് പറയുന്നത് ചിലപ്പോ കുറഞ്ഞ് പോയേക്കും, കഴുത്തറ്റം കടം എന്ന് വേണമെങ്കിൽ പറയാം. ഈ കടം ഇങ്ങനെ കേറി കേറി കടം നൽകിയവർ കിട്ടുന്നിടത്ത് വച്ച് തല്ലും എന്നൊരു സ്റ്റെയ്ജിൽ കാര്യങ്ങൾ എത്തിയിട്ടുണ്ട്. കടം വീട്ടാൻ തന്റെ ബിസിനസ് കൊണ്ട് കഴിഞ്ഞേക്കില്ല എന്ന് വ്യക്തമായി അറിയാവുന്ന ഹൊവാഡ് അതിനുള്ള വഴിയായി കാണുന്നതും ചൂതാട്ടം തന്നെയാണ്.

🔸വ്യക്തിജീവിതത്തിൽ കാര്യങ്ങൾ കുറച്ച് കൂടി പ്രശ്നങ്ങൾ നിറഞ്ഞതാണ്, ഭാര്യ ദിനായും ആയി ഇപ്പോൾ അത്ര അടുപ്പത്തിലല്ല ഹൊവാഡ്, വിവാഹേതര ബന്ധവും മറ്റ് സംശയങ്ങളും ഈഗോയും എല്ലാം ഇവിടെ വിഷയമാണ്. ഇനി ഇതൊന്നും പോരെങ്കിൽ തന്റെ കീഴ്‌ ജീവനക്കാരിയായ ജൂലിയും ആയി ചെറിയൊരു അടുപ്പവും ഉണ്ട് ഹൊവാർഡിന്, ഇങ്ങനെ എല്ലാം തികഞ്ഞ ഒരു കംപ്ലീറ്റ് ത്രീജി സിറ്റുവേഷനിൽ കൂടിയാണ് നമ്മുടെ കേന്ദ്ര കഥാപാത്രം കടന്ന് പോവുന്നത്, ഇതിലും താഴേക്ക് ഇനി പോവാനില്ല എന്നൊക്കെ വെറുതെ പറഞ്ഞിടാം.

🔸ഒരു വഴി ഒടുവിൽ ഹൊവാർഡിന് മുന്നിൽ ഉദിക്കുകയാണ്, പക്ഷെ ഒരു കുഴപ്പം ഉണ്ട് ഇത് ഏറ്റാൽ ഒന്നുകിൽ തന്റെ പ്രശ്നങ്ങൾ എല്ലാം തീരും, എന്ന് മാത്രമല്ല ശിഷ്ട കാലം ജീവിക്കാനുള്ള വക കൂടി കയ്യിലിങ് പോരും. എന്നാൽ ഇവിടെ പരാജയപ്പെടുക ആണെങ്കിൽ ഉണ്ടാകാൻ പോവുന്ന പ്രത്യാഘാതം ഓർക്കാൻ പോലും മടി തോന്നിക്കുന്ന വിധം ഭീകരവും. എന്താണ് ഈ വഴി, അതിൽ അയാളെടുത്ത തീരുമാനം എന്ത്, അതിന്റെ പ്രത്യാഘാതമെന്ത്, ഈ കഥാപാത്രങ്ങളുടെ എല്ലാം ഭാവിയെന്ത് തുടങ്ങി ഒരുപാട് ഒരുപാട് ചോദ്യങ്ങൾക്കുള്ള ഉത്തരമാണ് തുടർന്നുള്ള രണ്ട് മണിക്കൂർ സമയം, കാണാൻ ശ്രമിക്കുക.

Verdict : Very Good

DC Rating : 85/100

659. Portrait Of A Lady On Fire (2019)

Director : Céline Sciamma

Genre : Drama

Rating : 8.3/10

Country : France

Duration : 119 Minutes

🔸സ്വവർഗ്ഗ പ്രണയം പശ്ചാത്തലമാക്കി അനവധി സിനിമകൾ വിദേശ ഭാഷകളിലായി പുറത്തിറങ്ങിയിട്ടുണ്ട്, ഇവ മിക്കതും മികച്ച പ്രതികരണങ്ങൾ നേടിയവയും കയ്യടി കരസ്ഥമാക്കിയവയുമാണ്, ലോകത്ത് പല ഭാഗങ്ങളിലും ഇവരോടുള്ള മനോഭാവത്തിലും വലിയ മാറ്റങ്ങൾ കണ്ട് തുടങ്ങിയിട്ടുണ്ട് എന്നതും നല്ല കാര്യം, പ്രത്യേകിച്ചും ഒരു രണ്ട് നൂറ്റാണ്ട് മുൻപൊക്കെ ഉള്ള സ്ഥിതി ഗതികൾ കണക്കിൽ എടുക്കുക ആണെങ്കിൽ. ഈ വിഷയത്തോടുള്ള നമ്മുടെ നാട്ടിലെ ചിലരുടെ മനോഭാവത്തിലേക്ക് കടക്കുന്നില്ല, അത് മനസിലാവണം എങ്കിൽ ഒരു രണ്ട് മൂന്നാഴ്ച മുൻപുള്ള സ്വവർഗ്ഗ ദമ്പതിമാരുടെ വിവാഹ പരസ്യത്തിന് കീഴിൽ വന്ന കമന്റുകൾ മാത്രം ശ്രദ്ധിച്ചാൽ മതിയാവും. അത് തല്ക്കാലം നമുക്ക് വിടാം, ഈ ഒരു വിഷയം തന്നെയാണ് പോർട്രെയിറ്റ് ഓഫ് എ ലേഡി ഓൺ ഫയർ എന്ന ചിത്രത്തിന്റെ പ്രമേയം.

🔸പതിനെട്ടാം നൂറ്റാണ്ടിലെ ഇറ്റലി ആണ് നമ്മുടെ കഥാ പശ്ചാത്തലം, മറിയാൻ എന്ന യുവതി കഥ പറയുന്ന പോലെയാണ് ചിത്രം പുരോഗമിക്കുന്നത്, മറിയാൻ ഒരു ചിത്രകാരിയാണ്. കുറച്ച് വർഷങ്ങൾക്ക് മുന്നെയാണ് ഒരു യുവതിയുടെ നിർദ്ദേശ പ്രകാരം മറിയാൻ ബ്രിട്ടണിയിൽ എത്തുന്നത്, ഒരു യുവതിയുടെ പോർട്രെയിറ്റ് അല്ലെങ്കിൽ ചിത്രം വരയ്ക്കുക എന്നതായിരുന്നു അവളുടെ ദൗത്യം. ലളിതമായ കാര്യം എന്ന് കേൾക്കുമ്പോൾ തോന്നുമെങ്കിലും ഇതിൽ ചെറിയൊരു പ്രശ്നമുണ്ട്, ആരുടെ ചിത്രമാണോ വരക്കേണ്ടത്, അവർ ഇതറിയാൻ പാടില്ല.

🔸ഇനി മറ്റൊരു കഥാപാത്രത്തിലേക്ക് പോവാം, മറിയാൻ വരക്കേണ്ടത് ഹെലോയിസ് എന്ന യുവതിയുടെ ചിത്രമാണ്. ഹെലോയിസ് ദീർഘ നാളായുള്ള കോൺവെന്റ് വാസത്തിന് ശേഷം മടങ്ങി വീട്ടിൽ എത്തിയിട്ട് നാളുകൾ ഏറെ ആയില്ല, ഇതിനെല്ലാം പുറമെ വ്യക്തി ജീവിതത്തിൽ അനുഭവിക്കേണ്ടി വന്ന ചില നഷ്ടങ്ങളിൽ നിന്നും അവർ കരകയറി വരുന്നതേ ഉള്ളൂ. ഈയൊരു പശ്ചാത്തലത്തിൽ ഹെലൂയിസിന്റെ ചിത്രം വരയ്ക്കാനായി മറിയാൻ എത്തിയതിന് ഒരു പ്രത്യേക കാരണമുണ്ട്. ഹെലൂയിസിന് ഒരു കല്യാണ ആലോചന വന്നിരിക്കുകയാണ്.

🔸വരൻ ആവേണ്ട വ്യക്തി ഇറ്റലിയിലെ ഒരു പ്രമുഖനാണ്, എല്ലാം കൊണ്ടും ദോഷം പറയാൻ ഒന്നുമില്ലാത്ത ബന്ധം, ഒരേയൊരു പ്രശനം മാത്രം, ലവലേശം താല്പര്യം ഇല്ല ഹെലൂയിസിന്. ഈ താല്പര്യമില്ലായ്മ കാരണം തന്നെ തന്റെ പടം വരയ്ക്കാൻ സമ്മതിച്ചിട്ടുമില്ല അവർ, ഇതാണ് മറിയാനിന്റെ ദൗത്യം. ഒറ്റപ്പെടൽ അനുഭവിക്കുന്ന ഹെലൂയിസിന് ഒരു കൂട്ടായി, സന്തത സഹചാരി ആയൊരു സുഹൃത്ത് എന്ന നിലയ്ക്കാണ് മറിയാനിനെ ഹെലൂയിസിന്റെ അമ്മ പരിചയപ്പെടുത്തുന്നത്. പല രീതിയിലും സാമ്യതകൾ ഉള്ള ഈ രണ്ട് പേർക്കുമിടയിൽ ഒരു സൗഹൃദം ഉടലെടുക്കുകയാണ്.

🔸എന്നാൽ കാര്യങ്ങൾ കൂടുതൽ കോംപ്ലക്സ് ആവുന്നത് സൗഹൃദത്തിന് പുറമേയൊരു ബന്ധം കൂടി അവിടെ ഉണ്ടാവുമ്പോഴാണ്, പ്രണയം എന്നൊരു ഫാക്ടർ കൂടി പിറക്കുകയാണ്. കാലഘട്ടവും, കഥാപാത്രങ്ങളുടെ സാംസ്‌കാരിക ചുറ്റുപാടുകളും എല്ലാം ശ്രദ്ധയിൽ എടുക്കുമ്പോഴാണ് ഈ വിഷയത്തിന്റെ ഗൗരവം പൂർണമായും പിടികിട്ടുന്നത്. ഈ വർഷം കണ്ട മികച്ച ചിത്രങ്ങളിൽ ഒന്നാണ് പോർട്രെയിറ്റ് ഓഫ് എ ലേഡി ഓൺ ഫയർ, ഒരു സംശയവും ഇല്ലാതെ പറയാം. പ്രദർശിപ്പിച്ച വേദികളിൽ എല്ലാം മികച്ച അഭിപ്രായങ്ങൾ കരസ്ഥമാക്കിയ ചിത്രം തീർച്ചയായും കാണാൻ ശ്രമിക്കുക.

Verdict : Must Watch

DC Rating : 92/100

658. Kekexili Mountain Patrol (2004)

Director : Lu Chan

Genre : Drama

Rating : 7.6/10

Country : China

Duration : 88 Minutes

🔸ടിബറ്റിലെ ചൈനീസ് അധിനിവേശ പ്രദേശത്ത് സ്ഥിതി ചെയ്യുന്ന പീഠ ഭൂമിയാണ് കെക്ക്സിലി, ഉദ്ദേശം നാലായിരത്തി എഴുന്നൂറ് മീറ്റർ ഉയരെ സ്ഥിതി ചെയ്യുന്ന ഈ സ്ഥലം അതിന്റെ വന്യത കൊണ്ടും സൗന്ദര്യം കൊണ്ടും എല്ലാം പ്രസിദ്ധമാണ്. എന്നാൽ കുറച്ച് നാളുകളായി മറ്റ് ചില സംഭവങ്ങളും കാര്യങ്ങളും കൊണ്ട് കുപ്രസിദ്ധി ആർജിച്ച് കൊണ്ടിരിക്കുകയാണ് കെക്ക്സിലിയും ഇവിടുത്തെ താമസക്കാരും. പറയാൻ വിട്ടുപോയി, നൂറ് കണക്കിന് ആളുകൾ ഇവിടെ കാലങ്ങളായി താമസിച്ച് പോരുന്നുണ്ട്, ഒരു മുൻ സൈനികൻ എന്ന സൂചന നൽകുന്ന റിതായ് ആണ് ഇവരുടെ നേതാവ് എന്ന് പറയാം.

🔸താഴ്‌വാരം എന്ന മലയാള ചിത്രം പേഴ്സണലി ഏറ്റവും ഇഷ്ട്ടപ്പെട്ട സിനിമകളിൽ ഒന്നാണ്, മൗണ്ടൻ പട്രോൾ എന്ന ഈ ചിത്രം ചില ഇടത്തെങ്കിലും താഴ്വാരത്തെ ഓര്മിപ്പിക്കുന്നുണ്ട് എന്നത് കൗതുകകരമായി തോന്നി. ഇനി കാര്യത്തിലേക്ക്, ചൈനയിൽ എണ്പതുകൾക്ക് മുന്നേ ധാരാളമായി കാണപ്പെട്ട ഒരു ജീവിവർഗ്ഗമാണ് ആന്റലോപ്പുകൾ, കണക്കുകൾ പ്രകാരം പത്ത് ലക്ഷത്തിൽ അധികം ആന്റിലോപ്പുകൾ ആ രാജ്യത്ത് ഉണ്ടായിരുന്നു, സമാധാനപ്രിയരായ ഈ ജീവി വർഗം തങ്ങളുടെ കാലനെ കണ്ട് മുട്ടിയത് എൺപതുകളുടെ അവസാനത്തോടെയാണ്.

🔸ആന്റിലോപ്പുകളുടെ തൊലിക്ക് പുറം മാർക്കറ്റുകളിൽ വൻ ഡിമാൻഡാണ്, ഈ തൊലി ഉപയോഗിച്ചുള്ള വസ്ത്രങ്ങൾക്കും ആവശ്യക്കാർ ഏറെ. ഈ ഒരു വസ്തുത തിരിച്ചറിഞ്ഞ നിമിഷം തൊട്ട് ലാഭം കൊയ്യാനായി അനവധി ആളുകൾ ആ മല കേറി പീഠഭൂമിയിലേക്ക് എത്തി തുടങ്ങി. താമസിയാതെ തന്നെ ആന്റിലോപ്പുകളുടെ എണ്ണം ലക്ഷങ്ങളിൽ നിന്നും വെറും ആയിരങ്ങളിലേക്ക് മാത്രമായി ചുരുങ്ങി, മിണ്ടാപ്രാണികൾ കൂട്ടം കൂട്ടമായി കുരുതി കൊടുക്കപ്പെട്ടു, ഇതെല്ലാം ഔദ്യോഗികമായ വിവരങ്ങൾ.

