680. What Did Jack Do ? (2017)

Director : David Lynch

Genre : Short Film

Rating : 6.7/10

Country : USA

Duration : 17 Minutes

🔸വലിയ ബഹളങ്ങളോ കാര്യമോ ഒന്നും തന്നെ ഇല്ലാതെയാണ് ഡേവിഡ് ലിഞ്ചിന്റെ പതിനേഴ് മിനിറ്റ് ഷോർട്ട് ഫിലിം വാട്ട് ഡിഡ് ജാക്ക് ഡു നെറ്റ്ഫ്ലിക്സിൽ എത്തിയത്, ഉദ്ദേശം ഒരു ഒന്നര വർഷം മുന്നേ തന്നെ ഇതിനെ കുറിച്ച് കേട്ടിരുന്നെങ്കിലും ഫെയ്‌സ്ബുക്കിൽ സുഹൃത്തുക്കളിൽ ഒരാൾ കൊളാഷ് അപ്ലോഡ് ചെയ്യുമ്പോഴാണ് പ്രിന്റിന്റെ ലഭ്യതയെ കുറിച്ചും മറ്റും ഒരു ധാരണ കിട്ടിയത്. സംവിധായകനോട് ഒരു സ്പെഷ്യൽ താല്പര്യം ഉള്ളതിനാലും പുള്ളിയുടെ ഒരു ചിത്രം കണ്ടിട്ട് കാലം കുറച്ച് കഴിഞ്ഞതിനാലും ചൂടോടെ തന്നെ കാണുക ആയിരുന്നു എന്ന് പറയാം, പിന്നെ വേറൊരു പ്രത്യേകത എന്ന് പറയാൻ ഉള്ളത് ചിത്രത്തിൽ ഡേവിഡ് ലിഞ്ച് അഭിനേതാവായി തന്നെ എത്തുന്നുണ്ട് എന്നതാണ്, സെൻട്രൽ കഥാപാത്രങ്ങളിൽ ഒന്ന് തന്നെ.

🔸വെറും പതിനേഴ് മിനിറ്റ് മാത്രമുള്ള ഒരു ചിത്രത്തിന്റെ പ്ലോട്ടിനെ കുറിച്ച് സംസാരിക്കുന്നത് എത്രത്തോളം ഫലവത്ത് ആവും എന്ന കാര്യം പിടിയില്ല, അത് കൊണ്ട് പരമാവധി ചുരുക്കാം. ഒരു നോയിർ ബ്ലാക്ക് ആൻഡ് വൈറ്റ് സെറ്റപ്പിലാണ് ചിത്രം നടക്കുന്നത്, ഒരു ഇന്ററോഗേഷൻ അല്ലെങ്കിൽ ചോദ്യം ചെയ്യൽ അവിടെ അരങ്ങേറുകയാണ്. ഈ ചോദ്യം ചെയ്യലിന് കാരണം ഇടക്കാലത്ത് അരങ്ങേറിയ ഒരു കൊലപാതകം ആണെന്ന് ചോദ്യകർത്താവിന്റെ അതായത് ലിഞ്ചിന്റെ വാക്കുകളിൽ നിന്നും വ്യക്തമാണ്, പക്ഷെ ഇവിടെ ഹൈലൈറ്റ് അയാൾ ആരോടാണ് ചോദ്യങ്ങൾ ഉന്നയിക്കുന്നത് എന്നതാണ്, അത് ഒരു കുരങ്ങിനോടാണ്.

🔸ഈ രണ്ട് കഥാപാത്രങ്ങൾ തമ്മിലുള്ള ചോദ്യോത്തരങ്ങളിൽ കൂടിയാണ് ചിത്രം പുരോഗമിക്കുന്നത്, ഇതിനിടെ മറ്റൊരു കഥാപാത്രം വന്ന് പോവുന്നുണ്ട്. ഈ സംഭാഷണങ്ങളിൽ കൂടി വെളിപ്പെടുന്ന കഥയാണ് പതിനേഴ് മിനിറ്റ് ദൈർഘ്യമുള്ള ഈ ചിത്രം, പ്ലോട്ടിൽ നിന്ന് തന്നെ അല്പം വെയർഡ് ആണെന്ന സൂചന ലഭിക്കുന്നുണ്ടെങ്കിൽ അത് സംവിധായകനെ പറ്റി പിടിയില്ലാത്തത് കൊണ്ട് മാത്രമാണെന്ന് പറയേണ്ടി വരും. ഒരു പഴകിയ ചിത്രം എന്ന ഫീൽ കിട്ടാനായി ചില പൊടി കൈകൾ നമ്മുടെ സംവിധായകൻ ഇവിടെ കാണിച്ചിട്ടുമുണ്ട്.

🔸പേഴ്സണലി ലിഞ്ചിന്റെ ഇഷ്ട്ട സിനിമകളിൽ ഒന്നാണ് ഇറേസർഹെഡ്, ഈ ചിത്രം ആദ്യം കണ്ട അനുഭവം മറക്കാൻ ഇത്തിരി ബുദ്ധിമുട്ടുള്ള ഒന്നാണ്, മനം മടുപ്പിക്കുന്നത് എന്നൊക്കെയുള്ള വാക്കുകൾ കൊണ്ട് വിശേഷിപ്പിക്കാവുന്ന പ്രസ്തുത അനുഭവം പോകെ പോകെ മൈൻഡിൽ വളരുകയായിരുന്നു, പിന്നീട് ഇടക്കാലത്ത് എപ്പോഴോ ചിത്രം ഇഷ്ടപ്പെട്ട് തുടങ്ങുകയും ചെയ്തു. വാട്ട് ഡിഡ് ജാക്ക് ഡു എന്ന ചിത്രവും ചില ഇടങ്ങളിൽ ഇറേസർഹെഡിനെ ഓർമിപ്പിക്കുന്നതായിരുന്നു, വിചിത്ര രൂപമുള്ള കുട്ടിയെ പോലെ സ്‌ട്രൈക്കിങ് ആയൊരു ഇമേജ് ഇല്ലെങ്കിൽ കൂടിയും ആ സെറ്റപ്പും ഫീലുമെല്ലാം പഴയ ചിത്രത്തെ പല ആവർത്തി ഓർമിപ്പിച്ചു എന്ന് പറയാം.

🔸എല്ലാ വിധ കാഴ്ചക്കാർക്കും ഇഷ്ട്ടപ്പെടുന്ന അല്ലെങ്കിൽ അക്‌സെപ്റ്റ് ചെയ്യാൻ പറ്റുന്ന ഒന്നല്ല ഈ ചിത്രം എന്ന മുന്നറിയിപ്പ് ഡേവിഡ് ലിഞ്ച് ചിത്രത്തിന് കൊടുക്കുന്നത് പണ്ടാര ക്ളീഷേ ആണ്, എങ്കിലും ശീലം ആയിപോയത് കൊണ്ട് ഒരാവർത്തി കൂടി പറയുന്നു. ഫോട്ടോഗ്രാഫിക് എഫ്ഫക്റ്റ് വെച്ച് മനുഷ്യന്റെ വായ സൂപ്പർ ഇമ്പോസ്‌ ചെയ്താണ് കുരങ്ങ് സംസാരിക്കുന്നതായി കാണിച്ചത് എന്ന് വായിച്ചറിഞ്ഞു, അതെന്തായാലും നന്നായിരുന്നു, ഡിസ്ട്രാക്റ്റിംഗ് ആയി ഒട്ടും തോന്നീല്ല. അപ്പൊ പറഞ്ഞ് വന്നത് വെയർഡ് ചിത്രങ്ങൾ അല്ലെങ്കിൽ സമാന രീതിയിൽ ഉള്ള ചിത്രങ്ങളോട് താല്പര്യമുള്ളവർക്ക് സമീപിക്കാം.

Verdict : Good

DC Rating : 72/100

679. War And Peace (1966)

Director : Sergei Bondarchuk

Genre : War

Rating : 8.3/10

Country : Russia

Duration : 431 Minutes

🔸സിനിമയുടെ ഒരു നൂറ് വർഷത്തെ ചരിത്രത്തിൽ എപിക് എന്നൊക്കെ ഉള്ള വിശേഷണങ്ങൾ നേടിയ ചിത്രങ്ങൾ അനവധിയുണ്ട്, ലോർഡ് ഓഫ് ദി റിങ്‌സ് സീരീസൊക്കെ നമുക്ക് ഈ ഗണത്തിൽ പെടുത്താവുന്നതാണ്. ഈ എപിക് എന്ന വിശേഷണം ഒരു ചിത്രത്തിന് ലഭിക്കുന്നത് അത് എല്ലാ രീതിയിലും ഒരു ദൃശ്യ വിസ്മയം എന്നൊക്കെ വിശേഷിപ്പിക്കാവുന്ന തലത്തിലേക്ക് ഉയരുമ്പോഴാണ് എന്നാണ് ഞാൻ ഗ്രഹിച്ച് വെച്ചിരിക്കുന്നത്, അതിൽ എത്രത്തോളം ശെരി ഉണ്ടെന്നൊന്നും പിടിയില്ല. പറഞ്ഞ് വന്നത് ഈ ഒരു രീതിയിൽ നോക്കുമ്പോൾ എപിക് എന്ന വിശേഷണത്തിൽ കുറഞ്ഞതൊന്നും തന്നെ വാർ ആൻഡ് പീസ് എന്ന ഈ നാല് ഭാഗ ചിത്രം അർഹിക്കുന്നില്ല, ഇവിടെ വളരെ പ്രാധാന്യം അർഹിക്കുന്നൊരു വസ്തുത ചിത്രം പുറത്തിറങ്ങിയ കാലഘട്ടം കൂടി പരിഗണിക്കുമ്പോഴാണ്.

🔸ലിയോ ടോൾസ്റ്റോയ് എന്ന എഴുത്തുകാരനെ പറ്റി കേൾക്കാത്തവർ ഉണ്ടാവില്ല, പത്തൊൻപതാം നൂറ്റാണ്ടിൽ റഷ്യൻ എന്നല്ല ഓവർഓൾ ലിറ്ററേച്ചറിൽ ടോൾസ്റ്റോയ് നൽകിയ സംഭാവന ഒരു രീതിയിലും കുറച്ച് കാണാൻ കഴിയാത്തതാണ്. അന്ന കരേനിന, ദി കിങ്‌ഡം ഓഫ് ഗോഡ് ഈസ് വിത്തിന് യു തുടങ്ങി മഹത്തരം എന്നൊക്കെയുള്ള വിശേഷണങ്ങൾ അർഹിക്കുന്ന കൃതികൾ അദ്ദേഹം സൃഷ്ടിച്ചിട്ടുണ്ട് എങ്കിലും മാസ്റ്റർപീസ് എന്നൊക്കെയുള്ള വിശേഷണം പൊതുവെ കൊടുക്കാറ് വാർ ആൻഡ് പീസിനാണ്. ഈ വാർ ആൻഡ് പീസ് എന്ന നോവലിന്റെ ചലച്ചിത്രാവിഷ്കാരം ആണ് പ്രസ്തുത സെർജെയ് ബോണ്ടർശുക് ചിത്രം.

