613. Midsommar (2019)

Director : Ari Aster

Genre : Horror

Rating : 7.4/10

Country : USA

Duration : 171 Minutes

🔸അരി ആസ്റ്റർ സംവിധാനം ചെയ്ത ഹെറേഡിറ്ററി എന്ന ചിത്രം കഴിഞ്ഞ വർഷം കണ്ടപ്പോൾ പല കാരണങ്ങൾ കൊണ്ടും അതൊരു വ്യത്യസ്ത അനുഭവം തന്നെ ആയിരുന്നു. സ്ഥിരം ക്ലിഷേ ഹൊറർ പാതയിലൂടെ പോവാതെ തികച്ചും വ്യത്യസ്തമായ ട്രീറ്റ്മെന്റും മികച്ചൊരു ക്ളൈമാക്‌സും എല്ലാം തന്ന ചിത്രം കഴിഞ്ഞ വർഷത്തെ ഏറ്റവും ഇഷ്ട്ടപ്പെട്ട ചിത്രങ്ങളിൽ ഒന്ന് ആയിരുന്നു താനും. പിന്നീട് പ്രിന്റ് റിലീസ് ആയതിന് ശേഷം ചിത്രത്തെ പറ്റി എതിരഭിപ്രായങ്ങൾ അനവധി കേട്ടെങ്കിൽ കൂടിയും ആദ്യ കാഴ്ചയിൽ ലഭിച്ച അനുഭവം അവയെ എല്ലാം അവഗണിക്കാൻ പ്രേരിപ്പിക്കുന്നത് തന്നെ ആയിരുന്നു. ഈ സംവിധായകന്റെ രണ്ടാം ചിത്രത്തിന് വേണ്ടി കാത്തിരിക്കാൻ മറ്റനേകം കാരണങ്ങളും ആവശ്യം ഉണ്ടായിരുന്നില്ല.

🔸കഥയിലേക്ക് വരിക ആണെങ്കിൽ സ്വീഡനിൽ തൊണ്ണൂറ് വർഷം കൂടുമ്പോൾ ഒരു ഫെസ്റ്റിവൽ നടക്കാറുണ്ട്. ആ ഫെസ്റ്റിവലിനെ അതീവ ഗൗരവത്തോടെ നോക്കി കാണുന്ന ഒരു കൂട്ടം ആളുകളും, അവർക്കിടയിലേക്ക് ഒരു സംഘം വിദ്യാർഥികൾ എത്തിപ്പെടുകയാണ്. തങ്ങളുടെ ജീവിത കാലത്തിനിടെ ഒരിക്കൽ മാത്രം കാണാൻ കഴിയുന്ന ഈ പരിപാടി ആസ്വദിക്കാം എന്ന് ഇവർ തീരുമാനിക്കുകയാണ്, എന്നാൽ ഈ ചടങ്ങുകളിൽ അവർ കാണാൻ പോവുന്ന വിചിത്രമായ, ക്രൂരമായ ചില സംഗതികൾ ഇവർക്ക് മാനസികമായും ശാരീരികമായും കൈകാര്യം ചെയ്യാൻ കഴിയുമോ എന്നതാണ് യഥാർത്ഥ ചോദ്യം.

🔸ആസ്റ്ററിന്റെ മുൻ ചിത്രമായ ഹെറേഡിറ്ററിയും ആയി തട്ടിച്ച് നോക്കുമ്പോൾ പ്രകടമായ വ്യത്യാസം മിഡ്സോമറിന്റെ എല്ലാ വിഭാഗങ്ങളിലും കാണാനുണ്ട്, ട്രീറ്റ്‌മെന്റ് ആയാലും ടോൺ ആയാലും എല്ലാം. ഹെരെഡിറ്ററി കരുതി വെച്ചത് പോലുള്ള ടെയിൽ എൻഡ് സർപ്രൈസുകളും പ്രതീക്ഷിക്കരുത്, മിഡ്‌സോമർ ഒരു നേർ രേഖ പോലുള്ള ചിത്രമാണ്, അതിന്റെ പാതയിൽ നിന്നും കാര്യമായി വ്യതിചലിക്കുന്നില്ല. ഇത് കൊണ്ട് തന്നെ ചിത്രം ഒരല്പം പ്രെഡിക്റ്റബിൾ ആണോ എന്നൊരു സംശയവും ഉണ്ട്, അതെന്തായാലും അവിടെ നിൽക്കട്ടെ. രണ്ടര മണിക്കൂർ ദൈർഖ്യമുള്ള ഒറിജിനൽ കട്ടും മൂന്ന് മണിക്കൂറിന് അടുത്തുള്ള ഡിറക്ടേഴ്സ് കട്ടും ലഭ്യമാണ്, ആദ്യത്തേത് കേട്ടറിവ് വെച്ചും രണ്ടാമത്തേത് അനുഭവം വെച്ചും വർത്ത് ആണ്.

🔸ഇനി മറ്റ് കാര്യങ്ങളിലേക്ക് കണ്ണ് ഓടിക്കുക ആണെങ്കിൽ പ്രധാന കഥാപാത്രമായി എത്തിയ ഫ്ലോറെൻസ് പഗ്ഗിനെ പറ്റി പറയണം. ഒരല്പം ട്രാജിക്ക് ആയൊരു ബാക്ക് സ്റ്റോറി കഥാപാത്രത്തിന് നൽകിയിട്ടുണ്ട് ചിത്രത്തിൽ. ഈ ഒരു ബാക്ക് സ്റ്റോറി കാരണം തന്നെ കഥാപാത്രം മൂന്ന് മണിക്കൂർ ദൈർഖ്യം കൊണ്ട് സഞ്ചരിച്ച് അവസാനം ക്ലൈമാക്സ് ഷോട്ടിൽ എത്തി നിൽക്കുമ്പോഴുള്ള ആർക്ക് നല്ല വെടിപ്പായി കൊണ്ട് വന്നിട്ടുള്ളതായി തോന്നി, തികച്ചും ലോജിക്കലായി ഉള്ളത് പോലെ. ഈ കഥാപാത്രത്തിന്റെ വീക്ഷണത്തിലൂടെയാണ് ചിത്രം പുരോഗമിക്കുന്നത് എന്നതും കഥയുടെ പോക്കിൽ എടുത്ത് പറയേണ്ടതുണ്ട്. കയ്യടക്കത്തോടെ കാര്യങ്ങൾ ചെയ്ത് വെച്ച ആസ്റ്ററും പ്രശംസ അർഹിക്കുന്നുണ്ട്.

🔸മിഡ്സോമാറിന്റെ മധ്യ ഭാഗത്തായി ഒരു സീൻ ഉണ്ട്, ട്രെയിലർ കണ്ടവർക്ക് കഥ എങ്ങോട്ടാണ് പോവുന്നത് എന്ന് തിരിച്ചറിയാൻ കഴിയുമെങ്കിലും സത്യത്തിൽ എന്താണ് ചുറ്റിലും അരങ്ങേറുന്നത് എന്ന് കഥാപാത്രങ്ങൾ തിരിച്ചറിയുന്ന മൊമെന്റ്. ഒരു സ്ലോ ബർണർ ആയ ഇത് പോലുള്ള രംഗങ്ങളാണ് മിഡ്‌സോമർ എന്ന ചിത്രത്തെ സ്പെഷ്യൽ ആക്കുന്നത്. പിന്നെ എടുത്ത് പറയേണ്ട ഒരു കാര്യം മികച്ച സിനിമാറ്റോഗ്രഫിയാണ്, മികച്ച മനോഹരമായ ഒരുപാട് ദൃശ്യങ്ങൾ. നല്ല മ്യുസിക്കൽ സ്കോറും കൂടി ചേരുമ്പോൾ ഈ വർഷത്തെ മികച്ച ചിത്രങ്ങളിൽ ഒന്നായി മാറുന്നുണ്ട് അരി ആസ്റ്ററിന്റെ മിഡ്സോമർ.

Verdict : Very Good

DC Rating : 85/100

612. Shadow (2018)

Director : Zhang Yimou

Genre : Action

Rating : 7/10

Country : China

Duration : 116 Minutes

🔸ഈ സംവിധായകൻ ഴാങ് യിമോ ആളൊരു സംഭവമാണ്, റെയിസ് ദി റെഡ് ലാന്റേൺ എന്ന ചിത്രം കണ്ടപ്പോൾ തുടങ്ങിയതാണ് പുള്ളിയുടെ സിനിമകളോടുള്ള ഇഷ്ടം. അതിന് പിന്നാലെ ഹൌസ് ഓഫ് ഫ്ളയിങ് ഡഗേർസ്, ഹീറോ, റ്റു ലിവ്, റെഡ് സൊർഗും, ജു ദോ, നോട് വൺ ലെസ്, റോഡ് ഹോം തുടങ്ങി ഇഷ്ട്ടപ്പെട്ട ഒരുപാട് സിനിമകൾ പുള്ളിയുടേതായി കാണാൻ കഴിഞ്ഞു. ഇടക്കാലത്ത് ഗ്രെയ്റ്റ് വാൾ പോലെയുള്ള ചില ദുരന്തോം ഐറ്റംസും വന്നെങ്കിലും യിമോ ചിത്രങ്ങളോടുള്ള താല്പര്യത്തിന് ഒരു കോട്ടവും ഒരുകാലത്തും ഉണ്ടായിരുന്നില്ല. ഷാഡോ എന്നൊരു ഐറ്റം ചൈനയിൽ നിന്നും മികച്ച അഭിപ്രായങ്ങൾ നേടി പുറപ്പെട്ടിട്ടുണ്ട് എന്ന വാർത്ത ഈ കാരണം കൊണ്ട് തന്നെ വലിയ പ്രതീക്ഷയോടെയാണ് കേട്ടത്.

🔸യിൻ ആൻഡ് യാങ് എന്നൊരു പെയിന്റിംഗ് ഉണ്ട് ചൈനീസ് ഫോൾക്‌ളോറിൽ, നമ്മളെല്ലാം കണ്ടിട്ടും ഉണ്ടാവും. തുല്യമായ രീതിയിൽ, എന്നാൽ വ്യത്യസ്തമായ ആകൃതിയിൽ വീതിച്ചിരിക്കുന്ന കറുപ്പും വെളുപ്പും ആയുള്ള ഒരു വട്ടത്തിന് ഉള്ളിലെ രണ്ട് ഭാഗങ്ങൾ. ഈ രണ്ട് ആകൃതിക്ക് ഉള്ളിലും എതിർ നിറത്തിന്റെ ഒരു ഡോട്ടും ഉണ്ടായിരിക്കും. നല്ലതും മോശവും തമ്മിലുള്ള വ്യത്യാസവും അത് നിലനിർത്തി പോവുന്ന ബാലൻസും എല്ലാമാണ് ഈ ചിത്രം പറയുന്ന വസ്തുത എന്നാണ് കേട്ടറിവ്. ഒരു പരിധി വരെ ഈ ഒരു ചിത്രമാണ് ഷാഡോ എന്ന സിനിമയുടെ ബേസും. യിന്നും യാങ്ങും പോലെ രണ്ട് കഥാപാത്രങ്ങൾ ചിത്രത്തിലുണ്ട്, തല്ക്കാലം വിശദീകരിക്കുന്നില്ല.

🔸നൂറ്റാണ്ടുകൾക്ക് മുൻപേ ഉള്ള ചൈനയിലെ വളരെ പ്രശസ്തമായ രണ്ട് രാജവംശങ്ങളാണ് പേയിയും യാങ്ങും, ഇവരോളം തന്നെ അല്ലെങ്കിൽ ഇവരേക്കാൾ കുപ്രസിദ്ധമാണ് രണ്ട് രാജ്യങ്ങളും തമ്മിൽ നിലനിൽക്കുന്ന കുടിപ്പകയുടെയും കഥ. രണ്ട് രാജ്യങ്ങളുടെയും പടത്തലവന്മാരാണ് കീഴടക്കാൻ കഴിയാത്തവൻ എന്ന ഖ്യാതി തന്റെ ആയോധന കലയിൽ ഉള്ള കഴിവ് കാരണം നേടി എടുത്ത യാങ് ചാങ്ങും അത്ര പെട്ടെന്ന് ഒന്നും തോൽവി സമ്മതിക്കാത്ത പേയിയുടെ കമാണ്ടർ സിയുവും. ഇരുവരും തമ്മിൽ മുൻപ് ഒന്ന് ഏറ്റുമുട്ടിയപ്പോൾ വിജയം ചാങ്ങിന് ഒപ്പമായിരുന്നു, ആ പരാജയത്തിന് പേയ് അടിയറ വെക്കേണ്ടി വന്നത് തങ്ങളുടെ രാജ്യത്തിൻറെ വളരെ പ്രധാനപ്പെട്ട ജിങ്‌ഷു എന്ന നഗരം ആയിരുന്നു.

