600. Article 15 (2019)

Director : Anubhav Sinha

Genre : Crime

Rating : 8.4/10

Country : India

Duration : 125 Minutes

🔸കേരളത്തിൽ ആദ്യമായി രേഖപ്പെടുത്തിയ ദുരഭിമാന കൊലപാതക കേസിന്റെ കോടതി വിധി വന്ന ഈ സമയം തന്നെയാണ് ആർട്ടിക്കിൾ 15 എന്ന ചിത്രത്തെ കുറിച്ച് പറയാൻ ഏറ്റവും ഉചിതം. ഈ ചിത്രം കണ്ടിറങ്ങിയ ഒരു സുഹൃത്ത് കുറിച്ചുവെച്ചത് വളരെ കാലിക പ്രസക്തമായ ചിത്രം എന്നാണ്, ഇവിടെ ഒന്ന് വിയോജിക്കേണ്ടി വരും. കാരണം വേറൊന്നുമല്ല ഇത് ഈ കാലഘട്ടത്തിന്റെ മാത്രം പ്രശ്നമല്ല, എല്ലാ കാലത്തും നമ്മൾ നേരിട്ടതാണ്, അതിന്റെ ഭയാനകമായ തീവ്രത ഇന്നാണ് അറിയുന്നത് എന്ന് മാത്രം. ഈ ദുരഭിമാന കൊലപാതകങ്ങളുടെ നേർ സാക്ഷ്യമാണ് ഈ ചിത്രം എന്ന് പറയാം.

🔸ഇത് നമ്മുടെ നാട് തന്നെ ആണോ എന്ന സംശയം ജനിപ്പിക്കുന്ന രണ്ട് മൂന്ന് രംഗങ്ങൾ എങ്കിലും ചിത്രത്തിലുണ്ട്, അതിൽ ഏറ്റവും പ്രാധാന്യം അർഹിക്കുന്നത് കഥയുമായി വലിയ ബന്ധമില്ലാത്ത എന്നാൽ ആദ്യ കാഴ്ചയിൽ പരസ്പര ബന്ധം ഇല്ലാത്തത് എന്ന് തോന്നിച്ച ഒരു രംഗമാണ്. സുയർ ടാങ്കിൽ ശരീരം മുഴുവൻ മുങ്ങി തന്റെ ജോലി ചെയ്യുന്ന കീഴ്ജാതിക്കാരൻ എന്ന് വിശേഷിപ്പിക്കപ്പെട്ട കഥാപാത്രം. ജനിച്ചത് ഇത് പോലൊരു ജാതി വെറി നിറഞ്ഞ നാട്ടിലായതിനാൽ ആരും ചെയ്യാൻ അറക്കുന്ന ഇത് പോലുള്ള തൊഴിലുകളിൽ ഒതുങ്ങിപോയവർ. ഇത് പോലുള്ള കഥാപാത്രങ്ങളുടെ കഥയാണ് ചിത്രം.

🔸ഇനി വേറൊരു രംഗം എന്നത് മൂന്ന് രൂപ ദിവസക്കൂലി ചോദിച്ചതിന് കീഴ്ജാതിക്കാരനായ കഥാപാത്രത്തെ മർദിക്കുന്ന മേൽജാതിക്കാരൻ ഉൾപ്പെട്ട രംഗമാണ്, ഈ സംഭവത്തിന് അയാൾ നൽകുന്ന വിശദീകരണം അതിലും അപകടകരം ആണ് താനും. ക്ഷേത്രത്തിൽ പ്രവേശിക്കാൻ ശ്രമിച്ച അവർണ്ണരെന്ന് വിശേഷിപ്പിക്കപ്പെടുന്ന കഥാപാത്രങ്ങളെ പരസ്യമായി മർദിക്കുന്ന രംഗം വേറെ, ഇനി ഇതൊന്നും പോരെങ്കിൽ ചിത്രത്തിന്റെ നട്ടെല്ലായി കാണാവുന്ന സംഭവങ്ങളും. ഇതെല്ലാം സംഭവിക്കുന്നത് നമ്മടെ രാജ്യത്ത് തന്നെയാണ്, ജാതീയത പതിറ്റാണ്ടുകൾക്ക് മുന്നേ കുഴിച്ച് മൂടി എന്ന് ഊറ്റം കൊള്ളുന്ന ഇന്ത്യയിൽ.

🔸ഇങ്ങനെ ചിന്തിക്കാനും പറയാനും ഒരുപാട് കാര്യങ്ങളുണ്ട് ആർട്ടിക്കിൾ ഫിഫ്റ്റീൻ എന്ന ചിത്രത്തിൽ. ഈ ഒരു ജെനെറേഷനിലെ ഇഷ്ട നടന്മാരിൽ ഒരാളായ ആയുഷ്മാൻ കുറാന ആണ് പ്രധാന കഥാപാത്രമായ അയനിനെ അവതരിപ്പിക്കുന്നത്. ഇന്ത്യയ്ക്ക് പുറത്ത് ദീർഘ കാലമായി താമസമാക്കിയ, ഇവിടത്തെ സിസ്റ്റവും, ആചാരങ്ങളും എല്ലാമായി അത്ര പരിചിതൻ അല്ലാത്ത കഥാപാത്രമാണ് അയൻ, അത് കൊണ്ട് തന്നെ അയാളുടെ കണ്ണുകളിലൂടെ കാണുന്ന കാഴ്ചകളും അത് അയാളിൽ സൃഷ്ട്ടിക്കുന്ന റീപോൺസും നമ്മുക്കും റിലേറ്റ് ചെയ്യാൻ പറ്റുന്നതാണ്. മറ്റുള്ള കഥാപാത്രങ്ങളെപോലെ ജാതീയതയിൽ ഒരു ഡിഫോൾട്ട് സ്റ്റാൻഡ് ഈ കഥാപാത്രത്തിന് ഇല്ല എന്നതും ശ്രദ്ധേയമാണ്.

🔸പിന്നോക്ക ജാതിക്കാരുടെ രക്ഷകൻ ആയി മാറുന്ന നായക കഥാപാത്രം എന്ന ക്ലിഷേ പ്രതീക്ഷിച്ചിരുന്നെങ്കിലും അവിടെയും ചിത്രം വ്യത്യസ്തത പാലിച്ചു. വിഷയത്തിൽ നിന്നും ഒരുവേള പോലും തെന്നി മാറാതെ ശക്തമായ രീതിയിൽ തന്നെ പറഞ്ഞ് ഫലിപ്പിച്ച സംവിധായകന് ആദ്യം കയ്യടി നൽകണം, ഇദ്ദേഹത്തിന്റെ മുൻ ചിത്രമായ മുൽക് ഇതുവരെ കാണാൻ കഴിഞ്ഞില്ല, തീർച്ചയായും കാണണം ഇന്നിപ്പോൾ തോന്നുന്നുണ്ട്. ആർട്ടിക്കിൾ ഫിഫ്റ്റീൻ എന്ന ചിത്രം എങ്ങിനെ ഇന്നത്തെ രാഷ്ട്രീയ സാംസ്‌കാരിക പശ്ചാത്തലത്തിൽ പുറത്തിറങ്ങി എന്നത് ഇപ്പോഴും അത്ഭുതപ്പെടുത്തുന്ന കാര്യമാണ്, എന്തായാലും ഇത് വായിക്കുന്നവർ തീർച്ചയായും കാണാൻ ശ്രമിക്കുക, ഒരു ട്രൂ മസ്റ്റ് വാച്ച് മൂവി.

Verdict : Must Watch

DC Rating : 90/100

599. Homestay (2018)

Director : Parkpoom Wongpoom

Genre : Fantasy

Rating : 7.6/10

Country : Thailand

Duration : 136 Minutes

🔸ഒരു ആശുപത്രി കിടക്കയിൽ നിന്നുമാണ് ഹോംസ്റ്റേയ് എന്ന തായ്‌ലൻഡ് ചിത്രം ആരംഭിക്കുന്നത്, നമ്മുടെ കേന്ദ്ര കഥാപാത്രമായ മിന്നിന് ബോധം തെളിയുകയാണ്, അല്ലെങ്കിൽ അങ്ങനെയാണ് നമ്മൾ കരുതുന്നത്. എന്നാൽ യഥാർത്ഥത്തിൽ അയാൾ പുനർജനിക്കുകയാണ് എന്നത് പിന്നീടാണ് വ്യക്തമാവുന്നത്, അതെ മിൻ മരിച്ചിട്ട് ഏകദേശം ഇരുപത്തി നാല് മണിക്കൂർ പിന്നിട്ട് കഴിഞ്ഞിരുന്നു. മോർച്ചറിയിൽ നിന്നും ജീവനോടെ പുറത്തുവന്ന മിന്നിനെ കണ്ട് നേഴ്‌സുമാർ നിലവിളിച്ചത്തിനും ബോധം കെട്ടതിനും ഒന്നും അവരെ കുറ്റപ്പെടുത്താൻ ആവില്ല, സെൻസുള്ള ഏതൊരു വ്യക്തിയും അങ്ങനെ തന്നെയേ പ്രതികരിക്കുകയുള്ളൂ.

🔸നമ്മടെ കിലുക്കം സിനിമയിൽ ഉറക്കം ഉണരുന്ന തിലകന്റെ കഥാപാത്രം കണ്ണാടിയിൽ മീശയില്ലാത്ത തന്റെ രൂപം കണ്ട് ആരെടാ ഇത് എന്ന് ചോദിക്കുന്ന രംഗമില്ലേ, അത് പോലെയാണ് ഈ ചിത്രത്തിലെ മിന്നിന്റെ അവസ്ഥ. ആദ്യമായി കണ്ണാടിയിൽ കാണുന്ന തന്റെ രൂപത്തോട് യോജിക്കാൻ അവന് പറ്റുന്നില്ല. കുറച്ച് കൂടി ലളിതമായി പറയുക ആണെങ്കിൽ ശരീരവും ആത്മാവും അങ്ങട്ട് പൊരുത്തപ്പെടുന്നില്ല. വേറെ ഏതോ ഒരു അപ്പാവിയുടെ ശരീരത്തിലാണ് ഇപ്പൊ ആ മൈൻഡ് ഉള്ളത്, ആ അപ്പാവിയുടെ പേരാണ് മിൻ, അപ്പൊ ഇയാളേതാ ഐറ്റം എന്നൊരു ചോദ്യം സ്വാഭാവികമായും ഉയരും, അത് അവിടെ നിക്കട്ടെ, സസ്പെൻസ് ഗുണം ചെയ്യും.

🔸പ്രശനം എന്താണെന്ന് വെച്ചാൽ ആശുപത്രി കിടക്കയിൽ ഉള്ള തനിക്ക് ചുറ്റും ആരൊക്കെയോ വന്ന് പോവുന്നു, അതിൽ ഏതോ ഒരു സ്ത്രീ വന്ന് പിച്ചും പേയും ഒക്കെ പറയുന്നു, കരയുന്നു, ആകെ ബഹളമയം, കണ്ടിട്ട് ആ മിന്നിന്റെ അമ്മ ആയിരിക്കണം. കുറച്ച് കൂടി സമയം ചുറ്റുപാടും മറ്റുള്ളവരുടെ സംസാരങ്ങളും ഒക്കെ വീക്ഷിച്ച ശേഷമാണ് കാര്യങ്ങളിൽ ഒരു നീക്കുപോക്ക് ഉണ്ടാവുന്നത്. ആ പണ്ടാരകാലൻ മിൻ ആത്മഹത്യ ചെയ്യുക ആയിരുന്നു, അതാണ് എല്ലാവരും ഇങ്ങനെ തന്നെ തന്നെ വീക്ഷിച്ചോണ്ട് നിക്കുന്നത്. ഇതിപ്പോ ആകെ ബുദ്ധിമുട്ട് ആയല്ലോ, നൈസ് ആയിട്ട് മുങ്ങാം എന്ന് കരുതി അർധരാത്രി ആശുപത്രിയിൽ നിന്ന് കടന്ന് കളയാൻ ശ്രമിക്കവേ ആണ് മറ്റൊരു സംഭവം അരങ്ങേറുന്നത്.

🔸ഈ രക്ഷപ്പെടൽ ശ്രമത്തിനിടെ ആണ് മിൻ ഒരു അപരിചിതനെ കണ്ട് മുട്ടുന്നത്, ഇവിടെ ട്വിസ്റ്റ് എന്താണെന്നാൽ മിന്നിന്റെ ഉള്ളിലുള്ള ആത്മാവ് മറ്റാരുടെയോ ആണെന്ന് ഈ ഗടിക്ക് അറിയാം. അറിയാം എന്ന് മാത്രമല്ല ഇതിന് കാരണക്കാരൻ പുള്ളി ആണോ എന്ന് വരെ സംശയിക്കാം, ഗാർഡിയൻ എന്ന് സ്വയം പരിചയപ്പെടുത്തിയ ഈ പുള്ളി മിന്നിന്റെ മുന്നിൽ ഒരു ഓഫർ അല്ലെങ്കിൽ ഉടമ്പടി വെക്കുകയാണ്. തൊണ്ണൂറ് ദിവസം, തൊണ്ണൂറ് ദിവസത്തിനുള്ളിൽ യഥാർത്ഥ മിൻ ആത്മഹത്യാ ചെയ്യാൻ ഉണ്ടായ കാരണം കണ്ടെത്തിയിരിക്കണം, അങ്ങനെ സാധിച്ചാൽ തുടർന്ന് ജീവിക്കാൻ ഉള്ള അനുവാദം ലഭിക്കും, അതിൽ പരാജയപ്പെടുക ആണെങ്കിൽ മിന്നിനും, ആ ശരീരത്തിനുള്ളിൽ ഉള്ള ആത്മാവിനും എന്നെന്നേക്കുമായി ഗുഡ്ബൈ പറഞ്ഞ് കൈകൊടുക്കാം.

🔸ഒട്ടും പ്രതീക്ഷിക്കാതെ ലഭിക്കുന്ന കിടിലൻ ചില സിനിമാ അനുഭവങ്ങൾ ഉണ്ട്, അവയിൽ ഒന്നാണ് വ്യക്തിപരമായി ഈ ചിത്രം. വളരെ ലളിതമായത് എന്ന് പ്രത്യക്ഷത്തിൽ തോന്നുമെങ്കിലും ഒരു നാലഞ്ച് കഥാപാത്രങ്ങളുടെ സ്റ്റോറി എങ്കിലും നല്ല രീതിയിൽ ചിത്രം പറഞ്ഞ് പോവുന്നുണ്ട്. ഒരു മിസ്റ്ററി ചിത്രം എന്ന രീതിയിൽ ആരംഭിക്കുന്ന കഥ പിന്നീട് ഡ്രാമ റൊമാൻസ് ഫാമിലി ജിനേരിലേക്കും കടന്ന് കയറുന്നുണ്ട്. ഇങ്ങനെ നല്ല രീതിയിൽ ആരംഭിച്ച് മുന്നേറി സംപ്ത്രിപ്തി പകരുന്ന ഒരു ക്ലൈമാക്‌സും നൽകുന്നിടത്ത് ചിത്രം വിജയിക്കുന്നു.

Verdict : Very Good

DC Rating : 80/100

598. The Bread And Alley (1970)

Director : Abbas Kiarostami

Genre : Short Film

Rating : 7.2/10

Country : Iran

Duration : 10 Minutes

🔸ആബേൽ ഗാൻസ് എന്ന സംവിധായകന്റെ മൂന്ന് ചിത്രങ്ങൾ ഉൾപ്പെടുത്തി ഈ സീരീസിലെ ആദ്യ ചാപ്റ്റർ പൂർത്തിയാക്കിയ ശേഷം അടുത്തത് ആര് എന്ന ചോദ്യത്തിന് ആദ്യം മനസ്സിൽ എത്തിയത് അബ്ബാസ് കിയാറോസ്റ്റമിയുടെ മുഖമാണ്. ഇറാനിയൻ സിനിമാ ലോകത്തെ അനിഷേധ്യമായ സാന്നിധ്യം, കോക്കർ ട്രിലജി ഉൾപ്പെടെ മികച്ച അനവധി സിനിമകൾ, എല്ലാത്തിനും ഉപരി ലോക സിനിമയ്ക്ക് നൽകിയ വിസ്മരിക്കാൻ കഴിയാത്ത സംഭാവനകൾ, ഇതൊക്കെയാണ് ഈ സംവിധായകനെ എണ്ണം പറഞ്ഞവരിൽ ഒരാളാക്കുന്ന ചുരുക്കം ചില കാര്യങ്ങളിൽ ഒന്ന്.

🔸അബ്ബാസ് കിയാറോസ്തമി ചിത്രങ്ങളെ പറ്റി പറഞ്ഞ് തുടങ്ങുമ്പോൾ എവിടെ നിന്ന് തുടങ്ങണം എന്നത് സംശയകരമാണ്. ക്ളോസ് അപ്, ടേസ്റ്റ് ഓഫ് ചെറി പോലെ തൊണ്ണൂറുകളിൽ അദ്ദേഹത്തിന്റെ പേരും പ്രശസ്തിയും ഏറ്റിയ ചിത്രങ്ങളിൽ നിന്ന് വേണമോ അതോ ആർട്ടിന് പ്രാധാന്യം നൽകിയ 24 ഫ്രെയിംസ് പോലുള്ള ചിത്രത്തിൽ നിന്നും തുടങ്ങണമോ എന്നതായിരുന്നു സംശയം. ഒടുവിൽ ഒരു സംവിധായകൻ എന്ന നിലയിൽ പുള്ളി തുടങ്ങിയത് പോലെ തന്നെ അരങ്ങേറ്റ ചിത്രമായ ബ്രെഡ് ആൻഡ് അല്ലി മതി എന്ന തീരുമാനത്തിൽ എത്തുക ആയിരുന്നു, അല്ലെങ്കിലും ലളിതമായി പുള്ളിയുടെ ശൈലി പിടികിട്ടാൻ ഇത് തന്നെ ധാരാളമാണ്.

🔸വെറും പത്ത് മിനിറ്റ് ദൈർഖ്യം മാത്രമേ ഉള്ളൂ ഈ ഷോർട്ട് ഫിലിമിന്, അത് കൊണ്ട് തന്നെ പ്ലോട്ട് വിശദീകരിച്ച് പറയാൻ ഒന്നുമില്ല, ഇനി പറഞ്ഞാൽ തന്നെ അത് നീതികേട്‌ ആയിരിക്കുകയും ചെയ്യും അതിനാൽ ചെറുതായി ഒരു ഹിന്റ് തരാം. പേരോ മറ്റ് കാര്യങ്ങളോ ഒന്നും ഇല്ലാത്ത ഒരു ചെറിയ കുട്ടിയാണ് നമ്മടെ പ്രധാന കഥാപാത്രം, ഈ കുട്ടി കടയിൽ നിന്നും വീട്ടിലേക്ക് മടങ്ങുകയാണ്. ഒരു ചെറിയ കുപ്പി കാല് കൊണ്ട് തട്ടി രസിച്ച് ഉല്ലസിച്ചാണ് വീട്ടിലേക്ക് വരുന്നത്, ചുറ്റുപാടുകൾ ഒന്നും അങ്ങട്ട് ശ്രദ്ധിക്കുന്നില്ല. അങ്ങനെ നടന്ന് കൊണ്ട് ഒരുപാട് ദൂരം മുന്നിലേക്ക് എത്തിയപ്പോഴാണ് അവൻ ഒരു കാര്യം ശ്രദ്ധിച്ചത്.

