424. Leave No Trace (2018)

Director : Debra Granik

Genre : Drama

Rating : 7.3/10

Country : USA

Duration : 109 Minutes


🔸വളരെ ലളിതമായ ഒരു കഥയ്ക്ക് ശക്തമായ ഒരു സിനിമ ആയി പരിണമിക്കാം എന്ന് സിനിമ ഉള്ള ഭാഷകളിൽ എല്ലാം തെളിഞ്ഞ വസ്തുതയാണ്. ഈ സ്രേണിയിൽ ഉൾപ്പെടുത്താനാവുന്ന ചിത്രമാണ് ലീവ് നോ ട്രെയ്‌സും. ഒന്നോ രണ്ടോ വാക്യത്തിൽ പറഞ്ഞ് തീർക്കാൻ കഴിയുന്ന അത്രയും ലളിതമായ കഥയാണ് ചിത്രത്തിന്റേത്, അതിൽ തന്നെ ഞെട്ടിക്കുന്ന സംഭവ വികാസങ്ങൾ ഏതും അരങ്ങേറുന്നുമില്ല. എന്നാൽ ഈ ലളിതമായ കഥയിൽ നിന്നും ചിത്രം അവസാനിക്കുമ്പോൾ കാഴ്ചക്കാരന്റെ മനസ്സിൽ ഉടലെടുക്കുന്ന ശൂന്യത സൃഷ്ട്ടിക്കാൻ കഴിഞ്ഞ സംവിധായകന്റെ കഴിവിനെ അഭിനന്ദിച്ച് കൊണ്ട് തന്നെ പറയാം, ഈ വർഷം ഇറങ്ങിയ ഏറ്റവും മികച്ച ചിത്രങ്ങളിൽ ഒന്നാണ് ലീവ് നോ ട്രെയ്‌സ്.

🔸ഏകാന്തപഥികരെ, അവരുടെ ജീവിതത്തിലേക്ക് കടന്ന് ചെന്ന് ശല്യപ്പെടുത്തരുത് എന്ന് ഈസോപ്പിന്റെ സാരോപദേശ കഥകളിൽ കൂടി വായിച്ചതാണ് ഈ ചിത്രം കണ്ട് കഴിയുമ്പോൾ ആദ്യം മനസ്സിൽ വരുന്നത്, അവരെ അവരുടെ ലോകത്ത് വിഹരിക്കാൻ അനുവദിക്കുന്നതാണ് എല്ലാം കൊണ്ടും നല്ലത് എന്ന് ചിത്രം പറയാതെ പറയുന്നു. കാലങ്ങളായി മറ്റ് മനുഷ്യരുമായി യാതൊരു സഹവാസവും ഇല്ലാതെ ജീവിക്കുന്നവരാണ് കേന്ദ്ര കഥാപാത്രമായ വില്ലും മകൾ ടോമും. വില്ലിന്റെ ഭാഷയിൽ പറയുക ആണെങ്കിൽ അവർ ഇരുവരും തങ്ങളുടെ ജീവിതത്തിൽ സംപ്ത്രിപ്തരാണ്. മറ്റാരുടെയും ലോകത്തേക്ക് കടന്ന് ചെല്ലാൻ അവർ ആഗ്രഹിക്കുന്നില്ല എന്ന് മാത്രമല്ല തങ്ങളുടെ ലോകത്തേക്ക് വേറൊരാളെ കടത്തി വിടാനും അവർക്ക് താല്പര്യമില്ല.

🔸പുതിയ കാലത്തെ വസ്ത്രങ്ങൾ ഉപയോഗിക്കുന്നു എന്നത് ഒഴിച്ചാൽ ഭക്ഷണം പാചകം ചെയ്യാൻ കല്ല് ഉറച്ച് തീ സൃഷ്ട്ടിക്കുന്ന, കാടിന്റെ നടുവിൽ താമസിക്കുന്ന, പൂർണമായും പ്രകൃതിയും ആയി ലയിച്ച് ചേർന്ന് ജീവിക്കുന്ന ഒരു പ്രാകൃത മനുഷ്യ രീതിയാണ് ഇരുവരും പിന്തുടരുന്നത്. തന്റെ മുൻകാല ജീവിതത്തിൽ പട്ടാളക്കാരനായിരുന്ന വില്ലിന് ഈ ജീവിതം തന്റെ വിഷാദ രോഗത്തിന്റെ അനന്തരഫലവും, സർവോപരി ജീവിതത്തിൽ നിന്ന് തന്നെയുള്ള ഒളിച്ചോട്ടവും ആണെങ്കിൽ മകൾ ടോമിന് അത് അച്ഛനിൽ ഉള്ള വിശ്വാസമാണ്. തന്റെ ഇഷ്ടങ്ങളോ വികാരങ്ങളോ മാനിക്കാതെ അച്ഛനെ പിന്തുടരാൻ ആണ് ടോം പഠിച്ചിട്ടുള്ളത്, അതാണ് ശീലവും.

🔸ഇങ്ങനെ തീർത്തും ഒറ്റപ്പെട്ട് ജീവിച്ചു പോന്ന രണ്ട് ജന്മങ്ങളുടെയും വിധി മാറി മറിയുന്നത് ഒരു ചെറിയ അബദ്ധത്തിന്റെ ചുവട് പിടിച്ച് സമൂഹത്തിലേക്ക് ഇറങ്ങി ചെല്ലാൻ ഇരുവരും നിർബന്ധിതരാവുമ്പോൾ ആണ്. വില്ലിനെ സംബന്ധിച്ചിടത്തോളം ഈ മാറ്റം തീർത്തും നരക തുല്യമാണ്, കാരണം എന്തിനെ എല്ലാം ഭയന്നാണോ അയാൾ വഴി മാറി നടക്കാൻ ശ്രമിച്ചത് അതിലേക്കുള്ള മടങ്ങി പോക്കാണ് ഇത്, എന്നാൽ ടോമിന് ഇതെല്ലാം ഒരു പുതിയ അനുഭവവുമാണ്. ഇവിടെ നിന്നും ചിത്രം രണ്ട് കൈവഴികളായി മാറുകയാണ്. രണ്ട് ചിന്തകളിലൂടെ, രണ്ട് ആശയങ്ങളിലൂടെ, രണ്ട് മനസുകളിലൂടെ ഒഴുകിയ ശേഷം അതി മനോഹരമായ ക്ലൈമാക്സിലൂടെ ലീവ് നോ ട്രെയ്‌സ് കാഴ്ചക്കാരന്റെ മനസ്സിൽ പ്രത്യേകമായ സ്ഥാനം കരസ്ഥമാക്കുന്നു.

🔸ആദ്യമേ പറഞ്ഞത് പോലെ തന്നെ വളരെ ലളിതമായ ഗ്രൗൻഡഡ്‌ ആയ കഥയാണ് ചിത്രത്തിന്റേത്, കഥാ പശ്ചാത്തലവുമായി ഇഴുകി ചേർന്നാൽ കാഴ്ചക്കാരന് നിഷ്പ്രയാസം ഊഹിക്കാൻ കഴിയുന്ന രീതിയിൽ തന്നെയാണ് ചിത്രം മുന്നേറുന്നതും. എന്തിരുന്നാലും ഈ ഫീൽ ഗുഡ് ഡ്രാമ ചിത്രം നൽകുന്ന അനുഭവം ഒന്ന് വേറെ തന്നെയാണ്, അധികം ചിത്രങ്ങൾക്ക് ഒന്നും കഴിയാത്ത തലത്തിലേക്ക് കാണുന്ന പ്രേക്ഷകനെ കൊണ്ടുപോവാനും, അതി മനോഹരമായ രീതിയിൽ അവനെ രസിപ്പിക്കാനും ചിത്രത്തിന് കഴിയുന്നു. ഈ കാരണങ്ങൾ എല്ലാം കൊണ്ട് തന്നെ തീർച്ചയായും പറയാം ഈ വർഷം കണ്ട ഏറ്റവും മികച്ച ചിത്രങ്ങളുടെ പട്ടികയിൽ തന്നെ കാണും ഈ ചിത്രം. കാണാൻ ശ്രമിക്കുക, അനുഭവിക്കാനും.

Verdict : Very Good

423. Eighth Grade (2018)

Director : Bo Burnham

Genre : Comedy

Rating : 7.8/10

Country : USA

Duration : 94 Minutes


🔸കഴിഞ്ഞ വർഷം എന്നത് എണ്ണത്തിലും നിലവാരത്തിലും ഹൊറർ ചിത്രങ്ങൾ കൈവരിച്ച മുന്നേറ്റം കാരണം ശ്രദ്ധേയം ആയിരുന്നെങ്കിൽ ഇത്തവണ ആ ഊഴം ടീനേജ് റോം കോം ചിത്രങ്ങൾക്കാണ്. ടു ആൾ ദി ബോയ്സ് ഐ ഹാവ് ലവ്ഡ് ബീഫോർ പോലെ ഒരുപിടി നല്ല ചിത്രങ്ങൾ ഈ വർഷം ഈ വിഭാഗത്തിൽ നിന്നും കാഴ്ചക്കാരന്റെ മുന്നിലേക്ക് എത്തുക ഉണ്ടായി. ഈ കാരണം കൊണ്ട് തന്നെ റോം കോം വിഭാഗത്തിൽ ഈ വർഷം ഇറങ്ങിയ ഏറ്റവും മികച്ച ചിത്രം എന്ന വിശേഷണം പ്രൊഫഷണൽ നിരൂപകരും സൈറ്റുകളും ചാർത്തി കൊടുത്ത എയിറ്റ്ത് ഗ്രേഡ് എന്ന ചിത്രം കാണാനിരിക്കുമ്പോൾ പ്രതീക്ഷകൾ ഏറെ ആയിരുന്നു, കണ്ട് കഴിഞ്ഞപ്പോൾ ധൈര്യമായി പറയാനാവും, ലഭിച്ച വിശേഷണങ്ങൾ എല്ലാം തന്നെ ഈ ചിത്രം അർഹിക്കുന്നുണ്ട്.

🔸ഒരു ഫൗണ്ട് ഫുറ്റേജ് ചിത്രത്തെ അനുസ്മരിപ്പിക്കും വിധമാണ് ചിത്രം ആരംഭിക്കുന്നത്, ക്യാമറയെ അഭിമുഖീകരിച്ച് കൊണ്ട് ഒരു പെൺകുട്ടി തന്റെ നിർദ്ദേശങ്ങൾ നൽകുകയാണ്. പ്രത്യക്ഷത്തിൽ പ്രേക്ഷകന് വേണ്ടി എന്ന് തോന്നുമെങ്കിലും പ്രസ്തുത കഥാപാത്രമായ കൈല സംസാരിക്കുന്നത് തന്റെ യൂറ്റിയൂബ് ചാനൽ ആയ കൈലാസ്‌ കോർണർ പിന്തുടരുന്നവരോട് ആണ്. ജീവിതത്തിൽ ധൈര്യം ഇല്ലാത്തവരോടും കടമ്പകളിൽ വീണ് പോയവരോടും, അവിടെ നിന്ന് ഉയർത്തെഴുന്നേൽക്കാൻ സാധിക്കാത്തവരോടുമാണ് കൈല സംസാരിക്കുന്നത്. അവർക്ക് ഉത്തേജനം പകരാനും സഹായിക്കാനുമാണ് അവളുടെ ശ്രമം.

🔸കാര്യം ഇങ്ങനെ ഒക്കെ ആണെങ്കിലും, യഥാർത്ഥ കൈല എന്നത് തികച്ചും വ്യത്യസ്തയായ ഒരു കഥാപാത്രമാണ്, ജീവിതത്തിൽ തോറ്റ് പോയ, ധൈര്യമില്ലാത്ത, ഒട്ടും സോഷ്യൽ അല്ലാത്ത വ്യക്തികൾക്ക് പ്രചോദനമായി തീരാൻ ശ്രമിക്കുമ്പോഴും ഇവരിൽ ഒരാൾ തന്നെയാണ് കൈലയും. പരിചയമില്ലാത്ത വ്യക്തികളോട് സംസാരിക്കാൻ തുടങ്ങുമ്പോൾ ശബ്ദം ഇടറുന്ന, ക്യാമറയ്ക്ക് മുന്നിൽ ഇരിക്കുമ്പോൾ തൊണ്ട വിരളുന്ന, അത് മറച്ച് പിടിക്കാൻ വല്ലാതെ ബദ്ധപ്പെടുന്ന ആത്മ വിശ്വാസം ഒട്ടും ഇല്ലാത്ത ഒരു വ്യക്തിത്വത്തിന് ഉടമയാണ് കൈല. സ്വന്തം അച്ഛനോട് പോലും പരിഭ്രമം കൂടാതെ തന്റെ വികാര വിചാരങ്ങൾ പറയാൻ പതിമൂന്ന് വർഷത്തെ ജീവിതത്തിനടിയിൽ കൈലയ്ക്ക് ഒരിക്കൽപ്പോലും സാധിച്ചിട്ടില്ല.

🔸ചുരുക്കി പറയുക ആണെങ്കിൽ നല്ലൊരു സൗഹൃദമോ, ഓർക്കാൻ ഇഷ്ട്ടപ്പെടുന്ന നിമിഷങ്ങളോ സ്വന്തമായി ഇല്ലാത്ത സ്‌കൂൾ ജീവിതവും, ഇതിനെ മറികടക്കാൻ മറ്റുള്ളവരെ ഉപദേശിക്കുകയും സഹായിക്കുകയും ചെയ്യുന്ന, എന്നാൽ സ്വന്തം ജീവിതത്തിൽ ഇത് പ്രാവർത്തികം ആക്കാൻ കഴിയാത്ത യൂറ്റ്യുബ് വ്യക്തിത്വത്തിനും ഉടമയാണ് കൈല. തന്റെ മിഡിൽ സ്‌കൂൾ ജീവിതത്തിന്റെ അവസാന ദിനങ്ങളിൽ എത്തി നിൽക്കുകയാണ് കൈല, ഇതുവരെയുള്ള വ്യക്തിഗത ജീവിതം എന്നത് കൈലയെ സംബന്ധിച്ചിടത്തോളം വലിയ പരാജയമാണ്. വർഷങ്ങളായുള്ള തന്റെ സഹപാഠികളും ആയി പോലും ഓർമിക്ക തക്കവണ്ണം നല്ലൊരു ബന്ധം സൃഷ്ടിച്ചെടുക്കാൻ കൈലയ്ക്ക് കഴിഞ്ഞിട്ടില്ല, ഒരു പരിധി വരെ ശ്രമിച്ചിട്ടുമില്ല.

