768. City Of Life And Death (2009)

Director : Lu Chan

Genre : History

Rating : 7.7/10

Country : China

Duration : 136 Minutes

🔸സിറ്റി ഓഫ് ലൈഫ് ആൻഡ് ഡെത് എന്ന ചിത്രത്തെ ഭീകരം എന്ന ഒറ്റ വാക്കിൽ പറഞ്ഞ് ഒതുക്കുന്നതോ വിശേഷിപ്പിക്കുന്നതോ സത്യത്തിൽ ആ സിനിമയോടും, സിനിമയ്ക്ക് ആധാരമായ സംഭവത്തോടും ചെയ്യുന്ന വലിയ നീതികേടാണ്. ഷിൻഡ്‌ലേഴ്‌സ് ലിസ്റ്റ് എന്ന ചിത്രത്തിന്റെ ഓർമകൾ തരുന്നുണ്ട് ഈ ചൈനീസ് ചിത്രം, പലയിടത്തും. അത് രണ്ട് സിനിമയും കൈകാര്യം ചെയ്യുന്ന വിഷയങ്ങൾ തമ്മിലുള്ള സാമ്യതയോ, അല്ലെങ്കിൽ രണ്ടും ബ്ലാക്ക് ആൻഡ് വൈറ്റ് ആയത് കൊണ്ടോ മാത്രമല്ല അത്രയും ഇന്റെൻസ് ആയ അവതരണം കൊണ്ട് കൂടിയാണ്. രണ്ടര മണിക്കൂർ നീണ്ട് നിൽക്കുന്ന പെയിൻ എന്ന് വിശേഷിപ്പിക്കാം ഈ ചിത്രത്തെ.

🔸മുപ്പതുകളാണ് നമ്മുടെ കഥാ പശ്ചാത്തലം, ജാപ്പനീസ് സിനോ യുദ്ധം കൊടുമ്പിരി കൊണ്ടിരിക്കുന്ന കാലം. യുദ്ധത്തിന്റെ നിർണ്ണായകമായ ഒരു ഘട്ടത്തിൽ ജപ്പാൻ സേന റിപ്പബ്ലിക് ഓഫ് ചൈനയുടെ അന്നത്തെ തലസ്ഥാനമായ നാൻജിങ് പിടിച്ചെടുക്കുകയാണ്, തുടർന്നുള്ള മൂന്നാല് ആഴ്ചക്കാലം ജപ്പാൻ പട്ടാളം അവിടെ ക്യാമ്പ് ചെയ്തിരുന്നു, ഈ കാലയളവിൽ അവിടെ അരങ്ങേറിയ മനുഷ്യത്വ രഹിതം എന്ന് പറഞ്ഞാൽ കുറഞ്ഞ് പോകുന്ന സംഭവങ്ങളുടെ ദൃശ്യാവിഷ്കാരമാണ് ചിത്രം. അത്യാവശ്യം നല്ല തോതിൽ ഡിസ്റ്റർബിങ് ആണെന്ന് പ്രത്യേകം പറയേണ്ടതില്ലല്ലോ.

🔸ഇത്രയും പതിറ്റാണ്ടുകൾക്ക് ഇപ്പുറം ഇന്നും ജപ്പാൻ ചൈന ബന്ധത്തിൽ വിള്ളൽ വീഴ്ത്തി കൊണ്ട് നിൽക്കുന്ന ഒരു കറുത്ത അധ്യായമാണ് നാൻജിങ് മാസക്കർ, ചൈന സഹതാപ തരംഗം പിടിച്ച് പറ്റാനായി അന്നരങ്ങേറിയ സംഭവത്തെ ഓവർ ഗ്ലോറിഫൈ ചെയ്യുകയാണെന്ന് ജാപ്പനീസ് സർക്കാരും, അന്ന് തങ്ങൾക്ക് നേരിടേണ്ടി വന്ന നഷ്ടം ഒരു കാലത്തും സഹിക്കാനോ പൊറുക്കാനോ കഴിയുന്നതല്ല എന്ന് ചൈനയും ഒരാവർത്തി കൂടി പ്രസ്താവിച്ചിട്ട് കാലം ഒരുപാട് ആയില്ല. സത്യത്തിൽ പ്രസ്തുത സംഭവങ്ങളെ കുറിച്ചുള്ള രേഖകളും മറ്റും പോലും കിട്ടാൻ ബുദ്ധിമുട്ട് ഉള്ളവയോ പുറത്ത് വിടാൻ മടിക്കുന്നതോ ആണ്.

🔸നാല്പത്തിനായിരത്തിനും മൂന്ന് ലക്ഷത്തിനും ഇടയിൽ എവിടെയോ ആണ് മരിച്ചവരുടെ എണ്ണം, ഒരു തവണ എങ്കിലും പട്ടാളക്കാരാൽ ബലാത്സംഗം ചെയ്യപ്പെടാത്ത ഒരു യുവതി പോലും ആ നഗരത്തിൽ ഉണ്ടായിരുന്നില്ല എന്നൊരു വാചകം കൂടി വായിക്കാനിടയായി, എത്ര മാത്രം സത്യം ഉണ്ടെന്നും അറിവില്ല. കൊല്ലപ്പെട്ടവരേക്കാൾ എത്രയോ അധികമാണ് ശിഷ്ട കാലം അംഗ ഭംഗം സംഭവിച്ച് ജീവിക്കേണ്ടി വന്നിരുന്നവർ. ഇവയെല്ലാം തന്നെ ആ ഒരു മുപ്പത് നാല്പത് ദിവസം അവിടെ അരങ്ങേറിയ ഭീകരതയുടെ ശേഷിപ്പുകളാണ്, വാക്കുകളാൽ വിവരിക്കാൻ കഴിയാത്ത ഭീകരത.

🔸സ്ക്രീനിലെ ഓരോ മിനുട്ടും ഓരോ ഫ്രയിമും ഈ ഭീകരത ഒപ്പിയെടുക്കാൻ ശ്രമിച്ചിട്ടുണ്ട്, ഒരു പരിധി കഴിഞ്ഞാൽ അവ കണ്ടിരിക്കാൻ ബുദ്ധിമുട്ട് ആവുന്നുമുണ്ട്, ചിത്രത്തിൽ പറഞ്ഞ സംഭവങ്ങൾ എത്രത്തോളം യാഥാർഥ്യവുമായി ചേർന്ന് നിൽക്കുന്നതാണ് എന്ന് പറയാൻ ബുദ്ധിമുട്ടാണ്, ഈ സംഭവത്തെ കുറിച്ചുള്ള ഒഫീഷ്യൽ രേഖകളും മറ്റും രണ്ടാം ലോകമഹായുദ്ധത്തിൽ ജപ്പാൻ തോൽവി സമ്മതിക്കുന്നതിന് തൊട്ട് മുൻപേ നശിപ്പിക്കപ്പെട്ടതായാണ് അറിഞ്ഞത്. ഇതിൽ പറഞ്ഞ സംഭവങ്ങളുടെ ഒരു അമ്പത് ശതമാനം എങ്കിലും യാഥാർഥ്യമാണെങ്കിൽ അത് അപമാനമാണ്, ആകെയുള്ള മനുഷ്യത്വത്തിന് തന്നെ. താല്പര്യം ഉണ്ടെങ്കിൽ കണ്ട് നോക്കാം, ഒരാവർത്തി കൂടി പറയുന്നു ചിത്രം നല്ല തോതിൽ ഡിസ്റ്റർബിങ് ആണ്.

Verdict : Must Watch

DC Rating : 90/100

767. Hellraiser (1987)

Director : Clive Barker

Genre : Horror

Rating : 7/10

Country : UK

Duration : 94 Minutes

🔸സംവിധായകൻ ക്ളൈവ് ബാർകരുടെ കരിയർ എന്നത് ഒരു മിസ്റ്ററി ത്രില്ലർ സിനിമ പോലെയാണ്, എൺപതുകളിൽ സിനിമ സ്ക്രീനിലേക്ക് കടന്ന് വന്നപ്പോൾ തൊട്ട് പൊട്ടെൻഷ്യലിൽ പുള്ളി ഒരുപാട് വാഴ്ത്തപ്പെട്ടിട്ടുണ്ട്, ഹൊറർ സിനിമകളുടെ ഭാവി എന്ന് ക്ളൈവിനെ വിശേഷിപ്പിച്ചത് സാക്ഷാൽ സ്റ്റീഫൻ കിംഗ് തന്നെയാണ്, എന്നാൽ ഇത് പോലെ വലിയ പ്രശംസകളോട് പുള്ളി നീതി പാലിച്ചോ എന്നത് മറ്റൊരു ചോദ്യമാണ്, ഹൊററിന്റെ വഴിയേ തന്നെ പുള്ളി സഞ്ചരിച്ചു എങ്കിലും ഒരു കരിയർ ആൾട്ടറിങ് എന്നൊക്കെ വിശേഷിപ്പിക്കാവുന്ന സിനിമ പിന്നീട് ഒരിക്കലും ഉണ്ടായിട്ടില്ല, ഹെൽറെയ്‌സർ ക്ളോസ് ആയിരുന്നെന്ന് മാത്രം.

🔸അധികം ഹൊറർ സിനിമകൾക്ക് സാധിക്കാത്ത ഒരു കാര്യം ഈ ചിത്രത്തിന് കഴിഞ്ഞിട്ടുണ്ട്, വേറൊന്നുമല്ല ആളുകളെ ജെനുവിൻ ആയി പേടിപ്പിക്കുക എന്നത്. മറ്റ് പല ഹൊറർ സിനിമകളും ആവശ്യത്തിനും അനാവശ്യത്തിനും ജംപ് സ്‌കെയറുകളും മറ്റും സൃഷ്ടിച്ചെടുത്ത് വീണ ട്രാപ്പിൽ ഹെൽറെയ്‌സർ പോയില്ല, പിൽക്കാലത്ത് നേഴ്സറി കുട്ടികൾ എണ്ണമിട്ട് പഠിക്കുന്നത് പോലെ ഹെൽറെയ്‌സർ പത്ത് ഭാഗങ്ങൾ വന്നിട്ടുണ്ടെങ്കിലും ആദ്യത്തേതിന്റെ നിലവാരത്തിലേക്ക് സ്വാഭാവികമായും പോയില്ല. അതിൽ പലതും കണ്ടിട്ടില്ല, കാണാൻ തോന്നിയിട്ടില്ല, കാണാൻ സാധ്യതയുമില്ല.

🔸ഫ്രാങ്ക് എന്ന കഥാപാത്രത്തെ കാണിച്ച് കൊണ്ടാണ് സിനിമ ആരംഭിക്കുന്നത്, പുള്ളി ഒരുനാൾ ഒരു പസിൽബോക്സ് വാങ്ങുകയാണ്, ഒരു മെജീഷ്യന്റെ കയ്യിൽ നിന്നും. സ്വാഭാവികമായും കൗതുകം കാരണം പുള്ളി ആ പസിൽ സോൾവ് ചെയ്യാൻ ശ്രമിക്കുകയും തുടർന്ന് അവിടെ ഭീകരമായ ഒരു സംഭവം അരങ്ങേറുകയും ചെയ്യുന്നു. പിന്നീട് നമ്മൾ കാണുന്നത് ഫ്രാങ്കിന്റെ ശരീരത്തിലെ മജ്ജയും മാംസവും രക്തവും എല്ലാം ചിന്നി ചിതറി നിലത്ത് പരന്ന് കിടക്കുന്നതാണ്. ഇതിന്റെ കാര്യ കാരണങ്ങൾ ഒന്നും തുടക്കത്തിൽ വ്യക്തമാക്കുന്നേയില്ല.

🔸തുടർന്ന് ഏതൊരു ഇംഗ്ലീഷ് ഹൊറർ ചിത്രത്തിലെയും എന്നപോലെ ആ വീട്ടിലേക്ക് ഒരു പുതിയ കുടുംബം കടന്ന് വരികയാണ്, താമസക്കാരായിട്ട്. വന്ന് കേറുമ്പോൾ തന്നെ ദുർഗന്ധം വമിക്കുന്ന മുറികളും മറ്റും അവർക്ക് വിമ്മിട്ടവും പേടിയും നൽകുകയാണ്. വീട് വിൽക്കുന്നവനോ, അല്ലെങ്കിൽ ഏജന്റിനോ അതൊന്ന് നേരാംവണ്ണം വൃത്തിയാക്കി കൂടായിരുന്നോ എന്നൊക്കെയുള്ള സംശയങ്ങൾ അനുഭവപ്പെട്ടേക്കാം, പക്ഷെ കാര്യമാക്കണ്ട. തുടർന്ന് അവരുടെ കയ്യിൽ നിന്ന് സംഭവിക്കുന്ന ഒരു ചെറിയ തെറ്റ് കൊണ്ട് ഫ്രാങ്ക് പുനർജനിക്കുകയാണ്, ഇത്തവണ മനുഷ്യനായല്ല മറിച്ച് ഒരു ഭീകരസത്വമായി.

🔸കഥയിലും ചില സന്ദർഭങ്ങളിലും ചെറിയ കല്ല് കടി അനുഭവപ്പെട്ടേക്കാം, കാരണം പിന്നീട് വന്ന അനവധി ഹൊറർ സിനിമകളും മറ്റും പിന്തുടർന്നും, പകർത്തി എഴുതിയും ഒരു ശീലമാക്കിയതാണ് ഇതിൽ പലതും. ആ ഒരു വസ്തുത മാറ്റി നിർത്തിയാൽ അത്യാവശ്യം പേടിക്കാനുള്ള വക ഈ ചിത്രത്തിലുണ്ട്, ഒരു വൺ ഡയമെൻഷനിൽ പോകാതെ അത്യാവശ്യം താല്പര്യം ഉണർത്തുന്ന ചില സബ് പ്ലോട്ടുകളും ചിത്രത്തിലുണ്ട്, ചുരുക്കി പറഞ്ഞാൽ ഒരുതവണ കാണാനുള്ള വകുപ്പെല്ലാം ഈ ആദ്യ ഭാഗ ഹെൽറെയ്‌സറിൽ ഉണ്ടെന്ന് സാരം.

Verdict : Watchable

DC Rating : 65/100

766. The Tunnel (2001)

Director : Roland Suso Richter

Genre : Thriller

Rating : 7.7/10

Country : Germany

Duration : 167 Minutes

🔸ബെർലിൻ മതിൽ എന്നത് ഇന്ന് നമുക്ക് പലർക്കും പരിചിതം അല്ലാത്ത ഒരു കാര്യമാവും. നൂറ്റി അമ്പത്തി അഞ്ച് കിലോമീറ്റർ നീളത്തിൽ ഒരു മതിൽ, അതും പുരോഗമനവും മറ്റും ചൂട് പിടിച്ച ഇരുപതാം നൂറ്റാണ്ടിൽ ഒരു രാജ്യത്തെ രണ്ടായി പകുത്ത് മൂന്ന് പതിറ്റാണ്ടോളം നിലനിന്നിരുന്നു എന്ന് പറഞ്ഞാൽ ഈ കാര്യങ്ങളിൽ ഒന്നും അറിവില്ലാത്തയാൾ നെറ്റി ചുളിച്ചു എങ്കിൽ അതിൽ വലിയ അത്ഭുതമൊന്നും വേണ്ട, പക്ഷെ സത്യം സത്യമല്ലാതാവുന്നില്ലല്ലോ. ഒരു രീതിയിൽ പറഞ്ഞാൽ ഈ മതിലിന്റെ കഥയാണ് ചിത്രം, അതിനാണ് പ്രാധാന്യം.

🔸അറുപതുകളുടെ ആരംഭത്തിലാണ് ബെർലിൻ മതിൽ സ്ഥാപിക്കപ്പെട്ടത്, ജർമൻ ഡെമോക്രാറ്റിക് റിപ്പബ്ലിക്ക് ആരംഭിച്ച ഈ പദ്ധതിയുടെ പ്രധാന ഉദ്ദേശം ബെർലിൻ നഗരത്തെ കൃത്യമായി പകുത്ത് മാറ്റുക എന്നത് തന്നെ ആയിരുന്നു. ഈസ്റ്റ് ജർമനിയിൽ നിന്നും വെസ്റ്റ് ജർമനിയിലേക്കുള്ള പലായനത്തിന് തടയിടുക എന്നതായിരുന്നു പ്രധാന ഉദ്ദേശങ്ങളിൽ ഒന്ന്, ഫാസിസ്റ്റ് ഭരണ പ്രക്രിയയിൽ ജീവിതം ദുസ്സഹമായ വലിയൊരു ശതമാനം ആളുകൾ ഈ മതിൽ മറികടന്ന് രക്ഷപ്പെടാൻ ശ്രമിച്ചത് മറ്റൊരു ചരിത്രം, ഇത്തരമൊരു രക്ഷപ്പെടൽ ശ്രമത്തിന്റെ കഥയാണ് ഈ ചിത്രം.

🔸ഈസ്റ്റ് ജർമനിയിലെ അത്യാവശ്യം പേരും പ്രശസ്തിയും ഒക്കെയുള്ള കായിക താരമാണ് ഹെൻറി മേൽചിയോർ. നീന്തലാണ് പുള്ളിയുടെ ഇനം, ഈ വിഭാഗത്തിൽ ദേശീയ ചാമ്പ്യൻഷിപ്പ് അടക്കം ഒരുപാട് പുരസ്കാരങ്ങളും ബഹുമതികളും എല്ലാം ഹെൻറി കരസ്ഥമാക്കിയിട്ടുണ്ട്, രാജ്യത്തിൻറെ അഭിമാനം ആയാണ് ഹെൻറിയെ പലരും വാഴ്ത്തി പാടാറുള്ളത്. ഇങ്ങനെയൊക്കെ ആണ് കാര്യങ്ങളുടെ കിടപ്പ് എങ്കിലും രാഷ്ട്രീയത്തിൽ അപകടകരമായ ഒരു നിലപാടാണ് അയാളുടേത്, ഇപ്പോൾ ഭരിക്കുന്ന ഭരണപക്ഷത്തിന് എതിരെ ഉള്ള വികാരം തന്നെയെന്ന് പറയാം.

🔸ഫാസിസ്റ്റ് ഗവൺമെന്റിന് എതിരെ എല്ലാ കാലത്തും അയാൾ ശബ്ദം ഉയർത്തിയിരുന്നു, ഒരു റിബൽ എന്ന പൊതുധാരണ പുള്ളിയെ കുറിച്ച് മുന്നേ ഉള്ളതാണ് എങ്കിലും രാജ്യത്തെ ഉന്നത ഉദ്യോഗസ്ഥർ പങ്കെടുത്ത സമ്മാന ദാന ചടങ്ങിൽ അവരോട് വിധേയത്വം കാണിക്കാതിരുന്നപ്പോഴാണ് പുള്ളി അവരുടെ കണ്ണിലെ കരടായി മാറിയത്. അത് എന്ത് തന്നെ ആയാലും മതിലിന്റെ പണി പൂർത്തിയായി വിഭജനം പ്രാവർത്തികം ആവുന്നതിന് മുന്നേ ഹെന്രിയും കൂട്ടാളികളും അവിടെ നിന്ന് രക്ഷപ്പെടുകയാണ്, രഹസ്യ മാര്ഗങ്ങളിലൂടെ.