🔸വീട്ടിലേക്ക് എത്തണമെങ്കിൽ ഒരു ഇടവഴി കടന്ന് പോവണം, ആ ഇടവഴി അല്ലാതെ മറ്റ്‌ വഴികൾ ഒന്നും വീട്ടിലേക്കില്ല. പ്രശനം എന്താണെന്ന് വെച്ചാൽ ഇടവഴിയുടെ ഒത്ത നടുക്ക് ദാണ്ടെ ഇരിക്കുന്നു ഒരു പട്ടി. അതാണെങ്കിൽ നീ ഇത് വഴി പോണത് എനിക്കൊന്ന് കാണണം എന്ന മട്ടിൽ കലിപ്പും. ഇങ്ങനെ ആകെ വല്ലാത്തൊരു അവസ്ഥയിലാണ് നമ്മടെ കഥാപാത്രം, തുടർന്ന് അരങ്ങേറുന്ന സംഭവങ്ങളാണ് ചിത്രത്തിന്റെ പ്രമേയം. ആർക്കും ഏത് രീതിയിലും വ്യാഖ്യാനിക്കാൻ കഴിയുന്ന ഒരുപാട് മാനങ്ങൾ ഉള്ള ഒന്നായാണ് ഈ കഥ എന്ന് വേണമെങ്കിൽ പറയാം.

🔸പിൽക്കാലത്ത് ഇറങ്ങിയ ചിത്രങ്ങൾ പോലെ അത്ര ലക്ഷുറിയസ് ആയ ഒന്നല്ല അബ്ബാസ് കിയാറോസ്തമിയുടെ ഈ ചിത്രം, എന്തിരുന്നാലും ലഭ്യമായ റിസോഴ്സസും മറ്റും വെച്ച് നല്ല രീതിയിൽ തന്നെ പൂർത്തിയാക്കിയിട്ടുമുണ്ട് ഈ ചിത്രം. പത്ത് മിനിറ്റ് സമയത്തിൽ വെടിപ്പായി നല്ലൊരു കഥ പറയുന്നു എന്നത് തന്നെ വലിയൊരു, പ്രശംസ അർഹിക്കുന്ന കാര്യമാണ്. കിയാറോസ്തമിയുടെ ചിത്രങ്ങൾ കാണുന്ന കൂട്ടത്തിൽ ഇതും ഒന്ന് കാണാൻ ശ്രമിക്കുക, പത്ത് മിനിറ്റ് മാത്രമേയുള്ളൂ, നല്ലൊരു അറ്റെംപ്റ്റുമാണ്.

Verdict : Good

DC Rating : 75/100

597. Crawl (2019)

Director : Alexander Aja

Genre : Horror

Rating : 6.6/10

Country : USA

Duration : 87 Minutes

🔸ഈ സർവൈവൽ കം ഡിസാസ്റ്റർ ഹൊറർ ചിത്രങ്ങളോട് വലിയ താല്പര്യം പണ്ട് തൊട്ടേ ഇല്ല, അതിൽ തന്നെ ഈ മൃഗങ്ങൾ പ്രധാന കഥാപാത്രമാവുന്ന ചിത്രങ്ങളോട് ഒട്ടും താല്പര്യമില്ല. ഈ ഒരു കാരണം കൊണ്ട് തന്നെ പൊതുവെ ഒഴിവാക്കിയ ചിത്രങ്ങളാണ് ഈ ജോസ്, അനക്കോണ്ട, പിരാനഹാ എന്നിങ്ങനെ ഉള്ള ചിത്രങ്ങൾ. ഈ ഒരു വിഭാഗത്തിൽ പെടുത്താവുന്ന ഒന്നാണ് ക്രോൾ എന്ന ചിത്രവും, അപ്രതീക്ഷിതമായി കണ്ട ഈ ചിത്രത്തിൽ പ്രധാന താരങ്ങൾ ഒരു പറ്റം മുതലകളാണ്. ഇവറ്റകളുടെ ചെറിയ ചില കളി തമാശകൾ, കുസൃതികൾ, അത് പോലുള്ള കുൽസിത പരിപാടികളാണ് ചിത്രത്തിന്റെ പ്രധാന വിഷയം.

🔸ആദ്യം തൊട്ട് അവസാനം വരെ നല്ല രീതിയിൽ ത്രിൽ അടിപ്പിക്കുന്ന, ഒരേ സമയം ഞെട്ടിക്കുകയും പേടിപ്പിക്കുകയും ടെൻഷൻ അടിപ്പിക്കുകയും ചെയ്യുന്ന ഒരു ചിത്രമാണ് ക്രോൾ, ആ രീതിയിൽ ഉള്ള ചിത്രങ്ങൾ ഇഷ്ടപ്പെടുന്നവരാണ് നിങ്ങൾ എങ്കിൽ ധൈര്യമായി കാണാം ഈ ചിത്രം. നമ്മുടെ പൈറേറ്റ്സ് ഓഫ് ദി കരീബിയൻ അവസാന ഭാഗത്തെ നായികയായ കായ സ്കോട്‌ലറിയോ ആണ് ഈ ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നത്. ഏറെക്കുറെ പൂർണമായും ഫോക്കസ് ഈ കഥാപാത്രത്തിൽ ആയിരുന്നു എന്നും, അവർ ഒട്ടും മോശമാക്കിയില്ല എന്നും ഇതോടൊപ്പം ചേർത്ത് വായിക്കാം.

🔸ഫ്ലോറിഡാ നഗരത്തിൽ ആണ് ചിത്രത്തിന്റെ കഥ അരങ്ങേറുന്നത്, നഗരത്തിൽ ഒരുനാൾ പൊടുന്നെന്നെ ഒരു ചുഴലിക്കാറ്റ് പ്രത്യക്ഷപ്പെടുകയാണ്, അതും കാറ്റഗറി ഫൈവ് ലെവൽ ചുഴലിക്കാറ്റ്. വൻ നാശനഷ്ടങ്ങളും ആളപായവും എല്ലാം സാധ്യം ആയതിനാൽ ആളുകളോടെല്ലാം ഒഴിഞ്ഞ് പോവാൻ ആവശ്യപ്പെട്ടിരിക്കുകയാണ്. ഈ ഒരു അവസരത്തിലാണ് നായികാ കഥാപാത്രമായ ബെത് തന്റെ അച്ഛനെ അന്വേഷിച്ച് അവിടെ എത്തുന്നത്. മുന്നറിയിപ്പ് വന്നതിന് ശേഷം അയാളെ കുറിച്ച് ഒരു വിവരവും ഉണ്ടായിരുന്നില്ല. അയാളെ കുറിച്ചുള്ള അന്വേഷണം ബെത്തിനെ തടാക കരയിലുള്ള തന്റെ കുടുംബ വീട്ടിലേക്ക് എത്തിക്കുകയാണ്.

🔸ഏറെക്കുറെ വെള്ളത്തിൽ മുങ്ങി തുടങ്ങിയ വീട്ടിൽ ബെത്തിന് തന്റെ അച്ഛനെ കണ്ടെത്താൻ കഴിഞ്ഞെങ്കിലും അവിടെ മറ്റ് ചില ക്ഷണിക്കപ്പെടാത്ത അതിഥികളെ കൂടി നേരിടേണ്ടി വരികയാണ്. ഈ അതിഥികൾ അത്ര ചില്ലറക്കാരല്ല, നല്ല തണ്ടും താടിയും ആകാരവും എല്ലാമുള്ള ഒത്ത കുറച്ച് മുതലകൾ. ഇവിടെ നിന്നും പിന്നീട് അങ്ങോട്ടുള്ള ഒന്നര മണിക്കൂർ ഒരു സർവൈവൽ ത്രില്ലർ ചിത്രം പിറവി കൊള്ളുകയായി. ഗോറും വയലൻസും സസ്‌പെൻസും എല്ലാം അത്യാവശ്യം നല്ല തോതിൽ തന്നെ ചിത്രത്തിൽ ഉണ്ട് എന്നത് പറയേണ്ടി ഇരിക്കുന്നു.

🔸വലിയ വലിച്ച് നീട്ടലുകൾ ഒന്നുമില്ല, സ്ട്രെയിറ്റ് ആയിട്ട് കാര്യത്തിലേക്ക് വരുന്നുണ്ട് ചിത്രം. അത് കൊണ്ട് തന്നെ ഒന്നര മണിക്കൂർ ദൈർഖ്യമുള്ള ചിത്രത്തിൽ ഒരിടത്ത് പോലും ബോർ അടിക്കുന്നില്ല, നടക്കുന്ന അല്ലെങ്കിൽ നടക്കേണ്ട കാര്യങ്ങൾ എല്ലാം നല്ല വെടിയും തീയും പോലെ നടക്കുന്നുണ്ട്. കഥ പോലെ ഉള്ള കാര്യങ്ങൾ ഇത് പോലുള്ള ചിത്രത്തിൽ തപ്പുന്നത് ന്യായമല്ല, അത് കൊണ്ട് ആ ഭാഗത്തേക്ക് കൂടുതൽ ശ്രദ്ധ കൊടുക്കേണ്ട. നല്ല ട്രീറ്റ്‌മെന്റ്, പ്രകടനങ്ങൾ, ജംബ് സ്‌കെയറുകൾ, തുടങ്ങി മിക്ക കോലങ്ങളും ടിക്ക് ചെയ്ത് വിടുമ്പോഴും ക്ലൈമാക്സ് എന്തോ ഒരു തൃപ്തി തന്നില്ല എന്ന് പറയേണ്ടി ഇരിക്കുന്നു, ചിലപ്പോൾ എനിക്ക് മാത്രം തോന്നിയതും എന്റെ മാത്രം പ്രശ്നവും ആവും. ആകെ മൊത്തം ഒരു തവണ കാണാനുള്ള ഐറ്റം ഉണ്ട് ഈ ചിത്രം.

Verdict : Watchable

DC Rating : 65/100

596. Angel Has Fallen (2019)

Director : Ric Roman Waugh

Genre : Action

Rating : 6.8/10

Country : USA

Duration : 121 Minutes

🔸ട്രോപിക് തണ്ടർ എന്ന സിനിമയിൽ ഒരു സീൻ ഉണ്ട്, ഭൂമിയുടെ കറക്കവും അത് പോലെ ഗ്ലോബൽ വാമിംഗും എല്ലാം കാരണം ആവാസ വ്യവസ്ഥ തകിടം മറിഞ്ഞ ഭൂമിയെ രക്ഷിക്കാൻ വേണ്ടി ഒറ്റയാൾ പട്ടാളമായ നായകൻ കടന്ന് വരുന്നത്. ഇത് പിന്നെയും ആവർത്തിച്ചപ്പോ വീണ്ടും പുള്ളി മടങ്ങി വന്നു, മൂന്നാമതും നാലാമതും അഞ്ചാമതും പുള്ളി തന്നെ വേണ്ടിവന്നു, ഒടുവിൽ ആറാമതും. എയ്ഞ്ചൽ ഹാസ് ഫോളൻ എന്ന ചിത്രം കാണുമ്പോ പല കാരണം കൊണ്ടും ഓർമ്മ വന്നത് ആ രംഗമാണ്, പിന്നെ ഫ്രീ ടിക്കെറ്റ് ആയത് കൊണ്ട് പരാതിയും ഉണ്ടായില്ല. ഒളിമ്പസ് ഹാസ് ഫോളൻ, ലണ്ടൻ ഹാസ് ഫോളൻ എന്നീ ചിത്രങ്ങൾക്ക് ശേഷം സീരീസിലെ മൂന്നാമത്തെ ചിത്രമാണ് എയ്ഞ്ചൽ ഹാസ് ഫോളൻ.

🔸തൊണ്ണൂറുകളിലെ വൺ മാൻ ആർമി സ്റ്റൈൽ കോപ്പ് ചിത്രങ്ങളുടെ ഒരു റിപ് ഓഫ് ആയിരുന്നു ഒരു പരിധി വരെ ആദ്യ ചിത്രം. ആ ഒരു തീം കടമെടുത്തതായി തോന്നിയെങ്കിലും അത്യാവശ്യം എന്റർടൈനിംഗ് ആയി പോയ ചിത്രത്തിന്റെ മർമത്തിനിട്ടുള്ള അടി ആയിരുന്നു രണ്ടാമത്തെ രണ്ടാമത്തെ ചിത്രമായ ലണ്ടൻ ഹാസ് ഫോളൻ. ആദ്യ ഭാഗം ആസ്വാദ്യകരമാക്കിയ ഒരു വസ്തുതയും ഈ ഭാഗത്ത് കാണാൻ കഴിഞ്ഞില്ല എന്ന് മാത്രമല്ല ബോറിങ്ങും ആയിരുന്നു. ഈ കാരണങ്ങൾ കൊണ്ട് തന്നെ പ്രതീക്ഷ എന്നത് ലവലേശം ഉണ്ടായിരുന്നില്ല മൂന്നാമത്തെ ചിത്രത്തിൽ, കാണണം എന്ന് പോലും കരുതിയതുമല്ല. രണ്ടാം ഭാഗത്തേക്കാൾ ഭേദമാണ് ഇത് എന്ന് പറയാം, അത്ര മാത്രം.

🔸സീരീസിലെ മുൻ ചിത്രങ്ങൾ പോലെ തന്നെ പ്രസിഡന്റിന് നേരെ അരങ്ങേറുന്ന വധ ശ്രമവും അതിനെ തുടർന്ന് അരങ്ങേറുന്ന അന്വേഷണവും കൊലയാളിയെ കണ്ടെത്തി ഇല്ലായ്മ ചെയ്യാനുള്ള നായകന്റെ ശ്രമങ്ങളും എല്ലാമാണ് ഇവിടത്തെ തീം, ആ പിന്നെ ഒരു വറൈറ്റിക്ക് ഇവിടെ എല്ലാവരും കൊലയാളി ആയി തെറ്റിദ്ധരിക്കുന്നത് നമ്മടെ നായകനെ തന്നെയാണ്, ആ മുൻപ് രണ്ട് തവണ പ്രസിഡന്റിനെ മരണത്തിന്ന് രക്ഷിച്ച ഗഡിയെ തന്നെ, ഇത് പോലൊരു നന്ദിയില്ലാത്ത വർഗം, ത്ഫൂ. ഇനി നല്ലതും മോശവുമായി തോന്നിയ കാര്യങ്ങളിലേക്ക് കടക്കുക ആണെങ്കിൽ ആദ്യം തന്നെ കഥയെ പറ്റി പറയാം, അല്ലെങ്കി വേണ്ട പറയാൻ മാത്രം ഒന്നുമില്ല, ഒരു രണ്ട് വരിയിൽ പറയാൻ ഉള്ളതേ ഉള്ളൂ.

🔸നല്ലൊരു കാസ്റ്റ് ഉണ്ട് ചിത്രത്തിൽ, ഇവർക്ക് ചെയ്യാൻ കാര്യമായി ഒന്നുമില്ല താനും. ആദ്യാവസാനം പ്രെഡിക്ട് ചെയ്യാൻ പറ്റുന്നതാണ് ചിത്രത്തിന്റെ പ്ലോട്ട്. കഥ എഴുതിയ ആൾ അധികം സിനിമകൾ കണ്ടിട്ടില്ല എന്ന് തോന്നുന്നു, കാരണം വേറൊന്നുമല്ല വില്ലൻ ആരാണ് എന്നൊക്കെ ഒരു മൈൽ മുന്നേ കാഴ്ചക്കാരന് മനസിലാവും, പഴയ പല പടങ്ങളും ഉപയോഗിച്ചിട്ടുള്ള ടാക്റ്റിക്സ് ആണ് ഇവിടെയും ഉള്ളത് എന്നത് കൊണ്ട്. പിന്നെ അത്യാവശ്യം നല്ല ദൈർഖ്യവും ഉണ്ട് എന്നതും ഒരു പോരായ്മയായി തോന്നി. ഇനി നല്ല കാര്യങ്ങളിലേക്ക് കടക്കുക ആണെങ്കിൽ, ഡാനി ഹൂസ്റ്റൺ, നിക്ക് നോൾട് എന്നിവർ അത്യാവശ്യം നന്നായി തന്നെ തങ്ങളുടെ വേഷങ്ങൾ ചെയ്ത് ഫലിപ്പിച്ചിട്ടുണ്ട്.

🔸ആക്ഷൻ സീക്വൻസുകളുടെ കാര്യത്തിൽ ചിത്രം നിരാശപ്പെടുത്തുന്നില്ല എന്നത് ആശ്വാസകരം തന്നെ. നല്ല സൗണ്ട്ട്രാക്കും മറ്റൊരു പ്രത്യേകത ആണ്, നായകന്റെ ഭാര്യയെയും കുഞ്ഞിനേയും കാണിച്ചപ്പോൾ ഒരു തട്ടിക്കൊണ്ടുപോകൽ സബ്പ്ലോട്ട് പ്രതീക്ഷിച്ചിരുന്നു, അതില്ലാത്തതിൽ സന്തോഷം. ആകെ മൊത്തം പറയുക ആണെങ്കിൽ വലിയ കാര്യം ഒന്നുമില്ലാത്ത, ആവശ്യത്തിൽ അധികം സമയം ഉണ്ടെങ്കിൽ നോക്കാവുന്ന ഒരു ചിത്രം. ആക്ഷൻ ചിത്രങ്ങളോട് നല്ല താല്പര്യം ഉള്ള കാഴ്ചക്കാർക്ക് നോക്കാം, വലിയ പ്രതീക്ഷ ഒന്നും വേണ്ട.

Verdict : Avoidable

DC Rating : 45/100

595. And Then There Were None (2015)

Director : Craig Viveiros

Genre : Mystery

Rating : 8/10

Seasons : 1

Episodes : 03

Country : UK

Duration : 58 - 60 Minutes

🔸അഗതാ ക്രിസ്റ്റിയുടെ നോവലാണ് ആധാരം, ചാൾസ് ഡാൻസ് സാം നീൽ തുടങ്ങി പ്രതിഭാ ധനരായ ഒരുപിടി നടീ നടന്മാരുടെ സാന്നിധ്യം, നല്ല എൻഗെയ്‌ജിങ്‌ ആയ ഒരു എഡ്ജ് ഓഫ് ദി സീറ്റ് മിസ്റ്ററി സ്റ്റോറിലൈൻ, ഈ ലിമിറ്റഡ് ടീവി സീരീസ് കാണുന്നതിന് മുൻപേ തരാൻ കഴിയുന്ന ഗ്യാരന്റികൾ ഇവയൊക്കെ ആണ്. പിന്നെ മറ്റൊരു പ്രധാനപ്പെട്ട കാര്യം എന്താണെന്നാൽ ആകെ മൂന്ന് എപ്പിസോഡുകൾ മാത്രമേ ഉള്ളൂ, അവയെല്ലാം കൂടി ഉദ്ദേശം മൂന്ന് മണിക്കൂർ പരിധിയിൽ ദൈർഖ്യവും, ഈ കാരണം കൊണ്ട് തന്നെ ഒരു ചിത്രം കാണുന്ന ലാഘവത്തിൽ കണ്ട് വിടാം ഈ സീരീസ്, ഒട്ട് മടുപ്പിക്കുന്നുമില്ല.

