1261. Close (2022)

Director : Lukas Dhont

Cinematographer : Frank Eeden

Genre : Drama

Country : Belgium

Duration : 104 Minutes

🔸സ്ത്രീകൾ നേരിടുന്ന പ്രശ്നങ്ങളെ അടിസ്ഥാനപ്പെടുത്തി ഒരുപാട് സിനിമകൾ ഇതിനോടകം പല ഭാഷകളിലും പുറത്തിറങ്ങിയിട്ടും കണ്ടിട്ടും ഒക്കെ ഉണ്ട്, എന്നിട്ടും ആ പ്രശ്നങ്ങൾക്ക് ആവശ്യമായ പരിഹാരമോ ശ്രദ്ധയോടെ ലഭിച്ചോ എന്ന പ്രസക്തമായ ചോദ്യം അവിടെ കിടപ്പുണ്ട്, തല്ക്കാലം അതിലേക്ക് കടക്കുന്നില്ല. പക്ഷെ ഒരു പുരുഷൻ പാലിക്കേണ്ട ചില കാര്യങ്ങൾ എന്ന മട്ടിൽ ഒരു അലിഖിത നിയമ ഫോർമാറ്റ് എല്ലായിടത്തും നിലനിൽപ്പുണ്ട്. അതായത് ആണുങ്ങൾ എന്ത് പ്രശ്നങ്ങൾ നേരിട്ടാലും വികാരങ്ങൾ പുറത്ത് കാണിക്കാൻ പാടില്ല, അത് സ്വയം സഹിക്കണം, അല്ലെങ്കിൽ പറയുന്നവർ പുരുഷന്മാരല്ല തുടങ്ങിയ ചില പൊടി കൈകൾ. ജോയ്ലാണ്ട് എന്ന ചിത്രത്തിലെ ഹൈദർ എന്ന കഥാപാത്രം ഈ അവസ്ഥകളിലൂടെ കടന്ന് പോവുന്നുണ്ട്, ഈ ബെൽജിയൻ ചിത്രവും ഏറെക്കുറെ ഈ ഒരു സ്ട്രക്ച്ചറിന്റെ പ്രശ്നങ്ങൾ കാണിച്ച് തരികയാണ്.

🔸പതിമൂന്ന് വയസ്സുള്ള രണ്ട് കുട്ടികൾ ആണ് ലിയോയും റെമിയും. ബെൽജിയത്തിലെ ഗ്രാമ പ്രദേശങ്ങളിൽ കൃഷി ഒക്കെ ചെയ്ത് ജീവിക്കുന്ന രണ്ട് കുടുംബങ്ങളിൽ പെട്ടവരാണ് ഇരുവരും. ഇരുവരും അടുത്ത സുഹൃത്തുക്കൾ ആണ് എന്ന് പറഞ്ഞാൽ കുറഞ്ഞ് പോവും, ഉണരുന്നത് തൊട്ട് ഉറങ്ങുന്നത് വരെ ഒരുമിച്ച് സമയം ചിലവഴിക്കുന്ന തരം സന്തത സഹചാരികൾ ആണ് രണ്ട് പേരും. ഇരുവരും ഉറങ്ങുന്നത് പോലും ഒരുമിച്ചാണ് എന്ന് പറയുന്നിടത്ത് കാണേണ്ട ഇന്റിമസിക്ക് എന്നാൽ മറ്റ് പലരും വേറെ ചില മാനങ്ങൾ കൊടുക്കുന്നിടത്ത് ആണ് സിനിമ അതിന്റെ പ്രധാന പ്രശ്നത്തിലേക്ക് കടന്ന് ചെല്ലുന്നത്.

🔸ഇതിനോടകം തന്നെ സ്കൂളിൽ ഉൾപ്പെടെ പലരും ശ്രദ്ധിച്ചിരുന്ന ഇരുവരുടെയും സൗഹൃദത്തിന് മറ്റൊരു അർത്ഥം അവിടെ വെച്ച് തന്നെ നല്കപ്പെടുമ്പോൾ അതിനോട് ഇരുവരും പ്രതികരിക്കുന്നത് രണ്ട് രീതിയിൽ ആണ്, ഇവിടെ വെച്ച് ആരംഭിക്കുന്ന പ്രശ്നങ്ങൾ രണ്ട് സുഹൃത്തുക്കളുടെയും ബന്ധത്തിൽ വരുത്തുന്ന വിള്ളലുകളും അതിനെ തുടർന്ന് അരങ്ങേറുന്ന സംഭവങ്ങളും ഒക്കെയായി വേറൊരു തലത്തിലേക്ക് സിനിമ പോവുകയാണ്. മനോഹരമായി ഷൂട്ട് ചെയ്ത, അതിലും മനോഹരമായ പ്രകടനങ്ങൾ കാഴ്ചവെച്ച ഒരു മികച്ച സിനിമ ആണ് ക്ളോസ്. കണ്ട് കഴിയുന്ന വേളയിലും നമ്മളെ മാനസികമായി വേട്ടയാടുന്ന തരം കഥയും, കഥാപാത്രംങ്ങളും എല്ലാം ഈ സിനിമയുടെ പ്രത്യേകതകൾ തന്നെയാണ്. പോയ വർഷത്തെ മികച്ച സിനിമകളിൽ ഒന്നായി ക്ളോസും ഉണ്ടാവും, തീർച്ചയായും.

Verdict : Must Watch

DC Rating : 4.5/5

1260. Joyland (2022)

Director : Saim Sadiq

Cinematographer : Joe Saade

Genre : Drama

Country : Pakistan

Duration : 127 Minutes

🔸പാകിസ്ഥാനിൽ നിന്നും സോഷ്യൽ ഇഷ്യുസ് ഒക്കെ ചർച്ച ചെയ്യുന്ന ഒരു ചിത്രം, അതും ഒരു ട്രാൻസ് ജെണ്ടർ കഥാപാത്രത്തെ പ്രധാന കതപാത്രങ്ങളിൽ ഒന്നായി കൊണ്ട് വരുന്ന ഒരു ചിത്രം, സ്വാഭാവികമായും കൃട്ടിക്കൽ അക്ളെയിം അല്ലെങ്കിൽ അവാർഡ് മെട്ടീരിയൽ എന്ന തസ്തിക പിടിച്ച് വാങ്ങാൻ സാധ്യത ഉള്ള ചിത്രം എന്ന ചിന്ത സിനിമ കാണുന്നതിനും ഒരുപാട് മുന്നേ മനസ്സിൽ തോന്നിയതാണ്. ജോയ്ലാണ്ട് കണ്ട് കഴിഞ്ഞ വേളയിൽ നല്ല ഒരു സിനിമ എന്ന അഭിപ്രായം തോന്നി എങ്കിലും പല ഭാഗത്ത് നിന്നും കേട്ടത് പോലെ ഒരു ഗ്രൗണ്ട് ബ്രെയ്‌ക്കിങ് അറ്റംപ്റ്റ് ആയോ, പോയ വർഷത്തെ ഏറ്റവും മികച്ച സിനിമ ആയോ ഒന്നും അനുഭവപ്പെട്ടില്ല, നല്ല സിനിമ എന്ന അഭിപ്രായം മാത്രം.

🔸ഹൈദർ എന്ന കഥാപാത്രത്തിന്റെ വ്യൂ പോയിന്റിൽ കൂടിയാണ് കഥ പറഞ്ഞ് തുടങ്ങുന്നത്, പോകെ പോകെ മറ്റനേകം കഥാപാത്രങ്ങൾ കഥയിലേക്ക് വരികയും, ഷൈൻ ചെയ്യുകയും ഒക്കെ ചെയ്യുന്നുണ്ട്. ഒരു യാഥാസ്തിക പാകിസ്താനി കുടുംബത്തിൽ രണ്ടാമത്തെ മകനായി ജനിച്ച് വളർന്ന ആളാണ് ഹൈദർ. ഏറെക്കുറെ അന്തർ മുഖൻ ആയ, അയാളുടെ ചേട്ടന്റെയും അച്ഛന്റെയും ഭാഷയിൽ പറഞ്ഞാൽ ആണാണെന്ന് തെളിയിക്കേണ്ട ആവശ്യം ഉള്ള ഒരു കഥാപാത്രം ആണ് ഹൈദർ. കുറച്ച് അധികം നാളുകളായി ജോലി ഇല്ലാതെ വീട്ടിൽ നിക്കുന്ന ഹൈഡർ ചേട്ടന്റെ ഭാര്യയെ വീട്ട് ജോലികളിൽ ഒക്കെ സഹായിച്ചാണ് കഴിഞ്ഞ് പോവുന്നത്.

🔸വിവാഹിതൻ ആയ ഹൈഡറിന്റെ ഭാര്യ ഒരു ബ്യൂട്ടീഷ്യൻ ആയി ജോലി നോക്കുകയാണ്. ഇങ്ങനെ മുന്നോട്ട് പോകവേ ആണ് ഒരു ജോലി ഹൈഡറിന് ലഭിക്കുന്നത്, വേറൊന്നുമല്ല ഒരു അറിയപ്പെടുന്ന ഇറോട്ടിക്ക് ഡാൻസ് സെന്ററിൽ, ബാക്ക്ഗ്രൗണ്ട് ഡാൻസർ ആയിട്ട്. ഇവിടെ വെച്ചാണ് അയാൾ ട്രാൻസ് ജെണ്ടർ ആയ ബിബയെ കണ്ട് മുട്ടുന്നത്, തുടർന്ന് അരങ്ങേറുന്ന സംഭവങ്ങൾ ആണ് ഈ ചിത്രം. ഒരുപാട് സോഷ്യോ പൊളിറ്റിക്കൽ വിഷയങ്ങൾ പ്രതീക്ഷിച്ചത് പോലെ തന്നെ സിനിമ ചർച്ച ചെയ്യുന്നുണ്ട്, സിനിമ പുറത്തിറങ്ങിയ രാജ്യവും പശ്ചാത്തലവും ഒക്കെ നോക്കുമ്പോൾ അത്ഭുതപ്പെടുത്തുന്ന ഒരു കാഴ്ച തന്നെ ആണ്, കാഴ്ചപ്പാടിന്റെ പ്രശ്നം ആവാം. ഇങ്ങനെ ഒക്കെ ആണെങ്കിലും പോയ വർഷത്തെ നല്ല സിനിമകളിൽ ഒന്ന് എന്നതിന് അപ്പുറം സ്പെഷ്യൽ ആയി ഒന്നും തന്നെ അനുഭവപ്പെട്ടില്ല, കണ്ട് തന്നെ വിലയിരുത്തുക.

