524. Us (2019)

Director : Jordan Peele

Genre : Horror

Rating : 7.5/10

Country : USA

Duration : 114 Minutes

🔸അസ് എന്ന ചിത്രത്തിന്റെ ആരംഭത്തിൽ ഒരു സീൻ ഉണ്ട്, ഒരു ഒഴിഞ്ഞ വെളിച്ചം ഇല്ലാത്ത മുറിയിലേക്ക് കയറി വന്ന പെൺകുട്ടി അവിടം ചുറ്റി നടന്ന് കാണുന്ന രംഗം. വെളിച്ചം ഒട്ടും ഇല്ലാത്ത അവിടെ കണ്ണാടിയിലെ പ്രതിഫലനം പോലെ പെൺകുട്ടിയുടെ മറ്റൊരു പതിപ്പ് കാണാം, ഇതൊക്കെ കണ്ട് ഒരല്പം പേടിയോടെ ആണെങ്കിലും വിസിൽ ഒക്കെ അടിച്ച് മുന്നോട്ട് പോവുന്ന ഈ കഥാപാത്രം ഞെട്ടി തരിക്കുന്നത് പ്രതിഫലനം അല്ലാതെ ജീവനുള്ള തന്റെ യഥാർത്ഥ പതിപ്പിനെ തൊട്ട് മുന്നിൽ കാണുമ്പോഴാണ്. ട്രൈലെർ കണ്ടവർക്കെല്ലാം പ്രവചിക്കാവുന്ന രംഗം ആണെങ്കിൽ കൂടിയും ഈ സീൻ തന്ന ഒരു ഇഫക്ട് ഉണ്ട്, അതിനോടൊപ്പം ആ കിടിലൻ ബാക്ക്ഗ്രൗണ്ട് സ്‌കോർ കൂടിയാവുമ്പോൾ മികച്ച ഒരു എക്സ്പീരിയൻസ് ആവുന്നുണ്ട് അസ് എന്ന ചിത്രം.

🔸അസ് എന്ന ചിത്രത്തിന്റെ ആരംഭത്തിൽ ഒരു സീൻ ഉണ്ട്, ഒരു ഒഴിഞ്ഞ വെളിച്ചം ഇല്ലാത്ത മുറിയിലേക്ക് കയറി വന്ന പെൺകുട്ടി അവിടം ചുറ്റി നടന്ന് കാണുന്ന രംഗം. വെളിച്ചം ഒട്ടും ഇല്ലാത്ത അവിടെ കണ്ണാടിയിലെ പ്രതിഫലനം പോലെ പെൺകുട്ടിയുടെ മറ്റൊരു പതിപ്പ് കാണാം, ഇതൊക്കെ കണ്ട് ഒരല്പം പേടിയോടെ ആണെങ്കിലും വിസിൽ ഒക്കെ അടിച്ച് മുന്നോട്ട് പോവുന്ന ഈ കഥാപാത്രം ഞെട്ടി തരിക്കുന്നത് പ്രതിഫലനം അല്ലാതെ ജീവനുള്ള തന്റെ യഥാർത്ഥ പതിപ്പിനെ തൊട്ട് മുന്നിൽ കാണുമ്പോഴാണ്. ട്രൈലെർ കണ്ടവർക്കെല്ലാം പ്രവചിക്കാവുന്ന രംഗം ആണെങ്കിൽ കൂടിയും ഈ സീൻ തന്ന ഒരു ഇഫക്ട് ഉണ്ട്, അതിനോടൊപ്പം ആ കിടിലൻ ബാക്ക്ഗ്രൗണ്ട് സ്‌കോർ കൂടിയാവുമ്പോൾ മികച്ച ഒരു എക്സ്പീരിയൻസ് ആവുന്നുണ്ട് അസ് എന്ന ചിത്രം.

🔸ഇനി കാര്യത്തിലേക്ക് കടക്കാം, വളരെ ലളിതമായ കൺസെപ്റ്റ് ആണ് അസിന്റേത്. കാഴ്ചയിലും പ്രവർത്തിയിലും തങ്ങളുമായി യാതൊരു വ്യത്യാസവും ഇല്ലാത്ത ഒരു കൂട്ടം ആളുകൾ ഒരു കുടുംബത്തെ വേട്ടയാടുകയാണ്, ഇതാണ് ഈ ചിത്രത്തിന്റെ പ്രമേയം. ഈ സാമ്യതയ്ക്ക് സ്വാഭാവികമായും എന്തെങ്കിലും കാരണം ഉണ്ടായിരിക്കേണ്ടതാണ്, ആ ഒരു കാരണവും, അതിനുള്ള കാരണങ്ങളും പ്രത്യാഘാതങ്ങളും എല്ലാം ചിത്രം പറയുന്നുണ്ട്. ചിത്രത്തിന്റെ നെഗറ്റിവ് എന്ന് പറയാവുന്ന ഒരു കാരണവും ഈ ഭാഗത്ത് നിന്ന് തന്നെ ആണ്, മുകളിൽ സൂചിപ്പിച്ച കാരണങ്ങൾ എന്ന് ചിത്രം പറയുന്ന സംഭവങ്ങൾ അനവധി ചോദ്യങ്ങൾ തുറന്നിടുന്നുണ്ട്, ഇവയിൽ പലതിനും വ്യക്തമായ ഒരുത്തരം നൽകുന്നുമില്ല. ഇവ പ്രേക്ഷകന് കണ്ടെത്താനായി മനഃപൂർവം വിസ്മരിച്ചതാണോ അതോ തെറ്റ് പറ്റിയതാണോ എന്ന് മാത്രമേ അറിയേണ്ടതായുള്ളൂ.

🔸ഈ ഒരു പ്രശനം ഒഴിച്ച് നിർത്തിയാൽ ആസ്വദിച്ച് തന്നെ, ഒരല്പം ടെൻഷനോട് കൂടി കാണാവുന്ന ചിത്രമാണ് അസ്. പഴയ ഫണ്ണി ഗെയിംസ്, ഡോണ്ട് ബ്രീത് പോലെയുള്ള ചിത്രങ്ങളുമായി ചെറിയ ചില സാമ്യങ്ങൾ വെച്ച് പുലർത്തുന്നുണ്ട് ഈ ചിത്രം, പ്രത്യേകിച്ചും ഹോം ഇൻവേഷൻ പോലെയുള്ള കാര്യങ്ങൾ കൈകാര്യം ചെയ്യുമ്പോൾ. ലുപിറ്റ നിയോങ്കോയുടെ അന്യായ പ്രകടനവും, പിടിച്ചിരുത്തുന്ന രീതിയിൽ മുന്നേറുന്ന കഥയും, നല്ല ദൃശ്യങ്ങളും, ഹോന്റിങ് ആയ മ്യുസിക്കും ചെറിയ ചില സർപ്രൈസുകളും അസ് എന്ന ചിത്രത്തിന്റെ പരാമർശം അർഹിക്കുന്ന പ്ലസ് പോയിന്റുകളാണ്.

🔸ഇനി കാണണമോ വേണ്ടയോ എന്നാണെങ്കിൽ, നമ്മൾ അധികം ഒന്നും കണ്ട് ശീലിച്ചിട്ടില്ലാത്ത ഒരു വ്യത്യസ്ത ഐറ്റം ആണ് അസ് എന്ന ചിത്രം. ഹൊറർ ചിത്രം ആയിരിക്കുമ്പോഴും അനാവശ്യ സ്‌കെയറുകളോ കാര്യങ്ങളോ ചിത്രത്തിൽ ഇല്ല, ഹെറേഡിറ്ററി എന്ന ചിത്രത്തേക്കാളും എന്റർടൈൻമെന്റ് വാലിയു കൂടുതലും ആണ് ഈ ചിത്രത്തിന്. ആയതിനാൽ തന്നെ വലിയൊരു സ്‌ക്രീനിൽ, നല്ല അന്തരീക്ഷത്തിൽ കാണുന്നത് ഗുണം ചെയ്യും. എന്ത് കൊണ്ട് എന്ന ചോദ്യത്തെ കുറിച്ച് കൂടുതൽ ബോധവാൻ ആവേണ്ടതില്ല, പ്രത്യേകിച്ചും ഈ ചിത്രം കണക്കിലെടുക്കുമ്പോൾ, ഇതിനുള്ള കാരണങ്ങൾ ചിത്രം കണ്ടാലേ മനസിലാവുകയുള്ളൂ. കഴിഞ്ഞ വർഷം പുറത്തിറങ്ങിയതിൽ ഏറ്റവും മികച്ച ട്രൈലെറുകളിൽ ഒന്ന് ഈ ചിത്രത്തിന്റേത് ആയിരുന്നു, അന്ന് വെച്ച പ്രതീക്ഷ ഈ ചിത്രം സാധൂകരിച്ചു എന്നതിൽ ഒരുപാട് സന്തോഷം.

Verdict : Very Good

DC Rating : 80/100

523. A Face In The Crowd (1957)

Director : Elia Kazan

Genre : Drama

Rating : 8.2/10

Country : USA

Duration : 126 Minutes

🔸എ ഫേസ് ഇൻ ദി ക്രൗഡ് എന്ന ചിത്രം ക്ലൈമാക്സിനോട് അടുക്കുമ്പോൾ വളരെ പ്രസക്തമായ, ഒരു വേള പെർഫെക്റ്റ് എന്ന വിശേഷണം വരെ അർഹിക്കുന്ന ഒരു രംഗം ഉണ്ട്. നായക കഥാപാത്രം പതിനാലാം നിലയിൽ നിന്നും ഗ്രൗണ്ട് ഫ്ലോറിലേക്ക് ലിഫ്റ്റിൽ പോവുന്ന രംഗം, ഇവിടെ ഓരോ നില താഴേക്ക് പോവുമ്പോഴും ഇടയിൽ കാണിക്കുന്നത് പ്രസ്തുത കഥാപാത്രത്തിന്റെ വ്യക്തി ജീവിതത്തിൽ സംഭവിക്കുന്ന വീഴ്ചകളാണ്. ഒടുവിൽ ഗ്രൗണ്ട് ഫ്ലോറിൽ ചെന്ന് എലിവേറ്റർ നിൽക്കുമ്പോഴേക്കും ടിയാന്റെ ജീവിതം ഏറെക്കുറെ തകർന്ന് തരിപ്പണമായി മാറുന്നുമുണ്ട്. ഇതിലും സിമ്പിളായി കാര്യങ്ങൾ അവതരിപ്പിക്കാൻ മറ്റൊരു മാർഗം കാണിച്ച് തരാൻ കഴിയില്ല എന്ന് സാരം.

🔸സ്ലംഡോഗ് റ്റു മില്യനെയർ എന്നൊരു പടം ഇറങ്ങിയിട്ടുള്ളത് നമുക്കെല്ലാവർക്കും അറിയാം, ഏറെക്കുറെ ഈ ടൈറ്റിലിനെ സൂചിപ്പിക്കുന്ന രീതിയിൽ ഉള്ള വളർച്ചയാണ് നായക കഥാപാത്രം ആയ ലാറി റോഡ്സിന്റെത്. ചെറുകിട കുറ്റവാളികളെ കൊണ്ടിടുന്ന അർകാൻസാസ് ജയിലിൽ വെച്ച് മദ്യപിച്ച് ബോധം ഇല്ലാതെ പുലമ്പുന്ന അവസ്ഥയിലാണ് ലാറിയെ പ്രേക്ഷകൻ ആദ്യം കണ്ട് മുട്ടുന്നത്. തനിക്ക് ചുറ്റും അരങ്ങേറുന്ന സംഭവങ്ങളിൽ യാതൊരു താല്പര്യവും കാണിക്കാതെ, വിധിയെ പഴിച്ചും സ്വയം പ്രാകിയും, ഇങ്ങനെ ഭൂമിക്ക് ഭാരമായി പോവുന്ന ഒരു കഥാപാത്രം എന്ന ചിന്തയാണ് ടിയാനെ പറ്റി ആരുടെ മനസിലും ആദ്യം ഉണ്ടാവുക.

🔸ഇങ്ങനെ ഒക്കെ കഴിഞ്ഞ് പോവേണ്ട ആ ജീവിതത്തിന്റെ ഗതി മാറുന്നത് മാർസിയ ജെഫ്‌റീസിന്റെ വരവോട് കൂടിയാണ്. മറ്റാരും കാണാത്ത ചില കഴിവുകളും സാധ്യതകളും ലാറിയിൽ ജെഫേഴ്‌സ് കാണുകയാണ്. ഈ കഴിവുകളിൽ എടുത്ത് പറയേണ്ടത് സാഹചര്യത്തിന്റെ സമ്മർദ്ദം പോലും കണക്കിൽ എടുക്കാതെ ആളുകളെ കയ്യിൽ എടുക്കാനുള്ള ടിയാന്റെ ഹ്യുമർ സെൻസും, കൗണ്ടറുകളും എല്ലാം തന്നെ. ഈ കഴിവുകളിൽ ആകൃഷ്ട ആയ ജെഫേഴ്‌സ് ലാറിയെ തന്റെ റേഡിയോ ചാനലിലൂടെ പ്രേക്ഷകർക്ക് പരിചയപ്പെടുത്തി കൊടുക്കുകയാണ്, ഇവിടെ നിന്നും കഥ വഴി മാറി തുടങ്ങുകയാണ്.

🔸സ്വപ്ന തുല്യം എന്നൊക്കെ വിശേഷിപ്പിക്കാവുന്ന വളർച്ചയാണ് പിന്നീട് ലാറിയുടെ കാര്യത്തിൽ സംഭവിക്കുന്നത്. അയാളുടെ ചേഷ്ടകളും തമാശകളും സ്വാഗും എല്ലാം ജനങ്ങളെ കയ്യിൽ എടുക്കാൻ ഉള്ളതായിരുന്നു, രാജ്യത്താകമാനം അയാൾക്ക് ആരാധകർ ഉണ്ടാവുകയും, അവർക്കിടയിൽ ഒരു കൾട്ട് ഫോളോയിങ് ലഭിക്കുകയും ഉണ്ടായി. പോകെ പോകെ റേഡിയോ ചാനലിന്റെ തന്നെ അവിഭാജ്യ ഘടകം ആയി മാറുക ആയിരുന്നു ലാറി, ജെഫേഴ്‌സ് കൂടി അയാളുടെ ജീവിതത്തിലേക്ക് കടന്ന് വന്നപ്പോൾ അയാൾ ഏഴാം സ്വർഗത്തിൽ എത്തി ചേർന്നു എന്ന് വേണമെങ്കിൽ പറയാം. എന്നാൽ ഈ വളർച്ച ലാറിയുടെ സ്വഭാവത്തിലും വലിയ മാറ്റങ്ങൾ വരുത്തി എന്നതാണ് സത്യം.

🔸ഈ മാറ്റങ്ങൾ ലാറി എന്ന കഥാപാത്രത്തിന്റെ ഭാവിയെ എങ്ങിനെ ബാധിക്കും, ജെഫേഴ്‌സിനെ പോലെ അയാളുടെ ജീവിതത്തിന്റെ ഭാഗമായ പലരും ഈ മാറ്റത്തെ ഏത് രീതിയിൽ ഉൾക്കൊള്ളും തുടങ്ങി അനവധി ചോദ്യങ്ങളാണ് ചിത്രത്തിൽ അവശേഷിക്കുന്നത്. വളരെ മികച്ച ഒരു കഥാപാത്ര സംഗ്രഹമാണ് എ ഫേസ് ഇൻ ദി ക്രൗഡ് എന്ന ചിത്രം, ഏറെക്കുറെ ജെഫേഴ്‌സിന്റെ വീക്ഷണത്തിലൂടെ ആണ് ലാറി എന്ന കഥാപാത്രത്തെ നമ്മൾ കാണുന്നതെങ്കിലും ചിത്രത്തിന്റെ രണ്ട് മണിക്കൂർ ദൈർഖ്യത്തിൽ ഈ കഥാപാത്രത്തോട് ദേഷ്യം, ഇഷ്ടം, വെറുപ്പ്, സ്നേഹം, സഹതാപം തുടങ്ങി അനവധി വികാരങ്ങൾ സൃഷ്ടിക്കപ്പെടുന്നുണ്ട്. കൂടുതൽ പറഞ്ഞ് പോവുന്നില്ല, കാണാൻ ശ്രമിക്കുക, മികച്ചൊരു ചിത്രം തന്നെയാണ് എ ഫേസ് ഇൻ ദി ക്രൗഡ്.

Verdict : Must Watch

DC Rating : 90/100

522. Lady In A Cage (1964)

Director : Walter Grauman

Genre : Thriller

Rating : 6.8/10

Country : USA

Duration : 94 Minutes

🔸വാർദ്ധക്യത്തിലേക്ക് കടന്ന് കഴിഞ്ഞ, മകനെ മാറ്റി നിർത്തിയാൽ ഒറ്റപ്പെട്ട ജീവിതം നയിക്കുന്ന വ്യക്തിയാണ് മിസ് കൊർണേലിയ ഹില്യാർഡ്. കുറച്ച് നാളുകൾക്ക് മുന്നേ സംഭവിച്ച ഒരപകടം കാരണം പരസഹായം ഇല്ലാതെ തന്റെ കാര്യങ്ങൾ ചെയ്യുവാനോ, സ്വതന്ത്രമായി ചലിക്കാനോ പോലും പറ്റാതെ ഏറെക്കുറെ കെട്ടിയിടപ്പെട്ട അവസ്ഥയിലാണ് ഹില്യാർഡ്. തന്റെ വീടിന്റെ മുകൾ നിലയിൽ നിന്നും താഴെ നിലയിലേക്ക് വരാൻ തന്നെ പ്രൈവറ്റ് എലിവേറ്ററിന്റെ ആവശ്യമുണ്ട് ഹിലിയാർഡിന്. ഈ അവസ്ഥയുമായി പൊരുത്തപ്പെടാൻ ഒരല്പം ബുദ്ധിമുട്ട് ഉണ്ടെങ്കിലും തനിക്കാവുന്ന രീതിയിൽ കാര്യങ്ങൾ ചെയ്യാൻ അവർ ശ്രമിക്കുന്നുമുണ്ട്.

🔸ഇങ്ങനെ പൊയ്ക്കൊണ്ടിരുന്ന നാളുകളിൽ ഒന്നിലാണ് ചിത്രത്തിന് ആസ്പദമായ കഥ അരങ്ങേറുന്നത്, മിസ് ഹിൽയാർഡിന്റെ മകൻ മാൽക്കം ഒരു ദൂര യാത്രയ്ക്ക് ഒരുങ്ങുകയാണ്. ഇങ്ങനെയുള്ള യാത്രയ്ക്ക് ഇറങ്ങി തിരിക്കുന്നതിന് മുന്നേ മാൽക്കം എന്നും ചെയ്യാറുള്ളത് പോലെ അമ്മയ്ക്ക് ഒരു എഴുത്ത് എഴുതി വെക്കുകയാണ്, എന്നാൽ മുൻകാല രീതികളിൽ നിന്നും വ്യത്യസ്തമായി താൻ പോയി കഴിഞ്ഞ് മാത്രമേ ആ എഴുത്ത് അമ്മ വായിക്കാവു എന്ന് ടിയാൻ നിർബന്ധം പിടിക്കുന്നുണ്ട്. കാര്യം ഒന്നും പിടി കിട്ടിയില്ലെങ്കിലും അങ്ങനെ ആവട്ടെ എന്ന മട്ടിൽ ഹില്യാർഡ് മകനെ യാത്രയാക്കുന്നു, എന്നാൽ പോവുന്ന പോക്കിൽ ഒരു ചെറിയ അബദ്ധം കാണിച്ചാണ് മാൽക്കം പോവുന്നത്.

