403. End Of The F***ing World (2017)

Director : Jonathan Entwistle

Genre : Dark Comedy

Rating : 8.2/10

Season : 1

Episodes : 8

Country : UK

Duration : 19-22 Minutes Per Episode


🔸ഇരുപത് മിനുട്ട് പരിധിയിൽ ഉള്ള എട്ട് എപ്പിസോഡുകൾ ,ആകെ മൊത്തം കൂട്ടിയാൽ തന്നെ ഒരു സിനിമയുടെ ദൈർഖ്യം മാത്രം. കണ്ടവരിൽ നിന്നും നല്ല അഭിപ്രായങ്ങൾ കേട്ടിട്ടും എൻഡ് ഓഫ് ദി ഫ*ങ് വേൾഡ് എന്ന സീരീസ് കാണാനുണ്ടായ വലിയ പ്രചോദനം ഈ ദൈർഖ്യം ഒന്ന് തന്നെ ആയിരുന്നു. അതിന് പുറമെ സമൂഹത്തിൽ നിന്നും അകന്ന് ജീവിക്കുന്ന, നിയമങ്ങളോടും രീതികളോടും താല്പര്യം കാണിക്കാത്ത ടീനേജിലേക്ക് കടന്ന രണ്ട് കഥാപാത്രങ്ങളുടെ റോഡ് യാത്രയാണ് സീരീസിന്റെ നട്ടെല്ല് എന്നതും ഈ ഉദ്യമം കാണുന്നതിനുള്ള കാരണം ആയി മാറി. കാരണങ്ങൾ എന്തൊക്കെ തന്നെ ആണെങ്കിലും നല്ലൊരു കാഴ്ച്ചാനുഭവം ആണ് ഈ ടെലിവിഷൻ സീരീസ് എന്ന കാര്യത്തിൽ രണ്ടാമതൊരു അഭിപ്രായത്തിന് ഇടമില്ല. അഞ്ച് വർഷങ്ങൾക്ക് മുന്നേ പുറത്തിറങ്ങിയ ഇതേ പേരിലുള്ള കോമിക് ബുക്കിന്റെ ദൃശ്യാവിഷ്‌കാരം കൂടിയാണ് ഈ സീരീസ്.

🔸പതിനേഴ് വയസ്സുകാരനായ ജെയിംസ് ആണ് നമ്മുടെ പ്രധാന കഥാപാത്രം, ജെയിംസിനെ സംബന്ധിച്ചിടത്തോളം അയാളൊരു സൈക്കോ ആണ്. ഒരു രീതിയിലും സമൂഹവുമായോ ആളുകളുമായോ അടുക്കാൻ കഴിയാത്ത അവർ സൃഷ്ട്ടിക്കുന്ന ചട്ടക്കൂടിനകത്ത് ജീവിക്കാൻ കഴിയാത്ത ,താല്പര്യമില്ലാത്ത ,അതിന് തയാറാകാത്ത വ്യക്തിത്വമാണ് ജെയിംസിന്റേത്. മിണ്ടാപ്രാണികളായ മൃഗങ്ങളാണ് ജയിംസിന്റെ ഇര, തന്റെ മനസ്സിൽ അടിഞ്ഞ് കൂടിയ നിരാശയും പകയുമെല്ലാം അവറ്റകളുടെ മേലാണ് അവൻ തീർക്കാറ്, അതാണ് പതിവ്. എന്നാൽ ഇപ്പോൾ കാര്യങ്ങൾ കുറച്ച് വ്യത്യസ്തമാണ്, മൃഗങ്ങളെ ജെയിംസിന് മടുത്ത് തുടങ്ങിയിരിക്കുന്നു, അടുത്ത പടവായി അവൻ കാണുന്നത് മനുഷ്യരെ തന്നെയാണ്. ഇതിനെല്ലാം ജെയിംസിനെ സംബന്ധിച്ചിടത്തോളം കാരണങ്ങളുണ്ട്, അവന്റെ ഉള്ളിലെ മുറിവുകൾ അത്രമേൽ ആഴത്തിൽ പതിഞ്ഞവയാണ്.

🔸രണ്ടാമത്തെ കഥാപാത്രമായ അലിസയുടെ കാര്യ കാരണങ്ങൾ കുറച്ച് കൂടി ലളിതമാണ്, സാമാന്യ ബുദ്ധിക്ക് വിവരിക്കാൻ കഴിയുന്നതുമാണ്. കുടുംബം എന്നതിനോളം അലീസ വെറുക്കുന്ന മറ്റൊന്ന് ലോകത്ത് തന്നെ ഉണ്ടാവില്ല ,ഒരു പരിധി വരെ അവളെ മകളുടെ സ്ഥാനത്ത് കാണാനാവാത്ത രണ്ടാനച്ഛനും നിസ്സഹായതയുടെയും ദയനീയതയുടെയും ആൾരൂപമായ അമ്മയും ആണ് ഈ വെറുപ്പിന് ആധാരം. വീട് വിട്ടിറങ്ങുക, സമാധാനം ലഭ്യമായ എങ്ങോട്ടേക്കെങ്കിലും പോവുക എന്നതാണ് അലീസയുടെ വലിയ ആഗ്രഹങ്ങളിൽ ഒന്ന്. മേല്പറഞ്ഞ പ്രശ്നങ്ങൾ കൊണ്ടാവാം ജെയിംസിനെ പോലെ തന്നെ സമൂഹത്തിൽ നിന്നും ഒറ്റപ്പെട്ട് ജീവിക്കുന്ന മറ്റൊരു പ്രതിഭാസമാണ് അലീസയും, അതാണ് അവളെ സംബന്ധിച്ചിടത്തോളം സുഖകരം. പുറമേ ദേഷ്യത്തിന്റെയും ധിക്കാരത്തിന്റെയും മൂടുപടം ധരിക്കുമെങ്കിലും അവയെല്ലാം തന്നെ നിസ്സഹായതയുടെ യാഥാർഥ്യം ഒളിപ്പിക്കാനുള്ള മാർഗങ്ങളാണ് അലീസയ്ക്ക്.

🔸യാദൃച്ഛികമോ ,വിധിയോ എന്ത് പേരിട്ട് വിളിച്ചാലും ഈ രണ്ട് കഥാപാത്രങ്ങളുടെയും സഞ്ചാരമാർഗം കൂട്ടി മുട്ടുകയാണ്, സമൂഹത്തിനോടും ചുറ്റുമുള്ളവരോടും ഉള്ള വെറുപ്പ് ഇരുവർക്കും പരസ്പരം മനസിലാക്കാനുള്ള പാത ഒരുക്കുക ആയിരുന്നു. രണ്ട് കഥാപാത്രങ്ങളും കെട്ടുപാടുകൾ പൊട്ടിച്ചെറിഞ്ഞ് കൊണ്ട് ആഗ്രഹങ്ങൾ എത്തി പിടിക്കാനായുള്ള, സ്വാതന്ത്ര്യം അനുഭവിച്ചറിയാനുള്ള യാത്ര ആരംഭിക്കുകയാണ്. ഈ യാത്ര ഇരുവരുടെയും ,അവരുടെ ജീവിതത്തിന്റെ ഭാഗമെന്ന് വിശ്വസിക്കുന്നവരുടെയും ജീവിതങ്ങൾ മാറ്റി മറിക്കുമെന്ന് ഉറപ്പ് ,സംശയം ബാക്കി കിടക്കുന്നത് അളവിലും തീവ്രതയിലും മാത്രം. എന്ത് തന്നെ ആയാലും രണ്ട് കഥാപാത്രങ്ങളുടെയും യാത്ര പ്രശ്നങ്ങളിൽ നിന്നും കൂടുതൽ പ്രശ്നങ്ങളിലേക്കാണ് കടന്ന് പൊയ്ക്കൊണ്ടിരുന്നത്, കൂടുതൽ പറഞ്ഞ് കാഴ്ചയിലുള്ള രസച്ചരട് മുറിക്കുന്നില്ല. മൂന്ന് മണിക്കൂർ തിരക്കിൽ നിന്നും മാറ്റി വെക്കാൻ തയ്യാറാണെങ്കിൽ ഇതുവരെ കണ്ട് ശീലിച്ചിട്ടില്ലാത്ത രീതിയിൽ ഉള്ളൊരു ടെലിവിഷൻ സീരീസ് പരിചയപ്പെടാൻ കഴിഞ്ഞേക്കും.

🔸കഥാ ഗതിയിൽ നിന്ന് സൂചിപ്പിച്ചത് പോലെ തന്നെ അത്യാവശ്യം വയലൻസും ഗോറും ഒക്കെ കൈകാര്യം ചെയ്യുന്ന ഒന്നാണ് എൻഡ് ഓഫ് ദി ഫ*ങ്‌ വേൾഡ് എന്ന സീരീസ്, കഥാപാത്രങ്ങളുടെ കാര്യം ആണെങ്കിൽ ഉപയോഗിക്കുന്ന ഭാഷയിലും കടന്ന് പോവുന്ന സന്ദർഭങ്ങളിലും ഇഷ്ടം ജനിപ്പിക്കുന്നതായി പ്രത്യേകിച്ച് ഒന്നും കണ്ടെത്താനാവില്ല. സ്ഥിരം ഇംഗ്ലീഷ്, വിദേശ ഭാഷാ ചിത്രങ്ങൾ കാണുന്നവർക്ക് പ്രശ്‍നം ഉളവാക്കുന്നതായി ഒന്നുമില്ലെങ്കിലും മറ്റുള്ളവർക്ക് വേണ്ടിയാണ് മുകളിലെ ഓർമപ്പെടുത്തൽ. റോഡ് യാത്ര പ്രമേയമായ കഥ ആയതിനാൽ തന്നെ മനോഹരമായ ഇംഗ്ലീഷ് ഗ്രാമ പശ്ചാത്തലങ്ങളെയും പല രംഗങ്ങളിലും കാണാനാവും, കഥ വികസിക്കുന്നത് ഒരു പരിധി വരെ രണ്ട് കഥാപാത്രങ്ങൾക്കിടയിലുള്ള സംഭാഷണങ്ങളിലൂടെയും സമ്മർദ്ദം ഉളവാക്കുന്ന സന്ദർഭങ്ങളിലെ ഇവരുടെ സമ്പർക്കത്തിലൂടെയുമാണ്, ഈ സീരീസിൽ നിന്നും എന്ത് പ്രതീക്ഷിക്കാം എന്നതിനെ കുറിച്ച് ഒരേകദേശ ധാരണ ലഭിച്ചെന്ന് കരുതട്ടെ. മറ്റ് പല സീരീസുകളുമായും തട്ടിച്ച് നോക്കുമ്പോൾ അത്ഭുതാവഹമെന്നോ മികച്ചതെന്നോ പറയാൻ കഴിയില്ലെങ്കിലും മുഷിച്ചാൽ ഉളവാക്കില്ല എന്നുറപ്പുള്ള നല്ലൊരു അനുഭവം തന്നെയാണ് എൻഡ് ഓഫ് ദി ഫ*ങ് വേൾഡ്.

Verdict : Good

402. The Seven Year Itch (1955)

Director : Billy Wilder

Genre : Drama

Rating : 7.2/10

Country : USA

Duration : 105 Minutes


🔸വിദേശ സിനിമകളോട് യാതൊരു താല്പര്യവും പ്രകടിപ്പിക്കാത്ത വ്യക്തി ആണെങ്കിൽ കൂടിയും ജീവിതത്തിൽ ഒരിക്കൽ എങ്കിലും കണ്ടിരിക്കാനോ അറിഞ്ഞിരിക്കാനോ സാധ്യത ഉള്ള രംഗമാണ് മർലിൻ മൺറോ കാറ്റിൽ ഉയർന്നു വരുന്ന തന്റെ വെള്ള വസ്ത്രം താഴ്ത്തി പിടിക്കാൻ തത്രപ്പെടുന്ന മുകളിൽ ചേർത്തിരിക്കുന്ന രംഗം. റിലീസിന് ആറ് പതിറ്റാണ്ടുകൾക്ക് ഇപ്പുറം ഇന്നും ദി സെവെൻ ഇയർ ഇറ്റ്ച്ച് എന്ന ചിത്രം ഓർമിക്കപ്പെടുന്നത് ഈ രംഗം കൊണ്ട് തന്നെയാണ്, പിന്നെ ഒരു കാലഘട്ടം മുഴുവൻ യുവാക്കളുടെ മനസ്സിൽ നിറഞ്ഞ് നിന്ന, ഉത്തരങ്ങളെക്കാൾ ചോദ്യങ്ങൾ അവശേഷിപ്പിച്ച് മണ്മറഞ്ഞ് പോയ മർലിൻ മൺറോയാലും. ഈ ഒറ്റ രംഗത്ത് നിന്നും 26 അടി നീളമുള്ള പ്രതിമ ചിക്കാഗോയിൽ ഉയർന്നത് പിൽക്കാല ചരിത്രം.

🔸തന്റെ ജീവിതത്തിന്റെ മധ്യ കാലത്തിലേക്ക് കടന്ന് കൊണ്ടിരിക്കുന്ന വ്യക്തിയാണ് പബ്ലിഷർ ആയ റിച്ചാർഡ് ഷെർമാൻ. ചെറുപ്പ കാലത്ത് തന്നെ ഉത്തരവാദിത്തങ്ങൾ ഏറ്റെടുക്കേണ്ടി വന്നത് കൊണ്ടാവണം സന്തോഷം എന്നത് ബാല്യത്തിലോ യൗവനത്തിലോ വേണ്ടുവോളം അയാൾ അനുഭവിച്ചിട്ടില്ല. ഭാര്യയും മകനും അടങ്ങുന്ന കുടുംബത്തിന്റെ ഗൃഹ നാഥൻ കൂടിയാണ് ഷെർമാൻ, എന്നാൽ കുറച്ച് നാളുകളായി ചില പ്രശ്നങ്ങൾ അയാളെ അലട്ടികൊണ്ടിരിക്കുകയാണ്. മധ്യ വയസ്സിലേക്ക് കടന്ന് കൊണ്ടിരിക്കുന്ന മിക്കവരും പറഞ്ഞ് കേട്ടിട്ടുള്ള സെവൻ ഇയർ ഇറ്റ്ച്ച് എന്ന പ്രതിഭാസം തന്റെ ജീവിതത്തിലും സംഭവിക്കുകയാണോ എന്നാണ് അയാളുടെ ഭയം.

🔸വിവാഹത്തിന് ശേഷം ഭാര്യയ്ക്കും ഭർത്താവിനും ഇടയിൽ ഉടലെടുക്കാവുന്ന സ്നേഹത്തിനും അടുപ്പത്തിനും ആയുസ്സ് ഏഴ് വർഷം മാത്രമാണ് എന്നൊരു സങ്കൽപം പൊതുവെ പാശ്ചാത്യ നാടുകളിൽ നില നിൽക്കുന്നുണ്ട്. ഈ സങ്കല്പത്തെയാണ് സെവൻ ഇയർ ഇറ്റ്ച്ച് എന്ന ഓമനപ്പേരിട്ട് വിശേഷിപ്പിക്കുന്നത്. ഏഴ് വർഷങ്ങൾക്ക് ശേഷമുള്ള ദമ്പതിമാരുടെ ജീവിതം വെറും ഒത്തുതീർപ്പുകളുടേത് മാത്രമാണെന്നും സ്നേഹത്തിന് അവിടെ വലിയ റോളില്ല എന്നും ഈ അലിഖിത സാങ്കല്പിക നിയമം കണക്കാക്കുന്നു. ഏഴ് വർഷങ്ങൾക്ക് ശേഷം ഭർത്താവിനോ ഭാര്യയ്‌ക്കോ മറ്റൊരാളുമായി അടുപ്പം ഉടലെടുക്കാം എന്നും ഇത് പ്രകാരം കരുതപ്പെടുന്നുണ്ട്.

🔸ഇത്തരം സാങ്കല്പിക നിയമങ്ങളും ആചാരങ്ങളും എന്ത് തന്നെയോ ആയിക്കോട്ടെ, ഷെർമാന്റെ പ്രശനം എന്നത് അയാളിൽ ഉടലെടുത്തിരിക്കുന്ന ഭാര്യയോടും മകനോടുമുള്ള മാനസിക അകൽച്ച തന്നെയാണ്. പഴയ സ്നേഹം അയാൾക്ക് ഭാര്യയോട് തോന്നുന്നില്ല എന്നത് മാത്രമല്ല കുടുംബത്തിൽ നിന്നും വേർപെട്ട് നിന്ന് കൊണ്ടുള്ള ഏകാന്ത വാസം അയാൾക്ക് ഇഷ്ടപ്പെട്ട് തുടങ്ങിയിരിക്കുന്നു. ഭാര്യയോടും മകനോടും ഏതെങ്കിലും രീതിയിലുള്ള അടുപ്പക്കുറവ് തനിക്ക് ഉണ്ടെന്ന് അംഗീകരിക്കാം ഷെർമാന്റെ ബോധമനസ്സ് തയാറായിട്ടില്ല ,എന്നാൽ പ്രശ്നങ്ങൾ കൂടുതൽ സങ്കീർണം ആവുന്നത് അയാളുടെ അയൽക്കാരി ആയി മർലിൻ മൺറോയുടെ കഥാപാത്രം താമസത്തിന് എത്തുമ്പോഴാണ്.

🔸ആരുമായും പെട്ടെന്ന് അടുക്കുന്ന മൺറോയുടെ കഥാപാത്രം ഷെർമാനെ പോലെ മനസികാവസ്ഥയുള്ള ഒരാളുമായി ഇടപഴകുമ്പോൾ സ്വാഭാവികമായും ഉണ്ടാവുന്ന രസകരമായ അനവധി രംഗങ്ങൾ ചിത്രത്തിലുണ്ട്. ഈ കഥാപാത്രങ്ങൾക്കെല്ലാം തുടർന്ന് എന്ത് സംഭവിക്കും എന്നത് ചിത്രം കണ്ട് തന്നെ അറിയുക. ലളിതമായ നാടകത്തിൽ നിന്നും പ്രചോദനം ഉൾക്കൊണ്ട് പുറത്തിറങ്ങിയ ഈ ചിത്രത്തിന്റെ ചുവട് പിടിച്ച് പല ഭാഷകളിലും രാജ്യങ്ങളിലും സമാനമായ ചിത്രങ്ങൾ പുറത്തിറങ്ങുകയുണ്ടായി. ചെറിയ തോതിൽ വിരസത ഉളവാക്കിയേക്കാവുന്ന ഈ പ്രശനം ഒഴിച്ച് നിർത്തിയാൽ നല്ലൊരു ചിത്രം തന്നെയാണ് ദി സെവൻ ഇയർ ഇറ്റ്ച്ച്.

Verdict : Good

401. Bring Me The Head Of Alfredo Garcia (1974)

Director : Sam Peckinpah

Genre : Action

Rating : 7.5/10

Country : Mexico

Duration : 111 Minutes


🔸"ആൽഫ്രഡോ ഗാർഷ്യയുടെ തല എനിക്ക് വേണം, എങ്ങനെ എന്നതോ ആര് എന്നതോ എനിക്ക് അറിയേണ്ട, അവന്റെ തല വെട്ടി എന്റെ മുന്നിൽ കൊണ്ട് വരുന്നവൻ ആര് തന്നെ ആയാലും ഒരു മില്യൺ ഡോളർ പ്രതിഫലം ഞാൻ തരും. ഒരു മകനെ പോലെ താൻ കണ്ടിട്ടും ,ആ പരിഗണന നൽകിയിട്ടും ആൽഫ്രഡോ ഗാർഷ്യ ചെയ്തത് എനിക്ക് ഒരിക്കലും പൊറുക്കാൻ കഴിയാത്ത തെറ്റാണ് ,കൂടെ നിന്ന് ചതിക്കുക എന്ന തെറ്റ് ,ചതിക്ക് ഉത്തരം അത് ഏത് കാലത്ത് ആണെങ്കിലും ഒന്നേയുള്ളൂ ,മരണം. ഗാർഷ്യയുടെ സമയം അടുത്ത് കഴിഞ്ഞിരിക്കുന്നു" മെക്സിക്കൻ ഭൂവുടമയും മാഫിയ തലവനുമായ എൽ ജെഫെ തന്റെ തീരുമാനത്തിൽ എത്തി കഴിഞ്ഞിരുന്നു. നീണ്ട കാലത്തെ പ്രവർത്തി ജീവിതത്തിലൂടെ അയാളെ പരിചിതരായവർക്ക് ആ തീരുമാനത്തിൽ കടുകിട വ്യത്യാസം പോലും ഉണ്ടാവില്ലെന്നും നന്നായി അറിയാം.

🔸എൽ ജെഫെ ,സ്പാനിഷ് കുടിയേറ്റക്കാരുടെ കൂടെ വന്ന് കൈക്കരുത്തും മനക്കരുത്തും കൊണ്ട് മാത്രം സാമ്രാജ്യം പണിതുയർത്തിയവൻ. കീഴ്‍ജോലിക്കാരും സഹായികളും അയാളെ ബഹുമാനത്തോടെയും അതിനേക്കാൾ അധികം പേടിയോടെയും സംബോധന ചെയ്യുന്നത് ബോസ് എന്നാണ്. അപ്രവചനീയത ആണ് അയാളുടെ ശൈലി ക്രൂരതയാണ് അയാളുടെ കൈമുതൽ, അതിനാൽ തന്നെ ചെറുപ്പക്കാരിയും കല്യാണം കഴിഞ്ഞിട്ടില്ലാത്തവളുമായ മകൾ തെരേസ ഗർഭിണി ആണെന്ന് അറിഞ്ഞപ്പോൾ അത് ഉൾക്കൊള്ളാൻ ജെഫേ തയാറായില്ല. മകളെ വേദനിപ്പിച്ചിട്ടായാലും ഇതിന് ഉത്തരവാദിയായവന്റെ പേര് അറിയുക എന്ന ഒരേയൊരു ഉദ്ദേശമാണ് അയാൾക്ക് ഉണ്ടായിരുന്നത് ,അതിൽ വിജയിക്കുകയും ചെയ്തു.

🔸തെരേസയുടെ വായിൽ നിന്നും വന്ന നാമം ,ആൽഫ്രഡോ ഗാർഷ്യ എന്നായിരുന്നു. ആണ്മക്കളില്ലാത്ത ജെഫേ തന്റെ മകനായി ആയിരുന്നു ആൽഫ്രഡോയെ കണ്ടത് ,തന്റെ മരണ ശേഷം സകല സ്വത്തുക്കളുടെ ഉത്തരവാദിത്തങ്ങളും കച്ചവട ചുമതലകളും അവൻ ഏറ്റെടുക്കണം എന്നായിരുന്നു ജെഫേ കരുതിയിരുന്നത്. എന്നാൽ തെരേസയിൽ നിന്നും ലഭിച്ച വിവരങ്ങൾ ജെഫേയ്ക് ആൽഫ്രഡോയിൽ ഉണ്ടായിരുന്ന വിശ്വാസങ്ങളെ മുറിവേല്പിക്കുന്നത് ആയിരുന്നു. അങ്ങനെ മുന്നേ സൂചിപ്പിച്ച എൽ ജെഫേയുടെ പൊട്ടി തെറിയും ആൽഫ്രഫോയുടെ തലയുടെ വിലയായ ഒരു മില്യൺ ഡോളറും തുടർന്നുള്ള സംഭവങ്ങളും അരങ്ങേറുകയാണ്.

🔸സംഭവം അരങ്ങേറുന്ന കാലഘട്ടവും ,അന്നത്തെ ജീവിത സാഹചര്യങ്ങളും എല്ലാത്തിനുമുപരി ഒരു മില്യൺ ഡോളർ എന്ന തുകയുടെ വലുപ്പവും എല്ലാം കാരണം ആൽഫ്രഡോയുടെ ജീവന് ആവശ്യക്കാർ അനവധി ആയിരുന്നു. ദൗത്യം ഏറ്റെടുത്ത് അനവധി ബൗണ്ടി ഹണ്ടർമാരാണ് ആൽഫ്രഡോയെ തേടി എത്തിയത്, ഇവർ ദൗത്യത്തിൽ വിജയിക്കുമോ, അല്ലെങ്കിൽ തന്റെ ജീവൻ നിലനിർത്താൻ ആൽഫ്രഡോയ്ക്ക് കഴിയുമോ എന്ന ചോദ്യങ്ങൾക്കുള്ള ഉത്തരങ്ങൾ ചിത്രം കണ്ട് തന്നെ അറിയുന്നതാവും നല്ലത്. മെക്സിക്കോ സിറ്റിയിലെ പേരെടുത്തൊരു വേശ്യാലയത്തിൽ പിയാനോ വായനക്കാരനായ ബെന്നിയും അയാളുടെ കാമുകി എലീറ്റയും ഈ കളിയുടെ ഭാഗമായി മാറുകയാണ്.