Verdict : Good

DC Rating : 3.75/5

1259. The Beasts (2022)

Director : Rodrigo Sorogoyen

Cinematographer : Alejandro Pablo

Genre : Drama

Country : France

Duration : 138 Minutes

🔸ബീസ്റ്റ്സ് എന്ന ഫ്രഞ്ച് ഡ്രാമ ചിത്രത്തെ മുന്നോട്ട് കൊണ്ട് പോവുന്നത് വെറുപ്പ് എന്ന വികാരമാണ്. ഒരു മനുഷ്യനോട് വെറുപ്പ് തോന്നി കഴിഞ്ഞാൽ അയാൾ ചെയ്യുന്ന ഓരോ കാര്യത്തിലും തോന്നുന്ന അസഹിഷ്ണുത, ദേഷ്യം എന്നിങ്ങനെ ഉള്ള കാര്യങ്ങളാണ് സാനും, സഹോദരൻ ലോറനും നമ്മുടെ നായക കഥാപാത്രം ആയ അന്റോനെയോട് ആദ്യാവസാനം കാണിക്കുന്നത്. തങ്ങൾക്ക് ലഭിച്ചേക്കാവുന്ന പണത്തിന് അന്റോയിനെ വിലങ്ങിട്ടു എന്ന അവരുടെ വാദം ഒരു പരിധി വരെ ശെരി ആണെങ്കിലും അതെല്ലാം ഒരു വരത്തൻ ആയ വ്യക്തിയോടുള്ള അവരുടെ വെറുപ്പിന് കാറ്റലിസ്റ്റ് മാത്രം ആയിരുന്നു എന്നതാണ് സത്യം.

🔸ഫ്രഞ്ചുകാരൻ ആയ അന്റോനെയും ഭാര്യ ഓൽകയും സ്പെയിനിലെ കഥ നടക്കുന്ന ഗ്രാമ പ്രദേശത്ത് താമസിക്കാൻ എത്തിയിട്ട് രണ്ട് വർഷം ആവുന്നേ ഉള്ളൂ. കൃഷിയും മറ്റുമൊക്കെ ചെയ്ത് പൂർണമായി തങ്ങളുടെ സ്ഥലത്ത് ഒതുങ്ങി കൂടി ജീവിക്കുന്ന ഇരുവരുടെയും അയൽക്കാർ ആണ് മുന്നേ സൂചിപ്പിച്ച, കുറച്ച് പ്രശ്നക്കാർ ആയ സഹോദരങ്ങൾ. മറ്റൊരു രാജ്യക്കാരൻ ആയ അന്റോനെയോട് രണ്ട് സഹോദരന്മാർക്കും അങ്ങേയറ്റം വെറുപ്പ് ആണ്, അയാളെ അപമാനിക്കാനും ഉപദ്രവിക്കാനും അവഹേളിക്കാനും കിട്ടുന്ന ഒരവസരം പോലും ഇരുവരും കളയാറില്ല. മൂന്ന് നൂറ്റാണ്ട് മുന്നേ സ്‌പെയിൻകാരെ പറ്റി നെപ്പോളിയൻ പറഞ്ഞതിന് ഉൾപ്പെടെ അന്റോനെ മാപ്പ് പറയണം എന്നതാണ് ഇരുവരുടെയും പക്ഷം.

🔸ഇതിന്റെ ഇടയിലേക്ക് ഗ്രാമത്തിൽ വിൻഡ് മിൽ സ്ഥാപിക്കാൻ ഒരു കമ്പനി വരുന്നതും, അവർ ഗ്രാമീണരുടെ സ്ഥലം ഏറ്റെടുക്കാൻ തയാറാവുന്നതും ഒക്കെയായി ബന്ധപ്പെട്ട വേറൊരു പ്രശ്നം കൂടി നിലവിലുണ്ട്. ഈ വെറുപ്പ് ഇങ്ങനെ പുകഞ്ഞ് പുകഞ്ഞ് താമസിയാതെ കയ്യാങ്കളിയിലേക്ക് ഒക്കെ വഴി മാറുന്നുണ്ട്, ഒടുവിൽ ഒട്ടും പ്രതീക്ഷിക്കാത്ത ഒരു പേ ഓഫും. കഴിഞ്ഞ വർഷം പുറത്തിറങ്ങിയ ചിത്രത്തിൽ ഇത്രയും ഇമോഷണലി കണക്ഷൻ തോന്നിയ വേറൊരു സിനിമ ഉണ്ടോ എന്നത് സംശയമാണ്, കണ്ട് കൊണ്ടിരിക്കുന്ന വേളയിൽ സഹോദരന്മാർക്ക് രണ്ടെണ്ണം കിട്ടിയെങ്കിൽ എന്ന് ആത്മാർഥമായി തോന്നിപ്പിച്ച സിനിമ എന്ന് പറയാം. രണ്ടാം പകുതി ഒരല്പം വീക് ആയി തോന്നി എങ്കിലും, യഥാർത്ഥ സംഭവങ്ങൾ ആധാരമാക്കി ആണ് സിനിമ തയാറാക്കിയിട്ടുള്ളത് എന്ന അറിവ് അത്യാവശ്യം ഹോന്റിങ് തന്നെ ആയിരുന്നു.

Verdict : Must Watch

DC Rating : 4.5/5

1258. Holy Spider (2022)

Director : Ali Abbasi

Cinematographer : Nadim Carlsen

Genre : Drama

Country : Denmark

Duration : 117 Minutes

🔸മതത്തിന്റെയും, വിശ്വാസത്തിന്റെയും ഒക്കെ പേരിൽ ലോകത്തിന്റെ പല ഭാഗത്ത് അക്രമ സംഭവങ്ങൾ നടക്കുന്നത് ഇന്ന് ഒരു പുതിയ കാഴ്ച അല്ലാതായി മാറിയിട്ടുണ്ട്. മത ഗ്രന്ഥങ്ങളെയും, വചനങ്ങളെയും ഒക്കെ തങ്ങളുടെ ഇഷ്ടത്തിന് വളച്ചൊടിക്കുന്ന, അല്ലെങ്കിൽ പുതിയ മാനങ്ങളും വ്യാഖ്യാനങ്ങളും ഒക്കെ കൊടുക്കുന്ന എക്സ്ട്രീമിസ്റ്റുകൾ കുറവല്ല. ഈ നൂറ്റാണ്ടിന്റെ തുടക്കത്തിൽ ഉണ്ടായ അത്തരം ഒരു യഥാർത്ഥ സംഭവത്തിന്റെ ചുവട് പിടിച്ച് ആണ് ഹോളി സ്‌പൈഡർ എന്ന ചിത്രം തയാറാക്കപ്പെട്ടിരിക്കുന്നത്. ഹോപ്ലസ് എന്നൊക്കെ ഉള്ള വിശേഷണം അർഹിക്കുന്ന, അത്യാവശ്യം ഡെയറിങ് ആയൊരു സിനിമ ആണ് ഹോളി സ്‌പൈഡർ എന്നത് ഒരു അണ്ടർ സ്റ്റേട്ട്മെന്റ് ആണ് എന്ന് പറയാം.

🔸ഇറാനിലെ വിശുദ്ധ നഗരമായ മാഷാദ് ആണ് നമ്മുടെ കഥാ പശ്ചാത്തലം. കുറച്ച് നാളുകളായി മാഷാഡിൽ കൊലപാതകങ്ങൾ ഒരു പതിവ് സംഭവമായി മാറിയിരിക്കുകയാണ്. ഇതിലെ അപകടകരമായ സാധ്യത എന്താണെന്നാൽ ഒരു സീരിയൽ കില്ലരുടെ സാന്നിധ്യം ശെരി വെക്കുന്ന തോതിൽ കൊലപാതകങ്ങൾക്ക് എല്ലാം സാമ്യം ഉണ്ട് എന്നത് തന്നെയാണ്. കൊല ചെയ്യുന്ന രീതിയിൽ മാത്രമല്ല, കൊല്ലപ്പെടുന്നവരിലും ഉണ്ട് ആ സാമ്യം. തെരുവ് വേശ്യകൾ ആയി ജീവിക്കുന്ന സ്ത്രീകൾ ആണ് കൊല ചെയ്യപ്പെട്ടവർ എല്ലാം തന്നെ. അവരുടെ ഷോളുകളാൽ തന്നെ കഴുത്ത് ഞെരിക്കപ്പെട്ടാണ് ഇവർ എല്ലാവരും കൊല ചെയ്യപ്പെട്ടിരിക്കുന്നതും.

🔸ഈ വിഷയങ്ങൾ അന്വേഷിക്കാനായി ഒരു ജർണലിസ്റ്റ് ആയ രാഹിമി എന്ന യുവതി തെഹ്റാനിൽ നിന്നും വരുന്നിടത്ത് ആണ് കഥ ആരംഭിക്കുന്നത്. ഈ ഒരു അന്വേഷണത്തിന് ഇടെ അവർ നേരിടേണ്ടി വരുന്ന ബുദ്ധിമുട്ടുകളും നേടുന്ന അറിവുകളും എല്ലാം ഇമ്പാക്ട്ഫുൾ ആയ തോതിൽ തന്നെ സിനിമ കാണിക്കുന്നുണ്ട്. ഇത്തരത്തിൽ ഒരു കുറ്റകൃത്യം അരങ്ങേറിയാൽ, അതിന് മതപരമായ ഒരു മാനം കല്പിച്ച് നൽകിയാൽ സമൂഹത്തിൽ അതിനോട് ഉണ്ടാവുന്ന മനോഭാവം ഒക്കെ സ്ട്രൈകിങ് ആയ രീതിയിൽ സിനിമ കാണിച്ച് തരുന്നുണ്ട്. ഹോപ്ലസ് എന്നൊക്കെയുള്ള വിശേഷണം എന്തിന് സിനിമയ്ക്ക് കൊടുത്തു എന്ന ചോദ്യത്തിന് ഉള്ള ഉത്തരം ഈ സിനിമയുടെ ക്ലൈമാക്സോഡ് കൂടി ലഭിക്കുന്നത് ആയിരിക്കും. താല്പര്യം തോന്നുന്നു എങ്കിൽ ധൈര്യമായി കണ്ട് നോക്കാവുന്നതാണ് ഈ ചിത്രം.

