387. Allied (2016)

Director : Robert Zemeckis

Genre : War

Rating : 7.1/10

Country : UK

Duration : 124 Minutes


🔸രണ്ടാം ലോക മഹായുദ്ധം പ്രമേയമോ ,പശ്ചാത്തലമോ ആയി എണ്ണിയാൽ ഒടുങ്ങാത്ത അത്രയും ചിത്രങ്ങൾ ലോകത്താകമാനം വിവിധ ഭാഷകളിൽ പുറത്ത് വന്നിട്ടുണ്ടാകും. ചില ചിത്രങ്ങൾ യുദ്ധവും അതിനോട് അനുബന്ധമായ ഭീകര സംഭവങ്ങളും വ്യക്തികൾക്ക് മേൽ വരുത്തുന്ന മാറ്റങ്ങൾ പ്രമേയമാക്കിയപ്പോൾ അപൂർവം ചില ചിത്രങ്ങൾ പ്രണയം എന്ന വികാരത്തെ പ്രത്യക്ഷത്തിൽ ഒരു രീതിയിലും ഒത്ത് പോവാത്ത യുദ്ധത്തിന്റെ അകമ്പടിയോടെ അവതരിപ്പിച്ചു. കാസാബ്ലാങ്ക പോലെയുള്ള ക്ലാസിക് ചിത്രങ്ങൾ സഞ്ചരിച്ച ഈ പാതയിലൂടെ നടക്കാൻ ശ്രമിക്കുകയാണ് അല്ലീഡ് എന്ന ചിത്രം, എന്നാൽ അതിൽ എത്രത്തോളം വിജയം കരസ്ഥമാക്കാൻ ചിത്രത്തിന് കഴിഞ്ഞിട്ടുണ്ടെന്ന് തീരുമാനിക്കേണ്ടത് പ്രേക്ഷകനാണ്.

🔸പഴയ ചിത്രത്തിനോടുള്ള ആദരം എന്ന നിലയിൽ മൊറോക്കോയിലെ കാസാബ്ലാങ്ക എന്ന പട്ടണത്തിലാണ് ചിത്രം ആരംഭിക്കുന്നത്. രണ്ടാം ലോകമഹായുദ്ധം എങ്ങും കൊടുമ്പിരി കൊണ്ടിരിക്കുന്ന സമയം, കാനേഡിയൻ വ്യോമ സേനയിൽ വിങ് കമാൻഡറായ മാക്സ് വറ്റാൻ അധികാരികളുടെയും ,എതിരാളികളുടെയും കണ്ണ് വെട്ടിച്ച് നഗരത്തിൽ എത്തിയതിന് പിന്നിൽ വളരെ അപകടകരമായ ഒരു കാരണം ഉണ്ട്. നഗരത്തിൽ സന്ദർശനത്തിന് എത്തുന്ന ജർമൻ അംബാസഡറുടെ ജീവൻ ആണ് മാക്സിന്റെയും ,അയാളുടെ പിന്നിൽ പ്രവർത്തിക്കുന്ന രഹസ്യാന്വേഷണ വിഭാഗത്തിന്റെയും ലക്ഷ്യം.

🔸തന്റെ ലക്ഷ്യം നിറവേറ്റുന്നതിന് മറ്റൊരാളുടെ സഹായം കൂടി ആവശ്യമുണ്ട് മാക്സിന്, ഫ്രഞ്ച് വിപ്ലവ പോരാളി ആയ മരിയന്റെ സഹായം. ജർമനി കയ്യടക്കി വെച്ച ഫ്രാൻസിന്റെ ഭാഗങ്ങളിൽ വിമോചനത്തിനായി നാസി പട്ടാളവുമായി തുടർച്ചയായ ഗറില്ലാ യുദ്ധങ്ങളിൽ ഏർപ്പെട്ടവരാണ് വിമോചന പോരാളികൾ. കനത്ത തിരിച്ചടികളിൽ വലിയ നഷ്ടങ്ങൾ നേരിടേണ്ടി വന്നെങ്കിലും ,ചിഹ്നഭിന്നമായി പോയപ്പോഴും ഇവരുടെ ഉള്ളിലെ പക ഒടുങ്ങിയിരുന്നില്ല. ഈ കൂട്ടത്തിലുള്ളവളാണ് മരിയൻ. കുറച്ച് കാലമായി കാസാബ്ലാങ്കയിൽ താമസമാക്കിയ മരിയാനിന് അവിടെയുള്ള ഉന്നതരുമായി നല്ലൊരു സൗഹൃദ ബന്ധവുമുണ്ട്.

🔸ഈ ബന്ധങ്ങളുടെ ചുവട് പിടിച്ച് കൊണ്ട് സന്ദർശനത്തിനായി എത്തുന്ന ജർമൻ അംബാസഡർ പങ്കെടുക്കുന്ന വിരുന്നുകളിൽ ഒന്നിൽ കയറി പറ്റുക എന്നതും, യോജിച്ച സമയത്ത് അവസരം മുതലെടുത്ത് കൊണ്ട് അയാളെ വധിക്കുക എന്നതുമാണ് ഇരുവരും ഉൾപ്പെടുന്ന പദ്ധതിയുടെ ചുരുക്കം. ഒട്ടും എളുപ്പമല്ല ഈ പറയുന്ന കൃത്യങ്ങൾ ഒന്നും തന്നെ ,സംശയത്തിന്റെ ചെറിയ ഒരു കണിക പോലും അധികാരികൾക്കോ ,പട്ടാളത്തിനോ ലഭിച്ചാൽ പിന്നെ ബാക്കിയുണ്ടാവില്ല ,രക്ഷിക്കാൻ പോലും ഒരാൾ ഈ അന്യനാട്ടിൽ ഇല്ല താനും. അങ്ങനെ പരാജയം നേർക്കുനേർ തുറിച്ച് നോക്കുന്നുണ്ടെങ്കിലും തീരുമാനിച്ച് ഉറപ്പിച്ച കാര്യങ്ങളുമായി മുന്നോട്ട് നീങ്ങാൻ തന്നെയാണ് ഇരുവരുടെയും പുറപ്പാട്, പരിണിത ഫലങ്ങൾ എന്ത് തന്നെ ആയാലും അനുഭവിക്കുക തന്നെ.

🔸എല്ലാ കാര്യങ്ങളും കഥാപാത്രങ്ങൾ മനസ്സിൽ കരുതിയത് പോലെ സംഭവിക്കില്ല എന്ന പൊതു സിനിമാ തത്വം ശെരി വെച്ച് കൊണ്ട് തന്നെ ചില അപ്രതീക്ഷിത സംഭവങ്ങൾ ഇരുവരുടെയും ജീവിതത്തിൽ അരങ്ങേറുകയാണ്, ഇതിനിടെ പ്രധാന കഥാപാത്രങ്ങൾ ഇരുവരും തമ്മിൽ പ്രണയം ഉടലെടുക്കുക കൂടി ചെയ്യുമ്പോൾ സങ്കീർണ്ണത വർധിക്കുകയാണ്. കാസാബ്ലാങ്ക എന്ന ചിത്രം സഞ്ചരിച്ച പാത ഒരു പരിധി വരെ പിന്തുടരുന്നുണ്ടെങ്കിലും ഒരു രീതിയിലും താരമത്യം ചെയ്യാൻ ഉള്ള നിലയിലേക്ക് അല്ലീഡ് ഉയരുന്നില്ല ,അത് ചിത്രം മോശമായത് കൊണ്ട് അല്ല എന്നതും കാസാബ്ലാങ്കയുടെ തട്ട് അത്രയും ഉയരത്തിൽ ആയതിനാൽ ആണ് എന്നതും സൂചിപ്പിക്കട്ടെ. ഏറ്റവും ലളിതമായി പറയുക ആണെങ്കിൽ അർഹിച്ച വിജയം സ്‌ക്രീനിന്റെ പുറത്തുള്ള വിവാദങ്ങൾ കാരണം ലഭിക്കാതെ പോയ ഒരു തവണ കണ്ട് ആസ്വദിക്കാവുന്ന ചിത്രമാണ് അല്ലീഡ്.

Verdict : Good

386. Angels Wear White (2017)

Director : Vivian Qu

Genre : Drama

Rating : 7.3/10

Country : China

Duration : 107 Minutes


🔸ചിത്രം കഴിയുമ്പോഴും ഒരു തരം അനിശ്ചിതാവസ്ഥ നില നിൽക്കുകയാണ് ,പല വഴികളിലൂടെയും അനുഭവങ്ങളിലൂടെയും കടന്ന് വന്ന ഈ കഥാപാത്രങ്ങൾക്ക് ഇനി എന്ത് സംഭവിക്കും എന്ന് കൃത്യമായ ഒരു നിഗമനത്തിൽ എത്താൻ ചിത്രം അനുവദിക്കുന്നില്ല,അവരിൽ മിക്കവരും ഇനി എന്ത് ചെയ്യുമെന്നും പറയാൻ കഴിയില്ല. ചുരുക്കി പറയുക ആണെങ്കിൽ അടുത്ത കാലത്ത് കണ്ട ചിത്രങ്ങളിൽ അന്ത്യത്തോട് അടുക്കുമ്പോഴും അവസാനിക്കരുത് എന്ന് ആഗ്രഹിച്ച ചിത്രങ്ങളിൽ ഒന്നാണ് ഏയ്ഞ്ചൽസ് വേർ വൈറ്റ് എന്ന ചിത്രം. സ്‌ക്രീനിൽ പ്രത്യക്ഷപ്പെടുന്ന കഥാപാത്രങ്ങളോട് വൈകാരികമായി ചേർത്ത് നിർത്താനും അവരുടെ പ്രശ്നങ്ങളിൽ ഉൽക്കണ്ഠ ഉളവാക്കാനും പ്രേക്ഷകനെ നിർബന്ധിക്കുന്നതിൽ വലിയ വിജയം തന്നെ ഈ ചിത്രം കരസ്ഥമാക്കിയിട്ടുണ്ട്.

🔸ക്സിയാമെൻ പട്ടണത്തിൽ കടൽക്കരയിൽ സ്ഥിതി ചെയ്യുന്ന ഒരു ചെറുകിട ലോഡ്ജിൽ റീസെപ്‌ഷനിസ്റ്റ് ആണ് കേന്ദ്ര കഥാപാത്രമായ മിയ. ഇപ്പോൾ ഓഫ് സീസൺ ആണ് ,അതിനാൽ തന്നെ സഞ്ചാരികൾ ആരും ഈ ഭാഗത്തേക്ക് എത്തി തുടങ്ങിയിട്ടില്ല. എങ്കിലും യാത്രികരെ പ്രതീക്ഷിച്ച് കൊണ്ട് മിയയും അവളുടെ റിസ്പഷനിസ്റ്റ് സുഹൃത്തായ ലിലിയും എപ്പോഴും തയാറാണ്. അങ്ങനെ കടന്ന് പോയി കൊണ്ടിരുന്ന ഓഫ് സീസൺ ദിവസങ്ങളിൽ ഒന്നിലാണ് ചിത്രത്തിന്റെ ഗതി മാറ്റി മറിക്കുന്ന സംഭവങ്ങൾ അരങ്ങേറുന്നത്. വളരെ വൈകിയാണ് ലോഡ്ജിലേക്ക് രണ്ട് പെൺകുട്ടികളോടൊപ്പം അയാൾ കടന്ന് വന്നത്, ഗേറ്റ് കടന്നുള്ള വരവ് മുതൽക്കേ തന്നെ ഒരു അസ്വാഭാവികത മിയയ്ക്ക് അനുഭവപെട്ടിരുന്നു ,എന്തോ സംഭവിക്കാൻ പോവുന്നെന്ന അപായ സൂചന ,ഒരു തരം മുന്നറിയിപ്പ്.

🔸ലോഡ്ജിന്റെ മുന്നിൽ സ്ഥിതി ചെയ്തിരുന്ന അലങ്കാര വസ്തുക്കൾ ,അശ്രദ്ധമായ ഡ്രൈവിംഗ് കാരണം തരിപ്പണം ആക്കിയ ടിയാന്റെ കൂടെയുള്ള പെൺകുട്ടികളെ ഒരു നോക്ക് കാണാനുള്ള അവസരം അപ്പോഴാണ് മിയയ്ക്ക് ലഭിച്ചത്. ഇരുവരും സ്‌കൂൾ വിദ്യാർത്ഥിനികളാണ് ,ധരിച്ചിരിക്കുന്നത് നഗരത്തിലെ വളരെ പ്രശസ്തമായ ,അച്ചടക്കത്തിന് പേര് കേട്ട സ്‌കൂളിലെ യൂണിഫോം ആണ്. ഇവരെയും കൊണ്ട് ഇവിടെ എത്തിയ ഇയാൾ അച്ഛനാവാൻ വഴിയില്ല ,അത് പെരുമാറ്റത്തിൽ നിന്ന് വ്യക്തമാണ് ,ഇവർ ഈ സമയത്ത് എന്താണ് ഇവിടെ ,ഉദ്ദേശം എന്ത് ,എല്ലാത്തിനും പുറമെ ഇയാളും ഇവരും തമ്മിൽ എന്ത് ബന്ധം തുടങ്ങി നൂറ് കൂട്ടം ചോദ്യങ്ങൾ മിയയുടെ മനസ്സിൽ ഉയരുകയാണ്.

🔸ഈ ചോദ്യങ്ങളുടെ ഉത്തരങ്ങളും ഈ കഥാപാത്രങ്ങളുടെ ഉദ്ദേശങ്ങളും എന്ത് തന്നെ ആയാലും അന്നേ ദിവസം ,ഈ കഥാപാത്രങ്ങളെല്ലാം സന്നിഹിതരായി ലോഡ്ജിൽ ഉള്ള രാത്രി ചില പ്രശ്നങ്ങൾ അവിടെ അരങ്ങേറുകയാണ്, ഈ പ്രശ്നങ്ങളിൽ ഉൾപ്പെട്ടിരിക്കുന്നത് മേൽ സൂചിപ്പിച്ച കഥാപാത്രങ്ങളും. അധികം താമസിയാതെ തന്നെ ഈ പ്രശ്നങ്ങളുടെ പരിണിതഫലം സംഭവത്തിൽ ഉൾപ്പെട്ടിരിക്കുന്നവരുടെ എല്ലാം ജീവിതത്തെ ഇനി ഒരു തിരിച്ച് പോക്കിന് കഴിയാത്ത വിധം മാറ്റി മറിക്കുകയാണ്. തികച്ചും ഒരു സ്ത്രീ പക്ഷ സിനിമയാണ് ഏയ്ഞ്ചൽസ് വേർ വൈറ്റ്, ചിത്രം കൈകാര്യം ചെയ്യുന്ന വിഷയം അവരുടെ പ്രശ്നങ്ങളും ആണ്. സ്വഭാവത്തിന്റെ അടിസ്ഥാനത്തിലും ,കാഴ്ചപ്പാടിന്റെ അടിസ്ഥാനത്തിലും തികച്ചും വ്യത്യസ്തരായ ആറോളം സ്ത്രീ കഥാപാത്രങ്ങളാണ് ചിത്രത്തിൽ ഉള്ളത്.

🔸ലോഡ്ജിൽ അരങ്ങേറുന്ന സംഭവത്തിലൂടെ ആണ് ചിത്രം ആരംഭിക്കുന്നതെങ്കിലും താമസിയാതെ തന്നെ മൂന്ന് കഥകളായി മാറുകയാണ് ചിത്രം. ഈ മൂന്ന് കഥകളിലും പ്രാധാന്യം യഥാക്രമം റിസപ്ഷെണിസ്റ്റ് ആയ മിയ ,അന്നേ ദിവസം ലോഡ്ജിൽ എത്തിയ രണ്ട് വിദ്യാർത്ഥിനികൾ ,നിജസ്ഥിതി അറിയാൻ ശ്രമിക്കുന്ന വക്കീൽ എന്നിവർക്കാണ്. ഇങ്ങനെ മൂന്ന് കൈവഴികളായി കഥ ഒഴുകുമെങ്കിലും ഇവിടെ എല്ലാം പ്രശ്നമായി മാറുന്നത് ഉദ്യോഗസ്ഥരുടെ അഴിമതിയും ,സ്ത്രീകൾ നേരിടുന്ന ചൂഷണവും ,അവഗണനയും ഒക്കെ ആണ്. പ്രധാന കഥാപാത്രങ്ങളായി എത്തിയ നടിമാരുടെ എല്ലാം ശക്തമായ പ്രകടനം പ്രത്യേക പരാമർശം അർഹിക്കുന്ന ഈ ചിത്രം കാണാതിരിക്കുന്നത് നഷ്ടം തന്നെ ആണ് എന്നതിൽ സംശയമില്ല.

Verdict : Very Good

385. Mission Impossible Fallout (2018)

Director : Christopher Mcquarrie

Genre : Action

Rating : 8.9/10

Country : USA

Duration : 150 Minutes


🔸മിഷൻ ഇമ്പോസ്സിബിൾ സീരീസിലെ ഏറ്റവും പുതിയ ചിത്രം കണ്ടുകൊണ്ടിരിക്കെ ആണ് വളരെ അപ്രതീക്ഷിതം ആയി ഒരു ചിന്ത മനസ്സിൽ എത്തിയത്, ടോം ക്രൂയിസ് എന്ന നടന്റെ ആദ്യ ചിത്രം സ്‌ക്രീനിൽ എത്തിയിട്ട് 37 വർഷങ്ങൾ കഴിഞ്ഞിരിക്കുന്നു. ടോപ് ഗൺ ,റെയിൻ മാൻ എന്നീ ചിത്രങ്ങൾക്ക് വരെ പഴക്കം മൂന്ന് ദശാബ്ദങ്ങൾ കഴിഞ്ഞു ,എന്തിന് അധികം മിഷൻ ഇമ്പോസ്സിബിൾ സീരീസിലെ ആദ്യ ചിത്രം വരെ ഇരുപത്തി മൂന്ന് വർഷങ്ങൾക്ക് മുൻപാണ് റിലീസ് ആയത്. എന്നിട്ടും ഈ മനുഷ്യൻ സ്‌ക്രീനിൽ ഇപ്പോഴും ഓടുന്നു ,ചാടുന്നു ,ഒരു കെട്ടിടത്തിന്റെ മുകളിൽ നിന്ന് അടുത്തതിലേക്ക് ചാടി കടക്കുന്നു ,നിരപ്പിൽ നിന്നും വളരെ ഉയരത്തിലുള്ള ഹെലികോപ്റ്ററിൽ തൂങ്ങി കിടന്ന് അഭ്യാസങ്ങൾ കാണിച്ച് ഇന്നും കാണികളെ അമ്പരപ്പിച്ച് കൊണ്ടേ ഇരിക്കുന്നു.

🔸സിനിമ അതിന്റെ രണ്ടാം പകുതിയിൽ കത്തി ജ്വലിച്ച് കൊണ്ട് മുന്നോട്ട് പോവുമ്പോൾ ഒരു കഥാപാത്രം നായകനായ ഈതാനിന്റെ സുഹൃത്തിനോട് അവൻ ഇപ്പോൾ എങ്ങനെ എന്ന് ചോദിക്കുന്ന രംഗമുണ്ട്. അതിന് കിട്ടുന്ന ഉത്തരം ഇത്ര വർഷങ്ങൾക്ക് ശേഷവും മാറ്റമൊന്നുമില്ലാത്ത പഴയ ഈതാൻ തന്നെ എന്നാണ്. എന്നാൽ സിനിമയുടെ കാര്യത്തിൽ ഈ സംഭാഷണം എടുക്കുക ആണെങ്കിൽ ചെറിയൊരു വ്യത്യാസം അനിവാര്യമാണ് കാരണം ഈ ചിത്രം ഏത് രീതിയിൽ നോക്കുക ആണെങ്കിലും മുൻകാല ചിത്രങ്ങൾ പോലെ അല്ല ,അതിന് മേലെയാണ് സ്ഥാനം. സീരീസിലെ മികച്ചത് എന്ന വാദം എന്നിലെ കാഴ്ചക്കാരനെ സംബന്ധിച്ചിടത്തോളം ശെരി വെക്കേണ്ടി വരും.

🔸ചിത്രത്തിന്റെ കഥയിലേക്കും, കഥാപാത്രങ്ങളിലേക്കും, സന്ദർഭങ്ങളിലേക്കും കടക്കുന്നത് സ്പോയ്ലറിന് വഴിവെക്കും എന്നതിനാൽ അധികം വിശദീകരണങ്ങളിലേക്ക് പോവുന്നില്ല. നായകൻ ആയ ഈതൻ ഹണ്ടും ,സുഹൃത്തുക്കളായ ബെഞ്ചിയും ലൂതറും തങ്ങളുടെ സ്ഥിരം ദൗത്യങ്ങളുമായി എന്നത്തേയും പോലെ തന്നെ തിരക്കിലാണ്. എന്നാൽ ഇവർക്കും ,ലോകത്താകമാനം ഉള്ള രഹസ്യാന്വേഷണ വിഭാഗങ്ങൾക്കും ഭീഷണിയായി അപോസ്റ്റിൽസ് എന്ന ക്രിമിനൽ ഗ്രൂപ് ഉയർന്നു വരുന്നതും തുടർന്നുണ്ടാവുന്ന പ്രശ്നങ്ങളുമാണ് ചിത്രത്തിന്റെ ഇതിവൃത്തം. കഥാപരമായി വിപ്ലവകരം ആയ മാറ്റങ്ങളോ അതിനൊത്ത പുതുമയോ പ്രതീക്ഷിക്കേണ്ട എന്ന് ചുരുക്കം.

🔸മിഷൻ ഇമ്പോസ്സിബിൾ എന്ന സീരീസിലെ ഒരു ചിത്രം എങ്കിലും കണ്ട വ്യക്തിക്ക് എന്താണ് പ്രതീക്ഷിക്കേണ്ടത് എന്ന വ്യക്തമായ ധാരണ ഉണ്ടാവും, അതിൽ ഒരിക്കലും അത്ഭുതപ്പെടുത്തുന്ന തിരക്കഥയ്ക്കോ ,വൈകാരികമായി കാഴ്ചക്കാരനെ ബാധിക്കുന്ന സന്ദര്ഭങ്ങൾക്കോ സ്ഥാനം ഉണ്ടാവുമെന്ന് കരുതുന്നില്ല. നേരെ മറിച്ച് സീരീസ് പ്രശസ്തമായ ആക്ഷൻ രംഗങ്ങളും ,മുൾമുനയിൽ കാഴ്ചക്കാരനെ നിർത്തുന്ന നിമിഷങ്ങളും പ്രതീക്ഷിച്ചാണ് പോവുന്നതെങ്കിൽ തീർച്ചയായും നിരാശ പെടേണ്ടി വരികയുമില്ല. ഈ വിഭാഗത്തിൽ ചിത്രത്തിന്റെ തുടക്കവും ഒടുക്കവും ചിന്തിക്കാൻ പോലും അവസരം തന്നേക്കില്ല എന്നതാണ് സത്യം. സീരീസിലെ മുൻപിറങ്ങിയ ചിത്രങ്ങളിൽ ഒന്നിൽ ഇന്ത്യ പശ്ചാത്തലമായി വന്നത് പോലെ ഈ ചിത്രത്തിലും കാശ്മീർ ഒരു പ്രധാന സംസാര വിഷയം ആയത് കൗതുകം ഉളവാക്കി, സ്പോയ്ലർ ആവുമെന്നതിനാൽ ആ ഭാഗത്തേക്ക് കടക്കുന്നില്ല.

