1315. Mad Fate (2023)

Director : Cheang Pou Soi

Cinematographer : Cheng Keung

Genre : Thriller

Country : Hong Kong

Duration : 108 Minutes

🔸എവിടെയോ തുടങ്ങി എവിടെയോ അവസാനിച്ചത് എന്നൊക്കെയുള്ള വിശേഷണം അർഹിക്കുന്ന സിനിമയാണ് മാഡ് ഫെയ്റ്റ്. ഒരുപക്ഷെ കണ്ട് തീർത്ത മർഡർ മിസ്റ്ററി സൈക്കോളജിക്കൽ ത്രില്ലർ സിനിമകൾ ഒരുപാട് മനസ്സിൽ കിടപ്പുള്ളത് കൊണ്ടാവാം. പ്രതീക്ഷിച്ച വഴിയോ രീതിയോ ഒന്നും പിന്തുടരാതെ അൺ കൺവെൻഷനൽ ആയ രീതിയിൽ അത്ര തൃപ്തി ഒന്നും തരാതെ അവസാനിക്കുകയാണ് ഈ ഹോങ് കോങ് ത്രില്ലർ ചിത്രം. കഥയിലേക്ക് വരിക ആണെങ്കിൽ ഒരു കൊലയാളി, ഒരു സൈക്കോ, ഒരു പോലീസുകാരൻ, ഒരു ദുർമന്ത്രവാദി തുടങ്ങി നാല് പേരിൽ കൂടിയാണ് പ്ലോട്ട് വികസിക്കുന്നത്.

🔸അൽപ സ്വല്പം ഡാർക്ക് മാജിക് ഒക്കെ പിടിയുള്ള ദുർ മന്ത്രവാദി എന്നൊക്കെ പറയാവുന്ന കഥാപാത്രം ആണ് ഫെങ് ഷുയി. ഒരുനാൾ ഒരു യുവതിയുടെ ഭാവി മാറ്റി മറിക്കാനായി സ്മാശാനത്തിൽ അയാൾ നടത്തി കൊണ്ടിരിക്കുന്ന ആഭിചാര ക്രിയകൾ കാണിച്ച് കൊണ്ടാണ് സിനിമ ആരംഭിക്കുന്നത്. എന്നാൽ ടിയാൻ ഉദ്ദേശിച്ചിടത്ത് ഒന്നുമല്ല കാര്യങ്ങൾ നിൽക്കുന്നത്. തുടർന്നുള്ള അയാളുടെ സഞ്ചാരം ടിയാനെ ഒരു അപാർട്ട്മെന്റിൽ എത്തിക്കുകയാണ്, അവിടെ വെച്ച് ഇയാൾ ക്രൂരമായ ഒരു കൊലപാതകത്തിന് ദൃക്‌സാക്ഷി ആവുകയാണ്. കുറച്ച് അധികം നാളുകളായി നഗരത്തിൽ അരങ്ങേറി കൊണ്ടിരിക്കുന്ന കൊലപാതക പറമ്പരകളിൽ അവസാനത്തേത് ആണ് ഈ കൊല.

🔸എന്നാൽ കൊല ചെയ്യപ്പെട്ട യുവതിയും, കൊലയാളിയും, ദുർ മന്ത്രവാദിയും അല്ലാതെ ഒരാൾ കൂടി അവിടെ ഉണ്ടായിരുന്നു. ചെറുപ്പം തൊട്ടേ മാനസിക പ്രശ്നങ്ങൾ ഉള്ള, ആളുകൾ വേദനിക്കുന്ന കാഴ്ചയിൽ ഉന്മാദം കണ്ടെത്തുന്ന ഒരു ഡെലിവറി ബോയിയും. ഈ കുറ്റവാളിയുടെ പിറകെ വരുന്ന, ഡെലിവറി ബോയിയുമായി പൂർവ കാല പരിചയം ഉള്ള ഒരു പോലീസുകാരൻ കൂടി കടന്ന് വരുമ്പോൾ കോളം ഫിൽ ആവുകയാണ്. സ്ഥിരം മർഡർ മിസ്റ്ററി ത്രില്ലർ ശൈലി പിന്തുടരാതെ പോവുന്ന ഒരു ചിത്രമാണ് മാഡ് ഫെയ്റ്റ്, അത് കൊണ്ട് തന്നെ എല്ലാവർക്കും പറ്റിയ സിനിമ അല്ല മാഡ് ഫെയ്റ്റ്. താല്പര്യം തോന്നുന്നു എങ്കിൽ കണ്ട് നോക്കാം.

Verdict : Watchable

DC Rating : 3/5

1314. Are You There God? It's Me Margaret (2023)

Director : Kelly Fremon Craig

Cinematographer : Tim Ives

Genre : Drama

Country : USA

Duration : 107 Minutes

🔸തിരിച്ചറിവ് എന്നത് ഏത് വിഷയത്തിൽ ആയാലും, ഏത് കാലത്ത് ആയാലും നല്ലത് തന്നെയാണ്. കെല്ലി ക്രെയ്‌ഗ് സംവിധാനം ചെയ്‌ത് ഈ വർഷം റിലീസ് ആയ പ്രസ്തുത ചിത്രം ഒന്നല്ല, ഒരായിരം തിരിച്ചറിവുകളുടെ കഥയാണ്. സ്വയം ആരെന്ന തിരിച്ചറിവ്, തന്റെ ചുറ്റുപാടുകൾ എന്തെന്ന തിരിച്ചറിവ്, മതവും ദൈവവും പോലുള്ള കാര്യങ്ങളെ പറ്റിയുള്ള തിരിച്ചറിവ് തുടങ്ങി ഒരുപാട് കൗതുകം ജനിപ്പിക്കുന്ന കാര്യങ്ങളുടെ ആകെ തുക ആണ് ഈ ചിത്രം. വളരെ പ്ലസന്ററി ആയി കാര്യങ്ങൾ അവതരിപ്പിച്ച് പോവുന്ന സിനിമയുടെ ആ ലൈറ്റ് ഹെർട്ടഡ് നേച്ചറും മനോഹരം തന്നെ ആയിരുന്നു.

🔸ഒരു പതിനൊന്ന് വയസുകാരി ആണ് നമ്മുടെ പ്രധാന കഥാപാത്രമായ മാർഗരറ്റ്. തന്റെ അമ്മൂമ്മയോടും സുഹൃത്തുക്കളോടും ഒക്കെ ഒപ്പം നല്ല രീതിയിൽ പോയി കൊണ്ടിരുന്ന അവളുടെ ജീവിതം തല കീഴായി മറിയുന്നത് അവളുടെ മാതാ പിതാക്കൾ ന്യു യോർക്കിൽ നിന്നും ന്യു ജേഴ്സിയിലേക്ക് താമസം മാറ്റാൻ ഒരുങ്ങുമ്പോഴാണ്. പൊടുന്നനെ ഉള്ള ഈ മാറ്റം അവൾക്ക് ഒരു രീതിയിലും അംഗീകരിക്കാൻ പറ്റാത്ത ഒന്നായിരുന്നു, പുതിയ ആളുകളും പുതിയ രീതികളും എല്ലാം അവളെ സംബന്ധിച്ചിടത്തോളം വിചിത്രമായ അനുഭവങ്ങൾ ആയിരുന്നു.

🔸എന്നാൽ മാറ്റം കാലക്രമേണ ഉൾകൊള്ളുന്ന മാനുഷിക സ്വഭാവം പോലെ അവളും മാറി തുടങ്ങുകയാണ്, ഇതിനിടയിലേക്കാണ് ഒരു പുതിയ കോണ്ഫലിക്റ്റ് വരുന്നത്. ക്രിസ്ത്യാനി ആയ അമ്മയുടെയും ജൂതനായ അച്ഛന്റെയും മകളായ മാർഗരറ്റ് തന്റെ വിശ്വാസങ്ങളുടെ കാര്യത്തിൽ ഇതുവരെ ഒരു തീരുമാനം എടുത്തിരുന്നില്ല. എന്നാൽ അദ്ധ്യാപകൻ തന്ന പ്രോജെക്ട്ടിൽ വിശ്വാസങ്ങളെ വെല്ലുവിളിക്കുന്ന മട്ടിൽ അവൾ എഴുതിയ അഭിപ്രായങ്ങൾ കഥയെ മറ്റൊരു മേഖലയിലേക്ക് കൊണ്ട് പോവുകയാണ്. പോയ വർഷം ഇറങ്ങിയ നല്ല സിനിമകളിൽ ഒന്നാണ് ആർ യു ദേർ ഗോഡ്, ഇട്സ് മി മാർഗരറ്റ്. താല്പര്യം തോന്നുന്നു എങ്കിൽ കണ്ട് നോക്കാവുന്നതാണ്.

Verdict : Good

DC Rating : 3.5/5

1313. Family Guy (1999)

Creator : Seth Macfarlane

Genre : Animated Sitcom

Seasons : 21

Episodes : 409

Country : USA

Duration : 20 - 27 Minutes

🔸ഒരു കഥാപാത്രം, അയാൾ ജനിച്ച് വളർന്ന സാഹചര്യങ്ങൾ എന്ത് തന്നെ ആയാലും ഈ ഒരു രീതിയിൽ സംസാരിക്കണം, ഇങ്ങനെ പെരുമാറണം, ഇങ്ങനയെ പെരുമാറാവൂ എന്നൊക്കെയുള്ള ഒരു മിഥ്യാ ധാരണ വെച്ച് പുലർത്തുന്ന ഒരു സ്വഭാവം കുറച്ച് നാളുകളായി പിന്തുടരപ്പെടുന്നുണ്ട്. ഒരു പരിധി കഴിഞ്ഞപ്പോൾ തമാശ ആയി തോന്നിയ ഈ ഒരു പ്രക്രിയയിൽ നിന്നും വളരെ ആവശ്യമായ ഒരു മാറ്റം അല്ലെങ്കിൽ റിലീഫ് തന്നത് ഫാമിലി ഗയ് എന്ന സീരീസ് ആണ്. ഒരു വിധത്തിലുള്ള കെട്ട് പാടുകളും ഇല്ലാതെ അങ്ങേയറ്റം ഓഫൻസീവ് പോലുമായ കാര്യങ്ങൾ യാതൊരു വിധ മടിയും ഇല്ലാതെ 'ഒളിച്ച് കടത്തലുകൾ' ഇല്ലാതെ അവതരിപ്പിച്ച ആ ഒരു അപ്രവചനീയത തന്നെയാണ് ഈ സീരീസിനോട് തോന്നിയ ആ അറ്റാച്ച്മെന്റിന്റെ പ്രധാന കാരണവും.

🔸ഒരു രാജ്യത്തിന്റെ പ്രസിഡന്റ് ആയാലും പോപ്പുലർ ആയ സിനിമാ നടൻ ആയാലും എന്തിന് ലോകം ബഹുമാനിക്കുന്ന പോപ്പ് ആയാൽ പോലും ഈ സീരീസിൽ സേഫ് അല്ല എന്നത് വളരെ കൗതുകം ഉണർത്തിയ കാര്യം ആയിരുന്നു. മതം ആയാലും റേസ് ആയാലും സംസ്കാരം ആയാലും എല്ലാം ഇവിടെ വിമർശിക്കപ്പെടുന്നുണ്ട്, ചിലരെ എങ്കിലും ട്രിഗർ ചെയ്യാൻ സാധ്യത ഉണ്ടെങ്കിൽ കൂടിയും വ്യക്തിപരമായി ഇവ എല്ലാം തന്നെ നല്ല രീതിയിൽ ആസ്വദിക്കാൻ പറ്റി എന്നിടത്താണ് ഈ സീരീസിന്റെ വിജയം. ഇരുപത് വർഷത്തിൽ അധികമായി റൺ ചെയ്ത് കൊണ്ടിരിക്കുന്ന സീരീസ് ഓരോ കാലത്തും അർഹിച്ച രീതിയിൽ കൃത്യമായി അപ്ഡേറ്റ് ചെയ്യപ്പെട്ടിട്ടുണ്ട് എന്നതും ചെറിയ കാര്യമല്ല.

🔸അഞ്ച് മനുഷ്യരും ഒരു നായയും അടങ്ങുന്ന ഗ്രിഫിൻ കുടുംബത്തിന്റെ ദൈനം ദിന ജീവിതത്തിലെ തമാശകളും മറ്റുമൊക്കെയാണ് സീരീസിന്റെ പ്ലോട്ട് ലൈൻ. ഒരു ഓവർ ആർക്കിങ് സ്റ്റോറി ഒന്നും ഇല്ലെങ്കിൽ കൂടിയും ഒരിടത്തും ബോർ അടിപ്പിക്കുന്നില്ല സീരീസ്. മുകളിൽ സൂചിപ്പിച്ച കഥാപാത്രങ്ങൾക്ക് പുറമെ കുവാഗ്മൈർ പോലെയുള്ള സീൻ സ്റ്റീലർ കഥാപാത്രങ്ങൾ വേറെയും ഉണ്ട് സീരീസിൽ. സ്ഥിരം കൊമെടി സിറ്റ്കോമുകളിൽ നിന്നും മാറി നടക്കാൻ താല്പര്യം ഉള്ളവർക്ക് കണ്ട് നോക്കാവുന്നതാണ്. സീരീസിന്റെ മലയാളം ഡബ് ഉണ്ടെന്ന് കേട്ടു, വേണേൽ കണ്ട് നോക്കാം ഇല്ലെങ്കിൽ വേണ്ട, എല്ലാം നിങ്ങളുടെ സൗകര്യം പോലെ, ബാലയ്യ പറഞ്ഞത് പോലെ ഐ ഡോണ്ട് കേർ.

Verdict : Very Good

DC Rating : 4/5

1312. Burning Days (2022)

Director : Emin Alper

Cinematographer : Christos Karamanis

Genre : Thriller

Country : Croatia

Duration : 130 Minutes

🔸ഒരുപാട് രീതിയിൽ വ്യാഖ്യാനിക്കാൻ കഴിയുന്ന ഒരു പ്ലോട്ട് ആണ് ബെർണിങ് ഡെയ്സ് എന്ന ഡ്രാമ ചിത്രത്തിന്റേത്. പൂർണമായും നല്ലവർ ആയോ മോശം ആയോ ആരും തന്നെ ഇല്ല, എല്ലാവരിലും രണ്ട് അംശവും ഏറിയും കുറഞ്ഞും ഉണ്ട് എന്ന വാദം ശെരി വെക്കുന്ന മട്ടിൽ ഈ ചിത്രത്തിലും കാര്യങ്ങൾ അങ്ങനെ തന്നെയാണ്. കേന്ദ്ര കഥാപാത്രം അല്ലെങ്കിൽ നായകനായി ഒരു വ്യക്തി സിനിമയിൽ ഉണ്ട് എങ്കിലും അയാൾ സത്യത്തിൽ നല്ലവനാണോ എന്നത് സംശയമാണ്, നമ്മൾ കണ്ട വേർഷൻ തന്നെയാണോ യാഥാർഥ്യം എന്നതും ചോദ്യമായി നിൽക്കുന്നു. ചിലപ്പോൾ മറ്റൊരു വശം ഈ കഥയിൽ ഉണ്ടായിരിക്കും, നമ്മൾ കണ്ടതിന് നേരെ വിപരീതം ആയിരിക്കാം സംഭവിച്ചത്, ആ സാധ്യത തന്നെയാണ് ഈ സിനിമയെ മനോഹരം ആക്കുന്നതും. പോയ വർഷത്തെ മികച്ച സിനിമകളിൽ ഒന്നാണ് ബെർണിങ് ഡെയ്സ്.

