906. Rome Open City (1945)

Director : Roberto Rossellini

Genre : War

Rating : 8/10

Country : Italy

Duration : 105 Minutes

🔸പണ്ട് യുദ്ധകാലത്ത് ഒരു നഗരത്തെ ഓപ്പൺ സിറ്റി ആയി പ്രഖ്യാപിക്കുന്ന പതിവ് ഉണ്ടായിരുന്നു, അതായത് ഒരു നഗരം കീഴടക്കാനായി ശത്രു ഭാഗം ഒരുങ്ങി എത്തി കഴിഞ്ഞാൽ, ഒരു രീതിയിലും അവരിൽ നിന്നും പ്രസ്തുത നഗരത്തെ നമുക്ക് രക്ഷിച്ചെടുക്കാൻ കഴിയില്ല എന്ന് ഭരണകർത്താക്കൾക്ക് ബോധ്യപ്പെട്ടാൽ അവർ യാതൊരു വിധ പ്രകോപനവും കാണിക്കാതെ ആ നഗരം അടിയറ വെച്ച് കൊടുക്കും, ഇത്തരം നഗരങ്ങളെ ആണ് ഓപ്പൺ സിറ്റി എന്ന് പറയാറ്. നഗര പരിധിയിൽ ഉള്ള സ്ഥാപന ജംഗമ വസ്തുക്കൾ സംരക്ഷിക്കാനും സാധാരണക്കാരായ ജനങ്ങളെ രക്ഷിക്കാനും ഒക്കെയാണ് ഇത് ചെയ്യാറ്.

🔸ഈ ഒരു ഓപ്പൺ സിറ്റി സമ്പ്രദായത്തിന് ഉള്ള നല്ല ഒരു ഉദാഹരണമാണ് റോം എന്ന നഗരം, രണ്ടാം ലോക മഹായുദ്ധം കൊടുമ്പിരി കൊണ്ടിരുന്ന നാല്പതുകളിൽ റോമാ നഗരം ഓപ്പൺ സിറ്റി ആയി പ്രഖ്യാപിക്കപ്പെട്ടിരുന്നു. ഇവിടെ ടൈറ്റിലിലെ ഓപ്പൺ സിറ്റി എന്ന വിശേഷണത്തിന് പ്രതീക്ഷ നഷ്ട്ടപ്പെട്ട, പ്രത്യാശ പോലും ബാക്കിയില്ലാത്ത നഗരം എന്നൊക്കെ അർഥം കൊടുക്കാം. എന്തായാലും റോം ആണ് നമ്മുടെ കഥാ പശ്ചാത്തലം, ജർമൻ സേന തങ്ങളുടെ അധികാരം ഊട്ടി ഉറപ്പിക്കാനായി ഏതറ്റം വരെയും പോവുന്ന കിരാതമായ ഒരു കാലം. ഇവിടെ നിന്നാണ് റോം ഓപ്പൺ സിറ്റി കഥ പറഞ്ഞ് തുടങ്ങുന്നത്.

🔸ജർമൻ പട്ടാളവും ഭരണ സിരാ കേന്ദ്രങ്ങളിൽ ഉള്ളവരും ഏത് രീതിയിലും തങ്ങളുടെ നയങ്ങൾ ജനങ്ങളിൽ നടപ്പിലാക്കാൻ ഉള്ള തീവ്ര ശ്രമത്തിലാണ്, സ്വാഭാവികമായും ഇത്തരം ശ്രമങ്ങൾക്ക് നേരെ ചെറുത്തുനിൽപ്പും ഉണ്ടാവുന്നുണ്ട്, റെസിസ്റ്റൻസ് എന്ന പേരിൽ വിശേഷിപ്പിക്കപ്പെട്ട ഒരു കൂട്ടം സാധാരണക്കാരായ ജനങ്ങൾ. ഇത്തരത്തിൽ കുപ്രസിദ്ധി ആർജിച്ച ഒരാളാണ് ജിയോർജിയോ മാൻഫ്രഡി എന്ന കഥാപാത്രം, ഇറ്റാലിയൻ ഫാസിസ്റ്റുകൾക്കും നാസി പോരാളികൾക്കും എതിരെ ഉള്ള അയാളുടെ ചെറുത്തുനിൽപ്പ് ഇതിനോടകം തന്നെ അയാളെ അവരുടെ കണ്ണിലെ കരട് ആക്കി മാറ്റിയിട്ടുണ്ട്.

🔸ജർമൻ പട്ടാളത്തിന്റെ ഒരു തിരച്ചിൽ ശ്രമത്തിൽ നിന്നും ജിയോർജിനോ കഷ്ടപ്പെട്ട് രക്ഷപ്പെടുന്നിടത്ത് നിന്നുമാണ് ചിത്രം ആരംഭിക്കുന്നത്, തുടർന്നങ്ങോട്ട് നിലനിൽപ്പിനായുള്ള ഒരു പോരാട്ടം തന്നെയാണ്, അവസാനിക്കാത്ത പോരാട്ടം. ജിയോർജിനോക്ക് പുറമെ വേറെയും റെസിസ്റ്റൻസ് പോരാളികൾ ചിത്രത്തിന്റെ ഫോക്കൽ പോയിന്റിന്റെ ഭാഗം ആവുന്നുണ്ട്, ഡോൺ പെല്ലെഗ്രിനിയെ പോലുള്ള ചില മികച്ച കഥാപാത്രങ്ങൾ. കണ്ടിരിക്കാൻ ബുദ്ധിമുട്ടുള്ള ചിത്രങ്ങളിൽ ഒന്നാണ് റോം ഓപ്പൺ സിറ്റി, പ്രത്യേകിച്ചും ചിത്രത്തിന്റെ രണ്ടാം പാതി. ഒരു മികച്ച സിനിമ ആണെന്നതിൽ തർക്കം ഏതുമില്ല, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 5/5 

905. Raised By Wolves (2020)

Creator : Aaron Guzikowski

Genre : Sci Fi

Rating : 8.4/10

Seasons : 01

Episodes : 10

Duration : 42 - 55 Minutes

🔸റെയ്സ്ഡ് ബൈ വോൾവ്‌സ് എന്ന സീരീസിന്റെ പൈലറ്റ് എപ്പിസോഡ് കാണാൻ ഉണ്ടായ പ്രാഥമിക കാരണം എക്സിക്യു്റ്റിവ് ഡയറക്ടർ ആയ റിഡ്ലി സ്‌കോട്ട് ആയിരുന്നെങ്കിൽ പിന്നീടങ്ങോട്ട് തുടർന്ന് കാണാൻ ഉണ്ടായ കാരണം അത്രമേൽ വേർഡ് ആയ സ്റ്റോറി ടെല്ലിങ് തന്നെ ആയിരുന്നു. ഈ വർഷത്തെ അല്ല, ഒരുപക്ഷെ ഞാൻ കണ്ട ഏറ്റവും വിചിത്ര സ്വഭാവമുള്ള ടീവി സീരീസുകളിൽ ഒന്നാണ് റെയ്സ്ഡ് ബൈ വോൾവ്സ്, സീരീസിന്റെ ആദ്യ സീസൺ കഴിയുമ്പോഴും പിടി തരാതെ നിൽക്കുന്ന മെയിൻ പ്ലോട്ട്, ബാക്കി കിടക്കുന്ന ചോദ്യങ്ങൾ മുഴുവൻ, കൈകാര്യം ചെയ്യുന്ന കഥയുടെ ബാക്ക്ഗ്രൗണ്ട്, ആദ്യ സീസണിന്റെ ഫിനാലെ എന്നിവയെല്ലാം ഈ വിചിത്ര സ്വഭാവം കൂട്ടുന്നെ ഉള്ളു താനും.

🔸ഫയുച്ചറിലാണ് സീരീസിന്റെ കഥ ആരംഭിക്കുന്നത്, ഒരു ഡിസ്ട്ടോപ്യൻ ഫ്യുച്ചർ എന്ന് തന്നെ പറയാം, ഭൂമി എന്നത് ഒട്ടും വാസ യോഗ്യം അല്ലാത്തൊരു സ്ഥലം ആയി മാറിയിരിക്കുന്നു, മനുഷ്യ കുലത്തിന്റെ ഭാവി തന്നെ ഏറെക്കുറെ അവസാനിച്ച അവസ്ഥയാണ്. ഇതിന് വ്യക്തമായ കാരണം ഒന്നും പറയുന്നില്ല, ചില ഹിന്റുകൾ അല്ലാതെ പിറകിലോട്ടേക്ക് കഥ പോവുന്നുമില്ല, കുറഞ്ഞത് ഈ ഒരു സീസണിൽ എങ്കിലും. അപ്പൊ പറഞ്ഞ് വന്നത്, കെപ്ലർ 22ബി എന്ന ഗൃഹത്തിലേക്ക് രണ്ട് ആൻഡ്രോയിഡ് റോബോട്ടുകൾ എത്തുകയാണ്, ഒരു പുതിയ മനുഷ്യ വിഭാഗത്തിനെ വാർത്തെടുക്കുക എന്നതാണ് ഇവരുടെ ഉദ്ദേശം.

