1079. Too Late To Die Young (2018)

Director : Dominga Sotomayor Castillo

Genre : Drama

Rating : 6.8/10

Country : Chile

Duration : 110 Minutes

🔸മികച്ച സിനിമകൾ അന്വേഷിച്ചുള്ള ഈ യാത്ര ഇപ്പോൾ എത്തിയിരിക്കുന്നത് ചിലിയിലാണ്, കാലഘട്ടം തോണ്ണുറുകളും. ചരിത്രം പരിശോധിച്ചാൽ അറിയാം ചിലി എന്ന രാജ്യത്തെ സംബന്ധിച്ചിടത്തോളം ഒരുപാട് രാഷ്ട്രീയ സാംസ്‌കാരിക മാറ്റങ്ങൾ കൊണ്ടുവന്ന സമയമാണ് ഈ ഒരു കാലഘട്ടം. സാൽവദോർ ആയെന്ടെയുടെ വീഴ്ചയ്ക്ക് ശേഷം രാജ്യം ഏകാധിപത്യ ഭരണത്തിലേക്ക് കുപ്പ് കുത്തിയത് എഴുപതുകളിൽ ആയിരുന്നു, തുടർന്നുള്ള രണ്ട് പതിറ്റാണ്ടോളം കാലം ജനങ്ങൾ അതിന്റെ തിക്താനുഭവങ്ങൾ നേരിടേണ്ടിയും വന്നിട്ടുണ്ട്.

🔸പിന്നീട് തൊണ്ണൂറുകളിൽ ജനാധിപത്യം എന്ന കൺസപ്റ്റ് ചിലിയിലേക്ക് മടങ്ങി വന്നു എങ്കിലും ആളുകൾ വിശ്വാസം പൂർണമായി ആ ഒരു ട്രാൻസിഷെനിലേക്ക് അർപ്പിച്ചിരുന്നില്ലത്രേ. ഈ കാരണം കൊണ്ട് തന്നെ സ്ഥിതിഗതികൾ ഇനിയും വളരെ മോശം ആവും എന്നും തങ്ങളുടെ ജീവിതവും നിലനില്പും അതിജീവനവും എല്ലാം അവതാളത്തിൽ ആവും എന്നുമൊരു ചിന്ത അവരിൽ ഉണ്ടായിരുന്നു. ഇത്രയും ചരിത്രം ഇവിടെ പറഞ്ഞത് വേറൊന്നും കൊണ്ടല്ല, ഈ ഒരു ബാക്ക്ഗ്രൗണ്ടിന് ടൂ ലേറ്റ് ടു ഡൈ യങ് എന്ന ചിത്രത്തിൽ വലിയ പ്രാധാന്യമുണ്ട്.

🔸നമ്മൾ ഈ ചൂട് വെള്ളത്തിൽ വീണ പൂച്ച തണുത്ത വെള്ളം കണ്ടാലും പേടിക്കും എന്ന് പറയാറില്ലേ, ആ ഒരു പ്രയോഗം ഈ ചിത്രത്തിലെ കഥാപാത്രങ്ങൾക്കും നൽകാം. തങ്ങളുടെ ജീവിത കാലയളവിൽ ഒരുപാട് അവിശ്വസനീയ സംഭവങ്ങൾ കണ്ടത് കൊണ്ടാവണം ഇവരെല്ലാം പ്രിപ്പേർഡ് ആണ്. നഗര പരിധിയിൽ താമസിച്ചിരുന്ന ഇവർ കുറച്ച് നാളുകളായി നാടോടികൾക്ക് സമാനമായ ജീവിതം ആണ് നയിക്കുന്നത്, ഒരു സ്ഥലത്ത് നിന്നും മറ്റൊരു സ്ഥലത്തേക്ക് ഗ്രാമങ്ങളിലൂടെ തങ്ങളുടെ വണ്ടിയിൽ ഇവർ യാത്ര ചെയ്ത് യാത്ര ചെയ്ത് ജീവിതം മുന്നോട്ട് കൊണ്ട് പോവുന്നു.

🔸ഈ ഒരു നാടോടി കൂട്ടത്തിലെ മൂന്ന് ടീനേജർമാരായ കഥാപാത്രങ്ങളാണ് ചിത്രത്തിന്റെ ഫോക്കസ്, അതിൽ തന്നെ ഒരല്പം റിബൽ സ്വഭാവക്കാരിയായ സോഫിയയെ വേണമെങ്കിൽ നമുക്ക് നായിക എന്ന് വിശേഷിപ്പിക്കാം. ഈ കഥാപാത്രങ്ങളുടെ ദൈനംദിന ജീവിതം അതേ പടി പകർത്തി വെക്കുക എന്നതാണ് ചിത്രം ചെയ്തിരിക്കുന്നത്, അതൊരുപക്ഷെ ചിലർക്ക് എങ്കിലും രുചിക്കാതെ വന്നേക്കാം. അത്യാവശ്യം സ്ലോ ആണ് ചിത്രം, വിഷ്വലി മനോഹരമാണ്, നല്ല അഭിനയ പ്രകടനങ്ങളാണ്, താല്പര്യം ഉണ്ടെങ്കിൽ കാണാൻ ശ്രമിക്കുക.

Verdict : Good

DC Rating : 3.75/5