🔸തന്റെ ജീവിതത്തിൽ ഒട്ടും പ്രതീക്ഷാവഹം വല്ലാത്തൊരു കാലഘട്ടത്തിൽ സംവിധാനം ചെയ്യേണ്ടി വന്ന ചിത്രമാണ് ഇത് എന്ന് പിൽക്കാലത്ത് സംവിധായകൻ പറയുക ഉണ്ടായി ,മദ്യപാനം മുതലായ ലഹരി ഉപയോഗം കാരണം എടുത്തുചാട്ടം ,ദേഷ്യം ,പക ,നിരാശ എന്നീ ഭാവങ്ങൾ ഒഴിച്ച് കൂടാൻ കഴിയാഞ്ഞ സംവിധായകന്റെ ഈ കാലഘട്ടത്തിന്റെ പ്രതീകമാണ് നായക കഥാപാത്രവും. അയാൾ ഓടുകയാണ് ,ഒരപകടത്തിൽ നിന്നും അടുത്തതിലേക്ക് ,കാര്യമായി ഒന്നും നേടാൻ വേണ്ടി അല്ല ചില വാക്കുകൾ പാലിക്കാൻ വേണ്ടി മാത്രം. കൂടുതൽ ഒന്നും പറയുന്നില്ല നൂറ്റി പത്ത് മിനുട്ടിൽ ഉദ്വേഗ ജനകമായ കഥയും പ്രതീക്ഷിക്കാത്ത സന്ദര്ഭങ്ങളും മികച്ച ക്ലൈമാക്സും,സർവോപരി ക്ലിഷേകളില്ലാത്ത സിനിമയുമാണ് പ്രതീക്ഷിക്കുന്നതെങ്കിൽ ഈ ചിത്രത്തിന് ആ കോളങ്ങളിൽ എല്ലാം ടിക് നൽകാം.

Verdict : Very Good

Shining (1980) - Part 5

പോസ്റ്റ് 5 : ഭാഗം 6

അച്ഛനും മകനും

ഷൈനിംഗ് എന്ന ചിത്രത്തിന് ഒരു രണ്ടാം ഭാഗം വരാൻ പോവുന്ന ഈ സാഹചര്യത്തിലും ,ചിത്രം പ്രധാനമായും ശ്രദ്ധ ചെലുത്താൻ പോവുന്നത് ഡാനിയിൽ ആയതിനാലും ജാക്കും ഡാനിയും തമ്മിലുള്ള ബന്ധം ഒരു പരിധി വരെ ചിത്രത്തെ മുന്നോട്ട് നയിക്കുന്ന ഘടകം ആയതിനാലും ഈ ഭാഗം അതിലേക്ക് വെളിച്ചം വീശാനുള്ള ഒരു എളിയ ശ്രമം ആണ്. ഡാനിയുടെയും ജാക്കിന്റെയും സ്വഭാവ വൈകല്യങ്ങളെ കുറിച്ച് മുൻഭാഗങ്ങളിൽ പരാമർശിച്ചിരുന്നല്ലോ ,എന്നാൽ ഇരുവരും തമ്മിലുള്ള വൈകാരിക ,ശാരീരിക ബന്ധത്തിൽ വേണ്ട ശ്രദ്ധ നമ്മൾ ഇനിയും നൽകിയിട്ടില്ല. ചിത്രത്തിൽ തന്റെ മനസ്സ് കൈവിട്ട ശേഷം ജാക്ക് ഡാനിയ്ക്ക് നേരെ കാട്ടിക്കൂട്ടിയ ചെയ്ത്തുകൾ ഒരു ഒറ്റപ്പെട്ട സംഭവമായി കാണാൻ കഴിയില്ല ,പ്രത്യേകിച്ചും ചിത്രത്തിന്റെ ആരംഭത്തിൽ വെന്ഡി ഡാനിയെ പരിശോധിക്കാനായി എത്തിയ ഡോക്ടറോട് പറയുന്ന സംഭാഷണങ്ങൾ ശ്രദ്ധിക്കുക. ജാക്കിന് തന്റെ മകനോടുള്ള സ്നേഹത്തെ പറ്റിയും ,ഒരുനാൾ മദ്യ ലഹരിയിൽ അവനോട് ചെയ്ത് പോയ തെറ്റിനെ പറ്റിയും തുടർന്ന് മദ്യപാനം ഉപേക്ഷിച്ച സംഭവത്തെയും എല്ലാം വെന്ഡി വിശദീകരിക്കുന്നുണ്ട് ,എന്നാൽ അവ പറയുമ്പോൾ അവളുടെ മുഖത്ത് നിഴലിച്ച് നിന്ന നിസ്സംഗതയും ,നിർവികാരതയും ,നിസ്സഹായതയും മറ്റൊരു മാനം ആണ് നൽകുന്നത്.

ഈ ഭാഗത്ത് വളരെ ശ്രദ്ധിക്കേണ്ട മറ്റൊരു കാര്യം കൂടിയുണ്ട് ,സമയം എന്ന വസ്തുത. മകനെ ഉപദ്രവിച്ചതിൽ മനോവിഷമം ഉണ്ടായിരുന്ന ഡാനി മദ്യപാനം ഉപേക്ഷിച്ചത് വെൻഡിയുടെ വാക്കുകളിൽ അഞ്ച് മാസങ്ങൾക്ക് മുൻപാണ്. ഇനി പറയാൻ പോവുന്ന കാലയളവുകൾ പ്രത്യേകം ശ്രദ്ധിക്കുക ,വെന്ഡി അഞ്ച് മാസങ്ങൾക്ക് മുന്നേ നടന്ന കാര്യം ഒറ്റപ്പെട്ട സംഭവമായി ചിത്രീകരിച്ചതും ഓർക്കുക. ടോറെൻസ് കുടുംബം ഓവർലുക് ഹോട്ടലിൽ ചിലവഴിക്കുന്നത് ഒരു മാസത്തോളം സമയമാണ് ,ചില്ലറ മാറ്റങ്ങൾ കൂടി പരിഗണിക്കുകയാണെങ്കിൽ രണ്ട് മാസം എന്ന് വേണമെങ്കിൽ ഉറപ്പിക്കാം. അതായത് മുൻപ് സൂചിപ്പിച്ച മദ്യപാന സമയവും ജാക്ക് തന്റെ മനസ്സ് കൈവിട്ട് പോവുന്നതുമായ കാലത്തിന് ഇടയിൽ ഏകദേശം ഏഴ് മാസങ്ങളുടെ പഴക്കം മാത്രം.

ഗോൾഡ്‌റൂമിൽ ജാക്ക് ലോയ്ഡും ആയി ഏർപ്പെട്ട സംഭാഷണങ്ങൾ ശ്രദ്ധിക്കുക ,ഇവയിൽ ജാക്ക് വ്യക്തമായി സൂചിപ്പിക്കുന്നുണ്ട് തന്റെ ജീവിതം കീഴ്മേൽ മറിച്ചതും നശിപ്പിച്ചതും എല്ലാം അഞ്ച് മാസങ്ങൾക്ക് മുന്നേ നടന്ന സംഭവങ്ങൾ ആണെന്നത്. എന്നാൽ ഈ വിഷയത്തിലെ ഏറ്റവും വൈരുധ്യം സൂചിപ്പിക്കുന്ന സംഭാഷണം ജാക്കിൽ നിന്ന് തന്നെ കേൾക്കാനാവും. അങ്ങേയറ്റം ക്ഷുഭിതനും തനിക്ക് ചുറ്റും അരങ്ങേറുന്ന സംഭവ വികാസങ്ങളിൽ തിരിച്ചറിവ് നഷ്ട്ടപ്പെട്ടു നിൽക്കുന്ന സമയത്ത് ജാക്കിന്റെ വാക്കുകൾ ശ്രദ്ധിക്കുക "I did hurt him once ok. It was an accident, completely unintentional. And It was 3 goddamn years ago...."

ആദ്യം വെന്ഡി സൂചിപ്പിച്ച അഞ്ച് മാസം എന്ന കണക്കും ,പിന്നീട് സ്വാഭാവികമായി രൂപപ്പെട്ട ഏഴ് മാസം എന്ന കണക്കും ,ജാക്ക് ലോയ്ഡിനോട് പറഞ്ഞ അഞ്ച് മാസ കണക്കും ,പിന്നീട് സംഭാഷണത്തിൽ അറിയാതെ എങ്കിലും പറഞ്ഞ മൂന്ന് വർഷത്തെ കണക്കും ,ഇവയ്‌ക്കെല്ലാം പുറമെ ഓവർലുക്ക് ഹോട്ടലിൽ വെച്ച് മകനെ കൊല്ലാനുള്ള ജാക്കിന്റെ ശ്രമങ്ങളും എല്ലാം വിരൽ ചൂണ്ടുന്നത് ഒരേയൊരു വസ്തുതയിലേക്ക് ആണ്. ജാക്ക് ടോറെൻസ് അന്നും ഇന്നും എന്നും അച്ഛൻ എന്ന നിലയിൽ തികഞ്ഞ ഒരു റാസ്കൽ തന്നെ ആയിരുന്നു ,വെണ്ടി എത്ര മറച്ച് വെക്കാൻ ശ്രമിച്ചാലും സത്യം സത്യമല്ലാതാവുന്നില്ല.

ഭാഗം 7

ടോറെൻസ് കുടുംബം

മകനെ വേദനിപ്പിക്കുന്നതും ഉപദ്രവിക്കുന്നതും ഒരു ശീലമാക്കിയ വ്യക്തി ആണ് ജാക്ക് എന്ന വസ്തുതയിൽ നിന്ന് കൊണ്ട് ടോറെൻസ് കുടുംബത്തെ ഒന്ന് നിരീക്ഷിച്ച് നോക്കാം. "അച്ഛാ ,നിങ്ങൾക്ക് ഒരിക്കലും അമ്മയെയും എന്നെയും ഉപദ്രവിക്കാൻ കഴിയില്ലല്ലോ അല്ലെ ?" ചിത്രത്തിന്റെ ആദ്യ പകുതിയിൽ ഡാനി ജാക്കിനോട് ചോദിക്കുന്ന ഈ ചോദ്യം ശ്രദ്ധിക്കുക. മൂന്ന് പ്രധാനപ്പെട്ട കാര്യങ്ങളാണ് ഇതിൽ ശ്രദ്ധിക്കേണ്ടി ഇരിക്കുന്നത് ,ആദ്യമായി ഈ സംഭാഷണം പിന്നീട് അരങ്ങേറിയ സംഭവങ്ങളെ എത്രത്തോളം മികച്ച രീതിയിൽ മുൻകൂട്ടി സൂചിപ്പിക്കുന്നുണ്ട് എന്നതാണ് ,അത് പോരാതെ മറ്റൊരു കാര്യം മിക്കവരും വിട്ട് പോയത് ജാക്കിന്റെ ശബ്ദത്തിൽ വരുന്ന മാറ്റമാണ്. അത്രയും നേരം ഡാനിയോട് സംസാരിച്ച ശാന്തമായ ശബ്ദത്തിൽ നിന്നും ഞൊടിയിടയിൽ വന്ന വന്യമായ ശബ്ദ മാറ്റവും അതിനോടൊത്ത തീക്ഷ്ണതയും ഉറങ്ങി കിടക്കുന്ന ദ്വന്ത്വ സ്വഭാവത്തിന്റെ സൂചനയാണ്, എന്നാൽ ഏറ്റവും ശ്രദ്ധ ചെലുത്തേണ്ടത് ഡാനിയിൽ തന്നെയാണ്. അവന്റെ ഭയം ,അത് ലഘു ആയി തള്ളിക്കളയേണ്ട കാര്യമല്ല.

ഭയം അത് എന്തിനോട് ആയാലും എന്ത് തന്നെ ആയാലും കാരണം ഉണ്ടാവും. ഡാനിയെ സംബന്ധിച്ചിടത്തോളം ഈ ഭയത്തെ സൂചിപ്പിക്കാൻ ഒരു കാരണമേ നമുക്ക് മുന്നിലുള്ളൂ. മകനെ ഉപദ്രവിക്കുന്നതിലും ,വേദനിപ്പിക്കുന്നതിലും അവനെ ഒരു പരിധി വരെ ശാരീരികമായി മുതലെടുക്കുന്നതിലും ഉന്മാദം കണ്ടെത്തുന്ന അച്ഛനും ,ഇതിനെല്ലാം മൗനം അല്ലാതെ മറ്റൊരു മറുപടിയും ഇല്ലാത്ത നിസ്സഹായ ആയ അമ്മയും ആവണം ഭയത്തിന്റെ കാരണങ്ങൾ. ഇവരോടൊപ്പം ഒരു അവധിക്കാലം മുഴുവൻ ചിലവഴിക്കാനായി ഓവർലുക് ഹോട്ടലിൽ എത്തുന്ന ഡാനിയുടെ മനസ്സിലെ ഭയം തീർത്തും ന്യായവുമാണ്.

ഈ സംഭവങ്ങളിൽ ജാക്കിന്റെ നിലപാട് വിശദമാക്കാൻ അയാളുടെ മൂന്ന് സംഭാഷണങ്ങൾ ശ്രദ്ധിക്കേണ്ടി ഇരിക്കുന്നു, വെണ്ടിയുമായി തർക്കത്തിൽ ഏർപ്പെട്ട ജാക്ക് അവളോട് സ്വയം ന്യായീകരിച്ച് കൊണ്ട് പറയുന്ന സംഭാഷണത്തിൽ "ഇത് അവൻ തന്നെ അവനോട് ചെയ്തതാണ് ,ഈ സംഭവത്തെ പറ്റിയുള്ള അവന്റെ വിശദീകരണം ഒഴിവാക്കി നോക്കിയാൽ മനുഷ്യബുദ്ധിക്ക് നിരക്കുന്ന എന്താണ് ഉള്ളത് ? ഇത് പഴയ സംഭവം പോലെ തന്നെയാണ്" എന്ന് പറയുന്നുണ്ട്. ഇവയിൽ കാണാനാവുക ഒരു തരം ഡിനയൽ ആണ് ,സത്യം എന്താണ് എന്ന് ജാക്കിന് അറിയാം ,അത് വെണ്ടിക്കും അറിയാം എന്നാൽ അംഗീകരിക്കാൻ തയാറല്ല ,അത് അയാളോട് പറയാൻ പോലും അവൾക്ക് ഭയം ആണ്. മേല്പറഞ്ഞ സംഭാഷണത്തിന് ശേഷം ഡോർ വലിച്ചടച്ച് കൊണ്ട് ഡാനിക്ക് നേരെ വൈരാഗ്യ ബുദ്ധിയോട് കൂടിയ നോട്ടം നൽകി കടന്ന് പോവുന്ന ജാക്കിനെയും ഓര്മിക്കേണ്ടി ഇരിക്കുന്നു.

അടുത്ത സംഭാഷണം ഒരു തരം മനോഗതമാണ് ,"I Wouldn't touch one hair of his goddamn head, I love the little son of a bitch, I'd do anything for him....." ഈ സംഭാഷണത്തിൽ കാണാൻ കഴിയുക വ്യത്യസ്തനായ ഒരു ജാക്കിനെ ആണ് ,തന്റെ മകനെ താൻ ഉപദ്രവിക്കില്ല ,അതിന് തന്നെക്കൊണ്ട് കഴിയില്ല എന്ന് നൂറാവർത്തി മനസ്സിനെ പറഞ്ഞ് പഠിപ്പിക്കാൻ ശ്രമിക്കുകയും ,എന്നാൽ അയാൾ പോലും അറിയാതെ വെറുപ്പിന്റെയും വൈരാഗ്യത്തിന്റെയും അണ വാക്കുകളിൽ പൊട്ടി ഒഴുകുന്നത് നിയന്ത്രിക്കാൻ പോലും കഴിയാത്ത തികച്ചും വന്യമായ ജാക്ക് ടോറെൻസ്.

മൂന്നാമത്തെ സംഭവത്തിൽ ഉൾപ്പെട്ടിരിക്കുന്ന കഥാപാത്രങ്ങൾ ഭാര്യയും ഭർത്താവുമാണ്. ഇവിടെ വിഷയം തന്റെ മകനെ ചികിൽസിക്കാനായി ഡോക്ടറെ കൊണ്ടുവന്ന സംഭവം ആണ് ,സ്വാഭാവികം ആയും ഡോക്ടറുടെ വരവിനെ ജാക്ക് എതിർക്കുകയാണ്. ഇവിടെ ഉളവാകുന്ന വികാരം താനും ഭാര്യയും മകനും ഉൾപ്പെടുന്ന കുടുംബകാര്യങ്ങളിലേക്ക് മൂന്നാമത് ഒരു വ്യക്തി കൂടി കടന്നുവരുന്നതിൽ ജാക്കിനുള്ള നീരസം ആണ്. ഈ വികാരത്തിനുള്ള കാരണം തന്റെ മകനോടുള്ള തന്റെ പെരുമാറ്റം മറ്റൊരാൾ അറിയും എന്നതും ,അത് സ്വാഭാവികമായും തന്റെ വികട വ്യക്തിത്വത്തിനുള്ള അടി ആവും എന്ന ജാക്കിന്റെ തിരിച്ചറിവ് തന്നെയാണ്.

മേല്പറഞ്ഞ സംഭവങ്ങൾ വിരൽ ചൂണ്ടുന്നത് മദ്യപാനിയും ഉന്മാദിയും ആയ ജാക്ക് ടോറെൻസിന്റെയും അയാളുടെ ജീർണിച്ച കുടുംബത്തിന്റെയും ദുരഭിമാനത്തിന്റെയും വസ്തുതകൾ ആണെന്ന് കരുതാം ,അപ്പോഴും ബാക്കി നിൽക്കുന്നത് സ്റ്റോർ റൂമിൽ നിന്നും അയാളെ ആര് പുറത്തിറക്കി എന്നതും ഒരുപാട് കുഴക്കിയ മറ്റൊരു സംഭവവും ആണ്. ഹോട്ടലിലേക്ക് കടന്നുവന്ന ജാക്കിനോട് പറയുന്ന സംഭാഷണം ശ്രദ്ധിക്കുക ,അതിൽ വ്യക്തമായി പറയുന്നുണ്ട് അവധി കാലത്ത് ഹോട്ടലിലെ മദ്യം ഉൾപ്പെടെ ഉള്ള വസ്തുവകകൾ ഒഴിവാക്കും എന്നത് ,എന്നാൽ ബാറിൽ വെച്ച് ജാക്ക് കുടിക്കുന്ന മദ്യവും അത് ഒരു നിമിഷത്തേക്കെങ്കിലും അയാളിൽ ഉണ്ടാക്കിയ പൈശാചിക മാറ്റവും ഒരു ചോദ്യചിഹ്നമാണ്. മദ്യത്തിന്റെ കാര്യം ഒഴിവാക്കാം ,അത് വെറുമൊരു ഭാവന മാത്രമാണ് എന്നും കരുതാം എന്നാൽ ആ സീനിൽ ജാക്കിന്റെ മുഖഭാവം ക്ലൈമാക്സിൽ മരണത്തിന് തൊട്ട് മുൻപുള്ള ഭാവവുമായി അത്ഭുതാവഹമായ സാമ്യം വന്നതെങ്ങനെ ,ഇത് കൊണ്ട് ഉദ്ദേശിക്കുന്നതെന്താണ്. ചോദ്യങ്ങൾ ഒരുപാട് അവശേഷിക്കുന്നു ,ഈ സിനിമ ഓരോ കാഴ്ചയിലും ഒരത്ഭുതമായി മാറുകയാണ്.

Shining (1980) - Part 4

പോസ്റ്റ് 4 : ഭാഗം 5

ജാക്ക് ടോറൻസ്

"Its Just The Story Of One Mans Family Quietly Going Insane Together" ഷൈനിങ് എന്ന ചിത്രത്തെ മേല്പറഞ്ഞ സംഭാഷണത്തിലൂടെ ഏറ്റവും ലളിതമായി വിവരിച്ചത് ചിത്രത്തിന്റെ സംവിധായകനായ കുബ്രിക് തന്നെയാണ്.

സിനിമയിൽ പറയപ്പെടുന്ന സംഭവങ്ങളിലും കഥകളിലും ജാക്കിനുള്ള പങ്ക് ഓരോരുത്തരിലും വെവ്വേറെ നിഗമനങ്ങൾ ആണ് ഉണ്ടാക്കിയിരിക്കുന്നത് എങ്കിലും ജാക്കിന്റെ മാനസിക നില ഒരു സ്വാഭാവിക മനുഷ്യനിൽ നിന്നും വളരെ വ്യത്യസ്തമാണെന്ന് തർക്കം ഏതുമില്ലാതെ പറയാനാവും. മറ്റൊരു രീതിയിൽ പറയുകയാണെങ്കിൽ വീഴാൻ തയാറായി നിന്ന ഒരു വടവൃക്ഷത്തിന് ലഭിച്ച തട്ട് മാത്രമാണ് ഓവർലുക് ഹോട്ടൽ.

ഓവർലുക്ക് ഹോട്ടലിൽ കെയർടേക്കറായി എത്തുന്നതിന് മുൻപേയുള്ള ജാക്കിന്റെ ജീവിതത്തെ കുറിച്ചും ,ഡാനിയോടുള്ള പെരുമാറ്റത്തെ കുറിച്ചുമുള്ള അസ്വാഭാവികമായ ചിത്രം വെണ്ടി ഡോക്ടറുമായി നടത്തുന്ന സംഭാഷണങ്ങളിൽ നിന്നും ലഭിക്കുന്നതാണ്. മദ്യപാനിയായ ജാക്കിന്റെ ആക്രമണ മനോഭാവത്തെ കുറിച്ചും പഠിപ്പിച്ചിരുന്ന കോളേജിൽ നിന്നും പടിയിറങ്ങേണ്ടി വന്നതിനെ കുറിച്ചും ,ജാക്കിന്റെ നിയന്ത്രണം നഷ്ട്ടപ്പെട്ട നിമിഷം ഡാനിയുടെ കഴുത്തിന് സംഭവിച്ച അപകടത്തെ കുറിച്ചുമെല്ലാം ചിത്രത്തിൽ പലയിടത്തും പരോക്ഷമായി സൂചിപ്പിക്കപ്പെട്ടിട്ടുണ്ട്. ജാക്കിന്റെ മനസികനിലയെ കുറിച്ച് കൂടുതൽ ആഴത്തിൽ പോവാനായി ചിത്രത്തിലെ നാല് സംഭവങ്ങൾ ഉപയോഗിക്കുകയാണ്. താഴെ പറയാൻ പോവുന്ന കാര്യങ്ങൾ യാതൊരു വിധത്തിലും സമർത്തിക്കലല്ല. യഥാർത്ഥത്തിൽ ഈ രംഗങ്ങളിൽ എന്താണ് ഉദ്ദേശിച്ചത് എന്താണെന്ന് വിശദീകരിക്കാൻ കൂബ്രിക് തന്നെ വരേണ്ടിവരും ,ആയതിനാൽ ഒരു അന്വേഷണ മനോഭാവത്തിലാണ് കാര്യങ്ങൾ പ്രതിപാദിച്ചിരിക്കുന്നത്.

ജാക്കിന്റെ മനസികനിലയെ ചോദ്യം ചെയ്യേണ്ട ആവശ്യകത ഒരു ചോദ്യചിഹ്നമായി പ്രേക്ഷകരിൽ എത്തുന്ന ആദ്യ രംഗം ജാക്ക് വെണ്ടിയുമായി വഴക്ക് ഉണ്ടാക്കിയ ശേഷം ബാറിലേക്ക് നടന്ന് പോവുന്ന രംഗമാണ്.വെണ്ടിയുമായുണ്ടായ വാക്കുതർക്കത്തിനിടെ ജാക്ക് ഡാനിയെ മർദിക്കുകയും പരിക്കേൽപ്പിക്കുകയും ചെയ്ത സംഭവം വെണ്ടി പ്രതിപാദിച്ചത് ജാക്കിനെ തെല്ലൊന്നുമല്ല വിഷമിപ്പിച്ചത്. മദ്യപിച്ചിരുന്നെങ്കിലും അന്ന് നടന്ന പ്രസ്തുത സംഭവം ജാക്കിനെ വല്ലാതെ ബാധിച്ചിരുന്നെന്നും മനസ്സിനെ ഉലച്ചിരുന്നെന്നും അതിനാലാണ് ജാക്ക് മദ്യപാനം നിർത്തിയത് എന്നും ഓർക്കണം. വെണ്ടി പഴയ സംഭവങ്ങൾ വീണ്ടും പ്രതിപാദിച്ചപ്പോൾ ജാക്കിന്റെ ഉള്ളിൽ ഉറങ്ങി കിടന്ന പശ്ചാത്താപവും വിഷമവും എല്ലാം വീണ്ടും ഉണരുകയാണ്. ബാറിലേക്ക് നടന്ന് പോവുമ്പോൾ തന്റെ പ്രതിബിംബം കണ്ണാടിയിൽ കണ്ട ജാക്ക് അറപ്പോടെയും വെറുപ്പോടെയും അതിനെ നോക്കുന്നത് അതിനാൽ തന്നെ വളരെ പ്രാധാന്യം അർഹിക്കുന്ന ഒരു രംഗമാണ്.