🔸മദർ, ഫാദർ എന്നിങ്ങനെ പരസ്പരം അഭിസംബോധന ചെയ്യുന്നത് ഒഴിച്ചാൽ ഇവർ ആരാണെന്നോ എന്താണെന്നോ കൂടുതൽ ഒന്നും പറയുന്നില്ല, എന്തിനധികം ഇങ്ങനെ ഒരു ദൗത്യത്തിന് ഇവരെ നിയോഗിച്ചത് ആരാണെന്നോ, ഇത്രയും പ്രാധാന്യം അർഹിക്കുന്നൊരു ടാസ്കിന് തിരഞ്ഞെടുക്കപ്പെടാൻ മാത്രം ഇവർക്കുള്ള പ്രാധാന്യം എന്താണെന്നോ പോലും വ്യക്തമായി പറയുന്നില്ല. ഇപ്പോൾ ഈ ഒരു എഴുത്തിൽ തന്നെ ഉത്തരം ഇല്ലാത്ത അനവധി ചോദ്യങ്ങൾ ആയി എന്നറിയാം, അത് സീരീസിന്റെ സ്വഭാവത്തിനെ കുറിച്ചുള്ള നല്ലൊരു ഉദാഹരണമായി കരുതിക്കൊള്ളുക.

🔸ഇങ്ങനെ തങ്ങളുടെ ടാസ്ക് പൂർണമായും വിജയിപ്പിക്കാനായി രണ്ട് പേരും എല്ലാ വിധ സന്നാഹങ്ങളും ഒരുക്കി മുന്നോട്ട് പോകവേ ആണ് കണക്ക് കൂട്ടലുകൾ എല്ലാം തെറ്റിച്ച് കൊണ്ട് കുറച്ച് മനുഷ്യർ അങ്ങോട്ട് കടന്ന് വരുന്നത്, തുടർന്നുള്ള സംഭവങ്ങളാണ് സീരീസിന്റെ പ്ലോട്ട് ലൈൻ. ഒരു ബേസിക് സർവൈവൽ സ്റ്റോറി ഒക്കെ ആയി തോന്നാം എങ്കിലും വിശ്വാസം, എക്‌സിസ്റ്റൻസ് പോലെയുള്ള പല കാര്യങ്ങളിലേക്കും സീരീസ് കൈ കടത്തുന്നുണ്ട്, എന്തിരുന്നാലും ഇതിന്റെ സെല്ലിങ് പോയിന്റ് എന്നത് അപ്രവചനീയം ആയ സ്റ്റോറി ടെല്ലിങ് തന്നെയാണ്. പെർഫോമൻസ് ഒക്കെ എല്ലാവരുടേതും മികച്ചത് തന്നെയാണ്, പ്രത്യേകിച്ചും മദർ ആയി എത്തിയ നടി. ബാക്ക്ഗ്രൗണ്ട് ആയാലും സെറ്റപ്പ് ആയാലും വിഷ്വൽസ് ആയാലും ഒരു ഗ്രാൻഡ് ഫീൽ സീരീസ് തരുന്നുണ്ട്, ആകെ മൊത്തം ഇണ്ട്രിഗ്യുയിങ് ആയ ഒരു സീരീസ്, നന്നായിട്ടുണ്ട്.

Verdict : Very Good

DC Rating : 4/5 

904. Millennium Actress (2001)

Director : Satoshi Kon

Genre : Animation

Rating : 7.9/10

Country : Japan

Duration : 87 Minutes

🔸ജാപ്പനീസ് അനിമേ ചിത്രങ്ങളെ പോലെ അമ്പരപ്പിച്ച മറ്റൊരു സബ് ജോണർ വേറെ ഉണ്ടാവില്ല, കാണുംതോറും അത് വർധിച്ചിട്ടേ ഉള്ളൂ താനും. അത്തരത്തിൽ ഉള്ള, അപ്രതീക്ഷിതമായി കിട്ടിയ മറ്റൊരു മികച്ച ചിത്രമാണ് ദി മില്ലേനിയം ആക്ട്രസ്, വെറും ഒന്നര മണിക്കൂർ ദൈർഘ്യത്തിൽ ചിത്രം കൺവെ ചെയ്യുന്ന ഇമോഷന്സും പറയുന്ന കഥയും എല്ലാം കണ്ട്, അല്ല അനുഭവിച്ച് അറിയേണ്ടത് തന്നെയാണ്. ഒരു കാരക്ടർ സ്റ്റഡി രീതിയിൽ ഒക്കെ പോവുന്ന സിനിമ ആണെങ്കിലും ഒരു റൊമാന്റിക് തീം ആണ് ചിത്രത്തിന്, പ്ലോട്ട് ഏറെക്കുറെ ആ റൊമാന്സിന് ചുറ്റി പറ്റി മുന്നോട്ട് പോവുന്നുണ്ട്, ഇത് ഒട്ടും മെലോ ഡ്രമാറ്റിക്ക് ആവുന്നില്ല എന്നത് മറ്റൊരു സവിശേഷത.

🔸ഒരു റൊമാന്റിക് ചിത്രം ആണെങ്കിൽ കൂടിയും റിയാലിറ്റിയിൽ ഒതുങ്ങി നിൽക്കാതെ പല വിധ ജോണറുകളിലായി പടർന്നിറങ്ങുന്നുണ്ട് മില്ലേനിയം ആക്ട്രസ്. അതിനൊരു കാരണവുമുണ്ട് കഥയ്ക്കുള്ളിലെ കഥ പോലെ പ്ലോട്ടുമായി പ്രത്യക്ഷത്തിൽ ബന്ധം തോന്നിക്കാത്ത ചില സബ് എലെമെന്റുകളിലേക്ക് ചിത്രം കടന്ന് ചെല്ലുന്നുണ്ട്. കഥയിലേക്ക് വരിക ആണെങ്കിൽ രണ്ട് ഡോക്യുമെന്ററി സംവിധായകർ ഒരു പഴയ കാല നടിയെ ഇന്റർവ്യൂ ചെയ്യാൻ പോകുന്നതും തുടർന്നുള്ള ഡെവെലപ്മെന്റുകളും എല്ലാമാണ് ചിത്രത്തിന്റെ കഥ, അതിലേക്ക് കടന്ന് വരാം.

🔸വളരെ പ്രശസ്തയായ ഒരു അഭിനേത്രി ആയിരുന്നു ചിയോക്കോ ഫ്യൂജിവാര, ഒരുകാലത്ത് ജപ്പാനിലെ വീടുകളിൽ വളരെ പ്രശസ്തമായ, പരിചിതമായ ഒരു നാമം. സിനിമകളിലും മറ്റും കത്തി നിന്ന സമയത്താണ് ചിയോക്കോ പെട്ടെന്ന് ഒരുനാൾ എല്ലാം വിട്ട് പോയത്, ഇതിന് ഉണ്ടായ കാരണം എന്താണെന്നൊന്നും ആർക്കും വ്യക്തം ആയിരുന്നില്ല, പലരെയും അത്ഭുതപ്പെടുത്തുകയും ചെയ്തു. എന്തിരുന്നാലും അതെല്ലാം കഴിഞ്ഞ് വർഷങ്ങൾ ഒരുപാട് കഴിഞ്ഞ് പോയിരിക്കുന്നു, ഇന്ന് ഇത്രയും വർഷങ്ങൾക്ക് ശേഷം ചിയോകോയുടെ അഭിമുഖം നടത്താനായി രണ്ട് പേർ കടന്ന് വരികയാണ്, ഇവിടെ നിന്നുമാണ് ചിത്രം ആരംഭിക്കുന്നത്.

🔸ചിയോകോയുടെ പേഴ്സണൽ ലൈഫിലേക്ക് കഥ ഫോക്കസ് ചെയ്യുകയാണ് എങ്കിലും അവർ അഭിനയിച്ച സിനിമകളിലെ ചില പ്രസക്ത ഭാഗങ്ങളും ഫൂട്ടേജുകളായി കാണിച്ച് പോവുന്നുണ്ട്, സിനിമയ്ക്ക് ഉള്ളിലെ സിനിമ പോലെ. ചിയോകോയുടെ ജീവിതത്തിലെ ഒരു പ്രണയമാണ് കഥയുടെ ഡ്രൈവിങ് ഫോഴ്‌സ്, അതിന്റെ ഡീറ്റെയിൽസിലേക്ക് ഒന്നും തല്ക്കാലം പോവുന്നില്ല. മികച്ച ഒരു സിനിമയാണ് മില്ലേനിയം ആക്ട്രസ്, പ്ലോട്ടിനെ സൂചിപ്പിച്ച ഈ എഴുത്തിൽ നിന്നും ഇത് നമ്മൾ കണ്ടിട്ടുണ്ടല്ലോ എന്ന തോന്നൽ വരുന്നത് കൊണ്ട് കാണാതിരിക്കരുത്, തീർച്ചയായും ചിലവഴിക്കുന്ന സമയം നീതികരിക്കുന്ന മെറ്റിരിയൽ ചിത്രത്തിലുണ്ട്.