🔸ഈ ഒരു സംഭവത്തിന്റെ പ്രത്യാഘാതം എന്നവണ്ണം രണ്ട് കാര്യങ്ങൾ ആ താഴ്‌വരയിൽ അരങ്ങേറി, ഒന്ന് ലാഭം മാത്രം കണ്ട് കൊണ്ട് അനവധി പുറം നാട്ടുകാർ ആയുധങ്ങളുമായി അവിടേക്ക് കടന്ന് വരാൻ തുടങ്ങി, താമസിയാതെ തന്നെ വെടിക്കോപ്പുകളും വെടി ശബ്ദങ്ങളും ആ താഴ്വരയുടെ ശ്വാസത്തോട് ചേർന്ന് വരാനും തുടങ്ങി. രണ്ടാമത്തെ കാര്യം സ്വാഭാവികമായും തങ്ങളുടെ ചെറിയ വാസസ്ഥലത്തേക്കുള്ള വരത്തന്മാരുടെ അധിനിവേശത്തോട് നാട്ടുകാർ പ്രതികരിച്ച് തുടങ്ങി എന്നതുമാണ്. റിതായിയുടെ കീഴിൽ ഒരു സംഘം ചെറുപ്പക്കാർ കെകെസിലിയുടെ സംരക്ഷകരായി അവരോധിക്കപ്പെട്ടു.

🔸കെകെസിലി ഒരു നാഷണൽ റിസെർവായി പ്രഖ്യാപിക്കപ്പെടണം എന്നതാണ് റിതായിയുടെ ആഗ്രഹം, അത് എന്ത് തന്നെ ആയാലും ഈ രണ്ട് സംഘങ്ങളും തമ്മിലുള്ള ചെറിയ ചില സംഘർഷങ്ങൾ ഇവരിൽ ഒരാളുടെ കൊലയിൽ ചെന്ന് കലാശിക്കുകയാണ്, അതുവരെ ഉള്ള സംഭവങ്ങളെ എല്ലാം കീഴ്മേൽ മറിക്കുന്ന ടെർണിങ് പോയിന്റ് എന്ന് വിശേഷിപ്പിക്കാം. ഈ സംഭവങ്ങൾ പുറം നാട്ടിൽ നിന്നും അവിടേക്ക് വരുന്ന ഒരു ന്യുസ് റിപ്പോർട്ടറുടെ വ്യൂ പോയിന്റിലൂടെയാണ് കാണിക്കുന്നത്, മികച്ചൊരു ചിത്രം തന്നെയാണ് മൗണ്ടൻ പട്രോൾ, തീർച്ചയായും കാണാൻ ശ്രമിക്കുക.

Verdict : Very Good

DC Rating : 85/100

657. I Do Not Care If We Go Down In History As Barbarians (2018)

Director : Radu Jude

Genre : Black Comedy

Rating : 7.3/10

Country : Romania

Duration : 138 Minutes

🔸ഐ ഡു നോട്ട് കെയർ ഇഫ് വി ഗോ ഡൗൺ ഇൻ ഹിസ്റ്ററി ആസ് ബാർബേറിയൻസ് എന്ന ചിത്രം പേര് സൂചിപ്പിക്കുന്നത് പോലെ തന്നെ ചരിത്രവുമായി ബന്ധപ്പെട്ട ഒരു ചലച്ചിത്രമാണ്, കുറച്ച് കൂടി വിശദമാക്കുക ആണെങ്കിൽ രണ്ടാം ലോകമഹായുദ്ധ കാലത്തെ ഇന്ന് റൊമാനിയയുടെ ഭാഗമായ ഒഡേസ്സയിൽ അരങ്ങേറിയ കുപ്രസിദ്ധമായ ചില സംഭവങ്ങളുമായി ബന്ധപ്പെട്ട ചില കാര്യങ്ങളുടെ നേർ സാക്ഷ്യം, അതാണ് ഈ ചിത്രം. സംഭവങ്ങളെ ഡോകിയുമെന്ററി പോലെയോ അല്ലാതെയോ നേരിട്ടൊരു ആവിഷ്കരണത്തിന് മുതിരാതെ ഒരു തരം റീക്രിയേഷൻ, ഇന്നിന്റെ പശ്ചാത്തലം കൂടി കാണിച്ച് കൊണ്ടുള്ളൊരു റീക്രിയേഷന് ആണ് ചിത്രം ശ്രമിച്ചിരിക്കുന്നത്.

🔸ഇനി ഒരു ചെറിയ ജാമ്യം എടുക്കാം, ഈ ചിത്രം മുന്നോട്ട് വെക്കുന്ന കാര്യങ്ങളും മറ്റും പൂർണമായി മനസിലാക്കാനും അധികാരികമായൊരു അഭിപ്രായം പറയാനും രാജ്യത്തെ പറ്റിയും, രാജ്യത്തിൻറെ അന്നത്തെ ഒരു പരിതഃസ്ഥിതിയെ പറ്റിയും, സാംസ്‌കാരിക സാമ്പത്തിക ചുറ്റുപാടുകളെ പറ്റിയുമൊക്കെ ഒരു അറിവ് വേണ്ടിവന്നേക്കും, ഇതൊന്നും ദൈവം സഹായിച്ച് ഇല്ലാത്തതിനാൽ ചിത്രത്തിൽ ഉൾക്കൊള്ളിച്ചിട്ടുള്ള കാര്യങ്ങളിലേക്ക് മാത്രമായി ശ്രദ്ധ കൊടുക്കുകയാണ്, അറിവില്ലായ്മ മാത്രമാണ് പ്രശനം എന്നുകൂടി ചുവടെ ചേർക്കുന്നു.

🔸നടിയായ ലോയാന ലേക്കബ് ആണ് നമ്മുടെ പ്രധാന കഥാപാത്രം, പുള്ളിക്കാരി താൻ ഇനി ചെയ്യാൻ പോവുന്ന കഥാപാത്രത്തെ ചെറുതായി ഒന്ന് പരിചയപ്പെടുത്തുകയാണ് ആദ്യ രംഗങ്ങളിൽ. മറിയാന എന്ന ഈ കഥാപാത്രം ഒരു സംവിധായക ആണ്, അതും റൊമാനിയൻ ചരിത്രത്തിലെ തന്നെ വളരെ പ്രസിദ്ധമായ ഒരു സംഭവം സ്‌ക്രീനിൽ എത്തിക്കാനായി ശ്രമിക്കുന്ന ഒരു സംവിധായക, വേണമെങ്കിൽ റാഡ് ജൂഡിന്റെ തന്നെ വേർഷൻ എന്ന് പറയാം. എന്നാൽ പ്രശനം അല്ലെങ്കിൽ കോൺട്രോവേർസി ആരംഭിക്കുന്നത് ഇവിടെ ഒന്നുമല്ല, ഇവർ ചലച്ചിത്രമായി മാറ്റാൻ തുനിയുന്ന സംഭവമാണ് ഇവിടെ വില്ലൻ.

🔸1941ൽ ഒഡേസ്സയിൽ നടന്ന കൂട്ടക്കൊലയാണ് ഇവിടെ വിഷയമാവുന്നത്, കേട്ടറിവ് ഇല്ലെങ്കിൽ ചെറുതായി നമുക്കൊന്ന് ചരിത്രത്തിലേക്ക് പോവാം. നാല്പതുകളുടെ ആരംഭത്തിൽ സോവിയേറ്റ് യൂണിയണിന്റെ അധീനതയിൽ നിന്നും ആക്സിസ് രാജ്യങ്ങൾ പിടിച്ചെടുത്ത ഭാഗമാണ് ട്രാൻസ്നിസ്ട്രിയ പ്രദേശം. ഇവിടെ നാല്പത്തിയൊന്നിൽ ഉദ്ദേശം മുപ്പതിനായിരത്തോളം ജൂതന്മാരാണ് കൂട്ട കുരുതി ചെയ്യപ്പെട്ടത്. രണ്ടാം ലോക മഹായുദ്ധ കാലത്ത് നിലനിന്ന ജൂത വിരോധം തന്നെയാണ് ഈ കുരുതിക്ക് പിന്നിലെ കാരണമായി കാണിക്കപ്പെടുന്നത്.

🔸ഈ ഒഡെസ കൂട്ടക്കുരുതിയാണ് മറിയാനയുടെ ചിത്രത്തിന്റെ വിഷയം. ദേശസ്നേഹവും രാജ്യത്തിൻറെ പുരോഗതിയും എല്ലാം വിളിച്ചോതുന്ന ഒരു സംഭവം ദൃശ്യവൽക്കരിക്കാതെ ഇതുപോലെ ഏവരും കുഴിച്ചുമൂടിയ ഒരു സംഭവം സിനിമയാക്കാൻ തയാറായ സംഭവം വിവാദങ്ങൾക്ക് വഴി തുറക്കുകയാണ്. ഒരു ആന്റി റൊമാനിയൻ വികാരം കാഴ്ചക്കാരിലും ജനങ്ങളിലും ഉണ്ടാവും എന്ന അധികാരികളുടെ പേടിയും മറ്റും ഇവിടെ വിഷയമായി വരുന്നുണ്ട് താനും. ഒരു തൊട്ടാൽ പൊള്ളുന്ന വിഷയമാണ് ഇവിടെ കൈകാര്യം ചെയ്തിരിക്കുന്നത്, ചില ബയോഗ്രഫിക്കൽ എലെമെന്റുകൾ കൂടി ചിത്രത്തിലുണ്ട്. കാണാൻ താത്പര്യപ്പെടുന്നു എങ്കിൽ ധൈര്യമായി കാണാം, മികച്ചൊരു ചിത്രം തന്നെയാണ് ഇത്.

Verdict : Must Watch

DC Rating : 90/100

656. My Dad Is A Heel Wrestler (2019)

Director : Kyohei Fujimara

Genre : Sports

Rating : 7.4/10

Country : Japan

Duration : 110 Minutes

🔸ഈ ചിത്രത്തെ കുറിച്ച് എന്ത് പറയണം എന്നതാണ് സംശയം, ഫെസ്റ്റിൽ ഇതുവരെ കണ്ടതിൽ ഏറ്റവും മികച്ച ചിത്രമാണ് മൈ ഡാഡ് ഈസ് എ ഹീൽ റെസ്ലർ. ഒരു സ്പോർട്സ് ഡ്രാമ ചിത്രത്തിൽ നിന്നും പ്രതീക്ഷിക്കാവുന്ന സകലമാന ക്ലിഷേകളും പ്രതീക്ഷിച്ചിട്ടും അത്യാവശ്യം നന്നായി തൃപ്തിപ്പെടുത്തിയ ചിത്രം എന്ന് വിശേഷിപ്പിക്കാം ഇതിനെ. തന്റെ പ്രൈം കഴിഞ്ഞ ഒരു റെസ്ലറുടെ ഇപ്പോഴത്തെ ജീവിതവും സ്വന്തം മകനോടുള്ള അയാളുടെ അടുപ്പവും എല്ലാം മനോഹരമായി തന്നെ ചിത്രം സ്‌ക്രീനിൽ കാണിക്കുന്നുണ്ട്.

🔸ഈ റെസ്ലിങിൽ മുൻ നിശ്ചയ പ്രകാരം വ്യക്തികൾ നല്ലവരായും മോശപ്പെട്ടവരായും അഭിനയിക്കാറുണ്ട്, യഥാക്രമം ഇവർ ഫെയ്‌സസ് എന്നും ഹീൽസ് എന്നും വിശേഷിപ്പിക്കപ്പെടുന്നു. ഒരു നായകൻ അത്രമേൽ മികച്ചവൻ ആവുന്നത് അവനൊത്തൊരു വില്ലനെ കീഴ്പ്പെടുത്തുമ്പോഴാണ്, സത്യത്തിൽ നായകന്റെ നിലനിൽപ്പ് പോലും സാധൂകരിക്കപ്പെടുന്നത് വില്ലനായൊരു എതിരാളി ഉള്ളത് കൊണ്ടാണെന്ന് പറഞ്ഞിടാം. ഈ വില്ലൻ കഥാപാത്രങ്ങൾക്ക് ഏത് നിലയിലേക്കും തരം താഴാം, എന്ത് നെറികേടും കാണിക്കാം, അപ്പോഴാണ് അവരെ ജനങ്ങൾ കൂടുതൽ വെറുക്കുക, അപ്പോഴേ അവരൊരു വില്ലൻ കഥാപാത്രമായി മാറുകയുമുള്ളൂ.

🔸ഷോട്ട എന്ന സ്‌കൂൾ വിദ്യാർത്ഥിയായ കഥാപാത്രമാണ് നമ്മുടെ ചിത്രത്തിലെ ഫോക്കൽ പോയിന്റ്, തന്റെ അച്ഛനോടും അമ്മയോടും വല്ലാത്തൊരു അറ്റാച്ച്മെന്റ് ഉണ്ട് ഷോട്ടയ്ക്ക്. ഷോട്ടയുടെ അച്ഛനാണ് ഒരുകാലത്ത് ജാപ്പനീസ് റെസ്ലിങ് സർക്കിയുട്ടുകളിലെ അടുത്ത വലിയ താരം എന്ന ഖ്യാതി നേടിയ തകാഷി ഒമുറ. തന്റെ ചെറു പ്രായത്തിൽ തന്നെ രാജ്യത്തെ ഒരു റെസ്ലർക്ക് നേടാൻ കഴിയുന്ന നേട്ടങ്ങൾ എല്ലാം ഓമുറ നേടി കഴിഞ്ഞതാണ്, സെഡ് വൺ ക്ലൈമാക്സ് ടൂർണമെന്റ് അടക്കം, പറഞ്ഞ് വന്നത് എന്താണെന്നാൽ ഒരു ലെജൻഡറി സ്റ്റാറ്റസ് അയാൾക്ക് ഉണ്ടായിരുന്നു.