🔸സീരീസിലെ മികച്ച ചിത്രമാണോ എന്നത് വാദപ്രതിവാദത്തിന് ഇട നൽകാമെങ്കിലും നല്ല ചിത്രം തന്നെയാണ് ഫോലൗട്ട് എന്ന കാര്യത്തിൽ സംശയമില്ല, എന്നാലും ചിത്രത്തിൽ മോശം പറയാൻ തക്കവണ്ണം ഒന്നുമില്ല എന്ന് പറയാനാവില്ല. രണ്ടാം പകുതിയിൽ ചില കഥാപാത്രങ്ങൾ കൈക്കൊണ്ട തീരുമാനങ്ങളും അത് അവരിൽ കൊണ്ടുവന്ന മാറ്റങ്ങളും അതിന്റെ അവതരണവും ഒരല്പം കല്ലുകടി ആയി തോന്നി. ചിത്രത്തിന്റെ കഥയുമായി വളരെ അടുത്ത് നിൽക്കുന്ന കാര്യം ആയതിനാൽ ഒഴിവാക്കുന്നു. സ്‌ക്രീനിൽ എത്തിയ നടീ നടൻമാർ ആരും തന്നെ തങ്ങളുടെ കഥാപാത്രത്തെ മോശമാക്കിയില്ല ,എന്നാലും ജെറെമി റെന്നെരുടെ കഥാപാത്രം പ്രത്യക്ഷപ്പെടാഞ്ഞതും, അദ്ദേഹത്തിന്റെ അഭാവം വിശദീകരിക്കാഞ്ഞതും മോശം ആയിപ്പോയി. ഹെൻറി കാവിൽ, സൈമൺ പെഗ്ഗ് തുടങ്ങിയവർ പ്രത്യേകം പരാമർശം അർഹിക്കുന്നു. പിന്നെ ടോം ക്രൂയിസിനെ വിശദീകരിക്കാൻ മഹേഷിന്റെ പ്രതികാരത്തിലെ ബേബി ചേട്ടനെ കടമെടുക്കേണ്ടി വരും "ഈ പ്രായത്തിലും എന്നാ ഒരു ഇതാ....".കൂടുതൽ പറയുന്നില്ല സമയനഷ്ടവും ധനനഷ്ടവും നൽകാത്ത തികഞ്ഞ ഒരു എന്റർടെയ്നെർ ആണ് ഈ ചിത്രം.

Verdict : Good

384. Metropolis (1927)

Director : Fritz Lang

Genre : Sci Fi

Rating : 8.1/10

Country : Germany

Duration : 148 Minutes


🔸ഒരു സിനിമയുടെ യഥാർത്ഥ ,പൂർണമായ പ്രിന്റ് തേടിയുള്ള യാത്രകൾക്ക് ഒരു സിനിമാറ്റിക് പരിവേഷം എന്നത് മെട്രോപോളിസ് എന്ന ചിത്രത്തിന് മാത്രം അവകാശപ്പെടാൻ കഴിയുന്ന വസ്തുത ആവും. ഏകദേശം 92 വർഷങ്ങൾക്ക് മുന്നേ റിലീസിംഗ് സമയത്ത് 153 മിനുട്ടോളം ദൈർഖ്യം ഉണ്ടായിരുന്ന ചിത്രം ,പ്രദര്ശനം സുഗമം ആവാൻ വേണ്ടി വെട്ടി ചുരുക്കി 120 മിനുട്ടിൽ ആയിരുന്നു പ്രദർശിപ്പിച്ചിരുന്നത് ,പൂർണമായ പ്രിന്റ് ആണെങ്കിൽ പല വഴികളിലൂടെ ,കൈകളിലൂടെ കടന്ന് പോയി എവിടെയോ എത്തി ചേർന്നു. റിലീസിനപ്പുറം നല്ല പ്രതികരണങ്ങൾ നേടിയ ചിത്രത്തിന്റെ പൂർണ പതിപ്പിന് വേണ്ടി ഒരുപാട് സിനിമാ ആരാധകർ അന്വേഷകരുടെ പട്ടം എടുത്തണിഞ്ഞു ,വർഷങ്ങളുടെ പോക്കിൽ ഇറങ്ങിതിരിച്ചവരെല്ലാം തോൽവി സമ്മതിക്കേണ്ടിയും വന്നു. മെട്രോപോളിസ് എന്ന ചിത്രത്തിന്റെ പൂർണ പതിപ്പ് ആർക്കും പിടി കൊടുക്കാതെ ഒരു മരീചിക പോലെ തുടരുകയും ചെയ്തു.

🔸ഒടുവിൽ വർഷങ്ങൾക്കിപ്പുറം ഈ നൂറ്റാണ്ടിന്റെ തുടക്കത്തിൽ അർജന്റീനിയൻ നഗരമായ ബ്യുണസ് അയേഴ്സിലെ ഒരു പഴയ കാല ലാബിൽ നിന്നുമാണ് കുറച്ച് കൂടി ബേധപ്പെട്ട,ദൈർഖ്യം ഏറിയ പതിപ്പ് ലഭിച്ചത്. അപ്പോഴും യഥാർത്ഥ പ്രിന്റിൽ നിന്നും വ്യത്യാസങ്ങൾ അനവധി ആയിരുന്നു. ഉണ്ടെന്ന് പറഞ്ഞ് കേട്ട പല രംഗങ്ങളും ,സംഭാഷണങ്ങളും ഈ പ്രിന്റിലും കാണാനില്ല. ഇന്ന് മിക്കവരും ഡൗൺലോഡ് ചെയ്യുന്ന പ്രിന്റുകൾ മുകളിൽ സൂചിപ്പിച്ച അപൂർണമായ പ്രിന്റ് ആണ്, നഷ്ടപ്പെട്ടപോയ ഭാഗങ്ങളിൽ കറുത്ത സ്‌ക്രീനിനൊപ്പം പഴയ സെൻസറിങ് രേഖകളിലെ സംഭാഷണ ശകലങ്ങൾ ഉൾപ്പെടുത്തി പോരായ്മ പരിഹരിക്കാൻ ശ്രമങ്ങൾ നടത്തി ഒരു പരിധി വരെ വിജയിച്ചിയിച്ചിട്ടുണ്ട്.

🔸മുകളിലെ കാര്യങ്ങൾ വിശദീകരിച്ച് ഉൾപ്പെടുത്താൻ ഉള്ള കാരണം എന്താണെന്ന് വെച്ചാൽ മെട്രോപോളിസ് എന്ന ചിത്രം ഇന്നും അപൂർണമാണ് ,ഭാവി കാലത്തെ കുറിച്ചും അവിടെ സംഭവിക്കാൻ സാധ്യത ഉള്ളത് എന്ന് കഴിഞ്ഞ നൂറ്റാണ്ടിന്റെ തുടക്കത്തിൽ ഒരു സംവിധായകന്റെ മനസ്സിൽ ഉദിച്ച സങ്കല്പങ്ങളിൽ നിന്നും പിറവിയെടുത്ത ഈ ചിത്രത്തിന് അപൂർണത ഒട്ടും അർഹിക്കുന്നില്ല എന്ന തോന്നലാണ്. അതും പോരാതെ ഏകദേശം നൂറോളം വർഷങ്ങൾക്ക് ശേഷം ഈ ചിത്രത്തിലേക്ക് തിരിഞ്ഞ് നോക്കുമ്പോൾ ,വിലയിരുത്തുമ്പോൾ ഈ അപൂർണത മാത്രമാണ് ഒരു പ്രശ്നമായി തോന്നുന്നത് എന്നതും പറയേണ്ടി ഇരിക്കുന്നു.

🔸ഭാവി കാലത്താണ് ചിത്രം ആരംഭിക്കുന്നത് ,ദരിദ്രരും സമ്പന്നരും തമ്മിലുള്ള അകലം എന്നത്തേക്കാളും അധികമായി മാറിയിരിക്കുന്നു. രണ്ട് വിഭാഗങ്ങളും തീർത്തും വ്യത്യസ്തമായ ജീവിതരീതികൾ എന്നതിൽ കവിഞ്ഞ് തീർത്തും വേർപെട്ട് ,വ്യത്യസ്തമായ സ്ഥലത്താണ് കഴിഞ്ഞ് പോവുന്നത്. സമ്പന്നരായവരുടെ ഇടയിലേക്ക് ദരിദ്രരായ സാധാരണക്കാർക്ക് പ്രവേശനമില്ല ,ഈ വിഭാഗത്തിൽ ഉള്ളവർ മിക്കവരും കഠിനമായി അധ്വാനിച്ചിട്ടും ജീവിതം മുന്നോട്ട് കൊണ്ടുപോവാൻ ബുദ്ധിമുട്ടുന്ന അഷ്ടിക്ക് വകയില്ലാത്ത തൊഴിലാളികളാണ്. അവരില്ലെങ്കിൽ നഗരം തന്നെ നിശ്ചലമാകും എന്നതാണ് സത്യമെങ്കിൽ കൂടിയും ബുദ്ധിമുട്ടും അവഗണനയും മാത്രമാണ് അവർക്ക് ലഭിക്കുന്ന പാരിതോഷികങ്ങൾ.

🔸ഇങ്ങനെ പരസ്പരം അറിയാതെ ,ഇടപഴകാതെ പോയ രണ്ട് ജന സമൂഹങ്ങളാണ് ഈ ചിത്രത്തിൽ കാണാനാവുക. ഇവയിൽ സമ്പന്ന വിഭാഗത്തിൽ പെട്ട ഒരു വ്യക്തി ദുരിതം അനുഭവിക്കുന്ന തൊഴിലാളികൾക്കിടയിൽ വന്നെത്തുന്നതും തുടർന്നുണ്ടാവുന്ന പ്രശ്നങ്ങളും ആണ് ചിത്രത്തിന്റെ പ്രമേയം. ഈ രണ്ട് വിഭാഗങ്ങൾക്കുമിടയിൽ മധ്യസ്ഥനെ പോലെ നിൽക്കുന്ന ഒരു റോബോട്ടിക് കഥാപാത്രവും ഉണ്ട് ചിത്രത്തിൽ. ഈ നൂറ്റാണ്ടിന് അവതാറും അറുപതുകളിൽ സ്പേസ് ഒഡീസിയും എന്തായിരുന്നോ ,അതാണ് സിനിമയുടെ ആരംഭ കാലത്തിൽ ഈ ചിത്രം എന്ന് പറയേണ്ടി വരും.

Verdict : Must Watch

383. Wadjda (2012)

Director : Haifaa Al Mansour

Genre : Drama

Rating : 7.6/10

Country : Saudi Arabia

Duration : 98 Minutes


🔸ഒറ്റ നോട്ടത്തിൽ, വളരെ ലളിതമായി പറയുക ആണെങ്കിൽ വാഡ്‌ജ്യ എന്ന ചിത്രം പത്ത് വയസുകാരിയും സ്‌കൂൾ വിദ്യാർത്ഥിനിയുമായ ടൈറ്റിൽ കഥാപാത്രത്തിന്റെ ചെറിയ ഒരു ആഗ്രഹമാണ്. ഈ ആഗ്രഹം എന്നത് വേറൊരു രാജ്യത്ത് ജനിച്ച് വളർന്ന വ്യക്തിക്ക് വലിയ സംഭവമായോ ,ബുദ്ധിമുട്ടായോ തോന്നാൻ ഇടയില്ല. അത് എന്തോ ആവട്ടെ വാദ്യയുടെ ആഗ്രഹം ഒരു സൈക്കിൾ വാങ്ങണം എന്നതാണ്. അവൾ സ്‌കൂളിൽ പോവുന്ന വഴിക്കും ,തിരികെ വരുമ്പോഴും എല്ലാം വഴി വക്കിലുള്ള സ്റ്റോറിൽ നിന്ന് പച്ച നിറത്തിലുള്ള ബൈസിക്കിൾ അവളെ നോക്കി ചിരിക്കുന്നതായി തോന്നിയിട്ടുണ്ട്. ഏത് വിധേനയും അത് സ്വന്തം ആക്കണം എന്നതാണ് വാദ്യയുടെ ആഗ്രഹം ,വേണമെങ്കിൽ ജീവിതാഭിലാഷം എന്ന് തന്നെ പറയാം.

🔸ഇനി ഈ ചിത്രത്തിന്റെ മറ്റൊരു വശത്തേക്ക് ശ്രദ്ധ ചെലുത്തുക ആണെങ്കിൽ പൂർണമായും സ്വന്തം രാജ്യത്ത് ഷൂട്ട് ചെയ്ത ആദ്യ സൗദി അറേബ്യൻ ചിത്രമാണ് വാദ്യ. എന്നാൽ അതിലും പ്രധാനമായി ഒരു സ്ത്രീ സംവിധാനം ചെയ്ത ആദ്യ അറേബ്യൻ ചിത്രം എന്ന വിശേഷണവും ഈ ചിത്രത്തിന് സ്വന്തം. പ്രത്യക്ഷമായോ പരോക്ഷമായോ ഈ ചിത്രത്തിലൂടെ സംവിധായിക പറയാൻ ശ്രമിക്കുന്നത് രാജ്യത്തെ സ്ത്രീകളുടെ ആവശ്യങ്ങളാണ് എന്നതും ,വാദ്യ എന്ന പെൺകുട്ടി കേവലം ഒരു പ്രതീകം മാത്രമാണ് എന്നതും ചിത്രം ഇറങ്ങിയ നാൾ തൊട്ട് കേട്ട് പഴകിയതും ഒരുപാട് ചർച്ചയ്ക്ക് വഴി ഒരുക്കിയതും ആണ്.

🔸മേല്പറഞ്ഞ ചർച്ചകളിലേക്ക് കടക്കാൻ മിക്ക വിമർശക നിരൂപകരെയും പ്രേരിപ്പിച്ച ഘടകം എന്നത് വാദ്യയുടെ ആഗ്രഹത്തിന്റെ കാരണം ആവണം. വാദ്യ സൈക്കിളിന് വേണ്ടി ശ്രമിക്കുന്നത് വേറൊന്നും കൊണ്ടല്ല ,അവളുടെ വീടിനടുത്താണ് സുഹൃത്തായ അബ്ദുല്ലയുടെ വീട്. അവൻ സ്വന്തം സൈക്കിളിൽ തെരുവിലൂടെ ഒരല്പം അഹങ്കാരത്തോടെ ചീറി പാഞ്ഞ് പോവുന്ന കാഴ്ച വാദ്യയുടെ ദിനചര്യയുടെ ഭാഗമാണ്. ഒരു ദിവസം എങ്കിൽ ഒരു ദിവസം സ്വന്തം സൈക്കിളിൽ അബ്ദുള്ളയോട് മത്സരിച്ച് അവനെ വെട്ടിക്കണം എന്നതാണ് അവളുടെ ഉള്ളിലിരിപ്പ്.

🔸എന്നാൽ ഈ ആഗ്രഹം സാധിക്കുക എന്നത് ഒട്ടും എളുപ്പം ആയിരുന്നില്ല ,പ്രത്യേകിച്ചും അവകാശങ്ങളുടെ തുല്യതയ്ക്ക് വില നൽകി തുടങ്ങിയിട്ട് മാത്രമുള്ളൊരു രാജ്യത്ത്. വാദ്യയുടെ വേണ്ടപ്പെട്ടവരും ,അവർ ഉൾപ്പെടുന്ന സമൂഹവും ചില അലിഖിത നിയമങ്ങൾ പാരമ്പര്യമായി പിന്തുടർന്ന് വരുന്നവരാണ്. ഈ നിയമങ്ങളിൽ ഒന്നും പെൺകുട്ടികൾക്ക് സൈക്കിൾ ഓടിക്കാം എന്ന് രേഖപ്പെടുത്തിയിട്ടില്ല ,ആയതിനാൽ അത് നിരോധിതം ആണ് താനും. അങ്ങനെ സംഭവിക്കാൻ സാധ്യതയില്ലാത്ത ഒരു കാര്യമാണെങ്കിൽ കൂടിയും അതിനുള്ള ശ്രമങ്ങൾ വാദ്യ ഉപേക്ഷിക്കുന്നില്ല, അവ ഫലവത്താവുമോ എന്നത് കണ്ട് തന്നെ അറിയുക.

🔸ലളിതമായ കഥ എന്ന് മുകളിൽ പറഞ്ഞിട്ടുണ്ടെങ്കിലും സിനിമ കൈകാര്യം ചെയ്യുന്ന വിഷയം ഒരല്പം കഠിനം തന്നെയാണ്. വാദ്യയുടെ കഥ ആണ് ചിത്രത്തിന്റെ കേന്ദ്ര ഭാഗം എങ്കിൽ കൂടിയും അവളുടെ അച്ഛനും അമ്മയും അമ്മൂമ്മയും അബ്ദുള്ളയും എല്ലാം വളരെ ശക്തമായ കഥാപാത്രങ്ങളാണ്, അവർ ഓരോരുത്തർക്കും പറയാൻ ഉള്ളത് ഓരോ കഥകളും ആണ്. അതി മനോഹരം എന്നൊക്കെ വിശേഷിപ്പിച്ചാൽ കുറഞ്ഞ് പോവും ഈ ചിത്രത്തെ ,സിനിമ ഇഷ്ട്ടപ്പെടുന്ന ,സിനിമയെ അഗാധമായി സ്നേഹിക്കുന്ന ഓരോരുത്തരും നിസ്സംശയം കണ്ടിരിക്കേണ്ട ചിത്രങ്ങളിൽ ഒന്നാണ് വാഡ്‌ജ്യ.

Verdict : Must Watch

382. Ghost Stories (2017)

Director : Andy Nyman

Genre : Horror

Rating : 6.6/10

Country : UK

Duration : 98 Minutes


🔸മനുഷ്യ ബുദ്ധിക്ക് വിവരിക്കാൻ കഴിയാത്ത ,അതിന് അതീതമായ യാതൊന്നിലും പ്രൊഫസർ ഫിലിപ്പ് ഗുഡ്മാൻ വിശ്വസിക്കുന്നില്ല. ലോകത്ത് ആകമാനം അരങ്ങേറിയ അമാനുഷിക സംഭവങ്ങൾ എല്ലാം തന്നെ വിശദീകരിക്കാൻ തനിക്ക് കഴിയും എന്ന് പ്രൊഫസർ ഉറച്ച് വിശ്വസിക്കുന്നുണ്ട്. ഇവിടെ എല്ലാം തന്നെ മുതലെടുപ്പിനും സ്വന്തം താല്പര്യ സംരക്ഷണത്തിനും സർവോപരി തങ്ങളുടെ നേട്ടം മാത്രം മുന്നിൽ കണ്ട് കൊണ്ടുള്ള ആളുകളുടെ സാന്നിധ്യമാണ് പ്രശ്ന കാരണം എന്നതാണ് അയാളുടെ വിശ്വാസം. പ്രേക്ഷകരെ പൊടി കയ്യുപയോഗിച്ച് പറ്റിക്കുന്ന ചില കൺകെട്ട് വിദ്യക്കാരെയൊക്കെ കയ്യോടെ പിടിച്ച അനുഭവവും ടിയാന് ഉണ്ട് ,അത് തന്നെയാണ് ഈ ഉറച്ച വിശ്വാസത്തിന്റെ കാരണവും.

🔸പ്രേതങ്ങളോടും അവ സംബന്ധിച്ച കഥകളോടും അവയിലെല്ലാം ഉൾപ്പെടുന്ന അനേകം ആളുകളുടെ അനുഭവങ്ങളോടും ഒരു തരം പുച്ഛത്തോടെ മാത്രമേ പ്രൊഫസർക്ക് പ്രതികരിച്ച് ശീലമുള്ളൂ. അയാളെ സംബന്ധിച്ചിടത്തോളം നൂറ്റാണ്ടുകളായി ആളുകളെ പറ്റിച്ച് കൊണ്ട് തുടർന്ന് പോവുന്ന ഈ പ്രക്രിയ പരിഹാസമല്ലാതെ മറ്റൊന്നും തന്നെ അർഹിക്കുന്നില്ല. ഈ വിഷയത്തിൽ പ്രൊഫെസ്സർ പിന്തുടരുന്നത് തന്റെ ഗുരുനാഥനായ ചാൾസ് കാമറൂണിന്റെ പാതയാണ്. അതീന്ദ്രിയ ശക്തികളെ പറ്റിയുള്ള പഠനങ്ങളിൽ വേറാരും കടന്ന് ചെന്നിട്ടില്ലാത്ത വഴികളിലൂടെ കടന്ന് പോയ ,തനിക്ക് മുന്നേ സഞ്ചരിച്ച ,വഴികാട്ടിയായ ചാൾസിനോട് പ്രൊഫസർക്ക് തികഞ്ഞ ബഹുമാനമാണ്.

🔸തന്റെ സ്ഥിരം പ്രക്രിയകളുമായി ജീവിച്ച് പോയിക്കൊണ്ടിരുന്നു പ്രൊഫസറെ തേടി ഒരു ദിവസം ചാൾസിന്റെ കത്ത് എത്തുകയാണ്. പ്രിയപ്പെട്ട ഗുരുനാഥനെ കാലങ്ങൾക്ക് ശേഷം കാണാനുള്ള അവസരം ഒഴിവാക്കാതെ കടന്നെത്തിയ പ്രൊഫസർ കണ്ടുമുട്ടുന്നത് തികച്ചും വ്യത്യസ്തനായ ഒരു മനുഷ്യനെ ആയിരുന്നു ,അയാൾക്ക് പറയാൻ ഉണ്ടായത് പ്രൊഫസർക്ക് ഒരിക്കലും അംഗീകരിക്കാൻ കഴിയാത്ത ചില വസ്തുതകളും. തന്റെ വർഷങ്ങൾ നീണ്ട് നിന്ന പഠനത്തിന്റെയും അന്വേഷണത്തിന്റെയും ആകെ തുക ,അയാളുടെ നിഗമനങ്ങൾ ,എല്ലാം തന്നെ പ്രൊഫെസ്സർ ഗുഡ്മാന്റെ മുന്നിൽ അയാൾ പറയാൻ തുടങ്ങുകയാണ്.

🔸ഇത്രയും നാളും താൻ പുച്ഛിച്ച ,പരിഹസിച്ച ,ഇല്ലെന്ന് ഉറച്ച് വിശ്വസിച്ച ,ഒരു പരിധി വരെ ഭയന്ന സംഭവങ്ങൾ എല്ലാം യാഥാർഥ്യമാണ്. തങ്ങൾ ഇന്ന് വരെ എന്തിനെതിരെ ആണോ നിലനിന്നത് ,അവ എല്ലാം ഈ ലോകത്തിന്റെ ഭാഗമാണ് ,ഇത്രയും നാളും അവഗണിക്കാൻ ശ്രമിച്ച ഈ സത്യം അംഗീകരിക്കേണ്ട സമയം ആയി എന്ന ചാൾസിന്റെ വാക്കുകൾ ഒരല്പം ഞെട്ടലോടെയാണ് പ്രൊഫസർ കേട്ടത്, അതിന് വ്യക്തമായ കാരണവുമുണ്ട്. തന്റെ പ്രായത്തിൽ തന്നെക്കാൾ വീറോടെയും വാശിയോടെയും അതീന്ദ്രിയ ശക്തികളെ വെല്ലുവിളിച്ച് നടന്നിരുന്ന വ്യക്തിയാണ് ഇന്ന് തന്റെ മുന്നിൽ ഇരുന്ന് അവയെ അംഗീകരിക്കണം എന്നും ,തനിക്ക് സംഭവിച്ചതെല്ലാം തെറ്റുകൾ ആയിരുന്നെന്നും പറയുന്നത്.

🔸തന്റെ വാക്കുകൾ വിശ്വസിക്കാൻ മടി കാണിച്ച പ്രൊഫസർക്ക് രാജ്യത്തിൻറെ വിവിധ ഭാഗങ്ങളിൽ അരങ്ങേറിയ മൂന്ന് വിചിത്രമായ സംഭവങ്ങളെ കുറിച്ച് പഠിക്കാനും ,തീരുമാനത്തിൽ സ്വയം എത്തിച്ചേരാനും ഉള്ള നിർദേശങ്ങൾ നൽകുകയാണ് ചാൾസ് ചെയ്തത്. താൻ സഞ്ചരിച്ച വഴിയിലൂടെ സഞ്ചരിക്കാൻ അയാൾ പ്രൊഫസറെ പ്രേരിപ്പിക്കുകയാണ് ,തന്റെ ഈ വാക്കുകൾ തെറ്റാണെന്ന് തെളിയിക്കാൻ അയാളെ വെല്ലുവിളിക്കുകയാണ്. അവിടെ നിന്നും പ്രൊഫസർ യാത്ര ആരംഭിക്കുന്നത് മൂന്ന് കഥകളിലേക്കാണ്. കഥയെന്ന് കേൾക്കാൻ ഇഷ്ട്ടപ്പെടുമെങ്കിലും വിശദീകരിക്കാൻ കഴിയാത്ത ,അപകടകരമായ മൂന്ന് യഥാർത്ഥ സംഭവങ്ങളിലേക്ക്.