🔸കഴിഞ്ഞ നൂറ്റാണ്ടിന്റെ മധ്യകാലത്താണ് സീരീസിന്റെ കഥ ആരംഭിക്കുന്നത്. വ്യത്യസ്ത സാമ്പത്തിക, സാംസ്‌കാരിക മേഖലകളിൽ ഉള്ള എട്ട് പേർ ഒരുനാൾ ഒത്ത് കൂടുകയാണ്. ഈ ഒത്തുചേരൽ അവിചാരിതമായ ഒരു സംഭവമല്ല, മറിച്ച് ഇവരെല്ലാം തന്നെ മിസ്റ്റർ ആൻഡ് മിസിസ് ഓവൻ എന്ന ദമ്പതിമാരുടെ ക്ഷണിക്കപ്പെട്ട അതിഥികളാണ്. ഇനി കൗതുകകരമായ കാര്യം എന്താണെന്നാൽ ഇവരിലാർക്കും പരസ്പരം ഒരു പരിചയവുമില്ല, എന്ന് മാത്രമല്ല തങ്ങളെ ഇങ്ങോട്ടേക്ക് ക്ഷണിച്ച ഓവൻ ദമ്പതിമാരെ ഇവരാരും ഇന്നുവരെ കണ്ടിട്ടുമില്ല, ചുരുക്കി പറഞ്ഞാൽ എന്താണ് സംഭവം എന്ന് ഇവർക്കാർക്കും ഒരു പിടിയുമില്ല എന്നതാണ് സത്യം.

🔸അങ്ങനെ മുൻ നിശ്ചയ പ്രകാരം ഈ കഥാപാത്രങ്ങൾ എല്ലാം തന്നെ ഓവൻ ദമ്പതിമാർ താമസിക്കുന്ന ഒറ്റപ്പെട്ട ദ്വീപിലേക്ക് യാത്ര ആരംഭിക്കുകയും, അവിടേക്കുള്ള ബോട്ട് യാത്ര തിരിക്കുന്ന കടവിലേക്ക് ഒരുമിച്ച് എത്തുകയുമാണ്. തന്നോടൊപ്പം അവിടെ എത്തിച്ചേർന്ന മറ്റ് ഏഴ് കഥാപാത്രങ്ങളെയും ഒരല്പം സംശയത്തോടെയാണ് എല്ലാവരും നോക്കി കാണുന്നത്. ഒരല്പം പരുക്കനായ ബോട്ടുകാരനോടൊപ്പം ഇവരെല്ലാം തന്നെ യാത്ര ആരംഭിക്കുകയാണ്. ഈ എട്ട് കഥാപാത്രങ്ങളിലും ഒരു ജഡ്ജി, ഒരു പട്ടാളക്കാരൻ, ഒരു കെയർടേക്കർ തുടങ്ങി നാനാജാതി വ്യക്തികളും ഉണ്ട്, അവർക്കെല്ലാം വ്യത്യസ്ത ശൈലികളും പെരുമാറ്റ രീതികളും ഉണ്ട് താനും.

🔸ഒരു സഹായിയും, പാചകക്കാരിയും ആണ് ഈ എട്ട് കഥാപാത്രങ്ങളെയും ദ്വീപിൽ സ്വീകരിക്കുന്നത്, ഇവരല്ലാതെ തങ്ങളെ അവിടേക്ക് ക്ഷണിച്ച ഓവൻ ദമ്പതിമാരുടെ ഒരു സൂചന പോലും എട്ട് പ്രധാന കഥാപാത്രങ്ങൾക്ക് അവിടെ നിന്നും കിട്ടുന്നില്ല. അവരെ കുറിച്ചുള്ള ചോദ്യങ്ങൾക്കെല്ലാം മറുപടി ഉടനെ തന്നെ ഓവൻ കുടുംബം തങ്ങളോടൊപ്പം ചേരുന്നതായിരിക്കും എന്ന നിർവികാരമായ മറുപടി മാത്രം. തങ്ങൾ എത്തിപ്പെട്ടത് എവിടെ ആണെന്ന് വലിയ പിടിയില്ല, തങ്ങളെ ഇങ്ങോട്ടേക്ക് ക്ഷണിച്ചത് ആരാണെന്ന് അറിയില്ല, ഇനി എന്ത് എന്ന ചോദ്യത്തിനും അറിവില്ല, ഇനി ഇതൊക്കെ ആരുടെയോ വെറുമൊരു തമാശയാണോ അതോ അപകടകരമായ കാരണങ്ങൾ എന്തെങ്കിലും ഉണ്ടോയെന്നും അറിവില്ല. ചുരുക്കി പറയുക ആണെങ്കിൽ ആകെയൊരു പുകമറയാണ് എല്ലായിടത്തും.

🔸ഇവിടെ നിന്നുമാണ് ആൻഡ് ദെൻ ദെയർ വേർ നൻ എന്ന സീരീസ് ആരംഭിക്കുന്നത്, ചറപറാ ട്വിസ്റ്റുകൾ വന്ന് പോവുന്നുണ്ട്, ഒരുവേള സ്‌ക്രീനിൽ ഉള്ള ഓരോ കഥാപാത്രത്തെയും നമ്മളെക്കൊണ്ട് സംശയിപ്പിക്കുന്ന വിധമാണ് കഥ പുരോഗമിക്കുന്നത്, എല്ലാത്തിനും ഒടുവിൽ നല്ലൊരു അവസാനവും കഥ തരുന്നുണ്ട്, പൂർണമായും തൃപ്തി നൽകുന്നത് എന്നൊക്കെ വിശേഷിപ്പിക്കാവുന്ന ഒരു എൻഡിങ്. കൂടുതൽ പറഞ്ഞ് സ്പോയിൽ ചെയ്യുന്നില്ല, കാണാൻ ശ്രമിക്കുക പ്രത്യേകിച്ചും ത്രില്ലെർ മിസ്റ്ററി വിഭാഗം ഇഷ്ടപ്പെടുന്നവർ, നഷ്ടമാവില്ല എന്നുറപ്പ് നൽകുന്നു.

Verdict : Very Good

DC Rating : 85/100

594. Scary Stories To Tell In The Dark (2019)

Director : Andre Ovredal

Genre : Horror

Rating : 6.5/10

Country : USA

Duration : 110 Minutes

🔸ഈ ഒഴിവ് വേളകളും, വിശേഷ ദിവസങ്ങളും എല്ലാം ആഘോഷിക്കാൻ വിദേശ രാജ്യങ്ങളിലെ പ്രത്യേകിച്ച് അമേരിക്കയിലെ കുട്ടികൾ എന്തിനാണ് പ്രേത ബാധയുള്ള, അല്ലെങ്കിൽ അങ്ങിനെ പറഞ്ഞ് കേട്ട സ്ഥലങ്ങളും മറ്റും തിരഞ്ഞെടുക്കുന്നത് എന്നത് കാലങ്ങളായി ഉള്ള സംശയമാണ്. ഇനി അതും പോരെങ്കിൽ ഇത് പോലത്തെ സ്ഥലത്ത് നട്ട പാതിരായ്ക്ക് പോയി ഇരുട്ടിൽ മുറിയായ മുറി മുഴുവൻ തിരഞ്ഞ് മനസമാധാനത്തോടെ കുടി കൊള്ളുന്ന പ്രേതത്തെ അങ്ങട്ട് പോയി ചൊറിഞ്ഞ് എന്നെ കൊല്ലു എന്ന് പറയാനുള്ള ആ ധൈര്യം, സമ്മതിക്കണം. ഞാനെങ്ങാനും ആയിരുന്നു ഈ അവസ്ഥയിൽ എങ്കിൽ നിന്ന നിപ്പിൽ ചത്തേനെ.

🔸മുകളിൽ സൂചിപ്പിച്ചത് പോലെയാണ് സ്‌കാരി സ്റ്റോറീസ് റ്റു ടെൽ ഇൻ ദി ഡാർക്ക് എന്ന ചിത്രം ആരംഭിക്കുന്നത്, ഈ പ്ലോട്ട് സിനിമ ഉണ്ടായ കാലം തൊട്ടേ ഉള്ളതിനാലും ഇടക്കാലത്ത് ഇത് പോലെയുള്ള രണ്ടെണ്ണം കണ്ടതിനാലും, ഒരാവശ്യവും ഇല്ലെന്ന് തോന്നിയ രണ്ട് ജംബ് സ്‌കെയറുകൾ ആദ്യമേ വന്ന് പോയതിനാലും മറ്റൊരു ക്ളീഷേ അടപടല ഐറ്റം എന്ന് ചിന്തിച്ച് പോയിരുന്നു ഒരു വേള. എന്നാൽ ഇതിൽ നിന്നും ചിത്രം വ്യതിചലിക്കുന്നുണ്ട് എന്നത് വലിയ കാര്യം തന്നെ. കഥയുടെ കാര്യം ആദ്യമേ പറയാം, നമ്മൾ പ്രതീക്ഷിക്കുന്നത് പോലെയാണ് അത് പോവുന്നത്, എന്നാൽ വലിയ ബോറടി ഒട്ട് ഇല്ല താനും.

🔸ഉദ്ദേശം ഒരു അൻപത് വർഷം മുൻപാണ് ചിത്രത്തിന്റെ കഥ നടക്കുന്നത്, ഒരു ഹാലോവീൻ ദിവസം. ഭൂത പ്രേത പിശാചുക്കൾ എന്നിവയ്‌ക്കെല്ലാം വലിയ പ്രാധാന്യം ഉള്ള ഈ ദിവസം ചെറുതായി ഒന്നാഘോഷിക്കാൻ മൂന്ന് നാല് സുഹൃത്തുക്കൾ ഇറങ്ങി തിരിക്കുകയാണ്. വഴി മദ്ധ്യേ തങ്ങളുമായി അത്ര യോജിച്ച് പോവാത്ത മറ്റൊരു ഗ്യാങ്ങുമായി ഉടക്കുന്ന ഇവർ അഭയം തേടുന്നത് ഒരാളോഴിഞ്ഞ വീട്ടിലാണ്, വെട്ടമോ വെളിച്ചമോ ആളുകളോ ഒന്നും ആ പരിസരത്ത് എങ്ങുമില്ല, എല്ലാം കൊണ്ടും മനോഹരമായ ഒരു ഹൊറർ പശ്ചാത്തലം. ഇവിടെ പിന്നീട് സംഭവിക്കുന്ന കാര്യങ്ങളാണ് രണ്ട് മണിക്കൂറിൽ താഴെ ദൈർഖ്യമുള്ള ഈ ചിത്രം പറയുന്നത്.

🔸ഇനി ചെറുതായി ഒരു ഫ്ലാഷ് ബാക്ക് ആവാം, ആ വീടിന്റെ കാര്യം കൂടി നമ്മൾ അറിയണമല്ലോ, വെറുതെ ഒരു പ്രേതപ്പുര എന്ന് പറഞ്ഞാൽ അതിലൊരു ത്രില്ലില്ല. പത്തൊൻപതാം നൂറ്റാണ്ടിന്റെ അവസാനം അവിടെയൊരു കുടുംബം ജീവിച്ചിരുന്നു. ആദ്യമായി നഗരത്തിൽ പേപ്പർ മിൽ തുടങ്ങിയ അവരാണ് ഒരു പരിധി വരെ ആ നഗരം സൃഷ്ട്ടിച്ചത് എന്ന് വരെ പറയാം. ഈ കുടുംബത്തിൽ ഒരു ചൈൽഡ് മർഡറർ ഉണ്ടായിരുന്നു എന്ന് പറയപ്പെടുന്നു, അതും പോരെങ്കിൽ ഒരുപാട് മിസ്റ്ററി ബാക്കി വെക്കുന്ന, ചോദ്യങ്ങൾ അവശേഷിപ്പിച്ച മറ്റൊരു കഥാപാത്രവും. യാഥാർഥ്യത്തിൽ എന്താണ് അവിടെ സംഭവിച്ചത് എന്നൊന്നും ആർക്കും പിടിയില്ല.

🔸ഇതൊക്കെ എന്ത് തന്നെ ആയാലും നമ്മുടെ നാല് കഥാപാത്രങ്ങളും ആ വീടിനുള്ളിൽ ട്രാപ് ആവുകയാണ്. അവിടെ ബേസ്‌മെന്റിലുള്ള മുറിയിൽ ഈ കഥാപാത്രങ്ങൾ ചില വസ്തുക്കൾ കണ്ടെടുക്കുന്നിടത്ത് (കരണം മുറിയെ നാലെണ്ണം കിട്ടാത്തതിന്റെ കഴപ്പ്) ചിത്രം വഴി മാറി ഒഴുകുന്നു. ചില മോൺസ്റ്റർ കഥാപാത്രങ്ങളും ജീവികളും വന്ന് പോവുന്നുണ്ട്, അതൊക്കെ സർപ്രൈസ് ആയി നിൽക്കട്ടെ. ഇനി ആകെ മൊത്തം നോക്കി ഒരു തീരുമാനം പറയുക ആണെങ്കിൽ കൊഴപ്പമില്ല എന്ന് പറയാം. ഒരു വെറൈറ്റി ഒക്കെ ഉണ്ട്, എന്നാൽ അങ്ങട്ട് എത്തിയതുമില്ല (പഴയ ഇല്ലത്ത് നിന്ന് ഇറങ്ങുകയും ചെയ്തു, അമ്മാത്ത് എത്തിയതുമില്ല എന്ന ലൈൻ). കാണുന്നത് കൊണ്ട് വലിയ നഷ്ടം ഒന്നുമില്ല, എന്നാലും പ്രതീക്ഷ ഒട്ട് വേണ്ട.

Verdict : Watchable

DC Rating : 60/100

593. Kwaidan (1964)

Director : Masaki Kobayashi

Genre : Horror

Rating : 8/10

Country : Japan

Duration : 183 Minutes

🔸ഈ ജാപ്പനീസ് ഹൊറർ ചിത്രങ്ങൾക്ക് ഒരു പ്രത്യേക ഭംഗിയുണ്ട്, വാക്കുകളാൽ വിശേഷിപ്പിക്കാൻ കഴിയാത്ത വിധം ഈ ചിത്രങ്ങൾ കണ്ട് കഴിഞ്ഞാലും കാഴ്ചക്കാരനെ വേട്ടയാടിക്കൊണ്ടേ ഇരിക്കും. കുറോൺകോ, ഒനിബാബ പോലെയുള്ള പഴയകാല ചിത്രങ്ങൾ ഈ വിഭാഗത്തിൽ ചേർക്കാവുന്നതാണ്, ക്വെയ്ദാൻ ഈ സ്രെണിയിൽ ഉൾപ്പെടുത്താൻ കഴിയുന്ന മറ്റൊരു ചിത്രമാണ്. നാല് കഥകളാണ് ചിത്രത്തിൽ ഉള്ളത്, ഇവയെല്ലാം കൂട്ടിച്ചേർത്ത് ആന്തോളജി രൂപത്തിലാണ് ചിത്രമുള്ളത്. ഈ രണ്ട് കാരണങ്ങൾ തന്നെയാണ് ചിത്രം കാണാൻ ഏറ്റവും പ്രേരിപ്പിച്ച ഘടകങ്ങളും, പിന്നെ ഹ്യുമൺ കണ്ടീഷൻ എന്ന സീരീസിന്റെ അമരക്കാരനായ മസാകി കൊബായാഷിയുടെ പേരും.

🔸നാല് കഥകളിൽ ആദ്യത്തേതാണ് ബ്ലാക്ക് ഹെയർ, ഒരു സമുറായിയുടെയും അയാളുടെ ഭാര്യയുടെയും കഥയാണ് ഈ ഭാഗം പറയുന്നത്. ഇരുവരുടെയും അവസ്ഥ ഇപ്പോൾ കുറച്ച് മോശമാണ്, കൊടിയ ദാരിദ്ര്യമാണ് എങ്ങും. കഠിനാധ്വാനം ചെയ്ത് ഈ കാലഘട്ടം അതിജീവിക്കാം എന്ന് ഭാര്യ കരുതുന്നുണ്ടെങ്കിലും സമുറായി മറ്റൊരു വഴിയാണ് കണ്ടെത്തുന്നത്. അയാൾ സ്വന്തം ഭാര്യയെ ഉപേക്ഷിച്ച് സാമ്പത്തികമായി മുന്നിൽ നിൽക്കുന്ന മറ്റൊരു സ്ത്രീയുടെ പിറകെ പോവുകയാണ്, ഭാര്യയുടെ കരച്ചിലും നിലവിളിയും ഒന്നും അയാളുടെ ചെവിയിൽ പതിഞ്ഞതെ ഇല്ല, ഇവിടെ നിന്നുമാണ് ബ്ലാക്ക് ഹെയർ ആരംഭിക്കുന്നത്.

🔸രണ്ടാമത്തെ കഥയായ വുമൺ ഓഫ് ദി സ്നോ പേര് പോലെ തന്നെ മഞ്ഞിന്റെ മറവിൽ ജീവിക്കുന്ന ഒരു യക്ഷിയുടെ കഥയാണ്. മരം വെട്ടുകാരായ മിനോക്കിച്ചിയും മൂസാക്കുവും ജോലി ചെയ്യാനായി തിരഞ്ഞെടുത്ത സമയവും സ്ഥലവും ഇച്ചിരി പ്രശനം നിറഞ്ഞതായിരുന്നു, മഞ്ഞിലും കാറ്റിലും പെട്ട് ദിക്കോ ദിശയോ അറിയാതെ രണ്ട് കഥാപാത്രങ്ങളും നന്നായി ബുദ്ധിമുട്ടുകയാണ്. ഒടുവിൽ ഒരുപാട് സമയത്തെ അധ്വാനത്തിന് ശേഷം ഒരു ഓലപ്പുരയിൽ അഭയം കണ്ടെത്തുന്ന ഇരുവരും അവിടെ വെച്ച് ഒരു യക്ഷിയെ കണ്ട് മുട്ടുകയാണ്. തുടർന്ന് അരങ്ങേറുന്ന സംഭവങ്ങളാണ് ഈ ഭാഗം പറയുന്ന കഥ.

🔸മൂന്നാമത്തെ ഭാഗം അന്ധനായ ഒരു ഗായകന്റേത് ആണ്, ഹോയിച്ചിയുടെ കഥ. രാജ്യത്തിന്റെ ചരിത്രത്തിലെ തന്നെ ജ്വലിക്കുന്ന ഏടുകളിൽ ഒന്നായ ഹെയ്ക്ക് യുദ്ധത്തെ വർണിച്ച് കൊണ്ടുള്ള ഹോയിച്ചിയുടെ പാട്ടിന് ആരാധകർ ഏറെയാണ്, നാനാ ദിക്കിൽ നിന്നുമുള്ള ആളുകൾ അത് കേൾക്കാനായി വരാറുണ്ട്. ഇങ്ങനെയൊക്കെ ആണ് കാര്യം എങ്കിലും ഹോയിച്ചിയുടെ കാര്യത്തിൽ ഒരു ചെറിയ പ്രശ്നമുണ്ട്, രാത്രി ആയി കഴിഞ്ഞാൽ പുള്ളിയെ പിന്നെ കാണാൻ കിട്ടില്ല. എവിടെ പോകുന്നെന്നോ, എന്ത് ചെയ്യുന്നെന്നോ അടുത്ത സുഹൃത്തുക്കൾക്ക് പോലും പിടിയില്ല എന്നതാണ് സത്യം. അതെന്തായാലും നിജസ്ഥിതി അറിയാനായി സുഹൃത്തുക്കളിൽ ഒരാൾ ഹോയിച്ചിയെ നിരീക്ഷിക്കാൻ തയ്യാറാവുകയാണ്, ഇവിടെ നിന്നും മൂന്നാം ഭാഗം പുരോഗമിക്കുകയാണ്.

