579. Rick And Morty (2013)

Creator : Justin Roiland

Genre : Animated SitCom

Rating : 9.3/10

Seasons : 03

Episodes : 31

Duration : 22 Minutes

🔸കണ്ടവർ എല്ലാം തന്നെ മികച്ച അഭിപ്രായങ്ങൾ പറഞ്ഞ് കേട്ട അപൂർവം ടീവി സീരീസുകൾ മാത്രമേ അറിവുള്ളൂ, ഗെയിം ഓഫ് ത്രോൺസ് പോലെയുള്ളവ അവസാന ഭാഗങ്ങൾ പൊതുവെ വലിയ തൃപ്തി ഒന്നും തരാതെ പോയവയാണ്, ഈ ഒരു വസ്തുതയ്ക്ക് എതിര് നിൽക്കുന്ന ഒന്ന് ബ്രെയ്ക്കിങ് ബാഡ് എന്ന സീരീസ് ആണ്, പിന്നെ റിക്ക് ആൻഡ് മോർട്ടി എന്ന ഇവിടെ പറയാൻ പോവുന്ന ഐറ്റവും. നാളുകൾ ഏറെ ആയി ഈ സീരീസിനെ കുറിച്ച് പല ഭാഗങ്ങളിൽ നിന്നും കേൾക്കാൻ തുടങ്ങിയിട്ട്, എന്നാൽ ഇതുവരെ കാണാൻ തുനിയാതിരുന്നതിന് രണ്ട് പ്രധാന കാരണങ്ങൾ ആണ് ഉണ്ടായിരുന്നത്, ആദ്യമായി ഇതൊരു അനിമേഷൻ സീരീസ് ആണെന്നതും, പിന്നെ കൈകാര്യം ചെയ്യുന്നത് വലിയ താല്പര്യം ഇല്ലാത്ത സയൻസ് ഫിക്ഷൻ ആണെന്നതും.

🔸റിക്ക് എന്ന അപ്പൂപ്പനും മോർട്ടി എന്ന കൊച്ചുമകനും ആണ് നമ്മുടെ പ്രധാന കഥാപാത്രങ്ങൾ. അപ്പൂപ്പൻ എന്നൊക്കെ കേൾക്കുമ്പോൾ സ്വാഭാവികമായും ചെറുമകനോട് കരുതലും സ്നേഹവും എല്ലാമുള്ള ഒരു സ്വാഭാവിക വേർഷൻ ആവും നമ്മുടെ മനസ്സിൽ എത്തുക, അതിൽ കുറ്റം പറയാനും കഴിയില്ല, ഇവിടെ പ്രശനം എന്താണെന്ന് വെച്ചാൽ റിക്കിന്റെ കാര്യത്തിൽ ഈ വേർഷൻ ഒട്ടും ചേരില്ല. റിക്ക് ഒരല്പം എക്‌സെന്ററിക് ആയ കഥാപാത്രമാണ്, ശാസ്ത്രത്തിലും പരീക്ഷണങ്ങളിലും വലിയ പ്രാവീണ്യം നേടിയ വ്യക്തിയാണ് അയാൾ. കഠിനമായ, ചിന്തിക്കാൻ പോലും കഴിയാത്ത ഉപകരണങ്ങൾ ശാസ്ത്രത്തിന്റെ സഹായത്തോടെ യാഥാർഥ്യമാക്കാൻ അയാൾക്ക് കഴിയും.

🔸ഈ ഉദ്യമങ്ങളിൽ അയാളുടെ സ്ഥിരം പങ്കാളിയാണ് മോർട്ടി, ഒരു അസിസ്റ്റന്റ് എന്നതിൽ കവിഞ്ഞ് വലിയ സ്നേഹം ഒന്നും പ്രത്യക്ഷത്തിൽ റിക്ക് മോർട്ടിയോട് പ്രകടിപ്പിക്കുന്നില്ല എന്ന് മാത്രമല്ല തന്റെ ബുദ്ധിയും കഴിവുമായി താരമത്യം ചെയ്യാൻ കഴിയാത്ത ഏതൊരാളോടും ഒരു തരം പുച്ഛത്തോടെയാണ് റിക്കിന്റെ പെരുമാറ്റം, ഒരു തഗ് എന്നൊക്കെ പറയാം. മോർട്ടി ആണ് യഥാർത്ഥത്തിൽ റിക്കിനെ ഒരു പരിധി വരെ ഗ്രൗണ്ട് ചെയ്യുന്നതും. ഇനി മോർട്ടിയുടെ കാര്യത്തിലേക്ക് കടക്കുക ആണെങ്കിൽ, ഏതൊരു കുട്ടിയേയും പോലെ തന്നെ ഈ പ്രായത്തിൽ വലിയ ഉത്തരവാദിത്തങ്ങളും ലക്ഷ്യങ്ങളും ഒന്നും ഇല്ലാതെ തിമിർത്ത് നടക്കുന്ന ഒരാളാണ് അവൻ. റിക്കിന്റെ ഉദ്യമങ്ങളിൽ പങ്കാളി ആവുക എന്നത് അവന് താല്പര്യമുള്ള വിഷയമാണ്, ചിലപ്പോൾ എങ്കിലും ഈ പരിപാടികളിലേക്ക് അവൻ വലിച്ചിഴയ്ക്കപ്പെടാറുമുണ്ട്.

🔸റോബോട്ടിക്‌സ് തൊട്ട് അന്യ ഗ്രഹ ജീവികൾ വരെ, പല തരത്തിലുള്ള അറിവിന് അന്യമായ സംസ്കാരങ്ങൾ, ഗ്രഹങ്ങൾ, ജീവി വിഭാഗങ്ങൾ, ഇനി ഇതൊന്നും പോരെങ്കിൽ പാരലൽ ടൈംലൈനുകളും ആൾട്ടർനേറ്റ് റിയാലിറ്റികളും ടൈം ട്രാവലും വരെ അനവധി സംഭവങ്ങൾ റിക്കിന്റെയും മോർട്ടിയുടെയും യാത്രകളുടെ ഭാഗം ആവുന്നുണ്ട്. പുതിയ നൂതന കണ്ടുപിടിത്തങ്ങൾ ഇവരെ പുതിയ പ്രശ്നങ്ങളിലേക്ക് കൊണ്ട് ചെന്നെത്തിക്കുമ്പോൾ അതിൽ നിന്നും രസകരമായി രക്ഷപ്പെടുന്നുമുണ്ട് മിക്കപ്പോഴും നമ്മുടെ ടൈറ്റിൽ കഥാപാത്രങ്ങൾ. പ്രധാന കഥാപാത്രങ്ങൾക്ക് പുറമെ മോർട്ടിയുടെ അച്ഛനായ ജെറി, റിക്കിന്റെ മകളും മോർട്ടിയുടെ അമ്മയുമായ ബെത്, മോർട്ടിയുടെ സഹോദരി സമ്മർ എന്നിവരും സീരീസിന്റെ ഭാഗങ്ങളാണ്.

🔸ഈ കഥാപാത്രങ്ങളിൽ തന്നെ ജെറി ഒരുപാട് ഇഷ്ടം തോന്നിയ കഥാപാത്രങ്ങളിൽ ഒന്നാണ്, പ്രത്യേകിച്ചും അവസരം കിട്ടുമ്പോൾ എല്ലാം പരസ്പരം താറടിക്കുന്ന റിക്കുമായുള്ള ഗിവ് ആൻഡ് ടെയ്ക്ക് രംഗങ്ങൾ. ഒരു എപ്പിസോഡിൽ തന്നെ രണ്ടോളം വ്യത്യസ്ത കഥകൾ ഇടകലർത്തി അവതരിപ്പിക്കുന്ന രീതിയാണ് സീരീസ് പിന്തുടരുന്നത്, ഈ രണ്ടിലും മിക്കപ്പോഴും കഥാപാത്രങ്ങൾ രണ്ട് വിഭാഗങ്ങളായി പ്രത്യക്ഷപ്പെടുന്നുമുണ്ട്. ഇതുവരെ കണ്ട് തീർത്ത സീരീസുകൾ മികച്ചവ എന്ന അടിസ്ഥാനത്തിൽ ചിട്ടപ്പെടുത്തുക ആണെങ്കിൽ മുൻ നിരയിൽ തന്നെ കാണും റിക്ക് ആൻഡ് മോർട്ടി, അതിലും കൂടുതലായി നിലവാരത്തിന്റെ കാര്യത്തിൽ ഒന്നും പറയാനില്ല.

Verdict : Must Watch

DC Rating : 95/100

578. The Private Life Of Sherlock Holmes (1970)

Director : Billy Wilder

Genre : Thriller

Rating : 7.1/10

Country : UK

Duration : 125 Minutes

🔸പുസ്തക വായന എന്നത് വളരെ കുറവ് ആണെങ്കിലും, വായിച്ചവയിൽ ഒന്നും തന്നെ ഷെർലോക്ക് ഹോംസിനോളം താല്പര്യം തോന്നിയൊരു കഥാപാത്രത്തെ കണ്ട് കിട്ടിയിട്ടില്ല, തന്റെ കഴിവിൽ തികഞ്ഞ വിശ്വാസമുള്ള, ആ കഴിവ് ഒരു ആഘോഷമാക്കി മാറ്റുന്ന, മറ്റുള്ളവരുമായി ഒരു തരത്തിലും യോജിച്ച് പോവാത്ത, അവർക്കിടയിൽ ധിക്കാരി എന്നും തന്നിഷ്ടക്കാരൻ എന്നുമെല്ലാം പേര് സമ്പാദിച്ച, എന്നാൽ കഴിവിന്റെ കാര്യത്തിൽ പകരക്കാരൻ ഇല്ലാത്ത, ഇഷ്ടമില്ലാത്തവർ പോലും രഹസ്യമായി ആരാധിക്കുന്ന വേറെ ഏത് കഥാപാത്രം ഉണ്ടാവും ഈ ലോക ചരിത്രത്തിൽ തന്നെ. ഈ ഒരു താല്പര്യം കൊണ്ട് തന്നെ ഹോംസിന്റെ കിട്ടാവുന്നിടത്തോളം കഥകൾ വായിച്ചിട്ടുണ്ട്, സിനിമകളും സീരീസുകളും കണ്ടിട്ടുണ്ട്, ഇവയിൽ അവസാനമായി കണ്ടതാണ് ഈ ബില്ലി വൈൽഡർ ചിത്രം.

🔸പുതിയ കേസും കൂട്ടവും ഒന്നും ഇല്ലാതെ ആകെ ഡിപ്രഷൻ അടിച്ച് കിടക്കുന്ന ഷെർലോക്ക് ഹോംസിനെ കാണിച്ച് കൊണ്ടാണ് സിനിമ ആരംഭിക്കുന്നത്, താൻ ഈ ലോകത്ത് പിറവി കൊണ്ടത് തന്നെ അന്വേഷണങ്ങൾക്കും കണ്ടെത്തലുകൾക്കും വേണ്ടി ആണെന്നാണ് ഷെർലോക്കിന്റെ വശം, തനിക്ക് ഒരു വെല്ലുവിളി ഉയർത്താനാവാത്ത കുറ്റവാളി സമൂഹത്തോട് അയാൾക്ക് പരമ പുച്ഛമാണ്, താൻ അവരിൽ ഒരാളായി മാറാത്തത് ആരോ ചെയ്ത പുണ്യമാണ് എന്നതാണ് ഷെർലോക്കിന്റെ നിഗമനം. ഇങ്ങനെ ബോർ അടിച്ചിരിക്കുന്ന സമയം അല്പം കൊക്കെയ്ൻ ഒക്കെ അടിച്ച് ആനന്ദം കണ്ടെത്തുകയാണ് ആശാന്റെ ഇപ്പോഴത്തെ വിനോദം.