🔸കഥയിലേക്ക് വരിക ആണെങ്കിൽ നമ്മുടെ പ്രധാന കഥാപാത്രത്തിന്റെ പേര് എംറെ എന്നാണ്, ഒരു പ്രോസിക്യൂട്ടർ ആണ് ടിയാൻ. നഗര പ്രദേശത്ത് ജനിച്ച് വളർന്ന എംറെ ഒരുനാൾ ട്രാൻസ്ഫർ ആയി ഒരു ഉൾനാടൻ ഗ്രാമത്തിൽ എത്തുകയാണ്. തന്റെ വരവിൽ തന്നെ അത്യാവശ്യം ഡിസ്റ്റർബിങ് ആയൊരു കാഴ്ചയാണ് അയാൾ കാണുന്നത്. നാട്ടുകാർ എല്ലാം കൂടി ഒരു പന്നിയെ വേട്ടയാടി പിടിച്ച്, രക്തം വാർന്ന് കൊണ്ടിരിക്കുന്ന അതിനെ ഒരു ട്രാക്റ്ററിൽ കെട്ടി വലിച്ച് കൊണ്ട് പോവുന്ന ദാരുണമായ കാഴ്ച. ചാർജ് എടുത്ത അന്ന് തന്നെ എംറെ പ്രശ്നങ്ങളെ നേരിട്ട് തുടങ്ങുകയാണ്, ആദ്യം ആട്ടോർണി ആയ കഥാപാത്രവും ആയുണ്ടായ സംഘർഷ ഭരിതമായ കൂടിക്കാഴ്ച താമസിയാതെ കഥയുടെ ഗതി മാറ്റുന്ന കേസും.

🔸ഒരു റേപ്പ് കേസ് ആണ് കഥയുടെ ഗതി മാറ്റുന്നത്, ആര് എന്ത് എങ്ങിനെ എന്നൊക്കെയുള്ള വിശദീകരണങ്ങളിലേക്ക് തല്ക്കാലം കടക്കുന്നില്ല, കണ്ട് തന്നെ അറിയുക. ഈ കേസും അതിനെ സംബന്ധിച് എംറെ കൈക്കൊള്ളുന്ന ചില തീരുമാനങ്ങളും അയാളെ പ്രാബലരായ ചില നാട്ടുകാരുടെ കണ്ണിലെ കരടായി മാറ്റുകയാണ്. ഈ സംഭവങ്ങൾക്ക് ശേഷം ഇവർക്കെല്ലാം എന്ത് സംഭവിക്കുന്നു എന്നതാണ് സിനിമയുടെ പ്ലോട്ട് ലൈൻ. അത്യാവശ്യം ഗ്രിപ്പിങ് ആയ ചിത്രമാണ് ബെർണിങ് ഡെയ്സ്, കാഴ്ചക്കാരന്റെ ചിന്തയ്ക്ക് വിട്ട് തരുന്ന ഓപ്പൺ എൻഡിങ് കൂടി ഉണ്ട് ചിത്രത്തിന്. കാണാൻ താല്പര്യം തോന്നുന്നു എങ്കിൽ ശ്രമിച്ച് നോക്കാവുന്നതാണ്, വർത്ത് ആണ് ഈ ചിത്രം.

Verdict : Very Good

DC Rating : 4/5

1311. World War III (2022)

Director : Houman Seyyedi

Cinematographer : Peyman Shadmanfar

Genre : Drama

Country : Iran

Duration : 107 Minutes

🔸മുന്നേ പറഞ്ഞത് പോലെ തന്നെ ലളിതമായ പ്ലോട്ട് പോയിന്റിൽ നിന്നും അതിലും ലളിതമായ അവതരണത്തിൽ കൂടിയും ഉഗ്രൻ സിനിമകൾ ലോകത്തിന് സംഭാവന ചെയ്യുന്നതിൽ കുപ്രസിദ്ധി നേടിയ ഇറാനിൽ നിന്നും പുറത്ത് വന്ന മറ്റൊരു കിടിലൻ സിനിമ ആണ് വേൾഡ് വാർ ത്രീ. വെയ്ഫർ തിൻ എന്നൊക്കെ പറയാവുന്ന ഒന്നാണ് സിനിമയുടെ പ്ലോട്ട് ലൈൻ, വേണമെങ്കിൽ ഒന്നോ രണ്ടോ വാക്യത്തിൽ പറഞ്ഞ് വിടാവുന്നത്ര ലളിതം, ഇത് ഒരു പോരായ്മ ആയി മാറാതെ എങ്ങനെ മികച്ച ഔട്ട് പുട്ട് ആയി മാറ്റുന്നു എന്നത് അത്ഭുതാവഹംആയ നേട്ടം തന്നെയാണ്. പോയ വർഷത്തെ ഇറാന്റെ മികച്ച അന്താരാഷ്ട്ര സിനിമ വിഭാഗത്തിൽ ഉള്ള ഓസ്‌കാർ എൻട്രി കൂടി ആയിരുന്നു ഈ ചിത്രം.

🔸ഒരു ദിവസ വേതനക്കാരൻ ആണ് ഷകീബ് എന്ന നമ്മുടെ നായക കഥാപാത്രം. സ്വന്തമായി താമസ സ്ഥലം പോലുമില്ലാത്ത ഷകീബ് ഊമ ആയ കാമുകിയുടെ റൂമിൽ ആണ് തൽക്കാലികമായി താമസിക്കുന്നത്. ഷകീബിന്റെ ജീവിതം മാറി മറിയുന്നത് അയാളുടെ നാട്ടിൽ ഒരു സിനിമാ ഷൂട്ടിങ് വരുമ്പോഴാണ്, ഒരു വാർ ഡ്രാമ ആയ ചിത്രത്തിന്റെ കഥാപശ്ചാത്തലം രണ്ടാം ലോക മഹായുദ്ധകാലത്തെ നാസി ജർമനിയും കോൺസൻട്രേഷൻ കാമ്പും ഒക്കെയാണ്. സിനിമയിൽ ഒരു ചെറിയ വേഷം അവതരിപ്പിക്കാനുള്ള അവസരം ഷകീബിനും ലഭിക്കുകയാണ്, കൃത്യമായ ആഹാരവും വേതനത്തിനും പുറമെ തല്ക്കാലം താമസിക്കാൻ ഒരിടവും കിട്ടും എന്നതിനാൽ അയാൾ അതിന് തയ്യാറാവുകയാണ്, മുൻപരിചയം യാതൊന്നും ഇല്ലെങ്കിൽ കൂടിയും.

🔸എന്നാൽ കാര്യങ്ങൾ ആകെ മാറി മറിയുന്നത് പ്രധാന കഥാപാത്രമായി അഭിനയിക്കേണ്ടി ഇരുന്ന നടന് ഒരപകടം സംഭവിക്കുമ്പോഴാണ്. അവിചാരിതമായി ആ കഥാപാത്രത്തെ ഷകീബിന് അവതരിപ്പിക്കേണ്ടി വരികയാണ്, ആ കഥാപാത്രം ആണെങ്കിൽ സാക്ഷാൽ അഡോൾഫ് ഹിറ്റ്‌ലറും. പിന്നീട് സംഭവിക്കുന്ന കാര്യങ്ങൾ ആണ് ഈ ചിത്രം, വളരെ വിചിത്രമായ അപ്രതീക്ഷിതമായ, അവിചാരിതമായ സംഭവങ്ങൾ ആണ് പിന്നീട് സിനിമയിൽ സംഭവിക്കുന്നത്. നല്ല ഒരു വിഷ്വൽ എക്സ്പീരിയൻസ് ആണ് ഈ ചിത്രം, തീർത്തും തൃപ്തികരമായ ഒരു അനുഭവം, താല്പര്യം തോന്നുന്നു എങ്കിൽ കാണാൻ ശ്രമിക്കുക.

Verdict : Very Good

DC Rating : 4/5

1310. Hit The Road (2021)

Director : Panah Panahi

Cinematographer : Amin Jafari

Genre : Drama

Country : Iran

Duration : 94 Minutes

🔸യാത്ര പറച്ചിലുകൾ എന്നും വേദനാ ജനകം ആണ്, ആ ഒരു വസ്തുതയ്ക്ക് രാജ്യമോ ഭാഷയോ സംസ്കാരമോ ഒന്നും ബാധകമല്ല. നമ്മുടെ ജീവിതത്തിന്റെ ഭാഗമായ ഒരു വ്യക്തിയെ ഇനി ഒരിക്കലും, ഒരു ആൾക്കൂട്ടത്തിലും കണ്ട് മുട്ടില്ല എന്ന ചിന്ത തന്നെ ഭീതിതം ആണ്, മരണം എന്നത് അത്ര മാത്രം വിഷാദകരമായ ഒരു വസ്തുത ആയി മാറുന്നതും ഈ ഒരു ചിന്ത കാരണം ആവണം. ജാഫർ പനാഹിയുടെ മകൻ പനാഹ് പനാഹിയുടെ ഹിറ്റ് ദി റോഡ് എന്ന ചിത്രവും ഒരു യാത്ര പറച്ചിലിന്റെ ഹാർട്ട് ബ്രെയ്‌ക്കിങ് ആയ കഥയാണ്. കഴിഞ്ഞ മൂന്ന് വർഷങ്ങൾക്കിടെ കണ്ട ഏറ്റവും മികച്ച സിനിമകളിൽ ഒന്ന് എന്ന് നിസ്സംശയം പറയാവുന്ന സിനിമ കൂടിയാണ് ഹിറ്റ് ദി റോഡ്.

🔸ഒരു നാല് അംഗ കുടുംബം യാത്രയിൽ ആണ്, ഇറാനിലെ ഉൾനാടൻ ഗ്രാമങ്ങളിൽ കൂടി. ഈ യാത്രയുടെ കാരണം എന്താണ് എന്ന് തുടക്കത്തിൽ ഒന്നും തന്നെ സിനിമ റിവീൽ ചെയ്യുന്നില്ല, കുടുംബത്തിലെ ഏറ്റവും ഇളയ കുട്ടിയോട് എന്നത് പോലെ തന്നെ പ്രേക്ഷകരെയും ഈ കാര്യത്തിൽ ഇരുട്ടിൽ നിർത്തുക ആണ് സംവിധായകൻ. എന്നാൽ ഇളയ കുട്ടി ഒളിപ്പിച്ച് കൊണ്ട് വന്ന മൊബൈൽ ഫോൺ, വഴി മദ്ധ്യേ ഉപേക്ഷിച്ച് കളയുന്നതിൽ നിന്നും ഈ യാത്രയ്ക്ക് പിന്നിൽ ഭീകരമായ എന്തോ കാരണമോ അല്ലെങ്കിൽ അപകടമോ ഉണ്ട് എന്ന കാര്യം വ്യക്തം. അങ്ങനെ ആ നാല്വർ സംഘത്തിന്റെയും, ജീവൻ പോവാറായ അവശനായ അവരുടെ നായയുടെയും യാത്ര ഗ്രാമങ്ങളിൽ കൂടി പുരോഗമിക്കുകയാണ്.

🔸മുന്നേ ഏതോ ഒരു ഇറാനിയൻ സിനിമയെ കുറിച്ചുള്ള പോസ്റ്റിൽ ഈ രാജ്യത്തെ സിനിമകളുടെ പ്രത്യേകത ലാളിത്യം ആണെന്ന് പറഞ്ഞത് ഓർക്കുന്നു, ഇതിന്റെ മറ്റൊരു മികച്ച ഉദാഹരണം ആണ് ഹിറ്റ് ദി റോഡ്. ഏറെക്കുറെ ഒറ്റ വരിയിൽ പറയാവുന്ന പ്ലോട്ടിനെ നാല് വ്യക്തികൾക്ക് ഇടയിലുള്ള ദൃഢമായ ആത്മ ബന്ധം കാണിച്ച് കൊണ്ട് അവതരിപ്പിച്ച രീതി അങ്ങേയറ്റം മനോഹരമാണ്. പ്രത്യേകിച്ചും ക്ലൈമാക്സിനോട്‌ അടുക്കുമ്പോൾ ഉള്ള അച്ഛന്റെയും മൂത്ത മകന്റെയും കോമ്പോ സീൻസ് ഒക്കെ വളരെ ബ്യുട്ടിഫുൾ ആയിരുന്നു. വിരലിൽ എണ്ണാവുന്ന കഥാപാത്രങ്ങളെ ഉള്ളൂ എങ്കിലും പെർഫോമൻസ് വൈസ് ഇവരെല്ലാം അഭിനന്ദനാർഹമായ പ്രകടനം തന്നെയാണ് പുറത്തെടുത്തിരിക്കുന്നത്. ഒരു മസ്റ്റ് വാച് സിനിമ ആണ് ഹിറ്റ് ദി റോഡ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.5/5

1309. Sarmasik (2015)

Director : Tolga Karicelik

Cinematographer : Gokhan Tiryaki

Genre : Drama

Country : Turkey

Duration : 101 Minutes

🔸ലൈറ്റ് ഹൌസ് എന്ന സിനിമയുമായി ഉള്ള പാരലൽസ് ആണ് സര്മാസിക് എന്ന തുർക്കിഷ് ചിത്രം കണ്ട് കൊണ്ടിരിക്കെ ആദ്യം മനസ്സിൽ വന്ന ചിന്ത. രണ്ട് സിനിമകളും ഒരു ഒറ്റപ്പെട്ട സ്ഥലത്ത് കുടുങ്ങി പോവുന്ന ആളുകൾ പതിയെ എങ്ങനെ ഭ്രാന്തിലേക്ക് വീണ് പോവുന്നു എന്നത് അത്യന്തം ഡിസ്റ്റർബിങ് ആയ രീതിയിൽ കാണിച്ച് പോവുന്ന ഒരു ഡ്രാമ ആണ്. സര്മാസിക് എന്ന ചിത്രം കുറച്ച് കൂടി മെട്ടഫറിക്കൽ ആയ രീതിയിൽ കാര്യങ്ങൾ അവതരിപ്പിച്ചിരിക്കുന്നു, തുർകിയുടെ രാഷ്ട്രീയ സാമൂഹിക പശ്ചാത്തലത്തെ പരിഹസിച്ചു കൊണ്ടുള്ള ഒരു ക്രിയേഷൻ ആണ് ഈ ചിത്രം എന്നൊരു വിലയിരുത്തൽ മുന്നേ കേട്ടിരുന്നു എങ്കിലും കൂടുതൽ അറിവ് ഈ വിഷയത്തിൽ ഇല്ലാത്തതിനാൽ പറയാൻ ഒന്നും ഇല്ല.

🔸കഥയിലേക്ക് വരിക ആണെങ്കിൽ ഒരു തുർക്കിഷ് ചരക്ക് കപ്പലിൽ ആണ് കഥയുടെ ഭൂരിഭാഗവും അരങ്ങേരുന്നത്. ഒരു ദീർഘ നാളത്തെ യാത്രയ്ക്ക് ശേഷം സ്വന്തം നാട്ടിലേക്ക് മടങ്ങുകയാണ് പ്രസ്തുത കപ്പലിലെ ജോലിക്കാർ. കരയിലെ സ്ഥിതിയും ഒട്ടും ആശാവഹം അല്ല, യുദ്ധവും കലാപവും എല്ലാം കാരണം സ്വന്തം കുടുംബം ഉൾപ്പെടെ കഷ്ടപ്പെടുകയാണ് എന്ന് മിക്കവർക്കും അറിയാം, ഇവർക്ക് ആണെങ്കിൽ ജോലി ചെയ്തതിന്റെ ശമ്പളം പോലും കിട്ടിയിട്ട് മാസങ്ങൾ ആയി. ഈ യാത്രയ്ക്ക് ശേഷം സ്വന്തം നാട്ടിൽ എത്തിയാൽ പ്രശ്നങ്ങൾ എല്ലാം ഒരു പരിധി വരെ പരിഹരിക്കാം എന്നതാണ് ഇവരിൽ മിക്കവരുടെയും പ്രത്യാശ.

