452. Creed 2 (2018)

Director : Steven Caple Jr

Genre : Sports

Rating : 8/10

Country : USA

Duration : 117 Minutes

🔸ക്രീഡ് എന്ന ചിത്രത്തിനും റയാൻ കൂഗ്ലെർ എന്ന സംവിധായകനും മൈക്കൽ ജോർദാൻ എന്ന നടനും ലോകത്താകമാനം ഉള്ള റോക്കി സിനിമാ ഫ്രാൻഞ്ചൈസ് ആരാധകർക്ക് ഇടയിലുള്ള സ്ഥാനം ചെറുതല്ല, കാരണം റോക്കി 5 എന്ന അടപടല ദുരന്ത പടത്തിന്റെ റിലീസിന് ശേഷം ചത്തതിന് ഒക്കുമെ എന്ന പരിതാപകരമായ അവസ്ഥയിൽ നിലകൊണ്ടിരുന്ന സീരീസിനെ ഉയർത്തി കൊണ്ടുവന്നത് ഈ ടീമിന്റെ പ്രയത്നം ഒന്ന് കൊണ്ട് മാത്രമാണ്. റോക്കി ബൽബോവ എന്ന ഇതിഹാസ സമാനമായ കഥാപാത്രത്തിനും ക്രീഡ് കൊടുത്ത ഉണർവ് വാക്കുകൾക്ക് അതീതമാണ്, അതിനാൽ തന്നെ മൂന്ന് വർഷം മുൻപ് പുറത്തിറങ്ങിയ ക്രീഡിന് ഒരു രണ്ടാം ഭാഗം വരുന്നു എന്ന വാർത്ത ഒരുപാട് പ്രതീക്ഷയോടെ ആണ് സ്വീകരിച്ചത്, റയാൻ കൂഗ്ലെറിന്റെ വിടവാങ്ങൽ ചില സംശയങ്ങൾ ഉയർത്തിയെങ്കിൽ കൂടിയും ആദ്യ ദിവസം തന്നെ ചിത്രം കാണുന്നതിൽ നിന്നും പിന്മാറാൻ തക്കവണ്ണം മോശമായിരുന്നില്ല പുറത്തിറങ്ങിയ ടീസറും ട്രെയ്ലറും എല്ലാം.

🔸"A Fight Over 30 Years In The Making" എന്ന ടാഗ്‌ലൈനോട് കൂടി പ്രൊമോഷൻ നടത്തിയ ചിത്രം പൂർണമായും ആസ്വദിക്കാൻ ഒരല്പം ചരിത്രം അറിഞ്ഞിരിക്കുന്നത് നന്നാവും, പ്രത്യേകിച്ചും റോക്കി 4 എന്ന ചിത്രം ക്രീഡ് രണ്ടാം ഭാഗത്തിന്റെ കഥയിൽ നിർണ്ണായക സാന്നിധ്യമായി മാറുന്നുണ്ട്. കളത്തിൽ വികാരങ്ങൾ പ്രകടിപ്പിക്കാത്ത, എതിരാളികളെ ഇടിച്ച് ഇടുന്ന ഉപകരണം മാത്രമായ ഇവാൻ ഡ്രാഗോയെ റോക്കി ആരാധകർ അത്ര പെട്ടെന്ന് മറക്കാൻ ഇടയില്ല, പ്രത്യേകിച്ചും ഡ്രാഗോയുടെ ഇടിയേറ്റ് മരണത്തിലേക്ക് പോയികൊണ്ടിരുന്ന അപ്പോളോയുടെ മുന്നിൽ വെച്ച് തീർത്തും നിർവികാരനായി "If He Dies, He Dies" പോലെയുള്ള മരണമാസ്സ്‌ ഡയലോഗ് പടച്ച് വിട്ട ടിയാൻ അന്നും ഇന്നും ഒരു പേടി സ്വപ്നം തന്നെയാണ്. പല വഴികളിലൂടെ ഡ്രാഗോയും, ഡ്രാഗോയുടെ മകനും ക്രീഡും റോക്കിയും അപ്പോളോയുടെ ഓർമകളും എല്ലാം ഈ ചിത്രത്തിൽ ഒത്ത് ചേരുകയാണ്.

🔸ആദ്യ ഭാഗത്തെ സംഭവങ്ങൾക്ക് ശേഷം ബോക്സിങ് റിങ്ങിലേക്ക് മടങ്ങി എത്തിയ അഡോണിസ് ക്രീഡ് തുടർ വിജയങ്ങളുമായി ആരാധക ശ്രദ്ധ ഏറ്റുന്നതും, ഈ വിജയങ്ങൾ അയാളെ പഴയ ഇവാൻ ഡ്രാഗോയുടെ മകൻ വിക്ടർ ഡ്രാഗോയുമായുള്ള നേരങ്കത്തിന് തയാറെടുപ്പിക്കുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. പുതിയ ചിത്രം ആയതിനാലും, സ്‌പോയ്‌ലർ ഒഴുവാക്കാനുള്ള ആഗ്രഹം കാരണവും, അധികം കഥയെ പറ്റി ധാരണ ഇല്ലാതെ കാണുന്നത് ഈ ചിത്രത്തിന്റെ ആസ്വാദനത്തിന് ഗുണം ചെയ്യും എന്നതിനാലും കഥയിലേക്ക് കടക്കുന്നില്ല. ചിത്രം കണ്ട് കൊണ്ടിരിക്കെ മനസ്സിൽ ഉടലെടുത്ത തോന്നൽ തന്നെയാണ് ഈ ചിത്രത്തെ പറ്റി എടുത്ത് പറയേണ്ടത്, ക്രീഡ് 2 എന്ന ചിത്രം അച്ഛൻ - മകൻ ബന്ധത്തിന് ഊന്നൽ കൊടുക്കുന്ന ഒരു ചിത്രമാണ്. ഈ ഒരു വസ്തുതയെ ചിത്രം പല കഥാപാത്രങ്ങളിലൂടെ പല കൈവഴികളിലൂടെ സമീപിക്കുന്നുണ്ട്, ഇവയിൽ എല്ലാം വിജയിക്കുന്നുമുണ്ട്, അതാണ് ചിത്രത്തിന്റെ ശക്തിയും.

🔸തന്റെ വളർച്ചാ കാലഘട്ടത്തിൽ ഇല്ലാതെ പോയ അപ്പോളോയും അഡോനിസും തമ്മിലുള്ള ബന്ധം, സുഹൃത്തിന്റെ മകൻ എന്നതിൽ കവിഞ്ഞ് സ്വന്തം മകൻ എന്ന രീതിയിൽ അഡോണിസിനെ കാണുന്ന റോക്കി, സ്നേഹം പ്രകടിപ്പിക്കുന്നതിൽ അമ്പേ പരാജയമായ റോക്കി എന്ന കഥാപാത്രത്തെ ഒരു തവണ കൂടി സ്റ്റാലോൺ അവിസ്മരണീയമാക്കി എന്ന് പറയേണ്ടി ഇരിക്കുന്നു, ഇതിന് പുറമെ അഡോണിസും അയാളുടെ സന്തതിയും തമ്മിലുള്ള ബന്ധം, എല്ലാത്തിനും പുറമെ ഡോൾഫ് ലൻഡ്‌ഗ്രെനിന്റെ ഇവാൻ ഡ്രോഗോയും മകൻ വിക്ടറും തമ്മിലുള്ള ബന്ധം, ഇവയെല്ലാം ചേർന്നതാണ് ക്രീഡ് 2 എന്ന ചിത്രം, ഇവയ്ക്ക് പുറമെ മറ്റൊരു സബ്പ്ലോട്ട് കൂടി ഉണ്ടെങ്കിലും മുകളിൽ സൂചിപ്പിച്ച സ്‌പോയ്‌ലർ പ്രശനം കാരണം ഒഴിവാക്കുന്നു. ഒരു ബോക്സിങ് അല്ലെങ്കിൽ സ്പോർട്സ് ചിത്രത്തിൽ നിന്നും പ്രതീക്ഷിക്കാവുന്നതിൽ ഏറെ വികാരങ്ങൾക്ക് പ്രാധാന്യം നൽകുന്നുണ്ട് ക്രീഡ് 2, പ്രത്യേകിച്ചും അഡോണിസിന്റെ കുടുംബവും ഒത്തുള്ള രംഗങ്ങൾ മികച്ചതായിരുന്നു.

🔸വിദേശ ഭാഷാ സിനിമകൾ കണ്ട് തുടങ്ങിയ ആദ്യ നാളുകളിൽ കണ്ടവയാണ് റോക്കി, റാംബോ പോലെയുള്ള സിനിമാ സീരീസുകൾ, അതിനാൽ തന്നെ ഇവയോടുള്ള ഇഷ്ടം പറഞ്ഞറിയിക്കാൻ കഴിയാത്തവയാണ്. എന്തിരുന്നാലും ഇതെല്ലാം മാറ്റിവെച്ച് പരിശോധിക്കുക ആണെങ്കിലും ക്രീഡ് 2 എന്ന ചിത്രം നല്ല നിലവാരം പുലർത്തുന്ന ഒന്ന് തന്നെയാണ്, ഉപകരണം പോലെ ഭയം ജനിപ്പിച്ചിരുന്ന ഇവാൻ ഡ്രാഗോയിൽ മനുഷ്യപ്പറ്റുള്ള എന്തെങ്കിലും വികാരം കാണിച്ചത് പഴയ സിനിമകളുടെ ഓർമ വെച്ച് കല്ലുകടി ആയി എന്നത്, തെറ്റ് കണ്ട് പിടിക്കുന്ന മലയാളി സ്വഭാവത്തിനുള്ള ഹോമേജ് ആയിക്കോട്ടെ. ആദ്യ ഭാഗത്തിനോടൊപ്പം ഈ ചിത്രവും നിലവാരത്തിൽ വിമർശകർക്കും, കാത്തിരിപ്പിന് ആരാധകർക്കും ഉള്ള മറുപടി ആണ്. ചിത്രം കാണാൻ തിയേറ്ററിലേക്ക് കടക്കവേ പഴയ 'Gonna Fly Now' ഇട്ട് കേൾപ്പിച്ച ആ റോക്കി ആരാധകനായ മനുഷ്യന് ഇരിക്കട്ടെ ഒരു കുതിരപ്പവൻ.

Verdict : Good

451. The Fallen Idol (1948)

Director : Carol Reed

Genre : Family

Rating : 7.8/10

Country : USA

Duration : 95 Minutes

🔸മഹേഷിന്റെ പ്രതികാരം എന്ന സിനിമയിൽ ക്രിസ്പിൻ എന്ന കഥാപാത്രം പറയുന്ന വളരെ പ്രസക്തമായ ഒരു സംഭാഷണം ഉണ്ട്, അടുത്ത് അറിയുമ്പോഴാണ് ആരാധിക്കുന്ന വിഗ്രഹങ്ങൾ തകർന്നടിയുന്നത് എന്ന് അർഥം വരുന്ന ഒരു സംഭാഷണം. ഈ ഒരു സംഭാഷണമാണ് ദി ഫോളെൻ ഐഡൽ എന്ന കരോൾ റീഡ് ചിത്രത്തിന്റെ അടിത്തറ, ടൈറ്റിൽ സൂചിപ്പിക്കുന്നത് പോലെ തന്നെ അത്യാവശ്യം പേരും പെരുമയും ഒക്കെ സ്വന്തമായിരുന്ന ഒരു വ്യക്തിയുടെ, അഥവാ അയാളുടെ വ്യക്തിത്വത്തിന്റെ പതനവും തുടർന്നുണ്ടാവുന്ന സംഭവ വികാസങ്ങളും എല്ലാമാണ് ഈ ചിത്രത്തിന്റെ പ്രമേയം. എഴുത്ത്കാരൻ ആയ ഗ്രഹാം ഗ്രീനിന്റെ ചെറുകഥയാണ് ഈ സിനിമയ്ക്ക് ആധാരമായി തീർന്നിരിക്കുന്നത്.

🔸ഏഴ് വയസ്സുകാരനായ ഫിലിപ്പെ ആണ് ചിത്രത്തിലെ കേന്ദ്ര കഥാപാത്രം, അവന്റെ കണ്ണുകളിലൂടെ ആണ് കഥ വികസിക്കുന്നത്. ഏകാന്തമായ ബാല്യകാലമാണ് ഫിലിപ്പെയുടേത്, ഉന്നത പദവി വഹിക്കുന്ന അച്ഛനിൽ നിന്നും അകന്ന് ഏറെക്കുറെ ഒറ്റപ്പെട്ട ജീവിതമാണ് അവന്റേത്. ഫിലിപ്പെയ്ക്ക് അടുപ്പം എന്ന് പറയാൻ ഉള്ളത് അച്ഛന്റെ ജോലിക്കാരൻ ആയ ബെയ്ൻസിനോട് മാത്രമാണ്, ഒരു സൂപ്പർഹീറോ പരിവേഷമാണ് ഫിലിപ്പെയ്ക്ക് മുന്നിൽ ബെയ്ൻസിന് ഉള്ളത്. അത്യാവശ്യം പൊങ്ങച്ചവും തള്ളും എല്ലാം ചേർത്ത് വ്യത്യസ്തം ആയൊരു ചിത്രമാണ് ബെയ്ൻസ് തന്നെക്കുറിച്ച് തന്നെ ഫിലിപ്പെയിൽ സൃഷ്ടിച്ച് വെച്ചിരിക്കുന്നത്.

🔸ഈ വീരേതിഹാസങ്ങൾ കേട്ട് വളർന്നത് കൊണ്ടാവണം ഫിലിപ്പെയ്ക്ക് ബെയ്ൻസിനോട് വല്ലാത്തൊരു തരം ആരാധന ആണ്, കേട്ട് വളർന്ന കഥകളിലെ ബെയ്ൻസ് എന്ന നായക കഥാപാത്രത്തിന്റെ ധൈര്യത്തോടും സത്യസന്ധതയോടും തീരുമാനങ്ങളോടുമുള്ള അവന്റെ മതിപ്പ് ഒരു വേള താൻ ഭാവിയിൽ ബെയ്ൻസിനെ പോലെ ആവണം എന്ന ആഗ്രഹത്തിൽ വരെ കൊണ്ട് ചെന്നെത്തിക്കുകയാണ്. എന്നാൽ മുകളിൽ സൂചിപ്പിച്ച വീണുടഞ്ഞ ആരാധനാ വിഗ്രഹങ്ങൾ എന്ന വസ്തുത കഥയെ മറ്റൊരു തലത്തിലേക്ക് കൊണ്ട് പോവുകയാണ്. ഫിലിപ്പേയെ പറഞ്ഞ് പഠിപ്പിച്ച കഥകൾക്ക് അപ്പുറം ബെയ്ൻസ് ജീവിതത്തിൽ അമ്പേ പരാജയപ്പെട്ട് പോയ ഒരു വ്യക്തിയാണ്, വ്യക്തി ജീവിതമായാലും ഔദ്യോഗിക ജീവിതമായാലും അയാളൊരു സീറോ ആണ്.

🔸ഔദ്യോഗിക ജീവിതത്തിൽ ഫിലിപ്പെയുടെ കുടുംബത്തിന്റെ കേവലം ഒരു സഹായി മാത്രമാണ് ബെയ്ൻസ് എങ്കിൽ വ്യക്തി ജീവിതത്തിൽ പരാജയപ്പെട്ട കുടുംബ ജീവിതത്തിന്റെ ആൾരൂപമാണ്. സന്തോഷം എന്നൊന്ന് ഇല്ലാത്ത പരാജയപ്പെട്ട കുടുംബ ജീവിതത്തിൽ ഒരുവേള അയാൾക്ക് ആശ്വാസം ആയി തീരുന്നത് ഫിലിപ്പേയോടൊത്തുള്ള നിമിഷങ്ങൾ ഒക്കെയാണ്. എന്തിരുന്നാലും ബെയ്ൻസിന്റെ ജീവിതത്തിൽ അരങ്ങേറുന്ന നിർഭാഗ്യകരം എന്ന് വിശേഷിപ്പിക്കേണ്ട ചില സംഭവങ്ങൾ അയാളുടെ വ്യക്തിത്വത്തിനും പ്രവർത്തികൾക്കും മേലെ കരിനിഴൽ വീഴ്ത്തുകയാണ്, അവ ഫിലിപ്പെയിലും ചില ചോദ്യങ്ങളും സംശയങ്ങളും സൃഷ്ടിക്കുമ്പോൾ കഥ അപ്രതീക്ഷിത വഴിത്തിരിവുകളിലേക്ക് കടന്ന് ചെല്ലുകയാണ്.

🔸ഫിലിപ്പെ എന്ന ഏഴ് വയസ്സുകാരന്റെ നിഷ്കളങ്കതയുടെയും അതിന് മേലെ മുതിർന്ന വ്യക്തികളുടെ തെറ്റായ തീരുമാനങ്ങളും മറ്റും വരുത്തുന്ന പ്രത്യാഘാതങ്ങളും ആണ് ചിത്രത്തിന്റെ പ്രമേയം. ദി തേർഡ് മാൻ എന്ന ചിത്രത്തോളം ഇഷ്ടം സംവിധായകൻ കരോൾ റീഡിന് ഫോളെൻ ഐഡലിനോടും ഉണ്ടായിരുന്നതായി പറഞ്ഞ് കേട്ടിട്ടുണ്ട്, എന്തിരുന്നാലും തേർഡ് മാനിനോളം ആരാധക നിരൂപക ശ്രദ്ധ ഈ ചിത്രത്തിന് ലഭിക്കുക ഉണ്ടായില്ല എന്ന കാര്യം നിരാശാജനകം ആണ്. ഒരു ഏഴ് വയസുകാരന്റെ ഭാഗത്ത് നിന്നും പറഞ്ഞ് പോവുന്ന സിനിമയ്ക്ക് ചേരും വിധം, ആ ആശയം ഉൾക്കൊണ്ട് കൊണ്ടുള്ള കാമറ വർക്കും എടുത്ത് പറയേണ്ടി ഇരിക്കുന്നു. കൂടുതൽ പറഞ്ഞ് മുഷിപ്പിക്കുന്നില്ല സമയം കിട്ടുമ്പോൾ കാണാൻ ശ്രമിക്കുക, മികച്ചൊരു അനുഭവം തന്നെയാണ് ദി ഫോളെൻ ഐഡൽ.

Verdict : Must Watch

Bernardo Bertolucci

ബെർണാർഡോ ബെർട്ടോലൂച്ചി എന്ന ഇതിഹാസ തുല്യനായ സംവിധായകന്റെ ജീവിതത്തെ രണ്ട് രീതിയിൽ സമീപിക്കാം, ഉത്തരങ്ങളെക്കാൾ ചോദ്യങ്ങൾ ബാക്കി നിർത്തിയ, ഒരു വ്യക്തി എങ്ങിനെ ആവരുത് എന്നതിന് ഉദാഹരണമാവേണ്ട വ്യക്തി ജീവിതവും ഏതൊരു സിനിമാ ആസ്വാദകനും മാതൃക ആക്കാവുന്ന അസൂയ ജനിപ്പിക്കും വിധം സമ്പന്നമായ സിനിമാ ജീവിതവും ചേർന്നതാണ് ബെർട്ടോലൂച്ചി എന്ന വ്യക്തിയുടെ ലെഗസി. വ്യക്തി ജീവിതവും വിവാദങ്ങളും നമ്മുടെ വിഷയം അല്ലാത്തതിനാൽ ബെർട്ടോളുച്ചിയുടെ സിനിമകളിലേക്കും സംഭാവനകളിലേക്കും ശ്രദ്ധ ചെലുത്താം, അറുപതുകളുടെ തുടക്കത്തിൽ ആരംഭിച്ച സിനിമാ ജീവിതത്തിൽ ലൈംഗികതയ്ക്കും വ്യക്തി ബന്ധങ്ങൾക്കും പ്രാധാന്യം നൽകി കൊണ്ടുള്ള ശൈലിയാണ് ബെർട്ടോലൂച്ചി പിന്തുടർന്നത്, ഈ കാലഘട്ടത്തിലെ സ്ഥിരം അമേരിക്കൻ ശൈലികളിൽ വീണ് പോവാതെ തീർത്തും വ്യത്യസ്തമായി തന്റെ കാഴ്ചപ്പാടിന് ചേർന്ന രീതിയിലുള്ള ചിത്രങ്ങൾ സൃഷ്ട്ടിക്കാൻ കഴിഞ്ഞു എന്നിടത്താണ് ബെർട്ടോലൂച്ചി മറ്റുള്ളവരിൽ നിന്നും വ്യത്യസ്തനാവുന്നത്. തന്റെ സിനിമകൾ പ്രേക്ഷകനുമായി സംവദിക്കാനുള്ള തന്റെ ഉപാധിയാണ് എന്ന് ഉറച്ച് വിശ്വസിച്ചിരുന്ന ബെർട്ടോലൂച്ചി അതിനാൽ തന്നെ ആവണം രീതികളിലും ശൈലിയിലും വെള്ളം ചേർക്കലുകൾക്ക് മുതിരാതിരുന്നത്, കൊമേർഷ്യൽ സിനിമകളുടെ ലോകം തനിക്ക് അന്യം ആണെന്ന ബെർണാർഡോയുടെ വാക്കുകളും തിരിച്ചറിവും തന്നെ ആയിരുന്നു മുന്നോട്ട് പോവാനുള്ള പ്രചോദനവും. വ്യക്തി ജീവിതത്തിൽ ആരെയും സുഖിപ്പിക്കാനോ, ഇഷ്ടം പിടിച്ച് പറ്റാനോ ശ്രമിക്കാതിരുന്ന വ്യക്തിയുടെ റിബൽ സ്വഭാവം അതിന്റെ പൂർണതയിൽ സിനിമകളിലും കാണാൻ കഴിയും. ബെർട്ടോലൂച്ചി എന്ന വ്യക്തിയെ പലരും പല രീതിയിൽ വിലയിരുത്തിയേക്കും, എന്നാൽ അദ്ദേഹത്തിന്റെ സിനിമകളെ അതൊന്നും ബാധിക്കില്ല, കാലത്തിന് പോലും പഴക്കം ചെലുത്താൻ കഴിയാത്തവയെ കേവലം വിമർശനങ്ങൾക്ക് തളർത്താനാവും എന്ന ചിന്ത പോലും അസംബന്ധമാണ്. അത് എന്ത് തന്നെ ആയാലും തന്റെ യാത്ര പൂർത്തിയാക്കി മടങ്ങിയ ബെർട്ടോളൂച്ചിയുടെ സിനിമകളിലൂടെയുള്ള ഒരു ചെറിയ യാത്രയാണ് ഈ പോസ്റ്റ്.

