434. Voice Of A Murderer (2007)

Director : Park Jin Pyo

Genre : Thriller

Rating : 6.9/10

Country : South Korea

Duration : 122 Minutes

🔸ഈ കഥയ്ക്കും അതിന് കാരണമായ യഥാർത്ഥ സംഭവങ്ങൾക്കും മൂന്ന് പതിറ്റാണ്ടിന് അടുത്ത് പ്രായമുണ്ട്, അതിനപ്പുറം കൊറിയൻ നിയമ വ്യവസ്ഥിതിയിലും രഹസ്യാന്വേഷണ, പോലീസ് സേനകളിലും ഒരു പരിധി വരെ ഭരണ തലങ്ങളിൽ വരെയും ഒരല്പം കോളിളക്കം സൃഷ്ടിച്ചതാണ് ഈ സംഭവങ്ങൾ. കുറച്ച് കൂടി വ്യക്തമായി പറയുക ആണെങ്കിൽ 1991ലെ ഹ്യുങ് ഹൊലീ എന്ന കുട്ടിയുടെ തട്ടികൊണ്ട് പോവലും അതിനെ തുടർന്നുണ്ടായ അന്വേഷണവും, ആ അന്വേഷണത്തിൽ ഉടനീളം നില നിന്ന അനിശ്ചിതത്വവും ഒടുവിലെ പര്യവസാനവും എല്ലാം ചേർന്നതാണ് ഈ ചിത്രം. മെമോറീസ് ഓഫ് എ മർഡറെർ, ചിൽഡ്രൻ തുടങ്ങിയ ചിത്രത്തിന് ശേഷം യഥാർത്ഥ കുറ്റകൃത്യം പ്രമേയമാക്കി പുറത്തിറങ്ങിയ മറ്റൊരു നല്ല കൊറിയൻ ചിത്രമാണ് വോയിസ് ഓഫ് എ മർഡറർ.

🔸ഒരു യഥാർത്ഥ കുറ്റകൃത്യം പൊടിപ്പൊ തൊങ്ങലോ ഒന്നും ചേർക്കാതെ ദൃശ്യവൽക്കരിക്കുമ്പോൾ സ്വാഭാവികമായും നേരിടുന്ന പ്രശ്നങ്ങളിൽ ഒന്നാണ് ആരംഭവും, അവസാനവും പ്രേക്ഷകന് പരിചിതമാവും എന്ന സാധ്യത, അതും ഇത്പോലെ സാധാരണക്കാരുടെ വരെ ശ്രദ്ധ പിടിച്ചുപറ്റിയ ഒരു കേസ് ആവുമ്പോൾ പറയുകയേ വേണ്ട. അത് എന്ത് തന്നെ ആയാലും ഈ ചിത്രത്തെ കാര്യമായി ബാധിച്ചിട്ടില്ല, സസ്പെൻസ് എലെമെന്റുകൾക്കും അത് വഴി പ്രേക്ഷകനെ ആകാംക്ഷാഭരിതരാക്കുന്ന വഴിയേ സംവിധായകനും സിനിമയും സഞ്ചരിക്കുന്നില്ല എന്ന് സാരം. ഇവിടെ ശ്രദ്ധ കുട്ടിയുടെ മാതാപിതാക്കളിൽ ആണ്, ഈ ഒരു സംഭവം സമൂഹത്തിൽ നിലയും വിലയുമില്ല രണ്ട് വ്യക്തിത്വങ്ങളെ മാനസികമായി എങ്ങനെ തകർക്കുന്നു എന്നതാണ് ചിത്രത്തിലെ ചോദ്യം.

🔸കൊറിയൻ ദേശീയ മാധ്യമം ആയ ഡിഐസി ടിവിയുടെ അവതാരകൻ ആണ് കെയുങ് ബഹെൻ, പ്രേക്ഷകർക്കിടയിൽ ഒരു സെലിബ്രിറ്റി സ്റ്റാറ്റസ് ആൺ ബഹേനിന്. രാജ്യത്താകമാനമുള്ള ജനങ്ങളുടെ ദൈനംദിന ജീവിതത്തിന്റെ ഭാഗമായി മാറിയിട്ട് വർഷങ്ങളായ ബഹെനിൻറെ വാക്കുകൾക്കും വിമർശനങ്ങൾക്കും ചാട്ടൂളിയേക്കാൾ മൂർച്ചയാണ്. രാജ്യത്തെ രാഷ്ട്രീയ പ്രവർത്തകരോ, എഴുത്തുകാരോ, സെലിബ്രിറ്റിസോ എന്തിന് പോലീസ് സേന പോലും ബഹെനിൻറ്റെ വിമർശനങ്ങൾക്ക് അതീതരല്ല. വീട്ട് ജോലികളും ഭർത്താവും മകനും ഉൾപ്പെടുന്ന ലോകത്ത് മാത്രമായി ഒതുങ്ങി കൂടുന്ന ജിസുൻ ആണ് ബഹെനിൻറ്റെ ഭാര്യ. എല്ലാ രീതിയിലും സംപ്തൃപ്തരായ സന്തുഷ്ടമായ ഒരു കുടുംബമാണ് ബഹെനിന്റേത്. അങ്ങനെ കടന്ന് പോയ നാളുകളിൽ ഒന്നിലാണ് കേസിന് ആസ്പദമായ സംഭവം അരങ്ങേറുന്നത്.

🔸സ്വന്തം അപ്പാർട്മെന്റിന് മുന്നിൽ കളിച്ച് കൊണ്ടിരിക്കെ കെയുങ്ങിന്റെ മകൻ അപ്രത്യക്ഷനാവുകയാണ്. ഒരു തെളിവും അവശേഷിക്കാതെ ഒരു സൂചനയും നൽകാതെ പോയിമറഞ്ഞ മകനെ തേടിയുള്ള ദമ്പതിമാരുടെ അന്വേഷണം ഒരു ഫോൺ കോളിലാണ് അവസാനിച്ചത്. നിങ്ങളുടെ മകൻ എന്റെയൊപ്പം ഉണ്ടെന്നും, ഒരു ദിവസത്തിനുള്ളിൽ ഒരു ലക്ഷം അമേരിക്കൻ ഡോളർ തനിക്ക് ലഭിച്ചാൽ ഒരു പോറൽ പോലും പറ്റാതെ മകൻ വീട്ടിൽ എത്തിയിരിക്കും എന്നുമായിരുന്നു ഫോൺ സംഭാഷണത്തിന്റെ ഇതിവൃത്തം, ഒപ്പം എല്ലാ തട്ടിക്കൊണ്ടുപോവൽ പരിപാടിയിലെയും സ്ഥിരം ഭീഷണിയായ പോലീസിനെ അറിയിച്ചാൽ കനത്ത പ്രത്യാഘാതങ്ങൾ നേരിടേണ്ടി വരും എന്ന മുന്നറിയിപ്പും. എന്തായാലും കുപ്രസിദ്ധമായ ആ സംഭവങ്ങളുടെ ആരംഭം ഇങ്ങനെ ഒക്കെ ആയിരുന്നു.

🔸"Even The Strongest Person Has A Breaking Point, It Doesn't Mean They Are Suddenly Weak, It Just Means Someone Pushed Them Too Far" ഈ ചിത്രത്തെ വിശേഷിപ്പിക്കാൻ ഏറ്റവും ഉചിതമായ വാചകം ഇതാവും. ശക്തനായ ഒരു മനുഷ്യന്റെ മനസികമായുള്ള പതനവും വീഴ്ചയും ആണ് ചിത്രത്തിന്റെ പ്രമേയം, അതിനുള്ള കാരണങ്ങളാണ് ഈ ചിത്രം. വോയിസ് ഓഫ് എ മർഡറർ എന്ന ചിത്രത്തെ കുറിച്ചുള്ള ഒരു കുറിപ്പും വില്ലനെ പറ്റി പ്രതിപാദിക്കാതെ പൂർണമാവില്ല. ഒരു ഭാഗത്തും മുഖം കാണിക്കാതെ മിക്കപ്പോഴും ശബ്ദത്തിലൂടെ മാത്രം തന്റെ സാന്നിധ്യം അറിയിച്ച, അന്വേഷിച്ച് വന്നവരെക്കാളെല്ലാം ഒരു പടി മുകളിൽ ചിന്തിച്ച ഈ കഥാപാത്രം എങ്ങനെ നോക്കിയാലും മാസ്സ് ആയിരുന്നു. റേറ്റിംഗ് എന്ന സമ്പ്രദായത്തെ പറ്റി വ്യാകുലപ്പെടാതെ ഒഴിഞ്ഞ മനസോടെ കാണാൻ ശ്രമിക്കുക, ഇഷ്ടപ്പെടും.

Verdict : Good

433. Halloween (2018)

Director : David Gordon Green

Genre : Slasher

Rating : 7.4/10

Country : USA

Duration : 105 Minutes

🔸ഹാലോവീൻ സീരീസിലെ അവസാന ചിത്രം തിയേറ്ററുകളിലേക്ക് എത്തിയിട്ട് ഒരു പതിറ്റാണ്ട് കഴിഞ്ഞിരിക്കുന്നു, ഹൊറർ ക്ലാസ്സിക് എന്ന് വിശേഷിപ്പിക്കേണ്ട ആദ്യ ഭാഗത്തിനും അതിന്റെ ചുവട് പിടിച്ച് നിലവാര തകർച്ചയുടെ മേൻപൊടിയോട് കൂടി പിന്നീട് വന്ന എട്ട് ഭാഗങ്ങൾക്കും ശേഷം ഏറ്റവും പുതിയ ചിത്രം, സീരീസിലെ പത്താമത് ചിത്രം തിയേറ്ററുകളിൽ എത്തിയിരിക്കുന്നു. ആദ്യ ഭാഗത്തിന് മാത്രം പ്രാധാന്യം നൽകി കൊണ്ടും അതിന് ശേഷം പുറത്തിറങ്ങിയ ചിത്രങ്ങളെ എല്ലാം തന്നെ പൂർണമായും അവഗണിച്ചും ഒരു തരം ആൾട്ടർനേറ്റ് ടൈംലൈൻ മാതൃകയിലാണ് ഈ ചിത്രം തയാറാക്കപ്പെട്ടിട്ടുള്ളത്. ആദ്യ ഭാഗത്തിലെ സംഭവങ്ങൾക്ക് ശേഷം കഴിഞ്ഞ നാല് പതിറ്റാണ്ടുകളായി ഒരു മാനസിക ആരോഗ്യ കേന്ദ്രത്തിൽ അന്ദേവാസിയായ മൈക്കൽ മയേഴ്സിന്റെ തിരിച്ചുവരവും, ആ തിരിച്ചുവരവിനോട് മുൻകാല സംഭവങ്ങളിൽ നിന്ന് ഒരിക്കലും പൂർണ മുക്തി നേടിയിട്ടില്ലാത്ത ലോറിയുടെ പ്രതികരണവും എല്ലാം ചേർന്നതാണ് ഈ ചിത്രം.

🔸ചിത്രത്തിന്റെ കഥയിലേക്ക് ആഴ്ന്നിറങ്ങുന്നത് സ്പോയിലർ ആയതിനാൽ തന്നെ നല്ലതായും മോശമായും അനുഭവപ്പെട്ട വസ്തുതകളിലേക്ക് കടക്കുന്നതാവും നല്ലതെന്ന് കരുതുന്നു. ആദ്യ ചിത്രത്തിലെ കേന്ദ്ര കഥാപാത്രമായ ലോറിയും, മകളായ കാരനും, മകളുടെ മകളായ അലിസനും ആണ് ചിത്രത്തിലെ പ്രധാന താരങ്ങൾ (മൈക്ക് മയേഴ്സിനെ മാറ്റി നിർത്തിയാൽ). ഇവരിൽ ലോറി സ്ട്രോഡ് തന്റെ കഥാപാത്രം മുൻ ഭാഗത്തിലേത് പോലെ തന്നെ മികവുറ്റതാക്കി മാറ്റിയെങ്കിലും മറ്റ് രണ്ട് പേരുടെയും, അവർക്ക് ചുറ്റുമുള്ള മറ്റ് കഥാപാത്രങ്ങളുടെയും അവസ്ഥ നേരെ മറിച്ചായിരുന്നു എന്ന് പറയാം. ഈ വന്ന് പോവുന്ന പല കഥാപാത്രങ്ങളും പ്രത്യേകിച്ച് ഒന്നും തന്നെ ചെയ്യുന്നില്ല എന്ന പ്രതീതി ജനിപ്പിക്കുന്നതിനോടൊപ്പം തന്നെ ചോദ്യം ചെയ്യപ്പെടേണ്ട ചില തീരുമാനങ്ങൾ ചിത്രത്തിൽ കൈക്കൊള്ളുന്നുമുണ്ട്. സഹ കഥാപാത്രങ്ങളെ വേണ്ട രീതിയിൽ മികവുറ്റതാക്കാൻ കഴിയാഞ്ഞത് ഹാലോവീൻ എന്ന ചിത്രത്തിനെ ചെറുതായി പിറകോട്ട് വലിക്കുന്നുണ്ട് എന്നതാണ് സത്യം.

🔸ചിത്രത്തെ പറ്റി എടുത്ത് പറയേണ്ട മറ്റൊരു വസ്തുത അവസാന ഭാഗത്ത് കഥാപാത്രങ്ങളിൽ ഒന്ന് നടത്തുന്ന ഒരേ സമയം അപ്രതീക്ഷിതവും അതേ സമയം അമ്പരപ്പിക്കുന്നതും ആയ ഒരു നീക്കം ആണ്. അത്രയും സമയമുള്ള ചിത്രത്തിന്റെ ഒഴുക്കിന് എതിരെ ഒരു രീതിയിലും വിശദീകരിക്കാൻ കഴിയാത്ത ഒരു സന്ദർഭം ആയാണ് ഈ ഭാഗം അനുഭവപ്പെട്ടത്. ഒരുപക്ഷെ ചിത്രം കാണുന്ന മറ്റൊരാൾക്ക് ഇത് വേറെ രീതിയിൽ വ്യാഖ്യാനിക്കാൻ കഴിഞ്ഞേക്കാം എങ്കിലും കണ്ട് കഴിയുമ്പോൾ പോരായ്മയായി തോന്നിയ വസ്തുതകളിൽ ഒന്ന് കഥയുടെ ഈ ഭാഗമാണ്. സ്പോയിലർ ആയതിനാൽ കൂടുതൽ പറയുന്നില്ലെങ്കിലും ചിത്രത്തിന്റെ ക്ലൈമാക്സിന് മറ്റൊരു പ്രശസ്ത ഹൊറർ ഐക്കണിന്റെ വേറൊരു മരണമാസ്സ്‌ ചിത്രത്തിന്റെ ക്ലൈമാക്സും ആയി സാദൃശ്യം തോന്നിയതും എടുത്ത് പറയേണ്ടി ഇരിക്കുന്നു. ഈ സാദൃശ്യം മാറ്റി നിർത്തിയാൽ ഒരു രീതിയിലും പോരായ്മയായി മാറാത്ത വിധം മികച്ച രീതിയിൽ തന്നെ ചിത്രം അവസാനിപ്പിക്കാൻ സംവിധായകന് കഴിഞ്ഞിട്ടുണ്ട്.

🔸ചിത്രത്തിന്റെ നന്നായി തോന്നിയ ഭാഗങ്ങളിലേക്ക് കടക്കുക ആണെങ്കിൽ എടുത്ത് പറയേണ്ടത് അവസാന ഭാഗങ്ങൾ തന്നെയാണ്, പ്രത്യേകിച്ചും മൈക്ക് മയേഴ്സ് സ്ട്രോഡ് കുടുംബവുമായി വീണ്ടും ഇടപഴകാൻ തുടങ്ങുന്ന ചിത്രത്തിന്റെ അവസാന മുപ്പത് മിനുട്ട്. ഈ ഇരുപത് മിനുട്ടിൽ കഥാഗതി എങ്ങോട്ട് വേണമെങ്കിലും തിരിയാം എന്ന ചിന്ത പ്രേക്ഷകനിൽ സൃഷ്ടിക്കുന്നത് തൊട്ട് ഏറ്റവും അവസാന രംഗം വരെ അന്യായം എന്നതിൽ കവിഞ്ഞ് മറ്റൊരു വാക്ക് കൊണ്ട് വിശേഷിപ്പിക്കാൻ കഴിയില്ല ഹാലോവീണിനെ. ഒട്ടും മോശം പറയാൻ ഇല്ലാത്ത രീതിയിൽ വികസിപ്പിച്ച് കൊണ്ടുവന്ന കഥയ്ക്ക് മികച്ചൊരു പര്യവസാനം തന്നെ കൊടുക്കുന്നുണ്ട് ഈ ചിത്രം. പ്രധാന കഥാപാത്രമായി എത്തിയ ജാമി ലീ കാർട്ടീസ്‌ നാല് പതിറ്റാണ്ടുകൾ കഴിഞ്ഞും ഉണങ്ങാത്ത മുറിവുകളുമായി ജീവിക്കുന്ന ലോറി സ്ട്രോഡിനെ മികച്ചതാക്കിയപ്പോൾ കഴിഞ്ഞ നാല് പതിറ്റാണ്ടുകളായി ആരാധകർ കാണാത്ത ഇന്റെന്സിറ്റിയോടും ഭീകരതയോടും കൂടി മൈക്ക് മയേഴ്സിനെ നിക്ക് കാസിലും സ്‌ക്രീനിൽ എത്തിച്ചിരിക്കുന്നു.

🔸ഹാലോവീൻ എന്ന ചിത്രത്തെ കൃത്യമായി മൂന്നായി ഭാഗിക്കാം, പ്രധാന കഥാപാത്രങ്ങളെയും അവരുടെ ഇപ്പോഴത്തെ പരിതഃസ്ഥിതിയും, നിലപാടുകളും വെളിവാക്കുന്ന ആദ്യ ഭാഗം, മൈക്ക് മയേഴ്സിന്റെ തിരിച്ചുവരവിന്റെ രണ്ടാം ഭാഗം, പോരാട്ടത്തിന്റെയും അതിജീവന ശ്രമങ്ങളുടെയും മൂന്നാം ഭാഗം. ഇവിടത്തെ പ്രത്യേകത എന്തെന്നാൽ ഓരോ ഭാഗവും മികച്ച രീതിയിൽ തന്നെ ആരംഭിക്കാനും ഒരു പരിധി വരെ അവസാനിപ്പിക്കാനും ചിത്രത്തിന് കഴിഞ്ഞിട്ടുണ്ട് എന്നതാണ്. മൈക്ക് മയേഴ്സ് മടങ്ങി എത്തിയതിന് ശേഷമുള്ള മിനുട്ടുകൾ നീണ്ട് നിന്ന രണ്ട് ലോങ്ങ് ഷോട്ടുകൾ കഴിഞ്ഞ എട്ട് ചിത്രങ്ങൾക്കും നല്കാനാവാത്ത കോരിത്തരിപ്പ് തന്നെയാണ് പ്രേക്ഷകർക്ക് പ്രത്യേകിച്ചും സീരീസിന്റെ ആരാധകർക്ക് നൽകുന്നത്. ഇതിനോടൊപ്പം തന്നെ എടുത്ത് പറയേണ്ടതാണ് ചിത്രത്തിന്റെ മികച്ച ബാക്ക്ഗ്രൗണ്ട് സ്കോറും ആകെമൊത്തമുള്ള ടോണും. നല്ല ചിത്രം തന്നെയാണ് ഹാലോവീൻ, ഒരുപക്ഷെ ആദ്യ ചിത്രം കഴിഞ്ഞാൽ സീരീസിലെ ഏറ്റവും മികച്ചത്, സ്ലേഷർ ടൈപ്പ് ചിത്രങ്ങളോട് താല്പര്യമുള്ളവർക്കും ആദ്യ ഭാഗം ഇഷ്ട്ടപ്പെട്ടവർക്കും ധൈര്യമായി കാണാം. ഇത്തവണ എന്തായാലും Michael Myers Is Back !!!!

Verdict : Good

432. The Man Without A Past (2002)

Director : Aki Kaurismaki

Genre : Comedy

Rating : 7.7/10

Country : Finland

Duration : 97 Minutes

🔸"ഈ കിടന്ന കിടപ്പിൽ ഇയാൾ ചത്ത് പോവാൻ വേണ്ടി നമുക്ക് പ്രാർത്ഥിക്കാം, അതല്ലാതെ വേറെന്തെങ്കിലും ചെയ്യാൻ ബാക്കിയുണ്ടെന്ന് എനിക്ക് തോന്നുന്നില്ല. ഇങ്ങനെ ജീവച്ചവം പോലെ കഴിയുന്നതിലും ബേധം മരണം തന്നെയാണ്, ഒരു പക്ഷെ അയാൾ ആഗ്രഹിക്കുന്നതും ഒരു പരിധി വരെ അർഹിക്കുന്നതും അത് തന്നെ ആവും" നമ്മുടെ കേന്ദ്ര കഥാപാത്രത്തിനെ നോക്കിക്കൊണ്ട് അയാളെ ചികിൽസിക്കുന്ന ഡോക്ടർ തന്റെ സഹപ്രവർത്തകനോട് പറഞ്ഞ വാക്കുകളാണ് മുകളിലേത്, അതിന് അയാളെ കുറ്റപ്പെടുത്താനുമാവില്ല കാരണം അത്രമേൽ ദയനീയമാണ് ടിയാന്റെ അവസ്ഥ. കടുത്ത പ്രഹരം കാരണം വികൃതമായ മുഖം, ഒടിഞ്ഞ് തൂങ്ങിയ കൈ, എല്ലാത്തിനും പുറമെ ഒന്ന് തൊട്ടാൽ ഉതിർന്നു കയ്യിൽ പോരും എന്ന മട്ടിലുള്ള താടി എല്ലുകളും മൂക്കും, എല്ലാം കൂടി വല്ലാത്തൊരവസ്ഥയിലാണ് ടിയാൻ ഇപ്പോഴുള്ളത്.

