551. Godzilla The King Of Monsters (2019)

Director : Michael Dougherty

Genre : Sci Fi

Rating : 7/10

Country : USA

Duration : 132 Minutes

🔸അഞ്ച് വർഷം നീണ്ട കാത്തിരിപ്പിന് ഒടുവിൽ ഗോഡ്‌സില്ലയുടെ രണ്ടാം ഭാഗം തിയേറ്ററിൽ എത്തിയിരിക്കുകയാണ്, ആദ്യ ഭാഗം സാമ്പത്തികമായി വിജയം ആയിരുന്നെങ്കിൽ കൂടിയും വ്യക്തിപരമായി അത്രയൊന്നും ഇഷ്ടപ്പെടാതെ പോയ ഒരു ചിത്രമാണ്. ഈ ഇഷ്ടക്കേടിന് ഉള്ള പ്രധാന കാരണം ടൈറ്റിൽ കഥാപാത്രത്തിനെ വെറും പത്ത് മിനുട്ടിൽ ഒതുക്കി കളഞ്ഞതും, ബ്രയാൻ ക്രാൻസ്റ്റണിന്റെ കഥാപാത്രത്തോട് ചെയ്ത നീതികേടും ആയിരുന്നു. ഇങ്ങനെ ഒക്കെയാണ് കാര്യം എങ്കിലും രണ്ടാം ഭാഗം ഈ വർഷം പ്രതീക്ഷ അർപ്പിച്ചിരുന്ന ചിത്രങ്ങളിൽ ഒന്നായിരുന്നു, അതിന് വ്യക്തമായ ചില കാരണങ്ങളും ഉണ്ട്. ഈ കാരണങ്ങളെ സാധൂകരിക്കാൻ മോൺസ്റ്റർ യുണിവേഴ്സിലെ മൂന്നാം ചിത്രത്തിന് കഴിഞ്ഞിട്ടുണ്ടോ എന്നത് പ്രാധാന്യം അർഹിക്കുന്ന ചോദ്യമാണ്.

🔸ഒരു കൈജു ആരാധകനെ സംബന്ധിച്ചിടത്തോളം ഗോഡ്സില്ല ദി കിംഗ് ഓഫ് മോൺസ്റ്റർസ് ഒരു ഡ്രീം സിനാറിയോ ആണ്. ഗോഡ്സില്ല, മോത്ര, റോഡാൻ, ഗിഡോറ തുടങ്ങിയ പ്രശസ്തരായ കൈജു മോൺസ്റ്റേഴ്സിനെ സ്‌ക്രീനിൽ ഒരുമിച്ച് കാണാനുള്ള അവസരം, അത് ഒരുപക്ഷെ മറ്റുള്ള ആസ്വാദകർക്ക് മനസിലായെന്ന് വരില്ല. വളരെ സമ്മിശ്രമായ പ്രതികരണം ആണ് ചിത്രത്തിന് ലഭിച്ച് കൊണ്ടിരിക്കുന്നത്, തിയേറ്റർ അനുഭവത്തെ പലരും പുകഴ്ത്തി പറയുമ്പോഴും കഥ, ലോജിക് എന്നീ വസ്തുതകൾ നിരൂപകർ തേച്ച് ഒട്ടിക്കുന്നുണ്ട്. ഇവയിലേക്ക് കടക്കുന്നതിന് മുന്നേ ഒരുകാര്യം പറയാം, ആദ്യ ഭാഗത്തേക്കാൾ ഇഷ്ടം ഈ ചിത്രത്തോട് തോന്നുന്നുണ്ട്, ഒരു സിനിമ എന്നതിനേക്കാൾ തിയേറ്റർ എക്സ്പീരിയൻസിന് പ്രാധാന്യം ഉള്ള ചിത്രമാണ് ഗോഡ്സില്ല, ഇനി കാര്യങ്ങളിലേക്ക്.

🔸ആദ്യമായി മോശം എന്ന് അനുഭവപ്പെട്ട കാര്യങ്ങളിലേക്ക്, അണിയറ പ്രവർത്തകർ അവകാശപ്പെട്ടപോലെ ഇതൊരു മോൺസ്റ്റർ ബ്രോൾ കോണ്ടെസ്റ്റ് ആണ്, മനുഷ്യ കഥാപാത്രങ്ങൾക്ക് വലിയ കാര്യം ഒന്നും ഇല്ല, എന്നാൽ ഈ കഥാപാത്രങ്ങൾ വെറുപ്പിച്ചതിന് കയ്യും കണക്കുമില്ല, ഇവരെ എല്ലാം ഒഴിവാക്കി നാല് ജീവികളെ മാത്രമാണ് ഉൾപ്പെടുത്തിയത് എങ്കിൽ ഈ സിനിമ കൂടുതൽ മികച്ച് നിന്നേനെ എന്ന് തോന്നിപ്പോയി പലയിടത്തും. കഥ പ്രതീക്ഷിച്ച് പോവുന്നവരും നിരാശപ്പെടേണ്ടി വരും, ആ വിഭാഗത്തിൽ പരാമർശം അർഹിക്കുന്ന ഒന്നും തന്നെ കാണാനില്ല, അല്ലെങ്കിലും ഗോഡ്സില്ല പോലെയുള്ള ചിത്രങ്ങൾക്ക് കഥ പ്രതീക്ഷിക്കുന്നവരെ പറഞ്ഞാൽ മതി. അടുത്ത ഭാഗത്തിന് വേണ്ടിയുള്ള ചെറിയ ചില സെറ്റപ്പുകൾ കൂടിയുണ്ട് ചിത്രത്തിൽ, ഇവയിൽ ഒന്ന് സ്വാഭാവികമായും അടുത്ത ഭാഗത്തിൽ താല്പര്യം ഉണർത്തി എങ്കിൽ അടുത്തത് ഏറെക്കുറെ ആ ചിത്രം എങ്ങനെ ആയിരിക്കും എന്നത് സ്പോയിൽ ചെയ്യുന്ന ഒന്നാണ്. ആ വഴി ഭാവിയിൽ സ്റ്റുഡിയോ ഉപയോഗിക്കില്ല എന്ന പ്രതീക്ഷയിൽ കുറ്റം കണ്ടെത്തുന്ന പരിപാടി താൽക്കാലികമായി നിർത്തുന്നു.

🔸ഇനി നല്ല വശങ്ങളിലേക്ക്, ആക്ഷൻ എന്നതിനെ പറ്റി എന്ത് പ്രതീക്ഷിക്കണം എന്ന സൂചനയാണോ ട്രെയ്‌ലർ നൽകിയത് അത് ന്യായീകരിക്കുന്ന രീതിയിലാണ് ചിത്രം പുരോഗമിക്കുന്നത്. നാല് മോൺസ്റ്റേഴ്സും യുദ്ധത്തിന് സജ്ജരായ ശേഷമുള്ള സീനുകൾ ഇൻസെയ്ൻ എന്ന് വിശേഷിപ്പിക്കേണ്ടി വരും. മോൺസ്റ്റർ കഥാപാത്രങ്ങളെ മോശം എന്ന് പറയാനില്ലാത്ത രീതിയിൽ ബിൽഡ് ചെയ്തു എന്നതും പരാമർശം അർഹിക്കേണ്ട കാര്യമാണ്, പ്രത്യേകിച്ചും അടുത്തിടെ പുറത്തിറങ്ങിയ പല സിനിമകളും ഇതിൽ പരാജയപ്പെട്ടു എന്ന വസ്തുത പരിഗണിക്കുമ്പോൾ. ഇതിനൊപ്പം തന്നെ പറയേണ്ട ഒന്നാണ് ചിത്രത്തിന്റെ ഛായാഗ്രഹണവും വിശ്വല്സും, മികച്ചത് തന്നെ ആയിരുന്നു ഈ രണ്ട് വിഭാഗവും. ഇതിനോടൊപ്പം നല്ലൊരു തിയേറ്റർ ഓഡിയോ എക്സ്പിരിയെൻസും, സൗണ്ട്ട്രാക്കും കൂടി ചേരുമ്പോൾ ഗോഡ്‌സില്ലയുടെ പോസിറ്റിവ്‌സ് ഏറെക്കുറെ പറഞ്ഞ് തീരുകയാണ്.

🔸ഇനിയാണ് ആ മില്യൺ ഡോളർ ചോദ്യത്തിന്റെ ഉത്തരം, കാണണമോ വേണ്ടയോ എന്നത്. ഒരു കൈജു ആരാധകൻ ആണെങ്കിൽ യാതൊരു സംശയവും ഇല്ലാതെ പറയും കാണു എന്ന്. മറ്റുള്ളവരോട് ആണെങ്കിൽ വലിയ കഥ, ലോജിക്, സെൻസ് ഒന്നും പ്രതീക്ഷിക്കാതെ മോൺസ്റ്റർസ് ബ്രോൾ മാത്രം കാണാൻ തയാർ ആണെങ്കിൽ കാണാം, കൂടുതൽ പ്രതീക്ഷിക്കരുത്. ഒരു തിയേറ്റർ അനുഭവം എന്ന നിലയിൽ ഗോഡ്സില്ലയിൽ ഹാപ്പിയാണ്, പ്രതീക്ഷിച്ചത് എന്തോ അത് തന്നെയാണ് ചിത്രം. കൂടുതൽ പറയുന്നില്ല താല്പര്യം ഉണ്ടെങ്കിൽ, ഉണ്ടെങ്കിൽ മാത്രം കാണുക. ഗോഡ്സില്ല പോലെയൊരു ചിത്രം ഇഴകീറി പരിശോധിക്കേണ്ട ആവശ്യം ഉണ്ടെന്ന അഭിപ്രായം ഇല്ല, പിന്നെ ഇതൊക്കെ ഒരു കീഴ്വഴക്കം ആവുമ്പൊ....

Verdict : Watchable

DC Rating : 60/100

My Favourite Theater Experiences Ever

ഒരു സിനിമ, അതേതും ആയിക്കോട്ടെ, ഏത് വിഭാഗത്തിൽ പെട്ടതും ആയിക്കോട്ടെ കാണാൻ തിയേറ്ററിലേക്ക് കയറുമ്പോൾ ഒരു പ്രതീക്ഷ ഉണ്ട്, ഇതുവരെ കാണാത്ത എന്തെങ്കിലും ഒരു വസ്തുത ഈ ചിത്രം നമുക്കായി കരുതി വെച്ചിട്ടുണ്ട് എന്ന പ്രതീക്ഷ.തൊണ്ണൂറ് ശതമാനം സമയവും ഈ പ്രതീക്ഷ പാളിപോവാറാണ് പതിവ്, ഒരു ശരാശരി അല്ലെങ്കിൽ ബേധം എന്ന് പറയാവുന്ന രീതിയിലും കുറെ ചിത്രങ്ങൾ പോവും. എന്നാൽ ശിഷ്ട്ടം കിടക്കുന്ന ഒരു ശതമാനം സിനിമകൾ, ആ നൂറിൽ ഒന്ന് എന്നൊക്കെ വിശേഷിപ്പിക്കേണ്ട സിനിമകളാണ് കൊട്ടകയിലേക്ക് വീണ്ടും കടന്ന് ചെല്ലാൻ എന്നെ പ്രേരിപ്പിക്കുന്നത്. ആവേശം, രോമാഞ്ചം, ഞെട്ടൽ, സംപ്ത്രിപ്തി, സങ്കടം തുടങ്ങി അനവധി വികാരങ്ങളുടെ, വിചാരങ്ങളുടെ കഥ പറയാനുണ്ട് ഇവയിൽ ഓരോ ചിത്രത്തിനും. ഇങ്ങനെ മനസ്സിൽ തങ്ങി നിൽക്കുന്ന, അത്ര പെട്ടെന്നൊന്നും ഓർമയിൽ നിന്ന് മായാത്ത അഞ്ച് മികച്ച തിയേറ്റർ എക്സ്പീരിയൻസുകളിലേക്കുള്ള എത്തിനോട്ടമാണ് ഈ പോസ്റ്റിന്റെ ഉദ്ദേശം.

Dark Knight Rises (2012)

Director : Chris Nolan

Genre : Superhero

Rating : 8.4/10

Country : USA

Duration : 165 Minutes

👉🏻ഡാർക്ക് നൈറ്റ് റൈസസ് എന്ന ചിത്രം റിലീസായിട്ട് ഏകദേശം ഏഴ് വർഷങ്ങൾ തികയുകയാണ്, അതിന് ശേഷം ഒരുപാട് ചിത്രങ്ങൾ തിയേറ്ററുകളിൽ കാണുകയും ഇഷ്ടപ്പെടുകയും ചെയ്തിട്ടുമുണ്ട് എന്നാൽ ഈ ചിത്രം തന്നത് പോലൊരു ഫീൽ പിന്നീടിതുവരെ കിട്ടിയിട്ടില്ല, ഇനിയൊട്ട് കിട്ടുമെന്ന പ്രതീക്ഷയുമില്ല. ഒരു അന്യഭാഷാ ചിത്രത്തിനും മലയാളി ഓടിയെൻസ് ഇത് പോലെ റിയാക്റ്റ് ചെയ്തത് കണ്ടിട്ടില്ല. ആദ്യ രണ്ട് ചിത്രങ്ങൾ മികച്ചത് ആയത് കൊണ്ടും ഈ ചിത്രം സീരീസിലെ അവസാനത്തേത് ആയതിനാലും കാണാൻ പോവുന്നത് സ്പെഷ്യൽ ആയ ഒരു ചലച്ചിത്രാനുഭവം ആവും എന്ന ഉറച്ച തിരിച്ചറിവിലാണ് അന്ന് തിയേറ്ററിലേക്ക് കടന്ന് ചെന്നത്, പ്രതീക്ഷിച്ചതിന്റെ പത്തിരട്ടിയായി സിനിമ അത് തിരികെ നൽകുകയും ചെയ്തു. ശെരിയാണ് ചിത്രത്തിൽ പിഴവുകൾ ഉണ്ട്, ആദ്യത്തെ രണ്ടെണ്ണം പോലെ നറേറ്റിവ് അത്ര ശക്തവുമല്ല, എന്നാൽ ഇതൊന്നും തിയേറ്ററിൽ ഒരു വിഷയമേ ആയിരുന്നില്ല. ചിത്രത്തിന്റെ രണ്ടാം പകുതിയിൽ ബ്രൂസ് വെയ്ൻ കയറിന്റെ സഹായമില്ലാതെ ജയിലിൽ നിന്നും പുറത്തേക്ക് കടക്കുന്ന സീൻ ഓർമയില്ലേ, ഇനി ആ സീൻ ഒരു തിയേറ്റർ നിറയെ കടുത്ത ആരാധകർക്കിടയിൽ, അവരുടെ കയ്യടികൾക്ക് ഇടയിൽ, ആർപ്പുവിളികൾക്ക് ഇടയിൽ കാണുന്നത് ഒന്നോർത്ത് നോക്കിക്കേ, പറഞ്ഞ് അറിയിക്കാൻ കഴിയാത്തത്ര ഉയരെയാണ് ഡാർക്ക് നൈറ്റ് റൈസസ് എന്ന അനുഭവം.