🔸അയാൾ പോലും അറിയാതെ സംഭവിച്ച ഒരു ചെറിയ പിഴവ് കാരണം വീടിന്റെ കറന്റ് കണക്ഷൻ താറുമാർ ആവുകയും, കഷ്ടകാലത്തിന് ആ സമയം എലിവേറ്ററിൽ ആയിരുന്ന ഹില്യാർഡ് അതിൽ കുടുങ്ങി പോവുകയും ചെയ്യുന്നു. ഈ സംഭവം ഒന്നും അറിയാതെ മാൽക്കം യാത്ര തുടങ്ങുകയാണ്. സഹായത്തിന് വിളിച്ചാൽ ഓടിയെത്താൻ അടുത്തൊന്നും ആരുമില്ല, സഹായി ആണെങ്കിൽ കഷ്ടകാലത്തിന് വന്നിട്ടുമില്ല. ചുരുക്കി പറഞ്ഞാൽ എല്ലാ രീതിയിലും ട്രാപ് ആയി എന്ന് തന്നെ പറയാം. സമയം കഴിഞ്ഞ് പോകവേ പ്രതീക്ഷ കുറഞ്ഞ് വരുന്നതും ഭയം ഇരച്ച് കയറുന്നതും മിസ് ഹില്യാർഡ് തിരിച്ച് അറിയുകയായിരുന്നു.

🔸കഷ്ടകാല സമയത്ത് കയ്യിൽ കിടക്കണ കയർ പോലും പാമ്പായി മാറും എന്ന മഹദ് വചനം ശെരി വെച്ച് കൊണ്ട് അവിടം ഒരു കവർച്ചയ്ക്ക് ഭാഗമായി മാറുകയാണ്. ഇനി അതും പോരെങ്കിൽ കക്കാൻ വന്നവന്മാർ നല്ല ഒന്നാം ക്‌ളാസ് ഫ്രോഡുകളും. പെരുമാറ്റവും രീതിയും മട്ടും ഭാവവും എല്ലാം കണ്ടാൽ തന്നെ ചെവി കല്ല് അടിച്ച് പൊട്ടിക്കാൻ തോന്നണ ടൈപ്പ് ആളുകൾ. കിട്ടിയ അവസരം മുതലെടുത്ത് കൊണ്ട് സർവവും കൈക്കലാക്കി കടന്ന് കളയാൻ ഇവർ തയാറാവുമ്പോൾ ഇതെല്ലാം കണ്ടിട്ടും ഒന്നും ചെയ്യാനാവാത്ത ദയനീയ അവസ്ഥയിലാണ് മിസ് ഹില്യാർഡ്. ഇവിടെ നിന്നും ചിത്രം ഗിയർ മാറ്റി മറ്റൊരു തലത്തിലേക്ക് സഞ്ചരിക്കുന്നു.

🔸ഒരു ഹോം ഇൻവേഷൻ തീം പ്രമേയമാക്കി കൊണ്ട് മുന്നോട്ട് പോവുന്ന സൈകോളോജിക്കൽ ത്രില്ലർ ചിത്രമാണ് ലേഡി ഇൻ എ കെയ്ജ്. ഹിൽയാർഡിന്റെ വീക്ഷണത്തിലൂടെ കാണുമ്പോൾ ഒരുവേള ഹൊറർ ആയി പോലും മാറുന്നുണ്ട് ഈ ചിത്രം. ഒന്നര മണിക്കൂറിന് അടുത്ത് ദൈർഖ്യമുള്ള ചിത്രം പ്രശസ്ത നിരൂപക സിംഹങ്ങൾ തഴഞ്ഞതാണ്, എന്തിരുന്നാലും ആദ്യാവസാനം ആകാംക്ഷയിൽ നിർത്തുന്ന, ടെൻഷൻ ബിൽഡ് ചെയ്യുന്ന നല്ലൊരു ചിത്രം തന്നെയാണ് ലേഡി ഇൻ എ കേജ്‌. ബ്ലാക്ക് ആൻഡ് വൈറ്റ് ഫോര്മാറ്റിലാണ് ഈ ചിത്രം, ഒരല്പം വയലൻസും അഡൾട് കണ്ടന്റും ഉണ്ട്, താല്പര്യം തോന്നുന്നവർ കാണാൻ ശ്രമിക്കുക.

Verdict : Watchable

DC Rating : 70/100

521. Love Death And Robots (2019)

Creator : Tim Miller

Genre : Anthology

Rating : 9/10

Seasons : 01

Episode : 18

Country : USA

Duration : 6 - 17 Minutes

🔸ആന്തോളജി മോഡിൽ ഒരു അടാർ ഐറ്റം അണിയറയിൽ ഒരുങ്ങുന്നുണ്ട് എന്ന് കേട്ടിട്ട് കുറച്ച് നാളുകളായി, പഴയ ജറാൾഡ് പോട്ടെർട്ടണിന്റെ ഹെവി മെറ്റലിൽ നിന്നും പ്രചോദനം ഉൾക്കൊണ്ട് വരുന്ന സീരീസ് ആയതിനാലും ടിം മില്ലർ, ഡേവിഡ് ഫിഞ്ചർ പോലെയുള്ള പേരുകൾ പിന്നണിയിൽ കേട്ടതിനാലും അത്യാവശ്യം നല്ല പ്രതീക്ഷ തന്നെ ഉണ്ടായിരുന്നു ഈ സംരംഭത്തിൽ. അനിമേഷൻ മികവിനെ കുറിച്ചും ഹാർഡ് ഹിറ്റിങ് സ്റ്റൈലിൽ ഉള്ള കഥകളെ കുറിച്ചും കേട്ട റൂമറുകളും അഭിപ്രായങ്ങളും ഈ പ്രതീക്ഷകൾ ഏറ്റുകയെ ചെയ്തുള്ളൂ എന്നത് മറ്റൊരു സത്യം. വയലൻസ്, ടെക്കനോളജി, മരണം തുടങ്ങിയ വിഷയങ്ങളിലാണ് സീരീസ് ശ്രദ്ധ ചെലുത്തുന്നത്, ടോണിൽ ചില ഇടങ്ങളിൽ എങ്കിലും ബ്ലാക്ക് മിററിന്റെ ഒരു ചെറിയ സാമ്യം ഉണ്ട് ലവ് ഡെത് ആൻഡ് റോബോട്ട്സിന്.

🔸സീരീസുകൾ കാണാൻ മടിക്കുന്നവർ പൊതുവെ പറയുന്ന ഒരു കാര്യമാണ് ദൈർഖ്യം എന്ന വിഷയം, ലോസ്റ്റ് അല്ലെങ്കിൽ ഗെയിം ഓഫ് ത്രോൺസ് പോലെയുള്ള സീരീസുകൾ ആഴ്ചകൾ എടുക്കുന്നിടത്ത് ഈ സീരീസ് കണ്ടു തീർക്കാൻ മണിക്കൂറുകൾ മാത്രം മതിയാവും. ആറിനും പതിനഞ്ചിനും ഇടക്ക് ദൈർഖ്യം മാത്രമുള്ള പതിനെട്ട് എപ്പിസോഡുകളാണ് ഈ സീരീസിലുള്ളത്. ഇവയ്‌ക്കെല്ലാം ഉള്ള പ്രത്യേകതകൾ എന്താണെന്നാൽ തൊട്ടടുത്ത നിമിഷം എന്ത് സംഭവിക്കും എന്ന കാര്യത്തിൽ യാതൊരു സൂചനയും നൽകാനാവില്ല എന്നതാണ്, അത് തന്നെയാണ് സീരീസിന്റെ വൈൽഡ് കാർഡും.

🔸പരസ്പര ബന്ധിതം അല്ലാത്ത പതിനെട്ട് കഥകളാണ് സീരീസിൽ ഉള്ളത്, ഗോർ അല്ലെങ്കിൽ വയലൻസ് അത്യാവശ്യം നന്നായി ഉൾക്കൊള്ളുന്ന കഥകൾ ആയതിനാൽ തന്നെ ആ ഒരു മുൻകരുതൽ എടുക്കുന്നത് ഗുണം ചെയ്യും, അത്യാവശ്യം അഡൽറ്റ് കണ്ടന്റും ഉണ്ട്. ഇതിന് പുറമെ ഇവയിലെ ചില കഥകൾ എങ്കിലും ഹിറ്റ് ഓർ മിസ് ആയി പോവുന്നു എന്നത് നെഗറ്റിവ് ആയി ചൂണ്ടി കാണിക്കേണ്ടി വരും. പ്രത്യേകിച്ചും വ്യക്തിപരമായി യോഗര്ട്സ് ടേക്ക് ഓവർ, ഡംപ് എന്നീ എപ്പിസോഡുകൾ അതിന് മുൻപേ വന്ന എപ്പിസോഡുകളുമായി താരമത്യം ചെയ്യുമ്പോൾ ഏൽക്കാതെ പോയത് പോലെയാണ് അനുഭവപ്പെട്ടത്. ഈ അഭിപ്രായം കാഴ്ചക്കാരിൽ നിന്നും കാഴ്ചക്കാരിലേക്ക് മാറിയേക്കാം, സീരീസ് കാണാതിരിക്കാനുള്ള കാരണങ്ങളായി കരുത്താതിരിക്കുക.

🔸ഇനി നല്ല വശങ്ങളിലേക്ക് കടക്കുക ആണെങ്കിൽ സീരീസിന്റെ വിഷ്വൽ ഇഫക്ടസുകളെ എടുത്ത് പറയേണ്ടി ഇരിക്കുന്നു, ഒരു എപ്പിസോഡ് ഒഴിച്ച് നിർത്തിയാൽ ബാക്കിയെല്ലാം തന്നെ അനിമേഷൻ ഷോർട്ടുകളാണ് ഈ സീരീസിൽ ഉള്ളത്. ഇവയ്ക്ക് പിന്നിൽ പ്രവർത്തിച്ചവരെല്ലാം വെവ്വേറെ ടീമുകൾ ആണെന്നാണ് അറിവ്, ഈ കാരണം കൊണ്ട് തന്നെ സ്റ്റൈലിൽ നല്ല വ്യത്യാസം ഉണ്ടെങ്കിലും നിലവാരത്തിൽ അത് കാണാനേ ഇല്ല, എല്ലാം ഒന്നിനൊന്ന് മെച്ചം. ഇവയോടൊപ്പം മികച്ച കഥകളും, അവ പോവുന്ന അപ്രതീക്ഷിത വഴികളും, നല്ല കഥാപാത്രങ്ങളും എല്ലാം മറ്റ് പ്ലസ് പോയിന്റുകളായി നിൽക്കുന്നു. ഈ വ്യത്യസ്ത ആശയങ്ങളും അവ പൂർണമായി ഉൾക്കൊണ്ട് കൊണ്ട് സ്‌ക്രീനിൽ എത്തിക്കുന്നതിൽ വിജയിച്ച ടീമും തീർച്ചയായും പ്രശംസ അർഹിക്കുന്നുണ്ട്.

🔸ഈ വർഷം ഇതുവരെ കണ്ടതിൽ ഏറ്റവും ഇഷ്ട്ടപ്പെട്ട സീരീസ് ആണ് ലവ് ഡെത് ആൻഡ് റോബോട്സ്, അതിൽ തന്നെ വ്യക്തിപരമായി ഏറ്റവും ഞെട്ടിച്ച എപ്പിസോഡ് ആണ് ബീയോണ്ട് ദി അക്വില റിഫ്റ്റ്. ഇതിലേക്ക് കൂടുതൽ പോവുന്നത് സ്പോയ്ലർ ആവും എന്നതിനാൽ സജസ്റ്റ് ചെയ്ത് കൊണ്ട് നിർത്തുന്നു. ഈ എപ്പിസോഡിന് പുറമെ സോണീസ് എഡ്ജ്, ഹെല്പിങ് ഹാൻഡ്, ദി വിറ്റ്നസ്, ആൾട്ടർനേറ്റ് ഹിസ്റ്ററീസ്, സീക്രെട് വാർസ് എന്നിവയും കാണേണ്ട നല്ല എപ്പിസോഡുകളും ശ്രമങ്ങളും ആണ്. എല്ലാം കൂടി നാല് മണിക്കൂറിൽ താഴെ ദൈർഖ്യം മാത്രമേ ഉള്ളൂ ലവ് ഡെത് ആൻഡ് റോഡോട്സിന്. അനിമേഷൻ, ടീവി സീരീസ് എന്നീ ന്യായങ്ങൾ പറഞ്ഞ് ഒഴിവാക്കാതിരിക്കുക, നല്ലൊരു അനുഭവം ഉറപ്പ് നൽകുന്നു.

Verdict : Very Good

DC Rating : 88/100

520. How To Train Your Dragon 3 - The Hidden World (2019)

Director : Dean Deblois

Genre : Animation

Rating : 7.9/10

Country : USA

Duration : 130 Minutes

🔸ഒടുവിൽ അങ്ങനെ ലോകത്താകമാനം ആരാധകരുള്ള ഹൌ ടു ട്രെയിൻ യുവർ ഡ്രാഗൺ സീരീസിലെ അവസാനത്തേത് എന്ന് സ്റ്റുഡിയോ പറയുന്ന ചിത്രം കാഴ്ചക്കാരന്റെ മുന്നിൽ എത്തിയിരിക്കുകയാണ്. പൊതുവെ മികച്ച അഭിപ്രായം ആണ് റിലീസായ പല കോണുകളിൽ നിന്നും ചിത്രത്തിന് ലഭിച്ച് കൊണ്ടിരിക്കുന്നത്, ഒരു മാസത്തോളം വൈകിയാണ് ചിത്രം ഇന്ത്യയിൽ റിലീസ് ആവുന്നതും. ഹിക്കപ്പിന്റെയും ടൂത്ലെസിന്റെയും കഥയുടെ അവസാന ഭാഗം കാണുന്നതിന് വേണ്ടി കാത്തിരുന്ന അനേകം സിനിമാ ആസ്വാദകരിൽ ഒരാൾ ആയിരുന്നു ഈ പോസ്റ്റ്‌മാനും, ആയതിനാൽ തന്നെ പ്രതീക്ഷയെ കുറിച്ചും അമിതഭാരത്തെ കുറിച്ചുമൊന്നും കൂടുതൽ പറയുന്നില്ല.

🔸ചിത്രത്തെ കുറിച്ച് കൂടുതൽ എന്തെങ്കിലും പറയുന്നതിന് മുന്നേ രണ്ട് കാര്യങ്ങൾ പറയേണ്ടി ഇരിക്കുന്നു, ആദ്യമായി തുടർഭാഗങ്ങൾ തുടർച്ചയായി ഇറക്കി ആദ്യവും അവസാനവും തമ്മിൽ യാതൊരു ബന്ധവും സൂക്ഷിക്കാത്ത ചില സിനിമാ സീരീസുകൾക്ക് അപവാദം ആണ് ഈ ചിത്രം, വ്യക്തമായ മോട്ടീവും ദിശാബോധവും ചിത്രത്തിനുണ്ട്, പ്രത്യേകിച്ചും എല്ലാ കഥാപാത്രങ്ങളുടെയും കഥ എങ്ങിനെ പറഞ്ഞ് അവസാനിപ്പിക്കണം എന്ന കാര്യത്തിൽ. മുൻ ഭാഗങ്ങൾ നൽകിയ പുതുമയും ഫീലും ഒരു പക്ഷെ ഈ ചിത്രത്തിന് നൽകാൻ കഴിഞ്ഞേക്കില്ല എങ്കിലും മികച്ചൊരു ഫോളോ അപ്പ് തന്നെയാണ് ദി ഹിഡൻ വേർൾഡ്. കഥയിലും അവതരണത്തിലും പുലർത്തുന്ന ഡീസെൻസി ദൃശ്യ വിരുന്നിലും ചിത്രം നില നിർത്തി പോരുന്നുണ്ട്.

🔸സ്പോയ്ലർ ആവും എന്നതിനാൽ കഥയിലേക്ക് ആഴത്തിൽ കടക്കുന്നില്ലെങ്കിലും ഹിഡൻ വേർൾഡ് എന്ന പേരിൽ കേട്ട് കേൾവി മാത്രമുള്ള, തികച്ചും അപരിചിതമായ, നിലനിൽക്കുന്നുണ്ടോ എന്ന് പോലും ഉറപ്പില്ലാത്ത ഒരു നാട് കണ്ടെത്തുന്നതിനായി ടൈറ്റിൽ കഥാപാത്രങ്ങൾ നടത്തുന്ന ശ്രമങ്ങളും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ പ്രമേയം. ഇനി സ്പോയ്ലർ ഒഴിവാക്കി കൊണ്ട് തന്നെ ചിത്രത്തിന്റെ നല്ലതും മോശവുമായ കാര്യങ്ങളിലേക്ക് കടക്കാം, മോശമെന്ന് അനുഭവപ്പെട്ട വസ്തുതകൾ നോക്കുക ആണെങ്കിൽ ആദ്യമേ തന്നെ പ്രെഡിക്റ്റിബിൾ ആയ കഥാഗതി എടുത്ത് പറയേണ്ടി വരും, കഥയും കഥാപാത്രങ്ങളും തങ്ങളുടെ ഉദ്ദേശങ്ങളും ദൗത്യവും എല്ലാം തിരിച്ചറിയുന്ന നിമിഷം തന്നെ ഏറെക്കുറെ സിനിമയുടെ അവസാനം കാഴ്ചക്കാരന് വായിച്ചെടുക്കാൻ കഴിയും, വലിയ വ്യത്യാസം ഇല്ലാതെ ആ വഴി തന്നെ ചിത്രം പോവുന്നുമുണ്ട്.

🔸ഇനി നല്ല വശങ്ങളിലേക്ക് ശ്രദ്ധ കൊടുക്കുക ആണെങ്കിൽ പറയാൻ ഒരുപാട് കാര്യങ്ങൾ ഉണ്ട്, പ്രത്യേകിച്ചും ചിത്രത്തിന്റെ വിഷ്വൽ ഇഫക്ടുകളും ദൃശ്യഭംഗിയും കയ്യടി അർഹിക്കുന്നുണ്ട്. ഇതോടൊപ്പം ശബ്ദ രൂപേണ പ്രത്യക്ഷപ്പെട്ട നടീനടന്മാരുടെ പ്രകടനങ്ങളും എടുത്ത് പറയേണ്ടി ഇരിക്കുന്നു, ചിത്രം ആവശ്യപ്പെടുന്ന മൂടും സ്റ്റൈലും എല്ലാം ഉൾക്കൊണ്ട പ്രകടനമാണ് ഇവരുടെയെല്ലാം. മികച്ച സ്റ്റോറി ബില്ഡപ്പും നല്ല പശ്ചാത്തല സംഗീതവും എല്ലാം ഹിഡൻ വേൾഡിന്റെ മറ്റ് പ്ലസ് പോയിന്റുകളാണ്. എന്നാൽ ഇതിനെല്ലാം മേലെ നിൽക്കുന്നത് ചിത്രത്തിന്റെ ക്ലൈമാക്സ് തന്നെയാണ്, അത്യാവശ്യം ഇമോഷണൽ ആയിത്തന്നെ കഥാഗതിയോട് നീതി പുലർത്തി, കഥാപാത്രങ്ങൾ ഇത്രയും നാൾ വന്ന വഴികളെ സാധൂകരിച്ച് മികച്ച ഒരു ക്ലൈമാക്സ് തന്നെ ചിത്രം ഒരുക്കി വെച്ചിട്ടുണ്ട്, ഇത് തന്നെയാണ് ചിത്രത്തിന്റെ ഏറ്റവും വലിയ പ്ലസ് പോയിന്റും.