🔸ഈ ഒരു അവസ്ഥയിൽ ഹോംസിന്റെ സന്തത സഹചാരി ആയ വാട്സണിന് നല്ല വിഷമം ഉണ്ട്, വാട്സണിന്റെ ഓർമ്മ കുറിപ്പുകളും രേഖകളും എല്ലാം പുസ്തകങ്ങളായി പുറത്തിറങ്ങിയ ശേഷം ഹോംസിന് ഒരു സെലിബ്രിറ്റി സ്റ്റാറ്റസ് ഉണ്ട്, എന്തിന് അധികം പറയുന്നു ബ്രിട്ടീഷ് റാണി പോലും ഷെർലോക്കിന്റെ വലിയൊരു ആരാധികയാണ്. നല്ല വെല്ലുവിളി ഉയർത്തുന്ന പോലൊരു കേസ് വന്നാൽ ഈ അവസ്ഥ ആകെ മാറും എന്ന് വാട്സണിന് അറിയാം, അതിനായുള്ള കാത്തിരിപ്പിലാണ് അയാൾ. ഒടുവിൽ ലക്ഷണങ്ങൾ കൊണ്ട്, അങ്ങനെ വെല്ലുവിളി ഉയർത്തും എന്ന് സൂചിപ്പിക്കുന്ന ഒരു കേസ് ബേക്കർ സ്ട്രീറ്റിൽ, അവരുടെ വീട്ടുപടിക്കൽ എത്തുകയാണ്, ഗബ്രിയേല വലഡോൺ എന്ന യുവതിയുടെ രൂപത്തിൽ.

🔸കഴിഞ്ഞ മൂന്ന് ആഴ്ചകളായി യാതൊരു വിവരവും ഇല്ലാത്ത എൻജിനിയറായ ഭർത്താവിനെ അന്വേഷിച്ചാണ് ഗബ്രിയേല ബെൽജിയത്തിൽ നിന്നും ഇംഗ്ലണ്ടിൽ എത്തുന്നത്. തന്റെ കത്തുകൾക്ക് മറുപടി നൽകാത്ത ഭർത്താവിനെ തിരഞ്ഞ് അവർ ഒരുപാട് വാതിലുകൾ മുട്ടിയെങ്കിലും ആശ്വാസം പകരുന്ന മറുപടികൾ എവിടെ നിന്നും ലഭിച്ചില്ല. ഒടുവിൽ എംബസിയിൽ നിന്നുമാണ് ഷെർലോക്ക് ഹോംസ് എന്ന പേരും 221 ബേക്കർ സ്ട്രീറ്റ് എന്ന വിലാസവും അവർക്ക് ലഭിക്കുന്നത്. എന്നാൽ ദുരന്തങ്ങൾ അവരെ വിട്ട് പോയിരുന്നില്ല, വഴി മദ്ധ്യേ അവർ ആക്രമിക്കപ്പെടുകയാണ്.

🔸വളരെ സ്ട്രെയിറ്റ് ഫോർവേർഡ് ആയ ഒരു മാൻ മിസ്സിംഗ് കേസ് എന്ന ആരംഭത്തിൽ തോന്നിപ്പിക്കും എങ്കിലും അപ്രതീക്ഷിതമായ ചില വഴികളിലൂടെ ഈ ചിത്രം കടന്ന് പോവുന്നുണ്ട്. ഒരു കാര്യം കൂടി, പേര് സൂചിപ്പിക്കുന്നത് പോലെ തന്നെ ഷെർലക്ക് ഹോംസ് എന്ന കഥാപാത്രത്തിന്റെ വ്യക്തി ജീവിതത്തിനും മറ്റും നല്ല പ്രാധാന്യം ചിത്രം നൽകുന്നുണ്ട്, അത് കൊണ്ട് തന്നെ സീരീസുകളിലും മറ്റും കണ്ട് പഴകിയ ഷെർലോക്കിയൻ വൈദഗ്ദ്യം ഒന്നും വലിയ അളവിൽ ഈ ചിത്രത്തിൽ നിന്നും ലഭിച്ചേക്കില്ല. ഷെർലോക്ക് എന്ന കഥാപാത്രത്തിന്റെ ആരാധകർക്ക് ഒരു ട്രീറ്റ് ആയിരിക്കും ഈ ചിത്രം, കാണാൻ ശ്രമിക്കുക.

Verdict : Good

DC Rating : 75/100

577. The Wheel (1923)

Director : Abel Gance

Genre : Drama

Rating : 7.6/10

Country : France

Duration : 269 Minutes

🔸ദി വീൽ എന്ന ആബേൽ ഗാൻസ് ചിത്രം കണ്ട് കഴിഞ്ഞപ്പോൾ ആദ്യം മനസ്സിൽ എത്തിയത് നമ്മുടെ സെർജിയോ ലിയോണിന്റെ വൺസ് അപ്പോൺ എ ടൈം ഇൻ ദി വെസ്റ്റ് എന്ന ചിത്രമാണ്, ഇതിന് പ്രധാനമായി ഉണ്ടായ കാരണം കഥ എന്നത് ഒരു പെൺകുട്ടിയുടെയും അവൾക്ക് ചുറ്റുമുള്ള മൂന്ന് പുരുഷന്മാരിലും ഒതുങ്ങി നിൽക്കുന്നതാണ് എന്ന വസ്തുത തന്നെ. ഈ ഒരു കാര്യം ഒഴിച്ച് നിർത്തിയാൽ രണ്ട് ചിത്രങ്ങൾ തമ്മിലും യാതൊരു സാമ്യതയും അനുഭവപ്പെട്ടില്ല എന്നും, രണ്ടും വളരെ മികച്ച രണ്ട് സിനിമകൾ ആണ് എന്നും ഇതിനോടൊപ്പം പറയേണ്ടി ഇരിക്കുന്നു.

🔸നപോളിയൻ എന്ന ആബേൽ ഗാൻസ് ചിത്രത്തെ പറ്റി മുൻപ് പറഞ്ഞത് പോലെ തന്നെ ദൈർഖ്യത്തിന്റെ കാര്യത്തിൽ ഒരു ചെറിയ പ്രശനം ഉണ്ട് ഈ ചിത്രത്തിന്, ഇന്ന് ലഭ്യമായ പ്രിന്റ് തന്നെ ഉദ്ദേശം അഞ്ച് മണിക്കൂറിന് അടുത്ത് ഉണ്ട്. സംവിധായകൻ ചിത്രീകരിച്ച ആദ്യ പതിപ്പ് ഇന്ന് ഏറെക്കുറെ നഷ്ടപ്പെട്ട് കഴിഞ്ഞിരിക്കുന്നു, അത് ഉദ്ദേശം ഒൻപത് മണിക്കൂറിന് അടുത്ത് ഉണ്ടായിരുന്നെന്നും, മൂന്ന് ദിവസം എടുത്താണ് പ്രദര്ശിപ്പിച്ചിരുന്നത് എന്നും ഇതിനോടൊപ്പം ചേർത്ത് വായിക്കാം. ഒരു ഫ്രഞ്ച് നിശബ്ദ ചിത്രമാണ് സംഭവം, ചിത്രത്തിന് നൂറിനടുത്ത് വർഷം പഴക്കവും ഉണ്ട്, ആയതിനാൽ താല്പര്യം ഇല്ലാത്തവർ ഈ വഴി പോകേണ്ടതില്ല.

🔸അല്പം ഇമോഷണലായ ഒരു സ്റ്റോറിയാണ് ചിത്രത്തിന്റേത്, സിസിഫ് എന്ന ട്രെയിൻ എഞ്ചിനീയർ ആണ് നമ്മുടെ ആദ്യ പ്രധാന പുരുഷ കഥാപാത്രം, മൂന്ന് പേരിൽ ഒരാൾ. ടിയാൻ ഒരു ദിവസം ട്രാക്കിൽ അരങ്ങേറുന്ന ഒരു ട്രെയിൻ ദുരന്തത്തിന് സാക്ഷി ആവുകയാണ്, ഈ സംഭവ സ്ഥലത്ത് അവശിഷ്ടങ്ങൾക്കിടയിൽ നിന്നുമാണ് അയാൾക്ക് ഒരു കൈകുഞ്ഞിനെ ലഭിക്കുന്നത്. മാതാപിതാക്കൾ മരണപ്പെട്ട അവളെ സിസിഫ് സ്വന്തം മകളായി വളർത്തുകയാണ്, അവൾക്ക് നോർമ എന്ന പേരും നൽകി സ്വന്തം മകളായി അയാൾ വീട്ടിലേക്ക് കൊണ്ടുപോവുകയാണ്.

🔸സിസിഫിന് എല്ലി എന്നൊരു മകൻ കൂടിയുണ്ട്, വർഷങ്ങൾക്ക് മുന്നേ ഭാര്യ മരിച്ച് പോയ വിഭാര്യനായ സിസിഫ് രണ്ട് കുട്ടികളെയും ചേർത്ത് പിടിച്ച് ജീവിതത്തിൽ മുന്നോട്ടേക്ക് നടന്ന് തുടങ്ങുകയാണ്. പ്രശ്നങ്ങൾ ആ കുടുംബത്തിൽ പ്രത്യക്ഷപ്പെട്ട് തുടങ്ങുന്നത് വർഷങ്ങൾ വീണ്ടും ചിലത് കടന്ന് പോവുമ്പോഴാണ്. നോർമ്മ എന്ന കഥാപാത്രത്തോട് അച്ഛനും മകനും പ്രണയം തോന്നി തുടങ്ങുന്നിടത്ത് കഥ വഴി മാറി തുടങ്ങുകയാണ്. ഈ മൂന്ന് കഥാപാത്രങ്ങൾക്ക് പുറമെ മറ്റൊരു കഥാപാത്രം കൂടിയുണ്ട് ചിത്രത്തിൽ, അയാൾ ആരാണെന്നോ ഉദ്ദേശം എന്താണെന്നോ തല്ക്കാലം പറയാൻ ഉദ്ദേശിക്കുന്നില്ല, കണ്ട് തന്നെ അറിയുക.