🔸മൂന്ന് ഭാഗങ്ങളെ പറ്റിയും ചെറുതായി ഒന്ന് പറഞ്ഞ് വിട്ട സ്ഥിതിക്ക് നാലാം ഭാഗത്തേക്ക് കടക്കുന്നില്ല, അത് കണ്ട് തന്നെ അറിയാനായി വിട്ടുതരുന്നു. എന്കികും ഒരു ചെറിയ ക്ലൂ തരാം, താൻ കുടിക്കാൻ പോവുന്ന ചായക്കപ്പിൽ മറ്റൊരു വ്യക്തിയുടെ പ്രതിബിംബം ഒരു കഥാപാത്രം കാണുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ഈ ഭാഗത്ത് ഉൾപ്പെടുത്തിയിരിക്കുന്നത്. ജാപ്പനീസ് ഹൊറർ ചിത്രങ്ങളിൽ ഏറ്റവും മികച്ചത് എന്നൊന്നും പറയുന്നില്ല എന്നാലും ആ പട്ടികയിൽ നിസ്സംശയം ഉൾപ്പെടുത്താം ഈ ചിത്രത്തെയും, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 92/100

592. Sleep Has Her House (2017)

Director : Scott Barley

Genre : Experimental

Rating : 7.7/10

Country : UK

Duration : 89 Minutes

🔸ഈ എക്സ്പിരിമെന്റൽ ചിത്രങ്ങൾ എന്നത് പലപ്പോഴും ഒരു ഹിറ്റ് ഓർ മിസ് ഐറ്റങ്ങളാണ്, എല്ലാവരെയും പോലെ ചിന്തിക്കാതെയോ പ്രവർത്തിക്കാതെയോ വ്യത്യസ്തമായി എന്തെങ്കിലും ചെയ്യണം എന്ന തീരുമാനത്തിന് ആദ്യം കയ്യടി നൽകണം എങ്കിലും ഇവ ഒരു വിജയം പ്രത്യേകിച്ചും സാമ്പത്തികമായി ആവാറുണ്ടോ എന്നത് സംശയമാണ്, ഇല്ല എന്ന് തന്നെ പറയാം. ഈ വിഭാഗത്തിൽ പറയപ്പെടുന്ന പല ചിത്രങ്ങളും പിൽക്കാലത്ത് വാഴ്ത്തിപ്പടലുകൾ നേടിയിട്ടുണ്ട് എന്നത് ഇതോടൊപ്പം ചേർത്ത് വായിക്കണം. ഇങ്ങനെ ഒരു എക്സ്പിരിമെന്റൽ ചിത്രമാണ് സ്ലീപ് ഹാസ് ഹെർ ഹൌസ്.

🔸ഈ ചിത്രം സംവിധാനം ചെയ്തിരിക്കുന്നത് സ്‌കോട്ട് ബാർലി ആണ്. എഡിറ്റിങ്, ചിത്രീകരണം, സൗണ്ട് മിക്സിങ്, കൺസെപ്റ്റ് എല്ലാം പുള്ളിയുടേത് തന്നെയാണ്. സ്‌കോട്ട് ബാർലി എന്ന വ്യക്തിയുടെ വിഷൻ അതേപടി സ്‌ക്രീനിൽ എത്തിയതാണ് ഈ ചിത്രം എന്നും പറയാം. ചിത്രത്തിൽ സംഭാഷണങ്ങൾ ഏതുമില്ല, നടീനടന്മാർ ഇല്ല, ആകെ ഉള്ളത് അത്ഭുതപ്പെടുത്തുന്ന പ്രകൃതിയുടെ ശബ്ദങ്ങൾ മാത്രം. ചിത്രീകരണത്തിനായി സ്‌കോട്ട് ബാർലി എന്നൊരു വ്യക്തി മാത്രമാണ് ഉണ്ടായിരുന്നത്, അതും കൊടും കാട്ടിനുള്ളിൽ.

🔸പ്രകൃതിയാണ് ഇവിടെ വിഷയം, എന്നാൽ അത് നമ്മൾ കണ്ട ചില സീരീസുകളിലേത് പോലെ ഭംഗിയേയും, ഡിവേഴ്സിറ്റിയെയും കാണിക്കുന്ന ഒന്നാണോ, അല്ലേയല്ല. ഇവിടെ പ്രാധാന്യം കൊടുക്കുന്നത് സംഹാര ശേഷിക്കും മറ്റുമാണ്. എന്നാൽ ഇത് പ്രകടിപ്പിക്കുന്നതിനായി ഒരു പ്രകൃതി ദുരന്തമോ അത് പോലുള്ള പ്രക്രിയകളോ കാണിക്കുന്നുമില്ല, പൂർണമായും പ്രകൃതിയുടെ സ്വാഭാവികമായ പ്രവർത്തനമാണ് വിഷയമാക്കിയിരിക്കുന്നത്. ഉദാഹരണത്തിന് ചിത്രത്തിലെ ആദ്യ ഷോട്ട് ഒരു വെള്ളച്ചാട്ടമാണ്, എന്നാൽ അതിന്റെ ഇമ്പാക്റ്റ് നമുക്ക് മനസിലാകുന്നത് കൂടുതൽ അടുത്തറിയുമ്പോഴാണ് താനും.

🔸ഏറെക്കുറെ പൂർണമായും ഇരുട്ടാണ് ചിത്രത്തിൽ ഉള്ളത്, രാത്രികാലമാണ് ചിത്രം വിഷയമാക്കിയിരിക്കുന്നതും, ഹെഡ് ഫോൺ എന്നത് ചിത്രം കാണുന്നതിന് ഒരു നല്ല ഓപ്‌ഷൻ ആണ് താനും. ഇതിന് വലിയ പ്രാധാന്യം ഉണ്ട് എന്ന് പറയാൻ കാരണം വേറൊന്നുമല്ല ശബ്ദം, ശബ്ദമാണ് ഇവിടത്തെ ഹൈലൈറ്റ്. പൂർണമായും ഐ ഫോണിലാണ് ചിത്രം ചിത്രീകരിച്ചിരിക്കുന്നത്, ചില ഇടങ്ങളിൽ ഛായാ ചിത്രങ്ങളും ഉപയോഗിച്ചിരിക്കുന്നു, ഇവയെല്ലാം അതി മനോഹരമായി സിങ്ക് ആവുന്നുമുണ്ട്.

🔸എല്ലാവര്ക്കും കാണാൻ പറ്റിയ, കാണാൻ താൽപര്യപ്പെടുന്ന ഒന്നാവില്ല ഈ ചിത്രം എന്ന് ഉറപ്പുണ്ട്, ഈ കാരണം കൊണ്ട് തന്നെ ആർക്കും പ്രത്യേകിച്ച് നിർദ്ദേശിച്ച് തരുന്നുമില്ല. ഒരു മഴയുള്ള രാത്രി ഇരുട്ടിൽ, ഹെഡ്‌ഫോൺ വെച്ച് കണ്ടത് കൊണ്ടാവണം നല്ലൊരു അനുഭവം ആയിരുന്നു ഈ ചിത്രം, ചിത്രം എന്ന് പറയാമോ എന്ന് പോലും പിടിയില്ല. മിനുറ്റുകളോളം നീണ്ട് നിൽക്കുന്നതാണ് ഇതിലെ പല ഷോട്ടുകളും, കൂടുതൽ പറയാനില്ല താല്പര്യം തോന്നുന്നെങ്കിൽ മാത്രം ഈ വഴിക്ക് ഒന്ന് പോയി നോക്കുക.

Verdict : Very Good

DC Rating : 80/100

591. Parasite (2019)

Director : Bong Joon Ho

Genre : Drama

Rating : 8.6/10

Country : South Korea

Duration : 132 Minutes

🔸കഴിഞ്ഞ മെയിൽ കാനസ് ഫെസ്റ്റിവൽ കൊടി കയറിയപ്പോൾ തൊട്ട് കേട്ട് തുടങ്ങിയതാണ് ഒരു ബോങ് ജൂൻഹോ ചിത്രം കൊറിയയിൽ നിന്നും പുറപ്പെട്ടിട്ടുണ്ട് എന്നും അത് ഒരു ഒന്നൊന്നര ഐറ്റം ആണെന്നും. സംവിധായകന്റെ മുൻ ചിത്രങ്ങളായ മെമ്മറീസ് ഓഫ് മർഡർ, സ്നോ പിയേഴ്സർ, ഹോസ്റ്റ്, മദർ തുടങ്ങിയവ എല്ലാം വ്യക്തിപരമായി നന്നായി ഇഷ്ട്ടപ്പെട്ട ചിത്രങ്ങൾ ആയതിനാലും പ്ലോട്ടിലൂടെ മനസിലാക്കിയ ഹോം ഇൻവേഷൻ തീം ആയതിനാലും കാത്തിരിക്കുക ആയിരുന്നു പ്രിന്റിന് വേണ്ടി. ഫെസ്റ്റിൽ ചിത്രം പാൽമെ ഡിയോർ കൂടി നേടിയെന്ന് കേട്ടപ്പോൾ ആകാംക്ഷ ഒട്ടങ്ങോട്ട് വർധിച്ചതേ ഉള്ളൂ താനും.

🔸ചിത്രത്തെ കുറിച്ച് കൂടുതൽ എന്തെങ്കിലും പറയുന്നതിന് മുന്നേ ടൈറ്റിൽ ഒന്ന് ശ്രദ്ധിക്കുക, പാരസൈറ്റ് എന്ന വാക്കിന് മലയാളത്തിൽ ഇത്തിൾകണ്ണി എന്ന് പറയാം. ഇത്തിൾകണ്ണി എന്ന് പറഞ്ഞാൽ അന്യനെ ആശ്രയിച്ച് ജീവിക്കുന്നവൻ അല്ലെങ്കിൽ മറ്റുള്ളവരുടെ ചോരയും നീരും കുടിച്ച് വളർന്ന് അവർക്ക് തന്നെ ഒരു ബുദ്ധിമുട്ടായി മാറുന്നവൻ എന്നൊക്കെ പറയാം. ഇത്രയും യോജിച്ചൊരു ടൈറ്റിൽ ഈ ചിത്രത്തിന് വേറെ കിട്ടാനുണ്ടാവില്ല, അക്ഷരംപ്രതി ഇതാണ് ചിത്രം, ഇതാണ് കഥാപാത്രങ്ങൾ, തങ്ങളേക്കാൾ മുകളിൽ നിൽക്കുന്നവരുടെ ബലഹീനതകൾ മുതലെടുത്ത് അതിൽ പിടിച്ച് കയറി അവർക്കിടയിൽ ജീവിക്കുന്ന കുറച്ച് കഥാപാത്രങ്ങൾ.

🔸നാലംഗ കി ടേക്ക് കുടുംബമാണ് നമ്മുടെ പ്രധാന കഥാപാത്രങ്ങൾ, ഇവർ ലളിതമായി പറയുക ആണെങ്കിൽ ദാരിദ്ര്യത്തിന്റെ പടു കുഴിയിലാണ്, സമൂഹത്തിന്റെ ഏറ്റവും താഴെക്കിടയിൽ അതായത് ഓടയ്ക്ക് തുല്യമായ ഒരിടത്താണ് താമസം. അന്നന്നത്തേക്കുള്ള വക കണ്ടെത്താനായി പിസ ബോക്സുകളും മറ്റും ഉണ്ടാക്കലാണ് ഇവരുടെ തൊഴിൽ, ഗൃഹനാഥനായ കിം ഒരു ഡ്രൈവർ ആയിരുന്നെങ്കിലും ഇപ്പൊ ജോലി ഒന്നും കാര്യമായി ഇല്ല. പിന്നെ നാല് പേർക്കും കൈമുതലായി ഉള്ളത് നല്ല സാമർത്യമാണ്, എവിടെ കൊണ്ടിട്ടാലും പിഴച്ച് പോവുന്ന ജാതി എന്നൊക്കെ ചില റെയർ ഐറ്റങ്ങളെ വിശേഷിപ്പിക്കാറില്ലേ, അതാണ് ഈ കൂട്ടം എന്ന് പറയാം.

🔸ഒരുനാൾ കിമ്മിന്റെ മകനായ കിവുവിനെ തേടി സുഹൃത്തായ മിൻ എത്തുകയാണ്. മിൻ തന്റെ വീട്ടിൽ എത്തിയത് കിവുവിന് അത്ര ഇഷ്ടപ്പെട്ടില്ല, കാരണം വേറൊന്നുമല്ല തന്റെ ചുറ്റുപാട് പഴയ സ്നേഹിതൻ കണ്ട് അറിയുന്നതിലെ അപകർഷതാ ബോധം തന്നെ, ഇനി അതും പോരെങ്കിൽ മിൻ അത്യാവശ്യം ബേധപ്പെട്ട നിലയിലാണ് ഇന്ന്. പഠിപ്പൊക്കെ കഴിഞ്ഞ അവൻ ഇന്ന് ഒരു പ്രൈവറ്റ് അധ്യാപകനാണ്. പാർക്ക് ഫാമിലി നഗരത്തിലെ അത്യാവശ്യം പേരും പത്രാസും ഒക്കെയുള്ള കുടുംബക്കാരാണ്, ആ വീട്ടിലെ പെൺകുട്ടി ആയ ദാഹയേയുടെ അധ്യാപകൻ ആണ് മിൻ.

🔸ഇപ്പോഴത്തെ പ്രശനം എന്താണെന്ന് വെച്ചാൽ മിൻ താൽക്കാലികമായി നഗരം വിട്ട് പോവുകയാണ്, അയാൾക്ക് പകരക്കാരനായി കിവു അധ്യാപകനായി കുറച്ച് നാൾ പ്രവർത്തിക്കണം എന്നതാണ് മിന്നിന്റെ ആഗ്രഹം. ഒരു ജോലി എന്നത് വളരെ ആവശ്യമായ ഈ സാഹചര്യത്തിൽ കിട്ടിയ അവസരം കിവു രണ്ട് കയ്യും നീട്ടി സ്വീകരിക്കുകയാണ്. എന്നാൽ പാർക്ക് കുടുംബത്തിന്റെ വസതിയിൽ എത്തിയ കിവു അവിടെ കാണുന്നത് മറ്റൊരു അവസരമാണ്, തനിക്കും കുടുംബത്തിനും എന്നെന്നേക്കുമായി രക്ഷപ്പെടാനുള്ള ഒരവസരം. കാനസ് വേദിയിൽ പരമോന്നത പുരസ്‌കാരം ലഭിച്ച ചിത്രം മികച്ചതാണ് എന്ന കാര്യത്തിൽ തർക്കത്തിന് സ്ഥാനമില്ല, കാണാൻ തീർച്ചയായും ശ്രമിക്കുക.

Verdict : Must Watch

DC Rating : 95/100

590. Once Upon A Time In Hollywood (2019)

Director : Quentin Tarantino

Genre : Drama

Rating : 8.4/10

Country : USA

Duration : 161 Minutes

🔸അപ്പൊ ഇതാണ് ആ പടം, ഈ കൊല്ലം ഏറ്റവും കാത്തിരുന്ന പടം, എന്ത് തന്നെ സംഭവിച്ചാലും ആദ്യ ഷോ ആദ്യ ദിവസം തന്നെ കണ്ടിരിക്കണം എന്ന് രണ്ട് വർഷം മുൻപ്, അതായത് ചിത്രം പ്രഖ്യാപിച്ച അന്ന് തീരുമാനിച്ച് ഉറപ്പിച്ച ചിത്രം. ടരന്റീനോയുടെ ചിത്രം എന്ന ലേബൽ തന്നെ ഈ ചിത്രത്തിന് ധാരാളമാണ്, അതിനോടൊപ്പം ബ്രാഡ് പിറ്റ്, ലിയനാർഡോ ഡികാപ്രിയോ, മാര്ഗോട്ട് റോബ്ബി, അൽ ഫ്രീകിൻ പച്ചിനോ തുടങ്ങിയ പ്രതിഭകളുടെ സാന്നിധ്യം, ഇനി അതൊന്നും പോരെങ്കിൽ അറുപതുകളിലെ ഹിപ്പി ഹോളിവുഡിനുള്ള ട്രിബ്യുട് എന്ന് കൂടി ആയപ്പോ ഹൈപ്പ് അങ് കയറി കയറി ഒരു പോക്ക് പോകുവാണ്, എത്തിപ്പിടിക്കാൻ പറ്റാത്ത ഉയരത്തിലോട്ട്.

🔸നമ്മുടെ സെൻസർ ബോർഡ് കാര്യമായിട്ട് കത്തി വെച്ചിട്ടില്ല പടത്തിൽ, ഒന്ന് രണ്ട് തെറികൾ മ്യുട്ട് ചെയ്തതും ബിയർ ബോട്ടിലുകളും മറ്റും ഒന്ന് ബ്ലർ ആക്കിയതും ഒഴിച്ചാൽ അവര് അധികം കൈ കടത്തിയിട്ടില്ല. പിന്നെ സ്‌മോക്കിങ് ഈസ് ഇഞ്ചുറിയസ് എന്ന വാണിങ് ആദ്യം തൊട്ട് അവസാനം വരെ ഉണ്ടായിരുന്നു. സെൻസർ ബോർഡിന്റെ മുന്നറിയിപ്പ് അവിടെ നിക്കട്ടെ, ഞാനൊരു ചെറിയ മുന്നറിയിപ്പ് അല്ലെങ്കിൽ പ്രിക്കോഷൻ തരാം, ഇതുവരെ കണ്ട ടാരന്റിനോ പടങ്ങൾ എല്ലാം മറന്നേക്കുക, കാണാൻ പോവുന്നത് വ്യത്യസ്തമായ വേറൊരു ചിത്രം ആണെന്ന് ചിന്തിച്ച് ഉറപ്പിച്ച് കാണാൻ കയറുക. കാരണം വേറൊന്നുമല്ല ആക്ഷനും മറ്റും ചിത്രത്തിൽ വലിയ പ്രാധാന്യമില്ല, കഥാപാത്രങ്ങളോടൊപ്പം നമ്മൾ കുറച്ച് സമയം ചിലവഴിക്കുകയാണ് എന്ന് മാത്രം കരുതിയാൽ മതി.

