438. Annihilation (2018)

Director : Alex Garland

Genre : Horror

Rating : 6.9/10

Country : USA

Duration : 116 Minutes

🔸അനിഹിലേഷൻ എന്ന ചിത്രത്തെ കുറിച്ചും, ചിത്രം നിർമിച്ച പാരാമൗണ്ട് എന്ന സ്റ്റുഡിയോയെ കുറിച്ചും വളരെ രസകരമായ ഒരു കഥ കുറച്ച് നാൾ മുന്നേ നെറ്റിൽ വായിക്കുക ഉണ്ടായി. എക്സ് മെഷിന എന്ന ചിത്രം സംവിധാനം ചെയ്ത അലക്സ് ഗാർലണ്ടിൽ നിന്നും മറ്റൊരു സൈഫൈ ഹിറ്റ് പ്രതീക്ഷിച്ച് വേണ്ട സൗകര്യങ്ങൾ ചെയ്ത് കൊടുത്ത സ്റ്റുഡിയോ അധികൃതർ ചിത്രത്തിന്റെ ഫൈനൽ പ്രോഡക്റ്റ് കണ്ട് ഒരു നിമിഷം അമ്പരന്ന് പോയി എന്നായിരുന്നു കഥാസാരം. ചിത്രത്തിന്റെ പ്രൊമോഷൻ മുന്നിൽ കണ്ട് പടച്ച് വിട്ട കഥകളിൽ ഒന്ന് എന്നായിരുന്നു കരുതിയിരുന്നത്, എന്നാൽ പിന്നീടാണ് കൂടുതൽ ആഴത്തിൽ ഈ സംഭവത്തെ കുറിച്ച് അറിഞ്ഞത്, ജിനേർ ബെൻഡിങ് സിനിമാ എന്നൊക്കെയുള്ള വിശേഷണങ്ങൾ പൂർണമായും അർഹിക്കുന്ന ഈ ചിത്രത്തെ ഏത് രീതിയിൽ പ്രൊമോട്ട് ചെയ്യണം എന്നറിയാതെ സ്റ്റുഡിയോ അധികൃതർ അമ്പരന്ന് പോയി എന്നതാണ് കഥയുടെ തുടർ ഭാഗം.

🔸വളരെ വൈകിയ വേളയിൽ ഉടലെടുത്ത ഈ അമ്പരപ്പ് കാരണം വേണ്ട രീതിയിൽ ആവശ്യമായ പ്രൊമോഷൻ ചിത്രത്തിന് സ്റ്റുഡിയോ നൽകിയില്ല, എന്ന് മാത്രമല്ല റിലീസിന് മൂന്ന് ദിവസം മുൻപ് മാത്രമാണ് വ്യക്തമായ ഒരു ചിത്രം മാധ്യമങ്ങൾക്ക് പോലും ലഭിച്ചത്. ആവശ്യമായ റിലീസിന് പോലും തയ്യാറാവാതെ നെറ്റ്ഫ്ലിക്സ് വഴി വിദേശ മാർക്കെറ്റുകളിലേക്ക് ചിത്രം വിറ്റഴിക്കുകയും ചെയ്തു. ഈ തീരുമാനങ്ങൾക്ക് പിറകിലുള്ള സ്റ്റുഡിയോയുടെ ഉദ്ദേശങ്ങൾ എന്തായാലും അത് ചിത്രത്തിന് ഉപകാരപ്രദം ആയില്ല എന്ന് തന്നെ പറയാം, കാരണം റിലീസിന് അപ്പുറം ചിത്രത്തിന് ലഭിച്ച പ്രതികരണങ്ങളും സ്വീകാര്യതയും മികച്ചത് തന്നെ ആയിരുന്നു, സൊളാരിസ് സ്റ്റാൾക്കെർ എന്നീ ചിത്രങ്ങളുമായി നിലവാരത്തിൽ എത്തില്ലെങ്കിൽ കൂടിയും സയൻസ് ഫിക്ഷനും ഫിലോസഫിയും കൂട്ടി ചേർത്ത് കൊണ്ടുള്ള ഈ ഉദ്യമം ധീരമായ ശ്രമം എന്ന് തന്നെയാണ് പൊതുവെ വിലയിരുത്തപ്പെട്ടത്.

🔸സ്യുട്ടും, ഹെൽമെറ്റും ധരിച്ച ഒരു വ്യക്തി ഒരു സ്ത്രീയെ ചോദ്യം ചെയ്യുന്ന രംഗത്തിൽ നിന്നുമാണ് ചിത്രം ആരംഭിക്കുന്നത്, അവിടെ നിന്നും കട്ട് ചെയ്ത് പിന്നീട് പോവുന്നത് ഉൽക്കയ്ക്ക് സമാനമായ ഒരു വസ്തു ഭൂമിയിൽ പതിക്കുന്നത് കാണിക്കുകയാണ് തുടർന്നുള്ള രംഗത്തിൽ മരണപ്പെട്ടു എന്ന് പൊതുവെ എല്ലാവരും വിശ്വസിച്ച ഒരു വ്യക്തി സ്വന്തം വീട്ടിൽ തിരിച്ചെത്തുന്ന രംഗമാണ്. പ്രത്യക്ഷത്തിൽ ഒരു ബന്ധവും ഇല്ലാത്ത ഈ മൂന്ന് രംഗങ്ങളിലൂടെ ആൺ അനിഹിലേഷൻ എന്ന ചിത്രം ആരംഭിക്കുന്നത്. ഈ മൂന്ന് രംഗങ്ങളിൽ ഉടലെടുക്കുന്ന ചോദ്യങ്ങളുടെ ഉത്തരങ്ങളാണ് ഈ ചിത്രം. ഈ ഉത്തരങ്ങൾ എല്ലാം മിസ്റ്ററിയുടെയും ഹൊററിന്റെയും മേൻപൊടിയോടെ മികച്ച രീതിയിൽ തന്നെ അവതരിപ്പിച്ചിട്ടുണ്ട് അനിഹിലേഷൻ എന്ന ചിത്രത്തിൽ.

