1334. A Different Man (2024)

Director : Aaron Schimberg

Cinematographer : Wyatt Garfield

Genre : Drama

Country : USA

Duration : 112 Minutes

🔸A24 എന്ന പേരിന്റെ മുകളിൽ ഒരു വിശ്വാസം ഉണ്ട്, സിനിമ മോശമാവില്ല എന്നൊരു വിശ്വാസം. കുറച്ച് നാളുകളായി ഗ്രൗണ്ട് ബ്രെയ്‌ക്കിങ് ആയ സിനിമകൾ ഒന്നും സമ്മാനിച്ചിട്ടില്ല എങ്കിൽ കൂടിയും മോശം ആക്കിയിട്ടുമില്ല അവർ. കൃത്യമായി ഒരു വാചകത്തിൽ ഒതുക്കുക ആണെങ്കിൽ എ ഡിഫ്രണ്ട് മാൻ എന്ന ചിത്രവും അത് തന്നെയാണ്, "ഗ്രൗണ്ട് ബ്രെയ്‌ക്കിങ് ആയി ഒന്നും ഇല്ല എന്നാൽ ഒട്ട് മോശവുമല്ല". സ്ഥിരം ടർഫിൽ ഒതുങ്ങി നിൽക്കാതെ ഡൈവേഴ്‌സ് ആയ ആളുകളെയും കണ്ടന്റുകളെയും ഒക്കെ വിഷയമാക്കുന്ന ആ ഒരു രീതി പ്രസ്തുത സ്റ്റുഡിയോ ഈ സിനിമയിലും സ്വീകരിച്ചിട്ടുണ്ട്.

🔸ന്യൂ യോർക് ആണ് നമ്മുടെ കഥാ പശ്ചാത്തലം എഡ്വർഡ് എന്ന നമ്മുടെ നായക കഥാപാത്രം ഒരു വളർന്ന് വരുന്ന അഭിനേതാവ് ആണ്. ടിയാന് ഒരു പ്രത്യേകത ഉണ്ട്, എന്തെന്നാൽ അദ്ദേഹത്തിന്റെ മുഖം ചില ആരോഗ്യ പ്രശ്നങ്ങൾ കാരണം വികൃതമാണ്. ഈ ഒരു കാരണത്താൽ ആവണം ഉൾവലിഞ്ഞ സ്വഭാവമാണ് അയാളുടേത്, ഒരു തരം നാണം കുണുങ്ങിയായ ബഹളങ്ങളിൽ നിന്നൊക്കെ ഒഴിഞ്ഞ് നിൽക്കുന്ന പ്രകൃതം. തന്റെ തൊട്ടടുത്ത മുറിയിൽ താമസിക്കുന്ന യുവതിയോട് ഒരു ഇഷ്ടം നായകന് ഉണ്ടെങ്കിലും അത് പ്രകടിപ്പിക്കാൻ അയാൾക്ക് കഴിഞ്ഞിട്ടില്ല.

🔸ഇങ്ങനെ പോയി കൊണ്ടിരിക്കുന്ന നമ്മുടെ നായക കഥാപാത്രം ഒരു സർജറിക്ക് തയ്യാർ ആകുന്നതും അതിനെ തുടർന്ന് അയാളുടെ ജീവിതത്തിൽ ഉണ്ടാവുന്ന മാറ്റങ്ങളും, ഒരു പുതിയ കഥാപാത്രത്തിന്റെ വരവും ഒക്കെയായി സിനിമ വേറൊരു തലത്തിലേക്ക് പോവുകയാണ്. നല്ലൊരു സിനിമ ആണ് എ ഡിഫ്രണ്ട് മാൻ, പ്രത്യേകിച്ചും കഥയിൽ കാഴ്ചക്കാരനെ നല്ല രീതിയിൽ തന്നെ ഇൻവസ്റ്റ് ചെയ്യിക്കുന്നുണ്ട്. പ്രത്യേകിച്ചും അവസാന ഭാഗം ഒക്കെ നമ്മുടെ മനസ്സിൽ തങ്ങി നിൽക്കും വിധം മനോഹരമായി ആണ് അവതരിപ്പിച്ചിരിക്കുന്നത്. ഈ വർഷത്തെ നല്ല സിനിമകളിൽ ഒന്നായി തീർച്ചയായും ഉണ്ടാവും ഈ ആരോൺ ഷിംബർഗ് ചിത്രവും.

Verdict : Good

DC Rating : 3.75/5

1333. University Of Laughs (2004)

Director : Mamoru Hoshi

Cinematographer : Hiroshi Takase

Genre : Drama

Country : Japan

Duration : 121 Minutes

🔸വളരെ ഇൻട്രസ്റ്റിംഗ് ആയൊരു സിനിമ ആണ് യൂണിവേഴ്സിറ്റി ഓഫ് ലാഫ്‌സ്, ഏറെക്കുറെ തൊണ്ണൂറ് ശതമാനം സമയവും ഒരു ലൊക്കേഷനിൽ ഒതുങ്ങി പൂർണമായും രണ്ട് കഥാപാത്രങ്ങളെ മാത്രം ഫോകസ് ചെയ്ത് കൊണ്ട് പോവുന്ന വളരെ സിംപിൾ ആയൊരു കഥ ആണ് ചിത്രത്തിന്റേത്. വളരെ മന്ദ ഗതിയിൽ പുരോഗമിക്കുന്ന ചിത്രം ആദ്യ പാതിയിൽ ചില ഇടത്ത് എങ്കിലും ഫാസ്റ്റ് ഫോർവേർഡ് അടിക്കാൻ പ്രേരിപ്പിച്ചു എന്ന് പറഞ്ഞാൽ പോലും തെറ്റില്ല, എന്നാൽ ഇതെല്ലാം പരിഹരിക്കുന്ന ഒരു രണ്ടാം പകുതിയും റിസോല്യുഷനും ഒക്കെ കൂടി ചേരുമ്പോൾ നല്ലൊരു അനുഭവമായി മാറുന്നുണ്ട് ഈ ജാപനീസ് ചിത്രം.

🔸രണ്ടാം ലോക മഹായുദ്ധ കാലത്തെ ജപ്പാൻ ആണ് കഥാ പശ്ചാത്തലം. രാജ്യം കടന്ന് പോവുന്ന ഭീകരമായ അവസ്ഥ എല്ലാ മേഖലകളെയും നല്ല രീതിയിൽ തന്നെ ബാധിച്ചിട്ടുണ്ട്. തിയേറ്റർ ഡ്രാമ വിഭാഗം അതിന്റെ ഏറ്റവും ദൂഷ്യ വശം അനുഭവിച്ചത് സെൻസറിങ് എന്ന കീറാ മുട്ടിയിലൂടെ ആണ്. അധികാര കേന്ദ്രങ്ങളെ രസിപ്പിക്കുന്ന വകകൾക്ക് മാത്രമേ സെൻസറിങ് കഴിഞ്ഞ് പ്രദർശന അനുമതി ലഭിക്കുക ഉള്ളൂ, ഗവണ്മെന്റിനെയോ പട്ടാളത്തെയോ പോലീസിനെയോ വിമർശിക്കുന്ന എന്തെങ്കിലും ഒരു സൂചന പോലും സിനിമയിൽ ഉണ്ടെങ്കിൽ പിന്നീട് ആ നാടകത്തിന്റെ സ്ഥാനം ചവറ്റ് കുട്ടയിലാണ്.

🔸കർശന നടപടികൾ കൈക്കൊള്ളുന്നതിൽ അഗ്രഗണ്യൻ ആയ സാക്കിസാക്ക എന്ന ഉദ്യോഗസ്ഥൻ ആണ് സെൻസറിങ് വിഭാഗം കൈകാര്യം ചെയ്യുന്നത്, അയാളുടെ ഭാഷയിൽ പറയുക ആണെങ്കിൽ ജീവിതത്തിൽ ഇന്നേവരെ ചിരിച്ചതായി ഓർമ്മ പോലും ഇല്ലാത്ത ഒരു മുരടൻ. തന്റെ പുതിയ കൊമെടി നാടകത്തിനു അപ്രൂവൽ വാങ്ങാനായി സാക്കിസക്കയുടെ മുന്നിൽ എത്തുകയാണ് എഴുത്തുകാരനായ സുബാക്കി, പിന്നീട് അരങ്ങേറുന്ന സംഭവങ്ങൾ ആണ് ഈ ചിത്രം. സിനിമ കണ്ട് കഴിഞ്ഞതിനു ശേഷവും ഈ കഥാപാത്രങ്ങൾക്ക് പിന്നീട് എന്ത് സംഭവിച്ചിട്ടുണ്ടാവും എന്ന തോന്നൽ ഉണ്ടാക്കുന്ന അപൂർവം സിനിമകളിൽ ഒന്നാണ് യൂണിവേഴ്സിറ്റി ഓഫ് ലാഫ്‌സ്, തൃപ്തികരമായ അനുഭവമാണ് ഈ ചിത്രം.

Verdict : Good

DC Rating : 3.75/5

1332. The Count Of Monte - Cristo (2024)

Director : Mathhieu Delaporte

Cinematographer : Nicolas Bolduc

Genre : Drama

Country : France

Duration : 178 Minutes

🔸ഉദ്ദേശം പത്ത് പതിനെട്ട് വർഷങ്ങൾക്ക് മുന്നേ ആണെന്ന് തോന്നുന്നു ബാലരമ അലക്സാണ്ടർ ഡ്യുമയുടെ "ദി കൗണ്ട് ഓഫ് മോണ്ടി ക്രിസ്ട്ടോ" എന്ന നോവലിന്റെ മലയാളം പരിഭാഷ പുറത്തിറക്കിയിരുന്നു. അന്ന് പുറംചട്ട മാത്രം കണ്ട കൗതുകത്തിന് വാങ്ങി വായിച്ച് സംപ്തൃപ്തി അടഞ്ഞ നല്ല കിടിലൻ അനുഭവം ആയിരുന്നു ഈ നോവൽ. പിന്നീട് അത്ര ഇഷ്ടപ്പെടാതെ പോയ ഒരു ഇംഗ്ലീഷ് സിനിമായയും മലയാളത്തിലെ ലാൻഡ് മാർക് സിനിമകളിൽ ഒന്നായ പടയോട്ടം ആയും ഒക്കെ ഈ നോവൽ അനുഭവിച്ചിട്ടുണ്ട് എങ്കിലും ഒരു കുറവ് എവിടെയോ തോന്നിയിരുന്നു, അത് ഈ ഒരു സിനിമയിലൂടെ പരിഹരിക്കപ്പെടുകയാണ്.