Verdict : Good

381. Beyond The Clouds (2018)

Director : Majid Majidi

Genre : Drama

Rating : 6.7/10

Country : India

Duration : 120 Minutes


🔸മജീദ് മജീദി എന്ന പേര് തന്നെ ഒരു സിനിമ കാണാനായുള്ള വലിയ പ്രചോദനം ആണ് ,ഏതൊരു സിനിമ ആരാധകനും. ചിൽഡ്രൻ ഓഫ് ഹെവൻ ,ബറാൻ ,കളർ ഓഫ് പാരഡൈസ് തുടങ്ങി ലളിതവും മനോഹരവും ,അവിസ്മരണീയവും ആയ ചിത്രങ്ങൾ പറയും മജീദ് മജീദി എന്ന സംവിധായകന്റെ മേന്മ. ആയതിനാൽ തന്നെ മജീദി സംവിധാനം ചെയ്യുന്ന ഇന്ത്യൻ ചിത്രം ആയ ബിയോണ്ട് ദി ക്ലൗഡ്‌സിന് മേൽ പ്രതീക്ഷയുടെ ഒരു കൂമ്പാരം തന്നെ ഉണ്ടായിരുന്നു. എ ആർ റഹ്മാന്റെ സംഗീതവും ,മുന്നിലും പിന്നിലുമായി മലയാളികൾ അടക്കമുള്ള പ്രതിഭാധനരായ വ്യക്തികളുടെ സാന്നിധ്യവും എല്ലാത്തിനുമുപരി റിലീസിന് മുന്നേയുള്ള ആദ്യ ഷോകളിൽ ചിൽഡ്രൻ ഓഫ് ഹെവൻ എന്ന ചിത്രവുമായി ലഭിച്ച താരമത്യവും എല്ലാം കൂടി തിയേറ്ററുകളിൽ എത്തുന്നതിന് മുന്നേ തന്നെ ഒരു തരം ക്ലാസ്സിക് പരിവേഷം ഞാൻ അടക്കമുള്ള ആരാധകർ പ്രതീക്ഷിച്ചിരുന്നു ,ആഗ്രഹിച്ചിരുന്നു.

🔸തന്റെ കഥ പറയുവാനായി മജീദി പ്രേക്ഷകരെ കൊണ്ടുപോവുന്നത് മുംബൈയിലെ തെരുവുകളിലേക്കാണ്. നഗരത്തിലെ ദരിദ്രരും സമ്പന്നരും തമ്മിലുള്ള അന്തരം ആദ്യ സീൻ മുതൽ തന്നെ വ്യക്തമായി വരച്ചിടുന്ന മജീദി ഒരു വേള സ്ലംഡോഗ് മില്ല്യണയർ സഞ്ചരിച്ച വഴിയേ ഇന്ത്യൻ ചേരികളെ ആഘോഷമാക്കി മാറ്റുമോ എന്ന് ഭയന്നെങ്കിലും അത് അധികം ഉണ്ടായില്ല. ചിത്രത്തിലെ പ്രധാന കഥാപാത്രങ്ങൾ രണ്ട് പേരും ഇല്ലായ്മയുടെ പ്രതിനിധികളും ,ചേരിയുടെ സന്തതികളും ആണ്. സഹോദരീ സഹോദരന്മാരായ ആമിറും താരയും ആണ് ചിത്രത്തിലെ പ്രധാന കഥാപാത്രങ്ങൾ.

🔸നഗരത്തിലെ സാമ്പത്തികമായി ഏറ്റവും താഴ്ന്ന ജന വിഭാഗങ്ങളുടെ കൂടെ ജനിച്ച് വളർന്നവരാണ് ഇരുവരും. പ്രത്യേകിച്ച് തൊഴിൽ ഒന്നും തന്നെ ഇല്ലാത്ത ആമിർ ആവശ്യക്കാർക്ക് ലഹരി പദാർത്ഥങ്ങൾ എത്തിച്ച് കൊടുത്തും ,കൈമാറ്റങ്ങളിൽ സഹായിച്ചും ഒക്കെയാണ് തനിക്കാവശ്യമായ വരുമാനം ഉണ്ടാക്കുന്നത്. തന്റെ ചുറ്റിലും അരങ്ങേറുന്ന പേകൂത്തുകളോട് ഒരു തരം അമർഷവും ,എതിർപ്പുമെല്ലാം അവനിൽ ഉണ്ടെങ്കിലും അവ എല്ലാം സഹിച്ച് പിടിച്ച് നില്ക്കാൻ കഠിനമായ ജീവിതം അയാളെ പഠിപ്പിച്ച് കഴിഞ്ഞിരുന്നു.

🔸ആമിറിൽ നിന്നും വ്യത്യസ്തയായി താര തന്റെ ചിലവിനുള്ള പൈസ മാന്യമായ രീതിയിൽ തന്നെയാണ് സമ്പാദിക്കുന്നത് ,നഗരത്തിൽ തന്നെ സ്ഥിതി ചെയ്യുന്ന ഒരു ഇസ്തിരി കടയിൽ അവൾക്ക് ജോലിയുണ്ട്. തന്റെ സഹോദരന്റെ ചെയ്തികളെ പറ്റി താരയ്ക്ക് അറിവുണ്ടെങ്കിൽ കൂടിയും ഉപദേശിക്കാനോ ,ശാസിക്കാനോ കഴിയാത്ത അവസ്ഥയിലാണ് അവൾ. സഹോദരങ്ങൾക്കിടയിൽ ഒരിക്കലും ശക്തമായ ബന്ധം ഉണ്ടായിരുന്നില്ല എന്നതും താരയുടെ ഭർത്താവിന്റെ ചില കൊള്ളരുതായ്മകളും എല്ലാം ഇരുവരെയും കൂടുതൽ അകറ്റുന്നതിൽ പ്രധാന കാരണങ്ങൾ ആയിരുന്നു.

🔸അത്യാവശ്യം പ്രശ്നങ്ങളും ബുദ്ധിമുട്ടുകളും ഒക്കെ ആയി കഴിഞ്ഞ് കൊണ്ടിരുന്ന സഹോദരങ്ങൾക്കിടയിൽ പുതിയ ചില പ്രശ്നങ്ങൾ രൂപപ്പെടുന്നത് ,ആമിറിന്റെ പദ്ധതികളിൽ ഒന്ന് കൈവിട്ട് പോവുമ്പോഴാണ്. അവന്റെ തെറ്റുകൾക്കുള്ള ശിക്ഷ താര ഏറ്റു വാങ്ങേണ്ടി വരുമ്പോൾ സഹോദരങ്ങളുടെ ബന്ധം മറ്റൊരു തലത്തിലേക്ക് നീങ്ങുകയാണ്. ചിത്രം കണ്ട് കൊണ്ടിരിക്കെ കണ്ണിൽ ഉടക്കിയത് അനിൽ മേഹ്തയുടെ മനോഹരമായ രംഗങ്ങൾ ഒന്ന് തന്നെയാണ്, അത് മാറ്റി നിർത്തുക ആണെങ്കിൽ സംവിധായകന്റെ മുൻ ചിത്രങ്ങളോടും ,പേരിനോടും ഒരു വിധത്തിലും ചേർന്ന് നിൽക്കാത്ത ശരാശരിയ്ക്ക് മുകളിൽ നിൽക്കുന്ന സിനിമ അനുഭവം ആണ് ഈ ചിത്രം എന്ന് പറയേണ്ടി വരും.

Verdict : Above Average

380. Raazi (2018)

Director : Meghna Gulzar

Genre : Thriller

Rating : 7.9/10

Country : India

Duration : 140 Minutes


🔸ആലിയ ഭട്ട് എന്ന നടിയെ പറ്റി, പ്രധാനമായും അവരുടെ അബദ്ധങ്ങൾ കാരണവും ,സിനിമ പശ്ചാത്തലം കാരണം ബുദ്ധിമുട്ടുകൾ അറിയാതെ പ്രശസ്തിയുടെ ലോകം കയ്യടക്കിയ താര സന്തതികളിൽ ഒരാൾ എന്ന പൊതു വികാരം കാരണവും അത്ര നല്ല പ്രതികരണം ആയിരുന്നില്ല സാധാരണക്കാരായ സിനിമ കാഴ്ചക്കാരിൽ നിന്നും അരങ്ങേറ്റ കാലത്ത് നിന്നും ലഭിച്ചത്. ഈ ആരോപണങ്ങൾ ,പ്രത്യേകിച്ചും അഭിനയത്തെ സംബന്ധിച്ചുള്ളവയ്ക്ക് ഒരു മറുപടി ഹൈവെയ് എന്ന ചിത്രത്തിലൂടെ നല്കാൻ അവർക്ക് കഴിഞ്ഞിട്ടുണ്ടെങ്കിൽ കൂടിയും അന്ധമായ വിമർശനത്തിനുള്ള മറുപടി റാസി എന്ന ചിത്രമാണ്. സിനിമ മേഖലയിലെ തന്റെ പൂർവികരുടെ പേരിനോടൊപ്പം ചേർത്ത് അറിയപ്പെട്ടിരുന്ന അവർ അത് ന്യായീകരിക്കുന്ന പ്രകടനമാണ് ഈ ചിത്രത്തിൽ കാഴ്ചവെച്ചിട്ടുള്ളത് എന്ന് പറയാനാവും.

🔸1971ലെ ഇന്ത്യ പാകിസ്ഥാൻ യുദ്ധകാലം ആണ് ചിത്രത്തിന്റെ കഥാ പശ്ചാത്തലം ,യുദ്ധം രണ്ട് രാജ്യങ്ങൾക്കും സൃഷ്ടിച്ചിരിക്കുന്ന തലവേദന വളരെ വലുതാണ്. ബദ്ധ ശത്രുത പുലർത്തുന്ന അയൽ രാജ്യത്തിനോട് തോൽക്കുന്നത് ,അത് ഏത് വിധേന ആണെങ്കിലും ഒരു തരത്തിലും അംഗീകരിക്കാൻ കഴിയില്ല എന്നതാണ് സേനയുടെ പൊതു വികാരം. എതിരാളികൾക്ക് മേൽ ഏതെങ്കിലും രീതിയിൽ മേൽക്കോയ്മ നേടാൻ കിണഞ്ഞ് ശ്രമിച്ച് കൊണ്ടിരിക്കുമ്പോഴാണ് ഇന്റലിജൻസ് മേധാവിമാരിൽ ഒരാൾക്ക് പുതിയൊരു ആശയം ലഭിക്കുന്നത് ,അത് നിർവഹിക്കാൻ അയാൾ കണ്ടെത്തുന്നത് ഒരു പഴയ കാല സ്വാതന്ത്ര്യ സമര സേനാനിയുടെ മകളെയും.

🔸ഇന്ത്യയുടെ സ്വാതന്ത്ര്യ സമര പോരാട്ടത്തിൽ തങ്ങളുടേതായ പങ്ക് വഹിച്ചവരാണ് ഹിദായത് ഖാനും അയാളുടെ അച്ഛനും. ശാരീരികവും മാനസികവും ആയ പീഡനങ്ങൾ അനവധി സഹിക്കേണ്ടി വന്നെങ്കിലും താൻ കടന്ന് വന്ന വഴികളിലോ ചെയ്തികളിലോ ഒരു തരത്തിലുള്ള പശ്ചാത്താപവും അയാൾക്കില്ല, ചുരുക്കി പറഞ്ഞാൽ തന്റെ ജീവിതം പൂർണമായും രാജ്യത്തിന് അർപ്പിച്ച രാജ്യ സ്‌നേഹി. ഹിദായത് ഖാന്റെ മകളാണ് കാശ്മീരിൽ ജനിച്ച് വളർന്ന ഇപ്പോൾ കോളേജ് വിദ്യാർത്ഥിനി ആയ സെഹ്‌മത് ഖാൻ. തനിക്ക് ജനിച്ചത് മകൾ ആയത് കൊണ്ട് തന്നെ തലമുറകളായി തന്റെ കുടുംബം ചെയ്ത് പോന്ന രാജ്യസേവനം ഇനി തുടരാൻ ആവില്ലല്ലോ എന്ന വിഷമം ഖാനെ അലട്ടുന്നുണ്ട്.

🔸ഇന്റെലിജൻസ് മേധാവികളുടെ പുതിയ ആശയം വളരെ ലളിതവും അതെ സമയം അത്യധികം അപകടം നിറഞ്ഞതും ആയിരുന്നു. തിരഞ്ഞെടുക്കുന്ന പെൺകുട്ടി പാകിസ്ഥാൻ പട്ടാളത്തിൽ ഉന്നത പദവി വഹിക്കുന്ന സേനാനിയുമായി വിവാഹ ബന്ധത്തിൽ ഏർപ്പെടും ,അതിന് ശേഷം സ്വന്തം രാജ്യത്തിനായി ചാരപ്രവർത്തനം നടത്തുകയും ചെയ്യും. പറയാൻ വളരെ എളുപ്പം ആയി തോന്നാമെങ്കിലും അന്യ രാജ്യത്ത് ,അതും ശത്രു രാജ്യത്ത് മറ്റൊരാളുടെയും സഹായം ഇല്ലാതെ ,സംരക്ഷിക്കാൻ ഒരാളും ഇല്ലാതെ ,ആ രാജ്യത്തെ ഉന്നത സേനാധിപന്റെ മുന്നേറ്റങ്ങൾ സംബന്ധമായ രഹസ്യ വിവരങ്ങൾ ചോർത്തി സ്വന്തം രാജ്യത്തേക്ക് കടത്തി കൊടുക്കുക എന്നത് മരണം ചോദിച്ച് വാങ്ങുന്നതിന് തുല്യം തന്നെ ആണ്. ശ്രദ്ധ ഒന്ന് മാറിയാൽ ,ചെറിയ പിഴവ് സംഭവിച്ചാൽ പിന്നെ പുറം ലോകം കണ്ടെന്ന് വരില്ല.

🔸യഥാർത്ഥ സംഭവങ്ങൾ ആധാരമാക്കി സ്‌ക്രീനിൽ എത്തിയ ചിത്രം ആയ റാസി സ്ഥിരം സ്പൈ ത്രില്ലർ ചിത്രങ്ങളുടെ ആക്ഷൻ ഘടന സ്വീകരിക്കാതെ കേന്ദ്ര കഥാപാത്രത്തെ ഏറെക്കുറെ പൂർണമായി തന്നെ വൈകാരികമായി സമീപിക്കുകയാണ് ,അതിനാൽ തന്നെ സ്പൈ ത്രില്ലർ എന്ന ചിത്രം പ്രൊമോട്ട് ചെയ്ത ലേബൽ ഒന്ന് മാത്രം കേട്ട് ചിത്രം കാണാൻ തയാറാവുന്നവർ നിരാശരായേക്കാം. ചില ഇടങ്ങളിലെ കഥാപാത്രങ്ങളുടെ പ്രകടനവും ,അവർ കൈക്കൊള്ളുന്ന തീരുമാനങ്ങളും സമ്മർദ്ദങ്ങളുടെ പരിണിത ഫലം എന്ന പേരിൽ ഒഴിവാക്കിയാൽ ഒരു തവണ നല്ല രീതിയിൽ തന്നെ കണ്ട് ഒഴിവാക്കാൻ കഴിയുന്ന ചിത്രമാണ് റാസി.

Verdict : Good

379. Anubhavangal Palichakal (1971)

Director : K.S Sethumadhavan

Genre : Drama

Rating : 8.1/10

Country : India

Duration : 128 Minutes


🔸സിനിമ അന്ത്യഘട്ടത്തിലേക്ക് കടന്ന് കൊണ്ടിരിക്കുകയാണ് ,സത്യൻ മാഷ് അഭിനയിച്ച ചെല്ലപ്പൻ എന്ന കഥാപാത്രത്തെ പോലീസ് അറസ്റ്റ് ചെയ്ത് കൊണ്ട് പോവുന്ന രംഗമാണ് ഷൂട്ട് ചെയ്യുന്നത്. വല്ലാത്തൊരു തരം വൈകാരികമായ അവസ്ഥയാണ് ഷൂട്ടിങ് സ്ഥലത്ത് മുഴുവൻ ,ചെല്ലപ്പനെയും വഹിച്ച് കൊണ്ട് വണ്ടി ദൂരേക്ക് നീങ്ങുന്നതും ,ഷീല അവതരിപ്പിച്ച നായികാ കഥാപാത്രം പിറകെ ഓടുന്നതും പ്രേം നസീർ അവരെ തടയുന്നതുമാണ് രംഗത്തിന്റെ ചുരുക്കം. അഭിനയിക്കുന്ന ഓരോ നടീ നടന്മാരും അത്യധികം വിഷമത്തോടെ ആണ് തങ്ങളുടെ ഭാഗങ്ങൾ അവതരിപ്പിക്കുന്നത് ,കാരണം സത്യൻ എന്ന അതുല്യ നടൻ ക്യാൻസർ എന്ന മാരക രോഗത്തിന് മുന്നിൽ തോൽവി സമ്മതിച്ച് കഴിഞ്ഞിരുന്നു, വണ്ടിയിൽ ഉണ്ടായിരുന്നത് അദ്ദേഹത്തോട് രൂപ സാദൃശ്യം ഉള്ള മറ്റൊരു നടൻ ആയിരുന്നു.

🔸അവസാന രംഗത്തിലെ വിവരണം ഏറെക്കുറെ ആറം പറ്റിയത് പോലെ സത്യൻ എന്ന നടൻ സഹപ്രവർത്തകരിൽ നിന്നും ആരാധകരിൽ നിന്നും സിനിമയിൽ നിന്നും അകന്ന് പോവുകയായിരുന്നു ഈ ചിത്രത്തിലൂടെ. അകാലത്തിൽ പൊലിഞ്ഞു പോയ പ്രതിഭ എന്നത് നൂറ് ശതമാനം യോജ്യമാവുന്നത് അദ്ദേഹത്തിന്റെ കാര്യത്തിലായിരിക്കും. സത്യൻ മാഷിന്റെ അവസാന ചിത്രം എന്ന നിലയിലാണ് പ്രശസ്തമായത് എങ്കിൽ കൂടിയും ,അതിനുള്ള അർഹത ഈ ചിത്രത്തിന് ഉണ്ടെന്ന കാര്യത്തിൽ തർക്കത്തിന് ഇടയില്ല. തകഴിയുടെ നോവലും ,തോപ്പിൽ ഭാസിയുടെ തിരക്കഥയും ,സംവിധായകനായി അമരത്ത് സേതുമാധവൻ സാറും ഉള്ള സിനിമ അങ്ങനെ ആയില്ലെങ്കിലേ അത്ഭുതമുള്ളൂ.

🔸അൻപതുകളിലെ കേരളം ആണ് ചിത്രത്തിന്റെ പശ്ചാത്തലം , തൊഴിൽ മേഖലകളിൽ എല്ലാം കമ്മ്യുണിസ്റ്റ് മുന്നേറ്റങ്ങൾ ശക്തിപ്പെട്ട് വരികയാണ്. കാലങ്ങളായി തങ്ങളെ അടിച്ചമർത്തികൊണ്ടിരുന്ന മുതലാളി വർഗത്തിനെതിരെ തൊഴിലാളികൾ ശബ്ദം ഉയർത്തി തുടങ്ങിയിരിക്കുന്നു. ഇതേ പാതയിലാണ് പുന്നപ്ര വയലാർ പ്രദേശത്തെ ചാക്കോ മാപ്പിളയുടെ കീഴിലുള്ള തൊഴിലാളികളും. അവരെ മുന്നിൽ നിന്ന് നയിക്കുന്നത് തൊഴിലാളി നേതാവായ ചെല്ലപ്പൻ ആണ്. തങ്ങളുടെ ആവശ്യങ്ങൾക്ക് വേണ്ടി നിലകൊള്ളുന്ന ,മുതലാളിയെ വരെ ചോദ്യം ചെയ്യുന്ന ചെല്ലപ്പന് ഒരു വീര പരിവേഷമാണ് തൊഴിലാളികൾക്കിടയിൽ.

🔸ഇങ്ങനെ ഒക്കെ ആണെങ്കിലും വ്യക്തി ജീവിതത്തിൽ വലിയൊരു പരാജയമാണ് ചെല്ലപ്പൻ. ഭാര്യ ഭവാനിയും രണ്ട് മക്കളും ഉൾപ്പെടുന്നതാണ് ചെല്ലപ്പന്റെ കുടുംബം, തന്റെ ഭാര്യയ്ക്ക് മറ്റ് പുരുഷന്മാരുമായി അരുതാത്ത ബന്ധം ഉണ്ടെന്ന് ചെല്ലപ്പൻ ഉറച്ച് വിശ്വസിക്കുന്നുണ്ട് ,എന്തിനധികം മകനെന്ന് അവൾ പറയുന്ന വിത്ത് തന്റേതാണോ എന്ന് പോലും അയാൾക്ക് ഉറപ്പില്ല. ഭവാനിയെ വേദനിപ്പിക്കുന്നതും ,മറ്റ്‌ സ്ത്രീകളുമായി ശൃംഗേരിക്കുന്നതും ഒക്കെയാണ് ചെല്ലപ്പന്റെ നേരം പോക്കുകൾ. ഭാര്യയുടെമേൽ ഉള്ള സംശയം കാരണം അടുത്ത സുഹൃത്തായ ഗോപാലനെ പോലും ചെല്ലപ്പൻ വീട്ടിലേക്ക് അടുപ്പിക്കാറില്ല.

🔸ഇങ്ങനെ അല്ലറ ചില്ലറ പ്രശ്നങ്ങളുമായി പോയി കൊണ്ടിരുന്ന ചെല്ലപ്പന്റെയും അയാളുടെ ചുറ്റും ഉള്ളവരുടെയും ജീവിതങ്ങൾ മാറി മറയുന്നത് അയാൾക്ക് തന്റെ ജോലി ഒരുനാൾ നഷ്ടപ്പെടുമ്പോഴാണ്. തുടർന്ന് അരങ്ങേറുന്ന സംഭവങ്ങൾ ചിത്രം കണ്ട് തന്നെ അറിയുക ,ആദ്യ രംഗം തൊട്ട് അവസാന രംഗം വരെ അസാധ്യം എന്നതിൽ കവിഞ്ഞ് മറ്റൊരു വാക്കിനാലും വിശേഷിപ്പിക്കാനാവില്ല സത്യൻ മാഷിന്റെ അഭിനയത്തെ. പ്രേം നസീറിനോടൊപ്പം ഉള്ള കള്ള് ഷാപ്പിലെ രംഗങ്ങളും അതിന് ശേഷം ഉള്ള സംഭാഷണങ്ങളും എല്ലാം ഇതിന് ഉത്തമ ഉദാഹരണങ്ങൾ തന്നെയാണ് ,ചിത്രം കാണാൻ ഇത്രയും വൈകിയതിൽ മാത്രമാണ് നിരാശ. ചിത്രത്തിന്റെ രണ്ടാം പകുതിയിൽ ശ്രദ്ധയോടെ വീക്ഷിക്കുക ആണെങ്കിൽ ബഹദൂറിനൊപ്പം ഒരിടത്ത് നടൻ മമ്മൂട്ടിയെയും കാണാനാവും. ഒരു അതുല്യ നടന്റെ അവസാന ചിത്രം മറ്റൊരു മികച്ച നടന്റെ ആദ്യ ചിത്രമായത് നിമിത്തമാവും.