🔸ഏഴര മണിക്കൂറിന് അടുത്ത് ദൈർഘ്യം ഉള്ള നാല് ഭാഗങ്ങളായാണ് ചിത്രം പുറത്തിറങ്ങിയത്, ഈ വർഷം പുറത്തിറങ്ങിയ ബ്ലൂറേ റെസ്റ്റോറേഷൻ പ്രിന്റും ഈ ഫോർമാറ്റ് പിന്തുടരുന്ന, തീർച്ചയായും കണ്ടിരിക്കേണ്ട ഒന്ന് തന്നെ ആണ്. ഇനി കഥയിലേക്ക് കടക്കുക ആണെങ്കിൽ നെപ്പോളിയന്റെ റഷ്യൻ അധിനിവേശവും അത് ജനങ്ങളിൽ, അവരുടെ ജീവിതങ്ങളിൽ കൊണ്ടുവരുന്ന മാറ്റങ്ങളും ഒക്കെയാണ് പ്രമേയം. ഇവ സ്‌ക്രീനിൽ എത്തിക്കാനായി കുറച്ച് റഷ്യൻ കുടുംബങ്ങളിലേക്ക് മാത്രമായി ഫോക്കസ് കൊടുത്തുള്ള രീതിയിലാണ് ചിത്രം പുരോഗമിക്കുന്നത് എന്ന് പറയാം.

🔸ഈ റഷ്യൻ അഡാപ്റ്റേഷന്റെ കഥ പറയുന്നതിന് മുന്നേ അതിനും പത്ത് വർഷം പിറകിലേക്ക് പോവണം, അതായത് വാർ ആൻഡ് പീസിന്റെ അമേരിക്കൻ അഡാപ്റ്റേഷൻ പുറത്ത് വന്ന 1956ലേക്ക്. ഹെൻറി ഫോണ്ട, ഓഡ്രി ഹെപ്ബേൺ എന്നിവർ പ്രധാന കഥാപാത്രങ്ങളായ ചിത്രം വലിയ ചലനം ഒന്നും സൃഷ്ടിച്ചില്ല എങ്കിലും, ചിത്രത്തിലെ വെസ്റ്റേൺ ലൈഫ് സ്റ്റൈൽ ഗ്ലോറിഫൈ ചെയ്തത് സോവിയേറ്റ് യൂണിയനിലെ ചില പ്രമുഖർക്ക് പിടിച്ചില്ല എന്നും അതാണ് ഈ ചിത്രത്തിന് വഴി വെച്ചത് എന്നും ഒക്കെയാണ് ചരിത്രം. അങ്ങനെ പല തരത്തിലും അഭിമാന പ്രശ്നമായി മാറിയ ഈ ചിത്രത്തിന്റെ കഥ ആരംഭിക്കുന്നത് അഞ്ച് വർഷങ്ങൾക്ക് ശേഷം 1961ലാണ്.

🔸അതുവരെ സോവിയേറ്റ് യൂണിയന്റെ ചരിത്രത്തിൽ കേട്ട് കേൾവി ഇല്ലാത്ത ബഡ്ജറ്റും, സ്‌ക്രീനിന്റെ മുന്നിലും പിന്നിലുമായി പ്രതിഭാധനരായ ഒരുപിടി താരങ്ങളും എല്ലാം ചേർന്ന് കൊണ്ട് അക്ഷരാർത്ഥത്തിൽ ബ്രഹ്മാണ്ഡം എന്നൊക്കെ വിശേഷിപ്പിക്കാവുന്ന രീതിയിൽ ആയിരുന്നു ചിത്രത്തിന്റെ ആരംഭം. പിന്നീട് പെർഫെക്‌ഷൻ എന്നത് എത്തിപ്പിടിക്കാനായുള്ള അഞ്ച് വർഷം നീണ്ട കഠിനാധ്വാനം, ഒടുവിൽ ടിക്കറ്റ് നിരക്കിൽ പോലും അതുവരെ കേട്ടുകേൾവിയില്ലാത്ത തുകയിൽ സ്‌ക്രീനുകളിൽ എത്തി വൻ പ്രദർശന വിജയം നേടിയ, അത്യാവശ്യം ത്രില്ലിംഗ് ആയ ഒന്നാണ് സിനിമയ്ക്ക് പിറകിലെ കഥ. സിനിമയ്ക്ക് അകത്തെ കഥ തല്ക്കാലം പറയുന്നില്ല, കണ്ട് തന്നെ മനസിലാക്കുക, അക്ഷരം തെറ്റാതെ എപിക് എന്നൊക്കെ വിളിക്കാം ഈ ചിത്രത്തെ.

Verdict : Must Watch

DC Rating : 95/100

678. KD Engira Karuppu Durai (2019)

Director : Madhumitha

Genre : Drama

Rating : 9/10

Country : India

Duration : 112 Minutes

🔸ഈ മെയിന്റസ്ട്രീമിൽ നിന്നും മാറി അധികം ആരുടെയും ശ്രദ്ധയിൽ പെടാതെ പോവുന്ന ചില കിടിലൻ സിനിമകൾ ഉണ്ട്, സിമ്പിൾ സബ്ജെക്റ്റ് മനോഹരമായി അവതരിപ്പിച്ച് കയ്യടി വാങ്ങുന്ന കിടിലൻ ക്രാഫ്റ്റ് എന്നൊക്കെ വിശേഷിപ്പിക്കാവുന്ന ചിത്രങ്ങൾ, കെ ഡി എങ്കിറ കറുപ്പ് ദുരൈ എന്ന ചിത്രത്തെ ഈ വിഭാഗത്തിൽ ഉൾപ്പെടുത്താവുന്നതാണ്. പലപ്പോഴും തോന്നിയിട്ടുള്ള ഒരു കാര്യമാണ് തമിഴ് സിനിമാ ഇൻഡസ്ട്രി ഇത്തരം ചിത്രങ്ങൾക്ക് ഉള്ള ഈറ്റില്ലം ആണ് എന്നത്, ഈ ഒരു അവകാശ വാദത്തിന് ഉദാഹരണം എന്നവണ്ണം ചൂണ്ടികാണിക്കാൻ ഡസൻ കണക്കിന് സിനിമകളും ഉണ്ട്. ആ ഒരു വിശ്വാസത്തെ ഒന്ന് കൂടി ഊട്ടി ഉറപ്പിക്കുന്നുണ്ട് ഈ ചെറിയ മനോഹരമായ സിനിമ.

🔸ഒരു ടിപ്പിക്കൽ തമിഴ് പശ്ചാത്തലമുള്ള ഗ്രാമത്തിലെ വീട്ടിലാണ് നമ്മുടെ കഥ ആരംഭിക്കുന്നത്, വീട്ടിലാകമാനം ഒരു ഉത്സവ അന്തരീക്ഷമാണ്. ബന്ധു മിത്രാദികൾ എല്ലാം ഒത്ത് ചേർന്നിട്ടുണ്ട്, സ്ഥിരം വെടി വർത്തമാനങ്ങളും തമാശയുമൊക്കെ ആയി ഇവരിലെല്ലാവരിലും കുറച്ച് നേരം ഫോക്കസ് കൊടുത്ത ശേഷമാണ് നമ്മുടെ ടൈറ്റിൽ കഥാപാത്രവും നായകനുമായ കറുപ്പ് ദുരയിലേക്ക് ശ്രദ്ധ മാറുന്നത്. ഈ ബഹളങ്ങളിൽ നിന്നെല്ലാം മാറി ഒരു മൂലയ്ക്ക് കട്ടിലിന്മേൽ അയാൾ കിടപ്പാണ്, കഴിഞ്ഞ ഒരു മൂന്ന് മാസമായി അയാൾ ഇതേ കിടപ്പിലാണ്, ടിയാൻ ഇപ്പോൾ കോമയിലാണ് എന്ന് പറയാം.

🔸മക്കളും മരുമക്കളും ഒക്കെയായി എത്തിയ ബന്ധു ജനങ്ങൾ എല്ലാം തന്നെ കൂലം കഷമായ ചർച്ചയിലാണ്, കാര്യം വേറൊന്നുമല്ല കറുപ്പ് ദുരൈയുടെ ഈ അവസ്ഥ തന്നെ. മൂന്ന് മാസം കഴിഞ്ഞിരിക്കുന്നു കിടപ്പിൽ ആയിട്ട്, പ്രാഥമിക കാര്യങ്ങൾ പോലും കിടപ്പറയിലാണ്, ഇതെല്ലാം നോക്കി ചെയ്ത് മൂത്ത മരുമകൾ ആകെ മടുത്ത അവസ്ഥയിലാണ്, ഇനി അങ്ങോട്ട് തന്നെക്കൊണ്ട് ഇതൊന്നും നടക്കില്ല എന്നവർ തുറന്ന് പറയുന്നുമുണ്ട്. മരുന്നിനും മറ്റ് കാര്യങ്ങൾക്കുമായി വരുന്ന ചിലവ് വേറെ, അതിൽ കറുപ്പ് ദുരൈയുടെ മകനും ഇച്ചിരി ബുദ്ധിമുട്ടിലാണ്, ഇതൊക്കെ കണക്കിലെടുത്ത് കുടുംബം ഒന്നടങ്കം ഒരു തീരുമാനത്തിൽ എത്തിയിരിക്കുകയാണ്.

🔸തീരുമാനം വേറൊന്നുമല്ല അധികം വേദന ഒന്നും ഉണ്ടാകാത്ത രീതിയിൽ കറുപ്പ് ദുരൈയെ അങ് കൊന്ന് കളയാം എന്ന് തന്നെ. അച്ഛനാണ്, അമ്മയില്ലാത്ത മക്കൾക്കായി ജീവിതം മാറ്റി വെച്ച ആളാണ് എന്നതൊക്കെ ശെരി തന്നെ പക്ഷെ പുരയ്ക്ക് മീതെ വളർന്ന് പന്തലിച്ച വൃക്ഷം വെട്ടുക തന്നെ വേണം എന്ന നിലപാടിലാണ് സകലരും. ഈ ചർച്ചകളെല്ലാം നടക്കുമ്പോൾ മറ്റൊരു സംഭവം കൂടി അവിടെ അരങ്ങേറുന്നുണ്ട്, കോമയിൽ നിന്നും കറുപ്പ് ദുരൈ ബോധാവസ്ഥയിലേക്ക് മടങ്ങി വരികയാണ്. ഈ ഒരു സമയം സ്വന്തം മക്കളും ബന്ധുക്കളും തന്നെ കൊല്ലാൻ ഉള്ള പദ്ധതിയെ പറ്റിയൊക്കെ ചർച്ച ചെയ്യുന്നത് കണ്ട് പാവം കണ്ണ് തള്ളി നിന്ന് പോയി.

🔸ആർക്കും ഭാരമാവരുത് എന്ന നിർബന്ധമുള്ള കറുപ്പ് ദുരൈ അന്നേ ദിവസം രാത്രി തന്റെ പഴയ തുണി സഞ്ചിയും എടുത്ത് ആ വീട്ടിൽ നിന്നും ഇറങ്ങുകയാണ്. ഈ യാത്രയിൽ അരങ്ങേറുന്ന സംഭവങ്ങളാണ് ചിത്രത്തിന്റെ കഥ, ചിത്രത്തിന്റെ ആദ്യത്തെ ഒരു എട്ട് പത്ത് മിനിറ്റ് അതായത് ടൈറ്റിൽ കാണിക്കുന്നതിന് മുന്നേയുള്ള ഭാഗങ്ങൾ മാത്രമേ പോസ്റ്റിൽ ഉൾപ്പെടുത്തിയിട്ടുള്ളൂ, ആയതിനാൽ തന്നെ ധൈര്യമായി ബാക്കി കാണാവുന്നതാണ്. പ്രകടനത്തിന്റെ കാര്യത്തിൽ സ്‌ക്രീനിൽ വന്ന ഒരാൾ പോലും മോശമാക്കിയില്ല, നല്ലൊരു കഥയും അതിന് അർഹതപ്പെട്ട മികച്ച അവതരണവുമാണ് ചിത്രത്തിന്റേത്, പിന്നെ കണ്ടവസാനിക്കുമ്പോൾ ഒരു ബിരിയാണി ഒക്കെ തിന്നാൻ നമുക്ക് തോന്നും, കാരണം സിനിമ കണ്ടാൽ മനസിലാവും.

