572. Picnic At Hanging Rock (1975)

Director : Peter Weir

Genre : Thriller

Rating : 7.5/10

Country : Australia

Duration : 115 Minutes

🔸ഏതെങ്കിലും കഥാപാത്രത്തിന്റെയോ അല്ലെങ്കിൽ ഒന്നിൽ അധികം കഥാപാത്രങ്ങളുടെയോ തിരോധാനം പ്രമേയമാക്കി കൊണ്ട് വരുന്ന സിനിമകൾ കാണാൻ ഒരു പ്രത്യേക രസം തന്നെയാണ്, വേറൊന്നുമല്ല ഒരു മിസ്റ്ററി ഫീൽ ആദ്യാവസാനം ഈ ചിത്രങ്ങൾ നിലനിർത്തി പോവാറുണ്ട്. ഉദ്ദേശം എട്ട് വർഷങ്ങൾക്ക് മുന്നേ പുറത്തിറങ്ങിയ ചിൽഡ്രൻ എന്ന കൊറിയൻ ചിത്രം ഈ വിഭാഗത്തിൽ ഉൾപ്പെടുത്താവുന്ന ഒന്നാണ്. ഒരു സിനിമാ ആരാധകൻ എന്ന നിലയ്ക്ക് ഈ ചിത്രങ്ങളോട് വലിയ താല്പര്യം എല്ലാ കാലത്തും തോന്നിയിരുന്നു, അത് തന്നെ ആണ് പിക്നിക് അറ്റ് ഹാങ്ങിങ് റോക്ക് എന്ന ഓസ്‌ട്രേലിയൻ ചിത്രം കാണാൻ ഉണ്ടായ പ്രചോദനവും.

🔸മുകളിൽ സൂചിപ്പിച്ചത് പോലെ തന്നെ ഒരു കാണാതാവലിന്റെ കഥയാണ് ചിത്രം, മൂന്ന് വിദ്യാർത്ഥികളുടെയും ഒരു അധ്യാപികയുടെയും തിരോധാനം. ഇവിടെ പക്ഷെ ശ്രദ്ധ ചെലുത്തേണ്ട വിഷയം മറ്റൊന്നാണ്, ഈ തിരോധാനത്തിന്റെ ചുറ്റുപാടും പശ്ചാത്തലവും എല്ലാമാണ് കൂടുതൽ നിഗൂഡം. ചിത്രത്തിന് ആസ്പദമായ സംഭവം അരങ്ങേറുന്നത് ഇരുപതാം നൂറ്റാണ്ടിന്റെ ആരംഭത്തിലാണ്, ഒരു വാലെന്റൈൻസ് ഡേ ദിനത്തിൽ. ഓസ്‌ട്രേലിയയിലെ വളരെ പ്രശസ്തവും, അച്ചടക്കത്തിന് പേര് കേട്ടതുമായ ഒരു സ്‌കൂളിൽ നിന്നും വിദ്യാർഥികൾ ഒരു ടൂർ പോവുകയാണ്, തങ്ങളുടെ സ്‌കൂളിന് അടുത്ത് തന്നെയുള്ള ഒരു പാറ കെട്ടാണ് ഇവരുടെ ലക്ഷ്യ സ്ഥാനം.

🔸ഇത് പോലുള്ള ഒഴിവ് ദിവസങ്ങൾ ലഭിക്കുന്നത് അപൂർവം ആയതിനാലും കർക്കശക്കാരിയായ മദർ സുപ്പീരിയറിന്റെ കൺവെട്ടത്ത് നിന്ന് ഒരു ദിവസം എങ്കിൽ ഒരു ദിവസം രക്ഷപ്പെടാൻ കഴിഞ്ഞതിനാലും വിദ്യാർഥികൾ എല്ലാവരും ആർത്തുല്ലസിക്കാൻ ഉള്ള മൂഡിൽ ആയിരുന്നു, കളിയും ചിരിയും തമാശകളും എല്ലാമായി ആ ദിവസം ഉച്ചയോട് അടുത്തു. വൈകിട്ട് എട്ട് മണിക്ക് മുന്നേ മടങ്ങി എത്തണം എന്ന കർശനമായ ഉത്തരവുണ്ട്, മദർ സുപ്പീരിയറിന്റേത്. എന്നാലും സമയം ബാക്കി ഉള്ളതിനാൽ ഒരു കൂട്ടം വിദ്യാർഥികൾ പാറക്കെട്ടിന് മുകളിലേക്ക് കയറാൻ തീരുമാനിച്ചു.

🔸ഈ കയറ്റം അല്പം ക്ലേശകരം ആണെങ്കിൽ കൂടിയും അല്പം ശ്രമകരമായ അവർ ഉദ്യമത്തിൽ വിജയിക്കുകയാണ്, എന്നാൽ ഇവിടെ നിന്നും കഥ മാറുകയാണ്. കഠിനമായ യാത്രയും മല കയറ്റവും എല്ലാം കാരണം ക്ഷീണിതരായ യുവതികൾ ഒരല്പം വിശ്രമിക്കാൻ തീരുമാനിച്ചെങ്കിലും ഇവരിൽ ഒരാൾ പിന്നീട് കാണുന്ന കാഴ്ച ബാക്കിയുള്ള യുവതികൾ ആരുടെയോ പ്രേരണ എന്നപോൽ കെട്ടിന് ഉള്ളിലേക്ക് നടന്ന് കയറുന്നതാണ്. ആലസ്യത്തിൽ എന്ന പോലെ അവളുടെ നിലവിളിക്കും വിലക്കലിനും ഒന്നും അവർക്ക് മറുപടികൾ ഉണ്ടായിരുന്നില്ല, ഈ കടന്ന് പോയ കഥാപാത്രങ്ങൾ അപ്രത്യക്ഷരാവുകയാണ് എന്ന് അതിശയോക്തി ഒരല്പം കലക്കി പറയാം.

🔸ഇവിടെ നിന്നുമാണ് പിക്നിക് അറ്റ് ഹാങ്ങിങ് റോക്ക് എന്ന ചിത്രം ആരംഭിക്കുന്നത്, ഇതേ പേരിൽ കുറച്ച് വർഷങ്ങൾക്ക് മുന്നേ ഒരു ടീവി സീരീസ് പുറത്തിറങ്ങി എന്നറിഞ്ഞെങ്കിലും കൂടുതൽ അറിവില്ല ഈ കാര്യത്തിൽ. ഒരു ഡ്രീം പോലെയാണ് ചിത്രം പുരോഗമിക്കുന്നത്, കഥാപാത്രങ്ങൾ അടിമപ്പെട്ട ആലസ്യം ഒരു പരിധി വരെ ചിത്രം കാണുമ്പോൾ നമുക്കും അനുഭവപ്പെടുന്നുണ്ട്. കൂടുതൽ സ്പോയ്ലർ ആയ ഭാഗങ്ങളിലേക്ക് കടക്കുന്നില്ല, കഴിയും എങ്കിൽ, താല്പര്യം തോന്നുന്നെങ്കിൽ കാണാൻ ശ്രമിക്കുക, ഒരു വിധത്തിലും നഷ്ടം ആവില്ല ഈ ചിത്രം.

Verdict : Good

DC Rating : 78/100

571. Woman At War (2018)

Director : Benedikt Erlingsson

Genre : Drama

Rating : 7.6/10

Country : Iceland

Duration : 101 Minutes

🔸കഴിഞ്ഞ IFFK കഴിഞ്ഞപ്പോൾ തൊട്ട് കേട്ട് തുടങ്ങിയതാണ് വുമൺ അറ്റ് വാർ എന്ന ഈ ഉക്രേനിയന് ഐസ്ലാന്റിക് ചിത്രത്തെ കുറിച്ച്. കണ്ട് കഴിഞ്ഞ ആളുകളിൽ ഒരാൾ അന്യായം, കിടു എന്നീ വാക്കുകളാൽ വിശേഷിപ്പിക്കപ്പെട്ട നിമിഷം തൊട്ടേ ഒടുക്കത്തെ കാത്തിരിപ്പിലായിരുന്നു പ്രിന്റ് ഒന്ന് കയ്യിൽ കിട്ടാനായിട്ട്. ഒടുവിൽ ഇപ്പോൾ, കണ്ട് കഴിഞ്ഞ ഈ നിമിഷം ഉറപ്പിച്ച് പറയാനാവും, ഇത് ഒരു അന്യായ ഐറ്റം തന്നെ എന്ന്. അടുത്ത കാലത്ത് ഒന്നും ഒരു ചിത്രം കണ്ടിട്ട് ഇത്രയും സംപ്ത്രിപ്തി ലഭിച്ച മറ്റൊരു സന്ദർഭം ഉണ്ടായിട്ടില്ല എന്ന് തന്നെ പറയാം.

🔸ഹല്ലാ എന്ന യുവതിയാണ് നമ്മുടെ പ്രധാന കഥാപാത്രം, പുള്ളിക്കാരിയെ നമ്മൾ ആദ്യം കാണുന്നത് ഒരു താഴ്‌വരയിൽ വെച്ചാണ്. ഗ്രാമത്തിൽ സ്ഥിതി ചെയ്യുന്ന അലുമിനിയം പ്ലാന്റിലേക്കുള്ള വൈദ്യുതി സഞ്ചാരം വളരെ ബദ്ധപ്പെട്ട് ആയുധങ്ങൾ ഉപയോഗിച്ച് തടസ്സപ്പെടുത്തുന്ന ഹല്ലയെ ആദ്യം കാണുമ്പോൾ തന്നെ തോന്നും, കൊള്ളാമല്ലോ ഇവര് എന്ന്. ഇതിപ്പോ ആദ്യമായിട്ടല്ല ഹല്ല ഈ പണി ചെയ്യുന്നത്, പ്രകൃതിക്ക് ദോഷമാണ് എന്ന വസ്തുത മനസ്സിൽ വെച്ച് കൊണ്ട് കുറച്ച് നാളുകളായി അവർ പ്ലാന്റിന്റെയും അതിന്റെ നടത്തിപ്പ്കാരുടെയും സ്വകാര്യ തലവേദന ആയി മാറിയിട്ട്. ഇങ്ങനെയൊക്കെ ആണ് കാര്യം എങ്കിലും ഹല്ലയുടെ ഐഡന്റിറ്റി ഇതുവരെ ആർക്കും പിടികിട്ടിയിട്ടില്ല.

🔸അത്യാവശ്യം ഒന്ന് രണ്ട് സുഹൃത്തുക്കളുടെ സഹായം ഹല്ലയ്ക്ക് ഉണ്ട് എങ്കിലും എത്ര കാലം ഇത് തുടർന്ന് കൊണ്ട് പോവാൻ കഴിയും എന്ന കാര്യത്തിൽ അവർക്ക് യാതൊരു ഉറപ്പുമില്ല, പോലീസും മറ്റ് ഉദ്യോഗസ്ഥരും നാൾക്കുനാൾ കൂടുതൽ ജാഗരൂകരായി കൊണ്ടിരിക്കുകയാണ്, ഒരു ചെറിയ പിഴവ് തന്റെ പക്കൽ സംഭവിച്ചാൽ മതി ജീവിതത്തിന്റെ ഒരു വലിയ ഭാഗം ജയിലിനുള്ളിലാവും എന്ന കാര്യത്തിൽ യാതൊരു സംശയവും വേണ്ട. ഇങ്ങനെയൊക്കെ ആണ് കാര്യം എങ്കിലും പിന്മാറുക എന്നത് അവർക്ക് ചിന്തിക്കാൻ കഴിയാത്ത കാര്യമാണ്, താൻ ഇറങ്ങി പുറപ്പെട്ടിരിക്കുന്ന ദൗത്യം തന്നെക്കാൾ എത്രയോ വലുതാണ് എന്ന് ഹല്ലയ്ക്ക് അറിയാം.