കണ്ണാടികൾ വെച്ച് കുബ്രിക് കളിച്ച കളിയുടെ പ്രാധാന്യം വീണ്ടും ഏറി വരികയാണ്. മേൽ പറഞ്ഞ സീനിന്റെ തൊട്ടടുത്ത രംഗം ഓർക്കുക. ബാറിലെത്തിയ ജാക്ക് ഒഴിഞ്ഞ മുറിയും ടേബിളും നോക്കി ഒരു നിമിഷം ഇരുന്ന ശേഷം മുൻപ് പ്രതിപാദിച്ച അറപ്പോടും വെറുപ്പോടും കൂടി തന്റെ മുഖം പൊത്തി ഇരിക്കുന്നത് കാണാനാവും. വീണ്ടും ഈ മുഖഭാവം ആവർത്തിക്കാനുള്ള കാരണം മറ്റൊന്നുമല്ല ,താൻ ഇരുന്ന കസേരയ്ക്ക് എതിർവശം ജാക്ക് കണ്ട തന്റെ പ്രതിബിംബം തന്നെയാണ്. ചിത്രത്തിന്റെ ഗതി മാറുന്നത് ഇവിടെ നിന്നുമാണ് ,ആരുമില്ലാതെ ഒഴിഞ്ഞു കിടന്ന ഓവർലുക്ക് ഹോട്ടലിൽ ബാർമാൻ ആയ ലോയ്ഡിന്റെ രംഗപ്രവേശനം ഇവിടെയാണ്. ഈ രംഗത്തിൽ ശ്രദ്ധിക്കേണ്ട ചില കാര്യങ്ങൾ ഇരിപ്പുണ്ട്, ഒന്നാമതായി ലോയ്ഡിന്റെ മുഖത്ത് നിറഞ്ഞുനിൽക്കുന്ന നിസ്സംഗത ,രണ്ടാമതായി അയാളും ജാക്കും ഇട്ടിരിക്കുന്ന വസ്ത്രങ്ങളും ചിരിയും ,പരസ്പരം വർഷങ്ങളായി അറിഞ്ഞതു പോലെയുള്ള പെരുമാറ്റവും. ചിത്രത്തിന്റെ മറ്റൊരു ഭാഗത്തും ലോയ്ഡിനെ കാണിക്കുന്നതോ പറയുന്നതോ ഇല്ല എന്നതും ശ്രദ്ധേയമാണ്.

മേല്പറഞ്ഞ രംഗങ്ങളോടൊപ്പം തന്നെ ചേർത്തുവായിക്കേണ്ട രംഗങ്ങളാണ് ജാക്ക് റൂം നമ്പർ 237ൽ കാണുന്ന സ്ത്രീയും ,ലവട്ടറിയിൽ വെച്ച് കണ്ടുമുട്ടുന്ന ഗ്രേഡിയും. ലോയ്ഡിനെ സംബന്ധിച്ച് പറഞ്ഞത് പോലെ അത്യന്തം രഹസ്യ സ്വഭാവമുള്ള കഥാപാത്രങ്ങൾ. എന്നാൽ ഈ മൂന്ന് കഥാപാത്രങ്ങൾക്കും ചില സാമ്യതകളുണ്ട് ,പ്രത്യേകിച്ചും ജാക്കുമായി ഇടപെടുന്ന രീതികളിൽ. മൂന്ന് കഥാപാത്രങ്ങളും സിനിമയിലെ ജാക്കിന്റെ ആ സമയത്തെ മനസികനിലയുമായി വളരെ അടുത്തിരിക്കുകയാണ്. ലോയ്ഡിന്റെ മുഖത്ത് കണ്ട നിസ്സംഗതയും വേദനയും ദേഷ്യവും തന്റെ ഭൂതകാലം വീണ്ടും വേദനപ്പിക്കുന്ന ഒരു ഓർമയായി തിരികെ വരുമ്പോഴുള്ള ജാക്കിന്റെ മനോഭാവം ഓർമിപ്പിക്കുമ്പോൾ ,237ആം നമ്പർ മുറിയിലെ യുവതി ജാക്കിൽ ഉറങ്ങി കിടക്കുന്ന ഭയത്തെ ഉണർത്തുകയാണ് ,തന്റെ ജീവിതം കൈവിട്ട് പോവുമെന്ന ഭയം ,തന്റെ കുടുംബത്തിന്റെ നാശം താൻ കാരണം ആവും എന്ന ഭയം. ഗ്രേഡിയുമായുള്ള കൂടിക്കാഴ്ച ജാക്കിന്റെ വീഴ്ചയുടെ അവസാന ഭാഗമാണ് ,അയാൾ അയാളെ മറന്ന് തുടങ്ങിയിരിക്കുന്നു ,അയാളുടെ കുടുംബത്തെയും സ്നേഹത്തെയും മറന്ന് തുടങ്ങിയിരിക്കുന്നു. അയാളുടെ കുടുംബത്തെ ഇല്ലാതാക്കാനായി മാനസികമായി തയാറെടുക്കുന്ന ജാക്കിനെയാണ് ഈ രംഗത്ത് കാണാൻ ആവുക.ഗ്രേഡിയുമായുള്ള സംഭാഷണത്തിനിടെ മക്കളെ കൊന്ന കാര്യം ജാക്ക് പരോക്ഷമായി പ്രതിപാദിക്കുന്നത് ശ്രദ്ധിക്കുക.

ഈ മൂന്ന് രംഗങ്ങളിലും ഏറ്റവും കൗതുകം ഉണർത്തുന്ന കാര്യം ഇതൊന്നുമല്ല, ജാക്ക് അല്ലാതെ മറ്റുള്ള കഥാപാത്രങ്ങളൊന്നും തന്നെ യാഥാർഥ്യം അല്ല എന്ന വസ്തുതയാണ്. ഈ രംഗങ്ങളെ രണ്ട് രീതിയിൽ കാണാം. ഒന്നാമതായി പ്രസ്തുത സംഭവങ്ങൾ എല്ലാം തന്നെ ജാക്കിന്റെ മനസ്സിൽ ആണ് നടക്കുന്നത് എന്ന രീതിയിൽ കണ്ട് ചിത്രത്തിലെ സൂപ്പർനാച്ചുറൽ വസ്തുതകളെ ഒഴിവാക്കാം. രണ്ടാമതായി ചിത്രത്തിൽ ഭൂത പ്രേത പിശാചുക്കൾ ഉണ്ട് എന്ന രീതിയിൽ കണ്ട് ജാക്ക് നോർമൽ ആണ് എന്ന രീതിയിലും കാണാം. ചിത്രം കണ്ടപ്പോൾ ഉണർന്ന ചിന്തകൾ കാരണം ആദ്യ കാരണമാണ് സീരീസിൽ ഉപയോഗിച്ചിരിക്കുന്നത്. ഇതിന് സഹായകമായ ഒരു കാര്യം പ്രസ്തുത രംഗങ്ങളിൽ ഒന്നിൽ നിന്ന് തന്നെ ചൂണ്ടികാണിക്കട്ടെ. ഗ്രേഡിയുമായുള്ള സംഭാഷണത്തിനിടെ ജാക്ക് സംസാരിക്കുന്നത് സ്‌ക്രീനിൽ കാണിക്കുന്ന ഗ്രേഡിയുടെ ശരീരത്തിനോടല്ല ,മറിച്ച് ഗ്രേഡിയുടെ പിന്നിലുള്ള കണ്ണാടിയിലേക്കാണ്. അതിനാൽ തന്നെ പ്രസ്തുത കഥാപാത്രങ്ങളെല്ലാം തന്നെ ജാക്കിന്റെ മനസ്സിലെ ഉറങ്ങിക്കിടക്കുന്ന പല വികാരങ്ങളുടെയും പ്രോജക്‌ഷൻ ആണെന്ന് വിശ്വസിക്കേണ്ടി ഇരിക്കുന്നു.

ഇവയെല്ലാം ചിന്തിച്ച് കൂട്ടി ഒരു തീരുമാനത്തിൽ എത്തി എന്ന നിലയിൽ ഇരിക്കുമ്പോൾ ഒരു ചെറിയ സംശയം മനസ്സിനെ അലട്ടുകയാണ്. ഇതുവരെ പറഞ്ഞ എല്ലാത്തിനെയും മാറ്റിയെഴുതാൻ നിർബന്ധിക്കുന്ന സംശയം, ഇനിയങ്ങോട്ട് പറയാൻ ഉള്ളതിനെയെല്ലാം ബാധിക്കാൻ പോവുന്ന സംശയം. ചിത്രത്തിൽ സൂപ്പർനാച്ചുറൽ പ്രെസെൻസ് ഇല്ല എന്ന് കരുതാം ,പക്ഷെ പൂട്ടിയിട്ട ജാക്കിനെ തുറന്ന് വിട്ടതാരാണ് ? കളി മുഴുവൻ നടന്നത് ജാക്കിന്റെ മനസിലാണെങ്കിൽ അത് വെച്ച് അടച്ചിട്ടിരിക്കുന്ന ഒരു വാതിൽ ,അതും പുറത്ത് നിന്ന് തുറക്കാനാവില്ലല്ലോ. അവിടെ നിന്ന് അടുത്ത ഭാഗം....

Shining (1980) - Part 3

പോസ്റ്റ് 3 : ഭാഗം 3

ആദ്യ രണ്ട് പോസ്റ്റുകൾക്ക് കിട്ടിയ നല്ല പ്രതികരണത്തിന് നന്ദി പറഞ്ഞ് കൊണ്ട് ആരംഭിക്കുന്നു. ഷൈനിങ് എന്ന ചിത്രം ഒരു ഹൊറർ സ്പൂഫ് ആകാനുള്ള സാധ്യതകൾക്കും, ഓവർലുക്ക് ഹോട്ടലിന്റെ ഘടനയിലെ അപാകതകൾക്കും ശേഷം സിനിമയിലെ ഒളിഞ്ഞിരിക്കുന്ന ചില വ്യവസ്ഥകളിലേക്ക് വെളിച്ചം വീശാൻ ശ്രമിക്കുകയാണ് ഈ പോസ്റ്റ്. ചിത്രത്തിലെ വിവിധ സന്ദർഭങ്ങളിൽ ഒട്ടും പ്രതീക്ഷിക്കാതെ കടന്നു വരുന്ന കണ്ണാടികളും ,അവയിലെ പ്രതിബിംബങ്ങളും അവ വിരൽ ചൂണ്ടുന്ന വസ്തുതകളും നമ്മൾ ആദ്യ കാഴ്ചയിൽ കരുതുന്നതിനേക്കാൾ തീവ്രമായ പല കാര്യങ്ങളും ഒളിപ്പിച്ചു വെച്ചിരിക്കുന്നു. ഈ വസ്തുതകൾ കഥാപരമായും,കഥാപാത്രപരമായും വളരെ പ്രാധാന്യം അർഹിക്കുന്ന ഒന്നാണെന്ന് സൂക്ഷ്മാന്വേഷണത്തിൽ മനസിലാക്കാൻ കഴിയും.

146 മിനിറ്റ് ദൈർഖ്യമുള്ള ചിത്രത്തിൽ പ്രധാനമായും അഞ്ച് സ്ഥലത്താണ് കണ്ണാടികളും പ്രതിബിംബങ്ങളും കടന്ന് വരുന്നത്. ഇവയിൽ ആദ്യത്തേത് ഓവർലുക്ക് ഹോട്ടലിലെ ടോറൻസ് കുടുംബം താമസിക്കുന്ന അപ്പാർട്മെന്റിലാണ്. ചിത്രത്തിലെ കുപ്രസിദ്ധമായ 237ആം നമ്പർ മുറിയിലും ,ഗോൾഡ് റൂമിലും, ഗോൾഡ് റൂമിലേക്ക് നീണ്ട് കിടക്കുന്ന ഹാളിലും, ഡാനി ടോണിയോട് സംസാരിക്കുന്ന ബാത്റൂം സീനിലും സമർത്ഥമായ രീതിയിൽ കണ്ണാടിയും പ്രതിബിംബവും സംവിധായകൻ ഉപയോഗപ്പെടുത്തിയിരിക്കുന്നു.

237ആം നമ്പർ മുറിയുടെ മുന്നിൽ നിന്നും ഡാനി ഭയത്തോടെ നോക്കി നിൽക്കുന്ന രംഗത്ത് വാതിലിനപ്പുറം മുറിയുടെ ഉള്ളിൽ രണ്ട് കണ്ണാടികൾ കാണാം, ഇവ ഒരു വാതിലിന്റെ തന്നെ വലിപ്പം ഉള്ളവയും മുറിയുടെ ഒരു ഏകദേശ ചിത്രം ഡാനിക്ക് നല്കുന്നവയും ആണ്.രണ്ട് കണ്ണാടികളിലെയും പ്രതിബിംബങ്ങൾ മുറിയുടെ ഒരേകദേശ രൂപം ഡാനിക്ക് നൽകുന്നുണ്ട്, അതിലൂടെ മുറിക്കുള്ളിൽ താൻ കരുതുന്നത് പോലെ ഒന്നുമില്ല എന്ന ഒരു വിശ്വാസം ഡാനിക്ക് ലഭിച്ചിരിക്കണം. ടോറെൻസ് അപ്പാർട്മെന്റിലെ ആദ്യ സീനുകളിൽ ഒന്നിൽ കണ്ണാടിയിലെ പ്രതിബിംബത്തിൽ കാണുന്ന ജാക്കിന്റെ പ്രതിബിംബം ഡാനിയുടെ മുറിയിലേക്കുള്ള പാതയെ മറച്ചുപിടിക്കുകയും അച്ഛനെയും മകനെയും ഇരുവശങ്ങളിലേക്ക് മാറ്റി കാണിക്കുകയും ചെയ്യുന്നു. സിനിമയിൽ സംഭവിക്കാൻ പോവുന്ന കാര്യങ്ങളിലേക്കുള്ള ഒരു മുൻ‌കൂർ ജാമ്യം.

വെൻഡി ജാക്കിന് ഭക്ഷണം കൊണ്ടുകൊടുക്കുന്ന സീനിലാണ് മറ്റൊരു പ്രധാന മുൻ‌കൂർ ജാമ്യ പരിപാടി അരങ്ങേറുന്നത്.സീൻ ആരംഭിക്കുന്നത് തന്നെ ജാക്കിന്റെ ക്ലോസ് അപ്പ് ഷോട്ടിലൂടെ ആണ്. പിന്നിലേക്ക് വരുമ്പോൾ മാത്രമാണ് അത് കണ്ണാടിയിലെ പ്രതിബിംബം ആണെന്ന് കാഴ്ചക്കാരന് മനസ്സിലാവുന്നത്. ചിത്രത്തിലേക്ക് സൂം ചെയ്യുകയും പിന്നീട് കട്ട് ചെയ്ത് യഥാർത്ഥ ജാക്കിലേക്ക് മാറുകയും ചെയ്യുന്നുണ്ട്. ഇതേ മുറിയിലും ,ഇതേ കണ്ണാടിയിലുമാണ് ചിത്രത്തിന്റെ രണ്ടാം പകുതിയിൽ മർഡറർ എന്ന സീൻ സംഭവിക്കുന്നത്. പ്രസ്തുത സീനിൽ കൊലയാളി ആയി എത്തുന്നത് ജാക്ക് അല്ലാതെ മറ്റാരും അല്ല.വീണ്ടും ഒരു കുബ്രിക് മുൻ‌കൂർ ജാമ്യം.

ഇതൊക്കെ എവിടേക്ക് പ്രേക്ഷകനെ കൊണ്ടുപോവുന്നു എന്ന ചോദ്യത്തിനുള്ള ഉത്തരം അഞ്ചാമത്തെ രംഗത്ത് നിന്നും ലഭിക്കും. ചിത്രത്തിൽ പ്രത്യേകിച്ച് വലിയ പ്രാധാന്യം ഒന്നും തന്നെയില്ല എന്ന് കരുതിയ ഈ രംഗത്താണ് പ്രശ്നത്തിന്റെ താക്കോൽ കിടക്കുന്നത്. കണ്ണാടിയിൽ നോക്കി തന്റെ ദ്വന്ത്വവ്യക്തിത്വമായി ടോണിയോട് സംസാരിക്കുന്ന ഡാനി. ഈ സീനിൽ ടോണിയും ഡാനിയും തമ്മിലുള്ള സംസാരം പ്രേക്ഷകർക്കുള്ള സൂചനകളുടെ പെരുങ്കളിയാട്ടം തന്നെയാണ്.സംഭവിക്കാൻ പോവുന്ന കാര്യങ്ങൾക്കൊപ്പം ചിത്രം മുന്നോട്ട് വെക്കുന്ന ഡുവാലിറ്റിയാണ് ഇവിടെ ശ്രദ്ധിക്കേണ്ടത്. കഥാപാത്രങ്ങളുടെ ദ്വന്ത്വ വ്യക്തിത്വം, ലൊക്കേഷന്റെ ദ്വന്ത്വസ്വഭാവം സർവോപരി പ്രേക്ഷകന്റെ മനസ്സും, കഥയും തമ്മിലുള്ള അന്തരവും നിരന്തര കലഹവും. ഇവയ്‌ക്കൊക്കെയുള്ള സൂചനകളാണ് കണ്ണാടികളും പ്രതിബിംബങ്ങളും.

ഭാഗം 4 : വൺ പോയിന്റ് പേഴ്‌സ്പെക്ടിവ്

ഷൈനിങ് എന്ന ചിത്രത്തിൽ ഇടക്കിടയ്ക്ക് വന്നുപോവുന്ന മറ്റൊരു പ്രതിഭാസം ആണ് വൺ പോയിന്റ് പേഴ്‌സ്പെക്ടിവ്. കുബ്രിക് തന്റെ ചിത്രങ്ങളിൽ മിക്കതിലും ഉപയോഗിച്ച ഒരു സിദ്ധാന്തം, ക്ലോക്ക് വർക്ക് ഓറഞ്ചിലെ ഓപ്പണിങ് രംഗത്തും, പാത്ത്സ് ഓഫ് ഗ്ലോറിയിലെ ജനറലിന്റെ മാസ്സ് ഓപ്പണിങ് രംഗത്തും ഒക്കെ ആവേശമായി മാറിയ ഈ ടെക്നിക് ഷൈനിങ്ങിൽ അതിന്റെ പൂർണതയിൽ കാണാം. കുബ്രിക്കല്ല കണ്ടുപിടിച്ചതെങ്കിലും ഈ പഴ്സ്പെക്ടിവ് സിദ്ധാന്തം പ്രസിദ്ധി നേടിയത് അദ്ദേഹത്തിന്റെ ചിത്രങ്ങളിലൂടെ തന്നെ.ഏറ്റവും മികച്ച രീതിയിൽ വൺ പോയിന്റ് പെർസ്പെക്റ്റീവ് വിശദീകരിക്കാനാവുക യേശുക്രിസ്തുവിന്റെ അവസാന അത്താഴം എന്ന പെയിന്റിങ്ങിലൂടെ ആവും. തന്റെ കാഴ്ചക്കാരന്റെ ശ്രദ്ധ പൂർണമായും പിടിച്ചെടുക്കാൻ വേണ്ടി സ്ക്രീനിലെ പ്രധാന കഥാപാത്രത്തെ സീനിന്റെ ഒത്ത നടുക്ക് പ്രതിഷ്ഠിക്കുന്ന ടെക്നിക് ആണ് ഇത്. സീനിലെ ഇരു വശങ്ങളിലെയും വസ്തുക്കൾ തമ്മിൽ സിമെട്രി കൂടി ഉണ്ടായിരിക്കുന്നതാണ്.പ്രധാനമായും മൂന്ന് കാര്യങ്ങളാണ് ഈ ഒറ്റ ട്രിക്കിലൂടെ സംവിധായകൻ നേടിയെടുക്കുന്നത്.ആദ്യമായും കാഴ്ചക്കാരന്റെ മുഴുവൻ ശ്രദ്ധയും കഥാപാത്രങ്ങളിലേക്ക് നേടിയെടുക്കും, മനോഹരമായ വിശ്വൽ ആണ് ഈ ടെക്നിക്കിന്റെ മറ്റൊരു പ്രത്യേകത.എന്നാൽ പ്രധാനമായും ഇതിലൂടെ തങ്ങൾ ഇപ്പോൾ കണ്ടു കൊണ്ടിരിക്കുന്ന സീനിൽ പ്രാധാന്യം അർഹിക്കുന്ന എന്തോ സംഭവിക്കാൻ പോവുന്നു എന്ന ഒരു ചിന്ത പ്രേക്ഷകരിൽ എത്തുകയും ജാഗരൂകൻ ആവാൻ മുന്നറിയിപ്പ് കൊടുക്കുകയും ചെയ്യുന്നു.

വൺ പോയിന്റ് പെർസ്പെക്റ്റീവ് പ്രധാനമായും ഈ ചിത്രത്തിൽ കടന്നുവന്നിരിക്കുന്ന സന്ദർഭങ്ങൾ ഡാനി സൈക്കിൾ ഓടിക്കുന്ന രംഗവും ,ജാക്ക് ബാറിലേക്ക് കടന്ന് ചെല്ലുന്ന രംഗവും ,237ആം നമ്പർ മുറിയിലേക്ക് ജാക്ക് കയറുന്ന രംഗവും, വെണ്ടി ഉന്തുവണ്ടി തള്ളിക്കൊണ്ട് പോവുന്ന രംഗവും ,ഹല്ലോരൻ ഹോട്ടലിൽ മടങ്ങിയെത്തി ഡാനിയേയും വെണ്ടിയെയും അന്വേഷിക്കുന്ന രംഗവുമാണ്.ഇതിൽ ആദ്യം പറഞ്ഞ മൂന്ന് രംഗത്തും ചില സാമ്യതകളുണ്ട്. അസ്വസ്ഥരായ കഥാപാത്രങ്ങളാണ് ഈ മൂന്ന് രംഗത്തും കടന്ന് വരുന്നത് ,സീനിന്റെ അവസാനം ഇരുവരും തങ്ങൾ ജീവിതത്തിൽ മറക്കാനാവാത്ത മൂന്ന് കാഴ്ചകൾ കാണുന്നു. ഡാനി കൊല്ലപ്പെട്ട സഹോദരിമാരെയും ജാക്ക് ബാത്ത്ടബ്ബിലെ ജീർണിച്ച ശരീരത്തെയും,പിന്നീട് സംസാരത്തിൽ പോലും ഭയം നിഴലിപ്പിക്കുന്ന ബാർടെൻഡറെയും കണ്ട് മുട്ടുന്നു. മനുഷ്യ മനസ്സിന് വിവരിക്കാനാവാത്ത മൂന്ന് കാഴ്ചകൾ. മൂന്നും മനോഹരമായ വൺ പോയിന്റ് പെർസ്പെക്റ്റീവിന്റെ മുന്നറിയിപ്പിന് ശേഷം വന്ന രംഗങ്ങൾ. ശേഷമുള്ള രണ്ട് രംഗങ്ങളിലുമുണ്ട് സാമ്യതകൾ വെണ്ടിയും ഹല്ലോരനും നടക്കുന്ന വഴി ഒന്ന് തന്നെയാണ്. ഹാളിലൂടെയുള്ള ഹല്ലോരന്റെ നടത്തം കലാശിക്കുന്നത് പില്ലറിന് പിന്നിലുള്ള ജാക്കിന്റെ കയ്യിലൂടെയുള്ള മരണം ആണെങ്കിൽ വെണ്ടി നടന്ന് ആ പില്ലറിന് അടുത്തെത്തുമ്പോൾ സീൻ പെട്ടെന്ന് അവസാനിക്കുന്നു. ഈ ചിത്രം പല വഴികളിലൂടെ അത്ഭുത പെടുത്തുന്നത് തുടർന്നു കൊണ്ടേയിരിക്കുന്നു.

