1289. Saint Omer (2022)

Director : Alice Diop

Cinematographer : Claire Mathon

Genre : Drama

Country : France

Duration : 122 Minutes

🔸ഒരു യഥാർത്ഥ സംഭവത്തെ അടിസ്ഥാനപ്പെടുത്തി തന്നെയാണ് സെയിന്റ് ഒമർ എന്ന ഫ്രഞ്ച് സിനിമയും തയാറാക്കിയിരിക്കുന്നത്. അതായത് ഉദ്ദേശം ഒരു പത്ത് വർഷങ്ങൾക്ക് മുന്നേ വളരെ വിചിത്രമായ, അതേ സമയം ഒരുപാട് വിവാദങ്ങൾ ഉണ്ടാക്കിയ ഒരു സംഭവം ഫ്രാൻസിലെ തീര പ്രദേശങ്ങളിൽ ഒന്നിൽ അരങേറുക ഉണ്ടായി. ഒരു സെനഗലീസ് അഭയാർത്ഥി പെൺകുട്ടി സ്വന്തം കുഞ്ഞിനെ കൊന്ന് കളഞ്ഞു എന്നതാണ് മുകളിൽ സൂചിപ്പിച്ച സംഭവം. സെനഗൽ എന്ന രാജ്യത്തെ ആഭിചാര കർമങ്ങൾ, ദുരചാരങ്ങൾ പോലുള്ള ഒരുപാട് മാനങ്ങൾ നല്കപ്പെട്ടതിനാൽ കൂടി വലിയ വിവാദങ്ങൾ ഉണ്ടാക്കിയ സംഭവമാണ് ഇത്, ഈ ഒരു ഇൻസിഡന്റ് ആണ് സെയിന്റ് ഒമർ എന്ന സിനിമയ്ക് വിഷയം ആയിരിക്കുന്നത്.

🔸അത്യാവശ്യം ഒരു സമ്പന്ന കുടുംബത്തിൽ ജനിച്ച പ്രസ്തുത വിദ്യാർത്ഥി തന്നെക്കാൾ മുപ്പത് വയസ്സോളം കൂടുതൽ ഉണ്ടായിരുന്ന അധ്യാപകനുമായി അടുപ്പത്തിൽ ആയതോട് കൂടിയാണ് ട്രാക്ക് മാറുന്നത്. ഒട്ടും താല്പര്യം ഇല്ലാതെ സംഭവിച്ചത് കൊണ്ട് കൂടി ആവണം സ്വന്തം കുഞ്ഞിനെ വളർത്താൻ ഇരുവർക്കും വലിയ താല്പര്യം ഒന്നും ഉണ്ടായിരുന്നില്ല. ഒടുവിൽ എല്ലാം ചെന്ന് എത്തുന്നത് ഫ്രാൻസിലെ ഒരു കടൽ തീരത്ത് ആണ്, കുഞ്ഞിനെ മുങ്ങി ചാവാൻ എന്ന വണ്ണം യുവതി കടൽ കരയിൽ ഉപേക്ഷിക്കുകയാണ്. സ്വാഭാവികമായും കുഞ്ഞ് മരിക്കുകയും, അത് കേസ് ആവുകയും യുവതി വിചാരണ നേരിടേണ്ടി വരികയും ചെയ്യുന്നു.

🔸ഇത്രയും പറഞ്ഞത് യഥാർത്ഥ സംഭവങ്ങൾ. പിന്നീട് എന്ത് സംഭവിക്കുന്നു, ഈ കൊലയിലേക്ക് വഴി വെച്ച സംഭവങ്ങൾ എന്നിവയൊക്കെ സിനിമ വിശദീകരിക്കുന്നുണ്ട്. വിചാരണ കാണാൻ വരുന്ന ഗർഭിണി ആയ ഒരു എഴുത്തുകാരിയുടെ വ്യൂ പോയിന്റിൽ കൂടിയാണ് സിനിമ പുരോഗമിക്കുന്നത്. വളരെ സ്ട്രോങ്ങ്‌ ആയ ഒരു വിഷയം ആണ് ചിത്രത്തിന്റേത്, എന്നാലും മികച്ച ഒരു അനുഭവം ആയൊന്നും മാറുന്നില്ല എന്ന് പറയേണ്ടി വരും. അഭിനയം ആയാലും, അവതരണം ആയാലും നന്നായിരുന്നു, കാണാൻ താല്പര്യം തോന്നുന്നു എങ്കിൽ കണ്ട് നോക്കാവുന്നതാണ് ഈ ചിത്രം.

Verdict : Good

DC Rating : 3.75/5

1288. Farha (2021)

Director : Darin Sallam

Cinematographer : Rachelle Aoun

Genre : War

Country : Jordan

Duration : 92 Minutes

🔸ഇസ്രായേൽ പലസ്തീൻ പ്രശ്നം ഒക്കെ വിഷയമാക്കി ഇതിനോടകം തന്നെ ഒരുപാട് സിനിമകൾ വന്ന് കഴിഞ്ഞിട്ടുണ്ട്, ഇവയിൽ തന്നെ സംഭവങ്ങൾക്ക് പല പല വ്യാഖ്യാനങ്ങൾ നൽകിയ അല്ലെങ്കിൽ വേറിട്ട അനുമാനങ്ങൾ നൽകിയ സിനിമകളും ഉണ്ടെന്ന് പറയാം. ഫർഹ എന്ന ജോർദാൻ ചിത്രവും പ്രസ്തുത വിഷയങ്ങളുടെ ബാക്കി പത്രം എന്ന നിലയ്ക്ക് കഥ പറഞ്ഞ് പോവുന്ന ചിത്രമാണ്, വിഷയം വലുത് ആണെങ്കിലും അതിന്റെ പ്രത്യാഘാതങ്ങൾ ഒരു യുവതിയെ എങ്ങനെ ബാധിക്കുന്നു എന്ന് കാണിക്കുകയാണ് സിനിമ ചെയ്യുന്നത്. ഇത് ഒരു യഥാർത്ഥ സംഭവം അടിസ്ഥാനപ്പെടുത്തി തയ്യാറാക്കിയ ചിത്രമാണ് എന്ന വെളിപ്പെടുത്തൽ സിനിമയോട് ഉള്ള ഇഷ്ടം കൂട്ടുന്നെ ഉള്ളൂ താനും.