Drishyam (2013)

Director : Jeethu Joseph

Genre : Thriller

Rating : 8.6/10

Country : India

Duration : 164 Minutes

👉🏻ഈ അപ്രതീക്ഷിതമായി ലഭിക്കുന്ന ചില ഭാഗ്യ സന്ദർഭങ്ങളുണ്ട്, ലോട്ടറി അടിക്കുക എന്നൊക്കെയാണ് പൊതുവെ ഈ സന്ദർഭങ്ങളെ വിശേഷിപ്പിക്കാറ്, അത്തരത്തിൽ ലഭിച്ച ഒരു ലോട്ടറി ആണ് ദൃശ്യം എന്ന ചിത്രം. ഇനിയൊരു നാല്പത് അൻപത് വർഷം കഴിഞ്ഞാലും ഏതെങ്കിലും ഒരു ചിത്രം ആദ്യ ഷോ കാണാൻ കഴിഞ്ഞതിൽ നീ അഭിമാനിക്കുന്നുണ്ടോ എന്ന് ആരെങ്കിലും എന്നോട് ചോദിക്കുക ആണെങ്കിൽ നിസ്സംശയം പറയും അത് ദൃശ്യം റിലീസ് ദിവസം കണ്ടതിലാണ് എന്ന്. ഒരു ഇവിടം സ്വർഗമാണ് ഒക്കെ പ്രതീക്ഷിച്ചാണ് സത്യത്തിൽ അന്ന് തിയേറ്ററിലേക്ക് കയറിയത്, അതും വേണ്ടിയിട്ടല്ല എൻട്രൻസ് കോച്ചിങ് ക്‌ളാസ് കട്ട് ചെയ്ത് വേറൊന്നും ചെയ്യാനില്ലാത്തത് കൊണ്ട് മാത്രം. ചെറിയ ചില തമാശകളും, കളി ചിരികളും ഒക്കെയായി പോയ ആദ്യ നാല്പത് മിനുട്ടിന് ശേഷം കഥ ചെറുതായി അങ്ങട്ട് മാറി, ഇന്റെർവെല്ലിന് പുറത്തിറങ്ങുമ്പോൾ മനസ്സിൽ വേറൊന്നും ഉണ്ടായില്ല, എന്തൊക്കെയോ രണ്ടാം പകുതിയിൽ വരാനുണ്ട് എന്നൊരു പ്രതീക്ഷയും, സ്‌ക്രീനിൽ കണ്ട ജോർജ്ജ് കുട്ടിയുടെ മനസിലെ പേടിയും ആയിരുന്നു എന്റെയും ഉള്ളിൽ. അവിടെ നിന്നും രണ്ടാം പകുതി, ഷാജോൺ നിലത്തിട്ട് ചവിട്ടുന്ന രംഗം ഒക്കെ പിൻ ഡ്രോപ്പ് സൈലെൻസ്, ഒടുവിൽ ആ ക്ലൈമാക്സ് കഴിഞ്ഞ് അഞ്ച് മിനുട്ട് തരിച്ച് സീറ്റിൽ തന്നെയുള്ള ഇരുത്തം, ഞാൻ മാത്രമല്ല ഒപ്പമുള്ള പതിനഞ്ച് ഇരുപത് ആളുകളും. കണ്ട് കഴിഞ്ഞത് സ്പെഷ്യൽ ആയ ഒരു ചിത്രം ആണെന്ന് തിരിച്ചറിയുക ആയിരുന്നു ആ നിമിഷങ്ങളിൽ, പിറ്റേന്ന് അത് വഴി പോകുമ്പോൾ പടം കളിക്കുന്ന തിയേറ്ററിന് മുന്നിൽ കണ്ട തിക്കും തിരക്കും തന്ന സംപ്ത്രിപ്തിക്ക് കയ്യും കണക്കുമില്ല.

Kammara Sambhavam (2018)

Director : Rathish Ambat

Genre : Satirical Thriller

Rating : 7.2/10

Country : India

Duration : 185 Minutes

👉🏻വ്യക്തിപരമായി വേറെ ലെവൽ ഒരു തിയേറ്റർ അനുഭവം ആയിരുന്നു കമ്മാര സംഭവം എങ്കിലും ഏറ്റവും നിരാശ തോന്നിയ ഒരു തിയേറ്റർ എക്സ്പെരിയെൻസും ഇത് തന്നെ. ഈ ഒരു കാരണം കൊണ്ട് തന്നെയാണ് മറ്റ് പല ചിത്രങ്ങളെയും ഒഴിവാക്കി ഈ ചിത്രം പട്ടികയിൽ ഇടം പിടിക്കുന്നതും. ദോഷം പറയരുതല്ലോ, നല്ല കൂവൽ ആയിരുന്നു ചിത്രത്തിന് പ്രത്യേകിച്ചും രണ്ടാം പകുതിയിൽ. യഥാർത്ഥ സംഭവം കാണിച്ച ആദ്യ പകുതിയും, അതിനെ വളച്ചൊടിച്ച് വ്യാഖ്യാനിച്ച രണ്ടാം പകുതിയും പ്രേക്ഷക പ്രതികരണത്തിൽ രണ്ട് ധ്രുവങ്ങളിൽ ആയിരുന്നു. പാതി വഴിക്ക് വെച്ച് വലിയൊരു ജനവിഭാഗം ഇറങ്ങി പോയതും, സംവിധായകന്റെ പേര് കാണിച്ചപ്പോൾ ലഭിച്ച വൻ കൂവലും പറയുന്നത് മറ്റൊരു കഥയാണ്. വ്യക്തിപരമായി അടുത്ത കാലത്ത് ഇറങ്ങിയ ചിത്രങ്ങളിൽ കമ്മാര സംഭാവത്തോളം അത്ഭുതപ്പെടുത്തിയ വേറെ ചിത്രമില്ല, ഒരു സിനിമ എന്ന നിലയിൽ ചിത്രത്തിന്റെ പ്രസക്തി കൂടി വരുന്നതേ ഉള്ളൂ, പ്രത്യേകിച്ചും ഈ കാലഘട്ടത്തിൽ. കഴിഞ്ഞ അഞ്ച് വര്ഷങ്ങള്ക്കിടെ ഒരു സിനിമയുടെ ടൈറ്റിൽ കാർഡ് കണ്ട് അഭിമാനത്തിൽ കയ്യടിച്ച അപൂർവം ചിത്രങ്ങളിൽ ഒന്നാണ് ഈ ചിത്രം, ഭാവിയിൽ ഈ ചിത്രം എവിടെ എങ്കിലും പരാമര്ശിക്കപ്പെടുമ്പോൾ 'ഉവ്വ് ഞാനന്ന് അവിടെ ഉണ്ടായിരുന്നു' എന്ന് പറയാൻ കഴിയും എന്നത് തന്നെ സംപ്തൃപ്തി നൽകുന്ന കാര്യമാണ്.

ഈ വിഭാഗത്തിൽ പെടുന്ന മറ്റ്‌ അനവധി ചിത്രങ്ങളുണ്ട്, ഡെനിസ് വിലനോവിന്റെ അറൈവൽ, നമ്മുടെ സ്വന്തം സ്റ്റാർ വാർസ് ദി ഫോഴ്‌സ് അവെയ്‌ക്കൻസ്, ജിത്തു ജോസെഫിന്റെ തന്നെ മെമ്മറീസ്, സ്‌കൂൾ കാലഘട്ടത്തിലെ ജ്വലിക്കുന്ന ഓർമ ആയ പഴശ്ശി രാജ, ഈമായു, തുടങ്ങി അവസാനം പുറത്തിറങ്ങിയ അവേഞ്ചേഴ്‌സ് എൻഡ്ഗെയിം വരെ ഒരുപാടൊരുപാട് സിനിമകൾ. ഇത്തരത്തിലുള്ള അനുഭാഗങ്ങളാണ് കാണാൻ പോവുന്ന ചിത്രങ്ങളിലേക്ക് പ്രതീക്ഷ നൽകുന്നത്, അത് തന്നെയാണ് പ്രചോദനവും.

550. Booksmart (2019)

Director : Olivia Wilde

Genre : Comedy

Rating : 7.6/10

Duration : 105 Minutes

Country : USA

🔸നമ്മൾ ഏവരും സ്‌കൂൾ കോളേജ് കാലഘട്ടങ്ങളിൽ പരിചയപ്പെട്ടതോ അല്ലെങ്കിൽ അടുത്തറിഞ്ഞതോ ആയ ഒരു വിഭാഗമാണ് പഠിപ്പിസ്റ്റുകൾ എന്ന് മുദ്ര കുത്തപ്പെട്ട ചിലർ. പഠനത്തിന് പ്രാധാന്യം നൽകി മറ്റുള്ള കാര്യങ്ങളിൽ നിന്നും അകലം പാലിച്ച് നടക്കുന്ന ഈ വിഭാഗത്തിൽ ചിലരെ എങ്കിലും നിങ്ങൾക്ക് അറിയാൻ സാധ്യത ഉണ്ട്, ചിലപ്പോൾ നിങ്ങൾ തന്നെയും ആ രീതി പിന്തുടർന്നവർ ആവാം. ബുക്സ്മാർട് എന്ന സിനിമ പറയുന്ന കഥ ഇത്തരത്തിലുള്ള രണ്ട് പഠിപ്പിസ്റ്റുകളുടേതാണ്. ആമിയും മോളിയുമാണ് നമ്മുടെ പ്രധാന കഥാപാത്രങ്ങൾ, ഇരുവരും അത്യാവശ്യം പേരുകേട്ട രണ്ട് പഠിപ്പികളുമാണ്.

🔸ദിവസവും കോളേജിലേക്ക് വരിക, മറ്റുള്ള സഹപാഠികളുമായി വലിയ സമ്പർക്കം ഒന്നും പുലർത്താതെ തങ്ങൾ ചെയ്യേണ്ട കാര്യങ്ങൾ നല്ല വെടിപ്പായിട്ട് ചെയ്യുക, കൂടുതൽ സമയവും ഒരുമിച്ച് ചിലവഴിക്കുക, ഭാവിയെ കുറിച്ച് ഒരു കാര്യവും ഇല്ലാതെ ആകുലപ്പെടുക, ഇത്യാദി പരിപാടികളാണ് ആമിയുടെയും മോളിയുടെയും ദിനചര്യയുടെ ഭാഗമായിട്ട് ഉള്ളത്. ഒരു ടിപ്പിക്കൽ ബുദ്ധിജീവി ലൈൻ എന്നൊക്കെ പറയാം, ഈ കാരണങ്ങൾ കൊണ്ട് തന്നെ മറ്റുള്ള സഹപാഠികളുമായി അത്ര നല്ല അടുപ്പം ഒന്നും തന്നെ ഇരുവർക്കും ഇല്ല, അതിൽ അവർക്ക് വലിയ പ്രശ്നവും ഇല്ല എന്നതാണ് സത്യം.

🔸സ്‌കൂൾ ഗ്രാഡുവേഷൻ ദിവസമാണ് ചിത്രം ആരംഭിക്കുന്നത്, എല്ലാവരും ആഘോഷ തിമിർപ്പിലാണ്. സ്വാഭാവികമായും തങ്ങളുടെ അധ്യയന വർഷങ്ങൾ മികച്ച രീതിയിൽ തീർത്ത സംപ്തൃപ്തിയിലും, മികച്ച കോളേജുകളിലേക്ക് പ്രവേശനം നേടിയ ഒരല്പം അഹങ്കാരത്തിലും മോളിയും ആമിയും ആഘോഷിച്ച് കൊണ്ടിരിക്കുകയാണ്. ഈ ആഘോഷത്തിന്റെ പ്രധാന കാരണങ്ങളിൽ ഒന്ന് മറ്റുള്ള സഹപാഠികളേക്കാൾ മികച്ച അവസരം തങ്ങൾ നേടി എടുത്തു എന്ന തിരിച്ചറിവ് തന്നെ ആയിരുന്നു. എന്നാൽ ഈ തിരിച്ചറിവ് പൂർണമായും തെറ്റ് ആയിരുന്നു എന്ന് രണ്ട് കഥാപാത്രങ്ങളും മനസിലാക്കുന്നിടത്ത് കഥ മാറുകയാണ്.

🔸ഈ പോയ വർഷങ്ങൾ മുഴുവൻ ജീവിതം ആഘോഷിച്ച, ആസ്വദിച്ച തങ്ങളുടെ സഹപാഠികളും തങ്ങളോളം തന്നെ മികച്ച കോളേജുകളിലേക്ക് പ്രവേശനം നേടിയിട്ടുണ്ട് എന്ന അറിവ് കുറച്ചൊന്നുമല്ല ഇരുവരെയും ഞെട്ടിക്കുന്നത്. ഭാവിയെ കുറിച്ച് ഇത്രയും കാലം ആകുലപ്പെട്ടതും, വ്യഗ്രത പിടിച്ച് ഓടി നടന്നതും എന്തിനായിരുന്നു എന്ന് ഇരുവരും ചോദിച്ച് പോകുകയാണ്. പതിയെ തങ്ങൾ ഇരുവരും അർഹിക്കുന്ന രീതിയിൽ ഇത്രയും കാലം 'ജീവിച്ചില്ല' എന്നിരുവരും മനസിലാക്കുകയാണ്. എന്നാൽ ഇതല്ല കാര്യം എന്ന് മറ്റുള്ളവരെ ബോധ്യപ്പെടുത്തേണ്ടതുണ്ട്, അതിനും മുകളിൽ സ്വയം ആശ്വസിക്കാൻ എങ്കിലും എന്തെങ്കിലും ചെയ്യേണ്ടതുണ്ട്, അതിനായി ഒരു ദിവസം മാത്രമാണ് ഇരുവരുടെയും മുന്നിലുള്ളത്.

🔸മുകളിൽ സൂചിപ്പിച്ചത് പോലെ തന്നെ ഒരു ചെറിയ കാലയളവിൽ ആമി, മോളി എന്നിവരുടെ ജീവിതങ്ങളിൽ അരങ്ങേറുന്ന ചില സംഭവങ്ങളാണ് കൊമെടിയിൽ ചാലിച്ച് ചിത്രത്തിൽ അവതരിപ്പിച്ചിരിക്കുന്നത്. ഈ രണ്ട് കഥാപാത്രങ്ങളാണ് പ്രൈമറി ഫോക്കസ് എങ്കിലും ഹോപ്, ജർഡ്, ഗിഗി തുടങ്ങി നല്ല ചില കഥാപാത്രങ്ങളും വന്ന് പോവുന്നുണ്ട്. കമിങ് ഓഫ് എയ്ജ്, കോമെടി ചിത്രങ്ങളിൽ താല്പര്യം ഉള്ളവർക്ക് ധൈര്യമായി കാണാം ഈ ചെറിയ, നല്ല ചിത്രം.

Verdict : Good

DC Rating : 75/100

549. Brightburn (2019)

Director : David Yarovesky

Genre : Horror

Rating : 6.6/10

Country : USA

Duration : 88 Minutes

🔸സൂപ്പർമാൻ എന്ന പ്രശസ്തനായ കോമിക് ബുക് കഥാപാത്രത്തെ അറിയാത്തവർ ഉണ്ടാവില്ല. പ്രതീക്ഷയുടെ പ്രതിരൂപമായി കഴിഞ്ഞ എട്ടോളം പതിറ്റാണ്ടുകളായി ഈ കഥാപാത്രം നമ്മുടെ കൂടെയുണ്ട്. ഇനി ഒന്ന് വെറുതെ ആലോചിച്ച് നോക്കിക്കേ, ഈ കഥാപാത്രം ഒരു വില്ലൻ ആയിരുന്നെങ്കിലോ ?, ഇത്രയും കഴിവുകളും ശക്തികളും എല്ലാം സ്വന്തമായുള്ള കഥാപാത്രം മാനവ രാശിക്ക് എതിരെ നിലയുറച്ചെങ്കിൽ എന്ത് സംഭവിക്കും എന്ന ചിന്ത തന്നെ പേടിപ്പെടുത്തുന്നതാണ്. ഈ ചിന്തയിൽ നിന്നുമാണ് ബ്രൈറ്റ് ബേൺ എന്ന ചിത്രം ഉടലെടുത്തിട്ടുള്ളത്.

