720. The Hunt (2020)

Director : Craig Zobel

Genre : Action

Rating : 6.4/10

Country : USA

Duration : 115 Minutes

🔸സ്ലേഷർ ചിത്രങ്ങളോട് താല്പര്യം ഉള്ളവർക്ക് പരീക്ഷിച്ച് നോക്കാവുന്ന അത്യാവശ്യം വയലൻസ് ഒക്കെയുള്ള ഒരു ചിത്രം, അതാണ് ദി ഹണ്ട്. ഇത്തരം ചിത്രങ്ങളിൽ നിന്ന് കൂടുതലായി പ്രത്യേകിച്ചും കഥ ലോജിക് പോലെയുള്ള കാര്യങ്ങൾ പ്രതീക്ഷിക്കുന്നത് സത്യത്തിൽ മണ്ടത്തരമാണ്, ഇവിടെയും അത് തന്നെയാണ് വസ്തുത. ചോരക്കളി, വെട്ടൽ, അറക്കൽ, കൊല്ലൽ തുടങ്ങിയ കലാപരിപാടികളുടെ വിവിധ ഇന, വൈവിധ്യമാർന്ന ചേഷ്ടകൾ കാണാൻ കഴിയും, അത്ര മാത്രം. വ്യക്തിപരമായി ശ്ലേഷർ ചിത്രങ്ങളോട് താല്പര്യം ഇല്ലാത്ത ഒരാളാണ് പോസ്റ്റ്മാൻ എന്നത് കൂടി തുടർന്ന് വായിക്കുമ്പോൾ ഓർത്താൽ നന്ന്.

🔸ഒരു ഗ്രൂപ് ചാറ്റ് കാണിച്ച് കൊണ്ടാണ് സിനിമ ആരംഭിക്കുന്നത്, അടുത്ത സുഹൃത്തുക്കളായ ചിലർ തങ്ങളുടെ ദൈനംദിന കളി തമാശകളും മറ്റും പറഞ്ഞ് കൊണ്ടിരിക്കെ അവരിൽ ഒരാൾ ഒരു പ്രത്യേക കാര്യം ചെയ്യുകയും ആ ചാറ്റിന്റെ അന്തരീക്ഷം ഒന്നാകെ മാറുകയും ചെയ്യുന്നു. പിന്നീടങ്ങോട്ട് ഈ സീനിന് തുടർച്ചയെന്നോണം ഒന്നും കാണിക്കുന്നില്ല, എന്നാൽ അപ്രതീക്ഷിതമായി മറ്റൊരിടത്ത് പ്രാധാന്യം വെളിപ്പെടുത്തുന്നുമുണ്ട്. അവിടുന്നങ്ങോട്ട് ആണ് സിനിമയുടെ കഥ ആരംഭിക്കുന്നത്.

🔸ഒരു ദിവസം ഒരു സ്ത്രീ കഥാപാത്രം കണ്ണ് തുറക്കുമ്പോൾ കാണുന്നത് തനിക്ക് തീർത്തും അപരിചിതമായ ഒരു സ്ഥലത്ത് തന്നെ വാ മൂടി കെട്ടിയ അവസ്ഥയിൽ കൊണ്ട് ഇട്ടതായാണ്. എങ്ങനെ ഇവിടെ എത്തി എന്നോ, എന്താണ് ഇതിന്റെ കാരണം എന്നോ ഒന്നും തന്നെ അവൾക്ക് വ്യക്തമല്ല, അപകടം ആണെന്ന് മാത്രം തിരിച്ചറിഞ്ഞിട്ടുണ്ട്. ചുറ്റുപാടും ഒന്ന് വീക്ഷിച്ചപ്പോഴാണ് താൻ ഒറ്റയ്ക്ക് അല്ല എന്നും തന്നോടൊപ്പം വേറെ പതിനൊന്ന് പേർ കൂടി ഉണ്ട് എന്നും അവൾ തിരിച്ചറിയുന്നത്. എല്ലാവരും അവളെ പോലെതന്നെ വാ മൂടി കെട്ടിയ അവസ്ഥയിലുമാണ്.

🔸തങ്ങൾ എവിടെയാണ് എന്താണ് എന്നീ കാര്യങ്ങൾ ഈ കഥാപാത്രങ്ങ തിരിച്ചറിഞ്ഞ് കൊണ്ടിരിക്കുന്ന വേളയിലാണ് തങ്ങൾ നിൽക്കുന്ന മൈതാനത്തിന്റെ അറ്റത്ത് ഒരു വലിയ പെട്ടി നിൽക്കുന്നത് ഈ കഥാപാത്രങ്ങൾ കാണുന്നത്. പെട്ടിയിലുള്ള വസ്തു എന്താണെന്ന കഥാപാത്രങ്ങളുടെ അന്വേഷണം അവരുടെ കയ്യിൽ കൊണ്ട് ചെന്നെത്തിക്കുന്നത് ഒട്ടും പ്രതീക്ഷിക്കാത്ത ചില വകകളാണ്, എന്നാൽ അപകടം തുടങ്ങാൻ പോവുന്നെ ഉണ്ടായിരുന്നുള്ളൂ എന്നതാണ് സത്യം, പെട്ടി തുറന്നതിന്റെ തൊട്ടടുത്ത നിമിഷം അവർ നേരിടേണ്ടി വരുന്നത് അപകടകരമായ കാര്യങ്ങളെയാണ്.

🔸ഒട്ടും പ്രെഡിക്റ്റബിൾ അല്ല ചിത്രം എന്നത് തന്നെയാണ് ഏറ്റവും വലിയ പ്ലസ് പോയിന്റ്, ഒരു കഥാപാത്രത്തോട് അടുപ്പം തോന്നാൻ തുടങ്ങിയാൽ തൊട്ടടുത്ത നിമിഷം അവരെ കൊന്ന് കളയുന്ന തോതിലുള്ള ക്രൂരത ചിത്രം പലയിടത്തും പിന്തുടരുന്നുണ്ട്. ബ്ലഡ് ബാത് ഒക്കെ നല്ല തോതിൽ ചിത്രത്തിലുണ്ട്, അത് കൊണ്ട് തന്നെ അത്തരം രംഗങ്ങൾ താല്പര്യം ഇല്ലാത്തവർ മാറി നിൽക്കുന്നതാണ് നല്ലത്. ക്ളൈമാക്സ് പോലെയുളള വകകൾ നിരാശ സമ്മാനിച്ചു എന്ന് വേണമെങ്കിൽ പറയാം എങ്കിലും സ്ലേഷർ ഫാൻസിന് നിരാശ നല്കാൻ സാധ്യത ഇല്ല, അല്ലെങ്കിലും അത് തന്നെ ആണല്ലോ ചിത്രം ഉന്നമിട്ടതും, അതിന് വേണ്ടി കാണാം.

Verdict : Watchable

DC Rating : 60/100