🔸നാൽപതുകളുടെ അവസാനം പലസ്തീനിൽ അരങ്ങേറിയ ആഭ്യന്തര കലഹവും മറ്റുമൊക്കെ കാരണം ഏകദേശം ഏഴ് ലക്ഷത്തോളം സാധാരണക്കാരായ ജനങ്ങൾക്ക് പലായനം ചെയ്യേണ്ടി വന്നതായി പറയപ്പെടുന്നു. ആയിരത്തോളം കുടുംബങ്ങളെ ബാധിച്ച ഈ സംഭവങ്ങൾ കാരണം ഉണ്ടായ പ്രശ്നങ്ങൾ ഉദ്ദേശം എട്ട് പതിറ്റാണ്ടുകൾക്ക് ശേഷം ഇന്നും തുടർന്ന് കൊണ്ടേ ഇരിക്കുന്നു. ഇനി ഒരിക്കലും പലായനം ചെയ്തവർ മടങ്ങി വരാതിരിക്കാനായി കിണറ്റിൽ വിഷം കലർത്തുക പോലുള്ള ഭീകരമായ പരിപാടികളും നടന്നിരുന്നതായി പറയപ്പെടുന്നു. ഈ ഒരു പശ്ചാത്തലത്തിന് സിനിമയിൽ വലിയ പ്രാധാന്യം ഉണ്ട്, അത് ഉൾക്കൊണ്ടാൽ മാത്രമേ ഫർഹയുടെ അതിജീവന ശ്രമങ്ങൾക്കും ആ ഒരു ഇമ്പാക്റ്റ് ലഭിക്കുക ഉള്ളൂ.

🔸പലസ്തീനിലെ ഒരു ഗ്രാമ പ്രദേശത്ത് ഒരു ഇടത്തരം കുടുംബത്തിൽ ജനിച്ച ഫർഹയ്ക്ക് കല്യാണത്തിനേക്കാൾ താല്പര്യം കൂടുതൽ വിദ്യാഭ്യാസം നേടുക എന്നത് ആയിരുന്നു. അതിനിടയിലേക്ക് മുകളിൽ സൂചിപ്പിച്ച പ്രശ്നങ്ങൾ കടന്ന് വരുന്നതും, അത് ഫർഹയെയും കുടുംബത്തെയും എങ്ങിനെ ബാധിക്കുന്നു എന്നതും ഒക്കെയാണ് ഈ സിനിമ. സംവിധായികയുടെ അമ്മ ചെറുപ്പത്തിൽ കേട്ട, ഒരു പരിധി വരെ ഭാഗമായ ഒരു സംഭവമാണ് ഈ സിനിമയുടെ കഥ, സ്വാഭാവികമായും ഒരു പേഴ്സണൽ ടച് ചിത്രത്തിൽ ഉണ്ടെന്ന് സാരം. മികച്ച ഒരു സിനിമ ആണ് ഫർഹ, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.5/5

1287. The Kings Of The World (2022)

Director : Laura Ortega

Cinematographer : David Gallego

Genre : Drama

Country : Colombia

Duration : 103 Minutes

🔸കൊളമ്പിയൻ ചിത്രമായ ദി കിങ്‌സ് ഓഫ് ദി വേൾഡ് കണ്ട് കൊണ്ടിരിക്കുന്ന വേളയിൽ ആദ്യം നമ്മുടെ ശ്രദ്ധ പിടിച്ച് പറ്റുന്നത് മനോഹരമായ ദൃശ്യങ്ങൾ ആയിരിക്കും. സൗത്ത് അമേരിക്കൻ ഗ്രാമങ്ങൾക്ക് ഒരു പ്രത്യേക വന്യത കലർന്ന ഭംഗി ഉള്ളത് മുൻപ് കണ്ട സിനിമകളിൽ നിന്ന് തന്നെ വ്യക്തമായതാണ്, അതിന്റെ പീക്ക് പോയിന്റ് ഒക്കെ ഈ സിനിമയിൽ നമുക്ക് കാണാൻ സാധിക്കും. പ്രത്യേകിച്ചും കേന്ദ്ര കഥാപാത്രങ്ങളായ യുവാക്കൾ ഒരു മാറ്റം മുന്നിൽ കണ്ട് കൊണ്ട് തങ്ങൾക്ക് അത്ര നാൾ അഭയം ആയിരുന്ന നഗരം വിട്ട് ഗ്രാമങ്ങളിലേക്ക് യാത്ര തിരിക്കുന്ന ഭാഗം ഒക്കെ വളരെ മനോഹരം തന്നെ ആയിരുന്നു.

🔸തൊണ്ണൂറുകൾ എന്നത് കൊളമ്പിയ എന്ന രാജ്യത്തെ സംബന്ധിച്ചിടത്തോളം വളരെ മോശമായ കാലഘട്ടം ആയിരുന്നു. ഗവണ്മെന്റിൽ നിന്നും ഭരണത്തിന്റെ കടിഞ്ഞാൺ പിടിച്ചെടുത്ത ഗറില്ലാ വിഭാഗത്തിന്റെ ക്രൂര വാഴ്ച പതിറ്റാണ്ടുകൾ നീണ്ട് നിന്ന പ്രശ്നങ്ങൾക്ക് ആണ് വഴി വെച്ചത്. ആയിരക്കണക്കിന് സാധാരണക്കാരായ കർഷകർക്ക് തങ്ങളുടെ വീടും സ്ഥലവും എല്ലാം ഉപേക്ഷിച്ച് ജീവനും കൊണ്ട് പലായനം ചെയ്യേണ്ടി വന്നു. ഈ ഒരു കാരണം കൊണ്ട് തന്നെ അടിസ്ഥാന സൗകര്യങ്ങൾ പോലും ലഭിക്കാത്ത ഒരു പുതിയ തലമുറ തന്നെ കൊളമ്പിയയിൽ പിറവി എടുത്തു എന്ന് പറയാം.

🔸മുകളിൽ സൂചിപ്പിച്ച തലമുറയിലെ അഞ്ച് പേരാണ് നമ്മുടെ കേന്ദ്ര കഥാപാത്രങ്ങൾ, ഇവരുടെ നേതാവ് ആണ് റാ. മോഷണവും, പിടിച്ച് പറിയും, അടിയും ഒക്കെയായി നടന്ന റാക്ക് ഒരുനാൾ മാറ്റം ഉണ്ടാവുകയാണ്, അതിനുള്ള കാരണം അയാൾക്ക് ഗവണ്മെന്റിൽ നിന്നും ലഭിച്ച ഒരു ഉത്തരവ് ആണ്. കാര്യം വേറൊന്നുമല്ല, റായുടെ കുടുംബത്തിന്റെ പക്കൽ നിന്നും പണ്ട് പിടിച്ചെടുത്ത സ്ഥലം അവന് തിരികെ നൽകാൻ ഉത്തരവ് ആയിരിക്കുന്നു. ഈ ഒരു തീരുമാനം, ഒരു പുതിയ തുടക്കത്തിന് ഉള്ള അവസരമായി കണ്ട് റായും കൂട്ടുകാരും യാത്ര ആരംഭിക്കുകയാണ്. സ്ലോ ബെർണർ എന്ന നിലയ്ക്ക് പുരോഗമിക്കുന്ന, ബ്യൂട്ടിഫുൾ ആയൊരു സിനിമ ആണ് ദി കിങ്‌സ് ഓഫ് ദി വേൾഡ്, കാണാൻ ശ്രമിക്കുക.

