628. Love Exposure (2008)

Director : Sion Sono

Genre : Comedy

Rating : 8.1/10

Country : Japan

Duration : 237 Minutes

🔸നാല് മണിക്കൂർ, നാല് മണിക്കൂറാണ് ലവ് എക്സ്പോഷർ എന്ന ജാപ്പനീസ് കൊമെടി ഡ്രാമ ചിത്രത്തിന്റെ ദൈർഖ്യം. ഈ ഒരു കാരണം തന്നെയാണ് സത്യത്തിൽ ഇതുവരെ ചിത്രം കാണാതിരുന്നതിന്റെ കാരണവും. ഷോഹ പോലുള്ള ദൈർഖ്യമേറിയ ചിത്രങ്ങൾ മുൻപ് കണ്ടിട്ടുണ്ട് എങ്കിൽ കൂടിയും ഒരു റൊമാൻസ് പ്രമേയമായ ചിത്രത്തിൽ ഇത്രയും സമയം പിടിച്ചിരുത്താനുള്ള വസ്തു വകകൾ ഉണ്ടാവില്ല എന്നായിരുന്നു കരുതിയിരുന്നത്, ഇത് കൊണ്ട് തന്നെ ഉദ്ദേശം മൂന്ന് വർഷത്തിന് മുകളിലായി പ്രസ്തുത ചിത്രം ഹാർഡ് ഡിസ്കിന്റെ ഏതോ ഫോൾഡറിൽ കിടക്കാൻ തുടങ്ങിയിട്ട്, ഒടുവിൽ ഈ അടുത്താണ് ഒരു മോചനം ഉണ്ടായത്.

🔸നാല് മണിക്കൂർ എന്നത് കേൾക്കുമ്പോൾ ഒരല്പം ബുദ്ധിമുട്ട് ആയി തോന്നുമെങ്കിലും ഇത്രയ്ക്കും താല്പര്യം ജനിപ്പിച്ച, ആ ഫ്ലോയിനോടൊപ്പം നമ്മളെയും കൊണ്ടുപോയ അധികം സിനിമകൾ ഈ അടുത്ത് കണ്ടിട്ടില്ല. പ്രത്യേകിച്ചും ചിത്രം പറയാൻ ശ്രമിക്കുന്ന കഥയിലേക്ക് ഇറങ്ങി കഴിഞ്ഞാൽ പിന്നൊരു നിമിഷം പോലും ബോർ അടിപ്പിക്കുന്നില്ല, നല്ല സ്റ്റൈൽ ആയിട്ട് പറഞ്ഞ് പോവുന്നുണ്ട്. അല്പം കോമിക്കൽ ആയ രൂപേണ ഉള്ള അവതരണവും, ഹ്യുമറും, നല്ല ദൃശ്യങ്ങളും, അടുപ്പം തോന്നി പോകുന്ന എന്നാൽ ഒരല്പം എക്സജറേറ്റഡ് ആയ കഥാപാത്രങ്ങൾ എല്ലാം ഈ സിനിമയുടെ പ്രത്യേകതകളാണ്. ചുരുക്കി പറഞ്ഞാൽ ഒരു വെറൈറ്റി അനുഭവമാണ് ചിത്രം.

🔸യു ഹോണ്ട എന്ന കഥാപാത്രമാണ് നമ്മുടെ നായകൻ, ഒരു യാഥാസ്ഥിക ക്രിസ്തീയ കുടുംബത്തിൽ ജനിച്ച് വളർന്നവനാണ് യു. അച്ഛനോടും അമ്മയോടും ഏക മകൻ ആയത് കൊണ്ട് തന്നെ ഒരു വല്ലാത്ത തരം അടുപ്പമുണ്ട് യുവിന്, അത് കൊണ്ട് തന്നെയാണ് ചെറു പ്രായത്തിൽ തന്നെയുള്ള അമ്മയുടെ മരണം അവനെ ഉലച്ച് കളഞ്ഞത്, അതൊരിക്കലും പൂർണമായി ഉൾക്കൊള്ളാൻ യുവിന് കഴിഞ്ഞിട്ടില്ല. അമ്മയുടെ മരണം യുവിനെ എന്ന പോലെ തന്നെ അവന്റെ അച്ഛനെയും തളർത്തി കളഞ്ഞിരുന്നു, ആത്മീയതയിലേക്ക് വഴി മാറിയ യുവിന്റെ അച്ഛൻ പതിയെ ഒരു പള്ളിയിലച്ചനായി മാറുകയാണ്.

🔸ഭാര്യയുടെ മരണ ശേഷം ഒരു ഏകാകി ആയി മാറിയെങ്കിലും പള്ളിയിലെ സ്ഥിരം സന്ദർശകരിൽ ഒരാളായ സ്ത്രീയുമായി യുവിന്റെ അച്ഛൻ അടുപ്പത്തിലാവുകയാണ്, എന്നാൽ ഈ ബന്ധവും ഒരു ദുരന്തത്തിൽ കലാശിക്കുന്നത് മാനസികമായി അയാളെ വല്ലാത്ത രീതിയിൽ ബാധിക്കുന്നു. തന്റെ ചുറ്റുപാടും ഉള്ള സകല കാര്യങ്ങളോടും, സ്വന്തം മകനോട് പോലും ഉള്ള അയാളുടെ സമീപനം മാറുകയാണ്, ഇവിടെ നിന്നും കഥ മറ്റൊരു ട്രാക്കിലേക്ക് കടക്കുന്നു. യു, അയാളുടെ അച്ഛൻ എന്നീ കഥാപാത്രങ്ങൾ അല്ലാതെ യോക്കോ, ആയാ എന്നീ കഥാപാത്രങ്ങളുടെ കഥ കൂടി ചിത്രം പറയുന്നുണ്ട്.

🔸കഥയുടെ ഒരു പ്രത്യേക പോയിന്റിൽ ഈ കഥാപാത്രങ്ങൾ എല്ലാവരും കണ്ട് മുട്ടുന്നുണ്ട്, അവിടെ നിന്നങ്ങോട്ട് സംഭവിക്കുന്ന ചില കാര്യങ്ങൾ ഈ കഥാപാത്രങ്ങളുടെ എല്ലാം വർത്തമാന ഭാവി കാലഘട്ടത്തെ ബാധിക്കുന്നുമുണ്ട്. തുടർന്ന് ഉള്ള ഈ സംഭവങ്ങളാണ് നാല് മണിക്കൂർ ദൈർഖ്യമുള്ള സിനിമ പറയുന്നത്. മതം, ലൈംഗിക മുതലെടുപ്പ് തുടങ്ങി കൊലപാതകം വരെയുള്ള അനവധി വിഷയങ്ങൾ ഈ ചിത്രം കൈകാര്യം ചെയ്യുന്നുണ്ട്. ലൈറ്റായി പറയുക ആണെങ്കിൽ ഒരു മിനിറ്റ് പോലും ബോർ അടിക്കാൻ ഉണ്ടാവില്ല, കാഴ്ചക്കാരനെ രസിപ്പിച്ച് പിടിച്ചിരുത്തി നല്ല സ്റ്റൈലായി പോവുന്നൊരു ചിത്രം, അതാണ് ലവ് എക്സ്പോഷർ.

Verdict : Must Watch

DC Rating : 90/100

627. The Face Of Another (1966)

Director : Hiroshi Teshigara

Genre : Drama

Rating : 8/10

Country : Japan

Duration : 121 Minutes

🔸കടല് പോലെ കിടക്കുന്ന മികച്ച ജാപ്പനീസ് ചിത്രങ്ങളുടെ പട്ടികയിൽ നിസ്സംശയം ഉൾപ്പെടുത്താവുന്ന, ലളിതമായി പറയുക ആണെങ്കിൽ മുൻ നിരയിൽ തന്നെ ചേർക്കാവുന്ന വേറെ ലെവൽ ഒരു ചിത്രം, അതാണ് ഫെയ്‌സ് ഓഫ് അനതർ. ഹിരോഷി ടോഷിഗാര എന്ന സംവിധായകന്റെ ഒരൊറ്റ സിനിമ മാത്രമേ കണ്ടിട്ടുള്ളൂ, വുമൺ ഇൻ ദി ഡ്യുൺസ് എന്ന ചിത്രം. പല കോണുകളിൽ നിന്നും ടോഷിഗാരയുടെ കരിയർ ബെസ്റ്റ് ഫെയ്‌സ് ഓഫ് അനദർ ആണെന്ന് അഭിപ്രായം കേട്ടതിനാൽ തന്നെ വൻ പ്രതീക്ഷയായിരുന്നു ചിത്രത്തിൽ ഉണ്ടായിരുന്നത്, ആ പ്രതീക്ഷയോട് നൂറ് ശതമാനം നീതി പുലർത്താൻ ചിത്രത്തിന് കഴിഞ്ഞു എന്ന് സംശയമേതും ഇല്ലാതെ പറയാം.

🔸ഒകുയാമ എന്ന എൻജിനിയറുടെ കഥയാണ് ദി ഫെയ്‌സ് ഓഫ് അനദർ, ജോലിക്കിടെ ഒരുനാൾ ഒകുയാമയ്ക്ക് ഒരപകടം സംഭവിക്കുകയാണ്. അപകടത്തിന്റെ കാര്യ കാരണങ്ങൾ ഒന്നും ചിത്രം വ്യക്തമാക്കുന്നില്ല എങ്കിലും ഇതിന്റെ പരിണിത ഫലമായി ഒകുയാമയുടെ മുഖം മുഴുവൻ പൊള്ളലേറ്റ് കരിഞ്ഞ് പോവുകയാണ്. പഴയ രൂപത്തിലേക്ക് ഒരു മടക്കം ഏറെക്കുറെ അപ്രാപ്യം ആയ സാഹചര്യത്തിൽ മറ്റൊരു വഴി തേടാൻ അയാൾ നിർബന്ധിക്കപ്പെടുകയാണ്. ഈ ഒരാവശ്യം അയാളെ ഹിറാ എന്ന ഡോക്ടറുടെ അടുത്തേക്ക് എത്തിക്കുന്നു.

🔸ഹിറയുടെ നിർദേശ പ്രകാരം ഒരു പുതിയ മാസ്ക് മുഖത്ത് വെച്ച് പിടിപ്പിക്കാൻ ഒകുയാമ തയ്യാറാവുകയാണ്. പഴയ മുഖവുമായി സാമ്യം ഏതും ഇല്ലാത്ത തികച്ചും വ്യത്യസ്തം ആയൊരു രൂപമാണ് ഒകുയാമ കൈ കൊള്ളുന്നത്. ഈ ഒരു രൂപം സൃഷ്ട്ടിക്കുന്നതിനായി യാതൊരു മുൻ പരിചയവും ഇല്ലാത്ത മറ്റൊരാളുടെ സഹായം കൂടി ഇരുവരും ഉപയോഗിക്കുന്നുണ്ട്. അങ്ങനെ ഒകുയാമയ്ക്ക് ഒരു പുതിയ മുഖം ലഭിക്കുകയാണ്, എന്നാൽ യഥാർത്ഥ പ്രശ്നങ്ങൾ ആരംഭിക്കാൻ പോവുന്നെ ഉണ്ടായിരുന്നുള്ളൂ. ഒരു മുന്നറിയിപ്പ് ഹിറ ആദ്യമേ ഒകുയാമയ്ക്ക് നൽകിയിരുന്നു.

🔸ഹിറ നൽകിയ മുന്നറിയിപ്പ് എന്താണെന്ന് വെച്ചാൽ ഒരു പുതിയ രൂപത്തിന്റെ വരവോട് കൂടി ഒകുയാമ ഒരു പുതിയ വ്യക്തിയായി മാറുകയാണ്, രൂപത്തിന്റെ കാര്യത്തിൽ മാത്രമല്ല വ്യക്തിത്വത്തിന്റെ അടിസ്ഥാനത്തിലും. മറ്റുള്ളവരുടെ സമീപനം മാറും എന്നതിനോടൊപ്പം തന്നെ ഒകുയാമയുടെ പെരുമാറ്റവും കാഴ്ചപ്പാടും എല്ലാം മാറിയേക്കും. ചുരുക്കി പറയുക ആണെങ്കിൽ തികച്ചും വേറിട്ടൊരു വ്യക്തി ആയിരിക്കും പിറവി എടുക്കുന്നത് എന്ന് സാരം. ഈ മുന്നറിയിപ്പിനെ ആദ്യം ഒകുയാമ ചിരിച്ച് തള്ളിയെങ്കിലും തുടർന്ന് അരങ്ങേറിയ സംഭവങ്ങൾ മറ്റൊരു ചിത്രമാണ് നൽകിയത്.

🔸മുകളിൽ സൂചിപ്പിച്ചിരിക്കുന്ന പ്ലോട്ടിന് പുറമെ മറ്റൊരു പ്ലോട്ട് ലൈൻ കൂടി പാരലൽ ആയി ചിത്രം പറഞ്ഞ് പോവുന്നുണ്ട്. സിമ്പിൾ എന്ന് പ്രത്യക്ഷത്തിൽ തോന്നിയേക്കാം എങ്കിലും ഡീപ്പർ മീനിങ് ഉള്ളൊരു ചിത്രമായാണ് ഫെയ്‌സ് ഓഫ് അനദർ അനുഭവപ്പെട്ടത്, വ്യക്തിപരമായി വുമൺ ഇൻ ഡ്യുൻസിനെക്കാളും ഇഷ്ട്ടപ്പെട്ടു ഈ ചിത്രം. ഈ ഡിസൻഷൻ റ്റു മാഡ്‌നെസ്സ് അല്ലെങ്കിൽ മനസ്സ് കൈവിട്ട് പോവുന്ന ടൈപ്പ്‌ കഥാപാത്രങ്ങൾ ഉള്ള ചിത്രങ്ങൾ ഭയങ്കരമായി ഇഷ്ടമായത് കൊണ്ട് തന്നെ ഏറ്റവും ഇഷ്ട്ടപ്പെട്ട ചിത്രങ്ങളുടെ പട്ടികയിൽ തന്നെ ഉൾപ്പെടുത്തും ഈ മെറ്റഫർ ഹെവി ചിത്രം, തീർച്ചയായും കാണാൻ ശ്രമിക്കുക, നല്ലൊരു അനുഭവമാകും ഈ ചിത്രം.