🔸ഒരു സ്റ്റാൻഡ് അലോൺ ചിത്രം എന്നതിനേക്കാൾ സീരീസിന്റെ ഭാഗമായി കണ്ട് കൊണ്ട് ചേർത്ത് വായിക്കുമ്പോൾ മികവേറുന്ന ചിത്രമാണ് ഹിഡൻ വേൾഡ്, കാരണം ഇവിടെ കഥാപാത്രങ്ങൾ കൈക്കൊള്ളുന്ന പല തീരുമാനങ്ങളും മുൻകാല സംഭവങ്ങളുടെ പ്രത്യാഘാതങ്ങളിൽ നിന്ന് ഉരുത്തിരിഞ്ഞ് വരുന്നതാണ്. സീരീസിന്റെ ആരാധകർ ആയവർക്ക് ധൈര്യമായി കാണാം, നിരാശപ്പെടുത്തില്ല ഈ ചിത്രം. മറ്റുള്ള പ്രേക്ഷകർ മുൻ ഭാഗ ചിത്രങ്ങൾ കൂടി കണ്ട ശേഷം കാണുന്നതാവും ആസ്വാദനത്തിന് ഗുണം ചെയ്യുക. അധികം പറഞ്ഞ് മുഷിപ്പിക്കുന്നില്ല, മറ്റൊരു മികച്ച അനിമേഷൻ ചിത്രം കൂടി സമ്മാനിച്ചിരിക്കുന്നു ഈ വർഷം, കഴിയുമെങ്കിൽ കാണുക, ആസ്വദിക്കുക.

Verdict : Very Good

DC Rating : 80/100

519. The Dekalog (1988)

Director : Krzysztof Kieślowski

Genre : Drama

Rating : 9/10

Seasons : 01

Episodes : 10

Country : Poland

Duration : 572 Minutes

🔸ഡെകാലോഗ് എന്ന സീരീസിനെ കുറിച്ച് കേട്ട് തുടങ്ങിയിട്ട് കാലം ഒരുപാടായി, ആദ്യമായി കേട്ടത് വളരെ പ്രശസ്തമായ ഒരു ഇന്സ്ടിട്യൂട്ടിന്റെ എക്കാലത്തെയും മികച്ച ചിത്രങ്ങളുടെ പട്ടികയിൽ ഏറ്റവും മികച്ച രണ്ടാമത്തെ ചിത്രമായി കണ്ടപ്പോഴാണ്. അപ്പോഴും സംശയങ്ങൾ ഒരുപാട് ബാക്കി ഉണ്ടായിരുന്നു, പ്രത്യേകിച്ചും പത്ത് ഭാഗങ്ങൾ ഉള്ള ഡെകാലോഗ് ഒരു സിനിമ ആണോ അതോ ടിവി സീരീസ് ആണോ എന്ന സംശയം, ഈ പത്ത് കഥകളും പരസ്പര ബന്ധിതം ആണോ എന്ന സംശയം, എല്ലാത്തിനും മേലെ ഇത്രയും പ്രതീക്ഷ വച്ച് പുലർത്തി കാണുക ആണെങ്കിൽ ചിത്രം അർഹിക്കുന്ന രീതിയിൽ ഇഷ്ടപ്പെടാൻ കഴിയുമോ എന്ന സംശയം. ഈ കാരണങ്ങൾ കൊണ്ട് തന്നെ ഒരുപാട് കാലം ആ ഭാഗത്തേക്ക് തിരിഞ്ഞ് നോക്കിയതേ ഇല്ല. ഒടുവിൽ പ്രത്യേകിച്ച് കാരണങ്ങൾ ഒന്നുമില്ലാതെ പെട്ടെന്നൊരുനാൾ കണ്ട് തീർത്തപ്പോഴാണ് മാറ്റി വെച്ചത് എന്തായിരുന്നെന്നും ഏത് ആയിരുന്നെന്നും ഒരേകദേശ രൂപം ലഭിച്ചത്.

🔸ബൈബിളിൽ പരാമർശിച്ചിട്ടുള്ള പത്ത് കല്പനകളെ അടിസ്ഥാനപ്പെടുത്തി പത്ത് മണിക്കൂറിന് അടുത്ത് ദൈർഖ്യമുള്ള പത്ത് ചിത്രങ്ങൾ ആണ് ഡെകാലോഗ്, ഒരുപക്ഷെ ഈ സീരീസിനെ ഏറ്റവും ലളിതമായി വിലയിരുത്താൻ കഴിയുക ഈ ഒരു വാചകത്തിലൂടെ ആവും. കാരണം വേറൊന്നുമല്ല ഇതിനപ്പുറം ചിത്രം കൈകാര്യം ചെയ്യുന്ന വിഷയവും കാര്യങ്ങളും എല്ലാം തന്നെ അത്യന്തം ഗൗരവം നിറഞ്ഞതും ഇന്നും പ്രസക്തവുമാണ്. മഹാഭാരതവും രാമായണവും ചൂണ്ടി കാട്ടി പൊതുവെ പറയാറുണ്ട്, ഇതിൽ പറഞ്ഞിട്ടില്ലാത്ത ഒരു കഥ നിങ്ങൾക്ക് ഇനി കാണാനാവില്ല എന്ന്, മനുഷ്യന്റെ വികാരങ്ങളുടെ കാര്യം എടുക്കുക ആണെങ്കിൽ ഡെകാലോഗിനെ കുറിച്ചും ഇത് തന്നെ പറയാം, ഒരു മനുഷ്യായുസ്സിൽ കടന്ന് പോവുന്ന വികാരങ്ങളെല്ലാം ഈ ചിത്രങ്ങളിലൂടെ അനുഭവിച്ചറിയാനാവും.

🔸ചിത്രത്തെ കുറിച്ച് കൂടുതൽ പറയുന്നതിന് മുന്നേ, സിനിമ യാഥാർഥ്യമാവാൻ വേണ്ടി കീസ്ലോവ്സ്കി നടത്തിയ ചില ശ്രമങ്ങളെ കുറിച്ച് പറയാം. പോളണ്ടിന്റെ തനിക്ക് പരിചിതമായ ചുറ്റുപാടുകളിൽ നിന്ന് കൊണ്ട്, തനിക്ക് പരിചിതരായ മനുഷ്യരുടെയും, അവരുടെ ജീവിതത്തിന്റെയും കഥ പറയുക എന്നത് കീസ്ലോവ്സ്കിയുടെ എക്കാലത്തെയും വലിയ സ്വപ്നം ആയിരുന്നു. നീണ്ട പത്ത് വർഷക്കാലം ഈ ശ്രമങ്ങൾക്ക് പിറകെ അയാൾ വച്ച് പിടിച്ചെങ്കിലും ഒന്നും സംഭവിച്ചില്ല എന്നതായിരുന്നു സത്യം. ഒടുവിൽ ഒരുനാൾ അപ്രതീക്ഷിതമായി അയാളുടെ മനസിലേക്ക് പത്ത് കല്പനകളും അവയുടെ സാധ്യതകളും കടന്ന് വരികയാണ്. ഈ സാധ്യതകളാണ് പത്ത് മണിക്കൂറിനടുത്ത് ദൈർഖ്യമുള്ള ഈ ചിത്രങ്ങളായി പിൽക്കാലത്ത് രൂപം പ്രാപിച്ചത്.

🔸സർക്കാരും പ്രതിപക്ഷവും പള്ളിയും പട്ടക്കാരും എല്ലാവരുമായി ഉടക്കിൽ ആയിരുന്ന കീസ്ലോവ്സ്കിയുടെ ശ്രമങ്ങൾ പാഴായി പോവാൻ സാധ്യത വളരെ അധികമായിരുന്നു, എങ്കിലും കഠിനാധ്വാനവും ലക്ഷ്യബോധവും കൈമുതലാക്കി തന്റെയും സുഹൃത്തിനെയും ചെറിയ സമ്പാദ്യം അരിച്ചരിച്ച് ചിലവാക്കി ആ സിനിമ അയാൾ പൂർത്തിയാക്കുക തന്നെ ചെയ്തു. അപ്പോഴും പ്രശ്നങ്ങൾ ഒഴിഞ്ഞ് പോയിരുന്നില്ല, പത്ത് മണിക്കൂർ ഒരു പ്രേക്ഷകൻ എങ്ങിനെ സഹിച്ചിരിക്കും എന്ന ചോദ്യം ഉയർന്നു, സിനിമ വെട്ടി ചുരുക്കി ഭാഗങ്ങൾ ആക്കി മാറ്റിയാലോ എന്നും, ദൈർഖ്യം കുറച്ചാലോ എന്നും ഉള്ള അഭിപ്രായങ്ങൾ ഉയർന്നു. ഈ ചിന്തയുടെ ആകെത്തുക എന്ന മട്ടിൽ തിയേറ്റർ റിലീസോ, ഡിവിഡി റിലീസോ ലഭിക്കാതെ ഒരുപാട് നാൾ വിസ്‌മൃതിയിലാണ്ടു കിടന്നു ഡെകാലോഗ് എന്ന സൃഷ്ടി.

🔸പിൽകാലത്ത് റിലീസ് ആയപ്പോൾ ചിത്രത്തിന് ലഭിച്ചത് മികച്ച പ്രതികരണങ്ങൾ ആയിരുന്നു, സംവിധായകന്റെ ധൈര്യത്തിനും പ്രശംസ അർഹിക്കുന്ന മികച്ച കൺസെപ്റ്റിനും ആ പ്രതികരണങ്ങൾ ആവശ്യം ആയിരുന്നു താനും. ലൊക്കേഷനുകളും ചില കഥാപാത്രങ്ങളും ഒഴിച്ച് നിർത്തിയാൽ വലിയ ബന്ധം ഒന്നും തന്നെ കഥകൾക്ക് ഒന്നും തമ്മിലില്ല, ഇവ ഓരോന്നും കൈകാര്യം ചെയ്യുന്ന വിഷയങ്ങളും അത് പോലെ തന്നെ തികച്ചും വ്യത്യസ്തം ആയവയുമാണ്. ചിത്രങ്ങളുടെ കഥയിലേക്കും പ്രമേയത്തിലേക്കും ഒന്നും തന്നെ കടന്ന് ചെല്ലുന്നില്ല, താല്പര്യം തോന്നുന്നു എങ്കിൽ കാണാൻ ശ്രമിക്കുക, മികച്ച ഒരുകൂട്ടം ചിത്രങ്ങളും വ്യത്യസ്തമായ പത്ത് മണിക്കൂർ സിനിമ ആസ്വാദനവും ഉറപ്പ് നൽകുന്നു.

Verdict : Must Watch

DC Rating : 95/100

518. Triple Frontier (2019)

Director : J C Chandor

Genre : Action

Rating : 6.6/10

Country : USA

Duration : 125 Minutes

🔸നെറ്ഫ്ലിക്സ് റിലീസുകൾ എന്നത് കുറച്ച് കാലം മുന്നേ വരെ അസംഭവ്യം എന്ന് വിശേഷിപ്പിക്കപ്പെട്ടിട്ടുള്ള പ്രക്രിയ ആയിരുന്നു, തിയേറ്റർ റിലീസ് ഇല്ലാതെ നേരിട്ട് സ്ട്രീമിങ് സൈറ്റുകളിലേക്ക് വരിക എന്നത് അത് വരെ നമ്മൾ കണ്ട് പോന്നിരുന്ന രീതിയിൽ നിന്നും തികച്ചും വ്യത്യസ്തമായ ഒരു സംഭവവും ആയിരുന്നു, പ്രത്യേകിച്ചും ഒരു ചിത്രത്തിന്റെ വിജയവും ലാഭവും എല്ലാം തിയേറ്റർ റണ്ണിനെയും, ലാഭത്തിനെയും അടിസ്ഥാനപ്പെടുത്തി വിലയിരുത്തപ്പെടുന്ന ഈ കാലഘട്ടത്തിൽ. എന്നാൽ ഇന്ന് സ്ഥിതിഗതികൾ മാറി മറിഞ്ഞിരിക്കുന്നു, നെറ്ഫ്ലിക്സ് പോലെയുള്ള പരിപാടികൾ ഉന്നം വെച്ച് കൊണ്ട് വലിയ ബഡ്ജറ്റിൽ ഉള്ള ചിത്രങ്ങൾ അണിയറയിൽ ഒരുങ്ങുന്നുണ്ട്, എന്തിന് അധികം ഓസ്‌കാറിന്റെ മാധുര്യം വരെ നെറ്ഫ്ലിക്സ് രുചിച്ച് കഴിഞ്ഞിരിക്കുന്നു. ഈ ഒരു വിഭാഗത്തിൽ ഒരുപിടി നല്ല ചിത്രങ്ങൾ ഒരുങ്ങുന്നുണ്ട്, അവയിൽ തന്നെ ഏറ്റവും കാത്തിരുന്ന ചിത്രങ്ങളിൽ ഒന്നായിരുന്നു ട്രിപ്പിൾ ഫ്രന്റയർ.

🔸കാസ്റ്റിങ് തന്നെയാണ് ട്രിപ്പിൾ ഫ്രന്റയർ എന്ന ചിത്രത്തിന്റെ ആദ്യ പ്ലസ് പോയിന്റ്. ബെൻ അഫ്‌ളെക്, ഓസ്കാർ ഐസക്, ചാർളി ഹണ്ണം, പെഡ്രോ പാസ്കൽ തുടങ്ങി അത്യാവശ്യം സ്വന്തം റോൾ മികച്ചതാക്കുന്ന, പേരെടുത്ത ഒരുകൂട്ടം അഭിനേതാക്കളാണ് ചിത്രത്തിൽ ഉള്ളത്, ഇവർക്കെല്ലാം തുല്യ പ്രാധാന്യം നൽകുന്നതിലും സംവിധായകൻ വിജയിച്ചിട്ടുണ്ട്. എ മോസ്റ്റ് വയലെന്റ് ഇയർ, ഓൾ ഈസ് ലോസ്റ്റ് പോലെയുള്ള ചിത്രങ്ങൾ സമ്മാനിച്ച സംവിധായകൻ ആയതിനാലും മുകളിൽ സൂചിപ്പിച്ച കാസ്റ്റിംഗ് കാരണവും, ഹേയ്സ്റ്റ് തീം ആയതിനാലും പ്രതീക്ഷയുടെ അമിതഭാരം തന്നെ ഉണ്ടായിരുന്നു ഈ ചിത്രത്തിന് മേൽ.

🔸അമേരിക്കൻ സേനയിൽ സേവനം അനുഷ്ഠിച്ചവരാണ് നമ്മുടെ കേന്ദ്ര കഥാപാത്രങ്ങൾ എല്ലാം, എന്നാൽ ജീവിതത്തിന്റെ നല്ല ഭാഗം മുഴുവൻ രാജ്യ സേവനത്തിന് വേണ്ടി മാറ്റിവെച്ച ഇവർക്ക് തിരികെ ലഭിച്ചത് അവഗണനയും പരിഹാസവും ഒഴിവാക്കലുകളും മാത്രമായിരുന്നു. ഇവരിൽ മിക്കവരുടെയും അവസ്ഥ, സാമ്പത്തികമായാലും കുടുംബപരമായാലും അത്ര നല്ലതല്ല താനും. ഈ കഥാപാത്രങ്ങൾക്ക് മുന്നിലേക്ക് പഴയ സുഹൃത്തായ കഥാപാത്രം ഒരു പുതിയ ഐഡിയയും ആയി പ്രത്യക്ഷപ്പെടുന്നതും തുടർന്ന് അരങ്ങേറുന്ന സംഭവങ്ങളുമാണ് ഈ ചിത്രം, ഓസ്കാർ ഐസക് ആണ് ഈ കഥാപാത്രത്തെ അവതരിപ്പിച്ചിരിക്കുന്നത്.

🔸മുകളിൽ സൂചിപ്പിച്ച ഐഡിയ അല്ലെങ്കിൽ ദൗത്യം എന്നത് ഒരല്പം പ്രശനം നിറഞ്ഞ സംഗതിയാണ്, വേറൊന്നുമല്ല ഈ കഥാപാത്രങ്ങൾ എല്ലാം വിശ്വസിച്ച് പോന്ന, പിന്തുടർന്ന് പോന്ന വിശ്വാസങ്ങൾക്കും രീതികൾക്കും എല്ലാം എതിരാണ് ഈ ദൗത്യം. സംരക്ഷണവും നീതി ബോധവും പറഞ്ഞ് പഠിച്ച ഈ കഥാപാത്രങ്ങളോടാണ് കവർച്ചയുടെയും, നിരപരാധികളുടെ ജീവൻ എടുക്കലിന്റെയും കാര്യങ്ങൾ പറഞ്ഞ് മനസിലാക്കേണ്ടത്. ഇനി ഇതൊന്നും പോരെങ്കിൽ ഇറങ്ങി തിരിക്കുന്ന ദൗത്യത്തിൽ നിന്നും ജീവനോടെ മടങ്ങി വരാൻ കഴിയുമോ എന്ന കാര്യത്തിലും യാതൊരു ഉറപ്പുമില്ല.

🔸ഇങ്ങനെയൊക്കെ ഒരുപാട് ചോദ്യങ്ങൾക്ക് നടുവിൽ നട്ടം തിരിഞ്ഞ് നീക്കുകയാണ് നമ്മുടെ കഥാപാത്രങ്ങൾ എല്ലാം, എന്നാലും ഒടുവിൽ ദൗത്യത്തിന് ഇറങ്ങി തിരിക്കാൻ തന്നെ ഇവരെല്ലാം തീരുമാനിക്കുകയാണ്. ഇവിടെ നിന്നും ചിത്രം ഗിയർ മാറ്റി മുന്നോട്ട് പോവുന്നു. ഒരു ഹെയ്‌സ്റ്റ് ചിത്രം ആണെങ്കിൽ കൂടിയും ആക്ഷെനോടൊപ്പം തന്നെ പ്രാധാന്യം കഥാപാത്രങ്ങൾക്കിടയിൽ ഉള്ള ബന്ധങ്ങൾക്കും ആ വൈകാരിക തലങ്ങൾക്കും ചിത്രം നൽകുന്നുണ്ട്. പ്രതീക്ഷ കൂടി പോയത് കൊണ്ട് മാത്രം ഒരല്പം അപൂർണം എന്ന തോന്നൽ ലഭിച്ചെങ്കിലും ഒരു തവണ ആസ്വദിച്ച് കാണാവുന്ന നല്ലൊരു ചിത്രമാണ് ട്രിപ്പിൾ ഫ്രന്റയർ, സമാന താല്പര്യങ്ങൾ ഉള്ളവർക്ക് സമീപിക്കാം, നിരാശപ്പെടുത്തില്ല ഈ ചിത്രം.

Verdict : Good

DC Rating : 74/100

517. Stan And Ollie (2018)

Director : Jon Baird

Genre : Biographical

Rating : 7.5/10

Country : UK

Duration : 98 Minutes

🔸സിനിമ എന്നത് ഒരു മാന്ത്രിക ലോകമാണ് എന്നത് നമ്മുടെ ചുറ്റും ഉള്ള അനവധി ഉദാഹരണങ്ങളിൽ നിന്നും മനസിലാക്കാൻ കഴിയുന്നതാണ്. ഈ മായിക ലോകത്തേക്ക് ഒന്നും ഇല്ലായ്മയിൽ നിന്നും പ്രതീക്ഷകളുടെ ഭാരം പേറി കഠിനാധ്വാനത്തിലൂടെ വിജയം കൈവരിച്ചവരുടെ കഥകൾ നമ്മൾ കേട്ടിട്ടുണ്ടാവും, എന്നാൽ തോറ്റ് പോയവരുടെ കഥകൾക്ക് നമ്മൾ ചെവി കൊടുക്കാറില്ല, മായിക ലോകത്തേക്ക് കഴിവും പ്രതിഭയും ഉണ്ടായിട്ടും പ്രവേശനം നിഷേധിക്കപ്പെട്ട, ശോഭിക്കാതെ പോയ എത്രയോ ആളുകളുണ്ട്, ഇവരിലേക്കുള്ള ഓർമപ്പെടുത്തലാണ് സ്റ്റാൻ ആൻഡ് ഒള്ളി എന്ന ചിത്രം.

