719. Judy (2019)

Director : Rupert Gold

Genre : Biography

Rating : 6.9/10

Country : USA

Duration : 118 Minutes

🔸കഴിഞ്ഞ ഓസ്കർ പുരസ്‌കാര വേദിയിൽ റെനി സെല്വിഗറിന് മികച്ച നടിക്കുള്ള അവാർഡ് ലഭിച്ചപ്പോൾ ആദ്യം തോന്നിയത് നിരാശ ആയിരുന്നു, കാരണം മറ്റൊന്നുമല്ല മാര്യേജ് സ്റ്റോറി എന്ന ചിത്രത്തിലെ പ്രകടനത്തിന് സ്കാർലെറ്റ് ജോഹാൻസണിന് കിട്ടാത്തത് കൊണ്ട് തന്നെ, ആ കഥാപാത്രത്തെ അത്രയും ഇഷ്ടപ്പെട്ടിരുന്നു എന്നതാണ് സത്യം. ജൂഡി എന്ന ചിത്രം കാണുന്നത് വരെ ഈ ഒരു ചിന്ത അതേപടി നിലനിൽക്കുകയും ചെയ്തു, കാണുന്നത് വരെ മാത്രം. കണ്ട് കഴിഞ്ഞ ഈ നിമിഷം ഉറപ്പിച്ച് പറയാം, അർഹിച്ച പുരസ്‌കാരം തന്നെയാണ് സെല്വിഗറിന് ലഭിച്ചത് എന്ന്, അത്രമാത്രം സ്പർശിക്കുന്ന ഒന്നാണ് അവരുടെ പ്രകടനം.

🔸കുറച്ച് വർഷങ്ങൾക്ക് മുൻപ്, അല്ല പതിറ്റാണ്ടുകൾക്ക് മുൻപ് അമേരിക്കയിൽ ജൂഡി ഗാർലാൻഡ് എന്നൊരു അഭിനേത്രി ജീവിച്ചിരുന്നു. നടി എന്ന് മാത്രമായി അവരെ വിശേഷിപ്പിക്കുന്നത് സത്യത്തിൽ ശെരിയല്ല കാരണം അഭിനയം, ആലാപനം, നൃത്തം, റെക്കോർഡിങ് തുടങ്ങിയ മേഖലയിൽ എല്ലാം അറിവുള്ള, കഴിവ് തെളിയിച്ച ഒരു ബഹുമുഖ പ്രതിഭ ആയിരുന്നു അവർ. കൈവെച്ച മേഖലയിൽ എല്ലാം വിജയങ്ങൾ കരസ്ഥമാക്കിയ അവർക്ക് സ്വന്തമായി വലിയൊരു ആരാധക വൃന്ദവും ഉണ്ടായിരുന്നു, ഈ ജൂഡി ഗാർലണ്ടിന്റെ കഥയാണ് പ്രസ്തുത ചിത്രം പറയുന്നത്.

🔸വളരെ ചെറുപ്പത്തിൽ തന്നെ പ്രശസ്തിയുടെ പടവുകൾ നടന്ന് കേറിയവളാണ് ജൂഡി, ഉദ്ദേശം പതിനഞ്ചോ പതിനാറോ വയസ്സ് ഉള്ളപ്പോഴാണ് മനോഹരമായ ആ ശബ്ദവും, അതിനൊത്ത രീതിയിലുള്ള ആലാപന കഴിവും ലോകം തിരിച്ചറിയുന്നത്. ഇതിന് ശേഷം തന്റെ ജീവിതം അവസാനിക്കുന്നത് വരെ അതായത് മൂന്ന് പതിറ്റാണ്ടോളം ഒരു തരത്തിൽ സെലിബ്രിറ്റി എന്ന മായിക ലോകത്ത് ആ ഒരു ലഹരി നുണഞ്ഞ് കൊണ്ട് അവർ അഭിരമിക്കുക ആയിരുന്നു എന്ന് പറയാം. ഇത് തന്നെ ആയിരുന്നു ജൂഡിയുടെ വീഴ്ചയുടെ മൂല കാരണവും, ഈ ലഹരികൾ തന്നെ.

🔸ഡ്രഗ്സിനോടും മദ്യം ഉൾപ്പെടെ ഉള്ള മറ്റ് ലഹരി വസ്തുക്കളോടും ഉള്ള ജൂഡിയുടെ ആസക്തി എല്ലാ കാലത്തും ഒരു പ്രശനം തന്നെ ആയിരുന്നു. തുടക്ക കാലത്ത് ഇത് സുഹൃത്തുക്കളോടൊപ്പം ഉള്ള ആഘോഷ വേളകളിൽ മാത്രമായിരുന്നു എങ്കിൽ പോകെ പോകെ ജൂഡിക്ക് ഇതൊന്നും ഇല്ലാതെ പറ്റില്ലാ എന്നായി, ആസക്തി എന്നത് പതിയെ അവരെ കാർന്ന് തിന്ന് തുടങ്ങുകയായിരുന്നു. ഏറ്റെടുത്ത പല ജോലികളും കോൺട്രാക്ടുകളും അവർക്ക് പൂർത്തിയാക്കാൻ കഴിയാതെ വരുന്നതോടെ ഔദ്യോഗിക ജീവിതം ആകെ താറുമാറായി തീരുകയാണ്.

🔸ജൂഡിയുടെ വ്യക്തിജീവിതത്തെ കുറിച്ച് പറയാതിരിക്കുന്നതാവും കുറച്ച് കൂടി നല്ലത്, പരാജയം എന്നതിന്റെയൊക്കെ എക്സ്ട്രീം പോയിന്റാണ് അത്. കഴിവ് ഉണ്ടായിട്ടും അത് കളഞ്ഞ് കുളിക്കുക എന്നത് തികച്ചും ദൗർഭാഗ്യകരമായ അവസ്ഥയാണ്, ആ വഴിയിലേക്കാണ് ജൂഡി പോയികൊണ്ടിരിക്കുന്നതും. എന്നാൽ പ്രതീക്ഷിച്ച പോലെ ദുരന്തമായി ആ ജീവിതം കലാശിക്കുമോ അതോ ഒരു തിരിച്ചുവരവിന് ഉള്ള, തിരിച്ചറിവിന് ഉള്ള സാധ്യത ബാക്കിയുണ്ടോ എന്നതാണ് ചിത്രം ഉന്നയിക്കുന്ന ചോദ്യം. നല്ലൊരു ചിത്രമാണ്, ശക്തമായ പ്രകടനങ്ങളാണ്, കാണാൻ ശ്രമിക്കുക.

Verdict : Good

DC Rating : 75/100

718. Harriet (2019)

Director : Kasi Lemmons

Genre : Biography

Rating : 6.4/10

Country : USA

Duration : 126 Minutes

🔸ഹാരിയേറ്റ് ടബ്മന്റെ ജീവിതത്തെ ഐതിഹാസികം എന്നതിൽ കുറഞ്ഞ ഒരു വാക്കിനാൽ വിശേഷിപ്പിക്കാൻ കഴിയില്ല. അടിമ സമ്പ്രദായവും റേസിസവും അവഗണനയും എല്ലാം കൊടി കുത്തി വാണ ഒരു കാലഘട്ടത്തിൽ നിന്നും വിപ്ലവകാരിയായി ഉയർന്ന് വന്ന് കറുത്ത വംശജരുടെ വിമോചനത്തിന്റെ പ്രതീകമായി മാറിയ അവർ ആ വിശേഷണം അർഹിക്കുന്നുണ്ട് എന്നതാണ് സത്യം. ഇത്രയും പ്രാധാന്യം അർഹിക്കുന്ന ഒരു വ്യക്തിയുടെ ജീവിതം സിനിമാ രൂപം സ്വീകരിക്കാൻ കാലം ഇത്ര പിടിച്ചു എന്നതാണ് കൗതുകകരം.

🔸പത്തൊൻപതാം നൂറ്റാണ്ടിന്റെ ആദ്യ പകുതി, അതായത് എബ്രഹാം ലിങ്കണിനും തുല്യതാ പോരാട്ടത്തിനും നിയമത്തിനും ആഭ്യന്തര യുദ്ധത്തിനും എല്ലാം ഒരുപാട് മുൻപാണ് ചിത്രത്തിന്റെ കഥ ആരംഭിക്കുന്നത്. അമേരിക്കയുടെ തന്നെ വടക്ക് പ്രവിശ്യകളെ അപേക്ഷിച്ച് റേസിസം അതിന്റെ പീക്കിൽ നിന്ന സ്ഥലം ആയിരുന്നു തെക്കുള്ള സംസ്ഥാനങ്ങൾ. മറ്റ് ഭാഗങ്ങളിലെ ഫ്രീ മാൻ റൂളിനോ പേപ്പറുകൾക്കോ പോലും അവിടെ പുല്ല് വിലയായിരുന്നു എന്നതാണ് സത്യം, വളരെ ലളിതമായി പറഞ്ഞാൽ മേലാളൻ കല്പിക്കും കീഴാളൻ അനുസരിക്കും, ഇല്ലെങ്കിൽ തല്ലാം കൊല്ലാം, ആരും ചോദിയ്ക്കാൻ വരില്ല.

🔸ഈ തെക്ക് ഭാഗത്തുള്ള ബ്രോഡസ് പ്ലാന്റേഷൻ ആണ് നമ്മുടെ കഥാ പശ്ചാത്തലം. കറുത്ത വംശജരോട് വെറുപ്പും അവഗണനയും വെച്ച് പുലർത്തുന്നവരാണ് പ്ലാന്റേഷൻ ഉടമകൾ, ഇവർക്ക് കീഴിൽ ജോലി ചെയ്യുന്നവരാണ് നമ്മുടെ കേന്ദ്ര കഥാപാത്രമായ അരാമിന്റ മിന്റി റോസും അവളുടെ കുടുംബവും. കാലാ കാലങ്ങളായി അവിടെ ജോലി ചെയ്യുന്ന മിന്റിയുടെ ഭർത്താവ് ജോൺ സത്യത്തിൽ നിയമപ്രകാരം സ്വാതന്ത്ര്യം അർഹിക്കുന്ന ഒരു വ്യക്തിയാണ്, എന്നാൽ അവസ്ഥ കൊണ്ടും ക്രൂരനായ മുതലാളിയുടെ മനോഭാവം കൊണ്ടും അവിടെ തുടരേണ്ടി വരുന്നു എന്ന് മാത്രം.

🔸ബ്രോഡാസ് പ്ലാന്റേഷനിൽ ജോലി ചെയ്യുന്ന കറുത്ത വംശജരുടെ അവസ്ഥ സത്യത്തിൽ പരിതാപകരമാണ്, കഠിനമായ ജോലിയും അതിന് പുറമെയുള്ള അപമാനവും അവഹേളനവും എല്ലാം അവരെ നികൃഷ്ട ജീവികളേക്കാൾ താഴേയ്ക്ക് തള്ളി മാറ്റിയിരിക്കുന്നു, ഏറ്റവും അപകടകരമായ അവസ്ഥ തങ്ങൾ ഇത് അർഹിക്കുന്നുണ്ട് അല്ലെങ്കിൽ ഇതാണ് തങ്ങൾക്ക് വിധിച്ച ജീവിതം എന്ന നിലയിലേക്ക് അവർ കാര്യങ്ങൾ ആസപ്റ്റ് ചെയ്തിട്ടുണ്ട് എന്നതാണ്. എന്ത് തന്നെ ആയാലും നമ്മുടെ നായികാ കഥാപാത്രം അങ്ങനെ തീരുമാനിച്ചിട്ടില്ല, എന്ന് മാത്രമല്ല തങ്ങളും അവരെപ്പോലെ ചോരയും നീരും ജീവനുമുള്ള മനുഷ്യരാണ് എന്ന വ്യക്തമായ തിരിച്ചറിവ് അവൾക്കുണ്ട്.

🔸ഇങ്ങനെ കേവലമൊരു പ്ലാന്റേഷൻ തൊഴിലാളി ആയ അരാമിന്റയിൽ നിന്നും കറുത്ത വംശജരുടെ പ്രതീക്ഷയുടെ ബിംബമായ ഹാരിയേറ്റിലേക്ക് ഉള്ള അവരുടെ സഞ്ചാരമാണ് ഈ ചിത്രത്തിന്റെ പ്രമേയം. ഉദ്ദേശം നാല് വർഷത്തോളമായി ഡെവെലപ്‌മെന്റിൽ കിടന്ന ശേഷമാണ് ചിത്രം കഴിഞ്ഞ വർഷം വെളിച്ചം കണ്ടത്, പല പുരസ്‌കാര ഫെസ്റ്റിവൽ വേദികളിലും പരാമർശിക്കപ്പെട്ടിട്ടുള്ള ചിത്രത്തിന്റെ നട്ടെല്ല് എന്നത് നായികയായി എത്തിയ സിന്തിയ ഏവിയോയുടെ പ്രകടനവും നല്ല ബാക്ക്ഗ്രൗണ്ട് സ്കോറും കിടിലൻ ഛായാഗ്രഹണവും എല്ലാം തന്നെയാണ്. ഒരുപരിധി വരെ പലയിടത്തും അനുഭവപ്പെട്ട കെട്ടുറപ്പ് ഇല്ലായ്മയെ ഈ മൂന്ന് കാര്യങ്ങളും ആവും വിധം പരിഹരിക്കുന്നുണ്ട്, ആകെ മൊത്തം കാണുന്നതിൽ നഷ്ടം ഇല്ലാത്ത ഒരു ചെറിയ നല്ല ചിത്രമാണ് ഹാരിയേറ്റ്.

Verdict : Watchable

DC Rating : 68/100

717. The Killing (1956)

Director : Stanley Kubrick

Genre : Neo Noir

Rating : 8/10

Country : USA

Duration : 84 Minutes

🔸സ്റ്റാൻലി കുബ്രിക്കിന്റെ മികച്ച ചിത്രങ്ങളുടെ ഒരു ലിസ്റ്റ് എടുക്കുക ആണെങ്കിൽ, അത് ആര് തയാറാക്കിയതോ ആയിക്കോട്ടെ, അവയിൽ ഒന്നിലും കില്ലിംഗ് എന്ന അദ്ദേഹത്തിന്റെ ഈ ആദ്യകാല ചിത്രം കാണാൻ കഴിഞ്ഞേക്കില്ല. ഒരുപക്ഷെ മറ്റ് ചിത്രങ്ങൾ നിലവാരത്തിലും മറ്റും അത്രയ്ക്ക് ഉയരത്തിൽ നിൽക്കുന്നതിനാൽ ആവാം, പക്ഷെ ഈ കാരണങ്ങൾ ഒന്നും കില്ലിംഗ് എന്ന ചിത്രത്തെ ബാധിക്കുന്നെ ഇല്ല എന്നതാണ് സത്യം. പഴക്കം എന്നത് തീർത്തും ബാധിച്ചിട്ടില്ലാത്ത, വിഖ്യാതനായ സംവിധായകന്റെ ഏറ്റവും മികച്ച വർക്കുകളിൽ ഒന്നാണ് ദി കില്ലിംഗ്.

🔸കുബ്രിക്കിന്റെ കരിയറിലെ ആദ്യ മെച്വർഡ് ഫീച്ചർ ഫിലിം ആയാണ് കില്ലിംഗ് വിലയിരുത്തപ്പെടുന്നത്, ഒരു റോബ്ബറി ആണ് ചിത്രത്തിന്റെ ഫോക്കൽ പോയിന്റ്. ജോണി ക്ലേ എന്ന നമ്മുടെ നായക കഥാപാത്രം കക്കൽ, മുക്കൽ, പിടിച്ചുപറി എന്നീ കോഴ്‌സുകളിൽ ബിരുദവും ബിരുദാനന്തര ബിരുദവും നേടിയ വ്യക്തിയാണ്, തന്റെ പ്രവർത്തി മണ്ഡലത്തിൽ വർഷങ്ങളുടെ അനുഭവ പരിചയം അയാൾക്ക് കൈമുതലായി ഉണ്ട് എന്ന് തന്നെ പറയാം. അതെന്തായാലും വർഷം ഇത്രയും കഴിഞ്ഞ ഈ വേളയിൽ പുള്ളിക്ക് ഒരു മടുപ്പ് അനുഭവപ്പെടുകയാണ്, എല്ലാം നിർത്തിയാലോ എന്നൊരു തോന്നൽ.

🔸ഈ തോന്നലിന് പിന്നിൽ ഒരു കാരണമുണ്ട്, ക്‌ളേ കുറച്ച് നാളുകളായി ഫെയ് എന്ന യുവതിയുമായി പ്രണയത്തിലാണ്. അനിശ്ചിതത്വങ്ങൾ നിറഞ്ഞ ഈ ജീവിതം ഒഴിവാക്കി ഇനി അങ്ങോട്ട് ഫെയിയെയും കെട്ടി ആരും അറിയാത്ത, തിരിച്ചറിയാത്ത ഒരു നാട്ടിലേക്ക് ചെന്ന് പുതിയൊരു ജീവിതം ആരംഭിക്കണം എന്നാണ് അയാളുടെ ആഗ്രഹം. പക്ഷെ അപ്പോഴും ഒരു ചെറിയ പ്രശനം ബാക്കി കിടക്കുന്നു, മറ്റൊന്നുമല്ല മുന്നോട്ടുള്ള ജീവിതത്തിന് പണം ആവശ്യമാണ്, അതെങ്ങനെ സമ്പാദിക്കും എന്ന വളരെ ന്യായമായ, പ്രസക്തമായ പ്രശനം.

🔸ഈയൊരു പ്രശനം അങ്ങോട്ട് പരിഹരിക്കാൻ വേണ്ടിയിട്ടാണ് ക്ലേ ഒരു അവസാന കവർച്ചയ്ക്ക് വേണ്ടി തുനിഞ്ഞിറങ്ങുന്നത്, പ്ലാൻ ലളിതമാണ് എന്നാൽ പിഴവുകൾ ഏതും ഇല്ലാതെ പൂർത്തിയാക്കാൻ കാഠിന്യം ഏറിയതും. നഗരത്തിൽ വളരെ പ്രശസ്തമായ ഒരു കുതിര പന്തയ മത്സരം നടക്കാൻ പോവുകയാണ്, നാനാഭാഗത്ത് നിന്നും വലിയൊരു ശതമാനം ആളുകൾ സ്വാഭാവികമായും അവിടെ ഉണ്ടാവും, എന്ന് മാത്രമല്ല അന്നേദിവസം അവിടെ ഒഴുകാൻ പോവുന്നത് വലിയൊരു തുകയാണ്. ഈ തുക കൈക്കലാക്കാൻ കഴിഞ്ഞാൽ പിന്നീടങ്ങോട്ടുള്ള ജീവിതത്തിൽ ഒരു പ്രശ്നവും ഉണ്ടാവില്ല എന്നയാൾ മനസിലാക്കുന്നു.