Verdict : Must Watch

378. Will You Be There (2016)

Director : Hong Ji Young

Genre : Fantasy

Rating : 7/10

Country : Korea

Duration : 110 Minutes


🔸ഒരു വ്യക്തിയുടെ ,അയാൾ ആരുമായി കൊള്ളട്ടെ ഭൂതകാലം എന്നത് എഴുതി കഴിഞ്ഞ പുസ്തകമാണ് അല്ലെങ്കിൽ അങ്ങനെയാണ് നമ്മൾ വിശ്വസിച്ചിരിക്കുന്നത്. അതായത് സംഭവിച്ച കാര്യങ്ങളുമായി പൊരുത്തക്കേടുകൾ ഉണ്ടെങ്കിലും അവ അംഗീകരിക്കാൻ നമ്മെ നിർബന്ധിതരാക്കുന്ന ,ഒരു മാറ്റം എന്നതിനെ വെറും സ്വപ്നം മാത്രമായി നിലനിർത്തുന്ന ,യാഥാർഥ്യങ്ങളും ആഗ്രഹങ്ങളും തമ്മിലുള്ള അതിർ വരമ്പുകൾ വളരെ കൃത്യമായി സൂക്ഷിക്കുന്ന ഒരു തരം കണക്ക് പുസ്തകമാണ് ഏതൊരാളുടെയും ഭൂതകാലം. ഒരവസരം ലഭിച്ചാൽ ഈ കണക്ക് പുസ്തകം മാറ്റി എഴുതാൻ ഇഷ്ട്ടപ്പെടുന്നവരാവും ഞാനടക്കം മിക്കവരും ,ഈ ഒരവസരത്തിനെ പറ്റിയാണ് ഈ ചിത്രം.

🔸പത്ത് അവസരങ്ങൾ ,തന്റെ ഭൂതകാല ചരിത്രം മാറ്റി മറിക്കാൻ കേന്ദ്ര കഥാപാത്രം ആയ സൂഹ്യോണ് ലഭിക്കുന്നത് പത്ത് അവസരങ്ങളാണ്. തന്റെ ജീവിതത്തിൽ നിരാശയും പശ്ചാത്താപവും ഉളവാക്കുന്ന ഒരുപാട് സംഭവങ്ങളിലൂടെ കടന്ന് വന്ന വ്യക്തിത്വമാണ് സൂഹ്യോൻ, അതിനാൽ തന്നെ അയാളെ സംബന്ധിച്ചിടത്തോളം വലിയൊരു രക്ഷപ്പെടൽ തന്നെയാണ് ഈ സിദ്ധി. സിനിമ ആരംഭിക്കുന്നത് ഇന്നത്തെ കാലത്ത് തന്നെയാണ് ,ഒട്ടും ആശാവഹമല്ല കഥാനായകൻ ആയ സൂഹ്‌യോണിന്റെ ഇന്നത്തെ അവസ്ഥ. ഡോക്ടറായ ടിയാൻ കാൻസർ കാരണം ജീവിതത്തിൽ വല്ലാതെ ബുദ്ധിമുട്ടി കൊണ്ടിരിക്കുകയാണ് ഇന്ന്.

🔸തന്റെ ജീവിതം കൈവിട്ട് പോയി എന്ന യാഥാർഥ്യവുമായി സൂഹ്യോൻ ഏറെക്കുറെ പൊരുത്തപ്പെട്ട് വരികയാണ് ,പക്ഷെ ഒന്നാലോചിച്ചപ്പോഴാണ് അയാൾക്ക് ബോധ്യമായത് ,തന്റെ ജീവിതം നിലയില്ലാ കയത്തിലേക്ക് വീണുപോയിട്ട് പതിറ്റാണ്ടുകൾ കഴിഞ്ഞ് പോയിരിക്കുന്നു. ഏതൊക്കെയോ ചരടിൽ ആരുടെയൊക്കെയോ ഇങ്കിതത്തിനൊത്ത് ആടി കൊണ്ടിരിക്കുന്ന വെറുമൊരു പാവ മാത്രമായിരുന്നു താൻ ഇത്രയും കാലം എന്ന തിരിച്ചറിവ് അയാളിൽ എത്തിയ നിമിഷമാണ് മേൽ സൂചിപ്പിച്ച അത്ഭുതാവഹമായ സംഭവം അരങ്ങേറുന്നത്.

🔸തന്റെ സഹായം കൈപ്പറ്റിയ ആളുകളിൽ ഒന്ന് നൽകിയ സമ്മാനം ആയിരുന്നു സുവർണ നിറത്തിലുള്ള ആ പില്ലുകൾ. അവയിൽ ഒന്ന് ഉപയോഗിക്കുകയാണെങ്കിൽ സൂഹയോണിന് തന്റെ ഭൂതകാലത്തേക്ക് കടന്ന് ചെല്ലാൻ കഴിയും ,അധികമൊന്നും ആലോചിക്കാതെ അവയിൽ ഒന്ന് ഉപയോഗിച്ച സൂഹ്യോൻ ചെന്ന് പെടുന്നത് മുപ്പത് വർഷങ്ങൾക്ക് മുൻപെയാണ് ,അതും ചെറുപ്പക്കാരനായ സൂഹയോണിന്റെ മുന്നിലേക്ക്. രണ്ട് വ്യത്യസ്ത കാലഘട്ടത്തിലെ ഒരേ വ്യക്തികൾ അവിടെ വെച്ച് കണ്ടുമുട്ടുക ആയിരുന്നു.

🔸മുപ്പത് വർഷങ്ങൾക്ക് മുന്നേയുള്ള തന്റെ ജീവിതത്തിലേക്ക് മടങ്ങി എത്തിയ സൂഹയോണിന് വ്യക്തമായി അറിയാം ,ഇനി സംഭവിക്കാൻ പോവുന്ന ഓരോ കാര്യങ്ങളും. താൻ നേരിടാൻ പോവുന്ന നഷ്ടങ്ങളും അവ തന്നിൽ വരുത്താൻ പോവുന്ന മാറ്റങ്ങളും എല്ലാം അയാൾക്ക് നന്നായി അറിയാം. എന്നാലും ചില ശ്രമങ്ങൾ നടത്താൻ അയാൾ തയ്യാറാവുകയാണ് ,ഭാവിയെ പൂർണമായും തല കീഴായി മറിക്കാതെ ,ചെയ്യാൻ കഴിയാതെ പോയ ചില കാര്യങ്ങൾ തന്നെക്കൊണ്ട് സാധിച്ചു എന്ന ചാരിതാർഥ്യം മാത്രം മനസ്സിൽ നേടാനായുള്ള ചില ശ്രമങ്ങൾ. വളരെ വ്യത്യസ്തമായ പ്രമേയവുമായി പ്രേക്ഷകന് മുന്നിലെത്തുന്ന ഈ ചിത്രം ഒരു പുതിയ അനുഭവം ആവും എന്ന കാര്യം ഉറപ്പ് ,രണ്ട് മണിക്കൂറോളം മറ്റൊന്നും ചിന്തിക്കാതെ കണ്ട് ആസ്വദിക്കാൻ കഴിയുന്ന നല്ലൊരു ചിത്രം തന്നെയാണ് വിൽ യു ബി ദേർ.

Verdict : Good

377. How Much Further (2006)

Director : Tania Hermida

Genre : Journey

Rating : 7.1/10

Country : Ecuador

Duration : 88 Minutes


🔸ക്വിറ്റോയിൽ നിന്നും 440 കിലോമീറ്റർ അകലെ സ്ഥിതി ചെയ്യുന്ന കുയെങ്ക എന്ന പട്ടണത്തിലേക്ക് യാത്ര ആരംഭിക്കുകയാണ് ആ ബസും അതിലെ യാത്രക്കാരും. ബസിലെ മിക്കവരും വിനോദ സഞ്ചാരികൾ ആണ്, ഇക്വഡോറിലെ ഏറ്റവും മനോഹരമായ കാഴ്ചകളിൽ പലതും ഈ ബസ് യാത്രയിൽ വീക്ഷിക്കാനാവുമത്രെ. അഗ്നി പർവ്വതങ്ങളും ,പുഴയോരങ്ങളും ,താഴ്വരകളും എല്ലാമുള്ള ഒരു മനോഹര യാത്രയുടെ തുടക്കത്തിലാണ് എല്ലാവരും. അതിന്റെ പ്രസരിപ്പും ഊർജ്ജസ്വലതയും എല്ലാം യാത്രികരുടെ മുഖത്ത് കാണാം. ബസിലെ പതിനഞ്ചാം നമ്പർ സീറ്റിൽ നമ്മുടെ പ്രധാന കഥാപാത്രങ്ങളായ ട്രിസ്റ്റിസായും ,എസ്പെരൻസായും ഉണ്ട്. ഈ യാത്രയിലൂടെ കാഴ്ചക്കാർ അറിയാൻ പോവുന്നത് അവരുടെ ജീവിതങ്ങളാണ്.

🔸കൂട്ടത്തിൽ മുതിർന്നവളായ എസ്പെരൻസാ സ്പെയിൻ കാരിയാണ്, ഡോക്ടറായ അച്ഛന്റെയും ടെലിഫോൺ ഡിപ്പാർട്മെന്റിൽ ജോലിക്കാരിയായ അമ്മയുടെയും ഒരേയൊരു മകൾ. യാത്രയും പുതിയ അനുഭവങ്ങളും തേടിയുള്ള അവളുടെ അന്വേഷണങ്ങളാണ് ഇക്വഡോറിലും ,അവിടെ നിന്ന് ക്വിറ്റോയിലും എത്തിച്ചത്. എക്വഡോറിയൻ ഭാഷയിൽ പ്രതീക്ഷ എന്നർത്ഥം വരുന്ന പേരിനുടമയായ എസ്പെരൻസാ ,ഏറെക്കുറെ ചിത്രത്തിൽ പ്രതീക്ഷയുടെ പ്രതീകം തന്നെയാണ്. തനിക്ക് ചുറ്റും ഉള്ള സഹജീവികളോട് അനുഭാവം പ്രകടിപ്പിക്കുന്ന എന്നാൽ അമിതമായ ഉൽക്കണ്ഠ കാണിക്കാത്ത ഒരാളാണ് എസ്പെരൻസാ.

🔸എസ്പെരൻസയുടെ സഹ യാത്രിക ആയ ട്രിസ്റ്റെസാ തീർത്തും വ്യത്യസ്തയായ സ്വഭാവക്കാരിയാണ്. അധികം പെട്ടെന്നൊന്നും ആരുമായും അടുക്കാത്ത ,തന്റേതായ ലോകത്തും അതിന്റെ നാല് ചുവരുകൾക്കും ഇടയിൽ ജീവിക്കാനാണ് അവൾക്ക് താല്പര്യം. മറ്റുള്ളവരുമായി പരിധിയിൽ കടന്ന് ഇടപഴകുന്നതിലോ ,അവരുമായി തന്റെ സ്വകാര്യതകൾ പങ്ക് വെക്കുന്നതിലോ അവൾക്ക് യാതൊരു താല്പര്യവുമില്ല. ഇതെല്ലാം ആരോ മുൻകൂട്ടി കണ്ടിട്ടാവണം വിഷാദി എന്നർത്ഥം വരുന്ന ട്രിസ്റ്റെസ എന്ന പേര് അവൾക്ക് നൽകിയത്. ഏറെക്കുറെ ഒരു വിഷാദ അവസ്ഥയിലൂടെയാണ് ഈ കഥാപാത്രം കടന്ന് പോവുന്നതും.

🔸കുയെങ്ക എന്ന പട്ടണത്തിലേക്ക് യാത്ര തിരിക്കാൻ എസ്പെരൻസയുടെ കാരണം അവധിക്കാലം ആഘോഷിക്കുക എന്നതാണെങ്കിൽ ട്രിസ്റ്റെസായുടെത് കുറച്ച് കൂടി വ്യക്തിപരവും ,വൈകാരികവും ആണ്. രണ്ട് ദിവസം കഴിഞ്ഞാൽ അവളുടെ കാമുകൻ ഡാനിയേലിന്റെ കല്യാണം ആണ്. തനിക്ക് ജീവിതത്തിൽ എന്തെല്ലാമോ ആയിരുന്ന ഡാനിയേൽ ഒരു വാക്ക് പോലും പറയാതെ തന്നെ അറിയിക്കാതെ മറ്റൊരു കല്യാണത്തിന് സമ്മതം മൂളിയത് അവളെ വല്ലാതെ ചൊടിപ്പിച്ചിട്ടുണ്ട് ,എന്നാലും വിട്ടുകൊടുക്കാൻ അവൾ തയാറല്ലായിരുന്നു. കുയെങ്കയിലേക്ക് ലഭിച്ച അടുത്ത വണ്ടിയിൽ ട്രിസ്റ്റെസ തന്റെ യാത്ര ആരംഭിക്കുകയാണ് ,അവിടെ നിന്നാണ് അവൾ എസ്പെരൻസായെ പരിചയപ്പെടുന്നതും.

🔸യാത്ര ആരംഭിച്ച ഇരുവരെയും തേടി തടസ്സങ്ങൾ ഓരോന്നായി എത്തി തുടങ്ങുകയാണ്. കുയെങ്കയിലേക്കുള്ള വഴി കാന്യരോ എന്ന സ്ഥലത്ത് ചില വിപ്ലവ പ്രവർത്തകർ സമരം പ്രഖ്യാപിച്ചിരിക്കുകയാണ് ,സർക്കാരിന്റെ ചില ജനദ്രോഹ നടപടികൾ പിൻവലിക്കുന്നത് വരെ വാഹനങ്ങൾ ഒന്നും തന്നെ കടത്തിവിടേണ്ടതില്ല എന്നതാണ് അവരുടെ തീരുമാനം ,ഇനി ദിവസങ്ങൾ കഴിഞ്ഞാലും ശെരി. ഡാനിയേലിനെ കാണാൻ കല്യാണത്തിന് മുൻപ് രണ്ട് ദിവസങ്ങൾ മാത്രമുള്ള ട്രിസ്റ്റെസ തന്റെ യാത്ര തുടരാൻ തന്നെ തീരുമാനിക്കുകയാണ് ,നടന്നിട്ടാണെങ്കിൽ അങ്ങനെ ,അതല്ല വേറെ വാഹനങ്ങളിൽ കയറിപ്പറ്റി ആണെങ്കിൽ അങ്ങനെ. അവളുടെ കൂടെ എസ്പെരൻസായും ഇറങ്ങി തിരിക്കുമ്പോൾ ആരംഭിക്കുന്നത് മറ്റൊരു മികച്ച റോഡ് മൂവി കൂടിയാണ്.

Verdict : Very Good

376. Johnny Got His Gun (1971)

Director : Dalton Trumbo

Genre : War

Rating : 7.9/10

Country : USA

Duration : 110 Minutes


🔸ജോണിക്ക് കാഴ്ച ശക്തി ഇല്ല ,കേൾവി ശക്തി ഇല്ല ,സംസാരിക്കാനുള്ള കഴിവ് ഇല്ല ,മണത്തറിയാൻ പോലും കഴിയില്ല. ഇതൊന്നും പോരെങ്കിൽ കയ്യും കാലും ഒന്നും തന്നെയില്ല. ഇതൊരു മനുഷ്യൻ ആയിരുന്നു എന്ന് അപരിചിതനായ ഒരു വ്യക്തിക്ക് ചൂണ്ടി കാണിച്ച് കൊടുത്താൽ അയാൾ പോലും സംശയത്തോടെ മാത്രമേ പ്രതികരിക്കൂ ,അതിന് അയാളെ കുറ്റം പറയാനും കഴിയില്ല ,കാരണം ജോണി എന്ന ഒരു കാലത്ത് മജ്ജയോടും മാംസത്തോടും കൂടി ഈ ലോകത്ത് ചിരിച്ച് കളിച്ച് ജീവിച്ച് നടന്നവൻ ഇന്ന് വെറുമൊരു മാംസ പിണ്ഡം മാത്രമാണ്. ആശുപത്രിക്കിടക്കയിൽ പ്രതീക്ഷകൾ ഒന്നും തന്നെ ബാക്കിയില്ലാതെ മരണത്തെ മാത്രം പ്രതീക്ഷിച്ച് അയാൾ കിടപ്പ് തുടരുകയാണ്.

🔸ചിത്രം ആരംഭിച്ചത് മുതൽ സ്‌ക്രീനിൽ തെറ്റുകളൊന്നും ചെയ്യാതെ ,വില്ലനിസമോ ,ഭീകരതയോ ഒന്നും പ്രവർത്തികമാക്കാതെ ഒരു കഥാപാത്രത്തിന്റെ മരണത്തിന് വേണ്ടി അഗാധമായി ആഗ്രഹിച്ചിട്ടുണ്ടെങ്കിൽ അത് ഈ ചിത്രത്തിലെ ടൈറ്റിൽ കഥാപാത്രമായ ജോണിയുടെ മരണത്തിന് വേണ്ടിയാണ്. രണ്ട് മണിക്കൂർ ദൈർഖ്യമുള്ള ചിത്രത്തിൽ ഒരു ആയുഷ്കാലം മുഴുവൻ നിറഞ്ഞ് നിൽക്കുന്ന വേദന പ്രകടിപ്പിച്ച ജോണി മരണം അർഹിച്ചിരുന്നു ,എല്ലാ രീതിയിലും. മരണം എന്നത് അയാളെ സംബന്ധിച്ചിടത്തോളം ഒരു ഫുൾ സ്റ്റോപ്പിനോ അവസാനത്തിനോ അപ്പുറം രക്ഷപ്പെടൽ തന്നെയാണ്.

🔸ജോണിയുടെ കഥ ആരംഭിക്കുന്നത് ഒന്നാം ലോക മഹായുദ്ധത്തിന് മുന്നേ ആണ്, ഓർമ ഉറക്കുന്നതിന് മുന്നേ വിട്ട് പിരിഞ്ഞ അച്ഛന്റെ അസാന്നിധ്യത്തിൽ കുടുംബത്തിന് വേണ്ടി കഷ്ടപ്പെടുന്ന അമ്മയെയും സഹോദരിയെയും സഹായിക്കുന്നതിന് വേണ്ടി ചെറു പ്രായത്തിലെ ബേക്കറിയിൽ ജോലിക്ക് കയറിയതാണ് ജോണി. പണത്തിന് ഞെരുക്കം ഉണ്ടെങ്കിലും കുടുംബം ആണ് ജോണിയുടെ ഏറ്റവും വലിയ സ്വത്ത് ,അധികമാരും അറിയാതെ മനസ്സിൽ സൂക്ഷിക്കുന്ന ഒരു പ്രണയവും ഉണ്ട് ജോണിക്ക്. ഒന്നാം ലോക മഹായുദ്ധകാലത്ത് ഏതൊരു ചെറുപ്പക്കാരനെയും പോലെ രാജ്യസേവനം മാത്രം മുന്നിൽ കണ്ട് കൊണ്ടാണ് ജോണി യുദ്ധമുഖത്തേക്ക് എത്തുന്നത്.

🔸ശാരീരിക മാനസിക പീഡനങ്ങളും ,ഒരു ജന്മം മുഴുവൻ മറക്കാൻ കഴിയാത്ത ,തന്റെ മനസ്സിനെ വേട്ടയാടാൻ പോവുന്ന കാഴ്ചകൾ ജോണി ഈ കാലയളവിൽ കണ്ടുതീർത്തു. യുദ്ധം ഏറെക്കുറെ അവസാനിക്കാറായ സന്ദർഭത്തിലാണ് ജീവിതം ഒന്നടങ്കം കൈവിട്ട് പോവാൻ ഇടയാക്കിയ ആ സംഭവം അരങ്ങേറുന്നത്. തന്റെ കൃത്യങ്ങളുമായി തിരക്കിൽ ആയിരുന്ന ജോണിക്ക് അടുത്ത് ഒരു ഷെൽ വന്ന് വീണത് മാത്രമേ ഓർമയുള്ളൂ, തിരിച്ചറിവ് ലഭിക്കുമ്പോൾ അയാൾ എല്ലാം നഷ്ട്ടപ്പെട്ട അവസ്ഥയിൽ ആശുപത്രി കിടക്കയിലാണ്. എല്ലാമെല്ലാം പിടിച്ചെടുത്ത് കളഞ്ഞ ദൈവം ജോണിയിൽ ബാക്കി വെച്ചതും അത് തന്നെ ആയിരുന്നു ,തിരിച്ചറിവ് എന്ന ശാപം.

🔸ജോണിക്ക് താൻ ആരാണെന്നും ,എങ്ങനെ ഇവിടെ എത്തി എന്നും ,തന്റെ അവസ്ഥ എന്താണെന്നും ,നേരിട്ട നഷ്ടങ്ങൾ എന്താണെന്നും വ്യക്തമായി അറിയാം. അതിനെല്ലാം പുറമെ അപകടകരമായ മറ്റൊന്ന് കൂടി അയാളിൽ ബാക്കിയുണ്ട് ,ഓർമകൾ. തന്റെ ഭൂതകാലത്തെ സംഭവങ്ങളും ,അതിൽ ഭാഗം ആയവരെയും എല്ലാം ജോണിക്ക് ഓർമയുണ്ട്, ആ ഓർമകൾ തന്നെയാണ് അയാളെ വേട്ടയാടുന്നതും. ഇനി ഒരു തിരിച്ചുവരവ് തന്റെ ജീവിതത്തിലില്ല എന്ന് അറിയാവുന്ന അയാൾ ആഗ്രഹിക്കുന്നത് മരണം മാത്രമാണ് ,അത് മറ്റുള്ളവരെ അറിയിക്കാനുള്ള കഴിവ് പോലും അയാൾക്കിന്നില്ല. കണ്ടിരിക്കാൻ ബുദ്ധിമുട്ടുള്ള പ്രമേയവും ,കാഴ്ചക്കാരനിൽ വിഷാദം ഉളവാക്കുന്ന അവതരണവും ആണ് ഈ ചിത്രത്തെ മാറ്റി നിർത്തുന്നത്. മരണം എന്നത് ഇത്രയ്ക്ക് കടുപ്പമേറിയ കാര്യമാണോ എന്നതാവും കണ്ടവസാനിപ്പിക്കുന്ന ഏവരുടെയും മനസ്സിൽ ഉടലെടുക്കുന്ന ചോദ്യവും.

Verdict : Very Good

375. Scandal Makers (2008)

Director : Kang Hyeong Chol

Genre : Comedy

Rating : 7.3/10

Country : Korea

Duration : 108 Minutes


🔸"ഇതിപ്പോ എത്ര ആലോചിച്ചിട്ടും കണക്കുകൾ ഒന്നും ശെരിയാവുന്നില്ലല്ലോ, എന്റെ പ്രായം ഇന്നും മുപ്പതുകളിലാണ് ,ഒരു കുടുംബത്തെ കുറിച്ചൊക്കെ പൊതുവെ എല്ലാവരും ചിന്തിച്ച് ഒരു ധാരണയിൽ ഒക്കെ എത്തി കഴിയുന്ന സമയം. താൻ കുറച്ച് വൈകിപ്പോയി ,എന്നാലും ഈ ജീവിതം ഇഷ്ടപ്പെട്ട് വരികയായിരുന്നു. അപ്പോഴാണ് അവൾ കടന്ന് വന്നത്, അതും താനാണ് അവളുടെ തന്ത എന്ന അവകാശവാദവും ആയിട്ട്. അവളുടെ കൂടെ ആണെങ്കിൽ ഒരു കുട്ടിയുമുണ്ട് ,അവളുടെ കൊച്ചാണത്രെ. അപ്പൊ ഈ പ്രായത്തിൽ ഞാൻ ഒരു കുട്ടിയുടെ അപ്പൂപ്പൻ ആയോ ? ഇതൊക്കെ എപ്പോ സംഭവിച്ചു ?. അവൾ പറയുന്ന കഥയൊന്നും തനിക്ക് ഓർമ പോലുമില്ല." ഇങ്ങനെ ഒരുപാട് ചോദ്യങ്ങളുടെ ഒത്ത നടുക്കാണ് കഥാ നായകൻ ആയ നാം ഹ്യുൻസോ.