🔸പേയ് രാജ്യത്തെ ഇപ്പോഴുള്ള രാജാവ് ഒരു നട്ടെല്ല് ഇല്ലാത്ത തരം കഥാപാത്രമാണ്, ഏത് വിധേനയും യാങ് രാജ്യവും ആയി സമാധാനത്തിൽ എത്താനായി സ്വന്തം സഹോദരിയെ യാങ് ചാങ്ങിന്റെ മകനെ കൊണ്ട് കല്യാണം കഴിപ്പിക്കാൻ അയാൾ ശ്രമിക്കുകയാണ്. എന്നാൽ ഈ അനുനയ ശ്രമത്തിന് ലഭിച്ച മറുപടി തികഞ്ഞ അവഹേളനം ആയിരുന്നു താനും, ഭാര്യയായി പറ്റില്ല വേണമെങ്കിൽ ഒരു വേശ്യയുടെ സ്ഥാനം നൽകാം എന്നാണ് രാജാവിന് ലഭിച്ച മറുപടി. അങ്ങനെ എങ്കിൽ അങ്ങനെ, മുന്നോട്ട് പോവാം എന്ന് രാജാവ് കരുതി ഇരുന്നെങ്കിലും, സ്വന്തം അനുചരന്മാരിൽ നിന്ന് തന്നെ അയാൾക്ക് നേരിടേണ്ടി വന്ന പ്രതിഷേധം വളരെ വലുതായിരുന്നു. അധികം താമസിയാതെ ഈ പ്രതിഷേധം ഒരു തുറന്ന യുദ്ധത്തിനുള്ള വഴി ഒരുക്കുകയാണ്.

🔸ഇനി ഒരു ചെറിയ ജാമ്യം എടുക്കാം, ഈ മുകളിൽ പറഞ്ഞത് ഒന്നുമല്ല ചിത്രത്തിന്റെ കോർ പ്ലോട്ട്, അല്ലെങ്കിൽ അതിന്റെ വളരെ ചെറിയൊരു അംശം മാത്രമാണ്. പറഞ്ഞിട്ടില്ലാത്ത, പറയാൻ താല്പര്യം ഇല്ലാത്ത മറ്റനേകം കാര്യങ്ങൾ ചിത്രത്തിലുണ്ട്, അത് കണ്ട് തന്നെ അറിയാൻ ശ്രമിക്കുക. ചിത്രം അവസാനിക്കുമ്പോൾ അനവധി ചോദ്യങ്ങൾ ബാക്കിയാണ്, പ്രത്യേകിച്ചും ഇനി എന്ത് എന്ന തോതിൽ ഉള്ളവ, എന്നാൽ ഈ അനിശ്ചിതത്വം ഒരു അലങ്കാരമായി തോന്നിയ അപൂർവം ചിത്രങ്ങളിൽ ഒന്നാണ് ഷാഡോ. യാതൊരു സംശയവും ഇല്ലാതെ പറയാം, ഈ വർഷം കണ്ട ചിത്രങ്ങളിൽ ഏറ്റവും മികച്ചവയിൽ ഒന്നാണ് ഈ ഴാങ് യിമോ ചിത്രം.

Verdict : Must Watch

DC Rating : 90/100

611. A Dragon Arrives (2016)

Director : Mani Haghighi

Genre : Mystery

Rating : 6.7/10

Country : Iran

Duration : 103 Minutes

🔸ഒരല്പം മിസ്റ്ററി, പൊടിക്ക് ലേശം ഹൊറർ ഫീൽ, ചെറിയൊരു ഡോക്യു്മെന്ററി ലൈൻ അങ്ങനെ ഇതെല്ലാം ചേർന്ന് ഒരു ഒന്നേമുക്കാൽ മണിക്കൂർ ദൈർഖ്യം ഉള്ള സിനിമ, ഇതാണ് എ ഡ്രാഗൺ അറൈവസ് എന്ന ഇറാനിയൻ ചിത്രം. പൊതുവെ കണ്ടു ശീലിച്ച ഒരു പാറ്റേർണിൽ പെട്ട ലളിതവും ഊഷ്മളവും ആയ ഒരു സ്റ്റാൻഡേർഡ് ഇറാനിയൻ ചിത്രത്തിന്റെ കൂട്ടത്തിൽ ഉൾപ്പെടുത്താൻ കഴിയില്ല ഈ ശ്രമത്തെ. ചിത്രം നല്ലതാണോ മോശമാണോ എന്നതാണ് ചോദ്യം എങ്കിൽ സംശയം ഏതും ഇല്ലാതെ പറയാം നല്ല ഒന്നാന്തരം ഒരു സിനിമയാണ് എ ഡ്രാഗൺ അറൈവസ് എന്ന്.

🔸അറുപതുകളിലെ ഇറാനിൽ എവിടെയോ ഉള്ളൊരു ഇന്ററോഗേഷൻ റൂമിലാണ് ചിത്രം ആരംഭിക്കുന്നത്. ചോദ്യം ചെയ്യപ്പെടുന്ന ബാബക് എന്ന കഥാപാത്രം തന്റെ സെൻസിലേക്ക് മടങ്ങി വരുന്നേ ഉള്ളൂ. താൻ എത്ര ദിവസമായി ചോദ്യം ചെയ്യുന്ന ടീമിന്റെ കയ്യിൽ പെട്ടിട്ട് എന്നോ എവിടെയാണ് എന്നോ അയാൾക്ക് യാതൊരു പിടിപാടും ഇല്ല, തന്റെ ബോധം മറഞ്ഞിട്ട് എത്ര ദിവസം കഴിഞ്ഞെന്നും അയാൾക്ക് ധാരണ ഇല്ല. ഈ ഒരു ചുറ്റുപാടിൽ നിന്ന് കൊണ്ടാണ് ബാബക് തന്റെ കഥ പറഞ്ഞ് തുടങ്ങുന്നത്. ചോദ്യം ചോദിക്കുന്ന വ്യക്തി ഇതിനിടെ പ്രസക്തമായ ഒരു കാര്യം പറയുന്നുമുണ്ട്, കഥ തനിക്ക് മുഴുവൻ അറിയാം, പക്ഷെ ഇത് റെക്കോർഡ് ചെയ്യപ്പെടേണ്ടതാണ് എന്ന്, അതും ബാബാക്കിന്റെ വാക്കുകളിലൂടെ തന്നെ.

🔸പ്രത്യക്ഷത്തിൽ ലളിതം എന്ന് തോന്നുമെങ്കിലും വളരെ ദുരൂഹത നിറഞ്ഞ് നിൽക്കുന്ന, ഒരുപാട് മിസ്റ്ററികൾ ഒളിഞ്ഞിരിക്കുന്ന ഒരു വേർഷൻ ആണ് ബാബാക്കിന് പറയാൻ ഉണ്ടായ കഥ. ഇറാനിൽ ഡിറ്റക്ടീവ് ആയി ജോലി നോക്കുന്ന ബാബക്ക് ഒരുനാൾ ഖിയേഷാം മരുഭൂമിയിലെക്ക് വിളിക്കപ്പെടുകയാണ്. അവിടേക്ക് നാട് കടത്തപ്പെട്ട ഒരു രാഷ്ട്രീയ തടവുകാരൻ ആത്മഹത്യ ചെയ്ത സംഭവമാണ് ഇതിനുള്ള മൂല കാരണം. പൊതുവെ ഈ തടവുകാർ ഒക്കെ ആത്മഹത്യ ചെയ്യുന്നത് സർവ സാധാരണമായ കാര്യമാണ്, കുറ്റബോധം കാരണമോ കാർന്ന് തിന്നുന്ന ഏകാന്തത കാരണമോ ഇത് പല തവണ സംഭവിച്ചിട്ടുണ്ട്, പക്ഷെ ഈ കേസിൽ കുറച്ച് വ്യത്യാസം ഉണ്ട്.

🔸ആത്മഹത്യ ചെയ്ത തടവുകാരൻ സ്വാതന്ത്രനാവാൻ അറുപത്തി രണ്ട് ദിവസങ്ങൾ മാത്രമേ ഉണ്ടായിരുന്നുള്ളൂ, ദീർഘ കാലമായി തടവറയിൽ കഴിഞ്ഞൊരു വ്യക്തി മോചനം കണ്മുന്നിൽ എത്തി നിൽക്കെ ആത്മഹത്യാ ചെയ്യുക എന്നത് ഒരു ലോജിക് വെച്ച് അളന്നാലും സെൻസ് ഉണ്ടാക്കാത്ത കാര്യമാണ്. അപ്പൊ പിന്നെ സ്വാഭാവികമായും ഇതിന് പിന്നിൽ എന്തെങ്കിലും കാരണങ്ങളും സംഭവങ്ങളും ഉണ്ടായിരുന്നിരിക്കണം. ആ കരങ്ങളിലേക്ക് ഒന്ന് വെളിച്ചം വീശാൻ ശ്രമിക്കുകയാണ് അന്വേഷക വേഷം ധരിച്ച ബാബക്കും അയാളുടെ സംഘവും.

🔸മുകളിൽ സൂചിപ്പിച്ച പ്ലോട്ടിൽ നിന്നും ഒരു നേർ രേഖയിൽ പോവുന്ന കഥയെന്ന സൂചന ലഭിച്ചേക്കാം എങ്കിലും അത്യാവശ്യം ശ്രദ്ധ കൊടുക്കേണ്ട, അത് ആവശ്യപ്പെടുന്ന ഒന്നാണ് ഈ ചിത്രം. നേരായ രീതിയിൽ കഥ പറഞ്ഞ് പോവുന്നതിനിടെ ഒരു ഡോകിയുമെന്ററിയുടെ രൂപഭാവവും ചിത്രം സ്വീകരിക്കുന്നുണ്ട്, സംവിധായകൻ തന്നെയും സ്‌ക്രീനിന്റെ മുന്നിൽ എത്തുന്നുമുണ്ട്. അപ്പൊ പറഞ്ഞ് വന്നത് ഒരു വെറൈറ്റി രീതിയിൽ കഥ പറഞ്ഞ് പോവുന്ന ചിത്രമാണ് എ ഡ്രാഗൺ അറൈവസ്, മിസ്റ്ററി ഡ്രാമ ഫാന്റസി വിഭാഗ ചിത്രങ്ങളിൽ താല്പര്യം പ്രകടിപ്പിക്കുന്നവർക്ക് കാണാൻ ശ്രമിക്കാം, നഷ്ടമായി തോന്നില്ല എന്നുറപ്പ്.

Verdict : Very Good

DC Rating : 80/100

610. Ready Or Not (2019)

Director : Tyler Gillet

Genre : Horror

Rating : 7.2/10

Country : USA

Duration : 95 Minutes

🔸സാധാരണ ഈ ഹോളിവുഡ് ചിത്രങ്ങൾ, അതായത് ഈ ബിഗ് ബഡ്ജറ്റ് ആക്ഷൻ അല്ലെങ്കിൽ കോമിക് ബുക് അല്ലാത്ത ചിത്രങ്ങൾ ഇവിടെ തിയേറ്ററുകളിൽ എത്താനുള്ള സാദ്ധ്യതകൾ വളരെ കുറവാണ്. അത്രയൊന്നും പ്രശസ്തരല്ലാത്ത നടീ നടന്മാരെ വെച്ചുള്ള ഒരു സംവിധായകന്റെ ചിത്രമൊക്കെ ഇവിടെ റിലീസാവുക എന്നത് വലിയ കാര്യം തന്നെയാണ്. ഇവ റിലീസ് ആയാൽ തന്നെ കാണാൻ ആളില്ലാത്തത് കാരണം ഷോ നടക്കാതെ പോകാറാണ് പതിവ്, ടോയ് സ്റ്റോറി പോലുള്ള ചിത്രങ്ങൾ പോലും ഒരു ഷോ കളിപ്പിക്കാൻ പെട്ട പാട് വലുതായിരുന്നു. ഈ ഒരു കാര്യമൊക്കെ കണക്കിൽ എടുക്കുമ്പോൾ റെഡി ഓർ നോട്ട് എന്ന ചിത്രം തിയേറ്ററിൽ കാണാൻ കഴിഞ്ഞു എന്നത് പല വിധത്തിലും അത്ഭുതപ്പെടുത്തുന്ന ഒരു വസ്തുതയാണ്.

