946. His House (2020)

Director : Remi Weekes

Genre : Horror

Rating : 6.4/10

Country : UK

Duration : 93 Minutes

🔸സഥിരം ക്ളീഷേ ജംപ് സ്‌കെയറുകൾക്ക് പിറകെ പോവാതെ കാര്യവും കാമ്പുമുള്ള, പറയാൻ ഉദ്ദേശിച്ച കാര്യം സ്ട്രെയിറ്റ് ആയി വളച്ച് കെട്ടലുകളോ ഏച്ച് കെട്ടലുകളോ ഇല്ലാതെ പറഞ്ഞ് പോയ ഹൊറർ സിനിമകളുടെ പട്ടികയിലേക്ക് ഉൾപ്പെടുത്താവുന്ന ഒരു ചിത്രം കൂടി, അതാണ് ഹിസ് ഹൌസ്. ട്രീറ്റ്‌മെന്റ് കൊണ്ടും സൂപ്പർ നാച്ചുറൽ എലെമെന്റുകൾ കൊണ്ടുമെല്ലാം കഴിഞ്ഞ വർഷം പുറത്തിറങ്ങിയ അറ്റ്ലാന്റിക്സ് എന്ന ചിത്രത്തെ ഓർമ പെടുത്തുന്നുണ്ട് ഈ ചിത്രം. പ്ലോട്ടിനെ കുറിച്ച് വലിയ അറിവൊന്നും ഇല്ലാതെ കാണുന്നത് നന്നാവും എന്നത് കൊണ്ട് തന്നെ ഇവിടെ നിന്നും വായന നിർത്തി മടങ്ങി പോകാവുന്നതാണ്, ചിത്രം നല്ലൊരു അനുഭവം തന്നെയാണ്.

🔸സൗത്ത് സുഡാനിൽ നിന്നുമാണ് കഥ ആരംഭിക്കുന്നത്, കുറച്ചധികം കാലമായി നിലനിൽക്കുന്ന കിരാത ഭരണവും ആഭ്യന്തര യുദ്ധവും ഒക്കെ കാരണം അവിടെ താമസിക്കുക എന്നത് കഠിനമായി മാറിയിരിക്കുന്നു, പ്രത്യേകിച്ചും സാധാരണക്കാരായ ജനങ്ങൾക്ക്. ഇങ്ങനെ ഒരു ചുറ്റുപാടിൽ കയ്യിൽ കിട്ടിയ വസ്തു വകകളുമായി രാജ്യത്ത് നിന്ന് രക്ഷപ്പെടാൻ ശ്രമിക്കുന്ന ദമ്പതികളെ കാണിച്ച് കൊണ്ടാണ് സിനിമ തുടങ്ങുന്നത്, ഇവരാണ് നമ്മുടെ കേന്ദ്ര കഥാപാത്രങ്ങൾ. ഒരു വിധേന എല്ലാ പ്രതി ബന്ധങ്ങളും മറികടന്ന് അവിടെ നിന്നുള്ള അവസാന വണ്ടിയിൽ ഇരുവരും കയറി പറ്റുകയാണ്.

🔸തൊട്ടടുത്ത സീനിൽ കാണിക്കുന്നത് ഇങ്ങനെ രക്ഷപ്പെട്ട് പോയ കഥാപാത്രങ്ങൾ കടൽ മാർഗം യാത്ര തിരിക്കുന്നതാണ്, ഒരു ചെറിയ ബോട്ട് എന്ന് പറയാം, അതിൽ ആണെങ്കിൽ തിക്കി തിരുകിയത് പോലെ ആളുകളും ഉണ്ട്. ഈ രാത്രി യാത്രയ്ക്ക് ഇടയിൽ ഒരപകടം ഇവിടെ അരങ്ങേറുകയാണ്, ഈ ഒരു പോയിന്റിൽ ഇത് എന്താണെന്ന് ചിത്രം വ്യക്തമാക്കുന്നുമില്ല, സ്പോയിൽ ചെയ്യാൻ താല്പര്യവുമില്ല. ഈ ഒരു സംഭവത്തിന് പിന്നീട് കഥയിൽ അത്യാവശ്യം പ്രാധാന്യം ഉണ്ട് താനും, എന്തായാലും നമ്മുടെ കഥാപാത്രങ്ങൾ കഷ്ടപ്പെട്ട് ഇന്ഗ്ലണ്ടിൽ എത്തിപ്പെടുന്നുണ്ട്.

🔸അഭയാർത്ഥികൾ ആയതിനാൽ തന്നെ അത്ര ആശാവഹമായ സ്വീകരണം ഒന്നുമല്ല അവർക്ക് ലഭിക്കുന്നത്, സ്വതന്ത്രമായി ജീവിക്കാനുള്ള അനുവാദം കിട്ടുന്നത് വരെ തടവിൽ കഴിയേണ്ടിയും വരുന്നുണ്ട്. അങ്ങനെ ഒക്കെ ആണെങ്കിലും ഒരുനാൾ ഇവർക്ക് താമസ അനുവാദം കൊടുക്കുകയും, ഒരു വീട് അതോറിറ്റി കണ്ടെത്തി നൽകുകയും ചെയ്യുന്നുണ്ട്. ഈ വീട്ടിൽ താമസത്തിന് എത്തിയ കഥാപാത്രങ്ങൾ അവിടെ ചില ദുസൂചനകൾ കണ്ട് തുടങ്ങുന്നിടത്താണ് കഥ ചൂട് പിടിക്കുന്നത്, ഈ ഒരു വിശദീകരണത്തിൽ നിന്നും സ്ഥിരം ക്ളീഷേ ഐറ്റം ആണെന്ന് പ്രതീക്ഷിക്കരുത്, നിങ്ങൾ കരുതുന്ന വഴിയേ കഥ പോയേക്കില്ല.

Verdict : Very Good

DC Rating : 4/5 

945. The Ground Beneath My Feet (2019)

Director : Marie Kreutzer

Genre : Drama

Rating : 6.4/10

Country : Austria

Duration : 108 Minutes

🔸നല്ല കഥയും കാമ്പുമുള്ള ഡ്രാമ ജോണർ സിനിമകൾ അന്വേഷിച്ച് നടക്കുന്നവർ ഉണ്ടെങ്കിൽ പരീക്ഷിക്കാവുന്ന മികച്ച ഒരു അറ്റംപ്റ്റ് ആണ് ദി ഗ്രൗണ്ട് ബെനീത്ത് മൈ ഫീറ്റ് എന്ന ഓസ്ട്രിയൻ ചിത്രം. രാജ്യത്തിൻറെ ഒഫിഷ്യൽ ഓസ്കർ എൻട്രി ആയിരുന്ന ചിത്രം വെനീസ് ഉൾപ്പെടെ ഉള്ള ചലച്ചിത്ര വേദികളിൽ പ്രദര്ശിപ്പിക്കപ്പെടുകയും കയ്യടികൾ കരസ്ഥമാക്കുകയും ചെയ്ത ചിത്രമാണ്. രണ്ട് സഹോദരിമാർക്ക് ഇടയിലുള്ള ബന്ധവും അതിനിടയിലേക്ക് കടന്ന് വരുന്ന വളരെ പേഴ്സണൽ ആയ പ്രശ്നവും എല്ലാം ചിത്രത്തെ മറ്റൊരു തലത്തിലേക്ക് കൊണ്ടുപോവുന്നുണ്ട്.

🔸സബ്ടൈൽ ആയി കഥ പറഞ്ഞ് പുരോഗമിക്കുന്ന, സൈക്കോളജിക്കൽ എലെമെന്റുകൾ ധാരാളമുള്ള ഒന്നാണ് ദി ഗ്രൗണ്ട് ബെനീത് മൈ ഫീറ്റ് എന്ന ചിത്രം, ശ്രദ്ധാപൂർവം കാണേണ്ട ഒന്ന്. ലോല എന്ന നമ്മുടെ നായികാ കഥാപാത്രം ഒരു കോർപറേറ്റ് കമ്പനിയിൽ ജോലിക്കാരിയാണ്, തന്റെ പ്രവർത്തി മേഖലയിൽ ഇതിനോടകം തന്നെ കഴിവ് തെളിയിച്ച, വലിയ പൊട്ടൻഷ്യൽ ഉണ്ട് ഭാവിയിൽ നല്ലൊരു നിലയിൽ എത്തും എന്ന് എല്ലാവരാലും വിശ്വസിക്കപ്പെടുന്ന ഒരു കഥാപാത്രം. എന്നാൽ ഇതിനപ്പുറം ഒരു അടഞ്ഞ പുസ്തകമാണ് ലോല.

🔸തന്റെ സഹപ്രവർത്തകരുമായി ജോലി സംബന്ധമായി ഇടപഴകും എന്നത് ഒഴിച്ചാൽ അവരുമായി വ്യക്തിപരമായി സൗഹൃദം ഒന്നും തന്നെയില്ല, ഇതിന് ഒരപവാദം എലിസ മാത്രമാണ്, എലിസ ലോലയുടെ മേലുദ്യോഗസ്ഥ കൂടി ആണെന്ന് പറയാം. ഈ രണ്ട് കഥാപാത്രങ്ങൾക്ക് ഇടയിൽ പ്രണയം കൂടി ഉടലെടുത്തിട്ടുണ്ട്, എന്നാൽ മറ്റുള്ളവർ അറിയാൻ ഇട വരുത്താതെ, അവർക്കിടയിൽ ഒരു സംസാര വിഷയം ആകാതിരിക്കാൻ രണ്ട് പേരും നല്ല രീതിയിൽ ശ്രമിക്കുന്നുമുണ്ട്. ഇങ്ങനെ ഒക്കെ ആണെങ്കിലും എലിസയ്ക്ക് പോലും അറിയാത്ത ചില കാര്യങ്ങൾ ലോലയുടെ ജീവിതത്തിലുണ്ട്.

🔸ലോലയ്ക്ക് കോണി എന്ന പേരിൽ ഒരു സഹോദരി കൂടിയുണ്ട്, ലോകത്ത് അവശേഷിക്കുന്ന അവളുടെ ഒരേയൊരു ബന്ധു. കോണി കുറച്ച് കാലമായി ഒരു മാനസിക ആശുപത്രിയിലാണ്, വളരെ ചെറുപ്പം തൊട്ടേ അവളിൽ ചില പ്രശ്നങ്ങൾ കണ്ട് തുടങ്ങിയുമിരുന്നു. ഇനി ഇതൊന്നും പോരെങ്കിൽ ലോലയുടെ കുടുംബത്തിൽ തന്നെ മാനസിക പ്രശ്നത്തിന്റെ ഒരു ചരിത്രമുണ്ട്, ഇതിന് മുൻപുള്ള തലമുറയിൽ ഉൾപ്പെടെ. ഈ പ്രശ്നങ്ങൾ എല്ലാം തന്നെ ലോലയെയും, എലീസും ആയുള്ള ബന്ധത്തെയും എങ്ങനെ ബാധിക്കുന്നു എന്നതാണ് ഈ ചിത്രം, നല്ല ഒന്നാംക്‌ളാസ്സ് സിനിമ.