🔸സാധാരണ ടീനേജ് റൊമാന്റിക് കോമഡി ചിത്രങ്ങൾ പ്രമേയമാക്കാറുള്ള പ്രധാന കഥാപാത്രത്തിന്റെ മാനസിക സംഘർഷങ്ങളും, വേവലാതികളും, തെറ്റായ തീരുമാനങ്ങളും എല്ലാം തന്നെയാണ് എയ്റ്റ്ത് ഗ്രേഡ് എന്ന ഈ ചിത്രത്തിന്റെയും പ്രമേയം, അതെല്ലാം ഒട്ടും മോശം പറയാൻ കഴിയാത്ത വിധം ഭംഗിയായി തന്നെ അവതരിപ്പിച്ചിട്ടുമുണ്ട്. കൈല എന്ന കഥാപാത്രത്തിന്റെ വ്യക്തി ജീവിതത്തിലും, വിദ്യാർത്ഥി ജീവിതത്തിലും മേൽ സൂചിപ്പിച്ച തീരുമാനങ്ങൾ കൊണ്ടുവരുന്ന പ്രത്യാഘാതങ്ങളും അതിന്റെ അനന്തര ഫലങ്ങളുമെല്ലാം ആണ് ചിത്രത്തിന്റെ പ്രമേയം. ലളിതമായി ചിത്രത്തെ വിലയിരുത്തുക ആണെങ്കിൽ ഈ വിഭാഗം ചിത്രങ്ങൾ ഇഷ്ട്ടപ്പെടുന്നവർക്ക് തീർച്ചയായും രസിക്കാൻ ഇടയുള്ള കൊച്ച് മനോഹര ചിത്രമാണ് എയ്റ്റ്ത് ഗ്രേഡ്.

Verdict : Very Good

Top 10 Mistakes In Movies

സിനിമ എന്നത് കാഴ്ചയിൽ വിനോദം ആണെങ്കിലും, നിർമാണ വേളയിൽ അണിയറ പ്രവർത്തകർക്ക് അങ്ങേയറ്റം ബുദ്ധിമുട്ടേറിയ ഒരു ഉദ്യമം ആണ്. ഒരാശയം കഥാകൃത്തിന്റെ തലയിൽ ഉദിക്കുന്നത് മുതൽ അത് തിയേറ്ററിൽ കാഴ്ചക്കാരന് മുന്നിൽ എത്തുന്നത് വരെ കടമ്പകൾ അനവധിയാണ്. നിർണായകമായ ഈ ഓരോ ഘട്ടങ്ങളിലും ഉൾപ്പെട്ടിരിക്കുന്ന വ്യക്തികൾ വ്യത്യസ്തർ ആയതിനാലും, ജോലി അങ്ങേയറ്റം ശ്രദ്ധ ആവശ്യപ്പെടുന്ന കഠിനമായ ഒന്ന് ആയതിനാലും തെറ്റുകൾ സംഭവിക്കുക എന്നത് തികച്ചും സ്വാഭാവികമാണ്. ഇങ്ങനെ വളരെ പ്രശസ്തമായ ചില ചിത്രങ്ങളിൽ അബദ്ധവശാൽ സംഭവിച്ച് പോയ ചില തെറ്റുകൾ ചൂണ്ടികാട്ടുകയാണ് ഈ പോസ്റ്റിന്റെ ഉദ്ദേശം. ഒരു രീതിയിലും ഉൾപ്പെട്ടിരിക്കുന്ന ചിത്രങ്ങളെ പരിഹസിക്കുക അല്ല പോസ്റ്റിന്റെ ഉദ്ദേശം എന്നതും, കൗതുകം ഒന്ന് മാത്രമാണ് ഇതിന്റെ കാരണം എന്ന് കൂടി ചേർക്കട്ടെ.

North By Northwest (1959)

ആൽഫ്രഡ്‌ ഹിച്കോക്കിന്റെ ഏറ്റവും മികച്ച ചിത്രങ്ങളിൽ ഒന്ന് എന്നതിലധികം വിശേഷണങ്ങൾ നോർത്ത് ബൈ നോർത്‌വെസ്റ്റ് എന്ന ചിത്രത്തിന് ആവശ്യമില്ല. ചിത്രത്തിലെ കഥാഗതിയിൽ വളരെ നിർണ്ണായകമായ ഒരു രംഗമാണ് മുകളിൽ ചേർത്തിരിക്കുന്നത്. നായകൻ നായികാ കഥാപാത്രത്തെ ഹോട്ടലിൽ വെച്ച് കാണുന്ന രംഗത്തിൽ നായികയുടെ കൈവശം തോക്കുള്ളതായി ഒരു സൂചന പോലും ചിത്രം നൽകുന്നില്ല. എന്നാൽ വലത് ഭാഗത്തുള്ള ജൂനിയർ ആർട്ടിസ്റ്റ് കഥാപാത്രങ്ങളിൽ ഒന്ന് തോക്ക് പുറത്തെത്തുന്നതിന് മുൻപേ കൈ ചെവിയിൽ വച്ചത് ഒരു പക്ഷെ അതീന്ദ്രിയമായ സിദ്ധി വഴി ആവണം.


Gladiator (2000)

രണ്ടായിരം വർഷങ്ങൾക്ക് മുൻപുള്ള റോമിലെ അധികാര വടംവലികളും കുടിപ്പകയും പ്രതികാരവും എല്ലാം പ്രമേയമായ ചിത്രമായിരുന്നു ഗ്ലാഡിയേറ്റർ. ചിത്രത്തിലെ കാർത്തേജ് യുദ്ധ രംഗം അതിന്റെ അവതരണം കൊണ്ടും മറ്റും പ്രശസ്തമാണെങ്കിലും വലിയൊരു തെറ്റ് കൂടി ഈ രംഗത്ത് കാണാൻ കഴിഞ്ഞേക്കും. മുന്നിലുള്ള തടസത്തിൽ തട്ടി മറിഞ്ഞ രഥത്തിന്റെ പിറകിൽ ഒരു ഗ്യാസ് സിലിണ്ടർ.


Usual Suspects (1995)

രണ്ട് പതിറ്റാണ്ടുകൾ മുന്നേ പുറത്തിറങ്ങിയ യൂഷ്വൽ സസ്‌പെക്ടസ് എന്ന ചിത്രത്തെ ഓർക്കുമ്പോൾ ചിത്രം കണ്ട ഏതൊരു വ്യക്തിയും എടുത്ത് പറയാൻ സാധ്യതയുള്ളത് കെവിൻ സ്പേസി എന്ന നടന്റെ മാസ്മരിക പ്രകടനവും, അമ്പരപ്പിച്ച അപ്രതീക്ഷിതമായ ട്വിസ്റ്റും ആയിരിക്കും. ഇതിനോളം തന്നെ അമ്പരപ്പ് ഉളവാക്കുന്ന ഒന്നാണ് നാല് എൻജിനോട് കൂടി ആദ്യമായി പ്രത്യക്ഷപ്പെട്ട എയ്റോപ്ലൈൻ തൊട്ടടുത്ത സീനിൽ എങ്ങിനെ രണ്ട് എൻജിനോട് കൂടി പ്രത്യക്ഷപ്പെട്ടു എന്ന ചോദ്യം.


Commando (1985)

അർണോൾഡിന് മാച്ചോ പരിവേഷം ചാർത്തി കൊടുത്ത കമാൻഡോ എന്ന ചിത്രത്തിൽ മകളെ തട്ടിക്കൊണ്ടുപോയ വില്ലൻ കഥാപാത്രങ്ങളിൽ ഒരാളെ റോഡിലൂടെയുള്ള ചേസ് സീനിൻ ശേഷം കുന്നിൻ മുകളിൽ വെച്ച് പിടികൂടുന്ന ഒരു രംഗമുണ്ട്. രംഗത്തിന്റെ ആരംഭത്തിൽ ഇടത് ഭാഗം ഇടിച്ച് ചുളിഞ്ഞ കാർ അവസാനമാവുമ്പോൾ തനിയെ നന്നായത് ശ്രദ്ധയോടെ വീക്ഷിച്ചാൽ കാണാൻ കഴിയും.


Braveheart (1995)

ഒരു പിരിയഡ് ചിത്രം തെറ്റ് കുറ്റങ്ങൾ ഇല്ലാതെ പൂർത്തിയാക്കുക എന്നത് അത്യന്തം ദുഷ്കരമായ ഒരു പ്രവർത്തി തന്നെയാണ്. ഈ പ്രശ്നത്തിൽ നിന്നും വില്യം വാലസ് എന്ന സ്‌കോട്ടിഷ് പ്രഭുവിന്റെ കഥ സ്‌ക്രീനിൽ എത്തിച്ച ബ്രേവ്ഹാർട്ട് എന്ന ചിത്രത്തിനും രക്ഷപ്പെടാനായില്ല. പടയാളികൾ തങ്ങളുടെ എതിരാളികളുടെ നേരെ പോർവിളികളോടെ കുതിക്കുന്ന രംഗത്തിൽ സെറ്റിലെ പ്രവർത്തകരിൽ ഒരാളുടെ കാർ ബാക് ഗ്രൗണ്ടിൽ വ്യക്തമായി കാണാം.


Pulp Fiction (1995)

ലോകത്താകമാനം ഉള്ള ഭക്ഷണപ്രിയരെ കൊതിപ്പിച്ച് കൊണ്ട് ബർഗറും തിന്ന്, ജ്യുസും കുടിച്ച് ജൂൾസ് തന്റെ ആവശ്യം ഉന്നയിക്കുന്ന രംഗം ചിത്രം കണ്ടവരാരും മറക്കാൻ ഇടയില്ല. ഈ രംഗത്തിൽ റൂമിലെ ശ്രദ്ധയിൽ പെടാത്ത ആറാം കഥാപാത്രം ഡോർ തള്ളിത്തുറന്ന് ജൂൾസിനും വേഗയ്ക്കും നേരെ വെടി ഉതിർക്കുന്നതും അത് ഇരുവർക്കും കൊള്ളാതെ പോവുന്നതും നമുക്ക് അറിയാം. ഈ രംഗം ഒരു മുപ്പത് സെക്കൻഡ് പിറകിലേക്ക് പോവുക ആണെങ്കിൽ വെടി ഉതിർക്കുന്നതിനും കഥാപാത്രം സ്‌ക്രീനിൽ വരുന്നതിനും മുൻപ് ചുമരിൽ ഉണ്ടയുടെ പാടുകൾ വന്നതായി കാണാൻ കഴിയും.


Terminator 2 (1991)

T-1000 സാറ കോണറിനെയും മകനെയും തേടി മാനസിക ആശുപത്രിയിൽ വരുന്ന രംഗം നായക വില്ലൻ കഥാപാത്രങ്ങളുടെ ഇടപഴകൽ കാരണം പ്രശസ്തമാണ്. ഈ രംഗത്തിൽ സാറയെയും മകനെയും സംരക്ഷിക്കാനായി T-1000 എന്ന കഥാപാത്രത്തിന്റെ തലയ്ക്ക് നേരെ അർണോൾഡിന്റെ കഥാപാത്രം വെടി ഉതിർക്കുന്ന ഒരു രംഗമുണ്ട്. ഇവിടെ ശ്രദ്ധിക്കേണ്ടത് എന്താണെന്നാൽ അർണോൾഡ് വെടി ഉതിർക്കുന്നതിന് തൊട്ട് മുൻപേ രണ്ടായി പിളർന്ന് തുടങ്ങിയ T-1000 കഥാപാത്രത്തിന്റെ തല ആണ്, ഒരു ചെറിയ ടൈമിംഗ് മിസ്റ്റേക്ക്.


I Am Legend (2007)

സോമ്പി ചിത്രമായ ഐ ആം ലെജന്റിൽ വിൽ സ്മിത്ത് അവതരിപ്പിക്കുന്ന കഥാപാത്രത്തിന് സോമ്പിയായി മാറിയ ഒരാളിൽ നിന്നും കടി ഏൽക്കുന്ന ഭാഗമുണ്ട്. ഇതിൽ സവിശേഷമായത് എന്താണെന്നാൽ ഇടത് ഭാഗത്ത് കടിയേറ്റ വിൽ സ്മിത്ത് വലത് ഭാഗത്ത് മുറിവുമായി മറ്റൊരു സീനിൽ പ്രത്യക്ഷപ്പെടുന്നുണ്ട് എന്നതാണ്. അതും പോരെങ്കിൽ തൊട്ടടുത്ത രംഗത്തിൽ വീണ്ടും മുറിവ് ഇടത് ഭാഗത്ത് എത്തുന്നു.


Titanic (1997)

തെറ്റുകളുടെ ഒരു പെരുങ്കളിയാട്ടം തന്നെ കാണാനാവും ടൈറ്റാനിക് എന്ന ചിത്രത്തിൽ. അടുത്തടുത്ത രംഗങ്ങളിൽ ഹെയർ സ്റ്റൈൽ മാറ്റുന്ന നായക കഥാപാത്രവും കാലത്തിന് മുന്നേ അവതരിച്ച റോളക്സ് വാട്ച്ചും സ്ഥാനം മാറി കൊണ്ടിരിക്കുന്ന വസ്തുക്കൾക്കും ഒക്കെ ഇടയിൽ വ്യത്യസ്തമായി തോന്നിയത് അവസാനത്തെ മൂവിങ് ഷോട്ടിൽ സ്വന്തം സാന്നിധ്യം പ്രേക്ഷകനെ അറിയിച്ച ക്യാമറയുടെ ഇടപെടലാണ്.


Bad Boys (1983)

പ്രതീക്ഷിക്കാത്ത വ്യക്തികളോ, വസ്തുക്കളോ കടന്ന് വന്നത് കൊണ്ട് തെറ്റുകൾ സംഭവിക്കാം. എന്നാൽ ചിത്രം പകർത്തി കൊണ്ടിരുന്ന കാമറാമാൻ തന്നെ ഫ്രെയിമിൽ കടന്നുവരിക എന്നത് കൗതുകകരമായ കാര്യം തന്നെ. ബാഡ് ബോയ്സ് എന്ന ചിത്രത്തിൽ രണ്ട് കഥാപാത്രങ്ങൾ തമ്മിലുള്ള പോരാട്ടത്തിനിടെ വ്യക്തമായി തന്നെ ചിത്രീകരിക്കുന്ന ക്യാമെറാമാനെയും സ്‌ക്രീനിൽ കാണാൻ സാധിക്കും.