Verdict : Very Good

DC Rating : 4/5

1286. Beautiful Beings (2022)

Director : Arnar Gudmundsson

Cinematographer : Sturla Brandth

Genre : Drama

Country : Iceland

Duration : 123 Minutes

🔸ഒരു കമിങ് ഓഫ് ഏജ്‌ സ്റ്റോറി ആണ് ബ്യൂട്ടിഫുൾ ബീങ്സ് എന്ന ഐസ്ലാണ്ടിക് ചിത്രം. ഇടക്ക് ഒരു സബ് പ്ലോട്ട് വഴി മതം, വിശ്വാസം പോലുള്ള ഗൗരവം ഏറിയ വിഷയങ്ങളിൽ കൈ വെക്കാൻ ശ്രമിക്കുന്നുണ്ട് എങ്കിലും ആദ്യം തൊട്ട് അവസാനം വരെ രണ്ട് ടീനെജ് കുട്ടികളിൽ ഫോകസ് ചെയ്ത് കൊണ്ട് തന്നെയാണ് സിനിമ പുരോഗമിക്കുന്നത്. അഡി എന്ന പതിനാല് കാരൻ ആണ് നമ്മുടെ പ്രധാന കഥാപാത്രം, വീട്ടുകാരുമായി അത്ര നല്ല ബന്ധം ഒന്നും ഇല്ലാത്ത അഡി കൂടുതൽ സമയവും ചിലവഴിക്കുന്നത് തന്റെ തന്നെ പ്രായമുള്ള രണ്ട് സുഹൃത്തുക്കളോടൊപ്പം നാട്ടിലെ തിണ്ണകൾ നിരങ്ങി ആണെന്ന് പറയാം.

🔸ഇങ്ങനെ നാട്ടിലും വീട്ടിലും ഒക്കെ അത്യാവശ്യം പേര് ദോഷം കേൾപ്പിച്ച് കൊണ്ട് നടക്കുന്നതിനിടെ ആണ് ബാലി എന്ന മറ്റൊരു കഥാപാത്രത്തെ ആഡി പരിചയപ്പെടുന്നത്. മറ്റുള്ളവരിൽ നിന്നും മാറി ആരുടേയും ശ്രദ്ധയിൽ പെടാതെ ജീവിച്ച് പോവുന്ന ഒരു ഇൻട്രോവെർട്ടഡ് കഥാപാത്രം ആയിരുന്നു ബാലി. സ്കൂളിലെ തന്നെ ചില വിദ്യാർത്ഥികളുടെ ക്രൂര വിനോദം കൂടി ആയിരുന്നു ബാലി, യാതൊരു ദയാ ദാക്ഷണ്യവും ഇല്ലാതെ ബുള്ളി ചെയ്ത് അവനെ ഉപദ്രവിക്കുന്നത് ചിലരുടെ എങ്കിലും ഇഷ്ട പരിപാടി ആയിരുന്നു. വിധിയുടെ വിളയാട്ടം എന്നൊക്കെയുള്ള നിലയിൽ ആരും മതിക്കാത്ത ബാലിയും, ആരെയും വക വെക്കാത്ത ആഡിയും സുഹൃത്തുക്കൾ ആയി മാറുകയാണ്, ആ സൗഹൃദത്തിന് വിശദീകരണങ്ങൾ ഇല്ലായിരുന്നു.

🔸ഈ സൗഹൃദം എന്നത് രണ്ട് ധ്രുവങ്ങളിൽ ഉള്ള രണ്ട് പേരെയും ഏതൊക്കെ രീതിയിൽ മാറ്റി മറിക്കുന്നു എന്നത് മനോഹരമായി ഈ സിനിമ കാണിച്ച് തരുന്നു. ടീനെജ് കാലഘട്ടത്തിലൂടെ കടന്ന് പോവുന്ന രണ്ട് ആൺകുട്ടികൾക്ക് ഇടയിലുള്ള സൗഹൃദം വിഷയമാക്കിയ ക്ലോസ് പോലെ ഒരു മാരകമായ അനുഭവം ഒന്നും അല്ലെങ്കിലും ഒട്ടും പുറകിൽ അല്ല ഈ ചിത്രവും. അത്ര ഒന്നും എക്സ്പ്ലോർ ചെയ്തിട്ടില്ലാത്ത ഒരു രാജ്യത്ത് നിന്നുള്ള ഒരു ചിത്രം എന്ന പരിഗണന കൂടി നൽകുമ്പോൾ തീർച്ചയായും റിക്കമ്മെന്റ് ചെയ്യും ബ്യൂട്ടിഫുൾ ബീങ്സ് എന്ന ചിത്രത്തെ. ഡ്രാമ വിഭാഗത്തിൽ പെട്ട സിനിമകളുടെ ആരാധകർക്ക് മികച്ച ഒരു അനുഭവം തന്നെ ആയിരിക്കും ഈ സിനിമ, താല്പര്യം തോന്നുന്നെങ്കിൽ കാണാൻ ശ്രമിക്കുക.

Verdict : Very Good

DC Rating : 4/5

1285. R.M.N (2022)

Director : Christian Mungiu

Cinematographer : Tudor Vladimir

Genre : Drama

Country : Belgium

Duration : 122 Minutes

🔸കഴിഞ്ഞ വർഷം പുറത്തിറങ്ങിയ ദി ബീസ്റ്റ്സ് എന്ന ചിത്രത്തെ പറ്റി പറഞ്ഞത് പോലെ തന്നെ വെറുപ്പ് എന്ന വികാരം ആണ് ആർഎംഎൻ എന്ന ബെൽജിയം ചിത്രത്തെയും മുന്നോട്ട് കൊണ്ട് പോവുന്ന ഫാക്റ്റർ. തങ്ങൾ വെച്ച് അനുഭവിച്ചിരുന്ന കാര്യങ്ങളിലേക്ക് ഒരു പുതിയ അവകാശി കൂടി കടന്ന് വരുമ്പോൾ ഉണ്ടാവുന്ന സ്വഭാവികമായ അസൂയയും, ഫ്രസ്റ്റ്റേഷനും ഒക്കെയാണ് ഈ ചിത്രത്തിന്റെയും പോയിന്റ്. ഇവിടെ പക്ഷെ അഭയാർത്ഥികളായി എത്തുന്ന ജോലിക്കാർ കൂടി വിഷയമായി വരികയാണ്, ഈ അടുത്തിടെ കണ്ടതിൽ ഏറ്റവും ഇന്റൻസ് ആയ സിനിമകളിൽ ഒന്ന് കൂടിയാണ് ആർഎംഎൻ.