🔸നമ്മുടെ കേരളത്തിൽ പ്രത്യേകിച്ചും മലബാർ ഭാഗത്ത് നിലവിലുള്ള ഒരു സമ്പ്രദായമാണ് കല്യാണ സൊറകൾ എന്നൊക്കെ ഓമന പേരിട്ട് വിളിക്കുന്ന ചില കലാപരിപാടികൾ. വരന്റെ സുഹൃത്തുക്കളും മറ്റ് അടുപ്പക്കാരും എല്ലാം ചേർന്ന് കല്യാണത്തിന്റെ അന്നും തലേന്നും പിറ്റേന്നും എല്ലാമായി ചില നിർദോഷകരമായ തമാശകൾ ഒപ്പിക്കുന്നതും മറ്റുമാണ് സാധാരണയുള്ള രീതി, അതിര് കടക്കാത്തിടത്തോളം ഇതെല്ലാം നല്ല കാര്യങ്ങൾ തന്നെയാണ് എന്നാണ് വെപ്പ്, എന്നാൽ ചില അപൂർവ സന്ദർഭങ്ങളിൽ ഇത് കൈവിട്ട് പോവുന്നതും പ്രശ്നങ്ങൾ ഉണ്ടാവുന്നതും നമ്മൾ കണ്ടിട്ടുണ്ട്. അത്തരം ഒരു അതിര് വിട്ട തമാശയാണ് ഈ ചിത്രത്തിന്റെ പ്രമേയം.

🔸അത്യാവശ്യം പേരും പ്രശസ്തിയും പണവും എല്ലാമുള്ള ലെ ഡൊമസ് കുടുംബത്തിന്റെ കഥയാണ് റെഡി ഓർ നോട്ട്. ഈ ടീമിന് ഒരു പ്രത്യേകത ഉണ്ട്, തങ്ങളുടെ കുടുംബത്തിൽ പുതുതായി കല്യാണം കഴിച്ച് വരുന്ന ഏതൊരു വ്യക്തിയും പൂർണമായും തങ്ങളിൽ ഒരാളായി മാറുന്നതിന് വേണ്ടി എന്ന ന്യായത്തിന്റെ അടിസ്ഥാനത്തിൽ ചില കളികൾ അങ്ങട്ട് നടത്തിയേക്കും, അതും കല്യാണം കഴിഞ്ഞ അന്ന് രാത്രി തന്നെ. മുകളിൽ പറഞ്ഞ ന്യായമാണ് പ്രത്യക്ഷത്തിൽ അവർ പറയുന്നത് എങ്കിൽ കൂടിയും അപകടകരമായ മറ്റൊരു വശം കൂടി ഈ തമാശയ്ക്ക് പിറകിൽ ഉണ്ട്, ആ കാരണങ്ങളിലേക്ക് തല്ക്കാലം കടക്കുന്നില്ല. ഈ കളികളുടെ പരിണിത ഫലം എന്താവും എന്നൊരു ധാരണ തരാൻ പതിറ്റാണ്ടുകൾക്ക് മുൻപേ അരങ്ങേറിയ ഒരു സംഭവത്തെയും ചിത്രം പ്രതിപാദിക്കുന്നുണ്ട്, അപ്പൊ ഇതാണ് നമ്മുടെ കഥാ പശ്ചാത്തലം.

🔸ഇനി നമ്മുടെ നായകനായ അലെക്സിനെ കുറിച്ച് പറയാം, ലെ ഡൊമസ് കുടുംബത്തിൽ അംഗം ആണെങ്കിൽ കൂടിയും കാലങ്ങളായി കുടുംബത്തെ വിട്ട് പിരിഞ്ഞ് താമസിക്കുകയാണ് അലക്സ്. ഈ ഏകാന്ത വാസത്തിന് കാരണം കുടുംബത്തോടുള്ള സ്വരച്ചേർച്ച കുറവ് തന്നെയാണ് താനും. എന്തിരുന്നാലും ഒടുവിൽ ഒരുനാൾ അയാൾ മടങ്ങി വരികയാണ്, അതിന് ഒരു കാരണവുമുണ്ട്, ഗ്രേസ് എന്ന യുവതിയെ അയാൾ വിവാഹം കഴിക്കാൻ താല്പര്യപ്പെടുന്നുണ്ട്. അധികം വലിച്ച് നീട്ടൽ ഒന്നും ഇല്ലാതെ കാര്യത്തിലേക്ക് കടക്കാം, താമസിയാതെ തന്നെ അലക്സ് ഗ്രേസ് ദമ്പതികളുടെ വിവാഹം അരങ്ങേറുകയാണ്.

🔸ചിത്രം അതിന്റെ വയലെന്റ്, ഹൊറർ ട്രാക്കിൽ എത്തുന്നത് കല്യാണം കഴിഞ്ഞ അന്ന് രാത്രിയിലാണ്. ലെ ഡൊമസ് കുടുംബത്തിന്റെ വർഷങ്ങളായുള്ള ആചാരത്തിന്റെ ആവർത്തനം അവിടെ അരങ്ങേറുകയാണ്, ഗ്രേസ് ചില മത്സരങ്ങളിൽ പങ്കെടുക്കാൻ നിർബന്ധിക്കപ്പെടുകയാണ്. പിന്നെ പ്രധാന കാരണം എന്താണെന്ന് വെച്ചാൽ ഈ കളി കളിക്കേണ്ടത് ചില മാരക ആയുധങ്ങൾ ഒക്കെ വെച്ചാണ്, വലിയ അപകടങ്ങൾ സംഭവിച്ചേക്കാം, ജീവൻ തന്നെ നഷ്ടപ്പെട്ടേക്കാം, ശേഷം ഭാഗം സ്‌ക്രീനിൽ. കുറച്ച് കാലങ്ങൾക്ക് ശേഷം കണ്ട ബ്ലാക്ക് കൊമെടി സ്ലേഷർ ഹൊറർ ടൈപ്പ് ചിത്രം ആയത് കൊണ്ടാവണം നന്നായി ഇഷ്ട്ടപ്പെട്ടു ഈ ചിത്രം, കഴിയുമെങ്കിൽ കാണാൻ ശ്രമിക്കുക.

Verdict : Very Good

DC Rating : 80/100

609. Between Two Ferns The Movie (2019)

Director : Scott Aukerman

Genre : Comedy

Rating : 6.5/10

Country : USA

Duration : 82 Minutes

🔸ബിറ്റ്വീൻ റ്റു ഫേൺസ് എന്ന പരിപാടിയെ പറ്റി ആദ്യമായി അറിഞ്ഞത് ഉദ്ദേശം ഒരു ആറ് മാസം മുൻപാണ്, സ്ഥിരം യൂറ്റിയൂബ് അന്വേഷണങ്ങൾക്ക് ഇടയിലാണ് ബ്രാഡ് പിറ്റുമായുള്ള സാക്ക് ഗാലിഫിയാനാകിസിന്റെ സെഗ്മെന്റ് കാണാൻ ഇടയായത്. തന്റെ മുന്നിൽ ഇരിക്കുന്ന അതിഥികളെ ആക്കുന്ന രീതിയിൽ ഉള്ള ചോദ്യങ്ങളും തമാശ രൂപേണ ഉള്ള അവഹേളന ട്രോളുകളും പോകെ പോകെ നന്നായി രസിച്ചു. ബ്രാഡ് പിറ്റ് സെഗ്‌മെന്റിന്റെ എന്റിങ്ങോടെ പരിപാടിയുടെ മറ്റ് എപ്പിസോഡുകൾ തേടി പിടിച്ച് കാണുക ആയിരുന്നു, ഒടുവിൽ ഒരു റ്റു ഫേൺസ് ചിത്രം നെറ്റ്ഫ്ലിക്സ് പുറത്തിറക്കുന്നു എന്ന് കേട്ടപ്പോൾ അതിന് വേണ്ടിയുള്ള കാത്തിരിപ്പായി അത് പരിണമിക്കുകയും ചെയ്തു.

🔸പഴയ എപ്പിസോഡുകൾ പോലെ തന്നെ സെലിബ്രിറ്റികളും ആയുള്ള ഇന്റർവ്യൂ സെഗ്മെന്റുകളാണ് ഇവിടെയും ഹൈലൈറ്റ്. കീനു റീവ്സ്, മാത്യു മക്കെണോലി, ജോൺ ഹാം, ബ്രൈ ലാർസൺ, ഗാൽ ഗാഡറ്റ് തുടങ്ങി പ്രശസ്തരായ അനവധി നടീ നടന്മാർ ചിത്രത്തിൽ വന്ന് പോവുന്നുണ്ട്. ഇവർ എല്ലാവരുമായി രസകരമായ ഇന്റർവ്യൂകൾ ഉണ്ട് എന്ന് മാത്രമല്ല ഇതിനെയെല്ലാം കണക്റ്റ് ചെയ്യുന്ന ഒരു കഥ കൂടി ചിത്രത്തിലുണ്ട്. വലിയ സെൻസോ ലോജിക്കോ ഒന്നും തപ്പി പോയില്ലെങ്കിൽ ആദ്യം തൊട്ട് അവസാനം വരെ ചിരിക്കാനുള്ള വകുപ്പ് ഈ പടത്തിൽ ഉണ്ട്, ആ വിഭാഗത്തിൽ നൂറ് ശതമാനം ഗ്യാരന്റി.

🔸കഥ എന്നാൽ, റ്റു ഫേൺസ് എന്ന പരിപാടിയുടെ ഹോസ്റ്റ് ആണ് നമ്മുടെ കേന്ദ്ര കഥാപാത്രമായ സാക്ക് ഗാലിഫിയാനാകിസ്, പരിപാടിയുടെ ഒരു ഉദ്ദേശം എന്താണെന്ന് വെച്ചാൽ അതിഥികളെ വിളിച്ച് വരുത്തി അവരോട് മറ്റാരും ചോദിയ്ക്കാൻ മടിക്കുന്ന കാര്യങ്ങളും മറ്റും ചോദിക്കുകയും, ട്രോളലും മറ്റും ഒക്കെ തന്നെയാണ്. ഇങ്ങനെ പ്രമുഖ നടനായ മതി മാകണോഗ്ലിയുമായുള്ള ഒരു അഭിമുഖ വേളയിലാണ് ചിത്രം ആരംഭിക്കുന്നത്. പുള്ളിയുടെ അഭിനയത്തേയും സിനിമകളെയും എല്ലാം നന്നായി തന്നെ സാക്ക് ട്രോളി മുന്നോട്ട് പോകവേ ആണ് ആ മുറിയിൽ ഒരു പ്രത്യേക സംഭവം അരങ്ങേറുന്നത്.

🔸മുറിയിലേക്കുള്ള പൈപ്പിന്റെ ലീക് കാരണം അവിടേക്ക് വെള്ളം വന്ന് നിറയുകയാണ്, രക്ഷപ്പെടാൻ എല്ലാവരും തങ്ങളാൽ കഴിയുന്ന ശ്രമങ്ങൾ നടത്തുന്നുണ്ട് എങ്കിലും മഗ്കാണോഗ്ലിയുടെ കാര്യത്തിൽ സാക്കിന് വലിയ സഹായം ഒന്നും ചെയ്യാനായില്ല. അവസാനമായി ഗഡി കാണുന്നത് മുങ്ങി താഴുന്ന മാത്യുവിനെയാണ്. ഈ സംഭവം സാക്കിന് ക്ഷീണം ആവുന്നതും അതിനെ തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ പ്രമേയം. മുൻപ് സൂചിപ്പിച്ചത് പോലെ തന്നെ ലോജിക്ക് പോലെയുള്ള കാര്യങ്ങളിൽ വലിയ ശ്രദ്ധ കൊടുക്കേണ്ടതില്ല, ഇനി കൊടുത്താലും വലിയ കാര്യമില്ല.

🔸ചില സമ്മർദ്ദങ്ങൾ കാരണം അടുത്ത രണ്ടാഴ്ചയ്ക്കിടെ പത്ത് സെലിബ്രിറ്റികളുമായി അഭിമുഖം നടത്താനായി സാക്കും ടീമും ഇറങ്ങി പുറപ്പെടുന്നതും, അതിനെ തുടർന്നുള്ള രസകരമായ കാര്യങ്ങളും കണ്ട് മുട്ടുന്ന നടീ നടന്മാരും എല്ലാമായി നല്ല കോമിക്കലായി പടം മുന്നോട്ട് പോവുന്നുണ്ട്. ഒന്നര മണിക്കൂറിൽ താഴെയേ ദൈർഖ്യമുള്ളൂ, കാണുന്നത് കൊണ്ട് വലിയ നഷ്ടം ഒന്നും തന്നെയില്ല എന്ന് മാത്രമല്ല നല്ല ചിരിക്കും വകുപ്പുണ്ട്, വ്യക്തിപരമായി അത് തന്നെ വലിയൊരു കാര്യമാണ്. അത്കൊണ്ട് കാണാൻ താല്പര്യപ്പെടുന്നെങ്കിൽ ഒന്ന് നോക്കാം, നെറ്റ്ഫ്ലിക്സിൽ ചിത്രം ഇന്ന് എത്തീട്ടുണ്ട്.

