307. The Cow (1969)

Director : Dariush Mehrjui

Genre : Drama

Rating : 8.1/10

Country : Iran

Duration : 105 Minutes


🔸പ്രധാനമായും മൂന്ന് കാരണങ്ങൾ കൊണ്ടാണ് ഗാവ് എന്ന് അറിയപ്പെട്ടിരുന്ന ഈ ചിത്രത്തിനോട് ഇറാനിയൻ സിനിമാലോകം കടപ്പെട്ടിരിക്കുന്നത്. ഒന്നാമതായി ആദ്യം മുതൽ നിലവിലുണ്ടായിരുന്ന സങ്കല്പങ്ങളെയും രീതികളെയും തച്ചുടച്ച് കൊണ്ട് പുതിയൊരു സിനിമാ രീതി കാഴ്ചക്കാരന് മുന്നിൽ അവതരിപ്പിച്ചതിന് ,രണ്ടാമതായി വളരെ ലളിതമായ ഒരു കഥയിൽ നിന്നും പ്രേക്ഷകന്റെ മനസിനെ എന്നെന്നും നോവിക്കാൻ കഴിയുന്ന സ്ഥിരം ഇറാനിയൻ ചിത്രങ്ങളുടെ രീതിയിലെ ആദ്യ പതിപ്പ് ആയതിന്.

🔸ഗാവ് എന്ന ഈ ചിത്രം എന്നെന്നും ഓർമിക്കപ്പെടാനുള്ള മറ്റൊരു കാരണം അറുപതുകളിലെ ഇറാനിയൻ ഗ്രാമങ്ങളിലെ ദയനീയ പരിസ്ഥിതി ലോകത്തിന് മുന്നിൽ തുറന്നു കാണിച്ചു എന്നതിനാലാണ്. അതുവരെ മറ്റൊരു സംവിധായകനും സിനിമയും ധൈര്യപ്പെടാത്ത കാര്യമായിരുന്നു അത് ,ആയതിനാൽ തന്നെ ഇറാനിയൻ സെൻസർ ബോർഡ് നിലവിൽ വന്ന ശേഷം ആദ്യം വെട്ടിക്കൂട്ടിയ ചിത്രങ്ങളിൽ ഒന്നാണ് ഗാവ് അഥവാ പാശ്ചാത്യ രാജ്യങ്ങളിൽ ദി കൗ എന്ന് അറിയപ്പെട്ട ചിത്രം.

🔸മൃഗങ്ങളും മനുഷ്യരും തമ്മിലുള്ള ബന്ധം പലപ്പോഴും അതി മനോഹരമായി തോന്നാറുണ്ട് ,മൃഗങ്ങൾക്ക് മനുഷ്യരോടുള്ള സ്നേഹം പ്രമേയമാക്കികൊണ്ട് ഒരുപാട് ചിത്രങ്ങൾ വരികയും പ്രേക്ഷക ഹൃദയങ്ങൾ കീഴടക്കുകയും ചെയ്തിട്ടുണ്ട്. ഈ ചിത്രത്തിൽ റോളുകൾ നേരെ തിരിച്ചാണ് ,കഥാനായകനായ ഹസ്സന് തന്റെ പശുവിനോട് അഗാധമായ സ്നേഹമാണ്. മക്കളില്ലാത്ത ഹസ്സന് മക്കൾക്ക് സമമാണ് ഈ പശു.

🔸തന്റെ പശു ഗ്രാമത്തിലെ ഒരേയൊരു പശു ആണെന്ന ചെറിയൊരു അഹങ്കാരവും പൊങ്ങച്ചവും കൂടിയുണ്ട് മധ്യവയസ്കനും സർവോപരി പാവത്താനുമായ ഹസ്സന്. ഭാര്യ അല്ലാതെ പ്രത്യക്ഷത്തിൽ മറ്റ് ബന്ധുക്കൾ ഒന്നുമില്ലാത്ത ഹസ്സൻ തന്റെ മുഴുവൻ സമയവും പശുവിനോടൊപ്പം ആണ് ചിലവഴിക്കാറ്. ചുരുക്കി പറയുകയാണെങ്കിൽ പശു ഇല്ലാതെ ഹസനോ ഹസനില്ലാതെ പശുവിനോ ഒരു നിമിഷം പോലും ചിലവഴിക്കാൻ കഴിയാത്ത അവസ്ഥ.

🔸അങ്ങനെ കടന്നുപോയ ദിവസങ്ങളിൽ ഒന്നിൽ കുറച്ച് ദിവസത്തേക്കായി ഹസ്സന് പട്ടണത്തിലേക്ക് പോവേണ്ടി വരികയാണ്. ഒട്ടും താല്പര്യം ഉണ്ടായിട്ടല്ല ഹസ്സൻ പോയത് ,പോരാതെ പശു ആണെങ്കിൽ ഗർഭിണിയുമാണ്. നിർഭാഗ്യവശാൽ ഹസ്സൻ അടുത്തില്ലാത്തൊരു ദിവസം പശുവിന് ഒരു അത്യാഹിതം സംഭവിക്കുകയാണ്. ഹസ്സൻ തിരികെ വരുമ്പോൾ അയാളെ എന്ത് പറഞ്ഞ് ബോധ്യപ്പെടുത്തും എന്ന വിഷമത്തിലാണ് ഭാര്യയും നാട്ടുകാരും ,അയാൾ എങ്ങനെ പ്രതികരിക്കും എന്ന അതിയായ പേടി അവർക്കുണ്ട്.

Verdict : Must Watch

306. Once Upon A Time In Anatolia (2011)

Director : Nuri Bilge Ceylan

Genre : Drama

Rating : 7.8/10

Country : Turkey

Duration : 163 Minutes


🔸ചില സിനിമകൾ വിശദീകരിക്കാൻ വലിയ ബുദ്ധിമുട്ടാണ് ,കാരണം മറ്റൊരാൾക്ക് ചിത്രം എന്താണെന്നും എന്തിനെ കുറിച്ചാണെന്നും പറഞ്ഞുകൊടുക്കുമ്പോൾ ചിത്രത്തിന്റെ ഒരു ഏകദേശ രൂപം ആവശ്യമാണ്. വൺസ് അപ്പോൺ എ ടൈം ഇൻ അനറ്റോളിയ എന്ന ചിത്രം നൽകുന്ന ഏറ്റവും വലിയ വെല്ലുവിളിയും അത് തന്നെയാണ്. പ്രത്യക്ഷത്തിൽ ചിത്രത്തിൽ യാതൊന്നും സംഭവിക്കുന്നില്ല എന്നൊരു തോന്നൽ ഉണ്ടാവുമെങ്കിലും സംഗതി അങ്ങനെയല്ല എന്ന് കുറച്ച് കൂടി കഴിയുമ്പോൾ ചിത്രം പ്രേക്ഷകന് ബോധ്യപ്പെടുത്തി കൊടുക്കും.

🔸ചിത്രത്തിന് ദൈർഖ്യം ഏറെയാണ് ,കണ്ടിരിക്കാൻ കുറച്ച് ബുദ്ധിമുട്ടാണ് ,എല്ലാവർക്കും ഇഷ്ടപ്പെട്ടേക്കാവുന്ന രീതിയിലുമല്ല ചിത്രം കടന്ന് പോവുന്നത്. കഴിഞ്ഞ കുറച്ച് നാളുകൾക്കിടെ ചിത്രം കണ്ട ചില സുഹൃത്തുക്കളുടെ കമന്റുകളാണ് മുകളിൽ ചേർത്തത് ,ഒരു പരിധി വരെ ശരിയാണെന്ന് തോന്നുകയും ചെയ്യും. എന്തിരുന്നാലും കണ്ടവർ എല്ലാം തന്നെ തുറന്ന് സമ്മതിച്ച കാര്യമാണ് ഇതുപോലെ അധികം ചിത്രങ്ങളില്ല എന്ന സത്യം. ഒരു ചിത്രത്തിന് ലഭിക്കാവുന്ന വലിയ അംഗീകാരങ്ങളിൽ ഒന്ന്.

