1284. Babylon (2022)

Director : Damien Chazelle

Cinematographer : Linus Sandgren

Genre : Drama

Country : USA

Duration : 189 Minutes

🔸അൺ പോപ്പുലർ ആയ അഭിപ്രായങ്ങൾ ഒരു ട്രെൻഡ് ആയി മാറി കൊണ്ടിരിക്കുന്ന ഈ സമയത്ത് കഴിഞ്ഞ വർഷത്തെ സിനിമാ വ്യൂയിങ് അനുഭവങ്ങൾ വെച്ച് ഒരു ചെറിയ അൺ പോപ്പുലർ അഭിപ്രായം പറയാം, വേറൊന്നുമല്ല കഴിഞ്ഞ വർഷം ഞാൻ കണ്ട മികച്ച സിനിമകളിൽ ഒന്നാണ് ബാബിലോൺ എന്ന അഭിപ്രായം തന്നെ. പൊതുവെ നിരൂപകരെയും, സാധാരണക്കാരായ കാഴ്ചക്കാരെയും എല്ലാം രണ്ട് തട്ടിൽ നിർത്തിയ, ബോക്സ് ഓഫീസിൽ വൻ പരാജയം ഏറ്റ് വാങ്ങിയ ഈ ചിത്രം ആ ഫേറ്റ് അർഹിച്ചിരുന്നില്ല എന്ന് തന്നെയാണ് സിനിമ കണ്ട് കഴിഞ്ഞ വേളയിൽ തോന്നിയത്.

🔸മൂന്ന് കഥാപാത്രങ്ങളെ ഫോകസ് ചെയ്ത് കൊണ്ടാണ് സിനിമ മുന്നോട്ട് പോവുന്നത്, ആദ്യമേ തന്നെ കേന്ദ്ര കഥാപാത്രം എന്നൊക്കെയുള്ള വിശേഷണം അർഹിക്കുന്ന മാനുവൽ. ഒരു മെക്സിക്കൻ അഭയാർത്ഥി ആയി വരുന്ന മാനുവലിന്റെ വളർച്ച, അയാൾ ഒരു സിനിമ സെറ്റിലെ സഹായി ആയിരുന്നിടത്ത് തൊട്ട് സിനിമ കാണിക്കുന്നുണ്ട്, ഈ യാത്രയ്ക്കിടയിൽ ആണ് അയാൾ നെല്ലി ലൈറോയിയെ കണ്ട് മുട്ടുന്നത്. നെല്ലിയുടെ ഭാഷയിൽ പറയുക ആണെങ്കിൽ ലൈംലൈറ്റിൽ നിൽക്കാൻ വേണ്ടി, അല്ലെങ്കിൽ സ്റ്റാർ ആയി ജനിച്ചവളാണ് അവൾ. മൂന്നാമത്തെ വ്യക്തിത്വം ആണ് ജാക്ക് കോൺരാഡ്, ഒരു ലജണ്ടറി സ്റ്റാറ്റസ് ഒക്കെയുള്ള സിനിമാ നടൻ.

🔸നിശബ്ദ സിനിമ, ശബ്ദത്തിലേക്ക് മാറി കൊണ്ടിരിക്കുന്ന ഇരുപതുകളിൽ ആണ് ഈ സിനിമയും കഥ പറഞ്ഞ് തുടങ്ങുന്നത്. പിന്നീടങ്ങോട്ടുള്ള മൂന്ന് പതിറ്റാണ്ടുകൾ, സിനിമയോടൊപ്പം ഈ കഥാപാത്രങ്ങളും മാറുകയാണ്, നല്ലതിനും മോശത്തിനും വേണ്ടി. ഒടുവിൽ നല്ല ഒന്നാന്തരം ഒരു മോന്റെജ് കൂടി കാണിച്ച് കൊണ്ട് ബാബിലോണിന്റെ ടൈറ്റിൽ കാർഡ് പ്ളേ ചെയ്യുമ്പോൾ ഓർക്കാൻ ഒരുപാട് മോമെന്റുകൾ സിനിമ ബാക്കി വെക്കുന്നുണ്ട്. മിഡിൽ പോർഷനിൽ ഒരല്പം ട്രിമ്മ് ചെയ്തിരുന്നെങ്കിൽ നന്നായേനെ എന്ന അഭിപ്രായം ഒഴിച്ചാൽ പരാതികൾ ഒന്നുമില്ല, നന്നായി തന്നെ ഇഷ്ട്ടപ്പെട്ടു.

Verdict : Very Good

DC Rating : 4.25/5

1283. Godland (2022)

Director : Hlynur Palmason

Cinematographer : Maria Hausswolff

Genre : Drama

Country : Denmark

Duration : 143 Minutes

🔸വളരെ ബ്യൂട്ടിഫുൾ ആയി ചിത്രീകരിച്ച സിനിമയാണ് ഗോഡ്ലാണ്ട്, ഐസ്‌ലാണ്ട് എന്ന രാജ്യത്തിന്റെ പ്രത്യേകത കൊണ്ട് കൂടി ആവണം ഓരോ സീനിനും ഒരു പ്രത്യേക ഭംഗിയും, വല്ലാത്തൊരു നിഗൂഢതയും ഉണ്ടായിരുന്നു എന്ന് പറയേണ്ടി വരും. ഇഷ്ട സിനിമകളായ സയലൻസ്, അപ്പോകാലിപ്സ് നൗ തുടങ്ങിയവയും ആയി ചെറിയ സാമ്യങ്ങൾ പുലർത്തുന്നുണ്ട് ഈ സിനിമ. ഈ കാരണം കൊണ്ട് കൂടി നന്നായി ഇഷ്ട്ടപ്പെട്ട ഒരു സിനിമ അനുഭവമായി മാറുകയാണ് ഗോഡ്ലാണ്ട്. ഡെന്മാർക്കിലെ ഒരു പള്ളിയിൽ ആണ് കഥ ആരംഭിക്കുന്നത്, ഒരു വൈദികൻ ആണ് നമ്മുടെ പ്രധാന കഥാപാത്രമായ ലൂക്കാസ്.