Verdict : Must Watch

DC Rating : 94/100

626. Human Space Time And Human (2018)

Director : Kim Ki Duk

Genre : Drama

Rating : 5.4/10

Country : South Korea

Duration : 122 Minutes

🔸കിം കി ഡുക്കിന്റെ ചിത്രങ്ങൾക്ക് പൊതുവെ ഡിവിസിവ് ആയൊരു സ്വീകാര്യത പ്രേക്ഷകർക്കും നിരൂപകർക്കും ഇടയിൽ ലഭിക്കുക എന്നതൊരു പുതിയ കാര്യമല്ല, വ്യക്തിപരമായി തന്നെ പുള്ളിയുടെ ചിത്രങ്ങൾ മറ്റൊരാൾക്ക് സജസ്റ്റ് ചെയ്ത് കൊടുത്ത ശേഷം ഈ സംഭവങ്ങൾ അരങ്ങേറിയ അനുഭവങ്ങൾ അനവധിയുണ്ട്. ഈ കാരണം കൊണ്ട് തന്നെ ഹ്യുമൻ സ്‌പെയ്‌സ് ടൈം ആൻഡ് ഹ്യുമൻ എന്ന പുള്ളിയുടെ ചിത്രത്തിന് അടപടലം എന്ന അഭിപ്രായം ലഭിച്ചപ്പോഴും അത് അത്ര അങ്ങട്ട് കാര്യമാക്കിയില്ല. എന്തൊക്കെ ആണെങ്കിലും കിം കി ഡൂക് ആയത് കൊണ്ട് കാണാൻ എന്തെങ്കിലും ഉണ്ടാവും എന്നായിരുന്നു പ്രതീക്ഷ, അത്‌ വെറുതെ ആയോ ഇല്ലയോ എന്നതാണ് ചോദ്യം.

🔸ഒരു കപ്പലാണ് നമ്മുടെ കഥാ പശ്ചാത്തലം, ഒരാഴ്ചയോളം നീണ്ടുനിൽക്കുന്ന ഒരു യാത്രയ്ക്ക് ഒരുങ്ങുകയാണ് കപ്പലിലെ യാത്രികർ. രാജ്യത്തെ നാനാ ഭാഗത്ത് നിന്നുമുള്ള, വിവിധ സംസ്കാരങ്ങളുടെ ഭാഗമായ അനവധി ആളുകളുണ്ട് ആ യാത്രയിൽ. അടുത്ത് തന്നെ രാജ്യത്തിൻറെ പ്രസിഡന്റ് വരെയാവാൻ സാധ്യതയുള്ള ഒരു മുതിർന്ന നേതാവാണ് യാത്രക്കാരിലെ പ്രമുഖൻ, അയാളോടൊപ്പം മകനും യാത്ര ചെയ്യുന്നുണ്ട്. ഈ രണ്ട് കഥാപാത്രങ്ങൾക്ക് പുറമെ ഇപ്പോൾ വിവാഹിതരായ രണ്ട് യുവ മിഥുനങ്ങളും ആരുടെ മെക്കിട്ട് അടുത്തത് കേറണം എന്ന് തപ്പി നടക്കുന്ന വേറൊരു ഉടായിപ്പ് ടീമും കപ്പലിൽ എത്തി പെട്ടിട്ടുണ്ട്.

🔸യാത്ര തുടങ്ങിയപ്പോൾ തൊട്ടേ കപ്പലിൽ പ്രശ്നങ്ങൾ ആരംഭിക്കുകയാണ്, മുകളിൽ സൂചിപ്പിച്ച ഗ്യാങ്‌സ്റ്റർ സെനറ്ററുടെ ആവശ്യങ്ങളും മറ്റും നിറവേറ്റി കൊടുക്കാനായി ഒരു ആശ്രിതൻ അല്ലെങ്കിൽ അംഗരക്ഷനായി മാറുകയാണ്. കപ്പലിലെ ഏറ്റവും നല്ല മുറി, ഭക്ഷണം, സുഖ സൗകര്യങ്ങൾ തുടങ്ങി എല്ലാവിധ കാര്യങ്ങളിലും അയാളുടെ കൈ പതിഞ്ഞ് തുടങ്ങി. സെനറ്റർക്ക് വേണ്ടി എന്ന പറച്ചിലിൽ ടിയാനും അയാളുടെ സുഹൃത്തുക്കളും ഇതിലെല്ലാം പങ്ക് പറ്റാനും തുടങ്ങി. കുറച്ച് കൂടി ലളിതമായി പറയുക ആണെങ്കിൽ അധികാരവും കൈയ്യൂക്കും ഉള്ളവൻ എല്ലാം പിടിച്ചടക്കിയ മട്ടായി, ഇത് കൂടുതൽ പ്രശ്നങ്ങൾക്ക് വഴി വെക്കുകയാണ്.

🔸രണ്ട് കൂട്ടർക്കും വിളമ്പുന്ന ഭക്ഷണത്തിന്റെ വ്യത്യാസത്തിൽ ചില സാധാരണക്കാരായ യാത്രികർ ഒരുനാൾ പരാതി പറയുകയാണ്, ഈ പരാതിയിന്മേൽ സെനറ്റർ സമ്മർദ്ദത്തിൽ ആവുകയും ഇനിമേൽ ഇത്തരമൊരു പ്രശനം ഉണ്ടാവില്ല എന്ന് വാക്ക് നൽകേണ്ടിയും വരുന്നു. പ്രശ്നങ്ങൾ എല്ലാം ഒന്ന് തണുത്തു എന്ന് കരുതുമ്പോഴാണ് മുകളിൽ സൂചിപ്പിച്ച സംഭവം ഒരപമാനമായി കണ്ട് ഗ്യാങ്സ്റ്ററും കൂട്ടാളികളും വേട്ടയ്ക്ക് ഇറങ്ങുന്നത്, തുടർന്നങ്ങോട്ട് കപ്പലൊരു കൊലക്കളമായി മാറുകയാണ്. വയലൻസും ന്യുഡിറ്റിയും കാനിബാളിസവും എല്ലാം ചേർന്ന് മറ്റൊരു തലത്തിലേക്ക് ചിത്രം നീങ്ങുകയാണ്.

🔸ടൈറ്റിൽ സൂചിപ്പിക്കുന്നത് പോലെ തന്നെ ഹ്യുമൻ, സ്‌പെയ്‌സ്, ടൈം എന്നിങ്ങനെ ഭാഗങ്ങളായി തിരിച്ചാണ് കഥ പുരോഗമിക്കുന്നത്, ഒരല്പം സിമ്പോളിക്കയാണ് കാര്യങ്ങളുടെ കിടപ്പ്. കൂടുതൽ ഡീറ്റയിൽസിലേക്ക് പോവുന്നത് ചിത്രം കാണുമ്പോഴുള്ള ഞെട്ടലുകൾക്ക് ഒരു പ്രശനം ആവും എന്നതിനാൽ ഒഴിവാക്കുന്നു. മേൽ സൂചിപ്പിച്ച വയലൻസ് ഒക്കെ നല്ല തോതിൽ തന്നെ ചിത്രത്തിലുണ്ട്,.മനുഷ്യ ഇറച്ചി വെട്ടി നുറുക്കി ചോരയോട് കൂടി കഴിക്കുന്ന പോലുള്ള സീനുകളും അനവധി, പ്രത്യേകിച്ചും ഇൻസെയ്ൻ എന്നൊക്കെ വിശേഷിപ്പിക്കാവുന്ന രണ്ടാം പാതിയിൽ. മോശം അഭിപ്രായങ്ങൾ ഒരുപാട് കേട്ടെങ്കിലും വ്യക്തിപരമായി ഇഷ്ട്ടപ്പെട്ടു ഈ ചിത്രം, കണ്ട് വിലയിരുത്തുക.

Verdict : Good

DC Rating : 72/100

625. Star Wars Episode 1 - The Phantom Menace (1999)

Director : George Lucas

Genre : Sci Fi

Rating : 6.5/10

Country : USA

Duration : 139 Minutes

🔸സ്റ്റാർ വാർസ് എന്ന സീരീസിനോളം ഇഷ്ടം തോന്നിയ മറ്റൊരു സിനിമാ സീരീസ് വേറെ ഇല്ല, പ്രത്യേകിച്ചും എൺപതുകളിൽ പുറത്തിറങ്ങിയ ഒറിജിനൽ ട്രിലോജിയോട്. നിലവാരത്തിൽ ഹ്യുമൻ കണ്ടീഷൻ പോലെയുള്ള മറ്റ് ഉദാഹരണങ്ങൾ ചൂണ്ടി കാണിക്കാമെങ്കിലും സ്റ്റാർ വാർസ് ഏറെക്കുറെ ഒരു ഇമോഷനാണ്. ഒറിജിനൽ ട്രിലോഗി, പ്രീക്വൽ ട്രിലോഗി, സീക്വൽ ട്രിലോഗി തുടങ്ങി ഒൻപത് ചിത്രങ്ങൾ സീരീസിലുണ്ട്, ഇവയിൽ അവസാനത്തേത് ഈ വർഷം ഡിസംബറിൽ റിലീസിന് തയാറെടുക്കുകയാണ്. സ്‌കൈവാക്കർ സാഗ എന്ന പേരിൽ പ്രശസ്തി നേടിയ സീരീസിനെ പറ്റി പറയാനുള്ള ഏറ്റവും നല്ല സമയം ഇത് തന്നെയാണ്.

🔸ഡാർത്ത് വെയ്ഡറിന്റെ കഥയാണ് ഏറെക്കുറെ സ്റ്റാർ വാഴ്സിന്റെ ഒറിജിനൽ ട്രിലോഗി, എതിരഭിപ്രായം ഉണ്ടാവാം എങ്കിലും വ്യക്തിപരമായി എനിക്ക് തോന്നിയിട്ടുള്ളത് അങ്ങനെയാണ്. ഒരു തികഞ്ഞ വില്ലനിൽ നിന്നും ഹീറോയിലേക്കുള്ള പുള്ളിയുടെ യാത്രയാണ് ആ മൂന്ന് ചിത്രങ്ങളും, ആ ആർക്ക് ആണ് അവിടെ നിറഞ്ഞ് നിൽക്കുന്നത്. ഇതിന്റെ നേരെ റിവേഴ്‌സാണ് പ്രീക്വൽ ട്രിലോഗി എന്ന് പറയാം, ഒരു നായക പരിവേഷമുള്ള കഥാപാത്രത്തിൽ നിന്നും വില്ലനായി മാറുന്ന വെയ്ഡരുടെ കഥയാണ് പ്രീക്വൽ ചിത്രങ്ങൾ പറയുന്നത്.

🔸ഈ പ്രീക്വൽ ട്രിലോഗിയിലെ ആദ്യ ചിത്രമാണ് ദി ഫാന്റം മെനസ്, ഹൈപ്പ് എന്നൊക്കെ പറഞ്ഞാൽ അതിന്റെ പാരമ്യത്തിലുള്ള ഹൈപ്പുമായി തിയേറ്ററിൽ എത്തിയ ചിത്രം, ഒടുവിൽ വലിയൊരു ശതമാനം ആരാധകരെയും തൃപ്തി പെടുത്താൻ കഴിയാതെ ഒരു ബ്ലാക്ക് മാർക്ക് വാങ്ങി പിന്നണിയിലേക്ക് മാറ്റി നിർത്തപ്പെട്ട ചിത്രം, വിശേഷണങ്ങൾ അനവധിയാണ് ഈ ചിത്രത്തിന്. സ്റ്റാർ വാർസ് കാണാനുള്ള ബെസ്റ്റ് ഓർഡർ ഏതാണെന്ന് പലരും ചോദിച്ച് കണ്ടിട്ടുണ്ട്, കഥ വെച്ച് പ്രീക്വൽ സീക്വൽ ഓർഡറാണ് നല്ലത് എങ്കിലും ഫാന്റം മെനസ് പോലുള്ള സിനിമകൾ നന്നായി ആസ്വദിക്കണം എങ്കിൽ റിലീസ് ഓർഡർ തന്നെയാണ് നല്ലത് എന്നതാണ് അഭിപ്രായം, അതിന് ഒരു കാരണമുണ്ട്, ആ കാരണം തന്നെയാണ് ചിത്രത്തിന്റെ വലിയ നെഗറ്റീവ് ആയി അനുഭവപ്പെട്ടതും.

🔸സ്റ്റാർ വാർസ് സിനിമയുടെ ബാക്ക് ബോൺ ആയ ജെടൈ - സിത്ത് യുദ്ധം തന്നെയാണ് ഈ ചിത്രത്തിലെയും പ്ലോട്ട് എലെമെന്റ്, സീക്വൽ സീരീസുകളിൽ നിന്ന് വ്യത്യസ്തമായി ഇവിടെ ജെഡികളാണ് അധികാരത്തിൽ ഉള്ളത്, സിത്ത് എന്നത് വെറുക്കപ്പെട്ട, വേർതിരിക്കപ്പെട്ട ഒരു വിഭാഗമാണ്. ഈ യുദ്ധത്തിൽ ഒരു ബാലൻസ് കൊണ്ടുവരാനായി രണ്ട് യോദ്ധാക്കൾ ശ്രമിക്കുന്നതും അവരുടെ അന്വേഷണം ഒരു ചെറിയ കുട്ടിയിൽ എത്തി അവസാനിക്കുന്നതും എല്ലാമാണ് ചിത്രത്തിന്റെ കഥ. ഈ ഒരു പ്ലോട്ടിന് പുറമെ നാബു എന്ന രാജ്യത്തെ രാജകുമാരി ആയ നതാലി പോർട്മാന്റെ പദ്മെ അമിതാലയുടെ കഥ ഒക്കെ വേറൊരു വശത്ത് കൂടി ചിത്രം പറഞ്ഞ് പോവുന്നുണ്ട്, ഇതൊന്നും പോരാതെ ഒറിജിനൽ ട്രിലോഗിയിലേക്ക് ഒരുപാട് കോൾ ബാക്കുകളും ഉണ്ട്, ഇതിന്റെ അളവാണ് മുകളിൽ സൂചിപ്പിച്ച പോരായ്മ എന്ന് പറയാം.