Shining (1980) - Part 2

ഭാഗം 1 : ഒരു സ്പൂഫിലേക്ക്

ആദ്യത്തെ പോസ്റ്റിന് നൽകിയ മികച്ച പ്രതികരണത്തിന് നന്ദി പറഞ്ഞ് കൊണ്ട് ആരംഭിക്കുന്നു. ഷൈനിംഗ് എന്ന ചിത്രത്തിനോളം തന്നെ പ്രായമുണ്ട് ഇതൊരു ഹൊറർ ചിത്രമാണോ അതോ സൈകോളോജിക്കൽ ത്രില്ലർ ആണോ എന്ന ചോദ്യത്തിന്. രണ്ട് വാദങ്ങളെയും ശെരി വെയ്ക്കുന്ന വസ്തുതകൾ ചിത്രത്തിൽ ഉടനീളം കാണാൻ കഴിയും.എന്നാൽ ഇവ രണ്ടിലും പെടാത്ത മൂന്നാമതൊരു സാധ്യത കൂടി ഈ ചിത്രത്തിൽ ഒളിഞ്ഞു കിടപ്പുണ്ടെന്നതാണ് സത്യം.ഷൈനിങ് എന്ന ഹൊറർ ചിത്രത്തിനും ഷൈനിങ് എന്ന ത്രില്ലറിനും അപ്പുറം അതുവരെ നിലനിന്ന ഹൊറർ സങ്കല്പങ്ങളെ പരിഹസിച്ച് കൊണ്ട് പുറത്തുവന്ന ഷൈനിങ് എന്ന ഹൊറർ സ്പൂഫ് ചിത്രത്തെ അധികമാരും ശ്രദ്ധിക്കാൻ വഴിയില്ല.

സ്പൂഫ് എന്ന വാക്ക് അല്പം കടന്നുപോയി എന്ന് ചിലർക്ക് തോന്നാമെങ്കിലും അതിനെ ന്യായീകരിക്കുന്ന ചില വസ്തുവകകൾ ചിത്രത്തിൽ ഉണ്ട്.ഒന്നാമതായി ചിത്രത്തിലെ പ്രധാന രംഗങ്ങളിൽ ഒന്നായ 237ആമത്തെ റൂമിലെ സ്ത്രീയുടെ സീൻ.തന്റെ മാദക സൗന്ദര്യം കാണിച്ച് അപരിചിതരെ വശീകരിച്ച് കൊണ്ടുപോയി,ഒടുവിൽ തന്റെ യഥാർത്ഥ രൂപം കാണിച്ച് പേടിപ്പിക്കുന്ന മൂലകഥ ഹാൻസെൽ ആൻഡ് ഗ്രിറ്റിൽ എന്ന കാർട്ടൂണിൽ നിന്നും പ്രചോദനം ഉൾക്കൊണ്ടതാണെന്ന് ചിത്രത്തിൽ പ്രവർത്തിച്ച അണിയറ പ്രവർത്തകരിൽ ഒരാൾ പിന്നീട് പറയുക ഉണ്ടായി. മിക്കി മൗസ് ,മിന്നി മൗസ്,ഗൂഫി,സെവൻ ദ്വാരഫ്സ് തുടങ്ങി പ്രത്യക്ഷത്തിൽ ചിത്രത്തിൽ എത്തിയ കാർട്ടൂൺ കഥാപാത്രങ്ങളും കുറവല്ല.കഥാപാത്രങ്ങളുടെ സംഭാഷണങ്ങളിലുമുണ്ട് നിരവധി കാർട്ടൂൺ റെഫെറെൻസുകൾ. ഡിക്ക് ഹല്ലോരൻ എന്ന കഥാപാത്രം ഡാനിയെ അഭിസംബോധന ചെയ്ത് കൊണ്ട് പറയുന്ന "What's Up Doc" എന്ന സംഭാഷണം മുതൽ തന്റെ ഭാര്യയയോടും മകനോടും കൊലവെറിയോടെ ജാക്ക് ടോറൻസ് പറയുന്ന "Little Pigs,Little Pigs Let Me Come In" എന്ന സംഭാഷണം വരെ പ്രശസ്തമായ കാർട്ടൂൺ ഡയലോഗുകൾ തന്റെ ഇഷ്ടാനുസരണം കുബ്രിക് ഉപയോഗ പെടുത്തിയതാണ്. കഥാപാത്രങ്ങളുടെ അതി നാടകത്വം പ്രകടമാക്കുന്ന അഭിനയവും മറ്റൊരു തെളിവ് ആയി കണക്കാക്കാം.എന്തിരുന്നാലും ഏറ്റവും വലിയ കാർട്ടൂൺ റെഫെറെൻസുകളിൽ ഒന്ന് വെണ്ടിയുടെയും ഡാനിയുടെയും ഇൻട്രോ സീനിലാണ്.ഡാനിയെ ചികിൽസിക്കാൻ എത്തിയ ഡോക്ടറുടെ പുറകിലുള്ള ഗൂഫിയുടെ ആക്ഷൻ ഫിഗറും അതിന്റെ കോസ്ട്യുമും വെണ്ടിയുടേതുമായി വളരെ സാമ്യമുള്ളതാണ്.ചിത്രത്തിലെ പ്രശസ്തമായ ബേസ് ബോൾ ബാറ്റ് സീനിലെ വെണ്ടിയുടെ ഭാവങ്ങൾക്ക് കാർട്ടൂൺ കഥാപാത്രം ഗൂഫിയുടെ ചില ഭാവങ്ങളുമായി സാമ്യതകൾ ഉള്ളതായി പറയപ്പെടുന്നു.

എന്തിനു വേണ്ടി ഇതുപോലെ പ്രമേയത്തിലും അവതരണത്തിലും ഗൗരവമേറിയ ഒരു ചിത്രത്തിൽ ഇതുപോലെ കാർട്ടൂൺ ,ഫെയറി ടെയ്ൽ റെഫെറെൻസുകൾ കുബ്രിക് ഉൾപ്പെടുത്തി എന്ന ചോദ്യത്തിൽ നിന്ന് തന്നെയാണ് മേൽ പറഞ്ഞ മൂന്നാമത്തെ സാധ്യത ഉരുത്തിരിഞ്ഞു വരുന്നത്. അത് വരെ ഇറങ്ങിയ ഹൊറർ ചിത്രങ്ങളോട് പൊതുവെ വൈമുഖ്യം പ്രകടിപ്പിച്ചിരുന്ന കുബ്രിക് ആളുകളെ ഭയപ്പെടുത്താൻ ഭയാനകമായ സീക്വൻസുകൾ വേണ്ടെന്നും കേട്ട് പഴകിയ പഴങ്കഥകൾ മതിയെന്നും പറയാതെ പറഞ്ഞതാവണം.

ഭാഗം 2 - ഓവർലുക്ക് ഹോട്ടൽ

ഭൂമിശാസ്ത്രവും കാലാവസ്ഥയും എല്ലാം ഒഴിച്ചു നിർത്തി ഒരു ശരാശരി മനുഷ്യന്റെ ബുദ്ധിയിൽ ചിന്തിച്ചാൽ പോലും ഒരു തരത്തിലും വിശദീകരിക്കാനാവാത്ത ഒന്നാണ് ഓവർലുക്ക് ഹോട്ടലിന്റെ ഘടന. ഒരു രീതിയിലും സാധ്യമാവാത്ത ജനാലകളും വാതിലുകളും ചിലയിടത്ത് അപ്രതീക്ഷിതമായി കടന്ന് വരുന്ന കണ്ണാടികളും ചിത്രത്തിൽ ഉടനീളം കാണാൻ ആയേക്കും. ഇങ്ങനെയുള്ള അസാധ്യമായ ചില വസ്തുതകകളാണ് ഈ ഭാഗത്ത് ഉൾപ്പെടുത്തിയിരിക്കുന്നത്.

1. ഉൽമാന്റെ മുറിയിലെ ജനാല - ജാക്ക് ആദ്യമായി ഓവർലുക്ക് ഹോട്ടലിൽ എത്തി ഹോട്ടലുടമ ആയ ഉൽമാനെ കാണുന്ന രംഗത്തിൽ ആണ് ഹോട്ടൽ ഘടനയിലെ ആദ്യ പ്രത്യക്ഷമായ പോരായ്മ തെളിഞ്ഞു കാണുന്നത്. പ്രസ്തുത സീനിൽ ഉൽമാന്റെ പിറകിൽ വിശാലമായ ജനാല കാണാമെങ്കിലും ചിത്രത്തിന്റെ ബാക്കിഭാഗം കണക്കിൽ എടുക്കുമ്പോൾ യഥാർത്ഥത്തിൽ അങ്ങനെ ഒരു ജനാലയുടെ സാധ്യത വളരെ കുറവാണ്.ഇതിന് കാരണം ടോറെൻസ് കുടുംബം ഹോട്ടലിൽ താമസിക്കാൻ എത്തി പരിചയപ്പെടുന്ന സീനിൽ നിന്ന് തന്നെ വ്യക്തമാവും.ഈ സീനിൽ ഉൽമനോടൊപ്പം ഹോട്ടൽ ചുറ്റിക്കാണാൻ ഇറങ്ങിയ ടോറൻസ് കുടുംബം ഓഫീസ് റൂം മറികടക്കുന്നതും അതിന് പിന്നിലെ കോറിഡോറിലൂടെ നടക്കുന്നതും വ്യക്തമായി കാണിച്ചിരിക്കുന്നു. ഈ കോറിഡോറിലൂടെ തന്നെ ജാക്കിനെ ഭയന്ന് ഓടുന്ന ഡാനിയും, ഭാര്യയെ കൊല്ലാനായി ജാക്കും, വിരുന്നുകാരെ കണ്ട് പേടിച്ച വെണ്ടിയും പിന്നീട് കടന്നുപോവുന്നുണ്ട്.അവയിലൊന്നും ജനാലയോ ആകാശമോ കാണാനില്ല അതിനാൽ തന്നെ പ്രസ്തുത ഘടന തെറ്റ് ആണെന്ന് കാണാനാവും.
2. 237ആം മുറിയിലേക്കുള്ള കോറിഡോർ - മേല്പറഞ്ഞ വിഷയം സങ്കീർണമായ ഷൂട്ടിങ്ങിനിടെ സംവിധായകന് പറ്റിയ ഒരു കൈപ്പിഴ ആയി കണ്ട് ഒഴിവാക്കാമായിരുന്നു,ഇത്തരത്തിൽ ഒരു തെറ്റ് വീണ്ടും അവർത്തിച്ചില്ലായിരുന്നുവെങ്കിൽ. ടോറെൻസ് കുടുംബത്തിനെയും കൂട്ടിക്കൊണ്ട് ഉൽമാൻ ഹോട്ടൽ ചുറ്റി കാണിക്കുന്ന സീനിൽ വസ്തുതകൾക്ക് നിരക്കാത്ത ഒന്നിലധികം മാറ്റങ്ങൾ ചൂണ്ടികാണിക്കാനാവും. ആദ്യമായി ഹാളിൽ കാണുന്ന റൂഫ് മുതൽ നിലം വരെ നീണ്ടു നിൽക്കുന്ന ജനാലയും അതില്കൂടി കാണുന്ന പുറംകാഴ്ചകളും. തൊട്ടടുത്ത സീനിൽ എതിർ ഭാഗത്തേക്ക് നടന്ന് കയറുന്ന സംഘം ഇങ്ങനെ ഒരു സീനിനുള്ള സാദ്ധ്യതകൾ തള്ളിക്കളയുന്നു. ഏറ്റവും വിചിത്രമായത് ബാക്ക്ഗ്രൗണ്ടിൽ വഴിയില്ലാതെ ഭാഗത്തേക്ക് തങ്ങളുടെ ബാഗുകളുമായി നടന്ന് പോവുന്ന വിരുന്നുകാരാണ്.
3. ടോറൻസ് അപാർട്മെന്റ് - തെറ്റുകളുടെ (??) ഒരു പെരുങ്കളിയാട്ടം തന്നെയാണ് ടോറെൻസ് അപാർട്മെന്റ്. ആദ്യമായി പ്രേക്ഷകൻ അപാർട്മെന്റിന്റെ ഉൾവശം കാണുമ്പോൾ രണ്ട് ജനാലകൾ പരസ്പരം 90 ഡിഗ്രിയിലുള്ള രണ്ട് ചുവരുകളിൽ ഉള്ളതായി കാണാം. അതിൽ നിന്ന് തന്നെ ഹോട്ടലിന്റെ എതോ ഒരു മൂലയ്ക്ക് ആണ് ടോറൻസ് അപാർട്മെന്റ് എന്ന് മനസിലാക്കാനാവും. എന്നാൽ പ്രശനം സങ്കീർണം ആവുന്നത് ഒരു ഇരുപത് മിനിറ്റ് മുന്നിലേക്ക് പോവുമ്പോഴാണ് ,ഉൽമാനും സംഘവും അപ്പാർട്മെന്റിലേക്ക് നടന്ന് വരുന്ന കോറിഡോറിൽ അപാർട്മെന്റ് ഏകദേശം മധ്യ ഭാഗത്ത് ആയാണ് കൊടുത്തിരിക്കുന്നത്.അതിനാൽ തന്നെ തൊണ്ണൂറ് ഡിഗ്രി രൂപത്തിൽ ജനാല സാധ്യമല്ല ,ഇനി സാധ്യമാണെങ്കിൽ തന്നെ അതിലൂടെ പുറം കാഴ്ചകളും വെയിലും കാണാൻ ഇടയില്ല.എന്നാൽ ഏറ്റവും പ്രധാനമായ ചോദ്യം കോറിഡോർ അപാർട്മെന്റിന്റെ മുന്നിൽ അവസാനിക്കുന്നില്ലെങ്കിൽ അത് എവിടേക്കാണ് നീണ്ട് പോയത് എന്നതിനാണ്.ജാക്കിൽ നിന്നും രക്ഷപ്പെടാനായി ജനൽ വഴി ഐസിലൂടെ ഡാനി ഊർന്ന് ഇറങുന്ന സീൻ വെളിച്ചം വീശുന്നത് അപാർട്മെന്റ് കോറിഡോറിന്റെ മധ്യഭാഗത്ത് ആണ് എന്ന വസ്തുതയിലേക്കാണ്.

ഇതിൽ നിന്നെല്ലാം ഉയർന്ന് വരുന്ന ചോദ്യം എന്തിന് എന്നതാണ്. ഇത് പോലെയുള്ള ഘടനയിലെ തെറ്റുകളും, അസാധ്യമായ രീതികളും എന്തിന് കുബ്രിക് തന്റെ ചിത്രത്തിൽ ഉൾപ്പെടുത്തി ??. ഈ ചോദ്യത്തിലേക്ക് വെളിച്ചം വീശാൻ ഒരു ചെറിയ ശ്രമം നടത്താം. ആദ്യമായി ഓവർലുക്ക് ഹോട്ടൽ എന്നത് വെറുമൊരു ഒറ്റപ്പെട്ട ഹോട്ടൽ അല്ല ,ചിത്രത്തിൽ തന്നെ കാണിച്ചിട്ടുള്ള വളഞ്ഞ് പുളഞ്ഞ് കിടക്കുന്ന മെയ്‌സിന്റെ മറ്റൊരു പതിപ്പാണ്.ഓരോ കാഴ്ചയിലും മെയ്‌സിന്റെ ഘടന മാറിയതായി കാണാൻ ആവും,അതുപോലെ തന്നെയാണ് ഓവർലുക്ക് ഹോട്ടലും. ഹോട്ടലിനുള്ളിൽ പെട്ടുപോയവരുടെ മാനസികാവസ്ഥ മാറുന്നതിന് അനുസരിച്ച് ഹോട്ടലും പരിണമിക്കുകയാണ്.ഒരിക്കൽ അകപ്പെട്ടുപോയവർക്ക് പിന്നീട് രക്ഷപെടാൻ ആവുന്നില്ലെന്ന് മാത്രമല്ല അവർ ഹോട്ടലിന്റെ ഭാഗമായി മാറുകയാണ്. ഇങ്ങനെ ഒരേ സംഭവങ്ങളിലൂടെ തുടർച്ചയായി കടന്നു പോവുന്നത് കഥാപാത്രങ്ങളെ ഭ്രാന്തിലേക്ക് കടത്തി വിടുന്നു.

"All Work And No Play Makes Jack A Dull Boy"

Shining (1980) - Part 1

പറഞ്ഞതിൽ കൂടുതൽ കഥ ഒളിപ്പിച്ചു വെച്ച് കൊണ്ട് ഷൈനിങ് എന്ന ചിത്രം സ്റ്റാൻലി കുബ്രിക് പ്രേക്ഷകന് സമ്മാനിച്ചത് മുപ്പത്തേഴ് വർഷങ്ങൾക്ക് മുൻപാണ്. ഈ മുപ്പത്തിയേഴ് വർഷങ്ങൾക്കിപ്പുറം ചിത്രം ഇന്നും ഒരു അമ്പരപ്പാണ് ,ഓരോ കാഴ്ചയിലും പുതിയത് എന്തെങ്കിലും ഈ ചിത്രം നൽകുന്നു .ഷൈനിങ് ഒരു തരത്തിൽ പറഞ്ഞാൽ ഒരു മരീചിക ആണ് ,സംവിധായകന്റെ മനസ്സിനൊപ്പം സഞ്ചരിച്ചവർ ചുരുക്കം മനസ്സിലാക്കിയവർ അപൂർവം. ഒരുപാട് അത്ഭുതപ്പെടുത്തിയ ചിത്രം ആയതിനാൽ തന്നെ പത്തിൽ കൂടുതൽ തവണ ഈ ചിത്രം കണ്ടിട്ടുണ്ട് ,ചിത്രത്തിനാധാരമായ നോവലും മറ്റ് കാര്യങ്ങളും തേടിപ്പിടിച്ച് വായിച്ചിട്ടുമുണ്ട്.ഇവയിൽ നിന്നെല്ലാം മനസ്സിലുടക്കിയ കൗതുകമുളവാക്കുന്ന കാര്യങ്ങളും കരണങ്ങളുമാണ് ഈ പോസ്റ്റിൽ ചേർത്തിരിക്കുന്നത്. ചിത്രത്തിന്റെ കഥാ സംബന്ധമായ കാര്യകാരണങ്ങൾ ഉൾപ്പെടുത്തി മറ്റൊരു പോസ്റ്റ് കൂടി എഴുതാമെന്ന് പ്രതീക്ഷിക്കുന്നു.

