1107. There Is No Evil (2020)

Director : Mohammad Rasoulof

Genre : Drama

Rating : 7.4/10

Country : Iran

Duration : 151 Minutes

🔸തന്റെ സമകാലികരായ സംവിധായകരുമായി തട്ടിച്ച് നോക്കുമ്പോൾ രാഷ്ട്രീയ, സാമൂഹിക വിമർശനത്തിന്റെ കാര്യത്തിൽ യാതൊരു വിധ വിട്ടുവീഴ്ചയും കാണിക്കാത്ത ആളാണ് സംവിധായകൻ മുഹമ്മദ് റസൂലോഫ്. ഈ ഒരു കാരണം കൊണ്ട് തന്നെ ആവണം മാൻ ഓഫ് ഇന്റഗ്രിറ്റി എന്ന ചിത്രത്തിന് ശേഷം മറ്റൊരു സിനിമ സംവിധാനം ചെയ്യുന്നതിൽ നിന്ന് സർക്കാർ തന്നെ അജീവനാന്ത വിലക്ക് നൽകിയിരുന്നു, കുറച്ച് കാലം മുന്നേ. ഈ ഒരു കാരണം കൊണ്ട് തന്നെ സംവിധായകൻ രഹസ്യമായി ഷൂട്ട് ചെയ്യുകയായിരുന്നു ഈ നാല് ഭാഗ ചിത്രം.

🔸ഇത്തവണ സംവിധായകന്റെ വിമർശനത്തിന് ഇര ആയിരിക്കുന്നത് രാജ്യത്തെ ഇപ്പോഴും നില നിൽക്കുന്ന വധ ശിക്ഷ എന്ന സമ്പ്രദായമാണ്. നാല് കഥകളാണ് ചിത്രത്തിൽ സംവിധായകൻ ഉൾപ്പെടുത്തിയിരിക്കുന്നത്, ഇവ എല്ലാം തന്നെ സ്വന്തം ജീവിതവുമായി ഏതെങ്കിലും രീതിയിൽ ബന്ധപ്പെട്ടതാണ് എന്നും സംവിധായകൻ പറഞ്ഞിട്ടുണ്ടത്രേ. കഴിഞ്ഞ വർഷത്തെ ബെർലിൻ ഇന്റർനാഷണൽ ഫിലിം ഫെസ്റ്റിൽ ഉൾപ്പെടെ മികച്ച ചിത്രത്തിനുള്ള പുരസ്‌കാരം നേടിയ ചിത്രത്തിന്റെ നിലവാരം ഇഴ കീറി പരിശോധിക്കേണ്ട കാര്യം ഇല്ലെന്ന് അറിയാമല്ലോ.

🔸ഹർശത്ത് എന്ന ആരാചാറിലൂടെ ആണ് ആദ്യ ഭാഗം നമ്മൾ കാണുന്നത്, കുറ്റവാളികളെ പരലോകത്തേക്ക് അയക്കാൻ വിധിക്കപ്പെട്ട ആളാണ് എങ്കിൽ കൂടിയും ഈ ഭാഗം കൂടുതലായും ഫോക്കസ് ചെയ്യുന്നത് അയാളുടെ മാനസിക നിലയെ പറ്റിയും, ജീവിത രീതിയെ പറ്റിയും, കുടുംബ ജീവിതവും ഒക്കെയാണ്. ഒരു സ്റ്റാർട്ടർ എന്ന നിലയ്ക്ക് കാണാവുന്ന ഭാഗമാണ് ഈ ഒന്നാമത്തെ പോർഷൻ, തുടർന്ന് വരാനുള്ള പോർഷൻസിലേക്കുള്ള ടോൺ സെറ്റിങ് ഇവിടെ നടക്കുന്നുണ്ട്. തുടർന്നുള്ള മൂന്ന് കഥകളിൽ രണ്ടെണ്ണം തുടർ കഥകൾ കൂടിയാണ്.

🔸തനിക്ക് എതിരായി ഒരുപാട് ഘടകങ്ങൾ നിൽക്കുമ്പോഴും അവയൊന്നും പ്രൊഡകറ്റിന്റെ നിലവാരത്തെ ബാധിക്കാതിരിക്കാൻ സംവിധായകൻ എടുത്ത എഫെർട്ട് പ്രത്യേക പരാമർശം അർഹിക്കുന്നതാണ്, ഈ ഒരു സംരംഭത്തിന്റെ പിന്നാമ്പുറ കഥകളും പൊളിറ്റിക്കൽ സിനറിയോസും അറിയാത്ത ഒരാൾ തീർച്ചയായും സിനിമയിൽ അങ്ങനെ ഒന്നും തന്നെ നോട്ടീസ് ചെയ്യില്ല എന്നത് ഉറപ്പിച്ച് പറയാവുന്ന കാര്യമാണ്. നല്ലൊരു ചിത്രമാണ് തേർ ഈസ് നോ ഈവിൽ, ഒരുപക്ഷെ കഴിഞ്ഞ വർഷം ഇറങ്ങിയതിൽ മികച്ചവയിൽ ഒന്ന്, അപ്പൊ കാണാൻ ശ്രമിക്കുക.

Verdict : Very Good

DC Rating : 4.25/5 

1106. This Is Not A Burial, It's A Resurrection (2019)

Director : Lemohang Jeremiah Mosese

Genre : Drama

Rating : 7.3/10

Country : Lesotho

Duration : 119 Minutes

🔸ആഫ്രിക്കയുടെ തെക്കേ ഭാഗത്തായി സൗത്ത് ആഫ്രിക്കയ്ക്ക് അടുത്ത് ലെസോതോ എന്നൊരു രാജ്യം ഉണ്ടെന്ന അറിവ് ലഭിച്ചത് ഈ ചിത്രത്തെ കുറിച്ചുള്ള വാർത്ത ആദ്യമായി അറിഞ്ഞപ്പോഴാണ്. പ്രസ്തുത രാജ്യത്തിൻറെ ആദ്യ ഓസ്കർ എൻട്രി കൂടിയാണ് ഈ ചിത്രം, സ്വാഭാവികമായും ഒരു ദരിദ്ര രാജ്യമാണ് ലെസോതോ. കൃഷി എന്നത് ഒഴിച്ചാൽ കൂടുതൽ ആളുകളും മൈനുകളിലും മറ്റും ജോലി ചെയ്യുന്ന, ആരാജകത്വവും നിസ്സഹായതയും എല്ലാം ഭീകരമാം വിധം നില കൊള്ളുന്ന ഒരു രാജ്യം. ഈ രാജ്യമാണ് നമ്മുടെ കഥാ പശ്ചാത്തലം.

🔸മെന്റോവ എന്ന എൺപതുകാരി ആണ് നമ്മുടെ പ്രധാന കഥാപാത്രം, ഉറ്റവരും ഉടയവരും ആയി ആരും തന്നെ ബാക്കിയില്ലാത്ത, അവരുടെ ഭാഷയിൽ പറയുക ആണെങ്കിൽ മരണം പോലും മറന്ന് പോയ ഒരു കഥാപാത്രം. അയൽ രാജ്യമായ സൗത്ത് ആഫ്രിക്കയിലെ ഒരു ഖനിയിൽ ജോലി നോക്കുന്ന മകൻ മാത്രമാണ് മെന്റൊവയ്ക്ക് സ്വന്തം എന്ന് പറയാനുള്ള ഒരേയൊരു ബന്ധു. അവരുടെ ഭർത്താവ് വർഷങ്ങൾക്ക് മുന്നേ മരണം അടഞ്ഞിരുന്നു. ആ വഴിയേ തന്നെ മെന്റൊവയുടെ മകളും പേര കുട്ടിയും വിട പറഞ്ഞു പോയി.