🔸ഒരുപാട് പ്രശ്നങ്ങൾ ചിത്രത്തിൽ ഉണ്ട്, ഒറിജിനൽ ത്രിലോഗിയുമായി കമ്പയർ ചെയ്യാനും മാത്രം ഇല്ലതാനും, പക്ഷെ അപ്പോഴും ഫാന്റം മെനസ് ഒരു ദുരന്ത ചിത്രമായോ വധമായോ മാറുന്നില്ല, കണ്ടിരിക്കാം എന്ന അഭിപ്രായമാണ് വ്യക്തിപരമായി ഉള്ളത്. ജാർ ജാറിനെ പോലുള്ള വെറുപ്പിക്കൽ കഥാപാത്രങ്ങളും ഇഫക്ടുകളുടെ അതിപ്രസരവും നിലവാര കുറവും എല്ലാം ശെരി തന്നെ, സീരീസിലെ ഏറ്റവും മോശം എന്ന് വേണമെങ്കിലും പറയാം. കൂടുതൽ പറഞ്ഞ് നശിപ്പിക്കുന്നില്ല, ഒരു തവണ കാണാവുന്ന ചിത്രമാണ് ഫാന്റം മെനസ്, പ്രത്യേകിച്ചും സ്റ്റാർ വാഴ്സിന്റെ ചരിത്രത്തിലെ വളരെ പ്രാധാന്യമുള്ള ഒരേട്.

Verdict : Watchable

DC Rating : 68/100

624. Zombieland Double Tap (2019)

Director : Ruben Fleischer

Genre : Comedy

Rating : 7.3/10

Country : USA

Duration : 100 Minutes

🔸ഒരു പത്ത് വർഷം മുന്നേ വന്ന്, സോംബി ജിനേറും കൊമെടിയും അന്യായ ക്യാരക്ടർ കെമിസ്ട്രിയും എല്ലാം കൂട്ടി കലർത്തി ഒരു സ്ലീപ്പർ ഹിറ്റ് അടിച്ച ചിത്രമാണ് സോമ്പിലാൻഡ്. വുഡി ഹെറാൾസൺ, ജെസി എയ്‌സൻബർഗ്, എമ്മ സ്റ്റോൺ തുടങ്ങിയവർ ലീഡായി എത്തിയ ചിത്രം പേഴ്സണലി നന്നായി ഇഷ്ട്ടപ്പെട്ട ഒന്നാണ്, പ്രത്യേകിച്ചും ചിത്രത്തിന്റെ ടൈം പാസ് അസ്പക്റ്റ് കണക്കിൽ എടുക്കുമ്പോൾ. ഇങ്ങനെയൊക്കെ ആണെങ്കിലും ഒരു രണ്ടാം ഭാഗം അനൗൺസ് ചെയ്യുമ്പോൾ വലിയ പ്രതീക്ഷ ഒന്നും ഉണ്ടായിരുന്നില്ല, കാരണം സ്റ്റുഡിയോസ് മിക്കപ്പോഴും ഗ്യാരന്റി ചെയ്യുന്ന സീക്വലിലെ ബിഗ്ഗർ എലെമെന്റ്സ് മിക്കപ്പോഴും ബെറ്റർ റിസൾട്സ് തരാറില്ല എന്ന തുണിയുടുക്കാത്ത സത്യം തന്നെ.

🔸കഥ എന്നത് ആദ്യ ഭാഗത്തിലേത് പോലെ തന്നെ ഒരു സോംബി അപോകലിപ്‌സും, അതിനെ തുടർന്ന് അരങ്ങേറുന്ന സംഭവങ്ങളും എല്ലാം തന്നെയാണ്. ഒന്നാം ഭാഗം നാല് കഥാപാത്രങ്ങളിൽ ശ്രദ്ധ കൊടുത്ത ഒന്നാണെങ്കിൽ ഇവിടെ എണ്ണത്തിൽ ചെറിയ വർദ്ധനവ് ഉണ്ട്, ഒരുപറ്റം പുതിയ കഥാപാത്രങ്ങൾ തങ്ങളുടെ സാന്നിധ്യം അറിയിക്കുന്നുണ്ട് ചിത്രത്തിൽ. കൂടുതൽ ഡീറ്റയിലായി കാര്യത്തിലേക്ക് കടക്കുന്നതിന് മുന്നേ ഒരു ചെറിയ കാര്യം, ആദ്യ ഭാഗം ഇഷ്ടപ്പെടുന്നവർക്ക് രസിക്കാനുള്ളത് ഇവിടെ ഉണ്ട്, നിലവാരത്തിൽ അത്രയ്ക്ക് പ്രതീക്ഷിക്കണ്ട എങ്കിലും.

🔸മോശം എന്ന് തോന്നിയ കാര്യങ്ങളിലേക്ക് കടക്കുക ആണെങ്കിൽ, വലിയ പുതുമ ഒന്നും പ്രതീക്ഷിക്കേണ്ടതില്ല, കഥ എവിടേക്കാണ് പോവുന്നത് എന്താണ് സംഭവിക്കാൻ പോവുന്നത് എന്നതൊക്കെ ഒരു രണ്ട് മൂന്ന് സന്ദർഭങ്ങൾ ഒഴിച്ച് നിർത്തിയാൽ പകൽ പോലെ വ്യക്തമാണ്. പക്ഷെ ഈയൊരു ചെറിയ പ്രശനം എന്റർടൈൻമെന്റ് അല്ലെങ്കിൽ കൊമെടി എന്നത് വെച്ച് അത്യാവശ്യം ബാലൻസ് ചെയ്ത് കൊണ്ടുപോവുന്നുണ്ട് ചിത്രം. പ്രകടനത്തിന്റെ കാര്യത്തിൽ ആയാലും സർപ്രൈസുകളുടെ കാര്യത്തിൽ ആയാലും ആദ്യ ചിത്രത്തിന്റെ ലെവെലിലേക്ക് എവിടെയും സിനിമ ഉയരുന്നില്ല എന്നത് മറ്റൊരു സത്യം.

🔸ഇനി നല്ല വശങ്ങളിലേക്ക് കടക്കുക ആണെങ്കിൽ പുതുതായി വന്ന താരങ്ങളിൽ റൊസാരിയോ ഡോസനും, ലൂക്ക് വിത്സനും നന്നായി തോന്നി, സ്ക്രീൻ ടൈം ഇച്ചിരി കുറഞ്ഞ് പോയെങ്കിലേ ഉള്ളൂ. മെയിൻ ലീഡുകളായ താരങ്ങൾ എല്ലാം തന്നെ നല്ല കെമിസ്ട്രി പ്രകടിപ്പിക്കുകയും ചെയ്തിട്ടുണ്ട് ചിത്രത്തിൽ ഉടനീളം. നല്ല ഒഴുക്കോടെ പോവുന്ന ചിത്രം കൊമെടി വിഭാഗത്തിൽ നിലവാരം പുലർത്തുന്നുണ്ട് എന്നത് എടുത്ത് പറയേണ്ട കാര്യമാണ്. ഒരു മിഡ് ക്രെഡിറ്റ് സീൻ ചിത്രത്തിൽ ഉണ്ടെന്നും നല്ലതാണ് ആ രംഗമെന്നും അഭിപ്രായം കേട്ടു, പക്ഷെ ഇവിടെ പ്രദർശിപ്പിക്കുക ഉണ്ടായില്ല.

🔸ആകെ മൊത്തം പറയുക ആണെങ്കിൽ എന്റർടൈനിംഗ് ആയ ഒരു ചിത്രം, കണ്ട് കൊണ്ടിരിക്കുന്ന സമയം നഷ്ടമായി എന്നൊരു അഭിപ്രായം തോന്നാൻ ഇടയില്ല, അതെ സമയം കൂടുതലായി ഒന്നും പ്രതീക്ഷിക്കേണ്ടതുമില്ല. ഒരു തവണ കാണാനുള്ള വകുപ്പ് ചിത്രത്തിൽ ഉണ്ടെന്ന് സാരം. ഇനി ഒരു മൂന്നാം ഭാഗം വരികയാണെങ്കിൽ തീർച്ചയായും അതും കണ്ടിരിക്കും എന്ന് പറയുന്നിടത്ത് ഈ ഭാഗം ഒട്ടും നിരാശ നൽകിയില്ല എന്ന് കൂടി കൂട്ടി വായിക്കുമല്ലോ, നന്ദി നമസ്കാരം.

Verdict : Good

DC Rating : 70/100

623. Weathering With You (2019)

Director : Makoto Shinkai

Genre : Animation

Rating : 7.8/10

Country : Japan

Duration : 112 Minutes

🔸ജാപ്പനീസ് അനിമേഷൻ ചിത്രങ്ങൾക്ക് ഒരു പ്രത്യേകത ഉണ്ട്, വൈകാരികമായി കാഴ്ചക്കാരനെ ഉലയ്ക്കുന്ന അല്ലെങ്കിൽ വൈകാരികമായി ബാധിക്കുന്ന ഒന്നാവും മിക്ക ചിത്രങ്ങളും. ഈ ഒരു വാചകത്തിന് ഉദാഹരണമായി നിരത്താൻ ഏറ്റവും കുറഞ്ഞത് ഒരു അൻപത് ചിത്രങ്ങൾ എങ്കിലും കാണിച്ച് തരാൻ കഴിയും, അവയിൽ ഉൾപ്പെടുത്താവുന്ന ഒന്നാണ് മക്കോട്ടോ ശിങ്കായിയുടെ തന്നെ മുൻ ചിത്രമായ യുവർ നെയിം. യുവർ നെയിം കണ്ട ഓർമ്മ തന്നെയാണ് ഇന്ത്യയിൽ റിലീസാവുന്ന ആദ്യ അനിമേ ചിത്രമായ വെതറിങ് വിത് യു കാണാനുണ്ടായ പ്രചോദനവും.

🔸ഒരു ആശുപത്രി കിടക്കയ്ക്ക് അരികെ നിന്നുമാണ് നമ്മുടെ കഥ ആരംഭിക്കുന്നത്, ഹിനാ എന്ന നായികാ കഥാപാത്രത്തെ കാണിച്ച് കൊണ്ട്. തനിക്കും അവൾക്കും മാത്രം അറിയാവുന്ന ഒരു രഹസ്യം വെളിപ്പെടുത്താനുണ്ട് എന്ന നായകന്റെ വോയിസ് ഓവറോടെ ആരംഭിക്കുന്ന ചിത്രം നേരിട്ട് കടന്ന് ചെല്ലുന്നത് സൂചിപ്പിച്ചത് പോലെ തന്നെ ആ രഹസ്യത്തിലേക്കാണ്. രഹസ്യം എന്നത് വേറൊന്നുമല്ല, നമ്മുടെ നായികയ്ക്ക് കാലാവസ്ഥയെ കൺട്രോൾ ചെയ്യാൻ സാധിക്കും. മെഡിറ്റേഷൻ അല്ലെങ്കിൽ പ്രാർത്ഥന, ഇതാണ് ഹിനായുടെ കഴിവിന്റെ രഹസ്യം എന്നാണ് ചിത്രം സൂചിപ്പിക്കുന്നത്.

🔸പിന്നീട് ചിത്രം കടന്ന് പോവുന്നത് നമ്മുടെ നായക കഥാപാത്രമായ ഹൊടാകായുടെ ജീവിതത്തിലേക്കാണ്, ടിയാൻ തന്റെ വീടും നാടും ഉപേക്ഷിച്ച് നഗരത്തിലേക്ക് ചേക്കേറുകയാണ്. ഒരു ജോലിയും വരുമാനവും ഒക്കെയാണ് ഹൊകാദയുടെ ലക്ഷ്യം, എന്നാൽ അതിനാവശ്യമായ പഠിപ്പോ അറിവോ ലൈസൻസോ ഒന്നും തന്നെ അവനില്ല, ലോകപരിചയം പോലും. നഗരത്തിലേക്കുള്ള യാത്രയ്ക്കിടെ മരണത്തെ നേർക്കുനേർ കണ്ട ഹൊകാദയെ രക്ഷിക്കുന്നത് സുഗാ എന്ന കഥാപാത്രമാണ്, ഈ സംഭവമാണ് കഥയെ ട്രാക്ക് മാറ്റുന്നത്.

🔸ഈ ജീവൻ രക്ഷിക്കൽ പ്രക്രിയ ഒരു സൗഹൃദത്തിന്റെ ആരംഭം ആയിരുന്നു. എന്ത് ആവശ്യം ഉണ്ടെങ്കിലും ബന്ധപ്പെടാം എന്ന ഉറപ്പിന്മേൽ സുഗാ ഹൊകാദയ്ക്ക് ഒരു വിസിറ്റിംഗ് കാർഡ് നൽകുകയാണ്. ജോലി അന്വേഷണം ഒരു ദൈനംദിന പ്രക്രിയ ആയി സ്വീകരിച്ച ഹൊകാദയ്ക്ക് എല്ലായിടത്ത് നിന്നും നേരിടേണ്ടി വന്നത് പുച്ഛവും പരിഹാസവും അവഗണനയും മാത്രമായിരുന്നു. ഒടുവിൽ സുഗായുടെ ഓഫർ സ്വീകരിച്ച് അയാളെ കാണാൻ പോവുന്ന ഹൊകാദ താമസിയാതെ തന്നെ അയാളുടെ അസിസ്റ്റന്റ് ആയി ജോലിയിൽ പ്രവേശിക്കുകയാണ്, ആ നഗരത്തിന്റെ തന്നെ മറ്റൊരു കോണിൽ തന്റെ കഴിവ് ആരാലും അറിയാതെ മറച്ച് പിടിച്ച് ഹിനായും ഉണ്ടായിരുന്നു.