🔸പക്ഷെ പ്രശനം എന്താണെന്ന് വെച്ചാൽ രക്ഷപ്പെടുന്നതിന് ഇടെ ഹെന്രിക്കും സുഹൃത്തുക്കൾക്കും തങ്ങളുടെ വേണ്ടപ്പെട്ടവരെയും സുഹൃത്തുക്കളെയും മുഴുവൻ സ്വാതന്ത്രരാക്കാൻ കഴിഞ്ഞിട്ടില്ല. മറ്റ് മാർഗങ്ങൾ ഒന്നും ഇല്ലാഞ്ഞതിനാൽ ഇവർ എല്ലാവരും ചേർന്ന് ഒരു ഭൂഗർഭ തുരങ്കം അല്ലെങ്കിൽ അണ്ടർ ഗ്രൗണ്ട് ടണൽ സൃഷ്ടിക്കുകയാണ്. തുടർന്ന് അരങ്ങേറുന്ന സംഭവങ്ങൾ അത്യാവശ്യം ത്രില്ലിംഗ് ആയി തന്നെ ചിത്രം അവതരിപ്പിച്ചിട്ടുണ്ട്, യഥാർത്ഥ സംഭവങ്ങളാണ് ചിത്രത്തിന് ആധാരമാക്കിയിരിക്കുന്നത്, ഇത് പോലെ പന്ത്രണ്ട് ടണലുകൾ എങ്കിലും ഈ കാലയളവിൽ പണി കഴിപ്പിച്ചിരുന്നതായി പറയപ്പെടുന്നു.

Verdict : Very Good

DC Rating : 80/100

765. Sorry We Missed You (2019)

Director : Ken Loach

Genre : Drama

Rating : 7.6/10

Country : UK

Duration : 101 Minutes

🔸കെൻ ലോച് എന്ന പേര് മാത്രം മതിയാവും ഒരു സിനിമയ്ക്ക് അറ്റെൻഷൻ നേടാനായിട്ട്, അപ്പൊ പിന്നെ അദ്ദേഹത്തിന്റെ കരിയറിലെ മോസ്റ്റ് പ്രോബബിലി അവസാനത്തെ ചിത്രം എന്ന് പറയപ്പെടുന്ന, കാൻസ് പോലെയുള്ള വേദികളിൽ മികച്ച പ്രതികരണങ്ങൾ കൂടി കരസ്ഥമാക്കിയ ഒരു ചിത്രം ആണെങ്കിലോ, കണ്ടിരിക്കണം എന്നല്ലാതെ ഒന്നും തന്നെ പറയാനില്ല. ഈ ഹൈപ്പിനോടും, പേരിനോടും, പെരുമയോടും, പ്രതീക്ഷയോടും എല്ലാം നീതി പുലർത്തുന്നുണ്ട് എന്നത് തന്നെയാണ് സോറി വി മിസ്സ്ഡ് യു എന്ന ചിത്രത്തിന്റെ ഏറ്റവും വലിയ പ്രത്യേകതയും.

🔸ഒരു പത്ത് വർഷം മുൻപ് ലോകത്തെ ആകമാനം ബാധിച്ച സാമ്പത്തിക മാന്ദ്യത്തിന്റെ ബാക്കിപത്രം കൂടിയാണ് ഈ സിനിമയും അതിലെ കഥാപാത്രങ്ങളും. മാന്ദ്യം കാരണം ജോലി അടക്കം നഷ്ട്ടപ്പെട്ട അത്യാവശ്യം നല്ല രീതിയിൽ തന്നെ പണത്തിനായി ബുദ്ധിമുട്ടിയവരാണ് റിക്കി ടർനറും അയാളുടെ നാലംഗ കുടുംബവും, ഇപ്പോഴും ആ പരിതാപകരമായ സ്ഥിതിയിൽ നിന്ന് കരകയറി വരുന്നേ ഉള്ളൂ എന്ന് പറയാം. ഭാര്യ അബ്ബിയും മകൻ സെബ്ബും മകൾ ലിസയും ഉൾപ്പെടുന്നതാണ് റിക്കിയുടെ കുടുംബം.

🔸ചിത്രം കണ്ട് കൊണ്ടിരിക്കുമ്പോൾ തോന്നിയ വളരെ കൗതുകകരമായ ഒരു കാര്യമാണ് പലയിടത്തും ഒരു ഹോമേജ് എന്ന നിലയ്ക്ക് വിറ്റോറിയോ ഡി സിക്കയുടെ ഓൾ ടൈം ക്ലാസ്സിക് ബൈസിക്കിൾ തീവ്സിനെ ഓർമിപ്പിക്കുന്നത്. ക്ലൈമാക്സ് ഉൾപ്പെടെ ഉള്ള രംഗങ്ങളിൽ ചിത്രം ഈ പാത പിന്തുടരുന്നതായി അനുഭവപ്പെട്ടു, അതൊട്ടും തന്നെ അരോചകം ആയിരുന്നില്ല എന്ന് മാത്രമല്ല മനോഹരവും ആയിരുന്നു. രണ്ടും കൈകാര്യം ചെയ്യുന്ന വിഷയങ്ങളിലും പുലർത്തിയ സാമ്യം ഈ ഹോമേജിന് കൂടുതൽ ജെനുവിനിറ്റി നൽകുന്നെ ഉള്ളുതാനും.

🔸റിക്കി ഒരു മുൻ കൺസ്ട്രക്ഷൻ വർക്കറാണ്, മാന്ദ്യ കാലത്ത് ജോലി നഷ്ട്ടപ്പെട്ട ആൾ. വളരെ ബുദ്ധിമുട്ടിയാണ് പുള്ളി പിന്നീട് ഒരു ജോലി തരപ്പെടുത്തി എടുക്കുന്നത്, പ്രാഥമിക വിദ്യാഭ്യാസം ഒന്നും തന്നെ അയാൾക്കില്ല. ഡ്രൈവർ ജോലി ലഭിക്കാനായി തന്റെ പ്രിയപ്പെട്ട കാർ ഉൾപ്പെടെ വിറ്റാണ് അയാൾ ട്രക്ക് വാങ്ങുന്നത്. റിക്കിയുടെ ഭാര്യ അബ്ബി ഒരു നേഴ്‌സ് ആണ്, ദിവസേന പത്ത് പന്ത്രണ്ട് കേന്ദ്രങ്ങളിൽ കയറി ഇറങ്ങി പണിയെടുക്കേണ്ടി വരുന്ന ഒരു സാധാരണ ഹോം നേഴ്‌സ്. ഇവരുടെ മക്കളാണ് റിബൽ സ്വഭാവക്കാരനായ സെബ്ബും, ലിസയും.

🔸ട്രക്കിന്റെ വരവോടു കൂടി തന്റെ പ്രശ്നങ്ങൾക്ക് എല്ലാം ഒരു പരിഹാരം ആവും എന്ന് റിക്കി പ്രതീക്ഷിച്ചിരുന്നു എങ്കിലും ഒട്ടും ആശാവഹമായ രീതിയിലല്ല കാര്യങ്ങൾ പോയത്. പിന്നീട് ഈ കുടുംബത്തിന് എന്ത് സംഭവിക്കും എന്നതാണ് ചിത്രത്തിന്റെ പ്രമേയം. പവർഫുൾ എന്നൊക്കെ വിശേഷിപ്പിക്കാവുന്ന ക്ലൈമാക്സ് ഷോട്ട് ഉൾപ്പെടെ ഓർമയിൽ നിൽക്കുന്ന ഒരുപിടി രംഗങ്ങൾ ചിത്രത്തിലുണ്ട്, ട്രാജിക് ബാക്ക്ഗ്രൗണ്ട് ആണെങ്കിലും നല്ലൊരു ചിത്രമാണ് സോറി വി മിസ്സ്ഡ് യു, കാണാൻ ശ്രമിക്കുക.

Verdict : Very Good

DC Rating : 85/100

764. Never Rarely Sometimes Always (2020)

Director : Eliza Hittman

Genre : Drama

Rating : 7.2/10

Country : USA

Duration : 101 Minutes

🔸വളരെ സിമ്പിൾ ആയ ഒരു വാചകത്തിൽ ഒക്കെ പറയാവുന്ന ഒന്നാണ് നെവർ രേർലി സംടൈംസ് ഓൾവെയ്‌സ് എന്ന ചിത്രത്തിന്റേത്, ഒരുവേള ഇത്രയും ലളിതമായ ഒരു പ്ലോട്ടിൽ നിന്നും ഒന്നേമുക്കാൽ മണിക്കൂർ ദൈർഖ്യമുള്ള സിനിമ സൃഷ്ടിച്ച് എടുക്കാനാവുമോ എന്നോ അല്ലെങ്കിൽ ഒരു ഷോർട്ട് ഫിലിം ആയി ഇറക്കേണ്ട തീമിനെ വലിച്ച് നീട്ടിയ പോലെ ആവുമോ എന്നോ ഉള്ള സംശയങ്ങൾ എല്ലാം ഉണ്ടായേക്കാം, എന്നാൽ ഇവ രണ്ടും സിനിമ കഴിയുമ്പോഴേക്കും അസ്ഥാനത്ത് ആവുന്നുണ്ട് എന്നതാണ് പ്രസക്തമായ കാര്യം.

🔸പുതുമുഖ നടിയായ സിഡ്‌നി ഫ്ലാനികൻ ആണ് പ്രധാന കഥാപാത്രമായ ഓട്ടമിനെ അവതരിപ്പിച്ചിരിക്കുന്നത്, ഒരു കണ്ണീർ മഴ തോതിലേക്ക് പോകാമായിരുന്ന ത്രെഡ് ആണെങ്കിൽ കൂടിയും ആ വഴിക്ക് പോകാതെ അത്യാവശ്യം കെട്ടുറപ്പ് ഉള്ള രീതിയിൽ തിരക്കഥ തയാറാക്കിയ വ്യക്തിക്കും, തന്റെ ആദ്യ സിനിമ ആയിരുന്നിട്ട് കൂടിയും അതിന്റെ യാതൊരു പതർച്ചയും കാണിക്കാതെ പക്വമായ രീതിയിൽ അഭിനയിച്ച സിഡ്‌നിക്കും അഭിനന്ദനങ്ങൾ, ഒരുപരിധി വരെ ഈ ചിത്രം മുഴുവനായും അവരുടെ ചുമലിൽ ആയിരുന്നു.

🔸നല്ലൊരു ഗായിക കൂടിയാണ് സിഡ്‌നി, അത് ചിത്രത്തിന്റെ ഓപ്പണിങ് സീനുകളിൽ തന്നെ വ്യക്തമാവുന്നുണ്ട്. എന്നാൽ കഥയിലെ ടെർനിങ് പോയിന്റ് വരാൻ അധികം സമയം ഒന്നും എടുക്കുന്നില്ല, ഒട്ടും താമസിയാതെ തന്നെ സിഡ്‌നി തിരിച്ചറിയുകയാണ് താൻ ഗർഭിണി ആണ് എന്ന്. സിഡ്‌നിക്ക് പ്രായം കേവലം പതിനേഴ് വയസ്സ് മാത്രമാണ് എന്ന് ഓർക്കണം, ഇനി അതും പോരെങ്കിൽ ബന്ധുക്കളോ അടുപ്പക്കാരോ ആയി ചൂണ്ടിക്കാണിക്കാൻ അവൾക്ക് ആരും തന്നെയില്ല, ഒരു കസിൻ ഒഴിച്ച്.

🔸അണ്ടർ ഏജ്ഡ് ആയൊരു യുവതി ഗർഭിണി ആയാൽ നേരിടേണ്ടി വരുന്ന പ്രശ്നങ്ങൾ എല്ലാം നമ്മൾ പലയാവർത്തി പല സിനിമകളിൽ കൂടി കണ്ടതാണ്. ഇവിടെയും സ്ഥിതി ഗതികൾ വ്യത്യസ്തമല്ല, ഒരു കുഞ്ഞിനെ പ്രസവിക്കാനോ, വളർത്താനോ ഉള്ള വക ഒന്നും സിഡ്‌നിക്ക് ഇല്ല, അതിന്റെ പക്വതയോ, സാമ്പത്തിക ഭദ്രതയോ ഒന്നും തന്നെ. അപ്പോൾ പിന്നെ അവളുടെ മുന്നിലുള്ള നോർമലായ എന്നാൽ അത്യന്തം അപകടകരമായ മാർഗം അബോർഷൻ എന്നത് തന്നെയാണ്, അതിനും ഉണ്ട് അതിന്റെതായ പ്രശ്നങ്ങൾ. ഈ പ്രശ്നങ്ങളിലേക്ക് ഒക്കെയാണ് ചിത്രം പിന്നീട് ഇറങ്ങി ചെല്ലുന്നത്.

🔸വ്വേഫർ തിൻ ആയ പ്ലോട്ട് ആണെങ്കിലും അത്യാവശ്യം നന്നായി തന്നെ ചിത്രം തയാറാക്കിയിട്ടുണ്ട്, പ്രധാന രണ്ട് കഥാപാത്രങ്ങളും പ്രത്യേക പരാമർശം അർഹിക്കുന്ന പ്രകടനം തന്നെ കാഴ്ചവെച്ചിട്ടും ഉണ്ട്. ഡ്രാമ ചിത്രങ്ങൾ ഇഷ്ടപ്പെടുന്നവർക്ക് തീർച്ചയായും പരീക്ഷിക്കാവുന്ന ഒന്നാണ് ഈ ചിത്രം, ഈ ജോണറിനോട് താല്പര്യം ഉള്ളതാണെങ്കിൽ കൂടിയും കാര്യമായ രീതിയിൽ ആസ്വദിക്കാൻ കഴിഞ്ഞില്ല ഈ ചിത്രം എന്ന് പറയാം, കണ്ട സന്ദർഭത്തിന്റെ കുഴപ്പം കൊണ്ടാവാം, അപ്പോഴും ഇതൊരു നല്ല ചിത്രം അല്ലാതാവുന്നില്ല.

Verdict : Good

DC Rating : 70/100

763. Honey Boy (2019)

Director : Alma Har'el

Genre : Drama

Rating : 7.3/10

Country : USA

Duration : 94 Minutes

🔸ഓട്ടിസ് എന്ന പ്രധാന കഥാപാത്രത്തിന്റെ അച്ഛനായി എത്തിയ ഷിയാ ലെബോഫ് തന്നെയാണ് ഹണിബോയ് എന്ന ചിത്രത്തിന്റെ തിരക്കഥയും തയാറാക്കിയിരിക്കുന്നത്, മറ്റൊരു പ്രത്യേകത എന്താണെന്നാൽ പുള്ളി സ്വന്തം കഥയാണ് ഇതിനായി ഉപയോഗപ്പെടുത്തിയിരിക്കുന്നത് എന്നതാണ്. പൊതുവെ ഈ ബയോഗ്രഫിക്കൽ ചിത്രങ്ങളോട് വലിയ താല്പര്യമില്ല, അതിന് കാരണം ആ വ്യക്തിക്ക് മിക്കപ്പോഴും കൊടുത്തിരിക്കുന്ന വെള്ളപൂശൽ അല്ലെങ്കിൽ ഗ്ലോറിഫിക്കേഷൻ കൊണ്ട് തന്നെ. പക്ഷെ ഇവിടെ ഈ ചിത്രം ഒരു ചെറിയ കൗതുകം ഉണർത്തുന്നുണ്ട്, ഇതിൽ എത്രത്തോളം സത്യമുണ്ട് എന്നറിയാനുള്ള കൗതുകം.

🔸കഥയിലേക്ക് കടക്കുന്നതിന് മുന്നേ ഷിയാ ലെബോയെഫിനെ പറ്റി ചിലത് പറയണം, തന്റെ ചെറുപ്പ കാലത്ത് തന്നെ സെലിബ്രിറ്റി സ്റ്റാറ്റസ് സ്വന്തമാക്കിയ വ്യക്തിയാണ് ടിയാൻ. അഭിനയിച്ച ടീവി പരമ്പരകളിൽ ഒന്ന് മികച്ച പ്രേക്ഷക പിന്തുണ നേടിയപ്പോൾ അമേരിക്കയിലെ വലിയൊരു സമൂഹത്തിന്റെ വീടുകളിൽ എന്നും ഉച്ചരിക്കുന്ന പേരുകളിൽ ഒന്നായി മാറി അയാളുടേത്. ചെറുപ്പത്തിലേ നേടിയ ഈയൊരു ഫെയിം എല്ലാ രീതിയിലും പുള്ളിയുടെ ജീവിതത്തിൽ നെഗറ്റിവ് ആയി ബാധിച്ചിട്ടുണ്ട്. അതിന്റെ തലക്കനം, അഹങ്കാരം എന്നിവയെല്ലാം പല കാലങ്ങളിൽ അയാൾ പുറത്ത് കാണിച്ചിട്ടുണ്ട്.

🔸വളർന്ന് കഴിഞ്ഞപ്പോഴും പുള്ളിയുടെ മെന്റാലിറ്റിയിൽ വലിയ മാറ്റം ഒന്നും വന്നില്ല, ഈയൊരു അടുത്ത കാലം വരെ. ഇന്ത്യാന ജോൺസ് എന്ന ചിത്രത്തിൽ അഭിനയിച്ചതിന് പിന്നാലെ സംവിധായകനും ലെജന്റുമായ സ്റ്റീവൻ സ്പിൽബെർഗിന് എതിരെ ടിയാൻ നടത്തിയ ആരോപണങ്ങളും റാന്റുകളും, പിന്നീട് ഒരു ആരാധകനെ പരസ്യമായി തല്ലിയതും, പോലീസുകാരുമായി നടന്ന ചില കയ്യാങ്കളികളും എല്ലാം ഹോളിവുഡിലെ ബാഡ് ബോയ് എന്ന ഇമേജ് കൂട്ടിയിട്ടേ ഉള്ളൂ.

🔸ഈ ഒരു കാരണം കൊണ്ട് തന്നെ പ്രസ്തുത സംഭവങ്ങളിൽ പുള്ളിക്ക് പറയാനുള്ള സൈഡ് എന്താണ് എന്നറിയാനുള്ള ആകാംക്ഷ ഉണ്ടായിരുന്നു, എന്നാൽ മുകളിൽ സൂചിപ്പിച്ച കാര്യങ്ങളിലേക്കൊന്നും ചിത്രം പോവുന്നില്ല മറിച്ച് ശ്രദ്ധ മുഴുവൻ അതിന്റെ വേരുകളിലേക്കാണ് അതായത് ഈ കഥാപാത്രത്തിന്റെ ബാല്യകാലത്തേക്ക്. ഓട്ടിസ് എന്ന കുട്ടിയും അച്ഛനും ഇടയിലുള്ള ബന്ധമാണ് ഈ ചിത്രത്തിന്റെ ഫോക്കൽ പോയിന്റ്. ഓട്ടിസ് ഒരു വളർന്ന് വരുന്ന അഭിനേതാവാണ്, അവന്റെ അച്ഛൻ ആണെങ്കിൽ സ്ട്രീറ്റുകളിലും മറ്റും ആളുകളെ എന്റർറ്റെയിൻ ചെയ്യുന്ന ഒരു ലോക്കൽ ജോക്കർ.