🔸മുകളിൽ സൂപ്പർമാൻ എന്ന കഥാപാത്രത്തെ സൂചിപ്പിച്ചത് വെറുതെ അല്ല, ക്ലാർക്ക് കെന്റിന്റെ കഥയുമായി ചെറുതല്ലാത്ത സാമ്യം ഈ ചിത്രവും പുലർത്തുന്നുണ്ട്. ടോറി, കൈൽ ദമ്പതിമാരാണ് ചിത്രത്തിലെ പ്രധാന കഥാപാത്രങ്ങൾ, കർസാസ് നഗരത്തിൽ കൃഷിയും മറ്റ് കാര്യങ്ങളുമായി ജീവിച്ച് പോന്ന ഇരുവർക്കും മക്കളില്ല. ഈ ഒരു കാര്യത്തിൽ ഇരുവരും നിരാശർ ആണെങ്കിലും അതൊന്നും ദാമ്പത്യ ജീവിതത്തെ ബാധിക്കാതെ, പരസ്പരം സ്നേഹത്തോടെ ജീവിക്കുകയാണ് ഇരുവരും. അങ്ങനെ പൊയ്ക്കൊണ്ടിരുന്ന ദിവസങ്ങളിൽ ഒന്നിൽ ഒരു വിചിത്ര സംഭവം അവരുടെ വീട്ടുപടിക്കൽ അരങ്ങേറുകയാണ്.

🔸ഒരു സ്പേസ് ഷിപ് അവിടെ പതിക്കുകയാണ്, അതിൽ ആണെങ്കിൽ ഒരു പിഞ്ച് കുഞ്ഞും. സ്വാഭാവികമായും കുട്ടികളില്ലാത്ത ആ ദമ്പതിമാർ ആ കുഞ്ഞിനെ സ്വന്തം മകനായി എടുത്ത് വളർത്തുകയാണ്. ഇതുവരെ എല്ലാം സൂപ്പർമാൻ കഥ തന്നെ, എന്നാൽ ഗതി മാറാൻ തുടങ്ങുന്നത് ഈ കുഞ്ഞിന് പന്ത്രണ്ട് വയസ്സ് തികയുന്ന വേളയിലാണ്. ഒരു സാധാരണ മനുഷ്യന് സാധിക്കാത്ത പലതും ചെയ്യാൻ അവന് കഴിവുണ്ട്, എന്നാൽ ഇവ ഭൂമിയുടെയോ മനുഷ്യ കുലത്തിന്റെയോ നല്ലതിന് വേണ്ടി ഉപയോഗിക്കേണ്ടതില്ല എന്നവൻ തീരുമാനിക്കുന്നിടത്ത് കളി മാറുകയാണ്. പിന്നീടങ്ങോട്ടുള്ള ഒന്നര മണിക്കൂർ നീണ്ട് നിൽക്കുന്ന സംഭവങ്ങളാണ് ഈ ചിത്രം.

🔸ഒരു ലോ ബഡ്ജറ്റ് ചിത്രമാണ് ബ്രൈറ്റ് ബേൺ, മാർവെൽ അല്ലെങ്കിൽ ഡീസി ചിത്രങ്ങൾ പോലെയുള്ളവയിലെ ലാർജ് സ്കെയിൽ ആക്ഷൻ രംഗങ്ങൾ ഒന്നും ഇവിടെ പ്രതീക്ഷിക്കരുത്, കഥ അത് ഒരു പരിധി വരെ ആവശ്യപ്പെടുന്നുമില്ല, അത് ചിത്രം കാണുമ്പോൾ പിടികിട്ടും. ഒന്നര മണിക്കൂറിൽ താഴെ മാത്രമേ ചിത്രത്തിന് ദൈർഖ്യമുള്ളൂ, അതിനാൽ തന്നെ അത്യാവശ്യം വേഗതയിലാണ് കഥ പുരോഗമിക്കുന്നത്, ലാഗ് പ്രശ്നങ്ങൾ ഏതും കാണാനില്ല. എവർഗ്രീൻ എലിസബെത് ബാങ്ക്സിനെ ഒഴിച്ച് നിർത്തിയാൽ ഏറെക്കുറെ അപ്രശസ്തരായ കഥാപാത്രങ്ങളാണ് ചിത്രത്തിൽ ഉള്ളത്, എന്നാൽ ബേധപ്പെട്ട പ്രകടനം തന്നെ ഇവരെല്ലാം കാഴ്ചവെച്ചിരിക്കുന്നു.

🔸നല്ല ഒരു കൺസെപ്റ്റ് ആണ് ചിത്രത്തിന്റേത്, എന്നാൽ അത് അർഹിക്കുന്ന രീതിയിൽ സ്‌ക്രീനിൽ എത്തിക്കാൻ കഴിഞ്ഞിട്ടുണ്ടോ എന്നത് സംശയമാണ്. പ്രതീക്ഷിക്കാത്ത വഴികളിൽ കൂടി കഥയെ മുന്നോട്ട് കൊണ്ടുപോയി, അത്യാവശ്യം ഓർമയിൽ നിൽക്കുന്ന ഒരു അവസാനം ചിത്രത്തിന് നൽകി എന്നത് എടുത്ത് പറയേണ്ടി ഇരിക്കുന്നു. ചുരുക്കി പറഞ്ഞാൽ വലിയ നഷ്ട്ടം ഒന്നും ഇല്ലാതെ ഒരു തവണ കാണാവുന്ന ഒരു ചെറിയ സിനിമ ആണ് ബ്രൈറ്റ് ബേൺ, അതിൽ അധികം ഒന്നും പ്രതീക്ഷിക്കരുത്.

Verdict : Watchable

DC Rating : 63/100

548. Aladdin (2019)

Director : Guy Ritchie

Genre : Fantasy

Rating : 6.8/10

Country : USA

Duration : 128 Minutes

🔸ഡിസ്നിയുടെ ഇൻട്രോയും വോയിസ് ഓവറും കേൾക്കുമ്പോൾ ഒരു പ്രതീക്ഷയാണ്, വരാൻ പോവുന്നത് നല്ലൊരു സിനിമ ആണെന്ന പ്രതീക്ഷ. മുൻകാലങ്ങളിൽ ഒരുപാട് മികച്ച, ഇഷ്ട്ടപ്പെട്ട അനിമേഷൻ ചിത്രങ്ങൾ തന്നത് കൊണ്ടാവണം ആ പ്രതീക്ഷ ഇപ്പോഴും ഒട്ടും കുറയാതെ ബാക്കി കിടപ്പുണ്ട്. എന്നാൽ പഴയ കാല അനിമേഷൻ ചിത്രങ്ങൾ ലൈവ് ആക്ഷൻ ചിത്രങ്ങളായി മാറ്റാൻ എന്ന് തിരുമാനിച്ചുവോ അന്ന് തൊട്ട് നിലവാരത്തിൽ വലിയ ഇടിവ് സംഭവിച്ചിട്ടുണ്ട്, ചില വസ്തുവകകൾ അതേപടി മാറ്റങ്ങൾ ഒന്നുമില്ലാതെ, മാറ്റങ്ങൾ വരുത്താതെ നിൽക്കുന്നതാണ് നല്ലത് എന്ന ചിന്ത ഇവിടെ പ്രാവർത്തികം ആണ്. ഈ ചിന്തയെ അലാദ്ദീൻ തകിടം മറിക്കുമോ എന്നതായിരുന്നു അറിയേണ്ടി ഇരുന്നത്, അതിനാണ് കാത്തിരുന്നതും.

🔸"Oh, You Like That One Cause It Look's Better ? Trust Me That Might Look Good, But This One Here Have Seen Many More Storms. This One Has Something That's Irreplacable" ഒരല്പം സെല്ഫ് അവെർനെസ് ഒക്കെ അടിച്ച് കൊണ്ടാണ് ചിത്രം ആരംഭിക്കുന്നത്. ഇവിടെ നിന്നും നാവികൻ കഥ പറയുന്നത് പോലെ അലാദ്ദിനിന്റെ കഥ ആരംഭിക്കുകയാണ്. അലാവുദീന്റെയും അത്ഭുത വിളക്കിന്റെയും കഥ സിനിമകളിൽ പോലും അല്ലാതെ ചിത്രകഥാ മാസികകളിൽ നിന്നും മറ്റും ഏവർക്കും പരിചതമാണ്, അതറിയാത്തവർ കുറവാണ് എന്ന് തന്നെ പറയാം. ഈ കാരണം കൊണ്ട് തന്നെ അതിലേക്ക് കടക്കേണ്ട ആവശ്യം ഉദിക്കുന്നില്ല, മറ്റ് കാര്യങ്ങളിലേക്ക് കടക്കാം.

🔸ആദ്യം തന്നെ, പഴയ അനിമേഷൻ ചിത്രത്തേക്കാൾ ഉദ്ദേശം നാല്പത് മിനുട്ട് ദൈർഖ്യം കൂടുതൽ ഉണ്ട് ഈ ലൈവ് ആക്ഷൻ ചിത്രം. കഥാപാത്ര വികസനത്തിനും ബിൽഡ് അപ്പിനും വേണ്ടി ഈ സമയം ഉപയോഗിക്കാം എന്ന സംവിധായകന്റെ തീരുമാനം മികച്ചത് തന്നെ, എന്തിരുന്നാലും അത് എത്രമേൽ വിജയിച്ചു എന്നത് പരോശോധിക്കേണ്ടി ഇരിക്കുന്നു, പ്രത്യേകിച്ചും വില്ലനായ ജാഫറിന്റെ കാര്യത്തിൽ. ഈ ദൈർഖ്യം കാരണം തന്നെ ചിത്രം നാല്പത് മിനുട്ടിന് അടുത്ത് സമയം പിന്നിട്ട ശേഷമാണ് വിൽ സ്മിത്തിന്റെ ജീനി കഥയിലേക്ക് കടന്ന് വരുന്നത്, ആ ദൈർഖ്യം ഒരു പ്രശനം തന്നെയാണ് താനും.

🔸സിനിമയുടെ ട്രെയ്ലർ പുറത്തിറങ്ങിയപ്പോൾ ഏറ്റവും വിമർശനം കേൾക്കേണ്ടി വന്നത് വിൽ സ്മിത്തിന്റെ കഥാപാത്രത്തിന് തന്നെ ആയിരുന്നു. റോബിൻ വില്യംസിന്റെ അനശ്വര പ്രകടനം ഓർമയിൽ ഉള്ളത് കൊണ്ടും, സ്പെഷ്യൽ എഫക്ടുകൾ മോശം ആയത് കൊണ്ടും അന്ന് ആ പരിഹാസം തികച്ചും ന്യായം ആയിരുന്നു. എന്നാൽ ഇപ്പോൾ സ്ഥിതി ഗതികൾ കുറച്ച് വ്യത്യാസമാണ്, ചിത്രത്തിലെ എംവിപി എന്നൊക്കെയുള്ള വിശേഷണം അർഹിക്കുന്നുണ്ട് ജിനി, സ്‌ക്രീനിൽ വന്നപ്പോൾ തൊട്ടുള്ള എനർജിയും ശൈലിയും പ്രത്യേക പരാമർശം അർഹിക്കുന്നുണ്ട്. ഓപ്പണിങ്ങിൽ ഉള്ള ഗാനം ഉൾപ്പെടെ ആ വിഭാഗവും നിലവാരം പുലർത്തിയിട്ടുണ്ട്. പ്രധാന കഥാപാത്രങ്ങളായ ജാസ്മിൻ, അലദീൻ എന്നിവരെ അവതരിപ്പിച്ച നടീ നടന്മാരുടെ പ്രകടനവും ഇഷ്ടം ജനിപ്പിക്കുന്നതായിരുന്നു.

🔸ഇനി മോശം എന്ന് അനുഭവപ്പെട്ട കാര്യങ്ങൾ ആണെങ്കിൽ ആദ്യമേ പറയേണ്ടി വരും പഴയ അനിമേഷൻ ചിത്രത്തിന് കീഴെ നിൽക്കുന്ന ഒരു ശ്രമം മാത്രമാണ് ഈ ചിത്രം. പഴയ ചിത്രം ഇഷ്ട്ടപ്പെട്ടവർക്ക് ഈ ചിത്രത്തോട് യാതൊരു താല്പര്യവും തോന്നാൻ ഇടയില്ല, ജാഫർ പോലെയുള്ള കഥാപാത്രങ്ങൾക്ക് കൊണ്ടുവന്ന ചില മാറ്റങ്ങളും ആസ്വാദകർ ഏത് രീതിയിൽ എടുക്കും എന്നത് സംശയമാണ്. കൂടിയ ദൈർഖ്യവും, ശരാശരിയിൽ നിൽക്കുന്ന വില്ലനും മറ്റ് പോരായ്മകൾ ആയി മാറുന്നു. കരുതിയത്ര വലിയ ദുരന്തം ആയില്ല, താല്പര്യം ഉള്ളവർക്ക് വേണമെങ്കിൽ കാണാം, കണ്ടില്ലെങ്കിലും നഷ്ടമില്ല എന്നൊക്കെ പറഞ്ഞ് നിർത്താവുന്ന ഒരു ചിത്രമാണ് അലദീൻ.

Verdict : Average

DC Rating : 60/100

547. Lost (2004)

Creator : J J Abrams

Genre : Mystery

Rating : 8.4/10

Seasons : 06

Episodes : 121

Country : USA

Duration : 40 - 50 Minutes

🔸ലോസ്റ്റ് അഥവാ ടീവി സീരീസുകളുടെ ചരിത്രത്തിലെ ആദ്യത്തെ സൂപ്പർ സ്റ്റാർ, പിൽക്കാലത്ത് പുറത്തിറങ്ങിയ അനവധി സീരീസുകളുടെ വഴികാട്ടി, ഒരു പൈലറ്റ് എപ്പിസോഡിന് മാത്രം സിനിമയുടെ ചിലവ് വേണ്ടി വന്ന ആദ്യത്തെ ഗ്ലോബൽ ടീവി സെൻസേഷനുകളിൽ ഒന്ന്, ഇങ്ങനെ വിശേഷണങ്ങളും പ്രത്യേകതകളും അനവധിയാണ് ഈ ജെ ജെ അബ്രാംസ് സൃഷ്ടിക്ക്. ആറ് സീസണുകളിൽ നൂറ്റി ഇരുപതിന് മേൽ എപ്പിസോഡുകളായി പരന്ന് കിടക്കുന്ന, അത്യാവശ്യം നല്ല ദൈർഖ്യമുള്ള ഒന്നാണ് ലോസ്റ്റ് സീരീസ്, ആദ്യ എപ്പിസോഡിന്റെ പ്രക്ഷേപണം കഴിഞ്ഞ് പതിനഞ്ച് വര്ഷങ്ങളോളം കഴിഞ്ഞെങ്കിലും ഇന്നും വലിയൊരു ആരാധക വൃന്ദം ഈ സീരീസിന് ഉണ്ട്, ഈ ഒരു വസ്തുത മാത്രം മതി നിലവാരത്തിലും എന്റർടൈൻമെന്റിലും ഈ സീരീസ് എത്രത്തോളം മികച്ചതാണ് എന്ന് ഒരു ഐഡിയ ലഭിക്കാൻ.

