1366. The Killer (1989)

Director : John Woo

Cinematographer : Peter Pau Tak Hai

Genre : Action

Country : Hong Kong

Duration : 110 Minutes

🔸ജോൺ വൂ ചിത്രങ്ങളിൽ വ്യക്തിപരമായി ഏറ്റവും ഇഷ്ടമുള്ള ചിത്രം, അതാണ് ദി കില്ലർ. മറ്റ് ജോൺ വൂ ചിത്രങ്ങളുടെ തനത് ഓവർ ദി ടോപ്പ് സ്റ്റൈലും, കിടിലൻ കഥാപാത്രങ്ങളും ഒക്കെ ഉണ്ടെങ്കിലും അവയിൽ ഒന്നും ഇല്ലാത്ത ഒരു ട്രാജിക് ഫീൽ ഈ ചിത്രത്തിന് തരാൻ കഴിയുന്നുണ്ട്. ഇവിടെ കഥാപാത്രങ്ങൾക്ക് വെടി കൊള്ളുമ്പോഴും, അവർ വീഴുമ്പോഴും എല്ലാം കാഴ്ചക്കാരനിൽ വല്ലാത്തൊരു പെയിൻ സൃഷ്ടിക്കാൻ കഴിയുന്നതായി തോന്നിയിട്ടുണ്ട്. ഇത്തരത്തിൽ ഉള്ളൊരു ഇമോഷണൽ കണക്ഷൻ സംവിധായകന്റെ മറ്റൊരു ചിത്രത്തിനും സൃഷ്ടിക്കാൻ കഴിഞ്ഞിട്ടുണ്ട് എന്ന് തോന്നുന്നില്ല.

🔸കഥയിലേക്ക് വരിക ആണെങ്കിൽ ചോ യുൻ ഫാറ്റിന്റെ കരിയർ ബെസ്റ്റ് കഥാപാത്രങ്ങളിൽ ഒന്നായി നിസ്സംശയം പറയാവുന്ന അഹ് ജോങ് എന്ന ഹിറ്റ്മാൻ ആണ് നമ്മുടെ പ്രധാന കഥാപാത്രം. തന്റെ പ്രവർത്തി മേഖലയിൽ ജോങ്ങിന് വെല്ലുവിളി ആയി നിൽക്കാൻ കഴിവുള്ളവർ അധികമില്ല, അയാളുടെ കൃത്യതയും കൂർമ്മ ബുദ്ധിയും എല്ലാം അപാരം ആയത് കൊണ്ട് തന്നെയാവണം അയാൾക്ക് ഹിറ്റ് ജോബുകൾക്ക് യാതൊരു പഞ്ഞവുമില്ല. എന്നാൽ ജോങ്ങിന് ഈ ജീവിതം മടുത്ത് തുടങ്ങിയിരിക്കുന്നു, എല്ലാം നിർത്തുന്നതിന് മുന്നോടി ആയുള്ള അവസാന പണിക്ക് അയാൾ ഇറങ്ങിയപ്പോൾ സംഭവിക്കുന്നത് ആണെങ്കിൽ ഭീകരമായ ഒരു അബദ്ധവുമാണ്.

🔸ജോങ്ങിന്റെ കയ്യിൽ നിന്നുള്ള ഒരു പിഴവ് കാരണം ഒരു ഗായികയുടെ കാഴ്ച പോവുകയാണ്, ഇതിന് പ്രായശ്ചിത്തം ചെയ്യാനുള്ള ജോങ്ങിന്റെ ശ്രമങ്ങളും അതിനിടയിൽ അയാളുടെ ജീവിതത്തിലേക്ക് കടന്ന് വരുന്ന ഒരു പുതിയ സുഹൃത്തും ഒക്കെയാണ് ഈ സിനിമയുടെ പ്ലോട്ട് പോയിന്റ്. ഒരു മസ്റ്റ് വാച് സിനിമയാണ് ദി കില്ലർ, ഈ ഒരു സ്റ്റേട്ട്മെന്റിൽ കുറഞ്ഞ് വേറൊരു അവകാശ വാദവും പറയാൻ ഇല്ല. നല്ല കഥ, ഗംഭീര പ്രകടനങ്ങൾ, വാതിലും ഗംഭീരമായ ആക്ഷൻ രംഗങ്ങൾ, പിന്നെ നല്ല ഒന്നാന്തരം ഒരു ക്ലൈമാക്സും, അങ്ങനെ എല്ലാം കൊണ്ടും ഒരു ഒന്നൊന്നര സിനിമയാണ് ദി കില്ലർ.

Verdict : Must Watch

DC Rating : 4.75/5

1365. Wake Up Dead Man (2025)

Director : Rian Johnson

Cinematographer : Steve Yedlin

Genre : Mystery

Country : USA

Duration : 144 Minutes

🔸നൈവ്സ് ഔട്ട് സീരീസിലെ മൂന്നാമത്തെ ചിത്രം ഈ വർഷം ഏറ്റവും പ്രതീക്ഷ ഉണ്ടായിരുന്ന സിനിമകളിൽ ഒന്ന് തന്നെ ആയിരുന്നു, അതിന് കാരണങ്ങൾ ഒരുപാട് ഉണ്ട് താനും. ആദ്യത്തെ രണ്ട് സിനിമകളുടെ ആ ഒരു വെറൈറ്റി സ്റ്റൈലും, കിടിലൻ കാസ്റ്റും തുടങ്ങി പ്രതീക്ഷ അർപ്പിക്കാൻ ഒരുപാട് കാരണങ്ങൾ. എന്നാൽ മൂന്നാം ഭാഗം കണ്ട് തീർത്ത വേളയിൽ പറയാം, ആദ്യ രണ്ട് ഭാഗങ്ങളിൽ നിന്നും ടോൺ കൊണ്ട് ആയാലും സെറ്റപ്പ് കൊണ്ടായാലും പ്രകടനങ്ങൾ കൊണ്ടായാലും ഒരുപാട് മാറി നിൽക്കുന്ന ഒരു ചിത്രമാണ് മൂന്നാം ഭാഗം. ഈ ഒരു കാര്യം സത്യത്തിൽ ഒരു നെഗറ്റീവ് അല്ല മറിച്ച് പോസിറ്റീവ് ആണ് കാരണം, ഈ സീരീസിലെ ഏറ്റവും മികച്ച സിനിമയാണ് ഈ മൂന്നാം ഭാഗം എന്ന അഭിപ്രായം ആണ് പേഴ്സണലി ഉള്ളത്.

🔸മറ്റ് കഥകളെ അപേക്ഷിച്ച് അല്പം ഡാർക്ക് ആൻഡ് സീരിയസ് ആണ് ഈ ചിത്രം, മതം വിശ്വാസം ദൈവം എന്നീ കാര്യങ്ങൾ എല്ലാം ഈ കഥയിൽ ഒരു ഫാക്ടർ ആയി വരുന്നുണ്ട്. കഥയിലേക്ക് വരിക ആണെങ്കിൽ, ഒരു യുവ പാസ്റ്റർ പുതിയൊരു പള്ളിയിലേക്ക് പുരോഹിതനായി വരികയാണ്. ഈ പള്ളിയെ കുറിച്ചും അവിടത്തെ മുഖ്യ പുരോഹിതനെ കുറിച്ചും ഒക്കെ അത്ര നല്ല വാർത്തകൾ അല്ല അയാൾ കേട്ടത്. ഒരു എക്സ്ട്രീമിസ്റ്റ് സ്വഭാവം ഉള്ള മുഖ്യ പുരോഹിതൻ രീതികളും ചെയ്തികളും ഒന്നും അത്ര നല്ലതോ, ആളുകൾക്ക് ഇഷ്ടപ്പെടുന്നതോ അല്ല എന്ന് പറയേണ്ടി വരും. ഇനി അതൊന്നും പോരാ എങ്കിൽ ആ പള്ളിക്ക് തന്നെ ഒരു ഇരുണ്ട ചരിത്രം ഉണ്ട്.

🔸ഈ പള്ളി മേടയിൽ വെച്ച് ഒരു കൊലപാതകം അരങ്ങേരുമ്പോൾ ആണ് നമ്മുടെ നായക അന്വേഷകൻ ആയ ബെനോയിട്ട് ബ്ളാങ്ക് കഥയിലേക്ക് വരുന്നത്. ആദ്യ ഭാഗത്തേതിൽ നിന്നും വിഭിന്നമായി കുറച്ച് പ്രായമായ, തോൽവി വരെ അംഗീകരിക്കാൻ മടിയില്ലാത്ത കഥാപത്രമായുള്ള ദാനിയേൽ ക്രെയഗിന്റെ പ്രകടനം ഗംഭീരം ആയിരുന്നു, മറ്റുള്ളവരിൽ തന്നെ ആരും മോശം ആക്കിയില്ല. ഒരുപാട് ട്വിസ്റ്റും ടെർനും ഒക്കെയുള്ള കഥയും അവസാനം തൃപ്തി തന്ന് അവസാനിക്കുന്നുണ്ട്. പ്രത്യേകിച്ച് ഒരു വിഭാഗത്തിലും മോശം പറയാൻ ഇല്ലാത്ത ഈ ചിത്രം തീർച്ചയായും ഈ വർഷത്തെ മികച്ചവയുടെ കൂട്ടത്തിൽ കാണും. ഇനി ഒരു പതിനഞ്ച് സിനിമകൾ ഇറക്കിയാലും, ഈ ഇറക്കുന്ന സിനിമകൾ ഇത് പോലെ വെറൈറ്റി ആയി ചെയ്യാൻ കഴിയും എങ്കിൽ ഈ സീരീസിന് ഒരുപാട് ഭാവി ഉണ്ട് എന്ന് നിസ്സംശയം പറയാം.

Verdict : Very Good

DC Rating : 4/5

1364. A Better Tomorrow II (1987)

Director : John Woo

Cinematographer : Frank Prinzi

Genre : Action

Country : Hong Kong

Duration : 103 Minutes

🔸പ്രതീക്ഷിച്ചതിനേക്കാൾ ഒരുപാട് മുകളിൽ ഉള്ളൊരു വിജയം നേടിയ ചിത്രമാണ് എ ബെറ്റർ ടുമാറോ എന്നത് എല്ലാവർക്കും അറിയാവുന്ന ഒരു കാര്യമാണ്. ഒരു പോപ്പ് കൾച്ചർ സെൻസെഷൻ എന്ന നിലക്കും, ആരാധക പിന്തുണയിലും എല്ലാം സ്വപ്ന തുല്യമായ നേട്ടങ്ങൾ കൈവരിച്ചത് കൊണ്ട് തന്നെ രണ്ടാം ഭാഗം എന്നത് വലിയ അത്ഭുതം ഒന്നും സൃഷ്ടിക്കാത്ത ഒരു അനിവാര്യത മാത്രം ആയിരുന്നു. ഈ ഒരു ആരാധക ആവശ്യം കൊണ്ട് തന്നെ ആയിരിക്കണം ആദ്യ ഭാഗത്ത് മരണപ്പെട്ട ഒരു ഐക്കണിക്ക് കഥാപാത്രത്തിന് പകരം അയാളുടെ രൂപ സാദർശ്യം ഉള്ള ഇരട്ട സഹോദരൻ കഥാപാത്രത്തെ വരെ തിരികെ കൊണ്ട് വന്നു, ഈ സിനിമയുടെ അണിയറ പ്രവർത്തകർ. ചുരുക്കി പറഞ്ഞാൽ ആദ്യ ഭാഗത്ത് വർക്ക് ആയ എല്ലാ കാര്യങ്ങളെയും ഒന്ന് ആംപ്ലിഫൈ ചെയ്ത് അവതരിപ്പിക്കുകയാണ് ഈ സിനിമ.

🔸ആദ്യ ഭാഗത്തെ പോലെ തന്നെ ഇവിടെയും സഹോദരന്മാരായ ഹോ, കിറ്റ് എന്നിവരെ ചുറ്റി പറ്റിയാണ് കഥ ആരംഭിക്കുന്നത്. ആദ്യ ഭാഗത്തെ സംഭവങ്ങൾ അവരെ മാനസികമായും, ശരീരികമായും ഒക്കെ വല്ലാതെ വേട്ടയാടുന്നുണ്ട്, പ്രത്യേകിച്ചും ആത്മാർത്ഥ സുഹൃത്തിന്റെ മരണം. കിറ്റ് തന്റെ ഔദ്യോഗിക ജീവിതത്തിലേക്ക് മടങ്ങി എങ്കിലും ഹോ ഇപ്പോഴും ഇനി എന്ത് എന്ന ചോദ്യത്തിന് ഉത്തരം കണ്ടെത്താൻ കഴിയാതെ പകച്ച് നിൽക്കുന്ന അവസ്ഥയിലാണ്. ഇതിന്റെ ഇടയിലേക്ക് ഒരല്പം പഴക്കമുള്ള പ്രതികാര കഥയുമായി ഒരു വ്യക്തി കടന്ന് വരുന്നതും തുടർന്ന് ഉണ്ടാവുന്ന പ്രശ്നങ്ങളും ഒക്കെയാണ് ചിത്രത്തിന്റെ കഥ.

🔸ആക്ഷൻ ആരാധകർക്ക് ഇഷ്ടപ്പെടാൻ ഉള്ളതെല്ലാം ഈ ചിത്രത്തിൽ ഉണ്ട്, അത് തന്നെ ആദ്യ ഭാഗത്തെ അപേക്ഷിച്ച് ഒരു മൂന്ന് മടങ്ങ് എങ്കിലും ഉണ്ട്. അത് പോലെ തന്നെ പ്ലോട്ട് വലിയ സംഭവം ഒന്നും അല്ലെങ്കിലും അവതരണം ഒന്നാം തരം തന്നെയാണ്. കഥാപാത്രങ്ങൾ ആയി എത്തിയവർ എല്ലാം നന്നായിരുന്നു എങ്കിലും ചോ യുൻ ഫാറ്റ് ഒരു സീൻ സ്റ്റീലർ തന്നെ ആയിരുന്നു. യുൻ ഫാറ്റിന്റെ കഥാപാത്രം സംബന്ധിച്ചുള്ള ട്വിസ്റ്റ് ബോർ ആയിരുന്നു എങ്കിലും അത് ഒരു പരിധി വരെ ആവശ്യം തന്നെ ആയിരുന്നു. ആക്ഷൻ സിനിമകളോട് താല്പര്യം ഉള്ള, ആദ്യ ഭാഗം ഇഷ്ടപ്പെട്ട ഒരാളാണ് നിങ്ങൾ എങ്കിൽ ഈ സിനിമ തീർച്ചയായും നിങ്ങൾക്ക് ഉള്ളതാണ്, കാണാൻ ശ്രമിക്കുക.