🔸ഈ നഷ്ടങ്ങൾ എല്ലാം സംഭവിച്ചപ്പോഴും മെന്റൊവ തകർന്നില്ല, ദൈവത്തെ വിളിച്ച് കരഞ്ഞില്ല, വിധിയെ പഴി ചാരിയില്ല. ബാക്കി ഉണ്ടായിരുന്ന ഒരേയൊരു മകൻ മരിച്ചപ്പോഴും ഇതൊന്നും ഉണ്ടായില്ല, അവന്റേതെന്നും പറഞ്ഞ് ബാക്കിയുള്ള വസ്തുവകകൾ വീട്ടിൽ എത്തിയപ്പോഴും അവർ തകർന്നില്ല, ഒരുവേള ആ വികാരം അവർ മറന്ന് പോയോ എന്ന് പോലും സംശയം ആയിരുന്നു. ഇനി ഒന്നും ബാക്കിയില്ല എന്ന തിരിച്ചറിവിൽ മരണത്തിന് കീഴടങ്ങാൻ മെന്റൊവ തയാറാവുമ്പോഴാണ് പുതിയൊരു അറിയിപ്പ് അവരെ തേടി വരുന്നത്.

🔸മെന്റൊവ താമസിക്കുന്ന പ്രദേശം ഒരു ഡാം ആയി മാറ്റുകയാണ് എന്നും, താമസക്കാർ എല്ലാവരും പിരിഞ്ഞ് പോവണം എന്നും ആയിരുന്നു ആ അറിയിപ്പ്. സ്വന്തം എന്ന അർത്ഥത്തിൽ ഇനി ബാക്കിയുള്ളത് പൂർവികരുടെയും, ശേഷം വന്നവരുടെയും ഒക്കെ കുഴിമാടങ്ങൾ മാത്രമാണ്, അത് വിട്ട് പോവുക എന്നത് എളുപ്പവുമല്ല. ഈ അത്യന്തം പേഴ്സണൽ ആയ എന്നാൽ അതിനപ്പുറം മറ്റ് പലതിലേക്കും കടന്ന് ചെല്ലുന്ന ഒന്നാണ് ചിത്രത്തിന്റെ കഥ. അല്പം സ്ലോ ആയാണ് പോവുന്നത് എങ്കിലും ചിത്രം തരുന്നൊരു സംപ്ത്രിപ്തി ഉണ്ട്, അത് കണ്ട് അനുഭവിച്ച് തന്നെ അറിയേണ്ടതാണ്.

Verdict : Must Watch

DC Rating : 4.5/5 

1105. Pieces Of A Woman (2020)

Director : Kornél Mundruczó

Genre : Drama

Rating : 7.1/10

Country : Canada

Duration : 128 Minutes

🔸ഷിയാ ലെബോഫ് എന്ന നടൻ ടാലന്റഡ് ആയ ഒരു ആക്ടർ ആണെന്ന കാര്യത്തിൽ സംശയം ഏതും ഇല്ല, എന്നാൽ സ്പിൽബർഗ് ഉൾപ്പെടെ ഉള്ള സംവിധായകരെയും പല പ്രമുഖ സ്റ്റുഡിയോസിനെയും ഒക്കെ വിമർശിച്ച സംഭവങ്ങൾ കാരണം കുറച്ച് നാളുകളായി ബിഗ് സ്കെയിൽ സിനിമകളിൽ നിന്നും ടിയാന് അപ്രഖ്യാപിത വിലക്ക് ഉണ്ടെന്നൊരു റൂമർ മുന്നേ കേട്ടിരുന്നു. അത് ശെരി വെക്കുംവിധം കുറച്ച് നാളുകളായി ഇൻഡി സിനിമകളിലാണ് ഷിയാ ആക്റ്റീവ് ആയി നിൽക്കുന്നത്, എന്നാൽ പേഴ്സണലി ഇതൊരു നല്ല തീരുമാനം ആയാണ് അനുഭവപ്പെട്ടത്. കഴിഞ്ഞ വർഷം പുറത്തിറങ്ങിയ ഹണി ബോയ്ക്ക് ശേഷം പ്രസ്തുത നടന് അഭിമാനിക്കാൻ കഴിയുന്ന ഒരു സിനിമ കൂടി എത്തിയിരിക്കുകയാണ്, പീസസ് ഓഫ് വുമൺ എന്ന പേരിൽ.

🔸പീസസ് ഓഫ് വുമൺ എന്ന ചിത്രത്തിന്റെ ഹൈലൈറ്റ് ഓപ്പണിങ് ആക്റ്റിലെ ഡെലിവറി സീനാണ്. നായികാ നായകന്മാരും കെയർ ടേക്കർ ആയ യുവതിയും ഉൾപ്പെടെ മൂന്നേ മൂന്ന് പേർ മാത്രം സ്‌ക്രീനിൽ ഉള്ള ഈ സീൻ ഉദ്ദേശം പത്ത് മിനുട്ടോളം ലെങ്ത് ഉള്ളതും, കഴിയുന്നത് വരെ കാഴ്ചക്കാരനെ നല്ല തോതിൽ ടെൻഷൻ അടിപ്പിക്കുന്നതുമാണ്. ഈ വളരെ ഇന്റെൻസ് ആയ സീൻ തന്നെയാണ് പിന്നീട് അങ്ങോട്ടുള്ള കഥയെ മുഴുവൻ ഡ്രൈവ് ചെയ്ത് കൊണ്ട് പോവുന്നതും, ചുരുക്കി പറഞ്ഞാൽ സിനിമയുടെ മെയ്ക് ഓർ ബ്രെയ്ക് മോമെന്റ് ആയിരുന്നെന്ന് പറയാം.

🔸കൺസ്ട്രക്ഷൻ തൊഴിലാളി ആയ ഷോണും ഓഫീസ് ജോലിക്കാരിയായ മാർത്ഥയും ഇഷ്ടപ്പെട്ട് സ്വയം കല്യാണം കഴിച്ചവരാണ്, മാർഥയുടെ പണക്കാരിയായ അമ്മയ്ക്ക് ഈ ബന്ധത്തിൽ അന്നും ഇന്നും താല്പര്യം ഏതുമില്ല. ദമ്പതികൾ ഇരുവരും ഇന്ന് തങ്ങളുടെ മകളെ ഭൂമിയിലേക്ക് വരവേൽക്കാൻ തയാറായിരിക്കുകയാണ്, നിർഭാഗ്യവശാൽ ആ സന്ദർഭം ഇരുവരും ഒട്ടും പ്രതീക്ഷിക്കാത്ത, പ്രിപ്പേർഡ് അല്ലാത്ത ഒരു സമയത്ത് കടന്ന് വരികയാണ്. ഈ ടൈം ഇൽ നിർഭാഗ്യകരമായ ചില സംഭവങ്ങൾ അരങ്ങേറുന്നതും തുടർന്നുണ്ടാവുന്ന സംഭവങ്ങളും എല്ലാമാണ് ചിത്രം.