🔸പത്തൊൻപതാം നൂറ്റാണ്ടിലാണ് കഥ അരങ്ങേറുന്നത്, ക്രിസ്ത്യൻ മിഷ്നറികൾ തങ്ങളുടെ മതം മറ്റ് രാജ്യങ്ങളിലേക്കും, വൻകരകളിലേക്കും എല്ലാം വളർത്തുന്നതിന്റെ ഭാഗമായി യുവാക്കളായ വൈദികരെ പള്ളി പണിയുന്നതിനും മറ്റും വേണ്ടി അയക്കുന്നത് സർവ സാധാരണമായ കാര്യം ആയിരുന്നു ഈ കാലഘട്ടത്തിൽ. അങ്ങനെ ആണ് ലൂക്കാസ് എന്ന വൈദികൻ കഥയിലേക്ക് വരുന്നത്, ഐസ്ലാണ്ടിലെ ഒരു ഒഴിഞ്ഞ ഗ്രാമത്തിൽ പുതിയ പള്ളി പണിയുക എന്നതാണ് അയാളുടെ ദൗത്യം. വൈദിക വേളയിൽ കാര്യമായ അനുഭവ പരിചയം ഒന്നും അയാൾക്ക് ഇല്ലെങ്കിലും അയാൾ ദൗത്യത്തിനായി ഇറങ്ങി തിരിക്കുകയാണ്.

🔸പ്രസ്തുത ഗ്രാമത്തിൽ എത്തി ചേരുക എന്നത് തന്നെ വലിയൊരു ദൗത്യം ആയിരുന്നു. കര കവിഞ്ഞ് ഒഴുകുന്ന പുഴയും, ലാവ ഒഴുക്കുന്ന അഗ്നി പർവതവും, മഞ്ഞ് മലകളും കടന്ന് വേണം ഗ്രാമത്തിൽ എത്താൻ. ലൂക്കാസിന് ആണെങ്കിൽ ഗ്രാമീണരുടെ ഭാഷയും പിടിയില്ല, ചുരുക്കി പറഞ്ഞാൽ നരക തുല്യമായ ദൗത്യം ആയിരുന്നു അയാളുടേത്. ഈ യാത്രയിലും തുടർന്ന് അങ്ങോട്ടും ലൂകാസ് നേരിടേണ്ടി വരുന്ന സംഭവങ്ങളും, ആഭിമുഖീകരിക്കേണ്ടി വരുന്ന ആളുകളും, കാണുന്ന കാഴ്ചകളും ഒക്കെയാണ് ഈ സിനിമ. നന്നായി ഇഷ്ട്ടപ്പെട്ട നല്ലൊരു സിനിമയാണ് ഗോഡ്ലാണ്ട്, താല്പര്യം തോന്നുന്നു എങ്കിൽ കാണാൻ ശ്രമിക്കുക.

Verdict : Very Good

DC Rating : 4.25/5

1282. Daughters Of Abdur Rahman (2021)

Director : Zaid Abdu Hamdan

Writer : Zaid Abdu Hamdan

Genre : Drama

Country : Jordan

Duration : 112 Minutes

🔸ലോകത്ത് ആകമാനം വോക് സംസ്കാരം പിടി മുറുക്കി കൊണ്ടിരിക്കുന്ന ഈ കാലഘട്ടത്തിൽ പൊതുവെ പുരോഗമന സിനിമ എന്ന ലേബലിൽ വരുന്ന സിനിമകളോട് ഒരു അകൽച്ച തോന്നി തുടങ്ങിയിരുന്നു. ലിറ്റിൽ മർമേഡ് പോലുള്ള ജോക്ക് സിനിമകൾ തിയേറ്ററിൽ പ്രദർശനം തുടർന്ന് കൊണ്ടിരിക്കുന്ന ഈ സമയത്ത് ആ ഒരു മനോഭാവം തോന്നിയതിൽ വലിയ തെറ്റ് ഒട്ടും തോന്നിയില്ല. എന്നാൽ ഈ ഒരു ചിന്താഗതിയെ വെല്ലുവിളിക്കുന്ന നല്ല ഒരു സിനിമ ആണ് ഡോട്ടർസ് ഓഫ് അബ്ദുറഹ്മാൻ എന്ന ജോർദാൻ ചിത്രം. സ്ത്രീ പക്ഷ സിനിമ എന്ന വിശേഷണത്തോട് നീതി പുലർത്തുന്ന നല്ല ഒരു ഔട്ടിങ് എന്ന് തന്നെ പറയാം.