🔸ഇത്രയും ദുർഘടമായ ഒരു പ്ലാൻ പിഴവുകൾ ഏതും ഇല്ലാതെ പ്രാവർത്തികം ആക്കണം എങ്കിൽ അതിന്റേതായ ബുദ്ധിമുട്ടുകൾ ഉണ്ട്, ആദ്യമായി നല്ലൊരു പദ്ധതി വേണം, നല്ല തയാറെടുപ്പുകൾ വേണം, അതൊന്നും പോരെങ്കിൽ ശക്തരായ, എന്ത് പ്രശനം വന്നാലും ഉരുക്ക് പോലെ നില്ക്കാൻ ശേഷിയുള്ള കൂട്ടാളികൾ വേണം, അവർക്കിടയിൽ പരസ്പര വിശ്വാസവും വേണം. അങ്ങനെ ഇതെല്ലാം നേടിയെടുക്കാനായി ക്ലേ ഇറങ്ങി തിരിക്കുകയാണ്, തുടർന്ന് എന്തെല്ലാമാണ് സംഭവിക്കുന്നത് എന്ന് ചിത്രം പറയും. നല്ലൊരു ചിത്രമാണ്, തീർച്ചയായും കാണാൻ ശ്രമിക്കുക.

Verdict : Very Good

DC Rating : 84/100

716. Beanpole (2019)

Director : Kantemir Balagov

Genre : Drama

Rating : 7.2/10

Country : Russia

Duration : 138 Minutes

🔸രണ്ടാം ലോകമഹായുദ്ധത്തെ പ്രമേയമാക്കി അനവധി സിനിമകൾ ലോകത്ത് പുറത്തിറങ്ങിയിട്ടുണ്ട്, സത്യത്തിൽ ഇത്രയും സിനിമകൾക്ക് കാരണമായ ഒരു ചരിത്ര സംഭവം മറ്റൊന്നില്ല എന്ന് തന്നെ പറയാം. ബീൻപോൾ എന്ന ചിത്രത്തിന്റെ പ്രമേയവും രണ്ടാം ലോക മഹായുദ്ധം തന്നെയാണ്, പിന്നെ വ്യത്യാസം എന്താണെന്ന് വെച്ചാൽ ഇവിടെ പ്രാധാന്യം യുദ്ധ മുഖത്തല്ല മറിച്ച് യുദ്ധാനന്തരം ഉള്ള സംഭവങ്ങൾക്കാണ് എന്നതാണ്. യുദ്ധത്തിന് ശേഷം മാനസികമായും ശാരീരികമായും തളർന്ന ഒരു കൂട്ടം കഥാപാത്രങ്ങളെയാണ് കാണാൻ കഴിഞ്ഞേക്കുക, ഈ ചിത്രത്തിൽ.

🔸ഒരു രീതിയിൽ അല്ലെങ്കിൽ മറ്റൊരു രീതിയിൽ പങ്കെടുത്തവർക്കെല്ലാം നഷ്ടങ്ങൾ സമ്മാനിച്ച് കൊണ്ടാണ് രണ്ടാം ലോകമഹായുദ്ധം അവസാനിച്ചത്, അവസ്ഥയും സ്ഥിതിയും ഭീകരം ആയിരുന്നു എന്ന് തന്നെ പറയാം. റഷ്യയിലെ നഗരപ്രദേശങ്ങളിൽ ഒന്നിലെ ആശുപത്രിയിലാണ് ചിത്രം ആരംഭിക്കുന്നത്, ആകെ ഒരു ബഹള മയമാണ് അവിടം. കൃത്യമായ തോതിൽ കൊടുക്കാൻ ഭക്ഷണമോ മരുന്നോ അവശ്യ സാമഗ്രികളോ ഇല്ലാതെ മറ്റൊരു തരത്തിൽ ഒരു യുദ്ധഭൂമിയായി മാറിയിട്ടുണ്ട് ആ ആശുപത്രി, അതിജീവനത്തിനായുള്ള യുദ്ധം.

🔸യുദ്ധക്കളത്തിൽ വെച്ച് മുറിവുകളേറ്റ, പഴയ ജീവിതത്തിലേക്ക് ഇനി ഒരു മടക്കമില്ല എന്ന കഠിനമായ യാഥാർഥ്യത്തോട് പൊരുത്തപ്പെടാൻ ബുദ്ധിമുട്ടുന്ന പട്ടാളക്കാർ ഒരു വശത്ത്, തങ്ങളുടെ വേണ്ടപ്പെട്ടവരെയും വസ്തു വകകളെയും നഷ്ട്ടപ്പെട്ട ഓർമയിൽ നൊന്ത് ജീവിക്കുന്ന സാധാരണക്കാരായ ജനങ്ങൾ മറ്റൊരു ഭാഗത്ത്. ഈ രണ്ടും കൂട്ടർക്കും ഇടയിലാണ് നമ്മുടെ നായികാ കഥാപാത്രം ജോലി നോക്കുന്നത്, അവർ പ്രസ്തുത ആശുപത്രിയിലെ ഒരു നേഴ്‌സ് ആണ്. ഇയ എന്നാണ് ഈ കഥാപാത്രത്തിന്റെ പേര്, മുഖത്ത് നിർജീവമായ ഭാവം ആണെങ്കിലും ആവശ്യത്തിൽ അധികമുള്ള ഉയരവും മറ്റും അവരെ മറ്റ് നേഴ്‌സുമാരിൽ നിന്നും മാറ്റി നിർത്തുന്നുണ്ട്.

🔸ഇങ്ങനെ വ്യത്യസ്തമായ ആകാരം കൊണ്ടുതന്നെ അവർക്ക് ദിൽഡ എന്നൊരു വിളിപ്പേരുണ്ട്, ദിൽഡ യുദ്ധത്തിന്റെ ഭീകരത അതിന്റെ എക്സ്ട്രീം കേസ് സിനാറിയോയിൽ തന്നെ അതിജീവിച്ച ആളാണ്, കാണാനായി ഒന്നും ബാക്കിയില്ല എന്നൊക്കെ പറയാം, ഒരുപക്ഷെ അത് തന്നെ ആയിരിക്കണം അവരുടെ ഈ നിർജീവാവസ്ഥതയുടെ കാരണവും. ഈ യുദ്ധകാലത്ത് ദിൽദയും മാഷാ എന്ന സഹപ്രവർത്തകയും തമ്മിൽ ഒരു സൗഹൃദം ഉടലെടുക്കുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ പ്ലോട്ട് പോയിന്റ്.

🔸ഈ ഒരു സൗഹൃദം മാറ്റി നിർത്തിയാൽ ദിൽദയ്ക്ക് പിന്നെ വേണ്ടപ്പെട്ടത് എന്ന് പറയാനായി ബാക്കി ഉള്ളത് ആറ് വയസുകാരനായ മകൻ പാഷകയാണ്, ഈ മകൻ കഥാപാത്രത്തിന് ചിത്രത്തിന്റെ കഥാഗതിയിൽ വളരെ പ്രാധാന്യമുണ്ട് എന്ന് പറയാം. ഒരു കാലഘട്ടത്തെ അതിന്റെതായ മൂഡിൽ അവതരിപ്പിച്ചു എന്നത് ബീൻപോളിന്റെ വലിയൊരു പ്രത്യേകതയാണ്, ആ അന്തരീക്ഷം പോലും ഭീകരം ആയിരുന്നു. ഒരു ഡ്രാമ ചിത്രമാണ് ബിൻപോൾ, എല്ലാവർക്കും പറ്റിയ ഒന്നേ അല്ല, അത്യാവശ്യം സ്ലോ ആയാണ് കഥ പുരോഗമിക്കുന്നതും, അതിനാൽ തന്നെ എല്ലാവർക്കും നിർദ്ദേശിക്കുന്നുമില്ല, പേഴ്സണലി ഇഷ്ട്ടപ്പെട്ടു, താല്പര്യം ഉണ്ടെങ്കിൽ പരീക്ഷിക്കാം.

Verdict : Good

DC Rating : 78/100

715. Invasion Of The Body Snatchers (1978)

Director : Philip Kaufman

Genre : Horror

Rating : 7.4/10

Country : USA

Duration : 117 Minutes

🔸"നീ എന്നെ കണ്ട് മുട്ടിയത് എന്റെ ജീവിതത്തിലെ വിചിത്രമായ ഒരു സമയത്താണ്" എന്നൊരു ഡയലോഗ് ഉണ്ട്, ഫൈറ്റ് ക്ലബ്ബ് എന്ന ചിത്രത്തിൽ, ദി ഇൻവേഷൻ ഓഫ് ബോഡി സ്നാച്ചേർസ് എന്ന ചിത്രത്തിന് ഈ സംഭാഷണം നന്നായി ചേരും. ഭ്രാന്തമായ ഒരു സിനിമയാണ് ഇത്, ഈ ചിത്രം പുറത്തിറങ്ങിയതും അമേരിക്കയെ സംബന്ധിച്ചിടത്തോളം ഭ്രാന്തമായ ഒരു പിരീഡിലും, അതായത് കൊറിയൻ യുദ്ധ നാണക്കേടിന് ശേഷവും ഹിപ്പി സംസ്കാരത്തിലേക്ക് കാൽ എടുത്ത് വെക്കുന്നതിനും മുൻപുള്ള പിരിയഡിൽ. ചിത്രം ഒരു പരാജയം ആയതിന്റെ കാരണം ഈയൊരു ബാക്ക്ഗ്രൗണ്ട് ആണ് എന്ന് വായിച്ചിട്ടുണ്ട്.

🔸അത്യാവശ്യം ഡിസ്റ്റർബിങ് ആണ് ഈ ഫിലിപ്പ് കോഫ്മാൻ ചിത്രം. മനുഷ്യന്റെ മുഖം ഉള്ള മ്യുട്ടിലെറ്റ് ചെയ്യപ്പെട്ട നായയിൽ തുടങ്ങി വിചിത്രം എന്നൊക്കെ വിശേഷിപ്പിക്കാവുന്ന പ്ലോട്ട് അടക്കം കണ്ട് കഴിഞ്ഞാൽ കുറച്ച് സമയത്തേക്ക് ഹാങ്ങോവർ നൽകാനുള്ള വെടിമരുന്ന് എല്ലാം ചിത്രത്തിലുണ്ട്. അമ്പതുകളിൽ ഇറങ്ങിയ ഇതേ തീമിലുള്ള ചിത്രത്തിന്റെ റീമേയ്ക്ക് ആണെങ്കിൽ കൂടിയും വേറിട്ട് നിൽക്കാനുള്ള വക കഥയിൽ അടക്കം എല്ലാ ഡിപ്പാർട്മെന്റിലും ഉണ്ട് താനും, ഒരല്പം എക്സ്ട്രാ എന്ന് പറയാം.

🔸കഥയിലേക്ക് കടക്കുക ആണെങ്കിൽ പേര് സൂചിപ്പിക്കുന്നത് പോലെ തന്നെ ഒരു ഏലിയൻ ഇൻവേഷൻ ചിത്രമാണ്, മറ്റൊരു പ്ലാനെറ്റിൽ നിന്നും ഭൂമിയിലേക്ക് വരികയാണ് ഒരു കൂട്ടം വിചിത്ര ജീവികൾ. ഭൂമിയിൽ എത്തിയ ഇവർ ഒരു പോഡിന്റെ രൂപത്തിലാണ് നിലനിൽക്കുന്നത്, പിന്നെ അപകടകരമായ വസ്തുത എന്താണെന്നാൽ ഇവർക്ക് മനുഷ്യശരീരത്തിലേക്ക് ചേക്കേറാൻ കഴിയും എന്നതും, അതാണ് അവർക്ക് താല്പര്യം എന്നതുമാണ്. ഈ പ്രക്രിയ നടക്കുമ്പോൾ സ്വാഭാവികമായും ആ മനുഷ്യൻ കൊല്ലപ്പെടും എന്ന് പ്രത്യേകം പറയേണ്ടതില്ലല്ലോ.

🔸മനുഷ്യ ശരീരത്തിൽ ഇവ കേറി പറ്റിയാൽ പ്രഥമ ദൃഷ്ട്യാ വലിയ മാറ്റം ഒന്നും കണ്ടേക്കില്ല, പക്ഷെ ഇവയ്ക്ക് മനുഷ്യനെ പോലെ വികാരങ്ങൾ പ്രകടിപ്പിക്കാൻ കഴിയില്ല എന്നതാണ് സത്യം, ശവത്തിന് സമാനമായ ഒരു നിര്ജീവാവസ്ഥ ആയിരിക്കും പിന്നീടങ്ങോട്ട്. അപ്പൊ പറഞ്ഞ് വന്നത് ഒരു വയറസ് ഔട്ട്‍ബ്രെയ്ക്ക് പോലെ ഈ ജീവികൾ അങ്ങോട്ട് പടർന്ന് കയറുകയാണ്, ഒരു ടൗൺ മുഴുവനായി ഇവ കീഴ്പെടുത്തി കഴിഞ്ഞു എന്ന് തന്നെ പറയാം, ആര് ആരൊക്കെയാണ് ബാക്കി നിൽക്കുന്നത് എന്നൊന്നും പറയാൻ കഴിയാത്ത അവസ്ഥ. ഈ ഒരു അവസ്ഥയിലേക്കാണ് നമ്മുടെ പ്രധാന കഥാപാത്രങ്ങൾ ഫാക്ടർ ആയി വരുന്നത്.

🔸പ്രതീക്ഷയ്ക്ക് വക ലവലേശം ഇല്ലാത്തത് എന്ന് വിശേഷിപ്പിക്കാം ഈ ചിത്രത്തെ. അത്രമേൽ ഡാർക്ക് ആയ, ഭീകരമായ പ്രത്യാഘാതങ്ങൾ ഉള്ളൊരു കഥയാണ് ചിത്രത്തിന്റേത്. ആദ്യം പുറത്തിറങ്ങിയ ചിത്രം കാണാൻ കഴിഞ്ഞിട്ടില്ല ഇതുവരെ, ഈ ചിത്രം വെച്ച് നോക്കുമ്പോൾ കുറച്ച് കൂടി ഭീകരമാണ് അത് എന്നൊരു അഭിപ്രായമാണ് കേട്ടത്, തല്ക്കാലം കാണാൻ മുതിരുന്നുമില്ല. ഹോണ്റ്റിംഗ് ആയ അനവധി രംഗങ്ങൾ ഉണ്ട് ചിത്രത്തിൽ, പ്രത്യേകിച്ചും ക്ലൈമാക്സ് ഒക്കെ നൽകുന്ന ഒരു തരിപ്പ് ഉണ്ട്, അതൊക്കെ കണ്ട് തന്നെ അറിയാൻ ശ്രമിക്കുക.

Verdict : Very Good

DC Rating : 82/100

714. Aaranya Kaandam (2010)

Director : Thiagarajan Kumararaja

Genre : Neo Noir

Rating : 8.6/10

Country : India

Duration : 153 Minutes

🔸സംവിധാനം ചെയ്തവ വെറും രണ്ടേ രണ്ട് ചിത്രങ്ങൾ, ഇവയ്ക്കിടയിൽ ഉദ്ദേശം എട്ട് വര്ഷങ്ങളുടെ ഇടവേള, പറഞ്ഞ് വന്നത് ത്യാഗരാജ കുമാരരാജ എന്ന തമിഴ് ചലച്ചിത്ര സംവിധായകനെ കുറിച്ചാണ്. ഇദ്ദേഹത്തിന്റെ സൂപ്പർ ഡീലക്സ് എന്ന കഴിഞ്ഞ വർഷം പുറത്തിറങ്ങിയ ആന്തോളജി ചിത്രം അത്യാവശ്യം ഓളം ഉണ്ടാക്കിയതാണ്, പക്ഷെ ടിയാന്റെ ആദ്യ ചിത്രമായ ആരണ്യകാണ്ഡം ഇന്നും പലർക്കും ഒട്ട് അത്ര പരിചിതമല്ല. പേഴ്സണലി സൂപ്പർ ഡീലക്സിന് മുകളിൽ വെക്കാൻ കഴിവുള്ള, അർഹതയുള്ള ഒരു ചിത്രമാണ് നമുക്ക് അത്ര പരിചിതമല്ലാത്ത നിയോ നോയിർ വിഭാഗത്തിൽ പെട്ട ആരണ്യകാണ്ഡം.

🔸ജാക്കി ഷ്‌റോഫ് അവതരിപ്പിച്ച സിങ്കം പെരുമാൾ എന്ന കഥാപാത്രമാണ് ചിത്രത്തിലെ ഫോക്കൽ പോയിന്റുകളിൽ ഒന്ന്, ആളൊരു സട കൊഴിഞ്ഞ സിംഹമാണ് എന്ന് വേണമെങ്കിൽ പറയാം. സിംഗം പെരുമാൾ തന്റെ ആയ കാലത്ത് മദ്രാസ് പട്ടണത്തെ കൈവെള്ളയിൽ ഇട്ട് അമ്മാനം ആടിയ മുതലാണ്, ഗ്യാങ്‌സ്റ്റർ എന്നൊക്കെ വിളിച്ചാൽ കുറഞ്ഞ് പോവുന്ന ജാതി അസുര ജന്മം. പെരുമാൾ ആരായിരുന്നു എന്നത് അയാളുടെ അനുചരന്മാരുടെയും അടുത്തുള്ളവരുടെയും മുഖത്തെ ഭയം അല്ലെങ്കിൽ അവർ കാണിക്കുന്ന വിധേയത്വം പറയും, ഇവിടെ ശ്രദ്ധിക്കേണ്ട ഒരു വാക്ക് അയാൾ ആരായിരുന്നു എന്നതാണ്, പാസ്റ്റ് ടെൻസിൽ തന്നെ.

🔸സിംഗം പെരുമാൾ കയ്യടക്കി വെച്ചനുഭവിച്ച പല ടെറിട്ടറികളും കച്ചവടങ്ങളും എല്ലാം ഇന്ന് അയാളുടെ കൈവിട്ട് പോയിക്കൊണ്ടിരിക്കുകയാണ്. പ്രായം അയാളെ തളർത്തി തുടങ്ങി എന്നൊക്കെ അനുചരന്മാർ രഹസ്യമായി പറയുന്നുണ്ട്, അയാളുടെ മുന്നിൽ നിന്നും ഭയം കാരണം അത് മറച്ചുവെക്കുന്നു എന്ന് മാത്രം. എല്ലാ രീതിയിലും അയാൾക്ക് ഒത്ത ഒരു എതിരാളി ഗജപതിയുടെ രൂപത്തിൽ ആ നാട്ടിൽ ഉയർന്ന് വന്നതും പെരുമാളിനെ സംബന്ധിച്ച് അത്ര ആശ്വാസകരമായ ഒരു കാര്യമല്ല. സത്യം പറയുവാണേൽ പെരുമാളിന്റെ വീഴ്ച എന്നത് എന്ന് എന്ന ചോദ്യത്തിലേക്ക് മാത്രമായി ഒതുങ്ങിയിട്ടുണ്ട്.