🔸എന്നാൽ ഈ സംഭവങ്ങൾ എല്ലാം നടന്ന് കഴിഞ്ഞ് ഏകദേശം പത്ത് വർഷങ്ങൾ കഴിഞ്ഞ് പോയിരിക്കുന്നു, ഓമുറ എന്ന പേര് ഏറെക്കുറെ എല്ലാവരും മറന്ന് പോയിട്ടുണ്ട്. തന്റെ വലത്തെ കാലിന് നേരിട്ട കരിയർ ത്രേട്ടനിങ് ഇഞ്ചുറി കാരണം പഴയ പ്രതാപത്തിന്റെ ഒരു ശില മാത്രമാണ് ഇന്ന് ഒമുറ. ഇത് മറച്ച് വെക്കാൻ എന്നവണ്ണം ഇന്നയാൾ കൈകാര്യം ചെയ്യുന്നത് ഒരു ഹീൽ അല്ലെങ്കിൽ വില്ലൻ കഥാപാത്രത്തെയാണ്. ഈ അവതരണത്തിൽ അയാൾ ഒരു വൻ വിജയം ആണെന്ന് പറയാതെ വയ്യ കാരണം ഇത്രത്തോളം വെറുക്കപ്പെട്ട ഒരു റെസ്ലർ ഇന്ന് ജപ്പാനിൽ ഇല്ല എന്നതാണ് സത്യം.

🔸ഈ വസ്തുതകൾ ഒന്നും ഷോട്ടയ്ക്ക് പിടിയില്ല, ഇത് അറിയുന്ന നിമിഷം അവൻ എങ്ങിനെ പ്രതികരിക്കും എന്നതും തുടർന്ന് ഈ കഥാപാത്രങ്ങളുടെ ഭാവി എന്താവും എന്നതുമൊക്കെയാണ് ഈ ചിത്രത്തിന്റെ പ്രമേയം. ഈ ഒരു ബാക്ക്ഗ്രൗണ്ടിൽ നിന്നും പ്രതീക്ഷിക്കാവുന്ന സ്ഥിരം ക്ലിഷേകളിലേക്ക് പോവാതെ നന്നായി അവസാനിപ്പിച്ചു എന്നത് സിനിമയുടെ പ്ലസ് പോയിന്റുകളിൽ ഒന്നാണ്. ജാപ്പനീസ് റെസ്ലരായ ഹിരോഷി തനഹാശിയാണ് ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നത്, വലിയ ദോഷം ഒന്നും പറയാൻ ഇല്ലാത്ത നൈസ് ഒരു സിനിമ ആണ് മൈ ഡാഡ് ഈസ് എ ഹീൽ റെസ്ലർ.

Verdict : Very Good

DC Rating : 80/100

655.The Fable (2019)

Director : Kan Eguchi

Genre : Action

Rating : 6.6/10

Country : Japan

Duration : 122 Minutes

🔸മുന്നേ സൂചിപ്പിച്ച ജോണർ ഡൈവേഴ്സിറ്റി നിലനിർത്തുന്ന മറ്റൊരു ചിത്രം, അതാണ് ദി ഫാബിൾ. ഒരു ആക്ഷൻ ചിത്രമാണ് ഫാബിൾ, എന്നാൽ സമുറായ് ശൈലിയിലേക്കൊന്നും പോവാതെ ചിത്രം കടന്ന് ചെല്ലുന്നത് ജാപ്പനീസ് അണ്ടർ വേൾഡിന്റെ ഉള്ളറകളിലേക്കും മറ്റുമാണ്. അത്യാവശ്യം നല്ല തോതിൽ വയലന്റ് ടെറിട്ടറിയിലേക്ക് കടന്ന് ചെല്ലുന്ന ചിത്രം കോമഡിക്കും ഡ്രാമയ്ക്കും തുല്യമായ പ്രാധാന്യം നൽകുന്നുമുണ്ട്. ഒരു ഗ്യാങ്‌സ്റ്റർ ഡ്രാമ എന്നൊക്കെ ഉള്ള വിശേഷണവും ഈ ചിത്രത്തിന് നൽകാം.

🔸കാസുഹിസ് മിനാമിയുടെ മാങ്ങ നോവലിനെ ആധാരമാക്കിയാണ് ദി ഫാബിൾ എന്ന ചിത്രം തയാറാക്കിയിരിക്കുന്നത്, ഈ മാങ്കയെ പറ്റി വലിയ അറിവൊന്നും ഇല്ലാത്തതിനാൽ തല്ക്കാലം ആ ഭാഗത്തേക്ക് കടക്കുന്നില്ല. ഫാബിൾ എന്നത് നമ്മുടെ പ്രധാന കഥാപാത്രത്തിന്റെ വിളിപ്പേരാണ്, ആളൊരു വാടക കൊലയാളിയാണ്. കഴിവിന്റെ കാര്യത്തിൽ ഫാബിളിന് വെല്ലുവിളിയായി തീരാൻ ഇന്ന് ആ പ്രദേശത്ത് തന്നെ അധികമാരുമില്ല എന്നതാണ് സത്യം, അയാൾ അയാളുടെ കരവിരുത് അനവധി തവണ ഒട്ടേറെ സന്ദർഭങ്ങളിൽ തെളിയിച്ചിട്ടുള്ളതും തെളിയിച്ച് കൊണ്ടിരിക്കുന്നതുമാണ്.

🔸ഇങ്ങനെ പൊയ്ക്കൊണ്ടിരുന്ന ഫാബിളിന്റെ ജീവിതം പെട്ടെന്നൊരുനാൾ മാറി മറിയുകയാണ്, ചില സംഭവങ്ങൾ കാരണം അയാൾക്ക് ആ പ്രദേശം വിട്ട് ഒളിവിൽ പോവേണ്ടി വരികയാണ്. ഇതിന് കാരണമായ സംഭവവും മറ്റും ചിത്രം കണ്ട് തന്നെ അറിയുക, ഈ ഒരു ബാക്ക് ഗ്രൗണ്ടിൽ നിന്നുമാണ് കഥ ടെയ്ക്ക് ഓഫ് ചെയ്യുന്നത്. ഈ ഒരു കാലയളവിൽ മിസാകി എന്ന യുവതിയുമായി ഫാബിൾ പ്രണയത്തിൽ ആവുന്നുമുണ്ട്, തന്റെ സ്ഥിരം കർമ മണ്ഡലത്തിൽ നിന്നും മാറി പുതിയൊരു പാത വെട്ടാനുള്ള അയാളുടെ ശ്രമം ഒരു ദുരന്തമായി മാറുന്നിടത്ത് ചിത്രം ആകെമൊത്തം ഒന്ന് എക്സ്പ്ലോഡ് ചെയ്യുകയാണ്.

🔸ഒരു ടൈമിൽ തന്റെ വേണ്ടപ്പെട്ടവരിയുന്നവരോട് തന്നെ യുദ്ധത്തിന് ഇറങ്ങേണ്ടി വരുന്ന അവസ്ഥയിലാണ് ഫാബിൾ. ഈ കഠിനമായ പരീക്ഷണങ്ങൾ അയാൾ അതിജീവിക്കുമോ എന്നും അതിനയാൾ നൽകേണ്ടി വരുന്ന വില എന്ത് എന്നതുമെല്ലാമാണ് ഈ ചിത്രത്തിന്റെ പ്രമേയം. ഈ ഒരു മെയിൻ ട്രാക്കിന് പിറകെ മറ്റ് രണ്ട് കഥാപാത്രങ്ങൾ കൂടി ഉൾപ്പെട്ടൊരു സബ്ട്രാക്ക് ചിത്രത്തിനുണ്ട്, ഫാബിളിനെ കൊന്ന് പേരും പ്രശസ്തിയും നേടാനായി വരുന്ന രണ്ട് പുതുമുഖ അസാസിൻസിന്റെ കഥയും ചിത്രത്തിൽ നന്നായി ആഡ് ഓൺ ചെയ്യപ്പെട്ടിട്ടുണ്ട്.

🔸പോസ്റ്റിൽ സൂചിപ്പിച്ചതല്ലാതെ രസകരമായ അനവധികാര്യങ്ങൾ പ്ലോട്ട് റിലേറ്റഡ് ആയും അല്ലാതെയും ചിത്രത്തിലുണ്ട്. ആക്ഷൻ ചിത്രം എന്ന നിലയിൽ അത്യാവശ്യം പാക്ക്ഡ് ആയി നിൽക്കുമ്പോഴും കൊമെടി ഡ്രാമ ലെവെലിലും ഒരു മിനിമം ക്വാളിറ്റി ചിത്രം കീപ്പ് ചെയ്യുന്നുണ്ട്. ഒരിടത്തും മുഷിപ്പിക്കില്ല എന്നുറപ്പ്, അതിനും മാത്രമുള്ള സാധനങ്ങൾ ഈ രണ്ട് മണിക്കൂർ ചിത്രത്തിലുണ്ട്, കാണാൻ ശ്രമിക്കുക നഷ്ടങ്ങൾ ഏതുമില്ല. നല്ല ദൃശ്യങ്ങളും താല്പര്യം ഉണർത്തുന്ന കഥാപാത്രങ്ങളും നൈസ് സൗണ്ട്ട്രാക്കും ചിത്രത്തിന്റെ പ്രത്യേകതകളിൽ ചിലത് മാത്രമാണ്.

Verdict : Good

DC Rating : 75/100

654. Little Love Song (2019)

Director : Kojiro Hashimoto

Genre : Drama

Rating : 6.8/10

Country : Japan

Duration : 123 Minutes

🔸ഇതുവരെ കണ്ട ചിത്രങ്ങൾ എല്ലാം തന്നെ അല്പം ജോണേർ ഡൈവേഴ്സിറ്റി കാണിച്ചവ ആയിരുന്നു, അത് അനിമേ ആയാലും ഫീൽ ഗുഡ് ആയാലും എന്തിനധികം സമുറായി കോമെടി സ്പൂഫ് ചിത്രം ആയാലും എല്ലാം ആ ഒരു വ്യത്യസ്തത നിലനിർത്തുന്നവ ആയിരുന്നു. ഈ ഒരു കാരണം കൊണ്ട് തന്നെ ലിറ്റിൽ ലവ് സോങ് എത്തരത്തിൽ ഉള്ളൊരു ചിത്രം ആയിരിക്കും എന്നതിൽ ആകാംക്ഷ ഉണ്ടായിരുന്നു, കാരണം മുന്പുള്ളവയിൽ നിന്ന് വിഭിന്നമായി ഇതിന്റെ പോസ്റ്ററോ ടീസറോ ഒന്നും തന്നെ കണ്ടിരുന്നില്ല, ഒരൈഡിയയും ഇല്ലാതെ കണ്ട ഒന്നായിരുന്നു ഈ ചിത്രം.

🔸മുൻപ് സൂചിപ്പിച്ച ആ ജോണർ ഡൈവേഴ്സിറ്റി നിലനിർത്തുന്നുണ്ട് ലിറ്റിൽ ലവ് സോങ് എന്ന ചിത്രം, സംഭവമൊരു കമിങ് ഓഫ് ഏജ് ഡ്രാമ മ്യൂസിക്കൽ ചിത്രമാണ്, പൊടിക്ക് ലേശം ട്രാജഡി കൂടി ചേർക്കുന്നുണ്ട് എന്ന് മാത്രം. നാലഞ്ച് ഹൈ സ്‌കൂൾ വിദ്യാർഥികൾ ചേർന്നാരംഭിച്ച ഒരു മ്യുസിക്കൽ ബാൻഡ് ആണ് നമ്മുടെ ചിത്രത്തിലേത്, ഈ ബാൻഡിനെ ചുറ്റി പറ്റിയാണ് കഥ പുരോഗമിക്കുന്നത്. ഒകിനാവയിലെ ജനങ്ങൾക്കിടയിൽ വളരെ ചെറിയ തോതിൽ ആരംഭിച്ച ഈ കഥാപാത്രങ്ങളുടെ സംഗീത യാത്ര താമസിയാതെ അങ് കത്തി കയറുകയാണ്. ഒരു സെൻസേഷൻ എന്നൊക്കെ പറയാവുന്ന തോതിലേക്ക് ഇവർ വളർന്ന് പോവുകയാണ്, ചുരുങ്ങിയ കാലത്തിനുള്ളിൽ തന്നെ.

🔸വൈബ്രന്റ് ആയ ശൈലിയും നിലനിർത്തി പോന്ന റിബൽ ആറ്റിറ്റിയൂടും ഇവരുടെ ഗാനങ്ങൾക്കും ഇവർക്ക് തന്നെയും വൻ പ്രേക്ഷക പിന്തുണ നേടി കൊടുക്കുകയാണ്, അധികം താമസിയാതെ തന്നെ വലിയ ചില ഓഫറുകൾ ഇവർക്ക് മുന്നിൽ എത്തുകയാണ്. ഈ ഓഫറുകൾ വഴി പ്രൊഫഷണൽ അരങ്ങേറ്റത്തിനും കോൺട്രാക്ടുകൾക്കും അരങ്ങ് ഒരുങ്ങുമ്പോഴാണ് ദുരന്തം ഒട്ടും പ്രതീക്ഷിക്കാത്ത രീതിയിൽ തന്റെ സാന്നിധ്യം അറിയിക്കുന്നത്. എന്താണ് ഈ ദുരന്തം എന്നും മറ്റും അവിടെ നിൽക്കട്ടെ, അതിലേക്ക് ഇറങ്ങുന്നത് അത്യാവശ്യം നല്ലൊരു സ്പോയ്ലർ ആയി മാറിയേക്കും.

🔸ഈ ഒരു ദുരിതത്തിന് ശേഷം ടീം ആകെ ആടിയുലയുകയാണ്, മുന്നോട്ട് എന്ത് എന്നത് വലിയൊരു ചോദ്യ ചിഹ്നമായി നിലനിൽക്കുകയാണ്, കാരണം ഇത്തരമൊരു സംഭവം തീർത്തും അപ്രതീക്ഷിതം തന്നെ ആയിരുന്നു. അതിനിടെ പ്രശ്നങ്ങളുടെ വ്യാപ്തി കൂട്ടികൊണ്ട് ചില അന്താരാഷ്ട്ര സംഭവങ്ങളും മത്സരങ്ങളും കുടിപ്പകയും എല്ലാം ഇവിടെ വിഷയമായി മാറുന്നു, ചുരുക്കി പറഞ്ഞാൽ ആകെ ബഹളമയം. ഈ ഒരു അവസ്ഥയിൽ നമ്മുടെ കഥാപാത്രങ്ങളുടെ ഭാവി എന്താവും, ഇവർക്ക് ഇനിയൊരു തിരിച്ചുവരവ് ഉണ്ടാവുമോ എന്നൊക്കെ അനവധി ചോദ്യങ്ങൾ ഇവിടെ ഉയരുകയാണ്.