🔸എന്നാൽ പ്രതീക്ഷയ്ക്ക് വിപരീതമായ വാർത്തകൾ ആണ് ഇവരെ തേടി എത്തുന്നത്, കപ്പലുടമയെ കോടതി പാപ്പർ ആയി പ്രഖ്യാപിച്ചത് കൊണ്ട് തന്നെ ചരക്കുമായി തീരത്ത് അടുക്കരുത് എന്ന നിർദേശം ഇവർക്ക് ലഭിക്കുകയാണ്, അത് ലേലം ചെയ്യപ്പെട്ട് പോവുമത്രേ, പോരെങ്കിൽ ശമ്പള കുടിശികയുടെ കാര്യത്തിലും തീരുമാനം ആയിട്ടില്ല. അങ്ങനെ ആ കപ്പലിലെ ആറ് ജോലിക്കാരും നടു കടലിൽ പെട്ട് പോവുകയാണ്, ഇനി എന്ത് എന്ന കാര്യത്തിൽ യാതൊരു ധാരണയും ഇല്ലാതെ. ഇനി ഇതൊന്നും പോരെങ്കിൽ ഒരു പ്രേതം കൂടി കഥയിലേക്ക് വരുന്നുണ്ട്, അതോടെ എല്ലാം പൂർണം. നല്ല ഒരു സൈക്കോളജിക്കൽ ഡ്രാമ ചിത്രമാണ് സര്മാസിക്, തീർച്ചയായും കാണാൻ ശ്രമിക്കുക.

Verdict : Very Good

DC Rating : 4/5

1308. Killers Of The Flower Moon (2023)

Director : Martin Scorsese

Cinematographer : Rodrigo Prieto

Genre : Drama

Country : USA

Duration : 206 Minutes

🔸സ്‌ക്രീനിൽ റോബർട്ട്‌ ഡി നീറോ, ലിയനാർഡോ ഡി കാപ്രിയോ, ജെസി പ്ലമോൻസ്, ബ്രെണ്ടൻ ഫ്രസിയർ തുടങ്ങിയ പ്രമുഖർ, സ്ക്രീനിന്റെ പിറകിൽ ആണെങ്കിൽ എവെർഗ്രീൻ ആയി സാക്ഷാൽ ശ്രീമാൻ മാർട്ടിൻ സ്ക്കോർസീസ്, അതും പോരെങ്കിൽ വളരെ പ്രസക്തമായ അല്ലെങ്കിൽ നൊട്ടോറിയസ് ആയ ഒരു കാലഘട്ടത്തിന്റെ കഥ, അങ്ങനെ അങ്ങനെ ഈ വർഷത്തെ ഏറ്റവും കാത്തിരുന്ന സിനിമകളിൽ ഒന്നായി മാറാൻ കില്ലേഴ്‌സ് ഓഫ് ദി ഫ്‌ളവർ മൂൺ എന്ന സിനിമയ്ക്ക് കാരണങ്ങൾ ഒരുപാട് ഉണ്ടായിരുന്നു. സിനിമ കണ്ട് കഴിഞ്ഞ ഈ വേളയിൽ ആണെങ്കിൽ ഇതിനോടെല്ലാം നീതി പുലർത്തുന്ന നല്ല ഒന്നാന്തരം ഒരു ഔട്ട് പുട്ട് ആയി മാറുന്നുമുണ്ട് ഈ സിനിമ, തീർച്ചയായും ഈ വർഷത്തെ മികച്ച സിനിമകളിൽ ഒന്ന് എന്ന വിശേഷണം അർഹിക്കുന്ന ചിത്രം.

🔸സ്പോയിലർ ആവും എന്നതിനാൽ തന്നെ കഥയിലേക്ക് കടക്കുന്നില്ല എന്തിരുന്നാലും ഒക്ലഹോമയിലെ ഓസേജ് കൗണ്ടിയിൽ നേറ്റിവ് അമേരിക്കൻ വിഭാഗക്കാർക്കിടയിൽ അരങ്ങേറിയ കൂട്ട കുരുതിയും അതിന്റെ കാര്യ കാരണങ്ങളും എല്ലാമാണ് ഈ ചിത്രം. സിനിമയിലേക്ക് കടക്കുക ആണെങ്കിൽ മൂന്നര മണിക്കൂർ റൺ ടൈം തന്നെയാണ് ഏറ്റവും വലിയ വെല്ലുവിളി, ചില ഇടത്ത് ഡ്രാഗ് ചെയ്തു എന്നത് ഒഴിച്ചാൽ എവിടെയും ബോർ ആയി തോന്നിയതേ ഇല്ല, കാരണം പ്ലോട്ട് ആയാലും പെർഫോമൻസ് ആയാലും മികച്ചത് ആയിരുന്നു എന്നത് തന്നെ. പോസിറ്റീവ് വശങ്ങളിലേക്ക് ശ്രദ്ധ മാറ്റുക ആണെങ്കിൽ ഒരു ലാർജർ ദാൻ ലൈഫ് ഫിഗർ കടന്ന് വരും, വില്യം ഹെയിൽ ആയി സ്‌ക്രീനിൽ എത്തുന്ന സാക്ഷാൽ റോബർട്ട് ഡി നിറോ ആണ് ആ ഫിഗർ.

🔸അങ്ങേയറ്റം മാനിപുലേറ്റിവ് ആയ ഒരു കഥാപാത്രത്തെ അവതരിപ്പിച്ച റോബർട്ട് ഡി നീറോ ആയാലും, നട്ടെല്ലില്ലാത്ത, യുസ്ലസ് ആയ ഒരു കഥാപാത്രം ആയി എത്തിയ ലിയനാർഡോ ഡി കാപ്രിയോ ആയാലും, ലിലി ഗ്ലാഡ്സ്റ്റണിന്റെ ബ്രേക്ക് ഔട്ട് പ്രകടനം ആയാലും പെർഫോമൻസ് തന്നെയാണ് ഈ സിനിമയുടെ ശക്തി. അത്യാവശ്യം ഡിപ്രസിങ് ആയ കഥ ആണെങ്കിൽ കൂടിയും ഒട്ടും മടുപ്പിക്കാതെ ഇടവേളകളിൽ അത്യാവശ്യം സർക്കാസ്റ്റിക്ക് ആയി പോലും മാറുന്ന രീതിയിൽ ഉള്ള സിനിമയുടെ അവതരണത്തെ അഭിനന്ദിച്ചേ മതിയാവൂ. ഇതിനെല്ലാം ഒപ്പം മികച്ച ചായാഗ്രാഹനവും, സെറ്റപ്പും, പേസിങ്ങും കൂടി ചേരുമ്പോൾ ഈ വർഷത്തെ മികച്ച സിനിമകളിൽ ഒന്നായി മാറുകയാണ് കില്ലേഴ്‌സ് ഓഫ് ദി ഫ്‌ളവർ മൂൺ, തീർച്ചയായും കാണാൻ ശ്രമിക്കുക.

Verdict : Very Good

DC Rating : 4.25/5

1307. The Banishment (2007)

Director : Andrey Zvyagintsev

Cinematographer : Mikhail Krichman

Genre : Drama

Country : Russia

Duration : 157 Minutes

🔸അത്ര കൺവൻഷനൽ ആയ സിനിമ ഒന്നും അല്ല ദി ബാണിഷ്മെന്റ്, നമ്മൾ പ്രതീക്ഷിക്കുന്ന വഴിയിൽ കൂടി പോവാത്ത, പ്രതീക്ഷിക്കുന്ന ഒരു എൻഡ്‌ റിസൾട്ട് ഒന്നും നൽകാത്ത, ചുരുക്കി പറഞ്ഞാൽ വളരെ വെയ്ർഡ് ആയ ഒരു അനുഭവം സമ്മാനിച്ച് കടന്ന് പോവുന്ന ഒരു സിനിമ. നല്ല സിനിമ ആണോ എന്ന് ചോദിച്ചാൽ തീർച്ചയായും അതെ, എന്നാൽ കുറച്ച് കൂടി ഗംഭീരം ആയേക്കാവുന്ന ഒരു സിനിമ ഇതിന് ഇടയിൽ എവിടെയോ ഉണ്ടായിരുന്നു എന്നൊരു ഫീൽ ആണ് സിനിമ കണ്ട് കഴിയുമ്പോൾ ലഭിച്ച ഒരു പ്രതീതി. ദി റിട്ടേൺ പോലൊരു സിനിമ സംവിധാനം ചെയ്ത വ്യക്തിയിൽ നിന്നും തീർച്ചയായും കുറച്ച് കൂടി പ്രതീക്ഷിക്കുന്നതിൽ തെറ്റ് പറയാൻ കഴിയില്ല.

🔸തർക്കോവ്സ്കി സിനിമകൾക്ക് ഹോമേജ് നൽകുന്ന രീതിയിൽ ആണ് സിനിമ തയാറാക്കിയിരിക്കുന്നത്, വളരെ മനോഹരമായ ലോങ്ങ്‌ ഷോട്ടുകളും പശ്ചാത്തലങ്ങളും ഒക്കെയായി മനോഹരമായ ഒരു വ്യൂയിൻഗ് എക്സ്പീരിയൻസ് ആയി മരുന്നുണ്ട് ഈ ചിത്രം. കഥയിലേക്ക് വരിക ആണെങ്കിൽ നമ്മുടെ കേന്ദ്ര കഥാപാത്രത്തിന്റെ പേര് അലക്സ് എന്നാണ്, ഒരു കുടുംബസ്ഥൻ ആയ അലക്സിന് ചില ക്രിമിനൽ പശ്ചാത്തലം ഉള്ളവരുമായി രഹസ്യ ബന്ധങ്ങളും ഇടപാടുകളും ഒക്കെയുണ്ട്. ഈ ബന്ധങ്ങളിൽ എല്ലാം തന്നെ ഒരു ഇടനിലക്കാരന്റെ അല്ലെങ്കിൽ സഹായിയുടെ വേഷത്തിൽ അലക്സിന്റെ സഹോദരൻ മാർക്കും ഒരു ഭാഗം ആവുന്നുണ്ട്.

🔸കഥയിൽ ഒരു ടർണിങ് പോയിന്റ് സംഭവിക്കുന്നത് അലക്സിന്റെ ഭാര്യ ഒരു പ്രത്യേക കാര്യം അലക്സിനോട് പറയുമ്പോഴാണ്. എന്താണ് ഈ സംഭവം, അതിന്റെ പ്രത്യാഘാതം എന്ത് തുടങ്ങിയവ എല്ലാം സിനിമ കണ്ട് തന്നെ അറിയുക. അത്യാവശ്യം സ്ലോ ആയ ഒരു ഡ്രാമ ചിത്രമാണ് ബാണിഷ്മെന്റ്, സ്വാഭാവികമായും എല്ലാവർക്കും പറ്റിയ ഒരു അനുഭവവും ആവില്ല. സ്ലോ ബിൽഡപ്പ് ഉള്ള, ഡ്രാമകളോട് താല്പര്യം ഉള്ളവർ മാത്രം കാണാൻ ശ്രമിക്കുക. പേഴ്സണലി പ്രതീക്ഷിച്ച അത്ര നല്ലൊരു അനുഭവവും ആയിരുന്നില്ല ഈ ചിത്രം, ഒരുപാട് പ്ലോട്ട് പോയിന്റുകൾ ഡെവലപ്പ് ചെയ്യാതെ നമ്മുടെ ഇന്റപ്രേട്ടേഷന് വേണ്ടി വിട്ട് തന്നത് പോലെ ആയിരുന്നത് കൊണ്ട് തന്നെ ഒരു തൃപ്തി കുറവ് ആകെ മൊത്തം ഉണ്ടായിരുന്നു.

Verdict : Watchable

DC Rating : 3.25/5

1306. Hard To Be A God (2013)

Director : Aleksei German

Cinematographer : Yuri Klimenko

Genre : Drama

Country : Russia

Duration : 177 Minutes

🔸മോഹൻലാൽ നായകനായി അഭിനയിച്ച നമ്മുടെ ഗുരു സിനിമയുമായി ചെറുതല്ലാത്ത സാമ്യം പുലർത്തുന്നുണ്ട് പത്ത് വർഷങ്ങൾക്ക് മുൻപേ പുറത്തിറങ്ങിയ ഈ റഷ്യൻ ഡ്രാമ ചിത്രം. ഇന്നത്തെ കാലത്ത് ആണ് കഥ നടക്കുന്നത് എങ്കിലും നമ്മുടെ കഥാ പശ്ചാത്തലം ഇന്നും വികസനവും ടെക്ക്നോളജിയും ഒന്നും കടന്ന് വന്നിട്ടില്ലാത്ത ഒരു 'പുരാതന' ഗ്രാമം ആണ്. ഭൂമിയിൽ നിന്നും മാറി കുറച്ച് ദൂരെ ഉള്ള ഒരു ഏലിയൻ ഗ്രഹത്തിൽ ആണ് കഥ അരങ്ങേറുന്നത്, നൂതന ആയുധങ്ങൾക്ക് പകരം ഇന്നും കമ്പും കൊട്ടുവടിയും ഒക്കെയായി നായാടി ജീവിക്കുകയാണ് ഈ ഗ്രഹത്തിലെ മനുഷ്യർ. ഇതിനിടയിലേക്ക് ഭൂമിയിൽ നിന്നും ചില സയന്റിസ്റ്റുകൾ ആ ഗ്രഹത്തിൽ എത്തി ചേരുകയാണ്.

🔸ഭൂമിയിലെ വികസനം ഈ ഗ്രഹത്തിലും എത്തിക്കുക എന്നതിന് പകരം അവരുടെ സ്വഭാവികമായ ജീവിത രീതി പഠിക്കുക എന്നതാണ് അവരുടെ വരവിന് പിന്നിലെ ലക്ഷ്യം. അതായത് ഒരു കാരണവശാലും ആ ഗ്രഹത്തിലെ മനുഷ്യരുടെ ജീവിത രീതികളുമായി ബന്ധപ്പെടുകയോ അല്ലെങ്കിൽ അവരെ സ്വാധീനിക്കുകയോ ചെയ്യാതെ മാറി നിന്ന് കാര്യങ്ങൾ ഗ്രഹിച്ച് എടുക്കുന്ന ഒരു രീതി. ഈ വരവിൽ അവർ മറ്റൊരു കഥാപാത്രത്തിനെ കൂടി കണ്ട് മുട്ടുകയാണ്, അതായത് വർഷങ്ങൾക്ക് മുന്നേ ഭൂമിയിൽ നിന്നും അവിടെ എത്തി ആ മനുഷ്യർക്കിടയിൽ ജീവിച്ച് അവരിൽ ഒരാളായി മാറിയ ഒരു കഥാപാത്രത്തെ. ഈ കഥാപാത്രമാണ് പ്രസ്തുത സിനിമയുടെ ബാക്ക്ബോൺ അല്ലെങ്കിൽ നട്ടെല്ല്.