🔸ഈ നഷ്ടങ്ങളുടെ കണക്കുകൾക്ക് ഇടയിൽ മറ്റൊരു വലിയ നഷ്ടം കൂടി പെരുമാളിന് സംഭവിച്ചിട്ടുണ്ട്, ലൈംഗിക ശേഷി ഇല്ലായ്മ. സുബു എന്ന യുവതിയുമായി ചെറിയ തോതിൽ ബന്ധപ്പെടാൻ ഒരുങ്ങുന്ന പെരുമാളിനെ കാണിച്ച് കൊണ്ടാണ് സിനിമ തുടങ്ങുന്നത് തന്നെ, എന്നാൽ ആഗ്രഹം വെറും ആഗ്രഹം മാത്രമായി അവശേഷിക്കുകയാണ്, അയാളെ കൊണ്ട് സാധിക്കുന്നില്ല ഒന്നും തന്നെ. ഇങ്ങനെ എല്ലാ രീതിയിലും ഫ്രസ്റ്ററേറ്റഡ് ആയ പൊട്ടിത്തെറിക്കാൻ തയാറായി നിൽക്കുന്ന ഒരു അഗ്നി പർവതമാണ് സിംഗം പെരുമാൾ. കഥ തുടങ്ങുന്നത് പെരുമാളിന്റെ സഹായി പശുപതി ഒരു ഡീലുമായി അയാളെ കാണാൻ വരുമ്പോഴാണ്.

🔸ഈ മലൻകോള് എന്നൊക്കെ വിശേഷിപ്പിക്കാവുന്ന ഒന്നാണ് പശുപതിയുടെ ഡീൽ, സംഭവം ഒരു ഡ്രഗ് ഇടപാടാണ്, പിടിച്ചാൽ പിന്നീട് അതിന്റെ പിറകെ തൂങ്ങി ജീവിതം തന്നെ നായ നക്കിയ അവസ്ഥയിൽ ആവും, എന്തിനധികം ഒരു ഗ്യാങ് വാറിന് വരെ സ്കോപ്പ് ഉണ്ട്. പക്ഷെ ഉദ്ദേശിച്ച പോലെ ഡീൽ നടത്താൻ കഴിഞ്ഞാൽ ലഭിക്കുന്ന പൈസ എന്നത് വലിയൊരു തുകയാണ്, വളരെ വലിയത്. പ്രത്യക്ഷത്തിൽ റിസ്ക് ഒന്നും ഇല്ല എന്ന് തോന്നുമെങ്കിലും പ്രസ്തുത ഡീലിൽ എന്തൊക്കെ എതിരായി സംഭവിക്കാമോ അതൊക്കെ ഇവിടെ നടക്കുകയാണ്, തുടർന്ന് എന്ത് എന്ന ചോദ്യത്തിനുള്ള ഉത്തരമാണ് രണ്ടര മണിക്കൂർ ദൈർഖ്യമുള്ള ഈ ചിത്രം. ഒരു കിടിലൻ സിനിമയാണ് ആരണ്യകാണ്ഡം.

Verdict : Must Watch

DC Rating : 90/100

713. The Platform (2019)

Director : Galder Gaztelu-Urrutia

Genre : Thriller

Rating : 7.1/10

Country : Spain

Duration : 94 Minutes

🔸ഒരു ദിവസം നിങ്ങൾ ഉറക്കം ഉണരുന്നത് ഒരു തടവ് മുറിയിലാണ് എന്ന് കരുതുക, വലിയ വിസ്തൃതി ഒന്നുമില്ല, രണ്ടാൾക്ക് കിടക്കാം, അത്യാവശ്യം പ്രാഥമിക ആവശ്യങ്ങൾ നിറവേറ്റാം അത്ര മാത്രം. പിന്നെ പ്രധാനപ്പെട്ട കാര്യം എന്താണെന്നാൽ ഈ തടവ് മുറിയുടെ ഒത്ത നടുക്ക് വലിയൊരു ദ്വാരം ഉണ്ട് എന്നതാണ്, ഈ ദ്വാരത്തിലൂടെ മുകളിലും താഴെയും ഉള്ള കാര്യങ്ങൾ എല്ലാം നല്ല വ്യക്തമായും വെടിപ്പായും കാണാം. പക്ഷെ ഈ കാഴ്ച കൊണ്ടും വലിയ കാര്യം ഇല്ല എന്നതാണ് സത്യം, മുകളിലും താഴെയും എല്ലാം, എന്തിന് കണ്ണ് കൊണ്ട് കാണാൻ കഴിയുന്ന ദൂരം വരെ മുഴുവനും തടവറകളും തടവ് പുള്ളികളും ആണ്.

🔸നമ്മുടെ നായക കഥാപാത്രം ഇങ്ങനെ ഒരുനാൾ ഉറക്കം ഉണരുന്നത് ഇത്യാദി തടവറകളിൽ ഒന്നിലാണ്, അവിടെ വൃദ്ധനായ ഒരു സഹ തടവുകാരനുമുണ്ട്. പ്രസ്തുത ജയിലിലെ നാല്പത്തി രണ്ടാം നിലയിലാണ് തങ്ങൾ എന്ന് വൃദ്ധൻ അയാൾക്ക് പറഞ്ഞ് കൊടുക്കുന്നുമുണ്ട്. ഇനി പറയുന്ന കാര്യങ്ങൾ ശ്രദ്ധിക്കേണ്ടി ഇരിക്കുന്നു, താല്പര്യം ഇല്ലാത്ത, പ്ലോട്ടിന്റെ ഒരു ഭാഗവും കേൾക്കാൻ താല്പര്യമില്ലാത്ത എല്ലാ രീതിയിലും ഫ്രഷ് ആയി തന്നെ ചിത്രം അനുഭവിക്കണം എന്ന് നിർബന്ധം ഉള്ളവർ ഇവിടെ നിന്നും മടങ്ങി പോവുന്നത് ആയിരിക്കും അത്യുത്തമം.

🔸തടവ് മുറികളിലേക്ക് ദിവസം ഒരു നേരം മാത്രമേ ഭക്ഷണം വരികയുള്ളൂ അതും മുകൾ നിലയിൽ നിന്നും താഴെ നിലയിലേക്ക് ഒരു വഴിയിലൂടെ മാത്രം. മുകളിൽ സൂചിപ്പിച്ച ദ്വാരം വഴിയാണ് ഭക്ഷണം വരിക, അപ്പോൾ സ്വാഭാവികമായും ഒരു ചോദ്യം ഉയരാം, ഈ ഭക്ഷണം എല്ലാവർക്കും തികയുമോ എന്ന്, ഇല്ല ഒരിക്കലും തികയില്ല. ആ തടവറയിൽ എത്ര നിലകളുണ്ട് എന്ന കാര്യം ദൈവത്തിന് മാത്രമേ അറിയാവൂ, എന്തായാലും കുറഞ്ഞത് നൂറ്റി അമ്പതിന് മുകളിലുണ്ട് എന്നാണ് കേട്ടറിവ്, ഈ മുറികളിലെല്ലാം തന്നെ രണ്ട് പേർ വീതവുമുണ്ട്, അത് എന്ത് തന്നെ ആയാലും ആ വലിയ ചതുര ദ്വാരത്തിലൂടെ വരുന്ന ഭക്ഷണം കൊണ്ട് തൃപ്തി പെടുത്താൻ ആവുന്ന അളവല്ല.

🔸അപ്പൊ എന്ത് എന്നാണ് ചോദ്യം എങ്കിൽ അതിന് ഉത്തരം വേറൊന്നുമല്ല, പട്ടിണി തന്നെ, മുഴുപട്ടിണി. മുകളിൽ ഉള്ളവർക്ക് വൃഷ്ട്ടാനം കഴിക്കാം, താഴേയ്ക്ക് പോകവേ അളവ് കുറയും, എന്ന് മാത്രമല്ല മുകളിൽ ഉള്ളവർ കഴിച്ചതിന്റെ ഉച്ചിഷ്ടം മാത്രമായി ഭക്ഷണം മാറുകയും ചെയ്യും, അങ്ങനെ ആകെ മൊത്തത്തിൽ ഒരു നെറികെട്ട സിസ്റ്റം ആണ് അവിടെ അരങ്ങേറുന്നത് എന്ന് പറയാം. മാസാമാസം ഓരോരുത്തരും നിൽക്കുന്ന നിലകളും മാറിക്കൊണ്ടേയിരിക്കും, ചുരുക്കി പറഞ്ഞാൽ സകലതും ഒരു ഭാഗ്യത്തിന്റെ കളിയാണ് എന്ന്.

🔸വിശപ്പ് എന്നത് വലിയൊരു കാര്യമാണ്, മനുഷ്യന്റെ എല്ലാ പരിശ്രമങ്ങളും ഒരു പരിധി വരെ വിശപ്പ് അടക്കാനുള്ളതാണ്. വിശപ്പിന്റെ കാഠിന്യം കൂടുമ്പോൾ മനുഷ്യൻ ചിലപ്പോൾ ചില കൈവിട്ട കളികളൊക്കെ കളിച്ചെന്നിരിക്കും, അതാണ് ഈ ചിത്രം. അത്യാവശ്യം നല്ല തോതിൽ വയലന്റായ, ബ്ലഡ് ബാത്തുള്ള, ലോല മനസുള്ളവർക്ക് പറ്റാത്തൊരു ചിത്രമാണ് പ്ലാറ്റ്ഫോം, ഒരുവേള വയലൻസ് കൂടിപ്പോയോ എന്ന സംശയം വരെ തരുന്നുണ്ട് ഈ ചിത്രം, കൈകാര്യം ചെയ്യുന്ന വിഷയവും ഡിസ്റ്റർബിങ് തന്നെയാണ്. താല്പര്യം തോന്നുന്നു എങ്കിൽ കാണാൻ ശ്രമിക്കാം ഈ ചിത്രം.

Verdict : Good

DC Rating : 70/100

712. Throw Away Your Books, Rally In The Streets (1971)

Director : Shūji Terayama

Genre : Experimental

Rating : 8.1/10

Country : Japan

Duration : 137 Minutes

🔸ത്രോ എവേ യുവർ ബുക്സ് റാലി ഓൺ ദി സ്ട്രീറ്റ്, പേര് കേൾക്കുമ്പോ തന്നെ ഒരു വാർ ക്രൈ അല്ലെങ്കിൽ ഒരു വിദ്യാർത്ഥി പ്രക്ഷോഭത്തിന്റെ ഒക്കെ സൂചന ലഭിക്കുന്നുണ്ട് എങ്കിൽ അത് ചുമ്മാതെ അല്ല, അത് തന്നെയാണ് ഈ ചിത്രത്തിന്റെ ഉദ്ദേശവും സന്ദേശവും. പക്ഷെ ആദ്യം മനസ്സിൽ വരുന്ന സംശയം ഒരു സിനിമ എന്ന് ഈ സൃഷ്ടിയെ വിശേഷിപ്പിച്ച് നമ്മൾ ഊഹിക്കുന്ന അല്ലെങ്കിൽ പ്രതീക്ഷിക്കുന്ന ഒരു ചട്ട കൂട്ടിലേക്ക് ഈ ചിത്രത്തെ ഒതുക്കാൻ കഴിയുമോ എന്നതാണ്, അതിനേക്കാൾ വലിയൊരു നീതികേട്‌ ഈ ഷൂജി തെരയാമ ചിത്രത്തിനോട് ചെയ്യാനില്ല.

🔸ഒരു ഫോർത് വാൾ ബ്രെയ്ക്കിങ് സീനോട് കൂടിയാണ് പ്രസ്തുത സൃഷ്ട്ടി ആരംഭിക്കുന്നത്, അവസാനിക്കുന്നതും അങ്ങനെ തന്നെ ഇതിനിടയിൽ ടീനേജ് പ്രായത്തിലേക്ക് കാൽ എടുത്ത് വച്ച ഒരു വ്യക്തിയുടെ കഥയും പറയുന്നുണ്ട്. വളരെ മോശം ചുറ്റുപാടുകളിൽ നിന്നും വന്ന അവന്റെ ജീവിതം വീണ് ഉടയുന്നതും നിസ്സഹായൻ ആവുന്നതും എല്ലാം നമുക്ക് കാണേണ്ടിയും വരുന്നുണ്ട്, അതിനോടൊപ്പം തന്നെ സഞ്ചരിക്കാതെ പല പല ഇന്റെറാക്ഷനുകളും സൈഡ് പ്ലോട്ടുകളും എല്ലാം വിഗ്നെറ്റ് രൂപേണ ഇവിടെ കാണാൻ കഴിയും. ഒരു കഥ പറയുമ്പോൾ തന്നെ അതിൽ ഒതുങ്ങി നിൽക്കാതെ ഒരു ലാർജർ സ്‌കെയിലേക്ക് ചിത്രം കടക്കുന്നുണ്ട് എന്ന് പറയാം.

🔸എഴുപതുകളിലെ വിപ്ലവത്തിൽ ഊന്നി നിൽക്കുന്ന ജപ്പാൻ ആണ് നമ്മുടെ പശ്ചാത്തലം, ആ കാലഘട്ടത്തിലെ ഏതൊരു കുടുംബത്തെയും പോലെ തന്നെ അനിശ്ചിതത്വങ്ങൾ നിറഞ്ഞൊരു ഫെയ്‌സിലൂടെയാണ് കേന്ദ്ര കഥാപാത്രത്തിന്റെ കുടുംബവും കടന്ന് പോവുന്നത്. ഇത് ബുദ്ധിമുട്ടുകളുടെ, യാതനകളുടെ കാലമാണ് അതിനോട് പൊരുത്തപ്പെട്ട് സ്വയം ഉൾവലിഞ്ഞ് ഉള്ളത് കൊണ്ട് ഓണം പോലെ എന്നൊക്കെയുള്ള ക്ലിഷേ ഡയലോഗുകളിൽ വിശ്വസിച്ച് മുന്നോട്ട് പോവാൻ ആ കുടുംബം തയാറാണ് എങ്കിലും നമ്മുടെ പ്രധാന കഥാപാത്രം അതിന് ഒരുക്കമല്ല.

🔸ആഗ്രഹങ്ങൾ ഒരുപാട് ഉള്ളവനാണ് അവൻ, അവയെല്ലാം തന്നെ മറ്റുള്ള തന്നെ ബാധിക്കാത്ത താൻ ഭാഗം അല്ലാത്ത കാര്യങ്ങൾക്ക് വേണ്ടി ഉപേക്ഷിക്കാനോ കുരുതി കൊടുക്കാനോ അവൻ തയാറല്ല, പൊരുതാൻ തന്നെയാണ് തീരുമാനം, നിങ്ങൾ എനിക്ക് തരുന്നില്ലാ എങ്കിൽ ഞാൻ അത് പിടിച്ച് വാങ്ങിയിരിക്കും എന്ന പഴയ ലൈൻ തന്നെ. ഇങ്ങനെ ഒരു റിബൽ മെന്റാലിറ്റി ഉള്ള നായക കഥാപാത്രം അതിനൊത്ത ഒരു സൊസൈറ്റിയിലേക്ക് ഇറങ്ങി ചെന്നാൽ എന്ത് സംഭവിക്കും എന്നതിന് ഉത്തരമാണ് ഈ ചിത്രം.

🔸നില നിൽക്കുന്ന സിസ്റ്റത്തിനോട് ഒരു വെല്ലുവിളി കൂടി ആവുന്നുണ്ട് പല ഇടത്തും ഈ ചിത്രം. ഒരല്പം ഡിസ്റ്റർബിങ് കൂടിയാണ് ഈ ചിത്രം, നായക കഥാപാത്രം കടന്ന് പോവുന്ന വഴികൾ നമുക്ക് റിലേറ്റ് ചെയ്യാവുന്നതാണ് എന്നതിനോടൊപ്പം തന്നെ മറ്റനേകം കാരണങ്ങൾ കൂടി വരുന്നുണ്ട്, ഉദാഹരണത്തിന് ലൈംഗികതയുടെ അതിപ്രസരം കാണാൻ കഴിഞ്ഞേക്കാം ചില ഇടത്ത്, നിരാശ തോന്നിയേക്കാവുന്ന ദേഷ്യം പിടിപ്പിച്ചേക്കാവുന്ന പല സന്ദര്ഭങ്ങളും കാണാൻ കഴിഞ്ഞേക്കാം. ഷുജി തെരയമയുടെ ആദ്യമായി കാണുന്ന സൃഷ്ടിയാണ് ഇത്, ജപ്പാനിന് പുറത്തേക്ക് അധികം ഒന്നും പ്രചാരം കിട്ടിയിട്ടില്ലാത്ത സംവിധായകന്റെ മറ്റ് വർക്കുകൾ കാണാനുള്ള മോട്ടിവേഷൻ കൂടിയാണ് ഇത്, ആകെ മൊത്തം ഒരു മികച്ച ചിത്രം.

Verdict : Must Watch

DC Rating : 90/100

711. An Officer And A Spy (2019)

Director : Roman Polanski

Genre : Drama

Rating : 7.3/10

Country : France

Duration : 126 Minutes

🔸ഡ്രെയ്‌ഫസ് അഫയർ എന്ന പേരിൽ വളരെ പ്രശസ്തമായ ഒരു കേസ് ഉണ്ട് ഫ്രാൻസിന്റെ ചരിത്രത്തിൽ, രാജ്യത്തിൻറെ രാഷ്ട്രീയ ഭരണ നിയമ വാഴ്ചയുടെ ചരിത്രത്തിലെ നാണം കെടുത്തുന്ന ഒരേട് എന്നൊക്കെ പറയാം. സിനിമയെ കുറിച്ച് പറയുന്നതിന് മുന്നേ ഈ സംഭവത്തെ കുറിച്ച് ചെറുതായി പറയാം, നല്ല പഴക്കം ഉണ്ട് ഈ കഥയ്ക്ക്, നൂറ് വർഷങ്ങൾക്ക് മുകളിൽ പഴക്കം. ഫ്രാൻസ് എന്നത് ഒരു റിപ്പബ്ലിക്കൻ രാജ്യമായി നിലകൊണ്ടിരുന്ന പത്തൊൻപതാം നൂറ്റാണ്ടിന്റെ അവസാന കാലഘട്ടം, ഇതാണ് കഥ അരങ്ങേറുന്ന സമയം.

🔸ഒന്നാം ലോക മഹായുദ്ധത്തിന് മുന്നേ യൂറോപ്യൻ രാജ്യങ്ങൾ തമ്മിൽ ഒരു രീതിയിൽ അല്ലെങ്കിൽ മറ്റൊരു രീതിയിൽ അസഹിഷ്ണുത നിലനിന്നിരുന്ന സമയമായിരുന്നു ഇത്. ഒരു തുറന്ന യുദ്ധത്തിലേക്ക് കാര്യങ്ങൾ എത്തിച്ചേർന്നിരുന്നില്ല എങ്കിലും പരസ്പരമുള്ള വിശ്വാസവും ബഹുമാനവും എല്ലാം എന്നോ കൈമോശം വന്നിരുന്നു. ഒരുപരിധി വരെ ഈയൊരു വിശ്വാസമില്ലായ്മയാണ് ഈ കാലഘട്ടത്തിലെ ചാരന്മാരുടെ ഒഴുക്കിനും കാരണം. ഒരുവിധപ്പെട്ട എല്ലാ രാജ്യങ്ങളും ശത്രുരാജ്യത്തിന്റെ നിർണ്ണായക പദവികളിൽ തങ്ങളുടെ ഒരാളെ എങ്കിലും തിരുകി കേറ്റാൻ ശ്രമിച്ചിരുന്നു.