🔸ഒരു നീണ്ട ഇടവേളയ്ക്ക് ശേഷം സ്വന്തം നാട്ടിലേക്ക് മടങ്ങി വരികയാണ് മതിയാസ്. അന്യ നാട്ടിൽ ഒരുപാട് വിവേചനങ്ങൾ ഒക്കെ നേരിട്ടിട്ട് ആണെങ്കിലും പിടിച്ച് നിന്ന് ജോലി ചെയ്യാൻ അയാൾ പഠിച്ച് കഴിഞ്ഞിരുന്നു. ക്രിസ്തുമസിന് മുന്നോടി ആയി നാട്ടിൽ എത്തിയ അയാൾ വർഷങ്ങൾക്ക് ശേഷം തന്റെ മുൻ കാമുകി കൂടി ആയ സിസിലായെ അവിടെ വെച്ച് കണ്ട് മുട്ടുകയാണ്. ഒരു റീയുനിയൻ മൂവി എന്ന ഫീൽ ഒക്കെ തരും എങ്കിലും കുറച്ച് കൂടി ഡാർക്ക് ആയ, ഇമോഷണൽ ആയ ഒരു സ്റ്റോറിയിലേക്ക് സിനിമ ഇവിടെ നിന്നും മാറി ഒഴുകുകയാണ്.

🔸സിസില ജോലി ചെയ്യുന്ന ബേക്കറിയിൽ ഭക്ഷണം പാചകം ചെയ്യാനായി മൂന്ന് ശ്രീലങ്കൻ തൊഴിലാളികൾ എത്തുമ്പോൾ അവിടെ ഉള്ള ജനങ്ങളുടെയും, സഹ പ്രവർത്തകരുടെയും ഒക്കെ മനോഭാവം മാറുകയാണ്. തുടർന്ന് അരങ്ങേറുന്ന പ്രശ്നങ്ങൾ ആണ് സിനിമയുടെ വിഷയം. ഇത്തരത്തിൽ ഉള്ളൊരു വിഷയം കൈകാര്യം ചെയ്യുമ്പോൾ കൊടുക്കേണ്ട ഗൗരവം സിനിമ നിലനിർത്തി പോവുന്നുണ്ട്, പോരാതെ കാഴ്ചക്കാരന് വ്യാഖ്യാനം കൊടുക്കാൻ കഴിയുന്ന രീതിയിൽ ഉള്ളൊരു എൻഡിങ് കൂടി നൽകി കൊണ്ട് തൃപ്തികരമായ ഒരു ക്ളോഷർ സിനിമ കരുതി വെക്കുന്നുമുണ്ട്. ആകെ മൊത്തം നല്ലൊരു സിനിമ എന്ന് പറയാം ഈ ചിത്രത്തെ.

Verdict : Very Good

DC Rating : 4/5

1284. Babylon (2022)

Director : Damien Chazelle

Cinematographer : Linus Sandgren

Genre : Drama

Country : USA

Duration : 189 Minutes

🔸അൺ പോപ്പുലർ ആയ അഭിപ്രായങ്ങൾ ഒരു ട്രെൻഡ് ആയി മാറി കൊണ്ടിരിക്കുന്ന ഈ സമയത്ത് കഴിഞ്ഞ വർഷത്തെ സിനിമാ വ്യൂയിങ് അനുഭവങ്ങൾ വെച്ച് ഒരു ചെറിയ അൺ പോപ്പുലർ അഭിപ്രായം പറയാം, വേറൊന്നുമല്ല കഴിഞ്ഞ വർഷം ഞാൻ കണ്ട മികച്ച സിനിമകളിൽ ഒന്നാണ് ബാബിലോൺ എന്ന അഭിപ്രായം തന്നെ. പൊതുവെ നിരൂപകരെയും, സാധാരണക്കാരായ കാഴ്ചക്കാരെയും എല്ലാം രണ്ട് തട്ടിൽ നിർത്തിയ, ബോക്സ് ഓഫീസിൽ വൻ പരാജയം ഏറ്റ് വാങ്ങിയ ഈ ചിത്രം ആ ഫേറ്റ് അർഹിച്ചിരുന്നില്ല എന്ന് തന്നെയാണ് സിനിമ കണ്ട് കഴിഞ്ഞ വേളയിൽ തോന്നിയത്.

🔸മൂന്ന് കഥാപാത്രങ്ങളെ ഫോകസ് ചെയ്ത് കൊണ്ടാണ് സിനിമ മുന്നോട്ട് പോവുന്നത്, ആദ്യമേ തന്നെ കേന്ദ്ര കഥാപാത്രം എന്നൊക്കെയുള്ള വിശേഷണം അർഹിക്കുന്ന മാനുവൽ. ഒരു മെക്സിക്കൻ അഭയാർത്ഥി ആയി വരുന്ന മാനുവലിന്റെ വളർച്ച, അയാൾ ഒരു സിനിമ സെറ്റിലെ സഹായി ആയിരുന്നിടത്ത് തൊട്ട് സിനിമ കാണിക്കുന്നുണ്ട്, ഈ യാത്രയ്ക്കിടയിൽ ആണ് അയാൾ നെല്ലി ലൈറോയിയെ കണ്ട് മുട്ടുന്നത്. നെല്ലിയുടെ ഭാഷയിൽ പറയുക ആണെങ്കിൽ ലൈംലൈറ്റിൽ നിൽക്കാൻ വേണ്ടി, അല്ലെങ്കിൽ സ്റ്റാർ ആയി ജനിച്ചവളാണ് അവൾ. മൂന്നാമത്തെ വ്യക്തിത്വം ആണ് ജാക്ക് കോൺരാഡ്, ഒരു ലജണ്ടറി സ്റ്റാറ്റസ് ഒക്കെയുള്ള സിനിമാ നടൻ.