Verdict : Very Good

DC Rating : 85/100

677. Silenced (2011)

Director : Hwang Dong-Hyuk

Genre : Drama

Rating : 8.1/10

Country : South Korea

Duration : 124 Minutes

🔸ഈ കൊറിയൻ സിനിമകളെ മറ്റുള്ള സിനിമകളേക്കാൾ ഇമ്പാക്റ്റ് സൃഷ്ട്ടിക്കാൻ കഴിയുന്ന ഒന്നായി തോന്നിയിട്ടുണ്ട് പലപ്പോഴും, ഇങ്ങനെ തോന്നാനുള്ള കാര്യ കാരണങ്ങൾ വ്യക്തമായി പറയുക എന്നത് ഇച്ചിരി ബുദ്ധിമുട്ടുള്ള കാര്യമാണ് എങ്കിലും സ്‌ട്രൈക്കിങ് ആയ ഒരു ഇമേജ് അല്ലെങ്കിൽ ഒരു സീൻ എടുത്ത് കാണിക്കാൻ പറഞ്ഞാൽ ചൂണ്ടികാണിക്കുന്നതിൽ പത്തിൽ ഏഴും കൊറിയൻ ചിത്രങ്ങൾ ആയിരിക്കും, അത് തന്നെ ആവും ഒരു പരിധി വരെ ആദ്യം സൂചിപ്പിച്ച കാര്യത്തിന്റെ കാരണവും. സൈലെൻസ്ഡ് എന്ന പ്രസ്തുത ചിത്രത്തിലും ഉണ്ട് ഇതുപോലൊരു സീൻ, കണ്ട് കഴിയുമ്പോഴും മൈൻഡിനെ വേട്ടയാടാൻ കഴിവുള്ളൊരു സീൻ.

🔸നേരാംവണ്ണം ബസ് സർവീസ് പോലും ഇല്ലാത്ത കൊറിയയിലെ ഉൾനാടൻ ഗ്രാമമായ മുജിനിലാണ് കഥ അരങ്ങേറുന്നത്, മുജിനിലെ പ്രശസ്തമായ സ്‌കൂളാണ് ബെനെവെലെൻസ് അക്കാഡമി. രാജ്യത്തിൻറെ നാനാ ഭാഗത്ത് നിന്നുമുള്ള കേൾവി ശക്തി ഇല്ലാത്ത വിദ്യാർത്ഥികളാണ് കാലാ കാലങ്ങളായി അവിടെ പഠിച്ച് പോരുന്നത്. ഈ സ്‌കൂളിൽ അധ്യാപകനായി വരികയാണ് നായക കഥാപാത്രമായ കാങ് ഇൻ ഹോ. ആവശ്യത്തിനുള്ള യോഗ്യതയും പഠിപ്പും വിവരവും എല്ലാം ഉണ്ടായിരുന്നെങ്കിലും ജോലിക്കായി നല്ലൊരു തുക കാങ്ങിന് കൈക്കൂലി കൊടുക്കേണ്ടി വന്നിട്ടുണ്ട്, ഈ പൈസ ഒപ്പിക്കുന്നതിനായി സ്വന്തം പുരയിടം വിൽക്കാൻ പോലും അയാൾക്ക് തയാറാവേണ്ടി വന്നിട്ടുമുണ്ട്.

🔸കാങ്ങിന് കുടുംബം എന്ന് പറയാൻ ആകെ ഒരു മകളും സ്വന്തം അമ്മയും മാത്രമേയുള്ളൂ, രോഗിയായ മകളെ നോക്കുന്നതും പരിചരിക്കുന്നതും എല്ലാം ആ അമ്മ തന്നെ. വാർദ്ധക്യത്തിലേക്ക് പ്രായം കടന്നെങ്കിലും ഇന്നും സ്വന്തം കാര്യം സ്വയം ചെയ്യാനുള്ള പ്രാപ്തിയും തീരുമാനങ്ങൾ കൈക്കൊള്ളാൻ ഉള്ള വക തിരിവും എല്ലാം കാങ്ങിന്റെ അമ്മയ്ക്കുണ്ട്. കാങ്ങിന്റെ ഭാര്യ ഉദ്ദേശം ഒരു വർഷം മുൻപ് മരണപ്പെട്ടതാണ്, ഈ രണ്ട് കഥാപാത്രങ്ങൾക്കും അല്ലൽ ഒന്നും ഉണ്ടാവരുത് എന്ന കാങ്ങിന്റെ നിർബന്ധ ബുദ്ധിയാണ് ഈ ജോലിയിൽ എത്തി കലാശിക്കുന്നത്. അക്കാദമിയിലേക്കുള്ള കാങ്ങിന്റെ യാത്രയിൽ തുടക്കം തൊട്ടേ പ്രശ്നങ്ങൾ ആയിരുന്നു.

🔸സ്‌കൂളിൽ എത്തിയപ്പോൾ പ്രശ്നങ്ങൾ വർധിക്കുന്നതെ ഉള്ളൂ, ഹെഡ്മാസ്റ്ററും മറ്റ് അധ്യാപകരും അടക്കം ഉള്ളവരുടെ വിചിത്രമായ പെരുമാറ്റം ഒക്കെ പോട്ടെ എന്ന് വെക്കാം, പക്ഷെ വിദ്യാർത്ഥികളുടെ ഉൾവലിഞ്ഞ പ്രകൃതം കാങ്ങിനെ സംബന്ധിച്ചിടത്തോളം ഒരല്പം അത്ഭുതപ്പെടുത്തുന്നതായിരുന്നു. ഭയം എന്നത് കുട്ടികളുടെ കണ്ണിൽ നിന്നും വായിച്ചെടുക്കാം, പുതിയ അധ്യാപകനുമായി പരിചയപ്പെടാനും അടുക്കാനുമുള്ള എല്ലാ സന്ദര്ഭങ്ങളും അവർ ഒഴിവാക്കുകയാണ്, എല്ലാം കൊണ്ടും ഐസൊലേറ്റ് ചെയ്യപ്പെട്ടത് പോലെയുള്ളൊരു മനോഭാവം. പൊതുവെ വിദ്യാർത്ഥികളുമായി ഊഷ്മളമായ രീതിയിലുള്ള ബന്ധം വെച്ച് പുലർത്താറുള്ള കാങ്ങിന്റെ ശ്രമങ്ങളും പരാജയത്തിൽ തന്നെ കലാശിച്ചു എന്ന് പറയാം.

🔸ഇങ്ങനെ കുറച്ച് നാളുകൾ കടന്ന് പോയപ്പോഴാണ് ഞെട്ടിക്കുന്നൊരു സത്യം കാങ് മനസിലാക്കുന്നത്, തന്റെ മുന്നിൽ ഇരിക്കുന്ന താൻ പഠിപ്പിക്കുന്ന കുട്ടികൾ മിക്കവരും ലൈംഗികമായി മുതലെടുക്കപ്പെട്ടിട്ടുണ്ട് എന്ന്, ഇതിൽ തന്നെ ഏറ്റവും അപകടകരമായ വസ്തുത പ്രതി സ്ഥാനത്ത് നിൽക്കുന്നത് സ്‌കൂളിലെ മറ്റ് അധ്യാപകർ ആണ് എന്നതാണ്. ഞെട്ടി തരിച്ച് പോയ കാങ്ങിന് സത്യത്തിൽ സംയമനം വീണ്ടെടുക്കാൻ ലേശം ബുദ്ധിമുട്ടേണ്ടി വന്നു. ഇവിടെ നിന്നുമാണ് സൈലെൻസ്ഡ് എന്ന ചിത്രം ചൂട് പിടിക്കുന്നത്, കൊറിയയിൽ അരങ്ങേറിയ ഒരു യഥാർത്ഥ സംഭവമാണ് ഈ ചിത്രത്തിന് ആധാരം എന്നത് ഞെട്ടിക്കുന്നൊരു അറിവാണ്. ഈ ഗൗരവമേറിയ വിഷയത്തെ അതിശക്തമായി തന്നെ ചിത്രം അവതരിപ്പിച്ചിട്ടുമുണ്ട്.

Verdict : Very Good

DC Rating : 86/100

676. Motherless Brooklyn (2019)

Director : Edward Norton

Genre : Neo Noir

Rating : 7/10

Country : USA

Duration : 145 Minutes

🔸മദർലെസ്സ് ബ്രുക്ലിൻ എന്നത് തന്റെ പാഷൻ പ്രോജക്റ്റ് ആണ് എന്ന് എഡ് നോർട്ടൻ മുന്നേ പറഞ്ഞിട്ടുള്ളതായി കേട്ടിട്ടുണ്ട്. ഈ നോവൽ ചലച്ചിത്രമാക്കാനായി അദ്ദേഹം ശ്രമം തുടങ്ങിയത് ഉദ്ദേശം ഇരുപത് വർഷങ്ങൾക്ക് മുന്നെയാണ്, ഏകദേശം ഫൈറ്റ് ക്ലബ്ബ് പുറത്തിറങ്ങിയ കാലത്ത് തന്നെ. ഈ ഇരുപത് വർഷത്തെ കാത്തിരിപ്പിനും, സ്വന്തമായുള്ള അന്യായം എന്നൊക്കെ വിശേഷിപ്പിക്കാവുന്ന കാസ്റ്റിനും ഉള്ള വക എൻഡ് പ്രോഡക്റ്റിന് അഥവാ ചിത്രത്തിന് ഉണ്ടോ എന്ന ചോദ്യം വളരെ പ്രസക്തമാണ്, എന്നെ സംബന്ധിച്ചാണെങ്കിൽ ഇല്ല എന്നതാണ് സത്യം.

🔸നോവലിൽ നിന്നും ചില മാറ്റങ്ങൾ സിനിമയ്ക്കായി നോർട്ടൻ നടത്തിയിട്ടുണ്ട് എന്നാണ് കേട്ടറിവ്, പ്രത്യേകിച്ചും എൺപതുകളുടെ പശ്ചാത്തലത്തിൽ തയാറായ ചിത്രത്തെ അമ്പതുകളുടെ അവസാനത്തിലേക്ക് പറിച്ചു നട്ടിട്ടുണ്ട്. ഈ ഒരു മാറ്റം വഴി രഹസ്യാന്വേഷണ ഏജൻസികളും, ഉൾനാടകങ്ങളും, മാഫിയകളും എല്ലാം വിഹരിച്ച് നടന്നിരുന്ന പഴയ ന്യു യോർക്കാണ് കഥാ പശ്ചാത്തലം ആയിരിക്കുന്നത്. ഈ ഒരു ബാക്ക്ഗ്രൗണ്ട് കഥയിൽ വലിയ പ്രാധാന്യം ഉള്ളതാണ്, ഒരു തരം കോൺസ്പിരസി അല്ലെങ്കിൽ നിയോ നോയിർ സെറ്റപ്പിലേക്ക് കഥ പരന്ന് മാറുന്നുണ്ട്.