Verdict : Very Good

DC Rating : 4.25/5

1363. A Better Tomorrow (1986)

Director : John Woo

Cinematographer : Wong Wing Hang

Genre : Action

Country : Hong Kong

Duration : 95 Minutes

🔸ഹാർഡ് ബോയിൽഡ് എന്ന സിനിമയെ കുറിച്ച് പറഞ്ഞ് കഴിഞ്ഞാൽ തീർച്ചയായും എ ബെറ്റർ ടുമാറോ എന്ന സിനിമയെ കുറിച്ച് പറയാതെ മുന്നോട്ട് പോവാൻ കഴിയില്ല, അത് ശെരിയുമല്ല. ഒരു പരിധി വരെ ഹാർഡ് ബോയിൽഡ് ഓടിയത് എ ബെറ്റർ ടുമാറോ ഒരുക്കി വെച്ച വഴിയിൽ കൂടിയാണ് എന്ന് പറഞ്ഞാൽ പോലും തെറ്റില്ല. കാരണം കോമഡി, റോം കോം സിനിമകളെ ഇഷ്ടപ്പെട്ടിരുന്ന ഹോങ് കോങ് ആരാധകരെ ബ്ലഡ് ഷെഡ് ആക്ഷൻ സിനിമകളിലേക്ക് വീണ്ടും അടുപ്പിച്ചത് ബെറ്റർ ടുമാറോ തന്നെയാണ്. പിന്നീട് വന്ന ഒരുപാട് സിനിമകൾക്ക് ഉള്ള പ്രചോദനവും, മുന്നൊരുക്കവും എല്ലാം ഇവിടെ നിന്ന് തന്നെയാണ് എന്ന് സാരം.

🔸നിയമത്തിന്റെ രണ്ട് വശങ്ങളിൽ നിൽക്കുന്ന സഹോദരന്മാരുടെ കഥ നമ്മൾ ഒരുപാട് സിനിമകളിൽ കണ്ടിട്ടുണ്ട്, എന്തിന് അധികം നമ്മുടെ മലയാളത്തിൽ വരെ ഉണ്ട്. ഈ ഒരു പ്ലോട്ട് തന്നെയാണ് ഈ സിനിമയുടെ സ്റ്റാർട്ടിങ് പോയിന്റ് എങ്കിലും നല്ല കിടിലൻ ആക്ഷൻ സെറ്റ് പീസുകൾ കൊണ്ടും, ഹൈ മൊമന്റ്സ് കൊണ്ടും ഒക്കെ ഒരു പോയിന്റിൽ പോലും നമ്മളെ മടുപ്പിക്കുന്നില്ല എന്നതാണ് സത്യം. ഹോങ് കൊങ്ങിലെ കുപ്രസിദ്ധമായ ക്രിമിനൽ സിൻഡിക്കേറ്റിലെ അംഗമാണ് ഹോ, അയാളുടെ ഒരേയൊരു അനുജനായ കിറ്റ് ആണെങ്കിൽ ഒരു പോലീസുകാരനും.

🔸തന്റെ ക്രിമിനൽ ബാക്ക് ഗ്രൗണ്ട് അനിയന് ഒരു പ്രശ്നമാവും എന്ന തിരിച്ചറിവിൽ എല്ലാം ഉപേക്ഷിക്കുകയാണ് ഹോ, എന്നാൽ അയാളുടെ അവസാന ദിവസം ഏറ്റെടുത്ത ഒരു പരിപാടി അമ്പേ പൊളിഞ്ഞ് പോവുകയും, വലിയ ചില പ്രശ്നങ്ങളിലേക്ക് വഴി വെക്കുകയും ഒക്കെ ചെയ്യുമ്പോൾ അയാൾ ആകെ പകച്ച് പോവുകയാണ്, ഇവിടെ നിന്നുമാണ് കഥ ആരംഭിക്കുന്നത്. കഥയിൽ ഉള്ള പുതുമ ഇല്ലായ്മ പരിഹരിക്കുന്നത് നല്ല ഒന്നാം ക്ലാസ് ആക്ഷൻ രംഗങ്ങൾ തന്നെയാണ്, കാഴ്ചക്കാരനെ ത്രിൽ അടിപ്പിക്കാനുള്ള എല്ലാ സാധന സാമഗ്രികളും നല്ല തോതിൽ തന്നെ ചേർതിട്ടുണ്ട്. അതിനോടൊപ്പം അഭിനേതാക്കളുടെ മികച്ച പ്രകടനങ്ങളും, അന്യായ കരിസ്‌മയും ഒക്കെ കൂടി ചേരുമ്പോൾ ഒരു കിടിലൻ സിനിമ തന്നെയായി മാറുന്നുണ്ട് എ ബെറ്റർ ടുമാറോ, താല്പര്യം തോന്നുന്നെങ്കിൽ കാണാൻ ശ്രമിക്കുക, നഷ്ടം ആവില്ല.

Verdict : Very Good

DC Rating : 4/5

1362. Hard Boiled (1992)

Director : John Woo

Cinematographer : Horace Wong

Genre : Action

Country : Hong Kong

Duration : 126 Minutes

🔸ഹാർഡ് ബോയിൽഡ് എന്ന ഹോങ് കോങ് ആക്ഷൻ ചിത്രം ആദ്യമായി കണ്ടത് ഉദ്ദേശം പത്ത് വർഷങ്ങൾക്ക് മുൻപ് ആണെന്ന് തോന്നുന്നു, അന്ന് നമ്മുടെ നായക കഥാപാത്രം ഒരു കയ്യിൽ തോക്കും മറ്റേ കയ്യിൽ ഒരു കുഞ്ഞിനേയും ഒക്കെ പിടിച്ച് നിൽക്കുന്ന പോസ്റ്റർ കണ്ടപ്പോൾ ഒരു ക്രിഞ്ച് ഫീൽ കിട്ടിയിരുന്നു എങ്കിലും സിനിമ കണ്ട് കഴിഞ്ഞപ്പോൾ ഭയങ്കരം ത്രില്ലിങ് ആയ ഒരു അനുഭവം തന്നെ ആയിരുന്നു ലഭിച്ചത്. വർഷങ്ങൾക്ക് ഇപ്പുറം ഒരു ഓർമ്മ പുതുക്കൽ എന്ന മട്ടിൽ വീണ്ടും ഈ സിനിമയിലേക്ക് കടന്ന് വരുമ്പോൾ ലഭിക്കുന്ന ത്രില്ലിന് യാതൊരു വിധ കുറവും ഇല്ല, നല്ല ഒന്നാന്തരം ഒരു ആക്ഷൻ ചിത്രം എന്നല്ലാതെ വേറെ ഒന്നും പറയാൻ ഇല്ല.

🔸വേഫർ തിൻ എന്നൊക്കെ പറയാവുന്ന ഒന്നാണ് ഈ സിനിമയുടെ പ്ലോട്ട് എന്ന് പറയാം. അതായത് ആയുധ കടത്ത് ഒക്കെ നടത്തുന്ന ഒരു മാഫിയ ബോസിനെ നിയമത്തിന്റെ മുന്നിൽ എത്തിക്കാനുള്ള ഒരു സംഘം പോലീസുകാരുടെ ശ്രമവും, അതിനെ തുടർന്ന് ഉണ്ടാവുന്ന പ്രശ്നങ്ങളും ഒക്കെയാണ് ചിത്രം. എന്നാൽ ഈ പ്ലോട്ടിനെ മറ്റൊരു തലത്തിലേക്ക് എത്തിക്കുന്നത് നല്ല കിടിലൻ ആക്ഷൻ സെറ്റ് പീസുകളും, ഉഗ്രൻ ഹൈ മൊമന്റ്സും, കിടിലൻ കഥാപാത്രങ്ങളും ഒക്കെയാണ്. ആക്ഷൻ എന്ന ജോനറിനോട് നീതി പുലർത്തും വിധം രണ്ടാം പകുതി മുഴുവനും ഹോസ്പിറ്റലിന് അകത്തുള്ള ആക്ഷൻ രംഗങ്ങളും ആണ്.

🔸പ്രധാന രണ്ട് പോലീസ് കഥാപാത്രങ്ങൾ ആയി എത്തിയ ചോ എൻ ഫാറ്റും, ടോണി യുങ്ങും പെർഫെക്ട് കാസ്റ്റിങ് തന്നെ ആയിരുന്നു, പ്രത്യേകിച്ചും അല്പം കോണ്ഫ്ളിക്റ്റഡ് ആയ കഥാപാത്രം ആയി എത്തിയ ലിയുങ് സിനിമയുടെ സോൾ ആയി തന്നെ അനുഭവപ്പെട്ടു. വളരെ സ്റ്റൈലൈസ്ഡ് ആയ ആക്ഷൻ രംഗങ്ങൾ ആണ് സിനിമയുടെ ഏറ്റവും വലിയ പോസിറ്റീവ് എന്ന് നിസ്സംശയം പറയാം, മറ്റൊന്നിനെ കുറിച്ചും ചിന്തിക്കാൻ കാഴ്ചക്കാരന് സമയം തരാത്ത വണ്ണം അത്രയും ഗ്രിപ്പിങ് ആയാണ് ഈ ആക്ഷൻ സെറ്റ് പീസുകൾ എല്ലാം അവതരിപ്പിച്ചിരിക്കുന്നത്. ഒരു ആക്ഷൻ സിനിമാ പ്രേമി ആണ് നിങ്ങൾ എങ്കിൽ കണ്ടിരിക്കേണ്ട സിനിമയാണ് ഹാർഡ് ബോയിൽഡ്, സ്റ്റൈൽ കൊണ്ടും സബ്സ്റ്റൻസ് കൊണ്ടും ഒരു ഒന്നൊന്നര സിനിമ.

Verdict : Very Good

DC Rating : 4.25/5

1361. Drops Of God (2023)

Creator : Quoc Dang Tran

Genre : Drama

Seasons : 01

Episodes : 08

Duration : 49 - 58 Minutes

🔸വളരെ ഇൻട്രസ്‌റ്റിങ് ആയൊരു പ്ലോട്ട് ആണ് ഡ്രോപ്പ്സ് ഓഫ് ഗോഡ് എന്ന എട്ട് എപ്പിസോഡ് ടീവി സീരീസിന്റേത്, ചില എപ്പിസോഡുകളിൽ ആ ഒരു ബേസ് പ്ലോട്ടിൽ നിന്നും വ്യതിചലിച്ച് പോവാനുള്ള ശ്രമങ്ങൾ അത്ര കണ്ട് വിജയിച്ചില്ല എങ്കിൽ കൂടിയും എവിടെയും മോശമാവുന്നില്ല എന്നത് എടുത്ത് പറയേണ്ട കാര്യം തന്നെയാണ്. കഥയിലേക്ക് വരിക ആണെങ്കിൽ വൈൻ ടേസ്റ്റിംഗ് അല്ലെങ്കിൽ വൈൻ നിർമാണ മേഖലയിൽ ഒരു ലജണ്ടറി സ്റ്റാറ്റസ് ഉള്ള വ്യക്തിയാണ് അലക്സണ്ടർ ലെകർ. വർഷങ്ങളായി ടോകിയോ നഗരത്തിൽ ഒറ്റയ്ക്ക് താമസിക്കുന്ന ലെഗ്റിന്റെ മരണത്തോട് കൂടിയാണ് ഈ സീരീസ് ആരംഭിക്കുന്നത് എന്ന് പറയാം.

🔸തന്റെ ജീവിത കാലത്തെ സമ്പാദ്യവും, മറ്റ് കളക്ഷൻസും ഒക്കെയായി ഏകദേശം നൂറ്റി അൻപത് മില്യൺ ഡോളർ ആസ്തി ഉണ്ട് ഈ അലക്സാണ്ടറിന്. ബന്ധുക്കൾ എന്ന് പറയാൻ ആകെ ഒരു ഭാര്യയും മകളും മാത്രമാണ് ടിയാന് ഉള്ളത്, അവർ ആണെങ്കിൽ വർഷങ്ങൾ ഒരുപാട് ആയി ഇയാളിൽ നിന്നും മാറി താമസിക്കാൻ തുടങ്ങിയിട്ട്. കുറഞ്ഞത് ഒരു പതിറ്റാണ്ട് എങ്കിലും ആയി ഇവർ തമ്മിൽ ഒന്ന് സംസാരിച്ചിട്ട് പോലും, എന്നാൽ മരണ ശേഷം ഉള്ള അയാളുടെ വില്പത്രത്തിൽ മകൾക്ക് അവകാശം പറഞ്ഞ് വെച്ചിട്ടുണ്ട്, എന്നാൽ അത് അനുഭവിക്കാൻ അവൾക്ക് കുറച്ച് കടമ്പകൾ കടക്കാനുണ്ട് എന്നതാണ് ട്വിസ്റ്റ്.

🔸അലക്സാണ്ടറിന്റെ വില്പത്രത്തിൽ മകൾക്ക് പുറമെ ഒരു അവകാശി കൂടി ഉണ്ട്, അത് ആരാണ് എന്ന് കണ്ട് തന്നെ അറിയുക. ഈ രണ്ട് കഥാപാത്രങ്ങൾക്കും ഒരു മത്സരത്തിൽ പരസ്പരം നേരിട്ട് ജയിച്ചാലേ അയാളുടെ സ്വത്ത് വകകൾ അനുഭവിക്കാൻ കഴിയൂ എന്ന് ടിയാൻ തന്റെ വില്പത്രത്തിൽ എഴുതി വെച്ചിട്ടുണ്ട്. എന്താണ് ഈ മത്സരം, ആ മത്സരത്തിൽ ആര് നയിക്കുന്നു, അതിന്റെ പ്രത്യാഘാതംങ്ങൾ എന്തൊക്കെ എന്നതാണ് പിന്നീടുള്ള എട്ട് എപ്പിസോഡുകൾ പറയുന്നത്. നല്ല തുടക്കത്തിന് ശേഷം ഇടയ്ക്ക് ഒന്ന് ട്രാക്ക് മാറുന്നുണ്ട് എങ്കിലും നല്ല രീതിയിൽ തന്നെ അവസാനിപ്പിക്കുന്നുണ്ട് ഈ സെറീസ്. വലിയ അവകാശവാദങ്ങൾ ഒന്നും തന്നെയില്ല, ഒരു ചെറിയ നല്ല ശ്രമം എന്ന് മാത്രം.

Verdict : Good

DC Rating : 3.5/5

1360. Sentimental Value (2025)

Director : Joachim Trier

Cinematographer : Kasper Tuxen

Genre : Drama

Country : Turkey

Duration : 135 Minutes

🔸സെന്റിമെന്റൽ വാല്യൂ എന്ന സിനിമയെ കുറിച്ചുള്ള ചർച്ചകളിൽ, അത് ഏത് പ്ലെറ്റുഫോമുകളിലും ആയിക്കോട്ടെ കേട്ട് വരുന്ന ഒരു കാര്യമാണ് ഈ വർഷത്തെ മികച്ച ചിത്രങ്ങളിൽ ഒന്ന് എന്ന പരാമർശം. സംവിധായകന്റെ മുൻകാല ചിത്രങ്ങളിൽ വേർസ്റ്റ് പേഴ്സണൽ ഇൻ ദി വേൾഡ് പോലുള്ള സിനിമകൾ ഒക്കെ ഉള്ളത് കൊണ്ട് തന്നെ അതിൽ വലിയ അതിശയോക്തി ഒന്നും തോന്നിയില്ല. മുൻകാല ചിത്രങ്ങൾ പോലെ തന്നെ വ്യക്തികൾക്ക് ഇടയിലുള്ള ആത്മ ബന്ധവും, വൈകാരിക നിമിഷങ്ങളും എല്ലാം കോർത്തിണക്കി വളരെ മികച്ച ഒരു ഔട്ട് പുട്ട് തന്നെയാണ് സംവിധായകൻ ഈ സിനിഡമയിലൂടെയും കാഴ്ചക്കാർക്ക് മുൻപിലേക്ക് എത്തിച്ചിരിക്കുന്നത്.