🔸വിരലിൽ എണ്ണാവുന്ന കഥാപാത്രങ്ങൾ മാത്രമേയുള്ളൂ ഈ ചിത്രത്തിൽ, അവർക്ക് എല്ലാവർക്കും തന്നെ നല്ല ആർക്കുകളും പേ ഓഫുകളും എല്ലാം ചിത്രം നൽകുന്നുണ്ട്. വളരെ തൃപ്തികരമായ ഒരു എൻഡിങ്ങും ചിത്രത്തിനുണ്ട്, ഒരുപക്ഷെ അടുത്ത കാലത്ത് കണ്ടതിൽ നന്നായി ഇഷ്ട്ടപ്പെട്ടവയിൽ ഒന്ന്. മികച്ച പെർഫോമൻസും, സ്കോറും, ഛായാഗ്രഹണവും എല്ലാം സിനിമയുടെ മറ്റ് പ്രത്യേകതകളിൽ ചിലതാണ്, അപ്പൊ കാണാൻ ശ്രമിക്കുക, നഷ്ടം ആവില്ല.

Verdict : Very Good

DC Rating : 4/5 

1104. A Prophet (2009)

Director : Jacques Audiard

Genre : Crime

Rating : 7.9/10

Country : France

Duration : 156 Minutes

🔸എ പ്രൊഫറ്റ് എന്ന ഫ്രഞ്ച് ചിത്രത്തെ ഒരു ജോണറിൽ മാത്രമായി ഒതുക്കി നിർത്താൻ ബുദ്ധിമുട്ടാണ്, പത്തൊൻപത് വയസ്സ് പരിധിയിൽ ഉള്ള ഒരാളുടെ കഥ ആയതിനാൽ തന്നെ വേണമെങ്കിൽ ഒരു കമിങ് ഓഫ് ഏജ് ചിത്രമായി പരിഗണിക്കാം, ഏറെക്കുറെ തൊണ്ണൂറ് ശതമാനം സമയവും ജയിലിന് അകത്ത് കഥ അരങ്ങേറുന്നതിനാൽ ഒരു പ്രിസൺ ആക്ഷൻ ക്രൈം ചിത്രമായും കണക്കാക്കാം, ചില ഇടങ്ങളിൽ ഡ്രമാറ്റിക് പരിവേഷവും ചിത്രം എടുക്കുന്നുണ്ട്. ഈ എല്ലാ ഭാഗങ്ങളിലും നല്ല നിലവാരം ചിത്രം പുലർത്തുന്നുണ്ട് എന്നതാണ് എടുത്ത് പറയേണ്ട വസ്തുത, അത് തന്നെയാണ് ചിത്രത്തെ സ്പെഷ്യൽ ആക്കുന്നതും.

🔸പരവാചകൻ അല്ലെങ്കിൽ കാര്യങ്ങൾ മുൻകൂട്ടി മനസിലാക്കാൻ കഴിവുള്ള ആൾ എന്നൊക്കെയുള്ള അർത്ഥമാണ് ചിത്രത്തിന്റേത്, മാലിക് എന്ന നമ്മുടെ നായക കഥാപാത്രം ഒരു പത്തൊൻപത് വയസുകാരനാണ്, ബന്ധുക്കൾ എന്ന് പറയാൻ ആരും ഇല്ലാത്ത ഈ കഴിഞ്ഞ കാലം മുഴുവനും എന്നവണ്ണം ജുവനൈൽ ഹോമിൽ ചിലവഴിച്ച ഒരാൾ. ഫ്രാൻസിലാണ് ജനിച്ച് വളർന്നത് എങ്കിലും അറേബ്യൻ മുസ്‌ലിം പാരമ്പര്യമാണ് അയാളുടേത്, ഈ വസ്തുതയ്ക്ക് ചിത്രത്തിൽ വലിയ പ്രാധാന്യവുമുണ്ട്.

🔸ആറ് വർഷത്തെ തടവ് ശിക്ഷയിലാണ് മാലിക് ജയിലിൽ എത്തുന്നത്, സ്വാഭാവികമായും ഒരു പുതുക്കകാരനെ സംബന്ധിച്ചിടത്തോളം ജയിൽ ഒരു നരകം തന്നെയാണ്, കഠിനമായ അനുഭവങ്ങളിൽ കൂടിയാണ് മാലിക് കടന്ന് പോവുന്നതും. വേറൊരു കാര്യം കൊണ്ട് കൂടി ഈ ജയിൽ കുപ്രസിദ്ധി ആർജിച്ചതാണ്, പ്രശസ്തരായ കോർസിക്കൻ ഗ്യാങിലെ പല പ്രമുഖരും ഇന്ന് ആ ജയിലിലുണ്ട്, അവർ ആണെങ്കിൽ മറ്റ് അന്തേവാസികളായ മുസ്ലിംസും ആയിട്ട് അത്ര നല്ല ബന്ധത്തിലും അല്ല. സ്വാഭാവികമായും രണ്ട് ഗ്രൂപ്പുകളായി തിരിഞ്ഞ് ഒരു യുദ്ധം അവിടെ പുകയുന്നുണ്ട്, ഇവർക്കിടയിൽ.

🔸ഈ ഒരു ഗ്യാങ് വാറിനും മറ്റുമൊക്കെ ഇടയിലേക്ക് മാലിക് കടന്ന് വരുന്നതും പിന്നീട് ഒരു നിർണ്ണായക സാന്നിധ്യമായി മാറുന്നതും ഒക്കെയാണ് ചിത്രത്തിന്റെ പ്ലോട്ട്. നല്ല ഒരു ചിത്രം തന്നെയാണ് എ പ്രൊഫറ്റ്, ഒരുപക്ഷെ പ്രസ്തുത ജോണറിൽ ഈ അടുത്ത് കണ്ട ഏറ്റവും മികച്ച ചിത്രങ്ങളിൽ ഒന്ന്, ഓർമയിൽ കണ്ട ഏറ്റവും ബ്രൂട്ടൽ, ഇന്റെൻസ് കൊലപാതക രംഗങ്ങളിൽ ഒന്നും ഈ ചിത്രത്തിലാണ്. താല്പര്യം ഉണ്ടെങ്കിൽ ധൈര്യമായി സമീപിക്കാവുന്നതാണ് ഈ ചിത്രത്തെ, ചിലവഴിക്കുന്ന സമയത്തിന് വേർതി ആയ സാധനം ഇവിടുണ്ട്.

Verdict : Very Good

DC Rating : 4.25/5 

1103. Walk On Water (2004)

Director : Eytan Fox

Genre : Drama

Rating : 7.3/10

Country : Israel

Duration : 99 Minutes

🔸രണ്ടാം ലോക മഹായുദ്ധത്തിന്റെ ശേഷിപ്പുകൾ അന്വേഷിച്ച് കൊണ്ടുള്ള ഒരു സിനിമ കൂടി, ഇത്തവണ ഇസ്രായേലിൽ നിന്നും, വാക്ക് ഓൺ വാട്ടർ എന്ന ചിത്രം. നാസി ബാക്ക്ഗ്രൗണ്ട്, ഫാസിസ്റ്റ് ഭരണത്തിന്റെ ബാക്കി പത്രം എന്നിവയൊക്കെ കഥയിൽ ഫാക്റ്റർ ആയി വരുന്നുണ്ട് എങ്കിലും സിനിമയുടെ പ്രൈം ഫോക്കസ് രണ്ട് ചെറുപ്പക്കാർ തമ്മിലുള്ള സൗഹൃദവും, യാത്രയും ഒക്കെ തന്നെയാണ്. രണ്ടാം ലോകമഹായുദ്ധം അവസാനിച്ചതിന് ശേഷം പതിറ്റാണ്ടുകൾക്ക് ഇപ്പുറമാണ് സിനിമ ആരംഭിക്കുന്നത്, ഇയാൽ എന്ന മൊസാദ് ഏജന്റ് ആണ് നമ്മുടെ പ്രധാന കഥാപാത്രം.