🔸നാല് സഹോദരിമാരുടെ കഥയാണ് ഡോട്ടർസ് ഓഫ് അബ്ദുറഹ്മാൻ. നാല് പേരും വളരെ വ്യത്യസ്തമായ സാഹചര്യങ്ങളിൽ കൂടി കടന്ന് പോവുന്നവർ, വളരെ വ്യത്യസ്തമായ പ്രശ്നങ്ങൾ ദിവസേന നേരിടേണ്ടി വരുന്നവർ, ഇവരെ എല്ലാം ഒന്നിച്ച് ചേർക്കുന്ന ഒരേയൊരു ഘടകം ഇവരെല്ലാം തന്നെ സഹോദരിമാരാണ് എന്നത് മാത്രം ആയിരിക്കും. ഈ ഒരു ഫാക്ടർ കൊണ്ട് തന്നെ ജോർദാനിലെ സ്ത്രീകൾ അനുഭവിക്കുന്ന പ്രശ്നങ്ങളും മറ്റും വെവ്വേറെ പെർസ്പെക്ട്ടീവുകളിൽ കൂടി അവതരിപ്പിക്കാൻ സംവിധായകന് കഴിഞ്ഞിട്ടുണ്ട്. ഇവ ഒന്നും തന്നെ ഒരു വൺ ഡയമെൻഷനൽ ഫീൽ തരുന്നില്ല എന്നതും നല്ല കാര്യം തന്നെ.

🔸ഭർത്താവുമായി വളരെ അബ്യുസീവ് ആയ ഒരു ബന്ധത്തിലൂടെ കടന്ന് പോവുന്ന ഒരു കഥാപാത്രം, കാൻസർവേറ്റിവ് ആയ കുടുംബ പശ്ചാത്തലത്തിലൂടെ കടന്ന് പോവുന്ന കഥാപാത്രം, സ്വതന്ത്ര ജീവിതം നയിക്കുന്നത് കാരണം ചോദ്യ ശരങ്ങൾ നേരിടേണ്ടി വരുന്ന കഥാപാത്രം തുടങ്ങി ഒന്നിനും ഒരു കുറവും ഇല്ല. ഇവിടെ പ്രശ്നം എന്താണെന്നാൽ ഈ സഹോദരിമാർ എല്ലാം ഒന്നിക്കുന്ന ഒരു സന്ദർഭം വരുന്നത് ഒരു തിരോധാനം നടക്കുമ്പോഴാണ് എന്നതാണ്. ഈ തിരോധാനം ആരുടേതാണ്, എന്താണ്, എന്ത് കൊണ്ടാണ് എന്നതൊക്കെ സിനിമ കണ്ട് തന്നെ അറിയാൻ ശ്രമിക്കുക. ഇത്തരം സിനിമകൾ ഫോളോ ചെയ്യുന്ന ഒരു ഫോർമുല തന്നെയാണ് ഈ സിനിമയും ഉപയോഗിക്കുന്നത് എങ്കിലും ബോർ അടിപ്പിക്കുന്നില്ല എന്നതിൽ ആശ്വാസം.

Verdict : Good

DC Rating : 3.75/5

1281. Boy From Heaven (2022)

Director : Tarik Saleh

Cinematographer : Pierre Aim

Genre : Drama

Country : Denmark

Duration : 121 Minutes

🔸ആയിരത്തി ഒരുന്നൂറ് വർഷങ്ങൾക്ക് അധികം പഴക്കമുള്ള ഒരു പുണ്യ പുരാതന സ്ഥലമാണ് ഈജിപ്തിലെ കൈറോ നഗരത്തിൽ സ്ഥിതി ചെയ്യുന്ന ആൽ അസർ യൂണിവേഴ്സിറ്റി. ഇസ്ലാം മതത്തിന്റെ തന്നെ വളരെ പ്രധാനപ്പെട്ട, പരിപാവനമായ സ്ഥലമായി കണ്ട് കൊണ്ടിരിക്കുന്ന ഇവിടെ നിന്നും എത്രയോ തലമുറകൾ മത പഠനം പൂർത്തിയാക്കി സമൂഹത്തിലേക്ക് ഇറങ്ങി വന്നിരിക്കുന്നു. ഇത്തരത്തിൽ ഉള്ളൊരു സ്ഥലം ഇസ്ലാം എക്സ്ട്രീമിസ്റ്റ് ഗ്രൂപ്പുകളുടെ വളർച്ചയ്ക്ക് കൂടി ഭാഗം ആവുന്നുണ്ട് എന്ന രീതിയിൽ കഥ പറഞ്ഞ് പോവുന്ന ബോയ് ഫ്രം ഹെവൻ എന്ന ചിത്രം എന്ത് കൊണ്ട് വലിയ വിവാദങ്ങൾ ഇതിനോടകം സൃഷ്ടിച്ചില്ല എന്നോർത്ത് ചെറിയൊരു അത്ഭുതം തോന്നിയിരുന്നു.

🔸നൈൽ ഹിൽട്ടൻ ഇൻസിഡന്റ് പോലൊരു ചിത്രം സംവിധാനം ചെയ്ത വ്യക്തി ആയത് കൊണ്ട് തന്നെ ടാരിക് സാലയുടെ സിനിമ വാച്ലിസ്റ്റ് ചെയ്യപ്പെട്ടതിൽ വലിയ അത്ഭുതം ഒന്നും ഇല്ല, അത്യാവശ്യം കൊണ്ട്രാവർസി പ്രതീക്ഷിക്കുകയും ചെയ്തിരുന്നു. ഇങ്ങനെ ഒക്കെ ആണെങ്കിലും ആദ്യം സൂചിപ്പിച്ച സിനിമയുടെ അത്രയും തൃപ്തികരമായ ഒരു വ്യൂയിങ് അനുഭവം ഒന്നുമല്ല ഈ ചിത്രം. ഒരു മത്സ്യ തൊഴിലാളിയുടെ മകനായി കൈറോ നഗരത്തിൽ നിന്നും മാറി ഗ്രാമ പ്രദേശത്ത് ജനിച്ച് വളർന്ന ആളാണ് നമ്മുടെ പ്രധാന കഥാപാത്രം ആയ ആദം. അച്ചടക്കത്തിന്റെ കാര്യത്തിൽ കർക്കശക്കാരൻ ആയ ആദമിന്റെ അച്ഛന് അല്പം എങ്കിലും ഭയം ഉള്ളത് ദൈവത്തിൽ മാത്രം ആയിരിക്കണം.