🔸സയൻസ് ഫിക്ഷൻ ചിത്രം ആയതിനാലും ചിത്രത്തിന്റെ അവസാന ഭാഗത്തോട് അടുക്കുമ്പോൾ എഫക്ടുകളുടെ അതി പ്രസരം ഉള്ളതിനാലും ലോ ബഡ്ജറ്റ്, ചിത്രത്തിന് പല ഇടത്തും വിന ആയി തീർന്നിട്ടുണ്ട് എന്നതാണ് സിനിമയെ പറ്റി എടുത്ത് പറയാനുള്ള ഒരേയൊരു നെഗറ്റീവ്, ഇതിനോടൊപ്പം ആദ്യ രംഗങ്ങളിൽ ഒന്ന് ഉയർത്തുന്ന സ്പോയ്ലർ നിറഞ്ഞൊരു പ്രശ്നവും ഒഴിച്ച് നിർത്തിയാൽ അനിഹിലേഷൻ മികച്ചൊരു ചിത്രം തന്നെയാണ്. നതാലി പോർട്മാൻ എന്ന നടിക്ക് വിശേഷണങ്ങൾ ആവശ്യമില്ല, ലിയോൺ, ബ്ലാക്ക് സ്വാൻ എന്നീ ചിത്രങ്ങളിലെ മികച്ച പ്രകടനങ്ങൾക്ക് ശേഷം നതാലി തന്റെ കഴിവ് അതിന്റെ പൂർണതയിൽ പുറത്തെടുത്ത ചിത്രമാണ് അനിഹിലേഷൻ. നടാലിയുടെ കഥാപാത്രത്തെ ചിത്രത്തിന്റെ നെടുംതൂണായി അവതരിപ്പിച്ച മികച്ച സ്ക്രിപ്റ്റും, അവരിൽ പൂർണമായും വിശ്വസിച്ച സംവിധായകനും കയ്യടി അർഹിക്കുന്നുണ്ട്. ഇതിനോടൊപ്പം തന്നെ വിശ്വൽ എഫക്ട്സും പ്രശംസ അർഹിക്കുന്നുണ്ട്, മുകളിൽ പറഞ്ഞത് പോലെ അവസാന ഭാഗങ്ങളിൽ എവിടെയോ ഒന്ന് പാളിപ്പോയെങ്കിലും ചെറിയ ബഡ്ജറ്റിൽ മികച്ച വർക്ക് തന്നെയാണ് അനിഹിലേഷനിലേത്.

🔸രണ്ട് മണിക്കൂറിൽ താഴെയേ ദൈർഖ്യം ഉള്ളൂ എങ്കിൽ കൂടിയും സ്ലോ പോയിസൺ രീതിയിലാണ് ചിത്രത്തിന്റെ കഥ വികസിക്കുന്നത്. പ്രധാന കഥാപാത്രങ്ങളെയും അവരുടെ ഭാവിയെയും സംബന്ധിച്ച് സസ്പെൻസ് നിലനിർത്തി കൊണ്ട് തന്നെ മികച്ച ആക്ഷൻ രംഗങ്ങളും, കഥാപാത്ര വികസനവും ചിത്രം പ്രേക്ഷകനായി ഒരുക്കി വെച്ചിട്ടുണ്ട്. തന്റെ പ്രധാന കഥാപാത്രങ്ങളെ എല്ലാം നടിമാർക്ക് നൽകിയ സംവിധായകൻ ജെന്നിഫർ ലേ, ടെസ്സ തോംപ്സൺ, ജിന റോഡ്രിഗസ് തുടങ്ങിയവർ ഉൾപ്പെടുന്ന മികച്ച ഒരു കാസ്റ്റും ചിത്രത്തിനായി കണ്ടെത്തിയിട്ടുണ്ട്. അനിഹിലേഷൻ എന്ന ചിത്രത്തെ പറ്റി പറയുമ്പോൾ എടുത്ത് പറയേണ്ടത് അവസാന മുപ്പത് മിനിറ്റ് തന്നെയാണ്, കാഴ്ചക്കാരനെ അങ്ങേയറ്റം ടെൻഷൻ അടിപ്പിക്കുന്ന ഈ ഭാഗങ്ങളും അതിനോടൊപ്പം വരുന്ന മികച്ച ബാക്ഗ്രൗണ്ട് സ്കോറും ആണ് ചിത്രത്തിന്റെ ഏറ്റവും വലിയ പ്ലസ് പോയിന്റ്. മിസ്റ്ററ, ഹൊറർ ചിത്രങ്ങൾ ഇഷ്ടപ്പെടുന്നവർക്ക് ധൈര്യമായി കാണാം.

Verdict : Very Good