🔸എതിർ രാജ്യത്ത് നിന്ന് കൊണ്ട് അവരുടെ തന്ത്ര പ്രധാനമായ തീരുമാനങ്ങളും നീക്കങ്ങളും ചോർത്തുക എന്നതിനേക്കാൾ അപകടകരം ആയിരുന്നു ഓരോ ചാരനും പിടി കൊടുക്കാതെ സ്വന്തം തടി രക്ഷിക്കുക എന്നത്. കാരണം ഏതെങ്കിലും വിധേന പിടിക്കപ്പെട്ടാൽ സ്വന്തം ജീവൻ വരെ ബലി കൊടുക്കേണ്ടി വരും എന്നത് തന്നെ. ഇങ്ങനെ പിടിക്കപ്പെട്ട ആൽഫ്രെഡ് ഡ്രെയ്‌ഫസ് എന്ന വ്യക്തിയുടെ കഥയാണ് ഈ ചിത്രം, പക്ഷെ ഇവിടെ ചെറിയൊരു ട്വിസ്റ്റ് ഉള്ളത് എന്താണെന്നാൽ ആൽഫ്രെഡ് ഒരു നിരപരാധി ആയിരുന്നു എന്നതാണ്.

🔸അയാൾക്കെതിരെ ഉള്ള തെളിവുകൾ എല്ലാം ബാലിശം ആയിരുന്നു, നേരായ രീതിയിൽ ഒരു വിചാരണ നടന്നിരുന്നു എങ്കിൽ തീർച്ചയായും തള്ളിപ്പോവാൻ ഉള്ള വിധം ബാലിശം ആയത്. പിന്നെ ഡ്രെയ്‌ഫസിന്റെ കാര്യത്തിൽ എന്ത് കൊണ്ട് കൃത്യമായ വിചാരണ നടന്നില്ല എന്നതിന് കാരണങ്ങൾ കുറച്ചുണ്ട്. ഈ കാരണങ്ങളിൽ ഏറ്റവും പ്രധാനം അയാൾ ഒരു ജൂതനായിരുന്നു എന്നതാണ്, ജൂതന്മാരെ സംബന്ധിച്ചിടത്തോളം ഒട്ടും നല്ല ഒരു കാലം ആയിരുന്നില്ല അത്, വിവേചനവും പരിഹാസവും പുച്ഛവും അവഗണനയും എല്ലാം നല്ല തോതിൽ തന്നെ അവർക്ക് അനുഭവിക്കേണ്ടി വന്നിട്ടുണ്ട്.

🔸ഇതിന് പുറമെയും ചില കാരണങ്ങൾ ഉണ്ട്, ആ കാരണങ്ങൾക്ക് ഒരു അന്വേഷണ സ്വഭാവം ഉള്ളതിനാൽ ചിത്രം കണ്ട് തന്നെ അറിയുന്നതാവും നല്ലത്. വിചാരണ ഒരു പ്രഹസനം ആയത് കൊണ്ട് തന്നെ വിധി കടുപ്പം ആയിരുന്നു, രാജ്യത്തിന്റെ അതിർത്തിക്ക് അപ്പുറമുള്ള ജനവാസം ഇല്ലാത്ത ദ്വീപിലേക്ക് നാടുകടത്തൽ ആയിരുന്നു ശിക്ഷ. ഈ സംഭവത്തിന് ശേഷം കുറച്ച് വർഷങ്ങൾ കഴിഞ്ഞ് ഡ്രെയ്‌ഫസിന്റെ പഴയ മേലുദ്യോഗസ്ഥൻ നടത്തുന്ന അന്വേഷണം പോലെയാണ് ചിത്രം പുരോഗമിക്കുന്നത്. നല്ല സിനിമയാണ്, കാണാൻ ശ്രമിക്കുക.

Verdict : Very Good

DC Rating : 80/100

710. Swallows Of Kabul (2019)

Director : Zabou Breitman

Genre : Animation

Rating : 7.3/10

Country : France

Duration : 82 Minutes

🔸കഴിഞ്ഞ വർഷത്തെ കാൻസ് പുരസ്‌കാര വേദിയിൽ വൻ പ്രതീക്ഷ വെച്ച് പുലർത്തി കണ്ട ചില ചിത്രങ്ങളേക്കാൾ സത്യത്തിൽ ഞെട്ടിച്ചത് ഒരു അനിമേഷൻ ചിത്രം ആയിരുന്നു, ഐ ലാസ്റ്റ് മൈ ബോഡി എന്ന ചിത്രം. വലിയ പ്രതീക്ഷ ഒന്നും വെക്കാതെ കണ്ട് കഴിഞ്ഞപ്പോൾ നല്ല രീതിയിൽ ടച്ചിങ് ആയി തോന്നിയ വേറിട്ട ഒരു ശ്രമം തന്നെ ആയിരുന്നു ആ ചിത്രം. ഈ ഒരു സ്രെണിയിൽ പെടുത്താൻ കഴിയുന്ന മറ്റൊരു അനിമേഷൻ ചിത്രം, അതാണ് സ്വാലോസ് ഓഫ് കാബൂൾ. മുകളിൽ സൂചിപ്പിച്ച ടച്ചിങ്, ഹാർട്ട് വാർമിംഗ്, ഇമോഷണൽ, ഡിഫറൻറ്റ് അപ്രോച് എന്നീ വിശേഷണങ്ങൾ എല്ലാം തന്നെ ധൈര്യമായി ഈ ചിത്രത്തിനും നൽകാം.

🔸അഫ്ഗാനിസ്ഥാനിലെ കാബൂൾ ആണ് നമ്മുടെ കഥാ പശ്ചാത്തലം, താലിബാന്റെ തീവ്രവാദ വാഴ്ച പരകോടിയിൽ എത്തി നിൽക്കുകയാണ്. ഭക്ഷണം, കിടപ്പാടം തുടങ്ങി ആവശ്യമായ വസ്തുക്കളുടെ വരെ ലഭ്യത ഇല്ലായ്മ ആളുകളെ മോഷണത്തിലേക്കും പിടിച്ച് പറിയിലേക്കും തള്ളി ഇട്ടുകൊണ്ടിരിക്കുകയാണ്. രാജ്യത്തെ ക്രമ സമാധാന നില ആണെങ്കിൽ അതിലും പരിതാപകരം, വീടുകളിലേക്കാൾ ആളുകൾ തെരുവിലും ജയിലറകൾക്ക് ഉള്ളിലുമാണ്. ഈ ഒരു പശ്ചാത്തലത്തിലാണ് ചിത്രം കഥ പറഞ്ഞ് തുടങ്ങുന്നത്.

🔸ഉദ്ദേശം പതിനെട്ട് വർഷങ്ങൾക്ക് മുൻപുള്ള യാഷിറ ഖാദറായുടെ നോവലാണ് ചിത്രത്തിന് ആധാരം, കഥയിൽ നിന്ന് കാലാനുസൃതമായ മാറ്റം ചിത്രം വരുത്തിയിട്ടുണ്ട് എന്ന് കേട്ടു, വായിച്ചിട്ടില്ലാത്തതിനാൽ അഭിപ്രായമില്ല. രണ്ട് ദമ്പതിമാരാണ് ചിത്രത്തിലെ പ്രധാന കഥാപാത്രങ്ങൾ, നേരിട്ട് ഇവർ തമ്മിൽ ബന്ധം ഇല്ല എങ്കിലും കഥ ഇവരെയെല്ലാം ഒരു നേർ രേഖയിലേക്ക് കൊണ്ട് വരുന്നുണ്ട്. ആയിരത്തി തൊള്ളായിരത്തി തൊണ്ണൂറ്റി എട്ടിൽ കാബൂളിലാണ് ചിത്രം ആരംഭിക്കുന്നത്, മോഹസനും സുനൈറയും കാമുകീ കാമുകന്മാരാണ്.

🔸വാട്ടർ കളർ രൂപത്തിൽ ഉള്ള അനിമേഷനാണ് ചിത്രത്തിന്റെ സവിശേഷത, ഈ കാലഘട്ടത്തിൽ പുറത്തിറങ്ങിയ പല അനിമേഷൻ സിനിമകളുടെയും ഒഴുക്ക് കാണാൻ കഴിഞ്ഞേക്കില്ല എങ്കിലും ഈ രീതിക്ക് ഒരു വ്യത്യസ്ത ടച്ച് ഉണ്ടായിരുന്നു. എന്നെങ്കിലും ഒരുനാൾ തങ്ങളുടെ ആഗ്രഹം പോലെ സ്വരാജ്യത്ത് ജീവിക്കാൻ കഴിയും എന്ന പ്രതീക്ഷ വെച്ച് പുലർത്തുന്നവരാണ് മൊഹ്‌സീനും സുനൈറയും, എന്നാൽ മറ്റൊരു ദമ്പതിമാരായ അറ്റീക്കും മോസ്സാരത്തും മനസ്സ് ചത്തത് പോലെയാണ് ജീവിക്കുന്നത്, അവർക്ക് അതിന്റേതായ കാരണങ്ങളുമുണ്ട്. ഈ രണ്ട് ദമ്പതിമാരുടെയും കഥയാണ് ചിത്രം.

🔸ഇവരിൽ ഒരാൾ ചെയ്യുന്ന ചെറിയൊരു ബുദ്ധിമോശം ഈ കഥാപാത്രങ്ങളെ എല്ലാം മോശമായി ബാധിക്കുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ കഥ. സിനിമ കണ്ട് കഴിഞ്ഞപ്പോൾ തോന്നിയ ഒരു സവിശേഷ കാര്യം, ലൈവ് ആക്ഷൻ ചിത്രങ്ങൾക്ക് സാധിച്ചേക്കാവുന്നതിലും മനോഹരമായി കാര്യങ്ങൾ അവതരിപ്പിക്കാൻ ഈ നൂതന അനിമേഷൻ ശൈലിക്ക് കഴിഞ്ഞിട്ടുണ്ട് എന്നതാണ്, പ്രത്യേകിച്ചും ഒരല്പം ട്രാജിക്ക് മോഡിലേക്ക് പോവുന്ന കഥയ്ക്ക് പെയിന്റിങ്ങിന് സമാനമായ ടച് ഒക്കെ നൽകിയത് ജീനിയസ് തന്നെ. നല്ലൊരു ചിത്രമാണ്, കണ്ടാൽ നഷ്ടം ഏതും ഇല്ല, കാണാൻ ശ്രമിക്കുക.

Verdict : Very Good

DC Rating : 86/100

709. A Kind Of Loving (1962)

Director : John Schlesinger

Genre : Drama

Rating : 7.4/10

Country : UK

Duration : 113 Minutes

🔸ബ്രിട്ടീഷ് ന്യു വേവ് ചിത്രങ്ങളിൽ എ കൈൻഡ് ഓഫ് ലവിങ് എന്ന ചിത്രത്തിനുള്ള പ്രാധാന്യത്തെ പറ്റി മുൻപെങ്ങോ കേട്ടിരുന്നു എങ്കിലും ചിത്രം കാണാൻ ഇതുവരെ കഴിഞ്ഞിരുന്നില്ല എന്നതാണ് സത്യം. ഒരുപക്ഷെ മോറലി അത്ര കറക്റ്റ് അല്ലാത്തൊരു കഥാപാത്രത്തെ നായകനാക്കി കൊണ്ടുള്ള ആദ്യ കാല ബ്രിട്ടീഷ് ചിത്രങ്ങളിൽ ഒന്നായിരിക്കും ഇത്, ആ കാലഘട്ടത്തിൽ ഈ രീതിയിൽ ഉള്ള മറ്റ് ശ്രമങ്ങൾ ഉണ്ടായിട്ടുണ്ടോ എന്നത് വലിയ അറിവില്ല. ചുരുക്കി പറയുക ആണെങ്കിൽ ഇങ്ങനെ പലരും പോവാൻ മടിച്ച ഒരു ടെറിട്ടറിയിലേക്ക് കടന്ന് ചെന്നു എന്നത് കൊണ്ട് തന്നെ ഈ ചിത്രം കയ്യടി അർഹിക്കുന്നുണ്ട്.

🔸വിക് എന്ന നമ്മുടെ നായക കഥാപാത്രം അച്ഛനമ്മമാരോടും സഹോദരനോടും ഒപ്പം ഇംഗ്ലണ്ടിലെ ഗ്രാമ പ്രദേശങ്ങളിൽ ഒന്നിലാണ് താമസം. ഒരു ചെറിയ ഫെർമിൽ ജോലി ഉണ്ടെങ്കിലും അതിൽ അത്ര സംപ്ത്രിപ്തൻ ഒന്നുമല്ല ടിയാൻ, ഈ ഗ്രാമത്തിൽ ഇങ്ങനെ പുഴുക്കൾക്ക് സമാനമായി ജീവിച്ച് അമിഞ്ഞ് തീരാനുള്ളതല്ല ഞാൻ എന്നയാൾ ഉറച്ച് വിശ്വസിക്കുന്നുണ്ട്, എന്നാൽ മറ്റ് മാർഗങ്ങൾ ഏതും മുന്നിലില്ല എന്നതാണ് സത്യം. ഈ പ്രായത്തിലൂടെ കടന്ന് പോവുന്ന വ്യക്തികളെ പോലെ തന്നെ യാത്ര ചെയ്യണം, പുതിയ കാര്യങ്ങൾ അറിയണം അനുഭവിക്കണം എന്നൊക്കെയാണ് വിക്കിന്റെ ആഗ്രഹം.

🔸വിക് എന്ന കഥാപാത്രത്തെ മാറ്റി നിർത്തിയാൽ നമ്മുടെ രണ്ടാമത്തെ പ്രധാന കഥാപാത്രമാണ് ഇൻഗ്രിഡ് എന്ന യുവതി. അമ്മയോടൊപ്പം താമസിക്കുന്ന ഇൻഗ്രിഡിന്റെ ലോകം ഏറെക്കുറെ അവർക്ക് ചുറ്റും കറങ്ങി കൊണ്ടിരിക്കുന്ന ഒന്നാണ്, മറ്റ് വലിയ ആഗ്രഹങ്ങളോ താല്പര്യങ്ങളോ ഒന്നും ഇൻഗ്രിഡ് പ്രകടിപ്പിക്കുന്നില്ല എങ്കിലും വിക്കിനെക്കാൾ പക്വതയും പാകതയും അവർക്ക് ഉണ്ട്. ഈ രണ്ട് കഥാപാത്രങ്ങളുമാണ് നമ്മുടെ നായികാ നായകന്മാർ, ഇതിൽ തന്നെ കഥ പുരോഗമിക്കുന്നത് വിക്കിന്റെ വ്യൂ പോയിന്റിലൂടെയാണ്.

🔸രണ്ട് കഥാപാത്രങ്ങൾക്കും ഇടയിൽ പ്രണയം ഉടലെടുക്കുന്നിടത്ത് നിന്നുമാണ് കഥ വഴി മാറി ഒഴുകുന്നത്, വലിയ സാമ്യങ്ങൾ ഒന്നും ഇല്ലാത്ത, ലോകത്തെ തന്നെ വ്യത്യസ്തമായ രീതിയിൽ നോക്കി കാണുന്ന, വേറിട്ട പശ്ചാത്തലങ്ങളിൽ നിന്നും വരുന്ന ഈ കഥാപാത്രങ്ങൾക്ക് ഇടയിൽ ഉടലെടുക്കുന്ന ബന്ധത്തിന്റെ ഭാവി എന്താവും, തുടർന്ന് ഈ കഥാപാത്രങ്ങൾക്ക് എന്ത് സംഭവിക്കും എന്നീ ചോദ്യങ്ങൾക്ക് ഉള്ള ഉത്തരമാണ് ഈ ചിത്രം. അത്യാവശ്യം വൈകാരികമായ ഒരു ഇമോഷണൽ ഡ്രാമ ചിത്രമാണ് എ കൈൻഡ് ഓഫ് ലവിങ്, ഒരു ട്രാജിക് മോഡിലൂടെ ആണ് കഥ പുരോഗമിക്കുന്നതും.

🔸രണ്ട് കഥാപാത്രങ്ങൾക്ക് ഇടയിലുള്ള പ്രണയമാണ് വിഷയം, അതിനിടെ നായികാ കഥാപാത്രം ഗർഭിണി ആവുന്നുമുണ്ട്. അത്യാവശ്യം ഡിപ്രസിങ് ആയൊരു രീതിയിലാണ് സംവിധായകൻ ചിത്രം തയാറാക്കിയിരിക്കുന്നത്, അത് കഥാപാത്രങ്ങളുടെ പെരുമാറ്റത്തിലും ചേഷ്ടകളിലും മാത്രമല്ല സ്‌ക്രീനിൽ കാണാനാവുന്ന സ്ഥലങ്ങളിലും ബാക്ക്ഗ്രൗണ്ടിലും പോലും പ്രകടമാണ്. ഇത്തരം തീമിലുള്ള സിനിമകൾ പിന്നീട് അനവധി വന്നിട്ടുണ്ട് എങ്കിലും ഈ ചിത്രത്തിന് നൽകാൻ കഴിയുന്ന ആ ഒരു ഇമോഷണൽ പഞ്ചിന് വർഷങ്ങൾക്ക് ഇപ്പുറവും ഒരു കോട്ടവും തട്ടിയിട്ടില്ല, താല്പര്യം ഉണ്ടെങ്കിൽ കാണാൻ ശ്രമിക്കാം, നല്ലൊരു ചിത്രം തന്നെയാണ്.

Verdict : Very Good

DC Rating : 80/100

708. Phorpa The Cup (1999)

Director : Khyentse Norbu

Genre : Drama

Rating : 7/10

Country : Bhutan

Duration : 93 Minutes

🔸ഫുട്‍ബോൾ എന്ന കളിയോട് എല്ലാ കാലത്തും വല്ലാത്തൊരു തരം അഭിനിവേശം ഉണ്ടായിരുന്നു, തൊണ്ണൂറ് മിനുട്ടും ഒരു പന്തിന് പിറകെ ഇരുപത്തി രണ്ട് പേർ ഓടുന്നു എന്നൊക്കെ പലരും കളിയാക്കും എങ്കിലും ആ ഒരു മൈതാനത്ത് നടക്കുന്ന ഓരോ ചലനത്തിനും മനോഹരമായ എന്തോ ഒന്ന് ഉണ്ട്, ഓരോ തവണയും വീണ്ടും വീണ്ടും കാഴ്ചക്കാരനെ കാണാനായി ക്ഷണിക്കുന്ന വിവരിക്കാൻ കഴിയാത്തൊരു വസ്തുത. ജീവിതത്തിൽ ആദ്യമായി ഒരു ലോകകപ്പ് കാണുന്നത് രണ്ടായിരത്തി രണ്ടിൽ ഏഷ്യയിൽ വെച്ച് നടന്ന ലോകകപ്പ് ആയിരുന്നു, അവിടെ വെച്ചായിരുന്നു ആ ഇഷ്ടത്തിന്റെ തുടക്കവും.