🔸ഒരു പ്രതികാര കഥയാണ് കൗണ്ട് ഓഫ് മോണ്ടി ക്രിസ്ട്ടോ, സുഹൃത്തുക്കളാൽ ചതിക്കപ്പെട്ട ഒരു വ്യക്തി പിന്നെ ദുരന്തങ്ങളുടെ ഒരു പടു കുഴിയിലേക്ക് വീണ് പോവുന്നതും അയാളുടെ മടങ്ങി വരവും തുടർന്ന് ഉണ്ടാവുന്ന സംഭവങ്ങളും എല്ലാം കൂടി അവസാനം പീക് സാറ്റിസ്ഫാക്ഷൻ തരുന്ന ഒരു ദൃശ്യാനുഭവം. ഈ ഒരു റിവഞ്ച് പ്ലോട്ടിനെ കൂടുതൽ മനോഹരമാക്കുന്നത് കഥ കരുതി വെക്കുന്ന ചില മനോഹരമായ മൊമന്റ്സ് തന്നെയാണ്, പ്രത്യേകിച്ചും നായകന്റെ മടങ്ങി വരവിന് ശേഷം ഉള്ളത്. അവ അവതരിപ്പിക്കുന്നത് പോലെ ഇരിക്കും സിനിമയുടെ വേർഡിക്റ്റ് എന്ന് തോന്നിയ ഇടത്ത്, കിടിലൻ എന്നല്ലാതെ വേറൊന്നും പറയാൻ അവസരം തരാത്ത വിധം മനോഹരമായ അവതരണം.

🔸മഹാഭാരത യുദ്ധത്തിൽ എതിരെ നിൽക്കുന്ന ബന്ധു മിത്രാതികളെ കണ്ട് അർജുനൻ തളർന്നു പോവുന്നൊരു ഭാഗം ഉണ്ട്, അത്തരത്തിൽ ഒന്ന് ഈ നോവലിലും ഉണ്ടായിരുന്നു, എന്നാൽ അത് പ്രതികാരം അവസാനിക്കുന്നിടത്ത് ആയിരുന്നു. ഈ ഒരു ഭാഗം സിനിമയിൽ ആഗ്രഹിച്ച രീതിയിൽ കണ്ടില്ല എന്നൊരു പോരായ്മ മാത്രമേ തോന്നിയുള്ളൂ, പിന്നെ ചെറിയ വ്യത്യാസങ്ങൾ ഉള്ള ക്ലൈമാക്സും. ഈ ഒരു വസ്തുത ഒഴിവാക്കിയാൽ പ്രകടനങ്ങൾ ആയാലും, വിഷ്വൽസ് ആയാലും, മ്യൂസിക് ആയാലും എല്ലാം ഒന്നാം ക്ലാസ് നിലവാരം പുലർത്തിയ ഗംഭീര ഔട്ട്പുട്ട് ആണ് ഈ ചിത്രം. ഈ വർഷത്തെ ഏറ്റവും മികച്ച സിനിമകളിൽ ഒന്ന് എന്ന് നിസ്സംശയം പറയാം.

Verdict : Must Watch

DC Rating : 4.5/5

1331. Meiyazhagan (2024)

Director : C Prem Kumar

Cinematographer : Mahendiran Jayaraju

Genre : Drama

Country : India

Duration : 177 Minutes

🔸നൊസ്റ്റാൾജിയ പോലെ സംപ്തൃപ്തി തരുന്ന വേറെ ഫാക്ട്ടേഴ്‌സ് സിനിമയിൽ ഉണ്ടെന്ന് തോന്നിയിട്ടില്ല, സിനിമാ പാരഡൈസൊ പോലുള്ള സിനിമകളോട് ഒരു ഇഷ്ടക്കൂടുതൽ ഉള്ളത് ഈ ഒരു കാരണം കൊണ്ട് തന്നെയാണ്. മുകളിൽ പറഞ്ഞ കാര്യം ശെരി വെക്കുന്ന ഒരു സിനിമ കൂടി തമിഴിൽ നിന്നും കടന്ന് വന്നിരിക്കുകയാണ് മെയ്യഴകന്റെ രൂപത്തിൽ. ദൈർഘ്യം കുറച്ച് അധികമായി എന്നൊരു ഫീൽ പല ഇടത്തും തോന്നി എങ്കിലും കൃത്യമായ ഇടവേളകളിൽ സിനിമ തരുന്ന ആ ഒരു ഇമോഷണൽ ഗട് പഞ്ചുകൾ തീർച്ചയായും മികച്ച ഒരു അനുഭവമായി തന്നെ ഈ ചിത്രത്തെ മാറ്റി മറിക്കുകയാണ്.

🔸ഇരുപത്തി രണ്ട് വർഷങ്ങൾക്ക് മുന്നേ ഒരു ഭാഗം വെപ്പ് കാരണം നാട് വിട്ട് പോവേണ്ടി വന്ന ആളാണ് അരുൾ മൊഴി വർമൻ. പിന്നീട് ഈ കഴിഞ്ഞ് പോയ കാലങ്ങളിൽ ഒന്നിലും അയാൾക്ക് സ്വന്തം നാടായ തഞ്ചാവൂരേക്ക് മടങ്ങി വരാൻ കഴിഞ്ഞിട്ടില്ല, അയാൾ അതിന് തയ്യാർ ആയിരുന്നില്ല എന്നതാണ് സത്യം. എന്നാൽ ഇപ്പോൾ ഒരു മടങ്ങി വരവിന് സമയം ആയിരുക്കുകയാണ്, ഒഴിച്ച് കൂടാൻ കഴിയാത്ത ഒരു കാരണം അയാളെ തഞ്ചാവൂരേക്കും, അയാളുടെ തന്നെ ഭൂത കാലത്തേക്കും മടക്കി കൊണ്ട് വരികയാണ്. മുന്നേ എപ്പോഴോ പറഞ്ഞത് പോലെ തന്നെ തിരിച്ചു വരവുകൾ മനോഹരമാണ്, അരുൾ മൊഴി വർമന്റെ കാര്യവും വ്യത്യസ്തമല്ല.

🔸ഉദ്ദേശം മൂന്ന് മണിക്കൂറിന് അടുത്ത് ദൈർഘ്യം ഉള്ള ചിത്രം ഡെവലപ്പ് ആവുന്നത് ഏറെക്കുറെ പൂർണമായും രണ്ട് കഥാപാത്രങ്ങൾക്ക് ഇടയിലെ സംഭാഷണങ്ങളിൽ കൂടിയാണ്, അത് എത്രത്തോളം കാഷ്വൽ ആയ കാഴ്ചക്കാർക്ക് ഉൾക്കൊള്ളാൻ കഴിയും എന്നത് സംശയമാണ്. വാച് എന്നതിനേക്കാൾ ഫീൽ ചെയ്ത് അറിയേണ്ട അപൂർവം സിനിമകളിൽ ഒന്നാണ് മെയ്യഴകൻ. പ്രത്യേകിച്ചും കല്യാണ പരിപാടിക്ക് ഇടയിലേക്ക് കയറി വരുന്ന അരുൾ മൊഴിയുടെ വെപ്രാളവും, പിന്നീടങ്ങോട്ട് ഓരോ കഥാപാത്രത്തെയും കണ്ട് മുട്ടുന്ന രംഗങ്ങളും ഒക്കെയും മനോഹരം തന്നെ ആയിരുന്നു. രണ്ടാം പകുതി കുറച്ച് ഡ്രാഗ് ചെയ്തതായി തോന്നിയതും ലെങ്തും മാത്രമാണ് ഒരു പോരായ്മയായി തോന്നിയത്. മികച്ച സിനിമ തന്നെയാണ് മെയ്യഴകൻ, കാണാൻ ശ്രമിക്കുക.

Verdict : Very Good

DC Rating : 4/5

1330. How To Make Millions Before Grandma Dies (2024)

Director : Pat Boonnipat

Cinematographer : Boonyanuch Kraithong

Genre : Drama

Country : Thailand

Duration : 126 Minutes

🔸ഈ വർഷം ഇതുവരെ ഇറങ്ങിയ സിനിമകളിൽ ഗംഭീര അഭിപ്രായം നേടിയ, പല റപ്യുറ്റഡ് സൈറ്റുകളും അവരുടെ ടോപ് ലിസ്റ്റിൽ തന്നെ ഉൾപ്പെടുത്തിയ ചിത്രമാണ് ഹൌ ടു മേക് മില്യൻസ് ബിഫോർ ഗ്രാൻഡ്മാ ഡൈസ്. കണ്ട് കഴിഞ്ഞ വേളയിൽ ഈ പറഞ്ഞ അഭിപ്രായങ്ങളും ഹൈപ്പും ഒക്കെ കുറച്ച് അധികം ആയി പോയില്ലേ എന്നൊരു തോന്നൽ ഉണ്ടാക്കി എങ്കിലും ഒരു മോശം സിനിമ ഒന്നും ആവുന്നില്ല ഈ ചിത്രം, കണ്ടിരിക്കാനുള്ള വക ഒക്കെ തീർച്ചയായും ഉണ്ട്. വളരെ തിൻ ആയ ഒരു പ്ലോട്ട് ലൈൻ ആണ് ചിത്രത്തിന്റേത് എങ്കിലും ജീവിതത്തിന്റെ അവസാന ഘട്ടത്തിൽ ഒരു വ്യക്തി അനുഭവിക്കുന്ന ഒറ്റപ്പെടലും മറ്റുമൊക്കെ മനോഹരമായി തന്നെ സിനിമ അവതരിപ്പിച്ചിട്ടും ഉണ്ട്.

🔸അമാ എന്ന വൃദ്ധയായ സ്ത്രീ ഒറ്റയ്ക്കാണ് താമസിക്കുന്നത്, അവർക്ക് പ്രായം എൺപത് കഴിഞ്ഞു. അമായ്ക്ക് ബന്ധുക്കൾ എന്ന് പറയാൻ കിയാങ്, സോയ് എന്നീ ആൺമക്കളും സ്യു എന്ന മകളും ആണ് ഉള്ളത്. കിയങ് സ്വന്തം ജോലിയും മറ്റുമൊക്കെയായി കുടുംബത്തോടൊപ്പം അങ്ങ് ദൂരെ നഗരത്തിൽ ആണ് താമസിക്കുന്നത്. സ്യു എന്ന മകൾ അല്ലറ ചില്ലറ ജോലിയും മറ്റുമൊക്കെയായി കഴിഞ്ഞ് പോവുകയാണ് എങ്കിൽ രണ്ടാമത്തെ മകനായ സോയ് ജീവിതത്തിൽ ക്ലച്ച് പിടിച്ചിട്ടില്ല. ഈയൊരു ഘട്ടത്തിൽ ആണ് അമായ്ക്ക് ക്യാൻസർ ഉണ്ടെന്ന് തിരിച്ചറിയുന്നതും, ഇനി അധിക നാൾ ഇല്ല എന്ന് മനസിലാവുന്നതും.