🔸മുകളിൽ സൂചിപ്പിച്ച കഥാ ഗതിയിൽ നിന്നും ഒരു ലവ് ട്രയാങ്കിലോ അല്ലെങ്കിൽ അത് പോലുള്ള ത്രെഡോ മാത്രമാണ് ചിത്രം എന്ന് പ്രതീക്ഷിക്കരുത്, ദി വീൽ എന്ന പ്രസ്തുത ചിത്രം അടുത്തിടെ കണ്ട ഏറ്റവും മികച്ച ചിത്രങ്ങളിൽ ഒന്നാണ്, പ്രത്യേകിച്ചും ചിത്രത്തിലെ അവസാന ഷോട്ട്. കൂടുതൽ പറഞ്ഞ് നശിപ്പിക്കുന്നില്ല, താല്പര്യം ഉണ്ടെങ്കിൽ, ഉണ്ടെങ്കിൽ മാത്രം കാണാൻ ശ്രമിക്കുക, സൈലന്റ് ചിത്രങ്ങളിലെ മറ്റൊരു ക്‌ളാസ്സിക് ഐറ്റം ആണ് ദി വീൽ എന്ന ആബേൽ ഗാൻസ് ചിത്രം. ഒരു സിംപിൾ കഥയെ മികച്ച രീതിയിൽ വളർത്തി എടുത്ത് കൊണ്ടുവന്നത് അതിന്റെ പൂർണതയിൽ ഇവിടെ കാണാം, പിൽക്കാലത്ത് പല സിനിമകളിലും കണ്ട ചില ടെക്ക്നിക്കുകളുടെ ആദ്യ പതിപ്പും ഇവിടെ ഉണ്ട്.

Verdict : Very Good

DC Rating : 85/100

576. Tucker & Dale VS The Evil (2010)

Director : Eli Craig

Genre : Comedy

Rating : 7.6/10

Country : USA

Duration : 88 Minutes

🔸കുറെ നാളുകളായി റഷ്യൻ, ജാപ്പനീസ് പഴയകാല ചിത്രങ്ങൾക്ക് പുറകെ വച്ച് പിടിച്ച് അവ മിക്കതും കണ്ട് തീർത്ത് ഒരു മൂകാവസ്ഥയിൽ നിൽക്കവേ ആണ് ടക്കർ ആൻഡ് ടെയിൽ വേഴ്സസ് ദി ഈവിൾ എന്ന ഈ കൊമെടി ചിത്രം കയ്യിൽ കിട്ടിയത്. ചിത്രത്തിന്റെ പേരും പോസ്റ്ററും ഒക്കെ കണ്ടപ്പോൾ പലപ്പോഴും അബദ്ധത്തിൽ ചാടിയ ഓർമയിൽ ഒരു ഹൊറർ ബി മൂവി സ്ട്രെയിറ്റ് റ്റു ഡിവിഡി റിപ്പോഫ്‌ ആയിരിക്കും എന്നൊക്കെയാണ് പ്രതീക്ഷിച്ചത്, മുൻധാരണകൾ എത്രത്തോളം തെറ്റായിരുന്നു എന്ന് പടം കഴിഞ്ഞപ്പോഴാണ് പിടി കിട്ടിയത്. നല്ല ഒന്നാം ക്ലാസ് ചിത്രം, അത്യാവശ്യം നന്നായി ചിരിക്കാനും ഉണ്ട്.

🔸മുകളിൽ സൂചിപ്പിച്ചത് പോലെ തന്നെ ഒരുപാട് ഹൊറർ ക്ലിഷേ ചിത്രങ്ങൾ കണ്ട ഓർമയിൽ ഈ ചിത്രവും അത്തരത്തിൽ ഉള്ള ഒന്നാണോ എന്ന് തോന്നിപ്പോവും, പ്രത്യേകിച്ചും ആദ്യ രംഗങ്ങൾ കാണുമ്പോൾ. മിക്ക ഹൊറർ ടോർച്ചർ പോൺ സ്ലേഷർ ചിത്രങ്ങളിലും ഉള്ളത് പോലെ തന്നെ ഈ ചിത്രവും ആരംഭിക്കുന്നത് ഒരു കൂട്ടം വിദ്യാർത്ഥികളിൽ നിന്ന് ആണ്, ഒഴിവുകാലം ആഘോഷിക്കാൻ ഒരു ഒഴിഞ്ഞ താഴ്വരയിലേക്ക് വരികയാണ് ഇവർ. കളിയും ചിരിയും ഒക്കെ ആയി യാത്ര പുരോഗമിച്ച് കൊണ്ടിരിക്കെയാണ് തങ്ങളുടെ വണ്ടി ഓവർ ടേക്ക് ചെയ്ത് പോവുന്ന രണ്ട് പേരെ ഇവർ ശ്രദ്ധിക്കുന്നത്.

🔸കാണുമ്പോ തന്നെ ചെറുതായി പേടിപ്പെടുത്തുന്ന രണ്ട് കഥാപാത്രങ്ങൾ, അവരുടെ ഭാഷയിൽ ഹില്ലി ബില്ലികൾ എന്ന് പറയാം. ആദ്യ കൂടി കാഴ്ചയിൽ പ്രത്യേകിച്ച് ഒന്നും സംഭവിക്കുന്നില്ലെങ്കിലും ക്രൂരമായ ഒരു നോട്ടം സമ്മാനിച്ച് ആ രണ്ട് കഥാപാത്രങ്ങളും കടന്ന് പോവുകയാണ്. ഇതൊന്ന് മറന്ന് വരുമ്പോഴാണ് ഈ രണ്ട് ടീമും തമ്മിലുള്ള പുനഃ സമാഗമം, ടൗണിലുള്ള ഒരു കടയിൽ വെച്ച്. ഇവിടെ ആ രണ്ട് കഥാപാത്രങ്ങളിൽ ഒരാൾ വിദ്യാർത്ഥികളിൽ ഒരാളായ ആലിയെ ചെറുതായി ഒന്ന് പേടിപ്പിക്കുകയാണ്. വിദ്യാർത്ഥി സംഘം എന്തായാലും കൂടുതൽ പ്രശ്നങ്ങൾക്ക് നിക്കാതെ തങ്ങളുടെ ലക്ഷ്യ സ്ഥാനത്തേക്ക് നീങ്ങുകയാണ്.

🔸ഇത് കഥയുടെ ഒരു വേർഷൻ, ഇനി നമുക്ക് ആ ഹില്ലിബില്ലികളുടെ വശത്ത് നിന്നും കഥ കേൾക്കാം, ടക്കറിന്റെയും ഡെയ്‌ലിന്റെയും കഥ. കാണാൻ ഭീമാകാര ലുക്ക് ഒക്കെ ഉണ്ടെങ്കിലും പഞ്ച പാവങ്ങളാണ് ഇരുവരും. രാവെളുക്കുവോളം അധ്വാനിക്കുക, മദ്യപിക്കുക, രണ്ട് തമാശ പറയുക എന്നിങ്ങനെ ലളിതമായ ദിനചര്യകളാണ് രണ്ട് പേരുടേതും. കുറച്ച് കാലമായി രണ്ട് പേരും ഒരു വീട് സ്വന്തമായി വാങ്ങാനുള്ള പ്ലാനിലാണ്, ഒടുവിൽ അത് സാധിച്ച് പുതിയ വീട്ടിലേക്കുള്ള യാത്രാ മധ്യേയാണ് കോളേജ് വിദ്യാർത്ഥികളെ കണ്ട് മുട്ടുന്നത്. ഇവരിൽ ഒരാളായ ആലിയോട് ആദ്യ കാഴ്ചയിൽ തന്നെ പ്രണയം തോന്നിയ ഡെയ്ൽ അത് പ്രകടിപ്പിക്കാൻ ചെന്നപ്പോഴാണ് അവർ പേടിച്ചതും സ്ഥലം വിട്ടതും.

🔸വിധി എന്ന വസ്തുത ഈ രണ്ട് സംഘങ്ങളെയും ഒരു തവണ കൂടി നേർക്കുനേർ കൊണ്ട് വരികയാണ്, അവധിക്കാല വസതിക്കടുത്ത് വെച്ച്. കൊലയാളികൾ എന്ന് തെറ്റിദ്ധരിച്ച് വിദ്യാർഥികൾ ടക്കറിനും, ഡെയ്‌ലിനും എതിരെ തിരിയുമ്പോൾ അവിടെ നിന്നും പിടിച്ചിരുത്തുന്ന, ചിരിപ്പിക്കുന്ന ഒരു സിനിമ ആരംഭിക്കുകയായി. ബ്ലഡ് ബാത്തും വയലൻസും അത്യാവശ്യം നല്ല തോതിൽ തന്നെ ചിത്രത്തിൽ ഉണ്ട്, ഒരു ഹൊറർ സ്പൂഫ് എന്നൊക്കെ വിശേഷിപ്പിക്കാം ഈ ചിത്രത്തെ. താല്പര്യം തോന്നുന്നെങ്കിൽ കാണുക, നല്ലൊരു എന്റെർറ്റൈനെർ ആണ് ഈ ചിത്രം.

Verdict : Very Good

DC Rating : 80/100

575. Napoleon (1927)

Director : Abel Gance

Genre : Biography

Rating : 7.6/10

Country : France

Duration : 328 Minutes

🔸ഉദ്ദേശം ഒരു നൂറ്റാണ്ടിന്റെ പഴക്കം, ആ പഴക്കം അത്യാവശ്യം നന്നായി ബാധിച്ച മേഖലകൾ, നിശബ്ദ ചിത്രം, അഞ്ച് മണിക്കൂറിന് മുകളിൽ ദൈർഖ്യം, ഇതെല്ലാം നെപ്പോളിയൻ എന്ന ആബേൽ ഗാൻസിന്റെ ബയോഗ്രഫി ചിത്രം കാണുമ്പോൾ നിങ്ങൾ നേരിട്ടേക്കാവുന്ന ചെറിയ ചില പ്രശ്നങ്ങൾ മാത്രമാണ്. ഈ വസ്തുതകൾ ഒരു പ്രശ്നമായി നിങ്ങൾക്ക് തോന്നുന്നില്ലെങ്കിൽ നല്ലൊരു ചിത്രം ആവും ഇത് എന്ന് നൂറ് ശതമാനം ഉറപ്പ് നൽകാനാവും. ആറ് ഭാഗമായി പുറത്തിറക്കാൻ സംവിധായകൻ ആഗ്രഹിച്ച സീരീസിലെ ആദ്യ ചിത്രമാണ് ഇത്, മറ്റ് ഭാഗങ്ങൾ പല കാരണങ്ങളാലും പുറത്തിറങ്ങുക ഉണ്ടായില്ല.

🔸നിശബ്ദ ചിത്രങ്ങൾ ചലച്ചിത്ര മേഖലയിൽ നിന്നും വിട പറഞ്ഞ് തുടങ്ങിയ കാലത്താണ് നെപ്പോളിയൻ ജനങ്ങളുടെ മുന്നിലേക്ക് എത്തിയത്, ആദ്യമായി പാരിസിൽ വെച്ച് നടത്തിയ ചിത്രത്തിന്റെ ദൈർഖ്യം ഏകദേശം എട്ട് മണിക്കൂറോളം ആയിരുന്നു എന്നും ഈ നീളക്കൂടുതൽ കാരണം തന്നെ അന്ന് സന്നിഹിതരായവർക്ക് പ്രസ്തുത ചിത്രം അസഹനീയമായ അനുഭവമായി തോന്നിയെന്നും പറയപ്പെടുന്നു. ഇവിടെ നിന്നും വ്യക്തത ഇല്ലാത്ത അത്രയും തവണ ചിത്രം വെട്ടി ചുരുക്കലുകൾക്കും കൂട്ടി ചേർക്കേലുകൾക്കും വിധേയമായി തീർന്നു. ഈ കലാ പരിപാടികൾക്കിടയിൽ ഒറിജിനൽ വേർഷൻ എവിടെയോ കളഞ്ഞ് പോവുകയും ചെയ്തു.