🔸പൊതുവെ ഈ മ്യൂസിക്കൽ ചിത്രങ്ങളോട് വലിയ താല്പര്യം ഇല്ലാത്തത് കൊണ്ടാവണം അത്ര കണ്ടങ്ങ് ആസ്വദിക്കാൻ കഴിഞ്ഞില്ല ലിറ്റിൽ ലവ് സോങ് എന്ന ഈ ചിത്രം. ചിത്രം എവിടേക്കാണ് പോവുന്നത് എന്ന് ഏറെക്കുറെ കൃത്യമായി പ്രവചിക്കാൻ കഴിഞ്ഞു എന്നതും ഒട്ടും സഹായകരം ആയില്ല, എന്തിരുന്നാലും മറ്റ് കാഴ്ചക്കാരിൽ ചിലരിൽ നിന്ന് നല്ല പ്രതികരണം ചിത്രത്തിന് ലഭിച്ചിട്ടുണ്ട്, മൂളൽ പോലുള്ളൊരു ഗാനം ചിത്രത്തിലുണ്ട്, നൈസ് ആണ്. വലിയ മോശം പറയാൻ ഒന്നുമില്ല, എന്നാൽ കാണാൻ നിർദ്ദേശിക്കാൻ ഉള്ളതുമില്ല, മ്യൂസിക്കൽ ഡ്രാമകളോട് താല്പര്യം ഉണ്ടെങ്കിൽ കാണാം.

Verdict : Watchable

DC Rating : 62/100

653. Samurai Shifters (2019)

Director : Isshin Inudo

Genre : Comedy

Rating : 6.7/10

Country : Japan

Duration : 121 Minutes

🔸ജാപ്പനീസ് സിനിമാ ഇന്ഡസ്ട്രിക്ക് അഭിമാനം ആയ അനവധി സമുറായ് ചിത്രങ്ങൾ അവിടെ നിന്നും സൃഷ്ടിക്കപ്പെട്ടിട്ടുണ്ട്, കുറൊസാവയുടെ സെവൻ സമുറായ്, ത്രോൺ ഓഫ് ബ്ലഡ്, ഹരാകിരി എന്നിവയ്‌ക്കൊപ്പം മുസാഷി മിയമോട്ടോയുടെ ജീവിതം പ്രമേയമാക്കിയ സമുറായ് ട്രിലോഗി, ലേഡി സ്നോബ്ലഡ് എന്നിവയെല്ലാം ഈ വിഭാഗത്തിന് ചേർന്ന ക്‌ളാസ്സിക് ഉദാഹരണങ്ങളാണ്. ഈ ഒരു വിഭാഗത്തിൽ ഒരു സ്പൂഫ് കൊമെടി ടൈപ്പ് ചിത്രം വന്നാൽ എങ്ങനെ ഉണ്ടാവും എന്നൊരു ചിന്ത മുന്നേ ഉണ്ടായിരുന്നു, ഏറെക്കുറെ അതിന് പ്രതീക്ഷിച്ചിരുന്ന ഉത്തരം ആയിരുന്നു സമുറായ് ഷിഫ്റ്റർസ് എന്ന ചിത്രം.

🔸ഹാറൂണാകൊ എന്ന നായക കഥാപാത്രത്തെ നമുക്ക് ചുരുക്കി ഹാറൂണോ എന്ന് തല്ക്കാലം വിളിക്കാം. വലിയൊരു സമുറായ് കമ്മ്യുണിറ്റിയിലെ ലൈബ്രെറിയൻ ആണ് ഹാറൂണോ, മറ്റുള്ള കഥാപാത്രങ്ങളെ പോലെ യുദ്ധത്തിന് പോകാനോ ഇല്ലെങ്കിൽ തയാറെടുക്കാനോ ഒന്നും തന്നെ അയാൾക്ക് താല്പര്യമില്ല, മിക്ക സമയവും പുസ്തകങ്ങളുടെ ലോകത്ത് ചിലവഴിക്കുന്ന അയാൾ ഏറെക്കുറെ ഒരു ഇന്ട്രോവർട്ട് ആണ്, അയാൾക്ക് അയാളുടേതായ ലോകം ഉണ്ട് എന്ന് പറയാം. സമുറായികളെ സംബന്ധിച്ചിടത്തോളം ഇതത്ര നല്ല കാലമല്ല.

🔸സമുറായികളുടെ ഗോൾഡൻ ഏജ് ഏറെക്കുറെ അവസാനിച്ച് കൊണ്ടിരിക്കുകയാണ്, പഴയ കാല ഗതകാല സ്മരണകളെയും മറ്റും അയവിറക്കി ജീവിക്കേണ്ട അവസ്ഥയാണ് മിക്കവർക്കും, ഹാറൂണോ ഭാഗമായ കമ്യുണിറ്റിയും ഇത്തരത്തിൽ ഒന്നാണ്. വലിയ അല്ലലും ബുദ്ധിമുട്ടുകളും ഒന്നുമില്ലാതെ ജീവിക്കാൻ തുടർച്ചയായി യാത്ര ചെയ്യേണ്ടി വരുന്ന അവസ്ഥയാണ് ഈ കമ്യുണിറ്റിക്ക് ഇന്ന്, കഴിഞ്ഞ കുറച്ച് വര്ഷങ്ങളായി അനവധി തവണ ഇവർക്ക് പലായനം ചെയ്യേണ്ടി വന്നിട്ടുണ്ട്. ഈ പലായനം എന്നത് അത്യധികം ബുദ്ധിമുട്ടേറിയ ഒരു കാര്യം തന്നെയാണ്.

🔸പവർ കറപ്‌ഷനും മറ്റും ഒഴിവാക്കാനായി കമ്യുണിറ്റിയുടെ നേതാവിനെ മാറ്റിക്കൊണ്ട് ഇരിക്കുന്നൊരു ശീലം ഈ വിഭാഗക്കാർക്ക് ഉണ്ടായിരുന്നതായി എവിടെയോ കേട്ടത് ഓർമ്മിക്കുന്നു, അതെന്ത് തന്നെ ആയാലും ഇവിടെയും ആ പ്രക്രിയ അരങ്ങേറുന്നുണ്ട്, അതെന്തായാലും ഇത്തവണ പലായനത്തിന്റെ ചുമതലകൾ വന്ന് വീഴുന്നത് ഹാറൂനോയുടെ തലയിലാണ്, നാണവും മറ്റും കാരണം അയാൾക്ക് പരസ്യമായി വിസമ്മതിക്കാൻ പോലും മടി ആയിരുന്നു എന്നതാണ് സത്യം. അങ്ങനെ തികഞ്ഞ അന്തർമുഖനായ, നാണം കുണുങ്ങിയായ ഈ കഥാപാത്രം ആ വലിയ ചുമതല ഏറ്റെടുക്കുകയാണ്.

🔸ഒരു തെറ്റ് സംഭവിച്ചാലോ കണക്ക് കൂട്ടലുകൾ പാളിപ്പോയാലോ എല്ലാ ഉത്തരവാദിത്തവും വന്ന് വീഴുക നേതാവിന്റെ തലയിലായിരിക്കും, അങ്ങനെ ഒരു വലിയ പ്രശനം കൂടി ഡെമോക്ലിസിന്റെ വാൾ പോലെ ഹാറൂനോയുടെ തലക്ക് മുകളിലുണ്ട്. ഇങ്ങനെ ഒക്കെ ആണ് കാര്യം എങ്കിലും ഹാറൂനോയുടെ ബുദ്ധി ശക്തിയും, പ്രശ്നങ്ങൾ പരിഹരിക്കാൻ ഉള്ള കഴിവും എല്ലാം ചോദ്യങ്ങൾക്ക് അപ്പുറമാണ്. ഈ യാത്രയ്ക്കിടയിൽ നമ്മുടെ കഥാപാത്രങ്ങൾക്കും ഹാറൂനോയ്ക്കും നേരിടേണ്ടി വരുന്ന പ്രശ്നങ്ങളും മറ്റുമാണ് ചിത്രത്തിന്റെ പ്രമേയം. ആദ്യം തൊട്ടവസാനം വരെ ചിരിക്കാനുള്ള വകയുണ്ട് ചിത്രത്തിൽ, നല്ലൊരു ക്ളൈമാക്‌സും, പ്രിന്റ് ലഭിച്ചാൽ കാണാൻ ശ്രമിക്കുക.

Verdict : Very Good

DC Rating : 80/100

652. A Banana, At This Time Of Night (2019)

Director : Tetsu Maeda

Genre : Comedy

Rating : 6.5/10

Country : Japan

Duration : 120 Minutes

🔸ഒരു ഫീൽ ഗുഡ് ഇമോഷണൽ ഡ്രാമ ചിത്രം ആയിരിക്കും എന്ന് നൂറ് ശതമാനം ഉറപ്പിച്ച് കാണാൻ തയാറായ ചിത്രമാണ് എ ബനാന അറ്റ് ദിസ് ടൈം ഓഫ് ദി നൈറ്റ്. നമ്മുടെ ജയസൂര്യ അനൂപ് മേനോൻ ചിത്രത്തിന്റെ ചെറിയൊരു ഛായ ഉണ്ട് ഈ ചിത്രത്തിന്, അത് പ്ലോട്ടിൽ നിന്ന് തന്നെ മനസിലാക്കാൻ കഴിയുന്നതുമാണ്. ഏറെക്കുറെ തന്റെ ദൈനം ദിന കാര്യങ്ങൾ എല്ലാം ഒരു വീൽ ചെയറിൽ ഇരുന്ന് ചെയ്യാനായി വിധിക്കപ്പെട്ട കാനോ എന്ന കഥാപാത്രമാണ് ചിത്രത്തിലെ പ്രധാനി, അയാളുടെ സഹായി ആണ് ടാനാകി, അവർക്കിടയിലേക്ക് മിസാകി കടന്ന് വരികയാണ്.

🔸ഒരു ഭാഗത്തേക്ക് ചരിഞ്ഞ് കിടക്കുന്ന തല മറുഭാഗത്തേക്ക് നീക്കി വെക്കാൻ പോലും കഴിയാത്തവനാണ് കാനോ, ആൾ നല്ല പഠിപ്പും വിവരവും ഒക്കെ ഉള്ള വ്യക്തിയാണ്, പന്ത്രണ്ടാം വയസ്സിലോ മറ്റോ തന്റെ മസിലുകളിൽ കണ്ട് തുടങ്ങിയ രോഗ ലക്ഷണം കാലക്രമേണ അയാളെ ഒരു വീൽ ചെയറിൽ ഒതുക്കി കളയുകയാണ്. ഇന്ന് ഇരുന്നിടത്ത് ദേഹം ഒന്നനക്കാതെ ഇരിക്കുക എന്നല്ലാതെ മറ്റൊന്നും അയാളെക്കൊണ്ട് സാധിക്കില്ല. കാനോയെ പരിചരിക്കാനായി ഒരു വലിയ സംഘം ജോലിക്കാർ തന്നെ ആ വീട്ടിലുണ്ട്, ഇവർ രണ്ട് ഷിഫ്റ്റുകളിൽ രാത്രിയും പകലുമായി അയാൾക്ക് സഹായത്തിന് എത്തുന്നുമുണ്ട്.

🔸ഈ ഷിഫ്റ്റുകളിൽ ഒന്നിലെ ഒഴിവ് നികത്താനായാണ് മിസാകി അവിടെ ജോലിക്ക് എത്തുന്നത്, വന്ന് കയറുമ്പോൾ തന്നെ അവൾ കാണുന്ന കാഴ്ച ജോലിക്കാർ എല്ലാവരും തന്നെ പല ഭാഗത്ത് നിന്ന് കൊണ്ട് കാനോയെ കുളിപ്പിക്കുന്നതാണ്. വലിയ താല്പര്യം ഒന്നും ഇല്ലാതെ മറ്റ് മാർഗങ്ങൾ ഇല്ലാതെ ഈ ജോലിക്ക് വന്ന മിസാകിയ്ക്ക് ഉള്ള താല്പര്യം കൂടി ഇതോടെ പോയി, ഏറെക്കുറെ താൻ എത്തിപ്പെട്ട ചുറ്റുപാടിനെ കുറിച്ചൊരു ഐഡിയ അവൾക്ക് ഇവിടെനിന്ന് ലഭിക്കുകയാണ്. എന്ത് വേണമെന്ന് ഒരു എത്തുംപിടിയും ഇല്ലാതെ നിൽക്കുന്ന വേളയിലാണ് അവൾ ടാനാകിയെ കാണുന്നത്.

🔸മിസാകിയ്ക്കും ടനകിയ്ക്കും ഇടയിൽ ചില പഴയ ചരിത്രമുണ്ട്, ഇരുവരും പഴയ സുഹൃത്തുക്കളും ഒരു പരിധി വരെ കമിതാക്കളും ആയിരുന്നെന്ന് ഈ ഭാഗത്ത് ചിത്രം സൂചിപ്പിക്കുന്നുണ്ട്. മിസാകി വന്ന് പെട്ട ദിവസം എന്തായാലും പല പ്രത്യേകതകളും ഉള്ളതായിരുന്നു, അന്നേദിവസം ടനകിയോടൊപ്പം നൈറ്റ് ഷിഫ്റ്റിനായി നറുക്ക് വീഴുന്നത് മിസാകിയ്ക്കാണ്. മിസാകിയിൽ താല്പര്യം തോന്നിയ കാനോയുടെ വാക്കുകളും ക്‌ളാസും എല്ലാം അവളെ ഉറക്കത്തിലേക്ക് തള്ളി വിടുന്നതിന് ഇടയിലാണ് ഒരു പ്രത്യേക ആഗ്രഹം അയാളിൽ ഉടലെടുക്കുന്നത്, ആഗ്രഹം വേറൊന്നുമല്ല തനിക്ക് ഒരു വാഴപ്പഴം വേണമെന്ന്.

🔸ഈ നട്ടപ്പാതിര രാത്രി രണ്ട് മണിക്ക് നിന്റെ അച്ഛൻ എടുത്ത് വെച്ചിരിക്കുന്നോ വാഴപ്പഴം എന്നൊരു ചോദ്യം രണ്ട് പരിചാരകരിലും കാണുന്ന നമ്മളിലും ഉണ്ടാവും, എങ്കിലും മുതലാളിയുടെ ആഗ്രഹം നടത്താനായി അവർ തീരുമാനിക്കുകയാണ്, ഇവിടെ നിന്നും ചിത്രം ട്രാക്ക് മാറി മുന്നോട്ട് പോവുകയാണ്. ഒരു ഫീൽ ഗുഡ് ശൈലിയിൽ തന്നെയാണ് ഈ ചിത്രം പുരോഗമിക്കുന്നത്, എന്നാൽ ഈ ജോണറിൽ ഏഷ്യയിൽ നിന്നും നമ്മൾ കണ്ട മികച്ച പല ചിത്രങ്ങളുമായി തട്ടിച്ച് നോക്കുമ്പോൾ വലിയ സംഭവമായി ഒന്നും പറയാനുമില്ല. ഒരു ഓളത്തിൽ അങ്ങനെ കണ്ടു പോവാം ഈ ചിത്രം.