🔸മുകളിൽ സൂചിപ്പിച്ച വസ്തുതയിൽ നിന്നും ചെറിയൊരു വ്യത്യാസം ഉണ്ട് ഈ ചിത്രത്തിന്, വ്യത്യാസം വേറൊന്നുമല്ല രണ്ട് കേന്ദ്ര കഥാപാത്രങ്ങളും തങ്ങളുടെ ആയ കാലത്ത് സിനിമയിൽ നിറഞ്ഞ് നിന്ന് ശോഭിച്ചവരാണ്. സെൻസേഷൻ എന്നൊക്കെ വിശേഷിപ്പിക്കാവുന്ന രീതിയിലുള്ള ആരാധക ജന പിന്തുണ സ്വന്തമായിരുന്ന ഇരുവരുടെയും കാര്യം ഇപ്പോൾ കുറച്ച് മോശമാണ് എന്ന് മാത്രം.

🔸ഒരല്പം പഴക്കമുണ്ട് ഈ കഥയ്ക്ക്, പഴക്കം എന്ന് പറഞ്ഞാൽ രണ്ടാം ലോകമഹായുദ്ധം വരെയുള്ള പഴക്കം. അന്ത കാലത്തെ വളരെ പ്രശസ്തരായ രണ്ട കൊമേഡിയന്മാരാണ് സ്റ്റാൻലിയും ഒലിവറും. ഇരുവരും ഒന്നിച്ചുള്ള കൊമെടി രംഗങ്ങൾക്കും, അവ ഉൾപ്പെടുന്ന ചിത്രങ്ങൾക്കും ആരാധകർ അനവധി ആയിരുന്നു എന്നതാണ് സത്യം, രണ്ടാൾക്കും ഇടയിലുള്ള കെമിസ്ട്രിയും ടൈമിങ്ങും എല്ലാം മറ്റ് കലാകാരന്മാർക്ക് അസൂയ തോന്നും വിധം മനോഹരവും, ഇവയൊക്കെയാണ് ഒരു പരിധി വരെ സ്റ്റാൻ ഒലി എന്ന ബ്രാൻഡിനെ മുന്നോട്ട് കൊണ്ട് പോയതും.

🔸സ്‌ക്രീനിന്റെ പുറത്ത് ജീവിതത്തിലും ഉറ്റ ചങ്ങാതിമാർ ആയിരുന്നു സ്റ്റാനും ഒലിവറും, ഇങ്ങനെ കത്തി നിൽക്കുന്ന കാലഘട്ടത്തിൽ ലൊക്കേഷനിൽ നിന്ന് ലൊക്കേഷനിലേക്കുള്ള യാത്രകൾക്കിടെ രണ്ട് കഥാപാത്രങ്ങൾക്കും ഇടയിൽ ചില സൗന്ദര്യ പിണക്കങ്ങൾ ഉടലെടുക്കുന്നതും, അതിന്റെ കാര്യ കാരണങ്ങളും പ്രത്യാഘാതങ്ങളും എല്ലാമാണ് ഈ ചിത്രം പറയുന്നത്. മുപ്പതുകളുടെ അവസാനം ആണ് ചിത്രം ആരംഭിക്കുന്നത് എങ്കിലും കഥ ഒന്ന് ചൂട് പിടിക്കുന്നത് ഇരുപത് വർഷങ്ങൾക്ക് ശേഷമാണ്.

🔸രണ്ട് പതിറ്റാണ്ടുകൾക്ക് ശേഷം ഈ കഥാപാത്രങ്ങളെ നമ്മൾ കണ്ട് മുട്ടുമ്പോൾ അവസ്ഥ കുറച്ച് മോശമാണ്, തങ്ങളുടെ സുവർണ കാലം കഴിഞ്ഞ് പോയി എന്ന വസ്തുതയോട് മാനസികമായി യോജിക്കാൻ കഴിയാതെ ബുദ്ധിമുട്ടുന്ന രണ്ട് കഥാപാത്രങ്ങളാണ് ഈ ഭാഗത്തുള്ളത്. ഇവിടെ നിന്നും തങ്ങളുടെ ആരാധകരുമായി അവസാനമായി ഒരുതവണ കൂടി ഇടപഴകുന്നതിന് രണ്ട് പേരും ചേർന്ന് നടത്തുന്ന ചില്ലറ ശ്രമങ്ങളും മറ്റുമാണ് പിന്നീടുള്ള ഒന്നര മണിക്കൂർ സമയം. രണ്ട് പ്രധാന കഥാപാത്രങ്ങളെയും അവരുടെ ഭാര്യമാരെയും അവതരിപ്പിച്ച നടീ നടൻമാർ എല്ലാം നന്നായിരുന്നെങ്കിലും ജോൺ റെയ്ലിയുടെ അഭിനയം പ്രത്യേകം പരാമർശിക്കേണ്ടി ഇരിക്കുന്നു. ഒരല്പം സ്ലോ ആയ ഡ്രാമ ചിത്രങ്ങളോട് താല്പര്യം ഉള്ളവരാണ് നിങ്ങൾ എങ്കിൽ ധൈര്യമായി കാണാം ഈ ചിത്രം.

Verdict : Very Good

DC Rating : 80/100

516. One Cut Of The Dead (2017)

Director : Shinichiro Ueda

Genre : Comedy

Rating : 7.9/10

Country : Japan

Duration : 97 Minutes

🔸ഒരു സിനിമ കാണാൻ ഘടകങ്ങൾ പലതുണ്ട്, കണ്ടവരുടെ അഭിപ്രായങ്ങൾ, അതിൽ തന്നെ സാധാരണക്കാരായ പ്രേക്ഷകന്റെയും നിരൂപക സിംഹങ്ങളുടെയും അഭിപ്രായങ്ങൾ, ചിത്രം കൈകാര്യം ചെയ്യുന്ന വിഷയം, അഭിനേതാക്കൾ എന്നിവയെല്ലാം മേല്പറഞ്ഞ ഘടകങ്ങളിൽ ചിലതാണ്. ഇവയോടൊപ്പം തന്നെ ചേർക്കാവുന്ന മറ്റൊന്നാണ് ഒരു സിനിമയുടെ പോസ്റ്റർ എന്നത്, ഒരു പക്ഷെ കാഴ്ചക്കാരനിൽ ആദ്യം സ്വാധീനം ഉണ്ടാക്കാൻ കഴിയുന്നതും ഈ പോസ്റ്ററിന് ആവാം. ഇതാണ് കാര്യം എങ്കിൽ വൺ കട്ട് ഓഫ് ദി ഡെഡ് എന്ന ചിത്രം കാണാതിരിക്കാൻ ഇത്രയും കാലം പ്രചോദനം ആയതും ഈ പോസ്റ്റർ തന്നെയാണ്.

🔸ഒരു ലോ ബഡ്‌ജറ്റ്‌ ബി ഗ്രേയ്‌ഡ്‌ ഹൊറർ ചിത്രം ആണെന്ന പ്രതീതി ആണ് പോസ്റ്റർ ആദ്യം തന്ന സൂചന, ഈ കാരണങ്ങൾ കൊണ്ട് തന്നെ കാണാതിരുന്നെങ്കിലും മുകളിൽ സൂചിപ്പിച്ച മികച്ച പ്രതികരണങ്ങൾ അവയെ മറി കടക്കുക ആയിരുന്നു. സോംബി ചിത്രങ്ങളോട് പൊതുവെ ഉള്ള താല്പര്യക്കുറവും ഈ ചിത്രം ആസ്വദിക്കുന്നതിന് ഒരു വിലങ് തടി ആവുമോ എന്ന സംശയവും നിലനിൽക്കുന്നുണ്ടായിരുന്നു. ഈ പ്രശ്നങ്ങൾ എല്ലാം പരിഗണിച്ച് കൊണ്ട് തന്നെ പറയാം, അടുത്തിടെ കണ്ടതിൽ ആസ്വദിച്ച് കണ്ട, ചിരിച്ച ചിത്രമാണ് വൺ കട്ട് ഓഫ് ദി ഡെഡ്, ഈ വാക്യത്തിൽ അതിശയോക്തി യാതൊന്നും ഇല്ല എന്ന് ഉറപ്പിച്ച് പറയാം.

🔸ഒരു സംവിധായകൻ തന്റെ സ്വപ്ന പദ്ധതിയുടെ ചിത്രീകരണ വേളയിൽ ആണ്. ടിയാന് ഇത് ഏറെക്കുറെ അവസാന പരിശ്രമം ആണ്, കാരണം വേറൊന്നുമല്ല കടം കയറി മുടിഞ്ഞ അവസ്ഥയിലാണ് പുള്ളി, ഭാവിയെ കുറിച്ചുള്ള പ്രതീക്ഷകൾ എല്ലാം ഈ ചിത്രത്തിലാണ്. ഈ കാരണം കൊണ്ട് തന്നെ വൈകാരികമായി വേറിട്ടൊരു അവസ്ഥയിലാണ് പുള്ളി ഇപ്പോൾ നിൽക്കുന്നത്, ഭ്രാന്ത് എന്ന് തന്നെ പറയാം. തന്റെ അഭിനേതാക്കളും, സഹപ്രവർത്തകരും ചിത്രീകരണ വേളയിൽ സൃഷ്ട്ടിക്കുന്ന ചെറിയ തെറ്റുകൾ പോലും അയാളെ പ്രകോപിതനാക്കുന്നുണ്ട്. സ്വാഭാവിക അഭിനയം അല്ല എന്നും പറഞ്ഞ് നായികയോട് പൊട്ടി തെറിക്കുന്ന ആദ്യ സീനിൽ തന്നെ ടിയാന്റെ മാനസികാവസ്ഥ നമുക്ക് വായിച്ചെടുക്കാം.

🔸ഈ മനോഭാവവും ആയി പൊരുത്തപ്പെടാൻ സഹപ്രവർത്തകർ നന്നായി ബുദ്ധിമുട്ടുന്നുണ്ട്, എന്നിരുന്നാലും ചിത്രം പൂർത്തീകരിക്കണം എന്ന ഉദ്ദേശത്തിലാണ് ഇവരെല്ലാം. ഇങ്ങനെ കടന്ന് പൊയ്ക്കൊണ്ടിരുന്ന ചിത്രീകരണ സ്ഥലത്തിന്റെ അന്തരീക്ഷവും സ്വഭാവവും എല്ലാം മാറ്റി കൊണ്ട് അവിടെ യഥാർത്ഥ സോംബികൾ പ്രത്യക്ഷപ്പെടുകയാണ്. അധികം താമസിയാതെ തന്നെ അഭിനയവും പ്രകടനങ്ങളും എല്ലാം ജീവൻ നിലനിർത്താനും രക്ഷപ്പെടാനും ഉള്ള ശ്രമങ്ങൾക്ക് വഴി മാറി കൊടുക്കുകയാണ്. പിന്നീട് അങ്ങോട്ടുള്ള ഒന്നര മണിക്കൂർ പ്രേക്ഷകനെ ആകാംക്ഷയുടെ മുൾമുനയിൽ നിരത്തുന്നുണ്ട് ഈ ചിത്രം.

🔸ചിത്രം കാണുന്നതിന് മുൻപ് ഒരു ചെറിയ ഉപദേശം കൂടി, നിങ്ങൾ പ്രതീക്ഷിക്കുന്ന വഴികളിലൂടെ ഈ ചിത്രം പോയെന്ന് വരില്ല അത് കൊണ്ട് മുൻധാരണകൾ ഇല്ലാതെ കാണാനിരിക്കുക. ഇന്ത്യൻ രൂപ ഇരുപത് ലക്ഷത്തിൽ താഴെ ചിലവിൽ നിർമിച്ച ചിത്രം ഇന്നേവരെ ആയിരം മടങ്ങോളം ലാഭം കരസ്ഥമാക്കിയിട്ടുണ്ട്, വിരലിൽ എണ്ണാവുന്ന തിയേറ്ററുകളിൽ നിന്നും ലോകത്താകമാനം ഉള്ള പ്രേക്ഷകരിലേക്കും വൈഡ് റിലീസുകളിലേക്കും എത്തിയിട്ടുണ്ട്. കൂടുതൽ പറയുന്നില്ല, കാണാൻ ശ്രമിക്കുക വേറിട്ടൊരു അനുഭവം ആവും ഈ ചിത്രം.

Verdict : Very Good

DC Rating : 82/100

515. You Are The Apple Of My Eye (2011)

Director : Giddens Ko

Genre : Romance

Rating : 7.6/10

Country : Taiwan

Duration : 110 Minutes

🔸ഈ ജീവിതത്തിൽ അല്പം പ്രായവും പ്രാരാബ്ധവും ഒക്കെ ആയ മിക്കവരും ഒരല്പം വിഷമത്തോടെയും അസൂയയോടെയും ഒക്കെ നോക്കി കാണുന്ന ഒരു കാലഘട്ടമാണ് ഹൈ സ്‌കൂൾ അല്ലെങ്കിൽ കോളേജ് പഠന കാലം, പിന്നീട് ഒരിക്കലും തിരികെ ലഭിക്കില്ല എന്നത് നൂറ് ശതമാനം ഉറപ്പ് ആണെങ്കിലും ഓർമകൾ എന്നത് അവിടേക്ക് മടങ്ങി ചെല്ലാനുള്ള പ്രേരണയാണ്. സ്വാതന്ത്ര്യം എന്നത് അറിഞ്ഞ് തുടങ്ങിയ കാലം, പുതിയ കൂട്ട് കെട്ടുകളും, മറക്കാൻ കഴിയാത്ത സംഭവ വികാസങ്ങളും എല്ലാം ഉണ്ടായ ഈ കാലഘട്ടത്തിൽ പൂർണമാവാതെ പോയ ഒരു പ്രണയം കൂടി ഉണ്ടെങ്കിൽ പിന്നെ പ്രത്യേകിച്ച് പറയണ്ട. കുത്തിനോവിക്കാനും ഓർമകൾക്ക് മധുരം പകരാനും മറ്റ് കാരണങ്ങൾ തപ്പി പോവേണ്ട എന്ന് ചുരുക്കം.

🔸ഇവിടെ പറയാൻ പോവുന്നത് യിഷെൻ എന്ന പെൺകുട്ടിയുടെ കഥയാണ്, ഒരു പെർഫെക്റ്റ് സ്റ്റുഡന്റ് എന്നൊക്കെയുള്ള വിശേഷണം കരസ്ഥമാക്കിയവളാണ് യിഷേൻ, പഠനത്തിൽ ആയാലും അതുമായി ബന്ധപ്പെട്ട മറ്റ് പദ്ധതികൾ ആയാലും, പരീക്ഷകൾ ആയാലും യിഷെൻ എന്നും ഒന്നാമതാണ്, ഈ കാരണങ്ങൾ കൊണ്ട് തന്നെ മറ്റ് വിദ്യാർത്ഥികൾക്ക് ഇടയിൽ ഹോണർ സ്റ്റുഡന്റ് എന്ന പട്ടവും അധ്യാപകർ യിഷേന്നിന് നൽകിയിട്ടുണ്ട്. ഈ കഴിവുകൾക്കെല്ലാം പുറമെ നല്ല സ്വഭാവത്തിന് ഉടമയും, കാണാൻ അത്യാവശ്യം ഭംഗിയുമുള്ള യിഷേന്നിന് പിറകെ കോളേജിലെ ആൺകുട്ടികൾ എല്ലാം ഇറങ്ങി തിരിച്ചിരിക്കുകയാണ്, എങ്ങനെ എങ്കിലും അവളുടെ മനസ്സിൽ കയറി പറ്റുക എന്നതാണ് എല്ലാവരുടെയും ലക്ഷ്യം.

🔸ഇനി യിഷെനിൻറെ പിറകെ കൂടിയിരിക്കുന്ന വാനരപ്പടയിൽ ചിലരെ പറ്റി പറയാം. ആദ്യത്തവൻ ഡോണർ, ഇങ്ങനെയൊരു ഇരട്ടപ്പേര് ഈ പുള്ളിക്ക് വീഴാൻ ഉണ്ടായ കാരണം വളരെ രസകരമായ ഒരു സീനിലൂടെ ചിത്രം തുടക്കത്തിലേ കാണിച്ച് തരുന്നുണ്ട്. ബോണർക്ക് പുറമെ പഠിപ്പിസ്റ്റും ഭക്ഷണ കലയിൽ അഗ്രഗണ്യനും ആയ മിങ്‌ഹോ, ബാസ്കറ്റ്ബാളിൽ കേമനും, റോക്ക്സ്റ്ററും ഒക്കെ ആയ സാവോ, സ്ത്രീ ലമ്പടനും, പെൺകോന്തനും സർവോപരി ഒന്നാന്തരം കോഴിയും ഒക്കെ ആയ ഗോറിൻ എന്നിവരും ഉണ്ട് ഷെഞ്ചിയായിയുടെ പിറകെ. ഇവരെല്ലാവരും അടുത്ത സുഹൃത്തുക്കളും ആണ്, ഇങ്ങനെ ഒക്കെയാണ് കാര്യം എങ്കിലും കഥയിലെ നായകൻ കോ ചിങ് ടെങ് എന്ന മറ്റൊരു പ്രതിഭാസമാണ്.

🔸ക്ലാസ്സിലെ ഏറ്റവും തല തെറിച്ചത് എന്നൊക്കെ വിശേഷിപ്പിക്കാവുന്ന ഐറ്റം ആണ് കോ ചിങ്, എന്തിന് വേണ്ടിയാണ് ഒരുങ്ങി കെട്ടി ദിവസവും കോളേജിലേക്ക് വരുന്നത് എന്ന കാര്യത്തിൽ ടിയാനോ പഠിപ്പിക്കുന്ന അധ്യാപകർക്കോ ഇന്നേവരെ ഒരു ധാരണയിൽ എത്താൻ കഴിഞ്ഞിട്ടില്ല. ഇങ്ങനെ എല്ലാ രീതിയിലും ഒരു പരാജയമായി മാറിയ കോ ചിങ്ങിനെ നേർ വഴിക്ക് കൊണ്ട് വരാൻ ഒരു അവസാന ശ്രമം പ്രിൻസിപ്പാൾ നടത്തുകയാണ്, ആ ശ്രമം ഷെഞ്ചിയായിയെ കൂടി ഉൾപ്പെടുത്തിയിട്ടുള്ള ഒന്നായിരുന്നു എന്നിടത്ത് കഥ ചൂട് പിടിക്കുന്നു. തുടർന്ന് ഈ കഥാപാത്രങ്ങളുടെ എല്ലാം ജീവിതത്തെ ബാധിക്കുന്ന പരസ്പര ബന്ധിതമായ ചില സംഭവങ്ങൾ അവിടെ അരങ്ങേറുകയാണ്.