The Last Emperor (1987)

Genre : Epic

Rating : 7.8/10

Duration : 163 Minutes

ഒരു രാജ്യം മുഴുവൻ തന്റെ ഉത്തരവുകൾക്ക് വേണ്ടി കാത്തിരുന്നിട്ടും അവയെല്ലാം ഒഴിവാക്കി വീട്ടിലേക്ക് മടങ്ങണം എന്ന ആഗ്രഹം മാത്രം പ്രകടിപ്പിച്ച ചൈനയുടെ അവസാന ചക്രവർത്തി ആയ പുയിയുടെ ജീവിതമാണ് ദി ലാസ്റ്റ് എമ്പറർ എന്ന ബെർട്ടോലൂച്ചി ചിത്രം. എല്ലാവിധ സൗഭാഗ്യങ്ങളോടും കൂടി പണത്തിന്റെയും പദവിയുടെയും പ്രതാപത്തിന്റെയും ഇടയിൽ ജനിച്ച് വീണിടത്ത് നിന്നും യുദ്ധ കുറ്റവാളിയിലേക്കും സാധാരണക്കാരനിലേക്കും ഉള്ള വീഴ്ച അല്ലെങ്കിൽ യാത്ര ആണ് ഈ സിനിമയുടെ പ്രമേയം. ചൈന എന്ന രാജ്യം രാഷ്ട്രീയ പരിസ്ഥിതികളിൽ വിപ്ലവകരമായ മാറ്റങ്ങൾ കൈക്കൊണ്ടിരുന്ന കാലയളവിൽ ഇതിലേക്ക് വലിച്ചിഴയ്ക്കപ്പെടുന്ന ഒരു വ്യക്തിയുടെ ഭാഗത്ത് നിന്ന് കൊണ്ട് കഥ പറഞ്ഞ് പോവുന്ന ചിത്രം ഏതൊരു കാഴ്ചക്കാരനും മികച്ചൊരു അനുഭവം തന്നെ ആയിരിക്കും എന്നുറപ്പ്, അക്കാഡമി അവാർഡ് പോലെ അനവധി പുരസ്‌കാരങ്ങൾ കരസ്ഥമാക്കിയ ഈ ഒരു ചിത്രം മതിയാവും ബെർട്ടോലൂച്ചി എന്ന പ്രതിഭയെ പരിചയപ്പെടുത്താൻ.

Last Tango In Paris (1972)

Genre : Erotic

Rating : 7.1/10

Duration : 129 Minutes

ലാസ്റ്റ് ടാംഗോ ഇൻ പാരീസ് എന്ന ബെർട്ടോലൂച്ചി ചിത്രം പിൽക്കാലത്ത് പ്രശസ്തി ആർജിച്ചത് സിനിമാ ചരിത്രത്തിലെ ഏറ്റവും മൃഗീയമായ റേപ്പ് സീനുകൾ ഉൾപ്പെട്ട ചിത്രം എന്ന നിലയ്ക്കാണ്, സംവിധായകനും നായകനും എതിരെ നായിക തൊടുത്തുവിട്ട ആരോപണങ്ങളും ഈ കുപ്രസിദ്ധി ഏറ്റുന്നതിൽ വലിയ പങ്ക് വഹിച്ചിട്ടുണ്ട്. എന്നാൽ ഇതിനെല്ലാം അപ്പുറം ലാസ്റ്റ് ടാംഗോ ഇൻ പാരീസ് നല്ലൊരു ചിത്രം ആണ് എന്നതിൽ സംശയത്തിന് സ്ഥാനം ഇല്ല. തന്റെ വാർധക്യ കാലത്തിലേക്ക് കടക്കുന്ന വിഭാര്യനായ പോളിന് ചെറുപ്പക്കാരി ആയ ജീന്നിനോട് തോന്നുന്ന അടുപ്പവും, ഇരുവർക്കും ഇടയിൽ ഉടലെടുക്കുന്ന ബന്ധവും എല്ലാമാണ് ചിത്രത്തിന്റെ പ്രമേയം. ലൈംഗികതയുടെ അതിപ്രസരത്തോട് കൂടിയാണ് ഈ ബന്ധം ബെർട്ടോലൂച്ചി വരച്ചിടുന്നത്, ആയതിനാൽ തന്നെ സിനിമയ്ക്ക് നേരിടേണ്ടി വന്ന വിമർശനങ്ങക്കും ആരോപണങ്ങൾക്കും കയ്യും കണക്കുമില്ല. എന്തിരുന്നാലും ശക്തമായ കഥയും കഥാപാത്രങ്ങളും എല്ലാം ഉൾപ്പെട്ട ചിത്രം കാണാതിരുന്നാൽ നഷ്ടമാവും എന്ന കാര്യത്തിലും എതിരഭിപ്രായമില്ല.

The Conformist (1970)

Genre : Drama

Rating : 8.1/10

Duration : 111 Minutes

ബെർട്ടോലൂച്ചി എന്ന സംവിധായകന്റെ കഴിവ് വിളിച്ചോതുന്ന ചിത്രം ദി ലാസ്റ്റ് എമ്പറർ ആണെങ്കിലും എല്ലാ വശങ്ങളിൽ കൂടിയും പരിശോധിക്കുമ്പോൾ അദ്ദേഹത്തിന്റെ ഏറ്റവും മികച്ച സൃഷ്ടി എന്നത് ദി കൺഫെർമിസ്റ്റ് എന്ന ചിത്രം ആണെന്ന് തോന്നിയിട്ടുണ്ട്. കഥ തിരക്കഥ അവതരണം പ്രകടനം ഛായാഗ്രാഹണം തുടങ്ങി സർവ മേഘലകളികും ഇത്രയും മികച്ച് നിന്ന മറ്റൊരു ബെർട്ടോലൂച്ചി ചിത്രം കാണിച്ച് തരാനാവില്ല. രഹസ്യ പോലീസ് ആയ മാഴ്‌സെലോ തന്റെ ഭാര്യയോടൊപ്പം ഹണിമൂൺ ചിലവഴിക്കാൻ പാരിസിൽ എത്തുന്നതും, ആ കാലയളവിൽ മറ്റൊരു ദൗത്യം അദ്ദേഹം കയ്യാളുന്നതും തുടർന്ന് അരങ്ങേറുന്ന സംഭവങ്ങളും എല്ലാമാണ് ചിത്രത്തിന്റെ പ്രമേയം. യുദ്ധാനന്തര ഇറ്റാലിയൻ സിനിമാ ഇൻഡസ്ട്രിയുടെ ഉയർച്ചയിൽ കൺഫെർമിസ്റ്റിന്റെ പങ്ക് ചെറുതല്ല, ലോകോത്തര സിനിമകളോട് കിട പിടിക്കുന്നത് എന്ന രീതിയിൽ പുറത്തിറങ്ങിയ ആദ്യ ഇറ്റാലിയൻ ചിത്രങ്ങളിൽ ഒന്നായി വിശേഷിപ്പിക്കുന്ന കൺഫെർമിസ്റ്റ് തീർച്ചയായും കണ്ടിരിക്കേണ്ട ചിത്രങ്ങളിൽ ഒന്നാണ്.

1900 (1976)

Genre : Epic

Rating : 7.7/10

Duration : 317 Minutes

ഇഷ്ട നായകനായ റോബർട്ട് ഡി നീറോ ബെർണാർഡോ ബെർട്ടോലൂച്ചിയോടൊപ്പം ഒന്നിച്ച ചിത്രം, സംവിധായകന്റെ ഏറ്റവും ദൈർഘ്യമേറിയ ചിത്രം തുടങ്ങി 1900 എന്ന ചിത്രം കാണാൻ പ്രേരിപ്പിക്കുന്ന ഘടകങ്ങൾ അനവധി ആയിരുന്നു. ഇരുപതാം നൂറ്റാണ്ടിന്റെ ആരംഭത്തിൽ ഇറ്റലിയിലെ ഗ്രാമ പ്രദേശങ്ങളിൽ നിന്നും കടന്ന് വന്ന രണ്ട് സുഹൃത്തുക്കളുടെ ജീവിതവും അതിൽ അരങ്ങേറുന്ന സംഭവങ്ങളും അതിനാൽ ഉണ്ടാവുന്ന പ്രത്യാഘാതങ്ങളും എല്ലാമാണ് ഈ ബെർട്ടോലൂച്ചി ചിത്രം പറയുന്നത്, ഈ കഥയ്ക്കിടയിൽ അൻപത് വർഷങ്ങളോളം നീണ്ട് നിൽക്കുന്ന ഇറ്റാലിയൻ ചരിത്രവും, തൊഴിലാളി സമരങ്ങളും, കമ്മ്യുണിസത്തിന്റെ വരവും, മഹായുദ്ധങ്ങളും എല്ലാം ഭാഗമായി മാറുന്നുണ്ട്. രണ്ട് ഭാഗങ്ങളായി പുറത്തിറങ്ങിയ ചിത്രത്തിന്റെ ദൈർഘ്യം ഒരു പ്രശനമായി അനുഭവപ്പെട്ടേക്കാം എങ്കിലും ഒഴിവാക്കാൻ പാടില്ലാത്തത് എന്ന നിർദ്ദേശമാണ് ഈ ചിത്രത്തെ കുറിച്ചും നൽകാൻ ഉള്ളത്.

The Dreamers (2003)

Genre : Romance

Rating : 7.2/10

Duration : 116 Minutes

ഇരുപത്തൊന്നാം നൂറ്റാണ്ടിൽ പുറത്തിറങ്ങിയ ഏറ്റവും മികച്ച ബെർട്ടോലൂച്ചി ചിത്രം എന്ന് ദി ഡ്രീമേഴ്സിനെ വിശേഷിപ്പിക്കാം. പഠന സംബന്ധമായ ആവശ്യങ്ങൾക്കായി ഫ്രാൻ‌സിൽ എത്തുന്ന മാത്യു എന്ന യുവാവ് തിയോ, ഇസബെൽ എന്നീ സഹോദരീ സഹോദരന്മാരെ പരിചയപ്പെടുന്നതും, അവരുടെ ജീവിതത്തിന്റെ ഭാഗമാവുന്നതും, തുടർന്ന് ഈ മൂവർ സംഘത്തിന്റെ ജീവിതത്തിൽ അരങ്ങേറുന്ന സംഭവങ്ങളും എല്ലാമാണ് ഈ ചിത്രത്തിന്റെ പ്രമേയം. ഈ കഥയുടെ ചുവട് പിടിച്ച് മാവോയിസം, വിദ്യാർത്ഥി പ്രക്ഷോഭം, ലൈംഗികത തുടങ്ങിയ വിഷയങ്ങളും ബെർട്ടോലൂച്ചി പ്രതിപാദിക്കുന്നുണ്ട്. ഈ വിഷയങ്ങൾ വന്ന് പോവുന്നുണ്ടെങ്കിലും ചിത്രം അവസാനിക്കുമ്പോൾ പ്രേക്ഷകന്റെ ഓർമയിൽ നിൽക്കുക ഇവ ഗ്രീൻ എന്ന പേരും ബെർട്ടോലൂച്ചി മുന്നോട്ട് വെയ്ക്കുന്ന സെക്ഷ്വൽ ലിബർട്ടി എന്ന വികാരവും മാത്രമാവും.

ഈ സിനിമകൾക്ക് പുറമെ Little Budha (1994), La Luna (1979), The Sheltering Sky (1990), The Tragedy Of A Ridiculous Man (1982), Before The Revolution (1964) എന്നിവയും ബെർട്ടോളൂച്ചിയുടെ നല്ല സിനിമകളാണ്.

450. Raise The Red Lantern (1991)

Director : Zhang Yimou

Genre : Drama

Rating : 8.2/10

Country : China

Duration : 125 Minutes

🔸"ഈ കാണുന്നത് ഒന്നും അല്ല അവള്, ഈ കാണിച്ച് കൂട്ടുന്നതും അല്ല അവൾ, പുറമെ ഉള്ള നിസ്സംഗ ഭാവത്തിനും വന്യമായ ചിരിയ്ക്കും ഉള്ളിൽ അധികം ആരും കാണാതെ ഭംഗിയായി ഒളിപ്പിച്ച് വെച്ചൊരു മുഖമുണ്ട്. ആ ഞരമ്പുകളിലൂടെ ഒഴുകുന്നത് രക്തം അല്ല വിഷമാണ്, കൊടിയ വിഷം. മനസ്സിൽ ഒന്ന് വെച്ച് പുറമെ മറ്റൊന്ന് പ്രകടിപ്പിക്കുന്നവരെ ഭയക്കണം, അവളെ തീർച്ചയായും ഭയക്കണം". റെയിസ് ദി റെഡ് ലാന്റേൺ എന്ന ചിത്രത്തിലെ നിർണ്ണായക രംഗങ്ങളിൽ ഒന്നിൽ പ്രധാന കഥാപാത്രത്തെ മറ്റൊരു കഥാപാത്രം വിശേഷിപ്പിക്കുന്നത് മുകളിൽ ചേർത്തിരിക്കുന്ന വരികളിൽ കൂടിയാണ്.

🔸ചൈനീസ് ഫിലിം ഇൻഡസ്ട്രിയിൽ നിന്നും ലോക സിനിമയ്ക്ക് ലഭിച്ച ഏറ്റവും മികച്ച സംഭാവനകളിൽ ഒന്നായാണ് റെയിസ് ദി റെഡ് ലാന്റേൺ എന്ന ചിത്രം ഇന്ന് പൊതുവെ വിലയിരുത്തപ്പെടുന്നത്. എന്തിരുന്നാലും റിലീസിന് ശേഷം ചൈനയിൽ ഈ ചിത്രവും സംവിധായകൻ ഴാങ് യിമോവും നേരിടേണ്ടി വന്ന വിമര്ശനങ്ങൾക്ക് ഒരു പഞ്ഞവുമില്ലായിരുന്നു. ചരിത്രത്തിന്റെ ചുവട് പിടിച്ച് ചൈനീസ് ആചാരങ്ങളെയും ജീവിത രീതികളെയും കണക്കിന് വിമർശിച്ച ചിത്രം ഒരുവേള നിരോധനം വരെ നേരിടുക ഉണ്ടായി. അതിന് കുറ്റം പറയാനുമാവില്ല കാരണം അന്നത്തെ പരിതഃസ്ഥിതികൾക്ക് എതിരെ ഉള്ള കൂരമ്പുകളാണ് ചിത്രം എയ്ത് വിടുന്നത്.

🔸സോങ്‌ലിയൻ എന്ന ചെറുപ്പക്കാരിയാണ് ചിത്രത്തിലെ കേന്ദ്ര കഥാപാത്രം, അന്നത്തെ കാലത്തെ സ്ത്രീകൾക്ക് വിരുദ്ധമായി അത്യാവശ്യം വിദ്യാഭ്യാസവും ലോക പരിചയവും ഒക്കെ നേടിയവളാണ് സോങ്‌ലിയൻ. യൂണിവേഴ്സിറ്റിയിൽ പഠനം പാതി വഴി പിന്നീടവേ ആണ് സോങ്‌ലിയൻ വിവാഹിത ആവുന്നത്, അതും ജന്മ ഗൃഹത്തിൽ നിന്നും ദൂരപ്പെട്ട ദേശത്ത് സമ്പന്നനും പ്രമാണിയും മധ്യവയസ്കനും ആയ വ്യക്തിയുടെ നാലാമത്തെ ഭാര്യ ആയിട്ട്. താല്പര്യമോ ഇഷ്ടമോ വിഷയം അല്ലാഞ്ഞതിനാലും അവയ്ക്ക് പ്രാധാന്യം ഇല്ല എന്ന തിരിച്ചറിവിനാലും ഒഴുക്കിന് അനുസരിച്ച് നീന്താൻ തയ്യാറാവുകയാണ് സോങ്‌ലിയൻ.

🔸നാലാമത്തെ ഭാര്യ ആയി ഭർതൃഗൃഹത്തിൽ എത്തിയ സോങ്ഗ്ലിയാന് തികച്ചും വ്യത്യസ്തമായ ഒരു ലോകമാണ് അവിടെ കാണാൻ കഴിയുന്നത്. മുതലാളിയുടെ ഭാര്യമാരെ എന്നും പരിചരിക്കാനും അവരുടെ ഇഷ്ടങ്ങളും ആഗ്രഹങ്ങളും എല്ലാം സംരക്ഷിക്കാനുമായി വലിയൊരു പട, ആവശ്യാനുസരണം ഉപയോഗിക്കാൻ ഉള്ള വസ്തുവകകൾ, മറ്റൊന്നിനെ കുറിച്ചും വ്യാകുലതപ്പെടാതെ ഒഴിവ് സമയങ്ങൾ ചെലവഴിക്കാനുള്ള പരിപാടികൾ അങ്ങനെ അങ്ങനെ. സ്വന്തം ഭർത്താവിനെ സന്തോഷവാനാക്കി കൊണ്ടുനടക്കണം എന്നത് മാത്രമാണ് ഭാര്യമാരെ സംബന്ധിച്ചിടത്തോളം ചെയ്യാനുള്ള കർമം, അതിൽ അവർ എത്ര വിജയിക്കുന്നുവോ അത്രയും നല്ലത്.

🔸നാല് ഭാര്യമാരിൽ ആർക്കൊപ്പമാണോ ഭർത്താവ് അന്തി ഉറങ്ങാൻ തീരുമാനിക്കുന്നത് അന്നേ ദിവസം അവരുടെ വീടിന് മുന്നിൽ ഭംഗിയുള്ള ചുവന്ന വെളിച്ചം തെളിയിക്കും, അതാണ് റെയ്‌സ് ദി റെഡ് ലാന്റേൺ എന്ന ടൈറ്റിലിന് ആധാരം. ഭർത്താവിനോടും അദ്ദേഹത്തിന്റെ മറ്റ് ഭാര്യമാരോടും ഒപ്പമുള്ള സോങ്ലിയെന്റെ ജീവിതം ആ കുടുംബത്തെ സംബന്ധിച്ചുള്ള പല രഹസ്യങ്ങളിലേക്കും ഉള്ളുകളികളിലേക്കും വെളിച്ചം വീശുന്നതായിരുന്നു. കാണാൻ സാധിച്ചിട്ടില്ലാത്തവർ തീർച്ചയായും കാണാൻ ശ്രമിക്കുക, വളരെ മികച്ചൊരു ചിത്രം തന്നെയാണ് റെയിസ് ദി റെഡ് ലാന്റേൺ.