🔸ഇസ്രയേലിന്റെ ഗവണ്മെന്റ് സെക്യുരിറ്റി സെർവീസിൽ ഉദ്യോഗസ്ഥൻ ആയിരുന്നു ഇയാൽ, ഒരു പ്രൊഫഷണൽ ഹിറ്റ്മാൻ കൂടിയായ ടിയാൻ തന്റെ കർമ്മ മണ്ഡലത്തിൽ അപാരമായ കഴിവും എഫഷ്യൻസിയും എല്ലാം പ്രകടിപ്പിച്ച ഒരാൾ കൂടി ആയിരുന്നു. ഇസ്രയേലിന്റെ സെക്യുരിറ്റി കൊമ്പ്രമൈസ് ചെയ്യുന്നവരെ ഇല്ലായ്മ ചെയ്യുക എന്നതായിരുന്നു ഇയാലിന്റെ പ്രധാന ജോലികളിൽ ഒന്ന്. ഇങ്ങനെ പോയികൊണ്ടിരുന്ന ഇയാലിന്റെ ജീവിതത്തിൽ ഒരു പേഴ്സണൽ ട്രാജഡി അരങ്ങേറുമ്പോഴാണ് ഒരു മാറ്റം അയാളെ സംബന്ധിച്ച് അനിവാര്യം ആവുന്നത്.

🔸അയാളുടെ മേൽ ഉദ്യോഗസ്ഥർ മറ്റൊരു ജോലിയിലേക്ക് അയാളെ നിയമിക്കുകയാണ്, മുൻകാല മിഷ്ൻസിൽ നിന്നും വ്യത്യസ്തമായി താരമത്യേന എളുപ്പം എന്ന് തോന്നിക്കുന്ന ഒരു ജോലി. സംഭവം വേറൊന്നുമല്ല, ജർമനിയിൽ എവിടെയോ ഒരു പഴയ കാല നാസി വാർ ക്രിമിനൽ ഒളിച്ച് താമസിക്കുന്നുണ്ട്, അയാളെ കണ്ട് പിടിക്കുക എന്നതാണ് ദൗത്യം. നാസി ഭരണ കാലത്ത് അത്യാവശ്യം കുപ്രസിദ്ധി ആർജിച്ച ഒരാളെ ആണ് കണ്ടെത്തേടത്, സ്വാഭാവികമായും പ്രായം ഏറിയ ആള് ആയിരിക്കണം, സ്വന്തം മകന്റെ സംരക്ഷണത്തിൽ ഒളിച്ച് താമസിക്കുകയാണ് എന്നതാണ് കിട്ടിയ വിവരം.

🔸അയാളിലേക്ക് എത്തുക എന്നത് അത്ര എളുപ്പമുള്ള ഒരു ടാസ്ക് അല്ല, അതിന് രഹസ്യാന്വേഷണ വിഭാഗം കണ്ടെത്തിയ വഴി ടിയാന്റെ ചെറുമക്കളുമായി സൗഹൃദം സൃഷ്ടിക്കുക എന്നതാണ്, ഈ ഒരു പരിപാടിക്കാണ് ഇയാൽ നിയോഗിക്കപ്പെടുന്നത്. ഈ കഥാപാത്രങ്ങൾ ഉൾപ്പെട്ട ഒരു റോഡ് മൂവി പോലെയാണ് സിനിമ പിന്നീട് പുരോഗമിക്കുന്നത്. നല്ല ഒന്നാംക്‌ളാസ്സ് കഥയും, കഥാപാത്രങ്ങളും, പേ ഓഫും ഒക്കെ കൂടി ചേരുമ്പോൾ നല്ല ഒരനുഭവമായി മാറുന്നുണ്ട് വാക്ക് ഓൺ വാട്ടർ എന്ന ചിത്രം, സമയം ഉണ്ടെങ്കിൽ കാണാൻ ശ്രമിക്കുക.

Verdict : Very Good

DC Rating : 4/5

1102. Those Who Wish Me Dead (2021)

Director : Taylor Sheridan

Genre : Action

Rating : 6.3/10

Country : USA

Duration : 100 Minutes

🔸ടയ്‌ലർ ശെരിദാനിന്റെ വിൻഡ് റിവർ എന്ന ചിത്രം കഴിഞ്ഞ പതിറ്റാണ്ടിൽ കണ്ട മികച്ച സിനിമകളിൽ ഒന്ന് ആയിരുന്നു, കാടിന്റെ ഒക്കെ പശ്ചാത്തലത്തിൽ സംവിധായകൻ ഒരു ആക്ഷൻ ത്രില്ലർ ഒരുക്കുന്നു എന്ന വാർത്ത ആ ഒരു കാരണം കൊണ്ട് തന്നെ പ്രതീക്ഷ ഉയർത്തുന്ന ഒന്നായിരുന്നു. സർവൈവൽ എലെമെന്റുകൾ ഉൾപ്പെടുത്തിയ ട്രെയിലറും, നല്ല കാസ്റ്റിങ്ങും എല്ലാം ഈ ഒരു പ്രതീക്ഷ വർധിപ്പിച്ചേ ഉള്ളൂ താനും. ഈ ഫാക്ടർസ് ഒക്കെ മാറ്റിവെച്ച് ചിത്രം പ്രതീക്ഷിച്ച നിലവാരം കാത്ത് സൂക്ഷിച്ചിട്ടുണ്ടോ എന്നതാണ് ചോദ്യം.

🔸ഹന്ന എന്ന നായികാ കഥാപാത്രത്തെ ഫോക്കസ് ചെയ്ത് കൊണ്ടാണ് കഥ പറയുന്നത്, കഥയിലെ പ്രിമോഡോണ മറ്റൊരു കഥാപാത്രം ആണെങ്കിൽ കൂടിയും റിലേറ്റ് ചെയ്യിക്കുന്നത് ഹന്നായിലൂടെ ആണ്. ഫോറസ്റ്റ് സെർവീസിൽ ഫയർ ഫൈറ്റർ ആയിരുന്നു ഹന്ന, തന്റെ പ്രവർത്തന മണ്ഡലത്തിൽ മികച്ച എഫിഷ്യൻസിയും താല്പര്യവും എല്ലാം കീപ്പ് ചെയ്തിരുന്നു, കുറച്ച് കാലം മുന്നേ വരെ. എന്നാൽ മോണ്ടാന ഫോറെസ്റ്റ് റിസർവിൽ ഉണ്ടായ ഒരു തീ പിടുത്തം കൈകാര്യം ചെയ്യുന്നതിൽ ഹന്ന വരുത്തിയ പിഴവ് കവർന്നെടുത്തത് നിസ്സഹായരായ മൂന്നോളം കുട്ടികളുടെ ജീവനാണ്. ഈ ഒരു ആഘാതത്തിൽ നിന്നും അവർ കര കയറിയിട്ടില്ല ഇതുവരെ.

🔸ഇത്രയും പറഞ്ഞത് കേന്ദ്ര കഥാപാത്രത്തിന്റെ ഒരു ബാക്ക്ഗ്രൗണ്ട് മാത്രമാണ്, കഥയുമായി ചേർന്ന് നിൽക്കുന്ന ഒന്നല്ല ഈ സബ് പ്ലോട്ട്. കഥയിലേക്ക് വരിക ആണെങ്കിൽ ഒരു കഥാപാത്രത്തെ കൊല്ലാനായി ഉറപ്പിച്ച് മോണ്ടാനാ കാടുകളിലേക്ക് എത്തുന്ന രണ്ട് അസാസിൻസ് ഉണ്ട്, അവർ ആണെങ്കിൽ ഈ കൊല്ലൽ കലാപരിപാടി ഇന്നോ ഇന്നലെയോ തുടങ്ങിയതല്ല, ചോര കണ്ട് അറപ്പ് മാറിയ ടൈപ്പ് കഥാപാത്രങ്ങളാണ്. കൊല്ലാനും സംരക്ഷിക്കാനുമായി രണ്ട് കൂട്ടർ തമ്മിലുള്ള കാടിന് ഉള്ളിലെ ഒരു ക്യാറ്റ് ആൻഡ് മൗസ് ഗെയിം ഒക്കെയായി കഥ മാറുന്നുണ്ട്.