Verdict : Good

DC Rating : 70/100

608. Last Black Man In San Fransisco (2019)

Director : Joe Talbot

Genre : Drama

Rating : 7.5/10

Country : USA

Duration : 120 Minutes

🔸ഈ ബ്ലാക്ക് സെന്റിമെൻസ് ആധാരമായി വരുന്ന ചിത്രങ്ങളോട് പൊതുവെ വലിയ താല്പര്യം തോന്നിയിട്ടില്ല, ഇൻ ദി ഹീറ്റ് ഓഫ് ദി നൈറ്റ് പോലെയുള്ള പഴയകാല സിനിമകൾ ഇഷ്ടമാണെങ്കിൽ കൂടിയും ഈ അടുത്ത കാലത്ത് പുറത്തിറങ്ങിയ ഈ വിഭാഗത്തിൽ വന്ന പല ചിത്രങ്ങളും കുളിപ്പിച്ച് കുളിപ്പിച്ച് കുട്ടിയെ ഇല്ലാതാക്കുന്ന രീതി പിന്തുടരുന്നത് പോലെ തോന്നിയിരുന്നു പലപ്പോഴും. പ്രസ്തുത വിഭാഗക്കാർ അനുഭവിക്കേണ്ടി വന്ന പ്രശ്നങ്ങളെ താഴ്ത്തി കെട്ടുകയോ അവഹേളിക്കുകയോ ഒന്നുമല്ല, ഒരുപക്ഷെ ആ അന്തരീക്ഷം അപരിചിതം ആയത് കൊണ്ടുമാവാം. എന്തായാലും ഈ കാരണങ്ങൾ കൊണ്ട് തന്നെ ദി ലാസ്റ്റ് ബ്ലാക്ക് മാൻ ഇൻ സാൻ ഫ്രാൻസിസ്‌കോ എന്ന ചിത്രവും ആദ്യം വലിയ താല്പര്യം ഒന്നും ജനിപ്പിച്ചില്ല, എന്നാൽ ചിത്രത്തിന് ലഭിച്ച മികച്ച പ്രതികരണങ്ങളും മറ്റും കാണാനുള്ള കാരണങ്ങളായി മാറി.

🔸ജിമ്മി ഫെയിൽസ്, മോണ്ട് അലൻ, രണ്ട് സുഹൃത്തുക്കളാണ്, ഇവരാണ് നമ്മുടെ കേന്ദ്ര കഥാപാത്രങ്ങൾ. ജിമ്മി തന്റെ മുത്തച്ഛനും മോണ്ടിനോടും ഒപ്പമാണ് താമസിക്കുന്നത്. പ്രത്യേകിച്ച് പണിയൊന്നും ഇല്ലാത്ത രണ്ട് പേരും തങ്ങളുടെ സമയം ചിലവഴിക്കുന്നത് ഒരു കാര്യവും ഇല്ലാതെ നഗരത്തിലൂടെ റോന്ത് ചുറ്റിയാണ്. ഇങ്ങനെ ഉള്ള ദിവസങ്ങളിൽ ഒന്നിലാണ് ചിത്രം കഥ പറഞ്ഞ് തുടങ്ങുന്നത്, രണ്ട് കഥാപാത്രങ്ങളും ബസ് കാത്ത് നിൽക്കുന്നതിനിടെ തങ്ങളുടെ കഥ പറഞ്ഞ് തുടങ്ങുകയാണ്. ഈ സംഭാഷണങ്ങളിൽ തങ്ങളുടെ ചുറ്റുപാടുകൾ, തങ്ങൾ ജനിച്ച് വന്ന നഗരം, തങ്ങൾ നേരിട്ട അനുഭവങ്ങൾ, ഈ സംസ്കാരം എന്നിവ എല്ലാം വിഷയമായി വരാറുണ്ട്.

🔸ജിമ്മിയുടെയും മോണ്ടിന്റെയും റോന്ത് ചുറ്റലുകളിൽ ഒഴിച്ച് കൂടാനാവാത്ത ഒരു സ്ഥലമുണ്ട്, നഗരത്തിന്റെ ഒത്ത നടുക്ക് പഴയ കാല ശൈലി വിളിച്ചോതുന്ന, വിക്ടോറിയൻ സംസ്കാരത്തിന്റെ ബാക്കി പത്രമായ ഒരു പഴയ വീട്. ഈ വീടിനോട് ഒരു തരം ഒബ്‌സഷൻ ആണ് ജിമ്മിക്ക്, അതിന് ഒരു കാരണവും അവൻ പറയുന്നുണ്ട്. ജിമ്മിയുടെ മുത്തച്ഛൻ നാല്പതുകളിൽ പണിത ഒന്നാണ് ഈ വീട്, നഗരത്തിലെ ആദ്യ വലിയ സൃഷ്ടികളിൽ ഒന്ന്. ഈ ഒരു കഥയാണ് വീടിനോടുള്ള അടുപ്പത്തിന്റെ കാരണമായി നമ്മുടെ ജിമ്മി മോണ്ടിനോട് പറയുന്നത്. തന്റെ മുത്തച്ഛന്റെ കഴിവിനോടുള്ള താല്പര്യമാവാം, ഇല്ലെങ്കിൽ ഈ നഗരത്തിന്റെ ഉയർച്ചയിൽ അദ്ദേഹം വഹിച്ച പങ്കിന്റെ ഓർമ്മപ്പെടുത്തലും ആവാം.

🔸പ്രസ്തുത വീട്ടിൽ ഇപ്പോൾ താമസമാക്കിയ വൃദ്ധ ദമ്പതിമാർ വീട് നേരാം വണ്ണം നോക്കുന്നില്ല എന്നൊരു പരാതി ഉണ്ട് ജിമ്മിക്ക്, അത് അവൻ നാഴികയ്ക്ക് നാല്പത് വട്ടം എന്ന തോതിൽ മോണ്ടിനോട് പറയുന്നുമുണ്ട്. ഈ പരാതി പറച്ചിൽ അല്ലാതെ ഈ വിഷയത്തിൽ ജിമ്മിക്ക് വലിയ റോൾ ഒന്നുമില്ല, കാരണം നിയമ പരമായി ആ വീട്ടിൽ അവന് യാതൊരു അവകാശമോ അധികാരമോ ഇല്ല, കടന്ന് കയറിയാൽ തന്നെ അത് കുറ്റകരവും ആണ്. അപ്പൊ മിക്കപ്പോഴും അവിടെ ചെല്ലും, ദൂരെ നിന്ന് നോക്കും, പരാതി പറയും, മടങ്ങി പോരും, ഇതാണ് പാറ്റേൺ, കുറച്ച് കാലമായി ഇത് ഇങ്ങനെ തന്നെയാണ് തുടർന്ന് പോവുന്നതും.

🔸മുകളിലെ കഥയുടെ ചെറിയ ഭാഗത്ത് നിന്ന് തന്നെ മനസിലാക്കാം ഇതൊരു ഡ്രാമ ചിത്രമാണ്, അതും അത്യാവശ്യം നല്ല സ്ലോയിൽ തന്നെ പോകുന്ന ഒരു ഡ്രാമ ചിത്രം. നല്ല അഭിനയവും, അത്യാവശ്യം ടച്ചിങ് ആയൊരു ക്ലൈമാക്‌സും ചിത്രത്തിന്റെ പ്രത്യേകതകൾ തന്നെയാണ്. ആദ്യ ഭാഗത്ത് സൂചിപ്പിച്ച വിഷയം കൊണ്ടോ എന്തോ ഒരു നിരാശയാണ് ലാസ്റ്റ് ബ്ലാക്ക് മാൻ ഇൻ സാൻ ഫ്രാൻസിസ്‌കോ എന്ന ചിത്രം കണ്ട് കഴിയുമ്പോൾ അനുഭവപ്പെട്ടത്, പേരിനും ഖ്യാതിക്കും ഉള്ള ഉയരത്തിലേക്ക് എത്താതെ പോയ പോലെ ഒരു തോന്നൽ, അപ്പോഴും ഇതൊരു മോശം ചിത്രമാവുന്നില്ല, നല്ല ചിത്രം തന്നെ.

Verdict : Good

DC Rating : 70/100

607. Child's Play (2019)

Director : Lars Clevberg

Genre : Slasher

Rating : 6.2/10

Country : USA

Duration : 90 Minutes

🔸ചക്കി എന്ന മോൺസ്റ്റർ ടോയിയെ കേന്ദ്ര കഥാപാത്രമാക്കി അനവധി ചിത്രങ്ങൾ പുറത്തിറങ്ങിയിട്ടുണ്ട്, ഇവയിൽ ഏറ്റവും പുതിയതാണ് ഈ വർഷം പുറത്തിറങ്ങിയ ചൈൽഡ്‌സ് പ്ലെയ്‌ എന്ന പ്രസ്തുത ചിത്രം. ഒരു രണ്ട് മാസം മുന്നേ അടുത്തുള്ള തിയേറ്ററുകളിൽ റിലീസായ ചിത്രം അന്ന് ഒഴിവാക്കിയത് പ്രധാനമായും സെൻസർ ബോർഡ് കത്തി വെച്ചു എന്ന കേട്ടറിവ് കൊണ്ടാണ്, ഒരു സ്ലേഷർ ചിത്രത്തിലെ ഗോർ രംഗങ്ങൾക്ക് കത്രിക വെക്കുന്നതിലും വലിയൊരു തറപണി വേറെ ഉണ്ടാവില്ല എന്നത് പരസ്യമായ രഹസ്യമാണ്.

🔸ചിത്രത്തിൽ ആദ്യം താല്പര്യം തോന്നിയത് റിലീസിനോട് അനുബന്ധിച്ച് പുറത്തിറങ്ങിയ ടോയ് സ്റ്റോറി പോസ്റ്ററുകൾ കണ്ടപ്പോഴാണ്. ടോയ് സ്റ്റോറി കഥാപാത്രങ്ങളായ വുഡിയെയും ബസ്സിനെയും എല്ലാം മൃഗീയമായി കൊല്ലുന്ന ചക്കി പോസ്റ്ററുകൾ സത്യത്തിൽ അത്യാവശ്യം അറ്റൻഷൻ പിടിച്ചെടുക്കുന്നത് തന്നെ ആയിരുന്നു. പോസ്റ്ററിൽത്തന്നെ കാണാൻ ഇടയായ വയലൻസും ചിത്രം കാണാൻ കാത്തിരിക്കുന്നതിനുള്ള മറ്റൊരു കാരണം ആയിരുന്നു. മുൻപ് അനേകം ചക്കി ചിത്രങ്ങൾ പിറത്തിറങ്ങിയിട്ടുണ്ട് എങ്കിലും ആദ്യമായി കാണുന്നത് ഈ ചിത്രം തന്നെ.

🔸കുട്ടികളുടെ ആവശ്യങ്ങൾ നിറവേറ്റാൻ കഴിയുന്ന, സന്തത സഹചാരിയായ ഒരു ടോയ് ആണ് ബഡി. ബഡി ടോയികൾക്ക് ഇന്ന് ലോകത്തെങ്ങും വൻ പ്രചാരമാണ്. ഇങ്ങനെ സൃഷ്ടിക്കപ്പെടുന്ന ബഡികളിൽ ഒന്നിൽ സെക്യുറിറ്റി പ്രശ്നങ്ങൾ ഉടലെടുക്കുന്നതും, അതിനെ തുടർന്ന് അരങ്ങേറുന്ന സംഭവങ്ങളും മറ്റുമാണ് ഈ ചിത്രത്തിന്റെ പ്രമേയം. ആൻഡി എന്ന കുട്ടിയുടെ പക്കൽ എത്തുന്ന ചക്കിക്ക് അവനോട് അമിതമായ അടുപ്പവും അതിനെ തുടർന്ന് പൊസസീവ്‌നെസ്സും ഉടലെടുക്കുന്നിടത്ത് കഥാഗതി മാറുന്നു. കഥാഗതി ഒരല്പം സില്ലി ആയി തോന്നാമെങ്കിലും ഒരു സ്ലേഷർ ചിത്രത്തിൽ അതിന് വലിയ പ്രാധാന്യമില്ല എന്ന ന്യായം പറഞ്ഞ് കാര്യം ഒഴിവാക്കാം.

