726. Rhapsody In August (1991)

Director : Akira Kurosawa

Genre : Drama

Rating : 7.2/10

Country : Japan

Duration : 98 Minutes

🔸അകിര കുറൊസാവ എന്ന ഐതിഹാസിക സംവിധായകനെ സംബന്ധിച്ചിടത്തോളം വളരെ പ്രസക്തമായ ഒരു സമയത്താണ് റാപ്‌സോഡി ഇൻ ഓഗസ്റ്റ് എന്ന ചിത്രം തിയേറ്ററുകളിൽ എത്തിയത്, അതായത് അദ്ദേഹത്തിന്റെ കഴിവിനെ പ്രായം കീഴ്‌പ്പെടുത്തി തുടങ്ങി എന്ന് ആളുകൾ വിശ്വസിച്ച് തുടങ്ങിയ ഒരു കാലത്ത്. പ്രായം എഴുപതുകളിൽ എത്തിയപ്പോഴും റാൻ അല്ലെങ്കിൽ ഡ്രീംസ് പോലെയുള്ള ചിത്രങ്ങൾ അദ്ദേഹം സംവിധാനം ചെയ്തിരുന്നെങ്കിലും അവയിൽ ഒന്നും പഴയ ക്രാഫ്റ്റ്മാൻഷിപ്പ് കാണാനില്ല എന്നായിരുന്നു അന്ന് വിലയിരുത്തപ്പെട്ടതത്രെ.

🔸ഈ ഒരു കാരണം കൊണ്ട് തന്നെ അന്ത കാലത്ത് റാപ്‌സോഡി ഇൻ ഓഗസ്റ്റ് എന്ന ചിത്രത്തിന് പലതും തെളിയിക്കാൻ ഉണ്ടായിരുന്നു, തൊണ്ണൂറ്റി രണ്ടിലെ കാൻസ്‌ ഫെസ്റ്റിൽ ചിത്രം റിലീസ് ചെയ്യപ്പെടുകയും വലിയ അഭിപ്രായങ്ങൾ കരസ്ഥമാക്കാതെ പിന്നണിയിലേക്ക് തഴയപ്പെടുകയും ചെയ്തു, അന്ന് പല നിരൂപക സിംഹങ്ങളും ചിത്രത്തെ വിലയിരുത്തിയത് നിരാശാജനകം എന്നായിരുന്നു. സത്യത്തിൽ അത്രയ്ക്ക് മോശം ചിത്രമായിരുന്നു റാപ്‌സോഡി ഇൻ ഓഗസ്റ്റ് എന്നത് ചോദിക്കേണ്ട കാര്യം തന്നെയാണ്, ചോദ്യം എന്നോടാണെങ്കിൽ അല്ല എന്നാണ് ഉത്തരം.

🔸ശെരിയാണ്, സെവൻ സമുറായ് അല്ലെങ്കിൽ റാഷോമോൻ പോലെയുള്ള ചിത്രങ്ങളോടൊപ്പം ചേർക്കാനുള്ള വക ഒന്നും തന്നെ റാപ്‌സോഡി ഇൻ ഓഗസ്റ്റിന് ഇല്ല, അത് സത്യത്തിൽ ഈ ചിത്രത്തിന്റെ പോരായ്മ കൊണ്ടല്ല മറിച്ച് ആദ്യം സൂചിപ്പിച്ച ചിത്രങ്ങൾ ഉണ്ടാക്കിയ ബെഞ്ച്മാർക്ക് അത്രയും ഉയരത്തിൽ ആയത് കൊണ്ടാണ് എന്നാണ് വ്യക്തിപരമായി തോന്നിയിട്ടുള്ളത്. എൺപതുകളുടെ അവസാനം ഒരു വെക്കേഷൻ കാലത്താണ് ചിത്രത്തിന്റെ കഥ ആരംഭിക്കുന്നത്, ജപ്പാനിലെ ഒരു ഗ്രാമത്തിൽ.

🔸പ്രായം നന്നായി ബാധിച്ച് തുടങ്ങിയ ഒരു വൃദ്ധയാണ് കെയ്ൻ, അവരെ കാണാനും ഒന്നിച്ച് താമസിക്കാനുമായി മക്കളും മക്കളുടെ മക്കളും എല്ലാം എത്തുകയാണ്. കെയ്‌നിന്റെ ഭർത്താവ് വർഷങ്ങൾക്ക് മുന്നേ നാഗസാക്കി അണുബോംബ് ദുരന്തത്തിൽ കൊല്ലപ്പെട്ടതാണ്, അന്നേദിവസം കെയ്‌നും ആ പരിസരത്ത് ഉണ്ടായിരുന്നതാണ് എങ്കിലും സുരക്ഷിതമായ അകലം പാലിച്ചത് കാരണം കഷ്ടിച്ച് രക്ഷപ്പെടുകയായിരുന്നു. പിന്നീട് വർഷങ്ങൾ ഒരുപാട് കഴിഞ്ഞ് പോയിരിക്കുന്നു, ഇന്ന് കുട്ടികളെ കെയ്‌നിനെ ഏൽപിച്ച് കൊണ്ട് അവരുടെ മക്കൾ ഒരു യാത്ര പോവുകയാണ്, അമേരിക്കയിലേക്ക്.

🔸കെയ്‌നിന്റെ ഒരു ചേട്ടൻ രോഗാവസ്ഥ മൂർച്ഛിച്ച അവസ്ഥയിൽ അമേരിക്കയിൽ ഉണ്ട്, പ്രായം ഒരുപാട് ഉള്ള അയാൾക്ക് മരണം അടുത്തു എന്ന് നന്നായി അറിയാം, പുള്ളിയെ കാണാനായാണ് കെയ്‌നിന്റെ മക്കൾ യാത്ര തിരിച്ചിരിക്കുന്നത്. സത്യത്തിൽ തനിക്ക് അങ്ങനൊരു ചേട്ടൻ ഉണ്ടോ എന്ന് പോലും കെയ്നിന് വ്യക്തമായി അറിവില്ല, എന്ത് തന്നെ ആയാലും പെങ്ങളെ അവസാനമായി നേരിൽ കാണാൻ കഴിയാഞ്ഞതിൽ സഹോദരൻ വിഷമം അറിയിക്കുകയാണ്, തുടർന്ന് അരങ്ങേറുന്ന സംഭവങ്ങളാണ് ചിത്രത്തിന്റെ പ്രമേയം. ഒരു തവണ കാണാനുള്ള വക എല്ലാം ഇവിടുണ്ട്, ട്രൈ ചെയ്യാവുന്നതാണ്.

Verdict : Good

DC Rating : 75/100