🔸പേരോ മറ്റ് വിവരങ്ങളോ ഒന്നും വെളിപ്പെടുത്താത്ത നായക കഥാപാത്രം ട്രെയിനിൽ ഹെൽസിങ്കി പട്ടണത്തിൽ എത്തുന്നിടത്ത് നിന്നുമാണ് ചിത്രം ആരംഭിക്കുന്നത്, ടിയാന്റെ വരവിന്റെ ഉദ്ദേശം ഒന്നും ചിത്രം വ്യക്തമാക്കുന്നില്ല എന്ന് മാത്രമല്ല യാതൊരു തിടുക്കവും കാണിക്കാതെ അന്നേ ദിവസം രാത്രി കൈസനേമി എന്ന പബ്ലിക് പാർക്കിലെ ഇരിപ്പിടത്തിൽ കഴിച്ച് കൂട്ടാൻ ഇയാൾ തീരുമാനിക്കുകയാണ്. അവിടെ വെച്ച് ഇയാൾ ഒരു മോഷണ ശ്രമത്തിനും തുടർന്നുള്ള ഭീകരമായ ശാരീരിക ആക്രമണത്തിനും പാത്രമാവുകയാണ്. ഒട്ടും ദയാ ദാക്ഷണ്യം കാണിക്കാതെ വസ്തുവകകൾ അപഹരിച്ച ശേഷം കവർച്ചാ സംഘം ടിയാനെ തല്ലി ചതയ്ക്കുകയാണ്, അതിനിടെ കനത്തൊരു പ്രഹരം തലയ്ക്ക് ഏൽക്കുകയും ചെയ്തു.

🔸"The Greatest Curse Ever Inflicted On Human Race Is Memory" എന്ന് ഒർസൺ വെൽസ് സിറ്റിസൺ കെയ്നിൽ പറഞ്ഞിട്ടുണ്ടെങ്കിലും താൻ ആരാണെന്നും തന്റെ ചുറ്റുപാടുകൾ എന്താണെന്നും തിരിച്ചറിയാനാവാതെ, തന്റെ ജീവിതത്തിനെ കുറിച്ച് യാതൊരു ഓർമയും ഇല്ലാതെ ജീവിക്കുക എന്നത് അല്പം പ്രയാസകരം തന്നെയാണ്. ഈയൊരു അവസ്ഥയിലൂടെയാണ് നായക കഥാപാത്രവും കടന്ന് പോയിക്കൊണ്ടിരിക്കുന്നത്, താൻ ആരാണെന്നോ എന്താണെന്നോ അയാൾക്കറിയില്ല, താൻ എവിടുത്തക്കാരൻ ആണെന്നോ, ജോലി എന്താണെന്നോ, ഉറ്റവരും ഉടയവരും ആരാണെന്നതിനോ ഒന്നും അയാളുടെ പക്കൽ ഉത്തരങ്ങളില്ല. ഒരു പുതിയ സ്‌ളേറ്റ് പോലെയാണ് ഇപ്പോൾ അയാളുടെ മനസ്സും ഓർമകളും, ആകെ ശൂന്യം.

🔸പഴയ കാലം എന്ത് തന്നെ ആണെങ്കിലും പുതിയ ജീവിതത്തോട് ഇഴുകി ചേരാനുള്ള ശ്രമത്തിലാണ് നായക കഥാപാത്രം, എല്ലാം ഒന്ന് മുതൽ ആരംഭിക്കുന്ന അയാളുടെ യാത്രകൾ ഒരല്പം കൊമേഡിയുടെയും നിരാശയുടെയും സസ്പെന്സിന്റെയും എല്ലാം മേന്പൊടിയോടെ മനോഹരമായി അവതരിപ്പിച്ചിരിക്കുകയാണ് ഈ അക്കി കോറിസ്മാകി ചിത്രം. റിലീസിന് ശേഷം ഫിന്ലാന്ഡിന്റെ ആ വർഷത്തെ ഔദ്യോഗിക ഓസ്കാർ എൻട്രി കരസ്ഥമാക്കിയ ഈ ചിത്രത്തെ കുറിച്ച് കൂടുതൽ പറയുക എന്നത് കാഴ്ചക്കാരന്റെ ആസ്വാദനത്തെ നന്നായി തന്നെ ബാധിച്ചേക്കും കാരണം വളരെ ലളിതമായ കഥയും അതിന്റെ ലളിത സുന്ദരമായ അവതരണവുമാണ് ഈ ചിത്രം, അതിനാൽ തന്നെ പൂർണമായും ആസ്വദിക്കാൻ പരിമിതമായ അറിവ് തന്നെ മതിയാവും.

🔸ഒരു ജന്മത്തിൽ തന്നെ രണ്ട് ജീവിതങ്ങൾ ജീവിക്കേണ്ടി വരുന്ന നായക കഥാപാത്രത്തിനെ ഈ രണ്ട് കാലഘട്ടങ്ങളും, അതിൽ ഉൾപ്പെടുന്ന കഥാപാത്രങ്ങളും സംഭവങ്ങളും കഥയുടെ ഏതെങ്കിലും ഒരു കോണിൽ സന്ധിക്കുമോ എന്ന ചോദ്യത്തിന്റെയും ഒരല്പം മിസ്റ്ററിയുടെയും ബലത്തിൽ പ്രേക്ഷകനെ ആദ്യാവസാനം പിടിച്ചിരുത്തുന്നുണ്ട് ഈ ചിത്രം. ഒടുവിൽ നൂറ് മിനുട്ടിനടുത്ത് ദൈർഖ്യമുള്ള ചിത്രം കണ്ട് കഴിയുമ്പോൾ സ്വാഭാവികമായും രൂപപ്പെടാൻ ഇടയുള്ള സംപ്ത്രിപ്ത ഭാവത്തെക്കാൾ വലിയൊരു ഗ്യാരന്റി ഈ ചിത്രത്തിന് നൽകാനുമില്ല. മികച്ച കഥയും, കഥാപാത്രങ്ങളായെത്തിയ നടീ നടന്മാരുടെ നല്ല പ്രകടനവും, നല്ല ദൃശ്യങ്ങളും എല്ലാത്തിനും ഉപരി തമാശയിൽ ചാലിച്ച ട്രാജിക്കായ സ്റ്റോറിയുടെ അവതരണവും പരിഗണിക്കുമ്പോൾ നല്ലൊരു അനുഭവം ആവും ഈ ചിത്രം.

Verdict : Very Good

431. Bekas (2012)

Director : Karzan Kader

Genre : Journey

Rating : 7.4/10

Country : Iraq

Duration : 97 Minutes

🔸മനുഷ്യന് പ്രായം ഏറും തോറും അവന്റെ ഉള്ള് മലിനീകരിക്കപ്പെടുക ആണ് എന്ന് ഏതോ ഒരു മഹാൻ പറഞ്ഞതായി കേട്ടിട്ടുണ്ട്, അത് എന്ത് തന്നെ ആയാലും ഈ പ്രായം ഏറുന്ന പ്രക്രിയയോടൊപ്പം തന്നെ നശിക്കുന്ന ഒന്നാണ് മനുഷ്യന്റെ ഉള്ളിലെ കുട്ടിത്തവും അതിനോട് അനുബന്ധിച്ചുള്ള നിഷ്കളങ്കതയും. ഈ കാരണങ്ങൾ കൊണ്ട് തന്നെ ആവും കുട്ടികൾ കേന്ദ്ര കഥാപാത്രങ്ങളായി എത്തുന്ന ചിത്രങ്ങൾ മിക്കതും നിഷ്കളങ്കമായ സ്നേഹത്തിന്റെയും, പ്രതീക്ഷയുടെയും എല്ലാം പ്രതീകങ്ങളാണ്. ഈ ചിത്രങ്ങൾ അതിനാൽ തന്നെ മിക്കതും മനസ്സിന് കുളിർമ ഏറും വിധം മനോഹരമായ സൃഷ്ടികളായി മാറാറുമുണ്ട്, ബെക്കസ് എന്ന ചിത്രവും ഒട്ടും വ്യത്യസ്തമല്ല.

🔸സനാ, ദനാ എന്നീ രണ്ട് സഹോദരന്മാരുടെ കഥയാണ് ഈ ചിത്രം. മാതാപിതാക്കൾ ഇല്ലാത്ത ഇരുവരും തങ്ങളുടെ അന്നന്നത്തെ അന്നത്തിന് വേണ്ടി കഷ്ടപ്പെട്ടാണ് ജീവിതം മുന്നോട്ട് കൊണ്ട് പോവുന്നത്. സദ്ദാം ഹുസൈനിന്റെ ഭരണം അന്ത്യകാലത്തേക്ക് കടന്ന് കൊണ്ടിരുന്ന, യുദ്ധം കാരണം കീറി മുറിക്കപ്പെട്ട കുർദിസ്താനിൽ ആണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്. രണ്ട് സഹോദരന്മാരുടെയും നാട്ടിലേക്ക് അമേരിക്കൻ സൂപ്പർഹീറോ ആയ സൂപ്പർമാന്റെ ചിത്രം പ്രദർശനത്തിന് എത്തുകയാണ്, അത്യാവശ്യം ബുദ്ധിമുട്ടിയിട്ടാണെങ്കിലും ആ അമാനുഷിക കഥാപാത്രത്തെ ഒരുനോക്ക് കാണാൻ ഇരുവർക്കും സാധിക്കുന്നുണ്ട്.

🔸പ്രതീക്ഷയുടെ പ്രതീകമായ ആ അമാനുഷിക കഥാപാത്രം ഇരുവരെയും ഒരു കടുത്ത തീരുമാനം കൈക്കൊള്ളാൻ നിർബന്ധിക്കുകയാണ്, തങ്ങളുടെ ജീവിതം ഈ ദുസ്സഹമായ സാഹചര്യത്തിൽ ജീവിച്ച് തീർക്കാതെ അമേരിക്കയിൽ പോയി സൂപ്പർമാനോടൊപ്പം ചിലവഴിക്കാൻ ഇരുവരും തയ്യാറാവുകയാണ്. അമേരിക്ക എവിടെ ആണെന്നോ, അവിടെ എത്താൻ ഉള്ള മാർഗം എന്താണെന്നോ ഒന്നും സഹോദരന്മാർക്ക് ഒരു പിടിയുമില്ല. അമേരിക്ക എന്നത് കുറച്ച് കിലോമീറ്ററുകൾക്ക് അപ്പുറമോ റോഡിന്റെ മറുവശത്തോ മറ്റോ ആവാം എന്ന നിഗമനത്തിൽ തങ്ങളുടെ യാത്രയ്ക്ക് ആവശ്യമായ ഒരുക്കങ്ങൾ നടത്തുകയാണ് ഇരുവരും.

🔸യാത്രയ്ക്ക് വാഹനമായി തങ്ങളുടെ കഴുത മൈക്കൽ ജാക്ക്സണിനെ തീരുമാനിച്ചു, ഒരു രാജ്യത്ത് നിന്ന് മറ്റൊന്നിലേക്ക് കടക്കുമ്പോൾ പാസ്പോർട്ട് എന്നോ മറ്റോ പേരുള്ള ഒരു ചടങ്ങ് ആവശ്യമാണെന്ന് കേട്ടു, അത് വാങ്ങാനുള്ള ശ്രമം ആവശ്യമായ തുക കയ്യിൽ ഇല്ല എന്ന കാരണത്താൽ മുടങ്ങി എങ്കിലും മറ്റൊരു പകർപ്പ് തയാറാക്കി ആ പ്രശ്നവും പരിഹരിച്ചു. ഇങ്ങനെ ഏറെക്കുറെ കാര്യങ്ങളെല്ലാം തയാറാക്കി യാത്രയ്ക്ക് ഇറങ്ങി തിരിക്കുകയാണ് രണ്ട് സഹോദരങ്ങളും. തന്റെ ചെറുപ്പ കാലത്തെ ജീവിതത്തിനോട് സാമ്യം പുലർത്തും വിധം ഒരു ബയോഗ്രഫിക്കൽ ടച്ചിന്റെ പിൻബലത്തോട് കൂടിയാണ് സംവിധായകൻ കർസാൻ കാദർ ബെക്കസ് അണിയിച്ച് ഒരുക്കി ഇരിക്കുന്നത്.

🔸പോസ്റ്ററും മുകളിൽ സൂചിപ്പിച്ച കഥയുടെ ചെറിയ ഭാഗവും സൂചിപ്പിക്കുന്നത് പോലെ തന്നെ ഒരു ഫീൽ ഗുഡ്, കോമഡി ചിത്രമാണ് ബെക്കസ്, എന്നാൽ അതിനോടൊപ്പം തന്നെ വളരെ ശക്തമായ ഒരു രാഷ്ട്രീയ പരിസ്ഥിതി കൂടി ചിത്രം ചർച്ചാ വിഷയമാക്കുന്നുണ്ട്. പ്രധാന കഥാപാത്രങ്ങളായി എത്തിയ രണ്ട് കുട്ടികളുടെയും ശക്തമായ പ്രകടനവും മികച്ച ഛായാഗ്രഹണവും, മനസ്സിൽ നിന്ന് മായാത്ത കഥാ സന്ദർഭങ്ങളും എല്ലാം കൂടി വേറിട്ട ഒരനുഭവം ആയിരിക്കും ഏതൊരു കാഴ്ചക്കാരനും ഈ ചിത്രം. ഈ ചിത്രം ആദ്യാവസാനം നിങ്ങളെ രസിപ്പിച്ചിരിക്കും, സന്തോഷിപ്പിച്ചിരിക്കും, ചെറുതായി ഒന്ന് നോവിച്ചുമിരിക്കും, കണ്ടിട്ടില്ലാത്തവരോട് തീർച്ചയായും കാണാൻ ശുപാർശ ചെയ്യുന്നു.

Verdict : Must Watch

430. Asura The City Of Madness (2016)

Director : Kim Sung So

Genre : Crime

Rating : 6.6/10

Country : South Korea

Duration : 136 Minutes

🔸പൊതുവെ ഒരു സിനിമ എന്ന് പറയുമ്പോൾ വർഷങ്ങളായി നില നിൽക്കുന്ന കൺസെപ്റ്റ് ആണ് സൽ സ്വാഭാവിയും, സുമുഖനും, എന്നും ന്യായത്തിന്റെ പക്ഷത്ത് മാത്രം നില നിൽക്കുന്നവനും ആയ ഒരു നായകൻ, തന്റെ സ്വാർത്ഥ താല്പര്യങ്ങൾ കാരണം നായകനുമായി നേരിട്ട് സംഘട്ടനത്തിന് മുതിരേണ്ടി വരുന്ന ഒരു വില്ലൻ എന്നിവ. ശെരിയും തെറ്റും തമ്മിലുള്ള ഈ യുദ്ധത്തിൽ വില്ലന് ചതിക്കാം, വഞ്ചിക്കാം, പിന്നിൽ നിന്ന് കുത്താം, അതിലൊന്നും യാതൊരു കുഴപ്പവുമില്ല കാരണം അയാൾ വില്ലനാണ്, തെറ്റിന്റെ ആൾരൂപമാണ്, അയാൾ അങ്ങനെ ആവണം എന്ന് എഴുതപ്പെടാത്ത നിയമമുണ്ട്. ഇവിടെ ആണ് അസുര ദി സിറ്റി ഓഫ് മാഡ്‌നെസ് എന്ന ചിത്രം വ്യത്യസ്തമാവുന്നത്. ഇവിടെ നായകൻ ഇല്ല, ഉള്ളതെല്ലാം നല്ല ഒന്നാന്തരം വില്ലന്മാരാണ്.

🔸കാഴ്ചക്കാരന് ഇഷ്ടപ്പെടാനും, ചിത്രത്തിൽ ഉടനീളം അയാളോടൊപ്പം സഞ്ചരിക്കാനുമായി ഒരു കഥാപാത്രം ഈ ചിത്രത്തിൽ ഇല്ല എന്ന് തന്നെ പറയാം, ഒരർത്ഥത്തിൽ പറയുക ആണെങ്കിൽ റിയലിസ്റ്റിക് ആയ കഥയാണ് അസുരയുടേത്, കാരണം പൂർണമായും നല്ലവനായ ഒരു വ്യക്തി ഇല്ലെന്നും എല്ലാ മനുഷ്യന്റെ ഉള്ളിലും വില്ലത്തരം ഒളിഞ്ഞിരിപ്പുണ്ടെന്നും പുറത്തിറങ്ങാനായുള്ള സന്ദർഭത്തിന് വേണ്ടിയാണ് അത് കാത്ത് നിൽക്കുന്നതെന്നുമുള്ള യാഥാർഥ്യങ്ങൾ ഏവർക്കും അറിയാവുന്നതാണ്, ആ ഒരു മനോഭാവത്തോട് കൂടിയാണ് ചിത്രം പുരോഗമിക്കുന്നത്. പുരോഗതിയിലേക്ക് നയിച്ച് കൊണ്ടിരിക്കുന്ന കൊറിയയുടെ പുറം ലോകം അറിയാത്ത ജീർണിച്ച ക്രിമിനൽ സിൻഡിക്കേറ്റുകളുടെയും, അഴിമതിയുടെയും, ഇവയുടെ ഉള്ളുകളികളുടെയും ബാക്കി പത്രമാണ് ഈ ചിത്രം.

🔸അന്നം എന്ന സാങ്കല്പിക കൊറിയൻ നഗരമാണ് സംവിധായകൻ ആയ കിംഗ് സങ്‌സോയുടെ കഥയ്ക്ക് പശ്ചാത്തലമായി ഇരിക്കുന്നത്. ജനാധിപത്യം എന്ന കടലാസ്സിൽ പൊതിഞ്ഞ നല്ല ഒന്നാന്തരം ഏകാധിപത്യ ഭരണമാണ് മേയർ ആയ പാർക്ക് സുങ് വർഷങ്ങളായി നഗരത്തിൽ നടത്തി പോരുന്നത്. തന്റെ ഉരുക്ക് മുഷ്ട്ടിക്ക് മുന്നിൽ വിധേയരാവാത്തവരെ പാർക്ക് ഉന്മൂലനം ചെയ്യുകയോ അല്ലെങ്കിൽ സമ്മർദ്ദ തന്ത്രം ഉപയോഗിച്ച് വരുതിയിലാക്കുകയോ ചെയ്യാറാണ് പതിവ്. തനിക്കെതിരെ ശബ്ദം ഉയരാതിരിക്കാൻ നീതി ന്യായ വ്യവസ്ഥയെ വരെ തന്റെ ഇങ്ങിതത്തിന് അനുസരിച്ച് കൊണ്ടുവരാൻ പാർക്കിന് കഴിഞ്ഞിട്ടുണ്ട്. പാർക്കിന്റെ വരുതിയിൽ ഉള്ള ഡിറ്റക്റ്റീവ്മാരിൽ ഒരാളാണ് കേന്ദ്ര കഥാപാത്രമായ ഹാൻ ഡോക്യുങ്.

🔸തന്റെ ഔദ്യോഗിക ജീവിത കാലത്ത് മുഴുവൻ പാർക്കിനെയും അയാളുടെ ആശയങ്ങളെയും നീക്കങ്ങളെയും സംരക്ഷിച്ച്, അയാൾക്ക് വിധേയനായി കഴിഞ്ഞ് പോന്ന ഒരാളാണ് ഹാൻ. തന്റെ ജോലിയിൽ നിന്ന് പിരിഞ്ഞാലും ശിഷ്ട കാലം ഇതേ രീതിയിൽ തന്നെ മുന്നോട്ട് പോവാൻ ആണ് അയാൾ ആഗ്രഹിക്കുന്നത്. ഔദ്യോഗിക ബന്ധത്തിന് അപ്പുറം വ്യക്തിപരമായ അടുപ്പം കൂടിയുണ്ട് ഹാനും പാർക്കും തമ്മിൽ. ഇങ്ങനെ പാർക്കിന്റെ ചെയ്തികൾ മൂടിവെച്ച് കൊണ്ടും ന്യായീകരിച്ച് കൊണ്ടും ഹാനിന്റെ ജീവിതം മുന്നോട്ട് പോകവേ ആണ് ചിത്രത്തിന്റെ ഗതി തിരിച്ചുവിടുന്ന ഒരു സംഭവം അരങ്ങേറുന്നത്. പാർക്കിനെതിരെ പ്രയോഗിക്കാൻ ശക്തമായ ഒരായുധത്തിന് വേണ്ടി കാത്തിരുന്ന സേനയിലെ തന്നെ ചിലർ ഇത് മുതലെടുക്കുമ്പോൾ പെട്ട് പോവുന്നത് ഹാൻ ആണ്.

🔸ഇങ്ങനെ പരസ്പരം കീഴടക്കാൻ ശ്രമിക്കുന്ന ചെകുത്താനും കടലിനും സമമായ രണ്ട് കൂട്ടർക്ക് ഇടയിൽ നിൽക്കുന്ന ഹാനിന്റേയും അയാളുടെ മുന്നോട്ടുള്ള ജീവിതത്തിന്റെയും കഥയാണ് അസുര ദി സിറ്റി ഓഫ് മാഡ്‌നെസ്സ്. ഒരു കൊറിയൻ ത്രില്ലെർ ക്രൈം ചിത്രങ്ങളിൽ നിന്ന് പ്രതീക്ഷിക്കാവുന്ന ചടുലമായ ആക്ഷൻ രംഗങ്ങളും വയലൻസും എല്ലാം അസുരയിലും കാണാൻ ആവും, ദോഷം പറയാനില്ലാത്ത ഒരു കഥയെ നല്ല രീതിയിൽ തന്നെ ചിത്രത്തിൽ അവതരിപ്പിച്ചിട്ടുണ്ട്. മികച്ച സംഗീതവും അന്യായ കാസ്റ്റിംഗും എല്ലാം കൂടി ആവുമ്പോൾ നല്ലൊരു ദൃശ്യ വിരുന്ന് തന്നെ പകരാൻ കഴിയുന്നുണ്ട് ഈ ചിത്രത്തിന്. അപ്രവചനീയമായ സന്ദർഭങ്ങളിലൂടെ കടന്ന് പോവുന്ന ഈ ചിത്രം ആക്ഷൻ സ്രേണിയിൽ പെട്ട ചിത്രങ്ങളുടെ ആരാധകർക്ക് ഒരു വിരുന്ന് ആവുമെന്ന് തീർച്ച.