🔸പേഴ്സണലി പ്രതീക്ഷിച്ചത്ര മികച്ച ഒരനുഭവം ഒന്നും ഈ ചിത്രത്തിലൂടെ ലഭിച്ചില്ല. പെർഫോ ആയാലും കഥ ആയാലും അവതരണം ആയാലും ക്ളൈമാക്സ് പേ ഓഫ് ആയാലും ഒരു ആവറേജ് ഫീൽ മാത്രമേ എല്ലാ ഇടത്ത് നിന്നും ലഭിച്ചുള്ളൂ. ഇത്തരം കഥാഗതി ആവശ്യപ്പെടുന്ന ഒരു ടെൻഷനോ, റിലീഫോ പോലും ലഭിച്ചില്ല എന്നത് നിരാശാജനകം തന്നെ ആയിരുന്നു. ലൊക്കേഷൻസും, ഛായാഗ്രഹണവും നന്നായിരുന്നു, ആക്ഷൻ ജോണർ ഇഷ്ട്ടം ഉള്ളവർക്ക് വെറുതെ കണ്ട് വിടാം, അത്ര മാത്രം.

Verdict : Average

DC Rating : 2.5/5 

1101. The Woman In The Window (2021)

Director : Joe Wright

Genre : Mystery

Rating : 7/10

Country : USA

Duration : 101 Minutes

🔸ആൽഫ്രെഡ് ഹിച്കോക്കിന്റെ റിയർ വ്യൂ എന്ന സിനിമ നമ്മൾ മിക്കവരും കണ്ടതാണ്, കാലിന് വയ്യാതെ ഒരു അപ്പാർട്ട്മെന്റിൽ ഒറ്റപ്പെട്ട് കഴിയുന്ന നായക കഥാപാത്രം തന്റെ എതിരെ ഉള്ള ഫ്ളാറ്റിൽ നടക്കുന്ന ഒരു കുറ്റകൃത്യം നേരിട്ട് കാണുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ആ ചിത്രം. ഈ ഒരു പ്ലോട്ട് അല്ലെങ്കിൽ കൂടിയും ഐഡിയ കടം എടുത്ത് കുള്ളന്റെ ഭാര്യ എന്നൊരു ഷോർട്ട് നമ്മുടെ മലയാളത്തിലും വന്നിട്ടുണ്ട്, രണ്ടും പേഴ്സണലി ഇഷ്ട്ടപ്പെട്ട ചിത്രങ്ങൾ തന്നെ ആയിരുന്നു. ഈ ഒരു ആശയം തന്നെയാണ് വുമൺ ഇൻ ദി വിൻഡോ എന്ന ചിത്രത്തിന്റേതും.

🔸അന്യായമായ ഒരു കാസ്റ്റ് ആണ് ചിത്രത്തിന്റേത്, ഈ ജനറേഷനിലെ ഇഷ്ട്ട നായികയായ ആമി ആഡംസ്, ഗാരി ഓൾഡ്മാൻ, ആന്തണി മാക്കി, ജെന്നിഫർ ജെയ്‌സൺ ലെ, ജൂലിയൻ മൂർ തുടങ്ങി എ ക്‌ളാസ് ആക്റ്റേഴ്സിനെ തന്നെ അണി നിരത്താൻ പിന്നണി പ്രവർത്തകർക്ക് കഴിഞ്ഞിട്ടുണ്ട്. പക്ഷെ ഏറെക്കുറെ ഈ കാസ്റ്റ് തന്നെ പറ്റിക്കലാണ്, ആമി ആഡംസിന് പുറമെ ആർക്കും തന്നെ യാതൊരു സ്പെയ്സും ചിത്രത്തിൽ ഇല്ല, വേണമെങ്കിൽ അത് കഥ പോവുന്ന വഴി അങ്ങനെ ആയത് കൊണ്ട് ആ രീതിയിൽ ആയതാണ് എന്ന് പറഞ്ഞൊഴിയാം, അപ്പോഴും പ്രശ്നങ്ങൾ ബാക്കിയാണ്.

🔸ചില ശാരീരിക മാനസിക പ്രശ്നങ്ങൾ കാരണം വീടിന് വെളിയിൽ ഇറങ്ങാൻ കഴിയാതെ അപ്പാർട്ട്മെന്റിൽ ജീവിതം തള്ളി നീക്കുകയാണ് ആമിയുടെ അന്ന എന്ന കഥാപാത്രം. അന്നയുടെ വീടിന് എതിർ വശത്തായി അച്ഛനും അമ്മയും പതിനഞ്ച് വയസുകാരൻ മകനും അടങ്ങുന്ന റസ്സൽ കുടുംബം താമസത്തിന് എത്തുന്നിടത്താണ് പ്രശ്നങ്ങൾ ആരംഭിക്കുന്നത്. വഴക്കും തല്ലും ഒക്കെ സ്ഥിരം സംഭവമായ അവിടെ അരങ്ങേറുന്ന ഒരു സംഭവത്തിന് ആമി ദൃക്‌സാക്ഷി ആവുകയാണ്, ഇവിടെ നിന്ന് കഥ ട്രാക്ക് മാറുകയാണ്, പിന്നീട് അരങ്ങേറുന്ന സംഭവങ്ങളാണ് ഒന്നേ മുക്കാൽ മണിക്കൂർ സമയം ദൈർഘ്യം ഉള്ള ചിത്രം.

🔸ഈ താരമത്യേന ചെറിയ റൺ ടൈം ആയിട്ട് പോലും തേർഡ് ആക്റ്റ് എത്തുമ്പോഴേക്ക് മിസ്റ്ററിയും തെളിയണ്ട, ഉത്തരവും അറിയേണ്ട ഏതെങ്കിലും രീതിയിൽ ഒന്ന് കഴിഞ്ഞാൽ മതി എന്നൊരു ചിന്ത മാനസിൽ വരുന്നത് അത്ര ഗുണകരമല്ല. അനാവശ്യമായ സ്പൂൺ ഫീഡിങ്ങും, സൈഡ് കഥാപാത്രങ്ങളും, അനാവശ്യ സംഭാഷണങ്ങളും എല്ലാം ചിത്രത്തെ ഒരുപാട് ദോഷം ചെയ്തിട്ടുണ്ട്, ആമിയുടെ നല്ല പ്രകടനം പോലും ശ്രദ്ധ പിടിച്ച് നിർത്തുന്നില്ല. ഒരു തവണ കണ്ട് നോക്കു എന്ന് പറയാൻ പോലും യാതൊന്നും ഇല്ലാത്ത എന്തിനോ വേണ്ടി തിളച്ച ഒരു പടം മാത്രമായി മാറുന്നുണ്ട് വുമൺ ഇൻ തി വിൻഡോ.