Verdict : Very Good

DC Rating : 4.25/5

903. Like Someone In Love (2012)

Director : Abbas Kiarostami

Genre : Drama

Rating : 7/10

Country : France

Duration : 110 Minutes

🔸പേഴ്സണലി ഏറ്റവും ഇഷ്ട്ടപ്പെട്ട സംവിധായകരുടെ ഗണത്തിൽ പെടുത്താറുള്ള ഒരാളാണ് അബ്ബാസ് കിയാറോസ്തമി, ലാളിത്യമാണ് പുള്ളിയുടെ സിനിമകളിലെ ഏറ്റവും സ്‌ട്രൈക്കിങ് ഫാക്ടർ ആയി തോന്നിയിട്ടുള്ളത്, ലളിതമായ ബാക്ക്ഗ്രൗണ്ടിലും കഥയിലും ചേർത്ത് ശക്തമായ സിനിമകളെ അവതരിപ്പിക്കുക എന്നത് അദ്ദേഹത്തിന്റെ ഒരു ശൈലി തന്നെ ആയി തോന്നിയിട്ടുണ്ട്. കോക്കർ ട്രിലോഗി എല്ലാം ഈ പറഞ്ഞ വസ്തുതയ്ക്ക് ഉള്ള മികച്ച ഉദാഹരണങ്ങളാണ്, ലൈക് സംവൺ ഇൻ ലവ് എന്ന ചിത്രവും ഇത് പോലെ തന്നെ വളരെ ലൈറ്റ് ആയ ഒരു കഥയാണ് പറയാൻ ശ്രമിക്കുന്നതും, എന്തിരുന്നാലും അദ്ദേഹത്തിന്റെ മുൻകാല ചിത്രങ്ങളുടെ അത്രയും മികച്ച ഒരു അനുഭവം ചിത്രം തരുന്നില്ല എന്നതാണ് സത്യം.

🔸ഏകാന്തത, നിരാശ, നഷ്ടബോധം, ഫ്രസ്‌ട്രേഷൻ പോലുള്ള കാര്യങ്ങളാണ് കിയാറോസ്തമി തന്റെ ചിത്രത്തിന്റെ തീമുകളായി ഉപയോഗിച്ചിട്ടുള്ളത്. പ്രധാനമായും മൂന്ന് കഥാപാത്രങ്ങളാണ് ചിത്രത്തിൽ ഉള്ളത്, ഒരു കോളേജ് വിദ്യാർത്ഥിനി, വൃദ്ധനായ ഒരു പ്രൊഫസർ, കോളേജ് വിദ്യാർത്ഥിനിയുടെ കാമുകനായ മറ്റൊരു കഥാപാത്രം. ഈ മൂന്ന് പേരെ ഒരു ത്രികോണമായി എടുത്താൽ ഇതിനുള്ളിൽ കറങ്ങുന്ന ഒന്നാണ് ചിത്രത്തിന്റെ കഥ. കിയാറോസ്തമിയുടെ തന്നെ ബയോഗ്രഫിക്കൽ എലെമെന്റുകൾ വൃദ്ധനായ പ്രൊഫസറിൽ ഉണ്ട് എന്ന് ഒരു ആർട്ടിക്കിളിൽ വായിക്കാൻ ഇടയായിട്ടുണ്ട്, സാധ്യതകളാണ്.

🔸ടോക്കിയോ നഗരമാണ് പശ്ചാത്തലം, നമ്മുടെ നായികാ കഥാപാത്രമായ അകികോ ഒരു സോഷ്യോളജി വിദ്യാർത്ഥിയാണ്, എന്നാൽ അവളെ കുറിച്ച് അധികം ആർക്കും അറിയാത്ത മറ്റൊരു കാര്യം കൂടിയുണ്ട്, അകികോ ഒരു പ്രോസ്റ്റിറ്റിയൂട്ട് കൂടി ആണ്. ഇതിനുള്ള കാരണങ്ങളോ കാര്യമോ ഒന്നും ചിത്രം ആഴത്തിൽ പറയുന്നില്ല, എന്തായാലും ഇങ്ങനൊക്കെ ആണ് കാര്യങ്ങൾ. ഒരുനാൾ അകികോയ്ക്ക് ഒരു പുതിയ കസ്റ്റമർ എത്തുകയാണ്, വൃദ്ധനായ തകാഷി. തകാഷി ഒരു മുൻ പ്രൊഫസറാണ്, പോരെങ്കിൽ ജീവിതത്തിൽ ഒറ്റപ്പെട്ട് പോയ ഒരാൾ കൂടിയാണ്. അങ്ങനെ രണ്ട് കഥാപാത്രങ്ങളും തകാഷിയുടെ വീട്ടിലേക്ക് യാത്ര തിരിക്കുകയാണ്.

🔸എന്നാൽ കാര്യങ്ങൾ ഒന്നും പ്രതീക്ഷിച്ച ഇടത്തേക്ക് അല്ല പോവുന്നത്, അകികോയുമായി ലൈംഗിക ബന്ധത്തിന് ഒന്നും തകാഷി മുതിരുന്നില്ല, ഒരു അതിഥിയെ എന്നപോലെ പരിചരിക്കുകയാണ്, മനോഹരമായ ഒരു ബന്ധം അവിടെ തുടങ്ങുകയാണ്. ഈ കാര്യങ്ങൾ ഒന്നും തന്നെ അകികോയുടെ കാമുകനായ നോറിയകിക്ക് അറിയില്ല, അകികോ ഒരു പ്രോസ്റ്റിറ്റിയൂട്ട് ആണ് എന്നത് ഉൾപ്പെടെ. തുടർന്ന് ഈ കഥാപാത്രങ്ങൾക്ക് എന്ത് സംഭവിക്കും എന്നത് ചിത്രം കണ്ട് തന്നെ അറിയുക. വളരെ പതിയെ പ്രോഗ്രസ്സ് ചെയ്യുന്ന ഒരു ഡ്രാമ ചിത്രമാണ് ലൈക് സംവൺ ഇൻ ലവ്, താല്പര്യം ഉള്ളവർ മാത്രം ഈ വഴി പോയാൽ മതിയാവും.

Verdict : Watchable

DC Rating : 3/5 

902. Tokyo Trial (2016)

Director : Pieter Verhoeff

Genre : Historical

Rating : 7.4/10

Seasons : 01

Episodes : 04

Duration : 45 - 50 Minutes

🔸രണ്ടാം ലോക മഹായുദ്ധം അവസാനിച്ച ശേഷം അതിനും, അതിനോട് അനുബന്ധിച്ച് അരങ്ങേറിയ നരഹത്യയ്‌ക്കും കാരണക്കാരായ നാസി നേതാക്കളെ ഒക്കെ വിചാരണ ചെയ്ത സംഭവം ആസ്പദമാക്കി ജഡ്ജ്‌മെന്റ് അറ്റ് ന്യുരെൻബർഗ് എന്നൊരു സിനിമ ഒരുപാട് വർഷങ്ങൾക്ക് മുന്നേ പുറത്തിറങ്ങിയിട്ടുണ്ട്, കണ്ടിട്ടില്ലാത്തവർ ഉണ്ടെങ്കിൽ പ്രസ്തുത ചിത്രം നിങ്ങൾക്ക് പരീക്ഷിച്ച് നോക്കാവുന്നതാണ്, പ്രത്യേകിച്ചും ഹിസ്റ്റോറിക്കൽ സിനിമകളോട് താല്പര്യം ഉള്ളവർ. ഇവിടെ പറയാൻ പോവുന്നത് ന്യുരന്ബര്ഗ് അല്ല മറിച്ച് അതിനോളം തന്നെ പ്രാധാന്യം അർഹിക്കുന്ന എന്നാൽ വിസ്‌മൃതിയിൽ ആണ്ട് പോയ മറ്റൊരു വിചാരണയെ പറ്റിയാണ്, ടോക്കിയോ ട്രയൽ എന്ന യുദ്ധക്കുറ്റ വിചാരണാ സംഭവം.

🔸ജെർമനിയോളമോ ഇറ്റലിയോളമോ ഇല്ലെങ്കിൽ കൂടിയും രണ്ടാം ലോക മഹായുദ്ധത്തിന്റെ ജപ്പാന് ഉള്ള പങ്ക് ചെറുതല്ല, ഇതിന് ഹിരോഷിമ നാഗസാക്കി ബോംബിങ് വഴി വലിയൊരു വില അവർക്ക് കൊടുക്കേണ്ടി വന്നിട്ടുണ്ട് എങ്കിലും നിയമപരമായി നേതാക്കളോ അല്ലെങ്കിൽ ജപ്പാന്റെ ചക്രവർത്തിയോ ശിക്ഷിക്കപ്പെട്ടതായി വായിച്ച് അറിഞ്ഞ അറിവില്ല, ഈ സീരീസ് കാണുന്നതിന് മുന്നേ വരെ. ഹിറ്റ്‌ലർ സ്വയം ജീവൻ ഒടുക്കിയതും, നാസി പട്ടാളം ചിഹ്നഭിന്നമായി മാറിയതും, മുസ്സോളനിയെ ജനങ്ങൾ തെരുവിലിട്ട് കൊന്നതും എല്ലാം നമ്മൾ അറിഞ്ഞതാണ്, അപ്പോഴും ജപ്പാന്റെ കാര്യം കൗതുകം ആയിരുന്നു, ആ കൗതുകമാണ് ഈ നാല് എപ്പിസോഡ് സീരീസിന്റെ ബേസ്.