🔸രണ്ടായിരത്തി രണ്ട് ലോകകപ്പിനെ കുറിച്ച് ഓർക്കുമ്പോൾ മറക്കാൻ കഴിയാത്തൊരു മുഖമാണ് ഒലിവർ ഖാന്റേത്, ഗോൾവലയിൽ ചിലന്തി വല കെട്ടുന്നത് പോലെ ആരെയും തന്നെ കടന്ന് പോവാൻ സമ്മതിക്കാതെ അജയ്യനായി നിൽക്കുന്ന ഖാന്റേത് അല്ല ആ ചിത്രം എന്നതാണ് വേദനാജനകം, മറിച്ച് ഫൈനലിൽ തന്റെ സ്ഥിരം റീബൗണ്ട് ശൈലിയിലെ പിഴവ് മുതലെടുത്ത് ഗോൾ അടിച്ച റൊണാൾഡോയെ നിസ്സഹായാവസ്ഥയോടെ നോക്കി നിൽക്കുന്ന ഖാന്റേത് ആണ് ഓർമയിലെ ആദ്യ ഫുട്‍ബോൾ ചിത്രം. പിന്നീടിങ്ങോട്ട് ഒരുപാടൊരുപാട് ഓർമ്മകൾ, എല്ലാത്തിനെയും ചേർത്ത് നിർത്തുന്ന ഫുട്‍ബോൾ എന്ന വികാരവും.

🔸ഇത്രയും പറഞ്ഞ് വന്നത് മൂന്ന് കാരണങ്ങൾ കൊണ്ടാണ്, ഒന്നാമതായി ഫോർപ ദി കപ്പ് എന്ന ചിത്രം ഫുട്‍ബോൾ വിഷയമായി ഉള്ള, ഫുട്‍ബോൾ ഇഷ്ട്ടപ്പെടുന്നവർക്കുള്ള ഒരു മനോഹര ചിത്രമാണ്. രണ്ടാമതായി ഫുട്‍ബോൾ എന്ന കായിക വിനോദം ഒരു ആരാധകന് അല്ലെങ്കിൽ കാഴ്ചക്കാരന് എന്താണ് എന്ന് ഒരു ചെറിയ ഇൻട്രൊഡക്ഷൻ നൽകാൻ, മൂന്നാമതെത്തും ഏറ്റവും പ്രധാനപ്പെട്ടതുമായ കാരണം ഇത് ഒരു ഫുട്‍ബോൾ ആരാധകനും മിസ് ആക്കരുത് എന്ന് പറയാതിരിക്കാനും, അത്ര മനോഹരമായി തന്നെ പറയാനുള്ള കാര്യങ്ങൾ ചിത്രം പറഞ്ഞ് വെക്കുന്നുണ്ട്.

🔸അധികം സംഭാഷണങ്ങളോ കാഴ്ചക്കാരനെ ഞെട്ടിക്കുന്ന സംഭവ വികാസങ്ങളോ, ഒരു സ്പോർട്സ് ചിത്രത്തിൽ നിന്ന് പ്രതീക്ഷിക്കുന്ന ത്രില്ലിംഗ് മോമെന്റുകളോ ഒന്നും തന്നെ ഈ ചിത്രത്തിൽ കാണാൻ നിങ്ങൾക്ക് കഴിഞ്ഞേക്കില്ല, സിമ്പിൾ ആയാണ് കാര്യങ്ങൾ എല്ലാം അവതരിപ്പിച്ചിരിക്കുന്നത്. ഒരു ടിബറ്റൻ ലാമ മൊണാസ്റ്ററിയുടെ ബാക്ക്ഗ്രൗണ്ടിലാണ് ചിത്രത്തിന്റെ കഥ പുരോഗമിക്കുന്നത്, ഭൂട്ടാനിൽ നിർമിക്കപ്പെട്ട ആദ്യ ഫുൾ ലെങ്ത് ഫീച്ചർ ചിത്രം കൂടിയാണ് ഫോർപ. ഇതിന് ശേഷം മറ്റൊന്ന് ഉണ്ടായില്ല എന്നും പറഞ്ഞ് കേട്ടു, വ്യക്തമായ അറിവില്ല.

🔸തൊണ്ണൂറ്റി ഏട്ടിലെ ഫുട്‍ബോൾ ലോകകപ്പ് ആണ് പശ്ചാത്തലം, ലോകത്താകമാനം ലോകകപ്പിന്റെ ജ്വരം പടർന്ന് പിടിച്ചിരിക്കുകയാണ്, അത് വൈകാതെ പ്രസ്തുത മൊണാസ്റ്ററിയിലും എത്തുകയാണ്. ബ്രസീലും ഫ്രാൻസും തമ്മിലുള്ള ഫൈനൽ മത്സരം കാണാനായി ചില കുട്ടി ലാമമാർ നടത്തുന്ന ശ്രമങ്ങളും മറ്റും ഒക്കെയാണ് പിന്നീട് ചിത്രത്തിൽ അരങ്ങേറുന്നത്. ഹാർട്ട് വാർമിംഗ് എന്നൊക്കെ പറയാവുന്ന സ്റ്റോറി ആണ്, ചിത്രം കാണുന്നവർ ക്ളൈമാക്സിന് ശേഷം ഉള്ള ഡിസ്‌ക്രിപ്‌ഷൻ കൂടി വായിക്കാൻ ശ്രമിക്കണം എന്ന് നിർദ്ദേശിക്കുന്നു.

Verdict : Very Good

DC Rating : 80/100

707. The Invisible Man (1933)

Director : James Whale

Genre : Mystery

Rating : 7.7/10

Country : USA

Duration : 71 Minutes

🔸അദൃശ്യനാവുക എന്ന മനുഷ്യന്റെ ആഗ്രഹത്തിന് പഴക്കം ഒരുപാടുണ്ട്, ഒരു പക്ഷെ അവന്റെ ഉത്ഭവ കാലത്തോളം തന്നെ, പറക്കാൻ കഴിവ് നേടുക എന്ന ആഗ്രഹത്തോടൊപ്പം തന്നെ അത്ര മേൽ തീവ്രമായി ആ ആഗ്രഹം എന്നും അവിടെ നിലനിന്നിരുന്നു എന്നും വേണമെങ്കിൽ പറയാം. ഈ ഒരു വിഷയം പ്രമേയമാക്കി കൊണ്ട് തന്നെ അനവധി സിനിമകൾ വിവിധ ഭാഷകളിൽ പുറത്തിറങ്ങുക ഉണ്ടായി, സിനിമ പിച്ചവെച്ച് തുടങ്ങിയ കാലഘട്ടം തൊട്ട് കഴിഞ്ഞ മാസം വരെ അത് ആധാരമാക്കി ചിത്രങ്ങൾ പുറത്തിറങ്ങുകയും ഉണ്ടായി, ഒരുപക്ഷെ ഇവയിൽ ഏറ്റവും മികച്ചത് ഈ ജെയിംസ് വെയിൽ ചിത്രമായിരിക്കും.

🔸പേര് സൂചിപ്പിക്കുന്നത് പോലെ തന്നെ അദൃശ്യനാവാൻ കഴിവ് നേടിയ ആളാണ് നമ്മളുടെ നായക കഥാപാത്രമായ ഗ്രിഫിൻ, ഒരു സയന്റിസ്റ്റായ ഗ്രിഫിൻ വർഷങ്ങൾ നീണ്ടുനിന്ന പരിശ്രമങ്ങൾക്ക് ഒടുവിലാണ് അപ്രാപ്യം എന്ന് പലരും തള്ളിക്കളഞ്ഞ ആ നേട്ടം കരസ്ഥമാക്കിയത്. പക്ഷെ കാര്യങ്ങൾ കൈവിട്ട് പോയത് അത് അയാൾ സ്വന്തം ശരീരത്തിൽ പ്രയോഗിക്കുമ്പോഴാണ്, നിജസ്ഥിതിയിലേക്ക് മാറാനുള്ള ആന്റിഡോട്ട് ആണെങ്കിൽ കയ്യിൽ ഒട്ട് ഇല്ലതാനും. അങ്ങനെ ഒരു വല്ലാത്ത അവസ്ഥയിൽ എത്തുകയാണ് ഗ്രിഫിൻ.

🔸നമ്മൾ ആദ്യമായി ഗ്രിഫിനെ കാണുമ്പോൾ ഇതെല്ലാം സംഭവിച്ച് കഴിഞ്ഞിരുന്നു, എന്ന് മാത്രമല്ല മറുമരുന്ന് കണ്ടെത്താനുള്ള ഭ്രാന്തമായ ശ്രമത്തിലുമാണ് അയാൾ. ഇതിന് ആദ്യം അയാൾക്ക് വേണ്ടിയിരുന്നത്, സ്വസ്ഥമായ ആരും ശ്രദ്ധിക്കാത്ത ഒരു സ്ഥലം ആയിരുന്നു, തന്റെ പരീക്ഷണങ്ങൾ ബുദ്ധിമുട്ട് ഇല്ലാതെ ചെയ്യാനായി. ഈ ഒരു കാരണം കൊണ്ടാണ് ഗ്രിഫിൻ തന്റെ നഗരത്തിലെ പരീക്ഷണശാലയിൽ നിന്നും ഗ്രാമ പ്രദേശത്തെ ആ ലോഡ്ജിലേക്ക് വരുന്നത്, എന്നാൽ ഇവിടെ അയാൾ പ്രതീക്ഷിക്കുന്ന രീതിയിൽ ഒന്നുമല്ല കാര്യങ്ങൾ പോയത്.

🔸ശരീരം ആകെ മൂടിക്കെട്ടി, വലിയൊരു കണ്ണടയും വെച്ച്, മുഖത്തിന്റെ ഒരു ഭാഗം പോലും വെളിപ്പെടുത്താതെ വിചിത്രമായ വേഷ വിധാനത്തോടെയാണ് ഗ്രിഫിൻ ആ ലോഡ്ജിലേക്ക് കടന്ന് വന്നത്. സ്വാഭാവികമായും അവിടെ ഉണ്ടായിരുന്ന വലിയൊരു കൂട്ടം മദ്യപാനികൾക്ക് ഇടയിൽ അയാൾ ഒരു ചർച്ചാ വിഷയം ആവുകയാണ്. ഇയാളാര്, എന്താണ് ഇയാളുടെ ഉദ്ദേശം, ഈ വിചിത്ര വേഷ വിധാനങ്ങളുടെ കാരണമെന്ത് എന്നിങ്ങനെ ഒരുപാടൊരുപാട് ചോദ്യങ്ങൾ അവിടെ അലയടിക്കുകയാണ്. ഇവരുടെ അടക്കാൻ കഴിയാത്ത ആകാംക്ഷ അയാളുടെ വാതിൽ പടി വരെ കാര്യങ്ങളെ കൊണ്ടുപോവുകയാണ്.

🔸പൂർണമായും ഭ്രാന്തിലേക്ക് വീഴാൻ ഒരു കാരണം മാത്രം അന്വേഷിച്ച് നടന്ന ഗ്രിഫിനിന് ലഭിച്ച അവസാനത്തെ അടി എന്നൊക്കെ ഇതിനെ വിശേഷിപ്പിക്കാം. തുടർന്നങ്ങോട്ട് അയാൾ പൂർണമായും മറ്റൊരാളായി മാറുകയാണ്, ദേഷ്യം നിരാശ കുറ്റബോധം അമർഷം എന്നിവയൊക്കെ അയാളെ മാറ്റി മറിക്കുന്നു, ഇതിന്റെ എല്ലാം ഫലം അനുഭവിക്കേണ്ടി വരുന്നത് ആ ഗ്രാമത്തിലെ ജനങ്ങളും. വെറും എഴുപത് മിനിറ്റ് പരിധിയിൽ നിന്ന് കൊണ്ട് നല്ല രീതിയിൽ തന്നെ കഥ പറഞ്ഞ് പോകുന്നുണ്ട് ഈ ചിത്രം, ആ സമയം എല്ലാം തന്നെ കാഴ്ചക്കാരനെ എൻകെജ്‌ഡ്‌ ആയി നിർത്തുന്നുമുണ്ട്, ആയതിനാൽ തീർച്ചയായും കണ്ടിരിക്കേണ്ട ഒന്നാണ് ഈ ചിത്രം.

Verdict : Must Watch

DC Rating : 90/100

706. Corpus Christi (2019)

Director : Jan Komasa

Genre : Drama

Rating : 7.7/10

Country : Poland

Duration : 116 Minutes

🔸കോർപസ് ക്രിസ്റ്റി എന്ന ചിത്രത്തിന്റെ ബേസിക് പ്ലോട്ട് കേട്ടാൽ ചിലപ്പോൾ ഒരു പരിചയം തോന്നിയേക്കാം, പ്രത്യേകിച്ചും നമ്മൾ മലയാളികൾക്ക്, കാരണം ഇതുമായി സാമ്യമുള്ള ചിത്രം മലയാളത്തിൽ മുൻപ് പുറത്തിറങ്ങിയിട്ടുണ്ട് എന്നത് തന്നെ. ഒരു കൊമെടി ട്രാക്കിൽ പോയ ആ ചിത്രവും വിഷയത്തെ ഗൗരവമായി കാണുന്ന കോർപസ് ക്രിസ്റ്റിയും തമ്മിൽ ഇതല്ലാതെ മറ്റ് സാമ്യങ്ങൾ ഏതും ഇല്ല. ഈ വർഷത്തെ ഓസ്കാറിനുള്ള നോമിനേഷൻ പോളണ്ടിൽ നിന്ന് ലഭിച്ച ചിത്രം പല വേദികളിലും നിരൂപകർക്കിടയിലും മികച്ച പ്രതികരണങ്ങൾ കരസ്ഥമാക്കിയതുമാണ്.

🔸ഒരു ജുവനൈൽ ഹോമിലാണ് ചിത്രം ആരംഭിക്കുന്നത്, നമ്മുടെ നായക കഥാപാത്രമായ ഡാനിയേൽ കുറച്ച് നാളുകളായി അവിടത്തെ അന്തേവാസിയാണ്. ഡാനിയേലിന്റെ പേരിലുള്ള കുറ്റം അത്ര ചെറുതല്ല, നല്ല ഒന്നാം ക്‌ളാസ് ഒരു കൊലപാതകമാണ്. ഈ കൊലപാതകത്തിന്റെ ചുറ്റുപാടിലേക്ക് ഒന്നും നമ്മൾ പോവുന്നില്ല, എന്ന് മാത്രമല്ല ഒരു തികച്ചും നോർമലായ സമാധാന പ്രിയനായ ഡാനിയേലിനെ ആണ് നമ്മൾ കാണുന്നതും. ജയിൽ മുറികളിലെ തമ്മിൽ തല്ലിലും വാക്ക് പോരിലും ഒന്നും ചേരാതെ കൂടുതൽ സമയവും അയാൾ ഒറ്റയ്ക്ക് ചിലവഴിക്കുകയാണ്.

🔸ഡാനിയേലിന്റെ ഈ മാറ്റത്തിന് ഒരു കാരണവും ഉണ്ട്, അയാൾക്ക് ദൈവവിളി ലഭിച്ചിരിക്കുന്നു. ജുവനൈൽ ഹോമിലെ പ്രാർത്ഥനകൾക്ക് ഇടയിൽ എപ്പോഴോ അയാൾക്ക് ദൈവവുമായി സംവദിക്കാൻ കഴിഞ്ഞുവത്രേ, അതിന് ശേഷമാണ് ഈ പ്രസക്തമായ മാറ്റങ്ങൾ എല്ലാം. ഇപ്പോൾ ജയിലിൽ അരങ്ങേറുന്ന സുവിശേഷ പ്രസംഗങ്ങളും മറ്റും കേട്ട് കൊണ്ടും, വചനങ്ങൾ ചൊരിഞ്ഞ് കൊണ്ടും അയാൾ സമാധാനം കണ്ടെത്തുകയാണ്. ആയിടയ്ക്കാണ് ഡാനിയേലിന് പരോൾ ലഭിക്കാൻ ഇട വരുന്നത്, നിർബന്ധിത ജോലി കൂടി അയാൾക്ക് ലഭിക്കുന്നുണ്ട്, അതും രാജ്യത്തിൻറെ മറ്റൊരു കോണിൽ.

🔸പരോൾ കാലത്ത് ഒരു തടി മില്ലിൽ ജോലി ചെയ്യാനാണ് അയാളെ അയയ്ക്കുന്നത്. ഇങ്ങനെയൊക്കെ ആണ് കാര്യങ്ങൾ എങ്കിലും ഡാനിയേലിന്റെ ആഗ്രഹം എന്നത് ഒരു വികാരി ആവാനാണ്, അത് അയാൾ ജയിലിലെ വൈദികനോട് പറയുന്നുമുണ്ട്. എന്നാൽ പോളണ്ടിലെ നിയമങ്ങൾ അനുസരിച്ച് ഒരു കുറ്റവാളിയായ വ്യക്തിക്ക്, അല്ലെങ്കിൽ ജയിൽ ശിക്ഷ അനുഭവിച്ച വ്യക്തിക്ക് ഒരു സെമിനാരിയിലും പ്രവേശനം ലഭിക്കില്ല, പള്ളിയിലച്ചൻ ആവാൻ ഈ സെമിനാരി പഠനം ഒരു നിർബന്ധ കാര്യം ആയതിനാൽ തന്നെ പ്രാക്റ്റിക്കലി ഡാനിയേലിന് ഒരിക്കലും ഒരു വികാരി ആവാനും കഴിയില്ല.

🔸ഇങ്ങനെ പോയി കൊണ്ടിരുന്ന കഥയിൽ ഒരു ട്വിസ്റ്റ് വരുന്നത് പുതിയ നാട്ടിൽ ജോലിക്ക് എത്തിയ ഡാനിയേൽ ഒരു പള്ളി വികാരിയായി തെറ്റിദ്ധരിക്കപ്പെടുമ്പോഴാണ്. വളരെ വലിയ ആഗ്രഹം ആയതിനാൽ തന്നെ പുള്ളി ആ തെറ്റിദ്ധാരണ മാറ്റാനും പോയില്ല, അങ്ങനെ കുറ്റവാളിയായ ഡാനിയേൽ ഒരു പള്ളിവികാരിയായി അവരോധിക്കപ്പെടുകയാണ്. ശേഷം ഡാനിയേലിന് എന്ത് സംഭവിക്കും, അയാൾക്ക് എത്രനാൾ ഇങ്ങനെ മുന്നോട്ട് പോവാൻ കഴിയും എന്നൊക്കെയുള്ള ചോദ്യങ്ങളുടെ ഉത്തരമാണ് രണ്ട് മണിക്കൂറിന് അടുത്ത് ദൈർഘ്യമുള്ള ഈ ചിത്രം. മികച്ച ചിത്രമാണ്, കാണാൻ ശ്രമിക്കുക.