Verdict : Good

DC Rating : 70/100

651. Your Name (2016)

Director : Makoto Shinkai

Genre : Animation

Rating : 8.4/10

Country : Japan

Duration : 107 Minutes

🔸ജാപ്പനീസ് അനിമേ ചിത്രങ്ങളുടെ മേന്മയും പ്രാവീണ്യവും പറഞ്ഞ് അറിയിക്കേണ്ട കാര്യമില്ല, ഏറ്റവും കുറഞ്ഞത് ഒരു നൂറ് മികച്ച സിനിമകൾ എങ്കിലും ഈ ഒരു വിഭാഗത്തിൽ കാണിച്ച് തരാൻ കഴിഞ്ഞേക്കും എന്ന വസ്തുത മാത്രം മതി അതിനെല്ലാം ഉദാഹരണമായി. അനിമേകളുടെ സ്ട്രോങ്ങ് പോയന്റായ സീരീസുകളെ കുറിച്ച് പറയുന്നില്ല, കാരണം ആ ഭാഗത്തേക്ക് കടന്നാൽ കാര്യം കൈവിട്ട് പോവും. വെതറിങ് വിത് യു, ഫൈവ് സെന്റിമീറ്റർ പെർ സെക്കൻഡ് തുടങ്ങി ഒരുപിടി മികച്ച അനിമേ ചിത്രങ്ങൾ നമുക്ക് നൽകിയ ശിങ്കായിയുടെ ഏറ്റവും മികച്ച വർക്ക് ആയിരിക്കും ഒരുപക്ഷെ യുവർ നെയിം എന്ന ചിത്രം.

🔸വളരെ രസകരമായ ഒരു കൺസപ്റ്റ് ആണ് യുവർ നെയിം എന്ന ചിത്രത്തിന്റേത്, ഹൈ സ്‌കൂൾ വിദ്യാർത്ഥിയായ മിത്സുഹ ആണ് നമ്മുടെ പ്രധാന കഥാപാത്രങ്ങളിൽ ഒന്ന്, ഈ കഥാപാത്രം നാട്ടിൻ പുറത്തുള്ള തന്റെ ജീവിതം ഏറെക്കുറെ മടുത്ത് തുടങ്ങിയ വ്യക്തിയാണ്, പട്ടണത്തിലെ പരിഷ്‌കൃതമായ സംസ്കാരത്തോടും രീതികളോടുമാണ് അവൾക്ക് താല്പര്യം. അതെന്ത് തന്നെ ആയാലും ഒരു ദിവസം മിത്സുഹായുടെ ജീവിതത്തിൽ ഒരു അത്ഭുതം അരങ്ങേറുകയാണ്, തുറന്ന് പറഞ്ഞാൽ തന്റെ അടുത്ത സുഹൃത്തുക്കളോ എന്തിന് അനുജത്തിയോ പോലും വിശ്വസിക്കാൻ സാധ്യതയില്ലാത്ത ഒരു അത്ഭുതം.

🔸സംഭവം വേറൊന്നുമല്ല, ഒരുനാൾ ഉറക്കം ഉണർന്ന മിൽസുഹ ഒരു കാര്യം മനസിലാക്കുകയാണ്, താൻ താനല്ല എന്നും വേറാരൊ ആണ് എന്നും. ലളിതമായി പറയാം, മിത്സുഹായുടെ ശരീരം ഉറക്കം ഉണർന്നപ്പോൾ മനസിലാവുന്നത് ഉള്ളിലെ കോൺഷ്യസ്നെസ്സ് മറ്റാരുടേതോ ആണെന്നാണ്. പ്രശനം കൂടുതൽ വഷളാവുന്നത് ആ പെൺ ശരീരത്തിനുള്ളിൽ ഉള്ളത് ആണായ ടാക്കിയുടെ കോൺഷ്യസ്നെസ്സ് ആണെന്ന് ബോധ്യപ്പെടുമ്പോഴാണ്. ഈ പ്രശ്നങ്ങളിലേക്ക് കടക്കുന്നതിന് മുന്നേ ടാക്കിയെ കുറിച്ച് ചെറുതായി പറഞ്ഞിടാം.

🔸പട്ടണത്തിൽ ജനിച്ച് വളർന്നവനാണ് ടാക്കി, ഏറെക്കുറെ മിത്സുഹായുടെ അതേ പ്രായം. പഠനത്തിനോടൊപ്പം തന്നെ ചെറിയ ചില ജോലികളും ചെയ്യുന്ന അവന് സഹപ്രവർത്തകരിൽ ഒരാളോട് പ്രണയവുമുണ്ട്, എന്നാൽ ഇത് തുറന്ന് പറയാനോ പ്രകടിപ്പിക്കാനോ ഉള്ള ധൈര്യം ഒട്ടില്ലതാനും. ഈ ഒരു അവസരത്തിൽ മിൽസുഹായുടെ കാര്യത്തിൽ സംഭവിച്ച അതെ അത്ഭുത പ്രവർത്തി ടാക്കിയുടെ അടുത്തും നടക്കുകയാണ്, അങ്ങനെ ഒരു വെച്ച് മാറൽ പ്രക്രിയ ഇവിടെ രണ്ട് പേർക്കുമിടയിൽ അരങ്ങേറുകയാണ്.

🔸മുകളിൽ സൂചിപ്പിച്ചത് കഥയുടെ ആദ്യ പത്ത് അല്ലെങ്കിൽ പതിനഞ്ച് മിനിറ്റ് മാത്രം അരങ്ങേറുന്ന കാര്യങ്ങളാണ്, ഈ ഒരു പോയിന്റിന് ശേഷം ഒരുപാട് ട്വിസ്റ്റും ടെർണും കഥയിലേക്ക് കടന്നുവരുന്നുണ്ട്, എന്ന് മാത്രമല്ല അപ്രതീക്ഷിതമായ പല കോണിലേക്കും കഥ നീങ്ങുന്നുമുണ്ട്. യുവർ നെയിം എന്ന ചിത്രം അതിന്റെ ക്ലൈമാക്സിൽ എത്തുമ്പോൾ നൽകുക വല്ലാത്തൊരു തരം സംപ്ത്രിപ്തിയാണ്, തികച്ചും അനുഭവിച്ച് തന്നെ അറിയേണ്ട ഒരു വികാരം അല്ലെങ്കിൽ എക്സ്പീരിയൻസ്. അനിമേ ആരാധകർ കണ്ടിരിക്കും എന്നറിയാം, കാണാത്തവർ കാണാൻ ശ്രമിക്കുക.

Verdict : Very Good

DC Rating : 87/100

650. Marriage Story (2019)

Director : Noah Baumbach

Genre : Family

Rating : 8.5/10

Country : USA

Duration : 136 Minutes

🔸ഈ വർഷം ഇതുവരെ ഉണ്ടായൊരു പാറ്റേൺ ഉണ്ട്, ഒരു ചിത്രം കണ്ട് കഴിഞ്ഞാൽ തോന്നും ഇതാണ് ഏറ്റവും മികച്ചത് എന്ന്, ആ ഒരു പാറ്റേണിൽ അങ്ങനെ പോവുമ്പോഴായിരിക്കും ഒട്ടും പ്രതീക്ഷിക്കാത്ത മറ്റൊരു ചിത്രം വരുന്നതും മുന്നേ സൂചിപ്പിച്ച ചിത്രത്തിന് നൽകിയ സ്ഥാനം തട്ടിയെടുക്കുന്നതും. വൺസ് അപ്പോൺ എ ടൈം ഇൻ ഹോളിവുഡ്, ടോയ് സ്റ്റോറി 4, റോക്കറ്റ്മാൻ, ജോക്കർ തുടങ്ങി ഐറിഷ്‌മാൻ വരെ എത്തിയ ആ പാറ്റേൺ മാരിയേജ് സ്റ്റോറി ആവർത്തിക്കുകയാണ്, ഇതാണ് ബെസ്റ്റ്, ഈ വർഷം പേഴ്സണലി കണ്ട ഏറ്റവും മികച്ച ഫാമിലി ഡ്രാമ ചിത്രം എന്ന് ഒരു സംശയത്തിനും ഇട ഇല്ലാതെ വ്യക്തമായി പറയാൻ സാധിക്കുന്ന ഐറ്റം.

🔸സ്കാർലറ്റ് ജോഹാൻസൺ അവതരിപ്പിക്കുന്ന നിക്കോൾ എന്ന കഥാപാത്രവും ആദം ഡ്രൈവറുടെ ചാർളി എന്ന കഥാപാത്രവും വിവാഹിതരാണ്. ദീർഘ നാളുകളായി സന്തോഷത്തോടെ ജീവിച്ച് പോന്ന ഇരുവരുടെയും ദാമ്പത്യ ജീവിതം ഇന്നത്ര നല്ല അവസ്ഥയിലല്ല, ഒരു ആൺകുട്ടിയുടെ മാതാപിതാക്കളായ ഇരുവരും ഇന്ന് ഡിവോഴ്സിന്റെ വക്കിലാണ്. സുഹൃത്തുക്കളുടെയും കൗണ്സിലറുടെയും ഒന്നും അനുനയ ശ്രമങ്ങൾ വിജയിച്ചിട്ടില്ല എന്ന് മാത്രമല്ല വേർപിരിയാൻ ഉള്ള ഇരുവരുടെയും കാരണങ്ങൾക്ക് ശക്തി പകർന്നിട്ടേ ഉള്ളൂ, ഈ ഒരു അവസ്ഥയിലാണ് ചിത്രം കഥ പറഞ്ഞ് തുടങ്ങുന്നത്.

🔸രണ്ട് പ്രധാന കഥാപാത്രങ്ങളും മറ്റെയാളെ കുറിച്ച് തങ്ങളുടെ ബന്ധത്തിന്റെ തുടക്ക കാലത്ത് എഴുതി വെച്ച കുറിപ്പുകൾ നരേറ്റ് ചെയ്ത് കൊണ്ടാണ് സിനിമ ആരംഭിക്കുന്നത്, പറയാൻ ഉള്ളത് എല്ലാം നല്ല കാര്യങ്ങൾ മാത്രം. ഒരുവേള ഈ രണ്ട് കഥാപാത്രങ്ങളും പെർഫെക്റ്റ് ആണ് എന്നൊരു തോന്നൽ വരെ കാഴ്ചക്കാരന് ഉണ്ടായേക്കാം. ഈ ഒരു പോയിന്റിൽ നിന്നും ചിത്രം തൊട്ടടുത്ത സീനിൽ പോവുന്നത് കൗൺസിലിംഗ് റൂമിലേക്കാണ്, പരസ്പരം ഒന്ന് നോക്കാൻ പോലും മടിക്കുന്ന തോതിലേക്ക് ഇവർ ഇരുവരും വെറുത്ത് കഴിഞ്ഞിരിക്കുന്നു. ആദ്യം സൂചിപ്പിക്കുന്ന കുറിപ്പ് ഇപ്പോൾ വായിക്കാൻ തനിക്ക് അറപ്പ് ആണെന്നാണ് ഇതിലൊരു കഥാപാത്രം പറയുന്നത്.

🔸ഫാന്റസിയിൽ നിന്നും റിയാലിറ്റിയിലേക്കുള്ള ആ വീഴ്ച തന്നെ ഒരു കാഴ്ചക്കാരനെ ചിത്രത്തോട് ഹുക് ചെയ്തിട്ടിരിക്കും എന്നതാണ് യാഥാർഥ്യം. ഈ ഒരു പോയിന്റിലും ചോദ്യങ്ങൾ ഒരുപാട് ബാക്കിയാണ്, ടാലന്റഡ് ആയ തിയേറ്റർ ഡയറക്ടറായ ചാർളിയും അഭിനേത്രിയായ നിക്കോളും തങ്ങളുടെ പേഴ്സണൽ ലൈഫിലും പ്രൈവറ്റ് ലൈഫിലും ഹാപ്പി ആയിരുന്നു, കുറച്ച് നാൾ മുൻപ് വരെ. അപ്പോൾ ഈ ഒരു ചുരുങ്ങിയ കാലത്തിനിടെ ഈ ബന്ധം ഇത്രമേൽ ഉലച്ച കാര്യം എന്തായിരിക്കും, അതോ ഇനി വർഷങ്ങളായുള്ള ചെറിയ ചെറിയ കാര്യങ്ങളുടെ കൂടിച്ചേരൽ ആണോ ഈ പൊട്ടിത്തെറിക്ക് കാരണം, എന്തായാലും കഥ ഇങ്ങനെ റിവീൽ ചെയ്ത് റിവീൽ ചെയ്ത് വരികയാണ്.

🔸വളരെ സീരിയസ് ആയൊരു വിഷയം, അതിലും ഗൗരവത്തിൽ അവതരിപ്പിക്കുന്ന ചിത്രമാണ് മാര്യേജ് സ്റ്റോറി. രണ്ട് ദമ്പതിമാർക്കിടയിൽ ഉള്ള ബന്ധം അതിന്റെ തുടക്കത്തിലുള്ള ഫാസിനേഷൻ, യാഥാർഥ്യത്തിലേക്ക് കടക്കുമ്പോൾ ഉണ്ടാവുന്ന തിരിച്ചറിയലുകൾ, ഈ തിരിച്ചറിയലുകൾ കാരണം ഉടലെടുക്കുന്ന പ്രശ്നങ്ങൾ, ഈ പ്രശ്നങ്ങൾ കാരണം വരുന്ന വിള്ളലുകൾ, ഇത് വഴി വെക്കുന്ന വീഴ്ച എന്നിവയെല്ലാം അസാധാരണമാം വിധം മനോഹരമായി സിനിമ അവതരിപ്പിച്ചിട്ടുണ്ട്. രണ്ട് പ്രധാന കഥാപാത്രങ്ങളും തങ്ങളുടെ കഴിവിന്റെ പരമാവധി ചിത്രത്തിനായി പുറത്തെടുത്തിട്ടുണ്ട്, പ്രത്യേകിച്ചും കഥാഗതിയിൽ വളരെ നിർണായകമായ ആ ആർഗ്യുമെന്റ് സീനിൽ. ഈ വർഷത്തെ ഏറ്റവും മികച്ച അഞ്ച് ചിത്രങ്ങളിൽ ഒന്ന്, അതിൽ കൂടുതൽ ഒരു വിശേഷണമില്ല.