🔸സിഡ്‌നിയിൽ നിന്നും ലോസ് അഞ്ചൽസിലേക്ക് പോവുന്ന ഓഷ്യാനിക് ഫ്ലൈറ്റ് 815ലെ യാത്രികരാണ് സീരീസിലെ കഥാപാത്രങ്ങൾ. യാത്രാമധ്യേ ഉണ്ടാവുന്ന ചില സാങ്കേതിക തകരാറുകൾ കാരണം യാതൊരറിവും ഇല്ലാത്തൊരു ദ്വീപിലേക്ക് വിമാനം ഇടിച്ചിറങ്ങുകയാണ്. യാത്രികരിൽ പകുതിയിലേറെ പേരും കൊല്ലപ്പെടുകയോ കാണാതാവുകയോ ചെയ്യുന്നുണ്ട്, എല്ലാത്തിനും ഒടുവിൽ വെറും നാല്പതിന് അടുത്ത് യാത്രികർ മാത്രമേ ദ്വീപിൽ ജീവനോടെ അവശേഷിക്കുന്നുള്ളൂ, ഈ ഒരു ബാക്ക്ഗ്രൗണ്ടിൽ നിന്നുമാണ് സീരീസ് ആരംഭിക്കുന്നത്. തുടർന്നുള്ള നൂറ്റി ഇരുപത്തി ഒന്ന് എപ്പിസോഡുകളും ഇവരെ മാറി മാറി ഫോക്കസ് ചെയ്ത് കൊണ്ടാണ് പുരോഗമിക്കുന്നത്.

🔸ഒരു നീണ്ട കഥയുടെ നരേറ്റീവ്‌ തന്നെ ആണെങ്കിലും ഓരോ എപ്പിസോഡും ഒരു പരിധി വരെ സെല്ഫ് കണ്ടെയിൻഡ് ആണ്. വ്യത്യസ്ത കഥാപാത്രങ്ങളിലൂടെ, അവരുടെ ഭൂതകാലത്തെ ചില സംഭവങ്ങളിലൂടെ, അവയെ വർത്തമാന കാലത്തെ കഥയുടെ പുരോഗതിയുമായി ബന്ധിപ്പിച്ചാണ് സീരീസ് മുന്നോട്ട് പോവുന്നത്. സസ്പെൻസ് എന്നത് നന്നായി തന്നെ നിലനിർത്തിയാണ് സീരീസ് മുന്നേറുന്നത്, തങ്ങളെ രക്ഷിക്കാൻ ആരെങ്കിലും വരും എന്ന കഥാപാത്രങ്ങളുടെ പ്രതീക്ഷ പതിയെ കെട്ടടങ്ങുന്നത് തങ്ങൾ എത്തിപ്പെട്ട സ്ഥലം സാധാരണമായ ഒരിടമല്ല എന്ന തിരിച്ചറിവ് അവർക്ക് കിട്ടി തുടങ്ങുമ്പോഴാണ്.

🔸എത്തിപ്പെട്ടത് ഒരു സാധാരണ സ്ഥലത്ത് അല്ല എന്ന് പറയുന്നതിന് ചില കാരണങ്ങളുണ്ട്, ആദ്യമായി ഇങ്ങനെയൊരു ദ്വീപിന്റെ സാന്നിധ്യം എവിടെയും പറഞ്ഞോ രേഖപ്പെടുത്തിയോ ആയി ആർക്കും അറിവില്ല രണ്ടാമത്തേതും പ്രധാനപ്പെട്ടതുമായ കാര്യം ദ്വീപിലെ ആവാസ വ്യവസ്ഥയാണ്. ഒരു രീതിയിലും വിശദീകരിക്കാൻ കഴിയാത്ത സംഭവങ്ങളാണ് അവിടെ അരങ്ങേറുന്നത്, ഭൂമി ശാസ്ത്രപരമായും കാലാവസ്ഥാപരമായും ഒരു രീതിയിലും വിശദീകരിക്കാൻ കഴിയാത്ത ഹിമക്കരടി പോലെയുള്ള ജീവികളുടെ സാന്നിധ്യമാണ് എടുത്ത് പറയേണ്ടത്. എന്നാൽ ഏറ്റവും ഭീതിപ്പെടുത്തുന്നത് ഇരുളിന്റെ മറവിൽ കാട്ടിൽ നിന്നും കേൾക്കുന്ന വിചിത്ര ശബ്ദങ്ങളുടെയും, സംഭവങ്ങളുടെയും കാര്യമാണ്.

🔸തുടക്കത്തിൽ അനവധി ചോദ്യങ്ങൾ ഉന്നയിക്കുന്നുണ്ട് ഈ സീരീസ്, എന്നാൽ പോകെ പോകെ ഇവയ്‌ക്കെല്ലാം വിശദീകരണങ്ങൾ നൽകുന്നുമുണ്ട്. രണ്ടാമത്തെ സീസണിന് ശേഷം ചെറുതായി ഒന്ന് സ്ലോ ആവുന്നുണ്ടെങ്കിലും അവസാനത്തോട് അടുക്കുമ്പോൾ ആവേശവും, സന്തോഷവും, രോമാഞ്ചവും ഒരല്പം സങ്കടവും എല്ലാം സമം ചേർത്ത് മികച്ചൊരു അനുഭവം ഉറപ്പ് നൽകുന്നുണ്ട്. സോയർ, ജിൻ, സൺ, സയീദ്, ലോക്ക്, ബൂൺ, ക്ലെയർ, ഇക്കോ തുടങ്ങി ഒരുപിടി നല്ല കഥാപാത്രങ്ങളെയും സമ്മാനിക്കുന്നുണ്ട് ഈ സീരീസ്. ഈ പറഞ്ഞതൊന്നും അല്ല, അതിനേക്കാൾ പ്രതീക്ഷിക്കാത്ത വകകൾ ലോസ്റ്റിൽ ഉണ്ട്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

546. John Wick Chapter 3 - Parabellum (2019)

Director : Chad Stahelski

Genre : Action

Rating : 8.4/10

Country : USA

Duration : 128 Minutes

🔸"Winston... tell them... Tell them all... Whoever comes, whoever it is... I'll kill them. I'll kill them all." രണ്ടാം ഭാഗം എവിടെ നിർത്തിയോ, അവിടെ നിന്ന് തുടങ്ങുകയാണ് ജോൺ വിക്ക് ചാപ്റ്റർ 3, എല്ലാ അർത്ഥത്തിലും. രണ്ടാം ഭാഗ ചിത്രത്തിൽ വിക്കിന്റെ കയ്യിൽ നിന്നും സംഭവിക്കുന്ന ഒരു പിഴവ് അയാളെ ഹൈ ടേബിളിന് എതിരെ കൊണ്ട് വരികയാണ്, പതിനാല് മില്യൺ ഡോളറാണ് വിക്കിന്റെ തലയ്ക്ക് ഇന്നുള്ള വില. ഒരു മണിക്കൂർ, ഒരു മണിക്കൂർ സമയമാണ് അയാളുടെ മുന്നിൽ ഉള്ളത്, ക്ലോക്കിൽ ആറ് മണി മുഴങ്ങുന്ന നിമിഷം ഹൈ ടേബിളിന് കീഴിലുള്ള എല്ലാ പ്രവർത്തകരും അയാൾക്കെതിരെ തിരിയും, അയാളുടെ ജീവൻ മാത്രമാവും അവരുടെ ലക്‌ഷ്യം. മുൻ ഭാഗങ്ങളിൽ എതിരാളികളെ തോൽപ്പിക്കാൻ ഉള്ള ഓട്ടം ആയിരുന്നെങ്കിൽ ഇവിടെ സ്വന്തം ജീവൻ നിലനിർത്താനുള്ള ഓട്ടം ജോൺ വിക്ക് ഓടി തുടങ്ങുകയായി.

🔸ഉദ്ദേശം അഞ്ച് വർഷങ്ങൾക്ക് മുൻപാണ് ആദ്യ ജോൺ വിക്ക് ചിത്രം തിയേറ്ററുകളിൽ എത്തിയത്. എൺപതുകളിലെ ഹീറോയിസം തുളുമ്പി നിന്ന ഒറ്റയാൾ പട്ടാള സ്റ്റീരിയോടൈപ്പ്‌ നായകന്മാരുടെ അതിപ്രസരവും, അതിന്റെ തുടർച്ചയായുള്ള ആവർത്തനവും കാരണം ക്ഷീണത്തിൽ ആയിരുന്ന ആക്ഷൻ ജിനേരിന് ഒരു പുതിയ ഊർജ്ജം തന്നെ ആയിരുന്നു ജോൺ വിക്ക് എന്ന ചിത്രം, അത്ര തന്നെ പ്രാധാന്യം ഈ കഥാപാത്രത്തിന് കീനു റീവ്സ് എന്ന നടന്റെ കരിയറിലും ഉണ്ട്. മികച്ച പ്രതികരണം നേടിയ ചിത്രത്തിന് ആ നിലവാരം തന്നെ വെച്ച് പുലർത്തിയ ഒരു രണ്ടാം ഭാഗവും വന്നു. ഈ വസ്തുതകൾ തന്നെയാണ് മൂന്നാം ഭാഗത്തിന് വേണ്ടി കാത്തിരിക്കാൻ ഉണ്ടായ ഏറ്റവും വലിയ കാരണവും.

🔸വലിയ ആർഭാടമോ ഡെക്കറേഷനോ ഒന്നും ഇല്ലാതെ നേരിട്ടൊരു കാര്യം അങ്ങട്ട് പറയാം, ജോൺ വിക്ക് ചാപ്റ്റർ 3 കിടു ആണ്, ആദ്യ രണ്ട് ഭാഗങ്ങൾ ഇഷ്ട്ടപ്പെട്ട ഒരാളാണ് നിങ്ങൾ എങ്കിൽ കൊടുക്കുന്ന പൈസയ്ക്ക് നൂറ് ശതമാനം മുതലാവുന്ന ആക്ഷൻ സീൻസ് മാത്രം ഉണ്ട് ചിത്രത്തിൽ, ബാക്കി കിട്ടുന്നതെല്ലാം ബോണസ് ആണ്. രണ്ട് മണിക്കൂറിന് മുകളിൽ ദൈർഖ്യമുള്ള ചിത്രത്തിൽ ഏകദേശം പതിനൊന്നോളം ആക്ഷൻ സെറ്റ് പീസുകൾ ഉണ്ട്, ഇവയെല്ലാം ഒന്നിനൊന്ന് മികച്ചതാണ്, പ്രത്യേകിച്ചും കാസാബ്ലാങ്കയിൽ വെച്ചുള്ള ഷൂട്ടൗട്ടും ക്ലൈമാക്സിലെ ഹാന്ഡികാപ്പ് ഫൈറ്റും. ഈ ഫൈറ്റുകളിൽ ചിലതിൽ ചില പരിചിത മുഖങ്ങൾ കൂടി കാണാനാവും, റൈഡ് എന്ന ചിത്രത്തിലെ ചില മാസ് ഐറ്റങ്ങളെ. ഈ ടീമ്സ് ഉൾപ്പെട്ടിട്ടുള്ള സെറ്റ് പീസിനെ പറ്റി കൂടുതൽ പറയുന്നില്ല, കണ്ടറിയാൻ വിട്ട് തന്നിരിക്കുന്നു.

🔸ഇനി പെർഫെക്റ്റ് ആയൊരു ചിത്രമാണോ ജോൺ വിക്ക് എന്ന് ചോദിച്ചാൽ അതുമല്ല, പ്രശ്നമായി അനുഭവപ്പെട്ട രണ്ട് മൂന്ന് കാര്യങ്ങൾ ഉണ്ട്. ആദ്യമായി ചിത്രത്തിൽ രണ്ട് പ്രധാന വില്ലന്മാരാണ് ഉള്ളത്, ഇവരിൽ സീറോ എന്ന കഥാപാത്രം ജോൺ വിക്കിനോട് നേരിട്ട് സംസാരിക്കുന്ന ഒരു ചെറിയ സീൻ ഉണ്ട്, അതുവരെ നല്ല ടെറർ ആയി ബിൽഡ് ചെയ്ത് കൊണ്ടുവന്ന കഥാപാത്രത്തെ വെറും കൊമെടി ആക്കിക്കളഞ്ഞ ഈ സീനിന്റെ ആവശ്യകത ഇതുവരെ പിടികിട്ടിയിട്ടില്ല. ഇതിനോടൊപ്പം രണ്ടാം പകുതിയിലെ ട്വിസ്റ്റുകളിൽ ഒന്നും ചെറുതായി നെറ്റി ചുളിക്കുന്നുണ്ട്, അത് വിശദീകരിക്കാനുള്ള സമയം ഇതല്ല. അവസാനമായി പാലത്തിന് മുകളിലുള്ള ചെയ്‌സ് സീനിൽ ഉപയോഗിച്ച കാമറ ആണെങ്കിലും ആസ്വാദനത്തിന് അരോചകമായി അനുഭവപ്പെട്ടു.

🔸കീനു റീവ്സ് എന്ന നടന്റെ പ്രകടനം എടുത്ത് പറയേണ്ട ഒന്നാണ്, പ്രത്യേകിച്ചും ആദ്യ ഇരുപത് മിനുട്ടിൽ ഏത് വിധേനയും രക്ഷപ്പെടാനുള്ള അയാളുടെ വെറി പിടിച്ച ശ്രമങ്ങൾ കാഴ്ചക്കാരനിൽ വലിയ ഇമ്പാക്റ്റ് ആണ് സൃഷ്ടിക്കുന്നത്. നല്ല വെടിക്കെട്ട് സപ്പോർട്ടിങ് കാസ്റ്റ് കൂടിയുണ്ട് ചിത്രത്തിന്, സ്ക്രീൻ ടൈം അധികം ഇല്ലെങ്കിലും ഹാലെ ബറി, ജെറോം ഫ്ലിൻ, ഇയാൻ മക്ഷെയിൻ എന്നിവരും നന്നായിരുന്നു. ആസിയ കെയ്റ്റ് ധില്ലൻ അവതരിപ്പിച്ച കഥാപാത്രത്തെയും പ്രത്യേകം പരാമർശിക്കേണ്ടി ഇരിക്കുന്നു, തുടർ ഭാഗത്തിനുള്ള ചെറിയ സാദ്ധ്യതകൾ കൂടി തരുന്നുണ്ട് ഈ ചിത്രം, ഈ ചിത്രം കണ്ടവർ ഇനി അങ്ങനൊരു ചിത്രം വരിക ആണെങ്കിൽ തീർച്ചയായും കണ്ടിരിക്കും എന്നിടത്ത് മൂന്നാം ഭാഗം എത്രമാത്രം വിജയിച്ചിരിക്കുന്നു എന്ന് പറയാനാവും.

"Sir, You Think He Is Finished ?"

"Oh I Think He's Just Getting Started...."