🔸ഒരു അനാഥനാണ് കഥയിലെ നായകനായ ലിയോണൽ ഇസ്‌റോഗ്, ടിയാൻ ടൂറേറ്റ്‌ സിൻഡ്രോം ഉള്ളൊരു വ്യക്തി കൂടിയാണ്. ഞരമ്പുകളുടെ ഒരു പ്രത്യേക അവസ്ഥാന്തരമായ ഇത് ബാധിച്ചയാളുകളിൽ നിന്നും പ്രത്യേക തരം ശബ്ദങ്ങളും, ശരീരാവയവങ്ങളുടെ അപ്രവചനീയ ചലനങ്ങളും സൃഷ്ട്ടിക്കും. ഒരു പരിധി വരെ രോഗം നിയന്ത്രിക്കാം എങ്കിലും പൂർണമായൊരു മാറ്റം എന്നത് അസംഭവ്യമാണ്. ഈ അവസ്ഥ വർഷങ്ങൾ നീണ്ട് നിന്നേക്കാം, മിക്ക കേസുകളിലും ജീവിതാവസാനം വരെയും. ഇങ്ങനെയുള്ള അവസ്ഥയിൽ ജനിച്ച് വീണ നായകനെ തെരുവിൽ നിന്ന് എടുത്ത് വളർത്തിയതും ഒരു പരിധി വരെ ഇന്നത്തെ നിലയിലേക്ക് എത്തിച്ചതും ഫ്രാങ്ക് മിന്ന എന്ന വ്യക്തിയാണ്.

🔸കഥ ആരംഭിക്കുമ്പോൾ പ്രൈവറ്റ് ഡിറ്റക്റ്റീവ് ആണ് ഫ്രാങ്ക് മിന്ന, അയാളുടെ സഹായിയാണ് ലിയോണൽ. വാക്കുകളാൽ വിശേഷിപ്പിക്കാൻ കഴിയാത്തൊരു ബന്ധം ഈ കഥാപാത്രങ്ങൾക്ക് ഇടയിലുണ്ട്, ഒരു ഉദ്യോഗസ്ഥനും അയാളുടെ സഹായിയും എന്നതിനും മേലെ. ഒരു ഓപ്പറേഷന്റെ ഇടയിലാണ് നമ്മളീ കഥാപാത്രങ്ങളെ കണ്ട് മുട്ടുന്നത്, ഒരല്പം അപകടം പിടിച്ചത് എന്നതൊഴിച്ചാൽ കാര്യമായ വിവരങ്ങൾ ഒന്നും ഫ്രാങ്ക് ലിയോണലിന് നൽകുന്നില്ല. അത്യന്തം ജാഗ്രത പുലർത്തേണ്ടത് എന്ന് ഫ്രാങ്ക് വിശേഷിപ്പിച്ച ഈ ദൗത്യം ഏതെല്ലാം രീതിയിൽ മോശമായി ഭവിക്കാമോ അങ്ങനെയെല്ലാം നടക്കുകയാണ്, കാര്യങ്ങൾ കൈവിട്ട് പോയി എന്ന് തന്നെ പറയാം.

🔸ഈ ഒരു സംഭവത്തിൽ തുടങ്ങി പിന്നീടങ്ങോട്ടുള്ള ചെയിൻ റിയാക്ഷൻ കാരണം ഫ്രാങ്ക് മിന്ന കൊല്ലപ്പെടുകയാണ്, കൊലയാളികൾ ആരാണെന്നോ അതിനുള്ള കാരണം എന്താണെന്നോ ഒന്നും വ്യക്തമല്ല. ഈ കാരണങ്ങൾ തപ്പി കണ്ടുപിടിക്കാനായി ലിയോണൽ ഇറങ്ങുന്നതും ആ വഴിയിൽ അയാൾക്ക് ലഭിക്കുന്ന തിരിച്ചറിവുകളും എല്ലാമാണ് ചിത്രത്തിന്റെ കഥ. സംവിധായക വേഷം കൈകാര്യം ചെയ്ത എഡ് നോർട്ടൻ തന്നെയാണ് ചിത്രത്തിലെ കേന്ദ്ര കഥാപാത്രത്തെയും അവതരിപ്പിച്ചിരിക്കുന്നത്, ഇതിന് പുറമെ മുഴുനീള റോളുകൾ അല്ലെങ്കിലും ബ്രൂസ് വില്ലിസ്‌, വില്ലം ഡാഫോ എന്നിവരും ചിത്രത്തിലുണ്ട്. ഇങ്ങനെയൊക്കെയാണ് കാര്യം എങ്കിലും കാഴ്ചക്കാരനെ പിടിച്ചിരുത്തുന്ന ഒരു എക്സ് ഫാക്ടർ ചിത്രത്തിൽ എവിടെയും കാണാനായില്ല, ഒരു തവണ വെറുതെ കാണാം എന്ന് മാത്രം.

Verdict : Watchable

DC Rating : 60/100

675. A Hidden Life (2019)

Director : Terrence Malick

Genre : Drama

Rating : 7.7/10

Country : Germany

Duration : 174 Minutes

🔸വ്യക്തിപരമായി വളരെ ഇഷ്ടമുള്ള ഒരു സംവിധായകനാണ് ടെറൻസ് മാലിക്, ഫിലോസഫിക്കൽ ആയ രീതിയിൽ സിനിമയെ സമീപിക്കുകയും ആ ഒരു തലത്തിൽ തന്നെ ചലച്ചിത്രങ്ങൾ സൃഷ്ടിക്കുകയും ചെയ്യുന്ന അദ്ദേഹത്തിന്റെ വർക്കുകൾ പലപ്പോഴും ഞെട്ടിച്ച് കളഞ്ഞിട്ടുണ്ട്. കഴിഞ്ഞ ദശാബ്ദത്തിന്റെ തുടക്കത്തിൽ പുറത്തിറങ്ങിയ ട്രീ ഓഫ് ലൈഫും, ഒരു ആന്റി വാർ ചിത്രം എന്നൊക്കെ വിശേഷിപ്പിക്കാവുന്ന തിൻ റെഡ് ലൈനുമെല്ലാം മാലികിന്റെ കഴിവിന്റെ ചില ഉദാഹരണങ്ങൾ മാത്രമാണ്. ഈ വ്യക്തി രണ്ടാം ലോക മഹായുദ്ധത്തിന്റെയും നാസി ഹോളോകോസ്റ്റിന്റെയും എല്ലാം പശ്ചാത്തലത്തിൽ ഒരു ചിത്രം എടുക്കുന്നുണ്ട് എന്നത് തന്നെ വലിയൊരു കാരണം ആയിരുന്നു, ആ ചിത്രത്തിൽ പ്രതീക്ഷ വെക്കാൻ.

🔸ഇനി ഒരു ചെറിയ ജാമ്യം എടുക്കലാവാം, എല്ലാ ടെറൻസ് മാലിക് ചിത്രങ്ങളെ കുറിച്ചുള്ള പോസ്റ്റുകളിലും ഉൾപെടുത്താറുള്ള സ്റ്റേറ്റുവേറ്ററി വാണിങ് തന്നെ. എല്ലാ വിഭാഗത്തിൽ പെട്ട കാഴ്ചക്കാർക്കും ഇഷ്ടപ്പെട്ടേക്കാവുന്ന ചിത്രം അല്ല ഹിഡൻ ലൈഫ്, നല്ല സ്ലോ ആയി പുരോഗമിക്കുന്ന ഡ്രാമ പീരിയഡ് ചിത്രമാണ് ഇത്, മുൻപ് ഒന്ന് രണ്ട് സുഹൃത്തുക്കൾക്ക് തിൻ റെഡ് ലൈൻ സജസ്റ്റ് ചെയ്ത് കൊടുത്തതിന് ശേഷം ലഭിച്ച പ്രതികരണം ഈ ഒരു വാണിംഗിന് കാരണം ആകാനും ആകാതിരിക്കാനും സാധ്യത ഉണ്ട്. അതൊക്കെ എന്തായാലും അവിടെ നിൽക്കട്ടെ, നമുക്ക് എ ഹിഡൻ ലൈഫ് എന്ന ഈ ചിത്രത്തിലേക്ക് കടക്കാം.

🔸വർഷം 1939, രണ്ടാം ലോക മഹായുദ്ധം ചൂട് പിടിച്ച് വരികയാണ്. തന്റെ അധീശത്വം മറ്റുള്ളവരിലേക്ക് എത്തിക്കാനായി രണ്ടും കല്പിച്ച് ഹിറ്റ്‌ലർ ഇറങ്ങിയിരിക്കുകയാണ്, ഓസ്ട്രിയയിലെ സകലമാന പട്ടാളക്കാരെയും യുവാക്കളെയും തന്റെ കീഴിൽ യുദ്ധമുഖത്ത് ഇറങ്ങാനായി ഹിറ്റ്ലറും അയാളുടെ നാസി പട്ടാളവും ഭീഷണിയിയുടെയും മറ്റും അകമ്പടിയോടെ നിർബന്ധിക്കുകയാണ്. കഴിഞ്ഞ് പോയ ആ കാലഘട്ടത്തെ ആർകൈവ് ഫൂട്ടേജുകളിലും മറ്റും കാണിച്ച് കൊണ്ടാണ് ചിത്രം ആരംഭിക്കുന്നത്. എന്നാൽ തൊട്ടടുത്ത സീനിൽ സംവിധായകൻ തന്റെ തനത് ശൈലിയിൽ ഓസ്ട്രിയയിലെ ഒരു ഗ്രാമത്തിലേക്ക് കൊണ്ടുപോവുകയാണ്, വിശ്വൽ ബ്യുട്ടി എന്നൊക്കെ വിശേഷിപ്പിക്കാവുന്ന അതിമനോഹരമായ ഒരു ഗ്രാമം.

🔸ഫ്രാൻസ് ജഗ്ഗർസ്റ്റേറ്റർ എന്ന ഒരു നാൾ ഭൂമിയിൽ ജീവിച്ച് മരിച്ച യഥാർത്ഥ വ്യക്തിയുടെ ജീവിതമാണ് ഈ ചിത്രത്തിൽ ടെറൻസ് മാലിക് വിഷയമാക്കിയിരിക്കുന്നത്. ആദ്യമായി നമ്മൾ ഫ്രാൻസിനെ കാണുമ്പോൾ പുള്ളിയൊരു കർഷകനാണ്, യുദ്ധത്തിന്റെ വാർത്തകളും ഭീകരതയും ഒന്നും എത്തിയിട്ടില്ലാത്ത റദഗണ്ട് എന്ന കൊച്ചു ഗ്രാമത്തിലെ ഒരു സാധാരണ കർഷകൻ. തനിക്കും തന്റെ കുടുംബത്തിനുമായി അന്നന്നത്തെ അന്നത്തിന് വേണ്ടി കഠിനമായി അധ്വാനിക്കുക എന്നതിന് അപ്പുറം മറ്റൊന്നും തന്നെ അയാൾക്ക് വിഷയം ആയിരുന്നില്ല, ഗ്രാമത്തിലെ മറ്റുള്ളവരുമായി ഊഷ്‌മളമായ ബന്ധം നിലനിർത്തിയിരുന്ന ഫ്രാൻസിന്റെ ലോകം ഏറെക്കുറെ ആ ഗ്രാമം നിലനിന്നിരുന്ന താഴ്‌വരയിൽ മാത്രമായി ഒതുങ്ങിയിരുന്നു എന്നതാണ് സത്യം.