Verdict : Very Good

DC Rating : 4.25/5

1257. Triangle Of Sadness (2022)

Director : Ruben Ostlund

Cinematographer : Fredrik Wenzel

Genre : Drama

Country : Denmark

Duration : 147 Minutes

🔸നമ്മൾ പ്രതീക്ഷിക്കുന്ന വഴിയേ പോകാത്ത, അല്ലെങ്കിൽ അൺ പ്രെഡിക്ട്ടബിൽ ആയ സിനിമകൾ കാണാൻ ഒരു പ്രത്യേക രസം തന്നെയാണ്. ഇവിടെ ട്രയാങ്കിൽ ഓഫ് സാഡ്നെസ്സ് എന്ന ചിത്രത്തെ ഏറെക്കുറെ ഈ ഗണത്തിൽ പെടുത്താം. രണ്ടര മണിക്കൂർ ദൈർഘ്യം ഉള്ള സിനിമ എവിടേക്കാണ് പോവുന്നത് എന്നോ എങ്ങിനെയാണ് അവസാനിക്കാൻ പോവുന്നത് എന്നോ വ്യക്തമായ ഒരു രൂപം സിനിമ കണ്ട് കൊണ്ടിരിക്കുന്നതിന് ഇടെ തരുന്നേ ഇല്ല, ആ ഒരു ഫ്ലോയിൽ ഒപ്പം സഞ്ചരിക്കുക എന്ന ഓപ്ഷൻ മാത്രമേ നമുക്ക് ഉള്ളൂ. എന്നാൽ ആ ഒരു രണ്ടര മണിക്കൂർ യാത്ര നല്ല ഒന്നാന്തരം ഒരു അനുഭവം തന്നെ ആയിരുന്നു താനും, പോയ വർഷത്തെ മികച്ച സിനിമകളിൽ ഒന്നാണ് ട്രയാങ്കിൽ ഓഫ് സാഡ്നെസ്സ് എന്ന് നിസ്സംശയം പറയാം.

🔸മൂന്ന് ഭാഗങ്ങളായി, മൂന്ന് പശ്ചാത്തലത്തിൽ ആണ് ഈ സിനിമയുടെ കഥ പുരോഗമിക്കുന്നത്. കാൾ, യായ എന്നീ രണ്ട് മോഡലുമാരുടെ ജീവിതം കാണിച്ച് കൊണ്ടാണ് ആദ്യ പാർട്ട് ആരംഭിക്കുന്നത്, ദമ്പതിമാരായ ഇരുവരും തമ്മിൽ അത്ര സ്വര ചേർച്ച ഒന്നും ഇല്ല, ആസ്വാരസ്യങ്ങൾ സ്ഥിരവുമാണ്. ജെണ്ടർ ഇനിക്വാളിറ്റി, ഫെമിനിസം പോലുള്ള ഗ്ലോബൽ സബ്ജക്ട്ടുകൾ ഉൾപ്പെടെ ഈ ഭാഗത്ത് കടന്ന് വരുന്നുണ്ട്. തുടർന്നുള്ള രണ്ട് ഭാഗങ്ങളിലും ഈ കഥാപാത്രങ്ങൾ കടന്ന് വരുന്നുണ്ട് എങ്കിലും ഫോകസ് ഷിഫ്റ്റ്‌ ആവുന്നുണ്ട്, പിന്നീട് അരങ്ങേറുന്ന പലതിന്റെയും തുടക്കവും ഈ ഒരു ഭാഗത്ത് നിന്നുമാണ് ഉടൽ എടുക്കുന്നത്.

🔸രണ്ടാം ഭാഗം ഒരു ലക്ഷ്വറി യാചിൽ ആണ് അരങ്ങേറുന്നത്, ഇവിടെ ഒരുപാട് ഇന്ട്രെസ്റ്റ്റിങ് ആയ കഥാപാത്രങ്ങളെ നമ്മൾ കണ്ട് മുട്ടുന്നുണ്ട്. എലൈറ്റ് ക്ലാസിന്റെ പൊങ്ങച്ചവും, മെന്റാലിറ്റിയും എല്ലാം വിഷയമായി വരുന്ന ഈ ഭാഗത്ത് കമ്മ്യുണിസ്റ്റ് - കാപ്പിട്ടലിസ്റ്റ് വിമർശനങ്ങളും വാഗ്വദങ്ങളും എല്ലാം വന്ന് പോവുന്നുണ്ട്. മൂന്നാം ഭാഗത്തെ കുറിച്ച് തല്ക്കാലം ഒന്നും പറയാൻ ഉദ്ദേശിക്കുന്നില്ല, കണ്ട് തന്നെ അറിയുക. മികച്ച ഒരു അനുഭവം തന്നെ ആയിരുന്നു ട്രയാങ്കിൽ ഓഫ് സാഡ്നെസ്സ് എന്ന ചിത്രം, ഒരിടവേളയ്ക്ക് ശേഷം പലതിനെ പറ്റിയും ചിന്തിപ്പിച്ച ഒരു അറ്റംപ്റ്റ്, കാണാൻ ശ്രമിക്കുക.

Verdict : Very Good

DC Rating : 4.25/5

1256. The Quiet Girl (2022)

Director : Colm Bairead

Cinematographer : Cate Mcullough

Genre : Drama

Country : Ireland

Duration : 95 Minutes

🔸ഒരു ഊമ ആയ ഒൻപത് വയസുകാരിയുടെ കാഴ്ചയിലൂടെ ലോകത്തെ കാണിച്ച് തരികയാണ് പോയ വർഷം പുറത്തിറങ്ങിയ ഏറ്റവും മികച്ച സിനിമകളിൽ ഒന്നായ ഈ ഐറിഷ് ഡ്രാമ ചിത്രം. ഡ്രാമ ജോണറിൽ പെട്ട സിനിമകളോട് താല്പര്യം ഇല്ലാത്ത, ഒരല്പം സ്ലോ ആയി ഡെവലപ്പ് ആവുന്ന പ്ലോട്ടിനെ ആ രീതിയിൽ ഉൾക്കൊള്ളാൻ കഴിയാത്ത ആളുകൾക്ക് ചിലപ്പോൾ ഈ സിനിമയെ അംഗീകരിക്കാൻ കഴിഞ്ഞേക്കില്ല, കാരണം ഇതൊക്കെ തന്നെയാണ് ഈ ചിത്രം എന്നത് തന്നെ. ഒട്ടും സ്വര ചേർച്ച ഇല്ലാത്ത മാതാപിതാക്കൾക്ക് ജനിച്ചവൾ ആണ് നമ്മുടെ പ്രധാന കഥാപാത്രം ആയ കെയ്റ്റ്, അതിന്റെ ബുദ്ധിമുട്ടുകൾ അവൾ നല്ല തോതിൽ അനുഭവിക്കുന്നും ഉണ്ട്.

🔸ബഹളങ്ങളിൽ നിന്നും ആളുകളിൽ നിന്നും ഒക്കെ അകന്ന് മാറി തന്റെതായ ഒരു ലോകത്ത് സമയം ചിലവഴിക്കുന്നതിൽ ആനന്ദം കണ്ടെത്തുന്ന കെയ്റ്റിനെ ഗർഭിണി ആയ അവളുടെ അമ്മയ്ക്ക് ഒട്ടും ആസപ്റ്റ് ചെയ്യാൻ പറ്റുന്നില്ല. അതേ സമയം വളരെ അബ്യുസീവ് ആയ, ദേഷ്യക്കാരൻ ആയ അവളുടെ അച്ഛന്റെ കാര്യം ഒട്ട് പറയുകയും വേണ്ട, ഇങ്ങനെ ആകെ കൂടി എല്ലാ രീതിയിലും മോശപ്പെട്ട ഒരു അവസ്ഥയിലൂടെ കടന്ന് പോവുമ്പോഴാണ് ഒരു അവസരം, അല്ലെങ്കിൽ ഇതിൽ നിന്ന് താത്കാലികമായി എങ്കിലും രക്ഷപ്പെടാൻ ഉള്ളൊരു സാധ്യത അവളുടെ മുന്നിലേക്ക് കടന്ന് വരുന്നത്.

🔸കാര്യം വേറൊന്നുമല്ല, അവളുടെ അകന്ന ബന്ധുക്കളായ ഒരു ദമ്പതിമാരോട് ഒപ്പം ഒരു ഒഴിവ് കാലം ചിലവഴിക്കാൻ ഉള്ള ഒരവസരം. അങ്ങനെ കെയ്റ്റ് യാത്ര ആരംഭിക്കുകയാണ്, മധ്യവയ്സ്കർ ആയ അവരോടൊപ്പം ഒരു പുതിയ സ്ഥലത്തേക്ക്, പിന്നീട് അരങ്ങേറുന്ന സംഭവങ്ങൾ ആണ് ഈ സിനിമ. കെയ്റ്റ് എന്ന കഥാപാത്രത്തെ അവതരിപ്പിച്ച കുട്ടിയുടെ അരങ്ങേറ്റം ചിത്രമാണ് ഇത് എന്നത് ഒരല്പം അതിശയോക്തി ആയി തന്നെ തോന്നി, കാരണം അത്രമേൽ പക്വമായ പ്രകടനം ആയിരുന്നു അവരുടേത്. വളരെ ബ്യൂട്ടിഫുൾ ആയൊരു സിനിമയാണ് ദി ക്വയറ്റ് ഗേൾ, മികച്ചൊരു എൻഡിങ്ങും, നല്ല പ്രകടനങ്ങളും തുടങ്ങി പോസിറ്റീവ് ആയി പറയാൻ ഒരുപാട് ഒരുപാട് കാര്യങ്ങൾ. പോയ വർഷത്തെ മികച്ച സിനിമകളിൽ ഒന്ന് തന്നെയാണ് ഈ സിനിമ, കാണാൻ ശ്രമിക്കുക.

Verdict : Very Good

DC Rating : 4.25/5

1255. All Quiet On The Western Front (2022)

Director : Edward Berger

Cinematographer : James Friend

Genre : War

Country : Germany

Duration : 148 Minutes

🔸എറിക് മരിയ റിമാർക്കിന്റെ നോവൽ അടിസ്ഥാനപ്പെടുത്തി പുറത്തിറങ്ങിയ ആദ്യ സിനിമയെ കുറിച്ച് ഇതിനോടകം തന്നെ സംസാരിച്ച് കഴിഞ്ഞ സ്ഥിതിക്ക് അതിന്റെ ഏറ്റവും പുതിയ അടപ്റ്റേഷനെ പരിചയപ്പെടുത്താതെ പോവുന്നത് എങ്ങനെ. ഒരേ വേരിൽ നിന്നും വളർന്ന് വന്നതാണ് എങ്കിലും ഒരുപാട് വ്യത്യാസങ്ങൾ ഉണ്ട് രണ്ട് ശ്രമങ്ങളും തമ്മിൽ. മുപ്പതുകളിൽ പുറത്തിറങ്ങിയ ചിത്രം ഇമോഷനലി കുറച്ച് കൂടി സുപ്പീരിയർ ആണെങ്കിലും ഒരുപാട് പരിമിതികളിൽ നിന്നും തയ്യാറാക്കിയ ഒരു ഫീൽ ആദ്യാവസാനം ഉണ്ടായിരുന്നു, തീർച്ചയായും ആ കാലഘട്ടത്തിന്റെ പ്രശ്നം തന്നെ ആയിരിക്കാം. ഈ ഒരു വേർഷനിൽ എന്നാൽ ഇത്തരം പരിമിതികൾ ഏതും ഇല്ല എന്നത് എടുത്ത് പറയേണ്ട കാര്യം തന്നെയാണ്.

