1239. Nanpakal Nerathu Mayakkam (2023)

Director : Lijo Jose Pellissery

Cinematographer : Theni Eashwar

Genre : Drama

Country : India

Duration : 108 Minutes

🔸നന്പകൽ നേരത്ത് മയക്കം എന്ന സിനിമ കണ്ട് കൊണ്ടിരിക്കുന്ന വേളയിലും, ശേഷവും ഏറ്റവും ശ്രദ്ധ ആകർഷിച്ച കാര്യം ഓരോ പശ്ചാത്തലത്തിലും അനുയോജ്യമായ വണ്ണം കൊണ്ടുവന്ന പഴയ ചില ഗാനങ്ങളാണ്, പ്രത്യേകിച്ചും മയക്കമാ കലക്കമാ അല്ലെങ്കിൽ ഇറൈവൻ ഇറുക്കിന്ദ്രാനാ പോലുള്ള മനോഹരമായ ഗാനങ്ങൾ. ഒരു തമിഴ് ഗ്രാമീണ പശ്ചാത്തലത്തിൽ അരങ്ങേറുന്ന കഥയ്ക്കും, മരീചിക പോലുള്ള അനുഭവത്തിനും ഒക്കെ ഈ ഗാനങ്ങൾ ഒരുക്കുന്ന പശ്ചാത്തലം നൈസ് തന്നെ ആയിരുന്നു. എം ആർ രാധയുടെ രത്തകണ്ണീരിനും ചില ഹോമേജ് ഒക്കെ കൊടുക്കുന്നുണ്ട് ചിത്രം, ഇത്തരം ചില നുറുങ്ങുകൾ ഇഷ്ട്ടപ്പെട്ടു എങ്കിലും സിനിമ തൃപ്തി തന്നതുമില്ല എന്ന് പറയേണ്ടി വരും.

🔸ഒരു തീർത്ഥാടന യാത്ര ഒക്കെ കഴിഞ്ഞ് മടങ്ങി വരവിന് ഒരുങ്ങുകയാണ് ഒരു കൂട്ടം മലയാളികൾ, ഒരു ബസിൽ ആയിരുന്നു യാത്ര, ഉള്ളവർ എല്ലാം തന്നെ പരിചയക്കാരോ ബന്ധുക്കളോ ഒക്കെയാണ്. അങ്ങനെ വേളാങ്കണ്ണി യാത്ര ഒക്കെ കഴിഞ്ഞ് നാട്ടിലേക്കുള്ള മടങ്ങി വരവിനിടെ ആണ് വിചിത്രമായ ചില സംഭവങ്ങൾ അരങ്ങേറുന്നത്. ഒരു ഉച്ചയുറക്കം കഴിഞ്ഞ് ഉണർന്ന നമ്മുടെ ജെയിംസ് എന്ന കഥാപാത്രം നടത്തത്തിലും, പെരുമാറ്റത്തിലും, സംസാരത്തിലും എല്ലാം മറ്റൊരാളായി മാറുകയാണ്. ഒരു ടിപ്പിക്കൽ മധ്യവയസ്കൻ മലയാളി ആയിരുന്ന ജെയിംസ്, അങ്ങനെ സുന്ദരം എന്ന തമിഴ് ഗ്രാമീണനായി 'പുനർജനിക്കുകയാണ്'.

🔸ഒരു നട്ടുച്ച നേരം ആരംഭിച്ച് അടുത്ത ദിവസം ഏറെക്കുറെ അതേ സമയം അവസാനിക്കുന്ന ചെറിയൊരു സിനിമയാണ് നൻപകൽ നേരത്ത് മയക്കം. സംവിധായകന്റെ കഴിഞ്ഞ രണ്ട് മൂന്ന് സിനിമകൾ വെച്ച് നോക്കുമ്പോൾ ബഹളങ്ങളോ, വയലൻസോ ഒന്നും ഇല്ലാത്ത, പതിഞ്ഞ താളത്തിൽ മുന്നേറുന്ന ഒരു സാധാരണ സിനിമ. പഴയ ഗാനങ്ങളും, നല്ല പ്രകടനവും, നല്ല ഒരു ഫൈനൽ സീനും ഒഴിച്ച് നിർത്തിയാൽ ഏറെക്കുറെ ഡൾ ആയി തോന്നിയ ചിത്രമാണ് നൻപകൽ നേരത്ത് മയക്കം. ഗ്രൗണ്ട് ബ്രെയ്‌ക്കിങ് ആയി ഒന്നും സിനിമ പ്രോമിസ് ചെയ്തിരുന്നില്ല എങ്കിലും പിന്നിലും മുന്നിലും ഉൾപ്പെട്ട പ്രതിഭാ ധാരാളിത്തത്തിന് ഉള്ള ഔട്ട് പുട്ട് ലഭിച്ചതായി തോന്നിയില്ല, കണ്ട് വിലയിരുത്തുക.

Verdict : Above Average

DC Rating : 3/5