779. The Lord Of The Rings : The Return Of The King (2003)

Director : Peter Jackson

Genre : Epic

Rating : 8.9/10

Country : USA

Duration : 252 Minutes

🔸അവസാനം പാളി പോയ ഒരുപാട് സീരീസുകളുണ്ട്, അത് ടീവി ഷോകൾ ആയാലും ശെരി സിനിമാ സീരീസ് ആയാലും ശെരി. ഗെയിം ഓഫ് ത്രോൺസ് ഈ ഒരു സിനാറിയോയ്ക്ക് ഉള്ള പെർഫെക്റ്റ് ഉദാഹരണമാണ്, സിനിമാ മേഖലയിലേക്ക് വരിക ആണെങ്കിൽ എലിയൻസ്, ടെർമിനേറ്റർ എന്നിവയെയും ഈ ഗണത്തിൽ പെടുത്താം. പറഞ്ഞ് വന്നത് എന്താണെന്നാൽ ലോർഡ് ഓഫ് ദി റിങ്‌സിന്റെ കാര്യത്തിൽ ഈ പ്രക്രിയ നേർ വിപരീതമാണ്, സീരീസിലെ ഏറ്റവും മികച്ച ചിത്രമാണ് അവസാനം വന്നത്, അത് വഴി എപിക് ആയ സ്റ്റോറിക്ക് അർഹിക്കുന്ന തോതിലുള്ള ഒരു പേ ഓഫ് നൽകാൻ ഇവിടെ സാധിച്ചിട്ടുണ്ട്.

🔸അപ്പൊ ഇതാണ് ആ അസുലഭ സുന്ദര നിമിഷം, സൗരോണിനെ തോൽപ്പിക്കാനായി തന്റെ അറിവിലുള്ള എല്ലാ അടവുകളും പയറ്റി പഠിച്ച്, തന്നാൽ കൂടെ കൂട്ടാൻ കഴിയുന്ന ഏറ്റവും വലിയ സൈന്യവുമായി സൗറോണിനോട് അരഗോൺ പോരിനിറങ്ങുന്ന ഭാഗം. ഇതുവരെയുള്ള പത്ത് പതിനൊന്ന് മണിക്കൂറുകൾക്കിടെ സൃഷ്ടിച്ചെടുത്ത സകലമാന കഥാ സന്ദര്ഭങ്ങളും കഥാപാത്രങ്ങളും കലാശക്കൊട്ടിനായി നേർക്കുനേർ വരുന്ന മൊമെന്റ്, എല്ലാ ആർക്കുകളും മോട്ടിവേഷൻസും എല്ലാം, എല്ലാം അതിന്റെ പരിസമാപ്തിയിൽ എത്തുന്ന പോയിന്റ്, ഒരുപക്ഷെ സിനിമാ ചരിത്രത്തിലെ തന്നെ ഏറ്റവും മികച്ച ഫ്രാഞ്ചൈസ് ഫിനാലെകളിൽ ഒന്നായ റിട്ടേൺ ഓഫ് ദി കിംഗ്.

🔸രോമാഞ്ചം സൃഷ്ട്ടിക്കുന്ന മോമെന്റുകളാൽ സമ്പന്നമാണ് ഈ ചിത്രം, എന്നാൽ അതിനും അപ്പുറം ഈ ചിത്രത്തെ ഏറ്റവും സ്പെഷ്യൽ ആക്കുന്നത്, ഓരോ കഥാപാത്രങ്ങൾക്കും, അവർ എത്ര പ്രാധാന്യം ഉള്ളവരോ ആയിക്കോട്ടെ, ചെറുതായാലും വലുതായാലും കൊടുക്കുന്ന പേ ഓഫുകളാണ്, അനാവശ്യമായ ബിൽഡ് അപ്പുകളില്ല, അപ്രതീക്ഷിതമായ തലത്തിലേക്കുള്ള സ്റ്റോറി ഷിഫ്റ്റിങ് ഒന്നും തന്നെയില്ല, മറിച്ച് അതെല്ലാം നൂറ്റി ഒന്ന് ശതമാനം അർഹിക്കുന്നത് തന്നെ. പേഴ്സണലി അവിടെയാണ് ലോർഡ് ഓഫ് ദി റിങ്‌സ് ഒരു ബെഞ്ച്മാർക്ക് കുറിക്കുന്നത്.

🔸എക്സറ്റൻഡഡ്‌ വേർഷൻ ഉദ്ദേശം നാലര മണിക്കൂർ ദൈർഘ്യം ഉണ്ടായിട്ട് കൂടി ഒരു സ്ഥലത്ത് പോലും ഒരു നിമിഷം ചിന്തിക്കാൻ കൂടി ഇട നൽകാത്ത വിധം ഫാസ്റ്റ് പെയ്‌സ്ഡ് ആയാണ് കഥ പുരോഗമിക്കുന്നത്, മുൻപുള്ള രണ്ടാം ഭാഗ ചിത്രം രണ്ട് തലങ്ങളിലൂടെയാണ് കഥ കൊണ്ടുപോയത് എങ്കിൽ ഇവിടെ ഫോക്കസ് ഏറെക്കുറെ മുഴുവനായും രണ്ടിടത്താണ്. റിങ് നശിപ്പിക്കാനായി മോർഡോറിലേക്കുള്ള യാത്രയുടെ അവസാന ഘട്ടത്തിലാണ് സാമും ഫ്രോഡോയും, പക്ഷെ ഒരു വലിയ വെല്ലുവിളി അവരെ കാത്ത് കിടപ്പുണ്ട്, വേറൊന്നുമല്ല റിങ് കൈവശം വെക്കുന്നവന്റെ മനസിനെ അതിന് നിയന്ത്രിക്കാൻ കഴിയും എന്ന പുതിയ അറിവ് തന്നെ, അതും പോരെങ്കിൽ തലയ്ക്ക് മേലുള്ള വാൾ പോലെ ഗോളം ഇപ്പോഴും ചുറ്റിപ്പറ്റി കൂടെ തന്നെയുണ്ട്.

🔸ഇതേസമയം ഗാന്ധാൾഫ്, അരഗോൺ, ലെഗോളാസ്, ജിംലി എന്നിവർ അവസാന യുദ്ധത്തിന്റെ ഒരുക്കത്തിലാണ്. എതിരെ നിൽക്കുന്നത് സർവ്വശക്തനായ സൗരോണും അവന്റെ മരണത്തെ പോലും ഭയക്കാത്ത പടയുമാണ്, ഇതുവരെ കോപ്പ് കൂട്ടിയതൊന്നും മതിയായേക്കില്ല എന്നതാണ് സത്യം, പക്ഷെ ഒരു യുദ്ധം എന്നത് ഒഴിവാക്കാനാവാത്ത വസ്തുത തന്നെയാണ്. ലെങ്ങ്തി ആയ കഥയുടെ എപിക് ഫിനാലെ ആണ് റിട്ടേൺ ഓഫ് ദി കിങ്‌സ്, കണ്ടില്ല എങ്കിൽ നിങ്ങൾക്ക് വൻ നഷ്ടമാണ് എന്ന് നിസ്സംശയം പറയാവുന്ന അപൂർവം ചിത്രങ്ങളിൽ ഒന്ന്.

Verdict : Must Watch

DC Rating : 100/100

778. The Lord Of The Rings : The Two Towers (2002)

Director : Peter Jackson

Genre : Epic

Rating : 8.7/10

Country : USA

Duration : 226 Minutes

🔸ആദ്യം വന്ന ഫെല്ലോഷിപ്പ് ഓഫ് ദി റിങ് സൃഷ്ടിച്ചെടുത്ത ബേസിൽ കാൽ ഉറപ്പിച്ച് നിന്ന്, നിലവാരത്തിൽ ഒരു തരി പോലും പിറകോട്ട് പോവാതെ തുടർന്ന് വരാനിരിക്കുന്ന എപിക് ഫിനാലെ ആയ റിട്ടേൺ ഓഫ് ദി കിങ്ങിന് കളം ഒരുക്കുക എന്ന കേൾക്കുമ്പോൾ ലളിതമായി തോന്നിയർക്കാവുന്ന എന്നാൽ അങ്ങേയറ്റം കഠിനമായ ദൗത്യമാണ് ലോർഡ് ഓഫ് ദി റിങ്‌സ് ത്രിലോഗിയിലെ രണ്ടാം ഭാഗ ചിത്രമായ റ്റു ടവേഴ്സിന് ഉണ്ടായിരുന്നത്, അതിൽ അസൂയാവഹമാം വിധം വിജയിച്ചു, ആ ചിത്രം എന്നത് വലിയ കാര്യം തന്നെയാണ്.

🔸ആദ്യ ചിത്രം പൊതുവെ എല്ലാ സ്രെണിയിലും മികച്ച പ്രേക്ഷക ആരാധക നിരൂപക പ്രശംസ കരസ്ഥമാക്കിയത് ആണെങ്കിലും ഒരു ചെറിയ വോക്കൽ കമ്യുണിറ്റി ടോകിയെന്റെ വേർഷൻ വെള്ളം ചേർത്തതാണ് എന്നൊരു അഭിപ്രായം വെച്ച് പുലർത്തിയിരുന്നു എന്നത് സത്യമാണ്, ഒരു രീതിയിൽ നോക്കുക ആണെങ്കിൽ ശെരിയുമാണ്, കാരണം മറ്റ് രണ്ട് ഭാഗങ്ങളെ അപേക്ഷിച്ച് ഒരു ഫൺ ലവിങ് ടോൺ ആദ്യ ഭാഗത്ത് ഉണ്ടായിരുന്നു. ഒരുപക്ഷെ കഥാപാത്രങ്ങളെ നമ്മൾ പരിചയപ്പെട്ട് തുടങ്ങിയിരുന്ന സമയം ആയത് കൊണ്ടാവാം സ്റ്റോറിയുടെ ഡാർക്ക് ടെറിട്ടറിയിലേക്ക് കഥ പോയിരുന്നെ ഇല്ല.