🔸ഇനി കഥയിലേക്ക് ഡികാപ്രിയോയുടെ റിക്ക് ഡാൽട്ടൻ ആണ് നമ്മളുടെ ഹീറോ, ആളൊരു നടനാണ്, അൻപതുകളിലെ നല്ല കുറച്ച് ടിവി സീരീസുകളിലും സിനിമകളിലും എല്ലാം പുള്ളി ഭാഗമായിട്ടുണ്ട്. ഇനി ഇന്നത്തെ കാലത്തേക്ക് വരികയാണെങ്കിൽ കാര്യങ്ങൾ കുറച്ച് വിഷമകരമാണ്. റിക്കിന് ഇപ്പൊ പഴയ പേര് മാത്രമേ ഉള്ളൂ, അയാളുടെ ഭാഷയിൽ പറയുക ആണെങ്കിൽ മറ്റെല്ലാവരും അയാളെ മറികടന്ന് പോയിരിക്കുന്നു, പുള്ളി ഇപ്പോഴും ആകാശവും നോക്കി വായും പൊളിച്ച് നിൽക്കുന്നു. ഇപ്പൊ ചെറിയ ചില റോളുകളാണ് അയാളുടെ ആശ്രയം, വളർന്ന് വരുന്ന നായക കഥാപാത്രങ്ങളുടെ വില്ലനായും മറ്റും അയാൾ അയാൾക്കും സ്റ്റണ്ട് ഡബിളായ ക്ലിഫിനും ഉള്ള വക കണ്ടെത്തുന്നു.

🔸ക്ലിഫ് ബൂത്ത്, റിക്കിന്റെ കഥ ക്ലിഫിന്റെതും കൂടിയാണ്, ആ ഭാഗം കൂടി പറയാതെ അത് പൂർത്തിയാക്കാനാവില്ല, അത് ന്യായവുമല്ല. ഒരു സഹോദരനും മേലെ എന്നാൽ ഭാര്യയ്ക്കും താഴെ എന്നാണ് ക്ലിഫിനെ റിക്ക് വിശേഷിപ്പിക്കുന്നത്. റിക്കിന്റെ എല്ലാം ക്ലിഫ് ആണ്, കയ്‌പേറിയ യാഥാർഥ്യത്തിൽ നിന്ന് പോലും അയാളെ രക്ഷിക്കുന്നത് ക്ലിഫ് ആണെന്ന് പറയാം. ചിത്രം കണ്ടിരിക്കുന്ന വേളയിൽ നമ്മുടെ എല്ലാവരുടെയും ജീവിതത്തിൽ ഒരു ക്ലിഫ് ബൂത്ത് ഉണ്ടായിരിക്കണം എന്ന് പോലും ഒരുവേള തോന്നി. കാര്യം എന്ത് തന്നെ ആയാലും രണ്ട് പേരും പഴയ കാല സ്മരണകൾ ഇങ്ങനെ അയവിറക്കി ജീവിക്കുന്നതിന് ഇടയിലാണ് സംവിധായകനായ റോമൻ പൊളാൻസ്കിയും ഭാര്യ ഷാരോൺ ടെയ്റ്റും തൊട്ടടുത്തുള്ള വീട്ടിൽ താമസക്കാരായി എത്തുന്നത്.

🔸ഈ കഥാപാത്രങ്ങളുടെ എല്ലാം കഥയാണ് വൺസ് അപ്പോൺ എ ടൈം ഇൻ ഹോളിവുഡ്. ഗാനങ്ങൾ, വിഷ്വൽസ്, ബാക്ക്ഗ്രൗണ്ട്, പഴയ പടങ്ങൾക്കും, സംസ്കാരത്തിനും ഉള്ള ഹോമേജ് തുടങ്ങിയ മേഖലകൾ എല്ലാം തന്നെ നന്നായി തോന്നി. പ്രകടനങ്ങൾ എടുക്കുക ആണെങ്കിൽ ബ്രാഡ് പിറ്റ് ചിത്രം ഒന്നായി കൊണ്ടുപോയി എന്ന് പറയേണ്ടി വരും, അതൊരിക്കലും മറ്റുള്ള നടീ നടന്മാരെ കുറച്ച് കാണുന്നതുമല്ല, ഡികാപ്രിയോയും നന്നായിരുന്നു. പ്രതീക്ഷിച്ചതിലും ചെറിയ റോളുകൾ ആയിരുന്നെങ്കിലും മാര്ഗോട്ട് റോബി, അൽ പച്ചിനോ, ബ്രൂസ് ടേൺ എന്നിവരും നന്നായിരുന്നു. ആക്ഷനും, പ്ലോട്ടിനും മേലെ അവതരണത്തിനും കഥാപാത്രങ്ങൾക്കും പ്രാധാന്യം നൽകുന്ന ഒന്നാണ് ഈ ചിത്രം, ടോയ് സ്റ്റോറിക്ക് ശേഷം പൂർണ തൃപ്തി നൽകിയ ഹോളിവുഡ് ചിത്രം.

"A Tribute To The Hollywood, That's Long Gone" ❤

Verdict : Must Watch

DC Rating : 90/100

589. Demon (2015)

Director : Marcin Wrona

Genre : Horror

Rating : 6.1/10

Country : Poland

Duration : 94 Minutes

🔸ഈ സിനിമയുടെ ടൈറ്റിലിനും മുകളിൽ ചേർത്തിരിക്കുന്ന ഹൊറർ ജിൻറിനും ഒരു ചെറിയ കൊഴപ്പമുണ്ട്, തെറ്റിദ്ധരിപ്പിക്കാനുള്ള കുഴപ്പം. സ്വാഭാവികമായും ഇത് കണ്ടൊരു വ്യക്തി പ്രതീക്ഷിക്കാൻ പോവുന്നത് ഭൂത പ്രേതാദികളുടെ ഒരു പൂണ്ട് വിളയാട്ടവും, ജംപ് സ്‌കെയറുകളും മറ്റുമൊക്കെ ആവും. എന്നാൽ ആദ്യമേ ഒരു കാര്യം പറയാം, ഈ വക സംഭവങ്ങൾ ഒന്നും നിങ്ങൾ പ്രതീക്ഷിച്ച തോതിൽ ഈ ചിത്രത്തിൽ കാണില്ല. ഒരു ടിപ്പിക്കൽ ഹൊറർ ചിത്രം എന്നതിനേക്കാൾ ഒരു പസിലിന്റെ പീസുകൾ നമ്മുടെ മുന്നിൽ ഇട്ട് തന്നിട്ട് അവ പൂർത്തിയാക്കാൻ നമ്മളോട് തന്നെ ആവശ്യപ്പെടുന്ന തരം ഒന്നാണ് ഈ ചിത്രം.

🔸പോളണ്ടിലെ ഗ്രാമ പ്രദേശങ്ങളിൽ ഒന്നിലാണ് ചിത്രം ആരംഭിക്കുന്നത്, നായക കഥാപാത്രമായ പിറ്റോർ അവിടെ ആദ്യമായി എത്തുകയാണ്, അയാളുടെ ഈ വരവിന് പിന്നിൽ ഒരു ഉദ്ദേശമുണ്ട്, മൂന്നാല് ദിവസങ്ങൾ കഴിഞ്ഞാൽ അയാളുടെ വിവാഹമാണ്. തന്റെ പൂർവികർ പോളിഷുകാർ ആണെങ്കിൽ കൂടിയും ഭാഷയിലും ആ സംസ്കാരത്തിലും ഒന്നും പിറ്റോർ അത്ര പരിചിതനല്ല, ഒക്കെ പഠിച്ച് പരിചയിച്ച് വരുന്നേ ഉള്ളൂ. ഗ്രാമത്തിൽ കാല് കുത്തുന്ന ആ നിമിഷം തന്നെ ഓർക്കാൻ അത്ര ഇഷ്ട്ടപ്പെടാത്ത ഒരു കാഴ്ചയാണ് അയാൾക്ക് കാണേണ്ടി വരുന്നത്, തുടർന്ന് വരാൻ പോവുന്ന സംഭവങ്ങളുടെ ഒരു സൂചന പോലെ.

🔸താൻ വിവാഹം കഴിക്കാൻ പോവുന്ന സനേറ്റയെ സ്കൈപ്പ് വഴിയുള്ള പരിചയം മാത്രമേ പിറ്റൊറിന് ഉള്ളൂ. ഈ ഒരു പരിചയം തന്നെ പിറ്റോറിനെ സംബന്ധിച്ച് മതിയായിരുന്നു, ഇതോടൊപ്പം സനേട്ടയുടെ സഹോദരനുമായുള്ള വർഷങ്ങളായുള്ള പരിചയവും കൂടി ചേർന്നപ്പോൾ സ്വാഭാവികമായും ബന്ധം വിവാഹത്തിലേക്ക് നീണ്ടു എന്നതാണ് സത്യം. താൻ വിവാഹം കഴിക്കാൻ പോവുന്ന യുവതിയുടെ കുടുംബത്തെ പറ്റിയോ പശ്ചാത്തലത്തെ പറ്റിയോ വലിയ അറിവൊന്നും പിറ്റോറിന് ഇല്ല, ഒരല്പം യാഥാസ്ഥിക കുടുംബം ആണെന്ന് മാത്രം അറിയാം. വിവാഹത്തിനായി ആ കുടുംബം സമ്മാനിച്ച വില്ല കാണാനും ഒരുക്കങ്ങൾക്കും വേണ്ടിയാണ് ഈ വരവ്.

🔸വീട്ടിലെത്തി പരിസരവും ചുറ്റുപാടുകളും എല്ലാം വീക്ഷിച്ച് മനസിലാക്കിയ പിറ്റോർ പൂർണ സംപ്ത്രിപ്തൻ ആയിരുന്നു, വൈകാതെ തന്നെ കാമുകിയെയും സഹോദരനെയും എല്ലാം നേരിൽ കാണുകയും ബന്ധം ഒന്ന്കൂടി ഊട്ടി ഉറപ്പിക്കുകയും ചെയ്തു. ഇതുവരെ നടന്ന കാര്യങ്ങൾ എല്ലാം തന്നെ മംഗളമായി സംഭവിച്ചു എന്ന് പറയാം. എന്നാൽ ട്വിസ്റ്റ് സംഭവിക്കുന്നത് ഒരുക്കങ്ങൾ പൂർത്തീകരിക്കുന്നതിനായി വീടിന് മുൻപിലെ പറമ്പ് കുഴിക്കേണ്ടി വരുമ്പോഴാണ്. കുഴിയിൽ നിന്നും ഒരു സ്ത്രീയുടെ അസ്ഥികൂടം ലഭിക്കുന്നിടത്ത് നിന്നും കഥ മറ്റൊരു വഴിയിലേക്ക് മാറുകയാണ്. ഇതിനെ തുടർന്ന് അരങ്ങേറുന്ന സംഭവങ്ങളാണ് പിന്നീടുള്ള ഒന്നര മണിക്കൂർ സമയം ചിത്രം പറയുന്നത്.

🔸ഒരു സ്ട്രെയിറ്റ് അപ്പ് ഹൊറർ ക്ലിഷേ ചിത്രം എന്നതിനേക്കാൾ പൊസഷൻ പ്രമേയമായ ചിത്രം എന്ന് പറയാം ഡെമണിനെ. നായക കഥാപാത്രത്തിന്റെ മാനസിക നിലയിലും മറ്റും ആഘാതത്താലോ, മറ്റൊരു അതീന്ദ്രിയ ശക്തിയുടെ ഉദയത്താലോ വരുന്ന മാറ്റമാണ് പ്രമേയം. ഒരു തരം ഓപ്പൺ എൻഡിങ് കൂടിയാണ് ചിത്രം, അത് എങ്ങിനെ കാഴ്ചക്കാരൻ എടുക്കുന്നു എന്നതിനെ ആശ്രയിച്ചിരിക്കും ഈ ചിത്രം നിങ്ങൾക്ക് ഇഷ്ടപ്പെട്ടോ ഇല്ലയോ എന്ന കാര്യം. എന്തായാലും വ്യക്തിപരമായി ഇഷ്ട്ടപ്പെട്ട ചിത്രങ്ങളുടെ കൂട്ടത്തിൽ തന്നെ കാണും ഈ ചിത്രവും, സമയവും താല്പര്യവും ഉണ്ടെങ്കിൽ കാണാൻ ശ്രമിക്കുക.

Verdict : Very Good

DC Rating : 80/100

588. Polytechnique (2009)

Director : Denis Villeneuve

Genre : Drama

Rating : 7.2/10

Country : Canada

Duration : 78 Minutes

🔸ഈ ഒരു തലമുറയിലെ ഏറ്റവും മികച്ച സംവിധായകരുടെ കൂട്ടത്തിലാണ് വ്യക്തിപരമായി ഞാൻ ഡെനിസ് വിലനെവ് എന്ന സംവിധായകനെ കാണുന്നത്. രണ്ട് പതിറ്റാണ്ടോളം കാലത്തെ സിനിമാ ജീവിതത്തിനിടെ പ്രിസണേഴ്‌സ്, സികാരിയോ, എനമി, ബ്ലേഡ് റണ്ണർ തുടങ്ങി വേറെ ലെവൽ എന്നൊക്കെ വിശേഷിപ്പിക്കേണ്ട ഒരു പിടി ചിത്രങ്ങൾ അദ്ദേഹം സമ്മാനിച്ചിട്ടുണ്ട്. ഈ കൂട്ടത്തിൽ ചേർക്കാവുന്ന അറൈവൽ എന്ന ചിത്രം തിയേറ്ററിൽ കാണാൻ ഭാഗ്യം ലഭിച്ചതും, അന്ന് അത് കണ്ടമ്പരന്നതും ഇതോടൊപ്പം ചേർത്ത് വായിക്കണം. ഇത്രയും പറഞ്ഞത് എന്താണെന്നാൽ ആ പേര് തരുന്ന ഗ്യാരന്റി മാത്രം മതി ഈ ചിത്രം കാണാൻ എന്ന് പറയാൻ വേണ്ടിയാണ്.

🔸ഈ ചിത്രത്തെ പറ്റി പറയുമ്പോൾ ഒരല്പം ചരിത്രം കൂടി പറയണം, ഏകദേശം മുപ്പത് വർഷങ്ങൾക്ക് മുൻപേ മോണ്ട്രിയലിൽ അരങ്ങേറിയ ഒരു യഥാർത്ഥ സംഭവമാണ് ഈ ചിത്രത്തിന്റെ പ്രമേയം അല്ലെങ്കിൽ റ്റേർണിങ് പോയിന്റ് എന്ന് പറയാം. സംഭവം എന്താണെന്ന് വെച്ചാൽ അന്നേ ദിവസം ഒരു എൻജിനിയറിങ് കോളേജിൽ ഒരു വെടിവെയ്പ്പ് ഉണ്ടാവുകയാണ്. ഒരു എക്സ്ട്രീമിസ്റ്റ് എന്നൊക്കെ വിശേഷിപ്പിക്കാവുന്ന വ്യക്തിയുടെ തോക്കിൻകുഴലിന് മുന്നിൽ അന്ന് നഷ്ടപ്പെട്ടത് പതിനാല് ജീവനുകളാണ്, ഒന്നും അറിയാത്ത പതിനാല് പാവം യുവതികൾ. ഈ സംഭവത്തിന്റെ ചുവട് പിടിച്ചാണ് ചിത്രം പുരോഗമിക്കുന്നത് എന്ന് പറയാം.

🔸ഈ ചിത്രത്തെ സംബന്ധിച്ച മറ്റൊരു രസകരമായ വസ്തുത എന്താണെന്നാൽ മുകളിൽ സൂചിപ്പിച്ച സംഭവം മൂന്ന് വ്യത്യസ്ത അങ്കിളിലൂടെ കാണിക്കുന്നുണ്ട് എന്നതാണ്. ഈ മൂന്ന് കഥകളും കൂട്ടി ചേർക്കുമ്പോഴാണ് കഥ പൂർത്തിയാവുന്നതും കാഴ്ചക്കാരൻ എന്ന നിലയിൽ ഒരു തൃപ്തി ലഭിക്കുന്നതും. അന്നേ ദിവസം കൊല നടത്താനായി വരുന്ന കൊലയാളി, അവിടത്തെ വിദ്യാർത്ഥികളായ വലേറി, ജീൻ ഫ്രാൻസിസ് എന്നീ കഥാപാത്രങ്ങളുടെ അങ്കിളുകളിലൂടെയാണ് കഥ പറഞ്ഞ് പോവുന്നത്.

🔸ഫെമിനിസം എന്ന വസ്തുതയുടെ നല്ലതും മോശവുമായ വശം ചിത്രം കാണിച്ച് തരുന്നുണ്ട്. ഫെമിനിസത്തെ എതിർത്ത് നിലകൊള്ളുന്ന ഒരു കഥാപാത്രമാണ് ഈ ചിത്രത്തിലെ കൊലയാളി, അയാൾക്ക് പറയാൻ ഉള്ളത് ഈ വസ്തുത കൊണ്ട് തന്നെ അനുഭവിക്കേണ്ടി വന്ന അവഗണനയുടെയും മറ്റും കഥകളാണ്, ഒരുവേള ഇയാൾ പറയുന്നത് ശെരിയല്ലേ എന്ന് വരെ തോന്നിപ്പോകാം, എന്നാൽ വലേറി എന്ന കഥാപാത്രം പറയുന്നത് നാണയത്തിന്റെ മറുവശമാണ്. കൊലയാളിയായ കഥാപാത്രം സഞ്ചരിക്കുന്ന വഴി ന്യായീകരണം അർഹിക്കുന്നില്ലെങ്കിലും രണ്ട് കഥാപാത്രങ്ങളും നിലകൊള്ളുന്ന ആശയങ്ങളെ ചോദ്യം ചെയ്യാൻ ചിത്രം പ്രേരിപ്പിക്കുന്നുണ്ട്.

🔸ഈ രണ്ട് കഥാപാത്രങ്ങൾക്കും പുറമെ ജീൻ ഫ്രാൻസിസ് എന്നൊരു കഥാപാത്രം കൂടിയുണ്ട് ചിത്രത്തിൽ, അദ്ദേഹം ആരാണെന്നും എന്താണെന്നും എല്ലാം അവിടെ നിൽക്കട്ടെ, വ്യക്തിപരമായി ചിത്രത്തിലെ തന്നെ ഏറ്റവും ഇഷ്ടം തോന്നിയ കഥാപാത്രമാണ് ഫ്രാൻസിസ്. ഒരു സംഭവം ഒരുപാട് ജീവിതങ്ങളെ എങ്ങിനെ മാറ്റി മറിക്കും എന്നതിന്റെ നല്ലൊരു ഉദാഹരണമാണ് ഈ ചിത്രം, ഈ മാറ്റങ്ങൾ കാരണം പലപ്പോഴും ഒരു തിരിച്ച് പോക്ക് അസാധ്യമായി തീരുന്ന സന്ദർഭങ്ങൾ ഉണ്ട്, അവയിൽ ഒന്നാണിത്. ഈ ചിത്രം കണ്ട് കഴിയുമ്പോൾ ഒരു ഊർജ്ജം ലഭിക്കും, ഒരല്പം വിഷമം തോന്നും, ചെറുതായി ഒന്ന് വേദനിക്കും, ഇത്രയും മാത്രം ഉറപ്പ് നൽകാം.

