697. The Invisible Man (2020)

Director : Leigh Whannell

Genre : Thriller

Rating : 7.7/10

Country : USA

Duration : 124 Minutes

🔸ഇൻവിസിബിൾ മാനിന്റെ കഥ പ്രത്യേകിച്ച് പറയേണ്ട കാര്യം ഇല്ലല്ലോ, എല്ലാവർക്കും അറിയാവുന്ന പേരിൽ നിന്ന് തന്നെ മനസിലാക്കാൻ കഴിയുന്ന ഒന്നാണെന്ന് വിശ്വസിക്കുന്നു. ഈ ഒരു തീം ആധാരമാക്കി കൊണ്ട് അനവധി ചിത്രങ്ങൾ കഴിഞ്ഞ ഒരു നൂറ്റാണ്ടിനിടെ പുറത്തിറങ്ങിയിട്ടുണ്ട്. ഹെർബർട്ട് വെൽസിന്റെ നോവലിന്റെ ചുവട് പിടിച്ച് ആയിരത്തി തൊള്ളായിരത്തി മുപ്പത്തി മൂന്നിൽ ആണ് ആദ്യ ഇൻവിസിബിൾ മാൻ തിയേറ്ററുകളിൽ എത്തിയത്, പിന്നീട് അനവധി തുടർ ഭാഗങ്ങൾ വന്നിട്ടുണ്ട് എങ്കിലും നിലവാരം എന്നത് പടവലങ്ങ പോലെ കീഴ്പോട്ട് ആയിരുന്നു താനും. ഈ ഒരു കാരണം കൊണ്ട് തന്നെ ചത്തതിന് ഒക്കുമേ എന്ന തോതിൽ കിടന്ന ഐഡിയ ഒന്ന് പൊടി തട്ടി എടുക്കാൻ സ്റ്റുഡിയോ തീരുമാനിച്ചത് മൂന്ന് വർഷങ്ങൾക്ക് മുൻപാണ്, പ്രധാന കഥാപാത്രമായി പറഞ്ഞ് കേട്ടത് ജോണി ഡെപ്പിന്റെ പേരും.

🔸മോൺസ്റ്റെർസ് യുണിവേഴ്‌സ് എന്ന പേപ്പറിൽ അന്യായം എന്നൊക്കെ തോന്നിപ്പിച്ച ഐഡിയയും കൊണ്ട് സ്റ്റുഡിയോ വന്നതും ആ പ്ലാൻ മമ്മി എന്ന ചിത്രത്തോടെ അടപടലം പാളി പോയതും, പിന്നീട് പദ്ധതിയേ ഉപേക്ഷിച്ച് സോളോ രീതിയിലേക്ക് ചിത്രങ്ങളെല്ലാം മാറ്റി എഴുതിയതും നമ്മൾ കണ്ടതുമാണ്. ഈ പ്രക്രിയ എല്ലാം അരങ്ങേറുന്നതിനിടെ ഇൻവിസിബിൾ മാനിന്റെ സ്ക്രിപ്റ്റ് മുഴുവനായി പൊളിച്ചെഴുതി, ജോണി ഡെപ്പ് പോയി പകരം എലിസബത്ത് മോസ് വന്നു. വളരെ ചുരുങ്ങിയ സമയം കൊണ്ട് തയാറാക്കിയ സ്ക്രിപ്റ്റും, പരിചയ സമ്പന്നരായ അണിയറ പ്രാവർത്തകരുടെ അഭാവവും, സ്റ്റുഡിയോയുടെ തന്നെ മുൻ രീതികളും കണക്കിൽ എടുത്തപ്പോൾ ദുരന്തത്തിൽ കവിഞ്ഞതൊന്നും തന്നെ പ്രതീക്ഷിച്ചിരുന്നില്ല, അത് തെറ്റുകയും ചെയ്തു.

🔸പഴയ ഒറിജിനൽ ചിത്രവുമായും സോഴ്സ് മെറ്റിരിയലുമായും കാലാനുസൃതമായ മാറ്റങ്ങൾ പാലിക്കുന്നുണ്ട് ഈ ചിത്രം, സെസിലിയ എന്ന എലിസബത്ത് മോസിന്റെ നായികയാണ് നമ്മുടെ കേന്ദ്ര കഥാപാത്രം. ഒരു തകർന്നടിഞ്ഞ ദാമ്പത്യത്തിന്റെ ഇരയാണ് സെസിലിയ. ഓവർ കൺട്രോളിങ് സ്വഭാവമുള്ള, കൂർമ്മ ബുദ്ധിയായ ഒരു വല്ലാത്ത തരം വ്യക്തിത്വമാണ് അവരുടെ ഭർത്താവായ അഡ്രിയാൻ. ഒരുമിച്ചൊരു ജീവിതം ഇനി അങ്ങോട്ട് സാധ്യം അല്ല എന്ന തിരിച്ചറിവിൽ സെസിലിയ ഒരുനാൾ അയാളിൽ നിന്നും രക്ഷപ്പെടുകയാണ്. തന്റെ രക്ഷപ്പെടൽ താൽക്കാലികം ആണെന്നും ഒരുനാൾ അയാൾ തന്നെ തേടി വരിക തന്നെ ചെയ്യും എന്നൊരു ഭയം അവളിലുണ്ട്.

🔸ഇങ്ങനെ ഒരപകടം പ്രതീക്ഷിച്ചിരുന്ന സെസിലിയയെ തേടി വരുന്നത് അവൾ ഒരിക്കലും പ്രതീക്ഷിക്കാത്ത ഒരു വാർത്ത ആയിരുന്നു, വേറൊന്നുമല്ല അഡ്രിയാൻ തന്റെ ജീവൻ സ്വയം എടുത്തിരിക്കുന്നു എന്ന വാർത്ത. അഡ്രിയാനെ നന്നായി അറിയാവുന്നത് കൊണ്ടോ എന്തോ സന്തോഷത്തേക്കാളോ, ആശ്വാസത്തെക്കാളോ സെസിലിയയ്ക്ക് തോന്നിയത് പേടിയാണ്, ഇത് അവസാനം അല്ല മറിച്ച് എന്തോ ഒരു ആപത്തിന്റെ ആരംഭം ആണ് എന്ന പേടി. വെറുതെ ആങ് സ്വന്തം ജീവൻ എടുത്ത് കളി നിർത്തുന്നവൻ അല്ല അഡ്രിയാൻ, ഇങ്ങനെ ഒരു കാര്യം സംഭവിച്ചിട്ടുണ്ട് എങ്കിൽ, ഈ വാർത്ത തന്റെ കാതിൽ എത്തിയത് വെറുതെ ആവില്ല എന്നവൾക്ക് അറിയാം, ഇത് ശെരി വെച്ച് കൊണ്ടാണ് തുടർന്നുള്ള സംഭവങ്ങൾ.

🔸ചിത്രത്തിൽ അനുഭവപ്പെട്ട പ്രസക്തമായ ഒരു പോരായ്മ കഥയുടെ രണ്ടാം ആക്റ്റിൽ വരുന്ന പ്രവചനീയത തന്നെയാണ്, ഒരു ഇൻവിസിബ്ൾ മാനിന്റെ സാന്നിധ്യം തിരിച്ചറിഞ്ഞ ശേഷം നടക്കുന്ന ചില സംഭവങ്ങളും ഇന്റെറാക്ഷനുകളും എല്ലാം മുൻപ് എവിടെയോ കണ്ടത് പോലെ അനുഭവപ്പെട്ടു, ഇത് ഒരു പരിധി വരെ അവസാനത്തോട് അടുക്കുമ്പോൾ ഓക്കേ ആവുന്നുണ്ട് എന്നത് വലിയ കാര്യം തന്നെ. എലിസബത്ത് മോസ് തന്റെ പാർട്ടി നന്നായി ചെയ്‌തെങ്കിലും മറ്റാരും തന്നെ അത്ര സ്റ്റാൻഡ് ഔട്ട് ആയി തോന്നിയില്ല. സ്ക്രിപ്റ്റും കാര്യവും ഒന്നും വലിയ സംഭവം ആയി തോന്നിയില്ല എങ്കിലും കേട്ടറിഞ്ഞ കഥയെ മടുപ്പിക്കാതെ വീണ്ടും അവതരിപ്പിച്ചിട്ടുണ്ട് എന്നത് കൊണ്ട് പോസിറ്റിവായി തന്നെ എടുക്കാവുന്നതാണ്, ഒരു തവണ കാണാനുള്ള വകുപ്പുണ്ട് ചിത്രം.

Verdict : Good

DC Rating : 70/100

696. The Mandalorian (2019)

Creator : Jon Favreau

Genre : Action

Rating : 8.8/10

Seasons : 01

Episodes : 08

Country : USA

Duration : 31 - 46 Minutes

🔸കഴിഞ്ഞ വർഷം എന്നത് സ്റ്റാർ വാർസ് യുണിവേഴ്സിനെ സംബന്ധിച്ച് വളരെ നിർണ്ണായകമായ ഒന്നായിരുന്നു, നാല്പത് വർഷങ്ങൾക്ക് മുകളിലായി കഥ പറഞ്ഞ് പോന്ന സ്‌കൈവാക്കർ സീരീസിലെ അവസാന ചിത്രമായ 'റൈസ് ഓഫ് സ്‌കൈവാക്കർ' പുറത്തിറങ്ങാൻ തയാറായിരുന്നു എന്നത് മാത്രമല്ല, ലൈവ് ആക്ഷൻ ടീവി സീരീസ് മേഖലയിലേക്ക് ഡിസ്‌നി ഇറങ്ങിയ വർഷം കൂടി ആയിരുന്നു. റൈസ് ഓഫ് സ്‌കൈവാക്കർ ലോകത്താകമാനം ഉള്ള കാഴ്ചക്കാരെ അക്ഷരാർത്ഥത്തിൽ നിരാശരാക്കി എങ്കിൽ മണ്ഡലോറിയാൻ ഒരു പുത്തൻ ഉണർവായിരുന്നു എന്ന് പറയാം. കേവലം എട്ട് എപ്പിസോഡിൽ പിഴയ്ക്കാത്ത ഒരു തുടക്കം നേടാൻ കഴിഞ്ഞു എന്നത് വിജയം തന്നെയാണ്.

🔸ഒറിജിനൽ ട്രൈലോജിക്ക് ശേഷം, അതായത് റിട്ടേൺ ഓഫ് ദി ജെഡി അവസാനിച്ച ശേഷം എന്നാൽ ഫോഴ്സ് അവെയ്‌ക്കൻസ് തുടങ്ങുന്നതിന് വളരെ മുൻപും ഉള്ള കാലയളവിലാണ് ദി മണ്ഡലോറിയാൻ കഥ പറഞ്ഞ് തുടങ്ങുന്നത്. റിബൽസിന്റെ വിജയവും എമ്പയറിന്റെ വീഴ്ചയും എല്ലാം ഗാലക്സിയെ കൊണ്ട് ചെന്നെത്തിക്കുന്നത് വളരെ അരക്ഷിതമായ ഒരു അവസ്ഥയിലേക്കാണ്, ഈ കാലഘട്ടത്തെ ഒരു ബൗണ്ടി ഹണ്ടറുടെ കണ്ണുകളിലൂടെ കാണിച്ച് തരികയാണ് ഈ എട്ട് ഭാഗ സീരീസ്. ഒരു പ്ലോട്ട് എന്നതിനേക്കാൾ സിറ്റുവേഷന് അനുസരിച്ച് ഗ്രാഡുവൽ ആയി പുരോഗമിക്കുന്ന ഒന്നാണ് ഇതിന്റെ പ്ലോട്ട്.

🔸ഈ അവസാനം ഇറങ്ങിയ സ്റ്റാർ വാർസ് ചിത്രങ്ങൾക്ക് സ്‌കൈവാക്കർ പശ്ചാത്തലം ഒരു ബാധ്യത ആയിരുന്നോ എന്നൊരു സംശയം പലപ്പോഴും തോന്നിയിട്ടുണ്ട്, വേറൊന്നുമല്ല ആ കഥാപാത്രങ്ങൾ വരുമ്പോൾ നീതി പാലിക്കേണ്ടത് ആവശ്യം ആയതിനാൽ പുതിയ കഥാപാത്രങ്ങൾക്ക് ആവശ്യമായ സമയമോ, സാധനമോ നൽകാൻ കഴിഞ്ഞിട്ടില്ല എന്നാണ് അഭിപ്രായം. ഇവിടെ തന്നെ പഴയ കഥാപാത്രങ്ങളോടും നീതി പുലർത്തിയോ എന്നത് സംശയമാണ്, പറഞ്ഞ് വന്നത് എന്താണെന്നാൽ ഈ സീരീസിന് അത്തരം പ്രശ്നങ്ങളോ ബാധ്യതകളോ ഒന്നും തന്നെ ഇല്ല. ലഭിച്ച ക്ളീൻ സ്ലെയിറ്റിൽ നല്ല രീതിയിൽ തന്നെ എഴുതി പഠിക്കാൻ അണിയറ പ്രവർത്തകർക്ക് കഴിഞ്ഞിട്ടുണ്ട്.

🔸അവിടെയും ഇവിടെയും ആയി ഒരല്പം എത്തി നോക്കിയിട്ടിട്ടുണ്ട് എങ്കിലും സ്റ്റാർ വാർസ് ഫ്രാഞ്ചൈസ് ഇതുവരെ പൂർണമായും ഡെഡിക്കേറ്റ് ചെയ്തിട്ടില്ലാത്ത ഒരു ജോണറിലേക്കാണ് ഈ ചിത്രം കടന്ന് ചെല്ലുന്നത്, ഒരു വേസ്റ്റേർണിലേക്ക്. നായകനായ മാൻഡോ എന്ന കഥാപാത്രം ഒരു ബൗണ്ടി ഹണ്ടറാണ്, സ്റ്റാർ വാർസ് ആരാധകർക്ക് അറിയാവുന്ന ബോബ ഫെറ്റിനെ പോലെ ഒക്കെയുള്ള ഒരു കഥാപാത്രം, പണത്തിനും അവശ്യ വസ്തുക്കൾക്കും ഒക്കെയായി മറ്റുള്ളവരുടെ ക്വട്ടേഷൻ ഏറ്റെടുത്ത് നടത്തുന്ന മാൻഡോയ്ക്ക് അത്തരമൊരു ദൗത്യത്തിന് ഇടെ അപ്രതീക്ഷിതമായ ഒരു വസ്തു ലഭിക്കുന്നതും തുടർന്നുള്ള സംഭവങ്ങളുമാണ് സീരീസിന്റെ പ്രമേയം.

🔸നായക കഥാപാത്രമായി എത്തി മുഖം കാണിക്കാതെ പോയ പാസ്കലും, മറ്റ് കഥാപാത്രങ്ങളായി എത്തിയ ജിന കരാണോ, കാൾ വെതേർസ്, നിക്ക് നോൾട്ട് തുടങ്ങി വെർനെർ ഹെർസോഗ് വരെയുള്ളവർ എല്ലാം തന്നെ തങ്ങളുടെ കഥാപാത്രങ്ങൾ മികച്ചതാക്കി. സിനിമകൾക്ക് നൽകാൻ കഴിയാത്ത പഴയ ചിത്രങ്ങളുടെ ഫീൽ പലയിടത്തും നൽകാൻ കഴിഞ്ഞു എന്നൊരു വസ്തുത തന്നെ ധാരാളമാണ് സത്യത്തിൽ സീരീസിന് തംസ് അപ്പ് നൽകാൻ, ഇടയിൽ ചില എപ്പിസോഡുകൾ വലിഞ്ഞെങ്കിൽ കൂടിയും കാണാൻ ഉള്ള വക തീർച്ചയായും ഉണ്ട് ഇവിടെ.