🔸ലളിതമായ ഒരു കഥ തന്നെയാണ് ഈ ചിത്രത്തിന്റേത്, അത്ഭുതം ജനിപ്പിക്കുന്ന തോതിലുള്ള ട്വിസ്റ്റുകളും പ്ലോട്ട് ഡെവെലപ്മെന്റും ഒന്നും പ്രതീക്ഷിക്കേണ്ടതില്ല എന്ന് ചുരുക്കം, എന്നാൽ അവതരണം കൊണ്ട് അത്ഭുതം സൃഷ്ടിക്കാനുള്ള ഒരു കഴിവ് കൂടി ഈ ചിത്രത്തിനുണ്ട്. നൊസ്റ്റാൾജിയ, ആദ്യ പ്രണയം തുടങ്ങിയ വിഷയങ്ങളെ എല്ലാം ആഴത്തിൽ സ്പർശിക്കുന്ന രീതിയിൽ ചിത്രം അവതരിപ്പിച്ചിട്ടുണ്ട്. വിവരിക്കാൻ കഴിയാത്ത രീതിയിൽ ഇഷ്ടം തോന്നിപ്പോകുന്ന കഥാപാത്രങ്ങളാണ് ഈ ചിത്രത്തിലേത്, ഉദ്ദേശം ഇവരുടെ ജീവിതത്തിലെ രണ്ട് പതിറ്റാണ്ടോളം കാലം ചിത്രം നമുക്ക് കാണിച്ച് തരുന്നുമുണ്ട്, എടുത്ത് പറയാനാണെങ്കിൽ ഈ കഥാപാത്രങ്ങളോടൊപ്പം ഒന്നര മണിക്കൂറോളം ചിലവിട്ട ശേഷം പിന്നീട് ഇവർക്ക് എന്ത് സംഭവിച്ചു എന്ന് കാണിക്കുന്ന ക്ലൈമാക്സ് സീക്വൻസ് വേറെ ലെവൽ ഫീൽ ആണ് നൽകിയത്. ഒരല്പം അഡൾട് കണ്ടന്റ് ഉണ്ട്, അത് ഒഴിച്ച് നിർത്തിയാൽ തീർച്ചയായും എല്ലാവർക്കും നിർദ്ദേശിക്കുന്നു ഈ ചിത്രം.

Verdict : Very Good

DC Rating : 85/100

514. Teacher's Diary (2014)

Director : Nithiwat Tharathorn

Genre : Romance

Rating : 7.9/10

Country : Thailand

Duration : 90 Minutes

🔸ഒരു സ്ത്രീയും പുരുഷനും കണ്ട് മുട്ടി പരിചയപ്പെട്ട്, സൗഹൃദത്തിലായി, ആ സൗഹൃദം പ്രണയത്തിലേക്കും മറ്റുമൊക്കെ കടക്കണമെങ്കിൽ കടമ്പകൾ അനേകമാണ്, പ്രത്യേകിച്ചും ഇന്നത്തെ ചുറ്റുപാടുകളും സാമൂഹിക അന്തരീക്ഷവും എല്ലാം കണക്കിൽ എടുക്കുമ്പോൾ അതിന്റെ പ്രയാസം വർധിക്കുന്നതെ ഉള്ളൂ. എന്നാൽ രണ്ട് പേർക്ക് ജീവിതത്തിൽ ഒരിക്കലും നേരിൽ കാണാതെ പ്രണയിക്കാൻ കഴിയുമോ എന്നതാണ് ടീച്ചേർസ് ഡയറി എന്ന തായ്‌ലൻഡ് ചിത്രം ചോദിക്കുന്നത്. അത് സാധ്യമാണ് എന്ന് തെളിയിക്കുക മാത്രമല്ല മനോഹരമായ രണ്ട് കഥാപാത്രങ്ങളിലൂടെ മികച്ച രീതിയിൽ ആ കഥ അവതരിപ്പിക്കുന്നുമുണ്ട് ഈ ചിത്രം.

🔸വിരലിൽ എണ്ണാവുന്ന കഥാപാത്രങ്ങൾ മാത്രമേ ചിത്രത്തിലുള്ളൂ, ഇവയിൽ തന്നെ പ്രധാന കഥാപാത്രങ്ങൾ എന്ന വിശേഷണം അർഹിക്കുന്നത് ആനിനും സോങിനുമാണ്. ഇവരിൽ ആനിനെ കുറിച്ച് ആദ്യം പറയാം, ഒരു അധ്യാപികയാണ് അവൾ. നഗരത്തിലെ അത്യാവശ്യം പ്രശസ്തമായ വിദ്യാലയത്തിൽ ടീച്ചർ ആയിരുന്ന ആൻ, തന്റെ സ്വകാര്യ ജീവിതത്തിലേക്കുള്ള ചിലരുടെ കടന്ന് കയറ്റത്തിനെതിരെ പ്രതികരിച്ചതിനാൽ ചില ബുദ്ധിമുട്ടുകളിലൂടെ കടന്ന് പോവുകയാണ്. ഈ പ്രയാസങ്ങളുടെ ഫലം എന്നോണമാണ് തായ്‌ലൻഡിലെ ഉൾനാടൻ ഗ്രാമങ്ങളിൽ ഒന്നിലേക്ക് അദ്ധ്യാപിക ആയി ആനിന് കടന്ന് വരേണ്ടി വന്നത്.

🔸ഗ്രാമം എന്ന വാക്ക് ഒരുപക്ഷെ അധികം ആയി പോയേക്കാം, കുഗ്രാമം എന്നൊക്കെ പറയേണ്ടി വരും ആ സ്ഥലത്തെ. പുറം ലോകവുമായി വലിയ ബന്ധം ഒന്നും പുലർത്താത്ത ഒരു കൂട്ടം മൽസ്യ തൊഴിലാളികൾ ആണ് അവിടത്തെ അന്തേവാസികൾ. ഇവരുടെ മക്കൾ പഠിക്കുന്ന സ്‌കൂൾ ആണ് പുഴയുടെ ഓരത്ത് സ്ഥിതി ചെയ്യുന്ന ആ പഴയ ഇടിഞ്ഞ് പൊളിഞ്ഞ് വീഴാറായ ചായ്പ്പ്, അതിനെയാണ് അവർ സ്‌കൂൾ എന്ന് വിളിച്ച് ശീലിച്ചിട്ടുള്ളത്. ആവശ്യത്തിന് വെള്ളമില്ല, വെളിച്ചമില്ല, വൈദ്യുതി ഇല്ല, മൊബൈലിന് റേഞ്ച് പോലുമില്ല, അങ്ങനെയുള്ള ഇവിടം തുടക്കത്തിൽ ആനിന് ഒരല്പം പ്രശനം സൃഷ്ടിച്ചെങ്കിലും പതിയെ കാര്യങ്ങൾ മാറുകയാണ്.

🔸വിദ്യാർത്ഥികളും ആയുള്ള ഇടപഴകലുകളും, പ്രകൃതിയുടെ താൻ ഇന്നുവരെ അനുഭവിച്ചിട്ടില്ലാത്ത വശ്യതയും, ചില തിരിച്ചറിവുകളും എല്ലാം ആനിനെ ഇതുവരെ കൊണ്ട് പോയിട്ടില്ലാത്ത വഴികളിലൂടെ കൊണ്ട് പോവുകയാണ്. ഈ സംഭവങ്ങൾ എല്ലാം അരങ്ങേറി ഒരു വർഷം കഴിഞ്ഞ ശേഷമാണ് സോങ് അവിടെ എത്തുന്നത്, അയാൾ അവിടെ എത്തുമ്പോൾ ആൻ അവിടെ ഇല്ലെങ്കിലും മറ്റുള്ളവരുടെ വാക്കുകളിലൂടെ ഒരേകദേശ ചിത്രം സോങ്ങിന് ലഭിക്കുന്നുണ്ട്. ഇപ്പോൾ താൻ അനുഭവിക്കുന്ന പ്രശ്നങ്ങളിലൂടെ ആൻ ഒരു വർഷം മുന്നേ കടന്ന് പോയതാണ് എന്ന തിരിച്ചറിവും, വിദ്യാർത്ഥികളുടെ ഓർമകളിലെ നിറമുള്ള ചിത്രങ്ങളും ആനിനെ പറ്റി കൂടുതൽ അന്വേഷിച്ചറിയാൻ സോങിനെ പ്രേരിപ്പിക്കുകയാണ്.

🔸സ്‌കൂളിലെ വാസത്തിനിടെ ആനിന്റെ ഡയറി സോങ്ങിന് ലഭിക്കുന്നിടത്ത് ചിത്രം വഴി മാറി ഒഴുകി തുടങ്ങുകയാണ്. തുടർന്നങ്ങോട്ട് ഈ കഥാപാത്രങ്ങൾക്ക് എന്ത് സംഭവിച്ചു എന്നതെല്ലാം ചിത്രം കണ്ട് തന്നെ മനസിലാക്കുന്നതാവും നല്ലത്. അടുത്ത കാലത്ത് ഒരു ചിത്രത്തിന്റെ ലൊക്കേഷൻ കണ്ട്, അവിടെ എന്നെങ്കിലും പോവാൻ കഴിഞ്ഞിരുന്നെങ്കിൽ എന്ന് ആത്മാർഥമായി ആഗ്രഹിച്ചിട്ടുണ്ടെങ്കിൽ അത് ഈ ചിത്രത്തിലെ പുഴയോര തായ് ഗ്രാമമാണ്. ഈ ദൃശ്യ ഭംഗിയും, നല്ല കഥയും കഥാപാത്രങ്ങളും എല്ലാം ചേരുമ്പോൾ മനോഹരമായ ഒരനുഭവം ആയി മാറുന്നുണ്ട് ഈ ചിത്രം. കൂടുതൽ പറഞ്ഞ് മുഷിപ്പിക്കുന്നില്ല, കഴിയുമെങ്കിൽ കാണാൻ ശ്രമിക്കുക, നല്ലൊരു അനുഭവം ആവും ഈ ചിത്രം.

Verdict : Very Good

DC Rating : 80/100

513. Captain Marvel (2018)

Director : Anna Boden / Ryan Fleck

Genre : Superhero

Rating : 6.4/10

Country : USA

Duration : 128 Minutes

🔸"Your Name Is Carol Denvers, You Are The Woman Who Is Not Afraid To Risk Your Own Life To Do The Right Thing, You Are Smart, You Are Funny And A Huge Pain In The Ass, And You Are The Most Powerful Person I Knew, That's Who You Are" ക്യാപ്റ്റൻ മാർവെൽ എന്ന മാർവെൽ സ്റുഡിയോസിന്റെ ഇരുപത്തി ഒന്നാമത് ചിത്രത്തിലെ നിർണ്ണായകമായ ഒരു ഘട്ടത്തിൽ കേന്ദ്ര കഥാപാത്രത്തോട് മറ്റൊരു വ്യക്തി പറയുന്ന സംഭാഷണം ആണ് ഇത്, ഏറെക്കുറെ ഈ വരികളോട് തന്നെ കരോൾ ഡെൻവേര്സ് എന്ന കഥാപാത്രത്തിന്റെ വ്യക്തിത്വവും, സിനിമയുടെ ആകെ മൊത്തമുള്ള അവസ്ഥയും മനസിലാക്കി എടുക്കാം. ഒരു മാർവെൽ ചിത്രം എന്ന് കേൾക്കുമ്പോൾ അതിനോട് പരിചിതരായ പ്രേക്ഷകർ മനസ്സിൽ കരുതുന്ന കോളങ്ങളിൽ എല്ലാം ടിക്ക് ഇട്ട് പോവുന്ന, അതിൽ അധികമായി യാതൊന്നും പറയാതെ പോവുന്ന ഒരു ബേസിക്ക് സൂപ്പർഹീറോ ഒറിജിൻ മൂവി ആണ് ക്യാപ്റ്റൻ മാർവെൽ.

🔸സ്പോയ്ലറിലേക്ക് അധികം കടക്കാതെ ചിത്രത്തിന്റെ കഥയെ പറ്റി ലളിതമായ ഒരു ഐഡിയ തരാം, ഗാലക്സിയിലെ സ്റ്റാർഫോഴ്‌സ്‌ അഥവാ പൊലീസിന് സമാനമായ പ്രാചീന യോദ്ധാക്കളാണ് ക്രീ എന്ന വിഭാഗത്തിൽ പെട്ടവർ, വർഷങ്ങളായി ഈ വിഭാഗക്കാർക്കും രൂപം മാറാൻ കഴിവുള്ളവരും ആയ സ്‌ക്രൾ എന്ന വിഭാഗക്കാർക്കും ഇടയിൽ കുടിപ്പക നിലനിൽക്കുന്നുണ്ട്. ഈ പോരിന് ഇടയിലേക്ക് കരോൾ ഡെൻവേര്സ് എന്ന അമാനുഷിക ശക്തി ഉള്ള കഥാപാത്രം എത്ത പെടുന്നതും, തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ കഥ. ഇതിനിടയിലേക്ക് ഭൂമിയും, ഷീൽഡ് എന്ന രഹസ്യാന്വേഷണ ഏജൻസിയും, സാമുവൽ ജാക്സണിന്റെ നിക്കോളാസ് ജോസെഫ് ഫ്യുരിയും എല്ലാം കടന്ന് വരുന്നുണ്ട്.

🔸ഇനി ചിത്രത്തിന്റെ നല്ലതും മോശവുമായ വശങ്ങളിലേക്ക് കടക്കുക ആണെങ്കിൽ ആദ്യമേ തന്നെ നടീ നടന്മാരുടെ പ്രകടനങ്ങളിലേക്ക് കടക്കാം, റിലീസിന് മുന്നേ വിമർശനങ്ങൾ അനവധി കേട്ടിരുന്നെങ്കിലും സ്‌ക്രീനിൽ വലിയ പ്രശ്നങ്ങൾ ഒന്നും തന്നെ കാണപ്പെട്ടില്ല. ടൈറ്റിൽ കഥാപാത്രം ആയെത്തിയ ബ്രൈ ലാർസൺ, സാമുവൽ ജാക്സൺ, ലഷണ ലിഞ്ച് തുടങ്ങിയവർ നന്നായപ്പോൾ സ്ക്രീൻ ടൈം കുറഞ്ഞ് പോയെങ്കിലും ബെൻ മെൻഡൽസൺ ഉള്ളത് നന്നായി വിനിയോഗിച്ചു, ജൂഡ് ലോയ്ക്ക് കാര്യമായി ഒന്നും ചെയ്യാനില്ലെന്ന് തോന്നിച്ചെങ്കിലും മോശമായിരുന്നില്ല. മുൻകാല കഥാപാത്രങ്ങളായ ഫിൽ കോൽസൺ, റൊണാൻ, കൊറാത് എന്നിവർ മിക്കപ്പോഴും കാമിയോകളിൽ ഒതുങ്ങി. തൊണ്ണൂറുകളിൽ അരങ്ങേറുന്ന കഥയ്ക്ക് ആ കാലഘട്ടം ആവശ്യപ്പെടുന്ന സെറ്റിങ് ചിത്രത്തിന് നൽകാൻ കഴിഞ്ഞിട്ടുണ്ട് എന്നത് സമ്മതിച്ച് കൊടുക്കേണ്ട കാര്യമാണ്, പ്രത്യേകിച്ചും മ്യുസിക്ക് വിഭാഗം കൂടി പരിഗണിക്കുമ്പോൾ.

🔸ട്രെയ്‌ലറുകളും ടീസറുകളും സിനിമയുടെ മുക്കാൽ ഭാഗവും നശിപ്പിച്ച് തരുന്ന ഈ കാലഘട്ടത്തിൽ ക്യാപ്റ്റൻ മാർവെൽ ഒരു ആക്ഷേപം ആണ്, സിനിമ ആരംഭിക്കുന്നതിന് മുന്നേ എങ്ങനെയാവും കഥ പോവുന്നത് എന്ന് ഒരേകദേശ ധാരണ ഉണ്ടായിരുന്നെങ്കിലും ചില സ്ഥലങ്ങളിൽ മാർവെൽ ഒരു പടി മുകളിൽ ചിന്തിച്ചു, അതിൽ സന്തോഷം. ഇങ്ങനെ ഒക്കെയാണ് കാര്യം എങ്കിലും എഫക്ടുകളുടെ കാര്യത്തിൽ പലപ്പോഴും ശരാശരിയിൽ ഒതുങ്ങുന്നുണ്ട് ചിത്രം. ഏറെക്കുറെ പൂർണമായും സ്പേസിൽ ചിലവഴിക്കുന്ന അവസാന മുപ്പത് മിനുട്ടിൽ എഫക്ടുകളിൽ വരുന്ന മാറ്റങ്ങളിൽ മേൽ പറഞ്ഞ കാര്യം പ്രസക്തമാകുന്നുണ്ട്. ഇതിനോടൊപ്പം തന്നെ പാളി പോയ ചില തമാശകളും, മറ്റ് മാർവെൽ ചിത്രങ്ങളിൽ സൃഷ്ട്ടിക്കുന്ന പ്ലോട്ട് ഹോളുകളും എടുത്ത് പറയേണ്ടതുമുണ്ട്, പ്രത്യേകിച്ചും ഈ ചിത്രം അവയ്‌ക്കെല്ലാം പ്രീക്വൽ ആയി മാറുമ്പോൾ.

🔸ഒരു മാർവെൽ ഒറിജിൻ സ്റ്റോറി എന്ന് കേൾക്കുമ്പോൾ നമ്മൾ പ്രതീക്ഷിക്കുന്ന വസ്തുതകളും കാര്യങ്ങളും എല്ലാം ഈ ചിത്രത്തിൽ ഉണ്ട്, എങ്കിലും ചിലപ്പോൾ എങ്കിലും ഇതിൽ ആവർത്തന വിരസത വന്ന് കേറുന്നുണ്ട് എന്ന് പറയേണ്ടി ഇരിക്കുന്നു. എന്റർടൈൻമെന്റ് ലേബലിൽ നോക്കുക ആണെങ്കിൽ ഒരു തവണ കാണാവുന്ന ചിത്രമാണ് ക്യാപ്റ്റൻ മാർവെൽ, അതിനോടൊപ്പം തന്നെ മാർവെൽ ഇനി സഞ്ചരിക്കാൻ ഉദ്ദേശിക്കുന്ന, വന്ന വഴികളിലേക്കുള്ള ചെറിയ എത്തിനോട്ടം കൂടി ആവുന്നുണ്ട് ചിത്രം. ഇത് രണ്ടും സ്പോയ്ലർ ആവും എന്നതിനാൽ തല്ക്കാലം പറയാൻ ഉദ്ദേശിക്കുന്നില്ല. രണ്ട് പോസ്റ്റ് ക്രെഡിറ്റ് സീനുകൾ കൂടിയുണ്ട് ചിത്രത്തിൽ, ഇവയിൽ ആദ്യത്തേത് എന്തായാലും കണ്ടിരിക്കേണ്ട ഒന്നാണെങ്കിൽ രണ്ടാമത്തേത് വലിയ കാര്യമില്ലാത്ത നിർദോഷകരമായ ഒന്നാണ്. ആകെമൊത്തം ഒരു തവണ കണ്ട് ഒഴിവാക്കാവുന്ന മാർവെൽ എന്റർടൈൻമെന്റ് ഗ്യാരന്റീഡ് ചിത്രം, അതാണ് ക്യാപ്റ്റൻ മാർവെൽ.