🔸അനറ്റോളിയൻ ഗ്രാമമായ കെസ്‌കിന്നിലാണ് ചിത്രത്തിന് ആസ്പദമായ കഥ അരങ്ങേറുന്നത്. ആദ്യ രണ്ട് മണിക്കൂറോളം പൂർണമായും ഈ ഗ്രാമപ്രദേശത്ത് ,രാത്രിയിലാണ് കഥ അരങ്ങേറുന്നത്. മൂന്ന് ജീപ്പുകളിലായി പോലീസുകാരും, വക്കീലും, ഡോക്ടറും, കുഴി എടുക്കുന്നവരും ,പ്രതികൾ എന്ന് സംശയിക്കുന്ന രണ്ട് പേരും രാത്രിയുടെ മറവിൽ ആ ഗ്രാമ പ്രദേശത്തേക്ക് എത്തുകയാണ്. അടുത്തിടെ നടന്ന കൊലപാതകത്തിലേക്ക് കടന്ന തിരോധാനത്തിന്റെ അവസാന ഭാഗങ്ങളിലേക്കാണ് പ്രേക്ഷകനെ സംവിധായകൻ കൂട്ടി കൊണ്ടുപോവുന്നത്.

🔸പ്രതി കുറ്റം സമ്മതിച്ചിട്ടുണ്ട് ,മാനസിക വൈകല്യമുള്ള സഹോദരനും താനും ചേർന്നാണ് കൊല നടത്തിയത് എന്നും അയാൾ പറയുന്നുണ്ട്. കൊന്ന് കുഴിച്ചിട്ട ശവം മാന്തി എടുക്കുക എന്ന ലക്ഷ്യമാണ് സംഘത്തിന് ഇപ്പോഴുള്ളത്. രാത്രി കാലം ആയതിനാലും ,കുറ്റം ചെയ്ത ദിവസം മദ്യ ലഹരിയിൽ ആയതിനാലും കുഴിച്ചിട്ട സ്ഥലം പ്രതിക്ക് വലിയ പിടിയില്ല. പ്രതിയുടെ സംശയങ്ങളിൽ ആകെ വഴിമുട്ടി നിൽക്കുകയാണ് കൂടെയുള്ള അന്വേഷണ സംഘവും.

🔸സംശയം തോന്നുന്നിടം മുഴുവൻ കുഴിച്ച് നോക്കുക എന്നതല്ലാതെ മറ്റ് വഴികൾ ഒന്നും തന്നെ അവർക്ക് മുന്നിലില്ലായിരുന്നു. കുറ്റം സമ്മതിച്ചപ്പോഴും കൊല ചെയ്യാനുണ്ടായ സാഹചര്യങ്ങളും സർവോപരി കൊല്ലപ്പെട്ടവൻ പ്രതിക്ക് ആരാണെന്നോ ഉള്ള യാതൊരു അറിവും സംഘത്തിന് ലഭിച്ചിട്ടുണ്ടായിരുന്നില്ല. അങ്ങനെ രാത്രിയുടെ മറവിൽ പണികൾ തകൃതിയായി അരങ്ങേറുമ്പോൾ ആണ് സംഭാഷണത്തിനിടെ സംഘത്തിലെ വക്കീൽ തന്റെ ഔദ്യോഗിക ജീവിതത്തിലെ ഏറ്റവും അത്ഭുതപെടുത്തിയ സംഭവങ്ങളിൽ ഒന്നിന്റെ കെട്ടഴിക്കുന്നത്.


Verdict : Must Watch

305. L'Avventura (1960)

Director : Michael Angelo Antonioni

Genre : Drama

Rating : 7.9/10

Country : Italy

Duration : 145 Minutes


🔸ലാവെൻട്യൂറ പോലെ റിലീസിന് ശേഷം ഇത്രയും ഭിന്നമായ പ്രേക്ഷക പ്രതികരണം നേടിയ അധികം ചിത്രങ്ങൾ ഉണ്ടായിരിക്കില്ല. റിലീസായ വർഷം കാനസ് ഫിലിം ഫെസ്റ്റിവലിൽ ചിത്രത്തിന് ലഭിച്ചത് കാതടപ്പിക്കുന്ന കൂക്കി വിളികളും പരിഹാസ ശരങ്ങളും ആയിരുന്നു. മികച്ച ചിത്രത്തിനുള്ള പുരസ്‌കാരങ്ങൾ പലയിടത്ത് നിന്നും ചിത്രം വാരികൂട്ടിയെങ്കിലും പ്രേക്ഷകർ ചിത്രത്തോട് അടുക്കാതെ മാറിനിൽക്കുകയായിരുന്നു. കുറ്റം പറയാനാവില്ല ,മ്യൂസിക്കൽ റൊമാൻസ് ചിത്രങ്ങൾ കണ്ട് പരിചയിച്ചവർക്ക് അംഗീകരിക്കാൻ കുറച്ച് ബുദ്ധിമുട്ടായേക്കാം ഈ ചിത്രം.

🔸രണ്ട് സ്ത്രീകളും ഒരു പുരുഷനും ഉൾപ്പെടെ മൂന്ന് പ്രധാന കഥാപാത്രങ്ങളാണ് ചിത്രത്തിൽ ഉള്ളത്. അന്ന ,ക്ലോഡിയ ,സാൻഡ്രോ എന്നിവരാണിവർ. അന്ന സാൻഡ്രോയുമായി അപകടകരമാം വിധം അഗാധമായ പ്രണയത്തിലാണ്. സാൻഡ്രോ മറ്റാരോടെങ്കിലുമോ എന്തിനോടെങ്കിലുമോ താല്പര്യം കാണിക്കുന്നത് അന്നയ്ക്ക് ഇഷ്ട്ടമല്ല എന്ന് മാത്രമല്ല സാൻഡ്രോയുടെ ശ്രദ്ധ പിടിച്ചുപറ്റാൻ ഏതറ്റം വരെ പോവാനും അവൾ തയ്യാറുമാണ്.

🔸സാന്ദ്രോയ്ക്ക് തിരിച്ച് അന്നയോട് ഇഷ്ടം ആണെങ്കിലും പ്രണയം എന്ന വികാരം പൂർണമായും ഉൾക്കൊണ്ടുള്ള ബന്ധമാണോ അയാളുടേത് എന്ന് സംശയമാണ്. സാൻഡ്രോയുടെ ജീവിതത്തിൽ പ്രഥമ പരിഗണന അന്നയ്ക്ക് അല്ല ,ഒരിക്കലും ആയിരുന്നുമില്ല. തന്റെ ജോലിയും വ്യക്തി ജീവിതവും സർവോപരി തന്നോട് തന്നെയുള്ള കൂറും കഴിഞ്ഞിട്ടേ സാന്ദ്രോയ്ക്ക് മറ്റെന്തും ഉള്ളൂ. ഈ വികാരം ഉൾക്കൊള്ളാൻ അന്നയ്ക്ക് ഒരു കാലത്തും കഴിഞ്ഞിട്ടില്ല.

🔸ഈ രണ്ട് കഥാപാത്രങ്ങൾക്കും ഇടയിൽ പെട്ട് പോയ കഥാപാത്രമാണ് ക്ലോഡിയ. അന്നയുടെ അടുത്ത സുഹൃത്തും ,അളക്കാനാവാത്ത ആത്മാർത്ഥതയും വെച്ച് പുലർത്തുന്നവളാണ് ക്ലോഡിയ. കഥാപാത്രത്തെ പറ്റി കൂടുതൽ പറയുന്നത് കഥയിലേക്ക് കടന്നുപോകും എന്നതിനാൽ ഒഴിവാക്കുന്നു. അവധിക്കാലം ആഘോഷിക്കാനും ബോട്ട് യാത്ര നടത്താനും സിസിലിയിലെ ഐയോളിൻ ദ്വീപിൽ എത്തുകയാണ് മൂവർ സംഘം.