Verdict : Very Good

DC Rating : 85/100

695. Watchmen (2019)

Creator : Damon Lindelof

Genre : Superhero

Rating : 8.1/10

Seasons : 01

Episodes : 09

Country : USA

Duration : 52 - 67 Minutes

🔸ഇന്നേവരെ കണ്ട സൂപ്പർഹീറോ ചിത്രങ്ങളിൽ ഏറ്റവും ഇഷ്ടപ്പെട്ടത് ഏത് എന്ന് ചോദിച്ചാൽ ഒരൊറ്റ ഉത്തരം പറയുക എന്നത് ബുദ്ധിമുട്ടാണ്, കാരണം ഈ വിഭാഗത്തിൽ കഴിഞ്ഞ കുറച്ച് വർഷങ്ങൾക്കിടെ മികച്ചത് എന്ന ലേബൽ അർഹിക്കുന്ന, ഡൈവേഴ്‌സ് ആയ സിനിമകൾ അനവധി പുറത്തിറങ്ങുക ഉണ്ടായി, എന്നാൽ ഉറപ്പിച്ച് പറയാവുന്ന ഒരു വസ്തുത വാച്മെൻ എന്ന ചിത്രം ഏത് ലിസ്റ്റ് എടുത്താലും മുൻപന്തിയിൽ തന്നെ കാണും എന്നതാണ്. വാച്മെൻ പോലെ ഗ്രൗണ്ടഡ് ആയ, അമാനുഷിക കഥാപാത്രങ്ങളെ ഇത്രയും വിഭിന്നമായ, അൺകൺവെൻഷനൽ ആയി അവതരിപ്പിച്ച വേറൊരു സിനിമ ഉണ്ടാവില്ല, ഈ ഒരു കാരണം കൊണ്ട് തന്നെയാണ് ഒരു ടിവി സീരീസ് ആയി പ്രസ്തുത ഗ്രാഫിക്ക് നോവൽ വരുന്നുണ്ട് എന്ന വാർത്ത വളരെ സന്തോഷിപ്പിച്ചതും.

🔸സീരീസിനെ കുറിച്ച് പറഞ്ഞ് തുടങ്ങുന്നതിന് മുന്നേ ഒരല്പം പിറകിലോട്ട് പോവണം, ഉദ്ദേശം ഒരു നൂറ്റാണ്ട് പിറകിലേക്ക്. തൊലിയുടെ നിറ വ്യത്യാസം മാത്രം അടിസ്ഥാനമാക്കി ട്യുത്സ എന്ന അമേരിക്കൻ പട്ടണത്തിൽ നടന്ന കൂട്ടക്കുരുതി പലരും കേട്ടിരിക്കാൻ സാധ്യത ഇല്ല, ചരിത്ര പുസ്തകങ്ങളിലും റെക്കോര്ഡുകളിലും എല്ലാം പലപ്പോഴും ഈ ഭാഗം ഒഴിവാക്കിയിട്ടേ ഉള്ളൂ. അന്ന് നടന്ന ആ വർണ്ണ വെറി കാരണം കൊല്ലപ്പെട്ടവർ അനവധി ആണ്, വ്യക്തമായ കണക്കോ കാര്യമോ അധികൃതരുടെ പക്കൽ പോലുമില്ല എന്നതാണ് ഭയാനകം, ഒരു നൂറ്റാണ്ട് മുന്നേ നടന്ന ഈ സംഭവത്തെ ഓർമ്മപ്പെടുത്തി കൊണ്ടാണ് വാച്മെൻ എന്ന സീരീസ് ആരംഭിക്കുന്നത്. തുടർന്നങ്ങോട്ടുള്ള കാര്യങ്ങളുടെ ടോൺ ഇവിടെ തന്നെ സെറ്റ് ആവുന്നുണ്ട്.

🔸സൂപ്പർഹീറോ കഥാപാത്രങ്ങൾ ബേസ് ആയി വരുന്ന കഥയിൽ ഇത് പോലുള്ള കാര്യങ്ങൾക്ക് എന്താണ് പ്രാധാന്യം എന്നാണ് ചോദ്യം എങ്കിൽ മുന്നേ സൂചിപ്പിച്ച അൺകൺവെൻഷനൽ ആയ കഥ എന്ന വസ്തുതയും ഈ കഥയുടെ തന്നെ ബേസ് വെറുപ്പും, വര്ണവെറിയും, ചതിയും, പകയും ഒക്കെ തന്നെ ആണെന്ന് പറയേണ്ടി വരും. ഒരു കൃത്യമായ വൺ ഡയമെൻഷനൽ പ്ലോട്ടിൽ ഒതുക്കി നിർത്താനാവില്ല എന്നത് തന്നെയാണ് ഈ സീരീസിന്റെ ഏറ്റവും വലിയ ഗുണവും, പല കൈവഴികളിലൂടെ ഒഴുകി പടരുന്നുണ്ട് കഥകൾ എല്ലാം, കാര്യങ്ങൾ എല്ലാം പിടികിട്ടി എന്ന് നമ്മൾ കരുതുന്ന നിമിഷം ചില അപ്രതീക്ഷിത ട്വിസ്റ്റ് തന്ന് ഞെട്ടിക്കുന്നുമുണ്ട്.

🔸ആൻജല എന്ന യുവതിയുടെ വ്യൂ പോയിന്റിലൂടെ ആണ് സീരീസ് കഥ പറഞ്ഞ് തുടങ്ങുന്നത്. ഭർത്താവും മക്കളും അടങ്ങുന്ന കുടുംബവുമായി സന്തുഷ്ട ജീവിതം നയിക്കുന്നുണ്ട് എങ്കിലും ആഞ്ചല യഥാർത്ഥത്തിൽ ഒരു അന്വേഷക ആണ്. കഥ അരങ്ങേറുന്ന നഗരത്തിൽ ഒരു പ്രത്യേകത കൂടി ഉണ്ട്, ഇവിടെ സ്വന്തം വ്യക്തിത്വം രഹസ്യമായി കൊണ്ടുനടക്കുന്നത് പോലീസുകാരാണ്, മാസ്കുകൾ ഉൾപ്പെടെ ഉള്ള രീതികൾ ഉപയോഗിച്ച് കാലങ്ങളായി അവർ ഈ സമ്പ്രദായം തുടങ്ങിയിട്ട്. ആഞ്ചല ഒരു ദിവസം അഭിമുഖീകരിക്കുന്ന ഒരു പ്രശനം പിന്നീട് ഒരു ചെയിൻ റിയാക്ഷൻ ആയി മാറുകയാണ്, അതിന് പിറകിൽ കയ്യിൽ ഒതുങ്ങാത്ത ഒരു കോൺസ്പിറസിയും.

🔸ഈ കോൺസ്പിറസിയിലേക്ക് നമുക്ക് പരിചിതരായ ഒസീമാൻഡിയസും, ഡോക്ടർ മാൻഹട്ടനും എല്ലാം കടന്ന് വരുന്നുണ്ട്. അത് എങ്ങനെ, എന്തിന്, കഥയിൽ ഇവർക്കുള്ള റോൾ എന്ത് എന്നതൊന്നും ഇവിടെ പറയേണ്ട ആവശ്യം ഉണ്ടെന്ന് തോന്നുന്നില്ല, വെറും ഒൻപത് എപ്പിസോഡ് മാത്രമുള്ള സീരീസിന് രണ്ടാം സീസൺ ഉണ്ടാവില്ല എന്നും ഇതിനിടെ കേൾക്കാൻ ഇടയായി, അത് നഷ്ടം തന്നെയാണ് കാരണം ഈ കഥാപാത്രങ്ങളുടെ പ്രോഗ്രഷനിൽ അടുത്ത സ്റ്റേജ് എന്തായിരിക്കും എന്നറിയാനുള്ള ഒരു ആകാംക്ഷ ഉണ്ടായിരുന്നു. കാണാൻ താല്പര്യപ്പെടുന്നവർക്ക് തീർച്ചയായും ആവാം, ഒരു സാധാരണ ആവറേജ് സീരീസ് അല്ല വാച്മെൻ, പിന്നെ എന്താണെന്ന് തീരുമാനിക്കേണ്ടത് കണ്ട് ബോധ്യപ്പെട്ട ശേഷം നിങ്ങൾ തന്നെയാണ്.

Verdict : Must Watch

DC Rating : 90/100

694. Buddha Collapsed Out Of Shame (2017)

Director : Hana Makhmalbaf

Genre : Drama

Rating : 7.3/10

Country : Iran

Duration : 83 Minutes

🔸സിമ്പിളും അതെ സമയം പവർഫുളും ആയ ചിത്രങ്ങളിലൂടെ ഞെട്ടിക്കുക എന്നത് ഇറാനിയൻ സിനിമകളുടെ ഒരു ശൈലി ആയി മാറിയിട്ട് കാലം ഒരുപാടായി. വളരെ ലളിതമായ ഒരു വിഷയം അല്ലെങ്കിൽ തീമിൽ നിന്നും അത്യാവശ്യം ഞെട്ടിക്കുന്ന എൻഡ് പ്രോഡക്റ്റുകൾ അവർ പുറത്തിറക്കുന്നത് കണ്ട് അമ്പരന്ന് പോയിട്ടുണ്ട്, ഒരു പരിധി വരെ ഈ ഒരു വസ്തുത അവരുടെ മുഖമുദ്ര ആയി മാറിയിട്ടുണ്ട് എന്ന് പറയാം. ഇപ്പോൾ സൂചിപ്പിച്ച വസ്തുതയുടെ മറ്റൊരു മികച്ച ഉദാഹരണമാണ് ബുദ്ധ കൊളാപ്സ്ഡ് ഔട്ട് ഓഫ് ഷെയിം എന്ന ഈ ചിത്രം.

🔸താലിബാന്റെ സിരാ കേന്ദ്രമായ അഫ്‌ഗാനിസ്ഥാനിൽ ആണ് ചിത്രത്തിന് ആസ്പദമായ കഥ അരങ്ങേറുന്നത്, ഈ നൂറ്റാണ്ടിന്റെ ആരംഭത്തിൽ പ്രസ്തുത രാജ്യത്ത് തീവ്രവാദ ആക്രമണങ്ങൾ കാരണം ബുദ്ധ വിഗ്രഹങ്ങൾ തകർക്കപ്പെട്ട സംഭവം ഉണ്ടായിട്ടുണ്ട്. ഈ ദൗർഭാഗ്യകരമായ സംഭവത്തെ അടിസ്ഥാനപ്പെടുത്തി പ്രശസ്ത സംവിധായകനായ മുഹ്‌സിൻ മക്മൽബഫ് എഴുതിയ ഒരു സൃഷ്ടി ഉണ്ട്, അതിന്റെ തലക്കെട്ട് ബുദ്ധ വിഗ്രഹങ്ങൾ തകർക്കപ്പെട്ടതല്ലാ മറിച്ച് അപമാന ഭാരത്താൽ സ്വയം തകർന്നടിഞ്ഞതാണ് എന്നായിരുന്നു. ഈ കൃതിയാണ് സിനിമയ്ക്ക് വേണ്ടി സംവിധായകന്റെ മകൾ ഉപയോഗപ്പെടുത്തിയിരിക്കുന്നത്.

🔸ബക്റ്റായ എന്ന ആറ് വയസുകാരി അഫ്‌ഗാനി പെൺകുട്ടി ആണ് ചിത്രത്തിലെ പ്രധാന കഥാപാത്രം. വർഷങ്ങൾ നീണ്ട് നിന്ന യുദ്ധത്തിനും തീവ്രവാദ ആക്രമണങ്ങൾക്കും ശേഷം തകർന്നടിഞ്ഞ ഒരു അവസ്ഥയിലൂടെയാണ് രാജ്യം കടന്ന് പോവുന്നത്, ഈ ഒരു പശ്ചാത്തലത്തിന് കഥയിലും മറ്റും വലിയ പ്രാധാന്യം ഉണ്ട്. തന്റെ വാസ സ്ഥലത്തിന് തൊട്ടടുത്തുള്ള ഒരു ആൺകുട്ടി പുസ്തകം വായിക്കുന്നത് കാണുമ്പോൾ ബാക്റ്റായിൽ ഒരുനാൾ ഒരാഗ്രഹം ഉടലെടുക്കുകയാണ്, മറ്റൊന്നുമല്ല തനിക്കും പഠിക്കണം, അറിവ് സമ്പാദിക്കണം എന്ന ചെറിയ ആഗ്രഹം, നമ്മുടെ ചുറ്റുപാടിൽ വളരെ ചെറുതെന്ന് തോന്നുന്ന ഒരു കാര്യം.

🔸സ്‌കൂളിൽ പോവണം എങ്കിൽ പുസ്തകവും പെൻസിലും ഒക്കെ വേണം, അതിന് പൈസ വേണം എന്നതായിരുന്നു ആ കുട്ടിയുടെ മുന്നിലുള്ള ആദ്യ കടമ്പ. ഈ ഒരു തടസ്സം ഏതെങ്കിലും വിധേന ഒഴിവാക്കിയാൽ തന്നെ ഒരു സാധാരണ പെൺകുട്ടി ആൺകുട്ടികൾക്ക് മാത്രം അവകാശപ്പെട്ടത് എന്ന് ചിലർ മനസ്സിൽ തീരുമാനിച്ചുറപ്പിച്ച കാര്യങ്ങൾ ചെയ്യാൻ തുനിയുന്നതിനെ സമൂഹം എങ്ങനെ നോക്കി കാണും അല്ലെങ്കിൽ സ്വീകരിക്കും എന്ന വസ്തുത ഒരു ചോദ്യമായി തന്നെ നിലനിൽക്കുന്നുണ്ട്. ഇതിനെ മറികടക്കുക അത്ര എളുപ്പമല്ല, അതിന് ബാക്റ്റായയ്ക്ക് കഴിയുമോ എന്നതാണ് ചിത്രം ഉന്നയിക്കുന്ന ചോദ്യം.

🔸ബുദ്ധ വിഗ്രഹം അപമാന ഭാരത്താൽ തകർന്നടിഞ്ഞു എന്ന ടൈറ്റിലിന് വലിയ പ്രാധാന്യം ഉണ്ട്, ഇത് അത്തരമൊരു കഥയാണ്. നാണക്കേടിന്റെ അധ്യായമാണ് ഈ ചിത്രം ഇവിടെ തല താഴ്ത്തേണ്ടത് മനുഷ്യത്വം അല്ലെങ്കിൽ മാനവികത ആണ് എന്നൊരു വ്യത്യാസം മാത്രമേയുള്ളൂ. ബാക്റ്റായ എന്ന കുഞ്ഞിനെ കേന്ദ്രമാക്കി സത്യത്തിൽ സംവിധായക പറയുന്നത് വലിയ, പ്രധാനപ്പെട്ട, ശ്രദ്ധ ആവശ്യമുള്ള വിഷയമാണ്. ഈ വിഷയം ശക്തി ഒട്ടും ചോരാതെ തന്നെ അവതരിപ്പിക്കാൻ കഴിഞ്ഞിട്ടുണ്ട് എന്നത് എടുത്ത് പറയേണ്ട വിഷയമാണ്. ഒന്നര മണിക്കൂറിൽ താഴെ ദൈർഘ്യം ഉള്ള ചിത്രം നിങ്ങളുടെ സമയം തീർച്ചയായും അർഹിക്കുന്നുണ്ട്.

Verdict : Very Good

DC Rating : 85/100

693. A Sun (2019)

Director : Chung Mong-Hong

Genre : Drama

Rating : 7.8/10

Country : Taiwan

Duration : 156 Minutes

🔸അടുത്തിടെ കാണാൻ ഇടയായ, ഈ വർഷം കണ്ടതിൽ നന്നായി ഇഷ്ട്ടപ്പെട്ട സിനിമകളിൽ ഒന്നായ വെയ്‌വ്‌സ് എന്ന ചിത്രവുമായി പലയിടത്തും സാമ്യം പുലർത്തുന്നുണ്ട് എ സൺ എന്ന ഈ തായ്‌വാനീസ് ചിത്രം. രണ്ടും ഫാമിലി ഡ്രാമ ആണ് എന്നതിനേക്കാൾ രണ്ടിലും അച്ഛനമ്മമാരുടെ പ്രതീക്ഷകളെ തച്ചുടയ്ക്കുന്ന മക്കളും, ഈ മക്കളിൽ തന്നെ ഒരാൾക്ക് മറ്റൊരാളെക്കാൾ ലഭിക്കുന്ന അധിക ഫോക്കസും എല്ലാമാണ് പ്രമേയം. കൈകാര്യം ചെയ്യുന്ന വിഷയം ഇത്തരം ആയതിനാൽ തന്നെ ഒരല്പം ട്രാജിക്ക് മോഡിലേക്ക് പോവുന്നുണ്ട് ചിത്രം, കാണാനും മാത്രം ഉണ്ടോ എന്നാണ് ചോദ്യം എങ്കിൽ നിസ്സംശയം പറയാം നല്ല ഒന്നാംക്‌ളാസ് ചിത്രം തന്നെയാണിത്.