🔸പ്രശസ്തിയുടെ പടവുകൾ വളരെ ചെറിയ പ്രായത്തിലെ തന്നെ കയറിയ ആളാണ് ഹ്യുൻസോ. രാജ്യത്തെ യുവാക്കളുടെയും ,ഒരു പരിധി വരെ എല്ലാവരുടെയും ആരാധനാ പാത്രം ആയിരുന്ന ടീനേജ് സെൻസേഷൻ ആയിരുന്നു കുറച്ച് വർഷങ്ങൾക്ക് മുന്നേ വരെ അയാൾ. ഇന്ന് ആളും ആരവങ്ങളും എല്ലാം ഒഴിഞ്ഞ് പോയിരിക്കുന്നു ,ആഘോഷങ്ങളോ ബഹളങ്ങളോ ഇല്ലാത്ത സാധാരണക്കാരന്റെ ജീവിതവുമായി ഹ്യുൻസോ പൊരുത്തപ്പെട്ട് കഴിഞ്ഞിട്ടുണ്ട്. ഒരു പ്രാദേശിക റേഡിയോ ചാനൽ ജോക്കി ആയാണ് ഹ്യുൻസോ ഇന്ന് ജീവിക്കാനുള്ള വക കണ്ടെത്തുന്നത് ,അടുപ്പക്കാരോ ബന്ധുക്കളോ ആയി അയാൾക്ക് അധികമാരുമില്ല.

🔸ഏതൊരു ദിവസവും പോലെ അന്നും നാട്ടുകാരുടെ പ്രശ്നങ്ങൾ കേട്ടും അവർക്ക് ആവശ്യമായ മറുപടികൾ നൽകിയും പാട്ട് പാടിയും തമാശ പറഞ്ഞും ഒക്കെ തിരക്കിൽ ആയിരുന്നു ഹ്യുൻസോ ,ഹ്യാങ് ജിയോങ്ങിന്റെ കോൾ റേഡിയോ സ്റ്റേഷനിൽ ഹ്യുൻസോയെ തേടി എത്തിയപ്പോൾ അയാൾക്ക് അസ്വാഭാവികമായി ഒന്നും തോന്നിയില്ല എന്നതാണ് സത്യം. അവൾക്ക് അയാളോടും ലോകത്തോടും പറയാനുണ്ടായിരുന്നത് ഒരു അന്വേഷണത്തിന്റെ കഥയാണ് ,പാറക്കമറ്റാത്ത പ്രായത്തിൽ ഒരു കുഞ്ഞിനേയും കൊണ്ട് പ്രാരാബ്ധങ്ങളുടെ നടുക്കടലിൽ വീണ അവളുടെ തന്നെ കഥ.

🔸പക്ഷെ ഹ്യാങ് ജിയാങ്ങിന്റെ ഈ വരവിന്റെ ഉദ്ദേശം മറ്റൊന്നാണ് ,തന്റെ അമ്മയുടെ വാക്കുകളിൽ മാത്രം കേട്ട് പരിചയിച്ച അച്ഛനെ കണ്ടെത്തുക എന്നതാണ് അവളുടെ ലക്ഷ്യം. അതാരാണെന്ന് അവൾക്ക് അറിയാം ,എവിടെയാണെന്നും. കഥ കേട്ട് കഴിഞ്ഞ ഹ്യുൻസോ ഹ്യാങ് ജിയോക്ക് പകരുന്നത് ധൈര്യം മാത്രമല്ല ,പ്രചോദനം കൂടിയാണ്. ഇതുവരെ കണ്ടിട്ടില്ലാത്ത അച്ഛനെ കാണാനായി അയാളുടെ അടുത്തേക്ക് കടന്ന് ചെല്ലാൻ പ്രേരിപ്പിക്കുന്ന ഹ്യുൻസോ, അയാൾ അവളെ ഇരു കയ്യും നീട്ടി സ്വീകരിക്കും എന്ന പ്രത്യാശയും പകരുകയാണ്. പിന്നീട് ഹ്യുൻസോ കാണുന്നത് ഒരു കുട്ടിയും ,അത്യാവശ്യം സാധന സാമഗ്രികളുമായി വീട്ടുപടിക്കൽ നിൽക്കുന്ന ഹ്യാങ് ജിയോയെ ആണ്.

🔸തന്റെ ബോധം തിരികെ കിട്ടാൻ ഒരല്പം സമയം ആവശ്യപ്പെട്ട ഹ്യുൻസോയ്ക്ക് ഓർമയിൽ എവിടെയും ഇങ്ങനെയൊരു അനന്തരാവകാശി തനിക്കുള്ളതായി അറിവില്ല എന്നതായിരുന്നു സത്യം. തന്റെ ജീവിതവും ജോലിയും സമൂഹത്തിലെ സ്ഥാനവും ഉൾപ്പെടെ സകലതും തച്ചുടയ്ക്കാൻ കഴിവുള്ള ബോംബാണ് അയാളെ സംബന്ധിച്ചിടത്തോളം ഹ്യാങ് ജിയോയും കുട്ടിയും. തുടർന്ന് സംഭവിക്കുന്ന രസകരമായ സംഭവങ്ങൾ ചിത്രം കണ്ട് തന്നെ മനസ്സിലാക്കേണ്ടതാണ്. തികച്ചും വ്യത്യസ്തവും അതെ സമയം മികച്ച അനുഭവവും ആവും ഈ ചിത്രം എന്ന കാര്യം ഉറപ്പ്.

Verdict : Very Good

374. Sicario Day Of The Soldado (2018)

Director : Stefano Sollima

Genre : Action

Rating : 7.4/10

Country : USA

Duration : 122 Minutes


🔸അധികം ഒച്ചയും ബഹളവും ഒന്നും തന്നെ ഇല്ലാതെ വരികയും ,മികച്ച പ്രേക്ഷക നിരൂപക പ്രതികരണങ്ങൾ കരസ്ഥമാക്കുകയും ,സാമ്പത്തികമായി വലിയ വിജയം കൊയ്യുകയും ,എല്ലാത്തിനും ഉപരി മൂന്നോളം ഓസ്കാർ നോമിനേഷനുകൾ വാരി കൂട്ടിയ ആദ്യ ഭാഗത്തിന് മൂന്ന് വർഷങ്ങൾക്ക് ശേഷമാണ് സോൾഡാഡോ എന്ന ഈ രണ്ടാം ഭാഗ ചിത്രം പുറത്തിറങ്ങിയത്. ആദ്യ ഭാഗത്തിന്റെ മികച്ച പ്രതികരണം തന്നെയാണ് ഈ ചിത്രം നേരിടുന്ന ഏറ്റവും വലിയ വെല്ലുവിളിയും ,കാരണം താരമത്യം എന്നത് ഈ സിനിമയുടെ കാര്യത്തിൽ തികച്ചും സ്വാഭാവികമായി സംഭവിക്കാവുന്ന ,സംഭവിക്കേണ്ട വസ്തുത തന്നെയാണ്.

🔸ചിത്രം ഒരു യാഥാർഥ്യം ആക്കാനുള്ള ശ്രമങ്ങളുടെ ആരംഭത്തിൽ തന്നെ തിരിച്ചടികളാണ് നേരിടേണ്ടി വന്നത്. ആദ്യ ഭാഗം സംവിധാനം ചെയ്ത പ്രശസ്ത സംവിധായകൻ ഡെനിസ് വില്യനേവ് രണ്ടാം ഭാഗത്തിൽ നിന്നും പിന്മാറിയതും ,ആദ്യ ചിത്രത്തിലെ കേന്ദ്ര കഥാപാത്രങ്ങളിൽ ഒന്നിനെ അവതരിപ്പിച്ച നടി എമിലി ബ്ലന്റിന്റെ അസാന്നിധ്യവും നികത്താൻ കഴിയാത്ത ഒഴിവ് തന്നെ ആയിരിക്കും എന്നത് ഉറപ്പായിരുന്നു. എന്തിരുന്നാലും ഹോളിവുഡിലെ മികച്ച നടന്മാരുടെ പട്ടികയിൽ നിസ്സംശയം ഉൾപെടുത്താനാവുന്ന ബ്രോളിന്റെയും ,ഡെൽറ്റോറോയുടെയും സാന്നിധ്യം കുറച്ച് കാണാൻ ആവില്ല, ചിത്രം കൈകാര്യം ചെയ്യുന്ന കാലിക പ്രസക്തിയേറിയ വിഷയവും ഗുണകരം ആവുകയേ ഉള്ളൂ.

🔸അമേരിക്കയിലെ കൻസാസ് നഗരത്തിൽ അരങ്ങേറുന്ന തീവ്രവാദ ആക്രമണത്തിൽ നിന്നുമാണ് ചിത്രം ആരംഭിക്കുന്നത്. ആക്രമണങ്ങളും സ്ഫോടനങ്ങളും മനുഷ്യ കുരുതികളും എല്ലാം രാജ്യം നേരിടുന്ന സ്ഥിരം പ്രശ്നങ്ങളിൽ ഒന്നായി മാറുകയും ,വാർത്ത ആവാതിരിക്കുകയും ചെയ്യുന്ന അവസ്ഥ ആണെങ്കിലും ഈ അവസാനത്തെ സംഭവം ചില്ലറ നഷ്ടങ്ങളല്ല ഉണ്ടാക്കിയത്. പതിനഞ്ചോളം ജീവനും ,കണക്കാക്കാൻ കഴിയാത്ത നാശ നഷ്ടങ്ങളും നേരിടേണ്ടി വന്നതിനാൽ തന്നെ തിരിച്ചടിക്കാൻ ഉള്ള തയാറെടുപ്പിലാണ് അമേരിക്കൻ രഹസ്യാന്വേഷണ വിഭാഗം.

🔸അമേരിക്കയിലെ വിവിധ നഗരങ്ങളിൽ അടുത്തിടെ ആയി അരങ്ങേറി കൊണ്ടിരിക്കുന്ന തീവ്രവാദ ആക്രമണങ്ങളിൽ മെക്സിക്കൻ ഡ്രഗ് മാഫിയയ്ക്കുള്ള പങ്ക് പരസ്യമായ രഹസ്യമാണ്. അവരുടെ പങ്കും ,പ്രഹര ശേഷിയും ഏവർക്കും അറിയാവുന്നതാണെങ്കിലും പ്രസ്തുത സംഭവത്തിന് ശേഷം അവയെല്ലാം വിഷയമേ അല്ലാതായിരിക്കുന്നു. ഡ്രഗ് മാഫിയകളെ നിലക്ക് നിർത്താനും അവർക്കെതിരെ തിരിച്ചടിക്കാനുമായി രഹസ്യാന്വേഷണ ഏജൻസി തിരഞ്ഞെടുക്കുന്നത് മാറ്റ് ഗ്രെവറിനെയാണ്. ഇറങ്ങി തിരിച്ച കാര്യം സാധിക്കാനായി ഏതറ്റം വരെയും പോവാൻ മടിയില്ലാത്ത നിശ്ചയ ദാർഢ്യമാണ് ഏജൻസിക്ക് ഇപ്പോൾ ആവശ്യം.

🔸മാഫിയകളുടെ അന്ത്യം ലക്ഷ്യം ഇട്ടുകൊണ്ട് ഇറങ്ങി തിരിച്ച ഗ്രെവർ യാത്രാമദ്ധ്യേ പ്രസ്തുത വിഷയത്തിൽ അറിവും ,സർവോപരി ബ്ലാക്ക് ഓപ്പറേറ്റീവ് ഏജന്റ് കൂടിയായ അലെജാന്ദ്രോ ഗില്ലിക്കിനെയും കൂടെ കൂട്ടുകയാണ്. ആദ്യമേ പറഞ്ഞത് പോലെ മികച്ച ആദ്യ ഭാഗം തന്നെയാണ് ഈ ചിത്രം നേരിടുന്ന ഏറ്റവും വലിയ വെല്ലുവിളി. ആദ്യ ചിത്രത്തിന്റെ നിലയിലേക്ക് ഒരു രീതിയിലും ഉയരാൻ ചിത്രത്തിന് കഴിഞ്ഞിട്ടില്ല എന്നതിലൂടെ രണ്ടാം ഭാഗ ചിത്രങ്ങളുടെ പൊതുവായ ശാപം ഈ ചിത്രവും പിന്തുടരുകയാണ്. നല്ല ആദ്യ പകുതിക്ക് ഒട്ടും ചേരാത്ത ,കൈവിട്ട് പോയ രണ്ടാം പകുതിയാണ് ചിത്രത്തെ പിറകോട്ട് വലിക്കുന്നത്. ചുരുക്കി പറയുകയാണെങ്കിൽ ആദ്യ ചിത്രത്തിന്റെ ആരാധകർക്ക് നിരാശ സമ്മാനിച്ചേക്കാവുന്ന ,ഒരു തവണ കണ്ട് ഒഴിവാക്കേണ്ട ചിത്രങ്ങളുടെ പട്ടികയിലേക്ക് ചേർക്കാം ഈ ചിത്രത്തെ.

Verdict : Above Average

373. The Cabinet Of Dr.Caligari (1920)

Director : Robert Wiene

Genre : Thriller

Rating : 8.1/10

Country : Germany

Duration : 78 Minutes


🔸ദി ക്യാബിനറ്റ് ഓഫ് ഡോക്ടർ കാലിഗറി എന്ന ചിത്രം കാണാതിരിക്കാൻ ഒരു ശരാശരി കാഴ്ചക്കാരനെ സംബന്ധിച്ചിടത്തോളം കാരണങ്ങൾ ഒരുപാട് ഉണ്ടാവും ,ശെരിയാണ് ചിത്രത്തിന് നൂറ് വർഷത്തിനടുത്ത് പഴക്കം ഉണ്ട് ,ബ്ലാക്ക് ആൻഡ് വൈറ്റിൽ ചിത്രീകരിച്ച ചിത്രം ആണ് ,നിശബ്ദ ചിത്രമാണ് ,എല്ലാത്തിനും ഉപരി സിനിമ പിച്ച വെച്ച് തുടങ്ങിയ കാലഘട്ടത്തിൽ ചിത്രീകരിക്കപ്പെട്ട ,സിനിമയുടെ ആദ്യ ആചാര്യന്മാരിൽ ഒരാളായ ചാർളി ചാപ്ലിൻ പോലും അരങ്ങിൽ പ്രശസ്തനാവും മുൻപ് പുറത്തിറങ്ങിയ ജർമൻ ചിത്രം കൂടിയാണ് ഇത്. ഇങ്ങനെ കാണാൻ മടിക്കാൻ ഒരു ശരാശരി സിനിമാ പ്രേമിയെ സംബന്ധിച്ചിടത്തോളം കാരണങ്ങൾ അനവധിയാണ് ,ഒരു പരിധി വരെ ഈ മുൻവിധികളെ കുറ്റം പറയാനും ആവില്ല.

🔸കാണാതിരിക്കാൻ ഉള്ള കാരണങ്ങളായി പൊതുവെ കേൾക്കാറുള്ള വസ്തുതകൾ പറഞ്ഞ് കഴിഞ്ഞതിനാൽ എന്ത് കൊണ്ട് ഈ ചിത്രം കണ്ടിരിക്കണം എന്ന ഭാഗത്തേക്ക് കടക്കാം. സിനിമാ ചരിത്രത്തിലെ തന്നെ ആദ്യ കൾട്ട് ചിത്രമായാണ് ക്യാബിനറ്റ് ഓഫ് കാലിഗറി വിലയിരുത്തപ്പെടുന്നത് ,അതായത് സ്ഥിരം സിനിമകൾ സഞ്ചരിക്കുന്ന പാതയിൽ നിന്നും മാറി സഞ്ചരിക്കുകയും അത് വഴി പിൽക്കാലത്ത് മികച്ച ആരാധക പിന്തുണയും പ്രശംസയും കരസ്ഥമാക്കിയ ചിത്രം എന്ന് ലഘു ആയി പറയാം. ഫൈറ്റ് ക്ലബ് പോലെയുള്ള ചിത്രങ്ങൾ പിൽക്കാലത്ത് പിന്തുടരുകയും വൻ വിജയം കൈവരിക്കുകയും ചെയ്ത വിശ്വസിക്കാൻ കഴിയാത്ത ആഖ്യാതാവിന്റെ ആദ്യ പതിപ്പ് ഈ ചിത്രത്തിലൂടെ ആണ് എന്നത് മറ്റ് ചിത്രങ്ങൾക്ക് മേൽ ഉണ്ടാക്കിയ സ്വാധീനത്തിന്റെ ഉത്തമ ഉദാഹരണം കൂടിയാണ്.

🔸മറ്റൊരു പ്രത്യേകത കൂടിയുണ്ട് ഈ ചിത്രത്തിന് ,ലോകത്ത് ആദ്യമായി പുറത്തിറങ്ങിയ ട്വിസ്റ്റ് എൻഡിങ് ചിത്രം അഥവാ പ്രേക്ഷകനെ അമ്പരപ്പിക്കുന്ന ക്ലൈമാക്സ് എന്ന ട്രെൻഡ് ആദ്യമായി കൈവരിച്ച ചിത്രം കൂടിയാണ് ക്യാബിനറ്റ് ഓഫ് കാലിഗറി. നേർ രേഖയിൽ കഥ പറഞ്ഞ് ശീലിച്ച പ്രവർത്തകരെയും ,അവ കണ്ട് ശീലിച്ച പ്രേക്ഷകരെയും മാറി നടക്കാൻ പ്രേരിപ്പിച്ച ആദ്യ ചിത്രം എന്ന പദവി ഈ ചിത്രത്തിന് സ്വന്തം. പ്രേക്ഷകന്റെ മനസിനെ കബളിപ്പിക്കാനായി മനുഷ്യ ബുദ്ധിക്ക് വിവരിക്കാൻ കഴിയാത്ത വിധം വിചിത്രമായ ചുറ്റുപാടുകളും ചിത്രത്തിന്റെ പ്രത്യേകതകൾ ആണ്.

🔸ജർമൻ നഗരമായ ഹോൾസ്റ്റൻവലിൽ ആണ് ചിത്രം ആരംഭിക്കുന്നത്, നഗരത്തിൽ അരങ്ങേറി കൊണ്ടിരിക്കുന്ന ഒരു ഫെയറിൽ കാലിഗറി എന്ന പേരുള്ള ഓപ്പറേറ്റർ കടന്ന് വരികയാണ്. ഇന്നേവരെ ആരും കണ്ടിട്ടില്ലാത്ത ഒരു അഭ്യാസം അയാൾക്ക് നാട്ടുകാരെ കാണിക്കാൻ ഉണ്ടായിരുന്നു ,ജനിച്ചിട്ട് ഇരുപത്തി മൂന്ന് വർഷങ്ങൾ കഴിഞ്ഞിട്ടും ഉറക്കം ഉണരാത്ത സീസർ എന്ന വ്യക്തിയെ അയാൾ കാഴ്ചക്കാർക്ക് പരിചയപ്പെടുത്തി കൊടുക്കുകയാണ്. സൂര്യന് താഴെയുള്ള എന്തിനെ കുറിച്ച് ചോദിച്ചാലും സീസറിന് ഉത്തരം പറയാൻ കഴിയും എന്ന വെല്ലുവിളിയും അയാൾ ഉന്നയിക്കുകയാണ്.

🔸ഒരു നിമിഷം തോന്നിയ കൗതുകം ,ഉത്തരം അറിയാനുള്ള ആകാംക്ഷ അതൊന്ന് കൊണ്ട് മാത്രമാണ് പരിപാടി കാണാൻ എത്തിയ ഫ്രാൻസിസിന്റെ സുഹൃത്ത് അലൻ തന്റെ മരണസമയം പ്രവചിക്കാൻ സീസറിനോട് ആവശ്യപ്പെടുന്നത്. എന്നാൽ അതിന് കിട്ടിയ മറുപടി നാളെ സൂര്യോദയം കാണാൻ നീ ഉണ്ടാവില്ല എന്നതായിരുന്നു ,അപ്രതീക്ഷിതവും അസ്വാസ്ഥ്യം ഉളവാക്കുന്നതുമായ മറുപടി ആയിരുന്നെങ്കിലും പ്രശ്നത്തിന്റെ ഗൗരവം പൂർണമായി മനസിലാവുന്നത് പ്രവചനം സത്യമായി മാറുമ്പോഴാണ്.

Verdict : Must Watch

372. The Tiger An Old Hunters Tale (2015)

Director : Park Hoon Jung

Genre : Thriller

Rating : 7.3/10

Country : Korea

Duration : 139 Minutes


🔸ഒരു മൃഗത്തിനും മനുഷ്യനും ഇടയിൽ ഉടലെടുക്കുന്ന പകയും ,വൈരാഗ്യവും ,മത്സരവും എല്ലാം മികച്ച കഥകളും അതിലും മികച്ച സിനിമകളും ആയി രൂപാന്തര പെട്ട ചരിത്രമേ ഉള്ളൂ. അവിടെ ഉടലെടുക്കുന്നത് പണത്തിനും പദവിക്കും വിലയിടാൻ കഴിയാത്ത ഒറ്റയാന്മാരുടെ മത്സരമാണ്. ഓരോ തവണ തോൽപ്പിക്കപ്പെട്ടപ്പോഴും ,അളക്കാനാവാത്ത നഷ്ടങ്ങൾ സഹിക്കേണ്ടി വന്നപ്പോഴും ,ജീവിതം തന്നെ ചോദ്യ ചിഹ്നമായി നിന്നപ്പോഴും തോൽവി സമ്മതിക്കാതെ മോബിഡിക്കിനെ തോൽപ്പിക്കാനായി മടങ്ങിയെത്തിയ ആഹാബിന്റെ കഥ ഇതിഹാസം ആയി മാറിയത് അത് കൊണ്ട് തന്നെയാണ്. ഈ സ്രെണിയിൽ ഉൾപ്പെടുത്താൻ തീർത്തും അർഹമായ ചിത്രമാണ് ടൈഗർ ആൻ ഓൾഡ് ഹണ്ടേഴ്സ് ടയിൽ.

🔸തന്റെ നല്ല പ്രായം കഴിഞ്ഞ മാൻഡുക് എന്ന വേട്ടക്കാരനാണ് ചിത്രത്തിലെ പ്രധാന കഥാപാത്രം ,അയാളോളം തന്നെ പ്രാധാന്യം അർഹിക്കുന്ന സാന്നിധ്യം ആണ് ചിത്രത്തിലെ കടുവയുടേതും. വളരെ വ്യത്യസ്തം എന്ന് ഒറ്റനോട്ടത്തിൽ തോന്നാമെങ്കിലും ഇത്രയും ഇഴുകി ചേർന്ന ബന്ധമോ സമയമോ മറ്റൊരു വേട്ടക്കാരനിലോ അയാൾ കൊല്ലാൻ വിധിക്കപ്പെടുന്ന ഇരയിലോ കാണാൻ കഴിഞ്ഞേക്കില്ല. തങ്ങളുടെ ചുറ്റുപാടുകളിൽ നിന്നും അറുത്ത് മാറ്റപ്പെട്ട ആഗ്രഹിക്കാത്ത ഇഷ്ട്ടപ്പെടാത്ത ജീവിതങ്ങൾ ജീവിച്ച് തീർക്കേണ്ടി വരുന്ന രണ്ട് കഥാപാത്രങ്ങൾ. ഈ വേട്ടക്കാരന്റെയും മൃഗത്തിന്റെയും കഥയാണ് ഈ ചിത്രം.