🔸അന്നയും സാൻഡ്രോയും തമ്മിലുള്ള ചെറിയ പിണക്കങ്ങൾ വാക്ക് തർക്കങ്ങളിലേക്ക് കടന്നപ്പോൾ ഒട്ടും സന്തോഷവാഹം അല്ലാത്ത തുടക്കമാണ് മൂവരുടെയും യാത്രയ്ക്ക് ലഭിച്ചത്. അധികം താമസിയാതെ തെളിവുകൾ ഏതും ബാക്കിവെക്കാതെ അന്ന ദ്വീപിൽ നിന്നും അപ്രത്യക്ഷ ആവുന്നു. അന്നയുടെ തിരോധാനം മറ്റ് രണ്ട് പേരുടെയും ജീവിതങ്ങളെ ഏതൊക്കെ രീതിയിൽ ബാധിക്കുന്നു എന്നതാണ് ഈ ചിത്രം. കാണാനാഗ്രഹിക്കുന്നവരോട് ഒരു വാക്ക് ,സാധാരണ കണ്ട് ശീലിച്ച ക്ലിഷേ പ്രതീക്ഷിച്ച് ചിത്രം കാണാതിരിക്കുക. നിങ്ങൾ പ്രതീക്ഷിക്കുന്ന രീതിയിൽ ആവില്ല ഈ കഥ സംഭവിക്കുക.

Verdict : Very Good

304. The Girl With The Dragon Tattoo (2009)

Director : Niels Arden Oplev

Genre : Mystery

Rating : 7.8/10

Country : Sweden

Duration : 186 Minutes


🔸ലിസബെത്ത് സലാൻഡറിനെ കാണുമ്പോൾ ഒരു ശരാശരി മനുഷ്യന് വശപ്പിശക് തോന്നേണ്ടതാണ് ,തെറ്റ് പറയാനാവില്ല. ദേഹമാസകലം ടാറ്റൂ അടിച്ച് ശരീരത്തിൽ അലങ്കാര വസ്തുക്കൾ തുളച്ചിട്ട ,സർവോപരി തന്നെ പറ്റി മറ്റൊരാൾ എന്ത് പറയുന്നെന്ന് യാതൊരു പേടിയുമില്ലാത്ത ,ഇനി എന്ത് പറഞ്ഞാലും അത് തന്നെ ബാധിക്കില്ലെന്ന ദൃഢ നിശ്ചയമുള്ള പെൺകുട്ടി ആണ് ലിസബെത്ത്. സമൂഹത്തിന് അംഗീകരിച്ച് ശീലമില്ലാത്ത വ്യക്തിത്വം ,അഹങ്കാരമായി തെറ്റിദ്ധരിക്കപ്പെടുന്ന മനോഭാവം അതാണ് ലിസബെത്ത്.

🔸സിനിമയ്ക്കും മുകളിൽ നിൽക്കുന്ന നായികാ കഥാപാത്രം എന്ന് വിശേഷിപ്പിക്കേണ്ടിവരും ലിസ്ബെതിനെ. കമ്പ്യൂട്ടർ ഹാക്കർ ആണ് ലിസബെത്ത് ,തന്റെ പ്രവർത്തി മണ്ഡലത്തിൽ ലോകത്തിലെ തന്നെ ഏറ്റവും മികച്ച വ്യക്തികളിൽ ഒന്ന് ,സർവോപരി ചെയിൻ സ്മോക്കർ കൂടിയാണ്. ജീവിതത്തിൽ അങ്ങോളം ഇങ്ങോളം അവഗണനയും പുച്ഛവും പരിഹാസവും മാത്രം കണ്ടും കെട്ടും ശീലിച്ച ലിസബെത്ത് ഇപ്പോൾ പുതിയൊരു കേസിന് പിറകെയാണ്.

🔸തന്റെ അമ്മയുടെ സഹോദരിയായ ഹരിയേറ്റിനെ കണ്ടുപിടിക്കുക എന്ന ശ്രമകരമായ ദൗത്യമാണ് ലിസ്ബെത്തിന്റെ ചുമലിൽ ഉള്ളത്. ഉദ്ദേശം നാല്പത് വർഷങ്ങൾക്ക് മുന്നേ ,കൃത്യമായി പറയുകയാണെങ്കിൽ 1966ലെ ക്രിസ്മസ് ദിനത്തിൽ ആണ് ഹരിയേറ്റ് തെളിവുകൾ ഒന്നും തന്നെ ബാക്കി വെക്കാതെ അപ്രത്യക്ഷ ആയത്. കാര്യകാരണങ്ങൾ ഒന്നും തന്നെ വ്യക്തമാക്കാതെ ഉള്ള തിരോധാനത്തിന് ശേഷം സൂചനകൾ ഏതുമില്ലാതെ നാല്പത് വർഷങ്ങൾ കടന്നുപോയിരിക്കുന്നു.

🔸ജീവനോടെ ഉണ്ടാവാൻ ഉള്ള സാദ്ധ്യതകൾ കുറവാണ് ,കാരണം കടന്ന് പോയ വർഷങ്ങൾ തന്നെ. എന്നാലും ഹരിയേറ്റിന്റെ തിരോധാനത്തിന് പിറകിലുള്ള കാരണങ്ങൾ അറിയണം എന്ന് ലിസ്ബെത്തിന് നിർബന്ധമുണ്ട്. എന്തൊക്കെ തന്നെയായാലും തന്റെ അമ്മയുടെ സഹോദരിയാണ് ,ആ കഥയിലെ കഥാപാത്രങ്ങൾ തനിക്ക് അറിയാവുന്നവരും ആയിരിക്കണം. സർവോപരി നിറഞ്ഞു നിൽക്കുന്ന പുകമറ മാറ്റി ഹരിയേറ്റിനെ വെളിച്ചത്തിലേക്ക് കൊണ്ടുവരണം ,കൊലപാതകം ആണെങ്കിൽ അത് എന്തിനാണെന്നും ആരായിരുന്നെന്നും അറിയണം, അറിഞ്ഞേ പറ്റൂ.

🔸കടന്ന് പോവേണ്ട വഴികളും കാത്തിരിക്കുന്ന കടമ്പകളും കഠിനം ആയിരിക്കും എന്നറിയാം അതിനാലാണ് മില്ലേനിയം മാഗസീനിന്റെ പബ്ലിഷർ മികയെലിന്റെ സഹായം തേടിയത്. വർഷങ്ങളായി പട്ടണത്തിൽ നടന്ന പല കുറ്റകൃത്യങ്ങളെ കുറിച്ചും അതുമായി ബന്ധപ്പെട്ട സംഭവങ്ങളെ കുറിച്ചും നല്ല പിടിപാട് ആണ് മിഖായേലിന്. എന്നാൽ ടിയാന് ഇപ്പോൾ നല്ല സമയമല്ല ,ഒരു കേസ് തോറ്റ സംഭവവുമായി ബന്ധപ്പെട്ട മൂന്ന് മാസം തടവ് ശിക്ഷ അനുഭവിക്കുകയാണ് മിഖായേൽ. ഒടുവിൽ കാത്തിരിപ്പുകൾക്കും പരിശ്രമങ്ങൾക്കും ശേഷം ഇരുവരും യാത്ര ആരംഭിക്കുകയാണ് നാല്പത് വർഷങ്ങൾക്ക് മുൻപുള്ള ക്രിസ്മസ് ദിനത്തിലേക്കും ഹരിയേറ്റിലേക്കും.