🔸ആയിടയ്ക്കാണ് ഹല്ലയുടെ ജീവിതം വഴി മാറ്റി വിട്ടേക്കാവുന്ന ഒരു സംഭവം അരങ്ങേറുന്നത്, ഹല്ലയെ അന്വേഷിച്ച് അവരുടെ വീട്ടുപടിക്കൽ ഒരു കത്ത് എത്തുകയാണ്. നാല് വർഷങ്ങൾക്ക് മുന്നേ ഒരു കുഞ്ഞിനെ ദത്ത് എടുക്കുന്നതിനായി ഹല്ല ഒരു ശ്രമം നടത്തിയിരുന്നു, അത് അംഗീകരിച്ച് കൊണ്ടുള്ള ഉത്തരവായിരുന്നു ആ കത്ത്. അതോട് കൂടി ഭാവിയെ സംബന്ധിച്ചുള്ള വലിയൊരു ചോദ്യം ഹല്ലയുടെ മുന്നിലേക്ക് എത്തുകയാണ്, താൻ ഇതുവരെ ജീവിച്ച് പോന്ന രീതികളും ആശയങ്ങളുമായി മുന്നോട്ട് പോവണോ അതോ ഈ കുഞ്ഞിനൊപ്പം പുതിയൊരു പാതയിലേക്ക് യാത്ര തുടങ്ങണമോ എന്ന പ്രസക്തമായ ചോദ്യം.

🔸മുകളിൽ സൂചിപ്പിച്ച കഥാഗതിയിൽ വലിയ പ്രാധാന്യം ഉള്ള മറ്റ് ചില കഥാപാത്രങ്ങൾ കൂടി ഉണ്ട്, ചില സർപ്രൈസുകളും, അതൊക്കെ തല്ക്കാലം സർപ്രൈസുകളായി തന്നെ നിക്കട്ടെ. ഏറ്റവും ലളിതമായി പറയുക ആണെങ്കിൽ നല്ല ഒന്നാന്തരം ഒരു സിനിമയാണ് വിമൺ അറ്റ് വാർ, കണ്ട് അവസാനിപ്പിക്കുമ്പോൾ നമ്മുടെ മൂടിനെ തന്നെ ബാധിക്കുന്ന നല്ല ഫസ്റ്റ് ക്‌ളാസ്‌ ഐറ്റം. കണ്ടില്ലെങ്കിൽ നഷ്ടമാണ് എന്ന് പറയാതെ വയ്യ, ഒരു ഒന്നേമുക്കാൽ മണിക്കൂർ മാറ്റി വെച്ചാൽ ചിലപ്പോൾ നിങ്ങൾക്ക് ലഭിക്കാൻ പോവുന്നത് ഓർമയിൽ കുറച്ച് കാലം നില്ക്കാൻ പോവുന്ന നല്ലൊരു സിനിമ ആയിരിക്കും എന്ന് ഉറപ്പ് തരുന്നു.

"Your Journey Is Now My Journey....❤"

Verdict : Must Watch

DC Rating : 95/100

570. Forbidden Planet (1956)

Director : Fred Wilcox

Genre : Sci Fi

Rating : 7.6/10

Country : USA

Duration : 99 Minutes

🔸ഫോർബിഡൺ പ്ലാനറ്റ് എന്ന സിനിമ ഇന്ന് കാണുമ്പോൾ ചിലപ്പോ നമ്മുടെ ജോസ് പ്രകാശ് എന്ന നടനെ ഓർത്ത് പോയേക്കാം. വേറൊന്നുമല്ല ചിത്രത്തിന്റെ സെറ്റപ്പും, കൽ ഭിത്തികളും, അണ്ടർ ഗ്രൗണ്ട് സെറ്റപ്പും എല്ലാം ജോസ് പ്രകാശ് എന്ന വില്ലന്റെ പേര് മനസ്സിൽ എത്തിക്കും, അത് അവിടെ നിക്കട്ടെ. ഒരല്പം പഴക്കം ഉണ്ട് ഈ ചിത്രത്തിന് ഏകദേശം ഏഴിനടുത്ത് പതിറ്റാണ്ടുകളുടെ പഴക്കം, ഈ കാരണം കൊണ്ട് തന്നെ ബഹിരാകാശത്ത് അരങ്ങേറുന്ന ഒരു ചിത്രത്തിന്റെ സെറ്റപ്പും ഇഫക്റ്റും എല്ലാം വളരെ ബേസിക് ആയിരിക്കും എന്നത് പറയേണ്ട കാര്യം ഇല്ലല്ലോ, ചിലപ്പോൾ കോമെടി ആയി വരെ തോന്നിയേക്കാം. സിനിമ കാണുന്നത് വരെ ഇതായിരുന്നു ചിന്ത, റിപ്പീറ്റ് സിനിമ കാണുന്നത് വരെ മാത്രം.

🔸ഇനി കഥയിലേക്ക്, ഇത് ലോകചരിത്രത്തിലെ ഇരുപത്തി മൂന്നാം നൂറ്റാണ്ട്. സ്റ്റാർഷിപ് എന്ന ബഹിരാകാശ പേടകം ആൾട്ടർ 4 എന്ന ഗൃഹം ലക്‌ഷ്യം വെച്ച് കൊണ്ട് നീങ്ങുകയാണ്, ഭൂമിയിൽ നിന്നും പ്രകാശ വർഷങ്ങൾ അകലെയാണ് ഈ ഗ്രഹം സ്ഥിതി ചെയ്യുന്നത്, അത്യധികം കഠിനവും അപകടപൂർണവും ആയ ഈ യാത്രയ്ക്ക് പിന്നിൽ ഒരു കാരണമുണ്ട്, ഈ യാത്രയെ വേണമെങ്കിൽ ഒരു റസ്ക്യു മിഷൻ എന്ന് വേണമെങ്കിൽ വിശേഷിപ്പിക്കാവുന്നതാണ്. ഇരുപത് വർഷത്തോളം മുൻപ് അരങ്ങേറിയ ഒരു ദുരന്തത്തിന്റെ ശേഷിപ്പ് അന്വേഷിച്ചുള്ള യാത്രയാണ് ഇത്.

🔸അതായത് ഇരുപത് വർഷത്തോളം മുൻപ് ഡോക്ടർ എഡ്വേർഡ് മോർബിയസിന്റെ നേതൃത്വത്തിൽ ഒരു പര്യവേഷക ടീം ആൾട്ടയർ 4 ലക്ഷ്യം വെച്ച് പോവുക ഉണ്ടായി, അവിടത്തെയും ചുറ്റുപാടുകളിലെയും ശാസ്ത്രീയമായ വശങ്ങൾ പഠിക്കുക എന്നതായിരുന്നു യാത്രയുടെ ഉദ്ദേശം, എന്നാൽ ഈ സംഘം പിന്നീട് മടങ്ങി വന്നില്ല, എന്ന് മാത്രമല്ല ഇവരുമായി ബന്ധപ്പെടാനോ, സഹായിക്കാനോ ഉള്ള ഒരു ശ്രമങ്ങളും ഫലവത്ത് ആയതുമില്ല. ഈ ഒരു പശ്ചാത്തലത്തിലാണ് കമാന്റർ ജോൺ ആഡംസിന്റെ നേതൃത്വത്തിൽ ഒരു ടീം അവിടേക്ക് പുറപ്പിടുന്നത്.

🔸ഇരുപത് വർഷങ്ങൾക്ക് ശേഷമുള്ള യാത്രയിൽ ജോൺ ആഡംസ് അത്ഭുതങ്ങൾ ഒന്നും പ്രതീക്ഷിക്കുന്നില്ല, തങ്ങൾക്ക് മുൻപേ പുറപ്പെട്ടവർ ജീവനോടെ ഉണ്ടാവും എന്നും അയാൾ കരുതുന്നില്ല എന്നാലും തനിക്ക് കിട്ടിയ നിർദ്ദേശ പ്രകാരം കാര്യങ്ങൾ കണ്ടറിഞ്ഞ് ഉറപ്പ് വരുത്തണം എന്നത് മാത്രമാണ് അയാളുടെ ലക്ഷ്യം. അങ്ങനെ സംഘം ആൾട്ടയർ നാലിന്റെ ഉപരിതലത്തിൽ എത്തുകയാണ്, അവിടെ ജോൺ ആഡംസിനെ ഞെട്ടിച്ച് കൊണ്ട് ഒരു റഡാർ സിഗ്നലും അതിനെ തുടർന്ന് ഒരു മനുഷ്യ ശബ്ദവും കേൾക്കുന്നിടത്ത് ചിത്രം ചൂട് പിടിക്കുകയാണ്.

🔸ഒന്നേമുക്കാൽ മണിക്കൂറിന് അടുത്താണ് ചിത്രത്തിന്റെ ദൈർഖ്യം, അവയിൽ തന്നെ ആദ്യ അഞ്ച് മിനിറ്റ് നടക്കുന്ന കാര്യങ്ങൾ മാത്രമേ പോസ്റ്റിൽ ഉൾപ്പെടുത്തിയിട്ടുള്ളൂ, ആദ്യാവസാനം പിടിച്ചിരുത്തുന്ന, എങ്ങേയ്‌ജിങ്‌ ആയ ചിത്രം എന്നൊക്കെയുള്ള വിശേഷണം ഈ സിനിമയ്ക്ക് നൽകാം. ഒരു മിനിറ്റ് പോലും ബോർ അടിക്കാതെ കാണാൻ കഴിയുന്ന നല്ലൊരു ചിത്രം, നമ്മൾ വിചാരിക്കുന്ന വഴിയേ പോകാത്ത അവതരണം എന്നതൊക്കെ മറ്റ് പ്ലസ് പോയിന്റുകളാണ്. കാണാൻ ശ്രമിക്കുക, ഒരു തരത്തിലും നഷ്ടം ആവില്ല ഈ ചിത്രം.

Verdict : Must Watch

DC Rating : 90/100

569. Spider-Man Far From Home (2019)

Director : Jon Watts

Genre : Super Hero

Rating : 8.2/10

Country : USA

Duration : 129 Minutes

🔸ടോണി സ്റ്റാർക്ക് എന്ന വൻമരം വീണു, പകരമാര് എന്നതാണ് ചോദ്യം. അതാ കടന്ന് വരികയാണ് നമ്മടെ പീറ്റർ പാർക്കർ അഥവാ സ്‌പൈഡർമാൻ, പ്രേക്ഷകനും ലോകത്താകമാനം ഉള്ള മാർവെൽ ആരാധകരും ഒരുപോലെ ചോദിച്ച ചോദ്യത്തിന് ഉത്തരം പറയാൻ ശ്രമിക്കുകയാണ് മാർവെൽ ഫെയ്‌സ് ത്രീയിലെ അവസാന ചിത്രമായ സ്‌പൈഡർമാൻ ഫാർ ഫ്രം ഹോം. എൻഡ് ഗെയിം പോലെയൊരു ലാർജ് സ്കെയിൽ ചിത്രത്തിന് ശേഷം വരുന്ന ചിത്രം ആയതിനാലും മുൻ ചിത്രത്തിന്റെ ക്ലൈമാക്സിന് ശേഷം പിന്നീട് എന്ത് എന്ന ചോദ്യം ഒരു വലിയ ഫാക്റ്ററായി നിലനിൽക്കുന്നതിനാലും അത്യാവശ്യം നല്ല പ്രതീക്ഷ ഉണ്ടായിരുന്നു ഈ ചിത്രത്തിൽ, സ്‌പൈഡർമാൻ എന്ന കഥാപാത്രത്തോടുള്ള ഇഷ്ടം കൂടി ചേർന്നപ്പോൾ അത് ആദ്യ ദിനം തന്നെ സിനിമ കാണാനുള്ള പ്രേരണയായി മാറുകയും ചെയ്തു.