🔸അച്ഛൻ, അമ്മ, രണ്ട് ആൺമക്കൾ എന്നിവരിലാണ് ചിത്രം ഫോക്കസ് കൊടുക്കുന്നത്. ഇവരെ കൂടാതെ ചില കഥാപാത്രങ്ങൾ കഥയിൽ വന്ന് പോവുന്നുണ്ട് എങ്കിലും പ്രാധാന്യം ഇവർക്കും ഇവർക്കിടയിലെ ഇന്റെറാക്ഷനുകൾക്കും തന്നെ എന്ന് പറയാം. വെയ്‌വ്‌സിലെ പോലെ തന്നെ താല്പര്യം ജനിപ്പിക്കുന്ന കഥാപാത്രങ്ങളാണ് നാല് പേരും, പൊതുവെ പരുക്കനായ അച്ഛൻ കഥാപാത്രം ആയാലും നിസ്സഹായ ആയ അമ്മ ആയാലും വ്യക്തമായൊരു പ്ലോട്ട് അല്ലെങ്കിൽ മോട്ടിവേഷൻ ഇവർക്കെല്ലാം ഉണ്ട്, അതിന് ഉതകുന്ന ക്യാരക്റ്റർ ആർക്ക് ഇവർക്ക് കൊടുക്കാൻ കഴിഞ്ഞു എന്നിടത്താണ് സിനിമ സ്പെഷ്യൽ ആവുന്നത്.

🔸ഒരു പഴയ മമ്മൂട്ടി ചിത്രവുമായി ചില ഇടത്ത് സാമ്യം തോന്നിക്കുന്നുണ്ട് ഈ ചിത്രം, പേര് വ്യക്തമായി ഓർക്കാത്തത് കൊണ്ടും കഥ സ്പോയ്ലർ ആവും എന്നതിനാലും തല്ക്കാലം ആ വഴി പോവുന്നില്ല. രണ്ട് യുവാക്കൾ ഒരു ഗ്യാങ്ങുമായി നടത്തുന്ന അടിയിലൂടെ ആണ് ചിത്രം ആരംഭിക്കുന്നത്, അടി എന്ന് പറയാൻ കഴിയില്ല മറിച്ച് വടിവാളും കൊണ്ട് കേറി ചെന്ന് അവരിൽ ഒരുവന്റെ കൈ നേരെ അങ് വെട്ടി എടുക്കുക ആയിരുന്നു. ഇവരിൽ ഒരാളാണ് അഹാവോ, അഥവാ അഹേയ്‌ എന്ന വ്യക്തിയുടെ രണ്ട് ആണ്മക്കളിൽ ഒരാൾ. താമസിയാതെ തന്നെ ഈ കേസിൽ അവൻ പോലീസ് പിടിയിൽ ആവുകയാണ്.

🔸കേസ് വിചാരണയ്ക്ക് വിളിച്ചപ്പോൾ കോടതി മുറിയിൽ അരങ്ങേറിയത് വികാര ഭരിതമായ നിമിഷങ്ങൾ ആയിരുന്നു. തന്റെ കുറ്റങ്ങൾ എല്ലാം സമ്മതിച്ച് ശിക്ഷയിൽ ഇളവ് പ്രതീക്ഷിച്ച അഹാവോ കാണുന്നത് ജഡ്ജിയുടെ മുന്നിൽ വെച്ച് പൊട്ടിത്തെറിക്കുന്ന അഹോയിയെയാണ്. തനിക്ക് ഇങ്ങനെ ഒരു മകൻ ഇല്ല എന്നും, ഇവനെ നേർവഴിക്ക് കൊണ്ടുവരാൻ കഴിയാഞ്ഞ താനും ഭാര്യയും ഒരു പരാജയം ആണെന്നും, തന്റെ മകൻ ചെയ്ത കുറ്റത്തിന് അവന് പരമാവധി ശിക്ഷ നൽകണം എന്നും അയാൾ ജഡ്ജിയോട് ആവശ്യപ്പെടുകയാണ്. ശിഷ്ട കാലം അവൻ ജയിൽ മുറിയിൽ കിടന്ന് നരകിക്കട്ടെ എന്നും അയാൾ ആത്മാർഥമായി ആഗ്രഹിക്കുന്നതായി ഇവിടെ പറയുന്നുണ്ട്.

🔸കൂടുതൽ അത്ഭുതം ഒന്നും സംഭവിക്കാതെ കേസിന്റെ വിധി വരികയാണ്, അഹാവോയ്ക്ക് മൂന്ന് വർഷം തടവ് ജുവനൈൽ ഹോമിൽ കോടതി വിധിക്കുകയാണ്. വലിയ വികാര തള്ളിച്ച ഒന്നും കാണിക്കാതെ പുറത്തേക്ക് നടന്നകന്ന അഹോയിയെ സത്യത്തിൽ അയാളുടെ ഭാര്യയ്ക്ക് പോലും മനസിലാവുന്നില്ല, പിന്നീട് അഹോയിയുടെ പ്രതീക്ഷ മുഴുവൻ അഹീൻ എന്ന രണ്ടാമത്തെ മകനിലേക്ക് മാറുകയാണ്. അഹീൻ അയാളുടെ പ്രതീക്ഷയ്ക്ക് ഒത്ത് ഉയരുമോ, വീണ്ടും നിരാശ സമ്മാനിക്കുമോ, അഹാവോയ്ക്ക് ഇനിയൊരു മടങ്ങിവരവ് ഉണ്ടാവുമോ, ഈ കഥാപാത്രങ്ങളുടെ ഭാവി എന്ത് എന്നീ ചോദ്യങ്ങൾക്കുള്ള ഉത്തരമാണ് ഈ സിനിമ.

Verdict : Very Good

DC Rating : 85/100

692. The Japanese Wife (2010)

Director : Aparna Sen

Genre : Drama

Rating : 7.6/10

Country : India

Duration : 101 Minutes

🔸ഇന്ത്യൻ മെയിൻസ്ട്രീം ചിത്രങ്ങളുടെ ഇടയിൽ അധികം ആരും ശ്രദ്ധിക്കാതെ പോയ ഒരു ജെം എന്ന് വിശേഷിപ്പിക്കാം, കഴിഞ്ഞ ദശാബ്ദത്തിന്റെ തുടക്കത്തിൽ പുറത്തിറങ്ങിയ ഈ അപർണ സെൻ ചിത്രത്തെ. ടുംബാദ് എന്ന ഇന്ത്യൻ ചിത്രത്തിന് ശേഷം കഥ നടക്കുന്ന സ്ഥലത്തോടും ചുറ്റുപാടുകളോടും ഇത്രയും വൈകാരികമായി എന്നിലെ കാഴ്ചക്കാരനെ അടുപ്പിച്ച മറ്റൊരു ഇന്ത്യൻ ചിത്രം ഉണ്ടായിട്ടില്ല എന്ന് തന്നെ പറയാം. രണ്ടും രണ്ട് രീതിയിൽ ഉള്ള, രണ്ട് ജോണറുകളിൽ ഉള്ള വ്യത്യസ്ത ചിത്രങ്ങൾ ആണെങ്കിലും കഥ പറഞ്ഞ് അവസാനിപ്പിക്കുമ്പോൾ തരുന്നൊരു പെയ്ൻ ഉണ്ട്, അധികം സിനിമകൾ അത്തരത്തിൽ ഉള്ളത് കാണാൻ ഭാഗ്യം സിദ്ധിച്ചിട്ടില്ല.

🔸എൺപതുകളുടെ അവസാനം, ബംഗാളിൽ ആണ് ചിത്രത്തിന് ആസ്പദമായ കഥ ആരംഭിക്കുന്നത്. പേമാരിയും, വെള്ളപ്പൊക്കവും, പകർച്ച വ്യാധികളും എല്ലാം ഒരു തുടർ കഥയായി മാറിയ നമ്മൾക്കൊന്നും അത്ര പരിചിതമല്ലാത്ത ഒരു കാലഘട്ടത്തിലേക്കാണ് ചിത്രം നമ്മെ കൊണ്ടുപോവുന്നത്. നമ്മുടെ നായക കഥാപാത്രമായ സ്നേഹമൊയ് ചാറ്റർജി ഒരു അന്തർമുഖനാണ്, ആൾക്കൂട്ടവും ബഹളങ്ങളും എല്ലാം അയാൾക്ക് അസ്വസ്ഥത ഉളവാക്കുന്നതാണ്, കൂടുതൽ സമയവും സ്വന്തം ലോകത്ത് ചെലവഴിക്കാനാണ് ടിയാന് താല്പര്യം.

🔸സ്നേഹമൊയിയുടെ ചെറുപ്പ കാലത്ത് ഉണ്ടായ ഒരു വെള്ളപ്പൊക്കത്തിൽ അയാളുടെ അച്ഛനമ്മമാർ കൊല്ലപ്പെട്ടതാണ്, അതിന് ശേഷം അയാളെ വളർത്തിയതും പഠിപ്പിച്ചതും എല്ലാം മാഷി എന്ന വല്യമ്മയാണ്. വേണ്ടപ്പെട്ടവർ ഒന്നും അധികമില്ലാത്ത മാഷി സ്വന്തം മകൻ ആയാണ് സ്നേഹമൊയിയെ വളർത്തിയത്, അമ്മയില്ലാത്ത ഒരു കുറവും അയാൾ അറിഞ്ഞിട്ടില്ല എന്ന് തന്നെ പറയാം. തന്റെ കോളേജ് പഠന കാലത്താണ് സ്നേഹമൊയ് മിയാജി എന്ന ജപ്പാൻകാരിയെ പരിചയപ്പെടുന്നത്, അതും നേരിട്ടല്ല മറിച്ച് കത്തുകളിലൂടെ. സ്വഭാവത്തിലും മറ്റും സാമ്യതകൾ അനവധി ഉള്ള ഇരുവരും പെൻഫ്രെണ്ടുകളായി മാറുകയാണ് താമസിയാതെ.

🔸രണ്ട് രാജ്യങ്ങൾക്കിടയിലൂടെ ഉള്ള നിരന്തരമായ കത്തിടപാടുകളും സംസാരവും എല്ലാം ഇരുവരെയും താമസിയാതെ പ്രണയ ബദ്ധരാക്കുകയും വിവാഹത്തിലേക്ക് നയിക്കുകയും ചെയ്യുകയാണ്. ഈ സംഭവങ്ങൾ എല്ലാം നടക്കുന്ന കാലത്തൊന്നും തന്നെ ഇവർ മുഖാമുഖം കണ്ടിട്ടില്ല എന്നതാണ് കൗതുകകരമായ വസ്തുത. വിവാഹത്തിന് ശേഷവും ആ സമാഗമം നീണ്ട് പോവുകയാണ്, അങ്ങനെ ദിവസങ്ങൾ ആഴ്ചകൾക്കും, ആഴ്ചകൾ മാസങ്ങൾക്കും, മാസങ്ങൾ വർഷങ്ങൾക്കും വഴി മാറി കൊടുക്കുകയാണ്. ഇതിനിടെ സ്നേഹമോയിയുടെ ജീവിതത്തിലേക്ക് പുതിയ രണ്ട് കഥാപാത്രങ്ങൾ കൂടി കടന്ന് വരുന്നുണ്ട്.

🔸സ്നേഹമൊയിയുടെ ഭാര്യ ആകേണ്ടിയിരുന്ന, എന്നാൽ പല കാരണങ്ങൾ കൊണ്ടും നടക്കാതെ പോയി, മറ്റൊരാളുടെ ഭാര്യ ആയ സന്ധ്യ എന്ന കഥാപാത്രവും അവരുടെ മകനുമാണ് വർഷങ്ങൾക്ക് ശേഷം മടങ്ങി വരുന്നത്. സന്ധ്യ ഇന്ന് ഒരു വിധവയാണ്, ആ കാലഘട്ടത്തിലെ വിധവകളായ സ്ത്രീകളുടെ ജീവിതം നരകതുല്യം ആയതിനാലും പോവാൻ മറ്റൊരിടം ഇല്ലാത്തതിനാലും മാഷിയുടെ വീട്ടിൽ അവർ അഭയം പ്രാപിക്കുകയാണ്. തുടർന്ന് അങ്ങോട്ട് ഈ കഥാപാത്രങ്ങളുടെ എല്ലാം ഭാവി എന്താകും എന്ന ചോദ്യത്തിനുള്ള ഉത്തരമാണ് ഈ ചിത്രം. ഒരു കവിതയ്ക്ക് ഒക്കെ സമാനമായ അതി മനോഹരമായ ചിത്രമാണ് ദി ജാപ്പനീസ് വൈഫ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

691. Farewell My Concubine (1993)

Director : Chen Kaige

Genre : Drama

Rating : 8.1/10

Country : China

Duration : 166 Minutes

🔸ചൈനീസ് സിനിമാ ഇന്ഡസ്ട്രിയിലെ മികച്ച ചിത്രങ്ങളുടെ പട്ടികകൾ ഏതൊക്കെ എടുത്ത് പരിശോധിച്ചാലും അതിൽ എല്ലാം തന്നെ മുന്നിൽ കാണും ഫെയർവെൽ മൈ കൊങ്കുബൈൻ എന്ന ഈ ഡ്രാമ ചിത്രം, വ്യക്തിപരമായി ഈ ചിത്രം വളരെ പ്രിയപ്പെട്ടത് ആണെങ്കിൽ കൂടിയും അത്ഭുതപ്പെടുത്തിയ വസ്തുത എന്താണെന്നാൽ സിനിഫൈലുകളായ പല സുഹൃത്തുക്കളും ഈ സിനിമ കണ്ടിട്ടോ കേട്ടിട്ടോ ഇല്ല എന്നതാണ്. മുൻപ് എന്നോ എഴുതിയ ചൈനീസ് ചിത്രങ്ങൾക്ക് ലഭിക്കാത്ത സ്വീകാര്യത തന്നെ ആയിരിക്കണം വിഷയം എന്ന് കരുതുന്നു, ഒറ്റ വരിയിൽ പറയുക ആണെങ്കിൽ തീർച്ചയായും കണ്ടിരിക്കേണ്ട ഒരു കിടിലൻ ചിത്രം, അതാണിത്.

🔸കൃത്യം മൂന്നായി ഭാഗിക്കാവുന്ന ഒന്നാണ് ഫെയർവെൽ മൈ കൺകുബൈൻ എന്ന ചിത്രത്തിന്റെ കഥ. ബാല്യം, യൗവനം എന്നിവയ്ക്ക് ശേഷ്യം വാര്ധക്യത്തിലേക്ക് കടക്കാൻ ഒരുങ്ങുന്ന കാലം വരെയുള്ള മൂന്ന് ഘട്ടങ്ങളിലൂടെ രണ്ട് പ്രധാന കഥാപാത്രങ്ങളുടെയും സൗഹൃദത്തിന്റെ കഥയാണ് ചിത്രം പറയുന്നത്. ഈ നീണ്ട കഥയിൽ ചതി, സ്നേഹം, പ്രതികാരം, വേദന, അടുപ്പം ഇതെല്ലാം വിഷയമായി വരുന്നുണ്ട്. പതിറ്റാണ്ടുകൾ നീണ്ട് നിൽക്കുന്ന ഈ കഥയുടെ ഒപ്പം തന്നെ ചൈന എന്ന രാജ്യത്തിൻറെ ചരിത്രവും ഈ ചിത്രം പരാമർശിക്കുന്നുണ്ട്. ഈ ഭാഗത്ത് സാംസ്‌കാരിക വിപ്ലവവും, ജപ്പാനുമായുള്ള യുദ്ധവും, റെഡ് ഗാർഡുകളും എല്ലാം കടന്ന് വരുന്നു.