Verdict : Very Good

DC Rating : 85/100

705. Vitalina Varela (2019)

Director : Pedro Costa

Genre : Drama

Rating : 7.3/10

Country : Portugal

Duration : 123 Minutes

🔸വിറ്റാലിന വരേല എന്ന ചിത്രം കാണുന്നതിന് മുന്നേ പെഡ്രോ കോസ്റ്റയുടെ ഒരേയൊരു ചിത്രം മാത്രമേ കണ്ടിരുന്നുള്ളൂ, ഉദ്ദേശം ആറ് വർഷങ്ങൾക്ക് മുന്നേ വന്ന ഹോഴ്സ് മണി എന്ന ചിത്രം. ഹോഴ്സ് മണി ഇഷ്ട്ടപ്പെട്ടു എങ്കിലും പിന്നീട് പുള്ളിയുടെ സിനിമകൾക്ക് പിറകെ പോയില്ല, ഈ അടുത്താണ് ലോകർണോ ഫിലിം ഫെസ്റ്റിവൽ ഉൾപ്പെടെ ഉള്ള വേദികളിൽ മികച്ച പ്രതികരണം കരസ്ഥമാക്കിയ ടിയാന്റെ വിറ്റാലിന വരേലയെ പറ്റി കേൾക്കാനിടയായത്. സ്വാഭാവികമായും അണ്ടർ ലൂക്ഡ് ആയൊരു സംവിധായകന്റെ ഈ പുതിയ ചിത്രം തന്നെ കണ്ട് തുടങ്ങാം എന്ന് കരുതി.

🔸മറ്റ് സംവിധായകരിൽ അധികമൊന്നും കണ്ടിട്ടില്ലാത്ത ഒരു ഡിഫറൻറ്റ് സ്റ്റൈൽ ഉണ്ട് സംവിധായകൻ പെഡ്രോ കോസ്റ്റയ്ക്ക്, സ്റ്റൈലിനും മറ്റും പ്രാധാന്യം നൽകാതെ മെറ്റിരിയലിനും മറ്റും പ്രാമുഖ്യം നൽകി കൊണ്ട് ഗ്രൗണ്ടഡ് ആയ തോതിൽ റിയാലിറ്റിയോട് എത്ര മേൽ ചേരാൻ ഒക്കുമോ ആ രീതിയിൽ കഥ പറഞ്ഞ് പോവുന്ന ഒരു ശൈലി. ഈ മുകളിൽ സൂചിപ്പിച്ച കാര്യത്തിന്റെ നല്ല ഒന്നാന്തരം ഉദാഹരണമാണ് വിറ്റാലിന വരേല എന്ന ചിത്രത്തിന്റെ ഓപ്പണിങ് ഷോട്ടുകൾ. ഒരു സ്ലോ ബർണർ എന്ന നിലയിൽ പതിയെ കാഴ്ചക്കാരന്റെ ഉള്ളിലേക്ക് നുരഞ്ഞ് കയറുന്ന രീതിയാണ് ഇവിടെ അവലംബിച്ചിരിക്കുന്നത്.

🔸ടൈറ്റിൽ കഥാപാത്രമായ വിറ്റാലിന ആളൊരു മധ്യവയസ്‌ക ആണ്, നായികയായി എത്തിയ നടിയുടെ യഥാർത്ഥ പേര് തന്നെയാണ് ഇവിടെ കഥാപാത്രത്തിന് നൽകിയിരിക്കുന്നത്, ഇവർ ഹോഴ്സ് മണി എന്ന ചിത്രത്തിലും ഉണ്ട്. കഥയിലേക്ക് വരിക ആണെങ്കിൽ വർഷങ്ങൾ ഒരുപാട് കഴിഞ്ഞ ശേഷമാണ് വിറ്റാലിന ലിസ്ബണിലെക്ക് മടങ്ങി വരുന്നത്, പതിറ്റാണ്ടുകൾ എന്ന് തന്നെ പറയാം. ഇത്രയും നാൾ മടങ്ങി വരാത്തതിന് കാരണങ്ങൾ ഒരുപാട് ഉണ്ട് എങ്കിലും വിറ്റാലിനായുടെ ഇത്തവണത്തെ മടങ്ങി വരവ് സംഭവ ബഹുലമാണ്, തിരിച്ച് നാട്ടിൽ എത്തിയ അവർ അറിയുന്നത് സ്വന്തം ഭർത്താവിന്റെ മരണവർത്തയാണ്.

🔸ഭർത്താവും ആയുള്ള വിറ്റാലിനായുടെ ബന്ധം അതിലും വിശേഷകരമാണ്, തങ്ങളുടെ ചെറുപ്പകാലത്ത് വളരെ സ്നേഹത്തോടെ കഴിഞ്ഞവരാണ് ആ ദമ്പതികൾ. ദാരിദ്ര്യവും പട്ടിണിയും എല്ലാം കാരണം പുതിയ ഒരു തുടക്കത്തിനായി ആണ് ഇരുവരും കെയ്‌പ്പ് വേർഡായിലേക്ക് പോവുന്നത്. തുടക്കത്തിൽ പണത്തിന്റെയും മറ്റും പ്രശനം ഉണ്ടായിരുന്നെങ്കിലും താമസിയാതെ അത് മറ്റ്‌ ചിലതിലേക്ക് വഴി മാറുകയാണ്, ഒരുനാൾ അവളുടെ ഭർത്താവ് എന്നെന്നേക്കുമായി ജീവിതത്തിൽ നിന്നും പടി ഇറങ്ങി പോവുകയുമാണ്, പിന്നെ ഏകാന്തതയുടെ നീണ്ട വർഷങ്ങൾ.

🔸അതെല്ലാം തീർന്ന് ഇന്നാണ് അവൾ നാട്ടിലേക്ക് മടങ്ങി എത്തിയത്, അതാണെങ്കിൽ ഇത്‌ പോലൊരു ചുറ്റുപാടിലും. അവൾക്ക് ഇനി ഒരുമിച്ച് ചിലവഴിക്കാൻ അധികം കാര്യങ്ങളോ വ്യക്തികളോ ആ നാട്ടിൽ ഇല്ല, ഉള്ളത് മുഴുവൻ ഓർമകളാണ്, ഭൂതകാലത്തെ നിറമുള്ള ഓർമ്മകൾ. ആ ഒരു മെമ്മറി ലൈനിലേക്ക് വിറ്റാലിന മെല്ലെ ഇറങ്ങി ചെല്ലുകയാണ്, അതിനോടൊപ്പം പ്രേക്ഷകരും. സ്വപ്ന സമാനമായ, ആ സംശയം ഉദിപ്പിക്കുന്ന തോതിലാണ് കഥ പുരോഗമിക്കുന്നത്, ഒരുവേള ഗോസ്റ്റ്‌ലി പ്രെസെൻസ് ഉണ്ടോ എന്ന സംശയം പോലും ചിത്രം ജനിപ്പിക്കുന്നുണ്ട്. അത്യാവശ്യം നല്ല തോതിൽ സ്ലോ ആയാണ് ചിത്രം പുരോഗമിക്കുന്നത്, അത് കൊണ്ട് തന്നെ എല്ലാവര്ക്കും പറ്റിയ ഒന്നും അല്ല.

Verdict : Very Good

DC Rating : 80/100

704. High Life (2018)

Director : Claire Denis

Genre : Sci Fi

Rating : 5.9/10

Country : France

Duration : 113 Minutes

🔸റോബർട്ട് പാറ്റിൻസൺ എന്ന നടൻ മാറ്റ് റീവ്സിന്റെ ബാറ്റ്മാൻ ട്രിലോഗിയിൽ ടൈറ്റിൽ കഥാപാത്രമായി കാസ്റ്റ് ചെയ്യപ്പെട്ടപ്പോൾ നേരിടേണ്ടി വന്ന ഫാൻ ബാക്ക്ലാഷിന് കയ്യും കണക്കും ഉണ്ടായിരുന്നില്ല. അന്ന് വാളെടുത്ത് ഇറങ്ങിയ മിക്കവരും പറഞ്ഞ ന്യായം ട്വിലൈറ്റ് പോലെയൊരു ചിത്രത്തിൽ അഭിനയിച്ച കേവലം ഒരു ശരാശരി കഴിവ് മാത്രമുള്ള ഇയാളെ ആ സ്ഥാനത്ത് കാണാൻ കഴിയില്ല എന്നൊക്കെ ആയിരുന്നു. സത്യത്തിൽ ഗുഡ് ടൈം, ലൈറ്റ്ഹൗസ് പോലെയുള്ള ചിത്രങ്ങൾ കണ്ടാൽ മാറാൻ ഉള്ളതേ ഉള്ളൂ ഈ അഭിപ്രായം, അല്ലെങ്കിൽ ഹൈ ലൈഫ് എന്ന ചിത്രം കണ്ടാലും മതി.

🔸ഒരു സയൻസ് ഫിക്ഷൻ സ്‌പെയ്‌സ് ഡ്രാമ എന്നൊക്കെ കേൾക്കുമ്പോൾ ഓർമ്മ വന്നേക്കാവുന്ന ഇന്റെർസ്റ്റെല്ലാർ, അപ്പോളോ തെർറ്റീൻ പോലെയുള്ള സിനിമകൾ എല്ലാം ദയവ് ചെയ്ത് ഒരു മൂലയ്ക്കെക്ക് മാറ്റി വെക്കുക, അത്തരം ചിത്രങ്ങളുമായൊന്നും ഒരു രീതിയിൽ ഉള്ള സാമ്യമോ, നിങ്ങൾ ഉദ്ദേശിക്കുന്ന തോതിൽ ഉള്ള ത്രില്ലിംഗ് നിമിഷങ്ങളോ ഈ ചിത്രത്തിൽ ഇല്ല. ഒരു കമ്പാരിസൺ നിർബന്ധം ആണെങ്കിൽ അത് ആഡ് ആസ്ട്രയുമായി ആവാം, ഒരു സ്പിരിച്വൽ ജേർണി എന്നൊക്കെ വിളിക്കാൻ കഴിഞ്ഞേക്കാവുന്ന ഒന്നാണ് ഈ ചിത്രം, അത് മാത്രമേ പ്രതീക്ഷിക്കേണ്ടതും ഉള്ളൂ.

🔸ഏറെക്കുറെ മുഴുവൻ സമയവും കഥ അരങ്ങേറുന്നത് ഒരു സ്‌പെയ്‌സ് വെഹിക്കിളിന് അകത്താണ്. നോൺ ലീനിയർ ശൈലിയിൽ ഭൂതകാലവും വർത്തമാന കാലവും ഇടകലർത്തി ആണ് കഥ പുരോഗമിക്കുന്നത്, എന്നാൽ വലിയ കോമ്പ്ലിക്കേഷൻ ഒട്ട് ഇല്ല താനും. നായക കഥാപാത്രമായ മോന്റെയുടെ പോയിന്റ് ഓഫ് വ്യൂവിലൂടെയാണ് കഥ പുരോഗമിക്കുന്നത്, ആദ്യ സീനിൽ നിന്നും നമുക്ക് മനസിലാക്കാൻ കഴിയുന്നത് അയാളോടൊപ്പം ആ വാഹനത്തിൽ ഒരു കൊച്ച് കുഞ്ഞ് മാത്രമേ ഉള്ളൂ എന്നാണ്. ഇവർ ആര്, എന്താണിവരുടെ ദൗത്യം എന്നതൊക്കെ വഴിയേ പിടികിട്ടും.

🔸ജയിലിൽ ശിക്ഷ അനുഭവിക്കുന്ന ഒരു കൂട്ടം തടവ് പുള്ളികൾ ഒരു സ്‌പെയ്‌സ് ദൗത്യത്തിനായി തിരഞ്ഞെടുക്കപ്പെടുകയാണ്. ദൗത്യം എന്നൊക്കെ വെറുതെ വിശേഷിപ്പിക്കുന്നതാണ്, ഏറെക്കുറെ ആത്മഹത്യാപരമായ നീക്കം ആണിത് എന്ന് തന്നെ പറയാം. ഇവരുടെ ശ്രമം ഒരു ആൾട്ടർനേറ്റിവ് എനർജി സോഴ്സ് കണ്ടെത്തുക എന്നതാണ്, അതും മനുഷ്യൻ ഇന്നേവരെ വേണ്ട രീതിയിൽ പഠിച്ചിട്ടില്ലാത്ത ബ്ലാക്ക് ഹോളുകളിൽ നിന്നും. അതിനായി ഡോക്റ്റർ ഡിബിസ് എന്ന യുവതിയുടെ നേതൃത്വത്തിൽ അവർ യാത്ര ആരംഭിക്കുകയാണ്, ഇത് ഭൂതകാലത്തിൽ അരങ്ങേറുന്ന സംഭവമാണ് താനും.

🔸ഈ രണ്ട് സന്ദര്ഭങ്ങൾക്കും ഇടയിൽ വര്ഷങ്ങളുടെ അന്തരമുണ്ട്, ഇത് തന്നെയാണ് ചിത്രം പറയുന്ന കഥയും. അത്യാവശ്യം നല്ല തോതിൽ ഡിസ്റ്റർബിങ് ആയ ഒരു ചിത്രമാണ് ഹൈ ലൈഫ്. ലൈംഗികതയും വയലൻസും എല്ലാം ചിത്രത്തിന്റെ ഒഴിവാക്കാൻ കഴിയാത്ത, പ്രാധാന്യം ഉള്ള വിഷയങ്ങളാണ്. വലിയ റെറ്റിങ്ങോ കാര്യമോ ഒന്നും തന്നെ നിരൂപക സിംഹങ്ങൾ ചിത്രത്തിന് നൽകിയിട്ടില്ല എങ്കിലും ഒരുതവണ കാണാനുള്ള വ്യത്യസ്തമായ ത്രെഡ് ഇവിടെയുണ്ട്, മികച്ച പ്രകടനങ്ങളും. താല്പര്യം ഉണ്ടെങ്കിൽ കാണാൻ ശ്രമിക്കാവുന്നതാണ്.

Verdict : Good

DC Rating : 70/100

703. Seventh Seal (1957)

Director : Ingmar Bergman

Genre : Fantasy

Rating : 8.2/10

Country : Sweden

Duration : 96 Minutes

🔸ഏതൊരു ലോകോത്തര സംവിധായകനും ഉണ്ടാവും ലോകം അളവുകോലായി കണക്കാക്കപ്പെടുന്ന ഒരു ചിത്രം. കുബ്രിക്കിന് 2001 എ സ്പേസ് ഒഡിസ്സി പോലെ, ഹിച്ച്‌കോക്കിന് സൈക്കോ പോലെ, ഓർസോൺ വെൽസിന് സിറ്റിസൺ കയ്‌നും സ്പിൽബെർഗിന് സേവിങ് പ്രൈവറ്റ് റയാനും പോലെ. സിനിമ ജീവിതമായി കണ്ടവരുടെ സിനിമ ജീവിതം ശിഷ്ട കാലം വിലയിരുത്തപ്പെടുന്ന ചിത്രം. ആദ്യ കാലങ്ങളിൽ പുറം ലോകത്തിന് അപരിചിതമായ പൊതുവെ അപരിചിതമായ മേഖല ആയിരുന്നു സ്വീഡിഷ് ചിത്രങ്ങൾ, ഇവയെ ലോകത്തിന് മുന്നിൽ എത്തിച്ചതിൽ പ്രധാനി ആണ് സംവിധായകൻ ഇന്ഗമാർ ബെർഗ്മാൻ.

🔸തന്റെ ചിത്രങ്ങളിൽ എല്ലാം വിശ്വാസികളെയും വിശ്വാസത്തെയും ചോദ്യം ചെയ്ത സംവിധായകൻ. നിരാശയും നഷ്ടബോധവും സഹനവും വേദനയും പ്രതീകമായ കഥാപാത്രങ്ങളെ വെളിച്ചത്തിലേക്ക് കൊണ്ടുവന്ന സംവിധായകൻ. The Silence (1963), Fanny And Alexander (1982), Persona (1966) തുടങ്ങി എന്നും ഓര്മിക്കപ്പെടുന്ന ഒരുപിടി ചിത്രങ്ങൾ ബെർഗ്മാൻ സംവിധാനം ചെയ്തിട്ടുണ്ടെങ്കിലും അദ്ദേഹത്തിന്റെ മാഗ്നസ് ഓപസ് അന്നും ഇന്നും എന്നും The Seventh Seal (1957) ആണ്. ബെർഗ്മാൻ തന്നെ സംവിധാനം ചെയ്ത ഒരു നാടകം ആണ് ചിത്രത്തിന് ആധാരം. 

🔸60 വര്ഷം നീണ്ടുനിന്ന ബെർഗ്മാന്റെ സിനിമ ജീവിതം ആരെയും അസൂയപ്പെടുത്താം വിധം പൂർണം ആണ് , അതിൽ ഒരു ദീപസ്തംഭമായി നിലകൊള്ളുന്നു ഇത്ര വർഷങ്ങൾക്ക് ഇപ്പുറവും പ്രസക്തിയും പുതുമയും നഷ്ടപ്പെടാതെ The Seventh Seal (1957). ദീർഘകാലം യുദ്ധത്തിൽ പടയാളിയായ അന്റോണിയോസ്‌ ബ്ലോക്ക് ആണ് ചിത്രത്തിലെ പ്രധാന കഥാപാത്രം. യുദ്ധത്തിൽ പരാജയപ്പെട്ട ശേഷം കടൽത്തീരത്തു ഉറക്കം ഉണരുന്ന ബ്ലോക്ക് കാണുന്നത് തന്നെയും കാത്തിരിക്കുന്ന മരണത്തെ ആണ്. തന്റെ സമയം അടുത്ത് കഴിഞ്ഞു എന്ന് മനസ്സിലാവുന്ന ബ്ലോക്ക് കുറച്ചു സമയം കൂടി നീട്ടികിട്ടുവാനും തന്റെ അവസാനത്തെ ആഗ്രഹം സഫലീകരിക്കുവാനും വേണ്ടി മരണത്തിനെ ഒരു ചെസ്സ് മത്സരത്തിനായി വെല്ലുവിളിക്കുകയാണ്.