🔸നിശബ്ദ സിനിമ, ശബ്ദത്തിലേക്ക് മാറി കൊണ്ടിരിക്കുന്ന ഇരുപതുകളിൽ ആണ് ഈ സിനിമയും കഥ പറഞ്ഞ് തുടങ്ങുന്നത്. പിന്നീടങ്ങോട്ടുള്ള മൂന്ന് പതിറ്റാണ്ടുകൾ, സിനിമയോടൊപ്പം ഈ കഥാപാത്രങ്ങളും മാറുകയാണ്, നല്ലതിനും മോശത്തിനും വേണ്ടി. ഒടുവിൽ നല്ല ഒന്നാന്തരം ഒരു മോന്റെജ് കൂടി കാണിച്ച് കൊണ്ട് ബാബിലോണിന്റെ ടൈറ്റിൽ കാർഡ് പ്ളേ ചെയ്യുമ്പോൾ ഓർക്കാൻ ഒരുപാട് മോമെന്റുകൾ സിനിമ ബാക്കി വെക്കുന്നുണ്ട്. മിഡിൽ പോർഷനിൽ ഒരല്പം ട്രിമ്മ് ചെയ്തിരുന്നെങ്കിൽ നന്നായേനെ എന്ന അഭിപ്രായം ഒഴിച്ചാൽ പരാതികൾ ഒന്നുമില്ല, നന്നായി തന്നെ ഇഷ്ട്ടപ്പെട്ടു.

Verdict : Very Good

DC Rating : 4.25/5

1283. Godland (2022)

Director : Hlynur Palmason

Cinematographer : Maria Hausswolff

Genre : Drama

Country : Denmark

Duration : 143 Minutes

🔸വളരെ ബ്യൂട്ടിഫുൾ ആയി ചിത്രീകരിച്ച സിനിമയാണ് ഗോഡ്ലാണ്ട്, ഐസ്‌ലാണ്ട് എന്ന രാജ്യത്തിന്റെ പ്രത്യേകത കൊണ്ട് കൂടി ആവണം ഓരോ സീനിനും ഒരു പ്രത്യേക ഭംഗിയും, വല്ലാത്തൊരു നിഗൂഢതയും ഉണ്ടായിരുന്നു എന്ന് പറയേണ്ടി വരും. ഇഷ്ട സിനിമകളായ സയലൻസ്, അപ്പോകാലിപ്സ് നൗ തുടങ്ങിയവയും ആയി ചെറിയ സാമ്യങ്ങൾ പുലർത്തുന്നുണ്ട് ഈ സിനിമ. ഈ കാരണം കൊണ്ട് കൂടി നന്നായി ഇഷ്ട്ടപ്പെട്ട ഒരു സിനിമ അനുഭവമായി മാറുകയാണ് ഗോഡ്ലാണ്ട്. ഡെന്മാർക്കിലെ ഒരു പള്ളിയിൽ ആണ് കഥ ആരംഭിക്കുന്നത്, ഒരു വൈദികൻ ആണ് നമ്മുടെ പ്രധാന കഥാപാത്രമായ ലൂക്കാസ്.

🔸പത്തൊൻപതാം നൂറ്റാണ്ടിലാണ് കഥ അരങ്ങേറുന്നത്, ക്രിസ്ത്യൻ മിഷ്നറികൾ തങ്ങളുടെ മതം മറ്റ് രാജ്യങ്ങളിലേക്കും, വൻകരകളിലേക്കും എല്ലാം വളർത്തുന്നതിന്റെ ഭാഗമായി യുവാക്കളായ വൈദികരെ പള്ളി പണിയുന്നതിനും മറ്റും വേണ്ടി അയക്കുന്നത് സർവ സാധാരണമായ കാര്യം ആയിരുന്നു ഈ കാലഘട്ടത്തിൽ. അങ്ങനെ ആണ് ലൂക്കാസ് എന്ന വൈദികൻ കഥയിലേക്ക് വരുന്നത്, ഐസ്ലാണ്ടിലെ ഒരു ഒഴിഞ്ഞ ഗ്രാമത്തിൽ പുതിയ പള്ളി പണിയുക എന്നതാണ് അയാളുടെ ദൗത്യം. വൈദിക വേളയിൽ കാര്യമായ അനുഭവ പരിചയം ഒന്നും അയാൾക്ക് ഇല്ലെങ്കിലും അയാൾ ദൗത്യത്തിനായി ഇറങ്ങി തിരിക്കുകയാണ്.

🔸പ്രസ്തുത ഗ്രാമത്തിൽ എത്തി ചേരുക എന്നത് തന്നെ വലിയൊരു ദൗത്യം ആയിരുന്നു. കര കവിഞ്ഞ് ഒഴുകുന്ന പുഴയും, ലാവ ഒഴുക്കുന്ന അഗ്നി പർവതവും, മഞ്ഞ് മലകളും കടന്ന് വേണം ഗ്രാമത്തിൽ എത്താൻ. ലൂക്കാസിന് ആണെങ്കിൽ ഗ്രാമീണരുടെ ഭാഷയും പിടിയില്ല, ചുരുക്കി പറഞ്ഞാൽ നരക തുല്യമായ ദൗത്യം ആയിരുന്നു അയാളുടേത്. ഈ യാത്രയിലും തുടർന്ന് അങ്ങോട്ടും ലൂകാസ് നേരിടേണ്ടി വരുന്ന സംഭവങ്ങളും, ആഭിമുഖീകരിക്കേണ്ടി വരുന്ന ആളുകളും, കാണുന്ന കാഴ്ചകളും ഒക്കെയാണ് ഈ സിനിമ. നന്നായി ഇഷ്ട്ടപ്പെട്ട നല്ലൊരു സിനിമയാണ് ഗോഡ്ലാണ്ട്, താല്പര്യം തോന്നുന്നു എങ്കിൽ കാണാൻ ശ്രമിക്കുക.