🔸മാൻഡുക്കിന്റെ ചെറുപ്പ കാലത്ത് അയാളോളം കഴിവുള്ള വേട്ടക്കാരൻ ആ നാട്ടിൽ ഉണ്ടായിരുന്നില്ല എന്നത് ആരും സമ്മതിക്കുന്ന കാര്യമാണ്. ഒരു നായാട്ടക്കാരന് ആവശ്യമായ ശ്രദ്ധയും ശൗര്യവും എല്ലാം തികഞ്ഞ ഒരു പോരാളി തന്നെ ആയിരുന്നു മാൻഡുക്. ജീവിതത്തിൽ സംഭവിച്ച ചില അപ്രതീക്ഷിത ദുരന്തങ്ങൾ കാരണവും ,യാഥാർഥ്യത്തോട് പൊരുത്തപ്പെടാൻ കഴിയാത്തത് കാരണവും എല്ലാവരിൽ നിന്നും എല്ലാത്തിൽ നിന്നും മാറി ഒഴിഞ്ഞൊരു ജീവിതമാണ് ഇന്ന് മാൻഡുക് നയിക്കുന്നത്. അയാളെ സംബന്ധിച്ചിടത്തോളം വേട്ടയാടലിന്റെയും മത്സരത്തിന്റെയും ഒക്കെ കാലം എന്നോ കഴിഞ്ഞ് പോയിരിക്കുന്നു.

🔸ജിരിസാൻ മലനിരകൾക്കിടയിൽ താമസിക്കുന്ന ഗ്രാമീണർക്കിടയിൽ ദൈവ പരിവേഷം ആണ് ഒറ്റയാനായ കടുവയ്ക്ക്. മറ്റുള്ള വന്യ ജീവികളിൽ നിന്നും മറ്റും ഒരു പരിധി വരെ തങ്ങളെ സംരക്ഷിക്കുന്നത് അവൻ ആണെന്നാണ് അവരുടെ വിശ്വാസം ,രാജ്യത്തെ അവസാനത്തെ കടുവ ആണവൻ ,കൊല്ലാനായി എത്തിയ ഒരുപാട് വേട്ടക്കാരുടെ കാലൻ ആയി മാറിയവൻ. ഇന്നും തന്റെ ചോരയ്ക്കായി മല കയറി വരുന്ന ഒരുത്തന് മുന്നിലും തോൽവി സമ്മതിക്കാതെ ,ജീവൻ ചോദിച്ച് വരുന്നവനെ തിരികെ അയക്കാതെ ഇതിഹാസ പരിവേഷത്തോടെ മലനിരകൾ മുഴുവൻ അടക്കി വാഴുകയാണ് അവൻ ,എല്ലാ രീതിയിലും തന്റെ വംശത്തിലെ അവസാന പോരാളി.

🔸രാജ്യത്തെ കടുവകളെ എല്ലാം കൊന്നൊടുക്കാനായി ഒരുമ്പെട്ട് ഇറങ്ങിയ ഭരണാധികാരിക്കും ,അയാൾ നൽകാൻ ഇടയുള്ള സമ്മാനങ്ങളിൽ ആകൃഷ്ടരായി എത്തുന്ന വേട്ടക്കാർക്കും ,അവരെയെല്ലാം നേരിടാം എന്ന മട്ടിൽ വിഹാരം തുടരുന്ന കടുവയ്ക്കും ഇടയിൽ മാൻഡുക് കൂടി എത്തപ്പെടുകയാണ്. മാണ്ഡുക്കും കടുവയും തമ്മിൽ പഴയ ചില കണക്കുകൾ കൂടി ബാക്കി കിടക്കുന്നുണ്ട് ,അവയെല്ലാം തന്നെ ഒരു നേർ രേഖയിൽ എത്തുമ്പോൾ കാഴ്ചക്കാരന് മുന്നിൽ എത്തുന്നത് മറ്റൊരു മികച്ച കൊറിയൻ ചിത്രം കൂടി ആണ്.

Verdict : Very Good

371. Ant Man And The Wasp (2018)

Director : Peyton Reed

Genre : Superhero

Rating : 7.6/10

Country : USA

Duration : 118 Minutes


🔸പത്ത് വർഷങ്ങൾക്ക് മുന്നേ ആരംഭിച്ച മാർവെൽ സിനിമാറ്റിക് യുണിവേഴ്‌സ് തങ്ങളുടെ ഇരുപതാം ചിത്രത്തിൽ എത്തി നിൽക്കുകയാണ് ആന്റ് മാൻ ആൻഡ് ദി വാസ്പ് എന്ന ചിത്രത്തിലൂടെ. സാമ്പത്തിക വിജയവും നിരൂപക പ്രശംസയും നേടി വിജയം ഒരു ശീലം ആക്കിയതിനാലും തങ്ങളുടെ അവസാന ചിത്രം ആയ അവേഞ്ചേഴ്‌സ് ഇൻഫിനിറ്റി വാർ ലോകമെങ്ങും മികച്ച പ്രതികരണം നേടിയതിനാലും സമ്മർദ്ദം തീർച്ചയായും സ്റ്റുഡിയോയുടെയും അണിയറ പ്രവർത്തകരുടെയും മേൽ ഉണ്ടായിരിക്കണം ,അത് സ്വാഭാവികവും ആണ്. തങ്ങളുടെ ട്രാക്ക് റെക്കോർഡ് തുടരാനും അതെ സമയം ആദ്യ ഭാഗം നേരിടേണ്ടി വന്ന വിമർശനങ്ങൾ ഒഴിവാക്കാനും ,സർവോപരി അടുത്ത ചിത്രത്തിന് പ്രേക്ഷകരെ തയാറെടുപ്പിക്കാനും ഉള്ള ശ്രമകരമായ ദൗത്യമാണ് ചിത്രത്തിലൂടെ പ്രവർത്തകരുടെ മുന്നിൽ ഉണ്ടായിരുന്നത് ,അവയിൽ അവർ എത്രത്തോളം വിജയിച്ചിട്ടുണ്ട് എന്നത് പരിശോധിക്കേണ്ടി ഇരിക്കുന്നു.

🔸സിവിൽ വാർ എന്ന ചിത്രത്തിൽ അവതരിപ്പിക്കപ്പെട്ട സംഭവങ്ങൾക്ക് ശേഷമാണ് പ്രസ്തുത ചിത്രം ആരംഭിക്കുന്നത് ,ഗവണ്മെന്റിനും നിയമത്തിനും എതിരെ നിലകൊണ്ട സഖ്യത്തിന് വേണ്ടി പ്രവർത്തിച്ചതിനാൽ തന്നെ ആന്റ് മാൻ അഥവാ സ്കോട്ട് ലാങ്ങിന്റെ പരിതസ്ഥിതി അത്ര നല്ലതല്ല. ഒരുപാട് ഒത്തുതീർപ്പുകളിലൂടെയും നിയന്ത്രണങ്ങളിലൂടെയും ആണ് അയാളുടെ ജീവിതം കടന്ന് പോവുന്നത് ,നിയമത്തിന് അതീതനായി ജീവിക്കുന്നതിനേക്കാൾ കുടുംബത്തോടൊപ്പം ജീവിക്കാനായി സ്കോട്ട് കൈക്കൊണ്ട തീരുമാനങ്ങളുടെ പരിണിത ഫലം ആണ് അയാളുടെ ഇന്നത്തെ അസഹനീയം ആയ ജീവിതരീതിയുടെ കാരണം.

🔸മറ്റ് മാർഗങ്ങൾ ഒന്നും തന്റെ മുന്നിൽ ഇല്ലാത്തതിനാലും ഒരു അമാനുഷികൻ എന്ന പട്ടത്തെക്കാൾ കുടുംബസ്ഥൻ എന്ന പദവിക്ക് വില നൽകുന്നതിനാലും ഈ നിയന്ത്രണങ്ങളെ അയാൾ മാനിക്കുന്നുണ്ട് ,അതിനോട് അയാൾ ഏറെക്കുറെ പൊരുത്തപ്പെട്ടു എന്ന് വേണമെങ്കിൽ പറയാം. ഈ കാലയളവിൽ ഒന്നും തന്നെ തന്റെ പഴയ സഹപ്രവർത്തകർ ആയ ഹാങ്ക് പിമ്മിനോടോ ,ഹോപ്പിനോടോ യാതൊരുവിധ സമ്പർക്കവും അയാൾ പുലർത്തിയിരുന്നില്ല. അങ്ങനെ അരസികമായി പോയിക്കൊണ്ടിരുന്നു സ്കോട്ടിന്റെ ജീവിതം ഒരുനാൾ കീഴ്മേൽ മറിയുകയാണ്, അത്യന്തം വ്യക്തിപരമായ ഒരു ദൗത്യത്തിന് വേണ്ടി പഴയ സഹപ്രവർത്തകർ സ്കോട്ടിനെ അന്വേഷിച്ച് വരുമ്പോൾ അയാളുടെയും കുടുംബത്തിന്റെയും ഭാവി വീണ്ടും അനിശ്ചിതാവസ്ഥയിലേക്ക് നീങ്ങുകയാണ്.

🔸ചിത്രത്തിന്റെ കഥയെ കുറിച്ചോ ,കഥാപാത്രങ്ങളെ കുറിച്ചോ സ്പോയിലെർ മാനിച്ച് കൂടുതൽ ഉൾപ്പെടുത്തുന്നില്ല ,എന്തിരുന്നാലും ഒട്ടും ഇഷ്ട്ടപ്പെടാതിരുന്ന ആദ്യ ഭാഗത്തേക്കാൾ മികച്ച ഒരു അനുഭവം തന്നെയാണ് രണ്ടാം ഭാഗം. വളരെ മോശം ആയിരുന്ന വില്ലൻ കഥാപാത്രത്തെ വെച്ച് നോക്കുമ്പോൾ അത്യാവശ്യം കാര്യ കാരണങ്ങൾ വെച്ച് പുലർത്തുന്ന ഈ ചിത്രത്തിലെ കഥാപാത്രം ബേധപ്പെട്ട അനുഭവം തന്നെയാണ് ,എന്നാലും കാഴ്ചക്കാരൻ കഥാപാത്രത്തെ ഒരു വില്ലൻ എന്ന രീതിയിൽ കാണുമോ എന്നത് സംശയകരം ആണ്. സിനിമയുടെ നിർണ്ണായക ഘട്ടത്തിൽ കളിപ്പാട്ടമായ ടാങ്ക് എൻജിൻ ഒക്കെ ഉപയോഗിച്ച ചിത്രത്തിന്റെ രണ്ടാം ഭാഗം ആയതിനാൽ തന്നെ പ്രതീക്ഷിക്കേണ്ടത് എന്താണ് എന്ന് ഒരേകദേശ ധാരണ ഉണ്ടായാൽ നന്നാവും ,ഇല്ലെങ്കിൽ തീർത്തും നിരാശപ്പെടേണ്ടി വരും എന്ന കാര്യം ഉറപ്പ്.

🔸കഥയെയും ,കഥാപാത്രങ്ങൾ ഉൾപ്പെടുന്ന സന്ദർഭങ്ങളെയും തമാശയുടെ മേൻപൊടിയോടെ തന്നെ അവതരിപ്പിക്കുന്ന സ്ഥിരം മാർവെൽ ചിത്രമാണ് ആന്റ് മാൻ ആൻഡ് ദി വാസ്പ് ,അതിൽ അവർ നന്നായി വിജയിച്ചിട്ടുണ്ട് എന്നും പറയേണ്ടി വരും. അവേഞ്ചേഴ്‌സ് എന്ന ചിത്രം ഉയർത്തിയ ചില ചോദ്യങ്ങൾക്കുള്ള ഉത്തരവും ,മികച്ച ഒരു പോസ്റ്റ് ക്രെഡിറ്റ് സീനും ചിത്രത്തിലുണ്ട്. ആകെമൊത്തം വലിയ അവകാശ വാദങ്ങൾക്കൊന്നും പ്രസക്തി ഇല്ലാത്ത ,രണ്ട് മണിക്കൂർ മറ്റൊന്നും ആലോചിക്കാതെ ചിരിച്ച് കൊണ്ട് കണ്ടിരിക്കാൻ കഴിയുന്ന ഒരു ചിത്രം, അതാണ് ആന്റ് മാൻ ആൻഡ് ദി വാസ്പ്.

Verdict : Good

370. 102 Not Out (2018)

Director : Umesh Shukla

Genre : Comedy

Rating : 7.6/10

Country : India

Duration : 102 Minutes


🔸എഴുപത്തി അഞ്ച് വയസ്സുകാരൻ ആയ ബാബുലാൽ മരണത്തെ പേടിച്ച് ജീവിക്കാൻ മറന്നുപോയ വ്യക്തി ആണ് ,വർധക്യത്തിലേക്ക് കടന്ന തനിക്ക് മരണം അല്ലാതെ മറ്റൊന്നും ബാക്കിയില്ലെന്ന് മനസ്സിനെ പറഞ്ഞു പഠിപ്പിച്ച ടിയാന്റെ ജീവിതം ഏറെക്കുറെ ചത്തതിനൊക്കുമേ ജീവിച്ചിരിക്കിലും എന്ന അവസ്ഥയിലാണ്. ഇന്നിൽ ജീവിക്കാൻ കഴിയാതെ ഇന്നലെകളിൽ പശ്ചാത്തപിച്ചും നാളെയെ കുറിച്ചോർത്ത് വേവലാതിപ്പെട്ടും വല്ലാത്തൊരു അവസ്ഥയിലൂടെയാണ് ബാബുലാൽ ജീവിച്ചു പോകുന്നത്. ആയ കാലത്ത് കുടുംബത്തിന് വേണ്ടി സമ്പാദിച്ചും അവരെ സംരക്ഷിച്ചും കൂടെ നിന്നെങ്കിലും ഇന്ന് ബാബു ഏറെക്കുറെ ഒറ്റയ്ക്കാണ് ,ഭാര്യ എന്നോ മരിച്ചുപോയി മകൻ ആണെങ്കിൽ ഇങ്ങനെ ഒരു അച്ഛനെ കുറിച്ച് ഓർക്കുന്നുണ്ടോ എന്ന് പോലും സംശയമാണ്.

🔸മുംബൈയുടെ കിഴക്കേ ഭാഗത്ത് സ്ഥിതി ചെയ്യുന്ന വീട്ടിൽ വർഷങ്ങളായി താമസിക്കുന്ന ബാബുവിന്റെ ഒരു ദിവസം ആരംഭിക്കുന്നത് അളന്ന് മുറിച്ച 14 മിനിറ്റ് നീണ്ടുനിൽക്കുന്ന കുളിയോടെ ആണ് ,പതിനഞ്ച് മിനിറ്റ് വെള്ളം നനഞ്ഞാൽ വാർധക്യത്തിൽ എത്തി നിൽക്കുന്ന വ്യക്തിക്ക് ആരോഗ്യ പ്രശ്നങ്ങൾ ഉണ്ടാവും എന്ന ഡോക്ടറുടെ അഭിപ്രായമാണ് പതിനാല് മിനിറ്റ് എന്ന കണക്കിന്റെ പിന്നിലെ രഹസ്യം ,അതിന് ശേഷം കൃത്യമായ ഇടവേളകളോട് കൂടി യോഗ ,തുടർന്ന് ആഴ്ചയിൽ ഒരു ദിവസവും മുടങ്ങാതെയുള്ള ഡോക്ടറുടെ ചെക്കപ്പ്. അങ്ങനെ കൃത്യമായി പ്രോഗ്രാം ചെയ്യപ്പെട്ട കംപ്യൂട്ടർ പോലെ പോവുകയാണ് ബാബുലാൽ എന്ന വ്യക്തിയുടെ ജീവിതം.

🔸ബാബുലാലിന്റെ കൂടെ മറ്റൊരു വ്യക്തി കൂടി താമസിക്കുന്നുണ്ട് ,വേറാരുമല്ല അയാളുടെ നൂറ്റി രണ്ട് വയസ്സുള്ള അച്ഛൻ ദത്താത്രേയ ആണ് ഈ കഥാപാത്രം. ബാബുലാൽ എന്ന വ്യക്തിയെ പറ്റി എന്തൊക്കെയാണോ പറഞ്ഞത് അതിനെല്ലാം നേർ വിപരീതം ആണ് ദത്താത്രേയ. പ്രായം നൂറ് കഴിഞ്ഞെങ്കിലും തന്റെ മനസ്സിന് ഇന്നും ഇരുപത്തി ആറ് വയസ്സാണ് പ്രായം എന്നതാണ് ദത്താത്രേയയുടെ നിലപാട്. ഭൂതകാലത്തെ കുറിച്ചോ തന്റെ ജീവിതത്തെ കുറിച്ചോ യാതൊരു നഷ്ടബോധവും ഇല്ലാത്ത ദത്താത്രേയയ്ക്ക് ഭാവിയെ കുറിച്ച് യാതൊരു ചിന്തയുമില്ല. ബാബുലാലിനെ പോലെ ജീവിതം കണക്ക് കൂട്ടി ജീവിക്കാനോ അളന്ന് മുറിച്ച് ജീവിക്കാനോ അയാൾ തയാറല്ല ,ഒഴുക്കിന് അനുസരിച്ച് യാതൊരു സമ്മർദ്ദവും ഇല്ലാതെ പോവുന്നതാണ് ദത്താത്രേയയുടെ ജീവിതം.

🔸നൂറ്റി രണ്ട് വർഷങ്ങൾ പിന്നിട്ട ദത്താത്രേയയ്ക്ക് മറ്റൊരു ലക്‌ഷ്യം കൂടിയുണ്ട് ജീവിതത്തിൽ ,ലോകത്ത് ഇന്നേവരെ ജീവിച്ചതിൽ ഏറ്റവും പ്രായം ചെന്ന വ്യക്തി ചൈനീസ്‌കാരൻ ആണെന്നും ഗിന്നസ് റെക്കോർഡ് പ്രകാരം അയാളുടെ പ്രായം നൂറ്റി പതിനെട്ട് വയസ്സ് ആണെന്നും അറിയാവുന്ന ദത്താത്രേയ റെക്കോർഡ് തകർക്കാനായി ഇറങ്ങി പുറപ്പെടുകയാണ് ,അതിന് അയാൾക്ക് പതിനാറ് വര്ഷം കൂടി ജീവിക്കേണ്ടി ഇരിക്കുന്നു. ഈ രണ്ട് കഥാപാത്രങ്ങൾക്ക് പുറമെ ധീരു എന്ന നിഷ്കളങ്കനായ സഹായി കൂടിയുണ്ട് ചിത്രത്തിൽ.

🔸തന്റെ ആഗ്രഹം സഫലം ആവാനും ,റെക്കോർഡ് തകർക്കാനുമായി ചില പദ്ധതികൾ ദത്താത്രേയയുടെ മനസ്സിൽ ഉണ്ട്. അവയിൽ ഏറ്റവും പ്രധാനമായി ഉള്ളത് തന്റെ മകൻ ബാബുലാലുമായി ഉള്ള സമ്പർക്കം ഒഴിവാക്കുക എന്നതായിരുന്നു. അത്രമേൽ കഠിനവും ദുര്ഘടവും ആയ ഒരു പദ്ധതിക്ക് മനസ്സിൽ പ്രതികൂലമായ മനോഭാവം വെച്ചുപുലർത്തുന്ന ഒരാൾ കൂടെയുള്ളത് ഗുണകരം ആവില്ല എന്ന് മനസിലാക്കിയ ദത്താത്രേയ ഒരു വഴി കണ്ടെത്തുകയാണ്. അങ്ങനെ ആ അച്ഛൻ തന്റെ മകനെ വൃദ്ധസദനത്തിലേക്ക് പറഞ്ഞ് വിടാൻ തയ്യാറാവുകയാണ്.

Verdict : Good

369. The Vertical Ray Of The Sun (2000)

Director : Tran Anh Hung

Genre : Drama

Rating : 7.2/10

Country : Vietnam

Duration : 110 Minutes


🔸തന്റെ ചിത്രങ്ങളിൽ സംഭാഷണങ്ങളുടെ എണ്ണം വെട്ടി കുറച്ചും വൈകാരികതയുടെ അളവ് കൂട്ടിയും കാഴ്ചക്കാരനെ മനസികാപരമായി സിനിമയോട് ചേർത്ത് നിർത്തുക എന്ന സിദ്ധാന്തമാണ് സംവിധായകൻ ആയ ട്രാൻ അൻഹുങ് പൊതുവെ പിന്തുടരാറ്. ഇൻ ദി സെന്റ് ഓഫ് ഗ്രീൻ പപ്പായ എന്ന മുൻ ചിത്രവുമായി തട്ടിച്ച് നോക്കുമ്പോൾ സംഭാഷണങ്ങൾ അധികം ആണെങ്കിലും വൈകാരികതയുടെ കാര്യത്തിൽ ഒരു തരത്തിലും വിട്ടുവീഴ്ചയ്ക്ക് തയാറായിട്ടില്ല സംവിധായകൻ ,അതിനാൽ തന്നെ കഥാപരമായി വലിയ മുന്നേറ്റം ഒന്നും ഉണ്ടാക്കാത്ത ആദ്യ മുപ്പത് മിനിറ്റ് പോലും പ്രേക്ഷകനെ സംബന്ധിച്ച് വേറിട്ട ഒരു അനുഭവം തന്നെ ആവും എന്ന കാര്യം ഉറപ്പ്.

🔸മൂന്ന് സഹോദരിമാരാണ് ചിത്രത്തിലെ പ്രധാന കഥാപാത്രങ്ങൾ. വളർച്ചയുടെ പടവുകൾക്ക് ശേഷം വേർപിരിഞ്ഞ് പല വഴികളിലേക്ക് കടന്നുപോയ മൂവർക്കും ഒത്തുചേരാനുള്ള ഒരവസരം ലഭിക്കുകയാണ്. മൂവരുടെയും അമ്മയുടെ ഓർമ്മ ദിവസമാണ് മേൽ സൂചിപ്പിച്ച അവസരം. പരസ്പരം കാണാതെയും ഇടപഴകാതെയും കടന്നുപോയ വർഷങ്ങൾക്ക് ശേഷമുള്ള ഈ ഒത്തുചേരലിൽ മൂന്ന് പേർക്കും പറയാൻ ഒരുപാട് കാര്യങ്ങൾ ഉണ്ട് ,മനസ്സിൽ മറ്റൊരാൾ അറിയാതെ സൂക്ഷിക്കുന്ന ഒരുപാട് രഹസ്യങ്ങളും. വെളിപ്പെടുത്തലുകളുടെയും തിരിച്ചറിവുകളുടെയും നിമിഷങ്ങളാണ് മൂവരെയും കാത്ത് തങ്ങളുടെ ജന്മഗൃഹത്തിൽ നില്പുണ്ടായിരുന്നത്.

🔸അമ്മയുടെ ഓർമ്മ ദിവസം മുതൽ ഒരു മാസത്തിന് ശേഷമുള്ള അച്ഛന്റെ ഓർമ്മ ദിവസം വരെയുള്ള കൃത്യം മുപ്പത് ദിവസങ്ങൾ മൂന്ന് സഹോദരിമാരും ഒരുമിച്ച് ചിലവഴിക്കാൻ തീരുമാനിക്കുകയാണ്. ഇത്രയും കാലം കെട്ട് വിട്ട പട്ടം കണക്കെ ജീവിച്ചു പോന്നവരാണ് മൂന്ന് പേരും ,പ്രതീക്ഷിച്ച പോലെ ഒന്നും തന്നെ ഇവരുടെ ജീവിതത്തിൽ സംഭവിച്ചിട്ടില്ല. ഭാവിയെ കുറിച്ചുള്ള ചിന്തകൾ പോലും വല്ലാത്തൊരു തരം അനിശ്ചിതാവസ്ഥയാണ് മൂവരിലും ഉളവാക്കുന്നത് ,അതിനെയെല്ലാം അതിജീവിക്കാനും സർവോപരി എന്നോ നഷ്ടപ്പെട്ടുപോയ വ്യക്തിത്വങ്ങൾ തിരികെ കണ്ടെത്താനും ഈ മുപ്പത് ദിവസങ്ങൾക്ക് വലിയ പ്രാധാന്യം ഉണ്ടെന്ന് അവർക്കറിയാം.