Verdict : Watchable

DC Rating : 65/100

512. Capernaum (2018)

Director : Nadine Labaki

Genre : Drama

Rating : 8.4/10

Country : Lebanon

Duration : 126 Minutes

🔸"നീ ചെയ്ത തെറ്റ് എന്താണെന്ന് നിനക്കറിവുണ്ടോ, എന്തിനാണ് ഈ കോടതിയിൽ നീ ഇപ്പോൾ നിൽക്കുന്നത് എന്ന് ബോധ്യം ഉണ്ടോ ?" ജഡ്ജി തന്റെ മുന്നിൽ നിൽക്കുന്ന പന്ത്രണ്ട് വയസ്സുകാരനോട് ഒരല്പം സംശയത്തോട് കൂടി ചോദിക്കുകയാണ്, എന്നാൽ ഈ സംശയത്തെ സാധൂകരിക്കുന്ന യാതൊരു വികാരവും ഇല്ലാതെ അവൻ പറയുന്നു എനിക്ക് അറിയാം എന്ന്. അതും പോരെങ്കിൽ അവൻ ജഡ്ജിയോട് പറയുകയാണ് എനിക്ക് ഒരു പരാതി ബോധിപ്പിക്കാനുണ്ട് എന്ന്, അതും സ്വന്തം മാതാപിതാക്കൾക്ക് എതിരെ, കാരണം തിരക്കിയ ജഡ്ജിയോട് ആ പന്ത്രണ്ട് വയസ്സുകാരൻ പറയുന്ന മറുപടി തനിക്ക് ജന്മം നൽകിയതിന് എന്നായിരുന്നു, കാപെർനോം എന്ന ലെബനീസ് ചിത്രം ഇവിടെ നിന്നും ആരംഭിക്കുകയായി.

🔸പത്ത് പതിനെട്ട് വയസ്സുള്ള ഒരു കുട്ടിയെ സംബന്ധിച്ചിടത്തോളം സ്വാഭാവികമായും ഏറ്റവും അടുപ്പവും ഇഷ്ടവും എല്ലാം ഉണ്ടാവുക സ്വന്തം അച്ഛനമ്മമാരോട് തന്നെ ആവും. അവിടെ നിന്നും സ്വന്തം അച്ഛനമ്മമാരെ കോടതി പടിക്കൽ വരെ കൊണ്ട് പോവുക എന്നത് ഒരല്പം കടന്ന കൈ തന്നെ ആണ്, കഠിനമായ ഈ തീരുമാനങ്ങൾക്ക് പിന്നിൽ അതിലും കഠിനമായ ചില കാരണങ്ങളും ഉണ്ടാവണം, ഈ കരണങ്ങളിലേക്കുള്ള വെളിച്ചം വീശലാണ് കേപ്പർനോം എന്ന ചിത്രം. ഉദ്ദേശം ആറ് മാസങ്ങൾക്ക് മുന്നെയാണ് നദീൻ ലാബാക്കിയുടെ പുതിയ ചിത്രത്തെ കുറിച്ച് ആദ്യമായി കേൾക്കാൻ ഇടയായത്, പിന്നീട് കാൻസ്, ഐഎഫ്എഫ്കെ പോലെയുള്ള വേദികളിൽ മികച്ച പ്രതികരണങ്ങൾ കൂടി കരസ്ഥമാക്കിയപ്പോൾ ഏറ്റവും കൂടുതൽ കാണാൻ കാത്തിരുന്ന ചിത്രം കൂടി ആയിരുന്നു കേപ്പർനോം.

🔸മുൻപ് എന്നോ ചെയ്ത കുറ്റത്തിന് ജയിൽ ശിക്ഷ അനുഭവിക്കുന്നിടത്താണ് കേന്ദ്ര കഥാപാത്രവും, പന്ത്രണ്ട് വയസ്സുകാരനും ആയ സെയ്‌നിനെ നമ്മൾ കണ്ട് മുട്ടുന്നത്, ചെയ്ത തെറ്റിൽ പശ്ചാത്തപിക്കുന്നില്ല എന്ന് മാത്രമല്ല ഒരു പരിധി വരെ സംപ്ത്രിപ്തി പ്രകടിപ്പിക്കുന്നുമുണ്ട് അവൻ. ഇവിടെ നിന്നും കാഴ്ചക്കാരനെ സംവിധായിക കൊണ്ട് പോവുന്നത് ലെബണനിലെ ചേരികളിലേക്ക് ആണ്. ദാരിദ്ര്യാവസ്ഥ കൊടി കുത്തി വാഴുകയാണ് ഇവിടെ, ഒരു നേരത്തെ ഭക്ഷണം എന്നത് പോലും പലർക്കും വെറും സ്വപ്നം മാത്രമാണ്. ഈ ഒരു ചുറ്റുപാടിലാണ് സെയ്‌നും സഹോദരങ്ങളും അച്ഛനും അമ്മയും അടങ്ങുന്ന കുടുംബം ജീവിച്ച് വരുന്നത്.

🔸ശക്തമായ ചില സാമൂഹിക രാഷ്ട്രീയ വിഷയങ്ങളും ചിത്രം കൈകാര്യം ചെയ്യുന്നുണ്ട്. ദാരിദ്ര്യവും അരക്ഷിതാവസ്ഥയും ബാല വിവാഹവും തുടങ്ങി വികസിതം അല്ലാത്ത രാജ്യങ്ങളിലെ ഭരണാധികാരികൾ പോലും തുറന്ന് സമ്മതിക്കാൻ മടിക്കുന്ന കാര്യങ്ങൾ യാതൊരു മടിയോ പ്രശ്നമോ ഇല്ലാതെ ചിത്രം ഉയർത്തി കാണിക്കുന്നുണ്ട്. സെയ്ൻ എന്ന കഥാപാത്രത്തിലൂടെ ആണ് കഥ പുരോഗമിക്കുന്നതെങ്കിലും ഏറെക്കുറെ ഈ പ്രശ്നങ്ങൾ എല്ലാം അനുഭവിക്കുന്ന ജന വിഭാഗത്തിന്റെ പ്രതിനിധി ആവുകയാണ് അവൻ. മുകളിൽ സൂചിപ്പിച്ച അവസ്ഥയിലേക്ക് അവനെ കൊണ്ടെത്തിക്കുന്നതും ഈ പ്രശ്നങ്ങൾ തന്നെയാണ്, അവയിലേക്ക് കൂടുതൽ കടക്കാൻ ആഗ്രഹിക്കുന്നില്ല വേറൊന്നും കൊണ്ടല്ല ഈ ചിത്രം കാണാൻ ആഗ്രഹിക്കുന്നു എങ്കിൽ ഏറ്റവും അവസാനം വേണ്ട കാര്യം ആവും കഥയെ കുറിച്ചുള്ള ഒരേകദേശ ധാരണ അഥവാ സ്പോയ്ലർ എന്നത്.

🔸മൂക്കാനോ പഴുക്കാനോ പെണ്ണ് എന്താ തക്കാളിയോ മറ്റോ ആണോ എന്ന് പ്രധാന കഥാപാത്രം പരാമർശിക്കുന്ന ഒരു രംഗം ചിത്രത്തിലുണ്ട്, ഒരുപക്ഷെ ഈ അടുത്ത കാലത്ത് കണ്ടതിൽ പെട്ടെന്ന് ചിന്തിപ്പിച്ച രംഗങ്ങളിൽ ഒന്ന്. ഇതിനോടൊപ്പം അവസാന രംഗത്തിലെ ചിരി കൂടി ആവുമ്പോൾ അടുത്ത കാലത്ത് കണ്ട ഏറ്റവും മികച്ച ചിത്രമായി കേപ്പർനോം മാറുന്നു, കാത്തിരിപ്പിന് നൂറ് ശതമാനം ഫലം തന്ന ചിത്രം എന്ന് തന്നെ പറയാം. ഈ ചിത്രം കാണാൻ നിർദ്ദേശിക്കുക അല്ല, നിർബന്ധം പിടിക്കുകയാണ്, മാറ്റി വെക്കാതിരിക്കുക സമയം കണ്ടെത്തി തന്നെ കാണുക വേറൊന്നുമല്ല നൂതനാനുഭവം എന്നൊക്കെ വിശേഷിപ്പിക്കാവുന്ന ഒന്ന് നൽകാൻ കഴിയുന്ന അപൂർവം ചിത്രങ്ങളിൽ ഒന്നാണ് കേപ്പർനോം, ഒടുക്കത്തെ മസ്റ്റ് വാച്ച് എന്നൊക്കെ വിശേഷിപ്പിക്കാം.

Verdict : Must Watch

DC Rating : 95/100

511. The Purity Of Vengeance (2018)

Director : Christoffer Boe

Genre : Thriller

Rating : 7.5/10

Country : Denmark

Duration : 112 Minutes

🔸കാൾ ആസാദ് സഖ്യത്തിന്റെ അവസാന ചിത്രമായ പ്യുരിറ്റി ഓഫ് വെഞ്ചിയെൻസിൽ എത്തി നിൽക്കുമ്പോൾ സത്യത്തിൽ ഒരു അനിശ്ചിതാവസ്ഥ ആണ്, വേറൊന്നുമല്ല ഇതിനപ്പുറം ഇനി ഒരു ഭാഗം കാണാൻ ഇല്ല. അഞ്ചാമത് ഒരു പാർട്ട് പിന്നണിയിൽ ഉള്ളവർ പുറത്തിറക്കുമോ എന്ന കാര്യം പോലും സംശയമാണ്, അങ്ങനെ ആണ് കാര്യങ്ങളുടെ പോക്ക് എങ്കിൽ ഈ ചിത്രത്തോട് കൂടി പരിപാടികൾ എല്ലാം അവസാനിക്കും എന്ന് കരുതേണ്ടി ഇരിക്കുന്നു. ഒട്ടും നല്ലൊരു കാര്യമല്ല അത്, കണ്ട് തുടങ്ങിയിട്ട് ദിവസങ്ങൾ മാത്രമേ ആയുള്ളൂ എങ്കിൽ പോലും ഈ ചിത്രങ്ങൾ സൃഷ്ടിച്ചെടുത്ത മൂഡും താല്പര്യവും വിവരണാതീതമാണ്. അങ്ങനെ ഒരല്പം നിരാശയോടും, ഒരുപാട് പ്രതീക്ഷകളോടും കൂടിയാണ് പ്യുരിറ്റി ഓഫ് വെഞ്ചിയൻസ് എന്ന ഡിപ്പാർട്മെന്റ് ക്യൂ സീരീസിലെ നാലാം ഭാഗം കാണാൻ തയാറെടുത്തത്.

🔸ഇത്തവണ ഇരുവരുടെയും മുന്നിൽ എത്തിയിരിക്കുന്നത് നൂറ്റാണ്ടിലെ ഏറ്റവും കുപ്രസിദ്ധമായ കൊലപാതകം എന്ന പ്രസിദ്ധി ആർജിച്ച ഒരു കൊലപാതക പരമ്പര തന്നെയാണ്. ഒരല്പം പഴക്കം കൂടുതലുണ്ട് ഈ കേസിന്, പതിറ്റാണ്ടുകളുടെ തന്നെ പഴക്കം. ഡെന്മാർക്കിലെ പഴയ കാല വീടുകളിൽ ഒന്ന് പുതുക്കി പണിയുന്നതിന് ഇടെയാണ് വർഷങ്ങളായി തുറന്നിട്ടില്ലാത്ത ഇടനാഴികളിൽ ഒന്ന് തുറക്കേണ്ടി വന്നത്, അവിടെ കാണപ്പെട്ട കാഴ്ച ഭീകരം ആയിരുന്നു. ജീവന്റെ അവസാന നാളം ശരീരത്തിൽ നിന്ന് പോവുന്നതിന് മുന്നേ അസഹ്യമായ വേദനയാൽ പിടഞ്ഞ് പോയ, വർഷങ്ങളുടെ പഴക്കം ബാധിച്ചിരുന്ന ഒരു കൂട്ടം അസ്ഥികൂടങ്ങൾ ആയിരുന്നു അവിടെ ഉണ്ടായിരുന്നത്.

🔸സ്വാഭാവികമായും ഈ കേസ് വന്നെത്തുന്നത് ഡിപ്പാർട്ടമെന്റ് ക്യൂവിലേക്ക് തന്നെയാണ്, തങ്ങളുടെ അവസാന കേസ് അന്വേഷിക്കാനായി കാളും ആസാദും ഒരു തവണ കൂടി മുന്നിട്ട് ഇറങ്ങുകയാണ്. അവസാനത്തെ കേസ് എന്ന് പറയാൻ ഒരു കാരണം ഉണ്ട്, വേറൊന്നുമല്ല ആസാദ് ഇനി ഒരാഴ്ചക്കാലം കൂടിയേ ഡിപ്പാർട്മെന്റ് ക്യൂവിൽ ഉണ്ടാവുകയുള്ളൂ, അയാൾ സേനയുടെ മറ്റൊരു വിഭാഗത്തിലേക്ക് മടങ്ങുകയാണ്. ഈ ഒരു യാഥാർഥ്യവുമായി എല്ലാവരും പൊരുത്തപ്പെട്ട് വരുന്നതേ ഉള്ളൂ, എന്തിരുന്നാലും ഈ അവസാന ഉദ്യമം വിജയകരമായി പൂർത്തിയാക്കാൻ ഇരുവരും വരികയാണ്, അവരുടെ മുന്നിലെ വഴികളും അവശേഷിക്കുന്ന ചോദ്യങ്ങളും അത്ര എളുപ്പം ആയിരുന്നില്ല എന്നത് മറ്റൊരു കാര്യം.

🔸ക്രൂരം, പൈശാചികം എന്നൊക്കെ വിശേഷിപ്പിച്ചാൽ കുറഞ്ഞ് പോവും കാരണം അത്രമേൽ ഭീകരമാണ് കൊലപാതകം അരങ്ങേറിയ സ്ഥലത്തെ കാഴ്ചകൾ. ജനനേന്ദ്രിയങ്ങളും, സ്ഥാനങ്ങളും വരെ മുറിച്ച് മാറ്റപ്പെട്ട നിലയിൽ ആണ് ശരീരങ്ങൾ കാണപ്പെട്ടത്, അവ അവർ ജീവനോടെ ഉള്ളപ്പോൾ മുറിച്ചതാവാൻ സാധ്യത ഉണ്ടെന്ന് റിപ്പോർട്ട് പറയുമ്പോൾ തന്നെ ഘാതകന് അവരോടുള്ള വിരോധത്തിന്റെ തീവ്രത മനസിലാവും. അപ്പോഴും ബാക്കി കിടക്കുന്ന ചോദ്യങ്ങൾ അനവധിയാണ്, ആര് ? എന്തിന് ? എപ്പോൾ ? എങ്ങിനെ ? എന്നൊക്കെയുള്ള ചോദ്യങ്ങൾ. ഇതിനൊക്കെയുള്ള ഉത്തരം കണ്ടെത്തുക അത്ര എളുപ്പമാവില്ല കാരണം ഘാതകൻ ഇന്ന് ജീവനോടെ ഉണ്ടോ എന്ന് പോലും ഉറപ്പില്ല, എവിടെ നിന്ന് തുടങ്ങണം എന്നത് ഒരെത്തും പിടിയും ഇല്ല താനും.

🔸വർഷങ്ങൾക്ക് മുൻപേ അരങ്ങേറിയ ഇത്രയും ഭയാനകം ആയ ഒരു സംഭവത്തിന് പിന്നിൽ അതിലും തീവ്രമായ ഒരു കാരണം ഉണ്ടാവും എന്നതിൽ യാതൊരു സംശയവും വേണ്ട, ആ കരണങ്ങളിലേക്കുള്ള വെളിച്ചം വീശലാണ് ഈ ചിത്രം. മുൻ ചിത്രങ്ങളെ പോലെ തന്നെ ഇവിടെയും തുലാസിൽ നിൽക്കുന്ന വസ്തുതകളുടെ ഗൗരവം ഒരല്പം കൂടുതലാണ്, നായക കഥാപാത്രങ്ങൾ അപരിചിതനായ എതിരാളിയോടൊപ്പം പരസ്പരവും മത്സരിക്കുകയാണ്. സീരീസിലെ മറ്റ് ചിത്രങ്ങളോട് കിട പിടിക്കുന്ന, നിലവാരത്തിൽ നീതി പുലർത്തുന്ന മറ്റൊരു മികച്ച ത്രില്ലർ ചിത്രമാണ് പ്യുരിറ്റി ഓഫ് വെഞ്ചിയെൻസ് അഥവാ ജേർണൽ 64, തീർച്ചയായും കാണാൻ ശ്രമിക്കുക.

Verdict : Very Good

DC Rating : 83/100

510. A Conspiracy Of Faith (2016)

Director : Hans Petter Moland

Genre : Thriller

Rating : 7/10

Country : Denmark

Duration : 112 Minutes

🔸ഡിപ്പാർട്മെന്റ് ക്യൂ സീരീസിലെ മൂന്നാം ഭാഗത്തെ കുറിച്ച് പറഞ്ഞ് തുടങ്ങുമ്പോൾ മുൻ ഭാഗങ്ങൾ കണ്ടിട്ടില്ലാത്തവർ തുടർന്ന് വായിക്കാതിരിക്കുന്നത് നന്നാവും, വേറൊന്നും കൊണ്ടല്ല രണ്ടാം ചിത്രത്തിന്റെ ക്ളൈമാക്സിനെ കുറിച്ച് ചെറുതായ രീതിയിൽ എങ്കിലും പരാമർശിക്കാതെ കടന്ന് പോവാൻ കഴിയില്ല. മുൻഭാഗങ്ങൾ കണ്ടിട്ടില്ലാത്തവർ അറിയാൻ വേണ്ടി ഒരുകാര്യം മാത്രം പറയാം, കോൺസ്പിരസി ഓഫ് ഫെയിത് എന്ന ഈ ചിത്രം ഒരു മികച്ച സിനിമ ആണ്, ഒരുപക്ഷെ സീരീസിലെ ഏറ്റവും മികച്ചത് എന്ന് തന്നെ പറയാം. അത് കൊണ്ട് തന്നെ കാണാൻ താല്പര്യപ്പെടുന്നു എങ്കിൽ മറിച്ചൊരു ചോദ്യം ഇല്ലാതെ ധൈര്യമായി കണ്ടോളു, ഈ സിനിമ ആദ്യാവസാനം നിങ്ങളെ അമ്പരപ്പിച്ചിരിക്കും.

🔸ഇനി മുൻ ഭാഗം കണ്ടിട്ടുള്ളവരോട്, ശുഭ പര്യവസായി ആയ ഒന്നായിരുന്നില്ല മുൻഭാഗം എന്നത് അറിയാമല്ലോ, കേസ് അന്വേഷണം നല്ല രീതിയിൽ തന്നെ അവസാനിച്ചെങ്കിലും വ്യക്തിപരമായി അന്വേഷകൻ ആയ കാളിന് നഷ്ടങ്ങൾ ആയിരുന്നു നേരിടേണ്ടി വന്നത്. തന്റെ നിലനില്പിനും വിശ്വാസങ്ങൾക്കും വരെ ചോദ്യങ്ങൾ നേരിടേണ്ടി വരുന്നത് അയാൾ ഞെട്ടലോടെ തിരിച്ചറിയുകയാണ്, ഒരു മനുഷ്യൻ എന്ന നിലയിൽ താൻ പരാജയപ്പെട്ട് പോയിരിക്കുന്നു എന്നതിനോട് യോജിക്കാൻ കാൾ പെടാപ്പാട് പെടുകയാണ്. ഇങ്ങനെ ഒട്ടും ആശ്വാസകരം അല്ലാത്ത ഒരാവസ്ഥയിലാണ് കോൺസ്പിരസി ഓഫ് ഫെയിത് എന്ന ചിത്രത്തിൽ നാം കാളിനെ കണ്ട് മുട്ടുന്നത്.