🔸റഷ്യൻ ഭാഷയിൽ ഉദ്ദേശം രണ്ട് പതിറ്റാണ്ട് മുന്നേ പുറത്തിറങ്ങിയ ദി റിട്ടേൺ എന്ന സിനിമയുമായി കഥാപരമായി ചില സാമ്യതകൾ പുലർത്തുന്നുണ്ട് ഈ ചിത്രം. ആ കഥയിൽ അച്ഛനും രണ്ട് ആൺമക്കളും ആണ് പ്രധാന കഥാപാത്രങ്ങൾ എങ്കിൽ ഇവിടെ അച്ഛനും രണ്ട് പെണ്മക്കളും ആണെന്ന് മാത്രം. വർഷങ്ങളായി തങ്ങളെ പിരിഞ്ഞ് ജീവിച്ച അച്ഛന്റെ പെട്ടെന്നുള്ള മടങ്ങി വരവും, അവരുടെ വ്യക്തി ജീവിതങ്ങളിലേക്ക് അവർ പോലും അറിയാതെ അയാൾ ഒരു ഭാഗമായി മാറുന്നതും ഒക്കെ മനോഹരമായി തന്നെ ചിത്രം അവതരിപ്പിക്കുന്നുണ്ട്. ഇവിടെ രണ്ട് പെണ്മക്കളും തങ്ങളുടെ ജീവിതത്തിന്റെ മധ്യ കാലത്തേക്ക് കടന്നവരാണ് എന്നത് കഥയ്ക്ക് മറ്റൊരു മാനം നൽകുന്നുണ്ട്.

🔸അമ്മ തങ്ങളെ വിട്ട് പോയതിന്റെ ബുദ്ധിമുട്ടുകളിൽ നിന്ന് തന്നെ പൂർണമായി മോചിതർ ആവാത്ത ഇരുവർക്കും അച്ഛന്റെ മടങ്ങി വരവിനോടുള്ള മനോഭാവവും വെവ്വേറെ ആണ്. ഒരാൾക്ക് അത് സഹതാപം ആണെങ്കിൽ മറ്റേയാൾക് പുച്ഛവും പരിഹാസവും ഒക്കെ കലർന്ന ഒരു തരം ദേഷ്യം ആണെന്ന് പറയാം. ഈ മൂന്ന് കഥാപാത്രങ്ങളെ ചുറ്റി പറ്റിയാണ് കഥ പുരോഗമിക്കുന്നത്, വളരെ വൈകാരികമായ ഒരുപാട് നിമിഷങ്ങൾ ഈ കഥയിൽ ഉണ്ട്, അവയെല്ലാം തന്നെ കാഴ്ചക്കാരനെ ആഴത്തിൽ സ്പർശിക്കുന്നും ഉണ്ട്. വേർസ്റ്റ് പേഴ്സൻ ഇൻ ദി വേൾഡ് തന്നെയാണ് പേഴ്സണലി സംവിധായകന്റെ മികച്ച സിനിമയായി ഇപ്പോഴും കരുതുന്നത് എങ്കിലും ഈ ചിത്രം നല്ലൊരു വെല്ലുവിളി ആയി തന്നെ വന്നിട്ടുണ്ട്. തീർച്ചയായും ഈ വർഷത്തെ മികച്ച സിനിമകളിൽ ഒന്നായി ഉണ്ടാവും ഈ സിനിമയും എന്നത് നിസ്സംശയം പറയാം.

Verdict : Very Good

DC Rating : 4/5

1359. It Was Just An Accident (2025)

Director : Jafar Panahi

Cinematographer : Amin Jafari

Genre : Drama

Country : Iran

Duration : 104 Minutes

🔸എന്തൊക്കെ ത്യാഗം സഹിച്ചാണ് ജാഫർ പനാഹി ഒരു സിനിമ പുറത്തിറക്കുന്നത് എന്നത് ഏതൊരു ജാഫർ പനാഹി ചിത്രത്തെ കുറിച്ച് പറഞ്ഞ് തുടങ്ങുമ്പോഴും ചേർക്കാറുള്ള സ്ഥിരം ഐറ്റം ആണ്, ഇത്തവണ എന്തായാലും അതിലേക്ക് കടക്കുന്നില്ല. ഇറാനിയൻ രാഷ്ട്രീയ പരിതസ്ഥിതിയെ പ്രമേയമാക്കി പനാഹി അവതരിപ്പിക്കുന്ന പുതിയ സംരംഭം ആണ് ഇറ്റ് വാസ് ജസ്റ്റ് അൻ ആക്സിഡന്റ് എന്ന ചിത്രം. ഒട്ടൊരുപാട് നിയന്ത്രണങ്ങളിലും, നിയമങ്ങളിലും ഒക്കെ കുരുങ്ങി കിടന്ന് കൊണ്ട് സംവിധായകൻ പറയുന്ന കഥ സത്യത്തിൽ ആ നിയന്ത്രണങ്ങളുടേത് തന്നെയാണ്, അതിന് സാധാരണക്കാരായ കുറച്ച് ആളുകളെ കഥാപാത്രങ്ങളാക്കി കൊണ്ട് വരുന്നു എന്ന് മാത്രം.

🔸ഒരു വ്യക്തി, തന്റെ ഗർഭിണി ആയ ഭാര്യയുടെയും മകളുടെയും ഒപ്പം എവിടേക്കോ സ്വന്തം വണ്ടിയിൽ പോയി കൊണ്ടിരിക്കുകയാണ്. ഇടയ്ക്ക് എപ്പോഴോ വണ്ടി എന്തോ വസ്തുവിൽ കൊണ്ടിടിക്കുകയും, താമസിയാതെ തന്നെ ബ്രേക്ക് ഡൗൺ ആവുകയും ചെയ്യുന്നു. സഹായിക്കാൻ ആരും ഇല്ലാത്തതിനാലും, അതിന് പറ്റിയ സമയമോ സാഹചര്യമോ അല്ലാത്തതിനാലും നമ്മുടെ കഥാപാത്രം അടുത്തുള്ള ഒരു സ്ഥലത്തേക്ക് പോവുകയാണ്, അവിടെ വെച്ച് അയാൾ വാഹിദിനെ കണ്ട് മുട്ടുന്നു. വാഹിദിന് ആണെങ്കിൽ നമ്മുടെ പ്രധാന കഥാപാത്രത്തെ കണ്ട് നല്ല പരിചയം തോന്നുന്നു, കേവലം മുഖ പരിചയം മാത്രമല്ല. ഇത് തന്റെ ഭൂത കാലത്തെ ഏറ്റവും വേട്ടയാടിയ വ്യക്തികളിൽ ഒരാളാണ് എന്നൊരു സംശയം അയാളിൽ ഉടൽ എടുക്കുന്നു.

🔸ഈ ഒരു പോയിന്റിൽ കൂടിയാണ് കഥ ആരംഭിക്കുന്നത്, പിന്നീട് ഈ ഒരു കോണ്ഫലിക്റ്റ് എസ്‌കലേറ്റ് ചെയ്യ തക്ക വണ്ണം വേറെയും ഒരുപാട് കഥാപാത്രങ്ങൾ കഥയിലേക്ക് വരുന്നുണ്ട്. ഒരു ടിപ്പിക്കൽ പനാഹി സിനിമയിൽ നിന്നും പ്രതീക്ഷിക്കാവുന്ന സാമൂഹ്യ വിമർശനം, ഡ്രാമ, ഇമോഷൻ എന്നിവ എല്ലാം നല്ല തോതിൽ തന്നെ സിനിമയിൽ ഉണ്ട്. പേസിങ് പ്രശ്നങ്ങളും, ആസ്ഥാനത്ത് ആയിപ്പോയി എന്ന് തോന്നിയ ചില ഹ്യൂമറുകളും ഒഴിവാക്കിയാൽ നല്ല അഭിപ്രായം തന്നെയാണ് ഈ സിനിമയെ പറ്റിയും ഉള്ളത്. ജാഫർ പനാഹി സിനിമകളുടെ ആരാധകർ ആണ് നിങ്ങൾ എങ്കിൽ കണ്ട് നോക്കാവുന്നതാണ്.

Verdict : Good

DC Rating : 3.5/5

1358. Kalamkaval (2025)

Director : Jithin K Jose

Cinematographer : Faisal Ali

Genre : Thriller

Country : India

Duration : 144 Minutes

🔸ഈ വർഷം വലിയ പ്രതീക്ഷകളോടെ കാത്തിരുന്ന ചുരുക്കം ചില മലയാള സിനിമകളിൽ ഒന്നായിരുന്നു, കളങ്കാവൽ. ഈ ഒരു കാത്തിരിപ്പിന് ഉണ്ടായിരുന്ന പ്രധാന കാരണം മമ്മൂട്ടി എന്ന നടൻ, വളരെ വ്യത്യസ്തമായ ഒരു കഥാപാത്രമായി സ്‌ക്രീനിൽ വരുന്നു എന്നതും ചിത്രം അവതരിപ്പിക്കുന്നു എന്ന് പറയപ്പെടുന്ന സബ്ജെക്റ്റും തന്നെ ആയിരുന്നു. ഈ രണ്ട് കാര്യങ്ങളിലും സിനിമ കണ്ട് ഇറങ്ങിയ ഈ വേളയിൽ തൃപ്തനാണ് എന്ന് തന്നെ പറയാം, എന്നാൽ സിനിമയിൽ പൂർണമായും തൃപ്തൻ അല്ല താനും. ഒരു ഓക്കേ സിനിമയിലെ നല്ല പ്രകടനം എന്ന പേരിൽ ആയിരിക്കും സിനിമ ഓർമ്മിക്കപ്പെടുന്നത് എന്ന് തോന്നുന്നു.

🔸കേരളത്തിലും തമിഴ് നാട്ടിലും ഒക്കെയായി അരങ്ങേറുന്ന ഒരുപാട് സ്ത്രീകളുടെ തിരോധാനങ്ങളും അതിന്റെ ചുവട് പിടിച്ചുള്ള പോലീസ് അന്വേഷണങ്ങളും ഒക്കെയാണ് ഈ സിനിമയുടെ കഥ. ഉദ്ദേശം എട്ട് ഭാഗങ്ങളായി കഥ പറഞ്ഞ് പോവുന്ന ചിത്രം രണ്ട് രീതിയിൽ പാരലൽ ആയി തുടങ്ങി ഗംഭീരമായി തന്നെ ഒരു പോയിന്റിൽ കൂടി ചേരുന്നുണ്ട്, ആ സീനുകൾ തന്നെയാണ് സിനിമയുടെ ഏറ്റവും വലിയ സ്ട്രങ്തും. എന്നാൽ പ്രോട്ടഗണിസ്റ്റ് ആയ പുള്ളി അത്യാവശ്യം വീക്ക് തന്നെ ആയിരുന്നു, പുള്ളിയുടെ മാനറിസംസ് ആയാലും സംഭാഷണം പറയുന്ന രീതി ആയാലും അത്യാവശ്യം മോശമായി തന്നെ തോന്നി.

🔸ആ ഒരു ഹൈ പോയിന്റിൽ നിന്നും തുടങ്ങുന്ന സിനിമ രണ്ടാം പകുതിയിൽ നന്നായി പുരോഗമിക്കുന്നുണ്ട് എങ്കിലും ഫാസ്റ്റ് ആയ രീതിയിൽ അവസാനിപ്പിച്ച് ഒരു തൃപ്തി തരാതെ പോവുന്നുണ്ട്, കുറച്ച് സമയം കൂടി ചേർത്ത് കുറച്ച് കൂടി നല്ലൊരു എൻഡിങ് ഈ സബ്ജക്ട്ട് അർഹിക്കുന്നുണ്ട് എന്ന് തോന്നി. പ്രകടനപരമായി മമ്മൂട്ടി എന്ന നടനും, ആ കഥാപാത്രവും നന്നായിരുന്നു, അദ്ദേഹത്തിന് വലിയ ചാലഞ്ച് ഒന്നും ആയി ഈ റോൾ മാറി എന്ന് തോന്നുന്നില്ല, അതിനും മാത്രം മൊമന്റ്സും അദ്ദേഹത്തിന് ഉണ്ടായിരുന്നില്ല. ആദ്യമേ സൂചിപ്പിച്ചത് പോലെ തന്നെ ഒരു ഓകെ പടം, ഭാവിയിൽ ഓർമ്മിക്കപ്പെടുക മമ്മൂട്ടിയുടെ കഥാപാത്രത്തിന്റെ പേരിൽ ആവും എന്ന് മാത്രം.

Verdict : Average

DC Rating : 3/5

1357. Eko (2025)

Director : Dinjith Ayyathan

Cinematography : Bahul Ramesh

Genre : Mystery

Country : India

Duration : 125 Minutes

🔸എം പി നാരായണപിള്ളയുടെ പരിണാമം എന്നൊരു മലയാളം നോവൽ ഉണ്ട്, ഒരുപാട് പുരസ്‌കാരങ്ങൾ ഒക്കെ നേടിയ ഒരുപാട് വിശകലനങ്ങൾക്ക് ഒക്കെ പാത്രമായ നല്ല ഗംഭീരം ആയ ഒരു നോവൽ. ഒരു നായയെ ചുറ്റി പറ്റിയാണ് ആ നോവൽ മുന്നോട്ട് പോവുന്നത്, വിചിത്രം എന്ന് വിശേഷിപ്പിച്ചാൽ കുറഞ്ഞ് പോവുന്ന, ഒരുവേള ഇങ്ങനെ ഒക്കെ സംഭവിക്കുമോ എന്ന് പോലും നമുക്ക് തോന്നുന്ന ചില സംഭവങ്ങൾ ആണ് ആ കഥയിൽ അരങ്ങേറുന്നത്. പരിണാമം എന്ന നോവലും, എക്കോ എന്ന സിനിമയും തമ്മിൽ സാമ്യതകൾ ഒരുപാട് ഉണ്ട്, കഥയിലും കാഴ്ചക്കാരൻ അല്ലെങ്കിൽ വായനക്കാരനിൽ ഉണ്ടാക്കുന്ന ഇഫ്ഫക്ടിലും, ഗംഭീരം എന്നതിൽ കുറഞ്ഞ് ഒരു അഭിപ്രായം ഇല്ല.

🔸സിനിമയുടെ ടാഗ് ലൈൻ പോലെ തന്നെ കുര്യച്ഛൻ എന്ന കഥാപാത്രത്തിന്റെ ഐതിഹാസികമായ ജീവിത സംഭവങ്ങളിലെ ചില ഏടുകൾ ആണ് ഈ സിനിമയുടെ വിഷയം. കുര്യച്ഛൻ ആൾ ചില്ലറക്കാരൻ അല്ല, രണ്ടാം ലോകമഹായുദ്ധ കാലത്ത് മലേഷ്യയിൽ ഒക്കെ പോയ ആളാണ്, അയാളുടെ കാലങ്ങളും സമുദ്രങ്ങളും ഒക്കെ താണ്ടിയുള്ള യാത്രകൾ പ്രശസ്തവുമാണ്. എന്നാൽ കഴിഞ്ഞ ആറ് വർഷമായി ഇയാളെ കാണാൻ ഇല്ല. കുര്യച്ഛനെ തേടി കാടും മലയും താണ്ടി ഒരുപാട് പേർ വന്നു, ഈ കാലയളവിൽ. എന്നാൽ വന്നത് എല്ലാം ശത്രുക്കൾ ആണെന്ന് മാത്രം, അവർക്ക് ഓരോരുത്തർക്കും ഓരോ കഥകളും പറയാൻ ഉണ്ടായിരുന്നു.