🔸ചമത്തപ്പെട്ട യുദ്ധ കുറ്റങ്ങൾ ഇഴകീറി പരിശോധിച്ച ശേഷം ആരോപിതരായ ജാപ്പനീസ് രാഷ്ട്രീയ നേതാക്കൾക്കും, മറ്റ് അനുയായികൾക്കും ശിക്ഷ വിധിക്കുക എന്ന ശ്രമകരമായ ദൗത്യം ഒരു ജഡ്ജിങ് പാനലിന് മുന്നിൽ എത്തുകയാണ്. പാനലിൽ ഉള്ളവർ പല പല രാജ്യങ്ങളിൽ നിന്ന് ഉള്ളവരാണ്, എല്ലാവരും വ്യത്യസ്ത സ്വഭാവക്കാർ, വ്യക്തമായ അജണ്ടകൾ ഉള്ളവർ, ഇനി അതൊന്നും പോരെങ്കിൽ സ്വന്തം രാജ്യത്തെ നീതി ന്യായ വ്യവസ്ഥകളും, രാജ്യ താല്പര്യങ്ങളും സംരക്ഷിക്കാൻ ഉദ്ദേശം ഉള്ളവർ. ഇതിൽ നിന്ന് തന്നെ വ്യക്തമാവും കാര്യങ്ങൾ ഒട്ടും എളുപ്പമാവില്ല എന്ന്, അത് തന്നെയാണ് സീരീസിൽ സംഭവിക്കുന്നതും. ഒരു 12 ആംഗ്രി മാൻ ശൈലിയിൽ ജഡ്ജിമാർക്ക് ഇടയിൽ തന്നെ അഭിപ്രായ വ്യത്യാസങ്ങളും കക്ഷി ചേരലുകളും എല്ലാം ഉടൽ എടുക്കുകയാണ്, ചുരുക്കി പറഞ്ഞാൽ ഒരു യുദ്ധക്കളം ആ നാല് ചുവരുകൾക്ക് ഉള്ളിൽ സൃഷ്ടിക്കപ്പെടുകയാണ്.

🔸ഒരു ഹിസ്റ്റോറിക്കൽ പൊളിറ്റിക്കൽ സീരീസ് ആണ് ടോക്കിയോ ട്രയൽ, എന്നാൽ ഡോകിയുമെന്ററി സ്റ്റൈലിലേക്ക് പോവുന്നുമില്ല, നല്ല തോതിൽ എങ്ങേയ്‌ജിങ്‌ ആണ്, പ്രത്യേകിച്ചും കൈകാര്യം ചെയ്യുന്ന വിഷയത്തിൽ താല്പര്യം ഉള്ള ഒരാൾക്ക്. ഇന്ത്യൻ നടൻ ഇർഫാൻ ഖാൻ ചിത്രത്തിൽ ഒരു കഥാപാത്രമായി എത്തുന്നുണ്ട്, ഇന്ത്യക്കാരൻ ജഡ്ജി ആയ ജഡ്ജ് പാൽ എന്ന കഥാപാത്രം, മറ്റുള്ള കഥാപാത്രങ്ങളെ വെച്ച് നോക്കുമ്പോൾ ഒരു എക്സറ്റൻഡഡ്‌ കാമിയോ എന്നൊക്കെ പറയാവുന്ന റോൾ, എങ്കിലും നന്നായിരുന്നു. താല്പര്യം ഉള്ളവർക്ക് പരീക്ഷിച്ച് നോക്കാവുന്നതാണ്, ആകെ നാല് എപ്പിസോഡും കൂടി മൂന്ന് മണിക്കൂറിന് അടുത്ത് മാത്രമേയുള്ളൂ ഈ സീരീസ്.

Verdict : Very Good

DC Rating : 4/5 

901. It's Such A Beautiful Day (2012)

Director : Don Hertzfeldt

Genre : Experimental

Rating : 8.3/10

Country : USA

Duration : 62 Minutes

🔸അമേരിക്കൻ ആനിമേറ്ററായ ഡോൺ ഹേർട്സ്‌ഫെൽറ്റിന്റെ ഇറ്റ്സ് എ ബ്യുട്ടിഫുൾ ഡേ എന്ന ചിത്രത്തെ ഒരു സിനിമ എന്നോ അല്ലെങ്കിൽ ആ ഒരു അനിമേഷൻ ചിത്രം എന്ന് കേൾക്കുമ്പോൾ സ്വാഭാവികമായും മനസ്സിൽ വരാറുള്ള ചട്ടക്കൂടിൽ ഒതുക്കി നിർത്താൻ കഴിയുമോ എന്നത് സംശയമാണ്. ഒരു ചിത്രത്തേക്കാൾ അനുഭവമാണ് ഇത്, ഒരു മെഡിറ്റേഷൻ ഒക്കെ പോലെ അനുഭവിച്ച് അറിഞ്ഞ്, ആഴത്തിൽ സ്പർശിച്ച് ചിത്രം അങ് കടന്ന് പോവും, ഒരു മണിക്കൂർ മാത്രമേ ദൈർഘ്യം ഉള്ളൂ താനും. ഈ ഒരു സമയത്തിനിടെ ബിൽ എന്ന കേന്ദ്ര കഥാപാത്രത്തിൽ നമ്മളുടെ തന്നെ ചില ട്രെയ്റ്റുകൾ കാണാനായാൽ അത് യാദൃച്ഛികം അല്ലേയല്ല.

🔸ഡിപ്രഷൻ, സോഷ്യൽ ഒക്‌വേർഡ്‌നസ്സ്, കമ്മ്യുണിക്കേറ്റ് ചെയ്യാനുള്ള പ്രശ്നങ്ങൾ തുടങ്ങിയവ എല്ലാം നമ്മളിൽ പലരും അനുഭവിക്കുന്ന പ്രശ്നങ്ങളാണ്, ഒരല്പം ഇൻട്രൊവർട്ട് കൂടി ആയാൽ പറയണ്ട, മാനസികമായി അനുഭവിക്കുന്ന സമ്മർദ്ദം ഒക്കെ പലർക്കും ഊഹിക്കാൻ കഴിയുന്നതിലും വലുതാണ്. അത്തരമൊരു രംഗം കാണിച്ച് കൊണ്ടാണ് 'സിനിമ' ആരംഭിക്കുന്നത്. അതായത് അല്പം ഇൻട്രൊവർട്ട് ആയ ബില്ലിന് തന്റെ മനസ്സിൽ ഉള്ളത് പ്രകടിപ്പിക്കാനോ പറയാനോ കഴിയാതെ പോവുന്നതായി ഉള്ള ഒരു രംഗം. മനസ്സിൽ ഉള്ളതിൽ നിന്ന് തീർത്തും വിഭിന്നമായ ഒരു കാര്യം വാക്കായി വായിലൂടെ പുറത്ത് പോവുന്നതൊക്കെ നമ്മൾ പലരും ഒരിക്കൽ എങ്കിലും അനുഭവിച്ചിട്ട് ഉള്ളതായിരിക്കും.

🔸ബില്ലിന് അങ്ങനെ പറയത്തക്ക ബന്ധുക്കളോ, സുഹൃത്തുക്കളോ ഒന്നും തന്നെയില്ല, അല്ലെങ്കിൽ അങ്ങനെ ഒരു കാലത്ത് ഉണ്ടായിരുന്നവരിൽ നിന്നും ബോധപൂർവം മാറി നടക്കാൻ അവൻ ശ്രമിച്ചിട്ടുണ്ട്. ഒരു എക്സ് ഗേൾഫ്രണ്ട് ഉണ്ട്, അവളുമായി പിരിഞ്ഞിട്ട് കുറച്ച് നാളായി എങ്കിലും ഇപ്പോഴും ബില്ലിന് ഒരു ആവശ്യം വന്നാൽ അല്ലെങ്കിൽ അപകടം പറ്റിയാൽ സഹായിക്കാനായി അവൾ മാത്രമേ ഉള്ളൂ എന്ന് പറയാം. ഇൻസാനിറ്റിയിലേക്ക് പതിയെ പോയി കൊണ്ടിരിക്കുന്ന ബില്ലിനെ പിടിച്ച് നിർത്തുന്നത് ഒരു പരിധി വരെ അവളെ പോലെയുള്ള ചില ഘടകങ്ങൾ മാത്രമാണ്.

🔸ചില മാനസിക പ്രശ്നങ്ങൾ കൂടി ഉണ്ട് ബില്ലിന്, മുകളിൽ സൂചിപ്പിച്ചവ അല്ലാതെ ഉള്ള ചിലത്. ഓർമ പ്രശ്നങ്ങളാണ് അവയിൽ ഏറ്റവും പ്രസക്തം, ഓർമയുടെ താളുകളിൽ വേട്ടയാടുന്ന പല സംഭവങ്ങളുടെയും യാഥാർഥ്യവും റിയാലിറ്റിയും അവൻ മറന്ന് പോയിരിക്കുന്നു, അല്ലെങ്കിൽ വ്യക്തമല്ല, ചുരുക്കി പറഞ്ഞാൽ ഇതൊക്കെയാണ് ബിൽ. ബില്ലിന്റെ ജീവിതത്തിലെ വളരെ പ്രധാനപ്പെട്ട ഒരു കാലഘട്ടമാണ് ഈ ചിത്രത്തിന് ആധാരമായിരിക്കുന്നത്, എക്സ്പിരിമെന്റൽ ചിത്രങ്ങളോട് താല്പര്യം ഉള്ളവർക്ക് ധൈര്യമായി സമീപിക്കാവുന്നതാണ് ഈ ശ്രമം, നല്ല ഒന്നാംതരം ചിത്രം തന്നെ.