Verdict : Very Good

DC Rating : 80/100

545. Dracula (1931)

Director : Tod Browning

Genre : Horror

Rating : 7.6/10

Country : USA

Duration : 86 Minutes

🔸ഡ്രാക്കുള പ്രഭുവിന്റെ കഥ അനവധി തവണ സ്‌ക്രീനിൽ എത്തിയതാണ്, ഫ്രാൻസിസ് കൊപ്പോളയുടെ തൊണ്ണൂറുകളിലെ ഓൾ സ്റ്റാർ കാസ്റ്റ് ചിത്രം മുതൽ ഇങ് മലയാളത്തിൽ വരെ അനവധി തവണ വിവിധ രീതികളിൽ ഈ കഥ നമ്മൾ കണ്ടു. ഇവ എല്ലാം കണക്കിൽ എടുക്കുകയാണെങ്കിൽ ചില ഒഴിവാക്കലുകൾ വക വെക്കാതെ വിട്ടാൽ ബ്രോം സ്റ്റോക്കറുടെ കഥാപാത്രത്തിന്റെ ഏറ്റവും മികച്ച അഡാപ്റ്റേഷനുകളിൽ ഒന്നായിരിക്കും ഈ ടോഡ് ബ്രൗണിങ് ചിത്രം. ശെരിയാണ് നമ്മൾക്ക് പരിചിതമായ കഥയാണ്, പതിറ്റാണ്ടുകൾ അനവധി കടന്ന് പോയി, എന്നിട്ട് പോലും ഇന്ന് കാണുമ്പോൾ ഒരു ഉൾക്കിടിലം ഈ ചിത്രത്തിന് നൽകാൻ കഴിയുന്നുണ്ടെങ്കിൽ അത് മാത്രം മതി ഗ്യാരണ്ടീ സർട്ടിഫിക്കറ്റ് ആയി.

🔸ട്രാൻസിൽവാനിയയിൽ ആണ് കഥ ആരംഭിക്കുന്നത്, റെൻഫീൽഡ് എന്ന കഥാപാത്രം ബോഗോസ് താഴ്വരയിലേക്കുള്ള യാത്രയിലാണ്. അയാളുടെ വീക്ഷണത്തിൽ പറയുക ആണെങ്കിൽ ഒരു കൂട്ടം കിറുക്കന്മാരെ ആണ് സഹയാത്രികരായി അയാൾക്ക് ലഭിച്ചിട്ടുള്ളത്. യാത്രയിൽ ഉടനീളം ഈ കഥാപാത്രങ്ങൾ എല്ലാം പ്രാർത്ഥനയിൽ മുഴുകിയിരിക്കുകയാണ്, കൂടുതൽ സംഭാഷണങ്ങൾ ഏതുമില്ല. വണ്ടിക്കാരൻ ആണെങ്കിൽ ഏത് വിധേനയും ഇവിടെ നിന്ന് രക്ഷപ്പെട്ടാൽ മതി എന്ന തോതിൽ പേടിപ്പെടുത്തുന്ന വിധം കുതിരയെ പായിക്കുകയാണ്, ചുരുക്കി പറഞ്ഞാൽ ഒരു വല്ലാത്ത അന്തരീക്ഷമാണ് വണ്ടിക്ക് അകത്ത്.

🔸ഒടുവിൽ ആകാംക്ഷ അടക്കാൻ കഴിയാതെ കാരണം അന്വേഷിച്ച റെൻഫീൽഡിനോട് ഇന്നേ ദിവസം തങ്ങളുടെ വിശ്വാസ പ്രകാരം വളരെ മോശപ്പെട്ട ഒരു ദിവസം ആണെന്നും, ഇന്നേ ദിവസം വാതിലുകൾ അടച്ച് എല്ലാവരും പ്രാർത്ഥനയിൽ മുഴുകേണ്ടത് ഉണ്ടെന്നും കൂട്ടത്തിൽ ഒരുവൻ മറുപടി പറയുകയാണ്. ഈ മറുപടി കേട്ട് ചെറുതായി ഒന്ന് അന്ധാളിച്ചെങ്കിലും തന്റെ ദൗത്യവുമായി മുന്നോട്ട് പോവാൻ റെൻഫീൽഡ് തീരുമാനിക്കുകയാണ്. അന്നേ ദിവസം രാത്രി ബോർഗോ പാസ്സിലേക്ക് കടന്ന് ചെല്ലാൻ അയാൾ തുനിഞ്ഞിറങ്ങുകയാണ്, അയാളെയും കാത്ത് ഒരു കാര്യേജ് അർദ്ധരാത്രിയിൽ അവിടെ എത്തും.

🔸പ്രാദേശികരായ ജനങ്ങൾ ഒരുപാട് ശ്രമിച്ച് നോക്കിയെങ്കിലും റെൻഫീൽഡിന്റെ തീരുമാനത്തിൽ മാറ്റം ഏതും ഉണ്ടായിരുന്നില്ല, അവരുടെ വാക്കുകളെ എല്ലാം അന്ധ വിശ്വാസം എന്നും പറഞ്ഞ് അയാൾ തള്ളിക്കളഞ്ഞു. അങ്ങനെ പേടിച്ചരണ്ട വണ്ടിക്കാരനോടൊപ്പം യാത്ര തിരിച്ച റെൻഫീൽഡ് അർദ്ധ രാത്രി സമയത്ത് ബോർഗോ പാസിൽ എത്തുകയാണ്, റെൻഫീൽഡിനെ ഇറക്കി വിട്ട് അയാളുടെ സാധന സാമഗ്രികൾ എറിഞ്ഞ് കൊടുത്ത് ജീവനും കൊണ്ട് ഓടി രക്ഷപ്പെട്ട വണ്ടിക്കാരനെ ഒരല്പം ഭയത്തോടെ നോക്കാനേ റെൻഫീൽഡിന് കഴിഞ്ഞുള്ളു. അയാൾക്ക് പോവേണ്ട വണ്ടി അപ്പോഴേക്കും അവിടെ എത്തിയിരുന്നു, അതിൽ നിന്നും ഉയരം കൂടിയ നീണ്ട മുഖമുള്ള വണ്ടിക്കാരൻ മുഖം ചെരിച്ച് അയാളെ നോക്കി നിൽക്കുന്നുമുണ്ടായിരുന്നു.

🔸ഇവിടെ നിന്നങ്ങോട്ട് ഡ്രാക്കുള പ്രഭുവിന്റെ വിഹാരം ആരംഭിക്കുകയായി, ബെല ലുഗോസി എന്ന വ്യക്തിയാണ് ചിത്രത്തിൽ ഡ്രാക്കുളയെ അവതരിപ്പിച്ചിരിക്കുന്നത്. മറ്റാർക്കോ വെച്ചിരുന്ന കഥാപാത്രം അദ്ദേഹത്തിന് അവസാന നിമിഷം ലഭിച്ചതാണെന്ന് വായിക്കുക ഉണ്ടായി, അത് എന്ത് തന്നെ ആയാലും ചിത്രത്തിന് അനുഗ്രഹമായി, ഇത്രയും കമാൻഡിങ് ആയൊരു പ്രകടനം വേറെ ലഭിക്കാനില്ല. നല്ല പ്രകടനങ്ങളും മികച്ച ഛായാഗ്രാഹണവും എല്ലാം കൂടി ചേരുമ്പോൾ ഒന്നര മണിക്കൂറിൽ നല്ലൊരു അനുഭവമായി മാറുന്നുണ്ട് ഡ്രാക്കുള, തീർച്ചയായും ശുപാർശ ചെയ്യുന്നു.

Verdict : Very Good

DC Rating : 85/100

544. Pokemon Detective Pikachu (2019)

Director : Robert Letterman

Genre : Fantasy

Rating : 7/10

Country : USA

Duration : 106 Minutes

🔸പോക്കിമോൻ ഡിറ്റക്റ്റീവ് പികാച്ചു എന്ന ചിത്രത്തെ കുറിച്ച് എന്തെങ്കിലും പറയുന്നതിന് മുന്നേ ഒരു ചെറിയ ജാമ്യം എടുക്കേണ്ടതുണ്ട്. ഈ കഥാപാത്രം എന്താണെന്നോ എന്താണെന്നോ യാതൊരു അറിവും പോസ്റ്റ്മാന് ഇല്ല, ചെറുപ്പത്തിൽ ഒപ്പം പഠിച്ചവർ നോട്ട് പുസ്തകത്തിലും മറ്റും വരച്ച ഇവയുടെ നല്ല ചിത്രങ്ങൾ കണ്ട് കൊള്ളാം എന്ന് പറഞ്ഞതല്ലാതെ യാതൊരു ബന്ധവും ഇവയും ആയി ഇല്ല. ഈ കാര്യം ഇവിടെ പറയാൻ കാര്യം എന്ത് എന്നാണെങ്കിൽ ഒരു പക്ഷെ ആരാധകൻ എന്ന നിലയിൽ ഈ ചിത്രം മറ്റൊരാൾക്ക് കൂടുതൽ ആസ്വാദ്യകരം ആയേക്കാം, നമുക്ക് പിടികിട്ടാത്ത ചില ഈസ്റ്റർ എഗ്ഗുകളും മറ്റുമൊക്കെ ഇവർ കണ്ടെത്തിയേക്കാം. ഈ ഒരു വസ്തുത മനസ്സിൽ വെച്ച് കൊണ്ട് വേണം തുടർന്ന് വായിക്കാൻ എന്ന് അഭ്യർത്ഥിക്കുന്നു, തെറ്റ് കുറ്റങ്ങൾ ഉണ്ടെങ്കിൽ സദയം ക്ഷമിക്കുക.

🔸ഡിറ്റക്ടീവ് ആയ ഹാരി ഗുഡ്മാനെ തന്റെ കേസ് അന്വേഷണ ശ്രമങ്ങളിൽ ഒന്നിനിടെ കാണാതാവുകയാണ്, അച്ഛന്റെ തിരോധാനത്തിൽ ദുരൂഹമായ ചില സൂചനകൾ കണ്ടെത്തുന്ന മകൻ ടിം ഹാരിയുടെ അവസാന കേസിന് പിറകെ വെച്ച് പിടിക്കുന്നതും, ഇതിനിടെ പികാച്ചു എന്ന കഥാപാത്രത്തെ കണ്ട് മുട്ടുന്നതും എല്ലാമാണ് പോക്കിമോൻ ഡിറ്റക്റ്റീവ് പികാച്ചു എന്ന ചിത്രത്തിന്റെ പ്രമേയം. മുൻകാല വിഡിയോ ഗെയിം ചിത്രങ്ങൾ നേരിടേണ്ടി വന്ന പരീക്ഷണങ്ങൾ തന്നെയായിരുന്നു ഒരു പരിധി വരെ ഈ ചിത്രവും നേരിട്ടിട്ടുള്ളത്. ഈ പ്രശ്നങ്ങൾ എല്ലാം പരിഹരിച്ച് മുന്നേറാൻ ചിത്രത്തിന് കഴിഞ്ഞിട്ടുണ്ടോ എന്നത് പരിശോധിക്കേണ്ടി ഇരിക്കുന്നു.

🔸ചിത്രത്തിന്റെ നല്ല വശങ്ങളിലേക്ക് കടക്കുക ആണെങ്കിൽ ആദ്യമേ തന്നെ ടൈറ്റിൽ കഥാപാത്രമായി എത്തിയ റയാൻ റെനോൾഡ്‌സിനെ പരാമർശിക്കേണ്ടി വരും. ഡെഡ്പൂൾ പോലെ അറഞ്ചം പുറഞ്ചം പൂണ്ട് വിളയാടാനുള്ള സ്പേസ് പുള്ളിക്ക് ഇല്ലെങ്കിൽ കൂടിയും ആദ്യാവസാനം എന്റർടൈനിംഗ് ആയൊരു കഥാപാത്രമായി പികാച്ചുവിനെ മാറ്റുന്നുണ്ട് റെനോൾഡ്‌സ്. അത്ഭുതം ജനിപ്പിക്കുന്ന രീതിയിലുള്ള കഥ ഒന്നും ഈ ചിത്രത്തിൽ നിന്നും ആരും പ്രതീക്ഷിക്കുന്നില്ലെങ്കിലും ഉള്ളത് അത്യാവശ്യം ഭംഗിയായി തന്നെ കാണിച്ചിട്ടുണ്ട് എന്നത് നല്ല കാര്യം. അധികം വലിച്ച് നീട്ടൽ ഇല്ലാതെ ഉള്ള അവതരണവും കാര്യത്തെ അധികം ഗൗരവം കൊടുക്കാതെ ഉള്ള രസകരമായ രീതിയിൽ ഉള്ള അവതരണവും കൂടി ആവുമ്പോൾ ആ വിഭാഗം ഏറെക്കുറെ പൂർത്തിയാവുന്നു.

🔸ടൈറ്റിൽ കഥാപാത്രത്തിന് പുറമെ ഒരു പിടി മനുഷ്യ കഥാപാത്രങ്ങൾ കൂടിയുണ്ട് ഈ ചിത്രത്തിൽ, എന്നാൽ ഇവയിൽ മിക്കവരും പാതി വെന്ത രീതിയിൽ ഉള്ളവരോ, കാഴ്ചക്കാരനിൽ ഒരു താല്പര്യവും ജനിപ്പിക്കാത്തവരോ ആണെന്നത് ഒരു രീതിയിലും ചിത്രത്തെ സഹായിക്കുന്നില്ല. ഇതോടൊപ്പം മേൽ സൂചിപ്പിച്ച റയാൻ റെനോൾഡ്‌സിന്റെ കഥാപാത്രത്തെ സൈഡിലേക്ക് മാറ്റിയ രീതിയും ചിത്രത്തിന്റെ ലോ പോയിന്റ് ആണ്. ചിലയിടത്ത് എങ്കിലും ശരാശരിയിൽ ഒതുങ്ങുന്ന സ്പെഷ്യൽ എഫക്ടുകളും, അനാവശ്യ പ്ലോട്ട് പോയിന്റുകളും കൂടി ചേരുമ്പോൾ മോശം എന്നനുഭവപ്പെട്ട കാര്യങ്ങൾ കൂടി പൂർത്തിയായി.

🔸കാണണമോ വേണ്ടയോ എന്നതാണ് ചോദ്യമെങ്കിൽ ആദ്യമേ തന്നെ പറയാം, അതൊരല്പം പ്രശ്നം നിറഞ്ഞ ചോദ്യമാണ്. പോകെമോൻ ആരാധകരായവർക്ക് തീർച്ചയായും കണ്ടിരിക്കേണ്ട ചിത്രമായി തോന്നിയേക്കാം എങ്കിലും ഈ വിഭാഗത്തിൽ യാതൊരു പരിചയവും ഇല്ലാത്ത പോസ്റ്റ്മാന് വലിയ താല്പര്യം ഒന്നും തന്നെ ഈ ചിത്രത്തിൽ തോന്നിയില്ല. ആ ഒരോളത്തിൽ ഒരുതവണ കാണാം എന്ന് മാത്രം, എഫക്ടുകളുടെ പൂർണ ആസ്വാദനത്തിന് വേണമെങ്കിൽ തോയേറ്ററിലും ആവാം, യാതൊരു നിർദ്ദേശവും ഇല്ല. വിഡിയോ ഗെയിം ചിത്രങ്ങളുടെ നല്ല അഡാപ്റ്റേഷനിൽ ഒന്നായി ഈ ചിത്രവും പരിഗണിക്കാം, പക്ഷെ മാനദണ്ഡം വളരെ ചെറുത് ആയതിനാൽ അത് ചിത്രത്തെ ഉയർത്തി കാണിക്കില്ല.