🔸ചില ഹൊറർ സിനിമാ ക്ലിഷേകൾ ഉണ്ട്, പ്രത്യേകിച്ചും അടുത്ത ഭാഗത്തേക്കുള്ള സാദ്ധ്യതകൾ തുറന്നിടുന്നത്, അതിനെ തമാശ രൂപേണ പലരും കളിയാക്കിയിട്ടുമുണ്ട്. ഉദാഹരണത്തിന് ഇല്ലായ്മ ചെയ്ത പ്രേതത്തിന്റെ കണ്ണ് ചിത്രം അവസാനിക്കുന്നതിന് തൊട്ട് മുൻപ് വീണ്ടും തുറക്കപ്പെടുന്നത് പോലുള്ള കൾട്ട് ക്ലിഷേ ഐറ്റങ്ങൾ, അത് പോലൊന്ന് ഇവിടെയും ഉണ്ടെന്ന് പറയാം. പിന്നെ മുകളിൽ സൂചിപ്പിച്ച സില്ലി ആയ കഥ, അതും പോരെങ്കിൽ ഒരുപാട് ആവശ്യത്തിനും അനാവശ്യത്തിനും ഉള്ള ജംബ് സ്‌കെയറുകൾ ചിത്രത്തിലുണ്ട്, ഇതിൽ പലതും അങ്ങട്ട് ഫലിച്ചിട്ടുമില്ല. ഇതൊക്കെയാണ് പ്രത്യക്ഷത്തിൽ ചിത്രത്തിലെ നെഗറ്റീവുകൾ.

🔸ഇനി നല്ല കാര്യങ്ങളിലേക്ക് കടക്കുക ആണെങ്കിൽ സിംപിൾ ആയൊരു സ്ലേഷർ സ്റ്റോറിയിൽ നിന്നും നമ്മൾ പ്രതീക്ഷിക്കുന്ന ഗോർ എല്ലാം ചിത്രം കരുതി വെച്ചിട്ടുണ്ട്, പ്രത്യേകിച്ചും അവസാനത്തെ മുപ്പത് മിനിറ്റ്. മാർക്ക് ഹാമിലിന്റെ പെർഫോയും കിടിലൻ തന്നെ ആയിരുന്നു, ഇതോടൊപ്പം നല്ല ക്രീപി ആയ സ്കോറും,ഛായാഗ്രഹണവും ചേരുമ്പോൾ സിനിമ മോശമില്ലാത്ത ഒരനുഭവമായി മാറുന്നുണ്ട്. വയലെന്റ് ആയ സ്ലേഷർ ചിത്രങ്ങളോട് താല്പര്യം ഉള്ളവർക്ക് പരീക്ഷിച്ച് നോക്കാം ഈ ചിത്രം.

Verdict : Watchable

DC Rating : 60/10

606. It Chapter 2 (2019)

Director : Andres Muschieti

Genre : Horror

Rating : 7.1/10

Country : USA

Duration : 169 Minutes

🔸ഇറ്റ് എന്ന സ്റ്റീഫൻ കിങ്ങിന്റെ നോവലിന്റെ ചലച്ചിത്രാവിഷ്‌കരണം നോവലിനോട് നീതി പുലർത്തുക എന്നത് ഒരല്പം ദുഷ്കരം തന്നെയാണ്, കാരണം വേറൊന്നുമല്ല മ്യുറ്റിലേഷൻ അല്ലെങ്കിൽ കുഞ്ഞുങ്ങളെ ഒക്കെ പച്ചയ്ക്ക് ഭക്ഷിക്കുന്ന ഒരു മോൺസ്റ്ററിനെ സ്‌ക്രീനിൽ എത്തിക്കുക എന്നത് ഇന്നത്തെ ചുറ്റുപാടിൽ, അല്ലെങ്കിൽ നിയമത്തിന്റെ ചട്ടക്കൂടിൽ നിന്ന് കൊണ്ട് ചെയ്യുക എന്നത് പണി തന്നെയാണ്, ആ ഭാഗത്തിൽ ചിത്രം ഒരു നിരാശ ആയിരിക്കുമെന്നത് എന്നോ മനസ്സിൽ തീരുമാനിച്ചുറപ്പിച്ച കാര്യവുമാണ്. എന്നാൽ സിനിമയുടെ ആദ്യ ഭാഗം അങ്ങേയറ്റം തൃപ്തി തന്ന ഒരു വേർഷൻ ആയിരുന്നു, ഈ കാരണം കൊണ്ട് തന്നെ ഇറ്റ് ചാപ്റ്റർ റ്റുവിന് വേണ്ടി ആദ്യ ഭാഗത്തിന്റെ ടൈറ്റിൽ കാർഡ് കാണിച്ചപ്പോൾ തൊട്ടുള്ള കാത്തിരിപ്പ് ആയിരുന്നു, ഇപ്പോഴാണ് അവസരം ലഭിച്ചതെന്ന് മാത്രം.

🔸ആദ്യ ഭാഗത്ത് പെന്നിവൈസിനെ കീഴടക്കിയ ശേഷം ഇനി എന്നെങ്കിലും അത് മടങ്ങി വരികയാണെങ്കിൽ എന്നെന്നേക്കുമായി അതിനൊരു അറുതി വരുത്താനായി തങ്ങളും മടങ്ങി വരും എന്ന് ലൂസേഴ്‌സ് പരസ്പരം ധാരണയിലെത്തുന്ന ഒരു രംഗം ഉണ്ടല്ലോ, ആ രംഗം കാണിച്ച് കൊണ്ടാണ് രണ്ടാം ഭാഗം ആരംഭിക്കുന്നത്. ഈ സംഭവത്തിന് കൃത്യം ഇരുപത്തി ഏഴ് വർഷങ്ങൾക്ക് ശേഷം പെന്നിവൈസ് ഒരു തവണ കൂടി മടങ്ങി വരികയാണ്, അതിന് പിറകെ മുതിർന്നവരായി മാറിയ ലൂസേഴ്‌സും ഡെറിയിലേക്ക് മടങ്ങി വരുന്നു. തുടർന്ന് ഈ കഥാപാത്രങ്ങളുടെയെല്ലാം ജീവിതത്തിൽ അരങ്ങേറുന്ന സംഭവങ്ങളാണ് മൂന്ന് മണിക്കൂറിന് അടുത്ത് ദൈർഖ്യമുള്ള ചിത്രം. ആദ്യ ഭാഗം പെന്നിവൈസിന്റെ ഷോ ആയിരുന്നെങ്കിൽ ഈ ഭാഗം ലൂസേഴ്‌സിലാണ് കുറച്ച് കൂടി ഫോക്കസ് ചെയ്യുന്നത് എന്ന് തോന്നി, പെന്നിവൈസിന്റെ കുറഞ്ഞ സ്ക്രീൻ ടൈം നിരാശ തന്നെ ആയിരുന്നു തന്നത്.

🔸ഇനി നമ്മക്ക് കാര്യങ്ങളിലേക്ക് കടക്കാം, ആദ്യമേ തന്നെ മുൻ ഭാഗത്ത് നിന്നും ഒരു സ്റ്റെപ്പ് ഡൗൺ ആണ് ചാപ്റ്റർ ടു. ഇത് പ്രധാനമായും ഒരു കാരണം കൊണ്ട് എന്നല്ല, ഒരുപാട് കാരണങ്ങൾ കൊണ്ടാണ്, ആദ്യമേ തന്നെ ചിത്രത്തിൽ പേടിപ്പെടുത്താൻ ആയി കാര്യമായിട്ട് ഒന്നും തന്നെ ഇല്ല. ഇത് ഹൊറർ ചിത്രം കണ്ട് കഴിഞ്ഞ ഒരാളുടെ സ്ഥിരം ക്ലിഷേ സെല്ഫ് മാസ്സ് ആയി തോന്നാമെങ്കിലും അതാണ് സത്യം. മുൻ ഭാഗത്ത് ബില്ലിന്റെ അനിയനെ ആദ്യമേ തന്നെ തട്ടിക്കളഞ്ഞ് പെന്നിവൈസ് താൻ ആരാണെന്നും എന്താണെന്നും ഒരു മുന്നറിയിപ്പ് തരുന്നുണ്ടെങ്കിൽ ഇവിടെ അങ്ങനെ ചൂണ്ടിക്കാണിക്കാൻ അധികം ഒന്നും ഇല്ല, ഒട്ടും ഇല്ലെന്നല്ല. പിന്നെ മൂന്ന് മണിക്കൂറിന് അടുത്തുള്ള ചിത്രത്തിന്റെ ദൈർഖ്യം, ആദ്യ ഭാഗം നല്ല വെടിപ്പായി അച്ചടക്കം ഉള്ളൊരു കട്ട് ആണെങ്കിൽ ഇവിടെ നേരെ മറിച്ചാണ്, ഒന്ന് രണ്ട് തവണ എങ്കിലും ചിത്രം നമ്മളെക്കൊണ്ട് വാച്ചിൽ സമയം നോക്കിപ്പിക്കും എന്നത് ഉറപ്പ്.

🔸എന്നാൽ ഏറ്റവും പ്രധാന പ്രശനം പെന്നിവൈസ് തന്നെയാണ്, മുൻ ഭാഗത്തെ കഥാപാത്രവുമായി തട്ടിച്ച് നോക്കുമ്പോൾ പുതിയ ചിത്രത്തിലെ പെന്നിവൈസ് മറ്റേതോ ഒരു വേർഷനായി അനുഭവപ്പെട്ടു. കുറഞ്ഞ സ്ക്രീൻ ടൈമും ഈ പ്രശനം പരിഹരിക്കാൻ ഒട്ടും സഹായിച്ചിട്ടില്ല. ഇനി നന്നായി തോന്നിയ കാര്യങ്ങളിലേക്കാണെങ്കിൽ, കാസ്റ്റ് എല്ലാവരും തങ്ങളുടെ ജോലി നല്ല കിടിലൻ ആയിട്ട് തന്നെ ചെയ്തിട്ടുണ്ട്, മോശമെന്ന് പറയാൻ ഒരാൾ പോലുമില്ല. പെന്നിവൈസ് എന്ന കഥാപാത്രത്തോട് നീതി പുലർത്തിയോ എന്ന കാര്യം ഉറപ്പില്ലെങ്കിലും ആ കഥാപാത്രം തിരിച്ച് വന്നു എന്നറിയുമ്പോൾ ചിത്രം നൽകുന്നൊരു ഫീൽ ഉണ്ട്, കഥാപാത്രങ്ങളിൽ കാണുന്ന മാറ്റങ്ങൾ, നിറഞ്ഞ് നിൽക്കുന്ന ഭയം, ചില ചെയ്തികൾ, അങ്ങനെ ഈ ബിൽഡപ്പ് ഉഷാർ ആയിരുന്നു എന്ന് ഉറപ്പിച്ച് പറയാം.

🔸ഇതോടൊപ്പം നല്ല രീതിയിൽ തന്നെ ഒരവസാനം ഈ ചിത്രം ഉൾപ്പെട്ടിരിക്കുന്ന കഥാപാത്രങ്ങൾക്കെല്ലാം നൽകിയിട്ടുണ്ട് എന്നത് വലിയ കാര്യം തന്നെയാണ്. ഈ ക്ലൈമാക്സ് ഒരു പരിധി വരെ ചിത്രം കണ്ട് കഴിയുമ്പോൾ അനുഭവപ്പെട്ട പോരായ്മകളെ എല്ലാം മറയ്ക്കുന്നുണ്ട്, ഒരു ചെറിയ സംപ്തൃപ്തി നൽകുന്നുമുണ്ട്. ഇങ്ങനെ ആകെ മൊത്തം പറയുക ആണെങ്കിൽ വലിയ കുഴപ്പമില്ലാത്ത ഒരു ചിത്രം, ഒരു തവണ കാണാനുള്ളത് ഉണ്ട്. എന്നാൽ ഇറ്റ് എന്ന ചിത്രത്തെ കുറിച്ച് ഭാവിയിൽ ഒരു സംസാരം ഉണ്ടാവുക ആണെങ്കിൽ രണ്ട് ഭാഗവും കണ്ടൊരാൾ വാചാലൻ ആവാൻ പോവുന്നത് ഒന്നാം ഭാഗത്തെ കുറിച്ചായിരിക്കും എന്ന് മാത്രം.