Verdict : Very Good

DC Rating : 4/5 

900. Flame And Citron (2008)

Director : Ole Christian Madsen

Genre : War

Rating : 7.3/10

Country : Denmark

Duration : 130 Minutes

🔸രണ്ടാം ലോക മഹായുദ്ധം പ്രമേയമായി പുറത്തിറങ്ങിയ എണ്ണിയാൽ ഒടുങ്ങാത്ത അത്രയും ചിത്രങ്ങളിലേക്ക് ചേർക്കാനായി നിലവാരം ഉള്ള ഒരു സിനിമ കൂടി, അതാണ് ഫ്‌ളെയിൻ ആൻഡ് സിട്രോൺ. ഇവിടെ പശ്ചാത്തലം ഡെന്മാർക്ക് ആണ്, അതായത് നാസി പട്ടാളം പിടിച്ചടക്കിയ ശേഷം റെസിസ്റ്റൻസ് പോരാട്ടം ഒക്കെ മെല്ലെ ആരംഭിച്ച് കൊണ്ടിരിക്കുന്ന, വളരെ അപകടം നിറഞ്ഞ ഒരു ബാക്ക്ഗ്രൗണ്ട്. റിയൽ ലൈഫ് സംഭവമാണ് ഈ ചിത്രത്തിന് ആധാരം ആയിരിക്കുന്നത് എന്നത് കഥയുടെ ഭംഗിയും പ്രാധാന്യവും വർധിപ്പിക്കുന്നെ ഉള്ളു താനും, രണ്ട് കഥാപാത്രങ്ങളിലാണ് സിനിമയുടെ ഫോക്കസ് മുഴുവനും.

🔸ഡെന്മാർക്കിലെ ചരിത്രത്തിൽ ഏറ്റവും കൂടുതൽ ആളുകൾ കണ്ട, ടെലികാസ്റ്റിങ്ങിൽ പോലും റെക്കോഡ് ഇട്ട ചിത്രമാണ് ഫ്ലെയിം ആൻഡ് സിട്രോൺ, ഇതിന് നിലവാരത്തോളം തന്നെ മറ്റൊരു കാരണം കൂടി ഉണ്ട്. ജീവിച്ചിരുന്ന സമയത്തും മരണ സമയത്തും വലിയ ബഹുമതികളോ അർഹിച്ച പ്രാധാന്യമോ ഒന്നും ലഭിച്ചവരല്ല നമ്മുടെ ടൈറ്റിൽ കഥാപാത്രങ്ങൾ. ഒരുപക്ഷെ ആശയത്തിനും അധിനിവേശത്തിനും എതിരെ ആയുധം എടുത്ത് പോരാടിയത് കൊണ്ടും ചോര വീഴ്ത്തേണ്ടിടത്ത് അതിന് മടിക്കാഞ്ഞതും കൊണ്ടാവും തുറക്കാൻ താല്പര്യപ്പെടാതെ പലരും മടക്കിവെച്ച പുസ്തകം കൂടിയാണ് ഇവർ, ഒരുപക്ഷെ ആദ്യമായി ഇവരെ ആധാരമാക്കി വന്ന അഡാപ്റ്റേഷനും ഈ സിനിമ ആയിരിക്കും, എന്നാണ് അറിവ്.

🔸നാസി ക്രൂരതകൾക്ക് എതിരെ കൊലയുടേതും അക്രമം വഴിയുള്ള പ്രതിരോധത്തിന്റെയും മാർഗമാണ് രണ്ട് ടൈറ്റിൽ കഥാപാത്രങ്ങളും പിന്തുടരുന്നത്. ഒരു ബോണി ആൻഡ് ക്ളൈഡ് ശൈലിയിൽ പല നാസി നേതാക്കന്മാരെയും അവരുടെ മൂഡ് താങ്ങികളെയും, തൊഴുത്തിൽ കുത്തിമാരെയും എല്ലാം ഇവർ കൊന്ന് തള്ളിയിട്ടുണ്ട്. ഇരുവരെയും കുറിച്ച് ഊഹാപോഹങ്ങൾ അല്ലാതെ കാര്യമായ തെളിവുകളോ രേഖാ ചിത്രങ്ങളോ ഒന്നും തന്നെ പോലീസിന്റെ കൈവശമില്ല. ഈ ഒരു പശ്ചാത്തലത്തിലാണ് സിനിമ ആരംഭിക്കുന്നത്, അത്യാവശ്യം നല്ല തോതിൽ തന്നെ പിടിച്ചിരുത്തി മുന്നോട്ട് പോവുന്നുമുണ്ട്.

🔸തങ്ങളുടെ കൈയ്യിൽ നിന്നും സംഭവിക്കുന്ന ചെറിയ ഒരു പിഴവിന് പോലും വലിയ കൊടുക്കേണ്ടി വരും എന്ന് കഥാപാത്രങ്ങൾക്ക് അറിയാം, അങ്ങനെ സംഭവിച്ചാൽ ഇവർക്ക് സംഭവിക്കാൻ പോവുന്നത് ഭീകരമായ കാര്യങ്ങൾ ആയിരിക്കും എന്നത് അവർക്കും കണ്ടിരിക്കുന്ന നമുക്കും അറിയാം, ആ ഒരു ടെൻഷൻ ആണ് ചിത്രത്തിന്റെ ആഡഡ് ബോണസ്. ഒരു പൊളിറ്റിക്കൽ ഹോളോകോസ്റ്റ് ചിത്രത്തിന് വേണ്ട സവിശേഷതകൾ എല്ലാം ഉള്ളപ്പോഴും എഡ്ജ് ഓഫ് ദി സീറ്റിൽ കാഴ്ചക്കാരനെ ഇരുത്തുന്നത് മുകളിൽ സൂചിപ്പിച്ച പ്രസ്തുത ഘടകം തന്നെയാണ്. അപ്പൊ പറഞ്ഞ് വന്നത് എന്താണെന്നാൽ കാണേണ്ട ചിത്രമാണ് ഫ്ലെയിം ആൻഡ് സിട്രോൺ, നഷ്ടം തോന്നില്ല.

Verdict : Very Good

DC Rating : 4/5 

899. Enola Holmes (2020)

Director : Harry Bradbeer

Genre : Thriller

Rating : 8.2/10

Country : UK

Duration : 123 Minutes

🔸എത്ര പുതിയ വേർഷൻ സിനിമകൾ അല്ലെങ്കിൽ സീരീസുകൾ അതും അല്ലെങ്കിൽ കഥകൾ വന്നാലും മടുപ്പ് തോന്നാത്ത, അല്ലെങ്കിൽ ഇത് നിർത്താറായില്ലേ എന്ന് തോന്നാത്ത (ഫാസ്റ്റ് ആൻഡ് ഫ്യുരിയസ് സെയ്‌സ് ഹൈ) അപൂർവം യുണിവേഴ്‌സുകളിൽ ഒന്നാണ് ഷെർലോക്ക് യുണിവേഴ്‌സ്. ഈ വിഭാഗത്തിൽ ലഭ്യമായ ഒരുവിധപ്പെട്ട എല്ലാം കണ്ട് തീർന്നിട്ടുണ്ട്, ചിലത് രണ്ടോ മൂന്നോ തവണ ഒക്കെ, പോയിന്റ് ഈസ് ഇത്രയും ഫാസിനേഷൻ തോന്നിയ വേറൊരു ഫിക്ഷനൽ കഥാപാത്രം ഇല്ല എന്ന് തന്നെ. ഇവയിൽ ഒരിടത്തും പറഞ്ഞ് കേട്ടിട്ടില്ലാത്ത കാര്യമാണ് ഷെർലോക്കിന്റെ പെങ്ങളായ ഇനോള ഹോംസിനെ പറ്റി, ഈ ഒരു വസ്തുത തന്നെയാണ് പേഴ്സണലി ഏറ്റവും താല്പര്യം ഉണർത്തിയ ഘടകവും, പരിചയം ഇല്ലായ്മ അല്ലെങ്കിൽ ആ അൺപ്രെഡിക്റ്റബിലിറ്റി.

🔸രണ്ട് കേസുകളാണ് സിനിമയിൽ ഉള്ളത്, അതിന്റെ ഡീറ്റെയിൽസിലേക്ക് ഒന്നും പോവുന്നില്ല, പുതിയ സിനിമ ആയത് കൊണ്ട് ഒഴിവാക്കുന്നു. ഇനോളയുടെ ഓർമകളിൽ അവ്യക്തമായ രൂപങ്ങളാണ് സഹോദരന്മാരായ ഷെർലോക്കും മൈക്രോഫ്റ്റും, ഇരുവരെയും അവൾ നേരിൽ കണ്ടിട്ട് കാലം ഒരുപാടായി. ഇനോലയോടൊപ്പം എല്ലാ കാലത്തും ഉണ്ടായിരുന്നത് അമ്മയായ യുടോറ മാത്രമാണ്, അവർ ഒരുപരിധി വരെ സുഹൃത്തുക്കളെ പോലെ ആണെന്നും പറയാം. ടെക്സ്റ്റ് ബുക്കുകളിൽ കൂടിയുള്ള വിദ്യാഭ്യാസത്തിനോട് യുടോറയ്ക്ക് വലിയ താല്പര്യം ഒന്നും ഉണ്ടായിരുന്നില്ല, ഒരിക്കലും.