Verdict : Must Watch

449. Robin Hood (2018)

Director : Otto Bathurst

Genre : Adventure

Rating : 6.9/10

Country : USA

Duration : 116 Minutes

🔸ഒരു സിനിമ കണ്ട് കഴിയുമ്പോൾ സ്ഥിരമായി പിന്തുടരാറുള്ള ഒരു രീതി ഉണ്ട്, ആ ചിത്രം ഇഷ്ടപ്പെടുക ആണെങ്കിൽ പോസ്റ്റ് രൂപത്തിലോ സംഭാഷണ രൂപത്തിലോ മറ്റൊരാൾക്ക് സജസ്റ്റ് ചെയ്ത് കൊടുക്കാറുണ്ട്. ആ സിനിമ മറ്റൊരാൾ കണ്ട് നല്ല അഭിപ്രായങ്ങൾ പറയുക ആണെങ്കിൽ അത് അല്പം സന്തോഷം തരുന്ന കാര്യം തന്നെയാണ്. ഇനി ഇതിന്റെ മറുവശം ആണ് മോശം സിനിമകളുടെ കാര്യം, മോശം എന്ന് തോന്നിയ സിനിമകളെ പൊതുവെ ഒഴിവാക്കാറാണ് പതിവ്, മറ്റുള്ളവർ നല്ല അഭിപ്രായം പറഞ്ഞിട്ടും ഇഷ്ടപ്പെടാതെ പോയ, തിയേറ്ററിൽ ഓടി കൊണ്ടിരിക്കുന്ന ചിത്രങ്ങൾ കാഴ്ചയിൽ പോരാ എന്ന അഭിപ്രായം ആണെങ്കിൽ മൗനം പാലിക്കാറാണ് പതിവ്, ഇവിടെ ആ പതിവ് ചെറുതായി ഒന്ന് തെറ്റിക്കുകയാണ് റോബിൻഹുഡ് എന്ന ചിത്രത്തിന് വേണ്ടി, കൂടുതൽ അലങ്കാരം ഒന്നും ചേർക്കുന്നില്ല ഈ വർഷം തിയേറ്ററിൽ കണ്ട ഏറ്റവും മോശം ചിത്രം എന്നതിൽ കവിഞ്ഞ് ഒരു വിശേഷണം റോബിൻഹുഡിന് നല്കാനില്ല.

🔸ആഴ്ച്ചാവസാനം ഉള്ള തിയേറ്റർ ദർശനം കുറച്ച് കാലങ്ങളായി തുടരുന്ന ചടങ്ങ് ആണ്, ജോലിയിൽ നിന്നും മറ്റുമുള്ള ഇടവേള സമയം സിനിമയ്ക്ക് വേണ്ടി ചിലവഴിക്കുന്നത് ആ മായികതയോടുള്ള അടങ്ങാത്ത ഭ്രമം ഒന്ന് കൊണ്ട് മാത്രമാണ്, ഈ വേളയിൽ പ്രതീക്ഷിക്കുന്നത് ഒരല്പ സമയം എങ്കിലും മൈൻഡിനെ പിടിച്ചിരുത്തുന്ന എൻഗേജിങ് ആയ ഒരു സിനിമ മാത്രമാണ്, ഇതേ ചിന്താഗതിയോടെ ആണ് നിങ്ങളും തിയേറ്ററിലേക്ക് നടന്ന് കയറുന്നതെങ്കിൽ റോബിൻഹുഡ് നിങ്ങൾക്ക് പറ്റിയ സിനിമ അല്ല. എൻഗേജിങ് എന്ന് തോന്നിപ്പിക്കുന്നതോ ഒരല്പം എങ്കിലും താല്പര്യം ജനിപ്പിക്കുന്നതോ ആയോ ഒന്നും തന്നെ ചിത്രത്തിൽ കാണാൻ കഴിഞ്ഞില്ല. എന്തായാലും വികാരങ്ങളും വിചാരങ്ങളും മാറ്റി നിർത്തി സിനിമയെ ചെറുതായി ഒന്ന് വിശകലനം ചെയ്ത് കളയാം.

🔸എല്ലാവരും കേട്ട് ശീലിച്ചിട്ടുണ്ടാവാൻ ഇടയുള്ള റോബിൻഹുഡ് ഇംഗ്ലീഷ് കഥകളിലെ ഔട്‍ലോയുടെ കഥയാണ് ഈ ചിത്രം. റസ്സൽ ക്രോയുടെ ഈ പതിറ്റാണ്ടിന്റെ തുടക്കത്തിൽ പുറത്തിറങ്ങിയ (ആദ്യ വാണിംഗ്) ചിത്രത്തിൽ നിന്നും വിഭിന്നമായി റോബിൻഹുഡിന്റെ യുവത്വ കാലഘട്ടത്തിനാണ് ഇവിടെ പ്രാധാന്യം നൽകി ഇരിക്കുന്നത്. നല്ലതെന്ന് തോന്നിയ കാര്യങ്ങളിലേക്ക് ആദ്യം കടക്കാം (അധികം ഒന്നുമില്ലല്ലോ, ജഗതി.ജെപിജി). സിനിമയിൽ രണ്ട് ഇഷ്ട നടൻമാർ അഭിനയിച്ചിട്ടുണ്ട് ബെൻ മെൻഡൽസണും ജാമി ഫോക്സും, ഈ രണ്ട് പേരുടെ അഭിനയം തന്നെയാണ് ഒരല്പം ആശ്വാസം പകരുന്നതും, മികച്ചത് എന്നൊന്നും പറയില്ലെങ്കിലും ബേധപ്പെട്ട പ്രകടനമാണ് ഇരുവരുടേതും. ഇതോട് കൂടി ചിത്രത്തിൽ പ്രത്യക്ഷമായി അനുഭവപ്പെട്ട നല്ല കാര്യങ്ങൾ അവസാനിക്കുകയാണ്.

🔸ഇനി മോശമായി അനുഭവപ്പെട്ട കാര്യങ്ങളിലേക്ക്, ആദ്യമേ തന്നെ സിനിമയുടെ ക്ലൈമാക്സിനെ കുറിച്ച് പറയേണ്ടി വരും. സ്പോയ്ലർ ആവുന്നതിനാൽ കഥയിലേക്ക് കടക്കുന്നില്ലെങ്കിലും (എന്തിന്, സലിം കുമാർ.ജെപിജി) ചിത്രത്തിന്റെ അവസാനം അടുത്ത ഭാഗത്തിന് സൂചന നൽകുന്ന ഒരു ചെറിയ പോർഷെൻ ഉണ്ട്. ഇത് എന്തിന് വേണ്ടി ആണെന്നതാണ് ആദ്യത്തെ സംശയം പ്രത്യേകിച്ചും ആദ്യ ഭാഗത്തിന് ശരാശരി നിലവാരം പോലും നല്കാൻ കഴിയാഞ്ഞ ടീം രണ്ടാം ഭാഗത്തിനുള്ള സൂചന തന്നത് ഒരു തരത്തിൽ മുണ്ട് പൊക്കി കാണിച്ച ഫീൽ ആയിരുന്നെന്ന് പറഞ്ഞാലും കുറയില്ല, എങ്കിലും ശുഭാപ്തി വിശ്വാസത്തിന് ഒരു ചെറിയ കൈ'അടി' (ഒരു കാര്യവും ഇല്ല, വെള്ളിമൂങ്ങ.ജെപിജി). ഇതിനോടൊപ്പം തന്നെ ചേർത്ത് വായിക്കേണ്ടതാണ് സിനിമയുടെ ആക്ഷൻ രംഗങ്ങളും, ഒരു പക്ഷെ സിനിമയുടെ മറ്റ് ഭാഗങ്ങളോട് ചേർന്ന് നില്ക്കാൻ വേണ്ടിയും നീതി പുലർത്താൻ വേണ്ടിയും ആവണം അവിടെയും പരാജയം ആവർത്തിച്ചു (കൊട് കൈ, ശങ്കരാടി.ജെപിജി).

🔸100 മില്യൺ ഡോളർ ആണ് റോബിൻഹുഡിന്റെ ബഡ്‌ജറ്റ്‌, നൂറ് മില്യൺ ഡോളർ കൊണ്ട് എന്തൊക്കെ ചെയ്യാം എന്ന ചോദ്യം ചോദിക്കുന്നില്ല കാരണം ചിലവഴിച്ചവർക്ക് ഇല്ലാത്ത വിഷമം നമ്മൾക്ക് വേണ്ടല്ലോ എങ്കിലും ഈ ചോദ്യത്തിന് ഫസ്റ്റ് മാൻ, എ സ്റ്റാർ ഈസ് ബോൺ എന്നീ ചിത്രങ്ങൾ നിർമിക്കാം എന്ന ഉത്തരം നൽകാം. ഇത്രയും വലിയ ബഡ്ജറ്റിൽ പുറത്തിറങ്ങിയിട്ടും സ്പെഷ്യൽ എഫ്ഫക്റ്റ് രംഗങ്ങളിൽ റോബിൻഹുഡ് പുലർത്തിയ നിലവാരം ഫസ്റ്റ് മാനിനും എത്രയോ താഴെ ആയിരുന്നു, ചിത്രത്തിന്റെ അവസാന ഭാഗങ്ങളിലെ ചെയ്‌സ് രംഗങ്ങൾ ഒന്നും എടുത്ത് പറയുന്നില്ല. ഈ പറഞ്ഞ കാര്യങ്ങൾക്ക് എല്ലാം പുറമെയാണ് റോബിൻഹുഡ്, ഷെരിഫ് ഓഫ് നോട്ടിങ്ഹാം എന്നീ ലെജൻഡറി സ്റ്റാറ്റസ് ഉള്ള കഥാപാത്രങ്ങളുടെ പരിതാപകരമായ അവസ്ഥ. ഇതിൽക്കൂടുതൽ ചിത്രത്തെ കുറിച്ച് ഒന്നും പറയാനില്ല, (അഭിപ്രായങ്ങൾ തിയേറ്ററിൽ പോയി പൈസ മുടക്കി പടം കണ്ട് നിരാശനാവേണ്ടി വന്ന ഒരു വ്യക്തിയുടെത് ആണെന്ന് ഓർക്കുക, നന്ദി).

Verdict : Disaster

448. The Ballad Of Buster Scruggs (2018)

Director : Coen Brothers

Genre : Anthology

Rating : 7.4/10

Country : USA

Duration : 133 Minutes

🔸നോ കൺട്രി ഫോർ ഓൾഡ് മാൻ, ഫാർഗോ, ബിഗ് ലെബോവ്സ്കി എന്നീ സിനിമകൾ ആദ്യമായി കണ്ടപ്പോൾ തൊട്ടുള്ള ഇഷ്ടമാണ് കോയെൻ സഹോദരന്മാരുടെ ചിത്രങ്ങളോട്. മറ്റുള്ള സംവിധായകർക്കോ സിനിമകൾക്കോ ഒന്നും അനുകരിക്കാൻ കഴിയാത്ത രീതിയിലുള്ള ഒരു പ്രത്യേക തരം അനുഭൂതി ആണ് ഓരോ കോയെൻ ബ്രദേഴ്‌സ് ചിത്രവും. ഇരുവരും ചേർന്ന് വെസ്റ്റേൺ ആന്തോളജി സ്റ്റൈലിൽ ഒരു ആറ് ഭാഗ ടിവി സീരീസ് ചെയ്യുന്നു എന്നറിഞ്ഞ സമയം തൊട്ടുള്ള കാത്തിരിപ്പായിരുന്നു ബല്ലാട് ഓഫ് ബസ്റ്റർ സ്ക്രുഗ്‌സ് എന്ന ചിത്രത്തിന്റെ നെറ്റ്ഫ്ലിക്സ് റിലീസോഡ് കൂടി ഇന്നലെ പൂർത്തിയായത്. രണ്ടേകാൽ മണിക്കൂറിനടുത്ത് ദൈർഘ്യമുള്ള ചിത്രം ആറ് കഥകളാണ് കാഴ്ചക്കാരന് മുന്നിൽ എത്തിക്കുന്നത്, പരസ്പര ബന്ധമില്ലാത്ത ആറ് കഥകളിലും തികച്ചും വ്യത്യസ്തരായ കഥാപാത്രങ്ങളും സന്ദര്ഭങ്ങളും ആണ് വന്ന് പോവുന്നത്.

🔸ടൈറ്റിൽ കഥാപാത്രമായ ബസ്റ്റർ സ്ക്രൂഗ്‌സിന്റെ കഥയാണ് ആദ്യത്തേത്, പാട്ടുകാരനായ ടിയാൻ തോക്ക് ഉപയോഗത്തിലും വാക് സാമർഥ്യത്തിലും അഗ്രഗണ്യനാണ്, ഒരു പരിധി വരെ ബസ്റ്റർ തന്റെ കഴിവിൽ അമിതമായി വിശ്വസിക്കുന്നുണ്ട് എന്നും വേണമെങ്കിൽ പറയാം. ബസ്റ്ററിന്റെ കഥയിൽ നിന്നും രണ്ടാം ഭാഗത്ത് എത്തുമ്പോൾ പ്രധാന കഥാപാത്രമായി എത്തുന്നത് ജെയിംസ് ഫ്രാങ്കോ ആണ്, ടിയാൻ ഒരു ബാങ്ക് കൊള്ളയടിക്കാനുള്ള തയാറെടുപ്പിലാണ്, തുടർന്ന് അരങ്ങേറുന്ന സംഭവ വികാസങ്ങളാണ് ഈ ചിത്രം. മൂന്നാം ഭാഗത്ത് അംഗവൈകല്യമുള്ള ഒരു കലാകാരനെയും അയാളുടെ സഹായിയെയും അവരുടെ ബുദ്ധിമുട്ടുകളെയും എല്ലാമാണ് പ്രതിപാദിക്കുന്നത്. മറ്റുള്ള മൂന്ന് കഥകളെ കുറിച്ച് സൂചനകൾ ഏതും നൽകുന്നില്ല, കണ്ട് തന്നെ അറിയുന്നതാവും നല്ലത്.

🔸കഥയും സന്ദര്ഭങ്ങളും കഥാപാത്രങ്ങളും എല്ലാം വിട്ട് ലളിതമായി പറയുക ആണെങ്കിൽ ബസ്റ്റർ സ്ക്രൂഗ്‌സ് ഒരു നല്ല ചിത്രം തന്നെയാണ്, എന്നാൽ പ്രതീക്ഷിച്ച നിലവാരത്തിലേക്ക് ചിത്രം ഉയർന്നിട്ടില്ല എന്നതും പറയേണ്ടി ഇരിക്കുന്നു. ഏതെങ്കിലും ഒരു സിനിമയുടെ ആദ്യ ഇരുപത് മിനുട്ട് കണ്ട് ആവേശഭരിതരാവുകയും തുടർന്നുള്ള പോക്ക് കണ്ട് നിരാശ തോന്നുകയും ചെയ്തിട്ടുണ്ടെങ്കിൽ അവയിൽ ഒന്ന് ഈ ചിത്രമാണ്, അടുത്ത പകുതിയിൽ ചിത്രം ഒരു പരിധി വരെ ട്രാക്കിൽ എത്തുന്നുണ്ട് എന്നും പറയേണ്ടി ഇരിക്കുന്നു. ആറ് കഥകളും തമ്മിൽ നിലവാരത്തിൽ പുലർത്തിയ അന്തരമാണ് ഈ സമയത്ത് പറയേണ്ട മറ്റൊരു വസ്തുത, ആദ്യ മൂന്ന് ഭാഗങ്ങൾ പുലർത്തിയ നിലവാരത്തിനോട് നീതി പുലർത്താൻ കഴിയാതെ പോയി നാലാമത്തെയും അവസാനത്തെയും ചിത്രങ്ങൾക്ക്.

🔸നിലവാരത്തിൽ മാത്രമല്ല ഓരോ ചിത്രത്തിനും അനുവദിച്ച സമയത്തിലും വലിയ അന്തരം പുലർത്തുന്നുണ്ട് ഈ ചിത്രം, ആദ്യ രണ്ട് ഭാഗങ്ങളും പതിനഞ്ച് മിനുട്ടുകൾ വീതിച്ചെടുത്ത് നല്ല രീതിയിൽ പറഞ്ഞ് പോയപ്പോൾ പിന്നീട് വന്നവയ്ക്ക് വിനയായതും ഈ സമയക്കൂടുതൽ ആണെന്ന് തോന്നുന്നു. ഒന്നര മണിക്കൂറിനടുത്ത് ദൈർഖ്യമുള്ള ഈ മൂന്ന് ഭാഗങ്ങളും ചിത്രത്തെ ഒരു പരിധി വരെ പിറകോട്ട് വലിക്കുന്നുണ്ട്. സിനിമയുടെ നല്ല വശങ്ങളിലേക്ക് കടക്കുക ആണെങ്കിൽ ആദ്യം പറയേണ്ടത് ടൈറ്റിൽ കഥാപാത്രം ഉൾപ്പെടെയുള്ള കാസ്റ്റിംഗ് ആണ്, ലിയാം നീസൺ പോലെയുള്ളവർക്ക് ആവശ്യമായ സ്പേസ് ഇല്ലെങ്കിൽ കൂടിയും മികച്ചൊരു കൂട്ടം നടന്മാരെ കോയെൻ ബ്രദേഴ്‌സ് അണി നിരത്തിയിട്ടുണ്ട് ഈ ചിത്രത്തിൽ. ആദ്യ ഇരുപത് മിനുട്ട് കൊണ്ട് തന്നെ പിന്നീട് ശരാശരി ആയി തോന്നിച്ച ചിത്രത്തിൽ പ്രേക്ഷകനെ പിടിച്ചിരുത്താൻ കഴിഞ്ഞ സംവിധായക മികവും എടുത്ത് പറയേണ്ടി ഇരിക്കുന്നു.

🔸ഈ പറഞ്ഞതൊക്കെ മാറ്റി നിർത്തി ചിത്രത്തിന്റെ ഏറ്റവും വലിയ ശക്തി എന്താണ് എന്ന് ചോദിച്ചാൽ സംശയം ഏതുമില്ലാതെ പറയാനാവും അത് ബ്രൂണോ ടെൽബോലിന്റെ സിനിമാറ്റോഗ്രാഫി ആണ്. ഓരോ കഥയും ഓരോ സന്ദർഭവും കണ്ണിന് കുളിർമ നൽകുന്ന വിധം മനോഹരമായി ചിത്രീകരിക്കാൻ അദ്ദേഹത്തിന് കഴിഞ്ഞിട്ടുണ്ട്. ലൊക്കേഷനുകളും, പത്തൊൻപതാം നൂറ്റാണ്ടിന്റെ അവതരണവും എല്ലാം ചിത്രത്തിന് ശക്തി പകർന്നിട്ടേ ഉള്ളൂ. ഏത് ഭാഗത്ത് നിന്ന് സ്ക്രീൻഷോട്ട് എടുത്താലും മികച്ചൊരു ദൃശ്യം നല്കാൻ തക്കവണ്ണം സമ്പന്നമാണ് ഈ മേഖലയിൽ ചിത്രം. ഒരുപാട് മികച്ചതാവാൻ കഴിയുമായിരുന്ന ഒരു ചിത്രമാണ് ബല്ലാട് ഓഫ് ബസ്റ്റർ സ്ക്രുഗ്‌സ്, ആറ് കഥകളിൽ മോശമല്ലാത്ത മൂന്ന് നാലെണ്ണം പ്രേക്ഷകന് വേണ്ടി ചിത്രം കരുതി വെച്ചിട്ടുണ്ട് എന്നതിനാൽ ഒരു തവണ തീർച്ചയായും കാണാവുന്നതാണ്.

Verdict : Good

447. Band Of Brothers (2001)

Director : Phil Alden Robinson

Genre : War

Rating : 9.5/10

Seasons : 1

Episode : 10

Country : USA

Duration : 52 - 73 Minutes Per Episode

🔸ഒരു ശരാശരി സീരീസ് ആരാധകനോട് മികച്ച ടിവി സീരീസുകളെ പറ്റി ചോദിച്ചാൽ ലഭിക്കുന്ന ഉത്തരങ്ങൾ സ്വാഭാവികം ആയും ഗെയിം ഓഫ് ത്രോൺസ്, ബ്രെക്കിങ് ബാഡ് തുടങ്ങിയവ ആയിരിക്കും. ഇവിടെ എങ്ങും, അപൂർവം ചില സന്ദർഭങ്ങൾ ഒഴിച്ച് നിർത്തിയാൽ എവിടെയും ബാൻഡ് ഓഫ് ബ്രദേഴ്‌സ് എന്ന സീരീസ് മുകളിൽ സൂചിപ്പിച്ചവയുടെ കൂടെ പൊതുവെ പരാമർശിക്കപ്പെട്ടു കണ്ടിട്ടില്ല. ഈ കാരണങ്ങൾ കൊണ്ട് തന്നെ പരിമിതമായ അറിവോടെയും, താഴ്ന്ന പ്രതീക്ഷയോടെയും ആണ് സീരീസ് കാണാൻ ആരംഭിച്ചതും, എന്നാൽ സ്‌ക്രീനിന്റെ മുന്നിലും പിന്നിലും ആയി അണിനിരന്ന പ്രതിഭകളുടെ കുത്തൊഴുക്ക് അത്ഭുതാവഹം ആയിരുന്നു, സേവിങ് പ്രൈവറ്റ് റയാൻ എന്ന ചിത്രത്തിന് ശേഷം ടോം ഹാങ്ക്സ് സ്പിൽബെർഗ് സഖ്യം അണിയറയിൽ ഒന്നിച്ചത് ഈ രണ്ടാം ലോക മഹായുദ്ധം പ്രമേയമാക്കിയ സീരീസിന് വേണ്ടിയാണ് എന്നതാണ് പ്രസ്തുത ഉദ്യമത്തിന് നൽകാവുന്ന ഏറ്റവും വലിയ ഗ്യാരന്റിയും സർട്ടിഫിക്കറ്റും.