തെറ്റുകൾ മനുഷ്യ സഹജമാണ്, പരിഹാസം അല്ല പോസ്റ്റിന്റെ ഉദ്ദേശം, വെറും കൗതുകം മാത്രമാണ്. വായിക്കുന്നവരും ആ രീതിയിൽ ഉൾക്കൊള്ളുമെന്ന് പ്രതീക്ഷിക്കുന്നു.

422. The Little Girl Who Was Too Fond Of Matches (2017)

Director : Simon Lavoie

Genre : Horror

Rating : 7.2/10

Country : Canada

Duration : 110 Minutes


🔸സോയിസോൻസ് കുടുംബത്തെ കുറിച്ച് ഗ്രാമത്തിലുള്ളവർക്ക് അത്ര നല്ല അഭിപ്രായമല്ല, അച്ഛനായ സോയസോണും മക്കളായ ഫ്രേരെയും ആലീസും മറ്റുള്ളവരിൽ നിന്നും തീർത്തും ഒറ്റപ്പെട്ട്, യാതൊരു സമ്പർക്കവും കൂടാതെ ജീവിക്കാൻ തുടങ്ങിയിട്ട് വർഷങ്ങൾ കുറച്ചായിരിക്കുന്നു. മൂവർക്കും ഇടയിൽ ആ വീട്ടിൽ എന്താണ് സംഭവിച്ച് കൊണ്ടിരിക്കുന്നത് എന്നറിയാൻ ഗ്രാമവാസികൾക്ക് നല്ല ആഗ്രഹം ഉണ്ടെങ്കിലും വേലിക്കെട്ടുകൾ കടന്ന് അനുവാദം ഇല്ലാതെ അവിടേക്ക് കടന്ന് ചെന്നാൽ തങ്ങളെ കാത്തിരിക്കുന്നത് സോയിസോണിന്റെ തോക്ക് ആണെന്ന അനുഭവത്തിൽ നിന്നും ഉൾക്കൊണ്ട പാഠം അവരെ പിന്തിരിപ്പിക്കുകയാണ്. അറിയാൻ കഴിയാത്ത വസ്തുതകളെ കുറിച്ചുള്ള കൗതുകം ഏറിക്കൊണ്ടിരിക്കും എന്ന സ്വാഭാവിക മനുഷ്യ സ്വഭാവം കാരണം തന്നെ ഒരവസരത്തിനായി കാത്തിരിക്കുകയാണ് ഗ്രാമവാസികൾ, അവരുടെ രീതിയിൽ പറയുക ആണെങ്കിൽ മന്ത്രവാദിയായ സോയസോണിനെ പിടിച്ചുകെട്ടി ഒഴിവാക്കാൻ.

🔸ഒരുപാട് നുണകളിലും കെട്ട് കഥകളിലും പടുത്ത് ഉയർത്തിയതാണ് സോയിസോൻ കുടുംബത്തിന്റെ അടിത്തറ. മകളായ ആലീസിനെ താൻ ആൺകുട്ടി ആണെന്ന് പറഞ്ഞ് ബോധ്യപ്പെടുത്തി ആണ് സോയിസോൻ വളർത്തിയത്. സ്ത്രീ സഹജമായ സ്തന ഭാഗങ്ങൾ കെട്ടി വെച്ചും പുരുഷന്മാർക്ക് ഉണ്ടാവേണ്ട ജനനേന്ദ്രിയം ഒരപകടത്തിൽ ഇല്ലാതായത് ആണെന്ന് കള്ളം പറഞ്ഞും അവളുടെ സംശയങ്ങൾ സോയിസോൻ ഏറെക്കുറെ തീർത്ത് കൊടുത്തിട്ടുണ്ട്. ഇതിന് പുറമെ പുറമെ ഉള്ളവരുമായുള്ള സമ്പർക്കം എല്ലാം നിരോധിച്ച അയാൾ സ്വന്തം മക്കളെ പുസ്തകം വായിക്കാൻ പോലും അനുവദിച്ചിരുന്നുമില്ല, അങ്ങനെ തികച്ചും വിചിത്രവും ഒറ്റപ്പെട്ടതുമായ ഒരു ജീവിതമാണ് സോയിസോൻ കുടുംബത്തിന്റേത്.

🔸ഇങ്ങനെ പാതി വെന്ത പച്ച മാംസവും കഴിച്ച്, അച്ഛന്റെ കഠിനമായ ഉത്തരവുകളെയും അതിനോട് ചേർന്ന് വരുന്ന ശിക്ഷകളെയും ഭയന്ന് ജീവിതം മുന്നോട്ട് പോകവേ ആലീസിന്റെ ജീവിതത്തിൽ രണ്ട് പ്രധാന സംഭവങ്ങൾ അരങ്ങേറുകയാണ്. ആദ്യമായി തന്റെ സഹോദരൻ ആണെന്ന് അച്ഛൻ നൂറാവർത്തി പറഞ്ഞ് പഠിപ്പിച്ച ഫ്രേരെ ആലീസിനെ ക്രൂരമായി ബലാത്സംഗം ചെയ്യുകയാണ്, സ്വാഭാവികമായും അരങ്ങേറിയ സംഭവം എന്താണെന്നും അതിന്റെ പ്രത്യാഘാതങ്ങൾ എങ്ങനെ ആയിരിക്കും എന്നും അറിയാത്ത ആലീസ് ഒന്നും സംഭവിക്കാത്ത പോലെ ജീവിതവുമായി മുന്നോടട്ട് പോവുകയാണ്. ഇങ്ങനെ ഒക്കെ ആണെങ്കിലും ഇത് അച്ഛനെ അറിയിക്കാനും മാത്രം ധൈര്യം അവൾ ആർജിച്ചിട്ടില്ല.

🔸രണ്ടാമത്തെ സംഭവം കുറച്ച് കൂടി വിചിത്രമാണ്, തന്റെ ഓർമ്മ വെച്ച നാൾ മുതൽ മക്കളെ അറിയിക്കാതെ രാത്രി കൃഷിയിടത്തിലെ ഒറ്റപ്പെട്ട മുറിയിലേക്ക് അച്ഛൻ പോവുന്ന കാഴ്ച ആലീസ് കാണാറുണ്ടായിരുന്നു. കൗതുകം അടക്കാൻ കഴിയാഞ്ഞതിനാൽ ഒരു ദിവസം അച്ഛനെ പിന്തുടർന്ന് അവളും അവിടേക്ക് എത്തുകയാണ്, അരണ്ട വെളിച്ചത്തിൽ അകത്തേക്ക് നോക്കിയ ആലീസ് കണ്ടത് മരത്തടിയാൽ കെട്ടിയിടപ്പെട്ട ജീവിക്ക് ഭക്ഷണം കൊടുക്കുന്ന അച്ഛനെയാണ്, കുറച്ച് കൂടി സൂക്ഷ്മമായി ശ്രദ്ധിച്ചപ്പോഴാണ് ആ ജീവിയുടെ കൈകൾ മനുഷ്യ സമാനം ആണെന്ന് അവൾ തിരിച്ചറിയുന്നത്. ഈ രണ്ട് സംഭവങ്ങളുടെയും ബാക്കി പത്രമാണ് കഴിഞ്ഞ വർഷം പുറത്തിറങ്ങിയ പ്രസ്തുത കനേഡിയൻ ചിത്രം.

🔸യഥാർത്ഥത്തിൽ എന്തെല്ലാമാണ് സംഭവിക്കുന്നത് എന്ന് വെളിപ്പെടുത്താതെ ആദ്യാവസാനം സസ്പെൻസ് നില നിർത്തി കൊണ്ടാണ് ചിത്രം മുന്നേറുന്നത്, അവ ഒടുവിൽ മനസിലാക്കി എടുക്കുമ്പോൾ കാഴ്ചക്കാരന്റെ മനസ്സിൽ ഉടലെടുക്കാൻ സാധ്യത ഉള്ളത് വിഷാദവും സങ്കടവും ദേഷ്യവും എല്ലാം കലർന്ന വികാരവും ആയിരിക്കും. മേൽ സൂചിപ്പിച്ച കഥാഗതി ചിത്രത്തിന്റെ ആദ്യ പതിനെട്ട് മിനിറ്റുകളിൽ നിന്നും മാത്രമാണ്, നൂറ്റി പത്ത് മിനുട്ട് ദൈർഖ്യമുള്ള ഈ ബ്ലാക് ആൻഡ് വൈറ്റ് ചിത്രത്തിൽ കാഴ്ചക്കാരനെ ഞെട്ടിക്കാനും ചെറുതായി പേടിപ്പിക്കാനുമുള്ള വക ധാരാളമുണ്ട്. കഥാഗതിയിൽ സൂചിപ്പിച്ചത് പോലെ അത്യാവശ്യം എക്സ്പ്ലിസിറ്റ് രംഗങ്ങളും ന്യുഡിറ്റിയും ഡിസ്റ്റർബിങ് ആയ രംഗങ്ങളും ചിത്രത്തിലുണ്ട്, ഡാർക്ക് മൂഡ്, ഹൊറർ, മിസ്റ്ററി ചിത്രങ്ങൾ ഇഷ്ടപ്പെടുന്നവർ കാണാൻ ശ്രമിക്കുക.

Verdict : Very Good

Ingmar Bergman

സിനിമ എന്നത് അമേരിക്ക, ബ്രിട്ടീഷ് ചിത്രങ്ങളും ഒരു പരിധി വരെ ജാപ്പനീസ് ചിത്രങ്ങളും ആണ് എന്ന വിശ്വാസം പൊതുവെ പ്രേക്ഷകനിലും വിമർശകനിലും ഒരു പോലെ നില നിന്നിരുന്ന ഇരുപതാം നൂറ്റാണ്ടിന്റെ മധ്യകാലഘട്ടത്തിൽ സ്വീഡൻ പോലെയൊരു യൂറോപ്യൻ രാജ്യത്ത് നിന്നും തന്റെ സൃഷ്ടികളുമായി ലോകത്തിന് മുന്നിൽ അവതരിക്കുകയും പിന്നീടുള്ള നാല്പതിറ്റാണ്ടുകൾ സിനിമയുടെ ഒഴുക്കിൽ ഗണ്യമായ പങ്ക് വഹിക്കുകയും ചെയ്ത വ്യക്തിയാണ് ഇങ്മർ ബെർഗ്മാൻ. സിനിമ മനുഷ്യന്റെ ജീവിതത്തിന്റെ ഭാഗമായ കഴിഞ്ഞ ഒരു നൂറ്റാണ്ടിൽ മികച്ച സംവിധായകർ എന്ന പട്ടം കരസ്ഥമാക്കിയ അനവധി പ്രതിഭകൾ സിനിമാ ലോകത്ത് വരികയും തങ്ങളുടെ കഴിവ് പ്രകടിപ്പിക്കുകയും ചെയ്തിട്ടുണ്ട്, എന്നാൽ ബെർഗ്മാനോളം തന്റെ സൃഷ്ടികളിലൂടെ അനിഷേധ്യമായ വ്യക്തിമുദ്ര ചരിത്രത്തിൽ പതിപ്പിച്ച മറ്റൊരു സംവിധായകൻ ഉണ്ടായിട്ടില്ല എന്ന് ഉറപ്പിച്ച് പറയാം. അമരത്വം, വിശ്വാസം, മതം, ഏകാന്തത, എല്ലാത്തിലും ഉപരി അവനവനിലും ദൈവമെന്ന പദത്തിലുമുള്ള വിശ്വാസം ഇവയെല്ലാം ബെർഗ്മാൻ തന്റെ ചിത്രങ്ങൾക്ക് വിഷയമാക്കി. ചോദ്യം ചെയ്യപ്പെടേണ്ടതെന്ന് കരുതിയതിനെ ചോദ്യം ചെയ്തു, നിശിതമായി വിമർശിച്ചു, മാറ്റേണ്ടതെന്ന് വിശ്വസിച്ച വസ്തുതകളെ യാതൊരു മടിയുമില്ലാതെ കീറി എറിഞ്ഞു. ഇങ്ങനെ ആറ് പതിറ്റാണ്ടുകൾ നീണ്ട് നിന്ന കരിയറിൽ അൻപതിലധികം സിനിമകളും ടോക്കിയുമെൻടെറികളും. ഒന്നിനൊന്ന് മികച്ച ഈ സൃഷ്ടികളിലെ അഞ്ച് സിനിമകളെ ഒന്ന് പരിചയപ്പെടാം.

