437. The Black Hen (2015)

Director : Min Bahadur Bham

Genre : Drama

Rating : 7.2/10

Country : Nepal

Duration : 89 Minutes

🔸മലയാളികളുടെ പൊതുവായ ഒരു ശൈലി ആണ് തങ്ങളുടെ മനസ്സിന് ഒരു കാഴ്ചയിൽ പിടി നൽകാത്ത ചിത്രങ്ങളെ വാഴ്ത്തി പാടുന്നത്, സ്വപ്നങ്ങളിലേക്ക് ഇറങ്ങി ചെല്ലുന്ന ചിത്രത്തെയും, വേം ഹോളുകളും ടൈം ലൂപ്പുകളും ആധാരമാക്കി വന്ന ചിത്രങ്ങളെയും പൊതുവെ ക്ലാസിക്കുകൾ എന്ന രൂപേണ അമിത പ്രാധാന്യം നൽകി പറയാറുള്ളത് പലയിടത്തും കണ്ടിട്ടുണ്ട്. ഈ ചിത്രങ്ങൾ മോശം ആണെന്നല്ല മറിച്ച് മികച്ച ചിത്രങ്ങൾ തന്നെയാണ്, എന്നാൽ ഇവയെ ഒന്ന് വിശദീകരിക്കാൻ ആവശ്യപ്പെട്ടാൽ മിക്കവരും പറഞ്ഞ് കേൾക്കാറുള്ള മറുപടി അതൊന്നും പറഞ്ഞ് മനസിലാക്കിത്തരാൻ കഴിയില്ല, വേറെ ലെവലാണ് എന്നൊക്കെ ആണ്. പറഞ്ഞ് വന്നത് എന്താണെന്ന് വെച്ചാൽ മികച്ചവ എല്ലാം സങ്കീർണ്ണം ആയിരിക്കും എന്നൊരു അലിഖിത നിയമം പല മലയാളികളുടെയും മനസ്സിൽ പതിഞ്ഞ് പോയിട്ടുണ്ട്, ഇവയ്ക്ക് ഒരാക്ഷേപം ബ്ലാക്ക് ഹെൻ പോലെയുള്ള ചിത്രങ്ങളാണ്.

🔸ലളിതം, മനോഹരം....ദി ബ്ലാക്ക് ഹെൻ അഥവാ കാലോ പൊതി എന്ന നേപ്പാളീസ് ചിത്രത്തെ വിശേഷിപ്പിക്കാൻ ഈ രണ്ട് വാക്കുകൾ മതിയാവും. അടുത്ത കാലത്ത് ഒന്നും തന്നെ ഇത്രയും ലളിതമായ ഒരു കഥയെ ഇത്രയും നല്ല രീതിയിൽ അവതരിപ്പിച്ചൊരു ചിത്രം കാണാൻ കഴിഞ്ഞിട്ടില്ല. കാണാതായ തങ്ങളുടെ കറുത്ത കോഴിയെ അന്വേഷിച്ച് കൊണ്ടുള്ള രണ്ട് കുട്ടികളുടെ അന്വേഷണം നേപ്പാളീസ് ആഭ്യന്തര കലഹത്തിന്റെ പശ്ചാത്തലത്തിൽ അവതരിപ്പിച്ചിരിക്കുകയാണ് ഈ ചിത്രം. ഇതിന് മുൻപ് ഒരു നേപ്പാളീസ് ചിത്രം കാണാൻ സാധിച്ചിട്ടില്ലാത്തതിനാലും മേല്പറഞ്ഞ കാരണത്താലും മനോഹരമായ ഒരനുഭവം തന്നെ ആയിരുന്നു ബ്ലാക്ക് ഹെൻ.

🔸ബ്ലാക്ക് ഹെൻ എന്ന ചിത്രത്തെ കുറിച്ച് കൂടുതൽ സംസാരിക്കുന്നതിന് മുന്നേ ചിത്രത്തിന് ആസ്പദമായ സംഭവങ്ങൾ അരങ്ങേറുന്ന 2001ലെ രാജ്യത്തെ രാഷ്ട്രീയ പരിസ്ഥിതി ഒന്നറിയുന്നത് നന്നായേക്കും. പട്ടാളവും ഇടത് വിപ്ലവ പാർട്ടിയും തമ്മിലുള്ള കാലങ്ങളായി നീണ്ട് നിന്ന ഉരസലുകളും പോർവിളികളും വെട്ടുകുത്തുകളും ഏറെക്കുറെ അവസാനത്തിലേക്ക് കടന്ന് കൊണ്ടിരിക്കുകയാണ്, സമാധാന ചർച്ചകളും ഉടമ്പടികളും എല്ലാം തയാറായി കഴിഞ്ഞിരിക്കുന്നു. എന്തിരുന്നാലും പേപ്പറുകളിലെ തീരുമാനങ്ങളും ഉറപ്പുകളും ഇരു വിഭാഗക്കാരുടെയും മനസിലേക്ക് എത്തിയിട്ടില്ല, ചുരുക്കി പറഞ്ഞാൽ പുകഞ്ഞ് കൊണ്ടിരിക്കുന്ന ഒരു അഗ്നി പർവതത്തിന്റെ മുകളിലാണ് ഇപ്പോൾ രാജ്യം നിലനിൽക്കുന്നത് എന്ന അവസ്ഥ.