1. ചിത്രത്തിൽ ബാലതാരമായി അഭിനയം തുടങ്ങിയ ഡാനി ലോയ്ഡിനോട് ഇതൊരു ഹൊറർ ചിത്രമാണെന്നോ ,ഇത് പ്രമേയമാക്കിയ വിഷയത്തെക്കുറിച്ചോ ആരും ഒന്നും തന്നെ പറഞ്ഞിരുന്നില്ല. മാതാപിതാക്കളെ മോശമായി പ്രതിപാദിക്കുന്ന കഥ ആയതിനാൽ തന്നെ ഒരു അഞ്ച് വയസ്സുകാരനെ അത് ഏതു രീതിയിൽ ബാധിക്കും എന്ന് കുബ്രിക് ഭയപ്പെട്ടിരുന്നു.അതിനാൽ തന്നെ ഡാനിയുടെ കഥാപാത്രത്തെയും കൊണ്ട് വെൻഡി (അമ്മ) നിലവിളിച്ച് കൊണ്ട് ഓടുന്ന സീനിൽ കളിപ്പാവയെയാണ് ഉപയോഗിച്ചിരിക്കുന്നത്.
2. ചിത്രത്തെ കുറിച്ച് സംസാരിച്ച് തുടങ്ങിയാൽ സ്വാഭാവികമായും ചെന്നെത്തുന്നത് ജാക്ക് നിക്കോൾസന്റെ അസാമാന്യ പ്രകടനവും , Here's Johnny എന്ന ഡയലോഗിലും ആണ്. എന്നാൽ തന്റെ സിനിമയുടെ പെർഫെക്ഷന്റെ കാര്യത്തിൽ സന്ധിയില്ലാത്ത കുബ്രിക് ഈ സീൻ ഷൂട്ട് ചെയ്യാനായി മൂന്ന് ദിവസവും അറുപതോളം വാതിലുകളും ഉപയോഗിച്ചു .
3. തന്റെ ചിത്രങ്ങളുടെ സ്ക്രിപ്റ്റുകൾ ചിത്രീകരണത്തിനിടയ്ക്കും തോന്നലിന് അനുസരിച്ചും മാറ്റാൻ ഒരു മടിയുമില്ലാത്ത ആളാണ് കുബ്രിക്.ആയതിനാൽ തന്നെ ഈ ചിത്രം ഷൂട്ട് ചെയ്തത് കഥ നടക്കുന്ന ക്രമത്തിൽ തന്നെയാണ്.എല്ലാ സീറ്റുകളും എല്ലാ നടീനടന്മാരും ഏത് സമയത്തും ലൊക്കേഷനിൽ വേണം എന്നത് കുബ്രിക്കിന് നിർബന്ധമുള്ള കാര്യമായിരുന്നു.
4. ചിത്രത്തിനായി ഷൂട്ട് ചെയ്ത ഒരു സീൻ പിന്നീട് റിഡ്‌ലി സ്കോട്ടിന്റെ ബ്ലേഡ് റണ്ണർ എന്ന ചിത്രത്തിലും ,ഹോട്ടലിന്റെ സെറ്റ് പിന്നീട് കുറച്ച് മാറ്റം വരുത്തി ഇന്ത്യാന ജോൺസ്‌ ചിത്രത്തിലെ പ്രശസ്തമായ പാമ്പുകളുടെ കല്ലറ സീനിലും ഉപയോഗിച്ചിട്ടുണ്ട്.
5. ചിത്രത്തിലെ ഏറ്റവും കഠിനം എന്ന് പൊതുവെ തോന്നിക്കുന്ന സീനായ് എലവറ്ററിൽ നിന്നും രക്തം ഒഴുകി വരുന്ന സീൻ വെറും മൂന്ന് ടേക്കിൽ കഴിഞ്ഞെങ്കിലും ഷോട്ട് റെഡി ആക്കാൻ ഉദ്ദേശം ഒരു വർഷമെടുത്തു.
6.ഒരു സീൻ ഏറ്റവും കൂടുതൽ റീടേക് എടുത്തതിനുള്ള റെക്കോർഡ് ഈ ചിത്രത്തിനാണ്.ഹോട്ടലിലെ ഷെഫ് ഡാനിക്ക് ഷൈനിങ് എന്താണ് എന്ന് വിവരിച്ചു കൊടുക്കുന്ന സീൻ 148 ടേക്കിൽ ആണ് പൂർത്തിയാക്കിയതെങ്കിൽ,നായിക സ്വയരക്ഷയ്ക്കായി ബാറ്റ് വീശുന്ന രംഗം നൂറോളം ടേയ്ക്കുകൾക്ക് ശേഷമാണ് റെഡി ആയത്.
7. തന്റെ നടീ നടന്മാരോട് അങ്ങേയറ്റം മോശം പെരുമാറ്റം ആയിരുന്നു കുബ്രിക് ഈ ചിത്രത്തിന്റെ സെറ്റിൽ.കഥയ്ക്ക് ആവശ്യമായ മൂഡ് കിട്ടുന്നതിനായി അവർക്ക് ഇഷ്ട്ടപ്പെടാത്ത കാര്യങ്ങൾ മാത്രം ചെയ്യുന്നത് മുതൽ തുടർച്ചയായുള്ള ടേയ്ക്കുകളും അവരെ നന്നായി ബുദ്ധിമുട്ടിച്ചു.
8. കുബ്രിക്കിന്റെ ഈ പെരുമാറ്റം കൊണ്ട് തന്നെയാവണം ബാലതാരമായ ഡാനിയുടെയും ,ബാത്ത്ടബ് സീനിൽ അഭിനയിച്ച വൃദ്ധയുടെയും യുവനടിയുടെയും എല്ലാം അവസാന ചിത്രമായിരുന്നു ഷൈനിങ്.തങ്ങളുടെ ജീവിതകാലത്ത് പിന്നീടൊരു ചിത്രത്തിൽ ഇവർ പ്രത്യക്ഷപ്പെട്ടില്ല .
9. ചിത്രത്തിന്റെ വിശ്വൽസിലെ ഒരു പ്രത്യേകതയാണ് ഒരു പ്രധാന സംഭവം നടക്കുമ്പോൾ പ്രേക്ഷകരുടെ പൂർണ ശ്രദ്ധ ലഭിക്കാനായി സംഭവത്തെയോ വസ്തുവിനെയോ കൃത്യമായി സെന്ററിലേക്ക് കൊണ്ടുവന്നിരിക്കുന്നു. ശ്രദ്ധ പിടിച്ചുപറ്റാനും കഥയുടെ ആവശ്യത്തിനുമായി മിക്ക സീനുകളിലും ചുവപ്പ് നിറവും കാണാനാവും.
10. മരണാന്തര ജീവിതവും പ്രേതവും ഉൾപ്പെടുന്ന കഥയിൽ എന്ത്കൊണ്ട് കുബ്രിക്കിന് താല്പര്യമേറി എന്ന സ്റ്റീഫൻ കിങ്ങിന്റെ ചോദ്യത്തിന് കുബ്രിക് നൽകിയ ഉത്തരം "പ്രേതകഥ പോലെ മനുഷ്യന് പ്രതീക്ഷ നൽകുന്ന ഒരു കഥ വേറെയില്ല കാരണം ഇതിൽ നമ്മൾ മരണത്തെയും അതിജീവിക്കുന്നു" എന്നാണ്.
11. ചിത്രത്തിലെ ജാക്ക് നിക്കോൾസന്റെ കഥാപാത്രത്തിനായി പരിഗണിച്ച നടന്മാരിൽ റോബർട്ട് ഡെനിരോ,റോബിൻ വില്യംസ്,ഹാരിസൺ ഫോർഡ് എന്നിവരും ഉണ്ടായിരുന്നു.വർഷങ്ങൾക്കിപ്പുറം തിരിഞ്ഞ് നോക്കുമ്പോൾ ആ കഥാപാത്രത്തിന് നിക്കോൾസനോളം മികച്ച ഒരു കാസ്റ്റിംഗ് ലഭിക്കാനില്ല എന്ന് പറയേണ്ടി വരും.
12. ചിത്രത്തിന് പ്രചോദനമായി കുബ്രിക് ഉയർത്തിക്കാട്ടിയത് മൂന്ന് ചിത്രങ്ങളാണ്. Eraserhead, Rosemarys Baby ,The Exorcist.
13. ചിത്രത്തിലെ മറ്റൊരു ബുദ്ധിമുട്ടേറിയ ഷോട്ട് ആയിരുന്നു ജാക്ക് നിക്കോൾസന്റെ കഥാപാത്രം ടെന്നീസ് ബോൾ ചുവരിലേക്ക് എറിയുന്ന സീൻ.തിരിച്ചുവരുന്ന ബോൾ ക്യാമറയുടെ ലെൻസിൽ തട്ടണം എന്ന് നിര്ബന്ധമുണ്ടായിരുന്നു സംവിധായകൻ അത് സാധ്യം ആവുന്നത് വരെ ഏറിയിച്ച് കൊണ്ടേയിരുന്നു.ഒടുവിൽ സെറ്റിലെ ഓരോരുത്തരും ശ്രമിക്കാൻ തുടങ്ങി.നീണ്ട പരിശ്രമത്തിനൊടുവിൽ അഞ്ചാം ദിവസം പന്ത് ലെൻസിൽ കൊണ്ടു.
14. ചിത്രത്തിനാധാരമായ നോവൽ പ്രകാരമാണെങ്കിൽ ഡാനിയോട്  സംസാരിക്കുന്ന അദൃശ്യനായ കൂട്ടുകാരൻ ഡാനി തന്നെയാണ്.ഭാവിയിൽ നിന്നും തന്റെ ചുറ്റിലും നടക്കുന്ന കാര്യങ്ങൾ ഡാനിയെ അറിയിക്കാൻ എത്തിയ ഡാനിയുടെ ഭാവി പ്രതിരൂപം.എന്നാൽ ഈ കഥാ ബീജം കുബ്രിക് ചിത്രത്തിൽ ഉൾപ്പെടുത്തിയില്ല.
15. ക്ലാസിക് എന്ന് പിൽക്കാലത്ത് വിലയിരുത്തപ്പെട്ടെങ്കിലും അന്ന് മോശം നടിക്കും സംവിധായകനുമുള്ള റാസ്‌പേറി പുരസ്‌കാരത്തിന് ചിത്രം നോമിനേറ്റ് ചെയ്യപ്പെട്ടിരുന്നു.
16. കഥയ്ക്ക് ചേരാത്തത് എന്ന അഭിപ്രായത്തിൽ കുബ്രിക് വെട്ടിമാറ്റിയ ഒരു ക്ലൈമാക്സ് കൂടിയുണ്ട് ചിത്രത്തിന്.അത് പ്രകാരം വെൻഡിയെ കാണാൻ എത്തുന്ന ഹോട്ടൽ മാനേജർ അവർ പറയുന്ന സംഭവങ്ങൾ അവിടെ നടന്നതിന് തെളിവൊന്നുമില്ലെന്നും സംശയം മാറാൻ കുറച്ച് ദിവസം അയാളുടെ സാന്നിധ്യത്തിൽ അവർ അവിടെ വന്ന് താമസിക്കണം എന്നും നിർദേശിക്കുന്നു.
17. ജാക്കിന്റെ കഥ വെൻഡി പരിശോധിക്കുന്ന സീനിൽ അവൾ കാണുന്ന പേപ്പറുകളും അതിലെ All Work And No Play Makes Jack A Dull Boy എന്ന സംഭാഷാങ്ങളും പൂർണമായി ടൈപ്പ് ചെയ്തതാണ്.ഇതിനായി കുബ്രിക് ഒരു അസിസ്റ്റന്റിനെ മൂന്ന് മാസത്തോളം ജോലിക്ക് നിർത്തിയതായും പറയപ്പെടുന്നു.
18. ചിത്രത്തിന്റെ കഥ രചിച്ച സ്റ്റീഫൻ കിംഗ് ബാൾറൂം പാർട്ടി സീനിൽ കണ്ടക്ടറായി അഭിനയിച്ചിട്ടുണ്ട്. പൂർത്തിയായ ചിത്രത്തിൽ സ്റ്റീഫൻ കിംഗ് പിൽക്കാലത്ത് അതൃപ്തി പ്രകടിപ്പിച്ചത് ചരിത്രം.

ഇതുപോലെ ഒരുപാട് വ്യത്യസ്തമായ കാര്യങ്ങൾ ഈ ചിത്രത്തെ കുറിച്ച് പറയാൻ ബാക്കി കിടക്കുന്നു. ഒരു തവണയെങ്കിലും ഈ ചിത്രം കണ്ടില്ലെങ്കിൽ അതിനെ നഷ്ടം എന്ന് പറഞ്ഞാൽ തീരില്ല.ഷൈനിങ് എന്ന ചിത്രത്തിൽ തന്റെ കഥാപാത്രങ്ങൾക്കും നടീ നടന്മാർക്കും അപ്പുറം പ്രേക്ഷകന്റെ മനസ്സ് വെച്ച് കളിച്ച കുബ്രിക്കിന്റെ ചില കളിതമാശകൾ ഉൾപ്പെടുത്തി കൊണ്ട് മറ്റൊരു പോസ്റ്റുമായി എത്താം എന്ന് പ്രതീക്ഷിക്കുന്നു.

400. Kuruthipunal (1995)

Director : P C Sreeram

Genre : Action

Rating : 8.6/10

Country : India

Duration : 143 Minutes


🔸"വീരംനാ എന്നാ തെരിയുമാ, അത് ഭയം ഇല്ലാത മാതിരി നടിക്കിറത്" ,ഈ സംഭാഷണത്തോളം ഒരു ചിത്രത്തിന്റെ സത്തയും സന്ദേശവും ഉൾക്കൊള്ളുകയും അതെ സമയം കഥാപാത്രം കടന്ന് പോവുന്ന മാനസിക അവസ്ഥയെ പ്രതിനിധീകരിക്കുകയും ചെയ്യുന്ന മറ്റൊരു സംഭാഷണം കാണിച്ച് തരാൻ ആവശ്യപ്പെടുക ആണെങ്കിൽ കൈമലർത്തുക അല്ലാതെ മറ്റൊരു നിവർത്തിയില്ല. ഭയം അത് തന്നെയാണ് നായകനിൽ നിലനിൽക്കുന്ന വികാരം, കാരണം ഒരു തല അറുത്ത് മാറ്റിയാൽ ആ സ്ഥാനത്ത് പത്തെണ്ണം ഉയർന്ന് വരുമെന്ന് അയാൾക്കറിയാം, ഈ കളി തനിക്ക് ജയിക്കാനാവില്ല എന്നുമറിയാം ,എന്നാലും പേടിക്കാൻ കഴിയില്ല കാരണം ഭയന്ന് തുടങ്ങിയാൽ അവിടെ അയാളുടെ തോൽവി ആരംഭിക്കും.

🔸അറുപത്തി എട്ടാമത് ഓസ്കാർ പുരസ്‌കാര ചടങ്ങിലേക്കുള്ള മികച്ച ചിത്രങ്ങളുടെ പട്ടികയിൽ ആ വർഷത്തെ ഇന്ത്യയുടെ ഒഫിഷ്യൽ എൻട്രി, ഡോൾബി ഡിജിറ്റൽ സൗണ്ടിന്റെ പിൻബലത്തിൽ എത്തിയ ആദ്യ ഇന്ത്യൻ ചിത്രം, തൊണ്ണൂറുകളിലെ തമിഴ് ചലച്ചിത്ര ലോകത്തെ ഒഴിവാക്കാൻ കഴിയാത്ത സാന്നിധ്യങ്ങളായ കമൽഹാസൻ, അർജുൻ, നാസർ തുടങ്ങിയവരുടെ സാന്നിധ്യം, എല്ലാത്തിനും പുറമെ ഓം പുരി, ആശിഷ് വിദ്യാർത്ഥി, നസ്രുദീൻ ഷാ എന്നിവർ അഭിനയിച്ച് വിസ്മയിപ്പിച്ച ദ്രോഹകാൽ എന്ന ഹിന്ദി സിനിമയുടെ റീമെയ്ക്കും, ഇങ്ങനെ പ്രത്യേകതകൾ ഒരുപാടുണ്ട് കുരുതിപ്പുനൽ എന്ന ഈ ചിത്രത്തിന്. 1993ൽ ചിത്രം പ്രഖ്യാപിച്ച നാൾ മുതൽ തന്നെ തമിഴിലെ അടുത്ത ബ്രഹ്മാണ്ഡ ചിത്രം എന്ന പ്രതീക്ഷ കരസ്ഥമാക്കിയിരുന്ന ചിത്രത്തിൽ നിന്നും പ്രേക്ഷകരും ഒരുപാട് പ്രതീക്ഷിച്ചിരുന്നു എന്നതാണ് സത്യം.

🔸1993ൽ ഇന്ത്യയെ ഒന്നടങ്കം പിടിച്ച് കുലുക്കിയ സംഭവം ആയിരുന്നു മുംബൈ ബോംബ് സ്ഫോടന പരമ്പര, ഈ പശ്ചാത്തലത്തിൽ തൊണ്ണൂറുകളിലെ നവ തീവ്രവാദ മുന്നേറ്റങ്ങളുമായി ഇന്ത്യൻ ജനത പൊരുത്തപ്പെട്ട് കൊണ്ടിരിക്കുന്ന കാലഘട്ടത്തിലാണ് കുരുതിപ്പുനൽ എന്ന ചിത്രം സ്‌ക്രീനിൽ എത്തുന്നത്. ഒരുപക്ഷെ തീവ്രവാദം പ്രമേയമാക്കി വന്ന ഇന്ത്യൻ ചിത്രങ്ങളിൽ ഏറ്റവും മികച്ചത് എന്ന വിശേഷണം ഈ സിനിമ അർഹിക്കുന്നുണ്ട്, കാരണം മറ്റ് പല ചിത്രങ്ങളും പിന്തുടർന്ന ഒരു മേഖലയിൽ മാത്രം കേന്ദ്രീകൃതമായ തീവ്രവാദ സമീപനത്തിൽ നിന്നും വേർപെട്ട രാജ്യത്തിന്റെ ഓരോ മേഖലയിലും ആഴ്ന്നിറങ്ങിയ ഭീകരവാദത്തിന്റെ വേരുകൾ ഒട്ടും പ്രതീക്ഷയോ പ്രത്യാശയോ പകരാതെ ചിത്രം തുറന്ന് കാട്ടുന്നുണ്ട്.

🔸തങ്ങളുടെ നഗരത്തിൽ സാന്നിധ്യം കാണിച്ച് തുടങ്ങിയ തീവ്രവാദ സംഘത്തെ നിലക്ക് നിർത്താനുള്ള ശ്രമത്തിലാണ് പോലീസ് ഓഫിസർമാരായ ആദി നാരായണനും ,സുഹൃത്തായ അബ്ബാസും. ഇരുവരും തങ്ങളുടെ പ്രവർത്തി മണ്ഡലത്തിൽ അങ്ങേയറ്റം കഴിവുള്ളവരും ,സത്യസന്ധരും ,സർവോപരി ഏറ്റെടുത്ത ജോലിയിൽ ഒരു വിട്ടുവീഴ്ചയ്ക്കും തയാർ ആകാത്തവരുമാണ്. ഇരുവരുടെയും നേതൃത്വത്തിലാണ് തീവ്രവാദ സംഘടനയെ ചെറുത്ത് നിർത്താനായി ഓപ്പറേഷൻ ധനുഷ് നടപ്പിലാക്കുന്നത്, പദ്ധതി ഒരേസമയം അപകടകരവും ,അങ്ങേയറ്റം രഹസ്യ സ്വഭാവം ആവശ്യമുള്ളതുമാണ്. തങ്ങളിലേക്ക് വിവരങ്ങൾ എത്തിക്കുന്നതിനായി പോലീസ് ഉദ്യോഗസ്ഥരെ സംഘടനയുടെ ഭാഗമാക്കി മാറ്റാനുള്ള പദ്ധതിയാണ് ഓപ്പറേഷൻ ധനുഷ്.

🔸ഓപ്പറേഷൻ ധനുഷിന്റെ ചുവട് പിടിച്ചുള്ള ഇരുവരുടെയും ശ്രമങ്ങൾ അവരെ സംഘടനയുടെ നേതാവായ ബദ്രി എന്നയാളുമായുള്ള നേരങ്കത്തിന് നിർബന്ധിതരാക്കുകയാണ്. പ്രധാന കഥാപാത്രങ്ങളായി എത്തിയ കമൽഹാസൻ, അർജുൻ എന്നിവർ തിളങ്ങി എങ്കിലും നാസർ അവതരിപ്പിച്ച വില്ലൻ കഥാപാത്രം വേറിട്ട് തന്നെ നിൽക്കുന്നു, സ്‌ക്രീനിൽ ഉള്ള നിമിഷങ്ങൾ കാഴ്ചക്കാരനെ ശെരിക്കും പേടിപ്പെടുത്തുന്ന അപൂർവം വില്ലൻ കഥാപാത്രങ്ങളിൽ ഒന്ന്. ചിത്രത്തെ കുറിച്ച് അധികം ഒന്നും പറയുന്നില്ല, ഒരുപാട് ക്രൈം ത്രില്ലർ ആക്ഷൻ ചിത്രങ്ങൾ കണ്ടതിനാൽ തന്നെ മേൽ പറഞ്ഞ കഥാ ഗതിയിൽ നിന്നും ഇനി എന്ത് സംഭവിക്കും എന്ന് പ്രവചിക്കാൻ കഴിയും എന്ന് കരുതുന്നുണ്ടെങ്കിൽ അത് തീര്ത്തും തെറ്റാണ്, ഈ ചിത്രം പൂർണമായും ക്ലിഷേകൾക്ക് അപ്പുറത്താണ്. കാണാത്തവർക്ക് ധൈര്യമായി കാണാം, കണ്ടവർക്ക് ഒന്ന്കൂടി കാണാം.

Verdict : Must Watch

399. The Dresser (2015)

Director : Richard Eyre

Genre : Drama

Rating : 6.8/10

Country : UK

Duration : 105 Minutes


🔸ഒരു ചിത്രം റീമേയ്ക്ക് ചെയ്യപ്പെടുക എന്നത് അത്ര പുതിയ കാര്യമൊന്നും അല്ല, പല പല ഭാഷകളിൽ നിന്നും രാജ്യങ്ങൾ കടന്നും ,സംസ്കാരത്തിന് അനുസൃതമായ മാറ്റങ്ങൾ വരുത്തി പല ചിത്രങ്ങളും റീമേയ്ക്ക് ചെയ്യപ്പെട്ടിട്ടുണ്ട് ,ചെയ്യപ്പെടുന്നുണ്ട് ,ഇനി ചെയ്യപ്പെടുകയും ചെയ്യും. ഈ ചിത്രങ്ങളിലെല്ലാം പൊതുവായി കാണപ്പെടുന്ന വസ്തുതയാണ് യഥാർത്ഥ ചിത്രത്തിനോട് നീതി പുലർത്താൻ കഴിയാത്ത പ്രശനം, എല്ലാ ചിത്രങ്ങളും എന്നല്ല എങ്കിലും കൂടുതൽ ചിത്രങ്ങളും ഈ കടമ്പ കടക്കാറില്ല. ഈ കാരണം ഒന്ന് കൊണ്ട് തന്നെ ദി ഡ്രെസ്സർ എന്ന ഈ ചിത്രം റിലീസിന് മുന്നേ തന്നെ അത്യാവശ്യം മുറുമുറുപ്പുകൾ കേട്ടിരുന്നു, 1983ൽ പുറത്തിറങ്ങിയ ഒറിജിനൽ ചിത്രം അഞ്ച് ഓസ്കാർ നോമിനേഷൻ കരസ്ഥമാക്കിയതിനാൽ തന്നെ വലിയ ഉത്തരവാദിത്തമാണ് ഈ ചിത്രത്തിന് മേൽ ഉണ്ടായിരുന്നത്.

🔸ചാർളി ചാപ്ലിൻ തന്റെ മാസ്റ്റർപീസ് എന്ന് വിശേഷിപ്പിച്ച ചിത്രമാണ് ലൈംലൈറ്റ്, പല കാരണങ്ങൾ കൊണ്ടും ഡ്രെസ്സർ എന്ന ചിത്രം കണ്ട് കൊണ്ടിരിക്കെ ചിന്ത പോയത് ലൈംലൈറ്റ് എന്ന ചിത്രത്തിന് പിറകെയാണ്, അതിന് ചില കാരണങ്ങളുമുണ്ട്. ഒന്നാമതായി ചിത്രം കൈകാര്യം ചെയ്യുന്ന പ്രമേയം, തന്റെ നല്ല കാലം കഴിഞ്ഞു എന്ന തിരിച്ചറിവ് ഉണ്ടെങ്കിലും കളം ഒഴിയാൻ തയ്യാറാവാത്ത നായക കഥാപാത്രമാണ് രണ്ട് ചിത്രങ്ങളുടെയും അമരത്തുള്ളത്, ഇരുവരും ഇറങ്ങി തിരിക്കുന്നത് ഒരു അവസാന ശ്രമത്തിന് വേണ്ടിയാണ്.

🔸മറ്റൊരു കാരണം എന്നത് സ്‌ക്രീനിൽ എത്തിയ അഭിനേതാക്കളെ സംബന്ധിച്ചാണ്. ഏറെക്കുറെ ഒരേ കാലഘട്ടത്തിൽ അഭിനയ രംഗത്തേക്ക് കടന്ന് വന്ന, തങ്ങളുടെ പ്രവർത്തി മണ്ഡലത്തിൽ കഴിവ് തെളിയിച്ച രണ്ട് നടന്മാരാണ് ആന്റണി ഹോപ്കിൻസും, ഇയാൻ മക്കെല്ലനും. ദശാബ്ദങ്ങൾ നീണ്ടുകിടക്കുന്ന അഭിനയ ജീവിതത്തിനിടെ ഒരിക്കൽ പോലും ഒന്നിച്ച് അഭിനയിക്കാത്ത അഭിനയിക്കാത്ത ഇരുവരും ആദ്യമായി ഒന്നിച്ചത് ഡ്രെസ്സർ എന്ന ചിത്രത്തിന് വേണ്ടി, ചാർളി ചാപ്ലിനും ബസ്റ്റർ കീറ്റനും ആദ്യമായി ലൈംലൈറ്റിന് വേണ്ടി ഒന്നിച്ചത് പോലെ തന്നെ. ഇവിടെ തന്നെ മക്കെല്ലന്റെ നോർമൻ എന്ന കഥാപാത്രവും കീറ്റണിന്റെ കഥാപാത്രവും തമ്മിലുമുണ്ട് സാമ്യതകൾ.

🔸ഷേക്‌സ്‌പിയർ കഥാപാത്രങ്ങളെ അരങ്ങിൽ എത്തിക്കുന്നതിൽ പ്രത്യേക വൈദഗ്ദ്യം ഉള്ള ആളാണ് സർ എന്ന നാമധേയത്തിൽ മാത്രം ചിത്രത്തിലുടനീളം അഭിസംബോധന ചെയ്യപ്പെടുന്ന ആന്റണി ഹോപ്കിന്സിന്റെ കഥാപാത്രം. ഗാംഭീര്യവും പ്രൗഢിയും നിറഞ്ഞ രീതിയിലുള്ള സാറിന്റെ പ്രകടനത്തിന് എല്ലാ കാലത്തും ആരാധകർ ഒരുപാട് ഉണ്ടായിരുന്നു. എന്നാൽ കുറച്ച് നാളുകളായി ടിയാന്റെ പെരുമാറ്റത്തിൽ ചില മാറ്റങ്ങൾ സന്തത സഹചാരിയായ നോർമൻ ശ്രദ്ധിച്ചിരുന്നു, മറവി അയാളെ ബാധിച്ച് തുടങ്ങിയിരിക്കുന്നു, സംയമനവും ചുറ്റുപാടുകളെ കുറിച്ചുള്ള പൊതു ബോധവും അയാൾക്ക് കൈമോശം വന്നിരിക്കുന്നു.

🔸പതിറ്റാണ്ടുകളായി സാറിന്റെ നിഴൽ പോലെ നടക്കുന്നയാളാണ്‌ നോർമൻ, മനസാക്ഷി സൂക്ഷിപ്പുകാരൻ എന്ന് പറഞ്ഞാൽ പോലും അധികം ആവില്ല. മനസ്സ് കൈവിട്ട് കൊണ്ടിരിക്കുന്ന സാറിന്റെയും, പ്രകടനം മാറ്റിവെക്കാൻ കഴിയില്ല എന്ന അയാളുടെ വാശിയേയും ചോദ്യം ചെയ്യാൻ കഴിയാതെ നോർമനും അയാളുടെ ശ്രമങ്ങളുടെ ഭാഗം ആവുകയാണ്. പ്രധാന നടന്മാരുടെ മാസ്മരിക പ്രകടനവും മികച്ച അവതരണവും നല്ല കഥയും കൊണ്ട് സമ്പന്നമാണ് ഈ ചെറിയ നല്ല ചിത്രം.

Verdict : Good

398. Christopher Robin (2018)

Director : Marc Foster

Genre : Fantasy

Rating : 7.9/10

Country : USA

Duration : 103 Minutes

🔸ജീവിതകാലം മുഴുവൻ ഒരു കുട്ടി ആയി ജീവിക്കുക എന്നത് ഏതൊരാളും ഒരിക്കൽ എങ്കിലും ആഗ്രഹിച്ച കാര്യം ആയിരിക്കും, ഉത്തരവാദിത്തങ്ങൾ ഏതും ഏറ്റെടുക്കാതെ കളിയും ചിരിയും കൂട്ടുകാരും ഒക്കെ ആയി കടന്ന് പോയ ആ കാലഘട്ടം ഏതൊരു വ്യക്തിയെ സംബന്ധിച്ചും ഒരുപാട് ഓർമകൾ നിറഞ്ഞ് നിൽക്കുന്നതാവും. പ്രായം ഏറും തോറും അവിടേക്ക് മടങ്ങി പോവുക എന്നത് ഒരു ശരാശരി മനുഷ്യന്റെ സ്വപ്നം ആയി നിലനിൽക്കും എങ്കിലും അത് ഒരിക്കലും സംഭവിക്കില്ല എന്ന സത്യം ഒരു നോവായി തുടരുകയും ചെയ്യും, ഇത്രയും പറഞ്ഞത് പലരും ഒരു ഫാന്റസി പോലെ കരുതിയ കാലഘട്ടത്തെ കുറിച്ചാണ്.