Verdict : Very Good

DC Rating : 4.25/5 

944. Germany Year Zero (1948)

Director : Roberto Rossellini

Genre : War

Rating : 7.9/10

Country : Italy

Duration : 78 Minutes

🔸റോസലിനിയുടെ അൺ ഒഫീഷ്യൽ വാർ ത്രിലോഗിയിലെ അവസാന ചിത്രം, മുൻപത്തെ രണ്ട് കഥകളിലും ഫോക്കസ് യുദ്ധം കാരണം ദുരിതം അനുഭവിക്കേണ്ടി വന്ന അല്ലീഡ് രാജ്യങ്ങളിലെ ജനങ്ങൾ ആയിരുന്നെങ്കിൽ ഇവിടെ ഫോക്കസ് എന്നത് ജർമനിയിൽ തന്നെയാണ്. യുദ്ധാനന്തര ജർമനി എന്നത് ഏറെക്കുറെ തച്ച് തരിപ്പണമായ ഒരു ശില മാത്രമായിരുന്നു എന്നതാണ് സത്യം, ബോംബിങ്ങും മറ്റും കാരണം പ്രതാപത്തിൽ മുങ്ങിയിരുന്ന ബെർലിൻ നഗരം ഏറെക്കുറെ ആളൊഴിഞ്ഞ ശവപ്പറമ്പ് പോലെ ആയി തീർന്നിരുന്നു. എല്ലാത്തിനും കാരണക്കാരായവരും നാസികളും എല്ലാം ചരിത്രത്തിന്റെ താഴുകളിലേക്ക് പോയെങ്കിലും ജനങ്ങളുടെ അവസ്ഥ അത്യന്തം ദാരുണം തന്നെയായി തുടരുക ആയിരുന്നു എന്ന് പറയാം.

🔸ഈ ഒരു ബാക്ക്ഗ്രൗണ്ട് മനസ്സിൽ വെച്ച് കൊണ്ട് വേണം ജർമനി ഇയർ സീറോ കാണാൻ. പന്ത്രണ്ട് വയസുകാരനായ എഡ്‌മണ്ടിന്റെ കാഴ്ചപ്പാടിലൂടെ ആണ് നമ്മൾ സിനിമ കാണുന്നത്. എഡ്‌മണ്ടിന് ആകെ അച്ഛനും ഒരു സഹോദരനും, സഹോദരിയും മാത്രമേയുള്ളൂ. എഡ്‌മണ്ടിന്റെ അച്ഛൻ കുറച്ച് കാലമായി രോഗങ്ങളാൽ ബുദ്ധിമുട്ടുകയാണ്. ഒരുനേരത്തെ അന്നത്തിന് വരെ ബുദ്ധിമുട്ടുന്ന മക്കൾക്ക് താൻ ഒരു ഭാരം ആണെന്ന് അയാൾക്ക് അറിയാമെങ്കിലും ഗതികേട് കാരണം മുന്നോട്ട് പോവുന്നെന്ന് മാത്രം.

🔸എഡ്‌മണ്ടിന്റെ സഹോദരൻ ആണെങ്കിൽ നാസി പട്ടാളത്തിൽ ജോലി ചെയ്തിരുന്നവനും, ഏത് നേരം വേണമെങ്കിലും റഷ്യൻ പട്ടാളം വന്ന് തൂക്കി എടുത്ത് കൊണ്ടുപോവാൻ എന്നതാണ് അവസ്ഥ, ഇങ്ങനെ ആകെ അപ്രവചനീയമായ തോതിലാണ് അവന്റെ ജീവിതം. റഷ്യൻ പട്ടാളക്കാരുടെ കൂടെ പോയാണ് കുടുംബത്തിന് ഉള്ള വക എഡ്‌മണ്ടിന്റെ സഹോദരി ഉണ്ടാക്കുന്നതെന്ന് പറയാം, അത്രയ്ക്കും ശോകമാണ് കാര്യങ്ങളുടെ കിടപ്പ്. തന്നാൽ കഴിയും വിധം ചെറിയ ജോലികൾ ഒക്കെ ചെയ്ത് എഡ്‌മണ്ടും സഹായിക്കാൻ ശ്രമിക്കുന്നുണ്ട്, പക്ഷെ അവന് പ്രായം പന്ത്രണ്ട് കഴിഞ്ഞതേ ഉള്ളൂ, പരിമിതികളുണ്ട്.

🔸രണ്ടാം ലോകമഹായുദ്ധ കഥകളിലും കണക്കെടുപ്പുകളിലും അധികം പറഞ്ഞ് കേൾക്കാത്ത ഒന്നാണ് ജർമനിയിലെ സാധാരണക്കാരായ ജനങ്ങളുടെ പിന്നീടുള്ള ജീവിതവും, അവസ്ഥയും എല്ലാം, അതിലേക്കുള്ള ഒരു കൂട്ടിച്ചേർക്കലാണ് ഈ റോസെലീനി ചിത്രം. മുൻപേ വന്ന രണ്ട് ചിത്രം പോലെ തന്നെ അങ്ങേയറ്റം വേദനാജനകവും, ട്രാജിക്കും ആയ ഒന്നാണ് ചിത്രത്തിന്റെ പ്ലോട്ട് ലൈൻ. ഇതോട് കൂടി റോസലിനി ട്രിലോജിക്ക് കർട്ടൻ വീഴുകയാണ്, ഇന്ന് വരെ കണ്ട സിനിമ ട്രിലോഗികളിൽ ഏറ്റവും മികച്ചവയിൽ ഒന്ന് എന്ന് നിസ്സംശയം പറയാം, അത്രയ്ക്കും ഹാർട്ട് ബ്രെയ്ക്കിങ് ആണ്, ടച്ചിങ് ആണ്, തോട്ട് പ്രൊവോക്കിങ് ആണ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.75/5 

943. 37 Seconds (2020)

Director : Hikari

Genre : Drama

Rating : 7.3/10

Country : Japan

Duration : 116 Minutes

🔸ഈ വർഷം പുറത്തിറങ്ങിയ ചുരുക്കം ചില മികച്ച സിനിമകളിലേക്ക് ഉൾപ്പെടുത്താവുന്ന മറ്റൊരു മനോഹരമായ സിനിമ, അതാണ് തേർട്ടി സെവൻ സെക്കൻഡ്‌സ്. നമ്മുടെ കേന്ദ്ര കഥാപാത്രമായ യുമ സെറിബ്രൽ പാൾസി എന്ന രോഗാവസ്ഥയുടെ ഇരയാണ്, ഒരു വീൽ ചെയറിൽ ഒതുങ്ങി പോയ അവൾക്ക് തന്റെ പ്രാഥമിക കാര്യങ്ങൾ നിർവഹിക്കാനും മറ്റും അമ്മയുടെ സഹായം ഇല്ലാതെ പറ്റില്ല. അമ്മ അല്ലാതെ യുമായ്ക്ക് അടുപ്പമുള്ള, പരിചയമുള്ള ആളുകൾ വളരെ വളരെ കുറവാണ്. യുമായുടെ അച്ഛൻ വർഷങ്ങൾക്ക് മുന്നേ തന്നെ അവളെയും അമ്മയെയും ഉപേക്ഷിച്ച് എങ്ങോട്ടോ പോയതാണ്, പിന്നെ മടങ്ങി വന്നില്ല.

🔸ഒരു വളർന്ന് വരുന്ന അനിമേ ആർട്ടിസ്റ്റ് കൂടിയാണ് യുമേ, സയാക എന്ന സുഹൃത്തിന് വേണ്ടി ഗോസ്റ്റ് റൈറ്റർ ആയി ജോലി ചെയ്യുകയാണ് യുമേ. ഗോസ്റ്റ് റൈറ്റർ എന്ന് പറഞ്ഞാൽ അധ്വാനത്തിന് ആവശ്യമായ പ്രതിഫലം പണ രൂപത്തിൽ കിട്ടും, എന്നാൽ അതിന് അപ്പുറമുള്ള പരിഗണന ഒന്നും തന്നെ ലഭിക്കാൻ പോവുന്നില്ല, എന്തിനധികം തങ്ങൾ ഇഷ്ട്ടപ്പെടുന്ന കൃതിക്ക് പിന്നിൽ ഇങ്ങനെ ഒരാളുടെ അധ്വാനം കൂടി ഉണ്ട് എന്ന് വായനക്കാർ അറിയാനും പോവുന്നില്ല. യുമേയുടെ വർക്കുകളിലൂടെ സയാക അത്യാവശ്യം മോശം ഇല്ലാത്തൊരു ഫാൻ ബേസ് സ്വന്തം ആക്കിയിട്ടുണ്ട്.

🔸സയാകിയുടെ നിഴലിൽ നിന്നും മാറി നടക്കാൻ ഉള്ള ശ്രമം യുമേ നടത്തുന്നുണ്ട് എങ്കിലും അത് അത്ര വിജയം ആവുന്നില്ല, മിക്കപ്പോഴും അതിന് അവൾ കേൾക്കുന്ന കുറ്റം യുമേയുടെ കഥാപാത്രങ്ങൾ വികാരങ്ങൾ പ്രകടിപ്പിക്കുന്നതിൽ പരാജയമാണ് എന്നതും മറ്റും ഒക്കെയാണ്, ചിലപ്പോൾ ഒക്കെ ലൈംഗിക വിഷയങ്ങളിൽ യുമെയ്ക്കുള്ള അറിവില്ലായ്മയും ഒരു കാരണം ആവുന്നുണ്ട്. വീടിന്റെ നാല് ചുമരുകളിലും അമ്മയുടെ സഹായത്തിലും വർക് സ്‌പേസിന്റെ അകത്തളങ്ങളിലും തന്റെ ജീവിതം തള്ളി നീക്കിയ യുമേ ഇങ്ങനെ ആയതിൽ തെറ്റ് പറയാനാവില്ല.

🔸അങ്ങനെ ഒരുനാൾ തന്റെ ബലഹീനതയും മറ്റും ഒക്കെ ഉൾക്കൊണ്ട് തനിക്ക് അപരിചിതമായ ലോകത്തേക്ക് യുമേ ഇറങ്ങി തിരിക്കുന്നിടത്ത് നിന്നുമാണ് സിനിമ മറ്റൊരു ലെവെലിലേക്ക് മാറുന്നത്. മികച്ച കഥാപാത്രങ്ങളും, കഥാ സന്ദര്ഭങ്ങളും, നല്ല കിടിലൻ പേ ഓഫും എല്ലാം ചിത്രത്തിന്റെ പ്രത്യേകതകളിൽ ചിലതാണ്. യുമേയുടെ വർത്തമാന കാലത്തിലെ പ്രശ്നങ്ങൾ പരാമര്ശിക്കുന്നതിന് ഇടയിൽ തന്നെ ഭൂത കാലത്തേക്കും മറ്റുമൊക്കെ കഥ കടന്ന് ചെല്ലുന്നുണ്ട്, ആകെ മൊത്തം നല്ലൊരു ഫീൽ ഗുഡ് ഡ്രാമ, ഈ ജോണറിന്റെ ആരാധകർക്കും മറ്റും ഒക്കെ തീർച്ചയായും കണ്ട് നോക്കാവുന്നതാണ്, നഷ്ടം ഏതുമില്ല.