🔸ഒരു പ്രത്യേക പോയിന്റിൽ ഈ കഥാപാത്രങ്ങളുടെ എല്ലാം യാത്ര ഇന്റർസെക്റ്റ് ചെയ്യപ്പെടുകയാണ്, ഈ ഒരവസരത്തിൽ ഹിനായുടെ കഴിവിനെ പറ്റി ഹൊകാദ ബോധവാൻ ആവുന്നിടത്ത് ചിത്രം ട്രാക്ക് മാറുന്നു, തുടർന്ന് ഈ കഥാപാത്രങ്ങളുടെ ജീവിതത്തിൽ സംഭവിക്കുന്ന ചില കാര്യങ്ങൾ, അവ എങ്ങിനെ ഇവരുടെ ഭാവിയിൽ മാറ്റം വരുത്തുന്നു എന്നതൊക്കെ മനോഹരമായി ചിത്രം അവതരിപ്പിക്കുന്നു. ഒരു ശരാശരി ജാപ്പനീസ് അനിമെയിൽ നിന്നും പ്രതീക്ഷിക്കാവുന്ന വകകൾ എല്ലാം ഈ ചിത്രത്തിൽ കാണാൻ കഴിയും, മികച്ചത് എന്നോ യുവർ നെയിമിന്റെ ലെവലിൽ എന്നോ പറയാൻ കഴിയില്ലെങ്കിൽ കൂടിയും നല്ലൊരു ചിത്രം തന്നെയാണ് വെതറിങ് വിത്ത് യു. ജപ്പാന്റെ ഒഫിഷ്യൽ ഓസ്കാർ എൻട്രി ആയ ചിത്രം, ഇന്ത്യയിൽ റിലീസ് ആവുന്ന ആദ്യ അനിമേയാണ് എന്ന പ്രത്യേകത കൂടിയുണ്ട്.

Verdict : Very Good

DC Rating : 80/100

622. Maleficent - Mistress Of Evil (2019)

Director : Joachim Ronning

Genre : Fantasy

Rating : 7/10

Country : USA

Duration : 119 Minutes

🔸മാലഫീസെന്റ് എന്ന സീരീസിലെ ആദ്യ ഭാഗം പുറത്തിറങ്ങിയത് ഉദ്ദേശം ഒരു ആറ് വർഷങ്ങൾക്ക് മുൻപാണ്, ഒരു നെഗറ്റിവ് ടച് ഉള്ള ടൈറ്റിൽ കഥാപാത്രത്തെ നല്ല തോതിൽ തന്നെ ആഞ്‌ജലീന ജോളി സ്‌ക്രീനിൽ എത്തിച്ചതും ദോഷം പറയാനില്ലാതെ വെറുതെ കണ്ടിരിക്കാവുന്ന ഒരു കഥയും എല്ലാം ഈ പ്രസ്തുത ആദ്യ ഭാഗത്ത് നമ്മൾ കണ്ടതാണ്. വലിയ താല്പര്യം ഒന്നും അന്നൗൻസ്മെന്റിൽ രണ്ടാം ഭാഗത്തോട് തോന്നിയില്ലാ എങ്കിൽ കൂടിയും മിഷേൽ ഫെയ്‌ഫറിന്റെ കാസ്റ്റിങ്ങും, (അത് തന്നെ വില്ലൻ കഥാപാത്രമായി) കഥയെ ഒരല്പം ഡാർക്ക് ഷെയ്‌ടോടെ ആയിരിക്കും അവതരിപ്പിക്കുക എന്ന സ്റ്റുഡിയോ സമീപനവും അറ്റൻഷൻ നേടി കഴിഞ്ഞിരുന്നു.

🔸ചിത്രം ഡാർക്ക് ആയിരിക്കും എന്ന സ്റ്റുഡിയോയുടെ ഉറപ്പിനെ ന്യായീകരിക്കും വിധമാണ് ചിത്രത്തിന്റെ ആരംഭം, അമൂല്യമായ വസ്തു തേടി മൂന്ന് പേർ കാട്ടിൽ എത്തുന്നതും തുടർന്നുള്ള സീക്വൻസും ശേഷമുള്ള രംഗങ്ങളും ഒരു ഹൊറർ വൈബ് പകരുന്നുണ്ട്, എന്നാൽ പിന്നീടങ്ങോട്ട് ഇത് നിലനിർത്തിയോ എന്ന കാര്യം സംശയമാണ്, വമ്പൻ ടോണൽ ഷിഫ്റ്റുകൾ അല്ലെങ്കിലേ ചിത്രത്തിന്റെ സന്തത സഹചാരി ആയി മാറുന്നുണ്ട് താനും. ഇവിടെ നിന്നുമാണ് നമ്മൾ കഥയിലേക്ക് കടക്കുന്നത്, ജോളിയുടെ ടൈറ്റിൽ കഥാപാത്രവും എൽ ഫാനിങ്ങിന്റെ ഒറോറ എന്ന കഥാപാത്രവും തമ്മിലുള്ള ബന്ധവും മാതൃസ്നേഹവും എല്ലാം തന്നെയാണ് ഈ ചിത്രത്തിന്റെയും ബേസിക് ത്രെഡ്.

🔸ഫിലിപ്പ് എന്ന രാജകുമാരനുമായി കല്യാണത്തിന് ഒറോറ തയാറെടുക്കുന്നതും അവളുടെ അമ്മയുടെ സ്ഥാനത്ത് ചടങ്ങിൽ സന്നിഹിതയാകുവാൻ മാലെഫിസെന്റ് മടങ്ങി വരുന്നതും, ഈ രണ്ട് കഥാപാത്രങ്ങൾക്കും ഫെയ്‌ഫർ അവതരിപ്പിക്കുന്ന രാജ്ഞിയായ ഇൻഗ്രിസ് എന്ന കഥാപാത്രത്തെ ഡീൽ ചെയ്യേണ്ടി വരുന്നതുമെല്ലാമാണ് ഈ രണ്ടാം ഭാഗ ചിത്രത്തിന്റെ കഥ. കൂർമ്മ ബുദ്ധിയായ ഒരാളാണ് ഇൻഗ്രിസ്, ചിരിച്ച് കൊണ്ട് കഴുത്തറക്കുന്ന ടൈപ്പ് ഒരു കഥാപാത്രം, ഇത് പോലൊരു കഥാപാത്രത്തെ മിഷേൽ ഫെയ്‌ഫർ അവതരിപ്പിക്കുന്നത് കാണാൻ നന്നായിരുന്നെങ്കിലും അവസാനത്തോട്ടൊക്കെ കാര്യമായി ഒന്നും ചെയ്യാനില്ലാത്തത് പോലെ തോന്നിയത് മോശം തന്നെ, വെയ്‌സ്റ്റഡ് ഓപ്പർച്യുണിറ്റി എന്നൊക്കെ പറഞ്ഞ് വിടാം.

🔸അറോറ എന്ന കഥാപാത്രമായി എൽ ഫാനിങ് നന്നായിരുന്നു, അർഹിക്കുന്ന തോതിലുള്ള നിസ്സഹായതയും കൺഫ്യുഷനും എല്ലാം പ്രകടം ആയിരുന്നു. ടൈറ്റിൽ കഥാപാത്രമായി ആഞ്‌ജലീന ജോളി ശ്രദ്ധ പിടിച്ചെടുക്കുന്ന പ്രകടനവും ചേഷ്ടകളും കാഴ്ചവെച്ചു, സൂക്ഷ്മമായ രീതിയിലുള്ള വികാര പ്രകടനങ്ങളും മറ്റും കഥാപാത്രവും സിനിമയും അർഹിക്കുന്നത് തന്നെ ആയിരുന്നു, ഒരു രീതിയിൽ പറയുക ആണെങ്കിൽ സേവിങ് ഗ്രെയ്‌സ് എന്നൊക്കെ പറയാം, സിനിമയുടെ ഹൈലൈറ്റും ഇത് തന്നെ. നല്ലത് എന്ന് തോന്നിച്ച ഇഫക്ടുകളും, സ്കോറും, ചെറുതെങ്കിലും മോശമല്ലാത്ത ചിവറ്റൽ എജിയോഫോറിന്റെ കഥാപാത്രവും കൂടി ചേരുമ്പോൾ പറയാനുള്ള പോസിറ്റീവുകളെല്ലാം തീരുകയാണ്.

🔸ഈ ചിത്രം എവിടേക്കാണ് നീങ്ങുന്നത്, എന്താണ് ഉന്നം വെക്കുന്നത് എന്നതൊക്കെ ഏറെക്കുറെ ആദ്യ പത്ത് ഇരുപത് മിനിറ്റുകളിൽ നിന്നും മനസിലാവും, തുടർന്ന് കാണാതെ ഇറങ്ങിയാലും ആ ഊഹിച്ച പ്ലോറ്റ്ലൈനിൽ നിന്നും ലവലേശം വ്യതി ചലിക്കുന്നുമില്ല. പീറ്റർ എന്ന കഥാപാത്രം ഏറെക്കുറെ സിനിമയുടെ തന്നെ സിമ്പോളിക്കൽ ആയ പ്രതീകമാണ്, പലയിടത്തും ബോർ ആകുന്ന വലിച്ച് നീട്ടലിന്റെ പ്രതീകം. അനാവശ്യമായ പല കേടുപാടുകളും മാറ്റി അറോറ, മാലെഫീസെന്റ്, ഇൻഗ്രിസ് എന്നിവരെ ഫോക്കസ് ചെയ്ത് ഒരു ചിത്രമായിരുന്നു ഇതെങ്കിൽ കുറച്ച് കൂടി എന്ജോയബിൾ ആയേനെ. തിയേറ്ററിൽ കാണണം എന്നൊന്നും പറയാനില്ല, ആദ്യ ചിത്രം ഇഷ്ടപ്പെട്ടെങ്കിൽ ഡിവിഡി വരുമ്പോൾ ഒന്ന് കാണാം, അത്ര മാത്രം.

Verdict : Below Average

DC Rating : 48/100

621. The Human Condition Part 2 - Road To Eternity (1959)

Director : Masaki Kobayashi

Genre : Drama

Rating : 8.5/10

Country : Japan

Duration : 182 Minutes

🔸ഒരു സിനിമാ ട്രിലോജിയിലെ ഏറ്റവും പ്രാധാന്യം ഉള്ള ഭാഗം രണ്ടാമത്തേത് ആണെന്ന് പലപ്പോഴും തോന്നിയിട്ടുണ്ട്. തുടക്കത്തിനോട് നീതി പുലർത്തുക, അവസാനത്തിന് അരങ്ങ് ഒരുക്കുക എന്നീ ശ്രമകരമായ ദൗത്യമാണ് രണ്ടാം ഭാഗങ്ങൾക്ക് ഉള്ളത്, കഥയെ സംബന്ധിച്ച് വ്യക്തമായൊരു തുടക്കവും ഒടുക്കവും ലഭിച്ചേക്കില്ല എന്നത് മുകളിൽ സൂചിപ്പിച്ച ദൗത്യത്തിന്റെ കാഠിന്യം വർധിപ്പിക്കുന്നെ ഉള്ളൂ താനും. എന്നാൽ ഇവിടെ ജയിക്കുക ആണെങ്കിൽ നിലവാരത്തിന്റെ കാര്യത്തിൽ അത്‌ വലിയൊരു നേട്ടം തന്നെയാണ് എന്ന് എമ്പയർ സ്‌ട്രൈക്സ് ബാക്ക് പോലെയുള്ള ചിത്രങ്ങൾ തെളിയിച്ചിട്ടുണ്ട്, ഇവിടെ റോഡ് റ്റു ഏറ്റെർനിറ്റിയും ആ വിഭാഗത്തിൽ പെടും.

🔸ഒരു നീണ്ട കഥയുടെ മധ്യഭാഗമാണ് രണ്ടാം ഭാഗമായ റോഡ് റ്റു ഏറ്റെർനിറ്റി പറയുന്നത്, ഇതിനെകുറിച്ച് ഡീറ്റൈൽ ആയി പറയുന്നത് ഒന്നാം ഭാഗത്തെ ക്ളൈമാക്സിനും മൂന്നാം ഭാഗത്തിന്റെ തുടക്കത്തിനും സ്പോയ്ലർ ആയതിനാൽ കാര്യങ്ങൾ സിംപിൾ ആക്കി വെക്കാം. കാജി എന്ന നമ്മുടെ കേന്ദ്ര കഥാപാത്രത്തിന്റെ ലൈഫിലെ അടുത്ത സ്റ്റേജ് ആണ് ഈ ഭാഗം പറയുന്നത്, പട്ടാളത്തോടും മറ്റും വിമുഖത കാണിച്ച് മാറി നിന്ന ആദ്യ ഭാഗത്തെ കാജിയിൽ നിന്നും സൈനികനായ കാജിയിലേക്കുള്ള ദൂരം വളരെ വലുത് തന്നെയാണ്.

🔸സേനയിലെ വേർതിരിവുകൾ, ക്രൂരതകൾ, ആ കാലഘട്ടത്തിലെ ജാപ്പനീസ് പരിതഃസ്ഥിതികൾ, ലെഫ്റ്റിസ്റ്റ് ചിന്തകളും അതിനോട് വെച്ച് പുലർത്തുന്ന സമീപനവും എല്ലാത്തിനും ഉപരി യുദ്ധ മുഖത്തെ ഭീതി ജനകമായ സംഭവങ്ങളും എല്ലാം കാജി എന്ന കഥാപാത്രത്തിന്റെ വ്യൂ പോയിന്റിലൂടെ ചിത്രം കാണിച്ച് തരുന്നുണ്ട്. കാജിയോടൊപ്പം തന്നെ ആദ്യ ഭാഗത്തെ നായികാ കഥാപാത്രമായ മിഷീകോയും ശ്രദ്ധേയമായ ഒരു ഭാഗം അവതരിപ്പിക്കുന്നുണ്ട്, അവരുടെ കഥയിലും വളരെ പ്രസക്തമായ ഒരു തുടർച്ചയാണ് ഈ ചിത്രം.