Verdict : Very Good

DC Rating : 4.25/5

1282. Daughters Of Abdur Rahman (2021)

Director : Zaid Abdu Hamdan

Writer : Zaid Abdu Hamdan

Genre : Drama

Country : Jordan

Duration : 112 Minutes

🔸ലോകത്ത് ആകമാനം വോക് സംസ്കാരം പിടി മുറുക്കി കൊണ്ടിരിക്കുന്ന ഈ കാലഘട്ടത്തിൽ പൊതുവെ പുരോഗമന സിനിമ എന്ന ലേബലിൽ വരുന്ന സിനിമകളോട് ഒരു അകൽച്ച തോന്നി തുടങ്ങിയിരുന്നു. ലിറ്റിൽ മർമേഡ് പോലുള്ള ജോക്ക് സിനിമകൾ തിയേറ്ററിൽ പ്രദർശനം തുടർന്ന് കൊണ്ടിരിക്കുന്ന ഈ സമയത്ത് ആ ഒരു മനോഭാവം തോന്നിയതിൽ വലിയ തെറ്റ് ഒട്ടും തോന്നിയില്ല. എന്നാൽ ഈ ഒരു ചിന്താഗതിയെ വെല്ലുവിളിക്കുന്ന നല്ല ഒരു സിനിമ ആണ് ഡോട്ടർസ് ഓഫ് അബ്ദുറഹ്മാൻ എന്ന ജോർദാൻ ചിത്രം. സ്ത്രീ പക്ഷ സിനിമ എന്ന വിശേഷണത്തോട് നീതി പുലർത്തുന്ന നല്ല ഒരു ഔട്ടിങ് എന്ന് തന്നെ പറയാം.

🔸നാല് സഹോദരിമാരുടെ കഥയാണ് ഡോട്ടർസ് ഓഫ് അബ്ദുറഹ്മാൻ. നാല് പേരും വളരെ വ്യത്യസ്തമായ സാഹചര്യങ്ങളിൽ കൂടി കടന്ന് പോവുന്നവർ, വളരെ വ്യത്യസ്തമായ പ്രശ്നങ്ങൾ ദിവസേന നേരിടേണ്ടി വരുന്നവർ, ഇവരെ എല്ലാം ഒന്നിച്ച് ചേർക്കുന്ന ഒരേയൊരു ഘടകം ഇവരെല്ലാം തന്നെ സഹോദരിമാരാണ് എന്നത് മാത്രം ആയിരിക്കും. ഈ ഒരു ഫാക്ടർ കൊണ്ട് തന്നെ ജോർദാനിലെ സ്ത്രീകൾ അനുഭവിക്കുന്ന പ്രശ്നങ്ങളും മറ്റും വെവ്വേറെ പെർസ്പെക്ട്ടീവുകളിൽ കൂടി അവതരിപ്പിക്കാൻ സംവിധായകന് കഴിഞ്ഞിട്ടുണ്ട്. ഇവ ഒന്നും തന്നെ ഒരു വൺ ഡയമെൻഷനൽ ഫീൽ തരുന്നില്ല എന്നതും നല്ല കാര്യം തന്നെ.

🔸ഭർത്താവുമായി വളരെ അബ്യുസീവ് ആയ ഒരു ബന്ധത്തിലൂടെ കടന്ന് പോവുന്ന ഒരു കഥാപാത്രം, കാൻസർവേറ്റിവ് ആയ കുടുംബ പശ്ചാത്തലത്തിലൂടെ കടന്ന് പോവുന്ന കഥാപാത്രം, സ്വതന്ത്ര ജീവിതം നയിക്കുന്നത് കാരണം ചോദ്യ ശരങ്ങൾ നേരിടേണ്ടി വരുന്ന കഥാപാത്രം തുടങ്ങി ഒന്നിനും ഒരു കുറവും ഇല്ല. ഇവിടെ പ്രശ്നം എന്താണെന്നാൽ ഈ സഹോദരിമാർ എല്ലാം ഒന്നിക്കുന്ന ഒരു സന്ദർഭം വരുന്നത് ഒരു തിരോധാനം നടക്കുമ്പോഴാണ് എന്നതാണ്. ഈ തിരോധാനം ആരുടേതാണ്, എന്താണ്, എന്ത് കൊണ്ടാണ് എന്നതൊക്കെ സിനിമ കണ്ട് തന്നെ അറിയാൻ ശ്രമിക്കുക. ഇത്തരം സിനിമകൾ ഫോളോ ചെയ്യുന്ന ഒരു ഫോർമുല തന്നെയാണ് ഈ സിനിമയും ഉപയോഗിക്കുന്നത് എങ്കിലും ബോർ അടിപ്പിക്കുന്നില്ല എന്നതിൽ ആശ്വാസം.

Verdict : Good

DC Rating : 3.75/5

1281. Boy From Heaven (2022)

Director : Tarik Saleh

Cinematographer : Pierre Aim

Genre : Drama

Country : Denmark

Duration : 121 Minutes

🔸ആയിരത്തി ഒരുന്നൂറ് വർഷങ്ങൾക്ക് അധികം പഴക്കമുള്ള ഒരു പുണ്യ പുരാതന സ്ഥലമാണ് ഈജിപ്തിലെ കൈറോ നഗരത്തിൽ സ്ഥിതി ചെയ്യുന്ന ആൽ അസർ യൂണിവേഴ്സിറ്റി. ഇസ്ലാം മതത്തിന്റെ തന്നെ വളരെ പ്രധാനപ്പെട്ട, പരിപാവനമായ സ്ഥലമായി കണ്ട് കൊണ്ടിരിക്കുന്ന ഇവിടെ നിന്നും എത്രയോ തലമുറകൾ മത പഠനം പൂർത്തിയാക്കി സമൂഹത്തിലേക്ക് ഇറങ്ങി വന്നിരിക്കുന്നു. ഇത്തരത്തിൽ ഉള്ളൊരു സ്ഥലം ഇസ്ലാം എക്സ്ട്രീമിസ്റ്റ് ഗ്രൂപ്പുകളുടെ വളർച്ചയ്ക്ക് കൂടി ഭാഗം ആവുന്നുണ്ട് എന്ന രീതിയിൽ കഥ പറഞ്ഞ് പോവുന്ന ബോയ് ഫ്രം ഹെവൻ എന്ന ചിത്രം എന്ത് കൊണ്ട് വലിയ വിവാദങ്ങൾ ഇതിനോടകം സൃഷ്ടിച്ചില്ല എന്നോർത്ത് ചെറിയൊരു അത്ഭുതം തോന്നിയിരുന്നു.