🔸റ്റു ടവേഴ്സിൽ ആ രീതി അങ് മാറുകയാണ്, അത് വരെ നമുക്ക് പരിചിതമായ രീതിയിൽ നിന്നും ഡാർക്ക് ഗ്രിറ്റി ആയൊരു തലത്തിലേക്ക് കഥ ആകമാനം മാറുന്നു. എൽവ്സുകളും ദ്വാർഫുകളും തമാശ പൊട്ടിച്ചിരുന്ന, ലൈറ്റ് ആയ ടോണിൽ നിന്നും ബാറ്റിൽ ഓറിയന്റഡ് രീതിയിലേക്ക് കഥ മാറുന്നു, ഒരുവേള ഹൊററിന്റെ മേമ്പൊടി കൂടി ചിത്രം എടുത്ത് അണിയുന്നുണ്ട്. പോയിന്റ് ഈസ്, സേഫ് ഗെയിം കളിക്കാതെ കഥാപാത്രങ്ങൾ എല്ലാം തന്നെ ഡേഞ്ചർ സോണിൽ ആണെന്ന ഒരു വിശ്വാസവും ഭയവും ജനിപ്പിക്കാൻ കഥയുടെ ഈ ഭാഗത്തിന് കഴിഞ്ഞിട്ടുണ്ട് എന്ന് തന്നെ.

🔸ഒരു ട്രിലോഗിയുടെ രണ്ടാം ഭാഗം എന്ന് പറയുമ്പോൾ സ്വാഭാവികമായും പ്രതീക്ഷിക്കാവുന്നത് പോലെ തന്നെ വ്യക്തമായ തുടക്കമോ അവസാനമോ ഒന്നും ഇവിടെ പ്രതീക്ഷിക്കേണ്ടതില്ല, പൂർണമായും ഇല്ലെന്നല്ല. മൂന്ന് ആംഗിളുകളിലൂടെയാണ് കഥ പുരോഗമിക്കുന്നത്, റിങ് നശിപ്പിക്കാനായി മോർഡോറിലേക്ക് സഞ്ചരിക്കുന്ന ഫ്രോഡോയും സാമുമാണ് കഥയുടെ ഒരു ഭാഗം, ഒരുപക്ഷെ ഏറ്റവും പ്രധാനപ്പെട്ടത് എന്ന വിശേഷണം അർഹിക്കുന്നത്. ഗോല്ലം എന്ന കഥാപാത്രം ഇവരുടെ കൂടെ തന്നെയുണ്ട്, അവന്റെ ഉദ്ദേശം എന്താണെന്ന് വ്യക്തമല്ല എങ്കിലും റിങ്ങിന് മേൽ അവനൊരു കണ്ണുണ്ട് എന്ന കാര്യം വ്യക്തം.

🔸റോഹൻ രാജ്യത്ത് എത്തുന്ന അരഗോണും, ലെഗോളാസും, ഗിമിലിയുമാണ് കഥയുടെ മറ്റൊരു പോർഷൻ, യുദ്ധവും മറ്റും കാരണം തകർന്ന് തരിപ്പണമായ രാജ്യമാണ് റോഹൻ, എന്തിരുന്നാലും സൗരോണും ആയുള്ള യുദ്ധത്തിന് അവർക്ക് വലിയ പ്രാധാന്യമുണ്ട്. എല്ലാത്തിനും അപ്പുറം ഗാന്ധാള്ഫിന്റെ തിരോധാനം മൂവർ സംഘത്തിനെ ഒട്ടും സഹായിക്കുന്നുമില്ല. ഇസെൻഗാർഡ് ഉന്നം വെച്ച് നീങ്ങുന്ന മെറിയും പിപ്പിനും മൂന്നാം ഭാഗം കയ്യാളുന്നു. ലോർഡ് ഓഫ് ദി റിങ്‌സിലെ ഒഴിച്ച് കൂടാനാവാത്ത അധ്യായമാണ് ദി റ്റു ടവേഴ്സ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

777. The Lord Of The Rings : Fellowship Of The Ring (2001)

Director : Peter Jackson

Genre : Epic

Rating : 8.8/10

Country : USA

Duration : 208 Minutes

🔸ദൈവം സഹായിച്ച് ലോർഡ് ഓഫ് ദി റിങ്‌സ് നോവലുകളിൽ ഒന്ന് പോലും ഇന്നേവരെ വായിച്ചിട്ടില്ല, പൊതുവെ വായിക്കാൻ ഉള്ള മടി കാരണവും ദീപ സ്തംഭം കണക്കെ ഒരു ഫിലിം അഡാപ്റ്റേഷൻ നോവലിന് ഉള്ളത് കൊണ്ടും ഇനി ഒട്ട് വായിക്കാൻ സാധ്യതയുമില്ല, കേട്ടറിവുകൾ മാത്രമേ ഉള്ളൂ പ്രസ്തുത നോവലിനെ പറ്റി. പക്ഷെ ഇവിടെ പ്രസക്തമായ ഒരു കാര്യം എന്താണെന്നാൽ നോവൽ വായിച്ചവരാരും പൊതുവെ കാണപ്പെടാറുള്ളത് പോലെ അതിന്റെ ചലച്ചിത്രാവിഷ്കരണത്തെ തള്ളി പറഞ്ഞതായി കണ്ടിട്ടില്ല, മിക്കയിടത്തും അത്യാവശ്യം വർത്തി ആയ ഒന്ന് എന്ന് തന്നെയാണ് കേൾക്കാൻ ഇടയായത്, അത് അഭിനന്ദനാർഹവുമാണ്.

🔸എഴുപതുകളിൽ ടോകിയെന്റെ നോവൽ ആധാരമാക്കി ഒരു സിനിമാ അഡാപ്റ്റേഷൻ വന്നിട്ടുണ്ട് എന്ന് കേട്ടിരുന്നു, ഒറ്റ പാർട്ട് ആയി ഇറങ്ങിയ ആ ചിത്രത്തിൽ നിന്ന് വ്യത്യസ്തമായി മൂന്ന് ഭാഗങ്ങളിൽ വലിയ സ്കെയിലിൽ തന്നെയാണ് ലോർഡ് ഓഫ് ദി റിംഗ്‌സ് ട്രിലോഗി തയാറാക്കപ്പെട്ടത്, വലിയൊരു കഥയിലെ ഓപ്പണിങ് ആക്റ്റ് മാത്രമാണ് സത്യത്തിൽ ഫെല്ലോഷിപ്പ് ഓഫ് ദി റിങ്, എന്നാലും നിലവാരത്തിൽ ഒരു ബെഞ്ച്മാർക്ക് ഇവിടെ സ്ഥാപിക്കപ്പെട്ട് കഴിഞ്ഞിരിക്കുന്നു, അത് തന്നെയാണ് ചിത്രത്തിന്റെ പ്ലസ് പോയിന്റും.

🔸ഒരു ത്രിലോഗിയിലെ ആദ്യ ഭാഗത്തിന് പൊതുവെ ഉള്ള ദൗത്യം കഥയുടെ ബേസ് അല്ലെങ്കിൽ അടിത്തറ നന്നായി കെട്ടി ഉണ്ടാക്കുക എന്നതും തുടർന്ന് വരാൻ പോകുന്ന ഭാഗങ്ങളിലേക്ക് പ്രേക്ഷക ശ്രദ്ധയും ആകാംക്ഷയും സൃഷ്ടിക്കുക എന്നതുമാണ്, ഏറ്റവും കുറഞ്ഞത് അങ്ങനെയാണ് ഞാൻ ധരിച്ച് വെച്ചിരിക്കുന്നത്. ഈ രണ്ട് വസ്തുതകൾ മാത്രം കണക്കിൽ എടുക്കുക ആണെങ്കിൽ പോലും നൂറിൽ നൂറ് മാർക്ക് നൽകേണ്ട ഒന്നാണ് ഈ ചിത്രം, സിനിമയുടെ ചരിത്രത്തിലെ തന്നെ ഏറ്റവും മികച്ച ഫാന്റസി എപിക് അഡ്വെഞ്ചർ ചിത്രങ്ങളിൽ ഒന്നായി ലോർഡ് ഓഫ് ദി റിങ്‌സ് വിലയിരുത്തി കണ്ടിട്ടുണ്ട്, പലരാലും. ഈ ഒരു കാര്യം ചിത്രം കാണുമ്പോൾ വ്യക്തമാവും, ഉറപ്പ്.

🔸കഥയിലേക്ക് കടക്കുന്നതിന് മുന്നേ കുറച്ച് ചരിത്രം പറയണം, മിഡിൽ എർത്താണ് നമ്മുടെ കഥാ പശ്ചാത്തലം. യഥാർത്ഥ കഥ നടക്കുന്നതിനും ഒരുപാട് വർഷങ്ങൾക്ക് മുന്നേ മിഡിൽ എർത്തിൽ മൂന്ന് വിഭാഗത്തിൽ പെട്ട ആളുകളായിരുന്നു ഉണ്ടായിരുന്നത്. എൽവ്‌സ്, ദ്വാർസ്, മെൻ എന്നീ വിഭാഗങ്ങൾ, ഇവരുടെ കൈകളിൽ അതി ശക്തമായ ശേഷിയുള്ള റിങ്ങുകളും ഉണ്ടായിരുന്നു. എന്നാൽ ഒരുനാൾ സൗറോൺ എന്ന ഡാർക്ക് ലോഡ് മൗണ്ട് ഡൂം പർവതത്തിൽ നിന്നും അതി ശക്തമായ മറ്റൊരു റിങ് സൃഷ്ടിച്ച് എടുക്കുന്നതും, അതിനെ തുടർന്ന് ഒരു മഹായുദ്ധം പൊട്ടി പുറപ്പെടുന്നതും എല്ലാമാണ് കഥയുടെ ഫ്ലാഷ്ബാക്ക്.