🔸ദൗസി, ഷിറ്റോ ഈ രണ്ട് കഥാപാത്രങ്ങളാണ് ചിത്രത്തിന്റെ നട്ടെല്ല്. പതിറ്റാണ്ടുകൾ നീണ്ട് നിൽക്കുന്ന കഥ ഈ രണ്ട് കഥാപാത്രങ്ങളുടെ സൗഹൃദത്തിൽ കൊണ്ടുവരുന്ന മാറ്റങ്ങളാണ് വിഷയമാക്കുന്നത്, ചെറുപ്പ കാലത്ത് കണ്ട് മുട്ടുന്നിടത്ത് നിന്നും വാർദ്ധക്യത്തിലേക്ക് എത്തുന്നത് വരെ ഈ കഥാപാത്രങ്ങൾ കടന്ന് പോവുന്നത് ദുർഘടമായ അനവധി സംഭവങ്ങളിൽ കൂടിയും കഥാപാത്രങ്ങളിൽ കൂടിയുമാണ്. ഒരു ഓപ്പറ ടീമിന്റെ പശ്ചാത്തലത്തിലാണ് കഥ പറഞ്ഞ് തുടങ്ങുന്നത്. മാസ്റ്റർ ഗാനിന്റെ നേതൃത്വത്തിലുള്ള ആ ടീം തങ്ങളുടെ പ്രകടനത്തിലൂടെ രാജ്യത്താകമാനം പ്രശസ്തി നേടിയവരാണ്.

🔸എന്നാൽ ഈ പ്രശസ്തി വെറുതെ അങ് കിട്ടിയതല്ല, കാഴ്ചക്കാർ കാണുന്ന പ്രകടനങ്ങൾക്ക് പിറകിൽ വർഷങ്ങൾ നീണ്ട് നിൽക്കുന്ന അധ്വാനം ഉണ്ട്, സമർപ്പണം ഉണ്ട്, വേദനയും ഉണ്ട്. കഠിനമായ മുറകളാണ് മാസ്റ്റർ ഗാൻ തന്റെ ശിഷ്യന്മാരെ പരിശീലിപ്പിക്കാൻ ഉപയോഗിക്കുന്നത്, ഇവയെ പീഡനം അല്ലെങ്കിൽ ടോർച്ചർ എന്ന് വിശേഷിപ്പിച്ചാൽ പോലും കൂടില്ല, അവിടെ ഉള്ള രണ്ട് വിദ്യാർത്ഥികളാണ് ഷിറ്റോയും ദൗസിയും. ദൗസിയെ വേശ്യയായ അമ്മ ഒരുനാൾ ഓപ്പറ ഹോസിൽ ഉപേക്ഷിച്ച് പോയത് ആണെങ്കിൽ ഷിറ്റോയുടെ അച്ഛനമ്മമാരെ പറ്റി ഒരു സൂചന പോലുമില്ല. ഈ പീഡന കാലത്തിനിടെ ആണ് ഇരുവർക്കും ഇടയിൽ സൗഹൃദം മൊട്ടിട്ട് തുടങ്ങുന്നത്, പിന്നീട് പതിറ്റാണ്ടുകൾ നീണ്ട് നിന്ന സൗഹൃദം.

🔸ഒരു സ്ത്രൈണത ഉണ്ട് ദൗസിയുടെ പെരുമാറ്റത്തിലും മറ്റുമൊക്കെ, ഈ ഒരു കാരണം കൊണ്ട് തന്നെ ഓപെറയിൽ സ്ത്രീ കഥാപാത്രങ്ങളാണ് അയാൾ എല്ലായ്പ്പോഴും കൈകാര്യം ചെയ്തിരുന്നത്, ജീവിതത്തിൽ ഉടനീളം. ഈ സന്ദർഭങ്ങളിൽ എല്ലാം തന്നെ നായകനായി വേഷമിട്ടത് ഷിറ്റോയും, സ്വാഭാവികമായും ഒരു കെമിസ്ട്രി ഇരുവർക്കും ഇടയിൽ ഉണ്ട് എന്ന് പറയേണ്ടതില്ലല്ലോ. ഈ ഒരു കെമിസ്ട്രിക്ക് അപ്പുറം ഷിറ്റോയോട് ഒരു തരം പ്രണയവും ഉണ്ട് ദൗസിക്ക്, കാര്യങ്ങൾ കുറച്ച് കൂടി കോംപ്ലക്സ് ആവുന്നത് യൗവന കാലത്ത് ഇരുവർക്കും ഇടയിലേക്ക് ഒരു സ്ത്രീ കഥാപാത്രം വരുമ്പോഴാണ്. തീർച്ചയായും കണ്ടിരിക്കേണ്ട ചിത്രങ്ങളിൽ ഒന്ന്, അതാണ് ഫെയർവെൽ മൈ കങ്കുബൈൻ.

Verdict : Must Watch

DC Rating : 90/100

690. So Long My Son (2019)

Director : Wang Xiaoshuai

Genre : Drama

Rating : 7.7/10

Country : China

Duration : 174 Minutes

🔸ചൈനീസ് സിനിമകൾക്ക് പലപ്പോഴും പുറത്തേക്ക് വലിയ പ്രാതിനിധ്യം അല്ലെങ്കിൽ അർഹിക്കുന്ന പരിഗണന കിട്ടാറില്ല എന്ന് തോന്നിയിട്ടുണ്ട് പല സന്ദർഭങ്ങളിലും. കൊറിയൻ പോലെയുള്ള വിഭാഗത്തിൽ പെട്ട ചിത്രം ആണെങ്കിൽ വാനോളം പ്രശംസ ഏറ്റുവാങ്ങാമായിരുന്ന രണ്ടായിരത്തി പതിനെട്ടിൽ പുറത്തിറങ്ങിയ ഷാഡോയും, ഒരുപക്ഷെ വേണ്ട രീതിയിൽ പുറം രാജ്യങ്ങളിലേക്ക് എത്തിയിരുന്നെങ്കിൽ ക്ലാസ്സിക് എന്ന വിശേഷണം നിസ്സംശയം നേടുമായിരുന്നു എന്ന് ഉറച്ച് വിശ്വസിക്കുന്ന ഇൻ ദി ഹീറ്റ് ഓഫ് ദി സണ്ണും എല്ലാം മുകളിൽ പറഞ്ഞ കാര്യത്തിന്റെ ചില ഉദാഹരണങ്ങൾ മാത്രമാണ്, ഈ ഒരു കേസ് സൊ ലോങ്ങ് മൈ സൺ എന്ന ഈ ചിത്രത്തിനും ഒരു പരിധി വരെ ബാധകമാണ്.

🔸ഒരു കൂട്ടം കുട്ടികൾ ഒരു പുഴക്കരയിൽ ഇരുന്ന് കളിക്കുന്ന രംഗത്തോടെയാണ് ചിത്രം ആരംഭിക്കുന്നത്, തുടക്കത്തിൽ വലിയ പ്രാധാന്യം ഒന്നും ഇല്ല എന്ന് തോന്നിയേക്കാം എങ്കിലും ചിത്രത്തിന്റെ രണ്ടാം പാതിയിൽ ഈ പ്രസ്തുത ഭാഗം വളരെ നിർണ്ണായകമായി മാറുന്നുണ്ട്. മറ്റെല്ലാ കുട്ടികളും വെള്ളത്തിലിറങ്ങി കളിച്ച് തിമിർക്കുമ്പോൾ രണ്ട് പേർ മാത്രം ഇതെല്ലാം നോക്കി കൊണ്ട് കുന്നിൻ മുകളിൽ ഇരിക്കുകയാണ്, കളിക്കണം എന്ന് ആഗ്രഹം ഇല്ലാഞ്ഞിട്ടല്ല മറിച്ച് പേടി എന്നൊരു വസ്തുത മാത്രമാണ് തടസ്സം. ഇവരുടെ സംസാരത്തിൽ നിന്നും ഇതൊരു ഒറ്റപ്പെട്ട സംഭവം അല്ല എന്നും വ്യക്തമാവുന്നുണ്ട്.

🔸വെള്ളത്തോടുള്ള ഭയമാണോ അതോ അച്ഛനമ്മമാർ വഴക്ക് പറയുമോ എന്ന ഭയമാണോ എന്ന് വ്യക്തം അല്ല എങ്കിലും ഇവരിൽ ഒരാൾക്ക് അത് തന്നെ ധാരാളം ആയിരുന്നു, കൂട്ടുകാരുടെ ഒരു വാക്കോ, പ്രവർത്തിയോ, കളിയാക്കലോ അവനെ മാറി ചിന്തിക്കാൻ പ്രേരിപ്പിക്കുന്നില്ല. ഒടുവിൽ സഹികെട്ട് എന്നവണ്ണം ഒപ്പമിരുന്ന കൂട്ടുകാരൻ അവനെ വിട്ട് പുഴക്കരയിലേക്ക് ഓടി അകലുകയാണ്, വീണ്ടും ഒറ്റപ്പെട്ട് ഇരിക്കുന്ന കുട്ടിയെ കാണിച്ച് കൊണ്ട് ചിത്രം കഥ പറഞ്ഞ് തുടങ്ങുകയാണ്, ഒരു പരിധി വരെ ലീനിയർ ആയി കഥ പറഞ്ഞ് പോവുന്ന ചിത്രത്തിന്റെ ട്രാക്ക് ചെറുതായി ഒന്ന് മാറ്റുന്നത് രണ്ടാം പാതിയിൽ ഈ സീനാണ് എന്ന് പറയാം.

🔸മോഹൻലാലും മമ്മൂട്ടിയും കേന്ദ്ര കഥാപാത്രങ്ങളായി എത്തിയ എൺപതുകളിലെ ഒരു മലയാള ചിത്രവുമായി ചെറിയൊരു സാമ്യം പുലർത്തുന്നുണ്ട് ഈ ചിത്രം, ആ സാമ്യത്തിലേക്കും കഥയിലേക്കും ഒക്കെ കടക്കുന്നത് സ്പോയ്ലർ ആവും എന്നതിനാൽ തല്ക്കാലം ഒഴിവാക്കുന്നു. എൺപതുകളിൽ ആരംഭിച്ച് ഇന്നത്തെ കാലഘട്ടത്തിൽ കൊണ്ട് ചെന്ന് അവസാനിപ്പിക്കുന്ന പതിറ്റാണ്ടുകൾ നീണ്ട് നിൽക്കുന്ന ഒരു ലോങ്ങ് സ്റ്റോറി ആണ് ചിത്രത്തിന്റേത്. അച്ഛൻ, അമ്മ, മകൻ എന്നിവരുൾപ്പെട്ട രണ്ട് മൂന്നംഗ കുടുംബങ്ങളുടെ കഥയാണ് ചിത്രത്തിന്റേത്, ഇത് വ്യത്യസ്ത കാലഘട്ടങ്ങളിലൂടെ എങ്ങനെയൊക്കെ മാറി മറിയുന്നു എന്ന് ചിത്രം കാണിച്ച് തരുന്നു.

🔸ജനപ്പെരുപ്പം കുറയ്ക്കാനായി ചൈനീസ് സർക്കാർ കൊണ്ടുവന്ന ഒരു കുടുംബത്തിന് ഒരു കുഞ്ഞ് പോലുള്ള പദ്ധതികളെയും, ഈ പതിറ്റാണ്ട് കാലഘട്ടത്തിന് ഇടയിൽ അരങ്ങേറുന്ന സാംസ്‌കാരിക രാഷ്ട്രീയ മാറ്റങ്ങളെയും എല്ലാം ചിത്രം പരാമര്ശിക്കുന്നും വിമര്ശിക്കുന്നുമുണ്ട്. വൈകാരികമായി കാഴ്ചക്കാരനെ സ്പർശിക്കുന്ന സീനുകളുടെ ഒരു ഘോഷ യാത്ര തന്നെ സിനിമയിലുണ്ട്, പ്രത്യേകിച്ചും ചിത്രം തുടങ്ങി ആദ്യ പത്ത് മിനുട്ടിന് ഉള്ളിൽ തന്നെ വരുന്ന ലോങ്ങ് ഹോസ്പിറ്റൽ ഷോട്ട് പരാമർശം അർഹിക്കുന്നുണ്ട്. ഒരു ഡ്രാമ ചിത്രമാണ്, അത്യാവശ്യം സ്ലോ ആണ്, അത് രണ്ടും വിഷയം അല്ലെങ്കിൽ കണ്ടിരിക്കേണ്ട ചിത്രമാണ് സൊ ലോങ്ങ് മൈ സൺ.

Verdict : Very Good

DC Rating : 89/100

689. To All The Boys 2 - I Still Love You (2020)

Director :  Michael Fimognari

Genre : Romance

Rating : 7.2/10

Country : USA

Duration : 102 Minutes

🔸പൊതുവെ ഈ കമിങ് ഓഫ് എയ്ജ്, റൊമാൻസ് ചിത്രങ്ങളോട് വലിയ താല്പര്യം ഇല്ല എങ്കിലും കണ്ട് കഴിഞ്ഞ ശേഷം കൊള്ളാം എന്ന് തോന്നിയ അല്ലെങ്കിൽ താല്പര്യം ഉണർത്തിയ ഒരു ചിത്രം ആയിരുന്നു രണ്ടായിരത്തി പതിനെട്ടിൽ പുറത്തിറങ്ങിയ നെറ്റ്ഫ്ലിക്സ് സംരംഭമായ റ്റു ഓൾ ദി ബോയ്സ് ഐ ലവ്ഡ് ബിഫോർ. ലാറ ജീനും പീറ്ററും അവർക്ക് ചുറ്റുമുള്ള മറ്റ് കഥാപാത്രങ്ങളും എല്ലാം തന്നത് ഫ്രഷ് ഫീൽ തന്നെ ആയിരുന്നു. ചെറിയ പ്ലോട്ടിനെ വലിയ കോംപ്ലിക്കേഷൻ ഒന്നും ഇല്ലാതെ, എന്നാൽ അതെ സമയം എന്റർടൈനിംഗ് ആയി അവതരിപ്പിക്കുക എന്നത് ചെറിയ കാര്യമല്ല എങ്കിലും അതിൽ വിജയിച്ചിരുന്നു ഒന്നാം ഭാഗ ചിത്രം.

🔸ഈ ഹാപ്പി എൻഡിങ് ആയ റൊമാന്റിക് ചിത്രങ്ങൾ സാധാരണ അവസാനിക്കാറുള്ളത് മിക്കതും "അതിന് ശേഷം ഒരുപാട് നാളുകൾ അവരിരുവരും സുഖമായി ജീവിച്ചു...." എന്ന പോലുള്ള രീതികളിലാണ്. എന്നാൽ ഇതിന് ശേഷം, അതായത് കമിതാക്കൾ രണ്ട് പേരും ജീവിതത്തിലേക്ക് കടന്ന ശേഷം, ആ യാഥാർഥ്യങ്ങളുമായി പൊരുത്തപ്പെടുന്ന അല്ലെങ്കിൽ പൊരുത്തപ്പെടാൻ ശ്രമിക്കുന്ന ആ പീരീഡ്‌ ആണ് ഈ ചിത്രത്തിന്റെ പ്രമേയം. ഈ ഒരു വിഭാഗത്തിൽ അധികം ചിത്രം കണ്ടിട്ടില്ലാത്ത കൊണ്ടും കണ്ടവ നന്നായിരുന്നത് കൊണ്ടും പ്രതീക്ഷ അത്യാവശ്യം ഉണ്ടായിരുന്നു എന്ന് തന്നെ പറയാം.