🔸ഇനി റിയാലിറ്റി അഥവാ സത്യത്തിലേക്ക്, പ്രായം ഏറും തോറും ജീവിതത്തിന്റെ ഒരു ഭാഗം നമ്മളിൽ നിന്നും കൊഴിഞ്ഞു പോവും എന്നാണ് ഏതോ ഒരു പുസ്തകത്തിൽ ആരോ എഴുതിയത്. ഈ കൊഴിഞ്ഞു പോവുന്ന ഭാഗം നിഷ്കളങ്കത ആണോ സ്നേഹമാണോ തിരിച്ചറിവ് ആണോ എന്നൊന്നും അയാൾ വ്യക്തമാക്കിയിട്ടില്ല എന്നാണ് അറിവ്. അത് എന്തൊക്കെ തന്നെ ആയാലും ഈ കാലഘട്ടം കഴിഞ്ഞ് പോവുന്നതോട് കൂടി നഷ്ടങ്ങളുടെ കണക്കുകൾ ആരംഭിക്കുകയായി. സമ്മർദ്ദം നിറഞ്ഞ് നിൽക്കുന്ന ജോലി ജീവിതമോ കുടുംബ ജീവിതമോ ആരംഭിക്കുന്നതിന് മുൻപ് സഹിക്കേണ്ടി വരുന്ന ഇത്തരം നഷ്ടങ്ങളാണ് ചെറുപ്പ കാലത്തെ കൂട്ടുകാരും കളിച്ച് നടന്ന പാടവും തൊടിയും ലഭിച്ച വിലപ്പെട്ട ഓർമകളും എല്ലാം തന്നെ.

🔸ഈ രണ്ട് കാലഘട്ടങ്ങളിലൂടെയും കടന്ന് പോയ വ്യക്തിയാണ് ക്രിസ്റ്റഫർ റോബിൻ, അയാൾ ഇന്ന് ഫാന്റസിക്ക് അപ്പുറം യാഥാർഥ്യത്തിന്റെ ലോകത്താണ്. ജോലിയും കുടുംബവും ഒക്കെ ആയി പൂർണമായും ഇന്നിൽ ജീവിക്കുന്ന റോബിൻ തന്റെ ഓർമകളിലേക്ക് അധികം കടന്ന് ചെല്ലാറില്ല, ആയതിനാൽ തന്നെ അയാൾ തന്റെ പഴയ സുഹൃത്തുക്കളെ കുറിച്ചോ അവരോടൊത്തുള്ള ഓർമകളെ കുറിച്ചോ തീർത്തും ബോധവാനല്ല. എന്നാൽ ജന്മനാട്ടിലെ റോബിന്റെ സുഹൃത്തുക്കളുടെ കാര്യം നേരെ തിരിച്ചാണ്, അവരുടെ ജീവിതത്തിൽ ഇന്നും റോബിന്റെ സാന്നിധ്യവും ,സ്വാധീനവും വളരെ വലുതാണ്.

🔸ഇങ്ങനെ തന്റെ കാര്യങ്ങളും പ്രാരാബ്ധങ്ങളുമായി തിരക്കിലായി റോബിൻറെയും അയാളുടെ എന്നെങ്കിലും ഒരിക്കലുള്ള തിരിച്ചുവരവിനായി കാത്ത് നിൽക്കുന്ന കൂട്ടുകാരുടെയും കഥയാണ് ക്രിസ്റ്റഫർ റോബിൻ. ഈ കഥാപാത്രങ്ങളുടെ ജീവിതത്തിൽ തുടർന്നുണ്ടാവുന്ന മാറ്റങ്ങളും പ്രശ്നങ്ങളും എല്ലാം ചിത്രം കണ്ട് തന്നെ തിരിച്ചറിയേണ്ടി ഇരിക്കുന്നു. ഏറ്റവും ലളിതമായി പറയുക ആണെങ്കിൽ സൗഹൃദം എന്ന വസ്തുതയുടെ അടിത്തറയിൽ നിർമിക്കപ്പെട്ട ചിത്രമാണ് ക്രിസ്റ്റഫർ റോബിൻ. എടുത്ത് പറയേണ്ട മറ്റൊരു കാര്യം ഡിസ്‌നിയുടെ പ്രശസ്ത കഥാപാത്രങ്ങളായ വിന്നി ദി പൂഹ്, ടൈഗർ എന്നീ കഥാപാത്രങ്ങളാണ് റോബിന്റെ സുഹൃത്തുക്കൾ എന്നതാണ്.

🔸സൗഹൃദം പ്രമേയമാക്കിയ ചിത്രം ആണെങ്കിലും തികച്ചും വ്യത്യസ്തരായ കഥാപാത്രങ്ങൾ ആണെങ്കിലും പല സിനിമകളിലും കണ്ട, മനസ്സിൽ പതിഞ്ഞ ചില സന്ദര്ഭങ്ങളുടെ ആവർത്തനം ഈ ചിത്രത്തിലും കാണാൻ ഇടയായി. അധികം ഗൗരവം അർഹിക്കാത്ത കഥ ആയതിനാലും കുട്ടികൾ ഉൾപ്പെട്ട പ്രേക്ഷക സമൂഹത്തെ ഉന്നം വെച്ചുള്ള ശ്രമം ആയതിനാലും കൂടുതൽ ചർച്ചകൾ ആവശ്യമുണ്ടെന്ന് തോന്നുന്നില്ല. എന്തിരുന്നാലും കണ്ട സന്ദർഭത്തിന്റെ പ്രശ്നമോ അല്ലെങ്കിൽ യഥാർത്ഥ പോരായ്മകളോ കാരണം ശരാശരിയായ അനുഭവം ആയാണ് ഈ ചിത്രം തോന്നിയത്.

Verdict : Average

397. Onibaba (1964)

Director : Kaneto Shindo

Genre : Horror

Rating : 8/10

Country : Japan

Duration : 100 Minutes


🔸ഒനിബാബ എന്ന ഈ പഴയ കാല ഹൊറർ ചിത്രം കണ്ട് അവസാനിപ്പിച്ച് അതിനെ കുറിച്ച് ഒരു കുറിപ്പ് എഴുതാൻ ഇരുന്നപ്പോൾ മനസ്സിൽ ആദ്യം വന്ന സംശയം എന്ത് എഴുതണം എന്നോ എങ്ങിനെ എഴുതണം എന്നോ ആയിരുന്നില്ല മറിച്ച് എവിടെ നിന്ന് ചിത്രത്തെ കുറിച്ച് പറഞ്ഞ് തുടങ്ങണം എന്നതായിരുന്നു. ഒരു നില ഇല്ലാ കയം പോലെയാണ് ഈ ചിത്രം അനുഭവപ്പെട്ടത്, ചിത്രം കണ്ട് അനുഭവിക്കുന്ന കാഴ്ചക്കാരൻ അതിലേക്ക് വീണ് പോവുകയാണ്, കൃത്യമായ ആരംഭമോ അവസാനമോ കാണാൻ കഴിയില്ല, ഒരു തരം അനിശ്ചിതാവസ്ഥയിൽ നിന്നും ആരംഭിച്ച ശേഷം ഏറെക്കുറെ അതെ അവസ്ഥയിൽ പ്രേക്ഷകനെ എത്തിച്ചതിന് ശേഷമാവും ഈ ചിത്രം അവസാനിക്കുക. അതിനാൽ തന്നെ ഒരു കാര്യം ഉറപ്പിച്ച് പറയാനാവും ,ഇത് പോലെ അധികം ചിത്രങ്ങൾ ഉണ്ടാവില്ല.

🔸കഠിനമായ യുദ്ധത്തിന് ശേഷം മുറിവുകളോടെ ആണെങ്കിലും ജീവനോടെ രക്ഷപ്പെട്ട് വരുന്ന രണ്ട് സമുറായി പോരാളികളെ സ്‌ക്രീനിൽ കാണിച്ച് കൊണ്ടാണ് ചിത്രം ആരംഭിക്കുന്നത്. ജീവന്റെ അവസാന ശ്വാസം മാത്രമാണ് അവരിൽ നിലനിൽക്കുന്നത്, ജീവിക്കാനുള്ള ആഗ്രഹം മാത്രമാണ് അവരെ മുന്നോട്ട് നയിക്കുന്നതും, അത്രമേൽ അവശരാണ് രണ്ട് പോരാളികളും. ഇരുവരുടെയും കഥ ആരംഭിച്ചത് പോലെ തന്നെ അപ്രതീക്ഷിതമായി അവസാനിക്കുന്നത് രണ്ട് മൂർച്ചയേറിയ കുന്തങ്ങൾ ശരീരം തുളച്ച് കയറുമ്പോഴാണ്. രക്ഷപ്പെടാൻ ഇരുവരും തീവ്രമായി ശ്രമിക്കുന്നുണ്ടെങ്കിലും പരാജയപ്പെടുകയാണ്.

🔸ഈ രംഗത്ത് ചിത്രം ജനിപ്പിക്കുന്ന ടോൺ അല്ലെങ്കിൽ കഥാപാത്രങ്ങളിൽ ഉളവാക്കുന്ന മാനസികാവസ്ഥ തന്നെയാണ് ചിത്രം തുടർന്ന് അങ്ങോട്ട് പിന്തുടരുന്നത്. രണ്ട് സമുറായി പോരാളികളുടെയും മരണ ശേഷം അതിന് കാരണക്കാരായ രണ്ട് സ്ത്രീകൾ മറവിൽ നിന്നും പുറത്ത് വരികയാണ്, ഇവരാണ് ചിത്രത്തിലെ കേന്ദ്ര കഥാപാത്രങ്ങൾ. മരണപ്പെട്ട പോരാളികളുടെ വസ്ത്രങ്ങളും മറ്റ്‌ വസ്തുക്കളും കൈക്കലാക്കിയ ശേഷം അവരെയും കുഴിച്ചിട്ട ഇരുവരും സ്വസ്ഥമായി വിശ്രമിക്കുകയാണ്, അടുത്ത ആളുടെ വരവ് വരെ. ഈ വസ്തുക്കൾ മറിച്ച് വിറ്റാണ് ജീവിക്കാനുള്ള വക ഇരുവരും കണ്ടെത്തുന്നത്.

🔸ഒനിബാബ എന്ന ചിത്രം ചതി, വഞ്ചന, കൊലപാതകം ,ലൈംഗികതയും അതിലെ നിരാശയും ആസക്തിയും എന്നീ വികാരങ്ങളുടെ മുകളിൽ നിർമിക്കപ്പെട്ട ചിത്രം ആണ്. ഇതിനൊപ്പം തന്നെ സാധാരണക്കാരായ ജനങ്ങളുടെ ഉള്ളിൽ ഉറങ്ങി കിടക്കുന്ന ഭീകരമായ ചില ചിന്തകളുടെയും ദൃശ്യാവിഷ്‌കാരം കൂടിയാണ്. മനോഹരവും അതേ സമയം ഭീതി ഉണർത്തുന്നതുമായ രംഗങ്ങളും അവയുടെ അവതരണവും തീർച്ചയായും കാഴ്ചക്കാരനെ പിടിച്ചിരുത്തുക തന്നെ ചെയ്യും, പേടിപ്പെടുത്തുന്ന രംഗങ്ങൾ അനുസരിച്ചാണ് ഹൊറർ ചിത്രങ്ങളെ വിലയിരുത്തുന്നതെങ്കിൽ അതിന് ആവശ്യമായ രംഗങ്ങളും ചിത്രത്തിൽ ഉണ്ട്.

🔸കേന്ദ്ര കഥാപാത്രങ്ങൾ ആയ രണ്ട് സ്ത്രീകൾ അമ്മായി അമ്മയും മരുമകളും ആണ്, അവരുടെ മകൻ ആണെങ്കിൽ ജപ്പാനിലെ ആഭ്യന്തര യുദ്ധത്തിൽ പങ്കെടുക്കാൻ പോയ പട്ടാളക്കാരനും ആണ്. മകന്റെ കൂടെ ജോലി ചെയ്ത സഹപ്രവർത്തകൻ അവന്റെ വിവരങ്ങളുമായി മടങ്ങി വരുന്നതും തുടർന്നുണ്ടാവുന്ന പ്രശ്നങ്ങളുമാണ് ചിത്രത്തിന്റെ പ്രമേയം. വളരെ ലളിതമായ അല്ലെങ്കിൽ അങ്ങനെ തോന്നിക്കുന്ന കഥ അതി ശക്തമായ അവതരണത്തിന്റെ ബലത്തിൽ അനശ്വരമാവുന്നത് കാണണമെങ്കിൽ ഈ ചിത്രം കണ്ടാൽ മതിയാവും. കൂടുതൽ പറയുന്നില്ല, ബ്ലാക്ക് ആൻഡ് വൈറ്റ് ജാപ്പനീസ് ചിത്രം കാണുന്നതിൽ പ്രശനം ഏതുമില്ലെങ്കിൽ തീർച്ചയായും കാഴ്ചക്കാരനെ ഞെട്ടിച്ചിരിക്കും ഈ ചിത്രം.

Verdict : Must Watch

396. The Night Of The Hunter (1955)

Director : Charles Laughton

Genre : Thriller

Rating : 8/10

Country : USA

Duration : 91 Minutes


🔸"ഞാൻ ഇങ്ങനെ അല്ലറ ചില്ലറ കൊലപാതകങ്ങൾ ഒക്കെ ആയി ജീവിച്ച് പോവുന്നതിൽ നിനക്ക് വിഷമമൊന്നുമില്ലല്ലോ അല്ലെ, ഉണ്ടെങ്കിൽ പറയണം. നിനക്ക് എന്ത് വിഷമം ഉണ്ടാവാനാണ് അല്ലെ, നിന്നെ വാഴ്ത്തി പാടുന്ന പുസ്തകങ്ങളിൽ വരെ കൊലപാതകങ്ങൾ നിറഞ്ഞ് നിൽക്കുക അല്ലെ. നീ അതെല്ലാം ധർമ്മ യുദ്ധം എന്ന പേരിൽ, ആ മറവിൽ ചെയ്ത് കൂട്ടുന്നു ഞാൻ ആണെങ്കിൽ പണത്തിനും വസ്തുവകകൾക്കും വേണ്ടി ചെയ്യുന്നു, വലിയ വ്യത്യാസങ്ങൾ ഏതും ഞാൻ കാണുന്നില്ല" കൊലയാളി ആയ ഹാരി പവൽ ഇത് പറയുന്നത് ദൈവത്തിനോട് തന്നെ ആണ്, തന്റെ നീണ്ട കൊലപാതക ജീവിതത്തിലെ ഏറ്റവും പുതിയ കൊലയും നടത്തി സംപ്ത്രിപ്തിയോടെ മടങ്ങവേ ആണ് ഹാരി തന്റെ കുറ്റകൃത്യങ്ങളെ വിശകലനം ചെയ്യുന്നത്.

🔸തഗ് ലൈഫ് എന്നൊക്കെ വിശേഷിപ്പിക്കേണ്ട ഒന്നാണ് ഹാരിയുടെ ജീവിതം, താനൊരു വൈദികൻ അല്ലെങ്കിൽ ഉപദേശി ആണെന്ന് ഹാരി പറയുന്നുണ്ട് എങ്കിലും സത്യാവസ്ഥ വ്യക്തമല്ല. സാമ്പത്തിക മാന്ദ്യ കാലത്ത് കൊലപാതകങ്ങളും അത് വഴി കിട്ടിപ്പോന്ന ഉപഹാരങ്ങളും സമ്പത്തും ഒക്കെ ഉപയോഗിച്ച് കൊണ്ടാണ് ഹാരി ജീവിച്ച് പോന്നത്. തന്റെ കുറ്റ കൃത്യങ്ങൾക്ക് എന്നും കൃത്യമായ രൂപ രേഖയും പദ്ധതിയും ഒക്കെ വെച്ച് പുലർത്തിയിരുന്ന ഹാരി കൂടുതലും ശ്രദ്ധ ചെലുത്തിയിരുന്നത് ഭർത്താക്കന്മാർ ഇല്ലാത്ത ഒറ്റപ്പെട്ട് ജീവിക്കുന്ന സാധുക്കളായ സ്ത്രീകളിൽ ആയിരുന്നു.

🔸സ്ത്രീകൾ എന്നും ഹാരിയുടെ ഇഷ്ട വിഷയം ആയിരുന്നു, എന്നാൽ ഇത് ശരീരത്തിനോ കേവലം നേരം പോക്കിനോ ആയിരുന്നില്ല എന്നതാണ് സത്യം. തെറ്റ് ചെയ്യുന്ന സ്ത്രീകളെ ശിക്ഷിക്കാനായി ദൈവം പിറവി നല്കിയവനാണ് താൻ എന്നതാണ് ഹാരിയുടെ ന്യായം, ഈ തെറ്റുകൾ തിരുത്താനായി ഏതറ്റം വരെയും പോവുന്നതിന് ഹാരിക്ക് മടിയില്ല. ചില പ്രത്യേക സന്ദർഭങ്ങളിൽ തെറ്റിന്റെ ശിക്ഷയായി അവരുടെ ജീവനും എടുക്കാറുണ്ട് ,അയാളെ സംബന്ധിച്ചിടത്തോളം തികച്ചും സ്വാഭാവികമായ കാര്യം. നന്മയും തിന്മയും എന്നത് പോലെ കയ്യിൽ ലവ് ,ഹേറ്റ് എന്ന് പച്ച കുത്തിയിട്ടുള്ള ഹാരി തന്റെ കൃത്യങ്ങളളെ കാണാൻ ആഗ്രഹിക്കുന്നത് ദൈവത്തിന്റെ ഉത്തരവ് നടപ്പിലാക്കാൻ ഉള്ള ഉപാധികൾ ആയാണ്.

🔸ചെറിയ ഒരു മോഷണ ശ്രമത്തിന് ജയിൽ ശിക്ഷ അനുഭവിക്കവേ ജെയിലിൽ വെച്ചാണ് ഹാരി, ബെൻ ഹാർപ്പർ എന്ന കുറ്റവാളിയെ പരിചയപ്പെടുന്നത്. ബാങ്ക് കൊള്ളയടിക്കും അതിനിടെ ഉണ്ടായ രണ്ട് പേരുടെ മരണത്തിനും ഉത്തരവാദിയായ ബെൻ ഹാരിയുടെ സഹമുറിയൻ ആയിരുന്നു. പോലീസ് പിടിച്ചെങ്കിലും ഇത്രയും കാലം ആയിട്ടും കൊള്ളയടിച്ച തുക വീണ്ടെടുക്കാൻ ആർക്കും കഴിഞ്ഞിട്ടില്ല ,ആ രഹസ്യം അറിയാവുന്നത് ബെന്നിന് മാത്രം ആണ് താനും. കളവ് പോയ പണത്തിന്റെ വലിപ്പവും ,ബെന്നിന്റെ പശ്ചാത്തലവും അറിയാവുന്ന ഹാരിക്ക് സ്വാഭാവികമായും അയാളുടെ കഥയിൽ താല്പര്യമേറി.

🔸ജയിലിൽ നിന്നും പുറത്തിറങ്ങിയ ഹാരി ബെന്നിന്റെ കുടുംബത്തിനെ അന്വേഷിച്ച് കൊണ്ട് ആ താഴ്വരയിലേക്ക് കടന്ന് വരികയാണ്, ആ പണം അവിടെ എവിടെയോ ഉണ്ടെന്ന് അയാൾക്ക് വ്യക്തമായി അറിയാം. എന്നാൽ തങ്ങളെ അന്വേഷിച്ചെത്തിയ അപകടത്തെ മനസിലാക്കാതെ ബെന്നിന്റെ കുടുംബം അയാളെ സ്വീകരിക്കുകയാണ്. ആറ് പതിറ്റാണ്ടുകൾക്ക് ശേഷം ഇന്നും ആദ്യമായി കാണുന്ന കാഴ്ചക്കാരന്റെ നെഞ്ചിടിപ്പ് വർധിപ്പിക്കുന്ന ,പിരിമുറുക്കം ഏറ്റുന്ന ഈ ചിത്രം ഏതൊരു സിനിമാ ആസ്വാദകനും നിശ്ചയമായും കണ്ടിരിക്കേണ്ട ഒന്നാണ്.

Verdict : Must Watch

395. Harold And Maude (1971)

Director : Hal Ashby

Genre : Comedy

Rating : 8/10

Country : USA

Duration : 91 Minutes


🔸ഹാരോൾഡ്‌ തന്റെ ജീവിതത്തിൽ അന്നോളം അങ്ങനെ ഒരാളെ കണ്ടിരുന്നില്ല, അങ്ങനെ ഒരു കാഴ്ചയും. ചില ആളുകൾക്ക് പ്രത്യേക കാര്യങ്ങളോടായിരിക്കുമല്ലോ ഇഷ്ടവും ഇഷ്ടക്കൂടുതലും, ഹാരോൾഡിന്റെ ഇഷ്ട്ടപ്പെട്ട പരിപാടി എന്നത് മരിച്ചവരുടെ അടക്കിന് പോവുന്നതാണ്. പ്രത്യേകിച്ച് കാരണങ്ങൾ ഒന്നും തന്നെ ഹാരോൾഡിന് ഇത് സംബന്ധിച്ച് പറയാനില്ല ,എങ്കിലും എന്തോ ഒരു തരം സന്തോഷമാണ് ഈ അവസരത്തിൽ അവന് അനുഭവപ്പെടാറ്. ഇത്തരം ഒരുപാട് സന്ദർഭങ്ങളിൽ അവൻ പങ്കെടുത്തിട്ടുണ്ടെങ്കിലും മൗടിയെ പോലെയൊരാളെ ആദ്യമായാണ് കാണുന്നത്. വശപ്പിശക് എന്നൊക്കെ പറഞ്ഞാൽ കുറഞ്ഞ് പോകും ,ഒന്നോ രണ്ടോ പിരി ഇളകിയതാവും എന്നാണ് ആദ്യ കാഴ്ചയിൽ ഹാരോൾഡിന് മൗടിയെ കുറിച്ച് തോന്നിയ വികാരം.

🔸ഹാരോൾഡിനെ കുറ്റം പറയാനാവില്ല, അല്പം പ്രായമായി മരിച്ച ഒരു പ്രമുഖന്റെ അടക്ക് ചടങ്ങായിരുന്നു അന്ന്. അയാൾ ചെയ്ത് കൂട്ടിയ കാര്യങ്ങളെ ഒരല്പം മേമ്പൊടിയോട് കൂടി അവതരിപ്പിക്കുന്നത് കേട്ട് പലരും കണ്ണീർ വാർക്കുമ്പോൾ ഒരല്പം മാറിയിരുന്ന് ഇതൊന്നും തന്നെ ബാധിക്കുന്ന കാര്യം അല്ല എന്ന മട്ടിൽ അതി സൂക്ഷ്മതയോടെ നാരങ്ങയുടെ ഇതളുകൾ ,സന്ദർഭത്തിന് പ്രാധാന്യം കൊടുക്കാതെ ഉതിർത്തെടുത്ത് കഴിക്കുകയാണ് മൗദി. തന്റെ ഇരുപത് വർഷകാല ജീവിതത്തിൽ ഇന്നേവരെ കണ്ടിട്ടില്ലാത്ത ഒരു പ്രതിഭാസത്തെ ഹാരോൾഡ്‌ അവിടെ കണ്ട് മുട്ടുക ആയിരുന്നു.

🔸ഒരു ഇരുപത് വയസ്സുകാരന് എൺപത് വയസുകാരിയോട് തോന്നുന്ന പ്രണയം, കേൾക്കുമ്പോൾ തന്നെ ഒരു തരം അസ്വാഭാവികത തോന്നാം, ഒരു രീതിയിൽ അല്ലെങ്കിൽ മറ്റൊരു രീതിയിൽ ചിത്രം ആഗ്രഹിക്കുന്നതും ആവശ്യപ്പെടുന്നതും അത് തന്നെ ആണ്. മരണം എന്ന പ്രതിഭാസം, യാഥാർത്യം അതാണ് ചിത്രത്തെ മുന്നോട്ട് കൊണ്ട് പോവുന്ന ഘടകം. ഹാരോൾഡ്‌ എന്ന കഥാപാത്രത്തിന് മരണത്തോട് ഒരു വല്ലാത്ത രീതിയിൽ ഉള്ള അടുപ്പമാണ്. മരിച്ചവരുടെ അടക്ക് ചടങ്ങുകൾക്ക് പുറമെ തികച്ചും വ്യത്യസ്തമായ ആത്മഹത്യാ രീതികൾ അനുകരിക്കുക എന്നത് ടിയാന്റെ ഇഷ്ട്ട വിനോദമാണ്.