🔸രണ്ടാം ലോക മഹായുദ്ധ കാലത്ത് യുദ്ധഭൂമിയിൽ നിർണായക സാന്നിധ്യമായ, യുദ്ധശേഷം ധൈര്യത്തിന്റെയും വീരത്തിന്റെയും പേരിൽ പ്രസിദ്ധി നേടിയ ഈസി കമ്പനി എന്ന അമേരിക്കൻ സേനയുടെ എയർ ബോൺ ഡിവിഷൻറ്റെ കഥയാണ് ബാൻഡ് ഓഫ് ബ്രദേഴ്‌സ്. രാജ്യത്തിൻറെ വിവിധ ഭാഗങ്ങളിൽ നിന്നും കടന്ന് വന്ന അച്ചടക്കമില്ലാത്ത ഒരു കൂട്ടം ചെറുപ്പക്കാരിൽ നിന്നും ആർമിയുടെ അഭിമാനമായി മാറിയ ഒരു സംഘത്തിലേക്കുള്ള പരിണാമവും, യുദ്ധഭൂമിയിലേക്കുള്ള അവരുടെ യാത്രയും എല്ലാം പ്രമേയമായി വന്ന ആദ്യ രണ്ട് എപ്പിസോഡുകൾക്ക് ശേഷം സീരീസ് ഗിയർ മാറ്റുകയാണ്. ഒരു സീസണിൽ പത്ത് എപ്പിസോഡുകളായാണ് കഥ പറഞ്ഞവസാനിക്കുന്നത്, ഒരു മണിക്കൂർ പരിധിയിലുള്ള പത്ത് ഭാഗങ്ങളും യുദ്ധ ഭൂമിയിലെ തീവ്രതയോടെ നേർ സാക്ഷ്യങ്ങളാണ്.

🔸സേവിങ് പ്രൈവറ്റ് റയാൻ രണ്ടാം ലോക മഹായുദ്ധത്തെ ഇന്റെൻസ് ആയ രീതിയിൽ സമീപിച്ചെങ്കിൽ അതിന്റെ ഏറ്റവും റിയലിസ്റ്റിക് ആയ പതിപ്പ് ആണ് ബാൻഡ് ഓഫ് ബ്രദേഴ്‌സ്. കുറച്ച് കൂടി വ്യക്തമായി പറയുക ആണെങ്കിൽ ബേസ്ഡ് ഓൺ എ ട്രൂ സ്റ്റോറി എന്ന പ്രേക്ഷകൻ കേട്ട് പഴകിയ ഡയലോഗിനോട് അക്ഷരാർത്ഥത്തിൽ നീതി പുലർത്തുന്നുണ്ട് ഈ ടെലിവിഷൻ സീരീസ്. നായകൻ എന്ന് ചൂണ്ടി കാണിക്കാൻ തക്ക വണ്ണം ഒരു കഥാപാത്രം ഇല്ല, കണ്ട് പഠിച്ച മാസ്സ് രംഗങ്ങളും കാണാൻ കഴിഞ്ഞേക്കില്ല, വീര പരിവേഷം പുലർത്തുന്ന കഥാപാത്രങ്ങളും ഇല്ല ആകെ ഉള്ളത് യുദ്ധവും അതിന്റെ ഭീകരതയും ഇതിന്റെ എല്ലാം ഭാഗമാവുന്ന ഭീകരതയും എല്ലാമാണ്. ഇത്രയും പറഞ്ഞത് സീരീസിനെ കുറിച്ച് ഒരേകദേശ ചിത്രം ലഭിക്കട്ടെ എന്ന് കരുതിയാണ്.

🔸ബാൻഡ് ഓഫ് ബ്രദേഴ്‌സ് സ്‌ക്രീനിൽ എത്തിയിട്ട് വർഷം പതിനെട്ട് ആവുന്നു, യുദ്ധ രംഗങ്ങളും മറ്റും പരിശോധിക്കുമ്പോൾ ടിവി സീരീസ് ബൂം അതിന്റെ മൂർധന്യാവസ്തയിലേക്ക് കടന്നിട്ടില്ലാത്ത ആ കാലയളവിൽ ഇത്രയും വലിയ സ്കെയിലിൽ അന്നത്തെ നൂറ്റി ഇരുപത് മില്യൺ ഡോളർ ചിലവിൽ ഒരു ടിവി സീരീസ് എന്നത് അത്ഭുതാവഹമാണ്. ഇത്രയും വർഷങ്ങൾക്കിപ്പുറവും ഒരു പഴക്കവും ബാധിക്കാതെ ലാൻഡ്മാർക്ക് എന്ന രീതിയിൽ നിലവാരത്തിലും കാഴ്ച്ചാനുഭവത്തിലും ബാൻഡ് ഓഫ് ബ്രദേഴ്‌സ് പുലർത്തുന്ന മികവും എടുത്ത് പറയേണ്ടി ഇരിക്കുന്നു. സ്റ്റീവൻ അംബ്രോസിന്റെ നോവൽ പ്രമേയമാക്കി പുറത്തിറങ്ങിയ ബാൻഡ് ഓഫ് ബ്രദേഴ്‌സിൽ കഥാപാത്രങ്ങൾ ആധാരമായി മാറിയ യഥാർത്ഥ വ്യക്തികളും ഭാഗമായി വരുന്നുണ്ട്.

🔸ഡാമിയൻ ലൂയിസ്, റോൺ ലിവിങ്‌ടൺ, ടോണി വാഹൽബെർഗ്, ഷെയിൻ ടെയ്‌ലർ തുടങ്ങിയവർ പ്രധാന കഥാപാത്രമായി എത്തിയ സീരീസ് പിൽക്കാലത്ത് പ്രശസ്തരായ അനവധി നടന്മാരുടെ സാന്നിധ്യത്താലും ശ്രദ്ധേയമാണ്. ടോം ഹാർഡി, മൈക്കൽ ഫാസ്സ്‌ബെൻഡർ, ജെയിംസ് മക്കാവോയ് തുടങ്ങി ഹോളിവുഡിലെ എ ലിസ്റ്റ് താരങ്ങൾ ചെറുതും വലുതുമായ കഥാപാത്രങ്ങളിലൂടെ സാന്നിധ്യം അറിയിക്കുന്നുണ്ട്. മികച്ച സിനിമാട്ടോഗ്രഫിയും കളർ ടോണും ബാൻഡ് ഓഫ് ബ്രദേഴ്‌സിന്റെ എടുത്ത് പറയേണ്ട സവിശേഷതയാണ്. ഈ ദശാബ്ദത്തിൽ പുറത്തിറങ്ങിയ പല ടിവി സീരീസുകളും ബാൻഡ് ഓഫ് ബ്രദേഴ്‌സിന്റെ പോപ്പുലാരിറ്റിയിൽ ഇടിവ് വരുത്തിയിട്ടുണ്ടാവാം, എന്നാൽ അതൊന്നും നിലവാരത്തിന്റെ കാര്യത്തിൽ ഒരു വെല്ലുവിളി ആയിട്ടില്ല, ആവുകയുമില്ല. മുൻപും പിൻപും ആയി അനവധി സീരീസുകൾ വന്ന് പോയിട്ടും ബാൻഡ് ഓഫ് ബ്രദേഴ്‌സ് ഒരു അളവുകോലായി ഇന്നും നിലനിൽക്കുന്നുണ്ടെങ്കിലും അത് വ്യക്തമായ കാരണങ്ങൾ കൊണ്ടും അർഹത കൊണ്ടും തന്നെയാണ്, കാണാത്തവർക്കായി തീർച്ചയായും ശുപാർശ ചെയ്യുന്നു.

"There Was A Time When World Asked Ordinary Men To Do Extra Ordinary Things"

Verdict : Must Watch

Tarantino Connected Universe

ടാരന്റിനോ എന്ന സംവിധായകനെയോ അദ്ദേഹത്തിന്റെ സിനിമകളെയോ വിദേശ സിനിമാ ആസ്വാദകർക്ക് പ്രത്യേകം പരിചയപ്പെടുത്തണം എന്ന് തോന്നുന്നില്ല. പൾപ് ഫിക്ഷൻ, ഇൻഗ്ലോറിയസ് ബസ്റ്റാർഡ്സ്, റിസെർവോയർ ഡോഗ്സ് തുടങ്ങി മികവുറ്റ ഒരു പിടി നല്ല ചിത്രങ്ങൾ ടാരന്റിനോ സിനിമയ്ക്ക് സംഭാവന ചെയ്തിട്ടുണ്ട്, ഇത് വഴി ലോകത്താകമാനം മികച്ചൊരു ആരാധക ശൃംഖലയും ടിയാൻ കെട്ടി പൊക്കിയിട്ടുണ്ട്. എന്നാൽ ടരന്റീനോയുടെ സിനിമകളിൽ മിക്കതും ഒരേ യുണിവേഴ്സിൽ അരങ്ങേറുന്നതാണ് എന്ന കാര്യം ഇന്നും പലർക്കും അന്യമാണ്. തന്റെ കഥകൾ എല്ലാം തന്നെ അരങ്ങേറുന്നത് രണ്ട് യുണിവേഴ്സിൽ ആണെന്ന് ടാരന്റിനോ തന്നെ സമ്മതിച്ച കാര്യമാണ്. ഒന്ന് യഥാർത്ഥ മനുഷ്യരുടെ ലോകത്ത്, അതായത് കഥാപാത്രങ്ങൾ തിന്നുകയും കുടിക്കുകയും ഒക്കെ ചെയ്യുന്ന റിയൽ ലൈഫ് യുണിവേഴ്സിലും, മറ്റേത് ഈ യുണിവേഴ്സിന് ഉള്ളിലുള്ള സിനിമാറ്റിക് യുണിവേഴ്സിലും. ഒരല്പം തല കറക്കം തോന്നാം, സ്വാഭാവികമാണ് എന്നാൽ ഇതിന് വ്യക്തമായ കാരണങ്ങൾ ഉണ്ടെന്നും പല ചിത്രങ്ങളും നമ്മൾ കണ്ട് കൊണ്ടിരിക്കെ അത്ഭുതാവഹമായ ചില സൂചനകൾ സംവിധായകൻ ചിത്രങ്ങളിൽ നിക്ഷേപിച്ചിട്ടുണ്ട് എന്ന് പറഞ്ഞാലോ. ഈ സൂചനകളിൽ മിക്കതും ചിത്രം ചികഞ്ഞ് പരിശോധിച്ച ആരാധകവൃന്ദത്തിന്റെ കണ്ടെത്തലുകളാണ്, സംവിധായകൻ തുറന്ന് സമ്മതിച്ചവയേതുമില്ല അതിനാൽ തന്നെ ഒരുപാട് ആണെങ്കിലോ ങ്കിലോ ങ്കിലോ എന്ന സാദ്ധ്യതകൾ മാത്രമാണ് ഇവയുടെ അടിത്തറ, എന്തിരുന്നാലും ടാരന്റിനോ പോലെയൊരു സംവിധായകന്റെ ചിത്രങ്ങളിൽ ഇത് പോലുള്ള സൂചനകൾ അദ്ദേഹത്തിന്റെ മനസ്സറിവ് ഇല്ലാതെ കടന്ന് വരും എന്നും കരുതുന്നില്ല. ഈ സൂചനകളിലേക്ക് ഒരു ചെറിയ എത്തിനോട്ടം നടത്തി നോക്കാം.

സൂചനകളിലേക്ക് കടക്കുകയാണെങ്കിൽ ആദ്യം തന്നെ പൾപ് ഫിക്ഷൻ, കിൽ ബിൽ എന്നീ ചിത്രങ്ങളെ പരിശോധിക്കാം. ഇപ്പൊ സ്വാഭാവികമായും രണ്ട് ചിത്രങ്ങളും കണ്ടിട്ടുള്ള ഒരു വ്യക്തിയുടെ മനസിലൂടെ കടന്ന് പോയിട്ടുണ്ടാവുക ഇത് രണ്ടും എങ്ങിനെ ഒരേ യുണിവേഴ്സിൽ അരങ്ങേറുന്ന സംഭവം ആവും എന്നതാവും, പ്രത്യേകിച്ചും രണ്ടിലും നായികയായി ഉമാ തുർമാൻ രണ്ട് വ്യത്യസ്ത കഥാപാത്രങ്ങളായി എത്തുമ്പോൾ. ഇതിനുള്ള ഉത്തരം പൾപ് ഫിക്ഷൻ എന്ന ചിത്രത്തിലെ പാർലർ ഡാൻസ് സീനിൽ നിന്നും ലഭിക്കും, സംഭാഷണങ്ങൾക്കിടെ താൻ നായികയായി എത്തിയ ഫോക്സ് ഫോഴ്സ് ഫൈവ് എന്ന സീരീസിനെ കുറിച്ച് മിയ വിന്സന്റിനോട് പറയുന്നുണ്ട്. ആ സംഭാഷണങ്ങൾ പരിശോധിച്ചാൽ അതിൽ വിവിധ കഥാപാത്രങ്ങൾക്ക് കൊടുത്തിരിക്കുന്ന വിശേഷണങ്ങൾ കിൽ ബിൽ എന്ന ചിത്രത്തിലെ അസാസിൻ ടീമുമായി അടുത്ത സാമ്യം പുലർത്തുന്നതായി കാണാം, ഒരു പക്ഷെ (സാധ്യത മാത്രം) കിൽ ബിൽ എന്ന ചിത്രം ഫോക്സ് ഫോഴ്സ് ഫൈവ് എന്ന സീരീസിന്റെ ചലച്ചിത്രാവിഷ്കാരം ആണെങ്കിലോ, അത് നിലനിൽക്കുന്നത് ടരന്റീനോയുടെ റിയൽ യുണിവേഴ്സിന് അകത്തുള്ള മൂവി യുണിവേഴ്സിൽ ആണെങ്കിലോ. അപ്പോഴും നില നിൽക്കുന്നൊരു പ്രശനം സാമുവൽ ജാക്സൺ ആണ്, ജൂൾസ് എന്ന കഥാപാത്രം ആയി പൾപ് ഫിക്ഷനിലും റൂഫസ് ആയി കിൽ ബില്ലിലും (ഒരൊറ്റ സീനിൽ) അദ്ദേഹം വന്ന് പോവുന്നുണ്ട്. ഇതിന് നല്കാൻ കഴിയുന്ന വിശദീകരണം രണ്ടും ഒരേ കഥാപാത്രം തന്നെ ആയിരിക്കാം എന്നാണ്, ഒരുപക്ഷെ കുറ്റ കൃത്യങ്ങളുടെ ജീവിതത്തിൽ നിന്നും മാറി നടന്ന ശേഷം ജൂൾസ് ഐഡന്റിറ്റി മാറ്റി മറ്റൊരാളായി തീർന്നിരിക്കാം. ഇതിനൊക്കെ ഉള്ള സാധ്യത എന്താണ്, What Are The Odds ?? എന്നൊക്കെ ചോദിക്കുക ആണെങ്കിൽ ടാരന്റിനോ സ്റ്റൈലിൽ F**k The Odds, There Is A Slight Chance  എന്നെ പറയാനുള്ളൂ.

ഇനി കുറച്ച് കൂടി സാദ്ധ്യതകൾ ഏറിയ സൂചനകളിലേക്ക് കടക്കാം, കഥാപാത്രങ്ങളെയും അവരുടെ പേരുകളും വിശേഷങ്ങളും പരിശോധിച്ചാൽ ഒരുപാട് ഉത്തരങ്ങൾ ലഭിക്കും. പൾപ് ഫിക്ഷൻ എന്ന ചിത്രത്തിലെ ട്രവോൾട്ടയുടെ കഥാപാത്രം സിനിമ കണ്ടവർ ആരും മറക്കാനിടയില്ല, മർസെലസ് വാലസ് എന്ന അധോലോക രാജാവിന്റെ കയ്യാളായ വിൻസെന്റ് വേഗയുടെ സഹോദരനെ മറ്റൊരു ടാരന്റിനോ ചിത്രത്തിൽ നമുക്ക് കാണാനാവും, റിസെർവോയർ ഡോഗ്സിലെ മൈക്കൽ മാഡിസൺ അവതരിപ്പിച്ച സാഡിസ്റ്റായ വിക് വേഗയുടെ രൂപത്തിൽ. രണ്ട് കഥാപാത്രങ്ങളെയും കൂടി ചേർത്ത് ടാരന്റിനോ ഒരു പ്രീക്വൽ ചിത്രം പ്ലാൻ ചെയ്തിരുന്നു എന്നതിനേക്കാൾ നല്ലൊരു ഉറപ്പ് ഈ സാധ്യതയ്ക്ക് വേറെ നല്കാനില്ല. ഇത് പോലെ ബന്ധം പുലർത്തുന്ന അനവധി കഥാപാത്രങ്ങളെ ടാരന്റിനോ യുണിവേഴ്സിൽ കാണിച്ച് തരാൻ കഴിഞ്ഞേക്കും

റിസെർവോയർ ഡോഗ്സ് എന്ന ചിത്രത്തിലെ ഹാർവി കീറ്റലിന്റെ മിസ്റ്റർ മിസ്റ്റർ വൈറ്റ് എന്ന കഥാപാത്രത്തെ ശ്രദ്ധിക്കുക, "If You Shoot Me In A Dream, You Better Wake Up And Apologize" എന്ന മരണ മാസ്സ് ഡയലോഗ് ഒക്കെ വീശുന്ന കഥാപാത്രത്തെ മറ്റ് രണ്ട് ടാരന്റിനോ ചിത്രങ്ങളുമായി കൂട്ടി വായിക്കാം. മിസ്റ്റർ വൈറ്റ് തന്റെ പേര് ലാറി ഡിമ്മിക്ക് ആണ് എന്ന് പറയുമ്പോൾ അത് പൾപ് ഫിക്ഷനിലെ ടാരന്റിനോ തന്നെ അവതരിപ്പിച്ച ജിമ്മി ഡിമ്മിക്ക് എന്ന കഥാപാത്രത്തിലേക്കുള്ള സൂചന ആണ്, അവർ തമ്മിൽ ഏതെങ്കിലും രീതിയിൽ ബന്ധമുണ്ടാവാം. ഇനി മിസ്റ്റർ വൈറ്റ് ആദ്യം പ്രത്യക്ഷപ്പെടുന്ന രംഗത്തെ സംഭാഷണം ശ്രദ്ധിക്കുക ആണെങ്കിൽ പുള്ളിക്ക് അലബാമ എന്നൊരു യുവതിയുമായി അടുപ്പം ഉണ്ടെന്ന് മറ്റൊരു കഥാപാത്രം സൂചിപ്പിക്കുന്നുണ്ട്, ഈ അലബാമയെ ട്രൂ റൊമാൻസ് എന്ന ടാരന്റിനോ തിരക്കഥ രചിച്ച ചിത്രത്തിൽ കാണാനാവും.

ജാങ്കോ അൺചെയിൻഡ് എന്ന ചിത്രത്തിലെ ക്രിസ് വാൽട്സിന്റെ കഥാപാത്രമായ കിംഗ് ഷൂൾസിന്റെ ഭാര്യയുടെ കല്ലറ കിൽ ബില്ലിൽ കാണാനിടയായതും, ജാങ്കോയിലെ ചെറിയൊരു രംഗത്ത് പത്ര പരസ്യത്തിലൂടെ കണ്ട ക്രേസി കൂൺസ് എന്ന കഥാപാത്രത്തിന്റെ പേരിനോട് സാമ്യമുള്ള ക്യാപ്റ്റൻ കൂൺസ് ആയി ക്രിസ്റ്റഫർ വാക്കൻ പൾപ് ഫിക്ഷനിൽ എത്തിയതും യാദൃച്ഛികം ആണെന്ന് തോന്നുന്നില്ല. കഥാപാത്രങ്ങൾ തമ്മിൽ വര്ഷങ്ങളുടെ അന്തരം ഉണ്ടെങ്കിലും ഒരേ തായ് വഴി എന്ന് പറയാം (സാധ്യത മാത്രം). ഇൻഗ്ലോറിയസ് ബസ്റ്റാർഡ്‌സിലെ ബേസ് ബോൾ ബാറ്റ് കറക്കി മാസ്സ് കാണിക്കുന്ന ഡോണി ഡോണോവിറ്സിന്റെ മകനാണ് ട്രൂ റൊമാൻസിലെ നായകൻ ലീ ഡോനോവിറ്സ് എന്നും പറയപ്പെടുന്നു. നാച്ചുറൽ ബോൺ കില്ലേഴ്സ് എന്ന ചിത്രത്തിലെ നായികാ നായകന്മാർ കൊന്ന് തള്ളുന്ന ജെറാൾഡിന്റെയും റിസെർവോയർ ഡോഗ്സിൽ ചെവി നഷ്ട്ടപ്പെടുന്ന മാർവിന്റെയും പേരിന്റെ അവസാനം നാഷ് എന്നായതും, ഗാവിൻ നാഷ് എന്ന പേരിൽ ഇവർക്ക് രണ്ട് തലമുറ മുന്നേ മറ്റൊരു കഥാപാത്രം ജാങ്കോയിൽ വന്ന് പോയതും യാദൃച്ഛികമാവില്ല. ഹെയ്റ്റ്ഫുൾ എയ്റ്റിലെ ടിം റോത്തിന്റെ കഥാപാത്രവും ഇൻഗ്ലോറിയസ് ബസ്റ്റാർഡ്സ് എന്ന ചിത്രത്തിലെ ഫേസ്ബൻഡറിന്റെ കഥാപാത്രവും ഹികോക്സ് എന്ന നാമം പേരിനോട് ചേർത്ത് കൊണ്ട് നടക്കുന്നതും ആകസ്മികമല്ല, തലമുറകളുടെ വ്യത്യാസത്തിൽ ബന്ധുക്കളാവാം ഇരുവരും.