🔸ഈ തിരോധനവും, അതിനെ തുടർന്നുള്ള അന്വേഷണവും എല്ലാം നമ്മൾ പ്രതീക്ഷിക്കാത്ത തലങ്ങളിലേക്ക് പോയി ഗംഭീരമായി തന്നെ അവസാനിക്കുന്നുണ്ട്, അവസാന ഭാഗം ഒക്കെ മികച്ചത് ആയിരുന്നു. ആദ്യാവസാനം സിനിമ നില നിർത്തി പോവുന്ന മിസ്റ്ററി ഫീൽ മനോഹരം ആയിരുന്നു, അതിനോടൊപ്പം തന്നെ ഗംഭീര പ്രകടനങ്ങളും. എന്നാൽ ഇതിനെല്ലാം മേലെ കെട്ടുറപ്പുള്ള തിരകഥയും, പശ്ചാത്തല സംഗീതവും സിനിമയെ ഒന്ന് കൂടി മികച്ചത് ആക്കി മാറ്റുന്നു. ഈ വർഷം കണ്ട ഏറ്റവും മികച്ച സിനിമകളിൽ ഒന്നാണ് എക്കോ, തീർച്ചയായും ബിഗ് സ്‌ക്രീനിൽ കാണാൻ ശ്രമിക്കുക.

Verdict : Must Watch

DC Rating : 4.5/5

1356. Bugonia (2025)

Director : Yorgos Lanthimos

Cinematographer : Robbie Ryan

Genre : Drama

Country : UK

Duration : 118 Minutes

🔸ഇപ്പോഴും ആക്റ്റീവ് ആയി സിനിമകൾ സംവിധാനം ചെയ്യുന്നവരിൽ ഇഷ്ടമുള്ള സംവിധായകരിൽ ഒരാളാണ് യോർഗോസ് ലാന്തിമസ്. ഇദ്ദേഹത്തിന്റെ ഫേവറൈറ്റ്, ഡോഗ്ട്ടൂത് പോലുള്ള സിനിമകൾ എല്ലാം തന്നെ ഇഷ്ട സിനിമകളുടെ കൂട്ടത്തിൽ തീർച്ചയായും ഉൾപ്പെടുത്താവുന്നതും ആണ്. ഈ ഒരു വസ്തുതകൾ കൊണ്ട് തന്നെ അദ്ദേഹം ഒരു ഒറിജിനൽ സിനിമ അല്ലാതെ ഒരു ഏഷ്യൻ ചിത്രം റീമേക്ക് ചെയ്യുന്നു എന്ന് അറിഞ്ഞപ്പോൾ സത്യത്തിൽ നിരാശ ആണ് അനുഭവപ്പെട്ടത്, അത് ഒരു ഇഷ്ട ഏഷ്യൻ സിനിമ ആയിട്ട് പോലും അതിന്റെ ആവിശ്യകത ഒട്ടും മനസിലായില്ല എന്ന് തന്നെ പറയാം.

🔸വളരെ വിചിത്രമായ ഒരു കോൺസ്പിറസി തിയറിയിൽ വിശ്വസിക്കുന്നവനാണ് ജെസ്സി പ്ലിമൻസ് അവതരിപ്പിച്ച ടെഡി എന്ന കഥാപാത്രം. ഒരു പ്രശസ്ത ഫാർമസ്യുട്ടിക്കൽ കമ്പനിയുടെ ഉടമയായ മിഷേൽ ഫ്യുലർ സത്യത്തിൽ ഒരു മനുഷ്യ സ്ത്രീ അല്ല, മറിച്ച് ഒരു അന്യഗ്രഹ ജീവി ആണ് എന്നതാണ് ടെഡ്ഢിയുടെ വാദം, ഈ വാദം ശെരിവെച്ച് അവൻ പറയുന്നത് എല്ലാം തൊണ്ട തൊടാതെ വിഴുങ്ങുന്ന അർദ്ധ സഹോദരൻ ഡോണിന്റെ സഹായം കൂടി അവനുണ്ട്. ഈ ഒരു വാദം ശെരിയാണ് എന്ന് തെളിയിക്കാൻ വേണ്ടി ഇവർ ഇരുവരും കൂടി മിഷേലിനെ തട്ടി കൊണ്ട് വരികയാണ്, തങ്ങളുടെ വീട്ടിലേക്ക്.

🔸ഈ തട്ടി കൊണ്ട് പോവൽ പരിപാടിക്ക് ശേഷം ഉണ്ടാവുന്ന പുകിലുകളാണ് ഈ ചിത്രത്തിന്റെ പിന്നീടുള്ള പ്ലോട്ട്. ഒറിജിനൽ സിനിമ കണ്ടവർക്ക് അറിയാം ആ സിനിമയുടെ ഒരു ഷോക്ക് ഇലമന്റ്, അത് തീർച്ചയായും ഇവിടെ ലഭിക്കില്ല എന്നത് ഒരു പോരായ്മ തന്നെയാണ്, ഒരുപക്ഷെ ആ സിനിമ കാണാത്തവർക്ക് ഇത് ആസ്വദിക്കാൻ കഴിഞ്ഞേക്കാം. പ്രകടനങ്ങൾ എല്ലാം ഗംഭീരം തന്നെ ആയിരുന്നു, ചില്ലറ പേസിങ് പ്രശ്നങ്ങൾ അവിടെയും ഇവിടെയും ഉണ്ടായിരുന്നു എന്നത് ഒഴിച്ചാൽ പറയത്തക്ക പോരായ്മകൾ വേറെ ഇല്ല. ഇങ്ങനെ ഒക്കെ ആണെങ്കിലും ഒറിജിനലിന്റെ ആ ഒരു ഫ്രഷ്നസും, വിചിത്രമായ സെറ്റപ്പും ഒന്നും ഈ സിനിമയ്ക്ക് തരാൻ സാധിക്കുന്നില്ല, അതിനാൽ തന്നെ ഒരു ശരാശരി അല്ലെങ്കിൽ അതിന് മുകളിൽ നിൽക്കുന്ന അനുഭവം മാത്രമായി ഈ സിനിമ ഒതുങ്ങുന്നു.

Verdict : Above Average

DC Rating : 3/5

1355. Riding Alone For Thousands Of Miles (2005)

Director : Zhang Yimou

Cinematographer : Zhao Xiaoding

Genre : Drama

Country : China

Duration : 109 Minutes

🔸റൈഡിങ് അലോൺ ഫോർ തൗസൻഡ്‌സ് ഓഫ് മൈൽസ് എന്ന ചിത്രം ഒരു ഓർമ്മപ്പെടുത്തലാണ്, എത്രയോ മികച്ച സിനിമകൾ ഇനിയും നമ്മുടെ ഒന്നും കണ്ണിൽ പെടാതെ പല പല രാജ്യങ്ങളിൽ, പല പല കാലങ്ങളിൽ ഒളിഞ്ഞിരിപ്പുണ്ട് എന്ന ഓർമ്മപ്പെടുത്തൽ. രണ്ട് ദിവസം മുന്നേ വരെ ഇങ്ങനെ ഒരു സിനിമയെ കുറിച്ച് എവിടെയും കേട്ടിട്ടോ, അറിഞ്ഞിട്ടോ ഇല്ലെങ്കിൽ, ഇന്ന് പ്രസ്തുത ചിത്രം ഞാൻ കണ്ട മികച്ച, പ്രിയപ്പെട്ട ചിത്രങ്ങളിൽ ഒന്നുമാണ്. വളരെ ഇമോഷണൽ ആയ ഒരു വ്യൂയിങ് എക്സ്പീരിയൻസ് ആണ് ഈ ചിത്രം, പ്രത്യേകിച്ചും കൈകാര്യം ചെയ്യുന്ന വിഷയം കൂടി കണക്കിൽ എടുക്കുമ്പോൾ.

🔸ടക്കാട എന്ന വൃദ്ധനായ മീൻപിടുത്തക്കാരൻ ആണ് നമ്മുടെ കേന്ദ്ര കഥാപാത്രം, ആളുടെ പ്രായം എഴുപതിനോട് അടുത്തു. ഭാര്യ മരിച്ച് വർഷങ്ങൾ ഒരുപാട് കഴിഞ്ഞ ടക്കാടയ്ക്ക് ബന്ധു എന്ന് പറയാൻ ആകെ ഉള്ളത് സ്വന്തം മകനായ കെഞ്ചി മാത്രമാണ്. അച്ഛനും മകനും തമ്മിൽ ഇപ്പോൾ അത്ര രസത്തിലല്ല, ഉദ്ദേശം പത്ത് വർഷത്തോളമായി ഇരുവരും നേരിൽ കണ്ടിട്ടും, സംസാരിച്ചിട്ടും. അങ്ങനെ ഇരിക്കെ ആണ് ടക്കാടയ്ക്ക് മകന്റെ ഭാര്യയുടെ കോൾ വരുന്നത്, സംഭവം വേറൊന്നുമല്ല കെഞ്ചിക്ക് കാൻസർ ആണ്, ഇനി അധികം കാലവും അയാൾക്ക് ഇല്ല.

🔸വികാരങ്ങൾ പ്രകടിപ്പിക്കുന്നതിൽ പണ്ട് തൊട്ടേ ഒരു പരാജയം ആയ ടക്കാടയ്ക്ക് ഈ വാർത്ത താങ്ങാവുന്നതിലും ഭീകരം ആയിരുന്നു. അയാൾ മകനെ കാണാൻ ടോക്കിയോയിലേക്ക് പുറപ്പെടുകയാണ്, അവിടെ നിന്നും മകന്റെ ഒരു പക്ഷെ അവസാന ആഗ്രഹം സാധിക്കാനായി ചൈനയിലേക്കും. നല്ല കഥ, അതിന്റെ അപാരമായ എക്സിക്യൂഷൻ, കിടിലൻ പ്രകടനങ്ങൾ, പിന്നെ നല്ല ഒന്നാന്തരം എൻഡിങ്ങും, അങ്ങനെ എല്ലാം കൊണ്ടും മികച്ച ഒരു സിനിമയായി മാറുകയാണ് ഴാങ് യിമുവിൻറെ ഈ സംവിധാന സംരംഭം. അപ്പോൾ തീർച്ചയായും കാണാൻ ശ്രമിക്കുക.

Verdict : Must Watch

DC Rating : 4.5/5

1354. Homebound (2025)

Director : Neeraj Ghaywan

Cinematographer : Pratik Shah

Genre : Drama

Country : India

Duration : 122 Minutes

🔸ജാതി വിഷയമായി വരുന്ന സിനിമകളെ കുറിച്ചുള്ള വിവരണങ്ങളിലും മറ്റും പൊതുവെ കണ്ടു വരുന്ന ഒരു അഭിപ്രായമാണ് ഇതെല്ലാം മടുത്ത് തുടങ്ങി എന്നുള്ളത്, ആവർത്തന വിരസത ആയിരിക്കാം കാരണം എങ്കിലും ഈ വിഷയം എത്രത്തോളം പ്രസക്തമാണ് എന്നതിന് മറ്റൊരു ഉദാഹരണം ആണ് ഹോം ബൌണ്ട് എന്ന ചിത്രം. ജാതീയത എന്നത് നമ്മുടെ രാജ്യത്തിന്റെ അസ്തിത്വം വരെ ആഴ്ന്നിറങ്ങിയ ഒരു വലിയ പ്രശ്നം ആയത് കൊണ്ട് തന്നെ ഇനി വരാൻ ഇരിക്കുന്ന കാലത്തും വിഷയം പ്രസക്തം ആയിരിക്കും എന്നതിലും സംശയമില്ല. ഈ വർഷത്തെ ഇന്ത്യയുടെ ഒഫീഷ്യൽ ഓസ്‌കാർ എൻട്രി കൂടിയാണ് ഈ ചിത്രം.

🔸ബാല്യ കാലം തൊട്ടേ അടുത്ത സുഹൃത്തുക്കൾ ആണ് ചന്ദനും, ഷോയിബ് അലിയും. ഈ ബാല്യ കാലം തൊട്ട് തന്നെ സ്വന്തം മതവും ജാതിയും എല്ലാം കൊണ്ട് തന്നെ ഒരുപാട് പുച്ഛവും, പരിഹാസവും, അപമാനവും എല്ലാം നേരിടേണ്ടി വന്നവരാണ് ഇരുവരും, യൗവനത്തിലേക്ക് കടന്നതിന് ശേഷം ഒരു ഗവണ്മെന്റ് ജോലി എന്നതാണ് തങ്ങൾ നേരിട്ട് കൊണ്ടിരിക്കുന്ന പ്രശ്നങ്ങൾക്ക് ഒരു ശാശ്വത പരിഹാരമായി ഇരുവരും കാണുന്നത്. പോലീസ് കോൺസ്റ്റബിൾ തസ്തികയിലേക്ക് ഉള്ള പരീക്ഷ എഴുതി അതിന്റെ റിസൾട്ടിന് വേണ്ടി കാത്തിരിക്കുകയാണ് ഇരുവരും, അതിനിടെ ഉള്ള സമയം ദിവസ വേതനത്തിന് മറ്റ് ജോലികൾ ചെയ്യുന്നു എന്ന് മാത്രം.

🔸ഈ ഒരു പോയിന്റിൽ നിന്നും കഥ പറഞ്ഞ് തുടങ്ങുന്ന സിനിമ മികച്ച രീതിയിൽ തന്നെ കഥയുമായി കണക്റ്റ് ആവുന്നുണ്ട്, താൻ നേരിടേണ്ടി വരുന്ന അവഗണയുടെയും, പരിഹാസത്തിന്റെയും ഒക്കെ കാര്യം ഒരു ക്രിക്കറ്റ് കളി സംഭവവുമായി ചേർത്ത് പ്രധാന കതപാത്രങ്ങളിൽ ഒരാൾ പറയുന്ന സീൻ ഒക്കെ വളരെ വൈകാരികവും ബ്രൂട്ടലും ആയിരുന്നു. ഇടയ്ക്കിടെ വന്ന റൊമാന്റിക് സബ് പ്ലോട്ട് ഒരല്പം ഡിസ്ട്രാക്റ്റിംഗ് ആയി തോന്നി എന്നത് ഒഴിച്ചാൽ ഗംഭീര അനുഭവം തന്നെ ആയിരുന്നു ഈ ചിത്രം. പ്രകടനം വെച്ച് എല്ലാവരും നന്നായിരുന്നു എങ്കിലും അമ്മ കഥാപാത്രത്തെ അവതരിപ്പിച്ച ശാലിനി വത്സ പ്രത്യേക പരാമർശം അർഹിക്കുന്നുണ്ട്. ഈ വർഷത്തെ മികച്ച സിനിമകളിൽ ഒന്നായ ഹോം ബൌണ്ട് ഇപ്പോൾ നെറ്റ്ഫ്ലിക്സിൽ ലഭ്യമാണ്, കാണാൻ ശ്രമിക്കുക.