🔸ആ യുദ്ധത്തിൽ സൗരോണിന്റെ പട നാമാവശേഷം ആയി പോവുകയാണ്, എന്നാൽ പലകൈവഴികളിലൂടെ അയാൾ സൃഷ്ട്ടിച്ച റിങ് ബിൽബോ ബാഗിൻസ് എന്ന വ്യക്തിയുടെ പക്കൽ എത്തുകയും ചെയ്യുന്നു. ഇത്രയും പറഞ്ഞത് മുൻപ് നടന്ന കഥകൾ മാത്രം, ചിത്രത്തിലെ മൂന്നര മണിക്കൂർ ദൈർഘ്യമുള്ള സംഭവങ്ങളും മറ്റും പരാമർശിച്ചിട്ടേയില്ല. എപിക് എന്നൊക്കെ വിശേഷിപ്പിക്കാവുന്ന വാർ രംഗങ്ങളും, ഉഗ്രൻ കഥാപാത്രങ്ങളും, ഗൂസ്ബമ്പ്സ് എന്നൊക്കെ വിശേഷിപ്പിക്കാവുന്ന മുഹൂർത്തങ്ങളും ചിത്രത്തിന്റെ ഹൈലൈറ്റുകളാണ്, തീർച്ചയായും കണ്ടിരിക്കേണ്ട ഒന്നാണ് ലോർഡ് ഓഫ് ദി റിങ്‌സ് സീരീസ്, അതിന്റെ ആദ്യ പടിയാണ് ഈ ചിത്രം.

Verdict : Must Watch

DC Rating : 95/100

776. Plastic Jesus (1971)

Director : Lazar Stojanović

Genre : Drama

Rating : 6.9/10

Country : Croatia

Duration : 73 Minutes

🔸പ്ലാസ്റ്റിക് ജീസസ്, പേര് സൂചിപ്പിക്കുന്നത് പോലെ തന്നെ ഹൈലി കോണ്ട്രാവെർഷ്യൽ ഐറ്റം. ആയിരത്തി തൊള്ളായിരത്തി എഴുപത്തി ഒന്നിൽ ഷൂട്ടിങ് പൂർത്തിയായതാണ് ഈ ചിത്രം എങ്കിലും പുറം ലോകം കാണാൻ അല്ലെങ്കിൽ ഒരു പബ്ലിക് സ്ക്രീനിംഗ് നടക്കാൻ മാത്രം രണ്ട് പതിറ്റാണ്ട് എടുത്തു എന്നത് സിനിമ കൈകാര്യം ചെയ്യുന്ന വിഷയങ്ങളുടെ തീവ്രത കണക്കാക്കാൻ ഉള്ള നല്ല ഒരു ഉപാധിയാണ്. തൊണ്ണൂറ്റി ഒന്നിൽ മോണ്ട്രിയൽ ഫിലിം ഫെസ്റ്റിവലിൽ ആദ്യമായി പ്രദർശിപ്പിക്കുന്നത് വരെ ഈ ചിത്രത്തെ കുറിച്ച് ഊഹാപോഹങ്ങൾ മാത്രമേ ഉണ്ടായിരുന്നുള്ളൂ കാഴ്ചക്കാർക്കും മറ്റുള്ളവർക്കും ഇടയിൽ, ആ ഫെസ്റ്റിൽ ചിത്രം ടോപ് പ്രൈസ് കരസ്ഥമാക്കുകയും ചെയ്തിരുന്നു.

🔸ചിത്രം തയാറാക്കി ഉദ്ദേശം ഒരു വർഷം കഴിഞ്ഞപ്പോഴാണ് സംവിധായകൻ ലസാർ സ്റ്റോജെനോവിച്ച് അറസ്റ്റ് ചെയ്യപ്പെടുന്നത്, ഇതിന് ഒരു കാരണവുമുണ്ട്. യുഗോസ്ലോവിയൻ കമ്യുണിസ്റ്റ് നേതാവായ ജോസഫ് ബ്രോസിന്റെ ഭരണം വിമർശനത്തിന്റെ വാൾമുനയിൽ പെട്ട് ഉഴലുമ്പോഴാണ് സ്റ്റോജെനോവിച്ചിന്റെ പ്ലാസ്റ്റിക് ജീസസ് എന്ന ചിത്രം സാന്നിധ്യം അറിയിക്കുന്നത്, ചിത്രത്തിൽ ആണെങ്കിൽ ആന്റി നാസി ആന്റി കമ്യുണിസ്റ്റ് കൊട്ടൊക്കെ അത്യാവശ്യം നന്നായുണ്ട് താനും. അപ്പൊ പിന്നെ സ്വാഭാവികമായും അത്ര നല്ല കാര്യങ്ങൾ പ്രതീക്ഷിക്കേണ്ടതില്ലല്ലോ.

🔸ചിത്രം തയാറായി തൊട്ടടുത്ത വർഷം സ്റ്റോജെനോവിച്ച് അറസ്റ്റ് ചെയ്യപ്പെട്ടു, പേരിനൊരു വിചാരണ എന്ന മട്ടിൽ ഒരു പ്രഹസനത്തിന് ഒടുവിൽ വീണ്ടും ഒരു വർഷത്തിന് ശേഷം അയാൾക്ക് തടവറ വിധിക്കപ്പെടുന്നു. പിന്നീടുള്ള കുറച്ച് വർഷങ്ങൾ സ്റ്റോജെനോവിച്ച് ചിലവഴിച്ചത് ജയിലറകൾക്ക് ഉള്ളിലാണ്. ഈ ഒരു മുഖവര ഉൾപ്പെടുത്തി ചിത്രവും സംവിധായകനും എല്ലാം നേരിടേണ്ടി വന്ന ബുദ്ധിമുട്ടുകളെ ഫോക്കസ് ചെയ്ത് കൊണ്ടാണ് പ്ലാസ്റ്റിക് ജീസസ് കഥ പറഞ്ഞ് തുടങ്ങുന്നത്.

🔸ജോസഫ് ബ്രോസിനെയോ അല്ലെങ്കിൽ അയാളുടെ ഭരണത്തെയോ മാത്രമായി ഉള്ള തേജോവധമോ അല്ലെങ്കിൽ വിമർശനമോ അല്ല ചിത്രത്തിന്റെ കാതൽ, നിലനിൽക്കുന്നു എന്ന് പറയുന്ന അല്ലെങ്കിൽ പൊതുവെ വിമർശിക്കപ്പെടുന്ന സിസ്റ്റത്തെ മുഴുവനായി പൊളിച്ചെഴുതുന്നുണ്ട് ഈ ചിത്രം, രാഷ്ട്രീയ സാംസ്‌കാരിക പ്രഹസനങ്ങൾ തൊട്ട് ലൈംഗികത വരെ വിഷയമാവുന്നുണ്ട് ചിത്രത്തിൽ. കഥ എന്ന വസ്തുതയിലേക്ക് മനഃപൂർവം കടക്കാഞ്ഞത് തന്നെയാണ്, ഒരു ക്രൊയേഷ്യൻ അണ്ടർ ഗ്രൗണ്ട് സിനിമ സംവിധായകൻ നേരിടേണ്ടി വരുന്ന ബുദ്ധിമുട്ടുകൾ എന്ന് മാത്രം പറഞ്ഞിടാം.

🔸ഈ സൂചിപ്പിച്ച ത്രെഡിലൂടെ കഥ പോവുമ്പോൾ തന്നെ വിവിധ നേതാക്കന്മാരുടെയും ചരിത്രത്തിലെ ചില സംഭവങ്ങളുടെയും എല്ലാം ഫൂട്ടേജുകൾ ചിത്രം കാണിക്കുന്നുണ്ട്. യുഗോസ്ലോവിയയിൽ കാടൻ ഭരണം വീഴുന്നതിന് മുൻപുള്ള കാലഘട്ടത്തിലേക്കുള്ള നല്ലൊരു തിരിഞ്ഞ് നോട്ടം കൂടിയാണ് ഈ ചിത്രം, ചരിത്രാന്വേഷികൾക്കും സിനിമ സ്നേഹികൾക്കും ഒരുപോലെ പരീക്ഷിക്കാവുന്ന ഒരു വർക്. എല്ലാവര്ക്കും നിർദ്ദേശിക്കില്ല ഈ ചിത്രം, മുകളിൽ ചേർത്ത കാര്യങ്ങൾ വായിച്ച് താല്പര്യം ഉണ്ടെങ്കിൽ, തോന്നുന്നെങ്കിൽ മാത്രം പരീക്ഷിച്ച് നോക്കാവുന്നതാണ്.