🔸അവൾ മകളെ പഠിപ്പിച്ചത് ആയോധന കലകളും, വായനാ ശീലം വളർത്താനും, നിരീക്ഷണ പാടവം ഉണ്ടാക്കാനും ഒക്കെയാണ്, ഒരു റിബൽ സ്വഭാവമാണ് ഇനോളയ്ക്ക്, അതിൽ തെറ്റ് പറയാനുമാവില്ല, യുടോറയും അങ്ങനൊക്കെ തന്നെ. ഇത്രയും പറഞ്ഞതിൽ സ്പോയ്ലർ ഒന്നും തന്നെ ഇല്ല, ഇനി അങ്ങോട്ട് പറയാനും പോവുന്നില്ല. സിനിമ നെറ്റ്ഫ്ലിക്സിൽ സ്ട്രീം ചെയ്യുന്നുണ്ട്, കണ്ട് നോക്കാവുന്നതാണ്, അത്യാവശ്യം എന്റർടൈനിംഗ് ആണ് ചിത്രം, കണ്ടാൽ നഷ്ടം ഒന്നും തന്നെയില്ല എന്ന് സാരം. ചിത്രത്തിന്റെ കഥയുമായി വലിയ ബന്ധം ഒന്നും ഇല്ലാത്ത ചില തോന്നലുകളാണ് ചുവടെ ചേർക്കുന്നത്, മുൻ ഷെർലോക്ക് അഡാപ്റ്റേഷനുകൾ ഒക്കെ ആധാരമാക്കി ഉള്ള ചിലത്.

🔸കറ്റാന്വേഷണ കലയിൽ പരിചയം വന്നിട്ടില്ലാത്ത ചെറുപ്പക്കാരനായ ഷെർലക്കിനെ ആണ് ഇവിടെ കാണാനാവുക, അത് അത്യാവശ്യം കൗതുകകരം ആയ ഒന്ന് തന്നെയാണ്, തന്റെ സ്വതസിദ്ധമായ സ്വാഗ്, അരോഗൻസ് ഒന്നും ഇല്ല. പക്ഷെ അത്യാവശ്യം പ്രശ്നമായി തോന്നിയത് മൈക്രോഫ്ടിനെ ആണ്, തന്നോളം കഴിവുള്ള എന്നാൽ ലവലേശം ഈ വിഷയത്തിൽ താല്പര്യം ഇല്ലാത്ത എന്ന് ഷെർലോക്ക് തന്നെ വിശേഷിപ്പിച്ച മൈക്രോഫ്റ്റിന്റെ പൂർണമായും തൃപ്തി പെടുത്തിയ ഒരു ഓൺ സ്ക്രീൻ വേർഷൻ ഇന്നുവരെ കണ്ടിട്ടില്ല, ഇതിലും ഇല്ല, ഒരുപക്ഷെ സീക്വൽ ഒക്കെ ഉണ്ടെങ്കിൽ വന്നേക്കാം. അതെ, ഒരു ഫ്രാഞ്ചൈസ് അല്ലെങ്കിൽ തുടർ ഭാഗങ്ങൾക്ക് സ്കോപ്പ് ഉള്ള ഒന്നാണ് ഇനോള ഹോംസ്, അപ്പൊ കണ്ട് നോക്കാവുന്നതാണ്.

Verdict : Good

DC Rating : 3.5/5 

898. Ratched (2020)

Developer : Ryan Murphy

Genre : Thriller

Rating : 7.6/10

Seasons : 01

Episodes : 08

Duration : 45 - 62 Minutes

🔸വൺ ഫ്ലൂ ഓവർ ദി കുക്കൂസ് നെസ്റ്റ് എന്ന ജാക്ക് നിക്കോൾസൻ ചിത്രം കണ്ടവർ ആരും തന്നെ നേഴ്‌സ് റേച്ചഡ് എന്ന കഥാപാത്രത്തെ മറക്കാൻ ഇടയില്ല. ഇത്രയും വെറുപ്പ് തോന്നിയ, സ്‌ക്രീനിൽ ഉള്ള സമയം മുഴുവൻ ഒരു കമാൻഡിങ് ശൈലിയിൽ മറ്റ് കഥാപാത്രങ്ങൾക്ക് മേൽ തന്റെ അധീശത്വം കാണിച്ച അധികം കഥാപാത്രങ്ങളെ കണ്ട ഓർമയില്ല. ഇവരോട് മുട്ടാൻ നിൽക്കരുത് അപകടമാണ് എന്ന് വാക്കാൽ അല്ലാതെ തെളിയിച്ച വില്ലന്മാരും അപൂർവമാണ്, ആ ജനുസ്സിൽ പെടുന്ന ഒന്നാണ് നേഴ്‌സ് റേച്ചഡ് മിൽഡ്രഡ്. ഇതെല്ലാം കൊണ്ട് തന്നെ ഈ കഥാപാത്രത്തിന്റെ ഒറിജിൻ പ്രമേയമാക്കി ഒരു സീരീസ് വരുന്നു എന്നത് വളരെ താല്പര്യം ഉണർത്തിയ ഒരു കാര്യമായിരുന്നു.

🔸ആദ്യമേ തന്നെ പറയാം, സിനിമയും സീരീസും കണ്ട് തീർന്ന അനുഭവത്തിൽ നിന്നും, രണ്ട് കഥാപാത്രങ്ങൾ രണ്ട് ധ്രുവങ്ങളിൽ നിൽക്കുന്ന പ്രതീതിയാണ്, അത് കൊണ്ട് തന്നെ ഈ ഒരു സീരീസ് നേരിട്ട് സിനിമയിലേക്ക് ടൈ അപ്പ് ആവും എന്ന പ്രതീക്ഷ ഒന്നും വേണ്ട, അത് സംഭവിക്കുകയും ഇല്ല, കുറഞ്ഞത് ഈ ഒരു സീസണിൽ എങ്കിലും. ഒരു രണ്ടാമത്തെ സീസണിന് സീരീസ് റിന്യു ചെയ്യപ്പെട്ടിട്ടുണ്ട് എന്നാണ് അറിയാൻ കഴിഞ്ഞത്, ഒരുപക്ഷെ അവിടെ ക്യാരക്റ്റർ ഡെവലപ്മെന്റ് പൂർണം ആയേക്കാം, അതിനുള്ള സാദ്ധ്യതകൾ ഒക്കെ തുറന്നിടുന്നുണ്ട് ഈ സീസണിൽ പ്രത്യേകിച്ചും സീസൺ ഫിനാലെയിൽ.

🔸ഒരു പ്രത്യേക ഉദ്ദേശം വെച്ച് മിൽഡ്രഡ് ലൂസിയ മെന്റൽ ഹോസ്പിറ്റലിൽ നേഴ്‌സ് ആയി ജോലിക്ക് കേറുന്നിടത്താണ് സീരീസ് ആരംഭിക്കുന്നത്, അതിനായി അവർ തിരഞ്ഞെടുത്ത വഴിയൊക്കെ കൗശലം നിറഞ്ഞതും സമർത്ഥവും ആയിരുന്നു താനും. ഇത്രയും ബുദ്ധിമുട്ടി അവർ അവിടെ വരണമെങ്കിൽ സ്വാഭാവികമായും അതിന് ശക്തമായ കാരണവും കാണും, അതുണ്ട് താനും. ലൂസിയ ഹോസ്പിറ്റൽ അടുത്തായി വാർത്തയിൽ ഇടം പിടിച്ച ഒന്നാണ്, വളരെ കുപ്രസിദ്ധനായ ഒരു കൊലയാളിയെ അവിടേക്ക് മാറ്റി പാർപ്പിച്ചിട്ടുണ്ട്, ടിയാന്റെ പേരിലുള്ള കേസ് ഒരല്പം വിവാദം സൃഷ്ട്ടിച്ചതുമാണ്. ഈ രണ്ട് സംഭവങ്ങളിൽ നിന്നുമാണ് സീരീസ് കഥ പറഞ്ഞ് തുടങ്ങുന്നത്.