Verdict : Good

Akira Kurosawa

അകിര കുറൊസാവ എന്ന ഇതിഹാസത്തെ കുറിച്ച് കേട്ടിട്ടില്ലാത്ത സിനിമാ പ്രേമികൾ ഉണ്ടാവില്ല, പ്രത്യേകിച്ചും അന്താരാഷ്ട്ര സിനിമകളെ കുറിച്ചും കടന്ന് പോയ വർഷങ്ങൾക്കിടെ സിനിമ കൈവരിച്ച മാറ്റങ്ങളെ കുറിച്ചും കരസ്ഥമാക്കിയ നേട്ടങ്ങളെ കുറിച്ചും അറിയാൻ ശ്രമിക്കുന്ന ഏതൊരു വ്യക്തിയും തീർച്ചയായും പിന്തുടരേണ്ട പേരുകളിൽ ഒന്നാണ് കുറൊസാവയുടേത്. സിനിമ മേഖലയിൽ അനിഷേധ്യമായ സാന്നിധ്യമായി അമേരിക്കയും മറ്റും നില നിന്ന് പോന്നിരുന്ന കാലഘട്ടത്തിൽ തന്റെ ചിത്രങ്ങളിലൂടെ ആ നാടുകളിൽ തന്നെ സെലിബ്രിറ്റി സ്റ്റാറ്റസും, മികച്ച ആരാധക പിന്തുണയും കരസ്ഥമാക്കിയ അപൂർവം പ്രതിഭകളിൽ ഒരാളാണ് അകിര കുറൊസാവ. മുപ്പതുകളിൽ ആരംഭിച്ച്, ആറ് പതിറ്റാണ്ടുകളോളം നീണ്ടു നിന്ന ഐതിഹാസികം ആയ സിനിമാ ജീവിതത്തിൽ മുപ്പത്തി ഏഴോളം ചിത്രങ്ങൾ, ഇവയിൽ തന്നെ മികച്ച സിനിമകളുടെ പുസ്തക താഴുകളിൽ നിത്യ സാന്നിധ്യമായ ഒരു പറ്റം ചിത്രങ്ങളും. ഇന്ഗമാർ ബെർഗ്മാൻ, റോമൻ പൊളാൻസ്കി, ഫെല്ലിനി, സ്പിൽബെർഗ് തുടങ്ങി സമകാലികരായ ചലച്ചിത്ര പ്രേമികൾ പോലും ഉൾപ്പെടുന്ന ആരാധക വൃന്ദം സ്വന്തമായിരുന്ന കുറൊസാവയുടെ നേട്ടങ്ങൾ സിനിമാ മേഖലയിൽ മാത്രമായി ഒതുങ്ങുന്നില്ല. വിപ്ലവകരമായ രീതിയിൽ വ്യത്യസ്തമായി സിനിമയെ സമീപിച്ച കുറൊസാവയുടെ ചിത്രങ്ങളിലൂടെ കാഴ്ചക്കാരന്റെ ജീവിത പരിസ്ഥിതികളിലും വന്ന മാറ്റങ്ങൾ വളരെ വലുതായിരുന്നു, അതിനാൽ തന്നെയാണ് ഇരുപതാം നൂറ്റാണ്ടിൽ ജനങ്ങൾക്കിടയിൽ ഏറ്റവും സ്വാധീനം കൈവരിച്ച സിനിമ പ്രവർത്തകൻ എന്ന് കുറൊസാവ പൊതുവെ വിലയിരുത്തപ്പെടുന്നത്. കുറൊസാവയെ പോലൊരു പ്രതിഭയുടെ അര നൂറ്റാണ്ടിലധിക കാലം നീണ്ടുനിന്ന സിനിമാ ജീവിതത്തെ അദ്ദേഹത്തിന്റെ അഞ്ച് ചിത്രങ്ങളിലൂടെ വിവരിക്കാൻ ശ്രമിക്കുന്നത് അപൂർണ്ണത ആണെങ്കിലും ഒരു ചെറിയ ശ്രമം നടത്തുകയാണ്.

Seven Samurai (1954)

Genre : Epic Drama

Rating : 8.7/10

Duration : 206 Minutes

ഇറങ്ങിയിട്ട് അറുപത് വർഷങ്ങൾ കഴിഞ്ഞിട്ടും, ഈ കാലഘട്ടത്തിലും അതിന് മുൻപും ഒട്ടനവധി ചിത്രങ്ങൾ വിവിധ ഭാഷകളിൽ ആയും രാജ്യങ്ങളിൽ ആയും പുറത്തിറങ്ങിയിട്ടും ലോകത്തെ എക്കാലത്തെയും ഏറ്റവും മികച്ച ചിത്രമായി സെവൻ സമുറായിയെ കാണുന്നവരുണ്ട് എന്നത് മാത്രം മതിയാവും ഈ ചിത്രത്തിന്റെ നിലവാരം മനസിലാക്കാൻ. ഗ്രാമീണരെ കൊള്ളക്കാരിൽ നിന്നും സംരക്ഷിക്കാനായി എത്തുന്ന ഏഴ് സമുറായി പടയാളികളും അവരുടെ പോരാട്ടങ്ങളും ആധാരമാക്കി വന്ന ചിത്രം പിന്നീട് റീമേയ്ക്ക് ചെയ്യപ്പെടുകയും, ഒരുപാട് ചിത്രങ്ങൾക്ക് പ്രചോദനമായി തീരുകയും ചെയ്തിട്ടുണ്ട്. ടീം അപ്പ്‌ ചിത്രങ്ങൾക്കും വെസ്റ്റേൺ സിനിമാ വിഭാഗത്തിനും ഒരു പരിധി വരെ കാരണമായി തീർന്ന ഈ ചിത്രത്തെ സംശയം ഏതും ഇല്ലാതെ തന്നെ വിശേഷിപ്പിക്കാം, ക്ലാസ്സിക് എന്ന്. മൂന്നര മണിക്കൂറോളം ദൈർഖ്യം ഉണ്ടെങ്കിൽ കൂടിയും ഒരു നിമിഷം പോലും സ്‌ക്രീനിൽ നിന്നും പ്രേക്ഷകന്റെ ശ്രദ്ധ പോവാത്ത രീതിയിൽ അണിയിച്ചൊരുക്കിയ ചിത്രം ഏതൊരു സിനിമാ ആസ്വാദകനും പുതിയൊരു അനുഭവം ആവും എന്ന് നൂറ് ശതമാനം ഉറപ്പ് നൽകാനാവും.

Rashomon (1950)

Genre : Period Drama

Rating : 8.3/10

Duration : 88 Minutes

റാഷോമോൻ എന്ന ചിത്രം പ്രധാനമായും മൂന്ന് കാരണങ്ങൾ കൊണ്ടാണ് സിനിമാ ചരിത്രത്തിലെ ഇന്നത്തെ അനിഷേധ്യമായ സ്ഥാനം കയ്യാളുന്നത്. ആദ്യമായി ജാപ്പനീസ് ചിത്രങ്ങൾക്ക് പാശ്ചാത്യ നാടുകളിലേക്കുള്ള പ്രവേശനത്തിനും അതിനോട് അനുബന്ധിച്ച് ലഭ്യമായ ആരാധക വൃന്ദത്തിനും കാരണമായ ചിത്രം എന്ന നിലയ്ക്കാണ് റാഷോമോൻ ശ്രദ്ധേയമായത്. ചിത്രം പുറത്തിറങ്ങിയ വർഷം വെനീസ് ചലച്ചിത്ര മേളയിൽ നിന്നും ഏവരെയും അമ്പരപ്പിച്ച് കൊണ്ട് ഗോൾഡൻ ലയൺ പുരസ്‌കാരം നേടിയ ചിത്രം സ്വാഭാവികമായും മാറുന്ന സിനിമാ ചിന്തകളുടെ സൂചനയാണ് മറ്റുള്ളവർക്ക് നൽകിയത്. ഒരു സംഭവം ഒന്നിൽ അധികം വ്യക്തികളുടെ കാഴ്ചപ്പാടുകളിലൂടെ അവതരിപ്പിക്കുന്ന രീതിയാണ് പൊതുവെ റാഷോമോൻ എഫക്ട് എന്ന് അറിയപ്പെടുന്നത്, പേര് സൂചിപ്പിക്കുന്നത് പോലെ തന്നെ ചിത്രം ഭാഷയ്ക്ക് നൽകിയ സംഭാവനയാണ് ഈ പദം, റാഷോമോൻ എഫക്ടിന്റെ ചുവട് പിടിച്ച് പിന്നീട് അനവധി സിനിമകൾ പുറത്തിറങ്ങിയതും ചരിത്രം. മൂന്നാമതായി റാഷോമോൻ എന്ന ചിത്രത്തിലൂടെ ലോകത്തിന് ലഭിച്ചത് മികച്ച ഒരു ചിത്രത്തോടൊപ്പം അതിനോളം മികച്ചൊരു സംവിധായകനെയുമാണ്, തന്റെ സിനിമാ ജീവിതം ആരംഭിച്ച് ഒരു പതിറ്റാണ്ടിലേറെ കഴിഞ്ഞിരുന്നെങ്കിലും സിനിമാ ചരിത്രത്തിൽ തന്റേതായ ഒരു സ്ഥാനം കുറൊസാവ കരസ്ഥമാക്കിയത് ഈ ചിത്രത്തിലൂടെ ആണെന്ന് പറയാം. കുറൊസാവയുടെ ഏറ്റവും ദൈർഖ്യം കുറഞ്ഞ ചിത്രങ്ങളിൽ ഒന്നായ റാഷോമോൻ കാണാത്തവർ തീർച്ചയായും കാണാൻ ശ്രമിക്കുക.

Yojimbo (1961)

Genre : Samurai

Rating : 8.3/10

Duration : 110 Minutes

സെർജിയോ ലിയോണിന്റെ എ ഫിസ്റ്റ്ഫുൾ ഓഫ് ഡോളേഴ്‌സ് എന്ന ചിത്രം കണ്ടു കഴിഞ്ഞ ശേഷം കുറൊസാവ കത്ത് മുഖേന സംവിധായകനെ ബന്ധപ്പെട്ട ഒരു കഥ കേട്ടിട്ടുണ്ട്, കത്തിൽ ചിത്രത്തെ പുകഴ്ത്തിയ ശേഷം കുറൊസാവ സരസമായി അത് തന്റെ യോജിമ്പോ എന്ന ചിത്രം തന്നെയാണെന്ന് പറയുകയും ചെയ്തു. ഇനി ലിയോണിന്റെ ഭാഗത്ത് നിന്ന് സംഭവത്തെ നോക്കുക ആണെങ്കിൽ, മേൽ പറഞ്ഞ കത്തിടപാടിന് രണ്ടോളം വർഷങ്ങൾക്ക് മുൻപെയാണ് അദ്ദേഹത്തിന് യോജിമ്പോ എന്ന ചിത്രം കാണാൻ അവസരം ലഭിച്ചത്, ചിത്രത്തിൽ അങ്ങേയറ്റം ആകൃഷ്ടനായ ലിയോൺ റീമേയ്ക്ക് ചെയ്യാൻ ശ്രമിച്ചെങ്കിലും സാമ്പത്തികം എന്ന കടമ്പയിലും ജാപ്പനീസ് നിർമാതാക്കളുടെ കടുംപിടിത്തത്തിലും തട്ടി ആ ഉദ്യമം പരാജയപ്പെട്ടു. ശ്രമം ഉപേക്ഷിക്കാൻ തയ്യാറാകാതിരുന്ന ലിയോണിന്റെ അവസാന ശ്രമം ആയിരുന്നു എ ഫിസ്റ്റ് ഫുൾ ഓഫ് ഡോളേഴ്‌സ് എന്ന ചിത്രമായി പിൽക്കാലത്ത് പരിണമിച്ചെത്തിയത്. ഒരു ഗ്രാമത്തിൽ രണ്ട് സംഘങ്ങൾക്കിടയിൽ കാലങ്ങളായി നില നിന്ന് പോന്ന കുടിപ്പകയും, അതിനിടയിലേക്ക് ഒരു പുതിയ വ്യക്തി കടന്ന് വരുന്നതും അതിന്റെ പ്രത്യാഘാതങ്ങളും എല്ലാമാണ് യോജിമ്പോ എന്ന ചിത്രത്തിന്റെ പ്രമേയം. മറുത്തൊരു ചിന്തയ്ക്ക് മുതിരാതെ ധൈര്യമായി ഏതൊരാൾക്കും കാണാം ഈ ചിത്രം, ഒരു വേറിട്ട അനുഭവം ഉറപ്പ് നൽകുന്നു.

Dersu Uzala (1975)

Genre : Drama

Rating : 8.3/10

Duration : 144 Minutes

തന്റെ ജീവിതത്തിൽ രണ്ടേ രണ്ട് തവണ മാത്രമേ ക്യാപ്റ്റൻ ആർസീനിയേവ് ഡാർസോ ഉസാലയെ കണ്ടിട്ടുള്ളൂ. ആർസീനിയേവ് ഇപ്പോൾ ഇറങ്ങി തിരിച്ചിരിക്കുന്ന യാത്ര ഉസാലയ്ക്ക് വേണ്ടിയാണ്, അയാളെ  കണ്ടെത്താനായി. 1902ഇൽ പര്യവേഷണത്തിന്റെ ഭാഗമായി ആണ് ആർസീനിയേവ് റഷ്യിലെ അസീരിയിൽ എത്തുന്നത്. പുറം നാട്ടുകാർക്ക് എത്തിച്ചേരാൻ ബുദ്ധിമുട്ടായതിനാൽ അവരെ സഹായിക്കാനായി എത്തിയതാണ് വേട്ടക്കാരനായ ഉസാല. തന്റെ ജോലിയല്ലാതെ മറ്റൊന്നിനോടും താല്പര്യം കാണിക്കാത്ത ആരോടും അടുക്കാത്ത പരുക്കൻ കഥാപാത്രമാണ് ഉസാല.എങ്കിലും ഭൂമിശാസ്ത്രത്തെ കുറിച്ചും അസീരിയിലെ ഓരോ പുൽനാമ്പിനെ കുറിച്ച് പോലും അയാൾക്കുള്ള അറിവ് അയാളെ പര്യവേഷക സംഘത്തിന്റെ അവിഭാജ്യ ഘടകമാക്കുകയാണ്. പുറമെ പരുക്കനെങ്കിലും ഉസാലയുടെ യഥാർത്ഥ സ്വഭാവം അറിഞ്ഞവർ അധികമില്ല. ആർസെനിയെവിന് ഉസാലയോട് ഉള്ള കടപ്പാടും സ്നേഹവും അയാളോടുള്ള ജീവനോളമാണ്. വ്യത്യസ്ത പശ്ചാത്തലങ്ങളിൽ നിന്നും വന്ന രണ്ട് പേർ തമ്മിലുള്ള നിർവചിക്കാനാവാത്ത നിഷ്കളങ്കമായ സൗഹൃദം. അഞ്ച് വർഷങ്ങൾക്ക് ശേഷം ഒരിക്കൽക്കൂടി ആർസീനിയേവ് ഉസാലയെ കണ്ടുമുട്ടുക ഉണ്ടായി. പ്രതീക്ഷിക്കാതെ തന്റെ ജീവിതത്തിലേക്ക് കടന്ന് വന്ന് അതിലും അപ്രതീക്ഷിതമായി കടന്നുപോയ ഉസാലയെ തേടിയുള്ള ആർസീനിയേവിന്റെ യാത്രയാണ് ഈ ചിത്രം. കുറൊസാവയുടെ അവസാന ക്ലസ്സിക്കുകളിൽ ഒന്ന് ,ഏതൊരു സിനിമ പ്രേമിയും നിസ്സംശയം കണ്ടിരിക്കേണ്ട ചിത്രം.

Ikiru (1952)

Genre : Drama

Rating : 8.3/10

Duration : 143 Minutes

കുറൊസാവയുടെ ചിത്രങ്ങളിൽ ഏറ്റവും മികച്ചത് ഏത് എന്ന് തിരഞ്ഞെടുക്കുക ഒരല്പം ബുദ്ധിമുട്ടേറിയ കാര്യം തന്നെയാണ്. സെവൻ സമുറായി, റാഷോമോൻ എന്ന ചിത്രങ്ങളാണ് പൊതുവെ എല്ലാവരും ആ തസ്തികയിലേക്ക് പരിഗണിക്കാറെങ്കിലും അത്ര തന്നെ പ്രാധാന്യവും ശ്രദ്ധയും അർഹിച്ചിട്ടും ലഭിക്കാതെ പോവുന്ന ചിത്രമാണ് ഇകിരു. മുപ്പത് വർഷത്തോളം ജോലിയും മറ്റുമായി ജീവിതം ജീവിച്ച് തീർക്കാതെ പോയ നായകന് മരണം അടുത്ത നിമിഷം ഒന്ന് ജീവിക്കാൻ ആഗ്രഹം തോന്നുന്നതും അതിനുള്ള അയാളുടെ ശ്രമങ്ങളുമാണ് ചിത്രത്തിന്റെ പ്രമേയം. കാഴ്ചക്കാരനെ വൈകാരികമായി ബാധിക്കുന്ന രീതിയിൽ ഒരല്പം വിഷാദത്തിന്റെ അകമ്പടിയോടെ എത്തുന്ന ഈ ചിത്രം കാണാതിരിക്കുന്നത് വലിയ നഷ്ടം തന്നെയാണ്. ഏകാന്തതയിലൂടെയും വിഷാദത്തിലൂടെയും വേദനയിലൂടെയും മാത്രം തന്റെ ജീവിതം ജീവിച്ച് തീർത്ത നായകന്റെ സന്തോഷം കണ്ടെത്താനുള്ള യാത്ര എല്ലാ രീതിയിലും വ്യത്യസ്തമായ ഒരു സിനിമാ അനുഭവം തന്നെ ആയിരിക്കും എന്ന കാര്യത്തിൽ തർക്കമില്ല.

അകിര കുറൊസാവയെ പോലെ ഒരു സംവിധായകനെ, അദ്ദേഹത്തിന്റെ കേവലം അഞ്ച് ചിത്രങ്ങളിൽ കൂടി മാത്രം പരിചയപ്പെടുത്തുന്നത് അസംബന്ധം തന്നെയാണ്, അതിനാൽ തന്നെ മറ്റുള്ളവ ഉൾപ്പെടുത്തി മറ്റൊരു ഭാഗവുമായി എത്താം എന്ന് പ്രതീക്ഷിക്കുന്നു. മുകളിൽ സൂചിപ്പിച്ച ചിത്രങ്ങൾക്ക് ഒപ്പം Drunken Angel (1948), Ran (1985), Dreams (1990), Throne Of Blood (1957), Hidden Fortress (1958), എന്നിവയും പ്രതിഭ വിളിച്ചോതുന്ന, പരാമർശം അർഹിക്കുന്ന ചിത്രങ്ങളാണ്.

429. The Postman Always Rings Twice (1981)

Director : Bob Rafelson

Genre : Thriller

Rating : 6.7/10

Country : USA

Duration : 123 Minutes


🔸ജാക്ക് നിക്കോൾസൻ എന്ന നടനോടുള്ള ഇഷ്ടക്കൂടുതലിന് ഷൈനിങ് ആദ്യമായി കണ്ട കാലത്തോളം പഴക്കമുണ്ട്, തന്റെ കഥാപാത്രത്തിനെ ഒരു തരം വിഭ്രാന്തി ബാധിച്ച പോലുള്ള മാനറിസങ്ങളോട് കൂടിയുള്ള അദ്ദേഹത്തിന്റെ അവതരണം മറ്റൊരു നടനിലോ ചിത്രത്തിലോ ഒരു കാലത്തും കാണാൻ കഴിഞ്ഞിട്ടുമില്ല. മറ്റുള്ള നടീ നടന്മാരെ പോലും നിഷ്പ്രഭമാക്കുന്ന പോലെയുള്ള നിക്കോൾസണിന്റെ സ്ക്രീൻ പ്രസൻസും എടുത്ത് പറയേണ്ടി ഇരിക്കുന്നു, ഈ കാരണങ്ങളും അതിനോടൊപ്പം തന്നെ ജാക്കിന്റെ നെഗറ്റിവ് ഷെയ്ഡ് ഉള്ള കഥാപാത്രവും ആണ് ദി പോസ്റ്മാൻ ഓൾവെയ്‌സ് റിങ്‌സ് ട്വയിസ് എന്ന ചിത്രം കാണാനുള്ള പ്രചോദനം. പ്രകടനവും അതിനോട് അനുബന്ധിച്ചുള്ള വസ്തുതകളിലും ചിത്രം നല്ലൊരു വിരുന്ന് തന്നെ ആണെങ്കിലും മികച്ച ദൃശ്യാനുഭവം എന്ന വിശേഷണം ഒന്നും ഈ സിനിമ അർഹിക്കുന്നില്ല.

🔸മുപ്പതുകളിൽ പുറത്തിറങ്ങിയ വളരെ പ്രശസ്തമായ ഒരു നോവലിന്റെ നാലാമത് ദൃശ്യാവിഷ്കാരമാണ് ഈ ചിത്രം. 1946ൽ പുറത്തിറങ്ങിയ ചിത്രം മികച്ച പ്രതികരണം കരസ്ഥമാക്കി ഇരുന്നെങ്കിലും നോവലിലെ സംഭവങ്ങളിൽ വെള്ളം ചേർത്തു എന്ന ആരോപണം ശക്തമായിരുന്നു, അതിൽ ഒരു പരിധി വരെ സത്യവും ഉണ്ടായിരുന്നു. ഈ കുറവുകൾ നികത്തി പൂർണമായും രചനയോട് നീതി പുലർത്തി കൊണ്ടുള്ള ഒരു ചിത്രം എന്ന ആഗ്രഹമാണ് അഞ്ച് പതിറ്റാണ്ടുകൾക്ക് ശേഷം ഈ ചിത്രത്തിന് വഴി വെച്ചത്. ഇരുപതാം നൂറ്റാണ്ടിലെ ആരംഭ കാലത്ത് അമേരിക്കയെയും അവിടത്തെ ജനങ്ങളെയും രൂക്ഷമായി ബാധിച്ച സാമ്പത്തിക മാന്ദ്യ കാലത്താണ് ചിത്രത്തിന് ആസ്പദമായ സംഭവങ്ങൾ അരങ്ങേറുന്നത്.