🔸പിന്നെ ഒരു പ്രത്യേകത ഫ്രാൻസിന് ഉള്ളത് എന്താണെന്നാൽ, ജർമനിയിലെ വളർന്ന് വരുന്ന ആര്യൻ മേധാവിത്വവും, ഹിറ്റ്ലറുടേയും നാസി പടയുടെയും ആശയങ്ങളോടും അയാൾക്ക് യോജിക്കാൻ ഒരിക്കലും കഴിഞ്ഞിട്ടില്ല. ഒന്നുകിൽ ഞങ്ങൾക്ക് ഒപ്പം, അല്ലെങ്കിൽ ഞങ്ങൾക്ക് എതിര് എന്ന മനോഭാവം കൊണ്ട് തന്നെ ഒരു നാസി വിരോധി എന്ന പട്ടം സ്വാഭാവികമായും അയാളുടെ തലയിൽ വന്ന് ചേരുന്നുണ്ട്. ഈ ഒരു വസ്തുത ആ കഥാപാത്രങ്ങളെയും അവരുടെ ഭാവിയെയും ഏതെല്ലാം രീതിയിൽ ബാധിക്കും എന്നതാണ് ചിത്രം കൈകാര്യം ചെയ്യുന്ന പ്രമേയം. മികച്ചൊരു കാസ്റ്റും, നല്ലൊരു കഥയും, അന്യായം എന്നൊക്കെ വിശേഷിപ്പിക്കാവുന്ന മനോഹരമായ ദൃശ്യ ഭംഗിയും ചിത്രത്തിന്റെ പ്രത്യേകതകളാണ്. കഴിഞ്ഞ ഫെബ്രുവരിയിൽ മരണമടഞ്ഞ ബ്രൂണോ ഗാൻസിനെയും ചിത്രത്തിൽ കാണാൻ കഴിഞ്ഞു എന്നത് സന്തോഷം പകരുന്ന കാര്യമാണ്. ടെറൻസ് ഫാൻസിന് ഒരു ട്രീറ്റ് ആണ് ഈ ചിത്രം, അല്പം സ്ലോ ആയ തോതിൽ പോവുന്ന ചിത്രം പ്രശനം അല്ലെങ്കിൽ നിങ്ങൾക്കും കാണാം, അല്ല കാണണം.

Verdict : Very Good

DC Rating : 88/100

674. 1917 (2020)

Director : Sam Mendes

Genre : War

Rating : 8.7/10

Country : UK

Duration : 119 Minutes

🔸റിലീസിന് മുന്നേ ഹൈപ്പ് കൊടുമുടി കയറിയ ചിത്രമാണ് 1917, വാർ മൂവി ഓഫ് ദി ഡെക്കെയ്ഡ് പോലുള്ള അനവധി വിശേഷണങ്ങൾ ചിത്രത്തിന് ആദ്യ സ്ക്രീനിംഗ് കഴിഞ്ഞപ്പോഴേ ചാർത്തി കൊടുത്തിട്ടുണ്ട് പല നിരൂപക സിംഹങ്ങളും. ഈ ഒരു കാരണം കൊണ്ട് തന്നെ അമിത പ്രതീക്ഷ ഒരു വില്ലനാവുമോ എന്ന സംശയം ഉണ്ടായിരുന്നു, കാണാൻ ഇരിപ്പുറപ്പിക്കുന്നത് വരെ. ഈ ജോണറിൽ പെട്ട ചിത്രങ്ങളോട് താല്പര്യം കുറച്ചധികം ആയതിനാലും ഒരു രീതിയിലും ഒരു പ്ലോട്ട് പോയിന്റും സ്പോയിൽ ചെയ്യപ്പെടരുത് എന്ന നിർബന്ധം ഉണ്ടായിരുന്നതിനാലും ടീസർ, ട്രൈലെർ പോലുള്ള വകകൾ എല്ലാം പൂർണമായും ഒഴിവാക്കിയിരുന്നു. ഇനി ഇത്രയെല്ലാം പ്രതീക്ഷ വെച്ചിട്ട് ചിത്രം അതിനും മാത്രം ഉണ്ടോ എന്നാണ് ചോദ്യം എങ്കിൽ അതിനുള്ള ഉത്തരം നൂറ്റി ഒന്ന് ശതമാനം എന്നാണ്.

🔸ഒട്ടും കോംപ്ലക്സ് അല്ലാത്ത വളരെ ലളിതം ആയൊരു കഥയാണ് ചിത്രത്തിന്റേത്, പോരായ്മയായി ആർക്കെങ്കിലും എന്തെങ്കിലും ഈ ചിത്രത്തെ പറ്റി തോന്നാൻ ഉണ്ടെങ്കിൽ അത് ഇതുമാണ്. ഒന്നാം ലോക മഹായുദ്ധം കൊടുമ്പിരി കൊണ്ടിരിക്കുന്ന സമയമാണ്, ബ്രിട്ടനും ജർമനിയും തമ്മിലുള്ള രക്ത രൂഷിതമായ യുദ്ധം പുരോഗമിച്ച് കൊണ്ടിരിക്കെ പെട്ടെന്നൊരുനാൾ ജർമൻ പട്ടാളം യുദ്ധ മുഖത്ത് നിന്ന് പിന്തിരിയുകയാണ്. വിജയം മണത്ത ബ്രിടീഷ് ആർമി എതിരാളികൾക്ക് പുറകെ വെച്ച് പിടിച്ച് അവരെ അവരുടെ മേഖലയിലേക്ക് കയറിച്ചെന്ന് ഉന്മൂലനം ചെയ്യാനുള്ള പ്ലാനിലാണ്. എന്നാൽ ഇത് തന്നെയാണ് ജർമൻ ആർമി പ്രതീക്ഷിക്കുന്നതും എന്നിടത്ത് ചിത്രം ട്രാക്ക് ഒന്ന് മാറ്റുകയാണ്.

🔸തങ്ങൾ നടന്ന് കയറാൻ പോവുന്നത് കൂട്ട കുരുതിയിലേക്കാണ് എന്ന് ബ്രിട്ടീഷ് പട്ടാളത്തെ ആരെങ്കിലും അറിയിക്കേണ്ടി ഇരിക്കുന്നു. മറ്റ് രീതിയിലുള്ള വാർത്താ വിനിമയ ഉപാധികൾ എല്ലാം തകരാറിലായപ്പോൾ അതിനായി നിയോഗിക്കപ്പെടുന്നത് രണ്ട് ചെറുപ്പക്കാരായ പട്ടാളക്കാരാണ്, ഇവിടെ നിന്നുമാണ് ചിത്രം ആരംഭിക്കുന്നത്. അത്യന്തം ദുഷ്കരമായ വഴിയിലൂടെയാണ് അവർക്ക് കടന്ന് പോകേണ്ടത്, ഒരു പരിധി വരെ എതിരാളികളുടെ മൂക്കിൻ തുമ്പത്ത് കൂടി. ഈ യാത്രയിൽ എന്തെല്ലാം സംഭവിക്കുന്നു എന്നതാണ് ചിത്രത്തിന്റെ കഥ. രണ്ട് പ്രധാന കഥാപാത്രങ്ങൾക്ക് പുറമെ ഒരുപാട് എ ലിസ്റ്റ് താരങ്ങൾ ചിത്രത്തിൽ വന്ന് പോവുന്നുണ്ട്, മിക്കതും കാമിയോകൾ ആണെങ്കിലും എല്ലാവർക്കും വ്യക്തമായ സ്‌പെയ്‌സ് കഥയിലുണ്ട്, മോട്ടീവും.

🔸സിനിമാറ്റോഗ്രാഫിയുടെ കാര്യത്തിൽ റോജർ ദീകിൻസ് എന്ന പേര് തരുന്നൊരു ഗ്യാരന്റി ഉണ്ട്, അതിനോട് നൂറ് ശതമാനം ഗ്യാരന്റി ഈ ചിത്രം പാലിക്കുന്നുണ്ട്. ഒരു സിംഗിൾ ഷോട്ട് എന്ന പ്രതീതി നൽകുന്ന രീതിയിലുള്ള ദീകിൻസിന്റെ വർക്ക് അദ്ദേഹത്തിന് ഓസ്കാർ പോലെയുള്ള അംഗീകാരങ്ങൾ നേടി കൊടുത്തില്ലെങ്കിൽ അതിനെ അട്ടിമറി എന്ന് വിളിക്കാം. മികച്ച പ്രകടനമാണ് രണ്ട് പ്രധാന കഥാപാത്രങ്ങളുടെയും, കഥ പുരോഗമിക്കവേ യുദ്ധം ഇവരിൽ വരുത്തുന്ന മാറ്റങ്ങൾ ഒക്കെ നല്ല രീതിയിൽ തന്നെ പ്രകടമാണ്. കോളിൻ ഫിർത്, ബെനഡിക്റ്റ് കമ്പർബാച്ച്, ആൻഡ്രു സ്‌കോട്ട്, റിച്ചാർഡ് മഡ്ഡൻ എന്നിവരെല്ലാം ചെറിയ റോളുകളിൽ വന്ന് ചുമ്മാ കയ്യടി നേടി പോയി.

🔸കാമറ, പ്രകടനങ്ങൾ, ഓവർഓൾ സിനിമ എന്നിവ എല്ലാം നന്നായിരിക്കും അല്ലെങ്കിൽ മിനിമം ഗ്യാരന്റി ഉണ്ടായിരിക്കും എന്ന് പ്രതീക്ഷിച്ചത് ആയിരുന്നു എങ്കിൽ അപ്രതീക്ഷിതമായി ഞെട്ടിച്ച ഒരു വസ്തുത ചിത്രത്തിന്റെ സ്‌കോർ ആണ്. നമ്മുടെ പ്രധാന കഥാപാത്രം ബോംബുകൾക്ക് ഇടയിലൂടെ ഓടുന്നൊരു രംഗം ചിത്രത്തിലുണ്ട്, ആ സീനിലെ സ്കോറും അതിലേക്ക് കൊണ്ടുചെന്നെത്തിച്ച കഥയും, കഥാപാത്രത്തിന്റെ മാനസികാവസ്ഥയും എല്ലാം കൂടി ചേർന്നപ്പോൾ ലഭിച്ചത് അക്ഷരാർത്ഥത്തിൽ രോമാഞ്ചം ആണ്, ഏതെങ്കിലും ഒരു സീൻ കഴിഞ്ഞ ഉടനെ റിപ്പീറ്റ് ആയി കാണാൻ കഴിഞ്ഞെങ്കിൽ എന്ന് അടുത്ത കാലത്ത് തോന്നിയിട്ടുണ്ടെങ്കിൽ അത് ഈ സീൻ ആയിരിക്കും. സിക്സ്റ്റീൻ ഹൺഡ്രഡ് മെൻ എന്ന ഈ സീനിൽ വരുന്ന സോങ്ങിന് പ്രത്യേക പരാമർശം. കൂടുതൽ പറയുന്നില്ല, കാണുക കഴിയുമെങ്കിൽ ബിഗ് സ്‌ക്രീനിൽ തന്നെ.