🔸ഒട്ടീസിന്റെ അമ്മയുമായി പിരിഞ്ഞിട്ട് വർഷങ്ങളായി എങ്കിലും അവൻ അത്യാവശ്യം പേരെടുത്ത് തുടങ്ങിയപ്പോഴാണ് അവന്റെ അച്ഛൻ മടങ്ങി വന്നത്, പിന്നീട് അവിടുന്നങ്ങോട്ട് അയാളായിരുന്നു അവന്റെ ഗാർഡിയൻ. ഇരുവർക്കും ഇടയിലെ ബന്ധം അത്ര സ്മൂത്ത് ഒന്നും ആയിരുന്നില്ല, പത്ത് വർഷങ്ങൾക്ക് ഇടവേളയിൽ രണ്ട് കാലഘട്ടത്തിലെ കഥയാണ് ഈ ചിത്രം പറയുന്നത്. ഈ വർഷം കണ്ട മികച്ച ചിത്രങ്ങളിൽ ഒന്നാണ് ഹണീ ബോയ്, തീർച്ചയായും കാണാൻ നിർദ്ദേശിക്കുന്നു.

Verdict : Must Watch

DC Rating : 90/100

762. Come And See (1985)

Director : Elem Klimov

Genre : War

Rating : 8.3/10

Country : Russia

Duration : 142 Minutes

🔸നമ്മൾ മനുഷ്യർ ഇന്ന് സാമൂഹികപരമായും രാഷ്ട്രീയപരമായും നേരിടുന്ന ഏറ്റവും വലിയ വെല്ലുവിളികളിൽ ഒന്നാണ് ഫാസിസം എന്ന വസ്തുത. ഫാസിസത്തെ ഗ്ലോറിഫൈ ചെയ്തും, വിമർശന വിധേയമാക്കിയും, അതിന്റെ ക്രൂര മുഖം അതേപടി ദൃശ്യവൽക്കരിച്ചും എല്ലാം അനവധി സൃഷ്ട്ടികൾ പുറത്തിറങ്ങിയിട്ടുണ്ട്, ചിലത് പുസ്തക രൂപത്തിൽ, മറ്റ് ചിലത് സിനിമാ രൂപത്തിൽ, പിയാനിസ്റ്റ് പോലെയുള്ള ചിത്രങ്ങളെ ഒക്കെ ഈ ഗണത്തിൽ പെടുത്താവുന്നതാണ്. ഈ സിനിമാ രൂപേണ പുറത്തിറങ്ങിയവയിൽ ഏറ്റവും ഭീകരമായ ചിത്രങ്ങളിൽ ഒന്നാണ് കം ആൻഡ് സീ, അതിൽ ചോദ്യം ഏതുമില്ല.

🔸പറഞ്ഞ് ഫലിപ്പിക്കാൻ ഇച്ചിരി പണിയാണ് ഈ ചിത്രം, പണിയാണ് എന്നല്ല അസാധ്യം തന്നെ എന്ന് പറയാം. രണ്ടര മണിക്കൂർ നീണ്ട് നിൽക്കുന്ന പെയിൻ എന്നൊക്കെ പറഞ്ഞ് വിടാം ഈ സിനിമയെ, അതെ നിർവാഹമുള്ളൂ. ഒരു തവണ എങ്കിലും നമ്മൾ സിനിമാ ആസ്വാദകർ അറിഞ്ഞിരിക്കേണ്ട അല്ലെങ്കിൽ അനുഭവിക്കേണ്ട ഒരു എക്സ്പീരിയൻസ് ആണ് പ്രസ്തുത ചിത്രം. യുദ്ധം, യുദ്ധം മാത്രമാണ് ഈ സിനിമയുടെ വിഷയം, ആദ്യാവസാനം കൈകാര്യം ചെയ്യുന്നത് യുദ്ധഭീകരതയും, ഇതിനായി ഫ്ലായോർ എന്ന കഥാപാത്രത്തെ ദത്ത് എടുക്കുകയാണ്.

🔸തന്റെ ഈ ഇട്ടാവട്ട ഗ്രാമത്തിനും, പരിചിതമായ ചുറ്റുപാടിനും അപ്പുറം നടക്കുന്ന കാര്യങ്ങളെ പറ്റി കാര്യമായ ബോധ്യം ഒന്നും ഇല്ലാത്തയാളാണ്‌ ഫ്ലായോർ എന്ന് തുടക്കത്തിൽ കാഴ്ചക്കാരന് സംശയം തോന്നിയേക്കാം, അത് ഒരു പരിധി വരെ ശെരിയുമാണ്. യുദ്ധം കൊടുമ്പിരി കൊണ്ടിരിക്കുന്ന സമയത്താണ് മുതിർന്നവരുടെ വാക്ക് കേൾക്കാതെ മണലിനുള്ളിൽ നിന്നും അവൻ പട്ടാളക്കാരുടെ ആയുധങ്ങൾ കുഴിച്ചെടുക്കുന്നത്, ഈ ഒരു അറിവില്ലായ്മയ്ക്ക് അവന് കൊടുക്കേണ്ടി വരുന്നത് വലിയ വിലയാണ്.

🔸തന്റെ പരിചിതമായ ചുറ്റുപാടുകളിൽ നിന്നും യുദ്ധത്തിന്റെ ഭീകരത അതിന്റെ പരകോടിയിൽ നിലകൊള്ളുന്ന യുദ്ധ മുഖത്തേക്ക് അവൻ വലിച്ചിഴയ്ക്കപ്പെടുകയാണ്. പിന്നീടങ്ങോട്ട് അവന്റെ കണ്ണുകളിലൂടെ നമ്മളും ആ ഭീകരത കണ്ടറിയുകയാണ്, ഈ ക്രൂരതയുടെ ഓരോ അധ്യായം കഴിയുമ്പോഴും ചെറുതായൊന്ന് ആശ്വസിച്ച് വരുമ്പോൾ അതിലും ഭീകരമായ കാഴ്ചകൾ തന്ന് ചിത്രം നിങ്ങളെ പേടിപ്പെടുത്തി കൊണ്ടേയിരിക്കും. ഒടുവിൽ അവസാനം ഈ നിഷ്ട്ടൂരമായ കാര്യങ്ങൾ എല്ലാം ഇതിലും ഭീകരമായ തോതിൽ യഥാർത്ഥ ജീവിതത്തിൽ സംഭവിച്ചതാണ് എന്ന് തിരിച്ചറിയുന്നിടത്ത് നിങ്ങൾ തളർന്ന് പോവുകയും ചെയ്യും.

🔸ഞാൻ കണ്ട ഏറ്റവും മികച്ച യുദ്ധ വിരുദ്ധ ചിത്രമാണ് കം ആൻഡ് സീ, യുദ്ധ വിരുദ്ധ മനോഭാവം വളർത്തിയെടുക്കാൻ ഏറ്റവും നല്ല മാർഗം യുദ്ധത്തിന്റെ ഭീകര വശം തുറന്ന് കാട്ടുക എന്നതാണെന്ന് നല്ല രീതിയിൽ തന്നെ സിനിമ അടയാളപ്പെടുത്തുന്നുണ്ട്. സിനിമ നല്ല തോതിൽ ഡിസ്റ്റർബിങ് ആണെന്ന് പറയേണ്ടതില്ലല്ലോ, കേന്ദ്ര കഥാപാത്രമായ കുട്ടി സൈലന്റ് ആയി കരയുന്ന രംഗവും, ജനനേന്ദ്രിയം മുറിഞ്ഞ അവസ്ഥയിൽ ഇഴയുന്ന മനുഷ്യന്റെ ചിത്രവും ഉൾപ്പെടെ ഭീകരമായ അനവധി കാഴ്ചകൾ നിങ്ങളിലേക്ക് ഈ ചിത്രം ഇൻജെക്റ്റ് ചെയ്ത് തരും, തീർച്ചയായും വാക്കുകളിൽ പറഞ്ഞ് തീർക്കാനാവാത്ത ഒരു 'കാഴ്ച' തന്നെയാണീ സിനിമ.

Verdict : Must Watch

DC Rating : 100/100

761. War Of Arrows (2011)

Director : Kim Han-Min

Genre : Action

Rating : 7.2/10

Country : South Korea

Duration : 128 Minutes

🔸ഒരു കംപ്ലീറ്റ് പാക്കേജ് എന്നൊക്കെ വിശേഷിപ്പിക്കാവുന്ന ഒന്നാണ് വാർ ഓഫ് ആരോസ് എന്ന ചിത്രം. ത്രില്ലിന് ത്രിൽ, ഇമോഷന് ഇമോഷൻ, ആക്ഷന് ആക്ഷൻ, സസ്പെന്സിന് സസ്പെൻസ് തുടങ്ങി ഇത്തരമൊരു ചിത്രത്തിൽ നിന്ന് നമുക്ക് പ്രതീക്ഷിക്കാവുന്ന വകകൾ മിക്കതും ഇവിടുണ്ട്, എന്നാൽ ഒരു ക്രൗഡഡ് ഫീൽ സൃഷ്ട്ടിക്കുന്നുമില്ല എന്നതാണ് പ്ലസ് പോയിന്റ്. ഒരു ആക്ഷൻ ബേസ്ഡ് ചിത്രം ആണെങ്കിൽ കൂടിയും കഥാപാത്രങ്ങൾ കൺവെ ചെയ്യുന്ന വികാരങ്ങളും മറ്റും കാഴ്ചക്കാരന് റിലേറ്റ് ചെയ്യാൻ പറ്റുന്നതാണ് എന്നിടത്താണ് സിനിമ മികച്ചതായി മാറുന്നത്, പ്രതീക്ഷകളോട് നീതി പാലിച്ചത് എന്ന് തന്നെ പറയാം.

🔸ഒരു ചെറിയ ബാക്ക് സ്റ്റോറി പറഞ്ഞ് കൊണ്ടാണ് സിനിമ ആരംഭിക്കുന്നത്, പതിനേഴാം നൂറ്റാണ്ടിലെ ഒരു കൊറിയൻ രാജ്യമാണ് പശ്ചാത്തലം. ഒരു ദിവസം രാത്രി രാജ്യത്തിൻറെ മർമ്മ പ്രധാനമായ ഒരു ഭാഗത്ത് കലാപം പൊട്ടിപ്പുറപ്പെടുകയാണ്, കലാപമാണോ അതോ ശത്രു രാജ്യത്തിൻറെ അക്രമണമാണോ എന്ന് വ്യക്തമാക്കുന്നില്ല എങ്കിലും ഈ കലാപകാരികൾ മേൽക്കോയ്മ നേടുകയാണ്. ഈ ശത്രുക്കളിൽ നിന്നും രക്ഷ നേടിക്കൊണ്ട് തന്റെ രണ്ട് മക്കളെയും കൂട്ടി രക്ഷപെടാൻ ശ്രമിക്കുകയാണ് രാജ്യത്തെ ഒരു ആർമി ഉദ്യോഗസ്ഥൻ.

🔸ഈ പലായന ശ്രമം പുള്ളിയെ സംബന്ധിച്ച് ഒട്ടും നല്ല രീതിയിൽ അല്ല അവസാനിച്ചത്, തന്റെ മക്കളെ ആ കുരുതി കളത്തിൽ നിന്നും രക്ഷിക്കാൻ കഴിഞ്ഞെങ്കിലും ആ ഉദ്യോഗസ്ഥന് തന്റെ ജീവൻ അതിനായി ബലി കൊടുക്കേണ്ടി വന്നു. ഇത് ഉദ്ദേശം പതിമൂന്ന് വർഷങ്ങൾക്ക് മുൻപ് അരങ്ങേറിയ സംഭവമാണ്, ഈ സംഭവത്തിന് കഥയുമായുള്ള ലിങ്ക്, ഈ കഥാപാത്രങ്ങൾക്ക് പിന്നീട് എന്ത് സംഭവിച്ചു എന്നതൊക്കെ തല്ക്കാലം പറയുന്നില്ല, കണ്ട് തന്നെ അറിയുക. തുടർന്നുള്ള കഥ അരങ്ങേറുന്നത് 1636ഇൽ ആണ്, മറ്റൊരിടത്ത്.

🔸ഒരു കല്യാണത്തതിനായുള്ള കോപ്പ് കൂട്ടലിലാണ് സർവരും, തങ്ങളുടെ പ്രിയപ്പെട്ട ചോയി ജാൻ ഇന്ന് വിവാഹിതയാവുകയാണ്. എന്നാൽ അന്നേ ദിവസം വിവാഹം അരങ്ങേറേണ്ടിയിരുന്ന വേദിയിൽ ഒരു ദുരന്തം അരങ്ങേറുകയാണ്, അവിടെ നടന്നത് ഒന്നും തന്നെ ആരും പ്രതീക്ഷിച്ചതു ആഗ്രഹിച്ചതോ ആയ കാര്യങ്ങൾ ആയിരുന്നുമില്ല. എന്നാൽ ഇതിനൊരു പരിഹാരം കാണാനും പ്രശനം അവസാനിപ്പിക്കാനുമായി ഒരു കഥാപാത്രം കച്ച കെട്ടി ഇറങ്ങുന്നിടത്ത് ചിത്രം മറ്റൊരു ടോണിലേക്ക് മാറുകയാണ്, തുടർന്നങ്ങോട്ട് ഫാസ്റ്റ് പെയ്‌സ്ഡ് ആക്ഷന്റെ അയ്യര് കളിയാണ്.

🔸ആക്ഷൻ സിനിമാ ആരാധകർക്ക് തീർച്ചയായും കാണാവുന്ന, നൂറ് ശതമാനം എന്റർടെയിൻമെന്റ് ഉറപ്പ് നൽകാൻ കഴിയുന്ന ഒന്നാണ് വാർ ഓഫ് ആരോസ് എന്ന ചിത്രം. ചിത്രത്തിന്റെ രണ്ടാം പാതിയൊക്കെ ഒരു മിനിറ്റ് പോലും സ്ലോ ഡൗൺ ചെയ്യാത്ത കിടിലൻ പേസിലാണ് കഥ പോവുന്നത്, ഒരു മികച്ച ക്ലൈമാക്‌സും ചിത്രത്തിന്റെ ഹൈലൈറ്റാണ്. കൂടുതൽ ആലോചിച്ച് കീറി മുറിച്ച് പരിശോധിക്കേണ്ട ആവശ്യകത ഒന്നും ചിത്രത്തിൽ ഇല്ല, ഒരു ആക്ഷൻ ചിത്രം എന്ന് പറയുമ്പോൾ പ്രതീക്ഷിക്കുന്നത് എന്താണോ, അത് കിട്ടും, ദാറ്റ്സ് ഓൾ, കാണാൻ ശ്രമിക്കുക.

Verdict : Very Good

DC Rating : 82/100

760. Fireworks (1997)

Director : Takeshi Kitano

Genre : Drama

Rating : 7.9/10

Country : Japan

Duration : 103 Minutes

🔸ടാകേശി കിട്ടാനോയുടെ സിനിമകളോട് എപ്പോഴും ഒരു പ്രത്യേക താല്പര്യം ഉണ്ടായിരുന്നു, നമുക്ക് പരിചിതമായ ഒരു വിഷയത്തെ ഒട്ടും പ്രതീക്ഷിക്കാത്ത രീതിയിൽ ഒരു പുതുമയോടെ അവതരിപ്പിക്കുന്ന കാര്യത്തിൽ ആശാൻ എല്ലാ കാലത്തും കിടു ആയിരുന്നു. ഒരു ഗ്യാങ്‌സ്റ്റർ ചിത്രത്തെ സൈക്കോളജിക്കൽ ആയൊക്കെ അവതരിപ്പിച്ച സോനടൈൻ പോലുള്ള ഉദാഹരണങ്ങൾ വേറെയും കാണിച്ച് തരാനാവും, അത്തരത്തിൽ ഒന്നാണ് ഫയർവെർക്സ് എന്ന ചിത്രം, ഒരുപക്ഷെ അദ്ദേഹത്തിന്റെ ഏറ്റവും മികച്ച വർക്.

🔸പ്ലെയിങ് യുവർ കാർഡ്‌സ് ക്ളോസ് റ്റു ദി ചെസ്റ്റ് എന്നൊരു ഫ്രയ്സ്‌ ഉണ്ട് ഇംഗ്ളീഷിൽ, അതായത് തന്റെ ഉദ്ദേശമോ ഗെയിം പ്ലാനോ ഒന്നും തന്നെ വെളിപ്പെടുത്താതെ കാര്യങ്ങൾ പോവുന്നതിന് അനുസരിച്ച് പോവുക, അവസരത്തിനായി കാത്ത് നിൽക്കുക, അവസരം ഒത്താൽ കേറി കളിക്കുക എന്നൊക്കെയുള്ള അർത്ഥങ്ങളാണ് അതിന്. ഇവിടെ സംവിധായകൻ പിന്തുടരുന്നതും ഇതേ ശൈലിയാണ്, എന്താണ് നടക്കുന്നത് എന്നൊന്നും തുടക്കത്തിൽ വെളുപ്പെടുത്തുന്നെ ഇല്ല, കോമ്പ്ലിക്കേഷനും കൺഫ്യുഷനും എല്ലാം ആവശ്യത്തിന് ഉണ്ട് കഥയിൽ ഈ പോർഷനിൽ.

🔸ഈ കാര്യം കൂടുതൽ വ്യക്തമാവുക ഒരു ഉദാഹരണം പറഞ്ഞാലാവും, അതായത് ചിത്രത്തിന്റെ നിർണ്ണായകം അല്ലെങ്കിൽ മർമ്മ പ്രധാനം എന്നൊക്കെ വിശേഷിപ്പിക്കാവുന്ന ഒരു രംഗം ഒരു മാളിൽ വെച്ച് അരങ്ങേറുന്ന ഷൂട്ടൗട്ട് സീനാണ്, ഈ സീൻ പലയാവർത്തി കാണിക്കുന്നുണ്ട് സിനിമയിൽ, കഥയുടെ പല പോയിന്റുകളിൽ. എന്നാൽ ഈ സീനിന്റെ പ്രസക്തി എന്ത്, സത്യത്തിൽ എന്താണ് ഇവിടെ അരങ്ങേറുന്നത് എന്നൊക്കെ വ്യക്തമാവുക അവസാനത്തോട് അടുക്കുമ്പോൾ മാത്രമാണ്, ഇങ്ങനെ ചില പൊടികൈകൾ സംവിധായകന്റേതായി ചിത്രത്തിലുണ്ട്.