Verdict : Must Watch

DC Rating : 92/100

649. Knives Out (2019)

Director : Rian Johnson

Genre : Mystery

Rating : 8.1/10

Country : USA

Duration : 130 Minutes

🔸ഈ അന്യായ ഹൈപ്പിൽ കാണുന്ന സിനിമകൾ മിക്കപ്പോഴും അങ് ഏൽക്കാറില്ല, കേട്ട് മടുത്ത പ്രതീക്ഷയുടെ അമിതഭാര ക്ളീഷേ തന്നെ കാര്യം. ഇങ്ങനെ ഇഷ്ടപ്പെടാതെ പോയ ചിത്രങ്ങൾ അനവധിയുണ്ട്, അതിൽ ചിലതിന്റെ പേര് പറഞ്ഞാൽ കടപ്പുറം ഇളകും എന്നൊക്കെ പറയാവുന്ന അവസ്ഥയാണ്. ഒരു ചെറിയ ഉദാഹരണമായി നമ്മുടെ ഗ്ലാഡിയേറ്ററും ബ്രെയ്‌വ് ഹാർട്ടും, ഇൻസെൻഡീസും വരെ പറയാം, ഈ ഒരു വിഭാഗത്തിൽ നൈവ്സ് ഔട്ട് ഉൾപ്പെടുത്തേണ്ടി വരുമോ എന്നതായിരുന്നു പേടി, ഭാഗ്യം എന്നവണ്ണം അതുണ്ടായില്ല എന്ന് മാത്രമല്ല ഈ വർഷം കണ്ട് ഏറ്റവും ആസ്വദിച്ച ചിത്രങ്ങളിൽ ഒന്ന് ഇതായിരിക്കും.

🔸ഈ വർഷത്തെ ഏറ്റവും മികച്ച ചിത്രം എന്ന അഭിപ്രായം ഇല്ല, എന്നാൽ മികച്ചവയുടെ പട്ടികയിൽ ഉണ്ടാവും എന്ന കാര്യത്തിൽ ഒട്ട് സംശയവുമില്ല. വലിയ തർക്കം ഏതും ഇല്ലാതെ സമ്മതിക്കാൻ കഴിയുന്ന ഒരു വസ്തുത ഈ ചിത്രം ഈ വർഷത്തെ ഏറ്റവും മികച്ച ഹു ഡൺ ഇറ്റ് ആണ് എന്നതാണ്. മികച്ചൊരു കാസ്റ്റും, നല്ലൊരു കഥയും അത് വികസിപ്പിച്ച് എടുക്കുന്ന ട്രീറ്റ്മെന്റും എല്ലാം കൊണ്ട് മികച്ചൊരു അനുഭവം ആവുന്നുണ്ട് ഈ ചിത്രം. സബ്സ്റ്റൻസിനൊപ്പം സ്റ്റൈലും ചിത്രത്തിന്റെ എടുത്ത് പറയേണ്ട ഒരു പ്ലസ് പോയിന്റാണ്, നല്ല ദൃശ്യങ്ങളും ബാക്ക്ഗ്രൗണ്ടും അറ്റൻഷൻ പിടിച്ച് പറ്റുന്ന വൻ താരനിരയും.

🔸പണക്കാരനായ ഹർലാൻ ത്രോംബലി തന്റെ എൺപത്തഞ്ചാമത് പിറന്നാൾ ആഘോഷിക്കാൻ ഉള്ള തയാറെടുപ്പിലാണ്, അതിനായി അയാൾ തന്റെ ബന്ധു മിത്രാദികളെ എല്ലാം വിളിച്ച് കൂട്ടിയിട്ടുണ്ട്. അത്യാവശ്യം പൊടി പൊടിച്ച പരിപാടിക്ക് ശേഷം പിറ്റേദിവസം എല്ലാവരും കാണുന്നത് കൊല്ലപ്പെട്ട് കിടക്കുന്ന ഹർലാനെയാണ്. ആര്, എന്തിന്, എങ്ങിനെ എന്ന കാര്യങ്ങൾ മറ നീക്കി പുറത്ത് കൊണ്ടുവരാനായി ഡാനിയേൽ ക്രെയ്ഗ് അവതരിപ്പിക്കുന്ന ബെനോയിട്ട് ബ്ലാങ്ക് അവിടേക്ക് കടന്ന് വരികയാണ്. ഇതാണ് ഒരു നട്ട്ഷെല്ലിൽ ചിത്രത്തിന്റെ പ്ലോട്ട് ലൈൻ.

🔸ചിത്രത്തെ കുറിച്ച് പറയുക ആണെങ്കിൽ മോശമായി അനുഭവപ്പെട്ട കാര്യങ്ങൾ അധികമില്ല, തേർഡ് ആക്റ്റ് അത്ര എഫക്റ്റീവ് ആയി തോന്നിയില്ല എന്ന് വേണമെങ്കിൽ പറയാം, അത് പക്ഷെ മർഡർ ഓൺ ഓറിയെന്റ എക്സ്പ്രസ്സ് പോലെയുള്ള ചിത്രങ്ങൾ കണ്ടതിന്റെ ഓർമയാൽ ആവണം. നല്ല കാര്യങ്ങളെ പറ്റി പറയുക ആണെങ്കിൽ, ആദ്യമേ തന്നെ ചിത്രത്തിന്റെ കാസ്റ്റിനെ കുറിച്ച് പറയാം. ഡാനിയേൽ ക്രെയ്ഗ്, ക്രിസ് ഇവാൻസ്, ജാമി ലീ കർട്ടിസ്, അന ഡി അൽമാസ്, ക്രിസ് പ്ലമ്മാർ തുടങ്ങി ഒരു എ ലിസ്റ്റ് കാസ്റ്റ് തന്നെ ചിത്രത്തിനുണ്ട്, എന്ന് മാത്രമല്ല ഇവരെ വെയ്സ്റ്റ് ചെയ്യുന്നുമില്ല.

🔸നല്ല ഷാർപ്പ് ആയ ഛായാഗ്രഹണവും, നന്നായി അനുഭവപ്പെട്ട കളർ ടോണുകളും, കിടിലൻ സ്കോറും എല്ലാം കൂടി ചേരുമ്പോൾ ഏറെക്കുറെ എല്ലാ കോളത്തിലും ചിത്രം ടിക്ക് മാർക്ക് വാങ്ങി കഴിഞ്ഞു. തന്റെ സ്ഥിരം ശൈലി ഒന്ന് മാറ്റിപ്പിടിച്ച ക്രിസ് ഇവൻസിനെ ഇഷ്ട്ടപ്പെട്ടെങ്കിലും സീൻ സ്റ്റീലർ എന്നൊക്കെ പറയാൻ തോന്നിയത് അന അൽമാസിനെയാണ്, അഗതാ ക്രിസ്റ്റിയോടുള്ള ഹോമേജ് എന്നവണ്ണം ഹെർക്കുലി പൊയ്‌റോവിന്റെ ചെറിയൊരു എഫക്ട് ക്രെയ്ഗിന്റെ കഥാപാത്രത്തിൽ കാണാനുമുണ്ട്. കൂടുതൽ പറയുന്നില്ല, തിയേറ്റർ വാച്ച് അർഹിക്കുന്നുണ്ട്, കൊടുത്ത പൈസയ്ക്ക് നൂറ് ശതമാനം വർത്ത് ആയ ഈ ചിത്രം, കാണാൻ ശ്രമിക്കുക.

Verdict : Very Good

DC Rating : 88/100

648. Star Wars Episode 4 - A New Hope (1977)

Director : George Lucas

Genre : Sci Fi

Rating : 8.6/10

Country : USA

Duration : 126 Minutes

🔸ഇവിടെ നിന്നാണ് തുടക്കം, എല്ലാത്തിന്റെയും, ഒരു ബില്യൺ ഡോളർ ഫ്രാഞ്ചൈസിന്റെയും ലോകത്താകമാനം ഉള്ള ആരാധകരുടെയും തുടർന്നിങ്ങോട്ട് നാല്പത്തി രണ്ട് വർഷമായി നിൽക്കുന്ന ഫിനോമിനൻ എന്നൊക്കെ വിശേഷിപ്പിക്കാവുന്ന സംഭവത്തിന്റെ ആരംഭം ഇവിടെ നിന്നുമാണ്. വെയ്ഡർ, സ്‌കൈവാക്കർ, ഹാൻ സോളോ തുടങ്ങി പിന്നീട് ഒരുപാട് ഇഷ്ട്ടപ്പെട്ട പല കഥാപാത്രങ്ങളുടെയും ആരംഭവും ഇവിടെ നിന്ന് തന്നെ, അങ്ങനെ ചുരുക്കി പറയുക ആണെങ്കിൽ വളരെ പ്രാധാന്യമുള്ള ഒരു ചിത്രമാണ് എ ന്യു ഹോപ്പ്.

🔸വലിയ ഇൻട്രൊഡക്ഷൻ ഒന്നും ഇല്ലാതെ സ്ട്രെയിറ്റ് ആയിട്ട് നമ്മൾ സ്റ്റോറിയിലേക്ക് കടക്കുകയാണ്, ഗാലക്‌സി ഒന്നടങ്കം ഒരു ആഭ്യന്തര കലഹത്തിൽ പെട്ടിരിക്കുകയാണ്. ഒരുവശത്ത് ദാർത്ത് വെയ്ഡരുടെയും എംപെരരുടേയും നേതൃത്വത്തിൽ ഉള്ള ഗാലക്ടിക് എമ്പയർ ആണെങ്കിൽ മറുവശത്ത് ലെയ രാജകുമാരി നേതൃത്വം നൽകുന്ന വിപ്ലവകാരികളാണ്. ഗാലക്‌സി ഒന്നടങ്കം നശിപ്പിക്കാൻ ശേഷിയുള്ള, ഉഗ്ര വീര്യമുള്ള ഒരു ആയുധം എമ്പയർ സൃഷ്ടിച്ചിരിക്കുകയാണ്, ഡെത് സ്റ്റാർ എന്ന് വിളിപ്പേരുള്ള ഈ ആയുധം സത്യത്തിൽ ഒരു കൈവിട്ട കളി തന്നെയാണ്.

🔸ഈ ആയുധത്തിന് വെല്ലുവിളി തീർക്കാൻ കഴിവുള്ള, അല്ലെങ്കിൽ നിർമാർജ്ജനം ചെയ്യാൻ കഴിവുള്ള ഒരു പ്ലാൻ ലേയ ഓർഗാനയുടെ കൈവശം ലഭിച്ചിട്ടുണ്ട്, അത് ഏത് വിധേനയും തങ്ങളുടെ ആവശ്യത്തിന് ഉപയോഗിക്കാൻ ഉള്ള ശ്രമത്തിലാണ് അവർ, എന്നാൽ മറുഭാഗത്ത് എമ്പരരെ സംബന്ധിച്ചിടത്തോളം ഈ പ്ലാൻ തങ്ങളുടെ എതിരാളിയുടെ കൈവശം എത്തുക എന്നത് ആപൽക്കരവും തികഞ്ഞ പരാജയത്തിന് ഉദാഹരണവുമാണ്, അതിനാൽ ഏത് വിധേനയും അത് കൈക്കലാക്കാൻ ഉള്ള ശ്രമത്തിലാണവർ.

🔸ലേയ ഓർഗാന വെയ്ഡരുടെ പടയാളികളുടെ പിടിയിലാവുന്നിടത്ത് നിന്നാണ് ചിത്രം ആരംഭിക്കുന്നത്, അവരുടെ കൈവശം ഉള്ള പ്ലാൻ നേടിയെടുക്കാൻ ശ്രമിച്ചെങ്കിലും ആ ശ്രമങ്ങളെല്ലാം പരാജയമായി തീരുകയായിരുന്നു. ഇതിനിടെ ബുദ്ധിപൂർവം ലെയ ഈ പ്ലാനുകൾ തന്റെ പഴയൊരു കുടുംബ സുഹൃത്തും ആശ്രിതനുമായ ഒബിവാന്റെ പക്കലേക്ക് അയച്ച് കൊടുത്തിരുന്നു. ഇവിടെ നിന്നുമാണ് ചിത്രം ആരംഭിക്കുന്നത്, ഈ കഥയിലേക്കാണ് നായക കഥാപാത്രങ്ങളായ ഹാൻ സോളോയും ലൂക് സ്‌കൈവാക്കറും എല്ലാം കടന്ന് വരുന്നത്.

🔸ഒരു ട്രിലോഗി ആയി ചിന്തിക്കാതെ സ്റ്റാൻഡ് അലോൺ ആയൊരു സിനിമ ആയാണ് ജോർജ്ജ് ലൂക്കാസ് ഈ ചിത്രം പ്ലാൻ ചെയ്തിരുന്നത് എന്ന് കേട്ടിരുന്നു, അത് എത്രത്തോളം വിശ്വാസ യോഗ്യം ആണെന്ന് പറയാനാവില്ല കാരണം ഒരു കൃത്യമായ എൻഡിങ് ഈ ചിത്രത്തിൽ കാണാൻ സാധിച്ചേക്കില്ല, വലിയൊരു പസിലിന്റെ നിർണായകമായ ഒരു പീസ് മാത്രമാണ് എ ന്യു ഹോപ്പ്, ഒരു കാരണവശാലും ഒഴിവാക്കാൻ പറ്റാത്തത് എന്ന് നിസ്സംശയം പറയാം. അന്നത്തെ ടെക്കനോളജികൾ ഒക്കെ കാണുമ്പോൾ ഇന്ന് കൊമെടി ആയി തോന്നിയേക്കാം എങ്കിലും കണ്ടിരിക്കേണ്ട മികച്ചൊരു ചിത്രം തന്നെയാണ് സ്റ്റാർ വാർസ് എ ന്യു ഹോപ്പ്.