🔸ചിത്രത്തിന്റെ കഥയിലേക്ക് കടക്കുക ആണെങ്കിൽ ചെറിയ തോതിൽ സ്പോയ്ലർ ഉണ്ടാവും, മുൻ ഭാഗ മാർവെൽ സിനിമകൾ കണ്ടിട്ടില്ലാത്തവർ, അറിയാൻ താല്പര്യം ഇല്ലാത്തവർ ഇവിടെ വെച്ച് നിർത്തുന്നത് നന്നാവും. അവേഞ്ചേഴ്‌സ് എൻഡ് ഗെയിം എന്ന ചിത്രത്തിലെ ടോണി സ്റ്റാർക്കിന്റെ മരണം ഉൾക്കൊള്ളാൻ പീറ്ററിന്‌ കഴിഞ്ഞിട്ടില്ല, അതുമായി അവൻ പൊരുത്തപ്പെട്ട് വരുന്നതേ ഉള്ളൂ. ടോണിയുടെ മരണം തന്റെ മേൽ കൊണ്ടുവന്ന ഉത്തരവാദിത്തങ്ങളുടെ ഭാരവും അവൻ തിരിച്ചറിയാൻ പോവുന്നതേ ഉള്ളൂ, ആ തിരിച്ചറിവ് അവന് ലഭിക്കുന്നത് ഈ യൂറോപ്യൻ യാത്രയിലാണെന്ന് മാത്രം. ഈ കഥയാണ് രണ്ട് മണിക്കൂർ ദൈർഖ്യത്തിൽ സ്‌പൈഡർമാൻ ഫാർ ഫ്രം ഹോം പറയുന്നത്.

🔸ഇനി നമുക്ക് നല്ലതും മോശവും എന്ന് അനുഭവപ്പെട്ട കാര്യങ്ങളിലേക്ക് കടക്കാം. ആദ്യമേ തന്നെ ജെയ്ക് ജില്ലൻഹാൽ, പൊതുവെ കോമിക് ബുക് സിനിമകൾക്ക് പറ്റിയ ആളാണ് ജെയ്ക് എന്ന് ഇതുവരെ കരുതിയിരുന്നില്ല, പ്രത്യേകിച്ചും പുള്ളിയുടെ ശൈലിയും പഴയ കഥാപാത്രങ്ങളും എല്ലാം കണക്കിൽ എടുക്കുമ്പോൾ. എന്നാൽ ഈ ധാരണ തെറ്റായിരുന്നു എന്ന് പറയേണ്ടി വരും, മിസ്റ്റീരിയോ എന്ന കഥാപാത്രത്തെ പുള്ളി മികച്ചതാക്കിയിട്ടുണ്ട്, നിസ്സംശയം പറയാം. പുള്ളി ഉൾപ്പെട്ട ചില ഹാലൂസിനേഷൻ രംഗങ്ങളും സിനിമയുടെ ഹൈലൈറ്റ് ആയിരുന്നു, ഈ രംഗങ്ങൾ ട്രെയ്ലറുകളിലും മറ്റും കാണിക്കാത്തതും ഒരു സൂചന പോലും നൽകാഞ്ഞതും വളരെ മികച്ച തീരുമാനം തന്നെ. എൻഡ് ഗെയിം പോലുള്ള ചിത്രങ്ങൾക്ക് നൽകിയ ഹോമേജും, പ്രധാന കഥാപാത്രങ്ങൾക്കിടയിലുള്ള മികച്ച കെമിസ്ട്രിയും മറ്റ് പ്ലസ് പോയിന്റുകളാണ്.

🔸സ്‌പൈഡർമാൻ ചിത്രം എന്ന് കേൾക്കുമ്പോൾ സ്വാഭാവികമായും പ്രതീക്ഷിക്കാവുന്ന മികച്ച ഹ്യുമറും ചിത്രത്തിന്റെ മേന്മയാണ്, അതിനോടൊപ്പം ചേർക്കാവുന്ന നല്ല ആക്ഷൻ രംഗങ്ങളും, ബാക്ക്ഗ്രൗണ്ട് സ്കോറും എല്ലാം നന്നായിരുന്നു. ഇനി നെഗറ്റീവ് ഭാഗത്തേക്ക് കടക്കുക ആണെങ്കിൽ ഒരല്പം പ്രെഡിക്റ്റബിൾ ആണ് ചിത്രം, ഒരു ട്വിസ്റ്റ് രൂപേണ ചില വെളിപ്പെടുത്തലുകൾ സിനിമയിൽ ഉണ്ടെങ്കിലും അത് മിക്ക പ്രേക്ഷകനും ഒരു മൈൽ മുന്നേ പ്രതീക്ഷിച്ചത് ആണ് എന്ന് പറയേണ്ടി വരും. മെയ് പാർക്കരെ പോലെ ചില കഥാപാത്രങ്ങളെ സൈഡ് ആക്കിയതും മറ്റും വേണമെങ്കിൽ നെഗറ്റീവായി കാണാം എന്ന് മാത്രം. ഇതോട് കൂടി ഈ ഭാഗവും പറഞ്ഞ് തീരുകയാണ്.

🔸എല്ലാം കണ്ടും അറിഞ്ഞും തീർന്നു എന്ന് കാഴ്ചക്കാരൻ കരുത്തുന്നിടത്ത് രണ്ട് സർപ്രൈസുകൾ കൂടി സ്റ്റുഡിയോ കരുതി വെച്ചിട്ടുണ്ട്, രണ്ട് പോസ്റ്റ് ക്രെഡിറ്റ് സീനുകളുടെ രൂപത്തിൽ. ഇവയിൽ തന്നെ മിഡ് ക്രെഡിറ്റ് സീൻ ഒരു പരിധി വരെ സിനിമയെ ഓവർ ഷാഡോ ചെയ്യുന്ന ഒന്നാണ്, കാണാതെ തിയേറ്റർ വിട്ടാൽ വൻ നഷ്ടം എന്നൊക്കെ പറയാവുന്ന ഐറ്റം. സ്‌പൈഡർമാൻ ഫർ ഫ്രം ഹോം ഒരു എന്റെർറ്റൈനെർ ആണ്, ആദ്യാവസാനം ചിരിച്ച് രസിച്ച് കാണാവുന്ന ഒരു സിനിമ, കൂടുതൽ അവകാശവാദങ്ങൾ ഒന്നുമില്ല, അതിന്റെ ആവശ്യം ഉദിക്കുന്നുമില്ല.

Verdict : Good

DC Rating : 72/100

568. Donbass (2018)

Director : Sergei Loznitsa

Genre : Drama

Rating : 6.9/10

Country : Germany

Duration : 121 Minutes

🔸യുദ്ധം പ്രമേയമാക്കിയിട്ട് അനവധി സിനിമകൾ പിറത്തിറങ്ങിയിട്ടുണ്ട്, വിവിധ ഭാഷകളിൽ, വിവിധ രാജ്യങ്ങളിൽ എന്തിന് വിവിധ രീതിയിൽ പോലും വന്നിട്ടുണ്ട്. ഇവയെല്ലാം യുദ്ധത്തിന്റെ ഭീകരതയോ, അല്ലെങ്കിൽ യുദ്ധത്തിന്റെ പ്രത്യാഘാതങ്ങളോ അതും അല്ലെങ്കിൽ കാരണങ്ങളിലോ എല്ലാമാണ് പൊതുവെ ഫോക്കസ് ചെയ്ത് കണ്ടിട്ടുള്ളത്, ഇവിടെയാണ് ഡോൻബാസ് എന്ന ചിത്രം ഒരല്പം വ്യത്യസ്തം ആവുന്നത്. യുദ്ധത്തെ ഒരു തരത്തിൽ തമാശയായോ, പരിഹാസമായോ മാറ്റുകയാണ് കഴിഞ്ഞ വർഷം പുറത്തിറങ്ങിയ ഈ ജർമൻ ഡ്രാമാ ചിത്രം, ഒരു ഡിഫറെൻറ്റ് ട്രീറ്റ്മെന്റ് ആണ് ചിത്രം മുന്നോട്ട് വെക്കുന്നത്.

🔸പതിമൂന്നോളം സെഗ്മെന്റുകളായി വിഭജിക്കപ്പെട്ട് കിടക്കുകയാണ് ഡോൻബാസ് എന്ന ചിത്രം, പരസ്പര ബന്ധിതം അല്ല എന്ന് പ്രത്യക്ഷത്തിൽ തോന്നുമെങ്കിലും ഇവയിൽ എല്ലാം നില നിൽക്കുന്ന കോമൺ ആയ ചില കാര്യങ്ങൾ ഉണ്ട്. ഈ കാര്യങ്ങളിൽ ഏറ്റവും പ്രാധാന്യം അർഹിക്കുന്ന ഒന്നാണ് യുക്രേനിയൻ ദേശീയ വാദികളും റഷ്യയെ പിന്തുണയ്ക്കുന്ന റിപ്പബ്ലിക്കുകളും തമ്മിലുള്ള അടിഞ്ഞ് കിടക്കുന്ന വൈരാഗ്യം. പ്രതീക്ഷിക്കുന്നതിലും മുകളിലാണ് ഈ രണ്ട് വിഭാഗങ്ങൾക്കിടയിലുള്ള കുടിപ്പക, ഒരു തരം ദേഷ്യവും, പുച്ഛവും എല്ലാം ഇവർ തമ്മിൽ വെച്ച് പുലർത്തുന്നുണ്ട്, അത് ചിത്രത്തിന്റെ വിവിധ പോയിന്റുകളിൽ നിന്നും വ്യക്തമാവുന്നതുമാണ്.

🔸തീവ്ര ദേശീയ വാദികളുടെയും വിപ്ലവ വിഭാഗക്കാരുടെയും വാദങ്ങൾ ചിത്രം വിശകലനം ചെയ്യുന്നുണ്ട്, എന്നാൽ ഈ രണ്ട് വിഭാഗത്തിന്റെയും ഭാഗത്ത് ചേർന്ന് നിൽക്കാതെ മറ്റൊരു വശത്ത് കൂടിയാണ് സിനിമ പുരോഗമിക്കുന്നതും. ഇരു വിഭാഗങ്ങൾക്കും ഇടയിൽ രണ്ടാം ലോക മഹായുദ്ധ കാലത്തെ ഓർമ്മകൾ പോലും പൂർണമായും അസ്തമിച്ചിട്ടില്ല, എന്നാൽ ആ കാലയളവിൽ ഒരുമിച്ച് യുദ്ധകാലത്തിലേക്ക് ഇറങ്ങിയിടത്ത് നിന്നും സ്ഥിതി ഗതികൾ ഒരുപാട് മാറി പോയിരിക്കുന്നു. ഡോൻബാസ് എന്ന ഉക്രേനിയൻ ഗ്രാമ പ്രദേശത്താണ് ചിത്രത്തിന്റെ കഥ അരങ്ങേറുന്നത്.

🔸ഭയം, ഒരു പരിധി വരെ ഭയം എന്ന വികാരമാണ് ചിത്രത്തെ മുന്നോട്ട് നയിക്കുന്നത്. ഭൂത കാലത്തെ അനുഭവങ്ങളിൽ കൂടി നേടിയ അനുഭവത്താൽ അതെല്ലാം ഇനിയും അനുഭവിക്കേണ്ടി വരുമോ എന്ന ഭയം, വർത്തമാന കാലത്തെ ദുരിതങ്ങൾ അതിജീവിക്കാൻ തങ്ങൾക്ക് കഴിയുമോ എന്ന കാര്യത്തിലെ ഭയം, എല്ലാത്തിനും ഉപരി ഭാവി കാലം തങ്ങൾക്കായി കാത്ത് വെച്ചിരിക്കുന്ന അഗ്നി പരീക്ഷണങ്ങൾ എന്തെല്ലാമാണ് എന്ന അനിശ്ചിതാവസ്ഥ നൽകുന്ന ഭയം, ഇവയെല്ലാം നമ്മൾ കാണുന്ന ഓരോ കഥാപാത്രത്തിലും കാണാൻ കഴിയും. ഈ യാഥാർഥ്യങ്ങളുടെ അവതരണമാണ് ഈ ചിത്രം എന്ന് പറയാം.