Verdict : Very Good

DC Rating : 85/100

587. Justice League (2001)

Director : Bruce Timm

Genre : Superhero

Rating : 8.6/10

Seasons : 5

Episodes : 91

Duration : 24 Minutes

Country : USA

🔸പൊട്ടൻഷ്യലിന്റെ കാര്യത്തിൽ ഡീസി കോമിക്സിനെ തോൽപ്പിക്കാൻ ആർക്കും കഴിയില്ല എന്നാണ് വ്യക്തിപരമായുള്ള വിശ്വാസം. ഈ വിശ്വാസത്തിന് വലിയൊരു കാരണം ഇവിടെ പറയാൻ പോവുന്ന ആനിമേറ്റഡ് സീരീസുകൾ തന്നെയാണ്. എന്നാൽ ഈ പൊട്ടൻഷ്യൽ എന്നത് പലപ്പോഴും നശിപ്പിക്കുന്നത് മൂവി സ്റ്റുഡിയോസ് തന്നെയാണ്, അതിനുള്ള ഏറ്റവും മികച്ച സാക്ഷ്യപത്രം ആണ് ഇതേ പേരിൽ രണ്ട് വർഷം മുന്നേ പുറത്തിറങ്ങിയ സിനിമയും ഈ ടീവി സീരീസും തമ്മിലുള്ള നിലവാരത്തിൽ അന്തരം, രണ്ടും രണ്ട് ധ്രുവങ്ങളിൽ ആണെന്ന് പറയാം.

🔸മാർവലും ഡീസിയും ഇനി എത്ര സൂപ്പർഹീറോകളെ അവതരിപ്പിച്ചാലും ശെരി ബാറ്റ്മാനോളം ഇഷ്ടം തോന്നിയ മറ്റൊരു കഥാപാത്രം ഇല്ല. അമാനുഷികത എന്നതിൽ കവിഞ്ഞ് തന്റെ ബലഹീനതകൾ തിരിച്ചറിഞ്ഞ് അവ പരിഹരിക്കുക വഴി എതിരാളികൾക്ക് മേൽ മാനസികമായും ശാരീരികമായും തന്റെ സാന്നിധ്യം ഊട്ടി ഉറപ്പിക്കുന്ന, വ്യക്തി ജീവിതത്തിൽ ഇത്രയും പ്രഹരങ്ങൾ ഏറ്റ് വാങ്ങേണ്ടി വന്ന മറ്റ് അനേകം കഥാപാത്രങ്ങളെ കണ്ടിട്ടില്ല. ഒരു പരിധി വരെ ഈ ടീവി സീരീസിനും ബാറ്റ്മാൻ ആനിമേറ്റഡ് സീരീസിനും ശ്രദ്ധ കൊടുക്കാൻ ഉണ്ടായ കാരണം തന്നെ പ്രധാന കഥാപാത്രങ്ങളിൽ ഒന്ന് ബ്രൂസ് വെയ്ൻ ആണെന്നതാണ്.

🔸ഇരുപത്തി ആറ് എപ്പിസോഡുകൾ ഉള്ള രണ്ട് സീസണുകൾ, അതിന് ശേഷം പതിമൂന്ന് എപ്പിസോഡുകൾ വീതമുള്ള മൂന്നെണ്ണം ഉൾപ്പെട്ട ജസ്റ്റിസ് ലീഗ് അൺലിമിറ്റഡ്, ഈ രണ്ടും ചേർന്നതാണ് ആകെ അഞ്ച് സീസണിന് അടുത്തുള്ള പ്രസ്തുത ടീവി സീരീസ്. ഇവ രണ്ടും തമ്മിൽ മുകളിൽ സൂചിപ്പിച്ചത് പോലെ തന്നെ ചില വ്യത്യാസങ്ങൾ ഉണ്ട്, ആദ്യത്തെ രണ്ട് സീസണുകളിൽ ഏഴ് പ്രധാന ജസ്റ്റിസ് ലീഗ് മെമ്പർമാരിലാണ് ശ്രദ്ധ കേന്ദ്രികരിച്ചിരിക്കുന്നത് എങ്കിൽ പിന്നീടുള്ള മൂന്ന് സീസണുകളിൽ പല കഥാപാത്രങ്ങളിലേക്ക് ഫോക്കസ് മാറുന്നുണ്ട്. ഈ മാറ്റം കഥാപാത്രങ്ങളിൽ മാത്രമാവുന്നു എന്നതും നിലവാരത്തിൽ ഒരു അന്തരവും തോന്നിയില്ല എന്നും പറയേണ്ടി ഇരിക്കുന്നു.

🔸ബാറ്റ്മാൻ, സൂപ്പർമാൻ, വണ്ടർ വുമൺ തുടങ്ങിയ ഡീസി ട്രിനിറ്റിയിലും ഇവരോടൊപ്പം ഗ്രീൻ ലാന്റേൺ, ഫ്ലാഷ്, മാർഷ്യൻ മാൻഹണ്ടർ, ഹോക്ഗേൾ എന്നീ കഥാപാത്രങ്ങളിലാണ് ആദ്യ രണ്ട് സീസണുകൾ ഫോക്കസ് ചെയ്യുന്നത്. ഇവരെ കൂടാതെ അക്വമാൻ പോലെയുള്ള കഥാപാത്രങ്ങൾ വന്ന് പോവുന്നുമുണ്ട്. ഈ ചുരുങ്ങിയ കഥാപാത്രങ്ങളിൽ ഒതുങ്ങിയിരുന്ന സ്റ്റോറി ടെല്ലിങ് കാരണം തന്നെ നല്ല ഫോക്കസും മറ്റും കഥാപാത്രങ്ങൾക്ക് ലഭിക്കുന്നുണ്ട് എന്ന് എടുത്ത് പറയേണ്ടി ഇരിക്കുന്നു. ഡീസിയുടെ ശക്തി എന്നൊക്കെ വിശേഷിപ്പിക്കാവുന്ന റോഗ് ഗാലറി അഥവാ വില്ലന്മാരുടെ നീണ്ട നിര തന്നെ ഇവിടെ പ്രത്യക്ഷപ്പെടുന്നുണ്ട്.

🔸ഈ ടീവി സീരീസിനെ പറ്റി പറയുമ്പോൾ എടുത്ത് പറയേണ്ട ഒന്നാണ് ഓപ്പണിങ് സോങ്, ഉദിച്ചുയരുന്ന സൂര്യന്റെ പശ്ചാത്തലത്തിൽ കഥാപാത്രങ്ങൾ നടന്ന് വരുന്ന തീം ഒരു പരിധി വരെ സീരീസിനെ തന്നെ ഓവർ ഷാഡോ ചെയ്യുന്നുണ്ട് എന്ന് പറയാം. പെരുമ്പറ മുഴങ്ങുന്നത് പോലെയുള്ള ആ തീമും രംഗവും കഥയോടും ടോണിനോടും ചേർന്ന് നിൽക്കുന്നതാണ്. കോമിക്, അനിമേഷൻ ഐറ്റങ്ങളോട് താല്പര്യമുള്ളവർക്ക് ഒന്ന് ട്രൈ ചെയ്ത് നോക്കാവുന്നതാണ് ഈ ടീവി സീരീസ്, ഓരോ എപ്പിസോഡിനും വലിയ ദൈർഖ്യം ഒന്നും ഇല്ല താനും.

Verdict : Very Good

DC Rating : 84/100

586. Fighting With My Family (2019)

Director : Stephen Merchant

Genre : Sports

Rating : 7.2/10

Country : UK

Duration : 108 Minutes

🔸ഈ തൊണ്ണൂറുകളിൽ ജനിച്ച് വളർന്നവരുടെ മിക്കവരുടെയും ചെറുപ്പ കാലത്ത് ചെറുതോ വലുതോ ആയ സാന്നിധ്യമായിരിക്കും റെസ്‌ലിംഗും ഡബ്ള്യു ഡബ്ള്യു ഇയും. കാർഡ്‌സ്, പോസ്റ്റെർസ്, ആഴ്ചകളിൽ മുടങ്ങാതെ ഉള്ള ഷോകൾ, ഇഷ്ടപ്പെട്ട കഥാപാത്രങ്ങൾ തുടങ്ങി പല രീതികളിൽ ഇവ നമ്മുടെ ജീവിതത്തിന്റെ ഭാഗമായിട്ടുണ്ട്. വർഷങ്ങൾ കഴിഞ്ഞ് പോയപ്പോൾ ഇതെല്ലാം വെറും നാടകം ആണെന്നും മറ്റുമുള്ള തിരിച്ചറിവ് ലഭിച്ചപ്പോൾ വലിയൊരു വിഭാഗം ആ താല്പര്യവും മറികടന്ന് പോയി, മറ്റ് ചിലർ അതൊന്നും വിഷയമാക്കാതെ വീണ്ടും അതിന് പിറകെയും. ഈ ചിത്രം എന്നത് ഇതൊക്കെയാണ്, റെസ്ലിങിനോടുള്ള പാഷൻ, ഇഷ്ടം എന്നിവയെല്ലാം സറായ നൈറ്റ് എന്ന യുവതിയുടെ കാണിച്ച് തരികയാണ്.

🔸ഒരു പത്ത് പതിനഞ്ച് വർഷങ്ങൾക്ക് മുൻപ് വരെ ഈ പരിപാടികൾ വലിയ താല്പര്യത്തോടെ നോക്കി കണ്ടിരുന്നു, പിന്നീട് ആ ഇഷ്ടം എന്നോ കൈമോശം വന്നതിനാലാവണം ഈ ചിത്രത്തിൽ പറയുന്ന യഥാർത്ഥ കഥാപാത്രത്തെയോ അവരുടെ കഥയോ വലിയ പിടിയില്ല. അതെ ചിത്രം ഒരു ബയോപിക് ആണ്, പെയ്ജ് എന്ന റെസ്ലറുടെ കഥയാണ് ചിത്രം പറയുന്നത്. കുറച്ച് കൂടി വ്യക്തമായി പറയുക ആണെങ്കിൽ നോർവിച്ചിലെ ചെറുകിട വേദികളിൽ നിന്നും അമേരിക്കയിലെ പേ പെർ വ്യൂ ഇവന്റുകൾ വരെ എത്തിയ അവരുടെ യാത്രയുടെ കഥ.

🔸കുടുംബം അടക്കം റെസ്‌ലർമാരായ നൈറ്റ് ഫാമിലിയിലാണ് പെയ്ജ് അഥവാ സറായ ജനിച്ചത്. അച്ഛൻ ഒരു റെസ്ലിങ് പ്രൊമോട്ടർ ആണെങ്കിൽ അമ്മയും രണ്ട് സഹോദരന്മാരും കറ തീർന്ന റെസ്‌ലർമാർ തന്നെ. തന്റെ ചെറുപ്പ കാലത്ത് മത്സരങ്ങളിൽ ഒന്നിൽ ആളെ തികയ്ക്കാനായി റിങ്ങിൽ കയറിയ നിമിഷം തൊട്ട് സറായായും ഇതിന്റെയൊക്കെ ഭാഗമായി മാറി. ആദ്യ കാലത്ത് വലിയ താല്പര്യം ഒന്നും ഇല്ലെങ്കിൽ കൂടിയും പതിയെ രക്തത്തിൽ അലിഞ്ഞ് ചേർന്ന വികാരം അതിന്റെ ഇഫ്ഫക്റ്റ് സറായയിലും കാണിച്ച് തുടങ്ങി.

🔸അമേരിക്കയിലെ എന്നല്ല ഒരുപക്ഷെ ലോകത്തിലെ തന്നെ ഏറ്റവും വലിയ റെസ്ലിങ് കമ്പനികളിൽ ഒന്നായ ഡബ്ല്യൂഡബ്ള്യുഇയിൽ എത്തണം എന്നതാണ് സ്റായയുടെയും സഹോദരന്റെയും ലക്‌ഷ്യം. ചെറുപ്പം തൊട്ട് റിങ്ങിലും പ്രാക്ടീസ് ഗ്രൗണ്ടിലും ജിമ്മിലും വരെ ചിലവിട്ട ഓരോ നിമിഷവും ആ ഒരു അവസരത്തിന് വേണ്ടിയുള്ളതായിരുന്നു. മുൻപ് ഇതേ അവസരത്തിന് വേണ്ടി അഹോരാത്രം പ്രയത്നിച്ച് ഒടുവിൽ അത് കയ്യാലപ്പുറത്ത് നഷ്ട്ടപ്പെട്ട് പോയ, ആ വിഷമത്തിൽ ജീവിതം തന്നെ കൈവിട്ട് പോയ മൂത്ത ചേട്ടന്റെ കഥ ഒരു പാഠമായി ഇരുവർക്കും മുന്നിലുണ്ട്.

🔸ഒടുവിൽ ഇത്രയും നാളത്തെ പ്രയത്നത്തിന്റെ ഫലം എന്നോണം അവസരം ഇരുവരുടെയും വാതിൽക്കൽ വന്ന് മുട്ടുകയാണ്. ലണ്ടനിൽ നടക്കുന്ന പരിപാടിയ്ക്കിടെ ഒരു ട്രൈ ഔട്ടിന് കമ്പനി ഇരുവരെയും ക്ഷണിക്കുകയാണ്. കഠിനമാണ് അവരുടെ സെലക്ഷൻ പരിപാടി, പങ്കെടുക്കുന്നവരിൽ തൊണ്ണൂറ് ശതമാനം പേരും തിരഞ്ഞെടുക്കപ്പെടാറ് പോലുമില്ല. അങ്ങനെ രണ്ട് കഥാപാത്രങ്ങളും പരിപാടിയിൽ പങ്കെടുക്കാനായി ലണ്ടനിലേക്ക് യാത്ര തിരിക്കുകയാണ്. വലിയ അവകാശ വാദങ്ങൾ ഒന്നും ഇല്ലാത്ത ഒരു ചെറിയ നല്ല സ്പോർട്സ് ഡ്രാമ ആണ് ഫൈറ്റിങ് വിത്ത് മൈ ഫാമിലി.

Verdict : Good

DC Rating : 70/100

585. The Gangster The Cop The Devil (2019)

Director : Won-Tae Lee

Genre : Action

Rating : 7/10

Country : South Korea

Duration : 109 Minutes

🔸കഴിഞ്ഞ കുറച്ച് നാളുകളായി സോഷ്യൽ മീഡിയയിൽ അത്യാവശ്യം നല്ല പ്രതികരണവും ഫോളോയിങ്ങും ലഭിച്ച ചിത്രമാണ് ദി ഗ്യാങ്‌സ്റ്റർ ദി കോപ്പ് ദി ഡെവിൾ. കണ്ടവരിൽ മിക്കവരും നല്ല പ്രതികരണം നൽകിയിട്ടും ചിത്രം കാണാൻ വലിയ താല്പര്യം തോന്നിയില്ല എന്നതാണ് സത്യം, വേറൊന്നുമല്ല ഇത് പോലെ പ്രതികരണങ്ങൾ കണ്ടും മറ്റും മുൻകാലങ്ങളിൽ കണ്ട പല ചിത്രങ്ങളിൽ ഹൈപ് ഒന്ന് കൊണ്ട് മാത്രം ഇഷ്ടപ്പെടാതെ പോയിട്ടുണ്ട്. അതിനാൽ തന്നെ ഇത്തരം ചിത്രങ്ങൾ പലപ്പോഴും ആ പുൾ ഒന്ന് കഴിയുന്നത് വരെ ഒഴിവാക്കാറാണ് പതിവ്. ഇത് തന്നെ ആയിരുന്നു ഈ ചിത്രത്തിന് വേണ്ടിയും തീരുമാനിച്ചിരുന്നത് എന്നാൽ അപ്രതീക്ഷിതമായി മുന്നിൽ എത്തുക ആയിരുന്നെന്ന് പറയാം.

🔸മൂന്ന് കഥാപാത്രങ്ങളെയാണ് ഈ ചിത്രം കാണുമ്പോൾ ശ്രദ്ധിക്കേണ്ടത്, പേര് സൂചിപ്പിക്കുന്നത് പോലെ തന്നെ അത്യാവശ്യം രൂത്ലസ് ആയ ഒരു ഗ്യാങ്‌സ്റ്റർ, തന്റെ കടമ വൃത്തിയായി ചെയ്യാനുള്ള കഴിവും ആർജവവും ഉള്ള ഒരു പോലീസുകാരൻ, പിന്നെ മനുഷ്യത്വം എന്നത് തൊട്ട് തീണ്ടിയിട്ടില്ലാത്ത ഒരു സീരിയൽ കില്ലർ അഥവാ ഡെവിൾ. ഈ മൂന്ന് കഥാപാത്രങ്ങളെയും ഒരു ത്രികോണത്തിന്റെ മൂന്ന് പോയിന്റുകളായി എടുത്താൽ ഇതിന് ഉള്ളിൽ കറങ്ങി കളിക്കുന്നതാണ് ഈ ചിത്രം. ഒറ്റ വാക്കിൽ പറയുക ആണെങ്കിൽ അത്യാവശ്യം പിടിച്ചിരുത്തുന്ന നല്ലൊരു ത്രില്ലർ ചിത്രം എന്നൊക്കെ പറയാം.

🔸നമ്മടെ കഥാ പശ്ചാത്തലമായ നഗരത്തിൽ അടുത്തിടെ ആയി കുറ്റകൃത്യങ്ങൾ കൂടി വരികയാണ്, പ്രത്യേകിച്ചും കൊലപാതകങ്ങൾ അവയിൽ തന്നെ ഒരേ രീതിയിലുള്ള സംഭവങ്ങൾ തുടർന്ന് കൊണ്ടിരിക്കുകയാണ്. ഈ ഒരേ രീതി എന്ന് പറയുമ്പോൾ ആദ്യം കൊല്ലുന്നവൻ കൊല്ലപ്പെടാൻ പോവുന്നവന്റെ വണ്ടിക്ക് പിറകിൽ ചെറുതായി സ്വന്തം വണ്ടി ഒന്ന് തട്ടിക്കും, അത് ചോദിക്കാൻ വരുന്നവനെ അങ്ങട്ട് തട്ടിയേക്കും, പരിപാടി കഴിഞ്ഞു. ഈ രീതി പിന്തുടർന്ന് കൊണ്ട് കൊലപാതകങ്ങൾ ചിലത് സംഭവിച്ചപ്പോഴാണ് പോലീസ് സേനയ്ക്ക് അതിന്റെ ഗൗരവം പിടി കിട്ടിയത്.

🔸ഈ സംഭവ വികാസങ്ങൾക്ക് പിറകെ വെച്ച് പിടിക്കുകയാണ് നമ്മുടെ രണ്ടാമത്തെ കഥാപാത്രമായ പോലീസുകാരൻ. സൂത്ര ശാലിയായ, വലിയ പഴുതുകൾ ഒന്നും ബാക്കി വെക്കാത്ത സീരിയൽ കില്ലറിന് മുന്നിൽ അയാൾ പല തവണ നിസ്സഹായൻ ആവുന്നുണ്ടെങ്കിലും വിട്ട് കൊടുക്കാത്ത മനസ്ഥിതിയും, സ്വഭാവവും കാരണം അയാൾ പിറകെ കൂടുകയാണ്. ഒരു സ്വാഭാവിക പോലീസ്, സീരിയൽ കില്ലർ കഥയിൽ നിന്നും ഈ ചിത്രത്തെ വേറിട്ട് നിർത്തുന്നത് മൂന്നാമത്തെ കഥാപാത്രത്തിന്റെ സാന്നിധ്യമാണ്, ഗ്യാങ്സ്റ്ററിന്റെ സാന്നിധ്യം.