Verdict : Very Good

DC Rating : 4/5 

942. Floating Clouds (1955)

Director : Mikio Naruse

Genre : Drama

Rating : 7.7/10

Country : Japan

Duration : 118 Minutes

🔸ജാപ്പനീസ് സിനിമാ ഇന്ഡസ്ട്രിയിലെ ഏറ്റവും മികച്ച സിനിമകളിൽ ഒന്നായി വിലയിരുത്തപ്പെടുന്നതാണ് മികിയോ നറുസെയുടെ ഫ്‌ളോട്ടിങ് ക്ലൗഡ്‌സ്, ജപ്പാനിലെ ഏറ്റവും പോപ്പുലർ സിനിമകളിൽ ഒന്നായി പിൽക്കാലത്ത് തിരഞ്ഞെടുക്കപ്പെട്ട ചിത്രം തീർച്ചയായും ഈ പ്രശംസ അർഹിക്കുന്നുമുണ്ട്. യുകിക്കോ എന്നും ടോമിയാക്കോ എന്നും പേരുള്ള രണ്ട് പേരുടെ പ്രണയ ബന്ധമാണ് ചിത്രത്തിന്റെ പ്ലോട്ട് പോയിന്റ്, ഈ ഒരു റിലേഷൻ ഒരുപാട് പ്രശ്നങ്ങളിലൂടെയും കാലഘട്ടങ്ങളിലൂടെയും എല്ലാം കടന്ന് പോവുന്നത് മനോഹരമായി സിനിമ കാണിക്കുന്നുണ്ട്, ഇതിനോടൊപ്പം തന്നെ രാജ്യത്തിൻറെ ആ കാലത്തെ സാമൂഹിക രാഷ്ട്രീയ പശ്ചാത്തലവും ഒരു പ്രധാന ഭാഗമായി കഥയിലേക്ക് വരുന്നുമുണ്ട്.

🔸രണ്ടാം ലോകമഹായുദ്ധത്തിന് ശേഷമുള്ള ജപ്പാൻ ആണ് സിനിമയുടെ പശ്ചാത്തലം, യുകിക്കോ എന്ന നായികാ കഥാപാത്രം യുദ്ധ കാലഘട്ടത്തിൽ സേനയിൽ പ്രവർത്തിച്ചിട്ടുള്ള ആളാണ്, അതിന് മുന്നേ ഫോറസ്റ്റ് ഡിപ്പാർട്മെന്റിലും ജോലി ചെയ്തിരുന്നു. ഈ കാലഘട്ടത്തിലാണ് അവൾ ആദ്യമായി ടോമിയാക്കോയെ നേരിൽ കാണുന്നത്. ആദ്യ കാഴ്ചയിൽ തന്നെ മുരടൻ, പരുക്കൻ, ഗൗരവക്കാരൻ എന്നൊക്കെയുള്ള സൂചനകൾ ലഭിച്ചെങ്കിലും അതൊന്നും തന്നെ പരസ്പരം അടുക്കുന്നതിൽ നിന്നും രണ്ട് പേരെയും വിലക്കിയില്ല. സ്വാഭാവികമായും ഈ രണ്ട് കഥാപാത്രങ്ങളും പ്രണയത്തിൽ ആവുകയാണ്.

🔸മകളിൽ പറഞ്ഞ സംഭവങ്ങൾ യുദ്ധത്തിന് മുന്നേ നടന്നതാണ്, അവിടെ തന്നെ പിന്നീടെന്ത് സംഭവിച്ചു എന്നത് പറഞ്ഞിട്ടില്ല. യുദ്ധാനന്തരം ഒരുനാൾ യുകിക്കോ ടോമിയാക്കോയെ അന്വേഷിച്ച് അയാളുടെ വീട്ടിലേക്ക് വരികയാണ്. ഔദ്യോഗികമായ ആവശ്യത്തിനാണ് തന്റെ വരവ് എന്ന് അവൾ പറയുന്നുണ്ട് എങ്കിലും അതായിരുന്നില്ല ഉദ്ദേശം. ഇവിടെ വെച്ചാണ് ടോമിയാകോയുടെ ഭാര്യയെ യുകിക്കോ കണ്ട് മുട്ടുന്നത്, രോഗവും അവശതയും ഒക്കെ കാരണം ബുദ്ധിമുട്ടുന്ന എന്നാൽ അങ്ങേയറ്റം സ്നേഹവായ്‌പോടെ പെരുമാറുന്ന ഒരു പാവം സ്ത്രീ. അവരെപ്പറ്റി അറിയാമായിരുന്നു എങ്കിലും പ്രതീക്ഷിച്ചപോലെ ഒരാളായിരുന്നില്ല എന്ന് പറയാം.

🔸യകിക്കോയുടെ വരവിൽ ടോമിയാക്കോയ്ക്ക് വലിയ സന്തോഷം തോന്നിയില്ല എങ്കിലും ഇരുവരും വീണ്ടും ഇടപഴകി തുടങ്ങുകയാണ്. വർഷങ്ങൾക്ക് മുൻപേ നടന്ന സംഭവങ്ങൾ ഒരു അബദ്ധം മാത്രമായി കണ്ട് മറക്കണം എന്ന പക്ഷമാണ് അയാൾക്ക് എങ്കിൽ അവൾക്ക് അത് എത്രത്തോളം അംഗീകരിക്കാൻ കഴിയും എന്നത് കണ്ട് തന്നെ അറിയണം. ഒരു മികച്ച ഡ്രാമ ചിത്രത്തിനുള്ള എല്ലാ വിഭവങ്ങളും മനോഹരമായി തന്നെ ഒരുക്കി വെച്ചിട്ടുണ്ട് മികിയോ നറുസെ, പ്രത്യേകിച്ചും സിനിമയുടെ എൻഡിങ് ഒക്കെ കാഴ്ചക്കാരനെ ആഴത്തിൽ സ്പർശിക്കുന്ന ഒന്ന് തന്നെയാണ്. തീർച്ചയായും കണ്ടിരിക്കേണ്ട ഒന്നാണ് ഫ്‌ളോട്ടിങ് ക്ലൗഡ്‌സ് എന്ന ഈ ചിത്രം.

Verdict : Must Watch

DC Rating : 4.5/5 

941. The Magdalene Sisters (2002)

Director : Peter Mullan

Genre : Drama

Rating : 7.7/10

Country : Ireland

Duration : 119 Minutes

🔸മഗ്ദലീൻ ലോൻഡ്രീസ് എന്ന ഓമനപ്പേരിൽ അറിയപ്പെട്ട ഇൻസ്റ്റിറ്റിയൂഷൻ സെറ്റപ്പിന് നൂറ്റാണ്ടുകളുടെ പഴക്കം ഉണ്ട്, എഴുതപ്പെട്ട വ്യക്തമായ ചരിത്രം എത്ര കൊല്ലം പിറകോട്ട് പോവുമോ അത്രയും കാലം ഇവയെകുറിച്ചുള്ള പരാമർശങ്ങളും ഉണ്ടെന്നാണ് അറിവ്. ഇനി എന്താണ് ഇത് എന്ന് പറയാം, സമൂഹത്തിലെ മോറലി റൈറ്റ് അല്ലാത്ത സ്ത്രീകളെ കൊണ്ട് വന്ന് പാർപ്പിച്ച്, അവരെ മാനസികമായും ശാരീരികമായും പരിശീലിപ്പിച്ച് ഒരു 'ഉത്തമ' സ്ത്രീ ആയി മാറ്റുന്ന സ്ഥലം എന്ന് പറയാം. ഇവിടെ ഉത്തമ, മോറലി റൈറ്റ് എന്നീ പദങ്ങൾക്ക് കൊടുക്കുന്ന ഡെഫിനിഷൻ അവ്യക്തമാണ്, എന്താണ് എന്ന് പിടിയില്ല, എന്തായാലും ഇതാണ് ബേസിക് സെറ്റപ്പ്.

🔸ഈ കേന്ദ്രങ്ങൾ ഏറെക്കുറെ തടവറ തന്നെ ആയിരുന്നു, ഒരു ഏകാധിപത്യ ലൈൻ ആയത് കൊണ്ട് തന്നെ മാനസിക ശാരീരിക പീഡനങ്ങൾ ഒക്കെ നല്ല തോതിൽ തന്നെ അരങ്ങേറിയിരുന്നത്രെ. ചില സന്ദർഭങ്ങളിൽ ലൈംഗിക ചൂഷണം വരെ നടന്നിരുന്നതിന് തെളിവുകൾ ഉണ്ട്, ഈ ഒരു സെറ്റപ്പ് കഴിഞ്ഞ നൂറ്റാണ്ടിന്റെ അവസാനം വരെ ചില ഇടങ്ങളിൽ നിലവിൽ ഉണ്ടായിരുന്നത്രെ. എത്രയോ സ്ത്രീകളുടെ കണ്ണീരും, വേദനയും, തിക്താനുഭവങ്ങളും ഉണ്ടാവും ഇവിടെല്ലാം എന്നത് ഭീതിതമായ ചിന്ത തന്നെയാണ്. ഇത്തരം ഒരു മഗ്ദലീൻ ലോൺഡ്രി ആണ് നമ്മുടെ കഥാ പശ്ചാത്തലം.

🔸വയത്യസ്ത പശ്ചാത്തലങ്ങളിൽ നിന്നും ഈ ലോണ്ടറിയിലേക്ക് എത്തുന്ന മൂന്ന് കഥാപാത്രങ്ങളാണ് നമ്മുടെ ഫോക്കൽ പോയിന്റുകൾ. ബെർണാഡെറ്റ്, മാർഗരറ്റ്, റോസ് എന്നിവർ ഇവിടെ എത്തിപ്പെടാൻ അവരുടേതായ കാരണങ്ങൾ ഉള്ളവരായിരുന്നു. ഒരാൾക്ക് തന്റെ സൗന്ദര്യം ആയിരുന്നു ശാപം എങ്കിൽ മറ്റൊരാൾ മാനസിക പ്രശ്നമുള്ള യുവതി ആയിരുന്നു. മൂന്നാമത്തെ കഥാപാത്രത്തിന്റെ കഥ കുറച്ച് കൂടി വേദനാജനകം ആയിരുന്നു, സ്വന്തം ബന്ധുവിനാൽ ബലാത്സംഗം ചെയ്യപ്പെട്ട അതി ദാരുണമായ കഥ. എന്ത് തന്നെ ആയാലും ഇവരെല്ലാം ഈ ഇൻസ്റ്റിറ്റിയൂഷനിൽ വെച്ച് ഒത്ത് ചേരുകയാണ്.

🔸പറമെ കാണുന്ന കരുതലിനും, സ്നേഹത്തിനും എല്ലാം ഉള്ളിൽ വളരെ വൃത്തികെട്ട രീതികളും മനോഭാവവും ഉള്ളവരായിരുന്നു അവിടെ ഉള്ളത്, പ്രത്യേകിച്ചും സിസ്റ്റർ ബ്രിഡ്‌ജറ്റിനെ പോലുള്ളവർ. തുടർന്ന് ഈ കഥാപാത്രങ്ങൾക്ക് എന്ത് സംഭവിക്കും എന്നത് സിനിമ കണ്ട് തന്നെ അറിയുക, ചെറിയ തോതിൽ അഡൽറ്റ് കണ്ടന്റ് ഒക്കെ ഇവിടുണ്ട്, പോരെങ്കിൽ അല്പം ഡിസ്റ്റർബിങ് ആയി മാറുന്നുമുണ്ട് കഥ പലയിടത്തും. സിനിമ കണ്ട് കഴിയുന്ന വേളയിൽ ഒരു ബ്ലാങ്ക് ഫീൽ ആയിരിക്കും ലഭിക്കുക, അങ്ങനെ കണ്ടിരിക്കേണ്ട ഒന്ന് എന്ന് പറയാവുന്ന സിനിമയാണ് മഗ്ദലീൻ സിസ്റ്റേഴ്സ്, കാണാൻ ശ്രമിക്കുക.