കൗതുകങ്ങൾ ഇവിടെയും അവസാനിക്കുന്നില്ല, ജാങ്കോയിലും പൾപ് ഫിക്ഷനിലും വന്ന് പോവുന്ന രണ്ട് കഥാപാത്രങ്ങൾ ഏറെക്കുറെ ഒരേ മാനറിസങ്ങൾ പാലിക്കുന്നതിനും, ഇരുവരും റാസിസ്റ്റ് ആണ് എന്നതിനും ഉത്തരം ലഭിക്കുന്നത് രണ്ട് പേരുടെയും പേരിന്റെ അവസാനം മെയ്‌നാർഡ് എന്നാണെന്ന് അറിയുമ്പോഴാണ്. കിൽ ബിൽ എന്ന ചിത്രത്തിലെ ബ്രൈഡ് എന്ന നായികാ കഥാപാത്രത്തിനെ കോമയിൽ ആയിരിക്കെ റേപ്പ് ചെയ്യുന്ന ട്രക്ക് ഡ്രൈവർ ജാസ്പറിനെ ഡെത് പ്രൂഫ് എന്ന ചിത്രത്തിലും കാണാനാവും, രണ്ടിടത്തും സ്ത്രീകളോട് വല്ലാത്തൊരു തരം വികാരം കഥാപാത്രം പ്രകടിപ്പിക്കുന്നുമുണ്ട്. മിസ്റ്റർ ബ്ലോണ്ട് റിസെർവോയർ ഡോഗ്സിൽ സൂചിപ്പിച്ച സ്കഗ്നെറ്റി എന്ന കഥാപാത്രത്തോട് സാമ്യം പുലർത്തുന്നൊരു കഥാപാത്രം നാച്ചുറൽ ബോൺ കില്ലേഴ്സ് എന്ന ചിത്രത്തിലും പ്രത്യക്ഷപ്പെടുന്നുണ്ട്. റിസർവോയർ ഡോഗ്സിൽ ഒരു കഥാപാത്രം വെടി കൊണ്ട് കിടക്കവേ തങ്ങളെ സഹായിക്കാൻ കഴിയുന്ന ബോണി എന്ന നേഴ്‌സ് ഉണ്ടെന്ന് മറ്റൊരു കഥാപാത്രം പറയുന്നതും, പൾപ് ഫിക്ഷൻ എന്ന ചിത്രത്തിൽ ഡിമ്മിക്കിന്റെ ഭാര്യ അതേ പേരുള്ള നേഴ്സ് ആണെന്നതും, ഈ കഥാപാത്രം ട്രൂ റൊമാൻസിൽ വീണ്ടും സ്മരിക്കപ്പെടുന്നതും വെറുതെ ആണെന്ന് തോന്നുന്നില്ല. ഇങ്ങനെ പരിശോധിക്കുക ആണെങ്കിൽ ടരന്റീനോയുടെ മിക്ക ചിത്രങ്ങളും മറ്റുള്ളവയുമായി ഏതെങ്കിലും രീതിയിൽ ബന്ധപ്പെട്ട് കിടക്കുന്നതായി കാണാൻ സാധിച്ചേക്കും, ഒന്ന് ഒഴിച്ച്. ഒരുപക്ഷെ മറ്റൊരാളുടെ നോവൽ ആധാരമാക്കി ടാരന്റിനോ അണിയിച്ചൊരുക്കിയ ചിത്രം ആയതിനാലാവണം ജാക്കി ബ്രൗൺ ഇതിൽ എവിടെയും വന്ന് പെട്ടതായി കാണാനാവില്ല.

ഇവയ്ക്ക് പുറമെ പൾപ് ഫിക്ഷനിലെ ബച്ച്‌ (ബ്രൂസ് വില്ലിസ്) ഉപയോഗിച്ച കാർ കിൽ ബില്ലിൽ കാണാൻ കഴിയും എന്ന സ്ഥിരീകരിച്ചിട്ടില്ലാത്ത വാദവും ഉണ്ട്, ബിഗ് കാഹൂണ ബർഗർ എന്ന സാമുവൽ ജാക്സണിന്റെ സ്പെഷ്യൽ ഐറ്റം ഡസ്ക് റ്റിൽ ഡോൺ, ഡെത് പ്രൂഫ്, റിസെർവോയർ ഡോഗ്സ് എന്നീ ചിത്രങ്ങളിലും കാണാൻ കഴിഞ്ഞേക്കും. ഇനി ഇതുമായി ഒന്നും ബന്ധമില്ലാത്ത മറ്റൊരു കൗതുകകരമായ കാര്യം കൂടി പറയാം, പൾപ് ഫിക്ഷൻ എന്ന ചിത്രത്തിൽ ബ്രൂസ് വില്ലിസ് അവതരിപ്പിച്ച ബച്ച് എന്ന കഥാപാത്രം ഒരു ആയുധത്തിന് വേണ്ടി സ്റ്റോറിൽ തപ്പുന്ന രംഗം ഉണ്ട്, ഇതിൽ ആദ്യം ബച്ച് കയ്യിൽ എടുക്കുന്ന ബേസ്‌ബോൾ ബാറ്റ് പിന്നീട് ഇൻഗ്ലോറിയസ് ബസ്റ്റാർഡ്‌സിലെ ഡോണിയുടെ ആയുധമായും, ചുറ്റിക ഡികാപ്രിയയുടെ കയ്യിലും, കറ്റാന കിൽ ബില്ലിലും കാണാൻ കഴിഞ്ഞു, ചൈൻസോ എന്ന ആയുധം കൂടി ബച്ച് ഈ രംഗത്ത് ഉപയോഗിക്കുന്നുണ്ടെങ്കിലും അത് ഇതുവരെ മറ്റൊരു ടാരന്റിനോ ചിത്രത്തിൽ കാണാൻ സാധിച്ചിട്ടില്ല (ഒരുപക്ഷെ അടുത്ത വർഷം വൺസ് അപ്പോൺ എ ടൈം ഇൻ ഹോളിവുഡിൽ കാണാൻ സാധിച്ചേക്കും)

മേൽ സൂചിപ്പിച്ച വസ്തുതകൾ എല്ലാം ശെരി ആണെന്ന് യാതൊരു ഉറപ്പുമില്ല, എല്ലാം സാദ്ധ്യതകൾ മാത്രമാണ് എന്തിരുന്നാലും 12 ആംഗ്രി മെൻ എന്ന ചിത്രം പഠിപ്പിച്ചത് പോലെ ഒരു ചെറിയ സാധ്യത അവശേഷിക്കുന്നിടത്തോളം കാലം അവ തെറ്റാവുന്നുമില്ല. (കടപ്പാട് റെഡിറ്റിലെ പ്രിയ സഹോദരന്മാർക്ക്) ബാക്കി കിടക്കുന്ന ചോദ്യം അടുത്ത വര്ഷം റിലീസിന് ഒരുങ്ങുന്ന ടാരന്റിനോ - ഡികാപ്രിയോ - ബ്രാഡ് പിറ്റ് സഖ്യത്തിന്റെ ചിത്രം ഇതിൽ എവിടെ വരും എന്നതാണ്, അതിനുള്ള ഉത്തരം അടുത്ത വർഷം ജൂലൈയിൽ.

Federico Fellini

ഇരുപതാം നൂറ്റാണ്ടിന്റെ മധ്യ കാലഘട്ടത്തിൽ, പ്രത്യേകിച്ചും രണ്ടാം ലോക മഹായുദ്ധത്തിന് ശേഷം സിനിമാ മേഖല ഉയിർത്തെഴുന്നേൽപ്പ് നടത്തിയൊരു കാലഘട്ടം ഉണ്ടായിരുന്നു, ചലച്ചിത്രവും ചലച്ചിത്ര പ്രവർത്തകരും നിയോ റിയലിസ്റ്റിക് ശൈലിയിലേക്ക് കടന്ന് ചിന്തിക്കാൻ തുടങ്ങിയ ഈ കാലഘട്ടമാണ് പിന്നീടുള്ള സിനിമയുടെ ഉയർച്ചയ്ക്ക് അടിത്തറ പാകിയത് എന്ന് ഒട്ടും അതിശയോക്തി ഇല്ലാതെ പറയാം. അതിനാൽ തന്നെ ഈ കാലഘട്ടത്തിലെ പ്രതിഭാധനൻ ആയ ഫെഡറികോ ഫെല്ലിനി എന്ന സംവിധായകൻ സിനിമാ മേഖലയ്ക്ക് നൽകിയ സംഭാവനകളെ ഒരു രീതിയിലും കുറച്ച് കാണാനാവില്ല. സ്വാഭാവിക സന്ദർഭങ്ങളെക്കാൾ സ്വപ്നങ്ങളും മായികതയും എല്ലാം ഇട കലർത്തി കൊണ്ടുള്ള വ്യത്യസ്തമായ ശൈലി പിന്തുടർന്ന ഫെല്ലിനി ഒരു പരിധി വരെ മറ്റുള്ളവർക്ക് അനുകരിക്കാൻ കഴിയാത്ത വിധം അതിനെ സ്വായത്താക്കുകയും ചെയ്തിരുന്നു, ഈ ശൈലിയുടെ പാത പിന്തുടർന്ന് കാഴ്ചക്കാരൻ എന്നും ഓർക്കുന്ന ഒരു പിടി ലോകോത്തര ചിത്രങ്ങൾ ഫെല്ലിനി സൃഷ്ടിച്ചിട്ടുണ്ട്. നാല്പതുകളിൽ സംവിധായകനായ റോബർട്ടോ റോസെല്ലിനിയെ കണ്ട് മുട്ടിയിടത്ത് നിന്നും ആരംഭിച്ച ഫെല്ലിനിയുടെ സിനിമാ ജീവിതത്തിൽ പ്രശസ്തി ലഭിച്ചു തുടങ്ങിയത് തിരക്കഥാകൃത്തായുള്ള അരങ്ങേറ്റ ശേഷം ആയിരുന്നു. അമ്പതുകളിൽ വെറൈറ്റി ലൈറ്റ്‌സ് എന്ന ചിത്രത്തിലൂടെ ഐതിഹാസികമായ സംവിധാന വേഷം അണിഞ്ഞ ഫെല്ലിനിയുടെ മികച്ച കുറച്ച് ചിത്രങ്ങൾ പരിചയപ്പെടുത്തുക എന്ന ഉദ്ദേശമാണ് ഈ പോസ്റ്റിന് പിന്നിൽ. ചുവടെ ഉൾപ്പെടുത്തിയിരിക്കുന്ന അഞ്ച് ചിത്രങ്ങൾ ഒരിക്കലും മികച്ച അഞ്ച് എന്ന രീതിയിലോ അല്ലെങ്കിൽ ഏതെങ്കിലും തരത്തിലുള്ള റാങ്കിങ്ങോ അടിസ്ഥാനമാക്കി ഉൾപ്പെടുത്തിയത് അല്ല എന്ന് പറയട്ടെ, ഫെല്ലിനി എന്ന പ്രതിഭയുടെ വ്യത്യസ്ത ശൈലിയും, പ്രതിഭാ മികവും ബോധ്യപ്പെടുത്താനായി ഉൾപ്പെടുത്തിയ തികച്ചും വ്യത്യസ്തത പുലർത്തുന്ന ചിത്രങ്ങളാണ് ഇവ എല്ലാം തന്നെ.

8½ (1963)

Genre : Drama

Rating : 8.1/10

Duration : 138 Minutes

ഫെഡറികോ ഫെല്ലിനിയുടെ ആത്മകഥാംശം ഉള്ള 8½ എന്ന ചിത്രത്തെ പൊതുവിൽ ''The Film Which Marked The Beginning Of Modern Cinema" എന്ന് വിശേഷിപ്പിച്ച് കാണാറുണ്ട്, ഇത് ഒരല്പം കൂടുതലല്ലേ എന്ന ചിന്ത ചിലരിൽ എങ്കിലും ജനിക്കാൻ ഇടയുണ്ടെങ്കിക്കും അതിനുള്ള ഉത്തരങ്ങളെല്ലാം ഈ ചിത്രം നൽകും എന്ന ഉറച്ച വിശ്വാസം നിലനിൽക്കുന്നുണ്ട്, പ്രത്യേകിച്ചും ആദ്യ അര മണിക്കൂർ തന്നെ മതിയാവും. ഒരു സംവിധായകൻ ആണ് ചിത്രത്തിലെ കേന്ദ്ര കഥാപാത്രം, ടിയാന് തന്റെ ജോലിയിലുള്ള താല്പര്യം എവിടെയോ നഷ്ട്ടപ്പെട്ട് പോയിരിക്കുന്നു. വ്യക്തി ജീവിതത്തിലെ പരാജയങ്ങളോ, വിട്ട് പിരിയാതെ കൂടെ പോന്ന ഓർമകളോ കാരണമാവാം ഈ വ്യക്തിക്ക് തന്റെ ജീവിതത്തിൽ സന്തോഷം എന്നത് നാമ മാത്രമായി മാറിയിരിക്കുന്നു. ഈ ചിത്രം പ്രസ്തുത കഥാപാത്രത്തിന് തിരിച്ചറിവുകളുടേത് ആണെങ്കിൽ പ്രേക്ഷകന് അത് ഒരു കാരണവശാലും ഒഴിവാക്കാൻ പാടില്ലാത്ത ചലച്ചിത്ര അത്ഭുതമാണ്.

La Dolce Vita (1960)

Genre : Drama

Rating : 8.1/10

Duration : 180 Minutes

ഫെല്ലിനിയുടെ ചിത്രങ്ങളിൽ മിക്കതിലും ആത്മകഥയുടെ അംശങ്ങൾ ഉണ്ടെന്നത് പരസ്യമായ രഹസ്യമാണ്, സിനിമാ മേഖലയിലേക്ക് കടന്ന് വരുന്നതിന് മുന്നേ പത്ര പ്രവർത്തകനായി ജോലി ചെയ്തിരുന്ന ഫെല്ലിനിയുടെ ആ കാലഘട്ടങ്ങളിലെ അനുഭവങ്ങളാണ് ലാ ഡോൾസ്‌ വിറ്റ എന്ന ചിത്രത്തിന് ആധാരം. പത്ര പ്രവർത്തക ജീവിതത്തിലെ സ്ഥിരം താറടിക്കലും, ഗോസിപ്പുകളും, വെള്ളം ചേർക്കലുകളും എല്ലാം എപ്പിസോഡുകളായി അവതരിപ്പിച്ചിരിക്കുകയാണ് ഈ ചിത്രം. ഈ എപ്പിസോഡുകളെല്ലാം കൂട്ടി ചേർത്താൽ ഏറെക്കുറെ ഒരു പത്ര പ്രവർത്തകന്റെ ഒരാഴ്ച കാലത്തെ ജീവിതമായി മാറും. ഇവിടെ വ്യക്തി ജീവിതവും, ഔദ്യോഗിക ജീവിതവും, ആഘോഷവും, പരാജയവും, നഷ്ടവും, നേട്ടവും എല്ലാം വിഷയമായി വരുന്നു. തീര്ച്ചയായും കണ്ടിരിക്കേണ്ട ചിത്രങ്ങളുടെ പട്ടികയിലേക്ക് നിസ്സംശയം ഉൾപ്പെടുത്താം ഈ ഫെല്ലിനി ചിത്രത്തെയും.

La Strada (1954)

Genre : Drama

Rating : 8.1/10

Duration : 104 Minutes

"A complete catalogue of my entire mythological world, a dangerous representation of my identity that was undertaken with no precedent whatsoever." ലാ സ്ട്രാഡ എന്ന ചിത്രത്തെ കുറിച്ചുള്ള ഫെല്ലിനിയുടെ വാക്കുകളാണ് മുകളിൽ ചേർത്തിരിക്കുന്നത്, തന്റെ ജീവിതം അപകടകരമാം വിധം അവതരിപ്പിക്കപ്പെട്ടിട്ടുള്ള ചിത്രമാണ് ലാ സ്ട്രാഡ എന്ന് സമ്മതിച്ച ഫെല്ലിനി ഒരു ചിത്രം സാക്ഷാത്കരിക്കുന്നതിനായി ഏറ്റവും അധ്വാനിച്ചതും, അതിന്റെ വിജയത്തിൽ മനസ്സ് തുറന്ന് ആഹ്ലാദിച്ചതും ഈ ചിത്രത്തിന് വേണ്ടി ആയിരുന്നെന്ന് പിൽക്കാലത്ത് പറയുക ഉണ്ടായി. ഫെഡറികോ ഫെല്ലിനി എന്ന നാമം ഇറ്റാലിയൻ സിനിമാ ചരിത്രത്തിലും ലോക സിനിമയിൽ തന്നെയും രേഖപ്പെടുത്താൻ കാരണമായതും ലാ സ്ട്രാഡ ആയിരുന്നു എന്നത് മനോഹരമായ ഒരു ആകസ്മികത ആവാം. ഇറ്റാലിയൻ തെരുവുകളിലെ ദാരിദ്ര്യത്തിന്റെയും, അനാഥത്വത്തിന്റെയും സന്തതികളായ അഭയാർഥികളുടെ ജീവിതമാണ് ഈ ചിത്രം പ്രേക്ഷകന്റെ മുന്നിൽ എത്തിക്കുന്നത്, കൂടുതൽ പറയുന്നില്ല കണ്ട് തന്നെ അറിയേണ്ടി ഇരിക്കുന്നു ഈ ചിത്രത്തെ.

The Nights Of Cabiria (1957)

Genre : Drama

Rating : 8.1/10

Duration : 118 Minutes

അൻപതുകളും അറുപതുകളും ഏറെക്കുറെ പൂർണമായും ഫെല്ലിനി യുഗം തന്നെ ആയിരുന്നു എന്ന് പറയേണ്ടി വരും, കാരണം അസാധാരണം എന്നതിൽ കുറഞ്ഞ് വിശേഷിപ്പിക്കാൻ ഒരൊറ്റ സിനിമ പോലും അദ്ദേഹം ഈ കാലയളവിൽ സൃഷ്ടിക്കുക ഉണ്ടായില്ല. ആവശ്യമായ അർഹിക്കുന്ന പരിഗണന ഈ ചിത്രങ്ങൾക്ക് ലഭിച്ചിട്ടില്ല എന്നതാണ് നിരാശ പകരുന്ന വസ്തുത, പ്രത്യേകിച്ചും നൈറ്റ്സ് ഓഫ് കബീറിയ പോലെയുള്ള ചിത്രങ്ങൾ ഇന്നും നല്ലൊരു ശതമാനം കാഴ്ചക്കാർക്ക് അപരിചിതമാണ്. ക്യാബിരിയ എന്ന വേശ്യ ആണ് ഈ ചിത്രത്തിലെ കേന്ദ്ര കഥാപാത്രം, തന്റെ കാമുകനായ ജോർജിയോയുടെ കൂടെ ഒരു രാത്രി ആഘോഷിക്കുന്ന കബീരിയയ്ക്ക് അവനിൽ നിന്നും വധശ്രമം നേരിടേണ്ടി വരുന്നതും തുടർന്നുള്ള സംഭവങ്ങളും എല്ലാം ചേർന്നതാണ് ഈ ചിത്രം. ആദ്യ രംഗം തൊട്ടു തന്നെ പ്രേക്ഷകനെ ആകാംക്ഷാഭരിതരാക്കുന്ന ചിത്രം അവിടെ നിന്നും കൂടുതൽ മികച്ചതാവുന്നെ ഉള്ളൂ, തീർച്ചയായും കണ്ടിരിക്കേണ്ട മറ്റൊരു മികച്ച ഫെല്ലിനി ചിത്രമാണ് നൈറ്റ്സ് ഓഫ് കബീറിയ.