Verdict : Good

DC Rating : 75/100

775. Human Condition Part 3 - A Soldier's Prayer (1961)

Director : Masaki Kobayashi

Genre : Drama

Rating : 8.8/10

Country : Japan

Duration : 190 Minutes

🔸ഹ്യുമൻ കണ്ടീഷൻ സീരീസിലെ മൂന്നാം ഭാഗം, അതായത് എ സോൾജ്യേഴ്‌സ് പ്രെയർ ഒരു രീതിയിൽ പറഞ്ഞാൽ എപിക് കൺക്ലൂഷൻ ആണ്, കാജി എന്ന നായക കഥാപാത്രത്തിന്റെ കഥ അർഹിക്കുന്ന രീതിയിൽ എല്ലാ ഭംഗിയോടും കൂടെ ഇവിടെ അവസാനിക്കുകയാണ്. പക്ഷെ ഈ ഭാഗത്തെ എപിക് എന്ന് വിശേഷിപ്പിക്കുന്നതിലൂടെ ആദ്യ രണ്ടിനെയും താഴ്ത്തി കെട്ടാനോ അല്ലെങ്കിൽ അവയുടെ പ്രാധാന്യം കുറയ്ക്കാനോ അല്ല ലക്ഷ്യമിടുന്നത്, മറിച്ച് മൂന്നും ഒന്നിനൊന്ന് മികച്ചവ തന്നെയാണ്, എന്നാൽ പ്രേക്ഷകന്റെ ഓർമയിൽ മിക്കപ്പോഴും ആദ്യം എത്തുക ലാസ്റ്റ് ആക്റ്റ് ആയതിനാൽ തന്നെ ഈ ചിത്രത്തിനുള്ള പ്രാധാന്യം വളരെ വലുതാണ്.

🔸ജൂമ്പെയ്‌ ഗോമികാവയുടെ ആറ് വോള്യം നോവലാണ് ഈ മൂന്ന് ഭാഗ ചിത്രത്തിനായി മസാകി കൊബായാഷി ഉപയോഗപ്പെടുത്തിയിട്ടുള്ളത്. ഉദ്ദേശം മൂന്ന് വർഷത്തെ ഇടവേളയിൽ പുറത്തിറങ്ങിയ സിനിമകളിൽ ഒരുപക്ഷെ വിഷയമാവാത്ത സംഗതികൾ വളരെ കുറവായിരിക്കും. പ്രണയം, അതിജീവനം, പക, ചതി, യുദ്ധം തുടങ്ങിയ കാര്യങ്ങൾ എല്ലാം ചിത്രം കൈകാര്യം ചെയ്യുന്നുണ്ട്, പല പല കഥാപാത്രങ്ങളിലൂടെ. പത്ത് മണിക്കൂറിനടുത്ത് ദൈർഖ്യം ഉണ്ടെങ്കിലും ഹ്യുമൻ കണ്ടീഷൻ ത്രിലോഗിയെ വ്യത്യസ്തമാക്കുന്നത് ഈ ചിത്രങ്ങൾ എത്രമേൽ ലളിതമായ രീതിയിലാണ് ഗൗരവമേറിയ വിഷയങ്ങൾ വരെ കൈകാര്യം ചെയ്തിരിക്കുന്നത് എന്നതിലാണ്.

🔸പട്ടാളത്തോടും അവരുടെ ശൈലിയോടും മറ്റും വിയോജിപ്പ് ഉണ്ടായിരുന്ന കാജി, വിധി ഒന്ന് കൊണ്ട് ഒരു പട്ടാളക്കാരനായി തന്നെ മാറേണ്ടി വരികയാണ്. എല്ലാ കാലത്തും പുള്ളി അകലം പാലിച്ചിരുന്ന ആക്രമണം മുറകളിലേക്കും വയലെൻസിലേക്കും ഈ ഒരു കാരണം കൊണ്ട് തന്നെ കാജി വലിച്ചിഴയ്ക്കപ്പെടുകയാണ്. കരയ്ക്ക് പിടിച്ചിടപ്പെട്ട മീനിനെ പോലെ ശ്വാസം കിട്ടാൻ പാട് പെടുന്ന കാജിയെയാണ് നമ്മൾ ഈ ഭാഗത്ത് കാണുന്നതും. ഈ അനുഭവം അയാളിലെ ഐഡിയലിസ്റ്റിനെ നല്ല തോതിൽ തന്നെ ബാധിക്കുന്നുണ്ട്, തിരിച്ച് പോക്ക് അസാധ്യമാക്കുന്ന രീതിയിൽ മാറ്റി മറിക്കുന്നുണ്ട്.

🔸ഒഴുക്കിന് എതിരെ നീന്താൻ ശ്രമിക്കുന്നവർക്കും, സ്വന്തം സുരക്ഷ മുൻ നിർത്തി അനീതിക്ക് നേരെ കണ്ണടക്കാൻ ശ്രമിക്കാത്തവർക്കും ചില സമയത്ത് നേരിടേണ്ടി വന്നേക്കാവുന്ന കഠിനമായ യാതനകളുടെ ഉദാഹരണം കൂടിയാണ് കാജിയുടെ ജീവിതം. ഈ ഒരു വസ്തുത സീരീസിന്റെ തുടക്കം തൊട്ട് അവസാനം വരെ കാണാനായേക്കും, കൃത്യമായി പറഞ്ഞാൽ ചൈനീസ് തെഴിലാളികൾക്ക് ബേധപ്പെട്ട ഭക്ഷണം ലഭിക്കാനായി ഇറങ്ങി തിരിക്കുന്ന കാജിയിൽ നിന്നും അടിച്ചമർക്കപ്പെട്ട തൊഴിലാളികളുടെ ശബ്ദമായി മാറാൻ ശ്രമിക്കുന്ന നിസ്സഹായനായ കാജി വരെ.

🔸പോയേറ്റിക് എന്നൊക്കെ വിശേഷിപ്പിക്കാവുന്ന രീതിയിലാണ് ചിത്രത്തിന്റെ കഥയുടെ ഒഴുക്ക്, കാജിയുടെ ജീവിത കഥയ്ക്ക് ഫുൾ സ്റ്റോപ്പ് വീഴുന്നത് പോലെ തന്നെ നായികയായ മിഷീകോയുടെ കാര്യത്തിലും ഒരു ഡെഫിനിറ്റ് എൻഡിങ് ചിത്രം നൽകുന്നുണ്ട്, ഒരുപാട് ബുദ്ധിമുട്ടുകളിലൂടെ കടന്ന് പോയതാണെങ്കിലും കാജി മിഷിക്കോ ബന്ധവും മനോഹരമായ രീതിയിൽ അവസാനിക്കുന്നുണ്ട്, ഒരല്പം ബിറ്റർ സ്വീറ്റ് എൻഡിങ് ആണെങ്കിൽ കൂടിയും. നിർബന്ധമായും കണ്ടിരിക്കേണ്ട ഒന്നാണ് ഹ്യുമൻ കണ്ടീഷൻ ത്രിലോഗി, ഇനഫ് സെയ്‌ഡ്.

Verdict : Must Watch

DC Rating : 100/100

774. They Live By Night (1948)

Director : Nicholas Ray

Genre : Film Noir

Rating : 7.5/10

Country : USA

Duration : 95 Minutes

🔸ലവേഴ്സ് ഓൺ ദി റൺ എന്ന തീം പ്രമേയമാക്കി അനവധി സിനിമകൾ പുറത്തിറങ്ങിയിട്ടുണ്ട്, അതിൽ തന്നെ ബയോഗ്രഫിക്കൽ ആസ്പെക്റ്റ് ഉള്ള ബോണി ആൻഡ് ക്ളൈഡ് തൊട്ട് വയലൻസ് ഒരു ആഘോഷമാക്കിയ നാച്ചുറൽ ബോൺ കില്ലേഴ്സ് വരെ കാണാനാവും. ഒരുപക്ഷെ ഈ ഒരു വിഭാഗത്തിലെ ഏറ്റവും പ്യുവർ ആയ ചിത്രം ദേ ലൈവ് ബൈ നൈറ്റ് ആയിരിക്കും, കാഴ്ചക്കാരനെ ടച്ച് ചെയ്യുന്ന വിധം മനോഹരമായാണ് ഈ സിനിമയുടെ ഓരോ ഏടും കൂട്ടിച്ചേർത്ത് വച്ചിരിക്കുന്നത്. കഥയോടും കഥാപാത്രങ്ങളോടും വല്ലാത്തൊരു അടുപ്പം ഈ ചിത്രം സൃഷ്ടിച്ചെടുക്കുന്നുണ്ട്.

🔸മൂന്ന് പേർ ചേർന്ന് ജയിൽ ചാടുന്നിടത്താണ് സിനിമ ആരംഭിക്കുന്നത്, ഈ മൂന്ന് പേരിൽ ഒരാൾ നമ്മുടെ നായകനായ ബോവി ആണ്. വെറും ഇരുപത്തി മൂന്ന് വയസ്സ് മാത്രമാണ് ബോവിയുടെ പ്രായം, അതിനിടെ തന്നെ ഏഴ് വർഷത്തെ ജയിൽ ശിക്ഷ അയാൾ അനുഭവിച്ച് കഴിഞ്ഞിട്ടുണ്ട്. കൊലപാതകം ആയിരുന്നു അവന്റെ മേലുള്ള കുറ്റം, എന്നാൽ ഈ അടുത്ത കാലത്താണ് അവൻ തനിക്ക് ഗുണകരമായി വന്നേക്കാവുന്ന ഒരു നിയമ നടപടിയെ കുറിച്ച് അറിയാൻ ഇടയായത്, കാര്യം വേറൊന്നുമല്ല അറസ്റ്റ് ചെയ്യപ്പെട്ടപ്പോൾ ബോവിയുടെ പ്രായം പതിനാറ് വയസ്സ് മാത്രമായിരുന്നു.