🔸ദൈവ സമാനമായ ഒരു പരിവേഷം ആണ് ഈ കഥാപാത്രത്തിന് അവിടെ ലഭിക്കുന്നത്, സത്യത്തിൽ ഇയാൾ ആരാണ്, ഉദ്ദേശം എന്താണ്, ഈ വിഭാഗത്തിൽ പെട്ട ആളുകളുടെ ഭാവി എന്താവും തുടങ്ങിയ ചോദ്യങ്ങൾക്ക് എല്ലാമുള്ള ഉത്തരമാണ് മൂന്ന് മണിക്കൂറിന് അടുത്ത് ദൈർഘ്യം ഉള്ള ഈ സിനിമ. ഉദ്ദേശം പതിനഞ്ച് വർഷങ്ങൾ എടുത്ത് പൂർത്തിയാക്കപ്പെട്ട ഈ ചിത്രം സ്വാഭാവികമായും എല്ലാവർക്കും ഇഷ്ട്ടപ്പെടുന്ന രീതിയിൽ ഉള്ള ഒരു ഔട്ട് പുട്ട് അല്ല, നല്ല തോതിൽ സ്ലോ ആയ ഒരല്പം വിരസം ആയ അനുഭവം തന്നെയാണ്. ഈ ഒരു കാരണം കൊണ്ട് തന്നെ ഡ്രാമ ജോനറിനോട് താല്പര്യം ഉള്ളവർ മാത്രം കണ്ടാൽ മതിയാവും.

Verdict : Good

DC Rating : 3.75/5

1305. Return To Seoul (2022)

Director : Davy Chou

Cinematographer : Thomas Favel

Genre : Drama

Country : Cambodia

Duration : 119 Minutes

🔸പാർക് ജി മിൻ എന്ന അഭിനേത്രിയുടെ ആദ്യത്തെ സിനിമ ആണ് റിട്ടേൺ ടു സോൾ എന്ന് പറഞ്ഞാൽ, സിനിമ കണ്ട് തീർത്തവർക്ക് വിശ്വസിക്കാൻ അല്പം ബുദ്ധിമുട്ട് തന്നെ ആയിരിക്കും. കാരണം വേറൊന്നുമല്ല, ഒരുപാട് ടൈം ജമ്പുകളിൽ കൂടി അവർ അവതരിപ്പിച്ച കഥാപാത്രവും, കഥയും കടന്ന് പോവുന്നുണ്ട്, എന്നാൽ ഒരു പോർഷണിലും അവർ പ്രകടനം കൊണ്ട് മോശം ആക്കുന്നില്ല എന്ന് മാത്രമല്ല തന്മയത്വത്തോടെ കാര്യങ്ങൾ അവതരിപ്പിക്കുന്നും ഉണ്ട്. കഥയുടെ ഓരോ പോയിന്റിലും ആ കഥാപാത്രം അനുഭവിക്കുന്ന മാനസിക സംഘർഷങ്ങൾ, നേരിടുന്ന വെല്ലുവിളികൾ എന്നതൊക്കെ പ്രേക്ഷകനിലേക്ക് എത്തിക്കാനും, ആ സ്ട്രഗിളുമായി കാഴ്ചക്കാരനെ കണക്റ്റ് ചെയ്യിക്കാനും അവർക്ക് മനോഹരമായി സാധിച്ചിട്ടുണ്ട്. പാർക് ജി മിൻ ആണ് ഈ കഥയുടെ സോൾ എന്ന് പറഞ്ഞാലും കുറവില്ല.

🔸കൊറിയയിൽ ജനിച്ച് വളർന്ന ഫ്രഡ്‌ഡിയെ ചെറു പ്രായത്തിൽ തന്നെ അവളുടെ യഥാർത്ഥ മാതാപിതാക്കൾ ദത്ത് നൽകിയതാണ്. ഫ്രഡ്‌ഡിയെ ഏറ്റെടുത്തത് ഒരു ഫ്രഞ്ച് ദമ്പതിമാർ ആയത് കൊണ്ട് തന്നെ പിന്നീട് ഉള്ള അവളുടെ ജീവിതം അന്യ നാട്ടിൽ ആയിരുന്നു. വർഷങ്ങൾക്ക് ഇപ്പുറം ഒരു യുവതി ആയി മാറിയ ശേഷമാണ് ഫ്രെഡി തന്റെ ജന്മ നാട്ടിലേക്ക് മടങ്ങി എത്തുന്നത്, അതും തീർത്തും അപ്രതീക്ഷിതം എന്ന രീതിയിൽ. ഈ മടങ്ങി വരവ് എന്നത് ഫ്രഡിയെ സംബന്ധിച്ചിടത്തോളം സംഭവബഹുലമായ ഒന്നായി മാറുകയാണ്, ഈ വരവിൽ തന്റെ യഥാർത്ഥ മാതാപിതാക്കളെ കണ്ട് പിടിക്കാനായി അവൾ ഇറങ്ങി തിരിക്കുകയാണ്.

🔸തന്നെ ദത്ത് നൽകിയ ഓർഫനെജ് വഴി അവൾ ആരംഭിക്കുന്ന അന്വേഷണത്തിൽ പ്രതീക്ഷ ഒന്നും അവൾക്ക് ഉണ്ടായിരുന്നില്ല എങ്കിലും പ്രത്യാശ പൂർണമായും ഒഴിവാക്കിയിരുന്നില്ല താനും. അങ്ങനെ ഒരുനാൾ അവളെ തേടി അവളുടെ യഥാർത്ഥ പിതാവിന്റെ കത്ത് വരികയാണ്, തുടർന്ന് സംഭവിക്കുന്ന കാര്യങ്ങൾ ആണ് ഈ സിനിമ. രണ്ടര മണിക്കൂറിന് അടുത്ത് ദൈർഘ്യം ഉള്ള റിട്ടേൺ ടു സോൾ തീർച്ചയായും ഒരു മനോഹര സിനിമ തന്നെയാണ്, എന്നാൽ ഡ്രാമ ജോനറിനോട് താല്പര്യം ഉള്ളവർക്ക് അല്ലാതെ വേറെ ആർക്കും സാജസ്റ്റ് ചെയ്യുന്നുമില്ല, താല്പര്യം തോന്നുന്നു എങ്കിൽ കണ്ട് നോക്കാവുന്നതാണ്.

Verdict : Good

DC Rating : 3.75/5

1304. The Last Of Us (2023)

Creator : Craig Mazin

Genre : Drama

Seasons : 01

Episodes : 09

Country : USA

Duration : 43 - 81 Minutes

🔸ദി ലാസ്റ്റ് ഓഫ് അസ് എന്ന ഗെയിം സീരീസിനെ കുറിച്ച് ആദ്യമായി കേൾക്കുന്നത് ലോഗൻ എന്ന സിനിമ റിലീസ് ആവുന്ന സമയത്താണ്. ചിത്രം വളരെ ഏറെ ഇഷ്ട്ടപ്പെട്ട ഒരു അനുഭവം ആയിരുന്നത് കൊണ്ട് തന്നെ ആ ചർച്ചകളിൽ ഒന്നിൽ സുഹൃത്തുക്കളിൽ ഒരാൾ പറഞ്ഞ 'ലാസ്റ്റ് ഓഫ് അസ് വൈബ്' എന്ന പ്രയോഗം ആണ് ഈ സീരീസിലേക്ക് അടക്കം എത്തിച്ചത് എന്ന് പറയാം. ഒരു പോസ്റ്റ് അപ്പോകലിപ്റ്റിക്ക് സെറ്റപ്പിൽ ഉള്ള റോഡ് ജേർണി ടൈപ്പ് സംരംഭമായ ലാസ്റ്റ് ഓഫ് അസ് എന്ന ഗെയിം മുകളിൽ പറഞ്ഞ കാരണം കൊണ്ട് തന്നെ ആവേശത്തോടെ കളിച്ച് തീർത്തതുമാണ്. ഈ ഒരു കഥയെ തന്നെ ആധാരമാക്കി ഒരു സീരീസ് വരുന്നു എന്നറിഞ്ഞപ്പോൾ അത് കൊണ്ട് തന്നെ പ്രതീക്ഷകൾ ഒരുപാട് ഉയരത്തിൽ ആയിരുന്നു. പൊതുവെ വീഡിയോ ഗെയിം പ്രൊഡക്റ്റ്സ് ബിഗ് സ്‌ക്രീനിൽ എത്തുമ്പോൾ ദുരന്തം ആവാറുണ്ട് എന്ന വസ്തുത പോലും എച്ബിഒ എന്ന പേരിന് മുന്നിൽ വക വെച്ചില്ല എന്നത് മറ്റൊരു സത്യം.

🔸ഒരു സോമ്പി അപ്പോകാലിപ്സ് പശ്ചാത്തലത്തിൽ ആണ് ദി ലാസ്റ്റ് ഓഫ് അസ് കഥ പറഞ്ഞ് തുടങ്ങുന്നത്. ഒരു വയറസ് മ്യുട്ടേഷൻ കാരണം ലോകത്താകമാനം ചികിൽസിക്കാൻ കഴിയാത്ത വിധം ഭീകരമായ ഒരു വ്യാധി പടർന്ന് പിടിക്കുകയാണ്. ഇതിൽ നിന്ന് താൽക്കാലികം എന്ന രീതിയിൽ എങ്കിലും രക്ഷ നേടിയത് വളരെ ചെറിയ ഒരംശം ആളുകൾ മാത്രമാണ്. എന്നാൽ ഇനി ഒരിക്കലും തിരിച്ച് കിട്ടാൻ കഴിയാത്ത വിധം അവരുടെ മാനസിക നിലയും, ജീവിത രീതിയും, പശ്ചാത്തലവും എല്ലാം മാറി പോയിരിക്കുന്നു. മുകളിൽ സൂചിപ്പിച്ച 'ഭാഗ്യവാന്മാർ' എന്ന് കരുതപ്പെടുന്ന ആ ചെറിയ അംശം ആളുകളുടെ ജീവിതം ഒരു ക്വാറന്റൈൻ സോണിൽ മാത്രമായി ഒതുങ്ങി പോയിരിക്കുകയാണ്, ഇവിടെ ആണെങ്കിൽ ഏകാധിപത്യ സമാനമായ ഭരണവും രീതികളും ഒക്കെയാണ് താനും.

🔸ഈ ഒരു പശ്ചാത്തലത്തിൽ ആണ് നമ്മൾ പ്രധാന കഥാപാത്രങ്ങളായ ജോയലിനെയും എല്ലിയെയും കണ്ട് മുട്ടുന്നത്. പിന്നീടുള്ള ഒൻപത് എപ്പിസോഡുകൾ വിവിധ പശ്ചാത്തലങ്ങളിലൂടെ, പലവിധ കഥാപാത്രങ്ങളിലൂടെ നമ്മളും സഞ്ചാരിക്കുകയാണ്, ഇവർക്ക് ഒപ്പം. വളരെ ഇമോഷണൽ ആയ ഒരു അനുഭവം ആണ് ലാസ്റ്റ് ഓഫ് അസ്, പശ്ചാത്തലം കേൾക്കുമ്പോൾ ഒരു സർവയ്വൽ ത്രില്ലർ പ്രതീതി ഒക്കെ തരും എങ്കിലും വളരെ വേദനിപ്പിക്കുന്ന അല്ലെങ്കിൽ ഡിപ്രഷൻ അടിപ്പിക്കുന്ന ഒന്നാണ് ഈ സീരീസ്. ആദ്യ അഞ്ച് എപ്പിസോഡുകൾ വളരെ വേട്ടയാടുന്ന ഒരു അനുഭവം ആയിരുന്നെങ്കിലും പിന്നീട് ഷോ ഒരല്പം ഡൗൺ ആവുന്നുണ്ട്. പേസിങ് ഒരു പ്രശ്നം ആയിരുന്നു എങ്കിലും തൃപ്തികരമായ ഒരു അവസാനം തന്ന് കൊണ്ട് അവസാനിക്കുകയാണ് സീസൺ വൺ.

Verdict : Very Good

DC Rating : 4.25/5

1303. No Bears (2022)

Director : Jafar Panahi

Cinematographer : Amin Jafari

Genre : Drama

Country : Iran

Duration : 107 Minutes

🔸ഉദ്ദേശം പതിമൂന്ന് വർഷങ്ങൾക്ക് മുന്നേ ഇനിയൊരു സിനിമ ചെയ്യാൻ പാടില്ല എന്ന ബാൻ ഏറ്റുവാങ്ങിയ വ്യക്തി ആണ് ജാഫർ പനാഹി, പക്ഷെ ഈ ഒരു വസ്തുത പുള്ളിയെ പിറകോട്ട് വലിച്ചില്ല എന്നത് ഏവർക്കും അറിയാവുന്ന കാര്യവുമാണ്. ഒരു രാജ്യത്തെ ഭരണകൂടം തന്നെ നിശബ്ദൻ ആക്കാൻ ശ്രമിച്ചിട്ടും യാതൊരു വിധ കൂസലും ഇല്ലാതെ സിനിമകൾ അടിച്ചിറക്കുന്ന പനാഹി ഈ ഒരു വസ്തുത കൊണ്ട് തന്നെ പ്രേക്ഷക നിരൂപക ശ്രദ്ധ പിടിച്ച് പറ്റുന്നതിൽ വലിയ അത്ഭുതത്തിന് ഒന്നും സ്കോപ്പ് ഇല്ല. നോ ബിയേഴ്‌സ് എന്ന സിനിമയിലേക്ക് എത്തുമ്പോഴും ഈ ഒരു കൗതുകം തീർച്ചയായും ഉണ്ടായിരുന്നു, പ്രത്യേകിച്ചും സംവിധായകന് ഈ വർഷം ആദ്യം ലഭിച്ച പുതിയ ആറ് വർഷ തടവ് ശിക്ഷ കൂടി കണക്കിൽ എടുക്കുമ്പോൾ.

🔸പുതിയ സിനിമയിൽ പനാഹിയും ഒരു കഥാപാത്രത്തെ അവതരിപ്പിച്ചിട്ടുണ്ട്, തന്റെ പുതിയ ഫീച്ചർ ഫിലിമിന് പിറകെ ഇറങ്ങി തിരിക്കുന്ന ഒരു സംവിധായകന്റെ വേഷമാണ് ടിയാന് ഈ ചിത്രത്തിൽ. തുർക്കിയുടെയും ഇറാന്റെയും അതിർത്തി ഗ്രാമങ്ങളിൽ ഒന്നിൽ സംഭവിക്കുന്ന ഈ കഥ ഒരു ഭാര്യയുടെയും ഭർത്താവിന്റെയും ജീവിതം ആണ് വിഷയം ആക്കിയിരിക്കുന്നത്. മോശം ജീവിത സാഹചര്യങ്ങളും ദാരുണമായ പരിതസ്ഥിതിയും എല്ലാം കാരണം തങ്ങളുടെ ജന്മനാട്ടിൽ നിന്നും യൂറോപ്പിലേക്ക് താമസം മാറ്റാൻ ശ്രമിക്കുകയാണ് പ്രസ്തുത ദമ്പതികൾ. എന്നാൽ ഈ പലായനത്തിന് വേണ്ടിയുള്ള രേഖകൾ ശെരിയാക്കുക എന്നത് ഇവരെ സംബന്ധിച്ചിടത്തോളം വലിയൊരു വെല്ലുവിളി തന്നെയായി മാറുകയാണ്.

🔸ഈ കഥക്ക് പാരലൽ ആയി തന്നെ തന്റെ പുതിയ സിനിമ സൃഷ്ടിക്കാനായി അതിർത്തി ഗ്രാമത്തിൽ എത്തുന്ന ഒരു സംവിധായകനെയും നമുക്ക് കാണാം. ജീവിതത്തിൽ ഇമോഷണൽ ആയും പൊളിറ്റിക്കൽ ആയും ഒരുപാട് വെല്ലുവിളികൾ നേരിടേണ്ടി വരുന്ന ടിയാന്റെ കഥയിലെ ചില സ്‌ലാപ്സ്റ്റിക്ക് കോമെഡി ഒക്കെ കാണിച്ച് കൊണ്ട് സിനിമ നല്ല രീതിയിൽ തന്നെ അങ്ങനെ പുരോഗമിക്കുകയാണ്. മുൻകാല പനാഹി ചിത്രങ്ങളുടെ അത്ര സ്ട്രോങ്ങ്‌ ആയി തോന്നിയില്ല എങ്കിലും നല്ലൊരു അനുഭവം തന്നെയാണ് നോ ബിയേഴ്‌സ് എന്ന ചിത്രവും, ആദ്യാവസാനം നല്ല രീതിയിൽ ആസ്വദിച്ച് കണ്ട ചിത്രം റിയൽ ലൈഫ് ഫാക്ട്ടേഴ്‌സ് കഥയിലേക്ക് കൊണ്ട് വന്ന രീതി മികച്ചത് തന്നെയാണ്.