Verdict : Very Good

DC Rating : 4/5

1353. The Shadows Edge (2025)

Director : Larry Yang

Cinematographer : Qian Tiantian

Genre : Action

Country : China

Duration : 142 Minutes

🔸വില്ലന്മാർ ശക്തന്മാർ ആയിരിക്കുന്ന സിനിമകൾ കാണാൻ ഒരു പ്രത്യേക ഇഷ്ടം തന്നെയാണ്, കാരണം അപ്പോഴേ കഥയ്ക്കും നായകനും സിനിമയ്ക്ക് തന്നെയും ഒക്കെ ഒരു എക്സ്ട്രാ എലവേഷൻ കിട്ടുക ഉള്ളൂ. ദി ഷാഡോസ് എഡ്ജ് എന്ന ജാക്കി ചാൻ ചിത്രത്തിലെ വില്ലൻ ശക്തനും, ക്രൂരനും, ബുദ്ധിമാനും അത് പോലെ തന്നെ ചെറ്റയും ആണ്. ഒരുവേള ഈ ചിത്രത്തിലെ കേന്ദ്ര കഥാപാത്രം ആ വില്ലനാണ് എന്ന് പറഞ്ഞാൽ പോലും, അതിൽ യാതൊരു വിധത്തിൽ ഉള്ള തെറ്റോ, അതിശയോക്തിയോ ഇല്ല എന്നതാണ് സത്യം. ഒരു നീണ്ട ഇടവേളക്ക് ശേഷം ജാക്കി ചാന്റെ നിലവാരം ഉള്ളൊരു സിനിമ കാണാൻ പറ്റി എന്നതിലും ഒരു ചരിതാർഥ്യം ഉണ്ട്.

🔸കഥയിലേക്ക് വരിക ആണെങ്കിൽ, നമ്മുടെ പോലീസ് സേന കഴിഞ്ഞ മൂന്ന് പതിറ്റാണ്ടായി തല കുത്തി നിന്ന് ശ്രമിച്ചിട്ടും പിടിക്കാൻ കഴിയാത്ത കള്ളനാണ് ഷാഡോ എന്ന പേരിൽ അറിയപ്പെടുന്ന വ്യക്തി അല്ലെങ്കിൽ ഒരു കൂട്ടം ആളുകൾ. ബാങ്ക് കൊള്ളയടി ഒക്കെ പൂ പറിക്കുന്ന ലാഖവത്തോടെ ചെയ്യുന്ന ഷാഡോയുടെ ഐഡന്റിട്ടി ഈ അടുത്ത കാലം വരെ പോലീസിന് അറിയില്ലായിരുന്നു, എന്നാൽ ഒരു മോഷണ ശ്രമത്തിനിടെ അയാളുടെ ഫോട്ടോ പോലീസിന് ലഭിക്കുകയാണ്, പിന്നീടങ്ങോട്ട് ഒരു കാറ്റ് ആണ്ട് മൗസ് ഗെയിം ആണ് അരങ്ങേരുന്നത്.

🔸വളരെ സങ്കീർണമായ കേസ് തെളിയിക്കാൻ പഴയ നായകൻ റിട്ടയർമെന്റ് ഒഴിവാക്കി വരുന്ന ക്ളീഷേ കഥ ആണെങ്കിലും അധികം നിർബന്ധം ഒന്നും വേണ്ടാതെ കേസ് ഏറ്റെടുത്ത് അയാൾ മാതൃക ആവുന്നുണ്ട്, ഇത്തരം സീനുകളിൽ പഴയ ടെമ്പ്ളേറ്റ് എടുത്തിട്ട് ബോർ അടിപ്പിച്ചില്ല എന്ന് സാരം. കഥാപരമായി വലിയ പുതുമ ഒന്നും ഇല്ലെങ്കിലും ഈ പറഞ്ഞ ഫാസ്റ്റ് പേസും, വില്ലനും തന്നെയാണ് സിനിമയെ മെമ്മറബിൾ ആക്കുന്നത്. പ്രധാന കഥാപാത്രങ്ങളെ അവതരിപ്പിച്ച മൂന്ന് പേരും ഗംഭീര പ്രകടനം തന്നെ ആയിരുന്നു, പ്രത്യേകിച്ചും ക്വിജോങ് എന്ന കഥാപാത്രത്തെ അവതരിപ്പിച്ച അഭിനേത്രി. ഒരു ഓളത്തിൽ കണ്ടു വിടാവുന്ന ചിത്രമാണ് ഷാഡോസ് എഡ്ജ്, പ്രത്യേകിച്ചും ആക്ഷൻ സിനിമ ആരാധകർക്ക്.

Verdict : Above Average

DC Rating : 3/5

1352. The Return (2003)

Director : Andrei Zvyagintsev

Cinematographer : Mikhail Krichman

Genre : Drama

Country : Russia

Duration : 105 Minutes

🔸റഷ്യയിൽ നിന്നും പുറത്ത് വന്ന മികച്ച സിനിമകളുടെ ഏതൊരു പട്ടിക എടുത്താലും, അതിൽ ഉണ്ടാവും എന്ന് ഉറപ്പിച്ച് പറയാൻ കഴിയുന്ന ചിത്രമാണ് ദി റിട്ടേൺ. കേവലം ഒരു മൈൽ സ്റ്റോൺ സിനിമ എന്ന മട്ടിൽ പറയപ്പെടുന്നു എന്നതിന് അപ്പുറം വളരെ വൈകാരികമായ, കണ്ടു കഴിയുന്ന വേളയിൽ കാഴ്ചക്കാരനെ ആഴത്തിൽ സ്പർശിക്കുന്ന ഒരു സ്ലോ ബർൺ സിനിമയാണ് ദി റിട്ടേൺ. തീർച്ചയായും എല്ലാവർക്കും സജസ്റ്റ് ചെയ്യാൻ കഴിയാത്ത ഒരു ചെറിയ നല്ല ചിത്രം. ബാല്യം ഇനിയും കഴിഞ്ഞിട്ടില്ലാത്ത രണ്ട് സഹോദരന്മാരുടെ കഥയാണ് ഈ സിനിമ എന്ന് പറയാം.

🔸ഇവാനും ആൻഡ്രേയും ആണ് മുകളിൽ പറഞ്ഞ ഈ രണ്ട് സഹോദരന്മാർ, അമ്മയോടും അമ്മൂമ്മയോടും ഒപ്പം താമസിക്കുന്ന ഈ സഹോദരന്മാർക്ക് ഇടയിൽ വളരെ വൈകാരികമായ ഒരു അടുപ്പം ഉണ്ട്. ഇവർ ഇരുവർക്കും തങ്ങളുടെ അച്ഛനെ കണ്ട ഓർമ പോലുമില്ല, ഇവരുടെ ജീവിതത്തിന്റെ ഒരു ഘട്ടത്തിലും അയാൾ ഒരു ഭാഗവും ആയിരുന്നില്ല. എന്നാൽ ഒരുനാൾ ഈ അവസ്ഥ ആകെ മാറി മറിയുകയാണ്, തികച്ചും അപ്രതീക്ഷിതമായി സഹോദരന്മാർക്ക് ഇടയിലേക്ക് അവരുടെ അച്ഛൻ കടന്ന് വരികയാണ്. ആകെ മൊത്തം ഒരു അപരിചിതത്വം ഉണ്ട് എങ്കിലും രക്ത ബന്ധം എന്നത് ഒഴിവാക്കാൻ കഴിയുന്ന കാര്യം അല്ലല്ലോ.

🔸ഇളയവനായ ഇവാന് അച്ഛന്റെ പെട്ടെന്നുള്ള വരവിനോടും, അയാളുടെ പെരുമാറ്റത്തോടും അത്ര പെട്ടെന്ന് പൊരുത്തപ്പെടാൻ ആവുന്നില്ല എങ്കിൽ മൂത്തവൻ വല്ലാത്തൊരു തരം വിധേയത്വം ആണ് പ്രകടിപ്പിക്കുന്നത്. രണ്ട് മക്കളുടെയും ഒപ്പം ഒരല്പം സമയം ചിലവഴിക്കാൻ ആഗ്രഹം പ്രകടിപ്പിച്ചു അച്ഛൻ ആണെങ്കിൽ ഇരുവരെയും കൂട്ടി ഒരു യാത്രയ്ക്ക് പുറപ്പെടുകയാണ്, ഈ യാത്ര കഥയെ വേറൊരു തലത്തിലേക്ക് കൊണ്ട് പോവുന്നു. ആദ്യം സൂചിപ്പിച്ച ലാൻഡ് മാർക്ക് വിശേഷണത്തിന് ഒക്കെ അപ്പുറം ഒരു ഓക്കേ സിനിമ ആയി മാത്രമേ അനുഭവപ്പെട്ടുള്ളൂ, ഒരു പക്ഷെ വളരെ സ്ലോ ആയ പേസിങ് കൊണ്ട് ആവാം, എന്തായാലും കണ്ട് നോക്കുക.

Verdict : Good

DC Rating : 3.5/5

1351. Sirat (2025)

Director : Oliver Laxe

Cinematographer : Mauro Herce

Genre : Drama

Country : Spain

Duration : 114 Minutes

🔸ഈ മരുഭൂമികൾ ഒരു പ്രധാന വിഷയമായി വരുന്ന സിനിമകളോട് ഒരു പ്രത്യേക താല്പര്യം തോന്നാറുണ്ട്, ഈ വിഭാഗത്തിൽ പെട്ട രണ്ട് സിനിമകൾ, അതായത് മാഡ് മാക്സ് ഫ്യൂറി റോഡ് ആയാലും ലോറൻസ് ഓഫ് അറേബ്യ ആയാലും പേഴ്സണൽ ഫേവറൈറ്റുകളുടെ പട്ടികയിൽ മുകളിൽ തന്നെയാണ്. ഈ ഒരു കാരണം കൊണ്ടും, ലോകത്താകമാനം ഉള്ള ഫെസ്റ്റുകളിൽ നിന്ന് ലഭിച്ച മികച്ച അഭിപ്രായങ്ങൾ കൊണ്ടും വളരെ പ്രതീക്ഷയോടെ കാത്തിരുന്ന ഒരു സിനിമയാണ് സ്പെയിനിൽ നിന്നുമുള്ള സൈറത്. എന്നാൽ മുകളിൽ സൂചിപ്പിച്ച ഹൈപ്പിനും, പ്രതീക്ഷയ്ക്കും ഒക്കെയുള്ള ഒരു ഔട്ട്പുട്ട് ഈ ചിത്രം തരുന്നുണ്ടോ എന്നത് സംശയമാണ്.

🔸തല്ലിയ വഴിയേ പോയില്ല എങ്കിൽ പോയ വഴിയേ തല്ലുക എന്നൊരു പ്രയോഗം പൊതുവെ ഈ ഭാഗത്തുണ്ട്, ഈ ശൈലിയോട് നല്ല തോതിൽ സാമ്യം പുലർത്തുന്ന ഒന്നാണ് ഈ ചിത്രത്തിന്റെ കഥ. അതായത് തന്റെ മകളെ അന്വേഷിച്ചുള്ള ഒരു അച്ഛന്റെ യാത്ര എന്ന നിലയ്ക്കാണ് ഈ സിനിമയുടെ കഥ ആരംഭിക്കുന്നത്, എന്നാൽ രണ്ടാം പകുതിയിൽ ഒക്കെ ആ ഒരു പ്ലോട്ട് പോയിന്റ് ഒന്നും ഒരു വിഷയമേ ആയി വരുന്നില്ലാത്ത അവസ്ഥയാണ്, എവിടെയൊക്കെയോ പോയി എങ്ങനെയോ അവസാനിക്കുന്ന ഒരു ചിത്രം. ഈ ഒരു വസ്തുത സിനിമയുടെ ജോനറിലും കാണാം, ഒരു മിസ്റ്ററി ഡ്രാമ എന്ന രീതിയിൽ തുടങ്ങുന്ന കഥ പിന്നീട് ത്രില്ലറും കടന്ന് റോഡ് മൂവിയും കടന്ന് സർവൈവൽ മൂവി ഒക്കെയായി മാറുന്നുണ്ട്.

🔸ഇങ്ങനെ ഒക്കെ ആണെങ്കിലും വൈകാരികമായി സിനിമ നമ്മളുമായി കണക്റ്റ് ആവുന്നുണ്ട്, അത് പോലെ തന്നെ വിഷ്വലി കിടു ആണ്. ഒരു ത്രീ ആക്റ്റ് സ്ട്രക്ച്ചർ ഒന്നും ഈ സിനിമ പാലിക്കുന്നില്ല, അത് കൊണ്ട് തന്നെ അത്യാവശ്യം പ്രവചനാതീതം ആയ നിലയിലാണ് കഥ മുന്നോട്ട് പോവുന്നതും. പ്രകടനങ്ങൾ സിനിമയുടെ പോസിറ്റീവ് ആണ്, പോരെങ്കിൽ കഥയിൽ നിങ്ങൾ ഇൻവസ്‌റ്റഡ് അല്ല എങ്കിൽ അവസാനത്തെ മുപ്പത് മിനിറ്റ് അത്യാവശ്യം നല്ല ഇമ്പാക്റ്റ് ഉണ്ടാക്കുന്നുമുണ്ട്. ഒരു വിചിത്രമായ സിനിമയാണ്, സൈറത് ഒരു റേറ്റിംഗ് കൊണ്ട് ഒതുക്കി നിർത്താൻ കഴിയാത്ത ഒറ്റ വാക്കിൽ രേഖപ്പെടുത്താൻ കഴിയാത്ത ഒരു ചിത്രം, എല്ലാവർക്കും നിർദ്ദേശിക്കില്ല.

Verdict : Above Average

DC Rating : 3/5

1350. The Adventures Of Baron Munchausen (1988)

Director : Terry Gilliam

Cinematographer : Giuseppe Rotunno

Genre : Fantasy

Country : Germany

Duration : 126 Minutes

🔸വളരെ വിചിത്രമായ ഒരു കഥയാണ് ബാരൻ മൻചോസന്റേത്. ഈ കഥയിൽ വിചിത്ര ജീവികൾ ഉണ്ട്, മനുഷ്യ യുക്തിക്ക് വിശദീകരിക്കാൻ കഴിയാത്ത സംഭവങ്ങൾ ഉണ്ട്, അപാരമായ കഴിവുകൾ ഉള്ള മനുഷ്യരുണ്ട്, അങ്ങനെ ഒരുപാട് ഒരുപാട് കാര്യങ്ങൾ. ഒരുവേള അയാളുടെ കഥ മുഴുവൻ കേട്ട് കഴിയുമ്പോൾ ഈ ചിത്രത്തിലെ ഒരു കഥാപാത്രത്തെ പോലെ തന്നെ കാഴ്ചക്കാരനും ചോദിച്ച് പോവും, ഇതിൽ എത്രത്തോളം സത്യവും എത്രത്തോളം വെള്ളം ചേർക്കലുകളും ആണെന്ന്. ആ ഒരു ചോദ്യത്തിന് വ്യക്തമായ ഒരു ഉത്തരം തരാതെ പോവുന്ന ഒരു സിനിമ കൂടിയാണ് ഇത്, ചുരുക്കി പറഞ്ഞാൽ ഈ ചിത്രത്തിന്റെ ആസ്വാദനം നമ്മൾ നിർവചിക്കുന്ന, നമ്മുടെ ഒരു രീതി പോലെ ഒക്കെ ഇരിക്കും എന്ന് സാരം.