Verdict : Watchable

DC Rating : 60/100

543. Bad Day At Black Rock (1955)

Director : John Sturges

Genre : Thriller

Rating : 7.8/10

Country : USA

Duration : 81 Minutes

🔸കണ്ണെത്താ ദൂരത്തോളം പരന്ന് കിടക്കുന്ന തരിശ് ഭൂമിയുടെ ഒത്ത നടുക്ക് സ്ഥിതി ചെയ്യുന്ന വളരെ ചെറിയൊരു പട്ടണമാണ് ബ്ലാക്ക് റോക്ക്. അന്തേവാസികളായവർ അല്ലാതെ പുറത്ത് നിന്ന് ആരും തന്നെ ഒരാവശ്യത്തിനും ആ പട്ടണത്തിലേക്ക് കടന്ന് വരാറില്ല, ഈ ഒരു വസ്തുത കാരണം തന്നെ ഒരു അടഞ്ഞ സ്വഭാവം ആണ് ഇവിടുത്തുകാർക്ക്. തങ്ങൾ അല്ലാതെ മറ്റൊരു വ്യക്തിയെ അത്ര പെട്ടെന്നൊന്നും അംഗീകരിക്കുന്ന സ്വഭാവം ഇവർക്കില്ല, അതും പോരെങ്കിൽ ഒടുക്കത്തെ സംശയവും, ചുരുക്കി പറഞ്ഞാൽ ഒരുകൂട്ടം ഞരമ്പൻമാരുടെ സിരാകേന്ദ്രം ആണ് ബ്ലാക്ക് റോക്ക്.

🔸ഈ ഒരു അന്തരീക്ഷത്തിലേക്കാണ് ജോൺ മക്രീഡി ട്രെയിനിൽ വന്ന് ഇറങ്ങുന്നത്. മക്രീദിയുടെ വരവിന്റെ ഉദ്ദേശമൊന്നും ആരംഭത്തിൽ ചിത്രം വെളിപ്പെടുത്തുന്നില്ല, എന്തിരുന്നാലും താൻ വന്നിറങ്ങിയ സ്ഥലത്തെ പറ്റിയും നാട്ടുകാരെ പറ്റിയും ഒരപായ സൂചന അയാൾക്ക് ലഭിക്കുന്നുമുണ്ട്. വന്നിറങ്ങിയ മക്രീദിയോട് സ്റ്റേഷൻ മാസ്റ്റർ ഒരല്പം പരുക്കനായ രീതിയിൽ പറയുന്നുണ്ട്, ഈ പട്ടണത്തിൽ കഴിഞ്ഞ നാല് വർഷത്തിനിടെ ട്രെയിൻ ഇറങ്ങിയ ആദ്യ വ്യക്തി താൻ ആണെന്ന്, എന്നാൽ തന്നോട് ഇവർ കാണിക്കുന്ന സംശയത്തിനും പകയ്ക്കും ഒന്നും കാരണം കണ്ടെത്താൻ മക്രീഡിയ്ക്ക് കഴിയുന്നുമില്ല.

🔸മുകളിൽ സൂചിപ്പിച്ച സംശയം, പക എന്നത് വെറുതെ അല്ല, വന്നിറങ്ങിയപ്പോൾ തൊട്ട് തന്നെ പല ജനാലകൾക്കിടയിലൂടെയും മറ്റും തന്നെ പലരും നിരീക്ഷിക്കുന്നതായി മാക്രീഡി ശ്രദ്ധിക്കുന്നുണ്ട്. താമസിക്കാൻ ഒരു മുറി, സഞ്ചരിക്കാൻ ഒരു വണ്ടി എന്നൊക്കെയുള്ള അയാളുടെ ചെറിയ ആവശ്യങ്ങളും നിഷ്കരുണം തള്ളപ്പെടുന്നുണ്ട്. ഏത് വിധേനയും ടിയാനെ ഈ നാട്ടിൽ നിന്നും കെട്ട് കെട്ടിക്കണം എന്ന മനോഭാവമാണ് നാട്ടുകാർക്ക്, ഈ പരദൂഷണം പറച്ചിലും ചൊറിച്ചിലും അല്ലാതെ പേരിന് പോലുമൊരു തൊഴിൽ ഇവന്മാർക്ക് ആർക്കും തന്നെ കാണാൻ ഇല്ല. നിയമവാഴ്ച തെറ്റ് കൂടാതെ നടന്ന് പോവുന്നത് ഉറപ്പ് വരുത്താൻ ഒരു ഷെരീഫ് പട്ടണത്തിൽ ഉണ്ടെങ്കിലും പുള്ളി ചത്തതിന് ഒക്കുമേ എന്ന അവസ്ഥയിലാണ്.

🔸റിനോ സ്മിത്ത് എന്ന കൗബോയ് ആണ് ബ്ലാക്ക് റോക്ക് പട്ടണത്തിന്റെ അവസാന വാക്ക്. മറ്റുള്ളവരെ പോലെ നേരിട്ട് മക്രീഡിയുമായി മത്സരത്തിനും പക പോക്കലിനും നിക്കാതെ അവസരത്തിനായി കാത്ത് നിൽക്കുന്ന സ്മിത്ത് ഈ കാരണം കൊണ്ട് തന്നെ അപകടകാരി ആണ്. ഇതൊക്കെയാണ് അവസ്ഥ എങ്കിലും പല കാര്യങ്ങളും കാരണങ്ങളും ഇപ്പോഴും ഇരുട്ടിലാണ്, ആരാണ് ഈ മാക്രീഡി, ബ്ലാക്ക് റോക്കിൽ അയാളുടെ ദൗത്യം എന്ത്, സ്മിത്ത് യഥാർത്ഥത്തിൽ ആരാണ്, നാട്ടുകാർക്ക് വരത്തനായ മാക്രീദിയോട് പക തോന്നാൻ കാരണം എന്ത്, എല്ലാത്തിനും മേലെ ഇവർ മറച്ച് വെക്കുന്ന രഹസ്യങ്ങൾ എന്ത്, തുടങ്ങി അനവധി ചോദ്യങ്ങൾക്കുള്ള ഉത്തരമാണ് ഒന്നര മണിക്കൂറിൽ താഴെ മാത്രം ദൈർഖ്യമുള്ള ചിത്രം.

🔸ഒരൊറ്റ ദിവസം അരങ്ങേറുന്ന സംഭവങ്ങളാണ് ചിത്രത്തിന് ആധാരം, അതായത് നായക കഥാപാത്രം ബ്ലാക്ക് റോക്കിൽ വന്നിറങ്ങുന്നത് മുതൽ ഇരുപത്തി നാല് മണിക്കൂറിന് ശേഷം അയാൾ മടങ്ങാൻ തയാറെടുക്കുന്ന സമയം വരെയുള്ള സംഭവങ്ങൾ. ഒരു വെസ്റ്റേൺ ചിത്രത്തിന്റെ ഭാവം കൂടിയുണ്ട് ബാഡ് ഡേ അറ്റ് ബ്ലാക്ക് റോക്കിന്, ആദ്യ പത്ത് മിനുട്ടിൽ തന്നെ കാർഡ്‌സ് എല്ലാം നല്ല വെടിപ്പായിട്ട് പ്രേക്ഷകന്റെ മുന്നിൽ വെക്കുന്ന ചിത്രം അവസാന ഇരുപത് മിനുട്ടിൽ തകർത്താടുന്നുണ്ട്. ഇതിന് മേൽ ഈ ചിത്രത്തെ പറ്റി എന്ത് പറഞ്ഞാലും അത് സ്പോയ്ലർ ആയി മാറുമെന്നതിനാൽ നിർത്തുന്നു, കാണാൻ ശ്രമിക്കുക.

Verdict : Must Watch

DC Rating : 90/100

542. Remake (2003)

Director : Dino Mustafic

Genre : War

Rating : 7.7/10

Country : Bosnia Herzegovina

Duration : 108 Minutes

🔸അടുത്ത കാലത്ത് ഒന്നും തന്നെ ഒരു സിനിമ കാണാൻ ഇത്രയും ബിദ്ധിമുട്ടിയ ഒരു സംഭവം ഉണ്ടായിട്ടില്ല, പറഞ്ഞ് വന്നത് റീമേയ്ക്ക് എന്ന ബോസ്നിയൻ ചിത്രത്തെ കുറിച്ചാണ്. മുൻപ് കുറച്ച് ഫിലിം ഫെസ്റ്റുകളുമായി ബന്ധപ്പെട്ട ആർട്ടിക്കുകളിലും മറ്റും ഈ ചിത്രത്തെ പരാമർശിച്ച് കണ്ടിരുന്നെങ്കിലും കൂടുതൽ അന്വേഷിക്കാൻ പോയില്ല. എന്നാൽ ഒട്ട് പിറകെ പോയപ്പോൾ നല്ലൊരു പ്രിന്റോ, ഇംഗ്ലീഷ് സബ്ബോ ഇല്ല താനും. അങ്ങനെ അത്യാവശ്യം ബേധം എന്ന് തോന്നിയ ഒരു പ്രിന്റിൽ നിന്നും ക്രൊയേഷ്യൻ ഭാഷ ട്രാൻസ്ലേറ്ററിൽ ഇട്ടാണ് ഈ ചിത്രം കണ്ട് തീർന്നതും. ഇങ്ങനെ ഒക്കെ ആണ് തുടങ്ങിയത് എങ്കിലും മുന്നോട്ട് പോകവേ ഭാഷ എന്നത് ഒരു പ്രശനം അല്ലാതായി മാറുന്നുണ്ട്, കാരണം പറയുന്നതും പറയാൻ ഉദ്ദേശിക്കുന്നതുമായ കാര്യങ്ങൾ വ്യക്തമാണ്, മനോഹരമാണ്.

🔸വർത്തമാന കാലഘട്ടത്തിലാണ് ചിത്രം ആരംഭിക്കുന്നത്, താരിഖ് കരാഗ എന്ന കേന്ദ്ര കഥാപാത്രം ഒരു സൗഹൃദ വിരുന്നിൽ പങ്കെടുത്ത് കൊണ്ടിരിക്കുകയാണ്. അത്യാവശ്യം പേരും പ്രശസ്തിയും ഒക്കെയുള്ള എഴുത്തുകാരനായ ടാരിഖിന്റെ പുതിയ കൃതി സ്വാഭാവികമായും ഇവിടെ ചർച്ചാ വിഷയം ആവുകയാണ്. പ്രസ്തുത കൃതിയെ കുറിച്ച് സംസാരിക്കാനുള്ള താരിഖിന്റെ ശ്രമങ്ങൾ എല്ലാം പാളി പോവുകയാണ്, കാരണം മറ്റൊന്നുമല്ല ഈ കൃതിക്ക് താരിഖിന്റെ വ്യക്തി ജീവിതത്തിൽ വലിയ പ്രാധാന്യം ഉണ്ട്, അതാണെങ്കിൽ വാക്കുകളാൽ വിവരിക്കാൻ കഴിയാത്ത വിധം ദൃഡവുമാണ്. കുറച്ച് കൂടി വ്യക്തമായി പറയുക ആണെങ്കിൽ ഈ കൃതിയിൽ അയാൾ കുറിച്ചിട്ടിരിക്കുന്നത് സ്വന്തം അച്ഛന്റെ ജീവിതമാണ്.

🔸ഇവിടെ നിന്നും ചിത്രം കടന്ന് ചെല്ലുന്നത് രണ്ടാം ലോക മഹായുദ്ധ കാലഘട്ടത്തിലേക്കാണ്, താരിക്ക് കരാഗയുടെ അച്ഛനായ അഹ്മദ് കരാഗയുടെ കഥ പറയാൻ. അഹ്മദ് ആള് ചില്ലറക്കാരനല്ല എന്ന് ആദ്യ രംഗത്തിൽ നിന്ന് തന്നെ മനസ്സിലാവുന്നുണ്ട്, തന്റെ നേരേയ്ക്ക് എത്തിയ വെല്ലുവിളിയെ മറുത്തൊന്ന് ആലോചിക്കാതെ സ്വീകരിച്ചതും പോരാതെ കായികാഭ്യാസി ആയ എതിരാളിയെ നിഷ്കരുണം തറപറ്റിക്കുന്ന രംഗത്തോട് കൂടിയാണ് താരിഖിനെ നമ്മൾ പരിചയപ്പെടുന്നത്. ഈ കാലയളവിൽ തന്നെ നല്ല കുറച്ച് സൗഹൃദങ്ങളും പ്രണയവും താരിഖിന് ഉണ്ട്. ഇതൊക്കെയാണ് കാര്യം എങ്കിലും അധികം താമസിയാതെ തന്നെ അഹ്മദ് യുദ്ധഭൂമിയിലേക്ക് വലിച്ചിഴയ്ക്കപ്പെടുകയാണ്, സൈനികൻ എന്ന നിലയിൽ അതയാളുടെ ഉത്തരവാദിത്തവും ബാധ്യതയും ആയിരുന്നു.

🔸മുകളിൽ സൂചിപ്പിച്ച അഹ്മദിന്റെ കഥയോടൊപ്പം തന്നെ ചേർത്ത് പാരലൽ ആയി മകൻ താരിഖിന്റെ കഥയും നമ്മൾ കാണുന്നുണ്ട്. അച്ഛനെ പോലെ തന്നെ മകനും ഒട്ടും ആഗ്രഹം ഇല്ലെങ്കിൽ പോലും യുദ്ധ മുഖത്തേക്ക് കടന്ന് ചെല്ലേണ്ടി വരികയാണ്, അഹ്മദിന്റെ കാര്യത്തിൽ രണ്ടാം ലോക മഹായുദ്ധം ആണെങ്കിൽ ഇവിടെ ആഭ്യന്തര കലഹം എന്ന വ്യത്യാസം മാത്രം. ഈ യുദ്ധത്തിന്റെ തുടർച്ച എന്നോണം അഹ്മദിന് ഒരുപാട് നാളുകൾ കോണ്സെന്ട്രേഷൻ ക്യാമ്പുകളിൽ കഴിയേണ്ടി വന്നു, അച്ഛന്റെ വഴി പിന്തുടർന്ന മകനും സമാനമായ സാഹചര്യങ്ങൾ നേരിടേണ്ടി വരുന്നുണ്ട്, കുറച്ച് കൂടി ലളിതമായി പറയുക ആണെങ്കിൽ ചരിത്രം ഇവിടെ ആവർത്തിക്കപ്പെടുകയാണ്.

🔸ചരിത്രം എന്നത് തുടർച്ചയാണ്, അതിനും മുകളിൽ ആവർത്തനം ആണ്, തന്റെ മുൻ തെറ്റുകളിൽ നിന്നും പാഠം ഉൾക്കൊണ്ടവൻ മാറി ചിന്തിക്കും, പ്രശ്നത്തെ വ്യത്യസ്തമായ രീതിയിൽ സമീപിക്കും, വിജയം കരസ്ഥമാക്കും. ഈ മുകളിൽ ചേർത്തിരിക്കുന്ന വാക്കുകളാണ് ഏറെക്കുറെ ഈ ചിത്രം പറയുന്ന വിഷയം. സാമ്യതകൾ നിറഞ്ഞ് നിൽക്കുന്ന സന്ദര്ഭങ്ങളിലൂടെ കടന്ന് പോവുമ്പോഴും അച്ഛനും മകനും കൈക്കൊള്ളുന്ന വ്യത്യസ്തമായ രീതികളാണ് പുതിയ പാതകൾ തുറന്നിടുന്നത്. കൂടുതൽ പറഞ്ഞ് മുഷിപ്പിക്കുന്നില്ല, വ്യത്യസ്തമായ ഒരു ഉദ്യമം ആണ് റീമേയ്ക്ക് എന്ന ബോസ്നിയൻ ചിത്രം.