🔸എല്ലാ വിഭാഗക്കാരായ ഓടിയെൻസിനും പറ്റിയ ഒന്നല്ല ഡോൻബാസ് എന്ന ചിത്രം, ചിത്രം പറയാൻ ഉദ്ദേശിക്കുന്ന കാര്യങ്ങളിലും അവ പറയുന്ന രീതിയിലും താല്പര്യം ഇല്ലാത്ത ഒരു വ്യക്തിക്ക് ചിത്രം അരോചകമായി തോന്നിയേക്കാം, മടുപ്പ് അനുഭവപ്പെട്ടേക്കാം, ഈ കാരണങ്ങൾ കൊണ്ട് തന്നെ ചിത്രം എല്ലാവര്ക്കും നിർദ്ദേശിക്കുന്നില്ല. സ്ഥിരം വാർ, പൊളിറ്റിക്കൽ ചിത്രങ്ങളിൽ നിന്നും വ്യത്യസ്തമായ ഒരു ശ്രമം കാണാൻ താത്പര്യപ്പെടുന്നു എങ്കിൽ കാണാൻ ശ്രമിക്കുക. ഇത് പോലൊരു ചിത്രത്തിന്റെ ആസ്വാദനത്തിന് വ്യക്തി താല്പര്യങ്ങൾക്ക് വലിയ പ്രാധാന്യം ഉണ്ടെന്നതിനാൽ കൂടുതൽ പറഞ്ഞ് മുഷിപ്പിക്കുന്നില്ല, കണ്ട് തന്നെ വിലയിരുത്തുക.

Verdict : Watchable

DC Rating : 65/100

567. The Towering Inferno (1974)

Director : John Guillermin

Genre : Thriller

Rating : 7/10

Country : USA

Duration : 165 Minutes

🔸നൂറ്റി മുപ്പത്തി അഞ്ച് നിലകൾ ഉള്ള ഒരു ബിൽഡിങ്ങിന്റെ ഉൽഘാടനം സാൻ ഫ്രാന്സിസ്കോയിൽ നടന്ന് കൊണ്ടിരിക്കുകയാണ്. നഗരത്തിലെ തന്നെ ഏറ്റവും ഉയരമേറിയ ബിൽഡിങ് ആയതിനാലും, ഇത് നഗരവാസികൾക്ക് അഭിമാനകരമായ ഒരു സന്ദർഭം ആയതിനാലും ആഘോഷിക്കാൻ നഗരവാസികൾ മിക്കവരും അവിടെ സന്നിഹിതരായിട്ടുണ്ട്. രാഷ്ട്രീയ, സാംസ്‌കാരിക, സിനിമാ മേഖലകളിലെ പ്രമുഖർക്ക് വേണ്ടി അന്നേ ദിവസം ഒരു ചെറിയ പാർട്ടിയും ഉടമയായ ഡങ്കൻ സംഘടിപ്പിച്ചിട്ടുണ്ട്, നൂറ്റി ഇരുപതാം നിലയിൽ. എന്നാൽ കണക്ക് കൂട്ടലുകൾ എല്ലാം തെറ്റിച്ച് കൊണ്ട് അന്നേ ദിവസം അവിടെ ഒരു വലിയ അപകടം സംഭവിക്കുകയാണ്, തുടർന്ന് അരങ്ങേറുന്ന സംഭവങ്ങളാണ് മൂന്ന് മണിക്കൂറിന് അടുത്ത് ദൈർഖ്യമുള്ള ഈ ചിത്രം പറയുന്നത്.

🔸എഴുപതുകളിലെ ഏറ്റവും ചിലവേറിയ ചിത്രങ്ങളിൽ ഒന്നായിരുന്നു ദി ടവറിങ് ഇൻഫെർണോ, മൂന്ന് മണിക്കൂറിന് അടുത്ത് ദൈർഖ്യവും, കഠിനമായ സെറ്റ് പീസുകളും ഉള്ള ചിത്രത്തിൽ സ്റ്റീവ് മക്വീന്, പോൾ ന്യുമാൻ തുടങ്ങിയവർ ഉൾപ്പെട്ട മികച്ചൊരു കാസ്റ്റും ഉണ്ടായിരുന്നു. പോൾ ന്യുമാൻ അവതരിപ്പിച്ച ഡൗഗ് റോബെർട്സ് എന്ന ആര്കിടെക്ടിലൂടെയാണ് നമ്മൾ ചിത്രത്തിലേക്ക് കടന്ന് വരുന്നത്. തന്റെ ജോലിയിൽ യാതൊരു വിട്ടുവീഴ്ചയ്ക്കും തയ്യാറാവാത്ത കണിശക്കാരനായ ഒരാളാണ് ഡൗഗ്, ചിലവിന്റെ പേരിൽ ബില്ഡിങ്ങിന്റെ സേഫ്ടിയിൽ യാതൊരു വിധ കോംപ്രമൈസിനും ഡൗഗ് തയാർ അല്ലെങ്കിലും കാര്യങ്ങൾ നടക്കുന്നത് അത്ര സ്മൂത്ത് ആയല്ല.

🔸ഉടമ ആയ ഡങ്കനും അയാളുടെ തല തെറിച്ച ഇലക്ട്രിക്കൽ എൻജിനിയറായ മരുമകനും ചില വിട്ടുവീഴ്ചകൾ നടത്തിയിട്ടുണ്ട്, എന്നാൽ ഇത് ഡൗഗ് തിരിച്ചറിയുന്നത് വളരെ വൈകിയാണ്. ഉൽഘാടന ദിവസം രാത്രി ഷോർട്ട് സർക്യൂട്ട് കാരണം ബിൽഡിങ്ങിൽ അഗ്നി ബാധ ഉണ്ടാവുകയാണ്. എൺപതാം നിലയിൽ ആരംഭിച്ച തീപിടുത്തം വലിയ പ്രശനം ആവില്ല എന്ന മുൻധാരണ തെറ്റിച്ച് കൊണ്ട് കൈവിട്ട് പോവുമ്പോൾ പുറത്തിറങ്ങാനാവാതെ ബിൽഡിങ്ങിനകത്ത് കുടുങ്ങി പോവുന്നത് മുന്നൂറിന് അടുത്ത് ജനങ്ങളാണ്. ഓരോ മിനുട്ടും കഴിയവേ ആളി കത്തി കൊണ്ടിരിക്കുന്ന തീയിൽ ഇവരുടെ ഭാവി എന്താവുമെന്ന ചോദ്യമാണ് പിന്നീടുള്ള രണ്ടര മണിക്കൂർ.

🔸സാൻ ഫ്രാൻസിസ്‌കോ നഗരത്തിലെ അഗ്നി ശമന സേനയ്ക്കും, മറ്റുള്ള വ്യക്തികളുടെ ജീവിതത്തിന് ബുദ്ധിമുട്ടുകൾ ഉണ്ടാവാതിരിക്കാൻ സ്വന്തം ജീവൻ സമർപ്പിച്ച ഓരോ സൈനികനും നന്ദി അറിയിച്ച് കൊണ്ട് അവർക്കായി സമർപ്പിച്ച ഒന്നാണ് ഈ ചിത്രം. അഗ്നി ശമന സേനാ ചീഫ് ആയ സ്റ്റീവ് മക്വീനിന്റെ കഥാപാത്രം ഈ വസ്തുത ന്യായീകരിക്കുന്നുമുണ്ട്, സ്‌ക്രീനിൽ ഉള്ള ഓരോ നിമിഷവും അദ്ദേഹത്തിന്റെ രീതികളും, ചേഷ്ടകളും ഇത് പോലെ അഭിനന്ദനം പ്രതീക്ഷിക്കാതെ അഹോരാത്രം പ്രവർത്തിക്കുന്നവർക്കുള്ള നന്ദി രേഖപ്പെടുത്തലുകളാണ്, ചിത്രം അത് പരാമര്ശിക്കുന്നുമുണ്ട് എന്നത് വലിയ കാര്യം തന്നെ.

🔸ഒരല്പം പതിയെ ആണ് ചിത്രം തുടങ്ങുന്നത് എങ്കിലും ഒരു അര മണിക്കൂർ മാർജിൻ കഴിഞ്ഞാൽ പിന്നെ എല്ലാം ശടപടെ എന്ന തോതിലാണ്, പ്രത്യേകിച്ചും ചിത്രത്തിന്റെ രണ്ടാം പകുതി ഒരിടവേള പോലും നൽകാത്ത വിധം വേഗത്തിൽ മുന്നോട്ട് പോവുന്നതാണ്. ആദ്യാവസാനം നെയിൽ ബൈറ്റിങ് എന്നൊക്കെ വിശേഷിപ്പിക്കാവുന്ന മികച്ച ഒരു ത്രില്ലെർ ആണ് ദി ടവറിങ് ഇൻഫെർണോ, ഡിസാസ്റ്റർ ചിത്രങ്ങൾ ഇഷ്ടപ്പെടുന്നവർ എന്തായാലും കണ്ടിരിക്കേണ്ട ഒന്ന്. കൂടുതൽ വലിച്ച് നീട്ടുന്നില്ല, കാണാൻ ശ്രമിക്കുക.

Verdict : Very Good

DC Rating : 80/100

566. Dynasties (2018)

Presenter : David Attenborough

Genre : Documentary

Rating : 9.2/10

Seasons : 1

Episodes : 05

Country : UK

Duration : 58 - 62 Minutes

🔸ബിബിസി നാച്ചുറൽ ഹിസ്റ്ററി യുണിറ്റ് നിർമിച്ച്, ഒരു കൂട്ടം വ്യക്തികളുടെ കഠിനമായ ശ്രമങ്ങളുടെയും പ്രയത്നത്തിന്റെയും ഫലമായി പതിമൂന്ന് വർഷങ്ങൾക്ക് മുന്നേ പുറത്തിറങ്ങിയ സീരീസ് ആണ് പ്ലാനറ്റ് ഏർത്. ഒരു ഡോകുമെന്ററി സീരീസ് എന്ന നിലയിൽ എന്നെ ഇത്രയും അമ്പരപ്പിച്ച ഒരു സീരീസ് വേറെയില്ല, തങ്ങളുടെ സ്വപ്നം സാക്ഷാത്കരിക്കുന്നതിന് വേണ്ടി അണിയറയിൽ പ്രവർത്തിച്ചവർ എടുത്ത എഫേർട് സ്‌ക്രീനിൽ തന്നെ കാണാൻ ഉണ്ടായിരുന്നു. ഈ ഒരൊറ്റ കാരണം കൊണ്ട് തന്നെ ഡൈനാസ്റ്റീസ് എന്ന ഡോക്യൂമെന്ററി സീരീസിലും പ്രതീക്ഷ വാനോളം ആയിരുന്നു, മോശം ആവില്ല എന്നത് ഉറപ്പ് ആയിരുന്നെങ്കിലും പ്ലാനറ്റ് എർത്തിനോളം നിൽക്കുമോ എന്നതായിരുന്നു സംശയം.