🔸വ്യക്തിപരമായി ഏറ്റവും ഇഷ്ട്ടപ്പെട്ട സിനിമാ ത്രിലോഗിയിൽ ഒന്നാണ് ഹ്യുമൻ കണ്ടീഷൻ, ഏറ്റവും ഇഷ്ടപ്പെട്ടത് എന്ന് പറഞ്ഞാലും തെറ്റില്ല. കാജി എന്ന സിംപിളായ കഥാപാത്രത്തിന്റെ കഥയും വ്യക്തിത്വ വികസനവും എല്ലാം നല്ല രീതിയിൽ ചിത്രം കൈകാര്യം ചെയ്യുന്നുണ്ട്. സിമ്പിൾ എന്ന് പുറമെ നിന്ന് തോന്നുമെങ്കിൽ കൂടിയും ഇതിനേക്കാൾ മികച്ച രീതിയിൽ ഉള്ളൊരു അവതരണവും കോംപ്ലക്സ് ആയ കഥാപാത്രങ്ങൾ സൃഷ്ടിക്കുക എന്നതും അത്ര എളുപ്പമുള്ള കാര്യമായി തോന്നിയിട്ടില്ല, അത് കൊണ്ട് തന്നെ മസാകി കൊബായാഷിയുടെ ഏറ്റവും മികച്ച വർക്ക് ആയാണ് ഹ്യുമൻ കണ്ടീഷൻ അനുഭവപ്പെട്ടത്.

🔸ഈ ഡിസൻഷൻ റ്റു മാഡ്‌നസ് ടൈപ്പ് ചിത്രങ്ങൾ വളരെ താല്പര്യം ഉള്ളവ ആയതിനാലും ആന്റി വാർ എലെമെന്റ്സ് നന്നായി അവതരിപ്പിച്ചതിനാലും ആ തോതിലും ഒരുപാട് ആസ്വദിക്കാൻ പറ്റി ഹ്യുമൻ കണ്ടീഷൻ. ഒൻപത് മണിക്കൂർ ഉള്ള ഒറ്റ പ്രിന്റായിട്ടോ അല്ലെങ്കിൽ മൂന്ന് ഭാഗങ്ങളായി കട്ട് ചെയ്ത വേർഷൻ ആയിട്ടോ കാണാവുന്നതാണ്, വ്യക്തിപരമായി കട്ട് ചെയ്ത വേർഷൻ സജസ്റ്റ് ചെയ്യും, കാരണം കഥ ഒന്ന് തന്നെ ആണെങ്കിലും ആദ്യ രണ്ട് ഭാഗങ്ങളും പല രീതിയിലും വിഭിന്നമായി തോന്നി, പ്രത്യേകിച്ചും കൈകാര്യം ചെയ്യുന്ന വിഷയങ്ങൾ ഒക്കെ നോക്കുമ്പോൾ. സിനിമയെ കുറിച്ച് ഒറ്റ വാക്കിൽ പറയാൻ ആണെങ്കിൽ ചോദ്യം ഏതും ഇല്ല, മസ്റ്റ് വാച്ച്‌ തന്നെ.

Verdict : Must Watch

DC Rating : 96/100

620. El Camino (2019)

Director : Vince Gilligan

Genre : Crime

Rating : --/10

Country : USA

Duration : 122 Minutes

🔸ജെസ്സി പിങ്ക്മാനെ നമ്മൾ അവസാനം കണ്ടത് ബ്രെയ്ക്കിങ് ബാഡ് സീരീസിന്റെ ഫൈനൽ എപ്പിസോഡിലാണ്. അത്രയും കാലം നേരിട്ട പീഡനത്തിനും തടങ്കലിനും ഒടുവിൽ മോചനം ലഭിച്ചപ്പോൾ സന്തോഷവും സങ്കടവും എല്ലാം ചേർന്നൊരു വികാരത്തോടെ അയാൾ അകലേയ്ക്ക് മറയുന്നിടത്താണ് സീരീസ് അവസാനിച്ചത്. ബ്രെയ്ക്കിങ് ബാഡ് സീരീസിലെ മറ്റൊരു പ്രധാന കഥാപാത്രമായ വാൾട്ടർ വൈറ്റിന്റെ കാര്യത്തിൽ ഒരു ഡെഫിനിറ്റ് ആയ എൻഡിങ് സീരീസ് നൽകിയിട്ടുണ്ട് എങ്കിലും ജെസ്സിയുടെ കാര്യത്തിൽ അത് ഉണ്ടായിട്ടില്ല. ഈ ഒരു കാര്യമാണ് സീരീസ് അവസാനിച്ച് ഏകദേശം ആറ് വർഷങ്ങൾക്ക് ശേഷം ഈ ചിത്രത്തിലേക്ക് കാര്യങ്ങൾ കൊണ്ട് ചെന്ന് എത്തിച്ചിരിക്കുന്നത്.

🔸സീരീസ് കണ്ട കാലത്ത് പൊതുവെ രണ്ട് സാധ്യതകളാണ് മനസ്സിൽ ഉണ്ടായിരുന്നത്, ഒന്നും ഏറ്റവും സാധ്യത ഉള്ളതുമായ വേർഷനിൽ ജെസ്സി പിങ്ക്മാൻ പോലീസിന്റെ കയ്യിൽ ചെന്ന് പെട്ടിരിക്കും എന്നാണ് കരുതിയത്. വാൾട്ടർ വൈറ്റിനോടൊപ്പം ചെയ്ത് കൂട്ടിയ തെറ്റുകളുടെ പരിണിതഫലം അനുഭവിച്ച് പിന്നീടുള്ള ജീവിതത്തിന്റെ വലിയൊരു ശതമാനം അയാൾ ജയിലിൽ കഴിച്ച് കൂട്ടിയിരിക്കണം. രണ്ടാമത്തേതും സംഭവിക്കണം എന്ന് ഏറ്റവും ആഗ്രഹിച്ചതുമായ സാധ്യത അയാൾ പുതിയൊരു തുടക്കം തന്റെ ജീവിതത്തിൽ കൈവരിച്ചിട്ടുണ്ടാവും എന്നതാണ്, ആരാലും അറിയപ്പെടാത്ത മറ്റൊരു നാട്ടിൽ അയാൾ സമാധാനം എന്നത് നേടിയിരിക്കും എന്നായിരുന്നു പ്രതീക്ഷ. എൽ കമിനോ എന്ന ചിത്രം പോവാൻ പോകുന്ന റൂട്ട് ഇവയിൽ ഏതെങ്കിലും ആയിരിക്കുമോ എന്ന കാര്യത്തിൽ അത്യാവശ്യം ടെൻഷൻ ഉണ്ടായിരുന്നു എന്ന് പറയാം.

🔸സീരീസ് ഫിനാലെ കഴിഞ്ഞ ശേഷം ഏതാനും മിനിട്ടുകൾക്ക് അപ്പുറമാണ് ചിത്രം ആരംഭിക്കുന്നത്. ജെസ്സി പിങ്ക്മാൻ സ്വാതന്ത്ര്യം നേടി ഒരുതരം ഉന്മാദാവസ്ഥയിലാണ്. എന്നാൽ താമസിയാതെ തന്നെ റിയാലിറ്റിയിലേക്ക് മടങ്ങി വരാൻ അയാൾ പ്രേരിപ്പിക്കപ്പെടുകയാണ്. അയാളുടെ തലയ്ക്ക് വില പറഞ്ഞും, ഒരുപാട് ചോദ്യങ്ങൾക്ക് ഉത്തരം തേടിയും പോലീസ് സേന പരക്കം പായുന്നുണ്ട്. കഷ്ടിച്ച് രക്ഷപ്പെട്ട ജെസ്സി തന്റെ പഴയ സുഹൃത്തുക്കളായ സ്‌കിന്നി പീറ്റിന്റെയും ബാഡ്ജെറിന്റെയും വീട്ടിൽ അഭയം തേടുകയാണ്.

🔸നാട്ടിൽ നിൽക്കുക എന്നത് തീർത്തും അപ്രസക്തമായ കാര്യം ആയതിനാൽ ഏത് വിധേനയും രക്ഷപ്പെടാനുള്ള ഒരു മൈൻഡിലാണ് ജെസ്സി. എന്നാൽ പോലീസ് എന്ന പ്രശ്നത്തെക്കാളും അയാളെ വേട്ടയാടുന്നത് സ്വന്തം മാനസികാവസ്ഥയാണ്, കുറെ നാളുകളായുള്ള തടവും പീഡനവും അയാളുടെ മാനസികനിലയെ ആകെ താറുമാർ ആക്കിയിട്ടുണ്ട്, പേടി അയാളെ കാർന്ന് തിന്നുകയാണ്. തുടർന്ന് ജെസ്സി പിങ്ക്മാന് എന്ത് സംഭവിക്കും എന്നതാണ് ചിത്രം പറയുന്നത്. ഒരു ആന്തോളജി സ്റ്റൈലിൽ ജെസ്സിയുടെ ജീവിതത്തിലെ വിവിധ സ്‌റ്റെയ്‌ജുകളിലെ സംഭവങ്ങൾ ചിത്രം കാണിക്കുന്നുണ്ട്, അവ അയാളിൽ വരുത്തുന്ന മാറ്റങ്ങളും.

🔸മുകളിൽ സൂചിപ്പിച്ച സംഭവങ്ങൾ വർത്തമാന കാലത്ത് അയാൾ എടുക്കുന്ന തീരുമാനങ്ങളെ ഏതെല്ലാം രീതിയിൽ ബാധിക്കുന്നു എന്നൊക്കെ ചിത്രം ഒരു രൂപം തരുന്നുണ്ട്. സീരീസിലെ പല പഴയ കഥാപാത്രങ്ങളും ചെറുതും വലുതുമായ സാന്നിധ്യങ്ങളായി വന്ന് പോവുന്നുണ്ട്, പ്രായം ഇവരിൽ പലരെയും ബാധിച്ചതായി തോന്നി എന്നതൊഴിച്ചാൽ പരാതികൾ ഒന്നുമില്ല. സീരീസിൽ നിന്ന് വിഭിന്നമായി ജെസ്സിയുടെ കഥയ്ക്ക് ഒരു എൻഡിങ് നൽകാൻ ചിത്രം ശ്രമിച്ചിട്ടുണ്ട്, ഒരു തൃപ്തി നൽകുന്ന എൻഡിങ്. കൂടുതൽ പറയുന്നില്ല, എൽ കമിനോ നല്ലൊരു ചിത്രമാണ്, കാണാൻ ശ്രമിക്കുക.

Verdict : Very Good

DC Rating : 80/100

619. Dead Don't Die (2019)

Director : Jim Jarmusch

Genre : Comedy

Rating : 5.5/10

Country : USA

Duration : 103 Minutes

🔸ഈ വർഷത്തിന്റെ തുടക്കത്തിൽ പ്രിന്റ് കയ്യിൽ കിട്ടാനായി ഏറ്റവും കാത്തിരുന്ന ചിത്രങ്ങളിൽ ഒന്നായിരുന്നു ഡെഡ് ഡോണ്ട് ഡൈ, കാരണങ്ങൾ അനവധി ആയിരുന്നു ഈ കാത്തിരിപ്പിന്. ഒൺലി ലവേഴ്സ് ലെഫ്റ്റ് അലൈവ്, നൈറ്റ് ഓൺ എർത്, ഡൗൺ ബൈ ലോ പോലെയുള്ള ഇഷ്ട്ട ചിത്രങ്ങളുടെ സംവിധായകനായ ജിം ജാർമുഷിന്റെ പുതിയ ചിത്രം, എവർഗ്രീൻ ആക്ട്രസ് ആയ റ്റിൽഡ സ്വിണ്ടൻ, ബിൽ മുറെ, ആദം ഡ്രൈവർ, ഡാനി ഗ്ലോവർ തുടങ്ങി പ്രതിഭാധനരായ നടന്മാർ സ്ക്രീനിലും, മേൽ പറഞ്ഞ കാരണങ്ങളിൽ ഏറ്റവും പ്രാധാന്യം അർഹിക്കുന്നത് ഈ രണ്ടെണ്ണം തന്നെ.

🔸ഒരു സോംബി ചിത്രമാണ് ഡെഡ് ഡോണ്ട് ഡൈ, അല്ലെങ്കിൽ അങ്ങനെ ആവും എന്നാണ് പ്രതീക്ഷിച്ചിരുന്നത്. ഇവിടെ സംവിധായകൻ ഉദ്ദേശിച്ചത് ആ വിഭാഗത്തിന്റെ മോക്കിങ്ങോ അല്ലെങ്കിൽ വേറെന്തെങ്കിലും രീതിയിൽ ഉള്ള ഐറണി ആണോ എന്നതൊന്നും വ്യക്തമല്ല, ഇതിൽ രണ്ടിലും പെടാത്ത ഏതെങ്കിലും സങ്കര ഇനം ആവാനും സാധ്യതയുണ്ട്. പക്ഷെ മനസ്സിൽ തോന്നിയത് ഇല്ലത്ത് നിന്ന് ഇറങ്ങുകയും ചെയ്തു, അമ്മാത്ത് ഒട്ട് എത്തിയതും ഇല്ല എന്ന പഴയ ബനാന ടോക്ക് ആണ്, അതാവാനാണ് സാധ്യതയും. എതിർ വാദത്തിന് കാര്യമായ തെളിവുകൾ ഒന്നും ഇല്ലാത്തതിനാലും മറ്റ് വകകളുടെ നിലവാരം വലിയ പ്രത്യാശ നൽകാത്തതിനാലും ഇങ്ങനെ അനുമാനിക്കാം.

🔸കഥയിലേക്ക് കടക്കുക ആണെങ്കിൽ സെന്റർവിൽ എന്ന ചെറിയൊരു നഗരമാണ് നമ്മുടെ കഥാ പശ്ചാത്തലം. ക്ലിഫ് റോബർട്സൺ, റോണി പീറ്റേഴ്‌സൺ എന്നിവരാണ് നഗരത്തിലെ പോലീസ് ഉദ്യോഗസ്ഥർ. ചെറുകിട ഭൂമി പ്രശനം തൊട്ട് കോഴിയെ കട്ട കേസ് വരെയുള്ള എല്ലാം ഇവരാണ് ഡീൽ ചെയ്യുന്നത്, ഇരുവർക്കും സഹായി ആയി മിന്റി മോറിസൺ എന്നൊരു സഹപ്രവർത്തക കൂടിയുണ്ട് ഓഫിസിൽ. ഇങ്ങനെ ചെറിയ ചില കുറ്റകൃത്യങ്ങളും മറ്റുമായി പൊയ്ക്കൊണ്ടിരുന്ന ആ നഗരത്തിൽ ചില വിചിത്ര സംഭവങ്ങൾ അരങ്ങേറുന്നതും അത് ഒരു സോംബി ഔട്‍ബ്രെയ്ക്കിന് വഴി വെക്കുന്നതും ഒക്കെയാണ് കഥ, ലോജിക്കിന്റെ അംശം പോലും പ്രതീക്ഷിക്കേണ്ടതില്ല.