🔸കഥയിലേക്ക് കടക്കുക ആണെങ്കിൽ ജർമൻ പട്ടാളക്കാരൻ ആയ പോൾ ബോമർ ആണ് നമ്മുടെ പ്രധാന കഥാപാത്രം. ആ കാലഘട്ടത്തിലെ ഏതൊരു ടിപ്പിക്കൽ ജർമൻ യുവാവിനെയും പോലെ തന്നെ രാജ്യ സ്നേഹം ആവശ്യത്തിന് അധികം തുളുമ്പി നിൽക്കുന്ന, രാജ്യ സേവനത്തിന് മുന്നിൽ മറ്റൊന്നിനും വില നല്കാത്ത ഒരു യുവാവ് ആണ് ബോമർ. രാജ്യ സേവനത്തിന് വേണ്ടി പട്ടാളത്തിൽ എൻലിസ്റ്റ് ചെയ്ത സന്തോഷത്തിൽ സ്വയം മറന്ന് നിൽക്കുന്ന ബോമറേ കാണിച്ച് കൊണ്ട് ആരംഭിക്കുന്ന ചിത്രം യുദ്ധ മുഖത്തെ ഭീകരതകളെ കുറിച്ച് അയാൾക്ക് യാതൊരു ഐഡിയയും ഇല്ല എന്നത് വ്യക്തമായി ആദ്യം തന്നെ വരച്ചിടുന്നുണ്ട്. ഇവിടെ നിന്നും കഥ ഭീകര യുദ്ധം നടക്കുന്ന ജർമൻ ഫ്രഞ്ച് അതിർത്തിയിലേക്ക് കടന്ന് ചെല്ലുകയാണ്.

🔸യുദ്ധം എന്നത് മലയാളികൾക്ക് തന്നെയും അത്ര പരിചിതം അല്ലാത്ത ഒരു കാര്യമാണ്, അതിന്റെ ഭീകരതകൾ നമ്മൾ അധികം അനുഭവിക്കേണ്ടിയും അറിയേണ്ടിയും വന്നിട്ടില്ല ഇതുവരെ. അത് കൊണ്ട് തന്നെ പോൾ ബോമറിന്റെ ഷൂസിലേക്ക് സ്വയം ഇൻസർട്ട് ചെയ്യാൻ നമുക്ക് വലിയ ബുദ്ധിമുട്ട് ഒന്നും തോന്നിയെക്കില്ല. വളരെ മനോഹരമായി ഷൂട്ട് ചെയ്ത ഒരു സിനിമ കൂടിയാണ് ആൾ ക്വയറ്റ് ഓൺ ദി വെസ്റ്റേൺ ഫ്രണ്ട്, സിൽഹോലറ്റ് ഷോട്ട്സ് ഉൾപ്പെടെ എല്ലാം മികച്ചവ തന്നെ ആയിരുന്നു. വൈകാരികമായും മികച്ച ഒരു അനുഭവം നൽകാൻ സിനിമയ്ക്ക് കഴിഞ്ഞിട്ടുണ്ട്. ഒറിജിനൽ വേർഷൻ പോലെ ഒരു സൂപ്പറിയർ ക്രിയേഷൻ ഉള്ളപ്പോൾ അതിനോട് നീതി പുലർത്തുക എന്നത് തന്നെ വലിയ കാര്യമാണ്, അതിനോട് കിട പിടിക്കുക എന്നത് അതിലും റെയർ ആയ ഒരു അച്ചീവ്മെന്റും. തീർച്ചയായും പ്രശംസ അർഹിക്കുന്ന ഒരു സിനിമാ സംരംഭം തന്നെയാണ് ഈ ചിത്രം, കണ്ട് തന്നെ അറിയുക.

Verdict : Must Watch

DC Rating : 4.5/5

1254. Ant Man And The Wasp - Quantumania (2023)

Director : Peyton Reed

Cinematographer : Bill Pope

Genre : Sci Fi

Country : USA

Duration : 125 Minutes

🔸മാർവ്വലിന് ഇത് അത്ര നല്ല സമയം അല്ല, എൻഡ് ഗെയിം തൊട്ട് ഇങ്ങോട്ട് പൂർണ തൃപ്തി നൽകിയ ഒരു സിനിമയോ സീരീസോ പോലും പ്രസ്തുത നിലയത്തിൽ നിന്നും സംപ്രേക്ഷണം ചെയ്യപ്പെട്ടിട്ടില്ല. വക്കണ്ട ഫോറെവർ, ഫാൾക്കൻ ആൻഡ് വിന്റർ സോൾജ്യർ പോലുള്ളവ കുഴപ്പമില്ല എന്ന് തോന്നിച്ച് പോയെങ്കിലും, ആ ഭാഗത്തേക്ക്‌ പോവാൻ മടുപ്പിക്കുന്ന തോതിലുള്ള ഷീഹൾക്ക്, തോർ ലവ് ആൻഡ് ബ്ലണ്ടർ എന്നിങ്ങനെയുള്ളവ മാർവ്വലിന്റെ പഴയ ട്രാക്ക് റെക്കോർഡ് കളഞ്ഞ് കുളിക്കുക ആയിരുന്നു. ഇവിടെ ആന്റ് മാനിലേക്ക് എത്തുമ്പോഴും സ്ഥിതിഗതികൾ വ്യത്യസ്തമല്ല, അത്യാവശ്യം നല്ലൊരു ബോർ സിനിമ തന്നെയാണ് എൻഡ് പ്രോടക്റ്റ് ആയി മുന്നിലേക്ക് എത്തിയിരിക്കുന്നത്.

🔸പ്ലോട്ടിലേക്ക് തല്ക്കാലം ഡീറ്റെയിൽ ആയി പോവുന്നില്ല, പുതിയ സിനിമ ആയത് കൊണ്ട് തന്നെ സ്പോയിലേഴ്‌സ് ഉൾപ്പെടുത്താൻ ഉദ്ദേശിക്കുന്നില്ല. സിനിമയുടെ ബഹു ഭൂരിഭാഗവും ക്വാണ്ടം റിയാലമിലാണ് അരങ്ങേറുന്നത്. ആന്റ് മാൻ ആയ സ്ക്കോട്ട് ലാങ്ങും, സഹ പ്രവർത്തകരും ചില കാരണങ്ങളാൽ ഇവിടെ അകപ്പെട്ട് പോവുന്നതും, തുടർന്ന് തന്നോസിന് ശേഷമുള്ള മാർവ്വലിന്റെ അടുത്ത വലിയ വില്ലനായ കാങ്ങുമായി നേർക്ക് നേരെ വരുന്നതും ഒക്കെയാണ് പ്ലോട്ട് ലൈൻ. ആദ്യമേ തന്നെ അത്യാവശ്യം ഡാർക്ക് ആയിരുന്നെങ്കിൽ നന്നാവുമായിരുന്ന കഥയിലേക്ക് വളരെ ഫോഴ്സ്ഫുൾ ആയി ജോക്സ് കുത്തി നിറക്കുന്ന മാർവ്വലിന്റെ ശൈലി വളരെ ബോർ ആയി മുഴച്ച് നിൽക്കുന്ന ഫീൽ ആണ് സിനിമ തരുന്നത്, ഇതോടൊപ്പം പ്രത്യേകിച്ച് കാര്യം ഒന്നും ഇല്ലാതെ വന്ന് പോവുന്ന കുറേ സൈഡ് കഥാപാത്രങ്ങളും.

🔸താനോസിനെ പോലെ ഒരു വില്ലന് ശേഷം അടുത്തത് കാങ് ആണെന്നിരിക്കെ ആ കഥാപാത്രത്തെ ഓവർ എക്സ്പോസ് ചെയ്യുന്ന ഒരു ഫീൽ ആണ് ഇപ്പോൾ കിട്ടി കൊണ്ടിരിക്കുന്നത്, അയാൾക്ക് തന്നെ ഈ സിനിമയുടെ അവസാനം കൊടുത്തിരിക്കുന്ന എൻഡിങ് ഒക്കെ നല്ല ബോർ ആയിട്ടും ഉണ്ട്. കോമിക്സിലെ ഇഷ്ട വില്ലന്മാരിൽ ഒരാളായ മോഡക്കിനെ ഒക്കെ അവതരിപ്പിച്ചിരിക്കുന്ന രീതി ബോർ എന്നൊന്നും പറഞ്ഞാൽ പോരാ, അപമാനിക്കും വിധം ആയിരുന്നു, അതും ലുക്ക്‌ തൊട്ട് വർക്ക് വരെ സകലതും. ഒരു പുതിയ ഫെയ്സിന്റെ തുടക്കം ആണെന്നിരിക്കെ ഒട്ടും ആശാവഹം അല്ല കാര്യങ്ങൾ ഒന്നും. പോസ്റ്റ് ക്രെഡിറ്റ്, മിഡ് ക്രെഡിറ്റ് സീനുകളെ കുറിച്ച് പറയുക ആണെങ്കിൽ ചത്തതിന് ശേഷം റീത്ത് വെച്ചത് പോലുണ്ട് എന്ന് പറഞ്ഞ് നിർത്താം.