🔸ആ ചെറിയ പ്രായത്തിൽ കുറ്റകൃത്യം ചെയ്ത് അറസ്റ്റിൽ ആയവർക്ക് പ്രായം നൽകുന്ന പരിഗണന കാരണം ശിക്ഷയിൽ ഇളവ് ലഭിക്കും എന്നതാണ് കാര്യം. ബോവിയെ അറസ്റ്റ് ചെയ്യപ്പെട്ട സമയം അവന് ഈ കാര്യത്തെ പറ്റി അറിവുണ്ടായിരുന്നില്ല, ഉദ്യോഗസ്ഥർ ഒട്ട് ചിന്തിച്ചതുമില്ല. ചുരുക്കി പറഞ്ഞാൽ അവന് രക്ഷപ്പെടാനുള്ള, ഒരു പുതിയ ജീവിതം തുടങ്ങാനുള്ള അവസരം ലഭിച്ചേക്കും എന്നത് തന്നെ. എന്നാൽ ഈ കാര്യങ്ങൾ ഒന്നും തന്നെ ജയിൽ അധികൃതർ വിശ്വസിക്കുന്നുമില്ല, അങ്ങനെയാണ് അവൻ ആ കടുത്ത തീരുമാനത്തിൽ എത്തുന്നത്.

🔸ബോവിയോടൊപ്പം ജയിൽ ചാടിയ റ്റീടബ്ബും, ചിക്കമവും തികഞ്ഞ കള്ളന്മാരാണ്. കൊല, കൊള്ള തുടങ്ങി സകലമാന തക്കിട തരികിട പരിപാടികളിലും പ്രാവീണ്യം തെളിയിച്ചവർ, അങ്ങനെ മൂവരും പുറം ലോകത്ത് എത്തുകയാണ്. പുറമെ എത്തിയ ശേഷം ഒരു വക്കീലിന്റെ സഹായത്തോടെ തന്റെ കാര്യത്തിൽ എന്തെങ്കിലും നടപടി ഉണ്ടാക്കണം എന്നതാണ് ബോവിയുടെ ആഗ്രഹം, എന്നാൽ വിധി അവരെ കൊണ്ട് ചെന്നെത്തിക്കുന്നത് ഒരു ബാങ്ക് കൊള്ളയിലേക്കാണ്, അവിടെ നിന്നും കാര്യങ്ങൾ കൈവിട്ട് പോയി തുടങ്ങുകയാണ്.

🔸ഈ മരണ പാച്ചലിനിടയിൽ ബോവി, കീച്ചി എന്ന യുവതിയെ കണ്ട് മുട്ടുന്നതും അവർക്കിടയിൽ പ്രണയം നാമ്പെടുക്കുന്നതും ഒക്കെയാണ് കഥയുടെ മറ്റ് തലങ്ങൾ. കുറ്റങ്ങളിൽ നിന്നും കുറ്റങ്ങളിലേക്ക് ചെന്ന് കയറുന്ന ബോവിയെ തിരികെ കൊണ്ടുവരാൻ ശ്രമിക്കുന്ന കീച്ചിയുടെ കഥാപാത്രം അടുത്തിടെ കണ്ട മികച്ചവയിൽ ഒന്നാണ്. ആകെ മൊത്തം ഒരു ട്രാജിക് ഫീൽ ആണെങ്കിലും കണ്ടിരിക്കേണ്ട ഒന്ന് തന്നെയാണ് ദേ ലിവ് ബൈ നൈറ്റ് എന്ന ചിത്രം. പല ചിത്രങ്ങളിലും അനുഭവപ്പെടാറുള്ള ഫോസ്ഡ് ആയ റൊമാൻസ് ഒന്നുമല്ല ഇവിടെ, തീർച്ചയായും കാണാൻ ശ്രമിക്കുക, മികച്ച ചിത്രം തന്നെയാണ്.

Verdict : Must Watch

DC Rating : 90/100

773. Day Of The Beast (1995)

Director : Álex De La Iglesia

Genre : Comedy

Rating : 7.4/10

Country : Spain

Duration : 104 Minutes

🔸ഒരുപാട് ടീമപ്പ് ചിത്രങ്ങൾ നമ്മൾ പല ഭാഷകളിലും കാലഘട്ടങ്ങളിലും എല്ലാമായി കണ്ടിട്ടുണ്ട്, വളരെ വൈരുധ്യം നിറഞ്ഞ കോമ്പിനേഷനുകൾ ഉൾപ്പെട്ട ടീമപ്പുകൾ. എന്നാൽ ഒരുപക്ഷെ ഇത്രയും അന്തരത്തിൽ നിൽക്കുന്ന കഥാപാത്രങ്ങൾ ഒറ്റ ലക്ഷ്യത്തിനായി ഒന്നിച്ച് വരുന്ന മറ്റൊരു ചിത്രം കാണിച്ച് തരാനാവില്ല. വെറുതെ പറഞ്ഞതല്ല, ഈ ചിത്രത്തിലെ പ്രധാന കഥാപാത്രങ്ങൾ ഒരു പള്ളി വികാരി, ഒരു ഹെവി മെറ്റൽ റോക്ക് ബാൻഡ് ഫാനായ ജങ്കി, ഒരു തട്ടിപ്പ് തരികിട മജീഷ്യൻ എന്നിവരാണ്, നല്ല ഒന്നാംക്‌ളാസ്സ് കോംബോ തന്നെ.

🔸അത്യാവശ്യം വെയ്ർഡ് ആയ ഈ കോംബോ ഉൾപ്പെട്ട ചിത്രം ഒന്ന് കൂടി വിചിത്രം ആവുന്നത് ഇവർ ഇറങ്ങി തിരിക്കുന്ന കാര്യവും അതിന്റെ ഗൗരവവും കൂടി കണക്കിൽ എടുക്കുമ്പോഴാണ്, സ്പോയ്ലർ പരമാവധി ഒഴിവാക്കി കൊണ്ട് തന്നെ പറയാം, ഭൂമിയിൽ നിന്നും സാത്താനെ എന്നെന്നേക്കുമായി ഒഴിവാക്കാനും അത് വഴി മനുഷ്യ കുലത്തിനെ എന്നെന്നേക്കുമായി രക്ഷിക്കാനും ഒക്കെയാണ് ടീമ്സിന്റെ പ്ലാൻ. അത്യാവശ്യം ഇന്ററസ്റ്റ് തോന്നിക്കുന്ന കൺസപ്റ്റിനെ അർഹിക്കുന്ന വൈചിത്ര്യം കുത്തിവെച്ച് ബ്ലാക്ക് കൊമെടിയിൽ ചാലിച്ചാണ് അവതരണം, അത് കൊണ്ട് തന്നെ നല്ലൊരു ആസ്വാദനാനുഭവം പ്രതീക്ഷിക്കാം.

🔸ഒരു പള്ളിമേടയിൽ വെച്ചാണ് സിനിമ ആരംഭിക്കുന്നത്, അവിടുത്തെ വികാരി പ്രാർത്ഥിച്ച് കൊണ്ടിരിക്കെയാണ് അയാൾക്ക് പരിചിതനായ മറ്റൊരു വികാരി അവിടേക്ക് കടന്ന് വരുന്നത്. അയാളുടെ ചേഷ്ടകളിൽ നിന്നും അത്യന്തം രഹസ്യ സ്വഭാവമുള്ള എന്നാൽ അങ്ങേയറ്റം ഗൗരവമേറിയ ഒരു കാര്യം പള്ളി വികാരിയോട് പറയാൻ ഉണ്ട് എന്ന് വ്യക്തം. ആളൊഴിഞ്ഞ ശേഷം പതിയെ ഇരുവരും കാര്യത്തിലേക്ക് കടക്കുകയാണ്, പ്രസ്തുത കാര്യത്തെ പറ്റി കേട്ട മാത്രയിൽ തന്നെ ആ വൃദ്ധൻ എയ്ഞ്ചൽ എന്ന നമ്മുടെ നായകനോട് ചോദിക്കുന്നത് തികച്ചും സ്വാഭാവികമായ, നിനക്ക് തലയ്ക്ക് വല്ല പ്രശ്നവും ഉണ്ടോ എന്ന മട്ടിലൊരു ചോദ്യമാണ്.

🔸തുടർന്ന് ഒരല്പം വിശദീകരണത്തിനു വ്യക്തത വരുത്തലിനും എല്ലാം ശേഷം ഈ കാര്യത്തിന് ഞാൻ നിന്നെ സഹായിക്കാം എന്നയാൾ തുറന്ന് സമ്മതിക്കുകയാണ്, ഇപ്പോഴും എന്ത് എങ്ങിനെ എപ്പോൾ എന്നീ ചോദ്യങ്ങൾക്കുള്ള ഉത്തരങ്ങൾ എയ്ഞ്ചൽ വ്യക്തമാക്കിയിട്ടില്ല. അയാളുടെ വാക്കുകളിൽ നിന്നും ഇത് വൺസ് ഇൻ എ ലൈഫ്‌ടൈം ചാൻസ് ആണെന്നും ഇത് വഴി മനുഷ്യ രാശിയെ എന്നെന്നേക്കുമായി ഭീതിയുടെ മറയിൽ നിന്ന് രക്ഷിക്കാൻ പറ്റും എന്നും മാത്രം വ്യക്തമാണ്. സിനിമയുടെ ടോണിന് ചേർന്ന് നിൽക്കും വിധം ഈ സീനിൽ ഒരു ചെറിയ സർപ്രൈസ് കൂടിയുണ്ട്.