🔸അത് കൊണ്ടാവണം ഗ്രാമത്തിലെ ഇമാം പറഞ്ഞ ഉടനെ തന്നെ തന്റെ മകനെ വിദ്യാഭ്യാസം പൂർത്തിയാക്കാനായി ആൽ അസർ യൂണിവേഴ്സിറ്റിയിലേക്ക് അയക്കുന്നത്. എന്നാൽ സമയം എന്നത് ആദത്തിനെ സംബന്ധിച്ചിടത്തോളം ഒട്ടും നന്നായിരുന്നില്ല. ആദം എത്തി ദിവസങ്ങൾക്കു അകം തന്നെ അവിടുത്തെ വലിയ പണ്ഡിതൻ മരണപ്പെടുകയാണ്. താമസിയാതെ ആ വലിയ സ്ഥാനം കയ്യാളാനായി ഒരു അധികാര വടംവലി തന്നെ അവിടെ ഉണ്ടാവുകയാണ്. തന്റേത് അല്ലാത്ത കാരണങ്ങളാലും തീരുമാനങ്ങളാലും ആദം കൂടി ഈ വടംവലിയുടെ ഭാഗം ആവുകയാണ്. തുടർന്ന് ഒരുപാട് ഒരുപാട് പ്രശ്നങ്ങൾ കഥയിലേക്ക് കടന്ന് വരികയാണ്, മോശം പറയാൻ ഇല്ലാത്ത എന്നാൽ വലിയ സംഭവം ഒന്നും അല്ലാത്ത ഒരു ചെറിയ ചിത്രമാണ് ബോയ് ഫ്രം ഹെവൻ.

Verdict : Good

DC Rating : 3.75/5

1280. The Celebration (1998)

Director : Thomas Vinterberg

Cinematographer : Anthony Mantle

Genre : Drama

Country : Denmark

Duration : 105 Minutes

🔸ദി മെനു എന്ന ചിത്രം കണ്ട് കഴിഞ്ഞതിന് പിറകെ ദി സെലിബ്റേഷൻ എന്ന ഡാനിഷ് ചിത്രം കാണാൻ ഇടയായത് വളരെ കൗതുകകരം ആയ ഒരു യാദൃചികത ആയിരിക്കും, കാരണം രണ്ട് സിനിമകളുടെയും സെറ്റപ്പ് വളരെ വ്യത്യസ്തം ആണെങ്കിലും സ്ട്രൈകിങ് ആയ സാമ്യം പല ഇടത്തും ഉണ്ട്. രണ്ടിലും ഒരു ആഘോഷത്തിനായി ഒരു കൂട്ടം ആളുകൾ ഒരു സ്ഥലത്ത് ഒത്ത് ചേരുന്നതും, വളരെ വിചിത്രമായ ചില സംഭവങ്ങൾ കാരണം ചില രഹസ്യങ്ങൾ പാട്ടാവുന്നതും, അതിന്റെ ആഫ്റ്റർ എഫക്ടസും ഒക്കെയാണ്. എന്നാൽ മെനു ഒരു കൂട്ടം അപരിചിതരുടെ കഥ ആണെങ്കിൽ സെലിബ്രേഷൻ ഒരു കുടുംബത്തിൽ അരങ്ങേറുന്ന കഥയാണ്, ഈ ഒരു കാരണം കൊണ്ട് തന്നെ കുറച്ച് കൂടി പേഴ്സണൽ ആണ് ഈ ചിത്രം, ഒരല്പം കൂടുതൽ ഡിപ്രസിങ്ങും.

🔸ഹെൽഗേ എന്ന മധ്യവയസ്കൻ തന്റെ അറുപതാം പിറന്നാൾ ആഘോഷിക്കുന്ന വേളയിൽ ആണ്. സ്വന്തമായി ഒരുപാട് ബിസിനസ് സംരംഭങ്ങളും, അസ്സറ്റുകളും ഒക്കെയുള്ള ഹെൽഗെയുടെ പിറന്നാൾ ആഘോഷം അയാളുടെ ഹോട്ടലുകളിൽ ഒന്നിൽ വലിയ അർഭാടത്തോടെ നടത്താൻ ഉള്ള തയാറെടുപ്പിൽ ആണ് ബന്ധു മിത്രാദികൾ. പൊതുവെ സമൂഹത്തിൽ അങ്ങോളം ഇങ്ങോളം ഉള്ള ആളുകൾക്ക് ഇടയിൽ ഒരു ബഹുമാനവും ആദരവും ഒക്കെ ഹെൽഗെക്ക് ഉണ്ട്, ആയതിനാൽ തന്നെ പരിപാടിയിൽ പങ്കെടുക്കാൻ വലിയൊരു കൂട്ടം ആളുകൾ തന്നെ എത്തി ചേരുന്നുണ്ട്. ഈ കൂട്ടം ആളുകളിൽ ഹെൽഗെയുടെ മൂന്ന് മക്കളും ഉണ്ട്, ഹെൽഗെയുടെ മറ്റൊരു മകൾ ആത്മഹത്യ ചെയ്തിട്ട് അധികം നാളുകൾ ആയിട്ടില്ല.