🔸പിന്നീട് വർഷങ്ങൾക്ക് ശേഷം പ്രശസ്ത സംവിധായകൻ ഫ്രാൻസിസ് ഫോർഡ് കൊപ്പോള ഉൾപ്പെടെ ഉള്ളവരുടെ ശ്രമത്തിന്റെ ഫലമായി ഏറെക്കുറെ ആദ്യ വേർഷൻ റീസ്റ്റോർ ചെയ്യുകയും ചിക്കാഗോയിൽ വെച്ച് വലിയ സ്‌ക്രീനിൽ പ്രദർശിപ്പിക്കുകയും ചെയ്യുക ഉണ്ടായി. ഇന്ന് ഈ റീസ്റ്റോർഡ് വേർഷൻ ആസ്വാദകർക്കും ലോകത്താകമാനം ഉള്ള സിനിമാ പ്രേമികൾക്കും ലഭ്യമാണ്. ഉദ്ദേശം അഞ്ച് വര്ഷം നീണ്ടുനിന്ന ശ്രമങ്ങൾക്കൊടുവിലാണ് ചിത്രത്തിന്റെ പൂർണമായ റീസ്റ്റോറേഷൻ നടന്നത് എന്ന് പറയപ്പെടുന്നു.

🔸തന്റെ ആയോധന കലകളിലുള്ള വൈദഗ്ദ്യം നെപ്പോളിയൻ കാണിക്കുന്ന ആദ്യ രംഗങ്ങളിൽ നിന്നും ഒരു രാജ്യത്തിൻറെ പട തലവനിലേക്കുള്ള ദൂരം താണ്ടി നിൽക്കുന്ന ക്ലൈമാക്സിലെ നാപ്പോളിയനിലേക്കുള്ള യാത്രയാണ് ഈ അഞ്ചര മണിക്കൂർ ദൈർഖ്യം ഉള്ള എപിക് ചിത്രം. നെപോളിയനെ പോലെയൊരു പ്രശസ്തനായ ഹിസ്റ്റോറിക്കൽ കഥാപാത്രത്തെ അടിസ്ഥാനമാക്കി, ആ ഐതിഹാസികമായ ജീവിതം പ്രമേയമാക്കി എന്ത് കൊണ്ട് ഒരു ബയോഗ്രഫി ചിത്രം ഈ കാലമത്രയും പുറത്തിറങ്ങിയില്ല എന്നൊരു സംശയം കൂടി ഉടലെടുക്കുന്നുണ്ട് ഈ ചിത്രം അവസാനിക്കുമ്പോൾ.

🔸ലാൻഡ്മാർക്ക് എന്നൊക്കെ വിശേഷിപ്പിക്കാവുന്ന ചില കാര്യങ്ങളും കാണാൻ കഴിയും ഈ ചിത്രത്തിൽ, പ്രത്യേകിച്ചും ചിത്രത്തിന്റെ ക്ലൈമാക്സും അത് ചിത്രീകരിച്ചിരിക്കുന്ന രീതിയും ഉപയോഗപ്പെടുത്തിയ വസ്തുവകകളും എല്ലാം അത്ഭുതപ്പെടുത്തുന്നവയാണ് പ്രത്യേകിച്ചും കാലയളവ് കണക്കിലെടുക്കുമ്പോൾ. ഒരു കാലഘട്ടത്തിലെ സിനിമ രീതികളുടെ അവസാനവും, പുതിയതിന്റെ ഉദയവും ഈ ചിത്രത്തിൽ കാണാനാവും. എല്ലാവര്ക്കും നിർദ്ദേശിക്കുന്നില്ല ഈ ചിത്രം, താല്പര്യം ഉണ്ടെങ്കിൽ മാത്രം കാണുക.

Verdict : Very Good

DC Rating : 82/100

574. The Lion King (2019)

Director : Jon Favreau

Genre : Musical

Rating : 6.6/10

Country : USA

Duration : 118 Minutes

🔸"Look, Simba. Everything the light touches is our kingdom. A king's time as ruler rises and falls like the sun. One day, Simba, the sun will set on my time here, and will rise with you as the new king. Everything is yours, to protect, a great responsibility. While others search for what they can take, a true king searches for what he can give."  ഇരുപത്തി അഞ്ച് വർഷം, ഇരുപത്തി അഞ്ച് നീണ്ട വർഷങ്ങൾക്ക് ശേഷം മുഫാസയും സിംബയും എല്ലാം ഒരു തവണ കൂടി നമ്മളെ തേടി എത്തിയിരിക്കുകയാണ്, ഡിസ്നിയുടെ ഈ ലൈവ് ആക്ഷൻ റീമേക്കിലൂടെ. ലയൺ കിംഗ് പോലെ ഒരു തലമുറയെ, ഒരു സംസ്കാരത്തെ തന്നെ സ്വാധീനിച്ച അധികം ചിത്രങ്ങൾ ഉണ്ടാവില്ല, ഒരു പരിധി വരെ ഇതാണ് പുതിയ ചിത്രം നേരിടുന്ന വെല്ലുവിളിയും.

🔸ജീവിതചക്രം അഥവാ സർക്കിൾ ഓഫ് ലൈഫ് എന്നതാണ് ലയൺ കിങ്ങിന്റെ തീം. നമ്മൾക്ക് മുന്നേ ഈ ലോകത്ത് ജീവിച്ചവരുണ്ട്, നമ്മെക്കാൾ മുന്നേ കടന്ന് പോയവർ, അവർ ജീവിച്ചു മരിച്ച മണ്ണിലാണ് ഈ നിമിഷം നമ്മൾ വിഹരിക്കുന്നത്, നമ്മുടെ സമയവും കടന്ന് പോവും, നമുക്ക് പകരം മറ്റൊരാൾ വരും, സമയമെത്തുമ്പോൾ അയാളും മടങ്ങും അങ്ങനെ അങ്ങനെ ഈ പ്രക്രിയ തുടർന്ന് കൊണ്ടേയിരിക്കും. ഈ സർക്കിൾ ഓഫ് ലൈഫ് എന്ന മുകളിൽ സൂചിപ്പിച്ച വസ്തുത അവതരിപ്പിക്കാൻ ഉള്ളതാണ് മുഫാസ, സ്കാർ, സിംബ എന്നിങ്ങനെയുള്ള നമ്മുടെ പ്രധാന കഥാപാത്രങ്ങൾ. കഥയിലേക്ക് കടക്കേണ്ട ആവശ്യം ഉദിക്കുന്നില്ല എന്ന് തോന്നുന്നു.

🔸ആദ്യം തന്നെ ഒരു കാര്യം പറഞ്ഞ് ആ പ്രശനം അങ്ങട്ടേക്ക് ഒഴിവാക്കാം, ഇരുപത്തി അഞ്ച് വർഷങ്ങൾക്ക് മുന്നേ പുറത്തിറങ്ങിയ അനിമേഷൻ ചിത്രം നൽകിയ ഫീൽ ഈ ചിത്രത്തിന് നൽകാൻ കഴിഞ്ഞേക്കില്ല, ആ ഒരു ഇമ്പാക്റ്റും ലഭിച്ചേക്കില്ല, ഈ ചിത്രം ആ നിലയിലേക്ക് ഉയരും എന്ന് വ്യക്തിപരമായി ഒരു വേളയിലും വിശ്വസിച്ചിരുന്നില്ല, അത് കൊണ്ട് തന്നെ പഴയ ചിത്രവുമായി താരമത്യം ചെയ്യുന്നതിൽ വലിയ കാര്യവുമില്ല. നൊസ്റ്റാൾജിയ എന്ന വികാരത്തിൽ അഭിരമിച്ച് പുതിയ ശ്രമങ്ങളെ താഴ്ത്തി കെട്ടുന്ന പ്രവണതയോട് ഒന്നും പറയാനില്ല. പഴയ കാല മികച്ച അനിമേഷൻ ചിത്രങ്ങൾക്ക് ലൈവ് ആക്ഷൻ റീമേയ്ക്ക് ആവശ്യമോ എന്ന കാര്യത്തിൽ പ്രേക്ഷകനെ ബോധ്യപ്പെടുത്താൻ ഡിസ്‌നിക്ക് ഇതുവരെ കഴിഞ്ഞിട്ടില്ല എന്നതും ഇതോടൊപ്പം ചേർത്ത് വായിക്കണം.

🔸ഇനി കാര്യങ്ങളിലേക്ക് ജെയിംസ് ഏഴ്‌ൾ ജോൺസിന്റെ വോയിസ് ആണ് ചിത്രം കാണാൻ ഉണ്ടായ യഥാർത്ഥ പ്രചോദനം, മുഫാസ എന്ന കഥാപാത്രത്തിനെ മറ്റൊരു ശബ്ദത്തോട് കൂടി ചിന്തിക്കാൻ പോലുമാവില്ല എന്നതാണ് സത്യം, ഈ വിശ്വാസത്തെ നൂറാവർത്തി ഊട്ടി ഉറപ്പിക്കുന്നുണ്ട് ചിത്രം. ജെറെമി അയേൺസിന് പകരം സ്കാർ ആയി എത്തിയ ചിവെട്ടേൽ എജിയോഫോറും നന്നായിരുന്നു, സ്കറിന്റെ ബാക്ക് സ്റ്റോറിയിൽ ചെറിയ ചില മാറ്റങ്ങൾ കൊണ്ട് വന്നിട്ടുണ്ട്. സിംബ, നള, പുമ്പാ, ടിമോൻ എന്നിവരും മോശമാക്കിയില്ല. ഹാൻസ് സിമ്മെറിന്റെ സൗണ്ട് ട്രാക്കും, വിഷ്വൽസും എല്ലാം മികച്ചത് തന്നെ ആയിരുന്നു താനും.

🔸നെഗറ്റിവ് എന്ന് തോന്നിയ കാര്യങ്ങളിലേക്ക് കടക്കുക ആണെങ്കിൽ ബിയോൺസിന്റെ ഒരു പാട്ടുണ്ട് ചിത്രത്തിൽ, അത് ചിത്രത്തിന്റെ പോക്കിനോട് ചേർന്ന് നിൽക്കുന്നതായി തോന്നിയില്ല, ബാക്കി ഗാനങ്ങൾ നന്നായിരുന്നു എന്ന് കൂടി പറയാം ഈ സാഹചര്യത്തിൽ. രണ്ടാം പാതിയിൽ ദൈർഖ്യ കൂടുതൽ ചെറുതായി അനുഭവപ്പെടുന്നുണ്ട്, എന്നാലും വലിയ വിഷയമല്ല. പൊതുവെ വളരെ മോശം പ്രതികരണമാണ് പല ഭാഗത്ത് നിന്നും ചിത്രം നേടി കൊണ്ടിരിക്കുന്നത്, ഇതിന്റെ കാര്യ കാരണങ്ങൾ വ്യക്തമല്ല, ചിലപ്പോ ദീപസ്തംഭം പോലെ നിൽക്കുന്ന പഴയ വേർഷൻ കാരണമാവാം. അത് എന്ത് തന്നെ ആയാലും നഷ്ടം എന്ന തോന്നൽ ഒന്നും ചിത്രം നൽകുന്നില്ല എന്നതിൽ സന്തോഷം.