Verdict : Must Watch

DC Rating : 90/100

647. Ad Astra (2019)

Director : James Gray

Genre : Sci Fi

Rating : 7/10

Country : USA

Duration : 125 Minutes

🔸റോയ് മക്‌ബ്രൈഡ് എന്ന നായക കഥാപാത്രത്തിന്റെ വോയിസ് ഓവറോഡ് കൂടിയാണ് ചിത്രം ആരംഭിക്കുന്നത്. തുടക്കത്തിൽ അയാളുടെ ദൗത്യത്തെ കുറിച്ച് വലിയൊരു വ്യക്തത ഒന്നും ചിത്രം നല്കുന്നില്ലെങ്കിലും എന്തോ കാര്യപ്പെട്ട ഒരു യാത്രയ്ക്കായി അയാൾ ഇറങ്ങുക ആണെന്ന് വ്യക്തമാണ്, ശാരീരികവും മാനസികവുമായി അയാൾ ആ യാത്രയ്ക്ക് തയ്യാറെടുത്ത് കഴിഞ്ഞിരിക്കുകയാണ്, സ്വന്തം വാക്കുകളിൽ പറയുക ആണെങ്കിൽ ജീവിതത്തിൽ അതുവരെ നടന്ന സകല സംഭവങ്ങളും കാര്യങ്ങളും അനുഭവങ്ങളും എല്ലാം ഈ ഒരു പോയിന്റിലേക്ക് അല്ലെങ്കിൽ ആരംഭിക്കാനിരിക്കുന്ന യാത്രയിലേക്ക് വന്ന് ചേർന്നിരിക്കുകയാണ്.

🔸ബഹിരാകാശം പ്രമേയമായ ചിത്രം ആയിരുന്നിട്ട് കൂടി ഒരല്പം ഫിലോസഫിക്കൽ ആണ് ഈ ചിത്രം. റോയ് മക്‌ബ്രൈഡ് എന്ന കഥാപാത്രത്തിന്റെ മാനസിക നിലയ്ക്കും ഭൂത കാലത്തിനും എല്ലാം പ്രാധാന്യം നൽകുന്ന രീതിയിൽ വോയിസ് ഓവറിലൂടെയാണ് ചിത്രത്തിന്റെ നല്ലൊരു ഭാഗം പുരോഗമിക്കുന്നത്. ഒരുവേള ഈ വോയിസ് ഓവർ അധികമായി പോയോ എന്നൊരു സംശയം പോലും ഉയർന്നു, സ്പൂൺ ഫീഡിങ്ങിലേയ്ക്കും ചിലയിടത്ത് ചിത്രം കടന്നതായി തോന്നി. ദീർഘനാൾ പ്രൊഡക്ഷനിൽ ഇരുന്നും ചിത്രീകരണ വേളയിൽ ഒരുപാട് തടസ്സം നേരിട്ടും നന്നേ ബുദ്ധിമുട്ടിയാണ് ആഡ് ആസ്ട്ര തിയേറ്ററുകളിൽ എത്തിയത്.

🔸ഇന്ത്യയിൽ റിലീസ് പറഞ്ഞിരുന്ന ദിവസത്തിന് രണ്ട് ദിവസം മുന്നേ പാടെ റിലീസ് ഒഴിവാക്കി ഈ ചിത്രത്തിന്റെ അണിയറ പ്രവർത്തകർ കാണിച്ച ചതിയോളം വലുതൊന്ന് ഈ വർഷം മറ്റൊന്ന് കാണിച്ച് തരാനില്ല. പ്രധാനമായും രണ്ട് കാരണങ്ങൾ കൊണ്ടാണ് ഈ ചിത്രത്തിനായി കാത്തിരുന്നത്, ഒന്ന് സ്പേസ് ഫിലോസഫിക്കൽ ചിത്രം എന്ന രസകരമായി തോന്നിയ കൺസപ്റ്റ് കാരണം, മറ്റൊന്ന് ചിത്രത്തിന്റെ പ്രിലിമിനറി ഷോയിൽ പടം കണ്ടൊരു ക്രിട്ടിക്ക് ഈ ചിത്രത്തിന് നൽകിയ 'അപോകലിപ്സ് നൗ ഇൻ സ്‌പെയ്‌സ്' എന്ന വിശേഷണം കാരണം. ഇത് തള്ളാവാൻ ആയിരുന്നു സാധ്യത കല്പിച്ചതെങ്കിലും ആ താരമത്യം, അത് ധാരാളം ആയിരുന്നു.

🔸പ്രമേയത്തിലും അവതരണത്തിലും സാമ്യതകൾ ഉണ്ട് രണ്ട് ചിത്രങ്ങൾ തമ്മിലും, രണ്ടിടത്തും ജീവിതം കൈവിട്ട് പോയികൊണ്ടിരിക്കുന്ന നായക കഥാപാത്രം വർഷങ്ങൾക്ക് മുന്നേ കാണാതായ ഒരു കഥാപാത്രത്തെ തേടി യാത്ര തിരിക്കുന്നതാണ്, ഇവിടെ വ്യത്യാസം എന്താണെന്ന് വെച്ചാൽ റോയ് അന്വേഷിച്ചിറങ്ങുന്നത് സ്വന്തം അച്ഛനെ ആണ് എന്നതാണ്. പതിറ്റാണ്ടുകൾക്ക് മുന്നേ ഒരു പര്യവേഷകനായി ഭൂമി വിട്ട ആളാണ് റോയിയുടെ അച്ഛനായ ക്ലിഫ്‌ഫോർഡ്, പിന്നീട് ഒരു വിവരവും ഉണ്ടായിട്ടില്ല, എന്തിനധികം ഇന്നയാൾ ജീവനോടെ ഉണ്ടോ എന്ന് പോലും ഉറപ്പില്ല. ഈ ക്ലിഫ്‌ഫോർഡിനെ അന്വേഷിച്ചാണ് റോയ് ഇറങ്ങി പുറപ്പെടുന്നത്.

🔸ചിത്രത്തിൽ നിന്നും പ്രതീക്ഷിച്ചത് എന്താണോ, അത് നല്ല അന്തസ്സായി മടക്കി തരുന്നുണ്ട് എന്നത് എടുത്ത് പറയണം. പെർഫോമൻസ് വെച്ച് എല്ലാവരും ടോപ് ഫോമിലാണ്, നല്ല വിഷ്വൽസും സിനിമാട്ടോഗ്രഫിയും എല്ലാം ചിത്രത്തിന്റെ എടുത്ത് പറയേണ്ട പ്രത്യേകതകളാണ്, പ്രത്യേകിച്ചും ഓപ്പൺ അക്ടിലേത്. അതുവരെ ഉള്ള ടോണിൽ നിൽക്കാതെ ത്രിൽ മോഡിലേക്ക് പോവുന്ന ഫൈനൽ ആക്റ്റും മികച്ചതായിരുന്നു, ചുരുക്കി പറയുക ആണെങ്കിൽ തീർച്ചയായും നല്ലൊരു ചിത്രമാണ് ആഡ് ആസ്ട്ര, കാണാൻ ശ്രമിക്കുക.

Verdict : Very Good

DC Rating : 80/100

646. I Lost My Body (2019)

Director : Jeremy Clapin

Genre : Animation

Rating : 7.7/10

Country : France

Duration : 81 Minutes

🔸ജീവൻ തോന്നിപ്പിക്കുന്ന, കുറച്ച് കൂടി വെറൈറ്റി ആയി പറയുക ആണെങ്കിൽ ഹാർട്ട് ആൻഡ് സോൾ ഉള്ള ഒരു അനിമേഷൻ ചിത്രം കാണാൻ താൽപര്യപ്പെടുന്ന ആളാണ് നിങ്ങളെങ്കിൽ അതിന് പറ്റിയൊരു ചിത്രം ആൺ ഐ ലോസ്റ്റ് മൈ ബോഡി. നെറ്റ്ഫ്ലിക്സിന്റെ ഏറ്റവും പുതിയ റിലീസുകളിൽ ഒന്നായ ചിത്രം കാനസ് ഉൾപ്പെടെ ഉള്ള വേദികളിൽ മികച്ച പ്രതികരണം നേടിയിട്ടുണ്ട് എന്ന് മാത്രമല്ല ലോകത്താകമാനം ഉള്ള കാഴ്ചക്കാരും വിമർശകരുമായ പ്രേക്ഷകരിൽ നിന്നും കയ്യടികൾ വാരി കൂട്ടുന്നുമുണ്ട്. വ്യക്തിപരമായി ഈ വർഷം കണ്ട മികച്ച ചിത്രങ്ങളിൽ നിസ്സംശയം ഉൾപ്പെടുത്തും ഈ ഫ്രഞ്ച് ചിത്രം.

🔸ഒരു ഡിസക്ഷൻ ലാബിൽ നിന്നുമാണ് നമ്മുടെ കഥ ആരംഭിക്കുന്നത്, കൂടുതൽ ഡീറ്റെയിൽസ് ഒന്നും വെളിപ്പെടുത്താത്ത, മുഖം പോലും വ്യക്തമാകാത്ത ഒരു മനുഷ്യ ശരീരം വെട്ടി നുറുക്ക പെട്ടിട്ടുണ്ട്, അല്ലെങ്കിൽ അങ്ങനെയാണ് സൂചന ലഭിക്കുന്നത്. ഇങ്ങനെ ഉറപ്പിച്ച് പറയാതിരിക്കാൻ ഒരു കാരണമുണ്ട്, എന്താണെന്നാൽ വെട്ടിമുറിക്കപ്പെട്ട ശരീരത്തിന്റെ എല്ലാ ഭാഗങ്ങളും കാണാനില്ല, മറിച്ച് ഒരു കയ്യുടെ പാതിയും ചൂഴ്ന്നെടുത്ത ഒരു കണ്ണും മാത്രമേ അവിടുള്ളൂ. അത്ഭുതമെന്ന് പറയട്ടെ, ജീവന്റെ അംശം ഈ രണ്ടിലും ബാക്കിയുണ്ട്.

🔸എല്ലാം പോട്ടെ, ആ കണ്ണും കയ്യും ഒരു ശരീരത്തിൽ നിന്ന് തന്നെ വന്നതാണോ എന്ന് പോലും പിടിയില്ല. കൂടുതൽ എന്തെങ്കിലും അറിയുന്നതിനോ പറയുന്നതിനോ മുന്നേ ആ കണ്ണ് ആണെങ്കിൽ ചതഞ്ഞ് അരഞ്ഞ് പോവുകേം ചെയ്തു, ഒരു അശ്രദ്ധ കാരണം. ഇങ്ങനെ ഈ ഒരു അവസ്ഥയിൽ നിന്നും കഥ ആരംഭിക്കുകയാണ്, അവശേഷിക്കുന്ന കൈപ്പത്തി യാത്ര തുടങ്ങുകയാണ്, തന്റെ ബാക്കി ഭാഗങ്ങൾ കണ്ടെത്താൻ എന്നവണ്ണം. ഈയൊരു യാത്രയിൽ അപ്രതീക്ഷിതമായ പല പല സംഭവങ്ങളും അരങ്ങേറുന്നുണ്ട്, അവയെല്ലാം കണ്ട് തന്നെ അറിയുക.

🔸ഈ കയ്യുടെ കഥ പറയുന്നതിന് പാരലൽ ആയി തന്നെ മറ്റൊരു കഥ ഈ ചിത്രം പറയുന്നുണ്ട്, ആ കഥയിലെ നായകന്റെ പേര് നൗഫൽ എന്നാണ്. കഷ്ടിച്ച് പ്രായപൂർത്തിയായ നൗഫൽ ഒരു പിസ്സ ഡെലിവറി ബോയ് ആണ്. കൃത്യനിഷ്ഠയിൽ പേര് കേട്ടത് കൊണ്ട് തന്നെ മുതലാളിയുടെ തെറി കേൾക്കാത്തൊരു ദിവസം നൗഫലിന്റെ ജീവിതത്തിലില്ല. ഈ നൗഫൽ ഗബ്രിയേല എന്ന യുവതിയുമായി പ്രണയത്തിൽ ആവുന്നതും തുടർന്നുള്ള സംഭവങ്ങളുമാണ് ഈ ഭാഗത്തെ കഥ. രണ്ട് കഥകളും ബ്ലാക്ക് ആൻഡ് വൈറ്റിലും കളറിലുമായി ഇടകലർന്ന് പാരലൽ ആയി പുരോഗമിക്കുന്നുണ്ട്.

🔸ഇപ്പോഴും സംശയങ്ങൾ ഒരുപാടാണ്, നൗഫലിന്റെയും ഗബ്രിയേലയുടെയും ഭാവി എന്ത്, വെട്ടിമുറിക്കപ്പെട്ട കൈ തന്റെ ശരീരത്തിന്റെ മറ്റ് ഭാഗങ്ങൾ കണ്ടെത്തുമോ, അതോ കണ്ണിന് പറ്റിയത് പോലെ എവിടെ എങ്കിലും ചതഞ്ഞ് അരഞ്ഞ് തീരേണ്ടി വരുമോ, ഈ രണ്ട് കഥയും തമ്മിലുള്ള ബന്ധമെന്ത്, ഏതെങ്കിലും ഒരു പോയിന്റിൽ ഇവ കണക്റ്റ് ആവുമോ, തുടങ്ങി ഒരുപാട് ഒരുപാട് സംശയങ്ങൾ. ഇവയ്‌ക്കെല്ലാം ഉത്തരം ലഭിക്കാൻ ചിത്രം കാണുക തന്നെ വേണം. ഒരു രീതിയിലും നഷ്ടം ആവാത്ത മികച്ചൊരു ചിത്രമാണ് ഐ ലാസ്റ്റ് മൈ ബോഡി, ധൈര്യമായി കാണാം, അല്ല കാണണം.

Verdict : Must Watch

DC Rating : 90/100

645. Atlantics (2019)

Director : Mati Diop

Genre : Romance

Rating : 7.1/10

Country : Senegal

Duration : 104 Minutes

🔸നെറ്റ്ഫ്ലിക്സ് സ്ട്രീം ചെയ്ത് കാണുന്നവർക്ക് ഇത് നല്ല സമയമാണ്, സ്ട്രീമിങ് സർവീസിന്റെ ചരിത്രത്തിലെ തന്നെ ഏറ്റവും വലിയ ചിത്രമായ ഐറിഷ്‌മാൻ കാഴ്ചക്കാരുടെ മുന്നിലേക്ക് എത്തി എന്ന് മാത്രമല്ല, മികച്ച ഒരുപിടി സിനിമകളാണ് സ്ട്രീമിങ്ങിന് തയാറായി അണിയറയിൽ നിൽക്കുന്നത്. ഈ ചിത്രങ്ങളിൽ ചിലതാണ് അറ്റ്ലാന്റിക്സ്, ഐ ലോസ്റ്റ് മൈ ബോഡി, റ്റു പോപ്സ്, മാരിയേജ് സ്റ്റോറി എന്നിവ. സെനെഗളിൽ നിന്നും എത്തിയ അറ്റ്ലാന്റിക്സ് കാനസ് പുരസ്‌കാര വേദിയിൽ ഗ്രാൻഡ് പ്രിക്‌സ് ഉൾപ്പെടെ ഉള്ള പുരസ്കാരങ്ങളിൽ തന്റെ സാന്നിധ്യം അറിയിച്ച ഒരു സിനിമയാണ്.