Verdict : Must Watch

DC Rating : 90/100

673. Little Women (2019)

Director : Greta Gerwig

Genre : Drama

Rating : 8.3/10

Country : USA

Duration : 136 Minutes

🔸അങ്ങനെ ഈ വർഷത്തെ ഓസ്കാർ ചർച്ചകളും സാധ്യതകളും എല്ലാം ചർച്ചകളാൽ പൊടി പൊടിക്കുമ്പോൾ ഫ്രണ്ട് റോയിൽ ഇരിക്കാൻ കെല്പുള്ള ഒരു ചിത്രത്തിന്റെ പ്രിന്റ് കൂടി ഡിവിഡി സ്ക്രീനർ രൂപേണ ലഭ്യമായിരിക്കുകയാണ്. ഓസ്കർ വേർതി എന്നൊക്കെ ടൈറ്റിലിനോടൊപ്പം തന്നെ ചേർക്കാവുന്ന ഷുവർ ഷോട്ട് ചിത്രങ്ങളിൽ ഒന്നാണ് ലിറ്റിൽ വുമൺ. നല്ലൊരു കാസ്റ്റ് ഉണ്ട്, അത്യാവശ്യം പ്രശസ്തമായ ഒരു നോവലിന്റെ ചലച്ചിത്രാവിഷ്കാരം ആണ്, എല്ലാത്തിനും പുറമെ അക്കാഡമി സ്ഥിരമായി പരിഗണിക്കാറുള്ള ജനുസ്സിൽ പെട്ട ഒന്ന് കൂടിയാണ് ചിത്രം.

🔸ലൂയിസ മെയ് അൽകോട്ടിന്റെ ഒറിജിനൽ നോവൽ ദൈവം സഹായിച്ച് വായിച്ചിട്ടില്ല, ലിറ്ററേച്ചറിലെ നാഴിക കല്ലുകളിൽ ഒന്നാണെന്നും നാല് സഹോദരിമാരുടെ ജീവിതമാണ് നോവലിന് ആധാരം എന്നുമുള്ള കേട്ടറിവ് മാത്രമേ ആ ഭാഗത്ത് ഉള്ളൂ. പിന്നെയുള്ളൊരു അറിവ് ചില സംശയങ്ങൾക്കാണ് വഴി വെച്ചത്, കാര്യം വേറൊന്നുമല്ല നാല് കഥാപാത്രങ്ങളുടെയൊക്കെ ലൈഫ് പ്രമേയം ആകുമ്പോൾ സ്വാഭാവികമായും വലിയൊരു കഥ തന്നെ ആയിരിക്കും സോഴ്സ് മെറ്റിരിയലിന്റേത്, അതിനോട് നീതി പുലർത്താൻ ഈ രണ്ടേകാൽ മണിക്കൂർ കൊണ്ട് സാധിക്കുമോ എന്ന സംശയം.

🔸വലിയൊരു സ്റ്റോറി വെട്ടിച്ചുരുക്കി ആവശ്യാനുസരണം മാറ്റി മറിക്കുമ്പോൾ ഉണ്ടാവുന്ന ദുരന്തത്തിന് രണ്ട് വർഷം മുന്നേ വന്ന ഡാർക്ക് ടവർ തന്നെ നല്ലൊരു ഉദാഹരണമാണ്, ഈ വഴിയേ ചിത്രം പോകുമോ എന്ന കാര്യത്തിൽ മാത്രമായിരുന്നു സംശയം. അതുണ്ടായില്ല എന്ന് മാത്രമല്ല നല്ല കെട്ടുറപ്പുള്ള ശക്തമായ രീതിയിൽ തന്നെ ചിത്രം കഥ പറഞ്ഞ് പോകുന്നുണ്ട്. ജോ, മെഗ്, ആമി, ബെത് എന്നീ മാർച്ച് സഹോദരിമാരുടെ കഥയാണ് ചിത്രം പറയുന്നത്, ടീനേജ് ഒക്കെ കഴിഞ്ഞ് യൗവനത്തിലേക്ക് കടന്നിട്ടേ ഉള്ളൂ ഈ കഥാപാത്രങ്ങളെല്ലാം, അതിന്റെതായ അനിശ്ചിതത്വങ്ങളും ടെൻഷനും എല്ലാം ചിത്രം ഭംഗിയായി കാണിക്കുന്നുമുണ്ട്.

🔸ഒട്ടനവധി റിലേഷൻഷിപ്പും അല്ലാതെയുമുള്ള ഡ്രാമകളിലൂടെ കടന്ന് പോവുന്ന ഈ കഥാപാത്രങ്ങൾക്കിടയിലേക്ക് ലോറി എന്ന തിമോത്തി ശാലമാറ്റ് അവതരിപ്പിക്കുന്ന കഥാപാത്രം കടന്ന് വരുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ കഥ, ഇതിൽ നിന്നും ഒരു ലവ് ട്രയാങ്കിലും അതിനെ തുടർന്ന് സഹോദരിമാർക്ക് ഇടയിൽ വളരുന്ന പകയും പ്രതികാരവും പോലുള്ള ക്ലിഷേ ഐറ്റംസ് പ്രതീക്ഷിക്കേണ്ടതില്ല, ആ വഴിയേ പോകാനുള്ള ശ്രമം ചിത്രം നടത്തുന്നുമില്ല. കൺസപ്റ്റ് ആയാലും കഥ ആയാലും ഒരു ഫ്രഷ് ഫീൽ ചിത്രം എല്ലായിടത്തും പകരുന്നുണ്ട് എന്നത് എടുത്ത് പറയണം.

🔸വർഷങ്ങൾ നീണ്ടുനിൽക്കുന്ന കഥയാണ് ചിത്രത്തിന്റേത്, വർത്തമാന കാലവും ഭൂതകാലവും ഇട കലർന്ന രീതിയിൽ നോൺ ലീനിയർ ശൈലിയിലാണ് ചിത്രം പുരോഗമിക്കുന്നതും. സ്യോരിസ് റൊണാൻ, എമ്മ വാട്ട്സൺ, ഫ്ലോറൻസ് പഗ്, എലിസ സ്കാൻലൻ തുടങ്ങിയവർ നാല്‌ പ്രധാന സഹോദരി കഥാപാത്രങ്ങളെയും തന്മയത്വത്തോടെ തന്നെ അവതരിപ്പിച്ചിരിക്കുന്നു, വേറിട്ട വ്യക്തിത്വങ്ങൾ ഈ കഥാപാത്രങ്ങൾക്കെല്ലാം ഉണ്ട്. ഇവർക്ക് പുറമെ മെറിൽ സ്ട്രീപ്, ലോറ ടേൺ എന്നിവരും സുപ്രധാനമായ കഥാപാത്രങ്ങളായി എത്തുന്നുണ്ട്. ഒരു ഡ്രാമ ചിത്രമാണ് ലിറ്റിൽ വുമൺ, അപ്രതീക്ഷിതമായ ട്വിസ്റ്റുകൾ ഒന്നും പ്രതീക്ഷിക്കേണ്ടതില്ല, എന്നാൽ ആദ്യാവസാനം പിടിച്ചിരുത്തുന്ന ഒരു ഫ്രഷ് ഫീലുണ്ട് ഈ ചിത്രത്തിന്, അതൊക്കെ തന്നെ ധാരാളം ആണല്ലോ.

Verdict : Must Watch

DC Rating : 90/100

Oscar 2020 - DC Edition

The Academy Awards, more popularly known as the Oscars, are awards for artistic and technical merit in the film industry. Given annually by the Academy of Motion Picture Arts and Sciences, the awards are an international recognition of excellence in cinematic achievements as assessed by the Academy's voting membership. The various category winners are awarded a copy of a golden statuette, officially called the "Academy Award of Merit", although more commonly referred to by its nickname, the "Oscar".The 92nd Academy Awards ceremony, which honors the best films of 2019, will be held on February 9, 2020. The ceremony will again be broadcast on ABC. It will take place at the Dolby Theatre in Los Angeles, California, for the 18th consecutive year. (Courtesy - Wikipedia)

Best Adapted Screenplay

🔸 Little Women

🔸 Two Popes

🔸 Irishman

🔸 Ford VS Ferrari

🔸 Toy Story

🔸 Jojo Rabbit


Winner : The Irishman


Visual Effects

🔸 Ad Astra

🔸 1917

🔸 The Irishman

🔸 Avengers Endgame

🔸 Alita The Battle Angel

🔸 Star Wars The Rise Of Skywalker


Winner : Ad Astra


Sound Mixing

🔸 1917

🔸 Once Upon A Time In Hollywood

🔸 Rocket-Man

🔸 Ford VS Ferrari

🔸 Waves

🔸 Irishman


Winner : 1917


Best Original Screenplay

🔸 Marriage Story

🔸 Parasite

🔸 Knives Out

🔸 Once Upon A Time In Hollywood

🔸 The Last Black Man In San Francisco

🔸 A Hidden Life


Winner : Marriage Story


Sound Editing

🔸 1917

🔸 Ford VS Ferrari

🔸 The Irishman

🔸 Once Upon A Time In Hollywood

🔸 Ad Astra

🔸 The Lighthouse


Winner : The Lighthouse


Production Design

🔸 Joker

🔸 Once Upon A Time In Hollywood

🔸 1917

🔸 Parasite

🔸 Jojo Rabbit

🔸 Little Women


Winner : Once Upon A Time In Hollywood


Music Original Song

🔸 Rocket-Man

🔸 Frozen 2

🔸 The Lion King

🔸 Aladdin

🔸 Motherless Brooklyn

🔸 Harriet


Winner : Rocket-Man


Music Original Score

🔸 1917

🔸 Marriage Story

🔸 Jojo Rabbit

🔸 Little Women

🔸 Ford VS Ferrari

🔸 The Farewell


Winner : 1917


Makeup And Hairstyling

🔸 Dolemite Is My Name

🔸 Bombshell

🔸 Rocket-Man

🔸 Joker

🔸 Little Women

🔸 Downton Abbey


Winner : Little Women


Foreign Language Film

🔸 Parasite

🔸 Beanpole

🔸 Truth And Justice

🔸 Honeyland

🔸 Pain And Glory

🔸 Atlantics


Winner : Parasite


Film Editing

🔸 Irishman

🔸 Joker

🔸 Once Upon A Time In Hollywood

🔸 Marriage Story

🔸 1917

🔸 The Lighthouse


Winner : The Irishman


Costume Design

🔸 Rocket-Man

🔸 Little Women

🔸 Downton Abbey

🔸 Jojo Rabbit

🔸 Once Upon A Time In Hollywood

🔸 Hustlers


Winner : Little Women


Cinematography

🔸 1917

🔸 The Irishman

🔸 Ford VS Ferrari

🔸 Joker

🔸 Once Upon A Time In Hollywood

🔸 A Hidden Life


Winners : 1917


Best Director

🔸 Noah Baumbach

🔸 Bong Joon Ho

🔸 Sam Mendes

🔸 Martin Scorcese

🔸 Quentin Tarantino

🔸 Greta Gerwig


Winner : Martin Scorcese


Best Animated Feature

🔸 I Lost My Body

🔸 Toy Story 4

🔸 Weathering With You

🔸 Frozen 2

🔸 Klaus

🔸 How To Train Your Dragon 3


Winner : I Lost My Body


Best Supporting Actress

🔸 Laura Dern

🔸 Margot Robbie

🔸 Zhao Shuzen

🔸 Kathy Bates

🔸 Jennifer Lopez

🔸 Florence Pugh


Winner : Zhao Shuzen


Best Supporting Actor

🔸 Tom Hanks

🔸 Al Pacino

🔸 Joe Pesci

🔸 Brad Pitt

🔸 Anthony Hopkins

🔸 Willem Dafoe


Winner : Willem Dafoe


Best Actress

🔸 Charlize Theron

🔸 Scarlette Johanssen

🔸 Saoirse Ronan

🔸 Lupita Nyongo

🔸 Cynthia Erivo

🔸 Awkwafina


Winner : Scarlette Johanssen


Best Actor

🔸 Robert De Niro

🔸 Joaquin Phoenix

🔸 Adam Driver

🔸 Leonardo Dicaprio

🔸 Christian Bale

🔸 August Diehl


Winner : Adam Driver


Best Movie

🔸 1917

🔸 The Irishman

🔸 Marriage Story

🔸 Joker

🔸 Little Women

🔸 Once Upon A Time In Hollywood


Winner : The Irishman


"Let 2020 be a terrific year for all the cinemaholics out there...."