🔸നമ്മുടെ നായികാ കഥാപാത്രമായ ലാറ ജീൻ ജീവിതത്തിൽ ആദ്യമായാണ് ഒരു വ്യക്തിയുമായി പ്രണയത്തിൽ ആവുന്നത്, അവളുടെ ഭാഷയിൽ പറയുക ആണെങ്കിൽ ഒരു ഗേൾഫ്രണ്ട് ആവുക എന്നതിന്റെ ആ ഒരു എക്‌സൈറ്റേഷൻ അവൾ അനുഭവിച്ച് കൊണ്ടിരിക്കുകയാണ്. ഇതിന്റെ മറുവശം എന്താണെന്നാൽ ഒരു റിലേഷൻഷിപ്പിൽ നടക്കുന്ന, നടക്കേണ്ട പല കാര്യങ്ങളും അവൾക്ക് പുതുമ ഉള്ളത് അല്ലെങ്കിൽ ഒട്ടും പരിചിതം അല്ലാത്തതാണ്. കിട്ടിയതിനെ നഷ്ട്ടപ്പെടുത്താതിരിക്കാൻ ഉള്ള ഒരു മനോഭാവം അല്ലെങ്കിൽ പൊസസീവ്‌നെസ്സ് അവളിൽ നല്ല തോതിൽ തന്നെ ഉണ്ട്.

🔸ഇങ്ങനെ ഉള്ള ചെറിയ ചെറിയ കാര്യങ്ങളും മറ്റും രണ്ട് പ്രധാന കഥാപാത്രങ്ങൾക്ക് ഇടയിലെ ബന്ധത്തിൽ ഏതെല്ലാം രീതിയിൽ വിള്ളൽ വീഴ്ത്തും എന്നതും അതിനെ അതിജീവിക്കാൻ ഉള്ള കഴിവ് ഇവർക്കുണ്ടോ എന്നതും എല്ലാമാണ് ചിത്രം ഉയർത്തുന്ന ചോദ്യങ്ങൾ. പിന്നെ ഈ സംഭവങ്ങൾക്കിടയിലേക്ക് ഒരു പുതിയ കഥാപാത്രം കൂടി കടന്ന് വരുന്നുണ്ട് എന്നതാണ് ട്വിസ്റ്റ്, രണ്ട് കഥാപാത്രങ്ങൾക്കും ഒപ്പം ഏറെക്കുറെ തുല്യമായ സ്‌ക്രീൻ സ്പെയ്സും ജോൺ ആംബ്രോസ് എന്ന ഈ കഥാപാത്രം കരസ്ഥമാക്കുന്നുണ്ട്. ഇയാൾ ആര്, എന്ത്, എങ്ങിനെ കഥയിലേക്ക് വരുന്നു എന്നതെല്ലാം ചിത്രം കണ്ട് തന്നെ മനസിലാക്കുക.

🔸ആദ്യ ഭാഗത്തിനോട് താല്പര്യം തോന്നിച്ച നല്ല കഥാപാത്രങ്ങൾ, അവർക്കിടയിലെ കെമിസ്ട്രി, ലൈറ്റ് ആയ ഹ്യുമർ എന്നിവ എല്ലാം ഒട്ടും മോശം പറയാൻ ഇല്ലാത്ത രീതിയിൽ രണ്ടാം ഭാഗത്തിലും ഉണ്ട്, ചുരുക്കി പറഞ്ഞാൽ നിരാശ ഉണ്ടാവില്ല എന്ന് തന്നെ. ചില ഇടങ്ങളിൽ ഒരല്പം സ്ലോ ആവുന്നുണ്ട് എങ്കിലും അതൊന്നും കഥയുടെ ഒഴുക്കിൽ വലിയ പോരായ്മ ആയി തോന്നിയതുമില്ല. മുൻഭാഗം ഇഷ്ടപ്പെട്ടവരെ രസിപ്പിക്കുന്ന രീതിയിലാണ് ചിത്രം ഒരുക്കിയിരിക്കുന്നത്, ഒരു മൂന്നാം ഭാഗം വരുന്നുണ്ട് എന്നും കേട്ടു. താല്പര്യം ഉള്ളവർക്ക് പരീക്ഷിക്കാം, നിരാശപ്പെടുത്തില്ല

Verdict : Good

DC Rating : 70/100

688. Just Mercy (2019)

Director : Destin Cretton

Genre : Drama

Rating : 7.5/10

Country : USA

Duration : 136 Minutes

🔸അടുത്ത കാലത്ത് ഇറങ്ങിയ നല്ല കോർട്ട് റൂം ഡ്രാമകളിൽ ഉൾപ്പെടുത്താവുന്ന ഒരു സിംപിൾ ചിത്രം, അതാണ് ജസ്റ്റ് മേഴ്സി. അമേരിക്കയിലെ കറുത്ത വർഗക്കാരുടെ പ്രശ്നങ്ങളും കുഴിച്ച് മൂടി എന്ന് ആശ്വസിച്ച് അഭിരമിക്കുന്ന റേസിസത്തിന്റെ പ്രശ്നങ്ങളും എല്ലാം ചിത്രം ചർച്ച ചെയ്യുന്നുണ്ട്. ബ്രയാൻ സ്റ്റീവൻസൺ എന്ന പ്രശസ്തനായ ആക്ടിവിസ്റ്റിന്റെ പ്രശസ്തമായ ഒരു കൃതിയാണ് ചിത്രത്തിന് ആധാരം ആയിരിക്കുന്നത്, ആക്ടിവിസ്റ്റ് ആയി മാറുന്നതിനും മുൻപ് ഒരു വക്കീൽ ആയിരുന്ന കാലത്ത് ബ്രയാൻ നേരിട്ട് ഇടപെട്ട, അത്യാവശ്യം കുപ്രസിദ്ധി നേടിയ ഒരു കേസ് ആണ് ഇവിടെ വിഷയം.

🔸ജാമി ഫോക്സ് അവതരിപ്പിക്കുന്ന വാൾട്ടർ മാക്മില്ലനെ കാണിച്ച് കൊണ്ടാണ് സിനിമ ആരംഭിക്കുന്നത്, വികസനവും ടെക്കനോളജിയും ഗ്രാമങ്ങളിലേക്ക് എത്തുന്നതിന് തൊട്ട് മുന്നേയുള്ള എണ്പതുകളാണ് കഥ നടക്കുന്ന പിരീഡ്. വാൾട്ടർ ഒരു മരം വെട്ടുകാരൻ ആണ്, കാട്ടിലേക്കും മറ്റും കയറി തന്റെ ജോലി ചെയ്ത് കൊണ്ട് കുടുംബം പോറ്റാനുള്ള വക അയാൾ ദിവസേന ഉണ്ടാക്കുന്നു. ഈ ഒരു പ്രക്രിയ ആവർത്തിച്ച് കൊണ്ട് പോവുന്ന ദിവസങ്ങളിൽ ഒന്നിലാണ് കഥയുടെ ടേണിങ് പോയിന്റ് എന്നൊക്കെ വിശേഷിപ്പിക്കാവുന്ന സംഭവം അരങ്ങേറുന്നത്. ജോലിയും കഴിഞ്ഞ് വീട്ടിലേക്ക് മടങ്ങുന്ന വാൾട്ടിന്റെ വണ്ടിക്ക് നേരെ ഒരു പോലീസുകാരൻ കൈ കാണിക്കുകയാണ്.

🔸പോലീസുകാരുടെ സ്ഥിരം ലൈസൻസ് പരിശോധനാ പ്രക്രിയ ആണെന്ന് കരുതി വണ്ടി ഒതുക്കിയ വാൾട്ടിന് കാര്യങ്ങൾ താൻ വിചാരിക്കുന്ന അത്ര ലളിതം അല്ല എന്നും, ഇത്തിരി പ്രശനം ആണെന്നും തിരിച്ചറിയാൻ അധികം സമയം വേണ്ടി വന്നില്ല. സമയം പോകവേ പോലീസുകാരുടെ ശബ്ദത്തിന്റെ ടോണും സംസാരത്തിന്റെ ശൈലിയും മാറി തുടങ്ങി, പിന്നീടെല്ലാം വളരെ വളരെ പെട്ടെന്ന് ആയിരുന്നു. റോണ്ടാ മോറിസൺ എന്ന യുവതിയെ മൃഗീയമായി കൊലപ്പെടുത്തി എന്ന കുറ്റത്തിന് വാൾട്ടർ അറസ്റ്റ് ചെയ്യപ്പെടുകയാണ്, നിങ്ങൾക്ക് ആള് മാറിപ്പോയി എന്ന വാൾട്ടിന്റെ വാക്കുകൾ ആരുടേയും കാതുകളിൽ എത്താതെ പോവുകയും ചെയ്തു, കാരണം സാഹചര്യ തെളിവുകൾ എല്ലാം വിരൽ ചൂണ്ടിയത് അയാളിലേക്ക് തന്നെ ആയിരുന്നു.

🔸കൊല്ലപ്പെട്ടത് ഒരു ഓൾ അമേരിക്കൻ വൈറ്റ് വുമൺ ആയത് കൊണ്ടും, പ്രതിസ്ഥാനത്ത് നിൽക്കുന്ന വാൾട്ടർ മക്മില്ലൻ ഒരു കറുത്ത വംശജൻ ആയത് കൊണ്ടും ആ കാലഘട്ടം പരിഗണിക്കുമ്പോൾ സഹതാപമോ ഒരു പരിധി വരെയോ നീതി പ്രതീക്ഷിക്കേണ്ടതില്ല, എന്നാൽ ഇവിടെ സംഭവിച്ചിരിക്കുന്നത് അപകടകരമായ, ഒരു രീതിയിലും വിശദീകരിക്കാൻ കഴിയാത്ത നീതികേട്‌ തന്നെയാണ്. ഒരു പരിധി വരെ പ്രഹസനം എന്നൊക്കെ വിശേഷിപ്പിക്കാവുന്ന വാദ പ്രതിവാദങ്ങൾക്ക് ശേഷം വാൾട്ടർ വധ ശിക്ഷയ്ക്ക് വിധിക്കപ്പെടുകയാണ്. വെറും ഒന്നര ദിവസം കൊണ്ട് എല്ലാം കഴിഞ്ഞ് കേസിന് ഒപ്പ് വീണു എന്നത് കൂടി ഇതിനോടൊപ്പം ചേർത്ത് വായിക്കണം.

🔸വക്കീൽ പണി പഠിച്ചുവരുന്ന ബ്രയാൻ സ്റ്റീവൻസൺ എന്ന മൈക്കൽ ജോർദാൻ അവതരിപ്പിക്കുന്ന കഥാപാത്രം ചില കാരണങ്ങൾ കാരണം ഈ കേസിലേക്ക് വന്നെത്തുകയാണ്. കേസ് ഡയറിയിൽ നിന്നും അരങ്ങേറിയിട്ടുള്ള നീതികേടുകൾ മനസിലായ ബ്രയാൻ, ഒരു തവണ കൂടി ന്യായം അർഹിക്കുന്ന രീതിയിൽ അന്വേഷണവും വാദവും നടക്കാനായി കേസ് റീഓപ്പൺ ചെയ്യാൻ ശ്രമിക്കുകയാണ്, അതിന് അയാൾ നേരിടുന്ന പ്രശ്നങ്ങളും ഈ കേസിന്റെ തുടർന്നുള്ള ഭാവി എന്ത് എന്നതുമെല്ലാമാണ് രണ്ടര മണിക്കൂറിന് അടുത്ത് ദൈർഘ്യമുള്ള ഈ ചിത്രം. നല്ല ഒരു ചിത്രമാണ് ജസ്റ്റ് മേഴ്സി, കാണാൻ ശ്രമിക്കുക.

Verdict : Good

DC Rating : 70/100

687. Waves (2019)

Director : Trey Edward Shults

Genre : Drama

Rating : 7.7/10

Country : USA

Duration : 136 Minutes

🔸നാല് നല്ല സോൾ ഉള്ള കഥാപാത്രങ്ങളെ എടുക്കുക, അവർക്ക് നല്ല ഫസ്റ്റ് ക്‌ളാസ്സ് ബാക്ക് സ്റ്റോറുകളും, മോട്ടീവും, സ്റ്റോറി ആർക്കുകളും കൊടുക്കുക. ഈ നാല് കഥാപാത്രങ്ങളെയും ഒരു കുടുംബത്തിലെ അംഗങ്ങളായി കണക്കാക്കുക, ഈ കഥാപാത്രങ്ങൾക്കെല്ലാം അവർ അർഹിക്കുന്ന തോതിലുള്ള ഡെവലപ്മെന്റ് കൊടുക്കുന്നതിന് ഒപ്പം തന്നെ കുടുംബത്തിന് ഒറ്റ കെട്ടായി പറയാവുന്ന പ്രാധാന്യം ഉള്ള ഒരു കഥ കൂടി നൽകുക, ഇത്രയും കാര്യങ്ങൾ മനോഹരമായി ചെയ്യാൻ കഴിഞ്ഞു എന്ന കാരണം കൊണ്ട് തന്നെയാണ് വെയ്‌വ്‌സ് എന്ന ചിത്രം കയ്യടികൾ കരസ്ഥമാക്കുന്നത്. വലിയ സംശയമോ കാര്യമോ ഇല്ലാതെ പറയാം, ഒരു സ്പെഷ്യൽ മൂവി തന്നെയാണ് ഇത്, കണ്ടിരിക്കേണ്ട ഒന്ന് തന്നെ.

🔸റൊണാൾഡ് വില്യംസ്, ഭാര്യ കാത്തറീൻ വില്യംസ്, മക്കളായ ടെയ്‌ലറും, എമിലിയും അടങ്ങുന്ന നാലംഗ കുടുംബമാണ് നമ്മുടെ പ്രധാന കഥാപാത്രങ്ങൾ. റൊണാൾഡ് വില്യംസ് എന്ന അച്ഛൻ കഥാപാത്രം ആളൊരു ചെറുകിട കച്ചവടക്കാരനാണ്, ഒരു ഫിറ്റ്നസ് ഫ്രീക് കൂടിയാണ് പുള്ളി. കോളേജ് റെസ്ലിങിനോടും മറ്റും വലിയ താല്പര്യമുള്ള ടിയാൻ തന്റെ മകനെ തനിക്ക് എത്തിപ്പിടിക്കാൻ കഴിയാത്ത ഉയരങ്ങളിൽ എത്തിക്കണം എന്ന ആഗ്രഹവുമായാണ് ജീവിക്കുന്നത്, ഇതിനായി പേഴ്സണൽ ലൈഫിൽ ഒരുപാട് ത്യാഗങ്ങൾ അയാൾക്ക് ചെയ്യേണ്ടിയും വന്നിട്ടുണ്ട്.

🔸അച്ഛൻ ആഗ്രഹിച്ച വഴിയേ തന്നെയാണ് മകൻ ടെയ്‌ലർ സഞ്ചരിച്ചതും, റെസ്‌ലിംഗും ബോഡി ബിൽഡിങ്ങും എല്ലാം അയാൾക്കൊരു പാഷൻ തന്നെയാണ്, അതിനായി ജീവിതം മാറ്റി വെച്ചിരിക്കുകയാണ് എന്ന് വേണമെങ്കിൽ പറയാം. ഇങ്ങനെ എല്ലാം ഇരുവരും പ്രതീക്ഷിച്ച വഴിയേ പോകുമ്പോഴാണ് വില്ലൻ പരിക്കിന്റെ രൂപത്തിൽ അവിടെ പ്രത്യക്ഷപ്പെടുന്നത്. തോളിന് ഏറ്റ പരിക്ക് കാരണം ടെയ്‌ലറുടെ കരിയറിന് ഫുൾ സ്റ്റോപ്പ് ഇടുകയാണ്, ഇത്രയും കാലം ഒരൊറ്റ ലക്ഷ്യം മുന്നിൽ കണ്ട് പ്രയത്നിച്ച ഇരുവർക്കും തലയ്‌ക്കേറ്റ അടി തന്നെ ആയിരുന്നു ഇത്.