🔸പൊതുവെ ഒരു ദാരിദ്ര്യ പശ്ചാത്തലമുള്ള സെനെഗളിലെ ഒരു പിന്നോക്ക പ്രദേശത്താണ് ചിത്രത്തിന്റെ കഥ നടക്കുന്നത്. സുലൈമാൻ എന്ന നമ്മുടെ നായക കഥാപാത്രം ഒരു കൺസ്ട്രക്ഷൻ തൊഴിലാളിയാണ്, വലിയ വലിയ കെട്ടിടങ്ങൾ നിർമിക്കുന്ന ഒരു കൺസ്ട്രക്ഷൻ കമ്പനിക്ക് കീഴിൽ വര്ഷങ്ങളായി അയാൾ ജോലി ചെയ്യുന്നുണ്ട്, എന്നാൽ കഴിഞ്ഞ ഒരു മൂന്ന് നാല് മാസങ്ങളായി സ്ഥിതി ഗതികൾ വളരെ ദാരുണമാണ്. കഠിനമായ ജോലി ആണെന്ന് മാത്രമല്ല ശമ്പളം ഒട്ട് കിട്ടുന്നുമില്ല, വാക്കാൽ ഉള്ള ഉറപ്പുകൾ മാത്രം കേട്ട് സഹി കേട്ടിരിക്കുകയാണ് സൈറ്റിലെ തൊഴിലാളികൾ.

🔸തൊഴിലാളികളിൽ മിക്കവരും ദാരിദ്ര്യത്തിന്റെ പടുകുഴിയിൽ വീണ് കിടക്കുന്നവരാണ്, ഈ ഒരു തൊഴിൽ അല്ലാതെ മറ്റൊന്നും വശമില്ല, അതിനുള്ള സാഹചര്യവും ആ നാട്ടിലില്ല. കുടുംബം പുലർത്താനായി കടം വാങ്ങി തുടങ്ങിയത് കുന്ന് കയറിയിരിക്കുന്നു, പലരും കടക്കാരെ പേടിച്ച് ഇരുട്ട് വീണാലെ വീട്ടിലേക്ക് പോവുന്നുള്ളു, അല്ലെങ്കിൽ അവിടെ നിന്ന് മാറി നിൽക്കുന്നു, ചുരുക്കി പറഞ്ഞാൽ ഇതാണ് തൊഴിലാളികളുടെ ഇന്നത്തെ ഒരവസ്ഥ. പ്രശ്നങ്ങളുടെ ആക്കം കൂട്ടാൻ എന്നവണ്ണം സുലൈമാൻ ആട എന്ന യുവതിയുമായി പ്രണയത്തിലുമാണ്.

🔸ആടയ്ക്ക് പ്രായം പതിനെട്ട് തികഞ്ഞിട്ടില്ല, ഇപ്പോഴും പക്വത ഇല്ലാത്ത പ്രകൃതമാണ് അവൾക്ക്. ഏത് സമയവും കൂട്ടുകാരികളോടൊപ്പം വലിയ ചിന്തകളോ കാര്യമോ ഇല്ലാതെ നടക്കലാണ് അവളുടെ ഒരു രീതി. സുലൈമാന് ആദയോട് എന്ന പോലെ തന്നെ അവൾക്ക് തിരിച്ചും ഇഷ്ടം ഉണ്ട്, എന്നാൽ ഒമർ എന്ന യുവാവുമായി അവളുടെ വിവാഹം ഏതാണ്ട് ഉറപ്പിച്ചതാണ്. പത്ത് ദിവസത്തിനുള്ളിൽ അത് നടക്കുകയും ചെയ്യും, ഈ ഒരു വസ്തുത സുലൈമാന് പിടിയില്ല താനും. നാട്ടിൽ ഇനി നിന്നിട്ട് കാര്യമില്ല എന്ന് മനസിലായ സുലൈമാനും കൂട്ടരും കടൽ മാർഗം സ്പെയിനിലേക്ക് പോവാൻ തീരുമാനിക്കുകയാണ്.

🔸ചിത്രത്തിന്റെ തുടക്കത്തിലേ ഒരു പത്ത് മിനുറ്റാണ് പോസ്റ്റിൽ ഉൾപ്പെടുത്തിയിരിക്കുന്നത്, ഈ ഒരു പോയിന്റിന് ശേഷം ഒട്ടും പ്രതീക്ഷിക്കാത്ത അനവധി വസ്തുതകൾ കഥയിലേക്ക് കടന്നുവരുന്നുണ്ട്, ഒരു സൂപ്പർ നാച്ചുറൽ പശ്ചാത്തലം കൂടി കയറി വരുന്നിടത്ത് കഥ ചൂട് പിടിക്കുകയാണ്. റൊമാൻസ് എന്നൊരു ജോണറിൽ മാത്രമായി തളച്ചിടാൻ കഴിയാത്ത ഒന്നാണ് ഈ ചിത്രം, തുടക്കം പതിയെ ആണെങ്കിലും പിന്നീടങ്ങോട്ട് പിടിച്ചിരുത്തുന്ന തോതിലാണ് കഥയുടെ ഒഴുക്ക്, കാണാൻ ശ്രമിക്കുക നല്ലൊരു ചിത്രമായിരിക്കും അറ്റ്ലാന്റിക്സ്.

Verdict : Very Good

DC Rating : 82/100

644. The Irishman (2019)

Director : Martin Scorcese

Genre : Crime

Rating : 8.7/10

Country : USA

Duration : 209 Minutes

🔸"As Far As I Can Remember, I Always Wanted To Be A Gangster...." എന്ന് സ്വന്തം കഥാപാത്രത്തെ കൊണ്ട് പറയിപ്പിച്ച്, ആ ഒരു അനിശ്ചിതത്വം നിറഞ്ഞ ജീവിതത്തെ ആഘോഷമാക്കി കാണിച്ച് കയ്യടി വാങ്ങിയ വ്യക്തിയാണ് മാർട്ടിൻ സ്കോഴ്സാസി, അതും ഏകദേശം മുപ്പത് വർഷങ്ങൾക്ക് മുന്നേ ഗൂഡ്‌ഫെല്ലാസ് എന്ന ചിത്രത്തിലൂടെ. അവിടെ നിന്നും ഐറിഷ്‌മാൻ എന്ന ഈ ചിത്രത്തിലേക്കുള്ള ദൂരം വളരെ വളരെ വലുതാണ്, ഒരു നാണയത്തിന്റെ തന്നെ രണ്ട് വശം അല്ലെങ്കിൽ രാവും പകലും പോലെ എന്നൊക്കെയുള്ള വിശേഷണങ്ങൾ അർഹിക്കുന്നുണ്ട് ഈ രണ്ട് ചിത്രങ്ങളും.

🔸നായകനായി മാർട്ടിൻ സ്കോർസേസിയുടേ ടിപ്പിക്കൽ ഗ്യാങ്‌സ്റ്റർ നായകൻ റോബർട്ട് ഡെനിരോ, ഏറ്റവും ഇഷ്ട്ടപ്പെട്ട നടന്മാരിൽ ഒരാളായ ജോ പെഷിയുടെ തിരിച്ചുവരവ്, എല്ലാത്തിനും പുറമെ ആദ്യമായി അൽ പച്ചിനോ ഒരു മാർട്ടിൻ ചിത്രത്തിൽ തുടങ്ങി പല കാരണങ്ങൾ ഉണ്ടായിരുന്നു ഈ ചിത്രത്തിന് വെണ്ടി കാത്തിരിക്കാൻ, ഉദ്ദേശം രണ്ട് വർഷം മുന്നേ പ്രഖ്യാപിച്ച ചിത്രം പിന്നീട് ഒന്നര വർഷത്തോളം പോസ്റ്റ് പ്രൊഡക്ഷനിൽ ആയതും മറ്റും കാത്തിരിപ്പിന്റെ ആ ഒരു ഇഫക്ട് കൂട്ടിയിട്ടേ ഉള്ളൂ. എല്ലാം കഴിഞ്ഞ് ഇന്ന് ഈ ദിവസം ചിത്രം മുന്നിൽ എത്തുമ്പോൾ ഒന്നേ പറയാൻ ഉള്ളൂ, നൂറ് ശതമാനം കാത്തിരിപ്പിനോട് നീതി പാലിച്ച ഒരു ചിത്രം, ഈ വർഷത്തെ ഏറ്റവും മികച്ചത് അല്ലെങ്കിൽ അവയിൽ ഒന്ന്.

🔸ഫ്രാങ്ക് ഷീരൻ, ജിമ്മി ഹോഫ ഈ രണ്ട് കഥാപാത്രങ്ങളെയും ചുറ്റി പറ്റിയാണ് ചിത്രം പുരോഗമിക്കുന്നത്, ഈ രണ്ട് വ്യക്തികളെ കുറിച്ചും ആ കാലഘട്ടത്തിന്റെ ചരിത്രത്തെ പറ്റിയും എന്തെങ്കിലും ഒരു അറിവ് ഉള്ള ഏതൊരു വ്യക്തിയും നടന്ന സംഭവങ്ങളെ കുറിച്ച് ബോധവാൻ ആയിരിക്കും, ആ സംഭവങ്ങളിൽ തന്നെ മിസ്റ്ററി ഒരുപാട് ഉണ്ടായിരുന്നു എന്നത് വേറെ കാര്യം, പറഞ്ഞ് വന്നത് എന്താണെന്നാൽ കഥയിലേക്കും കാര്യങ്ങളിലേക്കും തല്ക്കാലം നമ്മൾ കടക്കുന്നില്ല, അത് സസ്പെൻസ് ആയും സർപ്രൈസുകൾ സർപ്രൈസുകൾ ആയും നിൽക്കട്ടെ. ചിത്രത്തിൽ നല്ലതും മോശവുമായി അനുഭവപ്പെട്ട കാര്യങ്ങൾ ചികഞ്ഞെടുക്കാൻ ആണെങ്കിൽ മോശമായി ഒന്നും കണ്ടില്ല എന്ന് ആദ്യമേ പറയാം, ഒരു പേടി ഉണ്ടായിരുന്ന ചിത്രത്തിന്റെ മൂന്നര മണിക്കൂർ റൺ ടൈം പോലും നൂറ് ശതമാനം അർഹിക്കുന്നതും ഒരു നിമിഷം പോലും അനാവശ്യവുമല്ല.

🔸'Crime Never Pays' എന്നൊരു ലൈൻ പൊതുവെ ഈ ഗ്യാങ്‌സ്റ്റർ ചിത്രങ്ങളിൽ പ്രതിപാദിക്കപ്പെടാറുണ്ട്, അതിന്റെ ഒരു തരത്തിൽ പറഞ്ഞാൽ ഡിപ്രഷൻ അടിപ്പിക്കുന്ന ചലച്ചിത്രാവിഷ്കാരം ആണ് ഈ ചിത്രം. പ്രകടനം നോക്കുക ആണെങ്കിൽ എല്ലാവരും ടോപ് ഫോമിൽ ആണ്, ഡെനിരോ തന്റെ സ്വത സിദ്ധമായ ശൈലിയിൽ ഒരു വശത്ത് കൂടി പൊളിച്ചടുക്കുമ്പോൾ ഒരല്പം ഓവറായ ജിമ്മി ഹോഫ എന്ന കഥാപാത്രത്തെ അൽ പച്ചിനോ മറ്റൊരു തലത്തിലേക്ക് കൊണ്ടുപോവുന്നു, പുള്ളിയുടെ അടുത്ത കാലത്തെ ഏറ്റവും മികച്ച റോൾ എന്ന് തന്നെ പറയാം. തന്റെ കരിയറിന്റെ പീക്ക് ടൈമിൽ റിട്ടയർമെന്റിലേക്ക് പോയ പെഷിയുടെ തിരിച്ചുവരവും കിടിലനാണ്, പക്ഷെ ഗുഡ്‌ഫെലാസിലേത് പോലെ ഉള്ള ഒരു ഓവർ ദി ടോപ് കഥാപാത്രത്തെ ഇവിടെ പ്രതീക്ഷിക്കരുത് എന്നൊരു മുന്നറിയിപ്പ് തരുന്നു.

🔸ദശാബ്ദങ്ങൾ നീണ്ട് നിൽക്കുന്ന ഒരു കഥയാണ് ഐറിഷ്മാന്റേത്, ഈ കഥയിൽ കഥാപാത്രങ്ങൾക്ക് എല്ലാം തന്നെ വ്യക്തമായ ഐഡന്റിറ്റിയും, വ്യക്തിത്വവും, മികച്ചൊരു തുടക്കവും, സ്റ്റോറി ആർക്കും, അവസാനവും എല്ലാം ചിത്രം നൽകുന്നുണ്ട്. അവസാനത്തെ പറ്റി പറയുവാണേൽ, ചിത്രത്തിന്റെ ലാസ്റ്റ്‌ ആക്ടിനെ പറ്റി പറയാതെ വിടാൻ കഴിയില്ല. ഒരുപാട് കഥാപാത്രങ്ങളെ പരിചയപ്പെടുത്തിയ തുടക്കത്തിന് ശേഷം ഇവർക്കെല്ലാം കൃത്യമായ പേ ഓഫ് നൽകുന്ന ഒന്നാണ് ചിത്രത്തിന്റെ ലാസ്റ്റ് ആക്റ്റ്, ഈ ഒരു പോർഷൻ ചിത്രത്തിന്റെ ഹൈലൈറ്റ് ആണ്, കൂടുതൽ എന്ത് പറഞ്ഞാലും സൂചിപ്പിച്ചാലും സ്പോയ്ലർ ആവും, അത്കൊണ്ട് നിർത്തുന്നു. വ്യക്തിപരമായി ഈ വർഷത്തെ ഏറ്റവും മികച്ച മൂന്ന് ചിത്രങ്ങളിൽ ഒന്നാണ് ഐറിഷ്‌മാൻ, തിയേറ്റർ റിലീസ് ഇല്ലാതെ നേരിട്ട് നെറ്റ്ഫ്ലിക്സിൽ വരുന്നു എന്നറിഞ്ഞപ്പോൾ ആദ്യം സന്തോഷം ആയിരുന്നെങ്കിലും ഇപ്പോൾ തോന്നുന്നു ഇത് ബിഗ് സ്‌ക്രീനിൽ ആസ്വദിക്കേണ്ടത് ആയിരുന്നെന്ന്.

Verdict : Must Watch

DC Rating : 90/100