🔸കഥയിലേക്ക് വരിക ആണെങ്കിൽ നായക കഥാപാത്രമായ നിഷിയെ അവതരിപ്പിച്ചിരിക്കുന്നത് സംവിധായകനായ തകേശി കിട്ടനോ തന്നെയാണ്. നിഷി ഒരു മുൻ പൊലീസുകാരനാണ്, എന്നാൽ ഒരു പ്രത്യേക സംഭവം കാരണം അദ്ദേഹത്തിന് പോലീസിൽ നിന്നും വിരമിക്കേണ്ടി വന്നു, അദ്ദേഹത്തിന് മാത്രമല്ല പുള്ളിയുടെ കുറച്ച് സുഹൃത്തുക്കൾക്കും, ഇതിന്റെ കാരണം ഒക്കെ തല്ക്കാലം അവിടെ നിൽക്കട്ടെ. അത് എന്ത് തന്നെ ആയാലും ഈ കഥാപാത്രങ്ങളുടെ ഇന്നത്തെ നില കുറച്ച് മോശമാണ്, സാമ്പത്തികമായും മറ്റും പിടിച്ച് നില്ക്കാൻ ഇവരെല്ലാം ബുദ്ധിമുട്ടുന്നുണ്ട്, മുൻ പോലീസുകാരൻ എന്ന പേര് ഈ പ്രശ്നങ്ങളുടെ ആക്കം കൂട്ടുന്നേയുള്ളൂ.

🔸നിഷിയുടെ കാര്യത്തിൽ സ്ഥിതിഗതികൾ കുറച്ച് കൂടി മോശമാണ്, പുള്ളിയുടെ ഭാര്യ കാൻസർ ബാധിതയാണ്, എന്ന് മാത്രമല്ല രോഗത്തിന്റെ അവസാന സ്‌റ്റേയ്ജിലാണ് അവരിന്ന്, കുറച്ച് ആഴ്ചകൾ അല്ലാതെ വലിയ ആയുസ്സൊന്നും ഡോക്ടർമാർ പോലും പ്രതീക്ഷിക്കുന്നില്ല. എവെരി മാൻ ഹാസ് ഹിസ് ബ്രെയ്ക്കിങ് പോയിന്റ് എന്ന വാചകത്തോട് നീതി പാലിച്ച് ഒരു ഘട്ടം കഴിയുമ്പോൾ നിഷി ഒരു ദൗത്യത്തിന് ഇറങ്ങി തിരിക്കുന്നതും, തുടർന്ന് അരങ്ങേറുന്ന കോലാഹലങ്ങളുമാണ് ചിത്രത്തിന്റെ കഥ. ഒരു മികച്ച ചിത്രം തന്നെയാണ് ഫയർവെർക്സ്, കാണാൻ ശ്രമിക്കുക.

Verdict : Very Good

DC Rating : 83/100

759. Whisper Of The Heart (1995)

Director : Yoshifumi Kondō

Genre : Animation

Rating : 7.9/10

Country : Japan

Duration : 111 Minutes

🔸ജാപ്പനീസ് അനിമേ സിനിമകൾ എന്നത് സത്യത്തിൽ കടല് പോലെയാണ്, എന്തായാലും കണ്ടിരിക്കേണ്ടത് എന്നൊക്കെയുള്ള വിശേഷണം അർഹിക്കുന്നവ തന്നെ ചുരുങ്ങിയത് നൂറിൽ അധികം ഉണ്ടാവും, ലൈവ് ആക്ഷൻ ചിത്രങ്ങൾ പലപ്പോഴും നൽകുന്നതിനേക്കാൾ ഇമോഷൻസ്, സ്‌ട്രൈക്കിങ് മൊമെന്റ്‌സ്‌ എന്നിവ നൽകാൻ ഈ സിനിമകളിൽ മിക്കതിനും കഴിഞ്ഞിട്ടുണ്ട് എന്നത് അത്ഭുതപ്പെടുത്തുന്ന വസ്തുതയാണ്. ഈ പട്ടികയിൽ നിസ്സംശയം ഉൾപ്പെടുത്താൻ കഴിയുന്ന ഒന്നാണ് വിസ്പർ ഓഫ് ഹാർട്ട് എന്ന ചിത്രം.

🔸പൊതുവെ ജാപ്പനീസ് ചിത്രങ്ങൾക്ക് വെസ്റ്റേൺ ഓഡിയൻസ് കുറവാണ് എന്നൊരു വാദം ഒക്കെ നിലവിലുണ്ട്, അത് ഒരു പരിധി വരെ ശെരിയാണെന്ന് തോന്നിയിട്ടുമുണ്ട്. പക്ഷെ ഈ ചിത്രത്തിന്റെ കാര്യത്തിലെ വിരോധാഭാസം എന്താണെന്നാൽ അനിമേ ഗിബ്‌ളി ആരാധകരിൽ പലരും തന്നെ ഈ ചിത്രം കണ്ടിട്ടില്ല എന്നതാണ്, അതിന് ഒരു കാരണവുമുണ്ട്. യോഷിഫുമി കൊണ്ടോ എന്ന സംവിധായകന്റെ പേര് വിഷനറിമാരായ ജാപ്പനീസ് സംവിധായകർക്ക് ഇടയിൽ നിങ്ങൾക്ക് പറഞ്ഞ് കേൾക്കാനാവില്ല, അല്ലെങ്കിൽ കേൾക്കാനിടയില്ല.

🔸തന്റെ ജീവിതത്തിൽ ഒരേയൊരു സിനിമയെ യോഷിഫുമി കൊണ്ടോ സംവിധാനം ചെയ്തിട്ടുള്ളൂ, അതാണ് വിസ്പർ ഓഫ് ദി ഹാർട്ട്, നിർഭാഗ്യവശാൽ മറ്റൊന്ന് ചെയ്യുന്നതിന് മുന്നേ അദ്ദേഹം മരണമടഞ്ഞു. തന്റെ ആദ്യത്തെ സിനിമ തന്നെ മികച്ചതാക്കിയ ഒരുപാട് സംവിധായകരൊന്നും ഇല്ല, അത് കൂടി ഓർക്കുമ്പോഴാണ് യോഷിഫുമി കൊണ്ടോയുടെ വിയോഗം എത്ര മാത്രം വലിയ നഷ്ട്ടം ആണെന്ന തിരിച്ചറിവ് ഉടലെടുക്കുന്നത്. കുറച്ച് വർഷങ്ങൾക്ക് ശേഷം സ്പിൻ ഓഫ് രൂപത്തിൽ ഒരു ചിത്രം കൂടി ഇതിൽ നിന്നും ഉടലെടുത്തിട്ടുണ്ട്, അതാണ് ദി കാറ്റ് റിട്ടേൺസ്.

🔸അറ്റ് ദി കോർ, കഥയിൽ വലിയ പുതുമ ഒന്നും നിങ്ങൾക്ക് കാണാൻ കഴിഞ്ഞേക്കില്ല. ലളിതമായി പറയുക ആണെങ്കിൽ വിസ്പർ ഓഫ് ദി ഹാർട്ടിന്റെ കഥ ഒരു പെൺകുട്ടി തന്റെ അഭിരുചി മനസിലാക്കുന്നതും സ്വപ്നം സാധ്യമാക്കാൻ വേണ്ടി പരിശ്രമിക്കുന്നതും ഒക്കെയാണ്, ഈ ഒരു പ്ലോറ്റ്ലൈനിൽ തന്നെ അനവധി സിനിമകൾ വിവിധ ഭാഷകളിലായി കാണാൻ കഴിഞ്ഞേക്കും. അപ്പൊ പിന്നെ ഈ സിനിമയെ എന്താണ് സ്പെഷ്യലാക്കി മാറ്റുന്നത് എന്ന് ചോദിച്ചാൽ അത് ആ കഥയുടെ ട്രീറ്റ്‌മെന്റ് തന്നെയാണ്, റിലേറ്റ് ചെയ്യാൻ കഴിയുന്ന ഊഷ്മളമായ രീതിയിലുള്ള അവതരണം.

🔸പതിനാല് വയസുകാരി പുസ്തകപ്പുഴു ആയ ഷിസുകു ആണ് നമ്മുടെ പ്രധാന കഥാപാത്രം, ഒരു എഴുത്തുകാരിയാവണം എന്നാണ് അവളുടെ ആഗ്രഹം എങ്കിലും അത് സാധ്യമാക്കാനായി കാര്യമായ പ്രയത്നം ഒന്നും ഇതുവരെ നടത്തിയിട്ടില്ല, ഈ കഥാപാത്രം ഒരു പ്രത്യേക സാഹചര്യത്തിൽ മറ്റൊരാളുമായി പ്രണയത്തിൽ ആവുന്നതും അത് അവളെ സെല്ഫ് റിയലൈസേഷന്റെ പാതയിലേക്ക് കൊണ്ടുപോവുന്നതും എല്ലാമാണ് ചിത്രത്തിന്റെ പ്രമേയം. അനിമേ അനിമേഷൻ ആരാധകർക്ക് ഒന്ന് ശ്രമിച്ച് നോക്കാവുന്നതാണ്, നല്ല ചിത്രമാണ്.

Verdict : Very Good

DC Rating : 85/100

758. Anantaram (1987)

Director : Adoor Gopalakrishnan

Genre : Drama

Rating : 7.4/10

Country : India

Duration : 126 Minutes

🔸അനന്തരം എന്ന ചിത്രം ഒരു ചുഴി പോലെയാണ്, നമ്മുടെ കണ്മുന്നിൽ ഉള്ള ചോദ്യങ്ങൾക്ക് ഉത്തരം തരാതെ കൂടുതൽ ചോദ്യങ്ങൾ ഇട്ട് തന്ന് അവസാനം കാണുന്ന കാഴ്ചക്കാരനെ തന്നെ വലിച്ചെടുത്ത് ചേർത്ത് നിർത്തുന്ന തരം ഒരു ചുഴി. കാണുന്ന നേരം അത്രയും പിടിച്ചിരുത്തുന്ന ഒരനുഭവം തന്നെയാണ് അനന്തരം, പക്ഷെ ആ അനുഭവം പൂർത്തിയാവുന്നതും ചിത്രം നൽകുന്ന അനുഭൂതി തുടങ്ങുന്നതും അതവസാനിച്ച ശേഷമാണ്, ചോദ്യങ്ങളാണ് അവശേഷിക്കുന്നത്, ഒരുപാട് ചോദ്യങ്ങൾ. സത്യമേത്, മിഥ്യയേത് എന്നിങ്ങനെയുള്ള ചോദ്യങ്ങൾ.

🔸യാഥാർഥ്യവും ഇമാജിനേഷനും എല്ലാം ഇടകലർന്ന് ചേർന്ന് ഇവയിൽ ഏത്, എന്ത്, എങ്ങിനെ എന്ന് വ്യക്തമാവാത്ത തലത്തിലേക്ക് പോവുന്നുണ്ട് ഈ ചിത്രത്തിന്റെ കഥ. അടൂർ ചിത്രങ്ങൾ അധികമൊന്നും കണ്ടിട്ടില്ല, പണ്ട് അതായത് കുറച്ചധികം വർഷങ്ങൾക്ക് മുൻപ് ടെലിവിഷൻ ചാനലുകളിൽ എന്നോ മതിലുകൾ ടെലികാസ്റ്റ് ചെയ്തപ്പോൾ കണ്ടിട്ടുണ്ട് എന്നല്ലാതെ അദ്ദേഹത്തിന്റെ സിനിമകൾക്ക് പിറകെ പോയിട്ടില്ല, അദ്ദേഹത്തിന്റെ സിനിമകൾ ആസ്വദിക്കാനുള്ള ടെയ്സ്റ്റോ, ക്ഷമയോ ഉള്ളതായി തോന്നിയിട്ടുമില്ല.

🔸ഒടുവിൽ ഈ അടുത്താണ് ഒരു സുഹൃത്തുമായുള്ള സംഭാഷണത്തിനിടെ അനന്തരം കടന്ന് വന്നത്, കണ്ടിട്ടില്ലെങ്കിൽ നഷ്ടമാണ് എന്ന വാക്കിന്മേൽ മാത്രം വിശ്വാസമർപ്പിച്ച് കാണുകയായിരുന്നു. ടൈറ്റിൽ കാണിച്ച് കൊണ്ടിരിക്കെ ബാക്ക്ഗ്രൗണ്ടിൽ ആരംഭിച്ച സ്‌കോർ തൊട്ട് തന്നെ ചിത്രം ശ്രദ്ധ പൂർണമായും കരസ്ഥമാക്കിയിരുന്നു. ഒരു ആശുപത്രി അങ്കണം പശ്ചാത്തലമാക്കിക്കൊണ്ട് നമ്മുടെ പ്രധാന കഥാപാത്രമായ അജയൻ കഥ പറഞ്ഞ് തുടങ്ങുകയാണ്. ഈ ഒരു നറേഷൻ അല്ലെങ്കിൽ കമന്ററി പോലുള്ള വോയിസ്ഓവർ ആദ്യാവസാനം ചിത്രത്തിൽ നിങ്ങൾക്ക് കേൾക്കാനാവും.

🔸അജയന് സ്വന്തം അച്ഛൻ ആരാണെന്ന് അറിവില്ല, അമ്മയെ ഒരല്പം പോലും ഓർമയില്ല, അവന്റെ ഭാഷയിൽ പറയുക ആണെങ്കിൽ ഉദരത്തിന്റെ ഭാരവും അപമാനത്തിന്റെ ഭാണ്ഡവും ആ ആശുപത്രിയിൽ ഇറക്കിവെച്ച് അവർ എന്നെന്നേക്കുമായി എങ്ങോട്ടോ പോയി മറഞ്ഞു. പിന്നീട് അജയനെ എടുത്ത് വളർത്തിയതും പഠിപ്പിച്ചതുമെല്ലാം ഡോക്ടറങ്കിൽ എന്നവൻ സ്നേഹപൂർവ്വം വിളിച്ച ആശുപത്രിയിലെ ഡോക്ടറാണ്. അയാളും അയാളുടെ മകൻ ബാലുവും മാത്രമായിരുന്നു ബന്ധുക്കൾ എന്ന് ചൂണ്ടി കാണിക്കാൻ അവന് ആകെ ഉണ്ടായിരുന്നത്.

🔸ചിത്രത്തിന്റെ ആദ്യ പകുതിയിൽ അജയൻ ഒരു കഥ പറയുന്നുണ്ട്, ഈ കഥയെ തന്നെ കോൺട്രഡിക്റ്റ് ചെയ്യുന്ന മറ്റൊരു കഥയാണ് രണ്ടാം പാതിയിലേത്, ഇവ ഏത് രീതിയിൽ ഉൾക്കൊള്ളണം, ഏതാണ് യാഥാർഥ്യം എന്നൊക്കെയുള്ള കാര്യങ്ങൾ പൂർണമായും പ്രേക്ഷകന് വിട്ട് തന്നിരിക്കുകയാണ്, ഈ ഒരു വസ്തുത കൂടുതൽ അമ്പരപ്പിക്കുന്നത് ചിത്രം ഇറങ്ങിയ കാലഘട്ടം കൂടി പരിഗണിക്കുമ്പോഴാണ്. ചെറുതും വലുതുമായ കഥാപാത്രങ്ങളായി എത്തിയ നടീ നടന്മാരെല്ലാം തന്നെ മികച്ച പ്രകടനമായിരുന്നു, വൺ ഓഫ് എ കൈൻഡ് എന്നൊക്കെയുള്ള വിശേഷണം അർഹിക്കുന്ന ചിത്രമാണ് അനന്തരം, കാണാൻ ശ്രമിക്കുക.

Verdict : Must Watch

DC Rating : 90/100

757. Kagemusha (1980)

Director : Akira Kurosawa

Genre : Action

Rating : 8/10

Country : Japan

Duration : 178 Minutes

🔸കഗേമുഷ അല്ലെങ്കിൽ ഷാഡോ വാര്യർ എന്ന് കൂടി അറിയപ്പെടുന്ന ചിത്രത്തെ പറ്റി കുറച്ച് വർഷങ്ങൾക്ക് മുന്നേ ഒരു സുഹൃത്തിനോട് സംസാരിച്ചിരുന്നു, അന്ന് അധികം സിനിമകൾ കണ്ടിട്ടില്ല, കുറൊസാവയെ ഒക്കെ പരിചയപ്പെട്ട് വരുന്നതേ ഉള്ളൂ. അന്ന് ആ വ്യക്തിയോട് പ്രസ്തുത സംവിധായകന്റെ ചിത്രത്തെ കുറിച്ചുള്ള സംശയത്തിൽ വളരെ ആവേശത്തോടെയൊക്കെ ആണ് ഈ ചിത്രം അദ്ദേഹം പരാമർശിച്ചത്, സമുറായി വാർ ബേസ്ഡ് ചിത്രം എന്നൊക്കെ കേട്ടപ്പോൾ സ്വാഭാവികമായും താല്പര്യം വർധിക്കുകയും ചെയ്തു.

🔸ഈ ഒരു സംഭാഷണത്തിന്റെ പരിണിതഫലം എന്നവണ്ണം പുള്ളിയോട് എന്താണ് ചിത്രത്തിന്റെ പ്ലോട്ട് എന്ന് ചോദിക്കുകയുണ്ടായി, അതിന് ടിയാൻ നൽകിയ മറുപടി "ഓ അത് ഒരു രാജാവ് മരിക്കാൻ കിടക്കുകയാണ്, പുള്ളിക്ക് പകരം പുള്ളിടെ രൂപ സാദൃശ്യം ഉള്ളൊരാളെ അടുപ്പക്കാർ കണ്ട് പിടിക്കുന്നു". സ്വാഭാവികമായും അന്നത്തെ പ്രതികരണം "ങേ, അത്രേയുള്ളൂ" എന്നായിരുന്നു. അല്ല അതിന് കുറ്റം പറയാൻ പറ്റില്ല, ഒരേ രൂപ സാദൃശ്യം ഉള്ള, വേഷം മാറലിന്റെ കഥയൊക്കെ ഒരുപാട് നമ്മൾ കണ്ടതാണ്, ഇങ് മലയാളത്തിൽ വരെ ഇതിന്റെ ഒരുപാട് വേർഷൻ ഇറങ്ങിയിട്ടുണ്ട്, അതിൽ മിക്കതും കണ്ട് പഴകിയിട്ടുമുണ്ട്.

🔸കാഗേമോശയുടെ കഥ പറയുന്നതിന് മുൻപേ കുറൊസാവ ഈ ചിത്രം സൃഷ്ടിക്കാനായി നടത്തിയ പ്രയത്നങ്ങളെ കുറിച്ച് പറയണം, ഉദ്ദേശം പത്ത് വർഷങ്ങൾ ഈ ചിത്രത്തിന്റെ കഥ അദ്ദേഹത്തിന്റെ പക്കൽ ഉണ്ടായിരുന്നത്രെ, എന്നാൽ ഇത്രയും വലിയൊരു സ്കെയിലിൽ ചിത്രം ചെയ്യുമ്പോൾ ഉണ്ടായേക്കാവുന്ന സാമ്പത്തിക ബാധ്യതകളും മറ്റും കണക്കിലെടുത്ത് മാറ്റിവെക്കുകയായിരുന്നു. ഇതിനിടെ സോവിയേറ്റ് ജാപ്പനീസ് സംഘടിത സംരംഭമായ ദേർസു ഉസാല അദ്ദേഹം സംവിധാനം ചെയ്യുകയും, അക്കാഡമി അവാർഡ് കരസ്ഥമാക്കുകയും ചെയ്തിരുന്നു താനും.