Verdict : Very Good

DC Rating : 80/100

541. Moscow Does Not Believe In Tears (1980)

Director : Vladimir Menshov

Genre : Drama

Rating : 8.1/10

Country : Russia

Duration : 148 Minutes

🔸സിനിമ എന്നത് നമുക്ക് ജീവിക്കാൻ കഴിയാത്ത അനവധി ജീവിതങ്ങളിലൂടെയുള്ള യാത്ര ആണെന്നോ മറ്റോ ഏതോ ഒരു ആർട്ടിക്കിളിൽ പണ്ട് വായിച്ചിട്ടുണ്ട്. ഈ ജീവിതങ്ങൾ ഓരോന്നും കണ്ട് കഴിയുമ്പോൾ സ്വാഭാവികമായും പ്രേക്ഷകൻ എന്ന നിലയിൽ നമ്മൾ റിയാക്റ്റ് ചെയ്യും. ചിലപ്പോൾ അത് ദേഷ്യം ആവാം, നിരാശ ആവാം, സങ്കടം ആവാം, അപൂർവം ചില സന്ദർഭങ്ങളിൽ അത് സംപ്ത്രിപ്തി നിറഞ്ഞ ചിരിയും ആവാം. മോസ്‌കോ ഡെസ് നോട്ട് ബിലീവ് ഇൻ റ്റിയേര്സ് എന്ന ചിത്രത്തെ അവസാനം പറഞ്ഞ ഗണത്തിലേക്ക് ചേർക്കാം, സംപ്ത്രിപ്തിയുടെ ചിരിയിലേക്ക്.

🔸സോവിയറ്റ് യൂണിയൻ തകർന്ന് തരിപ്പണം ആവുന്നതിനും മുന്നെയാണ് ഈ ചിത്രത്തിന്റെ കഥ ആരംഭിക്കുന്നത്. ഒരു പക്ഷെ സോവിയറ്റ് ജനങ്ങൾ ഇത്രമേൽ ചേർത്ത് പിടിച്ച മറ്റൊരു സിനിമ ഉണ്ടാവില്ല, എഴുപത്തി ഒൻപതിൽ ലിമിറ്റഡ് റിലീസ് കിട്ടിയ ചിത്രം തൊട്ടടുത്ത വർഷം തിയേറ്ററുകളിൽ എത്തിയപ്പോൾ കാണാൻ ചെന്നത് ഒൻപത് കോടിയോളം ജനങ്ങളാണ്, ടിവിയിലുള്ള ടെലികാസ്റ്റ് ഒരാഴ്ച കഴിഞ്ഞായിരുന്നു എന്ന് കൂടി ഇതിനോടൊപ്പം ചേർത്ത് വായിക്കേണ്ടതുണ്ട്. അത്രമേൽ ഒരു ജനതയെ സ്വാധീനിക്കുകയും, ഇഷ്ടം പിടിച്ച് പറ്റുകയും ചെയ്തിട്ടുണ്ട് ഈ റഷ്യൻ ചിത്രം.

🔸കാതരീന, ലിയുഡ്മില്ല, അന്റോണിന എന്നീ മൂന്ന് സുഹൃത്തുക്കളുടെ കഥയാണ് ഈ ചിത്രം. മൂന്ന് പേരും റഷ്യയിലെ ഗ്രാമ പ്രദേശങ്ങളിൽ നിന്നും ജോലിയും പഠനവും പോലെയുള്ള ആവശ്യങ്ങൾക്കായി മോസ്‌കോ നഗരത്തിൽ എത്തിയതാണ്. ഒരു ചെറുകിട വർക്കിങ് ഡോർമെറ്ററിയിൽ ഒരേ മുറിയിൽ അന്തേവാസികളാണ് മൂന്ന് പേരും. അൻപതുകളിലെ വിപ്ലവ കാലഘട്ടത്തിൽ സുന്ദരികളായ മൂന്ന് പെൺകുട്ടികൾക്ക്  മോസ്‌കോ പോലൊരു നഗരത്തിൽ ജീവിച്ച് പോവുക എന്നത് തീർച്ചയായും വെല്ലുവിളി തന്നെയാണ്, എല്ലാ അർത്ഥത്തിലും.

🔸കാതെറീന ഒരു ഫാക്ടറി തൊഴിലാളി ആണ്, ഏത് വിധേനയും പഠിച്ച് താൻ ആഗ്രഹിക്കുന്ന യൂണിവേഴ്സിറ്റിയിൽ പ്രവേശനം നേടാനുള്ള ശ്രമത്തിലാണ് അവൾ. മോസ്‌കോ പട്ടണത്തിലെ ജീവിതം ആസ്വദിക്കണം എന്ന ചിന്താഗതിക്കാരി ആണ് ലിയുഡ്മില്ല, തന്റെ ജീവിതത്തിലെ ഓരോ നിമിഷവും ആഘോഷിക്കാൻ താൽപര്യപ്പെടുന്ന, മറ്റൊന്നിനെയും ഗൗരവത്തോടെ കാണാൻ ശ്രമിക്കാത്ത ഒരാളാണ് അവൾ. മൂന്നാമത്തവളായ അന്റോണിന ഒരു പെയ്ന്റർ ആണ്, കാതറീനയ്ക്ക് ഇല്ലാത്ത ആത്മവിശ്വാസവും, ലിയുഡ്മില്ലയ്ക്ക് ഇല്ലാത്ത കാര്യ ഗൗരവവും അവൾക്ക് ഉണ്ട്. ഇതാണ് ഏറെക്കുറെ ചിത്രത്തിലെ മൂന്ന് കഥാപാത്രങ്ങളുടെയും ബാക്ക്ഗ്രൗണ്ടുകൾ.

🔸അമ്പതുകളിൽ ആരംഭിക്കുന്ന ചിത്രം പിന്നീട് രണ്ട് പതിറ്റാണ്ടുകൾക്ക് ശേഷമുള്ള ഈ കഥാപാത്രങ്ങളുടെയെല്ലാം ജീവിതത്തിലേക്കും കടന്ന് ചെല്ലുന്നുണ്ട്. ഈ രണ്ട് കാലയളവിലും കഥാപാത്രങ്ങൾക്ക് നേരിടേണ്ടി വരുന്ന സംഭവങ്ങളും മാറ്റങ്ങളും എല്ലാം തികച്ചും ന്യായീകരിക്കാൻ കഴിയുന്ന രീതിയിൽ, ഇവരോട് ഇഷ്ടം ജനിപ്പിക്കുന്ന വിധം അവതരിപ്പിക്കാൻ കഴിഞ്ഞു എന്നിടത്താണ് ചിത്രം വിജയിക്കുന്നത്. ഒരു സ്ത്രീപക്ഷ ചിത്രം ആണ് മോസ്‌കോ ഡെസ് നോട്ട് ബിലീവ് ഇൻ റ്റിയേര്സ്, ഒരുപക്ഷെ അടുത്ത കാലത്ത് കണ്ട ഏറ്റവും മികച്ച ചിത്രം. കഴിയുമെങ്കിൽ കാണാൻ ശ്രമിക്കുക.

Verdict : Must Watch

DC Rating : 90/100

540. Eat Drink Man Woman (1994)

Director : Ang Lee

Genre : Drama

Rating : 7.8/10

Country : Taiwan

Duration : 123 Minutes

🔸നല്ല ഭക്ഷണവും പുതിയ രുചികളും ഒരു ശരാശരി മലയാളിയുടെ ബലഹീനത ആണ്, അത്തരത്തിൽ ഉള്ളവർ എന്തായാലും കണ്ടിരിക്കേണ്ട ചിത്രങ്ങളിൽ ഒന്നാണ് ഈറ്റ് ഡ്രിങ്ക് മാൻ വുമൺ. ചു എന്ന കേന്ദ്ര കഥാപാത്രത്തെ കാണിച്ച് കൊണ്ടാണ് സിനിമ ആരംഭിക്കുന്നത്, ആദ്യ രംഗത്തിൽ ടിയാൻ നല്ല സ്റ്റൈൽ ആയി ഭക്ഷണം പാചകം ചെയ്ത് കൊണ്ടിരിക്കുകയാണ്, ചൈനീസ് ശൈലിയിൽ മീനും ഇറച്ചിയും ഉൾപ്പെടെ സകലമാന വിഭവങ്ങളും ഇയാൾ പാകം ചെയ്യുന്ന ശൈലിയിൽ നിന്ന് തന്നെ മനസിലാവും, ആള് ചില്ലറക്കാരൻ അല്ല എന്ന്. ഒരു റിട്ടയേർഡ് ഷെഫ് ആണ് ചു, എന്നാൽ ഇന്ന് അയാൾ പാചകം ചെയ്യുന്നത് സ്വന്തം മക്കൾക്ക് വേണ്ടിയാണ്.

🔸വിഭാര്യനാണ് ചു, മൂന്ന് പെണ്മക്കൾ അല്ലാതെ ബന്ധുക്കൾ എന്ന് പറയാൻ ടിയാന് ആരും തന്നെയില്ല. മരിച്ച് പോയ ഭാര്യയോട് അല്ലാതെ മറ്റാരോടും പ്രണയം എന്ന വികാരം ചുവിന് തോന്നിയിട്ടില്ല, അതിനാൽ തന്നെ ഭാര്യയുടെ ഓർമകളും പേറി ഒറ്റപ്പെട്ടാണ് ചു ജീവിച്ച് പോരുന്നത്. തങ്ങളുടെ അച്ഛനമ്മമാരുടെ ജീവിതത്തെ പറ്റി പെൺമക്കൾക്ക് തികച്ചും വ്യത്യസ്തമായ രണ്ട് കഥകളാണ് പറയാനുണ്ടായിരുന്നത്. ഒരു ഭാഗത്ത് കൂടി പറയുക ആണെങ്കിൽ ചുവിന് തന്റെ ഭാര്യയോട് അകമഴിഞ്ഞ സ്നേഹം തന്നെ ആയിരുന്നു, എന്നാൽ വഴക്കും വക്കാണവും നിറഞ്ഞ് നിന്നിരുന്ന ജീവിതത്തെ സ്നേഹം നിറഞ്ഞത് എന്ന് വിശേഷിപ്പിക്കാനാവുമോ എന്ന് മക്കളിലൊരാൾ സംശയം പ്രകടിപ്പിക്കുന്നുമുണ്ട്.

🔸അച്ഛൻ നൽകിയ തണലിൽ നിന്നും മൂന്ന് മക്കളും അകന്ന് കഴിഞ്ഞിരുന്നെങ്കിലും എല്ലാ ഞായറാഴ്ചയും അരങ്ങേറാറുള്ള വിരുന്നിൽ ഇവരെല്ലാം വീട്ടിൽ ഒത്തുകൂടാറുണ്ട്. ഒരു പരിധി വരെ ചുവിന്റെ നിർബന്ധമാണ് ഈ വിരുന്നിന്റെ കാരണം, അങ്ങനെ ഒരു വിരുന്ന് പരിപാടിക്ക് തകൃതിയായി ഭക്ഷണം പാകം ചെയ്ത് കൊണ്ടിരിക്കുന്നിടത്ത് നിന്നാണ് ചുവിനെ നമ്മൾ കണ്ട് മുട്ടുന്നത്. മക്കളോടുള്ള ഇഷ്ടം അയാൾ വാക്കുകളിൽ പ്രകടിപ്പിക്കുന്നില്ലെങ്കിലും അയാൾ പാചകത്തിൽ പുലർത്തുന്ന ശ്രദ്ധയും പരിചരണവും മറ്റൊരു വശം ആണ് കാഴ്ചക്കാരന് കാട്ടി തരുന്നത്.

🔸ഇനി ചുവിന്റെ മക്കളുടെ കാര്യത്തിലേക്ക് കടക്കുക ആണെങ്കിൽ, മൂവരും ജീവിതത്തിന്റെ മൂന്ന് വ്യത്യസ്ത തട്ടുകളിലാണ് ജീവിക്കുന്നത്. ആദ്യത്തെ മകൾ അച്ഛനോട് സ്നേഹം മനസ്സിൽ സൂക്ഷിക്കുമ്പോഴും സ്വന്തം ജീവിതത്തിൽ ഏറെക്കുറെ തോറ്റ് പോയ കഥാപാത്രം ആണ്, കുടുംബം ഭർത്താവ് എന്നൊക്കെയുള്ള വിഷയങ്ങളോട് ഒരുതരം സംശയം അവൾ വെച്ച് പുലർത്തുന്നുണ്ട്. രണ്ടാമത്തെ മകളാണ് തമ്മിൽ ബേധം, സ്വന്തം കാലിൽ നില്ക്കാൻ പഠിച്ചവളാണ് അവൾ. സ്വന്തമായി ജോലിയും വരുമാനവും എല്ലാം ഉള്ള ഈ കഥാപാത്രം തന്റെ ചുറ്റുപാടുകളിൽ നിന്നും മാറി പുതിയൊരു ജീവിതം കെട്ടിപ്പടുക്കാനുള്ള ശ്രമത്തിലാണ്. മൂന്നാമത്തെ മകൾ ഒരു ടിപ്പിക്കൽ ടീനേജ് കഥാപാത്രമാണ്, ഒരുപാട് സംശയങ്ങളും ആഗ്രഹങ്ങളും എല്ലാം മനസ്സിൽ വെച്ച് പുലർത്തുന്ന, പ്രണയം പോലും തുറന്ന് പറയാൻ ഭയമുള്ള ഒരു സാധാരണ കഥാപാത്രം.

🔸ഈ കഥാപാത്രങ്ങൾ എല്ലാം തന്നെ അത്താഴത്തിനായി എല്ലാ ആഴ്ചയിലേയും പോലെ അന്നും ഒത്ത് ചേരുകയാണ്. എന്നാൽ ചില പുതിയ സംഭവങ്ങൾ കൂടി അന്ന് അരങ്ങേറാനുണ്ട്, ചില കാര്യങ്ങൾ ഈ കഥാപാത്രങ്ങൾ ആ മേശമേൽ അന്ന് ചർച്ച ചെയ്യും. ആ ചർച്ച ഈ കഥാപാത്രങ്ങളെ എല്ലാം പുതിയൊരു ദിശയിലേക്ക് കൊണ്ട് പോവും. ആ മാറ്റം ഏതൊക്കെ രീതിയിൽ ഈ കഥാപാത്രങ്ങളെ ബാധിക്കും എന്നതും, ഇവരുടെ ഭാവി എന്താവും എന്നും എല്ലാമുള്ള ചോദ്യങ്ങൾക്ക് ഉത്തരമാണ് രണ്ട് മണിക്കൂർ ദൈർഖ്യമുള്ള ഈ ചിത്രം, തീർച്ചയായും കാണാൻ ശ്രമിക്കുക.