🔸രൂപ ഭാവം കൊണ്ട് ഒരു പോര് കാളയെ ഓർമപ്പെടുത്തുന്ന വ്യക്തിത്വമാണ് ഈ കഥാപാത്രം, ആ നഗരം പോലും അയാളുടെ കൈകളിലാണെന്ന് പറയാം. ആ സീരിയൽ കില്ലർ തന്റെ വഴിയിൽ ഒരേയൊരു അബദ്ധമേ കാണിച്ചുള്ളൂ എന്ന് വേണമെങ്കിൽ പറയാം, ആ അബദ്ധം എന്നത് തന്റെ അടുത്ത ഇരയായി ഈ ഗ്യാങ്സ്റ്ററിന്റെ തിരഞ്ഞെടുത്തത് ആണ് താനും, അല്ലെങ്കിൽ അയാളിൽ ജീവന്റെ അവസാന മിടിപ്പ് ബാക്കി വെച്ചത് എന്നും പറയാം. അധികം താമസിയാതെ തന്നെ കൊലപാതകിയെ പിടിക്കാനായി ഗ്യാങ്സ്റ്ററും പോലീസുകാരനും ഒന്നിച്ചിറങ്ങുമ്പോൾ നല്ലൊരു ക്രൈം ത്രില്ലർ കൊറിയൻ ചിത്രം കൂടി പിറക്കുകയായി.

Verdict : Good

DC Rating : 75/100

584. Sword Of Doom (1966)

Director : Kihachi Okamoto

Genre : Action

Rating : 8/10

Country : Japan

Duration : 120 Minutes

🔸സ്വോർഡ്‌ ഓഫ് ഡൂം എന്ന ചിത്രത്തെ പറ്റി ആദ്യമായി കേട്ടത് ഉദ്ദേശം രണ്ട് മൂന്ന് വർഷങ്ങൾക്ക് മുൻപാണ്, പഴയ ജാപ്പനീസ് ചിത്രങ്ങളുടെ കമനീയ ശേഖരത്തിൽ മുങ്ങി തപ്പി കൊണ്ട് നിൽക്കവേ ആണ് ഈ ചിത്രത്തിലെ ഒരു രംഗം കണ്ണിൽ പെട്ടത്. വീണ് കിടക്കുന്ന ഒരു പറ്റം യോദ്ധാക്കളുടെ ഇടയിലൂടെ നടന്ന് പോവുന്ന ഒരു കഥാപാത്രം, മഞ്ഞ് കാരണവും മറ്റും അവ്യക്തമായ വഴിയിലൂടെ അയാൾ കടന്ന് പോവുമ്പോൾ ഒന്ന് തിരിഞ്ഞ് നോക്കുന്നു പോലുമില്ല. ഈ ചിത്രത്തെ കുറിച്ചുള്ള ആദ്യ ഓർമ്മ സ്‌ട്രൈക്കിങ് ആയി തോന്നിയ ഈ ചിത്രം തന്നെയാണ്.

🔸ചിത്രത്തിന്റെ കഥയെ പറ്റി എന്ത് തന്നെ പറഞ്ഞാലും അത് അധികമായി പോവും, മാത്രമല്ല ഒരു പരിധി വരെ അത് ആസ്വാദനത്തെ സ്പോയിൽ ചെയ്യുകയും ചെയ്യും. അത് കൊണ്ട് വളരെ ചെറുതായി പ്രധാന കഥാപാത്രത്തെ കുറിച്ചും കഥയുടെ പശ്ചാത്തലത്തെ കുറിച്ചും ഒന്ന് സൂചിപ്പിച്ച് വിടാം. ഒരു മല മുകളിലാണ് ചിത്രം ആരംഭിക്കുന്നത്, ഒരു വൃദ്ധനും അയാളുടെ കൊച്ച് മകളും ദിവസങ്ങൾ നീണ്ട് നിൽക്കുന്ന ഒരു യാത്രയിലാണ്. മല കയറി മുകളിൽ എത്തിയ ഇരുവരും ഒരല്പ സമയം വിശ്രമിക്കാനും ഭക്ഷണം കഴിക്കാനുമായി അവിടം തിരഞ്ഞെടുക്കുകയാണ്.

🔸ഒരല്പം വെള്ളം എടുക്കാനായി അവിടെ നിന്നും കൊച്ചുമകൾ പോയ തക്കത്തിന് മല മുകളിലുള്ള ബുദ്ധ പ്രതിമ നോക്കി വൃദ്ധൻ പ്രാർത്ഥിക്കാൻ തുടങ്ങുകയാണ്. വൃദ്ധന് ഇനി അധികം ആയുസ്സില്ല, ഈ ഒരു അവസ്ഥയിൽ താൻ തന്റെ കൊച്ചുമകൾക്കും അവളുടെ ഭാവിക്കും ഒരു ബാധ്യത ആണെന്ന് അയാൾക്ക് നന്നായി അറിയാം. അത് കൊണ്ട് തന്നെ എത്രയും പെട്ടെന്ന് തന്റെ കഥ കഴിയണം എന്നതാണ് അയാളുടെ ആഗ്രഹം, അത് തന്നെയാണ് ആ പ്രതിമയ്ക്ക് മുന്നിൽ നിന്നും അയാൾ അപേക്ഷിക്കുന്നതും. ഇതെല്ലാം കേട്ട് കൊണ്ട് മറ്റൊരു കഥാപാത്രം കൂടി ആ പരിസരത്ത് ഉണ്ടായിരുന്നു, കേന്ദ്ര കഥാപാത്രമായ സുകുയെ.

🔸ചോദ്യോത്തര പരിപാടിക്ക് ഒന്നും കാത്ത് നിൽക്കാതെ സുകുയെ വൃദ്ധന്റെ ആഗ്രഹം അങ് നടത്തി കൊടുക്കുകയാണ്, ആ ബുദ്ധ പ്രതിമയ്ക്ക് മുന്നിൽ വെച്ച് തന്റെ ആയുധത്താൽ വൃദ്ധന്റെ കഥ എന്നെന്നേക്കുമായി അയാൾ അവസാനിപ്പിക്കുകയാണ്. ഇതിന് ശേഷം യാതൊന്നും സംഭവിക്കാത്തത് പോലെ അയാൾ നടന്ന് നീങ്ങുകയാണ്. നമ്മുടെ പ്രധാന കഥാപാത്രമായ റിയൂനോസുകെ സുകുയെ കുറിച്ച് ഒരേകദേശ ചിത്രം ഈ സീനിൽ നിന്ന് തന്നെ ലഭിക്കുന്നുണ്ട്, അയാൾക്ക് വികാരങ്ങളില്ല ഇനി അഥവാ ഉണ്ടെങ്കിൽ തന്നെ അത് പ്രകടിപ്പിക്കാറില്ല.

🔸സുകുയെ എന്ന ഈ കോംപ്ലക്സ് കഥാപാത്രത്തിന്റെ കഥയാണ് സ്വോർഡ്‌ ഓഫ് ഡൂം എന്ന ചിത്രം, പ്രസ്തുത കഥാപാത്രത്തെ അവതരിപ്പിച്ചിരിക്കുന്നത് ജാപ്പനീസ് സിനിമാ ചരിത്രത്തിലെ അതികായന്മാരിൽ ഒരാളായ ടാട്സൂയാ നകദായ് ആണ്, മറ്റൊരു പ്രധാന കഥാപാത്രത്തെ ടോഷിറോ മിഫുനെയും അവതരിപ്പിച്ചിരിക്കുന്നു. ഒരു സ്വോർഡ്‌ ഫൈറ്റ് ഒക്കെ പ്രമേയമായ ചിത്രം എന്ന് തോന്നുമെങ്കിലും അതിനോളം തന്നെ മികച്ചൊരു ക്യാരക്ടർ സ്റ്റഡി കൂടിയാണ് ചിത്രം, പ്രത്യേകിച്ചും പ്രധാന കഥാപാത്രത്തിന്റെ മാനസികാവസ്ഥ കൂടി ഒരു പ്രധാന വിഷയമായി വരുമ്പോൾ.

Verdict : Must Watch

DC Rating : 90/100

583. Hobbs And Shaw (2019)

Director : David Leitch

Genre : Action

Rating : 7.2/10

Country : USA

Duration : 135 Minutes

🔸ഏകദേശം ഒരു പതിനെട്ട് കൊല്ലം മുൻപാണ് ഫാസ്റ്റ് ആൻഡ് ഫ്യുരിയസ് സീരീസിലെ ആദ്യ സിനിമ തിയേറ്ററുകളിൽ എത്തിയത്. ഡിവിഡി മോഷണം അത്യാവശ്യം ബെറ്റിങ്, ഗ്യാങ് വാറുകൾ തുടങ്ങി ഗ്രൗണ്ടഡ് ആയ ഒരു കൂട്ടം യുവതീ യുവാക്കളുടെ കഥ ആയിരുന്നു ചിത്രം. വണ്ടികളോടും വേഗതയോടും മത്സരങ്ങളോടുമുള്ള താല്പര്യം ഇവരെ എല്ലാം ഒരുമിച്ച് നിർത്തുകയും ചെയ്തു. ഇന്ന്, ഇത്രയും വർഷങ്ങൾക്ക് ശേഷം തിരിഞ്ഞ് നോക്കുമ്പോൾ ഫ്രാഞ്ചൈസി ഒരുപാട് മാറി പോയിരിക്കുന്നു. ചെറുകിട മോഷണങ്ങളിൽ നിന്നും മറ്റും സൂപ്പർഹീറോ ടെറിട്ടറിയിലേക്കും ദേശീയ അന്തർ ദേശീയ തലത്തിലേക്കും കഥ മാറിയിരിക്കുന്നു. ഈ മാറ്റത്തിന്റെ ഏറ്റവും മികച്ച ഉദാഹരണമാണ് ഹോബ്സ് ആൻഡ് ഷോ എന്ന ഈ സ്പിൻ ഓഫ് ചിത്രം.

🔸ഇനി പ്രധാനപ്പെട്ട കാര്യം, കാണാൻ പോവുന്ന ചിത്രത്തെ കുറിച്ച് വ്യക്തമായ ധാരണ ഉണ്ടാവണം എന്ന വസ്തുത. സെൻസ്, ലോജിക്, ഗ്രാവിറ്റിവിറ്റി, എന്ത് കൊണ്ട് എന്ന് ചോദിക്കാനുള്ള ആർജവം എല്ലാത്തിനും ഉപരി നൂറ് ശതമാനം കണ്ടീഷനിൽ വർക് ചെയ്യുന്ന ബ്രെയിൻ, എന്ത് ഏതൊക്കെയാണ് എന്ന് തിരിച്ചറിയാൻ ഉള്ള വകതിരിവ്, ഈ വക കാര്യങ്ങൾ എല്ലാം തന്നെ തിയേറ്ററിന് വെളിയിൽ വെച്ച് ഒരു പച്ച മനുഷ്യനായി (തിലകൻ.ജെപിജി) കാണാനിറങ്ങുക എന്നത് വളരെ പ്രധാനമാണ്. ഉദാഹരണത്തിന് ഹെലികോപ്റ്റർ ഒരു സാധാരണ മനുഷ്യൻ കയർ കെട്ടി വലിക്കുന്നത്, നൂറോളം നിലയുള്ള കെട്ടിടത്തിന് മുകളിന്ന് ചാടുന്നതും, വലിയ പരിക്കുകൾ ഇല്ലാതെ രക്ഷപ്പെടുന്നതും, പഴയ മലയാള സിനിമാ നായകന്മാരെ വെല്ലുന്ന രീതിയിൽ വേഷപ്പകർച്ച നടത്തുന്നതും എല്ലാം ചിത്രത്തിന്റെ മർമ്മ പ്രധാന ഭാഗങ്ങളാണ് എന്ന് ഓർക്കണം.

🔸കഥയിലേക്ക് കടക്കുക ആണെങ്കിൽ ലോക ജനസംഖ്യയ്ക്ക് മുഴുവൻ വെല്ലുവിളി ആകുന്ന ഒരു വയറസ് പുതുതായി കണ്ട് പിടിക്കപ്പെടുകയാണ്, ഈ വയറസ് പിടിച്ചെടുക്കാനും സ്വന്തം ആവശ്യങ്ങൾക്ക് ഉപയോഗിക്കാനും അത് വഴി ലോകം തന്നെ തങ്ങളുടെ കൈപ്പടയിൽ ഒതുക്കാനുമായി (സർപ്രൈസ്) എറ്റിയോൺ എന്ന സംഘടനയും അവരുടെ ഏറ്റവും പുതിയ കണ്ടുപിടിത്തം ആയ ബ്രിക്സ്റ്റൻ എന്ന യോദ്ധാവും ഇറങ്ങി തിരിക്കുകയാണ്. ഹ്യുമൻ ഇവലയുഷനിന്റെ അടുത്ത സ്റ്റേജ് ആണ് ബ്രിക്സ്റ്റൻ എന്ന് പലവട്ടം ചിത്രം പറയുന്നുണ്ട്, ഇതിനെ ഒരു സൂപ്പർഹീറോ എന്ന് നിർവചിച്ച് നമുക്ക് കൈ കഴുകാം, അല്ലേലും അങ്ങനൊക്കെ ആണെല്ലോ. വയറസ് ഇപ്പോൾ ഹാറ്റി ഷോ എന്ന രഹസ്യ ഏജന്റിന്റെ കൈവശം ആണ്, സ്വാഭാവികമായും ബ്രിക്സ്റ്റൻ അവർക്ക് പിറകെ വെച്ച് പിടിക്കുകയാണ്.

🔸ഒരു കത്തി ടൈപ്പ് പടം ആണ് ഹോബ്സ് ആൻഡ് ഷോ എന്ന് മുകളിൽ പറഞ്ഞല്ലോ, അത് തന്നെയാണ് ഒരു പരിധി വരെ ചിത്രത്തിന്റെ ശക്തിയും. ഇത് പോലൊരു കഥയ്ക്ക് ഒട്ടും ഗൗരവം നൽകാതെ മൈൻഡ്‌ലെസ് ഫൺ എന്ന വിശേഷണം അത്യാവശ്യം നന്നായി ഉൾക്കൊണ്ട് തന്നെയാണ് ചിത്രം ഒരുക്കിയിരിക്കുന്നത്. ഈ ഒരു കാരണം കൊണ്ട് തന്നെ ബോറടി എന്ന വസ്തുത ലവലേശമില്ല. ഉൾപ്പെട്ടിരിക്കുന്ന താരങ്ങളെയും ഫ്രാഞ്ചയ്‌സും കണക്കിൽ എടുക്കുമ്പോൾ ആക്ഷൻ എന്നത് ഗ്യാരന്റി ചെയ്യാവുന്ന വസ്തുതയാണ്, അതിന് യാതൊരു കുറവും ഇല്ല താനും. ഇതോടൊപ്പം ടൈറ്റിൽ കഥാപാത്രങ്ങളുടെ പ്രകടനവും അവർക്കിടയിലുള്ള കെമിസ്ട്രിയും കൂടി എടുത്ത് പറയേണ്ടി ഇരിക്കുന്നു.

🔸ഇനി മോശം എന്ന് അനുഭവപ്പെട്ട കാര്യങ്ങളിലേക്കാണെങ്കിൽ സംശയം തോന്നിയ കഥയിലെ ചില ഭാഗങ്ങളിലേക്ക് പോവേണ്ടി വരും, പ്രത്യേകിച്ചും മൂന്ന് പ്രധാന കഥാപാത്രങ്ങളും വിമാനത്താവളത്തിൽ എത്തുമ്പോൾ തൊട്ടുള്ള രംഗങ്ങൾ, അതെന്തായാലും പറയാനുള്ള സമയം ഇതല്ല. ഇതിനോടൊപ്പം ശരാശരിയിലോ താഴെയോ ആയി ഒതുങ്ങുന്ന വില്ലൻ കഥാപാത്രവും ഒരു പോരായ്മ ആണ്, രണ്ടാം ഭാഗത്തിന് വേണ്ടി ചില നമ്പറുകൾ ചിത്രം കരുതി വെച്ചിട്ടുണ്ടെങ്കിലും അതും അത്രയ്ക്ക് ഒരു ഇഫക്ട് തന്നില്ല എന്ന് പറയേണ്ടി വരും. നല്ല ഒന്ന് രണ്ട സർപ്രൈസുകൾ ചിത്രത്തിൽ ഉണ്ട്, അതങ്ങനെ തന്നെ നിക്കട്ടെ. ആകെ മൊത്തം വലിയ ബോറടി ഒന്നും ഇല്ലാത്ത കണ്ടാലും കണ്ടില്ലേലും നഷ്ടമില്ലാത്ത ഒരു കൊമെടി ചിത്രമാണ് ഹോബ്ബ്സ് ആൻഡ് ഷോ.

Verdict : Watchable

DC Rating : 60/100

582. Memoirs Of A Murderer (2017)

Director : Yu Irie

Genre : Thriller

Rating : 7/10

Country : Japan

Duration : 118 Minutes

🔸കൺഫെഷൻ ഓഫ് എ മർഡറർ എന്ന കൊറിയൻ ചിത്രത്തിന്റെ റീമേയ്ക്ക് ആണ് ഈ ചിത്രം എന്ന് കേൾക്കുക ഉണ്ടായി, ഭാഗ്യ വശാലോ നിർഭാഗ്യ വശാലോ ഒറിജിനൽ ചിത്രം ഇത് വരെ കണ്ടിട്ടില്ലാത്തതിനാൽ അത്യാവശ്യം നന്നായി തന്നെ ഈ ജാപ്പനീസ് വേർഷൻ ആസ്വദിക്കാനായി. ഒറിജിനൽ ചിത്രത്തിന്റെ സീൻ ബൈ സീൻ കോപ്പി ആണോ അതോ വ്യത്യാസങ്ങൾ ഉണ്ടോ എന്നൊന്നും വലിയ പിടി ഇല്ലാത്തതിനാൽ ആ വിഷയം തല്ക്കാലം അങ്ങട്ട് വിടാം, ആ ചിത്രം ഇഷ്ട്ടപ്പെട്ടവർക്ക് ഇത് ഇഷ്ടപ്പെടുമോ എന്ന കാര്യവും ഉറപ്പില്ല. പിടിച്ചിരുത്തുന്ന നല്ല ത്രില്ലിംഗ് ആയ ഒരു ചിത്രം എന്ന് മാത്രം പറഞ്ഞ് തല്ക്കാലം വിടാം.