🔸ദേർസുവിൽ നിന്ന് ലഭിച്ച സാമ്പത്തിക ലാഭം ഈ ചിത്രത്തിനായി ഉപയോഗിക്കാം എന്നൊരു ധാരണ അദ്ദേഹത്തിന് ഉണ്ടായിരുന്നെങ്കിലും അതൊന്നും പ്രവർത്തികമായില്ല. പിന്നീട് കുറച്ച് വർഷങ്ങൾ കൂടി കഴിഞ്ഞ ശേഷം ചില അമേരിക്കൻ സംവിധായകരുടെയും ഇൻവെസ്റ്റേഴ്സിന്റെയും സഹായത്തിലാണ് അദ്ദേഹം തന്റെ ഡ്രീം പ്രോജക്റ്റ് പൂർത്തിയാക്കിയത്. ഷിൻജാൻ എന്ന കരുത്തനായ രാജാവാണ് നമ്മുടെ പ്രധാന കഥാപാത്രം, അദ്ദേഹത്തിന് ഒരുനാൾ ഒരു യുദ്ധത്തിനിടെ സാരമായ പരിക്കുകൾ ഏൽക്കുകയാണ്, മരണത്തിന്റെ വക്കിൽ എന്ന് തന്നെ പറയാം.

🔸തങ്ങളൊഴിച്ച് ബാക്കിയെല്ലാവരും ശത്രുക്കളാണ് എന്ന അവസ്ഥയിലൂടെയാണ് ആ രാജ്യം ഇന്ന് കടന്ന് പോയിക്കൊണ്ടിരിക്കുന്നത്, ഷിഞ്ഞനെ പോലെ കരുത്തനായ ഒരാൾ മരണപ്പെട്ടു എന്നറിഞ്ഞാൽ സ്വാഭാവികമായും ശത്രുക്കൾ അടങ്ങിയിരിക്കില്ല, അവർ അവസരം മുതലെടുക്കുക തന്നെ ചെയ്യും. ഇതൊഴിവാക്കാനായി മൂന്ന് വർഷക്കാലത്തേക്ക് ഷിഞാനുമായി രൂപ സാദൃശ്യമുള്ള ഒരാളെ കണ്ടെത്തുകയാണ് അടുത്ത അനുയായികൾ. ഈ സിമ്പിൾ ആയ പ്ലോട്ടിൽ നിന്നും ഊഹിക്കാൻ കഴിയാത്ത നിലവാരമുള്ള ഒരു ചിത്രം ഒരുക്കാൻ കുറൊസാവയ്ക്ക് കഴിഞ്ഞിട്ടുണ്ട്, ആക്ഷൻ രംഗങ്ങൾ എല്ലാം ടോപ് നോച്ച് തന്നെയാണ്, തീർച്ചയായും കാണാൻ ശ്രമിക്കുക.

Verdict : Must Watch

DC Rating : 90/100

756. The Gentlemen (2019)

Director : Guy Ritchie

Genre : Action

Rating : 8/10

Country : UK

Duration : 113 Minutes

🔸ഗയ് റിച്ചിയുടെ സിനിമകളിൽ നിന്നും നമ്മൾ എന്താണോ പ്രതീക്ഷിക്കുന്നത് അതിന്റെ മികച്ച, എക്‌സാക്റ്റ് ആയ അവതരണമാണ് ജെന്റിൽമാൻ എന്ന ചിത്രം. പേര് സൂചിപ്പിക്കുന്നത് പോലെ തന്നെ ചോരപ്പുഴ ഒഴുക്കിയ തികഞ്ഞ മാന്യന്മാർ ആയ ഒരു കൂട്ടം ഗ്യാങ്സ്റ്റർമാരാണ് ചിത്രത്തിന്റെ ബാക്ക്ബോൺ. വ്യക്തിപരമായി സംവിധായകന്റെ മുൻ ചിത്രങ്ങളായ സ്‌നാച്ച്, ലോക്ക് സ്‌മോക്ക് എന്നിവയ്‌ക്കൊപ്പം തന്നെ നിർത്തും ഈ ചിത്രത്തെയും, ഇത്രയ്ക്ക് ആസ്വദിച്ച് കണ്ടൊരു ചിത്രം ഈ അടുത്ത് വന്നിട്ടില്ല എന്നത് നൂറ് ശതമാനം ഉറപ്പ്.

🔸നമുക്ക് വളരെ പരിചിതമായ ഒരു കഥ ഒട്ടും മടുപ്പിക്കാതെ വീണ്ടും പറഞ്ഞ് ഫലിപ്പിക്കാമോ എന്ന ചോദ്യത്തിന് പറ്റില്ല എന്നാരെങ്കിലും ഉത്തരം പറഞ്ഞ് കണ്ടാൽ അയാളെ ഈ ചിത്രം ഒന്ന് വിളിച്ചിരുത്തി കാണിക്കുന്നത് ഗുണം ചെയ്യും, കാരണം പെർഫെക്റ്റ് ഉദാഹരണത്തിന് വേറെ തപ്പി പോവേണ്ടതില്ല. അറ്റ് ദി കോർ ജെന്റിൽമാൻ എന്ന ചിത്രം ഒരു ഗ്യാങ് വാർ ഒക്കെ തന്നെയാണ്, തന്റെ അധികാരം നിലനിർത്താനുള്ള ഒരു കൂട്ടത്തിന്റെയും പിടിച്ചെടുക്കാനുള്ള മറ്റൊരു കൂട്ടരുടെയും കഥ.

🔸ഈ ഒരു പ്ലോട്ടിൽ എന്താണ് സ്പെഷ്യലായി ഉള്ളത് എന്നാണ് ചോദ്യമെങ്കിൽ അത് അവതരണത്തിലാണ്. ഷോട്ട്സ്, സൗണ്ട്ട്രാക്ക്, കഥാപാത്രങ്ങൾ തൊട്ട് അവർ പിന്തുടരുന്ന സ്റ്റൈലിൽ വരെ മാരകം എന്നതിൽ കവിഞ്ഞൊരു വിശേഷണം പറയാനില്ല. തുടക്കത്തിലേ ഒരു പത്ത് മിനിറ്റ് അല്പം സ്ലോ ആണെങ്കിലും മുകളിൽ പറഞ്ഞ ആ സ്റ്റൈലിനോടും കാരക്ടർ ഡൈനാമിക്കിനോടും പൊരുത്തപ്പെടാനുള്ള വാംഅപ്പ് ടൈം ആയാണ് അനുഭവപ്പെട്ടത്, പിന്നീട് ഒരു മിനിറ്റ് പോലും കഥ സ്ലോ ആവുന്നുമില്ല.

🔸മിക്കി പിയേഴ്‌സൺ എന്ന നമ്മുടെ നായക കഥാപാത്രം മരിഹുവാണ ബിസിനസിൽ കഴിവ് തെളിയിച്ച ഒരു അണ്ടർവേൾഡ് ഡോൺ ആണ്, ലണ്ടൻ നഗരത്തിലെ നമ്പർ വൺ എന്നൊക്കെ വിശേഷിപ്പിക്കാവുന്ന ഒരു മാഫിയ തലവൻ കൂടിയാണ് മിക്കി. ഇപ്പൊ പുള്ളിക്ക് പ്രായം മധ്യവയസ്സിലേക്ക് കടന്നിരിക്കുകയാണ്, പോരെങ്കിൽ കുടുംബസ്ഥനും ആയിരിക്കുന്നു, സ്വാഭാവികമായും പുള്ളിയുടെ എതിരാളികൾ ഇതൊരു അവസരമായി കാണുകയാണ്, അയാളുടെ സ്ഥാനം കയ്യടക്കാനായി കോപ്പ് കൂട്ടൽ തുടങ്ങുകയാണ്.

🔸പ്രൈവറ്റ് ഡിറ്റക്ടീവ് ആയ ഫ്ലെച്ചർ മിക്കിയുടെ വലംകൈ ആയ റെമോൻഡിനോട് കഥ പറയുന്നത് പോലെയാണ് ചിത്രം പുരോഗമിക്കുന്നത്, പിന്നീടൊരു പോയിന്റിൽ ഈ കഥ വർത്തമാനകാലവുമായി കൂടി ചേരുന്നുമുണ്ട്. ഇന്റെരെസ്റ്റിംഗ് ആയ ഒരുപാട് കഥാപാത്രങ്ങൾ കൂടിയുണ്ട് ചിത്രത്തിൽ, ഇവയിൽ തന്നെ ചാർളി ഹണ്ണം, ഹ്യുഗ് ഗ്രാന്റ്, കോളിൻ ഫെറൽ എന്നിവർ ടോപ് ഫോമിൽ ആയിരുന്നു. കാണുന്നവരെ പിടിച്ചിരുത്താൻ ഉള്ള വക ഈ രണ്ട് മണിക്കൂർ ചിത്രത്തിലുണ്ട്, ഇനി ഒരു സീക്വൽ വരിക ആണെങ്കിൽ നിങ്ങൾ അത് കാണുകയും ചെയ്യും, അത് കോൺഫിഡൻസ് തന്നെയാണ്.

Verdict : Very Good

DC Rating : 85/100

755. When I Get Home, My Wife Always Pretends to Be Dead (2018)

Director : Toshio Lee

Genre : Comedy

Rating : 6.5/10

Country : Japan

Duration : 115 Minutes

🔸അത്യാവശ്യം വെറൈറ്റി പ്ലോട്ട് ഇഷ്ടപ്പെടുന്നവർക്ക്, റൊമാന്റിക് കൊമെടി ചിത്രങ്ങളോട് താല്പര്യം ഉള്ളവർക്ക് പരീക്ഷിച്ച് നോക്കാവുന്ന ഒന്നാണ് വെൻ ഐ ഗെറ്റ് ഹോം, ആ അത് തന്നെ. അധികം കോമ്പ്ലിക്കേഷൻ ഒന്നും തന്നെ കഥയിൽ ഇല്ല, ആദ്യാവസാനം ഒരു ചെറിയ ചിരി ഒക്കെ പാസ് ആക്കി ചുമ്മാ ടെൻഷൻ ഒന്നും ഇല്ലാതെ കണ്ടിരിക്കാവുന്ന ചെറിയൊരു ചിത്രം. അധികമാരും പറഞ്ഞ് കേട്ടില്ല എങ്കിലും ചില നല്ല രംഗങ്ങളും, കഥാപാത്രങ്ങളും, ബാക്ക്ഗ്രൗണ്ട് സ്കോറും എല്ലാം കൂടി ചേരുമ്പോൾ കണ്ടിരിക്കുന്ന ടൈമിൽ ഒരു തൃപ്തി ഒക്കെ തരുന്നുണ്ട് പ്രസ്തുത ചിത്രം.

🔸മൂന്ന് വർഷത്തെ കണക്ക് അല്ലെങ്കിൽ മൂന്ന് വർഷ നിർഭാഗ്യം എന്ന അന്ധ വിശ്വാസത്തിൽ അടിയുറച്ച് വിശ്വസിക്കുന്ന ആളാണ് നമ്മുടെ നായക കഥാപാത്രം, ഇതിന് ഒരുപാട് ഉദാഹരണങ്ങൾ പുള്ളിയുടെ സ്വന്തം ജീവിതത്തിൽ തന്നെയുണ്ട്. ആദ്യ ഭാര്യയുമായുള്ള ടിയാന്റെ ബന്ധം നീണ്ട് നിന്നത് മൂന്ന് വർഷങ്ങളാണ്, ഒടുവിൽ മൂന്നാം വർഷം അത് അത്യാവശ്യം മോശമായ നിലയിൽ മോചനത്തിൽ ചെന്ന് കലാശിച്ചു. ഇപ്പോഴുള്ള കോർപറേറ്റ് ജോലിക്ക് മുന്നേ സ്വന്തമായി ഒരു ചെറിയ ഹോട്ടലും, ബിസിനസും ഒക്കെ ഉണ്ടായിരുന്നു ഇയാൾക്ക്, ആ ബിസിനസ് വെടിക്കെട്ട് പോലെ പൊട്ടിയതും തുടങ്ങി മൂന്നാം മാസമാണ്.

🔸ഇങ്ങനെ താൻ എന്ത് പരിപാടിക്ക് ഇറങ്ങിയാലും എന്ത് സംരംഭം തുടങ്ങിയാലും മൂന്നാം വർഷം അടപടലം ആവും എന്നൊരു വിശ്വാസം അയാൾക്കുണ്ട്. ഇപ്പൊ പ്രശനം എന്താണെന്ന് വച്ചാൽ നമ്മുടെ നായകന്റെ രണ്ടാമത്തെ വിവാഹം നടന്നിട്ട് മൂന്ന് വർഷം തികയാൻ പോവുകയാണ്, തന്റെയൊരു അനുഭവം വെച്ച് ഇതും അടപടലം തേയുമോ എന്നൊരു പേടി പുള്ളിക്കുണ്ട്. പക്ഷെ ഏറ്റവും ഗൗരവമേറിയ പ്രശനം എന്നത്, മറ്റൊരു കാര്യമാണ്, ഒരല്പം കൗതുകകരമായ അതേസമയം വിചിത്രവുമായ കാര്യം.

🔸ഒരു ദിവസം ഇങ്ങനെ ജോലിയൊക്കെ കഴിഞ്ഞ് ക്ഷീണിച്ച് വീട്ടിൽ എത്തിയ നായകൻ കാണുന്നത് ചോര ഒക്കെ ഒലിപ്പിച്ച് തറയിൽ കിടക്കുന്ന ഭാര്യയെയാണ്, ആകെ ഭയന്ന് ഭ്രാന്ത് പിടിച്ച അവസ്ഥയിൽ എത്തിയ നായകൻ എന്നാൽ ഒരല്പം ഞെട്ടലോടെ തിരിച്ചറിയുകയാണ്, അത് അവളുടെ അഭിനയം മാത്രമായിരുന്നു എന്ന്. ഈ സംഭവത്തിന്റെ കാര്യ കാരണം ഒന്നും തിരക്കാൻ അയാൾ പോയില്ല, അത് വെറുമൊരു തമാശ മാത്രമായി കണ്ട് ഒഴിവാക്കിയെങ്കിലും പിറ്റേന്ന് വീണ്ടും ഈ സംഭവം ആവർത്തിക്കുകയാണ്, ചെറിയൊരു വ്യത്യാസം ഉണ്ടെന്ന് മാത്രം. മുൻപ് ചോര വാർന്ന് ആണ് മരിച്ചതെങ്കിൽ ഇത്തവണ അമ്പ് തലയിൽ തറച്ച് കയറിയാണ്.

🔸പിന്നീട് ഒരുപാട് വെറൈറ്റി രീതികളിൽ ഈ സംഭവം ആവർത്തിക്കുന്നുണ്ട്, മുതല കടിച്ച് കൊന്നത് തൊട്ട് ബഹിരാകാശ ജീവികൾ കാരണം വരെ. അപ്പോഴും ഇതിന്റെ ഒക്കെ അർഥം എന്താണ് എന്ന് തിരിച്ചറിയാൻ കഴിയാതെ ഉഴലുകയാണ് നായക കഥാപാത്രം, കാണുന്ന നമ്മൾ പ്രേക്ഷകരും. എന്ത് തന്നെ ആയാലും ഈ സംഭവത്തിന് ഒരു തീർപ്പ് ആവുന്നുണ്ട് ചിത്രത്തിന്റെ കഥ ക്ലൈമാക്സിനോട് അടുക്കുമ്പോൾ. വലിയ അവകാശവാദം ഒന്നും ഇല്ല, ഒരു രസികൻ കൺസപ്റ്റ്, തമാശ ഒക്കെ നിറഞ്ഞ അവതരണം, ആകെ മൊത്തം ഒരുതവണ ചുമ്മാ കാണാനുള്ള വകുപ്പുണ്ട്.

Verdict : Watchable

DC Rating : 60/100

754. Ran (1985)

Director : Akira Kurosawa

Genre : Drama

Rating : 8.2/10

Country : Japan

Duration : 162 Minutes

🔸റാൻ എന്ന അകിരാ കുറൊസാവ ചിത്രത്തെ ഒരു പ്രമുഖ സിനിമാ നിരൂപകൻ 'ദി ലാസ്റ്റ് എപിക് ഓഫ് അകിരാ കുറൊസാവ' എന്ന് വിശേഷിപ്പിച്ച് കണ്ടിട്ടുണ്ട്. ഈ ഒരു വിശേഷണം ശുദ്ധ അസംബന്ധമാണ് എന്നാണ് ഇന്നും ഉറച്ച് വിശ്വസിക്കുന്നത് എങ്കിലും ഒരു കാര്യത്തിൽ മാത്രം പുള്ളിയോട് യോജിക്കുന്നുണ്ട്, എപിക് എന്ന വിശേഷണത്തോട്. റാൻ എന്ന സിനിമ കണ്ട ആരോട് ചോദിച്ചാലും ലഭിക്കും എന്ന് പേഴ്സണലി ഉറപ്പുള്ള ഒന്നാണ് ഈ വിശേഷണം, തീർച്ചയായും ഒരു എപിക് സിനിമാറ്റിക് എക്സ്പീരിയൻസ് ആണ് റാൻ, അത്രയും കാര്യങ്ങൾക്ക് നൂറ് ശതമാനം ഗ്യാരന്റീ.

🔸ഷേക്സ്പിയറുടെ ട്രാജിക് പ്ലേയ്‌ ആയ കിംഗ് ലിയറിന്റെ ചലച്ചിത്രാവിഷ്കാരം ആണ് റാൻ, മിക്ക ഷേക്സ്പിയർ സൃഷ്ടികളും എന്ന പോലെ ഈ അഡാപ്റ്റേഷനും അല്പം ട്രാജിക് ആണ്. ലോർഡ് ഹിഡത്തോരയാണ് നമ്മുടെ കേന്ദ്ര കഥാപാത്രം, പുള്ളി ആളൊരു വേന്ദ്രനാണ്. തന്റെ ആയ കാലത്ത് ഹിഡത്തോറ വെട്ടി പിടിച്ച മണ്ണും, പൊന്നും, സ്വത്തും എല്ലാമാണ് ഇന്ന് അയാളും മക്കളും അനുഭവിക്കുന്നത്. വാർലോഡ് അല്ലെങ്കിൽ പ്രഭു എന്ന വിശേഷണം ഒക്കെ നൽകാം എങ്കിലും രാജാവിൽ കുറഞ്ഞ ഒന്നും തന്നെ അല്ല അയാൾ.