Verdict : Very Good

303. Le Trou (1960)

Director : Jacques Becker

Genre : Crime

Rating : 8.5/10

Country : France

Duration : 132 Minutes


🔸ജയിൽ ചാട്ടം പ്രമേയമാക്കിക്കൊണ്ട് ഒരുപാട് ചിത്രങ്ങൾ പുറത്തിറങ്ങിയിട്ടുണ്ട്. ല ഗ്രാൻഡ് ഇല്ല്യൂഷൻ ,പാപ്പിലോൺ ,ദി ഗ്രേറ്റ് എസ്‌കേപ്പ് ,ഷൗഷാങ്ക് റിഡെംപ്ഷൻ തുടങ്ങിയവ ഈ വിഭാഗത്തിലെ ഏറ്റവും മികച്ച ചിത്രങ്ങളിൽ ചിലതാണ്. നിലവാരം നോക്കുകയാണെങ്കിൽ ഈ ചിത്രങ്ങളോളം തന്നെ പ്രാധാന്യം അർഹിക്കുന്ന ചിത്രമാണ് ജാക്വിസ് ബെക്കറുടെ അവസാന ചിത്രമായ ദി ഹോൾ അഥവാ ല ട്രൗ.

🔸മറ്റുള്ള ചിത്രങ്ങളിൽ നിന്നും പ്രസ്തുത ചിത്രത്തിനുള്ള ഏറ്റവും വലിയ പ്രത്യേകത എന്തെന്നാൽ യഥാർത്ഥ സംഭവങ്ങളാണ് ചിത്രത്തിന് ആധാരം എന്നതാണ് ,അതും ഒട്ടും പൊടിപ്പും തൊങ്ങലും ചേർക്കാതെ തികച്ചും വിശ്വസിനീയമായ അവതരണത്തിന്റെ ബലത്തിൽ. ഇരുപതാം നൂറ്റാണ്ടിന്റെ പകുതിയിൽ ഫ്രാൻസിലെ സെന്റ് പ്രിസണിൽ അരങ്ങേറിയ ചില സംഭവങ്ങളാണ് ചിത്രത്തിന് ആധാരം.

🔸യഥാർത്ഥ സംഭവങ്ങളിൽ പങ്കാളിയും ദൃക്‌സാക്ഷിയും ആയിരുന്ന ജീൻ കേരടി ആണ് ചിത്രത്തിലും പ്രധാന കഥാപാത്രത്തെ അവതരിപ്പിച്ചിരിക്കുന്നത്. ഫ്രാൻസിലെ വിവിധ ഭാഗങ്ങളിൽ നിന്നും കുറ്റവാളിയെന്ന പേര് ചുമത്തി കിട്ടിയാണ് നാൽവർ സംഘമായ ജിയോ ,റോളണ്ട് ,മനു ,വോസ്‌സെലിൻ എന്നിവർ സെന്റ് ജയിലിൽ എത്തിയത്. ചെയ്ത് കൂട്ടിയ തെറ്റുകൾ എല്ലാം തന്നെ ഗുരുതരമായതിനാൽ ദീർഘ കാല തടവ് ശിക്ഷയാണ് നാലുപേർക്കും ലഭിച്ചിരിക്കുന്നത് ,ജീവിതത്തിന്റെ നല്ലൊരു ഭാഗം ജയിലിൽ നാല് ചുമരുകൾക്കുള്ളിൽ കഴിച്ച് തീർക്കേണ്ടി വരും എന്നത് ഉറപ്പ്.

🔸തടവ് ശിക്ഷ ജയിലിൽ അനുഭവിച്ച് തീർക്കാൻ യാതൊരു താല്പര്യവും ഇല്ല നാല് പേർക്കും. ഏത് വിധേനയും രക്ഷപ്പെടുക എന്ന ഒറ്റ ചിന്ത മാത്രമാണ് മനസ്സിൽ ,എന്നാൽ അതത്ര എളുപ്പം ആവില്ല. സുരക്ഷയുടെ കാര്യത്തിലും സേനയുടെ കാര്യത്തിലും സെന്റ് ജയിൽ ഫ്രാൻസിലെ മറ്റ് ജയിലുകൾക്ക് പുറകിലല്ല. എന്തിരുന്നാലും നാല് പേരുടെയും നിരന്തര ശ്രമങ്ങൾ കാരണം ഒരു വഴി തെളിഞ്ഞു വരിക തന്നെ ചെയ്തു.

🔸അങ്ങനെ പദ്ധതിയെല്ലാം തയാറാക്കി പരിശ്രമങ്ങൾ എല്ലാം പൂർത്തിയാക്കി രക്ഷപ്പെടൽ ശ്രമം നടത്താനിരിക്കെ ആണ് പ്രശ്‍നം സെല്ലിലെ പുതിയ തടവുകാരന്റെ രൂപത്തിൽ കടന്നുവന്നത്. പുതുതായി വന്ന അഞ്ചാമന്റെ ഉദ്ദേശമോ കാര്യങ്ങളോ ഒന്നും തന്നെ നാൽവർ സംഘത്തിന് പരിചിതമല്ല ,അഞ്ചാമന്റെ കണ്ണ് വെട്ടിച്ച് രക്ഷപ്പെടാനുമാവില്ല. അയാളെ തങ്ങളുടെ കൂടെ കൂട്ടുക എന്നതല്ലാതെ മറ്റ് വഴികൾ ഒന്നും അവരുടെ മുന്നിൽ തെളിഞ്ഞു വന്നതുമില്ല.

Verdict : Must Watch

302. Nightwatch (1994)

Director : Ole Bornedal

Genre : Thriller

Rating : 7.3/10

Country : Denmark

Duration : 107 Minutes


🔸നൈറ്റ്വാച്ച് എന്ന ഡാനിഷ് ചിത്രത്തെ ഒറ്റവാക്കിൽ വിചിത്രം എന്ന് വിശേഷിപ്പിക്കാനാവും. ശവശരീരങ്ങളുമായി പോലും ശാരീരിക ബന്ധത്തിൽ ഏർപ്പെടുന്ന കഥാപാത്രങ്ങളും ,ഉദ്ദേശം വ്യക്തമാക്കാതെ ഡെമോക്ലീസിന്റെ വാള് പോലെ തലയ്ക്ക് മീതെ ഭീഷണിയായി നിലനിൽക്കുന്ന ഒരു സീരിയൽ കില്ലറും ,ഒരു വിധത്തിലും ഇഷ്ടപ്പെടാൻ ആവാത്ത കേന്ദ്ര കഥാപാത്രങ്ങളും ചിത്രത്തിന് മറ്റൊരു വിശേഷണവും പ്രത്യക്ഷത്തിൽ നൽകുന്നില്ല.

🔸ടോർച്ചർ പോൺ വിഭാഗത്തിലെ ആദ്യ കാല ചിത്രങ്ങളിൽ ഒന്നായാണ് നൈറ്റ് വാച്ച് വിലയിരുത്തപ്പെടുന്നത്, തീവ്രത താരതമ്യം ചെയ്യാൻ ആവില്ലെങ്കിലും സോ പോലുള്ള ചിത്രങ്ങളുടെ ആദ്യ പതിപ്പ് ആണ് ഈ ചിത്രം.നിശ്ശബ്ദതയ്ക്ക് എത്രത്തോളം പ്രേക്ഷകനെ കയ്യിലെടുക്കാനും ഭയപ്പെടുത്താനും കഴിയും എന്നതിന് ഉത്തമ ഉദാഹരണമാണ് ചിത്രം. ഗെയിം ഓഫ് ത്രോൺസ് സീരീസിലെ പ്രധാന കഥാപാത്രങ്ങളിൽ ഒന്ന് അവതരിപ്പിച്ച നിക്കോളാസ് കോസ്റ്റർ വോൾഡൗ ആണ് പ്രധാന കഥാപാത്രമായ മാർട്ടിനെ സ്‌ക്രീനിൽ എത്തിച്ചിരിക്കുന്നത് ,അഭിനയ ജീവിതത്തിലെ ആദ്യ കഥാപാത്രങ്ങളിൽ ഒന്ന്.