🔸പൊതുവെ അന്തർ മുഖനായ ക്രിസ്ത്യൻ ആണ് ഹെൽജയുടെ മൂത്ത പുത്രൻ, അച്ഛനുമായി ഒരുപക്ഷെ ഏറ്റവും ആത്മബന്ധം ഉള്ളതും അയാൾക്ക് ആയിരിക്കണം. രണ്ടാമത്തെ മകനായ മൈക്കൽ ഒരു കുത്തഴിഞ്ഞ ജീവിതം നയിക്കുന്ന ആളാണ്, മൂന്നാമത്തേത് മകളായ ഹെലൻ ആണ്. ആഘോഷ പരിപാടികൾ മനോഹരമായി ആണ് ആരംഭിക്കുന്നത് എങ്കിലും താമസിയാതെ കാര്യങ്ങൾ കൈവിട്ട് പോവുകയാണ്. വളരെ വൃത്തികെട്ട പല കുടുംബ രഹസ്യങ്ങളും അതിഥികളുടെ മുന്നിൽ വെച്ച് വെളിപ്പെടുമ്പോൾ കാര്യങ്ങൾ കൂടുതൽ മോശമായി മാറുകയാണ്. സ്ഥിരം ശൈലിയിൽ നിന്ന് മാറി ഹാൻഡി കാം ഒക്കെ ഉപയോഗിച്ച് ചിത്രീകരിച്ച സിനിമ കൂടിയാണ് എന്ന പ്രത്യേകത കൂടി ഉണ്ട്. മികച്ച ഒരു സിനിമ ആണ് സെലിബ്രേഷൻ, വളരെ പേഴ്സണൽ ആയ ടച്ചിങ്‌ ആയ ഒരു കാഴ്ചനുഭവം തന്നെ ഉറപ്പ് തരുന്നു, കാണാൻ ശ്രമിക്കുക.

Verdict : Very Good

DC Rating : 4.25/5

1279. The Menu (2022)

Director : Mark Mylod

Cinematographer : Peter Deming

Genre : Thriller

Country : USA

Duration : 107 Minutes

🔸ഒരു അഗതാ ക്രിസ്റ്റി നോവൽ തരുന്ന മിസ്റ്ററി ഫീൽ ഒക്കെ നൽകുന്ന, വളരെ സ്ലോ ആയി പ്ലോട്ട് റിവീൽ നടത്തുന്ന, എന്നാൽ അത്രയും സമയം പ്രേക്ഷകനെ ഹുക് ചെയ്ത് നിർത്തുന്ന നല്ലൊരു ത്രില്ലർ സിനിമ ആണ് നിങ്ങൾ കാണാൻ ഉദ്ദേശിക്കുന്നത് എങ്കിൽ ദി മെനു നല്ലൊരു ഓപ്ഷൻ ആണ്. ഒരുപാട് ചോദ്യങ്ങൾ ബാക്കി വെക്കുന്നുണ്ട് സിനിമ എങ്കിലും സ്‌ക്രീനിൽ കഥയുടെ ചുരുൾ അഴിയുന്ന നിമിഷങ്ങളിൽ ഒന്നും ഇത്തരം ചോദ്യങ്ങൾ ഉയർത്താതെ കാഴ്ചക്കാരനെ ഡിസ്ട്രാക്റ്റ് ചെയ്ത് കൊണ്ട് പോവുന്നതിൽ സിനിമ വിജയിച്ചിട്ടുണ്ട് എന്നത് എടുത്ത് പറയണം. ഒന്നേ മുക്കാൽ മണിക്കൂർ ഏറെക്കുറെ പൂർണമായും ഒരു സെറ്റിംഗിന് അകത്ത് സംഭവിക്കുന്ന ഈ സിനിമ തീർച്ചയായും ഒരു വിന്നർ തന്നെയാണ്.

🔸ഒരു രാത്രി ചിലവഴിക്കാൻ ആയിരത്തി ഇരുന്നൂറ്റി അൻപത് ഡോളർ, അതായത് ഒരു ലക്ഷം ഇന്ത്യൻ രൂപയ്ക്ക് മുകളിൽ. ഇതാണ് ഹോത്തോൻ എന്ന ഐലൻഡ് റെസ്റ്റൊറന്റിലെ ബിൽ, സമൂഹത്തിലെ ഉന്നതർക്ക് മാത്രം എന്ന തോതിൽ ചിട്ടപ്പെടുത്തിയ ഈ പരിപാടിയിൽ പങ്കെടുക്കാനും, പ്രശസ്ത പാചക വിദഗ്ദനായ ജൂലിയൻ സ്ലോവിക്കിന്റെ ഭക്ഷണം രുചിക്കാനുമായി പന്ത്രണ്ടോളം പേർ ഒരുനാൾ അവിടേക്ക് എത്തുകയാണ്. ഈ പന്ത്രണ്ടോളം പേരിൽ ഒരാളാണ് നമ്മുടെ പ്രധാന കഥാപാത്രം ആയ മാർഗോട്ട്. മാർഗോട്ടിനെ കേന്ദ്ര കഥാപാത്രം എന്ന മട്ടിൽ അവതരിപ്പിച്ച് കൊണ്ടാണ് സിനിമ പുരോഗമിക്കുന്നത്.