🔸പിന്നീട് അങ്ങോട്ടുള്ള നാളുകളിൽ മക്കളുടെയും അവരുടെ മക്കളുടെയും ഒക്കെ അമായോടുള്ള സമീപനത്തിൽ ചില മാറ്റങ്ങൾ കണ്ട് വരികയാണ്, അതിന്റെ പിന്നിലെ കാരണങ്ങളും കാര്യങ്ങളും ഒക്കെയായി സിനിമ അങ്ങനെ കഥ പറഞ്ഞ് പോവുകയാണ്. നമ്മളൊക്കെ ഒരുപാട് കണ്ടും കേട്ടും പരിചയിച്ച ഒരു പ്ലോട്ട് ബാക്ക്ഗ്രൗണ്ട് തന്നെയാണ് ഈ ചിത്രത്തിന്റേത് എങ്കിലും എടുത്ത് പറയേണ്ടത് അതിനെ സ്പെഷ്യൽ ആക്കുന്ന ചില ബ്യൂട്ടിഫുൾ മോമെൻറ്സ് തന്നെയാണ്. പ്രത്യേകിച്ചും ക്ലൈമാക്സ്‌ ഉൾപ്പെടുന്ന ഫൈനൽ ആക്റ്റ് ഒക്കെ നന്നായിരുന്നു, ഒരു മെഡിറ്റേറ്റ്റീവ് ഫീൽ ഒക്കെ തരുന്ന സിമ്പിൾ സിനിമ, വേറൊന്നും തന്നെ ഇല്ല.

Verdict : Good

DC Rating : 3.5/5

1329. The Burmese Harp (1956)

Director : Kon Ichikawa

Cinematographer : Minoru Yokoyama

Genre : War

Country : Japan

Duration : 116 Minutes

🔸രണ്ടാം ലോക മഹായുദ്ധത്തോളം സിനിമകൾക്ക് കാരണമായ വേറൊരു ഇവന്റ് മനുഷ്യ ചരിത്രത്തിൽ ഉണ്ടെന്ന് തോന്നുന്നില്ല, ഇതിനോട് അനുബന്ധിച്ച് അരങ്ങേറിയ ധാരാളം വീര ചരിതങ്ങളും, കഥാപാത്രങ്ങളും എല്ലാം പല പല ഭാഷകളിലും രാജ്യങ്ങളിലും ഒക്കെയായി പുറത്തിറങ്ങി നമ്മളിൽ തന്നെ പലരെയും അമ്പരപ്പിച്ചിട്ടും രസിപ്പിച്ചിട്ടും ഒക്കെയുണ്ട്. എന്നാൽ തോറ്റ രാജ്യം ആയത് കൊണ്ടാവണം ജപ്പാനിൽ നിന്നും പുറത്ത് വന്ന മിക്ക രണ്ടാം ലോക മഹായുദ്ധ സിനിമകൾക്കും ഒരു ട്രാജിക് അല്ലെങ്കിൽ മെലൻകളിക് ഫീൽ തോന്നാറുണ്ട്. അണ്ടർ ദി ഫ്ലാഗ് ഓഫ് റൈസിങ് സൺ എന്ന ചിത്രം ഇതിന്റെ ഏറ്റവും മികച്ച ഉദാഹരണങ്ങളിൽ ഒന്നാണ്, മറ്റൊന്ന് ദി ബർമീസ് ഹാർപ് എന്ന ഈ ചിത്രവും.

🔸രണ്ടാം ലോക മഹായുദ്ധം അതിന്റെ അവസാന ലാപ്പിൽ ആണ്, ജപ്പാൻ തോൽവി സമ്മതിച്ച് കീഴടങ്ങി കഴിഞ്ഞിരിക്കുന്നു. കനത്ത ബോംബിങ് കാരണം ചിഹ്ന്നഭിന്നമായി പോയിരിക്കുകയാണ് രാജ്യം. പട്ടിണിയും, ബുദ്ധിമുട്ടുകളും, രോഗങ്ങളും എല്ലാം കാരണം ആളുകളും രാജ്യവും എല്ലാം പൊറുതി മുട്ടിയിരിക്കുമ്പോഴും ഇതൊന്നും അറിയാതെ യുദ്ധമുഖത്ത് യുദ്ധം തുടർന്ന് കൊണ്ടിരിക്കുകയാണ് ഒരുകൂട്ടം പട്ടാളക്കാർ. തങ്ങളുടെ അതിർത്തി വരെ എത്തിയ ബ്രിട്ടീഷ് ഇന്ത്യൻ സൈനികർക്ക് എതിരെ അവസാന യുദ്ധത്തിനായി ഒരുങ്ങുകയാണ് മുപ്പതോളം വരുന്ന ഈ പട്ടാള യുണിറ്റ്, ഈ യുണിറ്റിലെ ഒരു സാധാരണ പട്ടാളക്കാരൻ ആണ് മിസ്യൂഷിമ.

🔸മുകളിൽ പറഞ്ഞത് പോലെ വളരെ സാധാരണക്കാരൻ ആയ മിസ്യൂഷിമയുടെ അസാധാരണമായ ജീവിത യാത്ര ആണ് ഈ ചിത്രം. ഒരു പട്ടാളക്കാരനിൽ നിന്നും മിസ്യൂഷിമ എങ്ങനെ ഒരു ബുദ്ധ ഭിക്ഷു ആയി മാറി, അതിലേക്ക് വഴി വെച്ച സംഭവങ്ങൾ എന്ത്, തുടർന്ന് അങ്ങോട്ടുള്ള അയാളുടെ ഭാവി എന്ത് എന്നിങ്ങനെ ഒരുപാട് ചോദ്യങ്ങൾക്ക് ഉത്തരം തരികയാണ് രണ്ട് മണിക്കൂറിന് അടുത്ത് ദൈര്ഗ്യം ഉള്ള ഈ ചിത്രം. ഒരു പെർഫെക്ട് ആന്റി വാർ സിനിമയ്ക്ക് വേണ്ട എല്ലാ ഗുണ ഗണങ്ങളും ഒത്ത് ചേർന്ന നല്ല ഒന്നാം ക്ലാസ് ചിത്രമാണ് ബർമീസ് ഹാർപ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.75/5

1328. Three Of Us (2023)

Director : Avinash Arun

Cinematographer : Avinash Arun

Genre : Drama

Country : India

Duration : 99 Minutes

🔸നൊസ്റ്റാൾജിയ പോലെ ഇൻട്രസ്റ്റിംഗ് ആയ വേറൊരു ഫാക്ടർ ഉണ്ടെന്ന് തോന്നിയിട്ടില്ല, ചുരുങ്ങിയത് സ്വന്തം കാര്യത്തിൽ എങ്കിലും. പോയി മറഞ്ഞ കാലത്തിനോടും, വ്യക്തികളോടും, കാഴ്ചകളോടും, മണത്തിനോട് പോലും വല്ലാത്തൊരു ഫാസിനേഷൻ തോന്നാറുണ്ട്. ചിലപ്പോൾ ഒക്കെ പഴയ ഓർമകളിലേക്ക് തിരിഞ്ഞ് നോക്കുന്നത് കൊണ്ട് കാര്യം യാതൊന്നും ഇല്ല എന്ന റിയാലിറ്റി ഇടിത്തീ പോലെ കയറി വരാറുണ്ട് എങ്കിലും അവ ഒന്നും തന്നെ നൊസ്റ്റാൾജിയ തരുന്ന ആ ഒരു ഇൻട്ടിമേറ്റ് ഫീൽ കളഞ്ഞ് കുളിക്കാൻ ഉള്ളത് ആയിരുന്നില്ല. ഈ കാരണങ്ങൾ എല്ലാം കൊണ്ട് തന്നെ ആവണം ത്രീ ഓഫ് അസ് എന്ന ചിത്രം നല്ല രീതിയിൽ തന്നെ അനുഭവിച്ച് അറിയാൻ കഴിഞ്ഞു, ഒരു സ്ഥലത്ത് പോലും ബോർ അടിക്കാതെ അതെ സമയം ഇൻവെസ്റ്റ് ചെയ്യിച്ച് കടന്ന് പോയ ഒരു നല്ല ചിത്രം.

🔸ഫാമിലി കോർട്ടിൽ ഡിവോഴ്സ് ഡിവിഷനിൽ ആണ് ശൈലജ എന്ന നമ്മുടെ പ്രധാന കഥാപാത്രം ജോലി ചെയ്യുന്നത്, ഇൻഷുറൻസ് ഏജന്റ് ആയ ഭർത്താവും എഞ്ചിനീയറിംഗ് വിദ്യാർത്ഥി ആയ മകനും ഉൾപ്പെട്ട ചെറിയ ലോകമാണ് ശൈലജയുടേത്. ശൈലജയുടെ വിരമിക്കൽ പാർട്ടി കണ്ട് കൊണ്ടാണ് നമ്മൾ സിനിമയിലേക്ക് കടന്ന് വരുന്നത്, അവർ ഇന്ന് ഒരു ഡിമൻഷ്യ രോഗി ആണ്. ഓർമ്മകൾ മാഞ്ഞ് പോവുന്ന ഈ രോഗവസ്ഥ ശൈലജയെ പോലെ ഉള്ള ഒരാൾക്ക് ഉൾക്കൊള്ളാവുന്നതിലും താങ്ങാവുന്നതിലും അപ്പുറം ആയിരുന്നു, വിഷാദ അവസ്ഥയിലൂടെ ആണ് കുറച്ച് നാളുകളായി അവർ കടന്ന് പോയി കൊണ്ടിരിക്കുന്നത്.

🔸തന്റെ ഓർമ്മകൾ പൂർണമായും മാഞ്ഞ്, താൻ തന്നെ തന്നെ സ്വയം മറന്ന് പോവുന്ന കാലം വരുന്നതിന് മുന്നേ ശൈലജ ഒരു ചെറിയ ആഗ്രഹം ഭർത്താവിനോട് പറയുകയാണ്. തന്റെ കുട്ടിക്കാലം ചിലവിട്ട വെങ്ങുർള എന്ന ഗ്രാമത്തിലേക്ക് മടങ്ങി പോവണം എന്നത് ആയിരുന്നു അവരുടെ ആഗ്രഹം, ഈ യാത്രയിൽ അവർ കാണുന്ന കാഴ്ചകളും പരിചയം പുതുക്കുന്ന മുഖങ്ങളും എല്ലാമായി സിനിമ കടന്ന് പോവുകയാണ്. ചില സ്ഥലങ്ങളിൽ പോയിന്റ്ലസ് ആയ തോതിൽ ഡ്രിഫ്ട് ചെയ്യുന്നതായി തോന്നി എന്നത് ഒഴിച്ചാൽ നല്ലൊരു കാഴ്ചനുഭവം ആയിരുന്നു ഈ ചിത്രം, കണ്ട് നോക്കാവുന്നതാണ്.

Verdict : Good

DC Rating : 3.75/5

1327. Threads (1984)

Director : Mick Jackson

Cinematographer : Andrew Dunn

Genre : War

Country : UK

Duration : 116 Minutes

🔸ത്രെഡ്സ് എന്ന നാല് പതിറ്റാണ്ട് മുന്നേ പുറത്തിറങ്ങിയ ബ്രിട്ടീഷ് സിനിമയെ ഒരു ജോണറിൽ മാത്രമായി ഒതുക്കി നിർത്തുക എന്നത് ബുദ്ധിമുട്ടാണ്. ഒരു റിലേഷൻഷിപ്പ് ഡ്രാമ എന്ന് തോന്നിപ്പോകും വിധം ആരംഭിക്കുന്ന ഡ്രാമ താമസിയാതെ തന്നെ ഒരു യുദ്ധ സിനിമയായും താമസിയാതെ ഒരു ഫ്ലാറ്റ് ഔട്ട് ഹൊറർ മൂവി ആയും എല്ലാം പരിണമിക്കുന്നുണ്ട്. ചിത്രത്തിന്റെ ടാഗ് ലൈൻ പറയും പോലെ ഒരു ന്യുക്ലിയർ വാർ സിനാരിയോയുടെ ഏറ്റവും അടുത്ത് നമ്മൾക്ക് എത്താൻ പറ്റുക ഒരു പക്ഷെ ഈ ചിത്രത്തിൽ കൂടി തന്നെ ആവും, ഭീതിതമായ ഒരു സാധ്യത ഭാവിയിൽ ഉരുതിരിഞ്ഞ് വന്നില്ല എങ്കിൽ.