🔸നിയമ വിദ്യാർത്ഥിയാണ് മാർട്ടിൻ ,പണത്തിനുള്ള ഞെരുക്കം ഒരു പരിധി വരെ ഒഴിവാക്കാനായി ആണ് ശവശരീരങ്ങൾ സൂക്ഷിക്കുന്ന മെഡിക്കൽ സെന്ററിൽ നൈറ്റ് വാച്ച്മാനായി ജോലിക്ക് കയറിയത്. തന്റെ ജോലി സ്ഥലത്തെ കുറിച്ച് ഒട്ടും പ്രതീക്ഷാവഹമായ കാര്യങ്ങൾ അല്ല മാർട്ടിൻ കേൾക്കുന്നത് ,തനിക്ക് മുന്നേ ജോലിക്ക് നിന്നിരുന്ന വ്യക്തി സമയത്തിന്റെ കടന്നുപോക്കിൽ മനസ്സിന്റെ താളം തെറ്റി ശവശരീരങ്ങളുമായി വരെ ശാരീരിക ബന്ധം പുലർത്തിയിരുന്നെന്നും അതാണ് അയാൾ പുറത്തുപോവാൻ ഉണ്ടായ കാരണമെന്നും പറയപ്പെടുന്നു.

🔸പുതുതായി കേട്ടറിഞ്ഞ കാര്യങ്ങൾ ഒട്ടും നല്ലതല്ലെങ്കിലും ആവശ്യം തന്റേതായതിനാൽ തന്നെ ജോലിയുമായി മുന്നോട്ട് പോവാൻ തീരുമാനിക്കുകയാണ് മാർട്ടിൻ. അന്തരീരക്ഷവും ഒറ്റപ്പെടലും ഒഴിച്ച് നിർത്തിയാൽ മാർട്ടിൻ ചെയ്യേണ്ട ജോലികൾ ലളിതമാണ്. ശരീരങ്ങൾ സൂക്ഷിച്ചിരുന്ന മുറികളിൽ ഓരോന്നിലും കയറിച്ചെല്ലണം ,അവിടെനിന്നും എണ്ണം തിട്ടപ്പെടുത്തി താക്കോലുമായി വെളിച്ചം അണച്ച് തിരികെപ്പോവണം ,അതിന് ശവങ്ങളുടെ ഇടയിലൂടെ രണ്ട് തവണ കടന്നുപോവേണ്ടിയിരിക്കുന്നു.

🔸 മാർട്ടിൻ സെന്ററിൽ ജോലി ചെയ്തുകൊണ്ടിരുന്ന നാളുകളിൽ ഒന്നിലാണ് പട്ടണത്തിൽ ഒരു സീരിയൽ കൊലയാളിയുടെ വിളയാട്ടം ആരംഭിക്കുന്നത്. ആരാണെന്നോ എന്താണെന്നോ എന്തിനാണെന്നോ ഒന്നും വ്യക്തമല്ലെങ്കിലും അദൃശ്യനായി അയാൾ തന്റെ വേട്ട തുടർന്ന് കൊണ്ടേയിരുന്നു. കൊലയാളിയുടെ ഏറ്റവും പുതിയ ഇര മാർട്ടിനുമായി ബന്ധമുള്ള നന്നായി അറിയാവുന്ന ഒരു വ്യക്തിയാണ് ,അധികം താമസിയാതെ തന്നെ കൊലയാളിയിലേക്കുള്ള സൂചനകൾ മാർട്ടിനിലേക്ക് വിരൽ ചൂണ്ടുമ്പോൾ യഥാർത്ഥ കൊലയാളി ഇരുളിൽ ഇരുന്ന് മാർട്ടിനെ നോക്കി ചിരിക്കുകയാവാം.

Verdict : Very Good

301. My Life To Live (1962)

Director : Jean Luc Godard

Genre : Drama

Rating : 8.1/10

Country : France

Duration : 85 Minutes


🔸പഴയ കാല ഫ്രഞ്ച് ,നവ തരംഗ ചിത്രങ്ങളുടെ ആരാധകർ കേട്ടിരിക്കാൻ സാധ്യത ഉള്ള ഒന്നാണ് "സംവിധായകൻ ജീൻ ഗൊദാർദ് ആണെങ്കിൽ ക്യാമറ സ്വയം കറങ്ങിയിട്ടാണെങ്കിലും കൃത്യമായി ഒരു പെർഫെക്റ്റ് ഷോട്ട് കരസ്ഥമാക്കിയിരിക്കും" എന്ന തമാശ രൂപേണയുള്ള അഭിപ്രായം. പിഴവ് ഒരു രീതിയിലും പൊറുക്കാത്ത ,അതിന് ഇട നൽകാത്ത തന്റെ സിനിമയെ അതിന്റെ പരിപൂര്ണതയിൽ എത്തിക്കാൻ എന്തിനും തയ്യാറാവുന്ന സംവിധായകൻ എന്ന ഖ്യാതി ഗൊദാർദ് തന്റെ അധ്വാനം ഒന്ന് കൊണ്ട് മാത്രം നേടിയെടുത്തതാണ്.

🔸ഒരുവിധത്തിലും തന്റെ ചിത്രം മറ്റ് ചിത്രങ്ങളുടെ ആവർത്തനം ആവരുതെന്നും അവ മറ്റെല്ലാത്തിൽ നിന്നും മാറിനിൽക്കണം എന്നുമുള്ള ഗൊദാർദിന്റെ നിർബന്ധം ആദ്യ രംഗത്തിൽ നിന്ന് തന്നെ കാണാനാവും. കേന്ദ്ര കഥാപാത്രമായ നായിക അത്യന്തം വികാരം ഉളവാക്കുന്ന വസ്തുതകൾ ആണ് സംസാരിക്കുന്നതെങ്കിലും ഒരിടത്ത് പോലും മുഖം കാണിക്കുന്നില്ല ,ഇടതും വലതും പിൻഭാഗവും കാണിച്ചിട്ടും മുൻഭാഗം പ്രേക്ഷകന് കാണിച്ച് കൊടുക്കുന്നേയില്ല ഗൊദാർദ്.

🔸തെറ്റുകളുടെ ഒരു കൂമ്പാരമാണ് നായികയായ നാനയുടെ ജീവിതം. സിനിമ എന്ന സ്വപ്നം മനസ്സിൽ കേറിക്കൂടിയിട്ട് വർഷങ്ങളായി. ഒരവസരം കിട്ടിയാൽ ശോഭിക്കാനാവും എന്ന് നാനയ്ക്ക് ഉറപ്പുണ്ട് ,പോരാതെ അതിനാവശ്യമായ കഴിവും സൗന്ദര്യവും വേണ്ടുവോളം ഉണ്ട് താനും. എന്നാൽ ഇന്ന് ഒരു വലിയ തെറ്റിൽ നിന്നുമാണ് നാന യാത്ര ആരംഭിച്ചിരിക്കുന്നത് ,സിനിമയ്ക്ക് വേണ്ടി കുടുംബം ഉപേക്ഷിച്ചിരിക്കുന്നു.

🔸ലക്ഷക്കണക്കിന് ആളുകൾ പ്രതീക്ഷകളും പ്രത്യാശകളുമായി കടന്ന് വന്ന് ,അതിൽ വളരെ ചുരുക്കം മാത്രം രക്ഷപ്പെടുന്ന സിനിമാ മേഖല നാനയെ പോലെയുള്ള ഗ്രാമീണ യുവതിക്ക് അന്യമായിരുന്നു. തോൽക്കാൻ തയ്യാറാവാത്ത മനസ്സും ,ആർജവവും ഉള്ളതിനാൽ തന്നെ പൊരുതി നിൽക്കാനായിരുന്നു നാനയുടെ പദ്ധതി. ഒരുപാട് വിട്ടുവീഴ്ചകൾ ചെയ്യേണ്ടിവന്ന നാന എത്തിപ്പെടുന്നത് വേശ്യാവൃത്തിയിലേക്കാണ്.