🔸ടൈറ്റിൽ കാരക്റ്റർ ആയി സാറാ പോൾസൺ നന്നായിരുന്നു, പക്ഷെ സിനിമാറ്റിക് വേര്ഷനുമായുള്ള താരമത്യം ഒക്കെ അപ്രസക്തമാണ്, ആദ്യമേ സൂചിപ്പിച്ച രണ്ട് ധ്രുവങ്ങളിൽ ഉള്ള രീതികളും ചേഷ്ടകളും ഒക്കെ കൊണ്ട് തന്നെ. സിന്ധ്യ നിക്‌സൺ, ഫിൻ വിട്രോക്ക് എന്നിവരും നന്നായിരുന്നപ്പോൾ വിൻസെന്റ് ഓണാഫ്രിയോ വന്ന് പോയി, ഒരുപക്ഷെ തുടർ ഭാഗങ്ങളിൽ പ്രാധാന്യം വർധിച്ചേക്കാം. ലോബൊട്ടമി പോലുള്ള ഡിസ്റ്റർബിങ് ആയ വിഷയങ്ങൾ സീരീസ് കൈകാര്യം ചെയ്യുന്നുണ്ട്, അവ എല്ലാം അതേപടി കാണിക്കുന്നുമുണ്ട്, ആ കാരണം കൊണ്ട് തന്നെ ചില ഭാഗങ്ങൾ കണ്ടിരിക്കാൻ പാടായിരുന്നു. ഇന്റെരെസ്റ്റിംഗ് ആയ തുടക്കത്തിന് ശേഷം പാതി വഴി വെച്ചെവിടെയോ കെട്ടുറപ്പ് പോയ ഒന്നായാണ് സീരീസ് അനുഭവപ്പെട്ടത്, എങ്കിലും കാണാവുന്നതാണ്.

Verdict : Watchable

DC Rating : 2.75/5 

897. Yakshi (1968)

Director : K. S. Sethumadhavan

Genre : Thriller

Rating : 7.7/10

Country : India

Duration : 141 Minutes

🔸മലയാളം ഇൻഡസ്ട്രിയിലെ സകല ലക്ഷണ ങ്ങളും ഒത്തിണങ്ങി വന്ന മികച്ച സൈക്കോള ജിക്കൽ സിനിമകളിൽ മുൻനിരയിൽ ഇന്നും തലയുയർത്തി നിൽക്കുന്ന ചിത്രമാണ് 1968 ൽ പുറത്തിറങ്ങിയ "യക്ഷി". അമൂല്ല്യമായ സിനിമാ കളക്ഷനുകളാൽ സമ്പന്നമായ നമ്മുടെ കൊച്ച്‌ ഇൻഡസ്ട്രിയിലെയെങ്കിലും പരമാവധി ചിത്രങ്ങ ൾ കവർ ചെയ്യുക എന്ന് പറഞ്ഞാൽ പോലും അപ്രാപ്യമാവാത്ത കാര്യമാണ്. അപ്പോഴുള്ള ഒരേ യൊരു വഴി എന്തെന്നാൽ ഒരു കാരണവശാലും നഷ്ടപ്പെടുത്തരുത് എന്ന തരത്തിലുള്ളവയെ തന്നെ ആദ്യം ലക്ഷ്യമിടുക എന്നതാണ്. പണ്ട് എപ്പോളോ കണ്ടിട്ടുള്ളതാണ് എങ്കിലും ഓർമ്മയിൽ യാതൊന്നും തന്നെ നിലനിന്നിരുന്നി ല്ല എന്ന കാരണം കൊണ്ടാണ് യക്ഷി വീണ്ടും തിരഞ്ഞെടുത്തത്, അതുകൊണ്ട് തന്നെ ഫ്രഷ് ആയി തന്നെ സിനിമയെ ആസ്വദിക്കാൻ പറ്റി. സമുഖനും പ്രതിഭയുമായ ചെറുപ്പക്കാരനായ കോളേജ് പ്രൊഫസർ ആണ് ശ്രീനിവാസൻ (സത്യൻ ). കോളേജിലെ തന്നെ കൂടെ ജോലി ചെയ്യുന്ന ഒരു സ്ത്രീയുമായി അദ്ദേഹം പ്രണയ ത്തിലുമാണ്. ഏതാണ്ട് അവരുടെ കല്യാണം ഉറപ്പിച്ച മട്ടാണ്. ശാസ്ത്ര വിഷയങ്ങളിൽ പരീക്ഷ ണങ്ങൾ നടത്തിയിരുന്ന ശാസ്ത്രജ്ഞൻ കൂടിയാ യ ശ്രീനിയുടെ ജീവിതം പാടെ മാറ്റിമറിച്ചു കൊണ്ട് ആ സംഭവമുണ്ടായി, ലാബിൽ സംഭവിക്കുന്ന ഒരു പൊട്ടിത്തെറിയിൽ അദ്ദേഹത്തിന്റെ മുഖത്തിന്  സാരമായി പരുക്ക് പറ്റുന്നു. മുഖം പെട്ടെന്ന് കണ്ടാൽ ആരും ഭയന്നു പോകുന്ന തരത്തിൽ വികൃതമാകുന്നു. തന്മൂലം അയാളുടെ കാമുകി ശ്രീനിയെ ഉപേക്ഷിച്ചു  പോകുന്നു., പരിചയക്കാ രും, അടുപ്പമുള്ളവരും വരെ അയാളുടെ മുഖത്ത് നോക്കാൻ മടി കാണിക്കുന്നു. 

🔸ജീവിതം താറുമാറാകുന്ന ശ്രീനി പതിയെ സമൂഹ ത്തിൽ നിന്നും ഉൾവലിഞ്ഞു വീടിനുള്ളിൽ തന്നെ സ്ഥിരം ചിലവഴിക്കുന്ന തരത്തിലേക്ക് മാനസീക മായി മാറപ്പെടുന്നു. യക്ഷി,ആത്മാവ് എന്നീ വിഷ യങ്ങളിൽ തല്പരനായിരുന്ന ശ്രീനി വീട്ടിലിരുന്നു അവയിലേക്ക് കൂടുതൽ അടുക്കാൻ വേണ്ടി ശ്രമങ്ങൾ നടത്തുന്നു. സംഭവിച്ചു എന്ന തരത്തി ൽ കേട്ടു കേൾവിയുള്ള പല കഥകളിലെയും കഥാപാത്രങ്ങളാവാൻ അയാൾ വെമ്പൽ കൊള്ളുന്നു. തന്റെ മുഖത്തേക്ക് നോക്കി മുഖം തിരിക്കാത്ത ഒരു മനുഷ്യ ജന്മം പോലുമില്ല. എങ്കി ൽ ഒരു ആത്മാവിനെയെങ്കിലും കണ്ടു മുട്ടിയിരു ന്നെങ്കിലോ എന്ന് പോലും അയാൾ ചിന്തിച്ചു പോകുന്നു. അയാളുടെ ആഗ്രഹമെന്നോണം കറുത്ത വാവും വെള്ളിയാഴ്ചയും ഒത്തുവന്ന ആ ദിനം, ചുറ്റുപാടു മുള്ള മൃഗങ്ങൾ പരസ്പരം ആശയം പങ്കു വെച്ച് അവരുടെ ഭാഷയിൽ ഉറക്കെ ഭീതി ജനിപ്പിക്കും വിധം ഒച്ചവെച്ചു കൊണ്ടിരുന്നു. നീലാകാശത്തി നും മുകളിലെ തട്ടിലുള്ള ചുവന്ന ആകാശത്തു വിഹരിക്കുന്ന അവരുടെ ആണ്ടിലൊരിക്കലുള്ള ഭൂമീ പ്രവേശനത്തിന് പ്രകൃതി മഴയായും, കാറ്റാ യും,കൊള്ളിയാനായും സമ്മതമറിയിച്ചു. അവൾ വന്നു ചുറ്റിലും പാലപ്പൂ മണം പരന്നു. രാഗിണി.. പലപ്പോഴും ശ്രീനിവാസനും, പ്രേക്ഷകനും അവ ളൊരു യക്ഷിയോ മനുഷ്യ സ്ത്രീയോ എന്ന് വേർ തിരിച്ചറിയാൻ വയ്യാതായി.. ശ്രീനി അവളോടൊ പ്പം ജീവിക്കുകയാണ്, പക്ഷെ ആ ജീവിതത്തിന്റെ പൊരുൾ എന്തെന്ന് അയാൾക്കും പ്രേക്ഷകനും പൂർണ്ണമായി വെളിവാകുന്നത് ചിത്രത്തിന്റെ ക്ലൈമാക്സിലാണ്. പോസ്റ്റിൽ കാര്യങ്ങൾ പറ ഞ്ഞിരിക്കുന്നത് സിനിമാ ഇനിയും കാണാത്തവർ ക്ക് ആസ്വാദനം ലഭിക്കും തരത്തിലാണ് എന്ന് വിശ്വസിക്കുന്നു.

🔸ഒരുപാട് ബ്രില്ലിയന്റ് രംഗങ്ങൾ ആവർത്തിച്ചെടു ത്ത് കാണാൻ പാകത്തിനുള്ളവ സിനിമയിലുണ്ട് അതായത് ബ്രില്ലിയന്റ്സ് ലെ പെർഫെക്ക്ഷൻ എന്നൊക്കെ വിളിക്കാവുന്ന തരത്തിലുള്ളവ. രാഗിണിയുമായുള്ള പിണക്കത്തിന് ശേഷം രമ്യതയിലായി അവർ വീട്ടിലേക്ക് തിരിച്ചു വന്ന് കുളിക്കാൻ കയറിയിരിക്കുവാണ്. അകത്തു രാഗിണിയുടെ നഗ്ന മേനിയിൽ വെള്ളം പതിക്കു ന്ന ശബ്ദം വരാന്തയിൽ നിന്ന് നാണമോ, കാമ പരവശമോ മറ്റെന്തൊക്കെയോ ഭാവങ്ങൾ,ചേഷ് ടകൾ ഒക്കെയായി ആസ്വദിച്ചു സിഗരറ്റ് വലിച്ചു നിൽക്കുന്ന സത്യൻമാഷ്.,(മറ്റെവിടെയും അത്ത രത്തിലുള്ള ഒരു അഭിനയ രീതി വേറെ ഓർത്തെ ടുക്കാൻ കഴിയുന്നില്ല). ശേഷം ക്ഷമ നശിച്ച് സിഗരറ്റും കുത്തിക്കെടുത്തി അകത്തേക്ക് കയറി ചെന്ന് പ്രേമ പരവശനായി രാഗിണിയോട് കുളിമുറിയുടെ വാതിൽ തുറക്കാൻ എന്തൊക്കെ യോ പുലമ്പുകയാണ് ആള്. 