🔸ഒരു അൾട്ടർനേറ്റ് ടൈം ലൈൻ എന്ന് വേണമെങ്കിൽ നമുക്ക് പറയാൻ കഴിയുന്ന പോയിന്റിൽ ആണ് കഥ തുടങ്ങുന്നത്. യഥാർത്ഥത്തിൽ എൺപതുകളോട് കൂടി സോവിയറ്റ് യൂണിയൻ ക്ഷയിച്ച് തുടങ്ങിയിരുന്നു എങ്കിലും ഇവിടെ കഥ തുടങ്ങുമ്പോൾ അമേരിക്കയും സോവിയറ്റ് യുണിയനും ശക്തരായ പ്രതിയോഗികൾ തന്നെയാണ്. ഇറാനിൽ ഉണ്ടാവുന്ന അധിനിവേശ പ്രക്ഷോഭം കാരണം ഒരു ന്യുക്ലിയർ യുദ്ധം രണ്ട് രാജ്യങ്ങൾക്കും ഇടയിൽ ഉണ്ടാവുന്നതാണ് സിനിമയുടെ ടർണിങ് പോയിന്റ്. ഈ യുദ്ധത്തിന്റെ അനന്തര ഫലമായി കോടിക്കണക്കിന് ആളുകൾക്ക് ജീവിതം നഷ്ടപ്പെടുന്നു.

🔸ഈ സംഭവങ്ങൾ മാനവ രാശിയെ എങ്ങിനെ ഒക്കെ മാറ്റി മറിക്കുന്നു എന്നതാണ് ഈ സിനിമയുടെ പ്ലോട്ട് ലൈൻ. പ്രതീക്ഷയുടെ ഒരു തരിമ്പ് പോലും ബാക്കി വെക്കാത്ത ആദ്യാവസാനം ഡിപ്രസിങ് ആയ ഒരു വ്യൂയിങ് അനുഭവമാണ് ഈ സിനിമ. ചെറിയ ബജറ്റിൽ ഷൂട്ട് ചെയ്തു എന്ന വസ്തുത സത്യത്തിൽ സിനിമയ്ക്ക് അനുഗ്രഹമായി മാറിയതായാണ് തോന്നിയത്. തീർച്ചയായും കണ്ട് നോക്കേണ്ട ഒരു സിനിമ ആണ് ത്രെഡ്സ്, ഒരു അൾട്ടർനേറ്റ് ഹിസ്റ്ററി കാണിച്ച് തരുന്നു എന്നതിന് ഒപ്പം തന്നെ അത്യന്തം ഭീകരമായ ഒരു പോസിബിലിറ്റി കൂടി തുറന്ന് വെക്കുന്നുണ്ട് ഈ ബ്രിട്ടീഷ് ചിത്രം.

Verdict : Very Good

DC Rating : 4/5

1326. Jin Roh The Wolf Brigade (1999)

Director : Hiroyuki Okiyura

Cinematographer : Hisao Shirai

Genre : Anime

Country : Japan

Duration : 102 Minutes

🔸സീരിയസ് ആയ വിഷയങ്ങൾ കൈകാര്യം ചെയ്യുന്ന ആനിമേ സിനിമകളോട് എല്ലാ കാലത്തും ഒരു ഇഷ്ട്ട കൂടുതൽ ഉണ്ടായിരുന്നു, വാൾട്സ് വിത്ത്‌ ബഷീർ പോലുള്ള സിനിമകൾ എല്ലാ കാലത്തെയും പ്രിയപ്പെട്ട സിനിമകളിൽ ഒന്നാണ് താനും. ഈ വിഭാഗത്തിൽ നിസ്സംശയം പെടുത്താവുന്ന ഒരു ചിത്രമാണ് ജിൻ റോ ദി വുൾഫ് ബ്രിഗേഡ്. അമ്പതുകളിൽ ആണ് കഥ ആരംഭിക്കുന്നത്, ഒരു വലിയ യുദ്ധത്തിന് ശേഷം തകർന്ന് തരിപ്പണമായ ഒരു ജപ്പാൻ ആണ് നമ്മുടെ കഥാ പശ്ചാത്തലം. പട്ടിണിയും, കലാപങ്ങളും എല്ലാം കാരണം ശിഥിലമായ ജപ്പാനിൽ ആരാജകത്വം കൊടി കുത്തി വാഴുകയാണ്.

🔸ഏറെക്കുറെ ഒരു ഏകാധിപത്യ ഭരണം ആണ് ജപ്പാനിൽ അരങ്ങേറി കൊണ്ടിരിക്കുന്നത്. ഭരണം കാരണം പൊറുതി മുട്ടിയിരിക്കുന്ന ജനങ്ങളുടെ ദുരിതത്തിന് ഒരു താത്കാലിക പരിഹാരം എങ്കിലും ഉണ്ടാവുന്നത് സെക്റ്റ് എന്ന ഗറില്ലാ വിപ്ലവ വിഭാഗത്തിന്റെ ഉദയത്തോട് കൂടിയാണ്. സെക്റ്റിന്റെ പോരാട്ടങ്ങൾ ചെറിയ തോതിൽ ഒന്നുമല്ല ഭരണ സിരാ കേന്ദ്രങ്ങളെ വലയ്ക്കുന്നത്. സ്വാഭാവികമായും ഒരു കൗണ്ടർ ആക്ഷൻ എന്ന മട്ടിൽ പോലീസിലെ ഒരു വിഭാഗം സെക്റ്റിനെ നേരിടാനുള്ള ഗവണ്മെന്റിന്റെ രഹസ്യ ആയുധം ആയി മാറുകയാണ്. താമസിയാതെ തന്നെ ഒരു വലിയ ചോര കളിക്ക് കളം ഒരുങ്ങുകയാണ്, ഇതാണ് കഥയുടെ പ്രധാന കോൺഫ്ലിക്ട്.

🔸വിഷ്വലി സ്റ്റണ്ണിങ് എന്നൊക്കെ വിശേഷിപ്പിക്കാവുന്ന ചിത്രമാണ് ജിൻ റോ, അനിമേഷൻ മേഖലയിൽ കൊടുത്ത ഡീറ്റെയിലിങ് ഒക്കെ അത്രയും മികച്ച നിലവാരം പുലർത്തുന്നുണ്ട്. കഥാപാത്രങ്ങൾ എല്ലാം തന്നെ കോംപ്ലക്സ് ആണ് എന്ന് മാത്രമല്ല നല്ല രീതിയിൽ തന്നെ അവർക്ക് കാരക്റ്റർ പ്രോഗ്രഷൻ കൊടുത്തിട്ടും ഉണ്ട്. ഇന്നത്തെ കാലത്ത് ഒരു ടീവി സീരീസ് ഒക്കെയായി മാറ്റിയെടുക്കാൻ പറ്റിയ നല്ലൊരു പ്ലോട്ട് ആണ് ഈ ചിത്രത്തിന്റേത്, പ്രത്യേകിച്ചും വാച്മെൻ ഒക്കെ പോലെയുള്ള നല്ല ഉദാഹരണങ്ങൾ നമ്മുടെ മുന്നിൽ ഉള്ളപ്പോൾ. നല്ല രീതിയിൽ ആസ്വദിച്ച മികച്ച ഒരു സിനിമയാണ് ജിൻ റോ ദി വുൾഫ് ബ്രിഗേഡ്, അപ്പോൾ കണ്ട് നോക്കുക.

Verdict : Very Good

DC Rating : 4/5

1325. The Monk And The Gun (2024)

1325. The Monk And The Gun (2024)

Director : Pawo Choyning Dorji

Cinematography : Jigme Tenzing

Genre : Drama

Country : Bhutan

Duration : 107 Minutes

🔸ഭൂട്ടാൻ എന്ന രാജ്യത്ത് നിന്നും പുറത്തിറങ്ങിയ ഒരുപാട് സിനിമകൾ ഒന്നും കണ്ടിട്ടില്ല, ആകെ ഫോർപ്പ ദി കപ്പ് എന്ന സിനിമയും ലുനാന എ യാക് ഇൻ ദി ക്ലാസ്റൂം എന്ന സിനിമയും മാത്രമേ കണ്ടിട്ടുള്ളൂ എന്നാണ് ഓർമ. ഇതിന് പുറമെ ട്രാവലേഴ്‌സ് മെജീഷ്യൻസ് എന്ന സിനിമയെ പറ്റി കേട്ടിട്ടുണ്ട് എങ്കിലും കാണാൻ കഴിഞ്ഞിട്ടില്ല. കണ്ട രണ്ട് സിനിമകളിൽ നിന്നും അത്യാവശ്യം കൗതുകം ഉണർത്തിയ ഒരു പശ്ചാത്തലം ആണ് ഭൂട്ടാൻ, എന്നാൽ ഈ രണ്ട് സിനിമകളെക്കാൾ ആ പശ്ചാത്തലത്തെ ഒരു കഥാപാത്രമായി തന്നെ ഉപയോഗിച്ചിട്ടുണ്ട് ദി മോങ്ക് ആൻഡ് ദി ഗൺ എന്ന ചിത്രം. വ്യക്തിപരമായി പ്രസ്തുത രാജ്യത്ത് നിന്ന് ഇതുവരെ കണ്ടതിൽ ഏറ്റവും ഇഷ്ട്ടപ്പെട്ട ചിത്രം കൂടിയാണ് ഇത്.

🔸വർഷം 2006, ഭൂട്ടാനിൽ ഒരു കാലഘട്ടം അതിന്റെ അവസാന ഫെയ്‌സിൽ ആണ്, രാജ്യത്തിനോളം തന്നെ പ്രായമുള്ള രാജഭരണം അവസാനിക്കാൻ പോവുകയാണ്. അടുത്ത രണ്ട് വർഷത്തിനുള്ളിൽ താൻ സ്ഥാനം ഒഴിയും എന്നും, രാജ്യത്ത് ജനാധിപത്യ ഭരണം നിലവിൽ വരും എന്നും ഭൂട്ടാനിലെ രാജാവ് ജനങ്ങളെ അറിയിക്കുകയാണ്. ഇവിടെ പ്രശ്നം എന്താണെന്ന് വെച്ചാൽ ഏഷ്യയിലെ എന്നല്ല, ലോകത്തിലെ തന്നെ ഏറ്റവും അവസാനം ടെക്ക്നോളജി എത്തിയ രാജ്യങ്ങളിൽ ഒന്നാണ് ഭൂട്ടാൻ. വൈദ്യുതിയും, ടെലിവിഷനും പോലും വളരെ വൈകി എത്തിയ, പുറം ലോകത്തെ കുറിച്ചുള്ള അറിവ് വളരെ പരിമിതമായ ഒരു വിഭാഗം ആണ് അവിടുത്തെ ജനങ്ങൾ.