🔸ടെറി ഗില്യാമിന്റെ ടൈം ബാണ്ഡിറ്റ്‌സ്, ബ്രസീൽ എന്നീ സിനിമകളോടൊപ്പം ചേർത്ത് പൊതുവെ ഒരു അൺ ഒഫീഷ്യൽ ട്രിലോജി ആയി ഈ ചിത്രത്തെയും പറയാറുണ്ട്. കഥാപരമായി കണക്ഷൻ ഒന്നും ഇല്ലെങ്കിലും, ചില സാമ്യതകൾ അവതരണത്തിൽ ഉണ്ട്. പതിനെട്ടാം നൂറ്റാണ്ടിലെ യൂറോപ്പ് ആണ് നമ്മുടെ കഥാ പശ്ചാത്തലം, ഒരു നാടക ട്രൂപ് ബാരൻ മൻചോസന്റെ കഥ അരങ്ങിൽ അവതരിപ്പിച്ച് കൊണ്ടിരിക്കുകയാണ്. ആ കഥ അങ്ങനെ തള്ളി മറിക്കുമ്പോൾ ആണ് യഥാർത്ഥ മഞ്ചോസൻ അവിടേക്ക് കടന്ന് വരുന്നത്. തള്ളിന് ശക്തി പോരെന്നും, തന്റെ യഥാർത്ഥ കഥയുമായി ഒരുപാട് വ്യത്യാസം ഉണ്ട് ഈ നാടകത്തിന് എന്നുമാണ് പുള്ളിയുടെ വാദം.

🔸പിന്നീടങ്ങോട്ട് സ്വന്തം ജീവിത കഥ ബാരൻ തന്നെ പറയുകയാണ്, അല്ലെങ്കിൽ ഒരു അർത്ഥത്തിൽ കാണിച്ച് കൊടുക്കുക ആണ്. വളരെ സ്ലോ ആയ, ഒരു തരത്തിൽ പറഞ്ഞാൽ എപ്പിസോഡ് രൂപത്തിൽ ഉള്ള കഥയാണ് ഈ ചിത്രത്തിന്റേത്, അത് ഒരു പോരായ്മയായി തോന്നുകയും ചെയ്തു എന്നത് ഒഴിച്ചാൽ കണ്ടിരിക്കാവുന്ന നല്ലൊരു ശ്രമം തന്നെയാണ് ഈ സിനിമ. ബ്രസീൽ ഒക്കെ പോലെ മികച്ച ഒരു അനുഭവമായി മാറിയില്ല എങ്കിൽ കൂടിയും നല്ലൊരു സിനിമ തന്നെയാണ് ബാരൻ മഞ്ചോസനും. ഒരു നടനെ ഈ സിനിമയിൽ അപ്രതീക്ഷിതമായി കണ്ടു, പ്രസ്തുത വ്യക്തിയുടെ ഫിലിമോഗ്രാഫിയിൽ ഒരിക്കലും ഈ സിനിമ പരാമർശിച്ച് കണ്ടിട്ടില്ല എന്നത് കൊണ്ട് തന്നെ വലിയ സർപ്രയ്‌സ് ആയിരുന്നു.

Verdict : Good

DC Rating : 3.75/5

1349. On The Silver Globe (1988)

Director : Andrzej Zulawski

Cinematographer : Andrzej Jaroszewics

Genre : Drama

Country : Poland

Duration : 166 Minutes

🔸വലിയൊരു സ്കെയിലിൽ, ഒരു നെക്സ്റ്റ് ബിഗ് തിങ് എന്നൊക്കെയുള്ള ആഗ്രഹത്തിൽ തുടങ്ങിയ ഒരു സിനിമ ആണ് ഓൺ ദി സിൽവർ ഗ്ലോബ് എന്ന് കേട്ടിട്ടുണ്ട്. സിനിമ കൈകാര്യം ചെയ്യുന്ന വിഷയങ്ങൾ തന്നെ ഒരു ഗ്ലോബൽ സ്കെയിലിൽ ഉള്ളതാണ്. മതം, വിശ്വാസം, വ്യക്തിത്വം എന്നിങ്ങനെ ഒരുപാട് വിഷയങ്ങൾ ഈ സിനിമ കൈകാര്യം ചെയ്യുന്നുണ്ട്. ഈ സിനിമയുടെ പിന്നാമ്പുറ കഥകൾ തന്നെ മറ്റൊരു സിനിമയ്ക്ക് സ്കോപ്പ് ഉള്ളതാണ്, വിഷയത്തിൽ അതൃപ്തി ഉണ്ടായിരുന്ന പോളിഷ് ഗവണ്മെന്റ് ഈ ചിത്രം ബാൻ ചെയ്തതും പന്ത്രണ്ടോളം വർഷങ്ങൾ ഈ സിനിമ പെട്ടിയിൽ കിടന്നതും എല്ലാം ചരിത്രത്തിന്റെ ഭാഗവുമാണ്.

🔸ഇങ്ങനെയുള്ള ചരിത്രത്തിന്റെ ബാക്കിങ്ങും, സ്‌പേസ് ഒടീസി പോലുള്ള സിനിമകളുമായുള്ള താരമത്യവും എല്ലാം ഉണ്ടായിരുന്നു എങ്കിലും സിനിമ അതിനും മാത്രം വലിയൊരു ലാസ്‌റ്റിംഗ് ഇഫ്ഫക്ട് ഉണ്ടാക്കിയില്ല എന്നതാണ് അഭിപ്രായം. കഥയിലേക്ക് വരിക ആണെങ്കിൽ ഭൂമിയിൽ നിന്നും ഒരു കൂട്ടം ബഹിരാകാശ യാത്രികർ ഒരു പുതിയ ഗ്രഹത്തിൽ എത്തി താമസം ആരംഭിക്കുന്നതും പിന്നീട് നൂറ്റാണ്ടുകളിൽ അവരുടെ തലമുറകൾക്ക് എന്ത് സംഭവിക്കുന്നു എന്നതും ഒക്കെയാണ് ചിത്രം. മനുഷ്യ രാശിയുടെ തന്നെ ഒരു കഥ മറ്റൊരു പ്ലാറ്റുഫോമിൽ, പാരലൽ ആയി പറയുകയാണ് എന്ന് പറഞ്ഞാലും തെറ്റില്ല. സ്റ്റോറി വെച്ച് ഒരു ലാസ്‌റ്റിങ് ഇമ്പാക്റ്റ് ഉണ്ടാക്കുന്നില്ല എങ്കിലും വിഷ്വലി നേരെ വിപരീതമാണ് കാര്യങ്ങൾ, അപാരം എന്നതിൽ കവിഞ്ഞ് വേറൊരു അഭിപ്രായം ഇല്ല. പ്രത്യേകിച്ചും പുതിയൊരു സംസ്കാരം, പുതിയ ലോകം എന്നിവയൊക്കെ മനോഹരമായി ഉണ്ടാക്കി വെച്ചിരിക്കുന്നു.

🔸കുറച്ച് അധികം ഫിലോസഫിക്കൽ ആയ ചിത്രമാണ് ഓൺ ദി സിൽവർ ഗ്ലോബ്, അത്തരം സിനിമകൾ താല്പര്യം ഉള്ളവർക്ക് മാത്രമേ ഈ സിനിമയിൽ എന്തെങ്കിലും താല്പര്യം കാണാനും സാധ്യത ഉള്ളൂ. പൂർത്തിയാക്കാത്ത വർക്ക് കൂടിയാണ് ഈ ചിത്രം, കഥയെ കൂട്ടി ചേർക്കുന്ന ചില ഭാഗങ്ങൾ ഒന്നുകിൽ ഷൂട്ട് ചെയ്യപ്പെട്ടിട്ടില്ല അല്ലെങ്കിൽ നശിപ്പിക്കപ്പെട്ടിട്ടുണ്ട്, ഈ ഒരു കാരണം കൊണ്ട് തന്നെ ഒരു കണക്ഷൻ പലയിടത്തും ഇല്ല. ഇങ്ങനെ പറയാൻ പോരായ്മകൾ ഉണ്ട് എങ്കിലും വിഷ്വലി ഒരു ടോപ് നോച് സിനിമയാണ് ഓൺ ദി സിൽവർ ഗ്ലോബ്, താല്പര്യം തോന്നുന്നു എങ്കിൽ കാണാൻ ശ്രമിക്കുക.

Verdict : Above Average

Rating : 3/5

1348. Love And Honor (2006)

Director : Yoji Yamada

Cinematographer : Matsuo Naganuma

Genre : Drama

Country : Japan

Duration : 118 Minutes

🔸യോജി യമാടയുടെ വിഖ്യാതമായ സാമൂറായി ട്രിലോജിയിലെ അവസാനത്തെ ചിത്രം, ഒരുപക്ഷെ ഏറ്റവും പേഴ്സണൽ ആയ ചിത്രവും. ആദ്യ രണ്ട് ഭാഗങ്ങളെയും പോലെ തന്നെ സാമുറായ് കാലഘട്ടത്തെ പഴയ ജാപ്പനീസ് സിനിമകളിലെ പോലെ ഗ്ലോറിഫൈ ചെയ്യാതെ വളരെ ഗ്രൗണ്ടട് ആയി നിർത്തി, ഒരു പരിധി വരെ അവരുടെ ഗതികേടും ബാധ്യതകളും വരെ സ്‌ക്രീനിൽ എത്തിക്കുന്ന ആ ഒരു രീതി ഈ ചിത്രത്തിലും മനോഹരമായി അവതരിപ്പിച്ചിട്ടുണ്ട്. വ്യക്തിപരമായി ആദ്യ സിനിമ ആയ ട്വിലൈറ്റ് സാമൂറായി കഴിഞ്ഞാൽ ഏറ്റവും ഇഷ്ടപ്പെട്ടത് ഈ സിനിമ തന്നെ ആയിരിക്കും, രണ്ടാമത്തെ സിനിമയും മികച്ചത് തന്നെ ആയിരുന്നു എന്നിടത്ത് സീരീസിന്റെ ആകെ മൊത്തം നിലവാരം ഊഹിക്കാവുന്നതാണ്.

🔸ചില അപ്രതീക്ഷിതമായ സംഭവങ്ങൾ കാരണം കാഴ്ച നഷ്ടപ്പെട്ട് പോവുന്ന ഒരു വ്യക്തിയാണ് നമ്മുടെ നായകനായ ഷിനോജോ. പേരിന് ഒരു സാമൂറായി ആണെങ്കിലും അതിനൊത്ത വണ്ണം നിലയും വിലയും ഒന്നും ഇല്ലാത്ത ഷിനോജോയ്ക്ക് ഈ സംഭവത്തിന്‌ ശേഷം തന്റെ വ്യക്തി ജീവിതത്തിൽ വലിയ ഒരു അപമാനം നേരിടേണ്ടി വരുന്നതും അതിനുള്ള പ്രതികാരം ചെയ്യാനായി അയാൾ ഇറങ്ങി തിരിക്കുന്നതും ഒക്കെയാണ് ഈ സിനിമയുടെ കഥ. വളരെ ഗ്രൗണ്ടട് ആയി നിൽക്കുന്ന, അത്യാവശ്യം ഇമോഷണൽ ആയ ഒരു കഥ തന്നെ. വൈകാരികമായി മികച്ച ഒരു അനുഭവമാണ് ഈ ചിത്രം, പ്രത്യേകിച്ചും ഒരു കഥാപാത്ര പഠനം എന്ന നിലയ്ക്ക് നോക്കുക ആണെങ്കിൽ കേന്ദ്ര കഥാപാത്രം കടന്ന് പോവുന്ന ഓരോ വൈകാരിക തലങ്ങളും കാഴ്ചക്കാരനിൽ കൃത്യമായ ഇമ്പാക്ട് ഉണ്ടാക്കുന്നുണ്ട് എന്ന് പറയണം.

🔸മികച്ച ചായാഗ്രാഹണം, പ്രകടനങ്ങൾ എന്നിവ എല്ലാം സിനിമയുടെ ആഡഡ് ബോണസുകൾ ആണ്. വളരെ മനോഹരമായ രീതിയിൽ വരുന്ന കഥയുടെ പേ ഓഫും എടുത്ത് പറയേണ്ട ഒരു വസ്തുത തന്നെയാണ്. തീർച്ചയായും കണ്ടിരിക്കേണ്ട ഒരു ചിത്രം എന്ന് നിസ്സംശയം വിശേഷിപ്പിക്കാം ഈ യോജി യമാട ചിത്രത്തെയും. ഇതോടെ സാമൂറായി ട്രിലോജിക്ക് അവസാനം ആവുകയാണ്, വളരെ അണ്ടർ റേറ്റഡ് ആയ,. കുറച്ച് കൂടി പ്രശംസ അർഹിക്കുന്ന മൂന്ന് മനോഹര സിനിമകൾ ആണ് സീരീസിലെത്. പറയാനുള്ള കാര്യങ്ങളെ കുറിച്ച് വ്യക്തമായ ധാരണ ഉണ്ടായിരുന്ന, അത് മികച്ച രീതിയിൽ സ്‌ക്രീനിൽ എത്തിച്ച നല്ല മൂന്ന് സിനിമകൾ, കാണാൻ ശ്രമിക്കുക.

Verdict : Very Good

DC Rating : 4/5

1347. The Hidden Blade (2004)

Director : Yoji Yamada

Cinematographer : Matsuo Naganuma

Genre : Drama

Country : Japan

Duration : 132 Minutes

🔸യമാടയുടെ സാമൂറായി ട്രിലോജിയിലെ രണ്ടാമത്തെ ചിത്രമാണ് ഹിഡൻ ബ്ലേയ്ഡ്, ആദ്യ ചിത്രമായ ട്വിലൈറ്റ് സാമൂറായിയുമായി പ്രത്യക്ഷത്തിൽ കഥാപരമായ ബന്ധം ഒന്നും ഇല്ലെങ്കിലും തീമാറ്റിക്കലി സാമ്യങ്ങൾ ഒരുപാട് ഉണ്ട്. സാമൂറായി വിഭാഗത്തിന്റെ പ്രതാപം അവതരിപ്പിക്കുന്നതിന് പകരം, അവരുടെ വികാരങ്ങളും വിചാരങ്ങളും നേരിടേണ്ടി വരുന്ന വെല്ലുവിളികളും തുടങ്ങി പത്തൊൻപതാം നൂറ്റാണ്ടിലെ ജപ്പാനിൽ നില നിന്നിരുന്ന ജാതി വേർതിരിവ് വരെയുള്ള ഒരുപാട് സീരിയസ് ആയ വിഷയങ്ങൾ കൈകാര്യം ചെയ്യുന്നുണ്ട് ഈ ചിത്രം. ട്വിലൈറ്റ് സാമൂറായി പോലെ ആഘോഷിക്കപ്പെട്ട് കണ്ടില്ലെങ്കിലും അത് അർഹിക്കുന്ന ഒരു സിനിമ തന്നെയാണ് ഹിഡൻ ബ്ലേയ്ടും.