Verdict : Must Watch

DC Rating : 4.5/5 

940. Night Of The Living Dead (1968)

Director : George A. Romero

Genre : Horror

Rating : 7.9/10

Country : USA

Duration : 96 Minutes

🔸ബലാക്ക് ആൻഡ് വൈറ്റ് സിനിമകൾ കളറിന് വഴി മാറി തുടങ്ങിയ കാലഘട്ടം കഴിഞ്ഞ് വന്ന സിനിമ ആയിട്ടും എന്ത് കൊണ്ട് നൈറ്റ് ഓഫ് ദി ലിവിങ് ഡെഡ് ആ വഴി പോയില്ല എന്ന് ആലോചിച്ചിട്ടുണ്ട്, വർഷങ്ങൾക്ക് മുന്നേ സിനിമ ആദ്യമായി കണ്ട ദിവസം. പിന്നീട് മനസിലായി ചിത്രത്തിന്റെ ടോണിനും അത് കൊണ്ടുവരുന്ന സ്‌കെയറുകൾക്കും ഏറ്റവും നല്ലത് ബ്ലാക്ക് ആൻഡ് വൈറ്റ് തന്നെ ആണെന്ന്, ആഫ്റ്റർ ഓൾ ബ്ലാക്ക് ആൻഡ് വൈറ്റ് സിനിമകൾ മാത്രം കൊണ്ട് അൻസെറ്റിൽഡ് ആവുന്ന ഒരുപാട് ആളുകളെ അറിയാം, അതിനൊപ്പം ലേശം ഡിസ്റ്റർബിങ് കണ്ടന്റ് കൂടി ആയാൽ പൂർണം.

🔸സോംബി സിനിമകളിലേക്ക് സിനിമ പ്രവർത്തകർ അധികം കടന്നിട്ടില്ലാത്ത ഒരു കാലഘട്ടത്തിലാണ് നൈറ്റ് ഓഫ് ദി ലിവിങ് ഡെഡ് പ്രേക്ഷകരിൽ എത്തുന്നത്, അന്നത്തെ പ്രേക്ഷകരെ ഞെട്ടിച്ചു എന്നത് മാത്രമല്ല ഈ ചിത്രത്തിന്റെ പ്രസക്തി, മറിച്ച് പിന്നീട് വന്ന ഒരുപാട് ഒരുപാട് സിനിമകൾക്ക് സ്വാധീനമായി ഒരു ടെക്സ്റ്റ് ബുക് കണക്കെ നിലനിന്നു എന്നത് കൂടിയാണ്. വാമ്പയർ സിനിമകളിൽ അഭിരമിച്ച മുപ്പതുകൾക്ക് മുൻപേയുള്ള കാലഘട്ടത്തിനും, പ്രേത ഭൂതാതികളിൽ താല്പര്യം കാണിച്ച രണ്ടാം കാലഘട്ടത്തിനും ശേഷമുള്ള ഒരു മാറ്റം ഇവിടെ നിന്നാണെന്ന് വേണമെങ്കിൽ പറയാം.

🔸അക്കാലത്തെ ചിത്രങ്ങളുമായി താരമത്യം ചെയ്യുമ്പോൾ വളരെ കുറഞ്ഞ ബഡ്ജറ്റിലാണ് ഈ സിനിമ തയാറാക്കപ്പെട്ടത്. ബാർബറ എന്ന നായികാ കഥാപാത്രവും, പങ്കാളി ആയ ജോണിയും തങ്ങളുടെ കുടുംബ കല്ലറ സന്ദർശിക്കുന്നിടത്ത് നിന്നുമാണ് സിനിമ ആരംഭിക്കുന്നത്. അവിടെ നിന്നുമുള്ള മടക്കം കളി ചിരികൾ ഒക്കെ നിറഞ്ഞതാണ് എങ്കിലും അതിന് വലിയ ആയുസ്സ് ഉണ്ടായില്ല, അപ്രതീക്ഷിതമായി കടന്ന് വന്ന ഒരു വ്യക്തി ജോണിയെ തൽക്ഷണം കൊന്ന് കളയുകയാണ്, അയാൾക്ക് മനുഷ്യന്റെ രൂപം ആണെങ്കിലും പെരുമാറ്റവും രീതിയും ഒരു മനുഷ്യന്റേത് ആയിരുന്നെ ഇല്ല.

🔸ഈ സംഭവത്തിന് ശേഷം ബാർബറ ആകെ വിരണ്ട്‍ പോയെങ്കിലും ഇത് കേവലം ഒരു ഒറ്റപ്പെട്ട സംഭവം അല്ല എന്ന തിരിച്ചറിവ് അവൾക്ക് ഉണ്ടാവുകയാണ്, അവിടെ നിന്നും ഒരു സോംബി അപോകലിപ്സ് ആരംഭിക്കുകയാണ്. പിന്നീട് പല സിനിമകളിലും കണ്ട രംഗങ്ങൾ ഇവിടെ ആദ്യമായി കാണാം, ഇതിന്റെ ഒരു പ്രശനം എന്താണെന്നാൽ ഫ്രഷ് ഫീൽ ലഭിച്ചേക്കില്ല എന്നത് തന്നെ. ആദ്യം തൊട്ട് അവസാനം വരെ ടെൻഷൻ നിലനിർത്തുന്ന ചിത്രം ഒരു കിടിലൻ ക്ളൈമാക്സ് കൂടി ഒളിപ്പിച്ച് വെച്ചിട്ടുണ്ട്. അപ്പോൾ ഹൊറർ ജോണറിലെ ഒരു ലാൻഡ്മാർക് സിനിമയാണ് നൈറ്റ് ഓഫ് ലിവിങ് ഡെഡ്, കാണാൻ ശ്രമിക്കുക.

Verdict : Very Good

DC Rating : 4.25/5 

939. Scam 1992 (2020)

Director : Hansal Mehta

Genre : Drama

Rating : 9.6/10

Seasons : 01

Episodes : 10

Duration : 54 - 58 Minutes

🔸നിങ്ങൾ "രുചി സോയ" എന്ന് കേട്ടിട്ടുണ്ടോ?? കുക്കിങ് ഓയിൽ കമ്പനി ആണ്. കഴിഞ്ഞ ജനുവരി മാസം വരെ അതിനു ഷെയർ മാർക്കെറ്റിൽ ഒരു ഷെയറിന് വില വെറും പതിനഞ്ചു രൂപ മുതൽ ഇരുപതു രൂപ വരെയാണ് റേഞ്ച് ഉണ്ടായിരുന്നത്. ഈ കമ്പനി രണ്ടായിരത്തി ഇരുപതു ജനുവരിമാസം പകുതിക്കു വച്ച് "ബാബാ രാംദേവ്" ഏറ്റെടുത്തു. അതിനു ശേഷം കൊറോണ എന്ന മഹാ മഹാമാരിയെ പോലും വകവെക്കാതെ രുചി സോയയുടെ ഷെയർ പ്രൈസിൽ സംഭവിച്ചത് ഇതിഹാസ തുല്യമായ ഒരു അപ്പർ റാലി ആയിരുന്നു. ഏകദേശം ആയിരത്തി എണ്ണൂറു രൂപയിൽ ആണ് അത് ചെന്ന് നിന്നതു. എന്ന് വച്ചാൽ ഒരു ലക്ഷം മുടക്കി ആരേലും അന്ന് അതിൽ നിന്നും ഷെയർ വാങ്ങിച്ചിരുന്നേൽ ജൂൺ മാസത്തോടെ അയാൾ ഒരു കോടിയിൽ അധികം സമ്പാദ്യമുള്ള ഒരു വ്യക്തിയായി മാറുമായിരുന്നു. അങ്ങനെ ഒരുപാട്പേർ ആയി എന്നത് ചരിത്രം. ഈ ഹൈപ്പ് കഴിഞ്ഞപ്പോൾ അത് പതിയെ താഴാൻ തുടങ്ങി ഇപ്പോൾ പ്രൈസ് ലെവൽ അഞ്ഞൂറിനും അറുന്നൂറിനും ഇടയിലാണ് നിൽക്കുന്നത്. അപ്പോൾ റാലിയ്ക്കിടയിൽ ചാടിക്കേറി ആയിരത്തിനും, ആയിരത്തി അഞ്ഞൂറിനും ഒക്കെ ഇടയിൽ വാങ്ങി വിൽക്കാതെ ഹോൾഡ് ചെയ്തവരോ ?? അവർ ഒകെ ഭീമമായ ഒരു നഷ്ടത്തിൽ ഹോൾഡ് ചെയ്തു കൊണ്ട് ഇരിക്കുന്നുണ്ടാകും. ഷെയർ മാർക്കറ്റ് ഇങ്ങനെയാണ് ഒരു ഹൈപിനു നിങ്ങളെ രാജാവാക്കാൻ പറ്റും മറ്റൊരു നെഗറ്റീവ് ന്യൂസിന് പിച്ചക്കാരനും. രുചി സോയ കൊറോണ കഴിയുന്നതോടെ ഇനിയും കേറും എന്ന് വിചാരിക്കാം. ഒരു ജെനുവിൻ ബിസിനെസ്സ് ഡീൽ ആയതു കൊണ്ട് അത് ഹോൾഡ് ചെയ്യാം. പക്ഷെ ഇതൊരു ജെനുവിൻ ന്യൂസ് അല്ലായിരുന്നു എങ്കിലോ.. ??1987 ൽ അമേരിക്കയിൽ ൽ സംഭവിച്ച ബ്ലാക് മണ്ടേക്ക് ശേഷം സ്റ്റോക്ക് മാർക്കെറ്റിൽ നിലവിൽ വന്ന സെർക്ക്യൂട്ട് ബ്രെക്കർ എന്നൊരു നിയമം ഉണ്ട്. അതായതു ഒരു ദിവസത്തെ വിൽപ്പനക്ക് ഇത്ര ശതമാനം ലെവൽ ഒരു ദിവസം വാങ്ങുന്നതിനു ഇത്ര ശതമാനം ലെവൽ എന്നുണ്ട് അത് കഴിഞ്ഞാൽ ആ സംഗതി പിന്നെ വാങ്ങാനോ വിക്കാനോ പറ്റില്ല. വെറും ഹൈപ്പ് മൂലം കേറിയതാണേൽ പിന്നെ നെഗറ്റീവ് ന്യൂസ് അതിനെ ലോവർ  സർക്യൂട്ടിൽ കൊണ്ട് മുട്ടിച്ചു കൊണ്ടാകും ഓരോ ദിവസവും മാർക്കറ്റ് ഓപ്പൺ ആകുന്നത് തന്നെ. അപ്പോൾ ഒരു ഷെയർ  ആയിരം രൂപയ്ക്കും മറ്റും ആയിരക്കണക്കിന് എണ്ണം വാങ്ങി കൂട്ടിയവരുടെ അവസ്ഥ!!. ഒന്ന് സ്‌ക്വയർ ഓഫ് ചെയ്‌തത്‌ പുറത്തേക്കു ഇറങ്ങി നഷ്ടം സംഭവിക്കുന്നത് നിർത്താൻ പോലും പറ്റാതെ അവരുടെ പൈസ ഇങ്ങനെ കൺമുമ്പിൽ ഓരോദിവസവും കിടന്നു നശിക്കും. അന്ന് 1875ൽ സ്ഥാപിതമായ  BSE (ബോംബെ സ്റ്റോക്ക് എക്സ്ചേഞ്ച്) മാത്രമേ ഉള്ളു. ഇന്ത്യയിലെ ഏറ്റവും ആദ്യത്തേതും പഴയതുമായ എക്സ്ചേഞ്ച്. 1992 ൽ നാഷണൽ സ്റ്റോക്ക് എക്സ്ചേഞ്ച് എന്ന ഇന്ന് കൂടുതൽ  മൊമെന്റം ഉള്ള ആദ്യത്തെ ഡിജിറ്റൽ സ്റ്റോക്ക് എക്സ്ചേഞ്ച്നിലവിൽ വന്നു. അതിനു മുമ്പ് വരെ ഓളിയും ബഹളവും ഇട്ടു ബുൾസും-ബെയേഴ്സും നേർക്ക് നേർ  അങ്കപ്പൊരു നടത്തി വാണിരുന്ന ബോംബെ സ്റ്റോക്ക് എക്സ്ചേഞ്ചിലെക്ക് ഒരു തകർന്ന വസ്ത്ര വ്യാപാരിയുടെ മകൻ കടന്നു ചെന്നത് ഒഴിഞ്ഞ രണ്ടു കയ്യും തലയിൽ നിറയെ കുടില ബുദ്ധികളുമായി ആയിരുന്നു. ഇന്ത്യൻ സ്റ്റോക്ക് എക്സ്ചേഞ്ച് ലോകത്തെ മായാജാലക്കാരൻ,  ദി ബിഗ് ബുൾ എന്ന് വിളിക്കപ്പെട്ട അല്ലെങ്കിൽ സ്റ്റോക്ക് എക്സ്ചേഞ്ച് ലോകത്തെ ‘അമിതാബച്ചൻ’ എന്ന് ഓമനപ്പേരുണ്ടായിരുന്ന. "ഹർഷദ് ലാൽ മെഹ്ത" അന്ന് വരെ ഇന്ത്യ മഹാരാജ്യത്തെ ഷെയർ മാർക്കറ്റ് രാജാക്കന്മാരിൽ ഒരാൾക്കും നേടാൻ ആകാത്ത അത്രേം വലിയ സമ്പാദ്യം ചുരുങ്ങിയ കാലം കൊണ്ട് ഉണ്ടാക്കി ഹർഷദ്. അവിശ്വസനീയമായ വളർച്ച. സ്വന്തം ചിന്തകൾ കൊണ്ട് കെട്ടി പൊക്കിയ ഒരു ചീട്ടു കൊട്ടാരമായിരുന്നു ഹർഷദിന്റെതു. എന്നാൽ ആ ചീട്ടു കൊട്ടാരത്തെ ആർക്കും ചിന്തിക്കാൻ പറ്റാത്ത രീതിയിൽ ബാലൻസ് ചെയ്തു അതിനുള്ളിൽ നിന്നും അതി ഗംഭീരമായ ഒരു ലാഭം ആയിരുന്നു ഹർഷദ് തനിക്കു ചുറ്റിനും ഉള്ളവർക്ക് വരെ ഉണ്ടാക്കി കൊടുത്തത്. അത് കൊണ്ട് തന്നെ പബ്ബിളിക്കിന് മുമ്പിൽ പുള്ളി ഒരു സ്റ്റാർ ആയി മാറി. മുമ്പ് ഞാൻ സൂചിപ്പിച്ച ‘രുചി സോയ’ ഒരു ജെനുവിന് കമ്പനി ആയിരുന്നു എങ്കിൽ ഹർഷദ് തന്റെ കൂട്ടാളികളെ കൊണ്ട് ഹൈപ്പ് ഉണ്ടാക്കി കയറ്റി തകർത്ത പല കമ്പനികളും വളരെ നിലവാരം കുറഞ്ഞവയായിരുന്നു. ഫേക്ക് ന്യൂസുകൾ ഉണ്ടാക്കി ഹൈപ്പ് കയറ്റി വിട്ട ചില കമ്പനികൾ കാലങ്ങളായി പൂട്ടിക്കിടക്കുന്നതു പോലും ആയിരുന്നു. പക്ഷെ ഷെയർ മാർകെറ്റിൽ ന്യൂസിനാണ് പ്രാധാന്യം. പെട്ടിക്കടയിട്ടു മുറുക്കാൻ വിൽക്കുന്ന ചെല്ലപ്പൻ ചേട്ടന് നല്ല കാലത്തു ഏതേലും തരത്തിൽ എന്നേലും ഷെയർ മാർകെറ്റിൽ ഉണ്ടായിരുന്നു എങ്കിൽ കമ്പനി ദരിദ്രാവസ്ഥയിൽ ആണേലും ആ പേര് അവിടെ രെജിസ്റ്റർ ആയി കിടക്കും. അങ്ങനെ വളരെ ചെറിയ പൈസക്ക് കിട്ടുന്ന പെന്നി സ്റ്റോക്കുകൾ അതായതു പത്തോ ഇരുപതോ രൂപയ്ക്കു താഴെ ഷെയർ വാല്യൂ വരുന്ന സ്റ്റോക്കുകൾ നോക്കി വെറും ഹൈപ്പുണ്ടാക്കി കയറ്റി ആ ഹൈപിൽ കയറുന്ന എമൗണ്ടിൽ കയറി പൈസ വാരുക... അവരുടെ ആവശ്യം കഴിഞ്ഞാൽ അവർ സ്‌ക്വയർ ഓഫ് ചെയ്തു ഇറങ്ങാൻ തുടങ്ങും. പ്രോഫിറ്റ് ആദ്യം ഇട്ടവരുടെ പോക്കറ്റിലേക്കും പോകും. ബാക്ക ി ഉള്ളവർ ചത്തു മലച്ചു കിടന്ന ആ കമ്പനിയുടെ ഉള്ളിൽ നിന്നും ഒന്നുകിൽ ഏറ്റവും ഒടുവിലെ നഷ്ടത്തിൽ ബുക്ക് ചെയ്യും. അല്ലെങ്കിൽ ആ പൈസ അവിടെ ഇട്ടു കോഴിക്ക് മുലവരുമ്പോൾ ഇനിയും ഷെയർ കയറും എന്നും കരുതി കാത്തിരിക്കും. ഹർഷദ് ആണേൽ പിന്നെയും പമ്പ് ചെയ്തു കയറ്റി കൊടുക്കുന്നത് കൊണ്ട് അതൊരു ബുൾ റൺ ആയി നില നിർത്തികൊണ്ടിരുന്നു. അത് കൊണ്ട് തന്നെ ഇൻവെസ്റ്റെർസ് അതിലെ ബിസിനെസ്സ് നോക്കാതെ സ്ട്രോങ്ങ് ആയ ഇൻവെസ്റ്റിങ് കീപ്പ് ചെയ്തു.