🔸രക്ത ബന്ധങ്ങൾക്ക് മറ്റുള്ള അടുപ്പങ്ങളുടെ മേൽ ഉള്ള പ്രാധാന്യവും വളരെ മനോഹരമായ രീതിയിൽ അവതരിപ്പിച്ചിട്ടുണ്ട് ഈ ചിത്രം ,എത്രെയോ വര്ഷങ്ങളായി ഇടപഴകാതെയും സമ്പർക്കം പുലർത്താതെയും ജീവിച്ചുപോന്ന സഹോദരിമാർക്കിടയിൽ അവയൊന്നും യാതൊരു പ്രശ്നങ്ങളും സൃഷ്ടിച്ചില്ലെന്ന് മാത്രമല്ല ബന്ധം കുറച്ച് കൂടി ദൃഢം ആക്കിയതും മറ്റുള്ള ബന്ധങ്ങളിലും അടുപ്പങ്ങളിലും നേരിട്ട കനത്ത പരാജയങ്ങളും മേല്പറഞ്ഞ വസ്തുതകളുടെ ഓർമ്മപ്പെടുത്തലുകൾ ആണ്. മൂന്ന് സഹോദരിമാരിൽ മൂത്തവരായ ഖാൻഹോമും സുയോങ്ങും വിവാഹിതർ ആണെങ്കിലും ദാമ്പത്യ ജീവിതത്തിൽ പരാജിതർ ആണ് ,ഭർത്താവിനോടൊപ്പം അർഥപൂർണമായ ജീവിതം നയിക്കാൻ ഇരുവർക്കും കഴിഞ്ഞിട്ടില്ല ,മൂന്നാമത്തവളായ ലിയെൻ ആണെങ്കിൽ സ്വന്തം സഹോദരനുമായി അടുപ്പത്തിലുമാണ്.

🔸ദാമ്പത്യ ജീവിതത്തിലെയും പ്രണയ ജീവിതത്തിലെയും പ്രശ്നങ്ങൾ നേരിടുന്നതിനോടൊപ്പം മറ്റ് ചില പ്രധാന പ്രശ്നങ്ങളും സഹോദരിമാർ നേരിടുന്നുണ്ട് ,ഇവയിൽ ഏറ്റവും പ്രാധാന്യം അർഹിക്കുന്നതാണ് മാതൃത്വ സംബന്ധമായ സംശയങ്ങളും ആശങ്കകളും. ഗർഭിണിയായ കഥാപാത്രം തന്റെ ചോദ്യങ്ങൾക്കുള്ള ഉത്തരങ്ങൾ തേടി അലയുകയാണ് ചിത്രത്തിൽ അങ്ങോളമിങ്ങോളം. ഏറ്റവും ലളിതമായി പറയുക ആണെങ്കിൽ ഒരു സ്ത്രീ പക്ഷ ചിത്രമാണ് ദി വെർട്ടിക്കൽ റേ ഓഫ് ദി സൺ ,ചിത്രം പ്രമേയമാക്കുന്നത് സ്ത്രീകളുടെ പ്രശ്നങ്ങളും നേരിടേണ്ടി വരുന്ന വെല്ലുവിളികളും തന്നെയാണ്.

Verdict : Good

368. First They Killed My Father (2017)

Director : Angelina Jolie

Genre : Historical

Rating : 7.2/10

Country : Combodia

Duration : 136 Minutes


🔸ഒരു യുദ്ധ ചിത്രം സ്‌ക്രീനിൽ എത്തുമ്പോൾ പൊതുവായി കാണാറുള്ള രീതിയാണ് ,പൂർണമായും ഒരു രാജ്യത്തെ ശെരിയുടെ പക്ഷത്തും എതിരാളിയെ തീർത്തും ന്യായീകരിക്കാൻ കഴിയാത്ത വിധം തിന്മയുടെ ആൾരൂപങ്ങൾ ആയും അവതരിപ്പിക്കുന്ന രീതി. ചരിത്ര പരമായി നിലനിൽക്കുന്ന വസ്തുതകളോട് മിക്കപ്പോഴും ഈ രീതിയിൽ ഉള്ള ചിത്രങ്ങൾ നീതി പുലർത്താറുള്ളതായി ഒരിക്കലും തോന്നിയിട്ടില്ല ,കാരണം പൂർണമായും ശെരിയുടെ പക്ഷത്ത് നിൽക്കുന്നതോ അല്ലെങ്കിൽ തീർത്തും തിന്മ നിറഞ്ഞിരിക്കുന്നതോ ആയ വ്യക്തികളോ ആശയങ്ങളോ ഇല്ലെന്നും എല്ലാവരിലും നന്മയും തിന്മയും ഉണ്ടെന്ന കേവലമായ സത്യം സിനിമകൾ മറക്കുന്നത് കൊണ്ടാവാം അങ്ങനെ സംഭവിക്കുന്നത്. ഫസ്റ്റ് ദേ കിൽഡ് മൈ ഫാദർ എന്ന ചിത്രം പൂർണമായും ഈ വാദത്തെ ഉൾക്കൊണ്ടിട്ടുണ്ട് എന്ന് പറയാൻ ആവില്ലെങ്കിലും മാറ്റം ,അത് പ്രത്യക്ഷമാണ്.

🔸കമ്പോഡിയയിലെ ജനങ്ങൾക്കിടയിൽ മരണത്തെ കുറിച്ചും പുനർജന്മത്തെ കുറിച്ചും തലമുറകളായി നിലനിൽക്കുന്ന ഒരു വിശ്വാസമുണ്ട്. മരണപ്പെട്ട വ്യക്തി ,അത് ആരായാലും മൂന്ന് ദിവസം ഗാഢമായ ഉറക്കത്തിൽ ആയിരിക്കും. മൂന്നാം ദിവസം അയാൾക്ക് തിരിച്ചറിവ് ഉൾക്കൊള്ളേണ്ടി വരും ,മരണം എന്ന യാഥാർഥ്യവുമായി പൊരുത്തപ്പെടേണ്ടി വരും. അതിന് ശേഷം നദിക്കരയിൽ നിന്നും അയാളുടെ മടക്കം ആരംഭിക്കും. എന്നാൽ ചിത്രത്തിലെ കഥാപാത്രങ്ങളിൽ ഒന്ന് തനിക്ക് വേണ്ടപ്പെട്ട ഒരു കഥാപാത്രം മരണത്തിന് കീഴടങ്ങിയപ്പോൾ അവൾ ഒരിക്കലും മടങ്ങി വരരുത് എന്ന് അകമഴിഞ്ഞ് ആഗ്രഹിച്ച് പോവുകയാണ് ,കാരണം മരണം ഈ ജീവിതത്തേക്കാൾ എത്രെയോ ബേധമാണ്.

🔸അമേരിക്കൻ സംവിധായിക ആയിട്ട് കൂടിയും യഥാർത്ഥ സംഭവങ്ങളെ വെള്ളം ചേർക്കലുകൾ ഒന്നും നടത്താതെ സ്‌ക്രീനിൽ എത്തിക്കുന്നതിൽ വിജയിച്ചിട്ടുണ്ട് ആൻജെലിന ജോളി. വിയറ്റ്നാം യുദ്ധത്തിൽ അമേരിക്ക കൈക്കൊണ്ട ഏകാധിപത്യ നടപടികളെയും ,തീർത്തും നിഷ്പക്ഷമായി നിലകൊണ്ട കംബോഡിയ എന്ന രാജ്യത്തെ യുദ്ധത്തിലേക്ക് വലിച്ചിഴച്ച തീരുമാനത്തെയും തുടർന്നുണ്ടായ സംഭവ വികാസങ്ങളെയും എല്ലാം നിശിതമായി വിമർശിക്കുന്നുണ്ട് ചിത്രത്തിൽ. ചിത്രം പൂർണമായും കമ്പോഡിയൻ ജനങ്ങളുടെ പക്ഷത്ത് ആണ് നിലകൊള്ളുന്നത് ,സംസാരിക്കുന്നത് കംബോഡിയൻ ജനതയുടെ രാഷ്ട്രീയവും.

🔸എഴുപതുകളിലാണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. അമേരിക്കയും വിയറ്റ്നാമീസ് ഗൊറില്ല പോരാളികളും തമ്മിലുള്ള യുദ്ധം അങ്ങേയറ്റം തീവ്രമായ രീതിയിൽ കൊടുമ്പിരി കൊണ്ടിരിക്കുന്ന സമയം. നിഷ്പക്ഷമായ രീതിയിൽ നിലകൊള്ളാനുള്ള സർക്കാരിന്റെയും ജനങ്ങളുടെയും പൊതു വികാരം കാറ്റിൽ പറത്തി കൊണ്ട് കംബോഡിയ എന്ന രാജ്യവും യുദ്ധത്തിലേക്ക് വലിച്ചിഴയ്ക്കപ്പെടുകയാണ്. സമാധാനപരമായ രീതിയിൽ ജീവിച്ചുപോന്ന ജനങ്ങൾ അധികം താമസിയാതെ തന്നെ യുദ്ധക്കെടുതികളുടെ ഭാഗമായി മാറുകയാണ്.കംബോഡിയയുടെ രാഷ്ട്രീയ ചരിത്രത്തിലെ കറുത്ത അധ്യായങ്ങളിൽ ഒന്നാണ് ചിത്രത്തിന് ആസ്പദമായിട്ടുള്ളത്.

🔸ചരിത്രവും യാഥാർഥ്യവും ,സഹനവും അതിജീവനവും ,ഉയർച്ചയും വീഴ്ചയും എല്ലാം യുങ് എന്ന കംബോഡിയൻ പെൺകുട്ടിയിലൂടെയാണ് ചിത്രം പ്രേക്ഷകരിലേക്ക് എത്തിക്കുന്നത്. കാഴ്ചക്കാരൻ കാണുന്നത് യുങ്ങിന്റെ വീക്ഷണമാണ് ,അവളുടെ കാഴ്ചപ്പാടുകളാണ്. യുദ്ധം ഒറ്റപ്പെടുത്തിയ ഏതൊരു കുട്ടിയുടെയും തലത്തിൽ നിന്നും ചിത്രം അവസാനിക്കുമ്പോൾ കാണുന്ന യുങ്ങിലേക്കുള്ള യാത്രയാണ് ഈ ചിത്രം ,യുദ്ധ ചിത്രങ്ങളും അവയോട് അനുബന്ധിച്ച സംഭവങ്ങളും അറിയാൻ താല്പര്യമുള്ളവർ തീർച്ചയായും കണ്ടിരിക്കേണ്ട ചിത്രങ്ങളിൽ ഒന്നാണ് ഫസ്റ്റ് ദേ കിൽഡ് മൈ ഫാദർ.

Verdict : Very Good

367. The Third Man (1949)

Director : Carol Reed

Genre : Film Noir

Rating : 8.2/10

Country : UK

Duration : 106 Minutes


🔸ഹാരി ലൈമിന്റെ മരണം ഒരുപാട് ദുരൂഹതകൾ നിറഞ്ഞതാണ് ,പ്രത്യക്ഷത്തിൽ അപകട മരണം എന്ന് ഉറപ്പിക്കാൻ ഒരുപാട് കാരണങ്ങൾ ഉണ്ടെങ്കിലും ചില സംശയങ്ങളും അതിനോട് അനുബന്ധിച്ചുള്ള ചില ചോദ്യങ്ങളും വിരൽ ചൂണ്ടുന്നത് കൊലപാതകത്തിലേക്കാണ്. ഈ സൂചനകളിൽ ഏറ്റവും പ്രാധാന്യം അർഹിക്കുന്നത് സംഭവത്തിന് സാക്ഷ്യം വഹിച്ച വ്യക്തിയുടെ മൊഴിയും പോലീസ് റെക്കോർഡുകളിലെ മൊഴിയും തമ്മിലുള്ള വൈരുധ്യം തന്നെ ആണ്. റെക്കോർഡുകളിൽ ഹാരിയെ മരണശേഷം താങ്ങി എടുത്ത് കൊണ്ടുപോയത് രണ്ട് ആളുകൾ ചേർന്നാണ് എന്ന് വ്യക്തമായി രേഖപ്പെടുത്തിയിട്ടുണ്ട് ,എന്നാൽ ദൃക്‌സാക്ഷി പറയുന്നത് ഒരാൾ കൂടി അവിടെ ഉണ്ടായിരുന്നു എന്നാണ്. ആരും തുറന്ന് പറയാത്ത ,സമ്മതിക്കാത്ത ഒരു മൂന്നാമൻ കൂടി അവിടെ ഉണ്ടായിരുന്നു.

🔸രണ്ടാം ലോക മഹായുദ്ധത്തിന്റെ അവശേഷിപ്പുകൾ പേറി ജീവിക്കുന്ന വിയന്ന ആണ് ചിത്രത്തിന്റെ കഥാ പശ്ചാത്തലം. യുദ്ധം ഏല്പിച്ച ആഘാതങ്ങളിൽ നിന്നും ഭീകരമായ ഓർമകളിൽ നിന്നും ഏവരും കര കയറി വരുന്നതേ ഉള്ളൂ. ആ നഗരത്തിലേക്ക് ഒരുനാൾ എഴുത്തുകാരനായ ഹോളി മാർട്ടിൻസ് എത്തി ചേരുകയാണ്, തന്റെ സുഹൃത്തായ ഹാരി ലൈമിന്റെ ക്ഷണം സ്വീകരിച്ച് എത്തിയതാണ് സ്ഥിരം വെസ്റ്റേൺ ആക്ഷൻ സസ്പെൻസ് നോവലുകൾ മാത്രം എഴുതാറുള്ള ഹോളി. ഒട്ടും ശുഭകരം അല്ലാത്ത വാർത്ത ആയിരുന്നു ഹോളിയെയും കാത്ത് വിയെന്നായിൽ ഉണ്ടായിരുന്നത് ,അയാളുടെ പ്രിയ സുഹൃത്ത് ഹാരി ഒരു അപകടത്തിൽ കൊല്ലപ്പെട്ടിരുന്നു.

🔸അസ്വാഭാവികതകൾ ഒരുപാട് നിറഞ്ഞുനിൽക്കുന്നുണ്ട് ഹാരി ലൈമിനും അയാളുടെ മരണത്തിനും ഇടയിൽ ,അവയുടെ എല്ലാം ഉത്തരങ്ങൾ ഹോളിക്ക് കണ്ടെത്തേണ്ടി ഇരിക്കുന്നു. ഇതിനായി ആദ്യം ചെയ്യേണ്ടി ഇരുന്നത് ഹാരിയുടെ ജീവിതത്തിലൂടെ ,അയാളുടെ വേണ്ടപ്പെട്ടവരിലൂടെ സഞ്ചരിക്കുക എന്നത് തന്നെ ആയിരുന്നു. ഇവരിലൂടെയുള്ള അന്വേഷണങ്ങൾ ഹോളിക്ക് പരിചയപ്പെടുത്തി കൊടുക്കുന്നത് തനിക്ക് തീർത്തും അപരിചിതനായ ഹാരിയെ ആണ്. എന്നാലും ഓരോ ഉത്തരങ്ങളും അയാളിലെ സംശയങ്ങൾ ഏറ്റുകയും ,ചോദ്യങ്ങളുടെ എണ്ണം കൂട്ടുകയുമാണ് ചെയ്തത്.

🔸ഒരു തരം നിഗൂഢത നഗരത്തിന് ചുറ്റും നിലനിൽക്കുന്നുണ്ട് ,ഓരോ വ്യക്തിക്കും ഒളിക്കാനും കള്ളം പറയാനും ഒരുപാട് കാരണങ്ങൾ. അതിനാൽ തന്നെ തീർത്തും അപരിചിതനും ,സർവോപരി പാവവും ആയ ഹോളിയെ പോലെ ഒരു വ്യക്തിക്ക് ഒട്ടും ചേർന്നതല്ല ആ നഗരം ,അതിന്റെ വിഷമതകൾ അയാൾ അറിയാൻ കിടക്കുന്നതെ ഉണ്ടായിരുന്നുള്ളൂ എന്നതാണ് സത്യം. സിനിമ എന്നത് വെറും വിനോദമായോ അല്ലാതെയോ കാണാൻ താല്പര്യമുള്ള ആരുമായിക്കൊള്ളട്ടെ ഒരു കാരണവശാലും കാണാതെ ഒഴിവാക്കാൻ പാടില്ലാത്ത ചിത്രങ്ങളിൽ ഒന്നിന്റെ അത്യന്തം നിഗൂഡമായ കഥ കാഴ്ചക്കാരന് മുന്നിൽ ചുരുൾ അഴിഞ്ഞ് തുടങ്ങുകയാണ്.

🔸തേർഡ് മാൻ എന്ന ചിത്രം കാലാതീതമായി ഇന്നും ശക്തമായി നിലകൊള്ളുന്നതിന്റെ ഏറ്റവും വലിയ കാരണങ്ങൾ ശക്തമായ കഥയും ,മികച്ച കാമറ വർക്കും ,മറ്റൊരു ചിത്രത്തിലും കാണാനാവില്ല എന്ന് നൂറ് ശതമാനം ഉറപ്പ് നല്കാനാവുന്ന ബാക്ക്ഗ്രൗണ്ട് സ്കോറും കാരണമാണ്. ഒരു കഥാപാത്രത്തിന് ഇന്നേവരെ ലഭിച്ചേക്കാവുന്ന ഏറ്റവും മികച്ച എൻട്രികളിൽ ഒന്നും ഈ ബ്ലാക്ക് ആൻഡ് വൈറ്റ് ചിത്രത്തിൽ കാണാനായേക്കും ,വെറും വിരലിൽ എണ്ണാവുന്ന നിമിഷങ്ങൾ മാത്രമേ സ്‌ക്രീനിൽ ഉള്ളൂവെങ്കിലും ആ ഓരോ നിമിഷവും തന്റെ ഇതിഹാസ പരിവേഷത്തെ നൂറ് ശതമാനം ന്യായീകരിക്കുന്ന ഒർസൺ വെൽസിന്റെ മാസ്മരിക പ്രകടനവും ഈ ചിത്രത്തിൽ പ്രേക്ഷകന് കാണാനായേക്കും. ചുരുക്കി പറയുക ആണെങ്കിൽ സിനിമയുടെ ചരിത്രത്തിലെ തന്നെ നിർണ്ണായക നാഴിക കല്ലായ ഈ ചിത്രം കാണാതെ ഒഴിവാക്കിയാൽ നഷ്ടം നിങ്ങൾക്ക് മാത്രം.

Verdict : Must Watch

366. I Killed My Mother (2009)

Director : Xavier Dolan

Genre : Drama

Rating : 7.5/10

Country : Canada

Duration : 96 Minutes


🔸കേന്ദ്ര കഥാപാത്രമായ ഹുബെർട്ട് മിനിലിന്റെ മാനസികാവസ്ഥ കുറച്ച് വിചിത്രം ആണ് ,ഒരു പക്ഷെ അയാൾക്കല്ലാതെ മറ്റാർക്കും അയാളെ മനസിലാക്കാനും കഴിഞ്ഞേക്കില്ല. ഹുബെർട്ടിന് തന്റെ അമ്മയോട് ഏതൊരു മകനും ഉള്ളത് പോലെ അഗാധമായ സ്നേഹമാണ് ,തന്റെ ജീവിതം ഇന്ന് കാണുന്നത് പോലെ ആയി തീരാൻ തന്റെ അമ്മ അനുഭവിച്ചതെല്ലാം അയാൾക്ക് അറിയാം. എന്നാൽ പ്രശനം എന്താണെന്ന് വെച്ചാൽ ഒരു നിമിഷം പോലും അമ്മയോടൊപ്പം ചിലവഴിക്കാൻ അയാൾ ഇഷ്ടപ്പെടുന്നില്ല ,വേറൊന്നുമല്ല താനും അമ്മയും തമ്മിലുള്ള ബന്ധം പഴയ പോലെ ദൃഡം അല്ല എന്നാണ് അയാളുടെ കാരണം.

🔸ചിത്രത്തെ കുറിച്ച് പറയുമ്പോൾ ഒരു കാരണവശാലും ഒഴിവാക്കാൻ കഴിയാത്ത ഭാഗമാണ് ,ചിത്രം സ്‌ക്രീനിൽ എത്തിക്കാനായി അണിയറ പ്രവർത്തകർ നേരിട്ട വെല്ലുവിളികളും അതിനെ മറികടക്കാൻ ഉള്ള അവരുടെ ശ്രമങ്ങളും. സ്വവർഗ രതിയും അതിന് അനുബന്ധമയിലുള്ള സംഭവങ്ങളും കാരണം പ്രധാന കഥാപാത്രം അവതരിപ്പിച്ച വ്യക്തി അടക്കമുള്ള കലാകാരൻമാർ കടുത്ത മനഃപ്രയാസങ്ങൾ നേരിടേണ്ടി വന്നെന്ന് പറയപ്പെടുന്നു. എന്തിരുന്നാലും റിലീസിനും ,കാനസ് ഫിലിം ഫെസ്റ്റിവലിലെ പ്രദര്ശനത്തിന് ശേഷവും ചിത്രത്തിന് ലഭിച്ച എട്ട് മിനിറ്റ് സ്റ്റാന്റിംഗ് ഒവേഷൻ എല്ലാവർക്കുമുള്ള അംഗീകാരമാണ്.

🔸മുകളിൽ സൂചിപ്പിച്ചത് പോലെ തന്നെ ചിത്രവും കഥയും ഹുബെർട്ട് എന്ന പതിനാറ് വയസ്സുകാരന്റെയും അവന്റെ അമ്മ ആയ ഷാൻടാലിലൂടെയും ആണ് വികസിക്കുന്നത്. ഈ പ്രായത്തിലൂടെ കടന്ന് പോവുന്ന ഏതൊരു വ്യക്തിയെയും പോലെ തന്നെ ഉത്തരങ്ങളെക്കാൾ ചോദ്യങ്ങളാണ് ഹുബെർട്ടിൽ ഉള്ളത്. തന്റെ മേൽ അടിച്ചേൽപ്പിക്കുന്ന നിയമങ്ങളോടോ ,അവയുടെ വേലി കെട്ടുകളോടോ ഒട്ടും നല്ല മനോഭാവം അല്ല ഹുബെർട്ടിന്റേത്. ഈ ചോദ്യങ്ങളുടെ ഉറവിടം അവന്റെ അമ്മ തന്നെ ആവുന്ന നിമിഷം അവർക്കെതിരെ തിരിയാനും ഹുബെർട് മടിക്കുന്നില്ല. പൊട്ടിത്തെറിക്കാൻ തയാറായി നിൽക്കുന്ന അഗ്നി പർവതം കണക്കെയാണ് ഹുബെർട് എന്ന കഥാപാത്രം.

🔸ഷാൻടാൽ എന്ന കഥാപാത്രം ,അഥവാ ഹുബെര്ടിന്റെ അമ്മ തന്റെ ചെറു പ്രായത്തിൽ തന്നെ ഭർത്താവും ആയി പിരിഞ്ഞ വ്യക്തി ആണ്. ഹുബെർട്ടിന് ഓർമ പോലും ഉറയ്ക്കാത്ത കാലത്ത് അരങ്ങേറിയ ചില സംഭവങ്ങൾ കാരണമാണ് ഷാൻടാൽ തന്റെ ജീവിതത്തിൽ തനിച്ചായത് ,അമ്മയും മകനും തമ്മിലുള്ള ബന്ധം ഉലയുന്നതിൽ ഈ വേർപാടിനും വലിയ പങ്ക് ഉണ്ടായിരുന്നു. എന്തിരുന്നാലും ഷാൻറ്റാലിനെ സംബന്ധിച്ച് ഒരു വിഷമവും അറിയിക്കാതെയാണ് അവർ ഹുബെർട്ടിനെ വളർത്തിയത് ,തന്റെ ജീവിതത്തിൽ എന്നും മകൻ എന്നൊരു ചിന്ത മാത്രമേ അവർക്ക് ഉണ്ടായിരുന്നുള്ളൂ. അതിനാൽ തന്നെ മകന്റെ പെരുമാറ്റത്തെ ഒരു രീതിയിലും മനസിലാക്കാൻ അവർക്ക് കഴിയുന്നില്ല.