Seventh Seal (1957)

Genre : Fantasy

Rating : 8.3/10

Duration : 96 Minutes


ഏതൊരു ലോകോത്തര സംവിധായകനും ഉണ്ടാവും ലോകം അളവുകോലായി കണക്കാക്കപ്പെടുന്ന ഒരു ചിത്രം. കുബ്രിക്കിന് 2001 എ സ്പേസ് ഒഡിസ്സി പോലെ, ഹിച്ച്‌കോക്കിന് സൈക്കോ പോലെ, ഓർസോൺ വെൽസിന് സിറ്റിസൺ കയ്‌നും സ്പിൽബെർഗിന് സേവിങ് പ്രൈവറ്റ് റയാനും പോലെ. സിനിമ ജീവിതമായി കണ്ടവരുടെ സിനിമ ജീവിതം ശിഷ്ട കാലം വിലയിരുത്തപ്പെടുന്ന ചിത്രം. ആദ്യ കാലങ്ങളിൽ പുറം ലോകത്തിന് അപരിചിതമായ പൊതുവെ അപരിചിതമായ മേഖല ആയിരുന്നു സ്വീഡിഷ് ചിത്രങ്ങൾ, ഇവയെ ലോകത്തിന് മുന്നിൽ എത്തിച്ചതിൽ പ്രധാനി ആണ് സംവിധായകൻ ഇന്ഗമാർ ബെർഗ്മാൻ. തന്റെ ചിത്രങ്ങളിൽ എല്ലാം വിശ്വാസികളെയും വിശ്വാസത്തെയും ചോദ്യം ചെയ്ത സംവിധായകൻ. നിരാശയും നഷ്ടബോധവും സഹനവും വേദനയും പ്രതീകമായ കഥാപാത്രങ്ങളെ വെളിച്ചത്തിലേക്ക് കൊണ്ടുവന്ന സംവിധായകൻ. The Silence (1963), Fanny And Alexander (1982), Persona (1966) തുടങ്ങി എന്നും ഓര്മിക്കപ്പെടുന്ന ഒരുപിടി ചിത്രങ്ങൾ ബെർഗ്മാൻ സംവിധാനം ചെയ്തിട്ടുണ്ടെങ്കിലും അദ്ദേഹത്തിന്റെ മാഗ്നസ് ഓപസ് അന്നും ഇന്നും എന്നും The Seventh Seal (1957) ആണ്. ബെർഗ്മാൻ തന്നെ സംവിധാനം ചെയ്ത ഒരു നാടകം ആണ് ചിത്രത്തിന് ആധാരം. 60 വര്ഷം നീണ്ടുനിന്ന ബെർഗ്മാന്റെ സിനിമ ജീവിതം ആരെയും അസൂയപ്പെടുത്താം വിധം പൂർണം ആണ് , അതിൽ ഒരു ദീപസ്തംഭമായി നിലകൊള്ളുന്നു ഇത്ര വർഷങ്ങൾക്ക് ഇപ്പുറവും പ്രസക്തിയും പുതുമയും നഷ്ടപ്പെടാതെ The Seventh Seal (1957). ദീർഘകാലം യുദ്ധത്തിൽ പടയാളിയായ അന്റോണിയോസ്‌ ബ്ലോക്ക് ആണ് ചിത്രത്തിലെ പ്രധാന കഥാപാത്രം. യുദ്ധത്തിൽ പരാജയപ്പെട്ട ശേഷം കടൽത്തീരത്തു ഉറക്കം ഉണരുന്ന ബ്ലോക്ക് കാണുന്നത് തന്നെയും കാത്തിരിക്കുന്ന മരണത്തെ ആണ്. തന്റെ സമയം അടുത്ത് കഴിഞ്ഞു എന്ന് മനസ്സിലാവുന്ന ബ്ലോക്ക് കുറച്ചു സമയം കൂടി നീട്ടികിട്ടുവാനും തന്റെ അവസാനത്തെ ആഗ്രഹം സഫലീകരിക്കുവാനും വേണ്ടി മരണത്തിനെ ഒരു ചെസ്സ് മത്സരത്തിനായി വെല്ലുവിളിക്കുകയാണ്. ഒരു പിഴവിനപ്പുറം മരണമാണ് എന്ന തിരിച്ചറിവും, ദൈവവും സാത്താനും യാഥാർഥ്യമാണോ എന്ന സംശയവും, മരിക്കുന്നതിന് മുൻപ് ഒരു നല്ല കാര്യം എങ്കിലും ചെയ്യണം എന്ന നായകൻറെ ആഗ്രഹവും ആണ് ചിത്രത്തെ മുന്നോട്ട് കൊണ്ടുപോവുന്നത്. തന്റെ ചിത്രങ്ങളിൽ എല്ലാം തന്നെ ദൈവത്തിന്റെ നിലനില്പിനെയും, വേദന സഹിക്കുന്ന ജനങ്ങൾക്ക് നേരെയുള്ള ദൈവത്തിന്റെ നിശ്ശബ്ദതക്കെതിരെയും  ശബ്ദം ഉയർത്തിയ സംവിധായകൻ ആണ് ബെർഗ്മാൻ. കൈകാര്യം ചെയ്ത വിഷയതിനാലും വിശ്വാസങ്ങളെ തച്ചുടക്കാൻ ശ്രമിച്ചതിനാലും ഇറങ്ങിയ കാലത്തു ഒരുപാട് വിവാദത്തിന് പാത്രം ആയ ചിത്രമാണ് ദി സെവൻത് സീൽ. എന്തിരുന്നാലും ചിത്രം ഒരു ലോകോത്തര ക്ലാസിക് ആണ് എന്ന കാര്യത്തിൽ സംശയം നിലനിൽക്കുന്നില്ല. ദൈവം കച്ചവട വസ്തുവായ ഇന്നത്തെ കാലത്തും ചിത്രം പറഞ്ഞുവെച്ച കാര്യങ്ങൾക്കും നിർദേശങ്ങൾക്കും വലിയ പ്രസക്തി ഉണ്ട്. ചിത്രത്തിന്റെ കഥയിൽ ചെറിയ കാര്യങ്ങൾക്ക് പോലും സംവിധായകൻ പ്രാധാന്യം നൽകിയിട്ടുണ്ട്. 1950കളിൽ ഷൂട്ട് ചെയ്ത ചിത്രം ആയിട്ട് കൂടിയും ചിത്രത്തിലെ ക്ലൈമാക്സ് ഷോട്ട് ഉൾപ്പെടെയുള്ള രംഗങ്ങൾ ഇന്നും അത്ഭുതമായി നിലനിൽക്കുന്നു. കഥയും തിരക്കഥയും കഥാപാത്രങ്ങളും കഥാസന്ദർഭങ്ങളും എന്നും മനസ്സിൽ നിലനിൽക്കുന്നത് ആണ്. പ്രധാന കഥാപാത്രങ്ങളായ ബ്ലോക്കിനെ അവതരിപ്പിച്ച മാക്സ് വോൺ സിഡോയും മരണത്തിനെ അവതരിപ്പിച്ച ബെന്ഗത് എകെറോടും മികച്ച പ്രകടനം തന്നെ കാഴ്ചവെച്ചു. വേണ്ടവിധം വിശകലനം ചെയ്യപ്പെട്ടിട്ടില്ലാത്ത ഒരു ക്ലാസിക് ചിത്രം തന്നെ ആണ് ദി സെവൻത് സീൽ.

Virgin Spring (1960)

Genre : Revenge

Rating : 8.1/10

Duration : 89 Minutes


വിർജിൻ സ്പ്രിങ് എന്ന ചിത്രത്തിന് ഒരു സവിശേഷത, അല്ലെങ്കിൽ ഒരു കുഴപ്പം ഉണ്ട്. പ്രഥമ ദൃഷ്ടിയാൽ നോക്കവേ വളരെ ലളിതം എന്നൊരു ചിന്ത ഈ ചിത്രം കാഴ്ചക്കാരനിൽ ജനിപ്പിക്കാം എങ്കിലും സിനിമ മുന്നോട്ട് വെയ്ക്കുന്ന വിഷയവും ഉളവാക്കുന്ന ചിന്തയും വളരെ വലുതാണ്. സ്വീഡനിലെ ഗ്രാമ പ്രദേശങ്ങളിൽ പ്രചാരത്തിൽ ഉണ്ടായിരുന്ന ഒരു നാടോടി കഥയാണ് ബെർഗ്മാൻ സിനിമാ രൂപേണ വിർജിൻ സ്പ്രിങ്ങിലൂടെ അവതരിപ്പിച്ചിട്ടുള്ളത്. എട്ട് നൂറ്റാണ്ട് മുൻപേ സ്വീഡനിൽ താമസിച്ചിരുന്ന കടുത്ത ക്രിസ്തീയ മത വിശ്വാസം പാലിക്കുന്ന കുടുംബത്തിലേക്കാണ് കാഴ്ചക്കാരെയും കൂട്ടി ബെർഗ്മാൻ കടന്ന് ചെല്ലുന്നത്, ഗൃഹനാഥനായ റ്റോറിയും അയാളുടെ ഭാര്യയും മകളും വളർത്തുമകളും ഉൾപ്പെടുന്നതാണ് ആ കുടുംബം. ഈ കുടുംബത്തിൽ പിന്നീട് അരങ്ങേറുന്ന ഒരു ദുരന്തവും അതിന്റെ കാര്യ കാരണങ്ങളും പ്രത്യാഘാതങ്ങളും എല്ലാമാണ് തുടർന്നുള്ള ഒന്നര മണിക്കൂർ. ദൈവം എന്ന വസ്തുതയെ ഒരല്പം സംശയത്തോടെയും ഒരായിരം ചോദ്യങ്ങളോടെയും സമീപിച്ച ബെർഗ്മാൻ ഇവിടെയും ആവർത്തിക്കുന്നത് അത് തന്നെയാണ്, ചോദ്യം ചെയ്യുന്നത് വിശ്വാസങ്ങളെയാണ്.

Persona (1966)

Genre : Mystery

Rating : 8.2/10

Duration : 84 Minutes


ഓരോ രംഗം കഴിയുമ്പോഴും ഇനി എന്ത് എന്ന ചിന്ത മനസ്സിൽ ഉയരുകയും, നമ്മുടെ ധാരണകൾ എല്ലാം തന്നെ ഓരോന്നായി മാറി മറിയുകയും ചെയ്യുമ്പോൾ ഉറപ്പിക്കാം സ്‌ക്രീനിൽ ഇപ്പോൾ കണ്ട് കൊണ്ടിരിക്കുന്നത് ഒരു സാധാരണ ചിത്രമല്ല എന്ന്. ഈ വസ്തുതയെ നൂറ് ശതമാനം പിന്താങ്ങുന്ന ഒന്നാണ് ബെർഗ്മാൻ സംവിധാനം ചെയ്ത പെർസോണ എന്ന ചിത്രം. വ്യക്തിപരമായി സംവിധായകന്റെ ചിത്രങ്ങളിൽ ഏറ്റവും ഇഷ്ട്ടപ്പെട്ടതും അത്ഭുതപ്പെടുത്തിയതും ഈ ചിത്രമാണ്, അതിനാൽ തന്നെ ഏതെങ്കിലും ഒരു ചിത്രം ഇത് വായിക്കുന്നവർ അറിവൊന്നുമില്ലാതെ, യാതൊരു വിധ മുൻവിധികളും ഇല്ലാതെ കാണണം എന്ന് നിർബന്ധമുണ്ടെങ്കിൽ അത് ഇതാണ്. കഥയെ കുറിച്ചുള്ള വലിയ സൂചനകൾ ഒന്നും ഉൾപ്പെടുത്തുന്നില്ലെങ്കിലും രണ്ട് സ്ത്രീ കഥാപാത്രങ്ങളാണ് ഈ ചിത്രത്തിന്റെ നട്ടെല്ല്, ഇവർക്കിടയിൽ ഉടലെടുക്കുന്ന യാഥാർഥ്യമോ ഭാവനയോ എന്ന് തിരിച്ചറിയാനാവാത്ത ചോദ്യങ്ങളാണ് ഈ ചിത്രം, ഉത്തരങ്ങൾ കണ്ട്, അറിഞ്ഞ്, അനുഭവിച്ച് മനസിലാക്കാനായി ഈ ചിത്രം വിട്ടുതരുന്നു.

Wild Strawberries (1957)

Genre : Drama

Rating : 8.2/10

Duration : 91 Minutes


ജീവിതത്തിൽ ഏതൊരു വ്യക്തി ആയാലും ശെരി സംഭവിക്കും എന്ന് നൂറ് ശതമാനം ഉറപ്പുള്ള ഒരു വസ്തുതയെ ബുദ്ധി ഉറച്ച കാലം മുതൽക്കേ ഭയപ്പെടുന്നുണ്ടെങ്കിൽ അത് മരണത്തെയാണ്, മരണം എന്നത് സുനിശ്ചിതമാണ്, സത്യമാണ്, തിരിച്ചറിവാണ്. കഥ കാരണം അത്ഭുതമായി മാറിയ സിനിമകൾ അനവധി ആണെങ്കിലും കഥയില്ലായ്മ കാരണം ഞെട്ടിച്ച അപൂർവം ചിലതെ ഉള്ളൂ, അവയിൽ ഒന്നാണ് വൈൽഡ് സ്ട്രോബറീസ്, വിശദീകരിക്കാൻ മാത്രമൊരു കഥ ചിത്രത്തിലില്ല. തന്റെ ജീവിതത്തിന്റെ അന്ത്യ കാലത്തേക്ക് കടന്ന ഒരു പ്രൊഫെസറാണ് സിനിമയുടെ കേന്ദ്ര കഥാപാത്രം, സ്വന്തം ആദരിക്കൽ ചടങ്ങിലേക്കുള്ള അയാളുടെ യാത്രയിലൂടെയാണ് കഥ മുന്നേറുന്നത്. മരണഭയം പ്രൊഫസറെ കാർന്ന് തിന്നുകയാണ്, അയാളുടെ ചിന്തകളിൽ പോലും മരണം ഭാഗമാവുകയാണ്. കൂടുതൽ പറഞ്ഞ് ആസ്വാദനത്തെ കുറയ്ക്കുന്നില്ല, സിനിമ എന്നതിൽ കവിഞ്ഞ് ഒരു അനുഭവമാണ് വൈൽഡ് സ്ട്രോബറീസ്, കാണാൻ ശ്രമിക്കുക, അനുഭവിക്കാൻ ശ്രമിക്കുക.

Winter Light (1963)

Genre : Drama

Rating : 8.1/10

Duration : 81 Minutes


ബെർഗ്മാനെ കുറിച്ചുള്ള ഒരു സംഭാഷണവും അദ്ദേഹത്തിന്റെ ട്രിലോഗി ഓഫ് സൈലെൻസ് എന്ന സിനിമാ സീരീസിനെ കുറിച്ച് പറയാതെ അവസാനിപ്പിക്കാനാവില്ല.ത്രൂ എ ഗ്ലാസ് ഡാർക്‌ലി എന്ന ചിത്രത്തിലൂടെ ആരംഭിച്ച് ദി സൈലെൻസ് എന്ന ചിത്രത്തിൽ അവസാനിച്ച സീരീസിലെ രണ്ടാം ഭാഗ ചിത്രമാണ് വിന്റർ ലൈറ്റ്. വിഷമം അനുഭവിക്കുന്ന മനുഷ്യനെ അയാളുടെ ദുരിത സമയത്ത് പോലും ആശ്വസിപ്പിക്കാൻ കഴിയാത്ത ഒരു പാസ്റ്റർ കഥാപാത്രത്തിന്റെ നിസ്സഹായ അവസ്ഥയിലൂടെ കടന്ന് പോവുന്ന ചിത്രം ഒരു രീതിയിൽ അല്ലെങ്കിൽ മറ്റൊരു രീതിയിൽ ചോദ്യം ചെയ്യുന്നത് വിശ്വാസത്തെയും ദൈവത്തെയും തന്നെയാണ്. ദൈവത്തിനും വിശ്വാസത്തിനും മൂല്യങ്ങൾക്കും അപ്പുറം മനുഷ്യന്റെ നിശബ്ദതയും ചിത്രം പ്രതിപാദിക്കുന്നുണ്ട്. ചില ചിത്രങ്ങളെ കുറിച്ച് എന്തെങ്കിലും കുത്തി കുറിക്കുമ്പോൾ, നമ്മുടെ ഇടുങ്ങിയ മനസിലൂടെ കണ്ട് അഭിപ്രായം പറഞ്ഞ് അതിനോട് തന്നെ നീതികേട്‌ കാട്ടുകയാണ് എന്ന് തോന്നിയിട്ടുണ്ട്. വിന്റർ ലൈറ്റും ഒട്ടുമിക്ക ബെർഗ്മാൻ ചിത്രങ്ങളും ആ സ്രേണിയിൽ പെട്ടവയാണ്, അത് വിശകലനം ചെയ്യാൻ ഞാൻ ആളല്ല, എങ്കിലും പരിചയപ്പെടുത്താൻ ശ്രമിക്കുകയാണ്. ഒഴിവാക്കാതെ കാണാൻ ശ്രമിക്കുക ഓരോ ചിത്രങ്ങളും, കാരണം ഇവ ഓരോന്നും ഓരോ പാഠ പുസ്തകങ്ങൾ ആവുന്നു.

