787. Hellaro (2019)

Director : Abhishek Shah

Genre : Drama

Rating : 8.8/10

Country : India

Duration : 121 Minutes

🔸അഭിഷേക് ഷാ എന്ന സംവിധായകന്റെ അരങ്ങേറ്റ ചിത്രമാണ് ഹെല്ലറോ എന്നത് വിശ്വസിക്കാൻ ഒരല്പം പ്രയാസമുള്ള കാര്യം തന്നെയാണ്, പ്രത്യേകിച്ചും ചിത്രം കണ്ട് ആസ്വദിച്ച് കഴിഞ്ഞ ഒരാൾക്ക്. വർഷങ്ങളുടെ പരിചയത്തിൽ ലഭിക്കുന്ന കയ്യടക്കം, ക്വലിറ്റി എന്നിവയ്‌ക്കൊപ്പം ഒരു സംവിധായകന് ആവശ്യം എന്ന് വ്യക്തിപരമായി വിശ്വസിക്കുന്ന സ്വന്തം പ്രൊഡക്ടിനെ സംബന്ധിച്ചുള്ള വിഷനും, ഐഡിയയും അയാൾക്കുണ്ട് എന്നത് സ്പഷ്ടമാണ്, അത് തന്നെയാണ് ഹെലാരോ എന്ന ചിത്രത്തെ സ്പെഷ്യൽ ആക്കുന്നതും.

🔸പരിചിതമായ ഒരു വിഷയത്തെ അത്ര പരിചിതമല്ലാത്ത ബാക്ക്ഗ്രൗണ്ടിൽ പവർഫുൾ ആയാണ് ചിത്രം അവതരിപ്പിച്ചിരിക്കുന്നത്. സപ്രസ് ചെയ്ത് വെച്ചിരിക്കുന്ന സ്ത്രീത്വത്തെ പ്രമേയമാക്കി കൊണ്ട് അനവധി സിനിമകൾ ലോകത്താകമാനം ഉള്ള പല രാജ്യങ്ങളിൽ പല ഭാഷകളിൽ പുറത്തിറങ്ങിയിട്ടുണ്ട്, ഇന്ത്യയിലും കുറവല്ല. ഈ ചിത്രങ്ങൾ ഉയർത്തി കാണിക്കുന്ന പ്രശ്നങ്ങൾ പരിഹരിക്കപ്പെടാത്തിടത്തോളം കാലം അത് പ്രസക്തവുമാണ്, ഹെല്ലറോ എന്ന ചിത്രത്തിന്റെ തന്നെയും പ്രസക്തി അല്ലെങ്കിൽ പ്രാധാന്യം ഇവിടെയാണ്.

🔸മരുഭൂമിയുടെ വന്യത നിറഞ്ഞ് നിൽക്കുന്ന കച്ച് ആണ് ചിത്രത്തിന്റെ കഥാ പശ്ചാത്തലം, ടെക്കനോളജിക്കൽ ഔട്‍ബേർസ്റ്റിന് ഒക്കെ മുന്നേയുള്ള എഴുപതുകളാണ് കാലഘട്ടം. ഇന്ദിരാ ഗാന്ധിയാണ് അന്ന് ഇന്ത്യൻ പ്രധാന മന്ത്രി, രാജ്യത്തൊട്ടുക്കും അടിയന്തിരാവസ്ഥ പ്രഖ്യാപിച്ചിരുന്ന കാലം. എങ്ങും നിലനിന്നിരുന്ന അരക്ഷിതാവസ്ഥയ്ക്ക് കാരണം രാജ്യഭരണം ഒരു സ്ത്രീ കയ്യാളിയത് കൊണ്ടും അത് വഴി ഉണ്ടായ ദൈവ കോപം കാരണമാണ് എന്നും വിശ്വസിക്കുന്ന ഒരുകൂട്ടം പ്രാകൃത മനുഷ്യരാണ് ആ ഗ്രാമത്തിൽ ഉള്ളത്.

🔸ഈ സൂചിപ്പിച്ച ജെണ്ടർ വൈസ് വേർതിരിവ് ആദ്യ പത്ത് മിനുട്ടിൽ തന്നെ ചിത്രം വരച്ച് കാണിക്കുന്നുണ്ട്, ഗ്രാമത്തിൽ നടക്കുന്ന ഉത്സവങ്ങളിലോ മറ്റ് കാര്യങ്ങളിലോ പങ്കെടുക്കാൻ ഉള്ള അവകാശം ഇല്ലാത്ത, വീടിന് പുറത്ത് വരെ ഇറങ്ങാൻ കഴിയാതെ നാല് ചുവരിനുള്ളിൽ ജീവിക്കുന്നവരാണ് ചിത്രത്തിലെ സ്ത്രീ കഥാപാത്രങ്ങൾ. ജനിച്ച് വീഴുന്ന കുഞ്ഞുങ്ങളോട് വരെ ഇത്തരം സമീപനമാണ് സകലരും വെച്ച് പുലർത്തുന്നത്. ഈ ഒരു പശ്ചാത്തലത്തിലാണ് മഞ്ജരി എന്ന നായികാ കഥാപാത്രം വിവാഹിതയായി ആ ഗ്രാമത്തിലേക്ക് കടന്ന് വരുന്നത്, ഏഴാം ക്‌ളാസ് വരെ പഠനം പൂർത്തിയാക്കിയിട്ടുള്ള മഞ്ജരിക്ക് പ്രായ പൂർത്തി ആയിട്ട് പോലുമില്ല.

🔸ഈ സ്ത്രീ കഥാപാത്രങ്ങൾ എല്ലാവരും തന്നെ സ്വാതന്ത്ര്യം എന്നത് അറിയുന്നത് എന്നും കാലത്ത് അടുത്തുള്ള പുഴയിൽ നിന്നും വെള്ളം കോരാൻ പോവുമ്പോഴുള്ള ചെറിയ സമയം മാത്രമാണ്, ഇങ്ങനെ ഒരു സന്ദർഭത്തിൽ മരുഭൂമിയിൽ വെച്ച് ഇവരൊരു കഥാപാത്രത്തെ കണ്ട് മുട്ടുന്നതും തുടർന്ന് നടക്കുന്ന കാര്യങ്ങളുമാണ് ചിത്രത്തിന്റെ പ്രമേയം. ഗൗരവമേറിയ ഒരു വിഷയത്തിന്റെ ശക്തമായ അവതരണമാണ് ഈ ചിത്രം, അവസാന സീൻ ഒക്കെ മികച്ച അനുഭവം തന്നെയാണ്, ഓൺലൈൻ പ്ലാറ്റ്‌ഫോമുകളിൽ ലഭ്യമായ ചിത്രം തീർച്ചയായും കാണാൻ ശ്രമിക്കുക.

Verdict : Very Good

DC Rating : 85/100