🔸ഹുബെർട് എന്ന കഥാപാത്രം ,ഒരു ഗേ കൂടിയാണ്. തന്റെ ഈ പ്രത്യേകത പുറമെ ആരോടും തന്നെ പറഞ്ഞിട്ടില്ല എന്ന് മാത്രമല്ല സ്വയം ഉൾക്കൊള്ളുന്നതെ ഉള്ളൂ. അങ്ങനെ അത്യാവശ്യം പ്രശ്നങ്ങളും കാര്യങ്ങളുമായി ജീവിച്ച് പോന്ന ഈ അമ്മയുടെയും മകന്റെയും ഇടയിലേക്ക് ചില പുതിയ കഥാപാത്രങ്ങളുടെയും സംഭവങ്ങളുടെയും കടന്ന് വരവും അതിനെ തുടർന്നുണ്ടാവുന്ന പ്രശ്നങ്ങളും എല്ലാമാണ് ഈ ചിത്രത്തിന്റെ പ്രമേയം. എല്ലാവര്ക്കും ഇഷ്ടപ്പെട്ടേക്കാവുന്ന അവതരണം ഒന്നും അല്ലെങ്കിലും മികച്ച കഥയും ,വൈകാരികമായ അവതരണവുമാണ് ഈ കനേഡിയൻ ചിത്രത്തിന്റെ ശക്തി.

Verdict : Good

365. Nine Queens (2000)

Director : Fabian Bielinsky

Genre : Crime

Rating : 7.9/10

Country : Argentina

Duration : 114 Minutes


🔸നയൻ ക്വീൻസ് എന്ന ചിത്രം ആരംഭിച്ച് ഏകദേശം ഒരു പതിനഞ്ച് മിനുട്ട് കടക്കുമ്പോഴേക്കും ഏതൊരു മലയാളി കാഴ്ചക്കാരന്റെയും മനസ്സിൽ ഉദിച്ചേക്കാവുന്ന സ്വാഭാവികമായ ചിന്ത ഇത് ഞാൻ എവിടെയോ മുൻപ് കണ്ടിട്ടുണ്ടല്ലോ എന്നത് ആയിരിക്കും ,അത് തെറ്റും അല്ല കാരണം ഒരു പ്രശസ്ത മലയാള ചിത്രം അതിന്റെ കഥ ഏറെക്കുറെ പൂർണമായും ഈ ചിത്രത്തിൽ നിന്നും ചുരണ്ടിയിട്ടുണ്ട്. ചിത്രത്തിന്റെ ക്ലൈമാക്സ് അടക്കമുള്ള രംഗങ്ങൾ എല്ലാം വളരെ സാമ്യതകൾ നിറഞ്ഞതിനാലും മലയാള ചിത്രം എല്ലാവരും കണ്ടിരിക്കാൻ ഉള്ള സാധ്യത വളരെ അധികം ആയതിനാലും ചിത്രത്തിന്റെ കഥയെ കുറിച്ചോ കഥാപാത്രങ്ങളെ കുറിച്ചോ സൂചനകൾ ഒന്നും തന്നെ പോസ്റ്റിൽ ഉൾപെടുത്തുന്നില്ല.

🔸ഹിന്ദി ,തെലുങ്ക് ,മലയാളം എന്നീ മൂന്ന് ഇന്ത്യൻ ഭാഷകളിൽ റീമെയ്ക്ക് ചെയ്യപ്പെട്ടിട്ടുണ്ട് ഈ അർജന്റീനിയൻ ചിത്രം. ലോകത്താകമാനം ഇരുപത്തി എട്ടോളം അന്തർ ദേശീയ ചലച്ചിത്ര മേളകളിലും പുരസ്‌കാര വേദികളിലും പ്രദർശിപ്പിക്കപ്പെട്ട ചിത്രം ഇരുപത്തി ഒന്ന് അവാർഡുകളും നേടിയിട്ടുണ്ട് ,എന്നാൽ ഈ പുരസ്‌കാരങ്ങളുടെ കണക്കുകൾക്ക് അപ്പുറം ചിത്രത്തിന് അർജന്റീനിയൻ സിനിമാ ലോകത്തുള്ള പ്രാധാന്യം ഒരു വിധത്തിലും കുറച്ച് കാണാനാവാത്തതാണ്. സമ്പദ് വ്യവസ്ഥ തകർന്ന് തരിപ്പണമായ ഒരു രാജ്യത്തിൽ നിന്നും റിലീസിന് ശേഷം ലോകത്താകമാനമുള്ള കാഴ്ചക്കാരുടെ ശ്രദ്ധ ആകർഷിച്ച ചിത്രം ,പിന്നീട് ഒരുപാട് സംവിധായകർക്കും സിനിമ സ്വപ്നം കണ്ട അനേകം വ്യക്തികൾക്കും പ്രചോദനം ആയി മാറിയത് ചരിത്രം.

🔸പ്രേക്ഷകനെ കബളിപ്പിക്കുന്നതിൽ അങ്ങേയറ്റം വിജയിച്ചിട്ടുണ്ട് സംവിധായകൻ ആയ ഫാബിയാൻ ബൈലിൻസ്കി. പ്രത്യക്ഷത്തിൽ ചിത്രത്തിലെ കഥാപാത്രങ്ങളും ,അവരുടെ ഉദ്ദേശങ്ങളും എല്ലാം പ്രേക്ഷകന് ഊഹിച്ചെടുക്കാൻ മാത്രം ലളിതമാണ് എന്നൊരു സൂചന ചിത്രത്തിൽ കാണാൻ ആവും,അസ്വാഭാവികമായി യാതൊന്നും തന്നെ ഇല്ല എന്നൊരു ചിന്ത ജനിപ്പിക്കുക ആയിരുന്നു സംവിധായകന്റെ ഉദ്ദേശം എന്നും തോന്നിപ്പോകും ചിത്രം കണ്ടു കൊണ്ടിരിക്കുമ്പോൾ. ഒടുവിൽ തന്റെ കളി അവസാനിപ്പിച്ച് കാർഡുകൾ എല്ലാം മേശപ്പുറത്ത് വെക്കുന്ന നിമിഷം ,ആ നിമിഷം പ്രേക്ഷകനെ അമ്പരപ്പിക്കാൻ ഉള്ള കഴിവാണ് ചിത്രത്തിന്റെ വിജയവും.

🔸രണ്ട് മണിക്കൂർ ദൈർഖ്യമുള്ള ചിത്രത്തിൽ ഒരുപാട് സംഭവങ്ങൾ അരങ്ങേറുന്നുണ്ട് ,സ്ക്രീനിലും പിറകിലുമായി. അവ എല്ലാം പിടികിട്ടാൻ തന്നെ ചിത്രം ഒന്നിലധികം തവണ കാണേണ്ടി വരും ,എന്തിരുന്നാലും ഈ ഓരോ കാര്യങ്ങളും അതിന്റെ മേന്മ ചോരാതെ പ്രേക്ഷകരിൽ എത്തിക്കുന്നതിലും അതിന് അണിയറയിൽ ഉള്ളവർ കാണിച്ച കയ്യടക്കവും പ്രത്യേക പരാമർശം അർഹിക്കുന്നുണ്ട്. മലയാളം ഉൾപ്പെടെയുള്ള ഭാഷകളിലെ റീമേയ്ക്കുകൾ പരാജയപ്പെട്ടതും ഈ കയ്യടക്കം ഇല്ലാതെ പോയതിനാൽ ആണ് എന്ന് പറയേണ്ടി വരും ,ഒരു പരിധി വരെ. സിനിമയുടെ പൊതു അവതരണ ശൈലി കൊണ്ടാവണം പുതുതായി കടന്നുവരുന്ന ഓരോ കഥാപാത്രത്തെയും ഒരല്പം സംശയത്തിന്റെ നിഴലിൽ ആണ് അവതരിപ്പിച്ചിരിക്കുന്നതും ,ചുരുക്കി പറഞ്ഞാൽ ചിത്രം അവസാനിക്കുന്നത് വരെ ആരെ വിശ്വസിക്കണം എന്നതിനും ആരുടെ കൂടെ നിൽക്കണം എന്നതിനും ഒരു തീരുമാനത്തിൽ എത്താനായേക്കില്ല പ്രേക്ഷകർക്ക്.

🔸കഥാപരം ആയി വിപ്ലവകരം എന്നൊന്നും വിശേഷിപ്പിക്കാൻ ആവില്ല ഈ ചിത്രത്തെ ,എന്നാൽ അവതരണം എന്നതിൽ എല്ലാ രീതിയിലും മികച്ച് നിൽക്കുന്നുമുണ്ട്. റീമേയ്ക്ക് ചിത്രം കണ്ട കാഴ്ചക്കാരന് ഈ ചിത്രം അത് അർഹിക്കുന്ന മികവോടെ ആസ്വദിക്കാൻ കഴിയുമോ എന്ന കാര്യം സംശയമാണ്. പ്രധാന കഥാപാത്രങ്ങളായി എത്തിയ നടന്മാരെല്ലാം അവിസ്മരണീയമായ പ്രകടനം കാഴ്ചവെച്ച ചിത്രം നല്ല സിനിമകൾ ഇഷ്ട്ടപ്പെടുന്ന ഏതൊരു വ്യക്തിയും നിസ്സംശയം കണ്ടിരിക്കേണ്ട ചിത്രങ്ങളിൽ ഒന്നാണ്.

Verdict : Must Watch

364. Almayers Folly (2011)

Director : Chantal Ackerman

Genre : Drama

Rating : 6.5/10

Country : France

Duration : 130 Minutes


🔸ആഗ്രഹങ്ങളും പ്രതീക്ഷകളും ആണ് നിരാശയ്ക്ക് കാരണം എന്ന് ഏതോ ഒരു മഹാൻ എവിടെയോ പറഞ്ഞത് കേട്ടിട്ടുണ്ട് ,ഈ വാചകത്തിന്റെ ഏറ്റവും മികച്ച ഉദാഹരണം ആണ് അല്മെയേഴ്സ് ഫോളി എന്ന ചിത്രം. അടുത്തിടെ കണ്ട പല ചിത്രങ്ങളും വെച്ച് നോക്കുമ്പോൾ തികച്ചും അപ്രതീക്ഷിതമായ ഒരു തുടക്കം ആണ് ഈ ചിത്രത്തിന്റേത്. വളരെ സമാധാന പരമായ രീതിയിൽ പോയി കൊണ്ടിരിക്കുന്ന ഒരു ബാറിലാണ് ചിത്രം ആരംഭിക്കുന്നത് ,ഒട്ടും പ്രതീക്ഷിക്കാത്ത രീതിയിൽ ,സമയത്ത് ഒരു കൊലപാതകം അവിടെ അരങ്ങേറുകയാണ്. കൊല ചെയ്യപ്പെട്ട വ്യക്തി ആരാണെന്നതും ,ചിത്രത്തിന്റെ മുന്നോട്ടുള്ള ഒഴുക്കിൽ ഈ കൊലപാതകത്തിനും അനുബന്ധ സംഭവങ്ങൾക്കും ഉള്ള പ്രാധാന്യം എന്താണെന്നതും ചിത്രം കണ്ട് മനസ്സിലാക്കാൻ വേണ്ടി വിട്ട് തരികയാണ്.

🔸വിരലിൽ എണ്ണാവുന്ന കഥാപാത്രങ്ങൾ മാത്രമേ ചിത്രത്തിലുള്ളൂ ,അതിൽ തന്നെ കഥ വികസിക്കുന്നത് മൂന്ന് കഥാപാത്രങ്ങളുടെ ചുവട് പിടിച്ചാണ്. ചിത്രത്തിലെ പ്രധാന കഥാപാത്രം ആണ് അൽമേയർ ,കൈവെച്ച മേഖലകളിൽ എല്ലാം തന്നെ തോൽവി നേരിടേണ്ടി വന്ന ,തന്റെ കഴിവിന് അനുസരിച്ച് ഉയരാൻ ഒരിക്കലും കഴിയാതെ പോയി എന്ന് സ്വയം വിശ്വസിക്കുന്ന ,ആ ചിന്തയിൽ മുഴുകി പോയ ഒരു സമ്പൂർണ പരാജിതൻ. തന്റെ കുടുംബ ജീവിതത്തിൽ പോലും സംപ്തൃപ്തൻ അല്ലാത്ത അൽമേയറുടെ അവസാന പ്രതീക്ഷ അയാളുടെ മകളായ നീനയിൽ ആണ്. തനിക്ക് നേടാൻ കഴിയാഞ്ഞ വിജയം തന്റെ മകളിലൂടെ നേടാം എന്നൊരു സ്വാർത്ഥ ചിന്ത കൂടിയുണ്ട് അൽമേയർക്ക്.

🔸തന്റെ പാരമ്പര്യവും കുടുംബ മേന്മയും നിലനിർത്താനുള്ള മാർഗം ആയാണ് അൽമേയർ നീനയെ കാണുന്നത്. തനിക്ക് നഷ്ട്ടപ്പെട്ടതെല്ലാം തന്റെ മകൾക്ക് ലഭിക്കണം എന്നതും ,അവൾ വിജയത്തിന്റെ കൊടുമുടി ഏന്തി പിടിക്കണം എന്നതും അൽമേയർക്ക് നിര്ബന്ധമാണ് ,അതിനാലാണ് അവളെ പുറം നാട്ടിൽ അയച്ച് പഠിപ്പിക്കാൻ അയാൾ തയ്യാറാവുന്നത്. ചെറു പ്രായത്തിൽ തന്നെ മാതാപിതാക്കളിൽ നിന്നും പറിച്ചു നടപ്പെട്ട നീനയുടെ മാനസികാവസ്ഥയെ കുറിച്ചോ അവളുടെ വികാരങ്ങളെ കുറിച്ചോ ഒന്നും തന്നെ അൽമേയർ ചിന്തിച്ചില്ല എന്നതാണ് സത്യം.

🔸ഈ അച്ഛൻ മകൾ കഥാപാത്രങ്ങൾക്ക് പുറമെ മറ്റൊരു പ്രധാന കഥാപാത്രം കൂടിയുണ്ട് ചിത്രത്തിൽ ,ക്യാപ്റ്റൻ ലിംഗാർഡ് എന്ന കഥാപാത്രം. ലിംഗാർഡ് ആരാണെന്നോ എന്താണെന്നോ വ്യക്തമായ ഒരുത്തരം ചിത്രം നൽകുന്നില്ല ,അതിന് ശ്രമിക്കുന്നുമില്ല. അൽമേയറുമായോ നീനയുമായോ ലിംഗാർഡിന് ഉള്ള ബന്ധം എന്താണെന്ന് വ്യക്തമല്ലെങ്കിലും അച്ഛൻ മകൻ ബന്ധത്തിന്റേതായ അധികാരവും അവകാശവും അയാൾക്ക് അൽമേയറിന്റെ മേൽ ഉണ്ട്. പല സന്ദര്ഭങ്ങളിലും അൽമേയർ പിന്തുടരുന്നതും ലിംഗാർഡിന്റെ വാക്കുകൾ ആണ്.

🔸ഈ മൂന്ന് കഥാപാത്രങ്ങളുടെയും ജീവിതം ആണ് ഈ ചിത്രം. പഠനം പൂർത്തിയാക്കിയ ശേഷം ജന്മ നാട്ടിലേക്ക് മടങ്ങി എത്താൻ പോവുന്ന നീനയും ,അവളുടെ വരവ് കാത്തിരിക്കുന്ന ,അവളെ സംബന്ധിച്ച് ചില പദ്ധതികൾ മനസ്സിൽ തയ്യാറാക്കിയിട്ടുള്ള അൽമിയറും തുടർന്നുണ്ടാവുന്ന സംഭവങ്ങളുമാണ് ചിത്രത്തിന് ആധാരം. ഇതേ പേരിലുള്ള നോവൽ ആധാരമാക്കി വന്ന ചിത്രത്തെ മികച്ച ചിത്രങ്ങളുടെ പട്ടികയിൽ ഉൾപെടുത്താനാവുമോ എന്ന കാര്യം സംശയമാണ് എന്തിരുന്നാലും വ്യത്യസ്തമായ അനുഭവം ആവും ഈ ചിത്രം എന്നത് ഉറപ്പ്.

Verdict : Good

363. Hey Ram (2000)

Director : Kamal Hassan

Genre : Historical

Rating : 8/10

Country : India

Duration : 190 Minutes


🔸ജനിച്ച അന്ന് തൊട്ട് നമ്മൾ ഏവരും കണ്ടും കേട്ടും പരിചയിച്ച ചില കഥകൾ ഉണ്ട് ,ചില യഥാർത്ഥ സംഭവങ്ങളെ ആധാരമാക്കിയുള്ള 'കഥകൾ'. അവ യാതൊരു സന്ദേഹവും കൂടാതെ വിഴുങ്ങാനും ഗ്രഹിക്കാനും ആണ് സമൂഹം നമ്മളെ പഠിപ്പിച്ചിരിക്കുന്നത്. എന്നാൽ ഇന്നലെകളിലെ ചരിത്രം പോയ് മറഞ്ഞ വർഷങ്ങൾക്കിടയിൽ പല പല ആളുകളിലൂടെ കൈമാറി ആണ് നമ്മളിൽ എത്തിയത് എന്നതും ഈ ഓരോ കൈമാറ്റങ്ങൾക്കിടയിലും വ്യക്തതയിലും ആധികാരികതയിലും അൽപ സ്വല്പം വെള്ളം ചേർക്കലുകൾ നടന്നിരിക്കാം എന്ന ചിന്ത തന്നെ ഭയപ്പെടുത്തുന്നത് ആണ്. യാഥാർഥ്യം എന്തായിരുന്നെന്ന് പഠിക്കാനും അറിയാനും ഒരുപക്ഷെ ഏറ്റവും ഉപകാരപ്രദം ആയേക്കുക മറ്റൊരു വീക്ഷണകോൺ ആവും ,എന്നാലും വസ്തുതകൾ അപ്പോഴും ഇരുട്ടിൽ തന്നെ ആണെന്നത് മറ്റൊരു സത്യം.

🔸സ്വാതന്ത്ര്യ സമര ചരിത്രം നമ്മൾ ഏവർക്കും പരിചിതമാണ്. കഴിവുകെട്ട ,തമ്മിൽ അടി ശീലമാക്കിയ ,ചിതറി കിടന്ന ഒരുപറ്റം നാട്ടുരാജാക്കന്മാരുടെ ബുദ്ധിശൂന്യത മുതലെടുത്ത് അധികാരം കൈക്കലാക്കിയ ബ്രിട്ടീഷ് അധികാരികൾക്ക് നേരിടേണ്ടി വന്ന അനിവാര്യമായ ഭാരതീയരുടെ ചെറുത്ത് നിൽപ്പും അഞ്ചോളം നൂറ്റാണ്ടുകൾക്ക് ശേഷം രാജ്യം തിരികെ നൽകി മടങ്ങേണ്ടി വന്നതുമാണ് സ്വാതന്ത്ര്യ സമര ചരിത്രത്തിന്റെ ഏറ്റവും ലളിതമായ വ്യാഖ്യാനം. എന്നാൽ ഒരുപക്ഷെ തങ്ങളുടെ ഭരണ കാലത്ത് ചെയ്തതിനേക്കാൾ എത്രയോ പ്രഹര ശേഷി കൂടിയ ആയുധം ജനങ്ങൾക്കിടയിലേക്ക് വിതച്ചിട്ടാണ് അവർ നാട് വിട്ട് പോയത് എന്ന മനസിലാക്കാൻ വെറും മാസങ്ങളുടെ സമയം മാത്രമേ ആവശ്യം വന്നുള്ളൂ.

🔸ലോകം കണ്ട ഏറ്റവും വലിയ ചേരി തിരിവുകളിൽ ഒന്നായ ഇന്ത്യ പാകിസ്ഥാൻ വിഭജനം എന്നതായിരുന്നു ബ്രിട്ടീഷ് ഭരണകൂടം തങ്ങളുടെ മുൻ അടിയാളന്മാർക്കായി ഒരുക്കിവെച്ച അവസാന സമ്മാനം. എന്റേതെന്നും നിന്റേതെന്നുമുള്ള അവകാശ തർക്കങ്ങളും പങ്കിട്ടെടുക്കലുകളും അതിന് തുടർച്ചയായി അരങ്ങേറിയ ഭീകരമായ കയ്യാങ്കളികളും കൊലയും കൊള്ളയും ഒക്കെ വിഭജന കാലത്തിന്റെ കറുത്ത അധ്യായങ്ങളാണ്. ഭാരതീയർ എന്ന നിലയിൽ നിന്നും മതത്തിന്റെയും സമൂഹത്തിന്റെയും ജീർണിച്ച വേർതിരിവുകൾ ഒരു ജനതയെ ഒന്നാകെ കാർന്നുതിന്ന കാലം. ഈ കാലഘട്ടം ആണ് പ്രസ്തുത കമൽഹാസൻ ചിത്രത്തിന് ആധാരം ആയിരിക്കുന്നത്.

🔸സിനിമ എന്നത് ഒരു പരിധി വരെ തന്റെ വ്യക്തമായ രാഷ്ട്രീയ നിലപാടുകൾ അവതരിപ്പിക്കാനുള്ള വേദിയായി കണക്കാക്കുന്ന കമൽഹാസൻ ഈ ചിത്രത്തിന്റെ ആരംഭത്തിൽ പ്രേക്ഷകനെ കൊണ്ട് ചെല്ലുന്നത് നാല്പതുകളുടെ അവസാനത്തിലെ സിന്ധിലെക്കാണ്. പുരാവസ്തു ഗവേഷകരാണ് സുഹൃത്തുക്കളായ സാകേത് റാമും ,അംജദ് അലി ഖാനും. വിഭജനം എന്ന ചിന്തയോടും പാകിസ്ഥാൻ എന്ന രാജ്യത്തിന്റെ പിറവിയോടും പൊതുവെ അതൃപ്തി കലർന്ന മനോഭാവം ആണ് ഇരുവർക്കും. എന്നാൽ അനിവാര്യമായ മാറ്റം കണക്കിലെടുത്ത് തന്റെ നാട്ടിലേക്ക് മടങ്ങേണ്ടി വരുന്ന സാകേത് റാം യാത്രയ്ക്കിടയിൽ കാണുന്ന കാഴ്ചകൾ ഭീകരം ആയിരുന്നു.

🔸ഇന്നലെ വരെ സുഹൃത്തുക്കൾ ആയിരുന്നവരും ,പരിചയക്കാരും വരെ പരസ്പരം ആയുധം എടുക്കുന്നു. മനുഷ്യൻ നിർമിച്ച രാജ്യങ്ങളുടെ വേലിക്കെട്ടുകൾക്കായി കൊല്ലാനും ചാവാനും മടിയില്ലാത്ത ഈ ജനങ്ങൾ അയാൾക്ക് തീർത്തും അപരിചിതർ ആയിരുന്നു ,എല്ലാ അർത്ഥത്തിലും. തന്റെ തന്നെ വ്യക്തി ജീവിതത്തിൽ മേൽ പറഞ്ഞ സംഭവ വികാസങ്ങളുടെ ഫലമായി നേരിടേണ്ടി വരുന്ന ചില പ്രശ്നങ്ങൾ സാകേത് റാമിനെ മറ്റൊരു പാതയിലേക്ക് കൊണ്ട് പോവുകയാണ്. താൻ എതിർത്തതും വിയോജിച്ചതും ആയ പാതയിലൂടെ അയാൾ ആരംഭിച്ച യാത്ര ഒരു പുതിയ മനുഷ്യന്റെ പിറവി ആയിരുന്നു ,സ്വാതന്ത്ര്യ സമര ചരിത്രത്തിന്റെ മറ്റൊരു മുഖവും.

Verdict : Must Watch