Verdict : Avoidable

DC Rating : 1.5/5

1253. The Whale (2023)

Director : Darren Aronofsky

Cinematographer : Mathew Libatique

Genre : Drama

Country : USA

Duration : 117 Minutes

🔸ബ്രെണ്ടൻ ഫ്രയ്സർ എന്ന നടനെ കാണുമ്പോൾ തന്നെ ഒരു നൊസ്റ്റാൾജിക്, ട്രാജിക് ഫീൽ ആണ്. മമ്മി പോലുള്ള സിനിമാ സീരീസുകൾ പഴയ വീസീആർ കാലഘട്ടത്തിൽ കണ്ട ഓർമ്മകൾ അത്ര പെട്ടെന്ന് മറക്കാൻ കഴിയാത്ത ഒന്ന് തന്നെ ആണ്. പിന്നീട് നില ഇല്ലാ കയത്തിലേക്ക് എന്ന മട്ടിൽ ഒതുങ്ങി പോയ ബ്രെണ്ടൻ ഫ്രയ്സറിന്റെ കരിയറിനെ കുറിച്ചും പലപ്പോഴും ആലോചിച്ചിട്ടുണ്ട്. ഇന്ന് വർഷങ്ങൾക്ക് ഇപ്പുറം ഈ കഥയിലെ നായകനായ ചാർളിയെ പോലെ ബ്രെണ്ടൻ ഫ്രയ്സറിനും ഇത് തിരിച്ച് പിടിക്കലിന്റെ ഒരു റിദമ്പ്‌ഷൻ ആർക്ക് ആണെന്നത് മനോഹരമായ ഒരു പാരലൽ തന്നെയാണ്. വളരെ ബ്യൂട്ടിഫുൾ ആയ ഒരു വ്യൂയിങ് അനുഭവം തന്നെയാണ് ഈ ചിത്രം.

🔸സംവിധായകന്റെ തന്നെ മുൻ സിനിമകൾ പോലെ തന്നെ അല്പം ഇൻസ്‌ക്യൂർ ആയ, അത്ര ടൈഡി ഒന്നും അല്ലാത്ത ഒരാളാണ് ഈ ചിത്രത്തിലെ പ്രധാന കഥാപാത്രമായ ചാർളി. ആരോഗ്യ പ്രശ്നങ്ങൾ കാരണം തന്നെ എക്സ്ട്രീം ഒബീസ് ആയ ഒരു ഫിസിക്കൽ കണ്ടീഷൻ ആണ് അയാളുടേത്, താൻ മരണത്തിലേക്ക് ആണ് അടുത്ത് കൊണ്ടിരിക്കുന്നത് എന്നും ഇനി അധികം നാൾ ബാക്കി ഇല്ല എന്നുമൊക്കെ ചാർലിക്ക് വ്യക്തമായി അറിയാം. മുന്നേ പറഞ്ഞ ഇൻസെക്യുരിറ്റി കാരണം തന്നെ ഒരു ഓൺലൈൻ അധ്യാപകനായ ചാർളി തന്റെ ഫ്രണ്ട് കാം പോലും വിദ്യാർത്ഥികൾക്ക് മുന്നിൽ ഓൺ ചെയ്യാറില്ല.

🔸തന്റെ ജീവിതത്തിൽ ഇനി ഒരേ ഒരു കാര്യം മാത്രമേ ബാക്കി ഉള്ളൂ എന്നാണ് ചാർലിയുടെ പക്ഷം. അതായത് വര്ഷങ്ങളായി കാണാത്ത തന്റെ മകളെ ഒരു തവണ കൂടി കാണുക, മുറിഞ്ഞ് പോയ ആ ബന്ധം ഒന്ന് കൂടി ആസ്വദിക്കുക എന്ന കാര്യം. പല കാരണങ്ങൾ കൊണ്ടും അകന്ന് ജീവിക്കുകയാണ് ചാർലിയും അയാളുടെ കുടുംബവും, ഈ ഒരു ആഗ്രഹം സാധ്യമാവുക എന്നത് അത്ര എളുപ്പം അല്ല താനും, സമയം ആണ് മറ്റൊരു പ്രശ്നം. വേഫർ തിൻ എന്നൊക്കെ പറയാവുന്ന ഒരു പ്ലോട്ട് ലൈൻ ആണ് ചിത്രത്തിന്റേത്, സവിശേഷം എന്ന് പറയാൻ പ്രത്യേകിച്ച് ഒന്നുമില്ലാത്ത ഇതിനെ മറ്റൊരു തലത്തിലേക്ക് കൊണ്ട് പോവുന്നത് ബ്രെണ്ടൻ ഫ്രയ്സറിന്റെ അഭിനയം തന്നെയാണ്, ഈ ഒരു വസ്തുതയ്ക്ക് വേണ്ടി മാത്രം ഈ സിനിമ നിങ്ങൾക്ക് കാണാം.

Verdict : Good

DC Rating : 3.75/5

1252. All Quiet On The Western Front (1930)

Director : Lewis Milestone

Cinematographer : Arthur Edeson

Genre : War

Country : USA

Duration : 152 Minutes

🔸എരിച് മരിയ റിമാർക്കിന്റെ വിഖ്യാതമായ നോവൽ വായിച്ച പരിചയം ഒന്നും ഇല്ല, എങ്കിലും പ്രസ്തുത നോവലിന്റെ രണ്ട് പ്രശസ്ത സിനിമാറ്റിക് ആടാപ്റ്റെഷനും ഇതിനോടകം കണ്ടതിൽ നിന്നും തീർച്ചയായും മികച്ച ഒരു സൃഷ്ടി തന്നെ ആയിരിക്കും എന്ന അനുമാനത്തിൽ ആണ് എത്തിയിരിക്കുന്നത്. ഇങ്ങനെ ആണെങ്കിലും ചില ചോദ്യങ്ങൾ ബാക്കി കിടക്കുന്നുണ്ട്, അതായത് രണ്ട് സിനിമാറ്റിക്ക് അദാപ്പ്റ്റെഷനുകളും തമ്മിൽ വ്യത്യാസങ്ങൾ ഒരുപാട് കാണാൻ ഇടയായി, ഇതിൽ ഏതാണ് നോവലിനോട് കൂടുതൽ നീതി പുലർത്തുന്നത് എന്നത് അറിയാനുള്ള ഒരു കൗതുകം ബാക്കി കിടക്കുന്നു. ചില കഥാപാത്രങ്ങളും കഥാ സന്ദര്ഭങ്ങളും എല്ലാം രണ്ടിലും വ്യത്യസ്തമാണ്, എൻഡിങ് ഉൾപ്പെടെ വ്യത്യാസം ഉണ്ട് താനും. ഇങ്ങനെ ഒക്കെ ആണെങ്കിലും രണ്ടും മികച്ച സിനിമകൾ ആണെന്നതിൽ തർക്കം ഏതും ഇല്ല, ഈ ഒരു കാര്യം ഒരു റെയർ അച്ചീവമെന്റ് ആണ് താനും.

🔸കഥയിലേക്ക് വരിക ആണെങ്കിൽ യുദ്ധം എന്നത് റോമാൻറ്റിസൈസ് ചെയ്യപ്പെടുന്ന ഒരു സമൂഹത്തിൽ ആണ് കഥ ആരംഭിക്കുന്നത്, കാലം എന്നത് മനഃപൂർവം ഉപയോഗിക്കാഞ്ഞത് തന്നെയാണ് കാരണം അത്തരക്കാരെ ഇപ്പോഴും നമുക്ക് ചുറ്റും കാണാൻ കഴിഞ്ഞേക്കും എന്നത് കൊണ്ട് തന്നെ. ജന്മ നാടിനായി യുദ്ധ ഭൂമിയിലേക്ക് പോവുന്നതും, എതിരാളിയുടെ തല കൊയ്യുന്നതും, അതിനോടൊപ്പം സ്വയം മരിച്ച് വീഴുന്നത് ഒക്കെ ഒരു തരം ഓർഗ്ഗസത്തോടെ അവതരിപ്പിക്കുന്ന ചിലരെ ഒക്കെ കാണാം. ഇനി അതും പോരെങ്കിൽ യുദ്ധത്തിന് പോയി എങ്ങനെയോ മരിക്കാതെ രക്ഷപ്പെട്ട് സ്വന്തം കുടുംബത്തിൽ വന്ന് ചേരുന്നവരെ ഭീരുക്കൾ എന്ന് വിളിക്കുന്ന യൂസ്ലെസുകളെയും ഈ ചിത്രത്തിൽ കാണാം.

🔸ഈ രണ്ട് സിനാറിയുസിൽ മാത്രമായി ഒതുങ്ങി പോവുന്ന പട്ടാളക്കാരുടെ മാനസികാവസ്ഥ ഈ സിനിമ മുൻ നിർത്തി ആലോചിക്കുമ്പോൾ വിഷമം തോന്നുന്നിടത്താണ് ആൾ ക്വയറ്റ് ഓൺ ദി വെസ്റ്റേൺ ഫ്രണ്ട് എന്ന സിനിമ വിജയിക്കുന്നത്. പ്രത്യേകിച്ചും എല്ലാ വിധ പ്രിവിലേജുകളോടും കൂടി ജീവിതം നയിക്കുന്നവർ ആണ് രണ്ടാമത് പറഞ്ഞ വിഭാഗം എന്നത് ഈ ഒരു അരിശം വർധിപ്പിക്കുന്നെ ഉള്ളൂ താനും. ഇതുവരെ കണ്ട ഏറ്റവും മികച്ച ആന്റി വാർ സിനിമകളിൽ ഒന്നാണ് ഈ ചിത്രം, അവതരിപ്പിക്കാൻ ഉദ്ദേശിച്ച സബ്ജക്ട്ട് അതിന്റെ എല്ലാ ഇന്റൻസിറ്റിയോടും കൂടി അവതരിപ്പിച്ച ഒരു ഗംഭീര ചിത്രം, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.75/5

1251. Brigsby Bear (2017)

Director : Dave McCary

Cinematographer : C. Sprenger

Genre : Drama

Country : USA

Duration : 97 Minutes

🔸പ്രായം ഏകദേശം മുപ്പത്തിനോട് അടുത്തെങ്കിലും, പുറം ലോകവുമായി വലിയ ബന്ധം ഒന്നും സൂക്ഷിക്കാതെ ജനിച്ച് വളർന്ന ആളാണ് നമ്മുടെ കേന്ദ്ര കഥാപാത്രം ആയ ജെയിംസ്. അച്ഛനമ്മമാർ ആയ ടെഡിനോടും ഏപ്രിലിനോടും ഒപ്പമാണ് ജെയിംസിന്റെ ജീവിതം. നഗരത്തിൽ നിന്ന് മാറി ഒരു ഒഴിഞ്ഞ സ്ഥലത്ത് ബങ്കറിന് ഉള്ളിലാണ് ഇവർ മൂന്ന് പേരും കഴിഞ്ഞ കുറച്ച് കാലങ്ങളായി താമസിക്കുന്നത്. പുറം ലോകം അപകടകരം ആണെന്ന് മകനെ പറഞ്ഞ് മനസിലാക്കിയിട്ടുള്ള ഇരുവരും അവനെ പുറത്ത് വിടാറേ ഇല്ല. ഈ ഏകാന്ത വാസത്തിനിടയിൽ ജെയിംസ് സമയം ചിലവഴിക്കുന്നത് ഒരേയൊരു കാര്യത്തിന് വേണ്ടിയാണ്, പഴയ കുട്ടികളുടെ പരിപാടി ആയ ബ്രിങ്സ്ബി ബിയർ കാണാൻ വേണ്ടി.