🔸ഹിഡത്തോറ തന്റെ ആയ കാലത്ത് കാട്ടി കൂട്ടിയ ക്രൂരതകൾക്കും മറ്റും കയ്യും കണക്കുമില്ല. വെട്ടിപ്പിടിക്കാൻ വേണ്ടി നടത്തിയ യുദ്ധങ്ങൾ അയാളെ സംബന്ധിച്ച് നേട്ടങ്ങളാണ് സമ്മാനിച്ചത് എങ്കിലും ഇവയിൽ നഷ്ട്ടപ്പെട്ട ജീവനുകളും, വസ്തു വകകളും എല്ലാം വലിയ, ഭീകരമായ അളവിലായിരുന്നു. അപ്പൊ പറഞ്ഞ് വന്നത്, ഈ സംഭവങ്ങൾ എല്ലാം കഴിഞ്ഞിട്ട് വർഷങ്ങൾ കുറച്ചധികം കഴിഞ്ഞിരിക്കുന്നു, ഹിഡത്തോറ ഒരു വൃദ്ധൻ ആയിരിക്കുന്നു. ഈ ഭരണവും, യുദ്ധവും, വെട്ടിപിടിക്കലും എല്ലാം അയാൾക്ക് മടുത്ത് തുടങ്ങിയിരിക്കുകയാണ്, ഇനി തനിക്ക് വിശ്രമം ആവാം എന്നാണ് അയാൾ കരുതുന്നത്.

🔸തന്റെ മക്കൾക്കായി വലിയൊരു സാമ്രാജ്യം തന്നെയാണ് ഹിഡത്തോറയുടെ കൈവശം ഉള്ളത്, പറയാൻ വിട്ടു മൂന്ന് ആൺമക്കളാണ്‌ ഹിഡത്തോറെയ്ക്ക് ഉള്ളത്, ആയുധാഭ്യാസങ്ങളിലും പോരാട്ടഭൂമിയിലും എല്ലാം കഴിവ് തെളിയിച്ച മൂന്ന് മക്കൾ. ഇങ്ങനെയൊക്കെ ആണ് കാര്യങ്ങൾ എങ്കിലും സ്വഭാവ വിശേഷങ്ങളിലൊക്കെ വലിയ അന്തരമുണ്ട് ഈ മൂന്ന് പേർക്കുമിടയിൽ. മൂത്തവർ രണ്ടാളും അച്ഛൻ തെളിച്ച വഴിയേ ചോദ്യങ്ങൾ ഏതും ഇല്ലാതെ പോകുന്നവർ ആണെങ്കിൽ ഇളയവൻ ഒരല്പം റിബൽ സ്വഭാവത്തിന് ഉടമയാണ്.

🔸ഇങ്ങനെ മക്കൾക്കിടയിൽ ഭാഗിച്ച് നൽകിയ വകകൾ അഭിപ്രായ വ്യത്യാസങ്ങൾക്കും ചേരി തിരിവിനും എല്ലാം വഴി വെക്കുന്നതും, തുടർന്ന് ഒരു പോരാട്ടത്തിന് കൂടി കളം ഒരുങ്ങുന്നതുമാണ് ചിത്രത്തിന്റെ പ്ലോട്ട്. ലോകത്ത് ഇറങ്ങിയ ചിത്രങ്ങളിൽ കണ്ടവയിൽ ഏറ്റവും ഇന്റെൻസായ, ടെൻഷൻ അടിപ്പിച്ച രംഗങ്ങൾ ഏതാണെന്ന് ചോദിച്ചാൽ അതിലൊന്ന് ഹിദാത്തോരയുടെ ഫോർട്രസ് അറ്റാക്ക് സീൻ ആയിരിക്കും, ബ്രൂറ്റാലിറ്റി ഒക്കെ ഭീകരം ആയിരുന്നു. മികച്ചത് അല്ലെങ്കിൽ പെർഫെക്റ്റ് എന്നൊക്കെയുള്ള വിശേഷണങ്ങൾ നിസ്സംശയം കൊടുക്കാവുന്ന ഒരു കിടിലൻ ക്ളൈമാക്സ് ഷോട്ട് കൂടിയുണ്ട് ചിത്രത്തിൽ, ചുരുക്കി പറയുക ആണെങ്കിൽ മസ്റ്റ് വാച്ച്, അതാണ് റാൻ.

Verdict : Must Watch

DC Rating : 100/100

753. Dreams (1990)

Director : Akira Kurosawa

Genre : Anthology

Rating : 7.8/10

Country : Japan

Duration : 119 Minutes

🔸അകിരാ കുറൊസാവയുടെ സിനിമകൾ മിക്കതും കണ്ട് തീർത്തിട്ട് ഓർമ്മ ശെരിയാണെങ്കിൽ അഞ്ച് വർഷങ്ങൾ എങ്കിലും കഴിഞ്ഞിരിക്കുന്നു. അപ്രതീക്ഷിതമായാണ് ആദ്യമായി കുറൊസാവ ട്രീറ്റ്‌മെന്റ് ലഭിച്ചത്, റാഷോമോൻ എന്ന സിനിമയിലൂടെ, അവിടെ തുടങ്ങിയ സംവിധായകനോടുള്ള ഇഷ്ട്ടം പിന്നീട് അദ്ദേഹത്തിന്റെ ഫീച്ചർ ഫിലിമുകളിൽ പതിനാലെണ്ണം അടുപ്പിച്ച് കണ്ടപ്പോഴാണ് ഒരു ലെവലിൽ എത്തിയത്. വർഷങ്ങൾക്കിപ്പുറം കുറൊസാവ ചിത്രങ്ങൾ ഒന്ന് കൂടി റീവിസിറ്റ് ചെയ്യേണ്ട സമയം ആയെന്ന് തോന്നുന്നു.

🔸ആദ്യത്തെ തവണ ലഭിച്ച ആ ഒരു വൗ ഫാക്റ്റർ ഇനി ഒരിക്കലും ലഭിക്കാൻ ഇടയില്ല എങ്കിലും ഒരുമിച്ച് അദ്ദേഹത്തിന്റെ എല്ലാ ചിത്രങ്ങളും കയ്യിൽ വീണ്ടും വന്ന് ചേർന്നപ്പോൾ ലഭിച്ച ഒരു ഫീൽ ഉണ്ട്, നമ്മൾ വര്ഷങ്ങളായി കാണാത്ത ഒരു അടുത്ത സുഹൃത്തിനെ ഒരാവർത്തി കൂടി കണ്ടുമുട്ടുമ്പോൾ കിട്ടുന്ന ഒരു സുഖം, അതാണിവിടെയും ലഭിച്ചത്. അന്ന് കണ്ട സിനിമകളിൽ വലിയ താല്പര്യം തോന്നാഞ്ഞ ഒന്നായിരുന്നു ഡ്രീംസ്, ഇത്തവണ അത് തന്നെ ആദ്യമാവാം എന്ന് കരുതിയതും അത് കൊണ്ട് തന്നെ, പിന്നെ അന്നെന്തെങ്കിലും വിട്ട് പോയിരുന്നോ എന്നൊരു ചെറിയ പ്രതീക്ഷ കൊണ്ടും.

🔸ആന്തോളജി ചിത്രങ്ങളോട് എല്ലാ കാലത്തും വലിയ ഇഷ്ടം തന്നെ ആയിരുന്നു, ഇവ മിക്കപ്പോഴും ലഭിച്ച ചെറിയ സമയം കൊണ്ട് ശക്തമായ ഒരു കഥ അവതരിപ്പിക്കാറുണ്ട് എന്നത് കൊണ്ടാവാം, പറഞ്ഞ് വന്നത് ഈ ഗണത്തിൽ പെടുത്താവുന്ന ഒരു ആന്തോളജി ചിത്രമാണ് ഡ്രീംസ്. എട്ട് സെഗ്മെന്റുകളിലായി ആകെ എട്ട് കഥകളാണ് ഈ ചിത്രത്തിൽ ഉള്ളത്, ഇവ ഒന്നിനും ഇടയിൽ കണക്ഷൻ ഏതും പ്രത്യക്ഷത്തിൽ ഇല്ല. ജാപ്പനീസ് ഫോൾക്‌ളോറിൽ ഉൾപ്പെടെ ഉള്ള വ്യത്യസ്തമായ സെറ്റപ്പുകളും, ബാക്ക്ഗ്രൗണ്ടും ആണ് ഓരോന്നിനും.

🔸ഡ്രീംസ് എന്ന ടൈറ്റിൽ സംവിധായകൻ സിനിമയ്ക്ക് നൽകാൻ കാരണമുണ്ട്, തന്റെ ബാല്യ കാലം തൊട്ട് പല കാലങ്ങളിലായി സംവിധായകൻ തുടർച്ചയായി കാണാനിടയായ സ്വപ്നങ്ങളുടെ ചലച്ചിത്രാവിഷ്കാരമാണ് ഡ്രീംസ്. ഇതിൽ ഓരോന്നും കൈകാര്യം ചെയ്ത ഡൈവേഴ്‌സ് ആയ വിഷയങ്ങൾ തന്നെയാണ് ഹൈലൈറ്റ്. ഉദാഹരണത്തിന് ആദ്യ സെഗ്മെന്റിൽ ഒരു നാടോടി കല്യാണം അവിചാരിതമായി കാണാനിടയായ കുട്ടിയുടെ കഥയാണെങ്കിൽ, രണ്ടാമത്തേത് ഡീഫോറെസ്റ്റെഷൻ എന്ന വിഷയമാണ്.

🔸തുടർന്നങ്ങോട്ട് ആണവ ദുരന്തം, യുദ്ധഭീകരത പോലുള്ള ശക്തമായ വിഷയങ്ങളും കൈകാര്യം ചെയ്യുന്നുണ്ട്. ഈ സെഗ്മെന്റുകൾ എല്ലാം മികച്ചതാണ് എന്ന അവകാശ വാദം ഒന്നും ഉന്നയിക്കുന്നില്ല, പക്ഷെ ചിലതെങ്കിലും കാഴ്ചക്കാരനെ ആഴത്തിൽ സ്പർശിച്ചിരിക്കും. ആദ്യ കാഴ്ചയിൽ വലിയ താല്പര്യം തോന്നിയില്ല എങ്കിലും, ഈ ചിത്രം ഇന്ന് പ്രിയപ്പെട്ട ഒന്നാണ്, നിങ്ങൾക്കും ഇഷ്ടപ്പെടാൻ സാധ്യത ഉണ്ട്, കണ്ട് വിലയിരുത്തുക.

Verdict : Very Good

DC Rating : 85/100

752. Nokas (2010)

Director : Erik Skjoldbjærg

Genre : Heist

Rating : 6.5/10

Country : Norway

Duration : 86 Minutes

🔸നോകാസ് ഒരു ഹെസ്റ്റ് മൂവി ആണോ എന്ന് ചോദിച്ചാൽ അതെ എന്ന് പറയാം, പക്ഷെ ഒന്ന് കൂടി ആ ചോദ്യം ആവർത്തിച്ചാൽ സംശയമാണ്, കാരണം ഹെയ്‌സ്റ്റ് തന്നെയാണ് ഇവിടെ വിഷയം എങ്കിലും നമ്മൾ കണ്ട് ശീലിച്ച രീതിയിൽ ആരംഭിക്കുന്ന, പതിയെ ടോൺ മാറ്റി എസ്കലേറ്റ് ചെയ്ത് അത്യാവശ്യം ത്രില്ലിംഗ് ആയ നിലയിൽ തന്നെ അവസാനിക്കുന്ന സ്ഥിരം റോബ്ബറി ക്ളീഷ്ഡ് രീതിയിലേക്ക് നോകാസ് ഒരു സമയത്തും പോവുന്നില്ല, അത് കൊണ്ട് തന്നെ ആ വിഭാഗത്തിലേക്ക് അല്ലെങ്കിൽ ആ ചട്ടക്കൂടിലേക്ക് ഈ സിനിമയെ ഒതുക്കുന്നത് ശെരിയാണെന്നും തോന്നുന്നില്ല.

🔸കുറച്ച് വർഷങ്ങൾ പിറകോട്ട് പോവാം, ഉദ്ദേശം ഒരു പതിനാറ് വർഷം, ഇനി പറയാൻ പോവുന്ന കാര്യങ്ങൾ യാതൊരു രീതിയിലും അതിശയോക്തി ചേർക്കാത്ത, തികച്ചും സത്യമായ ഒരു കാര്യമാണ് എന്ന ബോധ്യത്തിൽ വായിക്കാൻ അപേക്ഷ. പതിനാറ് വർഷങ്ങൾ മുൻപുള്ള ഒരു ഈസ്റ്റർ കാലം, പശ്ചാത്തലം നോർവേ. ആഘോഷങ്ങളിലും അലയൊലികളിലും മുങ്ങി നിൽക്കുകയാണ് ആ നഗരം, എല്ലാവരും തിരക്കുകളിലാണ്, ഈ സമയത്താണ് നോർവെയുടെ ചരിത്രത്തിലെ ഏറ്റവും വലിയ കൊള്ള അരങ്ങേറുന്നത്.

🔸ആയുധ ധാരികളായ ഒരു കൂട്ടം വ്യക്തികൾ നഗരത്തിൽ ഒരു കൊള്ളയ്ക്ക് തയാറെടുക്കുന്നുണ്ട് എന്ന് ഈ സംഭവം അരങ്ങേറുന്നതിന് ദിവസങ്ങൾക്ക് മുൻപേ പോലീസിനും ഇന്റലിജൻസിനും വിവരം ലഭിച്ചിരുന്നത്രെ. എന്നാൽ ഇത്രയും ഗൗരവമേറിയ ഒരു സംഭവം പൊതുവെ വലിയ കുറ്റകൃത്യങ്ങൾ ഒന്നും അരങ്ങേറാറില്ലാത്ത നാട്ടിൽ, അതും തങ്ങളുടെ മൂക്കിന് കീഴിൽ വെച്ച് നടക്കും എന്ന് വിശ്വസിക്കാൻ അവർക്ക് ബുദ്ധിമുട്ടായിരുന്നു, അതും പോരെങ്കിൽ ഈസ്റ്റർ ആയതിനാൽ പോലീസുകാർ മിക്കവരും അവധിയിലും ആയിരുന്നു.

🔸കടുകിട പോലും പിഴയ്ക്കരുത് എന്ന ചിന്താഗതിയിൽ കഠിനമായ പരിശീലനവും പ്ലാനിങ്ങും എല്ലാം ഈ ഒരു മൈമെന്റിലേക്ക് വന്ന് ചേരുകയാണ്. ബുള്ളറ്റ്പ്രൂഫ് ജാക്കറ്റുകൾ, മാസ്കുകൾ, ആവശ്യത്തിന് ആയുധങ്ങൾ തുടങ്ങി എല്ലാ രീതിയിലും വന്നിറങ്ങിയവർ തയാറായിരുന്നു. ഈ പദ്ധതി വിജയിക്കാൻ തങ്ങൾ അവിടെ ചെലവഴിക്കേണ്ട മിനിറ്റും സെക്കന്റുകളും വരെ അവർ അളന്ന് മുറിച്ച് പഠിച്ചിരുന്നു എന്നിടത്താണ് അരങ്ങേറിയ സംഭവത്തിന്റെ പിറകിലെ മാസ്റ്റർമൈൻഡിന്റെ പവർ മനസിലാവുന്നത്.

🔸ഈ ഒരു സംഭവമാണ് ഈ ചിത്രത്തിന് ആധാരം, പക്ഷെ ഇവിടെ വ്യത്യസ്തമായി എന്താണെന്ന് വെച്ചാൽ ഒരു ഡോകിയുമെന്ററി സ്റ്റൈലിൽ ഷേക്കൻ കാം ഒക്കെ ഉപയോഗിച്ച് റിയലിസ്റ്റിക്ക് ആയി, ഒരു ബാങ്ക് റോബ്ബറി എങ്ങനെയാണോ നടക്കുന്നത് അത് അതേപടി പകർത്തി വെച്ചിരിക്കുകയാണ് ഇവിടെ. കഥാപാത്രങ്ങളോ, സബ് പ്ലോട്ടുകളോ, കഥാപാത്ര വികസനമോ, ത്രില്ലിംഗ് ആയ പേ ഒഫൊ ഒന്നും തന്നെയില്ല. ഒരു വ്യത്യസ്തമായ ചിത്രമാണ് നോകാസ്, എല്ലാവര്ക്കും ഇഷ്ടപ്പെടണം എന്നില്ല, കണ്ട് നോക്കാവുന്നതാണ്.

Verdict : Good

DC Rating : 70/100

751. See (2019)

Creator : Steven Knight

Genre : Action

Rating : 7.6/10

Seasons : 01

Episodes : 08

Duration : 52 - 60 Minutes

🔸ടാബൂ, പീക്കി ബ്ലൈൻഡേർസ് പോലെയുള്ള ടീവി സീരീസുകളുടെ ഒക്കെ പിന്നിലെ മാസ്റ്റർ മൈൻഡ് ആയ സ്റ്റീവൻ നൈറ്റിന്റെ പുതിയ സീരീസ് എന്നൊരു വിശേഷണം തന്നെ 'സീ' കാണാനുള്ള വലിയ പ്രചോദനമാണ്. അതിനോടൊപ്പം ചിത്രത്തിന്റെ ഭാവി ഡിസ്റ്റോപ്പിയൻ സെറ്റപ്പും, നായക കഥാപാത്രമായുള്ള ജേസൺ മാമോവയുടെ വരവും എല്ലാം പ്രതീക്ഷകൾ വർധിപ്പിച്ചേ ഉള്ളൂ. എന്നാൽ സത്യത്തിൽ ഈ പ്രതീക്ഷയ്‌ക്കൊത്ത് സീരീസ് ഉയരുന്നുണ്ടോ എന്ന ചോദ്യത്തിന് ഇല്ല എന്ന് തന്നെയാണ് ഉത്തരം.

🔸കഥയെ കുറിച്ചൊക്കെ പറഞ്ഞ് തുടങ്ങുന്നതിന് മുൻപ് ചെറിയ ഒരു ബാക്ക്സ്റ്റോറി പറയണം, ഇരുപത്തി ഒന്നാം നൂറ്റാണ്ടിൽ ലോകത്താകമാനം ഒരു വയറസ് പടർന്ന് പിടിക്കുകയാണ്, രാജ്യാതിർത്തികളും മറ്റ് പല വേർതിരിവുകളും എല്ലാം കാറ്റിൽ പറത്തി ലോകത്താകമാനം ഉള്ള ജനങ്ങളിൽ വലിയൊരു ശതമാനത്തെയും ഈ വയറസ് കൊന്നൊടുക്കുകയാണ്. ഉദ്ദേശം ഇരുപത് മില്യൺ ജനങ്ങൾ മാത്രമാണ് ഈ വയറസിന്റെ പടർന്ന് പിടിത്തത്തിൽ നിന്നും രക്ഷ നേടുന്നത്, ആകെ ജനസംഖ്യയുടെ വളരെ ചെറിയൊരു ശതമാനം മാത്രം.