🔸ഇനി ചിത്രത്തിലെ സ്ത്രീ കഥാപാത്രങ്ങളിലേക്ക് നോക്കുക ആണെങ്കിൽ റൊണാൾഡിന്റെ ഭാര്യ ആണ് കാതറീൻ, രണ്ടാം ഭാര്യ. ഒരു ടിപ്പിക്കൽ രണ്ടാനമ്മയുടെ ക്രൂര മനോഭാവ ക്ലിഷേകൾ ഒന്നും തന്നെ ഇവിടില്ല, ടെയ്‌ലർക്കും എമിലിക്കും തങ്ങളുടെ അച്ഛനെക്കാൾ അടുപ്പം കാതറീനോടാണ്, അത് തിരിച്ചും അങ്ങനെ തന്നെ. രണ്ട് മക്കൾക്കും, പ്രത്യേകിച്ച് ടെയ്‌ലർക്ക് വീണുപോവുന്ന സന്ദർഭങ്ങളിൽ എല്ലാം ഒരു കൈത്താങ്ങായി കാതറീൻ ഉണ്ട് എന്ന് പറയാം, ഒരുപക്ഷെ ചിത്രത്തിലെ ഏറ്റവും പവർഫുൾ ക്യാരക്റ്റർ എന്ന വിശേഷണവും നൽകാം. രണ്ട് മക്കളിലും ശ്രദ്ധ ഏറ്റവും കുറവ് കിട്ടിയത് എമിലിക്ക് ആയിരിക്കണം.

🔸സത്യത്തിൽ ചേട്ടന്റെ മുന്നിൽ എന്നും ഒരു രണ്ടാം നിരക്കാരിയുടെ സ്ഥാനമേ എമിലിക്ക് എല്ലായിടത്തും ലഭിച്ചിട്ടുള്ളൂ, സിനിമയുടെ രണ്ടാം പാതിയിലാണ് ഈ കഥാപാത്രത്തിന്റെ പ്രാധാന്യം വർധിക്കുന്നത്. ആദ്യ പാതി ടെയ്‌ലറിന്റെയും, രണ്ടാം പാതി എമിലിയുടെയും വ്യൂ പോയിന്റിലൂടെയാണ് കഥ പറഞ്ഞ് പോവുന്നത്. ഒരു ഡ്രാമ ആണ് എങ്കിൽ കൂടിയും എവിടെയും സ്ലോ ആവാതെ വേഗത്തിൽ കഥ പറഞ്ഞ് പോവുന്ന രീതിയാണ് ചിത്രത്തിന്റേത്, അത് കൊണ്ട് തന്നെ മടുപ്പ് ഒരിടത്തും ഉണ്ടാവില്ല. ഈ അടുത്ത് കണ്ട ചിത്രങ്ങളിൽ നല്ല നൈസ് ഒരു ക്ലൈമാക്സ് ഷോട്ട് തന്ന ചിത്രം കൂടിയാണ് വെയ്‌വ്‌സ്, തീർച്ചയായും കാണാൻ ശ്രമിക്കുക, അതിനുള്ള വക ചിത്രത്തിൽ ഉണ്ട്.

Verdict : Must Watch

DC Rating : 90/100

686. The Mirror Crack'd (1980)

Director : Guy Hamilton

Genre : Mystery

Rating : 6.2/10

Country : UK

Duration : 106 Minutes

🔸നമ്മുടെ നൈവ്സ് ഔട്ട് കണ്ട് കഴിഞ്ഞ ശേഷം ആ ഒരു രീതിയിൽ ഒക്കെ ഉള്ള, അധികം ആരുടേയും ശ്രദ്ധയിൽ പെടാതെ പോയ ചിത്രങ്ങളെ കുറിച്ച് അന്വേഷിച്ച് പോയപ്പോഴാണ് ദി മിറർ ക്രാക്ക്ഡ് എന്ന ഈ ചിത്രം കയ്യിൽ വന്ന് പെട്ടത്, സംഭവം ഒരു മർഡർ മിസ്റ്ററി ആണെന്നും അഗതാ ക്രിസ്റ്റിയുടെ കോൺട്രിബ്യുഷൻ ആണെന്നും അറിഞ്ഞപ്പോൾ പിന്നെ കാണാൻ മറ്റൊരു കാരണം വേണ്ടിവന്നില്ല എന്നതാണ് സത്യം. പൊതുവെ നിരൂപകരുടെയും റേറ്റിങ് സൈറ്റുകളുടെയും എല്ലാം ബ്ലാക്ക് ലിസ്റ്റിൽ പെട്ട ചിത്രം ആയതിനാലും വലിയ പ്രതീക്ഷ ഇല്ലായിരുന്നു എങ്കിലും മോശം പറയാനില്ലാത്ത ഒരു അനുഭവം ചിത്രം നൽകുന്നുണ്ട്.

🔸എണ്പതുകളാണ് ചിത്രത്തിന്റെ സെറ്റപ്പ്, ഒരു കൂട്ടം ആളുകൾ ഒരു മർഡർ മിസ്റ്ററി ചിത്രം തിയേറ്ററിൽ കാണുകയാണ്, ആദ്യാവസാനം നല്ല രീതിയിൽ ത്രില്ലിംഗ് ആയി പോയി കൊണ്ടിരിക്കുന്ന ചിത്രം ആളുകളെ പിടിച്ചിരുത്തിയിട്ടുണ്ട്. ആരാവും കൊലപാതകി എന്ന ചോദ്യം എല്ലാവരെയും അലട്ടുന്നുണ്ട്, തങ്ങൾക്ക് തോന്നിയ കാരണങ്ങൾ ചികഞ്ഞെടുത്ത് ഉത്തരം കണ്ടെത്താനായി ശ്രമിക്കുകയാണ് ചിത്രത്തിന്റെ ഇടവേള സമയത്ത് ഇവർ ഓരോരുത്തരും. ഇങ്ങനെ ചർച്ചകൾ ചൂട് പിടിക്കുമ്പോഴാണ് ഒരു കഥാപാത്രം അവിടെ നിന്നും ഇറങ്ങി പോവുന്നത് എല്ലാവരും ശ്രദ്ധിക്കുന്നത്, ഇത്രയും ആകാംക്ഷ ജനിപ്പിച്ച ഒരു ചിത്രത്തിന്റെ ഉത്തരം കാണാതെ ഒരാൾ ഇറങ്ങി പോവുക എന്നത് അവർക്ക് അത്ഭുതമായിരുന്നു.

🔸മിസ് മർപിൾ എന്ന വൃദ്ധയാണ് ഈ സാഹസത്തിന് മുതിർന്നത്, കൗതുകം മറച്ചുവെക്കാതെ ഇറങ്ങിപ്പോവുന്ന അവരോട് കാരണം തിരക്കിയ മറ്റ് കഥാപാത്രങ്ങൾക്ക് കിട്ടിയ ഉത്തരം അതിലും വിചിത്രമായിരുന്നു. "ഓ ഇതിൽ ഇത്ര ആലോചിക്കാൻ ഒന്നുമില്ല, ആരാണ് കൊന്നത് എന്നതൊക്കെ എനിക്ക് എപ്പോഴേ മനസിലായി" എന്നായിരുന്നു അവരുടെ മറുപടി. ഈ മറുപടി കേട്ട് അവിടെ ഉള്ളവരെല്ലാം ഒന്ന് അമ്പരന്നു എങ്കിലും ശെരിക്ക് ഞെട്ടിയത് മിസ് മർപിൾ കാര്യ കാരണ സഹിതം എല്ലാം വിശദീകരിച്ചപ്പോഴാണ്. സംവിധായകൻ ചിത്രത്തിൽ ഒളിച്ച് വെച്ച ചെറിയ സൂചനകൾ പോലും പിടിച്ചെടുത്ത് അവർ കുറ്റവാളിയെ കണ്ടെത്തി കഴിഞ്ഞിരുന്നു.

🔸ഇതാണ് മിസ് മാർപിലിന്റെ പ്രകൃതം, ഒരു കുറ്റാന്വേഷകയ്ക്ക് ആവശ്യമായ ശ്രദ്ധ, അറിവ്, കൂർമ്മ ബുദ്ധി എന്നിവയെല്ലാം അവർക്കുണ്ട്, ഇല്ലാത്തത് ഒരേയൊരു കാര്യം മാത്രമാണ്, മറ്റൊന്നുമല്ല ഇതെല്ലാം ഉപയോഗിക്കാൻ ഉള്ള ഒരു അവസരം. വാർദ്ധക്യത്തിലേക്ക് കടന്ന വിരസമായ ജീവിതമാണ് മാർബിളിന്റേത് എന്ന് പറയാം ചുരുക്കത്തിൽ. ഇത് എന്ത് തന്നെ ആയാലും ഒരു സംഭവം ആയിടെ ഗ്രാമത്തിൽ അരങ്ങേറുകയാണ്, മേരി ക്വീൻ ഓഫ് സ്കോറ്റ്സിന്റെ ബയോഗ്രഫി ചിത്രത്തിന്റെ ഷൂട്ടിങ് ലൊക്കേഷനായി അണിയറ പ്രവർത്തകർ തിരഞ്ഞെടുക്കുന്നത് മിസ് മാർബിളിന്റെ ഗ്രാമത്തെയാണ്.

🔸വലിയൊരു താര നിര തന്നെ ചിത്രത്തിൽ അണി നിരക്കുന്നുണ്ട്, ഇതിനിടെ ആണ് ചിത്രത്തിന് ആസ്പദമായ സംഭവം അരങ്ങേറുന്നത്. അഭിനേതാക്കൾക്കും അണിയറ പ്രവർത്തകർക്കും തദ്ദേശ വാസികൾക്കുമായി ഒരുക്കിയ വിരുന്നിനിടെ വിഷം ഉള്ളിൽ ചെന്ന് ഒരു അഥിതി കൊല്ലപ്പെടുകയാണ്, ഇവർ ആര് എന്ത് എങ്ങിനെ, ഇവരെ കൊന്നതാര് എന്നതൊക്കെയാണ് ചിത്രത്തിന്റെ പ്രമേയം. മിസ് മാർബിളിന്റെ അനന്തിരവനും സ്കോട്ട്ലൻഡ് യാർഡിൽ ഉദ്യോഗസ്ഥനുമായ വ്യക്തിയാണ് കേസ് അന്വേഷിക്കുന്നത്, താമസിയാതെ തന്നെ മാർബിളും അന്വേഷണത്തിന്റെ ഭാഗം ആവുകയാണ്. അവസാനത്തോട്ട് ഒരല്പം റഷ് ആവുന്നുണ്ട് എന്നതൊഴിച്ചാൽ ഒരുതവണ കാണാനുള്ളത് ചിത്രത്തിൽ ഉണ്ട്.

Verdict : Watchable

DC Rating : 66/100

685. Birds Of Prey (2020)

Director : Cathy Yan

Genre : Super Hero

Rating : 6.7/10

Country : USA

Duration : 109 Minutes

🔸ബാറ്റ്മാൻ എന്ന സൂപ്പർഹീറോ കഥാപാത്രത്തിനെ ഇന്ട്രെസ്റ്റിംഗ് ആക്കുന്ന ഒരുപാട് ഘടകങ്ങൾ ഉണ്ട്, കോമിക്സിൽ ആയാലും അവയുടെ അഡാപ്റ്റേഷനുകളിൽ ആയാലും. ഈ ഘടകങ്ങളിൽ സുപ്രധാനമായ ഒന്ന് പേഴ്സണലി ആ കഥാപാത്രത്തിന് എതിരായി വരുന്ന വില്ലൻ കഥാപാത്രങ്ങളാണ്. ആനിമേറ്റഡ് കോമിക്സ് ഒക്കെ കണ്ടവർക്ക് അല്ലെങ്കിൽ കോമിക്സ് വായിച്ചവർക്ക് അറിയാം, ബാറ്റ്മാന് വില്ലൻ കഥാപാത്രങ്ങൾക്ക് ഒരു പഞ്ഞവും ഇല്ല എന്ന്. ഈ ഒരു റോഗ് ഗാലറിയിൽ ഇതുവരെ സ്‌ക്രീനിൽ ലൈവ് ആയി പ്രത്യക്ഷപ്പെട്ടിട്ട് ഇല്ലാത്തൊരു കഥാപാത്രം ആയിരുന്നു ബ്ലാക്ക് മാസ്ക്, ആ കഥാപാത്രം ഇവാൻ മാക്ഗ്രിഗറിൽ കൂടി എത്തുന്നു എന്നതായിരുന്നു ഈ ചിത്രം കാണാനുള്ള ഡ്രൈവിങ് ഫോഴ്‌സ്.

🔸മുൻപ് ഈ വില്ലൻ കഥാപാത്രങ്ങളിൽ ചിലരെ മാത്രം ഫോക്കസ് ചെയ്ത് കൊണ്ട് സൂയിസൈഡ് സ്‌ക്വാഡ് എന്ന ചിത്രം പുറത്തിറങ്ങിയിരുന്നു എങ്കിലും ആരാധകർക്കും വിമർശകർക്കും ഒരുപോലെ തട്ടി കളിക്കാനുള്ള പാതി വെന്ത സൃഷ്ട്ടി മാത്രമായി മാറിയിരുന്നു അത്. എന്തിരുന്നാലും ആ ചിത്രത്തിലെ ഹൈലൈറ്റ് എന്നത് വ്യക്തിപരമായി മാര്ഗോട്ട് റോബ്ബിയുടെ ഹാർലി ക്വിൻ എന്ന കഥാപാത്രം ആയിരുന്നു, നമ്മളീ ടെയ്‌ലർ മേഡ് എന്നൊക്കെ ചില നടന്മാരെയും കഥാപാത്രങ്ങളെയും വിശേഷിപ്പിക്കാറില്ലേ, അത് തന്നെ ആയിരുന്നു കേസ്. എന്തായാലും ഈ കഥാപാത്രത്തെയും മറ്റ് ചിലരെയും ഫ്രണ്ട് സീറ്റിൽ കൊണ്ടുവന്ന് അവതരിപ്പിക്കുകയാണ് ബിർഡ്‌സ് ഓഫ് പ്രേ എന്ന ഈ ചിത്രം.

🔸വില്ലൻ കഥാപാത്രമായ ബ്ലാക്ക് മാസ്കിന്റെ കയ്യിൽ നിന്നും വളരെ പ്രധാനപ്പെട്ട ഒരു വസ്തു കസാൻഡ്ര കെയ്ൻ എന്ന കഥാപാത്രം മോഷ്ട്ടിക്കുന്നതും, ഇത് താമസിയാതെ ഒരു മാൻഹണ്ട് ആയി മാറുന്നതും ഒക്കെയാണ് ചിത്രത്തിന്റെ കഥ, ഒരുപക്ഷെ സിനിമയുടെ ഏറ്റവും വലിയ നെഗറ്റിവും ഇത് തന്നെ ആയിരിക്കണം, കാരണം വളരെ സിംപിൾ ആയ പ്രവചിക്കാൻ കഴിയുന്ന ഒന്നാണ് ഇതിലേത് എന്നത് തന്നെ. മോഷണം പോവുന്ന വസ്തു ഒരു മാക്ഗാഫിൻ ആയി കണക്കിലാക്കിയാൽ ഇതിനെ തുടർന്ന് ഉണ്ടാവുന്ന ഒരു ചെയിൻ പോലെയുള്ള സംഭവങ്ങളാണ് തുടർന്നുള്ള രണ്ട് മണിക്കൂർ.