🔸ബ്രിങ്സ്ബി ബിയർ കാർട്ടൂൺസ് എന്നത് ഒരു കാലത്ത് അത്യാവശ്യം ഫാൻ ഫോളോയിങ് ഒക്കെ ഉണ്ടായിരുന്ന ഒരു പരിപാടി ആയിരുന്നു. പക്ഷെ ഇതിന്റെ പ്രത്യേകത എന്താണെന്ന് വെച്ചാൽ ഒരു വ്യക്തമായ എൻഡിങ് ഒരിക്കലും ഈ സീരീസിന് ഉണ്ടായിരുന്നില്ല എന്നതാണ്. അതായത് തന്റെ സുഹൃത്തുക്കളെ എല്ലാ കാലത്തും സഹായിച്ചിരുന്ന ബ്രിങ്സ്ബി എന്ന കരടി, സീരീസിലെ പ്രധാന വില്ലനെ ഒരിക്കലും തോൽപ്പിക്കുന്ന, അല്ലെങ്കിൽ അവസാനിപ്പിക്കുന്ന ഒരു എപ്പിസോഡ് ഒരിക്കലും പുറത്തിറങ്ങിയിരുന്നില്ല. സീരീസിനോട് ഒബ്സഷൻ വെച്ച് പുലർത്തിയിരുന്ന ജെയിംസിനെ ഈ ഒരു വസ്തുത തെല്ലൊന്നും അല്ല അലോസര പെടുത്തിയത്.

🔸കാര്യം എന്ത് തന്നെ ആയാലും ഈ ഒരു പോരായ്മയ്ക്ക് പരിഹാരം കാണാൻ ഇറങ്ങി തിരിക്കുകയാണ് ജെയിംസ്, വർഷങ്ങൾക്ക് ഇപ്പുറം ബ്രിങ്സ്ബി സീരീസിന് ഒരു ക്ളോഷർ എന്ന നിലയ്ക്ക് ഒരു സിനിമ എടുക്കാം എന്ന ആലോചനയിലേക്ക് അയാൾ എത്തുകയാണ്. ഈ ഒരു പ്ലോട്ട് ലൈനിന് ഇടയിലേക്ക് വേറെയും ചില സംഭവങ്ങൾ കടന്ന് വരുന്നുണ്ട്, അതൊക്കെ സിനിമ കണ്ട് തന്നെ അറിയുക. വളരെ പ്ലോട്ട് ഡ്രൈവൻ ആയ, വൈകാരികം ആയ ഒരു വ്യൂയിങ് അനുഭവം ആണ് ഈ ചിത്രം, പ്രത്യേകിച്ചും ക്ലൈമാക്സ്‌ ഒക്കെ വേറിട്ട ഒരു ഫീൽ ആയിരുന്നു. വളരെ ഓവർ ലൂക്ഡ് ആയ മികച്ച ഒരു സിനിമ ആണ് ബ്രിങ്സ്ബി ബിയർ, കാണാൻ ശ്രമിക്കുക.

Verdict : Very Good

DC Rating : 4.25/5

1250. Decision To Leave (2022)

Director : Park Chan Wook

Cinematographer : Kim Ji Yong

Genre : Drama

Country : South Korea

Duration : 140 Minutes

🔸പാർക്ക് ചാൻ വുക് എന്ന സംവിധായകനോടും അയാളുടെ ഫിലിമോഗ്രഫിയോടും ഒരു പ്രത്യേക ഇഷ്ടം എല്ലാ കാലത്തും ഉണ്ടായിരുന്നു. ജോയിന്റ് സെക്യൂരിറ്റി ഏരിയ, വെഞ്ചിയൻസ് സീരീസ്, തേർസ്റ്റ് തുടങ്ങി അധികം ആരും പരാമർശിക്കാത്ത ത്രീ എക്സ്ട്രീംസ് വരെയുള്ള സിനിമകൾ വളരെ പ്രിയപ്പെട്ടവ തന്നെയാണ്. അത് കൊണ്ട് തന്നെ ഒരു മിസ്ട്ടറിയുടെ പശ്ചാത്തലത്തിൽ പുള്ളി അവതരിപ്പിക്കുന്ന ഒരു റൊമാന്റിക് ചിത്രം കാൻസിൽ കയ്യടി നേടിയപ്പോഴും, റിലീസ് ആയപ്പോഴും ഒന്നും അത്ഭുതം ഒട്ടുമേ തോന്നിയില്ല, പോയ വർഷം ഏറ്റവും കൂടുതൽ കാത്തിരുന്ന സിനിമകളിൽ ഒന്നായിരുന്നു ഡിസിഷൻ ടു ലീവ്.

🔸ഒരേ സമയം മർഡർ മിസ്റ്ററി ചിത്രവും, അതിനോടൊപ്പം തന്നെ അല്പം ട്രാജിക് ആയ റൊമാൻസ് ചിത്രം കൂടിയാണ് ഡിസിഷൻ ടു ലീവ്. രണ്ട് വളരെ വ്യത്യസ്തമായ ജോണർ ആണെങ്കിൽ കൂടിയും രണ്ടിനോടും നീതി പുലർത്താനും, രണ്ടും കൂടി ചേർത്ത് മികച്ച ഒരു എൻഡ് പ്രോടക്റ്റ് നല്കാനും ചിത്രത്തിന് സാധിച്ചിട്ടുണ്ട്. ഹയെ ജുൻ എന്ന നമ്മുടെ നായക കഥാപാത്രം ഒരു അന്വേഷകൻ ആണ്, വ്യക്തി ജീവിതത്തിൽ ഒരുപാട് ബുദ്ധിമുട്ടുകൾ നേരിടുന്ന ഡിപ്രഷന്റെ പിടിയിൽ അകപ്പെട്ട ഒരു കഥാപാത്രം. ഒരുനാൾ അയാളെ അന്വേഷിച്ച് ഒരു കൊലപാതക കേസ് വരികയാണ്, നഗരത്തിൽ നിന്നും അല്പം മാറിയുള്ള ഒരു താഴ്വരയിൽ ഒരു പവർ പ്ലാന്റ് ജോലിക്കാരൻ കൊല്ലപ്പെട്ടിരിക്കുകയാണ്, അതിന്റെ കാരണവും, ഘാതകനെയും കണ്ടെത്തുക എന്നതാണ് ജൂനിന്റെ ലക്ഷ്യം.

🔸അന്വേഷണത്തിന്റെ ഭാഗമായി ആ നാട്ടിൽ എത്തിയ ജുൻ അവിടെ വെച്ചാണ് കൊല്ലപ്പെട്ട വ്യക്തിയുടെ ഭാര്യ ആയ സൊറെയെ കണ്ട് മുട്ടുന്നത്. കൊലപാതകത്തിന് പിന്നിൽ അവരാണ് എന്ന് കരുതാൻ ജൂനിന്റെ പക്കൽ തെളിവുകളും മറ്റുമൊക്കെ ഉണ്ടായിരുന്നു എങ്കിലും കഥ പോവുന്നത് ആ വഴിക്ക് അല്ല, നായക കഥാപാത്രത്തിന് അവരോട് പ്രണയം തോന്നുന്നിടത്ത് കഥ ട്രാക്ക് മാറ്റുന്നു. പിന്നീട് ഈ കഥാപാത്രങ്ങൾക്ക് എന്ത് സംഭവിക്കും എന്നതും, കൊല ചെയ്തത് ആരാണെന്നും ഒക്കെയുള്ള ചോദ്യങ്ങൾക്ക് ഉത്തരമാണ് ഈ സിനിമ. വളരെ മെജസ്ടിക് എന്നൊക്കെ വിശേഷിപ്പിക്കാവുന്ന സിനിമാട്ടോഗ്രാഫി ആണ് ഈ സിനിമയുടേത്, അത് പോലെ തന്നെ ഫൈനൽ ഷോട്ടും. പോയ വർഷത്തെ മികച്ച സിനിമകളിൽ ഒന്നായി തീർച്ചയായും ഉണ്ടാവും ഡിസിഷൻ ടു ലീവ് എന്ന ചിത്രവും.

Verdict : Must Watch

DC Rating : 4.5/5

1249. Save The Green Planet (2003)

Director : Jang Joon Hwan

Cinematographer : Hong Kyung Pyo

Genre : Sci Fi

Country : South Korea

Duration : 118 Minutes

🔸വിചിത്രം എന്നൊക്കെയുള്ള വിശേഷണം ഒരു പരിധി വരെ അർഹിക്കുന്ന, ക്രിഞ്ച് എന്നൊക്കെ തോന്നിപ്പിക്കാൻ സാധ്യത ഉള്ള ഒന്നാണ് സേവ് ദി ഗ്രീൻ പ്ലാനറ്റ് എന്ന ചിത്രത്തിന്റെ പ്ലോട്ട് ലൈൻ. അന്യ ഗ്രഹത്തിൽ നിന്നും ഭൂമി കീഴടക്കാനായി വരുന്ന ഏലിയൻസിനെ ഭയന്ന്, അവരിൽ ഒരാളെന്ന് വിശ്വസിക്കുന്ന കോർപറേറ്റ് കമ്പനി മുതലാളിയെ തട്ടി കൊണ്ട് പോയി ബന്ധി ആക്കുന്ന നായകൻ ഒക്കെയുള്ള ചിത്രത്തിന് അങ്ങനെ ഒരു ഇമേജ് ലഭിച്ചതിൽ വലിയ തെറ്റ് ഒന്നും പറയാനില്ല. ഇങ്ങനെ ഒരു ചിന്തയിൽ വലിയ പ്രതീക്ഷ ഒന്നും ഇല്ലാതെ ആണ് കണ്ട് തുടങ്ങിയത് എങ്കിലും ഈ സിനിമ നൽകുന്ന വ്യൂയിങ് എക്സ്പീരിയൻസ് അത്യാവശ്യം ഗംഭീരം തന്നെ ആയിരുന്നു എന്നതാണ് സത്യം.