Verdict : Avoidable

DC Rating : 1.5/5 

1100. Nomadland (2020)

Director : Chloé Zhao

Genre : Drama

Rating : 7.4/10

Country : USA

Duration : 111 Minutes

🔸നോമാഡ് എന്ന വാക്കിന് നാടോടി എന്നൊക്കെയാണ് അർഥം, ഒരിടത്ത് മാത്രമായി ഒതുങ്ങി നിൽക്കാതെ ലോകമേ തന്റെ വീട് എന്ന മട്ടിൽ അലഞ്ഞ് തിരിഞ്ഞ് ജീവിക്കുന്ന, അതിൽ ആഹ്ലാദവും സന്തോഷവും എല്ലാത്തിനും ഉപരി സമാധാനവും എല്ലാം കണ്ടെത്തുന്ന ഒരു വിഭാഗം. വെനീസ് ഫെസ്റ്റിൽ ഗോൾഡൻ ലയൺ പുരസ്‌കാരം നേടിയ നിമിഷം തൊട്ട് തന്നെ മിക്ക സിനിമാ ആസ്വാദകരുടെയും മോസ്റ്റ് ആന്റിസിപ്പേട്ടഡ് സിനിമകളിൽ ഒന്നായ ഈ ചിത്രം ഓസ്കർ വേദികളിൽ ഒക്കെ കരസ്ഥമാക്കിയ വിജയം നമ്മൾ കണ്ടതുമാണ്, തീർച്ചയായും നല്ലൊരു സിനിമ തന്നെയാണ് നോമ്മാഡ്ലാൻഡ്, അതിൽ സംശയം ഏതും വേണ്ട.

🔸അറുപത് വയസ്സ് കഴിഞ്ഞ ഫേൺ എന്ന കഥാപാത്രത്തെയാണ് ഫ്രാൻസസ് മാക്ഡോർമാൻഡ് അവതരിപ്പിച്ചിരിക്കുന്നത്, ത്രീ ബില്ബോർഡ്സ് പോലെ സ്‌ട്രൈക്കിങ് ആയ ക്യാരക്റ്റർ ഒന്നും അല്ലെങ്കിലും ഈ ജെനെറേഷനിലെ ഏറ്റവും മികച്ച നടിമാരിൽ ഒരാൾക്ക് തീർച്ചയായും അഭിമാനിക്കാവുന്ന ഒന്ന് തന്നെയാണ് ഈ കഥാപാത്രം. സാമ്പത്തിക മാന്ദ്യം അമേരിക്കയെ പിടിച്ചുലച്ചതിന് പിന്നാലെ സർവവും നഷ്ട്ടപ്പെട്ട ആളാണ് ഫേൺ, ജോലി വരുമാന മാർഗം പ്രതീക്ഷ എന്നതിനോടൊപ്പം താമസിയാതെ തന്നെ ഭർത്താവിനെയും ഫെർണിന് നഷ്ട്ടപ്പെട്ടു. എല്ലാം നഷ്ടപ്പെട്ടാൽ പിന്നെ ഒന്നും നോക്കാതെ ജീവിക്കാൻ ഒരു ധൈര്യമാണ് എന്ന് ഏതോ സിനിമയിൽ ആരോ പറഞ്ഞത് പോലെ തന്റെ വസ്തുവകകൾ എല്ലാം വിറ്റു പെറുക്കി ഫേൺ ഒരു നാടോടിക്ക് സമാനമായ ജീവിതം ആരംഭിക്കുകയാണ്.

🔸ഈ ഒരു ബാക്ക്ഗ്രൗണ്ടിലാണ് സിനിമ കഥ പറയുന്നത്, ഈ നാടോടി ജീവിതത്തിനിടെ ഫേൺ കാണുന്ന കാഴ്ചകൾ, പരിചയപ്പെടുന്ന മുഖങ്ങൾ, നേടുന്ന അനുഭവങ്ങൾ എന്നിവയൊക്കെ ചിത്രം സ്ക്രീനിലേക്ക് എത്തിക്കുന്നുണ്ട്. ചിത്രത്തെ കുറിച്ചുള്ള അനുഭവപ്പെട്ട ഒരേയൊരു നെഗറ്റിവ് എന്നത് പ്രതീക്ഷിച്ചത്ര ഹാർഡ് ഹിറ്റിങ് ആയിരുന്നില്ല എന്നതാണ്, കഥയിൽ കാഴ്ചക്കരൻ ഇൻവെസ്റ്റ് ആവുന്നുണ്ട് എങ്കിലും ഒരു മിസ്സിംഗ് ഫീൽ ചിലയിടത്ത് എങ്കിലും ലഭിക്കുന്നുണ്ട്. മാന്ദ്യത്തിന് ശേഷമുള്ള ആ ഒരു ഡാർക്ക് പീരീഡ്‌ ഒട്ടും ഗൗരവം ചോർന്ന് പോവാതെ അവതരിപ്പിക്കാനും സംവിധായികയ്ക്ക് കഴിഞ്ഞിട്ടുണ്ട് എന്നത് എടുത്ത് പറയണം.

🔸പെർഫോമൻസ് തന്നെയാണ് ചിത്രത്തെ മുന്നോട്ടേക്ക് ഡ്രൈവ് ചെയ്യുന്ന ഫോഴ്‌സ്, പ്രത്യേകിച്ചും പ്രധാന കഥാപാത്രം. ഇതിനെല്ലാം ഒപ്പം മികച്ച ഛായാഗ്രഹണവും, വിഷ്വൽസും, പരാമർശിക്കാതെ പോവാൻ കഴിയാത്ത മികച്ച ബാക്ക്ഗ്രൗണ്ട് സ്കോറും, സെറ്റപ്പും കൂടി ചേരുമ്പോൾ നല്ലൊരു വാച്ച് ഉറപ്പ് തരുന്നുണ്ട് നോമ്മാഡ്ലാൻഡ്. ഈ വർഷത്തെ ഏറ്റവും മികച്ച സിനിമ ഒന്നുമല്ല നോമ്മാദ്ലൻഡ്, എന്നാലും കണ്ടിരിക്കേണ്ടതായ ഒരുപാട് ഘടകങ്ങൾ ഉള്ള, അത്യാവശ്യം വേർതി ആയൊരു ചിത്രവുമാണ്, കാണാൻ ശ്രമിക്കുക.

Verdict : Very Good

DC Rating : 4/5 

1099. News Of The World (2020)

Director : Paul Greengrass

Genre : Western

Rating : 6.8/10

Country : USA

Duration : 119 Minutes

🔸വെസ്റ്റേണുകളുടെ കാലം പൊതുവെ കഴിഞ്ഞു എന്നൊരു വിശ്വാസം പലരിലും കണ്ടിട്ടുണ്ട്, ശെരിയാണ് മുൻ കാലങ്ങളിൽ പുറത്തിറങ്ങിയവയുടെ എണ്ണം വെച്ച് തട്ടിച്ച് നോക്കുക ആണെങ്കിൽ വളരെ കുറച്ച് സിനിമകൾ മാത്രമേ ആ വിഭാഗത്തിൽ പുറത്തിറങ്ങുന്നുള്ളൂ. പക്ഷെ നിലവാരം കീപ്പ് ചെയ്യുന്ന വെസ്റ്റേൺ സിനിമകൾ, പ്രത്യേകിച്ചും സ്ലോ ബർണർ ആയവ തരുന്ന ഒരു വേറിട്ട അനുഭവം ഉണ്ട്, അത് എത്രത്തോളം മിസ് ചെയ്തിരുന്നു എന്നത് ന്യുസ് ഓഫ് ദി വേൾഡ് കണ്ടപ്പോഴാണ് മനസിലായത്. ചുരുക്കി പറഞ്ഞാൽ ഈ ജോണറിൽ പെട്ട സിനിമകളുടെ ആരാധകർക്ക് ആസ്വദിക്കാൻ ഉള്ളതെല്ലാം ഈ ചിത്രത്തിലുണ്ട് എന്ന് തന്നെ.