🔸ഉന്നതരായ ബിസിനസ്സുകാർ, സിനിമാ നടൻ, ഫുഡ്‌ കൃട്ടിക്സ് എന്നിവരുടെ മുന്നിലേക്ക് ജൂലിയൻ സ്ലോവിക്കും സഹ പ്രവർത്തകരും അണി നിരത്തുന്നത് ആറ് ഫുഡ്‌ കോർസുകളാണ്. വളരെ വിചിത്രമായ മെമ്പൊടികളോടും മറ്റുമൊക്കെ കൂടെയാണ് ഈ ആറ് ഡിഷുകളും അയാൾ അവതരിപ്പിക്കുന്നത്, ഒരു കാര്യം മാത്രം വ്യക്തം അവർ ഒട്ടും പ്രതീക്ഷിച്ചിരുന്ന ഒരു അനുഭവം ആയിരുന്നില്ല അവർക്ക് അവിടെ നിന്ന് ലഭിച്ചത് എന്ന്. ആദ്യാവസാനം നമ്മളെ ഉത്തരം കണ്ടെത്താനായി പ്രേരിപ്പിക്കുന്ന, എന്നാൽ വളരെ ലളിതവും അതേ സമയം വാലിഡ് ആയ ഒരു ഉത്തരം നമുക്കായി ബാക്കി വെക്കുകയും ചെയ്യുന്ന ഒരു സിനിമ ആണ് മെനു. ഒന്നേ മുക്കാൽ മണിക്കൂർ എൻജോയ് ചെയ്ത് കാണാൻ ഉള്ള ഒരു എന്റെർറ്റൈണർ തന്നെയാണ് സിനിമ, കണ്ട് നോക്കുക.

Verdict : Good

DC Rating : 3.75/5

1278. Lighting Up The Stars (2022)

Director : Jianjiang Liu

Cinematographer : Zhao Yuqing

Genre : Drama

Country : China

Duration : 112 Minutes

🔸ലൈറ്റിങ് അപ്പ് ദി സ്റ്റാർസ് എന്ന സിനിമ കണ്ട് കൊണ്ടിരിക്കുന്ന വേളയിൽ ആദ്യം നമ്മുടെ ശ്രദ്ധ പിടിച്ച് പറ്റുക അതിന്റെ ലാളിത്യം ആയിരിക്കും, വളരെ സിംപിൾ ആയ ഒരു സ്റ്റോറിയും അവതരണവും ഒക്കെയാണ് ഈ ചിത്രത്തിന്റേത്. ടൈറ്റിൽ കാർഡ് തെളിയുന്ന കുട്ടിയുടെ സീനിൽ ആ സിംപിൾ തീം മ്യൂസിക് കൂടി ആവുമ്പോൾ ഏറെക്കുറെ നമ്മൾ സിനിമയോട് ഹുക് ആയിരിക്കും, പിന്നീടങ്ങോട്ട് എന്താണ് സംഭവിക്കാൻ പോവുന്നത് എന്നറിയാൻ ഉള്ളൊരു ജനുവിൻ ആഗ്രഹം ഈ തുടക്കം കൊണ്ട് നമ്മളിൽ ഉണ്ടാക്കി എടുക്കാൻ സംവിധായകന് കഴിഞ്ഞിട്ടുണ്ട് എന്നത് ചെറിയ കാര്യമല്ല. കഥ എങ്ങോട്ടാണ് പോവാൻ പോവുന്നത് എന്നൊരു ഐഡിയ ഉണ്ടാവും എങ്കിലും അത് കണ്മുന്നിൽ റിവീൽ ആവുന്നത് കാണാനുള്ള ആ ഒരു ആഗ്രഹം അത്യപൂർവം സിനിമയ്ക്ക് മാത്രം ഉണ്ടാക്കാൻ കഴിയുന്ന ഒന്നാണ്.

🔸ലളിതമായ കാര്യങ്ങൾക്ക് കൂടുതൽ മനോഹാരിത ഉണ്ടാവും എന്ന് എവിടെയോ വായിച്ചത് ഇത് പോലുള്ള സിനിമകളെ കൂടി കണ്ട് കൊണ്ടാവണം. കഥയിലേക്ക് വരിക ആണെങ്കിൽ ഒരു ഫ്യൂനറൽ സർവീസ് നടത്തുക ആണ് നമ്മുടെ നായകനായ സാൻ. മറ്റുള്ള കഥാപാത്രങ്ങളുടെ വാക്കുകൾ കടം എടുക്കുക ആണെങ്കിൽ ഒരു ഭൂലോക തോൽവി ആണ് സാൻ. ചില കുറ്റ കൃത്യങ്ങൾ ഒക്കെ ചെയ്തത് കാരണം മുൻപ് ജയിൽ ശിക്ഷ അനുഭവിച്ച സാനിന്റെ സുഹൃത്തുക്കൾ എന്ന് പറയുന്നത് ഒരു എക്സ് കള്ളനും, ഇല്ലീഗൽ സാധനങ്ങൾ വിറ്റതിന് അകത്ത് പോയ വേറൊരു കൺവിക്റ്റും ആണ്. സ്വന്തം അച്ഛനുമായി അടിച്ച് പിരിഞ്ഞ സാനിനെ സ്വന്തം കാമുകി സുഹൃത്തിനോടൊപ്പം ചേർന്ന് ചതിക്കുക ആയിരുന്നു. നേരാവണ്ണം അഞ്ച് പൈസക്ക് വരുമാനം ഇല്ലാത്ത സാനിന് തന്റെ ജയിൽ റെക്കോർഡ് കാരണം ഒരുപാട് അപമാനങ്ങൾ സഹിക്കേണ്ടി വരുന്നുണ്ട്.