ബെർഗ്മാന്റെ നൂറാം ജന്മ വാർഷികത്തിൽ മികച്ച് നിൽക്കുന്ന അനവധി സൃഷ്ടികളിൽ നിന്നും അഞ്ച് ചിത്രങ്ങൾ മാത്രം തിരഞ്ഞെടുക്കുക എന്നത് നീതികേട് ആണ്. ഈ അഞ്ചെണ്ണത്തിലേക്ക് ശ്രദ്ധ തിരിയുമ്പോഴും ഓരോ കോണുകളിൽ നിന്നും ചോദ്യങ്ങൾ ഉയരുകയാണ്, ഫാനി ആൻഡ് അലക്സാണ്ടർ നല്ല ചിത്രമല്ലേ ? ഓട്ടം സൊണാറ്റ ആണോ മോശം ? ക്രൈസ് ആൻഡ് വിസ്‌പേർസ് മറക്കാൻ കഴിയുമോ ? അങ്ങനെ അങ്ങനെ. ഇവയെല്ലാം മറ്റൊരു ഭാഗത്ത് ഉൾപ്പെടുത്താം എന്ന പ്രതീക്ഷയിൽ ബെർഗ്മാന് പ്രണാമം അർപ്പിച്ച് തല്ക്കാലം പിൻവാങ്ങാം എന്ന് മാത്രം.

421. Freaks (1932)

Director : Tod Browning

Genre : Fantasy

Rating : 8/10

Country : USA

Duration : 62 Minutes


🔸ഒരു മനുഷ്യന് എത്രത്തോളം അധഃപതിക്കാം ?? കളവും ചതിയും വഞ്ചനയും എല്ലാം സമ്മതിക്കാം, എന്നാൽ സ്വന്തം സ്വാർത്ഥ ലാഭത്തിന് വേണ്ടി തന്നെ കണ്ണടച്ച് വിശ്വസിച്ച വികലാംഗൻ ആയ ഒരു പാവത്തിനെ പറഞ്ഞ് പറ്റിച്ച് അയാൾ തന്റെ ജീവിതകാലം മുഴുവൻ ചോര നീരാക്കി സമ്പാദിച്ച പണം കൈക്കലാക്കാൻ ശ്രമിക്കുക എന്നത് വിവരണം അർഹിക്കാത്ത ചെറ്റത്തരം തന്നെ ആണ്. ഈ കഥയാണ് ഫ്രീക്സ് എന്ന പഴയ കാല ചിത്രം. തൊണ്ണൂറ് മിനുട്ടിനടുത്ത് ദൈർഖ്യം ഉണ്ടായിരുന്ന പൂർണ ചിത്രം റിലീസ് സമയത്ത് കാസ്‌ട്രേഷൻ ഉൾപ്പെടെ ഉള്ള വിഷയങ്ങൾ കൈകാര്യം ചെയ്തതിനാൽ കടുത്ത വിമർശനങ്ങൾ നേരിടുകയും ബ്രിട്ടൻ പോലുള്ള രാജ്യങ്ങളിൽ നിരോധിക്കപ്പെടുകയും ചെയ്തിട്ടുണ്ട്. മുപ്പത് മിനുട്ടുകൾ വെട്ടി ചുരുക്കിയ ചിത്രത്തിന്റെ പ്രിന്റാണ് ഇന്ന് ലഭ്യമായിട്ടുള്ളത്.

🔸ഫ്രീക്സ് എന്ന ചിത്രത്തെ കുറിച്ച് പറയുന്നതിനെ മുൻപേ സംവിധായകൻ ടോഡ് ബ്രൗണിങ്ങിനെ ഒന്ന് പരിചയപ്പെടുന്നത് നന്നാവും, പത്തൊൻപതാം നൂറ്റാണ്ടിന്റെ അവസാന കാലത്ത് കെന്റക്കിയിലെ സാമ്പത്തികമായി ബേധപ്പെട്ട കുടുംബത്തിൽ ചാൾസ് എന്ന പേരിൽ ജനിച്ച സംവിധായകനെ എല്ലാ കാലത്തും മോഹിപ്പിച്ച ഒരേയൊരു വിഷയമേ ഉണ്ടായിരുന്നുള്ളൂ, സർക്കസ്. സർക്കസ് കൂടാരങ്ങളോടും, അഭ്യാസികളോടും അടങ്ങാത്ത അഭിനിവേശം പുലർത്തിയിരുന്ന ചാൾസ് പതിനാറാം വയസ്സിൽ നാട് സഞ്ചരിക്കാനെത്തിയ നാടോടി സർക്കസുകാരോടൊപ്പം വീട് വിട്ടിറങ്ങി. പിന്നീടുള്ള ചാൾസിന്റെ ജീവിതം അഭ്യാസികളോടും മൃഗങ്ങളോടും ഒപ്പം സർക്കസ് കൂടാരങ്ങളിലായിരുന്നു.

🔸"ശീലങ്ങളിൽ നിന്നും ആചാരങ്ങളിൽ നിന്നും മാറി നടക്കാനുള്ള എല്ലാ ശ്രമങ്ങളും നിർഭാഗ്യകരം ആയും അതിന് തുണിയുന്നവർ തിന്മയുടെ ആൾ രൂപങ്ങൾ ആയുമാണ് കരുതപെട്ടത്" എന്ന ഓര്മപ്പെടുത്തലോട് കൂടിയാണ് ചിത്രം ആരംഭിക്കുന്നത്. സർക്കസ് ട്രൂപ്പിലെ സൗന്ദര്യഭാജനമായ ക്ലിയോപാട്രയും ജന്മനാ കുള്ളനായ ഹാൻസും തമ്മിലുള്ള പ്രണയമാണ് ചിത്രത്തിന് ആധാരം. ക്ലിയോപാട്രയുമായി ഹാൻസ് അഗാധമായ ഇഷ്ടത്തിൽ ആണെങ്കിലും ക്ലിയോപാട്രയുടെ കണ്ണ് അയാളുടെ സമ്പാദ്യത്തിൽ മാത്രമാണ് എന്നതാണ് സത്യം. ഹാൻസിനെ ഒഴിവാക്കാനും സമ്പാദ്യം കൈക്കലാക്കാനുമായി ഒരവസരത്തിന് കാത്ത് നിൽക്കുകയാണ് ക്ലിയോപാട്രയും കാമുകനായ ഹെർക്കുലീസും.

🔸ഈ രണ്ട് കഥാപാത്രങ്ങൾക്കും അവരുടെ ചരട് വലികൾക്കും, കഥ അറിയാതെ ഇതിന്റെ എല്ലാം ഭാഗമായി മാറുന്ന ഹാൻസിനും പുറമെ മറ്റ് ചില കഥാപാത്രങ്ങൾ കൂടിയുണ്ട് ചിത്രത്തിൽ. ടൈറ്റിൽ പറയുന്നത് പോലെ ഫ്രീക്സ് എന്ന് വിശേഷിപ്പിക്കേണ്ട ചിലർ, ജന്മനാ വൈകല്യം ബാധിച്ച ചിലർ, ആ വൈകല്യങ്ങൾ കൊണ്ട് മറ്റുള്ളവരെ ചിരിപ്പിക്കാൻ ബാധ്യസ്ഥരായവർ, അതിന് വിധിക്കപ്പെട്ടവർ, അവരെ വിശേഷിപ്പിക്കാൻ ഏറ്റവും നല്ല വാക്ക് ഒരർത്ഥത്തിൽ ഫ്രീക്സ് എന്ന് തന്നെ. ക്ലിയോപാട്രയുടെയും ഹെർക്കുലീസിന്റേയും ചെയ്തികളിൽ സംശയം തോന്നി തുടങ്ങിയിരുന്ന ഇവരും കാത്തിരുന്നത് അവസരത്തിനായി തന്നെ, സുഹൃത്തിനെ സംരക്ഷിക്കാനുള്ള അവസരത്തിന് വേണ്ടി.

🔸ചിത്രത്തിലെ നിർണ്ണായകമായ ഒരു ഘട്ടത്തിൽ മുഖം വികൃതമായ ചില കലാകാരൻമാർ അഭ്യാസം കാണിക്കുമ്പോൾ മാന്യനെന്ന രീതിയിൽ വസ്ത്രം ധരിച്ച അഭ്യസ്ത വിദ്യൻ എന്ന് തോന്നിക്കുന്ന ഒരു വ്യക്തി അവരെ അപമാനിക്കുന്ന ഒരു രംഗമുണ്ട്. വേഷത്തിനും പഠിപ്പിനും പണത്തിനും അപ്പുറം മനുഷ്യനെ മനുഷ്യനാക്കുന്ന വേറെ ചില വസ്തുതകൾ ഉണ്ടെന്ന് ഈ ഒറ്റ രംഗത്തിൽ കൂടി തെളിയിച്ച സംവിധായകന് പ്രണാമം. ഇതൊക്കെയാണ് ഈ ചിത്രം, കാഴ്ചയിൽ സൗന്ദര്യമുള്ളവർ, പൂർണരെന്ന് കരുതുന്നവർ തങ്ങളുടെ നീചമായ ഭാവം പ്രകടിപ്പിക്കുമ്പോൾ വികലമായ, വൈകല്യം ബാധിച്ചവർ മറ്റൊരു വശം കാണിച്ചു തരുന്നു, അതി സുന്ദരം എന്നല്ലാതെ ഒന്നും പറയാനില്ല.

Verdict : Must Watch

420. Venom (2018)

Director : Ruben Fleischer

Genre : Superhero

Rating : 7/10

Country : USA

Duration : 116 Minutes


🔸ഒരു സിനിമ റിലീസിന് തയ്യാറെടുത്ത് കൊണ്ട് നിൽക്കെ പ്രധാന കഥാപാത്രത്തെ അവതരിപ്പിച്ച നടൻ ചിത്രത്തിൽ തനിക്ക് ഏറ്റവും ഇഷ്ട്ടപ്പെട്ട രംഗങ്ങൾ എഡിറ്റിങ് ടേബിളിൽ വെട്ടി മുറിച്ച് കളഞ്ഞ നാല്പത് മിനുട്ടോളം ദൈർഖ്യമുള്ള ഫൂട്ടജ് ആണെന്ന് പറയുന്നത് ഏത് രീതിയിൽ നോക്കിയാലും അത്ര നല്ല കാര്യമല്ല, തമാശയെന്നും ഫോർത്ത് വാൾ ബ്രേക്കിംഗ് എന്നുമൊക്കെ പറഞ്ഞ് തമാശയുടെ മേൻപൊടിയോട് കൂടി അത് മറച്ച് പിടിക്കാൻ സ്റ്റുഡിയോ എത്ര കണ്ട് ശ്രമിച്ചാലും അത് സത്യമാവാതെ ഇരിക്കുകയുമില്ല. സ്‌പൈഡർമാൻ എന്ന സുപർഹീറോ കഥാപാത്രത്തിനോടൊപ്പം ചേർത്ത് വയ്ക്കപ്പെടേണ്ട വെനം എന്ന കഥാപാത്രത്തെ ആ ബന്ധങ്ങളെല്ലാം അറുത്ത് മാറ്റി കേന്ദ്ര കഥാപാത്രമാക്കി കൊണ്ട് ഒരു ചിത്രം വരുന്നു എന്ന വാർത്തയും അതിനാലുണ്ടായ പ്രതീക്ഷയും വളരെ വലുതായിരുന്നു, പ്രത്യേകിച്ചും വില്ലന്മാരുടെ കൂട്ടയോട്ടം കാരണം പ്രാധാന്യം കുറഞ്ഞ് പോയ കഥാപാത്രത്തിന്റെ സ്‌പൈഡർമാൻ 3 എന്ന ചിത്രത്തിലെ ആദ്യ വരവ് കണക്കിലെടുക്കുമ്പോൾ.

🔸മലിനീകരണവും ജനപ്പെരുപ്പവും കാരണം നാശത്തിലേക്ക് പോയി കൊണ്ടിരിക്കുന്ന ഭൂമിക്ക് പകരമായി മനുഷ്യവാസം സാധ്യമായ ഗ്രഹങ്ങളെ കുറിച്ചുള്ള ലൈഫ് ഫൌണ്ടേഷൻ എന്ന കമ്പനിയുടെ അന്വേഷണങ്ങൾ അവരെ നയിക്കുന്നത് നാല് സിംബയോട്ടുകളിലേക്കാണ്. തികച്ചും ബോധവാന്മാരായ ഈ സിംബയോട്ടുകൾ ഏതെങ്കിലും വിധേന മനുഷ്യ ശരീരവുമായി ബന്ധപ്പെടുകയാണെങ്കിൽ അവ രണ്ടും ലയിക്കുകയും ഒരു പുതിയ സൃഷ്ടി പിറവി എടുക്കുകയും ചെയ്യും, ചുരുക്കി പറഞ്ഞാൽ ഇവ കൈകാര്യം ചെയ്യുമ്പോൾ അതീവ ശ്രദ്ധ വേണമെന്ന് സാരം. അത് എന്തൊക്കെ തന്നെ ആയാലും ചില കാരണങ്ങൾ കാരണം മനുഷ്യ വംശത്തിന്റെ ഉന്നമനം ലക്ഷ്യമിട്ട് കൊണ്ട് ഈ സിംബയോട്ടുകളെ ലൈഫ് ഫൌണ്ടേഷൻ കമ്പനിയുടെ മേധാവി ആയ കാൾട്ടൻ ട്രക്കിന്റെ നിർദേശ പ്രകാരം ഭൂമിയിലേക്ക് കൊണ്ടുവരികയാണ്. തുടർന്ന് അരങ്ങേറുന്ന പ്രശ്നങ്ങളും അതിന്റെ പ്രത്യാഘാതങ്ങളും എല്ലാം ചേരുന്നതാണ് വെനം എന്ന ചിത്രം.