🔸നല്ലൊരു കാസ്റ്റ് ഉണ്ട് ചിത്രത്തിൽ, അവരെ കാര്യമായി ഉപയോഗിച്ചോ എന്നതൊക്കെ സംശയമാണ്. ഒരുപാട് ആംഗിളിൽ നിന്നും കഥപറയാൻ ശ്രമിച്ചിട്ടുണ്ട്, അതും എത്രത്തോളം ഫലവത്തായി എന്നത് സംശയമാണ്. കുറച്ച് പ്ലോട്ട് പോയിന്റുകൾ തുടക്കത്തിന് ശേഷം എവിടെയൊക്കെയോ വെച്ച് കീറി മുറിച്ച് വെട്ടി കളഞ്ഞൊരു ഫീൽ ചിത്രത്തിലുണ്ട്. ഒരുപക്ഷെ സംവിധായകൻ തന്റെ കരിയറിൽ ഏറ്റവും അശ്രദ്ധമാം വിധം ചെയ്തത് ഈ ചിത്രമായിരിക്കും. അപ്പൊ പറഞ്ഞ് വന്നത് ചിത്രം സമ്പൂർണ്ണ ദുരന്തം ആണ് എന്നൊരു സംശയം വന്നെങ്കിൽ അല്ലേയല്ല, ഡംബ് ഫൺ എന്ന നിലയിൽ അത്യാവശ്യം ആസ്വദിച്ചു ചിത്രം, അതിൽ കൂടുതൽ ഒന്നും തന്നെയില്ല.

🔸ഏറ്റവും ഇഷ്ട്ടപ്പെട്ട നടിമാരിൽ വ്യക്തിപരമായി എന്നും മുന്നിൽ തന്നെ പ്രതിഷ്ഠിക്കാറുള്ള നടിയാണ് റ്റിൽഡാ സ്വിണ്ടൻ, അവരെ ഒരു സമുറായി സ്വാർഡിൽ ബാഡാസ്സ് മോഡിൽ കാണാൻ കഴിഞ്ഞു എന്നതിൽ ചെറിയൊരു സന്തോഷം, ആ കഥാപാത്രം പോലും എന്താണ് ഏതാണ് എന്നൊരു ധാരണ ചിത്രം നൽകുന്നില്ല, അത്‌ വേറെ കാര്യം. പറഞ്ഞ് വന്നത് എന്താണെന്നാൽ ഒരു തരത്തിലും സജസ്റ്റ് ചെയ്യാനുള്ള ഒന്നും ചിത്രത്തിൽ കാര്യമായി കണ്ടില്ല, ഡംബ് ഫൺ എന്ന് മുകളിൽ സൂചിപ്പിച്ച അവസ്ഥാന്തരത്തിൽ കണ്ടേക്കുക, ചിലപ്പോൾ ഒരു താല്പര്യം തോന്നിയേക്കും.

Verdict : Below Average

DC Rating : 50/100

618. Breaking Bad (2008)

Creator : Vince Gilligan

Genre : Crime

Rating : 9.5/10

Seasons : 5

Episodes : 62

Country : USA

Duration : 43 - 58 Minutes

🔸ടീവി സീരീസുകളുടെ കാര്യത്തിൽ എങ്ങനെ ഒക്കെ ചർച്ച നടന്നാലും, അത് ഏതെല്ലാം വഴിയിലൂടെ കടന്ന് പോയാലും ഏതെങ്കിലും ഒരു പോയിന്റിൽ ബ്രെയ്ക്കിങ് ബാഡ് എന്ന സീരീസുമായി തട്ടിച്ച് നോക്കപ്പെടാറുണ്ട്. കുറച്ച് കൂടി ലളിതമായി പറയുക ആണെങ്കിൽ ഈ വിഭാഗത്തിലെ ഒരു അളവ് കോലാണ് ബ്രെയ്ക്കിങ് ബാഡ്, ലോകത്താകമാനം ആരാധകരുള്ള സീരീസ് ഇന്നേവരെ പുറത്തിറങ്ങിയതിൽ എറ്റവും മികച്ചതാണ് എന്നൊരു അഭിപ്രായം പൊതുവെ ഉണ്ട്, വ്യക്തിപരമായി അങ്ങനെ തോന്നിയിട്ടില്ലെങ്കിൽ കൂടിയും കാണാവുന്ന, കണ്ടിരിക്കേണ്ട ഒന്നാണ് വാൾട്ടർ വൈറ്റിന്റെയും ജെസ്സീ പിങ്ക്മാന്റെയും കഥ. കഥ എന്നതിനേക്കാൾ മടങ്ങി വരവ് ഇല്ലാത്ത യാത്ര എന്ന് വിശേഷിപ്പിക്കാം രണ്ട് കഥാപാത്രങ്ങളെയും അടിസ്ഥാനമാക്കിക്കൊണ്ട്.

🔸ബ്രെയ്ക്കിങ് ബാഡോട് കൂടി സീരീസുകളുടെ പ്രചാരത്തിലും, സീരീസുകളോടുള്ള കാഴ്ചക്കാരന്റെ വീക്ഷണത്തോടും മാറ്റം വന്നിട്ടുണ്ടെന്ന് പൊതുവെ പറഞ്ഞ് കേട്ടിട്ടുണ്ട്. വസ്തുതകൾ വെച്ച് പരിശോധിക്കുക ആണെങ്കിൽ പോലും അത് യാഥാർഥ്യമാണ്, ഒരു ബൂം പീരീഡിലേക്ക് ഈ വിഭാഗം കാലെടുത്ത് വെച്ചത് ബ്രെയ്ക്കിങ് ബാഡ് ടെലികാസ്റ്റ് തുടങ്ങിയ കാലത്താണ്. പറഞ്ഞ് വന്നത് എന്താണെന്ന് വെച്ചാൽ ആ കാലത്ത് അത്ര പ്രശസ്തി ആർജിച്ചിട്ടില്ലാത്ത ഒരു പിടി നടീനടന്മാരെയും വലിയ ചിലവില്ലാത്ത പരിസരവും ഒക്കെ ചേർത്ത് വിൻസ് ഗില്ലിഗൻ തയാറാക്കിയ ഈ സൃഷ്ടിക്ക് പ്രത്യക്ഷമോ പരോക്ഷമോ ആയൊരു ഇമ്പാക്റ്റ് ഈ ബൂമിൽ ഉണ്ട് എന്നത് തന്നെയാണ്.

🔸ഇനി നമുക്ക് കഥയിലേക്ക് കടക്കാം, കെമിസ്ട്രി അധ്യാപകനായ വാൾട്ടർ വൈറ്റ് ചില വ്യക്തിപരമായ പ്രശ്നങ്ങൾ കാരണവും പണം എന്ന കടമ്പ കാരണവും ബാഹ്യ സമ്മർദ്ദങ്ങൾ കാരണവും മെത്ത് ബിസിനസിലേക്ക് കടക്കുന്നതും, പിന്നീട് സ്വകാര്യവും സുരക്ഷിതവും ആയ പഴയ ജീവിതത്തിലേക്ക് മടങ്ങി വരാൻ കഴിയാതെ പോവുന്നതും, ഒടുവിൽ ആ യാത്ര അയാളെ ഹെയ്‌സൺബെർഗ് എന്ന ക്രൈം ലോർഡായി മാറ്റുന്നതും എല്ലാമാണ് കഥ. സൂചിപ്പിച്ചത് പോലെ തന്നെ അറുപത്തി രണ്ട് എപ്പിസോഡുകൾ നീണ്ട് നിൽക്കുന്ന ഒരു കാരക്റ്റർ ട്രാൻസ്ഫോർമേഷനും, അതിലും ഡീറ്റെയിൽഡ് ആയൊരു ക്യാരക്ടർ സ്റ്റഡിയും ആണ് ഈ സീരീസ്. വാൾട്ടർ വൈറ്റ് എന്ന കോംപ്ലക്സ് കഥാപാത്രത്തെ സ്‌ക്രീനിൽ അനശ്വരമാം വിധം അവതരിപ്പിച്ചിരിക്കുന്നത് നടൻ ബ്രയാൻ ക്രാൻസ്റ്റൻ ആണ്.

🔸ഈ യാത്രയിൽ ഉടനീളം വാൾട്ടർ വൈറ്റിന്റെ സന്തത സഹചാരിയാണ് ആരോൺ പോൾ അവതരിപ്പിക്കുന്ന ജെസ്സി പിങ്ക്മാൻ എന്ന കഥാപാത്രം. കൂട്ടുകെട്ടുകളും പ്രശ്നങ്ങളും എല്ലാം കാരണം ജീവിതം തന്നെ കൈവിട്ട് പോയ, ഈ നഷ്ടങ്ങളെല്ലാം നിസ്സഹായതയോടെ നോക്കി നിൽക്കേണ്ടി വരുന്ന ഒരു ദയനീയ കഥാപാത്രമാണ് അയാൾ. വാൾട്ടറിനോടൊപ്പം ഉള്ള യാത്രയിൽ ഒരുപാട് വേഷങ്ങൾ പിങ്ക്മാന് അണിയേണ്ടി വന്നിട്ടുണ്ട്, സുഹൃത്തിന്റെ തൊട്ട് ശത്രുവിന്റെ വരെ. അങ്ങേയറ്റം ദുർഘടമായ ഈ ബന്ധത്തിന്റെ പുറത്താണ് ബ്രെയ്ക്കിങ് ബാഡ് നിലനിൽക്കുന്നത് എന്ന് വേണമെങ്കിൽ പറയാം, ഇത് തന്നെയാണ് കഥയുടെ ബാക്ക് ബോണും.

🔸ഈ രണ്ട് ഫോക്കൽ കഥാപാത്രങ്ങൾക്ക് പുറമെ ഹാങ്ക് ഷ്റെയ്ദർ, ഗസ് ഫ്രിങ്, മൈക്ക് എഹർമൺട്രോട്, സ്‌കൈലാർ വൈറ്റ് തുടങ്ങി പരാമർശം അർഹിക്കുന്ന ചില കഥാപാത്രങ്ങ കൂടിയുണ്ട് സീരീസിൽ, എല്ലാവർക്കും നല്ല വ്യക്തിത്വങ്ങൾ കൂടിയുണ്ട്. എല്ലാവർക്കും ഇഷ്ട്ടപ്പെട്ട വാനോളം പുകഴ്ത്തുന്ന ചില കാര്യങ്ങൾ നമുക്ക് ഇഷ്ട്ടപ്പെടാത്ത ചില സംഭവങ്ങൾ ഉണ്ടാവാറുണ്ട്, ബ്രെയ്ക്കിങ് ബാഡ് അത്തരത്തിൽ ഒന്നാണ്. മോശം എന്നൊരു അഭിപ്രായം ഒരിക്കലും ഇല്ലെങ്കിലും ഒരു കണക്ഷൻ ഒരുകാലത്തും തോന്നിയിട്ടില്ല സീരീസിനോട്, മറ്റുള്ളവർക്ക് പറയാൻ ഉണ്ടാവുക വേറൊരു വേർഷൻ ആണെന്ന് ഉറപ്പുണ്ട്, അത് തന്നെയാണ് ഭൂരിപക്ഷ അഭിപ്രായവും. ബ്രെയ്ക്കിങ് ബാഡ് കാണാവുന്ന ഒരു സീരീസ് ആണ്, നല്ല രീതിയിലുള്ള കഥാ പുരോഗമനവും കഥാപാത്രങ്ങളും, കാണാൻ ശ്രമിക്കുക.

Verdict : Very Good

DC Rating : 80/100

617. Juror 8 (2019)

Director : Hong Seung-wan

Genre : Thriller

Rating : 7.1/10

Country : South Korea

Duration : 114 Minutes

🔸12 ആംഗ്രി മെൻ എന്ന ചിത്രം നമ്മളിൽ മിക്കവരും കണ്ടതാണ്, ഒരു കൊലപാതകവും അതിനെ തുടർന്നുള്ള അന്വേഷണവും കാരണം ഒരു വ്യക്തി ശിക്ഷ കാത്ത് കിടക്കുന്നതും ഈ വിഷയത്തിൽ ഒരു അന്തിമ തീരുമാനം എടുക്കാനായി ഒരു ജൂറി നിയമിതം ആവുന്നതും ഒക്കെയാണ് കഥ. ആ ജൂറിയിൽ ഒരാൾക്ക് തോന്നുന്ന വളരെ ചെറിയൊരു സംശയം ആ കേസിന്റെ ഗതി ഒന്നടങ്കം മാറ്റുന്നത് കണ്ട് ത്രിൽ അടിച്ചത് ഇന്നും മറക്കാൻ കഴിയാത്ത സിനിമാ ഓർമകളിൽ ഒന്നാണ്, ഈ കഥയുടെ മറ്റൊരു പതിപ്പാണ് ജൂറി 8 എന്ന കൊറിയൻ ചിത്രം. ആംഗ്രി മെന്നിനോളം ഒരു വിഭാഗത്തിലും കിട പിടിക്കുന്നില്ല എങ്കിലും ഈ ചിത്രം കൊള്ളാം.

🔸മുകളിൽ സൂചിപ്പിച്ചത് പോലെ തന്നെ ഒരു കൊലപാതകം അരങ്ങേറിയിട്ടുണ്ട്, അതും ഒരല്പം കോളിളക്കം സൃഷ്ട്ടിച്ച കുറ്റകൃത്യങ്ങളുടെ പട്ടികയിൽ ചേർക്കാവുന്ന ഒന്ന്. ഒരമ്മ കൊല്ലപ്പെട്ടിരിക്കുന്നു, പ്രതി സ്ഥാനത്ത് അവരുടെ മകൻ തന്നെയാണ്. കൊല്ലപ്പെട്ടിരിക്കുന്ന രീതി കുറച്ച് കൂടി മൃഗീയമാണ്, ഒരു മുട്ടി ഉപയോഗിച്ച് തലയ്ക്ക് അടിച്ച ശേഷം ഒൻപതാമത്തെ നിലയിൽ നിന്ന് താഴേയ്ക്ക് എടുത്ത് എറിയുക ആയിരുന്നു. തൽക്ഷണം മരിച്ച ആ സ്ത്രീയുടെ മരണ കാരണം മകൻ ആണെന്ന് തെളിയിക്കാൻ കാരണങ്ങൾ ഒട്ടനവധി ആയിരുന്നു.