🔸ഐഡിയ ഒക്കെ കൊള്ളാം, പക്ഷേങ്കിൽ വകതിരിവ് കുറഞ്ഞ് പോയി എന്നൊക്കെ പറയാവുന്നതാണ് എയ്ഞ്ചേലിന്റെ കാര്യത്തിൽ. ഈ ഉദ്യമത്തിന് പുള്ളിക്ക് കിട്ടുന്നതും ഏറെക്കുറെ അത്തരം കൂട്ടാളികളെ തന്നെയാണ്, ഈ ഒരു ഡൈനാമിക് ആണ് ചിത്രത്തെ കുറച്ച് കൂടി എന്റർറ്റെയിനിങ് ആക്കുന്നത്. കൊമെടി എന്ന് വിശേഷിപ്പിക്കാം എങ്കിലും ഹൊറർ ആസ്‌പെക്റ്റുകൾ ചിത്രത്തിലുണ്ട്, ക്ലൈമാക്സിനോട് അടുക്കുമ്പോൾ ഒരു ഗ്യാങ്‌സ്റ്റർ കം ഗ്യാങ്‌വാർ ലെവെലിലേക്കും പോവുന്നുണ്ട് ഈ ചിത്രം. സ്‌ക്രീനിലുള്ള രണ്ട് മണിക്കൂറിന് അടുത്ത് സമയം അത്യാവശ്യം പിടിച്ചിരുത്തുന്ന, രസിപ്പിക്കുന്ന ഒന്നാണ് ഡേയ്സ് ഓഫ് ബീസ്റ്റ് എന്ന ചിത്രം, താല്പര്യം തോന്നുന്നെങ്കിൽ പരീക്ഷിക്കാവുന്നതാണ്.

Verdict : Very Good

DC Rating : 80/100

772. To Live (1994)

Director : Zhang Yimou

Genre : Drama

Rating : 8.3/10

Country : China

Duration : 132 Minutes

🔸ടു ലിവ് എന്ന ചിത്രം സിനിമയിൽ കാണിച്ചിരിക്കുന്ന കഥാപാത്രങ്ങളുടെ എന്നതിനോടൊപ്പം ഒരു കാലഘട്ടത്തിന്റെ കൂടി കഥയാണ്, ചൈന എന്ന രാജ്യം ഒരുപക്ഷെ ഇനിയൊരു തിരിച്ച് പോക്ക് സാധ്യമല്ലാത്ത രീതിയിൽ മാറ്റി മാറിക്കപ്പെട്ട ഇരുപതാം നൂറ്റാണ്ട് കാലഘട്ടത്തിലെ മൂന്ന് പതിറ്റാണ്ടുകൾ ആണ് ഈ ചിത്രത്തിന് വിഷയമായിരിക്കുന്നത്. ഈ കാലഘട്ടം അത്രയും ഒരു കുടുംബത്തിൽ കൊണ്ടുവരുന്ന മാറ്റങ്ങളിലൂടെയാണ് ചിത്രം കാഴ്ചക്കാരനിൽ എത്തിക്കാൻ ശ്രമിക്കുന്നത്, അതിൽ നൂറ് ശതമാനം വിജയിച്ചിട്ടുമുണ്ട്.

🔸ഫർഗുയി എന്ന കഥാപാത്രമാണ് സിനിമയുടെ ബാക്ക്ബോൺ, ചിത്രത്തിൽ നമ്മൾ ആദ്യം അയാളെ കണ്ട് മുട്ടുന്നത് ഒരു ചൂതാട്ട കേന്ദ്രത്തിൽ വെച്ചാണ്, ചൂത് കളി അയാളുടെ ബലഹീനതയാണ്. നമ്മൾ ഈ നശിച്ച് നശിച്ച് നാറാണ കല്ലെടുക്കുക എന്നൊക്കെ ചില സന്ദർഭങ്ങളിൽ പറയാറില്ലേ, ആ ഒരു ട്രാക്കിലാണ് ഫർഗുയി ഇപ്പോൾ പോയി കൊണ്ടിരിക്കുന്നത്. ദിവസവും രാവിലെ തന്നെ കയ്യിൽ കിട്ടുന്ന വസ്തു വകയുമായി ചൂത് കളിക്കാൻ ഫർഗുയി വരും, ഉള്ളത് മുഴുവൻ തീരുന്നത് വരെ കളിക്കും, പിന്നെ കടം വാങ്ങിയിട്ടും കളിക്കും.

🔸ഈ പരിപാടിയോട് വല്ലാത്തൊരു തരം ലഹരിയാണ് പുള്ളിക്ക്, അഡിക്ഷൻ എന്നൊക്കെ പറഞ്ഞാൽ നില മറന്ന് കളിക്കുന്ന തരം അഡിക്ഷൻ. ഈ ഒരു കാര്യം മാറ്റിവെച്ചാൽ പുള്ളിക്ക് മറ്റ് മോശം പ്രവർത്തികളോ രീതികളോ ഒന്നും തന്നെയില്ല, എന്നാൽ ഈ ഒരു കാര്യം കൊണ്ട് കുടുംബം അടക്കം തെരുവിൽ ഇറങ്ങേണ്ടി വരുന്ന അവസ്ഥയിലാണ് കാര്യങ്ങളുടെ കിടപ്പ്. ഈ പറഞ്ഞ് വെച്ച ട്രാക്കിലേക്ക് തന്നെയാണ് കാര്യങ്ങൾ പോവുന്നതും, കടം കേറി മുടിഞ്ഞെങ്കിലും ഒരു കളി കൂടി കളിക്കാം എന്ന പ്രലോഭനത്തിൽ അയാൾ വീണ് പോവുകയാണ്, അതിന് തന്റെ വീടടക്കം അയാൾ വാത് വെക്കുകയാണ്.

🔸പ്രതീക്ഷിച്ചത് പോലെ തന്നെ ഈ കളിയിലും പുള്ളി നല്ല അന്തസ്സായി തോൽക്കുകയാണ്, അങ്ങനെ തന്റെ കഴിവ് കേട് ഒന്ന് കൊണ്ട് മാത്രം ഫർഗുയി നാട്ടിലെ അറിയപ്പെടുന്ന ഭൂപ്രഭുക്കളായിരുന്ന സ്വന്തം കുടുംബത്തെ അന്നത്തിന് വകയില്ലാതെ തെരുവിലേക്ക് എത്തിക്കുകയാണ്. ഇവിടെ നിന്നുമാണ് റ്റു ലിവ് സത്യത്തിൽ കഥ പറഞ്ഞ് തുടങ്ങുന്നത്, ഈ പോസ്റ്റിൽ കാര്യങ്ങൾ അവതരിപ്പിച്ചിരിക്കുന്ന രീതിയൊന്നും വെച്ച് ലൈറ്റ് ടോണിലുള്ള സിനിമയൊന്നും പ്രതീക്ഷിക്കരുത്, അത്യാവശ്യം ഡാർക്ക് ഇന്റെൻസ് ആയൊരു കഥയാണ് റ്റു ലിവിന്റെത്.

🔸നാല്പതുകളിൽ തുടങ്ങി എഴുപതുകൾ വരെയുള്ള കാലഘട്ടത്തെ ചൈനയിലെ പല പ്രധാനപ്പെട്ട സംഭവങ്ങളും കഥയോട് ബന്ധിപ്പിച്ച് കൊണ്ടുവന്നിരിക്കുന്നതായി കാണാം, മാവോയുടെ ഉയർച്ചയും സാംസ്‌കാരിക വിപ്ലവവും പഞ്ചവത്സര പദ്ധതിയും വൻ കുതിച്ച് ചാട്ടവും എല്ലാം ഇവിടെ വിഷയങ്ങളാണ്. ശക്തമായ കഥയും അതി ശക്തമായ കഥാപാത്രങ്ങളുണ് ചിത്രത്തിന്റെ പ്ലസ് പോയിന്റുകളാണ്, കാഴ്ചക്കാരനെ ആഴത്തിൽ സ്പർശിക്കുന്ന വൈകാരികമായ രംഗങ്ങളും കഥാ തന്തുക്കളും ഒരുപാട് കാണാൻ കഴിയും. പറഞ്ഞ് വന്നത് എന്തെന്നാൽ, നിസ്സംശയം കണ്ടിരിക്കേണ്ട ചിത്രമാണ് റ്റു ലിവ്, കാണാൻ ശ്രമിക്കുക.

Verdict : Must Watch

DC Rating : 92/100

771. The General (1926)

Director : Buster Keaton

Genre : Comedy

Rating : 8.1/10

Country : USA

Duration : 106 Minutes

🔸സൈലന്റ് സിനിമ ഇറ പൊതുവെ രണ്ട് പേരുകളിലാണ് ഓർമ്മിക്കപ്പെടാറുള്ളത്, മറ്റുള്ള പ്രതിഭകളെ വിസ്മരിക്കുകയല്ല മറിച്ച് ഈ രണ്ട് വ്യക്തികൾ നേടിയ ഫാൻ ഫോളോയിങ്ങിലേക്കും മറ്റും ഫോക്കസ് ഷിഫ്റ്റ് ചെയ്യുന്നു എന്ന് മാത്രം. ഈ രണ്ട് വ്യക്തികൾ മറ്റാരുമല്ല, സാക്ഷാൽ ചാർളി ചാപ്ലിനും ബസ്റ്റർ കീറ്റനും. ഇപ്പോൾ ഈ പോസ്റ്റിൽ ഉൾപ്പെടെ ഒരുവിധം എല്ലായിടത്തും ചാപ്ലിന് പിന്നിൽ രണ്ടാമനായി മാത്രം പറയാറുള്ള പേരാണ് കീറ്റന്റേത്, ഒന്നാമൻ ആവാനുള്ള എല്ലാ അർഹതയും ഉണ്ടായിട്ടും ചാർളിയുടെ കാരിസ്മയ്ക്ക് മുന്നിൽ മാത്രം രണ്ടാമനായി പോയ ആളാണ് പുള്ളി എന്ന് പലപ്പോഴും തോന്നിയിട്ടുണ്ട്, ദി ജെനെറൽ ബസ്റ്റർ കീറ്റന്റെ മാസ്റ്റർ പീസാണ്.