🔸ഈ പറഞ്ഞ ജന വിഭാഗത്തെ ജനാധിപത്യ ഭരണ രീതിയെ പറ്റി പഠിപ്പിക്കുക എന്നതും തങ്ങളുടെ അവകാശങ്ങളെ പറ്റിയൊക്കെ ബോധവാന്മാരാക്കുക എന്നതും അത്ര എളുപ്പമുള്ള ഒരു കാര്യമല്ല. ഈ പശ്ചാത്തലത്തിൽ രണ്ട് കഥകളാണ് ഈ സിനിമ പറയുന്നത്, ആ നാട്ടിലേക്ക് എത്തുന്ന ഒരു ആയുധ കച്ചവടക്കാരന്റേതും, വളരെ വിചിത്രമായ തന്റെ ഗുരുവിന്റെ ഒരു ആവശ്യം നിറവേറ്റാനായി ഇറങ്ങി തിരിക്കുന്ന ഒരു ബുദ്ധ ഭിക്ഷുവിന്റെയും കഥകൾ. ഒരു പ്രത്യേക പോയിന്റിൽ ഈ രണ്ട് കഥകളും കൂടി ചേരുന്നുണ്ട്. വളരെ സിംപിൾ ആയ അതേസമയം മനോഹരമായ അവതരണ ശൈലി ആണ് ഈ ചിത്രത്തിന്റേത്, താല്പര്യം തോന്നുന്നു എങ്കിൽ കണ്ട് നോക്കാവുന്നതാണ്.

Verdict : Very Good

DC Rating : 4.25/5

1324. Eight Taels Of Gold (1989)

Director : Mabel Cheung

Cinematographer : Bill Wong Chung

Genre : Drama

Country : Hong Kong

Duration : 100 Minutes

🔸വളരെ നൊസ്റ്റാൽജിക്ക് ആയ ഒരു സിനിമ ആണ് ഏയ്റ്റ് ടെൽസ് ഓഫ് ഗോൾഡ്. ടെൽസ് എന്നത് കൊണ്ട് ഉദ്ദേശിച്ചത് നമ്മളൊക്കെ പറയുന്ന പവൻ പോലെ ഒരു മാനദണ്ഡം ആണെന്ന് തോന്നുന്നു, വർഷങ്ങൾക്ക് ശേഷം നാട്ടിലേക്ക് വരുന്ന നായക കഥാപാത്രം തന്റെ ഒരേയൊരു സമ്പാദ്യം ആയ ഈ എട്ട് 'പവൻ' സ്വർണത്തിൽ അത്യാവശ്യം നന്നായി തന്നെ ഊറ്റം കൊള്ളുന്നുണ്ട്. സിനിമ ആരംഭിക്കുന്നത് അമേരിക്കയിലാണ്, നമ്മുടെ നായകൻ ആയ സ്ലിം അമേരിക്കയിൽ ഒരു ടാക്സി ഡ്രൈവർ ആണ്. ചൈനയിൽ ജനിച്ച് വളർന്ന സ്ലിം ഏകദേശം പതിനാറ് വർഷത്തോളമായി അമേരിക്കയിലാണ് താമസം, ഈ കാലയളവിനിടെ ഒരിക്കൽ പോലും അയാൾ നാട്ടിലേക്ക് പോവുക ഉണ്ടായിട്ടില്ല.

🔸നീണ്ട പതിനാറ് വർഷങ്ങൾക്ക് ശേഷം സ്വന്തം നാട്ടിലേക്ക് മടങ്ങാൻ തയാറാവുന്ന നായകനെ ആണ് നമ്മൾ തുടക്കത്തിൽ കാണുന്നത്. എന്നാൽ അയാൾ അത്ര സന്തോഷത്തിലും അല്ല, പ്രിയപ്പെട്ടവരെ വീണ്ടും കാണാം എന്നതിൽ ആഹ്ലാദം ഉണ്ടെങ്കിലും ഈ പതിനാറ് വർദഷങ്ങൾക്കിടെ ഒരു കത്ത് പോലും ഇവർ ആർക്കും തന്നെ അയാൾ അയച്ചിട്ടില്ല. നാട് വിടുമ്പോൾ പോലും ഇവർ ആരോടും പറഞ്ഞിട്ടോ അറിയിച്ചിട്ടോ അല്ല അയാൾ പോയത്, അന്ന് സാഹചര്യം അങ്ങനെ ആയിരുന്നു എന്നത് മാത്രമാണ് അയാൾക്ക് തരാൻ ഉള്ള ഉത്തരം. എന്ത് തന്നെ ആയാലും അയാൾ യാത്ര ആരംഭിക്കുകയാണ്, അമ്മയെയും അച്ഛനെയും പെങ്ങളെയും ഒക്കെ വീണ്ടും കാണാനായി.

🔸തിരിച്ചുവരവുകൾ എപ്പോഴും മനോഹരമാണ്, ഇവിടെയും കാര്യങ്ങൾ വ്യത്യസ്തമല്ല. സ്വന്തം നാട്ടിലേക്ക് വന്നതിന് ശേഷം സ്ലിം കാണുന്ന ഓരോ കാഴ്ചകളും അനുഭവങ്ങളും ലളിതവും മനോഹരവുമാണ്. പോയ വർഷങ്ങളിൽ നഷ്ടപ്പെട്ടത് എല്ലാം അയാൾ അനുഭവിച്ചറിയുന്ന നിമിഷങ്ങളും മനോഹരം തന്നെ, ഇതിന്റെ ഇടയിലേക്ക് ഒരു പുതിയ/പഴയ കഥാപാത്രം കൂടി കടന്ന് വരികയാണ്. കണ്ടിരിക്കുന്നു വേളയിൽ നമ്മളെ സന്തോഷിപ്പിക്കുന്ന, ചെറിയ തോതിൽ സങ്കടപ്പെടുത്തുന്ന, ഒടുവിൽ ഒരുപാട് ചോദ്യങ്ങൾ ബാക്കി വെക്കുന്ന നല്ലൊരു സിനിമ ആണ് എയിറ്റ് ടെൽസ് ഓഫ് ഗോൾഡ്. ആരും എവിടെയും പറഞ്ഞ് കേട്ടിട്ടില്ലാത്ത നല്ലൊരു സിനിമ, കണ്ട് നോക്കാവുന്നതാണ്.

Verdict : Very Good

DC Rating : 4/5

1323. The Pig, The Snake And The Pigeon (2023)

Director : Wong Ching Po

Cinematographer : Jimmy Wong

Genre : Action

Country : Taiwan

Duration : 134 Minutes

🔸ഹോങ് കോങ് അല്ലെങ്കിൽ തായ്വാനീസ് ആക്ഷൻ ചിത്രങ്ങളുടെ ഒരു മുഖമുദ്ര എന്ന് പറയുന്നത് തന്നെ അതിന്റെ അപ്രവചനീയത ആണെന്ന് തോന്നിയിട്ടുണ്ട്. അതായത് ബെറ്റർ ടുമാറോ ഒക്കെ പോലെ ഒരു പാട് ഉദാഹരണങ്ങൾ കാണിച്ച് തരാൻ സാധിക്കും, ആദ്യം തൊട്ട് അവസാനം വരെ ഗസ് അടിപ്പിച്ച് നിർത്തുന്ന, ഒടുവിൽ നല്ല ഒന്നാംക്ലാസ്സ് ഒരു പേ ഓഫ് നൽകി അവസാനിക്കുന്ന ടിപ്പിക്കൽ ആക്ഷൻ സിനിമകളാണ് ഇവ എന്ന് പറയാം. വോങ് ചിങ്ങിന്റെ ലേറ്റസ്റ്റ് സിനിമയിലേക്ക് വരുമ്പോഴും ഈ ഒരു സ്ട്രക്ച്ചർ സിനിമ ഫോളോ ചെയ്യുന്നുണ്ട്. പ്ലോട്ട് ലൈൻ ഒരു എൺപത് ശതമാനവും പ്രെഡിക്ക്റ്റബിൾ ആണെങ്കിലും കാണാനുള്ള ഒരു കൗതുകം ഈ സിനിമ സൃഷ്ടിക്കുന്നുണ്ട്.

🔸തന്റെ അഭിമാനത്തിന് ഏറ്റ ഒരു ക്ഷതം ആണ് നമ്മുടെ നായക കഥാപാത്രത്തെ മുന്നോട്ട് കൊണ്ട് പോവുന്നത്. അതായത് ചെറുപ്പ കാലം തൊട്ടേ ഒരു ഹിറ്റ് മാൻ ആയി അത്യാവശ്യം കൊള്ളയും കൊലയും ഒക്കെയായി ജീവിച്ച് പോന്ന നായകൻ സ്വന്തം മനസ്സിൽ സ്വയം കീപ്പ് ചെയ്ത ഒരു മാസ്സ് ഇമേജ് ഉണ്ട്, തന്നെ കുറിച്ച് തന്നെ. ആ ഒരു ഇമേജ് ഒരു നാൾ നല്ല ക്ലാസ് ആയി പൊട്ടി പൊളിഞ്ഞ് പണ്ടാരം അടങ്ങുകയാണ്. തന്റെ കർമ മേഖലയിൽ തന്നെ വെല്ലാൻ ആരുമില്ല എന്ന് കരുതിയിരുന്ന നായകൻ ഒരു നാൾ തിരിച്ചറിയുകയാണ്, തന്നെക്കാൾ ആളുകൾ ഭയക്കുന്ന വേറെയും ചിലർ ഈ നാട്ടിൽ തന്നെ ഉണ്ട് എന്ന്.

🔸ആ ഒരു വസ്തുത അത്ര എളുപ്പത്തിൽ അങ്ങ് സമ്മതിച്ച് കൊടുക്കാൻ നായകന്റെ ഈഗോ സമ്മതിക്കുന്നില്ല, പിന്നീട് ഈ വിഷയത്തിൽ അയാൾ കാണിച്ച് കൂട്ടുന്ന രസകരമായ സംഭവങ്ങൾ ആണ് ചിത്രത്തിലെത്. നല്ല ഫ്ലോയിൽ പോയി കൊണ്ടിരുന്ന സിനിമ ക്ലൈമാക്സിൽ പടിക്കൽ കലം ഉടച്ച ഫീൽ ആണ് തന്നത് എങ്കിലും വലിയ നഷ്ടം ഒന്നും തോന്നിച്ചുമില്ല. നല്ല പ്രകടനങ്ങളും, ആക്ഷൻ രംഗങ്ങളും എല്ലാം ചേർന്ന് തൃപ്തികരമായ അനുഭവം ആണ് ഈ ചിത്രം. ഏത് ഭാഷയിലും പറ്റിയ പ്ലോട്ട് ആയത് കൊണ്ട് തന്നെ ഒരുപക്ഷെ ഭാവിയിൽ ചില റീമെയ്ക്കുകൾ ഒക്കെ കണ്ടേക്കാം, കണ്ട് നോക്കാവുന്നതാണ്.