🔸സാധാരണ ജനങ്ങളെ സംബന്ധിച്ചിടത്തോളം ജീവിതം അത്യന്തം ദുഷ്കരമായി തീർന്നിരിക്കുന്ന അവസ്ഥയാണ് എങ്ങും. ഈ സാധാരണക്കാരിൽ ഒരുവനാണ് ഫ്രാങ്ക് ചേംബേഴ്‌സ്, മറ്റൊരു രീതിയിൽ പറയുക ആണെങ്കിൽ ഒരു തരാം നാടോടി ആണ് ഫ്രാങ്ക്. ടിയാന് സ്വന്തമായി വീടോ ബന്ധുക്കളോ സ്ഥാപന ജംഗമ വസ്തുക്കളോ വരുമാന മാർഗങ്ങളോ ഏതുമില്ല, തന്റെ ആവശ്യാനുസരണം ഒരു നാട്ടിൽ നിന്നും മറ്റൊരു നാട്ടിലേക്ക് ജോലിയും മറ്റുമായി യാത്ര ചെയ്യുന്ന, എവിടെയും ഉറച്ച് നിൽക്കുന്ന സ്വഭാവക്കാരൻ അല്ലാത്ത ഫ്രാങ്കിനെ വിശേഷിപ്പിക്കാൻ ഏറ്റവും നല്ലത് നാടോടി എന്ന പദം തന്നെ. ഇങ്ങനെയുള്ള ഊര് തെണ്ടലിനിടെ ആണ് ഫ്രാങ്ക് യുവതിയും സുന്ദരിയും ആയ കോറ സ്മിത്തും ഭർത്താവ് നിക്കും നടത്തുന്ന ഹോട്ടലിൽ ഭക്ഷണം കഴിക്കാൻ എത്തുന്നതും അവിടെ തന്നെ ജോലിയിൽ പ്രവേശിക്കുന്നതും.

🔸കോറായെയും നിക്കിനെയും കുറിച്ച് പറയുക ആണെങ്കിൽ, ആദ്യ കാഴ്ചയിൽ തന്നെ ഒരു തരം അസ്വാഭാവികതയാണ് ഈ ദമ്പതിമാർ കാഴ്ചക്കാരന് നൽകുക. വാർദ്ധക്യത്തിലേക്ക് കടന്ന നിക്കും അയാളുടെ അതി സുന്ദരിയായ ഭാര്യ കോറായും തമ്മിൽ യാതൊരു ചേർച്ചയുമില്ല, കാഴ്ചയിലും മാനസികമായും. വർഷങ്ങൾക്ക് മുന്നേ യൂറോപ്പിൽ നിന്നും കുടിയേറി പാർത്ത നിക്കിന്റെ അധ്വാനത്തിന്റെ ഫലമാണ് ഈ ഹോട്ടലും അയാളുടെ സമ്പത്തും. ഈ സമ്പത്തിൽ കൊറായ്ക്കുള്ള കണ്ണ് ആണ് ഇരുവരുടെയും ദാമ്പത്യത്തെ മുന്നോട്ട് കൊണ്ട് പോവുന്നതും. ഇരുവർക്കുമിടയിലേക്കുള്ള ഫ്രാങ്കിന്റെ കടന്ന് വരവ് വലിയ മാറ്റങ്ങളാണ് സൃഷ്ടിക്കുന്നത്, വൃദ്ധനായ നിക്കിനെക്കാളും സുന്ദരനും യുവാവുമായ ഫ്രാങ്കിൽ കോറ ആകൃഷ്ട ആവുകയാണ്. താമസിയാതെ തന്നെ ഇരുവർക്കും ഇടയിൽ പ്രണയം മൊട്ടിട്ട് തുടങ്ങുകയാണ്.

🔸തങ്ങളുടെ ബന്ധത്തിനും ഭാവിക്കും നിക്ക് ഒരു തടസ്സം ആവും എന്ന യാഥാർഥ്യം ഇരുവരെയും ഒരു കൊലപാതകത്തിന് പ്രേരിപ്പിക്കുകയാണ്, തുടർന്നുള്ള ഭാഗങ്ങൾ ചിത്രം കണ്ട് തന്നെ അറിയുന്നതാവും നല്ലത്. 1979ൽ ഹരിഹരൻ സംവിധാനം ചെയ്ത് ഷീല, ജയൻ, സത്താർ തുടങ്ങിയവർ പ്രധാന കഥാപാത്രങ്ങൾ ആയെത്തിയ ശരപഞ്ജരം എന്ന ചിത്രത്തിനോട് ചില സാമ്യതകൾ പുലർത്തുന്നുണ്ട് ഈ ചിത്രം. മികച്ച സൃഷ്ടി എന്ന അവകാശ വാദം ഒന്നും മുന്നേ സൂചിപ്പിച്ചത് പോലെ ഈ ചിത്രം അർഹിക്കുന്നില്ല, ചില സന്ദർഭങ്ങളിൽ കഥയുടെ ഒഴുക്കും കഥാപാത്രങ്ങളുടെ കാരണങ്ങളും കാഴ്ചക്കാരനിൽ സംശയം ജനിപ്പിക്കുന്നുമുണ്ട്. എന്നാലും ജാക്ക് നിക്കോൾസണിന്റെ പ്രകടനവും മറ്റും കാരണം ഒരു തവണ കണ്ടൊഴിവാക്കാം ഈ ചിത്രം.

Verdict : Above Average

428. Apostle (2018)

Director : Gareth Evans

Genre : Mystery

Rating : 6.7/10

Country : USA

Duration : 130 Minutes


🔸രണ്ട് പതിറ്റാണ്ടുകൾക്ക് മുൻപാണ് മതാന്ധതയുടെയും അതിനാൽ ഉരുത്തിരിഞ്ഞ് വരുന്ന പ്രത്യാഘാതങ്ങളെയും ചൂണ്ടി കാണിച്ച് കൊണ്ട് ഗുരു എന്ന ചിത്രം പ്രേക്ഷകർക്ക് മുന്നിൽ എത്തിയത്. അന്ന് രാജീവ് അഞ്ചൽ പറഞ്ഞതും പറയാൻ ശ്രമിച്ചതും ആയ കാര്യങ്ങൾ ഇന്നും എത്രമേൽ പ്രസക്തം ആണെന്ന കാര്യം ചിത്രം കണ്ടിട്ടുള്ള ഏതൊരാൾക്കും മനസിലാക്കാൻ കഴിയുന്നതാണ്. അപ്പോസിൽ എന്ന ഈയിടെ റിലീസ് ആയ ഇംഗ്ലീഷ് മിസ്റ്ററി ചിത്രത്തെ കുറിച്ചുള്ള പോസ്റ്റിൽ ഗുരു എന്ന സിനിമയ്ക്ക് എന്ത് കാര്യം എന്നാണെങ്കിൽ, രണ്ട് ചിത്രങ്ങൾക്കും സാമ്യതകൾ അനവധിയാണ്. രണ്ട് ചിത്രങ്ങളും അന്ധത ബാധിച്ച ഒരു സമൂഹത്തിന്റെ കഥയാണ്, തങ്ങളെ അടക്കി വാഴുന്ന നേതാക്കന്മാരുടെ ഇങ്ങിതങ്ങൾ ആചാരങ്ങളായി പിന്തുടരുന്ന ഒരു കൂട്ടത്തിന്റെ കഥയാണ്, ഇനി ഇതൊന്നും പോരെങ്കിൽ അപ്പൊസിൽ എന്ന പദത്തിന് മലയാളത്തിലുള്ള അർഥം ഉപദേശി അല്ലെങ്കിൽ ഗുരു എന്ന് തന്നെയുമാണ്.

🔸ഇരുപതാം നൂറ്റാണ്ടിന്റെ തുടക്കത്തിൽ തീവ്ര വിശ്വാസികളായ ഒരു കൂട്ടം ആളുകളാൽ തട്ടി കൊണ്ടുപോകപ്പെട്ട സ്വന്തം സഹോദരിയെ തേടി കേന്ദ്ര കഥാപാത്രം ആയ തോമസ്, പുറം ലോകവുമായി യാതൊരു ബന്ധവും പുലർത്താത്ത അന്ധേവാസികളുടെ ദ്വീപിൽ എത്തുന്നതും തുടർന്ന് അരങ്ങേറുന്ന സംഭവ വികാസങ്ങളും ആണ് അപ്പോസിൽ എന്ന ചിത്രത്തിന്റെ പ്രമേയം. റെയ്‌ഡ്‌ പോലെയൊരു ചിത്രം സംവിധാനം ചെയ്ത വ്യക്തിയിൽ നിന്നും പ്രതീക്ഷിക്കാൻ കഴിയാത്ത ഒരു സൃഷ്ടി ആണ് അപ്പോസിൽ. സംവിധായകന്റെ മുൻകാല ചിത്രങ്ങൾ തന്നെയാണ് ഒരു പരിധി വരെ അപ്പൊസിലിന് വിനയായി തീരുന്നതും, മുൻ ചിത്രങ്ങളിലേത് പോലുള്ള ശ്വാസം അടക്കി പിടിച്ച് കാണേണ്ട ആക്ഷൻ രംഗങ്ങൾ ഇവിടെ കാണാൻ കഴിഞ്ഞേക്കില്ല. ഗോർ രംഗങ്ങളും രക്ത ചൊരിച്ചലും ഉണ്ടെങ്കിലും ആദ്യ പകുതിയിലെ സസ്പെൻസ് നിറഞ്ഞ അവതരണം അവയെ രണ്ടാം പാതിയിലേക്ക് മാത്രമായി ഒതുക്കി കളഞ്ഞിട്ടുണ്ട്.

🔸രണ്ട് മണിക്കൂറിന് മുകളിൽ ദൈർഖ്യം ഉള്ള ചിത്രത്തിനെ ഒരു പരിധി വരെ സമയക്കൂടുതലും പിറകോട്ട് വലിക്കുന്ന പ്രതീതി കാണപ്പെടുന്നുണ്ട്. സഹോദരിയെ അന്വേഷിച്ച് ആണ് നായക കഥാപാത്രം ദ്വീപിലേക്ക് എത്തുന്നതെങ്കിലും, സഹോദരി ഉൾപ്പെടുന്ന സ്ത്രീ കഥാപാത്രങ്ങൾക്ക് വലിയ പ്രാധാന്യം ഒന്നും തന്നെ ചിത്രത്തിൽ നൽകിയിട്ടില്ല എന്നതും ഒരു ചെറു പോരായ്മയായി തോന്നി, എന്നാൽ സ്ത്രീകളെ അടുത്ത തലമുറയ്ക്ക് പിറവി കൊടുക്കാനുള്ള കേവലം ഉപകരണം മാത്രമായി കാണുന്ന കഥാപാത്രങ്ങളുടെ ചിത്രത്തിൽ ഇത് ഒരു പോരായ്മയാണോ എന്നതും പ്രസക്തമായ ചോദ്യമാണ്. കാണാൻ ഇടയായ മോശം എന്ന ചിന്ത മനസ്സിൽ സൃഷ്ട്ടിച്ച കാര്യങ്ങൾ പറഞ്ഞു കഴിഞ്ഞ സ്ഥിതിക്ക് ചിത്രത്തിന്റെ നല്ല വശങ്ങളിലേക്ക് കടക്കാം.

🔸സഹോദരിയെ രക്ഷിക്കുക എന്ന ഒറ്റ ഉദ്ദേശത്തിൽ ദ്വീപിൽ എത്തുന്നിടത്ത് നിന്നും ചിത്രത്തിന്റെ അവസാന രംഗത്ത് കാണുന്നിടം വരെ പ്രധാന കഥാപാത്രമായ തോമസ് നേരിടേണ്ടി വരുന്ന കടമ്പകൾ അനവധിയാണ്, ഈ കടമ്പകളിൽ ഓരോന്നിലൂടെ കടന്ന് പോവുമ്പോഴും അയാളിൽ പ്രകടമാവുന്ന മാറ്റങ്ങളും വലുതാണ്. ഈ കഥാപാത്രത്തെ വിവിധ തലങ്ങളിലൂടെ തന്മയത്വത്തോടെ അവതരിപ്പിച്ച ഡാൻ സ്റ്റീവൻസ് ആണ് ചിത്രത്തിന്റെ നട്ടെല്ല്. ആദ്യാവസാനം കാഴ്ചക്കാരനെ സ്‌ക്രീനിൽ പിടിച്ചിരുത്തുന്ന അതി മനോഹരമായ സിനിമാട്ടോഗ്രഫിയും കയ്യടി അർഹിക്കുന്നുണ്ട്. ആക്ഷൻ രംഗങ്ങൾക്ക് ആദ്യ പാതിയിൽ കുറവുണ്ടെങ്കിൽ കൂടിയും രണ്ടാം പകുതിയിലെ ഗോർ രംഗങ്ങൾ, പ്രത്യേകിച്ചും ആ ഗ്രൈൻഡർ രംഗം ടെൻഷൻ വർധിപ്പിക്കുന്നതിൽ പൂർണമായും വിജയിച്ചു എന്ന് പറയേണ്ടി വരും.

🔸മികവുറ്റ പ്രകടനങ്ങൾ പുറത്തെടുത്ത മറ്റുള്ള നടീ നടന്മാരും, കഥയിലെ താല്പര്യം ഒട്ടും കുറയ്ക്കാത്ത രീതിയിൽ കൃത്യമായ ഇടവേളകളിൽ അപ്രതീക്ഷിതമായ സംഭവ വികാസങ്ങൾ ഉൾപ്പെടുത്തിയ കഥാഗതിയും ചിത്രത്തിന്റെ ഭംഗി കൂട്ടുന്നതിൽ നിർണ്ണായക പങ്ക് വഹിച്ചിട്ടുണ്ട്. എങ്കിലും ചില കഥാപാത്രങ്ങളുടെ മോട്ടീവ്, ഉദ്ദേശ ശുദ്ധി ചില സന്ദർഭങ്ങളിൽ ചോദ്യം ഉയർത്തുന്നുണ്ടെന്ന് പറയാതെ വയ്യ. മികച്ച ബാക്ഗ്രൗണ്ട് സ്കോറും, മറ്റുള്ള ചിത്രങ്ങളിൽ അപൂർവമായ വ്യത്യസ്തമായ ഒരു അന്തരീക്ഷവും ചിത്രത്തിന്റെ പ്രത്യേകതകൾ ആണ്. ചുരുക്കി പറയുക ആണെങ്കിൽ കൾട്ട്, ട്വിസ്റ്റഡ് ചിത്രങ്ങളിൽ താല്പര്യമുള്ളവർക്ക് ധൈര്യമായി കാണാവുന്ന എല്ലാവർക്കും ഇഷ്ടപ്പെടാൻ സാധ്യത ഇല്ലാത്ത ചിത്രമാണ് അപ്പോസിൽ.

Verdict : Good

427. First Man (2018)

Director : Damian Chazelle

Genre : Biography

Rating : 7.6/10

Country : USA

Duration : 138 Minutes


🔸നീൽ ആംസ്ട്രോങ് എന്ന വ്യക്തിയെ ആരും ആർക്കും പരിചയപ്പെടുത്തേണ്ട ആവശ്യമില്ല, ചന്ദ്രനിൽ കാല് കുത്തിയ ആദ്യ മനുഷ്യനാണ് നീൽ ആംസ്ട്രോങ് എന്നത് ഏതൊരാൾക്കും സുപരിചിതമായ കാര്യമാണ്. എന്നാൽ അതിന് അപ്പുറം ആരാണ് നീൽ ആംസ്ട്രോങ് എന്ന് ചോദിച്ചാൽ ഉത്തരം ഉണ്ടാവില്ല, അതിന്റെ ആവശ്യം ഉദിക്കുന്നില്ല എന്നതാണ് സത്യം. കാരണം നീൽ ആംസ്ട്രോങ് എന്ന വ്യക്തി എന്നും ഓർമിക്കപ്പെടുക ചാന്ദ്രയാത്ര ഒന്ന് കൊണ്ട് തന്നെ ആവും, അതിന് മുന്നിൽ ഈ ഉദ്യമനത്തിന് വേണ്ടി അയാൾ സഹിച്ച ത്യാഗങ്ങളോ, അനുഭവിച്ച നഷ്ടങ്ങളോ ഒന്നും പ്രസക്തം അല്ല. ഈ വക കാര്യങ്ങൾ ഒന്നും അറിയാൻ ആരും താല്പര്യപ്പെടാറില്ല, എന്നാൽ സംവിധായകൻ ഡാമിയൻ ചാസിൽ അതിന് ഒരുക്കമല്ല. ഫസ്റ്റ് മാൻ എന്ന ചിത്രം അതിനാൽ തന്നെ ഐതിഹാസികമായ ഈ യാത്രയോടൊപ്പം തന്നെ നീൽ ആംസ്ട്രോങ് എന്ന ഒരു പരിധി വരെ ഏകാകിയായ, വിഷാദനായ വ്യക്തിയിലേക്കുള്ള വെളിച്ചം വീശലാണ്.

🔸ബഹിരാകാശത്ത് കരസ്ഥമാക്കുന്ന ഓരോ മുന്നേറ്റങ്ങളും എതിരാളിക്ക് മേലെ ഉള്ള വിജയങ്ങളായി കണ്ട് സോവിയറ്റ് യൂണിയനും അമേരിക്കയും മത്സരിച്ച് കൊണ്ടിരുന്ന അറുപതുകളുടെ ആരംഭം മുതൽ അമേരിക്കൻ പേടകം ചന്ദ്രനിൽ ഇറങ്ങിയത് വരെയുള്ള സംഭവങ്ങൾ നീൽ ആംസ്ട്രോങ് എന്ന വ്യക്തിയെ മുന്നിൽ നിർത്തിക്കൊണ്ട്, അയാളുടെ വ്യക്തി ജീവിതത്തിന് ആവശ്യമായ പ്രാധാന്യം നൽകി കൊണ്ട് അവതരിപ്പിക്കുകയാണ് ഈ ചിത്രം. വെനീസ് ചലച്ചിത്ര മേളയിൽ ആദ്യ പ്രദർശനം കഴിഞ്ഞത് മുതൽ തന്നെ നിരൂപക സിംഹങ്ങളുടെ വാഴ്ത്തി പാടലുകൾക്ക് ആധാരമായ ചിത്രത്തിൽ സ്വാഭാവികമായും പ്രതീക്ഷകൾ ഏറെ ആയിരുന്നു. പൊതുവെ ബയോഗ്രഫിക്കൽ ചിത്രങ്ങളെ ഉയർത്തി പിടിക്കാറുള്ള അക്കാദമിയുടെ എഴുതപ്പെടാത്ത നയങ്ങൾ കാരണവും ദി ഫസ്റ്റ് മാൻ എന്ന ചിത്രം വാർത്തകളിൽ നിറഞ്ഞ് നിന്നിരുന്നു, അതൊക്കെ എന്ത് തന്നെ ആയാലും തിയേറ്ററുകളിൽ എത്തിയ ചിത്രം മികച്ച പ്രതികരണങ്ങൾ തന്നെയാണ് എല്ലാ വിഭാഗങ്ങളിൽ നിന്നും കരസ്ഥമാക്കി കൊണ്ടിരിക്കുന്നത്.

🔸ഒരു ബഹിരാകാശ ചിത്രം, മൂൺ ലാൻഡിംഗ് പ്രമേയമായ ചിത്രം എന്നൊക്കെ കേൾക്കുമ്പോൾ സ്വാഭാവികമായും ഏതൊരാളുടെയും മനസ്സിൽ വരാൻ സാധ്യത ഉള്ളത് ഗ്രാവിറ്റി പോലെയോ അല്ലെങ്കിൽ അപ്പോളോ 13 പോലെയോ ഒരു ചിത്രം ആയിരിക്കും. ഈ പ്രതീക്ഷയും പേറി സിനിമ കാണാൻ പോവുക ആണെങ്കിൽ നിരാശപ്പെടേണ്ടി വരും എന്നതാണ് ഫസ്റ്റ് മാൻ എന്ന ചിത്രത്തെ പറ്റി ആദ്യമേ തന്നെ പറയേണ്ടത്. ആംസ്ട്രോങ് എന്ന വ്യക്തിയുടെ ജീവിതം വൈകാരികമായി കാഴ്ചക്കാരന് മുന്നിൽ എത്തിക്കുക എന്നതിന് സംവിധായകൻ മറ്റെന്തിനേക്കാളും പ്രാധാന്യം നൽകിയിട്ടുണ്ട്, അതിനാൽ തന്നെ രണ്ട് മണിക്കൂർ ഇരുപത് മിനുട്ട് ദൈർഖ്യമുള്ള ചിത്രത്തിന് ഒരു ഡ്രാമ പരിവേഷമാണ് നൽകിയിട്ടുള്ളത്. ഈ ദൈർഖ്യം ചില സ്ഥലങ്ങളിൽ ചിത്രത്തെ പിറകോട്ട് വലിച്ചേക്കും എന്ന തോന്നൽ ഉളവാക്കിയെങ്കിലും, മികച്ച കഥാപാത്ര വികസനത്തിലൂടെയും ബഹിരാകാശ ദൗത്യത്തിനുള്ള ബിൽഡ് അപ്പിലൂടെയും ആശങ്കകൾ എല്ലാം തന്നെ സംവിധായകൻ കാറ്റിൽ പറത്തുകയാണ് ചെയ്തത്.