"Hakuna Matata"

Verdict : Good

DC Rating : 70/100

573. How To Sell Drugs Online Fast (2019)

Creator : Philipp Käßbohrer

Genre : Comedy

Rating : 8.1/10

Seasons : 1

Episodes : 06

Country : Germany

Duration : 25 - 32 Minutes

🔸പേര് കേട്ടിട്ട് ഞെട്ടി ആലോചിച്ച് കാട് കേറേണ്ട, സംഭവം ഒരു ടിവി സീരീസ് ആണ്. ടൈറ്റിൽ സൂചിപ്പിക്കുന്നത് പോലെ തന്നെ ഡ്രഗ്സും അതിന്റെ വില്പനയും കൈമാറ്റവും എല്ലാം പ്രധാന ഘടകങ്ങളായി വരുന്ന ഒരു ചെറിയ മിനി സീരീസ് ആണ് ഹൌ ടു സെൽ ഡ്രഗ്സ് ഓൺലൈൻ. എന്നാൽ നാർകോസ് പോലെയോ അല്ലെങ്കിൽ ബ്രെയ്ക്കിങ് ബാഡ് പോലെയോ ഡ്രഗ് കാർട്ടലുകളുടെ കഥ അല്ല ഈ സീരീസ്, ഒരു കമിങ് ഓഫ് എയ്ജ് റൊമാൻസ് മൂഡിലാണ് കഥ സെറ്റ് ചെയ്തിരിക്കുന്നതും പുരോഗമിക്കുന്നതും. ചുരുക്കി പറയുക ആണെങ്കിൽ ഒരു തരത്തിലും മിക്സ് ആവാത്ത രണ്ട് വിഷയങ്ങളുടെ കൂട്ടിക്കെട്ടൽ ആണിതെന്ന് പറയാം.

🔸ഒരു സ്വാറ്റ് ടീം റെയ്ഡോട് കൂടിയാണ് സീരീസ് ആരംഭിക്കുന്നത്, നായക കഥാപാത്രത്തെ പോലീസ് പിടിക്കുന്നത് ആണെന്നും തുടർന്നുള്ള ഭാഗം ഒരു ഫ്ലാഷ് ബാക്കിൽ ആയിരിക്കും കഥ പറഞ്ഞ് പോവുക എന്നുമൊക്കെ നമ്മൾ കരുതും എങ്കിലും കഥയിലെ ആദ്യ ട്വിസ്റ്റ് ഇവിടെ തന്നെ സംഭവിക്കുകയാണ്. നായകൻ തന്റെ വോയിസ് ഓവറിലൂടെ വെളിപ്പെടുത്തുകയാണ്, തന്റെ വിജയം കണ്ട് അസൂയ കാരണം അത് പകർത്താൻ ശ്രമിച്ച് പണി ഇരന്ന് വാങ്ങിയ അനേകം കോപ്പി കാറ്റുകളിൽ ഒന്നാണ് ഈ കഥാപാത്രം എന്ന്. ഏറെക്കുറെ സീരീസിന്റെയും കേന്ദ്ര കഥാപാത്രമായ മോറിറ്റ്സ് സിമ്മെർമാന്റെയും ടോൺ ഈ രംഗങ്ങളിൽ തന്നെ സെറ്റ് ചെയ്യപ്പെടുന്നുണ്ട്.

🔸ഇനി മോറിറ്റ്സ് സിമ്മെർമാനെ കുറിച്ച് പറയുക ആണെങ്കിൽ ആളൊരു സാധാരണക്കാരനും അതിനോളം തന്നെ പാവവും ആണ് എന്ന് പറയേണ്ടി വരും, ഒരു ടിപ്പിക്കൽ നേർഡിന് ആവശ്യമായ എല്ലാ സ്വഭാവ ഗുണങ്ങളും രീതികളും ശൈലിയും എല്ലാം മോറിറ്റ്സിന് ഉണ്ട്. ഇതോടൊപ്പം ഉൾവലിഞ്ഞ ശൈലിയും, മിഡിൽ ക്‌ളാസ് ജീവിത ശൈലിയും, ശരാശരിയോ അതിൽ താഴെയോ നിൽക്കുന്ന രൂപ ഭംഗിയും എല്ലാം കൂടി ചേരുമ്പോൾ മോറിറ്റ്സ് ആയി. മോറിറ്റ്സ് കുട്ടി കാലം തൊട്ടേ ലിസാ നൊവാക് എന്ന കളി കൂട്ടുകാരിയുമായി അഗാധ പ്രണയത്തിലാണ്, അവൾക്കും ഇതേ വികാരം തിരിച്ചുണ്ട് എന്നതാണ് സത്യം, അല്ലെങ്കിൽ ഉണ്ടായിരുന്നു എന്ന് പറയാം.

🔸കഴിഞ്ഞ ഒരു വർഷക്കാലമായി ലിസ ഉപരി പഠനത്തിനായി ന്യു യോർക്കിൽ ആയിരുന്നു, ഈ കാലയളവിൽ അവളിൽ ഒരുപാട് മാറ്റങ്ങളും സംഭവിച്ചിട്ടുണ്ട്, അതിൽ ഏറ്റവും പ്രധാനമാണ് മോറിറ്റ്സിൽ നിന്നും ലിസ അകന്ന് പോയിരിക്കുന്നു എന്ന വസ്തുത. ഇന്ന് അവൾ മറ്റൊരു ബന്ധത്തിൽ സന്തുഷ്ടയാണ്, എന്നാൽ ഈ കാര്യം മോറിറ്റ്സിന് അറിയത്തതുമില്ല. ദിവസങ്ങൾ എന്നി ലിസയുടെ മടങ്ങി വരവിന് വേണ്ടി കാത്തിരുന്ന മോറിറ്റ്സിന് ഏറ്റ കനത്ത അടിയായിരുന്നു ലിസയുടെ ഈ മാറ്റം. ഇവിടെ നിന്നും ആരംഭിക്കുന്ന മോറിറ്റ്സിന്റെ യാത്ര അയാളെ കൊണ്ട് ചെന്നെത്തിക്കുന്നത് യൂറോപ്പിലെ ഏറ്റവും വലിയ ഓൺലൈൻ ഡ്രഗ് ഡീലറിലേക്കാണ്.

🔸വെറും ആറ് എപ്പിസോഡ് മാത്രമേ ഉള്ളൂ ഈ ജർമൻ സീരീസ്, പ്ലോട്ടിൽ നിന്നും ഒരു സാധാരണ പൈങ്കിളി കമിങ് ഓഫ് എയ്ജ് ഡ്രാമ ആയിരിക്കും എന്ന് കരുതിയിരുന്നെങ്കിലും ഒരു മിനിറ്റ് പോലും ബോർ അടിപ്പിക്കാതെ അത്യാവശ്യം പിടിച്ചിരുത്തി തന്നെ കടന്ന് പോവുന്നുണ്ട് കഥ. മുകളിൽ സൂചിപ്പിച്ച രണ്ട് പേർക്ക് പുറമെ നല്ല ചില കഥാപാത്രങ്ങൾ കൂടിയുണ്ട് ഈ സീരീസിൽ. ഇനിയും തുടർ ഭാഗങ്ങൾ വരാൻ സാധ്യത ഉണ്ടെന്ന് കേട്ടിരുന്നു, അതിൽ സന്തോഷം മാത്രം. ചുരുക്കി പറഞ്ഞാൽ രണ്ട് സിനിമ കാണുന്ന സമയം കൊണ്ട് കണ്ട് തീർക്കാൻ കഴിയുന്ന നല്ലൊരു മിനി സീരീസ് ആണ് ഹൌ ടു സെൽ ഡ്രഗ്സ് ഓൺലൈൻ ഫാസ്റ്റ്, താല്പര്യം ഉണ്ടെങ്കിൽ കാണാൻ ശ്രമിക്കുക.

Verdict : Very Good

DC Rating : 85/100

572. Picnic At Hanging Rock (1975)

Director : Peter Weir

Genre : Thriller

Rating : 7.5/10

Country : Australia

Duration : 115 Minutes

🔸ഏതെങ്കിലും കഥാപാത്രത്തിന്റെയോ അല്ലെങ്കിൽ ഒന്നിൽ അധികം കഥാപാത്രങ്ങളുടെയോ തിരോധാനം പ്രമേയമാക്കി കൊണ്ട് വരുന്ന സിനിമകൾ കാണാൻ ഒരു പ്രത്യേക രസം തന്നെയാണ്, വേറൊന്നുമല്ല ഒരു മിസ്റ്ററി ഫീൽ ആദ്യാവസാനം ഈ ചിത്രങ്ങൾ നിലനിർത്തി പോവാറുണ്ട്. ഉദ്ദേശം എട്ട് വർഷങ്ങൾക്ക് മുന്നേ പുറത്തിറങ്ങിയ ചിൽഡ്രൻ എന്ന കൊറിയൻ ചിത്രം ഈ വിഭാഗത്തിൽ ഉൾപ്പെടുത്താവുന്ന ഒന്നാണ്. ഒരു സിനിമാ ആരാധകൻ എന്ന നിലയ്ക്ക് ഈ ചിത്രങ്ങളോട് വലിയ താല്പര്യം എല്ലാ കാലത്തും തോന്നിയിരുന്നു, അത് തന്നെ ആണ് പിക്നിക് അറ്റ് ഹാങ്ങിങ് റോക്ക് എന്ന ഓസ്‌ട്രേലിയൻ ചിത്രം കാണാൻ ഉണ്ടായ പ്രചോദനവും.

🔸മുകളിൽ സൂചിപ്പിച്ചത് പോലെ തന്നെ ഒരു കാണാതാവലിന്റെ കഥയാണ് ചിത്രം, മൂന്ന് വിദ്യാർത്ഥികളുടെയും ഒരു അധ്യാപികയുടെയും തിരോധാനം. ഇവിടെ പക്ഷെ ശ്രദ്ധ ചെലുത്തേണ്ട വിഷയം മറ്റൊന്നാണ്, ഈ തിരോധാനത്തിന്റെ ചുറ്റുപാടും പശ്ചാത്തലവും എല്ലാമാണ് കൂടുതൽ നിഗൂഡം. ചിത്രത്തിന് ആസ്പദമായ സംഭവം അരങ്ങേറുന്നത് ഇരുപതാം നൂറ്റാണ്ടിന്റെ ആരംഭത്തിലാണ്, ഒരു വാലെന്റൈൻസ് ഡേ ദിനത്തിൽ. ഓസ്‌ട്രേലിയയിലെ വളരെ പ്രശസ്തവും, അച്ചടക്കത്തിന് പേര് കേട്ടതുമായ ഒരു സ്‌കൂളിൽ നിന്നും വിദ്യാർഥികൾ ഒരു ടൂർ പോവുകയാണ്, തങ്ങളുടെ സ്‌കൂളിന് അടുത്ത് തന്നെയുള്ള ഒരു പാറ കെട്ടാണ് ഇവരുടെ ലക്ഷ്യ സ്ഥാനം.