🔸ദുരിതങ്ങൾ അവിടം കൊണ്ടും അവസാനിക്കുന്നില്ല, വയറസ് ഔട്ട്‍ബ്രെക്ക് ബാക്കിയുള്ള ജനങ്ങളുടെ ജീവൻ കൈവശപ്പെടുത്തിയില്ല എങ്കിലും കാഴ്ചയും കൊണ്ടാണ് പോയത്, അവരെല്ലാവരും അന്ധന്മാരായി തീർന്നിരുന്നു. ഈ സംഭവ വികാസങ്ങൾ എല്ലാം അരങ്ങേറിയിട്ട് നൂറ്റാണ്ടുകൾ ഒരുപാട് കഴിഞ്ഞിരിക്കുന്നു, കാഴ്ചശക്തി എന്നൊരു കഴിവ് തങ്ങളുടെ പൂർവികർക്ക് ഉണ്ടായിരുന്നെന്ന സത്യം പോലും ഇന്ന് ഉള്ളവർ അംഗീകരിക്കുന്നില്ല, കാഴ്ച എന്നത് ഒരു മിഥ്യ മാത്രമാണ് എന്നതാണ് ഇവരുടെ ധാരണ.

🔸കാലം എന്നത് മുന്നോട്ടാണ് പോയത് എങ്കിലും മറ്റെല്ലാ രീതിയിലും മനുഷ്യൻ പിറകോട്ടാണ് പോയത്. ഇരുപതാം നൂറ്റാണ്ടിലെ ജീവിത സൗകര്യങ്ങളോ, ടെക്കനോളജിയോ, മറ്റ് സൗകര്യങ്ങളോ ഒന്നും തന്നെ ഇന്ന് കാണാനില്ല. പഴയ കാലത്തെ ആദിമ മനുഷ്യരെ പോലെ ഗുഹയിലും താഴ്വരകളിലും എല്ലാം കൂട്ടം കൂട്ടമായാണ് മനുഷ്യർ വസിക്കുന്നത്. കാഴ്ച ഇല്ലാത്തത് കൊണ്ട് തന്നെ പരസ്പരം സഹായമില്ലാതെ മുന്നോട്ട് ജീവിക്കുക എന്നതൊക്കെ ഓരോരുത്തരെ സംബന്ധിച്ചും ബുദ്ധിമുട്ടുള്ള കാര്യമാണ്. ഈ ഒരു പശ്ചാത്തലത്തിലാണ് നമ്മുടെ കഥ ആരംഭിക്കുന്നത്.

🔸നമ്മുടെ മലയാളത്തിലെ ഗുരു എന്ന ചിത്രം ചിലയിടത്ത് എങ്കിലും ഓർമിപ്പിക്കുന്നുണ്ട് ഈ സീരീസ്. ജേസൺ മമോവ അവതരിപ്പിക്കുന്ന ബാബാ വോസ് എന്ന വ്യക്തിയിലൂടെയാണ് കഥ മുന്നേറുന്നത്, അയാൾ ഒന്നിച്ച് ജീവിക്കുന്ന മുകളിൽ സൂചിപ്പിച്ചത് പോലൊരു ട്രൈബിന്റെ തലവനാണ്. ഈ ട്രൈബിൽ ഒരുനാൾ കാഴ്ചശക്തിയുള്ള രണ്ട് കുഞ്ഞുങ്ങൾ ജനിക്കുന്നതും തുടർന്ന് അരങ്ങേറുന്ന കാര്യങ്ങളും ഒക്കെയാണ് സീരീസിന്റെ പ്ലോട്ട്. നല്ലൊരു തീം ആയിട്ട് കൂടി കഥയുടെ കെട്ടുറപ്പ് കൈവിട്ട് പോവുന്നത് വലിയ കഷ്ടമാണ്, ഈ സീരീസ് അതിനുള്ള ഉദാഹരണവും. പിടിച്ചിരുത്തുന്ന തുടക്കത്തിന് ശേഷം പിന്നീടെല്ലാം കീഴ്പോട്ട് പോയത് പോലെയാണ് അനുഭവപ്പെട്ടത്, തീർച്ചയായും ഒരു ശരാശരി അനുഭവം മാത്രം.

Verdict : Average

DC Rating : 50/100

750. Battlestar Galactica (2004)

Creator : Ronald D. Moore

Genre : Sci Fi

Rating : 8.7/10

Seasons : 04

Episodes : 76 

Duration : 42 - 44 Minutes

🔸എക്കാലത്തെയും മികച്ച ടീവി സീരീസുകളിൽ ഒന്ന്, ഡ്രാമയിലും ഇമോഷൻസിലും സസ്പെന്സിലും എല്ലാം ദി വയറിനോട് വരെ കിട പിടിക്കാൻ പറ്റുന്ന ഐറ്റം. ബാറ്റിൽസ്റ്റാർ ഗലാക്റ്റിക്ക എന്ന ടീവി സീരീസിനെ കുറിച്ചുള്ള ആദ്യ അന്വേഷണങ്ങൾ നേടിത്തന്ന അഭിപ്രായങ്ങളാണ് മുകളിൽ ഉള്ളത്, ഇത്രയും ഒക്കെ ഉണ്ടോ സീരീസ് എന്നത് സംശയമാണ്, ഒരുപക്ഷെ സീരീസിലെ അവസാനത്തെ എപ്പിസോഡും പുറത്തിറങ്ങിയിട്ട് വർഷങ്ങൾ കുറച്ചധികം കഴിഞ്ഞതിനാലാവണം, ഒരല്പം ഔട്ട് ഡേറ്റഡ് ആയി തോന്നി പ്രസ്തുത സീരീസ്.

🔸എന്താണ് സത്യത്തിൽ ബാറ്റിൽസ്റ്റാർ ഗലാക്റ്റിക്ക എന്ന ചോദ്യത്തിന്റെ ഉത്തരം ഒരല്പം സങ്കീർണ്ണമാണ്, വളരെ ലളിതമായി പറയുക ആണെങ്കിൽ ഒരു സയൻസ് ഫിക്ഷൻ ആക്ഷൻ അഡ്വെഞ്ചർ സീരീസ് ആണ്, അന്യ ഗ്രഹ സ്‌പെയ്‌സ് റോബോർട്ടുകളുമായുള്ള യുദ്ധം ഒക്കെയാണ് പ്ലോട്ട്. അതായത് സൈലോൺസ് എന്ന അതികായനായ വില്ലൻ കഥാപാത്രം മടങ്ങി വരികയാണ്, കുറച്ചധികം നാളുകൾക്ക് ശേഷം, മാനവരാശി തന്നെയാണ് സൈലോൻസിന്റെ മടങ്ങിവരവിൽ ഏറ്റവും ദുരിതം അനുഭവിക്കേണ്ടി വരുന്നത്.

🔸ഗാലക്സിയിൽ ആകമാനം മനുഷ്യർ തിങ്ങി പാർക്കുന്ന പതിമൂന്നോളം കോളനികളാണ് ഉള്ളത്, ഇവയിൽ പന്ത്രണ്ട് ഇടത്തും സൈലോൻസ് തന്റെ അപ്രമാദിത്യം തെളിയിച്ച് കഴിഞ്ഞിരിക്കുന്നു, ഇനി അവശേഷിക്കുന്നത് ഒരേയൊരു സ്ഥലം മാത്രമാണ്, മനുഷ്യന്റെ പതിമൂന്നാമത്തെയും അവസാനത്തെയും കോളനി, ഭൂമി. ജീവൻ കൊടുത്തും ഭൂമി സംരക്ഷിച്ചേ മതിയാവൂ എന്നതാണ് അവസ്ഥ, കാരണം ഇവിടം കൂടി സൈലോൻസ് പിടിച്ചെടുത്താൽ പിന്നെ ഭാവി എന്നൊന്ന് മാനവരാശിക്ക് ഇല്ല, എല്ലാം ഇതോടെ തീരും.

🔸ഈ പ്ലോട്ടിൽ നിന്നും വ്യക്തമാവുന്നത് പോലെ തന്നെ ഒരു സ്റ്റാർ വാർസ് ശൈലിയിൽ റെസിസ്റ്റൻസ് എമ്പയർ യുദ്ധത്തിലേക്ക് ഒക്കെ പോവുന്നുണ്ട് ബാറ്റിൽസ്റ്റാർ ഗലാക്റ്റിക്ക, അതിന്റേതായ വേർഷനിൽ. ഈ വിഷയം കൈകാര്യം ചെയ്യുമ്പോൾ തന്നെ മറ്റൊരു വശത്ത് കൂടി റൊമാൻസ് ഡ്രാമ ഇമോഷണൽ സബ് പ്ലോട്ട് കൂടി സീരീസ് നൽകുന്നുണ്ട്, ഇനി അതും പോരെങ്കിൽ മനുഷ്യന്റെ നിലനില്പിന്റെ കാര്യ കാരണങ്ങൾ എല്ലാം വിശകലനം ചെയ്ത് ഒരു സൈക്കോളജിക്കൽ തലത്തിലേക്ക് കൂടി സീരീസ് പോവുന്നുണ്ട്.

🔸ഇങ്ങനെ പല പല രീതികളിലൂടെ കഥയെ സമീപിച്ച്, വ്യക്തമായ ഒരു ജോണറിൽ മാത്രം ജനറലൈസ് ചെയ്യപ്പെടാതെ പോയ അത്യാവശ്യം ഫ്ലെക്സിബിൾ ആയ സീരീസ് ആണ് ബാറ്റിൽസ്റ്റാർ ഗലാക്റ്റിക്ക. പ്രശനം എന്ന് പറയാൻ ഉള്ള രണ്ട് കാര്യങ്ങൾ ഒന്ന് മുന്നേ സൂചിപ്പിച്ച ഔട്ട് ഡേറ്റഡ് എന്ന വസ്തുതയാണ്, ഈ സീരീസ് അവസാനിച്ച ശേഷം ടെക്ക്നിക്കൽ ഭാഗങ്ങളിൽ വന്ന വിപ്ലവകരമായ മാറ്റങ്ങൾ പല സിനിമകളിലൂടെ നമ്മൾ കണ്ടിട്ടുള്ളതിനാൽ തന്നെ ഈ സീരീസ് ഒരല്പം പഴഞ്ചനായി തോന്നിയാൽ അത്ഭുതമില്ല, ഇതിനോടൊപ്പം ചില കഥാപാത്രങ്ങളായി എത്തിയ നടീ നടന്മാരുടെ കല്ല് പോലെയുള്ള അഭിനയവും ഒരിച്ചിരി പ്രശ്നമായി തോന്നി. താല്പര്യം ഉണ്ടെങ്കിൽ കണ്ട് നോക്കാവുന്ന ഒന്നാണ് ബാറ്റിൽസ്റ്റാർ ഗലാക്റ്റിക്ക, സീരീസുകളുടെ ചരിത്രം പരിശോധിച്ചാൽ ലാൻഡ്മാർക്ക് എന്നൊക്കെ വിശേഷിപ്പിക്കാവുന്ന ഐറ്റം.

Verdict : Very Good

DC Rating : 80/100

749. Narcos (2015)

Creator : Chris Brancato

Genre : Thriller

Rating : 8.9/10

Seasons : 03

Episodes : 30

Duration : 43 - 60 Minutes

🔸കൊളംബിയ, മെക്സിക്കോ എന്നീ രാജ്യങ്ങളെ പറ്റി കേൾക്കുമ്പോൾ നമ്മുടെ മനസ്സിൽ വരുന്ന ചിന്തകൾ എന്തൊക്കെ ആയിരിക്കും, സ്ഥിരം അമേരിക്കൻ സിനിമകളിൽ മെക്സിക്കോ കാണിക്കുമ്പോൾ ഉപയോഗിക്കാറുള്ള ഇളം മഞ്ഞ നിറമുള്ള ലൈറ്റ് സെറ്റപ്പ് മാറ്റി നിർത്തിയാൽ ഏറെക്കുറെ റിലേറ്റ് ചെയ്യാൻ കഴിയുന്ന ഒരു വസ്തുത സ്വാഭാവികമായും ഡ്രഗ്സ് എന്ന ഉത്തരം തന്നെ ആവും, ഏറ്റവും കുറഞ്ഞത് എന്റെ കാര്യത്തിൽ എങ്കിലും അങ്ങനെ ആയിരിക്കും. ഈ രാജ്യങ്ങളെ പറ്റി നമ്മൾ കേട്ടിട്ടുള്ള മിക്ക കാര്യങ്ങളും ഈ പരിപാടികൾ സംബന്ധിച്ചുള്ളത് തന്നെയാണ് എന്നാണ് നിഗമനം.

🔸കൊളംബിയയുടെ പശ്ചാത്തലത്തിലാണ് ഈ സീരീസ് തയാറാക്കിയിരിക്കുന്നത്, ഈ സീരീസ് മൂന്ന് സീസൺ പിന്നിട്ട ശേഷം മെക്സിക്കോ പശ്ചാത്തലമായി ഒരു സ്പിൻ ഓഫ് ടൂ സീസൺ സീരീസ് കൂടി വന്നിട്ടുണ്ട്, രണ്ടും കൈകാര്യം ചെയ്യുന്നത് ഡ്രഗ് കാർട്ടലുകൾക്ക് ഇടയിലെ യുദ്ധം ഒക്കെ തന്നെയാണ് എങ്കിലും കണക്റ്റഡ് അല്ല. പാബ്ലോ എസ്കോബാർ എന്ന അത്യാവശ്യം സെലിബ്രെറ്റ് ചെയ്യപ്പെട്ട കൊളംബിയൻ മാഫിയാ കിങ്‌പിന്നിന്റെ കഥയാണ് ഷോയുടെ സിംഹഭാഗവും പ്രമേയമാക്കിയിരിക്കുന്നത്.

🔸ഒരു സാധാരണ കുടുംബത്തിൽ ജനിച്ചയാളാണ് എസ്കോബാർ, അയാൾക്കായി സ്വന്തമെന്ന് പറയാൻ കുടുംബം യാതൊന്നും കരുതിവെച്ചിരുന്നില്ല, കൈമുതലായി ഉണ്ടായിരുന്നത് തന്റേടവും, ധൈര്യവും, തോൽക്കാൻ മനസ്സില്ലാത്ത മനോഭാവവും തന്നെയാണ്. ക്രൈം ലോഡിന്റെ ഗ്ലോറിഫിക്കേഷൻ ആയൊന്നും കരുതിയെക്കരുത്, പ്രസ്തുത വ്യക്തി ചെയ്ത കാര്യങ്ങൾ എല്ലാം വെള്ളം ചേർക്കലുകൾ ഒന്നുമില്ലാതെ തന്നെ അവതരിപ്പിച്ചിട്ടുണ്ട് എന്നാണ് മനസിലായിട്ടുള്ളത്. ഇതിനോടൊപ്പം ചേർന്ന് കൊളംബിയയിലെ ഡ്രഗ് ഔറ്റ്‌ബേർസ്റ്റ് പിരീഡും നന്നായി ഇവിടെ അവതരിപ്പിച്ചിട്ടുണ്ട്.

🔸സ്റ്റീവ് മർഫി എന്ന ഏജന്റിന്റെ വ്യൂ പോയിന്റിലൂടെയാണ് കഥ പറഞ്ഞ് പോവുന്നത്, അതും പുള്ളി ഫ്ലാഷ്ബാക്കിൽ പറയുന്നത് പോലെ. തന്റെ ജീവിതത്തെ പിന്നീട് ഒരിക്കലും മടങ്ങി വരാൻ പറ്റാത്ത തോതിൽ മാറ്റി മറിച്ച വ്യക്തിയായാണ് മർഫി എസ്കോബാറിനെ പരിചയപ്പെടുത്തുന്നത്, അത് തീർച്ചയായും ശെരി വെച്ച് കൊണ്ട് നിയമത്തിന്റെ രണ്ട് ഭാഗത്ത് നിൽക്കുന്ന ഈ രണ്ട് കഥാപാത്രങ്ങളുടെയും ജീവിതം ഏറെക്കുറെ ഇന്റർകണക്റ്റഡ് ആയ നിലയിൽ നന്നായി തന്നെ കാണിക്കുന്നുണ്ട് നാര്കോസ്.

🔸ഒരു ഗ്യാങ്‌സ്റ്റർ അല്ലെങ്കിൽ ക്രിമിനൽ ലോർഡിന്റെ ജീവിതം പൊതുവെ രണ്ട് രീതിയിലാണ് കാണിക്കാറ്, ആ ഒരു ഫോർമുല ഇവിടെയും പിന്തുടരുന്നുണ്ട്. ആദ്യ രണ്ട് സീസണുകൾ എസ്കോബാറിൽ കേന്ദ്രീകൃതം ആണെങ്കിൽ മൂന്നാമത്തേത് എസ്കോബാറിൽ നിന്നുമാണ് നടക്കുന്നത്, ഈ മൂന്നാം സീസണിന്റെ ആവശ്യകത ഇപ്പോഴും നൂറ് ശതമാനം ബോധ്യപ്പെട്ടില്ല എങ്കിലും മികച്ച രീതിയിൽ തന്നെ കാപ്പ് ഓഫ് ചെയ്യുന്നുണ്ട്, കഥ. മികച്ച സീരീസുകളുടെ എണ്ണത്തിൽ ഉൾപ്പെടുത്താവുന്ന ഒന്നാണ് നാർക്കോസ്‌, ഒരു മിനിറ്റ് പോലും സ്ലോ ആവാതെ കഥ പറഞ്ഞ് പോകുന്ന സീരീസ് മികച്ചൊരു അനുഭവം തന്നെ ആവും, ഉറപ്പ്.

Verdict : Must Watch

DC Rating : 90/100

748. Hunters (2020)

Creator : David Weil

Genre : Thriller

Rating : 7.2/10

Seasons : 01

Episodes : 10

Duration : 57 - 90 Minutes

🔸എൺപതുകളുടെ തുടക്കത്തിലാണ് ഹണ്ടേഴ്സ് എന്ന ടീവി സീരീസ് ആരംഭിക്കുന്നത്, പുതുതായി ജോലിയിൽ പ്രവേശിച്ച ഒരു കഥാപാത്രം തന്റെ ഭാര്യയെയും കൂട്ടി മേലുദ്യോഗസ്ഥന്റെ പാർട്ടിയിൽ പങ്കെടുക്കാനായി യാത്ര തിരിക്കുകയാണ്. ഈ ഒരു പാർട്ടി അയാളെ സംബന്ധിച്ചിടത്തോളം വലിയ പ്രാധാന്യം ഉള്ളതാണ്, കാരണം വേറൊന്നുമല്ല തന്റെ ബോസ്സിന്റെ ഗുഡ് ബുക്കിൽ കയറി പറ്റാനുള്ള ഒരു ഉപാധി തന്നെ, ഇത് വഴി ജോലിയുടെ സെക്യുറിറ്റി ഉറപ്പാക്കുക എന്നതാണ് അയാളുടെ ഉദ്ദേശം, അങ്ങനെ ഇരുവരും പാർട്ടി നടക്കുന്നിടത്ത് എത്തുകയാണ്.