Verdict : Good

DC Rating : 3.5/5

1322. Bramayugam (2024)

Director : Rahul Sadasivan

Cinematographer : Shehnad Jalal

Genre : Horror

Country : India

Duration : 140 Minutes

🔸അത്യാവശ്യം നല്ലൊരു ബഡ്ജറ്റിൽ ഒരു ഹൊറർ സിനിമ സൃഷ്ടിക്കുക എന്ന് പറയുന്നത് തന്നെ മലയാള സിനിമയെ സംബന്ധിച്ചിടത്തോളം റിസ്ക് ഉള്ള കാര്യമാണ്. ഈ ഒരു വസ്തുത നില നിൽക്കെ പതിനേഴാം നൂറ്റാണ്ടിന്റെ പശ്ചാത്തലത്തിൽ കേരളത്തിൽ ഫോൾക്ലോർ ഒക്കെ ആധാരമാക്കി ബ്ളാക്ക് ആൻഡ് വൈറ്റിന്റെ മേമ്പൊടിയോടെ ഒരു ഹൊറർ സിനിമ സൃഷ്ടിക്കുകയും, യാതൊരു വിധ കൊമ്പ്രമൈസും ചെയ്യാതെ അത് പ്രേക്ഷകരുടെ മുന്നിലേക്ക് എത്തിക്കുകയും ചെയ്യുക എന്നത് അഭിനന്ദനം അർഹിക്കുന്ന ഒരു കാര്യം തന്നെയാണ്. വിശ്വസിച്ച് പൈസ മുടക്കിയ പ്രൊഡ്യൂസർ ലാഭം കൊയ്യും എന്ന പ്രതീക്ഷ ഇല്ലെങ്കിലും, പിന്നണിയിലും മുന്നണിയിലും പ്രവർത്തിച്ചവർ ഇപ്പൊൾ നേടി കൊണ്ടിരിക്കുന്ന പ്രശംസയിൽ സന്തോഷം തോന്നുന്നതും മുകളിൽ പറഞ്ഞ കാരണങ്ങൾ കൊണ്ടാണ്.

🔸ഭ്രമയുഗം എന്ന സിനിമയുടെ ഏറ്റവും വലിയ മേന്മകളിൽ ഒന്നായി തോന്നിയത് ആ സിനിമ സൃഷ്ടിക്കുന്ന അന്തരീക്ഷം ആണ്. ഒരു ചുഴി ഒക്കെ പോലെ വന്ന് കയറുന്ന കഥാപാത്രത്തെ വിഴുങ്ങി കളയുന്ന മനയുടെ കഥ പാരലൽ ആയി പോവുമ്പോൾ കാണുന്ന നമ്മളെയും ആ ഒരു അന്തരീക്ഷത്തിലേക്ക് വലിച്ച് കയറ്റാൻ സിനിമയ്ക്ക് കഴിയുന്നുണ്ട്. അർജുൻ അശോകന്റെ കഥാപാത്രം നേരിടുന്ന ശ്വാസം മുട്ടലിന്റെ ബുദ്ധിമുട്ടുകൾ കാഴ്ചക്കരനും അനുഭവിക്കുന്നിടത്ത് ഒരു റെയർ അച്ചീവ്മെന്റ് ഈ സിനിമ കരസ്തമാക്കുകയാണ്. ഈഒരു മൂഡ് സെറ്റിംഗിന് ബ്ലാക്ക് ആൻഡ് വൈറ്റ് എന്ന ഫാക്റ്റർ കൊടുക്കുന്ന പുഷ് ചെറുതല്ല.

🔸എടുത്ത് പറയേണ്ട മറ്റൊരു കാര്യം സിനിമയിലെ കഥാപാത്രങ്ങളുടെ പ്രകടനം തന്നെയാണ്, മമ്മൂട്ടിയുടെ കഥാപാത്രം ഒരു സീൻ സ്റ്റീലർ ആയിരിക്കും എന്ന അഭിപ്രായം മുന്നേ ഉണ്ടായിരുന്നു എങ്കിലും പ്രതീക്ഷിച്ചതിനും മുകളിലുള്ള ഒരു വൈൽഡ് സൈഡ് ആണ് അദ്ദേഹം കാണിച്ച് തരുന്നത്. ടെക്നിക്കലി ഒരു അച്ചീവ്മെന്റ് തന്നെയാണ് ഭ്രമയുഗം എന്ന സിനിമ, വേറിട്ട വഴിയേ പോവുന്ന സിനിമകളോട് ഉള്ള താല്പര്യ കൂടുതൽ കൊണ്ട് തന്നെ അത്യാവശ്യം നല്ല തോതിൽ ആസ്വദിച്ച് കണ്ട് അവസാനിപ്പിച്ച കാഴ്ച്ചാനുഭവം കൂടിയാണ് ഈ സിനിമ. കഴിവതും തിയേറ്ററിൽ കണ്ട് തന്നെ വിലയിരുത്താൻ ശ്രമിക്കുക.

Verdict : Very Good

DC Rating : 4/5

1321. Narc (2002)

Director : Joe Carnahan

Cinematographer : Alex Nepomniasch

Genre : Crime

Country : Canada

Duration : 105 Minutes

🔸തൊണ്ണൂറ്കളിലും രണ്ടായിരം ആണ്ടിന്റെ ആദ്യ പതിറ്റാണ്ടിലും ഒക്കെ ഉണ്ടായിരുന്ന ക്രൈം ത്രില്ലർ സിനിഡമകളുടെ അതി പ്രസരത്തിൽ മുങ്ങി പോയ വളരെ അണ്ടർ റേറ്റഡ് ആയ സിനിമയാണ് നാർക്. നല്ല കഥ, കഥാപാത്രങ്ങൾ, മികച്ച എൻഡിങ്, പെർഫോമൻസുകൾ തുടങ്ങി ദോഷം പറയാൻ ഒന്നും ഇല്ലാത്ത ഒരു സിനിമ ആയിട്ട് കൂടി ഈ സിനിമ ഇങ്ങനെ വിസ്‌മൃതിയിൽ ആണ്ട് പോയത് വളരെ ദൗർഭാഗ്യകരം തന്നെ. ഓപ്പണിങ് സീക്വൻസ് ആയാലും സ്പ്ളിറ്റ് സീൻ ആയാലും ഓർമ്മിക്കാൻ ഒന്നിൽ അധികം കാരണങ്ങൾ തന്നാണ് നാർക്ക് എന്ന ചിത്രവും കടന്ന് പോവുന്നത്.

🔸രണ്ട് പോലീസ് ഉദ്യോഗസ്ഥർ ആണ് നമ്മുടെ പ്രധാന കഥാപാത്രങ്ങൾ. രൂപത്തിലും ഭാവത്തിലും പെരുമാറ്റത്തിലും തുടങ്ങി അന്വേഷണ രീതിയിൽ വരെ തീർത്തും വ്യത്യസ്തരായ രണ്ട് പേർ. ഇവർ ഒന്നിച്ച് വരുന്നത് ഒരു സഹ പോലീസുകാരന്റെ കൊലപാതകം സംബന്ധിച്ചുള്ള കേസ് അന്വേഷണത്തിന് വേണ്ടിയാണ്. പ്രത്യക്ഷത്തിൽ ഒരു പക പോക്കൽ അല്ലെങ്കിൽ ഹിറ്റ്‌ ആൻഡ് റൺ എന്നൊക്കെയുള്ള ഫീൽ ഈ കൊലപാതകം തരുന്നുണ്ട് എങ്കിലും അന്വേഷണം പുരോഗമിക്കവേ കാര്യങ്ങൾ കുറച്ച് കൂടി കോംപ്ലക്സ് ആയി മാറുകയാണ്. ഒരു സ്‌ട്രെയിട്ട് കേസ് അന്വേഷണം എന്നതിൽ ഒതുങ്ങി നിൽക്കാതെ അന്വേഷകരുടെ മോറാലിറ്റിയും കഥയിൽ ഒരു സുപ്രധാന വിഷയമായി വരുന്നുണ്ട്.

🔸രണ്ട് പ്രധാന കഥാപാത്രങ്ങൾ ഉണ്ടെങ്കിലും കാഴ്ചക്കാരൻ ഇമോഷണലി കൂടുതൽ കണക്റ്റ് ആവുന്നത് റേ ലിയോട്ടയുടെ കഥാപാത്രത്തോട് ആയിരിക്കും. പരുക്കൻ ആണെങ്കിൽ കൂടി ആ കഥാപാത്രത്തിന്റെ ക്യാരക്റ്റർ ആർക്ക് മികച്ചത് തന്നെ ആയിരുന്നു. ക്രെഡിറ്റ് റോൾ ചെയ്ത ശേഷവും ചിന്തിക്കാൻ ചില സാധനങ്ങൾ ബാക്കി വെച്ചാണ് നാർക്ക് പോവുന്നത്, ആലോചിക്കും തോറും ആ പ്ലോട്ടിന്റെ ഡെപ്ത് കൂടുതൽ മികച്ചത് ആവുന്നുമുണ്ട്. ഈ അടുത്ത് കണ്ട് ക്രൈം ഡ്രാമ ജോനാർ ചിത്രങ്ങളിൽ തൃപ്തി നൽകിയ ഒന്നാണ് ഈ സിനിമ, അപ്പോൾ താല്പര്യം തോന്നുന്നു എങ്കിൽ കണ്ട് നോക്കുക, നഷ്ടം ആവില്ല.

Verdict : Very Good

DC Rating : 4/5

1320. Malaikottai Vaaliban (2024)

Director : Lijo Jose Pellissery

Cinematographer : Madhu Neelakandan

Genre : Fantasy

Country : India

Duration : 156 Minutes

🔸റിലീസിന് മുന്നേ കേട്ട അമർ ചിത്ര കഥ ഫീൽ തന്നെയാണ് മലയ്കോട്ടയ്‌ വാലിബന്റെ ആദ്യ പകുതി തന്നത്. അതായത് ഒരു ആന വന്നാലും ഇടിച്ച് വീഴ്ത്താൻ കെല്പുള്ള, അമാനുഷികൻ ആയ, സിനിമയിൽ പറയുന്നത് പോലെ ഒരു അതിശയ പിറവി ആയ വ്യക്തി വേറിട്ട എതിരാളികളിൽ കൂടിയും ഭൂപ്രദേശങ്ങളിൽ കൂടിയും ഒക്കെ ഒരു എപ്പിസോഡിക്കൽ രീതിയിൽ കടന്ന് പോവുന്ന ആദ്യ പകുതി. ഒരു ഓവർ ആർച്ചിങ് ആയ സ്റ്റോറി ഉണ്ടായിരുന്നില്ല എന്നത് ഒഴിച്ചാൽ നല്ല തോതിൽ തന്നെ ആസ്വദിച്ച് ആണ് ആദ്യ പകുതി കടന്ന് പോയത്, ഒരു പരിധി വരെ ഇനിയെന്ത് എന്ന കൗതുകവും നില നിർത്തിയിരുന്നു. പോസിറ്റിവോ നെഗറ്റീവോ എന്ന് പറയാൻ കഴിയാത്ത വിധം ബാക്കിയുടെ സൂചനകൾ ഒന്നും തരാത്ത ഒരു പോയിന്റിൽ ആണ് ഇടവേള വരുന്നതും.