Verdict : Watchable

DC Rating : 65/100

605. The Third Wife (2018)

Director : Ash Mayfair

Genre : Drama

Rating : 6.9/10

Country : Vietnam

Duration : 92 Minutes

🔸നൂറ്റാണ്ടുകൾക്ക് മുൻപ്, ഏഷ്യൻ പശ്ചാത്തലത്തിൽ ഒന്നിലധികം ഭാര്യമാരുള്ള ഭൂ പ്രഭുക്കന്മാരുടെയും, ആ വീടുകളിൽ ഒരുമിച്ച് കഴിയുന്ന ഭാര്യമാരുടെയും കഥകൾ പ്രമേയമാക്കി അനവധി ചിത്രങ്ങൾ മുൻപ് വന്നിട്ടുണ്ട്. റെയിസ് ദി റെഡ് ലാന്റേൺ പോലെയുള്ള ഈ വിഭാഗം ചിത്രങ്ങളുടെ കൂടെ ഉൾപ്പെടുത്താവുന്ന ഒന്നാണ് ദി തേർഡ് വൈഫ് എന്ന ഈ വിയെറ്റ്നാമീസ് ചിത്രവും. ചിത്രത്തിന്റെ ട്രെയിലർ തൊട്ട് തന്നെ റെഡ് ലാന്റണുമായി സാദൃശ്യം അനുഭവപ്പെട്ടിരുന്നെങ്കിലും രണ്ടും കണ്ട് കഴിഞ്ഞ അനുഭവത്തിൽ താരമത്യം ആവശ്യപ്പെടാത്ത വ്യത്യസ്ത സൃഷ്ടികൾ ആണെന്ന് പറയേണ്ടി വരും.

🔸പതിനാല് വയസുകാരി ആയ മെയ് ആണ് നമ്മുടെ പ്രധാന കഥാപാത്രം. പ്രായം സൂചിപ്പിക്കുന്നത് പോലെ തന്നെ കുട്ടിത്തം മെയിയെ വിട്ട് മാറുന്നതെ ഉള്ളൂ, പക്വത ആർജിക്കുന്നെ ഉള്ളൂ. അത് എന്ത് തന്നെ ആയാലും ആദ്യത്തെ സീനിൽ മെയിയെ നമ്മൾ കാണുമ്പോൾ അവൾ ഒരു ഭാര്യയാണ്. ഹുങ് എന്ന ഭൂ പ്രഭുവിന്റെ മൂന്നാമത്തെ ഭാര്യയായി അവൾ ആ വീട്ടിലേക്ക് പുറപ്പെടുകയാണ്. പ്രായത്തിന്റേതായ ആകുലതകളും സംശയങ്ങളും എല്ലാം ഉണ്ടായിരുന്നെങ്കിലും താമസിയാതെ തന്നെ അവളൊരു കുടുംബിനിയുടെ ചുമതലകൾ ഏറ്റെടുക്കുകയാണ്.

🔸ഹുങ്ങും അയാളുടെ രണ്ട് ഭാര്യമാരും, അവരുടെ മക്കളും വയസായ ഹുങ്ങിന്റെ അച്ഛനും പിന്നെ എണ്ണിയാൽ തീരാത്ത അത്രയും പുറം ജോലിക്കാരും സഹായികളും എല്ലാം നിറഞ്ഞതാണ് ആ വീട്. തനിക്ക് മുൻപുള്ള ഭാര്യമാരുടെ മക്കളുടെ കാര്യങ്ങൾ നോക്കുക, അമ്മായി അച്ഛനെ പരിചരിക്കുക, വീട്ടുജോലികളിൽ ചെറിയ സഹായങ്ങൾ ചെയ്ത് കൊടുക്കുക തുടങ്ങിയവയാണ് അവളുടെ ദൈനംദിന പരിപാടികൾ. ഇങ്ങനെ വലിയ സംഭവ വികാസങ്ങൾ ഒന്നും ഇല്ലാതെ പോയികൊണ്ടിരിക്കുന്ന മെയിയുടെ ജീവിതത്തിൽ ഒരുനാൾ കാണരുതാത്ത ഒരു കാഴ്ച അവൾ കാണുന്നതും തുടർന്ന് അരങ്ങേറുന്ന സംഭവങ്ങളുമാണ് ചിത്രത്തിന്റെ കഥ.

🔸യാഥാസ്ഥിക രീതികളും ആചാരങ്ങളും എല്ലാം പാലിക്കുന്ന, പെൺകുട്ടിക്ക് മേൽ കുടുംബത്തിൽ ആൺകുട്ടി ജനിക്കുന്നത് അഭിമാനമായി കാണുന്ന പഴയ യാഥാസ്ഥിക കുടുംബ പശ്ചാത്തലമാണ് ചിത്രത്തിൽ കാണിച്ചിരിക്കുന്നത്. ഹുങ് എന്ന ഭർത്താവിനെ പ്രീതിപ്പെടുത്താനും, കുടുംബത്തിൽ തന്റെ സ്ഥാനം ഉറപ്പിക്കാനായി ആൺകുഞ്ഞിന് ജന്മം നൽകാൻ മെയ് പ്രേരിപ്പിക്കപ്പെടുന്നതും എല്ലാം ഈ വസ്തുതയുടെ ഉദാഹരണങ്ങളാണ്. എന്നാൽ ഈ കുടുംബത്തിന്റെ ഉള്ളറകളിൽ ഒളിഞ്ഞിരിക്കുന്ന ചീഞ്ഞളിഞ്ഞ ചില രഹസ്യങ്ങളും മറ്റും കഥയെ മറ്റൊരു വഴിയിലേക്ക് കൊണ്ടുപോവുന്നു.

🔸ഒരു ടിപ്പിക്കൽ ഡ്രാമ ചിത്രമാണ് ദി തേർഡ് വൈഫ്, അത്യാവശ്യം നല്ല സ്ലോ ആയാണ് കഥ പുരോഗമിക്കുന്നത്, പറഞ്ഞത് എന്തിനാനെന്നാൽ ലാഗ് പോലെയുള്ള കാര്യങ്ങൾ ഒരു പ്രശ്നമായി തോന്നുന്നവർ ഈ ഭാഗത്തേക്ക് പോവേണ്ടതില്ല എന്നത് കൊണ്ട് തന്നെ. പതിനാല് വയസുകാരി നായികാ കഥാപാത്രത്തെ അവതരിപ്പിച്ച നടി മികച്ച പ്രകടനം തന്നെയാണ് കാഴ്ച വെച്ചത്. സെന്റ് ഓഫ് ദി ഗ്രീൻ പപ്പായ എന്ന ചിത്രത്തിലെ നായികാ കഥാപാത്രത്തെയും നല്ലൊരു വേഷത്തിൽ കാണാനിടയായി. താല്പര്യം ഉണ്ടെങ്കിൽ കാണാൻ ശ്രമിക്കുക, പ്രത്യേകിച്ചും ഡ്രാമ വിഭാഗം ഇഷ്ടപ്പെടുന്നവർ.

Verdict : Good

DC Rating : 72/100

604. Oru Vadakkan Veeragatha (1989)

Director : Hariharan

Genre : Drama

Rating : 8.7/10

Country : India

Duration : 169 Minutes

🔸ഈ ചരിത്രം എന്നും പുരാണം എന്നും ഒക്കെ പേരിട്ട് വിളിക്കുന്ന കാര്യങ്ങൾക്ക് ഒരു ചെറിയ പ്രശനം ഉണ്ട്, കാര്യം വേറൊന്നുമല്ല പല പല അഡ്ജസ്റ്റ്മെന്റുകൾക്കും ബാധകമായി യാഥാർഥ്യത്തിൽ നിന്നും അത്യാവശ്യം അകന്ന് നിൽക്കുന്ന ഒരു വേർഷൻ ആണ് ഈ പേരിൽ മിക്കപ്പോഴും അടിച്ചിറക്കപ്പെടുന്നത്. ഒരു കഥ ഓരോ തവണ പറയുമ്പോഴും അതിൽ ഒരല്പം അംശം കുറഞ്ഞിരിക്കും എന്നത് സത്യമാണ്, ചിലപ്പോൾ ഇത് കൂടുകയും ചെയ്യും, അങ്ങനെയാണ് ഗ്ലോറിഫിക്കേഷൻ എന്ന വസ്തുത ഉടലെടുക്കുന്നത്. ഈ ഗ്ലോറിഫിക്കേഷൻ എന്നത് അപകടകരമായ ഒരു കാര്യമാണ്, ഇത് കാരണം കളവും കൊള്ളയും നടത്തപ്പെട്ടവർ ആദരിക്കപ്പെട്ടേക്കാം, ന്യായത്തിനും ധർമ്മത്തിനും നിലകൊണ്ടവർ തഴയപ്പെട്ടേക്കാം. അപ്പൊ പറഞ്ഞ് വന്നത് എന്താണെന്നാൽ ഈ കഥകൾ നമുക്ക് ഏത് വിധേനയും വ്യാഖ്യാനിക്കാം, നായകൻ വില്ലനാവാം അല്ലെങ്കിൽ നേരെ മറിച്ചും, അതെല്ലാം സാധ്യമാണ്, ഈ ഒരു ഐഡിയ തന്നെയാണ് ഒരു വടക്കൻ വീരഗാഥ എന്ന ചിത്രത്തിന്റെ ആത്മാവും.

🔸മലയാള സിനിമ വലിയ പരിചയം ഇല്ലാത്തൊരു വ്യക്തി നീ കണ്ട ഏറ്റവും മികച്ച മലയാള ചിത്രമേത് എന്ന് എന്നോട് ചോദിക്കുക ആണെങ്കിൽ ആദ്യം പറയാൻ പോവുന്ന മൂന്ന് അല്ലെങ്കിൽ നാല് പേരുകളിൽ ഒന്ന് തീർച്ചയായും ഒരു വടക്കൻ വീരഗാഥ ആയിരിക്കും, ആ കാര്യത്തിൽ ഒരു സംശയത്തിനും സ്ഥാനമില്ല. ഇന്ന് ഈ മുപ്പത് വർഷങ്ങൾക്ക് ശേഷം തിരിഞ്ഞ് നോക്കുമ്പോൾ വടക്കൻ വീരഗാഥ ഒരത്ഭുതമാണ്, അത് കൈകാര്യം ചെയ്ത വിഷയം കൊണ്ടും അതിനോടൊപ്പം എത്തിയ പ്രതിഭാ ധാരാളിത്തം കൊണ്ടും. ഒരു പിരിയഡ് ഹിസ്റ്റോറിക്കൽ ചിത്രം എന്ന് കേൾക്കുമ്പോൾ നമ്മൾ കണ്ട് പരിചയിച്ച വാർ സീക്വൻസുകൾ ചിത്രത്തിൽ കാണാനില്ല, കഥാപാത്രങ്ങളുടെ ഓവർ ഡ്രാമടൈസ് ചെയ്ത സോപ് ഓപ്പറ നാടകങ്ങൾ കാണാനില്ല, ആകെ ഉള്ളത് സ്ട്രെയിറ്റ് ഫോർവേർഡായി പറഞ്ഞ് പോയ നല്ല ഒന്നാന്തരം ഒരു കഥയാണ്, ആ കഥയിൽ കാണിക്കാത്ത ഒരു വികാരം ഒട്ട് വേറെ ഇല്ലതാനും.

🔸പാണന്മാർ പാടി പഴകിയ ഒരു പഴയ വടക്കൻ പാട്ടിലെ കഥയാണ് ചിത്രത്തിന് ആധാരം. ആ കഥ ഇങ്ങനെയാണ്, കാഴ്ചയിലും ആകാരത്തിലും കഴിവിലും മികവിലും മുന്നിട്ട് നിന്ന ഒരു ആയോധന അഭ്യാസി, അല്ലെങ്കിൽ ചേകവൻ ആയിരുന്നു ആരോമൽ ചേകവർ. ആരോമൽ കരസ്ഥമാക്കാത്ത നേട്ടങ്ങൾ ഇല്ല, അയാൾ വിജയം രുചിക്കാത്ത തട്ടകങ്ങളോ നേടാത്ത സ്ഥാന മാനങ്ങളോ ഇല്ല, ഇങ്ങനെ ആ പേരും പ്രശസ്തിയും ഖ്യാതിയും നാടാകെ പരക്കുകയാണ്. ഈ കാര്യം ഒട്ടും രസിക്കാത്ത ഒരാളാണ് അടുത്ത സുഹൃത്തും ബന്ധുവുമായ ചന്തു. ആരോമലിന്റെ ഓരോ വിജയത്തിനും അയാൾ പ്രത്യക്ഷത്തിൽ പൊഴിച്ച പുഞ്ചിരിക്കുള്ളിൽ അസൂയയുടെ, പകയുടെ ഒരായിരം പുഴുക്കൾ ഉള്ളിൽ നുരയുക ആയിരുന്നു. ഒടുവിൽ ഒരവസരം ലഭിച്ചപ്പോൾ ഇരുചെവി അറിയാതെ അയാളത് വിനിയോഗിക്കുകയാണ്.