Verdict : Good

DC Rating : 3.75/5

1302. Chainsaw Man (2022)

Director : Ryu Nakayama

Genre : Action

Seasons : 01

Episodes : 12

Country : Japan

Duration : 23 - 25 Episodes

🔸പോയ വർഷം ഏറ്റവും പ്രതീക്ഷ വെച്ച് പുലർത്തിയ അനിമേ സീരീസുകളിൽ ഒന്നായിരുന്നു ചെയിൻസോ മാൻ. സോഴ്‌സ് മാൻഗ വായിച്ച അറിവ് ഒന്നും ഇല്ലെങ്കിലും അനിമേയുടെ പ്ലോട്ട് ലൈൻ, പൊതുവെ മറ്റ് അനിമേ വിദഗ്ദരുടെ പക്കൽ നിന്നും ലഭിച്ച അറിവ് എന്നിവ എല്ലാം കൊണ്ട് പ്രതീക്ഷ എന്നത് അത്രയും ഉന്നതിയിൽ ആയിരുന്നു എന്ന് തന്നെ പറയാം. പന്ത്രണ്ട് എപ്പിസോഡ് ഉള്ള ആദ്യ സീസൺ കണ്ട് കഴിഞ്ഞ ഈ വേളയിൽ ആ പ്രതീക്ഷയോടെ നൂറ് ശതമാനം നീതി പുലർത്താൻ ഈ സംരംഭത്തിന് കഴിഞ്ഞോ എന്നത് സംശയമാണ് എങ്കിലും നിരാശ ഒന്നും തന്നതുമില്ല. ഒരുപക്ഷെ ഇനി വരാൻ പോവുന്ന സീസണുകളിൽ ഒരു എസ്‌കലേഷൻ ലഭിച്ചാലും മതി, അതിനുള്ള സമയവും പ്ലോട്ട് സീഡ്‌സും ഇവിടെ ഉണ്ട് എന്നത് പ്രസക്തമായ കാര്യവുമാണ്.

🔸ഡെഞ്ചി എന്നൊരു ടീനേജർ ആണ് നമ്മുടെ പ്രധാന കഥാപാത്രം, കാഴ്ചയിൽ നായയെ പോലെ തോന്നിക്കുന്ന ഒരു സൂപ്പർ നാച്ചുറൽ കഥാപാത്രമായ പോചിട്ടോ എന്ന സന്തത സഹചാരിയെ മാറ്റി നിർത്തിയാൽ ഡെഞ്ചി ഒരു ഏകാകിയാണ്. ഒരു കുട്ടിക്ക് താങ്ങാൻ കഴിയുന്നതിലും വലിയ ഭാരം ചുമക്കാനായി നൽകി എന്നോ മരണപ്പെട്ട ആളാണ് ഡെൻജിയുടെ അച്ഛൻ, ഈ കടങ്ങൾ വീട്ടി തീർക്കാനായി ആണ് ഡെഞ്ചി അമാനുഷിക ശക്തികളെ വേട്ടയാടുന്ന ഒരു ഡെവിൾ ഹണ്ടർ ആയി മാറുന്നത്. എന്നാൽ വിധി ഇവിടെയും ഡെൻജിയുടെ കാര്യത്തിൽ ഒരു വില്ലനായി അവതരിക്കുകയാണ്, ഒപ്പം ഉള്ളവരായി കരുതിയവർ തന്നെ ഡെൻജിയെ ചതിക്കുകയാണ്, ഒടുവിൽ ഉടൽ വേറെ തല വേറെ എന്ന മട്ടിൽ ക്രൂരമായി അവൻ കൊല്ലപ്പെടുന്നു.

🔸അവിടെ കഥ അവസാനിക്കുന്നില്ല, ടെൻജിയും പോച്ചിട്ടോയും കൂടി ചേർന്ന് ഒരു പുതിയ അവതാരം അവിടെ പിറവി എടുക്കുകയാണ്. അതായത് ഡെൻജിയുടെ ശരീരവും, പോച്ചിട്ടോയുടെ തലയും, ദേഹമാസകലം ചെയിൻസോകൾ ഉള്ള ഒരു ഭീകര രൂപമായി അവൻ മാറുകയാണ്. ഇതാണ് ചെയിൻസോ മാൻ എന്ന കഥാപാത്രത്തിന്റെ തുടക്കം. പിന്നീട് ടിയാൻ ഒരുപാട് പ്രത്യേകതരം കഥാപാത്രങ്ങളെ കണ്ട് മുട്ടുന്നുണ്ട്, അത്യാവശ്യം ഗോറി ആയ ഫൈറ്റ് സീൻസ് ഒക്കെ വന്ന് പോവുന്നുമുണ്ട്. മാങ്ങായിലെ ആദ്യത്തെ 38 അധ്യായങ്ങൾ മാത്രമാണ് ഈ ഷോ ആദ്യ സീസണിന് വിഷയം ആക്കിയിരിക്കുന്നത്. അതിനാൽ തന്നെ സിംഹ ഭാഗവും ഇനി വരാൻ പോവുന്നെ ഉള്ളൂ, ഈ ഒരു കാരണം കൊണ്ട് തന്നെ ഒരു വിലയിരുത്തൽ എത്രത്തോളം പ്രസക്തമാണ് എന്നത് സംശയമാണ്, എന്തിരുന്നാലും കൊള്ളാം എന്ന് മാത്രം പറഞ്ഞ് നിർത്താം.

Verdict : Good

DC Rating : 3.75/5

1301. Oppenheimer (2023)

Director : Christopher Nolan

Cinematographer : Hoyte Van Hoytema

Genre : Drama

Country : USA

Duration : 181 Minutes

🔸നോളൻ എന്ന സംവിധായകന്റെ ആരാധകർ പൊതുവെ കൊടുക്കാറുള്ള "ഒരു നോളൻ പടം" എന്ന വിശേഷണത്തിൽ ചേർക്കാൻ കഴിയാത്ത ഒരു സിനിമ ആണ് ഓപ്പൻഹൈമർ.പ്രെസ്റ്റീജ് എന്ന ചിത്രത്തിലെത് പോലുള്ള മികച്ച ട്വിസ്‌റ്റോ, ഡാർക്ക് നൈറ്റ് റൈസസ് എന്ന ചിത്രം തന്നത് പോലുള്ള സംപ്തൃപ്തിയോ, ഇന്റർസ്റ്റെല്ലർ തന്നത് പോലെ വൺസ് ഇൻ എ ലൈഫ് ടൈം സൗണ്ട് ട്രാക്കോ ഒന്നും തന്നെ ഈ ചിത്രത്തിൽ ഇല്ല. മൂന്ന് മണിക്കൂർ ദൈർഘ്യം ഉള്ള സിനിമയുടെ അറുപത് ശതമാനവും കോൺഫ്രൻസ് റൂം പോലുള്ള സെറ്റപ്പിൽ ഇരുന്ന് ആളുകൾ കാര്യങ്ങൾ ഡിസ്‌കസ് ചെയ്യുന്നത് പോലെയാണ് കഥ പുരോഗമിക്കുന്നത്. ഈ ഒരു കാരണം കൊണ്ട് തന്നെ സ്റ്റോറിയുടെ ഹിസ്റ്ററിക്കൽ വശം ഉൾപ്പെടെ ഉള്ളവയുമായി കണക്ഷൻ കിട്ടിയില്ല എങ്കിൽ എത്രത്തോളം ആസ്വദിക്കാൻ കഴിയുമോ എന്നത് സംശയമാണ്.

🔸"മരണത്തിന്റെ മൊത്ത വ്യാപാരി" എന്ന വിശേഷണം തന്റെ ജീവിത കാലത്തെ കർമങ്ങൾ കാരണം നേടിയ ആളാണ് റോബർട്ട് ഓപ്പൺഹെയ്മർ. പതിറ്റാണ്ടുകളും, തലമുറകളും കടന്ന് കാലം ഒരുപാട് മുന്നോട്ട് വന്നിട്ടും ഇന്നും ഭീതിയോട് കൂടി മാത്രം ആളുകൾ ഓർക്കുന്ന ആറ്റം ബോംബ് എന്ന പിറവിയുടെ കാരണം ആണ് ഓപ്പൻഹെയ്മർ. ഇന്ന് ഏറെക്കുറെ ഈ ഒറ്റ കാരണത്താൽ ഓർമ്മിക്കപ്പെടുന്ന ഓപ്പൻഹേയ്മറുടെ ജീവിതത്തിന്റെ സംഭവ ബഹുലമായ മൂന്നോളം പതിറ്റാണ്ടുകൾ ആണ് സിനിമയ്ക്ക് വിഷയം ആയിരിക്കുന്നത്. ടൈറ്റിൽ കഥാപാത്രമായി എത്തിയ സിലിയൻ മർഫി തന്നെയാണ് സിനിമയുടെ ഏറ്റവും വലിയ പോസിറ്റിവുകളിൽ ഒന്ന്, പ്രത്യേകിച്ച് താൻ തുറന്ന് വിട്ട ഭീകരതയുടെ വ്യാപ്തി മനസിലായ ശേഷം അയാൾ പ്രകടിപ്പിക്കുന്ന പശ്ചാത്താപത്തിന്റെ രംഗങ്ങൾ എല്ലാം മികച്ചത് തന്നെ ആയിരുന്നു.

🔸സ്‌ക്രീനിൽ എത്തിയവർ എല്ലാം തന്നെ മികച്ച പ്രകടനം തന്നെ കാഴ്ചവെച്ചു, അതിൽ പ്രത്യേക പരാമർശം അർഹിക്കുന്ന രണ്ട് പേർ റോബർട്ട് ഡൗനി ജൂനിയറും, ദാൻ ഡിഹാനും ആണ്. നല്ല സൗണ്ട് ട്രാക്കും, മികച്ച ഹിസ്റ്ററിക്കൽ സെറ്റപ്പും, ബോംബ് എക്സ്പ്ലോഷൻ സീനിന്റെ ഇന്റൻസിറ്റിയും എല്ലാം എടുത്ത് പറയേണ്ട കാര്യങ്ങളാണ്. ലെങ്ത് ആണ് സിനിമയുടെ ഏറ്റവും വലിയ നെഗറ്റ്റീവുകളിൽ ഒന്ന്, ചില പോർഷൻസിൽ പ്രത്യേകിച്ച് മിഡിൽ പോർഷനിൽ സിനിമ ബോർ അടിപ്പിക്കുന്ന ഫീൽ ആയിരുന്നു. ഹോയ്റ്റ് വാൻ ഹോയ്റ്റമയുടെ ചായഗ്രഹണവും മികച്ചതായി തോന്നിയില്ല. നിലവാരത്തിൽ നോളന്റെ അവസാനം ഇറങ്ങിയ രണ്ട് സിനിമകളുമായി തട്ടിച്ച് നോക്കുമ്പോൾ മികച്ച ഔട്ട് പുട്ട് തന്നെയാണ് ഓപ്പൻഹേയ്മർ, കണ്ട് നോക്കാവുന്നതാണ്.

Verdict : Good

DC Rating : 3.75/5

1300. Beau Is Afraid (2023)

Director : Ari Aster

Cinematographer : Pawel Pogorzelski

Genre : Drama

Country : Canada

Duration : 179 Minutes

🔸എരി ആസ്റ്റർ, ജോവാക്വിൻ ഫീനിക്സ്, സൈക്കോളജിക്കൽ ഡ്രാമ, അങ്ങനെ ഇഷ്ടമുള്ള മൂന്ന് ഘടകങ്ങൾ ഒന്നിച്ച് വന്നത് കൊണ്ട് തന്നെ ഈ വർഷം ഏറ്റവും കൂടുതൽ പ്രതീക്ഷ അർപ്പിച്ച സിനിമകളിൽ ഒന്നായിരുന്നു ബിയു ഈസ് അഫ്റൈഡ്. മൂന്ന് മണിക്കൂറിന് അടുത്ത് ദൈർഘ്യം ഉള്ള ചിത്രം ഒരു ക്യാറക്ടർ സ്റ്റഡി അല്ലെങ്കിൽ ഒരു ബയോഗ്രാഫിക്കൽ സ്വഭാവം ഉള്ള ചിത്രം ആണെന്ന് പറഞ്ഞാലും തെറ്റില്ല.ഒരു ടിപ്പിക്കൽ അസ്റ്റർ ഫിലിം പോലെ അത്യാവശ്യം കൊമ്പ്ലക്സ് ആയ, വളരെ പേഴ്സണൽ ആയ, ചില ഭാഗങ്ങളിൽ കണ്ടിരിക്കാൻ പോലും ബുദ്ധിമുട്ടുള്ള ഒരു ചിത്രമാണ് ബിയു ഈസ്‌ അഫ്റൈഡ്. ഇങ്ങനെ ഒക്കെ ആണെങ്കിലും സംവിധായകന്റെ ചിത്രങ്ങളിൽ ലീസ്റ്റ് ഫേവറൈറ്റ് എന്ന് പറയാവുന്ന സിനിമ കൂടിയാണ് ഇത്, ഒരു പക്ഷെ ഈ കുറിപ്പ് എഴുതുന്ന വ്യക്തിക്ക് മാത്രം തോന്നിയത് ആയേക്കാവുന്ന ഒരു ആവർത്തന വിരസത അദ്ദേഹത്തിന്റെ സിനിമകളിൽ അനുഭവപ്പെട്ട് തുടങ്ങിയിരിക്കുന്നു.

🔸കഥയിലേക്ക് കടക്കുക ആണെങ്കിൽ നമ്മുടെ നായക കഥാപാത്രമായ ബിയു വാസർമാൻ ഒരു മധ്യ വയസ്കൻ ആണ്. എന്തിനോടും ഏതിനോടും ഉള്ള പേടിയാണ് അയാളുടെ സവിശേഷത, ആൻക്സൈറ്റി എന്നത് ബിയുവിനെ സംബന്ധിച്ചിടത്തോളം ഭീകരമായ തലത്തിൽ ആണ്. ഒരു വാതിൽ ഒരല്പം ശബ്ദത്തോട് കൂടി അടഞ്ഞാൽ പോലും ഭയപ്പെടുന്ന സ്വഭാവമാണ് ബിയുവിന്റേത്. ഇങ്ങനെ ഉള്ള ഒരാളുടെ ജീവിതത്തിലൂടെ ഉള്ള ഒരു യാത്ര ആണ് ഈ ചിത്രം, എപ്പിസോഡിക്കൽ ഫോർമാറ്റിൽ ഉള്ള ചിത്രം ബിയുവിന്റെ ജീവിതത്തിലെ ചെറുപ്പം തൊട്ട് ഇന്ന് വരെയുള്ള കാലഘട്ടങ്ങൾ സ്‌ക്രീനിൽ എത്തിക്കുകയാണ്.