🔸ഭൂമിയുടെ ചരിത്രത്തിലെ തന്നെ ഏറ്റവും ആഘോഷിക്കപ്പെട്ട, എന്നാൽ ഇന്ന് വംശ നാശ ഭീഷണി നേരിട്ട് കൊണ്ടിരിക്കുന്ന അഞ്ച് മൃഗങ്ങൾ ആണ് ഈ ഡോക്യുമെന്ററി സീരീസിലെ അഞ്ച് എപ്പിസോഡിന്റെയും വിഷയം. ഇവ യഥാക്രമം ചിമ്പാൻസി, പെൻഗ്വിൻ, സിംഹം, ചെന്നായ, കടുവ എന്നിവയാണ്. ഈ മൃഗങ്ങളുടെ രീതികൾ, ആവാസവ്യവസ്ഥ, തുടങ്ങിയ കാര്യങ്ങൾക്ക് പ്രാധാന്യം നൽകിയാണ് ഓരോ എപ്പിസോഡും ചിട്ടപ്പെടുത്തിയിട്ടുള്ളത്. പ്രതീക്ഷിച്ചത് പോലെ തന്നെ ദൃശ്യങ്ങളാണ് സീരീസിന്റെ ശക്തി, ഓരോ ഫ്രയിമും കഴിവും ക്ഷമയും വിളിച്ചോതുന്നത് തന്നെ എന്ന് പറയേണ്ടി ഇരിക്കുന്നു. ഇതിനോടൊപ്പം ഡേവിഡ് അറ്റൻബറോയുടെ ശബ്ദം കൂടി ചേരുമ്പോൾ മികച്ച ഒരനുഭവമായി മാറുന്നുണ്ട് ഡൈനാസ്റ്റീസ്.

🔸ചിമ്പാൻസികളിൽ ശ്രദ്ധ കൊടുക്കുന്ന ആദ്യ എപ്പിസോഡിലെ കേന്ദ്ര കഥാപാത്രം ഡേവിഡ് ആണ്, മുപ്പതിൽ അധികം ചിമ്പാൻസികൾ ഉള്ള സംഘത്തിന്റെ നേതാവ് ആണ് ഡേവിഡ്. ഉദ്ദേശം മൂന്ന് വർഷത്തോളമായി ഡേവിഡ് ഈ നേതാവിന്റെ വേഷം കയ്യാളാൻ തുടങ്ങിയിട്ട്. ഡേവിഡിന്റെ ശരീരത്തേയും, മുഖത്തെയും വരെയുള്ള പാടുകൾ തന്റെ സ്ഥാനം നിലനിർത്താനായി മറ്റുള്ളവരുമായി നടത്തിയ പോരാട്ടങ്ങളുടെ ബാക്കി പത്രങ്ങളാണ്. ഇതാണ് അവിടത്തെ നിയമം, വെല്ലുവിളിയായി വരുന്ന ഓരോരുത്തരെയും നേതാവ് നേരിടണം, കൂട്ടത്തെ നയിക്കാൻ ഏറ്റവും യോഗ്യനായവൻ താനാണ് എന്ന് അയാൾ തെളിയിക്കണം, ഓരോ വെല്ലുവിളിയും അയാൾ അതിജീവിക്കണം, അപ്പോഴേ അയാൾക്ക് ആ സ്ഥാനം സ്വന്തമാവുക ഉള്ളൂ.

🔸ആഫ്രിക്കയിലെ സെനഗലിൽ നിന്നും ഡേവിഡിന്റെ കഥ അറിഞ്ഞ ശേഷം അടുത്ത എപ്പിസോഡിൽ നമ്മൾ പോവുന്നത് അന്റാർട്ടിക്കയിലെ മഞ്ഞ് പുതച്ച താഴ്വരയിലേക്കാണ്, പെൻഗ്വിൻ എന്ന വംശത്തിന്റെ കഥ കേൾക്കാനായി. ഒരു പെൻഗ്വിൻ കുഞ്ഞിന്റെ ജന്മം തുടങ്ങി, അത് സ്വന്തം കാലിൽ നിൽക്കുന്നത് വരെയുള്ള അച്ഛൻ അമ്മമാരുടെ ജീവിതചര്യയും അവരുടെ രീതികളും എല്ലാമാണ് ഈ ഭാഗത്ത് പറയുന്നത്, ഒരുപക്ഷെ സീരീസിലെ തന്നെ ദൃശ്യ വിസ്മയം എന്നൊക്കെ വിശേഷിപ്പിക്കാവുന്ന ചില രംഗങ്ങൾ ഇവിടെ കാണാനിടയായി. മൂന്നാമത്തെ എപ്പിസോഡ് സിംഹങ്ങളെ കുറിച്ചാണ്, അതും ആൺ സിംഹങ്ങൾ ഉപേക്ഷിച്ച് പോയ മസായി മാരയിലെ ഒരു കൂട്ടം പെൺ സിംഹങ്ങളാണ് ഈ ഭാഗത്തെ ശ്രദ്ധാ കേന്ദ്രങ്ങൾ.

🔸നാലാമത്തെയും അഞ്ചാമത്തേയും എപ്പിസോഡുകൾ യഥാക്രമം സിംബാബ്‌വേയിലെ ആഫ്രിക്കൻ ചെന്നായ്ക്കളെ പറ്റിയും, ഇന്ത്യയിലെ ബംഗാൾ കടുവകളെ പറ്റിയുമാണ്. ചുരുക്കി പറയുക ആണെങ്കിൽ തികച്ചും വ്യത്യസ്തമായ ഭൂ പശ്ചാത്തലമുള്ള അഞ്ച് ജീവികളുടെ രസകരമായ ജീവിതമാണ് ഈ അഞ്ച് ഭാഗ ഡോക്യൂമെന്ററി സീരീസ് പറയുന്നത്. ഒരുപക്ഷെ ഭാവി കാലത്ത് ഇവ പലതും അതിജീവിച്ചു എന്ന് പോലും വരില്ല, അങ്ങനെ ആണെങ്കിൽ ഈ സീരീസ് ഒരു ഓർമപ്പെടുത്തൽ കൂടിയാണ്. അങ്ങനെ ഉണ്ടാവാതിരിക്കട്ടെ എന്ന പ്രത്യാശയിൽ നിർത്തുന്നു, താല്പര്യം ഉണ്ടെങ്കിൽ കാണാൻ ശ്രമിക്കുക, വേറിട്ടൊരു അനുഭവമാണ് ഡൈനാസ്റ്റീസ്.

Verdict : Must Watch

DC Rating : 90/100

565. Corn Island (2014)

Director : Giorgi Ovashvilli

Genre : Drama

Rating : 7.6/10

Country : Georgia

Duration : 100 Minutes

🔸അല്പം സ്ലോ ആയ രീതിയിൽ തുടങ്ങി പോകെ പോകെ കഥയിലേക്ക് വലിച്ചടുപ്പിച്ച ശേഷം ഒടുവിൽ അവസാനിക്കുമ്പോൾ മനോഹരമായി മാറുന്ന ഫാമിലി ഡ്രാമ ചിത്രങ്ങൾ ഇഷ്ടപ്പെടുന്നവർ ആണ് നിങ്ങൾ എങ്കിൽ കോൺ ഐലൻഡ് അത്തരമൊരു, കണ്ടിരിക്കേണ്ട ചിത്രമാണ്. നൂറ് മിനുട്ടിന് അടുത്ത് ദൈർഖ്യമുള്ള ചിത്രത്തിൽ ആകെ രണ്ട് പ്രധാന കഥാപാത്രങ്ങളെ ഉള്ളൂ, വന്ന് പോവുന്ന തോതിൽ ഉള്ള കുറച്ച് കഥാപാത്രങ്ങൾ വേറെയും, അധികം സംഭാഷണങ്ങളും ചിത്രത്തിൽ ഇല്ല. കാണുന്നതിന് മുന്നേ ഒരു ധാരണ ലഭിക്കാനാണ് ഇത്രയും പറഞ്ഞത്.

🔸പ്രായം നന്നായി ബാധിച്ച ഒരു മുത്തശ്ശൻ കഥാപാത്രവും, യൗവനത്തിലേക്ക് കടന്ന അയാളുടെ പേരകുട്ടിയും ആണ് ചിത്രത്തിലെ പ്രധാന കഥാപാത്രങ്ങൾ. ഈ രണ്ട് കഥാപാത്രങ്ങളിലും അധിഷ്ഠിതമായി നിൽക്കുന്നതാണ് ഈ ചിത്രം, ഇവരുടെ രീതികളിലും, ചെയ്തികളിലും, സംഭാഷണങ്ങളിൽ കൂടിയുമാണ് ചിത്രം പുരോഗമിക്കുന്നത്. ഇതിൽ വൃദ്ധൻ കഥാപാത്രം ഒരു കർഷകൻ ആണ്, വളരെ പ്രാകൃതമായ ഒരു രീതിയാണ് അയാൾ കൃഷിക്കായി ഉപയോഗിക്കുന്നത്. ഇങ്ങനെ ഒരു കൃഷിക്കാലത്ത് സംഭവിക്കുന്ന കഥയാണ് ഈ ചിത്രത്തിലെ സംഭവങ്ങൾ മുഴുവൻ, അതായത് വിത്ത് പാകുന്നത് തൊട്ട് വിളവെടുപ്പ് നടക്കുന്നത് വരെയുള്ള കാലഘട്ടം.

🔸ഇരുവരും കൃഷി ഇറക്കാൻ പോവുന്ന സ്ഥലത്തിന് ഒരു ചെറിയ പ്രത്യേകത ഉണ്ട്, ഇത് നദിയുടെ ഒത്ത നടുക്കുള്ള ഒരു ചെറിയ തുരുത്ത് ആണ്. വേനൽ കാലത്ത് വെള്ളം ഇറങ്ങുമ്പോൾ മാത്രമേ ഈ തുരുത്ത് പ്രത്യക്ഷപ്പെടാറുള്ളൂ, മഴക്കാലത്ത് വെള്ളത്തിനിടയിലേക്ക് താഴുകയും ചെയ്യും. ഇതിനിടയിൽ ഉള്ള ആ സമയമാണ് കൃഷിക്ക് അനുയോജ്യം, നല്ല വളക്കൂറ് ഉള്ള മണ്ണാണ് തുരുത്തിലേത്, പൊന്ന് വിളയിക്കാൻ പറ്റിയത് എന്നൊക്കെ ഒരല്പം അതിശയോക്തിയോടെ പറയാം. ഈ ഒരു പശ്ചാത്തലത്തിലാണ് നമ്മുടെ കഥാപാത്രങ്ങൾ വിളവിറക്കാൻ അവിടേക്ക് കടന്ന് വരുന്നത്.

🔸രണ്ട് കഥാപാത്രങ്ങളും മുത്തശ്ശനും പേരക്കുട്ടിയും ആണെന്ന വസ്തുത മാറ്റി നിർത്തിയാൽ അത്ര പിടി നൽകുന്നില്ല കാഴ്ചക്കാരന്, ഇരുവർക്കും ഇടയിലുള്ള ബന്ധം പോലും അസ്വാഭാവികത നിറഞ്ഞ് നിൽക്കുന്നതാണ്. വൃദ്ധൻ നിശ്ചയ ദാർഢ്യം ഉള്ള, കഴിവും അറിവും കാര്യ പ്രാപ്തിയും ഉള്ള ആളാണെങ്കിൽ പേരക്കുട്ടി അനുസരിക്കാൻ മാത്രം പഠിച്ച ഒരാളാണ്, പേടിയും നാണവും അവരുടെ സ്ഥായീ ഭാവമാണ്. ഈ രണ്ട് കഥാപാത്രങ്ങൾക്ക് പുറമെ മറ്റ് ചില കഥാപാത്രങ്ങളും വന്ന് പോവുന്നുണ്ട്, അത് ഒരല്പം സർപ്രൈസ് ആയി തന്നെ നിൽക്കട്ടെ.