🔸ബ്ലാക്ക് മാസ്കിന്റെ വളരെ കുറഞ്ഞ് പോയ സ്‌ക്രീൻ ടൈമും, ഹണ്ട്രസിനെ പോലെ ഉള്ള ചില കഥാപാത്രങ്ങൾക്ക് കൊടുക്കാതിരുന്ന വ്യക്തതയും എല്ലാം കൂടി ചേരുമ്പോൾ മോശം എന്ന് പറഞ്ഞ് വിടാവുന്ന കാര്യങ്ങൾ ഏറെക്കുറെ തീരുകയായി. ഇനി നല്ല വശങ്ങളിലേക്ക് കടക്കുക ആണെങ്കിൽ ഒരു പേര് പ്രത്യേകം എടുത്ത് പറയണം, മറ്റാരുമല്ല മാര്ഗോട്ട് റോബ്ബി തന്നെ, അത്ര മാത്രം എന്റർടെയ്‌നിങ് ആയിരുന്നു പ്രസ്തുത കഥാപാത്രം, ഇവരുടെ വ്യൂ പോയിന്റിലൂടെ ആണ് കഥ പുരോഗമിക്കുന്നത് എന്നതും ഒരു അഡ്വാന്റേജ്‌ ആയി പറയാം. ദുരന്തം ആയിരുന്ന സൂയിസൈഡ് സ്‌ക്വാഡിൽ നിന്നും ഇവിടേക്ക് ആ കഥാപാത്രത്തിന് കിട്ടിയ പ്രോഗ്രഷനും നൈസ് ആയിരുന്നു.

🔸ഇവാൻ മക്ഗ്രഗർ, റാമോൺ സിയോണിസ് എന്ന കഥാപാത്രമായി നൈസ് ആയിരുന്നു, കുറഞ്ഞ് പോയി എന്നൊരു അഭിപ്രായം മാത്രം. അത്യാവശ്യം കളർഫുൾ ആയ വെയർഡ് എന്നൊക്കെ വിശേഷിപ്പിക്കാവുന്ന സെറ്റപ്പ് ആണ് ചിത്രത്തിന്റേത്, പോസ്റ്റ് ക്രെഡിറ്റ് സീനിലും ഡിസി യുണിവേഴ്സിന്റെ മറ്റുള്ള ചിത്രങ്ങളുമായി ബന്ധിപ്പിക്കുന്ന ഘടകങ്ങൾ അല്ലെങ്കിൽ ഈസ്റ്റർ എഗ്ഗുകളിലും ഒന്നും വലിയ പ്രതീക്ഷ വേണ്ട. ഇനി ചിത്രത്തെ കുറിച്ച് ആകെ മൊത്തം പറയുക ആണെങ്കിൽ ഒരു തവണ കാണാനുള്ള വകുപ്പ് ഉണ്ട്, തിയേറ്ററിൽ തന്നെ കാണണം എന്നൊന്നുമില്ല, ഡിജിറ്റൽ റിലീസിന് ശേഷവും ആവാം.

Verdict : Watchable

DC Rating : 65/100

684. Still Human (2018)

Director : Oliver Siu Kuen Chan

Genre : Comedy

Rating : 7.6/10

Country : Hong Kong

Duration : 112 Minutes

🔸സ്റ്റിൽ ഹ്യുമൻ എന്ന ചിത്രത്തെ കുറിച്ച് കേട്ടത് ഉദ്ദേശം ഒരു വർഷം മുൻപാണ് എന്നാണ് ഓർമ്മ, ഫെസ്റ്റുകളിലും മറ്റുമൊക്കെ മികച്ച പ്രതികരണങ്ങൾ നേടിയ ചിത്രം കാണാൻ വൈകിയതിന്റെ കാരണം മറ്റൊന്നുമല്ല, പോസ്റ്റർ തന്നെയാണ്. അൺടച്ചബിൾസ് തൊട്ട് ഇങ് തെന്നിന്ത്യയിൽ എത്തിയ തോഴ വരെയുള്ള ചിത്രങ്ങളുമായി സാമ്യം തോന്നിപ്പിക്കുന്ന ഒന്നായിരുന്നു പോസ്റ്റർ. ഇവ ഒന്നും തന്നെ മോശം ചിത്രമായി തോന്നിയില്ല എങ്കിലും ഇതേ വിഭാഗത്തിൽ പെട്ട ഒന്ന് കൂടി കാണാൻ താല്പര്യം ഉണ്ടായിരുന്നില്ല, ഈ കാരണം കൊണ്ട് തന്നെ ഹാർഡ് ഡിസ്കിന്റെ ഒരു മൂലയ്ക്ക് കുറെ നാളായി ചിത്രം ഇരിക്കാൻ തുടങ്ങിയിട്ട്.

🔸മുകളിൽ സൂചിപ്പിച്ച ചിത്രങ്ങളുമായി ചെറിയ ചില സാമ്യതകൾ മാത്രമേ ഈ സിനിമ കാണിക്കുന്നുള്ളൂ, കുറച്ച് കൂടി ലളിതമായി പറയുക ആണെങ്കിൽ വീൽ ചെയറിൽ ഒതുങ്ങിപോയ ഒരു കഥാപാത്രവും അയാളുടെ സഹായിക്കും ഇടയിൽ ഉടലെടുക്കുന്ന ബന്ധം തന്നെയാണ് പ്രമേയം എങ്കിലും അവിടുന്ന് അങ്ങോട്ടുള്ള കഥ, അവതരണം എന്നിവയെല്ലാം വ്യത്യസ്തം തന്നെയാണ്. ഇത് തന്നെ അല്ലെ അത് എന്ന തോതിൽ ഉള്ള സങ്കോചമോ മടുപ്പോ ഒന്നും തന്നെ സ്റ്റിൽ ഹ്യുമൻ കാണുമ്പോൾ തോന്നില്ല എന്നത് ഉറപ്പ്.

🔸ഇൻഫെർണൽ അഫയേഴ്‌സ്, എക്സൈൽഡ് പോലുള്ള ചിത്രങ്ങളിൽ കൂടി സുപരിചിതനായ ആന്തണി വോങ് ആണ് ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നത്, ഒരു അപകടത്തിൽ പെട്ട് അരയ്ക്ക് കീഴ്പോട്ട് തളർന്ന് പോയ ആളാണ് പുള്ളി, നടക്കാൻ വീൽ ചെയറിന്റെ സഹായം വേണം, അത്യാവശ്യം പ്രാഥമിക കാര്യങ്ങൾ എല്ലാം നടക്കാനായി ഒരു സഹായിയുടെയും. വ്യക്തി ജീവിതത്തിലും അയാൾ വലിയ വിജയം ഒന്നുമല്ല, വേർപിരിയലിന് ശേഷം മക്കളുമായി ഒക്കെ പിരിഞ്ഞ് ഏറെക്കുറെ ഒരു ഏകാന്ത വാസം തന്നെയാണ് ഈ കഥാപാത്രത്തിന്റേത് എന്ന് പറയാം.

🔸പുള്ളിയുടെ സഹായി ആയി കുറെ പേർ ഇതിനോടകം വന്നിട്ടുണ്ടെങ്കിലും മിക്കവരും ഒരു മാസം തികയുന്നതിന് മുന്നേ പോവാറാണ് പതിവ്, ടിയാൻ ആളൊരു കടുപ്പക്കാരൻ ഒന്നും അല്ലെങ്കിലും ഒരു മനുഷ്യന്റെ എല്ലാ പ്രാഥമിക കാര്യങ്ങളും നിറവേറ്റി കൊടുക്കുക, അയാളെ കുളിപ്പിക്കുക, വൃത്തിയാക്കുക പോലെയുള്ള ദൗത്യങ്ങൾ എല്ലാം ഒരുപാട് കാലത്തേക്ക് ചെയ്യുക എന്നത് അവർക്ക് ബുദ്ധിമുട്ട് ഉണ്ടായിരുന്ന കാര്യം ആയിരുന്നു, ഇത് തന്നെ ആയിരിക്കണം അവരെല്ലാം അധികം താമസിയാതെ ഗുഡ്ബൈ പറഞ്ഞ് പോയതും. ഈ ഒരു പശ്ചാത്തലത്തിലാണ് നമ്മുടെ നായികാ കഥാപാത്രം സ്ക്രീനിലേക്ക് വരുന്നത്.

🔸പ്രശസ്തമായ ഒരു യൂണിവേഴ്സിറ്റിയിൽ നിന്നും ഗ്രാഡുവേഷൻ കഴിഞ്ഞ ആളാണ് അവർ, വോങിന്റെ ഭാഷയിൽ പറഞ്ഞാൽ ഈ ജോലി ഒരു രീതിയിലും ഏറ്റെടുക്കേണ്ട അവസ്ഥ വരാൻ പാടില്ലാത്ത ഒരാൾ, എന്തിരുന്നാലും സാഹചര്യം അവരെ ഇവിടെ എത്തിക്കുകയാണ്. ഫോട്ടോഗ്രഫിയാണ് ഇവരുടെ പാഷൻ, എന്നാൽ പണം എന്നത് വലിയൊരു തടസ്സമായി മാറിയപ്പോൾ അതെല്ലാം ഉപേക്ഷിച്ച് കിട്ടിയ ജോലി ചെയ്യുക എന്ന മാർഗമേ മുന്നിൽ ഉണ്ടായിരുന്നുള്ളൂ. ജോലിക്ക് വന്നപ്പോഴാണ് ഇരുവരും ഒരു കാര്യം കൂടി അറിയുന്നത്, അവർക്കിരുവർക്കും കോമൺ ആയൊരു ഭാഷ പിടിയില്ല എന്ന്, തുടർന്നങ്ങോട്ട് അരങ്ങേറുന്ന സംഭവങ്ങളാണ് രണ്ട് മണിക്കൂറിന് അടുത്ത് ദൈർഘ്യം ഉള്ള ചിത്രം.

Verdict : Very Good

DC Rating : 82/100

683. Bad Boys For Life (2020)

Director : Bilal Fallah

Genre : Action

Rating : 7.3/10

Country : USA

Duration : 124 Minutes

🔸എൺപതുകളിലെ അല്ലെങ്കിൽ തൊണ്ണൂറുകളിലെ ഒരു ചിത്രത്തിന്റെ തുടർ ഭാഗം, അത് സീക്വലോ പ്രീക്വലോ റീമെയ്‌ക്കോ എന്തോ ആവട്ടെ, വരുന്നു എന്ന വാർത്ത കേൾക്കുന്നത് സത്യത്തിൽ ഒരല്പം പേടിയോടെ ആണ്. ചില ചിത്രങ്ങൾ പഴയ ഭാഗത്തിന്റെ മൂല്യം മനസിലാക്കികൊണ്ട് അതിനോട് ചേർന്ന് നിൽക്കുന്ന രീതിയിൽ തുടർ ഭാഗങ്ങൾ സൃഷ്ടിച്ചിട്ടുണ്ട്, ഇല്ല എന്ന് പറയാൻ ആവില്ല, പക്ഷെ അതിനും എത്രെയോ ഇരട്ടിയാണ് കാശ് പിടുങ്ങുക എന്ന ഉദ്ദേശത്തിൽ മാത്രം എത്തി സമ്പൂർണ്ണ ദുരന്തങ്ങളായി മാറിയ ചിത്രങ്ങൾ, ഗോസ്റ്റ്ബസ്റ്റെർസ് പോലെയുള്ള മലങ്കൾട്ട് റീമേക്കിനെ കുറിച്ച് ഒന്നും പറയുന്നില്ല. ഈ ഒരു ട്രാപ്പിൽ ബാഡ് ബോയ്സ് വീഴുമോ എന്നതായിരുന്നു പേടി.

🔸ബാഡ് ബോയ്സ് ആദ്യ രണ്ട് ഭാഗങ്ങൾ കണ്ടിട്ട് വർഷങ്ങൾ ഒരുപാട് കഴിഞ്ഞു, വിദേശ സിനിമ ആദ്യം കണ്ട് തുടങ്ങിയ കാലഘട്ടത്തിൽ അതായത് ഒരു എട്ട് ഒൻപത് വർഷം മുൻപ് കണ്ട് വിട്ടതാണ് ഈ രണ്ട് ചിത്രങ്ങളും. രണ്ട് കഥാപാത്രങ്ങൾക്കിടയിലും ഉള്ള അന്യായം എന്നൊക്കെ വിശേഷിപ്പിക്കാവുന്ന കൊമെടിയും, വൺ ലൈനറുകളും എല്ലാം കൂടി ചേർന്ന് നൈസ് ആയ അനുഭവം ആയിരുന്നു ഈ രണ്ട് ചിത്രങ്ങളും, അത്രയൊക്കെ മാത്രമേ ഇവിടെയും പ്രതീക്ഷിച്ചിരുന്നുള്ളൂ, അത് എങ്കിലും കിട്ടണം എന്ന നിർബന്ധം ഉണ്ടായിരുന്നു എന്നത് വേറെ കാര്യം.

🔸ഒരു ബഡി കോപ്പ് സിനിമയിൽ നിന്നും പ്രതീക്ഷിക്കാവുന്ന എല്ലാ വകകളും കൂട്ടി കുഴച്ച് അത്യാവശ്യം ആരാധകരെയും സാധാരണക്കാരായ കാഴ്ചക്കാരെയും തൃപ്തി പെടുത്താനുള്ള വക എല്ലാം ചിത്രത്തിലുണ്ട്. മാർട്ടിൻ ലോറൻസ്, വിൽ സ്മിത്ത് എന്നിവരുടെ കിടിലൻ കെമിസ്ട്രി ആണ് പ്രതീക്ഷിച്ചത് പോലെ തന്നെ ചിത്രത്തിന്റെ ഹൈലൈറ്റ്. കാലത്തിന് അനുസരിച്ച് മാറ്റം വന്ന, കരിയർ ഏറെക്കുറെ അവസാന കാലത്തേക്ക് എത്തിയ രണ്ടുപേർ എന്ന നിലയിൽ ഇരുവരും കഥാപാത്രത്തിന് നൽകിയ സ്പെഷ്യൽ ഷെയ്ഡ് പ്രത്യേകം എടുത്ത് പറയണം.

🔸ഈ രണ്ട് കഥാപാത്രങ്ങളിലും ഫോക്കസ് ചെയ്യുന്നതിനോടൊപ്പം തന്നെ ഡ്രഗ് കാർട്ടലുകളിലേക്കും മാഫിയകളിലേക്കും എല്ലാം കഥ പന്തലിച്ച് പോവുന്നുണ്ട്. ഇതിനോടൊപ്പം തന്നെ ഇരു കഥാപാത്രങ്ങളെയും അത്യന്തം പേഴ്സണൽ ആയി ബാധിക്കുന്ന തലത്തിലേക്ക് ചിത്രത്തിന്റെ കഥ പോവുന്നുണ്ട്. രണ്ട് കഥാപാത്രങ്ങൾക്കും കാലം കാര്യമായ മാറ്റം വരുത്തിയിട്ടുണ്ട്, ലോറൻസിന്റെ കഥാപാത്രത്തെ ഈ വസ്തുത കൂടുതൽ ഉൾവലിഞ്ഞ ജാഗരൂകനായ വ്യക്തിയായി മാറ്റിയിട്ടുണ്ട്, പോലീസ് ജോലിയിൽ നിന്നും മാറി കുടുംബ ജീവിതത്തിലേക്ക് ഒതുങ്ങണം എന്നത് അയാളുടെ ആഗ്രഹം കൂടിയായി മാറിയിരിക്കുന്നു, ഇതുമായി ഒത്ത് പോവാൻ വിൽ സ്മിത്തിന്റെ കഥാപാത്രത്തിന് കഴിഞ്ഞിട്ടില്ല.

🔸ഇപ്പോൾ ഈ ചിത്രത്തിലേക്ക് വരുമ്പോൾ ഒരു പുതിയ പ്രശനം രൂപപ്പെട്ടിട്ടുണ്ട്, കാര്യം വേറൊന്നുമല്ല തങ്ങൾ പണ്ട് അന്വേഷിച്ച് തീർപ്പാക്കിയ കേസ് വീണ്ടും വിഷയമായി വരികയാണ്, ആരാണോ എന്താണോ എന്നൊന്നും പിടിയില്ല എങ്കിലും അന്വേഷക ടീമിൽ ഉണ്ടായിരുന്ന ഓരോരുത്തരും വേട്ടയാടപ്പെടുകയാണ്. ഈ ഒരു ബാക്ക്ഗ്രൗണ്ടിലാണ് ചിത്രം കഥ പറഞ്ഞ് തുടങ്ങുന്നത്. വലിയ കഥയോ കാര്യമോ ഒന്നും പ്രതീക്ഷിക്കരുത്, എന്നാലും എന്റെർറ്റൈന്മെന്റിന്റെ കാര്യത്തിൽ ആവശ്യം ഉള്ളതെല്ലാം ചിത്രത്തിലുണ്ട്, കാണുന്നത് കൊണ്ട് തെറ്റൊന്നും ഇല്ല.