🔸സാഹചര്യ തെളിവുകൾ, ശാസ്ത്രീയമായി തെളിഞ്ഞ കുറ്റകൃത്യം, കുറ്റവാളിയുടെ തന്നെ കൺഫെഷൻ, എല്ലാത്തിനും മേലെ കൊലപാതകം നേരിൽ കണ്ട ഒരു ദൃക്‌സാക്ഷിയും. ചുരുക്കി പറയുക ആണെങ്കിൽ എല്ലാ രീതിയിലും പൂർത്തിയായ, അധികാരികൾ ക്ളോസ് ചെയ്യാൻ തീരുമാനം എടുത്ത കേസ് ആണിത്. പക്ഷെ പ്രസ്തുത കേസിന് കൊറിയൻ കുറ്റാന്വേഷണ ചരിത്രത്തിലെ നാഴിക കല്ലാവാൻ ആയിരുന്നു വിധി. പുറം നാടുകളിലെ രീതി പിന്തുടർന്ന് ഒരു ജൂറി സമ്പ്രദായം കൊറിയൻ നേതൃത്വം ആലോചിച്ച് തുടങ്ങിയ കാലമായിരുന്നു അത്, ഈ രീതിയിൽ വിധി പറയാൻ ആദ്യമായി തിരഞ്ഞെടുത്തത് പ്രസ്തുത കേസും.

🔸നിയമ വ്യവസ്ഥയും ജനങ്ങളും തമ്മിലുള്ള അന്തരം കുറയ്ക്കുക എന്ന ഉദ്ദേശത്തിൽ സമൂഹത്തിന്റെ വിവിധ മേഖലകളിൽ ഉള്ള ഒരു കൂട്ടം ആളുകളെ ഉൾപ്പെടുത്തി ഒരു ജൂറി നിയോഗിക്കപ്പെടുകയാണ്. ഈ കഥാപാത്രങ്ങൾക്ക് ഒന്നും തന്നെ നിയമ വ്യവസ്ഥയിലും ഈ ചുറ്റുപാടുകളിലും യാതൊരു പരിചയവുമില്ല. അങ്ങനെ നമ്മുടെ മേൽ പറഞ്ഞ കേസ് ഇവരുടെ മുന്നിൽ എത്തുകയാണ്, ആദ്യമേ സൂചിപ്പിച്ചത് പോലെ തന്നെ ഇവരിൽ ഒരാൾക്ക് തോന്നുന്ന ചെറിയൊരു സംശയം കേസിനെ ആരും പ്രതീക്ഷിക്കാത്ത ഒരു തലത്തിലേക്ക് കൊണ്ടുപോവുകയാണ്. അത്യാവശ്യം ത്രില്ലിംഗ് ആയൊരു സ്റ്റോറി തന്നെയാണ് ചിത്രം പറയുന്നത്.

🔸ആൻഗ്രി മെൻ ചിത്രവുമായി സാമ്യതകൾ അനവധി ഉണ്ടെങ്കിലും കഥയുടെ പോക്കിലും, അവസാനത്തിലും എല്ലാം പ്രകടമായ വ്യത്യാസം കാണാനുണ്ട്. ഒരല്പം സ്ലോ ആയാണ് കഥ തുടങ്ങുന്നത് എങ്കിലും അര മണിക്കൂർ കഴിയുന്നിടത്ത് നിന്ന് ത്രില്ലിങ് മോഡിലേക്കും, അവിടുന്നങ്ങോട്ട് ഒരല്പം ഇമോഷണലായും മാറുന്നുണ്ട്. ആകെ മൊത്തം നല്ലൊരു പാക്കേജ് ആണ് ചിത്രം, പഴയ ചിത്രവുമായി താരമത്യം ഒന്നും അർഹിക്കുന്നില്ല എങ്കിലും കാണാനുള്ള വക ഒക്കെ ഉണ്ട് പടത്തിൽ. ആംഗ്രി മെൻ ചിത്രത്തിന്റെ ആരാധകർക്കും കോർട് റൂം ഡ്രാമ ഇഷ്ട്ടപ്പെടുന്നവർക്കും തീർച്ചയായും കാണാം.

Verdict : Very Good

DC Rating : 80/100

616. Joker (2019)

Director : Todd Philips

Genre : Superhero

Rating : 9/10

Country : USA

Duration : 124 Minutes

🔸ജോക്കറിനോളം പ്രശസ്തിയും പ്രചാരവും നേടിയൊരു കോമിക് ബുക് വില്ലൻ കഥാപാത്രം മറ്റൊന്ന് ഉണ്ടാവില്ല. ലോകത്താകമാനം ഉള്ള കാഴ്ചക്കാരുടെയും ആരാധകരുടെയും സ്നേഹാശിസ്സുകൾ നേടി കൊണ്ട് ഈ ഒരു കഥാപാത്രത്തിന്റെ തന്നെ അനവധി വേർഷനുകൾ ഇറങ്ങി കഴിഞ്ഞു. സെസാർ റോമെറോ തൊട്ട് ഇങ് ജൊവാക്വിൻ ഫീനിക്സ് വരെ ഒരുപാട് വേർഷനുകൾ, ഇതിനിടയിൽ തന്നെ എടുത്ത് പറയേണ്ട ജാക്ക് നിക്കോൾസണിന്റെയും, മാർക്ക് ഹാമിലിന്റെയും വേർഷനുകൾ പിന്നെ ഒരിക്കലും ഒഴിവാക്കാൻ കഴിയാത്ത ഹീത് ലെഡ്ജറുടെ അനശ്വരമായ വേർഷൻ. ഇവയിൽ എല്ലാം തന്നെ നമ്മൾ കഥ കണ്ടത് ബാറ്റ്മാന്റെ വീക്ഷണത്തിലൂടെയാണ്, ഇനി ഒരു വറൈറ്റിക്ക് ജോക്കറിന് എന്താണ് പറയാൻ ഉള്ളത് എന്ന് അയാളുടെ ഭാഗത്ത് നിന്ന് കേട്ടാലോ എന്ന ചിന്തയാണ് ഈ സോളോ ചിത്രത്തിൽ എത്തി നിൽക്കുന്നത്.

🔸ഒരു ഒറിജിൻ സ്റ്റോറി ആണ് ചിത്രം, ആർതർ ഫ്ലെക്ക് എന്ന തികഞ്ഞ പരാജയമായ സ്റ്റാൻഡ് അപ് കൊമേഡിയനിൽ നിന്നും ജോക്കർ എന്ന 'വില്ലൻ' കഥാപാത്രത്തിലേക്കുള്ള ദൂരം ആണ് ചിത്രം പറയുന്നത്. ഒന്നല്ല, ഒട്ടനവധി കാരണങ്ങളാണ് ആ മനുഷ്യനെ ഇൻസെയ്നിറ്റിയിലേക്ക് തള്ളി വിടുന്നത്, ഇവ എല്ലാം തന്നെ നല്ല വെടിപ്പായിട്ട് ചിത്രം കാണിക്കുന്നുമുണ്ട്. എല്ലാവർക്കും ചിത്രം കാണാൻ അവസരം ലഭിച്ചിട്ടില്ലാത്തതിനാൽ കഥ അവിടെ നിർത്താം, ബാക്കി കണ്ട് തന്നെ അറിയുക. ഒരു മോശം ദിവസം മതി, ഒരു മനുഷ്യനെ ഭ്രാന്തിലേക്ക് തള്ളി വിടാൻ എന്ന് മുൻപ് എങ്ങോ കണ്ട സിനിമയിലോ സീരീസിലോ മറ്റോ ഉള്ള സംഭാഷണത്തിന്റെ ദൃശ്യാവിഷ്‌കാരം ആണ് ചിത്രം.

🔸കാര്യങ്ങളിലേക്ക് കൂടുതലായി പോവുന്നതിന് മുന്നേ ഒരു ചെറിയ കാര്യം പറഞ്ഞിടാം, വൺസ് അപ്പോൺ എ ടൈം ഇൻ ഹോളിവുഡ്, അവേഞ്ചേഴ്‌സ് എൻഡ്ഗെയിം, ടോയ് സ്റ്റോറി 4, റോക്കെറ്റ്‌മാൻ എന്നീ ചിത്രങ്ങൾക്ക് ശേഷം ഈ വർഷം തിയേറ്ററിൽ കണ്ടതിൽ മസ്റ്റ് വാച്ച് എന്ന് ഉറപ്പിച്ച് പറയാൻ കഴിയുന്ന ഒന്നാണ് ഈ ചിത്രം, സംശയത്തിന് ഒരു ചെറിയ സാധ്യത പോലുമില്ല. ഇത്രയും സംപ്ത്രിപ്തി പകർന്ന, ആവേശം കൊള്ളിച്ച, ഇനി എന്ത് എന്ന ചോദ്യം ഉന്നയിച്ച വേറൊരു ചിത്രവും അടുത്ത് വന്നിട്ടില്ല. റിലീസിന് മുൻപ് എന്തായിരിക്കും ചിത്രം എന്നാണോ അണിയറ പ്രവർത്തകർ അവകാശപ്പെട്ടത്, ആ കോളത്തിൽ എല്ലാം ടിക്ക് മാർക്കും എ ഗ്രേഡും വാങ്ങി സിനിമ പാസ് ആയിട്ടുണ്ട്.

🔸സാസി ബീറ്റ്സിന്റെ കഥാപാത്രത്തിന് ഒരു പൂർണത കിട്ടിയില്ല എന്ന ചെറിയ പരാതി ഒഴിച്ചാൽ ബാക്കിയെല്ലാം പോസിറ്റിവുകളാണ്. അർത്ഥരും റോബർട്ട് ഡെനിറോയുടെ കഥാപാത്രവും തമ്മിലുള്ള ബന്ധവും കെമിസ്ട്രിയും എല്ലാം തന്നെ നന്നായിരുന്നു, അല്ല മികച്ചതായിരുന്നു. ഭ്രാന്തിലേക്ക് വീഴുന്ന, മനസ്സ് കൈവിട്ട് കൊണ്ടിരിക്കുന്ന ഒരു കഥാപാത്രത്തിന്റെ കഥ ആയതിനാൽ തന്നെ ഒരല്പം ഡിസ്റ്റർബിങ് ആവുന്നുണ്ട് ചിത്രം, ആ രംഗങ്ങൾ ആർതർ ഫ്ലെക്ക് എന്ന വ്യക്തിയുടെ വീഴ്ചയുടെ ആഘാതം കാണിച്ച് തരുന്നുമുണ്ട്. വ്യക്തമായ ഒരു ഒറിജിൻ സ്റ്റോറി ഇല്ലാത്ത കഥാപാത്രമാണ് കോമിക്സിൽ ജോക്കർ എന്ന് എവിടെയോ കേട്ടിട്ടുണ്ട്, അങ്ങനെ ഒരു ക്ളീൻ സ്ലേറ്റിൽ ഇതിനേക്കാൾ നല്ലൊരു പാഠം എഴുതാൻ കഴിഞ്ഞേക്കില്ല.

🔸ധനികരും ദരിദ്രരും തമ്മിലുള്ള വ്യത്യാസവും അത് പോലുള്ള കോണ്ടെക്സ്റ്റും ഒക്കെ ഉൾപ്പെടുത്തി മറ്റൊരു ലൈൻ കൂടി പ്ലോട്ടിൽ ചിത്രം ഉൾപ്പെടുത്തുന്നുണ്ട്. ഇതോടൊപ്പം നല്ല സൗണ്ട്ട്രാക്കും, അല്പം ക്രേസി ആയി തോന്നപ്പെട്ട സിനിമാട്ടോഗ്രഫിയും എല്ലാം ചേരുമ്പോൾ ജോക്കർ വേറൊരു തലത്തിലേക്ക് ഉയരുകയാണ്. ജൊവാക്വിൻ ഫീനിക്സിന്റെ പ്രകടനത്തെ പറ്റി ഒന്നും പറയാഞ്ഞത് മനപ്പൂർവം ആണ്, അത് പറയാൻ ആണേൽ ഈ പോസ്റ്റിന്റെ മുഴുവൻ ദൈർഘ്യം മതിയാവില്ല, എന്തൊരു മനുഷ്യനാടോ. ജോക്കറിന്റെ കഥ വെയ്ൻ ഫാമിലി ഇല്ലാതെ പൂർത്തിയാവില്ല, അവരുണ്ട്, ആ ഉള്ള രംഗങ്ങൾക്ക് കിട്ടിയത് തികഞ്ഞ കയ്യടി ആണെന്ന് പറഞ്ഞ് അവസാനിപ്പിക്കാം. ജോക്കർ തിയേറ്ററിൽ തന്നെ അനുഭവിക്കേണ്ട ഒരു ചിത്രമാണ്, പ്രത്യേകിച്ചും അവസാനത്തെ നാല്പത് മിനുട്ടുകൾ, അവ പാക്ക്ഡ് ഹൌസിൽ ഈ കഥാപാത്രങ്ങളുടെ ആരാധകരായവരോടൊപ്പം ഇരുന്ന് ആസ്വദിക്കാൻ പറ്റിയില്ലെങ്കിൽ നഷ്ടമാണ്, വൻ നഷ്ടം.