🔸നൈൽ ഹിൽട്ടൻ ഇൻസിഡന്റ് പോലൊരു ചിത്രം സംവിധാനം ചെയ്ത വ്യക്തി ആയത് കൊണ്ട് തന്നെ ടാരിക് സാലയുടെ സിനിമ വാച്ലിസ്റ്റ് ചെയ്യപ്പെട്ടതിൽ വലിയ അത്ഭുതം ഒന്നും ഇല്ല, അത്യാവശ്യം കൊണ്ട്രാവർസി പ്രതീക്ഷിക്കുകയും ചെയ്തിരുന്നു. ഇങ്ങനെ ഒക്കെ ആണെങ്കിലും ആദ്യം സൂചിപ്പിച്ച സിനിമയുടെ അത്രയും തൃപ്തികരമായ ഒരു വ്യൂയിങ് അനുഭവം ഒന്നുമല്ല ഈ ചിത്രം. ഒരു മത്സ്യ തൊഴിലാളിയുടെ മകനായി കൈറോ നഗരത്തിൽ നിന്നും മാറി ഗ്രാമ പ്രദേശത്ത് ജനിച്ച് വളർന്ന ആളാണ് നമ്മുടെ പ്രധാന കഥാപാത്രം ആയ ആദം. അച്ചടക്കത്തിന്റെ കാര്യത്തിൽ കർക്കശക്കാരൻ ആയ ആദമിന്റെ അച്ഛന് അല്പം എങ്കിലും ഭയം ഉള്ളത് ദൈവത്തിൽ മാത്രം ആയിരിക്കണം.

🔸അത് കൊണ്ടാവണം ഗ്രാമത്തിലെ ഇമാം പറഞ്ഞ ഉടനെ തന്നെ തന്റെ മകനെ വിദ്യാഭ്യാസം പൂർത്തിയാക്കാനായി ആൽ അസർ യൂണിവേഴ്സിറ്റിയിലേക്ക് അയക്കുന്നത്. എന്നാൽ സമയം എന്നത് ആദത്തിനെ സംബന്ധിച്ചിടത്തോളം ഒട്ടും നന്നായിരുന്നില്ല. ആദം എത്തി ദിവസങ്ങൾക്കു അകം തന്നെ അവിടുത്തെ വലിയ പണ്ഡിതൻ മരണപ്പെടുകയാണ്. താമസിയാതെ ആ വലിയ സ്ഥാനം കയ്യാളാനായി ഒരു അധികാര വടംവലി തന്നെ അവിടെ ഉണ്ടാവുകയാണ്. തന്റേത് അല്ലാത്ത കാരണങ്ങളാലും തീരുമാനങ്ങളാലും ആദം കൂടി ഈ വടംവലിയുടെ ഭാഗം ആവുകയാണ്. തുടർന്ന് ഒരുപാട് ഒരുപാട് പ്രശ്നങ്ങൾ കഥയിലേക്ക് കടന്ന് വരികയാണ്, മോശം പറയാൻ ഇല്ലാത്ത എന്നാൽ വലിയ സംഭവം ഒന്നും അല്ലാത്ത ഒരു ചെറിയ ചിത്രമാണ് ബോയ് ഫ്രം ഹെവൻ.

Verdict : Good

DC Rating : 3.75/5

1280. The Celebration (1998)

Director : Thomas Vinterberg

Cinematographer : Anthony Mantle

Genre : Drama

Country : Denmark

Duration : 105 Minutes

🔸ദി മെനു എന്ന ചിത്രം കണ്ട് കഴിഞ്ഞതിന് പിറകെ ദി സെലിബ്റേഷൻ എന്ന ഡാനിഷ് ചിത്രം കാണാൻ ഇടയായത് വളരെ കൗതുകകരം ആയ ഒരു യാദൃചികത ആയിരിക്കും, കാരണം രണ്ട് സിനിമകളുടെയും സെറ്റപ്പ് വളരെ വ്യത്യസ്തം ആണെങ്കിലും സ്ട്രൈകിങ് ആയ സാമ്യം പല ഇടത്തും ഉണ്ട്. രണ്ടിലും ഒരു ആഘോഷത്തിനായി ഒരു കൂട്ടം ആളുകൾ ഒരു സ്ഥലത്ത് ഒത്ത് ചേരുന്നതും, വളരെ വിചിത്രമായ ചില സംഭവങ്ങൾ കാരണം ചില രഹസ്യങ്ങൾ പാട്ടാവുന്നതും, അതിന്റെ ആഫ്റ്റർ എഫക്ടസും ഒക്കെയാണ്. എന്നാൽ മെനു ഒരു കൂട്ടം അപരിചിതരുടെ കഥ ആണെങ്കിൽ സെലിബ്രേഷൻ ഒരു കുടുംബത്തിൽ അരങ്ങേറുന്ന കഥയാണ്, ഈ ഒരു കാരണം കൊണ്ട് തന്നെ കുറച്ച് കൂടി പേഴ്സണൽ ആണ് ഈ ചിത്രം, ഒരല്പം കൂടുതൽ ഡിപ്രസിങ്ങും.

🔸ഹെൽഗേ എന്ന മധ്യവയസ്കൻ തന്റെ അറുപതാം പിറന്നാൾ ആഘോഷിക്കുന്ന വേളയിൽ ആണ്. സ്വന്തമായി ഒരുപാട് ബിസിനസ് സംരംഭങ്ങളും, അസ്സറ്റുകളും ഒക്കെയുള്ള ഹെൽഗെയുടെ പിറന്നാൾ ആഘോഷം അയാളുടെ ഹോട്ടലുകളിൽ ഒന്നിൽ വലിയ അർഭാടത്തോടെ നടത്താൻ ഉള്ള തയാറെടുപ്പിൽ ആണ് ബന്ധു മിത്രാദികൾ. പൊതുവെ സമൂഹത്തിൽ അങ്ങോളം ഇങ്ങോളം ഉള്ള ആളുകൾക്ക് ഇടയിൽ ഒരു ബഹുമാനവും ആദരവും ഒക്കെ ഹെൽഗെക്ക് ഉണ്ട്, ആയതിനാൽ തന്നെ പരിപാടിയിൽ പങ്കെടുക്കാൻ വലിയൊരു കൂട്ടം ആളുകൾ തന്നെ എത്തി ചേരുന്നുണ്ട്. ഈ കൂട്ടം ആളുകളിൽ ഹെൽഗെയുടെ മൂന്ന് മക്കളും ഉണ്ട്, ഹെൽഗെയുടെ മറ്റൊരു മകൾ ആത്മഹത്യ ചെയ്തിട്ട് അധികം നാളുകൾ ആയിട്ടില്ല.