🔸ഐതിഹാസികമായ ചാന്ദ്ര ദൗത്യത്തിൽ നിന്നും പിൽക്കാലത്ത് സെലിബ്രിറ്റി സ്റ്റാറ്റസ് തന്നെ കരസ്ഥമാക്കിയെങ്കിലും യഥാർത്ഥ വ്യക്തിഗത ജീവിതത്തിലെ ഉൾവലിഞ്ഞ ഏകാകിയായ നീൽ ആംസ്‌ട്രോങിനെ സ്‌ക്രീനിൽ എത്തിക്കുക എന്ന ശ്രമകരമായ ദൗത്യം അതി മനോഹരമായി തന്നെ റയാൻ ഗോസ്‌ലിംഗ് നിർവഹിച്ചിരിക്കുന്നു, എങ്കിലും എടുത്ത് പറയേണ്ട പ്രകടനം മറ്റൊരു വ്യക്തിയുടേതാണ്. ക്ലെയർ ഫോളി അവതരിപ്പിച്ച ജാനറ്റ് എന്ന ഭാര്യ കഥാപാത്രം പ്രത്യക്ഷപ്പെടുന്ന ഓരോ സീനും നടിയുടെ പ്രതിഭ വിളിച്ചോതുന്നതാണ്, അതിൽ തന്നെ മടങ്ങി വരവ് ഉറപ്പില്ലാത്ത യാത്രയ്ക്ക് ഒരുങ്ങുന്ന ഭർത്താവിനോട് ജാനറ്റ് ഒരു പ്രത്യേക കാര്യം ആവശ്യപ്പെടുന്ന സീൻ ഈ വർഷം സിനിമകളിൽ കണ്ട ഏറ്റവും വൈകാരികവും മികച്ചതുമായ രംഗങ്ങളിൽ ഒന്നാണ്.

🔸ബഹിരാകാശ ചിത്രങ്ങൾക്ക് അളവ് കോലുകളായി അനവധി ക്ലാസ്സിക് ചിത്രങ്ങൾ പുറത്തിറങ്ങിയതിനാലും സ്വാഭാവികമായും പുതുതായി പുറത്തിറങ്ങുന്ന ചിത്രങ്ങൾ ഇവയുമായി താരമത്യം ചെയ്യപ്പെടും എന്ന വസ്തുത കണക്കിലെടുക്കുമ്പോൾ ഉറപ്പിച്ച് പറയാം ചെറിയ ബഡ്ജറ്റ് ആണെങ്കിൽ കൂടിയും നിലവാരമുള്ള സ്പേസ് സീക്വൻസുകൾ ഈ ചിത്രത്തിൽ കാണാനാവും. അതിശയോക്തിയുടെ കണികകൾ ഇല്ലാതെ തന്നെ പറയാം, ഇതുവരെ ആകാശ, ബഹിരാകാശ യാത്രകൾ അനുഭവിച്ചിട്ടില്ലാത്തവർക്ക് ഒരു നൂതന അനുഭവം കൂടിയാവും ഈ ചിത്രം. അസാധ്യമായ സംവിധാന മികവും, മികവ് വിളിച്ചോതുന്ന ബാക്ക്ഗ്രൗണ്ട് സ്കോറും, ഉഗ്രൻ സിനിമാട്ടോഗ്രഫിയും, മികച്ച കാസ്റ്റിംഗും എല്ലാം ചിത്രത്തിന്റെ മേന്മ വർധിപ്പിക്കുന്നതിൽ ചെറുതല്ലാത്ത പങ്ക് വഹിക്കുന്നുണ്ട്. ചുരുക്കി പറയുക ആണെങ്കിൽ ഓസ്കാർ മത്സരത്തിൽ കരുത്തനായ മത്സരാർത്ഥി ആയി കളത്തിൽ ഫസ്റ്റ് മാനും കാണും.

Verdict : Very Good

426. A Star Is Born (2018)

Director : Bradley Cooper

Genre : Romance

Rating : 8.5/10

Country : USA

Duration : 136 Minutes


🔸ഒരു സിനിമാ ആസ്വാദകനെ സംബന്ധിച്ചിടത്തോളം വർഷത്തിലെ ഏറ്റവും മികച്ച സമയമാണ് വരാൻ പോവുന്നത്, ഓസ്കാർ ചർച്ചകളും പ്രവചനങ്ങളും എല്ലാം ചൂട് പിടിക്കാൻ പോവുന്ന ഈ കാലയളവിൽ പുരസ്‌കാരങ്ങൾ ലക്ഷ്യം ഇട്ട് കൊണ്ട് തന്നെ നിലവാരമുള്ള ഒരു പിടി ചിത്രങ്ങൾ തിയേറ്ററുകളിൽ എത്തും എന്നത് ഉറപ്പാണ്. ഈ വസ്തുതയെ ന്യായീകരിച്ചും, ആദ്യ പടി എന്ന നിലയ്ക്കും ലോകത്താകമാനം ഉള്ള ആരാധകരും നിരൂപകരും പ്രതീക്ഷ അർപ്പിക്കുന്ന രണ്ട് ചിത്രങ്ങൾ ഈ ആഴ്ച തിയേറ്ററുകളിൽ എത്തി. എ സ്റ്റാർ ഈസ് ബോൺ എന്ന ചിത്രവും നീൽ ആംസ്‌ട്രോങ്ങിന്റെ ജീവിതം പ്രമേയമാക്കി ഫസ്റ്റ് മാൻ എന്ന ചിത്രവും. പ്രതീക്ഷിച്ചത് പോലെ തന്നെ മികച്ച പ്രതികരണങ്ങളാണ് രണ്ട് ചിത്രങ്ങൾക്കും എല്ലാ ഭാഗങ്ങളിൽ നിന്നും കിട്ടി കൊണ്ടിരിക്കുന്നത്.

🔸പ്രശസ്തനായ ഗായകനും തികഞ്ഞ മദ്യപാനിയും ആയ ജാക്ക്സൺ മെയിൻ ഒരു കരിയർ ബ്രേക് ലഭിക്കാനായി ബുദ്ധിമുട്ടുന്ന ആലി എന്ന ഗായികയെ പരിചയപ്പെടുന്നതും അവർക്കിടയിൽ ഉടലെടുക്കുന്ന പ്രണയവും തുടർന്നുണ്ടാവുന്ന പ്രശ്നങ്ങളും എല്ലാമാണ് എ സ്റ്റാർ ഈസ് ബോൺ എന്ന ചിത്രത്തിന്റെ പ്രമേയം. കഥയെ കുറിച്ച് സൂചിപ്പിച്ച ഔട്ട്ലൈനിൽ നിന്നും പരിചിതമായ എന്തെങ്കിലും ചിന്ത ഉടലെടുക്കുന്നുണ്ടെങ്കിൽ അത് യാദൃച്ഛികമല്ല. ഹിന്ദിയിൽ ഉൾപ്പെടെ നാല് തവണ റീമേയ്ക്ക് ചെയ്യപ്പെട്ടിട്ടുള്ള ഇതേ പേരോട് കൂടി പുറത്തിറങ്ങിയ ഒരു പഴയ കാല ചിത്രത്തിന്റെ ഏറ്റവും പുതിയ രൂപം ആണ് ഈ ചിത്രം, കഥയിലോ കഥാ സന്ദർഭങ്ങളിലോ വലിയ മാറ്റങ്ങൾ ഏതുമില്ല.

🔸ഹിന്ദി ചിത്രം ഉൾപ്പെടെ ഉള്ള റീമയ്‌ക്കുകളോ ഒറിജിനലോ ഒന്നും കണ്ടിട്ടില്ലാത്തതിനാൽ വേറിട്ട അനുഭവം തന്നെയായിരുന്നു ഈ ചിത്രം. മോശം എന്ന് പറയാൻ യാതൊന്നും കാണാനില്ലെങ്കിലും മലയാളിയുടെ പൊതു മനോഭാവം പിന്തുടർന്ന് ലേഡി ഗാഗയുടെ ആല്ലി എന്ന കഥാപാത്രം അത്ര വിശ്വാസയോഗ്യം ആയിരുന്നില്ല എന്ന് വേണമെങ്കിൽ പറയാം. എന്തിരുന്നാലും പൊതുവെ സിനിമകളിലേക്ക് കടന്ന് വന്ന് ലഭിച്ച തങ്ങളുടെ വേഷങ്ങൾ ദുരന്തം ആക്കി മാറ്റുന്ന പതിവുള്ള പോപ്പ് ഗായകർക്കിടയിൽ ലേഡി ഗാഗ തകർത്തു എന്ന് തന്നെ പറയാം. ആദ്യാവസാനം നിറഞ്ഞ് നിൽക്കുന്ന കഥാപാത്രമായിട്ടും സങ്കോചം ഏതും ഇല്ലാതെ കിട്ടിയ ഭാഗം മികച്ചതാക്കിയിട്ടുണ്ട് അവർ. സംവിധായകനും നായകനുമായ ബ്രാഡ്ലി കൂപ്പറിന് വിശേഷണങ്ങൾ ആവശ്യമില്ല, തൊട്ടതെല്ലാം പൊന്നാക്കിയ ടിയാൻ തന്റെ സംവിധാന അരങ്ങേറ്റവും അവിസ്മരണീയമാക്കി, ഒരു ഓസ്‌കാറിന്റെ മണം അടിക്കുന്നുണ്ട് എന്ന് പറഞ്ഞാലും കുറഞ്ഞു പോവില്ല എന്നതാണ് സത്യം.

🔸പ്രധാന കഥാപാത്രങ്ങൾ ആയി എത്തിയ രണ്ട് പേരുടെയും പ്രകടനങ്ങളെയും, ഇരുവർക്കും ഇടയിൽ രൂപപ്പെടുന്ന കെമിസ്ട്രിയെയും വാഴ്ത്തുമ്പോൾ തന്നെ എടുത്ത് പറയേണ്ട ഒന്നാണ് ചിത്രത്തിന്റെ സംഗീത വിഭാഗം. ഒരു മ്യുസിക്കൽ ചിത്രം ആയതിനാലും രണ്ട് കഥാപാത്രങ്ങളും ഗായകർ ആയതിനാലും സംഗീത വിഭാഗം സ്വാഭാവികമായും അർഹിക്കുന്ന പ്രാധാന്യം ചിത്രം ഏറ്റവും മികച്ച രീതിയിൽ തന്നെ തിരിച്ച് നൽകിയിട്ടുണ്ട്. സിനിമയുടെ രണ്ട് നിർണ്ണായക ഘട്ടത്തിൽ സ്‌ക്രീനിൽ എത്തിയ ഷാലോ, ഐ വിൽ നെവർ ലവ് എഗൈൻ എന്നീ ഗാനങ്ങളിൽ ഒന്ന് ബെസ്റ്റ് ഒറിജിനൽ സോങ് വിഭാഗം ഓസ്കാർ കരസ്ഥമാക്കാതെ ഇരിക്കണമെങ്കിൽ അത്ഭുതം സംഭവിക്കണം എന്ന് പറയേണ്ടി വരും.

🔸സൗണ്ട്ട്രാക്കിനോടൊപ്പം തന്നെ അഭിനന്ദനം അർഹിക്കുന്നുണ്ട് സിനിമയുടെ സിനിമാട്ടോഗ്രഫി വിഭാഗവും, ചിത്രം അർഹിക്കുന്ന ആവശ്യപ്പെടുന്ന മൂഡ് പ്രേക്ഷകന് നൽകുന്നതിൽ ഈ രണ്ട് വിഭാഗങ്ങളും വഹിച്ച പങ്ക് ഒട്ടും ചെറുതല്ല. സിനിമ കണ്ട് കഴിയുമ്പോൾ കാഴ്ചക്കാരനെ വൈകാരികമായി ബാധിക്കുന്ന അവസാന രംഗങ്ങളെ കുറിച്ചും അവയുടെ അവതരണ മികവിനെ കുറിച്ചും പറയാതെ അവസാനിപ്പിക്കാൻ കഴിയില്ല, എന്തിരുന്നാലും സ്പോയ്ലർ ആയതിനാൽ ആഴത്തിൽ സമീപിക്കാനും ആവില്ല, അതിനാൽ കണ്ട് തന്നെ അനുഭവിക്കാൻ അഭ്യർത്ഥിക്കുന്നു. മുൻകാല റീമേയ്ക്കുകൾ കണ്ടിട്ടുള്ളവർക്ക് പുതുമ തോന്നാൻ ഇടയില്ലെങ്കിലും ഈ വർഷം ഇറങ്ങിയ ഏറ്റവും മികച്ച ചിത്രങ്ങളിൽ ഒന്ന് എന്ന് നിസ്സംശയം വിശേഷിപ്പിക്കാം എ സ്റ്റാർ ഈസ് ബോണിനെ. കഥയെ കുറിച്ച് അറിവില്ലാത്തവർക്ക് ധൈര്യമായി കാണാം, അല്ല കാണണം.

Verdict : Must Watch

425. Batman The Dark Knight Returns (2013)

Director : Jay Oliva

Genre : Superhero

Rating : 8/10

Country : USA

Duration : 152 Minutes


🔸ബാറ്റ്മാൻ എന്ന അമാനുഷിക കഥാപാത്രത്തിന് മുഖവുരകളുടെ ആവശ്യമില്ല, പ്രത്യേകിച്ചും സൂപ്പർഹീറോ ചിത്രങ്ങളുടെ തള്ളി കയറ്റം തന്നെ പ്രകടമായ ഈ കാലഘട്ടത്തിൽ ഏറ്റവും ജനപ്രീതി ഉള്ള കോമിക് കഥാപാത്രമാണ് ബാറ്റ്മാൻ എന്ന് വേണമെങ്കിൽ പറയാം. പണക്കാരനും ഏകാകിയും ആയ ബ്രൂസ് വെയിനും അയാളുടെ സൂപ്പർഹീറോ പരിവേഷമായ തിന്മയ്ക്ക് എതിരെ ഒറ്റയാൾ പോരാട്ടം നടത്തുന്ന ബാറ്റ്മാനും ഏവർക്കും സുപരിചിതനായിട്ട് ഒരു നൂറ്റാണ്ടിനോട് അടുക്കുന്നു. പൊതുവെ സൂപ്പർഹീറോ അനിമേഷൻ ചിത്രങ്ങളോട് താല്പര്യം ഇല്ലാതിരുന്നിട്ട് കൂടി ആരാധകനായ സുഹൃത്തിന്റെ വാക്കിൽ വിശ്വാസം അർപ്പിച്ചാണ് ഈ രണ്ട് ഭാഗ ചിത്രം കാണാൻ തയാറായത്, കണ്ട് കഴിയുമ്പോൾ എടുത്ത് പറയേണ്ടത് ഈ വിഭാഗം ചിത്രങ്ങളോടുള്ള സമീപനത്തിൽ വന്ന മാറ്റം തന്നെ, ഒരു ബെഞ്ച്മാർക് എന്നൊക്കെ വിശേഷിപ്പിക്കാം ഡാർക്ക് നൈറ്റ് റിട്ടേൺസിനെ.

🔸മറ്റ് ചിത്രങ്ങളിൽ നിന്നും കോമിക്സുകളിൽ നിന്നും വ്യത്യസ്തമായി ഒറിജിൻ സ്റ്റോറി പറയാൻ ശ്രമിക്കുന്നില്ല ഈ ചിത്രം, മറിച്ച് മധ്യവയസ്‌കൻ ആയ തളർന്ന് തുടങ്ങിയ ബ്രൂസ് വെയിനിനെ ആണ് ചിത്രം കാഴ്ചക്കാരന്റെ മുന്നിൽ അവതരിപ്പിക്കുന്നത്. ബ്രൂസ് വെയിൻ തന്റെ ബാറ്റ്മാൻ പരിവേഷം അഴിച്ച് വച്ചിട്ട് ഒരു ദശാബ്ദം തികയുന്നു, ഒരു കാലത്ത് തന്റെ വ്യക്തിത്വത്തിന്റെ തന്നെ ഭാഗമെന്ന് ഉറച്ച് വിശ്വസിച്ച നിശ്ശബ്ദനായ പോരാളിയുടെ വേഷം ഇന്ന് അയാളെ മോഹിപ്പിക്കുന്നില്ല, ആ കാലം കഴിഞ്ഞെന്ന് അയാൾ ഉറച്ച് വിശ്വസിക്കുന്നു. നിഴൽ പോലെ കൂടെ നിന്നവർ എല്ലാം വിട്ട് പോയിരിക്കുന്നു, എന്തിനധികം ബദ്ധ ശത്രു എന്ന വിശേഷണം അർഹിക്കുന്ന ജോക്കർ പോലും കുറെ വർഷങ്ങളായി തിരിച്ചറിവില്ലാത്ത അവസ്ഥയിൽ മാനസിക ആശുപത്രിയിലാണ്.

🔸ഇങ്ങനെയൊക്കെ ആണ് കാര്യങ്ങളുടെ കിടപ്പെങ്കിലും കുറ്റ കൃത്യങ്ങളുടെ എന്നതിൽ ഈ കാലയളവിൽ കുറവുകൾ ഒന്നും ഉണ്ടായിട്ടില്ല, ബാറ്റ്മാൻ ഒരു കാലത്ത് സംരക്ഷിച്ച് പോന്ന ഗോഥം നഗരത്തിൽ ഇന്ന് ജീവിതം ദുസ്സഹം ആയി തീർന്നിരിക്കുന്നു. ഈ പ്രശ്നങ്ങളും പ്രത്യാഘാതങ്ങളും ബ്രൂസ് വെയിൻ എന്ന വ്യക്തിയെകൊണ്ട് ഒരു പ്രാവശ്യം കൂടി പഴയ സുഹൃത്തിനെ തിരികെ വിളിക്കാൻ പ്രേരിപ്പിക്കുകയാണ്, സ്വയം തിരിച്ചറിവ് നേടാൻ പ്രാപ്തനാക്കുകയാണ്. രണ്ട് ഭാഗങ്ങളായി പുറത്തിറങ്ങിയ ഡാർക്ക് നയിറ്റ് റിട്ടേൺസ് എന്ന ചിത്രത്തിന്റെ ആദ്യ ഭാഗം എന്നത് ബാറ്റ്മാൻ കഥാപാത്രത്തിന്റെ തിരിച്ചുവരവിനെ പറ്റി ആണെങ്കിൽ രണ്ടാം ഭാഗം അതിനോടുള്ള പ്രതികരണങ്ങളെ ആധാരമാക്കി ആണ്.

🔸ഒന്നാം ഭാഗത്തിന്റെ തുടർച്ചയായി തന്നെയാണ് രണ്ടാം ഭാഗം ആരംഭിക്കുന്നത്, അതിനാൽ തന്നെ കഥയുടെ പ്രധാന ഭാഗങ്ങൾ ഒഴിവാക്കുകയാണ്. പത്ത് വർഷത്തിലധികമായി കാണാതിരുന്ന ബാറ്റ്മാന്റെ മടങ്ങിവരവും അതിനോടുള്ള ജനങ്ങളുടെയും സർക്കാരിന്റെയും പ്രതികരണം അവരെ ഈ മടങ്ങി വരവിനെ ചോദ്യം ചെയ്യാൻ നിർബന്ധിതരാക്കുകയാണ്. നിയമത്തിന് മേലെ ഒരു വ്യക്തിക്കും അധികാരമില്ല എന്ന നയത്തിന്റെ ചുവട് പിടിച്ച് ബാറ്റ്മാനെ നിലയ്ക്ക് നിർത്താനായി മറ്റൊരു അമാനുഷിക കഥാപാത്രമായ സൂപ്പർമാന്റെ സഹായം തേടാൻ സർക്കാർ തയ്യാറാവുന്നത് രണ്ടാം ഭാഗത്തിന് ചൂട് പിടിപ്പിക്കുന്നു. ഇതിനോടൊപ്പം തന്നെ തന്റെ വളരെ പ്രശസ്തരായ വില്ലന്മാരുമായി കൂടി ബാറ്റ്മാന് മത്സരിക്കേണ്ടി വരുന്നുണ്ട് ഈ ചിത്രത്തിൽ.

🔸ഫ്രാങ്ക് മില്ലർ രചിച്ച ഈ രണ്ട് ഭാഗ കോമിക് തന്നെയാണ് ബാറ്റ്മാൻ വേഴ്സസ് സൂപ്പർമാൻ എന്ന ചിത്രത്തിന് ആധാരമെങ്കിലും രണ്ട് ചിത്രങ്ങളും കണ്ട അനുഭവത്തിൽ പറയാൻ കഴിയും, ഏറ്റവും മികച്ചത് ഈ ആനിമേറ്റഡ് ചിത്രം തന്നെ. സ്‌ക്രീനിൽ എത്തിയ കഥാപാത്രങ്ങൾ എല്ലാം തന്നെ വ്യക്തമായ ക്യാരക്ടറിന്റെയും ചേർന്ന ആറ്റിറ്റിയൂഡിന്റെയും പിൻബലത്തിൽ നിറഞ്ഞാടുക തന്നെ ആയിരുന്നു, രണ്ടാം ഭാഗത്തിൽ പ്രധാന കഥാപാത്രം എതിരാളിയോട് പറയുന്ന നാല് വാചക സംഭാഷണം ഇന്നേവരെ കണ്ട സൂപ്പർഹീറോ ചിത്രങ്ങളിൽ ഏറ്റവും മാസ്സ് പരിവേഷം ഉള്ളത് ആണെന്നും എടുത്ത് പറയേണ്ടി ഇരിക്കുന്നു. ചുരുക്കി പറഞ്ഞാൽ കോമിക്സ് ആരാധകർ തീർച്ചയായും കണ്ടിരിക്കേണ്ട ചിത്രം, മറ്റുള്ള പ്രേക്ഷകർക്കും താല്പര്യം അനുസരിച്ച് കണ്ട് ഇഷ്ടപ്പെടാൻ സാധിച്ചേക്കും.

Verdict : Very Good

424. Leave No Trace (2018)

Director : Debra Granik

Genre : Drama

Rating : 7.3/10

Country : USA

Duration : 109 Minutes


🔸വളരെ ലളിതമായ ഒരു കഥയ്ക്ക് ശക്തമായ ഒരു സിനിമ ആയി പരിണമിക്കാം എന്ന് സിനിമ ഉള്ള ഭാഷകളിൽ എല്ലാം തെളിഞ്ഞ വസ്തുതയാണ്. ഈ സ്രേണിയിൽ ഉൾപ്പെടുത്താനാവുന്ന ചിത്രമാണ് ലീവ് നോ ട്രെയ്‌സും. ഒന്നോ രണ്ടോ വാക്യത്തിൽ പറഞ്ഞ് തീർക്കാൻ കഴിയുന്ന അത്രയും ലളിതമായ കഥയാണ് ചിത്രത്തിന്റേത്, അതിൽ തന്നെ ഞെട്ടിക്കുന്ന സംഭവ വികാസങ്ങൾ ഏതും അരങ്ങേറുന്നുമില്ല. എന്നാൽ ഈ ലളിതമായ കഥയിൽ നിന്നും ചിത്രം അവസാനിക്കുമ്പോൾ കാഴ്ചക്കാരന്റെ മനസ്സിൽ ഉടലെടുക്കുന്ന ശൂന്യത സൃഷ്ട്ടിക്കാൻ കഴിഞ്ഞ സംവിധായകന്റെ കഴിവിനെ അഭിനന്ദിച്ച് കൊണ്ട് തന്നെ പറയാം, ഈ വർഷം ഇറങ്ങിയ ഏറ്റവും മികച്ച ചിത്രങ്ങളിൽ ഒന്നാണ് ലീവ് നോ ട്രെയ്‌സ്.