🔸ബിയുവും അയാളുടെ അമ്മയുമായി ഉള്ള വളരെ കൊമ്പ്ലക്സ് ആയ ബന്ധം കൂടി ഫോകസ് ചെയ്യുന്നുണ്ട് ഈ ചിത്രം. ഒരു പരിധി വരെ ഒരല്പം ടോക്സിക് ആയ ഈ ബന്ധമാണ് കഥയെ മുന്നോട്ട് കൊണ്ട് പോവുന്നത് എന്ന് പറഞ്ഞാലും തെറ്റില്ല. ബിയുവിന്റെ വിഷമങ്ങളും ബുദ്ധിമുട്ടുകളും അയാളുടെ ജീവിതത്തിലെ ഉത്തരം കിട്ടാത്ത ചോദ്യങ്ങളും പ്രേക്ഷകന് സ്വയം ഒരു വിലയിരുത്തലിന് വിടുന്നത് പോലെയുള്ള ഒരു എൻഡിങ് കൂടിയാണ് ചിത്രത്തിന്റേത്. വ്യക്തിപരമായി ഇതിലും മികച്ച ഒരു ഔട്ട് പുട്ട് പ്രതീക്ഷിച്ചിരുന്നത് കൊണ്ട് തന്നെ ഒരല്പം നിരാശ തന്ന് കൊണ്ടാണ് ബിയു കടന്ന് പോവുന്നത്. പെർഫോമൻസ് വെച്ച് നന്നായിരുന്നു എങ്കിലും എവിടെയോ ഒരു മിസ്സിംഗ്‌ ഫീൽ സിനിമയിൽ ആകെ നിറഞ്ഞ് നിൽപ്പുണ്ടായിരുന്നു, അപ്പോഴും ഒരു മോശം സിനിമ ആവുന്നില്ല.

Verdict : Good

DC Rating : 3.5/5

1299. Next Sohee (2022)

Director : July Jung

Cinematographer : Kim Yeon

Genre : Drama

Country : South Korea

Duration : 135 Minutes

🔸ഒരു ഹൈ സ്കൂൾ വിദ്യാർഥിയുടെ അസാധാരണ സാഹചര്യത്തിൽ ഉള്ള മരണവും അതിനെ തുടർന്നുള്ള അന്വേഷണവും എന്നൊക്കെ ഒരു പ്ലോട്ട് ലൈൻ നെക്സ്റ്റ് സോഹീ എന്ന സിനിമയെ കുറിച്ച് പറഞ്ഞാൽ അതിൽ ഒരു അപകടം ഉണ്ട്. ഇത്തരത്തിൽ ഉള്ളൊരു സ്റ്റേറ്റ്മെന്റ് ശെരി ആണെങ്കിൽ കൂടിയും കാണാൻ ആഗ്രഹിക്കുന്ന ആളുകൾക്ക് ഇടയിൽ ഒരു തെറ്റിദ്ധാരണ ഉണ്ടാക്കും, അതായത് സിനിമ ഒരു മിസ്റ്ററി ത്രില്ലർ ആണെന്നൊക്കെ ഉള്ള ഒരു അനാവശ്യ ചിന്ത. സത്യത്തിൽ ഈ പ്ലോട്ട് ലൈൻ ഒരു സൈഡിൽ കൂടി മാത്രം പോവുന്ന ഒരു ചെറിയ ഡ്രാമ ജോണറിൽ പെട്ട സിനിമ മാത്രമാണ് നെക്സ്റ്റ് സോഹീ. ഈ ഒരു അബദ്ധം,. പ്രത്യേകിച്ചും സിനിമയെ പറ്റി യാതൊന്നും അറിയാൻ ശ്രമിക്കാതെ കാണാൻ ഇരുന്നത് കൊണ്ട് സംഭവിച്ചു എങ്കിലും തൃപ്തികരമായ ഒരു കാഴ്ചനുഭവം തന്ന് കൊണ്ടാണ് ഈ സിനിമയും കടന്ന് പോവുന്നത്.

🔸നമ്മുടെ ഈ ഒരു ജെനെറേഷൻ തങ്ങളുടെ ജോലി ജീവിതത്തിൽ നേരിടുന്ന പ്രധാന വെല്ലുവിളികളിൽ ഒന്നാണ് ജോലി ഭാരം എന്നത്. മിനിമം റെസ്‌പെക്ട് അർഹിക്കുന്ന ജോലിക്കാർ എന്നിൽ നിന്നും അടിമകൾ എന്ന നിലയിലേക്ക് ഇന്നത്തെ വർക്ക് കൾച്ചർ മാറിയിരിക്കുന്നു. ഈ ഒരു പ്രശ്നം തന്നെയാണ് നെക്സ്റ്റ് സോഹീ എന്ന ചിത്രത്തിന്റെയും ഫോക്കൽ പോയിന്റ്. നമ്മുടെ പ്രധാന കഥാപാത്രമായ പെൺകുട്ടി ഒരു പുതിയ ജോലിയിലേക്ക് പ്രവേശിച്ചിട്ട് അധിക കാലം ആയിട്ടില്ല,. ഊർജസ്വലതയോടെ അല്ലെങ്കിൽ പ്രസരിപ്പോടെ ജോലിക്ക് വന്ന് കൊണ്ടിരുന്ന അവൾ മൂക ആയി മാറുന്നത് കഥ പുരോഗമിക്കുന്നതിനോടൊപ്പം നമ്മളും തിരിച്ചറിയുകയാണ്.

🔸ഇത് ആണോ അവളുടെ മരണത്തിന്റെ കാരണം എന്ന് ചോദിച്ചാൽ തല്ക്കാലം വ്യക്തമായ ഒരു ഉത്തരം തരാൻ നിർവാഹമില്ല. പല പല കാരണങ്ങളുടെയും ചെയ്തികളുടെയും ഒക്കെ ഫലം എന്ന് പറഞ്ഞ് വിടാം എന്ന് മാത്രം. മുകളിൽ പറഞ്ഞത് പോലെ തന്നെ അന്വേഷണ സ്വഭാവം ഉള്ള കഥ ആണ് നെക്സ്റ്റ് സോഹിയുടേത് എങ്കിലും ഒരു ഡ്രാമ ആയി ആണ് ചിത്രം തയാറാക്കിയിരിക്കുന്നത്. പോയ വർഷങ്ങളിൽ പ്രശസ്തി നേടിയ കൊറിയൻ ത്രില്ലറുകളുമായോ അല്ലെങ്കിൽ കൊറിയൻ ഡ്രാമകളുമായോ താരമത്യം ഒന്നും അർഹിക്കുന്നില്ല എങ്കിലും കണ്ട് വിടാവുന്നതാണ് ഈ ചിത്രവും.

Verdict : Good

DC Rating : 3.5/5

1298. Josep (2020)

Director : Aurel

Writer : Jean Milesi

Genre : Animation

Country : Belgium

Duration : 71 Minutes

🔸ഉദ്ദേശം രണ്ട് വർഷങ്ങൾക്ക് മുന്നേ പുറത്തിറങ്ങിയ ഫ്ളീ എന്ന ചിത്രത്തെ കുറിച്ച് ഒരു കുറിപ്പ് എഴുതിയതാണ് ജോസപ് എന്ന സിനിമ കണ്ട് കഴിഞ്ഞപ്പോൾ ഓർമ വന്നത്. കാരണം ലളിതമാണ്, രണ്ട് സിനിമകളും തമ്മിൽ സാമ്യതകൾ ഒരുപാട് ഉണ്ട്. ഡിസ്‌നി ഒരുക്കുന്ന അനിമേഷൻ സിനിമകൾ പോലെ അത്ര പോളിഷ്ദ് ആയ അനിമേഷൻ രീതി ഒന്നുമല്ല ഈ ചിത്രത്തിന്റേത്, എന്നാൽ പറഞ്ഞറിയിക്കാൻ കഴിയാത്ത ഒരു ഭംഗി ഉണ്ട് താനും. രണ്ട് സിനിമകളും അഭയാർത്ഥികളുടെ ജീവിതമാണ് കഥാപശ്ചാത്തലം ആക്കുന്നത്, മികച്ച ഒരു ഔട്ട് പുട്ട് സൃഷ്ടിക്കാൻ രണ്ട് സിനിമകളുടെയും അണിയറ പ്രവർത്തകർക്ക് സാധിച്ചിട്ടുമുണ്ട്. ഈ കാരണങ്ങൾ എല്ലാം കൊണ്ട് തന്നെ ഫ്ളീ എന്ന ചിത്രത്തെ ഓർമിപ്പിക്കുകയാണ് ജോസപ് എന്ന ബെൽജിയം ചിത്രം.

🔸ജോസപ് ബർട്ടോളി എന്ന ആർട്ടിസ്റ്റിന്റെ കഥയാണ് ജോസപ്. വളരെ ഐതിഹാസികാം എന്നൊക്കെ വിശേഷിപ്പിക്കാവുന്ന ഒന്നാണ് ജോസപ്പിന്റെ ജീവിതം. മുപ്പത്കളുടെ രണ്ടാം പകുതിയിൽ സ്പെയിനിൽ വെച്ച് ആരംഭിക്കുന്ന കഥയിൽ ഫ്രാങ്കോയുടെ ഫാസിസ്റ്റ് ഭരണത്തിന് എതിരെ ശബ്ദം ഉയർത്തുന്ന ജോസപ്പിനെ ആണ് നമ്മൾ ആദ്യമായി കാണുന്നത്. എന്നാൽ അന്നത്തെ അവസ്ഥയിൽ സ്പെയിനിൽ തുടരുക എന്നത് ഏറെക്കുറെ അസാധ്യം ആയ അവസ്ഥ ആയത് കൊണ്ട് തന്നെ അയാൾക്ക് അവിടെ നിന്നും പലായനം ചെയ്യേണ്ടി വരികയാണ്. ഫ്രാൻസിലേക്ക് എത്തുന്ന ജോസപ് എത്തി പെടുന്നത് ഒരു അഭയാർത്ഥികളുടെ റെഫുഗീ ക്യാമ്പിൽ ആണ്, ക്രൂരവും ദയനീയവും ആയിരുന്നു അവിടുത്തെ അവസ്ഥ എന്ന് പറയാം.

🔸ഈ ഒരു കാലഘട്ടം ആണ് സിനിമ ഫോകസ് ചെയ്യുന്നത്, ജോസപ് അവിടെ ഉണ്ടായിരുന്ന കാലത്ത് പ്രസ്തുത അഭയാർത്ഥി കാമ്പിൽ ജോലിക്കാരൻ ആയിരുന്ന ഒരു ഗാർഡ് വർഷങ്ങൾക്ക് ശേഷം അവിടെ അരങ്ങേറിയ സംഭവങ്ങൾ തന്റെ പേര കുട്ടിക്ക് പറഞ്ഞ് കൊടുക്കുന്നത് പോലെയാണ് സിനിമ പുരോഗമിക്കുന്നത്. നല്ല വെറൈറ്റി അനിമേഷൻ സ്റ്റൈൽ ആയത് കൊണ്ടും, കഥ മികച്ചത് ആയത് കൊണ്ടുമെല്ലാം നല്ലൊരു അനുഭവം തന്നെ ആയിരുന്നു ജോസപ് എന്ന ചിത്രം. സിനിമ ജോസപ് ബർട്ടോളി എന്ന കഥപാത്രത്തിന്റെ പിൽക്കാല ജീവിതം കൂടി കഥയിലേക്ക് കൂടുതൽ ഫോകസ് ചെയ്ത് കൊണ്ട് വന്നിരുന്നെങ്കിൽ നന്നായേനെ എന്നൊരു അഭിപ്രായം മാത്രം ബാക്കി, താല്പര്യം തോന്നുന്നു എങ്കിൽ കണ്ട് നോക്കുക.

Verdict : Very Good

DC Rating : 4/5

1297. Past Lives (2023)

Director : Celine Song

Cinematographer : Shabier Kirchner

Genre : Drama

Country : South Korea

Duration : 106 Minutes

🔸പാസ്റ്റ് ലൈവ്സ് എന്ന സിനിമയെ പറ്റി എന്തെങ്കിലും ഡീറ്റെയിൽ ആയി പറയുന്നതിന് മുന്നേ ഒരു സ്റ്റേറ്റ്മെന്റ് കൺഫേം ചെയ്ത് പറയേണ്ട ആവശ്യം ഉണ്ട്. വേറൊന്നുമല്ല, ഈ വർഷം ഞാൻ കണ്ട ഏറ്റവും മികച്ച സിനിമകളിൽ ഒന്നാണ് പാസ്റ്റ് ലൈവ്സ്, ക്ലൈമാക്സ്‌ കണ്ട് കഴിയുമ്പോൾ സിനിമ കാഴ്ചക്കാർക്ക് തരുന്ന ഒരു വാം ഫീൽ ഉണ്ട്, അധിക ശ്രമങ്ങൾക്ക് ഒന്നും വിജയകരമായി കൈവരിക്കാൻ കഴിയാത്ത ഒരു അച്ചീവ്മെന്റ് തന്നെയാണ് അത്. ഒരു പൊടിക്ക് അങ്ങോട്ടോ ഇങ്ങോട്ടോ മാറി പോയിരുന്നെങ്കിൽ മെലോ ഡ്രാമ ആയി പോവുമായിരുന്ന കഥയെ മനോഹരമായി കെട്ടുറപ്പോടെ അവതരിപ്പിച്ച സംവിധായകൻ കയ്യടി തീർച്ചയായും അർഹിക്കുന്നുണ്ട്.

🔸പന്ത്രണ്ട് വർഷങ്ങളുടെ ഇടവേളയിൽ മൂന്ന് കാലഘട്ടങ്ങളിൽ ആണ് ഈ സിനിമ കഥ പറഞ്ഞ് പോവുന്നത്. നോറ എന്നും ഹേ സുങ് എന്നും പേരുള്ള രണ്ട് പേരാണ് നമ്മുടെ പ്രധാന കഥാപാത്രങ്ങൾ. വർത്തമാന കാലത്ത് കഥ പറഞ്ഞ് തുടങ്ങുന്ന ചിത്രം പിന്നീട് ഇരുപത്തി നാല് വർഷങ്ങൾ പുറകിലേക്ക് പോവുകയാണ്. അവിടെ വെച്ച് നോറയും, ഹേ സുങ്ങും കണ്ട് മുട്ടുകയും അടുക്കുകയും ചെയ്യുന്നു. മിക്കവരുടെയും കാര്യത്തിൽ എന്ന പോലെ തന്നെ മനോഹരമായ ഒരു ഓർമ ആയി ആദ്യത്തെ ആ പ്രണയം ഇരുവരുടെയും മനസ്സിൽ നില നിൽക്കുന്നതായി ആണ് അടുത്ത കാലഘട്ടത്തിൽ, അതായത് പന്ത്രണ്ട് വർഷങ്ങൾക്ക് ഇപ്പുറം നമ്മൾ കാണുന്നത്.