🔸സിനിമയുടെ ഏറ്റവും വലിയ പ്രശ്നമായി അനുഭവപ്പെട്ടത് കാത്തിരിപ്പ് എന്ന ഫാക്റ്റർ തന്നെയാണ്. അതായത് അതി ശക്തനായ ഒരു യോദ്ധാവ് അയാളുടെ കെൽപിന് ഉള്ള വെല്ലുവിളി കൂടി അർഹിക്കുന്നുണ്ട്, അത് വന്നാൽ മാത്രമേ കാണുന്നവർക്ക് അയാളോട് ഒരു ഇമോഷണൽ അറ്റാച്ച്മെന്റ്റ് തോന്നുകയുള്ളൂ. ഇവിടെ ചമതകൻ എന്ന കഥാപാത്രം വലിയ ദോഷം പറയാൻ ഇല്ലാത്ത തോതിൽ ഒരു വശത്ത് കൂടി പോവുന്നുണ്ട് എങ്കിലും വാലിബന്റെ ശക്തിക്ക് അയാൾ ഒരു വെല്ലുവിളി ആവുന്ന ഫീൽ ഉണ്ടായിരുന്നില്ല. വാലിബന്റെ ശക്തിക്ക് അനുസരിച്ച് ഒരു പ്രതിയോഗി വരുമ്പോഴേക്കും ഒരുപാട് വൈകി പോവുന്നുമുണ്ട്.

🔸ഇത്തരം ഒരു ചിത്രത്തിന് രണ്ടാം ഭാഗം എന്തിന് എന്നൊരു തോന്നൽ ജനിപ്പിക്കുന്നുണ്ട് ക്ലൈമാക്സിൽ. മുകളിൽ പറഞ്ഞ പ്രശ്നങ്ങളും, നില വിട്ട് പോയത് പോലെ തോന്നിയ രണ്ടാം ഭാഗത്തിലെ ചില പോർഷൻസും ഒഴിചാൽ മലയ്കോട്ടയ്‌ വാലിബൻ ഇഷ്ട്ടപ്പെട്ടു. മോഹൻലാലിൻറെ പ്രകടനം ആയാലും, നല്ല വിഷ്വൽസ് ആയാലും, മ്യൂസിക് ആയാലും മോശം പറയാൻ ഒന്നും ഉള്ളതായി അനുഭവപ്പെട്ടില്ല. നാടകീയമായ ഡയലോഗ് ചില ഇടങ്ങളിൽ, ചില കഥാപാത്രങ്ങൾക്ക് ബോർ ആയി തോന്നി എങ്കിലും ടൈംലെസ്സ് ആയ കഥയ്ക്ക് ഒരു ഏച്ച് കെട്ടായും തോന്നിയില്ല. വാലിബൻ വളരെ യുണീക്ക് ആയ സിനിമയാണ്, ഇത്തരത്തിൽ ഒന്ന് മുൻപ് മലയാളത്തിൽ കണ്ടിട്ടില്ലാത്തത് കൊണ്ട് ഒരു പ്രത്യേക സന്തോഷവുമുണ്ട്.

Verdict : Good

DC Rating : 3.75/5

1319. Deep Cover (1992)

Director : Bill Duke

Cinematographer : Bojan Bazeli

Genre : Drama

Country : USA

Duration : 108 Minutes

🔸തൊണ്ണൂറുകളിൽ പുറത്തിറങ്ങിയ സ്‌ട്രെയിട്ട് ഫോർവേർഡ് ആയി ആക്ഷൻ ക്രൈം ചിത്രങ്ങളിൽ ഒന്നാണ് ഡീപ് കവർ. വലിയ ഏച്ച് കെട്ടുകൾ ഒന്നും ഇല്ലാതെ പറയാൻ വന്ന കാര്യം കൃത്യമായി പറഞ്ഞ് പോയ ഈ ചിത്രത്തെ മറ്റുള്ള സിനിമകളെക്കാൾ എലവേറ്റ് ചെയ്യുന്നത് മൂന്ന് കാര്യങ്ങൾ ആണ്. ഈ മൂന്ന് കാര്യങ്ങളിൽ ആദ്യത്തേത് സിനിമയുടെ മ്യൂസിക് ആണ്. എൻഡിങ് സീൻ ഉൾപ്പെടെ ഉള്ള രംഗങ്ങൾ റിപ്പീറ്റ് ചെയ്ത് കാണാൻ പ്രേരിപ്പിക്കുന്നത് മാസ്മരികം എന്നൊക്കെ പറയാവുന്ന ബാക്ക്ഗ്രൗണ്ട് സ്ക്കോർ തന്നെയാണ്. രണ്ടാമത്തേത് ഫാസ്റ്റ് ആയി, അതേ സമയം നീറ്റ് ആയി കഥ പറഞ്ഞ് പോവുന്ന അവതരണവും മൂന്നാമത്തേത് രണ്ട് പ്രധാന കഥാപാത്രങ്ങളുടെ പ്രകടനവും സ്വാഗും ഒക്കെ തന്നെയാണ്.

🔸ഒരു മോഷണ രംഗം കാണിച്ച് കൊണ്ടാണ് സിനിമ ആരംഭിക്കുന്നത്, തോക്കുമായി ഒരു വ്യക്തി സ്റ്റോറിലേക്ക് കയറി പോവുകയാണ്. തോക്ക് കാണിച്ച് കടക്കാരനെ ഭയപ്പെടുത്തി അയാൾ കവർച്ച പൂർത്തിയാക്കുന്നുണ്ട് എങ്കിലും വണ്ടിയിൽ കയറുന്നതിനു തൊട്ട് മുന്നേ അയാൾക്ക് വെടി ഏൽക്കുകയാണ്. ഈ കാഴ്ചയെല്ലാം കണ്ട് കൊണ്ട് അയാളുടെ മകൻ വണ്ടിക്ക് അകത്ത് ഉണ്ട്. ആ കുട്ടി ആണ് നമ്മുടെ നായക കഥാപാത്രം, എന്ത് തന്നെ സംഭവിച്ചാലും തന്റെ അച്ഛൻ മരണപ്പെട്ടത് പോലെ തെരുവിൽ കിടന്ന് വെടിയേറ്റ് ആയിരിക്കില്ല തന്റെ മരണം എന്ന് അവൻ അവിടെ വെച്ച് തീരുമാനിക്കുകയാണ്.

🔸ഇരുപത് വർഷങ്ങൾക്ക് ഇപ്പുറം ആ കുട്ടി ഇന്ന് ഒരു പോലീസ് ഉദ്യോഗസ്ഥൻ ആണ്, ഡ്രഗ് കാർട്ടലുകൾക്ക് മേൽ പൂട്ട് വീഴ്ത്താനായി ഒരു അണ്ടർ കവർ ഏജന്റ് ആയി അവൻ മാറുകയാണ്. ഈ ശ്രമത്തിനിടെ അവന് നേരിടേണ്ടി വരുന്നത് വളരെ അപകടകാരികൾ ആയ മാഫിയ തലവന്മാരെ മാത്രമല്ല, ചില സമയങ്ങളിൽ സ്വന്തം മേൽ ഉദ്യോഗസ്ഥന്മാരെ കൂടിയാണ്. നല്ല ഒന്നാംക്ലാസ്സ് ഒരു ക്രൈം ഡ്രാമ ചിത്രമാണ് ഡീപ് കവർ. ചില ഇടങ്ങളിൽ എങ്കിലും നമ്മുടെ പ്രതീക്ഷകൾ തെറ്റിക്കുന്ന, നമ്മുടെ പ്രവചനങ്ങൾ തെറ്റിക്കുന്ന, അവസാനം പൂർണ തൃപ്തി തരുന്ന നല്ലൊരു ചിത്രം. ക്രൈം ജോനാർ സിനിമകളോട് താല്പര്യം ഉള്ളവർക്ക് തീർച്ചയായും കണ്ട് നോക്കാവുന്നതാണ്.

Verdict : Good

DC Rating : 3.75/5

1318. Ghost Dog The Way Of The Samurai (1999)

Director : Jim Jarmusch

Cinematography : Rob Muller

Genre : Action

Country : USA

Duration : 116 Minutes

🔸സാമുറായ് - മോബ് ഫിലിംസ്, പ്രത്യക്ഷത്തിൽ ഒരു രീതിയിലും ചേരില്ല എന്ന് തോന്നിയ രണ്ട് ഘടകങ്ങൾ നല്ല കിടിലനായി ചേർത്ത് വെച്ച് അവതരിപ്പിച്ചു എന്നത് തന്നെയാണ് ഗോസ്റ്റ് ഡോഗ് എന്ന ചിത്രത്തിന്റെ ആദ്യം പറയേണ്ട പോസിറ്റീവ്. അത് പോരെങ്കിൽ പൊതുവെ താല്പര്യമുള്ള ലോൺ ഹീറോ ടൈപ്പ് കഥാപാത്രമായി ഫോറസ്റ്റ് വിറ്റാക്കർ കൂടി അവതരിക്കുമ്പോൾ കാര്യങ്ങൾ കൂടുതൽ സ്മൂത്ത്‌ ആവുകയാണ്. ഈ അടുത്ത് കണ്ട ഏറ്റവും മികച്ച ആക്ഷൻ സിനിമകളിൽ ഒന്നാണ് ഗോസ്റ്റ് ഡോഗ് വേ ഓഫ് ദി സാമുറായി. ഒരുപാട് വർഷങ്ങൾ മുന്നേ കേട്ട് പരിചയിച്ചത് ആണെങ്കിലും കാണാൻ വൈകിയതിൽ മാത്രമാണ് ഖേദം.

🔸ഒരു ഏകാന്ത ജീവി ആണ് നമ്മുടെ നായക കഥാപാത്രം ആയ ഗോസ്റ്റ് ഡോഗ്. സാമുറായ് രീതികളോടും, സംസ്കാരത്തോടും എല്ലാം വലിയ താല്പര്യം ഉള്ള അയാൾ ജീവിതം ഉഴിഞ്ഞ് വെച്ചിരിക്കുന്നത് ആയുധങ്ങൾക്കും പുസ്തകങ്ങൾക്കും എല്ലാം വേണ്ടിയാണ്. മറ്റൊന്നിനോടും താല്പര്യം ഇല്ലാത്ത ഗോസ്റ്റ് ഡോഗ് ഒരു പ്രൊഫഷണൽ കില്ലർ കൂടിയാണ്. ഒരേയൊരു ഡീലറുമായി മാത്രമേ ഗോസ്റ്റ് ഡോഗ് ബിസിനസിന് ഇറങ്ങാറുള്ളൂ, അയാളുമായി ആണെങ്കിൽ സംവദിക്കുന്നത് പ്രാവുകളുടെ സഹായത്തിൽ കൂടിയാണ് താനും. പൊതുവെ ഭയം കലർന്ന ഒരു ബഹുമാനം ആണ് ഗോസ്റ്റ് ഡോഗിനോട് സകലർക്കും ഉള്ളത്.