🔸ഷെയർ മാർകെറ്റിൽ ആദ്യമായി ഇറങ്ങുന്ന എല്ലാവരും ആർത്തി മൂത്തു ആദ്യം നോക്കുക പെന്നി സ്റ്റോക്കുകളാണ്. കാരണം ആയിരം രൂപ ഷെയർ വാല്യൂ ഉള്ള ഒരു സ്റ്റോക്ക് പതിനായിരം രൂപയ്ക്കു ആകെ കിട്ടുക പത്തെണ്ണം ആയിരിക്കും. ആയിരം എന്നത് ആയിരത്തി ഒന്ന് എന്ന രീതിയിൽ ഉയർന്നാൽ ഷെയർ ഹോൾഡറുടെ ലാഭം പത്തു ഷെയറിനു പത്തു രൂപ. അതേ പതിനായിരം രൂപയ്ക്കു മൂന്നു രൂപ വിലയുള്ള ഷെയർ എത്ര എണ്ണം കിട്ടും. ഏകദേശം മൂവായിരത്തി മുന്നൂറെണം. ആ മൂന്നു രൂപ നാലു രൂപ ആകുമ്പോൾ പ്രോഫിറ്റ് ഒറ്റയടിക്ക് മൂവായിരത്തി മുന്നൂറാണ്. പത്തു രൂപ കൂടിയാൽ മുപ്പത്തി മൂവായിരം. വ്യത്യാസം കണ്ടുവോ. പക്ഷെ പലപ്പോഴും പെന്നി സ്റ്റോക്കുകൾ ആയുള്ള കമ്പനികൾ ഫണ്ടമെന്റലി യാതൊരു വിധത്തിലും സ്ട്രോങ്ങ് അല്ലായിരിക്കും. അത്തരം കമ്പനികളെ കണ്ടെത്തി ഓവർ ഹൈപ്പ് ഉണ്ടാക്കുന്നവർ ഇന്നുമുണ്ട്. രണ്ടാഴ്ച മുമ്പ് 'ദേവഹരി', 'ചന്ദ്രിമ' ഇങ്ങനെ രണ്ടു കമ്പനികളുടെ കമ്പനികളിൽ ഇതേ കളി നടന്നിരുന്നു. ഓവർ ഹൈപ്പുണ്ടാക്കി രണ്ടു രൂപ വിലയുള്ള ദേവഹരി പത്തു രൂപ എത്തുമെന്ന് ആദ്യം അവർ തന്നെ ഉണ്ടാക്കിയ ഗ്രൂപ്പുകളിൽ മെസ്സേജ് അയച്ചു. ചന്ദ്രിമ ഇരുപത്തി മൂന്ന് രൂപയുണ്ടാർന്നു അതിന്റെ ഇരട്ടി ആകുമെന്നും. പക്ഷെ അഞ്ചു രൂപ എത്തിയപ്പോഴേക്കും കളി പൊളിഞ്ഞപ്പോൾ മുതൽ ദേവ് ഹരിയും അതുപോലെ ചന്ദ്രിമയും സ്റ്റോക്ക് റേറ്റ് താഴോട്ട് പോകുകയാണ്. ലോവർ അടിച്ചു പോകുന്നത് കൊണ്ട് സ്‌ക്വയർ ഓഫ് ആക്കി ഇറങ്ങാനും  വയ്യ. ട്വിസ്റ്റ് പറയട്ടെ.. ഞാൻ ഇപ്പൊ എന്റെ പൈസ പോകുന്നത് കണ്ടാണ് ഓരോ ദിവസവും എഴുന്നേൽക്കുന്നത്. ഒരു കാര്യോം ഇല്ലായിരുന്നു. അറ്റ് ലീസ്റ്റ് ദേവഹരിയുടെ ആ ചാർട്ടൊന്നു നോക്കാനുള്ള ബുദ്ധിയെങ്കിലും കാണിച്ചിരുന്നേൽ ഇത്രേം വലിയ തോൽവി ആവില്ലായിരുന്നു. എന്തിനു ഹർഷദ് മേത്തയെ പറയുന്നു ഇന്നും ഇതുപോലെ ഉള്ളതിൽ തലവക്കാൻ ആളുള്ളപ്പോൾ അന്നത്തെ കാര്യം പറയാൻ ഉണ്ടോ?, ഒരു ഏടും മൂടും ഇല്ലാതെ കളിച്ചു കുറ്റം സ്റ്റോക്ക് മാർക്കറ്റിനു ഇട്ടു പിന്നെ ആ വഴിക്കു പോകാത്തവർ വേറെ. നമ്മുടെ ബിഗ് ബുള്ളിന്റെ കളി ഇവിടം കൊണ്ട് തീരുന്നില്ല എന്നതാണ് കഥയുടെ തീവ്രത കൂട്ടുന്നത്. ഇങ്ങനെ ഉള്ള കളിക്ക് പ്രത്യേകിച്ച് നിയമം ഒന്നുമില്ലായിരുന്നതിനാൽ അതങ്ങനെ അങ്ങ് നടന്നു പോയിരുന്ന കാലം. അപ്പോഴാണ് ഹർഷദിന്റെ കണ്ണ് മറ്റൊന്നിൽ പതിയുന്നത്. "മണിമാർക്കെറ്റ് !!" ഡെയിലി വോളിയം പതിനായിരം കോടി മാക്സിമം കിട്ടുന്ന ഷെയർ മാർക്കറ്റ് എന്ന ഇട്ടാവട്ടമല്ല... രണ്ടു ലക്ഷത്തിലധികം കോടിയുടെ ഡെയിലി വോളിയം ഉണ്ടാക്കുന്ന സമൃദ്ധമായ "മണിമാർക്കെറ്റ്".