I Vitelloni (1953)

Genre : Drama

Rating : 8/10

Duration : 103 Minutes

വിഖ്യാത സംവിധായകനായ മാർട്ടിൻ സ്കോർസെസെ ഒരിക്കൽ ഒരഭിമുഖത്തിൽ പറയുക ഉണ്ടായി, തന്റെ ചെറുപ്പകാലത്ത് എണ്ണമില്ലാത്ത അത്രയും തവണ താൻ കണ്ടതും, തന്നെ ആവേശഭരിതൻ ആക്കുകയും ചെയ്തത് ഇറ്റാലിയൻ നിയോ റിയാലിസ്റ്റ് ചിത്രങ്ങൾ ആണെന്നും, അവയിൽ ഏറ്റവും പ്രിയപ്പെട്ടത് ഐ വിറ്റലോണി എന്ന ഫെല്ലിനി ചിത്രം ആണെന്നും. ഇതിനേക്കാൾ മികച്ചൊരു സെര്ടിഫിക്കറ്റ് ഈ ചിത്രത്തിന് വേറെ നല്കാനില്ല. തങ്ങളുടെ ജീവിതത്തിലെ നിർണ്ണായകമായ ഒരു ഘട്ടത്തിൽ കൂടി കടന്ന് പോവുന്ന ഒരു കൂട്ടം ഇറ്റാലിയൻ ചെറുപ്പക്കാരുടെ കഥയാണ് ഐ വിറ്റലോണി പറയുന്നത്. യൗവനം കടന്ന് ഉത്തരവാദിത്ത ജീവിതത്തിലേക്ക് കടക്കുന്ന ഈ വ്യക്തികളുടെ ആകുലതകളും വ്യാധികളും പ്രശ്നങ്ങളും എല്ലാമാണ് ചിത്രത്തെ മുന്നോട്ട് നയിക്കുന്ന ഘടകങ്ങൾ. നഷ്ടബോധവും നൊസ്റ്റാൾജിയയും എല്ലാം വിറ്റലോണിയുടെ നിർണ്ണായക ഭാഗമാണ്, സിനിമയെ ഇഷ്ടപ്പെടുന്നവർ, പഠന വസ്തുവായി സമീപിക്കുന്നവർ തീർച്ചയായും കാണാൻ ശ്രമിക്കുക ഈ ചിത്രം.

ഈ ചിത്രങ്ങൾക്ക് പുറമെ Amarcord (1973), Juliet Of Spirits (1965), Roma (1972), City Of Women (1980), And The Ship Sails On (1983) എന്നിവയും കണ്ടിരിക്കേണ്ട, മികച്ച ഫെല്ലിനി ചിത്രങ്ങളാണ്.

446. Fantastic Beasts The Crimes Of Grindelwald (2018)

Director : David Yates

Genre : Fantasy

Rating : 7/10

Country : USA

Duration : 134 Minutes

🔸ഹാരി പോട്ടർ ചിത്രങ്ങൾക്ക് ഒരു പരിചയപ്പെടുത്തലിന്റെ ആവശ്യം ഉണ്ടെന്ന് തോന്നുന്നില്ല, കാരണം എട്ട് ഭാഗങ്ങളായി പുറത്തിറങ്ങിയ സീരീസ് സിനിമ എന്നതിന് അപ്പുറം പലർക്കും ഒരു വികാരമായി മാറിയിരിക്കുന്നു. മികച്ച ആരാധക പിന്തുണ ഉള്ള കഥാപാത്രങ്ങളൊടൊപ്പം തന്നെ എട്ട് ഭാഗങ്ങൾ പുലർത്തിയ നിലവാരവും ശ്രദ്ധിക്കപ്പെടേണ്ടത് തന്നെയാണ്, അതിനാൽ തന്നെ ഹാരി പോട്ടറുടെ കഥയ്ക്ക് ദശാബ്ദങ്ങൾ മുന്നേ ഉള്ള മറ്റൊരു കഥയുമായി ജെ കെ റൗളിംഗും സംഘവും വീണ്ടും വരുന്നു എന്ന വാർത്ത ലോകത്താകമാനം ഉള്ള ആരാധകർ വലിയ പ്രതീക്ഷയോടെ ആണ് കേട്ടത്, ഈ പ്രതീക്ഷ തെറ്റിക്കാതെ 2016ൽ പുറത്തിറങ്ങിയ ബേധപ്പെട്ട ആദ്യ ഭാഗവും എല്ലാം ട്രാക്കിൽ ആണെന്ന പ്രതീതി ഊട്ടി ഉറപ്പിക്കുന്നതായിരുന്നു. രണ്ടാം ഭാഗം കുറച്ച് കൂടി വലിയ സ്കെയിലിൽ ചെയ്യാനാവണം ജൂഡ് ലോ, ജോണി ഡെപ്പ് തുടങ്ങിയ എ ലിസ്റ്റ് താരങ്ങളെയും കൂടാരത്തിൽ എത്തിക്കാൻ അണിയറ പ്രവർത്തകർക്ക് കഴിഞ്ഞു. എല്ലാം കൊണ്ടും പ്രതീക്ഷകൾ ഒരുപാട് ആയിരുന്നു ചിത്രത്തെ പറ്റി, റിലീസിന് തൊട്ട് മുന്നേവരെ. എന്തൊക്കെ ആയാലും ജോണി ഡെപ്പിന്റെ വില്ലൻ വേഷം, അതും ഹാരി പോട്ടർ യുണിവേഴ്സിൽ, എന്ത് തെറ്റ് സംഭവിക്കാനാണ് ?? അല്ലെ ??

🔸ചിത്രത്തെ കുറിച്ച് പറഞ്ഞ് തുടങ്ങുന്നത് ജോണി ഡെപ്പിൽ നിന്ന് തന്നെ ആരംഭിക്കാം, ആദ്യ ഭാഗത്തിൽ വളരെ ചെറിയ വേഷം ആയിരുന്നെങ്കിൽ കൂടിയും രണ്ടാം ഭാഗത്തിൽ മുഴുനീള സാന്നിധ്യം ആയിരിക്കും എന്ന ആരാധക വിശ്വാസമാണ് ചിത്രം ആദ്യം എറിഞ്ഞുടയ്ക്കുന്നത്. പ്രധാന വില്ലൻ എന്ന നിലയ്‌ക്കോ, എ ലിസ്റ്ററായ അഭിനേതാവ് എന്ന നിലയ്‌ക്കോ ആവശ്യമായ സ്ക്രീൻ ടൈം ഡെപ്പിന് ഇല്ല എന്ന് മാത്രമല്ല ഉള്ള സമയം കഥാപാത്രത്തെ എങ്ങിനെ ഉപയോഗിക്കണം എന്ന തിരിച്ചറിവ് സംവിധായകനും ഇല്ലാതെ പോയി. ജോണി ഡെപ്പ് അവതരിപ്പിച്ച ഗ്രൈൻഡൽവാദ് എന്ന കഥാപാത്രം തടവിൽ നിന്ന് രക്ഷപ്പെടുന്നതും, തുടർന്നുള്ള അയാളുടെ പദ്ധതികളും ഇത് നായകനായ ന്യുറ്റിനെയും അയാളുടെ സഹായികളെയും, ഡമ്പിൽഡോർ എന്ന ഹാരി പോട്ടർ സീരീസ് കഥാപാത്രത്തെയും മുഖാമുഖം കൊണ്ടുവരുന്നതും എല്ലാമാണ് ചിത്രത്തിന്റെ കഥ.

🔸ഒന്നാം ഭാഗത്ത് അരങ്ങേറിയ സംഭവങ്ങളെ ഏറെക്കുറെ ആദ്യ പതിനഞ്ച് മിനുട്ടിൽ തന്നെ തീർത്തും വിസ്മരിക്കുന്ന ചിത്രം, അവിടെ നിന്നങ്ങോട്ട് ആവശ്യത്തിൽ അധികമുള്ള സഹ കഥാപാത്രങ്ങളുടെയും ഒരാവശ്യവും ഇല്ലാത്തതെന്ന് തോന്നിപ്പിച്ച സബ് പ്ലോട്ടുകളുടെയും കൊട്ടി കലാശം ആയി മാറുന്നു. പരസ്പര ബന്ധം പുലർത്താത്തത് എന്ന പ്രതീതി ജനിപ്പിക്കുന്ന ആദ്യ അര മണിക്കൂറും എന്തിനെന്ന് മനസിലാവാത്ത ഒരു റൊമാന്റിക് സബ് പ്ലോട്ടും ചിത്രത്തെ നന്നായി പിറകോട്ട് വലിക്കുന്നുമുണ്ട്. ഒരുപാട് കഥാപാത്രങ്ങൾ ഉള്ളതിനാൽ തന്നെ ആവശ്യമായ, അർഹിക്കുന്ന പ്രാധാന്യം ഒരു കഥാപാത്രത്തിനും ലഭിച്ചിട്ടില്ല, ഇത് ഏറ്റവും അരോചകമായി തോന്നിയത് നായകൻ എന്ന് കരുതപ്പെടുന്ന ന്യുട്ടിന്റെ കാര്യത്തിലാണ്. ഏറെക്കുറെ സ്വന്തം ചിത്രത്തിൽ അതിഥി വേഷം കയ്യാളുന്ന അവസ്ഥ ആയിരുന്നു പുള്ളിയുടേത്.

🔸തുടക്കത്തിലേ ആകുലതകളും പിഴവുകളും അത്രത്തോളം ഇല്ലെങ്കിലും ക്ലൈമാക്സിലും കാണാം, പ്രത്യേകിച്ചും ഇന്നത്തെ ഹൈ ബഡ്‌ജറ്റ്‌ മൈൻസ്ട്രീം ചിത്രങ്ങളുടെ ആകർഷണീയതകളിൽ പ്രാധാന്യം അർഹിക്കുന്ന കാര്യങ്ങളിൽ ഒന്ന് ചിത്രത്തിന്റെ ക്ലൈമാക്സും സ്പെഷ്യൽ എഫക്ടുകളാൽ സമ്പന്നമായ അവസാനത്തെ വില്ലൻ നായക പോരാട്ടവും ആണെന്ന് കണക്കിലെടുക്കുമ്പോൾ ആ ഭാഗത്തും ഫന്റാസ്റ്റിക് ബീസ്റ്റ്സ് ശരാശരിയോ അതിൽ താഴെയോ ആണ്. അത്രയും നേരം പോയിക്കൊണ്ടിരുന്നു കഥയിൽ നിന്നും വിഭിന്നമായ ചെറിയൊരു മാറ്റം ക്ലൈമാക്സിൽ അരങ്ങേറുന്നത് അടുത്ത ഭാഗത്തിനുള്ള ചെറിയൊരു പ്രതീക്ഷ എങ്കിലും ബാക്കി വെക്കുന്നുണ്ട്. ഇങ്ങനെ ഒക്കെ ആണെങ്കിലും ഒരു തികഞ്ഞ പരാജയം ഒന്നുമല്ല ഈ ചിത്രം, അല്ലറ ചില്ലറ നല്ല വശങ്ങളും ചിത്രത്തിനുണ്ട്.

🔸നല്ല വശങ്ങളെ പറ്റി പറയുക ആണെങ്കിൽ ജൂഡ് ലോയുടെ ഡമ്പിൽഡോർ എന്ന കഥാപാത്രത്തെ കുറിച്ച് പറയാതെ പോവാനാവില്ല. രണ്ട് മണിക്കൂറിന് മുകളിൽ ദൈർഖ്യം ഉള്ള ചിത്രത്തിൽ വെറും പതിനഞ്ച് മിനുട്ടിനടുത്ത് മാത്രമേ സ്ക്രീൻ ടൈം ഉള്ളുവെങ്കിലും ആ രംഗങ്ങൾ അദ്ദേഹം അക്ഷരാർത്ഥത്തിൽ കയ്യടക്കി എന്ന് തന്നെ പറയേണ്ടി വരും, അടുത്ത ഭാഗങ്ങളിൽ ജൂഡ് ലോയുടെ പ്രാധാന്യം കൂട്ടുന്നത് ചിത്രത്തിന് ഏത് രീതിയിലും ഗുണം ചെയ്യുമെന്ന് സാരം. ഇതിനോടൊപ്പം തന്നെ ഹാരി പോട്ടർ ചിത്രങ്ങളുടെ സ്ഥിരം വിചിത്ര സ്വഭാവം ഈ ചിത്രവും ദോഷം വരുത്താതെ പിന്തുടരുന്നുണ്ട്, ആരാധകരെ തൃപ്തി പെടുത്താൻ എന്നവണ്ണം ചില സന്ദർഭങ്ങളും ലെഗസി കഥാപാത്രങ്ങളും വന്ന് പോവുന്നുണ്ട്, ഇതിനോടൊപ്പം ബേധപ്പെട്ട രീതിയിലുള്ള ഇരുപതാം നൂറ്റാണ്ടിന്റെ തുടക്കകാലത്തെ യൂറോപ്യൻ ചുറ്റുപാടുകളുടെ അവതരണവും ചിത്രത്തിന്റെ പ്ലസ് പോയിന്റുകളാണ്. ക്രൈംസ് ഓഫ് ഗ്രൈൻഡൽവാദ് എന്ന ചിത്രം ഒരു മുന്നറിയിപ്പാണ്, നൊസ്റ്റാൾജിയ മാത്രം അരച്ച് ചേർത്താൽ ചിത്രം നന്നാവില്ല എന്ന മുന്നറിയിപ്പ്, സീരീസിലെ മൂന്നാം ഭാഗം ജൂണിൽ ചിത്രീകരണം ആരംഭിക്കുമ്പോൾ ഈ മുന്നറിയിപ്പ് അണിയറ പ്രവർത്തകർ കാര്യമായി എടുക്കും എന്ന് പ്രത്യാശിക്കാം.

Verdict : Below Average

445. Bohemian Rhapsody (2018)

Director : Bryan Singer

Genre : Biography

Rating : 8.3/10

Country : USA

Duration : 134 Minutes

🔸ഫ്രഡ്‌ഢി മെർക്കുറി എന്ന പേര്  ഇന്ന് പലർക്കും അപരിചിതം ആവും, പ്രത്യേകിച്ചും മേൽ പറഞ്ഞ വ്യക്തിത്വം മണ്മറഞ്ഞ് പോയിട്ട് ഏകദേശം മൂന്ന് പതിറ്റാണ്ടോട് അടുക്കുമ്പോൾ അതും ഫ്രഡി കയ്യാളിയ റോക്ക് സംഗീതത്തിന്റെ സിംഹാസനത്തിന് വലിയ പ്രാധാന്യം ലഭിച്ചിട്ടില്ലാത്ത ഇന്ത്യ പോലെ ഒരു രാജ്യത്ത് അത് അസാധാരണവുമല്ല. അത് എന്ത് തന്നെ ആയാലും പാശ്ചാത്യ നാടുകളിലും റോക്ക് സംഗീത ചരിത്രത്തിലും തങ്ക ലിപികളാൽ രേഖപ്പെടുത്തിയ നാമമാണ് ഫ്രഡി മെർക്കുറിയുടേത്, ചില മേഖലകളിൽ ഇതിഹാസം എന്നൊക്കെ ചിലരെ വിശേഷിപ്പിക്കാറില്ലേ അതാണ് ഫ്രഡി മെർക്കുറി. ക്വീൻ എന്ന റോക്ക് ബാൻഡിന്റെയും, അവിടത്തെ ലീഡ് സിംഗർ ആയിരുന്ന ഫ്രഡിയുടെയും കഥയാണ് ബൊഹീമിയൻ റാപ്‌സോഡി. കുറച്ച് കൂടി വിശദീകരിക്കുക ആണെങ്കിൽ ഫാറൂഖ് ബുൾസാര എന്ന ഏഷ്യൻ വംശജനായ പാട്ടുകാരനിൽ നിന്നും ഫ്രഡി മെർക്കുറി എന്ന ഇതിഹാസത്തിലേക്കുള്ള യാത്രയും അവിടെ നിന്നുള്ള വീഴ്ചയും ആണ് ഈ ചിത്രം.

🔸രണ്ട് വർഷം മുന്നേ പ്രഖ്യാപിച്ച നാൾ മുതൽ ചിത്രം നേരിട്ട തിരിച്ചടികൾക്ക് യാതൊരു പഞ്ഞവും ഉണ്ടായിരുന്നില്ല, കഥ സംബന്ധിച്ച് ഫ്രഡിയുടെ അഭ്യുദയാകാംക്ഷികളും ആയുണ്ടായ തർക്കം, സംവിധായകനും സ്റ്റുഡിയോയും തമ്മിലുണ്ടായ അഭിപ്രായ വ്യത്യാസങ്ങൾ, ആദ്യ നായകനായ സാഷ ബറോണിന്റെ പകുതി വഴിക്കുള്ള പിന്മാറ്റം തുടങ്ങി ചിത്രത്തിൽ പ്രതീക്ഷ വെക്കാതിരിക്കാൻ കാരണങ്ങൾ അനവധി ആയിരുന്നു. എങ്കിലും റാമി മാലിക് എന്ന നടനിൽ വിശ്വാസം അർപ്പിച്ച് കൊണ്ട് മുന്നോട്ട് പോവാനുള്ള അണിയറ പ്രവർത്തകരോടുള്ള തീരുമാനവും, മികച്ച ട്രെയ്ലറും, എല്ലാത്തിനും ഉപരി ഫ്രഡി മെർക്കുറി എന്ന ഗായകനോടും, ബൊഹീമിയൻ റാപ്‌സോഡി എന്ന ഗാനത്തോടുമുള്ള ഇഷ്ടം തന്നെ കാത്തിരിക്കാനുള്ള കാരണങ്ങൾ ആയിരുന്നു.

🔸മേൽ പറഞ്ഞ ഔട്ട് ലൈനിൽ നിന്നും സ്പോയിലെർ ഒഴിവാക്കുക എന്ന ഉദ്ദേശം കാരണം കഥയിലേക്ക് ആഴത്തിൽ കടക്കാൻ താല്പര്യപ്പെടുന്നില്ല, എന്തിരുന്നാലും ചിത്രത്തിന്റെ നല്ല, ദോഷ വശങ്ങളെ ഉൾപ്പെടുത്താൻ ശ്രമിക്കുകയാണ്. മോശമെന്ന് അനുഭവപ്പെടുന്ന കാര്യങ്ങളിലേക്ക് കടക്കുക ആണെങ്കിൽ ഒരു ശരാശരി ബയോപിക് ചിത്രം പാലിക്കാറുള്ള തെറ്റുകൾ ബൊഹീമിയൻ റാപ്‌സോടിയും പിന്തുടർന്നു എന്ന് പറയേണ്ടി വരും. സെലിബ്രിറ്റി ആയ നായകന്റെ ജീവിതത്തിലെ മൈൽസ്റ്റോൺ സംഭവങ്ങൾ എല്ലാം പകർത്തണം എന്ന ഉദ്ദേശം പാലിക്കും പോലെ ഒന്നിൽ നിന്നും അടുത്തത്തിലേക്കുള്ള ഓട്ടം തന്നെ ആയിരുന്നു ചിത്രം, അത് വഴി ഫാറൂഖ് ബുൾസാര എന്ന വ്യക്തിയിൽ നിന്നും ഫ്രഡി മെർക്കുറിയിലേക്കുള്ള പരിണാമത്തിന് വേണ്ട പ്രാധാന്യം ചിത്രം ഒരിടത്തും നൽകിയതായി അനുഭവപ്പെട്ടില്ല. നിയമങ്ങൾക്ക് വിധേയപ്പെടാതെ മാറി നടന്നിരുന്ന വ്യക്തിത്വത്തിന്റെ സിനിമ ഈ സ്ഥിരം ബയോപിക് ശൈലി പിന്തുടർന്നത് ഒരു പരിധി വരെ അരോചകം തന്നെ ആയിരുന്നു.

🔸ഫ്രഡി മെർക്കുറി എന്ന വ്യക്തിയെയും, അയാളുടെ സംഗീതത്തെയും പോലെ തന്നെ ആഘോഷിക്കപ്പെട്ട ഒന്നാണ് ടിയാന്റെ ലൈംഗിക ജീവിതവും ബന്ധങ്ങളും. ഒരുപരിധി വരെ ഫ്രഡിയുടെ യഥാർത്ഥ ജീവിതത്തിലെ വീഴ്ചയ്ക്ക് തന്നെ കാരണമായ ലൈംഗിക വിഷയങ്ങൾക്ക് ചിത്രം വലിയ പ്രാധാന്യം നൽകുന്നില്ല എന്നതും പോരായ്മ ആയി തോന്നി. വ്യക്തി ജീവിതത്തേക്കാൾ സെലിബ്രിറ്റി ലൈഫിന് പ്രാധാന്യം നൽകിയതായി പറയാമെങ്കിലും ഒരു വൈഡർ ഓടിയെൻസിനെ ലക്ഷ്യം വെച്ച സ്റ്റുഡിയോ തീരുമാനവും ആവാം കാരണം. സിനിമയുടെ ചെറിയ ബഡ്ജറ്റും പല ഇടങ്ങളിൽ പോരായ്മ ആയി മാറി, പ്രത്യേകിച്ചും സ്പെഷ്യൽ എഫക്ടുകളുടെ കാര്യത്തിൽ. ഇനി നല്ല വശങ്ങളിലേക്ക് കടക്കുക ആണെങ്കിൽ ആദ്യം പറയേണ്ടത് റാമി മാലിക്കിനെ കുറിച്ചാണ്, ഫ്രഡി മെർക്കുറി എന്ന അത്യാവശ്യം കിറുക്കുള്ള ഒരു കഥാപാത്രത്തെ വൈബ്രന്റ് ആയ പ്രകടനത്തിലൂടെ അക്ഷരാർത്ഥത്തിൽ തകർത്തിട്ടുണ്ട് റാമി മാലിക്.