🔸ആദ്യമേ തന്നെ സൂചിപ്പിച്ചത് പോലെ അല്പം സ്ലോ ആയാണ് കഥ പുരോഗമിക്കുന്നത്, പ്രത്യേകിച്ചും ആദ്യ പകുതി. കഥാപാത്രങ്ങളെയും സന്ദര്ഭത്തെയും പരിചയപ്പെടുത്താനായുള്ള ഈ ഭാഗം കഴിഞ്ഞാൽ തുടർന്നങ്ങോട്ട് പിടിച്ചിരുത്തുന്ന ഒന്ന് തന്നെയാണ് ഈ ചിത്രം. ഏറ്റവും ഒടുവിൽ കഥയ്ക്ക് അനുയോജ്യമായ നല്ലൊരു ക്ലൈമാക്സും ചിത്രം കരുതി വെച്ചിട്ടുണ്ട്. ചുരുക്കി പറയുക ആണെങ്കിൽ എല്ലാം കൊണ്ടും നല്ലൊരു അനുഭവമാണ് ഈ ജിയോർജിയൻ ഡ്രാമ ചിത്രം, താല്പര്യം തോന്നുന്നെങ്കിൽ കാണാൻ ശ്രമിക്കുക.

Verdict : Very Good

DC Rating : 85/100

564. 11.22.63 (2016)

Creator : Bridget Carpenter

Genre : Thriller

Rating : 8/10

Seasons : 1

Episodes : 08

Country : USA

Duration : 44 - 80 Minutes

🔸ഈ ടൈം ട്രാവലിംഗ് എന്നത് നല്ല രസകരമായ ഒരു കൺസെപ്റ്റ് ആണ്. സ്വന്തം ഭൂതകാലത്തേക്ക് ഒരു തവണ കൂടി മടങ്ങി പോകാൻ, അവിടെ സംഭവിച്ച പിഴവുകൾ മാറ്റിയെഴുതാൻ, ഇനി അതും അല്ലെങ്കിൽ ഓർമയിൽ നിൽക്കുന്ന ഊഷ്മളമായ ചില നിമിഷങ്ങൾ ഒന്ന് കൂടി ആസ്വദിക്കാൻ ആഗ്രഹിക്കാത്തവരായി അധികം ആരും തന്നെ കാണില്ല. ഈ ഒരു കാരണം കൊണ്ട് തന്നെ ടൈം ട്രാവൽ പ്രമേയമായ സിനിമകളോടും സീരീസുകളോടും പൊതുവെ ഒരു ഇഷ്ടക്കൂടുതൽ ഉണ്ട്. ഈ വിഭാഗത്തിലുള്ള ചിത്രങ്ങളും മറ്റും അന്വേഷിച്ചിറങ്ങിയപ്പോഴാണ് ജെയിംസ് ഫ്രാങ്കോ നായകനായ ഈ സീരീസിനെ പറ്റി കേൾക്കാൻ ഇടയായത്. ഒരു സീസണും അതിൽ എട്ട് എപ്പിസോഡുകളും മാത്രമേ ഉള്ളൂ എന്നറിഞ്ഞപ്പോൾ മറ്റൊന്നും നോക്കിയില്ല, കാണാൻ ഇറങ്ങി പുറപ്പെട്ടു.

🔸ഒരു ചെറിയ സ്‌കൂളിൽ ഇംഗ്ലീഷ് അധ്യാപകനാണ് നമ്മുടെ പ്രധാന കഥാപാത്രമായ ജാക്ക് എപ്പിംഗ്, പുള്ളി ഇപ്പോൾ വല്ലാത്തൊരു അവസ്ഥയിലൂടെ കടന്ന് പോയി കൊണ്ടിരിക്കുകയാണ്. കാമുകിയുമായി വേർപിരിഞ്ഞ ജാക്ക് ജോലിയിലും ശ്രദ്ധ ചെലുത്താൻ കഴിയാതെ, മറ്റ് വരുമാന മാർഗങ്ങൾ ഏതും ഇല്ലാതെ ഉഴലുകയാണ്. ഈ ഒരു അവസ്ഥയിൽ നിന്നുമാണ് ഈ സീരീസ് ആരംഭിക്കുന്നത്. ജാക്കിന്റെ ഒരേയൊരു വിനോദം എന്നത് സുഹൃത്തായ ടെംപിൾട്ടണിന്റെ റസ്റ്ററന്റിൽ സമയം ചിലവഴിക്കുക എന്നത് മാത്രമാണ്, ഒരു തരത്തിൽ ആശ്വാസം എന്നൊക്കെ വേണമെങ്കിൽ പറയാം.

🔸എന്ത് കൊണ്ട്, എങ്ങിനെ എന്നൊന്നും ചോദിക്കരുത്, പ്രകൃതിയുടെ ചെറിയൊരു കുസൃതി ആയിരിക്കും ടെംപിൾട്ടണിന്റെ റസ്റ്ററന്റിന് ഒരു ചെറിയ പ്രത്യേകത ഉണ്ട്. വേറൊന്നുമല്ല അവിടത്തെ ഒരു മുറിയിലേക്ക് കയറിയാൽ നിങ്ങൾ എത്തിപ്പെടുക 1960ലാണ്, അതായത് ഏകദേശം അൻപത് വർഷങ്ങൾക്ക് മുന്നേ, അത് തന്നെ, ടൈം ട്രാവൽ കൺസെപ്റ്റ് തന്നെ. അറുപതുകളിലേക്ക് നിങ്ങൾ കടന്ന് ചെന്ന്, അവിടെ എത്ര കാലം ചിലവഴിച്ചാലും യഥാർത്ഥ ടൈം ലൈനിൽ വെറും രണ്ട് മിനിറ്റ് മാത്രമേ കടന്ന് പോവുകയും ഉള്ളൂ. പക്ഷെ ഈ പ്രക്രിയയ്ക്ക് ഒരു ചെറിയ പിഴവുണ്ട്, വേറൊന്നുമല്ല എപ്പോഴൊക്കെ ഈ മുറിയിലേക്ക് കടന്ന് ചെന്നാലും ഒരേ സമയത്താണ് ഭൂതകാലത്തിലേക്ക് നിങ്ങൾ എത്തുക, അതിൽ ഒരു മാറ്റവും വരുത്താൻ കഴിയില്ല.

🔸അതായത് നിങ്ങളിപ്പോ 1960കളിൽ എത്തി എന്ന് കരുതുക, അവിടെ ഒരു അഞ്ച് വർഷം ചിലവഴിച്ച ശേഷം എന്തെങ്കിലും ഒരു കാരണവശാൽ യഥാർത്ഥ ടൈം ലൈനിലേക്ക് മടങ്ങി എത്തുക ആണെങ്കിൽ, അവിടെ നിന്നും വീണ്ടും ആ പോയിന്റിലേക്ക് തിരിച്ചെത്തുക എന്നത് അസാധ്യമാണ്, എല്ലാം ഒന്നിൽ നിന്ന് തന്നെ തുടങ്ങണം എന്ന് സാരം. ഇനി എത്ര വർഷം അവിടെ ചിലവഴിച്ചാലും യഥാർത്ഥ ടൈം ലൈനിൽ രണ്ട് മിനിറ്റ് മാത്രമേ കടന്ന് പോയിട്ടും ഉണ്ടാവു. എന്നാൽ ഇതിനേക്കാൾ എല്ലാം അപകടം പിടിച്ച മറ്റൊരു കാര്യം ഉണ്ട്, ഭൂത കാലത്തിൽ നിങ്ങൾ ചെയ്യുന്ന ഓരോ കാര്യവും, അത് എത്ര ചെറുത് ആണെങ്കിൽ പോലും ഭാവിയ്ക്കുമേൽ വലിയ മാറ്റങ്ങൾ സൃഷ്ട്ടിക്കും എന്ന അപകടകരമായ വസ്തുത ആണിത്.

🔸ഇത്രയൊക്കെ ബുദ്ധിമുട്ടി എന്തിനാണ് ഭൂത കാലത്തേക്ക് പോവുന്നത് എന്നൊക്കെ ചോദ്യം ഉയരാം, അത് സ്വാഭാവികവുമാണ്. എന്നാൽ ജാക്ക് എപ്പിംഗിന്റെ മുന്നിൽ വളരെ പ്രധാനമായ ഒരു ദൗത്യമുണ്ട്, ഇത് വേറൊന്നുമല്ല അമേരിക്കയുടെ ചരിത്രത്തിലെ തീരാ കളങ്കമായ ഒരു അധ്യായം മാറ്റിയെഴുതുക എന്നത് തന്നെ, തന്റെ ടൈം ലൈനിൽ വെടിയേറ്റ് മരിച്ച പ്രസിഡണ്ട് ജോൺ കെന്നടിയെ രക്ഷിക്കുക എന്നതാണ് ഈ ശ്രമകരമായ ദൗത്യം. വളരെ സൂക്ഷിച്ച് ചെയ്യേണ്ട ഒന്നാണിത്, കാരണം ഇവിടെ സംഭവിക്കുന്ന ഓരോ ചെറിയ കാര്യങ്ങൾക്കും ഭാവികലത്തിന് മേൽ ഉണ്ടാവുന്ന ഇമ്പാക്റ്റിന് വലിയ പ്രാധാന്യം ഉണ്ട്. ഈ കഥയാണ് സീരീസ് എട്ട് എപ്പിസോഡുകളിലായി മനോഹരമായി പറയുന്നത്, മികച്ച ഒരു സീരീസ് എന്ന് നിസ്സംശയം പറയാം, കാണാൻ ശ്രമിക്കുക.

Verdict : 85/100

DC Rating : Very Good

563. Toy Story 4 (2019)

Director : Josh Cooley

Genre : Animation

Rating : 8.7/10

Country : USA

Duration : 101 Minutes

🔸നമ്മുടെ സ്വന്തം ഭാഷയിലെ സിനിമകൾ കണ്ട് ഇമോഷണലായ സന്ദർഭങ്ങൾ അനവധി ഉണ്ടായിട്ടുണ്ട്, എന്നാൽ ഇംഗ്ലീഷ് അല്ലെങ്കിൽ മറ്റേതെങ്കിലും വിദേശ ഭാഷയുടെ കാര്യത്തിൽ സ്ഥിതി ഗതികൾ കുറച്ച് വ്യത്യസ്തമാണ്. ഈ ഓവർ ദി ടോപ് ചിത്രങ്ങൾ പലപ്പോഴും വൈകാരികമായി ബാധിക്കുന്ന സന്ദർഭങ്ങൾ ഒരു അപൂർവത ആയിരുന്നു, ഷിൻഡ്‌ലേഴ്‌സ് ലിസ്റ്റ് പോലെയുള്ള ചിത്രങ്ങൾ ഈ സ്രെണിയിൽ പെടുത്താവുന്നതാണ്. ഈ വിഭാഗത്തിൽ ഉൾപ്പെടുത്തേണ്ട ഒരു ചിത്രമാണ് ടോയ് സ്റ്റോറി സീരീസിലെ മൂന്നാം ഭാഗ ചിത്രം, പ്രത്യേകിച്ചും ആൻഡി വുഡിയോടും ടീമിനോടും വിട പറയുന്ന രംഗം അന്ന് അത്രമേൽ വൈകാരികമായി ബാധിച്ച ഒന്നായിരുന്നു. ഇത്രയും വർഷങ്ങൾക്ക് ശേഷം ഇന്ന് നാലാം ഭാഗം കണ്ടിറങ്ങുമ്പോൾ സത്യത്തിൽ അഭിമാനം ആണ്, ഈ സീരീസിലേക്ക് ഒരു മികച്ച ചിത്രം കൂടി എത്തുകയാണ് എന്ന അഭിമാനം.