🔸മൂന്ന് സുഹൃത്തുക്കളുടെ കഥയാണ് ഈ ചിത്രം എന്ന് പറയാം, കഥ പ്രധാനമായും രണ്ട് പേരെ ചുറ്റിപറ്റി ഉള്ളത് ആണെങ്കിലും. പത്തൊൻപതാം നൂറ്റാണ്ടിലെ ജപ്പാൻ ആണ് നമ്മുടെ കഥാ പശ്ചാത്തലം. തങ്ങളുടെ ദൗത്യത്തെയും കടമയെയും സ്വന്തം ജീവനേക്കാൾ ബഹുമാനിക്കുന്ന സാമൂറായി പോരാളികളിൽ ഒരാളായിരുന്നു നമ്മുടെ നായകനായ കട്ടാഗിരി. പുറമെ ശാന്ത പ്രകൃതക്കാരൻ ആണെങ്കിലും ഒരുപാട് മുറിവുകൾ ജീവിതത്തിൽ ഏൽക്കേണ്ടി വന്ന ഒരാളാണ് ഇയാൾ എന്ന് പറയാം. കാട്ടാഗിരിയെ നമ്മൾ ആദ്യമായി കാണുമ്പോൾ അയാളുടെ ഒപ്പം സുഹൃത്തുക്കളായ ശാമോനും, ഇയായ്ച്ചിരോയും ഉണ്ട്. അധികം താമസിയാതെ തന്നെ ഈ സുഹൃത്തുക്കൾക്കും വേർപിരിയേണ്ടി വരികയാണ്.

🔸പിന്നീട് വർഷങ്ങൾക്ക് ശേഷമാണ് ഇവർ കണ്ട് മുട്ടുന്നത്, അപ്പോഴേക്കും സാഹചര്യങ്ങൾ ഒരുപാട് മാറി പോയിരുന്നു. സുഹൃത്തുക്കൾ എന്ന നിലയിൽ നിന്നും ഒരാൾ കൊല്ലപ്പെടേണ്ടവനും മറ്റെയാൾ കൊല്ലേണ്ടവനും ആയി മാറി കഴിഞ്ഞിരുന്നു. ഈ ഒരു കോണ്ഫലിക്റ്റിലേക്ക് മികച്ച രീതിയിൽ തന്നെ സിനിമ എത്തുന്നുണ്ട്, അതിനെ ട്രിഗർ ചെയ്യാൻ ഒരുപാട് മികച്ച കഥാപാത്രങ്ങളും ഉണ്ട്. എല്ലാ വിഭാഗങ്ങളിലും മികച്ച നിലവാരം പുലർത്തുന്ന മനോഹരമായ ഒരു സിനിമ ആണ് ഹിഡൻ ബ്ലേയ്ഡ്, തീർച്ചയായും കാണാൻ ശ്രമിക്കുക.

Verdict : Very Good

DC Rating : 4/5

1346. The Twilight Samurai (2002)

Director : Yoji Yamada

Cinematographer : Matsuo Naganuma

Genre : Drama

Country : Japan

Duration : 129 Minutes

🔸പേഴ്സണലി ഏറ്റവും ഇഷ്ടമുള്ള സിനിമാ ഇൻഡസ്ട്രികളിൽ ഒന്നാണ് ജപ്പാൻ. അതിപ്പോ നിലവാരം കൊണ്ടായാലും അവതരിപ്പിച്ച കഥകൾ കൊണ്ടായാലും, എന്ത് തന്നെ ആയാലും അതിൽ മാറ്റം ഒന്നും ഇല്ല. ഈ ജാപ്പനീസ് ഇൻഡസ്ട്രിയിൽ തന്നെ ഏറ്റവും അലങ്കരിക്കപ്പെട്ട വിഭാഗങ്ങളിൽ ഒന്നാണ് സാമുറായി സിനിമകൾ. സാമൂറായി കഥാപാത്രങ്ങളെ ആരാധിച്, വീര പരിവേഷം കല്പിച്ച് അരുളിയ ഒരു ജനറേഷൻ തന്നെ അത് വഴി കടന്ന് പോയി എന്ന് പറഞ്ഞാലും തെറ്റില്ല, അവിടെയാണ് ട്വിലൈറ്റ് സാമൂറായി എന്ന സിനിമ വ്യത്യസ്തമാവുന്നത്, ഇവിടെ ഇത്തരം ഗ്ലോരിഫിക്കേഷനോ വീര പരിവേഷമോ ഒന്നും തന്നെ ഇല്ല.

🔸ഒപ്പമുള്ള സഹ പ്രവർത്തകരാലും, സ്വന്തം സുഹൃത്തുക്കൾ എന്ന് കരുതപ്പെടുന്നവരാലും, ബന്ധു മിത്രാദികളാലും എല്ലാം പരിഹസിക്കപ്പെടുന്ന ഒരു സാമൂറായി കഥാപാത്രം ആണ് നമ്മുടെ നായകനായ സെബേ. സ്വന്തം സഹ പ്രവർത്തകരുടെ ഒപ്പം യാതൊരു തരത്തിലുള്ള വിനോദ പരിപാടികളിലും ഏർപ്പെടാതെ കുടുംബം, കുട്ടികൾ എന്നീ ചിന്തകളിൽ മാത്രമായി ഒതുങ്ങി ജീവിക്കുകയാണ് അയാൾ. ഉടുക്കാൻ നല്ലൊരു വസ്ത്രമോ, കാര്യമോ ഒന്നും തന്നെ അയാൾക്ക് ഇല്ല. സ്വന്തം ഭാര്യ മരണപ്പെട്ടതിനാലും, അമ്മയ്ക്ക് ഓർമ പിശക് ഉള്ളതിനാലും കുടുംബത്തിന്റെ ഉത്തരവാദിത്തം പൂർണമായും അയാളുടെ ചുമലിലാണ്.

🔸അങ്ങനെ ജീവിച്ച് പോവുന്ന സെബിയുടെയും അയാളുടെ പ്രായമായ അമ്മയുടെയും രണ്ട് പെണ്മക്കളുടെയും ജീവിതത്തിലേക്ക് ഒരു പുതിയ കഥാപാത്രം കടന്ന് വരുന്നതും അതിനോടൊപ്പം തുടങ്ങുന്ന പ്രശ്നങ്ങളും എല്ലാമാണ് ഈ ചിത്രം. ഭീകരമായ കൊമ്പാറ്റ് രംഗങ്ങളോ, വയലൻസോ ഒന്നും ഇല്ലാത്ത വളരെ ഗ്രൗണ്ടട് ആയ ഒരു സിനിമ ആണ് ട്വിലൈറ്റ് സാമൂറായി. വളരെ ട്രാജിക് ആയ ഒരു കഥയാണ് സിനിമയുടേത്, അത് അതിമനോഹരമായി അവതരിപ്പിച്ചിട്ടും ഉണ്ട്. സംഭവിക്കുന്നത് എല്ലാം ഏറെക്കുറെ നെഗറ്റ്റീവ് ആണെങ്കിലും കണ്ട് കഴിയുമ്പോൾ ഒരു സംപ്തൃപ്തി തരുന്ന ഒരു പ്രത്യേകത ഈ സിനിമയ്ക് ഉണ്ട്, കാണാൻ ശ്രമിക്കുക.

Verdict : Very Good

DC Rating : 4.25/5

1345. Memories (1995)

Director : Katsuhiro Otomo

Cinematographer : Hiroaki Edamitsu

Genre : Animation

Country : Japan

Duration : 113 Minutes

🔸മൂന്ന് കഥകളുടെ ഒരു സമാഹാരം ആണ് മെമ്മറിസ് എന്ന ജാപനീസ് അനിമേ ചിത്രം. മൂന്ന് വ്യത്യസ്ത സംവിധായകർ തയ്യാറാക്കിയ ഉദ്ദേശം നാല്പത് മിനിറ്റിന് അടുത്ത് ദൈർഘ്യം ഉള്ള ഇവ ഓരോന്നും ഹാർഡ് ഹിറ്റിങ് ആണ് എന്ന് പറഞ്ഞാൽ അത് ഒരു അണ്ടർ സ്റ്റേട്ട്മെന്റ് ആയി പോവും. സയൻസ് ഫിക്ഷൻ, ഹൊറർ, സൈക്കോളജിക്കൽ ഡ്രാമ തുടങ്ങി വ്യത്യസ്തമായ ജോണരുകളുടെ ഒരു ആകെ തുക ആണ് ഈ ചിത്രം. മാഗ്നെറ്റിക് റോസ്, സ്റ്റിങ്ക് ബോംബ് കാനൺ ഫോഡർ എന്നിങ്ങനെയാണ് മൂന്ന് കഥകളുടെയും ടൈറ്റിലുകൾ. പേഴ്സണലി ഈ മൂന്നിൽ ഏറ്റവും ഇഷ്ടപ്പെട്ടത് ആദ്യത്തെ കഥയായ മാഗ്നെറ്റിക് റോസ് തന്നെ.

🔸കഥയിലേക്ക് വരിക ആണെങ്കിൽ, കൊറോണ എന്ന സ്‌പെയ്സ് ഷിപ്പും അതിലെ നാല് ജോലിക്കാരും ആണ് നമ്മുടെ പ്രധാന കഥാപാത്രങ്ങൾ. തങ്ങളുടെ സ്ഥിരം യാത്രകളിൽ ഒന്നിൽ ഒരു നശിപ്പിക്കപ്പെട്ട സാറ്റലൈറ്റിൽ നിന്നും സഹായത്തിനു വേണ്ടിയുള്ള സിഗ്നൽ അവർക്ക് ലഭിക്കുകയാണ്. ഈ സിഗ്നലിന് പിറകെയുള്ള അവരുടെ അന്വേഷണം ഉദ്ദേശം ഒരു നൂറ്റാണ്ടായി ജീവൻ ഇല്ലാത്തതെന്ന് അനുമാനിക്കപ്പെടുന്ന വിചിത്രമായ ഒരിടത്ത് അവരെ കൊണ്ട് ചെല്ലുന്നതും മറ്റുമൊക്കെയാണ് കഥ. ഈ മൂന്ന് കഥകളിലെ ഏറ്റവും സ്ട്രോങ്ങ്‌ ആയ സിനിമ ഇതാണെന്നാണ് അഭിപ്രായം, വളരെ ലെയെർഡ് ആയ ഒരു കഥ.

🔸രണ്ടാമത്തെ കഥ മരുന്ന് മാറി സ്വന്തം ശരീരത്തിൽ പ്രയോഗിക്കുന്ന ഒരു പാവം ലാബ് ടെക്ക്നീഷ്യന്റെ കഥയും, മൂന്നാമത്തെ കഥ സ്ഥിരമായി എതിരാളിയെയും പ്രതീക്ഷിച്ച് ജീവിക്കുന്ന ഒരു നാടിന്റെയും കഥയാണ്. കണ്ട് കഴിഞ്ഞാലും കുറച്ച് സമയം നമ്മളെ ചിന്തിപ്പിക്കുന്ന മികച്ച മൂന്ന് കഥകളാണ് സിനിമയുടേത്. അതിലും മികച്ച സൗണ്ട് ട്രാക്ക് ആണ് ചിത്രത്തിന്റേത്, പ്രത്യേകിച്ചും ക്രെഡിറ്റ് പോർഷനിലെ ട്രാക്ക് ഒക്കെ സ്പെഷ്യൽ മെൻഷൻ അർഹിക്കുന്നുണ്ട്. വ്യത്യസ്ത സിനിമാ അനുഭവങ്ങൾ ഇഷ്ടപ്പെടുന്നവർ തീർച്ചയായും കണ്ടിരിക്കേണ്ട സിനിമയാണ് മെമ്മറീസ്, കണ്ട് നോക്കുക.

Verdict : Very Good

DC Rating : 4.25/5

1344. Tokyo Fist (1995)

Director : Shinya Tsukamoto

Cinematographer : Shinya Tsukamoto

Genre : Drama

Country : Japan

Duration : 86 Minutes

🔸ബുള്ളറ്റ് ബാലറ്റ് എന്ന സിനിമയ്ക്ക് ശേഷം വീണ്ടും ഒരു ഷിന്യ സുഖാമോട്ടോ ചിത്രം. പ്രത്യക്ഷത്തിൽ പോസ്റ്റർ ഒക്കെ കണ്ടാൽ ഒരു ബോക്സിങ് ചിത്രം എന്ന ഫീൽ ഒക്കെ കിട്ടിയേക്കും എങ്കിലും അങ്ങനെയല്ല സംഗതിയുടെ കിടപ്പ് വശം. ബോക്സിങ് ഒരു വിഷയം ആണ് എങ്കിലും അത് കേവലം പ്ലോട്ടിനെ ഒന്ന് ഡൈവേർട്ട് ചെയ്യാനുള്ള ഉപകരണം മാത്രമാണ്, മറ്റ് ഷിന്യ സിനിമകൾ ഒക്കെ പോലെ ഒരു തരം വല്ലാത്ത ഫ്രാസ്ട്രെഷനിൽ കൂടിയാണ് ഈ സിനിമയിലെ കഥാപാത്രംങ്ങളും കടന്ന് പോവുന്നത്. മൂന്ന് പ്രധാന കഥാപാത്രങ്ങളിലൂടെ ആണ് ഈ ചിത്രം കടന്ന് പോവുന്നത്.

🔸ഇൻഷുറൻസ് ഏജന്റ് ആയ നമ്മുടെ നായക കഥാപാത്രം ഒരു തരത്തിൽ പറഞ്ഞാൽ ഒരു ഭീരു ആണ്, ബഹളങ്ങളിൽ നിന്നും ലഹളകളിൽ നിന്നുമെല്ലാം മാറി നടക്കുന്ന ഒരു സാധു. ടിയാൻ കുറച്ച് നാളുകളായി വല്ലാത്ത ഒരു ധർമ്മ സങ്കടത്തിലാണ് എന്ന് പറയാം, പണം തന്നെയാണ് വിഷയം. താൻ കല്യാണം കഴിക്കാൻ പോവുന്ന പെൺകുട്ടിയുടെ ജോലി നഷ്ടം ആയതിനാൽ അവളുടെ വകയ്ക്ക് വേണ്ടി കൂടിയുള്ള പണം അയാൾക്ക് കണ്ടെത്തേണ്ട അവസ്ഥ വന്നിരിക്കുന്നു. ഇപ്പോഴുള്ള ചെറിയ ജോലി കൊണ്ട് അത് അത്ര എളുപ്പം അല്ല താനും.