🔸ഏകാന്തപഥികരെ, അവരുടെ ജീവിതത്തിലേക്ക് കടന്ന് ചെന്ന് ശല്യപ്പെടുത്തരുത് എന്ന് ഈസോപ്പിന്റെ സാരോപദേശ കഥകളിൽ കൂടി വായിച്ചതാണ് ഈ ചിത്രം കണ്ട് കഴിയുമ്പോൾ ആദ്യം മനസ്സിൽ വരുന്നത്, അവരെ അവരുടെ ലോകത്ത് വിഹരിക്കാൻ അനുവദിക്കുന്നതാണ് എല്ലാം കൊണ്ടും നല്ലത് എന്ന് ചിത്രം പറയാതെ പറയുന്നു. കാലങ്ങളായി മറ്റ് മനുഷ്യരുമായി യാതൊരു സഹവാസവും ഇല്ലാതെ ജീവിക്കുന്നവരാണ് കേന്ദ്ര കഥാപാത്രമായ വില്ലും മകൾ ടോമും. വില്ലിന്റെ ഭാഷയിൽ പറയുക ആണെങ്കിൽ അവർ ഇരുവരും തങ്ങളുടെ ജീവിതത്തിൽ സംപ്ത്രിപ്തരാണ്. മറ്റാരുടെയും ലോകത്തേക്ക് കടന്ന് ചെല്ലാൻ അവർ ആഗ്രഹിക്കുന്നില്ല എന്ന് മാത്രമല്ല തങ്ങളുടെ ലോകത്തേക്ക് വേറൊരാളെ കടത്തി വിടാനും അവർക്ക് താല്പര്യമില്ല.

🔸പുതിയ കാലത്തെ വസ്ത്രങ്ങൾ ഉപയോഗിക്കുന്നു എന്നത് ഒഴിച്ചാൽ ഭക്ഷണം പാചകം ചെയ്യാൻ കല്ല് ഉറച്ച് തീ സൃഷ്ട്ടിക്കുന്ന, കാടിന്റെ നടുവിൽ താമസിക്കുന്ന, പൂർണമായും പ്രകൃതിയും ആയി ലയിച്ച് ചേർന്ന് ജീവിക്കുന്ന ഒരു പ്രാകൃത മനുഷ്യ രീതിയാണ് ഇരുവരും പിന്തുടരുന്നത്. തന്റെ മുൻകാല ജീവിതത്തിൽ പട്ടാളക്കാരനായിരുന്ന വില്ലിന് ഈ ജീവിതം തന്റെ വിഷാദ രോഗത്തിന്റെ അനന്തരഫലവും, സർവോപരി ജീവിതത്തിൽ നിന്ന് തന്നെയുള്ള ഒളിച്ചോട്ടവും ആണെങ്കിൽ മകൾ ടോമിന് അത് അച്ഛനിൽ ഉള്ള വിശ്വാസമാണ്. തന്റെ ഇഷ്ടങ്ങളോ വികാരങ്ങളോ മാനിക്കാതെ അച്ഛനെ പിന്തുടരാൻ ആണ് ടോം പഠിച്ചിട്ടുള്ളത്, അതാണ് ശീലവും.

🔸ഇങ്ങനെ തീർത്തും ഒറ്റപ്പെട്ട് ജീവിച്ചു പോന്ന രണ്ട് ജന്മങ്ങളുടെയും വിധി മാറി മറിയുന്നത് ഒരു ചെറിയ അബദ്ധത്തിന്റെ ചുവട് പിടിച്ച് സമൂഹത്തിലേക്ക് ഇറങ്ങി ചെല്ലാൻ ഇരുവരും നിർബന്ധിതരാവുമ്പോൾ ആണ്. വില്ലിനെ സംബന്ധിച്ചിടത്തോളം ഈ മാറ്റം തീർത്തും നരക തുല്യമാണ്, കാരണം എന്തിനെ എല്ലാം ഭയന്നാണോ അയാൾ വഴി മാറി നടക്കാൻ ശ്രമിച്ചത് അതിലേക്കുള്ള മടങ്ങി പോക്കാണ് ഇത്, എന്നാൽ ടോമിന് ഇതെല്ലാം ഒരു പുതിയ അനുഭവവുമാണ്. ഇവിടെ നിന്നും ചിത്രം രണ്ട് കൈവഴികളായി മാറുകയാണ്. രണ്ട് ചിന്തകളിലൂടെ, രണ്ട് ആശയങ്ങളിലൂടെ, രണ്ട് മനസുകളിലൂടെ ഒഴുകിയ ശേഷം അതി മനോഹരമായ ക്ലൈമാക്സിലൂടെ ലീവ് നോ ട്രെയ്‌സ് കാഴ്ചക്കാരന്റെ മനസ്സിൽ പ്രത്യേകമായ സ്ഥാനം കരസ്ഥമാക്കുന്നു.

🔸ആദ്യമേ പറഞ്ഞത് പോലെ തന്നെ വളരെ ലളിതമായ ഗ്രൗൻഡഡ്‌ ആയ കഥയാണ് ചിത്രത്തിന്റേത്, കഥാ പശ്ചാത്തലവുമായി ഇഴുകി ചേർന്നാൽ കാഴ്ചക്കാരന് നിഷ്പ്രയാസം ഊഹിക്കാൻ കഴിയുന്ന രീതിയിൽ തന്നെയാണ് ചിത്രം മുന്നേറുന്നതും. എന്തിരുന്നാലും ഈ ഫീൽ ഗുഡ് ഡ്രാമ ചിത്രം നൽകുന്ന അനുഭവം ഒന്ന് വേറെ തന്നെയാണ്, അധികം ചിത്രങ്ങൾക്ക് ഒന്നും കഴിയാത്ത തലത്തിലേക്ക് കാണുന്ന പ്രേക്ഷകനെ കൊണ്ടുപോവാനും, അതി മനോഹരമായ രീതിയിൽ അവനെ രസിപ്പിക്കാനും ചിത്രത്തിന് കഴിയുന്നു. ഈ കാരണങ്ങൾ എല്ലാം കൊണ്ട് തന്നെ തീർച്ചയായും പറയാം ഈ വർഷം കണ്ട ഏറ്റവും മികച്ച ചിത്രങ്ങളുടെ പട്ടികയിൽ തന്നെ കാണും ഈ ചിത്രം. കാണാൻ ശ്രമിക്കുക, അനുഭവിക്കാനും.

Verdict : Very Good

423. Eighth Grade (2018)

Director : Bo Burnham

Genre : Comedy

Rating : 7.8/10

Country : USA

Duration : 94 Minutes


🔸കഴിഞ്ഞ വർഷം എന്നത് എണ്ണത്തിലും നിലവാരത്തിലും ഹൊറർ ചിത്രങ്ങൾ കൈവരിച്ച മുന്നേറ്റം കാരണം ശ്രദ്ധേയം ആയിരുന്നെങ്കിൽ ഇത്തവണ ആ ഊഴം ടീനേജ് റോം കോം ചിത്രങ്ങൾക്കാണ്. ടു ആൾ ദി ബോയ്സ് ഐ ഹാവ് ലവ്ഡ് ബീഫോർ പോലെ ഒരുപിടി നല്ല ചിത്രങ്ങൾ ഈ വർഷം ഈ വിഭാഗത്തിൽ നിന്നും കാഴ്ചക്കാരന്റെ മുന്നിലേക്ക് എത്തുക ഉണ്ടായി. ഈ കാരണം കൊണ്ട് തന്നെ റോം കോം വിഭാഗത്തിൽ ഈ വർഷം ഇറങ്ങിയ ഏറ്റവും മികച്ച ചിത്രം എന്ന വിശേഷണം പ്രൊഫഷണൽ നിരൂപകരും സൈറ്റുകളും ചാർത്തി കൊടുത്ത എയിറ്റ്ത് ഗ്രേഡ് എന്ന ചിത്രം കാണാനിരിക്കുമ്പോൾ പ്രതീക്ഷകൾ ഏറെ ആയിരുന്നു, കണ്ട് കഴിഞ്ഞപ്പോൾ ധൈര്യമായി പറയാനാവും, ലഭിച്ച വിശേഷണങ്ങൾ എല്ലാം തന്നെ ഈ ചിത്രം അർഹിക്കുന്നുണ്ട്.

🔸ഒരു ഫൗണ്ട് ഫുറ്റേജ് ചിത്രത്തെ അനുസ്മരിപ്പിക്കും വിധമാണ് ചിത്രം ആരംഭിക്കുന്നത്, ക്യാമറയെ അഭിമുഖീകരിച്ച് കൊണ്ട് ഒരു പെൺകുട്ടി തന്റെ നിർദ്ദേശങ്ങൾ നൽകുകയാണ്. പ്രത്യക്ഷത്തിൽ പ്രേക്ഷകന് വേണ്ടി എന്ന് തോന്നുമെങ്കിലും പ്രസ്തുത കഥാപാത്രമായ കൈല സംസാരിക്കുന്നത് തന്റെ യൂറ്റിയൂബ് ചാനൽ ആയ കൈലാസ്‌ കോർണർ പിന്തുടരുന്നവരോട് ആണ്. ജീവിതത്തിൽ ധൈര്യം ഇല്ലാത്തവരോടും കടമ്പകളിൽ വീണ് പോയവരോടും, അവിടെ നിന്ന് ഉയർത്തെഴുന്നേൽക്കാൻ സാധിക്കാത്തവരോടുമാണ് കൈല സംസാരിക്കുന്നത്. അവർക്ക് ഉത്തേജനം പകരാനും സഹായിക്കാനുമാണ് അവളുടെ ശ്രമം.

🔸കാര്യം ഇങ്ങനെ ഒക്കെ ആണെങ്കിലും, യഥാർത്ഥ കൈല എന്നത് തികച്ചും വ്യത്യസ്തയായ ഒരു കഥാപാത്രമാണ്, ജീവിതത്തിൽ തോറ്റ് പോയ, ധൈര്യമില്ലാത്ത, ഒട്ടും സോഷ്യൽ അല്ലാത്ത വ്യക്തികൾക്ക് പ്രചോദനമായി തീരാൻ ശ്രമിക്കുമ്പോഴും ഇവരിൽ ഒരാൾ തന്നെയാണ് കൈലയും. പരിചയമില്ലാത്ത വ്യക്തികളോട് സംസാരിക്കാൻ തുടങ്ങുമ്പോൾ ശബ്ദം ഇടറുന്ന, ക്യാമറയ്ക്ക് മുന്നിൽ ഇരിക്കുമ്പോൾ തൊണ്ട വിരളുന്ന, അത് മറച്ച് പിടിക്കാൻ വല്ലാതെ ബദ്ധപ്പെടുന്ന ആത്മ വിശ്വാസം ഒട്ടും ഇല്ലാത്ത ഒരു വ്യക്തിത്വത്തിന് ഉടമയാണ് കൈല. സ്വന്തം അച്ഛനോട് പോലും പരിഭ്രമം കൂടാതെ തന്റെ വികാര വിചാരങ്ങൾ പറയാൻ പതിമൂന്ന് വർഷത്തെ ജീവിതത്തിനടിയിൽ കൈലയ്ക്ക് ഒരിക്കൽപ്പോലും സാധിച്ചിട്ടില്ല.

🔸ചുരുക്കി പറയുക ആണെങ്കിൽ നല്ലൊരു സൗഹൃദമോ, ഓർക്കാൻ ഇഷ്ട്ടപ്പെടുന്ന നിമിഷങ്ങളോ സ്വന്തമായി ഇല്ലാത്ത സ്‌കൂൾ ജീവിതവും, ഇതിനെ മറികടക്കാൻ മറ്റുള്ളവരെ ഉപദേശിക്കുകയും സഹായിക്കുകയും ചെയ്യുന്ന, എന്നാൽ സ്വന്തം ജീവിതത്തിൽ ഇത് പ്രാവർത്തികം ആക്കാൻ കഴിയാത്ത യൂറ്റ്യുബ് വ്യക്തിത്വത്തിനും ഉടമയാണ് കൈല. തന്റെ മിഡിൽ സ്‌കൂൾ ജീവിതത്തിന്റെ അവസാന ദിനങ്ങളിൽ എത്തി നിൽക്കുകയാണ് കൈല, ഇതുവരെയുള്ള വ്യക്തിഗത ജീവിതം എന്നത് കൈലയെ സംബന്ധിച്ചിടത്തോളം വലിയ പരാജയമാണ്. വർഷങ്ങളായുള്ള തന്റെ സഹപാഠികളും ആയി പോലും ഓർമിക്ക തക്കവണ്ണം നല്ലൊരു ബന്ധം സൃഷ്ടിച്ചെടുക്കാൻ കൈലയ്ക്ക് കഴിഞ്ഞിട്ടില്ല, ഒരു പരിധി വരെ ശ്രമിച്ചിട്ടുമില്ല.

🔸സാധാരണ ടീനേജ് റൊമാന്റിക് കോമഡി ചിത്രങ്ങൾ പ്രമേയമാക്കാറുള്ള പ്രധാന കഥാപാത്രത്തിന്റെ മാനസിക സംഘർഷങ്ങളും, വേവലാതികളും, തെറ്റായ തീരുമാനങ്ങളും എല്ലാം തന്നെയാണ് എയ്റ്റ്ത് ഗ്രേഡ് എന്ന ഈ ചിത്രത്തിന്റെയും പ്രമേയം, അതെല്ലാം ഒട്ടും മോശം പറയാൻ കഴിയാത്ത വിധം ഭംഗിയായി തന്നെ അവതരിപ്പിച്ചിട്ടുമുണ്ട്. കൈല എന്ന കഥാപാത്രത്തിന്റെ വ്യക്തി ജീവിതത്തിലും, വിദ്യാർത്ഥി ജീവിതത്തിലും മേൽ സൂചിപ്പിച്ച തീരുമാനങ്ങൾ കൊണ്ടുവരുന്ന പ്രത്യാഘാതങ്ങളും അതിന്റെ അനന്തര ഫലങ്ങളുമെല്ലാം ആണ് ചിത്രത്തിന്റെ പ്രമേയം. ലളിതമായി ചിത്രത്തെ വിലയിരുത്തുക ആണെങ്കിൽ ഈ വിഭാഗം ചിത്രങ്ങൾ ഇഷ്ട്ടപ്പെടുന്നവർക്ക് തീർച്ചയായും രസിക്കാൻ ഇടയുള്ള കൊച്ച് മനോഹര ചിത്രമാണ് എയ്റ്റ്ത് ഗ്രേഡ്.

Verdict : Very Good

Top 10 Mistakes In Movies

സിനിമ എന്നത് കാഴ്ചയിൽ വിനോദം ആണെങ്കിലും, നിർമാണ വേളയിൽ അണിയറ പ്രവർത്തകർക്ക് അങ്ങേയറ്റം ബുദ്ധിമുട്ടേറിയ ഒരു ഉദ്യമം ആണ്. ഒരാശയം കഥാകൃത്തിന്റെ തലയിൽ ഉദിക്കുന്നത് മുതൽ അത് തിയേറ്ററിൽ കാഴ്ചക്കാരന് മുന്നിൽ എത്തുന്നത് വരെ കടമ്പകൾ അനവധിയാണ്. നിർണായകമായ ഈ ഓരോ ഘട്ടങ്ങളിലും ഉൾപ്പെട്ടിരിക്കുന്ന വ്യക്തികൾ വ്യത്യസ്തർ ആയതിനാലും, ജോലി അങ്ങേയറ്റം ശ്രദ്ധ ആവശ്യപ്പെടുന്ന കഠിനമായ ഒന്ന് ആയതിനാലും തെറ്റുകൾ സംഭവിക്കുക എന്നത് തികച്ചും സ്വാഭാവികമാണ്. ഇങ്ങനെ വളരെ പ്രശസ്തമായ ചില ചിത്രങ്ങളിൽ അബദ്ധവശാൽ സംഭവിച്ച് പോയ ചില തെറ്റുകൾ ചൂണ്ടികാട്ടുകയാണ് ഈ പോസ്റ്റിന്റെ ഉദ്ദേശം. ഒരു രീതിയിലും ഉൾപ്പെട്ടിരിക്കുന്ന ചിത്രങ്ങളെ പരിഹസിക്കുക അല്ല പോസ്റ്റിന്റെ ഉദ്ദേശം എന്നതും, കൗതുകം ഒന്ന് മാത്രമാണ് ഇതിന്റെ കാരണം എന്ന് കൂടി ചേർക്കട്ടെ.

North By Northwest (1959)

ആൽഫ്രഡ്‌ ഹിച്കോക്കിന്റെ ഏറ്റവും മികച്ച ചിത്രങ്ങളിൽ ഒന്ന് എന്നതിലധികം വിശേഷണങ്ങൾ നോർത്ത് ബൈ നോർത്‌വെസ്റ്റ് എന്ന ചിത്രത്തിന് ആവശ്യമില്ല. ചിത്രത്തിലെ കഥാഗതിയിൽ വളരെ നിർണ്ണായകമായ ഒരു രംഗമാണ് മുകളിൽ ചേർത്തിരിക്കുന്നത്. നായകൻ നായികാ കഥാപാത്രത്തെ ഹോട്ടലിൽ വെച്ച് കാണുന്ന രംഗത്തിൽ നായികയുടെ കൈവശം തോക്കുള്ളതായി ഒരു സൂചന പോലും ചിത്രം നൽകുന്നില്ല. എന്നാൽ വലത് ഭാഗത്തുള്ള ജൂനിയർ ആർട്ടിസ്റ്റ് കഥാപാത്രങ്ങളിൽ ഒന്ന് തോക്ക് പുറത്തെത്തുന്നതിന് മുൻപേ കൈ ചെവിയിൽ വച്ചത് ഒരു പക്ഷെ അതീന്ദ്രിയമായ സിദ്ധി വഴി ആവണം.


Gladiator (2000)

രണ്ടായിരം വർഷങ്ങൾക്ക് മുൻപുള്ള റോമിലെ അധികാര വടംവലികളും കുടിപ്പകയും പ്രതികാരവും എല്ലാം പ്രമേയമായ ചിത്രമായിരുന്നു ഗ്ലാഡിയേറ്റർ. ചിത്രത്തിലെ കാർത്തേജ് യുദ്ധ രംഗം അതിന്റെ അവതരണം കൊണ്ടും മറ്റും പ്രശസ്തമാണെങ്കിലും വലിയൊരു തെറ്റ് കൂടി ഈ രംഗത്ത് കാണാൻ കഴിഞ്ഞേക്കും. മുന്നിലുള്ള തടസത്തിൽ തട്ടി മറിഞ്ഞ രഥത്തിന്റെ പിറകിൽ ഒരു ഗ്യാസ് സിലിണ്ടർ.


Usual Suspects (1995)

രണ്ട് പതിറ്റാണ്ടുകൾ മുന്നേ പുറത്തിറങ്ങിയ യൂഷ്വൽ സസ്‌പെക്ടസ് എന്ന ചിത്രത്തെ ഓർക്കുമ്പോൾ ചിത്രം കണ്ട ഏതൊരു വ്യക്തിയും എടുത്ത് പറയാൻ സാധ്യതയുള്ളത് കെവിൻ സ്പേസി എന്ന നടന്റെ മാസ്മരിക പ്രകടനവും, അമ്പരപ്പിച്ച അപ്രതീക്ഷിതമായ ട്വിസ്റ്റും ആയിരിക്കും. ഇതിനോളം തന്നെ അമ്പരപ്പ് ഉളവാക്കുന്ന ഒന്നാണ് നാല് എൻജിനോട് കൂടി ആദ്യമായി പ്രത്യക്ഷപ്പെട്ട എയ്റോപ്ലൈൻ തൊട്ടടുത്ത സീനിൽ എങ്ങിനെ രണ്ട് എൻജിനോട് കൂടി പ്രത്യക്ഷപ്പെട്ടു എന്ന ചോദ്യം.


Commando (1985)

അർണോൾഡിന് മാച്ചോ പരിവേഷം ചാർത്തി കൊടുത്ത കമാൻഡോ എന്ന ചിത്രത്തിൽ മകളെ തട്ടിക്കൊണ്ടുപോയ വില്ലൻ കഥാപാത്രങ്ങളിൽ ഒരാളെ റോഡിലൂടെയുള്ള ചേസ് സീനിൻ ശേഷം കുന്നിൻ മുകളിൽ വെച്ച് പിടികൂടുന്ന ഒരു രംഗമുണ്ട്. രംഗത്തിന്റെ ആരംഭത്തിൽ ഇടത് ഭാഗം ഇടിച്ച് ചുളിഞ്ഞ കാർ അവസാനമാവുമ്പോൾ തനിയെ നന്നായത് ശ്രദ്ധയോടെ വീക്ഷിച്ചാൽ കാണാൻ കഴിയും.


Braveheart (1995)

ഒരു പിരിയഡ് ചിത്രം തെറ്റ് കുറ്റങ്ങൾ ഇല്ലാതെ പൂർത്തിയാക്കുക എന്നത് അത്യന്തം ദുഷ്കരമായ ഒരു പ്രവർത്തി തന്നെയാണ്. ഈ പ്രശ്നത്തിൽ നിന്നും വില്യം വാലസ് എന്ന സ്‌കോട്ടിഷ് പ്രഭുവിന്റെ കഥ സ്‌ക്രീനിൽ എത്തിച്ച ബ്രേവ്ഹാർട്ട് എന്ന ചിത്രത്തിനും രക്ഷപ്പെടാനായില്ല. പടയാളികൾ തങ്ങളുടെ എതിരാളികളുടെ നേരെ പോർവിളികളോടെ കുതിക്കുന്ന രംഗത്തിൽ സെറ്റിലെ പ്രവർത്തകരിൽ ഒരാളുടെ കാർ ബാക് ഗ്രൗണ്ടിൽ വ്യക്തമായി കാണാം.