🔸എന്നാൽ കാര്യങ്ങൾ കീഴ്മേൽ മറയുന്നത് ഈ വ്യക്തിയുടെ ഭാര്യാ കഥാപാത്രം മേലുദ്യോഗസ്ഥനായ വ്യക്തിയെ നേർക്കുനേർ കാണുമ്പോഴാണ്, കണ്ട മാത്രയിൽ തന്നെ അവൾക്ക് ആളെ തിരിച്ചറിയാനും കഴിയുന്നുണ്ട്, ഭയം അവളെ ഒന്നായി വിഴുങ്ങുകയാണ്. തുടർന്ന് ഈ ഭാര്യാ കഥാപാത്രം പിച്ചും പേയും പോലെ സംസാരിക്കുകയാണ്, സംസാരം എന്നല്ല ഭയവും നിസ്സഹായതയും നിറഞ്ഞ കരച്ചിൽ എന്ന് പറയാം, ഇതിനിടെ ബോസ് കഥാപാത്രത്തെ അവൾ ബച്ചർ എന്നൊക്കെ വിളിച്ച് അഭിസംബോധന ചെയ്യുന്നുമുണ്ട്.

🔸കാര്യങ്ങൾ ലഘൂകരിക്കാനും അന്തരീക്ഷം ഒന്ന് മയപ്പെടുത്താനുമായി ആ മേലുദ്യോഗസ്ഥൻ ഒന്ന് രണ്ട് തമാശ ഒക്കെ പൊട്ടിക്കുന്നുണ്ട് എങ്കിലും യഥാർത്ഥ കാര്യം ആ സ്ത്രീയുടെ വായിൽ നിന്നും വീഴാൻ പോവുന്നെ ഉണ്ടായിരുന്നുള്ളൂ. രണ്ടാം ലോക മഹായുദ്ധ കാലത്ത് ജൂതന്മാരെ കൂട്ടക്കുരുതി കഴിച്ച, ബച്ചർ എന്ന പേരിൽ കുപ്രസിദ്ധി നേടിയ നാസി നേതാവാണ് അയാൾ എന്ന് ആ സ്ത്രീ എങ്ങനെയൊക്കെയോ പറഞ്ഞ് അവസാനിപ്പിക്കുന്നു, ജൂതയായ താൻ അയാളുടെ കയ്യിൽ നിന്നും കഷ്ടിച്ച് രക്ഷപ്പെട്ടതാണ് എന്നും, അയാൾ ഒരു മൃഗം ആണ് എന്നും അവൾ പറയുന്നുണ്ട്.

🔸അവൾക്ക് തെറ്റ് പറ്റിയതാവാം എന്നൊരു സാധ്യത ഇവിടെ ഉയരുന്നുണ്ട് എങ്കിലും അത് തൊട്ടടുത്ത നിമിഷം തള്ളി പോവുന്നുമുണ്ട്, മേലുദ്യോഗസ്ഥൻ ആയ കഥാപാത്രം പിന്നീട് അവിടെ അഴിച്ച് വിടുന്നത് പഴയ നാസി സ്റ്റൈലിൽ ഒരു ജെനോസൈഡ് തന്നെ ആണ്, അവിടെ ഒത്ത് ചേർന്നവർ എല്ലാം നിഷ്കരുണം കൊലചെയ്യപ്പെടുകയാണ്, അയാൾ പതിറ്റാണ്ടുകളുടെ പ്രയത്നത്താൽ സൃഷ്ടിച്ചെടുത്ത ഫേക്ക് ഐഡന്റിറ്റി വെറും സെക്കൻഡുകൾ കൊണ്ട് നശിപ്പിച്ചതിന്റെ ശിക്ഷ. ഇതാണ് ഹണ്ടേഴ്സ് എന്ന സീരീസിന്റെ ആദ്യ അഞ്ച് മിനിറ്റ്, ഒരുപക്ഷെ ഈ വർഷം കണ്ടതിൽ ഏറ്റവും ഷോക്കിങ് ആയ ഓപ്പണിങ് സീനുകളിലൊന്ന്.

🔸രണ്ടാം ലോക മഹായുദ്ധത്തിന് ശേഷവും നാസികൾ അവശേഷിക്കുന്നുണ്ട് എന്നൊരു വാദം മുന്നേ കേട്ടിട്ടുണ്ട്, അന്റാർട്ടിക്കയിൽ അവർ സൃഷ്ടിച്ചെടുത്ത ഒരു ബേസ് ഉണ്ടെന്നും, അത് കേന്ദ്രീകരിച്ച് ഇന്നും അവർ പ്രവർത്തിക്കുന്നുണ്ട് എന്നുമൊക്കെ കോൺസ്പിരസികൾ ഒരുപാട് ഉണ്ടായിട്ടുണ്ട്. ഈ ഒരു വിഷയം തന്നെയാണ് ഈ സീരീസും കൈകാര്യം ചെയ്യുന്നത്, നാസികൾ നമുക്ക് ഇടയിൽ നമ്മൾ പോലും അറിയാതെ ഇന്നും പ്രവർത്തിക്കുന്നുണ്ട് എങ്കിലോ എന്ന വിഷയം. മികച്ച തുടക്കത്തിന് ശേഷം പിന്നീടങ്ങോട്ട് പല ഇടത്തും പാളി പോയെങ്കിലും കൗതുകകരമായ ഒരു വിഷയം കൈകാര്യം ചെയ്യുന്നതിനാൽ കണ്ട് നോക്കുന്നതിൽ തെറ്റില്ല.

Verdict : Good

DC Rating : 75/100

747. Peaky Blinders (2013)

Creator : Steven Knight

Genre : Crime Drama

Rating : 8.8/10

Seasons : 05

Episodes : 30

Duration : 55 - 65 Minutes

🔸മികച്ച അഭിപ്രായം നേടിയ ഒരു ടീവി സീരീസ് കാണാൻ തുടങ്ങി ആദ്യത്തെ ഒരു മൂന്നാല് എപ്പിസോഡ് കണ്ട് കഴിഞ്ഞ ശേഷം ഒരു നീക്കുപോക്കോ തീരുമാനമോ ആവാത്തത് പോലെ തോന്നി അവിടെ വെച്ച് നിർത്തേണ്ടി വന്ന അവസ്ഥ ഒന്ന് രണ്ട് തവണയേ ഉണ്ടായിട്ടുള്ളൂ, അവയിൽ ഒന്ന് പീക്കി ബ്ലൈൻഡേർസ് എന്ന ഈ ടീവി സീരീസാണ്, മറ്റേത് സാക്ഷാൽ ബ്രെയ്ക്കിങ് ബാഡും. ഈ രണ്ട് സീരീസുകളും പിന്നീടൊരു അവസരത്തിൽ കണ്ട് തീർത്തിട്ടുമുണ്ട്, എന്നാൽ അവ അവസാനിക്കുമ്പോൾ ഉണ്ടായ മനോഭാവം വ്യത്യസ്തം ആയിരുന്നു, ഒരല്പം കൗതുകകരവും.

🔸ബ്രെയ്ക്കിങ് ബാഡ് എന്ന സീരീസിനോട് ഒരു കണക്ഷൻ ഒരു കാലത്തും തോന്നിയിട്ടില്ല, കഥയോ കഥാപാത്രങ്ങളോ മോശമാണ് എന്നൊന്നുമല്ല എന്തിരുന്നാലും പേഴ്സണൽ ടെയ്സ്റ്റിന് പറ്റിയതല്ല എന്ന് ബോധ്യപ്പെട്ടിട്ടുണ്ട്, എന്നാൽ പീക്കി ബ്ലൈൻഡേഴ്സിന്റെ കാര്യത്തിൽ സ്ഥിതിഗതികൾ വ്യത്യസ്തമാണ്. പതിഞ്ഞ തുടക്കത്തിന് ശേഷം അഞ്ചാം സീസൺ കണ്ടവസാനിക്കുന്നിടത്ത് ഇന്നേവരെ കണ്ട ഏറ്റവും മികച്ച സീരീസുകളിൽ ഒന്നായി മാറുന്ന മാരക ട്രാൻസ്ഫോർമേഷനാണ് ഇവിടെ സംഭവിച്ചത്.

🔸ലളിതമായി പറഞ്ഞാൽ ഒരു ഗ്യാങ്‌സ്റ്റർ ഡ്രാമ സീരീസാണ് പീക്കി ബ്ലൈൻഡേർസ്, അതും പത്തൊൻപതാം നൂറ്റാണ്ടിന്റെ അവസാന കാലഘട്ടത്തിലെ ബ്രിട്ടന്റെ പശ്ചാത്തലത്തിൽ. പീക്കി ബ്ലൈൻഡേർസ് എന്ന പേരിൽ ഈ കാലഘട്ടത്തിൽ പ്രശസ്തി ആർജിച്ച ഒരു ക്രിമിനൽ ഗ്രൂപ്പിന്റെ കഥയാണ് പ്ലോട്ട്, പ്രധാന കഥാപാത്രമായ തോമസ് ഷെൽബിയെ അവതരിപ്പിച്ചിരിക്കുന്നത് പ്രശസ്ത നടൻ സിലിയൻ മർഫിയും. മർഫിക്ക് പുറമെ ടോം ഹാർഡി, അഡ്രിയാൻ ബ്രോഡി, സാം നീൽ തുടങ്ങി അനവധി എ ലിസ്റ്റ് അഭിനേതാക്കൾ സീരീസിൽ പ്രത്യക്ഷപ്പെടുന്നുണ്ട്.

🔸ഉദ്ദേശം നാല് അഞ്ച് പതിറ്റാണ്ട് നീണ്ടുനിന്ന ബ്രിട്ടീഷ് ക്രൈം സീനിന്റെ കഥ ഏഴോളം സീസണുകളിൽ പറഞ്ഞ് തീർക്കുക എന്നതാണ് തങ്ങളുടെ ലക്‌ഷ്യം എന്ന് അണിയറ പ്രവർത്തകർ മുന്നേ പറഞ്ഞിട്ടുണ്ട്, അതിൽ തന്നെ അഞ്ച് സീസണുകൾ ഇതിനോടകം പുറത്തുവന്നിട്ടുണ്ട്, തുടർന്നുള്ള രണ്ട് സീസണുകൾ ഈ രീതിയിൽ അവസാനിപ്പിക്കാൻ കഴിഞ്ഞാൽ തന്നെ ഇന്നേവരെ പുറത്തിറങ്ങിയ മികച്ച സീരീസുകളിൽ ഒന്നായി പീക്കി ബ്ലൈൻഡേർസ് മുന്നിൽ തന്നെ ഉണ്ടാവും. മറ്റ് റൈവൽ ഗ്യാങ്ങുകളുമായുള്ള പ്രശ്നത്തോടൊപ്പം തന്നെ കഥാപാത്രങ്ങളുടെ ഇന്നർ കോൺഫ്ലിക്റ്റുകളും മികച്ച രീതിയിൽ സീരീസ് അവതരിപ്പിക്കുന്നുണ്ട്.

🔸ഓരോ കഥാപാത്രങ്ങൾക്കും നല്ല രീതിയിലുള്ള സ്റ്റോറി ആർക്കുകളും പേ ഓഫും എല്ലാം നൽകുന്നതിൽ ഇതുവരെ സീരീസ് ഒരു നിലവാരം കാത്ത് സൂക്ഷിച്ചിട്ടുണ്ട്, ഈ കഥാപാത്രങ്ങളിൽ മിക്കതും യുണീക് ആയവയും ഓർമയിൽ തങ്ങി നിൽക്കുന്നവരുമാണ് എന്നത് വേറെ കാര്യം. പത്തൊൻപതാം നൂറ്റാണ്ടിന്റെ ബ്രിട്ടീഷ് ബാക്ക്ഗ്രൗണ്ടൊക്കെ നല്ല രീതിയിൽ തന്നെ സീരീസ് അവതരിപ്പിച്ചിട്ടുണ്ട്, അതിനോടൊപ്പം മികച്ച സൗണ്ട്ട്രാക്കും കൂടി ചേരുമ്പോൾ സത്യത്തിൽ ഒരു സ്പെഷ്യൽ അനുഭവമായി മാറുന്നുണ്ട് ഈ സീരീസ്. വ്യക്തിപരമായി മികച്ച ഒരനുഭവമായിരുന്നു പീക്കി ബ്ലൈൻഡേർസ്, തീർച്ചയായും കാണാൻ നിർദ്ദേശിക്കുന്നു.

Verdict : Must Watch

DC Rating : 90/100

746. Batman Animated Series (1992)

Director : Kevin Altieri

Genre : Animation

Rating : 9/10

Seasons : 02

Episodes : 85

Duration : 21 - 24 Minutes

🔸ഇനിയിപ്പോ ഏതൊക്കെ സൂപ്പർഹീറോ കഥാപാത്രങ്ങൾ വന്നാലും പോയാലും, ആ സൂപ്പർഹീറോകളുടെ കഥകളിൽ എന്തൊക്കെ തന്നെ സംഭവിച്ചാലും ബാറ്റ്മാൻ ഇരിക്കുന്ന തട്ട് താണ് തന്നെ ഇരിക്കും, വെറുതെ പറയുന്നതല്ല മറിച്ച് അത്രത്തോളം ഡെപ്ത് ഉള്ള വൈകാരികമായി പോലും ഇത്രയും റിലേറ്റ് ചെയ്യാൻ കഴിയുന്ന മറ്റൊരു കഥാപാത്രത്തെ എനിക്ക് കാണാൻ കഴിഞ്ഞിട്ടില്ല. പുറമെ കാണിക്കുന്ന പരുക്കൻ സ്വഭാവത്തിനും ചേഷ്ടകൾക്കും പിറകിലെ ഒറ്റപ്പെട്ട് പോയ, സദാ വേട്ടയാടപ്പെട്ട ഒരു വ്യക്തിയെ ഇഷ്ടപ്പെടാൻ കഴിഞ്ഞില്ല എങ്കിൽ പിന്നെ ആരെയാണ് എന്നതാണ് ചോദ്യം.

🔸ബാറ്റ്‌മാനെ നായകനാക്കി അനവധി സിനിമാ അഡാപ്റ്റേഷനുകൾ വന്നിട്ടുണ്ട്, എൺപതുകളുടെ അവസാനം വന്ന കീറ്റന്റെ വേർഷൻ ആയാലും, സാക്ഷാൽ നോളന്റെ ബെയ്ൽ വേർഷൻ ആയാലും, ഒരുപരിധി വരെ അഫ്ലെക്കിന്റെ വേർഷൻ ആയാലും അതെല്ലാം കഥാപാത്രത്തോട് നീതി പുലർത്തിയതായാണ് തോന്നിയിട്ടുള്ളത്, തല്ക്കാലം നമുക്ക് മറ്റ് വേർഷനുകൾ സൗകര്യപൂർവം മറക്കാം. എന്നാൽ ഇതിനെല്ലാം മുകളിൽ നിൽക്കുന്ന ഒന്നായാണ് കെവിൻ കോൺറോയിയുടെ ആനിമേറ്റഡ് വേർഷൻ എപ്പോഴും അനുഭവപ്പെട്ടിട്ടുള്ളത്.

🔸ജസ്റ്റിസ് ലീഗ് ഒക്കെ കുട്ടിക്കാല നൊസ്റ്റു ആയി ഓർമയുള്ള ചില അനിമേഷൻ ഐറ്റങ്ങളിൽ ഒന്നാണ്, അന്ത കാലത്ത് കണ്ട പല അനിമേഷൻ സീരീസുകളും പിന്നീട് ഒരാവർത്തി മടങ്ങി പോയി കാണുമ്പോൾ ഇതൊക്കെ ഇത്രയേ ഉണ്ടായിരുന്നുള്ളൂ എന്നൊരു ചിന്ത വരാറുണ്ട്, ഈ ഒരു വിഷയത്തിനും ബാറ്റ്മാൻ ഒരപവാദമാണ്, അന്നും ഇന്നും ഫ്രഷ് ആയി തോന്നിയ ഒരു ആനിമേറ്റഡ് ടീവി സീരീസ് ഉണ്ടെങ്കിൽ അത് ബാറ്റ്മാൻ തന്നെയാണ്. ഈ സീരീസ് ഇത്രയും ഇഫക്ടീവ് ആയി തോന്നിയതിനുള്ള ഒരു പ്രധാന ഘടകം മുന്നേ സൂചിപ്പിച്ച കെവിൻ കോൺറോയിയുടെ വോയിസ് ആണ്, അത്യാവശ്യം ഡാർക്ക് ഗ്രിറ്റി ആയ പുള്ളിയുടെ ടോണിന് പകരം എന്ന് ചൂണ്ടി കാണിക്കാൻ പോലും മറ്റൊന്നില്ല.

🔸കോമിക്സിന്റെ ഏറ്റവും ഫെയ്ത്ഫുൾ ആയ അഡാപ്റ്റേഷൻ ആണ് ഈ ആനിമേറ്റഡ് സീരീസ് എന്ന് പലരും പറഞ്ഞ് കേട്ടിട്ടുണ്ട്, അതിനെ കുറിച്ച് കോമിക്സ് കാര്യമായി വായിക്കാത്തതിനാൽ അഭിപ്രായം പറയുന്നില്ല എങ്കിലും സിനിമയുമായി തട്ടിച്ച് നോക്കുമ്പോൾ അപ്രോച്ചിൽ ശ്രദ്ധേയമായ വ്യത്യാസം കാണാനാവും. സിനിമകളിൽ ഒരല്പം ബ്രൂട് ആയ നായകനാണ് ബാറ്റ്മാൻ എങ്കിൽ സീരീസിൽ ഒരു അന്വേഷകന്റെ തോതിലേക്ക് ഒക്കെ കഥാപാത്രം മാറുന്നത് കാണാം, അത് കുറച്ച് കൂടി ആ വ്യക്തിയുടെ സൈക്കോളജിയുമായി ചേർന്ന് നിൽക്കുന്നുമുണ്ട്.

🔸ബാറ്റ്മാന്റെ കഥയിൽ അദ്ദേഹത്തോടൊപ്പം തന്നെ പ്രാധാന്യം പുള്ളിയുടെ വില്ലൻ കഥാപാത്രങ്ങൾക്കും ഉണ്ട്. ഇത്രയും മികച്ച, കോംപ്ലക്സ് ആയ, ശക്തരായ ഒരു കൂട്ടം വില്ലന്മാരെ മറ്റൊരു കഥാപാത്രത്തിനും നേരിടേണ്ടി വന്നിട്ടുണ്ടാവില്ല. ഈ വില്ലന്മാരിൽ ഒട്ടുമിക്ക കഥാപാത്രങ്ങളും സീരീസിൽ തങ്ങളുടെ ശക്തമായ സാന്നിധ്യം അറിയിക്കുന്നുണ്ട്. അപ്പൊ പറഞ്ഞ് വന്നത്, ആനിമേറ്റഡ് സീരീസ് ആണ് കോമിക്സ് ആണ് കുട്ടിക്കളിയാണ് എന്നൊക്കെ പറഞ്ഞ് മാറ്റിവെക്കേണ്ടതല്ല ഈ സീരീസ്, കാണാൻ ശ്രമിക്കേണ്ട ഒന്ന് തന്നെയാണ്.

Verdict : Very Good

DC Rating : 80/100