🔸ഇത് പോലുള്ള ഒഴിവ് ദിവസങ്ങൾ ലഭിക്കുന്നത് അപൂർവം ആയതിനാലും കർക്കശക്കാരിയായ മദർ സുപ്പീരിയറിന്റെ കൺവെട്ടത്ത് നിന്ന് ഒരു ദിവസം എങ്കിൽ ഒരു ദിവസം രക്ഷപ്പെടാൻ കഴിഞ്ഞതിനാലും വിദ്യാർഥികൾ എല്ലാവരും ആർത്തുല്ലസിക്കാൻ ഉള്ള മൂഡിൽ ആയിരുന്നു, കളിയും ചിരിയും തമാശകളും എല്ലാമായി ആ ദിവസം ഉച്ചയോട് അടുത്തു. വൈകിട്ട് എട്ട് മണിക്ക് മുന്നേ മടങ്ങി എത്തണം എന്ന കർശനമായ ഉത്തരവുണ്ട്, മദർ സുപ്പീരിയറിന്റേത്. എന്നാലും സമയം ബാക്കി ഉള്ളതിനാൽ ഒരു കൂട്ടം വിദ്യാർഥികൾ പാറക്കെട്ടിന് മുകളിലേക്ക് കയറാൻ തീരുമാനിച്ചു.

🔸ഈ കയറ്റം അല്പം ക്ലേശകരം ആണെങ്കിൽ കൂടിയും അല്പം ശ്രമകരമായ അവർ ഉദ്യമത്തിൽ വിജയിക്കുകയാണ്, എന്നാൽ ഇവിടെ നിന്നും കഥ മാറുകയാണ്. കഠിനമായ യാത്രയും മല കയറ്റവും എല്ലാം കാരണം ക്ഷീണിതരായ യുവതികൾ ഒരല്പം വിശ്രമിക്കാൻ തീരുമാനിച്ചെങ്കിലും ഇവരിൽ ഒരാൾ പിന്നീട് കാണുന്ന കാഴ്ച ബാക്കിയുള്ള യുവതികൾ ആരുടെയോ പ്രേരണ എന്നപോൽ കെട്ടിന് ഉള്ളിലേക്ക് നടന്ന് കയറുന്നതാണ്. ആലസ്യത്തിൽ എന്ന പോലെ അവളുടെ നിലവിളിക്കും വിലക്കലിനും ഒന്നും അവർക്ക് മറുപടികൾ ഉണ്ടായിരുന്നില്ല, ഈ കടന്ന് പോയ കഥാപാത്രങ്ങൾ അപ്രത്യക്ഷരാവുകയാണ് എന്ന് അതിശയോക്തി ഒരല്പം കലക്കി പറയാം.

🔸ഇവിടെ നിന്നുമാണ് പിക്നിക് അറ്റ് ഹാങ്ങിങ് റോക്ക് എന്ന ചിത്രം ആരംഭിക്കുന്നത്, ഇതേ പേരിൽ കുറച്ച് വർഷങ്ങൾക്ക് മുന്നേ ഒരു ടീവി സീരീസ് പുറത്തിറങ്ങി എന്നറിഞ്ഞെങ്കിലും കൂടുതൽ അറിവില്ല ഈ കാര്യത്തിൽ. ഒരു ഡ്രീം പോലെയാണ് ചിത്രം പുരോഗമിക്കുന്നത്, കഥാപാത്രങ്ങൾ അടിമപ്പെട്ട ആലസ്യം ഒരു പരിധി വരെ ചിത്രം കാണുമ്പോൾ നമുക്കും അനുഭവപ്പെടുന്നുണ്ട്. കൂടുതൽ സ്പോയ്ലർ ആയ ഭാഗങ്ങളിലേക്ക് കടക്കുന്നില്ല, കഴിയും എങ്കിൽ, താല്പര്യം തോന്നുന്നെങ്കിൽ കാണാൻ ശ്രമിക്കുക, ഒരു വിധത്തിലും നഷ്ടം ആവില്ല ഈ ചിത്രം.

Verdict : Good

DC Rating : 78/100

571. Woman At War (2018)

Director : Benedikt Erlingsson

Genre : Drama

Rating : 7.6/10

Country : Iceland

Duration : 101 Minutes

🔸കഴിഞ്ഞ IFFK കഴിഞ്ഞപ്പോൾ തൊട്ട് കേട്ട് തുടങ്ങിയതാണ് വുമൺ അറ്റ് വാർ എന്ന ഈ ഉക്രേനിയന് ഐസ്ലാന്റിക് ചിത്രത്തെ കുറിച്ച്. കണ്ട് കഴിഞ്ഞ ആളുകളിൽ ഒരാൾ അന്യായം, കിടു എന്നീ വാക്കുകളാൽ വിശേഷിപ്പിക്കപ്പെട്ട നിമിഷം തൊട്ടേ ഒടുക്കത്തെ കാത്തിരിപ്പിലായിരുന്നു പ്രിന്റ് ഒന്ന് കയ്യിൽ കിട്ടാനായിട്ട്. ഒടുവിൽ ഇപ്പോൾ, കണ്ട് കഴിഞ്ഞ ഈ നിമിഷം ഉറപ്പിച്ച് പറയാനാവും, ഇത് ഒരു അന്യായ ഐറ്റം തന്നെ എന്ന്. അടുത്ത കാലത്ത് ഒന്നും ഒരു ചിത്രം കണ്ടിട്ട് ഇത്രയും സംപ്ത്രിപ്തി ലഭിച്ച മറ്റൊരു സന്ദർഭം ഉണ്ടായിട്ടില്ല എന്ന് തന്നെ പറയാം.

🔸ഹല്ലാ എന്ന യുവതിയാണ് നമ്മുടെ പ്രധാന കഥാപാത്രം, പുള്ളിക്കാരിയെ നമ്മൾ ആദ്യം കാണുന്നത് ഒരു താഴ്‌വരയിൽ വെച്ചാണ്. ഗ്രാമത്തിൽ സ്ഥിതി ചെയ്യുന്ന അലുമിനിയം പ്ലാന്റിലേക്കുള്ള വൈദ്യുതി സഞ്ചാരം വളരെ ബദ്ധപ്പെട്ട് ആയുധങ്ങൾ ഉപയോഗിച്ച് തടസ്സപ്പെടുത്തുന്ന ഹല്ലയെ ആദ്യം കാണുമ്പോൾ തന്നെ തോന്നും, കൊള്ളാമല്ലോ ഇവര് എന്ന്. ഇതിപ്പോ ആദ്യമായിട്ടല്ല ഹല്ല ഈ പണി ചെയ്യുന്നത്, പ്രകൃതിക്ക് ദോഷമാണ് എന്ന വസ്തുത മനസ്സിൽ വെച്ച് കൊണ്ട് കുറച്ച് നാളുകളായി അവർ പ്ലാന്റിന്റെയും അതിന്റെ നടത്തിപ്പ്കാരുടെയും സ്വകാര്യ തലവേദന ആയി മാറിയിട്ട്. ഇങ്ങനെയൊക്കെ ആണ് കാര്യം എങ്കിലും ഹല്ലയുടെ ഐഡന്റിറ്റി ഇതുവരെ ആർക്കും പിടികിട്ടിയിട്ടില്ല.

🔸അത്യാവശ്യം ഒന്ന് രണ്ട് സുഹൃത്തുക്കളുടെ സഹായം ഹല്ലയ്ക്ക് ഉണ്ട് എങ്കിലും എത്ര കാലം ഇത് തുടർന്ന് കൊണ്ട് പോവാൻ കഴിയും എന്ന കാര്യത്തിൽ അവർക്ക് യാതൊരു ഉറപ്പുമില്ല, പോലീസും മറ്റ് ഉദ്യോഗസ്ഥരും നാൾക്കുനാൾ കൂടുതൽ ജാഗരൂകരായി കൊണ്ടിരിക്കുകയാണ്, ഒരു ചെറിയ പിഴവ് തന്റെ പക്കൽ സംഭവിച്ചാൽ മതി ജീവിതത്തിന്റെ ഒരു വലിയ ഭാഗം ജയിലിനുള്ളിലാവും എന്ന കാര്യത്തിൽ യാതൊരു സംശയവും വേണ്ട. ഇങ്ങനെയൊക്കെ ആണ് കാര്യം എങ്കിലും പിന്മാറുക എന്നത് അവർക്ക് ചിന്തിക്കാൻ കഴിയാത്ത കാര്യമാണ്, താൻ ഇറങ്ങി പുറപ്പെട്ടിരിക്കുന്ന ദൗത്യം തന്നെക്കാൾ എത്രയോ വലുതാണ് എന്ന് ഹല്ലയ്ക്ക് അറിയാം.

🔸ആയിടയ്ക്കാണ് ഹല്ലയുടെ ജീവിതം വഴി മാറ്റി വിട്ടേക്കാവുന്ന ഒരു സംഭവം അരങ്ങേറുന്നത്, ഹല്ലയെ അന്വേഷിച്ച് അവരുടെ വീട്ടുപടിക്കൽ ഒരു കത്ത് എത്തുകയാണ്. നാല് വർഷങ്ങൾക്ക് മുന്നേ ഒരു കുഞ്ഞിനെ ദത്ത് എടുക്കുന്നതിനായി ഹല്ല ഒരു ശ്രമം നടത്തിയിരുന്നു, അത് അംഗീകരിച്ച് കൊണ്ടുള്ള ഉത്തരവായിരുന്നു ആ കത്ത്. അതോട് കൂടി ഭാവിയെ സംബന്ധിച്ചുള്ള വലിയൊരു ചോദ്യം ഹല്ലയുടെ മുന്നിലേക്ക് എത്തുകയാണ്, താൻ ഇതുവരെ ജീവിച്ച് പോന്ന രീതികളും ആശയങ്ങളുമായി മുന്നോട്ട് പോവണോ അതോ ഈ കുഞ്ഞിനൊപ്പം പുതിയൊരു പാതയിലേക്ക് യാത്ര തുടങ്ങണമോ എന്ന പ്രസക്തമായ ചോദ്യം.

🔸മുകളിൽ സൂചിപ്പിച്ച കഥാഗതിയിൽ വലിയ പ്രാധാന്യം ഉള്ള മറ്റ് ചില കഥാപാത്രങ്ങൾ കൂടി ഉണ്ട്, ചില സർപ്രൈസുകളും, അതൊക്കെ തല്ക്കാലം സർപ്രൈസുകളായി തന്നെ നിക്കട്ടെ. ഏറ്റവും ലളിതമായി പറയുക ആണെങ്കിൽ നല്ല ഒന്നാന്തരം ഒരു സിനിമയാണ് വിമൺ അറ്റ് വാർ, കണ്ട് അവസാനിപ്പിക്കുമ്പോൾ നമ്മുടെ മൂടിനെ തന്നെ ബാധിക്കുന്ന നല്ല ഫസ്റ്റ് ക്‌ളാസ്‌ ഐറ്റം. കണ്ടില്ലെങ്കിൽ നഷ്ടമാണ് എന്ന് പറയാതെ വയ്യ, ഒരു ഒന്നേമുക്കാൽ മണിക്കൂർ മാറ്റി വെച്ചാൽ ചിലപ്പോൾ നിങ്ങൾക്ക് ലഭിക്കാൻ പോവുന്നത് ഓർമയിൽ കുറച്ച് കാലം നില്ക്കാൻ പോവുന്ന നല്ലൊരു സിനിമ ആയിരിക്കും എന്ന് ഉറപ്പ് തരുന്നു.