🔸ടോം ഹാങ്ക്‌സിനെ ലോൺ ഔട്ട്ലോ ശൈലിയിൽ കാണുക എന്നതിന് അപ്പുറം ജോണർ ക്ലാസ്സിക്കുകളിൽ ഒന്നായ ജോൺ വെയ്നിന്റെ സെർച്ചേഴ്‌സ് എന്ന ചിത്രത്തിന്റെ ഒരു സ്വാധീനം കഥയിലും ദൃശ്യങ്ങളിലും എല്ലാം കാണാൻ കഴിഞ്ഞതാണ് ഈ ചിത്രം മോസ്റ്റ് ആന്റിസിപ്പേറ്റഡ് സിനിമകളിൽ ഒന്നായി മാറാൻ ഉള്ള കാരണം. പഴയ ചിത്രം പോലെ തന്നെ ഒരു പെൺകുട്ടിയെ അവളുടെ വീട്ടിലേക്ക് തിരികെ കൊണ്ട് വരാനുള്ള ഒരു ഔട്ട്ലോയുടെ ശ്രമമാണ് ഈ ചിത്രം. എന്നാൽ ഈ സാമ്യം ഒരു ബാധ്യതയാക്കി മാറ്റിയില്ല എന്നത് എടുത്ത് പറയേണ്ട കാര്യം തന്നെയാണ്.

🔸അമേരിക്കൻ സിവിൽ വാറിൽ സേവനം അനുഷ്ഠിച്ച വ്യക്തിയാണ് നമ്മുടെ കേന്ദ്ര കഥാപാത്രമായ ക്യാപ്റ്റൻ കിഡ്. യുദ്ധം കഴിഞ്ഞ് ഉദ്ദേശം അഞ്ച് വർഷങ്ങൾ കഴിഞ്ഞിരിക്കുന്നു, ഇന്ന് അയാൾ നാട് നീളെ യാത്ര ചെയ്ത്, ആളുകൾക്ക് വാർത്ത വായിച്ച് കൊടുത്താണ് ജീവിക്കാൻ ഉള്ള വക കണ്ടെത്തുന്നത്. പ്രായവും ഓർമകളും എല്ലാം അയാളെ തളർത്തി കളഞ്ഞിട്ടുണ്ട്, ബന്ധുക്കൾ എന്ന് പറയാൻ അയാൾക്ക് ആരും അവശേഷിക്കുന്നില്ല, ഉണ്ടായിരുന്ന ഒരു ഭാര്യയും മരിച്ചിട്ട് കാലം കുറെ ആയി. ഈ യാത്രയ്ക്ക് ഇടയിലാണ് അയാൾ ജോഹാന എന്ന പെൺകുട്ടിയെ കണ്ട് മുട്ടുന്നത്.

🔸അമേരിക്കയുടെ തെക്ക് കിഴക്കെ ഭാഗത്ത് ജനിച്ചവളാണ് അവൾ എങ്കിലും കിയാവോ വിഭാഗക്കാർ എടുത്ത് വളർത്തിയതാണ് അവളെ. ഉറ്റവർ എല്ലാം മരിച്ച് പോയ അവളെ തിരികെ നാട്ടിൽ എത്തിക്കാൻ ഉള്ള ദൗത്യം ക്യാപ്റ്റന്റെ മേൽ വന്ന് പതിക്കുകയാണ്. പിന്നീട് അമേരിക്കൻ ഗ്രാമ പ്രദേശങ്ങളിലൂടെ ഉള്ള ഒരു നീണ്ട യാത്ര ആരംഭിക്കുകയാണ്, ഈ യാത്രയ്ക്കിടയിൽ മറക്കാനാവാത്ത ഒരുപാട് സംഭവങ്ങളും കഥാപാത്രങ്ങളും എല്ലാം കടന്ന് വരുന്നുമുണ്ട്. നല്ല ചിത്രമാണ് ന്യുസ് ഓഫ് ദി വേൾഡ്, പ്രത്യേകിച്ചും വെസ്റ്റേൺ സിനിമകൾ ഇഷ്ട്ടം ഉള്ളവർക്ക് നല്ലൊരു അനുഭവം തന്നെ ലഭിച്ചേക്കും.

Verdict : Very Good

DC Rating : 4/5 

1098. Paris, I Love You (2006)

Director : 22 Directors

Genre : Anthology

Rating : 7.2/10

Country : France

Duration : 121 Minutes

🔸പാരീസ് നഗരത്തിന്റെ പശ്ചാത്തലത്തിൽ ഇരുപത്തി രണ്ടോളം സംവിധായകർ ചേർന്ന് ഒരുക്കുന്ന ആന്തോളജി ചിത്രം, അവയിലെ ഓരോന്നിന്റെയും ഫോക്കസ് എന്നത് പ്രണയം ആണ്, അതും എല്ലാം ആ നഗരത്തിൽ ഉള്ളവർ. ഈ ഒരു കൺസപ്റ്റ് തന്നെ സത്യത്തിൽ വളരെ മനോഹരമാണ്, അതിന്റെ ഒട്ടും ഭംഗി ചോരാതെ ഉള്ള മികച്ച അവതരണമാണ് പാരീസ് ഐ ലവ് യു എന്ന ചിത്രം. രണ്ട് മണിക്കൂറിന് അടുത്ത് മാത്രം ദൈർഘ്യം ഉള്ളത് കൊണ്ട് ഓരോ ഷോർട്ടും ആറ് ഏഴ് മിനിറ്റ് മാത്രം ദൈർഘ്യം ഉള്ളത് കൂടി ആണ് എന്നത് ശ്രദ്ധിക്കണം, ഈ ഒരു കാരണം കൊണ്ട് തന്നെ പലതും പെട്ടെന്ന് തീർന്നുപോയി എന്നൊരു വിഷമം ബാക്കി ഉണ്ട്.

🔸സിറ്റി ഓഫ് ലവ് എന്ന പേരിൽ പ്രസിദ്ധി ആർജിച്ച നഗരമാണ് പാരീസ്, പ്രണയം വിഷയമാക്കി ഒട്ടനവധി കൃതികളും, സിനിമകളും എല്ലാം പുറത്തിറങ്ങിയ എല്ലാ രീതിക്കും ഈ കഥകൾ പറയാൻ ചേർന്ന ഒരിടം. ഈ പതിനെട്ട് സിനിമകളും കൈകാര്യം ചെയ്യുന്ന വിഷയം പ്രണയം ആണെങ്കിലും അവയെല്ലാം തന്നെ നോക്കി കാണുന്ന ആൻഗിൾ വ്യത്യസ്തമാണ്. ഈ പ്രണയം എന്ന് വികാരം തന്നെ ഭാര്യാ ഭർത്താക്കന്മാർ തന്നെയാവാം, കാമുകീ കാമുകന്മാർ തമ്മിലാവാം, മുത്തശ്ശനും പേരക്കിടാവും തമ്മിലാവാം, എന്തിനധികം മരണപ്പെട്ട ഒരു വ്യക്തിയും അയാളെ ആദ്യമായി കാണുന്ന യുവതിയും തമ്മിൽ പോലുമാവാം.