Verdict : Must Watch

DC Rating : 90/100

615. A Meal Makes Her Forget (2018)

Director : Santa Yamagishi

Genre : Drama

Rating : 7.6/10

Country : Japan

Duration : 55 Minutes

🔸പറയാൻ പോവുന്ന സന്ദർഭം ഒന്ന് മനസ്സിൽ ആലോചിക്കുക, നിങ്ങളുടെ കല്യാണ ദിവസമാണ്, നാട്ടാരും ബന്ധുക്കളും സുഹൃത്തുക്കളും പരിചയക്കാരും എല്ലാവരുമായി വലിയൊരു കൂട്ടം ആളുകൾ പരിപാടിയിൽ പങ്കെടുക്കാനായി എത്തിയിട്ടുണ്ട്. ഇവരെല്ലാം വലിയ സന്തോഷത്തിലും ആണ്, കാരണം വേറൊന്നുമല്ല നിങ്ങളെ പോലെ ഒരാൾക്ക് കല്യാണം ശെരി ആവുക എന്നത് അവരെ സംബന്ധിച്ച് അത്ഭുതമാണ്, എന്ത് കൊണ്ട് എന്നൊക്കെ വഴിയേ പറയാം. ഇനിയാണ് ട്വിസ്റ്റ്, നിങ്ങളെ കല്യാണം കഴിക്കേണ്ടി ഇരുന്നയാൾ അന്നേ ദിവസം അവിടെ നിന്നും ഒളിച്ചോടുകയാണ്, വന്ന എല്ലാവരുടെയും മുന്നിൽ നിങ്ങളൊരു അപഹാസ്യനായി ഇങ്ങനെ മാനം നോക്കി നിൽക്കുകയാണ്.

🔸ഈ നല്ല ഭക്ഷണം, അല്ലെങ്കിൽ പുതിയ പുതിയ രുചികൾ എന്നതൊക്കെ മലയാളികളിൽ മിക്കവരുടെയും ബലഹീനത ആണ്, വ്യക്തിപരമായി നല്ല താല്പര്യമുള്ള മേഖല ആയത് കൊണ്ട് തന്നെ ആവണം ഇത് പോലുള്ള ചിത്രങ്ങൾ നന്നായി ആസ്വദിക്കാനും റിലേറ്റ് ചെയ്യാനും പറ്റാറുണ്ട്. ടൈറ്റിൽ സൂചിപ്പിക്കുന്നത് പോലെ തന്നെ ഭക്ഷണമാണ് ഈ ചിത്രത്തിന്റെ ഫോക്കൽ പോയിന്റ്, ബാക്കി എല്ലാം ഇതിന്റെ ചുറ്റും കറങ്ങി നടക്കുന്ന ഉപഗ്രഹങ്ങൾ പോലെ മാത്രമാണ്. ഇനി നമുക്ക് കഥയിലേക്ക് കടക്കാം, നമ്മുടെ കേന്ദ്രകഥാപാത്രമാണ് സച്ചിക്കോ സാൻ, പുള്ളിക്കാരിയാണ് ആദ്യം സൂചിപ്പിച്ച ഒളിച്ചോട്ട നാടകത്തിന്റെ ഇര.

🔸നായികയെ തല്ക്കാലം സാൻ എന്ന് ചുരുക്കി വിളിക്കാം, സാൻ ഒരു റെയർ ബ്രീഡ് ആണ്, ഇത് കഴിഞ്ഞാൽ തീർന്നു, ഇതിനെ വാർത്തതോടെ അച്ച് ഒടിഞ്ഞ് പോയി എന്നൊക്കെ പൊതുവെ പറയാറുള്ള ഐറ്റം. അയേൺ ലേഡി എന്നാണ് സാനിനെ ഒപ്പം ജോലി ചെയ്യുന്നവർ പോലും വിശേഷിപ്പിക്കുന്നത്, അതിനൊരു കാരണവും ഉണ്ട്, വികാരങ്ങൾ പ്രകടിപ്പിക്കുക എന്ന കാര്യത്തിൽ അവളൊരു തികഞ്ഞ പരാജയമാണ്. ചിരി, കരച്ചിൽ, ദേഷ്യം, സന്തോഷം ഇത്യാദി ഭാവങ്ങൾ ഒന്നും ഇല്ലാതെ ഒരുതരം നിസ്സംഗത ആണ് അവിടത്തെ സ്ഥായീ ഭാവം. മുന്നിൽ വന്ന് നിൽക്കുന്നവരെ സാൻ ബഹുമാനാർത്ഥം തൊഴുന്നത് വരെ വളരെ രസകരമായ കാഴ്ച ആണ്, ഇത്ര സെന്റിമീറ്റർ നടുവ് മടക്കി കൈ ഇത്ര ആംഗിളിൽ വെച്ച്, ഇത്ര സെക്കൻഡ് തല താഴ്ത്തി അങ്ങനെ അങ്ങനെ ഒരു മെഷീൻ തന്നെ.

🔸ഈ 'പാവം' പിടിച്ച സാനിനെ ആണ് കല്യാണ ദിവസം ഭർത്താവ് ആകേണ്ടി ഇരുന്ന കഥാപാത്രം ഉപേക്ഷിച്ച് കടന്ന് കളയുന്നത്. ഒരു നേർവസ് ബ്രെയ്ക് ഡൗൺ ഒക്കെ പ്രതീക്ഷിച്ചവരെ അത്ഭുതപ്പെടുത്തിക്കൊണ്ട് തികച്ചും സംയമനത്തോടെ സാൻ പെരുമാറുകയാണ്, എന്ന് മാത്രമല്ല നല്ലൊരു സ്പ്പീച്ചും എടുത്ത് അലക്കുകയാണ്. എന്നാൽ സത്യത്തിൽ ഉപേക്ഷിച്ച് പോയ വ്യക്തിയുടെ സാന്നിധ്യം മൈൻഡിൽ നിന്നും കളയാൻ വേണ്ടി സാൻ പെടാപ്പാട് പെടുകയാണ്, ഇവിടെയാണ് ഭക്ഷണം ഒരു റ്റേർണിങ് പോയിന്റ് ആവുന്നത്. ഭക്ഷണം കഴിക്കുക എന്നതിൽ സാൻ ഒരു റിലീഫ് കണ്ടെത്തുകയാണ്, അതും വെറുതെ കഴിച്ച് പോവുകയല്ല കഴിക്കുക തന്നെ കഴിക്കുക, ഏത് സമയവും അത് തന്നെ ചിന്ത.

🔸വിഷമം വരുമ്പോൾ ഭക്ഷണം കഴിക്കുക, വിശക്കുന്നതിന് മുന്നേ വീണ്ടും വിഷമം വന്നാൽ തിന്നത് ദഹിക്കാൻ വേണ്ടി റോഡ് നീളെ ഓടുക, ഇങ്ങനെ എന്തൊക്കെയോ ഹോബി ആണ് പുള്ളിക്കാരിക്ക്. ബേസിക്കലി ഇതാണ് ഈ സിനിമ, ഒരു ഡംബ് ഫൺ എന്നൊക്കെ വിശേഷിപ്പിക്കാൻ പറ്റിയ ഐറ്റം. ഈ ജാപ്പനീസ് ടിവി മൂവിയുടെ പന്ത്രണ്ട് എപ്പിസോഡുള്ള ടീവി സീരീസ് ഉള്ളതായി കേട്ടിരുന്നു, ആ അന്വേഷണമാണ് ഒരു മണിക്കൂറിൽ താഴെയുള്ള ഈ ചിത്രത്തിൽ എത്തിച്ചത്. ഈ തമാശ ഒക്കെ അല്ലാതെ കാര്യമായിട്ട് വേറൊന്നും ചിത്രത്തിൽ ഇല്ല, ഡെഫിനിറ്റ് ആയൊരു എൻഡിങ് പോലും കിട്ടിയേക്കില്ല, പക്ഷെ കണ്ടിരിക്കാൻ പറ്റിയ ടൈം രസകരമായിരുന്നു, അത്രയേ ഉള്ളൂ, താല്പര്യം ഉണ്ടെങ്കിൽ മാത്രം ആ വഴി ഒന്ന് പോയി നോക്കുക.

Verdict : Watchable

DC Rating : 66/100

614. Sonatine (1993)

Director : Takeshi Kitano

Genre : Action

Rating : 7.5/10

Country : Japan

Duration : 94 Minutes

🔸പല തരത്തിലുള്ള ക്രൈം ഗ്യാങ്‌സ്റ്റർ ത്രില്ലെർ ചിത്രങ്ങൾ നമ്മളെല്ലാം കണ്ടിരിക്കും, എന്നാൽ സൊണാറ്റയിൻ പോലെ ഒന്ന് കണ്ടിട്ടുണ്ടാവുമോ എന്ന കാര്യം സംശയമാണ്. ജാപ്പനീസ് യാക്കൂസ ബാക്ക്ഗ്രൗണ്ടിൽ ഗ്യാങ് വാർ ഒക്കെ പ്രമേയമാക്കി ഒരു ചിത്രം വരുന്നുണ്ടെന്ന് കേൾക്കുമ്പോൾ സ്വാഭാവികമായും വയലെന്സിന്റെ അതി പ്രസരവും ബ്ലഡ് ബാത്തും എല്ലാം നമ്മൾ പ്രതീക്ഷിച്ചെന്നിരിക്കും, ഇവ വളരെ കുറവാണ് ഈ ചിത്രത്തിൽ, തീരെ ഇല്ലെന്നല്ല മറിച്ച് ഫോക്കസ് മറ്റ് ചില കാര്യങ്ങളിലാണ്.

🔸കഥയിലേക്ക് കടക്കുക ആണെങ്കിൽ മുറാക്കവ എന്ന കഥാപാത്രമാണ് നമ്മുടെ ഫോക്കൽ പോയിന്റ്. ഓർമ്മ വെച്ച കാലം മുതൽ തന്നെ തോക്കും ബോംബും വെടിയുണ്ടയും എല്ലാം നിറഞ്ഞ ഒരാന്തരീക്ഷത്തിലാണ് പുള്ളി ഉണ്ടായിരുന്നത്, ഇതൊക്കെ അല്ലാതെ മറ്റൊന്നും പുള്ളിക്ക് പരിചയമില്ല. ഇന്നിപ്പോ വർഷങ്ങൾ ഒരുപാട് കഴിഞ്ഞ് പോയിരിക്കുന്നു, പ്രായം മധ്യവയസ്സിലേക്ക് എത്തിയിട്ടുണ്ട്, ശരീരം പ്രായത്തിന്റെ ബലഹീനതകൾ കാണിച്ച് തുടങ്ങിയിരിക്കുന്നു. താൻ എല്ലാം വിട്ടെറിഞ്ഞ് എവിടേക്കെങ്കിലും പോവേണ്ട സമയമായി എന്ന് മുറാകവയ്ക്ക് തോന്നി തുടങ്ങിയിട്ടുണ്ട്.

🔸ഒരു ദിവസം മുറാകാവയെ ബോസ് വിളിപ്പിക്കുകയാണ്, കാരണം എന്താണെന്ന് വെച്ചാൽ തങ്ങളുടെ സ്വാധീനം ഉള്ളൊരു നഗരത്തിൽ അനാൻ എന്നൊരു ഗ്യാങ്ങുമായി ചെറിയ ചില കശപിശകൾ ഉണ്ടായിട്ടുണ്ട്. കാര്യങ്ങളുടെ വ്യാപ്തി പൂർണമായും മുറാകവയ്ക്ക് പിടി കിട്ടിയില്ലെങ്കിലും ഒരു ഗ്യാങ് വാറിലേക്കാണ് കാര്യങ്ങൾ പോയി കൊണ്ടിരിക്കുന്നത് എന്ന് വ്യക്തം. ഇതിൽ മുറാകാവയുടെ റോൾ ഒരു മധ്യസ്ഥന്റെതാണ്, രണ്ട് ഭാഗങ്ങളുമായി സംസാരിച്ച് ചർച്ച ചെയ്ത് കാര്യങ്ങൾ ഒന്ന് തണുപ്പിക്കുക എന്നതാണ് ടിയാന്റെ ലക്‌ഷ്യം.

🔸എന്തൊക്കെയോ ചില ദുസൂചനകൾ ദൗത്യത്തിന്റെ തുടക്കം തൊട്ടേ മുറാകവയ്ക്ക് ലഭിക്കുന്നുണ്ട്, കാര്യങ്ങളെ കുറിച്ചും സന്ദർഭത്തെ കുറിച്ചും വ്യക്തത ഇല്ലാത്ത വിവരങ്ങൾ, ഒട്ടും പരിചയ സമ്പത്ത് ഇല്ലാത്ത കാര്യ ഗൗരവം ഇല്ലാത്ത കൂട്ടാളികൾ അങ്ങനെ അനവധി കാരണങ്ങൾ, എല്ലാത്തിനും പുറമെ ബോസും അയാൾക്ക് ചുറ്റുമുള്ള ഉപഗ്രഹങ്ങളുമായി കുറച്ച് കാലമായി നിലനിൽക്കുന്ന സ്വരച്ചേർച്ച ഇല്ലായ്മ. എന്തൊക്കെ ആയാലും മുറാക്കവ ഇറങ്ങി തിരിക്കുകയാണ്, വിശ്വസ്തരായ ഒന്ന് രണ്ട് കൂട്ടാളികളും കൂടെ ഉണ്ട്. തങ്ങളെ കാത്തിരിക്കുന്ന വിധി എന്തെന്ന കാര്യത്തിൽ ഇപ്പോഴും വ്യക്തത ഇല്ലായ്മ നിലനിൽക്കുകയാണ് താനും.

🔸അങ്ങനെ നമ്മുടെ സംഘം പ്രസ്തുത സ്ഥലത്ത് എത്തുകയാണ്, അവിടെ അവർ കാണുന്ന കാഴ്ചകളും അനുഭവങ്ങളും പ്രതീക്ഷിച്ചതിലും അപ്പുറത്താണ്, ചില പുതിയ തിരിച്ചറിവുകൾ മുറാകവയ്ക്കും സംഘത്തിനും ലഭിക്കുകയാണ്. തുടർന്ന് അരങ്ങേറുന്ന സംഭവങ്ങളും മറ്റുമാണ് ഒന്നര മണിക്കൂർ ദൈർഘ്യമുള്ള ഈ ചിത്രം. കഥയുടെ ഒരു ചെറിയ ഭാഗത്ത് നിന്നും ബ്ലഡ് ബാത്ത്, ആക്ഷന്റെ അതിപ്രശസരം ഒന്നും പ്രതീക്ഷിക്കരുത്, മറ്റൊരു രീതിയിൽ ഉള്ളൊരു സമീപനം ആണ് ഈ ചിത്രത്തിന്റേത്. ടാകേശി കിട്ടാനോ ചിത്രങ്ങളിലെ ഏറ്റവും മികച്ചവയിൽ ഒന്നാണ് സോണാറ്റയിൻ.

Verdict : Very Good

DC Rating : 82/100