🔸ഉദ്ദേശം ഒരു മൂന്ന് വർഷം മുൻപാണ് ടോയ് സ്റ്റോറി സീരീസിൽ ഒരു നാലാം ഭാഗം വരുന്നു എന്ന് കേൾക്കാനിടയായത്, അത് തീർത്തും അത്ഭുതപ്പെടുത്തുന്ന ഒരു വാർത്ത ആയിരുന്നു അന്ന്. കാരണം വേറൊന്നുമല്ല ഒരു സീരീസ് എന്ന നിലയിൽ മികച്ച രീതിയിലാണ് ടോയ് സ്റ്റോറി 3 കഥ കാപ്പ് ഓഫ് ചെയ്തത്, വുഡിയുടെയും ബസിന്റെയും ആന്റിയുടെയും എല്ലാം കഥ ആ കഥാപാത്രങ്ങൾ അർഹിക്കുന്ന മികവോടെയും പൂർണതയോടെയും പറഞ്ഞ് അവസാനിപ്പിക്കുക ആയിരുന്നു. ഒരു നാലാം ഭാഗം വരുമ്പോൾ മോശം ആവും എന്ന് തോന്നിയിരുന്നില്ല, എങ്കിലും സീരീസിന്റെ ഫ്ലോ പോവരുത് എന്ന നിർബന്ധം ഉണ്ടായിരുന്നു, അത് പിക്‌സാർ ഒട്ടും മോശമാക്കിയില്ല എന്നതിൽ സന്തോഷം.

🔸ഏകദേശം ഒൻപത് വർഷങ്ങൾക്ക് മുന്നെയാണ് ടോയ് സ്റ്റോറി 4 ആരംഭിക്കുന്നത്. ആന്റിയുടെ കളിപ്പാവകൾ ആണ് വുഡിയും ബസ്സും ബോ പീപും എല്ലാം. സ്ഥിരം കളി ചിരി തമാശകളുമായി മുന്നോട്ട് പൊയ്ക്കൊണ്ടിരുന്ന ദിവസങ്ങളിൽ ഒന്നിൽ ബോ പീപ്പിന് സുഹൃത്തുക്കളോട് വിട പറഞ്ഞ് പോവേണ്ടി വരുന്നതും അത് മറ്റുള്ളവരിൽ, പ്രത്യേകിച്ചും വുഡിയിലും മറ്റും ഏൽപ്പിക്കുന്ന ആഘാതവും പറഞ്ഞ് കൊണ്ടാണ് ചിത്രം തുടങ്ങുന്നത്. ഇവിടെ നിന്നും വർത്തമാനകാലത്ത് ഫോർക്കിയെ കണ്ട് മുട്ടുന്നതും അതിനെ തുടർന്നുണ്ടാവുന്ന പ്രശ്നങ്ങളും ഒക്കെയായി പുരോഗമിക്കുകയാണ് ഈ ഒന്നേമുക്കാൽ മണിക്കൂർ ദൈർഖ്യമുള്ള ചിത്രം.

🔸എടുത്ത് പറയത്തക്ക നെഗറ്റിവ് ഒന്നും ചിത്രത്തിൽ ഇല്ല എന്ന് പറയാം, സീരീസിലെ മികച്ചത് എന്നൊന്നും പറയാനാവില്ല ഈ ചിത്രം, അത് ഒരു കുറവുമല്ല കാരണം എത്തിപ്പിടിക്കേണ്ട ഉയരം അത്രയ്ക്കും ഉയരെയാണ് എന്ന വസ്തുത തന്നെ, എന്നാൽ മറ്റുള്ള ചിത്രങ്ങൾക്ക് ക്ഷീണമാവാതെ ആ ലെഗസി അതി മനോഹരമായി മുന്നോട്ട് കൊണ്ട് പോവുന്നു എന്നത് തന്നെ ഈ ചിത്രത്തെ സംബന്ധിച്ചിടത്തോളം വലിയ കാര്യമാണ്. ഫോർക്കി എന്ന കഥാപാത്രത്തെ ആദ്യമായി ടീസറിൽ കണ്ടപ്പോൾ സംശയങ്ങൾ ഉണ്ടായിരുന്നെങ്കിലും അതെല്ലാം കാറ്റിൽ പറത്തിയ ഒരു കഥാപാത്രത്തെയാണ് സ്‌ക്രീനിൽ കാണാനാവുക, ഒരു കുട്ടിക്ക് കളിപ്പാട്ടം എന്നാൽ എന്താണെന്ന ലളിതമായ ചോദ്യം ഫോർക്കി എന്ന കഥാപാത്രത്തെ ഉദാഹരണമാക്കി ചിത്രം പറഞ്ഞപ്പോൾ അത് വേറിട്ട അനുഭവം തന്നെ ആയിരുന്നു എന്ന് പറയാം.

🔸ഒരു ടോയ് സ്റ്റോറി ചിത്രം ആവുമ്പോൾ സ്വാഭാവികമായും അതൊരു ഇമോഷണൽ റൈഡ് ആയിരിക്കും, ഇവിടെയും സ്ഥിതി ഗതികൾ വ്യത്യസ്തമല്ല. ആദ്യ സീനിൽ ബോ പീപ് വിട പറയുന്ന രംഗം തൊട്ട് ക്ലൈമാക്സ് സീൻ വരെ ഈ രംഗങ്ങൾ അക്ഷരാർത്ഥത്തിൽ പിടിച്ചിരുത്തുന്നുണ്ട്. ബസ് ലൈറ്റിയറിനെ ഒന്ന് സൈഡ് ആക്കി എന്ന ചീപ് ആരാധക പരാതി ഒഴിച്ച് നിർത്തിയാൽ വേറൊന്നും പറയാനില്ല, എല്ലാ ഡിപ്പാർട്മെന്റും ഒന്നിനൊന്ന് മികച്ചത് തന്നെ. പ്രിയ കഥാപാത്രങ്ങളെ ഒരു തവണ കൂടി സ്‌ക്രീനിൽ കണ്ടു, അവരുടെ മികച്ച കഥയിലെ ലോജിക്കലായ, മനോഹരമായ അടുത്ത സ്റ്റെപ് കണ്ടു, ഒരല്പം ഇമോഷണലായി, അതിലേറെ ചിരിച്ചു, ഒടുവിൽ അവസാനിക്കുമ്പോൾ സംപ്ത്രിപ്തിയുടെ ചിരി അറിയാതെ വരികയായി.

"To Infinity And Beyond"

Verdict : Must Watch

DC Rating : 90/100

10 Surprising Deaths In Movies That Came Out Of Nowhere

നമ്മളീ ഒരുപാട് സിനിമകൾ കണ്ട് ശീലിച്ചത് കൊണ്ടാവണം ഒരു കഥാപാത്രത്തിന്റെ കാര്യം ഏകദേശം തീരുമാനം ആയി എന്ന് മുൻകൂട്ടി പറയാൻ കഴിയും, ഒരു പരിധി വരെ. അതായത് ഒരു പ്രത്യേക കഥാപാത്രം ആരോടെങ്കിലും അമിതമായ അടുപ്പമോ, സ്നേഹമോ അല്ലെങ്കിൽ അത്തരത്തിൽ ഉള്ള അമിത വികാര പ്രകടനങ്ങളോ നടത്തിയാൽ, അല്ലെങ്കിൽ ഭാവിയെ പറ്റി കൂടുതലായി ഉൽക്കണ്ഠ പെട്ടാൽ, ഇനി അതും അല്ലെങ്കിൽ സ്ഥിരം രീതികൾ വിട്ട് എന്തെങ്കിലും വ്യത്യസ്തമായ രീതിയിൽ പെരുമാറിയാൽ എല്ലാം സൂചനകളാണ്, മോനെ നിന്റെ പടം ഭിത്തിയിൽ കയറാറായി എന്ന സൂചന, അപൂർവം സന്ദർഭങ്ങളിലെ ഇത് മറിച്ച് സംഭവിക്കാറുള്ളൂ.

ഇതിനൊരു മറുവശം ഉണ്ട്, നമ്മൾ ഒട്ടും പ്രതീക്ഷിക്കാത്ത സമയത്ത് കയറി വരുന്ന ചില കഥാപാത്രങ്ങളുടെ മരണ രംഗങ്ങൾ. അവിടെ മേൽ പറഞ്ഞ സൂചനകൾ ഏതും കണ്ടെന്ന് വരില്ല, പലപ്പോഴും സിനിമ മുന്നോട്ട് പോവുക ഈ കഥാപാത്രങ്ങളിലൂടെ ആവും എന്നാവും നമ്മൾ കരുതി വെച്ചിരിക്കുക, എന്നാൽ അമ്പരപ്പിച്ച് കൊണ്ട് തൊട്ടടുത്ത മോമെന്റിൽ ആ കഥാപാത്രത്തിന്റെ വെടി തീർന്നിരിക്കും, ആ നിമിഷത്തില് അമ്പരപ്പ് എന്നതിനേക്കാൾ അപ്രവചനീയതയ്ക്കും ചിത്രം തുടർന്ന് കാണാനുള്ള താല്പര്യത്തിനും വേണ്ടി കൊടുക്കുന്ന ബലിയാണ് ഈ കഥാപാത്രങ്ങൾ. ഗെയിം ഓഫ് ത്രോൺസ് പോലെയുള്ള സീരീസുകളിൽ ഇത് നമ്മൾ ഒരുപാട് കണ്ടിട്ടുണ്ട്, നെഡ് സ്റ്റാർക്ക് പോലുള്ള കഥാപാത്രങ്ങളുടെ കാര്യത്തിൽ, ഈ പോസ്റ്റ് സിനിമയിൽ ഇത് പോലെ സംഭവിച്ച ചില അപ്രതീക്ഷിത മരണങ്ങളെ പറ്റിയാണ്....

കൂടുതൽ പറയേണ്ടല്ലോ, ഒടുക്കത്തെ SPOILER ALERT, പല ചിത്രങ്ങളുടെയും പ്രധാന രംഗങ്ങളാണ് ചുവടെ ചേർത്തിരിക്കുന്നത്, അറിയാൻ ആഗ്രഹിക്കാത്തവർ ദയവ് ചെയ്ത് മടങ്ങി പോവുക, നന്ദി....

Russel Franklin (Deep Blue Sea)

ചിത്രം തുടങ്ങി ഏകദേശം ഒരു മണിക്കൂർ കഴിഞ്ഞിരിക്കുന്നു, അണ്ടർ വോട്ടർ റിസേർച് സ്റ്റേഷനിലെ ഷാർക്‌ അറ്റാക്ക് കാരണം പൊറുതി മുട്ടിയിരിക്കുകയാണ് നമ്മടെ പ്രധാന കഥാപാത്രങ്ങളെല്ലാം, അപ്പൊ ദാ വരുന്നു സാമുവൽ ജാക്ക്സൺ. ആംഗ്രി ബ്ലാക്ക് ക്യാപ്റ്റൻ, തകർന്ന് തരിപ്പണമായി കിടക്കുന്ന സ്റ്റേഷൻ, നിസ്സഹായരായ ടീം, ങാ മോട്ടിവേഷന് സമയമായി എന്ന് നമ്മൾ വിചാരിക്കും, പക്ഷെ ഒരു തേങ്ങയും നടക്കൂല. പുള്ളി സംസാരിച്ച് തുടങ്ങുമ്പോഴേക്കും പിറകിൽ നിന്ന് ഷാർക്‌ വന്ന് കൊന്ന് തിന്ന് പോയിരിക്കും, എന്താണ് സംഭവിച്ചത് എന്ന ഞെട്ടലിൽ നിന്ന് നമ്മൾ രക്ഷപ്പെട്ടിട്ടും ഉണ്ടാവില്ല.