🔸എന്ത് കൊണ്ട് ഇരുവരും രണ്ട് ധ്രുവങ്ങളിലേക്ക് സഞ്ചരിക്കേണ്ടി വന്നു എന്നതും പിന്നീട് ഇവർക്ക് എന്ത് സംഭവിച്ചു എന്നതും എല്ലാം സിനിമ കണ്ട് തന്നെ അറിയുക. ഈ ഒരു പിരീടിന് ശേഷം ഒരു പന്ത്രണ്ട് വർഷം കൂടി കഴിഞ്ഞ് മൂന്നാമത്തെ, വർത്തമാന കാലത്തേക്ക് കഥ കടന്ന് വരുന്നുണ്ട്. ഈ ഒരു പോർഷനും, ഇവിടെ സംഭവിക്കുന്ന കഥാപാത്രങ്ങളുടെ ഇന്റരാക്ഷൻസും എല്ലാം അതി മനോഹരമാണ്. കണ്ട് കൊണ്ടിരിക്കുന്ന നമ്മളിൽ സന്തോഷവും, സങ്കടവും, വേദനയും, സംപ്തൃപ്തിയും എല്ലാം നൽകി ഒരു മികച്ച അനുഭവമായി മാറുന്ന ചിത്രമാണ് പാസ്റ്റ് ലൈവ്സ്. മോശം എന്ന് പറയാൻ ഒന്നും തന്നെ കാണാഞ്ഞ, എല്ലാം കൊണ്ടും മികച്ച ഒരു സിനിമാ എക്സ്പീരിയൻസ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 5/5

1296. Mission Impossible - Dead Reckoning Part One (2023)

Director : Christopher McQuarrie

Cinematographer : Fraser Taggert

Genre : Action

Country : USA

Duration : 163 Minutes

🔸ടോം ക്രൂയിസിന്റെ ഫിലിമോഗ്രാഫി കണ്ട് ചെറിയൊരു അത്ഭുതം ഒക്കെ ഇടക്കാലത്ത് തോന്നിയിട്ടുണ്ട്. കാര്യം വേറൊന്നുമല്ല, കഴിഞ്ഞ പത്ത് പതിനഞ്ച് കൊല്ലമായി കൃട്ടിക്കലി പേരെടുത്ത സംവിധായകരോടൊപ്പം പുള്ളി പ്രവർത്തിച്ചത് അപൂർവം ആയി തന്നെയാണ്. അത് പോരെങ്കിൽ ഏറെക്കുറെ പൂർണമായും തന്റെ സ്ട്രോങ്ങ്‌ സോൺ ആയ ആക്ഷൻ വിഭാഗത്തിൽ ഉള്ള സിനിമകളിൽ ആണ് പുള്ളി ഫോകസ് ചെയ്യുന്നതും, അപ്പോഴും മികച്ച സിനിമകളുടെ ഒരു സ്ട്രീക്ക് തന്നെ പുള്ളിക്ക് ഉണ്ട്. കുറച്ച് നാൾ മുന്നേ പുറത്തിറങ്ങിയ മിഷൻ ഇമ്പോസിബിൾ ഫാൾഔട്ട് ആയാലും ടോപ് ഗൺ സീക്വൽ ആയാലും ഈ ഒരു ട്രെൻഡ് പുള്ളി കീപ് ചെയ്ത് കൊണ്ട് പോവുന്നുണ്ട്. ഇവിടെ പറഞ്ഞ രണ്ട് സിനിമകളുടെയും നിലവാരം ഒന്നും ഇല്ലെങ്കിലും ഡെഡ് രെക്കണിങ്ങും ആ സ്ട്രീക്ക് ബ്രെക്ക് ചെയ്യുന്നില്ല എന്നത് എടുത്ത് പറയേണ്ട കാര്യമാണ്.

🔸പുതിയ സിനിമ ആയത് കൊണ്ടും സ്പോയ്‌ലർ ഒഴിവാക്കേണ്ട ആവശ്യകത കൊണ്ടും കഥയിലേക്ക് കടക്കുന്നില്ല, പക്ഷെ സംശയം ഏതും ഇല്ലാതെ പറയാം കഥാപരമായി സീരീസിലെ ഏറ്റവും മോശം സിനിമ ആയിരിക്കും ഡെഡ് രെക്കണിങ്, ഒരു പരിധി വരെ കോമിക്കൽ ആയൊക്കെ തോന്നുന്ന ഒരു കഥ. സീരീസിലെ ബെഞ്ച് മാർക്ക് ആയ ഗോസ്റ്റ് പ്രോട്ടൊക്കോളിന്റെയോ, ഫാൾ ഔട്ടിന്റെയോ പോലും അത്ര വെൽ പെയ്സ്ഡ് ആയ സിനിമ അല്ല ഡെഡ് രെക്കാണിങ്. ഇങ്ങനെ ഒക്കെ ആണെങ്കിലും സ്റ്റോറി കണ്ട് സംപ്തൃപ്തി അടയാനല്ല മിഷൻ ഇമ്പോസിബിൽ കാണാൻ ഒരു അവറേജ് വ്യൂവർ പോവുന്നത് എന്നത് ഏതൊരാൾക്കും അറിയാവുന്ന കാര്യമാണ്, ആ ഒരു ഡിപ്പാർട്മെന്റിൽ സിനിമ ഡെലിവർ ചെയ്യുന്നുമുണ്ട്.

🔸ആക്ഷൻ സെറ്റ് പീസുകളുടെ കാര്യത്തിൽ ഒട്ടും പിറകിൽ അല്ല ഡെഡ് രെക്കണിങ്, ട്രെയിലറിൽ കാണിച്ച ജമ്പ് സീൻ ഉൾപ്പെടെ എല്ലാം ബിഗ് സ്‌ക്രീനിൽ മികച്ച അനുഭവമാണ് സമ്മാനിച്ചത്. കാസ്റ്റിന്റെ കാര്യം ആയാലും പെർഫോമൻസ് ആയാലും മോശം എന്ന് പറയാൻ ഒന്നും തന്നെ ഇല്ല ചിത്രത്തിൽ. സ്വാഭാവികമായും സിനിമയുടെ മോസ്റ്റ്‌ ഇന്ട്രെസ്റ്റിങ് ആൻഡ് ഇമ്പോർട്ടന്റ് ഫാക്റ്റർ എന്നത് ടോം ക്രൂസ് തന്നെയാണ്, പ്രായത്തെ വെല്ലുന്ന പ്രകടനം എന്ന ഡയലോഗ് ഒക്കെ ക്ലിഷേ ആക്കി മാറ്റുന്ന അവസ്ഥ. ചുരുക്കി പറഞ്ഞാൽ പ്രതീക്ഷിച്ചത്ര മികച്ച അനുഭവം ഒന്നും അല്ലെങ്കിലും കാര്യമായ നഷ്ടം ഒന്നും തോന്നിയതുമില്ല എന്ന രീതിയിൽ കടന്ന് പോവുന്ന ഒരു ചിത്രമാണ് ഡെഡ് രെക്കനിങ്, ദാറ്റ്‌സ് ഓൾ.

Verdict : Above Average

DC Rating : 3/5

1295. Asteroid City (2023)

Director : Wes Anderson

Cinematographer : Robert Yeoman

Genre : Drama

Country : USA

Duration : 105 Minutes

🔸ഒരു വെസ് അൻഡേഴ്സൻ ചിത്രം അവസാനമായി പൂർണമായി ആസ്വദിച്ചത് ഗ്രാൻഡ് ബുദാപേസ്റ്റ് ഹോട്ടൽ ഒൻപത് വർഷം മുന്നേ റിലീസ് ആയപ്പോൾ ആണ്. അവിസ്മരണീയമായ കാസ്റ്റും, കഥയും, അവതരണവും എല്ലാം കൊണ്ട് പൂർണ തൃപ്തി തന്ന ചിത്രത്തെ കുറിച്ച് വർഷങ്ങൾക്ക് ഇപ്പുറം തിരിച്ച് ആലോചിക്കുമ്പോഴും ഒരു സന്തോഷം ആണ്. അതിന് ശേഷം റിലീസ് ആയ ഐൽ ഓഫ് ഡോഗ്സ് ഒരു ഓക്കേ അനുഭവം ആയിരുന്നു എങ്കിൽ ഫ്രഞ്ച് ഡിസ്പ്പാച്ച് ഒരു ശരാശരി എക്സ്പീരിയൻസ് മാത്രം ആയിരുന്നു. ഈ വർഷം ഏറ്റവും കൂടുതൽ പ്രതീക്ഷ അർപ്പിച്ച ആസ്റ്റരോയിഡ് സിറ്റി ആണെങ്കിൽ വൻ നിരാശ മാത്രം തന്ന് കടന്ന് പോവുകയാണ്, ഒരു വെസ് അൻഡേഴ്സൻ ചിത്രം ഇത്രയും ബോർ അടിച്ച് പാതി മയക്കത്തിൽ കണ്ട് തീർത്ത അനുഭവം മുന്നേ ഉണ്ടായിട്ടില്ല എന്നതാണ് സത്യം.

🔸കഥയിലേക്ക് വരിക ആണെങ്കിൽ, കോൺരാഡ് ഈപ് എന്ന വളരെ പ്രശസ്തനായ ഒരു നാടകകൃത്തിന്റെ പ്രശസ്തമായ സൃഷ്ടി ആണ് ആസ്റ്ററോയിഡ് സിറ്റി. ഈ ആസ്റ്ററോയിസ് സിറ്റിയുടെ ടെലിവിഷൻ വേർഷൻ എന്ന മട്ടിലാണ് പിന്നീടുള്ള സിനിമയുടെ അവതരണം, സ്‌ക്രീനിൽ നിങ്ങളുടെ ഇഷ്ട താരങ്ങൾ എന്ന മട്ടിൽ ഇൻട്രോ ഒക്കെ നൽകി കുഴപ്പം പറയാൻ ഇല്ലാത്ത തോതിൽ ആയിരുന്നു ആരംഭം. ഒരു മരുഭൂമിക്ക് നടുവിൽ സ്ഥിതി ചെയ്യുന്ന പട്ടണം എന്ന് പറയാവുന്ന സ്ഥലമാണ് ആസ്റ്റരോയിഡ് സിറ്റി, അവിടെ ഒരു കൺവെൻഷൻ നടന്ന് കൊണ്ടിരിക്കുകയാണ്. ഇതിന് ഇടയിലേക്ക് ഫോട്ടോഗ്രാഫർ ആയ ഓഗി സ്റ്റീൻബെക്കും അയാളുടെ നാല് മക്കളും എത്തുകയാണ്.

🔸അടുത്തിടെ വിഭാര്യൻ ആയ ആളാണ് ഓഗി, മക്കളെ അവരുടെ അപ്പൂപ്പന്റെ അടുത്തേക്ക് എത്തിക്കാനായി ആണ് അയാളുടെ ഈ യാത്ര, കുറച്ച് സമയം അയാൾക്ക് ഈ പറഞ്ഞ ഫിക്ഷണൽ പ്രദേശത്ത് ചിലവഴിക്കേണ്ടി വരുന്നതും, അവിടെ വെച്ച് കണ്ട് മുട്ടുന്ന ഇന്ട്രെസ്റ്റിങ് ആയ കഥാപാത്രങ്ങളും ഒക്കെയാണ് ഈ സിനിമയുടെ കഥ. വലിയ ഒരു കാസ്റ്റ് ആണ് ചിത്രത്തിന്റേത്, എന്നാൽ അതിൽ ബഹു ഭൂരിപക്ഷം ആളുകളും എന്തിനായിരുന്നു എന്നത് ഇപ്പോഴും വ്യക്തം ആയിട്ടില്ല. കഥാപരം ആയി യാതൊരു പുതുമയും ഇല്ല എന്ന് മാത്രമല്ല കളർ ടോൺ ഒക്കെ വൽകർ എന്ന് പറയാവുന്ന വിധം മോശമായി അനുഭവപ്പെടുകയും ചെയ്തു. ചുരുക്കി പറഞ്ഞാൽ ഒരു കമ്പ്ലീറ്റ് നിരാശ മാത്രമാണ് അസ്റ്റരോയിഡ് സിറ്റി.

Verdict : Bad

DC Rating : 1.5/5

1294. Leila's Brothers (2022)

Director : Saeed Roustaee

Cinematography : Hooman Behmanesh

Genre : Drama

Country : Iran

Duration : 160 Minutes

🔸സയീദ് റോസ്ഥായിയുടെ രണ്ട് സിനിമകൾ മുന്നേ കണ്ടിട്ടുണ്ട്, ലോ ഓഫ് തെഹ്റാൻ എന്ന ആദ്യത്തെ ചിത്രം ആയാലും ലൈഫ് ആൻഡ് എ ഡേ എന്ന ചിത്രം ആയാലും ശെരി തൃപ്തികരം ആയ അനുഭവം സമ്മാനിച്ച് കൊണ്ടാണ് കടന്ന് പോയത്. ഈ ഒരു കാരണം കൊണ്ട് തന്നെ ലൈലാസ് ബ്രദേഴ്‌സ് എന്നൊരു സിനിമയുമായി സയീദ് വീണ്ടും വരുന്നു എന്ന വാർത്ത കേട്ടപ്പോൾ പ്രതീക്ഷ നല്ല തോതിൽ തന്നെ ഉണ്ടായിരുന്നു, പോരെങ്കിൽ കാൻസ് ഉൾപ്പെടെ ഉള്ള വേദികളിൽ സിനിമയ്ക്ക് ലഭിച്ച മികച്ച പ്രകടനങ്ങൾ കൂടി ആയപ്പോൾ പോയ വർഷത്തെ ഏറ്റവും പ്രതീക്ഷയോടെ കാത്തിരുന്ന സിനിമകളിൽ ഒന്ന് കൂടി ആയി മാറി പ്രസ്തുത ചിത്രം. ഈ പ്രതീക്ഷയെ സാധൂകരിക്കുന്ന ഒരു ഔട്ട് പുട്ട് ആയി മാറുന്നുമുണ്ട് ഈ സിനിമ.

🔸ലൈല എന്ന നാല്പത് വയസിനോട് അടുത്ത് പ്രായമുള്ള യുവതി ആണ് നമ്മുടെ കേന്ദ്ര കഥാപാത്രം. മല പോലെ നിൽക്കുന്ന നാല് സഹോദരന്മാരുടെ ഒരേയൊരു പെങ്ങൾ ആണ് ലൈല, എന്നാൽ ഈ ഒരു വസ്തുത അവരെ സംബന്ധിച്ചിടത്തോളം ഭാഗ്യം എന്നതിനേക്കാൾ ഒരു ബാധ്യത ആണെന്ന് പറയേണ്ടി വരും. ഈ പറഞ്ഞ നാല് പേർക്കും സ്ഥിര വരുമാനം എന്ന നിലയ്ക്ക് കാണിക്കാൻ ഒരു ജോലി ഇല്ല, ഇവർ എല്ലാവരും ആ കുടുംബം അടക്കം ജീവിച്ച് പോവുന്നത് ലൈലയുടെ വരുമാനത്തിൽ കൂടിയാണ് എന്ന് പറഞ്ഞാലും തെറ്റില്ല. ഈ അഞ്ച് പേരുടെയും പിതാവ് ആണെങ്കിൽ ഇതിനെ എല്ലാം കടത്തി വെട്ടുന്ന തോതിലുള്ള മറ്റൊരു മഹദ് വ്യക്തിത്വവും.

🔸ഇങ്ങനെ പോയി കൊണ്ടിരിക്കുന്ന കഥയിൽ ലൈലയ്ക്കും മറ്റുള്ളവർക്കും ഇടയിൽ ഒരു കോൺഫ്ളിക്റ്റ് ഉടലെടുക്കുകയാണ്, അത് കുടുംബത്തെ എങ്ങിനെ ഒക്കെ ബാധിക്കുന്ന എന്നും കഥാപാത്രങ്ങളിൽ എന്തൊക്കെ മാറ്റങ്ങൾ കൊണ്ട് വരുന്നു എന്നും കാണിച്ച് കൊണ്ട് സിനിമ പുരോഗമിക്കുകയാണ്. കോണ്ഫലിക്റ്റ് നൈസ് ആയത് കൊണ്ടും പ്രകടനങ്ങൾ മനോഹരം ആയത് കൊണ്ടും കാഴ്ചക്കരനുമായി നല്ല രീതിയിൽ കണക്റ്റ് ആവുന്ന ചിത്രം കൂടിയാണ് ലൈലാസ് ബ്രദേഴ്‌സ്, ഒടുവിൽ ഒരു മനോഹരമായ വെഡിങ് സീനോട് കൂടി ചിത്രം അവസാനിക്കുമ്പോൾ നമുക്ക് ലഭിക്കുന്നത് തൃപ്തികരമായ ഒരു ഫീൽ അല്ലെങ്കിൽ അനുഭവം ആയിരിക്കും എന്നത് ഉറപ്പ്.