"Your Journey Is Now My Journey....❤"

Verdict : Must Watch

DC Rating : 95/100

570. Forbidden Planet (1956)

Director : Fred Wilcox

Genre : Sci Fi

Rating : 7.6/10

Country : USA

Duration : 99 Minutes

🔸ഫോർബിഡൺ പ്ലാനറ്റ് എന്ന സിനിമ ഇന്ന് കാണുമ്പോൾ ചിലപ്പോ നമ്മുടെ ജോസ് പ്രകാശ് എന്ന നടനെ ഓർത്ത് പോയേക്കാം. വേറൊന്നുമല്ല ചിത്രത്തിന്റെ സെറ്റപ്പും, കൽ ഭിത്തികളും, അണ്ടർ ഗ്രൗണ്ട് സെറ്റപ്പും എല്ലാം ജോസ് പ്രകാശ് എന്ന വില്ലന്റെ പേര് മനസ്സിൽ എത്തിക്കും, അത് അവിടെ നിക്കട്ടെ. ഒരല്പം പഴക്കം ഉണ്ട് ഈ ചിത്രത്തിന് ഏകദേശം ഏഴിനടുത്ത് പതിറ്റാണ്ടുകളുടെ പഴക്കം, ഈ കാരണം കൊണ്ട് തന്നെ ബഹിരാകാശത്ത് അരങ്ങേറുന്ന ഒരു ചിത്രത്തിന്റെ സെറ്റപ്പും ഇഫക്റ്റും എല്ലാം വളരെ ബേസിക് ആയിരിക്കും എന്നത് പറയേണ്ട കാര്യം ഇല്ലല്ലോ, ചിലപ്പോൾ കോമെടി ആയി വരെ തോന്നിയേക്കാം. സിനിമ കാണുന്നത് വരെ ഇതായിരുന്നു ചിന്ത, റിപ്പീറ്റ് സിനിമ കാണുന്നത് വരെ മാത്രം.

🔸ഇനി കഥയിലേക്ക്, ഇത് ലോകചരിത്രത്തിലെ ഇരുപത്തി മൂന്നാം നൂറ്റാണ്ട്. സ്റ്റാർഷിപ് എന്ന ബഹിരാകാശ പേടകം ആൾട്ടർ 4 എന്ന ഗൃഹം ലക്‌ഷ്യം വെച്ച് കൊണ്ട് നീങ്ങുകയാണ്, ഭൂമിയിൽ നിന്നും പ്രകാശ വർഷങ്ങൾ അകലെയാണ് ഈ ഗ്രഹം സ്ഥിതി ചെയ്യുന്നത്, അത്യധികം കഠിനവും അപകടപൂർണവും ആയ ഈ യാത്രയ്ക്ക് പിന്നിൽ ഒരു കാരണമുണ്ട്, ഈ യാത്രയെ വേണമെങ്കിൽ ഒരു റസ്ക്യു മിഷൻ എന്ന് വേണമെങ്കിൽ വിശേഷിപ്പിക്കാവുന്നതാണ്. ഇരുപത് വർഷത്തോളം മുൻപ് അരങ്ങേറിയ ഒരു ദുരന്തത്തിന്റെ ശേഷിപ്പ് അന്വേഷിച്ചുള്ള യാത്രയാണ് ഇത്.

🔸അതായത് ഇരുപത് വർഷത്തോളം മുൻപ് ഡോക്ടർ എഡ്വേർഡ് മോർബിയസിന്റെ നേതൃത്വത്തിൽ ഒരു പര്യവേഷക ടീം ആൾട്ടയർ 4 ലക്ഷ്യം വെച്ച് പോവുക ഉണ്ടായി, അവിടത്തെയും ചുറ്റുപാടുകളിലെയും ശാസ്ത്രീയമായ വശങ്ങൾ പഠിക്കുക എന്നതായിരുന്നു യാത്രയുടെ ഉദ്ദേശം, എന്നാൽ ഈ സംഘം പിന്നീട് മടങ്ങി വന്നില്ല, എന്ന് മാത്രമല്ല ഇവരുമായി ബന്ധപ്പെടാനോ, സഹായിക്കാനോ ഉള്ള ഒരു ശ്രമങ്ങളും ഫലവത്ത് ആയതുമില്ല. ഈ ഒരു പശ്ചാത്തലത്തിലാണ് കമാന്റർ ജോൺ ആഡംസിന്റെ നേതൃത്വത്തിൽ ഒരു ടീം അവിടേക്ക് പുറപ്പിടുന്നത്.

🔸ഇരുപത് വർഷങ്ങൾക്ക് ശേഷമുള്ള യാത്രയിൽ ജോൺ ആഡംസ് അത്ഭുതങ്ങൾ ഒന്നും പ്രതീക്ഷിക്കുന്നില്ല, തങ്ങൾക്ക് മുൻപേ പുറപ്പെട്ടവർ ജീവനോടെ ഉണ്ടാവും എന്നും അയാൾ കരുതുന്നില്ല എന്നാലും തനിക്ക് കിട്ടിയ നിർദ്ദേശ പ്രകാരം കാര്യങ്ങൾ കണ്ടറിഞ്ഞ് ഉറപ്പ് വരുത്തണം എന്നത് മാത്രമാണ് അയാളുടെ ലക്ഷ്യം. അങ്ങനെ സംഘം ആൾട്ടയർ നാലിന്റെ ഉപരിതലത്തിൽ എത്തുകയാണ്, അവിടെ ജോൺ ആഡംസിനെ ഞെട്ടിച്ച് കൊണ്ട് ഒരു റഡാർ സിഗ്നലും അതിനെ തുടർന്ന് ഒരു മനുഷ്യ ശബ്ദവും കേൾക്കുന്നിടത്ത് ചിത്രം ചൂട് പിടിക്കുകയാണ്.

🔸ഒന്നേമുക്കാൽ മണിക്കൂറിന് അടുത്താണ് ചിത്രത്തിന്റെ ദൈർഖ്യം, അവയിൽ തന്നെ ആദ്യ അഞ്ച് മിനിറ്റ് നടക്കുന്ന കാര്യങ്ങൾ മാത്രമേ പോസ്റ്റിൽ ഉൾപ്പെടുത്തിയിട്ടുള്ളൂ, ആദ്യാവസാനം പിടിച്ചിരുത്തുന്ന, എങ്ങേയ്‌ജിങ്‌ ആയ ചിത്രം എന്നൊക്കെയുള്ള വിശേഷണം ഈ സിനിമയ്ക്ക് നൽകാം. ഒരു മിനിറ്റ് പോലും ബോർ അടിക്കാതെ കാണാൻ കഴിയുന്ന നല്ലൊരു ചിത്രം, നമ്മൾ വിചാരിക്കുന്ന വഴിയേ പോകാത്ത അവതരണം എന്നതൊക്കെ മറ്റ് പ്ലസ് പോയിന്റുകളാണ്. കാണാൻ ശ്രമിക്കുക, ഒരു തരത്തിലും നഷ്ടം ആവില്ല ഈ ചിത്രം.

Verdict : Must Watch

DC Rating : 90/100

569. Spider-Man Far From Home (2019)

Director : Jon Watts

Genre : Super Hero

Rating : 8.2/10

Country : USA

Duration : 129 Minutes

🔸ടോണി സ്റ്റാർക്ക് എന്ന വൻമരം വീണു, പകരമാര് എന്നതാണ് ചോദ്യം. അതാ കടന്ന് വരികയാണ് നമ്മടെ പീറ്റർ പാർക്കർ അഥവാ സ്‌പൈഡർമാൻ, പ്രേക്ഷകനും ലോകത്താകമാനം ഉള്ള മാർവെൽ ആരാധകരും ഒരുപോലെ ചോദിച്ച ചോദ്യത്തിന് ഉത്തരം പറയാൻ ശ്രമിക്കുകയാണ് മാർവെൽ ഫെയ്‌സ് ത്രീയിലെ അവസാന ചിത്രമായ സ്‌പൈഡർമാൻ ഫാർ ഫ്രം ഹോം. എൻഡ് ഗെയിം പോലെയൊരു ലാർജ് സ്കെയിൽ ചിത്രത്തിന് ശേഷം വരുന്ന ചിത്രം ആയതിനാലും മുൻ ചിത്രത്തിന്റെ ക്ലൈമാക്സിന് ശേഷം പിന്നീട് എന്ത് എന്ന ചോദ്യം ഒരു വലിയ ഫാക്റ്ററായി നിലനിൽക്കുന്നതിനാലും അത്യാവശ്യം നല്ല പ്രതീക്ഷ ഉണ്ടായിരുന്നു ഈ ചിത്രത്തിൽ, സ്‌പൈഡർമാൻ എന്ന കഥാപാത്രത്തോടുള്ള ഇഷ്ടം കൂടി ചേർന്നപ്പോൾ അത് ആദ്യ ദിനം തന്നെ സിനിമ കാണാനുള്ള പ്രേരണയായി മാറുകയും ചെയ്തു.

🔸ചിത്രത്തിന്റെ കഥയിലേക്ക് കടക്കുക ആണെങ്കിൽ ചെറിയ തോതിൽ സ്പോയ്ലർ ഉണ്ടാവും, മുൻ ഭാഗ മാർവെൽ സിനിമകൾ കണ്ടിട്ടില്ലാത്തവർ, അറിയാൻ താല്പര്യം ഇല്ലാത്തവർ ഇവിടെ വെച്ച് നിർത്തുന്നത് നന്നാവും. അവേഞ്ചേഴ്‌സ് എൻഡ് ഗെയിം എന്ന ചിത്രത്തിലെ ടോണി സ്റ്റാർക്കിന്റെ മരണം ഉൾക്കൊള്ളാൻ പീറ്ററിന്‌ കഴിഞ്ഞിട്ടില്ല, അതുമായി അവൻ പൊരുത്തപ്പെട്ട് വരുന്നതേ ഉള്ളൂ. ടോണിയുടെ മരണം തന്റെ മേൽ കൊണ്ടുവന്ന ഉത്തരവാദിത്തങ്ങളുടെ ഭാരവും അവൻ തിരിച്ചറിയാൻ പോവുന്നതേ ഉള്ളൂ, ആ തിരിച്ചറിവ് അവന് ലഭിക്കുന്നത് ഈ യൂറോപ്യൻ യാത്രയിലാണെന്ന് മാത്രം. ഈ കഥയാണ് രണ്ട് മണിക്കൂർ ദൈർഖ്യത്തിൽ സ്‌പൈഡർമാൻ ഫാർ ഫ്രം ഹോം പറയുന്നത്.