🔸ഒരുപാട് ജോണറുകൾ ബ്ലൻഡ് ചെയ്താണ് ഈ സിനിമ ഒരുക്കിയിരിക്കുന്നത്. കോമെടി, സയൻസ് ഫിക്ഷൻ, ഡ്രാമ തുടങ്ങി വെവ്വേറെ എലമെന്റുകളിലേക്ക് ചിത്രം കടന്ന് ചെല്ലുന്നുണ്ട്, ഇതിനോടെല്ലാം നീതി പുലർത്തുന്നുമുണ്ട്. ഒരു കെമിക്കൽ മൾട്ടി നാഷണൽ കമ്പനിയുടെ മുതലാളിയെ നമ്മുടെ നായക കഥാപാത്രം തട്ടിക്കൊണ്ട് പോവുകയാണ്, ലേശം മാനസിക പ്രശ്നങ്ങൾ ഉണ്ടെന്ന് തോന്നിപ്പിക്കുന്ന പ്രകൃതം ആണ് നമ്മുടെ നായകന്റെത് എന്നത് അയാൾക്ക് ഒട്ടും സഹായകരം ആവുന്നില്ല കാരണം അയാൾക്ക് പറയാൻ ഉണ്ടായിരുന്ന കഥ അല്ലെങ്കിൽ തിയറി വളരെ വിചിത്രമായ ഒന്ന് തന്നെ ആയിരുന്നു.

🔸ഏഴ് ദിവസങ്ങൾക്ക് അപ്പുറം ഗ്രഹണ ദിനത്തിൽ ഭൂമി അന്യ ഗ്രഹ ജീവികളാൽ ആക്രമിക്കപ്പെടും, അന്യ ഗ്രഹ ജീവികളുടെ രാജാവ് ഭൂമിയിൽ കാൽ കുത്തുകയും സകല ചരാചരങ്ങളെയും കൊന്നൊടുക്കുകയും ചെയ്യും. ഭൂമിയെ രക്ഷിക്കാൻ ആകെ ഏഴ് ദിവസങ്ങൾ മാത്രമാണ് അയാൾക്ക് മുന്നിൽ ഉള്ളത് എന്നാണ് അയാളുടെ വാദം. ഒരുപാട് ചോദ്യങ്ങൾ ബാക്കി വെക്കുന്ന ഈ കഥയുടെ സോർസ് എന്താണ്, ഇതിൽ സത്യത്തിന്റെ അംശം വല്ലതും ഉണ്ടോ, നായകന്റെ പിൻകാല ചരിത്രം എന്താണ് തുടങ്ങിയ ഒരുപാട് ചോദ്യങ്ങൾക്ക് ഉള്ള ഉത്തരമാണ് ഈ സിനിമ. ഒന്നെമുക്കാൽ മണിക്കൂർ മാത്രം ഉള്ള സിനിമ ഒരു പോയിന്റിൽ പോലും ബോർ അടിപ്പിക്കുന്നില്ല എന്ന് മാത്രമല്ല കണ്ട് കഴിയുമ്പോൾ സംപ്തൃപ്തി തരുന്നുമുണ്ട്, അപ്പോൾ കാണാൻ ശ്രമിക്കുക.

Verdict : Good

DC Rating : 3.75/5

1248. Ichi The Killer (2001)

Director : Takashi Miike

Cinematographer : Hideo Yamamoto

Genre : Action

Country : Japan

Duration : 128 Minutes

🔸വയലൻസിന്റെ അതിപ്രസരം എന്നൊക്കെ പറഞ്ഞാൽ അത് കുറഞ്ഞ് പോവുന്നത് ഇച്ചി ദി കില്ലർ പോലുള്ള സിനിമകൾ കാണുമ്പോഴാണ്. ഈ ഒരു കാരണം കൊണ്ട് തന്നെ ഒരുപാട് രാജ്യങ്ങളിൽ, ഒരുപാട് ഭാഷകളിൽ ബാൻ നേരിടേണ്ടി വന്ന സിനിമ കൂടിയാണ് ഇത്. ഒരു മോബ്സ്റ്റർ, ഒരു വേശ്യയെ ക്രൂരമായി മർദിച്ച് റേപ്പ് ചെയ്യുന്ന സീൻ കാണിച്ച് കൊണ്ട് ആരംഭിക്കുന്ന ചിത്രം തുടക്കം തന്നെ ആ ഒരു ഷോക്ക് ട്രീട്ട്മെന്റ് തരുന്നുണ്ട് എങ്കിലും പോകെ പോകെ ഇതുവരെ കണ്ടതൊന്നും ഒന്നുമല്ല എന്ന തോതിലേക്ക് മാറുകയാണ്. ചുരുക്കി പറഞ്ഞാൽ കണ്ട് അവസാനിപ്പിക്കാൻ വളരെ ബുദ്ധിമുട്ടുള്ള, ഈ ഒരു കാര്യത്തിൽ യാതൊരു അതിശയോക്തിയും ഇല്ലാത്ത ഒരു ചിത്രം ആണ് ഇച്ചി ദി കില്ലർ.

🔸അഞ്ചോ എന്ന ജാപനീസ് യാകുസ ബോസ് ഒരുനാൾ ക്രൂരമായി കൊല ചെയ്യപ്പെടുകയാണ്, ക്രൂരം എന്ന വാക്ക് വെറുതെ പറഞ്ഞതല്ല, അയാൾ കൊല ചെയ്യപ്പെട്ട മുറിയിൽ ചോര പുരളാത്ത ഒരു ഭാഗമോ വസ്തുവോ പോലും ഇല്ലായിരുന്നു, മാത്രമല്ല കുടൽ മാല ഒക്കെ വലിച്ച് കീറി ആഭരണം കണക്കിന് ഒരുക്കി വെച്ചിരിക്കുകയാണ് മുറിയാകെ. ഇവിടെ നിന്നും സംഭവിച്ചത് എന്താണെന്ന് വ്യക്തമല്ല എങ്കിലും കൊന്നത് ഇച്ചി എന്ന വ്യക്തി ആണെന്ന് മാത്രം സിനിമ വെളിപ്പെടുത്തുന്നുണ്ട്, അതിലും സത്യത്തിന്റെ അംശം എത്ര എന്നത് വെളിവാക്കുന്നില്ല. പിന്നീട് കഥ കുറച്ച് പുറകിലേക്ക് പോവുകയാണ്.

🔸കൊല്ലപ്പെട്ട അഞ്ചോയുടെ അനുജരന്മാർ അടങ്ങി ഇരുന്നില്ല എന്ന് മാത്രമല്ല, താമസിയാതെ തന്നെ അവിടമാകെ ഒരു ചോര കളമായി മാറുകയാണ്. വളരെ ഇന്നൊവേറ്റിവ് ആയത് എന്ന വിശേഷണം ഒന്നും അർഹിക്കാത്ത ഒരു പ്ലോട്ട് ആണെങ്കിലും ആദ്യാവസാനം മുഷിച്ചിൽ ഒന്നും തോന്നാത്ത രീതിയിൽ ചിത്രം കാര്യങ്ങൾ അവതരിപ്പിച്ചിട്ടുണ്ട്. വയലൻസ് എന്നത് ഒരു പരിധി കഴിഞ്ഞാൽ കണ്ട് നിൽക്കാൻ ബുദ്ധിമുട്ടുള്ള അവസ്ഥയിലേക്ക് പോവുന്നുണ്ട് എന്നതിനാൽ എല്ലാവർക്കും പറ്റിയ ഒരു സിനിമയല്ല ഇച്ചി ദി കില്ലർ, താല്പര്യം തോന്നുന്നെങ്കിൽ കണ്ട് നോക്കുക.

Verdict : Good

DC Rating : 3.75/5

1247. Near Dark (1987)

Director : Kathryn Bigelow

Cinematographer : Adam Greenberg

Genre : Horror

Country : USA

Duration : 95 Minutes

🔸വാമ്പയർ സിനിമകളോടും സീരീസുകളോടും വലിയ താല്പര്യം ഒന്നും ഒരു കാലത്തും തോന്നിയിട്ടില്ല, ഈ വിഭാഗത്തിൽ പെട്ട ഒരു സബ് ജോണർ അറുപതുകളുടെ അവസാനം തൊട്ട് ഇങ്ങോട്ട് പലവിധ രൂപ ഭാഗങ്ങളിൽ പുറത്ത് ഇറങ്ങിയിട്ടുണ്ട് എങ്കിലും ഇഷ്ടപ്പെട്ടത് എന്ന് പറയാൻ മാത്രം ഒന്ന് ഇല്ല എന്നതാണ് സത്യം. ഈ ഒരു ട്രെന്ഡുമായി ബന്ധം ഒന്നും ഇല്ലാതിരുന്ന ഡ്രാക്കുളയും, ഈ അടുത്ത് വന്ന വാട്ട് വി ഡു ഇൻ ദി ഷാഡോസും മാത്രമാണ് ഒരു അപവാദം. ഈ ഒരു സ്റ്റേട്ട്മെന്റിന്റെ പ്രസക്തി നിയർ ഡാർക്ക്‌ എന്ന സിനിമ കാണുന്നത് വരെ മാത്രം ആയിരുന്നു.

🔸കാലിബ് എന്ന നമ്മുടെ കേന്ദ്ര കഥാപാത്രം, ഒരു ടിപ്പിക്കൽ അമേരിക്കൻ ചെറുപ്പക്കാരൻ ആണ്. ഭാവിയെ കുറിച്ചൊന്നും വലിയ ബോതേർഡ് ആവാതെ സുഹൃത്തുക്കളോടൊപ്പം സമയം ചിലവഴിച്ച് മുന്നോട്ട് പോവുന്ന കാലിബ്‌ അങ്ങനെ ഒരു ദിവസമാണ് മെയ് എന്ന യുവതിയെ കണ്ട് മുട്ടുന്നത്. കണ്ട മാത്രയിൽ തന്നെ അവളോട് പ്രണയം തോന്നുന്ന കാലിബ്‌ ആ ദിവസം മുഴുവൻ അവളോടൊപ്പം ചിലവഴിക്കുകയാണ്. തന്റെ വണ്ടിയിൽ അവളോടൊത്ത് ഉള്ള യാത്ര കാലിബ്‌ അവസാനിപ്പിക്കുന്നത് വളരെ വിചിത്രമായ ഒരു സംഭവം അരങ്ങേരുമ്പോഴാണ്, അതിനെ തുടർന്ന് ഭീകരമായ ഒരു തിരിച്ചറിവ് അവനും പ്രേക്ഷകർക്കും ലഭിക്കുന്നിടത്ത് നിന്ന് കഥ ട്രാക്ക് മാറ്റുന്നു.

