1268. The Banshees Of Inisherin (2022)

Director : Martin Mcdonagh

Cinematographer : Ben Davis

Genre : Drama

Country : UK

Duration : 114 Minutes

🔸പോയ വർഷത്തെ മികച്ച സിനിമകളിൽ ഒന്ന് എന്ന വിശേഷണം നൂറ് ശതമാനം അർഹിക്കുന്ന മറ്റൊരു ചിത്രം കൂടി, ദി ബാൻഷീസ് ഓഫ് ഇനിഷെറിൻ എന്ന ചിത്രം തീർച്ചയായും ഈ ഒരു വിശേഷണം അർഹിക്കുന്നുണ്ട്. മാർട്ടിൻ മാക്ഡോണയുടെ റെസ്യുമ് തന്നെ മതി ഒരു സിനിമയ്ക്ക് പ്രതീക്ഷ നൽകാൻ, ത്രീ ബിബോർഡ്സ് പോലൊരു ഷാറ്ററിംഗ് ആയ അനുഭവം ഒന്നും തരുന്നില്ല എങ്കിൽ കൂടിയും അതൊരു പോരായ്മ അല്ല ഈ സിനിമയെ സംബന്ധിച്ച്, കാരണം ആ സെറ്റ് ചെയ്തിരിക്കുന്ന ബാർ അത്രയും ഉയരത്തിലാണ് എന്നത് തന്നെ. ഇരുപതാം നൂറ്റാണ്ടിന്റെ ആദ്യ കാലഘട്ടത്തിലെ ഒരു ഐറിഷ് ദ്വീപ് ആണ് സിനിമയുടെ കഥാ പശ്ചാത്തലം.

🔸പദ്രേയ്ക്, കോം എന്നിങ്ങനെ രണ്ട് അടുത്ത സുഹൃത്തുക്കൾ ആണ് ഈ സിനിമയുടെ പ്രധാന കഥാപാത്രങ്ങൾ. ഒരുമിച്ച് പള്ളിയിലും, പബ്ബിലും, കടൽ തീരത്തും ഒക്കെ പോവുന്ന ഇവർക്ക് ഇടയിൽ ഒരുനാൾ ഒരു പ്രശ്നം ഉടൽ എടുക്കുകയാണ്. അതായത് ഒരു ദിവസം രാവിലെ തൊട്ട് കോം പദ്രേയ്കിനോട് മിണ്ടുന്നില്ല, പ്രത്യേകിച്ച് കാര്യമോ കാരണമോ ഒന്നും അയാൾക്ക് പറയാനില്ല, മിണ്ടുന്നില്ല അത്ര തന്നെ. ദ്വീപ്പിലെ തന്റെ ഏറ്റവും അടുത്ത സുഹൃത്തായ കോമിന്റെ ഈ പെരുമാറ്റത്തിൽ പൊടുന്നനെ ഉള്ള മാറ്റം ഉൾക്കൊള്ളാൻ പദ്രേയ്ക്കിന് കഴിയുന്നില്ല. ഈ ഒരു വസ്തുത അയാളെ ഭ്രാന്തമായ ഒരവസ്ഥയിലേക്ക് കൊണ്ട് പോവുകയാണ്, തുടർന്ന് അരങ്ങേറുന്ന രസകരമായ അതേസമയം വിചിത്രമായ കാര്യങ്ങൾ ആണ് ഈ സിനിമ.

🔸പ്രകടനം ആണ് സിനിമയുടെ ഏറ്റവും വലിയ പ്ലസ് പോയിന്റുകളിൽ ഒന്നും, ആരും തന്നെ മോശം അല്ല എങ്കിലും കൊളിൻ ഫെറൽ പ്രത്യേക പരാമർശം അർഹിക്കുന്നുണ്ട്, ബ്രെണ്ടൻ ഗ്ളീസനും കിടിലൻ ആയിരുന്നു. സിനിമയുടെ ആദ്യ പകുതിയേ അപേക്ഷിച്ച് കുറച്ച് കൂടി ഡാർക്ക്‌ ആൻഡ് ട്രാജിക് ആണ് രണ്ടാം പകുതി, എന്നാൽ ആ ബാലൻസ് മികച്ച രീതിയിൽ നിലനിർത്താൻ സംവിധായകന് സാധിച്ചിട്ടുണ്ട്. സിനിമ അരങ്ങേറുന്ന മനോഹരമായ താഴ്‌വരയുടെ ഭംഗി അങ്ങേയറ്റം മനോഹരമായ രീതിയിൽ ഒപ്പി എടുക്കാൻ സംവിധായകന് കഴിഞ്ഞിട്ടുണ്ട്, പ്രവചിക്കാൻ കഴിയാത്ത തോതിൽ പോവുന്ന കഥാ ഗതിയും മറ്റൊരു പ്ലസ് പോയിന്റ് ആണ്. ഇങ്ങനെ ആകെ മൊത്തം മികച്ച ഒരു അനുഭവം ആണ് ഈ സിനിമ, കാണാൻ തീർച്ചയായും ശ്രമിക്കുക.

Verdict : Must Watch

DC Rating : 4.5/5