🔸തെറ്റുകളിൽ നിന്നും തെറ്റുകളിലേക്ക് കടന്ന് പോവുന്ന നാനയുടെ കഥ പന്ത്രണ്ട് ഭാഗങ്ങളായാണ് ചിത്രത്തിൽ അവതരിപ്പിച്ചിരിക്കുന്നത്. എൺപത്തഞ്ച് മിനുട്ട് ദൈർഖ്യം ഉള്ള ചിത്രത്തിൽ പന്ത്രണ്ട് ഭാഗങ്ങൾ കൂട്ടി ചേർക്കുമ്പോൾ കാണുന്ന കഥയിൽ നിരാശയുണ്ട് ,വേദനയുണ്ട് ,ചതിയുണ്ട് ,പശ്ചാത്താപമുണ്ട് ,ദേഷ്യമുണ്ട് ,സർവോപരി ഒരുപാട് നാൾ മനസ്സിൽ നിറഞ്ഞു നിന്നേക്കാവുന്ന ഒരു സിനിമയുണ്ട്.

Verdict : Must Watch

300. The Memory Of A Killer (2003)

Director : Erik Van Looy

Genre : Thriller

Rating : 7.4/10

Country : Belgium

Duration : 123 Minutes


🔸രാഷ്ട്രീയവും ഭരണവും ഒരു പരിധി വരെ ഗവണ്മെന്റിനെ പോലും അടക്കി വാണ ബെൽജിയൻ ക്രിമിനൽ സിൻഡിക്കേറ്റിലെ അവസാനത്തെ കണ്ണിയാണ് ലിഡ്ഡ. പ്രതാപകാലം കഴിഞ്ഞു പോയി ,കൂടെ നടന്നവരും മുൻപേ പോയവരും എല്ലാം മണ്മറഞ്ഞ് പോയിട്ട് വർഷങ്ങളായി. ഏകാന്തതയും നിരാശയും നഷ്ടബോധവും ലദ്ദായെ നിരന്തരം വേട്ടയാടിക്കൊണ്ടിരിക്കുക ആണ്.

🔸താൻ മുൻകാലങ്ങളിൽ ചെയ്ത് കൂട്ടിയ പാപങ്ങൾ കാരണവും ഉള്ള ശത്രുക്കളുടെ എണ്ണം കാരണവും സർവോപരി തൊഴിൽ മേഖലയുടെ മേന്മ കാരണവും ശാന്തമായ ഒരു മരണം തനിക്ക് ഉണ്ടാവില്ലെന്ന് ലദ്ദായ്ക്ക് നന്നായി അറിയാം. സുഹൃത്തുക്കളുടെയും സഹപ്രവർത്തകരുടെയും അവസാനം നേരിൽക്കണ്ടതിനാൽ തന്നെ ആരുടെയെങ്കിലും തോക്കിൽ നിന്നുതിരുന്ന വെടിയൊച്ചയിൽ ലദ്ദായുടെ ജീവനും തീരും ,തീരണം അതാണ് നീതി.

🔸കൊലയും കൊള്ളയും ചോരയും എല്ലാം ലദ്ദായ്ക്ക് എന്നോ മടുത്തു തുടങ്ങിയിരുന്നു. അതിനാൽ ആണ് തന്റെ മുതലാളി ഏല്പിച്ച അവസാന ജോലി ഉപേക്ഷിച്ചത്. എന്നാൽ ലദ്ദായെ പോലെയുള്ളവർക്ക് വിരമിക്കാനുള്ള അവസരം ലഭിക്കാറില്ല എന്ന സെയ്‌നവിന്റെ വാക്യം ലദ്ദായെ ഇരുത്തി ചിന്തിപ്പിക്കുക ആണ്. ഒരുപക്ഷെ ലദ്ദാ ആഗ്രഹിച്ചതും മരണം ആയിരിക്കണം.

🔸ലദ്ദായുടെ അവസാന ജോലി അയാളുടെ കഴിവ് അനിസരിച്ച് നോക്കുകയാണെങ്കിൽ ലളിതമാണ്. രണ്ട് പേരെ കൊല്ലണം അവരുടെ കയ്യിലുള്ള ചില വസ്തുവകകൾ കണ്ടെത്തി സെയ്‌നിവിനെ ഏൽപ്പിക്കണം ,ഇത്ര മാത്രമാണ് അയാളുടെ ജോലി. ഇഷ്ടമില്ലായ്മയോടെ ഏറ്റെടുത്ത ജോലിയിൽ ലദ്ദായ്ക്ക് കൂടുതൽ മടുപ്പ് തോന്നുന്നത് താൻ കൊല്ലേണ്ടയാളെ കാണുമ്പോഴാണ്. ലദ്ദാ കൊല്ലേണ്ടിയിരുന്നത് പന്ത്രണ്ട് വയസ്സുള്ള ഒരു പെൺകുട്ടിയെ ആയിരുന്നു.

🔸പ്രശ്നങ്ങൾ കൂടുതൽ വഷളാവുന്നത് ലദ്ദായിൽ അൾഷെമേഴ്സ് രോഗ ലക്ഷണങ്ങൾ കണ്ട് തുടങ്ങുമ്പോഴാണ്. ഓർമകൾ ഓരോന്നായി കൈവിട്ട് പോവുന്നത് ലദ്ദാ നിസ്സഹായനായി മനസിലാക്കുന്നു. മനസ്സ് പൂർണമായും തുടച്ചു നീക്കപ്പെടാൻ എത്ര കാലം അവശേഷിക്കുന്നു എന്നയാൾക്ക് അറിയില്ല. തന്റെ ജീവന് വേണ്ടി ആരോ ഒരാൾ എവിടെ നിന്നോ ഇറങ്ങി തിരിച്ചിട്ടുണ്ടെന്ന് അയാൾക്കറിയാം ,ഓർമകൾ ചതിച്ചു തുടങ്ങുമ്പോഴേയ്ക്കും വിധി കീഴ്പ്പെടുത്തുമോ എന്ന് കണ്ടറിയേണ്ടി ഇരിക്കുന്നു.

Verdict : Very Good

299. Birth Of A Nation (2016)

Director : Nate Parker

Genre : Drama

Rating : 6.4/10

Country : USA

Duration : 120 Minutes


🔸മനുഷ്യരുള്ള കാലത്തോളം തന്നെ പഴക്കമുണ്ട് അവർക്കിടയിലുള്ള വേർതിരിവുകൾക്കും. പണക്കാരനും പാവപ്പെട്ടവനും എന്ന വേർതിരിവ് ,സമ്പന്നനും ദരിദ്രനും എന്ന വേർതിരിവ് ,കറുത്തവനും വെളുത്തവനും എന്ന വേർതിരിവ്. ഇവയിൽ തന്നെ ഏറ്റവും നീചമായത് തൊലിയുടെ നിറം സംബന്ധിച്ച വേർതിരിവാണ് ,ഇന്നത്തെ കാലത്ത് വിശ്വസിക്കാൻ പ്രയാസമുണ്ടാവാമെങ്കിലും നിറവ്യത്യാസത്തിൽ മനുഷ്യരെ അടിമകളായി വിൽക്കാറുണ്ടായിരുന്ന ഒരു കാലം ഈ ഭൂമിയിലും ഉണ്ടായിരുന്നു.

🔸പത്തൊൻപതാം നൂറ്റാണ്ടിലെ അമേരിക്കയാണ് കഥാ പശ്ചാത്തലം. എബ്രഹാം ലിങ്കൺ അമേരിക്കൻ പ്രസിഡണ്ട് പദവിയിൽ എത്തിയിട്ടില്ല ,കറുത്ത വർഗക്കാരെ മനുഷ്യരായി കാണാൻ മടിക്കുന്ന ഒരു സമൂഹമാണ് അമേരിക്കയിൽ ഉണ്ടായിരുന്നത്. അവരുടെ ഉന്നമനം പോയിട്ട് തുല്യതയെ കുറിച്ച് പോലും ആരും ചിന്തിക്കാത്ത കാലം. സിരകളിലൂടെ ഓടുന്ന രക്തം ഒന്നാണെന്ന വാദം കാറ്റിൽ പറത്തിക്കൊണ്ട് തങ്ങളുടെ തൊടിയിലും മറ്റും പണിക്ക് വന്ന ഇവരോട് മനുഷ്യത്വ രഹിതമായ പെരുമാറ്റമാണ് സർവരുടെയും.