🔸ഇനി നമുക്ക് നല്ലതും മോശവും എന്ന് അനുഭവപ്പെട്ട കാര്യങ്ങളിലേക്ക് കടക്കാം. ആദ്യമേ തന്നെ ജെയ്ക് ജില്ലൻഹാൽ, പൊതുവെ കോമിക് ബുക് സിനിമകൾക്ക് പറ്റിയ ആളാണ് ജെയ്ക് എന്ന് ഇതുവരെ കരുതിയിരുന്നില്ല, പ്രത്യേകിച്ചും പുള്ളിയുടെ ശൈലിയും പഴയ കഥാപാത്രങ്ങളും എല്ലാം കണക്കിൽ എടുക്കുമ്പോൾ. എന്നാൽ ഈ ധാരണ തെറ്റായിരുന്നു എന്ന് പറയേണ്ടി വരും, മിസ്റ്റീരിയോ എന്ന കഥാപാത്രത്തെ പുള്ളി മികച്ചതാക്കിയിട്ടുണ്ട്, നിസ്സംശയം പറയാം. പുള്ളി ഉൾപ്പെട്ട ചില ഹാലൂസിനേഷൻ രംഗങ്ങളും സിനിമയുടെ ഹൈലൈറ്റ് ആയിരുന്നു, ഈ രംഗങ്ങൾ ട്രെയ്ലറുകളിലും മറ്റും കാണിക്കാത്തതും ഒരു സൂചന പോലും നൽകാഞ്ഞതും വളരെ മികച്ച തീരുമാനം തന്നെ. എൻഡ് ഗെയിം പോലുള്ള ചിത്രങ്ങൾക്ക് നൽകിയ ഹോമേജും, പ്രധാന കഥാപാത്രങ്ങൾക്കിടയിലുള്ള മികച്ച കെമിസ്ട്രിയും മറ്റ് പ്ലസ് പോയിന്റുകളാണ്.

🔸സ്‌പൈഡർമാൻ ചിത്രം എന്ന് കേൾക്കുമ്പോൾ സ്വാഭാവികമായും പ്രതീക്ഷിക്കാവുന്ന മികച്ച ഹ്യുമറും ചിത്രത്തിന്റെ മേന്മയാണ്, അതിനോടൊപ്പം ചേർക്കാവുന്ന നല്ല ആക്ഷൻ രംഗങ്ങളും, ബാക്ക്ഗ്രൗണ്ട് സ്കോറും എല്ലാം നന്നായിരുന്നു. ഇനി നെഗറ്റീവ് ഭാഗത്തേക്ക് കടക്കുക ആണെങ്കിൽ ഒരല്പം പ്രെഡിക്റ്റബിൾ ആണ് ചിത്രം, ഒരു ട്വിസ്റ്റ് രൂപേണ ചില വെളിപ്പെടുത്തലുകൾ സിനിമയിൽ ഉണ്ടെങ്കിലും അത് മിക്ക പ്രേക്ഷകനും ഒരു മൈൽ മുന്നേ പ്രതീക്ഷിച്ചത് ആണ് എന്ന് പറയേണ്ടി വരും. മെയ് പാർക്കരെ പോലെ ചില കഥാപാത്രങ്ങളെ സൈഡ് ആക്കിയതും മറ്റും വേണമെങ്കിൽ നെഗറ്റീവായി കാണാം എന്ന് മാത്രം. ഇതോട് കൂടി ഈ ഭാഗവും പറഞ്ഞ് തീരുകയാണ്.

🔸എല്ലാം കണ്ടും അറിഞ്ഞും തീർന്നു എന്ന് കാഴ്ചക്കാരൻ കരുത്തുന്നിടത്ത് രണ്ട് സർപ്രൈസുകൾ കൂടി സ്റ്റുഡിയോ കരുതി വെച്ചിട്ടുണ്ട്, രണ്ട് പോസ്റ്റ് ക്രെഡിറ്റ് സീനുകളുടെ രൂപത്തിൽ. ഇവയിൽ തന്നെ മിഡ് ക്രെഡിറ്റ് സീൻ ഒരു പരിധി വരെ സിനിമയെ ഓവർ ഷാഡോ ചെയ്യുന്ന ഒന്നാണ്, കാണാതെ തിയേറ്റർ വിട്ടാൽ വൻ നഷ്ടം എന്നൊക്കെ പറയാവുന്ന ഐറ്റം. സ്‌പൈഡർമാൻ ഫർ ഫ്രം ഹോം ഒരു എന്റെർറ്റൈനെർ ആണ്, ആദ്യാവസാനം ചിരിച്ച് രസിച്ച് കാണാവുന്ന ഒരു സിനിമ, കൂടുതൽ അവകാശവാദങ്ങൾ ഒന്നുമില്ല, അതിന്റെ ആവശ്യം ഉദിക്കുന്നുമില്ല.

Verdict : Good

DC Rating : 72/100

568. Donbass (2018)

Director : Sergei Loznitsa

Genre : Drama

Rating : 6.9/10

Country : Germany

Duration : 121 Minutes

🔸യുദ്ധം പ്രമേയമാക്കിയിട്ട് അനവധി സിനിമകൾ പിറത്തിറങ്ങിയിട്ടുണ്ട്, വിവിധ ഭാഷകളിൽ, വിവിധ രാജ്യങ്ങളിൽ എന്തിന് വിവിധ രീതിയിൽ പോലും വന്നിട്ടുണ്ട്. ഇവയെല്ലാം യുദ്ധത്തിന്റെ ഭീകരതയോ, അല്ലെങ്കിൽ യുദ്ധത്തിന്റെ പ്രത്യാഘാതങ്ങളോ അതും അല്ലെങ്കിൽ കാരണങ്ങളിലോ എല്ലാമാണ് പൊതുവെ ഫോക്കസ് ചെയ്ത് കണ്ടിട്ടുള്ളത്, ഇവിടെയാണ് ഡോൻബാസ് എന്ന ചിത്രം ഒരല്പം വ്യത്യസ്തം ആവുന്നത്. യുദ്ധത്തെ ഒരു തരത്തിൽ തമാശയായോ, പരിഹാസമായോ മാറ്റുകയാണ് കഴിഞ്ഞ വർഷം പുറത്തിറങ്ങിയ ഈ ജർമൻ ഡ്രാമാ ചിത്രം, ഒരു ഡിഫറെൻറ്റ് ട്രീറ്റ്മെന്റ് ആണ് ചിത്രം മുന്നോട്ട് വെക്കുന്നത്.

🔸പതിമൂന്നോളം സെഗ്മെന്റുകളായി വിഭജിക്കപ്പെട്ട് കിടക്കുകയാണ് ഡോൻബാസ് എന്ന ചിത്രം, പരസ്പര ബന്ധിതം അല്ല എന്ന് പ്രത്യക്ഷത്തിൽ തോന്നുമെങ്കിലും ഇവയിൽ എല്ലാം നില നിൽക്കുന്ന കോമൺ ആയ ചില കാര്യങ്ങൾ ഉണ്ട്. ഈ കാര്യങ്ങളിൽ ഏറ്റവും പ്രാധാന്യം അർഹിക്കുന്ന ഒന്നാണ് യുക്രേനിയൻ ദേശീയ വാദികളും റഷ്യയെ പിന്തുണയ്ക്കുന്ന റിപ്പബ്ലിക്കുകളും തമ്മിലുള്ള അടിഞ്ഞ് കിടക്കുന്ന വൈരാഗ്യം. പ്രതീക്ഷിക്കുന്നതിലും മുകളിലാണ് ഈ രണ്ട് വിഭാഗങ്ങൾക്കിടയിലുള്ള കുടിപ്പക, ഒരു തരം ദേഷ്യവും, പുച്ഛവും എല്ലാം ഇവർ തമ്മിൽ വെച്ച് പുലർത്തുന്നുണ്ട്, അത് ചിത്രത്തിന്റെ വിവിധ പോയിന്റുകളിൽ നിന്നും വ്യക്തമാവുന്നതുമാണ്.

🔸തീവ്ര ദേശീയ വാദികളുടെയും വിപ്ലവ വിഭാഗക്കാരുടെയും വാദങ്ങൾ ചിത്രം വിശകലനം ചെയ്യുന്നുണ്ട്, എന്നാൽ ഈ രണ്ട് വിഭാഗത്തിന്റെയും ഭാഗത്ത് ചേർന്ന് നിൽക്കാതെ മറ്റൊരു വശത്ത് കൂടിയാണ് സിനിമ പുരോഗമിക്കുന്നതും. ഇരു വിഭാഗങ്ങൾക്കും ഇടയിൽ രണ്ടാം ലോക മഹായുദ്ധ കാലത്തെ ഓർമ്മകൾ പോലും പൂർണമായും അസ്തമിച്ചിട്ടില്ല, എന്നാൽ ആ കാലയളവിൽ ഒരുമിച്ച് യുദ്ധകാലത്തിലേക്ക് ഇറങ്ങിയിടത്ത് നിന്നും സ്ഥിതി ഗതികൾ ഒരുപാട് മാറി പോയിരിക്കുന്നു. ഡോൻബാസ് എന്ന ഉക്രേനിയൻ ഗ്രാമ പ്രദേശത്താണ് ചിത്രത്തിന്റെ കഥ അരങ്ങേറുന്നത്.

🔸ഭയം, ഒരു പരിധി വരെ ഭയം എന്ന വികാരമാണ് ചിത്രത്തെ മുന്നോട്ട് നയിക്കുന്നത്. ഭൂത കാലത്തെ അനുഭവങ്ങളിൽ കൂടി നേടിയ അനുഭവത്താൽ അതെല്ലാം ഇനിയും അനുഭവിക്കേണ്ടി വരുമോ എന്ന ഭയം, വർത്തമാന കാലത്തെ ദുരിതങ്ങൾ അതിജീവിക്കാൻ തങ്ങൾക്ക് കഴിയുമോ എന്ന കാര്യത്തിലെ ഭയം, എല്ലാത്തിനും ഉപരി ഭാവി കാലം തങ്ങൾക്കായി കാത്ത് വെച്ചിരിക്കുന്ന അഗ്നി പരീക്ഷണങ്ങൾ എന്തെല്ലാമാണ് എന്ന അനിശ്ചിതാവസ്ഥ നൽകുന്ന ഭയം, ഇവയെല്ലാം നമ്മൾ കാണുന്ന ഓരോ കഥാപാത്രത്തിലും കാണാൻ കഴിയും. ഈ യാഥാർഥ്യങ്ങളുടെ അവതരണമാണ് ഈ ചിത്രം എന്ന് പറയാം.

🔸എല്ലാ വിഭാഗക്കാരായ ഓടിയെൻസിനും പറ്റിയ ഒന്നല്ല ഡോൻബാസ് എന്ന ചിത്രം, ചിത്രം പറയാൻ ഉദ്ദേശിക്കുന്ന കാര്യങ്ങളിലും അവ പറയുന്ന രീതിയിലും താല്പര്യം ഇല്ലാത്ത ഒരു വ്യക്തിക്ക് ചിത്രം അരോചകമായി തോന്നിയേക്കാം, മടുപ്പ് അനുഭവപ്പെട്ടേക്കാം, ഈ കാരണങ്ങൾ കൊണ്ട് തന്നെ ചിത്രം എല്ലാവര്ക്കും നിർദ്ദേശിക്കുന്നില്ല. സ്ഥിരം വാർ, പൊളിറ്റിക്കൽ ചിത്രങ്ങളിൽ നിന്നും വ്യത്യസ്തമായ ഒരു ശ്രമം കാണാൻ താത്പര്യപ്പെടുന്നു എങ്കിൽ കാണാൻ ശ്രമിക്കുക. ഇത് പോലൊരു ചിത്രത്തിന്റെ ആസ്വാദനത്തിന് വ്യക്തി താല്പര്യങ്ങൾക്ക് വലിയ പ്രാധാന്യം ഉണ്ടെന്നതിനാൽ കൂടുതൽ പറഞ്ഞ് മുഷിപ്പിക്കുന്നില്ല, കണ്ട് തന്നെ വിലയിരുത്തുക.

Verdict : Watchable

DC Rating : 65/100