🔸ഇനി നമ്മക്ക് കഥയിലേക്ക് കടക്കാം, ഉദ്ദേശം രണ്ട് പതിറ്റാണ്ടുകൾക്ക് മുൻപാണ് ചിത്രത്തിന് ആധാരമായ ചില സംഭവങ്ങൾ അരങ്ങേറുന്നത്. സംഭവങ്ങൾ എന്ന് പറയുമ്പോൾ കുറച്ച് കൊലപാതകങ്ങൾ, അഞ്ചെണ്ണം. ഈ അഞ്ച് കൊലപാതകങ്ങളും ഒരേ രീതിയിലാണ് ചെയ്തിരിക്കുന്നത്, സ്വാഭാവികമായും ഒരു സീരിയൽ കില്ലറാണ് ഇതിന് പിന്നിൽ എന്ന് പറയാം. കഴുത്തിന് പിന്നിൽ നിന്നും കയർ ഉപയോഗിച്ച് വരിഞ്ഞ് മുറുക്കി ശ്വാസം മുട്ടിച്ചാണ് ഈ കൈക്രിയകൾ മുഴുവൻ ചെയ്തിരിക്കുന്നത്, ഇതിനോടൊപ്പം തന്നെ കൊല്ലപ്പെട്ടിരിക്കുന്ന വ്യക്തിയുടെ അടുത്ത ബന്ധുക്കളിൽ ഒരാളെ ഈ പരിപാടിക്ക് സാക്ഷിയാക്കാനും കൊലയാളി മടിച്ചിട്ടില്ല.

🔸ഇതെല്ലാം അരങ്ങേറിയിട്ട് ഏകദേശം ഇരുപത്തി രണ്ട് വർഷങ്ങൾ കഴിഞ്ഞിരിക്കുന്നു. വർഷങ്ങൾക്ക് മുന്നേ അരങ്ങേറിയ സംഭവങ്ങൾ വീണ്ടും പ്രസക്തമായി മാറിയതിന് ഒരു ചെറിയ കാരണം ഉണ്ട്, ഈ കൊലപാതകങ്ങൾക്ക് എല്ലാം കാരണക്കാരൻ താൻ ആണ് എന്നും പറഞ്ഞ് ഒരു പുള്ളി ഇപ്പോൾ കടന്ന് വന്നിരിക്കുകയാണ്, അപ്പോൾ സ്വാഭാവികമായും പുള്ളിയെ അറസ്റ്റ് ചെയ്ത് വിചാരണ ചെയ്ത് കൂടെ എന്ന സംശയം ഉന്നയിക്കാം. ഇവിടെയാണ് കൊറിയൻ നിയമ വ്യവസ്ഥയിലെ ഒരു ചെറിയ ലൂപ്പ് ഹോൾ വളരെ പ്രസക്തമാവുന്നത്, അത് തന്നെയാണ് കൊലയാളി മുതലെടുക്കാൻ ശ്രമിക്കുന്നതും.

🔸ഈ ലൂപ്‌ഹോൾ എന്താണെന്ന് വെച്ചാൽ, ഒരു കൊലപാതകം അരങ്ങേറിയ ശേഷം ഒരു നിശ്ചിത കാലയളവ് കഴിഞ്ഞാൽ, ഈ കാലയളവിനിടെ പ്രതിയെ പിടിക്കുകയോ ആശാവഹമായ രീതിയിൽ പുരോഗതി നേടാൻ കഴിയുകയോ ചെയ്തില്ലാ എങ്കിൽ കേസ് അസാധുവാക്കപ്പെടും, കുറച്ച് കൂടി ലളിതമായി പറഞ്ഞാൽ കുറ്റം ചെയ്ത കുറ്റവാളിക്ക് അതൊരു വിഷയമേ അല്ലാതാവും എന്ന് സാരം. എന്ത് തന്നെ ആയാലും ഈ വിഷയത്തിലും അത് തന്നെയാണ് സംഭവിച്ചിരിക്കുന്നത്, നിശ്ചിത കാലയളവ് കഴിഞ്ഞിരിക്കുന്നു. താൻ ചെയ്ത കുറ്റം എല്ലാം ഏറ്റ് പറഞ്ഞ് സോനേസാകി എന്ന വ്യക്തി മറ നീക്കി പുറത്ത് വന്നിരിക്കുകയാണ്.

🔸ചെയ്ത കുറ്റത്തിന്റെ തീവ്രത എന്ത് തന്നെ ആണെങ്കിലും സോനേസാകിക്ക് കിട്ടുന്നത് ഒരു സെലിബ്രിറ്റി സ്റ്റാറ്റസ് ആണ്, തന്റെ കൊലപാതക പരീക്ഷണങ്ങൾ പുസ്തക രൂപത്തിലാക്കിയ അയാൾക്ക് വൻ പ്രചാരവും അത് വഴി വലിയൊരു ഫോളോയിങ്ങും ലഭിക്കുകയാണ്. അപ്പോഴും വർഷങ്ങൾക്ക് മുൻപ് ഏറ്റ വെട്ടിന്റെ മുറിവ് ഉണങ്ങാത്ത ചിലർ ആ നഗരത്തിൽ ബാക്കി ഉണ്ടായിരുന്നു, തങ്ങളുടെ വേണ്ടപ്പെട്ടവർ കണ്മുന്നിൽ അവസാന ശ്വാസം വലിക്കുന്നത് കാണേണ്ടി വന്നവർ, താൻ അന്വേഷിച്ച് നടന്ന കൊലപാതകി കൈയ്യിലൂടെ ഊർന്നിറങ്ങി പോയത് നിസ്സഹായതയോടെ കണ്ടിരിക്കേണ്ടി വന്ന കേസിന്റെ അന്വേഷകനായ മാകിമുറ. ഈ കഥാപാത്രങ്ങൾക്കൊക്കെ തുടർന്ന് എന്ത് സംഭവിക്കുന്നു എന്നതാണ് ഈ ചിത്രം പിന്നീട് പറയുന്നത്, താല്പര്യം ഉണ്ടെങ്കിൽ കാണുക, വലിയ നഷ്ടം ഒന്നും ഇല്ലെന്ന് മാത്രമല്ല അത്യാവശ്യം ത്രിൽ അടിപ്പിക്കുന്നുമുണ്ട്.

Verdict : Good

DC Rating : 75/100

581. Exiled (2006)

Director : Johnnie To

Genre : Action

Rating : 7.3/10

Country : Hong Kong

Duration : 110 Minutes

🔸നമ്മടെ മലയാളത്തിൽ അമൽ നീരദ് വലിയൊരു കാസ്റ്റും, അത്യാവശ്യം മാസ്സും ഡയലോഗും ഒക്കെ ചേർത്ത് വെച്ച് സൃഷ്ട്ടിച്ച ബാച്ചലർ പാർട്ടി എന്ന ചിത്രത്തിന്റെ ഒറിജിനൽ വേർഷൻ ആണ് ഈ ഹോംഗ് കോങ്ങ് ആക്ഷൻ ചിത്രം. അരങ്ങേറുന്ന സംഭവങ്ങളുടെ എല്ലാം ഔട്ട് ലൈൻ ഏകദേശം ഒന്നാണെങ്കിലും ചെറിയ ചില മാറ്റങ്ങൾ ഉണ്ട് രണ്ട് ചിത്രത്തിലും പ്രത്യേകിച്ചും ട്രീറ്റ്മെന്റിലും അവതരണത്തിലും ഒക്കെ. വ്യക്തിപരമായി ബാച്ചലർ പാർട്ടി എന്ന ചിത്രം അന്ത കാലത്ത് തിയേറ്ററിൽ കണ്ട് ഇഷ്ട്ടപ്പെട്ടതിനാൽ ഈ ഒറിജിനൽ വേർഷൻ കാണുക എന്നത് ആഗ്രഹം തന്നെ ആയിരുന്നു, ഇപ്പോഴാണ് സമയം ഒത്തത് എന്ന് മാത്രം.

🔸ഹോംഗ് കോങ്ങിലെ ഡ്രഗ് മാഫിയകളും, അതിന്റെ ചുവട് പിടിച്ച് നിൽക്കുന്ന ചില കഥാപാത്രങ്ങളും എല്ലാം ചേർന്നതാണ് ഈ ചിത്രം. കഴിഞ്ഞ നൂറ്റാണ്ടിന്റെ അവസാന ദശകത്തിലാണ് ചിത്രം ആരംഭിക്കുന്നത്, നമ്മുടെ പ്രധാന കഥാപാത്രമായ വു പണ്ട് അത്യാവശ്യം കുപ്രസിദ്ധനായ ഒരു ഗ്യാങ്‌സ്റ്റർ ആയിരുന്നു. എന്തിരുന്നാലും ഇപ്പൊ പുള്ളി സമാധാനത്തിന്റെ പാതയിലാണ്, പഴയ രീതികളും ശൈലികളും എല്ലാം മറന്ന് ഭാര്യയും മകളും അടങ്ങുന്ന കുടുംബത്തിലേക്ക് അയാൾ ഒതുങ്ങി കഴിഞ്ഞിരിക്കുന്നു, ഇവരിലേക്കും അതിനോട് അനുബന്ധിച്ചുള്ള ദൈനം ദിന കാര്യങ്ങളിലേക്കുമായി അയാളുടെ ലോകം ചുരുങ്ങിയിരിക്കുന്നു.

🔸വു എന്ന പേര് കാർട്ടലുകൾ പൊതുവെ മറന്ന് തുടങ്ങി എങ്കിലും അത്ര പെട്ടെന്നൊന്നും മാറി നടക്കാൻ താല്പര്യം ഇല്ലാത്ത മറ്റൊരു പുള്ളി ആ പരിസരത്ത് തന്നെ ഉണ്ടായിരുന്നു, ഫെയ് എന്ന അധോലോക രാജാവ്. ഫെയ്ക്കും വുവിനും ഇടയിൽ ഒരു പഴയ കണക്ക് ബാക്കിയുണ്ട്, തന്റെ ആയ കാലത്ത് ഫെയിനെ ഇല്ലാതാക്കാൻ വു ഒന്ന് ശ്രമിച്ചതും അതിൽ ഏറെക്കുറെ വിജയിച്ചതുമാണ്. ആരോ ചെയ്ത പുണ്യം ഒന്ന് കൊണ്ട് മാത്രമാണ് ജീവന്റെ അവസാന ശ്വാസം ഫെയിൽ ബാക്കി കിടന്നത്, അത് എന്ത് തന്നെ ആയാലും മുതലെടുക്കാൻ ഉള്ള വാശിയിലാണ് അയാൾ.

🔸വുവിനെ ഇല്ലാതാക്കാൻ വേണ്ടി ബ്ലെയ്‌സ്, ഫാറ്റ് എന്നീ രണ്ട് അനുയായികളെ ഫെയ് പറഞ്ഞ് വിടുകയാണ്, ഇരുവരും അയാളുടെ വർഷങ്ങളായുള്ള അംഗ രക്ഷകരും വിശ്വസ്തരായ ഭടന്മാരുമാണ്. എന്നാൽ ഈ ദൗത്യത്തിന് അവരെ തിരഞ്ഞെടുത്തതിന് മറ്റൊരു കാരണം കൂടി ഫെയ്ക്ക് പറയാനുണ്ട്. വുവുമായി വളരെ അടുത്ത ബന്ധമാണ് രണ്ട് പേർക്കും ഉള്ളത്, ഒരുമിച്ച് കളിച്ച് വളർന്ന മൂവർക്കും ഇടയിൽ സഹോദര സഹജമായ ഒരു ബോണ്ട് തന്നെ ഉണ്ട് എന്ന് വേണമെങ്കിൽ പറയാം. ഈ ഒരു വസ്തുത കൂടി തന്റെ പദ്ധതിയിലേക്ക് ഉൾക്കൊള്ളിക്കുകയാണ് ഫെയ്.

🔸അങ്ങനെ ബ്ലെയ്‌സും ഫാറ്റും വുവിന്റെ വീട്ട് പടിക്കൽ എത്തുകയാണ്, അവിടെ വുവിന് പകരം അവരെ സ്വീകരിക്കുന്നത് മറ്റ് രണ്ട് കഥാപാത്രങ്ങളാണ്. ടൈ, കാറ്റ് എന്നീ കഥാപാത്രങ്ങൾ. ഇവർക്കും മുകളിൽ സൂചിപ്പിച്ച കഥാപാത്രങ്ങാകുമായി ചെറുതല്ലാത്ത ബന്ധമുണ്ട്, അടുത്ത സുഹൃത്തുക്കൾ അല്ലെങ്കിൽ സഹോദരങ്ങൾ എന്നൊക്കെ വിശേഷിപ്പിക്കാവുന്ന ബന്ധം തന്നെ. അങ്ങനെ നീണ്ട വര്ഷങ്ങളുടെ ഇടവേളയ്ക്ക് ശേഷം അഞ്ച് കഥാപാത്രങ്ങളും ഒരു സ്ഥലത്ത് ഒത്ത് കൂടുകയാണ്, വു ആണ് ഇവരുടെയെല്ലാം ലക്‌ഷ്യം, ചിലർക്ക് സംരക്ഷിക്കാനും മറ്റ് ചിലർക്ക് സംഹരിക്കാനും. അടി, ഇടി, വെടി, പുക എല്ലാം നിറഞ്ഞ നല്ല ഒന്നാം ക്‌ളാസ് ഒരു ആക്ഷൻ ചിത്രം ഇവിടെ നിന്ന് ആരംഭിക്കുകയായി.

Verdict : Very Good

DC Rating : 80/100

580. I Accuse (1919)

Director : Abel Gance

Genre : Drama

Rating : 7.3/10

Country : France

Duration : 166 Minutes

🔸നെപ്പോളിയൻ, ദി വീൽ തുടങ്ങിയ സിനിമകളുടെ പുറകെ പോയി ആബേൽ ഗാൻസ് എന്ന സംവിധായകനെ അറിഞ്ഞ ശേഷമാണ് ഐ അക്യൂസ് അഥവാ ജ്ക്കയുസ് എന്ന ഈ ചിത്രത്തെ പറ്റി കേൾക്കാൻ ഇടയായത്. ചിത്രത്തെ കുറിച്ചുള്ള അന്വേഷണങ്ങൾ എല്ലാം മികച്ച ചിത്രം എന്ന അഭിപ്രായത്തിൽ ചെന്ന് അവസാനിച്ചതിനാലും ഒരു പരിധി വരെ ഈ ചിത്രമാണ് ഗാൻസ് എന്ന സംവിധായകനെ സൃഷ്ട്ടിച്ചത് എന്നൊരു അഭിപ്രായം കേട്ടതിനാലും വേറൊന്നും നോക്കിയില്ല, കാണാൻ തയ്യാറാവുക ആയിരുന്നു. കണ്ട് കഴിഞ്ഞ വേളയിൽ ഈ ചിത്രം നൽകിയത് വേറിട്ടൊരു അനുഭവം തന്നെ ആയിരുന്നു.

🔸ആബേൽ ഗാൻസിന്റെ മുൻപ് പറഞ്ഞ ചിത്രങ്ങളെ പറ്റിയുള്ള ക്രൈറ്റെറിയ ഒക്കെ ഈ ചിത്രത്തിനും ബാധകമാണ്, നിശബ്ദ ചിത്രമാണ് അത് പോലെ നൂറ് വർഷത്തോളം പഴക്കമുണ്ട് എല്ലാം ശെരി തന്നെ, പിന്നെ പറയത്തക്ക ഒരു വ്യത്യാസം പുള്ളിക്കാരന്റെ ഇതുവരെ കണ്ട ചിത്രങ്ങളിൽ ഈ ചിത്രത്തിന് ദൈർഖ്യത്തിൽ ഒരു മയം ഉണ്ട് എന്നതാണ്. ഏകദേശം രണ്ടേമുക്കാൽ മണിക്കൂർ ആണ് ചിത്രത്തിന്റെ ദൈർഖ്യം, ഈ സമയം കൊണ്ട് നല്ലൊരു കഥ പറഞ്ഞ് പോവുന്നുണ്ട് താനും.

🔸ഇനി കഥയിലേക്ക്, നല്ലൊരു രസികൻ സൗഹൃദമാണ് ചിത്രത്തിന്റെ കഥ. ഈ സൗഹൃദം എന്നത് ഒരു യുവതിയുടെ ഭർത്താവും അവളുടെ വിവാഹേതര ബന്ധത്തിലുള്ള കാമുകനും തമ്മിലാണ്. സ്വാഭാവികമായും ഈ വാചകം വായിക്കുമ്പോൾ ഇതെന്ത് എന്നൊക്കെയുള്ള ചോദ്യങ്ങൾ ഉയരാം. മുകളിൽ പറഞ്ഞ രസികൻ അല്ലെങ്കിൽ മനോഹരം എന്നൊക്കെയുള്ള വിശേഷണങ്ങൾ ഈ സൗഹൃദത്തിന് നൽകിയതും ഈ ഒരു വസ്തുത കണക്കിൽ എടുത്ത് തന്നെയാണ്. ഒരുപക്ഷെ നെപോളിയൻ എന്ന ചിത്രത്തിന് ശേഷം സംവിധായകന്റെ ഏറ്റവും മികച്ച ചിത്രം ഇതായിരിക്കണം.

🔸സൗഹൃദം എന്നതിനോളം തന്നെ യുദ്ധത്തിനും ഈ ചിത്രം പ്രാധാന്യം നൽകുന്നുണ്ട്, ഒരുപക്ഷെ ആന്റി വാർ എന്നൊക്കെ പിൽക്കാലത്ത് പേര് കേട്ട സബ് വിഭാഗത്തിന്റെ ആദ്യ വേർഷൻ ഈ ചിത്രം ആയിരിക്കണം. ഒന്നാം ലോക മഹായുദ്ധം പ്രമേയമാക്കിക്കൊണ്ട് പുറത്തിറങ്ങിയ ലോകത്തിലെ തന്നെ ആദ്യ ചിത്രമാണ് ഇത് എന്നും പറഞ്ഞ് കേട്ടു. യുദ്ധം അല്ലെങ്കിൽ യുദ്ധക്കളത്തിലെ മൃഗീയത, ഭീകരത, ഇൻസെയ്നിറ്റി എല്ലാം തന്നെ ഈ ചിത്രത്തിൽ കാണാം. ഇവയെല്ലാം തന്നെ പ്രേക്ഷകനിലേക്ക് ഒട്ടും മിഴിവ് ചോരാതെ എത്തിക്കാൻ സംവിധായകന് കഴിഞ്ഞു എന്നതാണ് പ്ലസ് പോയിന്റ്.

🔸ആബേൽ ഗാൻസ് എന്ന സംവിധായകന്റെ റെയ്ഞ്ച് അല്ലെങ്കിൽ പൊട്ടൻഷ്യൽ ആണ് ഈ ചിത്രം കണ്ട് കഴിയുന്ന വേളയിൽ മനസ്സിൽ എത്തുന്ന ആദ്യത്തെ വസ്തുത, പിന്നീട് ഒരല്പം നഷ്ടബോധവും. നഷ്ടബോധത്തിന്റെ കാരണം വേറൊന്നുമല്ല, സംവിധായകന്റെ അനവധി ചിത്രങ്ങളുടെ പ്രിന്റ് നഷ്ടപെട്ടതോ അല്ലെങ്കിൽ ലഭ്യം അല്ലാത്തവയോ ആണ്, നെപ്പോളിയൻ പോലെയുള്ള ചിത്രങ്ങളുടെ തുടർ ഭാഗങ്ങൾ ആണെങ്കിൽ ഒരുകാലത്തും പ്രാവർത്തികം ആയതുമില്ല. ലഭ്യമായവയിൽ മൂന്ന് മികച്ച ചിത്രങ്ങൾ ഇതും, നാപ്പോളിയനും, ദി വീലും ആണ്, താല്പര്യം തോന്നുന്നെങ്കിൽ കാണുക.

Verdict : Very Good

DC Rating : 85/100