Billy Costigan (The Departed)

ഈ മാർട്ടിൻ സ്കോർസെസ് ചിത്രത്തിന്റെ കാര്യം കുറച്ച് കഷ്ടമാണ്, ഇന്റർനൽ അഫേഴ്‌സ് എന്ന ഒറിജിനൽ ചിത്രം കണ്ടവർക്ക് അറിയാം ഏകദേശം എന്താണ് സംഭവിക്കാൻ പോവുന്നത് എന്ന്, എന്നാൽ അവർ പോലും പ്രതീക്ഷിച്ച് കാണില്ല ലിഫ്റ്റ് തുറന്ന് നേരെ കോസ്റ്റിഗെൻ പോവുന്നത് മരണത്തിലേക്കാണ് എന്ന്, എല്ലാം ഞൊടിയിടയിൽ സംഭവിക്കുന്നു എന്നതും ഈ സീനിന്റെ റിപ്പീറ്റ് വാലിയു കൂട്ടുന്നു. സെക്കന്റുകൾക്കുള്ളിൽ ഒരു സിനിമയുടെ ഭാവി മാറി മറിയുന്നത് കാണാൻ എന്താ ഒരു രസം. ചിത്രത്തിലെ തന്നെ ജാക്ക് നിക്കോൾസൻ അവതരിപ്പിച്ച കഥാപാത്രത്തിന്റെ മരണവും ശ്രദ്ധേയമാണ്, പക്ഷെ അവിടെ ആര് കൊന്നു എന്നതാണ് ശ്രദ്ധേയം.

Casey (Scream)

തൊണ്ണൂറുകളിലെ തിരക്കേറിയ ഒരു നടിയെ സിനിമയിലേക്ക് കാസ്റ്റ് ചെയ്യുക, പ്രൊമോഷനിലും മറ്റും നടിക്ക് വലിയ പ്രാധാന്യം നൽകുക, എന്തിന് അധികം സിനിമയിൽ തന്നെ ടോപ് ബില്ലിംഗ് നൽകുക, ഒടുവിൽ ആദ്യ പത്ത് മിനുട്ടിൽ തന്നെ വില്ലന്റെ പ്രാധാന്യം കാണിക്കാൻ കൊന്ന് കളയുക. ഇതാണ് സ്ക്രീം എന്ന ചിത്രത്തിലെ ഡ്രൂ ബാരിമോറിന്റെ കഥാപാത്രം. മരിക്കുന്ന സമയം പോലെ പ്രാധാന്യം അർഹിക്കുന്നതാണ്, അവർ മരിക്കുന്ന മൃഗീയമായ രീതിയും. ടോൺ സെറ്റിങ് എന്നതിന്റെ ഒക്കെ നല്ല ഫസ്റ്റ് ക്‌ളാസ് ഉദാഹരണം, എന്നാലും ഡ്രൂ ബാരിമോർ....

Llewelyn Moss (No Country For Old Man)

ആന്റൺ ചിഗുർ എന്ന നമ്മടെ വില്ലൻ ഫുൾ മാസായിട്ട് സ്ക്രീൻ നിറഞ്ഞ് നിൽക്കുകയാണ്, നായക കഥാപാത്രം കുറെ ആയി ആന്റണിനെയും പേടിച്ച് ഓടാൻ തുടങ്ങിയിട്ട്, സ്വാഭാവികമായും സിനിമകൾ കണ്ട് ശീലിച്ച അനുഭവത്തിൽ പറയാം, ഇതെല്ലാം ക്ലൈമാക്സിലേ നായക വില്ലൻ സംഘട്ടനത്തിലേക്കാണ് പോയി കൊണ്ടിരിക്കുന്നത് എന്ന്, എന്നാൽ അല്ലേയല്ല. ആ പ്രതീക്ഷിച്ച സീൻ സംഭവിക്കുന്നെ ഇല്ല, നായകനെ വില്ലൻ നൈസ് ആയിട്ട് കൊല്ലും അതും ഓഫ് സ്‌ക്രീനിൽ, ഇത് നിങ്ങൾ ഉദ്ദേശിക്കുന്ന പടം അല്ല സാർ.

Chad Feldheimer (Burn After Reading)

ഈ സിനിമയെ പറ്റി ഓർമിക്കുമ്പോ ആദ്യം മനസ്സിൽ വരുന്നത് ബ്രാഡ് പിറ്റിന്റെ ചിരിയാണ്, പിന്നെ ആ കഥാപാത്രത്തിന്റെ മരണവും, സിനിമയെ പറ്റി വല്യ അഭിപ്രായം ഇല്ലെങ്കിലും ഈ സീൻ ഞെട്ടൽ ആയിരുന്നു എന്നത് സത്യം. ബ്രാഡ് പിറ്റിനെ പോലെ ഒരു നടൻ സ്വാഭാവികമായും ക്ളൈമാക്സ് വരെ ഉണ്ടാവും എന്നൊരു മിഥ്യാധാരണ ഉണ്ടായിരുന്നു, അതും പോരെങ്കിൽ ചിത്രത്തിൽ ഏറ്റവും ഇഷ്ടം തോന്നിയ കഥാപാത്രം ആയിരുന്നു ചാഡ്, ടമാർ പഠാർ തീർന്നു. മരിക്കുന്നതിന് തൊട്ട് മുൻപ് ഒരു ചിരി ഉണ്ട്, 60 വാൾട്ട് ബൾബ് കത്തിച്ച പോലെ, ആ ചിരി ഈ സീൻ കൂടുതൽ മെമറബിൽ ആക്കുന്നേ ഉള്ളൂ.

Dick Halloran (Shining)

ഡിക്ക് ഹലോറന്റെ മരണം അപ്രതീക്ഷിതം ആയതിന് ഒരു കാരണമുണ്ട്, ചിത്രത്തിന് ആധാരമായ നോവലിൽ പുള്ളി മരിക്കുന്നില്ല എന്ന് മാത്രമല്ല അതിന്റെ തുടർ ഭാഗത്തിൽ ശക്തമായ ഒരു സാന്നിധ്യം കൂടിയാണ്. അതെല്ലാം ഒഴിവാക്കിയാലും സിനിമ ഒരു സൂചന പോലും തരുന്നില്ല എന്നതാണ് സത്യം, വെണ്ടിയേയും ഡാനിയേയും അന്വേഷിച്ച് എത്തുന്ന ഹലോറൻ അവരെ രക്ഷിക്കും എന്ന് പ്രതീക്ഷിക്കും എങ്കിലും സംഭവിക്കുന്നത് മറിച്ചാണ്. അപ്രതീക്ഷിത മരണങ്ങളിൽ ഒന്നായി ഇപ്പോഴും ഉണ്ടാവും ഡിക് ഹലോറൻ എന്ന കഥാപാത്രം.

Marion Crane (Psycho)

ഒരു ആൽഫ്രെഡ് ഹിച്ച്കോക് ചിത്രമാവുമ്പോൾ സ്വാഭാവികമായും ആരെങ്കിലും ഒരാൾ മരിക്കണം. എന്നാൽ സൈക്കോ എന്ന ചിത്രം കാണുന്ന, ജാനറ്റ് ലെ എന്ന നടിയെ അറിയുന്ന ആരും അത് അവർ ആവും എന്ന് പ്രതീക്ഷിക്കില്ല. താരമൂല്യവും, നായിക എന്ന് മുഖത്ത് എഴുതി വെച്ചിട്ടുള്ള അവരുടെ മുൻ സിനിമകളും എല്ലാം ഇതിന് കാരണങ്ങളാണ്, എന്നാൽ എന്താണ് സംഭവിച്ചത് എന്ന് ചിത്രം കണ്ട എല്ലാവര്ക്കും അറിയാം, അതിൽ വലിയ വിഷമവും ഇല്ല കാരണം ചിത്രം നിലവാരത്തിൽ അത്രയും ഉയരത്തിലാണ്.

Hicks, Newt, Bishop (Aliens 3)

എലിയെൻസ് 2 എന്ന ചിത്രത്തിന്റെ ക്ലൈമാക്സ് ഒരു റിലീഫ് ആണ്, പ്രത്യേകിച്ചും നമ്മുടെ പ്രധാന കഥാപാത്രങ്ങളായ റിപ്ലി, ന്യുട്, ഹിക്ക്സ്, ബിഷപ് എന്നിവർ രക്ഷപ്പെട്ടു എന്ന് അറിയുമ്പോൾ. എന്നാൽ മൂന്നാം ഭാഗത്തിന്റെ തുടക്കത്തെ ഹാർട്ട് ബ്രെയ്ക്കിങ് എന്നൊക്കെ വിശേഷിപ്പിക്കാം, തുടക്കത്തിൽ സംഭവിച്ച ഒരു ദുരന്തത്തിൽ ഈ കഥാപാത്രങ്ങൾ എല്ലാം മരിക്കുകയാണ്, ഇനി അതും പോരെങ്കിൽ ആ ക്രൂരമായ ബീജിഎമ്മും, വികൃതമായ കഥാപാത്രങ്ങളുടെ മുഖങ്ങളും, ചിന്നി ചിതറിയ ശരീരങ്ങളും മതി ഓർമയിൽ നില്ക്കാൻ, എലിയൻസ് 3 വല്ലാത്ത ഒരു അനുഭവം ആയിരുന്നു, എല്ലാ അർത്ഥത്തിലും.

Bill Murray (Zombieland)

സോമ്പിലാൻഡ് എന്ന ചിത്രം രണ്ടാം പകുതിയിൽ കരുതിവെച്ച സർപ്രൈസ് ആയിരുന്നു ബിൽ മുറേയുടെ അതിഥി വേഷം. സോംബികളെ പറ്റിക്കാൻ അവരിൽ ഒരാളായി വേഷം മാറി നടന്നാൽ പോരെ എന്ന തികച്ചും ന്യായമായ ചോദ്യം ചോദിച്ച കഥാപാത്രത്തോളം തന്നെ സ്പെഷ്യൽ ആയിരുന്നു പുള്ളിയുടെ മരണവും, അത് എങ്ങിനെയാണ് സംഭവിക്കുന്നത് എന്ന് പറഞ്ഞാൽ ഫ്ലോ അങ് പോവും, യൂറ്റിയൂബിൽ ഒന്ന് കൂടി കണ്ട് നോക്കുക. ചിത്രത്തിന്റെയും നടന്റെയും എല്ലാം ടോണിനോടും, രീതിയോടും ചേർന്ന് നിൽക്കുന്ന നല്ല ഫസ്റ്റ് ക്‌ളാസ് ഡെത് സീൻ.

Everyone (Mist)

ഇത്രയും ഇന്റെൻസ് ആയ, ഗ്രിപ്പി ആയ ഒരു ചിത്രത്തിന് ഹാപ്പി ആയ ഒരു എൻഡിങ് ഉണ്ടാവും എന്ന് ആരാ പറഞ്ഞത്, മിസ്റ്റ് അവസാനിക്കുന്നത് ഒരുപക്ഷെ ഏറ്റവും ഡിപ്രസിങ് ആയ രീതിയിലാണ്, നമ്മൾ ഒട്ടും പ്രതീക്ഷിക്കാത്ത രീതിയിൽ, എന്നാൽ ഈ അപ്രവചനീയത ഒരു അനുഗ്രഹമാക്കി മാറ്റിയ ചിത്രമാണ് മിസ്റ്റ്, ചിത്രത്തെ പറ്റിയുള്ള മിക്ക ചർച്ചകളും ക്ലൈമാക്സിലേക്ക് വഴി മാറി പോവുന്നത് ഇതിനുള്ള നല്ല ഉദാഹരണമാണ്, ഇങ്ങനെ എത്ര എത്ര സിനിമകൾ പലപ്പോഴും ഈ രംഗങ്ങൾ ഒരു ശരാശരി ചിത്രത്തെ പോലും ഓർമ്മയിൽ നിർത്തും എന്നതാണ് അനുഭവം