🔸ഒരു പിഴവിനപ്പുറം മരണമാണ് എന്ന തിരിച്ചറിവും, ദൈവവും സാത്താനും യാഥാർഥ്യമാണോ എന്ന സംശയവും, മരിക്കുന്നതിന് മുൻപ് ഒരു നല്ല കാര്യം എങ്കിലും ചെയ്യണം എന്ന നായകൻറെ ആഗ്രഹവും ആണ് ചിത്രത്തെ മുന്നോട്ട് കൊണ്ടുപോവുന്നത്. തന്റെ ചിത്രങ്ങളിൽ എല്ലാം തന്നെ ദൈവത്തിന്റെ നിലനില്പിനെയും, വേദന സഹിക്കുന്ന ജനങ്ങൾക്ക് നേരെയുള്ള ദൈവത്തിന്റെ നിശ്ശബ്ദതക്കെതിരെയും  ശബ്ദം ഉയർത്തിയ സംവിധായകൻ ആണ് ബെർഗ്മാൻ. കൈകാര്യം ചെയ്ത വിഷയതിനാലും വിശ്വാസങ്ങളെ തച്ചുടക്കാൻ ശ്രമിച്ചതിനാലും ഇറങ്ങിയ കാലത്തു ഒരുപാട് വിവാദത്തിന് പാത്രം ആയ ചിത്രമാണ് ദി സെവൻത് സീൽ. എന്തിരുന്നാലും ചിത്രം ഒരു ലോകോത്തര ക്ലാസിക് ആണ് എന്ന കാര്യത്തിൽ സംശയം നിലനിൽക്കുന്നില്ല. ദൈവം കച്ചവട വസ്തുവായ ഇന്നത്തെ കാലത്തും ചിത്രം പറഞ്ഞുവെച്ച കാര്യങ്ങൾക്കും നിർദേശങ്ങൾക്കും വലിയ പ്രസക്തി ഉണ്ട്. 

🔸ചിത്രത്തിന്റെ കഥയിൽ ചെറിയ കാര്യങ്ങൾക്ക് പോലും സംവിധായകൻ പ്രാധാന്യം നൽകിയിട്ടുണ്ട്. 1950കളിൽ ഷൂട്ട് ചെയ്ത ചിത്രം ആയിട്ട് കൂടിയും ചിത്രത്തിലെ ക്ലൈമാക്സ് ഷോട്ട് ഉൾപ്പെടെയുള്ള രംഗങ്ങൾ ഇന്നും അത്ഭുതമായി നിലനിൽക്കുന്നു. കഥയും തിരക്കഥയും കഥാപാത്രങ്ങളും കഥാസന്ദർഭങ്ങളും എന്നും മനസ്സിൽ നിലനിൽക്കുന്നത് ആണ്. പ്രധാന കഥാപാത്രങ്ങളായ ബ്ലോക്കിനെ അവതരിപ്പിച്ച മാക്സ് വോൺ സിഡോയും മരണത്തിനെ അവതരിപ്പിച്ച ബെന്ഗത് എകെറോടും മികച്ച പ്രകടനം തന്നെ കാഴ്ചവെച്ചു. വേണ്ടവിധം ഇന്നും വിശകലനം ചെയ്യപ്പെട്ടിട്ടില്ലാത്ത ഒരു ക്ലാസിക് ചിത്രം തന്നെ ആണ് ദി സെവൻത് സീൽ.

Verdict : Must Watch

DC Rating : 100/100

702. Onward (2020)

Director : Dan Scanlon

Genre : Animation

Rating : 7.6/10

Country : USA

Duration : 103 Minutes

🔸മരിച്ചുപോയ നമ്മുടെ വേണ്ടപ്പെട്ടവരെ ഒരു തവണ കൂടി ഒരു നോക്ക് കാണണം എന്ന് ആഗ്രഹിക്കാത്തവർ ഉണ്ടാവില്ല, അടുപ്പം എന്നത് ഒരു കാരണം ആവാം എന്നതിനോടൊപ്പം തന്നെ ചിലപ്പോൾ നമ്മൾ ചെയ്തുപോയ ഒരു തെറ്റിന് ക്ഷമാപണം നടത്താൻ ആവാം, അല്ലെങ്കിൽ പോയിപ്പോയ വർഷങ്ങൾ നമ്മളിൽ വരുത്തിയ മാറ്റങ്ങൾ അവരെ അറിയിക്കാനാവാം, പറയാതെ പോയ കാര്യങ്ങൾ അവരെ അറിയിക്കാനാവാം, അവരുടെ പ്രിയപ്പെട്ടവർ വലിയ അല്ലലോ ബുദ്ധിമുട്ടുകളോ ഇല്ലാതെ ജീവിക്കുന്നുണ്ട് എന്നറിയിച്ച് അവർക്ക് സമാധാനം നൽകാനുമാവാം, ഇതെല്ലാം കാരണങ്ങളാണ്. ഈ ആഗ്രഹങ്ങൾ വെച്ച് പുലർത്താത്തവർ കാണില്ല, ഏറ്റവും കുറഞ്ഞത് ഞാൻ അത്തരമൊരു ആഗ്രഹം ഉള്ളൊരു വ്യക്തിയാണ്, ഇതാണ് ഓൺവെർഡ് എന്ന ചിത്രത്തിന്റെ തീം.

🔸ബാർലി എന്നും ഇയാൻ എന്നും പേരുള്ള രണ്ട് സഹോദരങ്ങളാണ് നമ്മുടെ പ്രധാന കഥാപാത്രങ്ങൾ, കൂട്ടത്തിൽ മൂത്തവനാണ് ബാർലി. മാജിക്കും, മന്ത്ര വിദ്യകളിൽ അഭ്യസ്തവിദ്യരായ സോര്സറർമാറും എല്ലാമുള്ള ഒരു ഫാന്റസി ലോകത്താണ് ഈ കഥാപാത്രങ്ങൾ ജീവിക്കുന്നത്, ഒരുപാട് അദ്ഭുതകരമായ സ്പെല്ലുകളും ജീവിവിഭാഗങ്ങളും എല്ലാം ചിത്രത്തിൽ തങ്ങളുടെ സാന്നിധ്യം അറിയിക്കുന്നുണ്ട്. ഇയാൻ തന്റെ പതിനാറാം പിറന്നാൾ ആഘോഷിക്കുന്ന ദിവസം ഇരുവരെയും തേടി ഒരു സർപ്രൈസ് എത്തുകയാണ്.

🔸ഇയാൻ ജനിച്ച് അധികം കഴിയുന്നതിന് മുന്നേ മരണപ്പെട്ട അച്ചൻ വിൽഡന്റെ ഒരു ഗിഫ്റ്റ് ആണ് അവർക്ക് ലഭിച്ച സർപ്രൈസ്. ഈ ഗിഫ്റ്റ് എന്നത് ചില്ലറകളിയല്ല, മറിച്ച് അതൊരു മാജിക് സ്പെൽ ആണ്. ഉദ്ദേശിച്ച രീതിയിൽ അത് പ്രയോഗിക്കാൻ സഹോദരന്മാർക്ക് സാധിക്കുക ആണെങ്കിൽ വിൽഡനെ തിരികെ ജീവിതത്തിലേക്ക് മടക്കി കൊണ്ടുവരാൻ സാധിക്കും, അത് ഒരു ദിവസത്തേക്ക് മാത്രം ആണെങ്കിൽ കൂടിയും. ഇയാന് അച്ഛനെ കണ്ട ഓർമയില്ല, അത് കൊണ്ട് തന്നെ ഒരുനോക്ക് എങ്കിൽ ഒരുനോക്ക് തനിക്ക് വിൽഡനെ കാണണം എന്ന നിർബന്ധം അവനുണ്ട്.

🔸പ്രശനം എവിടെയാണ് ആരംഭിക്കുന്നത് എന്ന് വെച്ചാൽ പ്രസ്തുത സ്പെൽ ഉദ്ദേശിച്ച രീതിയിൽ പ്രാവർത്തികമാക്കാൻ അവർക്ക് കഴിയാതെ വരുമ്പോഴാണ്. അച്ഛനെ മടക്കി കൊണ്ടുവരാൻ പ്രാക്ടിക്കലി അവർക്ക് സാധിച്ചു എങ്കിലും ഒരു ചെറിയ പിഴവ് കാരണം വന്നത് പുള്ളിയുടെ അരയ്ക്ക് കീഴ്പോട്ട് ഉള്ള ഭാഗം മാത്രമാണ്. ആകെ ഞെട്ടി പോയി എങ്കിലും പരിഹാരം ഇല്ലാത്ത പ്രശ്നമില്ല എന്ന വാചകം ഉറച്ച് വിശ്വസിച്ച് കൊണ്ട് പ്രതിവിധിക്കായി രണ്ട് സഹോദരങ്ങളും യാത്ര ആരംഭിക്കുകയാണ്, അത്യന്തം വികാര നിർഭരമായ, ഫാന്റസികൾ നിറഞ്ഞ, ഒരു നീണ്ട മനോഹര യാത്ര.

🔸മുൻ പിക്സർ ചിത്രങ്ങൾ പോലെ തന്നെ വൈകാരികതയ്ക്ക് ഒന്നും ഒരു കുറവുമില്ല ചിത്രത്തിൽ, പ്രത്യേകിച്ചും അവസാന ഭാഗം ഒക്കെ കാഴ്ചക്കാരനെ ചിത്രത്തിൽ ഇമോഷണലി ഇൻവെസ്റ്റ് ചെയ്യിക്കുന്നുണ്ട്. പ്രധാന കഥാപാത്രങ്ങളായി എത്തിയ ക്രിസ് പാറ്റിനും, ടോം ഹോളണ്ടിനും ഇടയിലുള്ള ഡൈനാമിക് ഒക്കെ നൈസ് ആയിരുന്നു. ഒരു എന്റർടെയ്‌നർ എന്ന നിലയ്ക്ക് മികച്ച ചിത്രമാണ് ഓൺവെർഡ്, സ്‌ക്രീനിൽ ഉള്ള നിമിഷം അത്രയും എന്ജോയ്മെന്റ് നൽകുന്നുണ്ട് ചിത്രത്തിന്റെ സകല വിഭാഗങ്ങളും. താല്പര്യം തോന്നുന്നു എങ്കിൽ കാണാൻ മടിക്കേണ്ട.

Verdict : Good

DC Rating : 74/100

701. Happy Together (1997)

Director : Wong Kar-Wai

Genre : Romance

Rating : 7.8/10

Country : China

Duration : 99 Minutes

🔸കാഴ്ചയിൽ മനോഹരമായ ഒരു പറ്റം സിനിമകൾ സ്വന്തം ഫിലിമോഗ്രാഫിയിൽ ഉള്ള വോങ് കർ വായിയുടെ അതി മനോഹരമായ ചിത്രം എന്ന് വിശേഷിപ്പിക്കാം ഹാപ്പി റ്റുഗെതെർ എന്ന ചിത്രത്തെ. അത്യാവശ്യം വയലെന്റ് ആയ ഒരു റിലേഷൻഷിപ്പും അതിലേക്ക് വഴി വെച്ച കാര്യങ്ങളും തുടർന്നുള്ള സംഭവങ്ങളും ഒക്കെ ആണ് ചിത്രത്തിന്റെ പ്രമേയം, കേൾക്കുമ്പോൾ ക്ലിഷേ ആയി തോന്നാം എങ്കിലും പ്രസ്തുത കഥ അവതരിപ്പിച്ച വിധവും മറ്റുമൊക്കെ കണ്ട് തന്നെ അറിയേണ്ടതാണ്, ആദ്യമേ സൂചിപ്പിച്ച മനോഹരം എന്ന വാക്ക് കുറഞ്ഞ് പോയി എങ്കിലേ ഉള്ളൂ.

🔸ഹോങ്കോങ്ങിൽ ജനിച്ച് വളർന്ന ഒരു ഗേ കപ്പിൾ ആണ് പ്രധാന കഥാപാത്രങ്ങളായ ലായിയും ഹൊവും, ഇതിൽ ലായിയുടെ വ്യൂ പോയിന്റിലൂടെയാണ് ചിത്രം പുരോഗമിക്കുന്നത്. വ്യക്തം അല്ലാത്ത കാരണങ്ങൾ കൊണ്ട് സ്വന്തം നാട് വിട്ട് അർജന്റീനയിൽ എത്തുകയാണ് ഈ രണ്ട് കഥാപാത്രങ്ങളും, അത് ഒരുപക്ഷെ മടുപ്പ് പിടിച്ച പഴയ ജീവിതത്തിൽ നിന്നും ഒരു പുതിയ തുടക്കം നേടാനായി ആവാം, അല്ലെങ്കിൽ തങ്ങളുടെ ബന്ധം കാരണം നേരിടേണ്ടി വന്ന പ്രശ്നങ്ങൾ കാരണവുമാവാം, എന്ത് തന്നെ ആയാലും മുഴുവൻ സമയവും അർജന്റീനയിൽ ആണ് കഥ പുരോഗമിക്കുന്നത്.

🔸ഈ രണ്ട് കഥാപാത്രങ്ങളിലും പക്വതയും പാകതയും ഉള്ളത് ലായിക്ക് ആണെന്ന് പറയാം, അർജന്റീനയിൽ ഒരു നൈറ്റ് ക്ലബ്ബിൽ ഡോർ മാൻ ആയി ജോലി ചെയ്യുകയാണ് ലായി. ലായിയുടെ പ്രകൃതത്തിന് നേരെ വിപരീതമാണ് ഹോവിന്റേത്, യാതൊരു പക്വതയോ ഉത്തരവാദിത്തമോ ഇല്ലാത്ത ഹോ സ്വയം നശിക്കുന്ന തോതിലുള്ള കുത്തഴിഞ്ഞ ജീവിതമാണ് പിന്തുടർന്ന് കൊണ്ടിരിക്കുന്നത്. പ്രശ്നങ്ങൾ ഒഴിഞ്ഞ് നേരമില്ലാത്ത ഇരുവരുടെയും ബന്ധം ഈ അർജന്റീന വാസത്തിനിടെ കൂടുതൽ വയലന്റായി മാറുകയാണ്, ഈ കാരണങ്ങൾ കൊണ്ട് തന്നെ ഇരുവർക്കും ഇടയിൽ അകൽച്ചയും വർധിച്ച് കൊണ്ടുവരികയാണ്.

🔸ആദ്യാവസാനം ട്രാജിക്ക് ആയൊരു കഥയാണ് ചിത്രത്തിന്റേത്, അത് അർഹിക്കുന്ന രീതിയിൽ തന്നെ ചിത്രത്തിൽ അവതരിപ്പിക്കാൻ സംവിധായകനും, അത് ഉൾക്കൊണ്ട് പ്രകടിപ്പിക്കാൻ നടീ നടന്മാർക്കും കഴിഞ്ഞിട്ടുണ്ട്. ആകെ മൂന്ന് പ്രധാന കഥാപാത്രങ്ങളെ ചിത്രത്തിൽ ഉള്ളൂ, ഈ മൂന്ന് പേർക്കും വ്യക്തമായൊരു പ്ലോട്ട് നൽകി എന്നതിനോടൊപ്പം അർഹിക്കുന്ന പേ ഓഫും കൊടുത്തിട്ടുണ്ട് എന്നത് വലിയ കാര്യം തന്നെയാണ്. ഈ പേ ഓഫ് നൽകുന്ന ഭാഗങ്ങൾ, അതായത് അവസാന ഇരുപത് മിനുട്ടുകൾ ചിത്രത്തിന്റെ ഹൈ ലൈറ്റ് തന്നെയാണെന്ന് പറയാം.

🔸ഒരു ഗേ റൊമാന്റിക് സ്റ്റോറി ആണ് ചിത്രം പറയുന്നത്, അത്യാവശ്യം ലൈംഗിക രംഗങ്ങളും ചെറിയ തോതിൽ ന്യുഡിറ്റിയും ചിത്രത്തിൽ ഉണ്ട്, പറഞ്ഞു എന്നെ ഉള്ളൂ. ഡെസ്റ്റിനി എന്നൊരു സാധനം എല്ലാവർക്കും ഉണ്ട് എന്ന ഡയലോഗിന് പറ്റിയ നല്ലൊരു ഉദാഹരണമാണ് ഈ ചിത്രം, ഓർമയിൽ തങ്ങി നിൽക്കുന്ന ഒരുപാട് ഫ്രേയ്മുകൾ ചിത്രത്തിൽ കാണാനിടയായി, അത് ക്ലൈമാക്സ് ഷോട്ട് ആയാലും, നായക കഥാപാത്രം വെള്ളച്ചാട്ടം കാണുന്ന രംഗം ആയാലും, ലോകത്തിന്റെ തെക്കേ അറ്റം കാണിക്കുന്ന ഷോട്ട് ആയാലും എല്ലാം ഒന്നിനൊന്ന് മികച്ചത് തന്നെ. ഈ കാരണങ്ങൾ കൊണ്ട് തന്നെ പറയാം നിസ്സംശയം കാണേണ്ട ചിത്രമാണ് ഹാപ്പി റ്റുഗെതെർ, അതിനുള്ള വക ചിത്രത്തിലുണ്ട്.

Verdict : Must Watch

DC Rating : 90/100

700. Coming Home (2014)

Director : Zhang Yimou

Genre : Drama

Rating : 7.3/10

Country : China

Duration : 111 Minute

🔸കൾച്ചറൽ റെവോള്യുഷൻ അല്ലെങ്കിൽ കുറച്ച് കൂടി ലളിതമായി ജനറലൈസ് ചെയ്ത് പറയുക ആണെങ്കിൽ ചരിത്രം പ്രമേയമാക്കി പുറത്തിറങ്ങിയ ചൈനീസ് പീരിയോഡിക് ചിത്രങ്ങളിൽ ഓർത്ത് വെക്കാൻ മാത്രം ഉള്ള, മനസിനെ ആഴത്തിൽ സ്പർശിച്ച ചിത്രങ്ങൾ അനവധിയുണ്ട്. റൈസ് ദി റെഡ് ലാന്റേൺ പോലെ അല്ലെങ്കിൽ ഈ അടുത്ത് ഇറങ്ങിയ ഷാഡോ, അതും അല്ലെങ്കിൽ ലാസ്റ്റ് എമ്പറർ പോലെയുള്ള മുകളിൽ സൂചിപ്പിച്ച വിഭാഗത്തിൽ പെട്ട ചിത്രങ്ങളുടെ ലെവെലിലേക്ക് ഈ സിനിമ എത്തുമോ എന്നത് സംശയം ആണെങ്കിലും മികച്ചത് എന്ന പട്ടം തീർച്ചയായും അർഹിക്കുന്നുണ്ട്.

🔸ചൈനീസ് സിനിമ ഇന്ഡസ്ട്രിയിലെ ഏറ്റവും മികച്ച സംവിധായക നായക ജോഡിയായ ഴാങ് യിമോവും നടൻ ഗോൺ ലീയും വീണ്ടും ഒന്നിക്കുന്ന ചിത്രം എന്ന ലേബലിനോട് നീതികേട്‌ ഒന്നും തന്നെ കാണിച്ചിട്ടില്ല ചിത്രം, ആകെ ഉള്ളൊരു വ്യത്യാസം എന്നത് ചില കാര്യങ്ങളോടുള്ള അവരുടെ മനോഭാവത്തിൽ വന്ന മാറ്റം മാത്രമാണ്. സാംസ്‌കാരിക വിപ്ലവത്തെ നിശിതമായി വിമർശിക്കുന്ന ന്യു ജനെറേഷൻ സംവിധായകനിൽ നിന്നും അതിനെ ദാരുണമായി അല്ലെങ്കിൽ പരിതാപകരമായി നോക്കി കാണുന്ന രീതിയിലേക്ക് അയാൾ മാറിയിട്ടുണ്ട് എന്നതാണ് ചിത്രം നൽകുന്ന സൂചന, ഒരു രീതിയിൽ പറയുക ആണെങ്കിൽ അതിന്റെ ശേഷിപ്പ് അല്ലെങ്കിൽ ബാക്കിപത്രം തിരയുകയാണ് ചിത്രം.