🔸ക്വീൻ എന്ന ബാൻഡിന്റെ ലെഗസിക്കും, മെർക്കുറിയുടെ കഴിവുകൾക്കും ഗാനങ്ങൾക്കും ചിത്രം ആവശ്യത്തിന് പ്രാധാന്യം നൽകുന്നുണ്ട് എന്നതും പ്ലസ് പോയിന്റ് തന്നെ, ബൊഹീമിയൻ റാപ്‌സോഡി ഫ്രഡിയുടെ ചിത്രം എന്നതിനോടൊപ്പം തന്നെ ക്വീൻ എന്ന ബാൻഡിന്റെയും ചിത്രമാണ്. ചിത്രത്തിന്റെ ടൈറ്റിൽ ആയ ഫ്രഡി മെർക്കുറിക്ക് ഇതിഹാസ പരിവേഷം സമ്മാനിച്ച ബൊഹീമിയൻ റാപ്‌സോഡി എന്ന ഗാനത്തിനും നല്ല പ്രാധാന്യം ചിത്രം നൽകിയിട്ടുണ്ട്, അത് അർഹിക്കുന്നുമുണ്ട്. ചിത്രത്തെ കുറിച്ച് എടുത്ത് പറയേണ്ട മറ്റൊരു വസ്തുത അവസാന ഇരുപത്തഞ്ച് മിനിറ്റ് ആണ്, കൂടുതൽ പറയുന്നില്ലെങ്കിലും ഇമോഷണൽ എന്ന വാക്കിൽ പറഞ്ഞ് ഒതുക്കാനാവില്ല ഈ ഭാഗങ്ങളെ. ഒരു മികച്ച ചിത്രം ഒന്നുമല്ല ബൊഹീമിയൻ റാപ്‌സോഡി, ഫ്രഡി മെർക്കുറി എന്ന വ്യക്തിയുടെ ജീവിതത്തെ, ലെഗസിയെ, സംഗീതത്തെ ആഘോഷിക്കലാണ് ചിത്രം ലക്ഷ്യമിട്ടത് എന്ന് തോന്നുന്നു, അതിൽ ഏറെക്കുറെ വിജയിച്ചിട്ടുമുണ്ട്.

Verdict : Good

444. In The Heat Of The Sun (1994)

Director : Jiang Wen

Genre : Action

Rating : 8.3/10

Country : China

Duration : 134 Minutes

🔸ലോകത്തിലെ ഏത് ഒരു മനുഷ്യനും പറയാൻ കഴിയുന്ന, മറ്റുള്ളവരിൽ നിന്നും തികച്ചും വ്യത്യസ്തമായ ഒരു കഥ സ്വന്തം ആത്മകഥ ആണെന്ന് പൊതുവെ പറയാറുണ്ട്. എന്നാൽ ഈ കഥ പറച്ചിലിന് ഒരു ചെറിയ പ്രശനം ഉണ്ട്, ഒരു കഥ അത് എത്രത്തോളം സത്യസന്ധമായി പറയാൻ ശ്രമിച്ചാലും ഒരിക്കലും അത് യഥാർത്ഥ സംഭവങ്ങളോട് നീതി പുലർത്തില്ല കാരണം ആ കഥ പറയുന്നത് ഒരു വ്യക്തി ആണ്, മറ്റുള്ളവർ കേൾക്കുന്നത് യഥാർത്ഥത്തിൽ സംഭവിച്ച കാര്യങ്ങളുടെ ഒരു പതിപ്പ് മാത്രമാണ്. ഇനി പറയാൻ പോവുന്ന കഥ സ്വന്തം കഥയാണെങ്കിലോ, ഒരല്പം ഹീറോയിസവും മാസ്സും ഒക്കെ ചേർത്ത് സ്വന്തം കഥാപാത്രത്തെ ഒട്ടും മോശമാക്കാതെ എല്ലാ രീതിയിലും മറ്റുള്ളവർക്ക് മുകളിൽ പ്രതിഷ്ഠിക്കുന്ന ഒരു പുതിയ വേർഷൻ കഥ ആവും ഉരുത്തിരിഞ്ഞ് വരുന്നത്, അതൊക്കെ എന്ത് തന്നെ ആയാലും സത്യം അല്ലെങ്കിൽ യാഥാർഥ്യം ഭൂത കാലത്തോടൊപ്പം മറഞ്ഞ് പോവുകയാണ്, പിന്നീട് കേൾക്കുന്നതെല്ലാം വെള്ളം ചേർക്കലുകളാണ്.

🔸ഇൻ ദി ഹീറ്റ് ഓഫ് ദി സൺ എന്ന ഈ ചൈനീസ് ചിത്രത്തിൽ പ്രേക്ഷകരോട് കഥ പറയാൻ എത്തുന്നത് കേന്ദ്ര കഥാപാത്രം തന്നെയാണ്, എന്നാൽ ടിയാന് തന്റെ കഥ എത്രത്തോളം സത്യസന്ധമായി പറയാൻ കഴിയും എന്ന കാര്യത്തിൽ ഒരു ഉറപ്പും ഇല്ല, അതിനുള്ള ജാമ്യം ആദ്യ കുറച്ച് സംഭാഷണങ്ങളിൽ കൂടി തന്നെ അദ്ദേഹം എടുക്കുന്നുമുണ്ട്. "ബീജിംഗ് ഒരുപാട് മാറി പോയിരിക്കുന്നു, കഴിഞ്ഞു പോയ വർഷങ്ങൾ നാടിനും നാട്ടാർക്കും വരുത്തിയ മാറ്റങ്ങൾ വളരെ വലുതാണ്, ഈ മാറ്റങ്ങൾ കാണുമ്പോൾ ഒരുവേള ഞാൻ ഭാഗമായ ഇനി പറയാൻ പോവുന്ന സംഭവങ്ങൾ യഥാർത്ഥത്തിൽ സംഭവിച്ചതാണോ എന്ന് പോലും എനിക്ക് സംശയം തോന്നുന്നു, യാഥാർത്യമേത് സ്വപ്നമേത് എന്ന് തിരിച്ചറിയാനുള്ള കഴിവ് എനിക്ക് നഷ്ട്ടപ്പെട്ടു എന്ന് തോന്നുന്നു...." ഈ വരികളോട് കൂടിയാണ് ചിത്രം ആരംഭിക്കുന്നത്.

🔸കഴിഞ്ഞ നൂറ്റാണ്ടിന്റെ മധ്യകാലത്തെ ചൈന ആണ് കഥാ പശ്ചാത്തലം, മാവോ സെയ്തുങ്ങിന്റെ സാംസ്‌കാരിക വിപ്ലവം രാജ്യത്താകമാനം പടർന്ന് കേറിക്കൊണ്ടിരിക്കുന്ന സമയം. മുതിർന്നവരെല്ലാം രാജ്യത്തിൻറെ ഉന്നമനത്തിനായി അഹോരാത്രം പ്രവർത്തിക്കുകയാണ്, ബീജിംഗ് നഗരവും തെരുവുകളും പൂർണമായും കുട്ടികളുടെ കയ്യിലാണ്. ഈ യുവജനങ്ങളിൽ ഒരാളാണ് കഥാനായകനായ മാ ക്സിയോജുൻ അഥവാ മങ്കി. രാജ്യസ്നേഹം ഒരല്പം തലയ്ക്ക് പിടിച്ചവനാണ് മങ്കി, മാവോ ആണ് അവന്റെ ദൈവം, രാജ്യ സംരക്ഷണം ആണ് അവന്റെ സ്വപ്നം. സ്വന്തം രാജ്യത്തോടുള്ള അടങ്ങാത്ത കൂറ് കൊണ്ടാവണം ഒരു മൂന്നാം ലോക മഹായുദ്ധം പൊട്ടി പുറപ്പെടും എന്നും ചൈന ലോകത്തിലെ ഏറ്റവും വലിയ ശക്തി ആയി ഉയരും എന്നുമൊക്കെ അവൻ പ്രതീക്ഷിക്കുന്നുണ്ട്.

🔸തന്റെ പ്രായത്തിനും സ്വഭാവത്തിനും ചേർന്ന ചെറിയൊരു വാനര പടയുമുണ്ട് മങ്കിക്ക്, സ്‌കൂൾ കാലം തൊട്ടേയുള്ള ഈ സൗഹൃദത്തിന്റെ ലക്‌ഷ്യം പൊതുവെ പെൺകുട്ടികളെ വരുതിയിലാക്കുക, മറ്റുള്ള ചെറുകിട ഗ്യാങ്ങുകളുമായി തല്ലുണ്ടാക്കുക തുടങ്ങിയ കലാ പരിപാടികളാണ്. ഈ തല്ലും, തിരിച്ച് തല്ലും ഒക്കെ ആയി ജീവിച്ച് പോന്ന ഈ സംഘത്തിന്റെ കഥയാണ് സാംസ്‌കാരിക വിപ്ലവത്തിൽ ഊന്നിക്കൊണ്ടിരുന്ന ചൈനയുടെ പശ്ചാത്തലത്തിൽ ചിത്രം പറയുന്നത്. ഇതിന് പുറമെ തന്നെക്കാൾ പ്രായമുള്ള ഒരു യുവതിയോട് മങ്കിക്ക് തോന്നുന്ന ഇഷ്ടവും, അവന്റെ അച്ഛനമ്മമാരും എല്ലാം കഥയുടെ നിർണ്ണായക ഭാഗങ്ങളായി വന്ന് പോവുന്നുണ്ട്. ചൈനയിൽ ജനിച്ച് വളർന്ന സംവിധായകന്റെ ആത്മകഥയുടെ അംശങ്ങൾ കൂടിയുണ്ട് ചിത്രത്തിൽ.

🔸രണ്ട് മണിക്കൂറിന് മുകളിൽ ദൈർഖ്യം ഉള്ള ചിത്രം ആദ്യ പകുതിയിൽ വലിയ ചലനങ്ങൾ ഒന്നും സൃഷ്ടിക്കുന്നതായി തോന്നിയില്ലെങ്കിലും രണ്ടാം പകുതി, പ്രത്യേകിച്ചും അവസാന മുപ്പത് മിനിറ്റ് ഒരു പ്രത്യേക അനുഭവം തന്നെ ആയിരുന്നു. ശക്തമായ കഥയും അതി ശക്തമായ പ്രകടനങ്ങളും തന്നെയാണ് ഇൻ ദി ഹീറ്റ് ഓഫ് ദി സണ്ണിന്റെ നട്ടെല്ല്, ഏറെക്കുറെ പൂർണമായും നവാഗതരായ ടീനേജ് നടീ നടന്മാരെ ഉൾപ്പെടുത്തി വന്ന ചിത്രം സംവിധായകന്റെ അരങ്ങേറ്റ ചിത്രം ആണെന്ന് പറഞ്ഞാൽ ഒരു പരിധി വരെ വിശ്വസിക്കാൻ പാടാണ്. ഒരു തരം കുരുക്ക് ആണ് ഈ ചിത്രത്തിലൂടെ കാഴ്ചക്കാരന് വേണ്ടി സംവിധായകൻ ഒരുക്കി വെച്ചിരിക്കുന്നത്, അതിലേക്ക് കടക്കുന്നത് സ്പോയിലെർ ആവും എന്നതിനാൽ ഒഴിവാക്കുന്നു. ചൈനയ്ക്ക് പുറത്തേക്ക് വലിയ പ്രസിദ്ധി കിട്ടാതെ പോയ മികച്ചൊരു ചിത്രം തന്നെയാണ് ഇൻ ദി ഹീറ്റ് ഓഫ് ദി സൺ, കാണാത്തവർക്ക് വേണ്ടി തീർച്ചയായും ശുപാർശ ചെയ്യുന്നു.

"Change has wiped out my memories. I can't tell what's imagined from what's real"

Verdict : Must Watch

443. 1987 When The Day Comes (2017)

Director : Jang Joon Hwan

Genre : Thriller

Rating : 7.8/10

Country : South Korea

Duration : 129 Minutes

🔸ഷാജി എൻ കരുൺ സംവിധാനം ചെയ്ത് പ്രേംജി പ്രധാന കഥാപാത്രത്തെ അവതരിപ്പിച്ച് മൂന്ന് പതിറ്റാണ്ടോളം മുന്നേ മലയാളത്തിൽ പുറത്തിറങ്ങിയ ചിത്രമാണ് പിറവി. ദേശീയ അന്തർദേശീയ ഫെസ്റ്റുകളിലും മറ്റും മികച്ച പ്രതികരണം കരസ്ഥമാക്കിയ പിറവി മലയാളത്തിലെ ലാൻഡ്മാർക്ക് ചിത്രങ്ങളിൽ ഒന്നായാണ് പൊതുവെ വിലയിരുത്തപ്പെടുന്നത്. അടിയന്തരാവസ്ഥ കാലത്ത് കേരളത്തിൽ കോളിളക്കം സൃഷ്ട്ടിച്ച രാജൻ കേസ് ആണ് ചിത്രത്തിന്റെ പ്രമേയം. എഴുപതുകളിൽ പോലീസ് അറസ്റ്റ് ചെയ്യുകയും പിന്നീട് ഒരു സൂചന പോലും ബാക്കി വെക്കാതെ അപ്രത്യക്ഷൻ ആവുകയും ചെയ്ത രാജന്റെയും, മകന്റെ കാര്യത്തിൽ നീതിക്ക് വേണ്ടി ജീവിതം ഉഴിഞ്ഞ് വെച്ച ഈച്ചര വാര്യർ എന്ന വ്യക്തിയുടെയും കഥയാണ് പിറവി എന്ന ചിത്രം പറഞ്ഞത്, കാണാത്തവർ ഉണ്ടെങ്കിൽ കാണാൻ ശ്രമിക്കുക കാരണം തീർച്ചയായും മികച്ചൊരു ചിത്രം തന്നെയാണ് പിറവി.

🔸കഴിഞ്ഞ വർഷം പുറത്തിറങ്ങിയ 1987 വെൻ ദി ഡേ കംസ് എന്ന ചിത്രത്തെ കുറിച്ചുള്ള എഴുത്തിൽ പിറവി എന്ന മലയാള ചിത്രത്തിനുള്ള കാര്യം എന്ത് എന്ന ചിന്ത സ്വാഭാവികമായും ഉടലെടുക്കും, എന്നാൽ ഈ രണ്ട് സിനിമകൾ തമ്മിലും സാമ്യതകൾ അനവധിയാണ്. ഭീകരമായ സത്യം മൂടി വെക്കാനുള്ള ഭരണകൂടത്തിന്റെ ശ്രമങ്ങളാണ് രണ്ട് സിനിമകളും പറയുന്നത്. ഏകാധിപത്യ സമാനമായ ഭരണം അരങ്ങേറുന്ന എൺപതുകളുടെ അവസാന കാലഘട്ടത്തിലെ കൊറിയ ആണ് കഥാ പശ്ചാത്തലം. ദുരിത പൂർണമായ ഭരണം ജനങ്ങൾക്ക് മടുത്ത് തുടങ്ങിയിരിക്കുന്നു, ഭരണ മാറ്റത്തിന് വേണ്ടിയുള്ള അലയൊലികൾ രാജ്യത്തിൻറെ പല ഭാഗങ്ങളിലും ഉയർന്ന് തുടങ്ങിയത് നേതൃത്വത്തിൽ ഇരിക്കുന്നവരെ തെല്ലൊന്നുമല്ല അലോസരപ്പെടുത്തുന്നത്.

🔸എതിരെ ഉയരുന്ന ശബ്ദങ്ങൾ ഒഴിവാക്കാനായി ഏതൊരു ഏകാധിപതിയും എല്ലാ കാലത്തും പിന്തുടരാറുള്ള അടിച്ചമർത്തലിന്റെ രാഷ്ട്രീയം ഇവിടെയും പിറവി എടുക്കുകയാണ്, തങ്ങൾക്കെതിരെ ഉയരുന്ന എതിർപ്പുകൾ നിഷ്കരുണം തള്ളിക്കളയാനായി നിയമത്തെയും, നിയമ വ്യവസ്ഥിതിയെയും, നിയമ പാലകരെയും അധികാരികൾ ഉപയോഗിക്കുകയാണ്. രാജ്യത്താകമാനം ഉള്ള വിദ്യാർത്ഥി പ്രക്ഷോഭ നേതാക്കളെ തുറുങ്കിൽ അടയ്ക്കാനും അവരെ തങ്ങളുടെ വഴിയിലേക്ക് എത്തിക്കാനായി ശാരീരിക പീഡനത്തിന്റെ വഴി പിന്തുടരാനും ഇവർ തയ്യാറാവുന്നു, എന്നാൽ ഇത് ഒരല്പം കൈ വിട്ട് പോവുകയാണ്, പ്രമുഖ വിദ്യാർത്ഥി നേതാവായ പാർക്ക് യോങ് പോലീസ് കസ്റ്റഡിയിൽ വെച്ച് കൊല്ലപ്പെടുന്നത് പദ്ധതികൾ എല്ലാം തകിടം മറിക്കുകയാണ്.

🔸ഭരണ ചരിത്രത്തിൽ തന്നെ ജന പിന്തുണ ഏറ്റവും കുറഞ്ഞിരിക്കുന്ന ഈ കാലഘട്ടത്തിൽ ഇത് പോലൊരു സംഭവം ജനങ്ങളിൽ എത്തിയാൽ, മാധ്യമങ്ങൾ ആഘോഷിച്ചാൽ അത് സർക്കാരിന് എത്രത്തോളം ദോഷം ചെയ്യും എന്ന കാര്യം ചിന്തിക്കാൻ പോലും കഴിയില്ല. അതിനാൽ തന്നെ ഏത് വിധേനയും ഇരു ചെവി അറിയാതെ സംഭവം ഒതുക്കി തീർക്കാനുള്ള ശ്രമത്തിലാണ് പ്രെസിഡന്റിന്റെ ഓഫിസ് മുതലുള്ള സകല അധികാര കേന്ദ്രങ്ങളും. എന്നാൽ മരണാപത്രത്തിൽ ഒപ്പിടേണ്ട പ്രോസിക്യുട്ടർക്ക് തോന്നിയ ചെറിയ സംശയം, ആരും ശ്രദ്ധിക്കാതെ പോയ ചെറിയൊരു പിഴവ് കളി ആകെ മാറ്റുകയാണ്, തുടർന്ന് അരങ്ങേറുന്ന സംഭവങ്ങൾ സിനിമ കണ്ട് തന്നെ അറിയുക. കഥ അധികം പറഞ്ഞ് പോയി എന്ന പേടിയും വേണ്ട ചിത്രത്തിലെ ആദ്യ പത്ത് മിനിറ്റ് മാത്രമേ പോസ്റ്റിൽ ചേർത്തിട്ടുള്ളൂ.

🔸യഥാർത്ഥ സംഭവങ്ങളാണ് ചിത്രം കഥയ്ക്ക് ആധാരമാക്കിയിട്ടുള്ളത്, എന്ന് മാത്രമല്ല ഏറെക്കുറെ വെള്ളം ചേർക്കലുകൾ ഒന്നും നടത്താതെ യാഥാർഥ്യം അത് പോലെ തന്നെയാണ് ചിത്രം അവതരിപ്പിച്ചിട്ടുള്ളത് എന്നും അറിയാനിടയായി. ഒരു കഥാപാത്രത്തിലും, ആ കഥാപാത്രം ഉൾപ്പെട്ടിരിക്കുന്ന സംഭവങ്ങളിലും മാത്രമായി ഒതുങ്ങാതെ പരസ്പര ബന്ധിതമായ അനവധി തലങ്ങളിലേക്ക് ചിത്രം കടന്ന് ചെല്ലുന്നുണ്ട്, അതിലേക്ക് കൂടുതൽ പറഞ്ഞ് പോയി ഭംഗി കളയുന്നില്ല. ടെക്ക്നിക്കൽ വശങ്ങളിൽ വരെ മികച്ച നിലവാരം പുലർത്തിയ ചിത്രത്തിലെ കാസ്റ്റിംഗും മികച്ചതാണ്, കൊറിയൻ സിനിമയിൽ കഴിവുള്ള ഒരുപറ്റം നടന്മാരെ ചിത്രത്തിൽ കാണാനാവും. ചുരുക്കി പറയുക ആണെങ്കിൽ ത്രില്ലറുകൾക്ക് പേര് കേട്ട കൊറിയയിൽ നിന്നും മികച്ച, സംപ്ത്രിപ്തി പകരുന്ന ഒരു ചിത്രം കൂടി എത്തുകയാണ് 1987 വെൻ ദി ഡേ കംസിന്റെ രൂപത്തിൽ.