Pulp Fiction (1995)

ലോകത്താകമാനം ഉള്ള ഭക്ഷണപ്രിയരെ കൊതിപ്പിച്ച് കൊണ്ട് ബർഗറും തിന്ന്, ജ്യുസും കുടിച്ച് ജൂൾസ് തന്റെ ആവശ്യം ഉന്നയിക്കുന്ന രംഗം ചിത്രം കണ്ടവരാരും മറക്കാൻ ഇടയില്ല. ഈ രംഗത്തിൽ റൂമിലെ ശ്രദ്ധയിൽ പെടാത്ത ആറാം കഥാപാത്രം ഡോർ തള്ളിത്തുറന്ന് ജൂൾസിനും വേഗയ്ക്കും നേരെ വെടി ഉതിർക്കുന്നതും അത് ഇരുവർക്കും കൊള്ളാതെ പോവുന്നതും നമുക്ക് അറിയാം. ഈ രംഗം ഒരു മുപ്പത് സെക്കൻഡ് പിറകിലേക്ക് പോവുക ആണെങ്കിൽ വെടി ഉതിർക്കുന്നതിനും കഥാപാത്രം സ്‌ക്രീനിൽ വരുന്നതിനും മുൻപ് ചുമരിൽ ഉണ്ടയുടെ പാടുകൾ വന്നതായി കാണാൻ കഴിയും.


Terminator 2 (1991)

T-1000 സാറ കോണറിനെയും മകനെയും തേടി മാനസിക ആശുപത്രിയിൽ വരുന്ന രംഗം നായക വില്ലൻ കഥാപാത്രങ്ങളുടെ ഇടപഴകൽ കാരണം പ്രശസ്തമാണ്. ഈ രംഗത്തിൽ സാറയെയും മകനെയും സംരക്ഷിക്കാനായി T-1000 എന്ന കഥാപാത്രത്തിന്റെ തലയ്ക്ക് നേരെ അർണോൾഡിന്റെ കഥാപാത്രം വെടി ഉതിർക്കുന്ന ഒരു രംഗമുണ്ട്. ഇവിടെ ശ്രദ്ധിക്കേണ്ടത് എന്താണെന്നാൽ അർണോൾഡ് വെടി ഉതിർക്കുന്നതിന് തൊട്ട് മുൻപേ രണ്ടായി പിളർന്ന് തുടങ്ങിയ T-1000 കഥാപാത്രത്തിന്റെ തല ആണ്, ഒരു ചെറിയ ടൈമിംഗ് മിസ്റ്റേക്ക്.


I Am Legend (2007)

സോമ്പി ചിത്രമായ ഐ ആം ലെജന്റിൽ വിൽ സ്മിത്ത് അവതരിപ്പിക്കുന്ന കഥാപാത്രത്തിന് സോമ്പിയായി മാറിയ ഒരാളിൽ നിന്നും കടി ഏൽക്കുന്ന ഭാഗമുണ്ട്. ഇതിൽ സവിശേഷമായത് എന്താണെന്നാൽ ഇടത് ഭാഗത്ത് കടിയേറ്റ വിൽ സ്മിത്ത് വലത് ഭാഗത്ത് മുറിവുമായി മറ്റൊരു സീനിൽ പ്രത്യക്ഷപ്പെടുന്നുണ്ട് എന്നതാണ്. അതും പോരെങ്കിൽ തൊട്ടടുത്ത രംഗത്തിൽ വീണ്ടും മുറിവ് ഇടത് ഭാഗത്ത് എത്തുന്നു.


Titanic (1997)

തെറ്റുകളുടെ ഒരു പെരുങ്കളിയാട്ടം തന്നെ കാണാനാവും ടൈറ്റാനിക് എന്ന ചിത്രത്തിൽ. അടുത്തടുത്ത രംഗങ്ങളിൽ ഹെയർ സ്റ്റൈൽ മാറ്റുന്ന നായക കഥാപാത്രവും കാലത്തിന് മുന്നേ അവതരിച്ച റോളക്സ് വാട്ച്ചും സ്ഥാനം മാറി കൊണ്ടിരിക്കുന്ന വസ്തുക്കൾക്കും ഒക്കെ ഇടയിൽ വ്യത്യസ്തമായി തോന്നിയത് അവസാനത്തെ മൂവിങ് ഷോട്ടിൽ സ്വന്തം സാന്നിധ്യം പ്രേക്ഷകനെ അറിയിച്ച ക്യാമറയുടെ ഇടപെടലാണ്.


Bad Boys (1983)

പ്രതീക്ഷിക്കാത്ത വ്യക്തികളോ, വസ്തുക്കളോ കടന്ന് വന്നത് കൊണ്ട് തെറ്റുകൾ സംഭവിക്കാം. എന്നാൽ ചിത്രം പകർത്തി കൊണ്ടിരുന്ന കാമറാമാൻ തന്നെ ഫ്രെയിമിൽ കടന്നുവരിക എന്നത് കൗതുകകരമായ കാര്യം തന്നെ. ബാഡ് ബോയ്സ് എന്ന ചിത്രത്തിൽ രണ്ട് കഥാപാത്രങ്ങൾ തമ്മിലുള്ള പോരാട്ടത്തിനിടെ വ്യക്തമായി തന്നെ ചിത്രീകരിക്കുന്ന ക്യാമെറാമാനെയും സ്‌ക്രീനിൽ കാണാൻ സാധിക്കും.

തെറ്റുകൾ മനുഷ്യ സഹജമാണ്, പരിഹാസം അല്ല പോസ്റ്റിന്റെ ഉദ്ദേശം, വെറും കൗതുകം മാത്രമാണ്. വായിക്കുന്നവരും ആ രീതിയിൽ ഉൾക്കൊള്ളുമെന്ന് പ്രതീക്ഷിക്കുന്നു.

422. The Little Girl Who Was Too Fond Of Matches (2017)

Director : Simon Lavoie

Genre : Horror

Rating : 7.2/10

Country : Canada

Duration : 110 Minutes


🔸സോയിസോൻസ് കുടുംബത്തെ കുറിച്ച് ഗ്രാമത്തിലുള്ളവർക്ക് അത്ര നല്ല അഭിപ്രായമല്ല, അച്ഛനായ സോയസോണും മക്കളായ ഫ്രേരെയും ആലീസും മറ്റുള്ളവരിൽ നിന്നും തീർത്തും ഒറ്റപ്പെട്ട്, യാതൊരു സമ്പർക്കവും കൂടാതെ ജീവിക്കാൻ തുടങ്ങിയിട്ട് വർഷങ്ങൾ കുറച്ചായിരിക്കുന്നു. മൂവർക്കും ഇടയിൽ ആ വീട്ടിൽ എന്താണ് സംഭവിച്ച് കൊണ്ടിരിക്കുന്നത് എന്നറിയാൻ ഗ്രാമവാസികൾക്ക് നല്ല ആഗ്രഹം ഉണ്ടെങ്കിലും വേലിക്കെട്ടുകൾ കടന്ന് അനുവാദം ഇല്ലാതെ അവിടേക്ക് കടന്ന് ചെന്നാൽ തങ്ങളെ കാത്തിരിക്കുന്നത് സോയിസോണിന്റെ തോക്ക് ആണെന്ന അനുഭവത്തിൽ നിന്നും ഉൾക്കൊണ്ട പാഠം അവരെ പിന്തിരിപ്പിക്കുകയാണ്. അറിയാൻ കഴിയാത്ത വസ്തുതകളെ കുറിച്ചുള്ള കൗതുകം ഏറിക്കൊണ്ടിരിക്കും എന്ന സ്വാഭാവിക മനുഷ്യ സ്വഭാവം കാരണം തന്നെ ഒരവസരത്തിനായി കാത്തിരിക്കുകയാണ് ഗ്രാമവാസികൾ, അവരുടെ രീതിയിൽ പറയുക ആണെങ്കിൽ മന്ത്രവാദിയായ സോയസോണിനെ പിടിച്ചുകെട്ടി ഒഴിവാക്കാൻ.

🔸ഒരുപാട് നുണകളിലും കെട്ട് കഥകളിലും പടുത്ത് ഉയർത്തിയതാണ് സോയിസോൻ കുടുംബത്തിന്റെ അടിത്തറ. മകളായ ആലീസിനെ താൻ ആൺകുട്ടി ആണെന്ന് പറഞ്ഞ് ബോധ്യപ്പെടുത്തി ആണ് സോയിസോൻ വളർത്തിയത്. സ്ത്രീ സഹജമായ സ്തന ഭാഗങ്ങൾ കെട്ടി വെച്ചും പുരുഷന്മാർക്ക് ഉണ്ടാവേണ്ട ജനനേന്ദ്രിയം ഒരപകടത്തിൽ ഇല്ലാതായത് ആണെന്ന് കള്ളം പറഞ്ഞും അവളുടെ സംശയങ്ങൾ സോയിസോൻ ഏറെക്കുറെ തീർത്ത് കൊടുത്തിട്ടുണ്ട്. ഇതിന് പുറമെ പുറമെ ഉള്ളവരുമായുള്ള സമ്പർക്കം എല്ലാം നിരോധിച്ച അയാൾ സ്വന്തം മക്കളെ പുസ്തകം വായിക്കാൻ പോലും അനുവദിച്ചിരുന്നുമില്ല, അങ്ങനെ തികച്ചും വിചിത്രവും ഒറ്റപ്പെട്ടതുമായ ഒരു ജീവിതമാണ് സോയിസോൻ കുടുംബത്തിന്റേത്.

🔸ഇങ്ങനെ പാതി വെന്ത പച്ച മാംസവും കഴിച്ച്, അച്ഛന്റെ കഠിനമായ ഉത്തരവുകളെയും അതിനോട് ചേർന്ന് വരുന്ന ശിക്ഷകളെയും ഭയന്ന് ജീവിതം മുന്നോട്ട് പോകവേ ആലീസിന്റെ ജീവിതത്തിൽ രണ്ട് പ്രധാന സംഭവങ്ങൾ അരങ്ങേറുകയാണ്. ആദ്യമായി തന്റെ സഹോദരൻ ആണെന്ന് അച്ഛൻ നൂറാവർത്തി പറഞ്ഞ് പഠിപ്പിച്ച ഫ്രേരെ ആലീസിനെ ക്രൂരമായി ബലാത്സംഗം ചെയ്യുകയാണ്, സ്വാഭാവികമായും അരങ്ങേറിയ സംഭവം എന്താണെന്നും അതിന്റെ പ്രത്യാഘാതങ്ങൾ എങ്ങനെ ആയിരിക്കും എന്നും അറിയാത്ത ആലീസ് ഒന്നും സംഭവിക്കാത്ത പോലെ ജീവിതവുമായി മുന്നോടട്ട് പോവുകയാണ്. ഇങ്ങനെ ഒക്കെ ആണെങ്കിലും ഇത് അച്ഛനെ അറിയിക്കാനും മാത്രം ധൈര്യം അവൾ ആർജിച്ചിട്ടില്ല.

🔸രണ്ടാമത്തെ സംഭവം കുറച്ച് കൂടി വിചിത്രമാണ്, തന്റെ ഓർമ്മ വെച്ച നാൾ മുതൽ മക്കളെ അറിയിക്കാതെ രാത്രി കൃഷിയിടത്തിലെ ഒറ്റപ്പെട്ട മുറിയിലേക്ക് അച്ഛൻ പോവുന്ന കാഴ്ച ആലീസ് കാണാറുണ്ടായിരുന്നു. കൗതുകം അടക്കാൻ കഴിയാഞ്ഞതിനാൽ ഒരു ദിവസം അച്ഛനെ പിന്തുടർന്ന് അവളും അവിടേക്ക് എത്തുകയാണ്, അരണ്ട വെളിച്ചത്തിൽ അകത്തേക്ക് നോക്കിയ ആലീസ് കണ്ടത് മരത്തടിയാൽ കെട്ടിയിടപ്പെട്ട ജീവിക്ക് ഭക്ഷണം കൊടുക്കുന്ന അച്ഛനെയാണ്, കുറച്ച് കൂടി സൂക്ഷ്മമായി ശ്രദ്ധിച്ചപ്പോഴാണ് ആ ജീവിയുടെ കൈകൾ മനുഷ്യ സമാനം ആണെന്ന് അവൾ തിരിച്ചറിയുന്നത്. ഈ രണ്ട് സംഭവങ്ങളുടെയും ബാക്കി പത്രമാണ് കഴിഞ്ഞ വർഷം പുറത്തിറങ്ങിയ പ്രസ്തുത കനേഡിയൻ ചിത്രം.

🔸യഥാർത്ഥത്തിൽ എന്തെല്ലാമാണ് സംഭവിക്കുന്നത് എന്ന് വെളിപ്പെടുത്താതെ ആദ്യാവസാനം സസ്പെൻസ് നില നിർത്തി കൊണ്ടാണ് ചിത്രം മുന്നേറുന്നത്, അവ ഒടുവിൽ മനസിലാക്കി എടുക്കുമ്പോൾ കാഴ്ചക്കാരന്റെ മനസ്സിൽ ഉടലെടുക്കാൻ സാധ്യത ഉള്ളത് വിഷാദവും സങ്കടവും ദേഷ്യവും എല്ലാം കലർന്ന വികാരവും ആയിരിക്കും. മേൽ സൂചിപ്പിച്ച കഥാഗതി ചിത്രത്തിന്റെ ആദ്യ പതിനെട്ട് മിനിറ്റുകളിൽ നിന്നും മാത്രമാണ്, നൂറ്റി പത്ത് മിനുട്ട് ദൈർഖ്യമുള്ള ഈ ബ്ലാക് ആൻഡ് വൈറ്റ് ചിത്രത്തിൽ കാഴ്ചക്കാരനെ ഞെട്ടിക്കാനും ചെറുതായി പേടിപ്പിക്കാനുമുള്ള വക ധാരാളമുണ്ട്. കഥാഗതിയിൽ സൂചിപ്പിച്ചത് പോലെ അത്യാവശ്യം എക്സ്പ്ലിസിറ്റ് രംഗങ്ങളും ന്യുഡിറ്റിയും ഡിസ്റ്റർബിങ് ആയ രംഗങ്ങളും ചിത്രത്തിലുണ്ട്, ഡാർക്ക് മൂഡ്, ഹൊറർ, മിസ്റ്ററി ചിത്രങ്ങൾ ഇഷ്ടപ്പെടുന്നവർ കാണാൻ ശ്രമിക്കുക.

Verdict : Very Good

Ingmar Bergman

സിനിമ എന്നത് അമേരിക്ക, ബ്രിട്ടീഷ് ചിത്രങ്ങളും ഒരു പരിധി വരെ ജാപ്പനീസ് ചിത്രങ്ങളും ആണ് എന്ന വിശ്വാസം പൊതുവെ പ്രേക്ഷകനിലും വിമർശകനിലും ഒരു പോലെ നില നിന്നിരുന്ന ഇരുപതാം നൂറ്റാണ്ടിന്റെ മധ്യകാലഘട്ടത്തിൽ സ്വീഡൻ പോലെയൊരു യൂറോപ്യൻ രാജ്യത്ത് നിന്നും തന്റെ സൃഷ്ടികളുമായി ലോകത്തിന് മുന്നിൽ അവതരിക്കുകയും പിന്നീടുള്ള നാല്പതിറ്റാണ്ടുകൾ സിനിമയുടെ ഒഴുക്കിൽ ഗണ്യമായ പങ്ക് വഹിക്കുകയും ചെയ്ത വ്യക്തിയാണ് ഇങ്മർ ബെർഗ്മാൻ. സിനിമ മനുഷ്യന്റെ ജീവിതത്തിന്റെ ഭാഗമായ കഴിഞ്ഞ ഒരു നൂറ്റാണ്ടിൽ മികച്ച സംവിധായകർ എന്ന പട്ടം കരസ്ഥമാക്കിയ അനവധി പ്രതിഭകൾ സിനിമാ ലോകത്ത് വരികയും തങ്ങളുടെ കഴിവ് പ്രകടിപ്പിക്കുകയും ചെയ്തിട്ടുണ്ട്, എന്നാൽ ബെർഗ്മാനോളം തന്റെ സൃഷ്ടികളിലൂടെ അനിഷേധ്യമായ വ്യക്തിമുദ്ര ചരിത്രത്തിൽ പതിപ്പിച്ച മറ്റൊരു സംവിധായകൻ ഉണ്ടായിട്ടില്ല എന്ന് ഉറപ്പിച്ച് പറയാം. അമരത്വം, വിശ്വാസം, മതം, ഏകാന്തത, എല്ലാത്തിലും ഉപരി അവനവനിലും ദൈവമെന്ന പദത്തിലുമുള്ള വിശ്വാസം ഇവയെല്ലാം ബെർഗ്മാൻ തന്റെ ചിത്രങ്ങൾക്ക് വിഷയമാക്കി. ചോദ്യം ചെയ്യപ്പെടേണ്ടതെന്ന് കരുതിയതിനെ ചോദ്യം ചെയ്തു, നിശിതമായി വിമർശിച്ചു, മാറ്റേണ്ടതെന്ന് വിശ്വസിച്ച വസ്തുതകളെ യാതൊരു മടിയുമില്ലാതെ കീറി എറിഞ്ഞു. ഇങ്ങനെ ആറ് പതിറ്റാണ്ടുകൾ നീണ്ട് നിന്ന കരിയറിൽ അൻപതിലധികം സിനിമകളും ടോക്കിയുമെൻടെറികളും. ഒന്നിനൊന്ന് മികച്ച ഈ സൃഷ്ടികളിലെ അഞ്ച് സിനിമകളെ ഒന്ന് പരിചയപ്പെടാം.

Seventh Seal (1957)

Genre : Fantasy

Rating : 8.3/10

Duration : 96 Minutes


ഏതൊരു ലോകോത്തര സംവിധായകനും ഉണ്ടാവും ലോകം അളവുകോലായി കണക്കാക്കപ്പെടുന്ന ഒരു ചിത്രം. കുബ്രിക്കിന് 2001 എ സ്പേസ് ഒഡിസ്സി പോലെ, ഹിച്ച്‌കോക്കിന് സൈക്കോ പോലെ, ഓർസോൺ വെൽസിന് സിറ്റിസൺ കയ്‌നും സ്പിൽബെർഗിന് സേവിങ് പ്രൈവറ്റ് റയാനും പോലെ. സിനിമ ജീവിതമായി കണ്ടവരുടെ സിനിമ ജീവിതം ശിഷ്ട കാലം വിലയിരുത്തപ്പെടുന്ന ചിത്രം. ആദ്യ കാലങ്ങളിൽ പുറം ലോകത്തിന് അപരിചിതമായ പൊതുവെ അപരിചിതമായ മേഖല ആയിരുന്നു സ്വീഡിഷ് ചിത്രങ്ങൾ, ഇവയെ ലോകത്തിന് മുന്നിൽ എത്തിച്ചതിൽ പ്രധാനി ആണ് സംവിധായകൻ ഇന്ഗമാർ ബെർഗ്മാൻ. തന്റെ ചിത്രങ്ങളിൽ എല്ലാം വിശ്വാസികളെയും വിശ്വാസത്തെയും ചോദ്യം ചെയ്ത സംവിധായകൻ. നിരാശയും നഷ്ടബോധവും സഹനവും വേദനയും പ്രതീകമായ കഥാപാത്രങ്ങളെ വെളിച്ചത്തിലേക്ക് കൊണ്ടുവന്ന സംവിധായകൻ. The Silence (1963), Fanny And Alexander (1982), Persona (1966) തുടങ്ങി എന്നും ഓര്മിക്കപ്പെടുന്ന ഒരുപിടി ചിത്രങ്ങൾ ബെർഗ്മാൻ സംവിധാനം ചെയ്തിട്ടുണ്ടെങ്കിലും അദ്ദേഹത്തിന്റെ മാഗ്നസ് ഓപസ് അന്നും ഇന്നും എന്നും The Seventh Seal (1957) ആണ്. ബെർഗ്മാൻ തന്നെ സംവിധാനം ചെയ്ത ഒരു നാടകം ആണ് ചിത്രത്തിന് ആധാരം. 60 വര്ഷം നീണ്ടുനിന്ന ബെർഗ്മാന്റെ സിനിമ ജീവിതം ആരെയും അസൂയപ്പെടുത്താം വിധം പൂർണം ആണ് , അതിൽ ഒരു ദീപസ്തംഭമായി നിലകൊള്ളുന്നു ഇത്ര വർഷങ്ങൾക്ക് ഇപ്പുറവും പ്രസക്തിയും പുതുമയും നഷ്ടപ്പെടാതെ The Seventh Seal (1957). ദീർഘകാലം യുദ്ധത്തിൽ പടയാളിയായ അന്റോണിയോസ്‌ ബ്ലോക്ക് ആണ് ചിത്രത്തിലെ പ്രധാന കഥാപാത്രം. യുദ്ധത്തിൽ പരാജയപ്പെട്ട ശേഷം കടൽത്തീരത്തു ഉറക്കം ഉണരുന്ന ബ്ലോക്ക് കാണുന്നത് തന്നെയും കാത്തിരിക്കുന്ന മരണത്തെ ആണ്. തന്റെ സമയം അടുത്ത് കഴിഞ്ഞു എന്ന് മനസ്സിലാവുന്ന ബ്ലോക്ക് കുറച്ചു സമയം കൂടി നീട്ടികിട്ടുവാനും തന്റെ അവസാനത്തെ ആഗ്രഹം സഫലീകരിക്കുവാനും വേണ്ടി മരണത്തിനെ ഒരു ചെസ്സ് മത്സരത്തിനായി വെല്ലുവിളിക്കുകയാണ്. ഒരു പിഴവിനപ്പുറം മരണമാണ് എന്ന തിരിച്ചറിവും, ദൈവവും സാത്താനും യാഥാർഥ്യമാണോ എന്ന സംശയവും, മരിക്കുന്നതിന് മുൻപ് ഒരു നല്ല കാര്യം എങ്കിലും ചെയ്യണം എന്ന നായകൻറെ ആഗ്രഹവും ആണ് ചിത്രത്തെ മുന്നോട്ട് കൊണ്ടുപോവുന്നത്. തന്റെ ചിത്രങ്ങളിൽ എല്ലാം തന്നെ ദൈവത്തിന്റെ നിലനില്പിനെയും, വേദന സഹിക്കുന്ന ജനങ്ങൾക്ക് നേരെയുള്ള ദൈവത്തിന്റെ നിശ്ശബ്ദതക്കെതിരെയും  ശബ്ദം ഉയർത്തിയ സംവിധായകൻ ആണ് ബെർഗ്മാൻ. കൈകാര്യം ചെയ്ത വിഷയതിനാലും വിശ്വാസങ്ങളെ തച്ചുടക്കാൻ ശ്രമിച്ചതിനാലും ഇറങ്ങിയ കാലത്തു ഒരുപാട് വിവാദത്തിന് പാത്രം ആയ ചിത്രമാണ് ദി സെവൻത് സീൽ. എന്തിരുന്നാലും ചിത്രം ഒരു ലോകോത്തര ക്ലാസിക് ആണ് എന്ന കാര്യത്തിൽ സംശയം നിലനിൽക്കുന്നില്ല. ദൈവം കച്ചവട വസ്തുവായ ഇന്നത്തെ കാലത്തും ചിത്രം പറഞ്ഞുവെച്ച കാര്യങ്ങൾക്കും നിർദേശങ്ങൾക്കും വലിയ പ്രസക്തി ഉണ്ട്. ചിത്രത്തിന്റെ കഥയിൽ ചെറിയ കാര്യങ്ങൾക്ക് പോലും സംവിധായകൻ പ്രാധാന്യം നൽകിയിട്ടുണ്ട്. 1950കളിൽ ഷൂട്ട് ചെയ്ത ചിത്രം ആയിട്ട് കൂടിയും ചിത്രത്തിലെ ക്ലൈമാക്സ് ഷോട്ട് ഉൾപ്പെടെയുള്ള രംഗങ്ങൾ ഇന്നും അത്ഭുതമായി നിലനിൽക്കുന്നു. കഥയും തിരക്കഥയും കഥാപാത്രങ്ങളും കഥാസന്ദർഭങ്ങളും എന്നും മനസ്സിൽ നിലനിൽക്കുന്നത് ആണ്. പ്രധാന കഥാപാത്രങ്ങളായ ബ്ലോക്കിനെ അവതരിപ്പിച്ച മാക്സ് വോൺ സിഡോയും മരണത്തിനെ അവതരിപ്പിച്ച ബെന്ഗത് എകെറോടും മികച്ച പ്രകടനം തന്നെ കാഴ്ചവെച്ചു. വേണ്ടവിധം വിശകലനം ചെയ്യപ്പെട്ടിട്ടില്ലാത്ത ഒരു ക്ലാസിക് ചിത്രം തന്നെ ആണ് ദി സെവൻത് സീൽ.