🔸ചിത്രത്തിന്റെ കഥയിലേക്കും സന്ദർഭങ്ങളിലേക്കും കടക്കാതെ പോസിറ്റീവ് നെഗറ്റീവ് എന്തൊക്കെ ആണെന്ന് പരിശോധിക്കുക ആണെങ്കിൽ വെനം എന്ന ചിത്രത്തിന്റെ ഏറ്റവും വലിയ പോരായ്മയായി തോന്നിയത് ആദ്യ പകുതി തന്നെയാണ്. ചിത്രത്തിന്റെ പ്രൊമോഷൻ ടീം സൂചിപ്പിച്ചത് പോലെ എഡി ബ്രോക് എന്ന വ്യക്തിയും വെനം എന്ന സിംബിയോടും ചേർന്നുള്ള ബഡി കോപ് സ്റ്റൈൽ ചിത്രമല്ല ആദ്യ പകുതി. എഡി ബ്രോക് എന്ന വ്യക്തിയെയും അയാൾക്ക് ചുറ്റുമുള്ള കഥാപാത്രങ്ങളെയും വികസിപ്പിച്ചെടുക്കുന്ന ആദ്യ പകുതി ഈ കഥാപാത്രങ്ങളെ ഏതെങ്കിലും രീതിയിൽ പ്രേക്ഷകന് പ്രിയപ്പെട്ടവരാക്കാൻ കഴിയുന്നതിലും വിജയിച്ചിട്ടില്ല. വെനം പോലെ ആർ റേറ്റിംഗ് ആവശ്യപ്പെടുന്ന ഒരു ചിത്രത്തെ കൂടുതൽ ലാഭം പ്രതീക്ഷിച്ച് കൊണ്ട് വെട്ടി ചുരുക്കി പിജി റേറ്റിംഗിൽ ഒതുക്കിയ സ്റ്റുഡിയോയും, മാർക്കറ്റിങ്ങിൽ വേണ്ട ശ്രദ്ധ കൊടുക്കാതെയും ചിത്രത്തോട് നീതി പാലിക്കാതെയും ഇരുന്ന അണിനിരക്കാരും പ്രത്യേക പരാമർശങ്ങൾ അർഹിക്കുന്നുണ്ട്.

🔸ചിത്രത്തിന്റെ നല്ല വശങ്ങൾ ശ്രദ്ധിക്കുക ആണെങ്കിൽ എടുത്ത് പറയേണ്ടത് ടോം ഹാർഡി എന്ന നടനെ തന്നെയാണ്. സോണിയുടെ അമ്പരപ്പിക്കുന്ന പദ്ധതിയും അണിയറയിൽ നിന്ന് കേട്ട മോശം വാർത്തകളിലും ഒരല്പം പ്രതീക്ഷ ബാക്കി വെച്ചത് ടോമിൽ ഉള്ള പ്രതീക്ഷ തന്നെ. ചിത്രം തിരഞ്ഞെടുക്കാൻ ഉണ്ടായ ടോമിന്റെ കാരണങ്ങളെ, പ്രത്യേകിച്ചും വെനം എന്ന കഥാപാത്രത്തിനോടുള്ള അടുപ്പം മാനിക്കാമെങ്കിലും ഫിനിഷ്ഡ് പ്രോഡക്റ്റ് അദ്ദേഹത്തിന്റെ കഴിവിന് അനുസൃതമായില്ല എന്ന് പറയേണ്ടി വരും. ഇതിനർത്ഥം ടോം ഹാർദിയുടെ പ്രകടനം ഒരിടത്തും മോശം ആണെന്നല്ല, എന്നാലും വെനം എന്ന ചിത്രവും ടോം ഹാർദിയും നിലവാരത്തിൽ രണ്ട് ധ്രുവങ്ങളിലേത് പോലെ കാണപ്പെട്ടു. രണ്ടാം പകുതിയിൽ പ്രാധാന്യം സിജിഐ കഥാപാത്രങ്ങളിലേക്ക് മാറിയെങ്കിലും, പിഴവുകൾ പ്രകടമാവാത്ത എഫക്ടുകൾ ചിത്രത്തിന്റെ പ്ലസ് പോയിന്റുകളിൽ ഒന്നാണ്, തീർച്ചയായും പ്രശംസ അർഹിക്കുന്ന ഒന്ന്.

🔸ടൈറ്റിൽ കഥാപാത്രം പ്രേക്ഷകനിലേക്ക് അതിന്റെ എല്ലാ ഭംഗിയോടെയും അവതരിക്കാൻ അല്പം സമയം എടുക്കുന്നുണ്ടെങ്കിലും അവിടെ നിന്നങ്ങോട്ട് ചിത്രം ഗിയർ മാറ്റുന്നുണ്ട്, അതിനാൽ തന്നെ ആദ്യ പകുതിയേ അപേക്ഷിച്ച് രണ്ടാം പകുതി കുറച്ച് കൂടി ആസ്വാദ്യകരമാണ്. കൃത്യമായ രീതിയിൽ ടോൺ നിലനിർത്താൻ ചിത്രം ബുദ്ധിമുട്ടുന്നുണ്ടെങ്കിലും ചില ഇടങ്ങളിലെ തമാശകളും നന്നായിരുന്നു. രണ്ടാം ഭാഗത്തിന് വേണ്ടിയുള്ള ഒരു ചെറിയ പോസ്റ്റ് ക്രെഡിറ്റ് സീൻ കൂടി ചിത്രത്തിലുണ്ട്, മികച്ചതെന്നൊന്നും പറയാനാവില്ലെങ്കിലും ഒരു പ്രശസ്ത ഹോളിവുഡ് നടൻ സീനിൽ എത്തുന്നുണ്ട്. രണ്ടാം പകുതി ബേധപ്പെട്ടത് ആയത് കൊണ്ട് തന്നെ തുടക്കം മുതൽക്കേ വെനം പ്രത്യക്ഷപ്പെടാൻ സാധ്യതയുള്ള അടുത്ത ഭാഗത്തിൽ ചെറിയൊരു പ്രതീക്ഷയുണ്ട്, എന്തിരുന്നാലും അതിലേക്ക് ഇപ്പോൾ കടക്കേണ്ട കാര്യമുണ്ടെന്ന് തോന്നുന്നില്ല. ഇതെല്ലാം കഴിയുമ്പോൾ കൗതുകം തോന്നുന്നത് ടോം ഹാർഡി എടുത്ത് പറഞ്ഞ നാല്പത് മിനിറ്റ് വെനം ഫൂട്ടേജിൽ എന്തായിരുന്നു എന്ന കാര്യത്തിൽ മാത്രം.

Verdict : Average

419. Taboo (2017)

Director : Kristoffer Nyholm

Genre : Drama

Rating : 8.5/10

Season : 1

Episodes : 8

Country : UK

Duration : 56-58 Minutes Per Episode


🔸എഴുത്ത്കാരനായ സ്റ്റീവൻ നൈറ്റും നടൻ ടോം ഹാർദിയും ഒരുമിച്ചപ്പോൾ എല്ലാം തന്നെ ലഭിച്ച ഫൈനൽ പ്രോഡക്റ്റ് ഒരു മിനിമം നിലവാരം ഉള്ളവ ആയിരുന്നു. ഒന്നര മണിക്കൂർ ഒരു കഥാപാത്രം മാത്രം സ്‌ക്രീനിൽ എത്തിയ, അയാളുടെ മാനസികാവസ്ഥയും വിഷമങ്ങളും ഫോൺ സംഭാഷണങ്ങളിലൂടെ പ്രേക്ഷകനിൽ എത്തിച്ച ലോക്ക് എന്ന സിനിമ ആയാലും ശെരി, പഴയ കാല ഗ്യാങ്‌സ്റ്റർ സംഘങ്ങളുടെ ഉള്ളുകളികൾ കാഴ്ചക്കാരുടെ മുന്നിൽ അവതരിപ്പിച്ച പീക്കി ബ്ലൈൻഡേർസ് എന്ന സീരീസ് ആയാലും ശെരി ഇവയെല്ലാം തന്നെ മികച്ച ആരാധക വിമർശക പിന്തുണ കരസ്ഥമാക്കിയവയാണ്. അതിനാൽ തന്നെ ഈ ടീമിന്റെ മൂന്നാമത്തെ ഒത്തുചേരലായ ടാബൂ എന്ന ടിവി സീരീസിൽ പ്രതീക്ഷ വാനോളം ആയിരുന്നു എല്ലാവരിലും, അതിനെ കുറ്റം പറയാനുമാവില്ല. ഇതൊന്നും പോരെങ്കിൽ ഈ തലമുറയിലെ മികച്ച നടന്മാരിൽ ഒരാളായ ടോം ഹാർഡി തന്റെ പാഷൻ പ്രൊജക്റ്റ് എന്ന രീതിയിൽ കൂടി കഥയെ സമീപിക്കുന്നു എന്ന വാർത്തയും, താൻ ഉൾപ്പെട്ടിരിക്കുന്ന സംരംഭം എന്ത് തന്നെ ആയാലും അതിനായി നൂറ് ശതമാനം കഴിവും സമയവും അർപ്പിക്കുന്ന ഹാർഡിയുടെ പ്രൊഫെഷണൽ മനോഭാവവും എല്ലാം കൊണ്ട് തന്നെ ടാബൂ എന്ന സീരീസ് റിലീസിന് മുന്നേ വാർത്തകളിൽ ഇടം പിടിച്ചിരുന്നു.

🔸ടോം ഹാർഡി അവതരിപ്പിക്കുന്ന ജെയിംസ് ഡിലാനി ആണ് ടാബൂയിലെ പ്രധാന കഥാപാത്രം, ഇംഗ്ലണ്ടിൽ ഷിപ്പിംഗ് കമ്പനി ഉടമയായ ഹോറസ് ഡെലാനിയുടെ മകനായി പതിനെട്ടാം നൂറ്റാണ്ടിന്റെ അവസാനത്തിലാണ് ജയിംസിന്റെ ജനനം. അച്ഛനും മകനുമിടയിൽ നാമ മാത്രമായ ബന്ധം മാത്രമേ എല്ലാ കാലത്തും നില നിന്നിരുന്നുള്ളൂ, ഭാര്യയുടെ വിയോഗത്തിന് ശേഷം മറ്റൊരു സ്ത്രീയിലേക്ക് നടന്നകന്ന അച്ഛനെ ഒരു കാലത്തും ജെയിംസിന് മനസിലാക്കാൻ കഴിഞ്ഞിട്ടില്ല, അതിന് ആവശ്യമായ ശ്രമങ്ങൾ ഹോറസ് ഒരുകാലത്തും നടത്തിയിട്ടുമില്ല. അച്ഛൻ മകൻ ബന്ധത്തിലെ വിള്ളലുകൾ എന്തെല്ലാം തന്നെ ആയാലും അവ എല്ലാം സംഭവിച്ച് കഴിഞ്ഞിട്ട് വർഷങ്ങൾ ഏറെ കഴിഞ്ഞിരിക്കുന്നു. ജന്മനാട്ടിൽ നിന്നും എന്നോ പോയി മറഞ്ഞ ജെയിംസ് ഇന്ന് ജീവനോടെ ഉണ്ടോ എന്ന് പോലും വേണ്ടപ്പെട്ടവരും സുഹൃത്തുക്കളും സംശയിച്ച് തുടങ്ങിയ സമയത്താണ് അയാളുടെ തിരിച്ചുവരവ്, തന്റെ അച്ഛന്റെ മരണാനന്ത ക്രിയകളിൽ പങ്കെടുക്കാൻ വേണ്ടി. തുടർന്ന് ജെയിംസിന്റെയും അയാളുടെ ഉറ്റവരുടെയും ജീവിതങ്ങളിൽ അരങ്ങേറുന്ന സംഭവങ്ങളും അതിന്റെ പ്രത്യാഘാതങ്ങളും ആണ് ടാബൂ എന്ന സീരീസിന്റെ പ്രമേയം.

🔸ഇരുപത്തി ഏഴ് വർഷങ്ങൾക്ക് ശേഷം ലണ്ടനിൽ മടങ്ങി എത്തുന്ന ജെയിംസ് ഡെലാനി ഒരുപാട് മാറി പോയിരിക്കുന്നു, തന്റെ തിരോധാന കാലയളവ് കൂടുതലും ആഫ്രിക്കയിൽ ചിലവഴിച്ച ജയിംസിന്റെ ശരീരവും മനസ്സും വന്യമാം വിധം മാറി പോയിരിക്കുന്നു. പാശ്ചാത്യ നാടുകൾക്ക് ഒരു പരിധി വരെ ഈ ഇരുപതാം നൂറ്റാണ്ടിൽ പോലും പിടി കൊടുക്കാത്ത ആഫ്രിക്കൻ വനന്തരങ്ങൾ രണ്ട് നൂറ്റാണ്ടുകൾക്ക് മുന്നേ എത്രമാത്രം വന്യവും വിചിത്രവും ആയിരുന്നിരിക്കണം എന്നത് ചിന്തിച്ചാൽ തന്നെ മനസിലായേക്കും. അങ്ങേയറ്റം വിചിത്രമായ ആചാരങ്ങാകും ഭയപ്പെടുത്തുന്ന രീതികളും എല്ലാം മുഖ മുദ്ര ആയിരുന്ന പതിനെട്ടാം നൂറ്റാണ്ടിലെ ആഫ്രിക്കയുടെ ഭീകരതയും വന്യതയും ജെയിംസിലും കാണാനാവും. ചുരുക്കി പറയുക ആണെങ്കിൽ അടുപ്പക്കാരും ബന്ധുക്കളും എല്ലാം കണ്ട് മറന്ന പഴയ ജെയിംസ് എങ്ങോ പോയി മറഞ്ഞിരിക്കുന്നു, മടങ്ങി എത്തിയത് എല്ലാവർക്കും അപരിചിതനായ മറ്റേതോ ഒരു വ്യക്തിയാണ്.