🔸ഈ പ്രശ്നങ്ങൾ എല്ലാം ബാക്ക്ഗ്രൗണ്ടിൽ നിർത്തിയാണ് രണ്ട് കുട്ടികളുടെ കഥ ചിത്രം പറഞ്ഞ് പോവുന്നത്. പ്രകാശ്, കിരൺ എന്നീ രണ്ട് കുട്ടികളാണ് കേന്ദ്ര കഥാപാത്രങ്ങൾ, ഇരുവർക്കുമിടയിൽ വൈരുധ്യങ്ങൾ ഏറെയാണ്. സമ്പത്തിലും ജാതിയിലും ജീവിത ശൈലിയിലും എല്ലാം വ്യത്യസ്തരായ ഇരുവരെയും ചേർത്ത് നിർത്തിയത് സൗഹൃദം എന്ന ഒറ്റവികാരം മാത്രം. അന്നത്തിന് വേണ്ടി കോഴിയെവാങ്ങി മുട്ട വിറ്റ് കാശാക്കാനുള്ള ഇരുവരുടെയും പദ്ധതിയാണ് ഇപ്പോൾ തകിടം മറിഞ്ഞിരിക്കുന്നത്, വരുമാന മാർഗം എന്ന പ്രതീക്ഷയിൽ വളർത്തി കൊണ്ടുവന്ന കോഴിയെ ഒരുനാൾ കാണാതാവുന്നത് ഇരുവർക്കും താങ്ങാവുന്നതിലും അധികം ആയിരുന്നു, എന്തിരുന്നാലും അതിനെ കണ്ടെത്താനായി രണ്ട് സുഹൃത്തുക്കളും ഇറങ്ങി തിരിക്കുകയാണ്.

🔸"പത്ത് വർഷങ്ങൾ നീണ്ട് നിന്ന മാവോയിസ്റ്റ് വാഴ്ചയിലും അതിനോട് അനുബന്ധിച്ച് ഉണ്ടായ ആഭ്യന്തര കലഹത്തിലും 13,000ത്തിൽ അധികം ആളുകൾക്കാണ് ജീവൻ നഷ്ടപ്പെട്ടത്, 14,000 ആളുകൾ രാജ്യം വിട്ട് ഇന്ത്യ ഉൾപ്പെടെ ഉള്ള രാജ്യങ്ങളിലേക്ക് കുടിയേറി, 8000ത്തോളം ആളുകൾ മാവോയിസ്റ്റുകളായും മാറി" ദി ബ്ലാക്ക് ഹെൻ എന്ന ചിത്രം ഒരു ഓർമപ്പെടുത്തൽ ആണ്, നഷ്ടങ്ങളുടെ ഓർമപ്പെടുത്തൽ. ഈ ഓർമപ്പെടുത്തലിന് സംവിധായകൻ ഉപയോഗിച്ച കളി പാവകളാണ് കഥാപാത്രങ്ങളും കഥയും കോഴിയും എല്ലാം. Iffk പോലെയുള്ള ലോകത്താകമാനം ഉള്ള ഫെസ്റ്റുകളിൽ പ്രദർശിപ്പിക്കപ്പെടുകയും അവിടെ നിന്നെല്ലാം മികച്ച അഭിപ്രായങ്ങൾ കരസ്ഥമാക്കുകയും ചെയ്ത ചിത്രമാണ് ബ്ലാക്ക് ഹെൻ. ലളിതമായ മികച്ച കഥയും, പ്രധാന താരങ്ങളുടെ അന്യായ അഭിനയവും, നല്ല സിനിമാട്ടോഗ്രഫിയും ചിത്രത്തിന്റെ പ്രത്യേകതയാണ്. മേല്പറഞ്ഞ വിഭാഗം ചിത്രങ്ങളോട് താല്പര്യം ഉള്ളവരാണെങ്കിൽ ധൈര്യമായി കാണാം.

Verdict : Very Good