🔸ഇതിന്റെ ഇടയിലേക്ക് ഒരു പെൺകുട്ടി കടന്ന് വരികയാണ്, അവൾ ആര് എന്ത് എന്നതൊക്കെ സിനിമ കണ്ട് തന്നെ അറിയുക. ഒരു കുട്ടിയുടെ വരവ് തീർത്തും ഇറസ്‌പോൻസിബൽ ആയ ഈ കൂട്ടം സുഹൃത്തുക്കളെ എങ്ങനെ ഒക്കെ ബാധിക്കുന്നു എന്നൊക്കെ കാണിച്ച് മനോഹരമായി കടന്ന് പോവുന്നുണ്ട്. വളരെ ബ്യൂട്ടിഫുൾ ആയ ഒരു സിനിമ ആണ് ലൈറ്റിങ് അപ്പ് ദി സ്റ്റാർസ്. നല്ല കഥ, കഥാപാത്രങ്ങൾ,. കഥാ സന്ദർഭങ്ങൾ ഒക്കെ കൂടി ആകെമൊത്തം ഒരു ചിരിയോടെ കണ്ട് അവസാനിപ്പിക്കാം. ടിപ്പിക്കൽ നന്മമര പടം എന്നൊക്കെ പറയാം എങ്കിലും വൃത്തിയായി എടുത്ത് വെച്ചത് കൊണ്ട് തന്നെ കാണാൻ ഉള്ള, തൃപ്തികരമായ ഒന്ന് ആണ് ഈ ചിത്രം.

Verdict : Very Good

DC Rating : 4/5

1277. The Swimmers (2022)

Director : Sally El Hosaini

Cinematographer : Christopher Ross

Genre : Drama

Country : UK

Duration : 134 Minutes

🔸ഒരു സിറിയൻ അഭയാർഥിയിൽ നിന്നും ഒളിമ്പിക്സിൽ പങ്കെടുത്ത നീന്തൽ താരം എന്ന വൺ ലൈൻ മാത്രം മതി ഹോളിവുഡിൽ ഒരു ടിപ്പിക്കൽ മൊട്ടിവേഷണൽ സ്പോർട്സ് ഡ്രാമ പിറക്കാൻ. ഇടയിൽ കൂടി ലേശം പൊളിറ്റിക്സും, സ്വഭാവകമായി ഉൾപ്പെടുത്താവുന്ന വോക് ഇമോഷൻസ് അല്ലെങ്കിൽ റപ്രസെന്റെഷൻ എലമെന്റ്സ് കൂടി ആയാൽ എല്ലാം പൂർണം. ഇത്രയും കണ്ടന്റ് ഉണ്ടായിട്ടും എന്ത് കൊണ്ട് ഈ ഐറ്റം ഒരു അമേരിക്കൻ സ്റ്റുഡിയോ ഇതുവരെ എടുത്ത് പ്രയോഗിച്ചില്ല എന്നായിരുന്നു സ്വിമ്മേഴ്‌സ് എന്ന സിനിമ കണ്ട് കഴിഞ്ഞ വേളയിൽ ആദ്യം തോന്നിയ സംശയം, അത് എന്ത് തന്നെ ആയാലും മോശം പറയാൻ ഇല്ലാത്ത ഒരു ഔട്ട് പുട്ട് ഈ ഒരു ശ്രമത്തിലൂടെ അണിയറ പ്രവർത്തകർ കൈ വരിച്ചിട്ടുണ്ട് എന്ന് പറയാം.

🔸യുസ്‌റ, സാറ എന്നീ രണ്ട് സഹോദരിമാരുടെ കഥയാണ് ചിത്രം. ദമസ്കസിൽ ജനിച്ച് വളർന്ന ഇരുവരുടെയും ജീവിതം ഈ ടീനെജ് കാലഘട്ടം വരെ വലിയ അല്ലൽ ഇല്ലാതെയാണ് നടന്ന് പോയത്. സ്നേഹം നിറഞ്ഞ കുടുംബ ചുറ്റുപാടുകളും, സപ്പോർറ്റീവ് ആയ ബന്ധുക്കളും ഒക്കെയായി നല്ല രീതിയിൽ പോയി കൊണ്ടിരുന്ന അവരുടെ ലൈഫ് മാറി മറിയുന്നത് യുദ്ധത്തിന്റെ വരവോട് കൂടിയാണ്. തങ്ങൾ സഞ്ചരിച്ചിരുന്ന വഴികളിൽ പൊടുന്നനെ വന്ന തടസങ്ങളും വേലി കെട്ടുകളും എല്ലാം അവർക്ക് ചിന്തിക്കാൻ കഴിയുന്നതിലും അപ്പുറം ആയിരുന്നു. താമസിയാതെ തന്നെ ഭീകരമായ ഒരു അപ്രവചനീയത അവരുടെ ലൈഫിലേക്ക് കടന്ന് വരികയാണ്.

🔸ദിവസങ്ങൾ പോകവേ കൂടുതൽ മോശം ആയി കൊണ്ടിരിക്കുന്ന അവസ്ഥയിൽ നിന്നും പലായനം എന്ന അവസാന കച്ചി തുരുമ്പിലേക്ക് അവർ കടന്ന് പോവുകയാണ്. ഇവിടെ നിന്നും 2016ലെ റിയോ ഒളിമ്പിക്സ് വേദിയിൽ വരെ എത്തിയ ഒരു ജൈത്ര യാത്രയുടെ കഥയാണ് സിനിമ പറയുന്നത്. ഒരു അണ്ടർ ഡോഗ് സ്റ്റോറി ആണെങ്കിലും, പറയത്തക്ക ഫീൽ ഒന്നും സിനിമയ്ക്ക് നൽകാൻ കഴിഞ്ഞില്ല, വെറുതെ ഒരു ഓളത്തിന് കണ്ട് വിടാം എന്ന് മാത്രം. രണ്ടര മണിക്കൂറിന് അടുത്തുള്ള ദൈർഘ്യവും ഒരു പ്രശ്നം തന്നെ ആയിരുന്നു. അപ്പൊ താല്പര്യം തോന്നുന്നു എങ്കിൽ കണ്ട് നോക്കുക, ഒരു അവറേജ് അല്ലെങ്കിൽ എബവ് അവറേജ് അനുഭവം മാത്രമായി ഒതുങ്ങി പോവുകയാണ് ദി സ്വിമ്മേഴ്‌സ്.