Verdict :Very Good

DC Rating : 85/100

539. The Tashkent Files (2019)

Director : Vivek Agnihotri

Genre : Historical

Rating : 8.5/10

Country : India

Duration : 136 Minutes

🔸ലാൽ ബഹാദൂർ ശാസ്ത്രി ഇന്ത്യയുടെ രണ്ടാമത്തെ പ്രധാനമന്ത്രി ആയിരുന്നു, അദ്ദേഹത്തിന്റെ കീഴിലാണ് ഇന്ത്യ പാകിസ്താനെതിരെ അറുപത്തി അഞ്ചിലെ യുദ്ധത്തിൽ വിജയം കൈവരിച്ചത്. യുദ്ധത്തിന് ശേഷം സമാധാനം പുനഃസ്ഥാപിക്കാനായി പാകിസ്താനുമായി ചർച്ചയ്ക്ക് തയാറായിരുന്നു ശാസ്ത്രി, അതിനായി ഉസ്ബെകിസ്താനിലെ ടാഷ്കെന്റിൽ ചർച്ചയ്ക്കുള്ള കളം ഒരുങ്ങുകയും ചെയ്തു. ആറ് ദിവസങ്ങൾ നീണ്ട് നിന്ന കഠിനമായ ചർച്ചകൾക്കൊടുവിൽ ഇന്ത്യയും പാകിസ്ഥാനും കരാറിൽ ഒപ്പുവെച്ചു. കരാർ പ്രാബല്യത്തിൽ വന്നതിന്റെ ആറാം നാൾ ലാൽ ബഹാദൂർ ശാസ്ത്രി താഷ്‌ക്കന്റിൽ വെച്ച് മരണപ്പെട്ടു. അദ്ദേഹത്തിന്റെ മരണം ഇന്നും പല ചോദ്യങ്ങളും ബാക്കി വെക്കുന്നു....

🔸മുകളിൽ സൂചിപ്പിച്ച വരികളോടെയാണ് ചിത്രം ആരംഭിക്കുന്നത്. അതായത് പറയാനുള്ള, പറയാൻ ഉദ്ദേശിക്കുന്ന കാര്യങ്ങൾ വ്യക്തമായും വൃത്തിയായും പറഞ്ഞ് കൊണ്ടാണ് ചിത്രം ആരംഭിക്കുന്നത്. ഇവിടുന്നങ്ങോട്ട് അവതരണത്തിൽ മേൽ സൂചിപ്പിച്ച വ്യക്തതയും വൃത്തിയും എല്ലാം കാത്ത് സൂക്ഷിച്ചിട്ടുണ്ടോ എന്ന കാര്യത്തിൽ ചർച്ച അനിവാര്യമാണ്. വളരെ എങ്ങേയ്‌ജിങ്‌ ആയ ഒരു ത്രെഡ് തന്നെയാണ് ചിത്രത്തിന്റേത്, ഇത് പോലൊരു കഥയിൽ ചരിത്രവും സത്യവും എല്ലാം ഇടകലർത്തി ബോസ് എന്ന സീരീസ് വിജയിച്ചിടത്ത് താഷ്കെന്റ് ഫയൽസ് വിജയം ആവർത്തിക്കുമോ എന്നാണെങ്കിൽ ഇല്ല എന്ന് ഒരല്പം നിരാശയോടെ പറയേണ്ടി വരും, ഇത് ബോസ് ഡെഡ് ഓർ അലൈവ് അല്ല വേറെയാണ് ഇനം.

🔸തൊണ്ണൂറുകളുടെ തുടക്കത്തിൽ ആണ് ചിത്രം ആരംഭിക്കുന്നത്, ആധാരമായ സംഭവങ്ങൾക്ക് ഉദ്ദേശം രണ്ട് പതിറ്റാണ്ട് ശേഷം. ഒരുനാൾ ബ്രിട്ടീഷ് എംബസ്സിയുടെ മുന്നിൽ ഒരു വ്യക്തി പ്രത്യക്ഷപ്പെടുകയാണ്, ഉള്ളിലേക്ക് കടക്കാനും മേധാവിയുമായി സംസാരിക്കാനും ഉള്ള ടിയാന്റെ ശ്രമങ്ങൾ എല്ലാം വിഫലം ആയപ്പോൾ അവസാന അമ്പ് എടുത്ത് പ്രയോഗിക്കുകയാണ് ഇയാൾ. താൻ ഒരു പഴയ റഷ്യൻ ചാരൻ ആണെന്നും കെജിബി കാലഘട്ടത്തിൽ ഉള്ള തന്റെ പ്രവർത്തനങ്ങളിൽ നിന്നും നിർണ്ണായകമായ ചില വിവരങ്ങൾ തനിക്ക് നൽകാൻ കഴിയും എന്നുമുള്ള ഇയാളുടെ അവകാശ വാദത്തിന് മുന്നിൽ അംബാസഡർ കേൾവിക്കാരന്റെ വേഷം കെട്ടാൻ നിർബന്ധിതൻ ആവുകയാണ്.

🔸ഇവിടെ നിന്നും ഫോക്കസ് രാഗിണി ഫുലെ എന്ന മാധ്യമ പ്രവർത്തകയിലേക്ക് മാറുകയാണ്. ഒരു പൊളിറ്റിക്കൽ ജേർണലിസ്റ്റ് എന്ന നിലയിൽ പ്രതീക്ഷാവഹമായ യാതൊരു സവിശേഷതയും അവകാശപ്പെടാനില്ല എന്ന സ്വന്തം സീനിയരുടെ പരിഹാസം കേട്ട് പുറത്തിറങ്ങുന്ന രാഗിണിയെ തേടി ഒരു അനോണിമസ് കോൾ എത്തുകയാണ്. തന്റെ പക്കൽ ദേശീയ ശ്രദ്ധ പിടിച്ച് പറ്റാൻ കെൽപ്പുള്ള ഒരു വിഷയം ഉണ്ടെന്ന ടിയാന്റെ അവകാശവാദം രാഗിണിയെ കൊണ്ട് ചെല്ലുന്നത് അൻപത് വർഷങ്ങൾക്ക് മുൻപുള്ള താഷ്കെന്റിലും, ലാൽ ബഹാദൂർ ശാസ്ത്രിയിലും ആയിരുന്നു. ഇന്ത്യ മറന്ന ഒരു വ്യക്തിയെ കുറിച്ചുള്ള അന്വേഷണം കൊണ്ട് എന്ത് കാര്യം എന്ന ചോദ്യം രാഗിണിയെ പിന്തിരിപ്പിച്ചതും ഇല്ല.

🔸ഒരു രാജ്യത്തിൻറെ പ്രധാനമന്ത്രി, വിദേശ രാജ്യത്ത് വെച്ച് മരണമടഞ്ഞിട്ടും വ്യക്തമായ രേഖകളോ, പോസ്റ്റ് മോർട്ടം റിപ്പോർട്ടോ ഗവണ്മെന്റിന്റെ കയ്യിൽ ഇല്ല എന്ന വിവരം സത്യത്തിൽ രാഗിണിയെയും കണ്ടിരിക്കുന്ന പ്രേക്ഷകനെയും ഒരുപോലെ ഞെട്ടിക്കുന്നുണ്ട്. അവിടുന്നങ്ങോട്ട് ഈ വിഷയത്തിൽ അരങ്ങേറുന്ന ചർച്ചകളും, സാധ്യതകളും, അന്വേഷണങ്ങളും എല്ലാമാണ് താഷ്കെന്റ് ഫയൽസ് എന്ന ചിത്രം. ട്വൽവ് ആംഗ്രി മെൻ എന്ന ചിത്രത്തിൽ നിന്നും ചെറിയ തോതിൽ പ്രചോദനം ഉൾക്കൊണ്ടിട്ടുണ്ട് ഈ ചിത്രം. ഇതൊക്കെയാണ് കാര്യം എങ്കിലും ഒരു സിനിമ എന്ന നിലയിൽ പൂർണത ഈ ചിത്രത്തിന് ഇല്ല, കയ്യിലുള്ള വിഷയത്തിന് വേണ്ട രീതിയിലുള്ള ഒരവസാനമോ, ഗൗരവമോ കൊടുക്കാത്ത ചിത്രം ചില സ്ഥലങ്ങളിൽ വഴി മാറി എവിടെ ഒക്കെയോ പോയി എത്തുന്നുണ്ട്. ചുരുക്കി പറഞ്ഞാൽ ഒരു തവണ കണ്ടിരിക്കാവുന്ന, എത്രയോ മികച്ചത് ആവേണ്ടി ഇരുന്ന ഒരു ചിത്രം, അതാണ് താഷ്കെന്റ് ഫയൽസ്.

Verdict : Watchable

DC Rating : 64/100

538. To Each His Own Cinema (2007)

Director : 36 Directors

Genre : Anthology

Rating : 6.8/10

Country : France

Duration : 119 Minutes

🔸ഉദ്ദേശം പത്ത് വർഷങ്ങൾക്ക് മുന്നെയാണ് ഒരു കൂട്ടം സംവിധായകർ യാത്ര എന്ന തീമിൽ ഒന്നിച്ച് ചേർന്ന് പത്ത് ഷോർട്ട് ഫിലിമുകൾ അടങ്ങിയ കേരള കഫെ എന്ന ചിത്രം മലയാളത്തിന് സമ്മാനിച്ചത്. സ്‌കൂൾ കാലഘട്ടത്തിൽ ഈ സിനിമ അപ്രതീക്ഷിതമായി കാണാൻ ഇടയായതും അവയിൽ ഓരോന്നും അമ്പരപ്പിക്കുകയും ആഴത്തിൽ സ്പർശിക്കുകയും ചെയ്തത് ഇന്നും മറക്കാനാവാത്ത ഒരനുഭവം ആയിരുന്നു. അത്തരത്തിൽ ഒരു ചിത്രമാണ് ടു ഈച് ഹിസ് ഓൺ സിനിമ എന്ന ഫ്രഞ്ച് ആന്തോളജി ചിത്രം, യാത്ര എന്ന തീമിന് പകരം ഇവിടെ സിനിമ തന്നെയാണ് വിഷയം എന്ന വ്യത്യാസം ഉണ്ട്.

🔸കാനസ് ഫിലിം ഫെസ്റ്റിവലിന്റെ സിനിമാ സംഘാടകനായ ഗില്ലസ് ജേക്കബിന്റെ മനസ്സിൽ ഒരുനാൾ ഒരാശയം ഉദിക്കുകയാണ്, ഫെസ്റ്റിന്റെ അറുപതാമത് വാർഷികത്തിൽ സിനിമയെ തന്നെ കേന്ദ്രീകരിച്ച് എന്ത് കൊണ്ട് ഒരു സിനിമ തയാറാക്കികൂടാ എന്ന ആശയം. കൂടുതൽ ഒന്നും ആലോചിക്കാതെ പുള്ളി ഇതുമായി മുന്നോട്ട് പോവുകയും ചില സംവിധായകരെ സമീപിക്കുകയും ചെയ്യുകയാണ്. ആശയം നല്ലത് ആയതിനാൽ മിക്കവരും ഉദ്യമത്തിനായി ഇറങ്ങി തിരിക്കുകയും ചെയ്തു, ഒന്നും രണ്ടുമല്ല മുപ്പത്തി ആറ് സംവിധായകർ. ആശയം കേട്ട് ഞെട്ടിയില്ലെങ്കിൽ സംവിധായകർ ആരൊക്കെ ആണെന്ന് അറിഞ്ഞാൽ ഞെട്ടിക്കോളും, ഇരുപത്തി അഞ്ചോളം രാജ്യങ്ങളിലെ പ്രഗത്ഭരായ, കഴിവ് തെളിയിച്ച അതികായന്മാരായിരുന്നു ഓരോ സംവിധായകരും.

🔸തിയോ ആഞ്ചെലോപൗലോസ്, കോയെൻ ബ്രദേഴ്‌സ്, ഡേവിഡ് ക്രൊനെൻബെർഗ്, ഡാർദീൻ ബ്രദേഴ്‌സ്, അലെജാന്ദ്രോ ഗോൺസാലസ് ഇനാരിറ്റു, ആകി കൗറിസ്മാകി, അബ്ബാസ് കിയാറോസ്തമി, തകേശി കിത്താനോ, റോമൻ പൊളാൻസ്കി, ഗസ് വാൻ സെന്റ്, ലാർസ് വോൻ ട്രയർ, വോങ് കാർവായി തുടങ്ങിയവരാണ് മുകളിൽ സൂചിപ്പിച്ച സംവിധാന പ്രമുഖരിൽ ചിലർ. ഒരു പക്ഷെ ഈ വിഭാഗം എടുക്കുക ആണെങ്കിൽ ഓൾ സ്റ്റാർ കാസ്റ്റ് എന്നൊക്കെ വിശേഷിപ്പിക്കേണ്ട ഐറ്റം. ഈ വ്യക്തികളുടെ മൂന്ന് മിനുട്ട് പരിധിയിൽ ഉള്ള ചിത്രങ്ങളുടെ കൂട്ടായ്മ ആണ് ഈ ഫ്രഞ്ച് ആന്തോളജി ചിത്രം.

🔸പേര് സൂചിപ്പിക്കുന്നത് പോലെ തന്നെ മുപ്പത്തി ആറ് സംവിധായകരുടെ തികച്ചും വ്യത്യസ്തമായ സിനിമാ കാഴ്ചപ്പാടുകളും വീക്ഷണവും എല്ലാമാണ് ഈ ചിത്രം വിഷയമാക്കുന്നത്. പശ്ചാത്തലത്തിലും വ്യക്തിത്വങ്ങളിലും എല്ലാം വ്യത്യാസം പുലർത്തുന്നുണ്ട് എങ്കിലും ഈ മുപ്പത്തി ആറ് കഥകളും സിനിമ എന്ന വിഷയത്തോട് ബന്ധപ്പെട്ട് കിടപ്പുണ്ട്. ലോകത്തുള്ള ഓരോ വ്യക്തിയുടെയും ജീവിതത്തിൽ ദേശ, പ്രായ, രൂപഭാവ ഭേദമന്യേ സിനിമ എന്ന കൺസെപ്റ്റ് കൊണ്ട് വന്ന മാറ്റത്തെയും, പുലർത്തുന്ന സ്വാധീനത്തെയും എല്ലാം ഇവിടെ പരാമർശിക്കുന്നുണ്ട്, എല്ലാ രീതിയിലും ഒരു ഹോമേജ് തന്നെ.

🔸സിനിമ കാണുക, അനുഭവിക്കുക, ആസ്വദിക്കുക എന്നീ ലളിതമായ കാര്യങ്ങളെ വിവിധ ബാക്ക്ഗ്രൗണ്ടുകളിൽ, വ്യത്യസ്ത വികാരങ്ങളുടെ മേമ്പൊടിയോടെ അവതരിപ്പിച്ചിട്ടുണ്ട് ഈ ചിത്രം. ചിലത് സംവിധായകരുടെ വ്യക്തിപരമായ അനുഭവങ്ങൾ ആണ്, സിനിമയുമായി ബന്ധപ്പെട്ടിട്ട് ഉള്ളത് തന്നെ. ആദ്യാവസാനം എല്ലാ ഷോർട്ടുകളിലും നിറഞ്ഞ് നിൽക്കുന്നത് സിനിമയോടുള്ള പാഷൻ തന്നെയാണ്, അസൂയ ജനിപ്പിക്കും വിധമുള്ള പാഷൻ. കൂടുതൽ പറയുന്നില്ല സിനിമകൾ ഇഷ്ടം ആണെങ്കിൽ അതിനും മേലെ 'സിനിമയെ' ഇഷ്ടം ആണെങ്കിൽ കാണാൻ ശ്രമിക്കുക.

Long Live Cinema !!!!

Verdict : Very Good

DC Rating : 80/100