🔸ജമ്പ് സ്കെയർ രംഗങ്ങൾ ഒന്നും ഇല്ലാതെ തന്നെ പശ്ചാത്തലവും, കഥാപാത്രങ്ങളെയും ഉപയോഗിച്ച് ഒരു ഫിയർ ഫാക്ടർ സിനിമ നമുക്ക് തരുന്നുണ്ട്. രണ്ടാം പകുതി ഏറെക്കുറെ പൂർണമായും ഒരു സർവയ്വൽ മോഡിലുള്ള ത്രില്ലർ ആണെന്ന് പറയാം. വെറും ഒന്നര മണിക്കൂർ മാത്രമാണ് സിനിമയുടെ ദൈർഘ്യം, അത് കൊണ്ട് തന്നെ ഒരിടത്തും സ്ലോ ആവാതെ ഫാസ്റ്റ് പെയ്സ്ഡ് ആയാണ് കഥ പുരോഗമിക്കുന്നത്. എൻഡിങ് എന്നത് ഒരല്പം ഡൗൺ ആയി തോന്നി എങ്കിലും ആകെ മൊത്തം ഉള്ള വ്യൂയിങ് അനുഭവം മികച്ചത് തന്നെ ആയിരുന്നു, ഒരുപക്ഷെ ടോൺ കാരണം കുറച്ച് കൂടി ഡാർക്ക് ആയ അവസാനം പ്രതീക്ഷിച്ചത് കൊണ്ടാവാം. ഹൊറർ, ത്രില്ലർ ആരാധകരാണ് നിങ്ങൾ എങ്കിൽ മികച്ച ഒരു അനുഭവം ആയിരിക്കും ഈ ചിത്രം, തീർച്ചയായും കണ്ട് നോക്കുക.

Verdict : Very Good

DC Rating : 4/5

1246. Elvis (2022)

Director : Baz Luhrmann

Cinematographer : Mandy Walker

Genre : Drama

Country : Australia

Duration : 159 Minutes

🔸ഇരുപതാം നൂറ്റാണ്ടിലെ ഏറ്റവും പോപ്പുലർ ആയ കൾച്ചറൽ ഐക്കൺ, കിങ് ഓഫ് റോക്ക് ആൻഡ് റോൾ എന്ന് പരക്കെ അറിയപ്പെട്ട വ്യക്തിത്വം, മരണ ശേഷം പോലും ഒരുപാട് കോൻസ്പിറേസി തിയറികൾക്ക് ഭാഗമായ വ്യക്തി, സംഗീത ചരിത്രത്തിൽ തന്നെ ഏറ്റവും കൂടുതൽ കോപ്പികൾ വിറ്റഴിഞ്ഞ മ്യൂസിക് ആർട്ടിസ്റ്റ്, ഇങ്ങനെ ഒരുപാട് ഒരുപാട് നേട്ടങ്ങൾ കരസ്തമാക്കിയ എൽവിസ് പ്രസ്‌ലി എന്ന നാൽപത്തി രണ്ട് വയസ്സ് വരെ മാത്രം ജീവിച്ച വ്യക്തിയുടെ കഥയാണ് കഴിഞ്ഞ വർഷം പുറത്തിറങ്ങിയ എൽവിസ് എന്ന സിനിമ. കഴിഞ്ഞ വർഷം പുറത്തിറങ്ങിയ സിനിമകളിൽ മികച്ചവയിൽ ഒന്ന് എന്ന് നിസ്സംശയം പറയാവുന്ന ഒരു സംരംഭം തന്നെയാണ് എൽവിസ്.

🔸പ്രസ്തുത സിനിമ എൽവിസിന്റെ കഥ എന്നതിനൊപ്പം തന്നെ അയാളുടെ മാനേജർ ആയിരുന്ന കോളണൽ പാർക്കരിന്റെയും കഥയാണ്. മിസിസ്പ്പിയിലെ ദരിദ്ര കുടുംബ പശ്ചാത്തലത്തിൽ ജനിച്ച് വളർന്ന എൽവിസ് പിന്നീട് ഒരു ഗ്ലോബൽ സെൻസെഷൻ ആയി മാറിയതിനു പിന്നിൽ തീർച്ചയായും പാർക്കരിന്റെ കൂടി സ്വാധീനം ഉണ്ട് എന്ന് പറയേണ്ടി വരും. പിൽക്കാലത്ത് ഒരുപാട് വിള്ളലുകൾ വീണ, ഒരുപാട് വിവാദങ്ങൾ സൃഷ്ട്ടിച്ച ഒരു ബന്ധം കൂടിയാണ് എങ്കിലും അതിൽ മാത്രം ഒതുങ്ങി നിൽക്കാതെ എല്ലാ വശങ്ങളിൽ കൂടിയും കാര്യങ്ങളെ നോക്കി കാണാൻ സിനിമ തയാറാവുന്നുണ്ട്.

🔸മുന്നേ സൂചിപ്പിച്ചത് പോലെ തന്നെ എൽവിസിന്റെ യൗവനത്തിൽ തുടങ്ങി അയാളുടെ അവസാന പെർഫോമൻസ് വരെ ഉള്ള സംഭവങ്ങൾ സിനിമ കവർ ചെയ്യുന്നുണ്ട്. ഇതിന് പാരലൽ ആയി യൂറോപ്പിൽ നിന്ന് അനധികൃതമായി കുടിയേറി വന്ന്, ഐതിഹസികമായ ഒരു ജീവിതം ജീവിച്ച് തീർത്ത പാർക്കരിന്റെ യാത്രയും അയാളുടെ മരണകിടക്ക വരെ സിനിമ കാണിച്ച് തരുന്നുണ്ട്, അതും ടോം ഹാങ്ക്സ് പോലൊരു നടനിലൂടെ ആണ് അത് അവതരിപ്പിച്ചത് എന്നത് കൂടുതൽ മനോഹരമായ ഒരു സ്റ്റാറ്റ് ആണ്. നല്ലൊരു സിനിമ ആണ് എൽവിസ്, ദൈർഘ്യം ഒരല്പം കൂടി പോയത് പോലെ തോന്നിയെങ്കിലും പോരായ്മയായി പറയാൻ മാത്രം ഇല്ല, കണ്ട് നോക്കുക.

Verdict : Very Good

DC Rating : 4/5

1245. All About My Mother (1999)

Director : Pedro Almodovar

Cinematographer : Affonso Beato

Genre : Drama

Country : Spain

Duration : 104 Minutes

🔸ഒരുപാട് വികാരങ്ങളുടെ തള്ളിച്ച ആദ്യം തൊട്ട് അവസാനം വരെ കീപ്പ് ചെയ്ത് പോവുന്ന വളരെ മനോഹരമായ ഒരു സിനിമയാണ് ആൾ എബൌട്ട്‌ മൈ മദർ. പ്രണയം, സൗഹൃദം, വിട പറച്ചിൽ, ഒത്തുചേരൽ തുടങ്ങി ഒരുപാട് മികച്ച മൊമന്റുകളും സിനിമയുടെ ഭാഗമാണ്, കാഴ്ചക്കാരനെ സംബന്ധിച്ചിടത്തോളം മികച്ച ഒരു വ്യൂയിങ് അനുഭവം എന്നല്ലാതെ മറ്റൊന്നും തന്നെ ഈ സിനിമയെ കുറിച്ച് പറയാനില്ല. കണ്ട് കഴിയുന്ന വേളയിൽ വല്ലാത്തൊരു തരം ഇമോഷണൽ ടോൾ നമ്മളിൽ സൃഷ്ടിക്കാൻ ഈ സിനിമയ്ക്ക് കഴിയുന്നുണ്ട്. നല്ലതാണ് എന്ന് അറിയാമായിട്ടും കാണാൻ വൈകിയതിൽ ഉള്ളൊരു നിരാശ മാത്രമാണ് അവസാന രംഗവും കഴിഞ്ഞ് ഈ ചിത്രവും ഓർമയിലേക്ക് കടന്ന് പോവുമ്പോൾ തോന്നിയ വികാരം.

🔸സ്വന്തം മകൻ കൺ മുന്നിൽ വെച്ച് ഒരു വാഹനാപകടത്തിൽ കൊല്ലപ്പെടുന്നത് കണ്ട് നിൽക്കേണ്ടി വരുന്നുണ്ട് നമ്മുടെ കേന്ദ്ര കഥാപാത്രമായ മാനുവേലയ്ക്ക്. വർഷങ്ങൾക്ക് മുന്നേ ബാര്സലോനയിൽ നിന്നും ഏക മകനോടൊപ്പം താമസം മാറി മാദ്രിഡിൽ എത്തിയതാണ് മാനുവേല. പരിചയം ഉള്ള ആളുകളിൽ നിന്നും, പരിചിതമായ ചുറ്റുപാടുകളിൽ നിന്നും എല്ലാമുള്ള ഒരു ഒളിച്ചോട്ടം ആയിരുന്നു എന്ന് വേണമെങ്കിൽ പറയാം. പിന്നീട് രണ്ട് പതിറ്റാണ്ടോളം മകന് വേണ്ടി മാത്രം മാറ്റി വെച്ച ജീവിതമാണ് ഇന്ന് വേറൊരു പോയിന്റിൽ എത്തിയിരിക്കുന്നത്. ഇവിടെ നിന്നും ഒരു യാത്രയ്ക്കായി മാനുവേല ഇറങ്ങി തിരിക്കുകയാണ്.

🔸തന്റെ ജന്മ നാട്ടിൽ എവിടെയോ മകന്റെ അച്ഛൻ ആയിരുന്ന വ്യക്തി ഉണ്ട്, അയാൾ ഒരു ട്രാൻസ്‌ജണ്ടർ ആയിരുന്നു, അയാളെ കണ്ടെത്തി കാര്യം അറിയിക്കണം എന്നതാണ് യാത്രയുടെ ഉദ്ദേശം. ഈ യാത്രയിൽ തന്റെ ഭൂതകാലത്തെ കൂടിയാണ് മാനുവേലയ്ക്ക് നേരിടേണ്ടി വരുന്നത്, അതോടൊപ്പം കടന്ന് വരുന്ന ഇന്ട്രെസ്റ്റിങ് ആയ ചില കഥാപാത്രങ്ങളെയും. ഏത് രീതിയിൽ നോക്കിയാലും പൂർണ തൃപ്തി തരുന്ന മികച്ച ഒരു സിനിമാ അനുഭവം ആണ് ആൾ എബൌട്ട്‌ മൈ മദർ, കണ്ടില്ല എങ്കിൽ തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.75/5