Verdict : Above Average

DC Rating : 3/5

1276. Klondike (2022)

Director : Maryna Er Gorbach

Cinematographer : Svyatoslav Bulakovsky

Genre : Drama

Country : Ukraine

Duration : 100 Minutes

🔸പ്രേക്ഷക നിരൂപക പ്രശംസകൾ ഒരുപാട് ഏറ്റ് വാങ്ങി, പല പല അവാർഡ് പരിപാടികളിൽ പുരസ്‌കാരങ്ങളും മറ്റുമൊക്കെ കരസ്ഥമാക്കി അത്യാവശ്യം പേര് എടുത്തതിന് ശേഷമാണ് ക്ളോണ്ടികെ എന്ന തുർക്കിഷ് ഉകൃനിയൻ ചിത്രം കാണാൻ കഴിഞ്ഞത്. കേരളത്തിന്റെ തന്നെ അന്താരാഷ്ട്ര ഫിലിം ഫെസ്റ്റിവലിൽ പ്രദർശിപ്പിക്കപ്പെട്ട ചിത്രം അവിടെയും നേടിയത് നല്ല അഭിപ്രായങ്ങൾ ആയിരുന്നു, ഈ കാരണങ്ങൾ എല്ലാം കൊണ്ട് തന്നെ കാണാൻ തുടങ്ങുമ്പോൾ ഒരു ഗംഭീര കാഴ്ചനുഭവം എന്നതിൽ കുറഞ്ഞ് വേറൊന്നും പ്രതീക്ഷിച്ചിരുന്നില്ല. എന്നാൽ നല്ല ഒരു സിനിമ തന്നെ ആണെന്ന അഭിപ്രായം ഉണ്ടെങ്കിലും ഒരു ഗംഭീര അനുഭവം അല്ലെങ്കിൽ പറഞ്ഞ് കേട്ട ഉള്ള് ഉലയ്ക്കുന്ന എക്സ്പീരിയൻസ് ഒന്നും ചിത്രം തരുന്നില്ല എന്നതിൽ ഒരല്പം നിരാശ തന്നെ തോന്നി.

🔸2014ൽ അരങ്ങേറിയ ഒരു വിമാന ദുരന്തവും, ഡോൺബാസ് യുദ്ധ പശ്ചാത്തലവും ഒക്കെ ചേർന്ന് ഒരു കായോടിക്ക് ആയ സെറ്റപ്പ് ആണ് ചിത്രത്തിന്റേത്. ഇതിന്റെ എല്ലാം ഒത്ത നടുക്ക് പെട്ട് പോവുന്ന ഒരു കുടുംബത്തിന്റെ അനുഭവങ്ങൾ ഫോകസ് ചെയ്ത് കൊണ്ടാണ് സിനിമ അതിന്റെ കഥ പറഞ്ഞ് പോവുന്നത്. മുന്നൂറോളം ആളുകൾ മരണപ്പെട്ട ഒരു ദുരന്തം തൊട്ട് അടുത്ത് അരങ്ങേറിയിട്ടും, ഒപ്പം ഉണ്ടായിരുന്ന നാട്ടുകാരും സഹ പ്രവർത്തകരും എല്ലാം നാട് വിട്ട് പോയിട്ടും തന്റെ ഭൂമിയും വീടും വിട്ട് കൊടുക്കാതെ ചെറുത്ത് നിൽപ് തുടരുന്ന ഇർക എന്ന കഥാപാത്രത്തിലൂടെ റെസിസ്റ്റൻസ് എന്ന തീം തന്നെയാണ് സിനിമ ഉയർത്തി കാട്ടുന്നത്.

🔸പ്രൊ ഉകൃനിയൻ ആയ ആളുകളുടെയും, സെപ്പെറേറ്റിസ്റ്റ് ആയ വിഭാഗക്കാരുടെയും പൊളിറ്റിക്കൽ സ്റ്റേട്ട്മെന്റ് കൂടി ആവുന്നുണ്ട് ചിത്രം ചില ഇടങ്ങളിൽ. ഈ ഒരു ഡിവിഷൻ ആദ്യാവസാനം പരോക്ഷമായി എന്ന മട്ടിലാണ് കാണിക്കുന്നത് എങ്കിലും ഫിനിഷിങ് പോയിന്റ് എത്തുമ്പോഴേക്കും കഥയിൽ ഒഴിവാക്കാൻ കഴിയാത്ത ഒരു ഫാക്ടർ ആയി മാറുന്നുണ്ട്. വളരെ ചുരുക്കം കഥാപാത്രങ്ങൾ മാത്രമാണ് സിനിമയിൽ ഉള്ളത്, അവർക്ക് എല്ലാം നല്ല ഐഡന്റിട്ടി കൊടുക്കാൻ കഴിഞ്ഞിട്ടുണ്ട് എന്നത് നല്ല കാര്യം തന്നെ. എടുത്ത് പറയത്തക്ക വിധം ഒന്നും ഇല്ലാത്ത എന്നാൽ ഒരു തവണ കണ്ട് വിടാവുന്ന ഒരു സാധാരണ സിനിമ മാത്രമാണ് ക്ളോണ്ടികെ, താല്പര്യം തോന്നുന്നു എങ്കിൽ കാണാൻ ശ്രമിക്കുക.

Verdict : Good

DC Rating : 3.5/5