Virgin Spring (1960)

Genre : Revenge

Rating : 8.1/10

Duration : 89 Minutes


വിർജിൻ സ്പ്രിങ് എന്ന ചിത്രത്തിന് ഒരു സവിശേഷത, അല്ലെങ്കിൽ ഒരു കുഴപ്പം ഉണ്ട്. പ്രഥമ ദൃഷ്ടിയാൽ നോക്കവേ വളരെ ലളിതം എന്നൊരു ചിന്ത ഈ ചിത്രം കാഴ്ചക്കാരനിൽ ജനിപ്പിക്കാം എങ്കിലും സിനിമ മുന്നോട്ട് വെയ്ക്കുന്ന വിഷയവും ഉളവാക്കുന്ന ചിന്തയും വളരെ വലുതാണ്. സ്വീഡനിലെ ഗ്രാമ പ്രദേശങ്ങളിൽ പ്രചാരത്തിൽ ഉണ്ടായിരുന്ന ഒരു നാടോടി കഥയാണ് ബെർഗ്മാൻ സിനിമാ രൂപേണ വിർജിൻ സ്പ്രിങ്ങിലൂടെ അവതരിപ്പിച്ചിട്ടുള്ളത്. എട്ട് നൂറ്റാണ്ട് മുൻപേ സ്വീഡനിൽ താമസിച്ചിരുന്ന കടുത്ത ക്രിസ്തീയ മത വിശ്വാസം പാലിക്കുന്ന കുടുംബത്തിലേക്കാണ് കാഴ്ചക്കാരെയും കൂട്ടി ബെർഗ്മാൻ കടന്ന് ചെല്ലുന്നത്, ഗൃഹനാഥനായ റ്റോറിയും അയാളുടെ ഭാര്യയും മകളും വളർത്തുമകളും ഉൾപ്പെടുന്നതാണ് ആ കുടുംബം. ഈ കുടുംബത്തിൽ പിന്നീട് അരങ്ങേറുന്ന ഒരു ദുരന്തവും അതിന്റെ കാര്യ കാരണങ്ങളും പ്രത്യാഘാതങ്ങളും എല്ലാമാണ് തുടർന്നുള്ള ഒന്നര മണിക്കൂർ. ദൈവം എന്ന വസ്തുതയെ ഒരല്പം സംശയത്തോടെയും ഒരായിരം ചോദ്യങ്ങളോടെയും സമീപിച്ച ബെർഗ്മാൻ ഇവിടെയും ആവർത്തിക്കുന്നത് അത് തന്നെയാണ്, ചോദ്യം ചെയ്യുന്നത് വിശ്വാസങ്ങളെയാണ്.

Persona (1966)

Genre : Mystery

Rating : 8.2/10

Duration : 84 Minutes


ഓരോ രംഗം കഴിയുമ്പോഴും ഇനി എന്ത് എന്ന ചിന്ത മനസ്സിൽ ഉയരുകയും, നമ്മുടെ ധാരണകൾ എല്ലാം തന്നെ ഓരോന്നായി മാറി മറിയുകയും ചെയ്യുമ്പോൾ ഉറപ്പിക്കാം സ്‌ക്രീനിൽ ഇപ്പോൾ കണ്ട് കൊണ്ടിരിക്കുന്നത് ഒരു സാധാരണ ചിത്രമല്ല എന്ന്. ഈ വസ്തുതയെ നൂറ് ശതമാനം പിന്താങ്ങുന്ന ഒന്നാണ് ബെർഗ്മാൻ സംവിധാനം ചെയ്ത പെർസോണ എന്ന ചിത്രം. വ്യക്തിപരമായി സംവിധായകന്റെ ചിത്രങ്ങളിൽ ഏറ്റവും ഇഷ്ട്ടപ്പെട്ടതും അത്ഭുതപ്പെടുത്തിയതും ഈ ചിത്രമാണ്, അതിനാൽ തന്നെ ഏതെങ്കിലും ഒരു ചിത്രം ഇത് വായിക്കുന്നവർ അറിവൊന്നുമില്ലാതെ, യാതൊരു വിധ മുൻവിധികളും ഇല്ലാതെ കാണണം എന്ന് നിർബന്ധമുണ്ടെങ്കിൽ അത് ഇതാണ്. കഥയെ കുറിച്ചുള്ള വലിയ സൂചനകൾ ഒന്നും ഉൾപ്പെടുത്തുന്നില്ലെങ്കിലും രണ്ട് സ്ത്രീ കഥാപാത്രങ്ങളാണ് ഈ ചിത്രത്തിന്റെ നട്ടെല്ല്, ഇവർക്കിടയിൽ ഉടലെടുക്കുന്ന യാഥാർഥ്യമോ ഭാവനയോ എന്ന് തിരിച്ചറിയാനാവാത്ത ചോദ്യങ്ങളാണ് ഈ ചിത്രം, ഉത്തരങ്ങൾ കണ്ട്, അറിഞ്ഞ്, അനുഭവിച്ച് മനസിലാക്കാനായി ഈ ചിത്രം വിട്ടുതരുന്നു.

Wild Strawberries (1957)

Genre : Drama

Rating : 8.2/10

Duration : 91 Minutes


ജീവിതത്തിൽ ഏതൊരു വ്യക്തി ആയാലും ശെരി സംഭവിക്കും എന്ന് നൂറ് ശതമാനം ഉറപ്പുള്ള ഒരു വസ്തുതയെ ബുദ്ധി ഉറച്ച കാലം മുതൽക്കേ ഭയപ്പെടുന്നുണ്ടെങ്കിൽ അത് മരണത്തെയാണ്, മരണം എന്നത് സുനിശ്ചിതമാണ്, സത്യമാണ്, തിരിച്ചറിവാണ്. കഥ കാരണം അത്ഭുതമായി മാറിയ സിനിമകൾ അനവധി ആണെങ്കിലും കഥയില്ലായ്മ കാരണം ഞെട്ടിച്ച അപൂർവം ചിലതെ ഉള്ളൂ, അവയിൽ ഒന്നാണ് വൈൽഡ് സ്ട്രോബറീസ്, വിശദീകരിക്കാൻ മാത്രമൊരു കഥ ചിത്രത്തിലില്ല. തന്റെ ജീവിതത്തിന്റെ അന്ത്യ കാലത്തേക്ക് കടന്ന ഒരു പ്രൊഫെസറാണ് സിനിമയുടെ കേന്ദ്ര കഥാപാത്രം, സ്വന്തം ആദരിക്കൽ ചടങ്ങിലേക്കുള്ള അയാളുടെ യാത്രയിലൂടെയാണ് കഥ മുന്നേറുന്നത്. മരണഭയം പ്രൊഫസറെ കാർന്ന് തിന്നുകയാണ്, അയാളുടെ ചിന്തകളിൽ പോലും മരണം ഭാഗമാവുകയാണ്. കൂടുതൽ പറഞ്ഞ് ആസ്വാദനത്തെ കുറയ്ക്കുന്നില്ല, സിനിമ എന്നതിൽ കവിഞ്ഞ് ഒരു അനുഭവമാണ് വൈൽഡ് സ്ട്രോബറീസ്, കാണാൻ ശ്രമിക്കുക, അനുഭവിക്കാൻ ശ്രമിക്കുക.

Winter Light (1963)

Genre : Drama

Rating : 8.1/10

Duration : 81 Minutes


ബെർഗ്മാനെ കുറിച്ചുള്ള ഒരു സംഭാഷണവും അദ്ദേഹത്തിന്റെ ട്രിലോഗി ഓഫ് സൈലെൻസ് എന്ന സിനിമാ സീരീസിനെ കുറിച്ച് പറയാതെ അവസാനിപ്പിക്കാനാവില്ല.ത്രൂ എ ഗ്ലാസ് ഡാർക്‌ലി എന്ന ചിത്രത്തിലൂടെ ആരംഭിച്ച് ദി സൈലെൻസ് എന്ന ചിത്രത്തിൽ അവസാനിച്ച സീരീസിലെ രണ്ടാം ഭാഗ ചിത്രമാണ് വിന്റർ ലൈറ്റ്. വിഷമം അനുഭവിക്കുന്ന മനുഷ്യനെ അയാളുടെ ദുരിത സമയത്ത് പോലും ആശ്വസിപ്പിക്കാൻ കഴിയാത്ത ഒരു പാസ്റ്റർ കഥാപാത്രത്തിന്റെ നിസ്സഹായ അവസ്ഥയിലൂടെ കടന്ന് പോവുന്ന ചിത്രം ഒരു രീതിയിൽ അല്ലെങ്കിൽ മറ്റൊരു രീതിയിൽ ചോദ്യം ചെയ്യുന്നത് വിശ്വാസത്തെയും ദൈവത്തെയും തന്നെയാണ്. ദൈവത്തിനും വിശ്വാസത്തിനും മൂല്യങ്ങൾക്കും അപ്പുറം മനുഷ്യന്റെ നിശബ്ദതയും ചിത്രം പ്രതിപാദിക്കുന്നുണ്ട്. ചില ചിത്രങ്ങളെ കുറിച്ച് എന്തെങ്കിലും കുത്തി കുറിക്കുമ്പോൾ, നമ്മുടെ ഇടുങ്ങിയ മനസിലൂടെ കണ്ട് അഭിപ്രായം പറഞ്ഞ് അതിനോട് തന്നെ നീതികേട്‌ കാട്ടുകയാണ് എന്ന് തോന്നിയിട്ടുണ്ട്. വിന്റർ ലൈറ്റും ഒട്ടുമിക്ക ബെർഗ്മാൻ ചിത്രങ്ങളും ആ സ്രേണിയിൽ പെട്ടവയാണ്, അത് വിശകലനം ചെയ്യാൻ ഞാൻ ആളല്ല, എങ്കിലും പരിചയപ്പെടുത്താൻ ശ്രമിക്കുകയാണ്. ഒഴിവാക്കാതെ കാണാൻ ശ്രമിക്കുക ഓരോ ചിത്രങ്ങളും, കാരണം ഇവ ഓരോന്നും ഓരോ പാഠ പുസ്തകങ്ങൾ ആവുന്നു.

ബെർഗ്മാന്റെ നൂറാം ജന്മ വാർഷികത്തിൽ മികച്ച് നിൽക്കുന്ന അനവധി സൃഷ്ടികളിൽ നിന്നും അഞ്ച് ചിത്രങ്ങൾ മാത്രം തിരഞ്ഞെടുക്കുക എന്നത് നീതികേട് ആണ്. ഈ അഞ്ചെണ്ണത്തിലേക്ക് ശ്രദ്ധ തിരിയുമ്പോഴും ഓരോ കോണുകളിൽ നിന്നും ചോദ്യങ്ങൾ ഉയരുകയാണ്, ഫാനി ആൻഡ് അലക്സാണ്ടർ നല്ല ചിത്രമല്ലേ ? ഓട്ടം സൊണാറ്റ ആണോ മോശം ? ക്രൈസ് ആൻഡ് വിസ്‌പേർസ് മറക്കാൻ കഴിയുമോ ? അങ്ങനെ അങ്ങനെ. ഇവയെല്ലാം മറ്റൊരു ഭാഗത്ത് ഉൾപ്പെടുത്താം എന്ന പ്രതീക്ഷയിൽ ബെർഗ്മാന് പ്രണാമം അർപ്പിച്ച് തല്ക്കാലം പിൻവാങ്ങാം എന്ന് മാത്രം.

421. Freaks (1932)

Director : Tod Browning

Genre : Fantasy

Rating : 8/10

Country : USA

Duration : 62 Minutes


🔸ഒരു മനുഷ്യന് എത്രത്തോളം അധഃപതിക്കാം ?? കളവും ചതിയും വഞ്ചനയും എല്ലാം സമ്മതിക്കാം, എന്നാൽ സ്വന്തം സ്വാർത്ഥ ലാഭത്തിന് വേണ്ടി തന്നെ കണ്ണടച്ച് വിശ്വസിച്ച വികലാംഗൻ ആയ ഒരു പാവത്തിനെ പറഞ്ഞ് പറ്റിച്ച് അയാൾ തന്റെ ജീവിതകാലം മുഴുവൻ ചോര നീരാക്കി സമ്പാദിച്ച പണം കൈക്കലാക്കാൻ ശ്രമിക്കുക എന്നത് വിവരണം അർഹിക്കാത്ത ചെറ്റത്തരം തന്നെ ആണ്. ഈ കഥയാണ് ഫ്രീക്സ് എന്ന പഴയ കാല ചിത്രം. തൊണ്ണൂറ് മിനുട്ടിനടുത്ത് ദൈർഖ്യം ഉണ്ടായിരുന്ന പൂർണ ചിത്രം റിലീസ് സമയത്ത് കാസ്‌ട്രേഷൻ ഉൾപ്പെടെ ഉള്ള വിഷയങ്ങൾ കൈകാര്യം ചെയ്തതിനാൽ കടുത്ത വിമർശനങ്ങൾ നേരിടുകയും ബ്രിട്ടൻ പോലുള്ള രാജ്യങ്ങളിൽ നിരോധിക്കപ്പെടുകയും ചെയ്തിട്ടുണ്ട്. മുപ്പത് മിനുട്ടുകൾ വെട്ടി ചുരുക്കിയ ചിത്രത്തിന്റെ പ്രിന്റാണ് ഇന്ന് ലഭ്യമായിട്ടുള്ളത്.

🔸ഫ്രീക്സ് എന്ന ചിത്രത്തെ കുറിച്ച് പറയുന്നതിനെ മുൻപേ സംവിധായകൻ ടോഡ് ബ്രൗണിങ്ങിനെ ഒന്ന് പരിചയപ്പെടുന്നത് നന്നാവും, പത്തൊൻപതാം നൂറ്റാണ്ടിന്റെ അവസാന കാലത്ത് കെന്റക്കിയിലെ സാമ്പത്തികമായി ബേധപ്പെട്ട കുടുംബത്തിൽ ചാൾസ് എന്ന പേരിൽ ജനിച്ച സംവിധായകനെ എല്ലാ കാലത്തും മോഹിപ്പിച്ച ഒരേയൊരു വിഷയമേ ഉണ്ടായിരുന്നുള്ളൂ, സർക്കസ്. സർക്കസ് കൂടാരങ്ങളോടും, അഭ്യാസികളോടും അടങ്ങാത്ത അഭിനിവേശം പുലർത്തിയിരുന്ന ചാൾസ് പതിനാറാം വയസ്സിൽ നാട് സഞ്ചരിക്കാനെത്തിയ നാടോടി സർക്കസുകാരോടൊപ്പം വീട് വിട്ടിറങ്ങി. പിന്നീടുള്ള ചാൾസിന്റെ ജീവിതം അഭ്യാസികളോടും മൃഗങ്ങളോടും ഒപ്പം സർക്കസ് കൂടാരങ്ങളിലായിരുന്നു.

🔸"ശീലങ്ങളിൽ നിന്നും ആചാരങ്ങളിൽ നിന്നും മാറി നടക്കാനുള്ള എല്ലാ ശ്രമങ്ങളും നിർഭാഗ്യകരം ആയും അതിന് തുണിയുന്നവർ തിന്മയുടെ ആൾ രൂപങ്ങൾ ആയുമാണ് കരുതപെട്ടത്" എന്ന ഓര്മപ്പെടുത്തലോട് കൂടിയാണ് ചിത്രം ആരംഭിക്കുന്നത്. സർക്കസ് ട്രൂപ്പിലെ സൗന്ദര്യഭാജനമായ ക്ലിയോപാട്രയും ജന്മനാ കുള്ളനായ ഹാൻസും തമ്മിലുള്ള പ്രണയമാണ് ചിത്രത്തിന് ആധാരം. ക്ലിയോപാട്രയുമായി ഹാൻസ് അഗാധമായ ഇഷ്ടത്തിൽ ആണെങ്കിലും ക്ലിയോപാട്രയുടെ കണ്ണ് അയാളുടെ സമ്പാദ്യത്തിൽ മാത്രമാണ് എന്നതാണ് സത്യം. ഹാൻസിനെ ഒഴിവാക്കാനും സമ്പാദ്യം കൈക്കലാക്കാനുമായി ഒരവസരത്തിന് കാത്ത് നിൽക്കുകയാണ് ക്ലിയോപാട്രയും കാമുകനായ ഹെർക്കുലീസും.

🔸ഈ രണ്ട് കഥാപാത്രങ്ങൾക്കും അവരുടെ ചരട് വലികൾക്കും, കഥ അറിയാതെ ഇതിന്റെ എല്ലാം ഭാഗമായി മാറുന്ന ഹാൻസിനും പുറമെ മറ്റ് ചില കഥാപാത്രങ്ങൾ കൂടിയുണ്ട് ചിത്രത്തിൽ. ടൈറ്റിൽ പറയുന്നത് പോലെ ഫ്രീക്സ് എന്ന് വിശേഷിപ്പിക്കേണ്ട ചിലർ, ജന്മനാ വൈകല്യം ബാധിച്ച ചിലർ, ആ വൈകല്യങ്ങൾ കൊണ്ട് മറ്റുള്ളവരെ ചിരിപ്പിക്കാൻ ബാധ്യസ്ഥരായവർ, അതിന് വിധിക്കപ്പെട്ടവർ, അവരെ വിശേഷിപ്പിക്കാൻ ഏറ്റവും നല്ല വാക്ക് ഒരർത്ഥത്തിൽ ഫ്രീക്സ് എന്ന് തന്നെ. ക്ലിയോപാട്രയുടെയും ഹെർക്കുലീസിന്റേയും ചെയ്തികളിൽ സംശയം തോന്നി തുടങ്ങിയിരുന്ന ഇവരും കാത്തിരുന്നത് അവസരത്തിനായി തന്നെ, സുഹൃത്തിനെ സംരക്ഷിക്കാനുള്ള അവസരത്തിന് വേണ്ടി.

🔸ചിത്രത്തിലെ നിർണ്ണായകമായ ഒരു ഘട്ടത്തിൽ മുഖം വികൃതമായ ചില കലാകാരൻമാർ അഭ്യാസം കാണിക്കുമ്പോൾ മാന്യനെന്ന രീതിയിൽ വസ്ത്രം ധരിച്ച അഭ്യസ്ത വിദ്യൻ എന്ന് തോന്നിക്കുന്ന ഒരു വ്യക്തി അവരെ അപമാനിക്കുന്ന ഒരു രംഗമുണ്ട്. വേഷത്തിനും പഠിപ്പിനും പണത്തിനും അപ്പുറം മനുഷ്യനെ മനുഷ്യനാക്കുന്ന വേറെ ചില വസ്തുതകൾ ഉണ്ടെന്ന് ഈ ഒറ്റ രംഗത്തിൽ കൂടി തെളിയിച്ച സംവിധായകന് പ്രണാമം. ഇതൊക്കെയാണ് ഈ ചിത്രം, കാഴ്ചയിൽ സൗന്ദര്യമുള്ളവർ, പൂർണരെന്ന് കരുതുന്നവർ തങ്ങളുടെ നീചമായ ഭാവം പ്രകടിപ്പിക്കുമ്പോൾ വികലമായ, വൈകല്യം ബാധിച്ചവർ മറ്റൊരു വശം കാണിച്ചു തരുന്നു, അതി സുന്ദരം എന്നല്ലാതെ ഒന്നും പറയാനില്ല.

Verdict : Must Watch