1339. I'm Still Here (2024)

Director : Walter Salles

Cinematographer : Adrian Teijido

Genre : Drama

Country : Brazil

Duration : 138 Minutes

🔸അറുപതുകളിലെയും എഴുപതുകളിലെയും ഒക്കെ രാഷ്ട്രീയ ചരിത്രം പരിശോധിച്ച് കഴിഞ്ഞാൽ പൊതുവായി തോന്നിയ ഒരു കാര്യം ആ കാലഘട്ടത്തിൽ ഒക്കെ നിലനിന്ന ഒരുതരം അരക്ഷിതാവസ്ഥ ആണെന്ന് തോന്നിയിട്ടുണ്ട്. പട്ടാള ആട്ടിമറികളും കൂട്ട കൊലപാതകങ്ങളും, ജനാധിപത്യത്തിന്റെ വീഴ്ചയും എല്ലാം ചുരുങ്ങിയത് രണ്ടിൽ അധികം രാജ്യങ്ങളിൽ എങ്കിലും ഒരേ രീതിയിൽ എന്ന പോലെ അരങ്ങേറിയിട്ടുള്ളതായി കാണാം. ഈ ഒരു ചരിത്രത്തിന്റെ ബ്രസീലിയൻ സൈഡ് പറയുന്ന ചിത്രമാണ് ഐ ആം സ്റ്റിൽ ഹിയർ എന്ന് പറയാം, ഒരുപക്ഷെ പോയ വർഷത്തെ ഏറ്റവും പവർഫുൾ സിനിമകളിൽ ഒന്നായി കൂടി നമുക്ക് ഈ ചിത്രത്തെ വിശേഷിപ്പിക്കാം, അതിപ്പോൾ പ്രകടനം കൊണ്ടായാലും കഥ കൊണ്ടായാലും.

🔸മാഴ്സ്ലോ റൂബൻസ് ഉദ്ദേശം പത്ത് വർഷങ്ങൾക്ക് മുന്നേ എഴുതിയ കൃതിയെ ആധാരപ്പെടുത്തി, ഒരു യഥാർത്ഥ സംഭവത്തിന്റെ സിനിമാ രൂപം ആണ് ഈ ചിത്രം. എഴുപതുകളിൽ ബ്രസീലിലെ പട്ടാള ഭരണ കാലത്ത് തന്റെ ഭാര്യയോടും അഞ്ച് മക്കളോടും ഒപ്പം ജീവിച്ച് പോന്ന വ്യക്തി ആണ് റൂബൻസ് പൈവ. ഒരു സിവിൽ എഞ്ചിനിയർ എന്ന നിലയ്ക്കാണ് അയാളെ സർവർക്കും പരിചയം എങ്കിലും രാജ്യത്തെ അന്ന് നിലനിന്നിരുന്ന ഐഡിയോളജിക്ക് എതിരെ അയാൾ ശബ്ദം ഉയര്യത്തിയിരുന്നു എന്നതും ആ കാരണം കൊണ്ട് തന്നെ അയാൾ ഭരണവർഗത്തിന്റെ നോട്ടപ്പുള്ളി ആയിരുന്നു എന്നതും അധികം ആർക്കും അറിയാത്ത ഒരു കാര്യം ആയിരുന്നു, കുറഞ്ഞത് അയാളുടെ കുടുംബത്തിന് എങ്കിലും.

🔸ഒരുനാൾ റുബൻസിനെ കാണാതാവുകയാണ്, അയാൾ എവിടേക്ക് പോയി എന്നതോ അയാൾക്ക് എന്ത് സംഭവിച്ചു എന്നതോ ഉത്തരം കിട്ടാത്ത ഒരു ചോദ്യമായി അവശേഷിക്കുന്നു. ഈ ഒരു തിരോധനത്തിന്റെ ശേഷിപ്പുകൾ ആണ് ഈ സിനിമ ചർച്ച ചെയ്യുന്നത്, ഒരു യഥാർത്ഥ സംഭവം ആയത് കൊണ്ട് തന്നെ കഥ മിക്കവർക്കും അറിയാം എന്നത് ഒരു പോരായ്മയായി തോന്നിയേക്കാം, എന്നാൽ പ്രകടനങ്ങൾ ആണ് സിനിമയെ മറ്റൊരു തലത്തിലേക്ക് കൊണ്ട് പോവുന്നത്, പ്രത്യേകിച്ചും ഫെർണണ്ട ടോറസ് എന്ന അഭിനേത്രിയുടേത്. ആ കഥാപാത്രം ഇല്ലെങ്കിൽ ഈ സിനിമയെ ഇല്ല എന്നിരിക്കെ ആ പ്രകടനത്തിന്റെ പ്രാധാന്യം എന്താണെന്ന് പറയേണ്ടത് ഇല്ല. പോയ വർഷം ഇറങ്ങിയ മികച്ച സിനിമകളിൽ ഒന്നാണ് ഐ ആം സ്റ്റിൽ ഹിയർ,. കണ്ട് നോക്കേണ്ടതാണ്.

Verdict : Very Good

DC Rating : 4/5