🔸ഇങ്ങനെ പോയി കൊണ്ടിരുന്ന ഗോസ്റ്റ് ഡോഗ് ഒരു വലിയ മാഫിയ ഗ്രൂപ്പിന്റെ അധികാര വടംവലിക്കും, അധികാര കൈമാറ്റത്തിനും ഒക്കെ ഇടയിൽ കയറി വരുന്നതും തുടർന്ന് അരങ്ങേറുന്ന പ്രശ്നങ്ങളും എല്ലാമാണ് ഈ സിനിമ. നല്ല കിടിലൻ പെർഫോമൻസ് ആണ് ഈ സിനിമയിലെ കഥാപാത്രങ്ങൾ എല്ലാം, അത് നായകൻ ആയാലും ശെരി സ്‌ക്രീനിൽ വരുന്ന കുട്ടികൾ ആയാലും ശെരി എല്ലാവരും തങ്ങളുടെ എ ഗെയിം കൊണ്ട് വന്നിട്ടുണ്ട്. നല്ല സ്റ്റോറിയും, മ്യൂസിക്കും,. കിടിലൻ പേ ഓഫും എല്ലാം കൂടി ചേരുമ്പോൾ തൃപ്തി നൽകുന്ന ഒരു അനുഭവം ആയി മാറുകയാണ് ഈ സിനിമ. അപ്പോൾ താല്പര്യം ഉണ്ടെങ്കിൽ കണ്ട് നോക്കാവുന്നതാണ്, നഷ്ടം ആവില്ല.

Verdict : Very Good

DC Rating : 4/5

1317. Aattam (2024)

Director : Anand Ekarshi

Cinematographer : Anurudh Aneesh

Genre : Drama

Country : India

Duration : 139 Minutes

🔸മോറാലിറ്റി അല്ലെങ്കിൽ ധാർമികത എന്ന വാക്കിൽ ആണ് ആട്ടം എന്ന ചിത്രം നില കൊള്ളുന്നത്, സാഹചര്യത്തിന് അനുസരിച്ച് ഓരോ മനുഷ്യനെയും ധാർമികത എങ്ങനെയൊക്കെ മാറി മറിയുന്നു അല്ലെങ്കിൽ എങ്ങനെ സാഹചര്യത്തിന് അനുസരിച്ച് മനോഹരമായി കളം മാറ്റി ചവിട്ടാൻ മനുഷ്യന് കഴിയുന്നു എന്നതിന്റെയൊക്കെ നല്ല ഒരു ഉദാഹരണം ആണ് ഈ ചിത്രം. ട്വീൽവ് ആംഗ്രി മെന്നിനെ ഒക്കെ അനുസ്മരിപ്പിക്കും വിധം സിംഹ ഭാഗവും ഒറ്റ ലൊക്കേഷനിൽ കഥ പറഞ്ഞ് പോവുന്ന ഈ ചിത്രം നിസ്സംശയം പറയാം, പോയ വർഷത്തെ മികച്ച മലയാള സിനിമകളിൽ ഒന്നാണ്. ബെഞ്ച് മാർക്ക്‌ വളരെ താഴെ ആണെങ്കിലും അത് അംഗീകരിച്ച് കൊടുക്കേണ്ട ഒരു വസ്തുത തന്നെയാണ്.

🔸ഒരു നാടക ഗ്രൂപ്പ് ആണ് സിനിമയുടെ കഥാ പശ്ചാത്തലം, സമൂഹത്തിന്റെ പല തട്ടുകളിൽ നിന്നുള്ള പന്ത്രണ്ടോളം ആളുകളാണ് ഈ ട്രൂപ്പിലെ അഭിനേതാക്കൾ. നിലവാരം കൊണ്ടും അഭിനയം കൊണ്ടും അത്യാവശ്യം പ്രേക്ഷക പിന്തുണ ഉള്ള ഇവർ ഒരുനാൾ വിജയകരമായ ഒരു പെർഫോമൻസിന് ശേഷം ഒരു ഹോട്ടൽ റിസോട്ടിൽ ഒത്ത് ചേരുകയാണ്. മദ്യവും സംഗീതവും ഒക്കെ കൊഴുപ്പിച്ച ആ രാത്രി അവസാനിക്കുന്നത് വളരെ മോശമായ ഒരു സംഭവത്തോട് കൂടിയാണ്. ഗ്രൂപ്പിലെ ഒരേയൊരു ലേഡി പെർഫോമർ ആയ അഞ്‌ജലിക്ക് ഗ്രൂപ്പിലെ മറ്റൊരാളിൽ നിന്നും ലൈംഗിക അതിക്രമം നേരിടേണ്ടി വരികയാണ്.

🔸ആരാണ് വില്ലൻ എന്ന കാര്യത്തിൽ അഞ്‌ജലിക്ക് ഒരേകദേശ ധാരണ ഉണ്ട്, എന്നാൽ അത്ര എളുപ്പം ആയിരുന്നില്ല പിന്നീട് അങ്ങോട്ടുള്ള സംഭവ പരമ്പര. അരങ്ങേറിയ സംഭവത്തിന്റെ വിവിധ തലങ്ങൾ ബാക്കിയുള്ള പത്ത് പേരും പല രീതിയിൽ വിശകലനം ചെയ്യുകയാണ്, വളരെ സിംപിൾ ആയ രീതിയിൽ പരിഹരിക്കാം എന്ന പ്രഥമ ദൃഷ്ടിയിൽ തോന്നിയ പ്രശ്നം താമസിയാതെ വളരെ ദുർഘടം ആവുകയാണ്. രണ്ടര മണിക്കൂറിന് അടുത്ത് സമയം കാണുന്ന കാഴ്ചക്കാരനെ പിടിച്ചിരുത്തുക, ഗസ് അടിപ്പിക്കുക എന്നതൊക്കെ അത്യാവശ്യം ബുദ്ധിമുട്ടുള്ള കാര്യമാണ്, പ്രത്യേകിച്ചും ഈ കാലത്ത്. അത് നല്ല വൃത്തിക്ക് വെടിപ്പായി ഈ സിനിമയിൽ അണിയറ പ്രവർത്തകർ സാധിച്ചിട്ടുണ്ട്, മികച്ചൊരു ചിത്രം തന്നെയാണ് ആട്ടം.

Verdict : Very Good

DC Rating : 4.25/5

1316. Paid In Full (2002)

Director : Charles Stone III

Cinematographer : Paul Sarossy

Genre : Drama

Country : USA

Duration : 98 Minutes

🔸വാൾ എടുത്തവൻ വാളാൽ എന്ന് പറയുന്ന ഒരു ശൈലിയിലാണ് ഒട്ടുമിക്ക ക്രൈം ഡ്രാമ ചിത്രങ്ങളും കടന്ന് പോവുന്നത്. അതായത് ഒരു ക്രിമിനൽ സിണ്ടിക്കേറ്റിന്റെ ഉയർച്ച, പ്രശ്നങ്ങൾ പിന്നെ അനിവാര്യമായ തകർച്ച, ഇതാണ് പാറ്റേൺ. ഈ ഒരു ടെക്സ്റ്റ്ബുക്ക് ശൈലി പിന്തുടരുന്ന ഒട്ടനേകം സിനിമകൾ നമ്മൾ പല ഭാഷകളിലായി കണ്ടിട്ടുണ്ട്, ഏറെക്കുറെ ആ ഒരു വഴിയിൽ തന്നെയാണ് പെയ്ഡ് ഇൻ ഫുൾ എന്ന ചിത്രവും കടന്ന് പോവുന്നത്. എന്നാൽ കഥാപാത്രത്തിന്റെ സ്ട്രഗിൽ കാണുന്ന കാഴ്ചക്കാരനുമായി നല്ല തോതിൽ കണക്റ്റ് ആവുന്നു എന്നിടത്താണ് ഈ സിനിമ വിജയമായി മാറുന്നത്.

🔸കുപ്രസിദ്ധി ആർജിച്ച ഹാർലം തെരുവിലാണ് നമ്മുടെ നായക കഥാപാത്രം ആയ ഏയ്‌സ് ജീവിക്കുന്നത്. ഏയ്‌സിന്റെ കൂട്ടുകാരും പരിചയക്കാരും എല്ലാം തന്നെ വളരെ വളരെ അർഭാടകരമായ ഒരു ജീവിത രീതി ആണ് പിന്തുടരുന്നത്. പണത്തിന് പണം, പവറിന് പവർ, അങ്ങനെ ആകെ മൊത്തം ഒരു ശരാശരി യുവാവ് സ്വപ്നം കാണുന്ന ഒരു ജീവിതം. ഇതിനെല്ലാം കാരണം ഡ്രഗ് മാഫിയകളുടെ സ്വാധീനവും, ആൾബലവും ഒക്കെ ആണെന്നത് പരസ്യമായ രഹസ്യമാണ്. നമ്മുടെ കഥാനായകൻ ആയ ഏയ്‌സ് മാത്രം ഇതുവരെ ആ വഴിയിലേക്ക് കടന്ന് ചെന്നിട്ടില്ല, ഒരുപരിധി വരെ ക്രിമിനൽ പശ്ചാത്തലം അവനിൽ താല്പര്യം ഉണ്ടാക്കിയിട്ടില്ല എന്നതാണ് സത്യം.

🔸എന്നാൽ എല്ലാത്തിനും ഒരു ബ്രെയ്‌ക്കിങ് പോയിന്റ് ഉണ്ട് എന്നത് പോലെ ഏയ്‌സിന്റെ ജീവിതവും ക്രിമിനൽ പശ്ചാത്തലത്തിലേക്ക് കടന്ന് വരികയാണ്, താല്പര്യം ഇലാത്തിരുന്നിട്ട് കൂടി അയാൾ അതിലേക്ക് വലിച്ചിഴയ്ക്കപ്പെടുകയാണ്. തുടർന്ന് അങ്ങോട്ട് സംഭവിക്കുന്ന കാര്യങ്ങൾ അയാളുടെ കൈപ്പിടയിൽ നിൽക്കുന്നതല്ല. ഈ ഒരു പോയിന്റിൽ നിന്ന് നല്ല ഒന്നാം ക്ലാസ് ഒരു ക്രൈം ഡ്രാമ സിനിമയുടെ വേഷം ഈ കഥ എടുത്ത് അണിയുകയാണ്. നല്ല കഥ, മികച്ച പ്രകടനങ്ങൾ, ഗംഭീര അവതരണം തുടങ്ങി നല്ലത് പറയാൻ ഒരുപാട് ഒരുപാട് ഉണ്ട് ഈ ചിത്രത്തിൽ, പ്രത്യേകിച്ചും ഈ ജോണറിൽ പെട്ട സിനിമകളുടെ ആരാധകർക്ക് കണ്ട് നോക്കാൻ ഉള്ളത് ഉണ്ട് എന്ന് നിസ്സംശയം പറയാം.

Verdict : Very Good

DC Rating : 4/5