🔸പേര് സൂചിപ്പിക്കുന്നത് പോലെ തന്നെ ഒരു മടങ്ങി വരവിന്റെ കഥയാണ് ചിത്രം, ലു യാൻഷി എന്ന നായക കഥാപാത്രത്തിന്റെ വീട്ടിലേക്കുള്ള മടങ്ങി വരവിന്റെ കഥ. സാംസ്‌കാരിക വിപ്ലവ കാലഘട്ടത്തിൽ പ്രൊഫസർ ആയി ജോലി നോക്കിയിരുന്ന വ്യക്തിയാണ് ലു, തനിക്കെതിരെ ശബ്ദം ഉയർത്തിയവരെയും അതിന് സാധ്യത ഉള്ളവരെയും ലേബർ ക്യാമ്പിലേക്ക് അയച്ച മാവോയുടെ നീക്കത്തിന്റെ ഫലം എന്നവണ്ണം ലുവും ലേബർ ക്യാമ്പിൽ അടക്കപ്പെട്ടു. പിന്നീട് വർഷങ്ങൾ നീണ്ടുനിന്ന ഏകാന്തവാസം ആയിരുന്നു ലുവിന്, ഒടുവിൽ അയാൾ മോചിതനായി സ്വന്തം നാട്ടിലേക്ക് മടങ്ങി വരികയാണ്.

🔸ഭാര്യ ഫെങ്ങും മകൾ ദണ്ഡനും അടങ്ങുന്നതാണ് ലുവിന്റെ കുടുംബം, മകളുമായി അത്ര നല്ല ബന്ധമോ അടുപ്പമോ അയാൾക്കില്ല, അവൾക്ക് ആവശ്യമുണ്ടായിരുന്ന സമയത്തൊന്നും കൂടെ ഉണ്ടാവാനും അയാൾക്ക് കഴിഞ്ഞിട്ടില്ല. അങ്ങനെ ഒരുനാൾ എല്ലാ പ്രശ്നവും ഒഴിഞ്ഞ് സ്വന്തം കുടുംബത്തിന്റെ അടുത്തേക്ക് ലു മടങ്ങി എത്തിയപ്പോഴാണ് അയാൾ മറ്റൊരു വസ്തുത തിരിച്ചറിയുന്നത്, തന്റെ ഭാര്യയ്ക്ക് മറവി രോഗം ബാധിച്ചിരിക്കുന്നു എന്ന്. തന്നെ തിരിച്ചറിയാൻ അവർക്ക് കഴിഞ്ഞിട്ടില്ല എന്നത് അയാളെ സംബന്ധിച്ച് ഹൃദയ ബേധകമായ ഒരു കാര്യം ആയിരുന്നു.

🔸തുടർന്ന് ഈ കഥാപാത്രങ്ങളുടെ ഭാവി എന്താവും എന്ന ചോദ്യത്തിന്റെ ഉത്തരമാണ് രണ്ട് മണിക്കൂറിന് അടുത്ത് ദൈർഘ്യമുള്ള ഈ ചിത്രം. വികാര നിർഭരമായ അനവധി മുഹൂർത്തങ്ങൾ ചിത്രത്തിലുണ്ട്, അവ എല്ലാം തന്നെ കാണുന്ന കാഴ്ചക്കാരനെ സ്പർശിക്കുന്ന, അയാളെ വേദനിപ്പിക്കുന്ന രീതിയിൽ മനോഹരമായാണ് അവതരിപ്പിച്ചിരിക്കുന്നത്. ഒരു ടിയർ ജേർക്കർ എന്നൊക്കെ വിശേഷിപ്പിക്കാവുന്ന ചിത്രമാണ്, പ്രത്യേകിച്ചും ക്ലൈമാക്സ് ഷോട്ട് ഒക്കെ. താല്പര്യം തോന്നുന്നവർക്ക് കാണാം, സമയം നഷ്ടം എന്ന തോന്നൽ ഉണ്ടാവില്ലെന്ന് ഉറപ്പ്.

Verdict : Very Good

DC Rating : 80/100

699. Dark Waters (2019)

Director : Todd Haynes

Genre : Thriller

Rating : 7.6/10

Country : USA

Duration : 126 Minutes

🔸റോബ് ബൈലോട്ട് എന്ന നമ്മുടെ നായക കഥാപാത്രം ജീവിതത്തിൽ വിജയിച്ച വ്യക്തിയാണ്, സ്വന്തമായി കോർപറേറ്റ് ഫീൽഡിൽ അയാൾക്ക് ഒരു വക്കീൽ ജോലിയുണ്ട്, മോശം ഇല്ലാത്ത ശമ്പളം ഉണ്ട്, ഉന്നതരായ വ്യക്തികളുമായി അടുപ്പവും ബിസിനസ് റിലേഷനുകളുമുണ്ട്. ഇനി വ്യക്തി ജീവിതത്തിലേക്ക് കടക്കുക ആണെങ്കിൽ അയാൾക്ക് ഭാര്യയും ഒരു മകളുമുണ്ട്, ഇവരോടൊപ്പം വലിയ അല്ലലോ പരാതിയോ ഇല്ലാത്ത സന്തുഷ്ടമായ ഒരു ദാമ്പത്യ ജീവിതമാണ് അയാളുടേത്. ഇങ്ങനെ ഒരു വ്യക്തിയാണ് തന്റെ കരിയറും, കുടുംബവും എല്ലാം തുലാസിൽ നിർത്തിക്കൊണ്ട് ചിത്രത്തിൽ കാണിച്ച വഴിയിലൂടെ സഞ്ചരിച്ചത് എന്ന് അറിയുമ്പോഴാണ് സത്യത്തിൽ പ്രശ്നത്തിന്റെ വ്യാപ്തിയും ആഘാതവും എല്ലാം നമുക്ക് മനസിലാവുന്നത്.

🔸വലിയൊരു ലീഗൽ കോർപറേറ്റ് ഫിർമിൽ വക്കീൽ ആണ് റോബ്, തന്റെ ആഗ്രഹം പോലെ തന്നെ വലിയൊരു കമ്പനിയിൽ ജോലിക്ക് കേറാൻ അയാൾക്ക് സാധിച്ചിട്ടുണ്ട്, അത് സാധിച്ചിട്ട് അധിക കാലം ആയതുമില്ല. ഇങ്ങനെ എല്ലാം സ്വപ്നം എന്നപോലെ പൊയ്ക്കൊണ്ടിരുന്ന ദിവസങ്ങളിൽ ഒന്നിലാണ് റോബിനെ അന്വേഷിച്ച് വിൽബർ റ്റെന്നന്റ് എന്ന കർഷകൻ ഓഫിസിൽ എത്തുന്നത്. അയാൾക്ക് പറയാൻ ഉണ്ടായിരുന്ന കേസും അതിനോട് അനുബന്ധിച്ചുള്ള കാര്യങ്ങളും സത്യത്തിൽ റോബിനെ മുഷിപ്പിക്കുക ആണ് ഉണ്ടായത്. കാര്യം വേറൊന്നുമല്ല തന്റെ കൃഷിയിടത്തിലെ പശുക്കൾ മരിച്ച് വീഴുന്നു, അതിന് കാരണമായ രാസവസ്തു നിർമ്മാണ കമ്പനിയിൽ നിന്നും നീതി വേണം എന്ന ടിയാന്റെ പരാതിയിൽ റോബിന് ചെയ്യാൻ ഒന്നും ഉണ്ടായിരുന്നില്ല.

🔸നല്ല രീതിയിൽ കാര്യം പറഞ്ഞ് അയാളെ യാത്ര ആക്കി എങ്കിലും അയാൾ പറഞ്ഞ ചില കാര്യങ്ങൾ റോബിൽ താല്പര്യം ഉണർത്തുകയാണ്, അപ്പോഴും കേസ് ഏറ്റെടുക്കണം എന്ന യാതൊരു ചിന്തയും അയാളിൽ ഉണ്ടായിരുന്നില്ല, അതിനയാളെ തെറ്റും പറയാൻ ആവില്ല. റോബ് ഇപ്പോൾ ജോലി ചെയ്യുന്ന ലീഗൽ ഫേം, വിൽബർ പരാതി പറഞ്ഞ രാസവസ്തു വികസന കമ്പനിയുമായി അടുത്ത ബന്ധം ഉള്ളവരാണ്, അവരുടെ നിയമ ഉപദേശകർ എന്ന് വരെ പറയാം. ഇങ്ങനെ ഉള്ളൊരു വസ്തുത അവിടെ കിടക്കുമ്പോൾ വിൽബറിന്റെ കേസ് റോബ് എടുക്കുന്നത് തീക്കൊള്ളി കൊണ്ട് തല ചൊറിയുന്നത് പോലെയാണ്.

🔸കാര്യങ്ങൽ അങ്ങനെ കിടക്കുമ്പോഴും വിൽബറിനെ അയാളുടെ കൃഷി സ്ഥലത്ത് ചെന്ന് സന്ദർശിക്കാൻ തയാറാവുന്നുണ്ട് റോബ്, അവിടെ അയാൾ കണ്ട കാഴ്ചകൾ ഹൃദയ ബേധകം ആയിരുന്നു. കഴിഞ്ഞ കുറച്ച് വർഷങ്ങൾക്കിടെ മരിച്ച് വീണത് നൂറ് കണക്കിന് പശുക്കളാണ്, അതും എല്ലാം അസ്വാഭാവികമായ ചുറ്റുപാടുകളിൽ. ഇവയിൽ നിന്നും ആ പ്രദേശത്തിന് കാര്യമായ എന്തോ തകരാറ് ഉണ്ട് എന്ന നിഗമനത്തിൽ റോബ് എത്തുകയാണ്, തുടർന്നുള്ള അയാളുടെ അന്വേഷണങ്ങളും ആ അന്വേഷണത്തിൽ അയാൾക്ക് ലഭിക്കുന്ന കണ്ടെത്തലുകളുമാണ് ചിത്രത്തിന്റെ പ്രമേയം.

🔸മാർക്ക് റഫലോ, ആൻ ഹതാവേ, ടിം റോബ്ബിൻസ് തുടങ്ങി നല്ലൊരു കാസ്റ്റ് തന്നെയുണ്ട് ചിത്രത്തിൽ, അവരെല്ലാം തന്നെ ടോപ്പ്‌ ഫോമിലുമാണ്. വളരെ പ്രസക്തമായ ഗൗരവമേറിയ വിഷയമാണ് ചിത്രം കൈകാര്യം ചെയ്യുന്നത്, അത് എത്രത്തോളം ഭീകരമാണ് എന്ന് തിരിച്ചറിയാൻ ചിത്രം കഴിഞ്ഞ ശേഷം സ്‌ക്രീനിൽ എഴുതി കാണിക്കുന്ന ചില കാര്യങ്ങൾ ശ്രദ്ധിച്ചാൽ മതിയാവും. ഒരു ലീഗൽ ത്രില്ലർ എന്ന നിലയിൽ ഒരു മിനിറ്റ് പോലും ബോർ അടിപ്പിക്കാതെ മികച്ച രീതിയിൽ തന്നെ കഥപറഞ്ഞ് പോവുന്നുണ്ട് ഈ ചിത്രം, താല്പര്യം ഉള്ളവർക്ക് തീർച്ചയായും കാണാം, നഷ്ടം ആവില്ല.

Verdict : Very Good

DC Rating : 80/100

698. Ash Is Purest White (2018)

Director : Jia Zhangke

Genre : Drama

Rating : 7/10

Country : China

Duration : 136 Minutes

🔸ബിൻ, കിയാവോ എന്നീ രണ്ട് അണ്ടർ വേൾഡ് പവർ കപ്പിൾസിന്റെ കഥയാണ് ആഷ് ഈസ് പ്യുവറസ്റ്റ് വൈറ്റ് എന്ന ചൈനീസ് ചിത്രം. വിവിധ രീതിക്കാരായ, വിഭാഗക്കാരായ, അത്യാവശ്യം ടഫ് ആയ അനവധി ക്രൈം ലോർഡുകൾ ഉൾപ്പെട്ട വലിയൊരു ക്രിമിനൽ ബിസിനസ് സിണ്ടിക്കേറ്റിന്റെ തലപ്പത്ത് ഇരിക്കുന്നത് ഈ രണ്ട് കഥാപാത്രങ്ങൾ ആണെന്ന് പറയാം, ഒരു ബോണി ആൻഡ് ക്ളൈഡ് വൈബ് കിട്ടിയേക്കാം എങ്കിൽ തെറ്റ് പറയാൻ ആവില്ല. ഒരു ക്രൈം ത്രില്ലർ എന്ന് തോന്നിക്കാവുന്ന പശ്ചാത്തലം ആണെങ്കിലും സത്യത്തിൽ പ്രസ്തുത ചിത്രം ഈ ബാക്ക്ഗ്രൗണ്ടിൽ നിൽക്കുന്ന ഒരു റൊമാന്റിക് ഡ്രാമ ആണ്.

🔸ഉദ്ദേശം പതിനേഴ് വർഷം നീണ്ട് നിൽക്കുന്ന ഒരു ലോങ്ങ് സ്റ്റോറി ആണ് ചിത്രത്തിന്റേത്, 2001ൽ തുടങ്ങി അഞ്ച് വർഷങ്ങൾക്ക് ശേഷം 2006ലും ഒടുവിൽ വീണ്ടും പന്ത്രണ്ട് വർഷങ്ങൾക്ക് ശേഷം രണ്ടായിരത്തി പതിനെട്ടിലും ചെന്നെത്തി അവസാനിക്കുന്ന കഥ. ഈ മൂന്ന് കാലഘട്ടങ്ങളും ചർച്ച ചെയ്യുന്നത് ബിൻ കിയാവോ ദമ്പതിമാരുടെ ബന്ധത്തെ കുറിച്ച് തന്നെയാണ്. പോയി കൊണ്ടിരിക്കുന്ന വർഷങ്ങൾ ഏതെല്ലാം രീതിയിൽ ഈ കഥാപാത്രങ്ങളെ ബാധിക്കുന്നു എന്നും, എന്തെല്ലാം മാറ്റങ്ങൾ ഇവരിൽ വരുത്തുന്നു എന്നും അതി മനോഹരമായി തന്നെ ചിത്രം വരച്ച് കാണിക്കുന്നു.

🔸മുകളിൽ സൂചിപ്പിച്ചത് പോലെ തന്നെ രണ്ട് കഥാപാത്രങ്ങളുടെയും പ്രതാപ കാലത്താണ് കഥ പറഞ്ഞ് തുടങ്ങുന്നത്, നല്ലൊരു ചുറ്റുപാടിൽ നിന്നും ക്രൈം ലൈഫിലേക്ക് എത്തിയ വ്യക്തിയാണ് കിയാൻ എന്ന് ചിത്രം സൂചിപ്പിക്കുന്നുണ്ട്, എന്നാൽ ബിനിന്റെ കാര്യം നേരെ മറിച്ചാണ്. ഒരു ഗ്യാങ്‌സ്റ്റർ ചുറ്റുപാടിൽ നമ്മൾ കണ്ട് ശീലിച്ചത് പോലെ തന്നെയാണ് ഇവിടെയും കാര്യങ്ങൾ, അപകടം ഒഴിഞ്ഞ നേരമില്ല, തങ്ങൾക്ക് മുകളിൽ നിൽക്കുന്നവനെ വെട്ടി ഒഴിവാക്കി സ്ഥാനമാനങ്ങൾ പിടിച്ചെടുക്കാനുള്ള ശ്രമങ്ങൾ സജ്ജമാണ്. ഈ ഒരു വസ്തുതയാണ് അഞ്ച് വർഷങ്ങൾക്ക് ശേഷമുള്ള രണ്ടാമത്തെ ഭാഗത്തെ കഥയ്ക്ക് പ്രചോദനം ആവുന്നത്.

🔸രണ്ടാം ഭാഗത്ത് സ്ഥിതി ഗതികൾ കുറച്ച് കൂടി മോശമാണ്, രണ്ട് കഥാപാത്രങ്ങളുടെയും ഗ്ലോറി ഡേയ്സ് ഏറെക്കുറെ അവസാനിച്ചിരിക്കുന്നു, ഈ ഒരു വസ്തുതയോട് പൊരുത്തപ്പെടാനും അവർ തയാറായി കഴിഞ്ഞിട്ടുണ്ട്, എന്നാൽ ഇവർക്കിടയിൽ ഉടലെടുക്കുന്ന പ്രശ്നങ്ങൾ മറ്റെല്ലാത്തിനേക്കാളും അപകടകരം ആയി മാറുകയാണ്. അവസാന ഭാഗം അല്ലെങ്കിൽ കഥയുടെ തേർഡ് ആക്റ്റ് എന്നത് ക്രൈം നെവർ പെയ്സ് എന്ന ഡയലോഗിന്റെ മികച്ച അവതരണമാണ്, ഒരുവിധപ്പെട്ട എല്ലാ ഗ്യാങ്‌സ്റ്റർ ചിത്രവും പോവുന്ന വഴി ആണെങ്കിൽ കൂടിയും കാഴ്ചക്കാരനെ നോവിക്കുന്ന രീതിയിൽ ട്രാജിക്ക് ആയ തോതിലാണ് ഇവിടെ കഥ വികസിക്കുന്നത്.

🔸മികച്ച ചിത്രം എന്ന് സംശയം ഏതും ഇല്ലാതെ പറയാനാവുന്ന ഒന്നാണ് ആഷ് ഈസ് പ്യുവറസ്റ്റ് വൈറ്റ് എന്ന ഈ ചിത്രം. ഗ്യാങ്‌സ്റ്റർ ഗ്ലോറിഫിക്കേഷനിലേക്ക് പോവാതെ ദാരുണമായ റിയാലിറ്റിയിലേക്ക് കഥ കൊണ്ടുപോവാൻ രണ്ട് കഥാപാത്രങ്ങളുടെ പ്രണയം വിഷയമാക്കിയതും അത് തന്നെ മികച്ച രീതിയിൽ അവതരിപ്പിച്ചതും എല്ലാം നന്നായി ഇഷ്ട്ടപ്പെട്ടു. തന്റെ ചെറുപ്പ കാലത്ത് കേട്ടറിഞ്ഞ ഒരു ഗ്യാങ്സ്റ്ററിന്റെ ജീവിതമാണ് സംവിധായകൻ ഇവിടെ വിഷയമാക്കിയിരിക്കുന്നത് എന്നറിയാൻ കഴിഞ്ഞു. പെർഫോമൻസ് വൈസ് ആയാലും കഥ ആയാലും സെറ്റിങ് ആയാലും എല്ലാം ഗംഭീരം തന്നെ, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100