🔸എടുത്ത് ചാട്ടക്കാരനും മുൻകോപിയും എല്ലാം ആയിരുന്ന കാളിൽ നിന്നും ഇന്നത്തെ കാളിലേക്കുള്ള ദൂരം വളരെ അധികമാണ്. കേസ് അന്വേഷണത്തോടും രീതികളോടും അയാൾ മുഖം തിരിച്ച് കളഞ്ഞിരിക്കുന്നു, അവ ഒന്നും തന്നെ അയാളെ ബാധിക്കുന്ന വിഷയങ്ങൾ അല്ലാതായിരിക്കുകയാണ്. എല്ലാത്തിൽ നിന്നും മാറി സ്വസ്ഥമായ എങ്ങോട്ടേക്കെങ്കിലും പോയി മറയണം എന്ന ആഗ്രഹം അയാളിൽ നിറഞ്ഞിരിക്കുകയാണ്, ഔദ്യോഗിക ദിവസങ്ങളിൽ പോലും സിക് ലീവ് എഴുതി മാറി നടക്കുന്നത് അയാൾ ഒരു പതിവാക്കിയിരിക്കുകയാണ്. സന്തത സഹചാരി ആയ ആസാദിനെയും സേനയിലെ സഹപ്രവർത്തകരെയും എല്ലാം ഈ പ്രശനം സാരമായി ബാധിക്കുന്നുമുണ്ട്.

🔸ഇങ്ങനെ അത്യാവശ്യം പ്രശ്നങ്ങൾ ഒക്കെ ആയി പൊയ്ക്കൊണ്ടിരുന്ന ഡിപ്പാർട്മെന്റ് ക്യൂവിലേക്ക് ഒരുനാൾ പുതിയൊരു കേസ് എത്തുകയാണ്. കേസ് എന്ന് വിശേഷിപ്പിക്കാൻ കഴിയുമോ എന്ന കാര്യം പോലും സംശയമാണ്, കാരണം ഇവിടെ കുറ്റം എന്നൊന്ന് അരങ്ങേറിയിട്ടുണ്ടെങ്കിലും പരാതികൾ ഒന്നുമില്ല. നഷ്ടം ബാധിച്ചവർക്ക് പരാതികൾ ഇല്ലെങ്കിൽ എന്തിന് ബുദ്ധിമുട്ടണം എന്ന സ്വാഭാവിക ചിന്തയിൽ ആസാദ് തുടങ്ങി വെക്കുന്ന ചെറിയൊരു ശ്രമം താമസിയാതെ ഡിപ്പാർട്മെന്റ് ഇന്നേവരെ നേരിട്ടതിൽ ഏറ്റവും കഠിനമായ കേസുകളിൽ ഒന്നായി പരിണമിക്കുകയാണ്. ഇതിന് പിറകെ ഇറങ്ങി തിരിച്ചവർക്ക് നേരിടേണ്ടി വരുന്ന നഷ്ടങ്ങൾ പലപ്പോഴും സ്വന്തം ജീവനേക്കാൾ അധികം ആയിരുന്നു എന്നത് മതി തീവ്രതയുടെ അളവ് മനസ്സിലാവാൻ.

🔸മതഭ്രാന്ത്, അമിത വിശ്വാസം, അന്ധമായ ആചാരങ്ങൾ തുടങ്ങി ശക്തമായ ചില വിഷയങ്ങളാണ് എ കോൺസ്പിരസി ഓഫ് ഫെയിത് എന്ന ചിത്രം കൈകാര്യം ചെയ്യുന്നത്. കാൾ ആസാദ് സഖ്യത്തിന്റെ കുപ്രസിദ്ധമായ അന്വേഷക ജീവിതത്തിലെ ഏറ്റവും ഡാർക്ക് ആയ ചാപ്റ്റർ എന്ന് വേണമെങ്കിൽ ഈ ഭാഗത്തെ വിശേഷിപ്പിക്കാം, കാരണം ഇവിടെ ഡെമോക്ലസിന്റെ വാൾ പോലെ തൂങ്ങി കിടക്കുന്ന അപകടം അത്രയ്ക്കും കാഠിന്യം എറിയതാണ്. സ്‌ക്രീനിൽ എത്തിയവർ എല്ലാം തന്നെ തങ്ങളുടെ റോളുകൾ ഒരു തവണ കൂടി ഭംഗിയാക്കിയപ്പോൾ വില്ലൻ കഥാപാത്രം ആയെത്തിയ പുള്ളി പ്രത്യേക പരാമർശം അർഹിക്കുന്നു. നാലാം ഭാഗമായ പ്യുരിറ്റി ഓഫ് വെഞ്ചിയെന്സോട് കൂടി ചിത്രങ്ങൾ അവസാനിക്കും എന്നത് നിരാശ സമ്മാനിക്കുമ്പോൾ ഊഹിക്കാം ഈ ചിത്രങ്ങൾ എത്രത്തോളം മികച്ചതാണ് എന്ന്, തീർച്ചയായും കാണാൻ ശ്രമിക്കുക.

Verdict : Very Good

DC Rating : 85/100

509. The Absent One (2014)

Director : Mikkel Norgaard

Genre : Thriller

Rating : 7.1/10

Country : Denmark

Duration : 119 Minutes

🔸ഡിപ്പാർട്ടമെന്റ് ക്യൂ സീരീസിലെ ഈ രണ്ടാം ഭാഗ ചിത്രത്തിൽ വളരെ മികച്ച ഒരു രംഗമാണ് കാൾ അടിയേറ്റ് ആശുപത്രിയിൽ എത്തുന്ന രംഗം. ബോധമില്ലാതെ കിടക്കുന്ന കാളിന്റെ കിടയ്ക്കക്ക് അരികിലുള്ള ആസാദിനോട് സഹപ്രവർത്തക ചോദിക്കുന്ന ചോദ്യമാണ് നിങ്ങൾ ഇയാളെ എങ്ങനെയാണ് സഹിക്കുന്നത് എന്ന്, അതിന് മറുപടിയായി ഒരു നിമിഷം ചിന്താമഗ്നനായി നിന്ന് ആസാദ് പറയുന്നത് ഞാൻ അല്ലാതെ ഇയാൾക്ക് മറ്റാരും ഇല്ല എന്നതാണ്, അത് തനിക്ക് നന്നായി അറിയാം എന്നും. ഈ രണ്ട് കഥാപാത്രങ്ങൾക്കും ഇടയിലുള്ള അടുപ്പം, അത് അവർ പ്രകടിപ്പിച്ചാലും ഇല്ലെങ്കിലും ഏറെക്കുറെ പൂർണമായി കാണിക്കുന്നുണ്ട് ഈ രംഗം. ഈ കാരണങ്ങൾ കൊണ്ട് തന്നെ കാൾ - ആസാദ് സഖ്യത്തിന്റെ ഈ രണ്ടാം ഔട്ടിങ്ങിൽ ഏറ്റവും പ്രിയപ്പെട്ട രംഗവും ഇത് തന്നെ.

🔸ആദ്യ ഭാഗം ആയ കീപ്പർ ഓഫ് ലോസ്റ്റ് കോസസിൽ നിന്നും രണ്ടാം ഭാഗം ആയ അബ്സെന്റ് വണ്ണിൽ എത്തുമ്പോൾ മിസ്റ്ററിയുടെ അളവ് കുറച്ച് കുറവാണ്, അത് മാത്രമാണ് ഒരു പക്ഷെ ചിത്രത്തെ കുറിച്ച് താരമത്യേനെ കുറവായി പറയാനുള്ളൂ. പ്രതിസ്ഥാനത്ത് നിൽക്കുന്നവരെ കുറിച്ച് ഒരേകദേശ ധാരണ ചിത്രം തുടക്കം തൊട്ടേ നൽകുന്നുണ്ടെങ്കിലും സസ്പെൻസ് എന്നത് സംഭവങ്ങളുടെ ചുരുൾ അഴിയുന്ന രീതിയിലും ക്രമത്തിലും ആവശ്യത്തിന് ചിത്രത്തിൽ ബാക്കി കിടപ്പുണ്ട്. എന്നാൽ ഈ മിസ്റ്ററിയുടെ കുറവ് കഥാപാത്ര - കഥാ വികസനത്തിൽ ചിത്രം പരിഹരിക്കുന്നുണ്ട് എന്നതിലൂടെ സീരീസിലെ ശക്തമായ സാന്നിധ്യമായി മാറുന്നുണ്ട് ദി ആബ്സെന്റ വൺ.

🔸ആദ്യ ചിത്രത്തിലെ സംഭവങ്ങൾക്ക് ശേഷം കുറച്ച് കാലം കഴിഞ്ഞിരിക്കുന്നു, ഡിപ്പാർട്മെന്റ് ക്യൂവിന്റെ സ്ഥിതിയും ഇന്ന് അത്ര മോശമല്ല. ആദ്യത്തെ കേസിലൂടെ സേനയുടെ പേരും പെരുമയും വർധിപ്പിച്ചെങ്കിലും പിന്നീട് കാര്യമായ പുരോഗതി ഒന്നും കൈവരിച്ചില്ല എന്നൊരു കിംവദന്തി അങ്ങിങ്ങായി കേട്ട് തുടങ്ങിയിട്ടുണ്ട്. ഇതൊക്കെ ആണ് കാര്യം എങ്കിലും കാളും ആസാദും തങ്ങളുടെ ജോലികളൊക്കെ ആയി തിരക്കിലാണ്. അങ്ങനെ കഴിഞ്ഞ് പോയ ദിവസങ്ങളിൽ ഒന്നിൽ കാളിനെ അന്വേഷിച്ച് ഒരു വൃദ്ധൻ കടന്ന് വരികയാണ്, തന്റെ കേസ് അന്വേഷിക്കണം എന്ന അഭ്യർത്ഥനയുമായാണ് ടിയാന്റെ വരവ്. അയാൾ ആഗ്രഹിക്കുന്ന ഒരു മറുപടി അന്ന് നൽകാൻ കാളിന് കഴിഞ്ഞില്ലെങ്കിലും വിധി ഒന്ന് കൊണ്ട് ഈ കേസ് അയാളുടെ മുന്നിലേക്ക് തന്നെ എത്തുകയാണ്.

🔸ഒരല്പം പഴക്കമുണ്ട് ഈ കേസിന്, പഴക്കം എന്ന് പറഞ്ഞാൽ ഏകദേശം ഇരുപത് വർഷത്തെ പഴക്കം. രണ്ട് ഇരട്ട കുട്ടികളെ റേപ്പ് ചെയ്ത ശേഷം കൊലപ്പെടുത്തി എന്നതാണ് രേഖപ്പെടുത്തിയിരിക്കുന്ന കുറ്റം. എന്നാൽ പ്രധാന പ്രശനം ഇതല്ല, ഈ കുറ്റകൃത്യം ആ കാലത്ത് ലോക്കൽ പോലീസ് അന്വേഷിക്കുകയും, പ്രതി ചേർത്ത് ഒരു വ്യക്തിയെ അറസ്റ്റ് ചെയ്യുകയും ചെയ്തിട്ടുണ്ട്. സ്വമേധയാ കുറ്റം ഏറ്റ് പറഞ്ഞ ഈ വ്യക്തി ജയിൽ വാസവും അനുഭവിച്ച് തീർത്തിട്ടുണ്ട്. ഈ പറഞ്ഞ സംഭവങ്ങൾ എല്ലാം അരങ്ങേറിയിട്ട് വർഷങ്ങൾ ഒരുപാട് കഴിഞ്ഞിരിക്കുന്നു, ഉൾപ്പെട്ടിരിക്കുന്ന വ്യക്തികളെല്ലാം ഒരുപാട് മാറിപ്പോയിരിക്കുന്നു, തെളിവുകളെല്ലാം മാഞ്ഞ് പോയിട്ടുമുണ്ട്. എങ്കിലും ചില സംശയങ്ങളുടെ ചുവട് പിടിച്ച് കാളും ആസാദും ഈ കേസിന് പുറകെ വെച്ച് പിടിക്കുകയാണ്, ചില നിഗമനങ്ങളുടെ മാത്രം ബലത്തിൽ.

🔸മുൻ ഭാഗത്തേക്കാൾ വൈകാരികമായി ഒരുപടി മുകളിൽ നിൽക്കുന്ന ചിത്രമാണ് ദി അബ്സെന്റ് വൺ, അന്വേഷകർക്ക് ലഭിച്ച പ്രാധാന്യം തന്നെ ഏറെക്കുറെ ഈ ചിത്രത്തിലെ മറ്റ് കഥാപാത്രങ്ങൾക്കും ലഭിച്ചിട്ടുണ്ട്. മുകളിൽ സൂചിപ്പിച്ചത് പോലെ സസ്പെന്സിന്റെ അളവ് കുറവാണെങ്കിലും ശക്തമായ കഥയിലും അവതരണത്തിലും അത് മറികടക്കുന്നുണ്ട് ഈ ചിത്രം, എങ്കിലും മുൻ ചിത്രവുമായി ട്രീറ്റ്മെന്റിൽ വലിയ വ്യത്യാസമുണ്ട് ഈ ചിത്രത്തിന് എന്ന് പറയേണ്ടി ഇരിക്കുന്നു. മുൻ ചിത്രം നൽകിയ നിലവാരത്തിനോട് നീതി പുലർത്തുന്ന അതി ശക്തമായ ഒരു ചിത്രം തന്നെയാണ് ദി ആബ്സെന്റ വൺ, തീർച്ചയായും കാണാൻ ശ്രമിക്കുക.

Verdict : Very Good

DC Rating : 82/100

508. The Keeper Of Lost Causes (2013)

Director : Mikkel Norgaard

Genre : Thriller

Rating : 7.2/10

Country : Denmark

Duration : 96 Minutes

🔸ജേർണൽ 64 എന്ന ചിത്രത്തിന്റെ പ്രിന്റ് കഴിഞ്ഞ മാസം പുറത്തിറങ്ങിയപ്പോഴാണ് ഡിപ്പാർട്മെന്റ് ക്യൂ എന്ന ഡാനിഷ് സിനിമാ സീരീസിനെ പറ്റി സത്യത്തിൽ ഓർത്തത്. ആദ്യാവസാനം ത്രില്ലിംഗ് ആയ മികച്ച കുറ്റാന്വേഷണ സീരീസ് ആണ് എന്ന് അറിവ് ഉണ്ടായിരുന്നെങ്കിൽ കൂടിയും പല കാരണങ്ങൾ കൊണ്ടും കാണാതെ പോയവയാണ് ഈ ചിത്രങ്ങൾ. നാലെണ്ണവും കയ്യിൽ വന്ന് ചേർന്ന സ്ഥിതിക്ക് രണ്ടും കല്പിച്ച് ഒരു ഇരുത്തം തന്നെ ആയിരുന്നു, സിനിമ തുടങ്ങി എട്ടാം മിനുട്ടിൽ ലഭിച്ച ഞെട്ടൽ തൊട്ട് അവസാനം സ്വയം അറിയാതെ ചുണ്ടിൽ വിരിഞ്ഞ സംപ്ത്രിപ്തിയുടെ ചിരി വരെ ഈ ചിത്രം നൽകിയ അനുഭവം അത്ര പെട്ടെന്ന് മറക്കാൻ കഴിയാത്തതാണ്. ഒരു ബഡി കോപ്പ് ഡിറ്റക്റ്റീവ് ചിത്രത്തിൽ നിന്ന് നിങ്ങൾ പ്രതീക്ഷിക്കുന്നതും അതിനപ്പുറവും ഈ ചിത്രത്തിൽ നിന്ന് ലഭിക്കും, തീർച്ച.

🔸കാൾ എന്ന കുറ്റാന്വേഷകൻ ആണ് ചിത്രത്തിലെ കേന്ദ്ര കഥാപാത്രം, ചിത്രത്തിന്റെ ആരംഭത്തിൽ ഡിപ്പാർട്മെന്റിലെ ഹോമിസൈഡ് വിഭാഗത്തിൽ അന്വേഷകൻ ആൺ കാൾ, തന്റെ സ്വതസിദ്ധം ആയ എടുത്ത് ചാട്ടവും രോഷവും എല്ലാം കാരണം കാളിന് ഒരു കൈയബദ്ധം സംഭവിക്കുകയാണ്, ഈ അബദ്ധം കാരണം കാലിന്റെ വ്യക്തിജീവിതവും ഔദ്യോഗിക ജീവിതവും എല്ലാം പടു കുഴിയിലേക്ക് വീഴുന്നതിന് നമ്മൾ ദൃക്‌സാക്ഷികളാവേണ്ടി വരികയാണ് ചിത്രത്തിന്റെ തുടക്കത്തിൽ. ഈ കാരണങ്ങൾ കൊണ്ട് തന്നെ ഹോമിസൈഡ് വിഭാഗത്തിൽ നിന്നും സേനയുടെ പുതിയ കണ്ടുപിടിത്തം ആയ ഡിപ്പാർട്ടമെന്റ് ക്യൂവിലേക്ക് കാൾ തരം താഴ്ത്തപ്പെടുകയാണ്.

🔸ഡിപ്പാർട്ട്മെന്റ് ക്യൂ എന്നൊക്കെ ഓമന പേര് ഇട്ട് വിളിക്കുന്നെങ്കിലും തന്റെ കാര്യത്തിൽ ഇതൊരു തടവറ ആണെന്ന് കാളിന് വ്യക്തമായി അറിയാം, സേനയിലുള്ള ഉന്നതർക്കോ സഹപ്രവർത്തകർക്കോ താനുമായി സഹകരിച്ച് പ്രവർത്തിക്കുന്നതിന് താല്പര്യമില്ല എന്നയാൾക്ക് എന്നോ വ്യക്തമായതാണ്, ഈ കാരണങ്ങൾ കൊണ്ട് തന്നെ ഒരു ഒഴിവാക്കൽ പ്രക്രിയ ആണ് നടന്നിരിക്കുന്നത്. ഡിപ്പാർട്ടമെന്റ് ക്യൂവിന്റെ പ്രധാന ഉദ്ദേശം എന്നത് പ്രധാനമായും കഴിഞ്ഞ ഇരുപത് വര്ഷങ്ങള്ക്കിടെ തെളിയിക്കപ്പെട്ടിട്ടില്ലാത്ത കേസുകളുടെ അന്വേഷണവും തരം തിരിക്കലുകളും എല്ലാമാണ്. ഈ കേസുകളിൽ മിക്കതും കഴിഞ്ഞിട്ട് വർഷങ്ങൾ ഏറെ കടന്ന് പോയിരിക്കുന്നു, പലതിലും വാദിയും പ്രതിയും, സംശയിക്കപ്പെട്ടവരും, മൊഴി നൽകിയവരും എല്ലാം മണ്മറഞ്ഞ് പോയിരിക്കുന്നു. ചുരുക്കത്തിൽ കാളിന്റെ ഭാഷയിൽ ശിഷ്ട കാലം ചിലവഴിക്കാനായി സേനയുടെ നേതൃത്വത്തിൽ തനിക്കൊരു തടവറ എന്ന് തന്നെ പറയാം.

🔸ഇവിടെ വെച്ചാണ് കാൾ ആസാദിനെ പരിചയപ്പെടുന്നത്, കാളിന്റെ സ്വഭാവത്തിന് നേർവിപരീതമാണ് ആസാദ്. ദേഷ്യക്കാരനും ധിക്കാരിയും എല്ലാമായ കാളും സൗമ്യനും ഏത് കാര്യത്തിലും നല്ലത് കാണാൻ ശ്രമിക്കുന്നവനുമായ ആസാദും തങ്ങളുടെ ഈ പുതിയ ഉദ്യമത്തിൽ ഒന്നിച്ച് പ്രവർത്തിക്കാൻ നിർബന്ധിക്കപ്പെടുകയാണ്. പ്രത്യേകിച്ച് ഉദ്ദേശങ്ങളോ ലക്ഷ്യങ്ങളോ ഒന്നും ഇല്ലാതെ ആരംഭിച്ച ഈ ഉദ്യമം ഒഴുക്കിൽ പെട്ട തോണി പോലെ ആടി ഉലഞ്ഞ് ഏതൊക്കെയോ വഴി പോവും എന്ന് തോന്നിപ്പിച്ചെങ്കിലും രണ്ട് പേരുടെയും ശ്രദ്ധ പിടിച്ച് പറ്റിയ ഒരു കേസ് ശ്രദ്ധയിൽ പെടുന്നതോടെ കളി ആകെ മാറി മറിയുകയാണ്. ഈ കേസിന് ഒരല്പം പഴക്കം ഉണ്ട്, അതിൽ അധികം വിചിത്ര സ്വഭാവവും.