Verdict : Very Good

DC Rating : 4.25/5

1293. Great Freedom (2021)

Director : Sebastian Meise

Cinematographer : Crystel Fournier

Genre : Drama

Country : Austria

Duration : 116 Minutes

🔸ഗ്രേറ്റ് ഫ്രീഡം എന്ന സിനിമ കാണുന്നതിന് മുന്നേ പ്രൊമോഷൻ മെട്ടീരിയൽ വഴി തന്നെ സിനിമയുടെ പ്ലോട്ട് ലൈനിനെ സംബന്ധിച്ച് ഒരു ഏകദേശ ധാരണ ലഭിച്ചിരുന്നു. ഇവയിൽ നിന്നെല്ലാം ആദ്യമേ തോന്നിയ ഫീൽ ഒരു ടിപ്പിക്കൽ അവാർഡ് ബേറ്റ് യൂറോപ്യൻ ഡ്രാമ എന്നത് മാത്രം ആയിരുന്നു. അതായത് ഫെസ്റ്റിവൽ വേദികളിൽ പെട്ടെന്ന് വിറ്റഴിഞ്ഞ് പോവാറുള്ള ഹോമോ സെക്ഷുവൽ കണ്ടന്റ്, അത് പോരെങ്കിൽ രണ്ടാം ലോകമഹായുദ്ധ ഹോളോകോസ്റ്റ് ബാക്ക്ഗ്രൗണ്ട് ഒക്കെ ഈ സിനിമയുടെ പ്രത്യേകതകൾ ആണ്. ഈ കാരണം കൊണ്ട് തന്നെ സിനിമ റിലീസ് ആയി രണ്ട് വർഷം കഴിഞ്ഞിട്ടും, നല്ല പ്രതികരണങ്ങൾ ലഭിച്ചിട്ടും കാണാൻ ഉള്ള പ്രചോദനം ഒന്നും അനുഭവപ്പെട്ടിരുന്നില്ല എന്നതാണ് സത്യം.

🔸രണ്ടാം ലോക മഹായുദ്ധത്തിന്റെ അവസാനത്തോടെ ആണ് ഗ്രേറ്റ് ഫ്രീഡം കഥ പറഞ്ഞ് തുടങ്ങുന്നത്. ദീർഘ നാളുകളായി നാസി പീഡനം അനുഭവിക്കേണ്ടി വന്ന ജൂത വിഭാഗക്കാർക്ക് ഉള്ള വിമോചനം എന്നൊക്കെ പറയപ്പെട്ട ഈ അല്ലീദ് വിഭാഗത്തിന്റെ നീക്കത്തിൽ സത്യത്തിൽ എല്ലാ വിഭാഗത്തിൽ പെട്ട ജനങ്ങൾക്കും അത് ലഭിക്കുക ഉണ്ടായോ എന്നതാണ് സിനിമ ഉയർത്തുന്ന ചോദ്യം. അതായത് നാസി പട്ടാളവും ഭരണവും എല്ലാം ചരിത്രത്തിലേക്ക് മടങ്ങിയിട്ടും ഹോമോ സെക്ഷുവൽ വിഭാഗത്തിൽ പെട്ട ആളുകൾക്ക് യൂറോപ്പിൽ കടുത്ത വിവേചനം പിന്നെയും പതിറ്റാണ്ടുകൾ നേരിടേണ്ടി വന്നിട്ടുണ്ട്. ഇങ്ങനെ ഒരുപാട് തിക്താനുഭവങ്ങൾ നേരിടേണ്ടി വന്ന ആളാണ്‌ നമ്മുടെ കേന്ദ്ര കഥാപാത്രവും.

🔸ഓസ്ട്രിയൻ നിയമ സംഹിതികളിൽ ആർട്ടിക്കിൾ 175 എന്നൊരു നിയമം ഉണ്ടായിരുന്നു, അതായത് സ്വവർഗ അനുരാഗികളെ പത്ത് വർഷം വരെ കഠിന തടവിന് ശിക്ഷിക്കാൻ കഴിയുന്ന ഒരു നിയമം, ഇതാണ് സിനിമയുടെ ഫോക്കൽ പോയിന്റ്. ഉദ്ദേശം ഇരുപത്തി അഞ്ച് വർഷങ്ങൾ നീണ്ട് നിൽക്കുന്ന കഥയാണ് സിനിമയുടേത്, ഏറെക്കുറെ പൂർണമായും ജയിൽ മുറികൾക്ക് ഉള്ളിൽ വെച്ച് പുരോഗമിക്കുന്ന കഥ. വിഷയം ഗൗരവകരം ആണെങ്കിലും മുകളിൽ സൂചിപ്പിച്ച അവാർഡ് ബേയ്റ്റിന് അപ്പുറം വലിയ ഇമ്പാക്റ്റ് ഒന്നും ഈ കാഴ്ചനുഭവം നൽകിയില്ല, കുഴപ്പമില്ല എന്നൊരു ഫീൽ മാത്രം. ഡ്രാമ ജോനറിനോട് താല്പര്യം ഉള്ളവർ ആണെങ്കിൽ കണ്ട് നോക്കുക.

Verdict : Above Average

DC Rating : 3/5

1292. Guardians Of The Galaxy - Volume 3 (2023)

Director : James Gunn

Cinematographer : Henry Braham

Genre : Sci - Fi

Country : USA

Duration : 150 Minutes

🔸സാമ്പത്തിക ലാഭവും, ആരാധക പിന്തുണയും, ഒരു വിഷ്വൽ സ്പെക്ടക്കിൽ എന്ന കാര്യവും കണക്കിൽ എടുക്കുമ്പോൾ മാർവ്വലിന്റെ നമ്പർ വൺ ഫ്രാൻചെയ്‌സ് എന്നത് അവൻജേഴ്സ് ആണെങ്കിലും സോൾ എന്നത് എല്ലാ കാലത്തും ഗാർഡിയൻസ് ആണെന്ന് തോന്നിയിട്ടുണ്ട്. ഗാർഡിയൻസിനോളം പ്രേക്ഷകരുമായി ഇമോഷനലി കണക്റ്റ് ആവാൻ മറ്റേതെങ്കിലും മാർവൽ കഥാപാത്രത്തിന് കഴിഞ്ഞിട്ടുണ്ടോ എന്നതും സംശയമാണ്. മുൻ ഭാഗങ്ങളെ പോലെ തന്നെ ഒരു കംപ്ലീറ്റ് പാക്കേജ് ആണ് ഈ മൂന്നാം ഭാഗവും. ഇമോഷനിന് ഇമോഷൻ, ഹ്യൂമറിന് ഹ്യൂമർ, സൗണ്ട്ട്രാക്കിന് സൗണ്ട്ട്രാക്ക് തുടങ്ങി മിക്ക വിഭാഗങ്ങളിലും തങ്ങളുടെ എ ഗെയിം മാർവെൽ ഇവിടെ കൊണ്ട് വന്നിട്ടുണ്ട്.

🔸കാര്യത്തിലേക്ക് കടക്കുന്നതിന് മുൻപേ മോശം എന്ന് അനുഭവപ്പെട്ട ചില കാര്യങ്ങളിലേക്ക് കടക്കാം, ആദ്യമെ തന്നെ കോമിക്സിലെ കിടിലൻ കഥാപാത്രങ്ങളിൽ ഒന്നായ ആദം വാർലോക്കിനെ അവതരിപ്പിച്ച രീതി ഏറെക്കുറെ പരിഹാസ്യം തന്നെ ആയിരുന്നു. പക്ഷെ ക്യാറക്ടർ പ്രോഗ്രഷനിന് ഉള്ള സാധ്യത ഭാവിയിൽ ഉള്ളതിനാൽ വിട്ട് കളയാവുന്നതാണ്. മുൻ ഭാഗങ്ങളെ അപേക്ഷിച്ച് അത്ര മികച്ച പേസിങ് ഒന്നും സിനിമയ്ക്ക് ഇല്ല എന്നത് ഒരു പോരായ്മയായി തോന്നി. ഈ രണ്ട് കാര്യങ്ങൾ മാറ്റി നിർത്തിയാൽ മികച്ച ഒരു തിയേറ്റർ അനുഭവം തന്നെ ആയിരുന്നു ഗാർഡിയൻസ് ഓഫ് ദി ഗാലക്സി വോളിയം ത്രീ. ആദ്യം ഭാഗം തൊട്ടേ ഇഷ്ട കഥാപാത്രമായ റോക്കറ്റിനെ ചുറ്റി പറ്റി പ്രോഗ്രസ് ചെയ്യുന്ന കഥ ആയത് കൊണ്ട് തന്നെ ഒരല്പം ഇഷ്ടക്കൂടുതൽ മൂന്നാം ഭാഗത്തിനോട് ഉണ്ട് എന്നും പറയാം.

🔸ഹൈ എവോലുഷനറി എന്ന വില്ലൻ ഒരുപക്ഷെ മാർവെൽ അവസാന രണ്ട് വർഷത്തിൽ അവതരിപ്പിച്ച വില്ലൻ കഥാപാത്രങ്ങളിൽ ഏറ്റവും മികച്ചത് ആയിരിക്കണം, ഗോർ അല്ലെങ്കിൽ കാങ് പോലുള്ള കഥാപാത്രങ്ങൾ ഉള്ളപ്പോൾ ആണ് ഇത് എന്നത് ഒരു അച്ചീവ്മെന്റ് തന്നെയാണ്, ആ കഥാപാത്രങ്ങളുടെ അവതരണം പരാജയം ആയിരുന്നു എങ്കിലും. മൂന്നാം ഭാഗം പ്രസ്തുത ഗാർഡിയൻസ് ടീമിന്റെ അവസാന ഔട്ടിങ് ആയിരിക്കും എന്നത് കൊണ്ട് തന്നെ വളരെ ഇമോഷണൽ ആയ ഒരു സിനിമയാണ് പ്രതീക്ഷിച്ചിരുന്നത്, അത് ഏറെക്കുറെ സിനിമ ഡെലിവർ ചെയ്യുന്നുമുണ്ട്. കുറച്ച് കാലങ്ങളായി ക്ഷീണത്തിൽ ആയിരുന്ന മാർവ്വലിനെ സംബന്ധിച്ചിടത്തോളം ഒരു അനിവാര്യത ആയിരുന്നു ഗാർഡിയൻസ് ഓഫ് ദി ഗാലക്സി വോളിയം ത്രീ, ഒരു രീതിയിലും നിരാശപ്പെടുത്തുന്നില്ല എന്ന് മാത്രമല്ല മികച്ച ഒരനുഭവമായി മാറുന്നുമുണ്ട്.

Verdict : Very Good

DC Rating : 4/5

1291. Rehana Maryam Noor (2021)

Director : Abdullah Saad

Cinematographer : Tuhin Tamijul

Genre : Drama

Country : Bangladesh

Duration : 107 Minutes

🔸ഈ കുറിപ്പ് എഴുതുന്ന വ്യക്തിയെ സംബന്ധിച്ച് സ്കൂൾ ജീവിതം എന്നത് വ്യക്തിപരമായി വളരെ മോശപ്പെട്ട ഒരു കാലഘട്ടം ആയിരുന്നു. ഈ പറഞ്ഞ പതിനാല് വർഷ സ്കൂൾ ജീവിതത്തിനിടെ ബഹുമാനം തോന്നിയ അധ്യാപകന്മാർ എന്നത് വിരലിൽ എണ്ണാവുന്നത്ര ചുരുക്കം മാത്രം, ബാക്കിയുള്ള മിക്കവരും അധ്യാപനം എന്നത് തങ്ങളുടെ സ്വഭാവ വൈകൃത്യങ്ങളെ ബാലൻസ് ചെയ്യിക്കാൻ ഉള്ള ഒരു മീഡിയം മാത്രമായി കണ്ടിരുന്നു എന്ന് പോലും തോന്നിയിട്ടുണ്ട്. ഈ ഒരു കാരണം കൊണ്ട് കൂടി ആവണം രഹ്‌ന മർയം നൂർ എന്ന ബംഗ്ലാദേശ് ചിത്രം ഒരു മികച്ച അനുഭവം തന്നെ ആയിരുന്നു, എല്ലാ അർത്ഥത്തിലും.

🔸വളരെ സ്റ്റബേൺ ആയ ഒരു അധ്യാപിക ആണ് നമ്മുടെ നായികാ കഥാപാത്രം ആയ രഹന മർയം നൂർ. ഒരു മെഡിക്കൽ സ്കൂളിൽ അധ്യാപിക ആയ രഹ്‌ന പരീക്ഷയ്ക്കിടെ ഒരു കൂട്ടിയെ കോപ്പി അടിച്ച് പിടിച്ചതിനാൽ പുറത്താക്കുന്ന രംഗത്തിൽ നിന്ന് തന്നെ അവരുടെ സ്വഭാവം നമുക്ക് മനസിലാവുന്നുണ്ട്. വിഭാര്യ ആയ രഹ്‌നയ്ക്ക് ഒരു മകളാണ് ഉള്ളത്, സിംഗിൾ മദർ ആയത് കൊണ്ട് തന്നെ വ്യക്തി ജീവിതത്തിലും ഒരുപാട് കഷ്ടപ്പാടുകൾ അവർ അനുഭവിക്കുന്നുണ്ട്. ഇങ്ങനെ കഥ പുരോഗമിക്കുമ്പോൾ ആണ് ഒരു പ്രത്യേക സംഭവം കാമ്പസ്സിൽ അരങ്ങേറുന്നത്, നമ്മുടെ പ്രധാന കഥാപാത്രത്തിന്റെയും കഥയുടെ കോർസിനെ തന്നെയും മാറ്റി മറിക്കുകയാണ് ഈ സംഭവം.

🔸സംഭവം മറ്റൊന്നുമല്ല, നമ്മുടെ കോളേജിലെ ഒരു അദ്ധ്യാപകൻ വിദ്യാർഥികളിൽ ഒരാളോട് വളരെ മോശമായി പെരുമാറുകയാണ്, സെക്ഷുവൽ അസോൾട്ട് എന്ന് തന്നെ പറയാം. ഇതിന് ഇരയായ പെൺകുട്ടി ആകെ ഭയന്ന് പോയി എങ്കിലും രഹ്‌ന ഈ സംഭവത്തെ അങ്ങനെ അങ്ങ് വിട്ട് കളയാനുള്ള ഭാവത്തിൽ ആയിരുന്നില്ല. ഇനി ഇങ്ങനെ ഒരു സംഭവം ആവർത്തിക്കാതിരിക്കുക എന്നത് ഉറപ്പ് വരുത്തുക തന്റെ ദൗത്യമായി അവർ കാണുകയാണ്, തുടർന്ന് അരങ്ങേറുന്ന സംഭവങ്ങൾ ആണ് ഈ ചിത്രം. വളരെ ഇന്റൻസ് ആയ പ്രകടനങ്ങൾ ആണ് ഈ ചിത്രത്തിലെത്, മികച്ച ഒരു സ്റ്റോറി മനോഹരമായി തന്നെ അവതരിപ്പിച്ചിട്ടുണ്ട്, ചില വ്യൂ പോയിന്റ്സിനോട് യോജിപ്പ് തോന്നിയില്ല എങ്കിലും സിനിമ ഇഷ്ട്ടപ്പെട്ടു, കാണാൻ ശ്രമിക്കുക.

Verdict : Very Good

DC Rating : 4/5