🔸മുകളിൽ പറഞ്ഞത് നമ്മൾ കേട്ടറിഞ്ഞ ചരിത്രം, സിനിമ പറയുന്നത് ഇതിന്റെ തികച്ചും വ്യത്യസ്തമായ മറ്റൊരു വേർഷൻ ആണ്. അസൂയാലുവായ, പിന്നിൽ നിന്ന് കുത്തിയ, ചതിയനായ ചന്തുവിനും പറയാനുണ്ടായിരുന്നു ഒരു കഥ. അവഗണനയുടെ, അപമാനത്തിന്റെ, ഒറ്റപ്പെടലിന്റെ, ജീവിതം മുഴുവൻ തഴയപ്പെട്ടവന്റെ കഥ, ഒടുവിൽ ഈ ചവിട്ടെല്ലാം ഏറ്റ് വാങ്ങി പാതാളത്തോളം താഴ്ന്നപ്പോഴും നിർത്താതെ അവസാന ആണിയും തന്റെമേൽ അടിച്ച് കയറ്റാൻ തുനിഞ്ഞപ്പോൾ അതുവരെയുള്ള സകല കാരണങ്ങളും ഒരു പൊട്ടിത്തെറിയിലേക്ക് വഴി വെച്ച കഥ. ആ അടിച്ചമർത്തലിന്റെ അഗ്നിയിൽ നിന്നും തച്ചോളി തറവാടിന്റെ ഒരു തലമുറ തന്നെ അടർത്തി മാറ്റപ്പെട്ട പകയുടെയും പ്രതികാരത്തിന്റെയും കഥ. ഈ കഥയാണ് എം ടിയുടെ തിരക്കഥയിൽ ഹരിഹരൻ അഭ്രപാളിയിൽ എത്തിച്ചത്. സ്‌ക്രീനിന്റെ പിന്നിലും മുന്നിലുമായി പ്രതിഭകളുടെ ഒരു കുത്തൊഴുക്ക് തന്നെ ആയിരുന്നു ഈ ചിത്രം.

🔸ചന്തു എന്ന കഥാപാത്രമായി മമ്മൂട്ടിയും, പ്രാധാന്യം ഉള്ള മറ്റ്‌ കഥാപാത്രങ്ങളായി സുരേഷ് ഗോപി, മാധവി, ഗീത, ക്യാപ്റ്റൻ രാജു, ബാലൻ കെ നായർ എന്നിവരും പ്രധാന കഥാപാത്രങ്ങളായി എത്തിയിരിക്കുന്നു. ഒരു സിനിമയ്ക്ക് ലഭിക്കാവുന്ന ഏറ്റവും മികച്ച സൗണ്ട് ട്രാക്കുകളിൽ ഒന്ന് കൂടി ഈ ചിത്രത്തിന് സ്വന്തമാണ്, ഇന്ദുലേഖ കൺ‌തുറന്നു പോലുള്ള ഗാനങ്ങൾ ഇന്നും ഒരത്ഭുതമായി നിലകൊള്ളുന്നു എന്ന് പറയേണ്ടി വരും. ഒരു വടക്കൻ വീരഗാഥ എന്ന ചിത്രം കാണാത്ത മലയാളികൾ അപൂർവമായിരിക്കും, കാണാത്തത് വൻ നഷ്ടമാണ് എന്ന് ഇതിനോടൊപ്പം ചേർത്ത് വായിക്കുക. പറഞ്ഞ് വന്നത് എന്താണെന്നാൽ മുപ്പത് വർഷം കഴിഞ്ഞ് ഇപ്പോഴും വടക്കൻ വീരഗാഥ ഒരു ദീപസ്തംഭം കണക്കെ നിൽപ്പുണ്ട്, ഇനിയൊരു മുപ്പത് വർഷം കഴിഞ്ഞാലും, ഏറ്റവും കുറഞ്ഞത് ചിത്രം അത് പോലെ തന്നെ നിൽപ്പുണ്ടാവും, അപൂർവ്വത്തിൽ അപൂർവം എന്നൊക്കെ വിശേഷിപ്പിക്കാൻ കഴിയുന്ന റെയർ പീസ് ആണ് ഈ ചിത്രം, തികച്ചും കാലങ്ങൾക്ക് അതീതം.

Verdict : Must Watch

DC Rating : 100/100

603. The Long Goodbye (1973)

Director : Robert Altman

Genre : Thriller

Rating : 7.6/10

Country : USA

Duration : 112 Minutes

🔸ചില സിനിമാ കഥാപാത്രങ്ങൾ ഉണ്ട്, നമുക്ക് അറിയാതെ അവരോട് സഹതാപം തോന്നിപോകും, കാരണം അവർ നേരിടേണ്ടി വരുന്ന പ്രശ്നങ്ങളും ആ പ്രശ്നങ്ങൾ അവരെ കൊണ്ടെത്തിക്കുന്ന അവസ്ഥകളും പലപ്പോഴും അവർ അർഹിക്കുന്നതിനേക്കാൾ അധികം ആവാറുണ്ട്. ഡിറ്റക്റ്റീവ് ഫിലിപ്പ് മാർലോ എന്ന ഈ ചിത്രത്തിലെ കേന്ദ്ര കഥാപാത്രവും അത് പോലൊരു വ്യക്തിത്വമാണ്. ആദ്യ കാഴ്ചയിൽ തോന്നിയത് ഇയാൾ ആള് വെടിപ്പല്ല എന്നൊരു സൂചന ആണെങ്കിൽ ക്ലൈമാക്സിലേക്ക് കടക്കുമ്പോൾ ഉണ്ടായ തോന്നൽ മുകളിൽ സൂചിപ്പിച്ചത് പോലെ സഹതാപം കലർന്ന ഒരു ദയനീയ ഭാവം തന്നെ ആയിരുന്നു.

🔸വളരെ പ്രശസ്തമായ ഒരു നോവലിനെ ആധാരമാക്കിയാണ് ചിത്രം തയാറാക്കിയത് എന്നറിയാൻ കഴിഞ്ഞു, വായനാശീലം ലവലേശം ഇല്ലാത്തത് കൊണ്ട് ആ ഭാഗത്തേക്ക് അഭിപ്രായം പറയാനില്ല. നോവലിൽ നിന്നും പശ്ചാത്തലവും അത് പോലെ ചില സബ് പ്ലോട്ടുകളും ചിത്രത്തിൽ വ്യത്യാസം വരുത്തിയിട്ടുണ്ട് എന്നറിയാൻ കഴിഞ്ഞു. രണ്ട് വരിയിൽ ചിത്രത്തിന്റെ കഥ വിവരിക്കാൻ കഴിഞ്ഞേക്കും, എന്നാൽ അതെത്രത്തോളം സിനിമയോട് നീതി പുലർത്തും എന്ന് പറയാനാവില്ല. കാരണം വേറൊന്നുമല്ല അത്യാവശ്യം ഡീറ്റയിലിങ്ങും അപ്രതീക്ഷിതമായ പുരോഗതിയും എല്ലാം ചേർന്ന് വേറൊരു തലത്തിലേക്ക് കഥ മാറുന്നുണ്ട്.

🔸ജീവിതത്തിൽ ക്ലച്ച് പിടിക്കാത്ത ഒരാളാണ് ഡിറ്റക്റ്റീവ് ഫിലിപ്പ് മാർലോ, മറ്റൊരു കഥാപാത്രം അയാളെ മുഖത്ത് നോക്കി തോൽവി എന്നുവരെ വിളിക്കുന്നുണ്ട്, ജീവിതത്തിൽ അയാൾ ഏറെക്കുറെ അത് തന്നെയാണ്. ആരെയും പെട്ടെന്ന് വിശ്വസിക്കുന്ന, അവർക്ക് വേണ്ടി ആവുന്ന സഹായങ്ങൾ ചെയ്ത് കൊടുക്കുന്ന, എന്നാൽ ഇതിന് പ്രതിഫലം ഒന്നും പറ്റാത്ത, പിന്നീട് ഈ സഹായം തന്നെ പണി ആയി മേടിക്കുന്ന ഒരു സാധാരണക്കാരൻ കഥാപാത്രമാണ് മാർലോ. ഇങ്ങനെ പൊയ്ക്കൊണ്ടിരുന്ന മാർലോയെ തേടി ഒരുനാൾ ഒരു സുഹൃത്ത് വരികയാണ്, ഇവിടെ നിന്നാണ് കഥ ഒന്ന് ട്രാക്കിൽ കയറുന്നത്.

🔸മാർലോയെ തേടി വന്നിരിക്കുന്നത് ബാല്യകാല സുഹൃത്തായ ടെറി ലിനോക്സ് ആണ്, ഒരേയൊരു ആവശ്യം മാത്രമേ ടെറിക്ക് ഉണ്ടായിരുന്നുള്ളൂ. ടെറി ഇപ്പോൾ ആകെ വല്ലാത്തൊരു അവസ്ഥയിലാണ്, ഈ അവസ്ഥയിൽ നിന്നും രക്ഷപ്പെടാൻ അയാൾക്ക് രാജ്യം വിട്ട് മെക്സിക്കോ അതിർത്തിയിലേക്ക് കടന്നേ പറ്റൂ, അതിനാണ് അയാൾ ഫിലിപ്പ് മാർലോയെ സമീപിച്ചിരിക്കുന്നത്. കാരണങ്ങൾ എന്ത് തന്നെ ആയാലും മാർലോ ലിനോക്സിനെ സഹായിക്കാൻ തീരുമാനിക്കുകയാണ്. അങ്ങനെ രണ്ട് പേരും മെക്സിക്കോ കാലിഫോർണിയ അതിർത്തിയായ ടൈഹുവാനയിലേക്ക് യാത്ര ആരംഭിക്കുകയാണ്.

🔸സുഹൃത്തിനെ യാത്രയാക്കി മടങ്ങിയെത്തിയ മാർലോ കാണുന്നത് തന്റെ വീട്ടുപടിക്കൽ നിൽക്കുന്ന രണ്ട് പോലീസുകാരെയാണ്. അവർ വന്നതാവട്ടെ ലിനോക്സിനെ തേടിയും, അയാളുടെ പേരിലുള്ള കുറ്റം സ്വന്തം ഭാര്യയെ മൃഗീയമായി കൊലപ്പെടുത്തി എന്നും. തുടർന്ന് ഈ കഥാപാത്രങ്ങളുടെ എല്ലാം ജീവിതം ഗതി മാറ്റി വിടുന്ന അനവധി സംഭവങ്ങൾ അരങ്ങേറുകയാണ്. രണ്ട് മണിക്കൂർ പരിധിയിൽ കാഴ്ചക്കാരനെ പിടിച്ചിരുത്തുന്ന നല്ല ഒന്നാംക്‌ളാസ്സ് ത്രില്ലർ ചിത്രമാണ് ദി ലോങ്ങ് ഗുഡ്ബൈ. ചിത്രത്തിന്റെ ക്ലൈമാക്സിനോട് അടുത്ത് ഒരു സീനിൽ അർണോൾഡ് ഷ്വാർസനഗ്ഗറെ കാണാൻ കഴിയും, അദ്ദേഹത്തിന്റെ ആദ്യ കാല സിനിമകളിൽ ഒന്ന് കൂടിയാണ് ഈ ചിത്രം.

Verdict : Must Watch

DC Rating : 90/100

602. On Golden Pond (1981)

Director : Mark Rydell

Genre : Family

Rating : 7.6/10

Country : USA

Duration : 109 Minutes

🔸ഉദ്ദേശം ഒരു പതിനെട്ട് വർഷം മുന്നേ മലയാളത്തിൽ പുറത്തിറങ്ങിയ ചിത്രമാണ് ഒരു ചെറു പുഞ്ചിരി. ഒടുവിൽ ഉണ്ണികൃഷ്ണന്റെ കൃഷ്ണ കുറുപ്പും ഭാര്യ അമ്മാളു കുട്ടിയമ്മയും അവരുടെ വർധക്യത്തിലേക്ക് കടന്ന ജീവിതവും ഊഷ്‌മളമായ ബന്ധവും എല്ലാം നല്ല ഭംഗിയോടെ ചിത്രം അവതരിപ്പിച്ചിട്ടുണ്ട്. കുടുംബ ബന്ധങ്ങളുടെയും മറ്റും മൂല്യം എടുത്ത് കാണിക്കുന്ന ചിത്രം ഓർമയിൽ തങ്ങി നിൽക്കുന്നൊരു ക്ലൈമാക്‌സും കരുതി വെച്ചിട്ടുണ്ട്. ഇതിപ്പോ ഇവിടെ പറയാൻ കാരണം എന്താണെന്നാൽ ഓൺ ഗോൾഡൻ പോൻഡ് എന്ന ചിത്രം പലപ്പോഴും ഒരു ചെറു പുഞ്ചിരിയെ ഓർമിപ്പിക്കുന്നു എന്നത് കൊണ്ട് തന്നെ.