🔸ഒന്നര മണിക്കൂറിന് അടുത്ത് ദൈർഖ്യം മാത്രമേ ദി കീപ്പർ ഓഫ് ലോസ്റ്റ് കോസസ് എന്ന ചിത്രത്തിന് ഉള്ളൂ, എന്നാൽ ഈ സമയത്തെ വ്യക്തവും കൃത്യവുമായ രീതിയിൽ വിനിയോഗിച്ച് കൊണ്ട് ഓർമയിൽ തങ്ങി നിൽക്കുന്ന മികച്ചൊരു ചിത്രം തന്നെ സമ്മാനിച്ചിട്ടുണ്ട് ഈ സംവിധായകൻ. ചിത്രത്തിന്റെ രണ്ടാം പകുതി, പ്രത്യേകിച്ചും അവസാന മുപ്പത് മിനുട്ട് എടുത്ത് പറയേണ്ടി ഇരിക്കുന്നു, ഉദ്വേഗം വർധിപ്പിക്കുന്ന അവതരണവും, പിടിച്ചിരുത്തുന്ന രീതിയും എല്ലാം ഇവിടെ നന്നായി തന്നെ അവതരിപ്പിക്കപ്പെട്ടിട്ടുണ്ട്. അഭിനേതാക്കളുടെ പ്രകടനവും, മികച്ച ദൃശ്യങ്ങളും ചിത്രത്തിന്റെ മറ്റ് പ്രത്യേകതകളാണ്. കൂടുതൽ പറഞ്ഞ് മുഷിപ്പിക്കുന്നില്ല, കണ്ട മികച്ച ഇൻവെസ്റിഗേറ്റിവ് ചിത്രങ്ങളിൽ മുന്നിൽ തന്നെ ഉണ്ടാവും ഈ ചിത്രം, കാണാൻ വൈകിയതിലെ വിഷമം മാത്രം ബാക്കി.

Verdict : Very Good

DC Rating : 80/100

507. The Human Condition Part 1 - No Greater Love (1959)

Director : Masaki Kobayashi

Genre : Epic

Rating : 8.6/10

Country : Japan

Duration : 206 Minutes

🔸ചില സിനിമകളെ അവ കൈകാര്യം ചെയ്യുന്ന വിഷയം കൊണ്ടും അതിന്റെ വ്യാപ്തി കൊണ്ടും അത് പ്രേക്ഷകനിൽ സൃഷ്ട്ടിക്കുന്ന ആഘാതം കാരണവും എല്ലാം എപിക് എന്ന് വിശേഷിപ്പിക്കപ്പെടാറുണ്ട്. കുറച്ച് കൂടി വിശദമായി പറയുക ആണെങ്കിൽ കാലത്തെ അതിജീവിച്ച സിനിമ എന്നോ മറ്റൊരു കാഴ്ചക്കാരന് മുന്നിൽ അഭിമാനപൂർവം നിർത്താൻ കഴിയുന്ന ചിത്രം എന്നോ ഒക്കെ വിശേഷിപ്പിക്കാം ഈ ചിത്രത്തെ, ഇതിൽ എങ്ങിനെ വിശേഷിപ്പിച്ചാലും ഈ ചിത്രം കാണാതിരിക്കുന്നത് നഷ്ടമാണ് എന്ന കാര്യത്തിൽ രണ്ടാമതൊരു അഭിപ്രായമില്ല. ഹ്യുമൻ കണ്ടീഷൻ എന്ന സിനിമാ സീരീസ് മുകളിൽ സൂചിപ്പിച്ച വസ്തുതയ്ക്ക് വളരെ ഉത്തമം ആയ ഒരുദാഹരണമാണ്. കുറച്ച് നാളുകൾക്ക് മുന്നേ വരെ ഈ ഒരു സിനിമാ സീരീസിനെ പറ്റി യാതൊരു അറിവും ഉണ്ടായിരുന്നില്ല എന്നിടത്ത് നിന്നും ഞാൻ കണ്ട ഏറ്റവും മികച്ച സിനിമാ സീരീസുകളിൽ ഒന്നായി മാറുകയായിരുന്നു ഹ്യുമൻ കണ്ടീഷൻ.

🔸രണ്ടാം ലോക മഹായുദ്ധ കാലത്തെ ജപ്പാൻ ആണ് നമ്മുടെ കഥാ പശ്ചാത്തലം, പട്ടാളത്തിൽ ചേർന്നുള്ള രാജ്യ സേവനം എന്നത് ഇന്ന് യുവാക്കൾക്ക് ഏറെക്കുറെ നിർബന്ധമായ കാര്യമാണ്. താല്പര്യം ഉണ്ടെങ്കിലും ഇല്ലെങ്കിലും ആരോഗ്യപരമായ പ്രശ്നങ്ങൾ ഇല്ലാത്തവരാണ് അവരെങ്കിൽ തീർച്ചയായും പട്ടാള സേവനത്തിന് ഇറങ്ങിയിരിക്കണം എന്നതാണ് ഗവണ്മെന്റ് നയം. രക്ത രൂഷിതമായ യുദ്ധം ആണ് അതിർത്തിയിൽ അരങ്ങേറിക്കൊണ്ടിരിക്കുന്നത്, നാൾക്ക് നാൾ തോൽവി അറിഞ്ഞ് കൊണ്ടിരിക്കുന്ന ജപ്പാന് മുന്നിൽ ഇതല്ലാതെ മറ്റ് മാർഗങ്ങളും ഇല്ലായിരുന്നു. പട്ടാളത്തിൽ ചേരുക എന്നതിന് സ്വയം മരണം വരിക്കുന്ന മട്ടാണ് യുവാക്കൾക്ക്, കാരണം അതിർത്തിയിലേക്ക് പോയ മിക്കവരും പിന്നീട് ഒരിക്കലും മടങ്ങി വന്ന ചരിത്രമില്ല.

🔸ഈ ഒരു പശ്ചാത്തലത്തിലാണ് നമ്മൾ കഥാ നായകൻ ആയ കാജിയെ കണ്ട് മുട്ടുന്നത്. ഒരു ഉൾവലിഞ്ഞ പ്രകൃതക്കാരൻ ആണ് കാജി, യുദ്ധത്തിലോ രാഷ്ട്രീയത്തിലോ രാഷ്ട്ര സേവനത്തിലോ അയാൾക്ക് താല്പര്യമില്ല, ആകെ ഉള്ള താല്പര്യം എന്നത് തൊഴിലാളികൾക്കിടയിലേക്ക് ഇറങ്ങി ചെല്ലാനും അവരുടെ പ്രശ്നങ്ങൾ നേരിട്ടറിഞ്ഞ് സഹായിക്കാനും ഒക്കെയാണ്. ഈ ഒരു പ്രവർത്തന രീതി കൊണ്ടൊക്കെ തന്നെ അത്യാവശ്യം നല്ല പേരാണ് കാജിക്ക് സഹപ്രവർത്തകർക്കും സുഹൃത്തുക്കൾക്കും എല്ലാം ഇടയിൽ ഉള്ളത്. എങ്കിലും ഈ നയങ്ങൾ കാരണം കാജി ഒരു കമ്മ്യുണിസ്റ്റ് ആണോ എന്ന സംശയവും ഇവരിൽ ചിലർക്ക് ഇല്ലാതെയില്ല, കമ്മ്യുണിസം എന്നതിനോട് വളരെ മോശം സമീപനം ജപ്പാൻ പുലർത്തിയിരുന്ന കാലം കൂടി ആണെന്ന് ഓർക്കണം.

🔸കാജിയെ പറ്റി എന്ത് തന്നെ പറഞ്ഞ് തുടങ്ങിയാലും അത് ചെന്ന് അവസാനിക്കുക മിച്ചികൊയിലാണ്, അത് അങ്ങനെ തന്നെയാണ് വേണ്ടതും. രണ്ട് ശരീരവും ഒരു മനസും എന്നൊക്കെ വിശേഷിപ്പിക്കാൻ കഴിയുന്ന വ്യക്തിത്വങ്ങളാണ് ഇരുവരും. വർഷങ്ങളായി പ്രണയത്തിലാണ് ഇരുവരും, എന്തിരുന്നാലും മിച്ചിക്കോയെ വിവാഹം കഴിക്കുന്ന കാര്യത്തിൽ കാജിക്ക് ഇന്നും രണ്ട് മനസ്സാണ്. വിട്ട് പോവാൻ കഴിയില്ലെങ്കിലും ഏതെങ്കിലും രീതിയിൽ താൻ പട്ടാളത്തിൽ എത്തിപ്പെട്ടാൽ മിച്ചിക്കോ ഒറ്റപ്പെട്ട് പോവരുത് എന്ന് കാജിക്ക് നിർബന്ധമുണ്ട്. അത് കൊണ്ട് തന്നെ അവളെ ഒരു പരിധി വരെ തന്നിൽ നിന്നകറ്റാൻ കാജി ശ്രമിക്കുന്നുണ്ട്, അത് എത്രകണ്ട് വിജയിക്കും എന്നത് കണ്ട് അറിയേണ്ടി ഇരിക്കുന്നു.

🔸മൂന്ന് ഭാഗങ്ങളായി പുറത്തിറങ്ങിയ ഒൻപത് മണിക്കൂറിന് അടുത്ത് ദൈർഖ്യം ഉള്ള ഒന്നാണ് ഹ്യുമൻ കണ്ടീഷൻ എന്ന ട്രിലജി. ഈ മൂന്ന് ഭാഗങ്ങളിലും ആയി കാജി എന്ന വ്യക്തിയുടെ ജീവിതം ആണ് നമുക്ക് കാണാനാവുക, ഇതിൽ ആദ്യത്തെ ചാപ്റ്റർ മാത്രമാണ് നോ ഗ്രെയ്റ്റർ ലവ്. രാജ്യസേവനത്തിൽ നിന്നും ഒഴിവാക്കാനായി കാജി മറ്റൊരു ജോലി ഏറ്റെടുക്കുന്നതും അവിടേക്ക് കടന്ന് വരുന്നതും തുടർന്ന് അരങ്ങേറുന്ന സംഭവങ്ങളും ആണ് മൂന്നര മണിക്കൂറിനടുത്ത് ദൈർഖ്യം ഉള്ള ഈ ചിത്രം. കൂടുതൽ പറയുന്നില്ല ലോകത്ത് ഇന്നേവരെ പുറത്തിറങ്ങിയ സിനിമാ ട്രിലോഗിയിലെ ഏറ്റവും മികച്ചവയിൽ ഒന്ന് എന്ന് നിസ്സംശയം വിശേഷിപ്പിക്കാം ഈ ചിത്രത്തെ, താല്പര്യം തോന്നുന്നുവെങ്കിൽ കാണാൻ ശ്രമിക്കുക.

Verdict : Must Watch

DC Rating : 92/100

506. 24 Frames (2017)

Director : Abbas Kiarostami

Genre : Experimental

Rating : 7/10

Country : Iran

Duration : 114 Minutes

🔸നിശ്ചല ചിത്രങ്ങളും പെയിന്റിങ്ങുകളും മാത്രം കൊണ്ടൊരു സിനിമ, അതും രണ്ട് മണിക്കൂറിനടുത്ത് ദൈർഖ്യം ഉള്ള ഒരു ചിത്രം, സ്വാഭാവികമായും ആദ്യമായി ഇങ്ങനെയൊരു വാർത്ത കേട്ടപ്പോൾ ഇതെങ്ങനെ ശെരിയാവും എന്ന ചിന്ത ആയിരുന്നു മനസ്സിൽ എത്തിയത്. നമ്മൾ കണ്ട് ശീലിച്ച സിനിമാ രീതികൾ വെച്ച് ഒരു സിനിമ ആവുമ്പോൾ കഥ വേണം, കഥാപാത്രങ്ങൾ വേണം, ഇവർ തമ്മിലുള്ള ഇടപഴകലുകൾ തുടങ്ങിയ ഒട്ടനവധി കാര്യങ്ങൾ വേണം, അല്ലെങ്കിൽ അങ്ങനെയാണ് ധരിച്ച് വെച്ചിരുന്നത്. ഈ ധാരണ പോലും തെറ്റാണെന്ന് തെളിയിക്കുക ആണ് 24 ഫ്രെയിംസ് എന്ന ചിത്രത്തിലൂടെ ഇഷ്ട സംവിധായകനായ അബ്ബാസ് കിയാറോസ്റ്റമി, ചിത്രത്തിന്റെ ഔട്പുട്ട്‍ കണ്ടതിൽ നിന്നും ധാരണകൾ അസ്ഥാനത്ത് ആയതിൽ സന്തോഷം ഉണ്ടെന്നും പറയാൻ ആഗ്രഹിക്കുന്നു.

🔸കൗതുകം എന്ന് പറയട്ടെ, മുൻപ് ഇത് പോലൊരു ചിത്രം കണ്ട് സംശയം തോന്നിയിട്ടുണ്ടെങ്കിൽ അത് ഈ സംവിധായകന്റെ തന്നെ ഷിറിൻ എന്ന ചിത്രത്തെ കുറിച്ചായിരുന്നു. സിനിമ കാണുന്ന പ്രേക്ഷകന്റെ ഭാവങ്ങൾ മാത്രം ഒപ്പി എടുത്ത് കൊണ്ടൊരു സിനിമയോ എന്ന സംശയം ചിത്രം കണ്ടപ്പോൾ മാറിയ അനുഭവം തന്നെ ആയിരുന്നു 24 ഫ്രയിംസ് എന്ന ചിത്രം കാണാനുള്ള പ്രചോദനം. എന്തിരുന്നാലും പെയ്ന്റിങ്ങുകളോട് വലിയ താല്പര്യമോ അറിവോ ഇല്ലാത്ത ഒരു വ്യക്തിക്ക് ആസ്വദിക്കാൻ കഴിയുമോ എന്ന സംശയവും നിലനിന്നിരുന്നു, അത് എന്ത് തന്നെ ആയാലും പ്രശ്നമായി അനുഭവപ്പെട്ടില്ല എന്നിടത്ത് ഈ ചിത്രവും വിജയം കാണുന്നു.

🔸അബ്ബാസ് കിയാറോസ്റ്റമി എന്ന സംവിധായകനോട് ഒരിഷ്ടം എന്നും ഉണ്ടായിരുന്നു, ക്ളോസ് അപ് എന്ന ചിത്രം വർഷങ്ങൾക്ക് മുന്നേ കണ്ടപ്പോൾ തോന്നിയ ഇഷ്ടം പിന്നീട് കോക്കർ ട്രിലജി, വിൻഡ് വിൽ കാരി അസ്, ടേസ്റ്റ് ഓഫ് ചെറി എന്നീ ചിത്രങ്ങളിലൂടെ വർധിച്ചിട്ടേ ഉള്ളൂ. ഈ സംവിധായകൻ തന്റെ ജീവിതത്തിലെ നിർണായകമായ മൂന്ന് വർഷങ്ങൾ ചിലവഴിച്ച ചിത്രം ആയതിനാലും ആകസ്മിക മരണം കാരണം അവസാന ചിത്രം എന്ന പട്ടം ചാർത്തി കിട്ടിയ ചിത്രം ആയതിനാലും ഒരുപാട് പ്രതീക്ഷയോട് കൂടി തന്നെയാണ് 24 ഫ്രയിംസ് കാണാൻ ഇരുന്നതും കണ്ടവസാനിപ്പിച്ചതും.

🔸നാല് മിനുട്ട് പരിധിയിൽ ഇരുപത്തി നാല് ചിത്രങ്ങളുടെ, പെയിന്റിങ്ങും ഫോട്ടോയും ഉൾപ്പെടെ ഉള്ളവയുടെ ദൃശ്യാവിഷ്‌കരണം ആണ് ഈ അബ്ബാസ് കിയാറോസ്തമി ചിത്രം. നമ്മൾ എല്ലാവരും ചിത്രങ്ങൾ പകർത്തുന്നവരും അവയിലെ ദൃശ്യ ഭംഗി ആസ്വദിക്കുന്നവരും ആണ്, അത് സ്വന്തം രൂപം ആയാലും ചുറ്റുപാടുകളും പ്രകൃതിയും ആയാലും ആ ഒരു നിമിഷത്തെ പകർത്തി വെക്കുകയാണ്. എന്നാൽ ഈ ചിത്രം പകർത്തുന്നതിന് തൊട്ട് മുൻപും ശേഷവുമുള്ള ഒരല്പ സമയത്തിന് പ്രാധാന്യം നൽകുകയാണ് അബ്ബാസ് കിയാറോസ്തമി ഈ ചിത്രത്തിലൂടെ. കുറച്ച് കൂടി ലളിതമായി പറയുക ആണെങ്കിൽ ഒരു മനോഹര നിമിഷത്തേക്ക് നമ്മളെ കൊണ്ടെത്തിച്ചതും അതിന് ശേഷം അവിടെ സംഭവിച്ചതുമായ കാര്യങ്ങളിലേക്കുള്ള ഒരെത്തിനോട്ടം.

🔸പൂർണമായും ഒരു എക്സ്പിരിമെന്റൽ ചിത്രമാണ് 24 ഫ്രയിംസ്, മുകളിൽ സൂചിപ്പിച്ചത് പോലെ ഒരു സിനിമയിൽ നിന്നും നമ്മൾ കണ്ട് ശീലിച്ച്, പ്രതീക്ഷിക്കുന്ന പല കാര്യങ്ങളും ഇവിടെ കാണാൻ കഴിഞ്ഞേക്കില്ല. ഈ വക കാര്യങ്ങൾ പ്രതീക്ഷിച്ചാണ് ചിത്രം കാണാൻ ഇറങ്ങുന്നതെങ്കിൽ തീർച്ചയായും പറയാം നിങ്ങൾ നിരാശരാവും. പെയ്ന്റിങ്ങുകളുടെ കാര്യത്തിൽ അറിവോ ആസ്വാദന ശേഷിയോ ഇല്ലെങ്കിൽ കൂടിയും കൺസപ്റ്റിലും ഐഡിയയിലും ഇഷ്ടം തോന്നിയത് കാരണം ആസ്വദിക്കാൻ കഴിഞ്ഞ പോസ്റ്റ്മാന്റെ അനുഭവം വേണമെങ്കിൽ ചേർത്ത് വായിക്കാം. താല്പര്യം തോന്നുന്നെങ്കിൽ കാണാൻ ശ്രമിക്കാം, എല്ലാവര്ക്കും ഇഷ്ടപ്പെടാൻ സാധ്യത ഇല്ല എന്ന് ഒരാവർത്തി കൂടി ഓർമിപ്പിക്കുന്നു. കുത്തിക്കീറലുകൾ കാണാൻ താല്പര്യം ഇല്ലാത്തതിനാൽ എല്ലാവര്ക്കും നിർദ്ദേശിക്കുന്നില്ല, താല്പര്യം തോന്നുന്നവർ മാത്രം കാണാൻ ശ്രമിക്കുക.

Verdict : Very Good

DC Rating : 82/100