Verdict : Very Good

442. Outlaw King (2018)

Director : David Mackenzie

Genre : Historical

Rating : 7.1/10

Country : UK

Duration : 121 Minutes

🔸റോബർട്ട് ദി ബ്രൂസ് എന്ന വ്യക്തിയെ കുറിച്ചുള്ള അറിവുകൾ വളരെ പരിമിതം ആയിരുന്നു, ഔട്ട്ലോ കിംഗ് എന്ന ക്രിസ് പൈൻ ചിത്രം കാണുന്നത് വരെ. പതിനാലാം നൂറ്റാണ്ടിൽ സ്കോട്ലൻഡ് ഭരിച്ചിരുന്ന രാജാവായിരുന്നു പുള്ളി എന്നും, ബ്രിട്ടീഷ് സേനയ്‌ക്കെതിരെ സ്വന്തം ജനങ്ങളെ സംരക്ഷിക്കാനായി ഗറില്ലാ യുദ്ധത്തിന് ഇറങ്ങി തിരിച്ച നമ്മുടെ പഴശ്ശി രാജയെ പോലെയുള്ള വ്യക്തി ആയിരുന്നു എന്ന് മാത്രമേ അറിയാമായിരുന്നുള്ളൂ. ചിത്രീകരണത്തിൽ ഇരിക്കെ തന്നെ ഓസ്കാർ സാധ്യത ഉള്ള ചിത്രം എന്നൊക്കെ ഉള്ള അഭിപ്രായങ്ങൾ പല കോണുകളിൽ നിന്നും കേട്ടതിനാലും നെറ്റ്ഫ്ലിക്സ് വഴി നേരിട്ടുള്ള റിലീസ് ആണെന്നതിനാലും ഒരു പരിധി വരെ ഔട്ട്ലോ കിങ്ങിന് വേണ്ടി ഉള്ള കാത്തിരിപ്പിൽ തന്നെ ആയിരുന്നു, എന്നാൽ മേൽ സൂചിപ്പിച്ച അഭിപ്രായങ്ങളെ ചിത്രം എത്രത്തോളം സാധൂകരിക്കുന്നുണ്ട് എന്നത് പരിശോധിക്കേണ്ടി ഇരിക്കുന്നു.

🔸ചിത്രത്തെ കുറിച്ച് ആദ്യമേ തന്നെ പറയേണ്ടത് പല ഫെസ്റ്റുകളിലും പ്രദർശിപ്പിച്ച് ഭിന്ന അഭിപ്രായങ്ങൾ കരസ്ഥമാക്കിയ ദൈർഖ്യമേറിയ പ്രിന്റ് അല്ല ഇപ്പോൾ കാഴ്ചക്കാരന് മുന്നിൽ എത്തിയിരിക്കുന്നത് എന്നതാണ്, രണ്ടര മണിക്കൂറോളം ദൈർഖ്യം ഉണ്ടായിരുന്ന ചിത്രം പല നിരൂപകരിൽ നിന്നും നേരിട്ട വിമർശനങ്ങൾ കാരണം വെട്ടി ചുരുക്കി രണ്ട് മണിക്കൂറിൽ ഒതുക്കിയാണ് റിലീസ് ചെയ്യപ്പെട്ടിരിക്കുന്നത്. പ്രധാന കഥാപാത്രം ഉൾപ്പെട്ട ഒരു യുദ്ധ രംഗവും, വില്യം വാലസ് എന്ന മറ്റൊരു ഐതിഹാസിക കഥാപാത്രത്തിന്റെ ഗസ്റ്റ് അപ്പീറൻസും എല്ലാം എഡിറ്റിങ് ടേബിളിൽ കളഞ്ഞിട്ടുണ്ട് എന്നതാണ് അറിയാൻ കഴിഞ്ഞത്, ഇത് കൊണ്ട് ചിത്രത്തിന് എന്ത് ഗുണം എന്നാണ് ചോദ്യമെങ്കിൽ രണ്ട് മണിക്കൂറിൽ ഒഴുക്ക് നഷ്ടപ്പെടാത്ത രീതിയിൽ ശക്തമായി മുന്നേറുന്ന ഒരു ചിത്രമായി ഔട്ട്ലോ കിംഗ് മാറി എന്നതാവും (മുൻപുള്ള വേർഷനെ കുറിച്ച് കൂടുതൽ അറിവില്ല).

🔸ബ്രിട്ടീഷ് രാജാവിന് കീഴിൽ ഐക്യം പ്രഖ്യാപിക്കേണ്ടി വന്ന റോബർട്ട് ദി ബ്രൂസ് എന്ന രാജാവിന് പല കാരണങ്ങളാൽ തന്റെ തീരുമാനത്തിൽ പശ്ചാത്താപം ഉണ്ടാവുകയും അത് സ്വാഭാവികമായും ഇരു വിഭാഗങ്ങൾക്കും ഇടയിൽ യുദ്ധമായി പരിണമിക്കുന്നതും എല്ലാമാണ് ഔട്ട്ലോ കിംഗ് എന്ന ചിത്രം പറയുന്ന കഥ. ചിത്രത്തിൽ മോശമായി തോന്നിയ വസ്തുതകളിലേക്ക് കടക്കുകയാണെങ്കിൽ ആദ്യമേ തന്നെ പറയേണ്ടത് സിനിമയുടെ കഥ തന്നെയാണ്. ഒരു ചരിത്ര സിനിമ എന്ന വസ്തുതയും മേൽ സൂചിപ്പിച്ച കഥാഗതിയും പരിഗണിക്കുമ്പോൾ ഏറെക്കുറെ നമ്മൾ പ്രതീക്ഷിക്കുന്ന വഴി എന്താണോ അതിലൂടെ ഒക്കെ തന്നെയാണ് ഔട്ട്ലോ കിംഗ് എന്ന ചിത്രവും മുന്നേറുന്നത്, യഥാർത്ഥ സംഭവങ്ങൾ ആധാരമാക്കി വന്ന സിനിമ ആയതിനാൽ കുറ്റം പറയാനും ഒരു പരിധി വരെ കഴിയില്ല എന്നത് മറ്റൊരു കാര്യം, ഇതിനോടൊപ്പം തന്നെ ഒരു സീനിൽ നിന്ന് മറ്റേതിലേക്കുള്ള പെട്ടെന്നുള്ള മാറ്റവും ഒരു കുറവായി തോന്നിയേക്കാം (രണ്ട് മണിക്കൂറിൽ പറഞ്ഞ് തീർക്കാനുള്ള ശ്രമം കൊണ്ടാവാം).

🔸ഈ മോശം എന്ന് തോന്നിയ (എതിരഭിപ്രായങ്ങൾ ഉണ്ടാവാം) കാര്യ കാരണങ്ങൾ മാറ്റി നിർത്തിയാൽ ഔട്ടലോ കിംഗ് നല്ലൊരു ചിത്രം തന്നെയാണ്, എന്തിരുന്നാലും മുൻപേ സൂചിപ്പിച്ച ഓസ്കാർ പകിട്ട് വ്യക്തിപരമായി പ്രതീക്ഷിക്കുന്നില്ല ഈ ചിത്രത്തിന്. നല്ല വശങ്ങളിലേക്ക് കടക്കുക ആണെങ്കിൽ ആദ്യം തന്നെ പറയേണ്ടത് ക്രിസ് പൈൻ എന്ന നടനെ പറ്റിയാണ്, സ്റ്റാർ ട്രെക്ക്, അൺസ്റ്റോപ്പബിൽ എന്നീ ചിത്രങ്ങളിൽ കണ്ട നടനെ ഇവിടെ കാണാനാവില്ല, പകരം റോബർട്ട് ദി ബ്രൂസ് എന്ന കഥാപാത്രം മാത്രം, തന്റെ കഴിവിനെ സംശയിച്ചവർക്കുള്ള മറുപടി ഒരു പരിധി വരെ അദ്ദേഹം ഈ ചിത്രത്തിലൂടെ നൽകുന്നുണ്ട്. ഒരു ഡയറക്റ്റ് നെറ്ഫ്ലിക്സ് റിലീസ് ആയിട്ടും, പൊതുവെ ലോ ബഡ്‌ജറ്റ്‌ ആയിരുന്നിട്ടും യുദ്ധ രംഗങ്ങളിൽ ചിത്രം പുലർത്തിയ നിലവാരവും എടുത്ത് പറയേണ്ടി ഇരിക്കുന്നു.

🔸ബ്രിട്ടീഷ് സ്‌കോട്ടിഷ് താഴ്വരകളുടെ മനോഹാരിത നല്ല രീതിയിൽ തന്നെ പകർത്തിയ മികച്ച സിനിമാറ്റോഗ്രാഫിയും ചിത്രത്തിന്റെ പ്ലസ് പോയിന്റ് ആണ്, ബാരി ഏക്കറോയ്ഡ് എന്ന പേര് ടൈറ്റിൽ കാർഡിൽ ഉള്ളതിനാൽ തന്നെ അതിൽ വലിയ അത്ഭുതവുമില്ല. ആദ്യ സീൻ മുതൽക്കേ തന്നെ അദ്ദേഹത്തിന്റെ കയ്യൊപ്പ് ചിത്രത്തിൽ നന്നായി പതിഞ്ഞിട്ടുണ്ട്. കേന്ദ്ര കഥാപാത്രത്തോടൊപ്പം തന്നെ പ്രശംസ അർഹിക്കുന്ന മറ്റ് കഥാപാത്രങ്ങളും ഉണ്ട് ചിത്രത്തിൽ, പ്രത്യേകിച്ചും ആരോൺ ജോഹാൻസണിന്റെയും ബില്ലി ഹോളിന്റെയും കഥാപാത്രങ്ങൾ. ഇവയെല്ലാം ചിത്രത്തിന് ഗുണം ചെയ്തിട്ടേ ഉള്ളൂ. മികച്ച ചിത്രം അല്ലെങ്കിൽ മികച്ച ചിത്രങ്ങളിൽ ഒന്ന് എന്ന അവകാശ വാദങ്ങൾ ഒന്നുമില്ല, ഒരു തവണ കണ്ട് ഒഴിവാക്കാവുന്ന ചരിത്ര പ്രാധാന്യമുള്ള സിനിമ അതാണ് ഔട്ട്ലോ കിംഗ്.

Verdict : Good

441. The Haunting Of Hill House (2018)

Creator : Mike Flanagan

Genre : Horror

Rating : 8.9/10

Season : 1

Episode : 10

Country : USA

Duration : 42 - 70 Minutes Per Episode

🔸ദി ഹൊന്റിങ് ഓഫ് ഹിൽ ഹൌസ് എന്ന ടിവി സീരീസിലെ ആദ്യ എപ്പിസോഡിൽ ഒരു ഉഗ്രൻ രംഗം ഉണ്ട്, ഒരു കഥാപാത്രം തന്റെ മകനെയും കൊണ്ട് വീട്ടിൽ നിന്ന് രക്ഷപ്പെടാൻ ശ്രമിക്കുന്ന രംഗം. ഭയം അയാളുടെ മുഖത്ത് നിന്നും വായിച്ചെടുക്കാം, അയാളുടെ മകന്റെ മുഖത്ത് ഒരായിരം ചോദ്യങ്ങൾ ഉണ്ട്, അവയ്‌ക്കെല്ലാം ഉത്തരങ്ങൾ നല്കാൻ അയാൾക്ക് കഴിഞ്ഞെന്ന് വരില്ല കാരണം തന്റെ ചുറ്റിനും അരങ്ങേറുന്നത് എന്തൊക്കെ ആണെന്നുള്ള തിരിച്ചറിവ് അയാൾക്ക് നഷ്ട്ടപ്പെട്ട് കഴിഞ്ഞിരുന്നു. അല്ലെങ്കിലും ഈ നിമിഷം പ്രാധാന്യം കൊടുക്കേണ്ടത് ചോദ്യങ്ങൾക്കോ ഉത്തരങ്ങൾക്കോ ഒന്നുമല്ല, അത് സ്വന്തം ജീവൻ രക്ഷിക്കുക എന്ന വസ്തുതയ്ക്ക് മാത്രമാണ്. അതിന് വേണ്ടി അയാൾ മകനെയും കൊണ്ട് സർവ ശക്തിയും എടുത്ത് ഓടുകയാണ്, ഭയക്കുന്നത് എന്തിനെ ആണോ അത് പിറകെ ഉണ്ട് എന്നത് മറ്റൊരു കാര്യം. ഈ ഒരു രംഗം ജനിപ്പിച്ച പേടി, ടെൻഷൻ, മരവിപ്പ് എല്ലാം വിശദീകരിക്കാൻ കഴിയുന്നതിലും മേലെ ആയിരുന്നു, ഈ ഒരു രംഗത്തോട് കൂടി ഈ വർഷം പുറത്തിറങ്ങിയ ഏറ്റവും മികച്ച ടീവി സീരീസുകളിൽ ഒന്ന് എന്ന് പൊതുവെ വിലയിരുത്തപ്പെടുന്ന ഹൊന്റിങ് ഓഫ് ഹിൽ ഹൌസിന്റെ ആരാധകനായി ഞാൻ മാറുക ആയിരുന്നു.

🔸ക്രൈൻ കുടുംബത്തിന്റെ കഥയാണ് ദി ഹൊന്റിങ് ഓഫ് ഹിൽ ഹൌസ് എന്ന ടിവി സീരീസ് പറയുന്നത്, അച്ഛനും അമ്മയും അഞ്ച് കുട്ടികളും ചേർന്ന ക്രൈൻ കുടുംബം. വർത്തമാന കാലത്തിനോടൊപ്പം ഫ്ലാഷ് ബാക്കിന്റെ മേൻപൊടിയോടെ ഭൂതകാലവും കൂടി ചേർന്ന അവതരണ രീതിയാണ് സീരീസ് പിന്തുടരുന്നത്. ഹിൽ ഹൌസ് എന്ന ഭൂത പ്രേതാദികളുടെ ആവാസ കേന്ദ്രം എന്ന ഖ്യാതി നേടിയ, അപസർപ്പക കഥകളിൽ എല്ലാം തന്നെ വലിയ പ്രാധാന്യമുള്ള പഴകിയ കൊട്ടാരത്തിൽ തങ്ങളുടെ ബാല്യ കാലം ചിലവഴിക്കേണ്ടി വന്നവരാണ് ക്രൈൻ കുടുംബത്തിലെ കുട്ടികൾ. വർഷങ്ങൾ അനവധി കഴിഞ്ഞെങ്കിലും ഇവരിൽ പലരും ഇന്നും മാനസികമായി തങ്ങൾ അനുഭവിക്കേണ്ടി വന്ന ഭീകരമായ അനുഭവങ്ങളിൽ നിന്നും മുക്തി നേടിയിട്ടില്ല എന്നതാണ് സത്യം. സീരീസിന്റെ കഥയിലേക്ക് ഇറങ്ങി ചെല്ലുന്നില്ല, വേറൊന്നും കൊണ്ടല്ല ആസ്വാദന ഭംഗി ഒന്ന് മാത്രം പരിഗണിച്ചാണ്.

🔸ക്രൈൻ കുടുംബത്തിലെ കുട്ടികളെ കേന്ദ്രീകരിച്ച് കൊണ്ടാണ് സീരീസിലെ ആദ്യ ഭാഗങ്ങൾ കടന്ന് പോവുന്നത്, ദുരനുഭവങ്ങൾക്ക് ശേഷം വർഷങ്ങൾ കഴിയുമ്പോൾ മൂത്തവനായ സ്റ്റീവൻ അറിയപ്പെടുന്ന ഒരു അപസർപ്പക നോവലിസ്റ്റ് ആണ്. രാജ്യത്താകമാനം അരങ്ങേറിയ മനുഷ്യ ബുദ്ധിക്ക് നിരക്കാത്ത സൂപ്പർനാച്ചുറൽ എന്ന് വിശേഷിപ്പിക്കേണ്ട സംഭവങ്ങൾക്ക് പിറകെ പോവുന്നതാണ് ടിയാന്റെ വിനോദം. വലിയൊരു ആരാധക വൃന്ദം തന്നെ സ്വന്തമായി ഉള്ള സ്റ്റീവിന്റെ നോവലുകളിൽ ഒന്ന് തന്റെയും കുടുംബത്തിന്റെയും ഹിൽ ഹൌസിലെ അനുഭവങ്ങൾ കേന്ദ്രീകരിച്ച് ഉള്ളതാണ്. ഇങ്ങനെ ഒക്കെ ആണെങ്കിലും ഭൂത പ്രേത പിശാചുക്കളിൽ ഒന്നിലും സ്റ്റീവൻ വിശ്വസിക്കുന്നില്ല, ഒരു തരം വെല്ലുവിളി മനോഭാവം പോലും അയാൾക്ക് ഉണ്ടെന്ന് പറയാം. എന്നാൽ മറ്റുള്ള സഹോദരങ്ങളുടെ സ്ഥിതി അത്ര നല്ലതല്ല.

🔸ക്രൈൻ കുടുംബത്തിലെ ഗൃഹ നാഥനായ ഹ്യുഗ് ക്രൈനിന്റെ കാര്യമാണ് കഷ്ടം, ദുരനുഭവങ്ങൾ അയാളെ നിരന്തരം വേട്ടയാടുകയാണ്, മനഃസമാധാനത്തോട് കൂടിയ ഉറക്കവും സ്വസ്ഥതയും എന്നോ നഷ്ട്ടപ്പെട്ട ടിയാനെ സംബന്ധിച്ചിടത്തോളം ജീവിതം ഒരു നരകമാണ്. സ്റ്റീവിന്റെ മൂത്ത സഹോദരി ആയ ഷിർലി ആണ് കുടുംബത്തിലെ അല്പമെങ്കിലും പക്വതയുള്ള വ്യക്തിത്വം, തന്റെ സഹോദരങ്ങളുടെയും അവരുടെ ജീവിതത്തിന്റെയും കാര്യത്തിൽ ഉൽക്കണ്ഠ പുലർത്തുന്ന ഷേർളി സീരീസ് കണ്ട് തന്നെ അറിയേണ്ട ഒരു കഥാപാത്രമാണ്. ഹിൽ ഹൌസിലെ വാസം ഏറ്റവും ബാധിച്ചത് ഇളയവളായ നെല്ലിനെയും അവളുടെ ഇരട്ട  സഹോദരൻ ലുക്കിനെയും ആവും, ഒരാൾ വിഷാദത്തിലേക്ക് തെന്നി വീണപ്പോൾ മറ്റൊരാൾ ലഹരികളിൽ അഭയം പ്രാപിച്ചു. ഇവർക്ക് പുറമെ മറ്റ് രണ്ട് കഥാപാത്രങ്ങൾ കൂടിയുണ്ട്, അവിടെ ഒരല്പം സസ്പെൻസ് കിടക്കട്ടെ.

🔸തങ്ങളുടെ ഭൂത കാലത്ത് നേരിടേണ്ടി വന്ന ദുരനുഭവങ്ങൾ ഒരു രീതിയിൽ അല്ലെങ്കിൽ മറ്റൊരു രീതിയിൽ സഹോദരങ്ങളുടെ എല്ലാം വ്യക്തിത്വങ്ങളെ ബാധിച്ചിട്ടുണ്ട്. ഇവയിൽ നിന്നെല്ലാം മാറി നടക്കാനുള്ള ആഗ്രഹവും, എല്ലാം കഴിഞ്ഞെന്ന പ്രത്യാശയും എല്ലാം മാറി മറിയുന്നത് വീണ്ടും ഒരു തവണ കൂടി ഇവർക്കെല്ലാം ഒരുമിക്കേണ്ടി വരുമ്പോഴാണ്. ആ ഒത്തുചേരലിന് ചില വ്യക്തിപരമായ കാരണങ്ങൾ ഉണ്ട്, എന്ന് മാത്രമല്ല അവയെല്ലാം വിരൽ ചൂണ്ടുന്നത് ഹിൽ ഹൌസിലേക്കും ആണ്. ആദ്യാവസാനം സസ്‌പെൻസും ഉദ്വേഗവും നിറച്ച് വെച്ച് മുന്നേറുന്ന ഉഗ്രൻ സീരീസ് തന്നെയാണ് ഹോൻഡിങ് ഓഫ് ഹിൽ ഹൌസ്. പിടിക്കാനുള്ള വക സീരീസ് കരുതി വെച്ചിട്ടുണ്ട്, കഥ പുരോഗമിക്കുന്നതിന് ഒപ്പം കാഴ്ചക്കാരന്റെ നെഞ്ചിടിപ്പ് കൂട്ടുന്ന അവതരണവും കഥാഗതിയും ചിത്രത്തിന് സ്വന്തമായി ഉണ്ട്. ചുരുക്കി പറയുക ആണെങ്കിൽ പേടിക്കാനും ഞെട്ടാനും തയ്യാറാണെങ്കിൽ ധൈര്യമായി പോവാം ഹിൽ ഹൌസിലേക്ക്.

Verdict : Must Watch