🔸വർധക്യത്തിലേക്ക് കടന്ന ദമ്പതികളാണ് ഇവിടെയും പ്രധാന കഥാപാത്രങ്ങൾ, ഹെൻറി ഫോണ്ടയുടെ നോർമൻ ഥേയരും ഭാര്യയായ കാതറീൻ ഹെപ്ബൺ അവതരിപ്പിച്ച ഈതൽ ഥേയരും. അവധിക്കാലം ആഘോഷിക്കാൻ തങ്ങളുടെ പഴയ വസതിയിലേക്ക് എത്തുകയാണ് ഇരുവരും. കഴിഞ്ഞ തവണ വന്ന് പോയ അവസ്ഥയിൽ നിന്നും കാര്യങ്ങൾ ഒരുപാട് മാറി പോയിരിക്കുന്നു ഇന്ന്. വാർധക്യ സഹജമായ പ്രശ്നങ്ങൾ രണ്ട് പേരെയും അലട്ടി തുടങ്ങിയിട്ടുണ്ട് എന്നതാണ് സത്യം, മരണം എന്നത് സുനിശ്ചിതം ആണെങ്കിലും ആ വസ്തുത ചെറുതായി ഒന്ന് പേടിപ്പിച്ച് തുടങ്ങിയിട്ടുണ്ട് നോർമനെ.

🔸ഈ പേടി പോരെങ്കിൽ മറവി സംബന്ധമായ പ്രശ്നങ്ങൾ കൂടി ഉണ്ട് നോര്മന്, ഒരുദാഹരണത്തിന് തങ്ങളുടെ പഴയ കുടുംബ ഫോട്ടോയിൽ ഉള്ള പലരെയും ഇന്ന് തിരിച്ചറിയാൻ കഴിയാത്ത അവസ്ഥയിലേക്ക് അയാൾ മാറിയിരിക്കുന്നു. അയാളുടെ ഏതൊരു സംഭാഷണവും ചിന്തയും ചെന്ന് അവസാനിക്കുന്നത് മരണ സംബന്ധമായ കാര്യങ്ങളിലേക്കും. ഇങ്ങനെ എല്ലാ രീതിയിലും തോൽവി സമ്മതിച്ച ഒരാവസ്ഥയിലാണ് നോർമനെ നമ്മൾ കണ്ട് മുട്ടുന്നത്. ഈതലിന്റെ അവസ്ഥ കുറച്ച് കൂടി ബേധമാണ് എന്നതാണ് ആശ്വാസം.

🔸മരണവും അത് പോലുള്ള കാര്യങ്ങളും അവരെ ഒട്ടും ബാധിച്ചിട്ടില്ല, പ്രായത്തിന്റേതായ പ്രശ്നങ്ങൾ ഉണ്ടെങ്കിൽ കൂടിയും താൻ ഇന്നും ചെറുപ്പം ആണെന്ന പക്ഷക്കാരിയാണ് അവർ. ഈ കാരണം കൊണ്ട് തന്നെ മനസ്സ് ചത്ത് ജീവിക്കുന്ന നോർമന്റെ രീതികളോട് പൊരുത്തപ്പെടാൻ അവർക്ക് കഴിയുന്നില്ല. തന്നാൽ കഴിയുന്ന രീതിയിൽ ഭർത്താവിൽ ഊർജ്ജം നിറയ്ക്കാൻ അവർ ശ്രമിക്കുന്നുണ്ടെങ്കിലും അത് വിജയിക്കുന്നില്ല എന്നത് സത്യമാണ്. ഇങ്ങനെ കടന്ന് പോയി കൊണ്ടിരുന്ന ദമ്പതിമാരുടെ ഇടയിലേക്ക് പുതിയ ചില കഥാപാത്രങ്ങൾ കടന്ന് വരികയാണ്.

🔸ഈ കഥാപാത്രങ്ങൾ മറ്റാരുമല്ല മകളായ ചെൽസി ആണ്, നോർമനും മകളും തമ്മിലുള്ള ബന്ധം വർഷങ്ങളായി ഉലഞ്ഞതാണ്. ചെൽസിയുടെയും അവളുടെ കുടുംബത്തിന്റെയും മടങ്ങി വരവ് ദമ്പതിമാരെ ഏത് രീതിയിൽ ബാധിക്കും എന്നതാണ് തുടർന്നുള്ള ഒന്നര മണിക്കൂർ സമയം ചിത്രം പറയുന്നത്. ഇത് പോലെയൊരു ചിത്രത്തിന്റെ ആരംഭത്തിൽ ക്ലൈമാക്സ് എന്താവും എന്നൊരു ധാരണ വെച്ച് പുലർത്തിയിരുന്നു, അത് തെറ്റായിരുന്നു എന്നതിൽ വളരെ സന്തോഷം. ഡ്രാമ, ഫാമിലി ടൈപ്പ് ചിത്രങ്ങളോട് താല്പര്യം ഉള്ളവർക്ക് തീർച്ചയായും ഒന്ന് പരീക്ഷിച്ച് നോക്കാം, നല്ലൊരു ചിത്രമാണ് ഓൺ ഗോൾഡൻ പോൻഡ്.

Verdict : Very Good

DC Rating : 80/100

601. Finisterrae (2010)

Director : Sergio Caballero

Genre : Fantasy

Rating : 6.4/10

Country : Spain

Duration : 81 Minutes

🔸നമ്മുടെ ഗോസ്റ്റ് സ്റ്റോറി എന്നൊരു പടം രണ്ട് വർഷം മുന്നേ വന്നിരുന്നു, ഒരു വെറൈറ്റി തീം ആയിരുന്നു ചിത്രത്തിന്റേത്, ഭാര്യയെ ആശ്വസിപ്പിക്കാനായി മരണശേഷം വരുന്ന കഥാപാത്രവും തുടർന്ന് അരങ്ങേറുന്ന സംഭവങ്ങളും പ്രശ്നങ്ങളും എല്ലാമായി സിനിമ അത്യാവശ്യം നന്നായി തീർന്നു. വ്യക്തിപരമായി ഗോസ്റ്റ് സ്റ്റോറി ഇഷ്ടപ്പെട്ടെങ്കിൽ കൂടിയും ലാഗ് പോലെയുള്ള പല പരാതികളും ഇടക്കാലത്ത് കേൾക്കുക ഉണ്ടായി, ഇത് പറഞ്ഞത് എന്ത് കൊണ്ടാണ് എന്നാൽ രണ്ട് ചിത്രങ്ങൾ തമ്മിലും ചില സാമ്യതകൾ ഉണ്ട്, എന്ന് മാത്രമല്ല ഗോസ്റ്റ് സ്റ്റോറി പ്രശ്നമായി തോന്നിയവർക്ക് ഈ ചിത്രം ഒട്ടും രസിക്കാൻ സാധ്യതയുമില്ല.

🔸പറയാൻ മാത്രം കഥയൊന്നുമില്ല, കഥ അന്വേഷിച്ച് വരുന്നവർ ഇവിടെ നിന്ന് തന്നെ മടങ്ങി പോവുന്നതാവും നല്ലത്. രണ്ട് പ്രേതങ്ങൾ, നമ്മുടെ ഗോസ്റ്റ് സ്റ്റോറിയിലേത് പോലെ തന്നെ നടത്തുന്ന ഒരു യാത്രയും അതിനിടയിൽ അവർ കാണുന്ന കാഴ്ചകളും മറ്റ് കാര്യങ്ങളും എല്ലാമായാണ് ചിത്രം മുന്നേറുന്നത്. ഒരു ഓളത്തിൽ നല്ല ദൃശ്യങ്ങളും മറ്റുമായി ചിത്രം പുരോഗമിക്കുമ്പോൾ പതിയെ കാഴ്ചക്കാരനും ആ യാത്രയുടെ ഭാഗമായി മാറുകയാണ്. തുടക്കത്തിൽ ഒരല്പം മുഷിപ്പ് അനുഭവപ്പെട്ടെങ്കിലും സാവധാനം തന്റെ ആദ്യ ചിത്രത്തിലൂടെ സെർജിയോ കബല്ലെറോ ആസ്വാദകനെ കയ്യിലെടുക്കുന്നുണ്ട്.

🔸ദൃശ്യങ്ങളും സെറ്റപ്പും ബാക്ക്ഡ്രോപ്പുകളും എല്ലാം ചിത്രത്തിന്റെ ഹൈലൈറ്റുകളാണ്, വാൾപേപ്പർ ആയും ബാക്ക്ഗ്രൗണ്ട് ആയും എല്ലാം സൂക്ഷിക്കാൻ കഴിയുന്ന മനോഹരമായ അനവധി ദൃശ്യങ്ങൾ കാണാൻ കഴിഞ്ഞു. അധികം സംഭാഷണങ്ങൾ ചിത്രത്തിൽ ഇല്ല, ഉള്ളത് വ്യക്തവും അല്ല പലയിടത്തും. റോട്ടർഡാം ഫെസ്റ്റിൽ ഉൾപ്പെടെ പ്രദര്ശിപ്പിക്കപ്പെട്ട ചിത്രം ഫെസ്റ്റിവൽ റണ്ണുകളിൽ മികച്ച പ്രതികരണങ്ങളും കരസ്ഥമാക്കിയിരുന്നു. രണ്ട് പ്രധാന കഥാപാത്രങ്ങളോടൊപ്പം പ്രകൃതിയും ചിത്രത്തിന്റെ ഭാഗമാവുന്ന ഒരു ഫീൽ ചിത്രത്തിൽ ഉടനീളം കിട്ടാനുണ്ട്.

🔸നമ്മുടെ രണ്ട് പ്രധാന പ്രേത കഥാപാത്രങ്ങളും സഹോദരങ്ങളാണ് എന്നൊരു സൂചന ചിത്രം നൽകുന്നുണ്ട്. മരണപ്പെട്ടിട്ട് കുറച്ച് കാലമായ ഇരുവരും മരണാനന്തര ജീവിതത്തിൽ അത്ര തൃപ്തരല്ല. പഴയ ഓർമകൾ അതേപടി തികട്ടി വരുന്നത് കൊണ്ടാവണം, ഏത് വിധേനയും വീണ്ടും മനുഷ്യനായി മാറണം എന്നതാണ് ഇരുവരുടെയും ആഗ്രഹം, അതിനായുള്ള ശ്രമത്തിലാണ് ഇരുവരും. ഇവിടെ നിന്നുമാണ് നമ്മളീ കഥാപാത്രങ്ങളെ കണ്ട് മുട്ടുന്നത്, പിന്നീട് ഇവർക്ക് എന്ത് സംഭവിക്കുന്നു എന്നതാണ് ഒന്നര മണിക്കൂറിന് അടുത്ത് ദൈർഖ്യമുള്ള ചിത്രം.

🔸ഒരു ആർട്ട് ഹൌസ് ചിത്രമാണ് ഇത്, അത് കൊണ്ട് തന്നെ പറയുന്നു എല്ലാവര്ക്കും ഇഷ്ടപ്പെടാൻ ഒരു സാധ്യതയുമില്ല. പറഞ്ഞ് വന്നത് എന്താണെന്നാൽ, പ്രത്യേകിച്ച് കഥയില്ലാത്ത, സംഭാഷണങ്ങൾ കുറവുള്ള, എന്നാൽ നല്ല ദൃശ്യങ്ങൾ ഉള്ള ടൈപ്പ് ചിത്രങ്ങൾ ഇഷ്ട്ടപ്പെടുന്നു എങ്കിൽ ഒന്ന് പരീക്ഷിച്ച് നോക്കാം, ഇടയ്ക്കൊക്കെ ഒരു വെറൈറ്റി ആവാം. കൂടുതൽ അവകാശവാദങ്ങൾ ഇല്ല, താല്പര്യം തോന്നുന്നെങ്കിൽ നോക്കുക.

Verdict : Good

DC Rating : 75/100