🔸സറ്റോക്ക് മാർകെറ്റിൽ രണ്ടു തരം ആളുകൾ ആണുള്ളത് ഒന്ന് ബുൾസ്..കാളകൾ അതായതു ഒരു കമ്പനിയുടെ അല്ലെങ്കിൽ പ്രൊഡക്ടിന്റെ വില മുകളിലേക്ക്‌ പോകുമ്പോൾ അതിൽ നിന്നും പൈസ ഉണ്ടാക്കുന്നവർ. മറ്റേതു ബെയേഴ്സ്... കരടികൾ സ്റ്റോക്ക് മാർകെറ്റിൽ വില കൂപ്പുകുത്തി താഴേക്ക് പോകുമ്പോൾ ഷോർട് ചെയ്തു കാശുണ്ടാക്കുന്നവർ. അതായതു നിങ്ങളുടെ കൈയിൽ ഇല്ലാത്ത ഒരു സാധനം വിൽക്കാൻ സാധിക്കും സ്റ്റോക്ക് മാർകെറ്റിൽ. എന്നിട്ടു താഴെ എത്തുമ്പോൾ വാങ്ങും അതായതു അതിൽ നിന്നും എക്സിറ്റ് അടിക്കും. ആയിരം രൂപ ഉണ്ടായിരുന്ന ഒരു ഐറ്റം അഞ്ഞൂറിലേക്കു എത്തുമ്പോൾ ആയിരത്തിൽ ഷോർട്ട് ചെയ്തയാൾക്കു അഞ്ഞൂറ് രൂപ ലാഭം എന്നർത്ഥം. ഹർഷദ് മേത്ത സ്റ്റോക്ക് മാർക്കെറ്റിൽ സാധനങ്ങളുടെ വില ബുള്ളിഷ് ആക്കി കയറ്റി കൊണ്ട് പോയി ലാഭം ഉണ്ടാക്കിയിരുന്ന ആളായിരുന്നു. ഷെയർ മാർക്കെറ്റിൽ ലിസ്റ്റെഡ് കമ്പനികൾക്കും അതൊരു സന്തോഷമുള്ള കാര്യം. അതെ സമയം സ്റ്റോക്ക് മാർക്കറ്റിലെ ബ്ലാക്ക് കോബ്ര എന്നറിയ പെടുന്ന മനു മാണിക്ക് ഒരു ബെയറിഷ് ഗെയ്മ്മർ ആയിരുന്നു. ബുൾസ് ചട്ടം കെട്ടിയ ആളുകളെ കൊണ്ട് വളരെ വലിയ ക്വാണ്ടിറ്റി ഷെയേർസ് വാങ്ങികൂട്ടിക്കും അങ്ങനെ ആ ഷെയറിന്റെ വില കുത്തനെ മുകളിലേക്ക്‌ പോകും.പലതവണയായി ഇങ്ങനെ പണം ഇറക്കി കൊടുത്തു ഷെയറിൽ ഇല്ലാത്ത കാര്യം ഉണ്ടാക്കി മാനിപുലേഷൻ നടത്തി ആളുകളെ ആ ഷെയർ സ്ട്രോങ്ങ് ആണെന്ന് വിശ്വാസം വരുത്തി ഇൻവെർസ്റ്റേഴ്സിന്റെ എണ്ണം കൂട്ടുക. അത് വഴി താൻ ഇൻവെസ്റ്റ് ചെയ്ത പൈസയുടെ മൂല്യവും കൂടി കൊണ്ടിരിക്കും. ടോപ്പിൽ നിന്ന് ആവശ്യത്തിന് പ്രോഫിറ്റ് ബുക്ക് ചെയ്യും. ബെയേർസ് അതിന്റെ നേരെ തിരിച്ചും . ഇതിനെ 'പമ്പ് ആൻഡ് ഡംപ്' എന്ന് പറയും. ഹർഷദ് വന്നത് മണി മാണിക്കിന് കനത്ത തിരിച്ചടി ആയിരുന്നു. പോരാത്തേന് മണിമാർകെറ്റിൽ കണ്ണ് വച്ച് അതിലൂടെ ബാങ്കുകളുടെ ഡീൽ ഏറ്റെടുത്തപ്പോൾ അതിലെ ആളുകളുടെയും കണ്ണിലെ കരടായി മാറി.ഈ കാലഘട്ടങ്ങളിൽ ബാങ്കുകൾക്ക് ഷെയർ മാർകെറ്റിൽ ഇൻവെസ്റ്റ് ചെയ്യാൻ അനുവാദം ഉണ്ടായിരുന്നില്ല പകരം ഗവർമെന്റ് ബോണ്ടിൽ രെജിസ്റ്റർ ചെയ്യണം എന്നായിരുന്നു നിയമം. ഗവർമെന്റ്  ഈ പണം ഇൻവെർസ്റ്റേഴ്സിനു കൊടുത്ത് അതിൽ നിന്നും വരുമാനമുണ്ടാകുകയും ബാക്കി ആക്ടിവിറ്റിസിന് ഉപയോഗിക്കുകയും. അതിൽ കുറച്ചു പൈസ ഇൻവെർസേഴ്സിന് പലിശയായി കൊടുക്കുകയും ചെയ്യും.

🔸അങ്ങനെ ബോണ്ട് വിൽക്കുവാനും വാങ്ങുവാനും തയ്യാറായിട്ടുള്ള ബാങ്ക്സിൽ നിന്നും ഡീൽ ചെയ്തു ഹർഷദ് മേത്ത ഒരു മീഡിയേറ്റർ ആയി വർക്ക് ചെയ്തു. ബോണ്ട് വിൽക്കാൻ  ഉള്ളവരുടെ കയ്യിൽ നിന്ന് ബോണ്ട് വാങ്ങി ബയ്‌ ചെയ്യുവാനുള്ള ബാങ്ക്സിനെ കണ്ടു പിടിച്ചു അവരുടെ കയ്യിൽ നിന്ന് പൈസ വാങ്ങി മറ്റേ ബാങ്കിന് കൊടുക്കും. ഇതിനിടയിൽ, പരസ്പരം കൈമാറുന്ന ഈ പൈസ കുറച്ചു ഗാപ്പിൽ പുള്ളിയുടെ കയ്യിൽ വരും ആ പൈസ എല്ലാം ആ ഒരു ടൈം പിരീഡിൽ ഷെയർ മാർകെറ്റിൽ പമ്പ് ആൻഡ് ഡംപ് ചെയ്തു പൈസ ഉണ്ടാക്കി. കൃത്യം സമയത്തു തിരിക കൊടുക്കും. അത് കഴിഞ്ഞു പുള്ളി പിന്നേം ഒരു കളി കൂടെ കളിച്ചു, കിട്ടുന്ന പൈസ എല്ലാം ഷെയർമാർക്കെറ്റിൽ തന്നെ ഇട്ടു വേറെ ബാങ്കുകൾ തേടി പിടിച്ചു മുമ്പത്തെ സെല്ലേഴ്‌സിന് കൊടുക്കാൻ തുടങ്ങി. അതിൽ കുറച്ചു കൂടെ ടൈം ഗാപ് കിട്ടുമല്ലോ. അങ്ങനെ റൊട്ടേറ്റ് ചെയ്തു കളിക്കുന്നതിനിടയിൽ പുള്ളിക്ക് പിന്നേം ഒരു ഐഡിയ എന്തിനു പൈസ കൊടുക്കണം. ബാങ്ക് റെസിപ്പ്റ്റ് കൊടുത്താൽ പോരെ പൈസക്ക് തുല്യമായ ബാങ്ക് റെസിപ്പ്റ്റുകൾ സെക്യൂരിറ്റി ആയി കൊടുക്കാം. പൈസയുടെ തന്നെ വാല്യൂ ഉള്ളവയാണ് ഇത്തരം റെസിപ്പ്റ്റുകൾ. അതിനു വേണ്ടി മുംബയിലെ ചെറുകിട ബാങ്കുകൾ തേടിപ്പിടിച്ചു അവരെ കൺവീനസ് ചെയ്തു വലിയ എമൗണ്ട് റെസിപ്പ്റ്റുകൾ സങ്കടിപ്പിച്ചു എന്നാൽ ഫണ്ടമെന്റലി ആ ബാങ്കുകൾ ഒന്നും അത്രേം തുകക്കുള്ള സ്ട്രോങ്ങ് അല്ലായിരുന്നു. ഷെയർ മാർക്കറ്റ് ഗോഡ് ആയ ഹർഷദ് അല്ലെ ആള് ഇതിൽ നിന്നും കിട്ടുന്ന നല്ലൊരു വരുമാനം അവരിലേക്ക്‌ വരുമെന്നും പുള്ളി ഓഫർ ചെയ്തു.

🔸ഈ ഫേക്ക് റെസിപ്പ്റ്റുകൾ കാണിച്ചു കൊണ്ട് SBIൽ നിന്ന് അഞ്ഞൂറിലധികം കോടികൾ കൈക്കലാക്കി. ഇത് മണത്തറിഞ്ഞ മണിമാർക്കെറ്റ് റ്റീംസും, ബെയേഴ്സും എല്ലാം കൂടെ ടൈംസ് ഓഫ് ഇന്ത്യയിൽ വർക്ക് ചെയ്യുന്ന “സു ജീത ദല്ലാൾ’’ എന്നാൽ ജേര്ണലിസ്റ്റിലേക്കു വിവരം എത്തിക്കുന്നു. മുമ്പേ തന്നെ ഹർഷാദിന്റെ കേസ് പഠിച്ചു കൊണ്ടിരുന്ന സുജിത ഈ ഇൻഫോർമേഷൻ നന്നായി വിനിയോഗിച്ചു. എല്ലാം കൈവിട്ടു പോകുന്നു എന്ന് കണ്ട ഹർഷദ് പൈസ തിരികെ കൊടുക്കാൻ തയ്യാറാകുന്നു എങ്കിലും ഇതൊരു സ്‌കാം ആണെന്നുള്ളതിനാൽ സുജിത ദലാൽ “ടൈംസ് ഓഫ്  ഇന്ത്യയിൽ” കൂടെ ഒരു ആർട്ടിക്കിൾ പുറത്തു വിടുകയും അവിടെ നിന്നും ഹർഷദ് മേത്തയുടെ ശനിദശ ആരംഭിക്കുകയും ചെയ്യുന്നു. ഹർഷദ് മേത്തയുടെ ശനിദശ രാജ്യത്തിൻറെ തന്നെ ശനിദശയായി മാറി. വളരെ സെന്സിറ്റിവ് ആണ് ഷെയർ മാർക്കറ്റ് ഒരു നെഗറ്റീവ് ന്യൂസ് വന്നാൽ ഉടനെ ഇൻവെസ്റ്റെർസ് സ്‌ക്വയർ ഓഫ് ചെയ്യാൻ തുടങ്ങും. അങ്ങനെ ബാങ്കുകളിൽ നിന്നും ഫേക്ക് റിസെപ്പ്റ്റും മറ്റും കാണിച്ചു വാങ്ങി കൂട്ടി ഹർഷദ് പൊക്കി കെട്ടിയ ആ ബുൾ റൺ താഴോട്ട് കൂപ്പുകുത്തി. ബാങ്കുകളുടെയും ഹര്ഷദിനെ വിശ്വസിച്ച ഒരുപാടുപേരുടെ പണം അതിൽ ഒഴുകി പോയി. ഇന്ത്യയിലെ മൊത്തം ബാങ്കിങ് സിസ്റ്റം തകർന്നു തരിപ്പണമായി. നാലായിരം കോടിയുടെ സ്‌കാം ആണ് നടന്നത് ഇന്നത്തെ പൈസയുമായി കമ്പയർ ചെയ്യുമ്പോൾ ഇരുപതിനായിരം  കോടിയോളം രൂപ!!!. കോമഡി എന്തെന്നാൽ ഇതേ പണി ഹർഷദിന്റെ കമ്പനിയിലെ ഒരു ജോലിക്കാരൻ പിന്നെയും ഇതിലും ഗംഭീരമായി ആവർത്തിച്ചിരുന്നു "കേതൻ പാരെക്ക്". 1998ൽ അത് പൊളിഞ്ഞു. അവിടെയും സു ജീത ദല്ലാൾ എന്ന ജേർണലിസ്റ്റ് ആയിരുന്നു പാരയായത്. പുള്ളിക്കാരൻ ജയിലിൽ നിന്നും ഇറങ്ങുമ്പോഴേക്കും തിരികെ കേറും ഇപ്പോഴും ജയിലിൽ തന്നെ. പക്ഷെ എവിടെ ഇരുന്നാലും ഭയക്കേണ്ട അജ്ജാതി വിഷ പാമ്പാണ് കേതൻ. ഉണ്ടാക്കിയ അയ്യായിരം കോടി പുള്ളി വിദേശത്തേക്ക് കടത്തിയിരുന്നു. അതുകൊണ്ടു തന്നെ മറ്റു പലരിലൂടെയും കേതൻ കളികൾ നടത്തുന്നുണ്ട് എന്ന് പലരും ഭയക്കുന്നു. സെബി ഹർഷദ് മേത്തക്ക് ശേഷം ദിവസോം ഓരോ നിയമം വച്ചുണ്ടാക്കുന്നുണ്ട് എന്ന് തോന്നുന്നു. എല്ലാം ഇൻവെസ്റ്റേഴ്സിന്റെ നന്മയെ കരുതി ആണല്ലോ എന്നോർക്കുമ്പോൾ വല്യ ഒരു മാതിരി സന്തോഷവും ഇല്ലാതില്ല.