🔸ലളിതമായി പറയുക ആണെങ്കിൽ ടാബൂ എന്ന സീരീസ് ഒരു റിവഞ്ച് സ്റ്റോറി ആണ്, ആരെന്നും എന്തിനെന്നും എങ്ങനെ എന്നും തൽക്കാലം പോസ്റ്റിൽ പ്രതിപാദിക്കുന്നില്ല, അതിന് വ്യക്തമായ കാരണവുമുണ്ട്. പ്രതികാര കഥയെ മികച്ച രീതിയിൽ തന്നെ സ്‌ക്രീനിൽ എത്തിക്കാനായി അണിയറ പ്രവർത്തകർക്ക് കഴിഞ്ഞിട്ടുണ്ടെങ്കിലും ആ കഥ തന്നെയാണ് സീരീസ് നേരിടുന്ന ഏറ്റവും വലിയ വെല്ലുവിളിയും. ഒരുപാട് ഡ്രാമ, ത്രില്ലർ, റിവഞ്ച് ടിവി സീരീസുകൾ കണ്ട് ശീലിച്ച പ്രേക്ഷകർക്ക് തൃപ്തിപ്പെടുവാൻ മാത്രം കണ്ടന്റ് ടാബൂ എന്ന സീരീസ് നൽകാൻ ശ്രമിച്ചിട്ടില്ല. പല കൈവഴികളായി ഒഴുകി വരുന്ന കഥകളെ തൃപ്തികരമാം വിധം കൂട്ടി ചേർക്കാനോ, ഓർമയിൽ തങ്ങി നിൽക്കുന്ന രീതിയിലുള്ള ഒരു ക്ലൈമാക്സ് നൽകാനോ കഴിഞ്ഞിട്ടുമില്ല. ഒരുപക്ഷെ കഴിഞ്ഞ വർഷം പ്രഖ്യാപിച്ച രണ്ടാം സീസൺ മേൽ സൂചിപ്പിച്ച പ്രശ്നങ്ങൾ പരിഹരിച്ചേക്കാം എങ്കിലും പൂർണത എന്ന വസ്തുത ആദ്യ സീസണ് കൈവരിക്കാൻ കഴിഞ്ഞിട്ടില്ല എന്നത് പോരായ്മ തന്നെ.

🔸ടോം ഹാർഡി എന്ന നടൻ തന്നെയാണ് ടാബുവിന്റെ ശക്തിയും, സ്‌ക്രീനിൽ കാര്യമായൊന്നും തന്നെ സംഭവിക്കാത്ത നിമിഷങ്ങളിലും ദിശ അറിയാത്ത രീതിയിൽ കഥാപാത്രം ഉഴലുമ്പോഴും കാഴ്ചക്കാരന്റെ ശ്രദ്ധ പിടിച്ച് പറ്റാനും കഥയിലും കഥാപാത്രത്തിലും കൗതുകവും ആകാംക്ഷയും നില നിർത്തുന്നതിലും ടോം ഹാർഡി എന്ന നടന്റെ പങ്ക് ചെറുതല്ല. ആദ്യാവസാനം സീരീസ് നിലനിർത്തുന്ന ഡാർക്ക്, മിസ്റ്ററി ടോണും എടുത്ത് പറയേണ്ടി ഇരിക്കുന്നു. മനോഹരമായ വിശ്വലുകൾക്കും യാതൊരു പഞ്ഞവുമില്ല ടാബുവിൽ, പത്തൊൻപതാം നൂറ്റാണ്ടിന്റെ ആരംഭത്തിലെ ലണ്ടനെ ഒരുപക്ഷെ പീരിയഡ് കഥകൾ പ്രമേയമാക്കി എത്തിയ സീരീസുകളിൽ ഏറ്റവും മികച്ച രീതിയിൽ അവതരിപ്പിക്കാൻ ടാബുവിന് കഴിഞ്ഞിട്ടുണ്ട്. കാണണമോ വേണ്ടയോ എന്ന ഒറ്റച്ചോദ്യത്തിൽ ടാബുവിനെ ഒതുക്കുക ആണെങ്കിൽ വ്യത്യസ്തവും അതെ സമയം വന്യവുമായ കഥയെ കണ്ടന്റിന് പ്രാധാന്യം നൽകി അവതരിപ്പിച്ചിരിക്കുകയാണ് ഈ സീരീസിൽ, പ്രതീക്ഷകൾ കൂട്ടാതെ കണ്ടാൽ ഉചിതമാവും.

Verdict : Good

418. Cuckoo (2014)

Director : Raju Murugan

Genre : Romance

Rating : 7.8/10

Country : India

Duration : 163 Minutes


🔸കണ്ണുള്ളവന് ഒരിക്കലും കാഴ്ച ശക്തി ഇല്ലാത്തവന്റെ വിഷമം മനസിലാക്കാൻ കഴിയില്ല എന്നത് തർക്കത്തിന് ഇടയില്ലാത്ത വിഷയമാണ്. മനുഷ്യൻ ഏറ്റവും ആശ്രയിക്കുന്ന കഴിവുകളിൽ ഒന്നായ കാഴ്ചശക്തി ഇല്ലാതെ ഭൂമിയിൽ ജനിച്ചു വീണവരുടെ ജീവിതം മനസിലാവണം എങ്കിൽ ഒരല്പ നേരം എങ്കിലും കണ്ണടച്ച് തങ്ങളുടെ പ്രാഥമിക കാര്യങ്ങൾ ചെയ്യാൻ ശ്രമിച്ചാൽ മതിയാവും. തങ്ങളുടെ ഉറ്റവരുടെ മുഖമോ, ജീവിക്കുന്ന ചുറ്റുപാടോ, കാഴ്ചകളോ, നിറങ്ങളോ, എന്തിന് ജീവിതത്തിൽ ഒരിക്കൽ പോലും സ്വന്തം മുഖം പോലും കാണാൻ കഴിയാതെ ജീവിക്കുക എന്നത് നിസ്സാര കാര്യമല്ല. അങ്ങനെ ജീവിച്ചു പോവുന്ന അനേകം ആളുകൾ നമുക്ക് ചുറ്റിലുമുണ്ട്, നമ്മൾ കണ്ട് പരിചയിച്ച ചുറ്റുപാടുകളെയും കാഴ്ചകളെയും അവരെങ്ങനെ സങ്കൽപ്പിക്കുന്നു എന്നത് നമ്മൾ സ്വപ്നം പോലും കാണാത്ത വിധം മനോഹരമാം വിധമായിരിക്കും. കുക്കൂ എന്ന ചിത്രവും ഈ പോസ്റ്റും ഇവർക്ക് വേണ്ടിയുള്ളതാണ്.

🔸കേരളത്തിന്റെ വടക്ക് ഭാഗത്ത് കണ്ണൂർ ജില്ലയിൽ തലശ്ശേരിക്ക് അടുത്ത് ഒരു ചെറിയ ഗ്രാമമാണ്  ചുവടെ ചേർക്കുന്ന യഥാർത്ഥ സംഭവങ്ങളുടെ പശ്ചാത്തലം. ചെറുപ്പത്തിലെ കളിചിരി ബഹളങ്ങൾക്കിടയിൽ എന്നോ കണ്ട് മനസ്സിൽ കയറിയ ഒരു ചിത്രമാണ് ലോട്ടറി വില്പനക്കാരായ ദമ്പതിമാരുടേത്. രാവിലെ തൊട്ട് വൈകുന്നേരം വരെ അന്നത്തിനായി അങ്ങാടിയിൽ ലോട്ടറി വിറ്റിരുന്ന ഇരുവർക്കും കാഴ്ച ശക്തി ഇല്ലായിരുന്നു. രാവിലെ കാഴ്ചയുള്ള ഏക മകളുടെ കൈ പിടിച്ച് വരുന്ന അമ്മയും, അവർ നീട്ടുന്ന വടിയിൽ പിടിച്ച് നടക്കുന്ന അച്ഛനും ഓർമകളിലെ നിറമുള്ള ചിത്രങ്ങളായി നില്ക്കാൻ കാരണങ്ങൾ അനവധി ആയിരുന്നു. ആരുടേയും നോട്ടങ്ങൾക്കോ ചോദ്യങ്ങൾക്കോ വില നൽകാതെ അഭിമാനത്തോടെ എന്നവണ്ണം അച്ഛനമ്മമാരെ നയിച്ച് കൊണ്ട് മുന്നിൽ നടക്കുന്ന ആ കുട്ടിയും ഒരു കാഴ്ച തന്നെ ആയിരുന്നു.

🔸ഈ മൂന്ന് കഥാപാത്രങ്ങൾ വഴിയുടെ അങ്ങേ തലയ്ക്കൽ പ്രത്യക്ഷപ്പെട്ട് തുടങ്ങിയാൽ അങ്ങാടി ഒന്നാകെ മാറും, ചായക്കടയിലും ബാർബർ ഷോപ്പിലും ഒക്കെ ഇരുന്ന് വെടി വർത്തമാനത്തിൽ ഊറ്റം കൊള്ളുന്നവർ വരെ ഒരു നിമിഷം നിശ്ശബ്ദരാകും, ആ നിശബ്ദത എല്ലാവരിലേക്കും പരക്കുകയും ആ കുടുംബം റോഡിന്റെ മറുഭാഗത്തേക്ക് നടന്ന് അപ്രത്യക്ഷരാവുന്നത് വരെ തുടരുകയും ചെയ്യും. അന്ധതയെ പരിഹസിക്കാതെയും സഹതാപം വാരി വിതറാതെയും ആ ജീവിതങ്ങൾ അതേ പടി സ്‌ക്രീനിൽ എത്തിച്ചത് കൊണ്ടാവണം കുക്കൂ എന്ന ചിത്രം കണ്ട് കഴിഞ്ഞപ്പോൾ ഓർമ്മ വന്നത് ഈ കഥാപാത്രങ്ങളെ ആണ്, അല്ല ആ ജീവിതങ്ങളെയാണ്.

🔸തമിഴ്, സുതൻതിരക്കോടി എന്നീ രണ്ട് കഥാപാത്രങ്ങളാണ് ചിത്രത്തിന്റെ നട്ടെല്ല്, ഈ അന്ധ കഥാപാത്രങ്ങൾക്കിടയിൽ ഉടലെടുക്കുന്ന പ്രണയമാണ് ചിത്രം കൈകാര്യം ചെയ്യുന്ന വിഷയം. പ്രണയം തന്നെ പല വിധം ഉണ്ടെന്നും അത് ഓരോരുത്തരും അവരവരുടെ അനുഭവങ്ങളാൽ നിർവചിക്കുന്നതിനാൽ വ്യത്യസ്തം ആയിരിക്കുമെന്നും, അതിന് തടസ്സങ്ങൾ ബാധകം അല്ലെന്നുമെല്ലാം തെളിയിക്കാൻ ശ്രമിക്കുകയാണ് ഈ ചിത്രം. രണ്ട് അന്ധ കഥാപാത്രങ്ങളുടെ പ്രണയം വ്യത്യസ്തമായ രീതിയിൽ അവതരിപ്പിക്കുന്നതിൽ വിജയിക്കുന്നതിനോടൊപ്പം തന്നെ അവരുടെ ലോകം ഒരു പരിധി വരെ മറ്റുള്ള മനുഷ്യരുടേതിനോളം തന്നെ മനോഹരം ആണെന്നും ചിത്രം പറയുന്നുണ്ട്.

🔸കുക്കൂ എന്ന ചിത്രത്തെ പരിചയപ്പെടുത്തുമ്പോൾ എടുത്ത് പറയേണ്ട മറ്റൊരു വസ്തുത നായികാ നായക കഥാപാത്രങ്ങൾ ഉൾപ്പെടെയുള്ള അന്ധ സമൂഹത്തെ ഒരു രീതിയിലും മറ്റുള്ളവരെക്കാൾ താഴ്ന്ന രീതിയിലോ അമിത വൈകാരികതയുടെ പിന്ബലത്തോട്‌ കൂടിയോ ക്ലിഷെയിൽ പൊതിഞ്ഞോ അവതരിപ്പിച്ചിട്ടില്ല എന്ന കാര്യമാണ്, അത് എടുത്ത് പറയേണ്ടിയും ഇരിക്കുന്നു. മികച്ച ഒരു കൂട്ടം പാട്ടുകളും മനോഹരമായ ദൃശ്യങ്ങളും അതി മനോഹരമായ കഥാ സന്ദർഭങ്ങളും മികച്ച് നിൽക്കുന്ന അഭിനയ പ്രകടനങ്ങളും എല്ലാം ഒരുമിച്ച് ചേരുന്ന മനോഹരമായ ചിത്രം തന്നെയാണ് കുക്കൂ, കാണാത്തവർക്ക് തീർച്ചയായും ശുപാർശ ചെയ്യുന്നു.

Verdict : Very Good

417. Performance (1970)

Director : Donald Cammel

Genre : Crime

Rating : 7/10

Country : UK

Duration : 105 Minutes


🔸1985ൽ പുറത്തിറങ്ങിയ ബോയിങ് ബോയിങ് എന്ന മലയാള ചിത്രത്തിൽ ജഗതി ശ്രീകുമാർ അവതരിപ്പിച്ച ഓ പി ഒളശ്ശ എന്ന കഥാപാത്രം സ്‌ക്രീനിൽ പറയുന്ന വളരെ പ്രശസ്തമായ ഒരു സംഭാഷണമുണ്ട്, "അപരാഹ്നത്തിന്റെ അനന്തപഥങ്ങളിൽ ആകാശനീലിമയിൽ അവൻ നടന്നകന്നു" എന്ന് തുടങ്ങി ഒടുവിൽ ശങ്കരാടി അവതരിപ്പിച്ച കഥാപാത്രത്തിനോട് സ്വല്പം കഞ്ചാവ് അടിച്ച് എഴുതിയതാണ് എന്ന് തുറന്ന് പറയുന്നത് വരെയുള്ള രംഗം ചിത്രം ഒരു തവണ എങ്കിലും കണ്ട ഏതൊരു പ്രേക്ഷകനും ഓർത്തിരിക്കാൻ സാധ്യത ഉള്ള ഒന്നാണ്. ഏറെക്കുറെ ഈ ഒരു വികാരം തന്നെയാണ് പെർഫോമൻസ് എന്ന ബ്രിട്ടീഷ് ചിത്രം കണ്ട് കഴിയുമ്പോഴും ലഭിക്കുക. ആദ്യം തൊട്ട് അവസാനം വരെ ഒരു തരം പുകമറ ചിത്രത്തിൽ നിറഞ്ഞ് നിൽക്കുന്നുണ്ട്.