🔸അതിലും കഷ്ടമാണ് കറുത്ത വംശജരുടെ അവസ്ഥ ,തങ്ങൾ അനുഭവിക്കുന്ന യാതനകൾ എല്ലാം തന്നെ തങ്ങൾ അർഹിക്കുന്നതാണെന്ന മനോഭാവവും ജീവിതം തങ്ങളുടെ ഉടമയുടെ കാൽച്ചുവട്ടിൽ ഞെരിഞ്ഞ് തീരേണ്ടതാണ് എന്ന വിശ്വാസവും ആണ് അവർക്കിടയിൽ നിലവിലുള്ളത്. എന്തും സഹിക്കാനും ക്ഷമിക്കാനും അവർ മാനസികമായും ശാരീരികമായും തയാറായിരുന്നു. കഷ്ടിച്ച് കിടക്കാനാവുന്ന ചായ്പുകളും ഒട്ടിയ വയർ നിറയ്ക്കാനാവാത്ത ഭക്ഷണവും അവർക്ക് ശീലമായി മാറിയിരിക്കുന്നു.

🔸ജോലിസ്ഥലത്തിന് അപ്പുറമുള്ള ലോകം ഇവരിൽ മിക്കവരും കണ്ടിട്ടില്ല. ജനിച്ച് വീണത് മുതൽക്കേ കണ്ടും കേട്ടും പഴകിയത് ഇതൊക്കെ തന്നെയാണ്. പൂർവികന്മാർ ചെയ്ത് കൊണ്ടിരുന്ന ജോലിയും ഒടുവിൽ ഒരു നാൾ മരിച്ച് വീണതും ,അവരെ മൃഗങ്ങൾക്ക് തുല്യമായി വലിച്ചിഴച്ച് കൊണ്ടുപോയി അടക്കിയതും എല്ലാം ഇവിടെ തന്നെ. തങ്ങളെ കാത്തിരിക്കുന്നതും ഇതൊക്കെ തന്നെയാണെന്ന് അറിയാം ,ഒരു പരിധി വരെ അവർ ആഗ്രഹിക്കുന്നതും മരണമാണ്.

🔸എന്നാൽ അടിമകളിൽ ഒരാൾ ,നാറ്റ് ടാർനേരിന് മറ്റ് ചില ആശയങ്ങൾ ഉണ്ടായിരുന്നു. നൂറ്റാണ്ടുകളായി അടക്കി ഭരിക്കപ്പെട്ട തന്റെ കൂട്ടർ സ്വാതന്ത്ര്യം അർഹിക്കുന്നു എന്നയാൾക്ക് അറിയാം. ഇത് തങ്ങളുടെ കൂടി മണ്ണാണ് ,തങ്ങളുടെ അധ്വാനമാണ് ,തങ്ങളുടെ വിയർപ്പും ചോരയുമാണ് ,അത് ആർക്ക് മുന്നിലായാലും അടിയറവ് വെച്ച് കൊടുക്കാൻ അയാൾ തയാറായിരുന്നില്ല. അപ്പോഴും പ്രതികരണ ശേഷി നഷ്ട്ടപ്പെട്ട ഒരു കൂട്ടത്തെ എങ്ങിനെ ഒരു കുടക്കീഴിൽ കൊണ്ടുവരാം എന്നതിനെ പറ്റി അയാൾക്ക് ഒരറിവും ഉണ്ടായിരുന്നില്ല.

Verdict : Good

298. 2001 A Space Odyssey (1968)

Director : Stanley Kubrik

Genre : Sci Fi

Rating : 8.6/10

Country : USA

Duration : 161 Minutes


🔸ആദ്യ മൂന്ന് മിനിറ്റ് ഇരുട്ടല്ലാതെ മറ്റൊന്നും കാണിക്കുന്നില്ല ,പിന്നീട് കുറച്ച് സമയം മോണോലിത്ത് അഥവാ ഒരു കൽ പ്രതിമ ആണ് സ്‌ക്രീനിൽ, ആദ്യ ഇരുപത്തഞ്ച് മിനിറ്റും അവസാന ഇരുപത്തി മൂന്ന് മിനിറ്റും സംഭാഷണങ്ങൾ ഏതുമില്ല. അവസാന ഭാഗത്ത് എന്താണ് സംഭവിക്കുന്നതെന്ന് കൃത്യമായി വിശദീകരിക്കാൻ ഇന്നേവരെ ആർക്കും സാധിച്ചിട്ടുമില്ല. ഇതാണ് ചുരുക്കി പറഞ്ഞാൽ കുബ്രിക്കിന്റെ സ്പേസ് ഒഡിസ്സി.

🔸ഒരു കാരണവശാലും കാഴ്ചക്കാരന് കാര്യം മനസിലാവരുത് എന്ന് അണിയറ പ്രവർത്തകർ വാശി പിടിച്ച് തീരുമാനിച്ച് ഉറപ്പിച്ച് പുറത്തിറക്കിയ ലോകത്തെ ആദ്യത്തെയും അവസാനത്തെയും ചിത്രം ആയിരിക്കും സ്പേസ് ഒഡീസി. കാഴ്ചക്കാരൻ ചിത്രത്തിൽ നടക്കുന്ന സംഭവങ്ങൾ മനസിലാക്കിയാൽ അത് തങ്ങളുടെ പരാജയം ആണെന്ന് പിന്നണിയിൽ പ്രവർത്തിച്ചവർ തുറന്ന് പറഞ്ഞത് ചരിത്രം.

🔸സങ്കീർണമായ ചിത്രം ആയതിനാൽ തന്നെ ആദ്യ ഷോ കഴിഞ്ഞ് തിയേറ്ററിലുള്ള ഇരുന്നൂറോളം കാഴ്ചക്കാർ പാതിവഴി പിന്നിട്ടപ്പോൾ ഇറങ്ങിപ്പോയ ചരിത്രവും ഈ ചിത്രത്തിന് ഉണ്ട്. പഴക്കം കൂടും തോറും വീര്യം കൂടുന്ന വീഞ്ഞ് പോലെ വർഷങ്ങൾക്കിപ്പുറം കൾട്ട് സ്റ്റാറ്റസ് ആണ് ചിത്രത്തിന് ഇന്ന്. കാലത്തിന് പോലും പഴക്കം വരുത്താൻ കഴിയാഞ്ഞ കാലത്തിന് മുന്നേ സഞ്ചരിച്ച കുബ്രിക്കിന്റെ വിശ്വൽ എഫക്ടുകളും ടെക്‌നോളജിയും ആണ് വർഷങ്ങൾക്കിപ്പുറവും ചിത്രത്തിനെ കൾട്ടായി നിലനിർത്താനുള്ള പ്രധാന കാരണങ്ങളിൽ ഒന്ന് എന്നത് തീർച്ചയാണ്.

🔸കുരങ്ങന്മാരായി ഭൂമിയിൽ വിഹരിച്ചിരുന്ന കാലം മുതൽ ചന്ദ്രനിൽ കാൽ കുത്തിയത് വരെയുള്ള മാനവരാശിയുടെ പരിണാമത്തിന്റെ വിവിധ ഘട്ടങ്ങളിലൂടെ ചിത്രം കടന്ന് പോവുന്നു. ഇന്റെർസ്റ്റെല്ലർ ,ആർട്ടിഫിഷ്യൽ ഇന്റലിജിൻസ് പോലെയുള്ള ഒരുപാട് ചിത്രങ്ങൾക്ക് പ്രചോദനമായ സ്പേസ് ഒഡീസി അമ്പത് വർഷങ്ങൾക്ക് മുന്നേ തന്നെ മൊബൈൽ ഫോൺ ,ഐ പാഡ് ,സ്പേസ് റോബോട്ട് തുടങ്ങിയവയെ പ്രവചിച്ചിരുന്നു എന്നത് കുബ്രിക് എന്ന ദീർഘ വീക്ഷകന്റെ ലെവൽ മനസ്സിലാക്കി തരുന്നു.