672. Bombshell (2020)

Director : Jay Roach

Genre : Drama

Rating : 6.6/10

Country : USA

Duration : 110 Minutes

🔸ഈ ചിത്രത്തെ പറ്റി കൂടുതൽ എന്തെങ്കിലും പറയുന്നതിന് മുന്നേ ഒരു ചെറിയ ജാമ്യം ആവാം, ഫോക്സ് ന്യുസിൽ പ്രവർത്തിച്ചിരുന്ന സ്ത്രീ കഥാപാത്രങ്ങളും സീഇഓ ആയിരുന്ന റോബർട്ട് ഈഗിൾസും തമ്മിൽ ലൈംഗിക ആരോപണത്തിൽ നിന്നും ഉടലെടുത്ത പോരാണ് ബോംബ്ഷെൽ എന്ന ചിത്രത്തിന്റെ ആധാരം. ജാമ്യം എന്താണെന്നാൽ ഈ വിഷയത്തെ കുറിച്ച് ആധികാരികമായി പറയാനും മാത്രം അറിവില്ല എന്നതാണ്, ചില ആർട്ടിക്കിളുകളിലും മറ്റും കണ്ട ബേസിക് ആയ അറിവ് മാറ്റി നിർത്തിയാൽ മറ്റൊന്നും തന്നെ പിടിയില്ല. ഈ കാരണം കൊണ്ട് തന്നെ സിനിമയിൽ കാണിച്ചിരിക്കുന്ന കാര്യങ്ങളുടെ ജനുവിനിറ്റി എത്രത്തോളം ആണെന്നും പിടിയില്ല, തൽക്കാലത്തേക്ക് ഇതാണ് ശെരി എന്ന് കരുതുന്നു.

🔸ഫോക്സ് ന്യുസ് ചാനൽ എന്താണെന്നും ഏതാണെന്നും ഉള്ള ചാർളീസ് തെറോൺ അവതരിപ്പിക്കുന്ന കഥാപാത്രത്തിന്റെ പരിചയപ്പെടുത്തലോട് കൂടിയാണ് ചിത്രം ആരംഭിക്കുന്നത്. ഒരു രാജ്യത്തെ ജനങ്ങൾ എങ്ങിനെ നോക്കികാണണം, അല്ലെങ്കിൽ ഒരു നേതാവിനോടുള്ള ജനങ്ങളുടെ സമീപനം എന്തായിരിക്കണം തുടങ്ങി ഒരുപാട് കാര്യങ്ങൾ, എന്തിന് രാജ്യ സുരക്ഷയെ വരെ ബാധിക്കുന്ന തരം കാര്യങ്ങൾ നിയന്ത്രിക്കാൻ കഴിവുള്ളവരാണ് ഇന്നത്തെ മീഡിയ. അപകടകരമായ ഒരു വസ്തുത ആണെങ്കിലും ഇതാണ് സത്യം, മെഗ്ഗിൻ കെല്ലി പറയുന്നത് പോലെ ഈ ഒരു കെട്ടിടത്തിൽ ഇരുന്ന് കൊണ്ടാണ് ഫോക്സ് ഒരു പരിധി വരെ രാജ്യത്തെ നിയന്ത്രിക്കുന്നത്.

🔸തന്റെ തിരഞ്ഞെടുപ്പ് കാലത്ത് ഡൊണാൾഡ് ട്രെമ്പുമായി മെഗ്ഗിൻ കെല്ലി നടത്തുന്ന ഡിബേറ്റിലൂടെ ആണ് ചിത്രം ട്രാക്ക് മാറ്റുന്നത്, സ്ത്രീകളുടെ അവകാശങ്ങൾക്കും തുല്യതയ്ക്കും എല്ലാം വലിയ പ്രാധാന്യം നൽകുന്ന വ്യക്തിയാണ് മെഗ്ഗിൻ കെല്ലി, അത്തരമൊരു വ്യക്തി സ്ഥലമോ സന്ദർഭമോ നോക്കാതെ സ്ത്രീയെന്നോ പുരുഷനെന്നോ ബേധമില്ലാതെ വായിൽ തോന്നുന്നത് വിളിച്ച് പറയുന്ന ട്രംപിനെ പോലൊരാളെ നേരിട്ടാൽ എന്ത് സംഭവിക്കുമോ അത് തന്നെയാണ് അവിടെ അരങ്ങേറിയതും. കാര്യങ്ങൾ ഒന്നും കെല്ലി വിചാരിച്ച തോതിലേക്ക് പോയില്ല എന്നത് വേറെ കാര്യം.

🔸ഇങ്ങനെ കെല്ലിയും ട്രംപും തമ്മിലുള്ള ശീത സമരം പുകഞ്ഞ് കൊണ്ടിരിക്കുമ്പോഴാണ് മറ്റൊരു ഭാഗത്ത് നിന്നും ഒട്ടും പ്രതീക്ഷിക്കാത്തൊരു ബോംബ് പൊട്ടുന്നത്, കഥയിലെ റ്റേർണിങ് പോയിന്റ് എന്നൊക്കെ വിശേഷിപ്പിക്കാൻ കഴിയുന്ന ഐറ്റം. ഗ്രെറ്റ്ചൻ കാൾസൺ എന്ന ഫോക്സ് ന്യുസിന്റെ ആങ്കർ കമ്പനിയുടെ ഉന്നത സ്ഥാനങ്ങളിൽ ഒന്ന് കയ്യാളുന്ന വ്യക്തിക്ക് എതിരെ ഒരു ആരോപണം ഉന്നയിക്കുകയാണ്, ലൈംഗിക ആരോപണം തന്നെ. ഈ ഒരു ആരോപണത്തോടൊപ്പം താൻ മാത്രമല്ല, ഫോക്സിന് കീഴിൽ ജോലി ചെയ്യുന്ന സ്ത്രീകളിൽ കുറെ പേർക്ക് കൂടി ഇത്തരം അനുഭവങ്ങൾ നേരിടേണ്ടി വന്നിട്ടുണ്ട് എന്നവർ വെളിപ്പെടുത്തുമ്പോൾ കാര്യത്തിന്റെ ഗൗരവം കൈവിട്ട് പോവുകയാണ്.

🔸ഇവിടെ നിന്നുമാണ് കഥ ഒന്ന് ചൂട് പിടിക്കുന്നത്, നല്ല ഒന്നാന്തരം കാസ്റ്റ് ആണ് ചിത്രത്തിന്റേത്. മുകളിൽ സൂചിപ്പിച്ച രണ്ട് കഥാപാത്രങ്ങളെയും യഥാക്രമം അവതരിപ്പിച്ച ചാർളീസ് തെറോണിനും, നിക്കോൾ കിഡ്മാനും പുറമെ നിർണ്ണായകമായ ഒരു കഥാപാത്രമായി മാർഗോട്ട് റോബ്ബിയും ചിത്രത്തിലുണ്ട്. അതീവ ഗൗരവകരമായ ഒരു വിഷയത്തെ അർഹിക്കുന്ന പ്രാധാന്യത്തോടെ അവതരിപ്പിക്കാൻ കഴിഞ്ഞിട്ടുണ്ടോ എന്ന കാര്യത്തിൽ ചെറിയ സംശയമുണ്ടെങ്കിലും ഒരു തവണ കാണാൻ ഉള്ള ചിത്രം തന്നെയാണ് ബോംബ്ഷെൽ. പ്രധാന താരങ്ങളുടെ എല്ലാം പ്രകടനം തന്നെയാണ് ചിത്രത്തിന്റെ ബാക്ക്ബോൺ, ആകെ മൊത്തം ഇഷ്ട്ടപ്പെട്ടു.

Verdict : Good

DC Rating : 75/100

671. Richard Jewell (2020)

Director : Clint Eastwood

Genre : Drama

Rating : 7.7/10

Country : USA

Duration : 129 Minutes

🔸ചില ചിത്രങ്ങൾ കാണാൻ താല്പര്യപ്പെടാൻ ഒരു ചെറിയ സ്പാർക്ക് മതി, ഈ സ്പാർക്ക് എന്ന് പറയുന്നത് ചിലപ്പോ സിനിമ കൈകാര്യം ചെയ്യുന്ന വിഷയമോ ഇല്ലെങ്കിൽ ട്രെയിലറിൽ കണ്ട ചില കാര്യങ്ങളോ അല്ലെങ്കിൽ സ്ക്രീനിന്റെ മുന്നിലുള്ള താരങ്ങളോ ആവാം, ചില സന്ദർഭങ്ങളിൽ സ്‌ക്രീനിന്റെ പിറകിൽ ഉള്ളവരുമാവാം. ഈ ഒരു സ്പാർക്കിന്റെ കാര്യം എടുക്കുക ആണെങ്കിൽ ക്ലിന്റ് ഈസ്റ്റ്‌വുഡ് എന്ന പേര് അതിൽ പെട്ടേക്കില്ല, അത് സ്പാർക്കല്ല മറിച്ച് വെടിമരുന്നാണ്. ഈ പറയുന്ന എല്ലാത്തിന്റെയും തലതൊട്ടപ്പനായിട്ട് വരും പുള്ളി, ഈ ഒരു ഫാക്ടർ തന്നെയാണ് സത്യത്തിൽ റിച്ചാർഡ് ജ്യുവൽ എന്ന ചിത്രത്തിൽ താല്പര്യം തോന്നാൻ ഉണ്ടായ ഏറ്റവും വലിയ കാരണവും.

🔸എൺപതുകളുടെ പാതിയിലാണ് ചിത്രം ആരംഭിക്കുന്നത്, ഒരു ചെറിയ ലോ ഫിർമിൽ സഹായി ആണ് റിച്ചാർഡ് ജ്യുവൽ എന്ന നായക കഥാപാത്രം, അതെ ഫിർമിലെ അറ്റോർണി ആണ് സാം റോക്ക്വെൽ അവതരിപ്പിക്കുന്ന വാട്സൺ ബ്രയന്റ്. അത്യാവശ്യം ചൂടനായ വാട്സണും റിച്ചാർഡും തമ്മിൽ ഉടലെടുക്കുന്ന സൗഹൃദവും മറ്റും കാണിച്ച് കൊണ്ടാണ് ചിത്രം ആരംഭിക്കുന്നത്, ഈ രണ്ട് കഥാപാത്രങ്ങൾക്കിടയിലും രൂപപ്പെടുന്ന സൗഹൃദം പോകെ പോകെ പ്രധാനമായി മാറുന്നുണ്ട്, പുതിയൊരു ചിത്രം ആയതിനാലും സ്പോയ്ലർ ആവുമെന്നതിനാലും കഥയിലേക്ക് അധികം കടക്കുന്നില്ല.