🔸പൊതുവെ അന്തർ മുഖനായ ക്രിസ്ത്യൻ ആണ് ഹെൽജയുടെ മൂത്ത പുത്രൻ, അച്ഛനുമായി ഒരുപക്ഷെ ഏറ്റവും ആത്മബന്ധം ഉള്ളതും അയാൾക്ക് ആയിരിക്കണം. രണ്ടാമത്തെ മകനായ മൈക്കൽ ഒരു കുത്തഴിഞ്ഞ ജീവിതം നയിക്കുന്ന ആളാണ്, മൂന്നാമത്തേത് മകളായ ഹെലൻ ആണ്. ആഘോഷ പരിപാടികൾ മനോഹരമായി ആണ് ആരംഭിക്കുന്നത് എങ്കിലും താമസിയാതെ കാര്യങ്ങൾ കൈവിട്ട് പോവുകയാണ്. വളരെ വൃത്തികെട്ട പല കുടുംബ രഹസ്യങ്ങളും അതിഥികളുടെ മുന്നിൽ വെച്ച് വെളിപ്പെടുമ്പോൾ കാര്യങ്ങൾ കൂടുതൽ മോശമായി മാറുകയാണ്. സ്ഥിരം ശൈലിയിൽ നിന്ന് മാറി ഹാൻഡി കാം ഒക്കെ ഉപയോഗിച്ച് ചിത്രീകരിച്ച സിനിമ കൂടിയാണ് എന്ന പ്രത്യേകത കൂടി ഉണ്ട്. മികച്ച ഒരു സിനിമ ആണ് സെലിബ്രേഷൻ, വളരെ പേഴ്സണൽ ആയ ടച്ചിങ്‌ ആയ ഒരു കാഴ്ചനുഭവം തന്നെ ഉറപ്പ് തരുന്നു, കാണാൻ ശ്രമിക്കുക.

Verdict : Very Good

DC Rating : 4.25/5

1279. The Menu (2022)

Director : Mark Mylod

Cinematographer : Peter Deming

Genre : Thriller

Country : USA

Duration : 107 Minutes

🔸ഒരു അഗതാ ക്രിസ്റ്റി നോവൽ തരുന്ന മിസ്റ്ററി ഫീൽ ഒക്കെ നൽകുന്ന, വളരെ സ്ലോ ആയി പ്ലോട്ട് റിവീൽ നടത്തുന്ന, എന്നാൽ അത്രയും സമയം പ്രേക്ഷകനെ ഹുക് ചെയ്ത് നിർത്തുന്ന നല്ലൊരു ത്രില്ലർ സിനിമ ആണ് നിങ്ങൾ കാണാൻ ഉദ്ദേശിക്കുന്നത് എങ്കിൽ ദി മെനു നല്ലൊരു ഓപ്ഷൻ ആണ്. ഒരുപാട് ചോദ്യങ്ങൾ ബാക്കി വെക്കുന്നുണ്ട് സിനിമ എങ്കിലും സ്‌ക്രീനിൽ കഥയുടെ ചുരുൾ അഴിയുന്ന നിമിഷങ്ങളിൽ ഒന്നും ഇത്തരം ചോദ്യങ്ങൾ ഉയർത്താതെ കാഴ്ചക്കാരനെ ഡിസ്ട്രാക്റ്റ് ചെയ്ത് കൊണ്ട് പോവുന്നതിൽ സിനിമ വിജയിച്ചിട്ടുണ്ട് എന്നത് എടുത്ത് പറയണം. ഒന്നേ മുക്കാൽ മണിക്കൂർ ഏറെക്കുറെ പൂർണമായും ഒരു സെറ്റിംഗിന് അകത്ത് സംഭവിക്കുന്ന ഈ സിനിമ തീർച്ചയായും ഒരു വിന്നർ തന്നെയാണ്.

🔸ഒരു രാത്രി ചിലവഴിക്കാൻ ആയിരത്തി ഇരുന്നൂറ്റി അൻപത് ഡോളർ, അതായത് ഒരു ലക്ഷം ഇന്ത്യൻ രൂപയ്ക്ക് മുകളിൽ. ഇതാണ് ഹോത്തോൻ എന്ന ഐലൻഡ് റെസ്റ്റൊറന്റിലെ ബിൽ, സമൂഹത്തിലെ ഉന്നതർക്ക് മാത്രം എന്ന തോതിൽ ചിട്ടപ്പെടുത്തിയ ഈ പരിപാടിയിൽ പങ്കെടുക്കാനും, പ്രശസ്ത പാചക വിദഗ്ദനായ ജൂലിയൻ സ്ലോവിക്കിന്റെ ഭക്ഷണം രുചിക്കാനുമായി പന്ത്രണ്ടോളം പേർ ഒരുനാൾ അവിടേക്ക് എത്തുകയാണ്. ഈ പന്ത്രണ്ടോളം പേരിൽ ഒരാളാണ് നമ്മുടെ പ്രധാന കഥാപാത്രം ആയ മാർഗോട്ട്. മാർഗോട്ടിനെ കേന്ദ്ര കഥാപാത്രം എന്ന മട്ടിൽ അവതരിപ്പിച്ച് കൊണ്ടാണ് സിനിമ പുരോഗമിക്കുന്നത്.

🔸ഉന്നതരായ ബിസിനസ്സുകാർ, സിനിമാ നടൻ, ഫുഡ്‌ കൃട്ടിക്സ് എന്നിവരുടെ മുന്നിലേക്ക് ജൂലിയൻ സ്ലോവിക്കും സഹ പ്രവർത്തകരും അണി നിരത്തുന്നത് ആറ് ഫുഡ്‌ കോർസുകളാണ്. വളരെ വിചിത്രമായ മെമ്പൊടികളോടും മറ്റുമൊക്കെ കൂടെയാണ് ഈ ആറ് ഡിഷുകളും അയാൾ അവതരിപ്പിക്കുന്നത്, ഒരു കാര്യം മാത്രം വ്യക്തം അവർ ഒട്ടും പ്രതീക്ഷിച്ചിരുന്ന ഒരു അനുഭവം ആയിരുന്നില്ല അവർക്ക് അവിടെ നിന്ന് ലഭിച്ചത് എന്ന്. ആദ്യാവസാനം നമ്മളെ ഉത്തരം കണ്ടെത്താനായി പ്രേരിപ്പിക്കുന്ന, എന്നാൽ വളരെ ലളിതവും അതേ സമയം വാലിഡ് ആയ ഒരു ഉത്തരം നമുക്കായി ബാക്കി വെക്കുകയും ചെയ്യുന്ന ഒരു സിനിമ ആണ് മെനു. ഒന്നേ മുക്കാൽ മണിക്കൂർ എൻജോയ് ചെയ്ത് കാണാൻ ഉള്ള ഒരു എന്റെർറ്റൈണർ തന്നെയാണ് സിനിമ, കണ്ട് നോക്കുക.

Verdict : Good

DC Rating : 3.75/5