🔸ഒരു ദിവസം വീട്ടിലേക്ക് കടന്ന് വരുന്ന ഹാരോൾഡിന്റെ അമ്മ കാണുന്നത് തൂങ്ങി മരിച്ച രീതിയിൽ ഉള്ള ഹാരോൾഡിനെ ആണ്, മറ്റൊരു ദിവസം ആണെങ്കിൽ ശരീരമാസകലം രക്തം വാർന്ന് മരിച്ച രീതിയിലും. ഇതിനൊക്കെ എന്താണ് കാരണം അല്ലെങ്കിൽ വ്യക്തമായ കാരണങ്ങൾ ഹാരോൾഡിനുണ്ടോ എന്നത് സിനിമ കണ്ട് തന്നെ അറിയാൻ ശ്രമിക്കുക. മൗദി എന്ന കഥാപാത്രം ,നിഗൂഢതകൾ എറിയതാണ് എവിടെനിന്ന് വന്നുവെന്നോ ആരാണെന്നോ ഒന്നും തന്നെ വ്യക്തത നല്കുന്നില്ലെങ്കിൽ കൂടിയും ഹാരോൾഡിന്റെ ജീവിതത്തിലും മാനസിക നിലയിലും അവരുണ്ടാക്കുന്ന മാറ്റങ്ങൾ വിവരിക്കാൻ കഴിയാത്തതാണ്.

🔸രാത്രിക്ക് പകൽ പോലെ, യൗവനത്തിന് വാർദ്ധക്യം പോലെ, ജീവിതത്തിന് മരണം പോലെ തികച്ചും വ്യത്യസ്തരായ രണ്ട് കഥാപാത്രങ്ങളുടെ അടുപ്പവും തുടർന്ന് അരങ്ങേറുന്ന സംഭവങ്ങളും പ്രമേയം ആയ ചിത്രം ആണ് ഹാരോൾഡ്‌ ആൻഡ് മൗഡ്. രസകരമായ സംഭവങ്ങൾ ആണ് ആധാരം എങ്കിൽ കൂടിയും ഗൗരവമേറിയ, വൈകാരികമായ വസ്തുതകളാണ് ചിത്രം മുന്നോട്ട് വയ്ക്കുന്നത്. മരണത്തോട് ആസക്തിയുള്ള ജീവിതം തുടങ്ങിയിട്ട് മാത്രമുള്ള ഹാരോൾഡും ,മരണത്തോട് അടുത്ത് കൊണ്ടിരിക്കുന്ന ജീവിച്ച് കൊതി തീർന്നിട്ടില്ലാത്ത മൗദിയും കാഴ്ചക്കാരന് വ്യത്യസ്തമായ അനുഭവം ആവുമെന്ന് ഉറപ്പ്.

Verdict : Very Good

394. The Kid With A Bike (2011)

Director : Dardenne Brothers

Genre : Drama

Rating : 7.4/10

Country : Belgium

Duration : 87 Minutes


🔸ഇന്ന് തിയേറ്ററുകളിൽ എത്തുന്ന പല കൊമേർഷ്യൽ മാസ്സ് ചിത്രങ്ങളും ഉപയോഗിക്കുന്ന ഒരു ചെറുകിട ക്ളീഷെ ആണ് ട്രാൻസ്ഫോർമേഷൻ രംഗങ്ങൾ, ഗ്രാമ പശ്ചാത്തലത്തിൽ അടങ്ങി ഒതുങ്ങി ജീവിക്കുന്ന നായകൻ ഒരു പ്രത്യേക ഘട്ടത്തിൽ തന്റെ യഥാർത്ഥ മുഖം വെളിപ്പെടുത്തുന്ന രംഗം ആരാധകരെ കയ്യിലെടുക്കാനുള്ള നല്ലൊരു ഉപാധിയാണ്. ഇനി വേറൊരു തരം ട്രാൻസ്ഫോർമേഷൻ ഉണ്ട്, ചാപ്പാകുരിശ് പോലെ ഒരു ചിത്രത്തിൽ താൻ ഉൾപ്പെട്ട സമൂഹത്തിന്റെ സമ്മർദ്ദം ഒന്ന്കൊണ്ട് മാത്രം അനിവാര്യമായ മാറ്റത്തെ ഉൾക്കൊള്ളേണ്ടി വന്ന അൻസാരിയുടെ ട്രാൻസ്ഫോർമേഷൻ, ദി കിഡ് വിത്ത് എ ബൈക്ക് എന്ന ചിത്രം അത്തരമൊരു മാറ്റത്തിന്റെ തന്നെ കഥയാണ്, അത് എന്താണെന്നും എന്ത് കൊണ്ടാണെന്നും സിനിമ കണ്ട് തന്നെ മനസിലാക്കുക.

🔸കേന്ദ്ര കഥാപാത്രമായ സിറിളിനെ കാഴ്ചക്കാരൻ കണ്ട് മുട്ടുന്നത് ഒരു ബോയ്സ് ഹോമിൽ വെച്ചാണ്, അച്ഛനല്ലാതെ മറ്റ് ബന്ധുക്കൾ ഒന്നുമില്ലാത്ത സിറിലിനെ അയാൾ ഉപേക്ഷിച്ചിരിക്കുന്നു. തിരികെ വരും എന്ന ഉറപ്പൊക്കെ നൽകിയാണ് പോയതെങ്കിലും പിന്നീട് ഈ കാലയളവിൽ ഒരിക്കൽ പോലും അയാൾ മടങ്ങി വന്നിട്ടില്ല, തന്റെ മകന്റെ സുഖ സുഖ വിവരങ്ങൾ അറിയാൻ അയാൾ വിളിച്ചില്ല എന്ന് മാത്രമല്ല ബന്ധപ്പെടാൻ നൽകിയ നമ്പറിൽ വിളിച്ചാൽ ആണെങ്കിൽ ഒരിക്കലും ലഭിക്കാറുമില്ല. ചുരുക്കി പറയുക ആണെങ്കിൽ മകനെ ഉപേക്ഷിച്ച് ,ബാധ്യതകളോ ഉത്തരവാദിത്തങ്ങളോ നിറവേറ്റാതെ അയാൾ കടന്ന് കളഞ്ഞിരിക്കുന്നു.

🔸അച്ഛൻ തന്നെ ഉപേക്ഷിച്ച് പോയി എന്നത് അംഗീകരിക്കാൻ സിറിൽ തയാറായിട്ടില്ല, ഓരോ തവണയും ഓരോ ദിവസവും അയാൾ വരാതിരിക്കുമ്പോൾ അച്ഛനെ പഴിക്കുന്നതിന് പുറമെ അതിന് കാരണമായി മാറിയിട്ടുണ്ടാവാം എന്ന് അവൻ മനസ്സിൽ കരുതുന്ന വസ്തുതകളെയാണ് അവൻ പഴിക്കുന്നത്, എന്നെങ്കിലും ഒരു ദിവസം അയാൾ മടങ്ങി വരും എന്ന പ്രതീക്ഷയും അവൻ കളയുന്നില്ല. ഇതൊക്കെ ആണെങ്കിലും ചെറിയ ചില ശ്രമങ്ങൾ ഒക്കെ സിറിൽ തന്നാൽ കഴിയും വിധം ചെയ്യുന്നുമുണ്ട്. തന്റെ ആകെ സമ്പാദ്യമായ ബൈക്ക് ഉപയോഗിച്ച് നഗരത്തിലൂടെയുള്ള സഞ്ചാരമാണ് സിറിളിന്റെ സ്ഥിരം ജോലി.

🔸അച്ഛൻ സ്ഥിരമായി പോവാറുള്ള ബാറുകൾ, കടകൾ തുടങ്ങി അയാളുടെ സാന്നിധ്യം ഉണ്ടാവാൻ സാധ്യതയുള്ള സ്ഥലങ്ങൾ എല്ലാം അവന്റെ സ്ഥിരം സഞ്ചാര കേന്ദ്രങ്ങളായി മാറി. ഒരിക്കലും മറുപടി ഉണ്ടാവാൻ സാധ്യതയില്ല എന്ന് അറിയാമെങ്കിലും തന്റെ കയ്യിലുള്ള ഫോൺ നമ്പറിൽ ബന്ധപ്പെടാൻ ശ്രമിക്കുക എന്നത് അവൻ ശീലമാക്കി. ഇതൊന്നും പോരാതെ താനും അച്ഛനും പണ്ട് ജീവിച്ചിരുന്ന ഫ്ലാറ്റിലേക്ക് കടന്ന് ചെല്ലാനും സിറിൽ തീരുമാനിച്ചു, എങ്കിലും ഇവിടെ നിന്ന് ഒന്നും തന്നെ പ്രതീക്ഷാവഹമായ മറുപടികൾ സിറിലിന് ലഭിച്ചില്ല, അന്വേഷണം തുടർന്ന് കൊണ്ടേ ഇരുന്നു.

🔸അങ്ങനെ തിരച്ചലും അതിനെ തുടർന്ന് ഉണ്ടാവുന്ന നിരാശയും എല്ലാം ഒരു സ്ഥിര സംഭവങ്ങളായി മാറി കൊണ്ടിരുന്ന ഈ കാലയളവിൽ ആണ് സിറിലിന്റെ ഉത്തരവാദിത്തങ്ങൾ ആഴ്ചയിലെ അവസാന ദിവസങ്ങളിൽ ഏറ്റെടുത്ത് കൊണ്ട് സാമന്ത എന്ന യുവതി കടന്ന് വരുന്നത്. അച്ഛനെ അറിയാമെങ്കിലും തന്റെ അമ്മയെ കേട്ടറിവ് പോലുമില്ല സിറിളിന്, ആ സ്ഥാനത്തേക്ക് സാമന്ത കടന്ന് വരുമ്പോൾ വലിയ മാറ്റങ്ങളാണ് ഉടലെടുക്കുന്നത്. ട്രാൻസ്ഫോർമേഷൻ രംഗങ്ങളെ ചെറുതായി പ്രതിപാദിച്ചിട്ടുണ്ടെങ്കിലും അവയെ സ്ഥിരമായി കാണുന്ന മാസ്സ് പരിവേഷത്തോടെ ഈ ചിത്രത്തിൽ പ്രതീക്ഷിക്കരുത് ,അതിനുള്ള കാരണങ്ങൾ ചിത്രത്തിൽ നിന്ന് തന്നെ ലഭിക്കുന്നതാണ്. ഡാർദീൻ സഹോദരങ്ങൾ സമ്മാനിച്ച മികച്ച ചിത്രങ്ങളുടെ പട്ടികയിൽ മുൻ നിരയിൽ ഉൾപെടുത്താവുന്ന ചിത്രം കണ്ട് വിലയിരുത്തുക.

Verdict : Very Good

393. The Never Ending Story (1984)

Director : Wolfgang Petersen

Genre : Epic

Rating : 7.4/10

Country : Germany

Duration : 102 Minutes


🔸സസ്പെന്സിന് സസ്പെൻസ്, ട്വിസ്റ്റിന് ട്വിസ്റ്റ് ,ഒട്ടും പ്രതീക്ഷിക്കാത്ത കഥാ സന്ദർഭങ്ങൾ ആണെങ്കിൽ അത് ,ചിത്രം കണ്ട് കഴിഞ്ഞാലും മനസ്സിൽ നിന്ന് പോവാത്ത കഥാപാത്രങ്ങൾ ,തികച്ചും വ്യത്യസ്തമായ സിനിമ അനുഭവവും സർവോപരി ഇറങ്ങിയ കാലഘട്ടം പരിഗണിക്കുക ആണെങ്കിൽ അമ്പരപ്പിക്കുന്ന ദൃശ്യവിസ്മയവും ,എല്ലാത്തിനും പുറമെ സിനിമാ ചരിത്രത്തിലെ തന്നെ ഏറ്റവും ഇമോഷണൽ രംഗങ്ങളിൽ ഒന്ന് എന്ന് കരുതപ്പെടുന്ന മനോഹരവും ,അതിലേറെ വിഷാദം ഉളവാക്കുന്നതും ആയ രംഗവും, ചുരുക്കി പറഞ്ഞാൽ ഒന്നിനും ഒരു കുറവും ഇല്ലാത്ത എല്ലാ തരം കാഴ്ചക്കാരെയും സംപ്ത്രിപ്തി പെടുത്തുന്ന ഒരു കംപ്ലീറ്റ് പാക്കേജ് ആണ് ദി നെവർ എൻഡിങ് സ്റ്റോറി എന്ന ഈ എപിക് ഫാന്റസി ജർമൻ ചിത്രം.

🔸പൊതുവെ നാണം കുണുങ്ങിയും ,പുസ്തക പുഴുവും ആയ ബാസ്റ്റിൻ ബക്സ് എന്ന പത്ത് വയസ്സുകാരൻ ആണ് ചിത്രത്തിലെ പ്രധാന കഥാപാത്രം. വളർന്ന് വന്ന സാഹചര്യങ്ങളും സ്വതവേ സ്വഭാവത്തിന്റെ ഭാഗമായ ഉൾവലിയുന്ന മനോഭാവവും കാരണം അധികം സുഹൃത് ബന്ധങ്ങൾ ഒന്നും ബാസ്റ്റിന്റെ ജീവിതത്തിൽ ഇല്ല. കൂടുതൽ സമയവും പുസ്തകങ്ങൾക്കൊപ്പം ചിലവഴിക്കാൻ ആഗ്രഹിക്കുന്ന ബാസ്റ്റിൻ അതിനാൽ തന്നെ മറ്റുള്ള കുട്ടികളുടെ ചെണ്ടയാണ്, പരിഹാസ ശരങ്ങളും പ്രഹരങ്ങളും ഏറ്റുവാങ്ങാൻ വേണ്ടി മാത്രമുള്ള ചെണ്ട.

🔸വലിയ മാറ്റങ്ങൾ ഒന്നും ഇല്ലാതെ ഈ പ്രക്രിയകൾ തുടർന്ന് കൊണ്ടിരുന്ന നാളുകളിൽ ഒന്നിൽ സ്ഥിരമായി തന്നെ നോവിക്കാറുള്ള ഒരുത്തന്റെ കണ്ണ് വെട്ടിച്ച് ബാസ്റ്റിൻ പഴയ പുസ്തകങ്ങൾ ശേഖരിക്കുന്ന കൊറിയണ്ടറുടെ പുസ്തക ശാലയിൽ എത്തുകയാണ്, അവിടെ അവന്റെ കണ്ണിൽ ഉടക്കിയത് നെവർ എൻഡിങ് സ്റ്റോറി ,അഥവാ ഒരിക്കലും അവസാനിക്കാത്ത കഥ എന്ന തലക്കെട്ടോട് കൂടി അവന്റെ വരവും പ്രതീക്ഷിച്ച് എന്ന മട്ടിൽ കണ്മുന്നിൽ തന്നെ ഉണ്ടായിരുന്ന പുസ്തകവും. കൊറിയണ്ടറുടെ മുന്നറിയിപ്പുകൾ കാര്യമാക്കാതെ ബാസ്റ്റിൻ തന്റെ വായന ആരംഭിക്കുകയാണ്.

🔸വായന എന്നതിൽ കവിഞ്ഞ് ബാസ്റ്റിനെ സംബന്ധിച്ചിടത്തോളം അതൊരു യാത്ര തന്നെ ആയിരുന്നു ,ഫന്റാസിയ എന്ന മായിക ലോകത്തേക്ക്. അപൂർവ ഇനം ജീവികൾക്കും ,അതിലും വിചിത്രമായ സംസ്കാരങ്ങൾക്കും പാത്രമായ ഫന്റാസിയ ഇന്ന് തകർച്ചയുടെ പാതയിലാണ്, ഒട്ടനവധി രാജ്യങ്ങളെയും ,രാജാക്കന്മാരെയും ,വംശങ്ങളെയും അവസാനിപ്പിച്ച ശൂന്യത എന്ന വസ്തുത ,അത് എന്ത് തന്നെ ആണെങ്കിലും ഫന്റാസിയയിലും എത്തിയിരിക്കുന്നു. രാജ്യവും ജീവജാലങ്ങളും രാജകുമാരിയും എല്ലാം ഭീഷണിയിലാണ് ,തുടർന്നുള്ള ഭാഗങ്ങൾ ചിത്രം കണ്ട് മനസിലാക്കുന്നതാവും നല്ലത്.

🔸നാർനിയ ,പേഴ്സി ജാക്സൺ ,ഹാരി പോട്ടർ തുടങ്ങി പിൽക്കാലത്ത് കാണികൾ ഏറ്റെടുത്ത ഫാന്റസി ചിത്രങ്ങളുടെ ആദ്യ പതിപ്പ് ആണ് നെവർ എൻഡിങ് സ്റ്റോറി എങ്കിലും ഇവയ്‌ക്കൊന്നും ലഭിച്ച സ്വീകാര്യത ചിത്രത്തിന് ലഭിക്കാതെ പോയി, പിൽക്കാലത്ത് പുറത്തിറങ്ങിയ ദുരന്ത പൂർണമായ തുടർ ഭാഗങ്ങളും ആദ്യ ഭാഗത്തിന് ദോഷം മാത്രമേ നല്കിയിട്ടുള്ളു. കഥയ്ക്കുള്ളിലെ കഥയോടൊപ്പം തന്നെ ഒരു കാഴ്ചയിൽ പിടിച്ചെടുക്കാവുന്നതിൽ കൂടുതൽ കാര്യങ്ങൾ താഥ്വികം ആയും രാഷ്ട്രീയപരം ആയും ചിത്രം പറയാൻ ശ്രമിക്കുന്നുണ്ട്. ദാസ് ബൂട്ട് പോലെ ഗൗരവമേറിയ ചിത്രങ്ങൾ സംവിധാനം ചെയ്ത പീറ്റേഴ്സന്റെ മറ്റൊരു മികച്ച ചിത്രമായ നെവർ എൻഡിങ് സ്റ്റോറി പ്രായ ബേധമന്യേ ഏതൊരു കാഴ്ചക്കാരനും മികച്ച സിനിമാ അനുഭവം ആവുമെന്ന് ഉറപ്പുള്ളതിനാൽ ശുപാർശ ചെയ്യുന്നു.

Verdict : Very Good

392. Karwaan (2018)

Director : Akarsh Khurana

Genre : Journey

Rating : 8.4/10

Country : India

Duration : 116 Minutes


🔸ബോളിവുഡിലെ ഏറ്റവും മികച്ച നടന്മാരിൽ ഒരാൾ, സർവോപരി തനിക്കൊപ്പമോ ശേഷമോ വന്നവരെല്ലാം തന്നെ സ്ഥിരം കച്ചവട സിനിമാ ചേരുവകകളുടെ ബലത്തിൽ വിജയം കയ്യടക്കിയപ്പോഴും തിരഞ്ഞെടുക്കുന്ന സിനിമകളുടെ മേന്മയും തന്റെ കഥാപാത്രത്തിന്റെ മികവും പരിഗണിച്ച് സിനിമകൾ ചെയ്യുന്നത് ഒരു ശീലമാക്കിയ നടൻ, ബോളിവുഡിലെ മിനിമം ഗ്യാരന്റി അഭിനേതാവ്, അങ്ങനെ വിശേഷണങ്ങൾ അനവധി ആണ് ഇർഫാൻ ഖാൻ എന്ന നടന്. പിക്കു എന്ന മനോഹര ചിത്രത്തിന് ശേഷം ഇർഫാൻ ഖാൻ പ്രധാന കഥാപാത്രങ്ങളിൽ ഒന്ന് അവതരിപ്പിക്കുന്ന റോഡ് മൂവി എന്ന ഒറ്റ കാരണം തന്നെ കാർവാൻ എന്ന ചിത്രം കാണുന്നതിന് എന്നിലെ കാഴ്ചക്കാരന് വലിയ പ്രചോദനം ആയിരുന്നു, പോരെങ്കിൽ ദുൽക്കർ സൽമാന്റെ അരങ്ങേറ്റവും ,റിലീസിന് മുന്നേ കേട്ട മികച്ച പ്രതികരണവും ,യാത്ര പ്രമേയമായ ചിത്രങ്ങളോടുള്ള പ്രത്യേക ഇഷ്ടവും എല്ലാം ചിത്രം കാണാൻ ഉള്ള കാരണങ്ങളായി മാറി.

🔸വളരെ ലളിതമായ കഥയാണ് ചിത്രത്തിന്റേത്, ചിത്രത്തിന്റെ ടാഗ്‌ലൈനിൽ പറയുന്നത് പോലെ തന്നെ മൂന്ന് കഥാപാത്രങ്ങളുടെയും രണ്ട് ശവശരീരങ്ങളുടെയും കഥ. തന്റെ ഇഷ്ടങ്ങൾക്ക് മേൽ മാതാപിതാക്കളുടെ ഇഷ്ടത്തിന് വില കൊടുക്കേണ്ടി വന്ന കഥാപാത്രമാണ് അവിനാശ്. ഫോട്ടോഗ്രഫി ഒരു വിനോദത്തിന് അപ്പുറം നിർവചിക്കാൻ കഴിയാത്ത രീതിയിൽ ഹൃദയത്തോട് ചേർത്ത് വെച്ചിരുന്ന ടിയാൻ തന്റെ അച്ഛന്റെ താല്പര്യ പ്രകാരം ആണ് സോഫ്ട്‍വെയർ മേഖലയിൽ ജോലിക്ക് കയറുന്നത്, താല്പര്യമേതും ഇല്ലെങ്കിലും മറ്റ് മാർഗങ്ങൾ ഇല്ലാത്തതിനാൽ ഇത് തുടരുക അല്ലാതെ വേറെ വഴി അയാൾക്ക് മുന്നിൽ ഉണ്ടായിരുന്നില്ല.

🔸അച്ഛനുമായി ഒരിക്കലും സ്വരച്ചേർച്ച കൈവരിക്കാനാവാഞ്ഞ അവിനാശിന്റെ ജീവിതം ഒന്നടങ്കം മാറി മറയുന്നത് തീർത്ഥാടനത്തിന് പോയ അച്ഛൻ അവിടെ വെച്ച് മരണമടയുമ്പോൾ ആണ്. ഏജൻസികളുടെ സഹായത്തോടെ ശവശരീരം നാട്ടിലേക്ക് അയച്ചെങ്കിലും ,ഇടയിൽ ഉണ്ടായ ചില പ്രശ്നങ്ങൾ കാരണം എത്തുന്നത് തികച്ചും അപരിചിതനായ വ്യക്തിയുടെ ശരീരം ആണ് താനും. തുടർന്ന് പ്രശ്നങ്ങൾ പരിഹരിക്കാനും കാര്യങ്ങൾ നേർ രേഖയിൽ എത്തിക്കാനുമായി അവിനാശും സുഹൃത്ത് ഷൗക്കത്തും നടത്തുന്ന യാത്രയാണ് ചിത്രത്തിന്റെ പ്രമേയം. ഈ യാത്രയിൽ അവർക്കിടയിലേക്ക് മറ്റ് ചില കഥാപാത്രങ്ങൾ കൂടി അപ്രതീക്ഷിതമായി കടന്നുവരുന്നുണ്ട്.

🔸തിരിച്ചറിവ് എന്ന വസ്തുതയാണ് ചിത്രത്തെ മുന്നോട്ട് നയിക്കുന്ന വികാരം, അന്യനായ വ്യക്തിയുടെ ശവ ശരീരവും പേറിയുള്ള ഈ നീണ്ട യാത്ര അവിനാശ് എന്ന കഥാപാത്രത്തെ സംബന്ധിച്ചിടത്തോളം ഒരു തിരിച്ചറിവിന് വേണ്ടി ഉള്ളത് തന്നെയാണ്, ഈ കഥാപാത്രവും അത് അവതരിപ്പിച്ച നടനും തുടക്കം ഒരല്പം ബുദ്ധിമുട്ടുന്നതായി തോന്നിയെങ്കിലും ബേധപ്പെട്ട രീതിയിൽ തന്നെ പറയാൻ ഉദ്ദേശിച്ച കാര്യങ്ങൾ സ്ക്രീനിലും പുറത്തും ഫലവത്തായി പറയാൻ കഴിഞ്ഞു എന്ന് തന്നെ പറയേണ്ടി വരും. എന്നാലും അത്ഭുതം ഏതുമില്ലാതെ പറയാനാവും ഇത് തീർത്തും ഒരു ഇർഫാൻ ഖാൻ ചിത്രം തന്നെയാണ്, സ്‌ക്രീനിൽ പ്രത്യക്ഷപ്പെട്ട മറ്റ് നടന്മാരോട് നീതി പുലർത്തി കൊണ്ട് തന്നെ പറയുന്നു ,പ്രത്യക്ഷപ്പെട്ട രംഗങ്ങളിലും സംഭാഷണങ്ങളിലും എല്ലാം കയ്യടക്കത്തോടെ തിളങ്ങി നിന്നത് ഇർഫാൻ ഖാൻ തന്നെ.