🔸ഹർഷദ് മേത്തയുടെ സ്റ്റോറി അധികം കേൾക്കുന്നത് നല്ലതല്ല എന്നാണ്. കാരണം ഭയങ്കര ഗ്രാവിറ്റി ആണ് വല്ലാത്ത ഒരു വൈബ്. ആരും ആരാധിച്ചു പോകുന്ന ഒരു ജാതി മനുഷ്യൻ. ഈ സീരിയൽ കൂടെ കണ്ടു കഴിഞ്ഞാൽ പിന്നെ പറയാനില്ല. അസാധ്യ മേക്കിങ് ആണ് സ്‌കാം 1992. പക്ഷേ പുള്ളി മൂലം ആത്മഹത്യ ചെയ്യേണ്ടി വന്ന ഒരു പാട് പേരുടെ കഥകൾ കൂടെ ചേർത്തു വായിച്ചാൽ ശരിയായ് കൊള്ളും. കുറച്ചു കൂടെ മിതമായി കൈകാര്യം ചെയ്തിരുന്നെൽ ഒരു പക്ഷെ കാര്യങ്ങൾ കുറച്ചു കൂടെ സ്മൂത്ത് ആയി അവസാനിപ്പിക്കാമായിരുന്നു എന്ന് തോന്നിയിട്ടുണ്ട്. ആദ്യം സാമ്പത്തിക ക്രമക്കേടുകൾ അവസാനിപ്പിക്കാൻ ഉള്ള ശ്രമം തുടരണമായിരുന്നു. അത് വരെ ന്യൂസ് പുറത്തു വിടാതെ ഇരിക്കാൻ നോക്കണം. ന്യൂസ് വന്നത് കൊണ്ടാണ് സ്റ്റോക്ക് പ്രൈസുകൾ ഇടിഞ്ഞത്. അതവിടെ തന്നെ നിന്നിരുന്നേൽ അതിൽ നിന്നും ഹർഷദ് ഓഫർ ചെയ്ത പോലെ ഉള്ള വലിയൊരു തുക കണ്ടെത്താൻ ആകുമായിരുന്നു. ബാങ്ക് പ്രോബ്ലെംസ് പരിഹരിച്ച ശേഷം പിന്നീട് ഹർഷദിന്റെ കേസ് മുന്നോട്ടു പോയിരുന്നേൽ ആ സെക്ഷനിലെ വീഴ്ചയെങ്കിലും പരിഹരിക്കാമായിരുന്നു. വലിയ ആധികാരികമായി അറിയില്ല എങ്കിലും ഏകദേശം കിട്ടിയ ഒരു ധാരണ വച്ച് പറഞ്ഞതാണ്. ഒടുവിൽ 2001ൽ ട്രയൽ പിരീഡിൽ ജയിലിൽ വച്ച് തന്നെ ആ ബുള്ളിന്റെ ഓട്ടം അവസാനിച്ചു.

Verdict : Very Good

DC Rating : 4.25/5

938. 12 Suicidal Teens (2019)

Director : Yukihiko Tsutsumi

Genre : Mystery

Rating : 5.7/10

Country : Japan

Duration : 118 Minutes

🔸ഒരു നല്ല കൺസപ്റ്റിന്റെ വികലമായ അവതരണം, അതിലും മോശമായ ഒരു തരത്തിലും ലോജിക് കണ്ടെത്താൻ കഴിയാത്ത, കണ്ടിരിക്കുന്നവരുടെ യുക്തിയെ വരെ ചോദ്യം ചെയ്യുന്ന വളരെ മോശമായ അവതരണം അങ്ങനെ ട്വൽവ് സൂയിസൈഡൽ ടീൻസ് എന്ന ജാപ്പനീസ് ത്രില്ലർ ചിത്രത്തിന് ഒരുപാട് വിശേഷണങ്ങൾ നൽകാൻ കഴിയും. പേരിൽ നിന്ന് തന്നെ മനസിലാവുന്നതാണ് കഥയുടെ ഒരേകദേശ കിടപ്പ്, അത് തന്നെയാണ് കാണാൻ ഉണ്ടായ കാരണവും, എന്നാൽ ഒട്ടും തൃപ്തിപ്പെടുത്താതെ പോയ ഒരു ചിത്രം കൂടിയാണിത്, ബേസിക് പ്ലോട്ടിന് വേണ്ടി കാണാം.

🔸യാതൊരു വിധ മുൻപരിചയവും ഇല്ലാത്ത, തമ്മിൽ ഒന്നിപ്പിക്കുന്ന ഘടകങ്ങൾ ഒന്നും ഇല്ലാത്ത പന്ത്രണ്ട് ടീൻസ് ഒരുനാൾ ഒരു സ്ഥലത്ത് ഒത്തുചേരുകയാണ്. ഇവർക്കിടയിൽ ആൺകുട്ടികളും പെണ്കുട്ടികളുമുണ്ട്, ഈ കമ്യുണിറ്റിയെ സോഷ്യൽ മീഡിയ വഴിയാവണം ഒന്നിച്ച് കൊണ്ടുവന്ന ഒരു നേതാവും ഉണ്ട്. ചില നിർദ്ദേശങ്ങൾ പാലിച്ച ശേഷമാണ് ഇവർ എല്ലാവരും തന്നെ ആ ഒഴിഞ്ഞ ആശുപത്രി കെട്ടിടത്തിൽ എത്തിയത്, എല്ലാവരുടെയും ഉദ്ദേശം ഒന്ന് മാത്രം, മരണം. അതെ ജീവിതം മടുത്താണ് ഇവരെല്ലാം എത്തിയിരിക്കുന്നത്, ഇനി സ്വന്തം ജീവിതത്തിലേക്ക് ഒരു മടങ്ങിപ്പോക്ക് ആഗ്രഹിക്കുന്നുമില്ല.

🔸പക്ഷെ പ്രശ്നങ്ങൾ തുടങ്ങുന്നത് ഇവരെല്ലാം കോൺഫറൻസ് ഹാളിൽ എത്തുന്നിടത്ത് നിന്നുമാണ്, പരിപാടികളിലേക്ക് കടക്കുന്നതിന് മുന്നേ ഒരവസാന വട്ട വോട്ടെടുപ്പ് നടത്തേണ്ടതുണ്ട്, അതിലേക്ക് കടക്കാൻ തയാറെടുക്കുമ്പോഴാണ് ഒരു കാര്യം ശ്രദ്ധയിൽ പെടുന്നത്. നേതാവ് അടക്കം പന്ത്രണ്ട് പേരാണ് റൂമിൽ വേണ്ടത്, എന്നാൽ അവിടെ പതിമൂന്ന് പേരുണ്ട്, നമ്മുടെ കഥാപാത്രങ്ങൾ എല്ലാം വരുന്നതിന് മുന്നേ മറ്റൊരാൾ അവിടെ എത്തിയിരുന്നു, ഒരാൾ എന്ന് പറയാൻ കഴിയുമോ എന്നത് സംശയമാണ്, ഒരു ജഡം. ആ ജഡം ആരുടെ ആണെന്നോ അയാൾ എങ്ങനെ ഇവിടെ എത്തി എന്നോ വ്യക്തമല്ല എന്നാൽ ഒരു കൊലപാതകത്തിനുള്ള സൂചനകൾ അവിടെ ഉണ്ട് താനും.

🔸ഈ സംഭവത്തെ കുറിച്ച് വ്യക്തത ലഭിക്കാതെ കലാ പരിപാടികളിലേക്ക് കടക്കുന്നത് ശെരിയല്ല എന്ന് ഒരഭിപ്രായം വന്നതിനാൽ ഈ പന്ത്രണ്ട് പേരും ഗ്രൂപ്പുകളായി തിരിഞ്ഞ് അന്വേഷണം നടത്തുകയാണ്, ഇവിടെ നിന്നുമാണ് കഥ ആരംഭിക്കുന്നത്. ട്വിസ്റ്റുകളുടെ കാര്യത്തിൽ ഒന്നും യാതൊരു പഞ്ഞവുമില്ല, ചറപറാ വന്ന് കൊണ്ടേ ഇരിക്കും, എന്നാൽ ഇവയിൽ മിക്കതും ഒരു രീതിയിലും സെൻസ് ഉണ്ടാക്കുന്നില്ല എന്നതും ട്വിസ്റ്റിന് വേണ്ടി ട്വിസ്റ്റ് ഉണ്ടാക്കിയ ഫീൽ തരുന്നു എന്നതും പ്രശനം തന്നെയാണ്. താല്പര്യം ഉണ്ടെങ്കിൽ നോക്കാം, ഒരു പ്രതീക്ഷയും വെക്കേണ്ടതില്ല.

Verdict : Avoidable 

DC Rating : 2.25/5 

937. The English Game (2020)

Creator : Julian Fellowes

Genre : Sports Drama

Rating : 7.6/10

Seasons : 01

Episodes : 06

Duration : 43 - 55 Minutes

🔸ഫട്ബോളിനെ പ്രമേയമാക്കി അനവധി സൃഷ്ട്ടികൾ പല ഭാഷകളിലായി പുറത്തിറങ്ങിയിട്ടുണ്ട്, എന്നാൽ ഇവ എല്ലാം തന്നെ ഇന്നത്തെ പശ്ചാത്തലത്തിൽ, അതായത് നിയമവും കളിയുടെ ശൈലിയും രൂപവും എല്ലാം ഊട്ടി ഉറപ്പിച്ച ശേഷമുള്ള, ടെക്ക്നിക്കലി ഫുട്ബോൾ ഒരുപാട് പുരോഗമിച്ച ശേഷമുള്ള കാര്യങ്ങളാണ് അവതരിപ്പിച്ചത്. ഇവിടെയാണ് ദി ഇംഗ്ളീഷ് ഗെയിം എന്ന സീരീസ് വ്യത്യസ്തമാവുന്നത്. ഇവിടെ കഥാ പശ്ചാത്തലം പത്തൊൻപതാം നൂറ്റാണ്ടാണ്, ഫുട്ബോൾ എന്ന കായിക വിനോദം പിച്ച വെച്ച് തുടങ്ങിയ കാലഘട്ടം, ഇവിടെ നിന്നുമാണ് ഈ ആറ് എപ്പിസോഡ് സീരീസ് കഥ പറഞ്ഞ് തുടങ്ങുന്നത്.