🔸ഇത്തരത്തിൽ ഉള്ള വളരെ വ്യത്യസ്തമായ പതിനെട്ട് പ്രണയങ്ങളാണ് ചിത്രത്തിൽ ഉള്ളത്. അൽഫോൻസോ കുറോൺ, കോയൻ ബ്രദേഴ്‌സ്, ഗസ് വാൻ സന്റ്, അലക്‌സാണ്ടർ പെയിൻ, ടോം ടൈക്കർ തുടങ്ങിയ പ്രശസ്തരായ സംവിധായകരും ജൂലിയേറ്റ് ബിനോച്ചേ, നതാലി പോർട്ടമൻ, വില്ലാം ഡെഫോ, നിക്ക് നോൾട്ട്, എലിജഹ് വുഡ് തുടങ്ങിയ പ്രശസ്തരായ നടീ നടന്മാരും ഈ ചിത്രത്തിന് വേണ്ടി ഒന്നിച്ചിട്ടുമുണ്ട്. ചെറുതെങ്കിലും ഓർമയിൽ തങ്ങി നിൽക്കും വിധം മനോഹരമാണ് മിക്ക കഥാപാത്രങ്ങളും.

🔸ഇത്തരത്തിൽ ഒരു വിഷയം ആയതിനാലും നഗരം പാരീസ് ആയതിനാലും അതി മനോഹരമായ ദൃശ്യങ്ങൾ പ്രതീക്ഷിക്കാവുന്നതാണ് സ്വാഭാവികമായും, അത് തീർച്ചയായും ഇവിടെ ഉണ്ട് താനും, ഛായാഗ്രഹണം ചിത്രത്തിന്റെ ഏറ്റവും വലിയ പോസിട്ടീവുകളിൽ ഒന്നാണ്. വ്യത്യസ്തരായ ആളുകളാണ് ഓരോ ഷോർട്ടിലെതും എന്കിലും ചിത്രം അവസാനത്തോട് അടുക്കുമ്പോൾ ഇവയിൽ പലതും മനോഹരമാം വിധം കണക്റ്റ് ചെയ്യപ്പെടുന്നുണ്ട്. കണ്ട് നോക്കാവുന്ന നല്ലൊരു സിനിമയാണ് പാരീസ് ഐ ലവ് യു, ഈ സിനിമയിലെ ചില കഥകൾ തീർച്ചയായും നിങ്ങളെ ആഴത്തിൽ സ്പർശിച്ചിരിക്കും എന്നത് ഉറപ്പാണ്, കാണാൻ ശ്രമിക്കുക.

Verdict : Very Good

DC Rating : 4.25/5 

1097. Demon Slayer - Mugen Train (2020)

Director : Haruo Sotozaki

Genre : Action

Rating : 8.4/10

Country : Japan

Duration : 117 Minutes

🔸ജപ്പാന്റെ സിനിമാ ചരിത്രത്തിലെ തന്നെ ഏറ്റവും വലിയ വിജയങ്ങളിൽ ഒന്നാണ് ഡെമൻ സ്ലെയർ മുഗൻ ട്രെയിൻ എന്ന ചിത്രം. ഈ ചിത്രത്തിന് ആധാരമായ മാങ്കായും, സീരീസ് തന്നെയും മികച്ച ആരാധക നിരൂപക പ്രശംസ നേടിയതിനാൽ തന്നെ സിനിമയും ആ ഹൈപ്പ് നേടിയതിൽ അത്ഭുതത്തിന്റെ ആവശ്യം ഒന്നുമില്ല. നാളിത് വരെ അഞ്ഞൂറ് മില്യൺ യുഎസ് ഡോളറിന് അടുത്ത് കളക്ഷൻ കരസ്ഥമാക്കിയ ചിത്രം, ഈ കോവിഡ് കാലത്ത് പോലും ഒരു ഗ്ലോബൽ സെൻസേഷൻ ആയി മാറി എന്നത് ചെറിയ കാര്യമല്ല പ്രത്യേകിച്ചും അനിമേ മേഖലയ്ക്കും മറ്റും ഇത് വഴി ലഭിക്കുന്ന വൈഡർ റീച്ച് വളരെ വളരെ വലുതാണ്.

🔸കേവലം ആദ്യ സീസണിന്റെ ഒരു എക്സ്ട്ടെൻഷൻ ആയി നിൽക്കാതെ ഒരു സെല്ഫ് സഫിഷ്യന്റ് പ്ലോട്ട് ചിത്രത്തിനുണ്ട്, ആദ്യ സീസണിനും രണ്ടാം സീസണിനും ഇടയിൽ ഒരു ഫില്ലർ ആയി കാനാവുന്നതുമാണ് ഈ ചിത്രത്തെ, കുറഞ്ഞത് പ്ലോട്ട് വൈസ് എങ്കിലും. ആദ്യ സീസൺ അവസാനിച്ചിടത്ത് നിന്ന് തന്നെയാണ് ചിത്രം ആരംഭിക്കുന്നത്, നമ്മുടെ നായക കഥാപാത്രമായ തേഞ്ചുരോയും സഹോദരി നേസുകൊയും മറ്റ് പോരാളികളും എല്ലാം റെങ്ങോകുവിനെ സഹായിക്കാനായി ഇറങ്ങി തിരിച്ചിരിക്കുകയാണ്.

🔸ഡിമൻസിന് എതിരെ ഉള്ള അവരുടെ യുദ്ധം ഇപ്പോൾ മറ്റൊരു തലത്തിലേക്ക് മാറിയിരിക്കുന്നു, മുഗൻ ട്രെയിൻ എന്ന വളരെ മിസ്റ്റീരിയസ് ആയ ട്രെയിനിൽ വെച്ച് അപ്രത്യക്ഷമായ നാല്പതോളം ആളുകളെ കണ്ടെത്താൻ ഉള്ള ശ്രമത്തിലാണ് നമ്മുടെ പ്രധാന കഥാപാത്രങ്ങൾ എല്ലാം. സീരീസ് കാണാത്തവർ ആണ് നിങ്ങൾ എങ്കിൽ അത് കണ്ടതിന് ശേഷം ഈ ചിത്രത്തെ സമീപിക്കുന്നത് ആയിരിക്കും ഗുണകരം, കാരണം മുന്നേ അരങ്ങേറിയ കാര്യങ്ങളെ പറ്റി കാര്യമായ ഓർമ്മപ്പെടുത്തൽ ഒന്നും ചിത്രത്തിലില്ല, നേരിട്ട് കാര്യത്തിലേക്ക് കടന്ന് വരികയാണ്.

🔸ഫാൻ പ്ലീസിങ് എലെമെന്റുകൾ കൊണ്ട് സമ്പുഷ്ടമാണ് മുഗൻ ട്രെയിൻ, പ്രത്യേകിച്ചും അവസാന ഭാഗമൊക്കെ ആക്ഷൻ രംഗങ്ങൾ കൊണ്ട് ആരാധകരെ പിടിച്ചിരുത്തുന്നുണ്ട്. ഡെമൻ സ്ലെയർ യൂണിവേഴ്‌സുമായി പരിചയം ആയിക്കഴിഞ്ഞ ഒരാളെ സംബന്ധിച്ച് വളരെ വേർതി ആയ ഒരു കണ്ടിന്യുവേഷൻ ആണ് ഈ ചിത്രം. അപ്പോഴും ചില ചോദ്യങ്ങൾ ബാക്കി ആയത്, അല്ലെങ്കിൽ മനഃപൂർവം ഉത്തരം തരാതെ പോയത് ചെറുതായി കല്ല് കടി ആയിട്ടുമുണ്ട്, രണ്ടാം സീസണിന് വേണ്ടി കരുതി വെച്ചതാവും, എന്തായാലും കാണാൻ ശ്രമിക്കുക.

Verdict : Good

DC Rating : 3.75/5