🔸മിക്ക റോഡ് മൂവികളെയും പോലെ തന്നെ കാർവാനും പ്രധാന കഥാപാത്രങ്ങൾക്കിടയിലുള്ള സംഭാഷണങ്ങളിൽ കൂടിയാണ് വികസിക്കുന്നത്. തികച്ചും അപ്രവചനീയം ആയതൊന്നും സ്‌ക്രീനിൽ സംഭവിക്കുന്നില്ലെങ്കിൽ കൂടിയും ഒട്ടും മുഷിച്ചൽ ഉളവാക്കാതെ പ്രേക്ഷകനെ പിടിച്ചിരുത്താൻ ഉള്ള വകയെല്ലാം സംഭാഷണങ്ങളിൽ ചിത്രം ചേർത്തിട്ടുണ്ട്, തികച്ചും വ്യത്യസ്തരായ മൂന്ന് കഥാപാത്രങ്ങളോടൊപ്പം മടുപ്പില്ലാതെ ചിലവഴിക്കുക എന്നതിൽ കവിഞ്ഞ് വലിയ പ്രതീക്ഷകൾ ഒഴിവാക്കി കയറുകയാണെങ്കിൽ സംപ്ത്രിപ്തിയോടെ തന്നെ കണ്ടിറങ്ങാനാവും ഈ ചിത്രം.

Verdict : Good

391. A Pigeon Sat On A Branch Reflecting On Existence (2014)

Director : Roy Andersson

Genre : Comedy

Rating : 7/10

Country : Sweden

Duration : 100 Minutes


🔸വേണ്ടവഴിയെ പോയില്ലേൽ പോയ വഴിയേ തെളിക്കുക എന്നൊരു ചൊല്ല് പണ്ടെങ്ങോ കേട്ടിട്ടുണ്ട്, പേരിൽ തന്നെ ഒരുപാട് വ്യത്യസ്തതകകൾ പേറി കൊണ്ട് കണ്മുന്നിൽ എത്തിയ ഈ ചിത്രം കണ്ട് കഴിഞ്ഞപ്പോൾ പല കാരണങ്ങൾ കൊണ്ടും മനസ്സിൽ എത്തിയത് മേൽ പറഞ്ഞ വാചകം തന്നെയാണ്. ഒരു സിനിമയ്ക്ക് വളരെ ആവശ്യമായിട്ടുള്ളത് കഥയും ,ആ കഥയോട് നീതി പുലർത്തുന്ന കഥാ ഘടനയും ,നല്ല അവതരണവും ആണെന്നാണ് ഇത്രയും നാൾ കരുതി വെച്ചിരുന്നത്. എന്നാൽ ഈ ധാരണയെ സാധ്യമായ എല്ലാ രീതിയിലും ആരംഭം മുതൽ അവസാനം വരെ തച്ചുടച്ച് കയ്യിൽ തരുന്നുണ്ട് ഈ ചിത്രം. മറ്റൊരാൾക്ക് പറഞ്ഞ് തരാനോ ,എഴുതാനോ ഉള്ള കണക്കിൽ ഈ ചിത്രത്തിൽ ഒരു കഥയില്ല ,

🔸അതെ വായിച്ചതിൽ തെറ്റൊന്നുമില്ല കഥ എന്ന് പറയുന്ന സാധനം ,അല്ലെങ്കിൽ മറ്റുള്ള സിനിമകൾ കണ്ട് കഥ എന്ന് നമ്മൾ കരുതി വെച്ച മനസ്സിൽ ഊട്ടി ഉറപ്പിച്ച വസ്തുത ഈ ചിത്രത്തിൽ ഇല്ല. തികച്ചും വ്യത്യസ്തവും കണ്ട് പരിചയം ഇല്ലാത്തതുമായ ഒരു പറ്റം കഥാപാത്രങ്ങളാണ് ചിത്രത്തിലൂടെ പ്രേക്ഷകന്റെ കണ്മുന്നിൽ എത്തുന്നത്, സ്വന്തം കാര്യങ്ങളും പ്രാരാബ്ധങ്ങളുമായി തിരക്കിലായ ,മറ്റുള്ളവരുടെ ജീവിതത്തിനോ താല്പര്യങ്ങൾക്കോ യാതൊരു വിലയും കൽപ്പിക്കാത്ത ഒരു കൂട്ടം ആളുകളെ തമാശ രൂപേണ ,ഒരല്പം മുന്നറിയിപ്പോട് കൂടി ചിത്രത്തിൽ കാണാനാവും.

🔸ടൈറ്റിലിൽ സൂചിപ്പിച്ചത് പോലെ തന്നെ നിലനിൽപ് ചിത്രം കൈകാര്യം ചെയ്യുന്ന പ്രധാന വിഷയങ്ങളിൽ ഒന്ന് തന്നെയാണ്, പേരിൽ സൂചിപ്പിച്ച പ്രാവിനെ കാണിച്ച് കൊണ്ടാണ് ചിത്രം ആരംഭിക്കുന്നത്. എന്നോ ചത്ത പ്രാവ് സ്റ്റഫ് ചെയ്യപ്പെട്ട രീതിയിൽ മ്യുസിയത്തിൽ പ്രദര്ശനത്തിന് വെച്ച അവസ്ഥയിലാണ്, എത്ര വർഷങ്ങളായെന്ന് അറിയില്ല തന്റെ മുന്നിൽ വന്ന് പോവുന്ന പല തരം ആളുകൾക്കും കൗതുകമായി അത് നിലകൊള്ളുന്നുണ്ട്. അതിനെ തുറിച്ച് നോക്കികൊണ്ട് നിൽക്കുന്ന കഥാപാത്രത്തിൽ നിന്നും ചിത്രം പിന്നീട് പോവുന്നത് ചത്തതിന് സമം എന്ന് വിശേഷിപ്പിക്കേണ്ട ചില കഥാപാത്രങ്ങളിലേക്കാണ്.

🔸വിചിത്രം എന്ന വാക്ക് കുറഞ്ഞ് പോവും ചിത്രത്തിലെ ചില കഥാപാത്രങ്ങളെ വിശേഷിപ്പിക്കാൻ, ഉദാഹരണത്തിന് നാല് നൂറ്റാണ്ടുകൾക്ക് മുന്നേ മരിച്ചുപോയെങ്കിലും പഴയ വേഷഭൂഷാധികളോടെ പുതിയ കാലത്തെ ബാറുകളിൽ ഒന്നിൽ കടന്ന് വരുന്ന പഴയ രാജാവ് ചാൾസ് പന്ത്രണ്ടാമനും ,രക്തരക്ഷസ്സുകളുടെ പല്ല് വിൽക്കാൻ ശ്രമിക്കുന്ന സെയിൽസ്മാനും ,മദ്യക്കുപ്പി തുറക്കാൻ ശ്രമിക്കുമ്പോൾ വീര ചരമം പ്രാപിക്കുന്ന ഒരു മധ്യവയസ്കനും അയാളെ ശ്രദ്ധിക്കാത്ത തൊട്ടപ്പുറത്തെ മുറിയിലുള്ള ഭാര്യയും എല്ലാം വിചിത്രം എന്ന വാക്കിന്റെ ചെറിയ ഡോസുകൾ മാത്രമാണ്.

🔸എന്തിന് അല്ലെങ്കിൽ എന്ത് കൊണ്ട് എന്നൊരു ചോദ്യം ചിത്രത്തിന്റെ സംവിധായകനോട് ചോദിക്കുക ആണെങ്കിൽ തീർച്ചയായും അതിനുള്ള ഉത്തരം എനിക്ക് തോന്നിയത് കൊണ്ട് എന്നാവും എന്നത് റോയ് ആൻഡേഴ്സന്റെ മറ്റ് ചിത്രങ്ങളിൽ നിന്നും മനസിലാക്കാവുന്നതാണ്. ഒരുപക്ഷെ ഈ ചിത്രത്തിന് നൽകാൻ കഴിയുന്ന ഏറ്റവും ചെറിയ വിശദീകരണം കാഴ്ചക്കാരൻ കാണാതെയോ ശ്രദ്ധിക്കാതെയോ പോവുന്ന നിസ്സാര കാര്യങ്ങളിലൂടെ പോലും സന്തോഷവും ,തമാശയും അനുഭവിക്കാൻ കഴിയും എന്നതാവണം. വാക്കുകളിൽ കൂടിയോ എഴുത്തിലൂടെയോ വിശദീകരിക്കാൻ കഴിയാത്ത ചിത്രം കണ്ട് തന്നെ അറിയേണ്ടി ഇരിക്കുന്നു ,ഓരോ സിനിമ ആസ്വാദകനും.

Verdict : Good

390. Kaili Blues (2015)

Director : Bi Gan

Genre : Mystery

Rating : 7.2/10

Country : China

Duration : 110 Minutes


🔸കൈലി ബ്ലൂസ് എന്ന ചിത്രത്തിന്റെ ഏറ്റവും വലിയ പ്രത്യേകത ചിത്രത്തിന്റെ രണ്ടാം പകുതി ആയിരിക്കും, പ്രത്യേകിച്ചും നാല്പത് മിനിറ്റ് ദൈർഖ്യമുള്ള ഒറ്റ ഷോട്ട്. ഈ ഇടതടവില്ലാത്ത നാല്പത് മിനിറ്റുകളിൽ പ്രേക്ഷകൻ കേന്ദ്ര കഥാപാത്രത്തോടൊപ്പം ഒരു യാത്രയുടെ ഭാഗം ആവുകയാണ്, ആ യാത്ര ആണെങ്കിൽ ദക്ഷിണ ചൈനീസ് ഗ്രാമങ്ങളിലൂടെയുള്ള അതി സുന്ദരമായ ഒരു അനുഭവവും. മലനിരകളിൽ കൂടിയും വ്യത്യസ്ത ഭൂതലങ്ങളിൽ കൂടിയും അതിലും വ്യത്യസ്തരായ സഹയാത്രികർക്ക് ഒപ്പവും ഉള്ള അതിസുന്ദരമായ ഈ യാത്ര ഒടുവിൽ ലക്ഷ്യ സ്ഥാനത്ത് എത്തുമ്പോൾ അത്ഭുതത്തോട് കൂടി പുഞ്ചിരിക്കാൻ അല്ലാതെ മറ്റൊന്നും കാഴ്ചക്കാരന് ചെയ്യാനില്ല.

🔸കഥാ നായകൻ ആയ ചെൻഷെങ് ഒരു ഡോക്ടറാണ് ,അല്ലെങ്കിൽ അങ്ങനെയാണ് അയാൾ കരുതപ്പെടുന്നത്, ഇയാൾ തന്റെ വൈദ്യപഠനം ഒരുകാലത്തും പൂർത്തിയാക്കിയതായി കേട്ടിട്ടില്ല. ഇതിന് മുന്നേ ചെൻഷെങ് അത്യാവശ്യം കഴിവുള്ള ഒരു കവിയും ,പാട്ടുകാരനും ,യാത്രികനും ഒക്കെ ആയിരുന്നത്രേ, ചുരുക്കി പറഞ്ഞാൽ വ്യത്യസ്തമായ മേഖലകളിൽ എല്ലാം ഒരു കൈ പരീക്ഷിച്ച് നോക്കിയ ബഹുമുഖ പ്രതിഭ ആണ് ചെൻ ഷെങ്. മറ്റൊരു അലങ്കാരം കൂടി അയാളുടെ പേരിനോടൊത്ത് ചേർത്ത് പറയപ്പെടാറുണ്ട്, അത് കേൾക്കുന്നത് ചെൻഷെങിനെ സംബന്ധിച്ചിടത്തോളം അത്ര നല്ല അനുഭവം അല്ലെങ്കിൽ കൂടിയും. ചെൻ ഷെങ് ഒരു മുൻകാല കുറ്റവാളിയാണ്, ചെയ്ത കുറ്റം ഹീനം ആയതിനാൽ തന്നെ നല്ലൊരു സമയം ജയിലിലും കിടക്കേണ്ടി വന്നിട്ടുണ്ട് ചെൻഷെങിന്.

🔸യാഥാർഥ്യങ്ങളെക്കാൾ ഭാവനയ്ക്ക് പ്രാധാന്യം നൽകുന്ന സ്വപ്നജീവി കൂടിയാണ് ചെൻഷെങ്. യഥാർത്ഥ ജീവിതം എന്നത് അയാളെ സംബന്ധിച്ചിടത്തോളം നഷ്ടങ്ങളും ,നിരാശയും ,പശ്ചാത്താപവും എല്ലാം നിറഞ്ഞതാണ് അതിനാൽ തന്നെ സ്വയം സൃഷ്ടിച്ചെടുത്ത ഭാവനയ്ക്ക് അനുസരിച്ച് ജീവിതം മുന്നോട്ട് കൊണ്ടുപോവാനാണ് അയാൾക്ക് താല്പര്യം. കുറച്ച് കൂടി ലളിതമായി പറയുക ആണെങ്കിൽ ചെൻ ഷെങിന്റെ കാര്യത്തിൽ യാഥാർഥ്യവും ഭാവനയും തമ്മിലുള്ള വേർതിരിവ് വളരെ നേർന്നതാണ്, അത് അങ്ങനെ കിടക്കുന്നതിലാണ് അയാൾക്ക് താല്പര്യവും. അത് എന്ത് തന്നെ ആയാലും ചെയ്ത തെറ്റിന്റെ ശിക്ഷ അനുഭവിച്ച് തീർന്ന ശേഷം പുറത്തിറങ്ങിയ ഷെൻ ചെങിന്റെ ജീവിതമാണ് സിനിമയുടെ പ്രമേയം.

🔸തന്റെ കയ്യിൽ നിന്നും പറ്റിയ തെറ്റിന് ജീവിതത്തിന്റെ ഒരു ഭാഗം തടവറയിൽ കഴിച്ച് കൂട്ടിയ ഷെൻ ചെങ് ജയിലിൽ നിന്ന് പുറത്തിറങ്ങുമ്പോഴാണ് മറ്റൊരു തിരിച്ചറിവ് ഉണ്ടാവുന്നത്. തന്റെ നഷ്ടങ്ങൾ കുറച്ച് കാലത്തെ ഏകാന്ത വാസം കൊണ്ടോ ,ഇനി അങ്ങോട്ടുള്ള പരിഹാസവും പേടിയും നിഴലിക്കുന്ന നോട്ടം കൊണ്ടോ തീരുന്നില്ല, അതിലും കനത്ത നഷ്ടങ്ങൾ തന്നെയും കാത്ത് പുറം ലോകത്ത് നില്പുണ്ടെന്ന് അയാൾ ഒരല്പം വേദനയോടെ തിരിച്ചറിയുകയാണ്. ബന്ധുക്കളും സുഹൃത്തുക്കളുമായ വേണ്ടപ്പെട്ടവർ എല്ലാം അയാളെ വിട്ട് എങ്ങോ പോയി മറഞ്ഞിരിക്കുന്നു, ചിലർ ഇനി ഒരിക്കലും മടങ്ങി വരാൻ കഴിയാത്ത പാതയിലൂടെ എന്നോ യാത്ര ആരംഭിച്ച് കഴിഞ്ഞിരിക്കുന്നു. ഈ വിശാലമായ ലോകത്ത് ഷെൻ ചെങ് ഏകനാണ്, എല്ലാ അർത്ഥത്തിലും.

🔸തന്റെ അവശേഷിക്കുന്ന ഒരേയൊരു ബന്ധുവിനെ അന്വേഷിച്ച് കണ്ടെത്താൻ ഷെൻ ചെങ് നടത്തുന്ന യാത്രയാണ് ഈ ചിത്രത്തിന്റെ വിഷയം. ഇനി ഒരിക്കൽ കൂടി കാണാൻ താല്പര്യപ്പെടുക ഇല്ലെങ്കിൽ കൂടിയും സ്‌ക്രീനിൽ ചിത്രം കണ്മുന്നിൽ എത്തിയ നിമിഷങ്ങളിൽ താൻ കണ്ട് കൊണ്ടിരിക്കുന്നത് തികച്ചും വ്യത്യസ്തമായ ഒരു അനുഭവം ആണ് എന്ന് തോന്നിപ്പിച്ച അപൂർവം ചിത്രങ്ങളിൽ ഒന്നാണ് കൈലി ബ്ലൂസ്. വ്യത്യസ്തത ആഗ്രഹിക്കുന്നവർക്ക് ,വ്യത്യസ്തമായ പ്രമേയങ്ങൾ ഇഷ്ടപ്പെടുന്നവർക്ക് തീർച്ചയായും ശുപാർശ ചെയ്യും ഈ ചിത്രം.

Verdict : Very Good

389. Offside (2006)

Director : Jafar Panahi

Genre : Drama

Rating : 7.3/10

Country : Iran

Duration : 93 Minutes


🔸ഓഫ്‌സൈഡ് എന്ന ഈ ഇറാനിയൻ ചിത്രത്തെ കുറിച്ച് പറയുന്നതിന് മുൻപ് ഒരല്പം ചരിത്രം പരിശോധിക്കുന്നത് നന്നാവും ,അധികം പിറകിലോട്ടേക്കല്ല 1998ൽ ഫ്രാൻസിൽ അരങ്ങേറിയ ഫുട്‍ബോൾ ലോകകപ്പ് വരെ പോയാൽ മതിയാവും. ലോകകപ്പിന്റെ മത്സര ഘടന പ്രഖ്യാപിച്ചത് മുതൽ ഏവരും കാത്തിരുന്ന മത്സരങ്ങളിൽ ഒന്നായിരുന്നു ഇറാനും അമേരിക്കയും തമ്മിലുള്ള മത്സരം. രാഷ്ട്രീയപരം ആയും വൈകാരികമായും ഇരു രാജ്യങ്ങളും അങ്ങേയറ്റം വേർപെട്ടിരിക്കുന്ന സമയത്ത് പ്രഖ്യാപിച്ച ഈ മത്സരം സ്വാഭാവികമായും എല്ലായിടത്തും ചർച്ചയായി. വിജയം എന്നത് ഇരു രാജ്യങ്ങളിലെ കളിക്കാർക്കും അഭിമാന പ്രശ്‍നം ആയി മാറിയ ഈ കളിയെ അമേരിക്കൻ സോക്കർ ഫെഡറേഷൻ പ്രസിഡണ്ട് വരെ വിശേഷിപ്പിച്ചത് മദർ ഓഫ് ആൾ ഗെയിംസ് എന്നായിരുന്നു.

🔸അത് എന്തൊക്കെ ആയാലും മത്സരം അത്യധികം വീറും വാശിയോടും കൂടി നടന്നു, ഇരു രാജ്യങ്ങളും ജീവൻ കയ്യിൽ പിടിച്ചെന്ന മട്ടിൽ ഗ്രൗണ്ടിൽ പോരാടി, എന്നാൽ വിജയം ഇറാന്റെ കൂടെ ആയിരുന്നു. ഒന്നിന് എതിരെ രണ്ട് ഗോളുകൾക്ക് ഇറാൻ അമേരിക്കയെ മുട്ട് കുത്തിച്ചു, ലോകകപ്പിൽ വലിയ ചലനങ്ങൾ ഒന്നും ഉണ്ടാക്കാൻ ഇരു രാജ്യങ്ങൾക്കും കഴിഞ്ഞില്ലെങ്കിലും ഇറാന്റെ കാര്യത്തിൽ ഈ മത്സരത്തോടെ വലിയൊരു മാറ്റം പ്രത്യക്ഷമായി തുടങ്ങിയിരുന്നു ഫുട്‍ബോൾ എന്ന കളിയോടുള്ള ജനങ്ങളുടെ സമീപനത്തിൽ വലിയ മാറ്റമാണ് ഈ മത്സരം കൊണ്ടുവന്നത്, നിർണായകമായ മത്സരത്തിൽ ഗ്രൗണ്ടിൽ ഉരുണ്ട പന്ത് ചെന്ന് കേറിയത് ഒരു ശരാശരി ഇറാൻ കാണട്ടെ ഹൃദയത്തിലേക്ക് ആയിരുന്നെന്ന് ചുരുക്കം.

🔸ആരാധകരിൽ നിന്നും ടീമിന് ലഭിച്ച മികച്ച പിന്തുണയാൽ ശ്രദ്ധേയമായ മത്സരത്തിലൂടെ ഇറാനിയൻ തെരുവുകളിലും പന്ത് ഉരുണ്ട് തുടങ്ങി, ഫുട്‍ബോൾ എന്നത് ഒരു ലഹരിയായി എല്ലാ തലമുറകളിലേക്കും ,എല്ലാ വിഭാഗക്കാരിലേക്കും പടർന്ന് ഇറങ്ങുകയായിരുന്നു ഈ മത്സരത്തിലൂടെ. ഈ ചിത്രം കൈകാര്യം ചെയ്യുന്നത് ഫുടബോളിനോടുള്ള ഇറാനിയൻ ജനതയുടെ ,പ്രത്യേകിച്ചും സ്ത്രീകളുടെ സമീപനം ആണ്. മുൻപ് സൂചിപ്പിച്ച മത്സരത്തിന് ശേഷം എട്ട് വർഷങ്ങൾ പിന്നിട്ടിരിക്കുന്നു, ഇറാൻ ഇന്ന് മറ്റൊരു ലോകകപ്പിന് യോഗ്യത നേടാനുള്ള ശ്രമത്തിലാണ്. യോഗ്യത മത്സരത്തിനായി ബഹ്റിനുമായുള്ള പോരാട്ടത്തിന് നാട്ടിൽ അരങ്ങ് ഒരുങ്ങുകയാണ്, ലോകകപ്പിലേക്കുള്ള യാത്രയിൽ വളരെ നിർണായകമായ ഈ മത്സരത്തിന് ശാരീരികം ആയും മാനസികമായും തയ്യാറെടുത്ത് കൊണ്ടിരിക്കുക ആണ് കളിക്കാരും ആരാധകരും ഒന്നടങ്കം.

🔸പൊതു സ്ഥലത്ത് അരങ്ങേറുന്ന ഫുട്‍ബോൾ മത്സരങ്ങൾ കാണുന്നതിന് സ്ത്രീകൾക്ക് അവകാശം നല്കിയിട്ടില്ലാത്ത സമയത്താണ് ഈ മത്സരം അരങ്ങേറുന്നത്, യാതൊരു കാരണവശാലും പുരുഷന്മാരോടൊത്ത് മത്സരം കാണുവാൻ സ്ത്രീകൾക്ക് അധികാരം ഇല്ല, നിയമം ലംഘിക്കുന്നവരെ കാത്തിരിക്കുന്നത് നിയമ നടപടികളും ജയിലും ഒക്കെ തന്നെ. ഈ പശ്ചാത്തലത്തിലാണ് ചിത്രം അരങ്ങേറുന്നത്, നിർണായകമായ മത്സരം നേരിട്ട് വീക്ഷിക്കാൻ ചില സ്ത്രീകൾ നടത്തുന്ന ശ്രമവും, നേരിടുന്ന വെല്ലുവിളികളും ഒക്കെയാണ് ചിത്രത്തിന് ആധാരം.

🔸യഥാർത്ഥ മത്സരത്തിന് ഇടയിൽ സ്റ്റേഡിയത്തിൽ വെച്ച് തന്നെ ജാഫർ പനാഹി ഷൂട്ട് ചെയ്ത ചിത്രമാണ് ഓഫ്‌സൈഡ്, ഫുട്‍ബോൾ മത്സരം ആയതിനാലും ഫലം അപ്രവചനീയം ആയതിനാലും രണ്ട് ക്ലൈമാക്സുകൾ വരെ സംവിധായകൻ കരുതിയിട്ട് ഉണ്ടായിരുന്നു. ചോദ്യങ്ങൾ നിശ്ചയമായും ഉയരേണ്ട വിവാദ വിഷയങ്ങൾ ഒട്ടും ഗൗരവം ചോരാതെ സ്‌ക്രീനിൽ എത്തിക്കുന്നതിൽ മികവ് കാട്ടാറുള്ള പനാഹിയുടെ മറ്റൊരു മികച്ച ചിത്രമാണ് ഓഫ്‌സൈഡ് എന്ന കാര്യത്തിൽ സംശയത്തിന് ഇടയില്ല.

Verdict : Very Good