🔸കടുതൽ ദീർഖിപ്പിക്കുന്നില്ല മലയാളത്തിൽ നിന്നും ഒരു കാരണവശാലും നഷ്ടപ്പെടുത്താൻ പാടില്ലാത്ത ചിത്രങ്ങളിൽ ഒന്നാണ് മലയാറ്റൂരിന്റെ യക്ഷി എന്ന നോവലിൽ നിന്നും തോപ്പിൽ ഭാസി തിരക്കഥ എഴുതി KS സേതുമാധവൻ സംവിധാനം നിർവ്വഹിച്ച "യക്ഷി" എന്ന ഈ ചിത്രം. ചില രംഗ ങ്ങളിളും സംഭാഷണങ്ങളിലുമെല്ലാം ചിലപ്പോൾ കഴിഞ്ഞു പോയ കാലഘട്ടത്തിന്റെ പോരായ്മ കൾ നിഴലിക്കുന്നതായി "ഇന്ന്" ചിലപ്പോൾ ആർ ക്കെങ്കിലുമൊക്കെ തോന്നാൻ സാധ്യതയുണ്ട്. എന്നാൽ കാലഘട്ടം മനസ്സിൽ വെച്ച് സിനിമയെ  ആസ്വദിക്കാൻ കഴിയുന്നവർക് ഒരു ക്ലാസ്സിക്ക് ഉൽപ്പന്നവും ലഭിക്കും. പക്ഷെ ഏത് കാലഘട്ട ത്തിൽ ഉള്ളവർ ആണ് എങ്കിലും സത്യൻ എന്ന പ്രതിഭയുടെ പെർഫോമൻസ് സുസൂഷ്മം വീക്ഷി ച്ചാൽ ഒരു കൊച്ചു ചിരിയോടെ അതിനെ നോക്കി നിന്നാസ്വാധിക്കാൻ നിങ്ങൾക്ക് എപ്പോളും സാധി ക്കും തീർച്ച. ശാരദ തന്റെ ശാലീനമായ സൗന്ദര്യം കൊണ്ടും, അഭിനയ മികവുകൊണ്ടും ചിത്രത്തിന്റെ മാറ്റ് കൂട്ടിയപ്പോൾ സപ്പോർട്ട് റോളുകളിൽ വന്ന ഭാസിയും, സുകുമാരിയുമെല്ലാം അവരുടെ ഭാഗം മികവോടെ ചെയ്ത്  സിനിമയിൽ നിറഞ്ഞു നിന്നു. സ്വർണ്ണച്ചാമരം വീശിയെത്തുന്ന എന്ന ഗാനം പണ്ടുമുതലേ ഇഷ്ടം ആണ്. ചിത്രത്തിലുള്ള മറ്റു ഗാനങ്ങളും ഹിറ്റുകളാണ്.

Verdict : Must Watch

DC Rating : 5/5 

896. Marona's Fantastic Tale (2019)

Director : Anca Damian

Genre : Animation

Rating : 7.6/10

Country : France

Duration : 88 Minutes

🔸നായയോളം വിശ്വസ്തനായ ഒരു സന്തത സഹചാരി മനുഷ്യന് വേറെ കിട്ടാനില്ല എന്ന് തോന്നിയിട്ടുണ്ട്, അനുഭവം കൊണ്ട് പോലും. മനുഷ്യന് നായ എന്നത് ഒരു സമയം പോക്ക് മാത്രം ആണെങ്കിൽ പോലും നായയ്ക്ക് അതിന്റെ യജമാനൻ അവന്റെ ജീവനോളം തന്നെ പ്രാധാന്യം ഉള്ളൊരു കാര്യമാണ്, ഈ ഒരു വസ്തുതയ്ക്ക് ഉദാഹരണങ്ങൾ ഒരുപാടുണ്ട്, എന്തിന് സിനിമയ്ക്ക് കാരണമായ റിയൽ ലൈഫ് എക്‌സാംപിൾ ഹാച്ചിക്കോ വരെ. എന്നാൽ ഒരു നായ തന്റെ കഥ പറഞ്ഞ് തുടങ്ങിയാലോ, അല്ലെങ്കിൽ അതിന്റെ ഭൂത കാലത്തേക്ക് തിരിച്ച് ചെന്നാലോ, അതാണ് മറൊണാസ് ഫന്റാസ്റ്റിക്ക് ടെയ്ൽ എന്ന ചിത്രം.

🔸ചിത്രം കണ്ട് കൊണ്ടിരിക്കെ ആദ്യം ശ്രദ്ധയിൽ പെടുക കണ്ട് പരിചയിച്ചിട്ടില്ലാത്ത അനിമേഷനും അതിന്റെ അവതരണവും എല്ലാമായിരിക്കും, ഡിസ്‌നി പോലുള്ള കമ്പനികളുടേതുമായി നോക്കുമ്പോൾ അത്ര പോളീഷ് ചെയ്ത ഫീൽ കിട്ടില്ല എങ്കിലും സംഭവം വെറൈറ്റി ആണെന്ന് പറയേണ്ടതില്ല. കുറച്ച് കാലം മുൻപ് പുറത്തിറങ്ങിയ ഐൽ ഓഫ് ഡോഗ്സിനെ ഓർമിപ്പിച്ചു ഈ ചിത്രം, അനിമേഷൻ കൊണ്ടും അവതരണം കൊണ്ടും, നായകളുമായി ബന്ധപ്പെട്ട് കിടക്കുന്ന പ്ലോട്ട് കൊണ്ടും. ഒരു നായ ഫസ്റ്റ് പേഴ്സൺ ആയി നരേറ്റ് ചെയ്യുന്ന പോലെയാണ് കഥ പുരോഗമിക്കുന്നത്.

🔸സിനിമയുടെ കഥയിലേക്ക് കടക്കുക ആണെങ്കിൽ, ഒരപകടത്തെ തുടർന്ന് നായയ്ക്ക് തന്റെ ലൈഫ് മുഴുവനായി ഒരു എപ്പിസോഡിക് ശൈലിയിൽ കാണാൻ കഴിയുന്നതും അതിനെ തുടർന്നുള്ള സംഭവങ്ങളും എല്ലാമാണ് കഥ. ഈ ഒരു ചെറിയ ജീവിത കാലത്തിനിടെ തന്നെ നമ്മുടെ കേന്ദ്ര കഥാപാത്രത്തിന് ഒരുപാട് യജമാനന്മാർ ഉണ്ടായിട്ടുണ്ട്, ഇവരിൽ നിന്നും സ്നേഹ പരിലാളനങ്ങൾ ലഭിക്കുകയും ചിലരാൽ തിരസ്കരിക്കപ്പെടുകയും ചെയ്തിട്ടുണ്ട്. ആ ഓർമകളിലേക്ക് ആണ് കഥ പോവുന്നത്, മനുഷ്യാധിപത്യം പുലർത്തുന്ന സമൂഹത്തിൽ നായയിൽ ഫോക്കസ് ചെയ്ത് അതിന്റെ മൈൻഡ് ലൈനിലൂടെ കഥ പറഞ്ഞ് പോവുന്ന ട്രീറ്റ്‌മെന്റ് നന്നായി തന്നെ ഇഷ്ട്ടപ്പെട്ടു.

🔸ഹാച്ചിക്കോ പോലെ ഔട്ടറൈറ്റ് ഡിപ്രസിങ് അല്ല ചിത്രം, അത് പോലെ ഹർട്ട് ചെയ്യാൻ കഴിയുന്ന ചില മോമെന്റിലൂടെ കഥ പോവുന്നുണ്ട് എങ്കിലും ബോധപൂർവം ഉള്ള ശ്രമം ഇല്ല. കണ്ടിരിക്കുന്ന സമയം മുഴുവൻ പിടിച്ചിരുത്തുന്ന കഥാഗതിയാണ് ചിത്രത്തിന്റേത്, പിന്നൊരു ഫാക്റ്റർ ഉള്ളത് ഈ അനിമേഷൻ ശൈലി ഇഷ്ടപ്പെടുമോ എന്നതാണ്, ഇല്ലെങ്കിൽ അത് ആസ്വാദനത്തെയും ബാധിക്കാം. അപ്പൊ പറഞ്ഞ് വന്നത് എന്താണെന്നാൽ ഒരു തവണ കണ്ട് നോക്കാവുന്നതാണ് ഈ ചിത്രം, അതിനുള്ള വക ഉണ്ട്.

Verdict : Good

DC Rating : 3.75/5