🔸അങ്ങനെ ഇരിക്കെ ആണ് ഈ രണ്ട് കഥാപാത്രങ്ങൾക്ക് ഇടയിലേക്ക് ഒരു പുതിയ വ്യക്തി കടന്ന് വരുന്നത്, നമ്മുടെ നായകന്റെ ചെറുപ്പ കാലത്തെ ഒരു സുഹൃത്ത്. ഈ കഥാപാത്രത്തിന്റെ വരവോട് കൂടി ഒരു വലിയ ടോണൽ ഷിഫ്റ്റ്‌ ഈ സിനിമയിൽ ഉണ്ടാവുകയാണ്, നമ്മൾ ഒട്ടും പ്രതീക്ഷിക്കാത്ത സ്ഥലങ്ങളിലേക്ക്, സന്ദര്ഭങ്ങളിലേക്ക് ഈ സിനിമ കടന്ന് പോവുന്നുണ്ട്. ഒടുവിൽ ഒരുപാട് ചോദ്യങ്ങളും ഉത്തരങ്ങളും എല്ലാം ബാക്കി വെച്ച് സിനിമ അവസാനിക്കുമ്പോൾ ലഭിച്ചത് തൃപ്തികരമായ ഒരു അനുഭവം തന്നെയാണ്. ഷിന്യ സിനിമകളിൽ പേഴ്സണൽ ഫേവറൈറ്റ് എന്ന് പറയാം ഈ ചിത്രത്തെ.

Verdict : Good

DC Rating : 3.75/5

1343. Thunderbolts (2025)

Director : Jake Schreier

Cinematographer : Andrew Palermo

Genre : Sci Fi

Country : USA

Duration : 126 Minutes

🔸ദാരിദ്ര്യം കേറിയ പഴയ ഇല്ലം പോലെ മാർവെൽ ക്ഷയിച്ച് തുടങ്ങിയിട്ട് കാലം കുറച്ചായി, തോറിന്റെ നാലാം ഭാഗം ഒക്കെ കണ്ട ശേഷം ആ ഭാഗത്തേക്ക്‌ പോവില്ല എന്നെടുത്ത തീരുമാനത്തിൽ വലിയ നഷ്ടം ഒന്നും തോന്നിയില്ല എന്ന് മാത്രമല്ല ഈ അടുത്ത് ഇറങ്ങിയ ബ്രേവ് ന്യൂ വേൾഡ് ഒക്കെ ആ തീരുമാനം ശെരി ആയിരുന്നു എന്ന് അടിവര ഇടുന്നതും ആയിരുന്നു. തണ്ടർബോൾട്സ് എന്ന സിനിമ കാണാനുള്ള പ്രേരണ പൊതുവെ അതിന്റെ കൺസപ്റ്റ് തന്നെ ആയിരുന്നു, അതായത് സുയിസൈഡ് സ്‌ക്വാഡ് ഒക്കെപ്പോലെ ഒരു ബഞ്ച് ഓഫ് ലൂസേഴ്‌സ് ടൈപ്പ് ഐറ്റം ആയത് തന്നെ. എന്ത് തന്നെ ആയാലും മുന്നേ വന്ന സിനിമകളെ അപേക്ഷിച്ച് ബേധപ്പെട്ട ഒരു വ്യൂയിങ് അനുഭവം ആണ് ഈ ചിത്രം എന്ന് മാത്രം.

🔸ട്രെയിലർ ടീസർ മുതലായവ കണ്ടിട്ടുള്ള ഏതൊരാൾക്കും പ്രെഡിക്റ്റ് ചെയ്യാൻ കഴിയുന്ന ഒന്ന് തന്നെയാണ് ഈ സിനിമയുടെ കഥ, ഒന്ന് രണ്ട് പുതിയ സാധനങ്ങളും വൈഡർ എംസിയുവും ആയിട്ടുള്ള കണക്ഷൻസ് കടന്ന് വരുന്നു എന്നത് ഒഴിച്ചാൽ എല്ലാം പ്രെഡിക്റ്റബിൾ തന്നെയാണ്. എന്നാൽ ഈ സിനിമയെ മീഡിയോകൃട്ടിയിൽ നിന്നും മുകളിലേക്ക് കൊണ്ട് വരുന്നത് കഥാപാത്രങ്ങൾ തമ്മിലുള്ള കെമിസ്ട്രിയും ആ കഥാപാത്രങ്ങൾ തന്നെയുമാണ്. ഒരു ഹീറോ ലേബൽ ഒന്നും ഇല്ലാത്ത, അതൊരു ഭാരമായി മാറാത്ത കുറച്ച് കഥാപാത്രങ്ങൾ. ഈ കഥാപാത്രങ്ങൾക്ക് മിക്കതിനും ട്രോമട്ടിക് ആയ പാസ്റ്റും ഉണ്ട്, അത് മനോഹരമായി അവതരിപ്പിച്ചിട്ടുമുണ്ട്.

🔸എടുത്ത് പറയേണ്ട മറ്റൊരു വസ്തുത ആയി തോന്നിയത് സിനിമയുടെ സൗണ്ട് ട്രാക്ക് ആണ്, പ്രത്യേകിച്ചും സിനിമ പകുതിയോട് അടുക്കുമ്പോൾ ഉള്ളൊരു കാരക്റ്റർ റിവീൽ സീൻ ഒക്കെ ഗംഭീരം തന്നെയായിരുന്നു. ഫ്ലോറൻസ് പഗ്, ലുയിസ് പുൽമാൻ, ജൂലിയ ഡ്രെയ്‌ഫസ് തുടങ്ങിയവർ എല്ലാം പ്രകടനത്തിൽ നന്നായിരുന്നു. ഇങ്ങനെ കുറച്ച് പോസിറ്റ്റീവുകൾ ഉണ്ടെങ്കിലും സ്പെഷ്യൽ എന്ന് പറയാവുന്ന, സിനിമ കണ്ടിറങ്ങുന്ന വേളയിൽ മനസ്സിൽ തങ്ങി നിൽക്കുന്ന ഒന്നും സിനിമ തരുന്നില്ല എന്നത് പോരായ്മയാണ്, പിന്നെ നല്ല കിടിലൻ ഒരു പോസ്റ്റ് ക്രെഡിറ്റ് സീൻ ഉണ്ട്.

Verdict : Above Average

DC Rating : 2.75/5

1342. Bullet Ballet (1998)

Director : Shinya Tsukamoto

Cinematographer : Shinya Tsukamoto

Genre : Crime

Country : Japan

Duration : 87 Minutes

🔸ഉദ്ദേശം ഒരു നാല് അഞ്ച് വർഷം മുന്നേ ആണെന്ന് തോന്നുന്നു ഷിന്യ സുഖാമോട്ടോയുടെ ടെത്സുവോ ദി അയേൺ മാൻ എന്ന സിനിമ കണ്ടത്, ഒരു വല്ലാത്ത അനുഭവം തന്നെ ആയിരുന്നു ആ ചിത്രം. പ്രസ്തുത വ്യൂയിങ് അനുഭവം തന്ന ട്രോമട്ടിക് ഫീൽ മാറാൻ മാത്രം മൂന്നോ നാലോ ദിവസം വേണ്ടി വന്നു എന്ന ഒറ്റ കാരണം കൊണ്ട് പിന്നീട് ഈ സംവിധായകന്റെ സിനിമകളോട് ഒരു അകൽച്ച പാലിച്ചിരുന്നു, ഒരു തരത്തിൽ പറഞ്ഞാൽ വളരെ അവിചാരിതമായാണ് ബുള്ളറ്റ് ബാലറ്റ് എന്ന സിനിമയിലേക്ക് എത്തുന്നത്. അയേൺ മാൻ പോലെ തന്നെ ഒരു കമ്പ്ലീറ്റ് ബ്ലാക്ക് ആൻഡ് വൈറ്റ് അനുഭവം ആണ് ബുള്ളറ്റ് ബാലറ്റ് എന്ന ചിത്രവും.

🔸ഗോദ എന്ന നമ്മുടെ നായക കഥാപാത്രം, മിക്ക ഷിന്യ സിനിമകളിലെയും പോലെ തന്റെ ജീവിതത്തിലും ദൈനംദിന കാര്യങ്ങളിലും എല്ലാം ഫ്രസ്റ്റ്റേറ്റഡ് ആയ ഒരു വ്യക്തിയാണ്. മുറിവിൽ മുളക് പുരട്ടുന്നത് പോലെ ഒരുനാൾ അയാളുടെ കാമുകി ആത്മഹത്യ ചെയ്യുകയാണ്, സ്വന്തം തലയിലേക്ക് നിറ ഒഴിച്ച് ചോരയിൽ കുളിച്ച് കിടക്കുന്ന കാമുകിയുടെ ചിത്രം ഗോദയിൽ ഒരു വല്ലാത്ത ട്രോമ സൃഷ്ടിക്കുകയാണ്. തോക്ക് എന്നത് ബ്ലാക്ക് മാർക്കെട്ടിലും, മാഫിയകൾക്കും ഇടയിൽ മാത്രം ലഭ്യമായ ഒരു വസ്തു ആയിരിക്കെ അതെങ്ങനെ തന്റെ കാമുകിക്ക് ലഭിച്ചു എന്നത് അയാളിൽ കൗതുകവും ഭീതിയും എല്ലാം ചേർന്ന ഒരു വികാരം സൃഷ്ടിക്കുകയാണ്.

🔸തന്റെ പക്കലും തോക്ക് വേണം എന്ന ചിന്ത അയാളിൽ ഉടൽ എടുക്കുന്നു, എന്തിന് ഏതിന് എന്നതൊക്കെ ചോദ്യം മാത്രമായി അവശേഷിക്കുന്നു. ഈ തോക്ക് തേടിയുള്ള അയാളുടെ യാത്ര കൂടുതൽ രക്ത ചൊരിച്ചിലുകളിലേക്കും ഗാങ് വാറിലേക്കും ഒക്കെയാണ് കാര്യങ്ങളെ കൊണ്ട് പോവുന്നത്. ഒരുപാട് ലൂസ് എന്ഡുകളും പ്ലോട്ട് ഹോളുകളും ഒക്കെയുള്ള ഒന്നാണ് ഈ ചിത്രം, ചില കഥാപാത്രങ്ങളുടെ വരവും പോക്കും ഒക്കെ എന്തിനായിരുന്നു എന്ന് സിനിമ കഴിയുമ്പോൾ പോലും വ്യക്തത തരുന്നില്ല. ഇതൊക്കെ നിലനിൽക്കുമ്പോഴും ഒരു ലോ ബഡ്ജറ്റ് സിനിമയുടെ ബാധ്യത ഒന്നും കാണിക്കാതെ ഒരു ലാസ്‌റ്റിങ് ഇമ്പാക്റ്റ് ഈ സിനിമ തരുന്നുണ്ട്, ആയതിനാൽ വ്യത്യസ്തമായ ഒരു അനുഭവത്തിന് ഒന്ന് കണ്ട് നോക്കാവുന്നതാണ്.

Verdict : Above Average

DC Rating : 3/5

1341. Sansho The Bailiff (1954)

Director : Kenji Mizoguchi

Cinematographer : Kazuo Miyagawa

Genre : Drama

Country : Japan

Duration : 124 Minutes

🔸ജാപനീസ് സിനിമയെ കുറിച്ചുള്ള ചർച്ചകളിൽ എവിടെയും പൊതുവെ പറഞ്ഞ് കേട്ടിട്ടില്ലാത്ത ഒരു പേരാണ് കെഞ്ചി മിസ്വഗുച്ചി. അകിറാ കുറോസവയിൽ മിക്കപ്പോഴും ഒതുങ്ങി നിൽക്കാറുള്ള ചർച്ചകളിൽ കെഞ്ചി കടന്ന് വരാത്തത് അദ്ദേഹത്തിന്റെ സിനിമകൾക്ക് ജപ്പാന് പുറത്ത് ഒരു വൈഡർ ഒടിയൻസ് കിട്ടാഞ്ഞത് കൊണ്ടാവണം എന്ന് തോന്നിയിട്ടുണ്ട്, തെറ്റായിരിക്കാം. നിലവാരത്തിന്റെ കാര്യത്തിൽ ഒട്ടും മോശമല്ല കെഞ്ചിയുടെ സിനിമകൾ, അതിൽ തന്നെ പിന്നാക്കിൾ എന്നൊക്കെ പറയാവുന്ന ഒന്നാണ് സന്ഷോ ദി ബെയിലിഫ് എന്ന ചിത്രം. താല്പര്യം ഉള്ളവർക്ക് കെഞ്ചിയുടെ യുഗേട്സു, ക്രൂശിഫൈഡ് ലാവേഴ്സ്, ലൈഫ് ഓഫ് ഓറു എന്നീ സിനിമകൾ കണ്ട് നോക്കാവുന്നതാണ്.

🔸ഈ സിനിമയിലേക്ക് വരിക ആണെങ്കിൽ ജപ്പാന്റെ ചരിത്രത്തിലെ തന്നെ ഒരു ഇരുണ്ട കാലഘട്ടമായ, ഫ്യുടൽ ഭരണാവസ്ഥ നിലനിന്നിരുന്ന പതിനൊന്നാം നൂറ്റാണ്ട് ആണ് നമ്മുടെ കഥാപശ്ചാത്തലം. നീതിമാനായ ഒരു പ്രാദേശിക ഭരണകർത്താവ് തന്റെ മേൽ ഉദ്യോഗസ്ഥന്മാരുടെ ശകാരത്തിന് ഇര ആവുകയാണ്, തന്റെ ജനങ്ങളോട് അല്പം കാരുണ്യം കാണിച്ചു എന്നതാണ് അയാളുടെ മേൽ ആരോപിക്കപ്പെട്ട കുറ്റം. ഈ കുറ്റത്തിന് അയാൾക്ക് വിധിക്കപ്പെടുന്ന ശിക്ഷ എന്നത് ഒരു തരത്തിൽ പറഞ്ഞാൽ നാട് കടത്തലാണ്, സ്വന്തം കുടുംബത്തെയും സുഹൃത്തുക്കളെയും എല്ലാം ഉപേക്ഷിച്ചുള്ള ഒരു യാത്ര.

🔸ഈ ഒരു പോയിന്റ് എന്നത് കഥയുടെ ആരംഭം മാത്രമാണ്, ഈ നാട് കടത്തപ്പെട്ട വ്യക്തിയെ അന്വേഷിച്ച് അയാളുടെ കുടുംബം നടത്തുന്ന യാത്രയും, ആ യാത്രയിൽ ഉണ്ടാവുന്ന സംഭവങ്ങളും ഒക്കെയാണ് തുടർന്ന് അങ്ങോട്ടുള്ള ചിത്രം. വളരെ ഡാർക്ക് ആയ, ട്രാജിക് ആയ ഒരു സ്റ്റോറി ലൈൻ ആണ് ഈ സിനിമയുടേത്, കണ്ട് തീരുന്ന വേളയിൽ ആ കഥാപാത്രങ്ങളുടെ വിഷമങ്ങളും വേദനകളും എല്ലാം കാഴ്ചക്കരന്റേത് കൂടി ആവുമ്പോൾ ഈ സിനിമ ഒരു ആവിശ്മരണീയമായ അനുഭവമായി മാറുകയാണ്. തീർച്ചയായും കണ്ടിരിക്കേണ്ട ജാപ്പനീസ് സിനിമകളിൽ, അല്ല ലോക സിനിമകളിൽ ഒന്നായി നിൽക്കും ഈ മനോഹര ചിത്രം.

Verdict : Must Watch

DC Rating : 4.5/5