🔸ജനറൽ എന്ന ചിത്രം പുറത്തിറങ്ങിയിട്ട് നൂറ് വർഷത്തിനടുത്ത് ആയിരിക്കുന്നു, പറഞ്ഞത് എന്താണെന്ന് വെച്ചാൽ സിനിമ പിച്ച വെച്ച് തുടങ്ങിയ കാലത്ത് ഇതിലേത് പോലുള്ള ആക്ഷൻ രംഗങ്ങൾ എങ്ങനെയാവും ഷൂട്ട് ചെയ്തിരിക്കുക എന്ന ജെനുവിൻ ആയ സംശയം ബാക്കി കിടക്കുന്നു, പ്രത്യേകിച്ചും ട്രെയിനിന്റെ കോച്ച് ഉപയോഗിച്ച രംഗങ്ങളും ക്ലൈമാക്സിനോട് അടുക്കുമ്പോഴുള്ള ബ്രിഡ്ജ് ബ്രെയ്ക്കിങ് സീനുമൊക്കെ, എങ്ങനെ ആയാലും അതിനായി എടുത്ത എഫേർട്ട് കാണാനുണ്ട് ചിത്രത്തിൽ.

🔸കീറ്റൺ തന്നെയാണ് ചിത്രത്തിലെ നായക കഥാപാത്രമായ ജോണിയെ അവതരിപ്പിച്ചിരിക്കുന്നത്, സതേൺ റെയിൽവേയിൽ എൻജിനീയറാണ് ജോണി. അയാളുടെ ഭാഷയിൽ പറയുക ആണെങ്കിൽ രണ്ടേ രണ്ട് കാര്യങ്ങളോടെ പുള്ളിക്ക് പ്രണയമുള്ളൂ, തന്റെ ട്രെയിൻ കോച്ചായ 'ജെനെറലിനോടും' പിന്നെ അന്നബെൽ എന്ന യുവതിയോടും, തീവ്രമായ പ്രണയം തന്നെയാണ് ജോണിക്ക് ഈ രണ്ട് കാര്യത്തിലും. ആഭ്യന്തര യുദ്ധം കൊടുമ്പിരി കൊണ്ടിരിക്കുന്ന കാലമാണ്, തെക്കും വടക്കും തമ്മിലുള്ള യുദ്ധം ഏറെക്കുറെ അഭിമാന പ്രശനം എന്ന തലത്തിലേക്ക് പോയിരിക്കുന്നു.

🔸യുദ്ധത്തിൽ പങ്കെടുക്കാനായി നാടൊട്ടുക്കും ഉള്ള യുവാക്കൾ രെജിസ്റ്റർ ചെയ്യാൻ വേണ്ടി തിക്കും തിരക്കും കൂട്ടുകയാണ്. അന്നബെല്ലിന്റെ അച്ഛനും ചേട്ടനും ഇതിനോടകം തന്നെ ഇറങ്ങി തിരിച്ച് കഴിഞ്ഞു, സ്വാഭാവികമായും ജോണിയും യുദ്ധത്തിന് ഇറങ്ങണം എന്ന് അന്ന നിർബന്ധിക്കുകയാണ്, പക്ഷെ ഇവിടെ പുതിയൊരു പ്രശനം ഉടലെടുക്കുകയാണ്. യുദ്ധകാലം ആണെങ്കിലും റെയിൽവേ എഞ്ചിനിയർമാരെ യുദ്ധമുഖത്തേക്ക് കൊണ്ടുപോവാൻ നിർവാഹമില്ല, അതിനാൽ തന്നെ ജോണിയുടെ രെജിസ്ട്രേഷൻ പാടെ തള്ളപ്പെടുകയാണ്.

🔸ഇത് രണ്ട് കമിതാക്കൾക്കും ഇടയിലെ ബന്ധത്തിൽ വിള്ളൽ വീഴ്ത്തുകയാണ്, ഇങ്ങനെ വിഷമിച്ചിരിക്കുന്ന വേളയിൽ ജോണിയുടെ കോച്ച് കൂടി മറ്റൊരു ടീം കയ്യടക്കുമ്പോൾ നഷ്ട്ടപ്പെട്ട രണ്ട് പ്രണയങ്ങളും തിരികെ പിടിക്കാൻ ജോണി ശ്രമിക്കുകയാണ്, ഈ ശ്രമങ്ങളുടെ ഫലം എന്താവും എന്നതൊക്കെയാണ് ഒന്നര മണിക്കൂറിൽ താഴെ മാത്രം ദൈർഖ്യമുള്ള ഈ ചിത്രം. ഒരു സൈലന്റ് ചിത്രമാണ്, മാത്രമല്ല കണ്ട് പരിചയിച്ച ചാപ്ലിന്റെ സ്റ്റൈലിൽ നിന്നും വളരെ പ്രകടമായ മാറ്റം ഈ ചിത്രത്തിന്റെ ശൈലിയിൽ ഉണ്ട്, താല്പര്യം ഉള്ളവർക്ക് കാണാം, നല്ല ചിത്രം തന്നെയാണ് ദി ജെനെറൽ.

Verdict : Very Good

DC Rating : 85/100

770. Dersu Uzala (1975)

Director : Akira Kurosawa

Genre : Drama

Rating : 8.3/10

Country : Russia

Duration : 144 Minutes

🔸തന്റെ ജീവിതത്തിലെ വളരെ മോശം ഒരു കാലഘട്ടത്തിൽ അകിര കുറൊസാവ സംവിധാനം ചെയ്ത ചിത്രമാണ് ദേർസു ഉസാല. ആദ്യ കളർ ചിത്രം പ്രേക്ഷകർക്ക് ഇടയിലും നിരൂപകർക്ക് ഇടയിലും വൻ പരാജയം ആയതിന് പിറകെ തന്റെ ഡ്രീം പ്രൊജക്റ്റിന് ഫണ്ട് പോലും ഒപ്പിക്കാൻ കഴിയാതെ ആത്മഹത്യയ്ക്ക് ശ്രമിച്ച വ്യക്തിയാണ് ഇത് പോലെ ഇൻസ്പയറിങ് ആയ അപ്ലിഫ്റ്റിങ് ആയൊരു സിനിമ സംവിധാനം ചെയ്തത് എന്ന് പറഞ്ഞാൽ അത് അത്ഭുതം ഉളവാക്കുന്ന വസ്തുത തന്നെയാണ്, കുറൊസാവയുടെ മികച്ച ചിത്രങ്ങളിൽ ഒന്നാണ് ദേർസു ഉസാല എന്ന് നിസ്സംശയം പറയാം.

🔸ഈ ചിത്രത്തിന് തന്നെയും ഒരു കഥ പറയാനുണ്ട്, തന്റെ ചെറുപ്പ കാലത്താണ് കുറൊസാവ സിനിമയ്ക്ക് ആസ്പദമായ കഥ വായിക്കാൻ ഇടയായത്, അതിനോട് തോന്നിയ ആകർഷണം കാരണം നാല്പതുകളിൽ ജാപ്പനീസ് ചിത്രമായി ഒരുക്കാൻ പുള്ളി ഇറങ്ങി തിരിച്ചു എങ്കിലും കാര്യമായി ഒന്നും തന്നെ നടന്നില്ല. പിന്നീട് വീണ്ടും ഒരു മുപ്പത് വർഷങ്ങൾക്ക് ശേഷമാണ് ദേർസു ഉസാല ട്രാക്കിൽ എത്തുന്നത്, അതും സോവിയേറ്റ് ഫണ്ടിങ്ങിന്റെ സഹായത്തിൽ തന്നെ, പല കാരണങ്ങൾ കൊണ്ടും അന്നത്തെ പശ്ചാത്തലത്തിൽ ജപ്പാനിൽ ഇത് പോലൊരു ചിത്രം പ്രാക്റ്റിക്കൽ ആയിരുന്നില്ല എന്നതാണ് സത്യം.

🔸ഇരുപതുകളിൽ പബ്ലിഷ് ചെയ്യപ്പെട്ട റഷ്യൻ ആർമി എൻജിനിയർ ക്യാപ്റ്റൻ വ്ലാദിമിർ ആർസിനിയെവിന്റെ ബയോഗ്രഫിക്കൽ ടച്ച് ഉള്ള പുസ്തകമാണ് ചിത്രത്തിന്റെ പ്രമേയം. യുദ്ധകാലത്ത് റൂറൽ ഏരിയകൾ സർവേ ചെയ്യാനും മാപ്പ് തയാറാക്കാനും വേണ്ടിയാണ് ആർസിനിയെവ് കഥ നടക്കുന്ന വന പ്രദേശത്ത് എത്തുന്നത്. ആർസിനിയെവ് പരിചയ സമ്പന്നനായ ഉദ്യോഗസ്ഥൻ ആണെങ്കിലും പുള്ളിക്കും ഒപ്പമുള്ളവർക്കും ഈ വന പ്രദേശത്തുള്ള സർവെയിങ് ഒക്കെ ഇച്ചിരി ബുദ്ധിമുട്ടുള്ള പണി തന്നെ ആയിരുന്നു, ഈ ഒരു ടർഫിൽ മുൻ പരിചയം ലവലേശം ഇല്ലായിരുന്നു എന്ന് തന്നെ പറയാം.