Verdict : Good

DC Rating : 70/100

682. Dont F**k With Cats : Hunting An Internet Killer (2019)

Director : Mark Lewis

Genre : Thriller

Rating : 8.1/10

Seasons : 01

Episodes : 03

Country : USA

Duration : 57 - 67 Minutes

🔸ഈ സോഷ്യൽ മീഡിയ, ഡാർക്ക് വെബ്ബ് പോലുള്ള പ്ലാറ്റ്‌ഫോമുകളിൽ കൂടി അരങ്ങേറുന്ന കുറ്റ കൃത്യങ്ങളും മറ്റും പ്രമേയമാക്കി കൊണ്ട് അനവധി സിനിമകൾ മുൻപ് വന്നിട്ടുണ്ട്, ഈ വിഭാഗത്തിൽ ഉൾപ്പെടുത്താവുന്ന ഏറ്റവും പുതിയ സംരംഭമാണ് നെറ്റ്ഫ്ലിക്സിന്റെ സ്വന്തം സൃഷ്ടിയായ, വെറും മൂന്ന് എപ്പിസോഡുകൾ മാത്രമുള്ള ഡോണ്ട് ഫ** വിത് ക്യാറ്റ്‌സ് അഥവാ ഹണ്ടിങ് ആൻ ഇന്റർനെറ്റ് കില്ലർ. പേര് സൂചിപ്പിക്കുന്നത് പോലെ തന്നെ ഒരു സൈക്കോ സീരിയൽ കില്ലെറിനെ ചുറ്റിപ്പറ്റിയാണ് നമ്മുടെ കഥ പുരോഗമിക്കുന്നത്. അയാൾ ആര്, എന്ത്, അയാളുടെ ചെയ്തികൾ എന്തൊക്കെ തുടങ്ങി അയാളിലേക്ക് വഴി വെച്ചേക്കാവുന്ന അന്വേഷണം വരെയുള്ള കാര്യങ്ങളാണ് ഇവിടെ ഉൾപ്പെടുത്തിയിരിക്കുന്നത്.

🔸ആദ്യ എപ്പിസോഡ് റോൾ ചെയ്ത് തുടങ്ങുമ്പോൾ പ്രേക്ഷകർ കാണുന്നത് ഒരു സ്ത്രീയെ ആണ്, അതായത് ചുവടെ പറയാൻ പോവുന്ന സൈക്കോ കില്ലർ പരമ്പരയുമായി നേരിട്ട് ബന്ധമോ അറിവോ ഉള്ളൊരു സ്ത്രീ, ഇവർ കഥ പറഞ്ഞ് തുടങ്ങുകയാണ്. ഈ കഥയ്ക്ക് ഒരല്പം പഴക്കമുണ്ട്, കുറച്ച് വര്ഷങ്ങളുടെ പഴക്കം. ഈ സംഭവം എല്ലാം ആരംഭിക്കുന്നത് അനോണിമസ് ആയൊരു സോഴ്സ് ഇന്റർനെറ്റിൽ ഒരു വിഡിയോ അപ്ലോഡ് ചെയ്യുന്നതോട് കൂടിയാണ്. വിഡിയോ അപ്ലോഡ് ചെയ്തതും മറ്റും അത്ര പ്രശസ്തം അല്ലാത്ത അക്കൊണ്ട് വഴി ആയിരുന്നെങ്കിലും അതിലെ കണ്ടന്റ് ഇച്ചിരി കുഴപ്പം പിടിച്ചത് ആയിരുന്നു.

🔸ഒരല്പം ബ്ലർ ആയ സെറ്റപ്പിലാണ് അപ്ലോഡ് ചെയ്യപ്പെട്ട വീഡിയോ പ്ളേ ചെയ്ത് തുടങ്ങുന്നത്, സ്‌ക്രീനിൽ ആകെ ഒരു വ്യക്തി മാത്രമേ ഉള്ളൂ, അയാളോടൊപ്പം രണ്ട് പൂച്ച കുഞ്ഞുങ്ങളും. വലിയ അപകട സൂചന ഒന്നും തരാതെ ആരംഭിച്ച വിഡിയോ കുറച്ച് സമയം കഴിയുമ്പോൾ ചെറുതായി ഒന്ന് ടോൺ മാറ്റുകയാണ്, സ്‌ക്രീനിൽ ഉള്ള കഥാപാത്രം തന്റെ അടുത്തുള്ള രണ്ട് പൂച്ച കുഞ്ഞുങ്ങളെയും വാക്വമ് ബാഗ് ഉപയോഗിച്ച് ശ്വാസം മുട്ടിക്കുകയാണ്, ഒരല്പ നേരം നീണ്ട് നിന്ന പ്രതിരോധത്തിനും ചെറുത്തു നില്പിനും ശേഷം ആ രണ്ട് ജീവികളും ചാവുന്നു, ഇതാണ് വീഡിയോയുടെ കണ്ടന്റ്.

🔸വീഡിയോയ്ക്ക് ലഭിച്ച പ്രതികരണങ്ങൾ ഭീതിതം ആയിരുന്നു, മൃഗ സംരക്ഷകരും മൃഗ സ്നേഹികളും എല്ലാം ഈ ജീവികളുടെ വേദനയിൽ നിന്നും ഉന്മാദം കണ്ടെത്തുന്ന കഥാപാത്രത്തിന്റെ രക്തത്തിന് വേണ്ടി മുറവിളി കൂട്ടി എങ്കിലും അയാളെ ട്രാക്ക് ചെയ്ത് പിടിക്കുക എന്നത് അത്ര എളുപ്പം ഉള്ള കാര്യം ആയിരുന്നില്ല. ഈ കഥാപാത്രത്തിനെ നിയമത്തിന്റെ മുന്നിൽ എത്തിക്കാനായി ഒരു കൂട്ടം വ്യക്തികൾ സോഷ്യൽ മീഡിയ വഴി ഒത്തുകൂടുന്നുണ്ട് എങ്കിലും അവരുടെ ഓരോ ശ്രമങ്ങളും കണ്ടെത്തുന്ന ഓരോ ഉത്തരങ്ങളും കഥയെ കൊണ്ടുപോവുന്നത് കൂടുതൽ കൂടുതൽ ദുർഘടമായ പാതയിലേക്കും ചോദ്യങ്ങളിലേക്കുമാണ്, ഇതാണ് ഏറ്റവും ലളിതമായി പറഞ്ഞാൽ ഈ കഥയുടെ ബാക്ക്ഗ്രൗണ്ട്, ബാക്കി സ്‌ക്രീനിൽ കാണാൻ ശ്രമിക്കുക.

🔸പല കോണുകളിൽ നിന്നും മികച്ച അഭിപ്രായങ്ങളാണ് സീരീസിന് പൊതുവിൽ ലഭിച്ചിരുന്നത്, ഈ ഒരു കാരണം കൊണ്ട് തന്നെ നല്ല പ്രതീക്ഷയോടെയാണ് കാണാൻ ഇരുന്നതും. നല്ല രീതിയിൽ തന്നെ ത്രിൽ അടിപ്പിക്കുന്നുണ്ട് ഈ കഥ, അവസാനത്തെ എപ്പിസോഡ് ഒക്കെ ആവുമ്പോൾ ആദ്യത്തേത് നൽകിയ ബില്ഡപ്പിനോട് നീതി പുലർത്താൻ കഴിഞ്ഞോ എന്നത് സംശയം ആണെങ്കിലും കാണാൻ ഉള്ള വക ഇതിലെല്ലാം ഉണ്ട്. പിന്നെ പറഞ്ഞ് വന്നത് അത്യാവശ്യം ഡിസ്റ്റർബിങ് ആയ ഒന്നാണ് സീരീസിന്റെ കഥ എന്ന് മനസിലായി കാണുമല്ലോ, ഗോർ നല്ല രീതിയിൽ കാണിക്കുന്നില്ല എങ്കിലും സംഭാഷണങ്ങളിലൂടെ വെളിവാക്കുന്നുണ്ട്, ഓവർ വയലൻസ് പ്രശനം ഉള്ളവർ കാണാതിരിക്കുക.

Verdict : Good

DC Rating : 78/100

681. Sons Of Denmark (2019)

Director : Ulaa Salim

Genre : Drama

Rating : 6.6/10

Country : Denmark

Duration : 117 Minutes

🔸ഈ വെറുപ്പ് അല്ലെങ്കിൽ വിഷം എന്നൊക്കെ പറയാറുള്ള വികാരം നമ്മുടെ ഉള്ളിൽ എത്തിയാൽ, അത് ആരോടോ ആയിക്കോട്ടെ അല്ലെങ്കിൽ ഏതെങ്കിലും വിഭാഗക്കാരായ ആളുകളോട് ആയിക്കോട്ടെ, അത്യന്തം അപകടകരമായ അവസ്ഥയാണ്. ആ ഒരു വിത്ത് അവിടെ മുളച്ചാൽ, നമ്മൾ അറിഞ്ഞാലും ഇല്ലെങ്കിലും അതുണങ്ങാത്ത മുറിവ് പോലെ അവിടെ തന്നെ കിടക്കും, പിന്നീട് വെറുപ്പ് തോന്നിയ ആളോ കൂട്ടമോ ചെയ്യുന്ന ഓരോ കാര്യത്തിലും ആ വെറുപ്പിന്റെ അളവ് കൂട്ടാനുള്ള വക നമ്മൾ തന്നെ കണ്ടെത്തി എന്ന് പോലും ഉണ്ടാവാം. ഒടുവിൽ ഈ വെറുപ്പ് കൂടി കൂടി ഒരു സ്റ്റേജ് കഴിയുമ്പോൾ അവശേഷിക്കുന്നത് ഒരു കാരണം മാത്രം ആയിരിക്കും, പൊട്ടിത്തെറിക്കാൻ ഉള്ള കാരണം.

🔸നമ്മളീ കടന്ന് പോവുന്ന കാലത്തെ, രാഷ്ട്രീയ സാംസ്‌കാരിക ചുറ്റുപാടുകളിൽ അടുത്തിടെ അരങ്ങേറിയ, അരങ്ങേറി കൊണ്ടിരിക്കുന്ന, ലോകം ചർച്ച ചെയ്യുന്ന ചില വിഷയങ്ങളുമായി പല ഇടത്തും സാമ്യം പുലർത്തുന്നുണ്ട് ഈ ചിത്രം. നമുക്ക് ചുറ്റുമുള്ള രാഷ്ട്രീയത്തെയും രാഷ്ട്രീയ അന്തരീക്ഷത്തെയും തല്ക്കാലം വിട്ടുകൊണ്ട് സിനിമയിൽ കാണിക്കുന്ന കാര്യങ്ങളിലേക്ക് മാത്രമായി ഫോക്കസ് മാറ്റുകയാണ്, അതാണ് ഇവിടെ നമ്മുടെ വിഷയം എന്നത് കൊണ്ട് മാത്രം. കഥ അരങ്ങേറുന്നത് യൂറോപ്യൻ രാജ്യമായ ഡെന്മാർക്കിലാണ്, ഒട്ടും ആശ്വാസകരം അല്ലാത്ത ഒരു ഫെയ്‌സിലൂടെ ആണ് രാജ്യം കടന്ന് പോയി കൊണ്ടിരിക്കുന്നത്.

🔸അത്യാവശ്യം ബ്രൂട്ടൽ എന്നൊക്കെ വിശേഷിപ്പിക്കാവുന്ന രീതിയിലാണ് ചിത്രത്തിന്റെ ഓപ്പണിങ് ആക്റ്റ്, കുറച്ച് നാളുകളുടെ ഇടവേളയ്ക്ക് ശേഷം രണ്ട് കമിതാക്കൾ കണ്ട് മുട്ടുകയാണ്, സ്വാഭാവികമായും ഇന്റിമേറ്റ് ആയൊരു നിമിഷം ഒരുമിച്ച് ചിലവിട്ട ശേഷം അവർ പിരിയുകയാണ്, വീണ്ടും ഉടനെ കാണാം എന്ന വാക്ക് നൽകികൊണ്ട്, ഇരുവരും അല്പം തിരക്കുള്ളവരാണ്. ഈ കഥാപാത്രത്തോട് യാത്ര പറഞ്ഞ് നടന്നകലുന്ന സ്ത്രീ കഥാപാത്രം പോവുന്നത് ഒരു സബ്‌വേയിലേക്കാണ്, തൊട്ടടുത്ത നിമിഷം അവിടെ ഒരു സ്ഫോടനം അരങ്ങേറുന്നു, പിന്നീട് കേൾക്കുന്നത് ഭീകരമായ അലർച്ചയും മറ്റുമൊക്കെയാണ്.

🔸പല കാരണങ്ങൾ കൊണ്ടും ഈ ഒരു തീവ്രവാദ ആക്രമണം ഡെന്മാർക്കിന്റെ ചരിത്രത്തിൽ ഒരു റീസെറ്റ് ബട്ടൺ ആയിരുന്നെന്ന് പറയാം, അനവധി ആളുകൾക്കാണ് ജീവൻ നഷ്ടപ്പെട്ടത്. ഈ ഒരു ആക്രമണത്തിന്റെ പശ്ചാത്തലത്തിൽ ഒരു പരിധി വരെ ആളുകളുടെ ചിന്തയിലും മനോഭാവത്തിലും സമീപനത്തിലും വരെ മാറ്റം വന്നു എന്ന് പറയാം. ഇതിന് പിന്നാലെ ഒരു പുതിയ പാർട്ടി ഡെന്മാർക്കിൽ പിറവി കൊണ്ടു, എന്ന് മാത്രമല്ല വലിയൊരു ശതമാനം ആളുകൾ അവരോടൊപ്പം ചേർന്നു എന്ന് പറയാം, കാരണം അവർ നിലകൊണ്ടത് പലരും പറയാൻ മടിക്കുന്ന, എന്നാൽ ഉള്ളിൽ നീറി പുകയുന്ന ഒരു കാരണത്തിന് വേണ്ടിയാണ്.

🔸ഈ കാരണം എന്നത് വേറൊന്നുമല്ല, ഇന്ന് രാജ്യം നേരിടുന്ന പ്രശ്നങ്ങൾ എല്ലാം തന്നെ അഭയാർഥികളായി എത്തിയ ജന വിഭാഗം കാരണമാണ് എന്നൊരു ചിന്ത പൊതുവിലുണ്ട്, ഇവരെ നാട്ടിൽ നിന്ന് തുരത്തണം എന്നും തങ്ങളുടെ രാജ്യം വീണ്ടെടുക്കണം എന്ന ചിന്ത ഉള്ളവരും ഉണ്ട്, ഇവരോടൊപ്പമാണ് പുതിയ പാർട്ടി നില കൊള്ളുന്നത്. ഇവിടെ നിന്നും ആരംഭിക്കുന്ന ചേരി തിരിവ് താമസിയാതെ തന്നെ വയലെൻസിലേക്ക് കടക്കുകയാണ്, ചെറുത്തുനിൽക്കുക എന്ന മനോഭാവത്തിൽ ഒരു കൂട്ടരും പിടിച്ചെടുക്കുക എന്ന മെന്റാലിറ്റിയിൽ മറ്റൊരു കൂട്ടരും. ഈ ഒരു പശ്ചാത്തലത്തിലാണ് സൺസ് ഓഫ് ഡെന്മാർക്ക് കഥ പറഞ്ഞ് തുടങ്ങുന്നത്, വലിയ ഗൗരവമേറിയ ഒരു വിഷയം ആണെങ്കിലും രണ്ട് മൂന്ന് കഥാപാത്രങ്ങൾക്ക് ഫോക്കസ് നൽകി, അവരിലൂടെയാണ് ചിത്രം പുരോഗമിക്കുന്നത്.

Verdict : Very Good

DC Rating : 80/100