🔸ആദ്യ രംഗം മുതൽ തന്നെ വലിയ സങ്കീർണ്ണതകൾ ഒന്നും ചിത്രം പ്രേക്ഷകന് മുന്നിൽ കൊണ്ടുവരുന്നില്ല, നേർ രീതിയിൽ കഥ പറഞ്ഞ് പോവുന്ന ചിത്രം കണ്ട് ശീലിച്ചിട്ടില്ലാത്ത രീതിയിലുള്ള ഒരു തരം വ്യഗ്രതയോട് കൂടിയ എഡിറ്റിംഗ് ഉപയോഗപ്പെടുത്തി എന്നതും മുകൾ ഭാഗത്ത് സൂചിപ്പിച്ച ഫീലും ഒഴിച്ച് നിർത്തിയാൽ വലിയ ചോദ്യങ്ങൾ ഒന്നും പ്രേക്ഷകന്റെ മനസ്സിൽ ഉയർത്തുന്നില്ല, ക്ലൈമാക്സ് വരെ. ഈ സൂചിപ്പിച്ച വസ്തുതകൾ എല്ലാം ക്ലൈമാക്സിൽ മാറിമറയുകയാണ്, ഒട്ടും പ്രതീക്ഷിക്കാത്ത കേവലം സെക്കൻഡുകൾ മാത്രം നിലനിൽക്കുന്ന ഒരൊറ്റ സീനിൽ സിനിമയെ കുറിച്ചുള്ള ചിന്തകളും ഒട്ടും പ്രതീക്ഷിക്കാത്ത ചില ഡയമെൻഷനുകളും ഈ ചിത്രം തുറന്നിടുന്നുണ്ട്, അവ ഏത് രീതിയിലും വ്യാഖ്യാനിക്കുകയും ആവാം.

🔸ജെയിംസ് ഫോക്സ് അവതരിപ്പിച്ച ചാസ് എന്ന കഥാപാത്രത്തിലൂടെ ആണ് ചിത്രം ആരംഭിക്കുന്നത്, ഹാരി ഫ്ളവേഴ്സിന്റെ ഈസ്റ്റ് ലണ്ടൻ ക്രിമിനൽ ഗാങ്ങിന്റെ അടിയാളുകളിൽ ഒരാളാണ് ചാസ്. പ്രധാനമായും പലിശ പിരിക്കൽ പോലുള്ള പരിപാടികളിൽ തല്പരനായ ചാസ് തന്റെ കയ്യിൽ വന്ന് പെടുന്നവരെ ശാരീരികമായി ആക്രമിക്കുന്നതിലും അവർ അനുഭവിക്കുന്ന വേദനയിലും ഉന്മാദം കണ്ടെത്തുന്നവനാണ്, ചുരുക്കി പറഞ്ഞാൽ ഒരു സൈക്കോ തന്നെ. ഇങ്ങനെ ഉള്ള ഇടപാടുകളിൽ ഒന്ന് ചാസിന്റെ കൈവിട്ട് പോവുന്നതും തുടർന്ന് അരങ്ങേറുന്ന സംഭവങ്ങളും അതിന്റെ പ്രത്യാഘാതങ്ങളും അയാളെ ടാർണർ എന്ന കഥാപാത്രത്തിന്റെ അടുത്ത് എത്തിക്കുകയാണ്.

🔸ടാർണർ അഥവാ ഒരു പല്ല് കൊഴിഞ്ഞ സിംഹം, ഒരു പഴയ കാല പോപ്പ് കൾച്ചർ റോക് സ്റ്റാറാണ് ടിയാൻ. മൂന്ന് വർഷങ്ങൾക്ക് മുൻപ് വരെ ആരാധകരുടെയും പുരസ്കാരങ്ങളുടെയും പ്രശംസകളുടെയും പത്രമായിരുന്ന ടാർണറുടെ ഇന്നത്തെ അവസ്ഥ കുറച്ച് മോശമാണ്. ടാർണറുടെ പ്രതാപ കാലം അവസാനിച്ചിരിക്കുന്നു, എല്ലാവരിൽ നിന്നും മാറി ഒരു ബേസ്‌മെന്റിൽ ഏറെക്കുറെ ഒറ്റപ്പെട്ട ജീവിതമാണ് ടാർണർ നയിക്കുന്നത്, അയാളുടെ നേരം പോക്കുകൾ എന്നത് ലഹരിയിലേക്കും പിന്നെ തനിക്ക് വീര പരിവേഷം നൽകുന്ന കുറച്ച് സ്ത്രീകളിലേക്കുമായി ഒതുങ്ങിയിരിക്കുന്നു. എല്ലാ രീതിയിലും സമൂഹത്തിൽ നിന്നും വേർപെട്ട കുത്തഴിഞ്ഞ ജീവിതമാണ് ടാർണറുടേത്.

🔸തന്റെ കയ്യിൽ നിന്നും സംഭവിച്ച പിഴവ് കാരണം പിടിച്ചു നിൽക്കാൻ കഴിയാതെ ചാസിന് അഭയം പ്രാപിക്കേണ്ടി വരുന്നത് ടാർണറുടെ ബേസ്‌മെന്റിലാണ്, അവിടെ നിന്നും രണ്ട് കഥാപാത്രങ്ങളുടെയും ജീവിതങ്ങൾ പ്രതീക്ഷിക്കാത്ത കൈവഴികളിലൂടെ ഒഴുകുകയാണ്, പ്രവചിക്കാനാവാത്ത ഒരു പര്യവസാനത്തിലേക്ക്. ഹിപ്പി ലഹരി സംസ്കാരത്തെ ഒരു പരിധി വരെ ഉയർത്തി കാണിക്കുന്ന ചിത്രം ആയതിനാൽ തന്നെ ലഹരി ഉപയോഗത്തിനും എക്സ്പ്ലിസിറ്റ് രംഗങ്ങൾക്കും യാതൊരു പഞ്ഞവുമില്ല ഈ ചിത്രത്തിൽ, അതിനാൽ എല്ലാ വിഭാഗക്കാരായ കാഴ്ചക്കാർക്കും പറ്റിയതല്ല ഈ ചിത്രം. ഡൗൺലോഡ് പ്രിന്റുകൾ ലഭിക്കാൻ പാടാണെങ്കിലും ചിത്രത്തിന്റെ ബേധപ്പെട്ട ഒരു പ്രിന്റ് യൂട്യുബിൽ ലഭ്യമാണ്.

Verdict : Good

416. First Reformed (2017)

Director : Paul Schrader

Genre : Drama

Rating : 7.2/10 (IMDB)

Country : USA

Duration : 113 Minutes


🔸ഫസ്റ്റ് റീഫോംഡ് എന്ന ചിത്രത്തെ പരിചയപ്പെടുത്തുമ്പോൾ തന്നെ കാണാൻ ആഗ്രഹിക്കുന്നവർ, താല്പര്യപ്പെടുന്നവർ അറിഞ്ഞിരിക്കേണ്ട ചില വസ്‌തുതകൾ ഉണ്ട്. വളരെ ഗൗരവമേറിയ ഒരു കഥയെ ഒട്ടും തീവ്രത കളയാതെ, വെള്ളം ചേർക്കലുകൾ നടത്താതെ അതിന്റെ പരിപൂർണ്ണ ഭംഗിയിൽ തന്നെയാണ് അണിയറ പ്രവർത്തകർ സ്‌ക്രീനിൽ എത്തിച്ചിരിക്കുന്നത്. കഥയുടെ ആവശ്യം ഉൾക്കൊണ്ട് തന്നെ വളരെ പതിയെ ആണ് ചിത്രം പുരോഗമിക്കുന്നത്, അതിനാൽ ആവശ്യമായ കഥാ, കഥാപാത്ര വികസനത്തെ ലാഗ് എന്ന പേരിൽ മാറ്റി നിർത്തുന്നവർക്ക് ഒരിക്കലും ആസ്വദിക്കാൻ കഴിയാത്ത ഒരു ചിത്രമായിരിക്കും ഇത്. എല്ലാത്തിനും പുറമെ സിനിമ കൈകാര്യം ചെയ്യുന്നത് മതപരമായും, വിശ്വാസപരമായും ഇട കലർന്നിരിക്കുന്ന വിഷയം ആയതിനാലും, ചിത്രത്തിലെ പ്രധാന കഥാപാത്രം ഒരു വികാരി ആയതിനാലും, ചിത്രം അയാളുടെ വീഴ്ചയെ പറ്റി ആയതിനാലും എത്രത്തോളം ഈ ചിത്രത്തെ കാഴ്ചക്കാർക്ക് അംഗീകരിക്കാനാവും എന്ന കാര്യത്തിലും സംശയമുണ്ട്.

🔸മൂന്ന് നൂറ്റാണ്ടുകളോളം പഴക്കമുണ്ട് ന്യു യോർക്കിൽ സ്ഥിതി ചെയ്യുന്ന ഡച്ച് റീഫോംഡ് ചർച്ചിന്, വിശ്വാസികളുടെയും മറ്റും ഒഴുക്കും ബഹളങ്ങളും ഒന്നുമില്ലെങ്കിലും പഴക്കം കൊണ്ടും പാരമ്പര്യം കൊണ്ടും എല്ലാത്തിനും അപ്പുറം വിശ്വാസം കൊണ്ടുമാണ് സഭ റീഫോംഡ് ചർച്ച് നില നിർത്തി പോന്നത്. ഡച്ച് റീഫോംഡ് ചർച്ചിലെ വികാരിയാണ് മുൻപ് പട്ടാളത്തിൽ ജോലി നോക്കിയിരുന്ന ഏർനെസ്റ്റ് ടോലെർ. തന്റെ വ്യക്തി ജീവിതത്തിൽ അനുഭവിക്കേണ്ടി വന്ന ചില വലിയ നഷ്ടങ്ങളിൽ നിന്നും ടോലെർ കര കയറി വരുന്നതേ ഉള്ളൂ, ആ പാതയിൽ അയാൾക്ക് ഒരു പരിധി വരെ ആശ്വാസമാണ് ഈ വികാരി പട്ടവും ഇടപഴകേണ്ടി വരുന്ന വിശ്വാസികളും അവരുടെ പ്രശ്നങ്ങളും വിശ്വാസവും എല്ലാം.

🔸വലിയ സംഭവബഹുലം ഒന്നും അല്ലാതെ കടന്ന് പോയിക്കൊണ്ടിരുന്ന തന്റെ ജീവിതത്തിൽ ചെറിയൊരു മാറ്റം അനിവാര്യമാണെന്ന ചിന്തയിൽ നിന്നും ടോലെരുടെ മനസിലേക്ക് ഒരു പുതിയ പദ്ധതി ഉരുത്തിരിഞ്ഞ് വരികയാണ്. അടുത്ത ഒരു വർഷം താൻ കാണുന്ന കാഴ്ചകളും അത് തന്നിൽ ഉണ്ടാക്കുന്ന ചിന്തകളും അതിനാൽ സംഭവിക്കാൻ പോവുന്ന പ്രത്യാഘാതങ്ങളും എല്ലാം ടോലെർ ഒരു ഡയറിയിൽ കുറിച്ചിടും. മറ്റൊരാൾക്ക് വായിക്കാനോ, വർഷങ്ങൾക്കിപ്പുറം തന്റെ ഭൂതകാലത്തിലേക്ക് ഒന്ന് തിരിഞ്ഞ് നോക്കാനോ ഒന്നും വേണ്ടിയല്ല, വെറുമൊരു കൗതുകത്തിന് വേണ്ടി മാത്രം. വിരസമായി പോയി കൊണ്ടിരുന്ന തന്റെ ജീവിതത്തിൽ അത്ഭുതാവഹം ആയ സംഭവങ്ങൾ എന്തെങ്കിലും അരങ്ങേറും എന്ന പ്രതീക്ഷയൊന്നും ടോലെറിൽ ഉണ്ടായിരുന്നില്ല.

🔸എന്ത് തന്നെ ആയാലും ഈ തീരുമാനം കൈക്കൊണ്ടതിന്റെ പിറ്റേ ദിവസം ഇടവകയിൽ അംഗവും വിവാഹിതയുമായ മേരി, അച്ഛനെ കാണാൻ എത്തുകയാണ്. വളരെ സങ്കീർണ്ണമായ ഒരു പ്രശ്നമായിരുന്നു മേരിക്ക് ടോലെറിനെ അറിയിക്കാൻ ഉണ്ടായിരുന്നത്, തന്റെ വിവാഹ ജീവിതത്തിൽ ഇന്നേ വരെ ഭർത്താവായ മൈക്കലിൽ നിന്നും മോശമായ അനുഭവങ്ങൾ ഏതും മേരിക്ക് നേരിടേണ്ടി വന്നിട്ടില്ല, വളരെ സ്നേഹം നിറഞ്ഞ സന്തുഷ്ടമായ ഒരു ജീവിതമാണ് ഇരുവരും നയിച്ച് പോന്നത് എന്നാൽ മേരി ഗർഭം ധരിച്ചത് മുതൽ ഇരുവർക്കും ഇടയിലെ ബന്ധത്തിൽ ചില വിള്ളലുകൾ പ്രത്യക്ഷപ്പെട്ട് തുടങ്ങിയിരിക്കുന്നു, ഈ പ്രശ്നത്തിലേക്ക് ഏർനെസ്റ്റ് ടോലെർ ഇറങ്ങി ചെല്ലേണ്ടി ഇരിക്കുന്നു അഥവാ ഈ പ്രശ്നത്തിലാണ് അയാളുടെ പ്രസക്തി.

🔸കേൾക്കുമ്പോൾ നിസാരം എന്ന് തോന്നാമെങ്കിലും വിശ്വാസങ്ങളെയും നിലപാടുകളെയും ചോദ്യം ചെയ്യുന്ന കഠിനമായ ഒരു പ്രശ്നത്തിലേക്കായിരുന്നു ടോലെർ കാലെടുത്ത് വെച്ചത്, അത് അയാൾക്ക് തിരിച്ചറിയാനായില്ല എന്നതാണ് സത്യം. പ്രശ്നത്തെ അഭിമുഖീകരിച്ച ഈ മൂന്ന് കഥാപാത്രങ്ങളെയും അതിന്റെ പ്രത്യാഘാതങ്ങൾ എവിടെ കൊണ്ട് ചെന്നെത്തിക്കുന്നു എന്നതാണ് ചിത്രത്തിന്റെ പ്രമേയം. ഡ്രാമ ചിത്രങ്ങളോട്, പ്രത്യേകിച്ച് പതിയെ മുന്നേറുന്ന കഥകളോട് താല്പര്യം പ്രകടിപ്പിക്കുന്നവർ തീർച്ചയായും കണ്ടിരിക്കേണ്ട ചിത്രങ്ങളിൽ ഒന്നാണ് ഫസ്റ്റ് റീഫോംഡ്.

Verdict : Good