🔸കാഴ്ചക്കാരന്റെ ശ്രദ്ധ പിടിച്ച് നിർത്താനായി ഒരൊറ്റ ഷോട്ട് പോലുമില്ല ചിത്രത്തിൽ ,അതിനായി ചിത്രത്തിലെവിടെയും കൂബ്രിക് ശ്രമിച്ചിട്ടുമില്ല. അതിനാൽ തന്നെ പൊതുവെ കേൾക്കുന്ന പരാതികളിൽ ഒന്നാണ് ചിത്രം വളരെ മടുപ്പിക്കുന്നതും വിരസവും ആണെന്നത്. എന്നാൽ സിനിമയെ ഗൗരവമായി കാണുന്ന ഒരാളും ഒരിക്കലും കാണാതെ ഒഴിവാക്കാൻ പാടില്ലാത്ത സിനിമ അപനുഭവം തന്നെയാണ് ഈ ചിത്രം. 2001ൽ എങ്ങനെയാണ് ഇത്രയും മികച്ച ടെക്കനോളജി ഉപയോഗിച്ച് സംവിധായകൻ ചിത്രം പുറത്തിറക്കിയത് എന്ന് 1968ൽ പുറത്തിറങ്ങിയ ചിത്രം കണ്ട് അത്ഭുതപ്പെട്ട കൂട്ടുകാരനെ സ്മരിക്കുന്നു.

Verdict : Must Watch

297. Trainspotting (1996)

Director : Danny Boyle

Genre : Comedy

Rating : 8.2/10

Country : UK

Duration : 95 Minutes


🔸മദ്യപാനികളുടെയും മറ്റ് ലഹരി ഉപഭോക്താക്കളുടെയും ബുദ്ധിമുട്ടുകൾ ഒരിക്കലും സമൂഹത്തിന് മനസിലാവണം എന്നില്ല, അതിന് മറ്റൊരു മദ്യപാനി തന്നെ വേണം. അതിനാൽ തന്നെ ലഹരിയോട് ആസക്തിയുള്ള രണ്ട് വ്യക്തികൾ തമ്മിൽ പലപ്പോഴും നിർവചിക്കാനാവാത്ത ഒരുതരം ബന്ധം ഉടലെടുക്കാറുണ്ട്. രക്തബന്ധത്തേക്കാൾ തീവ്രമായ ബന്ധവും സ്നേഹവും പരസ്പരം ഉടലെടുത്ത സഹകുടിയന്മാരെ കാണാൻ കഴിഞ്ഞിട്ടുണ്ട്. ട്രൈൻസ്‌പോട്ടിങ് എന്ന ബ്രിട്ടീഷ് ചിത്രം ലഹരിക്കടിമകളായ ഒരു കൂട്ടം സുഹൃത്തുക്കളുടെ കഥ ആണ് ,അവർക്കിടയിലെ തമാശകളുടെയും.

🔸ലഹരിയുടെ അമിത ഉപയോഗം കാരണം ജീവിതചര്യയും കുടുംബവും എന്തിന് മാനസികനില പോലും തെറ്റിക്കിടക്കുന്ന ഒരാൾക്ക് ഒരു നിമിഷത്തേക്കെങ്കിലും ലഹരി കിട്ടാതിരുന്നാലുള്ള അവസ്ഥ ഭീകരമാണ്. സമൂഹം എങ്ങനെ കണ്ടാലും ആ നിമിഷം അയാൾക്ക് തന്റെ കുടുംബത്തേക്കാളും സുഹൃത്തുക്കളെക്കാളും പണത്തേക്കാളും മാനാഭിമാനത്തേക്കാളും ആവശ്യം ഒരിറ്റ് ലഹരി പദാർത്ഥം തന്നെ ആയിരിക്കും. ആ വ്യഗ്രതയും പരവേശവും മനസിലാക്കാൻ മറ്റൊരാൾക്ക് കഴിയുന്നിടത്താണ് സൗഹൃദം ആരംഭിക്കുന്നത്.

🔸ലഹരി ഉപയോഗം തന്റെ ജീവിതത്തെ ഏതെല്ലാം രീതിയിൽ ബാധിച്ചു എന്ന് തിരിച്ചറിഞ്ഞ് രീതികൾ മാറ്റി പുതിയൊരു മനുഷ്യനായി മാറാൻ തയാറെടുക്കുകയാണ് ചിത്രത്തിന്റെ തുടക്കത്തിൽ  കഥാനായകനായ റെന്റൻ. പൂർണമായും ഒരു മുറിയിൽ പുറംലോകവുമായുള്ള ബന്ധങ്ങളെല്ലാം വിച്ഛേദിച്ച് മനസിനെ മറ്റകാര്യങ്ങളിലേക്ക് മുഴുകാൻ പ്രേരിപ്പിച്ചുകൊണ്ടുള്ള റെന്റന്റെ സാഹസം അയാളെ എത്തിക്കുന്നത് ഒരു തുള്ളി ലഹരി മരുന്നിനായി സ്കോട്ലൻഡിലെ ഏറ്റവും വൃത്തികെട്ട ക്ലോസെറ്റിന്റെ അടിത്തട്ടിലേക്കാണ്.

🔸റെന്റണെ പോലെ തന്നെ അല്ലെങ്കിൽ റെന്റനെക്കാൾ ലഹരി പദാർത്ഥങ്ങൾ ഉപയോഗിക്കുന്ന ,തെക്കേതാണ് വടക്കേതാണ് എന്ന് തിരിച്ചറിയാനാവാത്ത ഒരു കൂട്ടം സുഹൃത്തുക്കളും ഉണ്ട് അയാൾക്ക്. പേരെടുത്ത് പറയുകയാണെങ്കിൽ സ്പഡ്ഡ് ,സിക്ക് ബോയ് ,ബെഗ്‌ബി എന്നിവരാണിവർ. തിന്നുക കുടിക്കുക ഉറങ്ങുക എന്നതിനൊപ്പം ലഹരിയും ദിനചര്യയുടെ ഭാഗമാക്കി മാറ്റിയവർ, മറ്റൊന്നിനോടും താല്പര്യമില്ലാത്ത ജനിച്ചതേ ഇതിനായി മാത്രം എന്ന് മനസ്സിൽ കരുതി തീരുമാനിച്ച് ഉറപ്പിച്ചവർ.

🔸പ്രത്യേകിച്ച് മാറ്റങ്ങളൊന്നും ഇല്ലാതെ തുടർന്ന് കൊണ്ടിരുന്ന ഈ പ്രക്രിയക്ക് ഭേദഗതി വരുത്തിക്കൊണ്ട് നാൽവർ സംഘത്തിന്റെ ജീവിതത്തിൽ അപ്രതീക്ഷിതമായ ചില സംഭവങ്ങൾ അരങ്ങേറുകയാണ്. ഒന്നര മണിക്കൂർ മാത്രം ദൈർഖ്യം ഉള്ള ചിത്രം ലഹരി ഉപയോഗത്തെ ഏതെങ്കിലും ഒരു പ്രത്യേക രീതിയിൽ ചിത്രീകരിക്കാതെ പൂർണമായും ലഹരിക്കടിമകളായ ഒരുകൂട്ടം വ്യക്തികളുടെ ജീവിതത്തിലേക്കുള്ള എത്തിനോട്ടമാണ്. ചിത്രത്തിന്റെ രണ്ടാം ഭാഗം കഴിഞ്ഞ വർഷം പുറത്തിറങ്ങിയിരുന്നു.

Verdict : Must Watch