🔸ഇംഗ്ളീഷ് പ്രീമിയർ ലീഗിനും, യുവേഫ ചാമ്പ്യൻസ് ലീഗിനും ഒക്കെ ഒരുപാട് വർഷങ്ങൾക്ക് മുൻപേ ഇംഗ്ലണ്ടിൽ നിലനിന്നിരുന്ന ഒരു വാർഷിക കപ്പ് മത്സരമാണ് എഫ് എ കപ്പ്. രാജ്യത്തെ ഏറ്റവും മികച്ച ടീമുകളും കളിക്കാരും മാറ്റുരക്കുന്ന ഈ മത്സരം ഒരർത്ഥത്തിൽ അഭിമാന പോരാട്ടം തന്നെയാണ്. പൊതുവെ ഈ കാലഘട്ടത്തിൽ കപ്പ് ജേതാക്കൾ ആവുന്നത് ഇംഗ്ലണ്ടിലെ ഉന്നത കുല ജാതർ ഒക്കെ കളിക്കാറുള്ള വലിയ ടീമുകളാണ്, ഇടത്തരം ടീമുകൾക്ക് മിക്കപ്പോഴും ആവശ്യത്തിന് കളിക്കാറോ ആവശ്യമായ ഫെസിലിട്ടീസോ ഉണ്ടാവാറില്ല, എന്തിനധികം യാത്ര ചെയ്ത് മത്സരത്തിന് എത്താനുള്ള വണ്ടി കൂലി ഒപ്പിക്കാൻ പറ്റിയില്ല എന്ന കാരണം കൊണ്ടുവരെ നടക്കാതെ പോയ മത്സരങ്ങളുണ്ട്.

🔸ഈ ഒരു രീതി മാറി മറിയുന്നത് ഡാർവിൻ എന്ന നെയ്ത്തുകാരുടെ ഗ്രാമത്തിൽ ഒരു മില്ലുടമ തന്റെ ടീമിൽ ഒരു ചെറിയ മാറ്റം വരുത്തുമ്പോഴാണ്. അന്ത കാലത്ത് പുറം നാടുകളിൽ നിന്നും മറ്റും കളിക്കാരെ ഇറക്കുമതി ചെയ്യുന്ന ട്രാൻസ്ഫർ പരിപാടി നിയമ വിധേയമല്ല, പിടിക്കപ്പെട്ടാൽ ശിക്ഷ തന്നെ പ്രതീക്ഷിക്കാം, എന്നാൽ വാൽ‌ഷ് എന്ന മില്ലുടമ രണ്ട് മികച്ച കളിക്കാരെ തന്റെ ടീമിലേക്ക് കൊണ്ടുവരികയാണ്, നെയ്ത്ത് തൊഴിലാളികൾ എന്ന രൂപേണ. സ്കോട്ട്ലാന്റുകാരായ ഇരുവരും ഫുട്‍ബോൾ സർക്കിയുട്ടുകളിൽ തങ്ങളുടെ കഴിവ് അതിനോടകം തന്നെ തെളിയിച്ചവരുമാണ്.

🔸ഇരുവരും വന്ന് ആദ്യ നാളുകളിൽ തന്നെ ടീമിന്റെ ദൈന്യാവസ്ഥ മനസിലാക്കി, ആദ്യ കളിയിൽ അടപടലം തോക്കുകയും ചെയ്തു. എന്നാൽ പിന്നീട് ഒരു അഴിച്ചുപണിക്ക് ഡാർവിൻ തയാറാവുന്നിടത്ത് നിന്ന് കഥ ട്രാക്ക് മാറുകയാണ്. ഇതല്ലാതെ മറ്റനേകം കഥാപാത്രങ്ങളും സന്ദര്ഭങ്ങളും എല്ലാം കഥയിലേക്ക് വരുന്നുണ്ട്. പോരായ്മകൾ ഒരുപാടുള്ള സീരീസാണ് ദി ഇന്ഗ്ലീഷ് ഗെയിം, മോശം പറയാനില്ലാത്ത തുടക്കം ആണെങ്കിലും പാതി വഴി പിന്നിട്ടാൽ ദിശ മറന്ന കപ്പൽ പോലൊരു പോക്കാണ് സീരീസിന്റെ പ്ലോട്ട്. ഒരു കണക്ഷനും ഇല്ലാത്ത പ്ലോട്ട് പോയിന്റുകൾ, മറന്ന് പോവുന്ന കഥാ സന്ദർഭങ്ങൾ, ലോജിക്‌ലസ് ആയ അവതരണം ഒക്കെ കൂടി ആവുമ്പോൾ എന്തിനോ വേണ്ടി തിളച്ച ഒരു സീരീസ് മാത്രമായി ഒതുങ്ങുന്നു ദി ഇംഗ്ലീഷ് ഗെയിം.

Verdict : Avoidable

DC Rating : 2/5 

936. 4Bia (2008)

Director : Banjong Pisanthanakun

Genre : Horror

Rating : 6.7/10

Country : Thailand

Duration : 116 Minutes

🔸ഹൊറർ സിനിമ ആസ്വാദകർ തീർച്ചയായും പരീക്ഷിക്കേണ്ട, ശ്രദ്ധ കൊടുക്കേണ്ട ഒരു മേഖലയാണ് തായ് ഹൊറർ സിനിമകൾ. ഇന്നോവേറ്റിവ് ആയ അത്യാവശ്യം ഒരേ സമയം ത്രിൽ അടിപ്പിക്കുകയും പേടിപ്പിക്കുകയും ചെയ്യുന്ന ഒട്ടനവധി സിനിമകൾ ഇവിടെ സൃഷ്ടിക്കപ്പെട്ടിട്ടുണ്ട്, ഇതിന് നല്ലൊരു ഉദാഹരണമായി ചൂണ്ടി കാണിക്കാൻ കഴിയുന്ന സിനിമയാണ് ഫോബിയ. ഒരു ആന്തോളജി ശൈലിയിൽ തയ്യാറാക്കപ്പെട്ട ചിത്രം നാല് കഥകളുടെ സമാഹാരം ആണ്. ഒന്നിനൊന്ന് മികച്ചത് എന്നൊന്നും പറയുന്നില്ല എങ്കിലും കണ്ടിരിക്കാൻ ഉള്ളത് ഇവയിൽ ഉണ്ട് എന്ന ഉറപ്പ് തരാം, അത്ര മാത്രം.

🔸നാല് ഭാഗങ്ങളിൽ ആദ്യത്തേതിന്റെ കഥ ഏറെക്കുറെ മുഴുവനായും അരങ്ങേറുന്നത് ഒരു ഫ്ളാറ്റിന് ഉള്ളിൽ വെച്ചാണ്. പിൻ എന്ന നായികാ കഥാപാത്രം ഒരു അപകടം പറ്റി നടക്കാൻ കഴിയാതെ താമസിക്കുകയാണ് ആ ഫ്‌ളാറ്റിൽ, പിന്നിന്റെ ബോയ്ഫ്രണ്ട് മറ്റൊരു സ്ഥലത്ത് ആയതിനാൽ തന്നെ വളരെ ലോൺലി ആണ് അവൾ. ഇങ്ങനെ ഒരുനാൾ പിന്നിലെ ഫോണിൽ ഒരു അപരിചിതന്റെ മെസ്സേജ് വരുന്നതും, ആ സംഭാഷണങ്ങൾ കുറച്ച് അപകടകരമായ ലെവെലിലേക്ക് കാര്യങ്ങളെ കൊണ്ടുപോവുന്നതും എല്ലാമാണ് ചിത്രത്തിന്റെ കഥ. ഔട്ട്റൈറ്റ് സൂപ്പർനാച്യുറൽ എലമെന്റ് ആണ് ഇവിടെ എങ്കിൽ രണ്ടാം ഭാഗം ബ്ലാക്ക് മാജിക്കിലേക്ക് ആണ് പോവുന്നത്.

🔸പേഴ്സണലി നാല് കഥകളിലും കൂടി ഏറ്റവും ഇഷ്ടപ്പെട്ടത് ഈ രണ്ടാം ഭാഗമാണ്, ഒരു സ്‌കൂളിന്റെ പശ്ചാത്തലത്തിൽ കുട്ടികൾ തമ്മിലുള്ള അഭിപ്രായ വ്യത്യാസങ്ങളും തല്ലും എല്ലാം കാണിച്ച് കൊണ്ട് തുടങ്ങിയ കഥ താമസിയാതെ ബുള്ളീയിങ് എന്ന ടോപിക് വിട്ട് ആഭിചാര കര്മങ്ങളിലേക്കും ബ്ലാക്ക് മാജിക്കിലേക്കും എല്ലാം കടക്കുന്നു, ഏറ്റവും വയലന്റ് ആയ കഥകളിൽ ഒന്നായ ഈ പാർട്ടിന്റെ എൻഡിങ് ഒരു കോരിത്തരിപ്പിക്കുന്ന അനുഭവം തന്നെ തന്നേക്കും. മൂന്നാമത്തെ ഭാഗമാണ് ഒരല്പം ക്ളീച്ഡ് ആയി തോന്നിയത് ഒരു ആറ്റിൽ കുളിക്കാൻ പോവുന്ന നാല് യുവാക്കളാണ് കഥയുടെ ഫോക്കസ്, പ്രെഡിക്റ്റബിൾ ആയിരുന്നു ഈ പാർട്ട് എങ്കിലും വലിയ മോശം പറയാനില്ല.

🔸ആദ്യ രണ്ട് ഭാഗത്തിന്റെ നിലവാരം കാത്ത് സൂക്ഷിക്കാൻ കഴിയാതെ പോയ ഒരു എൻഡിങ് സ്റ്റോറിയാണ് അവസാനത്തേത്, ഏറെക്കുറെ മുഴുവനും ഒരു എയ്റോപ്ലൈനിൽ നടക്കുന്ന കഥയിൽ എടുത്ത് പറയത്തക്കതായി ഒന്നും തന്നെ കണ്ടില്ല. ഒരുപക്ഷെ ഏറ്റവും വീക്ക് ഭാഗങ്ങളിൽ ഒന്ന്, ആകെമൊത്തം നോക്കുക ആണെങ്കിൽ ആദ്യ രണ്ട് കഥകൾക്ക് വേണ്ടി കാണാവുന്ന ഒരു ചിത്രമായാണ് ഫോബിയ. ഈ ഹൊറർ ആന്തോളജി എന്ന കൺസപ്റ്റിനോട് ഇപ്പോഴും യാതൊരു വിധ താല്പര്യക്കുറവുമില്ല, അതിന് വഴി ഫോബിയ വെക്കുന്നില്ല എന്നതിൽ സന്തോഷം, ഒരു എബവ്‌ ആവറേജ് വാച്ച്.

Verdict : Above Average

DC Rating : 2.75/5