🔸കൂടുതൽ കഥയിലേക്ക് കടക്കുന്നതിന് മുന്നേ ഒരു ചെറിയ കാര്യം പറഞ്ഞിടാം, അടുത്ത കാലത്ത് കാണുന്ന പല സിനിമകളിലും പ്രോഡക്റ്റ് പ്ലേസ്മെന്റ് ഇച്ചിരി അരോചകമായി തോന്നുന്നുണ്ട്, ഇവിടെയും ഉണ്ട് അത്യാവശ്യം നല്ലൊരു പ്രധാനപ്പെട്ട സീനിൽ. ഒരു പരിധി വരെ അനാവശ്യം എന്നൊക്കെ പറയാവുന്ന ഈ പ്രോഡക്റ്റ് പ്ലേസ്മെന്റ് കാഴ്ചക്കാരന്റെ ശ്രദ്ധ തിരിക്കുന്നതാണെന്ന് പറയാതെ വയ്യ. കഥയിലേക്ക് വരിക ആണെങ്കിൽ ചെറിയൊരു ഔറ്റ്ലൈൻ ആവാം, സ്പോയ്ലർ ഒട്ടും ഇല്ലാതെ തന്നെ. അമേരിക്കയിൽ അത്യാവശ്യം കോളിളക്കം സൃഷ്ട്ടിച്ച ഒരു കേസ് ആണ് റിച്ചാർഡ് ജ്യുവലിന്റേത്.

🔸ഇന്നത്തെ സാഹചര്യത്തിൽ, പ്രത്യേകിച്ചും വായിൽ വരുന്നത് കോതയ്ക്ക് പാട്ട് എന്ന തോതിലുള്ള മീഡിയ റിപ്പോർട്ടിങ്ങിന്റെ ഈ കാലത്ത് വളരെ പ്രസക്തമായ ഒന്നാണ് ജ്യുവലിന്റെ കഥ. വിക്ടിം തന്നെ കുറ്റവാളി ആയി മാറുന്ന അല്ലെങ്കിൽ ആടിനെ പട്ടിയാക്കുന്ന ടൈപ്പ് സംഭവ വികാസങ്ങൾ നമ്മൾ നമ്മുടെ ചുറ്റിനും അനവധി കണ്ടതാണ്, ആയതിനാൽ തന്നെ നമുക്ക് ഇതൊരു പുതുമയായി തോന്നിയേക്കില്ല, എന്നാൽ ജ്യുവലിന്റെ വിഷയം രാജ്യ സുരക്ഷയും തീവ്രവാദവും വരെയുള്ള തോതിലേക്ക് പോയ കൈവിട്ട കളി തന്നെ ആയിരുന്നു. ഇതാണ് ഈസ്റ്റ്‌വുഡ് സ്‌ക്രീനിൽ എത്തിക്കുന്നതും.

🔸പ്രശ്നങ്ങൾ ഇല്ലാത്ത ചിത്രമല്ല റിച്ചാർഡ് ജ്യുവൽ, കാരക്ടർ മോട്ടിവേഷനും ഡെവെലപ്മെന്റും ഉൾപ്പെടെയുള്ള ചില കാര്യങ്ങളിൽ ചില ഇടത്ത് കൈവിട്ട കളി പോലെ അനുഭവപ്പെട്ടു എങ്കിലും അതൊന്നും കഥയുടെ ഒഴുക്കിനെ ബാധിക്കുന്നില്ല. നല്ലൊരു കാസ്റ്റ് ആണ് ചിത്രത്തിന്റേത്, നായകനായി എത്തിയ പോൾ വാൾട്ടർ അത്ര ഫെമിലിയർ ആയിരുന്നില്ല എങ്കിലും കാത്തി ബേറ്റ്സ് സാം റോക്ക്‌വെൽ തുടങ്ങിയവർ ഉൾപ്പെട്ട സപ്പോർട്ടിങ് നിര അതിശക്തം തന്നെയാണ്, ഒരു നീണ്ട ഇടവേളയ്ക്ക് ശേഷമാണ് കാത്തിയുടെ ശക്തമായ ഒരു കഥാപാത്രം സ്‌ക്രീനിൽ കാണാൻ കഴിഞ്ഞത്. ഒരു റിയൽ ലൈഫ് സംഭവത്തിന്റെ ഒരു തവണ കാണാവുന്ന നല്ലൊരു ചലച്ചിത്രാവിഷ്കാരം ആണ് റിച്ചാർഡ് ജ്യുവൽ, കൂടുതലും ഇല്ല കുറവുമില്ല.

Verdict : Good

DC Rating : 70/100

670. Dolemite Is My Name (2019)

Director : Craig Brewer

Genre : Biography

Rating : 7.3/10

Country : USA

Duration : 118 Minutes

🔸ഒരു വർഷത്തിന്റെ തുടക്കത്തിൽ തന്നെ കണ്ടത് ഈ ചിത്രമാണ് എന്ന് അഭിമാനത്തിൽ പറയാൻ കഴിയുന്നൊരു ചിത്രം, അതാണ് ഡോളമൈറ്റ് ഈസ് മൈ നെയിം. അടുത്ത കാലത്ത് ഒന്നും തന്നെ ഒരു ചിത്രത്തോടും അതിലെ നായക കഥാപാത്രത്തോടും ഇത്രയും അറ്റാച്ച്മെന്റ് തോന്നിയിട്ടില്ല, സ്ക്രീനിലെ ഒരു കഥാപാത്രം തന്റെ സ്വപ്നത്തിനും വിജയത്തിനുമായി ആത്മാർത്ഥമായി ശ്രമിക്കുമ്പോൾ അറിയാതെ നമ്മളും അത് ആഗ്രഹിച്ച് പോവുന്നുണ്ടെങ്കിൽ അത് ആ സിനിമയുടെ വിജയമാണ്, ഇവിടെ ആ കാര്യത്തിൽ ഡോളമൈറ്റും വിജയം തന്നെയാണ്.

🔸എഴുപതുകളിൽ പുറത്തിറങ്ങിയ ഹോളിവുഡ് ബ്ലാക്സ്പ്ലോയിട്ടേഷൻ ചിത്രമാണ് ഡോളമൈറ്റ്, ചിത്രത്തെ അന്ത കാലത്ത് നിരൂപകർ എടുത്തിട്ട് അലക്കി വിട്ടതാണ് എന്ന് പറയാം. ഏൽക്കാതെ പോവുന്ന പരിതാപകരമായ ഹ്യുമർ, സോൾ ഇല്ലാത്ത സ്റ്റോറി, അവഹേളനം എന്നൊക്കെ വിശേഷിപ്പിക്കാവുന്ന കഥയും കഥാപാത്രങ്ങളും തുടങ്ങി നിരൂപക സിംഹങ്ങൾ ചിത്രത്തിൽ കാണാത്ത കുറ്റങ്ങൾ ഇല്ലായിരുന്നു എന്ന് തന്നെ പറയാം. ചിലർ ചിത്രത്തെ വിശേഷിപ്പിച്ചത് വർഷത്തെ ഏറ്റവും വലിയ ദുരന്തം എന്നൊക്കെയാണ്, ഇതാണ് യഥാർത്ഥ ചിത്രത്തിന്റെ ഒരു ചെറിയ ബാക്ക്ഗ്രൗണ്ട്.

🔸എന്നാൽ സാമ്പത്തികപരമായി വൻ വിജയം ആയിരുന്നു ഡോളമൈറ്റ്, മുടക്ക് മുതലിന്റെ പതിനാറ് ഇരട്ടിയോളം തുക തിയേറ്ററുകളിൽ നിന്നും വാരി കൂട്ടിയ ചിത്രത്തിന് വര്ഷങ്ങളുടെ ഇടവേളയിൽ സീക്വലുകളും വൻ ഫാൻ ഫോളോയിങ്ങും ലഭിച്ചിരുന്നു. പോയ വർഷങ്ങൾക്കുള്ളിൽ ഒരു കൾട്ട് ഫോളോയിങ് ചിത്രത്തിന് ലഭിച്ചു എന്നൊക്കെ പറയാം. ഈ ചിത്രത്തിന്റെ പിറവിക്ക് പിന്നിൽ അസാധാരണം എന്നൊക്കെ വിശേഷിപ്പിക്കാവുന്ന ഒരു കഥയുണ്ട്, ആ കഥയാണ് ഡോളമൈറ്റ് ഈസ് മൈ നെയിം എന്ന ചിത്രം.

🔸എഡി മർഫി എന്ന നടനോടും പുള്ളിയുടെ ചിത്രങ്ങളോടും പണ്ട് തൊട്ടേ ഒരു ഇഷ്ടക്കൂടുതൽ ഉണ്ട്, കമിങ് ടു അമേരിക്ക ബീവേർലി ഹിൽസ് കോപ്പ് തുടങ്ങിയ ചിത്രങ്ങളിലൂടെ തന്റെ ടാലന്റ് എന്താണെന്ന് പുള്ളി തെളിയിച്ചിട്ടുള്ളതുമാണ്, ഇൻ ഷോർട്ട് എഡി മർഫി കിടു ആണ്. ഈ എഡി മർഫിയുടെ ഒരു ഇടക്കാലത്തിന് ശേഷമുള്ള മടങ്ങിവരവ് കൂടിയാണ് ഈ ചിത്രം, ടാലന്റ് ഈസ് പെര്മനെന്റ് എന്നൊക്കെ പറയുന്നതിന്റെ ടെക്സ്റ്റ് ബുക് എക്‌സാംപിൾ ആണ് ഈ ചിത്രമെന്ന് പറയാം. ഡോളമൈറ്റ് എന്ന ചിത്രത്തിന് പിന്നിലെ ബ്രെയിൻ ആയ റൂഡി മൂറിനെയാണ് എഡി ഇവിടെ അവതരിപ്പിക്കുന്നത്.

🔸സിനിമ കാണുക എന്നതിൽ കവിഞ്ഞ് ഒരു താല്പര്യവും ഒരു കാലത്തും ഈ മേഖലയോട് തോന്നിയിട്ടില്ല എന്നതാണ് സത്യം, എന്നാൽ ചുറ്റും ഉള്ള അനവധി സുഹൃത്തുക്കളുടെ പാഷനും ഇഷ്ടത്തിനും അനവധി തവണ സാക്ഷിയാകാൻ കഴിഞ്ഞിട്ടുമുണ്ട്. അത്തരത്തിൽ ഉള്ള ഒരാളാണ് നിങ്ങളെങ്കിൽ ജസ്റ്റ് വാച്ച്, പ്രത്യേകിച്ചും ഇതിന്റെ അവസാനത്തെ ഒരു മുപ്പത് മിനിറ്റ് തരുന്നൊരു സംപ്ത്രിപ്തി ഉണ്ട്, അധികം ചിത്രങ്ങൾക്കൊന്നും അത് തരാൻ കഴിഞ്ഞേക്കില്ല. കഴിഞ്ഞ വർഷത്തെ മികച്ച ചിത്രങ്ങളിൽ ഒന്ന്, ഈ വർഷത്തിന് ഒരു മികച്ച തുടക്കം, അതാണ് ഡോളമൈറ്റ് ഈസ് മൈ നെയിം.

Verdict : Must Watch

DC Rating : 90/100