🔸അങ്ങനെ കാര്യങ്ങൾ ഒന്നും ട്രാക്കിൽ ആവാതെ ഇനിയെന്ത് എന്ന ചോദ്യം വാൾ പോലെ തലയ്ക്ക് മേലെ തൂങ്ങി നിൽക്കുന്ന സമയത്താണ് വൈദ്യൻ ഇച്ഛിച്ചതും രോഗി കല്പിച്ചതും എന്നൊക്കെ പറയുന്ന പോലെ ഒരു പ്രത്യേക സംഭവം ഉണ്ടാവുന്നത്. എന്നത്തേയും പോലെ രാത്രി തീ കായാനായി വിറകും കൂട്ടി എല്ലാവരും വിശ്രമിക്കുന്ന വേളയിലാണ് ഇരുട്ടിൽ കാട്ടിനകത്ത് നിന്നും കാൽപ്പെരുമാറ്റം കേൾക്കുന്നത്. കരടി ആണെന്ന് കരുതി തോക്ക് എടുത്തെങ്കിലും നടന്ന് വന്നത് ഒരു മനുഷ്യനായിരുന്നു, ആ മനുഷ്യനാണ് ദേർസു, പിന്നീട് ആർസിനിയെവിന്റെ ജീവിതത്തിന്റെ തന്നെ ഗതി മാറ്റിയ വ്യക്തി.

🔸വർഷങ്ങൾ നീണ്ട് നിന്ന ഒരു സൗഹൃദത്തിന്റെ കഥ അവിടെ നിന്നും ആരംഭിക്കുകയാണ്, കാടിന്റെ മകൻ എന്നൊക്കെയുള്ള വിശേഷണം പൂർണമായും അർഹിക്കുന്ന ഒരാളാണ് ദേർസു. ഓരോ മുക്കും മൂലയും അയാൾക്ക് ഹൃദ്യസ്ഥമാണ്, ജീവി ഗണങ്ങളുടെ പെരുമാറ്റവും കാലാവസ്ഥയും വരെ അയാൾക്ക് തിരിച്ചറിയാൻ കഴിയും. എന്നാൽ ഇതിനെല്ലാം അപ്പുറം രണ്ട് പ്രധാന കഥാപാത്രങ്ങളും പരസ്പരം ഉള്ള ഇടപഴകലുകളിലൂടെ നേടുന്ന മാറ്റം, ചില വ്യൂ പോയിന്റുകളിൽ ഒക്കെ പരസ്പരം സ്വാധീനിക്കുന്നതും ഒക്കെ മനോഹരമായി തന്നെ ചിത്രം അവതരിപ്പിച്ചിട്ടുണ്ട്. ഇത്രയും ഡൈവേഴ്‌സ് ആയ രണ്ട് കഥാപാത്രങ്ങളെ വെച്ച് ഇത്രയും മനോഹരമായ സിനിമ സൃഷ്ടിക്കുക എന്നതൊക്കെ ഒരു മാസ്റ്റർ ക്രാഫ്റ്റ്മാന് മാത്രം സാധിക്കുന്ന കാര്യമാണ്, അതാണിവിടെ സംഭവിച്ചിരിക്കുന്നതും.

Verdict : Must Watch

DC Rating : 90/100

769. Ali Fear Eats The Soul (1974)

Director : Rainer Werner Fassbinder

Genre : Romance

Rating : 8.1/10

Country : Germany

Duration : 94 Minutes

🔸അലി ഫിയർ ഈറ്റ്സ് ദി സോൾ എന്ന ചിത്രത്തിന്റെ കഥയെ പറ്റി അല്ലെങ്കിൽ പ്ലോട്ടിന്റെ ഔട്ട് ലൈനിനെ പറ്റി കേൾക്കുമ്പോൾ സ്വാഭാവികമായും ങേ എന്നൊരു ചിന്ത ചിലരിൽ എങ്കിലും ഉടലെടുത്തേക്കാം, പ്രണയമാണ് വിഷയം എങ്കിലും റേസിസം പോലുള്ള അതി ശക്തമായ വിഷയങ്ങൾ കൂടി ഈ സിനിമ കൈകാര്യം ചെയ്യുന്നുണ്ട്. ഇത്രയും ഗൗരവം അർഹിക്കുന്ന വിഷയങ്ങൾ പോലും ലഘു എന്ന് തോന്നുന്ന നിലയിൽ മനോഹരമായി ഒട്ടും ഫോസ്ഡ് ആവാതെ അവതരിപ്പിച്ചതാണ് ഈ ചിത്രത്തിന്റെ സവിശേഷത.

🔸മുപ്പത്തി അഞ്ച് വയസുകാരനായ അലിക്കും അറുപത് വയസുകാരിയായ എമ്മിക്കും ഇടയിലെ പ്രണയമാണ് ഈ സിനിമയിലെ വിഷയം. വലിയ കോമ്പ്ലിക്കേറ്റഡ് ആയ കഥയോ കഥാസന്ദർഭങ്ങളോ ഒന്നും പ്രതീക്ഷിക്കരുത്, പക്ഷെ വളരെ മൈന്യുട്ട് ആയ ചില കാര്യങ്ങളും സൂചനകളും ശ്രദ്ധിക്കേണ്ടിയും ഇരിക്കുന്നു, പ്രത്യേകിച്ചും രണ്ട് പ്രധാന കഥാപാത്രങ്ങളുടെയും ബാക്ക് സ്റ്റോറിയെ പറ്റി ഉള്ള ചില സൂചനകൾ. മൊറാക്കോയിൽ നിന്നും കുടിയേറി താമസിച്ച ആളാണ് അലി, അതിന്റെതായ ബുദ്ധിമുട്ടുകളും മറ്റും അയാൾ അനുഭവിച്ചിട്ടുണ്ട് എന്നത് വ്യക്തം.

🔸അലി ആദ്യ സീനിൽ തന്നെ പറയുന്നൊരു വാചകമുണ്ട്, തന്റെ പേര് അലി എന്നല്ല എന്നാൽ എല്ലാവരും തന്നെ അങ്ങനെ വിളിച്ചാണ് ശീലം, അതാണ് പതിവ്, അത് കൊണ്ട് ഞാനതങ് ശീലമാക്കി എന്ന്. ഇങ്ങനെ അത്യാവശ്യം വൽനിറബിൾ ആയ ഒരാളാണ് അലി, ഈ ഒരു ഫാക്ടർ പിന്നീട് ചിത്രത്തിലെ നിർണ്ണായകമായൊരിടത്ത് കടന്ന് വരുന്നുണ്ട്, മറ്റൊരു രാജ്യത്ത് കുടിയേറി പാർത്ത് ജീവിക്കുമ്പോൾ ചിലപ്പോൾ അഭയാർത്ഥികൾക്ക് ഒരു കോമാളി വേഷം പോലും എടുത്തണിയേണ്ടി വരും എന്നൊക്കെയുള്ള ഹിന്റുകളും ഷാഡൊയിങ്ങും ഒക്കെ അവിടെ നിൽക്കട്ടെ.

🔸ഒരു ബാറിൽ വെച്ച് അലിയും, കാഴ്ചക്കാരും എമ്മിയെ കണ്ട് മുട്ടുമ്പോൾ അവരും അലിയെ പോലെ തന്നെ ദുര്ബലയാണ്, പക്ഷെ ഇവിടെ സ്ഥിതിഗതികൾ പൊളിറ്റിക്കൽ എന്നതിനേക്കാൾ പേഴ്സണൽ ആണ് എന്നതാണ് സത്യം. ഒരു കാലത്ത് കുടുംബിനി ആയിരുന്നു എമ്മി, ഇന്ന് ജീവിതത്തിൽ ഒറ്റപ്പെട്ട് പോയിരിക്കുന്നു, മക്കളായാലും മറ്റ് ബന്ധുക്കൾ ആയാലും ഇന്നവരുടെ ലോകത്താണ്, ഈ ഒരു അവസ്ഥയിലാണ് കഥ ട്രാക്കിൽ കയറുന്നത്, ഇരുവർക്കും ഇടയിലെ പ്രണയം പിന്നീട് ഒരുപാട് ട്വിസ്റ്റും ടർണും ഒക്കെ കഴിഞ്ഞ് വേറൊരു ദിശയിലേക്ക് പോവുന്നുമുണ്ട്.

🔸ഒരു സിനിമ കഴിഞ്ഞ ശേഷം പിന്നീടതിലെ കഥാപാത്രങ്ങൾക്ക് എന്ത് സംഭവിച്ചു എന്നറിയാനുള്ള ഒരു ജെനുവിൻ ആയ ആഗ്രഹം ചില അപൂർവ സന്ദർഭങ്ങളിൽ ഉടലെടുക്കാറുണ്ട്, ഇത്യാദി ചിന്ത ജനിപ്പിക്കുന്ന ഒന്നാണ് അലി ഫിയർ ഈറ്റസ് ദി സോൾ, സിനിമ ഇറങ്ങിയിട്ട് വർഷം അൻപതിനോട് അടുക്കുന്നു, വെറുതെ ചിന്തിക്കാൻ പറ്റിയ നല്ലൊരു വിഷയമാണ് പിന്നീട് അലിക്കും എമ്മിക്കും എന്ത് സംഭവിച്ചു എന്നത്, എന്ത് തന്നെ ആയാലും ഇരുവരും മറ്റെല്ലാത്തിനേക്കാളും മനസമാധാനം ജീവിതത്തിൽ കണ്ടെത്തി കാണും എന്ന പ്രത്യാശയോടെ നിർത്തുന്നു.

Verdict : Must Watch

DC Rating : 95/100